Al cavalier Paolin Bonecchi...

Al cavalier Paolin Bonecchi

(con mezza donzena de formagitt de cavra)

De quand me son ridott a fa el massee
E a viv in tra i boasc e la pollina,
Se voeuri fa on regall de roba fina
Ciappi gèner de stalla e de pollee.
Lù el me dirà che, per sparmì danee
Tratti i amis cont i scart della cusina,
Ma, quand el saggiarà sta formaggina,
El dirà pù che l'è on regall a pee.
El merit l'è di càver che gh'hoo su
Che me procuren tutt sto bell formagg:
El savor, poeu, le ciappa de per lù,
A pocch a pocch, cont el diventà vecc,
De mè ghe metti: quatter gott de cagg.
E la fadiga de tiragh el pecc!