A ro signor Giambatista Richê

From Wikisource
Jump to navigation Jump to search
A ro signor Giambatista Richê
by Steva de Franchi
pe-a pubricaçion de so rimme do 1753


[ iv ]

A RO SIGNOR
GIAMBATISTA RICCHE’,

Sonetto dro Signor Steva de' Franchi
Patriçìo Zeneize, fra ri Arcadi
Micrilbo Termopilatide.


Messê Apollo, re Muze, e ri Pastoî
D’Elicoña son tutti in gran sciaratto:
Giubilan, van in ære, e dan recatto
A fâ gran festa, e despensâ dri ónoî.

Per tesce, groppi dre ciù belle scioî,
E d'orifœggi, ognun côrre per matto;
E se mostran za lesti, e pronti all'atto
D'incoronâ un Poeta chi fra noî.

Giambatista Ricche', ra vostra fronte
L’è fæta per portâ questa coroña:
Incaminæve là in çimin dro monte.

Dre vostre brave Rimme se raxoña:
Dixe ognun: Pœu vantâ Giano Bifronte
Vivo un Petrarca in ra vostra persoña.


by Ambrœuxo Conti
[ v ]

A RO SIGNOR
GIAMBATISTA RICHE’,

In occaxion che o fà stampâ
re sò Poexie.

Sonetto dro Signor Abate Conti


Finarmente, ò Riche', tira e retira,
Virà Zena feliçe a i dì d’ancœu
Sciortî quell’oro fin da ro corzœu,
Quelle Rimme passæ pe ra trafira;

Quello bon, quello ben, che ognun sospira,
Quello camin sccianao sença un riççœu,
Quello stile çernuo, che và a ro cœu
In fin, quanto de bon Parnazo inspira.

A vista d'uña mente così fiña,
Ro tempo, che a ra fin tuto sotterra,
Respetterà quest'œuvera diviña:

E quante Arcadie luxan sorveterra
Diran, de voî parlando, a bocca piña:
Se un finto Apollo è in çê, n’è un vero in terra.