Ala Tawdaǵı árman (Qayıpnazarov)

by Bayniyaz Qayıpnazarov

Aq qalpaq qırǵızdıń Ala tawınıń,
Qarı bolsam kún túspegen jaǵınıń,
Jarasıqlı gúli bolsam baǵınıń,
Tamır urıp óssem qıya tasına.

Usha bası aqsha bulttı irikken,
Kiyik, qulan setem alıp úrikken,
Say-salaǵa kóz jibersem biyikten,
Qıran bolıp qonsam shıńnıń basına.

Keshte tawda mawjıraǵan tún tursa,
Kúndiz shıńda kúlimlep kún tursa,
Kún nurında bir qızıl gúl qulpırsa,
Gúbelektey ushıp barsam qasına.

Bulaq bolsam sarqıraǵan tawdaǵı,
Quyash bolsam jarqıraǵan tańdaǵı,
Ya gúl bolsam jawdıraǵan baǵdaǵı,
Ya shıq bolıp tússem gúl shaqasına.

Atqan tańday, shıqqan kúndey jarıq etsem,
Óz gúlimdi gúller ushın sarp etsem,
Sóytip Ala tawdıń bawırın ǵarq etsem,
Gúl menen búlbildiń tamashasına.