A storia do pesto

From Wikisource
Jump to navigation Jump to search
A storia do pesto
by Luigi Anselmi
da-a rivista "Zena", 2, ott.-dex. 1958, www.francobampi.it

Tütti i zeneixi che mangian meneströn, trenette, troffie e lasagne cö pesto, scommetto che conoscian ben poco e origini, o per meglio dire, i natali de questo condimento coscì gûstoso, ormai famoso in te tûtte e cuxinn-e dô môndö, perchè anche in tà Patagonia e in Groelandia dêuvian ô pesto.

A sêu storia, almeno cömme ä contava a Cesira de Ravecca, sciû per zû a l'e questa:

E primme brocche de baxaicò che l'e spontôu, appenn-a Adamo o l'ha viste, o n'ha fâeto ûn mazzetto e o l'ha portâe a Eva, cömme ûn mazzö de viovette, e pe diversci secoli o baxaicò o l'ha avûo questa funzion, ma non appenn-a a taera a l'ha començôu a popolâse doppo o Diluvio, fra un terramotto e l'atro, pe passase o tempo, i popoli han attaccôu a pestase, e de chi l'é spontôu a parolla pesto, però o pesto vero e proprio come delizia del palato o l'aiva ancon da spuntâ!

L'idea feliçe de questa combinazion l'ha avûa trei sordatti zeneixi in Crimea, che se ciammavan: Pestello, Pignêu, Testa d'aggio, che trovandose in sce o campo de battaglia vixin a ûn mortâ, dûrante 'na sosta do combattimento son andaeti a accoegase in t'ûn campo pin de baxaicò; e qui avvenne il miracolo, perchè in t'o frattempo ûn sordatto sardo, ch'o l'aiva riçevûo ûn pacco da casa, o l'ha tiöu fêua ûn tocco de formaggio, e li frà Pestello, Pignêu, Testa d'aggio, formaggio sardo, baxaicò, e mortâ missi inçemme l'e spontoù o pesto per la gioia de tütto o reggimento. E da quello giornö o Comandante o l'ha ordinôu sempre rancio a base de pesto, passando d'in vittoria in vittoria, perchè i sêu sordatti pestavan tûtti: in virtù dö pesto, che s'o l'e ben faeto ö fortifica, e l'e ben ben difficile che ûn ch'o l'agge mangiôu troffie cö pesto o s'accostippe, mentre e trenette fan ben pe a sciatica e l'artrite, non dimenticando che e lasagne portan benessere e pace, perchè 'na famiggia ch'a s'assetta a töa intorno a 'na bella fiamanghilla de lasagne cö pesto ben condie, doppö mangiôu, s'abbraççan e se baxan tûtti. In baxaicò, concordia.