მუხური (სერგო პერტაია)
გევორექ ნაცხაში ხინს
დო მასქური მაჰამანს.
სოფელს თეში მასქვამას,
მით ქოძირჷნს- დოხვამანს.
მარა მიკვენს მუხურწყარს
სახელს მი რე უთირანს?!
გაგშასოფუნს ლუგელას...
მოგურჯუნსუ, ფაფარანს,
მარგინუანს, მოღვარანს,
უკულ მუში წყარმარჩხათ
ნაცხას გიოპოპორანს.
მუნარქია მართახცალო
მიკმახორცქუ ტკილონას.
მუში ნარდი კალმახას
უფერუანს, კარკატანს...
დონწყუნს გიმე წყარორთუს,
კინი ეშე ქაჸათანს.
დიღვერჯუანს, ქოსხაპუნს,
ღვედიშორო ჟღვარტალანს.
მოშქველერი ცირაშნერო
კინი დონწყუნს წყვაფანას.
უკულ თოლს ქაკინდუანს
ლარჭემ ცირა ჭყვანტალას,
ანგელოზო ნახანტას,
ირემი რიჸაშ მასქვამას,
ენჯარებუ კალმახას -
ჭითა-უჩათ გაგმარღვანს.
ნარღენს თიში მანწარას,
ჩილამურით ღვარღვალანს.
ნაშაყარა ნანგარას,
ტომბა ირთუ ტყვარცალანს,
ცა ორტყაფუთ ვარკალანს
დო ოხუტოლ ბჟალარას...
თოლუნჭაფუ გვალაშ წვანს
ღორონთ რთჷნს ჯიშტიშ წყარს,
ოკალმახეთ ორჩქინანს
ტეხურა დო მუხურწყარს!