Bahadırlar erligi (Qayıpnazarov)
Keń dalanı jaylaǵan,
Baxtı kúndey jaynaǵan,
Árwanaday iydirip,
Jerdey gáwhar jıynaǵan,
Bahadırlar erligi,
Miynetinen belgili.
Boyda kúshi artqanday,
Kórki kózdi tartqanday,
Beldi buwıp taq turǵan,
Is palwanı márt qanday.
Bahadırlar erligi,
Miynetinen belgili.
Piter iske qol tiygen,
Shól baǵınıp, jer iygen,
Tabısın tań qutlıqlap,
Peshenasın kún súygen.
Bahadırlar erligi,
Miynetinen belgili.
Jarqın júzde shadlıq bar.
Aytqan sózde mártlik bar,
Iske shıqsa ózinde,
Tań qalǵanday erlik bar,
Bahadırlar erligi,
Miynetinen belgili.