წუნი მერქა მარულია

From Wikisource
Jump to navigation Jump to search
please do not remove empty parameters (see the template documentation).
* * *
by ზაალ ჯალაღონია

წუნი, მერქა მარულია -
კაწაბი დო ჩე-ჩე მურა.
ცა მურიცხით ფორილი რე,
ნათასა დო ნაციმურა.
ჩე მუნაფა ტორონჯია,
შარა გინობაქურელი.
ვაღურიაშ დუნაჩინა
დოქსილადირჷ- ვაღურელი.
ლერსი,ლერსო გეგვერგვილი,
ფაჭვიეფიშ უჩა სუა.
ცაშ ჸალეფცჷ მურიცხეფიშ
გოჭაპანა, მეთორსუა.
გენაგეფიშ გეშარუა,
დაჩხირელი ართო ღიფა,
ჩე გვალა დო რზენიშ თუდო,
გარაგანიშ გუნაჟღიფა.
ფართო შარას გერინელი,
ვითოჟირშა გუნაჭიფა.
შურიშ გეთართალაფა დო
ორაგადეშ გეთქუმალა.
ცაშა თანჯიშ მიდაღალა,
დუდშა თიში გერთუმალა.
ათე რინაშ გერგელაფა,
მინ ცქვაფა დო მინი კილი.
ჩქიმ ონჯირუს სქანი თუმა,
ვარ მუნაფა ეფაფილი.
ართიშურო, ართიგურო,
პეულეფიშ ვორდი მაფა.
დიო ჸოფე სერ-უკმელა,
ასე კინე გეჩხანაფა.
ათე შურიშ წყარმალუსჷ
ხოლო დიდი გეჩხომაფა.
გვალა რე დო ხოლო გვალა,
აშო თუდო გვალაშ ბორკი.
ფურინუაშ დოჭყაფაშა
მიღუდ ირო გეციბოკი.
ჸვინთელ თუთას ჯილეშ თუდო,
უღჷ მუთუნი თაკვირი-და.
ზუღას თეში ინიძირე,
მუჭოთ ჩხომიშ ნაქვირითა.
ბორია რე მოჭირხინე,
ურა ცხენო მაფენთური.
თე ორთაში სქუა ვორეთ,
მენძელი დო გალენ თური.
თოლოწონდეშ გოფაჩუა,
ნარღიშ ინოჭიჭარება.
ფერო, რწვანეშ მეწყორუა,
ვარდა, გინოჭითარება.
თოლიშ იშო თოლი ვორდი,
დო ვანობღვე სოთინ თება.
მა ქობძირი ათე რინას
ბორჯიშ ბორჯშე გინორტება.
ცა დო დიხაშ მობოლუა,
კინ თინეფიშ გინოტება.