Báhárim keldi (Qayıpnazarov)
Qıstıń qamalı ketse,
Giya bórter tawlarda,
Sáwir samalı esse,
Suw sarqırar saylarda,
Kúnniń quyashı tússe,
Búrtik jarrar baǵlarda,
Gúl ashılıp, yosh berer,
Meniń báhárim keldi,
Kewlim shalqıp xosh kórer,
Jazar máhálim keldi.
Tallar shaqalar ósse,
Sayasın tóser jerge,
Tamırı tereńlesse,
Tóbesin sozar kúnge,
Pákize bir lep esse,
Áste terbeler jelge,
Keń dalama kórik berip,
Meniń báhárim keldi,
Qıyalıma erk berip,
Jazar máhálim keldi.
Sharwalar shıǵar qıstan,
Jazda óristi jaylar,
Qoylar ot izler tıstan,
Qırda qozılar oynar,
Sahralar bolar bostan,
Jerler gúllener, jaynar,
Baǵda búlbiller sayrar,
Meniń báhárim keldi,
Júregimde yosh qaynar,
Jazar máhálim keldi.
Dáryalar aǵar tasıp,
Gáwharın bizge gizner,
Quyash náwpir nur shashar,
Daraqlar qáddin dúzer,
Baǵlar jáne gúl ashıp,
Elimniń kórkin bezer,
Jerdi qulpı dóndirip,
Meniń báhárim keldi,
Qálemge jan endirip,
Jazar máhálim keldi.