Bai raskignou

From Wikisource
Jump to navigation Jump to search
Bai raskignou  (1970)  by S.n.
Bai raskignou
[ 1 ]
Bai Raskignou
Musique da N. Senny-Filot.

1

Bai raskignou, chantez, chantez sins r’prinde halène !
Des grands bwès, des cothais, vos estez div’nou rwë
Des airs qui v’s grusinez, li musique est si fène
Qui tos les grands ârtisses copiet d’vins vos boquets
Qwand c’est qui vos k’mincïz li nateure si dispiète
Li solo sèm’ so l’térre si binamêye clârté
Et tos les p’tits ouhais gistrés so les cohètes
Dimanet bin pâhule tot binâhe di v’houter.

2

Bai raskignou, chantez, chantez l’amour li jôye,
Po les coppes qu’ènnè vont, po s’rifer des sermints
Tot v’ houtant is s’diront fivreus’mint tote li vôye,
Les mots qui s’dihint hîr, puis qui rouveieront d’main
Rispârdez à pleinte vwè, vos doucès ritournelles,
Vos frez fer des sot’reyes âx cours èmmanourés ;
Li jône home gruzin’rèt à l’orèye di s’bâcèle :
Pusqui l’raskignou chante, c’est l’moumint d’nos inmer.

3

Bai raskignou, chantez, chantez des notes bin trisse
Po les cis qu’ont del ponne, po les cis qu’ont des r’gret,
Po les cis qu’s’ont qwittés, fez rouvî totes les d’vises
Raminez so leus lèpes on p’tit lègîr rislet
Kisèmez po tos zèls vos doucès mélodèyes
Fez raspiter l’espwér po tos les amoureux
Qui vosse chant fasse rouvî les pus neurès pinsêyes
Po n’tuser qu’a plaisir, â bonheur d’esse à deux.