Báhár (II) (Qayıpnazarov)
Qushaq-qushaq gúl kóterip,
Qulpı dónip keldi kóklem,
Keń dalaǵa kóz jiberip,
Qarap tursam qanday kórkem.
Kiyinip shıqqan qızlarday,
Kók terekler dolanıp tur,
Dalalar jasıl maqpalday,
Gúller menen oranıp tur.
Jasarıp oy-qır túrlengen,
Búr ashıp baǵlar gúlleydi,
Baǵlarda júrsem gúllengen,
Kewlimde shadlıq kerneydi.
Miynetim menen qulpırıp,
Jerlerim gúl-gúl jaynadı,
Isledim alǵa umtılıp,
Is páti qızdı qaynadı.
Atızda iske berildi,
Awıldıń qızı, jigiti,
Jerlerge erte egildi,
Paxtanıń hasıl shigiti.
Qolıma alıp ketpendi,
Jumısqa shıqtım tań sáhár,
Jolıma tósep gúllerdi,
Turıptı kútip náwbáhár.