Be·m platz lo gais temps de pascor

by Bertran de Bòrn

IBe·m platz lo gais temps de pascor
Que fai foillas e flors venir;
E plaz mi, qand auch la baudor
Dels auzels que fant retentir
Lor chan per lo boscatge;5
E plaz me, qand vei per los pratz
Tendas e pavaillons fermatz;
Et ai gran alegratge,
Qand vei per campaignas rengatz
Cavalliers e cavals armatz.10

IIE plaz mi, qan li corredor
Fant las gens e l’aver fugir;
E plaz mi, qand vei apres lor
Gran ren d’armatz ensems venir;
E plaz me e mon coratge,15
Qand vei fortz chastels assetgatz
E·ls barris rotz et esfondratz
E vei l’ost el ribatge
Q’es tot entorn claus de fossatz
Ab lissas de fortz pals serratz.20

IIIEt atressi·m plaz de seignor,
Qand es primiers a l’envazir,
En caval armatz, ses temor,
C’aissi fai los sieus enardir
Ab valen vassalatge.25
E pois que l’estorns es mesclatz,
Chascus deu esser acesmatz
E segre·l d’agradatge,
Que nuills hom non es ren prezatz
Troq’a mains colps pres e donatz.30

IVMassas e brans, elms de color
Escutz trancar e desgarnir
Veirem a l’intrar de l’estor
E maint vassal essems ferir,
Don anaran aratge35
Cavaill dels mortz e dels nafratz.
E qand er en l’estor intratz,
Chascus hom de paratge
Non pens mas d’asclar caps e bratz,
Que mais val mortz que vius sobratz.40

VE·us dic que tant no m’a sabor
Manjar ni beure ni dormir
Cuma qand auch cridar : “A lor!”
D’ambas las partz et auch bruïr
Cavals voitz per l’ombratge45
Et auch cridar : “Aidatz ! aidatz!”
E vei cazer per los fossatz
Paucs e grans per l’erbatge
E vei los mortz que pels costatz
Ant los troncons ab los cendatz.50

VIPros comtessa, per la meillor
C’anc se mires ni mais se mir
Vos ten hom e per la genssor
Dompna del mon, segon q’auch dir.
Biatriz d’aut lignatge,55
Bona dona en ditz et en fatz,
Fons lai on sortz tota beutatz,
Bella ses maestratge,
Vostre rics pretz es tant poiatz
Que sobre totz es enansatz.60

EBaron, metetz en gatge
Castels e vilas e ciutatz
Enans q’usqecs no·us gerreiatz.