སྤྱོད་འཇུག་རྣམ་བཤད་ཐེག་ཆེན་ཆོས་ཀྱི་རྒྱ་མཚོ། སྨད་ཆ།

Page: 451 ༄༅། །གནོད་བྱས་ན། །སེམས་ཡོད་ཅིས་ཏེ་བཀར་ཏེ་བཀོན། །དེ་བས་གནོད་པ་བཟོད་པར་གྱིས། །ཞེས་གསུངས་ཏེ། འགྲོ་བ་འདི་དག་ལ་སེམས་ཡོད་པའི་དགྲས་གནོད་པ་བྱེད་པ་ལྟར་སེམས་མེད་པའི་འབྱུང་བ་དང་རླུང་མཁྲིས་ བད་ཀན་སོགས་ཀྱིས་ཀྱང་གནོད་པ་བྱེད་པར་ཁྱད་མེད་ན་ཅིའི་ཕྱིར་བེམ་པོ་དེ་དག་ལ་ཁྲོ་བར་མི་བྱེད་ལ། སེམས་ལྡན་ཁོ་ན་ཟུར་དུ་བཀར་ནས་ཁྲོ་བར་བྱེད་པ་འདི་ཅིའི་ཐ་ཚིག་ཞེས་པ་སྟེ། དཀའ་འགྲེལ་ཆུང་ངུ་ལས་ནི། འདི་ལ། ཁྲོ་བའི་མཚན་མ་མ་གྲུབ་ པ། ཞེས་བསྟན་ཏོ། །བི་བྷུ་ཏིས། སེམས་ཅན་གྱིས་བྱས་པ་ནི་ལག་པ་དང་རྐང་པས་གང་བྱས་པའོ། །ཞེས་འབྲུ་གཉེར་ཀྱང་པཎྜི་ཏ་ལ་འོས་པའི་བཤད་པར་མ་མཐོང་སྟེ་རྐང་ལག་སེམས་ཅན་མ་ཡིན་པའི་ཕྱིར། གཉིས་པ་སྐྱོན་ཅན་ཁྱད་མེད་དུ་འགྱུར་བ་ནི། ལ་ལ་རྨོངས་ པས་ཉེས་པ་བྱེད། ལ་ལ་རྨོངས་ཏེ་ཁྲོས་གྱུར་ན། །དེ་ལ་སྐྱོན་མེད་གང་གིས་བྱ། །སྐྱོན་དང་བཅས་དེ་གང་ཞིག་ཡིན། །ཞེས་གསུངས་ཏེ། ལ་ལ་ཞེས་བྱ་བ་ནི་གང་ཡང་རུང་བའི་དོན་ཏེ་སེམས་ཅན་ཁ་ཅིག་གིས་ཁྲོས་ཤིང་ཁ་ཅིག་གིས་དེའི་ ལན་བྱས་ན་དེ་གཉིས་ཁྱད་མེད་པར་འགྱུར་ཏེ། དེའི་ཚེ་དེ་གཉིས་ལས་སུ་སྐྱོན་དང་བཅས་པ་དང་སུ་སྐྱོན་མེད་པའི་ཁྱད་པར་འགའ་ཡང་མི་རྙེད་དོ། །དེས་ན་བདག་ཉིད་སྐྱོན་མེད་པ་དང་ཡོན་ཏན་དང་ལྡན་པར་འདོད་པ་དེས་བཟོད་པ་ཁོ་ན་ལ་གནས་པར་བྱའོ། ། གསུམ་པ་རང་གིས་ཉེས་པར་བརྟག་པ་ནི། གང་གིས་གཞན་དག་གནོད་བྱེད་པའི། ལས་དེ་སྔོན་ཆད་ཅི་ཕྱིར་བྱས། །ཐམས་ཅད་ལས་ལ་རག་ལས་ན། །བདག་གིས་དེ་ལ་ཅི་སྟེ་བཀོན། །དེ་ལྟར་མཐོང་ནས་ཅི་ནས་ཀྱང་། །ཐམས་ཅད་ཕན་ཚུན་བྱམས་སེམས་སུ། ། འགྱུར་བ་དེ་ལྟར་བདག་གིས་ནི། །བསོད་ནམས་དག་ལ་བསྒྲིམས་ཏེ་བྱ། །ཞེས་གསུངས་ཏེ། གཉེན་བཤེས་ལ་སོགས་པ་གནོད་བྱ་གང་དག་དེ་ཉིད་ཀྱིས་སྔོན་ཚེ་རབས་གཞན་དང་གཞན་དག་གམ་འདི་ཉིད་དུ་ཡང་གཞན་དག་ལ་རྡེག་པ་དང་

Page: 452 མི་སྙན་པ་བརྗོད་པ་སོགས་ཀྱི་ལས་བྱས་ཏེ། དེའི་འབྲས་བུས་གཞན་དག་གིས་གནོད་པ་བྱེད་པར་ཟད་ན་སྡུག་བསྔལ་འདི་ལྟ་བུ་སྐྱེད་པར་བྱེད་པའི་ལས་དེ་འདྲ་བ་ཞིག་ཅིའི་ཕྱིར་བྱས་ཞེས་འགྱོད་པ་སྐྱེད་པའོ། །དེ་ལྟར་བདེ་སྡུག་ཐམས་ཅད་རང་གི་ལས་ ལ་རག་ལས་པ་ཡིན་ན་ལས་ལ་མི་ཁྲོ་བར་གནོད་བྱེད་ལ་ཅིའི་ཕྱིར་ཁྲོ། ཞེས་པའོ། །གལ་ཏེ་ལས་ལ་ཁྲོའོ་ཞེ་ན། དེ་ནི་མཐོང་བྱ་མིན་པས་དམིགས་པར་མི་ནུས་ལ་ཁྲོས་པས་དེ་གཞོམ་ཡང་མི་ནུས་པའི་ཕྱིར། ཁྲོས་པ་དོན་མེད་ལ་ཉེས་པར་བྱས་པའི་ལས་དེ་ནི་འགྱོད་ པས་བཤགས་ཞིང་ཕྱིན་ཆད་བསྡམ་པར་བྱ་བ་ལ་དགོད་པ་ཁོ་ན་ཡིན་ནོ། །དེ་ལྟར་ཁྲོ་བའི་ཉེས་དམིགས་དང་བཟོད་པའི་ཕན་ཡོན་མཐོང་བས་རྟག་ཏུ་ཁྲོ་བའི་སྐབས་མི་འབྱེད་ཅིང་བྱམས་པ་ལ་གནས་པས་བདག་མཐོང་བ་ཙམ་ཡང་བྱམས་པ་དང་ལྡན་པར་ འགྱུར་བ་འཕགས་པ་བྱམས་པ་སྔོན་དགེ་སློང་བློ་གྲོས་བརྟན་པར་གྱུར་པ་ན་སྒོ་གང་གི་ཐེམ་པ་ལ་ཞབས་བཞག་པ་ཙམ་གྱིས་ཁྱིམ་དེའི་སེམས་ཅན་ཐམས་ཅད་ལ་བྱམས་པའི་ཏིང་ངེ་འཛིན་སྐྱེ་བར་འགྱུར་བ་དེ་ལྟ་བུར་བདག་གིས་ཀྱང་བསྒྲུབ་པར་བྱའོ། ། བཞི་པ་འབྲས་བུ་ཡིད་ལ་བྱ་བ་གསུམ་བསྟན་པ་ལ་ཡང༌། བསོད་ནམས་མི་ཉམས་པ། སྡུག་བསྔལ་ལས་ལྡོག་པ། དོན་འགྲུབ་པ་སྟེ་གསུམ་མོ། །དང་པོ་བསོད་ནམས་མི་ཉམས་པ་ནི། དཔེར་ན་ཁྱིམ་ཚིག་གྱུར་པའི་མེ། །ཁྱིམ་གཞན་ཞིག་ཏུ་སོང་ནས་ནི། །རྩྭ་སོགས་གང་ལ་མཆེད་བྱེད་པ། །དེ་ནི་ཕྱུང་སྟེ་དོར་བ་ ཡིན། །དེ་བཞིན་གང་ལ་སེམས་ཆགས་ནས། ཞེ་སྡང་མེ་ནི་མཆེད་གྱུར་པ། །བསོད་ནམས་འཚིག་པར་དོགས་པ་ཡིས། །དེ་ནི་དེ་ཡི་མོད་ལ་དོར། །ཞེས་གསུངས་ཏེ། ཁྱིམ་མེས་ཚིག་པ་ན་བུད་ཤིང་བསྣན་པར་བྱ་བ་མ་ཡིན་གྱི། ཡོ་བྱད་འཚིག་པར་ དོགས་པས་གང་ལ་མཆེད་པའི་རྩྭ་སོགས་དོར་ཞིང་ས་དང་ཆུས་དགབ་པར་བྱ་བ་ཡིན་པ་དེ་བཞིན་དུ། རྒྱུད་ལ་ཞེ་སྡང་གི་མེ་འབར་བ་ན་ཡང་ང་བདེན་གྱི་ཡུས་བསྣན་པར་མི་བྱ་ལ། བསོད་ནམས་འཚིག་པར་དོགས་པས་ཞེ་སྡང་སྐྱེས་མ་ཐག་ཏུ་རིག་པར་བྱས་ལ་དང་དུ་མི་

Page: 453 ༄༅། །བླང་བར་འདོར་ཞིང་བྱམས་སོགས་ཀྱི་སས་དགབ་ཅིང་དེ་ཁོ་ན་ཉིད་ཤེས་པའི་ཆུས་བསད་པར་བྱའོ། གཉིས་པ་སྡུག་བསྔལ་ལས་ལྡོག་པ་ནི། གསད་བྱའི་མི་ཞིག་ལག་བཅད་དེ། །གལ་ཏེ་ཐར་ན་ཅིས་མ་ལེགས། །གལ་ཏེ་མི་ཡི་སྡུག་བསྔལ་གྱིས། ། དམྱལ་བ་བྲལ་ན་ཅིས་མ་ལེགས། །ད་ལྟའི་སྡུག་བསྔལ་འདི་ཙམ་ལའང་། །བདག་གིས་བཟོད་པར་མི་ནུས་ན། །དེས་ན་དམྱལ་བའི་སྡུག་བསྔལ་རྒྱུ། །ཁྲོ་བ་ཅིས་ཏེ་བཟློག་མི་བྱེད། །ཅེས་གསུངས་ཏེ། རྒྱལ་པོའི་ཁྲིམས་ཆེན་པོས་བསད་པར་བྱ་བ་ ཞིག་ལག་པ་ཙམ་བཅད་ནས་ཐར་བར་གྱུར་ན་ཆེས་ལེགས་པར་བྱེད་པ་བཞིན་དུ་ད་ལྟའི་མིའི་སྡུག་བསྔལ་འདི་ཙམ་ཞིག་གིས་ཕྱིས་ངན་སོང་གི་སྡུག་བསྔལ་ཡུན་རིང་མྱོང་བར་འགྱུར་བ་རྣམས་བྲལ་བར་གྱུར་ན་ཅིའི་ཕྱིར་མ་ལེགས་ཏེ། ཐེག་ཆེན་གྱི་མདོ་དུ་མར་འཇིག་ རྟེན་གྱི་ཁམས་གཞན་གྱི་དེ་བཞིན་གཤེགས་པ་རྣམས་ཀྱིས་ཞིང་འདིའི་བསྔགས་པ་བརྗོད་པ་ན། སངས་རྒྱས་ཀྱི་ཞིང་དག་པ་རྣམས་སུ་བསྐལ་པ་མཐའ་ཡས་པར་ཕ་རོལ་ཏུ་ཕྱིན་པ་བཅུ་ལ་སྤྱད་པ་བས་འཇིག་རྟེན་གྱི་ཁམས་མི་མཇེད་དེར་སྔ་དྲོ་གཅིག་བྱམས་པ་ ལ་གནས་པ་ཆེས་བསོད་ནམས་རྨད་དུ་བྱུང་ལ། བསྐལ་པ་དུ་མར་ངན་སོང་གི་གནས་མྱོང་འགྱུར་རྣམས་ཀྱང་སྔ་དྲོ་གཅིག་ཀླད་པ་ན་བས་བྱང་བར་བྱེད་དོ། །ཞེས་བྱུང་ཞིང༌། རྡོ་རྗེ་གཅོད་པར། ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པའི་བྱང་ཆུབ་སེམས་དཔའ་དེ་ནི་མནར་བར་ འགྱུར། ཤིན་ཏུ་མནར་བར་འགྱུར་ཏེ། དེ་ནི་ཚེ་རབས་ཕྱི་མའི་རྣམ་སྨིན་ངན་པ་ཐམས་ཅད་ཚེ་འདིར་འདྲེན་པའི་སླད་དུའོ། །ཞེས་གསུངས་པ་ལྟར། ད་ལྟའི་སྡུག་བསྔལ་ཕྲ་མོས་ཀྱང་རྣམ་སྨིན་ཆེན་པོ་རྣམས་ཀྱང་སྦྱོང་བར་བྱེད་པའི་ཕྱིར་རོ། གསུམ་པ་དོན་འགྲུབ་པ་ནི། འདོད་ པའི་དོན་དུ་སྲེག་ལ་སོགས། དམྱལ་བ་སྟོང་ཕྲག་མྱོང་གྱུར་ཀྱང་། བདག་གིས་རང་གི་དོན་དང་ནི། །གཞན་གྱི་དོན་ཡང་མ་བྱས་སོ། །འདི་ནི་དེ་ཙམ་གནོད་མིན་ལ། །དོན་ཆེན་དག་ཀྱང་འགྲུབ་འགྱུར་བས། །འགྲོ་བའི་གནོད་སེལ་སྡུག་

Page: 454 བསྔལ་ལ། །དགའ་བ་འབའ་ཞིག་འདིར་བྱ་རིགས། །ཞེས་གསུངས་ཏེ། ཐོག་མ་མེད་པ་ནས་རྙེད་བཀུར་ལ་སོགས་པ་འདོད་པ་ངན་ངོན་སྣ་རེའི་ཆེད་དུ་ཡང་མི་བྱ་བ་མེད་པའི་སྡིག་པའི་ལས་བྱས་ཏེ། དེའི་འབྲས་བུས་དམྱལ་བའི་སྡུག་བསྔལ་བགྲང་དུ་མེད་པ་མྱོང་ མོད་ཀྱི་རང་སྡུག་བསྔལ་བ་ཁོ་ན་ཙམ་ལས་རང་གཞན་སུ་ལ་ཡང་མ་ཕན་ནོ། །ད་ལྟའི་སྡུག་བསྔལ་དང་བརྙས་སོགས་འདི་ནི་དམྱལ་བའི་སྡུག་བསྔལ་ཙམ་གྱི་གནོད་པ་ཡང་མིན་པས་བཟོད་པར་ཡང་སླ་ཞིང་བཟོད་པར་བྱས་ན་དོན་ཆེན་པོ་བླ་ན་མེད་པའི་བྱང་ཆུབ་ཀྱི་ བར་དུ་ཡང་འགྲུབ་པར་འགྱུར་བས་ན། བཟོད་པའི་རྐྱེན་དུ་གྱུར་པའི་སྡུག་བསྔལ་དང་བརྙས་སོགས་ལ་བདག་གིས་རྙེད་པའི་མཆོག་རྙེད་པ་ལྟར་དགའ་བ་ཁོ་ན་བྱ་བར་རིགས་སོ། །དེ་ལྟར་བདག་དང་བདག་གི་བ་ལ་གནོད་པ་ལ་བཟོད་པ་བསྟན་ནས། གསུམ་པ་དགྲ་ལ་ལེགས་པ་བྱེད་པ་ལ་བཟོད་པ་སྒོམ་ཚུལ་གསུམ་ནི། དགྲ་ལ་བསྟོད་གྲགས་བྱུང་བ་ལ་མི་བཟོད་པ་སྤང་བ་གཉིས། དགྲ་ལ་བདེ་བ་སྒྲུབ་པ་ལ་མི་བཟོད་པ་སྤང་བ། དགྲ་ལ་རྙེད་པ་སྒྲུབ་པ་ལ་མི་བཟོད་པ་སྤང་བ་གཉིས་སོ། །དང་པོ་ ལའང་གཉིས་ལས། དང་པོ་རང་གིས་གཞན་ལ་བསྟོད་ན་བདེ་བ་འཐོབ་པར་བསྟན་པ་ནི། གཞན་གྱིས་ཡོན་ཏན་ལྡན་བསྟོད་ནས། །གལ་ཏེ་དགའ་བའི་བདེ་འཐོབ་ན། །ཡིད་ཁྱོད་ཀྱང་ནི་དེ་བསྟོད་ནས། །ཅི་ཕྱིར་དེ་ལྟར་དགའ་མི་བྱེད། ། ཁྱོད་ཀྱི་དགའ་བའི་བདེ་བ་འདི། །བདེ་འབྱུང་ཁ་ན་མ་ཐོ་མེད། །ཡོན་ཏན་ལྡན་པ་རྣམས་ཀྱིས་གནང་། གཞན་སྡུད་པ་ཡི་མཆོག་ཀྱང་ཡིན། །ཞེས་པ་དང་། གཉིས་པ་གཞན་གྱི་ཡོན་ཏན་ལ་བསྟོད་པ་མི་བཟོད་ན་བདག་ཉིད་ལ་སྡུག་ བསྔལ་འབྱུང་བར་བསྟན་པ་ནི། གཞན་ཡང་དེ་ལྟར་བདེ་འགྱུར་ཞེས། །གལ་ཏེ་ཁྱོད་བདེ་འདི་མི་འདོད། །གླ་རྔན་བྱིན་སོགས་སྤངས་པའི་ཕྱིར། །མཐོང་དང་མ་མཐོང་ཉམས་པར་འགྱུར། །རང་གི་ཡོན་ཏན་བརྗོད་པའི་ཚེ། །གཞན་ལའང་

Page: 455 ༄༅། །བདེ་བ་འདོད་པར་བྱེད། །གཞན་གྱི་ཡོན་ཏན་བརྗོད་པའི་ཚེ། །རང་ལའང་བདེ་བ་འདོད་མི་བྱེད། །ཅེས་གསུངས་ཏེ། དེ་ཡང་བདག་གིས་མི་མཛའ་བ་དགྲར་བཟུང་བ་ཡོན་ཏན་དང་ལྡན་པ་ཞིག་ལ་སྐྱེ་བོ་ཡོན་ཏན་ཤེས་ པ་གཞན་ཞིག་གིས་དེའི་ཡོན་ཏན་ཇི་ལྟ་བས་བསྟོད་པ་ན་བསྟོད་ཡུལ་དེ་དགའ་བའི་བདེ་བ་འཐོབ་ཅིང་དེ་གཉིས་མཛའ་བོར་འགྱུར་རོ། །དེ་ལ་སེམས་ཁྱོད་ཁྲོ་བར་མི་རིགས་ཏེ་ཁྲོ་བས་ནི་ཁྲོ་བ་པོ་སྡུག་བསྔལ་བ་ཁོ་ནར་ཟད་པས་ན་ཁྲོ་བར་མི་བྱ་བར་ཡིད་ཁྱོད་ཉིད་ ཀྱང་དགྲ་བོ་ཡོན་ཏན་དང་ལྡན་པ་དེའི་ཡོན་ཏན་ཚུལ་བཞིན་བསྟོད་པར་གྱིས་ཤིག་དང་། དེས་རང་གི་ཁྲོ་བའི་མེ་ཞི་ཞིང་དགྲ་བོ་དེ་ཡང་དགའ་བ་འཐོབ་པས་བདག་དང་མཛའ་བོར་འགྱུར་བས་ན་ཅིའི་ཕྱིར་གཉི་ག་དགའ་བ་དེ་ཅིས་མི་བྱེད། དེ་ལྟར་བྱས་པས་ ཁྱོད་ཀྱི་རྒྱུད་ལ་ཐོབ་པའི་དགའ་བདེ་འདི་ནི་བདེ་བ་མང་དུ་འབྱུང་བའི་གནས་ཀྱང་ཡིན་ལ། ཁ་ན་མ་ཐོ་བ་མེད་པའི་བདེ་བ་ཡང་ཡིན་ཏེ། ཡོན་ཏན་དང་ལྡན་པའི་སངས་རྒྱས་རྣམས་ཀྱིས་ཀྱང་ཁྲོ་བ་ཞི་བ་ལས་བྱུང་བའི་བདེ་བ་འདི་ནི་བསྟེན་པར་གནང་ལ། འདིས་ ཕ་རོལ་གྱི་ཁྲོ་བ་ཡང་ཞི་བར་བྱེད་པའི་ཕྱིར། སེམས་ཅན་གཞན་ཆོས་ཀྱིས་སྡུད་པའི་མཆོག་ཏུའང་འདི་འགྱུར་བ་ཡིན་ནོ། །དེ་ལྟར་གཞན་དང་ཡང་གི་སྒྲས་རང་ཡང་སྟེ་གཉི་ག་དེ་ལྟ་བུར་རྩོད་པ་མེད་ཅིང་ཁོན་ཞི་བའི་བདེ་བ་འཐོབ་པར་འགྱུར་རོ། །ཞེས་བསྟན་ཡང་ ད་དུང་སེམས་ཁྱོད་དགྲའི་ཡིད་བདེ་ཞིང་རང་ཡང་ཁྲོ་བ་ཞི་བས་བདེ་བ་འདི་མི་འདོད་ན་ནི་སྔར་སེམས་ཁྱོད་ཀྱི་རྟེན་དུ་གྱུར་པའི་ལུས་འདི་ལ་དག་པའི་དོན་དུ་ཟས་གོས་ཀྱི་གླ་རྔན་ཙམ་བྱིན་ནས་གསོས་མོད་ཀྱི་སེམས་ཁྱོད་དེ་ལྟར་མ་རུངས་པར་བྱེད་ན། ད་ནི་ཁྱོད་ཆད་པ་ བྱ་བའི་འོས་ཡིན་པའི་ཕྱིར། ཁྱོད་གང་ལ་བསྟེན་པའི་ལུས་འདི་ལ་གླ་རྔན་གྱི་ཟས་གོས་མི་སྟེར་བས་ན་མཐོང་བའི་ཆོས་འདི་ལ་ཡང་སེམས་ཁྱོད་བཀྲེས་སྐོམ་དང་འཁྱགས་པས་སྡུག་བསྔལ་བར་འགྱུར་ལ། མ་མཐོང་བའི་ཆོས་ཚེ་ཕྱི་མ་ལ་ནི་སེམས་ཁྱོད་ཞེ་སྡང་

Page: 456 གི་འབྲས་བུས་དམྱལ་བར་སྐྱེས་ཏེ་སྡུག་བསྔལ་མི་བཟད་པ་མྱོང་བའི་ཕྱིར། སེམས་ཁྱོད་འདི་ཕྱི་ཐམས་ཅད་དུ་ཉམས་པར་འགྱུར་རོ། །ཞེས་འཇིགས་པའི་གནས་བསྟན་ཏོ། །དེ་ལྟ་མོད་ཀྱི་གཞན་ཞིག་གིས་རང་ཉིད་ཀྱི་ཡོན་ཏན་བརྗོད་པ་ན་ནི་སེམས་ཁྱོད་དགའ་ ཞིང་མགུ་བས་བདག་གི་ཡོན་ཏན་ལ་བསྟོད་པ་པོ་བདེ་བར་གྱུར་ཅིག་སྙམ་ནས་གཞན་ལ་ཡང་བདེ་བ་འདོད་པར་བྱེད་ལ། སྐྱེ་བོ་གཞན་གྱིས་དགྲ་ལ་སོགས་པ་གཞན་གྱི་ཡོན་ཏན་བརྗོད་པ་ན་ནི་གཞན་ལ་བསྟོད་པ་དེ་མི་བཟོད་པས་སེམས་ཁྱོད་ཁྲོ་ཞིང་ འཁྲུག་པས་འཕྲལ་དུ་སྡུག་བསྔལ་བ་དང་། ཕྱི་མར་དེའི་འབྲས་བུས་དམྱལ་བར་འཕེན་པའི་ཕྱིར་ན་རང་ལའང་བདེ་བ་འདོད་པར་མི་བྱེད་པ་འདི་ཅིའི་ཐ་ཚིག་ཅེས་རང་ཉིད་ལ་ཁྲེལ་བའི་ཚིག་གོ །འདིར་འགྲེལ་པ་ཕལ་ཆེར་ན། བསྟོད་པས་གཞན་དགའ་བ་ལྟར་ ཡིད་ཁྱོད་ཀྱང་དེ་བསྟོད་ནས་དགའ་བར་ཅིས་མི་བྱེད། ཅེས་དང་། བྲན་གཡོག་ལ་གླ་རྔན་སྤངས་ན་བདེ་བ་མེད་པ་ལྟར་བདེ་བའི་རྒྱུ་ལས་ཉམས་སོ། །ཞེས་འབྲུ་གཉེར་མོད་ཀྱང་འདི་ལྟར་མ་བཤད་ན་ད་དུང་རྒྱུ་མཚན་གཞན་ཁོང་ན་གནས་པས་དོན་དཔྱིས་ཕྱིན་གོ་བར་ མི་ནུས་སོ། གཉིས་པ་དགྲ་ལ་བདེ་བ་སྒྲུབ་པ་ལ་མི་བཟོད་པ་སྤང་བ་ནི། སེམས་ཅན་ཐམས་ཅད་བདེར་འདོད་པས། །བྱང་ཆུབ་ཏུ་ནི་སེམས་བསྐྱེད་ནས། །སེམས་ཅན་རང་གིས་བདེ་རྙེད་ན། །དེ་ཀོ་ཅི་སྟེ་ཁྲོ་བར་བྱེད། །ཅེས་གསུངས་ཏེ། དགྲ་བོ་བདེ་བ་ན་སེམས་ཁྱོད་ཞེ་ སྡང་བར་མི་རིགས་ཏེ་ཁྱོད་ཀྱིས་སྔར་སེམས་ཅན་བདེ་བར་འདོད་པས་བྱང་ཆུབ་ཏུ་ནི་སེམས་བསྐྱེད་པ་ཡིན་ན་དེ་སེམས་ཅན་དགྲ་བོ་ཁོ་རང་གིས་བདེ་བ་རྙེད་པ་ལ་སེམས་ལ། ཁྱོད་ཀྭའི་ཞེས་བོས་ནས་ཅིའི་ཕྱིར་ཁྲོ་བར་བྱེད་དེ་དགྲ་བོ་དེ་སེམས་ཅན་གྱི་ནང་དུ་མ་འདུས་ སམ་ཞེས་རང་ཉིད་ལ་དྲི་བའོ། །གསུམ་པ་དགྲ་ལ་རྙེད་པ་སྒྲུབ་པ་ལ་མི་བཟོད་པ་སྤང་བ་གཉིས་ལ་ཡང་གཉིས་ལས། ཚིགས་བཅད་སྔ་མའི་དོན་རྒྱུ་མཚན་གྱིས་བསྟན་པ་ནི། འཇིག་རྟེན་གསུམ་མཆོད་འཚང་རྒྱ་བར། སེམས་ཅན་རྣམས་ནི་འདོད་ཅེ་ན། །རྙེད་བཀུར་ངན་ངོན་ཙམ་མཐོང་ན། །

Page: 457 ༄༅། །ཅི་ཕྱིར་དེ་ལ་གདུང་བར་བྱེད། །གསོ་བྱ་གང་ཞིག་ཁྱོད་གསོ་བ། །ཁྱོད་ཉིད་ཀྱིས་ནི་སྦྱིན་བྱ་དེ། །གཉེན་གྱིས་འཚོ་བ་རྙེད་གྱུར་ན། །དགར་མི་འགྱུར་བར་སླར་ཁྲོའམ། །དེ་ཅི་འགྲོ་ལ་མི་འདོད་ན། །དེ་ལ་བྱང་ཆུབ་ འདོད་གང་ཡིན། །གང་ཞིག་གཞན་འབྱོར་ཁྲོ་དེ་ལ། །བྱང་ཆུབ་སེམས་ནི་ག་ལ་ཡོད། །ཅེས་གསུངས་ཏེ། དང་པོས་སངས་རྒྱས་སྦྱིན་པར་འདོད་ན་རྙེད་བཀུར་ལ་སེར་སྣ་བྱེད་པ་མི་རིགས་པར་བསྟན། གཉིས་པས་བདག་གིས་གསོ་བར་བྱ་ དགོས་ན་རང་གིས་འཚོ་བ་རྙེད་པ་ལ་ཁྲོ་མི་རིགས་པར་བསྟན། ཐ་མས་དོན་བསྡུས་པའོ། །གཉིས་པ་གཞན་ལ་མ་བྱིན་ཀྱང་སྦྱིན་བདག་གི་ཁྱིམ་ན་གནས་པའི་ཡོ་བྱད་ཀྱིས་བདག་ལ་མི་ཕན་པར་བསྟན་པ་ནི། གལ་ཏེ་དེས་དེ་ལས་རྙེད་དམ། ། སྦྱིན་བདག་ཁྱིམ་དུ་གནས་གྱུར་ཀྱང་། ཀུན་ཏུའང་དེ་ཁྱོད་ལ་མེད་ན། །བྱིན་མ་བྱིན་རུང་དེས་ཅི་བྱ། །བསོད་ནམས་དང་ནི་དད་པའམ། །རང་གི་ཡོན་ཏན་ཅིའི་ཕྱིར་འདོར། །རྙེད་པར་འགྱུར་བ་མི་འཛིན་ལ། །གང་ཞིག་ཁྲོ་བར་མི་བྱེད་སྨྲོས། ། ཁྱོད་ནི་རང་གིས་སྡིག་བྱས་ལ། །མྱ་ངན་མེད་པར་མ་ཟད་ཀྱི། །བསོད་ནམས་བྱས་པ་གཞན་དག་དང་། །ལྷན་ཅིག་འགྲན་པར་བྱེད་འདོད་དམ། །ཞེས་གསུངས་ཏེ། དང་པོས་དངོས་དང་། གཉིས་པས་ཁྲོ་ན་རང་ཉིད་ལ་ཁྲོ་བར་རིགས་པ་དང་། གསུམ་པས་བསོད་ནམས་ལྡན་པ་ལ་འགྲན་མི་རིགས་པར་བསྟན་ཏོ། །དེ་ཡང་བདག་གིས་སེམས་ཅན་རྣམས་སངས་རྒྱས་ལ་དགོད་པར་ཁས་བླངས་ཀྱི་བདེ་བ་གཞན་ལ་མ་ཡིན་ནོ་ཞེ་ན། དེ་ཉིད་ཀྱི་ཕྱིར་སངས་རྒྱས་ཀྱང་སྟེར་བར་ཁས་བླངས་ནས་འཕྲལ་གྱི་ རྙེད་བཀུར་ངན་ངོན་ཙམ་ཞིག་ཁོ་རང་ཉིད་ཀྱིས་རྙེད་ན་དེ་ལ་ཅིའི་ཕྱིར་ཁྲོ། ཅིའི་ཕྱིར་རྙེད་བཀུར་ངན་ངོན་ཏུ་བརྗོད་ཅེ་ན། ལྷ་དང་ཀླུ་དང་མིའམ་ཅི་ལ་སོགས་པའི་འཚོ་བ་ནི་རང་བཞིན་གྱིས་གྲུབ་པའི་བདུད་རྩི་རོ་བརྒྱ་པ་གཙང་ཞིང་དག་པ་དང་བདུད་རྩིའི་འབྲས་བུ་

Page: 458 ཁྱད་པར་ཅན་དང་དཔག་བསམ་གྱི་ཤིང་ལས་བྱུང་བའི་གོས་རྩོལ་བ་ལས་བྱུང་བ་མ་ཡིན་པ་སྲབ་ཅིང་འཇམ་པ་དུས་དང་མཐུན་པའི་རེག་བྱ་ཅན་ཡིན་ལ། དེ་དག་ལ་བལྟོས་ཏེ་མིའི་འཚོ་བ་ནི་ཡ་ང་ཞིང་མི་གཙང་བ་སྟེ་མང་ཞིག་ནི་སྲོག་ཆགས་ལ་གནོད་པ་བྱས་ པ་ལས་བྱུང་བ་ཤ་ཁྲག་ལ་སོགས་པ་འཇིགས་སུ་རུང་བའི་གནས་ཡིན་ལ། འོ་མ་དང་མར་ལ་སོགས་པ་ཡང་སྲོག་ཆགས་ཀྱི་དྲི་མའི་ཁམས་འདུས་པའི་སྙིང་པོར་ཟད་ལ། འབྲུ་རྣམས་ཀྱང་མི་གཙང་བའི་ལྗན་ལྗིན་ཁོ་ནས་བསྐྱེད་པ་མི་རྣམས་ཀྱིས་རྩོལ་བ་ ཆེན་པོས་ཕུབ་མ་དང་ཕྲལ་ཞིང་སླར་རྔོད་འཐག་ཏུ་བྱས་པ་སོགས་རེ་རེའང་རྩོལ་བ་མཐའ་པས་བསྒྲུབས་པར་ཟད་པའི་ཕྱིར་དང༌། གོས་ཀྱང་སྲད་བུ་ཕྲ་མོ་ནས་བཀལ་ཞིང་ཐགས་དང༌། ཆགས་སུ་བྱས་པ་སོགས་དཀའ་བ་མཐའ་ཡས་པས་བསྒྲུབས་མོད་ ཀྱང་རང་བཞིན་གྱིས་གྲུབ་པ་དེ་དག་གི་ཆར་ཡང་ཉེ་བ་མ་ཡིན་པའི་ཕྱིར་རོ། །འདིར་འགྲེལ་ཆེན་ལས་ནི། འཇིག་རྟེན་གསུམ་མཆོད་འཚང་རྒྱ་བར། །སེམས་ཅན་རྣམས་འདོད་ལོ་ཞེ་ན། །ཞེས་གཞུང་བཏོན་ནས་ཁྱོད་རྙེད་བཀུར་ངན་ངོན་ལ་ཕྲག་ དོག་འདི་འདྲ་ན་ཁྱོད་ཀྱི་སངས་རྒྱས་སྦྱིན་པ་དེའང་ཅི་འདྲའམ་ཞེས་ལོའི་སྒྲས་མ་མགུ་བར་སྟོན་པར་བཤད་དོ། །དེས་ན་བྱང་ཆུབ་སེམས་དཔས་སེམས་ཅན་ཐམས་ཅད་བདེ་བ་ཐམས་ཅད་ལ་དགོད་པར་བྱ་བར་ཐམས་ཅངཕ་མ་ལྟར་ཁས་བླངས་པ་ཡིན་པས་ འགྲོ་བ་འདི་དག་བྱང་ཆུབ་སེམས་དཔའ་བདག་རང་གིས་གསོ་དགོས་པ་ཡང་ཡིན་ན་ཁོང་རང་སོ་སོས་འཚོ་བ་རྙེད་པ་ལ་ཅིའི་ཕྱིར་ཁྲོ། དེས་ན་བུས་རྙེད་པ་ཁྱད་པར་ཅན་ཐོབ་ན་ཕ་མ་ཆེས་དགའ་བ་ལྟར་སེམས་ཅན་རྣམས་རྙེད་བཀུར་དང་ལྡན་པ་ན་བྱང་ཆུབ་སེམས་ དཔའ་ཤིན་ཏུ་དགའ་བར་རིགས་པའི་དོན་ཏེ། སེམས་ཅན་རང་གིས་རྙེད་པའི་རྙེད་པ་དང་བཀུར་སྟི་ཙམ་ཡང་བདག་གི་བློས་མི་ཐོངས་ཤིང་སེར་སྣ་བྱེད་ན་བདེ་བ་ཐམས་ཅད་ཀྱི་མཐར་ཐུག་བྱང་ཆུབ་སྦྱིན་པར་ལྟ་ག་ལ་བྱེད། དེས་ན་གཞན་འབྱོར་བས་ཡིད་མི་བདེ་

Page: 459 ༄༅། །ཞིང་ཁྲོ་བ་དེ་ལ་ནི་ཉན་ཐོས་ཀྱི་དགེ་སྦྱོང་གི་ཆོས་ཀྱང་མེད་ན་བྱང་ཆུབ་ཀྱི་སེམས་ལྟ་ག་ལ་ཡོད་པའི་དོན་ཏོ། །གལ་ཏེ་དེས་བདག་གི་སྦྱིན་བདག་ལས་རྙེད་པ་བླངས་པས་བདག་གི་རྙེད་པ་ཆུང་ངུར་བྱས་སོ་ཞེ་ན། དེ་ལ་བྱིན་ནམ་མ་ བྱིན་ཡང་རུང་སྟེ་སྦྱིན་བདག་གི་ཁྱིམ་ན་གནས་པ་དེ་ནི་ཁྱོད་དབང་བ་མ་ཡིན་ན་ཁྱི་ལྟར་རང་མི་དབང་བའི་བདོག་པ་བསྲུངས་ནས་ཅི་ཞིག་བྱ། དེ་ལྟ་མོད་ཀྱི་ཆོས་བཞིན་གྱི་རྙེད་པ་རྣམས་ནི་རང་གི་ཕྲག་དོག་མེད་པའི་བློ་དང་། བསོད་ནམས་དང་། དད་པ་དང་། བྱམས་ པ་ལ་སོགས་པའི་རྒྱུ་ལས་འབྱུང་བ་ཡིན་ན་རྙེད་པ་ལ་ཞེན་པས་རྙེད་པའི་རྒྱུ་རང་གི་ཡོན་ཏན་དེ་དག་འདོར་བ་ནི་ཆེས་མི་རིགས་པས་གལ་ཏེ་རྙེད་པ་ལ་ཞེན་ནས་ཁྲོ་ན་རྙེད་པའི་རྒྱུ་ཡོན་ཏན་འདོད་པའི་རང་གི་སེམས་འདི་ལ་ཁྲོ་བར་རིགས་སོ། །དེས་ན་རང་ གིས་ཁྲོ་བའི་སྡིག་པ་བསྐྱེད་པ་ལ་མྱ་ངན་མེད་ཀྱི་སྟེང་དུ་བསོད་ནམས་དང་ལྡན་པ་གཞན་དག་ལ་འགྲན་པར་བྱེད་པ་ནི་ཆེས་མི་རིགས་ཏེ། བསོད་ནམས་ཆེན་པོ་ཅན་རྣམས་ལ་འགྲན་སེམས་སུ་བྱེད་པ་ནི་ཕྱེ་མ་ལེབ་མར་མེ་ལ་འགྲན་པ་ལྟར་རང་གི་དགེ་ བ་ཟད་པར་བྱེད་པའི་ཕྱིར་རོ། །བམ་པོ་གཉིས་པ་ཞེས་བྱ་བ་ནི། ད་ལྟ་སྤྱོད་འཇུག་གི་བོད་དཔེ་མཐོང་བ་རྣམས་ན་གཞུང་གི་ཐོག་མར་བམ་པོ་དང་པོ་ཞེས་པ་མི་སྣང་ཡང་། འདིར་བམ་པོ་གཉིས་པ་ བཤད་པའི་ཕྱིར་ངེས་པར་འཐོབ་སྟེ། དེ་ཡང་རྩྭའི་ཆུན་པོ་ལ་ཕོན་དང་བམ་པོར་བརྗོད་པ་ལྟར་གཞུང་ལ་ལྷག་ཆད་སྤང་བའི་ཕྱིར། བོད་དུ་བསྒྱུར་དུས་ལོ་པཎ་གྱིས་བམ་མཚམས་བཀོད་པ་ཡིན་ལ། བམ་པོ་ཆེ་ཚད་ཤློ་ཀ་ལྔ་བརྒྱ་དང༌། འབྲིང་སྟོང་ གི་སུམ་ཆ་དང༌། ཐ་མ་ཤློ་ཀ་ཉི་ཤུ་རྩ་ལྔ་ལ་བཞག་པ་ལས་འདིར་ཤློ་ཀ་སྟོང་ང་ལ་བམ་པོ་གཉིས་སུ་བྱས་པའི་ཕྱིར། བམ་ཚད་ཆེ་བ་ཡིན་ལ། འདི་ཡན་གྱི་བམ་པོ་དང་པོ་རྫོགས་ནས་འདི་ནས་བམ་པོ་གཉིས་པ་འཆད་པ་ནི་ཞེས་བྱ་བའི་དོན་ཏོ། །དྲུག་པ་

Page: 460 འདོད་པའི་གེགས་བྱེད་པ་ལ་བཟོད་པ་སྒོམ་པ་ལ་གཉིས། དགྲ་ལ་གནོད་པའི་གེགས་བྱེད་པ་ལ་བཟོད་པར་བསྟན་པ་དང་། བདག་དང་བདག་གི་ཕྱོགས་ལ་ལེགས་པ་འགྲུབ་པའི་བར་ཆད་བྱེད་པ་ལ་བཟོད་པར་བསྟན་པའོ། །དང་པོ་ནི། གལ་ཏེ་ དགྲ་ཞིག་མི་དགའ་ནའང་། །དེ་ལ་ཁྱོད་དགར་ཅི་ཞིག་ཡོད། ཁྱོད་ཀྱི་ཡིད་སྨོན་ཙམ་གྱིས་ནི། །དེ་ལ་གནོད་པའི་རྒྱུར་མི་འགྱུར། །ཁྱོད་ཀྱི་འདོད་པ་སྡུག་བསྔལ་དེ། །གྲུབ་ནའང་ཁྱོད་དགར་ཅི་ཞིག་ཡོད། །གལ་ཏེ་འཚེངས་པར་འགྱུར་ཞེ་ན། །དེ་ལས་ ཕུང་བའང་གཞན་ཅི་ཡོད། །ཉོན་མོངས་ཉ་པས་བཏབ་པ་ཡི། །མཆིལ་བ་འདི་ནི་མི་བཟད་གཟེ། །དེས་བཟུང་སེམས་དམྱལ་བུམ་པར་ཡང་། །དམྱལ་བའི་བསྲུང་མས་བདག་འཚེད་ངེས། །ཞེས་གསུངས་ཏེ། དགྲ་བོ་ལ་གནོད་པ་བྱུང་ན་ དེ་མི་དགའ་ཞིང་སྡུག་བསྔལ་བར་འགྱུར་བ་དེ་ལ་ཡང་སེམས་ཁྱོད་དགའ་བར་མི་རིགས་ཏེ། ངན་སོང་བ་རྣམས་ཀྱིས་སྡུག་བསྔལ་མྱོང་བས་ལྷ་མི་ལ་མི་ཕན་པ་ལྟར་དགྲ་སྡུག་བསྔལ་བས་ཁྱོད་ཀྱི་ལུས་སེམས་གང་ལ་ཡང་མི་ཕན་པའི་ཕྱིར། གལ་ཏེ་དགྲ་ལ་ སྡུག་བསྔལ་མ་བྱུང་ན་ནི་སེམས་ཁྱོད་ཀྱིས་དགྲ་བོ་སྡུག་བསྔལ་ན་ཅི་མ་རུང་སྙམ་པའི་བློ་ཡིད་སྨོན་ཙམ་དེས་ནི་དགྲ་ལ་གནོད་པར་མི་འགྱུར་གྱི་རང་ཉིད་ཀྱི་ཡིད་མི་བདེ་བར་ཟད་དོ། །གལ་ཏེ་དགྲ་ལ་སྡུག་བསྔལ་དེ་གྲུབ་ན་ཡང་ཁྱོད་དགའ་བར་བྱར་ཅི་ཡོད་དེ་བཤད་ མ་ཐག་པའི་བདག་ལ་མི་ཕན་པ་ཉིད་ཀྱི་ཕྱིར། གལ་ཏེ་སེམས་ཀྱི་འདོད་པ་གྲུབ་པས་འཚེངས་སོ་ཞེ་ན། གཞན་སྡུག་བསྔལ་བས་རང་དགའ་བ་སྐྱེ་ན་དེ་ལས་ཕུང་བ་གཞན་ཅི་ཡོད་དེ་བློ་དེ་འཛིན་པ་ནི་བྱང་སེམས་ལྟ་ཅི་སྨོས་ཉན་ཐོས་པར་ཡང་ག་ལ་ཆུད། གཞན་ལ་གནོད་པར་སེམས་པའི་ཉོན་མོངས་པ་ཉ་པ་ལྟ་བུས་བཏབ་པའི་སྡིག་པའི་མཆིལ་པ་སྟེ་ཉ་འདྲེན་པའི་ལྕགས་ཀྱུ་ཟས་ཅན་དང་འདྲ་བ་ཤིན་ཏུ་རྣོ་ཞིང་གཟེ་བ་གང་ལ་བཏབ་ན་འཆོར་མི་སྲིད་པ་འདིས་སེམས་ཉ་ལྟར་ཚུལ་བཞིན་མ་ཡིན་པ་ཡིད་

Page: 461 ༄༅། །ལ་བྱེད་པའི་ཆུ་བོའི་ནང་ན་ཀུན་ནས་འགྲེ་བ་ཁྱོད་བཟུང་སྟེ་དམྱལ་བ་ཆེན་པོའི་བུམ་པར་ཁྲོ་ཆུ་ཁོལ་མའི་ནང་དུ་འཚེད་པར་གདོན་མི་ཟ་བས་ན་ད་ལྟ་ནས་དེའི་རྒྱུ་གཞན་གནོད་ཀྱི་བསམ་སྦྱོར་ཐོངས་ཤིག་པའོ། །འདི་ལ་དཀའ་འགྲེལ་ དུ། ཡུལ་གྱིས་རང་ལ་མི་ཕན་པ་དང་། ཡུལ་ཅན་གྱིས་གཞན་ལ་མི་གནོད་པ་དང་། ཡུལ་ཅན་གྱིས་རང་ལ་གནོད་པ་ཞེས་གསུམ་དུ་ཕྱེ་ནས་རྐང་པ་གཉིས་རེ་དང་ཚིགས་བཅད་གཅིག་གིས་བསྟན་པར་བཤད་དོ། །དགེ་བའི་ལྷས་ནི། གལ་ཏེ་འཚེངས་པར་ འགྱུར་ཞེ་ན། །དེ་ལྟར་བདེ་བའམ་གཞན་ཡང་རུང་། །དེ་ལས་ཕུང་བ་གཞན་ཅི་ཡོད། །དེའི་སྡུག་བསྔལ་ཡོད་ན་བདེ་བའམ་དོན་གཞན་དུ་འགྱུར་ན་ངེས་པར་དོན་མེད་པ་ཆེན་པོར་འགྱུར་རོ་ཞེས་པའི་ཐ་ཚིག་གོ །ཅིའི་ཕྱིར་ཞེ་ན། ཉོན་མོངས་ཞེས་བྱ་བ་ ལ་སོགས་སྨོས་ཏེ་ཅེས་གཞུང་ཚིག་རྐང་པ་གཅིག་ལྷག་པོར་བཤད་དོ། །གཉིས་པ་བདག་དང་བདག་གི་ཕྱོགས་ལ་ལེགས་པ་འགྲུབ་པའི་བར་ཆད་བྱེད་པ་ལ་བཟོད་པར་བསྟན་པ་ལ་ཡང་། བསོད་ནམས་ཀྱི་གེགས་བྱེད་པ་ལ་སྒོམ་པའོ། །དང་པོ་འཇིག་རྟེན་གྱི་ཆོས་ཀྱི་གེགས་བྱེད་པ་ལ་སྒོམ་པ་ལ་ཡང༌། བདག་གི་བསྟོད་གྲགས་འཇིག་ པ་ལ་གནོད་པར་མི་ལྟ་བ་དང་། བསྟོད་གྲགས་འགོག་པ་ནི་ཕན་འདོགས་ཀྱི་དམ་པར་བསྟན་པའོ། །དང་པོ་བདག་གི་བསྟོད་གྲགས་འཇིག་པ་ལ་གནོད་པར་མི་ལྟ་བ་ནི། བསྟོད་དང་གྲགས་དང་རིམ་གྲོ་ནི། །བསོད་ནམས་མི་འགྱུར་ཚེར་མི་འགྱུར། །བདག་སྟོབས་མི་འགྱུར་ནད་མེད་མིན། །ལུས་བདེ་ བར་ཡང་མི་འགྱུར་རོ། །བདག་ནི་རང་དོན་ཤེས་གྱུར་ན། །དེ་ལ་རང་དོན་ཅི་ཞིག་ཡོད། ཡིད་བདེ་འབའ་ཞིག་འདོད་ན་ནི། །རྒྱན་སོགས་ཆང་ཡང་བསྟེན་དགོས་སོ། །གྲགས་པའི་ཕྱིར་ནི་ནོར་ཤོར་ཞིང་། །བདག་ཉིད་ཀྱང་ནི་གསོད་བྱེད་ན། ། ཚིག་འབྲུ་རྣམས་ཀྱིས་ཅི་ཞིག་བྱ། །ཤི་ནས་དེས་ཀོ་སུ་ལ་བདེ། །བྱེ་མའི་ཁང་བུ་རྡིབ་གྱུར་ན། །བྱིས་པ་རྣམས་ནི་ག་ཆད་ངུ་། །དེ་བཞིན་བསྟོད་དང་གྲགས་ཉམས་ན། །རང་གི་སེམས་ནི་བྱིས་པ་བཞིན། །རེ་ཞིག་སྒྲ་ལ་སེམས་མེད་ཕྱིར། །

Page: 462 བདག་ལ་བསྟོད་སེམས་ཡོང་མི་སྲིད། །བདག་ལ་གཞན་དགའ་ཞེས་གྲག་པ། །དེ་ནི་དགའ་བའི་རྒྱུ་ཡིན་གྲང་། །གཞན་ནམ་ཡང་ན་བདག་ལའང་རུང་། གཞན་དགའས་བདག་ལ་ཅི་ཞིག་ཕན། །དགའ་བདེ་དེ་ནི་དེ་ཉིད་ཀྱི། ། བདག་གིས་དེ་ལས་ཤས་མི་འཐོབ། །དེ་བདེ་བ་ཡིས་བདག་བདེ་ན། །ཀུན་ལའང་དེ་བཞིན་བྱ་དགོས་ན། །ཇི་ལྟར་གཞན་ལ་དགའ་བ་ཡིས། །བདེ་བར་གྱུར་ན་བདག་མི་བདེ། །དེ་བས་བདག་ནི་བསྟོད་དོ་ཞེས། །རང་གིས་དགའ་བ་སྐྱེ་ འགྱུར་པ། །དེ་ཡང་དེ་ལྟར་མི་འཐད་པས། །བྱིས་པའི་སྤྱོད་པ་ཁོ་ནར་ཟད། །ཅེས་གསུངས་ཏེ། དང་པོ་གཉིས་ཀྱིས་བསྟོད་སོགས་ནི་བདག་གི་བདེ་བའི་རྒྱུ་མ་ཡིན་པར་བསྟན། དེ་ནས་གཉིས་ཀྱིས་བསྟོད་གྲགས་ལ་ཆགས་པའི་ཉེས་པ་ བསྟན། དེ་ནས་ཚིགས་བཅད་གསུམ་གྱིས་རྣམ་པར་བརྟགས་ཏེ་བསྟོད་གྲགས་ལ་ཆགས་བྱ་མ་ཡིན་པར་བསྟན། ཐ་མས་དོན་བསྡུས་པའོ། །དེ་ཡང་གལ་ཏེ་བསྟོད་པའམ་གྲགས་པ་བསྒྲགས་པ་ན་དེས་བདག་གི་ནད་ཞི་བའམ། ཚེ་འཕེལ་བའམ། བསོད་ནམས་རྒྱས་པ་ཞིག་ཏུ་འགྱུར་ན་སྐྱེ་བོ་གཉུག་མར་གནས་པ་རྣམས་ལ་ཡང་བདག་གི་ཡོ་བྱད་ཅི་བདོག་པ་བྱིན་ཏེ་བསྟོད་གྲགས་སྒྲོག་ཏུ་འཇུག་པར་འོས་མོད་ཀྱང་། བསྟོད་གྲགས་དེས་ནི་བདག་ལ་ཕན་པ་ཅིར་ཡང་མི་འགྱུར་རོ། །དེ་ལྟ་མོད་ཀྱི་སེམས་ ཁྱོད་ནི་སུ་ཡང་མ་ཡིན་པ་ཞིག་ལ་རང་དུ་ཞེན་ཅིང་འདི་ཁོ་ན་ཕུན་སུམ་ཚོགས་པའི་དོན་སྒྲུབ་པར་འདོད་ན། ཅི་བསྟོད་གྲགས་ཚིག་ཙམ་པ་དེ་ལས་ཁྱོད་ཀྱི་རང་དོན་ཅི་ཞིག་འགྲུབ། གལ་ཏེ་ཚིག་ཙམ་པ་དེ་ལ་ཆགས་ན་སྒྲ་ཙམ་ལ་ཡང་ཅིའི་ཕྱིར་མི་ཆགས་ཏེ། དེ་ལྟ་ན་ ཆུ་སྒྲ་དང་རླུང་སྒྲ་ལ་ཡང་ཁྱོད་ཆགས་པར་གྱིས་ཤིག་པའོ། །གལ་ཏེ་ལུས་ལ་བདེ་བ་སོགས་མི་འབྱུང་ཡང་བསྟོད་གྲགས་དེས་བདག་གི་ཡིད་བདེ་བར་འགྱུར་རོ་ཞེ་ན། མཐར་ཉེས་པ་བསྐྱེད་པའི་འཕྲལ་གྱི་ཡིད་བདེ་བ་ཙམ་ཁོ་ན་སྒྲུབ་ན་ཆོ་ལོ་དང་མིག་མང་དུ་རྡེའུ་

Page: 463 ༄༅། །འགྲིག་སོགས་རྒྱན་པོ་འགྱེད་པ་དང་ཆང་དང་གཟུགས་ཚོང་གི་ཁྱིམ་དུ་རྒྱུ་བ་ཡང་བསྟེན་བྱར་ཐལ་ལོ། །དུག་ཀྱང་ཟ་རིགས་པར་འགྱུར་ཏེ་འཕྲལ་དུ་མངར་བའི་ཕྱིར། དེས་ན་བསྟོད་གྲགས་ཀྱིས་ཡིད་བདེ་བར་འཛིན་པ་ནི་སེམས་ ཁྱོད་རང་གི་ཕྱིན་ཅི་ལོག་གོམས་པས་སྣང་བར་ཟད་ཀྱི་བྱུང་མ་ཐག་ཏུ་འགགས་པའི་སྒྲ་དེས་ནི་བྱ་བ་ཅི་ཡང་བྱས་པ་མེད་དོ། །དེ་ལྟ་མོད་ཀྱི་བསྟོད་གྲགས་ནི་ཉེས་པའི་འབྱུང་ཁུངས་ཡིན་ཏེ། བསྟོད་གྲགས་སྐམ་པོ་དེ་འདོད་པས་གཞན་དང་འགྲན་པའི་ཕྱིར། ལོངས་སྤྱོད་ཐམས་ཅད་གནས་མིན་དུ་གོད་པར་བྱེད་པ་དང་དཔའ་ཞིང་རྟུལ་ཕོད་དེ་ཞེས་པའི་མིང་འདོད་པས་གཡུལ་དུ་ཞུགས་ཏེ་འཆི་བར་འགྱུར་བ་དང་། ཡང་ན་གཞན་བསད་དེ་གཉིས་ཀའང་ཞེ་སྡང་གིས་མཚམས་སྦྱར་བས་དམྱལ་བར་འདོད་དགོས་ལ། དེ་ལྟར་ བསྟོད་གྲགས་ལ་བརྟེན་ནས་ཚེ་འདིར་ལོངས་སྤྱོད་དང་བྲལ་ནས་ཤི་ཞིང་ཕྱི་མར་ངན་སོང་དུ་ལྷུང་བར་བྱེད་ན་དེ་ལྟ་བུའི་བསྟོད་གྲགས་དེས་སེམས་ཁྱོད་ཅི་ཞིག་བྱ་ཞེས་སོམས་ཤིག་པའོ། །དེས་ན་བྱེ་མའི་ཁང་བུ་རྡིབ་པ་ན་བྱིས་པ་དག་ག་ཆད་པར་ངུ་ཞིང་འགྲེ་ལྡོག་པ་ ལྟར་བསྟོད་གྲགས་བྱེ་མའི་ཁང་བུ་ལྟར་སྙིང་པོ་མེད་པར་མ་ཤེས་པས་སེམས་བྱིས་པ་ལྟ་བུའང་ག་ཆད་པར་ངུ་བ་ལྟར་ཟད་དོ། །དེ་ལྟ་མོད་ཀྱི་རེ་ཞིག་བརྟག་པར་བྱ་སྟེ་བསྟོད་གྲགས་དེ་ནི་མིང་ཚིག་ཡི་གེ་ཚོགས་པའི་སྒྲ་ཙམ་དུ་ཟད་དེ། དཔེར་ན་སྐྱེས་བུ་ཁྱོད་ མཛེས་སོ། །ཞེས་བྱ་བ་འདི་གཞན་ཞིག་གིས་བདག་ལ་བརྗོད་པས་བསྟོད་པ་དང༌། དེ་བཞིན་དུ་མས་བརྒྱུད་ནས་བསྒྲགས་པ་ནི་གྲགས་པར་འཇོག་ལ། དེའི་ཚེ་སྐྱེས་བུ་སོགས་ཀྱི་ས་ཡིག་དང་། ཀ་ཡིག་དང༌། ཡ་བཏགས་དང་། སྲོག་གི་ཨེ་དང་ས་ཡིག་དང༌། བ་ཡིག་དང༌། སྲོག་གི་ཨུ་ སོགས་རེ་རེ་ཞིང་ཡི་གེ་ཐ་དད་པ་རེ་སྟེ་དེ་ལྟར་ཕྱེ་ན་ཡི་གེ་རེ་རེ་བ་དེ་དག་གིས་ཅི་ཡང་བརྗོད་པ་མེད་དོ། །དེ་དག་ཚོགས་པ་ལས་སྐྱེས་བུ་དང་ཁྱོད་དང་མཛེས་པ་ཞེས་སོགས་ནི་མིང་རེ་རེ་བ་སྟེ་དེ་དག་ཀྱང་མིང་བསྒྲིགས་པར་ཟད་ཀྱི། དོན་གྱི་ཁྱད་པར་འགའ་ཡང་མ་

Page: 464 བསྟན་དེ། དཔེར་ན། ཀ་ཁ་ག་ང་། ཞེས་པས་དོན་གྱི་ཁྱད་པར་ཅི་ཡང་མ་བསྟན་པ་བཞིན་ནོ། །གལ་ཏེ་མིང་འདུས་པས་དོན་གྱི་ཁྱད་པར་བསྟན་པའི་ཚིག་ཡིན་ནོ་སྙམ་ན། འདི་ནི་རང་གི་བློས་འདིས་འདི་བརྗོད་དོ་སྙམ་དུ་སྒྲོ་བཏགས་ནས་ཞེན་པར་ཟད་ཀྱི་ཞེན་པའི་དུས་དེ་ ཉིད་ན་ཡང་མིང་ཚིག་ཡི་གེའི་སྒྲ་དེས་ནི་ཅི་ཡང་བརྗོད་པ་མེད་དེ་ཇི་ལྟར་རླུང་གི་སྒྲས་ཅི་ཡང་མ་བརྗོད་པ་བཞིན་ཏེ་སྒྲ་ཐམས་ཅད་ནི་དེ་ལྟ་བུ་ཁོ་ནའོ། །དེས་ན་ཡང་དག་པར་ན་བསྟོད་པ་དང་གྲགས་པའི་སྒྲ་ཞིག་ཀྱང་མེད་ལ། གལ་ཏེ་སྒྲ་ཙམ་འདི་ཁོ་ན་བསྟོད་གྲགས་ ཡིན་ནོ་ཞེ་ན། སྒྲ་དེ་ལ་ནི་བསྟོད་པའི་སེམས་མེད་པས་བྲག་ཆ་ལྟར་ཟད་པའི་ཕྱིར་དེ་བས་ཀྱང་དགའ་བར་མི་རིགས་སོ། །ཡང་དེ་ལ་བརྟེན་ནས་བདག་ལ་གཞན་དག་དགའ་འོ་ཞེས་རང་གིས་གོ་བར་འགྱུར་བས་འདི་ཙམ་ཞིག་ལ་བདག་དགའ་འོ་ཞེ་ན། བདག་ གཞན་སུ་ལ་ཡང་རུང་གཞན་དགའ་བ་ཙམ་དེས་ཅི་ཕན་ཏེ་དགའ་བ་དེ་ནི་དགའ་བ་པོ་ཁོ་རང་གི་སེམས་ཡིན་པས་ཁོ་རང་བདེ་བར་ཟད་ཀྱི་ཁོའི་བདེ་བ་དེ་ལས་བདག་གིས་ཅུང་ཟད་ཀྱི་ཤས་ཀྱང་མི་འཐོབ་བོ། །གལ་ཏེ་དེ་བདེ་བས་བདག་གི་ཡིད་བདེ་འོ་ཞེ་ན། ལེགས་ སྟེ་སེམས་ཁྱོད་ཀྱིས་སེམས་ཅན་ཐམས་ཅད་ལ་དེ་ལྟར་བྱོས་ཤིག །གལ་ཏེ་གཞན་ལ་བསྟོད་གྲགས་བྱུང་བས་དེ་དགའ་བར་འགྱུར་དུ་འོང་ངོ་ཞེས་སེམས་ཁྱོད་ཡིད་མི་བདེ་ན་ནི་ཁྱོད་ཀྱིས་དེ་བདེ་བ་ཡིས་བདག་བདེའོ་ཞེས་སྨྲས་པ་དེ་བརྫུན་པར་འགྱུར་རོ། ། རྒྱུ་མཚན་དེ་རྣམས་ཀྱིས་རྣམ་པར་བརྟགས་པ་ན་སྙིང་པོ་མེད་པའི་བསྟོད་གྲགས་ལ་ཆགས་པ་ནི་ངོ་ཚ་བའི་གནས་བྱིས་པ་ཤེད་མ་བྱེ་བའི་སྤྱོད་པ་ཁོ་ནར་ཟད་དོ་ཞེས་བདག་གིས་ཀྱང་ཤེས་པར་འགྱུར་རོ། །དགེ་བའི་ལྷས་ནི། བདག་གིས་དེ་ལས་ཤས་ མི་འཐོབ། །བདེ་བ་ནི་ནང་གི་ཡིན་པའི་ཕྱིར་དང་། གཟུགས་ཅན་མ་ཡིན་པ་ཉིད་ཀྱིས་བགོ་བར་བྱ་བ་མ་ཡིན་པ་ཉིད་ཀྱི་ཕྱིར་རོ། །ཞེས་བཀྲལ་ཏོ། །གཉིས་པ་བསྟོད་གྲགས་འགོག་པ་ནི་ཕན་འདོགས་ཀྱི་དམ་པར་བསྟན་པ་ལ་ཡང༌། ངན་སོང་ལས་སྲུང་བ་དང༌། ཐར་པའི་གྲོགས་སུ་བསྟན་པ་གཉིས་ལས། །དང་པོ་ངན་སོང་ལས་སྲུང་བ་ནི།

Page: 465 ༄༅། །བསྟོད་སོགས་དག་ནི་གཡེང་བར་བྱེད། །དེས་ནི་སྐྱོ་བའང་འཇིག་པར་བྱེད། །ཡོན་ཏན་ལྡན་ལ་ཕྲག་དོག་དང་། །ཕུན་སུམ་ཚོགས་པའང་འཇིག་པར་བྱེད། །དེ་ཕྱིར་བདག་གི་བསྟོད་སོགས་ནི། །གཞིག་ཕྱིར་གང་དག་ཉེར་གནས་ པ། །དེ་དག་བདག་ནི་ངན་སོང་དུ། །ལྟུང་བ་སྲུང་ཕྱིར་ཞུགས་མིན་ནམ། །ཞེས་པའོ། །གཉིས་པ་ཐར་པའི་གྲོགས་སུ་བསྟན་པ་ནི། བདག་ནི་གྲོལ་བ་དོན་གཉེར་ལ། །རྙེད་དང་བཀུར་སྟིས་འཆིང་མི་དགོས། །གང་དག་བདག་བཅིངས་གྲོལ་བྱེད་པ། །དེ་ལ་བདག་ནི་ཇི་ལྟར་ཁྲོ། ། བདག་ནི་སྡུག་བསྔལ་འཇུག་འདོད་ལ། །སངས་རྒྱས་ཀྱིས་ནི་བྱིན་བརླབས་བཞིན། མི་གཏོང་སྒོ་འཕར་ཉིད་གྱུར་པ། །དེ་ལ་བདག་ནི་ཇི་ལྟར་ཁྲོ། །ཞེས་གསུངས་ཏེ། དེ་ཡང་བསྟོད་གྲགས་ལ་དགའ་བ་ན་དེས་སེམས་གཡོ་ཞིང་ཏིང་ངེ་འཛིན་དང་བྲལ་ བར་བྱེད། རྒྱུད་ང་རྒྱལ་བས་དྲེགས་ཏེ་སྐྱོ་བའི་བློ་འཇིག །གཞན་ཡོན་ཏན་དང་ལྡན་པར་མཐོང་ན་ཕྲག་དོག་དང་འགྲན་སེམས་སྐྱེ་ཞིང་ཡོན་ཏན་དང་མི་ལྡན་པ་ལ་བརྙས་ཤིང་ཁྱད་དུ་གསོད། དེ་དག་ལ་བརྟེན་ནས་འཐབ་རྩོད་དང་སྡིག་པ་འཕེལ་བས་འདི་ཕྱིའི་ཕུན་ཚོགས་ ཞིག་སྟེ་ངན་སོང་དུ་འགྲོའོ། །དེས་ན་སུ་ཞིག་བདག་གི་བསྟོད་པ་དང་གྲགས་པ་སོགས་འགོག་ཅིང་མི་སྙན་པ་སྒྲུབ་པར་བྱེད་པ་དེ་ནི་བདག་གི་དགེ་བའི་གྲོགས་དམ་པ་ཡིན་ཏེ། རྙེད་གྲགས་ལ་ཞེན་པས་སྡིག་པ་བསགས་ཏེ་བདག་ངན་སོང་དུ་འདོད་པར་ཕྱོགས་པ་ ལས་སྲུང་བར་བྱེད་པ་ཡིན་པའི་ཕྱིར་ཏེ། བདག་གཡང་དུ་ལྷུང་ལ་ཁད་པ་ན་གཞན་ཞིག་གིས་བཟུང་བ་ལྟ་བུ་ཡིན་ནོ། །དེ་ལྟ་མོད་ཀྱི་བདག་ནི་དང་པོར་རབ་ཏུ་བྱུང་བ་དང་བྱང་ཆུབ་ཏུ་སེམས་བསྐྱེད་པ་ཉིད་ནས་རྣམ་པར་གྲོལ་བའི་བྱང་ཆུབ་དོན་དུ་གཉེར་བ་ཡིན་གྱི། དེ་སྒྲུབ་པའི་གེགས་ནི་རྙེད་བཀུར་གྱི་འཆིང་བ་ཁོ་ན་ཆེ་སྟེ། འོད་སྲུང་གི་མདོར། ལྟ་གྱུར་འཆིང་དང་རྙེད་དང་བཀུར་སྟི་དང་། །གྲགས་པའི་འཆིང་བ་རབ་ཏུ་བྱུང་བ་ཡི། །འཆིང་བ་དམ་ཞེས་འཕགས་པ་རྣམས་ཀྱིས་གསུངས། །དེ་དག་རྟག་ཏུ་རབ་ཏུ་

Page: 466 བྱུང་བས་སྤང་། །ཞེས་དང་། དོ་རྣམས་ལས། འདུ་འཛིའི་ཉེས་དམིགས་རྒྱས་པར་བསྟན་པའི་ཕྱིར་ན། བདག་ལ་རྙེད་བཀུར་གྱི་འཆིང་བས་ཅི་བྱ་སྟེ་ཐག་རིང་པོར་མྱུར་དུ་འགྲོ་བར་འདོད་པའི་སྐྱེས་བུ་ཡན་ལག་ལྕགས་སྒྲོག་གིས་བསྡམས་པ་དོན་ དུ་མི་གཉེར་བ་ལྟར་རོ། །དེས་ན་བདག་བྱང་ཆུབ་ཀྱི་ལམ་དུ་མྱུར་བར་འགྲོ་བ་ལ་ཚེ་འདི་དོན་གཉེར་གྱི་འདམ་དུ་བྱིང་ཞིང་རྙེད་བཀུར་གྱི་ཞགས་པས་བཅིངས་པ་ལས་འགྲོལ་བར་བྱེད་པ་དེ་ལྟ་བུ་ལ་ཅིས་ཁྲོ་སྟེ། གྲོགས་དང་བཤེས་ཀྱི་དམ་པ་ཡིན་པའི་ཕྱིར་ཏེ། ནད་སེལ་བ་ལ་སྨན་པ་བཞིན་ནོ། །དེ་ལྟར་བདག་སྡུག་བསྔལ་གྱི་རྒྱུ་ལས་ལྡོག་པ་ངན་སོང་གི་སྒོ་གཅོད་པའི་སྒོ་གླེགས་ལྟ་བུར་གྱུར་པ་དེ་ལ་ནི་ཅིས་ཁྲོ་སྟེ་སངས་རྒྱས་ཀྱི་བྱིན་རླབས་ཁོ་ན་ཡིན་ཏེ། འདིས་བདག་ལ་དགེ་བའི་བཤེས་གཉེན་གྱི་བྱ་བ་བྱས་པའི་ ཕྱིར་རོ། །གཉིས་པ་བསོད་ནམས་ཀྱི་གེགས་བྱེད་པ་ལ་བཟོད་པར་བསྟན་པ་ལ་ཡང་། ཁྲོ་བ་ཁོ་ན་བསོད་ནམས་ཀྱི་གེགས་སུ་བསྟན། གནོད་བྱེད་གེགས་མ་ཡིན་པར་བསྟན། དེ་གུས་པའི་ཡུལ་དུ་བསྟན་པ་དང་གསུམ་ལས། དང་པོ་ཁྲོ་བ་ཁོ་ན་བསོད་ནམས་ཀྱི་གེགས་སུ་བསྟནནི། འདི་ནི་བསོད་ ནམས་གེགས་བྱེད་ཅེས། །དེ་ལའང་ཁྲོ་བ་རིགས་མིན་ཏེ། །བཟོད་མཚུངས་དཀའ་ཐུབ་ཡོད་མིན་ན། །བདག་ནི་དེ་ལ་མི་གནས་སམ། །གལ་ཏེ་བདག་ནི་རང་སྐྱོན་གྱིས། །འདི་ལ་བཟོད་པར་མི་བྱེད་ན། །བསོད་ནམས་རྒྱུ་ནི་ཉེར་གནས་པ། འདི་ ལ་བདག་གེགས་བྱས་པར་ཟད། །ཅེས་པ་དང་། གཉིས་པ་གནོད་བྱེད་གེགས་མ་ཡིན་པར་བསྟན་ནི། གང་ཞིག་གང་མེད་མི་འབྱུང་ལ། །གང་ཞིག་ཡོད་ན་ཡོད་འགྱུར་བ། དེ་ཉིད་དེ་ཡི་རྒྱུ་ཡིན་ན། །ཇི་ལྟར་དེ་ལ་གེགས་ཞེས་བྱ། །དུས་སུ་ཕྱིན་པའི་སློང་མོ་བས། །སྦྱིན་པའི་གེགས་ བྱས་ཡོད་མ་ཡིན། །རབ་ཏུ་འབྱིན་པར་བྱེད་གྱུར་པ། །རབ་བྱུང་གེགས་ཞེས་བྱར་མི་རུང་། །ཞེས་པས་བསྟན་ཏེ། དེ་ཡང་གནོད་བྱེད་འདིས་བདག་གི་བསོད་ནམས་ཀྱི་ལས་དགེ་བའི་བར་ཆད་བྱས་པས་ཁྲོ་འོ་ཞེ་ན། དེ་ལ་ཡང་ཁྲོ་བར་མི་རིགས་ཏེ་

Page: 467 ༄༅། །འདིས་གེགས་མ་བྱས་པས་སྦྱིན་པ་ལྟ་བུའི་དགེ་བ་ཕྲ་མོ་ཞིག་འགྲུབ་པར་ཟད་ལ། འདིའི་གནོད་པ་ལ་བཟོད་པ་བསྒོམས་པས་དེ་ནི་དེ་བས་ཆེས་ལྷག་པའི་དགེ་བ་འགྲུབ་སྟེ་བཟོད་པ་དང་མཚུངས་པའི་དཀའ་ཐུབ་ནི་གཞན་མེད་པའི་ ཕྱིར། དེས་ན་དགེ་བ་ཆུང་ངུའི་ཚབ་ཏུ་ཆེན་པོ་བསྒྲུབས་ཆོག་པ་འདི་ལ་བདག་ཅིའི་ཕྱིར་མི་གནས། དེ་ལྟ་མོད་ཀྱི་བདག་ནི་རང་གི་སྐྱོན་ཞེ་སྡང་གི་དབང་དུ་གྱུར་ཏེ། དགེ་བ་ཆེན་པོ་བཟོད་པ་ལ་གནས་པར་མི་བྱེད་ན་ནི་རང་ཉིད་ཀྱིས་རང་གི་དགེ་བའི་གེགས་བྱས་པར་ཟད་ པས་རང་ཉིད་ལ་ཁྲོ་རིགས་པར་འགྱུར་རོ། །དེས་ན་གང་ཞིག་གནོད་བྱེད་མེད་ན་བཟོད་པ་གང་མེད་ལ་གནོད་བྱེད་ཡོད་ན་བཟོད་པ་གང་ཡོད་པར་འགྱུར་བའི་ཕྱིར། གནོད་བྱེད་དེ་ཉིད་ནི་བཟོད་པའི་དངོས་རྒྱུའམ་དངོས་ཀྱི་རྐྱེན་གྲུང་པོ་ཡིན་ན་ཇི་ལྟར་ན་གནོད་བྱེད་དེ་ལ་དགེ་ བའི་གེགས་སོ་ཞེས་བྱར་ཅི་ཞིག་རུང་སྟེ། དཔེར་ན། དུས་སུ་ཕྱིན་པའི་སློང་མོ་པས་སྦྱིན་པའི་གེགས་བྱས་པ་ཡོད་པ་མ་ཡིན་ལ། རབ་ཏུ་འབྱིན་པར་བྱེད་པར་གྱུར་པ་མཁན་པོ་སོགས་ལ་རབ་བྱུང་གི་གེགས་ཞེས་བྱར་མི་རུང་བ་བཞིན་ནོ། །གསུམ་པ་གུས་པའི་ཡུལ་དུ་བསྟན་ པ་ལ་གཉིས། བཟོད་པའི་གྲོགས་ཡིན་པའི་ཕྱིར་གུས་པར་བྱ་བ་དང་། སྟོན་པའི་ཐུགས་དགོངས་རྫོགས་པའི་ཕྱིར་གུས་པར་བྱ་བའོ། །དང་པོ་བཟོད་པའི་གྲོགས་ཡིན་པའི་ཕྱིར་གུས་པར་བྱ་བ་ལ་གསུམ། ཕན་འདོགས་ཆེ་བར་བསྟན་པ། ཕ་རོལ་གྱི་སྡང་སེམས་མེད་ན་བཟོད་པ་མི་འབྱུང་བར་ བསྟན་པ། སྟོན་པ་དང་འདྲ་བ་དེ་བསྟན་པའོ། །དང་པོ་ཕན་འདོགས་ཆེ་བར་བསྟན་པ་ནི། འཇིག་རྟེན་ན་ནི་སློང་བ་མོད། །གནོད་པ་བྱེད་པ་དཀོན་པ་སྟེ། །འདི་ལྟར་ཕར་གནོད་མ་བྱས་ན། །འགའ་ཡང་ཚུར་གནོད་མི་བྱེད་དོ། །དེ་བས་ངལ་བས་མ་སྒྲུབས་པའི། །ཁྱིམ་དུ་གཏེར་ནི་བྱུང་བ་ ལྟར། །བྱང་ཆུབ་སྤྱོད་པའི་གྲོགས་གྱུར་པས། །བདག་གིས་དགྲ་ལ་དགའ་བར་བྱ། །འདི་དང་བདག་གིས་བསྒྲུབས་པས་ན། །དེའི་ཕྱིར་བཟོད་པའི་འབྲས་བུ་ནི། །འདི་ལ་ཐོག་མར་བདེར་འོས་ཏེ། །འདི་ལྟར་དེ་ནི་བཟོད་པའི་རྒྱུ། །ཞེས་པ་དང༌། གཉིས་

Page: 468 པ་ཕ་རོལ་གྱི་སྡང་སེམས་མེད་ན་བཟོད་པ་མི་འབྱུང་བར་བསྟན་པ་ནི། གལ་ཏེ་བཟོད་སྒྲུབ་བསམ་མེད་པས། །དགྲ་འདི་མཆོད་བྱ་མིན་ཞེ་ན། །གྲུབ་པ་ཡི་ནི་རྒྱུར་རུང་བ། །དམ་པའི་ཆོས་ཀྱང་ཅིས་ཏེ་མཆོད། །གལ་ཏེ་དགྲ་འདི་གནོད་བྱ་ཡི། །བསམ་ཡོད་མཆོད་བྱ་མིན་ཞེ་ན། །སྨན་པ་བཞིན་དུ་ཕན་བརྩོན་ ན། །བདག་གི་བཟོད་པ་ཇི་ལྟར་འགྲུབ། །དེ་བས་རབ་ཏུ་སྡང་སེམས་ལ། བརྟེན་ནས་བཟོད་པ་སྐྱེ་བས་ན། །དེ་ཉིད་བཟོད་པའི་རྒྱུ་ཡིན་པས། །དམ་པའི་ཆོས་བཞིན་མཆོད་པར་འོས། །ཞེས་པས་བསྟན་ཏེ། དེ་ཡང་འཇིག་རྟེན་གྱི་ཁམས་དག་པ་ རྣམས་ན་སེམས་ཅན་དབུལ་པོ་དང་མི་དགེ་བ་སྤྱོད་པ་དང་གནོད་པ་བྱེད་པ་སོགས་མེད་པས་སྦྱིན་པ་དང་། ཚུལ་ཁྲིམས་དང་། བཟོད་པ་ཡང་ཡུལ་མེད་པའི་ཕྱིར། གསལ་བར་མི་འབྱུང་ལ། མི་མཇེད་ཀྱི་ཁམས་འདི་ནི་རྣམ་པ་མ་དག་པ་ལྟར་སྣང་ཡང་དེ་རྣམས་ཡོད་པས་སྦྱིན་ ཚུལ་བཟོད་གསུམ་བྱར་ཡོད་ཅིང་། དེའི་ཕྱིར་འཇིག་རྟེན་གྱི་ཁམས་གཞན་དུ་བསྐལ་པར་བྱང་ཆུབ་སེམས་དཔའི་སྤྱོད་པ་སྤྱད་པ་ལས་འདིར་སྔ་དྲོ་གཅིག་བྱམས་པ་ལ་གནས་པ་ཙམ་ཡང་ཆེས་ཕན་ཆེ་བར་གསུངས་པ་ཡིན་ལ། ཕར་ཕྱིན་གྱི་ཡུལ་དེ་དག་ གི་ནང་ནས་ཀྱང་སྦྱིན་པའི་ཡུལ་སློང་མོ་བ་ནི་ཤིན་ཏུ་མོད་དེ་རྒྱུ་དེས་སྦྱིན་པ་ནི་ཆེས་འབྱུང་བར་སླའོ། །དེའི་ཤུགས་ཀྱིས་བསྟན་པ་ཚུལ་ཁྲིམས་ཀྱི་རྐྱེན་མི་དགེ་བའི་ཡུལ་ཡང་ཤིན་ཏུ་མང་ལ་སློང་མོ་པ་ལས་ཀྱང་འབྱུང་ཉེ་བའི་ཕྱིར། དེ་སྤོང་བའི་ཚུལ་ཁྲིམས་ཀྱང་ འབྱུང་བར་སླ་ལ། དེ་དག་ལ་བལྟོས་ཏེ་བཟོད་པའི་ཡུལ་བདག་ལ་གནོད་པ་བྱེད་པ་ནི་ཤིན་ཏུ་དཀོན་ཏེ། འདི་ལྟར་སེམས་ཅན་དུད་འགྲོའི་སྐྱེ་གནས་ཅན་སྟག་དང་། སེང་གེ་དང་། དོམ་དང༌། དྲེད་ལ་སོགས་པ་ཡང་མིས་ཕར་གནོད་པ་མ་བྱས་ཀྱི་བར་དུ་མི་ལ་བྱོལ་ཞིང་ འབྲོས་པར་ཟད་ཀྱི་ཚུར་གནོད་པ་མི་བྱེད་དོ། །གལ་ཏེ་ཕར་གནོད་པ་བྱས་ཏེ་མཚོན་ལ་སོགས་ཀྱིས་ཟུག་པའམ་འཛིན་པའི་ཐབས་ས་མདའ་ལ་སོགས་པ་བྱས་པར་ཤེས་ན་ནི་སླར་རྒོལ་བར་བྱེད་ལ། ལམ་དོག་པོར་མི་དང་གདོང་ཐུག་ཏུ་ཕྲད་དེ་འབྲོས་སུ་མ་རྙེད་

Page: 469 ༄༅། །ན་རང་འཇིགས་ཤིང་སྐྲག་པས་མ་བཟོད་སྟེ་གྱ་ཚོམས་སུ་རྒོལ་བར་ཟད་དོ། །དུད་འགྲོའི་ཆོས་ཉིད་ཀྱང་དེ་ལྟ་བུ་ཡིན་ན་བསམ་ཤེས་སུ་འདོད་པའི་མི་ལྟ་ག་ལ་སྨོས་ཏེ་སྐྱེ་བོ་ཐ་ཆད་རེ་ཙམ་མ་གཏོགས་པ་ནི་ཕར་གནོད་པ་མ་བྱས་ན་ ཚུར་འགའ་ཡང་གནོད་པ་མི་བྱེད་དོ། །དེ་བས་ན་གནོད་པ་བྱེད་པ་ནི་ཆེས་དཀོན་ན་བདག་ཉིད་ཀྱིས་ཉེས་སམ་མ་ཉེས་ཀྱང་རུང་སྟེ་ངལ་བས་སྒྲུབ་པའི་དཀའ་བ་མེད་པར་ཁྱིམ་ནང་དུ་རིན་པོ་ཆེའི་གཏེར་བྱུང་བ་ལྟར་བྱང་ཆུབ་ཀྱི་སྤྱོད་པ་མཆོག་བཟོད་པའི་གྲོགས་ གནོད་བྱེད་བྱུང་བ་འདི་ནི་ཆེས་དགའ་བར་རིགས་ཏེ། ཁྱིམ་ནང་དུ་གསེར་ཐོན་ཀྱང་ཤི་ཕན་ཆད་རྗེས་སུ་མི་འབྲང་ལ། འདི་ལ་བདག་གིས་བཟོད་པར་བྱས་པ་དེ་ནི་ཚེ་རབས་ཐམས་ཅད་དུ་སུས་ཀྱང་དབྲོག་ཏུ་མེད་ཅིང་འདི་ལས་དེ་བཞིན་གཤེགས་པའི་སྐུ་ཛམྦུའི་ གསེར་གྱི་མདོག་ཅན་ཉི་མ་བྱེ་བའི་འོད་འབར་བ་ལྷམ་མེ། ལྷན་ནེ། ལྷང་ངེར་འདུག་པ་ལྟ་བས་ཆོག་མི་ཤེས་པ་དེ་འཐོབ་པའི་ཕྱིར་རོ། །བོད་འགྲེལ་ཁ་ཅིག་ན་བྱང་ཆུབ་སེམས་དཔའ་རྣམས་ནི་ཕར་གནོད་པ་མ་བྱས་ན་ཚུར་གནོད་པ་མི་བྱེད་བས་ཞེས་བྲིས་སྣང་ བ་ནི་སྙིང་པོས་དབེན་ཏེ་འཇིག་རྟེན་ན་ནི་ཞེས་པའི་ཤུགས་ཀྱིས་འཇིག་རྟེན་ན་ནི་ཕར་གནོད་པ་མ་བྱས་པར་ཚུར་གནོད་པ་བྱེད་པ་དཀོན་ན་ཞེས་རྣམ་གྲངས་སྤྱིར་བསྟན་པ་ཡིན་གྱི་བྱང་ཆུབ་སེམས་དཔའ་ལ་སྦྱར་བྱ་ག་ལ་ཡིན། བྱང་ཆུབ་སེམས་ དཔའ་ནི་གཤེ་ཡང་སླར་མི་གཤེ་བ་སོགས་དང་ལྡན་དགོས་ཏེ་ཉན་ཐོས་ཀྱི་དགེ་སྦྱོང་གི་ཆོས་ཀྱང་དེ་ཡིན་ན་རྒྱལ་བའི་སྲས་ལྟ་ཅི་སྨོས། །དེས་ན་གནོད་བྱེད་འདིས་བཟོད་པའི་ཡུལ་བྱས་ལ་བདག་གིས་སྒོམ་པ་པོ་བྱས་ཏེ་གཉི་ག་ཚོགས་པས་བཟོད་པ་ གྲུབ་པའི་ཕྱིར་བཟོད་པ་འདི་ནི་གནོད་བྱེད་འདི་དང་བདག་གིས་བསྒྲུབས་པས་ན་དེའི་ཕྱིར་བཟོད་པའི་འབྲས་བུ་ནི་གནོད་བྱེད་འདི་ལ་ཐོག་མར་བདར་ཞིང་སྟབ་པར་འོས་ཏེ་འདི་ལྟར་དེ་ནི་བཟོད་པའི་རྒྱུ་གྲུང་པོ་ཡིན་པའི་ཕྱིར་རོ། །འོ་ན་བཟོད་པའི་འབྲས་བུ་

Page: 470 ཐོག་མར་གནོད་བྱེད་ཀྱིས་འཐོབ་བམ་ཞེ་ན། ལས་ནི་བྱེད་པ་པོ་ཉིད་ཀྱིས་ཟིན་པའི་ཕུང་ཁམས་ལ་རྣམ་པར་སྨིན་པའི་ཕྱིར། ཐོག་མར་བཟོད་པ་སྒོམ་པ་པོ་འཚང་རྒྱ་ཞིང་དེའི་འོག་ཏུ་བཟོད་ཡུལ་གྱིས་ཕན་བདེ་གྲུབ་པ་ནི་མི་འགལ་ཏེ། རྒྱལ་པོ་བྱམས་པའི་ སྟོབས་ཉིད་སངས་རྒྱས་ནས་འཁོར་གྱི་ཐོག་མར་གནོད་བྱེད་ཀྱི་གནོད་སྦྱིན་ལྔ་པོ་ལྔ་སྡེར་གྱུར་པ་ལ་དམ་བཅའ་དང་སྨོན་ལམ་གྱི་དབང་གིས་བདུད་རྩི་ཐོག་མར་བསྩལ་བ་བཞིན་ནོ། །གལ་ཏེ་དགྲ་འདི་ནི་ཁྲོ་བས་གནོད་པ་བྱེད་པར་ཟད་ཀྱི་འདི་ལ་བཟོད་པ་སྒྲུབ་ པའི་གྲོགས་བྱའོ་བསམ་པ་མེད་པས་ན་འདི་ལ་བདག་གིས་མཆོད་པ་དང་དགའ་བར་མི་རིགས་སོ་ཞེ་ན། འོ་ན་བྱང་ཆུབ་འགྲུབ་པའི་རྒྱུར་གྱུར་པའི་དམ་ཆོས་ཀྱང་མཆོད་བྱ་མིན་པར་འགྱུར་ཏེ། འདི་ལ་ཕན་གདགས་པར་བྱའོ་བསམ་པའི་བསམ་པ་མེད་པའི་ ཕྱིར། དེ་བཞིན་དུ་སངས་རྒྱས་ལའང་མཚུངས་ཏེ་འདུ་ཤེས་ཀྱི་རྒྱུ་བ་མི་མངའ་བའི་ཕྱིར། དེ་བཞིན་དུ་མཆོད་རྟེན་དང་སྐུ་གཟུགས་སོགས་ལའང་རིགས་པ་མཚུངས་པར་འཐོབ་བོ། །གལ་ཏེ་དགྲ་འདི་ནི་བདག་ལ་གནོད་པར་བྱ་བའི་བསམ་པ་ཡོད་ པས་མཆོད་པ་བྱ་བ་མིན་ནོ་ཞེ་ན། དེའི་ཕྱིར་བདག་གི་བཟོད་པའི་གྲོགས་ཡིན་གྱི་ནད་གསོ་བའི་སྨན་པ་དང་མཛའ་བོ་འམ་ཕ་མ་ལྟར་བྱམས་ཤིང་ཕན་པ་འབའ་ཞིག་བྱེད་ན་དེ་ལ་བཟོད་པ་སྒོམ་མི་དགོས་པའི་ཕྱིར། དེ་ལས་བདག་གི་བཟོད་པ་ཅིའི་ཕྱིར་འགྲུབ། དེས་ན་ཕ་རོལ་གྱི་རབ་ཏུ་ཞེ་སྡང་བའི་སེམས་ལ་བརྟེན་ནས་སེམས་ཅན་མ་སྦྱངས་པ་དག་བདག་རྒྱུད་ལ་ཁྲོ་བ་སྐྱེ་ལ། དེའི་ཚེ་བྱང་ཆུབ་སེམས་དཔས་བདག་རྒྱུད་ཀྱི་ཁྲོ་བ་དང་དུ་མི་བླང་བར་གཉེན་པོས་བཅོམ་སྟེ། ཕ་རོལ་གྱིས་ཇི་ལྟར་བྱས་ཀྱང་གླང་པོ་ཆེ་ལ་ཚེར་མ་ ཟུག་པའམ། རི་རབ་རླུང་གིས་མི་བསྒུལ་བ་ལྟར་སེམས་གཡོ་བ་མེད་པར་སྲན་ཚུགས་པས་ཇི་ལྟར་བྱས་ཀྱང་ཇི་མི་སྙམ་པར་བཟོད་པ་ནི་བཟོད་པ་སྟེ། དེས་ན་ཕ་རོལ་གྱི་སྡང་སེམས་དེ་ཁོ་ན་བདག་གི་བཟོད་པའི་རྒྱུ་ཡིན་པས་ན་གནོད་བྱེད་དེ་ནི་དམ་པའི་ཆོས་དང་

Page: 471 ༄༅། །དཀོན་མཆོག་གཞན་ལྟར་བདག་ལ་དྲིན་ཆེ་ཞིང་མཆོད་པར་བྱ་བ་ཁོ་ན་ཡིན་ནོ། །གསུམ་པ་སྟོན་པ་དང་འདྲ་བ་དེ་བསྟན་པ་ནི། དེ་ནི་སེམས་ཅན་ཞིང་དང་ནི། །རྒྱལ་བའི་ཞིང་ཞེས་ཐུབ་པས་གསུངས། འདི་དག་མགུ་བྱས་མང་པོ་ཞིག ། འདི་ལྟར་ཕུན་སུམ་ཕ་རོལ་ཕྱིན། །སེམས་ཅན་རྣམས་དང་རྒྱལ་བ་ལས། །སངས་རྒྱས་ཆོས་འགྲུབ་འདྲ་བ་ལས། རྒྱལ་ལ་གུས་བྱེད་དེ་བཞིན་དུ། །སེམས་ཅན་ལ་མིན་ཅི་ཡི་ཚུལ། །བསམ་པའི་ཡོན་ཏན་རང་གིས་མིན། །འབྲས་བུ་ ལས་ཡིན་དེ་མཚུངས་པར། །སེམས་ཅན་རྣམས་ལའང་ཡོན་ཏན་ཡོད། དེ་ཕྱིར་དེ་དག་མཉམ་པ་ཡིན། །བྱམས་སེམས་ལྡན་ལ་མཆོད་པ་གང་། །དེ་ནི་སེམས་ཅན་ཆེ་བ་ཉིད། །སངས་རྒྱས་དད་པའི་བསོད་ནམས་གང་། །དེ་ཡང་སངས་རྒྱས་ ཆེ་བ་ཉིད། །སངས་རྒྱས་ཆོས་འགྲུབ་ཆ་ཡོད་པ། །དེས་ན་དེ་དག་མཉམ་པར་འདོད། །ཡོན་ཏན་རྒྱ་མཚོ་མཐའ་ཡས་པའིསངས་རྒྱས་རྣམས་དང་འགའ་མི་མཉམ། །ཡོན་ཏན་མཆོག་ཚོགས་གཅིག་པུ་ཡི། །ཡོན་ཏན་ཤས་ཙམ་འགའ་ཞིག་ ལ། །སྣང་ནའང་དེ་ལ་མཆོད་དོན་དུ། །ཁམས་གསུམ་ཕུལ་ཡང་ཆུང་བར་འགྱུར། །སངས་རྒྱས་ཆོས་མཆོག་སྐྱེ་བའི་ཤས། །སེམས་ཅན་རྣམས་ལའང་ཡོད་པས་ན། །འདི་ཙམ་དག་གི་ཆ་བསྟུན་ནས། །སེམས་ཅན་མཆོད་པར་རིགས་པར་འགྱུར། ། ཞེས་གསུངས་ཏེ། དེ་ཡང་ཞིང་ས་གཤིན་པོ་ལ་བརྟེན་ནས་ལོ་ཏོག་སྐྱེ་བ་ལྟར་བྱང་ཆུབ་སེམས་དཔའ་རྣམས་ཀྱི་དགེ་བའི་ལོ་ཏོག་སྤེལ་བའི་ཞིང་ཡང་གཉིས་སུ་ངེས་ཏེ། སེམས་ཅན་གྱི་ཞིང་ལས་སྦྱིན་པ་དང་ཚུལ་ཁྲིམས་དང་བཟོད་པ་དང་བྱམས་སོགས་ཀྱི་ ལོ་ཏོག་སྤེལ་བ་དང་། སངས་རྒྱས་ཀྱི་ཞིང་ལས་དད་པ་དང་ལྷག་པའི་བསམ་པ་དང་སྟོབས་སོགས་ཀྱི་ལོ་ཏོག་བསྐྲུན་ཞིང་། མདོར་ན་གཉིས་ཀ་ལས་བྱང་ཆུབ་ཀྱི་སེམས་ཀྱི་ལོ་ཏོག་འབྲས་བུ་ཡོངས་སུ་འབྱོར་བ་སེམས་ཅན་ཐམས་ཅད་ཀྱི་གསོས་གཅིག་པུར་

Page: 472 གྱུར་པ་འདི་སྤེལ་བར་བྱེད་དོ། །དེས་ན་ཞིང་རྣམ་པ་གཉིས་ཡིན་ཏེ། སྨོན་ལམ་དག་པའི་མདོ་ལས། ངས་སྔོན་སེམས་ཅན་ཞིང་རྣམས་དང་། །ཐུབ་པའི་ཞིང་ལ་བརྟེན་ནས་ནི། །སངས་རྒྱས་ཆོས་རྣམས་མཐའ་ཡས་པའི། །ལོ་ཏོག་ཕུན་སུམ་ ཚོགས་པ་ཐོབ། ཅེས་གསུངས་ཤིང་། ཆོས་ཡང་དག་པར་སྡུད་པའི་མདོ་ལས་ཀྱང་གསུངས་པའི་ཕྱིར་རོ། །འདིར་དགེ་བའི་ལྷས་ན་ཡམས་གཉིས་བཤད་པའི་བཤད་པ་སྔ་མ་ཤོས་ལས། སེམས་ཅན་ནི་རྒྱལ་བའི་ཞིང་སྟེ་སྐྱེ་བའི་གནས་ཡིན་ནོ། །སེམས་ ཅན་ཞིང་ནི་དེ་སྔོན་དུ་སོང་བ་ཅན་གྱི་རྒྱལ་བ་རྣམས་ཏེ་སེམས་ཅན་རྣམས་ཀྱི་འབྲས་བུའི་ས་གཞིར་ཐུབ་པས་གསུངས་སོ། །ཞེས་བཤད་པ་ལ་ནི་གཉི་ག་རྒྱལ་བའི་ཞིང་གཅིག་ཁོ་ནར་ཐལ་བའི་སྐྱོན་སྣང་ངོ༌། །ཞེས་པ་ཞར་བྱུང་ངོ་། །རིགས་པས་ཀྱང་གྲུབ་སྟེ། སེམས་ ཅན་འདི་དག་གནས་སྐབས་དང་། མཐར་ཐུག་གི་མགུ་བར་བྱས་པ་ལས་སྔོན་ཡང་མང་པོ་ཞིག་འདི་ལྟར་ཕ་རོལ་ཏུ་ཕྱིན་པ་ཕུན་སུམ་ཚོགས་པ་ཐམས་ཅད་དང་ལྡན་པའི་བྱང་ཆུབ་ཐོབ་པའི་ཕྱིར་ཏེ། བྱིས་པས་རང་དོན་བྱས་པ་དང་། །ཐུབ་པས་གཞན་གྱི་དོན་མཛད་ པ། །འདི་གཉིས་ཀྱི་ནི་ཁྱད་པར་ལྟོས། །ཞེས་བྱ་བས་འདིར་ཡང་འཆད་དོ། །དེས་ན་སེམས་ཅན་རྣམས་མགུ་བར་བྱས་པ་དང་སངས་རྒྱས་མཉེས་པར་བྱས་པ་གཉིས་བདག་ཉིད་སངས་རྒྱས་ཀྱི་ཆོས་མི་སློབ་པའི་གོ་འཕང་འགྲུབ་པའི་རྒྱུར་མཚུངས་པ་ལས་ སངས་རྒྱས་ལ་གུས་པར་བྱེད་ལ། སེམས་ཅན་ལ་དེ་ལྟར་མི་བྱེད་པ་ཅིའི་ཐ་ཚིག་ཅེས་རང་ཉིད་ལ་དྲི་བའི་སྒོ་ནས་མི་བཟོད་པའི་བློ་ཚར་གཅོད་པའོ། །འོ་ན་སེམས་ཅན་དང་སངས་རྒྱས་ཡོན་ཏན་མཚུངས་པར་ཐལ་ལོ་ཞེ་ན། དེ་གཉིས་བསམ་པའི་ཡོན་ ཏན་རང་གི་སྒོ་ནས་མཉམ་པར་བཞག་པ་མིན་ཏེ། སངས་རྒྱས་ལ་སྟོབས་སོགས་ཀྱི་ཡོན་ཏན་མངོན་དུ་གྱུར་ཅིང་སེམས་ཅན་ལ་དེ་ས་བོན་གྱི་ཚུལ་དུ་གནས་ཀྱི་མངོན་དུ་མ་གྱུར་པའི་ཕྱིར། དེས་ན་བྱང་ཆུབ་ཀྱི་སེམས་ཀྱིས་ཟིན་པས་སེམས་ཅན་ལ་སྦྱིན་སོགས་

Page: 473 ༄༅། །དང་སངས་རྒྱས་ལ་མཆོད་པ་གཉིས་འབྲས་བུ་སངས་རྒྱས་འཐོབ་པར་མཉམ་པའི་ཕྱིར། རེ་ཞིག་ཞིང་དེ་གཉིས་མཚུངས་པར་བསྟན་པ་ཡིན་ནོ། །དེས་ན་སེམས་ཅན་རྣམས་ལའང་ཡོན་ཏན་ཡོད་དེ་ཁམས་རང་བཞིན་གྱིས་རྣམ་པར་ དག་ལ་སྟོབས་སོགས་འཐོབ་རུང་དུ་ཡོད་ཅིང་བྱང་ཆུབ་སེམས་དཔའ་རྣམས་ལ་མཆོད་པ་བྱས་ན་ཕན་ཡོན་གཞལ་དུ་མེད་པ་འཐོབ་པ་དང་། དེ་ལྟ་མིན་ཡང་ཕ་མ་དང་། ཆོས་སྨྲ་བ་དང་། མཁན་སློབ་སོགས་བདག་ལ་བྱམས་པའི་སེམས་དང་ལྡན་པ་ལ་མཆོད་པས་ ཕན་ཡོན་ཆེས་ཆེ་བ་དང་། ཐ་ན་དུད་འགྲོར་གྱུར་པ་ལ་སྦྱིན་པ་ཁམ་གཅིག་ཙམ་བསྩལ་བའི་དགེ་བའང་རྒྱ་ཆེར་བསྟན་པས་ན་སེམསེམས་ཅན་རྣམས་ཀྱང་ཆེ་བའི་བདག་ཉིད་དང་ལྡན་པར་གྲུབ་པའི་ཕྱིར། ཇི་ལྟར་ན་སངས་རྒྱས་ལ་སྐད་ཅིག་ཙམ་དད་པ་དང་ཐ་ན་ བྱེ་མ་སྙིམ་པ་གང་གིས་མཆོད་པས་ཀྱང་ཛམ་གླིང་གི་རྒྱལ་པོ་མྱ་ངན་མེད་ཀྱི་དཔལ་ཐོབ་པ་དང་། སྲན་མ་འབྲུ་བཞི་ལྷུང་བཟེད་དུ་ལྷུང་ཞིང་གཅིག་ཕྱིར་ཡར་བ་ལས་གླིང་བཞི་བརྒྱ་བྱིན་གྱི་སྟན་ཕྱེད་དང་བཅས་པ་དབང་བ་ང་ལས་ནུའི་གོ་འཕང་ཐོབ་ པ་དེ་ཡང་སངས་རྒྱས་ཀྱི་ཆེ་བ་ཡིན་པ་བཞིན་ནོ། །དེས་ན་སེམས་ཅན་ནི་གང་གི་ཆེད་དུ་བྱ་བའི་ཡུལ་ཡིན་ལ། སངས་རྒྱས་ནི་གང་འཐོབ་པར་བྱ་བའི་འབྲས་བུ་ཡིན་ཞིང་དེ་གཉིས་ཚོགས་པའི་བྱང་ཆུབ་ཀྱི་སེམས་ནི་སངས་རྒྱས་ཀྱི་ཐབས་སམ་རྒྱུ་ དངོས་ཡིན་ལ། སེམས་ཅན་ལ་བརྟེན་ནས་ཕར་ཕྱིན་དྲུག་རྫོགས་དགོས་པའི་ཕྱིར། གཉིས་ཀ་ལས་སངས་རྒྱས་ཀྱི་ཆོས་འགྲུབ་པའི་ཆ་ཤས་ཡོད་པ་དེས་ན་ཞིང་དེ་དག་མཉམ་པར་བརྗོད་པ་ཡིན་ནོ། །འོ་ན་ཞིང་དེ་གཉིས་ཁྱད་པར་གཏན་མེད་དམ་ཞེ་ ན། རང་གི་བློ་སྦྱོང་བའི་ཆ་ནས་དེ་ལྟར་ཡིན་མོད། ཡོན་ཏན་གི་ཆ་ནས་ཁྱད་པར་མཐའ་ཡས་ཏེ། དེ་ལྟ་མོད་ཀྱི་ས་རྡུལ་དང་། །རྒྱ་མཚོ་བ་ལང་རྨིག་རྗེས་ཀྱི། །ཁྱད་པར་གང་ཡིན་སངས་རྒྱས་དང་། །བྱང་ཆུབ་སེམས་དཔའི་ཁྱད་དེ་ཉིད། །ཅེས་སངས་རྒྱས་དང་ས་

Page: 474 བཅུ་རྒྱུན་མཐའི་བྱང་སེམས་ཀྱི་ཁྱད་པར་ཡང་ས་ཆེན་པོ་དང་རྡུལ་ཕྲ་རབ། རྒྱ་མཚོ་དང་རྨིག་རྗེས་ཆུས་གང་བ། ཉི་མ་དང་མེ་ཁྱེར་གྱི་ཁྱད་པར་ཙམ་ཡོད་པར་གསུངས་ན་བྱིས་པ་རྣམས་དང་ལྟ་ཅི་སྨོས་ཏེ། དེས་ན། ཡོན་ཏན་རྒྱ་མཚོ་མཐའ་ཡས་པའི། སངས་རྒྱས་རྣམས་དང་འགའ་མི་མཉམ། །ཞེས་བྱའོ། །གལ་ཏེ་སྐྱེ་བོ་འགའ་ཞིག་ལ་ཡང་རུང་སྟེ་སངས་རྒྱས་ཀྱི་ཡོན་ཏན་ལས་གངྒ་ཀླུང་གི་བྱེ་མ་སྙེད་ཀྱི་བྱེ་མའི་འབྲུ་གཅིག་གི་བྱེ་བའི་ཆ་ཙམ་ཞིག་ཡོད་པར་མཐོང་ན་ཡང་དེ་ལ་ཁམས་གསུམ་པོ་ ཕུལ་ཡང་དེ་ཙམ་གྱིས་མཆོད་པ་བྱས་པར་མི་འགྱུར་ཏེ། ཡོན་ཆུང་བར་ཟད་དོ། །དེ་ལྟར་ཡོན་ཏན་གྱི་ཆ་ནས་ནམ་མཁའ་དང་རྩྭ་མཆོག་གི་བུ་གའི་ཁྱད་པར་ཙམ་ཡིན་དུ་ཟིན་ཡང་སངས་རྒྱས་སྒྲུབ་པའི་ཚེ་ནི། ལམ་གྱི་ཕྱེད་སེམས་ཅན་ཁོ་ན་ལ་རག་ལས་ པས་ན་སངས་རྒྱས་ཀྱི་ཆོས་ཀྱི་མཆོག་སྐྱེ་བའི་ཆ་ཤས་སེམས་ཅན་རྣམས་ལའང་ཡོད་པས་འདི་ཙམ་གྱི་ཆ་དང་བསྟུན་པ་རྒྱུ་མཚན་དུ་བྱས་ནས་སེམས་ཅན་རྣམས་ཀྱང་མཆོད་པར་རིགས་པར་འགྱུར་བ་ཡིན་ནོ། །གཉིས་པ་སྟོན་པའི་ཐུགས་དགོངས་རྫོགས་པའི་ཕྱིར་གུས་པར་བྱ་བ་ནི། གཞན་ཡང་གཡོ་མེད་གཉེན་ གྱུར་ཅིང་། ཕན་པ་དཔག་མེད་མཛད་རྣམས་ལ། །སེམས་ཅན་མགུ་བྱ་མ་གཏོགས་པར། །གཞན་གང་ཞིག་གིས་ལན་ལོན་འགྱུར། །གང་ཕྱིར་སྐུ་གཏོང་མནར་མེད་འཇུག་པ་ལ། །དེ་ལ་ཕན་བཏགས་ལན་ལོན་འགྱུར་བས་ན། །དེ་བས་ འདི་དག་གནོད་ཆེན་བྱེད་ན་ཡང་། །ཐམས་ཅད་བཟང་གུ་ཞིག་ཏུ་སྤྱད་པར་བྱ། །རེ་ཞིག་བདག་གི་རྗེར་གྱུར་ཉིད་ཀྱང་ནི། །གང་ཕྱིར་རང་གི་སྐུ་ལའང་མི་གཟིགས་པ། །དེ་ལ་རྨོངས་པ་བདག་གིས་ཇི་ལྟར་ན། །ང་རྒྱལ་བྱ་ཞིང་བྲན་གྱི་དངོས་ མི་བྱ། །གང་དག་བདེ་བས་ཐུབ་རྣམས་མཉེས་འགྱུར་ཞིང་། །གང་ལ་གནོད་ན་མི་དགྱེས་འབྱུང་འགྱུར་ལ། །དེ་དག་བདེ་བྱས་ཐུབ་དབང་ཀུན་མཆོད་ཅིང་། །དེ་ལ་གནོད་བྱས་ཐུབ་ལ་གནོད་པ་བྱས། །ཇི་ལྟར་ལུས་ལ་ཀུན་ནས་མེ་འབར་ན། །

Page: 475 ༄༅། །འདོད་པ་ཀུན་གྱིས་ཡིད་བདེར་མི་འགྱུར་བ། །དེ་བཞིན་སེམས་ཅན་གནོད་པ་བྱས་ན་ཡང་། །ཐུགས་རྗེ་ཆེ་རྣམས་དགྱེས་པའི་ཐབས་མེད་དོ། །དེ་བས་བདག་གིས་འགྲོ་ལ་གནོད་བྱས་པས། །ཐུགས་རྗེ་ཆེ་ཀུན་མི་དགྱེས་ གྱུར་པ་གང་། །སྡིག་དེ་དེ་རིང་སོ་སོར་བཤགས་བགྱི་ཡིས། །མི་དགྱེས་གང་ལགས་དེ་ཀུན་བཟོད་པར་གསོལ། །དེ་བཞིན་གཤེགས་རྣམས་དགྱེས་པར་བགྱི་སླད་དུ། དེང་ནས་བཟུང་སྟེ་འཇིག་རྟེན་བྲན་དུ་མཆི། །འགྲོ་མང་རྡོག་པས་བདག་གི་སྤྱིར་ འཚོག་གམ། །འགུམས་ཀྱང་མི་ཁྲོ་འཇིག་རྟེན་མགོན་དགྱེས་མཛོད། །འགྲོ་བ་འདི་ཀུན་ཐུགས་རྗེའི་བདག་ཅན་དེས། །བདག་ཏུ་མཛད་པ་འདི་ལ་ཐེ་ཚོམ་མེད། །སེམས་ཅན་ངོ་བོར་མཐོང་བ་འདི་དག་ཉིད། །མགོན་ཏེ་བདག་ཉིད་ཅི་ཕྱིར་གུས་མི་བྱེད། ། ཅེས་གསུངས་ཏེ། དེ་ཡང་དང་པོ་གཉིས་ཀྱིས་སེམས་ཅན་མགུ་བས་སྟོན་པའི་དྲིན་ལན་ལོན་པར་བསྟན། གཅིག་གིས་སྟོན་པའི་རྗེས་སུ་འཇུག་ན་དེ་ལྟར་བྱ་དགོས་པར་བསྟན། དེ་ནས་གཉིས་ཀྱིས་སེམས་ཅན་ལ་གནོད་པ་བྱས་ན་སངས་རྒྱས་བྱང་ ཆུབ་སེམས་རྣམས་མི་དགྱེས་པར་བསྟན། དེ་ནས་གཅིག་གིས་དེའི་ཉེས་པ་རྣམས་བཤགས་ཤིང༌། གཅིག་གིས་ཕྱིན་ཆད་སྡོམ་པའི་དམ་བཅའ་བར་བསྟན། ཐ་མས་སེམས་ཅན་འདི་དག་ཀྱང་ངོ་བོ་ཉིད་ཀྱིས་སངས་རྒྱས་སུ་བསྟན་པ་ཡིན་ནོ། །དེ་ལ་ གཞན་ཡང་ཞེས་བྱ་བ་ནི་སྔར་བསྟན་པ་དེ་དག་ཏུ་མ་ཟད་སེམས་ཅན་མགུ་བར་བྱ་དགོས་པའི་རྒྱུ་མཚན་གཞན་ཡང་ཡོད་དེ་ཞེས་བྱ་བའི་དོན་ཏོ། །དེ་གང་ཞེ་ན། ནམ་དུ་ཡང་གཡོ་དང་སྒྱུ་མེད་པར་སེམས་ཅན་ཐམས་ཅད་ལ་མ་འདྲིས་པའི་གཉེན་དུ་གྱུར་ པ་ཕན་པ་དང་བདེ་བ་དཔག་ཏུ་མེད་པ་མཛད་པ་པོ་རྫོགས་པའི་སངས་རྒྱས་དང་བྱང་ཆུབ་སེམས་དཔའ་རྣམས་ལ་ནི་སེམས་ཅན་མགུ་བྱ་མ་གཏོགས་པ་གཞན་གང་ཞིག་གིས་ལན་ལོན་པར་འགྱུར་ཏེ། འཕགས་པ་ཤཱ་རིའི་བུ་དང་འཆར་ཁ་ལ་སོགས་པ་

Page: 476 ཉན་ཐོས་ཆེན་པོ་དག་ཀྱང་དགྲ་བཅོམ་ཐོབ་པ་ན་བཅོམ་ལྡན་འདས་ཀྱིས་བདག་ལ་བཀའ་དྲིན་ཆེར་མཛད་ན། བདག་གིས་དྲིན་ལན་ཅི་ལྟ་བུ་ཞིག་གིས་སླན་པར་བྱ་སྙམ་པ་ན་བཅོམ་ལྡན་འདས་ནི་སེམས་ཅན་གདུལ་བ་ཁོ་ནར་ཟད་དེ། སེམས་ཅན་ལ་ཕན་པ་ མ་གཏོགས་སྟོན་པ་ལ་གཞན་གྱིས་དྲིན་ལན་སླན་པར་མི་ནུས་ཀྱི་བདག་གིས་ཀྱང་སྟོན་པའི་དགོངས་པ་རྫོགས་པར་བྱའོ། །ཞེས་བསམས་ཏེ་རྣག་གི་ལུས་ཀྱིས་མི་སྐྱོ་བར་གཞན་དོན་སྤྱོད་པར་བཤད་ན་ཐེག་པ་ཆེན་པོར་ལྟ་ཅི་སྨོས་པའི་ཕྱིར་རོ། །དེས་ན་བདག་ ཅག་གི་སྟོན་པ་ཤཱཀྱའི་དབང་པོ་དེ་ཉིད་ཀྱང་སྔོན་སློབ་པའི་ལམ་སྤྱོད་པའི་ཚེ་སེམས་ཅན་གཅིག་གི་སྲོག་གི་ཆེད་དུ་ཡང་བདག་གི་སྐུ་ལུས་འཇིག་རྟེན་ན་གཅེས་ཤིང་འཕངས་པ་ལ་ཡང་རྡུལ་ཙམ་གྱི་བལྟོས་པ་མེད་པར་སྐུ་ལུས་གཏོང་ཞིང་། སེམས་ཅན་རེ་ རེའི་ཆེད་དུ་ཡང་མནར་མེད་པར་ཡང་འཇུག་པར་མཛད་དེ། སྟག་མོའི་ཆེད་དུ་ལུས་བཏང་བ་དང་། ཕུག་རོན་རང་གི་ཤས་བླུས་པ་དང་། དམྱལ་བར་ཡང་ལྕགས་ཀྱི་ཤིང་རྟ་འདྲེན་པའི་གྱད་དུ་གྱུར་པའི་ཚེ་ཟླ་བོ་སྟོབས་ཆུང་བའི་སྐལ་བ་ཡང་རང་གིས་བཞེས་ པའི་ཕྱིར་ཏེ། དེ་ལྟ་བུས་རང་གི་བདེ་བ་ཐམས་ཅད་ཁྱད་དུ་བསད་དེ། སེམས་ཅན་ཁོ་ནའི་ཕན་བདེ་སྒྲུབ་པར་མཛད་པས་ན་སེམས་ཅན་དེ་དག་ལ་ཕན་བཏགས་ན་བདག་གི་རྗེ་བོ་རྫོགས་པའི་སངས་རྒྱས་དེ་ལ་དྲིན་ལན་གླན་པ་དང་ལོན་པར་འགྱུར་ཞིང་། སངས་ རྒྱས་དེ་དག་མཉེས་པའི་ཐབས་ནི་སེམས་ཅན་ལ་ཕན་པ་ལས་གཞན་མེད་པའི་ཕྱིར། སེམས་ཅན་འདི་དག་བདག་ལ་གནོད་པ་ཆེར་བྱེད་དུ་ཟིན་ཀྱང་བདག་གིས་གནོད་ལན་བྱ་བ་ལྟ་ཅི་སྨོས་ཏེ། ཐ་ན་སྐད་ཅིག་ཙམ་གྱིས་གནོད་སེམས་དང་ཁྲོ་བ་ཡང་ མི་བྱ་བར་དེ་དག་གིས་ཅི་བྱས་པ་ཐམས་ཅད་ཀྱང་བཟང་གུ་སྟེ་ལེགས་པ་འབའ་ཞིག་ཏུ་བལྟ་བར་བྱའོ། མདོར་ན་བདག་གི་རྗེ་བོ་ནི་སངས་རྒྱས་ཡིན་ལ། དེས་ཀྱང་རྗེ་བོ་ལྟར་གཟིགས་པ་ནི་སེམས་ཅན་རྣམས་ཡིན་ཏེ། དགེ་བསྙེན་ཞི་བའི་གོ་ཆས།

Page: 477 ༄༅། །རི་བོ་པོ་ཊ་ལར་ཕྱིན་པའི་ཚེ་སྒྲོལ་མ་དང་ཁྲོ་གཉེར་ཅན་གྱིས་གདམས་པ་ན་ཁྱོད་ཀྱིས་སེམས་ཅན་སུ་ལའང་ངན་སེམས་མ་སྐྱེད་ཅིགདེ་ཅིའི་ཕྱིར་ཞེ་ན། ཇོ་བོའི་ཡང་ཇོ་བོ་ནི་སེམས་ཅན་རྣམས་ཁོ་ན་ཡིན་ནོ། །ཞེས་དང་། ཐུགས་རྗེ་ ཆེ་ཞེས་གང་གྲགས་པ། །སྙིང་རྗེ་ཆེན་པོ་དེ་ལ་བྱ། །ཞེས་བསྟན་པའི་ཕྱིར་རོ། །དེས་ན་བདག་གི་རྗེ་བོ་ཡང་གང་གི་ཆེད་དུ་རང་གི་སྐུ་ལའང་མི་གཟིགས་པར་ཕན་པ་མཛད་པའི་ཡུལ་དེ་ལ་བདག་གིས་ཇི་ལྟར་ང་རྒྱལ་གྱིས་གནས་པར་བྱ་སྟེ་བྲན་ དང་གོ་རེ་ལོང་མི་བྱེད་པ་འདི་ཅིའི་ཐ་ཚིག །དེས་ན་སེམས་ཅན་གང་དག་བདེ་བས་ཐུབ་རྣམས་མཉེས་པར་འགྱུར་ཞིང་གང་གིས་སེམས་ཅན་གང་དག་ལ་གནོད་པ་བྱས་ན་དེ་ལ་ཐུབ་རྣམས་མི་དགྱེས་པར་འགྱུར་ལ། དེའི་ཕྱིར་སེམས་ཅན་དེ་དག་ལ་ཕན་ བཏགས་ན་སངས་རྒྱས་ཐམས་ཅད་མཆོད་པར་འགྱུར་ལ། དེ་ལ་གནོད་པ་བྱས་ན་སངས་རྒྱས་ཐམས་ཅད་ལ་གནོད་པ་བྱས་པར་འགྱུར་རོ། །འདིར། དེ་དག་བདེ་བས་ཐུབ་དབང་ཀུན་དགྱེས་ཤིང་། །ཞེས་པ་ཁོ་ན་གཞུང་དག་ན་སྣང་ཞིང་། བོད་འགྲེལ་ དག་ན་ཡང་འབྲུ་དེ་ལྟར་གཉེར་ལ། རྒྱ་འགྲེལ་རྣམས་སུ་དོན་སྔ་ཕྱི་བསྡོམས་པའི་དོན་གྱི་འབྲུ་ཙམ་ལས་གསལ་བར་མི་སྣང་ཡང༌། གང་དག་བདེ་བས་ཐུབ་རྣམས་མཉེས་འགྱུར་ཞིང༌། །ཞེས་པ་དང་། དེ་དག་བདེ་བས་ཐུབ་དབང་ཀུན་དགྱེས་ཤིང་། ། ཞེས་པ་ཚིགས་བཅད་གཅིག་ཁོ་ནའི་ནང་དུ་ཚིག་དོན་གཉིས་ཀ་ཧ་ཅང་བཟློས་ཆེས་པར་འགྱུར་ལ། སྤྱིར་གཞུང་འདི་ཐུགས་སྙིང་རྗེ་ཆེན་པོ་ཁོ་ནས་དྲངས་པའི་མཐུས་རྩོམ་པའི་ངལ་བ་མེད་པར་དོ་ཧའི་ཚུལ་དུ་གསུངས་པས་འགལ་ཟློས་སོགས་ལ་མ་གཟིགས་ མོད་ཀྱང་འབད་རྩོལ་ལ་མི་ལྟོས་པ་ཉིད་ཀྱི་ཕྱིར་ཚིག་འབྲུ་བཟང་པོ་ཉམས་དང་རྒྱན་དུ་མའི་འགྱུར་བ་ཅན་རང་བཞིན་གྱི་འབྱུང་བ་ཆོས་ཉིད་ཡིན་པས་བསྟན་བཅོས་འདི་ལྟ་བུའི་ཚིག་དོན་གྱི་ཉམས་ནི་གང་དུ་ཡང་རྙེད་པར་དཀའ་བས་འདི་ཙམ་དུ་ཟློས་པ་

Page: 478 འབྱུང་མི་སྲིད་པས་འགྱུར་གྱི་སྐྱོན་ཞིག་ཏུ་ཟད་ལ། ཕྱི་མའི་ཚིག་གི་ནུས་པ་ལ་བརྟགས་ན་ཡང་། དེ་དག་བདེ་བྱས་ཐུབ་དབང་ཀུན་མཆོད་ཅིང༌། །དེ་ལ་གནོད་བྱས་ཐུབ་ལ་གནོད་པ་བྱས། །ཞེས་པ་འདིར་འཐོབ་པར་སྣང་ངོ་། །དེ་ལྟ་མོད་ ཀྱི་སངས་རྒྱས་ལ་མཉེས་མ་མཉེས་ཡོད་ན་དེ་ལ་ཆགས་སྡང་ཡང་ཡོད་པར་འགྱུར་རོ་ཞེ་ན། སངས་རྒྱས་རང་གི་ངོ་བོ་ཉིད་ཀྱིས་ཕུང་པོ་ལྔ་གནས་ཡོངས་སུ་གྱུར་པས་འདུ་ཤེས་དང་འདུ་བྱེད་དང་རྣམ་པར་ཤེས་པའི་རྒྱུ་བ་མི་མངའ་ཞིང་བདག་དང་གཞན་དུ་ གཟིགས་པ་མེད་པས་ནམ་མཁའ་ལྟར་ཀུན་ནས་དག་པའི་ཕྱིར། མཉེས་པ་དང་མ་མཉེས་པ་ག་ལ་ཡོད་ཀྱང་གཞན་ངོར་གདུལ་བྱའི་དབང་དུ་བྱས་ཏེ་གཟུགས་ཀྱི་སྐུ་ནི་བདག་ལ་བསྟོད་པ་སོགས་ལ་ཆགས་པ་དང་སྨད་པ་སོགས་ལ་སྡང་བ་ནི་མི་མངའ་སྟེ། བྲམ་ཟེ་བ་ར་དྷཱ་ཛས་མི་སྙན་པའི་ཚིག་ལྔ་བརྒྱས་སྤྱོས་ཀྱང་བ་སྤུ་ཙམ་ཡང་གཡོ་བ་མི་མངའ་བའི་ཕྱིར་དང་། སེར་སྐྱ་བཅོམ་པའི་ཚེ་ཕྲིན་ལས་མཐུན་པར་སྟོན་པས་དབུ་བསྙུན་པར་བསྟན་གྱི་ཐ་ན་ཟློག་པར་ཡང་མ་མཛད་ལ། མཽངྒལ་གྱི་བུས་ བདག་གིས་འཕགས་སྐྱེས་པོ་དང་མ་ལ་གནོད་འཇིག་རྟེན་གྱི་ཁམས་གཞན་དུ་བཞག་པར་བགྱིའོ། །ཞེས་དང་། གྲོང་ཁྱེར་སེར་སྐྱ་ལྕགས་ཀྱི་ར་བས་བསྐོར་བར་བགྱིའོ། །ཞེས་ཞུས་ཀྱང་འདི་ནི་ཤཱཀྱ་རྣམས་ཉིད་ཀྱིས་མྱོང་བར་ངེས་པའི་ལས་སོ། །ཞེས་གསུངས་ ནས་མ་གནང་བའི་ཕྱིར་རོ། །འོན་ཀྱང་སེམས་ཅན་དག་ཆོས་ཡང་དག་པ་ལ་ཞུགས་པ་ན་མཉེས་པ་དང་དེ་ལས་ལྡོག་པ་ན་མི་མཉེས་པར་སྟོན་པ་ནི་ཡོད་དེ། ཆོས་ཀྱི་རྣམ་གྲངས་ཁྱད་པར་ཅན་ཞུས་པ་དང་རྟོགས་པ་ཁྱད་པར་ཅན་སྐྱེས་པས་ཆེད་དུ་བརྗོད་ པ་སོགས་ལ་ལེགས་སོ་ལེགས་སོ་ཞེས་དགྱེས་པའི་ཚིག་སྩོལ་བ་དང༌། བསླབ་པ་དང་འགལ་བ་ལ་ངས་འདོད་པ་དག་ནི་རྣམ་པར་སྨད་ན་སྐྱེས་བུ་གཏི་མུག་ཅན་ཁྱོད་ཀྱིས་དེ་ལས་འགལ་བར་བྱས་སོ་ཞེས་ཚར་གཅོད་པ་དང་། མ་འོངས་པ་ལ་

Page: 479 ༄༅། །དགོངས་ཏེ་ཡང་གང་རྟག་པ་དང་ཆད་པར་སྨྲ་བ་ནི་ངའི་ཉན་ཐོས་མ་ཡིན་ལ་ང་ཡང་དེ་ཡི་སྟོན་པ་མ་ཡིན་ནོ། །ཞེས་གསུངས་པའི་ཕྱིར་རོ། །དེས་ན་སེམས་ཅན་ལ་གནོད་པ་བྱས་ན་མཆོག་གི་སྤྲུལ་པའི་སྐུར་བཞེངས་པའི་ སངས་རྒྱས་རྣམས་མི་དགྱེས་བར་འགྱུར་ལ། བྱང་ཆུབ་སེམས་དཔའ་ཆེན་པོ་རྣམས་ནི་ཤིན་ཏུ་མི་མཉེས་པས་མྱ་ངན་དུ་མཛད་དེ། བ་རི་ལོ་ཙཱ་བ་རྡོ་རྗེ་གདན་ན་བཞུགས་དུས་རྨི་ལམ་དུ་ཐུགས་རྗེ་ཆེན་པོ་སྤྱན་ཆབ་འབྱིན་པ་ལན་གཉིས་སུ་མཐོང་ནས་རྒྱུ་ ཞུས་པས་ངའི་བུ་མང་འོར་ལོ་ཙཱ་བའི་གསེར་ཞོ་དོ་སྨྱལ་པ་ལོ་ཙཱ་བས་བརྐུས་ནས་ངུ་ཞིང་འདུག་པ་ལ་མ་བཟོད་པ་ཡིན་གསུང་ནས་བ་རི་བས་བཙལ་པས་མང་འོར་ལོ་ཙཱ་བ་ངུ་ཞིང་བླ་མ་རྣལ་འབྱོར་པ་ཞིག་ལ་དབང་བསྐུར་ཞུ་བའི་ཡོ་བྱད་ཚོལ་དུ་བོད་ལ་ ཕྱིན་དཀའ་བ་ཆེན་པོས་བཙལ་བས་གསེར་ཞོ་དོ་བརྙེད་པ་སྟོར། ད་དབང་བསྐུར་མི་ཐོབ་ཟེར་ནས་སྡུག་བསྔལ་ཆེ་བར་འདུག་པས་བ་རི་ལོ་ཙཱ་བས་གསེར་ཞོ་བཞི་བྱིན་པས་ཤིན་ཏུ་དགའ། ཡང་མཱ་ག་དྷཱའི་རྒྱལ་པོས་བཙོན་བརྒྱ་ཕྲག་གཅིག་བཟུང་ ནས་གསོད་པར་འདུག་པས་མ་བཟོད་པ་ཡིན་གསུང་བ་ལ་བ་རི་བས་གསེར་སྲང་རེ་རེས་བླུ་བར་བྱས་པས་རྒྱལ་པོས་མ་སྟེར། རེ་རེ་ལ་གསེར་སྲང་བཅུ་རེ་དགོས་ཟེར་ནས་དེས་བླུས་ནས་བཏང་ངོ་། །ཞེས་དོན་ཞགས་ཀྱི་ལོ་རྒྱུས་ལས་བྱུང་བའི་ཕྱིར་རོ། ། དེས་ན་མི་ཞིག་ལུས་ལ་མེ་འབར་བ་ན་དེ་མ་ཞིའི་བར་ཅིས་ཀྱང་བདེ་བར་མི་འགྱུར་བ་བཞིན་དུ་སེམས་ཅན་ལ་གནོད་པ་བྱས་ན་སངས་རྒྱས་བྱང་སེམས་རྣམས་དགྱེས་པའི་ཐབས་མེད་དོ། །ཞེས་དཔེས་བསྟན་པར་མཛད་ལ། དཔེ་གཞན་ཡང་ཡོད་དེ་ བུ་གཅིག་པོ་བསད་ནས་མ་དེ་ལ་ཕན་པ་ཅི་བྱས་ཀྱང་མགུ་བར་མི་འགྱུར་བ་བཞིན་ནོ། །དེས་ན་བདག་གིས་སྔོན་སེམས་ཅན་ལ་གནོད་པ་བྱས་པས་སངས་རྒྱས་དང་བྱང་ཆུབ་སེམས་དཔའ་རྣམས་མི་མཉེས་པར་གྱུར་པ་དེ་ཐམས་ཅད་འགྱོད་པས་

Page: 480 བཤགས་ཤིང་བཟོད་པར་གསོལ་ནས་ད་ཕྱིན་ཆད་སངས་རྒྱས་དགྱེས་པར་བྱ་བའི་སླད་དུ་སེམས་ཅན་རྣམས་ཀྱིས་བདག་གི་སྤྱི་བོར་རྡོག་པས་འཚོག་གམ་འགུམ་པ་སྟེ་གསོད་པར་བྱེད་དམ་ཇི་ལྟར་བྱེད་དུ་ཟིན་ཡང་བདག་གིས་དེ་ཐམས་ཅད་ལ་ཁྲོ་ བ་སྐད་ཅིག་ཡང་མི་སྐྱེད་པར་བཟོད་པར་བྱ་ཞིང་འཇིག་རྟེན་ཀུན་གྱི་བྲན་ལྟ་བུར་ཁས་བླང་བར་བགྱིའོ་ཞེས་དམ་འཆའ་བའོ། །དེ་ལྟ་མོད་ཀྱི་སེམས་ཅན་འདི་དག་སངས་རྒྱས་རྣམས་ཀྱིས་བདག་གིར་མཛད་པ་ཙམ་དུ་མ་ཟད་རང་ཅག་མ་དག་པའི་ངོར་སེམས་ ཅན་དུ་སྣང་བ་འདི་དག་ཁོ་ན་བདག་ཅག་གིས་ཡིན་ཚུལ་མ་མཐོང་བར་ཟད་ཀྱི་ངོ་བོ་ཉིད་ཀྱིས་ནི་སངས་རྒྱས་ལས་གཞན་མ་ཡིན་ཏེ་སྔོན་དང་ད་ལྟར་གྱི་སངས་རྒྱས་ཐམས་ཅད་ཀྱང་འདི་ལྟ་བུ་ཁོ་ན་ལས་བྱུང་བའི་ཕྱིར་དང་། གཟོད་ནས་རྣམ་པར་དག་པའི་ ཁམས་ཀྱི་རང་བཞིན་ལ་ཐ་དད་པ་མ་མཐོང་བའི་ཕྱིར་རོ། །འདིར་བོད་འགྲེལ་ཁ་ཅིག་ན། དེ་བཞིན་ཉིད་བདག་དག་པའི་བདག །ཅེས་པ་ལྟར་དེ་བཞིན་ཉིད་རང་བཞིན་གྱིས་དག་པའི་བདག་ཉིད་དུ་གཅིག་པར་དགོངས་པར་མཛད་པ་འདི་ལ་ཐེ་ ཚོམ་མེད་དོ། །ཅེས་དང༌། ཀུན་རྫོབ་ཏུ་སེམས་ཅན་དུ་སྨད་པ་འདི་དག་ཉིད་དོན་དམ་པར་སངས་རྒྱས་ཡིན་ནོ། །ཞེས་སྣང་མོད་ཀྱང་དེ་བཞིན་ཉིད་བདག་དག་པའི་བདག་ནི་བདག་དམ་པ་སོགས་བཤད་པའི་སྐབས་ཡིན་ལ། འདི་ནི་སེམས་ཅན་འདི་རྣམས་ ཐུགས་རྗེ་ཅན་དེས་བདག་གིར་མཛད་པ་འདི་ལ་ཐེ་ཚོམ་མེད་ཅེས་པ་ཡིན་ཏེ། བྱང་ཆུབ་སེམས་དཔའ་དོན་གྲུབ་སྐྱེད་མོས་ཚལ་དུ་རྩེ་བ་ན་ལྷས་བྱིན་གྱི་ངང་པ་ཞིག་ལ་མདའ་བསྣུན་ཏེ་བྱང་ཆུབ་སེམས་དཔའི་པང་དུ་ལྷུང་བ་ན་དེའི་མདའ་ཕྱུང་སྟེ་སྨན་ བྱུགས་པས་སོས་ནས་བྱང་ཆུབ་སེམས་དཔའི་ཕྱི་བཞིན་དུ་རྟག་པར་འབྲང་ངོ་། །ལྷས་བྱིན་གྱིས་ངང་པ་དེ་ངས་བཟུང་བ་ཡིན་གྱིས་བྱིན་ཅིག་ཅེས་སྤྲིང་བ་ན་བྱང་ཆུབ་སེམས་དཔས་ངས་སེམས་སྐྱེད་མ་ཐག་ཏུ་སེམས་ཅན་ཐམས་ཅད་བདག་གིར་

Page: 481 ༄༅། །བཟུང་བ་ཡིན་ནོ། །ཞེས་གསུངས་པ་ལྟ་བུའོ། །ཀུན་རྫོབ་ཏུ་སེམས་ཅན་དུ་སྣང་བ་དོན་དམ་པར་སངས་རྒྱས་ག་ལ་ཡིན་ཏེ། ཀུན་རྫོབ་ཏུ་སྨིག་རྒྱུར་སྣང་བ་དོན་དམ་པར་ཆུ་མ་ཡིན་པའི་ཕྱིར་དང་། ཀུན་རྫོབ་ཏུ་སེམས་ཅན་དུ་སྣང་བ་ ནི་ཀུན་རྫོབ་དེའི་ཚེའང་འཁྲུལ་པ་ཁོ་ན་ཡིན་པའི་ཕྱིར་རོ་ཞེས་པ་ནི་ཞར་ལ་དཔྱད་པའོ། །དེ་ལྟར་བཟོད་པ་ཉམས་སུ་བླང་བ་བཤད་ཟིན་ནས། གཉིས་པ་འབྲས་བུ་ཡིད་ལ་བྱ་བ་ལ་བཞི། མདོར་བསྟན་པ། དཔེས་རྒྱས་པར་བཤད་པ། དཔེ་ལས་ ཁྱད་པར་དུ་འཕགས་ཚུལ་བཤད་པ། འབྲས་བུ་དངོས་བཤད་པའོ། །དང་པོ་མདོར་བསྟན་པ་ནི། འདི་ཉིད་དེ་བཞིན་གཤེགས་པ་མཉེས་བྱེད་ཡིན། །རང་དོན་ཡང་དག་སྒྲུབ་པའང་འདི་ཉིད་དེ། །འཇིག་རྟེན་སྡུག་བསྔལ་སེལ་བ་འདི་ཉིད་དོ། །དེ་ལྟར་བདག་ གིས་རྟག་ཏུ་དེ་ཉིད་བྱ། །ཞེས་པ་དང་། གཉིས་པ་དཔེས་རྒྱས་པར་བཤད་པ་ནི། དཔེར་ན་རྒྱལ་པོའི་མི་འགའ་ཞིག །སྐྱེ་བོ་མང་ལ་གནོད་བྱེད་ཀྱང་། །སྐྱེ་བོ་མིག་རྒྱང་རིང་པོ་དག །ནུས་ཀྱང་ཕྱིར་གནོད་མི་བྱེད་དེ། །འདི་ལྟར་དེ་གཅིག་མ་ཡིན་གྱི། །རྒྱལ་པོའི་མཐུ་ སྟོབས་དེ་ཡི་དཔུང་། །དེ་བཞིན་གནོད་བྱེད་ཉམ་ཆུང་བ། །འགའ་ཡང་ཁྱད་དུ་བསད་མི་བྱ། །འདི་ལྟར་དམྱལ་བའི་སྲུང་མ་དང་། །ཐུགས་རྗེ་ལྡན་རྣམས་དེ་ཡི་དཔུང་། དེ་ལྟར་དམངས་ཀྱིས་རྒྱལ་གཏུམ་བཞིན། །སེམས་ཅན་རྣམས་ནི་ མགུ་བར་བྱ། །ཞེས་པ་དང་། གསུམ་པ་དཔེ་ལས་ཁྱད་པར་དུ་འཕགས་ཚུལ་བཤད་པ་ནི། རྒྱལ་པོ་ལྟ་ཞིག་ཁྲོས་ན་ཡང་། །སེམས་ཅན་མི་མགུ་བྱས་པ་ཡིས། །མྱོང་བར་འགྱུར་བ་གང་ཡིན་པ། །དམྱལ་བའི་གནོད་པ་དེས་བྱེད་དམ། །རྒྱལ་པོ་ལྟ་ཞིག་མགུ་ན་ཡང་། ། སེམས་ཅན་མགུ་བར་བྱས་པ་ཡིས། །འཐོབ་པར་འགྱུར་བ་གང་ཡིན་པ། །སངས་རྒྱས་ཉིད་སྦྱིན་མི་སྲིད་དོ། །ཅེས་པས་བསྟན་ཏེ། དེ་ཡང་འདི་ཉིད་དེ་བཞིན་གཤེགས་པ་མཉེས་བྱེད་ཡིན་ཏེ། སེམས་ཅན་མགུ་བྱ་མ་གཏོགས་པ། །

Page: 482 གཞན་གང་ཞིག་གིས་ལན་ལོན་འགྱུར། །ཞེས་བཤད་ཟིན་པའི་ཕྱིར། རང་དོན་ཡང་དག་སྒྲུབ་པའང་འདི་ཉིད་དེ། བྱིས་པས་རང་དོན་བྱས་པ་དང་། །ཞེས་སོགས་ཀྱིས་རྣམ་པར་བཤད་པའི་ཕྱིར། འཇིག་རྟེན་སྡུག་བསྔལ་སེལ་བའང་ འདི་ཉིད་དེ། བདག་པས་གཞན་གཅེས་ཀྱི་བྱང་ཆུབ་ཀྱི་སེམས་ནི་སངས་རྒྱས་ཀྱི་རྒྱུ་གྲུང་པོ་ཡིན་ལ། དེ་ཡོད་ན་རྫོགས་པའི་སངས་རྒྱས་འཐོབ་པ་ལ་སངས་རྒྱས་འཇིག་རྟེན་དུ་བྱུང་ན་སེམས་ཅན་གྱི་ཕན་བདེ་ཐམས་ཅད་འབྱུང་བའི་ཕྱིར་ཏེ། ཉི་མའི་ དཀྱིལ་འཁོར་གང་ཚེ་འོད་ཀྱི་དྲ་བ་འགྱེད། །དེ་ཚེ་སེམས་ཅན་ལས་བྱེད་བརྩོན་པ་དེ་བཞིན་དུ། མཁས་པའི་ཤེས་ཕྱིར་འཇིག་རྟེན་བྱང་ཆུབ་སེམས་བྱུང་ན། ཡེ་ཤེས་ཀྱི་ནི་སེམས་ཅན་ཡོན་ཏན་ཆོས་དང་ལྡན། །དཔེར་ན་མ་དྲོས་གནས་ པའི་ཀླུ་བདག་མེད་གྱུར་ན། ཛམྦུའི་གླིང་འདིར་ཆུ་ཀླུང་འབབ་པར་ག་ལ་འགྱུར། །ཞེས་སོགས་དཔེ་དང་བཅས་ཏེ་རྒྱས་པར་བསྟན་པའི་ཕྱིར། དེས་ན། དེ་ལྟར་རྟག་ཏུ་བདག་གིས་དེ་ཉིད་བྱ། །ཞེས། འགུམས་ཀྱང་མི་ཁྲོ་ཞེས་སོགས་ ཀྱི་དམ་བཅའ་སླར་ཡང་བརྟན་པོར་བཟུང་བ་ཡིན་ནོ། །དེ་རིགས་ཏེ། དཔེར་ན་རྒྱལ་པོས་མངགས་པའི་མི་གཅིག་པོ་ཞིག་གི་མང་པོ་ལ་གནོད་པ་བྱེད་ཀྱང་སྐྱེ་བོ་མིག་རྒྱང་རིང་བ་ཕྱི་རྗེས་རིང་དུ་ལྟ་བ་དག་མི་གཅིག་པོ་དེ་ཐུབ་པར་སླ་མོད་ཀྱང་། དེ་ལ་གནོད་ པ་མི་བྱེད་དེ། རྒྱལ་པོ་དཔུང་དང་བཅས་པ་དེའི་ཕྱོགས་ཡིན་པའི་ཕྱིར། དེ་བཞིན་དུ་སྐྱེ་བ་ཕྱི་མ་ནས་ཕྱི་མ་དཔག་ཏུ་མེད་པར་ཕྱི་རྗེས་རིང་དུ་ལྟ་བའི་སྐྱེ་བོ་མིག་རྒྱང་རིང་པོ་རྣམས་གནོད་བྱེད་ཉམ་ཆུང་ཡང་བརྙས་པར་མི་བྱེད་དེ། འདི་ལྟར་དཀོན་མཆོག་ཐམས་ ཅད་དང་དམྱལ་སྲུང་ལ་སོགས་པ་རྣམས་དེའི་ཕྱོགས་ཡིན་པའི་ཕྱིར་ཏེ། རྣམ་པར་གནག་པའི་ལས་ཆུང་ངུས་ཀྱང་འབྲས་བུ་མི་བཟད་པ་སྐྱེད་པ་ནི་དགྲ་བཅོམ་པ་ལ་སྤྲེའུ་ལྟར་ཡང་རྩལ་ཆེའོ་ཞེས་བྱས་པས་ངན་འགྲོ་དུ་མ་མྱོང་ཞིང་ཚེ་རབས་བརྒྱ་སྟོང་

Page: 483 ༄༅། །ཕྲག་དུ་མར་སྤྲེའུར་གྱུར་པ་སོགས་མདོ་སྡེ་ལས་བརྒྱ་པ་སོགས་ལས་བསྟན་ཏོ། །དེའི་ཕྱིར་རྒྱལ་པོ་གཏུམ་པོ་གཟུ་ལུམས་ཅན་ནི་ཅིས་ཀྱང་མགུ་བར་དཀའ་ཞིང་རྒྱུ་མེད་དུ་གནོད་པ་བྱེད་མོད་ཀྱི། དེའི་འབངས་ན་གནས་པ་རྣམས་ ཀྱིས་ཅི་ནས་ཀྱང་དེའི་སེམས་སྲུང་དགོས་པ་བཞིན་དུ། བདག་ཅག་དཀོན་མཆོག་ལ་སྐྱབས་སུ་འཛིན་པ་རྣམས་ཀྱིས་ཀྱང་དཀོན་མཆོག་གི་སྲས་ལྟ་བུའི་སེམས་ཅན་རྣམས་མགུ་བར་བྱའི་གནོད་པར་མི་བྱའོ། །དེ་ལྟ་མོད་ཀྱི་རྒྱལ་པོ་ནི་ཤིན་ཏུ་ཁྲོས་ཀྱང་ ནོར་དབྲོག་པ་དང་གསོད་པར་ཟད་ཀྱི་དམྱལ་བར་སྐྱུར་མི་ནུས་ལ། སེམས་ཅན་ལ་གནོད་པ་ལས་ནི་ངན་སོང་གི་སྡུག་བསྔལ་མུ་མཐའ་མེད་པ་ཐམས་ཅད་འབྱུང་ངོ་། །ཡང་རྒྱལ་པོ་ནི་ཤིན་ཏུ་མགུ་ནའང་རྒྱལ་སྲིད་ཀྱི་ཕྱེད་སྦྱིན་པར་ཟད་ཀྱི་ཕྱི་མའི་ བདེ་བ་སྦྱིན་པར་མི་ནུས་ལ། སེམས་ཅན་ལ་ཕན་པ་ལས་ནི་གནས་སྐབས་དང་མཐར་ཐུག་གི་བདེ་བ་སངས་རྒྱས་ཉིད་ཀྱི་བར་དུ་ཐམས་ཅད་སྦྱིན་པར་བྱེད་དོ། བཞི་པ་འབྲས་བུ་དངོས་བཤད་པ་ནི། སེམས་ཅན་མགུ་ལས་བྱུང་བ་ཡིས། །མ་འོངས་སངས་རྒྱས་འགྲུབ་ ལྟ་ཞོགཚེ་འདི་ཉིད་ལ་དཔལ་ཆེ་དང་། །གྲགས་དང་སྐྱིད་འགྱུར་ཅིས་མ་མཐོང་། །འཁོར་ཚེ་བཟོད་པས་མཛེས་སོགས་དང་། །ནད་མེད་པ་དང་གྲགས་པ་ཡིས། །ཤིན་ཏུ་ཡུན་རིང་འཚོ་བ་དང་། །འཁོར་ལོས་བསྒྱུར་བའི་བདེ་རྒྱས་ འཐོབ། །ཅེས་གསུངས་ཏེ། དེ་ཡང་། སེམས་ཅན་མགུ་ལས་བྱུང་བ་ཡིས། མ་འོངས་སངས་རྒྱས་འགྲུབ་་་་་་། ཅེས་པས་ནི་མཐར་ཐུག་གི་འབྲས་བུ་དང་། ལྟ་ཞོག །ཚེ་འདི་ཉིད་ལ་དཔལ་ཆེ་དང་། །གྲགས་དང་སྐྱིད་འགྱུར་ཅིས་མ་མཐོང་། ། ཞེས་པས་ནི་མཐོང་ཆོས་ཀྱི་འབྲས་བུ་དང༌། འཁོར་ཚེ་བཟོད་པས། །ཞེས་སོགས་ཀྱིས་མ་མཐོང་བའི་ཆོས་ཀྱི་འབྲས་བུ་བསྟན་ཏོ། །དེ་ཡང་སེམས་ཅན་ལ་ཕན་བདེར་བྱས་པའི་མཐར་ཐུག་གི་དངོས་འབྲས་ནི་རྫོགས་པའི་སངས་རྒྱས་ཡིན་ལ།

Page: 484 མཐར་ཐུག་ལྟ་ཞིག་མཐོང་བའི་ཆོས་ལ་ཡང་མང་པོས་བཀུར་བའི་རྒྱལ་པོས་ཞིང་ཆ་མཉམ་དུ་བགོས་ཤིང་ཞིང་ལེགས་པར་བསྲུངས་པས་སྐྱེ་བོ་ཀུན་གྱིས་རྒྱལ་པོར་བཀུར་ཏེ་བསྐལ་པ་བཟང་པོ་འདི་ལ་རྒྱལ་པོའི་ཐོག་མར་གྱུར་པ་བཞིན་ནོ། །མ་མཐོང་ བའི་ཆོས་ཚེ་རབས་གཞན་དག་ལ་ཡང་གཟུགས་མཛེས་ཤིང་ལྟ་ན་སྡུག་པ་དང་ནད་མེད་ཅིང་སྙན་པར་གྲགས་པ་དང་ཚེ་རིང་ཞིང་འཁོར་ཕུན་སུམ་ཚོགས་པ་དང་འཁོར་ལོས་བསྒྱུར་བའི་རྒྱལ་སྲིད་ལ་སོགས་པ་རྒྱ་ཆེར་འཐོབ་པར་འགྱུར་རོ། །བྱང་ཆུབ་ སེམས་དཔའི་སྤྱོད་པ་ལ་འཇུག་པ་ལས། བཟོད་པ་བསྟན་པ་ཞེས་བྱ་སྟེ་ལེའུ་དྲུག་པ་རྣམ་པར་ཕྱེ་བའོ། །

ལེའུ་བདུན་པ། བརྩོན་འགྲུས་བསྟན་པ།

ད་ནི་བརྩོན་འགྲུས་ཀྱི་ཕ་རོལ་ཏུ་ ཕྱིན་པ་བཤད་པར་བྱའོ། །དེ་ལ་ལེའུའི་འབྲེལ་ནི། དེ་ལྟར་བཟོད་པ་དང་ལྡན་ན་བརྩོན་འགྲུས་བརྩམ་པར་ནུས་ཤིང༌། དོན་ཆེན་པོ་དང་ལྡན་པར་མཐོང་ནས་རྩོམ་པར་ཡང་འགྱུར་བས་བཟོད་པའི་དེ་མ་ཐག་ཏུ་བརྩོན་འགྲུས་ཀྱི་ལེའུ་བཤད་པ་སྟེ། འགྲེལ་ ཆེན་ལས་ཀྱང༌། དེ་ལྟར་བཟོད་པས་བརྩོན་འགྲུས་བརྩམ་པ་ནི་གཞན་དུ་ན་སྡུག་བསྔལ་བཟོད་པར་མི་ནུས་པས་བརྩོན་འགྲུས་ཞན་པར་འགྱུར་བས་སོ། །ཞེས་སོ། །དགེ་བའི་ལྷས་ནི། དེ་ལྟར་བཟོད་ལྡན་བརྩོན་འགྲུས་བརྩམ། །ཞེས་བཏོན་ནས་ལེའུའི་ འབྲེལ་དུ་འཆད་དོ། །འབྲེལ་བ་དེ་ལྡན་གྱི་བརྩོན་འགྲུས་ཀྱི་ལེའུ་འདི་ལ་ལྔ། བརྩོན་འགྲུས་ལ་སྤྲོ་བ་སྐྱེད་པ། བརྩོན་འགྲུས་ཀྱི་ངོ་བོ། མི་མཐུན་ཕྱོགས་སྤང་བ། བརྩོན་འགྲུས་བརྩམ་ཚུལ་དངོས། བརྩོན་འགྲུས་སྤེལ་བའི་ཚུལ་ལོ། ། དང་པོ་བརྩོན་འགྲུས་ལ་སྤྲོ་བ་སྐྱེད་པ་ནི། དེ་ལྟར་བཟོད་པས་བརྩོན་འགྲུས་བརྩམ། །དེ་ལྟར་བརྩོན་ལ་བྱང་ཆུབ་གནས། །རླུང་མེད་གཡོ་བ་མེད་པ་བཞིན། །བསོད་ནམས་བརྩོན་འགྲུས་མེད་མི་འབྱུང༌། །ཞེས་གསུངས་ཏེ། དེ་ལྟར་བཟོད་པ་དང་ལྡན་པའི་དགོས་

Page: 485 ༄༅། །པ་ནི། བརྩོན་འགྲུས་བརྩམ་པ་སྟེ། གལ་ཏེ་བརྩོན་འགྲུས་དང་བྲལ་ན་བཟོད་པ་ཉིད་ཀྱང་མི་བརྟན་ནོ། །དེས་ན་བྱང་ཆུབ་ལ་སོགས་པ་དགེ་བའི་ཆོས་ཐམས་ཅད་ནི་བརྩོན་འགྲུས་ཁོ་ན་ལ་རག་ལས་ཏེ་དཔེར་ན་གཡོ་བ་ནི་རླུང་ལ་རག་ ལས་པ་བཞིན་ནོ། །དེས་ན་བརྩོན་འགྲུས་མེད་ན་བསོད་ནམས་ཀྱི་ལས་གང་ཡང་མི་འབྱུང་སྟེ། བློ་གྲོས་རྒྱ་མཚོའི་མདོ་ལས། ལེ་ལོ་ཅན་ལ་ནི་སྦྱིན་པ་ནས་ཤེས་རབ་ཀྱི་བར་དུ་མེད་དོ་ལེ་ལོ་ཅན་ལ་ནི་གཞན་དོན་བྱ་བ་མེད་དོ་ལེ་ལོ་ཅན་ལ་ནི་བྱང་ཆུབ་ ཤིན་ཏུ་རིང་ཞིང་རྣམ་པར་རིང་ངོ༌། །ཞེས་སོ། །བརྩོན་འགྲུས་དང་ལྡན་ན་ཡོན་ཏན་ཐམས་ཅད་འཐོབ་སྟེ་བློ་གྲོས་རྒྱ་མཚོ་གང་ན་བརྩོན་འགྲུས་ཡོད་པ་དེ་ན་བྱང་ཆུབ་ཡོད་དོ། །ཞེས་སོ། །གཉིས་པ་ངོ་བོ་ནི། བརྩོན་གང་དགེ་ལ་སྤྲོ་བའོ། །ཞེས་གསུངས་ ཏེ། མི་དགེ་བ་དང༌ལུང་དུ་མ་བསྟན་པའི་ཚོང་སོ་ནམ་སོགས་ལ་འབད་པ་ནི་བརྩོན་འགྲུས་མ་ཡིན་ཏེ། བྱ་བ་ངན་ཞེན་གྱི་ལེ་ལོ་འམ། དམད་པའི་ལེ་ལོ་ཞེས་བྱའོ། །དེས་ན་དགེ་བ་ལ་སྤྲོ་བས་འཇུག་པ་ནི་བརྩོན་འགྲུས་ཡིན་ཏེ། མདོ་ལས། བརྩོན་འགྲུས་ གང་ཞེ་ན་དགེ་བ་ལ་སྤྲོ་བའོ། །ཞེས་དང༌། རྒྱན་གྱི་འགྲེལ་པར། དགེ་ལ་ཡང་དག་སྤྲོ་བ་དང་ཞེས་བྱ་བ་ནི་ངོ་བོ་ཉིད་དེ། ཞེས་སོ། །འགྲེལ་ཆེན་ལས་ཀྱང༌། བརྩོན་འགྲུས་གང་ཞེ་ན། དགེ་བའི་ལས་སྦྱིན་པ་ལ་སོགས་པ་དང༌། ཐོས་པ་ལ་སོགས་པ་ལ་ སྤྲོ་བ་དེ་ལ་བརྩོན་འགྲུས་ཞེས་བརྗོད་དེ། མི་དགེ་བ་ལ་སྤྲོ་བ་ནི་ལེ་ལོ་ཉིད་དོ། །ཞེས་སོ། །གསུམ་པ་མི་མཐུན་ཕྱོགས་སྤང་བ་ལ་ལྔ། མདོར་བསྟན་པ། ལེ་ལོ་སྐྱེ་བའི་རྒྱུ་བཤད་པ། སྙོམས་ལས་ཀྱི་ལེ་ལོ། །བྱ་བ་ངན་ཞེན་གྱི་ལེ་ལོ། །སྒྱིད་ལུག་པའི་ལེ་ལོ་ སྟེ་གསུམ་པོ་རིམ་པས་སྤང་ཚུལ་ལོ། །དང་པོ་མདོར་བསྟན་པ་ནི། དེ་ཡི་མི་མཐུན་ཕྱོགས་བཤད་བྱ། །ལེ་ལོ་ངན་ལ་ཞེན་པ་དང༌། །སྒྱིད་ལུག་བདག་ལ་བརྙས་པའོ། །ཞེས་གསུངས་ཏེ། འདི་ལྟར་བརྩོན་འགྲུས་ཀྱི་མི་མཐུན་ཕྱོགས་ནི་བྱ་བར་འོས་པ་དུས་

Page: 486 ལས་ཡོལ་བར་བྱེད་པའི་ཕྱིར་ལེ་ལོ་ཞེས་བྱ་སྟེ། དེ་ནི་སྙོམས་ལས་ཀྱིས་བག་མེད་དུ་གནས་པ་དང༌། བྱ་བ་ངན་པ་མཁས་པས་དམད་པའི་གནས་ལ་ཞེན་པ་དང༌། བདག་ཉིད་ལ་བརྙས་པས་ཞུམ་ཞིང་སྒྱིད་ལུག་པ་སྟེ་སྤང་པར་བྱ་བའི་ལེ་ལོ་ནི་རྣམ་པ་གསུམ་མོ། ། གཉིས་པ་ལེ་ལོ་སྐྱེ་བའི་རྒྱུ་བཤད་པ་ནི། སྙོམས་ལས་བདེ་བའི་རོ་མྱང་དང༌། །གཉིད་ལ་བསྟེན་པའི་སྲེད་པ་ཡིས། །འཁོར་བའི་སྡུག་བསྔལ་མི་སྐྱོ་ལས། །ལེ་ལོ་ཉེ་བར་སྐྱེ་བར་འགྱུར། །ཞེས་གསུངས་ཏེ། སོས་དལ་དུ་སྡོད་པ་ཙམ་ལ་དགའ་བའི་སྙོམས་ལས་ ལ་བདེ་བར་འདུ་ཤེས་པས་དེའི་རོ་མྱང་བ་དང༌། ཉལ་བ་དང༌། བསྙེས་པ་དང༌། གཉིད་ལ་དགའ་བས་གོང་ནས་གོང་དུ་དེའི་ཞེན་པ་འཕེལ་ཞིང་དེ་ལ་སྐྱོན་དུ་མི་ལྟ་བ་ནི་ལེ་ལོ་སྐྱེ་བའི་རྒྱུ་སྟེ། དེས་འཁོར་བ་ལ་སྐྱོ་བར་མི་འགྱུར་ལ། འཁོར་བ་ལས་མི་སྐྱོ་བ་དང་མི་འཆི་ བའི་འདུ་ཤེས་ཀྱིས་ཀྱང་ལེ་ལོ་གོང་དུ་སྐྱེ་བར་འགྱུར་ཏེ། དཀའ་འགྲེལ་ཆུང་ངུ་ལས་ཀྱང༌། རྒྱུ་གང་ལས་ཞེ་ན་འཁོར་བའི་སྡུག་བསྔལ་ལས་མི་སྐྱོ་བ་ལས་སོ། །ཞེས་སོ། །གསུམ་པ་སྙོམས་ལས་ཀྱི་ལེ་ལོ་སྤང་བ་ལ་གཉིས། འཆི་བའི་འཇིགས་ པ་བསམས་ཏེ་རྒྱུད་བསྐུལ་བ་དང༌། ཕྱི་མར་ངན་སོང་ལ་འཇིགས་པས་བསྐུལ་བའོ། །དང་པོ་འཆི་བའི་འཇིགས་པ་བསམས་ཏེ་རྒྱུད་བསྐུལ་བ་ནི། ཉོན་མོངས་ཉ་བས་བཤོར་ནས་ནི། །སྐྱེ་བའི་རྒྱར་ནི་ཆུང་གྱུར་ནས། །འཆི་བདག་ཁར་ནི་སོང་གྱུར་བ། །ཅི་སྟེ་ད་དུང་མི་ཤེས་ སམ། །རང་སྡེ་རིམ་གྱིས་གསོད་པ་ཡང༌། །ཁྱོད་ཀྱིས་མཐོང་བར་མ་གྱུར་ཏམ། །འོན་ཀྱང་གཉིད་ལ་བསྟེན་པ་གང༌། །གདོལ་པ་དང་ནི་མ་ཧེ་བཞིན། །ལམ་ནི་ཀུན་ནས་བཀག་ནས་སུ། །འཆི་བདག་གིས་ནི་བལྟས་བཞིན་དུ། །ཇི་ ལྟར་ཁྱོད་ནི་ཟ་དགའ་ཞིང༌། །འདི་ལྟར་གཉིད་ལོག་ཇི་ལྟར་དགའ། །མྱུར་པ་ཉིད་དུ་འཆི་འགྱུར་བས། །དེ་སྲིད་དུ་ནི་ཚོགས་སོག་བྱ། །དེ་ཚེ་ལེ་ལོ་སྤངས་ཀྱང་ནི། །དུས་མ་ཡིན་པས་ཅི་ཞིག་བྱ། །འདི་ནི་མ་བྱས་བརྩམས་པ་དང༌། །

Page: 487 ༄༅། །འདི་ཕྱེད་བྱས་པར་གནས་པ་ལ། །གློ་བུར་འཆི་བདག་འོངས་ནས་ནི། །ཀྱེ་ཧུད་བཅོམ་ཞེས་སེམས་པར་འགྱུར། །མྱ་ངན་ཤུགས་གྱིས་སྐྲངས་པ་ཡི། །མིག་དམར་གདོང་ལ་མཆི་མ་འཛག །ཉེ་དུ་རེ་ཐག་ཆད་པ་ དང༌། །གཤིན་རྗེའི་ཕོ་ཉའི་བཞིན་ལ་ལྟ། །རང་སྡིག་དྲན་པས་གདུངས་པ་དང༌། །དམྱལ་བའི་སྒྲ་ནི་ཐོས་པ་ཡིས། །སྐྲག་པས་མི་གཙང་ལུས་གོས་ཤིང༌། །མྱོས་པར་གྱུར་ཚེ་ཅི་ཞིག་བྱ། །ཞེས་གསུངས་ཏེ། དེ་ཡང་དང་པོས་ སྐྱེས་པའི་ཕྱིར་འཆི་ངེས་པར་བསྟན། གཉིས་པས་རང་གཞན་ཀུན་ཀྱང་རིམ་གྱིས་འཆི་བར་བསྟན། གསུམ་པས་འཆི་བ་ལས་མི་ཐར་བར་བསྟན། བཞི་པས་མྱུར་དུ་འཆི་བ་དང༌། ལྔ་པས་བློ་བུར་དུ་འཆི་བ་དང༌། དེ་ནས་གཉིས་ཀྱིས་ དེའི་ཚེ་ཅིས་ཀྱང་མི་ཕན་པར་བསྟན་པའོ། །དེ་ཡང་ཉོན་མོངས་པ་ཉ་པ་ལྟ་བུས་འདུས་བྱས་པའི་སྐྱེ་གནས་རྣམ་པ་བཞིའི་རྒྱར་བདག་ཆུང་ཟིན་ན་ལྕགས་ཀྱུས་ཟིན་པའི་ཉ་ད་ལྟ་ཆུ་ནང་ན་འཕྱོ་ཡང་སྐམ་སར་ཐོན་ཟིན་པ་དང་འདྲ་བ་ལྟར་ བདག་ཡང་འཆི་བདག་གི་ཁར་སོང་ཟིན་པ་དང་མཚུངས་པ་སྟེ་ཅིས་ཀྱང་འཆི་དགོས་སོ། །འོན་ཏེ་ཡིད་མི་ཆེས་ན་རང་དང་སྐྱེ་གནས་གཅིག་པའི་སྡེ་ཚན་ཡུལ་མི་ལ་སོགས་པ་མཆོག་དམན་ཐམས་ཅད་རིམ་གྱིས་འཆི་བ་འདི་ཅིས་མ་མཐོང༌། གལ་ཏེ་འདི་ མཐོང་བཞིན་དུ་ཡང་གཉིད་དང་སྙོམས་ལས་ལ་ཞེན་ན་ལུག་དང་མ་ཧེ་སོགས་ར་བར་བཅུག་སྟེ་གདོལ་པས་རིམ་གྱིས་གསོད་པ་མཐོང་བ་ན་ཕྱི་མ་དེ་དག་སྐྲག་ཆེས་བས་གདོལ་བའི་གྲི་སྦས་ཏེ་སས་འགེབས་པ་དང་ངུ་ཞིང་འཕྱོང་བ་དང༌། ཁ་ཅིག་རང་བཞིན་ གྱིས་སྙིང་གས་ཏེ་འཆིའོ་ཞེས་ཐོས་ན་ཁྱོད་ནི་དེ་བས་ཀྱང་བླུན་པར་ཟད་དེ་རང་སྡེ་རིམ་གྱིས་གསོད་པ་མཐོང་ཡང་སེམས་ཅུང་ཟད་ཀྱང་མི་སྐྲག་པས་སོ། །དེས་ན། གང་དུ་ཕྱིན་ཡང་འཆི་བས་མི་ཚུགས་པའི། །ས་ཕྱོགས་དེ་ནི་གང་ནའང་ཡོད་

Page: 488 མ་ཡིན། །ནམ་མཁའ་ལ་མེད་རྒྱ་མཚོའི་གཏིང་ནའང་མེད། །རི་བོ་ཀུན་གྱི་ཕུག་ཏུ་ཞུགས་ཀྱང་མེད། །ཅེས་དང༌། རྒྱལ་པོ་གཟུགས་ཅན་སྙིང་པོ་ལ་གདམས་པའི་མདོ་ལས། རྒྱལ་པོ་ཆེན་པོ། དཔེར་ན། ཕྱོགས་བཞི་ནས་རི་ཆེན་པོ་སྲ་བ་བརྟན་ པ་མ་གས་པ་འཕན་མེད་པ་བཞི་ནམ་མཁའ་ལ་རེག་ཅིང་ས་རློག་སྟེ་རྩྭ་ཤིང་དང་སྲོག་ཆགས་ཐམས་ཅད་ཕྱེ་མར་འཐག་ཅིང༌། འོང་བ་དེ་དག་ལ་མགྱོགས་པས་འབྲོས་པའམ། སྟོབས་ཀྱིས་ཟློག་པའམ། ནོར་གྱིས་ཟློག་པར་སླ་བ་མ་ཡིན་ནོ། །དེ་བཞིན་དུ་ འཇིགས་པ་ཆེན་པོ་འདི་དག་འབྱུང་སྟེ་བཞི་གང་ཞེ་ན། རྒ་བས་ནི་དར་ལ་བབ་པ་འཇོམས་ཤིང་འོང༌། ནད་ཀྱིས་ནི་ནད་མེད་པ་འཇོམས། གུད་པས་ནི་ཕུན་སུམ་ཚོགས་པ་འཇོམས། འཆི་བས་ནི་སྲོག་འཇོམས་ཤིང་འོང་སྟེ་དེ་ལ་མགྱོགས་པས་འབྲོས་པ་ལ་སོགས་ པར་སླ་བ་མ་ཡིན་ནོ། །ཞེས་པ་ལྟར་བདག་ལ་འབྲོས་པའི་ལམ་ནི་མེད་ལ། འཆི་བདག་གིས་ནི་བདག་ལ་སྐད་ཅིག་ཡང་མི་གཡེལ་བར་ལྟ་བ་འདི་ཤེས་བཞིན་དུའང་བདག་ཉིད་དང་ཟས་སྐོམ་ལ་ཆགས་པར་རིགས་སམ་སོམས་ཤིག་པའོ། ། དེ་ལྟ་མོད་ཀྱི་ཚེ་ལ་ལོང་མེད་པའི་ཕྱིར་མྱུར་དུ་འཆི་ཞིང༌། བྱ་བ་ཁ་ཅིག་ནི་མགོ་བརྩམས། ཁ་ཅིག་ནི་ཕྱེད་ཟིན་པ་སོགས་བདག་གི་བྱ་བ་ཚར་མ་ཚར་ལ་མ་ལྟོས་པར་འཆི་བདག་གིས་གློ་བུར་དུ་བསད་དེ། ཀྱེ་མ། བདག་ནི་བཅོམ་གྱིས་མེད་དོ་ཞེས་འགྱོད་ཅིང༌། འཇིགས་ པ་དང་བཅས་ཏེ་འཆི་བར་འགྱུར་ལ། དེའི་ཚེ་མཛའ་བཤེས་དང་འབྲལ་བར་ཤེས་ཏེ་རེ་ཐག་ཆད་པས་མྱ་ངན་གྱིས་ཅི་བྱ་ཏོལ་མེད་པའི་ཉེ་དུ་རྣམས་མིག་ཁྲག་ལྟར་དམར་ཞིང༌། གདོང་ཆེས་སྐྲངས་པར་ངུ་བས་མཐའ་བསྐོར་ཡང་འཆི་བ་པོ་ཉིད་ནི་རིས་མནན་པ་ དང་ཆུ་བོར་སུབས་པ་སོགས་ཀྱི་འཁྲུལ་སྣང་འཆར་ཞིང་དབུགས་རིང་ཐུང་དུ་རྩེག་ལ། གཤིན་རྗེའི་ཕོ་ཉ་ཡང་ཡུད་དུ་མཐོང་བའི་བཞིན་ལ་འཇིགས་ཤིང་སྐྲག་པས་ལྟ་བ་དང༌། རང་གི་སྡིག་པས་འགྱོད་ཅིང་དམྱལ་བའི་སྣང་བ་ཤར་ཏེ་ངུ་འབོད་དང༌། འཚེད་པ་

Page: 489 ༄༅། །དང༌། འཚེར་བའི་སྒྲ་འཇིགས་སུ་རུང་བ་རྣམས་ཐོས་པས་སྐྲག་ཆེས་བས་འཆི་ཀ་མའི་ལུས་དེ་ལས་བཤང་གཅི་དང་རྡུལ་འཛག་ཅིང༌། མགོན་སྐྱབས་མེད་པར་ཕ་རོལ་ཏུ་འགྲོ་བ་དེའི་ཚེ་ལེ་ལོ་སྤངས་ཏུ་ཟིན་ཡང་ཅི་ཡང་མི་ནུས་ ཀྱི་དེ་བས་བདག་ཡང་འདི་ལྟ་བུ་ཁོ་ནའི་ཆོས་ཅན་དུ་གོ་བར་གྱིས་ལ། ད་ལྟ་ལེ་ལོ་སྤངས་ཏེ་དགེ་བའི་ཚོགས་ལ་འབད་པ་བྱོས་ཤིག་པའོ། །འདིར་བི་བྷུ་ཏིས། ཉེ་དུ་དང་གཤིན་རྗེའི་གདོང་ལ་ལྟ་དགོས་ན་ཞེས་དང་ཡིག་སྡུ་བའི་སྒྲར་འབྲུ་གཉེར། དགེ་ལྷས། ཉེ་དུ་དེ་དག་ཁྱོད་འཚོ་བའི་རེ་ཐག་ཆད་པར་མཐོང་བ་དང་ཁྱོད་ཉིད་གཤིན་རྗེའི་གདོང་ལ་ལྟ་བ་ཞེས་པའི་དོན་ཅན་གྱིས་དང་ཡིག་འབྱེད་པའི་སྒྲར་འབྲུ་གཉེར་རོ། །གཉིས་པ་ཕྱི་མར་ངན་སོང་ལ་འཇིགས་བས་བསྐུལ་བ་ནི། ཁྱོད་ནི་ཉ་གསོན་འགྲེ་བ་ལྟའི། །ཚེ་འདིར་འཇིགས་དང་ལྡན་ གྱུར་ན། །སྡིག་བྱས་དམྱལ་བ་མི་བཟད་པའི། །སྡུག་བསྔལ་རྣམས་ནི་སྨོས་ཅི་དགོས། །ཆུ་ཚན་གྱིས་ནི་རེག་པ་ན། །གཞོན་ཤ་ཅན་ལ་རབ་ཚ་བའི། །དམྱལ་བ་ཡི་ནི་ལས་བྱས་ནས། །ཅི་ཕྱིར་འདི་ལྟར་བདེ་བར་གནས། ། བརྩོན་མེད་འབྲས་བུ་འདོད་པ་དང༌། །གཟེ་རེ་ཅན་ལ་གནོད་མང་ཞིང༌། །འཆི་བས་བཟུང་བཞིན་ལྷ་ལྟར་སྤྱོད། །ཀྱེ་ཧུད་སྡུག་བསྔལ་དག་གིས་བཅོམ། །མི་ཡི་གྲུ་ལ་བསྟེན་ནས་ནི། །སྡུག་བསྔལ་ཆུ་བོ་ཆེ་ལས་སྒྲོལ། །གྲུ་འདི་ཕྱི་ནས་ རྙེད་དཀའ་བས། །རྨོངས་པ་དུས་སུ་གཉིད་མ་ལྡོག །ཞེས་གསུངས་ཏེ། དང་པོས་དམྱལ་བའི་སྡུག་བསྔལ་ཚད་མེད་པར་བསྟན། གཉིས་པས་ད་ལྟ་བཏང་སྙོམས་སུ་སྡོད་མི་རིགས་པར་བསྟན། གསུམ་པས་བདག་གི་སྤྱོད་པ་ལ་ཡི་ཆད་ པར་བསྟན། ཐ་མས་ད་ལྟ་འབད་དེ་སྒྲུབ་དགོས་པར་བསྟན་པའོ། །དེ་ཡང་ཁྱོད་ནི་འཆི་བ་ན་ཡང་གནད་གཅོད་ཀྱི་སྡུག་བསྔལ་ཉ་གསོན་པོར་བྱེ་ཚན་ལ་འགྲེ་ལྡོག་བྱེད་པ་ལྟ་བུ་སྔར་བཤད་པ་དེ་ལྟ་ཡིན་མོད་ཀྱང་དེས་ཁྱོད་ཀྱི་སྡིག་པའི་འབྲས་བུ་ཕྱོགས་

Page: 490 ཙམ་ཡང་ཟད་པ་མ་ཡིན་ཏེ། འདི་ནི་མྱུ་གུ་ཙམ་དུ་ཟད་ལ། སྡོང་བུ་དང༌། མེ་ཏོག་དང༌། འབྲས་བུ་ལྟ་བུའི་དམྱལ་བའི་སྡུག་བསྔལ་འཇིགས་སུ་རུང་བ་ནི། ད་གདོད་འོང་སྟེ་དེ་དག་ནི་ཉན་པ་ཙམ་ཡང་བཟོད་པར་དཀའ་སྟེ། མནར་མེད་པའི་དམྱལ་བའི་སྡུག་བསྔལ་ཇི་ ལྟ་བར་ཐོས་ན་མི་རྣམས་ཁྲག་དྲོན་མོ་བསྐྱུགས་ཏེ་འཆི་བར་འགྱུར་བས་ན་མ་གསུངས་པར་བཤད་ལ། སུམ་བཅུ་རྩ་གསུམ་གྱི་ཤིང་ཤྲི་ཤི་ཥའི་གཞལ་མེད་ཁང་སྟོང་པ་གཅིག་ཤོས་ན་སངས་རྒྱས་འཁོར་བ་འཇིག་གིས་བྱིན་གྱིས་བརླབས་པའི་ རིགས་དྲུག་གི་དུས་གསུམ་གྱི་གཟུགས་བརྙན་ཞལ་བ་ལ་འཆར་བ་ཡོད་པར་ཡང་ལྷ་རྣམས་དེ་མཐོང་ན་ཁྲག་དྲོན་མོ་བསྐྱུགས་ཏེ་འཆི་བས་ན། མནར་མེད་ཀྱི་རྣམ་པ་མ་བསྟན་པ་ལྟ་བུ་ཡིན་ལ། དམྱལ་བ་གཞན་བདུན་པོ་དག་ཡང་བྲིས་པ་མཐོང་ན་ ཡང་ལྟར་མི་བཟོད་དེ། བཤེས་སྤྲིང་ལས། དམྱལ་བ་བྲིས་པ་མཐོང་དང་ཐོས་པ་དང༌། །དྲན་དང་བཀླགས་དང་གཟུགས་སུ་བགྱིས་རྣམས་ཀྱང༌། །འཇིགས་པ་སྐྱེད་པར་བགྱིད་ན་མི་བཟད་པའི། །རྣམ་སྨིན་ཉམས་སུ་མྱོང་རྣམས་སྨོས་ ཅི་དགོས། །ཞེསསོ། །བི་བྷུ་ཏིས། ཉ་གསོན་པོ་མིས་གསོད་པའི་དོན་དུ་བུམ་པ་ལ་སོགས་པར་བཅུག་སྟེ་ནམ་འདོད་གསོད་པ་ལྟར་ཞེས་འབྲུ་གཉེར་བ་ལྟར་ན། ཁྱོད་ནི་གསོན་འདྲ་བ་ལྟར། །ཞེས་གཞུང་འདོན་པར་སྣང་ཡང༌། ཚེ་འདིར་ འཇིགས་དང་ལྡན་གྱུར་ན། །ཞེས་པ། སྐྲག་པས་མི་གཙང་ལུས་གོས་ཤིང༌། །སོགས་ཀྱི་གནད་གཅོད་ཀྱི་སྡུག་བསྔལ་ལ་སྙེག་པར་སྣང་བས་འབྲུ་སྔ་མ་ཉིད་ལེགས་ཏེ་ཉ་གསོན་པོ་བུམ་པར་བཅུག་སྟེ་ཟས་བཟང་པོས་བསེས་ན་དེས་ནི་བདག་ ཉིད་བདེ་བར་ཤེས་ཀྱི་གསོད་པར་མི་ཤེས་སོ། །མཐོ་རིས་སུ་བསོད་ནམས་ཀྱི་ལས་ཀྱིས་ལུས་གཞོན་ཤ་ཅན་དུ་འགྱུར་ལ། དེ་ནི་འཇམ་ཞིང་ཁ་དོག་བཟང་བ་ལྟ་ན་མཛེས་པས་བདག་ཉིད་བདེ་བར་བྱེད་པའོ། །ངན་སོང་དུ་ནི་སྡིག་པའི་ལས་ཀྱིས་

Page: 491 ༄༅། །ལུས་གཞོན་ཤ་ཅན་ཤིན་ཏུ་རྙི་པར་འགྱུར་ཡང་མི་དགེ་བའི་ལས་ཀྱིས་བསྐྱེད་པའི་ཕྱིར། གཞན་སྐྱུག་བྲོ་བ་དང་མི་མཛེས་པ་དང་འཇིགས་སུ་རུང་བ་སྐྱེད་ཅིང་རྩྭའི་མྱུ་གུས་ཀྱང་ལུས་ལ་ཚེར་མ་ལྟར་འཛུག་པའི་ཟུག་རྔུ་སྐྱེད་པས་ གཟེ་རེག་ཆེ་ཞིང་བདག་ཉིད་སྡུག་བསྔལ་བར་བྱེད་པ་སྟེ་སྦལ་པ་དང་ན་བུན་གྱི་འབུའི་ལུས་ལྟ་བུ་ཡིན་ལ་དམྱལ་བར་ནི་དེ་བས་འབུམ་འགྱུར་གྱིས་ཡང་སོས་ཀྱི་ལུས་རྙི་བ་ནས་མནར་མེད་ཀྱི་བར་དུ་བདུན་འགྱུར་གྱིས་རིམ་པས་རྙི་ཞིང་མི་སྡུག་པར་འགྱུར་ ལ། དེ་ལྟར་དམྱལ་བ་པའི་ལུས་ལས་ངན་གྱིས་བསྐྱེད་པའི་རྙི་ཞིང་གཞོན་ལ་མི་སྡུག་པ་ལ་ཟངས་ཞུན་ཁོལ་མས་སྲེག་ལ། ཡང་སྐད་ཅིག་དེ་ཉིད་དུ་དེ་བས་ཀྱང་རྙི་བའི་ལུས་སུ་འགྱུར་ཞིང་ཡང་སྲེག་པ་སོགས་ལོ་གྲངས་མཐའ་ཡས་པར་དེ་ལྟར་མྱོང་ ངེས་ཀྱི་ལས་བསགས་ནས་ད་ལྟ་རློམ་སེམས་དང་བཅས་ཏེ་བདེ་བའི་ང་རྒྱལ་གྱིས་སྡོད་ནུས་པ་འདི་ཅི་ལྟ་ཞིག་ཏུ་རུང༌། དེས་ན། བརྩོན་འགྲུས་མི་རྩོམ་འབྲས་བུ་འདོད། །གཟེ་རེག་ཆེ་ཡང་གནོད་པ་མང༌། །འཆི་བས་བཟུང་ཡང་ལྷ་ལྟར་ བསྙེམས། །ཀྱེ་ཧུད་སྡུག་བསྔལ་གྱིས་བཅོམ་ཁྱོད། །ཅེས་རང་ལ་ཁྲེལ་གདའ་བ་སྟེ་འདི་ལྟར་འབྲས་བུ་འདོད་ལ་བརྩོན་འགྲུས་མི་རྩོམ་པ་ནི་འགལ་ལོ་ཞེས་སོགས་ཀྱི་དོན་ཅན་ནོ། །དེས་ན་དལ་འབྱོར་གྱི་གྲུ་དང་དགེ་བའི་བཤེས་གཉེན་གྱི་ མཉན་པར་འཛོམ་པའི་དུས་འདིར་སེམས་ཁྱོད་སྡུག་བསྔལ་གྱི་ཆུ་བོ་འདི་ལས་རྒོལ་ཞིག་སྟེ་གྲུ་དང་མཉན་པ་འདི་ལྟ་བུ་ཕྱིས་མི་རྙེད་པས་ད་ལྟ་ཁོ་ན་ཆུ་བོ་ལས་རྒལ་དགོས་ཏེ་ཅུང་ཟད་ཀྱང་ལེ་ལོ་བྱ་བའི་དུས་ནི་འདི་མ་ཡིན་ནོ། །བཞི་པ་ངན་ཞེན་གྱི་ལེ་ ལོ་སྤང་བ་ནི། དགའ་བའི་རྒྱུ་ནི་མཐའ་ཡས་པའི། །དམ་ཆོས་དགའ་བའི་མཆོག་སྤངས་ནས། །སྡུག་བསྔལ་རྒྱུ་ཡི་གཡེང་བ་དང༌། །རྒོད་སོགས་ལ་ཁྱོད་ཅི་ཕྱིར་དགའ། །ཞེས་གསུངས་ཏེ། དུས་སྟོན་དང༌། གླུ་གར་དང༌། མགྲོན་དུ་བོད་

Page: 492 པ་སོགས་ནི་དགའ་བའི་གནས་ཡིན་པས་དེ་ལ་ཆགས་པར་རིགས་སོ་ཞེ་ན། གནས་སྐབས་དང༌། མཐར་ཐུག་གི་དགའ་བ་ཐམས་ཅད་ཀྱི་རྒྱུ་དམ་པའི་ཆོས་ཀྱི་དགའ་བ་སྤངས་ནས་སྡུག་བསྔལ་ཁོ་ནའི་རྒྱུར་གྱུར་པ་དེ་དག་ལ་ཅིའི་ཕྱིར། དགའ་སྟེ་གླུ་གར་ནི་ རང་ཉིད་ལུས་ངལ་ཞིང་དུབ་པར་འགྱུར་ལ། དཔྱོད་ལྡན་གྱི་ངོ་ཚ་དང་སྙིང་རྗེའི་གནས་ཡིན་ཞིང༌། དུས་སྟོན་སོགས་ཀྱང་འབྲས་བུ་མེད་པར་མ་ཟད། ཡམས་ནད་དང༌། རྒྱལ་པོའི་ཆད་པ་དང་ཆོམ་རྐུན་སོགས་འཇིགས་པ་དུ་མའི་གནས་ཡིན་པའི་ཕྱིར་ན། རྒོད་ཅིང་རྩེ་བ་སོགས་བྱིས་པའི་སྤྱོད་པ་དེ་དག་ལ་ངོ་ཚ་ཞིང་སྐྱོ་བར་རིགས་ཀྱི་དགའ་བར་མི་རིགས་སོ། །དེས་ན་རྒྱལ་བུ་ལྕགས་ཁྱིམ་སྐྱེས་ཀྱིས་ཀུ་མུ་དའི་དུས་སྟོན་མཐོང་བ་ན་འདི་ལྟ་བུ་ཡང་རིང་པོར་མི་གནས་སོ་སྙམ་པ་དང༌། མི་འདི་ཐམས་ ཅད་འཆི་བའི་ཆོས་ཅན་ནོ། །ཞེས་སྐྱོ་བར་གྱུར་པ་དེ་ལྟ་བུའི་འདུ་ཤེས་གོམས་པར་བྱའོ། །ལྔ་པ་སྒྱིད་ལུག་གི་ལེ་ལོ་སྤང་བ་ལ་གསུམ། བསྒྲུབ་བྱ་མཐའ་དག་མདོར་བསྟན་པ། འབྲས་བུ་བྱང་ཆུབ་ལ་སྒྱིད་ལུག་སྤང་བ། རྒྱུ་སྦྱིན་སོགས་ལ་ སྒྱིད་ལུག་སྤང་བའོ། །དང་པོ་བསྒྲུབ་བྱ་མཐའ་དག་མདོར་བསྟན་པ་ནི། སྒྱིད་ལུག་མེད་དང་དཔུང་ཚོགས་དང༌། །ལྷུར་བླང་བདག་ཉིད་དབང་བྱ་དང༌། །བདག་དང་གཞན་དུ་མཉམ་པ་དང༌། །གཞན་དང་བདག་ཏུ་རྗེ་བར་གྱིས། །ཞེས་གསུངས་ཏེ། སྒྱིད་ལུག་མེད་དང་ཞེས་ པས་སྒྱིད་ལུག་པའི་གཉེན་པོ་དངོས་བསྟན་ཏོ། །དཔུང་ཚོགས་དང་ཞེས་པས་མོས་པ་དང༌། བརྟན་པ་དང༌། དགའ་བ་དང༌། དོར་བའི་དཔུང་ཚོགས་བཞི་འཆད་ལ། ལྷུར་བླང་དང༌། བདག་ཉིད་དབང་དུ་བྱ་བ་དང་བཅས་ཏེ་བརྩོན་འགྲུས་བརྩམ་པ་དང༌། སྤེལ་ བ་ཡང་མདོར་བསྟན་ཏོ། །བདག་གཞན་མཉམ་པ་དང༌། བདག་གཞན་རྗེ་བར་གྱིས་ཤིག་པས་ནི་བྱང་ཆུབ་སེམས་དཔའི་སྤྱོད་པ་མཐའ་དག་ཡང་བསྟན་ཏེ་ཚིགས་སུ་བཅད་པ་འདི་ནི་དོན་ཟབ་ཅིང་རྒྱ་ཆེ་བ་ཡིན་ནོ། །འདིར་བི་བྷུ་ཏིས། ཚིགས་བཅད་

Page: 493 ༄༅། །འདི་གཞན་གྱིས་བཅུག་པ་ཡིན་གྱི་སློབ་དཔོན་གྱི་མ་ཡིན་ལ། གལ་ཏེ་སྡོམ་ཚིག་ཡིན་ནོ་ཞེ་ན། འོ་ན་ལེ་ལོའི་གཉེན་པོ་དང་ངན་ལ་ཆགས་པ་དང་བདག་ཉིད་བརྙས་པའི་གཉེན་པོ་སྐབས་སུ་བབ་པ་ཅི་སྟེ་མི་འཆད། བདག་ གཞན་མཉམ་པ་དང་བརྗེ་བ་ནི་འདིར་སྐབས་སུ་མ་བབ་སྟེ་བསམ་གཏན་གྱི་ལེའུ་ཁོ་ནར་བརྗོད་དགོས་སོ་ཞེས་བྲིས་མོད་ཀྱི། དེ་ལྟ་མ་ཡིན་ཏེ་རྒྱ་འགྲེལ་གཞན་རྣམས་ལས་འདི་གཞུང་ཉིད་དུ་འདོན་པའི་ཕྱིར་དང༌། གསེར་གླིང་པས་གཙོ་བོའི་ དོན་བཅུ་གཅིག་ཏུ་བསྡུས་པར་ཡང་ཚིགས་བཅད་འདི་སྣང་བའི་ཕྱིར་དང༌། འོག་གི་དཔུང་ཚོགས་སོགས་ཀྱི་བཤད་གཞི་འདི་ཡིན་པའི་ཕྱིར། སྐྱོན་དེ་དག་ཡང་མི་འཇུག་སྟེ། ལེ་ལོའི་གཉེན་པོ་ཞེས་པ་ལེ་ལོ་སྤྱིར་བཏང་གི་གཉེན་པོ་ལ་ཟེར་ན་བརྩོན་ལེ་ཚང་བ་ ཉིད་དེ་ཡིན་པའི་ཕྱིར་དང༌། སྙོམས་ལས་ཀྱི་ལེ་ལོའི་གཉེན་པོ་ལ་ཟེར་ན་གོང་དུ་བཤད་ཟིན་པའི་ཕྱིར། ངན་ཞེན་གྱི་གཉེན་པོའམ་དེ་མ་ཐག་ཏུ་བཤད་ཟིན་ལ། བདག་ཉིད་བརྙས་པའི་གཉེན་པོ་ནི་མ་བཤད་པ་ག་ལ་ཡིན་ཏེ། སྒྱིད་ལུག་མེད་དང་ཞེས་ པས་མདོར་བསྟན་ནས་འོག་ཏུ་ཚིགས་བཅད་བཅོ་ལྔས་རྒྱས་པར་འཆད་པའི་ཕྱིར། བདག་གཞན་མཉམ་པ་དང་བརྗེ་བ་བསམ་གཏན་གྱི་ལེའུར་འཆད་མོད་ཀྱང་ལེའུ་སྔ་མ་ལ་ཕྱི་མའི་ས་བོན་དགོས་པ་དང༌། ཤིན་ཏུ་དོ་གལ་ཆེ་བ་དག་ནི་བཟློས་ནས་ ངེས་པར་ཡང་བརྗོད་དགོས་པའི་ཕྱིར། དེས་ན་འདི་སློབ་དཔོན་གྱི་གསུང་ཉིད་དུ་བཟུང་ངོ༌། །གཉིས་པ་འབྲས་བུ་བྱང་ཆུབ་ལ་སྒྱིད་ལུག་སྤང་བ་ནི། བདག་གིས་བྱང་ཆུབ་ག་ལ་ཞེས། །སྒྱིད་ལུག་པར་ནི་མི་བྱ་སྟེ། །འདི་ལྟར་དེ་བཞིན་གཤེགས་པ་ནི། །བདེན་པ་གསུང་བས་ བདེན་འདི་གསུངས། །སྦྲང་བུ་ཤ་སྦྲང་བུང་པ་དང༌། །དེ་བཞིན་སྲིན་བུར་གང་གྱུར་པ། །དེས་ཀྱང་བརྩོན་པའི་སྟོབས་བསྐྱེད་ན། །བྱང་ཆུབ་འཐོབ་དཀའ་བླ་མེད་འཐོབ། །བདག་ལྟ་རིགས་ཀྱི་མིར་སྐྱེས་ལ། །ཕན་དང་གནོད་པ་ངོ་ཤེས་ནས། །

Page: 494 བྱང་ཆུབ་སྤྱོད་པ་མ་བཏང་ན། །བདག་གིས་བྱང་ཆུབ་ཅིས་མི་འཐོབ། །ཅེས་གསུངས་ཏེ། བྱང་ཆུབ་ནི་བསོད་ནམས་ཅན་རྣམས་ཀྱིས་འཐོབ་ཀྱི་བདག་འདྲ་བས་འཐོབ་བོ་སྙམ་དུ་སེམས་ཞུམ་པ་དང་སྒྱིད་ལུག་པར་མི་བྱ་སྟེ། བདེན་པར་ གསུང་བ་དེ་བཞིན་གཤེགས་པ་ཉིད་ཀྱིས་མདོ་ལས། ལག་བཟང༌། གཞན་ཡང་བྱང་ཆུབ་སེམས་དཔའ་འདི་ལྟར་ཡང་དག་པར་སློབ་སྟེ་གང་དག་སེང་གེ་དང༌། སྟག་དང་ཁྱི་དང༌། ཅེ་སྤྱང་ནས་སྦྲང་བུ་དང༌། ཤ་སྦྲང་དུ་གྱུར་པ་དེ་དག་གིས་ཀྱང་མངོན་པར་ རྫོགས་པར་འཚང་རྒྱ་བར་འགྱུར་ན་བདག་མིར་གྱུར་བཞིན་དུ་སྲོག་གི་ཕྱིར་ཡང་ཅིའི་ཕྱིར། ཡང་དག་པར་རྫོགས་པའི་བྱང་ཆུབ་འཐོབ་པར་འགྱུར་བའི་བརྩོན་འགྲུས་ཉམས་པར་བྱ་སྟེ། ཞེས་སྲོག་གི་ཕྱིར་ཡང་མི་འདོར་བར་གསུངས་པ་དང༌། རྒྱན་ ལས་ཀྱང༌། གང་ཕྱིར་སེམས་ཅན་མིར་གྱུར་པ། །ཚད་མེད་སྐད་ཅིག་རེ་རེ་ལ། །རྫོགས་པའི་བྱང་ཆུབ་ཐོབ་དེའི་ཕྱིར། །ཞུམ་པ་དང་དུ་བླང་མི་བྱ། །ཞེས་སོགས་གསུངས་པའི་ཕྱིར། དེས་ན་སྦྲང་བུ་སོགས་ཀྱིས་ཀྱང་སེམས་སྐྱེད་པ་ཡོད་ ན་ངེས་པར་འགྲུབ་ལ་འདས་པ་དང༌། ད་ལྟ་བའི་སངས་རྒྱས་རྣམས་ཀྱང་སྔོན་སེམས་ཅན་དུ་གྱུར་པ་བདག་ཅག་ལྟ་བུ་ལས་བརྩོན་འགྲུས་ཀྱི་ཁྱད་པར་གྱིས་སྔོན་དུ་སངས་རྒྱས་པ་ཁོ་ན་ཡིན་པའི་ཕྱིར་རོ། །དེས་ན་བདག་ད་ལྟ་དལ་འབྱོར་གྱི་ལུས་ ཐོབ་ལ་ཕན་གནོད་ཀྱི་གནས་ཆོས་དང་ཆོས་མ་ཡིན་པ་ཁ་ཅིག་ཤེས། མི་ཤེས་པ་དག་ཡང་དགེ་བའི་བཤེས་གཉེན་ལ་དྲིར་ཡོད་པའི་དུས་འདིར་བདག་ཉིད་ཀྱིས་བརྩོན་འགྲུས་བརྩམས་ན་བྱང་ཆུབ་ཅིས་མི་འཐོབ་སྟེ་ད་ནི་ཤིན་ཏུ་འབད་པའི་དུས་ ཡིན་གྱིས་ཞུམ་པའི་དུས་མ་ཡིན་ནོ། །ལེགས་བཤད་བསྡུས་པར་ནི། བདག་ལྟ་རིགས་ཀྱི་མིར་སྐྱེས་ལ། །ཞེས་པའི་རིགས་ལ། རང་བཞིན་གནས་རིགས་དང༌། རྒྱས་འགྱུར་གྱི་རིགས་གཉིས་ཀྱི་བཤད་པ་བྱེད་པར་སྣང་ངོ༌། །གསུམ་པ་

Page: 495 ༄༅། །རྒྱུ་སྦྱིན་སོགས་ལ་སྒྱིད་ལུག་སྤང་བ་ལ་གསུམ། སྦྱིན་སོགས་ཀྱི་སྡུག་བསྔལ་ནི་སྡུག་བསྔལ་ཆུང་ངུར་བསྟན་པ། གོམས་ན་མི་དཀའ་བར་བསྟན་པ། དེ་ཉིད་བདེ་བའི་མཆོག་ཏུ་བསྟན་པའོ། །དང་པོ་སྦྱིན་སོགས་ཀྱི་སྡུག་བསྔལ་ནི་སྡུག་བསྔལ་ཆུང་ངུར་བསྟན་པ་ནི། འོན་ཏེ་རྐང་ལག་ལ་སོགས་པ། །བཏང་དགོས་བདག་ ནི་འཇིགས་ཞེ་ན། །ལྕི་དང་ཡང་བ་མ་དཔྱད་པར། །རྨོངས་པས་བདག་ནི་འཇིགས་པར་ཟད། །བསྐལ་པ་བྱེ་བ་གྲངས་མེད་དུ། །ལན་གྲངས་དུ་མར་གཅོད་པ་དང༌། །དབུག་དང་སྲེག་དང་གཤེག་འགྱུར་གྱི། །བྱང་ཆུབ་འཐོབ་པར་མི་འགྱུར་ རོ། །བདག་གིས་བྱང་ཆུབ་སྒྲུབ་པ་ཡི། །སྡུག་བསྔལ་འདི་ནི་ཚོད་ཡོད་དེ། །ཟུག་རྔུ་ཁོང་བརླག་གནོད་བསལ་ཕྱིར། །ལུས་རྨ་གཏོད་པའི་སྡུག་བསྔལ་བཞིན། །སྨན་པ་ཀུན་ཡང་གསོ་དཔྱད་ཀྱི། །མི་བདེ་བ་ཡིས་ནད་མེད་བྱེད། །དེ་བས་ སྡུག་བསྔལ་མང་པོ་དག །གཞོམ་ཕྱིར་མི་བདེ་ཆུང་བཟོད་བྱ། །གསོ་དཔྱད་ཕལ་པ་འདི་འདྲ་བའང༌། །སྨན་པའི་མཆོག་གིས་མ་མཛད་དེ། །ཆོ་ག་ཤིན་ཏུ་འཇམ་པོ་ཡིས། །ནད་ཆེན་དཔག་མེད་གསོ་བར་མཛད། །ཅེས་པ་དང༌། གཉིས་པ་གོམས་ན་མི་དཀའ་བར་བསྟན་པ་ནི། ཚོད་མ་ལ་སོགས་སྦྱིན་པ་ལའང༌། །འདྲེན་པས་ཐོག་མར་སྦྱོར་བར་མཛད། །དེ་ལ་གོམས་ནས་ཕྱིས་ནས་ནི། །རིམ་གྱིས་རང་གི་ཤ་ཡང་གཏོང༌། །གང་ཚེ་རང་གི་ལུས་ལ་ནི། །ཚོད་སོགས་ལྟ་བུའི་བློ་སྐྱེས་པ། ། དེ་ཚེ་ཤ་ལ་སོགས་གཏོང་བ། །དེ་ལ་དཀའ་བ་ཅི་ཞིག་ཡོད། །ཅེས་པ་དང༌། གསུམ་པ་དེ་ཉིད་བདེ་བའི་མཆོག་ཏུ་བསྟན་པ་ནི། སྡིག་པ་སྤངས་ཕྱིར་སྡུག་བསྔལ་མེད། །མཁས་པའི་ཕྱིར་ན་མི་དགའ་མེད། །འདི་ལྟར་ལོག་པར་རྟོག་པ་དང༌། །སྡིག་པས་སེམས་དང་ལུས་ ལ་གནོད། །བསོད་ནམས་ཀྱིས་ནི་ལུས་བདེ་ལ། །མཁས་པ་ཡིས་ནི་སེམས་བདེ་ན། །གཞན་དོན་འཁོར་བར་གནས་ཀྱང་ནི། །སྙིང་རྗེ་ཅན་དག་ཅི་སྟེ་སྐྱོ། །འདི་ནི་བྱང་ཆུབ་སེམས་སྟོབས་ཀྱིས། །སྔོན་གྱི་སྡིག་པ་ཟད་བྱེད་ཅིང༌། །

Page: 496 བསོད་ནམས་རྒྱ་མཚོ་སྡུད་བྱེད་ཕྱིར། །ཉན་ཐོས་རྣམས་ལས་མཆོག་ཏུ་བཤད། །དེ་བས་སྐྱོ་ངལ་ཀུན་སེལ་བའི། །བྱང་ཆུབ་སེམས་ཀྱི་རྟ་ཞོན་ནས། །བདེ་ནས་བདེ་བར་འགྲོ་བ་ལ། །སེམས་ཤེས་སུ་ཞིག་སྒྱིད་ལུག་འགྱུར། ། ཞེས་པས་བསྟན་ཏེ། དང་པོ་ལ་ཡང་ཚིགས་བཅད་དང་པོས་མཚམས་སྦྱར། གཉིས་པས་སྡུག་བསྔལ་ཆུང་ངུ་འདི་མ་སྐྱེད་ན་སྡུག་བསྔལ་གཞན་ཚད་མེད་མྱོང་དགོས་པར་བསྟན། གཉིས་ཀྱིས་དེའི་དཔེ་བཤད། ཐ་མས་དཔེ་ལས་ལྷག་པར་ བསྟན་ཏོ། །གཉིས་པ་ལ་ཡང་ཚིགས་བཅད་སྔ་མས་གོམས་སུ་གཞུག་ཚུལ་དང༌། ཕྱི་མས་གོམས་ན་སླ་བར་བསྟན་ཏོ། །གསུམ་པ་ལ་ཡང་དང་པོས་འཁོར་བའི་རང་བཞིན་ཤེས་པས་འཇིགས་པ་མེད་པར་བསྟན། གཉིས་པས་ འཁོར་བས་མི་སྐྱོ་བར་བསྟན། གསུམ་པས་དེའི་ཕྱིར་ཉན་རང་ལས་ལྷག་པར་བསྟན། ཐ་མས་དོན་བསྡུས་པའོ། །དེ་ཡང་བྱང་ཆུབ་སྒྲུབ་པ་ནི་མགོ་དང་རྐང་ལག་ལ་སོགས་ཀྱང་གཏོང་དགོས་སྐད་ན་དེ་ལྟ་བུ་མི་ནུས་སོ་ཞེ་ན། དེ་ནི་ཆུའི་སྒྲ་ ཐོས་པ་ཙམ་གྱིས་ལྷམ་འབུད་པ་ལྟར་མ་བརྟགས་པར་གྱ་ཚོམས་སུ་སྐྲག་པར་ཟད་དེ་ཐབས་མཁས་པས་མགོ་ལ་སོགས་པ་གཏོང་བ་མེད་པར་བདེ་བས་ལམ་བགྲོད་པ་ཡང་ཡོད་ལ། མགོ་ལ་སོགས་གཏོང་བ་དེའི་ཚེ་ཡང་བྱང་ཆུབ་ཆེད་དུ་བྱ་དཀའ་ སྤྱོད་པ་འདི་ལྕི་འམ། འོན་ཏེ་འཁོར་བའི་སྡུག་བསྔལ་གཞན་ལྕི་ཞེས་ལྕི་ཡང་གི་ཁྱད་པར་བརྟགས་ན་འདི་ནི་ཡུད་ཙམ་ཞིག་སྡུག་བསྔལ་བར་སྣང་བ་འདི་བཟོད་པར་བྱས་པ་ཁོ་ནས་སྡུག་བསྔལ་གྱི་རྒྱ་མཚོ་འདི་བ་ལང་གི་རྐང་རྗེས་ཀྱི་ཆུ་ཙམ་དུ་བྱེད་ལ་ཚོགས་ གཉིས་ཀྱི་ཁྱད་པར་མཐའ་ཡས་པ་འཐོབ་པས་བཤང་གཅིའི་བུམ་པ་བཙོངས་ཏེ་གྲུབ་པའི་བུམ་པ་བཟང་པོ་ཐོབ་པ་ལྟ་བུ་ཡིན་པས་སྡུག་བསྔལ་འདི་ནི་ཆེས་ཡང་བར་མཐོང་ལ། འདི་ལྟར་མ་སྤྱད་ན་འཁོར་བ་མཐའ་མེད་དུ་འཁྱམ་ཞིང་དེར་མི་འདོད་མི་

Page: 497 ༄༅། །བཟོད་བཞིན་དུ་དམྱལ་བ་ལ་སོགས་པར་འབྲས་ལྟར་འཚེད་པ་དང༌། ཡུངས་ཀར་ལྟར་འཚིར་བ་དང༌། ཀར་ཥ་པ་ཎ་ཙམ་དུ་གཏུབ་པ་སོགས་གྲངས་མེད་པ་བསྐལ་པ་ཐམས་ཅད་གཏུགས་པར་མྱོང་དགོས་ལ་དེས་རང་གཞན་གང་ལའང་ ཅུང་ཟད་ཀྱང་མི་ཕན་ནོ། །དེ་ལྟར་ལྕི་ཡང་ལ་དཔྱད་ན་བྱང་ཆུབ་སྒྲུབ་པའི་སྡུག་བསྔལ་འདི་ནི་ཤིན་ཏུ་སྡུག་བསྔལ་ཆུང་ངུ་སྡུག་བསྔལ་ལྟར་སྣང་ཙམ་དུ་ཟད་དེ། ཚེ་འདི་ཁོ་ནའི་ནང་མདེའུ་དུག་ཅན་འདོད་པ་དང༌། སྙིང་ཆུ་དང༌། གློ་རྣག་དང༌། རྩ་སྦུབས་ཀྱི་ནད་འབྱིན་པའི་ ཕྱིར་སྨན་པས་རྨ་གཏོང་པ་ལྟ་བུ་སྟེ་དཔྱད་རྩུབ་མོ་དེ་དག་གིས་ཀྱང་ནད་ཆུང་ངུ་འབྱིན་པར་བྱེད་ན་སྐྱེ་བ་གཏན་དུ་སྡུག་བསྔལ་ཐམས་ཅད་ཀྱི་རྒྱུར་གྱུར་པའི་ནད་ཆེན་པོ་དབྲལ་བར་དཀའ་བ་བདག་ཏུ་འཛིན་པ་གཞོམ་པའི་ཆེད་དུ་སྡུག་བསྔལ་ཆུང་ངུ་དེ་ཅིའི་ ཕྱིར་མི་བཟོད། དེ་ལྟ་མོད་ཀྱིས་རྫོགས་པའི་སངས་རྒྱས་ཀྱིས་ནི་གཏར་སྲེག་ཙམ་གྱི་དཔྱད་རྩུབ་མོའང་མ་གསུངས་ཏེ་སེམས་ལ་གྲོས་གདབ་པའི་ཆོ་ག་འཇམ་པོ་ཁོ་ནས་སྒོ་གསུམ་གྱི་ནད་ཐམས་ཅད་ཅིག་ཆར་ཞི་བར་མཛད་པའི་ཕྱིར་དང༌། ཉན་ ཐོས་ཀྱི་སྐབས་སུ་ཡོ་བྱད་བསྙུངས་པ་བསྔགས་པའི་ཚེའང་ངལ་ཞིང་དུབཔའི་མཐའ་སྤང་བར་གསུངས་པའི་ཕྱིར་རོ། །ངེས་པར་མགོ་ལ་སོགས་པ་གཏོང་དགོས་སོ་ཞེས་ཁྱབ་འཇུག་གི་ཚིག་ལྟ་བུས་ཁྲིམས་བཅས་པ་ཡང་མ་ཡིན་ཏེ། དང་པོར་སེམས་ ཞེན་པ་ལས་ལྡོག་པ་དང༌། རང་གཞན་གྱི་བདེ་བའི་ཆེད་དུ་དང་པོར་ཚོད་མ་ངན་ངོན་དང༌། ཁ་ཟས་ཀྱི་ལྷག་མ་རང་བཞིན་གྱིས་དོར་བྱ་དང༌། ཆུ་ཙམ་གྱི་སྦྱིན་པ་བྱོས་ཤིག་ཞེས་བསྟན་ཏེ། དེ་གོམས་པ་ན་དངོས་པོ་ཆེན་པོའང་མི་འཕངས་པར་གཏོང་བར་ནུས་ཤིང་མཐར་ ལུས་དང་ཚོད་མའང་མཉམ་པར་མཐོང་སྟེ་གཉི་ག་ལ་སེམས་པ་མེད་པ་དང་སུའི་ཡང་མ་ཡིན་པར་མཐོང་བས་ལུས་ལ་གཅེས་སྤྲས་དང༌། བདག་གིར་འཛིན་པ་ལས་ལོག་སྟེ་ཆགས་པ་མེད་ཅིང་སྙིང་རྗེའི་གཞན་དབང་དུ་གྱུར་པས་བདག་ཉིད་ཀྱིས་དགའ་བཞིན་དུ་

Page: 498 གཏོང་བ་བུ་གཅེས་པ་ལ་ཟས་བཟང་པོ་སྟེར་བ་ལྟ་བུའི་བློ་འབྱུང་བ་ཡིན་ཏེ། སྡུག་དང་མི་སྡུག་ཀུན་ལ་ལྟ་བ་མེད་པ་ཡིན། །མགོ་དང་རྐང་ལག་གཏོང་ཞིང་ཞུམ་པའི་སེམས་ཀྱང་མེད། །བདོག་པ་ཐམས་ཅད་གཏོང་ཞིང་རྟག་ཏུ་ཞེན་པ་མེད། ། ཆོས་རྣམས་རང་བཞིན་བདག་མེད་ཡ་མ་རླར་ཤེས་ནས། །བདག་གི་ཤ་ཡང་གཏོང་ལ་ཞུམ་པའི་སེམས་མེད་ན། །དེ་ཚེ་ཕྱི་རོལ་དངོས་པོ་གཏོང་ལ་སྨོས་ཅི་དགོས། །ཞེས་གསུངས་པ་ཡིན་གྱི། དུས་མིན་དུ་ལྕེབ་དགོས་པར་བསྟན་པ་མིན་ལ། དེ་ལྟར་དུས་སུ་གཏོང་བ་དེ་ནི་ཟློག་པར་ཡང་མི་མཛད་དེ། འདུལ་བར་ཡང་ཁྱིམ་བདག་མོས་རང་གི་ཤ་ཁྲག་གིས་དགེ་སློང་ཞིག་གི་སྨན་བྱས་པ་ན་ཁྱིམ་བདག་མོ་དགེ་བའི་བསམ་པ་ཅན་དེ་བོས་ཤིག །ཅེས་དང༌། ཅི་འདི་བྱང་ཆུབ་སེམས་དཔའི་སྤུངས་ ཉམས་སུ་མྱོང་བར་བྱེད་དམ་ཞེས་ཟུར་གྱིས་བྱང་ཆུབ་སེམས་དཔར་བསྟན་གྱི་ཟློག་པར་མ་མཛད་ལ། དགེ་སློང་རྣམས་ལ་ནི་མིའི་ཤ་ཟ་བར་མི་བྱའོ། །ཞེས་བཅས་པ་མཛད་པ་དང༌། ཤྭ་རིའི་བུས་མྱ་ངན་ལས་འདའ་བར་ཞུས་བས་མྱ་ངན་ལས་ འདའ་བའི་ཕྱིར་སྨྲ་འམ་ཞེས་ལན་གསུམ་དུ་གསུངས་ནས་ཐ་མ་ལ་འདི་ནི་འདུས་བྱས་ཀྱི་ཆོས་ཉིད་ཡིན་ན་ངས་སྨྲར་ཅི་ཡོད་ཅེས་ཆོས་ཉིད་ཡིན་པར་གསུངས་ནས་གནང་བཀག་མི་དགོས་པར་བསྟན་པ་ལྟར་བྱང་ཆུབ་སེམས་དཔའ་དེ་ལྟ་བུའི་ཚེ་ལུས་ གཏོང་བ་ནི་སྐབས་དེའི་ཆོས་ཉིད་ཡིན་པས་ཟློག་པར་ཡང་མི་མཛད་པ་ཡིན་ནོ། །དེས་ན་ཁྱིམ་བདག་ཤིན་ཏུ་སེར་སྣ་ཅན་ཞིག་ལ་ཁོ་རང་གི་ལག་པ་གཡས་པས་གཡོན་པ་ལ་སྟེར་བ་བསླབས་པས་ཕྱིས་བདོག་པ་ཐམས་ཅད་ཆགས་མེད་དུ་ གཏོང་བ་ཞིག་བྱུང་བར་བཤད་པ་ལྟར་སྤྱོད་པ་ཐམས་ཅད་ཀྱང་གོམས་པའི་རྩ་བ་ཅན་ཡིན་ནོ། །ཁ་ཅིག་བྱང་ཆུབ་སེམས་དཔའ་ནི་འཁོར་བར་བསྐལ་པ་མཐའ་ཡས་པར་གནས་དགོས་སོ་ཞེས་ཐོས་ནས་འཁོར་བ་ནི་སྐྱི་གཡའ་ཞིང་འཇིགས་སུ་

Page: 499 ༄༅། །རུང་བ་གཤིན་རྗེའི་དོང་ལྟ་བུ་ཡིན་པས་དེ་ཙམ་དུ་གནས་པའི་སྡུག་བསྔལ་ཇི་ལྟར་བཟོདེས་ན་སྲིད་པ་ལས་མྱུར་དུ་ཐར་བར་བྱེད་པའི་ཉན་རང་གི་བྱང་ཆུབ་སྒྲུབ་བོ་ཞེ་ན། འདི་ཡང་གང་ལྕི་བ་དང་གང་ཡང་བ་མ་དཔྱད་པས་སྐྲག་ པ་ཉིད་ཡིན་ཏེ། མི་སྐྱེ་བའི་ཆོས་ལ་བཟོད་པ་ཆུང་ངུ་ཐོབ་པ་ཡང་འདོད་ན་ཞག་བདུན་གྱིས་ཡང་དག་པའི་མཐའ་མངོན་དུ་བྱེད་པར་ནུས་མོད་ཀྱང་སྙིང་རྗེ་ཆེན་པོས་སེམས་ཅན་ལ་བརྩེ་བ་འབའ་ཞིག་གི་ཕྱིར་དང༌། འཁོར་བ་དང་མྱ་ངན་ལས་འདས་ པ་ནི་རང་བཞིན་གྱིས་མཉམ་པ་ཉིད་དུ་གཟིགས་པས་རེ་དོགས་ཀྱི་བློ་མི་མངའ་བ་དང༌། བདེ་བ་དང་སྡུག་བསྔལ་ནི་སྒྲོ་བཏགས་གོམས་པར་ཁོ་ནར་ཟད་ཀྱི་ངོ་བོ་ཉིད་ཀྱིས་མ་ཡིན་པར་གཟིགས་པས་བླང་དོར་གྱི་དམིགས་པ་མི་མངའ་བའི་ཕྱིར། ཡང་ དག་པའི་མཐའ་ལག་ཐིལ་དུ་འོངས་ཀྱང་དུས་མིན་དུ་མངོན་དུ་མི་བྱེད་པར་སྙིང་རྗེའི་ཆུས་བསྐྲུན་པ་བསམ་གྱིས་མི་ཁྱབ་པའི་འཆི་འཕོ་ཡོངས་སུ་སྟོན་པས་འདམ་ན་པདྨ་ལྟར་འཁོར་བར་སྤྱོད་ཀྱང་དེས་མ་གོས་པར་གནས་ཤིང་བསྐལ་པ་མཐའ་ཡས་པ་ དང་སྐད་ཅིག་མ་གཅིག་ཡང་ཡང་དག་པར་རིང་ཐུང་གི་མཚན་མ་མི་མངའ་བར་གཟིགས་པས་དུས་རིང་ངོ་ཞེའམ་ཐུང་ངོ་ཞེས་མི་རྟོག་པའི་ཕྱིར། སྐྱོ་བ་མེད་པར་རྒྱལ་པོ་སྐྱེད་ཚལ་ན་སྤྱོད་པ་ལྟར་བསམས་བཞིན་དུ་དགའ་བས་བཞུགས་པར་ཟད་ཀྱི་སྡུག་ བསྔལ་ཞིང་དབང་མེད་དུ་འཁོར་བར་གནས་པ་ག་ལ་ཡིན་ཏེ། ཡུལ་ཡུལ་ཅན་ལ་མཚན་མར་ཞེན་པའི་ལོག་རྟོག་གིས་ནི་ཡིད་མི་བདེ་དང་དེས་སེམས་ཀྱི་སྡུག་བསྔལ་སྐྱེད་ལ་སྡིག་པའི་རྣམ་སྨིན་གྱིས་ལུས་ལ་ནད་མཚོན་གྱིས་གནོད་པར་འགྱུར་ བ་ཡིན་ལ། བྱང་ཆུབ་སེམས་དཔའ་དེ་ནི་ལས་ཀྱི་སྒྲིབ་པ་མི་དགེ་བ་བཅུ་ཀུན་ཏུ་སངས་པའི་ཕྱིར། འབྲས་བུ་སྡུག་བསྔལ་མེད་ལ། ཆོས་ཐམས་ཅད་རང་བཞིན་མེད་པའི་མཐོང་བ་ལ་མཁས་པའི་ཕྱིར་ཡིད་མི་བདེ་དང༌། དེས་ཀུན་ནས་བསླང་པའི་ཉོན་མོངས་

Page: 500 མེད་པའི་ཕྱིར་རོ། །དེས་ན་བསོད་ནམས་གཞལ་དུ་མེད་པ་སྐད་ཅིག་རེ་རེ་ལ་ཡང་གོང་ནས་གོང་དུ་འཕེལ་ཞིང་ཆོས་ཐམས་ཅད་ཀྱི་རང་བཞིན་ངོ་བོ་ཉིད་མེད་པ་མཉམ་པ་ཉིད་ལས་མི་གཡོ་བ་ལ་སངས་རྒྱས་དང་མཚུངས་པའི་གཟིགས་པ་ ཐོབ་པ་དེ་ནི་བདེ་བར་འགྲོ་བའི་ཏིང་ངེ་འཛིན་གྱིས་དུས་འདའ་ཞིང་ཟག་མེད་ཀྱི་བསོད་ནམས་ཆེན་པོས་བསྒྲུབས་པའི་འཕགས་པའི་ལོངས་སྤྱོད་ཚུར་མཐོང་གི་ཡུལ་མ་ཡིན་པ་རྣམས་ཀྱི་རྟག་དུ་དགྱེས་པར་རྩེན་པའི་སྙིང་རྗེའི་མཐུ་ཅན་འདི་དག་ ཇི་ལྟར་འཁོར་བས་སྐྱོ་སྟེ་ལུས་སེམས་ཀྱི་བདེ་བ་འདི་ནི་བརྒྱ་བྱིན་དགའ་ཚལ་ན་མི་སྐྱོ་བ་ལྟ་བུས་དཔེ་དང་ཆ་དང་རྒྱུར་ཡང་མི་བཟོད་དོ། །འདི་ལྟར་བྱང་ཆུབ་སེམས་དཔའ་གཅིག་ཁོ་ནས་ཆོས་ཐམས་ཅད་གཟོད་ནས་དག་པར་མཐོང་བའི་ཉི་མའི་དཀྱིལ་ འཁོར་དམིགས་པ་མེད་པའི་སྙིང་རྗེ་ཆེན་པོའི་འོད་ཟེར་མཐའ་ཡས་པ་ཅན་གྱིས་སྒྲིབ་པའི་མུན་པ་དྲུང་འབྱིན་ཞིང་བསོད་ནམས་ཀྱི་ཆུ་བོ་ཇི་སྙེད་པ་སེམས་ཀྱི་རྒྱ་མཚོར་རྒྱུན་མི་འཆད་པར་སྡུད་པ་འདི་ལྟ་བུ་ཉན་ཐོས་དང་རང་སངས་རྒྱས་བྱེ་བ་ཕྲག་དུ་མ་ ལ་ཡང་ག་ལ་ཡོད་དེ། དེའི་ཕྱིར་བྱང་ཆུབ་སེམས་དཔའ་བུད་མེད་འགྱུར་བའི་སྤོབས་པས་འཕགས་པ་རབ་འབྱོར་ཟིལ་གྱིས་མནན་པ་དང་བུ་མོ་ཟླ་མཆོག་གི་སྤོབས་པས་མཽངྒལ་གྱི་བུ་ཟིལ་གྱིས་མནན་ཅིང༌། ཕྱིས་དགྲ་བཅོམ་པ་དེ་དག་གིས་ཕྱག་བྱས་པ་ན་འཕགས་ པ་ཤྭ་རིའི་བུའི་སྤོབས་པ་ཡང་ཟིལ་གྱིས་ནོན་ཏེ། འདི་དག་ི་ལྷ་དང་བཅས་པའི་འཇིག་རྟེན་ཐམས་ཅད་ཀྱི་ཕྱག་གི་ཡུལ་ཡིན་ན་ཚེ་དང་ལྡན་པ་རབ་འབྱོར་དང་མཽངྒལ་གྱི་བུས་ལྟ་ཅི་སྨོས་ཞེས་སྨྲས་པ་ལྟ་བུའི་ཕྱིར། དེ་ལྟ་མོད་ཀྱི་བྱང་ཆུབ་སེམས་དཔའ་ཆེན་ པོ་དེ་དག་ལྟ་ཞོག་སྨོན་འཇུག་གི་སེམས་དང་པོ་བསྐྱེད་པའི་བྱང་ཆུབ་སེམས་དཔའ་ཡང་ཉན་རང་ལས་ཆེས་རྨད་དུ་བྱུང་སྟེ། འཁོར་ལོས་བསྒྱུར་བའི་རྒྱལ་པོར་འགྱུར་རྒྱུ་ནུར་ནུར་པོ་ལ་གནས་པ་ཡང་མངོན་པར་ཤེས་པ་ཅན་གྱི་མཐོང་བར་རྒྱལ་པོ་དང་

Page: 501 ༄༅རྒྱལ་ཕྲན་ཇི་སྙེད་པ་དང་མི་མཉམ་པར་མཐོང་བ་ལྟ་བུའི་ཕྱིར་དང༌། ཀ་ལ་པིངྐའི་ཕྲུ་གུ་སྒོ་ང་ནས་མ་བྱུང་བའི་སྐད་ཀྱིས་བྱ་གཞན་ཐམས་ཅད་ཟིལ་གྱིས་གནོན་པ་དང༌། སེང་གེའི་ཕྲུ་གུ་བཙས་མ་ཐག་པ་ཡང་སེང་གེའི་ང་རོ་ཐོས་ན་ མི་སྐྲག་ཅིང་དགའ་བ་འཕེལ་ལ་བཙས་མ་ཐག་པ་དེའི་ང་རོ་ཡང་དུད་འགྲོ་གཞན་གྱིས་མི་བཟོད་པ་ལྟར། ཐེག་ཆེན་གྱི་རིགས་ཅན་ལས་དང་པོ་པ་ཡང་སྟོང་པ་ཉིད་ལ་སོགས་པ་ཟབ་མོའི་སྒྲར་འབྱིན་ཞིང་ཟབ་རྒྱས་ཀྱི་སྡེ་སྣོད་ཐོས་ན་མི་སྐྲག་པར་མོས་ཤིང༌། དེའི་སྟོང་པ་ཉིད་ལ་སོགས་པའི་སྨྲ་བ་རྩམ་ཡང་དམིགས་པ་ཅན་ཐམས་ཅད་ཀྱིས་བཟོད་པར་མི་ནུས་པར་སྡོང་རྒྱན་ལས་གསུངས་པ་ལྟར་དང༌། སྔོན་ཁྱེའུ་གསུམ་དུ་གྱུར་པ་ན་དབུས་མས་སངས་རྒྱས་དང་གཉིས་ཀྱིས་ཉན་ཐོས་སུ་སེམས་བསྐྱེད་པ་ ལས་བརྩམས་ནས་ཤཱ་རིའི་བུ་དང་མཽངྒལ་གྱི་བུ་འདི་གཉིས་དེའི་ཚེ་འཁོར་བས་སྐྲག་སྟེ་མྱུར་དུ་འཐར་པར་འདོད་པས་ཉན་ཐོས་སུ་སེམས་བསྐྱེད་པ་ཡིན་ཡང་ང་འཚང་མ་རྒྱས་ཀྱི་བར་དུ་འདི་གཉིས་ཐར་བར་མ་ནུས་ལ་ང་སངས་རྒྱས་ནས་འདི་གཉིས་ངས་ བཏུལ་བ་ཡིན་ནོ། །དེས་ན་མྱུར་དུ་འཁོར་བ་ལས་འཐར་བར་འདོད་པས་ཀྱང་རྫོགས་པའི་བྱང་ཆུབ་ཏུ་སེམས་བསྐྱེད་པར་བྱའོ། །ཞེས་གསུངས་པ་ཡིན་ནོ། །དེས་ན་སྐྱོ་འཇིགས་ཐམས་ཅད་ལས་རྣམ་པར་རྒྱལ་བའི་བྱང་ཆུབ་ཀྱི་སེམས་ཀྱི་ཐེག་པ་ལྷའི་ གཞལ་མེད་ཁང་བྱེ་བར་ལྡན་པའི་རིན་པོ་ཆེའི་ཤིང་རྟ་ནམ་མཁའ་ལྡིང་འབུམ་གྱིས་དྲངས་པ་ལྟ་བུའི་ཐེག་པ་ལ་ཞོན་ནས་བདེ་བ་ནས་བདེ་བ་དང༌། དེ་བཞིན་ཉིད་ནས་དེ་བཞིན་ཉིད་དུ་འགྲོ་བ་ལ་སུ་ཞིག་ངལ་ཏེ། དེའི་ཕྱིར། ཐེག་པ་འདི་ནི་མཁའ་འདྲ་གཞལ་ མེད་ཁང་ཆེན་ཏེ། །དགའ་སྐྱིད་བདེ་བ་མངོན་པར་འཐོབ་བྱེད་ཐེག་པའི་མཆོག །ཞེས་གསུངས་པ་ཡིན་ནོ། །འདི་དག་ཏུ་དགེ་བའི་ལྷས། ལྕི་དང་ཡང་བ་མ་དཔྱད་པས། །ཞེས་པ་ལ། གཅེས་དང་མི་གཅེས་མ་དཔྱད་པར། །ཞེས་གཞུང་

Page: 502 འདོན་ཞིང་འོག་ཏུ་ཉན་ཐོས་དག་ལས་བྱང་ཆུབ་སེམས་དཔའ་ཐ་ནའང་བསྐལ་བ་གྲངས་མེད་པ་བཞི་བཅུས་མྱུར་བར་འགྱུར་རོ། །ཞེས་བྲིས་ལ། ཡང་དེར་ནད་བཞི་བརྒྱ་རྩ་བཞིས་ཟིན་པ་ལ་ཇི་ལྟར་དཔྱོད་པ་འཇམ་པོས་གསོ་བར་མཛད་པ་ཞེས་སྣང་ ཀྱང་ནད་ཆེན་དཔག་མེད་ཅེས་པ་ནད་བཞི་བརྒྱ་རྩ་བཞི་ལས་ཆེས་འཇིགས་པའི་ཉོན་མོངས་ཀྱི་ནད་མཐའ་དག་ཡིན་གྱི་མིའི་ནད་བཞི་བརྒྱ་རྩ་བཞི་རྩམ་ཉིད་ལ་འབྲུ་གཉེར་བྱ་མ་ཡིན་ནོ། །ེ་ལྟར་མི་མཐུན་པའི་ཕྱོགས་ལེ་ལོ་བཤད་ནས། བཞི་ པ་བརྩོན་འགྲུས་བརྩམ་ཚུལ་དངོས་ལ། བསྟན་བཤད་གཉིས་ལས། དང་པོ་མདོར་བསྟན་པ་ནི། སེམས་ཅན་དོན་གྲུབ་བྱ་ཕྱིར་དཔུང༌། །མོས་བརྟན་དགའ་དང་དོར་བ་ཡིན། །མོས་པ་སྡུག་བསྔལ་འཇིགས་པ་དང༌། །དེ་ཡི་ཕན་ཡོན་བསམས་པས་སྐྱེ། ། དེ་ལྟར་མི་མཐུན་ཕྱོགས་སྤངས་ཏེ། །མོས་དང་ང་རྒྱལ་དགའ་དང་དོར། །ལྷུར་བླང་དབང་བསྒྱུར་སྟོབས་ཀྱིས་ནི། །བརྩོན་འགྲུས་སྤེལ་ཕྱིར་འབད་པར་བྱ། །ཞེས་གསུངས་ཏེ། རྒྱལ་པོ་ཆེན་པོ་རྣམས་དཔུང་ཚོགས་ཡན་ལག་བཞིས་ ཕས་རྒོལ་འཇོམས་ཤིང་དཀའར་བཏགས་པའི་ཁྲིམས་ཀྱིས་བྱ་བ་སྒྲུབ་པ་ལྟར། བྱང་ཆུབ་སེམས་དཔས་ཀྱང་དགེ་བ་ལ་མོས་ཤིང་འདུན་པས་ཁ་ལོ་བསྒྱུར་སླ་བ་ཤིང་རྟ་པའི་ཚོགས་ལྟ་བུ་དང༌། བརྟན་ཞིང་མི་ཟློགས་པ་གླང་པོ་ཆེ་པའི་ཚོགས་ལྟ་བུ་དང༌། དགའ་ཞིང་སྤྲོ་བས་འཇུག་པས་ཟོར་ཡང་བ་རྟ་པའི་ཚོགས་ལྟ་བུ་དང༌། མི་ནུས་ན་རེ་ཞིག་དོར་བ་བསྐྱིལ་པར་སླ་བ་རྐང་ཐང་གི་ཚོགས་ལྟ་བུ་སྟེ་གཉེན་པོའི་དཔུང་ཚོགས་ཡན་ལག་བཞིས་ལེ་ལོ་ལས་རྒྱལ་བར་བྱ་ལ། དེ་ལ་བརྟེན་ནས་བརྩོན་ འགྲུས་སྤེལ་བའི་ཕྱིར་ལྷུར་བླང་བ་དང་དབང་དུ་བྱ་བ་བཀར་བཏགས་པའི་ཁྲིམས་ལྟ་བུས་བརྩོན་འགྲུས་ཀྱི་ཕ་རོལ་ཏུ་ཕྱིན་པ་ལ་རང་དབང་ཐོབ་པར་བྱའོ། །དེ་དག་གི་རྒྱུ་ཡང་སྡུག་བསྔལ་ལ་འཇིགས་པ་དང་བརྩོན་འགྲུས་ཀྱི་ཕན་ཡོན་བསམས་

Page: 503 ༄༅། །པས་ནི་མོས་འདུན་ཉིད་སྐྱེ་ལ། དེ་གོམས་པས་དེ་ཉིད་བརྟན་པ་སྟེ་སྤང་བྱ་འཇོམས་པ་ལ་དཔའ་བའི་ང་རྒྱལ་དང༌། དེ་ལས་གོང་ནས་གོང་དུ་བརྩོན་འགྲུས་རྩོམ་པར་དགའ་བ་སྐྱེ་ལ། དོར་བ་ནི་ཅུང་ཟད་ངལ་གསོ་བ་ཡིན་པས་ ཆེད་དུ་སྐྱེ་མི་དགོས་ཀྱང་དུས་ཤེས་པས་འགྲུབ་པར་འགྱུར་ལ། དེ་བཞིའི་འབྲས་བུ་ནི་བརྩོན་འགྲུས་ལྷུར་ལོངས་པ་ཉིད་དང་བདག་ཉིད་དབང་དུ་གྱུར་པ་ཡིན་ནོ། །དཀའ་འགྲེལ་ཆུང་ངུ་ལས་ཀྱང༌། སེམས་ཅན་དོན་སྒྲུབ་བྱ་ཕྱིར་དཔུང༌། །མོས་ བརྟན་དགའ་དང་དོར་བ་ཡིན། །ཞེས་བྱ་བས་དཔུང་ཚོགས་ཀྱི་ངོ་བོ་ཉིད་མདོར་བསྟན་ཏོ། །མོས་པ་སྡུག་བསྔལ་འཇིགས་པ་དང༌། །དེ་ཡི་ཕན་ཡོན་བསམས་པས་སྐྱེ། །ཞེས་བྱ་བས་ནི་རྒྱུ་མདོར་བསྟན་ཏོ། །མོས་པའི་རྒྱུ་དངོས་སུ་བསྟན་པ་ འདིས་ནི་གཞན་གྱི་ཡང་བརྒྱུད་པའི་རྒྱུ་ཡིན་ཏེ། མོས་པ་ལས་བརྟན་བ་དེ་ལས་དགའ་བ་དང་དོར་བ་སྐྱེ་བའི་ཕྱིར་རོ། །ཚིགས་བཅད་གཅིག་གིས་ནི་དཔུང་ཚོགས་ཀྱི་འབྲས་བུ་མདོར་བསྟན་ཏོ། །འདིའི་དོན་ནི་ལེ་ལོ་གསུམ་སྤངས་ཏེ་དེ་ལྟར་མོས་ བརྟན་དགའ་དོར་ལྷུར་ལེན་དབང་གྱུར་ཏེ་རྣམ་པ་ལྔའི་སྟོབས་ཀྱིས་འབད་པར་བྱའོ། །ཅིའི་དོན་དུ་ཞེ་ན། བརྩོན་འགྲུས་གོང་ནས་གོང་དུ་སྤེལ་བའི་ཕྱིར་ཏེ་འདིའི་དོན་དུའོ། །འདིས་ནི་མོས་པ་ལ་སོགས་པ་རྒྱུན་ཕྱི་མ་འཕེལ་བས་སམ། ཡང་ན་མོས་པ་དེ་ལས་ བརྟན་པ་དེ་ལས་དགའ་དོར་དེ་ལས་ལྷུར་ལེན་དང་དབང་དུ་གྱུར་པ་འཕེལ་བ་ནི་འབྲས་བུར་བསྟན་ཏོ། །ཞེས་སོ། །སྐབས་འདིར་ཡང་བི་བྷུ་ཏིས། གོང་གི་སྒྱིད་ལུག་མེད་དང་སོགས་ཀྱི་ཚིགས་བཅད་ལ་མི་མཐུན་ཕྱོགས་བསྡུས་པ་དང་སྟོབས་དང་ ལྡན་པ་ཡང་མེད་ལ། རྒྱས་བཤད་ཀྱང་མེད་པས་གཞན་གྱིས་བཅུག་པ་ཡིན་གྱི་མདོར་བསྟན་མ་ཡིན་ནོ། །ཞེས་བཀག་མོད་ཀྱང་དགག་བྱ་གཅིག་པོ་དེ་ཉིད་སྔ་ཕྱིར་ལན་གཉིས་སུ་འགོག་པ་མཁས་པའི་རྩོམ་ཚུལ་མ་ཡིན་ལ། ལན་དེ་དག་ཀྱང་གོང་གི་ཞར་

Page: 504 ལ་ཤེས་པར་འགྱུར་ཞིང༌། སྤྱིར་བི་བྷུ་ཏིའི་གཞུང་དངོས་ལ་ལྷད་ཞུགས་པ་ཞིག་ཡིན་པར་ཡང་དོགས་སོ། །གཉིས་པ་རྒྱས་བཤད་ལ་བཞི། མོས་པ། བརྟན་པ། དགའ་བ། དོར་བ་སྟེ་བཞི་པོ་རེ་རེ་ཞིང་བཤད་པའོ། །དང་པོ་མོས་པ་ལ་ཡང་བཞི། གང་ལ་ མོས་པའི་ཡུལ། མོས་པའི་འབྲས་བུ། མོས་པ་སྐྱེ་བའི་རྒྱུ། མཇུག་བསྡུ་བའོ། །དང་པོ་གང་ལ་མོས་པའི་ཡུལ་ནི། བདག་དང་གཞན་གྱི་ཉེས་པ་ནི། །དཔག་མེད་བདག་གིས་གཞོམ་བྱ་སྟེ། །གང་དུ་ཉེས་པ་རེ་རེ་ལའང༌། །བསྐལ་བ་རྒྱ་མཚོར་ཟད་འགྱུར་པ། ། ཉེས་ཟད་རྩོམ་པ་དེ་ཡི་ནི། །ཆ་ཡང་བདག་ལ་མ་མཐོང་ན། །སྡུག་བསྔལ་དཔག་ཏུ་མེད་པའི་སྣོད། །བདག་ཀོ་ཅི་སྟེ་སྙིང་མ་གས། །བདག་དང་གཞན་གྱི་ཡོན་ཏན་ནི། །མང་པོ་བདག་གིས་བསྒྲུབ་བྱ་སྟེ། །དེ་ལ་ཡོན་ཏན་རེ་རེ་ལའང༌། ། བསྐལ་པ་རྒྱ་མཚོས་གོམས་འགྱུར་ན། །བདག་ནི་ཡོན་ཏན་ཆ་ལ་ཡང༌། །གོམས་པ་ནི་ཡང་མ་སྐྱེས་ཏེ། །ཅི་ཞིག་ལྟར་བརྙེད་སྐྱེ་བ་ནི། །བདག་གིས་དོན་མེད་བྱས་པ་མཚར། །བདག་གིས་བཅོམ་ལྡན་མ་མཆོད་ཅིང༌། །དགའ་ སྟོན་ཆེན་པོའི་བདེ་མ་བྱིན། །བསྟན་ལ་བྱ་བ་མ་བྱས་དང༌། །དབུལ་པོའི་བསམ་པ་རྫོགས་མ་བྱས། །འཇིགས་ལ་མི་འཇིགས་མ་བྱིན་དང༌། །ཉམ་ཐག་བདེ་མ་བྱིན་ན་བདག །མ་ཡི་མངལ་གྱི་ཟུག་རྔུ་དང༌། །སྡུག་བསྔལ་འབའ་ ཞིག་སྐྱེད་པར་ཟད། །ཅེས་གསུངས་ཏེ། དེ་ཡང་ཚིགས་བཅད་དང་པོ་གཉིས་ཀྱིས་ཉེས་པ་འདོར་བ་དང༌། གཉིས་ཀྱིས་ཡོན་ཏན་སྒྲུབ་བ་དང༌། ཐ་མ་གཉིས་ཀྱིས་བྱ་བའི་རྣམ་གྲངས་བསྟན་ཏོ། །གཉིས་པ་མོས་པའི་འབྲས་བུ་ནི། བདག་ནི་སྔོན་དང་ད་ལྟར་ཡང༌། ། ཆོས་ལ་མོས་དང་བྲལ་བ་ཡིས། །ོངས་པ་འདི་འདྲ་བྱུང་གྱུར་ན། །སུ་ཞིག་ཆོས་ལ་མོས་པ་གཏོང༌། །དགེ་བའི་ཕྱོགས་ནི་ཐམས་ཅད་ཀྱི། །རྩ་བ་མོས་པར་ཐུབ་པས་གསུངས། །ཞེས་གསུངས་ཏེ། རྐང་པ་དང་པོ་གསུམ་གྱིས་

Page: 505 ༄༅། །མོས་པ་དང་བྲལ་བའི་ཉེས་དམིགས་དང༌། ཕྱི་མ་གསུམ་གྱིས་མོས་པའི་ཕན་ཡོན་བསྟན་ཏོ། །གསུམ་པ་མོས་པ་སྐྱེ་བའི་རྒྱུ་ནི། དེ་ཡི་རྩ་བ་རྟག་ཏུ་ནི། །རྣམ་སྨིན་འབྲས་བུ་བསྒོམས་པས་སོ། །སྡུག་བསྔལ་ཡིད་མི་བདེ་བ་དང༌། ། འཇིགས་པ་རྣམ་པ་སྣ་ཚོགས་དང༌། །འདོད་པ་རྣམས་དང་བྲལ་བ་ནི། །སྡིག་པ་སྤྱོད་ལས་འབྱུང་བར་འགྱུར། །ཡིད་ལ་བསམས་པའི་དགེ་བྱས་པས། །གང་དང་གང་དུ་འགྲོ་འགྱུར་པ། །དེ་དང་དེར་ནི་བསོད་ནམས་དེས། །འབྲས་བུ་ ཡོན་གྱིས་མངོན་མཆོད་འགྱུར། །སྡིག་པ་བྱེད་པ་བདེ་འདོད་ཀྱང༌། །གང་དང་གང་དུ་འགྲོ་འགྱུར་བ། །དེ་དང་དེར་ནི་སྡིག་པ་དེས། །སྡུག་བསྔལ་མཚོན་གྱིས་རྣམ་པར་འཇོམས། །རྒྱ་ཆེ་དྲི་བཟང་བསིལ་བའི་པདྨའི་སྙིང་པོར་གནས། ། རྒྱལ་བའི་གསུང་སྙན་ཟས་ཀྱིས་གཟི་བརྗིད་བསྐྱེད་བྱས་པ། །ཐུབ་འོད་ཀྱིས་རྒྱས་པདྨ་ལས་བྱུང་ལུས་མཆོག་ཅན། །རྒྱལ་བའི་མདུན་གནས་བདེ་གཤེགས་སྲས་སུ་དགེ་བས་འགྱུར། །གཤིན་རྗེའི་སྐྱེས་བུས་པགས་པ་མ་ལུས་བཤུས་ པས་རབ་ཏུ་ཉམ་ཐག་ཅིང༌། །རབ་ཏུ་ཚ་བའི་མེ་ཡིས་བཞུས་པའི་ཟངས་ཞུན་ལུས་ལ་བླུགས་གྱུར་པ། །འབར་བའི་རལ་གྲི་མདུང་ཐུང་གིས་བསྣུན་ཤ་ཡི་དུམ་བུ་བརྒྱར་ལྷགས་ཤིང༌། །ཤིན་ཏུ་འབར་བའི་ལྕགས་ཀྱི་ས་གཞིར་ལྷུང་བ་མི་དགེ་ མང་པོས་འགྱུར། །ཞེས་གསུངས་ཏེ། རྐང་པ་དང་པོ་གཉིས་ཀྱིས་ལས་རྒྱུ་འབྲས་བསམ་པ་མོས་པའི་རྒྱུའི་གཙོ་བོར་བསྟན། དེ་ནས་ཚིགས་བཅད་གསུམ་གྱིས་དཀར་ནག་གི་ལས་འབྲས་སྤྱིར་བསྟན། གཅིག་གིས་གཅིག་ཏུ་དཀར་བའི་ ལས་ཀྱི་འབྲས་བུ་དང༌། གཅིག་གིས་གཅིག་ཏུ་གནག་པའི་ལས་ཀྱི་འབྲས་བུ་བསྟན་ཏོ། །བཞི་པ་མཇུག་བསྡུ་བ་ནི། དེ་བས་དགེ་ལ་མོས་བྱ་ཞིང༌། །གུས་པ་ཉིད་དུ་བསྒོམ་པར་བྱ། །ཞེས་རྐང་པ་གཉིས་ཀྱིས་དེ་ཐམས་ཅད་ཀྱི་དོན་བསྡུས་ཏེ་བསྟན་ཏོ། །

Page: 506 དེ་ཡང་གང་ལ་ཡིད་མོས་པར་བྱ་ཞེ་ན། བདག་གིས་བྱང་ཆུབ་ཏུ་སེམས་བསྐྱེད་ནས་བདག་གཞན་ཐམས་ཅད་ཀྱི་ཉེས་པ་ཐམས་ཅད་འཇོམས་ཤིང་ཡོན་ཏན་ཐམས་ཅད་སྒྲུབ་པར་དམ་བཅས་ཟིན་པའི་ཕྱིར། བླང་དོར་དེ་གཉིས་ལ་མོས་པས་རྩེ་གཅིག་ཏུ་སྒྲུབ་དགོས་ མོད་ཀྱང་ཉེས་པ་དང་ཡོན་ཏན་ཐམས་ཅད་ལྟ་ཞོག་བདག་འཛིན་ལྟ་བུའི་ཉེས་པ་རེ་རེ་འཇོམས་པ་དང༌། མི་སྐྱེ་བའི་བཟོད་པ་ལྟ་བུའི་ཡོན་ཏན་རེ་རེ་སྒྲུབ་པ་ལ་ཡང་བསྐལ་བ་ཚད་མེད་པར་བརྩོན་འགྲུས་བརྩམ་དགོས་ལ། ད་ལྟར་བདག་ལ་དེ་ལྟ་བུའི་བརྩོན་འགྲུས་ ཀྱི་ཆ་རྩམ་ཡང་མ་མཐོང་བས་རང་གིས་རང་ལ་ཀོ་ཞེས་བོས་ཏེ་འདི་ལྟ་བུ་ལ་སྙིང་འགས་པ་ལྟ་བུའི་མི་བཟོད་པ་སྐྱེ་བར་རིགས་ཀྱི་ལེ་ལོར་སྡོད་ཁོམ་མམ། གལ་ཏེ་རང་རྒྱུད་ལ་ཉོན་མོངས་པ་བཅོམ་པ་སོགས་ཀྱི་ཡོན་ཏན་འགའ་ཡང་མ་སྐྱེས་ཤིང་བསྟན་པ་ དང་འགྲོ་བ་ལ་ཕན་པར་ཡང་མ་གྱུར་ཅིང༌། ཐ་ན་སྦྱིན་པ་གསུམ་གྱིས་ཅུང་ཟད་ཕན་གདགས་པ་ཙམ་ཡང་མ་བྱས་པ་འདིའི་ངང་དུ་བདག་ལྔ་པར་གྱུར་ན་ནི་མི་ལུས་ཐོབ་པ་འདིས་དོན་ཅི་ཡང་མ་གྲུབ་ཀྱི་སྟེང་དུ་མ་ལ་ཚོར་བའི་སྡུག་བསྔལ་བསྐྱེད་པ་འདི་ཁོ་ན་འབྲས་ བུར་ཟད་དོ་ཞེས་རང་ཉིད་ལ་ནན་གྱིས་འདོམས་བའོ། །དགེ་བའི་ཕྱོགས་ཐམས་ཅད་ཀྱི་རྩ་བ་ནི་མོས་པ་ཁོ་ན་སྟེ། འཇམ་དཔལ་གྱི་ཞིང་གི་ཡོན་ཏན་བཀོད་པར། ཆོས་རྣམས་ཐམས་ཅད་རྐྱེན་བཞིན་ཏེ། །འདུན་པའི་རྩེ་ལ་རབ་ཏུ་གནས། ། ཞེས་གསུངས་ཤིང༌། མོས་པ་ནི་དད་པ་ཉིད་ཡིན་ལ། དད་པ་ནི་ཐར་བའི་རྒྱུ་གཅིག་པོ་སྟེ་ཀུན་དགའ་བོ་དད་པ་ལ་སྦྱོར་བར་གྱིས་ཤིག་འདི་ནི་དེ་བཞིན་གཤེགས་པས་གསོལ་བ་འདེབས་པ་ཡིན་ནོ། །ཞེས་གསུངས་པའི་ཕྱིར་རོ། །དད་པའི་རྒྱུ་ནི། དཀར་ནག་གི་ ལས་འབྲས་བསམ་པ་ཁོ་ན་ཡིན་ཏེ། དེས་ལས་འབྲས་ལ་ཡིད་ཆེས་པ་སྐྱེ་ལ། དེའི་ཚེ་སྲོག་ལ་བབ་ཀྱང་དཀར་ནག་གི་བླང་དོར་མི་གཏོང་པ་འདི་ནི་དད་པ་རྒྱུད་ལ་སྐྱེས་པ་ཞེས་བྱ་སྟེ། དེའི་ཕྱིར་ཐར་རྒྱན་དུའང་འདོད་ཆགས་དང་ཞེ་སྡང་དང༌། གཏི་མུག་དང༌།

Page: 507 ༄༅། །འཇིགས་པ་སྟེ་བཞིའི་ཕྱིར་ཆོས་མི་གཏོང་ན་དད་པ་ཅན་དུ་བཤད་པ་ཡིན་ནོ། །དེས་ན་མི་འདོད་པ་མྱོང་བ་ཐམས་ཅད་ནི་རང་བྱས་ཀྱི་སྡིག་པའི་འབྲས་བུ་སྨིན་པ་ཡིན་ལ། བདེ་བ་མྱོང་བ་ཐམས་ཅད་ནི་རང་བྱས་ཀྱི་དགེ་བ་རྣམ་པར་སྨིན་ པ་ཡིན་ཏེ། ས་བོན་ཚ་བ་རྣམས་ལས་ནི། །མྱུ་གུ་ཚ་བ་སྐྱེ་བར་འགྱུར། །ས་བོན་མངར་བ་རྣམས་ལས་ནི། །འབྲས་བུ་མངར་བ་སྨིན་པར་འགྱུར། །དཀར་པོའི་རྣམ་སྨིན་མངར་བ་དང༌། །སྡིག་པའི་རྣམ་སྨིན་ཚ་བ་ཉིད། །ཅེས་སོ། ། ཆོས་རྗེས་ས་སྐྱ་པས། ལས་དཀར་རྣམ་སྨིན་གནག་པ་སོགས་མུ་བཞིར་བཞེད་པ་ནི། ལས་དཀར་བ་ལྟར་སྣང་ཡང་རྣམ་སྨིན་གནག་པ་ཞེས་པ་ལྟ་བུའི་དོན་ཅན་ལ་ཐུགས་རྩེ་བཏད་ན་ནི་དེར་ཟད་མོད། གཞན་དུ་སངས་རྒྱས་ཀྱི་བསྟན་པ་ལས་ཕྱིན་ཅི་ ལོག་ཏུ་གྱུར་པའི་རྣམ་གཞག་སར་པ་ཡིན་ཏེ། ས་བོན་ཚ་ལ་མྱུ་གུ་མངར་བ་སོགས་མུ་བཞིར་བཤད་པར་སོང་བའི་ཕྱིར་དང༌། སྟོབས་བཅུའི་དང་པོ་གནས་དང་གནས་མ་ཡིན་པ་མཁྱེན་པའི་སྟོབས་འཆད་པའི་ཚེ་རྒྱུ་དགེ་བ་ལས་འབྲས་བུ་བདེ་བ་འབྱུང་བ་ འདི་ནི་གནས་སོ། །རྒྱུ་དགེ་བ་ལས་འབྲས་བུ་སྡུག་བསྔལ་འབྱུང་བ་འདི་ནི་གནས་མ་ཡིན་ནོ་ཞེས་སོགས་མི་དགེ་བ་ལ་ཡང་སྦྱར་ཏེ་གསུངས་ལ། གང་གནས་སུ་གསུངས་པ་ནི་གནས་མིན་དུ་འགྱུར་མི་སྲིད་པ་དང༌། གནས་མིན་དུ་གསུངས་པ་ནི་གནས་སུ་ འགྱུར་མི་སྲིད་པར་བཤད་པའི་ཕྱིར་ན། རྒྱུ་དགེ་བ་ལས་འབྲས་བུ་སྡུག་བསྔལ་བ་སོགས་ནི་སངས་རྒྱས་ཤཱཀྱ་ཐུབ་པའི་བསྟན་པ་ལ་ཞུགས་པ་ཡིན་ན་ཁས་བླང་བར་མི་བྱའོ། །ཞེས་པ་ནི་ཞར་ལ་དཔྱད་པའོ། །དེས་ན་དགེ་བ་བྱེད་པ་ནི་གང་དུ་ཕྱིན་ཡང་བདེ་ བ་འཐོབ་པ་སྔོན་རྒྱལ་བུ་གཟུགས་སྟོབས་དང༌། གཟོ་སྟོབས་དང༌། བརྩོན་འགྲུས་སྟོབས་དང༌། ཤེས་རབ་སྟོབས་དང༌། བྱང་ཆུབ་སེམས་དཔའ་ཉིད་ལྔ་པ་བསོད་ནམས་སྟོབས་སུ་གྱུར་ཏེ། རང་རང་གི་ཡོན་ཏན་གྱི་མཐུ་བརྟག་པའི་ཕྱིར། སོ་སོར་ཡུལ་གཞན་དུ་

Page: 508 ཞུགས་པ་ན་བསོད་ནམས་སྟོབས་དབུལ་པོའི་ཁྱིམ་དུ་ཞུགས་མ་ཐག་དེ་ལོངས་སྤྱོད་ཐམས་ཅད་ཀྱིས་གང་བ་སོགས་སྐྱེ་བོ་ཐམས་ཅད་ཀྱི་བཀུར་བ་ལྟ་བུའོ། །གང་སྡིག་པ་མི་བཟད་པ་བྱས་པ་ནི་གང་དུ་ཕྱིན་ཡང་སྡུག་བསྔལ་བ་ཉིད་མྱོང་བ་སྟེ་རྒྱལ་པོ་ སྒོམ་པོ་ཞེས་བྱ་བ་སྔོན་དགྲ་བཅོམ་པ་མང་པོ་བཀྲོང་བ་ཞིག་དམྱལ་བ་ན་སྡུག་བསྔལ་མྱོང་བ་དེ་སྟོན་པས་བཀུག་ཏེ། མི་རྣམས་ལ་བསྟན་པ་ན་དེ་ལྕགས་ཀྱི་འཁོར་ལོ་ཆར་པ་ལྟར་བབ་པས་ལུས་གཅོད་པ་དང༌། གཤིན་རྗེའི་ཚོགས་ཀྱིས་མི་བཟོད་པར་མནར་བས་འབྲོས་ པར་རྩོམ་སྟེ་ནམ་མཁའ་ལ་སོང་བ་ན་ལྕགས་ཀྱི་བྱ་རྒོད་བྱེ་མ་མང་པོས་ཀླད་པ་འབྲུ་བ་དང༌། བར་སྣང་ལ་སོང་བ་ལྕགས་ཀྱི་ཁྭ་རྣམས་ཀྱིས་མིག་འབྱིན་པ་དང༌། ཆུ་བོར་ཞུགས་ན་ཆུ་བོ་མེར་འབར་ཞིང་ལྕགས་སྲེག་གི་ཉ་པོ་ཆེ་དང་སྲིན་བུས་འབྲང་ཞིང༌། གཤིན་རྗེའི་ སྐྱེས་བུས་མཐའ་ནས་ལྕགས་སྲེག་གི་རྒྱས་བཤོར་བ་དང༌། ཐང་ལ་སོང་ན་ལྕགས་ཀྱི་འཁོར་ལོས་རྐང་པ་གཅོད་པ་དང་གཤིན་རྗེ་ལྔ་བརྒྱས་མདས་བསྣུན་པ་སོགས་ཁོ་ན་མྱོང་ཞིང༌། ད་དུང་བསྐལ་བཟང་གི་སངས་རྒྱས་དགུ་བརྒྱ་དགུ་བཅུ་རྩ་ལྔ་པོའི་བར་སྡུག་ བསྔལ་དེ་ཁོ་ན་མྱོང་ལ། མཐར་དེ་བཞིན་གཤེགས་པ་མོས་པའི་དུས་ངན་སོང་ལས་འཐར་བར་གསུངས་པ་ལྟ་བུ་སྟེ། སྤྱིར་ངན་སོང་པ་ཐམས་ཅད་གང་དུ་ཕྱིན་ཡང་སྡུག་བསྔལ་བ་འདི་ལྟ་བུའི་ཆོས་ཅན་ཏེ། དཔེར་ན་རྟ་དང་བོང་བུ་དང་དྲེའུ་ལ་སོགས་པ་གང་དུ་ སོང་ཡང་བྲན་དུ་བཀོལ་བ་དང་ལུག་ལ་སོགས་པ་གང་དུ་ཕྱིན་ཡང་གསོད་པར་འགྱུར་བ་ལྟ་བུ་བདག་ཅག་གིས་ཀྱང་མངོན་སུམ་དུ་མཐོང་བའི་ཕྱིར་རོ། །དེ་ལྟར་བསོད་ནམས་ཀྱི་ལས་ཀྱི་འབྲས་བུ་ཤིན་ཏུ་དཀར་བ་དང༌། བསོད་ནམས་མ་ཡིན་པ་ ལས་འབྲས་ཤིན་ཏུ་གནག་པ་ལ་ཐུགས་ཆེས་པས་མཆོག་ཏུ་ངོ་མཚར་ཏེ་སློབ་དཔོན་ཉིད་ཀྱིས་ཚིགས་སུ་བཅད་པ་རེ་རེས་ཆེད་དུ་བརྗོད་པར་མཛད་དོ། །བསོད་ནམས་ཀྱི་ལས་ཀྱིས་བདེ་བ་ཅན་ལ་སོགས་པ་དག་པའི་ཞིང་དུ་རིན་པོ་ཆེའི་པདྨའི་

Page: 509 ༄༅། །ནང་དུ་བལྟ་བས་མི་ངོམས་པའི་ལུས་སུ་བརྫུས་ཏེ་སྐྱེ་ཞིང་སངས་རྒྱས་ཀྱི་གསུང་ཆོས་ཀྱི་བདུད་རྩི་ཐོས་པས་ཟས་སྐོམ་གྱི་བྱ་བ་དང༌། སྟོན་པའི་འོད་ཟེར་གྱིས་ཉི་མའི་བྱ་བ་བྱས་ཏེ་པདྨའི་ཁ་བྱེ་ནས་སྟོན་པའི་ཞལ་ལ་བལྟ་ བའི་བདེ་བ་ཁྱད་པར་ཅན་དེ་ལྟ་བུ་མྱོང་བའི་ཕྱིར་དང༌། མི་དགེ་བའི་ལས་ཀྱིས་དམྱལ་བར་གཤིན་རྗེའི་ཚོགས་ཀྱིས་པགས་པ་བཤུས་པ་ལ་སླར་ཟངས་ཞུན་གྱིས་ཤ་བརྙིལ་བ་དང༌། མཚོན་ཆ་ཐམས་ཅད་ཀྱིས་བསྣུན་ཞིང་ལྕགས་བསྲེགས་ཀྱི་གཞིར་ བསྐལ་པར་བསྲེགས་ཀྱང་འཆི་བར་ཡང་མི་ནུས་པའི་སྡུག་བསྔལ་མྱོང་བའི་ཕྱིར་རོ། །དེས་ན་ལུས་སྲོག་ཙམ་ནི་འཁོར་བ་གང་དུ་སྐྱེས་ཀྱང་རྟག་པར་བརྙེད་ལ། དགེ་བའི་བློ་ནི་དེ་ལྟ་མ་ཡིན་པས་ད་ནི་སྲོག་ལ་ལན་སྟོང་དུ་བབ་ཀྱང་དད་པ་མི་གཏོང་བའི་ ཡི་དམ་བརྟན་པོ་བཅས་ཏེ་སྒོ་གསུམ་སྐད་ཅིག་ཀྱང་དོན་མེད་དུ་མི་འཇོག་པར་དགེ་བ་ལ་བསྐུལ་བར་བྱའོ། །ེགས་བཤད་བསྡུས་པར་ནི། བསྐལ་པ་རྒྱ་མཚོས་གོམས་གྱུར་ན། །ཞེས་སོགས་ལ་ཞིང་ཁམས་བཅུའི་འཇིག་རྟེན་པ་དང་ ཉན་རང་ཀུན་གྱི་དགེ་བ་ཇི་སྙེད་པ་བཅུར་བསྒྱུར་བས་སངས་རྒྱས་ཀྱི་བ་སྤུ་གཅིག་འགྲུབ་ལ། ཚུལ་དེས་བ་སྤུ་ཐམས་ཅད་ཀྱི་རྒྱུའི་དགེ་བ་བརྒྱར་བསྒྱུར་བས་དཔེ་བྱད་བཟང་པོ་གཅིག་དང༌། དཔེ་བྱད་བརྒྱད་བཅུའི་རྒྱུའི་དགེ་བ་སྟོང་དུ་བསྒྱུར་བས་མཚན་སུམ་བཅུ་ལས་ གཅིག་དང༌། མཚན་སུམ་བཅུའི་རྒྱུའི་དགེ་བ་སྟོང་འགྱུར་གྱིས་སྨིན་མཚམས་ཀྱི་མཛོད་པུ་དང༌། དེའི་རྒྱུ་འབུམ་འགྱུར་གྱིས་དབུའི་གཙུག་ཏོར་ལྟར་མི་མངོན་པ་དང༌། དེའི་རྒྱུ་འབུམ་ཕྲག་བཅུར་བསྒྱུར་བས་གསུང་ཆོས་ཀྱི་དུང་འགྲུབ་ཅིང༌། དེ་བཞིན་དུ་གསུང་དབྱངས་ དྲུག་བཅུ་དང༌། ཐུགས་ཀྱི་ཡོན་ཏན་སྟོབས་བཅུ་སོགས་རེ་རེ་ཡང་རྒྱུ་མཐའ་ཡས་པས་སྒྲུབ་དགོས་པའོ། །འོ་ན་དེ་ཙམ་དུ་མང་བ་སྒྲུབ་པར་མི་ནུས་སམ་སྙམ་ན་བྱང་ཆུབ་སེམས་དཔའས་སྐད་ཅིག་མ་གཅིག་གི་བསོད་ནམས་ཀྱང་མཐའ་ཡས་པས་

Page: 510 ན་མྱུར་དུ་འགྲུབ་སྟེ། དཀོན་བརྩེགས་གསང་བ་བསམ་གྱིས་མི་ཁྱབ་པ་ལས། སེམས་ཅན་ཀུན་གྱི་བསོད་ནམས་ཀྱི། །ཕུང་པོ་ཇི་སྙེད་ཡོངས་བཟུང་བ། །དེ་སྙེད་བྱང་ཆུབ་སེམས་དཔའ་ཡིས། །བྱང་ཆུབ་སེམས་ལས་རབ་ཏུ་འབྱུང༌། ། ཞེས་དང༌། རིན་ཆེན་ཕྲེང་བར། སེམས་ཅན་མཐའ་ཡས་དེ་དག་ནི། །བྱང་ཆུབ་སེམས་དཔའས་སྙིང་རྗེ་བས། །སྡུག་བསྔལ་ཀུན་ལས་དྲངས་བྱས་ཏེ། །སངས་རྒྱས་ཉིད་ལ་འགོད་པར་ངེས། །དེ་ལྟར་བརྟན་པར་གནས་དེ་ནི། །མི་ཉལ་བའམ་ ཉལ་ཡང་རུང༌། །ཡང་དག་བླངས་པ་ནས་བཟུང་ཏེ། །བག་མེད་གྱུར་ཀྱང་སེམས་ཅན་རྣམས། །མཐའ་ཡས་ཕྱིར་ན་སེམས་ཅན་བཞིན། །བསོད་ནམས་མཐའ་ཡས་སོགས་པར་འགྱུར། །མཐའ་ཡས་དེས་ན་སངས་རྒྱས་ཉིད། །བསམ་ ཡས་ཐོབ་མི་དཀའར་ཤེས་བྱ། །ཞེས་དང༌། གང་ཞིག་དཔག་མེད་དུས་གནས་ཏེ། །ལུས་ཅན་དཔག་ཏུ་མེད་དོན་དུ། །བྱང་ཆུབ་དཔག་ཏུ་མེད་འདོད་ཅིང༌། །དགེ་བ་དཔག་ཏུ་མེད་བྱེད་པ། དེས་ཀོ་བྱང་ཆུབ་དཔག་མེད་ཀྱང༌། །དཔག་ཏུ་ མེད་པ་རྣམ་བཞི་ཡི། །ཚོགས་ཀྱིས་རིང་པོར་མི་ཐོགས་པར། །ཇི་ལྟ་བུར་ན་འཐོབ་མི་འགྱུར། །ཞེས་དང༌། གོམ་པ་བདུན་པའི་དུས་སུ་ཡང༌། །བདོག་པ་ཀུན་བཏང་སེམས་འཆང་བའི། །བྱང་ཆུབ་སེམས་དཔའ་རྣམས་ལ་ནི། ། བསོད་ནམས་མཁའ་འདྲ་དཔག་མེད་སྐྱེ། །ཞེས་གསུངས་པས་སོ། །ཞེས་ཚིག་ཟུར་གྱི་ནུས་པ་ལ་རྒྱས་བཤད་བྱས་སྣང་ལ་མཚན་དཔེ་སོགས་ཀྱི་རྒྱུ་འགྲུབ་ཚུལ་འདི་ལ་ནི་མདོ་རྣམས་ན་གྲངས་མང་ཉུང་མི་འདྲ་བ་མང་དུ་གསུངས་ལ། འདི་ནི་ཐུན་མོང་ གི་མདོ་ཞིག་གི་ལུགས་ཡིན་པ་སྙམ་ཞིང༌། གང་དང་གང་དུ་འགྲོ་འགྱུར་བ། །ཞེས་པ་ལ། དུས་ཀྱི་བསྙེར་ནས་རྒྱལ་པོ་འགྲོངས་འགྱུར་ཏེ། །ལོངས་སྤྱོད་མཛའ་དང་གཉེན་བཤེས་རྗེས་མི་འབྲེང༌། །སྐྱེས་བུ་དག་ནི་གང་དང་གར་འགྲོ་

Page: 511 ༄༅། །ཡང༌། །ལས་ནི་གྲིབ་མ་བཞིན་དུ་རྗེས་སུ་འབྲེང༌། །ཞེས་པ་དྲངས་སྣང་ངོ༌། །ཐུབ་འོད་ཀྱིས་རྒྱས་ཞེས་པ་ལ་དགེ་བའི་ལྷས། ཐུབ་པ་སྟེ་སངས་རྒྱས་སྣང་བ་མཐའ་ཡས་ཀྱི་ཕྱག་གི་པདྨ་རྒྱས་པ་སྟེ་ཆུ་སྐྱེས་ཁ་བྱེ་བ་ལས་སོ་ཞེས་ བྲིས་པ་ནི་ལེགས་པར་མ་མཐོང་ཏེ་པདྨ་ཁ་མ་བྱེ་བ་དེ་སངས་རྒྱས་དེའི་ཕྱག་སོར་གྱིས་ཁ་ཕྱེ་བར་འཆང་ན་ཡང་ཐུབ་འོད་ཀྱིས་རྒྱས་ཞེས་འོད་ཀྱིས་ཕྱེ་བར་དངོས་སུ་བཤད་པ་དང་འགལ་ཞིང༌། ཕྱག་པདྨའི་གཟུགས་སུ་བཀོད་པའི་གཟུགས་ཅན་གྱི་རྒྱན་ནམ་ ཕྱག་གིས་པདྨ་འཛིན་པ་གང་དུའང་འབྲུ་གཉེར་མི་ནུས་ཏེ། བྱང་ཆུབ་སེམས་དཔའ་དེ་སངས་རྒྱས་ཀྱི་ཕྱག་ཐིལ་དུ་སྐྱེ་བའམ། ཕྱག་མཚན་གྱི་པདྨའི་ནང་དུ་སྐྱེ་བ་གང་ཡང་མི་འོས་ལ་ལྷ་རྣམས་ལ་ཕ་མའི་པང་པར་སྐྱེ་བ་ལ་བུའི་འདུ་ཤེས་བྱེད་པ་ཡོད་མོད་ཀྱང་ སངས་རྒྱས་ལ་དེ་ལྟ་བུ་མི་རིགས་པའི་ཕྱིར་དང༌། རྒྱལ་བའི་མདུན་གནས་ཞེས་དངོས་སུ་བཤད་ཀྱི་ཕྱག་ན་གནས་པར་མ་བཤད་པའི་ཕྱིར་རོ། །ཡང་སློབ་དཔོན་གསེར་གླིང་ཆོས་སྐྱོང་གིས། སྤྱོད་འཇུག་གི་དོན་སོ་དྲུག་ཏུ་བསྡུས་པ་ལས་ནི། ཉེས་པ་རེ་རེ་ཙམ་ ལ་ཡང༌། གང་དུ་བསྐལ་པ་རྒྱ་མཚོར་ཟད། །ཉེས་ཟད་རྩོམ་པ་དེ་ལ་ནི། །བདག་གིས་ཅུང་ཟད་ཙམ་མི་ལྟ། །བདག་དང་གཞན་གྱི་ཡོན་ཏན་ནི། །མང་པོ་བདག་གིས་བསྒྲུབ་བྱ་སྟེ། །གང་དུ་ཡོན་ཏན་རེ་རེ་ཞིག །བསྐལ་པ་རྒྱ་མཚོས་ལོབས་ ནའང་རུང༌། །རྡོ་རྗེ་རྒྱལ་མཚན་ཆོ་ག་ཡིས། །བརྟན་པར་བརྩམ་ཞིང་བསྒོམ་པར་བྱ། །ཞེས་གཞུང་འདོན་ཞིང༌། ཉེས་པ་སྣ་རེ་འཇོམས་པ་དང༌། ཡོན་ཏན་སྣ་རེ་སྒྲུབ་པ་ལ་བསྐལ་པ་རྒྱ་མཚོ་འགོར་དུ་ཟིན་ཡང་དེ་ཙམ་གྱིས་ཅིར་ཡང་མི་སེམས་པར་རྡོ་ རྗེ་རྒྱལ་མཚན་གྱི་ཆོ་གས་ང་རྒྱལ་བསྐྱེད་དེ་བསྒྲུབ་པར་བྱའོ་ཞེས་པའི་དོན་ཅན་དུ་འཆད་ལ། བསྐལ་བ་རྒྱ་མཚོས་ལོབས་ཀྱང་རུང༌། །ཞེས་པའི་དོན་ཅན་དུ་འགྲེལ་ཆེན་ལས་ཀྱང་བཤད་དོ། །གཉིས་པ་བརྟན་པའི་དཔུང་ཚོགས་རྒྱས་བཤད་

Page: 512 ལ་ཡང༌། རྩོམ་པ་ལ་བརྟན་པ་དང༌། ཞུགས་པ་ལ་བརྟན་པ་གཉིས་ལས། དང་པོ་རྩོམ་པ་ལ་བརྟན་པ་ལ་ཡང༌། རྡོ་རྗེ་རྒྱལ་མཚན་ཆོ་ག་ཡིས། །བརྩམས་ནས་ང་རྒྱལ་བསྒོམ་པར་བྱ། །དང་པོར་འབྱོར་པ་བརྟགས་ནས་ནི། །རྩམ་མམ་ཡང་ན་མི་རྩམ་བྱ། ། མ་རྩམས་པ་ནི་མཆོག་ཡིན་གྱི། །བརྩམས་ནས་ལྡོག་པར་མི་བྱའོ། །ཞེས་པའི་དངོས་དང༌། སྐྱེ་བ་གཞན་དུའང་དེ་གོམས་ནས། །སྡིག་དང་སྡུག་བསྔལ་འཕེལ་འགྱུར་ཏེ། །གཞན་དུ་འབྲས་བུའི་དུས་ཀྱང་ནི། །དམན་འགྱུར་དེ་ཡང་ འགྲུབ་མི་འགྱུར། །ཞེས་པས་རྩོམ་པ་བརྟན་པའི་ཕན་ཡོན་དང༌། མི་བརྟན་པའི་ཉེས་དམིགས་བཤད་དོ། །ཞུགས་པ་ལ་བརྟན་པ་ལ་ཡང༌། ལས་དང་ཉོན་མོངས་ནུས་པ་སྟེ། །གསུམ་པོ་དག་ལ་ང་རྒྱལ་བྱ། །ཞེས་མདོར་བསྟན་ནས། རྒྱས་ བཤད་ལ་ཡང༌། བདག་ཉིད་གཅིག་པུས་བྱའོ་ཞེས། །འདི་ནི་ལས་ཀྱི་ང་རྒྱལ་ཉིད། །ཉོན་མོངས་དབང་མེད་འཇིག་རྟེན་འདིས། །རང་དོན་སྒྲུབ་པར་མི་ནུས་པས། །འགྲོ་བས་བདག་ལྟར་མི་ནུས་ཏེ། དེ་བས་བདག་གིས་འདི་བྱའོ། ། གཞན་ཡང་དམན་པའི་ལས་བྱེད་ན། །བདག་ཉིད་ཀྱང་ནི་ཇི་ལྟར་འདུག །ང་རྒྱལ་གྱིས་འདི་མི་བྱེད་དེ། །བདག་ལ་ང་རྒྱལ་མེད་པ་མཆོག །ཞེས་པས་ལས་ཀྱི་ང་རྒྱལ་དང༌། །ཤི་བའི་སྦྲུལ་དང་ཕྲད་གྱུར་ན། །ཁྭ་ཡང་མཁའ་ལྡིང་ ལྟ་བུར་སྤྱོད། །གལ་ཏེ་བདག་ཉིད་ཉམ་ཆུང་ན། །ལྟུང་བ་ཆུང་ངུས་ཀྱང་གནོད་བྱེད། །ཞུམ་བཅས་རྩོལ་བ་དོར་བ་ལ། །ཕོངས་ལས་ཐར་པ་ཡོད་དམ་ཅི། །ང་རྒྱལ་རྩོལ་བ་བསྐྱེད་པས་ནི། །ཆེན་པོ་ཡིས་ཀྱང་ཐུབ་པར་དཀའ། ། དེ་བས་སེམས་ནི་བརྟན་པ་ཡིས། །ལྟུང་བ་རྣམས་ནི་གཞོམ་བྱ་སྟེ། །བདག་ནི་ལྟུང་བས་ཕམ་བྱས་ན། །ཁམས་གསུམ་རྒྱལ་འདོད་བཞད་གད་འགྱུར། །བདག་གིས་ཀུན་ལས་རྒྱལ་བྱ་སྟེ། །བདག་ལས་སུ་ཡང་རྒྱལ་མི་བྱ། །

Page: 513 ༄༅ ། །རྒྱལ་བ་སེང་གེའི་སྲས་དག་གིས། །ང་རྒྱལ་འདི་ལ་གནས་པར་བྱ། །འགྲོ་གང་ང་རྒྱལ་གྱིས་བཅོམ་སྟེ། །ཉོན་མོངས་ང་རྒྱལ་ཅན་མ་ཡིན། །ང་རྒྱལ་ཅན་དགྲའི་དབང་མི་འགྲོ། །དེ་དག་ང་རྒྱལ་དགྲ་དབང་ འགྱུར། །ཉོམ་མོངས་ང་རྒྱལ་གྱིས་ཁེངས་ན། །ངན་འགྲོར་ང་རྒྱལ་གྱིས་འཁྲིད་ཅིང༌། །མི་ཡི་དགའ་སྟོན་བཅོམ་པ་དང༌། །གཞན་གྱི་ཟས་ཟའི་བྲན་དང་ནི། །གླེན་པ་མི་སྡུག་ཉམ་ཆུང་དང༌། །ཐམས་ཅད་དུ་ནི་བརྙས་བར་འགྱུར། ། ང་རྒྱལ་གྱིས་ཁེངས་དཀའ་ཐུབ་ཅན། །དེ་ཡང་ང་རྒྱལ་ཅན་གཏོགས་ན། །དམན་པ་ཅི་འདྲ་ཡིན་པ་སྨྲོས། །གང་ཞིག་ང་རྒྱལ་དགྲ་ལས་རྒྱལ་ཕྱིར་ང་རྒྱལ་འཆང༌། །དེ་ནི་ང་རྒྱལ་ཅན་དང་རྣམ་རྒྱལ་དཔའ་དེ་ཉིད། །གང་ཞིག་ང་རྒྱལ་ དགྲ་བདོ་པ་ཡང་དེས་བཅོམ་སྟེ། །འགྲོ་ལ་འདོད་བཞིན་རྒྱལ་བའི་འབྲས་བུ་རྫོགས་པར་བྱེད། །ཅེས་པས་ནུས་པའི་ང་རྒྱལ་དང༌། ཉོན་མོངས་ཚོགས་ཀྱི་ཁྲོད་གནས་ན། །རྣམ་པ་སྟོང་དུ་སྲན་གཟུགས་ཏེ། །ཝ་ལ་སོགས་པས་སེང་གེ་ བཞིན། །ཉོན་མོངས་ཚོགས་ཀྱིས་མི་ཚུགས་བྱ། །ཉམ་ང་ཆེ་ཐང་བྱུང་གྱུར་ཀྱང༌། །མི་ཡིས་མིག་ནི་སྲུང་བ་ལྟར། །དེ་བཞིན་ཉམ་ང་བྱུང་གྱུར་ཀྱང༌། །ཉོན་མོངས་དབང་དུ་མི་འགྱུར་བྱ། །བདག་ནི་བསྲེགས་ཏེ་གསོད་པ་འམ། །མགོ་ པོ་ལྷུང་བར་བྱས་རུང་གི། ཉོན་མོངས་དགྲ་ལ་ཐམས་ཅད་དུ། །འདུད་པ་ཉིད་དུ་མི་བྱའོ། །དེ་བཞིན་གནས་སྐབས་ཐམས་ཅད་ཏུ། །རིགས་པ་ལས་ནི་གཞན་མི་སྤྱད། །ཅེས་པས་ཉོན་མོངས་འཇོམས་པའི་ང་རྒྱལ་རྒྱས་པར་བཤད་དོ། ། དེ་ཡང་སངས་རྒྱས་ཕལ་པོ་ཆེའི་རྡོ་རྗེ་རྒྱལ་མཚནགྱི་སྔོ་བ་རྣམ་པ་བཅུ་ལས་སྔོ་བ་དང་པོའི་སྐབས་སུ་དཔེར་ན་ལྷའི་བུ་ཉི་མ་ཤར་བ་ནི་དམུས་ལོང་གི་ཉེས་པས་མི་ལྡོག་གོ །སའི་རྡུལ་དང་དུ་བ་དང་གྲིབ་མ་ཐ་དད་པ་དང་རི་མི་མཉམ་པའི་ཉེས་པས་

Page: 514 མི་ལྡོག་གོ །དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཟབ་ཅིང་རྒྱ་ཆེ་བ་རྣག་པ་མ་ཞུམ་པ་ནི་སེམས་ཅན་འཁུ་བའི་ངང་ཚུལ་ཅན་གྱི་ཉེས་པས་མི་ལྡོག་གོ །དམུ་རྒོད་ཀྱི་ཉེས་པས་མི་ལྡོག་གོ་སེམས་ཅན་མ་རུངས་པས་ བྱང་ཆུབ་ཀྱི་གོ་ཆ་རྒྱུན་མི་གཅོད་དོ། །སེམས་ཅན་གྱི་ཐ་བའི་རྙོག་པ་ཐམས་ཅད་ཀྱིས་འགྲོ་བ་ཐམས་ཅད་ཡོངས་སུ་སྐྱོབ་པའི་སྨོན་ལམ་རྒྱུན་གཅོད་པར་མི་བྱེད་དོ། །བྱིས་པའི་སྐྱེ་བོ་དང་འགྲོགས་པ་དང་སེམས་ཅན་གཞན་གྱིས་ཉེས་པ་རྣམས་ཀྱིས་སྐྱོ་ བར་མི་བྱེད་དོ། །ཞེས་སོགས་དང༌། སེམས་ཅན་གྱི་དོན་དུ་བདག་གིས་སྡུག་བསྔལ་གྱི་ཕུང་པོ་ཆེན་པོ་བླང་བར་བྱའོ། །བརྩོན་པར་བྱའོ། །སྤྲོ་བ་དང་མི་ལྡོག་པ་དང་མི་སྐྲག་པ་དང་མི་འཇིགས་པར་བྱའོ། །ཞེས་གསུངས་པ་རྣམས་ཀྱིས་གོ་ཆ་ཆེན་ པོ་བསྒོས་ཏེ་གང་བརྩམས་པ་དེ་ཉིད་རྐྱེན་ཅིས་ཀྱང་ལྡོག་པར་མི་ནུས་པའི་ང་རྒྱལ་བརྟན་པོས་བསྒྲུབ་པར་བྱའོ། །དེ་ལ་ཡང་བྱ་བ་གང་རྩོམ་ཡང་རུང་སྟེ། ཡུལ་དུས་དང༌། བདག་ཉིད་ཀྱི་འབྱོར་བ་སོགས་ལ་ཞིབ་མོར་བརྟགས་ཏེ། ཅི་བྱ་བ་འདི་ བདག་གིས་སྒྲུབ་པར་ནུས་སམ་མི་ནུས་ཞེས་ཞིབ་མོར་བསམ་ཞིང་བྱ་བ་ཆེན་པོ་དག་ལ་ནི་འགྲུབ་མི་འགྲུབ་སོགས་དཀོན་མཆོག་ལ་གསོལ་བ་བཏབ་པས་མ་བཀག་པར་མཐོང་ཞིང་འགྲུབ་པར་ཤེས་ན་བསྒྲུབ་པར་བྱའི། མ་བརྟགས་པར་ཚམ་ཚོམ་གྱིས་ འཇུག་པར་མི་བྱ་བའི་ཕྱིར། དང་པོར་འབྱོར་བ་བརྟགས་ནས་ནི། །རྩོམ་མམ་ཡང་ན་མི་རྩོམ་བྱ། །ཞེས་སོ། །དེས་ན་དཔའ་བྱིན་གྱི་མདོ་ལས་ཀྱང༌། གལ་ཏེ་བསླབ་པའི་གཞི་ལྔ་ལ་བསླབ་པར་མི་ནུས་ན་བཞི་འམ། གསུམ་མམ། གཉིས་ སམ། ཐ་ན་གཅིག་ཙམ་ལ་ཡང་བསླབ་པར་བྱའོ། །ཞེས་དགེ་བ་རང་གི་ཉམ་དང་སྦྱར་ཏེ་བསྒྲུབ་པར་བྱ་བར་གསུངས་པ་ཡིན་ནོ། །དེ་ལ་བྱ་བ་གང་ཡང་མ་རྩམས་པ་ནི་མཆོག་ཡིན་མོད་ཀྱང་གང་ཞིག་ཕན་ཡོན་ཁྱད་པར་ཅན་མཐོང་ནས་བྱ་བར་བརྩམས་

Page: 515 ༄༅། །པ་དེ་ནི་རྐྱེན་ཅིས་ཀྱང་མི་ལྡོག་པར་བསྒྲུབ་པར་བྱ་སྟེ། དེའི་གོམས་པས་སྐྱེ་བ་འདི་དང་གཞན་དུ་ཡང་རུང་སྟེ་ལེགས་པའི་དོན་ཐམས་ཅད་བདེ་བླག་ཏུ་འགྲུབ་པར་འགྱུར་རོ། །གལ་ཏེ་ཐོག་མར་བྱ་བར་བརྩམས་ལ་དེ་ནས་མ་ སྒྲུབས་པར་དོར་ན་ནི་སྐྱེ་བ་ཕྱི་མ་རྣམས་ལའང་བརྩམས་ནས་ལྡོག་པ་དེ་ཉིད་གོམས་པའི་བྱེད་པ་དང༌། མྱོང་བའི་རྒྱུ་མཐུན་གྱི་འབྲས་བུས་བྱ་བ་གང་ཡང་ཚར་མི་ཕྱིན་ཞིང་འབྲས་བུས་དབེན་པ་དང་འབྲས་བུ་འཐོབ་ནའང་ཕྱི་ནང་ཏུ་ནུར་བ་དང་སྔ་མ་དོར་ཏེ་ཕྱི་ མ་སྒྲུབ་པར་བརྩམ་པ་དེ་ཡང་གྲུབ་པར་དཀའ་བ་ཉིད་དུ་འགྱུར་རོ། །འདིར་དཀའ་འགྲེལ་ཆུང་ངུར། མི་བརྟན་པ་གོམས་པས་ཚེ་རབས་གཞན་དུའང་མི་བརྟན་པ་ཉིད་ཏུ་འགྱུར་བ་དང་དམ་བཅས་པ་ལས་ཉམས་པའི་སྡིག་པས་ངན་སོང་དུ་འཕེན་པའི་ ཕྱིར། སྡིག་སྡུག་འཕེལ་བ་དང་བྱ་བ་དེ་རྩོམ་རིང་དགེ་བ་གཞན་རྒྱུན་འཆད་པས་དགེ་བ་གཞན་གྱི་གེགས་སུ་འགྱུར་བ་དང༌། རྩོམ་པ་དེ་ཚར་མ་ཕྱིན་པས་རྒྱུ་དགེ་བ་དེ་དངེའི་འབྲས་བུ་གཉིས་ཀ་མ་ཐོབ་པ་སྟེ་མི་བརྟན་པའི་ཉེས་པ་ལྔར་བཤད་དོ། །དེ་ལྟར་ ལེགས་པར་བརྟགས་ཏེ་འཇུག་པ་ནི་རྩོམ་པ་ལ་བརྟན་པ་ཡིན་ལ། དེ་ནས་སྲོག་ལ་བབ་ཀྱང་མི་འདོར་བ་ནི་ཞུགས་པ་ལ་བརྟན་པ་ཞེས་བྱའོ། །ཞུགས་པ་ལ་བརྟན་པ་དེ་ཡང་གཉེན་པོའི་ང་རྒྱལ་གསུམ་གྱིས་སྒྲུབ་སྟེ་ལས་འདི་ཐམས་ཅད་གཞན་དྲིང་ ལ་མི་འཇོག་པར་བདག་ཉིད་ཁོ་ནས་སྒྲུབ་པར་ནུས་སོ་ཞེས་སྙིང་སྟོབས་བསྐྱེད་པ་ལས་ཀྱི་ང་རྒྱལ་ལོ། །བདུད་ཀྱི་སྡེ་འཇོམས་པ་དང༌། ཕོངས་པ་ཐམས་ཅད་སེལ་བ་དང༌། བླ་ན་མེད་པའི་བྱང་ཆུབ་ཀྱི་ཡོན་ཏན་ཐམས་ཅད་བདག་གིས་སྒྲུབ་པར་ནུས་སོ་ཞེས་སྙིང་ སྟོབས་བསྐྱེད་པ་ནུས་པའི་ང་རྒྱལ་ལོ། །ཉོན་མོངས་རྣམས་ཀྱིས་བདག་མི་ཐུབ་ལ་བདག་གིས་ཉོན་མོངས་ཐམས་ཅད་འཇོམས་པར་བྱའོ། །ཞེས་སླན་ཚུགས་པ་ཉོན་མོངས་འཇོམས་པའི་ང་རྒྱལ་ལམ་ཉོན་མོངས་ལྟར་སྣང་བའི་ང་རྒྱལ་ལོ། །དེ་ཡང་ཉོན་

Page: 516 མོངས་པས་བྲན་དུ་བཀོལ་བའི་སེམས་ཅན་འདི་རྣམས་ཀྱིས་ནི་རང་རང་གི་ཚེ་འདིའི་དོན་བདེ་བ་ལྟར་སྣང་སྔ་དྲོ་གཅིག་ལུས་སེམས་བདེ་བར་འདུག་པ་ཙམ་རེ་ཡང་སྒྲུབ་པར་མི་ནུས་ཏེ། རང་རྒྱུད་ཀྱི་བུད་ཤིང་ལ་ཉོན་མོངས་ཀྱི་མེ་འབར་བ་ལ་བདག་དང་ བདག་གིར་འདུ་ཤེས་པས་དུས་འདའ་བར་ཟད་ན་བྱང་ཆུབ་སེམས་དཔའ་བདག་ཅག་རྣམས་ལྟ་བུར་སེམས་ཅན་ཐམས་ཅད་བདེ་བ་ལ་འགོད་བ་ལྟ་ག་ལ་ནུས། དེ་བས་ན་འདི་རྣམས་ཀྱིས་བསྒོ་བར་མི་ནུས་པའི་བཟོད་པའི་གོ་བསྒོ་ཞིང་ཐོགས་ པར་མི་ནུས་པའི་ཤེས་རབ་ཀྱི་མཚོན་བཟུང་ལ་བརྣགས་པར་མི་ནུས་པའི་བྱང་ཆུབ་ཀྱི་སེམས་གཅིག་ཏུ་བརྟན་པས་བདག་གིས་སེམས་ཅན་ཐམས་ཅད་ཀྱི་སྡུག་བསྔལ་གྱི་རྒྱ་མཚོ་གཞོམ་པར་བྱ་ལ། སེམས་ཅན་ཉོན་མོངས་པའི་ང་རྒྱལ་ཅན་འདི་དག་ ཡང་འཚོ་བ་ལ་སོགས་པ་མ་རྙེད་པ་ན་ང་རྒྱལ་བསྐྱུངས་ཏེ་ཕྱགས་བདར་པ་དང་བྲན་དུ་ཁས་བླངས་པས་ཀྱང་འཚོ་བ་སྒྲུབ་ན་བདག་བྱང་ཆུབ་སེམས་དཔས་བླ་ན་མེད་པའི་བྱང་ཆུབ་སྒྲུབ་པ་ལ་ལྟ་ཅི་སྨོས་ཏེ། བདག་ནི་རིགས་རུས་ཆེ་བས་དབུལ་པོ་ ལ་ལག་གིས་སྦྱིན་པར་མི་འོས་སོ་ཞེས་བསྙམས་པ་དང༌། བསླབ་པས་རྒན་པ་སོགས་ཕྱག་གི་གནས་ལ་བདག་རིགས་རུས་ཀྱིས་ལྷག་གོ་ཞེས་ཕྱག་མི་བྱེད་པ་ལ་སོགས་པ་ཉོན་མོངས་པ་ཅན་གྱི་མངོན་པའི་ང་རྒྱལ་བཅོམ་སྟེ། སེམས་ཅན་ཐམས་ ཅད་ཀྱི་བྲན་དུ་ཁས་ལེན་པས་ཕ་རོལ་ཏུ་ཕྱིན་པ་རྣམས་བསྒྲུབ་པར་བྱ་སྟེ། བདག་ལ་མངོན་པའི་ང་རྒྱལ་མེད་པ་འདི་ནི་མཆོག་ཡིན་ཏེ། གལ་ཏེ་མངོན་པའི་ང་རྒྱལ་ཡོད་ན་དེས་གཉེན་པོའི་ང་རྒྱལ་གསུམ་སྒྲུབ་པར་མི་ནུས་སོ། །དེའི་ཕྱིར། གཞན་ཡང་ དམན་པའི་ལས་བྱེད་ན། །བདག་ཉིད་ཀྱང་ནི་ཇི་ལྟར་འདུག །ང་རྒྱལ་གྱིས་འདི་མི་བྱེད་དེ། །བདག་ལ་ང་རྒྱལ་མེད་པ་མཆོག །ཅེས་སྨོས་སོ། །ནུས་པའི་ང་རྒྱལ་སྒོམ་ཚུལ་ཡང༌། དཔེར་ན་བྱ་ཁྭ་རྣམས་སྦྲུལ་མཐོང་ན་སྒྲ་འབྱིན་ཞིང་འབྲོས་

Page: 517 ༄༅། །ཀྱང་སྦྲུལ་གྱི་རོ་མཐོང་ན་ཉམ་ང་མེད་པར་མཁའ་ལྡིང་ལྟར་ཟ་བར་བྱེད་པ་ལྟར་བདག་ཉིད་གཉེན་པོའི་ཉམ་ཆུང་བའི་ཚེ་ལྟུང་བ་ཆུང་ངུ་ཡང་སྤོང་མི་ནུས་པས་སེམས་ལ་གནོད་པར་འགྱུར་ལ། གཉེན་པོའི་ཉམ་སྟོབས་རྒྱས་ པའི་ཚེ་ནི་ཐམས་ཅད་ཀྱང་བྱང་ཆུབ་ཀྱི་སེམས་ཀྱི་གྲོགས་སུ་འགྱུར་གྱི་ཅིས་ཀྱང་གནོད་པར་མི་ནུས་སོ། །དེས་ན་བདག་འདྲ་བས་མི་ནུས་སོ་ཞེས་ཞུམ་ཞིང་སྒྱིད་ལུག་པས་གནས་པས་ནི་ཅི་ཡང་ཐོབ་པར་མི་ནུས་ལ། ང་རྒྱལ་གྱི་སྒྲས་བསྟན་པ་སྙིང་ སྟོབས་དང་རྩོལ་བ་ཆེར་བསྐྱེད་ན་མི་འགྲུབ་བ་ཅི་ཡང་མེད་ལ། གཞོམ་དཀའ་བའི་ཉེས་པ་ཆེན་པོས་ཀྱང་བདག་མི་ཐུབ་སྟེ་བདེ་བླག་ཏུ་འཇོམས་སོ། །དེས་ན་སེམས་བརྟན་ཞིང་མི་གཡོ་བས་རང་རྒྱུད་ཀྱི་ཉེས་པ་བྱུང་ངོ་ཅོག་དང་པོར་ངོས་བཟུང༌། བར་དུ་ ཚར་བཅད། མཐར་ས་བོན་ལྡང་བ་མེད་པར་གཞོམ་དགོས་ཏེ་བདག་ཉིད་ཀྱིས་རང་རྒྱུད་ཀྱི་ཉེས་པ་ཙམ་ཡང་མ་ཐུབ་ན་ཁམས་གསུམ་ལས་རྒྱལ་བའི་སངས་རྒྱས་ཇི་ལྟར་འགྲུབ། ཆོས་ཐམས་ཅད་ནི་རང་གི་རྣམ་རྟོག་ཙམ་དུ་ཟད་པས་རྣམ་རྟོག་དེ་ ཐམས་ཅད་རང་གི་ངོ་བོ་ཇི་ལྟ་བར་རྟོགས་པའི་ཤེས་རབ་ཀྱིས་ཚར་བཅད་ནས་དབང་དུ་བསྡུས་ཏེ་ཕྱོགས་ཐམས་ཅད་ལས་རྣམ་པར་རྒྱལ་བར་བྱ་ཡི་རྣམ་རྟོག་གང་གིའང་དབང་དུ་བདག་མི་འགྲོ་བའི་ཕྱིར། རྣམ་རྟོག་སུ་ཡང་བདག་ལས་རྒྱལ་དུ་མི་གཞུག་ གོ་ཞེས་དེ་བཞིན་གཤེགས་པ་མིའི་སེང་གེའི་སྲས་རྣམས་ཀྱིས་ང་རྒྱལ་འདི་ལྟ་བུ་བརྩམ་པར་བྱ་ཡི་སྤང་བྱའི་ང་རྒྱལ་ནི་གཞོམ་པར་བྱ་དགོས་ཏེ། སེམས་ཅན་ཐམས་ཅད་ཀྱང་ང་རྒྱལ་གྱིས་ཀུན་ནས་བསླང་བའི་ལས་ཀྱིས་ངན་སོང་དུ་འཕེན་པ་དང༌། མཐོ་ རིས་ཀྱིས་བཀལ་བ་དང་མིར་སྐྱེས་སྲིད་ཀྱང་བྲན་དང་གླེན་པ་དང་ཉམ་ཆུང་བ་སོགས་སྐྱེ་བོས་བརྙས་ཤིང་བཞད་གད་དུ་བྱེད་པ་རྣམས་སུ་སྐྱེ་བའི་ཕྱིར་ཏེ། ཡུལ་འཁོར་སྐྱོང་ཞུས་ཀྱི་མདོར། རྨོངས་པ་དེ་དག་ང་རྒྱལ་དབང་གིས་ནི། །ངན་སོང་ས་དང་མི་

Page: 518 ཁོམ་སྐྱེ་བ་དང༌། །དབུལ་དང་དམན་པའི་རིགས་སུ་སྐྱེ་བ་དང༌། །དམུས་ལོང་མདོག་ངན་མཐུ་ཆུང་རྣམས་སུ་སྐྱེ། །ཞེས་སོ། །ཉོན་མོངས་ཀྱི་ང་རྒྱལ་དེ་གང་ཞེ་ན། བདག་ཏུ་ཞེན་པ་ལས་སླར་བདག་ཉིད་མཆོག་ཏུ་འཛིན་པ་ཕྱིན་ཅི་ལོག་གི་རྨོངས་ པ་ཡིན་ལ། དེ་ཡང་རྣམ་པ་བདུན་དུ་མདོ་དང་བསྟན་བཅོས་ལས་བཤད་དེ། བདག་ཏུ་ལྟ་བ་ངའོ་སྙམ་པའི་ང་རྒྱལ་དང༌། ང་རྒྱལ་ཙམ་པོ་བ་དང༌། ཆེ་བའི་ང་རྒྱལ་དང༌། ཆེར་བསྙེམས་པ་ང་རྒྱལ་ལས་ཀྱང་ང་རྒྱལ་དང༌། ཐོས་པ་ལ་སོགས་པས་བསྙེམས་པ་ མངོན་པའི་ང་རྒྱལ་དང༌། ཅུང་ཟད་སྙམ་པའི་ང་རྒྱལ་དང༌། ཀུན་བཏགས་ཀྱི་བདག་ཏུ་ཞེན་པ་ལོག་པའི་ང་རྒྱལ་ཏེ་བདུན་ནོ། །དེ་ལྟར་མི་གཙང་པ་ལ་གཙང་བར་འཁྲུལ་བ་ལྟ་བུའི་ཉོན་མོངས་པའི་ང་རྒྱལ་དེ་ནི་རྨོངས་པ་ཕྱིན་ཅི་ལོག་འབའ་ཞིག་ཏུ་ཟད་ པ་ལྦུ་བ་ལ་ཤེལ་འཛིན་གྱི་བློ་ལྟ་བུར་མཐོང་བའི་ཕྱིར་ན། ཡང་དག་པར་དེ་ནི་ང་རྒྱལ་མ་ཡིན་ཏེ་རྣམ་པ་ཐམས་ཅད་དུ་དགྲར་གྱུར་བའི་ཉོན་མོངས་པའི་དབང་དུ་དེ་མ་ཐག་འགྲོ་བའི་ཕྱིར་དང༌། གང་ང་རྒྱལ་ཅན་ཡིན་ན་དགྲ་འཇོམས་པར་རིགས་ཀྱི་དགྲའི་དབང་ དུ་འགྲོ་བར་མི་རིགས་པའི་ཕྱིར། དེས་ན་དགྲ་ཆུང་ངུས་ཀྱང་བྲན་དུ་བྱེད་ནུས་པ་དེ་ང་རྒྱལ་ཅན་ཡིན་ན་སུ་ཞིག་ཉམ་ཆུང་ཡིན། དེས་ན་ལས་ཉོན་གྱི་མི་ཚུགས་ཤིང་ལས་ཉོན་ལས་ཀུན་ཏུ་རྒྱལ་བ་དེ་ནི་ཡང་དག་པའི་ང་རྒྱལ་ཅན་དང༌། ཕྱོགས་ ལས་རྣམ་པར་རྒྱལ་བའི་དཔའ་བོ་ཡིན་ཏེ། ང་རྒྱལ་ལ་སོགས་པ་རང་གཞན་གྱི་རྒྱུད་ཀྱི་དགྲ་བོ་ཉོན་མོངས་པ་ཐམས་ཅད་ཚར་བཅད་དེ་ཡིད་བཞིན་གྱི་སྐུ་ཅན་རྫོགས་པའི་སངས་རྒྱས་འཐོབ་པའི་ཕྱིར་རོ། །འོ་ན་ཉོན་མོངས་པ་འཇོམས་པའི་ང་རྒྱལ་ ཇི་ལྟར་སྐྱེད་ཅེ་ན། བདག་གི་རྒྱུད་འདི་ནི་ཉོན་མོངས་པའི་རྣམ་པ་མཆིས་སོ་འཚལ་གྱི་ས་བོན་དང་ཀུན་ལྡང་དང་རྣམ་སྨིན་ཐམས་ཅད་པ་ཡིན་ཏེ། ས་ཆེན་པོ་འདི་ས་བོན་དང༌། མྱུ་གུ་དང༌། ལྡོང་བུ་ཐམས་ཅད་པ་ཡིན་པ་བཞིན་ནོ། །ཇི་ལྟར་ས་བོན་

Page: 519 ༄༅། །ཐམས་ཅད་ཀྱི་རྩ་བའང་ས་ཆེན་པོ་འདིའི་གཏིང་ཇི་སྲིད་པར་སོན་ལ་དབྱེར་མི་ནུས་པ་ནི་འགའ་ཡང་མེད་དེ་རིམ་པ་དང་པོ་མན་དུ་ཕལ་ཆེར་འདའ་བ་མེད་པ་ལྟར། ཉོན་མོངས་དེ་ཡང་སེམས་ཀྱི་ཁ་རིམ་ལྟ་བུའི་རྣམ་པར་རྟོག་པར་ ཟད་ཀྱི་ངོ་བོར་དབྱེར་མེད་དུ་ཞུགས་པ་ནི་མ་ཡིན་པས་སྦྱང་བར་ཆེར་སླའོ། །དེས་ན་ས་གཞི་ལ་ས་བོན་མེད་ན་ཆུ་ལུད་ཁོ་ནས་ཅི་ཡང་སྐྱེད་མི་ནུས་པ་ལྟར་བདག་རྒྱུད་ལ་ཉོན་མོངས་ཀྱི་ས་བོན་གནས་པ་དེ་ཕ་རོལ་གྱི་གནོད་པ་ལ་སོགས་པ་ཆུ་ལུད་ དང་འདྲ་བས་སྐྱེད་པར་སྣང་བར་ཟད་ཀྱི་ས་བོན་མེད་ན་ཅི་ཡང་སྐྱེད་མི་ནུས་པས་ན། རང་ཅག་སོ་སྐྱེ་རྣམས་ནི་རང་རྒྱུད་ཀྱི་ཉོན་མོངས་པ་ཐམས་ཅད་ཀྱི་ཁྲོད་ན་རྟག་པར་གནས་པའི་ཕྱིར། ཉོན་མོངས་ཚོགས་ཀྱི་ཁྲོད་གནས་ན། །ཞེས་བྱའོ། །འདིའི་ རིང་ནི་བདག་ཉིད་ཀྱིས་རྣམ་པ་སྟོང་དང་འབུམ་དང་བྱེ་བར་ཡང་དེའི་དབང་དུ་མི་འགྲོ་བར་སྲན་ཚུགས་པར་བྱ་སྟེ། དང་པོར་གོ་ཆའི་བརྩོན་འགྲུས་ཀྱིས་མི་རྣམས་ཉམ་ང་བ་ཅི་བྱུང་ཡང་ཐོག་མར་རང་གི་མིག་སྲུང་བ་ལྟར་བདག་གིས་ཀྱིས་སུས་བདག་ མེར་བསྲེགས་སམ་ཆུར་དོར་རམ་མགོ་བོ་བཅད་ཀྱང་དེའི་ཚེ་བདག་གིས་ཞེ་སྡང་གི་དགྲའི་དབང་དུ་མི་གཏོང་བར་བྱའོ་ཞེས་འཕེན་པས་དམ་བཅའ་བ་སྔོན་དུ་བཏང་སྟེ། དེ་ནས་སྦྱོར་བའི་བརྩོན་འགྲུས་ཀྱིས་དྲན་ཤེས་ཀྱིས་སྒྲིམ་ཞིང་ཅིས་ཀྱང་མི་ལྡོག་པའི་ བརྩོན་འགྲུས་བསྐྱེད་ཏེ་ཝ་ལ་སོགས་པ་རི་དྭགས་ཐམས་ཅད་ཀྱིས་སེང་གེ་ལ་གདོར་མི་ཚུགས་ཤིང་སེང་གེའི་དྲི་ཚོར་བ་ཙམ་གྱིས་ཀྱང་རི་དྭགས་ཐམས་ཅད་ཅི་བྱ་ཏོལ་མེད་པར་འབྲོས་པ་ལྟ་བུར་སྤང་བྱས་མི་ཚུགས་པའི་བརྩོན་འགྲུས་བསྐྱེད་པར་བྱའོ། ། ཞེ་སྡང་ལ་བཤད་པ་དེ་བཞིན་དུ་འདོད་ཆགས་དང༌། ང་རྒྱལ་དང༌། ཕྲ་དོག་སྐྱེ་བའི་ཡུལ་ཉེ་བ་སོགས་ཀྱི་གནས་སྐབས་ཐམས་ཅད་དུ་འང་ཁོ་ན་ལྟར་ཤིན་ཏུ་བྱ་བར་རིགས་པའི་བརྩོན་པ་ཁོ་ན་བསྐྱེད་ཀྱི་དེ་ལས་སྤང་བྱའི་དབང་དུ་འགྱུར་བ་ནི་སྤང་པར་མི་བྱའོ་

Page: 520 ཞེས་གདམས་པ་ཡིན་ནོ། །མི་ཡིས་མིག་ནི་སོགས་ལ་འགྲེལ་ཆེན་དུ། མིག་ནི་གཟུགསལ་འཇུག་གི་སྒྲ་ལ་མི་འཇུག་པ་ལ་སྲུང་བའི་ཐ་སྙད་དུ་བྱས་ཏེ་དེ་བཞིན་དུ་ཉམ་ང་ཅི་བྱུང་ཡང་གཉེན་པོ་ལ་འཇུག་གི་སྤང་བྱ་ལ་མི་འཇུག་པར་བྱའོ། །ཞེས་པའི་དོན་ དུ་འབྲུ་གཉེར་ཞིང༌། དགེ་ལྷས་ཀྱང༌། ཉམ་ང་ཆེ་ཐང་བྱུང་གྱུར་ཀྱང༌། །རོ་ལ་མིག་ནི་མི་ལྟ་ལྟར། །ཞེས་གཞུང་བཏོན་ནས་མིག་ནི་གཟུགས་ལ་འཇུག་གི་ལྕེའི་ཡུལ་གྱི་རོ་ལ་མི་འཇུག་པ་ལྟར། ཞེས་སྔ་མ་ལྟར་དང༌། བི་བྷུ་ཏིས་ཀྱང་དེ་ལྟར་ འབྲུ་གཉེར་ཏོ། །འདི་ལ་དཀྱུས་ལྟར་འབྲུ་གཉེར་བའི་ཚེ་མི་ཡིས་མིག་ནི་ཞེས་གསུམ་པ་བྱེད་པ་པོའི་རྣམ་དབྱེ་ཡིན་ལ། འགྲེལ་ཆེན་ལྟར། འབྲུ་གཉེར་ན་མི་ཡི་མིག་ནི་ཞེས་དྲུག་པ་འབྲེལ་པའི་རྣམ་དབྱེ་ཅན་དུ་འགྱུར་རོ། །ས་བཟང་པས། དེ་བཞིན་ གནས་སྐབས་ཐམས་ཅད་དུ། །རིགས་པ་ལས་ནི་གཞན་མི་སྤྱད། །ཅེས་པ་འདི་རྒྱ་དཔེ་དང་འགྲེལ་པ་དག་ན་མི་སྣང་ངོ་ཟེར་ཡང༌། རྒྱ་དཔེ་ཐམས་ཅད་ཀྱང་མཚུངས་པར་མ་ངེས་པས་གཅིག་ཁོ་ན་ཚད་མའང་མིན་ལ། རྒྱ་འགྲེལ་ཕལ་ཆེར་དུ་དོན་གྱི་ འབྲུ་རགས་པ་ཙམ་ལས་མ་བྱས་སྣང་ཡང༌། དཀའ་འགྲེལ་ཆུང་ངུར། ཉོན་མོངས་པ་ལ་ང་རྒྱལ་བྱེད་པ་སྟོན་པ་ནི་ཚིགས་སུ་བཅད་པ་ཕྱེད་དང་བཞི་སྟེ། ཉོན་མོངས་ཚོགས་ཀྱི་ཁྲོད་གནས་ན། །ཞེས་བྱ་བ་ལ་སོགས་པའོ། །ཞེས་བྱུང་བས་འདི་གཉིས་ མེད་ན་ཚིགས་བཅད་ཕྱེད་དང་བཞིར་མི་ལོངས་བས་གཞུང་ཡིན་པར་བཟུང་ངོ༌། །གསུམ་པ་དགའ་བའི་དཔུང་ནི། རྩེད་མོའི་བདེ་འབྲས་འདོད་པ་ལྟར། །འདི་ཡིས་བྱ་བའི་ལས་གང་ཡིན། །ལས་དེ་ལ་ནི་ཞེན་བྱ་ཞིང༌། །ལས་དེས་མི་ ངོམས་དགའ་བར་བྱ། །བདེ་བའི་དོན་དུ་ལས་བྱས་ཀྱང༌། །བདེ་འགྱུར་མི་འགྱུར་གཏོལ་མེད་ཀྱི། །གང་གི་ལས་ཉིད་བདེར་གྱུར་པ། །དེའི་ལས་མི་བྱེད་ཇི་ལྟར་བདེ། །སྤུ་གྲིའི་སོར་ཆགས་སྦྲང་རྩི་ལྟའི། །འདོད་པ་རྣམས་ཀྱིས་མི་

Page: 521 ༄༅། །ངོམས་ན། །རྣམ་སྨིན་བདེ་ལ་ཞི་བ་ཡི། །བསོད་ནམས་ཀྱིས་ལྟ་ཅིས་ཏེ་ངོམས། །དེ་ལྟས་ལས་ཚར་ཕྱིན་བྱའི་ཕྱིར། །ཉི་མ་ཕྱེད་དུས་གདུངས་པ་ཡི། །གླང་ཆེན་མཚོ་ཕྲད་མཚོར་འཇུག་ལྟར། །ལས་དེ་ལ་ཡང་ འཇུག་པར་བྱ། །ཅེས་གསུངས་ཏེ། ཇི་ལྟར་ལྷ་རྣམས་ཀྱང་སྐྱེད་མོས་ཚལ་དུ་འཇུག་ཅིང་འདོད་ཡོན་སྣ་ཚོགས་ཀྱིས་བག་མེད་པར་རྩེ་ཞིང་དགའ་མགུར་སྤྱོད་པ་དང༌། མི་རྣམས་ཀྱང་དུས་སྟོན་དང༌། བྲོ་གར་དང༌། བཟང་སྡེའི་འདུས་པ་སོགས་ལ་ཤིན་ ཏུ་དགའ་བས་འཇུག་པ་ལྟར། བྱང་ཆུབ་སེམས་དཔའས་ཀྱང་དགེ་བའི་ལས་ལམ་གང་ཡིན་པ་དེ་ལ་མི་ངོམས་པའི་དགའ་བ་ཚད་མེད་པས་འཇུག་པར་རིགས་ཏེ། མི་རྣམས་ཀྱི་གླུ་གར་གྱི་ཁྲོམ་དུ་འཇུག་པ་སོགས་ནི་བདེ་བར་འདུ་ཤེས་ཤིང༌། བདེ་བའི་རྒྱུར་རློམ་ མེད་ཀྱི་དེ་ནི་བདེ་བ་ལྟར་སྣང་ཙམ་དེར་ཡང་འགྱུར་མི་འགྱུར་གཏོལ་མེད་དེ་གླུ་གར་གྱི་རྐྱེན་ལས་ཤི་བའམ། ཁྲོམ་དེར་རྒྱལ་པོའི་ཆད་པའམ། འཐབ་མོ་ལ་སོགས་པས་ཤི་བ་དང་ནད་ཀྱི་སྡུག་བསྔལ་ཆེར་བསྐྱེད་པའང་ཡོད་པའི་ཕྱིར། དགེ་བ་ནི་འབྲས་བུའི་དུས་ ནའང་བདེ་བར་འགྲུབ་མི་འགྲུབ་མ་ངེས་པ་དེ་འདྲ་ཡང་མིན་ལ། བྱེད་པའི་དུས་ཉིད་ནའང་ལུས་སེམས་དང་ཞིང་འགྱོད་པ་མེད་པ་དགའ་བའི་བདག་ཉིད་ཅན་དུ་གདོན་མི་ཟ་བས་འབྲས་བུ་ལྟ་ཞོག་རྒྱུའི་དུས་ཉིད་ནའང་བདེ་བ་ཡིན་ན་དེ་ཀོ་སུ་ཞིག་མི་སྒྲུབ་ཅེས་ པའི་ཐ་ཚིག་གོ །སྒྲུབ་པ་ཙམ་ལྟ་སྨོས་ཀྱང་ཅི་དགོས་དགེ་བའི་ལས་དེས་ངོམས་ཤིང་ཆོག་པར་ཡང་མི་རུང་སྟེ། འཇིག་རྟེན་པ་རྣམས་ཉེས་དམིགས་མང་ལ་མནོག་ཆུང་པ་སྤུ་གྲིའི་སོར་ཆགས་པའི་སྦྲང་རྩི་ལྕེས་བལྡག་པ་ལྟ་བུའི་འཁྲིག་པ་ལ་སོགས་པ་འདོད་ པའི་ཡོན་ཏན་རྣམས་ཀྱིས་མི་ངོམས་པར་མཐོང་ན་རྒྱུ་དང་འབྲས་བུ་གཉིས་ཀའི་དུས་བདེ་བ་ཕུན་སུམ་ཚོགས་པ་ཤིན་ཏུ་ཞི་བའི་གནས་འཐོབ་པའི་བསོད་ནམས་ཀྱི་ལས་ཀྱིས་སུ་ཞིག་ངོམས། དེ་ལྟ་བས་ན་བརྩམས་པའི་ལས་གང་ཡིན་པ་དེ་ཚར་

Page: 522 ཕྱིན་པར་བདེ་བླག་ཏུ་བྱ་བའི་ཕྱིར་སོས་ཀའི་དུས་ཉི་མའི་གུང་ལ་ཚད་པས་ཆེས་གདུངས་ལ་སྤྱིར་གླང་པོ་ཆེ་རང་བཞིན་གྱིས་སྤུ་ཆུང་ཞིང་སྲབ་པས་མིའི་བ་སྤུ་ལྟ་བུར་སྣང་ལ། ལུས་ཆེ་བས་གསིལ་གྲིབ་ཀྱི་གནས་མི་རྙེད་ཅིང་ལུས་ལྕི་བ་ལས་སླར་ཉི་ མས་ཤིན་ཏུ་ཚིག་པ་དེ་མཚོ་དང་ཕྲད་ན་ལུས་ཆེ་བའི་ཕྱིར་གཏིང་གི་ཚོད་ལོངས་ཤིང་བསིལ་བར་འདོད་པས་ཚམ་ཚོམ་མེད་པར་མཚོར་འཇུག་ཅིང་ཉལ་དང་རྒལ་བ་སོགས་བྱེད་པ་ལྟར་ཆོས་ཐམས་ཅད་ཀྱི་རང་བཞིན་ཤེས་པས་གང་ལའང་མི་ སྐྲག་ཞིང་རློམ་སེམས་མེད་ལ། གཞན་སྐྱབ་པར་འདོད་པའི་བློ་འབའ་ཞིག་གིས་དགེ་བའི་ལས་དེ་ཐམས་ཅད་ལ་ཚམ་ཚོམ་མེད་པར་འཇུག་པར་བྱོས་ཅིག་པའོ། །བཞི་པ་འདོར་བའི་དཔུང་ནི། སྟོབས་ཉམས་པ་དང་རྗེས་འབྲེལ་ན། །སླར་བྱའི་དོན་དུ་ དོར་བར་བྱ། །ལེགས་པར་ཟིན་ནས་ཕྱི་མ་དང༌། །ཕྱི་མ་འདོད་པས་དེ་སྤང་བྱ། །ཞེས་གསུངས་ཏེ། གལ་ཏེ་ཧ་ཅང་ནན་ཏན་གྱིས་འབད་པས་ལུས་སེམས་ཀྱི་སྟོབས་ཉམས་ཏེ་དུབ་ཆེས་པ་ན་ནི་སླར་ཕྱི་ནས་བྱ་བའི་ཕྱིར། རེ་ཞིག་དོར་བས་ངལ་གསོ་བར་བྱ་ སྟེ། ཐོས་བསམ་དང༌། ལས་ཀྱི་འཁོར་ལོས་དུབ་པ་ལ་ནི་ཏིང་ངེ་འཛིན་དུ་བཞག་པས་ངལ་གསོ་བ་དང༌། འཁོར་གསུམ་གྱི་རྟོག་པའི་སྤྲོས་པས་དུབ་ན་ཅིར་ཡང་མི་དམིགས་པའི་ཤེས་རབ་ཟབ་མོར་ངལ་གསོ་བ་དང༌། ཏིང་ངེ་འཛིན་སྐྱེ་བའི་ཕྱིར། བསྒོམས་ པས་སེམས་རྩེ་གཅིག་པ་མ་ཐོབ་པར་དུབ་ན་ཁ་ཐོན་ལ་སོགས་པས་ངལ་གསོ་བ་དང༌། རེས་འགའ་སྒོ་གསུམ་བཏང་སྙོམས་སུ་གནས་པས་ཀྱང་ཅུང་ཟད་ངལ་གསོར་རུང་སྟེ། སྤྱིར་སྤྱན་རས་གཟིགས་དབང་ཕྱུག་གིས་སེམས་ཅན་མཐའ་ཡས་པ་དྲངས་པས་ དུབ་པ་ལྟར་མཛད་ཏེ། སེམས་ཉིད་ངལ་གསོའི་ཏིང་ངེ་འཛིན་མཛད་པ་ལྟ་བུ་ཡིན་ལ། དེ་བཞིན་དུ་སྤྲོད་པ་དང་མཚན་མས་དུབ་པ་ན་འགོག་པ་ལ་སྙོམས་པར་ཞུགས་པས་ཀྱང་ངལ་གསོ་སྟེ་འོན་ཀྱང་ཡང་དག་མཐའ་དུས་མིན་དུ་དོན་དུ་བྱས་དགོས་

Page: 523 ༄༅། །པས་བྱང་ཆུབ་སེམས་དཔའས་ཞག་བདུན་ལས་འགོག་པ་ལ་སྙོམས་པར་མི་འཇུག་པར་སྟོན་པས་བཅའ་བ་མཛད་པ་ཡིན་ནོ། །ལེགས་པར་ཟིན་ནས་ཕྱི་མ་དང༌། །ཕྱི་མ་འདོད་པས་དེ་སྤང་བྱ། །ཞེས་པ་ལ་འབྲུ་གཉིས་སུ་ འགྱུར་ཏེ། དོར་བའི་དཔུང་ཉིད་ཏུ་གཤང་ན་ངལ་གསོ་བའི་ཕྱིར། རེ་ཞིག་དོར་བ་དེ་ལེགས་པར་ཟིན་པ་ཡིན་ལ། དེ་ལ་ཡུན་རིང་དུ་ཆགས་པར་མི་བྱ་སྟེ། དགེ་བའི་བར་ཆད་དུ་འགྱུར་བའི་ཕྱིར། དེ་ནས་ངལ་སོས་ནས་སླར་དགེ་བ་ཕྱི་མ་དང་དེའི་ཕྱི་མ་གཞན་སྒྲུབ་ པའི་ཆེད་དུ་སླར་ཡང་འབད་པར་བྱའོ་ཞེས་པར་འགྱུར་ལ། གལ་ཏེ་དཔུང་ཚོགས་བཞི་ཀའི་དོན་བསྡུ་ལྟ་བུར་འཆད་ན་ནི་དགེ་བ་དེ་དག་ཟིན་ནས་དེ་ཉིད་ལ་མི་ཞེན་པར་སླར་ཕྱི་མ་གཞན་དང་གཞན་སྒྲུབ་དགོས་སོ་ཞེས་པར་འགྱུར་རོ། ། འདིར་གསེར་གླིང་པས་དོན་བཅུ་གཅིག་ཏུ་བསྡུས་པར་ནི། རྗེས་སུ་མི་བདེར་འགྱུར་བའི་ལས། །རིག་གྱུར་དེ་མ་ཐག་ཏུ་བཏང༌། །དེ་ནི་ཤིན་ཏུ་རྫོགས་ནས་ཡང༌། །ཕྱི་ཕྱིར་བྱེད་འདོད་སྤང་བར་བྱ། །ཞེས་གཞུང་བཏོན་ནས་དགེ་བ་ཡིན་ཡང་ ཕྱིས་གཞན་ལ་གནོད་པའི་རྒྱུར་འགྱུར་བ་ལྟ་བུ་དོར་བྱར་བཤད་ཀྱི་ངལ་གསོར་མ་བཤད་ལ། དགེ་བའི་ལྷས་ཀྱང་དེ་ལྟར་འཆད་དོ། །བི་བྷུ་ཏིས་ནི། དོར་བའི་སྟོབས་འཆད་དེ་བསམ་གཏན་ལ་སྐྱོན་ཙ་ན་ཐབས་སུ་སེམས་དེ་ཉིད་དུ་འཇུག་པ་མ་ ཡིན་ཏེ་འོན་ཡང་བསམ་གཏན་དར་ཅིག་འདོར་རོ། བསམ་གཏན་དངོས་ལ་ནི་སྐྱོ་བར་མི་འགྱུར་ཏེ་བསམ་གཏན་གྱི་བདེ་བ་ནི་དཔེ་མེད་པར་བཤད་པའི་ཕྱིར་དང༌། ངལ་གསོ་ཐམས་ཅད་ཀྱི་མཆོག་འདི་ཡིན་པའི་ཕྱིར། བསམ་གཏན་ སྒོམ་པར་འདོད་ཀྱང་བསམ་གཏན་མ་སྐྱེས་པས་སྐྱོ་བ་ལ་དེ་ལྟར་མི་འགལ་ལོ། །ལྔ་པ་བརྩོན་འགྲུས་སྤེལ་བ་ལ་གཉིས། ལྷུར་བླང་བ་དང༌། བདག་ཉིད་དབང་དུ་བྱ་བའོ། །དང་པོ་ལྷུར་བླང་བ་ནི། འཐབ་རྙིང་དགྲ་དང་ལྷན་ཅིག་ཏུ། །

Page: 524 གཡུལ་ངོར་རལ་ཁ་ལྷགས་པ་བཞིན། །ཉོན་མོངས་མཚོན་ལས་བཟུར་བྱ་ཞིང༌། །ཉོན་མོངས་དགྲ་རྣམས་འཇེབས་པར་བཏག །གཡུལ་དུ་རལ་གྲི་ལྷུང་གྱུར་ན། །འཇིགས་པས་མྱུར་དུ་ལེན་པ་ལྟར། །དེ་བཞིན་དྲན་པའི་ མཚོན་ཤོར་ན། །དམྱལ་བའི་འཇིགས་དྲན་མྱུར་དུ་བླང༌། །ཇི་ལྟར་ཁྲག་ལ་བརྟེན་བཅས་ནས། །དུག་ནི་ལུས་ལ་ཁྱབ་འགྱུར་བ། །དེ་བཞིན་གླགས་ནི་རྙེད་གྱུར་ན། །ཉེས་པས་སེམས་ལ་ཁྱབ་པར་འགྱུར། །ཡུངས་མར་ བཀང་བའི་སྣོད་བསྐུར་ལ། །རལ་གྲི་ཐོགས་པས་དྲུང་བསྡད་དེ། །ོ་ན་བསོད་བསྡིགས་འཇིགས་པ་ལྟར། །བརྟུལ་ཞུགས་ཅན་གྱིས་དེ་བཞིན་སྒྲིམ། །དེ་བས་པང་དུ་སྦྲུལ་འོངས་ན། །ཇི་ལྟར་རིངས་སུ་ལྡང་བ་ལྟར། །དེ་བཞིན་ གཉིད་དང་སྙོམ་འོངས་ན། །མྱུར་དུ་དེ་དག་བཟློག་པར་བྱ། །ཉེས་པ་བྱུང་བ་རེ་རེ་ཞིང༌། །བདག་ལ་སྨད་ནས་ཅི་ནས་ཀྱང༌། །བདག་ལ་ཕྱིས་འདི་མི་འབྱུང་བ། །དེ་ལྟར་བྱ་ཞེས་ཡུན་རིང་བསམ། །ཇི་ལྟར་གནས་སྐབས་འདི་དག་ ལ། །དྲན་པ་གོམས་པ་ཉིད་འགྱུར་ཞེས། །རྒྱུ་འདི་ཡིས་ནི་ཕྲད་པ་འམ། །རིགས་པའི་ལས་ནི་འདོད་པར་བྱ། །ཞེས་གསུངས་ཏེ། དེ་ཡང་ཚིགས་བཅད་དང་པོས་བག་ཡོད་ལྷུར་བྱ་བ་དང༌། གཉིས་པས་དྲན་ཤེས་ལྷུར་བྱ་བ་དང༌། དེ་ ནས་གཉིས་ཀྱིས་རྒྱུད་ལ་ཉེས་པའི་སྐབས་མི་དབྱེ་བ་དང༌། དེ་ནས་གཉིས་ཀྱིས་ཉེས་པ་བྱུང་ན་དེ་མ་ཐག་ཟློག་པ་དང༌། མདོར་ན་བྱ་བ་སྒྲུབ་པ་ལྷུར་བླང་བ་ནི་ཚིགས་བཅད་ཐ་མས་བསྟན་ཏོ། །དེ་ཡང་དམག་གི་སྐྱེས་བུ་གཡུལ་དུ་ཤིན་ཏུ་གོམས་ ཤིང་རང་སྲུང་བ་དང༌། གཞན་འཇོམས་པའི་སྦྱོར་བ་ལ་མཁས་པ་ཞིག་གཡུལ་ཆེན་པོར་དགྲ་བོ་གཞན་དང༌། རལ་གྲིའི་སྟབས་དང༌། འཕོང་གི་སྟབས་དང༌། ཕྱིར་བསྣུར་བ་དང༌། མདུན་དུ་བསྣུར་བ་ལ་སོགས་པ་མཚོན་ཆའི་སྟབས་འགྱེད་དུ་ལྷགས་པ་ན་རང་

Page: 525 ༄༅། །ཉིད་ཕ་རོལ་གྱི་མཚོན་ལས་གཟུར་ཏེ་དགྲ་ཐམས་ཅད་ལྷག་མ་མེད་པར་འཇེབས་པར་ཁ་བཏགས་པ་དེ་བཞིན་དུ་གོ་ཆའི་བརྩོན་འགྲུས་གྱིས་ཉོན་མོངས་ཀྱི་མི་གནོད་པར་བྱས་ཏེ་སྦྱོར་བ་དང་མི་ལྡོག་པའི་བརྩོན་འགྲུས་ ཀྱིས་ཉོན་མོངས་ལྡང་མི་སྲིད་པར་ཚར་བཅད་པར་བྱའོ། །གཡུལ་དུ་རྩོད་པའི་ཚེ་རང་གི་རལ་གྲི་སར་བྲུལ་ན་མྱུར་དུ་ལེན་པ་ལྟར་གོ་ཆའི་བརྩོན་འགྲུས་དྲན་པ་དང་ཤེས་བཞིན་ནི་ཅུང་ཟད་བརྗེད་ནའང་ངན་སོང་གི་འཇིགས་པ་དྲན་པས་དེ་མ་ཐག་མི་ བརྗེད་པར་བླང་དགོས་ཏེ་ཉོན་མོངས་པ་ནི་སྐྱེ་བར་སླ་ལ་འཇོམས་པར་དཀའ་བ་དཔེར་ན་ཟས་སྐོམ་ལྗན་ལྗིན་རྣམས་མེ་དྲོད་ཀྱིས་དངས་རྙིགས་ཕྱེ་ནས་དངས་མ་ཁྲག་ཏུ་གྱུར་པས་རྩ་ཁམས་ཐམས་ཅད་དུ་སོང་སྟེ་ཤ་ལ་སོགས་པ་རིམ་པས་སྐྱེད་ལ་གལ་ཏེ་ དུག་ཁོང་དུ་སོང་ན་དེ་ལུས་ཟུངས་ཀྱི་ཁྲག་དེ་ལ་བརྟེན་ནས་རྩ་གནས་སུ་འགྲོ་བས་ཉེས་པ་སྐྱེད་ཅིང༌། སྤྱིར་དུག་གི་རྟེན་ཁྲག་ཡིན་པས་སྨན་པ་དག་དུག་ཁོང་དུ་སོང་མ་ཐག་ལ་གསོན་པོའི་ཁྲག་བླུད་པ་ལ་དུག་འདུར་བཅུག་ནས་སླར་སྨན་རྣོན་པོས་སྦྱོང་བར་བྱེད་དོ། ། དེས་ན་དྲན་ཤེས་ཀྱིས་མ་ཟིན་པའི་གནས་སྐབས་ཁྲག་ལྟ་བུ་ལ་བརྟེན་ནས་ཉེས་པས་སེམས་ཆུད་འཛའ་བར་བྱེད་པའི་ཚུལ་ཤེས་ནས་སྔོན་འཕགས་པ་ཀ་ཏྱཱ་ན་ལ་རྒྱལ་པོ་རབ་སྣང་གིས་མཆོད་པའི་ཕྱིར། གླུ་གར་བྱས་ཏེ་འཕགས་པ་གླུ་སྙན་ནམ་གར་བཟང་ ངམ་ཞེས་དྲིས་པ་ན་སུ་མཐོང་བ་དང་ཐོས་པ་ལ་དྲིས་ཤིག །རྒྱལ་པོས་སྨྲས་པ། དབང་པོ་ནང་དུ་བསྡུས་པ་རྣམས་ཀྱིས་མ་མཐོང་བ་ནི་སྲིད་ན་མ་ཐོས་པ་ལྟ་ག་ལ་རིགས། འཕགས་པས་སྨྲས་པ། རྒྱལ་པོ་ཁྱོད་ཀྱི་འོག་ན་མི་གསོད་པའི་ཆད་པ་ ལ་ཐུག་པ་འགའ་ཡོད་དམ་ཡོད་དོ། །འོ་ན་དེ་ལ་ཡུངས་མར་གྱིས་ཁད་ཆད་དུ་བཀང་བའི་སྣོད་ལག་ཏུ་བསྐུར་ལ་དེའི་ཕྱི་བཞིན་དུ་གཤེད་མ་རལ་གྲི་ཤུབས་ནས་ཕྱུང་སྟེ་ཕྱར་བ་ཐོང་ལས་འདི་ལས་ཐིགས་པ་གཅིག་བོ་ན་དེའི་མོད་ལ་རལ་གྲིས་རྐེ་བཅད་

Page: 526 དོ། །གལ་ཏེ་གཏན་མ་བོ་ན་ཆད་པ་ལས་ཐར་རོ་ཞེས་གྱིས་ལ། དེའི་མདུན་དུ་གླུ་གར་བྱེད་བཞིན་པས་གྲོང་ཁྱེར་བསྐོར་ཅིག་གསུང་སྟེ་དེ་ལྟར་བྱས་ནས་དེའི་འོག་ཏུ་མི་དེ་ལ་གླུ་སྙན་ནམ་གར་བཟང་ངམ་དྲིས་པས་བདག་གིས་མ་མཐོང་མ་ཐོས་ཏེ་བདག་སྲོག་གིས་ འཇིགས་སྐྲག་པས་ཉེན་ན་ལྟ་བ་དང་ཉན་པ་ལྟ་ཅི་སྨོས་ཞེས་ཟེར་བ་ན། འཕགས་པས་རྒྱལ་པོ་ཆེན་པོ་མི་འདི་ཚེ་འདི་གཅིག་པུའི་སྲོག་གི་ཆེད་དུ་འདི་ལྟར་དབང་པོ་ནང་དུ་སྡུད་ན། བདག་ཅག་རྣམས་འཁོར་བའི་མཐའ་ཇི་སྲིད་པའི་སྡུག་བསྔལ་གཞོམ་ པའི་སླད་དུ་ཅིས་མི་སྡུད། ཅེས་གསུངས་པས་རྒྱལ་པོ་དད་པར་བྱས་པ་ལྟ་བུ་སྟེ་དེ་ལྟར་ཤེས་བཞིན་གྱིས་སྒྲིམ་མོ། །དེ་ལྟར་དྲན་ཤེས་ཀྱིས་རྟག་པར་ཟིན་པ་ན་ཉོན་མོངས་པ་རྣམས་རྒྱུད་ལ་མི་འབྱུང་ལ། གལ་ཏེ་གཉིད་དང་སྙོམས་ལས་ལྟ་བུ་ལུང་དུ་མ་ བསྟན་པའི་རྣམ་པ་ཅན་ཅུང་ཟད་བྱུང་ནའང་དེ་མ་ཐག་ཏུ་ཚོར་བར་འགྱུར་བས་དང་དུ་མི་བླང་བ་པང་པར་སྦྲུལ་ཞུགས་པ་འདོར་བ་ལྟ་བུའི་བརྩོན་པ་བསྐྱེད་དེ་ཉེས་པས་མ་གོས་པར་བྱ་ཞིང༌། འདོད་ཁམས་པ་ལ་ཟས་སུ་འགྱུར་བའི་དུས་ཀྱི་གཉིད་མཚན་མོའི་ དྲུག་ཆའམ་བཞི་ཆ་གཅིག་གུང་ལ་ཉལ་བ་ཙམ་ནི་མ་གཏོགས་ཏེ་དེ་ནི་སྔར་བསྟན་པ་ལྟར་དགེ་བའི་གཉིད་དུ་བྱ་སྟེ་དུས་མིན་གྱི་གཉིད་སྙོམས་སོགས་ཉེས་པ་བྱུང་ངོ་ཅོག་སྐད་ཅིག་གིས་ཚོར་ནས་དང་དུ་མི་བླང་ཞིང་སྔ་མ་ཚར་བཅད་པ་དང༌། ཕྱི་མ་མི་སྐྱེ་བའི་ ཕྱིར་འབད་པར་བྱ་སྟེ། མདོར་ན་གནས་སྐབས་དེ་ཐམས་ཅད་དུ་དགེ་བའི་དྲན་པ་གོམས་པ་ལྷུར་བྱ་ཞིང་དེ་ལས་ཤེས་བཞིན་གྱིས་རིགས་པའི་ལས་ལ་རྩེ་གཅིག་ཏུ་འབད་པར་བྱ་བ་ཁོ་ནའོ། འདི་ལ་དཀའ་འགྲེལ་ཆུང་ངུ་ལས་ནི། ལྷུར་བླང་བ་ཞེས་ བྱ་བ་ནི་ཉོན་མོངས་པ་དང་དེས་བྱས་པའི་ཉེས་སྤྱོད་སྤོང་བ་ལ་རབ་ཏུ་སྦྱོར་བའོ། །དེ་ལ་བག་བྱེད་པ་ནི་སྦྱོར་བ་ལ་མཁས་པ་སྟེ་ཉམས་སུ་ལེན་པ་ནི་ཚིགས་བཅད་དང་པོ་འདིས་བསྟན་ཏོ་ཞེས་དང༌། དེ་བས་པང་དུ་སྦྲུལ་འོངས་ན། །ཞེས་སོགས་

Page: 527 ༄༅། །ཀྱི་ཚིགས་བཅད་གཉིས་ལ་སྔ་མས་ནི་ཉོན་མོངས་པ་བྱུང་བ་ཟློག་པ་དང༌། གཉིས་པས་ནི་དེས་བསྐྱེད་པའི་གནས་ངན་ལེན་བྱུང་བ་ཟློག་པར་བསྟན་ཏེ། གནས་ངན་ལེན་ཞེས་བྱ་བ་ནི་ཉོན་མོངས་པའི་འབྲས་བུ་ཉེས་ སྤྱོད་ལ་འདོད་དོ་ཞེས་དང༌། ཐ་མ་འདིས་ནི་བག་ཡོད་པ་དང༌། དྲན་པ་དང༌། ཤེས་བཞིན་དང༌། ཉེས་པ་འབྱུང་བའི་སྐབས་མི་དབྱེ་བ་དང༌། བྱུང་བ་ཟློག་པའི་གནས་སྐབས་སམ། མཚན་ཉིད་འདི་དག་ལ་དྲན་པ་གོམས་པར་བྱ་བའི་ཕྱིར། བླ་མ་དང་ཚངས་ པ་མཚུངས་པར་སྤྱོད་པ་དང་ཕྲད་པའི་བྱ་བ་ཉམས་སུ་བླངས་པའམ། དེས་བསྒོ་བའི་ལས་སམ། ཐོས་པ་དང་བསམ་པ་དང་སྒོམ་པ་ལ་སོགས་ལ་འདོད་པར་བྱ་སྟེ། ལས་དེ་འདྲ་བ་ལྷུར་བླང་ངོ་ཞེས་བཤད་ལ། བི་བྷཱུ་ཏིས། ཉོན་མོངས་དགྲ་རྣམས་ འཇེབས་པར་བཏག་པ་ནི་ཉོན་མོངས་པ་ནི་རྟོག་པའི་རང་བཞིན་ཡིན་ལ་དེ་དང་དེའི་དམིགས་པ་སྟོང་པར་བསྒོམས་ཏེ་རྟོག་མེད་ཀྱི་ཏིང་ངེ་འཛིན་ལ་འཇུག་པ་ན་དེ་དག་མེད་པར་འགྱུར་རོ། །ཞེས་དང༌། རལ་གྲི་ལྷུང་གྱུར་ན་སོགས་ལ་དྲན་པ་ཁོ་ན་རལ་གྲི་སྟེ། ཞེས་དང༌། གཉིད་དང༌། ལེ་ལོ་བྱུང་ན་དེ་མ་ཐག་ལང་ཏེ་ཆོས་བཤད་པ་དང༌། འདོན་པ་དང༌། བཟའ་བཏུང་ལ་སོགས་པ་བྱའོ། །ཞེས་དང༌། ཅི་ནས་ཀྱང་བདག་ལ་ཕྱིས་འདི་ཞེས་སོགས་ལ་རང་གིས་མི་ཤེས་ན་མཁན་པོ་འམ་སློབ་དཔོན་ལ་བསྟེན་ཏེ་མན་ ངག་ནོད་དོ་ཞེས་བཤད་ལ། འདིའི་ཡང་གཉིད་རྨུགས་བཟའ་བཏུང་གིས་སེལ་བ་ནི་ངོ་མཚར་བའི་བཤད་པར་སྣང་ངོ༌། །འགྲེལ་བ་ཕལ་ཆེར་ན། ཇི་ལྟར་ཁྲག་ལ་བསྟེན་ནས་ནི། །སོགས་ལ་དུག་མདའ་བསྣུན་པ་རྨ་བྱུང་པས་ཁྲག་ལ་བསྟེན་ ནས་ཁྱབ་པ་ལྟར་ཞེས་བཤད་པ་ཁོ་ན་སྣང་ཡང་སྤྱིར་ཞར་བྱུང་གི་དཔེ་ཙམ་དོན་དོ་གལ་མི་ཆེ་བས་དེ་ལྟར་ཡང་བཤད་རུང་མོད་ཀྱི་འོན་ཀྱང་དུག་ཁྲག་ལ་རྟེན་འཆའ་བ་ནི་གསོ་དཔྱད་རིག་པ་རྣམས་ཁྲག་ཙམ་ལ་འཆད་པ་ཡིན་གྱི། རྨའི་ཁྲག་ཁོ་ན་

Page: 528 ལ་འཆད་པ་མ་ཡིན་ནོ། །གཉིས་པ་བདག་ཉིད་དབང་དུ་བྱ་བ་ནི། ཅི་ནས་ལས་བྱེད་སྔོན་རོལ་ནས། །ཐམས་ཅད་ལ་ནི་མཐུ་ཡོད་པ། །དེ་ལྟར་བག་ཡོད་གཏམ་དྲན་ཏེ། །བདག་ཉིད་ལྡང་བ་ཡང་བར་བྱ། །ཇི་ལྟར་རླུང་ནི་འགྲོ་བ་དང༌། ། འོང་བས་ཤིང་བལ་དབང་བསྒྱུར་བ། །དེ་བཞིན་སྤྲོ་བས་དབང་བསྒྱུར་བྱ། །དེ་ལྟ་ན་ནི་འགྲུབ་པར་འགྱུར། །ཞེས་གསུངས་ཏེ། དང་པོས་ལུས་དབང་དུ་བྱ་བ་དང༌། ཕྱི་མས་སེམས་དབང་དུ་བྱ་བ་བསྟན་པའམ། ཡང་ན་སྤྱི་དང་དཔེར་ ཡང་བཤད་དོ། །དེ་ཡང་ལས་རྣམས་ཀྱི་སྔོན་རོལ་དུ་རྩོམ་པ་ལ་བརྟན་པས་གྱ་ཚོམས་མ་ཡིན་པར་འཇུག་ཅིང༌། དེ་སྒྲུབ་པའི་མཐུ་ཡོད་པར་བྱ་བའི་ཕྱིར། བག་ཡོད་ཀྱི་ལེའུ་དང་དེ་མ་ཐག་དུའང་བཤད་པའི་རྗེས་སུ་བསྟན་པའི་གཏམ་ རྣམས་མི་བརྗེད་པར་དྲན་པས་བདག་གི་སྒོ་གསུམ་འཇུག་ལྡང་ཡང་ཞིང་ཁ་ལོ་བདེ་བར་བྱ་སྟེ། ཇི་ལྟར་ཤིང་བལ་ཆུང་ངུ་ནི་རླུང་ཆུང་ངུས་ཀྱང་དབང་བསྒྱུར་ཞིང་འགྲོ་འོང་སྟོན་པ་ལྟར། སེམས་ཀྱི་ཤིང་བལ་ཡང་སྤྲོ་བ་དང༌། གཉེན་པོའི་རླུང་གིས་རང་དབང་དུ་ འགྱུར་བར་བྱ་སྟེ། རང་གི་སེམས་དུལ་བ་འདི་ནི་ཆོས་ཀྱི་དོན་པོ་ཡིན་ལ། འདི་དང་ལྡན་ན་དགེ་བ་ཐམས་ཅད་འགྲུབ་པ་ཡིན་ལ་འདིས་ནི་བརྩོན་འགྲུས་ཀྱི་འབྲས་བུ་ཕུན་སུམ་ཚོགས་པ་ཡང་བསྟན་པ་ཡིན་ནོ། །བྱང་ཆུབ་སེམས་དཔའི་སྤྱོད་པ་ལ་འཇུག་པ་ ལས། བརྩོན་འགྲུས་ཀྱི་ལེའུ་རྣམ་པར་ཕྱེ་བ་སྟེ་བདུན་པའོ། །

ལེའུ་བརྒྱད་པ། བསམ་གཏན་བསྟན་པ།

ལེའུ་བརྒྱད་པ། བསམ་གཏན་བསྟན་པ། དེ་ལྟར་བརྩོན་འགྲུས་བརྩམས་པའི་དངོས་འབྲས་ནི། དགེ་བ་ལ་སེམས་རྩེ་གཅིག་པ་ཐོབ་པ་ཉིད་ཁོ་ན་ཡིན་ པའི་ཕྱིར། བརྩོན་འགྲུས་ཀྱི་དེ་མ་ཐག་ཏུ་དེའི་འབྲས་བུ་བསམ་གཏན་གྱི་ལེའུ་འཆད་པར་འབྲེལ་ཏོ། །འདི་ལ་འགྲེལ་ཆེན་དང༌། བི་བྷཱུ་ཏིས་ནི། བཟོད་བྱ་ཐོས་པ་བཙལ་བར་བྱ། །དེ་ནས་ནགས་སུ་གནས་པ་ཡིས། །མཉམ་པར་བཞག་ལ་བརྩོན་

Page: 529 ༄༅། །བྱ་ཞིང༌། །མི་སྡུག་ལ་སོགས་བསྒོམ་པར་བྱ། །ཞེས་བྱ་བའི་རིམ་པས་ཚིག་རྐང་དང་པོ་གཉིས་ཉིད་ལེའུའི་འབྲེལ་དུ་འཆད་ལ། དཀའ་འགྲེལ་དང༌། དགེ་བའི་ལྷས། མདོར་བསྟན་ཏུ་འཆད་ཀྱང་གཉི་གར་དུ་མི་འགལ་ལོ། ། གཞུང་དངོས་ལ་གསུམ། མི་མཐུན་པའི་ཕྱོགས་རྣམ་གཡེང་སྤང་བ་དང༌། ཞི་གནས་ཀྱི་དམིགས་པ་བྱང་ཆུབ་ཀྱི་སེམས་སྒོམ་པ། དོན་བསྡུ་བའོ། །དང་པོ་མི་མཐུན་པའི་ཕྱོགས་རྣམ་གཡེང་སྤང་བ་ལ་གསུམ། སྤང་བའི་གནས་མདོར་བསྟན་པ། འཇིག་རྟེན་སྤོང་བ་རྒྱས་ བཤད་དང༌། རྣམ་རྟོག་སྤོང་བ་རྒྱས་བཤད་དོ། །དང་པོ་སྤང་བའི་གནས་མདོར་བསྟན་པབ་ནི། དེ་ལྟར་བརྩོན་འགྲུས་བསྐྱེད་ནས་ནི། །ཡིད་ནི་ཏིང་ངེ་འཛིན་ལ་བཞག །སེམས་ནི་རྣམ་པར་གཡེངས་པའི་མི། །ཉོན་མོངས་མཆེ་བའི་ཕྲག་ན་གནས། །ལུས་དང་སེམས་ ནི་དབེན་པ་ཡིས། །རྣམ་པར་གཡེང་བ་མི་འབྱུང་ངོ༌། །དེ་བས་འཇིག་རྟེན་སྤང་བྱ་ཞིང༌། །རྣམ་པར་རྟོག་པའང་ཡོངས་སུ་དོར། །ཞེས་གསུངས་ཏེ། སེམས་རྣམ་པར་གཡེངས་ན་ཉོན་མོངས་པའི་དབང་དུ་འགྱུར་ལ། དེ་གྱུར་ན་སྦྱིན་སོགས་བཞི་ པོ་དེ་ཡང་མི་འགྲུབ་པའི་ཕྱིར། སེམས་རྣམ་གཡེང་ལས་ལྡོག་དགོས་ལ། དེའི་རྒྱུ་ནི་ལུས་ངག་འདུ་འཛིས་དབེན་པ་དང་སེམས་རྣམ་རྟོག་གིས་དབེན་པ་གཉིས་ཡིན་ལ། སྤང་བར་བྱ་བའི་རྣམ་གཡེང་དེ་ནི་མདོར་བསྡུ་ན་སྐབས་འདིར་འཇིག་རྟེན་སྤང་ བ་དང་རྣམ་རྟོག་སྤང་བ་གཉིས་ཡིན་ནོ། །དཀའ་འགྲེལ་ཆུང་ངུ་ལས་ནི། ཏིང་ངེ་འཛིན་ལ་ཇི་ལྟར་བཞག་ན་རྣམ་གཡེང་སྤོང་བས་སོ། །རྣམ་གཡེང་གི་ཉེས་པ་ཅི་ཞེ་ན། ཉོན་མོངས་མཆེ་བའི་ཕྲག་ན་གནས་སོ། །ཇི་ལྟར་སྤོང་ན་ལུས་དང་སེམས་ནི་ དབེན་པ་ཡིས་སོ། །འཇིག་རྟེན་སྤང་བ་དང་རྣམ་རྟོག་དོར་བ་ནི་དབེན་པའི་མཚན་ཉིད་ཅན་ཡིན་པས་དེ་དག་དོར་རོ། །ཞེས་སོ། །དགེ་བའི་ལྷས་ནི། ཏིང་ངེ་འཛིན་ནི་སེམས་རྩེ་གཅིག་པ་ཉིད་ཡིན་ཏེ། དེ་ལའང་ནང་དུ་ཡང་དག་འཇོག་དང༌། ཀུན་ནས་འཇོག་དང༌།

Page: 530 ནན་ཏན་གྱིས་འཇོག་སྟེ་གསུམ་ཡིན་ལ། དེ་ཐམས་ཅད་ལ་འདིར་གཡེང་བ་མེད་པའི་ཏིང་ངེ་འཛིན། ཞེས་བྱའོ། །དེ་ལ་ནང་དུ་ཡང་དག་འཇོག་གི་དབང་དུ་བྱས་ནས་ལུས་དང་སོགས་ཏེ་ལུས་དབེན་པས་འདོད་པའི་རྣམ་རྟོག་ཡོངས་སུ་སྤོང་ལ། སེམས་ དབེན་པས་ནི་འདོད་སེམས་ནས་བསམ་གཏན་བཞི་པའི་བར་འགྲུབ་པ་ཡིན་ལ། གཟུགས་མེད་དང་འགོག་པའི་བར་དུ་ཡང་རྫོགས་པར་བྱའོ། །ཞེས་བཤད་དོ། །གཉིས་པ་འཇིག་རྟེན་སྤོང་ཚུལ་ལ་ལྔ། གང་གིས་མི་སྤོངས་པའི་རྒྱུ། གང་གིས་ སྤོངས་པའི་རྒྱུ། གཉེན་པོ་ཇི་ལྟར་སྒྲུབ་ཚུལ། འདུ་འཛིའི་ཉེས་པ། དབེན་པའི་ཕན་ཡོན་བསྔགས་པའོ། །དང་པོ་གང་གིས་མི་སྤོངས་པའི་རྒྱུ་ནི། ཆགས་པའི་ཕྱིར་དང་རྙེད་སོགས་ལ། །སྲེད་པས་འཇིག་རྟེན་མི་སྤོངས་ཏེ། །དེ་བས་འདི་དག་ཡོངས་སྤོངས་ ལ། །མཁས་པས་འདི་ལྟར་སྤྱད་པར་བྱ། །ཞེས་གསུངས་ཏེ། སྐྱེས་པ་དང་བུད་མེད་ལ་སོགས་པ་ནང་སེམས་ཅན་ལ་ཆགས་པ་དང༌། ཕྱིའི་རྙེད་བཀུར་སོགས་ལ་ཞེན་པ་ནི་འཇིག་རྟེན་མི་སྤོངས་པའི་རྒྱུ་སྟེ་དེས་ཁྱིམ་དུ་བུ་སྨད་དང་བཅས་པར་ འཆིང་ལ། རྒྱུ་དེས་བདག་གི་མི་ལུས་ཐོབ་པ་དོན་མེད་པར་བྱེད་དོ། །དེས་ན་ཆགས་ཡུལ་དེ་དག་ལ་སྙིང་པོ་མེད་པའི་ཚུལ་འཆད་པར་འགྱུར་པ་འདི་དག་སེམས་པས་ཞེན་པ་སྤོངས་ལ་འདི་ལྟར་གྱིས་ཤིག་པའོ། །གཉིས་པ་གང་གིས་སྤོངས་པའི་རྒྱུ་ནི། ལྷག་མཐོང་རབ་ཏུ་ལྡན་པའི་ཞི་གནས་ཀྱིས། །ཉོན་མོངས་རྣམ་པར་འཇོམས་པར་ཤེས་བྱས་ནས། །ཐོག་མར་ཞི་གནས་བཙལ་བྱ་དེ་ཡང་ནི། །འཇིག་རྟེན་ཆགས་པ་མེད་ལ་མངོན་དགའས་འགྲུབ། །ཅེས་གསུངས་ཏེ། དེ་ཁོ་ན་ཉིད་ཤེས་པ་ནི་ལྷག་ མཐོང་ངོ༌། །དེ་ལ་རྩེ་གཅིག་ཏུ་གནས་པ་ནི་སྐབས་དེའི་ཞི་གནས་ཏེ་རབ་ཏུ་ལྡན་པའི་སྒྲས་ཞི་ལྷག་དབྱེར་མེད་པར་ཟུང་དུ་ཆུད་པ་འདིས་ཉོན་མོངས་པ་ཐམས་ཅད་རྣམ་པར་འཇོམས་ཏེ་ཞི་གནས་ཀྱིས་མངོན་གྱུར་བ་མགོ་གནོན་ཞིང༌། ལྷག་མཐོང་གིས་ས་བོན་

Page: 531 ༄༅། །སྐྱེ་འགྱུར་གྱི་ཆ་འཇོམས་པའི་ཕྱིར་རོ། །དེ་ཡང་དང་པོར་སྒྲུབ་སླ་བ་དང་ཕ་རོལ་ཏུ་ཕྱིན་པ་དྲུག་རིམ་འཇུག་གི་དབང་དུ་བྱས་ནས་ཐོག་མར་ཞི་གནས་བཙལ་བར་བྱ་ལ། དེ་ནི་འཇིག་རྟེན་ཐམས་ཅད་ཀྱི་ཉེས་དམིགས་རིག་པས་ གང་ལའང་ཆགས་པ་མེད་པར་སྐྱོ་ཞིང་ཡིད་འབྱུང་ལ། དབེན་ཞིང་ཞི་བ་ལ་གཅིག་ཏུ་མངོན་པར་དགའ་བས་སེམས་ནང་དུ་སྡུད་པ་འདིས་འགྲུབ་སྟེ། ཇོ་བོ་རྗེས། འཇིག་རྟེན་བྱ་བ་དག་ལ་ཕར་བལྟས་པས། །བྱས་པ་ཐམས་ཅད་དོན་མེད་སྡུག་ བསྔལ་རྒྱུ། །ཅི་ལ་བསམས་ཀྱང་ཕན་པར་མི་འགྱུར་བས། །རང་གི་སེམས་ལ་ལྟ་བ་གོམས་པར་གྱིས། །ཞེས་གསུངས་པ་ལྟར་འཇིག་རྟེན་སྤང་བ་དང༌། རྣམ་སྣང་མངོན་བྱང་གི་རྒྱུད་ལས། རྣམ་རྟོག་མ་རིག་ཆེན་པོ་སྟེ། །འཁོར་བའི་ རྒྱ་མཚོར་ལྟུང་བྱེད་ཡིན། །མི་རྟོག་ཏིང་འཛིན་ལ་གནས་ན། །མཁའ་བཞིན་དྲི་མ་མེད་པར་འགྱུར། །ཞེས་པ་ལྟར། རྟོག་པ་སྤང་བ་སྟེ་གཉིས་ཀྱིས་འགྲུབ་བོ། །འདིས་ལེགས་བཤད་བསྡུས་པར་ནི། ལྷག་མཐོང་ནི་སྒོམ་ལམ་ཟག་མེད་ཀྱི་ཤེས་ རབ་དང༌། མཐོང་ལམ་དང༌། སྦྱོར་ལམ་ཆོས་མཆོག་གི་ཡེ་ཤེས་དང༌། ཐོས་བསམ་གྱིས་བདག་མེད་རྟོགས་པའི་ཤེས་རབ་སྟེ་བཞི་ཡིན་ལ། དང་པོས་ལྷན་སྐྱེས་དང༌། གཉིས་པས་ཀུན་བཏགས་ཀྱི་ཉོན་མོངས་པ། གསུམ་པས་ཉོན་མོངས་སྔ་ཕྱི་མཚམས་ སྦྱོར་གྱི་ནུས་པ། བཞི་པས་བདག་འཛིན་ལས་གྱུར་པའི་ཉོན་མོངས་མངོན་གྱུར་ཙམ་སྤོང་ལ། དེ་ཐམས་ཅད་ལ་རང་སའི་ཞི་གནས་གྲོགས་སུ་དགོས་སོ། །ཞེས་འཆད་པར་མཐོང་ངོ༌། །གསུམ་པ་གཉེན་པོ་སྒྲུབ་པ་ལ་གཉིས། སེམས་ཅན་ལ་མ་ ཆགས་པ་སྒྲུབ་པ་དང༌། རྙེད་སོགས་ལ་མ་ཆགས་པ་སྒྲུབ་པའོ། །དང་པོ་སེམས་ཅན་ལ་མ་ཆགས་པ་སྒྲུབ་པ་ལ་ཡང༌། ཆགས་པའི་ཉེས་པ་བསྟན་པ་དང༌། བྱིས་པ་ནི་འགྲོགས་བྱ་མ་ཡིན་པར་བསྟན་པའོ། །དང་པོ་ཆགས་པའི་ཉེས་པ་བསྟན་པ་ནི། མི་རྟག་སུ་ཞིག་མི་རྟག་ལ། །ཡང་དག་ཆགས་

Page: 532 པ་བྱེད་པ་ཡོད། །དེས་ནི་ཚེ་རབས་སྟོང་ཕྲག་ཏུ། །སྡུག་པ་མཐོང་བར་ཡོང་མི་འགྱུར། །མ་མཐོང་ན་ནི་དགར་མི་འགྱུར། །ཡིད་ཀྱང་མཉམ་འཇོག་མི་འགྱུར་ལ། །མཐོང་ཡང་ངོམས་པར་མི་འགྱུར་བས། །སྔར་བཞིན་སྲེད་པས་ གདུང་བར་འགྱུར། །སེམས་ཅན་རྣམས་ལ་ཆགས་བྱས་ན། །ཡང་དག་ཉིད་ལ་ཀུན་ནས་སྒྲིབ། །སྐྱོ་བའི་སེམས་ཀྱང་འཇིག་པར་བྱེད། །ཐ་མར་མྱ་ངན་གདུང་བར་འགྱུར། །དེ་ལ་སེམས་པ་འབའ་ཞིག་གིས། །ཚེ་འདི་དོན་མེད་འདའ་ བར་འགྱུར། །རྟག་པ་མེད་པའི་མཛའ་བཤེས་ཀྱིས། །གཡུང་དྲུང་ཆོས་ཀྱང་འཇིག་པར་འགྱུར། །ཞེས་གསུངས་ཏེ། དེ་ཡང་ཚིགས་བཅད་དང་པོས་སྤྱིར་བསྟན། གཉིས་པས་མཐོང་ཆོས་ལ་སྡུག་བསྔལ་སྐྱེད་པ་དང༌། གསུམ་པས་ཐར་ བའི་གེགས་བྱེད་པ་དང༌། རྐང་པ་གཉིས་ཀྱིས་ཡོན་ཏན་སྔར་མེད་མི་སྐྱེ་བ་དང༌། རྐང་པ་གཉིས་ཀྱིས་ཡོན་ཏན་སྔར་ཡོད་འགག་པར་བསྟན་ཏོ། །གཉིས་པ་བྱིས་པ་ནི་འགྲོགས་བྱ་བ་མ་ཡིན་པར་བསྟན་པ་ནི། བྱིས་དང་སྐལ་པ་མཉམ་སྤྱོད་ན། །ངེས་པར་ངན་འགྲོར་འགྲོ་བར་འགྱུར། ། སྐལ་མི་མཉམ་པར་འཁྲིད་བྱེད་ན། །བྱིས་པ་བསྟེན་པས་ཅི་ཞིག་བྱ། །སྐད་ཅིག་གཅིག་གིས་མཛའ་འགྱུར་ལ། །ཡུད་ཙམ་གཅིག་གིས་དགྲར་ཡང་འགྱུར། །དགའ་བའི་གནས་ལའང་ཁྲོ་བྱེད་པས། །སོ་སོའི་སྐྱེ་བོ་མགུ་བར་དཀའ། ། ཕན་པ་སྨྲས་ན་ཁྲོ་བར་བྱེད། །བདག་ཀྱང་ཕན་ལས་ཟློག་པར་བྱེད། །དེ་དག་ངག་ནི་མ་མཉན་ན། །ཁྲོས་བས་ངན་འགྲོར་འགྲོ་བར་འགྱུར། །མཐོ་ལ་ཕྲག་དོག་མཉམ་དང་འགྲན། །དམའ་ལ་ང་རྒྱལ་བསྟོད་ན་དྲེགས། །མི་སྙན་བརྗོད་ན་ཁོང་ ཁྲོ་སྐྱེ། །ནམ་ཞིག་བྱིས་ལས་ཕན་པ་འཐོབ། །བྱིས་དང་འགྲོགས་ན་བྱིས་པ་ལས། །བདག་བསྟོད་གཞན་ལ་སྨོད་པ་དང༌། །འཁོར་བར་དགའ་བའི་གཏམ་ལ་སོགས། །མི་དགེ་ཅིས་ཀྱང་ངེས་པར་འབྱུང༌། །དེ་འདྲ་བདག་དང་གཞན་བརྟེན་

Page: 533 ༄༅། །པ། །དེ་ནི་ཕུང་བར་འགྱུར་བར་ཟད། །དེས་ཀྱང་བདག་དོན་མ་བྱས་ལ། །བདག་ཀྱང་དེ་དོན་མི་འགྱུར་བས། །བྱིས་ལས་ཐག་རིང་བྱོལ་བར་བྱ། །ཕྲད་ན་དགའ་བས་མགུ་བྱ་སྟེ། །འདྲིས་ཆེན་ཉིད་དུ་མི་འགྱུར་བར། །ཐ་མལ་པ་ ཙམ་ལེགས་པར་བྱ། །བུང་བས་མེ་ཏོག་སྦྲང་རྩི་བཞིན། །ཆོས་ཀྱི་དོན་ཙམ་བླངས་ནས་ནི། །ཀུན་ལ་སྔོན་ཆད་མ་མཐོང་བཞིན། །འདྲིས་པ་མེད་པར་གནས་པར་བྱ། །ཞེས་གསུངས་ཏེ། དང་པོས་ངན་འགྲོར་འཁྲིད་པ་དང༌། ཚིགས་བཅད་ གསུམ་གྱིས་བྱིས་པའི་ངང་ཚུལ་བསྟན་པ་དང༌། དེ་ནས་ཚིགས་བཅད་ཕྱེད་དང་གཉིས་ཀྱིས་བསྟེན་པའི་ཉེས་དམིགས་དང༌། དེ་ནས་རྐང་པ་གསུམ་གྱིས་སྤང་དགོས་པར་བསྟན་པ་དང༌། རྐང་པ་གསུམ་གྱིས་བསྟེན་དགོས་ནའང་གཉི་ག་ལ་མི་གནོད་པ་བར་ མའི་བརྟུལ་ཞུགས་ཀྱིས་གནས་དགོས་པ་དང༌། ཚིགས་བཅད་ཐ་མས་སེམས་རྩེ་གཅིག་ཏུ་བསྡུས་ཏེ་གནས་དགོས་པར་བསྟན་ཏོ། །དེ་ཡང་ཆགས་པ་པོ་རང་ཉིད་མི་རྟག་ཅིང་མྱུར་དུ་འཆི་ལ་མི་སྡུག་པ་མི་གཙང་བ་འདུས་པའི་ལུས་རུས་པའི་འཁྲུལ་ འཁོར་ཅན་ཡིན་ལ། ཆགས་ཡུལ་བུད་མེད་སོགས་ཀྱང་དེ་ཁོ་ན་ཡིན་པ་ལ་དེ་ལྟར་མི་ཤེས་ཀྱི་སྟེང་དུ་མི་གཙང་བའི་འདུས་པ་གཅིག་གིས་གཅིག་ལ་གཙང་བར་འཛིན་པ་དང་བརྟགས་ན་རོ་ལངས་ལྟར་འཇིགས་སུ་རུང་བའི་གནས་གཅིག་གིས་གཅིག་ལ་ མཛེས་པ་དང་ཆགས་པར་འཛིན་པ་ནི་ཤིན་ཏུ་འཁྲུལ་པའི་ཕྱིར། འདི་ལྟ་བུ་བྱེད་པ་སུ་ཡོད་ཅེས་ཁྲེལ་ཞིང་དམད་པ་ཡིན་ལ། བུ་མོ་ཟླ་མཆོག་བུད་མེད་རིན་པོ་ཆེར་བཀུར་བ་མི་ལས་འདས་ཤིང་ལྷའི་ལུས་མ་ཐོབ་པ་དེ་ལ་རྒྱལ་བུ་དང་ཁྱིམ་བདག་གི་བུ་ མཆོག་ཏུ་བཀུར་བ་ཐམས་ཅད་ཀྱིས་སློངས་ཀྱང་མ་བྱིན་ནས་ང་རང་གིས་ཁྱིམ་ཐབ་འདམ་མོ་ཞེས་དྲིལ་བསྒྲགས་པས་སྐྱེ་བོ་རྣམས་རང་རང་གི་གཟུགས་ལ་སོགས་པས་དྲེགས་ཤིང་འདམ་དུ་རེ་བས་ཕྱིས་བདར་དང་རྒྱན་ཐམས་ཅད་ཀྱིས་བརྒྱན་ཏེ་འདུས་པ་

Page: 534 ན་བུ་མོ་དེ་ནམ་མཁའ་ལ་འཕགས་ནས་བདག་གི་ལུས་མཆོག་འདི་ནི་ཚུལ་ཁྲིམས་དང་བཟོད་པས་ཐོབ་པ་ཡིན་གྱི་འདོད་པས་ཐོབ་པ་མ་ཡིན་ལ། འདོད་པ་ལ་ཞེན་པ་དག་གིས་འདི་ལྟ་བུ་འཐོབ་པའི་གནས་མེད་དོ་ཞེས་པའི་དོན་ཅན་གྱི་ཆོས་རྒྱ་ཆེར་ བསྟན་ནས། སྟོན་པའི་སྤྱན་སྔར་སོང་བ་ལྟར་གཟུགས་སྡུག་པ་ལ་ཞེན་པ་དེས་ནི་ཚེ་རབས་མཐའ་ཡས་པར་ཡང་ཤིན་ཏུ་མི་སྡུག་པའི་ལུས་འཐོབ་ཅིང་མི་སྡུག་པའི་གྲོགས་འཐོབ་ལ། ཚུལ་ཁྲིམས་དང་བཟོད་པ་ལ་གནས་པས་ནི་ལུས་སྡུག་པ་འཐོབ་ ཅིང་སྡུག་ཅིང་ཡིད་དུ་འོང་བའི་གྲོགས་འཐོབ་པར་འགྱུར་རོ། །དེ་ལྟར་མོད་ཀྱི་འདོད་པའི་ཡོན་ཏན་ལ་ཞེན་པ་ནི་ལན་ཚྭའི་ཆུ་ཇི་ཙམ་འཐུངས་པ་ཙམ་དུ་སྐོམ་པ་འཕེལ་བ་ལྟར་ཇི་ཙམ་སྤྱད་པ་དེ་ཙམ་དུ་ཞེན་ཞིང་སྲེད་པར་འགྱུར་གྱི་ངོམས་པ་མེད་ལ། མ་ མཐོང་ན་སྙིང་ཕྱུང་བ་ལྟར་སྡུག་བསྔལ་ཞིང་ཤུགས་རིང་གིས་འདེབས་ལ་ནང་གི་མྱ་ངན་མི་བཟད་པ་འཕེལ་བར་ཟད་ལ། དེས་ནི་མི་རྟག་པའི་འདུ་ཤེས་ཙམ་སྐྱེ་བ་ལ་ཡང་གེགས་བྱེད་ན་ཆོས་ཉིད་མཐོང་བ་ལ་ལྟ་ཅི་སྨོས། ཕྱིན་ཅི་ལོག་གི་འདུ་ཤེས་ ལ་གཅིག་ཏུ་ཞེན་པ་དེས་འཁོར་བའི་ཉེས་དམིགས་མཐོང་བར་མི་འགྱུར་བའི་ཕྱིར། ཐར་བའི་རྩ་བ་འདུས་བྱས་ཀྱིས་སྐྱོ་ཞིང་ཡིད་འབྱུང་བ་ཡིན་ན་དེ་ཇི་ལྟར་སྐྱེ། ཉིན་མཚན་རྟག་ཏུ་ཡང་འདོད་པའི་ཡུལ་སེམས་པ་དེས་དུས་འདའ་བས་དགེ་བའི་རྩ་བ་ ལྟ་ཞོག་ཐ་ན་སོ་ནམ་དང་བཟོ་ལ་སོགས་པ་ལུང་དུ་མ་བསྟན་པའི་ལས་ལམ་རྣམས་ཀྱང་མི་འགྲུབ་ན་དམ་པའི་ཆོས་ལྟ་སྨོས་ཀྱང་ཅི་དགོས། འདུས་བྱས་ལ་ནི་འབྲལ་བ་ལས་གཞན་པའི་ཆོས་ཉིད་མེད་པའི་ཕྱིར། སྡུག་པའི་ཡུལ་དེ་རྙེད་དུ་ཟིན་ ཡང་ཤི་བའམ་གསོན་པ་གང་རུང་གིས་ངེས་པར་འབྲལ་ལ། དེའི་ཚེ་སྡུག་པ་དང་བྲལ་བའི་སྡུག་བསྔལ་གྱིས་མནར་བར་འགྱུར་ལ། དེ་ལྟར་མི་རྟག་པའི་མཛའ་བཤེས་ལ་ཆགས་ན་རྟག་པ་དང་ཞི་བ་དང་གཡུང་དྲུང་གི་བདག་ཉིད་བདེ་བ་ཐམས་ཅད་

Page: 535 ༄༅། །ཀྱི་འབྱུང་གནས་དམ་པའི་ཆོས་ལས་ཉམས་པར་འགྱུར་རོ། །དེས་ན་མེ་ལས་རྒྱང་རིང་དུ་བྱོལ་ན་འཚིག་པའི་སྡུག་བསྔལ་མི་འབྱུང་བ་ལྟར་འདོད་པའི་ཉེས་དམིགས་རིག་པས་སྐྱེས་པ་དང་བུད་མེད་དང་མཛའ་བཤེས་དང་ ཉེ་དུ་སོགས་ལ་སྙིང་པོ་མེད་པར་ཤེས་ཏེ་ཆགས་པའི་བློ་དོར་བ་ཙམ་གྱིས་སྡུག་བསྔལ་དེ་ཐམས་ཅད་མི་འབྱུང་ལ། དེ་ཙམ་གྱིས་སེམས་དུལ་ཞིང་དེས་ལ་ལས་སུ་རུང་སྟེ་ཏིང་ངེ་འཛིན་དེ་མ་ཐག་སྐྱེ་བར་འགྱུར་རོ། །དེའི་ཕྱིར། ཞི་གནས་རྒྱུ་ནི་ཚུལ་ ཁྲིམས་ལས་གཞན་མེད། །ཅེས་གསུངས་པ་ཡིན་ལ། ཚུལ་ཁྲིམས་དེ་ཡང་སེམས་ཀུན་ནས་སྡོམ་པ་འདི་ལྟ་བུ་ཞིག་ཡིན་གྱི། དེང་སང་ངེས་འབྱུང་ལ་སོགས་པའི་བསམ་པ་ཅི་ཡང་མེད་པར་ཁྱིམ་པའི་དུས་ཀྱི་བསམ་པ་འཇིག་རྟེན་པའི་བློ་དེ་ ཉིད་ལས་མ་གཡོས་པ་ལ་རྟགས་དང་ཆོ་ག་ཙམ་རེ་བྱིན་པ་ལ་ཚུལ་ཁྲིམས་སུ་འདོགས་པ་འདིས་ནི་ཏིང་ངེ་འཛིན་མི་སྐྱེ་བར་མངོན་སུམ་དུ་མཐོང་ངོ༌། །དེས་ན་སེམས་ཅན་རྣམས་སེམས་རྒྱུད་རེ་རེ་བ་ཐ་དད་ཅིང་ལས་ཐ་དད་པ་རྣམས་འཁོར་བའི་མཐོ་ དམན་ཐམས་ཅད་དུ་སྐྱེ་གནས་གྲངས་མེད་པ་རྒྱུན་མི་ཆད་པར་འཛིན་པ་ལས་ད་ལྟ་མིའི་ལུས་རིས་མཐུན་པར་ས་ཕྱོགས་གོ་སྐབས་ཉེ་བར་སྐྱེ་བ་ལན་གཅིག་ཚོགས་པ་ཙམ་འདི་ལ་མཛའ་བཤེས་དང་དགྲ་གཉེན་སོགས་སུ་བཟུང་ནས་ཐོག་མ་ནས་ཐ་ མའི་བར་དུ་འདི་ཁོ་ན་བདེན་པར་ལྟ་བ་འདི་ནི། ནང་གི་མུན་ནག་ཆེན་པོ་མི་བཟད་པ་ཡིན་ལ། ཁྱིམ་པ་རྣམས་ཀྱིས་དེ་ལྟར་མི་གོ་བ་བདེན་མོད་ཀྱང་ཆོས་སྒོར་ཞུགས་ཤིང་དམ་པའི་ཆོས་ལ་ཐོས་བསམ་སྒོམ་པར་རློམ་པ་དང༌། མཁས་པ་དང༌། བཙུན་པ་དང༌། བཟང་པོར་ རློམ་པ་རྣམས་ཀྱང་དགྲ་གཉེན་མཛའ་བཤེས་ཉེ་དུ་ལ་སོགས་པའི་ཞེན་པ་སྔར་ཁྱིམ་པའི་དུས་ལས་ཀྱང་ཆེས་འཕེལ་བ་ཞིག་དེང་སང་སྣང་བ་འདི་ནི་འཇིགས་པ་དང༌། ཡ་ང་བ་དང༌། བག་ཚ་བ་དང༌། མུ་སྟེགས་པ་རྣམས་དང༌། འཇིག་རྟེན་པ་རྣམས་ལ་ཡང་ངོ་ཚ་བར་

Page: 536 སྣང་ངོ༌། །ེ་ལྟ་མོད་ཀྱི་བྱིས་པའི་གྲོགས་སམ་འཁོར་ཙམ་ཡང་ཐག་སྲིང་བར་བྱའི་བསྟེན་པར་བྱ་བ་མ་ཡིན་ཏེ། འཇིག་རྟེན་ན་ཡང་བུས་པ་གཞོན་ནུ་ཤེད་མ་བྱེ་བ་དག་ལ་བྱིས་པར་སྒྲོག་ཅིང་དེ་ནི་ནད་འཇོམས་པའི་སྨན་ཅུང་ཟད་ཁ་བ་བྱིན་ན་མི་འཐུང་ཞིང་ལྕེ་ ལ་རེག་མ་ཐག་ངུ་ཞིང་ལྕེ་སྦར་མོས་འབྲད་པར་བྱེད་ལ། འདིས་ཁྱོད་ཀྱི་ནད་ཞིའོ་ཞེས་སྨྲས་ཀྱང་ཡུས་པས་ངུ་བར་བྱེད་ཀྱི་སྨན་མི་འཐུང་ལ། བཙན་དུག་གི་དུམ་བུ་ལྕེ་ལ་རེག་ན་མངར་བར་མཐོང་བས་འདིས་འཆི་ཡི་བཟའ་མི་རུང་ངོ་ཞེས་སྨྲས་ཀྱང་བརྐུས་ནས་ ཀྱང་ཟ་བར་བྱེད་པ་ལྟར་སེམས་ཅན་འདི་རྣམས་ཀྱང་དགེ་བའི་བསམ་པའི་ཤེད་མ་བྱེ་ཕན་གནོད་ཀྱི་མིག་རྒྱང་ཐུང་བས་དགེ་བའི་རྩ་བ་སྨན་ཁ་བ་ལྟ་བུ་ལ་བཅུག་ན་ལྡོག་ཅིང་འདོར་ལ། མི་དགེ་བ་བཙན་དུག་ལྟ་བུ་རོ་མངར་བ་དང་འདྲ་བའི་འཕྲལ་གྱི་རྙེད་བཀུར་ རམ་མིང་དང་གྲགས་པ་སྣ་རེའི་ཆེད་དུ་གཞན་གྱིས་བསྲུངས་ཀྱང་མི་ཐུབ་པར་ནན་གྱིས་འཇུག་ལ། ངན་སོང་གི་འཇིགས་པ་སོགས་བསྟན་ཡང་ཅིར་ཡང་མི་སེམས་པ་བ་ལང་གི་མདུན་དུ་རིག་བྱེད་བཏོན་པ་ལྟ་བུར་སྣང་བ་འདི་དག་ནི་བྱིས་པ་ཉིད་ཡིན་གྱིས་བུས་ པ་ལུས་ཆུང་ངུ་དེ་དག་ནི་ལོ་འགའ་ཟུང་ཁོ་ནར་ལུས་རྫོགས་ཤིང་སྨན་དང་དུག་ཤེས་པ་ཙམ་གྱི་ཤེད་མྱུར་དུ་བྱེ་བར་འགྱུར་ཡང་སེམས་ཅན་འདི་རྣམས་ལ་ནི་སྐྱེ་བ་མཐའ་ཡས་པ་དང་བསྐལ་པ་བསམ་གྱིས་མི་ཁྱབ་པས་ཀྱང་བླང་དོར་ཇི་ལྟ་བ་ཤེས་པའི་ ཤེད་བྱེ་བའི་དུས་མི་སྣང་བའི་ཕྱིར་རོ། །དེས་ནི་བྱིས་པ་དང་སྤྱོད་པའམ་སྐལ་བ་མཚུངས་པར་སྤྱད་ན་ནི་བྱིས་པ་གང་དུ་འགྲོ་བའི་གནས་ངན་འགྲོ་དེར་བདག་ཀྱང་འགྲོ་བར་འགྱུར་བས་ད་ལྟའི་མི་ལུས་འདི་དང་སྐལ་བ་མི་མཉམ་ཞིང་ངན་པའི་ངན་སོང་ དུ་འཁྲིད་པའི་གྲོགས་དེས་བདག་ལ་ཅི་ཞིག་བྱ། དེ་ལྟ་མོད་ཀྱི་བྱིས་པའི་རྣམ་པར་ཐར་པ་ནི་འདི་དག་ཡིན་ཏེ། ཕྲད་པ་ཙམ་གྱིས་ཀྱང་རྒྱུ་རྐྱེན་གཞན་མེད་ཀྱང་ཅ་ཅོ་དང་ག་ཞར་བྱེད་ཅིང་བདག་ཅག་མཛའ་བོ་ཡིན་ནོ་ཞེས་འབྲལ་མི་ཕོད་པ་ཙམ་གྱི་མཛའ་

Page: 537 ༄༅། །བར་ཡང་བྱེད་ལ། དེ་མ་ཐག་ཚིག་བརྗོད་ལེགས་ཉེས་ཅུང་ཟད་ཀྱིས་ཁྲོས་འཁྲུགས་ཏེ་དབྱུག་པ་དང་ཁུ་ཚུར་དང་མཚོན་ཆས་འགྱེད་ཅིང་ཚིག་གི་རྨ་འབྱིན་ལ། གསོད་པའི་བར་དུ་ཡང་བྱེད་པས་རྒྱུ་མེད་དུ་མཛའ་ལ། རྒྱུ་མེད་དུ་ཁྲོ་ བར་ཡང་བྱེད་དོ། །དོན་ཉམས་པར་བྱེད་པའི་བྱ་བ་མ་ཡིན་པ་ལས་ལྡོག་ཅིང་བྱ་བར་འོས་པའི་ལས་ཀྱི་གྲོས་ལེགས་པར་བཏབ་ན་དེ་ལ་ཁྲོ་ཞིང་བདག་ཉམས་ཀྱང་ཁྱོད་ལ་ཅི་ཏོ་ཞེས་སོགས་འཁོན་ཆེན་པོར་འཛིན་ལ། མི་འོས་པར་བསྟོད་པ་སོགས་ ཁ་གསག་གིས་བསླུས་ན་ཤིན་ཏུ་དགའ་བར་བྱེད་ལ། ཕན་པ་ལ་སྦྱར་ན་ཁྲོ་ཞིང་མི་སྒྲུབ་པར་མ་ཟད་སྦྱོར་བ་པོ་བདག་ཉིད་ཀྱང་ཕན་པ་ལས་ལྡོག་པར་བྱེད་དེ། དཔེར་ན། རྔོན་པའི་ལས་མ་བྱེད་ཅིག་ཅེས་བསྒོ་ན་འདི་ནི་རིན་མི་དགོས་པར་ཟས་ཞིམ་པོ་འབྱུང་ བས་ཁེ་སྤོགས་ཀྱི་མཆོག་ཡིན་གྱི་ཁྱོད་ཉིད་ཀྱང་འདོང་ངོ་ཞེས་དཀྲི་བ་ལྟ་བུ་གཞན་དག་ཀྱང་བྱ་བ་མ་ཡིན་པ་ལ་སྦྱོར་བར་བྱེད་ལ། དེའི་ངག་མ་ཉན་ན་ཁྲོས་པས་ཚིག་རྩུབ་མོ་སྨྲ་ཞིང་ཞེ་འཁོན་དུ་དམ་པོར་འཛིན་ཏེ་རྒྱུ་དེ་ལས་ཀྱང་དེ་ངན་འགྲོར་འདོང་པར་ འགྱུར་ལ། དཔེར་ན། རྒྱལ་པོ་ངན་པ་ལྟ་བུ་ལ་ཡ་རབས་ཀྱི་ཆོས་ལུགས་ཀྱི་གྲོས་བཏབ་ན་ཤིན་ཏུ་ཁྲོས་པས་ཆད་པ་བྱེད་པ་དང༌། གྲོས་འདེབས་པ་པོ་དེ་དུས་མིན་གྱི་དཔྱ་ཁྲལ་དང་གནས་མིན་གྱི་རྩུབ་ཁྲིམས་བྱེད་པ་པོར་བསྐོ་ཞིང་སུན་འབྱིན་པ་དང་བློན་པོ་ལས་ འབྱིན་པ་སོགས་བྱེད་ལ། གཡོ་སྒྱུའི་གཅི་སག་སྨྲས་ན་མགུ་ཅིང་རངས་པས་བློན་པོའི་དམ་པར་བཀུར་བ་རྒྱལ་པོ་ཨུ་ཏྲ་ཡ་ནའི་བུ་གཙུག་ཕུད་ཅན་གྱིས་ཆོས་བཞིན་གྱི་བློན་པོ་ཧེ་རུ་ཀ་དང༌། བྷི་རུ་ཀ་གཉིས་ལེགས་པའི་གྲོས་བཏབ་པས་བློན་པོ་ལས་ ཕྱུང་ཞིང༌། སྡིག་བློན་དབྱུག་པ་དང་ཐོ་བ་གཉིས་ཀྱིས་རྒྱལ་པོའི་བསམ་པ་ལྟར་སྙན་པར་སྨྲས་པས་བློན་པོའི་དམ་པར་བཅུག་པ་ལས་དེ་གཉིས་ཀྱིས་རྒྱལ་པོ་ཕ་དགྲ་བཅོམ་པ་གསོད་དུ་བཅུགའཕགས་པ་ཀ་ཏྱཱ་ན་ཕྱགས་དར་གྱི་ཕུང་པོས་གཡོགས་པས་

Page: 538 སའི་ཆར་གྱིས་གྲོང་ཁྱེར་སྒྲ་སྒྲོགས་མི་མངོན་པར་མནན་ཏེ་ལུས་འདིས་དམྱལ་བར་ལྷུང་བ་བཞིན་ནོ། །གཞན་ཡང་མཐོ་བ་དང༌། དམའ་བ་དང༌། བར་མར་རྟོག་པ་ནི་ནམ་མཁའ་ལ་མཐོ་དམན་དུ་རྟོག་པ་ལྟར་ཤིན་ཏུ་སྒྲོ་བཏགས་པ་འབའ་ཞིག་གིས་ ཡིན་གྱི་སྒྲོ་བཏགས་དུས་ན་ཡང་དེ་ལྟར་མི་བདེན་ལ། སྒྲོ་བཏགས་གོམས་པས་མཐོ་དམའ་བར་མར་འཛིན་ཙམ་པ་དེ་ཉིད་ཀྱང་མི་རྟག་པས་གནས་སྐབས་གཞན་དུ་འགྱུར་བ་ལ་ཚེགས་མེད་མོད་ཀྱི། དེ་ལྟ་བུ་མི་ཤེས་ཀྱི་སྟེང་དུ་སུ་ཞིག་ནི་བདག་ལས་རྙེད་པ་ བཀུར་སྟིའམ་ཐོས་པ་ལ་སོགས་པའི་ཡོན་ཏན་གྱིས་ལྷག་གོ་ཞེས་ཐོས་ན་དེ་ལ་ཕྲག་དོག་གི་ཚེར་མས་རང་གི་སེམས་རྩུབ་པར་གྱུར་ཏེ་བཞིན་གྱི་མདངས་ཉམས། མིག་རིག་རིག་པོར་འགྱུར། ལག་པ་འདྲིལ། ངག་གིས་དེ་ལ་མི་སྙན་པ་སྣ་ཚོགས་བརྗོད་པར་ བྱེད་དོ། །ཁ་ཅིག་བདག་དང་མཉམ་པར་ཐོས་ན་བུས་པ་ལུས་བོངས་འགྲན་པ་ན་རྐང་འོག་ཏུ་རྡེའུ་བཅུག་པ་དང་ལུས་བརྙེངས་པས་ཀྱང་མཐོར་རེ་བ་ལྟར་རྣམ་པ་སྣ་ཚོགས་པའི་སྒོ་ནས་དེ་ལས་ལྷག་པར་སྒྲུབ་པར་བྱེད་དོ། །ཆེ་གེ་ཞིག་བདག་ ལས་དམན་པར་ཐོས་སམ་མཐོང་ན་དེ་ལ་བརྙས་ཤིང་ཁྱད་དུ་གསོད་པས་སྤྲེའུ་མིའི་ལག་ཏུ་ཚུད་པ་ལྟར་བཞད་གད་ཀྱི་གནས་སུ་བྱེད་ལ། རང་ཉིད་ནི་ཀླ་ཀློས་སྟག་སོད་པ་ལྟ་བུའི་ང་རྒྱལ་གྱིས་འགྱིང་ཞིང་བཞིན་གྱི་རྣམ་འགྱུར་ཀྱང་སེམས་རང་བཞིན་དུ་ གནས་པས་མཐོང་ན་ངོ་ཚ་བའི་གནས་སུ་བྱེད་དོ། །གལ་ཏེ་ཡོན་ཏན་གྱི་ཆ་ཅུང་ཟད་ཙམ་ཡོད་པ་ལ་སྒྲོ་བཏགས་པས་བསྟོད་ཀྱང་རུང་ཡོན་ཏན་གཏན་མེད་པ་ལ་སྒྲོ་བཏགས་པ་ཁོ་ནས་བསྟོད་ཀྱང་རུང་སྟེ། ཁ་ཅིག་གིས་བདག་ལ་བསྟོད་པར་གྱུར་ན་ནི་ ཅི་བདག་ལ་ཡོན་ཏན་འདི་ལྡན་ནམ་མི་ལྡན་ཞེས་རྟོག་པ་ཡང་མེད་དེ། ང་རྒྱལ་ཞིང་སེམས་ཤིན་ཏུ་མཐོ་བས་རློམ་སེམས་སུ་བྱེད་དོ། །གལ་ཏེ་བདག་ལ་ཡོད་པའི་སྐྱོན་ནས་བརྗོད་པའམ་མེད་པའི་སྐྱོན་ནས་བརྗོད་ནའང་རུང་སྟེ། བདག་ཉིད་ལ་

Page: 539 ༄༅། །མི་སྙན་པའམ་སྐྱོན་ཞིག་བརྗོད་ན་ནི་བདག་ཉིད་ལ་སྐྱོན་དེ་འདུག་ན་སྨན་པས་ནད་ངོས་བཟུང་བ་ལྟ་བུ་ཡིན་པས་འདོར་ཞིང་མི་འདུག་ན་དེ་ཉིད་ཀྱིས་ཆོག་མོད་ཀྱང་དེ་ལྟར་མི་ཤེས་པར་ཐོས་པ་ཙམ་གྱིས་ཁྲོས་འཁྲུགས་རྔམ་པར་ བྱེད་དོ། །དེ་ལྟར་ན་ཅིས་ཀྱང་མགུ་བར་མི་ནུས་ཤིང་རེས་འགའ་རྒྱུ་མེད་དང་རྒྱུ་ཕྱིན་ཅི་ལོག་གིས་ཀྱང་མགུ་བར་བྱེད་ལ། མགུ་བ་དང་ཁྲོ་བ་གང་སྣང་ཡང་ཆུ་ཚོད་གཅིག་ཙམ་དུ་ཡང་ཡིད་བརྟན་པར་མི་ནུས་པ་ཕན་བཏགས་པ་ལ་དགྲར་འཛིན་ཞིང་ཕན་ གནོད་ཀྱི་བྱེ་བྲག་མི་ཤེས་པ་འདི་རྣམས་ལ་ད་ལྟ་བདག་གིས་ཕན་གདགས་པར་མི་ནུས་ཏེ་འདི་དག་དང་འགྲོགས་ན་གནག་རྫི་ལས་གནག་གི་གཏམ་དང༌། ཚོང་པ་ལས་ཚོང་གི་གཏམ་ལས་གཞན་མི་འབྱུང་བ་ལྟར་བྱིས་པ་ལས་ནི་བདག་བསྟོད་གཞན་ སྨོད་ཆགས་སྡང་རྨོངས་གསུམ། ང་རྒྱལ་ཕྲ་དོག་ཚོང་སོ་ནམ་དམག་བུད་མེད་ལ་སོགས་པ་དག་གི་རྣམ་པ་བཞི་གང་ཡང་རུང་བ་ཁོ་ནའི་གཏམ་ལས་གཞན་མི་འབྱུང་ལ། དེ་དག་གི་ངོ་སྲུང་བའི་ཕྱིར་བདག་ཀྱང་གཏམ་དེ་ལྟ་བུ་ལ་འཇུག་དགོས་ཤིང༌། དེའི་རེ་རེ་སེམས་ཀྱི་དགེ་བ་དང་ངག་གི་དགེ་བ་རྣམ་པར་ཉམས་པར་འགྱུར་བས་བྱིས་པའི་གྲོགས་བསྟེན་པ་ནི་འདི་ཕྱིར་ཕུང་བར་ཟད་ལ། བདག་ཀྱང་ད་ལྟ་ཡོན་ཏན་གྱི་མཐུ་མ་རྫོགས་ཏེ་མར་མེ་རླུང་ནང་ན་གནས་པ་ལྟར་མཐོང་ནས་བྱིས་པ་དེ་རྣམས་ལ་ ད་ལྟ་བདག་གི་ཕན་མི་ཐོགས་པར་ཡང་ཤེས། དེ་ལ་ཁྲོ་བའི་ཡུལ་དུ་ཡང་མི་བྱེད་བྱིས་པའི་ངང་ཚུལ་ཤེས་པས་བུས་པ་ལ་རྒན་པོས་སྙིང་བརྩེ་བ་ལྟར་སྙིང་བརྩེའི་འདུ་ཤེས་ཉེ་བར་བཞག་སྟེ། རེ་ཞིག་བྱིས་པའི་གྲོགས་ལས་བྱོལ་ནས་ ལུས་འདུ་འཛིས་དབེན་པ་དང་སེམས་རྣམ་གཡེང་གིས་དབེན་པས་སྒྱུ་མ་ལྟ་བུ་དང་དཔའ་བར་འགྲོ་བ་ལ་སོགས་པའི་ཏིང་ངེ་འཛིན་དང་དེས་བསྐྱེད་པའི་ཆོ་འཕྲུལ་རྣམ་པ་གསུམ་བསྒྲུབས་ཏེ་ནུས་པ་ཐོབ་པ་ན་འདི་ཐམས་ཅད་བྱང་ཆུབ་ལ་གདོད་ཀྱིས་

Page: 540 དགོད་པར་བྱ་ལ། ད་ལྟ་ནི་འདི་དག་གིས་ཀྱང་བདག་གི་དོན་མི་བྱེད་ལ་བདག་གིས་ཀྱང་འདི་དག་ལ་ཕན་པར་མི་ནུས་སོ་ཞེས་ཤེས་པས་གཅིག་པུར་བསམ་གཏན་བསྒྲུབ་པར་བྱའོ། །བོད་ཡུལ་འདི་ན་ནི་བྱིས་པའི་མཚན་ཉིད་འདི་དག་ལས་ཀུན་ནམ། ཕལ་ཆེར་དང་ལྡན་པའི་མཁས་པ་དང༌། གྲུབ་ཐོབ་དང༌། ཞིག་པོ་དང༌། དམ་པར་ཁས་འཆེ་ཞིང་གྲགས་པ་ཡང་ཡོད་པར་དོགས་སོ། །གལ་ཏེ་བྱིས་པ་འགའ་ཞིག་སྟེས་དབང་གིས་འགྲོགས་དགོས་བྱུང་བའམ་དབེན་པར་བདག་ གི་གན་དུ་འོངས་པ་ན་དེ་ལ་གཏམ་བདེན་པ་དང་གསོང་པོ་ཡིན་ལ། དེའི་ཡིད་དང་ཡང་མི་འགལ་བ་ཁ་གསག་དང་གཅམ་བུ་ཡང་མ་ཡིན་པ་ཧ་ཅང་མི་མང་བ་ཙམ་གྱིས་མགུ་བར་བྱས་ཏེ་མ་འདྲིས་ཆེས་པས་དེ་བདག་ལ་བརྙས་སོ་ཞེས་ཁྲོ་བར་ཡང་མི་འགྱུར་ ལ། འདྲིས་ཆེས་པས་བདག་གི་ཚོད་ལོངས་པར་རློམ་ཏེ་བདག་གི་དགེ་བ་ལ་བར་དུ་གཅོད་པ་ཡང་མ་ཡིན་པ་ཐ་མལ་པ་བར་མ་ཙམ་ལ་གནས་པར་བྱའི་ཧ་ཅང་མ་བསྟེན་པས་མ་འདྲིས་ཆེས་པ་དང་ཧ་ཅང་བསྟེན་པས་འདྲིས་ཆེས་བ་དང༌། ཅི་འདོད་ལོངས་ཤིག་ ཅེས་ཟེར་བ་ན་ཧ་ཅང་བསླངས་པ་དང་དང་པོར་བསྟེན་ཆེས་ལ་ཕྱིས་མ་བསྟེན་ཆེས་པ་སོགས་ནི་འཇིག་རྟེན་ན་ཤིན་ཏུ་འཁོན་གྱི་རྒྱུ་ཡིན་པས་སྤང་བར་བྱ་ལ། སོ་སྐྱེའི་སྤྱོད་པ་ཅན་གྱི་པཎྜི་ཏ་ལ་སོགས་ལས་ཆོས་ཀྱི་ཚིག་དོན་ལེན་དགོས་པའམ། གྲོང་ན་ ཆོས་ཀྱི་དོན་དུ་བསོད་སྙོམས་ཙམ་ལེན་པ་ན་ཡང་བུང་བ་ནི་མེ་ཏོག་ལ་ཡང་མ་གནོད་ཡུན་རིང་ཆེས་པ་ཡང་མ་ཡིན་པར་སྦྲང་རྩི་ཚིམ་པར་བླངས་ཏེ་ཆགས་པ་མེད་པར་འཕུར་ཏེ་འགྲོ་བ་ལྟར་ཕ་རོལ་ལ་མི་གནོད་ཅིང་བདག་གི་དོན་གྲུབ་པ་དུས་རིང་པོ་ ཡང་མ་ཡིན་ལ། ཞེན་པ་མེད་པར་འཇུག་པར་བྱ་ཞིང༌། ཇོ་བོའི་སློབ་མ་རྣལ་འབྱོར་པ་ཕྱག་ཁྲི་མཆོག་ཁོ་བོ་མཚམས་ཆེན་པོ་བགྱི་གསུང་ནས་སུ་ལ་ཡང་ངོ་མཁྱེན་པའི་ཚུལ་མི་མཛད་པར་བཞུགས་པ་ལྟར་འདྲིས་མ་འདྲིས་དང་བར་མར་འཛིན་པའི་རྟོག་

Page: 541 ༄༅། །པ་ཐམས་ཅད་ཚར་བཅད་དེ་སེམས་རྩེ་གཅིག་ཏུ་བསྡུ་པ་ཁོ་ནས་དུས་འདའ་བར་བྱའོ། །ཡང་དག་པར་ན་གང་མཐོང་བ་ཐམས་ཅད་ཀྱང་སྔོན་མ་མཐོང་བ་མཐོང་བ་ཁོ་ན་ཡིན་ཏེ། ལི་ཙཱ་ཝི་དྲི་མ་མེད་པར་གྲགས་པས་འཇམ་ དཔལ་ལ་འོངས་པ་ལེགས་སོ། །སྔོན་མ་མཐོང་བ་མཐོང་ངོ༌། །འཇམ་དཔལ་ཀྱིས་སྨྲས་པ། ཁྱིམ་བདགདེ་དེ་བཞིན་ཏེ། སྔོན་མཐོང་བ་ཐམས་ཅད་ནི་ཕྱིས་མི་མཐོང་ངོ༌། །གང་མཐོང་བ་ཐམས་ཅད་ནི་སྔོན་མ་མཐོང་བ་མཐོང་བའོ། །ཞེས་བཤད་པ་ལྟར་ཆོས་ཐམས་ ཅད་ནི་སྐད་ཅིག་མ་ཁོ་ནར་ཟད་ལ། སྔ་མ་ཡང་གཞན་ཕྱི་མ་ཡང་གཞན་ལ་སྔ་མ་མཐོང་བའི་ཤེས་པ་ཡང་གཞན་ཕྱི་མ་མཐོང་བའི་ཤེས་པ་ཡང་གཞན་ཏེ་ཆོས་ཐམས་ཅད་སོ་མར་ཤེས་ན་སྔར་འདྲིས་པ་ལ་སོགས་པ་འདས་པ་ལ་ཞེན་པ་ཐམས་ཅད་ འཇིག་པར་འགྱུར་རོ། །འདིར། བུང་བས་མེ་ཏོག་སྦྲང་རྩི་བཞིན། །སོགས་ལ་དགེ་བའི་ལྷས། ཐམས་ཅད་དུ་སྦྲང་མ་སྤྱོད་པ་བཞིན་དུ་ཆོས་དང་དོན་ནི་ཆོས་ཀྱི་དོན་ཏེ་ལུང་གི་ཆོས་ལེགས་པར་བཤད་པའི་དོན་ཙམ་བླངས་ནས་ཞེས་འབྲུ་གཉེར་ལ། བི་བྷཱུ་ཏིས། སྐལ་མི་མཉམ་པར་དེ་མི་འདོད། །ཅེས་གཞུང་བཏོན་ནས། གལ་ཏེ་འཕགས་པའི་རྗེས་སུ་འབྲངས་ན་དེའི་ཚེ་བྱིས་པ་དེ་མི་འདོད་དེ་སྤྱོད་པ་མི་མཐུན་པས་སོ། །ཞེས་དང༌། བུང་བས་མེ་ཏོག་སོགས་ལ་གྲོང་དུ་རྒྱུ་ན་ཆོས་ཀྱི་དོན་ཙམ་ དུ་ཆོས་གོས་དང་བསོད་སྙོམས་བླངས་ཏེ། ཞེས་འབྲུ་གཉེར་ཏོ། །ས་བཟང་པས་ནི། དེས་ཀྱང་བདག་དོན་མ་བྱས་ལ། །བདག་ཀྱང་དེ་དོན་མི་འགྱུར་བས། །ཞེས་པ་རྒྱ་དཔེ་དང་འགྲེལ་པ་ན་མེད་ལ་དེའི་ཚབ་ཏུ། བདེ་ཞིང་ཉོན་མོངས་ མེད་ཡིད་ཀྱིས། །གཅིག་པུ་དབེན་པར་གནས་པར་བྱ། །ཞེས་པ་ཡོད་དོ་ཟེར་ཡང༌། རྒྱ་འགྲེལ་དག་ན་དེ་གཉི་གའི་འབྲུ་མི་སྣང་ལ། སྤྱོད་འཇུག་འགྱུར་སྔ་ཕྱི་ཀུན་ནི་སྔ་མ་ཉིད་སྣང་བའི་ཕྱིར་རྒྱ་དཔེ་ཐ་དད་པར་ངེས་སོ། །གཉིས་པ་རྙེད་སོགས་ལ་མ་ཆགས་པ་སྒྲུབ་པ་ནི། བདག་ནི་

Page: 542 རྙེད་མང་བཀུར་སྟི་བྱས། །བདག་ལ་མང་པོ་དགའ་བོ་ཞེས། །དེ་འདྲའི་བསྙེམས་པ་འཆང་གྱུར་ན། །ཤི་བའི་འོག་ཏུ་འཇིགས་པ་སྐྱེ། །དེ་བས་རྣམ་པར་རྨོངས་པའི་ཡིད། །གང་དང་གང་ལ་ཆགས་གྱུར་པ། །དེ་དང་དེ་བསྡོངས་སྟོང་ འགྱུར་དུ། །སྡུག་བསྔལ་ཉིད་དུ་གྱུར་ཞིང་ལྡང༌། །དེ་བས་མཁས་པས་ཆགས་མི་བྱ། །ཆགས་པ་ལས་ནི་འཇིགས་པ་སྐྱེ། །འདི་དག་རང་བཞིན་འདོད་འགྱུར་བར། །བརྟན་པར་གྱིས་ཏེ་རབ་ཏུ་རྟོགས། །རྙེད་པ་དག་ནི་མང་བྱུང་ཞིང༌། ། གྲགས་དང་སྙན་པ་བྱུང་གྱུར་ཀྱང༌། །རྙེད་དང་གྲགས་པའི་ཚོགས་བཅས་ཏེ། །གང་དུ་འདོང་བའི་གཏོལ་མེད་དོ། །བདག་ལ་སྨོད་པ་གཞན་ཡོད་ན། །བསྟོད་པས་བདག་དགར་ཅི་ཞིག་ཡོད། །བདག་ལ་བསྟོད་པ་གཞན་ཡོད་ན། །སྨད་པས་ མི་དགར་ཅི་ཞིག་ཡོད། །ཅེས་གསུངས་ཏེ། ཚིགས་བཅད་དང་པོས་རྙེད་སོགས་ཀྱིས་ཕྱི་མར་སྡུག་བསྔལ་སྐྱེད་པར་བསྟན། གཉིས་པས་རྙེད་ཀྱང་ངོམས་པ་མེད་པར་བསྟན། གསུམ་པས་རྙེད་སོགས་མི་རྟག་པར་བསྟན། བཞི་པས་ རྙེས་སོགས་བདག་གིས་རྗེས་སུ་མི་འབྲང་བར་བསྟན། ལྔ་པས་བསྟོད་སྨད་ལ་སྙིང་པོ་མེད་པར་བསྟན་པའོ། །དེ་ཡང་འཇིག་རྟེན་ན་ཀུན་ནས་ཞེན་པའི་གནས་ནི་ཆོས་བརྒྱད་དེ། ཟས་ནོར་དང་ལོངས་སྤྱོད་གསར་དུ་ཐོབ་པ་ ནི་རྙེད་པའོ། །མ་ཐོབ་པ་ནི་མ་རྙེད་པའོ། །བདག་གི་ཡོན་ཏན་གྱི་ཁྱད་པར་བདེན་པའམ་བརྫུན་པ་ཡང་རུང་སྟེ་སྐྱེ་བོ་གཞན་གྱིས་སྒྲོག་ཅིང་དེ་གཅིག་ནས་གཅིག་ཏུ་བརྒྱུད་པས་མང་པོས་སྒྲོག་པ་ནི་གྲགས་པ་ཡིན་ལ། དེ་མེད་པའམ་ཡང་ན་བདེན་མི་བདེན་གང་རུང་གི་སྐྱོན་གྱི་རྣམ་ པ་གཅིག་ནས་གཅིག་ཏུ་གླེང་པ་ནི་མ་གྲགས་པའམ་གྲགས་པ་མ་ཡིན་པའོ། །ལུས་སེམས་སིམ་པ་ཉམས་སུ་མྱོང་བ་དང་འདོད་པའི་དོན་གྲུབ་པ་ནི་བདེ་བའོ། །གདུང་བར་ཉམས་སུ་མྱོང་བ་དང་འདོད་པའི་དོན་མ་གྲུབ་པ་ནི་སྡུག་བསྔལ་ལོ། །

Page: 543 ༄༅། །བདག་ཉིད་ལ་ཡོད་པའམ་མེད་པའི་ཡོན་ཏན་བདག་ལ་ལྡན་པར་གཞན་གྱིས་བརྗོད་པ་ནི་བསྟོད་པའོ། །བདེན་པའམ་མི་བདེན་པའི་སྐྱོན་ནས་བརྗོད་པ་ནི་སྨད་པ་སྟེ། ཆོས་བརྒྱད་པོ་དེ་ལས་རྙེད་པ་དང༌། གྲགས་པ་དང༌། བདེ་བ་དང༌། བསྟོད་པ་བཞི་ནི་བདག་ཉིད་དང་བདག་ཉིད་ཀྱི་ཕྱོགས་ལ་བྱུང་ན་དགའ་ཞིང་ཞེན་ལ་དེ་ལྟ་བུ་བྱུང་ན་ཅི་མ་རུང་སྙམ་དུ་སྨོན་པར་བྱེད་དོ། །མ་རྙེད་པ་དང༌། གྲགས་པ་མ་ཡིན་པ་དང༌། སྡུག་བསྔལ་དང༌། སྨད་པ་སྟེ་བཞི་ནི་བདག་ཉིད་དང་བདག་ཉིད་ཀྱི་ཕྱོགས་ ལ་མི་འདོད་ཅིང་བྱུང་ན་ཡང་ཞེ་སྡང་ཞིང་འཁྲུག་པར་བྱེད་དོ། །ེ་ལྟར་འདོད་པའི་ཆོས་བརྒྱད་ལ་བླང་དོར་དུ་ཀུན་ནས་ཞེན་པ་འདིས་ནི་སྡུག་བསྔལ་དང་ཉེས་པ་ཐམས་ཅད་སྐྱེད་པར་བྱེད་དོ། །དེའི་ཕྱིར་བདག་ཉིད་རྣམ་ཐོས་ཀྱི་བུའི་ལོངས་སྤྱོད་ ལྟ་བུའི་རྙེད་པ་ཐོབ་ཅིང་འབྱོར་ལ་སྐྱེ་བོ་ཐམས་ཅད་ཀྱིས་ཚངས་པ་དང་བརྒྱ་བྱིན་ལྟར་བལྟ་བས་ཕྱག་དང་ལྡང་བ་དང་སྟན་མཐོན་པོ་སྟོབ་པའི་བཀུར་སྟི་བྱེད་ལ། སྙན་པར་བསྟོད་པ་དང་དེ་འཛམ་གླིང་ཐམས་ཅད་དུ་རྒྱ་ཆེར་གྲགས་སུ་ཟིན་ཡང་དེ་རྣམས་ཀྱི་ བདག་ལ་ཅི་བྱ་སྟེ། དེའི་ཚེ་བདག་མཆོག་ཏུ་འཛིན་པའི་ང་རྒྱལ་དང་རྒྱུ་དེས་གཞན་ཁྱད་དུ་གསོད་པར་འགྱུར་ལ། དེས་སྐྱེ་བ་ཕྱི་མར་ངན་སོང་དང་དབུལ་པོ་དང་བྲན་གྱི་ཁྱིམ་སོགས་སྨད་པའི་གནས་སུ་ང་རྒྱལ་གྱི་མཐུས་སྐྱེ་ཞིང་གཞན་ཁྱད་དུ་བསད་པའི་ རྒྱུ་ལས་སྐྱེ་བོ་ཐམས་ཅད་ཀྱིས་བརྙས་ཤིང་དམད་པ་དང་ག་ཞའི་གནས་སུ་བྱེད་པར་འགྱུར་བའི་ཕྱིར་དང༌། ཆོས་ཉིད་ཀྱིས་འདོད་པའི་ཡོན་ཏན་གྱིས་ནི་ལན་ཚཱའི་ཆུ་ལྟར་ངོམས་པ་མེད་དེ། རྒྱལ་པོ་ང་ལས་ནུ་གླིང་བཞི་དང༌། རྒྱལ་ཆེན་རིས་བཞི་པ་ དང༌། བརྒྱ་བྱིན་གྱི་སྟན་ཕྱེད་ཀྱིས་མ་ངོམས་པ་དང༌། རི་བོ་གསེར་དུ་གྱུར་ན་ཡང༌། །གཅིག་གི་ནོར་དུའང་མི་ཆོག་སྟེ། །ཞེས་པ་ལྟར། རྙེད་བཀུར་ཇི་ཙམ་འཕེལ་བ་དེ་ཙམ་བརྒྱ་སྟོང་དུ་བསྒྱུར་བའི་སྲེད་ཞེན་དང་དེས་འབྲས་བུ་སྡུག་བསྔལ་ཁོ་

Page: 544 ན་འཕེལ་བ་སྟེ། སྔོན་ཝ་སྐྱེས་གཅིག་གིས་གླང་པོ་ཆེའི་རོ་དང༌། མི་སྟོང་གི་རོ་རྙེད་པ་ན་ད་ལྟ་གཞོན་པའི་དུས་སྲ་བ་ནས་ཟ་ལ་རྒས་ནས་རྙི་བ་རྣམས་བཟའ་བར་སེམས་ཏེ་གཞུ་རྒྱུད་ཟོས་པས་ཆད་དེ་གཞུ་སྣ་ལ་ཕོག་ནས་ཤི་ཞིང༌། ལྷ་རྣམས་ཀྱིས་ ཚིགས་བཅད་སྨྲས་པར་ལུང་ལས་བཤད་པའི་ཕྱིར། རྙེད་བཀུར་དེ་ལྟ་བུ་ཐོབ་ཀྱང་རྟག་པ་མ་ཡིན་ཏེ་རིང་པོར་མི་ཐོགས་པར་དེ་དག་དོར་ཏེ་བདག་གི་རྣམ་པར་ཤེས་པ་གཅིག་པུར་ཕ་རོལ་ཏུ་འགྲོ་དགོས་པའི་ཕྱིར་དང༌། དེའི་ཚེ་བདག་གི་རྙེད་བཀུར་དང་ བསྟོད་གྲགས་དེ་དག་ནི་རྨི་ལམ་ན་ནོར་བུ་རྙེད་པ་ལས་སད་པ་ལྟར་ཡིད་ཀྱི་དྲན་ཡུལ་དུ་གསལ་ཞིང་ད་ལྟ་མེད་པས་ཀྱེ་མ་ཞེས་སྡུག་བསྔལ་བ་སྐྱེད་ཀྱི་རྙེད་གྲགས་དེ་དག་གང་དུ་སོང་ཡང་མི་ཤེས་ན་བདག་ཉིད་ཀྱི་དབང་བྱར་ག་ལ་ཡོད་པའི་ ཕྱིར་རོ། །ཁྱད་པར་བསྟོད་སྨད་ནི། སྒྲ་ཙམ་དང༌། མིང་ཚིག་དང༌། ཡི་གེའི་ཚོགས་པ་ཙམ་ཡིན་ལ། དེ་དག་གི་འབྲེལ་བ་དང༌། བརྗོད་བྱ་རྗོད་བྱེད་ཀྱང་རང་བློས་སྒྲོ་བཏགས་པ་ཁོ་ནར་ཟད་པས། ཡང་དག་པར་ཆུ་སྒྲ་དང༌། རླུང་གི་སྒྲ་སོགས་ལ་བསྟོད་སྨད་དུ་བཟུང་ བ་ལྟ་བུ་ཁོ་ནའི་ཕྱིར་དང༌། སྤྱིར་འཇིག་རྟེན་ནི་མཛའ་བ་དང༌། མི་མཛའ་བ་དང༌། བར་མར་གནས་ལ། སྐྱེ་བོ་ཐམས་ཅད་ཀྱིས་མགྲིན་གཅིག་ཏུ་གཅིག་ཆར་བསྟོད་པའམ་སྨད་པ་ནི་མི་སྲིད་ལ། མཛའ་བ་ཁ་ཅིག་གིས་བསྟོད་པ་དང༌། མི་མཛའ་བ་ཁ་ཅིག་གིས་སྨད་པ་ཙམ་ ལ་དགའ་བ་དང་མི་དགའ་བ་ཅི་ཡང་བྱར་ཅི་ཡོད་དེ། བདག་གི་ཕུང་པོ་ལྔ་དང་ཕ་རོལ་གྱི་བསྟོད་སྨད་ཀྱི་སྒྲ་ཙམ་དེ་ལ་འབྲེལ་བ་ཅི་ཡང་མེད་པའི་ཕྱིར་དང༌། མཛའ་མི་མཛའ་བར་མ་གསུམ་ཡང་རྐྱེན་ཅུང་ཟད་རེ་ལས་གནས་སྐབས་གཞན་དུ་འགྱུར་བའི་ཕྱིར་དང༌། སྐྱེས་བུ་ཞིག་ན་བ་ན་ཁྱོད་ཀྱི་ནད་མེད་དོ་ཞེས་བསྟོད་པ་དང་ཁྱོད་ཀྱི་ནད་ལྕིའོ་ཞེས་སྨོད་པ་གཉིས་ཀས་ཀྱང་ནད་འཕེལ་འགྲིབ་གང་ཡང་མེད་པ་ལྟར་བསྟོད་སྨད་ཀྱིས་བདག་ལ་ཕན་གནོད་ཅི་ཡང་མེད་པའི་ཕྱིར་དང༌། གཅིག་གིས་བདག་ལ་བསྟོད་པའི་ཚེ་

Page: 545 ༄༅། །དགའ་བར་བྱེད་ན་དེའི་དུས་ཁོ་ན་ན་གཞན་བདག་ལ་སྨད་པ་དུ་མ་ཡོད་པས་དེ་དག་ལ་མི་དགའ་བ་སྐྱེད་པར་ཡང་རིགས་ཤིང༌། གཅིག་གིས་སྨད་པའི་ཚེ་མི་དགའ་བ་སྐྱེད་ན་དེའི་དུས་ཁོ་ན་ན་བདག་ལ་བསྟོད་མཁན་ཡང་དུ་མ་ཡོད་པས་ དེ་དག་ལ་དགའ་བར་ཡང་རིགས་ལ། དེ་ལྟར་ན་དགའ་མི་དགའ་གཉི་ག་གཅིག་ཆར་དུས་མཉམ་དུ་སྐྱེད་དགོས་པས་དེའི་ཚེ་སེམས་ཁྱོད་ཇི་ལྟར་བྱ་ཞེས་རྣམ་པར་བརྟགས་པའོ། །བཞི་པ་འདུ་འཛིའི་ཉེས་པ་ནི། སེམས་ཅན་མོས་པ་སྣ་ཚོགས་པ། ། རྒྱལ་བས་ཀྱང་ནི་མ་མགུ་ན། །བདག་འདྲ་ངན་པས་སྨོས་ཅི་དགོས། །དེ་བས་འཇིག་རྟེན་བསམ་པ་གཏོང༌། །སེམས་ཅན་རྙེད་པ་མེད་ལ་སྨོད། །རྙེད་པ་ཅན་ལ་འང་མི་སྙན་བརྗོད། །རང་བཞིན་འགྲོགས་དཀའ་དེ་དག་གིས། །དགའ་བ་ཇི་ ལྟར་སྐྱེ་བར་འགྱུར། །གང་ཕྱིར་བྱིས་པ་རང་དོན་ནི། །མེད་པར་དགའ་བ་མི་འབྱུང་བས། །བྱིས་དང་བཤེས་ལ་དགའ་མེད་ཅེས། །དེ་བཞིན་གཤེགས་པ་རྣམས་ཀྱིས་གསུངས། །ཞེས་གསུངས་ཏེ། དང་པོས་སེམས་ཅན་མགུ་མི་ནུས་པར་ བསྟན། གཉིས་པས་དེའི་རྒྱུ་མཚན་བརྗོད། གསུམ་པས་ལུང་དང་སྦྱར་བའོ། །དེ་ཡང་སེམས་ཅན་རྣམས་ནི་བསམ་པ་སྣ་ཚོགས་པས་མོས་པ་ཐ་དད་པ་བསམ་གྱིས་མི་ལང་བ་ཞིག་སྟེ། སྦྱར་བའི་དུག་ནི་སྐྱེ་བོ་ཀུན་འཇིགས་པའི་གནས་ཡིན་མོད་ ཀྱང་ཀླ་ཀློའི་ཡུལ་དག་ན་སྦྱར་བའི་དུག་འཆོས་ཤིང་འཚོང་ལ་བྱིན་པས་འཚོ་བར་བྱེད་པ་མང་དུ་ཡོད་ལ། དེ་དག་ཉིད་ནི་དུག་ཇི་ཙམ་དུ་རྣོ་བ་ལ་ཡོན་ཏན་གྱི་མཆོག་ཏུ་ལྟ་བར་བྱེད་པ་དང༌། སྤྱིར་ཕ་མ་ལ་གུས་པ་འཇིག་རྟེན་ན་ཡ་རབས་ཀྱི་ཆོས་ལུགས་ ཀྱི་གཙོ་བོ་ཡིན་ཡང་སྟག་གཟིག་གི་ཡུལ་ན་བུས་མ་བག་མར་ལེན་པ་དང༌། ཡང་བག་མ་གཞན་ལེན་ན་མ་བསད་པའི་མགོ་བུའི་མདུན་དུ་འདྲེན་ཞིང༌། ཤ་ཁྲག་གཞན་དེའི་ཚེ་འདུས་པ་རྣམས་ཀྱི་བྱ་ནར་བྱེད་པ་སོགས་ལ་རིགས་ཀྱི་ཆོས་ལུགས་

Page: 546 སུ་ཞེན་པ་སོགས་འཇིག་རྟེན་འདི་ན་མི་སྲིད་པ་འགའ་ཡང་མེད་ཅིང༌། དེ་བཞིན་གཤེགས་པ་ཉི་མའི་དཀྱིལ་འཁོར་ལྟ་བུའི་མདུན་རོལ་དུ་ཡང་སོལ་བའི་དུམ་བུ་ལྟ་བུའི་མུ་སྟེགས་ཀྱི་སྟོན་པ་དྲུག་མཆོད་ཅིང་བཀུར་བ་དང༌། སྟོན་པ་དྲུག་ལ་སོགས་པས་ དགེ་སྦྱོང་གཽ་ཏ་མ་ནི་བྱས་པ་མི་གཟོ་བ་སྟེ་རབ་ཏུ་བྱུང་བས་རྒྱལ་པོ་ཟས་གཙང་མ་སྡུག་བསྔལ་བར་བྱས་སོ། །ཞེས་དང༌། འདི་ནི་སྒྱུ་མ་སྟེ་བདེན་པའི་དངོས་པོ་མེད་དོ། །ཞེས་དང༌། འདིའི་སྒྱུ་མས་འཇིག་རྟེན་སླུས་སོ། །ཞེས་སོགས་ཀྱང་སྒྲོག་པར་བྱེད་ན་བདག་ཅག་བྱིས་པའི་ སྐྱེ་བོས་འདི་ཐམས་ཅད་ཅིག་ཆར་མགུ་བར་ལྟ་ག་ལ་ནུས། ཅུང་ཟད་མགུ་ནའང་ཡིད་བརྟན་དུ་མི་རུང་སྟེ། ཡང་དེ་མ་ཐག་ཁྲོ་བར་ཡང་འགྱུར་བའི་ཕྱིར། མགུ་བ་ཙམ་དེ་ཡུན་རིན་དུ་རྟག་སྲིད་ཀྱང་སྙིང་པོ་འགའ་ཡང་མེད་དེ་ལྷའི་བུ་དང་བུ་མོའི་ཚོགས་ པ་བཞིན་ནོ། །ཡང་རྙེད་བཀུར་དང་མི་ལྡན་པ་ལ་ནི་སེམས་ཅན་རྣམས་བརྙས་པར་བྱེད་དེ། བསོད་ནམས་མ་བསགས་པ་དང་མུ་ཏོ་བའོ། །ཞེས་སོགས་ཀྱིས་བརྙས་ཤིང་སྡང་བ་དང་ལྟར་མི་འདོད་པར་བྱེད་ལ། རྙེད་བཀུར་གྱིས་འབྱོར་བ་དག་ལ་ཡང་མིག་ ཕྲ་བོ་ཞེས་སོགས་ཀྱིས་སྨོད་དེ། བོད་ཀྱི་ཞ་ལུ་པཎྜི་ཏས། ཐམས་ཅད་མགུ་བའི་སྤྱོད་པ་ངས་མ་ཤེས། །བདག་གི་སྤྱོད་ལམ་ཇི་ལྟར་བྱས་ན་ཡང༌། །ངན་པའི་སྙད་མ་བཏགས་པ་མ་བྱུང་ངོ༌། །ཞེས་པ་ལྟ་བུ་ཁོ་ན་ཡིན་ཏེ། དཔེར་ན། ཚེར་མ་དང༌། ཟྭ་ཚོད་ནི་རང་བཞིན་གྱིས་འགྲོགས་པར་དཀའ་ཞིང་ཤིན་ཏུ་ཉེ་ན་འཛུག་པར་གདོན་མི་ཟ་བ་བཞིན་དུ་བྱིས་པའི་གྲོགས་ཀྱང་དེ་ལྟ་བུ་ཡིན་ལ། བྱིས་པ་དེ་དག་གིས་བདག་ཉིད་ཀྱི་དོན་གྱི་མཆོག་ཚད་མེད་པ་ཡིན་ཡང༌། གནས་སྐབས་དོན་ཆུང་ ངུར་མངོན་པ་བྱང་ཆུབ་ཏུ་སེམས་བསྐྱེད་པ་ལྟ་བུ་དང༌། རང་ཉིད་ལ་གནོད་པ་ཆེན་པོའི་རྒྱུ་ཡིན་ཡང་འཕྲལ་ཡིད་དུ་འོང་བར་སྣང་བ་དཀོན་པའི་ཟས་ལ་དུག་སྦྱར་བ་ལྟ་བུ་སྡིག་པའི་ལས་སོགས་རང་དོན་དུ་འགྱུར་བ་དང༌། མི་འགྱུར་བའི་དབྱེ་

Page: 547 ༄༅། །བའང་མི་ཤེས་པས་རང་ཕྱུག་པར་འདོད་ནས་གཞན་ནོར་རྐུ་འཕྲོག་བྱེད་པ་དང༌། རང་ཚེ་རིང་བར་འདོད་ནས་རིམ་གྲོར་གཞན་གསོད་པ་སོགས་འབྲས་བུ་བདེ་བ་འདོད་ལ། དེའི་རྒྱུ་ཕྱིན་ཅི་ལོག་འབའ་ཞིག་སྒྲུབ་ཅིང་དོན་ ཆེན་པོ་རྣམས་ལ་ནི་ཤིན་ཏུ་བརྙས་པས་འདོར་ཏེ་རྒྱུ་ཕྱིན་ཅི་ལོག་གྲུབ་པ་ལ་རང་དོན་དུ་ཞེན་ནས་དེའི་གྲོགས་སུ་གྱུར་ན་དགའ་བར་བྱེད་ཀྱི་དེའི་གྲོགས་སུ་མ་གྱུར་ན་ཁྲོ་ཞིང་སྡང་བར་བྱེད་པས་ན་བྱིས་པ་དང་བཤེས་པ་ལ་ནི་སྙིང་པོ་འགའ་ཡང་མེད་ དེ། སྤྱང་ཀི་དང༌། སྟག་གཟིག་དང༌། བ་ལང་དང༌། ར་ལུག་སོགས་མི་མཐུན་པའི་སྲོག་ཆགས་རྣམས་བསགས་ནས་མཛའ་བོར་བཟུང་སྟེ། བདག་ཉིད་དང་གནས་ཁང་གཅིག་ཏུ་རྟག་པར་འདུག་ན་དེ་དག་གཅིག་ལ་གཅིག་འཚེ་བ་དང༌། བདག་ཉིད་ལ་ ཡང་འཚེ་བས་བདེ་བའི་སྐབས་མི་རྙེད་པ་བཞིན་ཏེ། ཟླ་བ་སྒྲོན་མར། སོ་སོའི་སྐྱེ་བོ་རྣམས་ལ་མཛའ་བ་མེད། །ཚུལ་དང་མཐུན་པའི་ཚིག་གིས་སྨྲས་གྱུར་ཀྱང༌། །ཁྲོ་དང་ཞེ་སྡང་ཡིད་མི་ཆེས་པ་དག །རབ་ཏུ་སྨྲ་སྟེ་འདི་ནི་བྱིས་པའི་ཆོས། ། དོན་དེ་རྣམ་པར་རིག་ནས་ཡིད་མི་རྟོན། །ཅེས་དང༌། བྱིས་པ་ཇི་ལྟར་ཡུན་རིང་ལེགས་བསྟེན་ཡང༌། །དེ་དག་ཕྱིར་ཞིང་མི་མཛའ་དགྲར་འགྱུར་ཞེས། །བྱིས་པའི་ངོ་བོ་ཉིད་ཀྱི་རྒྱུས་ཤེས་ནས། །མཁས་པ་བྱིས་པ་དག་དང་བསྟེན་མི་བྱེད། །ཅེས་དང༌། དེ་དག་བདག་ལ་གནོད་སེམས་ལྡན་པའོ་ཞེས། །མཁས་པ་བྱིས་པ་རྣམས་དང་རྩོད་མི་བྱེད། །བསྟི་བསྟང་བྱས་ཏེ་བྱིས་པ་ཡོངས་སུ་སྤོང༌། །ཞེས་སོགས་རྒྱ་ཆེར་གསུངས་པའི་ཕྱིར་རོ། །འདིར་དོགས་པ་འདི་ཡོད་དེ། བྱིས་པ་རང་དོན་ མེད་པར་ནི། །ཞེས་འཆད་ན་བྱིས་པས་རང་དོན་གང་ཡིན་པ་ཤེས་སམ་ཞེས་པ་དང༌། ཡང་སྔོན་དུ། སེམས་ཅན་མགུ་བྱ་མ་གཏོགས་པ། །སོགས་ཀྱིས་སེམས་ཅན་མགུ་བ་ཁོ་ན་བསྒྲུབ་བྱར་བསྟན་པ་དང༌། འདིར་སེམས་ཅན་མགུ་མི་ནུས་པར་

Page: 548 བསྟན་པ་འགལ་ལོ་སྙམ་པའོ། །སྐྱོན་དེ་དག་ནི་མེད་དེ། བྱིས་པས་རང་དོན་ཡང་དག་པར་མི་ཤེས་ཀྱང་དོན་མ་ཡིན་པ་ལ་བྱིས་པ་ཉིད་རང་དོན་དུ་འཛིན་པའི་ཆ་ནས་དེ་སྐད་དུ་བརྗོད་ལ། འཕྲལ་དུ་སེམས་ཅན་དེ་ཉིད་མགུ་བའམ། མ་མགུ་བའམ། ཕན་གནོད་གང་དུ་འཛིན་ ཡང་རུང་སྟེ། ཡུལ་དེ་ལ་ཕན་བདེ་ཁོ་ན་སྒྲུབ་ལ་ནམ་ཞིག་ན་ནི་ཡུལ་དེས་ཀྱང་ཕན་པར་གོ་བར་འགྱུར་ལ། དེས་མ་གོ་ཡང་གཞན་ལ་ཕན་བདེར་གྱུར་པ་ཁོ་ནས་བྱང་ཆུབ་སེམས་དཔའ་ལ་ཆོག་པའི་ཕྱིར། ཕན་བདེ་སྒྲུབ་པ་ལ་གཞན་མགུ་བར་བྱ་དགོས་པའི་ མིང་གིས་བསྟན་པ་ཡིན་ལ། འདིར་ནི་ཕན་བདེར་མི་འགྱུར་བར་སྤྱོད་པ་མཚུངས་པར་འགྲོགས་པ་ལ་སྙིང་པོ་མེད་པས་དེ་སྤང་དགོས་པར་བསྟན་པ་སྟེ། དཔེར་ན། གདོལ་བ་ཞིག་གསོད་པའི་བྱ་བ་ལས་ལྡོག་ནུས་པར་ཤེས་ན་དེ་དང་མཛའ་བོར་བྱས་ཏེ་ བག་ཕབ་ནས་ཁད་ཀྱིས་སྲོག་གཅོད་སྤོང་བར་འགོད་མོད་ཀྱང༌། དེ་དགེ་བ་ལ་སྦྱོར་མི་ནུས་པར་ཤེས་ན་དེ་དང་མཛའ་བོར་བྱས་པ་ལ་སྙིང་པོ་མེད་པས་དེ་དང་འགྲོགས་པ་སྤོང་བ་བཞིན་ནོ། །ལྔ་པ་དབེན་པའི་ཡོན་ཏན་ནི། ནགས་ན་རི་དྭགས་བྱ་རྣམས་དང༌། ། ཤིང་རྣམས་མི་སྙན་བརྗོད་མི་བྱེད། །འགྲོགས་ན་བདེ་བ་དེ་དག་དང༌། །ནམ་ཞིག་ལྷན་ཅིག་བདག་གནས་འགྱུར། །ཕུག་གམ་ལྷ་ཁང་སྟོང་པའམ། །ལྗོན་ཤིང་དྲུང་དུ་གནས་བཅས་ཏེ། །ནམ་ཞིག་རྒྱབ་ཏུ་མི་ལྟ་ཞིང༌། །ཆགས་པ་ མེད་པར་འགྱུར་ཞིག་གུ། །ས་ཕྱོགས་བདག་གིར་བཟུང་མེད་པ། །རང་བཞིན་གྱིས་ནི་ཡངས་རྣམས་སུ། །རང་དབང་སྤྱོད་ཅིང་ཆགས་མེད་པར། །ནམ་ཞིག་བདག་ནི་གནས་པར་འགྱུར། །ལྷུང་བཟེད་ལ་སོགས་ཉི་ཚེ་དང༌། །ཀུན་ལ་ མི་མཁོའི་གོས་འཆང་ཞིང༌། །ལུས་འདི་སྦ་བ་མ་བྱས་ཀྱང༌། །འཇིགས་མེད་གནས་པར་ནམ་ཞིག་འགྱུར། །དུར་ཁྲོད་སོང་ནས་གཞན་དག་གི། རུས་གོང་དག་དང་བདག་གིས་ལུས། །འཇིག་པའི་ཆོས་ཅན་དག་ཏུ་ནི། །ནམ་ཞིག་མགོ་

Page: 549 ༄༅། །སྙོམ་བྱེད་པར་འགྱུར། །བདག་གི་ལུས་ནི་འདི་ཉིད་ཀྱང༌། །གང་གི་དྲི་ཡིས་ཝ་དག་ཀྱང༌། །དྲུང་དུ་ཉེར་འགྲོ་མི་འགྱུར་བ། །ེ་ལྟ་བུར་ནི་འགྱུར་བར་འོང༌། །ལུས་འདི་གཅིག་པུ་བྱུང་བ་ཡང༌། །ལྷན་ཅིག་ སྐྱེས་པའི་ཤ་རུས་དག །ཞིག་སྟེ་སོ་སོར་འགྱེས་འགྱུར་ན། །མཛའ་བ་གཞན་ལྟ་ཅི་ཞིག་སྨོས། །སྐྱེ་ནའང་གཅིག་པུ་སྐྱེ་འགྱུར་ཞིང༌། །འཆི་ནའང་དེ་ཉིད་གཅིག་འཆི་སྟེ། །སྡུག་བསྔལ་སྐལ་གཞན་མི་ལེན་ན། །གེགས་བྱེད་མཛའ་ བས་ཅི་ཞིག་བྱ། །ལམ་དག་ཏུ་ནི་ཞུགས་པ་རྣམས། །ཇི་ལྟར་གནས་ནི་འཛིན་བྱེད་ལྟར། །དེ་བཞིན་སྲིད་པའི་ལམ་ཞུགས་པ། །སྐྱེ་བའི་གནས་ནི་ཡོངས་སུ་འཛིན། །འཇིག་རྟེན་ཀུན་ནས་གདུང་བཞིན་དུ། །ཇི་སྲིད་སྐྱེས་བུ་བཞི་ ཡིས་ནི། །དེ་ལས་དེ་ནི་མ་བཏེག་པ། །དེ་སྲིད་དུ་ནི་ནགས་སུ་སོང༌། །བཤེས་མེད་འཁོན་པའང་མེད་བྱས་ནས། །ལུས་འདི་གཅིག་པུ་དབེན་གནས་ཏེ། །སྔ་ནས་ཤི་དང་འདྲར་བརྩིས་ན། །ཤི་ཡང་མྱ་ངན་བྱེད་པ་མེད། །དྲུང་ན་ འཁོད་པ་སུ་དག་ཀྱང༌། །མྱ་ངན་གནོད་པ་བྱེད་མེད་པས། །འདི་ཡི་སངས་རྒྱས་རྗེས་དྲན་སོགས། །སུས་ཀྱང་གཡེངས་པར་འགྱུར་བ་མེད། །དེ་བས་ཤིན་ཏུ་མདངས་དགའ་བའི། །ནགས་ཚལ་ཚེགས་ཆུང་བདེ་སྐྱིད་ཅིང༌། །གཡེང་བ་ ཐམས་ཅད་ཞི་བྱེད་པར། །བདག་ཉིད་གཅིག་པུར་གནས་པར་བྱ། །ཞེས་གསུངས་ཏེ། དང་པོས་གྲོགས་འགྲོགས་བདེ་བ་དང༌། དེ་ནས་གཉིས་ཀྱིས་གནས་རང་དབང་ཐོབ་པ་དང༌། གཅིག་གིས་ཡོ་བྱད་རྙེད་སྲུང་སླ་བ་དང༌། དུར་ཁྲོད་སོགས་ཚིགས་ བཅད་ལྔས་རྐྱེན་གྱིས་བརྩོན་འགྲུས་འཕྲལ་དུ་སྐྱེ་བ་དང༌། འཇིག་རྟེན་སོགས་ཚིགས་བཅད་བཞིས་མ་ཆགས་ཤིང་གཡེང་བ་མེད་པར་བསྟན་ཏོ། །དེ་ཡང་གང་ན་ལྗོན་ཤིང་གི་ཚོགས་པ་ཡོད་པ་ལ་ནགས་ཚལ་ཞེས་བྱ་མོད་ཀྱང༌། རྒྱ་གར་ན་དགོན་པའི་

Page: 550 གནས་རྣམས་ནགས་ཀྱིས་ཁྱབ་པ་ཤས་ཆེ་ཞིང་བཅོས་པ་དང་རང་བཞིན་གྱིས་གྲུབ་པའི་རི་ཆུང་ངུ་རེ་རེ་ཙམ་མ་གཏོགས་རི་བོ་ཆེན་པོ་དག་ཉུང་བའི་ཕྱིར། ནགས་ཞེས་གཙོ་ཆེ་བ་སྨོས་པར་ཟད་ཀྱི། ཤིང་ནགས་ཁོ་ན་ལ་ནི་མི་བཟུང་སྟེ་བོད་ལ་སོགས་པ་མཐའ་ འཁོབ་ཀྱི་ཡུལ་གྲུ་རྣམས་ན་རི་བོ་ཆེ་ཞིང་ལྷུན་སྟུག་པ་གངས་རི་དང༌། བྲག་དང༌། གཡའ་དང༌། རྫ་དང༌། སྤང་སོགས་ཤིང་དང་བཅས་པ་དང༌། མ་བཅས་པ་དང་ཆེས་མང་བས་དེ་ལྟ་བུའི་དགོན་པའི་གནས་ཐམས་ཅད་བསྡུ་བའོ། །དེ་དག་ན་ནི་སྐྱེ་བོའི་རྒྱུན་ལུགས་ ཀྱིས་དབེན་པས་བྱ་དང༌། རི་དྭགས་དང༌། ལྗོན་ཤིང་ལ་སོགས་པ་གྲོགས་སུ་ཟད་ལ། དེ་དག་ནི་ངོ་སྲུང་བ་མི་དགོས་ཤིང་སྨོད་པར་མི་བྱེད་པས་འགྲོགས་ན་བདེ་བའོ། །ཅི་དེ་དག་ན་གཅན་གཟན་གཏུམ་པོ་དག་ཡོད་པས་དེ་དག་ནི་འགྲོགས་ན་བདེ་བ་མ་ཡིན་ནོ་ སྙམ་ན། དེ་ལྟ་བུའང་རེས་འགའ་ནི་སྲིད་མོད་ཀྱི་རྣམ་པ་ཀུན་ཏུ་མ་ཡིན་པ་དང༌། བྱང་ཆུབ་སེམས་དཔའ་ནི་ལུས་སྲོག་ལ་ཆགས་པ་མེད་ཅིང༌། སེམས་ཅན་ཐམས་ཅད་ཕ་མ་འདུ་ཤེས་པས་དེའི་དོན་དུ་དབེན་པར་འགྲོ་བའི་ཕྱིར། ཆགས་པ་དང༌། འཇིགས་པ་ མེད་ལ། སེམས་གཡོ་བར་མི་བྱེད་ན་ལུས་ཀྱི་གནས་སྐབས་ཅི་ཐོབ་ཀྱང་སྡུག་བསྔལ་མ་ཡིན་ཏེ། སྡུག་བསྔལ་ནི་ཚོར་བ་ཡིན་ལ། དེ་ནི་ཤེས་པའི་ཆོས་ཡིན་གྱི་བེམ་པོ་ལ་མེད་དོ། །དེ་དག་ཏུ་བྲག་གི་ཕུག་གམ་བྱ་སྐྱིབས་སོགས་དང་སྔོན་ཚངས་པ་ ལ་སོགས་པའི་གཟུགས་བརྙན་བྱས་ཏེ་མཆོད་པ་འཇིག་རྟེན་པའི་ལྷ་ཁང་ཡིན་པ་ལས་ཕྱིས་ཕྱོགས་དེ་སྐྱེ་བོས་དབེན་པས་སྟོང་པར་གྱུར་བའམ། ལྗོན་ཤིང་ཆེན་པོ་ལོ་མའི་སྐྱིབས་ཆེ་ཞིང་གཡུར་ཟ་བས་ཆར་དང་ཉི་མའི་གདུང་བ་དང་རླུང་ལས་སྐྱོབ་པས་ ཁང་བཟང་གི་མཆོག་ལྟ་བུ་ལ་སོགས་པ་རྙེད་པར་སླ་ཞིང་འཆོས་པའི་སྡུག་བསྔལ་མེད་པ་སུས་ཀྱང་བདག་གིར་མ་བཟུང་བས་རྩོད་པ་མེད་པ་རྣམས་སུ་ཅི་ལྟར་བདེ་བས་གནས་ཏེ་གཞན་དབང་གི་ཁོལ་པོ་མ་ཡིན་པས་རང་དབང་དུ་སྤྱོད་ལ། རྒྱབ་ལྟ་བུ་

Page: 551 ༄༅། །འདས་པ་དང༌། ེས་མཚོན་པ་མདུན་ལྟ་བུ་མ་འོངས་པ་སྟེ་ཚེ་འདིའི་བསམ་པ་ཅི་ལ་ཡང་མི་ལྟ་ཞིང་མི་སེམས་པའོ། །ནང་པའི་རབ་བྱུང་ལ་ལྷུང་བཟེད་དང༌། དཀའ་ཐུབ་པ་གཞན་ལ་སློང་ཕོར་ལ་སོགས་པར་བརྗོད་པའི་སྣོད་ངན་ངོན་ དང༌། སྐྱེ་བོ་རྣམས་ཆས་གོས་ངན་པ་ལ་ངོ་ཚ་བར་བྱེད་པས་དེ་དག་ལ་མི་མཁོ་བའི་ཕྱིར་འཕྲོག་པར་མི་བྱེད་པའི་ཆོས་གོས་སམ། ཇི་ལྟར་རྙེད་པ་ལ་སོགས་པ་གོས་ངན་ངོན་ཙམ་དང༌། རྩཱ་དང་ཤིང་འཇམ་པོ་ལ་སོགས་པའི་སྟན་གྱིས་ཆོག་ཤེས་ཤིང༌། ཉེ་བའི་གྲོང་དག་ ནས་བསོད་སྙོམས་ཙམ་བླངས་པས་འཚོ་བའམ། ཡང་ན་རྙེད་པར་སླ་ལ་གཞན་ལ་རག་མ་ལུས་པའི་མེ་ཏོག་དང་འབྲས་བུ་དང༌། རྩ་བ་དང༌། ལོ་མ་དང༌། ས་རྡོ་བཞུན་པ་དང༌། ཆུ་གཙང་མ་སོགས་ཀྱིས་འཚོ་བ་སྟེ། སྐྱེས་རབས་ལས། ཆོག་ཤེས་དེས་ པའི་བདག་ཉིད་ཅན། །འཚོ་བ་གང་ནའང་བཙལ་མི་དཀའ། །རྩྭ་དང་ལོ་མ་ཆུ་ནི་གནས། །གང་ནའང་མེད་པ་མ་ཡིན་ནོ། །ཞེས་གསུངས་པ་ལྟར་སྤྱོད་ཅིང༌། སྤྱིར་དུ་བསམ་གཏན་གྱི་སེམས་ཐོབ་པ་ན་ཁམ་གྱི་ཟས་སྐོམ་ལ་སྲེད་པ་འགག་ ཅིང་ཏིང་ངེ་འཛིན་གྱི་དགའ་བ་དེ་ཉིད་ཟས་སུ་འགྱུར་བ་སྟེ། འཇིག་རྟེན་ན་ཁམ་གྱི་ཟས་དང༌། ལས་ཀྱི་ཟས་དང༌། བསམ་པའི་ཟས་དང༌། ཏིང་ངེ་འཛིན་གྱི་ཟས་ཏེ་རྣམ་པ་བཞི་ལས་ཏིང་ངེ་འཛིན་གྱི་ཟས་ཁོ་ན་མཆོག་ཡིན་ལ། འཁོར་བ་པ་ཁམས་གོང་གི་ལྷ་ ཐམས་ཅད་ཀྱི་ཟས་ཀྱང་འདིར་ཟད་ན་འཇིག་རྟེན་ལས་འདས་པའི་ཡེ་ཤེས་ཐོབ་པ་བསམ་གཏན་གྱི་ཕ་རོལ་ཏུ་ཕྱིན་པ་ལ་སྤྱོད་པའི་བྱང་ཆུབ་སེམས་དཔའ་ལྟ་ཅི་སྨོས་པའི་ཕྱིར། ནང་པའི་རབ་བྱུང་གི་ལྷུང་བཟེད་དང༌། ཆོས་གོས་ཀྱང་གཞན་གྱི་ འཕྲོག་བྱ་མིན་ཏེ། སྤྱིར་ཆོས་བཞིན་དུ་ཞེན་པ་མེད་ན་གོས་ཀར་ཥ་པ་ཎ་འབུམ་ཕྲག་རི་བ་དང༌། ཁ་ཟས་རོ་བརྒྱ་པ་དང༌། ཁང་པ་བརྩེགས་པ་མིག་ལྔ་བརྒྱ་པ་སོགས་ཀྱང་གནང་བའི་ཕྱིར་ལྷུང་བཟེད་དང་ཆོས་གོས་ལ་ངན་ངོན་གྱིས་མ་ཁྱབ་མོད་ཀྱང་དེ་དག་ནི་གཙུག་

Page: 552 ལག་ཁང་ཆེན་པོ་སོགས་སུ་གནས་ཤིང་རྒྱལ་པོས་བླ་མར་བྱེད་པ་སོགས་ཀྱི་གནས་བརྟན་ཆེན་པོ་ལ་འབྱུང་བར་ཟད་ལ། འདིར་ནི་དགོན་པ་བ་དང་སྦྱངས་པའི་ཡོན་ཏན་ཅན་གྱི་དབང་དུ་གཙོ་བོར་མཛད་ལ། སྤྱིར་ཉན་ཐོས་ཀྱི་ལྷུང་བཟེད་ ཀྱང་རིན་པོ་ཆེ་ལས་བྱས་པ་བཀག་ནས་ས་དང་ལྕགས་ཁོ་ན་ལས་བྱེད་ལ། རྒྱ་གར་ན་དེ་གཉིས་རྒྱུ་ངན་པར་ལྟ་བའི་ཕྱིར་དང༌། གོས་ངུར་སྨྲིག་ཀྱང་རྒྱ་གར་ན་ཁ་དོག་གི་ཐ་ཆད་དུ་ལྟ་ཞིང་བོར་བ་ཕྱགས་བདར་ཁྲོད་པ་ནི་རོ་རས་ཡིན་པས་སྐྱུག་བྲོ་བས་མི་ལེན་ལ། དམན་པ་ཕྱགས་བདར་ཁྲོད་པ་ཡང་གཞན་གྱིས་ཟླ་བ་བཞིར་ལོངས་སྤྱད་པའི་གོས་ཡིན་པས་རྒྱ་གར་ན་མི་གྲ་མ་རྣམས་རྙིང་པ་དེ་ལྟ་བུ་མི་ལེན་ཞིང༌། ཉིན་རེ་བཞིན་ཡང་རས་གསར་པ་ལ་ལོངས་སྤྱོད་པའི་ཕྱིར་དང༌། སྤྱིར་ཐེག་ཆེན་གྱི་འདུལ་བ་ལ་ཕྱིར་རོལ་ཕྱགས་བདར་ གྱི་ཕུང་པོརོར་བའི་ལྷན་ཚལ་སྣ་ཚོགས་པ་བསྒྲིགས་པ་ལ་ཕྱགས་བདར་ཁྲོད་པར་བཤད་པས་དེ་ལྟ་བུ་སྐྱེ་བོ་རྣམས་ལ་ཕལ་ཆེར་མི་མཁོ་བའི་ཕྱིར་རོ། །དེ་ལྟ་མོད་ཀྱི་དེང་སང་བོད་ཡུལ་ན་ནི་མི་རྣམས་འབྱོར་པ་ཉམས་ཤིང་དབུལ་བས་དེ་ལྟ་བུའི་ གནས་སྐབས་ལས་ཀྱང་འདས་པར་མཐོང་མོད་ཀྱང༌། རེ་ཞིག་འདིར་གཙོ་ཆེ་བའི་ཆ་ནས་བསྔགས་པར་མཛད་ཀྱི་ངེས་བཟུང་དུ་ཁྱབ་མཐའ་བཅས་པ་ནི་མ་ཡིན་ནོ། །དབེན་པའི་གནས་དེ་ལྟ་བུ་ན་ནི་རང་ཉིད་གཅིག་པུར་ཟད་པའི་ཕྱིར། གང་ལ་འཇིགས་ པ་དང་ངོ་ཚ་བའི་ཡུལ་གཞན་མེད་པས་འཇིགས་པའམ། ངོ་ཚའི་གནས་སྲུང་བའི་ཕྱིར། ལུས་སྦ་བའི་སྤྱོད་ལམ་གྲོང་དུ་འཆོས་པ་ལྟ་བུ་ཡང་དགོས་པ་མ་ཡིན་ནོ། །དེ་ལྟར་གནས་སུའི་ཡང་མ་ཡིན་པ་རྣམས་སུ་ཟས་གོས་གང་བྱུང་གིས་ཆོག་ ཤེས་པས་གཡེང་བ་མེད་པར་གཅིག་པུར་སེམས་རྣལ་དུ་ཕེབས་པས་རང་དབང་དུ་གནས་པ་ནི་བདེ་བའི་མཆོག་སྟེ། སྟོན་པ་ཉིད་ཀྱིས་ཀྱང༌། རང་དབང་ཐམས་ཅད་བདེ་བ་སྟེ། །གཞན་དབང་ཐམས་ཅད་སྡུག་བསྔལ་ཡིན། །ཞེས་བཀའ་

Page: 553 ༄༅། །བསྩལ་བ་ལྟར། བདག་ཀྱང་གནས་དེ་ལྟ་བུར་ནམ་ཞིག་ན་སྤྱོད་པ་དེས་གནས་པར་འགྱུར་ཞིག་གུ་ཞེས་ཤིན་ཏུ་སྨོན་པའི་ཚིག་སྟེ་སྐབས་སོ་སོར་སྦྱར་རོ། །དགོན་པའི་གནས་དེ་དག་ནི་དུར་ཁྲོད་དང་ཡང་མི་རིང་བ་ཡིན་ལ། གང་དུ་མི་ རྣམས་ཀྱི་རོ་འདོར་བའི་གནས་ནི་དུར་ཁྲོད་དུ་གྲགས་ལ། འདུལ་བ་ལས་ཀྱང༌། དགེ་སློང་གིས་དུར་ཁྲོད་དུ་ཡང་ཡང་འགྲོ་ཞིང་སྒོམ་པར་གསུངས་ལ། དེར་སྐྱེས་པ་དང་བུད་མེད་དང་མཆོག་དམན་དུ་མ་ཤི་བའི་རོ་འཕྲལ་འཕྲལ་དུ་འབྱུང་བའི་ཕྱིར། དེ་མཐོང་བའི་མི་རྟག་ པའི་འདུ་ཤེས་དང༌། ལུས་མཛེས་ཤིང་བྱི་དོར་བྱས་པ་རྣམས་ཀྱང་གཅེར་བུར་ཕྱུང་བ་ན་འཇིགས་སུ་རུང་བ་དང༌། མི་གཙང་བ་དང༌། བམ་པ་དང༌། སྔོས་པ་དང༌། རུལ་ཞིང་མྱགས་པ་དང༌། རུས་གོང་གི་བར་དུ་མཐོང་བས་མི་སྡུག་པའི་འདུ་ཤེས་དང༌། འདི་ལྟར་ ལྷན་ཅིག་ཏུ་བྱུང་བའི་ཤ་རུས་ཀྱང་འགྱེས་ཤིང་རུས་ཚིགས་རེ་ཡང་རྡུལ་ཕྲ་རབ་ཏུ་འཐོར་བ་འདི་ལྟ་ན་གྲོགས་ཙམ་གྱི་མཛའ་བ་ལྟ་ག་ལ་རྟག་ཅེས་འབྲལ་བའི་འདུ་ཤེས་དང༌། རོའི་རྗེས་སུ་འབྲང་བའི་བུ་ལ་སོགས་པ་དག་མྱ་ངན་དང་ངུད་མོ་ཆེར་ བྱེད་ཀྱང་ཤི་བ་པོའི་སེམས་དེ་ནི་སུས་ཀྱང་མ་དམིགས་ལུས་དེ་ནི་དེ་ལྟར་དོར་བ་ན་མྱ་ངན་དེས་སུ་ལའང་མ་ཕན་ཏེ་སྔོན་ཡང་རང་གཅིག་པུར་སྐྱེས་ཤིང་ཕྱིས་ཀྱང་རང་ཉིད་གཅིག་པོར་ཤི་སྟེ་བདེ་སྡུག་ཐམས་ཅད་རང་ཉིད་གཅིག་པུས་མྱོང་གི་སུས་ཀྱང་ སྐལ་བའི་ཤས་མི་ལེན་ཞིང་བགོ་བཤའ་བྱར་མེད་པར་ཤེས་པས་གྲོགས་ལ་མ་ཆགས་པའི་འདུ་ཤེས་དང༌། མགྲོན་པོ་རྣམས་ལམ་དུ་ཞུགས་པ་ན་ཞག་སའི་གནས་སྔ་མ་སྔ་མ་འདོར་ཞིང་ཕྱི་མ་ཕྱི་མ་འཛིན་པ་ལྟར་ཁམས་གསུམ་ཐམས་ཅད་དུ་རྒྱུ་བའི་སེམས་ཅན་ རྣམས་ཀྱང་སྐྱེ་བའི་གནས་ཡང་ཡང་དུ་འཛིན་པས་བདག་གཞན་ཐམས་ཅད་ཀྱང་མགྲོན་པོ་ཙམ་དང་སྐྱེ་གནས་ཐམས་ཅད་ཀྱང་ཞག་མལ་ཙམ་དུ་འདུ་ཤེས་པ་རྣམས་ངང་གི་སྐྱེའོ། །ེས་ན་ལུས་སྙིང་པོ་མེད་པ་དང༌། ཚེ་

Page: 554 ངེས་པ་མེད་པ་དང༌། འཆི་བའི་རྐྱེན་མང་བ་བསམས་ན་སྔོན་མ་ཤི་བ་ཁ་རྗེ་ཆེ་ལ། ད་ལྟ་མི་འཆི་བའི་ངེས་པའང་མེད་ན་རྣམ་པར་གཡེང་བ་གཞན་བྱར་ཅི་ཁོམ་སྟེ། ད་ནི་ཕྱི་མའི་དོན་སྒྲུབ་པ་རན་པས་མི་ཆོག་འཕྱིས་པར་ཡང་ཟད་པས་བརྩོན་པ་ཆེན་པོ་སྐྱེད་ པའི་དུས་ཡིན་གྱི་བདག་མི་འདོད་བཞིན་བློ་བུར་དུ་ཤི་ནས་ཤུལ་ན་གནས་པ་དག་གིས་བདག་གི་རོ་ཁྱོགས་ཀྱིས་དུར་ཁྲོད་དུ་མ་ཁྱེར་བ་དེའི་སྔ་རོལ་ཏུ་ད་ལྟ་ནས་བདག་ཉིད་ཀྱིས་དཀའ་ཐུབ་ཀྱི་ནགས་སུ་ཕྱིན་ནས་བརྩོན་པ་ཆེན་པོ་བརྩམ་དགོས་སོ་ཞེས་ རང་གིས་རང་ལ་ནན་ཏན་གྱིས་འདོམས་པའོ། །ཅི་ནགས་སུ་འཆི་བ་དེ་མི་འབྱུང་ངམ་ཞེ་ན། གང་དུ་ཕྱིན་ཡང་འཆི་བས་མི་ཚུགས་པའི། །ས་ཕྱོགས་དེ་ནི་གང་ནའང་ཡོད་མིན་ཏེ། །ནམ་མཁའ་ལ་མེད་རྒྱ་མཚོའི་གཏིང་ན་འང་མེད། །རི་བོ་ དག་གི་ཕུག་ཏུ་ཞུགས་ནའང་མེད། །ཅེས་གསུངས་པ་ལྟར། འཆི་བ་ནི་གར་ཡང་འབྱུང་མོད་ཀྱང་འཆི་ཚུལ་ལ་ཁྱད་པར་ཆེ་སྟེ། གྲོང་ལ་སོགས་པར་ཤི་ན་གཉེན་གྱི་མྱ་ངན་བྱེད་དགྲ་རྣམས་དགའ་བའི་ཅ་ཅོ་འདོན། འཆི་བ་པོ་ཡང་ཉེ་དུ་མྱ་ངན་ ཅན་མཐོང་བས་ཆགས་ཤིང་སྡུག་བསྔལ། དགེ་བའི་དམིགས་པ་བརྗེད་ཅིང་མི་དྲན་སྡུག་བསྔལ་དང་མྱ་ངན་གྱི་ངང་དུ་འཆི་ལ། རྒྱུ་དེས་ངན་སོང་གི་གནས་སུ་ཉིང་མཚམས་སྦྱོར་རོ། །དབེན་པར་ཤི་བ་ནི་དེ་ལྟ་བུ་མ་ཡིན་ཏེ་དགྲ་གཉེན་སུ་ ཡང་མེད་པས་ཆགས་སྡང་གི་ཡུལ་མེད། གཙུག་ཕུད་འདོར་བ་ནི་རྒྱ་གར་ན་ཉེ་དུའི་གྲལ་ནས་ཕྱུང་བའི་ཐ་ཚིག་ཡིན་ལ། ཤི་བ་དང་རབ་ཏུ་བྱུང་བ་ནི་ཁྱད་པར་གང་ཡང་མེད་དོ་ཞེས་ཡང་ཡང་བྱུང་བའི་ཕྱིར། རབ་ཏུ་བྱུང་བ་ཉིད་ཀྱིས་ཉེ་དུའི་གྲལ་ནས་ ཕྱུང་སྟེ་ཤི་བ་དང་འདྲ་བར་བརྩིས་ཟིན་པས་ན་མྱ་ངན་བྱེད་པ་མེད་ཅིང་རྗེས་སུ་དྲན་པ་དྲུག་ལ་སོགས་པ་དགེ་བའི་དམིགས་པ་ལ་གཡེང་བ་མེད་པར་བརྟན་ཅིང་རྩེ་གཅིག་པའི་ངང་ནས་འཆི་བར་འགྱུར་ལ། རྒྱུ་དེས་སངས་རྒྱས་ཀྱི་ཞིང་དག་པ་རྣམས་སུ་པདྨའི་

Page: 555 ༄༅། །སྦུབས་ལས་སྐྱེ་བའི་ལུས་ཁྱད་པར་ཅན་ཐོབ་ནས་སངས་རྒྱས་ལས་དངོས་སུ་ཆོས་ཉན་པ་འཐོབ་ཅིང༌། ཐ་ནའང་མཐོ་རིས་ནས་མཐོ་རིས་སུ་འགྲོ་བར་བྱེད་པའི་ཕྱིར་རོ། །དེས་ན་རྣམ་པར་གཡེང་བ་ཐམས་ཅད་དོར་ཏེ་སྐྱེ་བའི་ རྒྱུན་ལུགས་ཀྱིས་དབེན་པར་ཆོག་ཤེས་ཤིང༌། རྩེ་གཅིག་པས་དུས་འདའ་བ་བོད་ཀྱི་ཡུལ་གྲུ་འདིར་ཡང་སྣུབས་ནམ་མཁའི་སྙིང་པོ་དང༌། རྦ་ཡེ་ཤེས་དབང་པོ་དང༌། རྣལ་འབྱོར་གྱི་དབང་ཕྱུག་མི་ལ་དང༌། རྨོག་ལྕོག་པ་དང༌། སྐྱེར་སྒང་པ་ལ་སོགས་པ་བསམ་གཏན་ གྱི་དེད་དཔོན་ཆེན་པོ་རྣམས་ཀྱིས་ཇི་ལྟར་བསྒྲུབས་པ་ལྟར་རྣལ་འབྱོར་དུ་བྱ་ལ། གཙོ་བོར་གནས་ལོངས་སྤྱོད་སོགས་གང་བྱུང་གིས་ཆོག་ཤེས་པ་ཁོ་ན་མཆོག་ཡིན་ཏེ། སྐྱེས་རབས་ལས། མང་དུ་ཐོས་ལ་ང་རྒྱལ་མེད། །དཀའ་ཐུབ་ཅན་ལ་ གཏོང་བར་ལྡན། །དབེན་པར་གནས་ལ་ཆོག་ཤེས་པ། །འདི་རྣམས་རྒྱན་གྱི་རྒྱན་ཡིན་ནོ། །ཞེས་དང༌། བཤེས་སྤྲིང་ལས། ནོར་རྣམས་ཀུན་གྱི་ནང་ན་ཆོག་ཤེས་པ། །རབ་མཆོག་ལགས་པར་ལྷ་མིའི་སྟོན་པས་གསུངས། །ཀུན་ཏུ་ ཆོག་ཤེས་མཛོད་ཅིག་ཆོག་མཁྱེན་ན། །ནོར་མི་བདོག་ཀྱང་ཡང་དག་འབྱོར་བ་ལགས། །ཞེས་དང༌། ཆོག་ཤེས་བདེ་སྤྱོད་གང་ཡིན་པ། །དབང་པོས་ཀྱང་ནི་དེ་རྙེད་དཀའ། །ཞེས་འཆད་པར་འགྱུར་བའི་ཕྱིར་རོ། །འདིར་དོགས་པའི་གནས་འདི་ ཡོད་དེ། ཤེས་ཕྱིན་གྱི་མདོ་ལས། སེམས་དབེན་པ་གཙོ་བོར་གསུངས་པ་མ་ཡིན་ནམ། འདི་ནི་ལུས་ངག་གི་དབེན་པར་ཟད་དོ་ཞེ་ན། དེ་ནི་ཉན་རང་ལུས་ངག་གི་དབེན་པ་ལ་དགའ་བས་ཐེག་ཆེན་གྱི་ལས་དང་པོ་བ་རྣམས་དེ་ལས་ལྡོག་པའི་ཕྱིར། སེམས་ རང་དོན་ཡིད་བྱེད་ཀྱི་བློས་དབེན་ན་གར་བསྡད་ཀྱང་དབེན་པ་ཡིན་གྱི། དེ་མེད་པར་ལུས་ངག་དབེན་པ་ཙམ་ལ་ནི་སྙིང་པོ་མེད་དོ་ཞེས་སྟོན་པའི་ཕྱིར། གང་ཞིག་དཔག་ཚད་ལྔ་བརྒྱ་ཡོད་པའི་རི་ཡི་སུལ། །སྦྲུལ་གྱི་གང་བར་ལོ་མང་བྱེ་བར་

Page: 556 གནས་བྱེད་ཀྱང༌། །དབེན་པ་འདི་མི་ཤེས་པའི་བྱང་ཆུབ་སེམས་དཔའ་དེ། །ལྷག་པའི་ང་རྒྱལ་རྙེད་ནས་འདྲེ་བར་གནས་པ་ཡིན། །ཞེས་དང༌། གང་ཞིག་གྲོང་ངམ་འོན་ཏེ་དགོན་པར་གནས་ཀྱང་རུང༌། །ཐེག་པ་གཉིས་ཀྱི་སེམས་ བྲལ་བྱང་ཆུབ་མཆོག་དེས་ན། །འདི་ནི་འགྲོ་དོན་ཞུགས་པ་རྣམས་ཀྱི་དབེན་པ་སྟེ། །ཞེས་དང༌། རྟག་ཏུ་གྲོང་དང་ཡུལ་འཁོར་གྲོང་རྡལ་གནས་བྱེད་ཅིང༌། །སེམས་ཅན་སྨིན་བྱེད་བྱང་ཆུབ་བརྩོན་པ་མ་གཏོགས་པར། །འདི་ན་དགྲ་བཅོམ་རང་ རྒྱལ་འདོད་པ་གཞན་མི་སྐྱེད། །འདི་ནི་བདེ་བར་གཤེགས་པའི་སྲས་ཀྱི་དབེན་པར་གསུངས། །ཞེས་བྱང་ཆུབ་ཀྱི་སེམས་དང་མ་བྲལ་བ་ལ་སེམས་ཀྱི་དབེན་པར་གསུངས་ནས་དེ་བསྔགས་པའི་སྐབས་ཡིན་ལ། འདི་ནི་སེམས་ཀྱི་དབེན་པ་ དེ་དང་ལྡན་པས་དེ་བརྟན་ཞིང་འཕེལ་བའི་ཕྱིར། གཞན་དོན་ཁོ་ནའི་ཆེད་དུ་གཞན་དོན་གྱི་ནུས་པ་སྒྲུབ་པའི་ཕྱིར་ལུས་ངག་གི་དབེན་པ་བསྟེན་པ་མཉན་པ་གྲུ་འཆོས་པ་ལྟ་བུ་ཡིན་ཏེ། ཟླ་བ་སྒྲོན་མར། གྲོང་དང་གྲོང་ཁྱེར་དག་ལ་དགའ་སྤོངས་ལ། ། རྟག་ཏུ་དབེན་པའི་ནགས་ཁྲོད་བསྟེན་པར་གྱིས། །བསེ་རུ་ལྟ་བུར་རྟག་ཏུ་གཅིག་པོར་བྱོས། །རིང་པོར་མི་ཐོགས་ཏིང་ངེ་འཛིན་མཆོག་འཐོབ་འགྱུར། །ཞེས་གསུངས་ཤིང༌། ཤེས་ཕྱིན་ཉིད་ལས་ཀྱང༌། ཤེས་རབ་ཀྱི་ཕ་རོལ་ཏུ་ཕྱིན་པ་སྒོམ་པར་འདོད་ པས་དགོན་པར་གནས་པར་བྱ་བས་མཐའི་གནས་ལ་བསྟེན་པར་བྱའོ། །ཞེས་གསུངས་པ་ལྟ་བུ་བཞིན་ནོ། །དེ་ལྟར་འཇིག་རྟེན་སྤོང་བ་བཤད་ནས། གཉིས་པ་རྣམ་རྟོག་སྤང་ཚུལ་ལ་གཉིས། འདོད་པ་ལ་སྐྱོ་བ་སྐྱེད་པ་དང༌། དབེན་པ་ལ་དགའ་ བ་སྐྱེད་པའོ། །དང་པོ་ལ་གཉིས། འབྲས་བུ་འཇིགས་སུ་རུང་བར་བསྟན་པ། རང་བཞིན་མི་གཙང་བར་བསྟན། སྒྲུབ་པའི་རྒྱུ་སྡུག་བསྔལ་ཆེ་བར་བསྟན་པ་སྟེ། གསུམ་གྱིས་ནང་སེམས་ཅན་ལ་ཆགས་པ་སྤང་བ་དང༌། ཚེགས་ཆེན་པོས་སྒྲུབ་དགོས་པ་

Page: 557 ༄༅། །དང༌། སྡུག་བསྔལ་གྱི་འབྱུང་ཁུངས་སུ་བསྟན་པ་སྟེ། གཉིས་ཀྱིས་ཕྱི་ཡོ་བྱད་ལ་ཆགས་པ་སྤང་བ་དང༌། གཉི་གའི་ཉེས་དམིགས་ཐུན་མོང་དུ་བསྟན་པའོ། །དང་པོ་ནི། བསམ་པ་གཞན་ནི་ཀུན་བཏང་སྟེ། །བདག་ལ་སེམས་ པ་གཅིག་པུ་ཡིས། །སེམས་ནི་མཉམ་པར་བཞག་ཕྱིར་དང༌། །དུལ་བར་བྱ་ཕྱིར་བརྩོན་པར་བྱ། །འཇིག་རྟེན་འདི་དང་ཕ་རོལ་ཏུའང༌། །འདོད་པ་རྣམས་ནི་ཕུང་ཁྲོལ་སྐྱེད། །འདིར་ནི་བསད་དང་བཅིང་དང་གཅོད། །ཕ་རོལ་ཏུ་ནི་དམྱལ་སོགས་ འགྲུབ། །ཅེས་པ་དང༌། གཉིས་པ་རང་བཞིན་མི་གཙང་བར་བསྟན་པ་ལ་ཡང༌། དུར་ཁྲོད་ཀྱིས་ཆོས་ཀྱི་མི་གཙང་བར་བསྟན་པ་དང༌། གསོན་པ་ཉིད་ནའང་མི་གཙང་བར་བསྟན་པའོ། །དང་པོ་ལའང་གསུམ་ལས། ཀེང་རུས་སུ་ལྟ་བ་ནི། ཕོ་ཉ་ཕོ་ཉ་མོ་ལས་ སྔོན། །གང་ཕྱིར་དུ་མར་གསོལ་བཏབ་ཅིང༌། །སྡིག་པ་རྣམས་སམ་གྲགས་མིན་ལའང༌། །གང་གི་དོན་དུ་མ་འཛེམས་པར། །འཇིགས་པ་ལ་ཡང་བདག་ཞུགས་ཤིང༌། །རྫས་ཀྱང་ཟད་པར་བྱས་གྱུར་ཏེ། །གང་ལ་ཡོངས་སུ་འཁྱུད་པ་ན། །མཆོག་ ཏུ་དགའ་འགྱུར་དེ་དག་ཉིད། །ཀེང་རུས་ཉིད་ཡིན་གཞན་མིན་ན། །རང་དབང་དང་ནི་བདག་མིན་ལ། །རབ་ཏུ་འདོད་ཅིང་ཡོངས་ཞེན་ནས། །ཅི་ཕྱིར་མྱ་ངན་འདས་མི་འགྲོ། །། ཞེས་པ་དང༌། བྱ་གཅན་གྱི་ཁ་ཟས་སུ་ལྟ་བ་ནི། གང་ཞིག་དང་པོ་འབད་ དེ་བཏེག །དྲངས་ཀྱང་ངོ་ཚས་འོག་ཏུ་བལྟ། །སྔོན་ནི་མཐོང་ངམ་མ་མཐོང་ཡང༌། །གོས་ཀྱིས་གདོང་ནི་གཡོགས་པར་གྱུར། །ཁྱོད་ཉོན་མོངས་པའི་གདོང་དེ་ནི། །ད་ལྟ་མངོན་སུམ་གྱུར་པ་བཞིན། །བྱ་རྒོད་ཀྱིས་བསལ་བྱས་མཐོང་ནས། ། ད་ལྟ་ཅི་ཕྱིར་འབྱེར་བར་བྱེད། །གཞན་རྣམས་མིག་གིས་བལྟ་ན་ཡང༌། །གང་ཞིག་ཡོངས་སུ་བསྲུངས་གྱུར་པ། །ཇི་སྲིད་དེ་ནི་དེ་ཟ་ན། །སེར་སྣ་ཅན་ཁྱོད་ཅིས་མི་སྲུང༌། །ཤ་ཡི་ཕུང་པོ་འདི་མཐོང་ནས། །བྱ་རྒོད་དང་གཞན་ཟ་བྱེད་ན། །

Page: 558 གཞན་གྱི་ཟས་ལ་མེ་ཏོག་གི། ཕྲེང་བ་ཙནྡན་རྒྱན་གྱིས་མཆོད། །ཅེས་པ་དང༌། རོ་ལངས་ལྟ་བུར་ལྟ་བ་ནི། རུས་གོང་ཉིད་དུ་མཐོང་ནས་ནི། །མི་འགུལ་ཡང་ནི་ཁྱོད་སྐྲག་ན། །རོ་ལངས་གཞན་དུ་འགའ་ཡིས་ཀྱང༌། །བསྐྱོད་པར་གྱུར་ན་ ཅིས་མི་འཇིགས། །གང་ལ་གཡོགས་ཀྱང་འདི་ཆགས་ན། །དེ་མ་གཡོགས་ཚེ་ཅིས་མི་འདོར། །དེ་ལ་དགོས་པ་མེད་ན་ནི། །གཡོགས་པ་ལ་ནི་ཅི་ཕྱིར་འཁྱུད། །ཅེས་པ་དང༌། གསོན་པ་ཉིད་ན་མི་གཙང་བར་བསྟན་པ་ལ་ཡང་གསུམ་ ལས། དང་པོ་མི་གཙང་བ་ཐམས་ཅད་ཀྱི་འབྱུང་གནས་ལུས་ཡིན་པར་བསྟན་པ་ནི། ཟས་ནི་གཅིག་པུ་ཉིད་ལས་ནི། །བཤང་དང་ཁ་ཆུ་འབྱུང་གྱུར་ན། །དེ་ལས་བཤང་ལ་མི་དགའ་ཞིང༌། །ཁ་ཆུ་ལ་ཁྱོད་ཅི་ཕྱིར་དགའ། །ཤིང་བལ་རེག་ན་ འཇམ་པ་ཡི། །སྔས་ལའང་དགའ་བར་མི་བྱེད་པར། །དྲི་ང་འཛག་པ་མ་ཡིན་ཞེས། །འདོད་ལྡན་མི་གཙ་ང་བ་ལ་རྨོངས། །འདོད་ལྡན་ངན་པ་རྨོངས་པ་རྣམས། །ཤིང་བལ་རེག་ན་འཇམ་པ་ལའང༌། །ཉལ་པོ་བྱ་བར་མི་ནུས་ཞེས། །དེ་ལ་ ཁྲོ་བ་དག་ཏུ་བྱེད། །གལ་ཏེ་མི་གཙང་ཆགས་མེད་ན། །རུས་གཟེབ་རྒྱུས་པས་སྦྲེལ་བ་ལ། །ཤ་ཡི་འདམ་གྱིས་ཞལ་ཞལ་བྱས། །གཞན་ཁྱོད་ཅི་ཕྱིར་པང་དུ་འཁྱུད། །ཁྱོད་ཉིད་མི་གཙང་མང་ཡོད་པ། །དེ་ཉིད་ལ་ཁྱོད་བརྟན་སྤྱོད་ཅིང༌། ། མི་གཙང་རྐྱལ་བ་གཞན་དག་ལའང༌། །མི་གཙང་བརྐམ་པས་འདོད་པར་བྱེད། །བདག་ནི་ཤ་འདི་ལ་དགའ་ཞེས། །རེག་དང་ལྟ་བར་འདོད་ན་ཀོ། སེམས་མེད་པ་ཡི་རང་བཞིན་གྱི། །ཤ་ནི་ཁྱོད་ཀོ་ཅིས་མི་འདོད། །འདོད་པའི་སེམས་ གང་ཡིན་པ་དེ། །རེག་དང་བལྟ་བར་མི་ནུས་ལ། །གང་ཞིག་ནུས་དེ་ཤེས་པ་མིན། །དོན་མེད་འཁྱུད་དེས་ཅི་ཞིག་བྱ། །མི་གཙང་རང་བཞིན་གཞན་གྱི་ལུས། །མི་རྟོགས་ངོ་མཚར་མི་ཆེ་ཡི། །རང་ཉིད་མི་གཙང་ཉིད་ཡིན་པར། །རྟོགས་པར་

Page: 559 ༄༅། །མི་འགྱུར་ངོ་མཚར་ཆེ། །ཞེས་པ་དང༌། དེ་རིགས་པས་སྒྲུབ་པ་ནི། སྤྲིན་བྲལ་ཉི་ཟེར་གྱིས་ཕྱེ་བའི། །པདྨ་གཞོན་ནུ་སྤངས་ནས་ནི། །མི་གཙང་ཞེན་པའི་སེམས་ཀྱིས་ནི། །མི་གཙང་གཟེབ་ལ་ཅིའི་ཕྱིར་དགའ། ། ས་ཕྱོགས་མི་གཙང་གིས་གོས་པ། །གལ་ཏེ་རེག་པར་མི་འདོད་ན། །གང་ལས་དེ་ནི་བྱུང་བ་ཡི། །ལུས་ལ་ཇི་ལྟར་ཁྱོད་རེག་འདོད། །གལ་ཏེ་མི་གཙང་ཆགས་མེད་ན། །གཞན་ཁྱོད་ཅི་ཕྱིར་པང་དུ་འཁྱུད། །མི་གཙང་ལས་བྱུང་མི་གཙང་ སྲིན། །ཆུང་ངུའང་ཁྱོད་འདོད་མི་བྱེད་ན། །མི་གཙང་ཞིང་ལས་བྱུང་གྱུར་ཅིང༌། །དེ་ཡི་ས་བོན་དེས་བསྐྱེད་པ། །མི་གཙང་མང་གི་རང་བཞིན་ལུས། །མི་གཙང་སྐྱེས་པའང་འདོད་པར་བྱེད། །ཁྱོད་ནི་རང་ཉིད་མི་གཙང་ལ། །སྨོད་མི་བྱེད་པར་མ་ ཟད་ཀྱི། །མི་གཙང་རྐྱལ་བ་མི་གཙང་ལ། །བརྐམ་པས་གཞན་ཡང་འདོད་པར་བྱེད། །ག་པུར་ལ་སོགས་ཡིད་འོང་དང༌། །འབྲས་ཆན་དག་གམ་ཚོད་མའང་རུང༌། །ཁར་བཅུག་ཕྱིར་ཕྱུང་བོར་བ་ཡི། །ས་ཡང་མི་གཙང་བཙོག་པར་འགྱུར། ། གལ་ཏེ་མི་གཙང་འདི་འདྲ་བ། །མངོན་སུམ་གྱུར་ཀྱང་ཐེ་ཚོམ་ན། །དུར་ཁྲོད་དག་ཏུ་བོར་བའི་ལུས། །མི་གཙང་གཞན་ཡང་བལྟ་བར་གྱིས། །གང་ཞིག་པགས་པའི་ཁ་ཕྱེ་ན། །འཇིགས་པ་ཆེན་པོ་སྐྱེ་འགྱུར་བ། །ཤེས་ཀྱང་ཇི་ལྟར་དེ་ཉིད་ལ། ། ཕྱིར་ཞིང་དགའ་བ་སྐྱེ་བར་འགྱུར། །ཞེས་པ་དང༌། གཞན་གྱི་རྒྱུས་གཞན་ལ་ཆགས་པར་མི་རིགས་པ་ནི། ལུས་ལ་བསྐུས་པའི་དྲི་དེ་ཡང༌། །ཙནྡན་སོགས་ཡིན་གཞན་མིན་ན། །གཞན་གྱི་དྲི་དེས་གཞན་དག་ལ། །ཅི་ཡི་ཕྱིར་ན་ཆགས་ པར་བྱེད། །གལ་ཏེ་རང་བཞིན་དྲི་ང་བས། །འདི་ལ་མ་ཆགས་ལེགས་མིན་ནམ། །འཇིག་རྟེན་དོན་མེད་སྲེད་པ་དག །ཅི་སྟེ་དེ་ལ་དྲི་ཞིམ་སྐུད། །འོན་ཏེ་དྲི་ཞིམ་ཙནྡན་ན། །ལུས་ལས་འདིར་ནི་ཅི་ཞིག་བྱུང༌། །གཞན་གྱི་

Page: 560 དྲི་ཡིས་གཞན་དག་ལ། །ཅི་ཡི་ཕྱིར་ན་ཆགས་པར་བྱེད། །གལ་ཏེ་སྐྲ་སེན་རིང་བ་དང༌། །སོ་སྐྱ་དྲི་མར་བཅས་པ་དང༌། །འདམ་གྱི་དྲིས་བསྒོས་གཅེར་བུ་སྟེ། །ལུས་ཀྱི་རང་བཞིན་འཇིགས་བཅས་ན། །རང་ལ་གནོད་པའི་མཚོན་ འདྲ་བ། །དེ་འབད་ཅི་ཕྱིར་བྱི་དོར་བྱེད། །བདག་ལ་རྨོངས་པའི་འབད་པ་ཡིས། །སྨྱོས་པས་ས་འདི་ཀུན་ཏུ་འཁྲུགས། །རུས་གོང་འབའ་ཞིག་མཐོང་ནས་ནི། །དུར་ཁྲོད་དུ་ནི་ཡིད་འབྱུང་ན། །གཡོ་བའི་རུས་གོང་གིས་ཁྱབ་པའི། ། གྲོང་གི་དུར་ཁྲོད་ལ་དགའ་འམ། །ཞེས་པ་དང༌། གསུམ་པ་སྒྲུབ་པའི་རྒྱུ་སྡུག་བསྔལ་ཆེ་བར་བསྟན་པ་ནི། དེ་ལྟར་མི་གཙང་གྱུར་པ་དེའང༌། །རིན་མེད་པར་ནི་མི་རྙེད་དོ། །དེ་དོན་བསྒྲུབས་པས་ཤ་ཐང་དང༌། །དམྱལ་ལ་སོགས་པའི་གནོད་པར་ འགྱུར། །ཞེས་པ་དང༌། ཕྱིའི་ཡོ་བྱད་ལ་ཆགས་པ་སྤང་བ་ལ་ཡང༌། ཚེགས་ཆེན་པོས་སྒྲུབ་དགོས་པ་ནི། བྱིས་པ་ནོར་སྤེལ་མི་ནུས་པས། །དར་ལ་བབ་ན་འདི་ཅིས་བདེ། །ནོར་གསོག་པ་ཡིས་ཚེ་གཏུགས་ནས། །རྒས་ནས་འདོད་པས་ཅི་ ཞིག་བྱ། །འདོད་ལྡན་ངན་པ་ཁ་ཅིག་ནི། །ཉིན་རངས་ལས་ཀྱིས་ཡོངས་དུབ་སྟེ། །ཁྱིམ་དུ་འོངས་ནས་ཆད་པའི་ལུས། །རོ་དང་འདྲ་བར་ཉལ་བར་བྱེད། །ཁ་ཅིག་བྱེས་བགྲོད་ཉོན་མོངས་དང༌། །རིང་དུ་སོང་བའི་སྡུག་བསྔལ་ཅན། ། བུ་སྨད་འདོད་བཞིན་བུ་སྨད་རྣམས། །ཁྱུད་ཁོར་ལོས་ཀྱང་མཐོང་མི་འགྱུར། །བདག་ལ་ཕན་འདོད་རྣམ་རྨོངས་པས། །རང་དོན་ཉིད་དུ་བཙོངས་པ་ཡང༌། །དེ་མ་ཐོབ་པར་དོན་མེད་པའི། །གཞན་གྱི་ལས་ཀྱི་རླུང་གིས་བདས། །ལ་ལ་རང་ གི་ལུས་བཙོངས་ཤིང༌། །དབང་མེད་གཞན་གྱིས་བཀོལ་གྱུར་ཏེ། །ཆུང་མ་དག་ཀྱང་བུ་བྱུང་ན། །ཤིང་དྲུང་དགོན་པར་བབ་བབ་འབྱུང༌། །འདོད་པས་བསླུས་པའི་གླེན་པ་དག །འཚོ་འདོད་འཚོ་བར་བྱའོ་ཞེས། །སྲོག་སྟོར་དོགས་བཞིན་

Page: 561 ༄༅། །གཡུལ་དུ་འཇུག །ཁེ་ཕྱིར་བྲན་དུ་འགྲོ་བར་བྱེད། །འདོད་ལྡན་ལ་ལ་ལུས་ཀྱང་བཅད། །ཁ་ཅིག་གསལ་ཤིང་རྩེ་ལ་བཙུགས། །ཁ་ཅིག་མདུང་ཐུང་དག་གིས་བསྣུན། །ཁ་ཅིག་བསྲེགས་པ་དག་ཀྱང་སྣང༌། ། ཞེས་པ་དང༌། སྡུག་བསྔལ་གྱི་འབྱུང་གནས་སུ་བསྟན་པ་ནི། བསགས་དང་བསྲུང་དང་བརླག་པའི་གདུང་བ་ཡིས། །ནོར་ནི་ཕུང་ཁྲོལ་མཐའ་ཡས་ཤེས་པར་བྱ། ནོར་ལ་ཆགས་པས་གཡེངས་པར་གྱུར་པ་རྣམས། །སྲིད་པའི་སྔུག་བསྔལ་ ལས་གྲོལ་སྐབས་མེད་དོ། །ཞེས་པ་དང༌། ཐུང་མོང་གི་ཉེས་དམིགས་བསྟན་པ་ནི། འདོད་ལྡན་རྣམས་ལ་དེ་ལ་སོགས། །ཉེས་དམིགས་མང་ལ་མནོག་ཆུང་སྟེ། །ཤིང་རྟ་འདྲེན་པའི་ཕྱུགས་དག་གིས། །རྩྭ་ནི་ཁམ་འགའ་ཟོས་པ་ བཞིན། །ཕྱུགས་ཀྱིས་བསྒྲུབས་ནའང་མི་དཀོན་པའི། །མནོག་ཆུང་གང་ཡིན་དེའི་དོན་དུ། །དལ་འབྱོར་ཕུན་སུམ་རྙེད་དཀའ་འདི། །ལས་ཀྱི་མནར་བ་རྣམས་ཀྱིས་བཅོམ། །འདོད་པས་ངེས་པར་འཇིག་འགྱུར་ཞིང༌། །དམྱལ་ལ་ སོགས་པར་ལྟུང་བྱེད་པ། །ཆེན་པོ་མིན་ཕྱིར་དུས་ཀུན་ཏུ། །དུབ་པའི་ཚེགས་བྱུང་གང་ཡིན་པ། །དེ་ཡི་བྱེ་བའི་ཆ་ཙམ་གྱི། །ཚེགས་ཀྱིས་སངས་རྒྱས་ཉིད་འགྲུབ་ན། །འདོད་ལྡན་བྱང་ཆུབ་སྤྱོད་པ་བས། །སྡུག་བསྔལ་ཆེ་ལ་བྱང་ཆུབ་ མེད། །དམྱལ་སོགས་སྡུག་བསྔལ་བསམས་བྱས་ན། །འདོད་པ་རྣམས་ལ་མཚོན་དང་ནི། །དུག་དང་མེ་དང་གཡང་ས་དང༌། །དགྲ་རྣམས་ཀྱིས་ཀྱང་དཔེར་མི་ཕོད། །ཅེས་པ་དང༌། གཉིས་པ་དབེན་པ་ལ་དགའ་བ་སྐྱེད་པ་ལ་ཡང༌། དེ་ལྟར་འདོད་ ལ་སྐྱོ་བྱས་ཏེ། །དབེན་པ་ལ་ནི་དགའ་བ་སྐྱེད། །ཅེས་པས་མདོར་བསྟན། ྩོད་དང་ཉོན་མོངས་ཀྱིས་སྟོང་པ། །ཞི་བའི་ནགས་ཀྱི་ནང་དག་ཏུ། །སྐལ་ལྡན་ཟླ་འོད་ཙནྡན་གྱིས་བསིལ་བའི། །ཡངས་པའི་རྡོ་ལེབ་ཁང་བཟང་ཉམས་དགའ་

Page: 562 བར། །སྒྲ་མེད་ཞི་བའི་ནགས་ཀླུང་གཡོབ་པ་ཡིས། །གཞན་ལ་ཕན་དོན་སེམས་ཤིང་འཆག་པར་བྱེད། །ཅེས་པས་རྒྱལ་པོ་ལས་བདེ་བ་ལྷག་པ་དང༌། །ཁང་སྟོང་ཤིང་དྲུང་ཕུག་དག་ཏུ། །གང་དུ་ཇི་སྲིད་འདོད་གནས་ཤིང༌། །ཡོངས་འཛིན་ སྲུང་བའི་སྡུག་བསྔལ་སྤངས། །ལྟོས་པ་མེད་པར་བག་ཡངས་སྤྱོད། །རང་དབང་སྤྱོད་ཅིང་ཆགས་མེད་ལ། །གང་དང་ཡང་ནི་འབྲེལ་མེད་པའི། །ཆོག་ཤེས་བདེ་སྤྱོད་གང་ཡིན་པ། །དབང་པོས་ཀྱང་ནི་དེ་རྙེད་དཀའ། །ཞེས་པས་བརྒྱ་བྱིན་ ལས་བདེ་བ་ལྷག་པར་བསྟན་པའོ། །དེ་ཡང་དབེན་པའི་ཡོན་ཏན་དེ་ལྟ་བུ་རིག་ནས་འཇིག་རྟེན་པའི་བསམ་པ་ཐམས་ཅད་ལས་ལྡོག་སྟེ་བྱང་ཆུབ་སེམས་དཔའ་བདག་ཉིད་ཀྱིས་སྔོན་ནས་བརྣགས་པའི་དོན་གཅིག་པུ་སེམས་ཅན་ཐམས་ཅད་སྡུག་བསྔལ་ ལས་སྒྲོལ་བའི་ཕྱིར། དེ་ནུས་པའི་རྫོགས་པའི་སངས་རྒྱས་སྒྲུབ་པ་ཁོ་ནའི་ཆེད་དུ་ཆོས་ཐམས་ཅད་ཀྱི་རང་བཞིན་ཡོངས་སུ་ཤེས་པའི་ཏིང་ངེ་འཛིན་ལ་རྩེ་གཅིག་ཏུ་མཉམ་པར་བཞག་སྟེ། ཉོན་མོངས་པ་མངོན་གྱུར་དང་ས་བོན་བག་ཉལ་དང་བཅས་པ་ལྡང་ བ་མེད་པར་དུལ་ཞིང་གཞོམ་པའི་ཕྱིར། རྩེ་གཅིག་ཏུ་བརྩོན་པར་བྱའོ། །ཅི། བསམ་པ་གཞན་ནི་ཀུན་བཏང་སྟེ། །ཞེས་འཇིག་རྟེན་པའི་བསམ་པ་བཏང་དགོས་རྒྱུ་དེ་གང་ཞེ་ན། སྤྱིར་ཚེ་འདི་ལ་ཞེན་པ་སོགས་མཐའ་དག་ཡིན་མོད་ཀྱང་ཁྲོ་ བ་དང་རྣམ་པར་འཚེ་བ་སོགས་ནི་བཟོད་པའི་སྐབས་སུ་གཙོ་བོརལྡོག་ཟིན་ཅིང་ལེ་ལོ་རྣམས་ཀྱང་བརྩོན་འགྲུས་ཀྱི་སྐབས་སུ་ལྡོག་ཟིན་ལ། གཙོ་བོར་ཁྲོ་བ་དང་རྣམ་འཚེ་དང་ང་རྒྱལ་དང་ཕྲ་དོག་གི་གཉེན་པོ་ནི་འཆད་པར་འགྱུར་བའི་བདག་གཞན་མཉམ་ པ་དང་བདག་གཞན་བརྗེ་བའི་བྱང་ཆུབ་ཀྱི་སེམས་ཁོ་ན་ཡིན་པས་དེ་དག་ལྡོག་པ་ནི་སྐབས་འདིར་གཙོ་བོར་མི་འཆད་ལ། ནང་སེམས་ཅན་དང་ཕྱིའི་ཡོ་བྱད་ཀྱི་འདོད་པ་ལ་སྲེད་པ་ནི་འདོད་ཁམས་སུ་འབྱུང་ཉེ་ཞིང་སྤང་དཀའ་བས་སྐབས་འདིར་ཀུན་ནས་བཏང་

Page: 563 ༄༅། །བྱའི་བསམ་པའི་གཙོ་བོ་ནི་འདི་ཡིན་ནོ། །འོ་ན་ནང་སེམས་ཅན་ལ་ཆགས་པ་ཚུལ་ཁྲིམས་ཀྱི་སྐབས་དང༌། ཕྱིའི་ཡོ་བྱད་ལ་ཆགས་པ་སྦྱིན་པའི་སྐབས་སུ་སྔར་ཟློག་ཟིན་པ་མ་ཡིན་ནམ་ཞེ་ན། སྤྱི་ཙམ་དུ་ཡིན་མོད་ཀྱང་བྱེ་ བྲག་ཏུ་ཚངས་སྤྱོད་ལ་གནས་ཀྱང་བུད་མེད་ལ་སོགས་པའི་གཟུགས་སྡུག་པའི་མཚན་མ་དང་གླུ་དང་རོལ་མོ་ལ་སོགས་པའི་སྒྲའི་མཚན་མ་དང་སྔོན་མྱོང་བ་ལ་སོགས་པའི་རེག་པའི་མཚན་མ་ཅུང་ཟད་ཡིད་ལ་བྱེད་པ་ཡང་མ་དག་པའི་ཚངས་སྤྱོད་ དུ་གསུངས་པས་ཡིད་བྱེད་དེ་དག་ནི་ཚུལ་ཁྲིམས་ཙམ་པོས་ལྡོག་མི་ནུས་ཀྱི་རྩེ་གཅིག་པའི་བསམ་གཏན་གྱིས་ལྡོག་དགོས་ལ། སྦྱིན་པའི་ཆེད་དུ་ལོངས་སྤྱོད་འཛིན་པ་ཡང་བསམ་གཏན་གྱི་སྐབས་སུ་གཡེང་བ་ཡིན་ལ། དེ་ནི་བསམ་གཏན་གྱི་མི་ མཐུན་པའི་ཕྱོགས་ཡིན་ལ། སྐབས་འདིར་ནི་ཟང་ཟིང་གི་གཏན་པ་མེད་པའི་མཆོད་སྦྱིན་ཆེས་མང་པོ་ལས་ཀྱང་སྙིང་རྗེ་ཆེན་པོས་ཀུན་ནས་བསླང་སྟེ། ཤེས་རབ་གྱི་ཕ་རོལ་ཏུ་ཕྱིན་པའི་ངོ་བོ་ཉིད་ལ་མིག་འཛུམ་ཙམ་མཉམ་པར་བཞག་པ་ཡང་ཆེས་རྨད་དུ་ བྱུང་སྟེ། འདིའི་ཕན་ཡོན་ནི་སངས་རྒྱས་ཁོ་ནས་མཁྱེན་པར་ཟད་ལ། གཏན་པ་མེད་པའི་མཆོད་སྦྱིན་གཅིག་གིས་འདོད་པའི་རྒྱལ་པོ་སྡིག་ཏོ་ཅན་དང༌། མཆོད་སྦྱིན་བརྒྱས་བརྒྱ་བྱིན་གྱི་གོ་འཕང་དུ་ཟད་ལ། དེ་གཉིས་ཀྱང་སྙིང་པོ་མེད་པའི་ཕྱིར་རོ། །འདིར་ དཀའ་འགྲེལ་ཆུང་ངུ་ལས་ནི། འདོད་པའི་རྣམ་རྟོག་སྤང་དཀའ་བས་དེ་སྤོང་བ་དངོས་སུ་སྟོན་ལ། དེ་སྤངས་ན་ཁྲོ་བ་དང་རྣམ་པར་འཚེ་བའི་རྟོག་པ་ཚེགས་མེད་པར་ལྡོག་པར་དགོངས་ནས་དེ་གཉིས་སྤོང་བ་དངོས་སུ་མ་བརྗོད་དོ་ཞེས་སྣང་ངོ༌། །བདག་ལ་ སེམས་པ་གཅིག་པུ་ཡིས། །ཞེས་པ་ཡང་རང་དོན་ཡིད་བྱེད་ཀྱི་བློ་སྐྱེད་པར་འཁྲུལ་བར་མི་བྱ་ལ། རྒྱ་བོད་ཀྱི་འགྲེལ་པ་ཕལ་ཆེར་དུ་ཞི་གནས་ལ་མཉམ་པར་བཞག་ཅིང་ལྷག་མཐོང་གིས་ཉོན་མོངས་དུལ་བར་བྱ་ཞེས་སྣང་ཡང་གང་ལ་མཉམ་

Page: 564 པར་བཞག་བྱ་ནི་ལྷག་མཐོང་དེ་ཡིན་ལ། དེ་ལས་མི་གཡོ་བར་གནས་པ་ལ་ཞི་གནས་སུ་བརྗོད་ཀྱི་སྔོན་དུ་ལྷག་མཐོང་དང་མ་འབྲེལ་བའི་ཞི་གནས་ལ་བཞག་པས་ཕྱིས་ལྷག་མཐོང་སྐྱེ་བ་མ་ཡིན་ཏེ། དེ་ལྟ་ན་འཇིག་རྟེན་པའི་སྙོམས་འཇུག་ཁོ་ན་ བསྒོམས་པས་ལྷག་མཐོང་ཁྱད་པར་ཅན་སྐྱེ་བར་ཐལ་བའི་ཕྱིར་རོ་ཞེས་པ་ནི་ཞར་བྱུང་གི་དཔྱད་པའོ། །ཅིའི་ཕྱིར་འདོད་པ་ལས་བློ་ལྡོག་ཅེ་ན། ནང་སེམས་ཅན་དང༌། ཕྱིའི་ཡོ་བྱད་ལ་ཞེན་པའི་བློ་འདིས་ནི་ཚེ་འདིར་ཡང་དེའི་དོན་དུ་ཕན་ཚུན་གཅིག་གིས་ གཅིག་གསོད་པ་དང་བཙོན་དུ་འཆིང་བ་དང་ལུས་མཚོན་གྱིས་གཅོད་ཅིང་རྨ་འབྱིན་པ་སོགས་ཕུང་ཁྲོལ་མཐའ་ཡས་པ་སྐྱེད་ལ། འཇིག་རྟེན་ཕ་རོལ་ཏུ་ནི་དེའི་རྣམ་སྨིན་གྱི་འབྲས་བུ་དམྱལ་བ་ཆེན་པོ་རྣམས་དང་ངན་འགྲོ་གཞན་དུ་ཡང་རྒྱུ་མཐུན་པའི་འབྲས་ བུ་མི་བཟད་པ་མྱོང་བའི་ཕྱིར་རོ། །ཅི་འདོད་པའི་ཁམས་ཀྱི་བདེ་བའི་མཆོག་ནི་ཡུལ་ཡིད་དུ་འོང་བ་ལས་བྱུང་བའི་རེག་པའི་བདེ་བ་མ་ཡིན་ནམ་ཞེ་ན། དེ་ནི་མི་གཙང་བ་ལ་གཙང་བར་འཛིན་པ་ཕྱིན་ཅི་ལོག་གི་བློ་གོམས་པར་ཟད་ཀྱི་སྐྱེས་པ་དང་ བུད་མེད་ཀྱི་ཡུལ་དེ་དག་ནི་མི་གཙང་བ་ཐམས་ཅད་འདུས་པའི་ཕུང་པོ་དང་ཀེང་རུས་ཀྱི་འཕྲུལ་འཁོར་ཁོ་ན་ཡིན་པའི་ཕྱིར། གཉེན་ནམ་མཛའ་ན་མོར་བྱ་བའི་ཕྱིར། ཕོ་ཉའམ་ཕོ་ཉ་མོ་ལས་བརྒྱུད་དེ། དེ་དང་ཕྲད་པའི་དོན་དུ་དཀའ་བ་དུ་མ་བྱས་ ཤིང་ཡོ་བྱད་ཀྱང་དེའི་ཆེད་དུ་ཟད་པར་བྱས་ནས་སྡིག་པ་དང་མི་སྙན་པ་གཉི་ག་ལ་མ་འཛེམས་པར་ཕྲད་ཅིང་ཞུགས་པས་དགའ་བ་ཆེར་ཐོབ་པ་དེ་ཉིད་ཇི་ལྟར་སྒྱུ་མ་མཁན་གྱིས་ཀེང་རུས་ལས་བུད་མེད་དུ་སྤྲུལ་ཏེ་དེ་ལ་གཞན་ཞིག་གིས་འཁྱུད་ཅིང་ དགའ་བར་བཟུང་བ་ལས་མོད་ལ་སྒྱུ་མ་བཤིག་པ་ན་འཇིགས་སུ་རུང་བའི་ཀེང་རུས་ལ་འཁྱུད་པར་མཐོང་ནས་ལ་གོར་དུ་ལངས་ཏེ་འབྲོས་པ་ལྟར་ཟད་དེ། སྒྱུ་མ་ཞིག་པ་ལྟར་སྐྱེས་པའམ་བུད་མེད་དེ་ཤི་བའི་ཚེ་ལུས་དུར་ཁྲོད་དུ་བོར་བ་དེ་ལྟོས་ཤིག་

Page: 565 དང་ཁྱོད་ཉིད་ཀྱིས་ཤེས་པར་འགྱུར་རོ། །སེམས་ཅན་འདི་དག་བདག་གམ་བདག་གི་བ་ལ་ཞེན་ཞིང་ཆགས་པར་ནི་མཐོང་མོད་ཀྱང་གང་ལ་ཆགས་པའི་ཡུལ་བུད་མེད་ལྟ་བུ་འདི་ནི་བདག་ཀྱང་མ་ཡིན་ལ། བདག་ཉིད་དབང་བ་ ཡང་མ་ཡིན་ན་དེ་ལ་འདོད་ཅིང་ཞེན་ནས་ཐར་པ་མི་སྒྲུབ་པར་སྡོད་པ་འདི་ཅིའི་ཐ་ཚིག་ཅེས་སྣང་བའོ། །དེ་ལྟ་མོད་ཀྱི་ཆགས་པས་གཟིར་བའི་སྐྱེས་པ་དག་ཆགས་ཡུལ་དེའི་གདོང་ལྟ་བར་འདོད་པས་སྟེང་དུ་གཏེག་ཅིང་དྲངས་ཀྱང་དེ་ངོ་ཚ་བའམ་གཡོ་ སྒྱུའི་བྱེ་བྲག་གིས་དེ་ཙམ་གྱིས་འོག་ཏུ་ལྟ་ཞིང་འབྱོལ་བ་ལྟར་བྱེད་པ་དང༌། རྒྱ་གར་ན་ཡུལ་བཅོམ་བརླག་པ་རྣམས་རིགས་ཀྱི་བུད་མེད་ཀྱི་གདོང་རྟག་ཏུ་སེང་རས་ཀྱིས་འགེབས་ཤིང་ཡུལ་དབུས་ན་རྟག་ཏུ་དྲ་བས་འགེབས་པས་སྐྱེས་པས་བུད་ མེད་ཀྱི་བཞིན་གསལ་བར་མི་མཐོང་བ་དེ་དག་གི་དབང་དུ་བྱས་ནས་ཁྱོད་སྔོན་ནི་བུད་མེད་ཀྱི་གདོང་ལྟ་བར་འདོད་ཀྱང་གཡོགས་པ་ལས་གཞན་དུ་ཚིམ་པར་མ་མཐོང་ལ། དེ་ཙམ་གྱིས་འདོད་པ་དག་ནི་ཚྭ་ཆུ་འཐུངས་པ་འདྲ་བའི་ཕྱིར། མཐོང་བར་འདོད་ པ་འཕེལ་བ་ཡིན་ན་ད་ལྟ་བུད་མེད་དེའི་ལུས་དུར་ཁྲོད་དུ་བོར་བའི་ཚེ་བཞིན་ལ་གཡོགས་པ་མེད་པས་ཤིན་ཏུ་གསལ་བའི་སྐབས་འདི་དང་དེ་བས་ཀྱང་བྱ་རྒོད་ཀྱིས་པགས་པ་དང་ཤས་གཡོགས་པ་ཡང་བཤུས་ཏེ་རུས་པ་འབའ་ཞིག་ཏུ་སྒྲེན་མོར་ བྱས་པ་འདི་ལྟ་བར་རིགས་ཀྱི་འཇིགས་པས་འབྲོས་པར་མི་རིགས་ཏེ། སྔོན་ཁྱོད་ཉིད་ཆེས་ཆགས་པའི་ལུས་དེ་འདི་ཁོ་ན་ཡིན་པའི་ཕྱིར་དང༌། སྔོན་གཡོགས་པའི་ཚེ་དེ་ཙམ་དུ་ཆགས་ན་ཕྱིས་མ་གཡོགས་པའི་སྐབས་འདིར་དེ་བས་ཆེས་ཆགས་པར་ རིགས་ལ། མ་གཡོགས་པའི་ལུས་འདི་ལ་མི་ཆགས་ན་ནི་སྔོན་གཡོགས་པའི་སྐབས་ལའང་ཆགས་པར་མི་རིགས་ཏེ་གང་ལ་གཡོགས་པའི་ལུས་ནི་འདི་ཁོ་ན་ཡིན་ལ། གཡོགས་པའི་གོས་དེ་ཡང་ཆགས་བྱའི་ཡུལ་མ་ཡིན་པའི་ཕྱིར་རོ། །

Page: 566 སྔོན་ནི་སྐྱེས་པ་གཞན་གྱིས་མིག་ཟུར་ཙམ་ལྟ་བ་ལ་ཡང་མིག་སེར་གྱིས་ཁྲོ་ཞིང་ནན་གྱིས་བསྲུངས་པ་ཡིན་ལ། ད་ནི་བྱ་རྒོད་དང་གཅན་གཟན་རྣམས་ཀྱིས་དེའི་མིག་འབྲུ་ཞིང་ལྕེ་འབྱིན་ལ། རྒྱུ་ལྟོ་དང་ནང་རོལ་ཐམས་ཅད་གཞིབ་ཅིང་རུས་པའི་བར་ དུ་ཧབ་ཐོབ་ཏུ་ཟ་ན་སེར་སྣ་ཅན་ཁྱོད་ཅིའི་ཕྱིར་འདི་མི་སྲུང༌། གལ་ཏེ་ཤི་བའི་རོ་ནི་བྱ་གཅན་གྱིས་ཟ་བ་འཇིག་རྟེན་ན་ཆོས་ཉིད་ཡིན་པས་མི་སྲུང་ངོ་ཞེ་ན། འོ་ན་སྔོན་ནི་ཁྱོད་ཀྱིས་འདི་ལ་ཙནྡན་གྱི་བྱུག་པས་བསྐུ་ཞིང་མིག་སྨན་དང་སྨུག་རྩིའི་ ཐིག་ལེ་འབྲི་ལ། མེ་ཏོག་དང་རིན་པོ་ཆེ་ལ་སོགས་པའི་ཕྲེང་བས་བརྒྱན་ཞིང་གོས་སྲབ་མོ་ཁ་དོག་སྡུག་གུ་དག་གིས་གཡོགས་པས་མཆོད་པ་ཡིན་ལ། ད་ལྟ་ནི་འདི་བྱ་གཅན་གྱི་ཟས་སུ་སྣང་ན་ཅི་ཁྱོད་གཞན་གྱི་ཁ་ཟས་ལ་དེ་ལྟར་དུ་མཆོད་པར་བྱེད་ པའི་རྒྱུ་མཚན་ཅི་ཞེས་པའོ། །སྔོན་ཆགས་པའི་གནས་ཡིན་ཡང་རོའི་གནས་སྐབས་སུ་འཇིགས་པར་ལྟ་བ་འཇིག་རྟེན་གྱི་ལུགས་སོ་ཞེ་ན། འོ་ན་འཇིག་རྟེན་ན་རོ་ལ་ཅུང་ཟད་སྐྲག་ཅིང་རོ་ལངས་ལ་ཤིན་ཏུ་སྐྲག་པ་ལྟར་འདི་སྔོན་གཡོ་ཞིང་བསྐྱོད་ པ་དེའི་ཚེ་ཤིན་ཏུ་སྐྲག་པར་རིགས་ཏེ་རོ་ལངས་ནི་འཁྲུལ་འཁོར་གྱི་སྐྱེས་བུ་ལྟར་གདོན་གྱི་མཐུས་བསྐྱོད་པ་ཙམ་དུ་ཟད་ཀྱི་གཡོ་སྒྱུ་ལ་སོགས་པ་ཅན་མ་ཡིན་ལ། འདི་སྔོན་བསྐྱོད་པ་དེ་ཡི་ཚེ་ན་ཉོན་མོངས་པ་མཐའ་ཡས་པའི་མཛོད་ཡིན་ཞིང༌། གཡོ་སྒྱུ་དང༌།

ཕྲ་མ་དང༌། བརྫུན་དང༌། ཚིག་རྩུབ་ཐམས་ཅད་ཀྱི་འབྱུང་གནས་ཡིན་པའི་ཕྱིར། རོ་ལངས་འབུམ་ལས་ཀྱང་འདི་འཇིགས་སུ་རུང་བ་ཡིན་ནོ། །དེ་ལྟ་མོད་ཀྱི་ཆགས་པས་ཤིན་ཏུ་རྨོངས་པ་ཁྱོད་ནི་ཆགས་ཡུལ་སྐྱེས་པའམ་བུད་མེད་དེའི་བཤང་ལམ་

འཇིབ་པ་དང་བཤང་གཅི་ལ་ཤིན་ཏུ་ལྕེས་གཞིབ་པར་རིགས་ཏེ། དེའི་ཁ་དང་བཤང་ལམ་དག་ནི་ལུས་གཅིག་གི་ཆ་ཤས་སུ་ཁྱད་མེད་ཅིང་བཤང་གཅི་དང་ཁ་ཆུ་ཡང་ཟས་གཅིག་ལས་མངོན་པར་སྐྱེད་པར་ཁྱད་མེད་ལ་ཁ་དང་མཆུ་དང་ཁ་ཆུ་ལ་ཁྱོད་

Page: 567 ༄༅། །དེ་ཙམ་དུ་རོ་མྱང་བར་བྱེད་པའི་ཕྱིར། གལ་ཏེ་བཤང་གཅི་ནི་མི་གཙང་ཞིང་དྲི་ང་བས་མ་འདོད་དོ་ཞེ་ན། སོ་ཡང་བཙོག་པའི་དྲི་མ་དང་ལྡན་ཞིང༌། ལྕེ་ནི་བད་ཀན་གྱི་ལྗན་ལྗིན་དྲི་ང་བས་རྟག་ཏུ་གཡོགས་པས་མི་གཙང་ བ་ཡིན་ན། དེ་ཅིའི་ཕྱིར་འདོད་དེ། ཁྱོད་མི་གཙང་བ་མི་འདོད་པ་གལ་ཏེ་བདེན་ན་ལྷ་བ་སོབ་སོབ་པོ་རྣམས་ཁྲག་གིས་གང་ཞིང་རྐང་གི་ནང་ན་རྐང་མར་དང༌། སྦུབས་ལྗན་ལྗིན་གྱིས་གང་བ་དེ་ལྟ་བུའི་རུས་པ་དབྱུག་པ་ལྟ་བུ་དང༌། ཟླུམ་པོ་དང༌། ལེབ་མོ་དང༌། སྲབ་ མོ་དང༌། སྟུག་པོ་དང༌། ཆེ་བ་དང༌། ཆུང་བ་སྣ་ཚོགས་པའི་དུམ་བུ་སུམ་བརྒྱ་དང་དྲུག་ཅུ་མིའི་དབྱིབས་སུ་བསྒྲིགས་པ་ལ་རྩ་རྒྱུས་ཀྱི་སྲད་བུས་སྦྲེལ། ཕྱི་རོལ་ཤ་སྣག་མའི་འདམ་གྱིས་ཞལ་བ་ལྟར་བྱུགས་ཤིང་མགོ་བོར་ཀླད་པ། རྒྱབ་ཏུ་གཞུངས་པ། ཁྲུང་ཁྲུང་གི་ནང་དུ་ སྣབས། རོ་སྟོད་དུ་ཁྲག་བར་དུ་མཁྲིས་པ་དང་བད་ཀན་གྱི་ལྗན་ལྗིན། སྨད་དུ་བཤང་གཅི་བླུགས་ཤིང༌། གནས་ཐམས་ཅད་དུ་སྲིན་བུའི་རིགས་བརྒྱད་ཁྲིས་མི་གཙང་བ་འབུས་གཞིགས་པ་ལྟར་ལོང་ལོང་པོར་བྱས་ཤིང༌། ཁྲག་དང༌། ཆུ་སེར་དང༌། རྣག་དང༌། ཞག་ དང༌། རྡུལ་གྱིས་ཀུན་ནས་ཁྱབ་པའི་ཕྱིར། པགས་པའི་སྐྱི་ཤུན་གྱིས་བཏུམས། བུ་ག་རགས་པ་དགུ་དང་ཕྲ་བ་བ་སྤུའི་སྒོ་ཇི་སྙེད་པ་གཏོད་པ་ཐམས་ཅད་ནང་ནས་མི་གཙང་བའི་དྲི་ངད་ལྡན་པའི་རླུང་དང་རླངས་པ་ཀུན་ནས་རྒྱུན་མི་འཆད་པར་འབྱུང་ ཞིང་སྒོ་དགུ་པོ་ལས་རང་རང་གི་དྲི་མ་རྟག་ཏུ་འཛག་ཅིང་བ་སྤུ་ཐམས་ཅད་ལས་རྔུལ་འབྱུང་བ། མགོ་ལ་སོགས་པའི་གནས་ཁ་ཅིག་ཏུ་ཕྱུགས་ཀྱི་སྤུ་ལྟ་བུ་ཁ་ཅིག་ཏུ་རིང་པོ་དང༌། ཁ་ཅིག་ཏུ་ཐུང་ངུར་སྐྱེས་ཤིང་ཐམས་ཅད་ཀྱང་སྲིན་བུའི་སྤུ་ལྟ་བུའི་ བ་སྤུས་ཁྱབ་པ་སྒྲེན་མོར་འགྲོ་ཞིང་འཕྱན་པ་མཐོང་ན་འཇིགས་སུ་རུང་བའི་བློ་སྐྱེ་བ་འདི་ལྟ་བུ་དག་ཅིའི་ཕྱིར་པང་དུ་འཁྱུད། ཁྱོད་ཉིད་ལུས་ཀྱང་འདི་ཁོ་ན་སྟེ་མི་གཙང་བ་ཐམས་ཅད་ཀྱི་འབྱུང་གནས་སུ་རང་གིས་མངོན་སུམ་དུ་མཐོང་

Page: 568 ཡང་དེས་མི་སྐྱོ་བར་སླར་མི་གཙང་བ་ཐམས་ཅད་གཅིག་ཏུ་བསྡུས་པའི་རྐྱལ་བ་གཞན་ལ་བརྐམ་ཞིང་ཆགས་པས་འདོད་པ་འདི་ཅིའི་ཐ་ཚིག་ཅེས་དམད་པའོ། །གལ་ཏེ་རེག་བྱ་འཇམ་པ་དང་སྙི་བ་ཙམ་འདི་ལ་དགའ་འོ་ཞེ་ན། འོ་ན་ཨརྫྷུན་ ལ་སོགས་པའི་ཤིང་བལ་འཇམ་ཞིང་འབོལ་བ་ལྔ་ལས་ཆགས་སུ་བཅགས་པའི་སྔས་དང༌། སྟན་འཇམ་པོས་དགའ་བར་རིགས་ཀྱང་འདི་ནི་འཇམ་མོད་ཀྱི་འདིས་ཉལ་པོ་བྱ་མི་ནུས་སོ་ཞེས་ཁྲོ་བར་བྱེད་པས་ཁྱོད་ནི་བཤང་གཅིའི་ཕུང་པོ་འདི་ ཁོ་ན་ལ་ཆགས་པར་ཟད་དོ། །ཡང་ཤའི་རེག་བྱ་འཇམ་པ་འདོད་ཀྱི་ཤིང་བལ་གྱི་འཇམ་པོ་མི་འདོད་དོ་ཞེ་ན། དེ་ལྟ་ན་ཤི་བའི་རོ་བསྔོས་པ་དང༌། བརྣགས་པ་དང༌། བམ་པ་རྣམས་ཀྱི་རེག་བྱ་ཡང་ཅིས་མི་འདོད་དེ། ཁྱོད་ནི་ཤའི་རེག་པ་འདོད་ན་ཤི་མ་ ཤི་གང་གི་ཚེ་ཡང་ཤ་ནི་སེམས་དང་བཅས་པ་མ་ཡིན་པར་སྔ་ཕྱི་མཚུངས་པའི་ཕྱིར། ཡང་སེམས་དང་བཅས་པའི་ཤ་ལ་རེག་པར་འདོད་ཀྱི་སེམས་མེད་པའི་ཤ་ལ་མ་ཡིན་ནོ་ཞེ་ན། ཤ་ལ་ནི་ནམ་ཡང་སེམས་ཡོད་པ་མི་སྲིད་ལ། ཕ་རོལ་གྱི་སེམས་ དེ་ནི་ནམ་ཡང་ཁྱོད་ཀྱིས་བལྟ་བ་དང་རེག་པར་མི་ནུས་ལ། གང་མིག་གིས་མཐོང་ཞིང་ལུས་ཀྱིས་རེག་ཏུ་ཡོད་པ་དེ་ནི་ཕ་རོལ་པོའི་སེམས་དེ་མ་ཡིན་ན། ཁྱོད་ཀྱི་རེག་པའི་ཡུལ་དེ་སུ་ཞིག་ཅེས་བརྟག་པའོ། །དེ་ལྟ་མོད་ཀྱི་གཞན་གྱི་ལུས་ཀྱི་མི་ གཙང་བ་མི་ཤེས་པ་སྲིད་མོད་ཀྱང་རང་གི་ལུས་སྣབས་དང༌། ངར་སྣབས་དང༌། སྐྱུགས་པ་དང༌། བླུགས་པ་དང༌། བཤང་གཅི་སོགས་ཡང་ཡང་དུ་རང་རང་གིས་མཐོང་བཞིན་པར་འབྱུང་བའི་གནས་འདི་མི་གཙང་བར་མི་ཤེས་པ་ནི་ཤིན་ཏུ་དམད་པའི་གནས་ ཏེ་ཨ་ཧོ་ཞེས་པ་ངོ་མཚར་གྱི་སྒྲ་ཡ་མཚན་པའི་རྨད་དུ་བྱུང་བ་དང༌། ཤིན་ཏུ་དམད་པའི་གནས་ལ་ཁྲེལ་པ་སོགས་དུ་མ་ལ་འཇུག་པ་ལས་འདིར་ཁྲེལ་བའི་དོན་ཏོ། །དེས་ན་ཉི་ཟེར་དྭངས་པས་ཕྱེ་བའི་པདྨ་གཞོན་ནུ་ཁ་དོག་རྒྱས་ཤིང་དྲི་བཟང་

Page: 569 ༄༅། །བ་སྤངས་ནས་གཞན་གྱི་ལུས་མི་གཙང་བའི་ཕུང་པོ་ལ་ཇི་ལྟར་དགའ། བཤང་གཅི་དང་ངར་སྣབས་སོགས་ཅུང་ཟད་ལྷུང་བའི་ས་ཕྱོགས་ཀྱང་བཙོག་གོ་ཞེས་སྐྱུག་བྲོ་ཞིང་སྣ་གོས་ཀྱིས་འགེབས་པར་བྱེད་ལ། གང་ལས་མི་ གཙང་བ་དེ་འབྱུང་བའི་ལུས་ལ་རེག་ཅིང་ཞེན་པར་བྱེད་པ་འདི་ལྟ་བུ་ཅི་ཞིག །ས་ཕྱོགས་མི་གཙང་བས་ཅུང་ཟད་གོས་པ་འདོར་བ་འདི་དང་མི་གཙང་བའི་ཁྲོད་ཀྱི་སྲིན་བུ་ཆུང་ངུ་ལ་ཡང་ཁྱོད་སྐྱུག་བྲོ་བས་ལྟ་བར་མི་འདོད་པ་འདི་ལྟ་ན་གཞན་གྱི་ལུས་མི་ གཙང་བའི་ཞིང༌། མའི་མངལ་བཙོག་པ་ནས་སྐྱེས་ཤིང་ས་བོན་མི་གཙང་བ་ཁུ་ཁྲག་གི་ཐིགས་པ་ལས་བྱུང་ཞིང༌། མའི་ལྗན་ལྗིན་མི་གཙང་བས་བསྐྱེད་པ་ད་ལྟ་མི་གཙང་བ་འབའ་ཞིག་འདུས་པའི་ལུས་མངོན་སུམ་དུའང་མི་གཙང་བ་འབྱུང་བཞིན་ པ་འདི་ལ་འདོད་ཅིང་ཞེན་པར་མི་རིགས་སོ་ཞེས་བསྟན་པ་སྟེ། དེ་ཡི་ས་བོན་དེས་བསྐྱེད་པ། །མི་གཙང་ལས་སྐྱེས་མི་གཙང་སྲིན། །ཞེས་སོགས་སུགཞུང་བཏོན་ན་མི་གཙང་ཞིང་ལས་སོགས་ཀྱི་གཞུང་གི་ནུས་པ་ཉམས་པར་འགྱུར་ བས་ན། གལ་ཏེ་མི་གཙང་ཆགས་མེད་ན། །གཞན་ཁྱོད་ཇི་ལྟར་པང་དུ་འཁྱུད། །མི་གཙང་ལས་བྱུང་མི་གཙང་སྲིན། །ཆུང་ངུའང་ཁྱོད་འདོད་མི་བྱེད་ན། །མི་གཙང་ཞིང་ལས་བྱུང་གྱུར་ཅིང༌། །དེ་ཡི་ས་བོན་དེས་བསྐྱེད་པ། ། མི་གཙང་མང་གི་རང་བཞིན་ལུས། །མི་གཙང་སྐྱེད་པའང་ཅི་ཕྱིར་འདོད། །ཅེས་གཞུང་འདོན་པར་བྱའོ། །རིགས་པ་གཞན་ཡང༌། ག་པུར་དང་ཙནྡན་ལ་སོགས་པ་དྲི་ཞིམ་པ་དང་འབྲས་ཆེན་སོགས་རོ་བཟང་པོ་དག་ཀྱང་ཁར་བཅུག་ནས་ བོར་ན་སྐྱུག་བྲོ་བས་དེའི་ས་ཡང་བཙོག་པར་ལྟ་ན་ལུས་མི་གཙང་བའི་འབྱུང་གནས་ལ་ཅིའི་ཕྱིར་ཆགས། འོན་ཏེ་ད་དུང་ཡིད་མི་ཆེས་ན་དུར་ཁྲོད་དུ་སོང་ལ་སྐྱེས་པ་དང་བུད་མེད་ཀྱི་ཚོགས་ཤི་བའི་རོ་ལ་ལྟོས་ཤིག་དང༌། དང་པོར་པགས་པའི་ཁ་

Page: 570 ཕྱེ་སྟེ་དབྲལ་བ་ཙམ་གྱིས་ཀྱང་དམར་བ་དང་ཁྲག་དང་ཆུ་སེར་འཛག་པ་སོགས་མཐོང་བས་འཇིགས་པ་སྐྱེ་ཞིང་དེ་ནས་ལུས་ཀྱི་གནས་ཐམས་ཅད་ཀྱང་ལྟོས་ཤིག་དང༌། ལུས་ཀྱི་རང་བཞིན་བདག་ཉིད་ཀྱིས་ཤེས་པར་འགྱུར་རོ། །གལ་ཏེ་དྲི་བྱུགས་ ཤིང་རྒྱན་གྱིས་བརྒྱན་པ་ལ་ཆགས་སོ་ཞེ་ན། དྲི་དེ་ནི་ཙནྡན་དང་ག་པུར་དང་ཨེ་ལ་ལ་སོགས་པའི་ཡིན་གྱི་ལུས་དེའི་དྲི་མ་ཡིན་ལ་གཞན་ཙནྡན་དང་ག་པུར་སོགས་དྲི་ཞིམ་པ་རྒྱུ་མཚན་དུ་བྱས་ནས་གཞན་གྱི་ལུས་དྲི་ང་བ་དེ་ལ་ཆགས་པར་རིགས་ ན་མི་གཙང་བའི་ཕུང་པོ་ལ་ཡང་ག་པུར་གྱི་ཆུས་གཏོར་ཏེ་ཆགས་པར་ཡང་རིགས་ལ། གཡས་སུ་ག་པུར་གྱི་གོང་བུ་བཞག་པ་དྲི་ཞིམ་པའི་རྒྱུ་མཚན་ལས་གཡོན་དུ་ཁྱིའི་རོ་རུལ་པ་བཞག་པ་ལ་ཡང་ཆགས་པར་རིགས་སོ། །དེས་ན་ནང་བཤང་ གཅིའི་གོང་བུ་ལ་ཕྱི་དྲི་ཞིམ་པོས་བསྐུས་ཀྱང་དྲི་ཆུད་ཟོས་པར་ཟད་ཀྱི་བཤང་གཅིའི་རང་བཞིན་གཞན་དུ་མི་འགྱུར་བས་དྲི་ལས་ཀྱང་ཆགས་པར་མི་རིགས་སོ། །དེ་བཞིན་དུ། ལུས་ལ་བརྒྱན་པའི་རྒྱན་དེ་ཡང༌། །རིན་ཆེན་སོགས་ཡིན་གཞན་ མིན་ན། །གཞན་གྱིས་མདོག་གིས་གཞན་དག་ལ། །ཅི་ཡི་ཕྱིར་ན་ཆགས་པར་བྱེད། །ཅེས་ཀྱང་དགོངས་པ་སྟེ། གསེར་དང༌། བཻཌཱུརྱ་དང༌། མུ་ཏིག་ལ་སོགས་པའི་རིན་པོ་ཆེའི་རྒྱན་དང༌། མེ་ཏོག་གི་ཕྲེང་བ་སོགས་ཀྱིས་བརྒྱན་པའང་ཆགས་བྱའི་གནས་མ་ ཡིན་ཏེ། རིན་པོ་ཆེ་དེ་དག་ཁ་དོག་གསལ་བ་དང༌། མདངས་བཟང་བའི་རྒྱུ་མཚན་གྱིས་ལུས་ལ་ཆགས་རིགས་ན་པདྨ་ཁ་དོག་ལེགས་པས་དེའི་འདམ་ལ་ཆགས་པར་བྱ་རིགས་པ་དང༌། སོལ་བའི་ཕུང་པོ་དང༌། མུ་ཏིག་གི་ཕྲེང་བ་ཁད་ཉེ་བར་བཞག་པ་ན་སོལ་བའི་ ཕུང་པོ་དེ་ཆགས་པའི་གནས་སུ་འགྱུར་བར་ཐལ་བའི་ཕྱིར་རོ། །དེ་ལྟར་ཁྲུས་དང༌། གོས་དང༌། དྲི་དང་རྒྱན་དང་བཅས་པའི་ཚེ་ཡང་དེ་ཙམ་དུ་ཟད་ལ། དེ་དག་མེད་པའི་ཚེ་ནི་སྐྲ་མ་བཀྲུས་པས་ཟིང་ཟིང་པོ་དང༌། སེན་མོ་རིང་ཞིང་མདོག་མི་ལེགས་པ་དང༌། སོ་དྲི་མ་

Page: 571 ༄༅། །སེར་སྔོན་གྱིས་གཡོགས་པ་དང༌། ལུས་ཐམས་ཅད་ནག་ཅིང་མི་མཛེས་པའི་དྲི་མ་སྟུག་པོས་ཁྱབ་ལ་འདམ་རྫབ་ཀྱི་དྲི་དང་ལྡན་པ་དེ་ལྟ་བུ་སྒྲེན་མོར་གར་བྱེད་པ་དང༌། རྒྱུག་པ་དང༌། མཆོང་བ་མཐོང་ན་འཇིགས་སུ་རུང་བ་དང༌། སྤྱིར་མཚོན་བྱ་འབུམ་ཕྲག་ལས་ཀྱང་ཆེ་བའི་གནོད་པས་བདག་འདི་ཕྱི་ཐམས་ཅད་དུ་ཕུང་བར་བྱེད་པ་ཡིན་ཡང་དེ་ལྟར་གནོད་པ་དང་རང་བཞིན་མི་ཤེས་པར་འདི་ལྟ་བུ་ལ་གཙང་མཛེས་དང་ཕན་པར་འཁྲུལ་བའི་སེམས་ཅན་འདི་རྣམས་ ཅིའི་ཐ་ཚིག་ཅེས་བརྩེ་བ་ཆེན་པོ་སྐྱེས་པའོ། །དེ་ལྟར་དུར་ཁྲོད་དུ་ཕྱིན་པས་རུས་གོང་གི་ཚོགས་ཀྱིས་སྐྱོ་ཞིང་ཡིད་མི་འཆགས་ན་དུར་ཁྲོད་ནི་མི་གཡོ་བའི་རུས་གོང་གནོད་པ་མི་བྱེད་པས་ཁྱབ་པར་ཟད་ལ་གྲོང་ན་ནི་གཡོ་བའི་རུས་གོང་ གཡོ་སྒྱུས་འབྲིད་བརྫུན་གྱིས་སླུ་ཕྲ་མས་འབྱེད་ཆོས་ལས་འབེབས་ཚུལ་ཁྲིམས་འཕྲོག་དགེ་བའི་བར་ཆད་བྱེད་པའི་ཚོགས་ཀྱིས་ཟིང་ཟིང་པོར་ཁྱབ་པའི་ཕྱིར་དེ་བས་ཀྱང་གྲོང་ལ་སྐྱོ་ཞིང་ཡིད་མི་འཆགས་པར་རིགས་སོ། །དེ་ལྟར་བརྟགས་ ན་འཇིགས་སུ་རུང་བ་དང་མི་གཙང་བའི་བུད་མེད་དེ་ཡང་འཇིག་རྟེན་ན་རིན་མེད་པར་མི་རྙེད་དེ། ཁྱིམ་བདག་དགོན་མེད་ཟས་སྦྱིན་གྱི་བུ་ཐ་ཆུང་གི་ཆུང་མ་རྒྱལ་པོའི་ཁབ་ནས་དགུག་པ་ན་རིན་དུ་གངས་ཀྱི་གླང་པོ་ཆེ་བརྒྱ་དང༌། ཀ་ཤིའི་བུ་མོ་བརྒྱ་ལ་སོགས་ པ་ཕབ་པ་ལྟ་བུའི་ཕྱིར་དང༌། དེའི་ཆེད་དུ་ལུས་ངག་གི་ངལ་བ་དུ་མ་སྒྲུབ་དགོས་ཤིང་ཕྱི་མར་ངན་སོང་གི་སྡུག་བསྔལ་སྐྱེད་པའི་ཕྱིར་ནང་སེམས་ཅན་ལ་ཆགས་པ་ནི་ཉེས་དམིགས་ཐམས་ཅད་ཀྱི་འབྱུང་ཁུངས་ཡིན་པས་འབད་པ་ཐམས་ཅད་ཀྱི་ལྡོག་ པར་བྱའོ། །དེ་བཞིན་དུ་ལོངས་སྤྱོད་ཀྱང་དེ་འདྲ་སྟེ་ལོངས་སྤྱོད་མེད་ན་དབུལ་པོ་ཞེས་མི་རྣམས་ཀྱིས་བརྙས་པར་བྱེད་དེ། མི་རྣམས་བདེ་བའང་ལོངས་སྤྱོད་མེད་མིན་ལ། །ཞེས་པ་ལྟར་རོ། །ལོངས་སྤྱོད་ཡོད་ཀྱང་བྱིས་པའི་ཚེ་ན་

Page: 572 ནི་ཤེད་མ་བྱེ་བས་གསོག་པ་དང་སྲུང་བ་སོགས་ལྟ་ཅི་སྨོས། ཐ་ན་མེད་དུ་མི་རུང་བའི་ཟས་གོས་ཙམ་ལ་ཡང་བཀྲེས་སམ་འཁྱགས་ན་ངུ་བར་བྱེད་ཀྱང་འདི་བདག་ལ་དགོས་སོ་ཞེས་མི་ཤེས་ན་ལོངས་སྤྱོད་གོང་དུ་སྤེལ་ནུས་པ་ལྟ་ག་ལ་ཞིག ཕྱིས་ འཇིག་རྟེན་པའི་ཤེད་བྱེ་ཞིང་དར་ལ་བབ་པ་ན་ནི་ལོངས་སྤྱོད་དགོས་པར་གོ་ནས་ཡོད་པ་སྲུང་བ་དང་ཚོང་དང་སོ་ནམ་ལ་སོགས་པས་སྤེལ་བ་དང་མེད་པ་ཚོལ་བས་སྡུག་བསྔལ་ཞིང་ཤ་ཐང་ཆད་དེ། ཇི་ལྟར་ཁྱིམ་བདག་འབྱོར་པའི་བུ། འབྱོར་དགའ། འབྱོར་སྐྱོབ། འབྱོར་ལེན་གསུམ་སྐྱེས་པ་མེད་པར་རོལ་མོ་ཁོ་ནས་སྟེང་ཁང་ན་རྩེ་ཞིང་གང་པོས་མཛོད་པ་བྱེད་ཅིང༌། ཁྱིམ་བདག་རང་ཉིད་སྐད་ཅིག་ཀྱང་མི་དལ་བར་ནོར་སྤེལ་བའི་ཚེ་བུ་སྔ་མ་གསུམ་གྱིས་ཡབ་འདི་ལྟ་བུར་འོ་བརྒྱལ་བ་ཅི་མཛད་ཅེས་དྲིས་ པས་དེས་བདག་གིས་ཀྱང་ཁྱེད་རྣམས་ལྟར་རྩེ་བས་དུས་འདའ་བར་བྱས་ན་བདག་ཅག་ཐམས་ཅད་ལ་བཟའ་བ་དང་བསྒོ་བ་ཅི་ཡང་མི་འབྱུང་ངོ་ཞེས་སྨྲས་པས་དེ་གསུམ་གནད་དུ་ཕོག་པ་ལྟར་གྱུར་ཏེ། དོན་གྱིས་ཕས་བདག་ཅག་ལ་བསྐུལ་ལོ་སྙམ་ ནས་སོ་སོར་བདག་ཅག་གསེར་སྲང་འབུམ་རེ་མ་རྙེད་ཀྱི་བར་དུ་རིན་པོ་ཆེའི་རྣ་ཆ་མི་འདོགས་སོ་ཞེས་དམ་བཅས་ནས་རེ་རེ་ཞིང་ཤིང་དང༌། རྒྱ་སྐྱེགས་དང༌། ཞ་ཉེའི་རྣ་ཆ་བྱས་ཏེ་ཡུལ་གཞན་དུ་ཚོང་ལ་སོང་བས་རྣ་ཆའི་མིང་གིས་ཐོགས་ཤིང་གང་པོས་ཀྱང་ གཞིར་ཚོང་བྱས་ཏེ་རེ་རེ་ཞིང་གསེར་འབུམ་རེ་རྙེད་པ་ལྟ་བུ་སྟེ། དེ་ལྟར་ཚོང་དང་སོ་ནམ་ལ་སོགས་པ་དལ་བ་མེད་པས་ནོར་སྤེལ་དགོས་ལ། དེས་ཀྱང་ནོར་འགྲུབ་པར་ཡང་མ་ངེས་ལ་གྲུབ་ཀྱང་རྐུན་པོ་དང༌། རྒྱལ་པོ་ལ་སོགས་པས་དབྲོག་པ་དང༌། མེ་ཆུས་ ཆུད་འཛའ་བ་སོགས་ཀྱིས་ལོངས་སྤྱད་དུ་འབྱུང་བར་མ་ངེས་ཤིང༌། འཕེལ་ཞིང་ཆུད་མ་ཟོས་པར་བདོག་ཀྱང་སེར་སྣས་སྤྱད་པར་ཡང་མི་ནུས་ལ། དེའི་ངང་དུ་ཚེ་གཏུགས་ཏེ་རྒན་པོར་གྱུར་པ་ན་ནི་ལོངས་སྤྱོད་དེ་དག་བུ་དང་མནའ་མས་བདག་གིར་བྱས་ཏེ་ཅི་

Page: 573 ༄༅། །ཡང་མི་དབང་བས་སྡུག་བསྔལ་ཆེ་ལ། རང་གིས་ལོངས་སྤྱད་དུ་ཡོད་ཀྱང་མིག་གིས་དེ་དག་གི་གཟུགས་མི་མཐོང༌། སོས་མི་ཕེད། ཕོ་བར་མི་འཇུ། ལྕེའི་དབང་པོ་ཉམས་པས་རོ་ཡང་སྔར་ལྟར་མི་མྱོང་སྟེ། དེའི་ཚེ་སྔར་ལྟར་འབད་པས་བསགས་ པ་རྣམས་ཀྱང་སྙིང་པོ་མེད་པར་རང་གིས་ཀྱང་གོ་བར་འགྱུར་ལ། དེ་བཞིན་དུ་མེད་པ་ཚོལ་བའི་ཕྱིར་གཞན་གྱི་གླ་མི་བྱས་ཏེ་དུབ་པར་ལས་བྱེད་ཅིང༌། ཉིན་རེས་ཀ་ཀ་ནི་རེ་ཙམ་རྙེད་པ་ལ་ངོ་མཚར་དུ་བྱེད་པ་དང༌། ཁ་ཅིག་ཚོང་དང་ནོར་བུ་ལེན་པའི་ ཕྱིར། རྒྱ་མཚོར་འཇུག་པ་སོགས་ཀྱིས་ཤི་བ་དང༌། མ་ཤི་ཡང་བྱེས་སུ་བགྲོད་པས་བུ་སྨད་དང་ལོ་ཆེས་མང་པོར་མི་འཕྲད་དེ་ཤ་ནའི་གོས་ཅན་སྟོན་པ་བཞུགས་དུས་ལོ་ལྔ་པའི་དུས་སྟོན་བྱེད་འདོད་པས་རྒྱ་མཚོར་ཞུགས་ཀྱང་སྟོན་པ་མྱ་ངན་ལས་འདས། འོད་སྲུང་ཆེན་པོའང་འདས་ནས་འཕགས་པ་ཀུན་དགའ་བོ་བསྟན་པའི་བདག་པོ་མཛད་པའི་ཚེ་འཁོར་བ་ལྟ་བུ་དང༌། གཞོན་ནུ་གསེར་མདོག་གི་ཕ་སྟོན་པ་རྒྱལ་པོའི་ཁབ་ཏུ་ཐ་མ་ཕེབས་དུས་ཁྱིམ་བདག་ཆེན་པོ་རྣམས་ཀྱིས་མཆོད་པ་མཐོང་བས་འགྲན་ པའི་བློས་རྒྱ་མཚོར་ཞུགས་པ་ཤ་ནའི་གོས་ཅན་རབ་ཏུ་བྱུང་བའི་འོག་རོལ་ཏུ་ཕྱིར་འཁོར་བ་ལྟ་བུ་ལོ་ཉི་ཤུ་དང༌། སུམ་ཅུ་ལ་སོགས་པར་ཡུལ་གཞན་དུ་འཁྱམ་པས་ལོངས་སྤྱོད་ཚོལ་བ་དང༌། བྲན་ཁ་ཅིག་རང་གི་ལུས་བཙོངས་པས་འཚོ་བར་བྱེད་ཅིང༌། དེས་བདེ་བར་རེ་ཡང་སླར་བྲན་གྱི་སྡུག་བསྔལ་ཕྱགས་བདར་ཁུང་ལ་སོགས་པར་ཉལ། བཅའ་བ་ན་ཡང་ཕྱི་རོལ་གྱི་གནས་དམན་པ་དག་ཏུ་འབྱིན། ཟས་གོས་ཐམས་ཅད་ཀྱི་ཐ་ཆད་ཚེགས་ཆེན་པོས་རྙེད་ཅིང༌། ཚིག་རྩུབ་དང༌། རྡེག་ཐབས་ཀྱིས་ སྟེར་པ་ཙམ་གྱིས་འཚོ་ལ། ཁ་ཅིག་གིས་རྒྱལ་པོའི་ངོ་སྲུང་ཞིང་དེས་འཚོ་བ་ཐོབ་པར་འདོད་པས་ཤི་བར་དོགས་བཞིན་དུ་གཡུལ་ངོར་འཇུག་ཅིང༌། དེར་ཡང་རྒྱལ་བ་ཐོབ་པ་ནི་ཁ་ཅིག་ཙམ་ཡིན་ལ། དེ་བཞིན་དུ་ནོར་གྱི་ཕྱིར་ཆོམ་རྐུན་

Page: 574 སོགས་བྱས་པས་ཆད་པས་བཅད་དེ། ལུས་གཅོད་པ་དང༌། འབིགས་པ་དང༌། གསལ་ཤིང་ལ་འཛུགས་པ་དང༌། མེར་སྲེག་པ་དང༌། ཆུར་འཕེན་པ་སོགས་སྣ་ཚོགས་པ་མྱོང་སྟེ། མདོར་ན་ལོངས་སྤྱོད་རྣམས་ནི་མཐོང་བའི་ཆོས་འདི་ལ་ཡང་དང་པོར་བསགས་པས་ སྡུག་བསྔལ། བར་དུ་སྲུང་བས་སྡུག་བསྔལ། ཐ་མར་བརླག་པས་སྡུག་བསྔལ་ལ། ཕྱི་མར་ནི་དེའི་ཆེད་དུ་བསགས་པའི་སྡིག་པ་རེ་རེས་ཀྱང་ངན་འགྲོ་མཐའ་མེད་དུ་འཕེན་ན་མང་པོས་ལྟ་སྨོས་ཀྱང་ཅི་དགོས་ཏེ་ངན་འགྲོ་ལས་ཐར་བ་མེད་པ་དེ་ལ་སྲིད་པ་ཐམས་ ཅད་ལས་གྲོལ་བའི་མྱ་ངན་ལས་འདས་པ་ལྟ་ག་ལ་ཡོད། དེས་ན་ཕྱི་ནང་གི་འདོད་པ་རྣམས་ནི་དེ་དག་ལ་སོགས་པའི་ཉེས་དམིགས་མང་བས་བརྗོད་ཀྱིས་མི་ལང་སྟེ་འདོད་པའི་སྐད་ཅིག་ཙམ་ལ་ཞེན་པས་བདེ་བ་ཆེན་པོ་ལས་ཉམས་ཤིང་ སྡུག་བསྔལ་དུ་མ་མྱོང་བ་ཇི་ལྟར་བ་ལང་དུ་མས་ཤིང་རྟ་འདྲེན་པ་ན་དེ་ལས་བ་ལང་གཅིག་གིས་རྩྭ་ཁམ་གཉིས་སམ་གསུམ་བཟའ་བའི་ཕྱིར། གོམ་པ་སྲིས་ན་ཤིང་རྟའི་འཁོར་ལོས་ལུས་སྨད་བཅོམ་སྟེ་སྡུག་བསྔལ་བའམ། ཡང་ན་ཤིང་རྟའི་མགོ་ ལོགས་ན་གནས་པའི་ཁ་ལོ་བས་ལྕག་གིས་དྲག་པོར་བཞུས་ཏེ་སྡུག་བསྔལ་ཆེར་མྱོང་བ་ལྟ་བུ་དང༌། བྲམ་ཟེ་རྣམས་ལ་ཟླ་བ་བཞིར་ཁ་ཟས་རོ་བརྒྱ་པའི་མཆོད་སྦྱིན་ཡོན་དང་བཅས་པ་བྱུང་བའི་ཚེ་ཐོག་མའི་ཉིན་གང་འོངས་པ་ལ་ལག་པ་ལ་ སྦྲང་རྩི་སོགས་སྦྱར་བའི་རྒྱས་བཏབ་སྟེ་གང་ལ་རྒྱ་མཐོང་བ་དེ་ལ་ཕྱིས་སྟེར་བ་ལས་བྲམ་ཟེ་བརྐམ་པ་ཞིག་གིས་རྒྱའི་མངར་བ་དེ་ལ་ལྕེས་བལྡགས་པས་ཟླ་བ་བཞིའི་འཚོ་བ་དང་རྙེད་པ་ལས་ཉམས་པ་ལ་སོགས་པའི་ཕྱིར་ཏེ། རྙེད་པ་དང༌། བཀུར་སྟི་དང༌། ཟས་གོས་གནས་མལ་འཁྲིག་པ་སོགས་ནི་ངན་འགྲོ་པ་རྣམས་ལ་ཡང་ཆེས་བཟང་བར་ཡོད་དེ། གྲུབ་པའི་དངུལ་ཆུ་ལ་སོགས་བཅུད་ཀྱི་ལེན་ཁྱད་པར་ཅན་ཚེ་བསྐལ་པར་འཚོ་ནུས་པ་དང༌། ཤི་བ་ལས་སློང་བའི་བདུད་རྩི་སོགས་ནི་

Page: 575 ༄༅། །གནོད་སྦྱིན་དང༌། སྲིན་པོ་དང༌། མིའམ་ཅི་དང༌། ཡི་དྭགས་མཐུ་བོ་ཆེ་སོགས་ཀྱི་ལག་ན་ཡོད་ལ། རིན་པོ་ཆེ་མཆོག་རྣམས་ཀྱང་ཀླུའི་རྒྱལ་པོ་རྣམས་ལ་ཡོད་ཅིང༌། ཀླུའི་རྒྱལ་པོ་སངས་རྒྱས་བཅོམ་ལྡན་འདས་ཞེས་བྱ་བས་སྟོང་གསུམ་ལ་དབང་བྱེད་ ཅིང༌། རྒྱ་མཚོས་ཁོར་ཡུག་ཆུང་ངུའི་བར་དང༌། མ་དྲོས་པས་འཛམ་གླིང་དང༌། དགའ་བོ་དང་ཉེར་དགའས་རི་རབ་སོགས་དབང་བྱེད་པས་དེ་དག་གི་འཁོར་ཚོགས་ལ་ལྟོས་ན་འཁོར་ལོས་བསྒྱུར་བའི་རྒྱལ་པོའི་འཁོར་ནི་ཤིན་ཏུ་ཉུང་ངུར་ཟད་པའི་ཕྱིར་དང༌།

ཀླུའི་རྒྱལ་པོ་དང་མིའམ་ཅིའི་རྒྱལ་པོ་རྣམས་ལ་ཆུང་མའི་འཁོར་ཡང་ལྷ་དང་ཀླུ་དང་མི་འམ་ཅིའི་བུ་མོ་བྱེ་བ་ཕྲགམང་པོ་དང་ལྡན་ཞིང༌། དེ་དག་གི་མཛེས་པ་ལ་བལྟོས་ན་མིའི་བུད་མེད་བཙུན་མོ་རིན་པོ་ཆེ་ཡང་བདུད་རྩིའི་མདུན་དུ་མི་གཙང་བ་བཞག་

པ་ལྟར་ཟད་པའི་ཕྱིར་དང༌། ཉི་ཚེ་བའི་དམྱལ་བ་ཁ་ཅིག་ཀྱང་ལྷའི་བདེ་བ་ཕལ་ཆེར་སྤྱོད་ཅིང་སྐབས་འགར་དམྱལ་བའི་སྡུག་བསྔལ་མྱོང་བར་གསུངས་པའི་ཕྱིར། དེ་ལྟར་མནོག་ཆུང་ལ་སྙིང་པོ་མེད་པའི་འདོད་པ་སྣ་རེའི་དོན་དུ་ཤ་ཐང་དུ་འབད་འབད་ པས་དལ་འབྱོར་རིན་པོ་ཆེ་རྙེད་པར་དཀའ་ཞིང་ཕན་ཡོན་ཆེ་བ་འདི་ལྟ་བུ་དོན་མེད་དུ་བྱས་པར་མ་ཟད། སླར་འདི་ལ་བརྟེན་ནས་ངན་འགྲོའི་རྒྱུ་མཐའ་ཡས་པ་བསྒྲུབས་ཏེ་ཐར་བ་མེད་པའི་དོང་ཆེན་པོར་རང་ཉིད་ཀྱིས་མཆོང་བ་འདི་ལྟ་བུ་ཀྱེ་མ་ཀྱི་ཧུད་ཅེས་ སྙིང་རྗེའི་ཐུགས་ཀྱིས་མ་བཟོད་པའོ། །དེས་ན་མིའི་རྟེན་ལ་སྒྲུབ་པར་ནུས་ཤིང༌། ལྷ་དང༌། ཀླུ་དང༌། གནོད་སྦྱིན་དང༌། ཡི་དྭགས་དང༌། དུད་འགྲོ་དང༌། དམྱལ་བ་སོགས་འགྲོ་བ་གཞན་གྱི་སྒྲུབ་པར་མི་ནུས་པ་ནི་དམ་པའི་ཆོས་རིན་པོ་ཆེ་ཁོ་ན་སྟེ། སློབ་སྤྲིང་ལས། སེམས་ཀྱི་སྟོབས་ཆེན་མི་ཡིས་རྙེད་པ་གང་ཡིན་པའི། །ལམ་འདི་ལྷ་དང་ཀླུ་ཡིས་མི་རྙེད་ལྷ་མིན་དང༌། །མཁའ་ལྡིང་རིག་འཛིན་མིའམ་ཅི་དང་ལྟོ་འཕྱེས་མིན། །ཞེས་གསུངས་ཤིང༌། ལྷ་བས་ལྷག་པའི་ལུས་ཐོབ་ནས། །

Page: 576 ཞེས་འཆད་པར་འགྱུར་པའི་ཕྱིར་རོ། །དེ་ལྟར་གནས་སྐབས་སུ་སྡུག་བསྔལ་ཞིང་འབྲས་བུ་འཇིགས་སུ་རུང་བའི་ནོར་དང་བུད་མེད་སོགས་འདོད་པ་སྣ་རེའི་དོན་དུ་དུབ་པར་འབད་པའི་དཀའ་བ་གཅིག་ཁོ་ནའི་བྱེ་བའི་ཆ་གཅིག་ཆོས་ཀྱི་ཕྱིར་སྤྱད་ན་དེ་ ཙམ་གྱིས་འཚང་རྒྱ་བའམ་མཐོང་བའི་ལམ་མངོན་དུ་བྱེད་པ་ལ་སོགས་པར་ནུས་མོད་ཀྱང་སྡུག་བསྔལ་ཆེ་ལ་དོན་མེད་པ་འདི་ལྟ་བུ་སྤྱོད་པར་སྙིང་རྗེ་ཞེས་དགོངས་པའོ། །འཆི་བ་དང་ལུས་འཇིགས་པའི་སྡུག་བསྔལ་སྐྱེས་པ་ལ་བསམས་ན་འཕྲལ་དུ་དུག་ ཆུང་ངུ་སྲན་མའི་འབྲུ་ཙམ་པ་དེ་ཡང་འཇིགས་སུ་རུང་བའི་གནས་ཡིན་པ་ལྟར་མཐོང་ཆོས་ལ་སྡུག་བསྔལ་སྐྱེས་པ་དང་རྣམ་སྨིན་ངན་འགྲོའི་སྡུག་བསྔལ་སྐྱེད་པ་ལ་བསམས་ན་ནོར་དང་བུད་མེད་སོགས་ཀྱི་འདོད་པ་འདི་ནི་ཤིན་ཏུ་རབ་ཏུ་ཀུན་ཏུ་འཇིགས་སུ་ རུང་བའི་གནས་ཡིན་ཏེ། དུག་དང༌། མེ་ཆུ་དང༌། དགྲ་དང༌། མཚོན་ཆ་སོགས་ཀྱིས་ནི་འཆི་བར་བྱེད་པ་ཙམ་ཡིན་གྱི་དེ་ཕན་ཆད་དུ་གནོད་པར་མི་ནུས་ལ་འདི་ལས་བྱུང་བའི་མི་དགེ་བའི་ལས་ལམ་ནི་སྐྱེ་བ་མཐའ་ཡས་པར་རྗེས་སུ་འབྲང་བས་གནོད་པ་བྱེད་ པའི་ཕྱིར་ཏེ། སྟོན་པ་གཤེགས་པའི་བཤུལ་ཀར་འོད་པས་ས་བསྙིལ་པའི་སེབ་ནས་གསེར་གྱི་ཕུང་པོ་འོད་འཕྲོ་བ་ཡོད་པ་ལ། ཀུན་དགའ་བོས། བཅོམ་ལྡན་འདས་སྦྲུལ་དུག་མྱུར་དུ་ཁྱབ་པར་བྱེད་པ་ལགས་སོ། །ཞེས་ལན་གཉིས་གསོལ་བ་ན། སྟོན་པས་འདི་ནི་སྦྲུལ་གདུག་དྲག་པོའ། །ཞེས་ལན་གཉིས་སུ་བཀའ་བསྩལ་བ། མི་ཞིག་གིས་ཐོོས་ནས་སྦྲུལ་གདུག་དྲག་པོ་ནི་སྔོན་མ་མཐོང་མ་ཐོས་སོ་སྙམ་ནས་བལྟས་པ་ན། གཏེར་མཐོང་ནས་བླང་བར་བརྩམས་ཤིང་ཡང་རང་གི་ཆུང་མས་གསང་བར་ ནུས་མི་ནུས་བརྟག་པའི་ཕྱིར་བདག་གི་མཚན་འོག་ནས་བྱ་རོག་དཀར་པོ་ཞིག་འཕུར་ཏེ་སོང་བས་ཁྱོད་ཀྱིས་སུ་ལ་ཡང་མ་བཤད་ཅིག །བཤད་ན་བདག་འཆིའོ་ཞེས་སྨྲས་པ་དེས་གཅིག་ནས་གཅིག་ཏུ་བརྒྱུད་དེ། བྱ་རོག་སྟོང་འཕུར་རོ་ཞེས་ཐམས་ཅད་

Page: 577 ༄༅། །ཀྱིས་གྲགས་པའི་ཚེ། རྒྱལ་པོ་མ་སྐྱེས་དགྲས་ཐོས་ནས། མི་དེ་ལ་གཞན་ལ་བཟླར་མི་རུང་བའི་གཏམ་ཡོད་པར་འདུག་པས་ཟུངས་ཤིག་ཅེས་བཟུང་ནས་ཕྱག་སྦལ་དུ་བཅུག་སྟེ་དྲིས་པ་ན། མ་སྨྲས་པས་དེའི་ཉེ་འཁོར་ཐམས་ཅད་ ཀྱང་བཟུང་ནས་བཅིངས་པ་ན། དེ་སྡུག་བསྔལ་བས་སྟོན་པ་གཙོ་འཁོར་གྱི་ཞུ་ལན་གྱི་ཚིག་དེ་དག་ལན་གཉིས་སུ་བཟླས་པས་རྒྱལ་པོས་དེའི་རྒྱུ་དྲིས། དེས་མི་འཇིགས་པ་སྟེར་ན་སྨྲ་བར་བྱས་ཏེ་མི་འཇིགས་པ་བྱིན། དེ་ནས་དོན་དེ་སྨྲས་ཏེ་སྦྲུལ་དུག་ མྱུར་དུ་ཁྱབ་པར་བྱེད་པས་ཟིན་ན་བདག་གཅིག་པུ་འཆི་བར་ཟད་ཀྱང་སྦྲུལ་གདུག་དྲག་པོས་ཟིན་པས་བདག་གཉེན་ཀོར་དང་བཅས་པ་འདི་ལྟར་སྡུག་བསྔལ་བས་བཅོམ་ལྡན་འདས་གཏེར་ལ་སྦྲུལ་གདུག་དྲག་པོར་བཀའ་བསྩལ་བ་བདེན་ནོ་ ཞེས་བརྗོད་པར་བཤད་པ་ལྟ་བུའི་ཕྱིར་རོ། །དེས་ན་འདོད་པ་ལ་སྐྱོ་ཞིང་ཞེན་པ་ལོག་པ་ཁོ་ནས་ཀྱང་བསམ་གཏན་ཁྱད་པར་ཅན་སྐྱེ་བར་འགྱུར་ཏེ། རྒྱ་གར་གྱི་སློབ་དཔོན་ཨ་ཝ་དྷུ་ཏི་པ་སངས་རྒྱས་ཡེ་ཤེས་ཀྱི། བསམ་གཏན་གྱི་ཆོས་དྲུག་ཉུང་ གསལ་ལས། སེར་སྐྱ་མོ་དང་ཆུ་སྐྱར་སྦྲུལ། །ནགས་ན་རི་དྭགས་ཚོལ་བ་དང༌། །མདའ་མཁན་དང་ནི་གཞོན་ནུ་མ། །འདི་དྲུག་ང་ཡི་སློབ་དཔོན་ཡིན། །རེ་བ་ཟང་ཟིང་ཁྱིམ་སྤོང་དང༌། །དབེན་པའི་ནགས་སུ་གོམས་པ་དང༌། ། དམིགས་པ་བརྟན་དང་གཅིག་པུ་ཉིད། །བདག་གི་བླ་མ་ལས་འདི་རྙེད། །ཅེས་བུད་མེད་སེར་སྐྱ་མོ་ཞེས་བྱ་བ་ཞིག་ནམ་སྟོད་ལ་སྐྱེས་པ་འོང་དུ་རེ་བས་སྡུག་བསྔལ་ལ། ནམ་སྨད་ལ་མི་འོང་བར་ཤེས་པས་ཁོ་ཐག་ཆོད་དེ་བདེ་བར་གཉིད་ལོག་པ་ ལྟར། འདོད་པ་ལ་རེ་བ་ནི་སྡུག་བསྔལ་གྱི་རྩ་བ་ཡིན་ལ། རེ་བ་མེད་པ་ནི་བདེ་བའི་དམ་པའོ། །ཆུ་སྐྱར་ཞིག་གིས་ཉ་ཆེན་པོ་མགུལ་བར་མི་ཆུད་པ་ཞིག་ཁྱེར་བས་ཆུ་སྐྱར་གཞན་ཐམས་ཅད་ཀྱིས་དེད་པས་དེས་མ་ཐར་ནས་ཉ་བོར་བས་འདེད་མཁན་མེད་

Page: 578 ལ། ཆུ་སྐྱར་གཞན་ཞིག་གིས་ཉ་དེ་བླངས་པས་དེ་ཐམས་ཅད་ཀྱིས་དེད་པ་ལྟ་བུ་ཁོ་ན་རིམ་པར་བྱུང་བ་ལྟར། ཟང་ཟིང་སུས་བཟུང་བ་དེ་ལ་རྩོད་པར་འབྱུང་གི་ཟང་ཟིང་སྤངས་ན་རྩོད་པའི་གཞི་མེད། སྦྲུལ་ཞིག་ཚང་དུ་ཉལ་བར་རང་གི་ཕྲུ་གུ་མང་པོས་གཙེས་ པས་ཚང་ནས་བྱུང་སྟེ་ཁུང་གཞན་དུ་གཅིག་པུར་ཉལ་བས་བདེ་བ་ལྟར། ཁྱིམ་དུ་བུ་སྨད་ཀྱི་སྡུག་བསྔལ་ལ་གཅིག་པུར་བསྡད་པ་ལ་དེའི་སྡུག་བསྔལ་མེད། རྔོན་པ་ཞིག་རྟག་ཏུ་རྔོན་གྱི་ཕྱིར་ནགས་སུ་འགྲོ་བ་ལས་བསམ་གཏན་པ་དག་ མཐོང་ཞིང་རང་ཉིད་ཀྱང་ནགས་སུ་གོམས་པས་བསམ་གཏན་པར་གྱུར་པ་ལྟར། དབེན་པར་གོམས་སུ་གཞུག །མདའ་མཁན་མདའ་བྱེད་པའི་མདུན་དུ་རྒྱལ་པོ་དཔུང་བཅས་འགྲོ་བ་མ་མཐོང་བ་ལྟར། རྩེ་གཅིག་ཏུ་མ་ཡེངས་པར་འབད། གཞོན་ནུ་ མ་སྤོས་བདར་བ་ན་གདུབ་བུ་མང་པོ་འཁྲོལ་བས་མ་བདེ་ནས་རིམ་གྱིས་ཕུད་མཐར་གཉིས་ཀྱང་འཁྲོལ་བ་ན་གཅིག་ཤོས་ཀྱང་ཕུད་པས་མི་འཁྲོལ་བར་བདེ་བ་ལྟར། གྲོགས་སྤངས་ནས་གཅིག་པུ་ལ་བསླབ་པ་སྟེ། དཔེ་འདི་དྲུག་མཐོང་བས་སློབ་དཔོན་དེ་ ལ་ཏིང་ངེ་འཛིན་ཁྱད་པར་ཅན་སྐྱེས་པ་ཡིན་ལ། ལུང་ལས་ཀྱང༌། རྒྱལ་པོ་ཞིག་གཡུལ་ལས་བྲོས་པས་ཆུ་སྐྱར་གྱི་དཔེ་དེ་མཐོང་སྟེ་བདག་ཀྱང་རྒྱལ་སྲིད་སྤངས་ན་རྩོད་པ་མེད་དོ་སྙམ་ནས་ནགས་སུ་རང་རྒྱལ་ཐོབ་པ་དང༌། རྒྱལ་པོ་གཅིག་ གིས་གཞོན་ནུ་མའི་གདུབ་བུའི་དཔེ་དེ་མཐོང་བས་འདི་ལྟར་བདག་ཀྱང་གཅིག་པུ་བདེའོ་སྙམ་ནས་ནགས་སུ་རང་རྒྱལ་ཐོབ་པར་བཤད་དོ། །དེས་ན་རྒྱ་ཆེ་རོལ་པ་ལས། འདོད་པའི་སྐྱོན་རྣམས་མཐའ་ཡས་བདག་གིས་རིག །འཐབ་མོ་འཁོན་ བཅས་མྱ་ངན་སྡུག་བསྔལ་རྩ། །འཇིགས་བྱེད་དུག་གི་ལོ་མ་འདྲ་བ་སྟེ། །མེ་དང་འདྲ་ཞིང་རལ་གྲིའི་སོ་དང་འདྲ། །ཞེས་དང༌། འདོད་པའི་ཁོལ་པོ་རྣམས་ནི་གཤེག་ཅིང་གཏུབ། །མགོ་དང་མིག་དང་རྐང་ལག་གཅོད་པར་འགྱུར། །

Page: 579 ༄༅། །འདོད་ཆགས་ཀྱིས་ནི་སེམས་ཅན་དམྱལ་བར་ལྟུང༌། །འདོད་ཆགས་ཀྱིས་ནི་ཡི་དྭགས་དུད་འགྲོར་འགྲོ། ཞེས་གསུངས་པ་ལྟར། འདོད་པའི་ཉེས་དམིགས་ཁོང་དུ་ཆུད། སེམས་དང་འདྲེས། ཤིན་ཏུ་སྐྱོ། བརྒྱ་བྱིན་གྱི་བདེ་བ་ ཡང་བཙོན་ར་ལྟར་ཤེས་པས་དབེན་པ་ཁོ་ན་ལ་དགའ་བ་བསྐྱེད་པར་བྱ་སྟེ། ཆགས་སྡང་གི་ཡུལ་མེད་ལ་དེར་སླེབ་པས་ཀྱང་སེམས་ཞི་ཞིང་དང་བར་འགྱུར་བའི་དཀའ་ཐུབ་ཀྱི་ནགས་བསྟེན་པར་བྱའོ། །འདི་ལྟར་གནས་པ་ནི་རྒྱལ་པོ་རྒྱལ་ སྲིད་ལ་སྤྱོད་པའི་བདེ་བ་ལས་ཆེས་ལྷག་པ་ཡིན་ཏེ། རྒྱལ་པོ་རྣམས་ནི་ཁང་བཟང་དང༌། ཁ་ཟས་སོགས་བཟང་མོད་ཀྱང་བྱ་རོག་ལྟར་ཁུ་འཕྲིག་ཟ་བས་སུ་ལའང་བག་རྟོན་མི་ནུས་པ་དང༌། དགྲ་བོ་ལ་འཇིགས་པ་དང༌། ཁ་ཟས་ལའང་དུག་ཅན་ དུ་དོགས་པ་སོགས་ཀྱིས་དུས་འདའ་ལ། དབེན་པར་སྤྱོད་པ་འདི་ལ་ནི་དེ་ལྟ་བུའི་འཇིགས་པ་ཅི་ཡང་མེད་ཅིང༌། དབེན་པ་དང༌། ཞི་བའི་བདེ་བས་སེམས་དང་ཞིང་གསལ་ལ་ལས་སུ་རུང་བར་རྣལ་དུ་ཕེབས་ཤིང༌། ག་པུར་གྱིས་བྱུག་པ་དང༌། རྔ་ཡབ་ཀྱིས་གཡབས་ པའི་སེར་བུ་ལས་ཆེས་བསིལ་བ་མཚན་མོ་ཟླ་བའི་འོད་དང༌། རླུང་སེར་བུ་དྲི་ཞིམ་པོ་ལྡང་བ་ཙནྡ་ནའི་ངད་ལྟ་བུས་ཚ་གདུང་དང་སྦྲང་བུ་ལས་སྐྱོབ་པ་དང༌། རང་བཞིན་གྱིས་གྲུབ་པའི་བྲག་ཕུག་གམ། རྡོ་ལེབ་ཀྱིས་གཡོགས་པའི་སྤྱིལ་བུ་འཚམ་ཞིང་ རན་པས་རྒྱལ་པོའི་ཁང་བཟང་ལས་བདེ་བ་དང༌། མེ་ཏོག་དང་འབྲས་བུ་དང་ལོ་འདབ་ཏུ་ལྡན་པའི་ཤིང་སྟུག་པོའི་ཚལ་དང་མེ་ཏོག་དང་སྨན་དང་རྩྭ་དང་ལྡུམ་བུ་ཡིད་དུ་འོང་བས་ཁེབས་ཤིང༌། དེ་དག་སྒྲ་མེད་པའི་རླུང་འཇམ་པོས་བསྐྱོད་པ་ན་བྲོ་གར་ ལས་ཆེས་ལྟ་ན་མཛེས་པ་དང༌། གཞན་ཡང་ཆུ་སྒྲ་སྙན་པ་ལྷུང་ལྷུང་པོར་སྒྲོག་པ་དང༌། བྱ་སྤུ་མདོག་སྡུག་ཅིང་སྒྲ་སྙན་པ་དག་སྐད་དུ་མར་བསྒྱུར་བས་གླུ་དང་རོལ་མོ་ཟིལ་གྱིས་གནོན་པ་སྟེ་རྒྱལ་པོའི་སྐྱེད་ཚལ་ལས་ཆེས་རྨད་དུ་བྱུང་བའི་

Page: 580 ནགས་ཚལ་དག་ན་སྙིང་རྗེ་དང་བྱང་ཆུབ་ཀྱི་སེམས་འབའ་ཞིག་ཡིད་ལ་བྱེད་པས་འཆག་པ་དང༌། སྐྱིལ་མོ་ཀྲུང་དུ་བྱེད་པས་དུས་འདའ་ཞིང༌། གང་ཡང་ཡོངས་སུ་མ་བཟུང་བས་སྲུང་བའི་སྡུག་བསྔལ་མེད་ལ། གང་ལ་ཡང་རེ་བ་དང་ལྟོས་པ་མེད་ཅིང༌། གནས་དེ་དག་ལ་ཡང་ཆགས་པ་མེད་པར་གང་དུ་འདོད་པར་འགྲོ་ཞིང༌། ཇི་ཙམ་འདོད་པར་གནས་པས་བག་ཡངས་སུ་སྤྱོད་པའི་ཕྱིར། རྒྱལ་པོའི་བདེ་བ་ཟིལ་གྱིས་གནོན་པ་ཡིན་ཏེ། སྔོན་རྒྱལ་པོ་ཞིག་གིས་གྲུའི་སྐྱེད་ཚལ་དུ་སྤྱོད་པའི་ཚེ་ཆུ་དེའི་རྒྱུན་གྱི་ མགོ་ན་ནྱ་གྲོ་དྷའི་སྡོང་པོ་འབྲས་བུ་ཕུན་སུམ་ཚོགས་པ་ཡོད་པ་ལས་ངན་ཤོས་གཅིག་ཆུས་ཁྱེར་བ་དེའི་དྲིས་བྱུག་པའི་དྲི་ཐམས་ཅད་ཟིལ་གྱིས་མནན་ཞིང་ཁ་དོག་བཟང་ལ་འཇམ་པ་དེ་རྒྱལ་པོས་ཟོས་པས་རང་གི་ཁ་ཟས་ཐམས་ཅད་ལ་ཡིད་ བྱུང་སྟེ། རྒྱལ་སྲིད་སྤྱོད་པའི་སྡུག་བསྔལ་ཡོང་མེད་པར། །འདི་དྲ་ཟ་བ་གང་དེ་རྒྱལ་པོ་ཡིན། །ཞེས་སྨྲས་པ་ལྟ་བུའི་ཕྱིར་རོ། །མིའི་རྒྱལ་པོ་ལྟ་ཞོག་བརྒྱ་བྱིན་གྱི་བདེ་བ་ལས་ཀྱང་ཆེས་རྨད་དུ་བྱུང་བ་ཡིན་ཏེ། བརྒྱ་བྱིན་ནི་ལྷ་མ་ཡིན་ཐགས་ བཟང་རིས་གཡུལ་དུ་ཞུགས་ན་བདག་ཉིད་ངེས་པར་གཡུལ་དུ་འཇུག་དགོས་པ་ལྟ་བུས་རང་དབང་ཅན་མ་ཡིན་པ་དང༌། རྒྱལ་པོ་མ་སྐྱེས་དགྲ་ལྷས་བྱིན་གྱིས་བསླུས་པའི་ཚེ་དཀོན་མཆོག་མི་མཆོད་པའི་ཁྲིམས་བཅས་པ་ལས་བཙུན་མོའི་འཁོར་ ཞིག་གིས་སྟོན་པའི་དབུ་སྐྲ་དང་སེན་མོའི་མཆོད་རྟེན་ལ་མར་མེ་ཕུལ་བས་གླུ་རོལ་བྱེད་བཞིན་པ་ལ་མ་སྐྱེས་དགྲས་འཁོར་ལོ་འཕངས་ཏེ་བསད་པ་ན་མིའི་རོལ་མོའི་སྒྲ་མ་ཞི་བར་ལྷའི་རོལ་མོའི་སྒྲ་བྱུང་སྟེ་སུམ་བཅུ་རྩ་གསུམ་དུ་ལྷ་མོ་དཔེ་མེད་པར་ མཛེས་པ་ཞིག་ཏུ་སྐྱེས་པ་ན་འཇིག་རྟེན་སྐྱོང་བ་བཞི་དང༌། བརྒྱ་བྱིན་དང་ལྔ་ཀ་དེ་ལ་ཆགས་པས་ཡ་ཡ་བོར་གྱུར་ཏེ། སུ་འདོད་པའི་ཚིགས་བཅད་ངོ་ཚ་མེད་པ་སྨྲ་བར་ནུས་པ་དེས་བདག་གིར་བྱེད་པར་བྱས་ནས་སོ་སོས་གཡུལ་གྱི་རྔ་སྒྲས་ཀྱང་སེམས་ལ་

Page: 581 ༄༅ ། །ཆགས་པ་སྐྱེ་བ་དེ་ལྟ་བུར་བདག་འདོད་དོ་ཞེས་སོགས་རེ་རེ་སྨྲས་ཤིང༌། བརྒྱ་བྱིན་གྱིས། ཁྱེད་ཅག་ཚིགས་བཅད་སྨྲ་བས་ན། །ཁྱེད་ཅག་རབ་ཏུ་བདེ་བ་ཡིན། །བདག་ནི་ཧ་ཅང་འདོད་ཆེས་པས། །ཤིའམ་གསོན་པའི་ གཏོལ་མེད་དོ། །ཞེས་སྨྲས་པས་བརྒྱ་བྱིན་ལ་བྱིན་པ་ལྟ་བུ་ཆགས་པས་སེམས་ཆོག་མི་ཤེས་པ་དང་རང་དབང་མེད་པ་དེ་ལྟ་བུ་དང་ལྡན་ལ། བསམ་གཏན་པ་ནི་རང་གི་སེམས་རང་དབང་དུ་གྱུར་བ་དང༌། སུ་དང་ཡང་རྩོད་པ་མེད་པ་དང༌། ཉེ་དུ་དང་ འཁོར་ལ་སོགས་པ་གང་དང་ཡང་སེམས་ཀྱི་འབྲེལ་ཐག་ཆོད་པས་གང་ལ་ཡང་ལྟོས་པ་མེད་པ་དང༌། གང་བྱུང་དེས་ཆོག་ཤེས་པས་ཅི་ལ་ཡང་རེ་བ་མེད་པ་སྟེ། བརྒྱ་བྱིན་ལས་ལྷག་པའི་བདེ་བ་དེ་ལྟ་བུ་ཡོད་པའི་ཕྱིར་རོ། །འདིར་སྨྲས་པ། གང་གིས་ སེམས་ཀྱི་ཟུག་རྔུ་ཐམས་ཅད་བཅོམ། །རྣམ་པར་རྟོག་པའི་དབང་དུ་མ་གྱུར་ཏེ། །རང་རྒྱུད་རང་གིས་ལེགས་པར་བཏུལ་བྱས་པས། །རང་སེམས་རང་དབང་གྱུར་དེ་བདེ་བའི་མཆོག །ཆོག་ཤེས་རྙེད་སླའི་འཚོ་བ་ཙམ་གྱིས་འཚོ། །མ་ལ་ ཡ་འདྲའི་ནགས་ཚལ་དབེན་པར་གནས། །འདྲིས་དང་འཁོན་མེད་གྱ་གྱུར་སྤྱོད་དང་བྲལ། །བག་ཡོད་སྤྱོད་འདི་བདེ་བའི་ནང་ན་མཆོག །སྐྱེ་བོའི་རྒྱུན་ལུགས་མེད་ཅིང་ཆུ་གཙང་བསིལ། །བྱ་དང་རི་དྭགས་གནོད་མེད་བག་ཕེབས་རྒྱུ། ། བྲག་སྐྱིབས་ཤིང་དྲུང་ཡིད་ཀྱིས་བཀོད་འདྲ་བ། །བདག་གིར་མ་བཟུང་འདི་ནི་གནས་ཀྱིས་མཆོག །ཁམས་གསུམ་ཀུན་ཀྱང་གཟོད་ནས་དབེན་པར་མཁྱེན། །བདག་དང་གཞན་དུ་འཛིན་པའི་གཉིད་རབ་སད། །གཡེང་དང་མི་གཡེང་ མཚན་མ་མི་དམིགས་བཞིན། །དབེན་པར་ཏིང་འཛིན་མཛད་རྣམས་ཆེས་བསྔགས་འོས། །བར་སྐབས་ཀྱི་ཚིགས་བཅད་དོ། །འདི་རྣམས་སུ་དགེ་བའི་ལྷས། བསམ་པ་གཞན་ནི་ཀུན་བཏང་སྟེ། །ཞེས་པ་ཕ་རོལ་པོ་ལ་སེམས་

Page: 582 པ་སྟེ། གཞན་གྱིས་བྱས་དང་མ་བྱས་ལ། །བརྟག་པར་མི་བྱ་བདག་ཉིད་ཀྱི། །མཉམ་དང་མི་མཉམ་ཡང་དག་ལྟ། །ཞེས་བཤད་པ་ལྟར་རོ། །བདག་ལ་སེམས་པ་ནི་བྱང་ཆུབ་གྱི་སེམས་ལ་སེམས་པ་ཡིན་ལ་གཅིག་པུ་ནི་དམིགས་པ་ལ་རྩེ་ གཅིག་པའོ། །ཞེས་དང༌། དབེན་པར་གནས་པ་མེད་པར་ལས་དང་པོ་བའི་སེམས་ལས་རུང་དུ་མི་འགྱུར་ཏེ། བསླབ་པ་འདོད་པའི་དགེ་སློང་རྣམས། །དབེན་པ་དག་ཀྱང་འཐོབ་པར་ཤོག །ཅེས་སོགས་འཆད་པའི་ཕྱིར་རོ། །ཞེས་དང༌། བི་བྷཱུ་ཏིས། མི་གཙང་བ་ལས་བྱུང་བ་འདོད་ན་མི་གཙང་བའི་སྲིན་བུ་ཅིས་མི་འདོད་དེ། བུད་མེད་ཀྱི་ལུས་དང་དེ་གཉིས་མི་གཙང་བ་ལས་བྱུང་བ་དང་སྲོག་ཆགས་སུ་མཚུངས་པའི་ཕྱིར་རོ། །ཞེས་དང༌། དར་ལ་བབ་ཚེ་འདི་ཅི་བདེ། །ཞེས་པ་ལ་ གང་ཕ་དང་མེས་པོས་སྤེལ་བའི་ནོར་གྱི་དར་ལ་བབ་པའི་དུས་སུ་བདེ་བ་དེ་ཡང་ཉུང་སྟེ་སྐལ་བ་མི་ལྡན་ན་ཉམས་པའི་ཕྱིར། ཞེས་དང༌། སྡུག་བསྔལ་ཆེ་ལ་བྱང་ཆུབ་མེད། །སོགས་ལ་བྱང་ཆུབ་ཀྱི་སྤྱད་པ་སྤྱོད་པ་ལ་ཡང་སྡུག་བསྔལ་མཐའ་ ཡས་པ་ཡོད་དོ་ཞེ་ན། དེ་ལས་འདོད་པ་ཅན་གྱི་སྡུག་བསྔལ་ཆེ་སྟེ་མི་འདོད་ཀྱང་རྣམ་པ་དུ་མ་འབྱུང་ངོ༌། །བྱང་ཆུབ་སེམས་དཔའ་ནི་འདོད་བཞིན་དུ་དུས་ངེས་པ་ཅན་གཞན་དོན་དུ་སྡུག་བསྔལ་བ་ཡིན་ནོ། །ཞེས་འཆད་ལ། ས་བཟང་པས། འདོད་ ལྡན་དོན་ལ་རྨོངས་པ་རྣམས། །སོགས་ཀྱི་ཤླཽོ་ཀ་གཅིག་པོ་རྒྱ་དཔེ་ལ་མེད་དོ་ཟེར་རོ། །དེ་ལྟར་མི་མཐུན་པའི་ཕྱོགས་སྤོང་བ་རྒྱས་པར་བཤད་ནས། གཉིས་པ་བྱང་ཆུབ་ཀྱི་སེམས་སྒོམ་པར་བསྟན་པ་ལ་གསུམ། བདག་གཞན་མཉམ་པ་སྒོམ་པ། བདག་གཞན་ བརྗེ་བ་སྒོམ་པ། བསམ་གཏན་གྱི་སྒྲིབ་པ་བསལ་བའོ། །དང་པོ་བདག་གཞན་མཉམ་པ་སྒོམ་པ་ལ་གསུམ། མདོར་བསྟན་པ། སྒོམ་ཚུལ་རྒྱས་བཤད། དེ་བསྒོམས་པའི་ཕན་ཡོན་བསྟན་པའོ། །དང་པོ་མདོར་བསྟན་པ་ནི། དེ་ལ་སོགས་

Page: 583 ༄༅། །པའི་རྣམ་པ་ཡིས། །དབེན་པའི་ཡོན་ཏན་བསམ་བྱས་ནས། །རྣམ་རྟོག་ཉེ་བར་ཞི་བ་དང༌། །བྱང་ཆུབ་སེམས་ནི་བསྒོམ་པར་བྱ། །བདག་དང་གཞན་དུ་མཉམ་པ་ནི། །དང་པོ་ཉིད་དུ་འབད་དེ་བསྒོམ། ། བདེ་དང་སྡུག་བསྔལ་མཉམ་པས་ན། །ཐམས་ཅད་བདག་བཞིན་བསྲུང་བར་བྱ། །ཞེས་སོ། །གཉིས་པ་སྒོམ་ཚུལ་རྒྱས་བཤད་ལ་གསུམ། བདག་གཞན་མཉམ་པར་སྒོམ་རིགས་པའི་རྒྱུ་མཚན། སྒོམ་ཚུལ་དངོས། དེ་ལ་རྩོད་པ་སྤང་པའོ། །དང་པོ་ནི། ལག་ པ་ལ་སོགས་དབྱེ་བ་རྣམ་མང་ཡང༌། །ཡོངས་སུ་སྲུང་བྱའི་ལུས་སུ་གཅིག་པ་ལྟར། །དེ་བཞིན་འགྲོ་བའི་སྡུག་བསྔལ་ཐ་དད་ཀྱང༌། །ཐམས་ཅད་བདག་བཞིན་བདེ་བ་འདོད་མཉམ་གཅིག །དེ་ལྟའང་དེ་བདག་སྡུག་བསྔལ་ཏེ། །བདག་ཏུ་ཞེན་པས་མི་བཟོད་ པར་དཀའ། །ཞེས་གསུངས་ཏེ། དང་པོས་བདག་གཞན་བདེ་འདོད་དུ་མཉམ་པར་བསྟན། གཉིས་ཀྱིས་སྡུག་བསྔལ་མི་བཟོད་པར་མཚུངས་པར་བསྟན་ཏོ། །གཉིས་པ་སྒོམ་ཚུལ་དངོས་ནི། བདག་གིས་གཞན་གྱི་སྡུག་བསྔལ་བསལ། །སྡུག་བསྔལ་ ཡིན་ཕྱིར་བདག་སྡུག་བཞིན། །བདག་གིས་གཞན་ལ་ཕན་པར་བྱ། །སེམས་ཅན་ཡིན་ཕྱིར་བདག་ལུས་བཞིན། །གང་ཚེ་བདག་དང་གཞན་གཉིས་ཀ། བདེ་བ་འདོད་དུ་མཚུངས་པ་ལ། །བདག་དང་ཁྱད་པར་ཅི་ཡོད་ན། །གང་ཕྱིར་ བདག་གཅིག་བདེ་བར་བརྩོན། །གང་ཚེ་བདག་དང་གཞན་གཉིས་ཀ། སྡུག་བསྔལ་མི་འདོད་མཚུངས་པ་ལ། །བདག་དང་ཁྱད་པར་ཅི་ཡོད་ན། །གང་ཕྱིར་གཞན་མིན་བདག་སྲུང་བྱེད། །གལ་ཏེ་དེ་ལ་སྡུག་བསྔལ་བས། །བདག་ལ་མི་

Page: 584 གནོད་ཕྱིར་མི་བསྲུང༌། །མ་འོངས་པ་ཡི་སྡུག་བསྔལ་ཡང༌། །གནོད་མི་བྱེད་ན་དེ་ཅིས་བསྲུང༌། །བདག་གིས་དེ་ནི་མྱོང་སྙམ་པའི། །རྣམ་པར་རྟོག་དེ་ལོག་པ་སྟེ། །འདི་ལྟར་ཤི་བ་གཞན་ཉིད་ལ། །སྐྱེ་བ་ཡང་ནི་གཞན་ཉིད་ཡིན། ། གང་ཚེ་གང་གི་སྡུག་བསྔལ་གང༌། །དེ་ནི་དེ་ཉིད་ཀྱིས་བསྲུང་ན། །རྐང་པའི་སྡུག་བསྔལ་ལག་པས་མིན། །ཅི་ཕྱིར་དེས་ནི་དེ་སྲུང་བྱ། །གལ་ཏེ་རིགས་པ་མིན་ཡང་འདིར། །བདག་ཏུ་འཛིན་ལས་འཇུག་ཅེ་ན། །བདག་གཞན་མི་རིགས་ གང་ཡིན་དེ། །ཅི་ནུས་པར་ནི་སྤང་བྱ་ཉིད། །རྒྱུད་དང་ཚོགས་ཞེས་བྱ་བ་ནི། །ཕྲེང་བ་དམག་ལ་སོགས་བཞིན་བརྫུན། །སྡུག་བསྔལ་ཅན་གང་དེ་མེད་པ། །དེ་འདིར་སུ་ཞིག་དབང་བར་འགྱུར། །སྡུག་བསྔལ་བདག་པོ་མེད་པར་ནི། །ཐམས་ ཅད་བྱེ་བྲག་མེད་པ་ཉིད། །སྡུག་བསྔལ་ཡིན་ཕྱིར་དེ་བསལ་བྱ། །ངེས་པས་དེར་ནི་ཅི་ཞིག་བྱ། །ཞེས་གསུངས་ཏེ། དང་པོས་ཇི་ལྟར་སྒོམ་པ་བཤད། དེ་ནས་གཉིས་ཀྱིས་དེའི་རྒྱུ་མཚན་བསྟན། བཞི་པས་གཞན་གྱི་སྡུག་བསྔལ་གྱིས་བདག་ ལ་མི་གནོད་པས་སེལ་མི་དགོས་པ་བཀག །ལྔ་པས་དེའི་ལན་གྱི་བདག་མེད་པར་བསྟན། དྲུག་པས་གཞན་གྱི་སྡུག་བསྔལ་གཞན་གྱིས་སེལ་མི་རིགས་པ་བཀགབདུན་པས་བདག་འཛིན་སྤང་བྱར་བསྟན། བརྒྱད་པས་རྒྱུན་དང་ཚོགས་པ་ བརྫུན་པར་བསྟན། དགུ་པས་དེ་དག་གི་དོན་བསྡུས་ཏེ་བསྟན་ཏོ། །གསུམ་པ་རྩོད་སྤང་ནི། ཅི་ཕྱིར་ཀུན་གྱི་སྡུག་བསྔལ་ནི། །བཟློག་པར་བྱ་ཞེས་བརྩད་དུ་མེད། །གལ་ཏེ་བཟློག་ནའང་ཐམས་ཅད་བཟློག །དེ་མིན་བདག་ཀྱང་སེམས་ཅན་བཞིན། ། སྙིང་རྗེ་སྡུག་བསྔལ་མང་གྱུར་པས། །ཅི་ཕྱིར་ནན་གྱིས་བསྐྱེད་ཅེ་ན། །འགྲོ་བའི་སྡུག་བསྔལ་བསམས་བྱས་ན། །ཇི་ལྟར་སྙིང་རྗེ་སྡུག་བསྔལ་མང༌། །གལ་ཏེ་སྡུག་བསྔལ་གཅིག་གིས་ནི། །སྡུག་བསྔལ་མང་པོ་མེད་འགྱུར་ན། །བརྩེ་དང་ལྡན་

Page: 585 ༄༅། །པས་སྡུག་བསྔལ་དེ། །རང་དང་གཞན་ལ་བསྐྱེད་བྱ་ཉིད། །དེས་ན་མེ་ཏོག་ཟླ་མཛེས་ཀྱིས། །རྒྱལ་པོའི་གནོད་པ་ཤེས་ཀྱང་ནི། །བདག་གི་སྡུག་བསྔལ་མ་བསལ་ཏེ། །མང་པོའི་སྡུག་བསྔལ་ཟད་འགྱུར་ཕྱིར། །ཞེས་ གསུངས་ཏེ། དང་པོས་ཐམས་ཅད་ཀྱི་སྡུག་བསྔལ་ཟློག་མི་དགོས་པའི་རྩོད་པ་སྤངས། གཉིས་པས་སྙིང་རྗེ་སྡུག་བསྔལ་ཡིན་པས་སྒོམ་མི་རིགས་པའི་རྩོད་པ་སྤངས། ཚིགས་བཅད་གཉིས་ཀྱིས་སྡུག་བསྔལ་ཡིན་ཀྱང་རང་གཞན་ལ་ཕན་ན་བསྟེན་རིགས་ པར་བསྟན་ཏོ། །གསུམ་པ་ཕན་ཡོན་ནི། དེ་ལྟར་རྒྱུད་ནི་གོམས་གྱུར་ན། །གཞན་གྱིས་སྡུག་བསྔལ་ཞི་དགའ་བས། །པདྨའི་མཚོ་ལ་ངང་པ་ལྟར། །མནར་མེད་པར་ཡང་འཇུག་པར་འགྱུར། །སེམས་ཅན་རྣམས་ནི་གྲོལ་བ་ན། །དགའ་བའི་ རྒྱ་མཚོ་གང་ཡིན་པ། །དེ་ཉིད་ཀྱིས་ནི་ཆོག་མིན་ནམ། །ཐར་པ་འདོད་པས་ཅི་ཞིག་བྱ། །དེ་ལྟར་གཞན་གྱི་དོན་བྱས་ཀྱང༌། །རློམ་སེམས་དང་ནི་ངོ་མཚར་མེད། །གཅིག་ཏུ་གཞན་དོན་ལ་དགའ་བས། །རྣམ་སྨིན་འབྲས་བུར་རེ་བ་མེད། ། དེ་བས་ཇི་ལྟར་ཆུང་ངུ་ན། །མི་སྙན་ལས་ཀྱང་བདག་སྲུང་བ། །དེ་བཞིན་གཞན་ལའང་སྲུང་སེམས་དང༌། །སྙིང་རྗེའི་སེམས་ནི་དེ་ལྟར་བྱ། །ཞེས་གསུངས་ཏེ། དང་པོས་གཞན་གྲོལ་བར་བྱེད་པའི་ཕན་ཡོན་དངོས་བཤད། གཉིས་ པས་རང་དོན་འབའ་ཞིག་པའི་ཐར་པ་ལ་སྨད། གསུམ་པས་རློམ་སེམས་དང་རེ་བ་མེད་པར་བསྟན། བཞི་པས་དེའི་ཕྱིར་བདག་གཞན་མཉམ་པའི་སེམས་སྒོམ་པར་གདམས་པ་ཡིན་ནོ། །དེ་ཡང་དབེན་པའི་ཕན་ཡོན་དང་གཡེང་བའི་ ཉེས་དམིགས་ཇི་ལྟར་བསྟན་ཟིན་པ་དེ་དག་དང་དེ་ཁོ་ནར་ཟད་པ་ཡང་མ་ཡིན་ཏེ། ཏིང་ངེ་འཛིན་རྒྱལ་པོའི་མདོ་ལ་སོགས་པ་དང༌། སྐྱེས་པའི་རབས་ལ་སོགས་པར་དེ་ལྟ་བུ་རྒྱ་ཆེར་བཤད་པ་རྣམས་དང༌། བསམ་གཏན་ལ་གཙོ་བོར་གཞོལ་བའི་

Page: 586 དམ་པ་རྣམས་ཀྱི་ངོ་མཚར་གྱི་གླེང་སློང་བ་ལས་བྱུང་བ་རྣམས་རྒྱ་ཆེར་ཐོས་ཤིང་བསམས་ཏེ་སྐྱེ་བོའི་རྒྱུན་ལུགས་མེད་པའི་དབེན་པ་དེ་དག་ཏུ་རྣམ་གཡེང་ཐམས་ཅད་སྤངས་ཏེ་སེམས་རབ་ཏུ་དབེན་པས་བྱང་ཆུབ་ཀྱི་སེམས་ཁོ་ན་བསྒོམ་པར་བྱའོ། །ཅི་ཞི་ གནས་དང་ལྷག་མཐོང་བསྒོམ་བྱར་སྔོན་དུ་བསྟན་པ་མ་ཡིན་ནམ། ད་ནི་བསྒོམ་བྱ་བྱང་ཆུབ་ཀྱི་སེམས་ཡིན་པར་ཇི་ལྟར་འཆད་ཅེ་ན། སྤྱིར་ཞི་ལྷག་གི་སྒྲ་ཙམ་ནི་རྒྱ་ཆེ་སྟེ་འཇིག་རྟེན་པའི་འདོད་སེམས་རྩེ་གཅིག་པའི་ཞི་གནས་དང༌། ཁམས་གོང་ གི་རྒྱུ་དང་འབྲས་བུའི་བསམ་གཏན་དང༌། ཞི་རགས་སུ་ལྟ་བའི་ལྷག་མཐོང་ནི་ཕྱི་རོལ་པའི་དྲང་སྲོང་དག་གིས་ཀྱང་འགྲུབ་ཅིང་སྲིད་རྩེའི་བར་དུ་འགྲོ་མོད་ཀྱི་སྙིང་པོས་དབེན་ཏེ། ཁྱོད་ཀྱི་བསྟན་ལས་ཕྱིར་ཕྱོགས་པའི། །སྐྱེ་བོ་མ་རིག་གིས་ ལྡོངས་པ། །སྲིད་རྩེའི་བར་དུ་སོང་ནས་ཀྱང༌། །སྡུག་བསྔལ་ཡང་འབྱུང་སྲིད་པ་གྲུབ། །ཅེས་པ་ལྟར་རོ། །སྲིད་པ་ལས་ཡིད་ངེས་པར་འབྱུང་ཞིང་ཞི་བ་ལ་མོས་པའི་བློས་བསྒྲུབས་པའི་མཐར་གནས་སྙོམས་འཇུག་དགུ་ཡི་ཞི་གནས་དང༌། གང་ཟག་དང་གཟུང་བའི་བདག་མེད་པའི་ལྷག་མཐོང་ནི་ཉན་རང་གི་ལམ་སྟེ་ཐེག་ཆེན་པའི་བསྒོམ་བྱ་མ་ཡིན་ནོ། །དེས་ན་ཐེག་ཆེན་གྱི་ལམ་ནི་བྱང་ཆུབ་ཀྱི་སེམས་ཁོ་ནར་ཟད་ལ། དེའི་ཡང་ལྷག་མཐོང་དོན་དམ་པའི་བྱང་ཆུབ་ཀྱི་སེམས་ནི་གཙོ ་བོར་ཤེས་རབ་ལེའུར་འཆད་ལ། འདིར་ནི་ཀུན་རྫོབ་བྱང་ཆུབ་ཀྱི་སེམས་དེ་གཙོ་བོར་སྒོམ་པ་སྟོན་ལ། སྤྱིར་མི་རྟག་པ་དང༌། མི་སྡུག་པ་དང༌། འདུས་བྱས་ལས་ཡིད་འབྱུང་བ་ལྟ་བུའི་དམིགས་པ་ལ་རྩེ་གཅིག་པ་ནི་ཕན་ཡོན་རྒྱ་ཆེན་པོ་མ་ཡིན་ལ། བདག་གཞན་མཉམ་པའམ། བརྗེ་བའི་བྱང་ཆུབ་ཀྱི་སེམས་ལ་རྩེ་གཅིག་པ་ནི་ཕན་ཡོན་གཞལ་དུ་མེད་དེ། བྱང་ཆུབ་སེམས་ཀྱི་བསོད་ནམས་གང༌། །ཞེས་སོགས་བསྟན་ཟིན་པའི་ཕྱིར་དང༌། བྱང་ཆུབ་ཀྱི་སེམས་བསྒོམས་པས་བསམ་

Page: 587 ༄༅། །གཟུགས་ཙམ་ལྟ་ཞོག་གཟུངས་དང༌། སྤོབས་པ་དང༌། ཏིང་ངེ་འཛིན་གྱི་སྒོ་བརྒྱད་ཁྲི་བཞི་སྟོང་ལ་སོགས་པ་ཇི་སྙེད་པ་ཐམས་ཅད་སྐྱེ་ཞིང་སངས་རྒྱས་ཉིད་འགྲུབ་པའི་ཕྱིར་རོ། །ཅི་བྱང་ཆུབ་ཀྱི་སེམས་ཉིད་ཞི་ལྷག་ཡིན་ནམ་ ཞེ་ན། དོན་དམ་པའི་བྱང་ཆུབ་ཀྱི་སེམས་ཀྱི་སེམས་ནི་ལྷག་མཐོང་གི་རབ་དང་མཆོག་དང་གཙོ་བོ་ཡིན་ལ། ཀུན་རྫོབ་བྱང་ཆུབ་ཀྱི་སེམས་སེམས་ཅན་ཐམས་ཅད་ཀྱི་སྡུག་བསྔལ་བསལ་བར་འདོད་ཅིང་འཁོར་བར་མ་ཆགས་ལ། འཁོར་བས་མི་སྐྱོ་བ་འདི་ཡང་ཉན་ཐོས་ པའི་མི་རྟག་སྡུག་བསྔལ་སྟོང་བདག་མེད་ཀྱི་རྣམ་པར་མཐོང་བའི་ལྷག་མཐོང་ལས་ནི་ཆེས་རྨད་དུ་བྱུང་སྟེ། བླ་ན་མེད་པའི་བྱང་ཆུབ་ཀྱི་རྒྱུ་དང༌། ཉི་ཚེ་བའི་བྱང་ཆུབ་ཀྱི་རྒྱུའི་ཁྱད་པར་ཡོད་པའི་ཕྱིར། དེས་ན་ཀུན་རྫོབ་བྱང་ཆུབ་ཀྱི་སེམས་ཀྱང་ལྷག་མཐོང་ དུ་འཇོག་པ་མི་འགལ་ཏེ་སངས་རྒྱས་ལ་དམིགས་པའི་བློ་ཡིན་པའི་ཕྱིར། སྟོང་པའང་སྤྲོས་བྲལ་གྱི་རྣམ་པ་ལ་དམིགས་པ་ཙམ་ལྷག་མཐོང་ཡིན་ན་སྟོང་པའི་མཆོག་དང༌། སྤྲོས་བྲལ་གྱི་མཐར་ཐུག་པ་ནི་སངས་རྒྱས་ཡིན་ན་དེ་ལ་དམིགས་པ་ཅིའི་ ཕྱིར་ལྷག་མཐོང་དུ་མི་འགྱུར། འོན་ཀྱང་སྐབས་འདིར་དོན་དམ་བྱང་ཆུབ་ཀྱི་སེམས་ལ་དམིགས་པ་ལྷག་མཐོང་དང༌། ཀུན་རྫོབ་བྱང་ཆུབ་ཀྱི་སེམས་ལ་དམིགས་པ་ཐེག་ཆེན་གྱི་ཞི་གནས་སུ་བཞེད་ལ། སྤྱིར་གཉི་ག་ལ་ཡང་དེ་ལ་དམིགས་པའི་ཆ་ལྷག་ མཐོང་དང༌། དེར་རྩེ་གཅིག་པར་གནས་པའི་ཆ་ཞི་གནས་སུ་ཡང་འཐོབ་བོ། །དེས་ན་བྱང་ཆུབ་ཀྱི་སེམས་ཁོ་ན་བསྒོམ་པར་བྱ་ལ། དེའི་ཡང་དང་པོར་སྐྱེ་དཀའ་སླའི་གོ་རིམ་གྱིས་ཀུན་རྫོབ་བྱང་སེམས་དང༌། དེ་ལས་ཀྱང་བདག་གཞན་མཉམ་པའི་བྱང་ ཆུབ་ཀྱི་སེམས་ཐོག་མར་བསྒོམ་པར་བྱའོ། །ཇི་ལྟར་སྒོམ་ན་བདག་ཉིད་བདེ་བ་འདོད་ཅིང་སྡུག་བསྔལ་མི་འདོད་པ་ལྟར་སེམས་ཅན་ཐམས་ཅད་རེ་རེ་ཞིང་ཡང་བདེ་བ་འདོད་ཅིང་སྡུག་བསྔལ་མི་འདོད་པར་མཚུངས་པའི་རྒྱུ་མཚན་ལེགས་པར་བསམས་ནས་

Page: 588 བདག་འདོད་པའི་བདེ་བ་སེམས་ཅན་ལ་བསྒྲུབས་པར་བྱ་ཞིང༌། བདག་ཉིད་མི་འདོད་པའི་སྡུག་བསྔལ་ནི་སེམས་ཅན་སུ་ལ་འདུག་ཀྱང་བསལ་བར་བྱའོ་སྙམ་པའི་བློ་རྩེ་གཅིག་ཏུ་གོམས་པར་བྱ་ཞིང་དེ་བཅོས་མིན་དུ་སེམས་ཀྱི་ཁོང་ནས་བཟོད་མེད་དུ་སྐྱེས་ པ་ནི་བདག་གཞན་མཉམ་པའི་བྱང་ཆུབ་ཀྱི་སེམས་སྐྱེས་པ་ཡིན་ལ། རྐྱེན་ཅིས་ཀྱང་མི་འཕྲོགས་ཤིང་ཡེངས་ཀྱང་ཐུབ་ན་འབྱོངས་པ་ཉིད་དོ། །ཅིའི་ཕྱིར་བདེ་བ་འདོད་པ་དང་སྡུག་བསྔལ་མི་འདོད་པར་བདག་གཞན་མཚུངས་ཞེ་ན། འདི་ནི་ཕལ་ ཆེར་མངོན་སུམ་གྱིས་གྲུབ་པ་ཡིན་ཏེ། རང་དང་སྤྱོད་ཡུལ་མཚུངས་པས་མཐོང་བའི་མི་ནས་སྲིན་བུའི་བར་འདི་དག་བདེ་བ་ལ་སྲེད་ཅིང་སྡུག་བསྔལ་ལ་འབྲོས་པར་མཐོང་བའི་ཕྱིར་དང༌། འདིའི་རིགས་པས་སེམས་ཅན་ཐམས་ཅད་དེ་ལྟ་བུར་ངེས་པའི་ཕྱིར་རོ་ ཞེས་དགོངས་ཤིང༌། དཔེར་ན་བདག་གི་ལུས་ལ་རྐང་ལག་དང་སོར་མོ་ལ་སོགས་པའི་དབྱེ་བ་མང་མོད་ཀྱི་དེ་ཐམས་ཅད་བདག་ཉིད་ཀྱིས་བསྲུང་བྱར་གཅིག་ཅིང་སྲུང་དགོས་ལ། དེ་ལས་གང་ལ་གནོད་པ་བྱུང་ཡང་བདག་ཉིད་སྡུག་བསྔལ་བ་ལྟར་སེམས་ ཅན་སེམས་རྒྱུད་ཐ་དད་པ་འདི་རྣམས་ཀྱང་རང་རང་བདེ་བ་འདོད་པར་གཅིག་ལ་སྡུག་བསྔལ་བྱུང་ན་སོ་སོར་མི་འདོད་པའི་ཕྱིར་རོ། །གལ་ཏེ་གཞན་སྡུག་བསྔལ་ན་བསྔལ་དུ་ཟད་མོད་དེས་བདག་ལ་མི་གནོད་དོ་སྙམ་ན། བདག་སྡུག་བསྔལ་བས་གཞན་ ལ་མི་གནོད་མོད་ཀྱང་རང་ཉིད་ཀྱིས་མི་བཟོད་པར་མངོན་སུམ་དུ་མཐོང་ལ། སྡུག་བསྔལ་དེ་མ་བཅོལ་བར་གཞན་གྱིས་སེལ་མཁན་བྱུང་ན་རང་དགའ་བ་མཐའ་ཡས་པ་འཐོབ་པ་ལྟར་གཞན་གྱི་སྡུག་བསྔལ་འདི་བདག་ལ་མི་འབབ་མོད་ཀྱང༌། སེམས་ཅན་ དེ་ཉིད་ཀྱིས་ནི་མི་བཟོད་པར་ཡོད་ལ་དེས་བདག་ལ་སེལ་བར་མ་བཅོལ་ཡང་བདག་གིས་དེའི་སྡུག་བསྔལ་བསལ་ན་དེ་དགའ་བ་མཐའ་ཡས་པ་འཐོབ་ཅིང་རྒྱུ་དེས་དགེ་བ་ཆེར་སྐྱེད་པར་གདོན་མི་ཟ་བའི་ཕྱིར། དེས་ན་གཞན་མི་བཟོད་པའི་སྡུག་

Page: 589 ༄༅། །བསྔལ་ཅན་དེ་སྙིང་རྗེའི་གནས་ཡིན་པས་དེའི་སྡུག་བསྔལ་སེལ་བར་རིགས་སོ། །དེ་རིགས་པས་སྒྲུབ་པའི་ཕྱིར། གཞན་གྱི་ན་བའི་སྡུག་བསྔལ་ལྟ་བུ་ཆོས་ཅན། བདག་གིས་བསལ་བར་བྱ་བ་ཡིན་ཏེ། རང་གཞན་ལ་ མི་ཕན་པའི་སྡུག་བསྔལ་ཡིན་པའི་ཕྱིར། དཔེར་ན། བདག་གི་ཚེར་མ་ཟུག་པའི་སྡུག་བསྔལ་བཞིན་ནོ། །ཡང་སེམས་ཅན་གཞན་ཆོས་ཅན། བདག་གིས་ཕན་བདེ་སྒྲུབ་པར་བྱ་བ་ཡིན་ཏེ། སེམས་ཅན་ཡིན་པའི་ཕྱིར། དཔེར་ན། བདག་ལུས་ལ་ ཕན་བདེ་སྒྲུབ་པ་བཞིན་ནོ། །ཞེས་སྒྲུབ་ངག་ཡང་དག་བཀོད་ནས་དེའི་ཁྱབ་པ་སྒྲུབ་པའི་ཕྱིར། ཐམས་ཅད་རང་ལ་བདེ་བ་འདོད་ཅིང་སྡུག་བསྔལ་མི་འདོད་པར་མཚུངས་པར་ནི་ངེས་སླ་ལ། དེ་ལྟ་ན་བདག་གཞན་བདེ་འདོད་དུ་མཚུངས་པར་ཤེས་ནས་གཞན་ལ་ བདེ་བ་མི་སྒྲུབ་པ་འགལ་ཞིང༌། སྡུག་བསྔལ་མི་འདོད་པར་མཚུངས་པར་ཤེས་ནས་གཞན་གྱི་སྡུག་བསྔལ་མི་སེལ་བ་འགལ་ལོ། །གལ་ཏེ་གཞན་གྱི་སྡུག་བསྔལ་སེལ་མི་དགོས་ཏེ། བདག་ལ་ད་ལྟ་མི་གནོད་པའི་ཕྱིར་སྙམ་ན། འོ་ན་བདག་གི་མ་འོངས་ པའི་ངན་སོང་གི་སྡུག་བསྔལ་སྲུང་བའི་ཕྱིར། སྡིག་པ་སྤོང་བ་ཡང་མི་རིགས་པར་ཐལ་ཏེ། དེས་བདག་ལ་ད་ལྟར་མི་གནོད་པའི་ཕྱིར་རོ། །གལ་ཏེ་མ་འོངས་པའི་སྡུག་བསྔལ་དེས་བདག་ལ་ད་ལྟར་མི་གནོད་ཀྱང་མ་འོངས་པ་ན་བདག་ཉིད་ཀྱིས་མྱོང་བས་ སྲུང་རིགས་སོ་སྙམ་ན། བདག་ནི་འདས་མ་འོངས་ད་ལྟར་ཐམས་ཅད་ན་གཅིག་ཏུ་བདེན་ནོ་སྙམ་པ་འདི་ནི་ཕྱིན་ཅི་ལོག་གི་རྣམ་རྟོག་ཆེན་པོ་ཡིན་ཏེ། འདི་ལྟར་བདག་ནི་སྐྱེ་འོ་ཞེས་འཛིན་པ་སྐྱེ་བའི་དུས་ཀྱི་བདག་འཛིན་དེ་སྐད་ཅིག་ེ་ཉིད་དུ་འགག་ ལ། དེ་ནས་རིང་ཞིག་ན་བདག་ནི་དར་ལ་བབ་པའོ་ཞེས་དང༌། དེ་ཡང་འགགས་ནས་བདག་ནི་རྒས་པའོ་ཞེས་དང༌། དེ་འགགས་ནས་བདག་ནི་འཆིའོ་སྙམ་པ་དག་རིམ་པར་སྐྱེ་མོད་ཀྱི་བདག་འཛིན་དེ་དག་སྔ་མ་སྔ་མ་འགགས་ནས་ཕྱི་མ་ཕྱི་མ་སྐྱེ་བར་མཐོང་

Page: 590 ༄༅། །བས་བདག་འཛིན་གཅིག་མ་ཡིན་པར་མངོན་སུམ་གྱིས་མྱོང་པའི་ཕྱིར་དང༌། བདག་ཏུ་བཟུང་བྱའི་ལུས་སེམས་ཀྱང་སྐྱེས་མ་ཐག་པ་ན་སེམས་མི་གསལ་ལུས་ཉམ་ཆུང༌། དར་ལ་བབ་པ་ན་སེམས་གསལ་ཞིང་ལུས་འཁྲེགས། རྒན་པོའི་ཚེ་གཉི་ག་མཐུ་ ཆུང༌། འཆི་བའི་ཚེ་གཉི་གའི་སྟོབས་ཉམས་པས་ཕྱི་མའི་ཚེ་སྔ་མའི་གནས་སྐབས་འགག་པར་མངོན་སུམ་གྱིས་མྱོང་བས་ལུས་སེམས་མི་རྟག་པར་རང་གིས་མངོན་སུམ་གྱིས་ངེས་པའི་ཕྱིར་རོ། །གཞན་ཡང་རང་གིས་རང་གི་སྡུག་བསྔལ་སེལ་རིགས་ ཀྱི་གཞན་གྱི་སྡུག་བསྔལ་སེལ་མི་དགོས་སོ་སྙམ་ན། འོ་ན་མིག་ཏུ་རྡུལ་སོང་བའི་རྡུལ་ལག་པས་སེལ་མི་རིགས་པའམ་རྐང་པ་ལ་ཚེར་མ་ཟུག་པ་ན་རྐང་པ་ཉིད་ཀྱིས་འབྱིན་པར་རིགས་ཀྱི་ལག་པས་འབྱིན་མི་རིགས་པ་དང༌། བུའི་སྡུག་བསྔལ་བུ་ཉིད་ཀྱིས་སེལ་ བ་ལས་མས་སེལ་མི་རིགས་པ་ལྟ་བུ་མཐའ་ཡས་པར་ཐལ་ལོ། །གལ་ཏེ་དེ་དག་དཔྱད་ན་མི་རིགས་ཀྱང་བདག་དང་བདག་གིར་འཛིན་པ་གོམས་པ་ལས་བྱུང་བའི་ཕྱིར་གནས་སྐབས་སུ་མི་འགལ་ལོ་སྙམ་ན། བདག་ནི་ཀུན་རྫོབ་ཉིད་དུའང་ གང་ནའང་ཡོད་པ་མིན་པས་བདག་དང་བདག་གིར་འཛིན་པ་དེ་ཉིད་མི་རིགས་ཏེ་སྤང་དགོས་སོ། །གལ་ཏེ་བདག་ལུས་སོ་སོ་བ་སོགས་ལ་དཔྱད་ན་མེད་ཀྱང་ལུས་ཀྱི་ཚོགས་པ་དང་རྒྱུན་ཙམ་བདག་ཡིན་ནོ་སྙམ་ན། རྒྱུན་ཉིད་མི་འགྲུབ་སྟེ་གྲོག་ མ་མང་པོ་འགྲོ་བ་ལ་གྲོག་མའི་ཕྲེང་བ་ཞེས་བཏགས་ཀྱང་དེ་རྣམས་གྲོག་མའི་རྒྱུན་གཅིག་མ་ཡིན་པའི་ཕྱིར་དང༌། གློག་ཡང་ཡང་འབྱུང་བ་ལ་གློག་གི་རྒྱུན་དང་ཕྲེང་བར་བཏགས་ཀྱང་དེ་ནི་བར་མུན་ནག་གིས་ཆོད་ཅིང་ཕྱི་མ་སྐྱེ་བའི་ཕྱིར་རྒྱུན་དུ་ གནས་པ་མེད་ལ། འདུས་བྱས་གཞན་ལ་རྒྱུན་དུ་རྟོག་པ་ཡང་སྔ་ཕྱི་མཚམས་མ་ཕྱེད་འཇུག་པ་མྱུར་བས་འབྲེལ་བ་འཁྲུལ་བ་ཁོ་ན་ཡིན་གྱི། ཆོས་འདི་རྣམས་ནི་སྐད་ཅིག་སྐད་ཅིག་ཏུ་ཟད་དེ་སྔ་ཕྱི་རེག་ཅིང་འབྲེལ་བ་མེད་ལ་སྐད་ཅིག་དེ་ཉིད་ཀྱང་

Page: 591 ༄༅། །གང་དུ་ཡང་གནས་པ་མེད་དོ། །ཚོགས་པ་ཡང་རྫུན་པ་ཁོ་ན་སྟེ་གོ་སྐབས་ཉེ་བ་ལས་བཏགས་པར་ཟད་ཀྱི་རེ་རེ་བཞིན་དཔྱད་ན་རྡུལ་ཕྲ་རབ་དང༌། དེ་ཡང་ཕྱོགས་ཆོས་དཔྱད་ན་རྡུལ་དུ་ཡང་མི་གནས་པའི་ཕྱིར་རོ། ། དེས་ན་བདག་སུ་ཡང་མེད་ན་འདིར་སུ་ཞིག་མ་འོངས་པ་ན་སྡུག་བསྔལ་བར་འགྱུར། དེས་ན་ཡང་དག་པར་ན་བདག་མི་དམིགས་པས་ལྟོས་ཟླ་གཞན་ཡང་མི་དམིགས་ཤིང་སྤྲོས་མཚན་ངོ་བོ་ཉིད་གྱིས་ཞི་བར་ཆོས་ཐམས་ཅད་བྱེ་བྲག་མེད་ པས་ཁྱད་གཞི་བདག་གཞན་དང་ཁྱད་ཆོས་བདེ་སྡུག་ཉིད་ཀྱང་དམིགས་སུ་མེད་ལ་དེ་ལྟར་ཤེས་པ་ན་དེ་མ་ཤེས་པའི་སེམས་ཅན་དུ་སྣང་ཙམ་པ་འདི་ལ་སྙིང་རྗེ་ཁྱད་པར་དུ་འཇུག་པས་དེ་ཉིད་གང་ལ་ཞེན་པའི་བདེ་བ་སྒྲུབ་པ་དང༌། སྡུག་བསྔལ་སེལ་བ་ ལ་ཆེས་བརྩོན་པར་འགྱུར་བས་བདག་གི་སྡུག་བསྔལ་སེལ་ལ་གཞན་གྱི་མི་སེལ་ལོ་སྙམ་པའི་གཏི་མུག་ནི་དེར་འཇོག་གོ །གལ་ཏེ་བདག་གཞན་ཡང་དག་པར་མེད་ན་སྔར་སྒྲུབ་ངག་བཀོད་པའི་དཔེ་མ་གྲུབ་པར་ཐལ་ལོ་སྙམ་ན། དེ་ནི་ཀུན་རྫོབ་ མ་དཔྱད་པའི་སྐབས་མྱུ་གུ་ལྟ་བུའི་དབང་དུ་བྱས་ལ། འདི་ནི་དོན་དམ་པའི་རིགས་པས་དཔྱད་པའི་སྐབས་སཱ་ལུ་སྨིན་པ་ལྟ་བུའི་སྐབས་ཏེ་འབྲས་ཀྱི་མྱུ་གུ་སྐྱེད་པ་འགལ་ཏེ་སཱ་ལུ་སྨིན་པ་དང་མི་མཚུངས་པའི་ཕྱིར་རོ་ཞེས་རྟོག་པར་མི་བྱའོ། ། དེས་ན་སེམས་ཅན་ཐམས་ཅད་ཀྱི་སྡུག་བསྔལ་ཟློག་མི་རིགས་སོ་ཞེས་བརྩད་པར་བྱར་མེད་དེ། བདག་གི་སྡུག་བསྔལ་ཟློག་པར་བྱེད་ན་ཐམས་ཅན་ཀྱི་སྡུག་བསྔལ་ཟློག་རིགས་ལ་གཞན་གྱི་མི་ཟློག་ན་བདག་གི་ཡང་མི་ཟློག་པར་རིགས་སོ། །གལ་ ཏེ་བདག་གི་སྡུག་བསྔལ་ཟློག་ན་སྙིང་རྗེ་སྒོམ་མི་རིགས་ཏེ་སྙིང་རྗེ་ནི་སྡུག་བསྔལ་ཡིན་པའི་ཕྱིར་ཞེ་ན། སེམས་ཅན་གྱི་སྡུག་བསྔལ་ཕ་མཐའ་ཡས་པ་ལ་བསམས་ན་ཇི་ལྟར་སྙིང་རྗེ་སྡུག་བསྔལ་མང་སྟེ་སྙིང་རྗེ་སྡུག་བསྔལ་ག་ལ་ཡིན་ཏེ་བདེ་བར་ཡང་རིགས་ལ། སྤྱིར་སྡུག་བསྔལ་

Page: 592 ཡིན་ཡང་རང་གི་ད་ལྟའི་སྡུག་བསྔལ་ཙམ་ཞིག་གིས་མ་འོངས་པའི་སྡུག་བསྔལ་མང་པོ་མེད་པར་འགྱུར་བའམ། རང་གི་སྡུག་བསྔལ་གྱིས་གཞན་མང་པོའི་སྡུག་བསྔལ་ཟད་པར་གྱུར་ན་སྡུག་བསྔལ་དེ་ངེས་པར་སྒྲུབ་དགོས་ལ། གཞན་གྱི་ད་ལྟའི་སྡུག་ བསྔལ་ཆུང་ངུས་མ་འོངས་པའི་སྡུག་བསྔལ་ཆེན་པོ་སེལ་ནུས་ན་སྡུག་བསྔལ་དེ་གཞན་ལ་ཡང་ངེས་པར་སྐྱེད་དགོས་ཏེ། སྨན་དཔྱད་ཀྱི་དཔེས་སྡུག་བསྔལ་དང་ལེན་གྱི་བཟོད་པར་བཤད་པ་བཞིན་ནོ། །དེས་ན་སྔོན་དེ་བཞིན་གཤེགས་པ་རིན་ཆེན་པད་ ཟླ་མངོན་པར་འཕགས་པའི་བསྟན་པའི་སྙིགས་མ་ལ་དམིགས་པར་ལྟ་བའི་དགེ་སྦྱོང་དང་བྲམ་ཟེས་གང་སྟེ་བྱང་ཆུབ་སེམས་དཔའ་བདུན་སྟོང་རྒྱལ་པོའི་ཕོ་བྲང་འཁོར་ནས་བསྐྲད་དེ་ནགས་ཚལ་ཀུན་ཏུ་བཟང་པོར་གནས་ཤིང༌། དེ་དག་གི་བླ་མ་ཆོས་ སྨྲ་བ་དགེ་སློང་མེ་ཏོག་ཟླ་མཛེས་ལས་དམ་པའི་ཆོས་ཉན་ཏོ། །དེའི་ལྷའི་མིག་གིས་བལྟས་ན་སངས་རྒྱས་ཀྱི་ཞིང་སྣ་ཚོགས་ནས་སེམས་ཅན་དགེ་རྩ་བསགས་པ་ཁྲག་ཁྲིག་མང་པོ་རྒྱལ་པོ་དཔའ་བས་བྱིན་གྱི་ཕོ་བྲང་འཁོར་དུ་མིར་སྐྱེས་ཏེ་དེ་དག་ རང་ལས་ཆོས་ཉན་པ་རྙེད་ན་ཕྱིར་མི་ལྡོག་པ་འཐོབ་ལ། མ་རྙེད་ན་ལྡོག་པར་མཐོང་ཞིང་དེར་ཕྱིན་ན་རང་གི་སྲོག་གི་བར་ཆད་དུ་ཡང་འགྱུར་ལ། རྒྱལ་པོ་ཡང་དམྱལ་བར་ལྟུང་བར་ཤེས་མོད་ཀྱི་དེ་ལ་མ་བལྟས་པར་སྙིང་རྗེས་དེར་ཞུགས་ཏེ་ཉིན་དྲུག་གི་ བར་དུ་གྲོང་དང་ལྗོངས་དང་ཕོ་བྲང་འཁོར་དུ་ཆོས་བསྟན་པས་སྲོག་ཆགས་མཐའ་ཡས་པ་ཕྱིར་མི་ལྡོག་པར་བཀོདཅིང་ཟས་ཀྱི་བྱ་བ་མེད་པར་མཚན་མོ་ནི་དབུ་སྐྲ་དང་སེན་མོའི་མཆོད་རྟེན་གྱི་དྲུང་དུ་འགྲེང་བས་དུས་འདའ་འོ། །ཉིན་བདུན་པ་ལ་ རྒྱལ་པོ་དེ་བུ་དང་བུ་མོ་ལྔ་བརྒྱ་རེ་དང་བཙུན་མོའི་འཁོར་དང་དཔུང་ཚོགས་སུ་བཅས་ཏེ་སྐྱེད་ཚལ་དུ་འགྲོ་བ་ན་རྒྱལ་པོའི་འཁོར་རྣམས་ཀྱི་བྱང་ཆུབ་སེམས་དཔའ་ཤིང་དྲུང་དུ་འཁོད་པ་ལ་སྐྱེ་བོའི་ཚོགས་ཆོས་ཉན་པ་མཐོང་མ་ཐག་དད་པའི་

Page: 593 ༄༅། །དབང་པོ་བརྟས་ཤིང་ཕལ་ཆེར་ཕྱིར་མི་ལྡོག་པར་ཡང་གྱུར་ཏེ་བཞོན་པ་ལས་བབས་ནས་ཆོས་ཉན་པ་མཐོང་བས་རྒྱལ་པོས་དེ་ཤིན་ཏུ་གཟུགས་མཛེས་པ་དང༌། བདག་ཉིད་ལས་གཞན་པའི་སྲོག་ཆགས་ཐམས་ཅད་ཀྱིས་ བླ་མར་བྱས་པ་མཐོང་བས་འདིས་བདག་གི་རྒྱལ་སྲིད་འཕྲོག་གོ་སྙམ་ནས་གསོད་པར་བསྒོས་པ་རང་གི་བུ་དག་གིས་ཟློག་པས་དེ་བས་ཀྱང་ཁུ་འཕྲིག་ཟོས་ཏེ་གཤེད་མ་དགའ་བྱེད་ལ་བསྒོས་ཏེ། དེས་ཡན་ལག་དང་ཉིང་ལག་བཏུབས་པ་ན་འོ་མའི་ རྒྱུན་བབ། བཅད་མཚམས་ནས་འོད་ཟེར་མཐའ་ཡས་པས་འཇིག་རྟེན་སྣང་བར་བྱས་ཏེ་སླར་དེ་ཉིད་དུ་ནུབ། རྒྱལ་པོ་ཞག་བདུན་སྐྱེད་ཚལ་དུ་གནས་ཀྱང་སྡིག་པའི་ལས་བྱས་པའི་ཕྱིར་དགའ་བ་མ་ཐོབ་ནས་སླར་ལོག་པ་ན་དེའི་ས་གཞི་མེ་ཏོག་ གི་ཆར་གྱིས་གཡོགས་ཞིང་ལུས་གསེར་གྱི་ཁ་དོག་མ་ཉམས་ལ། སྐྱེས་བུ་ཆེན་པོའི་མཚན་སྣང་བ་མཐོང་བས་འདི་ནི་ཕྱིར་མི་ལྡོག་པར་ངེས་ཏེ་བདག་གིས་མི་བཟད་པའི་ལས་བྱས་སོ་སྙམ་པའི་མོད་ལ་ལྷ་རྣམས་ཀྱིས་དེ་དེ་བཞིན་ནོ་ཞེས་བརྗོད་ཅིང༌། བྱང་ཆུབ་སེམས་དཔའ་བདུན་སྟོང་པོ་ཡང་ལྷགས་ཏེ། དེའི་ཡོན་ཏན་བརྗོད་པས་རྒྱལ་པོ་མི་བཟད་པར་འགྱོད་དེ་ཙནྡ་ནའི་མེས་གདུང་སྦྱངས། རིན་པོ་ཆེའི་མཆོད་རྟེན་བྱས་ཏེ་མཆོད་པ་ཆེར་བྱས་ཉིན་རེ་དུས་གསུམ་དུ་བཤགས་པ་བྱས་ཀྱང་ ཤི་ནས་ངན་སོང་དུ་སོང་ལ། རྒྱལ་པོ་དེ་སྟོན་པ་ཉིད་དང་ཆོས་སྨྲ་བ་དེ་ཟླ་འོད་གཞོན་ནུར་གྱུར་བ་ཡིན་པར་ཟླ་བ་སྒྲོན་མར་གསུངས་སོ། །དེས་ན་ཆོས་སྨྲ་བ་དེས་གཞན་མང་པོའི་སྡུག་བསྔལ་ཟད་པར་བྱ་བའི་ཕྱིར། རང་དུས་མིན་དུ་འཆི་བའི་ སྡུག་བསྔལ་ལ་མ་འཛེམས་པར་ལྟར་དོན་ཆེན་པོ་མཐོང་ན་དེ་ལྟ་བུར་བསྒྲུབ་པར་བྱ་དགོས་སོ། །དེ་ལྟར་ཀུན་རྫོབ་ཏུ་བདག་གཞན་མཉམ་པ་དང་དོན་དམ་དུ་བདག་གཞན་མི་དམིགས་པ་འདི་གོམས་ན་རང་གི་སྡུག་བསྔལ་ལ་ཇི་མི་སྙམ་པར་

Page: 594 སྙིང་རྗེས་གཞན་གྱི་སྡུག་བསྔལ་སེལ་བའི་ཆེད་དུ་མནར་མེད་པར་ཡང་དགའ་བས་འཇུག་ལ། གཞན་གྲོལ་བ་དང་བདེ་བ་དེའི་དགའ་བས་བདག་ཉིད་ཚིམ་སྟེ་དེ་ཁོ་ན་སྒྲུབ་ཀྱི་ཉན་རང་གི་ཐར་པ་ལག་མཐིལ་དུ་འོངས་ཀྱང་ཐོབ་པར་མི་བྱེད་དེ། དེ་ལྟར་ཤིན་ཏུ་ཡང་རིགས་ཏེ་སུ་ཡང་སྒྲོལ་བར་མི་བྱེད་པའི་གྲུ་ལ་སྙིང་པོ་མེད་པ་ལྟར་རང་ཉིད་གཅིག་པུའི་ཐར་པ་ནི་སྙིང་རྗེ་ཅན་གྱི་མདུན་ན་ངོ་ཚ་བའི་གནས་ཡིན་པའི་ཕྱིར་རོ། །དེ་ལྟར་ཉིན་རེས་ཀྱང་སེམས་ཅན་མཐའ་ཡས་པ་སྒྲོལ་བར་བྱེད་ཀྱང་ གཞན་དོན་ལ་དགའ་བ་དང་གོམས་པས་འཇུག་པར་ཟད་ཀྱི་བདག་གིས་བྱའོ་ཞེའམ་བྱས་སོ་ཞེས་རློམ་སེམས་དང༌། ངོ་མཚར་དུ་འཛིན་པ་མེད་ལ། དེ་དག་ལས་ལན་དང་སྙན་ཚིག་མི་འདོད་ཅིང་ཐ་ན་འབྲས་བུ་བྱང་ཆུབ་ལ་ཡང་རེ་བ་མེད་དེ། ཆོས་ ཐམས་ཅད་བྱང་ཆུབ་ལས་མི་གཡོ་བར་ཤེས་པའི་ཕྱིར་རོ། །དེས་ན་བདག་ཉིད་མི་སྙན་པའི་ཚིག་ཆུང་ངུ་ལས་ཀྱང་སྲུང་བ་ལྟར་སེམས་ཅན་ཐམས་ཅད་ཀྱང་བདག་བཞིན་དུ་སྡུག་བསྔལ་ལས་སྲུང་ཞིང་ཕན་བདེ་བསྒྲུབ་པར་བྱའོ། །འདིར་བི་བྷཱུ་ ཏིས། སྡུག་བསྔལ་ཡིན་པའི་ཕྱིར། གཞོམ་བྱ་ཡིན་ཏེ། བདག་གི་སྡུག་བསྔལ་བཞིན། གཞན་རྒྱུད་ལ་བྱུང་བའང་སྡུག་བསྔལ་ཡིན་ནོ། །ཞེས་པ་རང་བཞིན་གྱི་རྟགས་བཀོད། ཁྱབ་སྟེ། སྡུག་བསྔལ་དུ་གྲུབ་པའི་ཕྱིར། རྟགས་མ་ངེས་པ་མ་ཡིན་ཏེ། རང་ གི་སྡུག་བསྔལ་ཡང་གཞོམ་བྱ་མ་ཡིན་པར་ཐལ་པའི་ཕྱིར། སེམས་ཅན་ཡིན་པའི་ཕྱིར། རྗེས་སུ་བཟུང་བྱ་ཡིན་ཏེ་བདག་ཉིད་བཞིན། གཞན་དག་ཀྱང་སེམས་ཅན་ཡིན་ནོ། །ཞེས་ཁྱབ་རྟགས་སྔ་མ་ལྟར་བསྒྲུབས་སོ། །འདི་ལྟར་སྐྱེ་བའང་གཞན་ཡིན་ཏེ། སོགས་ལ་ཀླུའི་ཞབས་ཀྱིས། ཁ་དོན་མར་མེ་མེ་ལོང་རྒྱ། །མེ་ཤེལ་སྐྱུར་དང་བྲག་ཆ་དག །དེ་ལ་བརྟེན་བྱུང་འཕོས་པ་ཡིན། །ཞེས་དྲངས་ཤིང༌། ཕྲེང་བ་དམག་ལ་སོགས་བཞིན་བརྫུན། །ཞེས་པ་ལ། གྲོག་མ་ལ་སོགས་པ་སྔ་ཕྱི་ཁོ་ན་

Page: 595 ༄༅། །ཡོད་ཀྱི་དེ་ལས་གཞན་ཕྲེང་བ་མེད་ལ། རྟ་དང་གླང་པོ་ལ་སོགས་པ་ཁོ་ན་ཡོད་ཀྱི་དེ་ལས་གཞན་དམག་མེད་དོ། །དེ་བས་ན་རྒྱུན་ཡིན་པ་དེ་ལྟར་མེད་དེ་བདག་ལ་སོགས་པ་མེད་པས་སྡུག་བསྔལ་གང་གི་ཡིན་པ་དེ་མེད་དོ། །ཞེས་ སྦྱར་རོ། །དཀའ་འགྲེལ་ཆུང་ངུ་ལས་ནི། བདག་ཏུ་འཛིན་པ་འཇུག་ཅེ་ན། །སོགས་ལ་ཉན་ཐོས་པ་དག་འདི་སྙམ་དུ་དོན་དམ་པར་བདག་མེད་པས་ལག་པའི་སྡུག་བསྔལ་ཡང་ལག་པ་ཉིད་ཀྱིས་བསལ་བྱ་མིན་ན་རྐང་པའི་སྡུག་བསྔལ་ལག་པས་སེལ་ བ་ལྟ་ག་ལ་རིགས། དེས་ན་དཔེ་མ་གྲུབ་བོ་སྙམ་ན། བདག་གཞན་མི་རིགས་གང་ཡིན་དེ། །ཅི་ནུས་པར་ནི་སྤང་བྱ་ཉིད། །ཅེས་བདག་འཛིན་མི་རིགས་ན་རང་གི་བདག་འཛིན་སྤོང་བ་ལྟར། གཞན་རྒྱུད་ཀྱི་བདག་འཛིན་ཡང་སྤང་དགོས་ཏེ། ང་དང་ གཞན་གྱི་རྣམ་པར་མ་ཆད་ཀྱང་མི་རིགས་པ་ཙམ་གྱིས་སྤང་བྱ་ཡིན་པའི་ཕྱིར་རོ་ཞེས་སྦྱར་རོ། །ས་བཟང་པས། བདག་གིས་གཞན་གྱི་སྡུག་བསྔལ་བསལ། །སོགས་ཤླཽོ་ཀ་གཅིག་གིས་རྟགས་བཀོད། །གང་ཚེ་བདག་དང་གཞན་གཉིས་ག །ཞེས་ པའི་ཤླཽོ་ཀས་རྟགས་གཉིས་པའི་ཁྱབ་པ་བསྒྲུབས། ལྷག་མས་རྟགས་དང་པོའི་ཁྱབ་པ་བསྒྲུབས་པར་སྦྱར་རོ། །གཉིས་པ་བདག་གཞན་བརྗེ་བ་སྒོམ་པ་ལ་གསུམ། བརྗེ་ནུས་པར་བསྟན་པ། སྒོམ་ཚུལ་མདོར་བསྟན། དེ་རྒྱས་བཤད་དོ། ། དང་པོ་བརྗེ་ནུས་པར་བསྟན་པ་ནི། གོམས་པ་ཡིས་ནི་གཞན་དག་གི། ཁུ་བ་ཁྲག་གི་ཐིགས་པ་ལ། །དངོས་པོ་མེད་པར་གྱུར་ཡང་ནི། །བདག་གོ་ཞེས་ནི་ཤེས་པ་ལྟར། །དེ་བཞིན་གཞན་གྱི་ལུས་ལ་ཡང༌། །བདག་ཅེས་ཅི་ཡི་ཕྱིར་མི་བཟུང༌། །བདག་གི་ ལུས་ནི་གཞན་དག་དུའང༌། །བཞག་པ་དེ་ལྟར་དཀའ་བ་མེད། །ཅེས་གསུངས་ཏེ། རྒྱ་བོད་ཀྱི་འགྲེལ་བ་ཐམས་ཅད་དུ་འདི་བདག་གཞན་མཉམ་པའི་དོན་བསྡུར་སྦྱར་མོད་ཀྱང་འདི་གཙོ་བོར་བརྗེ་ནུས་པའི་རྒྱུ་མཚན་སྟོན་ལ། དེ་བཞིན་གཞན་

Page: 596 གྱི་ལུས་ལ་ཡང༌། །བདག་ཅེས་ཅི་ཡི་ཕྱིར་མི་བཟུང༌། །ཞེས་པ་འདིས་བདག་གཞན་བརྗེ་བར་དངོས་སུ་བསྟན་ཞིང༌། བདག་གི་ལུས་འདི་གཞན་དག་ཏུའང༌། །བཞག་པ་དེ་ལྟར་དཀའ་བ་མེད། །ཅེས་པ་འདི་ནི་འཆད་པར་འགྱུར་བའི། དམན་ སོགས་བདག་ཏུ་བྱས་པ་དང༌། །གཞན་ཉིད་དུ་ནི་བདག་བྱས་ནས། །ཞེས་གཉེན་པོའི་འགྲན་སེམས་ང་རྒྱལ་ཕྲག་དོག་སྒོམ་པ་རྣམས་ཀྱི་ས་བོན་དུ་གནས་པའི་ཕྱིར། བདག་གིས་འདི་ལྟར་སྦྱར་བ་ཡིན་ནོ། །གཉིས་པ་མདོར་བསྟན་ནི། བདག་ཉིད་ སྐྱོན་བཅས་གཞན་ལ་ཡང༌། །ཡོན་ཏན་རྒྱ་མཚོར་ཤེས་བྱས་ནས། །བདག་འཛིན་ཡོངས་སུ་དོར་བ་དང༌། །གཞན་བླང་བ་ནི་བསྒོམ་པར་བྱ། །ཞེས་སོ། །རྒྱས་བཤད་ལ་བཞི། བརྗེ་རིགས་པའི་འཐད་པ། བདག་དོར་ཞིང་གཞན་ བླང་བའི་སྒོ་ནས་བསམ་པས་བརྗེ་ཚུལ། བརྗེས་པའི་ཕན་ཡོན་དང་མ་བརྗེས་པའི་ཉེས་དམིགས། བརྗེ་ཚུལ་དངོས་རྒྱས་པར་བཤད་པའོ། །དང་པོ་བརྗེ་རིགས་པའི་འཐད་པ་ནི། ཇི་ལྟར་ལག་པ་ལ་སོགས་པ། །ལུས་ཀྱི་ཡན་ལག་ཡིན་འདོད་ལྟར། ། དེ་བཞིན་འགྲོ་བའི་ཡན་ལག་ཏུ། །ཅི་ཕྱིར་ལུས་ཅན་རྣམས་མི་འདོད། །ཇི་ལྟར་བདག་མེད་ལུས་འདི་ལ། །གོམས་པས་བདག་གི་བློ་འབྱུང་བ། །དེ་བཞིན་སེམས་ཅན་གཞན་ལ་ཡང༌། །གོམས་པས་བདག་བློ་ཅིས་མི་སྐྱེ། །དེ་ལྟ་ན་ ནི་གཞན་གྱི་དོན། །བྱས་ཀྱང་ངོ་མཚར་རློམ་མི་འབྱུང༌། །བདག་ཉིད་ཀྱི་ནི་ཟན་ཟོས་ནས། །ལན་ལ་རེ་བ་མི་འབྱུང་ཞིང༌། །དེ་བས་ཇི་ལྟར་ཆུང་ངུ་ན། །མི་སྙན་ལས་ཀྱང་བདག་སྲུང་བ། །དེ་བཞིན་འགྲོ་ལ་སྲུང་སེམས་དང༌། ། སྙིང་རྗེའི་སེམས་ནི་གོམས་པར་བྱ། །དེ་བས་མགོན་པོ་སྤྱན་རས་གཟིགས། །ཐུགས་རྗེ་ཆེན་པོས་འགྲོ་བ་ཡིས། །འཁོར་གྱི་འཇིགས་པའང་བསལ་བའི་ཕྱིར། །རང་གི་མཚན་ཡང་བྱིན་གྱིས་བརླབས། །དཀའ་ལས་ཕྱིར་ལྡོག་མི་

Page: 597 ༄༅། །བྱ་སྟེ། །གང་གིས་མིང་ཐོས་འཇིགས་པ་ཡང༌། །འདི་ལྟར་གོམས་པའི་མཐུ་ཡིས་ནི། །དེ་ཉིད་མེད་ན་མི་དགར་འགྱུར། །གང་ཞིག་བདག་དང་གཞན་རྣམས་ནི། །མྱུར་དུ་བསྐྱབ་བར་འདོད་པ་དེས། །བདག་དང་གཞན་ དུ་བརྗེ་བྱ་བ། །གསང་བའི་དམ་པ་སྤྱད་པར་བྱ། །ཞེས་གསུངས་ཏེ། དང་པོ་གཉིས་ཀྱིས་གོམས་ན་གཞན་ལ་ཡང་བདག་གི་བློ་སྐྱེ་ནུས་པར་བསྟན། གསུམ་པས་དེའི་ཕན་ཡོན་བསྟན། བཞི་པས་གོམས་སུ་གཞུག་ཚུལ་བཤད། ལྔ་པས་དེའི་དཔེ་བསྟན། དྲུག་པས་གོམས་ན་སླ་བས་འཇིགས་མི་དགོས་པར་བསྟན། བདུན་པས་དེས་ན་བདག་གཞན་བརྗེ་བ་སྒོམ་པར་གདམས་སོ། །གཉིས་པ་བདག་དོར་ཞིང་གཞན་བླང་བའི་སྒོ་ནས་བསམ་པས་བརྗེ་ཚུལ་ནི། བདག་ལུས་གང་ལ་ཆགས་པ་ཡིས། །འཇིགས་གནས་ ཆུང་ལའང་འཇིགས་སྐྱེ་བ། །འཇིགས་པ་སྐྱེ་བའི་ལུས་དེ་ལ། །སུ་ཞིག་དགྲ་བཞིན་སྡང་མི་བྱེད། །ལུས་གང་བཀྲེས་དང་སྐོམ་སོགས་ནད། །གསོ་བའི་ཆོ་ག་བྱེད་འདོད་པས། །བྱ་དང་ཉ་དང་རི་དྭགས་དག །གསོད་པར་བྱེད་ཅིང་ལམ་སྒུགས་ བྱེད། །གང་ཞིག་ཁེ་དང་རིམ་གྲོའི་ཕྱིར། །ཕ་དང་མ་ཡང་གསོད་བྱེད་ཅིང༌། །དཀོན་མཆོག་གསུམ་གྱི་དཀོར་བརྐུས་ནས། །དེས་ན་མནར་མེད་སྲེག་འགྱུར་ན། །མཁས་པ་སུ་ཞིག་ལུས་དེ་ལ། །འདོད་ཅིང་སྲུང་དང་མཆོད་བྱེད་ཀྱི། ། འདི་ལ་སུ་ཞིག་དགྲ་བཞིན་དུ། །ལྟ་བར་མི་བྱེད་བརྙས་མི་བྱེད། །གལ་ཏེ་བྱིན་ན་ཅི་སྤྱད་ཅེས། །བདག་དོན་སེམས་པ་འདྲེ་ཡི་ཚུལ། །གལ་ཏེ་སྤྱད་ན་ཅི་སྦྱིན་ཞེས། །གཞན་དོན་སེམས་པ་ལྷ་ཡི་ཆོས། །ཞེས་གསུངས་ཏེ། དང་པོས་ལུས་ཆགས་བྱ་མིན་པར་བསྟན། གསུམ་གྱི་ལུས་ལ་ཆགས་པའི་ཉེས་པ་བསྟན། ཐ་མས་སྤྱད་པ་སྐྱོན་དང་བྱིན་པ་ཡོན་ཏན་དུ་བསྟན་ཏོ། །གསུམ་པ་བརྗེས་པའི་ཕན་ཡོན་དང་མ་བརྗེས་པའི་ཉེས་དམིགས་ནི། བདག་ཕྱིར་གཞན་ལ་གནོད་བྱས་ན། །དམྱལ་ལ་སོགས་

Page: 598 པར་གདུང་བར་འགྱུར། །གཞན་ཕྱིར་བདག་ལ་གནོད་བྱས་ན། །ཕུན་སུམ་ཚོགས་པ་ཐམས་ཅད་འཐོབ། །བདག་ཉིད་མཐོ་བར་འདོད་པ་དེས། །ངན་འགྲོ་ངན་དང་གླེན་པར་འགྱུར། །དེ་ཉིད་གཞན་ལ་སྤོ་བྱས་ན། །བདེ་འགྲོར་ རིམ་གྲོ་འཐོབ་པར་འགྱུར། །བདག་གི་དོན་ལ་གཞན་བཀོལ་ན། །བྲན་ལ་སོགས་པ་མྱོང་བར་འགྱུར། །གཞན་གྱི་དོན་དུ་བདག་སྤྱད་ན། །རྗེ་དཔོན་ཉིད་སོགས་མྱོང་བར་འགྱུར། །འཇིག་རྟེན་བདེ་བ་ཇི་སྙེད་པ། །དེ་ཀུན་གཞན་བདེ་ འདོད་ལས་བྱུང༌། །འཇིག་རྟེན་སྡུག་བསྔལ་ཇི་སྙེད་པ། །དེ་ཀུན་རང་བདེ་འདོད་ལས་བྱུང༌། །མང་དུ་བཤད་ལྟ་ཅི་ཞིག་དགོས། །བྱིས་པས་རང་གི་དོན་བྱས་དང༌། །ཐུབ་པས་གཞན་གྱི་དོན་མཛད་པ། །འདི་གཉིས་ཀྱི་ནི་ཁྱད་པར་ ལྟོས། །བདག་བདེ་གཞན་གྱི་སྡུག་བསྔལ་དག །ཡང་དག་བརྗེ་བར་མ་བྱས་ན། །སངས་རྒྱས་ཉིད་དུ་མི་འགྲུབ་ཅིང༌། །འཁོར་བ་ན་ཡང་བདེ་བ་མེད། །འཇིག་རྟེན་ཕ་རོལ་ཕར་ཞོག་གི། བྲན་གཡོག་ལས་མི་བྱེད་པ་དང༌། །རྗེ་དཔོན་ རྔན་པ་མི་སྟེར་པའི། །ཚེ་འདིར་དོན་ཡང་འགྲུབ་མི་འགྱུར། །མཐོང་དང་མ་མཐོང་བདེ་འགྲུབ་བའི། །ཕུན་སུམ་བདེ་སྐྱིད་ཡོངས་བོར་ཞིང༌། །གཞན་ལ་སྡུག་བསྔལ་བྱས་པའི་རྒྱུས། །རྨོངས་རྣམས་སྡུག་བསྔལ་མི་བཟད་ལེན། ། འཇིག་རྟེན་དག་ན་འཚེ་བ་གང་ཡོད་དང༌། །འཇིགས་དང་སྡུག་བསྔལ་ཇི་སྙེད་ཡོད་གྱུར་པ། །དེ་ཀུན་བདག་ཏུ་འཛིན་པ་ལས་གྱུར་ན། །འདྲེ་ཆེན་དེས་ཀོ་བདག་ལ་ཅི་ཞིག་བྱ། །བདག་ཉིད་ཡོངས་སུ་མ་བཏང་ན། །སྡུག་བསྔལ་སྤོང་བར་ མི་ནུས་ཏེ། །ཇི་ལྟར་མེ་ནི་མ་བཏང་ན། །སྲེག་པ་སྤོང་བར་མི་ནུས་བཞིན། །ཞེས་གསུངས་ཏེ། དང་པོ་ལྔས་བདག་གཞན་མ་བརྗེས་པའི་སྐྱོན་དང་བརྗེས་པའི་ཡོན་ཏན་སྣྲེལ་ཞིར་བཤད། དྲུག་པས་མ་བརྗེས་ན་སངས་རྒྱས་མི་འགྲུབ་

Page: 599 ༄༅། །པར་བསྟན། བདུན་པས་རྣམ་གསལ་གྱི་དཔེ་བཤད། བརྒྱད་པས་གཞན་ལ་གནོད་པའི་འབྲས་བུ་བསྟན། ཐ་མ་གཉིས་ཀྱིས་རྩ་བ་བདག་འཛིན་དོར་བྱར་བསྟན་ཏོ། །བཞི་པ་བརྗེ་ཚུལ་དངོས་ལ། བསྟན་ བཤད་གཉིས། དང་པོ་མདོར་བསྟན་པ་ནི། དེ་ལྟས་བདག་གནོད་ཞི་བ་དང༌། །གཞན་གྱི་སྡུག་བསྔལ་ཞི་བྱའི་ཕྱིར། །བདག་ཉིད་གཞན་ལ་བཏང་བྱ་དང༌། །གཞན་རྣམས་བདག་ཏུ་བཟུང་བར་བྱ། །བདག་ནི་གཞན་གྱི་དབང་གྱུར་ཞེས། །ཡིད་ཁྱོད་ ངེས་པར་ཤེས་གྱིས་ལ། །སེམས་ཅན་དོན་དུ་མ་གཏོགས་པ། །ད་ནི་ཁྱོད་ཀྱིས་གཞན་མི་བསམ། །གཞན་དབང་མིག་ལ་སོགས་པ་ཡིས། །རང་དོན་སྒྲུབ་པ་རིགས་མ་ཡིན། །དེ་ཡི་མིག་ལ་སོགས་པ་ཡིས། །དེ་ལ་ལོག་པར་བྱ་མི་ རིགས། །དེས་ན་སེམས་ཅན་གཙོར་བྱས་ཏེ། །བདག་གི་ལུས་ལ་ཅི་མཐོང་བ། །དེ་དང་དེ་ནི་ཕྲོགས་ནས་ཀྱང༌། །གཞན་དག་ལ་ནི་ཕན་པར་སྤྱོད། །ཅེས་གསུངས་ཏེ། དང་པོས་སྤྱིར་བསྟན། གཉིས་པས་བྱེ་བྲག་ཏུ་བསམ་པས་བརྗེ་ ཚུལ་དང༌། གཉིས་ཀྱིས་སྦྱོར་བས་སྒྲུབ་ཚུལ་མདོར་བསྟན་པའོ། །གཉིས་པ་རྒྱས་བཤད་ལ་བཞི། སེམས་ཅན་གཞན་བདག་ཏུ་བྱས་ནས་ལུས་སེམས་ལ་ཕྲག་དོག་དང་འགྲན་སེམས་དང་ང་རྒྱལ་སྒོམ་པ། བདག་འཛིན་རང་སོར་བཞག་ ནས་བདག་གཞན་བརྗེ་བ། གཉེན་པོ་ལ་བདག་ཏུ་བྱས་ནས་སེམས་ཚར་བཅད་པ། ལུས་ལ་ཆགས་པ་ཉེས་པའི་འབྱུང་གནས་སུ་བསྟན་པའོ། །དང་པོ་ལ་ཡང༌། བསྟན་བཤད་གཉིས་ཀྱི། དང་པོ་མདོར་བསྟན་པ་ནི། དམན་སོགས་བདག་ཏུ་བྱས་པ་ དང༌། །གཞན་ཉིད་དུ་ནི་བདག་བྱས་ནས། །རྣམ་རྟོག་མེད་པའི་སེམས་ཀྱིས་སུ། །ཕྲ་དོག་དང་ནི་ང་རྒྱལ་སྒོམ། །ཞེས་སོ། །གཉིས་པ་རྒྱས་བཤད་ལ་གསུམ། སེམས་ཅན་རྣམས་བདག་ཏུ་བྱས་ནས་གཞན་ལུས་སེམས་ལ་ཕྲག་དོག་སྒོམ་པ།

Page: 600 སེམས་ཅན་རྣམས་བདག་ཏུ་བྱས་ནས་གཞན་ལུས་སེམས་ལ་འགྲན་སེམས་སྒོམ་པ། སེམས་ཅན་རྣམས་བདག་ཏུ་བྱས་ནས་གཞན་ལུས་སེམས་ལ་ང་རྒྱལ་སྒོམ་པའོ། །དང་པོ་ནི། འདི་ནི་བཀུར་བྱས་བདག་ནི་མིན། །འདི་བཞིན་ བདག་གིས་མ་རྙེད་ཅིང༌། །འདི་ནི་བསྟོད་བྱས་བདག་ལ་སྨོད། །འདི་བདེ་བདག་ནི་སྡུག་བསྔལ་ལ། །བདག་ནི་ལས་རྣམས་བྱེད་པ་དང༌། །འདི་ནི་བདེ་བ་ཉིད་དུ་གནས། །འདི་ནི་འཇིག་རྟེན་ལ་ཆེ་དང༌། །བདག་དམན་ཡོན་ཏན་མེད་པར་ གྲགས། །ཡོན་ཏན་མེད་པས་ཅི་ཞིག་བྱ། །བདག་ཀུན་ཡོན་ཏན་ལྡན་པ་ཉིད། །གང་བས་དེ་དམན་དེ་ཡོད་ཅིང༌། །གང་བས་བདག་མཆོག་དེ་ཡང་ཡོད། །ཚུལ་ཁྲིམས་ལྟ་བས་རྒུད་སོགས་ནི། །ཉོན་མོངས་སྟོབས་ཀྱིས་བདག་དབང་ མིན། །ཅི་ནུས་བདག་གིས་གསོ་དགོས་ཏེ། །གནོད་པའང་བདག་གིས་དང་དུ་བླང༌། །འོན་ཏེ་བདག་འདིའི་གསོ་བྱ་མིན། །ཅི་ཕྱིར་བདག་ལ་བརྙས་པ་བྱེད། །བདག་ལ་དེ་ཡི་ཡོན་ཏན་གྱིས། །ཅི་བྱ་འདི་བདག་ཡོན་ཏན་ཅན། །ངན་འགྲོ་གདུག་ པའི་ཁར་གནས་པའི། །འགྲོ་ལ་སྙིང་རྗེ་མེད་པར་འདི། །ཕྱིར་ལ་ཡོན་ཏན་རློམ་པ་ཡིས། །མཁས་པ་དག་ལ་བསྡོ་བར་འདོད། །ཅེས་གསུངས་ཏེ། བདག་ཀུན་ཡོན་ཏན་ལྡན་པ་ཉིད། །ཅེས་པ་ཡན་གྱིས་ལུས་སེམས་ལ་རྙེད་བཀུར་དང་ གྲགས་པ་བྱུང་བ་ལ་བདག་སེམས་ཅན་གྱིས་མི་བཟོད་པ་སྒོམ་པ་དང༌། ཅི་ཕྱིར་བདག་ལ་བརྙས་པ་བྱེད་ཀྱི་བར་གྱིས་ལུས་སེམས་ཀྱིས་བརྙས་པ་བྱས་པ་བདག་སེམས་ཅན་གྱིས་མི་བཟོད་པ་དང༌། ལྷག་མས་ལུས་སེམས་ཀྱིས་བསྡོ་བ་ བདག་སེམས་ཅན་གྱིས་མི་བཟོད་པ་སྒོམ་པའོ། །གཉིས་པ་་ནི། བདག་དང་མཉམ་གཞན་ལ་བལྟས་ནས། །གང་གིས་རང་ནི་ལྷག་བྱའི་ཕྱིར། །བདག་གི་རྙེད་དང་བཀུར་སྟི་ནི། །རྩོད་པ་ཡིས་ཀྱང་ངེས་པར་སྒྲུབ། །ཅི་ནས་བདག་

Page: 601 ༄༅། །གི་ཡོན་ཏན་ནི། །འཇིག་རྟེན་ཀུན་ལ་གྲགས་པ་དང༌། །གཞན་ཡང་འདི་ཡི་ཡོན་ཏན་གང༌། །སུས་ཀྱང་ཐོས་པར་མི་འགྱུར་བྱ། །བདག་གི་སྐྱོན་ཡང་སྦ་བྱ་ཞིང༌། །བདག་ནི་མཆོད་འགྱུར་འདི་ལ་མིན། ། བདག་དེང་རྙེད་པ་ལེགས་བརྙེད་ཅིང༌། །བདག་ནི་བཀུར་འགྱུར་འདི་ལ་མིན། །འདི་ནི་མ་རུངས་བྱས་པ་ལ། །ཡུན་རིང་བདག་ནི་དགའ་བས་ལྟ། །འགྲོ་བ་ཀུན་གྱིས་བཞད་གད་དང༌། །ཕན་ཚུན་སྨོད་པ་དག་ཏུ་བྱ། །ཞེས་གསུངས་ཏེ། དང་པོས་ལུས་སེམས་ལ་རྙེད་བཀུར་འདུག་ན་ཕྲོགས་ཏེ་བདག་སེམས་ཅན་གྱིས་སྤྱོད་པ་དང༌། གཉིས་པས་ལུས་སེམས་ནི་གྲགས་སུ་མི་གཞུག་ཅིང་བདག་སེམས་ཅན་གྱི་གྲགས་པ་སྤེལ་བ་དང༌། གཉིས་ཀྱིས་ཉེས་པ་ཐམས་ཅད་ གཞན་ལུས་སེམས་འདི་ལ་བསྐུར་ཞིང་ལེགས་པ་ཐམས་ཅད་བདག་སེམས་ཅན་གྱིས་སྤྱོད་པར་བསྟན་ཏོ། །གསུམ་པ་ནི། ཉོན་མོངས་འདི་ཡང་བདག་དང་ནི། །ལྷན་ཅིག་ཏུ་ནི་འགྲན་ཞཻས་གྲག །འདི་བདག་ཐོས་དང་ཤེས་རབ་བམ། ། གཟུགས་རིགས་ནོར་གྱིས་མཉམ་མམ་ཅི། །དེ་ལྟར་ཀུན་ལ་གྲགས་པ་ཡི། །བདག་གི་ཡོན་ཏན་ཐོས་ནས་ནི། །སྤུ་ལྡང་དགའ་བ་སྐྱེ་འགྱུར་བའི། །བདེ་སྐྱིད་ལ་ནི་ཡོངས་སུ་སྤྱོད། །ཅི་སྟེ་འདི་ལ་རྙེད་ཡོད་ཀྱང༌། །གལ་ཏེ་ང་ཡི་ལས་ བྱེད་ན། །འདི་ལ་འཚོ་བ་ཙམ་བྱིན་ནས། །བདག་གི་སྟོབས་ཀྱིས་དེ་བླང་བྱ། །འདི་ནི་བདེ་ལས་ཉམས་བྱ་ཞིང༌། །བདག་གི་སྣོད་དང་རྟག་སྦྱར་བྱ། །ཞེས་གསུངས་ཏེ། གཉིས་ཀྱིས་ལུས་སེམས་ལས་བདག་སེམས་ཅན་ལྷག་པར་ བསྟན། ཚིགས་བཅད་ཕྱེད་དང་གཉིས་ཀྱིས་དེ་བདག་གི་བྲན་དུ་བཀོལ་བར་བསྟན་ཏོ། །གཉིས་པ་བདག་འཛིན་རང་སར་བཞག་ནས་བདག་གཞན་བརྗེ་བ་ནི། འདི་ཡིས་བརྒྱ་ཕྲག་ཐམས་ཅད་དུ། །འཁོར་བར་བདག་ལ་གནོད་པ་བྱས། །

Page: 602 ཡིད་ཁྱོད་རང་དོན་བྱེད་འདོད་པས། །བསྐལ་པ་གྲངས་མེད་འདས་གྱུར་ཀྱང༌། །ངལ་བ་ཆེན་པོ་དེ་ལྟ་བུས། །ཁྱོད་ཀྱི་སྡུག་བསྔལ་འབའ་ཞིག་བསྒྲུབས། །དེ་ལྟར་ངེས་པར་གཞན་དག་གི །དོན་ལ་རབ་ཏུ་འཇུག་གྱིས་དང༌། །ཐུབ་པའི་ བཀའ་ནི་མི་སླུ་བས། །དེ་ཡི་ཡོན་ཏན་ཕྱིས་མཐོང་འགྱུར། །གལ་ཏེ་ཁྱོད་ཀྱིས་སྔ་དུས་སུ། །ལས་འདི་བྱས་པར་གྱུར་ན་ནི། །སངས་རྒྱས་ཕུན་སུམ་བདེ་མིན་པ། །འདི་འདྲའི་གནས་སྐབས་སྲིད་མི་འགྱུར། །དེ་བས་འདི་ལྟར་གཞན་ དག་གི། ཁུ་བ་ཁྲག་གི་ཐིགས་པ་ལ། །ཁྱོད་ཀྱིས་བདག་འཛིན་བྱས་པ་ལྟར། །དེ་བཞིན་གཞན་ལའང་གོམས་པར་གྱིས། །གཞན་གྱི་རྟོག་ཆེན་བྱས་ནས་ནི། །བདག་གི་ལུས་ལ་ཅི་སྣང་བ། །དེ་དང་དེ་ཉིད་ཕྲོགས་བྱས་ནས། །ཁྱོད་ཀྱིས་ གཞན་ལ་ཕན་པར་སྦྱོར། །བདག་སྐྱིད་གཞན་ནི་མི་སྐྱིད་ལ། །བདག་མཐོ་གཞན་ནི་དམའ་བ་དང༌། །བདག་ནི་ཕན་བྱེད་གཞན་མིན་ཞེས། །བདག་ལ་ཕྲག་དོག་ཅིས་མི་བྱེད། །བདག་ནི་བདེ་དང་བྲལ་གྱིས་ཏེ། །གཞན་གྱི་སྡུག་ བསྔལ་བདག་ལ་སྦྱོར། །གང་ཚེ་འདི་ན་ཅི་བྱེད་ཅེས། །བདག་གི་སྐྱོན་ལ་བརྟག་པར་གྱིས། །གཞན་གྱིས་ཉེས་པ་བྱས་པ་ཡང༌། །རང་གི་སྐྱོན་དུ་བསྒྱུར་བྱོས་ལ། །བདག་གིས་ཉེས་པ་ཆུང་བྱས་ཀྱང༌། །སྐྱེ་བོ་མང་ལ་རབ་ཏུ་ཤོགས། ། གཞན་གྱི་གྲགས་པ་ལྷག་བརྗོད་པས། །རག་གི་གྲགས་པ་ཟིལ་གྱིས་གནོན། །བདག་གི་བྲན་གྱི་ཐ་མ་ལྟར། །དོན་རྣམས་ཀུན་ལ་བཀོལ་བར་གྱིས། །འདི་ནི་སྐྱོན་ཅན་རང་བཞིན་ཏེ། །གློ་བུར་ཡོན་ཏན་ཆས་མི་བསྟོད། ། འདི་ཡི་ཡོན་ཏན་ཅི་ནས་ཀྱང༌། །འགས་ཀྱང་མི་ཤེས་དེ་ལྟར་གྱིས། །མདོར་ན་བདག་གི་དོན་གྱི་ཕྱིར། །ཁྱོད་ཀྱིས་གཞན་ལ་གནོད་བྱས་གང༌། །གནོད་དེ་སེམས་ཅན་དོན་གྱི་ཕྱིར། །བདག་ཉིད་ལ་ནི་འབབ་པར་གྱིས། །འདི་ནི་

Page: 603 ༄༅། །གཉའ་དྲག་འགྱུར་ཚུལ་དུ། །ཤེད་སྐྱེད་པར་ནི་མི་བྱ་སྟེ། །བག་མ་གསར་བའི་ཚུལ་བཞིན་དུ། །ངོ་ཚས་འཇིགས་དང་བསྡམས་ཏེ་བཞག །ཞེས་གསུངས་ཏེ། ཚིགས་བཅད་ཕྱེད་དང་གཉིས་ཀྱིས་སྔར་རང་དོན་ འབའ་ཞིག་བསམས་པས་བསླུས་པར་བསྟན། གཉིས་ཀྱིས་ཕྱིན་ཆད་དེ་ལས་ལྡོག་པར་གདམས། ལྷག་མས་བདེ་དགེ་རྣམས་གཞན་ལ་བྱིན་ལ་སྡུག་བསྔལ་བདག་གིས་ལོང་ཞིག་པར་གདམས་སོ། །གསུམ་པ་གཉེན་པོ་ལ་བདག་ ཏུ་བྱས་ནས་སེམས་ཚར་བཅད་པ་ནི། དེ་བྱ་དེ་ལྟར་གནས་བྱ་ཞིང༌། །དེ་ལྟར་ཁྱོད་ཀྱིས་མི་བྱ་བ། །དེ་ལྟར་འདི་ནི་དབང་བྱ་སྟེ། །དེ་ལས་འདས་ན་ཚར་བཅད་བྱ། །འོན་ཏེ་དེ་ལྟར་གདམས་ཀྱང་ནི། །སེམས་ཁྱོད་དེ་ལྟར་མི་བྱེད་ན། ། ཁྱོན་ལ་ཉེས་ཀུན་བརྟེན་པས་ན། །ཁྱོན་ཉིད་ཚར་བཅད་བྱ་བར་ཟད། །ཁྱོད་ཀྱིས་ཁོ་བོ་གར་བརླག་པའི། །སྔོན་གྱི་དུས་དེ་གཞན་ཡིན་ཏེ། །ངས་མཐོང་ཁྱོད་ད་གང་དུ་འགྲོ། ཁྱོད་ཀྱི་དྲེགས་པ་ཀུན་གཞོམ་བྱ། །ད་དུང་བདག་ ལ་རང་གི་དོན། །ཡོད་སྙམ་སེམས་པ་དེ་དོར་ཞིག །བདག་གིས་གཞན་ལ་ཁྱོད་བཙོངས་ཀྱིས། །སྐྱོ་བར་མ་སེམས་ཞོ་ཤ་ཕུལ། །གལ་ཏེ་བག་མེད་གྱུར་ནས་ཁྱོད། །སེམས་ཅན་རྣམས་ལ་མ་བྱིན་ན། །ཁྱོན་ཀྱིས་ཁོ་བོ་དམྱལ་བ་ཡི། ། སྲུང་མ་རྣམས་ལ་བྱིན་དུ་ངེས། །དེ་ལྟར་ཁྱོད་ཀྱིས་རེ་ལྟ་ཞིག །ཁོ་བོ་བྱིན་པས་ཡུན་རིང་སྡུག །ད་ནི་འཁོན་རྣམས་དྲན་བྱས་ཏེ། །ཁྱོད་ཀྱིས་རང་དོན་སེམས་པ་གཞོམ། །ཞེས་གསུངས་ཏེ། དང་པོ་གཉིས་ཀྱིས་སེམས་ཚར་བཅད་བྱར་བསྟན། གསུམ་པ་དང་བཞི་པས་ཕྱིན་ཆད་སེམས་ཀྱི་དབང་དུ་མི་གཏོང་བར་བསྟན། ཐ་མ་གཉིས་ཀྱིས་སེམས་ཀྱི་དབང་དུ་གཏོང་མི་རིགས་པར་བསྟན་པའོ། །བཞི་པ་ལུས་ལ་ཆགས་པ་ཉེས་པའི་འབྱུང་གནས་སུ་བསྟན་པ་ནི། དེས་ཏེ་བདག་ནི་དགའ་

Page: 604 འདོད་ན། །རང་ལ་བདག་གིས་དགར་མི་བྱ། །དེས་ཏེ་བདག་ནི་སྲུང་འདོད་ན། །གཞན་དག་རྟག་ཏུ་སྲུང་བར་བྱ། །ཇི་ལྟ་ཇི་ལྟར་ལུས་འདི་ནི། །ཡོངས་སུ་སྐྱོང་བར་བྱེད་འགྱུར་བ། །དེ་ལྟ་དེ་ལྟར་ཤིན་ཏུ་ནི། །གཟེ་རེག་ཅན་དུ་གྱུར་ནས་ ལྟུང༌། །དེ་ལྟར་ལྟུང་བ་དེ་ཡི་ཡང༌། །འདོད་པ་ས་འདི་ཐམས་ཅད་ཀྱིས། །རྫོགས་པར་ནུས་པ་ཡོད་མིན་ན། །དེ་ཡི་འདོད་པ་སུས་བྱེད་ནུས། །ནུས་མེད་འདོད་ལས་ཉོན་མོངས་དང༌། །བསམ་པ་ཉམས་པའང་སྐྱེ་བར་འགྱུར། །གང་ཞིག་ ཀུན་ལ་ལྟོས་མེད་པ། །དེ་ཡི་ཕུན་ཚོགས་ཟད་མི་ཤེས། །དེ་བས་ལུས་ཀྱི་འདོད་པ་ནི། །འཕེལ་ཕྱིར་སྐབས་དབྱེ་མི་བྱ་སྟེ། །གང་ཞིག་ཡིད་འོང་མི་འཛིན་པ། །དེ་ནི་དངོས་པོ་བཟང་པོ་ཡིན། །ཐ་མར་ཐལ་བའི་མཐར་གཏུགས་ཤིང༌། ། མི་གཡོ་གཞན་གྱིས་བསྐྱོད་བྱ་བ། །མི་གཙང་གཟུགས་ནི་མི་བཟད་པ། །འདི་ལ་ཅི་ཕྱིར་བདག་ཏུ་འཛིན། །གསོན་ནམ་ཡང་ན་ཤི་ཡང་སླའི། །བདག་ལ་འཁྲུལ་འཁོར་འདིས་ཅི་བྱ། །བོང་སོགས་འདི་ཁྱད་ཅི་ཡོད་ན། །ཀྱེ་ཧུད་ང་རྒྱལ་ སེལ་མི་བྱེད། །ལུས་ཀྱི་ཁ་ཏ་བྱས་པ་ཡིས། །དོན་མེད་སྡུག་བསྔལ་ཉེར་བསགས་ནས། །རྗེས་སུ་ཆགས་དང་ཁོང་ཁྲོ་བ། །ཤིང་མཚུངས་འདི་ལ་ཅི་ཞིག་བྱ། །བདག་གིས་འདི་ལྟར་བསྐྱངས་པ་འམ། །བྱ་རྒོད་སོགས་ཀྱིས་ཟོས་ཀྱང་ རུང༌། །ཆགས་མེད་ཞེ་སྡང་ཡོན་མིན་ན། །ཅི་སྟེ་དེ་ལ་ཆགས་པར་བྱེད། །གང་ཞིག་སྨོད་པས་ཁྲོ་བ་དང༌། །གང་ཞིག་བསྟོད་པས་མགུ་གྱུར་བ། །གལ་ཏེ་དེ་ཉིད་ཤེས་མེད་ན། །བདག་གིས་གང་གི་ངལ་བ་བྱས། །གང་ཞིག་ལུས་ འདི་འདོད་གྱུར་པ། །དེ་དང་བདག་བཤེས་ཡིན་ཞེ་ན། །ཐམས་ཅད་རང་གི་ལུས་འདོད་པས། །དེ་ལ་བདག་ཀོ་ཅིས་མི་དགའ། །ེ་བས་བདག་གིས་ཆགས་མེད་པར། །འགྲོ་ལ་ཕན་ཕྱིར་ལུས་བཏང་བྱ། །དེས་ན་འདི་ལ་ཉེས་མང་ཡང༌། །

Page: 605 ༄༅། །ལས་ཀྱི་སྤྱད་བཞིན་བཟུང་བར་བྱ། །ཞེས་གསུངས་ཏེ། དང་པོས་མདོར་བསྟན། གསུམ་གྱིས་བསྐྱངས་ན་གཟེ་རེག་འཕེལ་བ་དང། ལྔ་པ་དང་དྲུག་པས་བདག་ཏུ་བཟུང་བྱ་མ་ཡིན་པ་དང༌། དེ་ནས་གསུམ་གྱིས་ ལུས་ལ་སྙིང་པོ་མེད་པ་དང༌། གཉིས་ཀྱིས་ལུས་ལ་བསྟོད་དམད་བྱས་པ་ལ་ཆགས་སྡང་སྐྱེད་མི་རིགས་པ་དང༌། ཐ་མས་ལུས་སྙིང་པོ་མེད་ཀྱང་དུས་མིན་དུ་མི་དོར་ཞིང་དུས་སུ་ཕྱིན་ན་བཏང་བྱར་བསྟན་པ་ཡིན་ནོ། །དེ་ཡང་བདག་མེད་སྒོམ་པ་ནི་ ཆོས་ཀྱི་མཆོག་ཡིན་ལ། བདག་གཞན་བརྗེ་བ་ནི་དེ་ལྟ་མ་ཡིན་ནོ་སྙམ་ན། སྤྱིར་གང་ཟག་གི་བདག་རྟོག་དང༌། གཟུང་བའི་བདག་རྟོག་ཙམ་གཙོ་བོར་ཟློག་པ་ནི་ཉན་རང་གི་ལམ་སྟེ་འབྲས་བུ་ཉི་ཚ་བར་ཟད་ལ། ཇི་ལྟར་རྡོ་གཙང་མའི་སྟེང་དུ་ས་བོན་མི་སྐྱེ་ལ། ས་གཞི་ལྗན་ལྗིན་དང་བཙོག་པས་ཁེབས་པ་ལ་ནི་ལོ་ཐོག་ལེགས་པར་སྐྱེ་བ་ལྟར་ཉན་རང་སྲེད་པ་དང་བྲལ་བ་ལ་ནི་དེ་ལྟ་མིན་ལ། སོ་སྐྱེ་ཉོན་མོངས་ཀྱི་འཆིང་བ་ཐམས་ཅད་པ་ལ་ནི་བྱང་ཆུབ་ཀྱི་སེམས་ཡོན་ཏན་ཐམས་ཅད་པ་སྐྱེ་སྟེ། དེའི་ཕྱིར་བདག་ཏུ་འཛིན་ པ་ནི་དེ་བཞིན་གཤེགས་པའི་གདུང་ངོ༌། །མ་རིག་པ་དང༌། འདོད་ཆགས་དང༌། ཞེ་སྡང་དང༌། གཏི་མུག་ནི་དེ་བཞིན་གཤེགས་པའི་གདུང་ངོ༌། །ཞེས་དང༌། ཇི་ལྟར་གྲོང་ཁྱེར་སྐྱོ་བོའི་མི་གཙང་ལུད། །དེ་ནི་བུ་རམ་ཤིང་པའི་ཞིང་ལ་ཕན། །དེ་བཞིན་བྱང་ ཆུབ་སེམས་དཔའི་ཉོན་མོངས་ལུད། །དེ་ནི་སངས་རྒྱས་ཆོས་རྣམས་སྐྱེད་ལ་ཕན། །ཞེས་གསུངས་པ་ཡིན་ནོ། །ཁ་ཅིག་འདི་ནི་སྙིང་རྗེ་ལ་ཉོན་མོངས་ཀྱི་སྒྲས་བསྟན་པ་སྟེ། ཉོན་མོངས་ཀྱིས་འཁོར་བར་སྐྱེ་བ་ལྟར་སྙིང་རྗེས་ཀྱང་བྱང་ཆུབ་སེམས་ གཞན་དོན་དུ་སྲིད་པ་འཛིན་པའི་རྒྱུ་བྱེད་པས་སོ་ཟེར་ཡང༌། དེ་ནི་ཐབས་མཁས་པའི་ལམ་ལ་སྐྱི་གཡའ་བས་འཁྱོག་འགྲོས་སུ་སྨྲ་བར་ཟད་དེ། ཉོན་མོངས་དགྲོལ་བ་རྡོ་རྗེ་ཐེག་པའི་གཏམ་རྣམས་ཆོས་མ་ཡིན་པར་སྒྲོག་འདོད་པའི་གཏམ་

Page: 606 ཡིན་གྱི། དེས་འདུལ་གྱི་གདུལ་བྱ་ལ་སྟོན་ན་དེར་ཟད་གཞན་དུ་ན་དེར་ཞེན་པར་མི་བྱའོ། །དེས་ན་བདག་ནི་བཟུང་བ་ཙམ་ལས་རང་བཞིན་མི་དམིགས་པར་ཤེས་ནས་བྱ་ནམ་མཁའ་ལ་འཕུར་རྩལ་སྦྱོང་བ་ལྟར། རེས་གཞན་བདག་ཏུ་བྱས་ཤིང་བདག་ ཉིད་གཞན་དུ་བཞག་པ་དང༌། རེས་གཉེན་པོའི་སེམས་བདག་ཏུ་བྱས་ིང་བདག་འཛིན་གཞན་དུ་བཞག་པ་སོགས་རྣམ་པ་དུ་མས་རྒྱུད་སྦྱངས་ཏེ་ཕ་རོལ་ཏུ་ཕྱིན་པ་རྣམས་རྫོགས་པར་བྱེད་པས་བདག་འཛིན་དང་བདག་མེད་སོགས་ནི་རྒན་པོའི་ མདུན་ན་བྱིས་པའི་རྩེད་མོ་ལྟར་མཐོང་བར་འགྱུར་ལ། ལས་དང་པོ་པ་གང་ཟག་གི་བདག་འཛིན་སྟུག་པོ་ཅན་ཡང་འདི་ལྟར་སྦྱངས་པ་ན་བདག་འགོག་གི་རིགས་པ་ལ་མ་ལྟོས་པར་བདག་ཏུ་འཛིན་པ་ཐམས་ཅད་ཀྱང་རྣམ་པར་གྲོལ་བར་འགྱུར་ན་གང་ ཟག་གི་བདག་འཛིན་ཁོ་ན་ཞིག་ལྟ་སྨོས་ཀྱང་ཅི་དགོས། གང་ཟག་གི་བདག་མེད་དོ་ཞེས་ཁ་དོན་དུ་བྱེད་པ་ནི་བདག་མེད་སྒོམ་པ་མིན་ལ། གང་ཟག་གི་བདག་མེད་པར་ངེས་པ་རྒྱུད་ལ་མ་སྐྱེད་པར་མེད་དོ་ཞེས་འཛིན་པ་ནི་བདག་མེད་ཤེས་པ་མ་ ཡིན་ཏེ། ཁ་ཟས་ཁ་ཟས་ཞེས་ཁ་དོན་བྱེད་པ་ནི་ཁ་ཟས་སྒྲུབ་པ་མ་ཡིན་ལ། ཁ་ཟས་ཡོད་དོ་སྙམ་དུ་འཛིན་པ་ནི་ཁ་ཟས་ལ་ལོངས་སྤྱོད་པ་མ་ཡིན་པ་བཞིན་ནོ་ཞེས་འདིར་ཡང་ཤེས་པར་བྱའོ། །ཡང་བདག་གཞན་བརྗེ་བ་ཞེས་བྱ་བ་དེ་ཅི། ཇི་ ལྟར་བ་ལང་དང་བདག་ཉིད་བདག་གཞན་བརྗེ་བའི་ཚེ་ན་བདག་བ་ལང་དུ་འགྱུར་ལ། བ་ལང་བདག་ཉིད་དུ་འགྱུར་བ་ཞིག་ཡིན་ནམ། དེ་ལྟ་ན་སེམས་ཅན་གཅིག་གི་སེམས་རྒྱུད་དེ་གཅིག་ཤོས་ཀྱི་སེམས་རྒྱུད་དུ་ཕན་ཚུན་འགྱུར་དགོས་ལ་དེ་ ལྟ་བུ་ནི་གནས་མ་ཡིན་ནོ། །གལ་ཏེ་མི་འགྱུར་ན་ནི་བདག་གཞན་ཇི་ལྟར་བརྗེ་ཅེ་ན། འདི་ལ་མཚོ་སྣ་པས། ཅི་བདག་གཞན་བརྗེ་བ་དེ་བདག་གཞན་གྱི་ལུས་སེམས་གང་རུང་ཞིག་བརྗེ་འམ། གཉིས་ཀ་བརྗེ། དང་པོས་ལྟར་ན་གཞན་གྱི་

Page: 607 ༄༅། །ལུས་སེམས་གང་རུང་ཞིག་སྡུག་བསྔལ་ལས་སྲུང་མི་དགོས་པར་འགྱུར། གཉིས་པ་ལྟར་ན་གཞན་ལུས་ཀྱིས་གཞན་སེམས་བསྲུངས་པ་ལ་མི་རིགས་པ་མེད་པ་ལ། གཞན་དབང་མིག་ལ་སོགས་པ་ཡིས། ། རང་དོན་སྒྲུབ་པ་རིགས་མ་ཡིན། །ཞེས་པ་མི་འཐད་དོ་ཞེ་ན། བདག་ལ་སྲུང་བྱའི་ཆ་དང་སྲུང་བྱེད་ཀྱི་ཆ་གཉིས་ལས་སྲུང་བྱའི་ཆ་ནས་བདག་གཞན་བརྗེ་བ་ཡིན་ནོ། །དེ་ལ་རེས་འགའ་ནི་བདག་གཞན་མིང་དོན་གཉིས་ཀ་བརྗེས་པ་དང༌། རེས་འགའ་ མིང་འབའ་ཞིག་བརྗེས་པ་དང༌། རེས་འགའ་བདག་གི་ལུས་གཞན་ལ་བྱིན་པའི་ཚུལ་གྱིས་འཆད་དོ་ཞེས་བཤད་ཀྱང་དཔྱད་པའི་གཞི་སྟེ། ལུས་སེམས་གང་རུང་བརྗེ་འམ་གཉིས་ཀ་བརྗེ་ཞེས་རང་གིས་དོགས་པ་བཀོད་ནས། སྲུང་བྱ་དང་སྲུང་བྱེད་ གཉིས་ལས་སྲུང་བྱའི་ཆ་བརྗེ་ཞེས་རང་གིས་ལན་འདེབས་པ་ནི་བདག་གི་བུ་རམ་དང་གཞན་གྱི་སྦྲང་བརྗེ་བ་ན་སྣོད་བཅུད་གཉིས་ཀ་བརྗེ་འམ་གང་རུང་བརྗེ་ཞེས་དོགས་པ་བཀོད་ནས་བུ་རམ་ལ་ཤིང་དང་ཁུ་བ་གཉིས་ལས་ཁུ་བའི་ཆ་བརྗེའོ་ཞེས་ ལན་བཏབ་པ་ལྟ་བུ་སྟེ་སྙིང་པོ་མ་མཐོང་ལ། རེས་འགའ་མིང་དོན་གཉིས་ཀ་བརྗེའོ་ཞེས་སོགས་ཀྱང་ལུས་སེམས་གཉིས་ཀའི་འམ་རེ་རེའི་ཡིན་ཞེས་སླར་དྲི་དགོས་སོ། །བདག་ལ་སྲུང་བྱའི་ཆ་དང་སྲུང་བྱེད་ཀྱི་ཆ་གཉིས་ཞེས་པའང་སྤྱིར་རང་རྒྱུད་ ཀྱིས་ཟིན་པའི་ཕུང་པོ་ལྔ་ལ་བདག་གི་འདུ་ཤེས་འཇུག་པ་ཡིན་ལ། དེ་ལ་དེའི་ལུས་སུ་སྣང་བ་གཟུགས་ཕུང་སྲུང་བྱ་དང་གཞན་བཞི་པོ་སྲུང་བྱེད་དུ་འདོད་རྒྱུ་ཡིན་ནམ། བདག་འཛིན་ནི་འདུ་ཤེས་ཡིན་པས་འདུ་ཤེས་ཁོ་ནའི་སྟེང་ནས་བདག་སྡུག་ བསྔལ་ལོ་སྙམ་པ་སྲུང་བྱ་དང༌། བདག་གི་སྡུག་བསྔལ་ཞི་བར་བྱའོ་སྙམ་པ་ལྟ་བུ་སྲུང་བྱེད་དུ་འདོད་དམ། བདག་འཛིན་ལ་མ་ལྟོས་པའི་སྲུང་བྱ་དང་སྲུང་བྱེད་ཀྱི་བདག་ཁས་ལེན་ནམ་ཅི། རེ་རེ་ཞིང་ཡང་མི་རིགས་ཏེ། བདག་འཛིན་ནི་མ་བརྟགས་པར་

Page: 608 འཁྲུལ་པ་ཁོ་ན་ཡིན་པའི་ཕྱིར། ཡུལ་རེ་རེ་ལ་ཡང་རེས་སྲུང་བྱ་དང་རེས་སྲུང་བྱེད་དུ་རྟོག་པས་རྨི་ལམ་ལྟར་ཉིང་འཁྲུལ་པ་ཁོ་ན་ཡིན་ཏེ། རེས་ལུས་སེམས་ཚོགས་པ་ལ་བདག་འགྲོའ་བཟའོོ་ཞེས་སོགས་བདག་ཏུ་ལྟ་ཞིང༌། རེས་བདག་གི་ལུས་ཞེས་ ལུས་ལ་བདག་གི་བའི་འདུ་ཤེས་སྐྱེ་ཞིང་སེམས་ལ་བདག་ཏུ་རྟོག་ལ། རེས་བདག་གི་སེམས་ཞེས་སེམས་ལ་ཡང་བདག་གི་བའི་འདུ་ཤེས་འཇུག་པས་བདག་ནི་དེ་ལས་གཞན་པར་ལྟ་བའི་ཕྱིར། སྲུང་བྱ་དང་སྲུང་བྱེད་ཀྱི་བདག་ཐ་དད་པ་ཅི་ཡང་མེད་ དེ་ཁྱད་གཞི་བདག་དཔྱད་ན་མི་རྙེད་པའི་ཕྱིར་རོ། །བདག་མེད་ན་བདག་གཞན་ཇི་ལྟར་བརྗེ་ཞེ་ན། བདག་གཞན་གཉིས་ཀ་ཡོད་ནས་བརྗེ་བ་མ་ཡིན་མོད་ཀྱང༌། འཁོར་བ་ཐོག་མ་མེད་པའི་བག་ཆགས་ཀྱིས་སེམས་ཅན་རྣམས་བདག་གཞན་དུ་རྟོག་ ཅིང་ཀུན་ནས་ཞེན་ལ། བདག་ཉིད་ལ་གཅེས་སྤྲས་སུ་ལྟ་བ་བཟློག་པའི་ཕྱིར། ཤིང་འཁྱོག་པོ་སྲོང་བ་ལྟ་བུའི་ཚུལ་གྱིས་བདག་པས་གཞན་གཅེས་པར་ལྟ་བ་ཡིན་ལ། བདག་མེད་རྟོགས་ནའང་བདག་གཞན་བརྗེ་བ་ནི་མི་འགལ་ཏེ་ས་ཐོབ་པའི་ སྐྱེས་རབས་རྣམས་སུ་ཉ་རོ་ཧི་ཀ་དང༌། རྒྱལ་པོ་དཔལ་གྱི་སྡེ་ལ་སོགས་པས་གཞན་གྱི་བདེ་བའི་ཆེད་དུ་བདག་གི་སྡུག་བསྔལ་དང་དུ་བླངས་པ་མཐའ་ཡས་པའི་ཕྱིར་དང༌། སོ་སྐྱེ་ནི་བདག་གཞན་བརྗེ་བ་བསམ་པས་སྒོམ་པར་ཟད་ལ་འཕགས་ཆེན་རྣམས་ སྦྱོར་བས་དངོས་སུ་སྒྲུབ་པའི་ཕྱིར། བདག་མེད་རྟོགས་ཀྱང་རྗེས་ཐོབ་ཏུ་བདག་གི་ཐ་སྙད་ཙམ་རང་སོར་འཇོག་སྟེ། དགྲ་བཅོམ་པ་རྣམས་ཀྱང་བདག་བསོད་སྙོམས་ལ་འཇུག་གོ་ཞེའམ། བདག་ནང་དུ་ཡང་དག་འཇོག་གོ་ཞེའམ་བདག་གི་ཕྱགས་ བདར་ཁྲོད་པའི་རྣམ་སྦྱར་ཅེས་སོགས་སྨྲ་ཞིང༌། དེ་བཞིན་གཤེགས་པ་ཡང་འཇིག་རྟེན་དང་མཐུན་པར་འཇུག་པས་ང་མངོན་པར་རྫོགས་པར་སངས་རྒྱས་སོ་ཞེས་སོགས་གསུངས་པའི་ཕྱིར་དང༌། བདག་གཞན་དུ་གདགས་པ་ཙམ་མ་བཞག་ན་འཇིག་

Page: 609 ༄༅། །རྟེན་གྱི་ཐ་སྙད་ཐམས་ཅད་མི་རུང་བའི་ཕྱིར་རོ། །དེས་ན་བདག་འཛིན་ནི་སེམས་ཀྱིས་ཡུལ་གང་ལ་ངའམ་ངའི་འོ་ཞེས་རློམ་པ་དེ་གོམས་པ་ཁོ་ན་ཡིན་ལ། གང་གོམས་དེ་ལ་བདག་དང་བདག་གི་བའི་འདུ་ཤེས་འཇུག་སྟེ། དེ་རིང་ གཞན་གྱིས་བདག་ལ་གླང་པོ་ཆེ་ཞིག་བྱིན་ན་ཁ་སང་ཕན་དེ་ལ་བདག་གི་བའི་འདུ་ཤེས་མེད་ཀྱང་དེ་རིང་ནས་བདག་གི་གླང་པོ་ཆེ་ཞེས་རྟོག་ལ། ཤིང་གི་ལྷ་ཁ་ཅིག་ཤིང་ལ་བདག་གི་འདུ་ཤེས་སྐྱེ་བ་དང༌། སའི་ལྷ་ཁ་ཅིག་ས་ལ་བདག་གོ་ཞེས་འདུ་ཤེས་ པ་ཡང་ཡོད་པས་ས་ལྷ་ལ་ས་དང༌། མེ་ལྷ་ལ་མེ་དང༌། གངྒཱའི་ལྷ་མོ་ལ་གངྒཱར་བརྗོད་པ་ལྟ་བུ་སྟེ་ཕྱི་རོལ་པ་དག་གངྒཱ་ཆུར་ཡང་འདོད་ཅིང་བུད་མེད་ཀྱང་ཡིན་པར་སྒྲོག་པ་ལྟ་བུ་ཡིན་ལ། དེ་གང་གི་ཚེ་ཡང་སེམས་ཀྱི་འཛིན་སྟངས་སུ་ཟད་ཀྱི་ཇི་ལྟར་བཟུང་ བའི་བདག་དེ་ནི་ཤེས་བྱ་ལ་སྲིད་པ་མ་ཡིན་ནོ། །དེས་ན་བདག་མེད་པའི་ཕྱིར། དེའི་ལྟོས་ཟླ་གཞན་ཡང་མེད་པས་བདག་གཞན་ཉིད་ངོ་བོ་ཉིད་ཀྱིས་མེད་ལ། གང་རྒྱུ་རྐྱེན་གྱི་རྟེན་འབྲེལ་ལས་སྣང་ཙམ་པ་བདག་གཞན་དུ་སྒྲོ་མ་བཏགས་ པའི་མངོན་སུམ་པ་ཙམ་འདི་ཡང་སྐད་ཅིག་མའི་ཕྲེང་བ་ཡིན་ལ། དེ་ལས་འདས་པ་ནི་འགགས་པས་བརྗེར་མེད། མ་འོངས་པ་མ་སྐྱེས་པས་བརྗེར་མེད། ད་ལྟར་བ་ལ་གཅིག་ཐ་དད་མི་དམིགས་པས་བརྗེར་མེད་པས་ཆོས་གང་ཞིག་གང་ནས་གང་དུ་ སྤོ་བ་དང་གང་ནས་གང་དུ་བརྗེ་བར་བྱ་བ་རྡུལ་ཙམ་ཡང་མེད་མོད་ཀྱི་དེ་ལྟར་ཤེས་པ་ཉིད་ཀྱིས་བདག་གཞན་ལ་སོགས་པའི་འཛིན་སྟངས་སྣ་ཚོགས་པ་གོམས་པའི་དབང་གིས་སྐྱེ་བར་སྣང་ཙམ་པ་འདི་ལ་བཞད་གད་ཀྱི་གནས་སུ་མཐོང་སྟེ། སྦྲུལ་ སྔགས་མཁན་དུག་སྦྲུལ་ལ་རྩེད་མོར་བྱེད་པ་དང༌། བྱ་ནམ་མཁའ་ལ་རྩེ་བ་དང༌། ཉ་ཆུ་ནང་ན་རྩེ་བ་ལྟར་རང་བཞིན་ཤེས་པས་བདག་འཛིན་ལ་འཇིགས་པ་མེད་པར་རྩེད་མོ་ལྟར་བྱེད་ཅིང་བླ་ན་མེད་པའི་ལམ་སྦྱོང་བ་ཡིན་ནོ། །དེས་ན་བདག་གཞན་

Page: 610 ལ་བརྗེ་རྒྱུ་མེད་ཀྱང་འདུ་ཤེས་ཀྱི་འཛིན་སྟངས་བསྒྱུར་ནས་སྔར་བདག་ཉིད་གཅེས་པར་འཛིན་པ་དེ་ཕྱིས་གཞན་གཅེས་འཛིན་དུ་བསྒྱུར་བ་དང༌། སྔར་བདག་ཏུ་བཟུང་བ་དེ་གཞན་དུ་བཞག་ནས་སྔར་གཞན་དུ་བཟུང་བ་དེ་ཕྱིས་བདག་ཏུ་འདུ་ཤེས་བསྒྱུར་ནས་ འཛིན་པ་ལ་སོགས་ཚུལ་སྣ་ཚོགས་པས་ཞི་བདེ་དོན་གཉེར་གྱི་རྟོག་པ་རྨི་ལམ་ནའང་མེད་པར་བདེ་དགེ་ཐམས་ཅད་སེམས་ཅན་ལ་གཏོང་བ་ནི་བདག་གཞན་བརྗེ་བའི་བྱང་ཆུབ་ཀྱི་སེམས་སྒོམ་པ་ཞེས་འདོགས་པ་ཡིན་ནོ་ཞེས་པ་ནི་ཞར་ལ་དོགས་ པ་དཔྱད་པའོ། །ད་ནི་གཞུང་དོན་དངོས་ལ་འཇུག་པར་བྱ་སྟེ། དེ་ཡང་གཞན་ཕའི་ཁུ་བ་དང་མའི་ཁྲག་གི་ཐིགས་པ་འདྲེས་པའི་གོང་བུ་སྨིན་ནས་ཡན་ལག་དང༌། ཉིང་ལག་དང༌། དབང་པོ་དང་བཅས་པར་སྣང་བ་འདི་ལ་བདག་གམ་གཞན་ཞེས་བྱ་ བ་ཅི་ཡང་མེད་ཀྱང་སེམས་ཀྱིས་བདག་གོ་ཞེས་འདུ་ཤེས་པ་གོམས་པའི་ད་ལྟར་དུ་སེམས་ཁྱོད་ཀྱིས་སེམས་ཅན་གཞན་འདི་རྣམས་ལ་ཡང་བདག་ཏུ་ཅིས་མི་བཟུང་སྟེ། བཟུང་བྱའི་བདག་མེད་པར་ཡང་མཚུངས་ཤིང་བློས་འཛིན་ན་གང་ལ་ཡང་བཟུང་ ཆོག་པའི་ཕྱིར། དེ་ལྟར་གོམས་ན་གཞན་ལུས་ལ་བདག་གི་འདུ་ཤེས་སྐྱེ་ཞིང་བདག་ལུས་ལ་གཞན་གྱི་འདུ་ཤེས་སྐྱེ་བ་ལ་ཡང་དཀའ་བ་ཅི་ཡང་མེད་དོ། །དེས་ན་བདག་འབའ་ཞིག་སྐྱོན་གྱི་ཕུང་པོ་དང༌། གཞན་ཡོན་ཏན་གྱི་རྒྱ་མཚོར་ཤེས་ པས་བདག་གཅེས་པར་འཛིན་པ་དོར་ཏེ། ད་ནི་གཞན་ཁོ་ན་གཅེས་པར་བཟུང་བར་བྱའོ། །གལ་ཏེ་གཞན་མང་པོ་ཡིན་ན་དེ་དང་བདག་གཅིག་པུ་རྗེ་བར་ག་ལ་ནུས་སྙམ་ན་ལུས་འདི་ཡང་ཕྱེ་ན། རུས་ཚིགས་སུམ་བརྒྱ་དྲུག་བཅུ། སྐྲ་ཉི་ཁྲི་ཆིག་སྟོང༌། རྩ་སྟོང་ཕྲག་དོན་གཉིས། བ་སྤུ་བྱེ་བ་ཕྲག་མང་པོ། དོན་ལྔ། སྣོད་དྲུག་སོགས་ཡན་ལག་མང་པོ་ཡིན་ཡང་སེམས་ཀྱིས་བདག་ལུས་གཅིག་ཏུ་འཛིན་པ་ལྟར་སེམས་ཅན་མང་པོ་འདི་རྣམས་ཀྱང་རེ་རེ་ཞིང་སྐྱེ་འགྲོའི་བྱེ་བྲག་ཡིན་ལ། སེམས་ཅན་དེ་ཐམས་

Page: 611 ༄༅། །ཅད་ལ་གཞན་གཅིག་གི་འདུ་ཤེས་སྐྱེ་བར་ནུས་སོ། །དཔེ་འདི་གོང་དུ། ལག་པ་ལ་སོགས་དབྱེ་བ་རྣམ་མང་ཡང༌། །ཞེས་པ་དང་ཟློས་སོ་ཞེ་ན། མི་ཟློས་ཏེ་སྔ་མ་སྲུངབྱར་གཅིག་པ་དང༌། འདི་ལུས་སུ་གཅིག་པའི་དོན་ དུ་འཆད་པའི་ཕྱིར་རོ། །དེ་ལན་གཅིག་སྐྱེས་པས་ཆོག་གམ་སྙམ་ན་ཡང་ཡང་གོམས་པར་བྱ་དགོས་ཏེ་གོམས་པ་ན་བདག་མེད་ཀྱི་ལུས་ལ་བདག་གི་བློ་སྐྱེ་བ་ལྟར་གཞན་ལ་བདག་འཛིན་གོམས་ནའང་དེ་ལ་བདག་གི་འདུ་ཤེས་སྐྱེའོ། ། དེ་ལྟར་སྔར་གཞན་དུ་བཟུང་བ་དེ་ཁོ་ན་ལ་གཅེས་པར་འཛིན་པ་སྐྱེས་ཏེ་རྣམ་པ་སྣ་ཚོགས་པས་དེའི་དོན་སྒྲུབ་པར་འགྱུར་ལ། དེའི་ཚེ་ཡང་དོན་སྒྲུབ་ཡུལ་དེ་ལས་ཕན་བཏགས་པའི་ལན་འདོད་པ་དང་ཚིག་གི་གཏང་རག་རེ་བའམ་འདིའི་དོན་བྱས་ སོ་ཞེས་པའི་རློམ་སེམས་གང་ཡང་འབྱུང་བའི་གནས་མེད་དེ། དཔེར་ན། འཇིག་རྟེན་པ་དག་རང་གི་ཟས་ཟོས་ནས་རང་ལ་ལན་མི་རེ་བ་བཞིན་ནོ། །གོམས་པ་དེ་ཡང་དང་པོར་མེ་ཆུང་ངུ་ནས་གསོ་བ་ལྟར་ཆུང་ངུ་ནས་གོམས་པ་རེ་བྱ་སྟེ། ཇི་ལྟར་ བདག་ཉིད་མི་འདོད་པ་ཆུང་ངུ་ལས་ཀྱང་སྲུང་པ་དེ་ལྟར་སེམས་ཅན་གང་ཡང་རུང་བ་ཞིག་ལ་ཐ་ན་ཀུ་རེ་དང་ཀྱལ་ཀ་ཙམ་དུ་ཡང་མི་འདོད་པ་དང་མི་སྙན་པ་ཆུང་ངུ་ཙམ་འདུག་པའང་བསལ་ཞིང་སྲུང་བར་བྱ་ལ། རྟག་ཏུ་གཞན་ཕན་དང་སྙིང་རྗེའི་ སེམས་རྒྱུན་མི་འཆད་པར་གོམས་ཤིང་ལག་ལེན་དུ་གདབ་པར་བྱའོ། །འགྲེལ་ཆེན་དུ། ཇི་ལྟར་མྱ་ངན་གདུང་སོགས་ལས། །བདག་སྲུང་འདོད་པ་དེ་བཞིན་དུ། །འགྲོ་བ་རྣམས་ལ་སྲུང་སེམས་དང༌། །སྙིང་རྗེའི་སེམས་ནི་གོམས་ པར་བྱ། །ཞེས་འབྲུ་གཉེར་ཏོ། །འགྲོ་བའི་སྡུག་བསྔལ་ཆུང་ངུ་ནས་བསལ་དགོས་ཤིང་སེལ་ནུས་ཏེ། ཇི་ལྟར་མགོན་པོ་སྤྱན་རས་གཟིགས་འཁོར་ལོས་བསྒྱུར་བ་རྩིབས་ཀྱི་མུ་ཁྱུད་ཀྱི་སྲས་ཀྱི་ཐུབ་བོ་མིག་མི་འཛུམ་པར་གྱུར་པའི་ཚེ་བདག་

Page: 612 གིས་སེམས་ཅན་གྱི་ཁམས་ཐམས་ཅད་ལ་རྣམ་པར་བལྟས་ནས་སྡུག་བསྔལ་མཐའ་ཡས་པར་མཐོང་ལ་སྡུག་བསྔལ་དེ་ཐམས་ཅད་ལས་བསྐྱབ་པའི་ཕྱིར། བདག་གིས་བྱང་ཆུབ་སེམས་དཔའི་དུས་ཉིད་ནས་སངས་རྒྱས་ཀྱི་བྱ་བ་བྱ་སྟེ་བདག་གིས་མིང་བྱིན་གྱིས་ བརླབ་པར་བྱའོ། །བདག་གིས་མིང་གང་གིས་ཐོས་པ་ལ་ངན་འགྲོའི་འཇིགས་པ་མེད་པ་དང་མི་ཁོམ་པར་མི་ལྟུང་བ་དང་བདེ་བ་ཅན་དུ་སྐྱེ་བར་གྱུར་ཅིག་ཅེས་སོགས་རྒྱ་ཆེར་སྨོན་པ་ན་དེ་བཞིན་གཤེགས་པ་རིན་ཆེན་སྙིང་པོས་ལེགས་སོ་བྱིན་ཏེ། ཁྱོད་ཀྱིས་སེམས་ཅན་གྱི་ཁམས་ཐམས་ཅད་ལ་རྣམ་པར་བལྟས་པའི་ཕྱིར་ཁྱོད་ཀྱི་མིང་ནི་སྤྱན་རས་གཟིགས་དབང་ཕྱུག་ཅེས་བྱའོ་ཞེས་མཚན་བཏགས་ཅིང༌། སྡོང་པོ་བཀོད་པར། བདག་གི་མིང་ལན་གསུམ་དྲན་པས་འཁོར་གྱི་ནང་དུ་བག་ཚ་བའི་ འཇིགས་པ་མེད་པར་གྱུར་ཅིག་ཅེས་དང༌། སེམས་ཅན་འགའ་ཞིག་སེམས་མྱོས་པས་ཀྱང་བདག་གི་མིང་ཙམ་འཛིན་པ་བྱེད་ན། དེ་ལ་སྡུག་བསྔལ་ཐམས་ཅད་རྣམ་པ་ཐམས་ཅད་དུ་འབྱུང་པར་མི་འགྱུར་ལ། ཐ་ན་འཁོར་གྱིས་འཇིགས་ཤིང་སྐྲག་པ་ཙམ་ ཡང་མི་འབྱུང་བར་ངས་བྱིན་གྱིས་བརླབས་སོ། །ཞེས་གསུངས་ཤིང༌། གཞན་ཡང་བརྩོན་དུ་བཅིངས་པས་དེའི་མཚན་དྲན་ན་སྒྲོག་དང་རྡོས་ལ་སོགས་པའི་འཆིང་བ་ཐམས་ཅད་ཆད་ཅིང་བདེ་བར་ཐར་བ་དང༌། གཡུལ་ངོར་དྲན་ན་མཚོན་གྱིས་ མི་འཛུག་ཅིང་རྒྱལ་བ་འཐོབ་པ་སོགས་རྒྱ་ཆེར་བཤད་དོ། །དེས་ན་འཁོར་གྱིས་བག་ཚ་བའི་འཇིགས་པ་ཙམ་ལས་ཀྱང་སྐྱོབ་པར་སྨོན་ལམ་མཛད་ཅིང་དེའི་མཚན་དྲན་པས་ཀྱང་སྐྱོབ་ནུས་པ་ལྟར་བདག་ཅག་གིས་ཀྱང་སྨོན་ལམ་དང་ཐབས་ མཁས་པའི་མཐུས་སྐྱོབ་པར་ནུས་ཤིང་བསྐྱབ་པ་ལ་བརྩོན་པར་བྱའོ། །གཞན་ལ་གཅེས་པར་འཛིན་པ་ནི་དཀའོ་སྙམ་ན་མི་དཀའ་སྟེ། སྤྱིར་ཕ་མ་དག་ཀྱང་རང་གི་བུའོ་སྙམ་དུ་འདུ་ཤེས་པ་དེ་ལ་རང་ལས་གཅེས་པར་འཛིན་པ་དང༌། ཁྲ་དང༌།

Page: 613 ༄༅། །སྤྱང་ཀི་ཡང་རང་གི་ཕྲུ་གུ་ལ་གཅེས་པར་བལྟ་བ་སོགས་སེམས་ཅན་འདི་རྣམས་ཀྱི་འཇིག་རྟེན་པའི་བདག་པས་གཞན་གཅེས་ཀྱི་བློ་འབྱུང་བ་དུ་མ་ཡོད་པ་ཡང་བདག་པས་གཞན་གཅེས་ཀྱི་རིགས་ཡིན་པས་སེམས་ཅན་ཐམས་ ཅད་ལ་ཡང་འདིའི་རིགས་དང་ས་བོན་ཙམ་ཡོད་དེ། མ་བུ་ལ་བྱམས་པ་སོགས་བྱམས་པ་དང་སྙིང་རྗེའི་རིགས་ཡིན་པ་བཞིན་ནོ། །དེས་ན་རིགས་དེ་གསལ་གདབ་པར་ནུས་པའི་ཕྱིར་དང༌། ཆོས་ཐམས་ཅད་ནི་གོམས་པའི་རྩ་བ་ཅན་ཏེ། དཔེར་ན། རྒྱལ་པོ་གཉིས་དགྲར་གྱུར་ཏེ་གཅིག་ལ་གཅིག་ཐོས་སུ་མི་བཟོད་པའི་ཞེ་སྡང་ཡོད་པ་ལས་ཅི་ཞིག་ན་མཛའ་བོར་བྱས་པ་ན་ཆེས་ཕན་ཚུན་བྱམས་པས་སྐད་ཅིག་ཙམ་བྲལ་ན་ཡང་མི་དགའ་ཞིང་སྐྱོ་བར་འགྱུར་བས་འབྲལ་མི་ཕོད་པའི་མཛའ་ བོར་འགྱུར་བ་བཞིན་ནོ། །དེས་ན་བདག་ཉིད་སྐྱབ་པར་འདོད་པ་རྣམས་ཀྱིས་ཀྱང་བདག་དོན་དོར་ནས་གཞན་ཕན་ཁོ་ན་ལྷུར་བྱ་སྟེ། བྱིས་པས་རང་དོན་བྱས་པ་དང༌། །ཐུབ་པས་གཞན་དོན་མཛད་པ་སྟེ། །འདི་གཉིས་ཀྱིས་ནི་ཁྱད་ པར་ལྟོས། །ཞེས་འཆད་པར་འགྱུར་རོ། །སྙིང་རྗེའི་བློ་ཅན་ཐམས་ཅད་བསྐྱབ་པར་འདོད་པ་དེས་ཀྱང་འདི་ཁོ་ན་ལ་བསླབ་པར་བྱ་སྟེ། ཀླུའི་ཞབས་ཀྱིས། བདག་ལ་དེ་དག་སྡིག་སྨིན་ཞིང༌། །བདག་དགེ་མ་ལུས་དེར་སྨིན་ ཤོག །ཅེས་གསུངས་ཤིང༌། སྐྱེས་པའི་རབས་རྒྱ་མཚོ་ལྟ་བུ་རྣམས་ཀྱང་བདག་གི་བདེ་དགེ་དང༌། གཞན་གྱི་སྡུག་བསྔལ་བརྗེ་བ་ཕྱག་བཞེས་སུ་བཏབ་པ་ཁོ་ན་ཡིན་པའི་ཕྱིར། བདག་གཞན་བརྗེ་བའི་བྱང་ཆུབ་ཀྱིས་སེམས་སྒོམ་པ་འདི་ནི་བྱང་ཆུབ་སེམས་ དཔའ་རྣམས་ཀྱི་གསང་བའི་ལམ་སྟེ་ཕྱི་རོལ་པ་ལྟ་ཞོག་ཉན་ཐོས་དང༌། རང་སངས་རྒྱས་ཐམས་ཅད་ལ་ཡང་རྨི་ལམ་དུ་ཡང་མ་གྲགས་པ་ཞིག་སྟེ་མདོ་ཆེན་པོ་རྣམས་ལས་ཀྱང་བདག་ཏུ་ལྟ་བ་ནི་དེ་བཞིན་གཤེགས་པའི་གདུང་ངོ༌། །ཞེས་སོགས་ཀྱིས་

Page: 614 ས་བོན་ཙམ་རྡོ་རྗེའི་ཚིག་ཏུ་བསྟན་ཞིང་འཕགས་པ་འཇམ་དཔལ་གྱིས་དཔལ་མགོན་ཀླུའི་ཞབས་དང༌། བཅོམ་ལྡན་འདས་བྱམས་པས་འཕགས་པ་ཐོགས་མེད་རྗེས་སུ་བཟུང་ནས་མདོའི་དོན་མན་ངག་ཏུ་གསལ་བར་མཛད་པ་ཡིན་ནོ། །བློ་ ཆུང་ངུ་ཁ་ཅིག་བདག་གི་ལུས་ནི་ཤིན་ཏུ་གཅེས་པས་བརྗེ་བར་མི་ནུས་སོ་སྙམ་ན་སྔར་ཡང་ལུས་ལ་ཆགས་པ་ཁོ་ནས་སྡུག་བསྔལ་ཐམས་ཅད་སྐྱེད་པ་ཡིན་ཏེ། འཇིགས་པའི་གནས་ཆུང་ངུ་སྡོམ་དང་སྡིགས་པ་དང་ཤ་སྦྲང་ཙམ་ལ་ཡང་སྐྲག་པ་དང༌། འཇིགས་པར་ལྟ་བ་ནི་དེས་ལུས་ལ་གནོད་ཀྱིས་དོགས་པ་གོམས་པ་ལས་བྱུང་བ་ཡིན་ལ། དེས་ན་ལུས་འདི་ལ་ཆགས་ན་ནི་འཇིགས་པའི་གནས་སུ་མི་མཐོང་བ་འགའ་ཡང་མེད་དེ་གྲིབ་མ་ལ་འདྲེར་མཐོང་བ་དང༌། མཚན་མོ་བྱུང་བ་ན་འདྲེས་ འཇིགས་པ་དང་མུན་པ་ར་རིའི་ཚེ་ཤིང་ཕུང་ལྟ་བུ་ནག་ཡོར་བ་ཙམ་མཐོང་བས་ཀྱང་སྐྲག་པ་སོགས་སྐྱེ་བའི་ཕྱིར། སེམས་ལ་སུས་ཀྱང་གནོད་པར་མི་ནུས་ཤིང་ལུས་ཉིད་ནི་ཅིར་ཡང་མི་རྟོག་མོད་ཀྱང་ལུས་ལྦུ་བ་ལྟ་བུ་འདི་ལ་སེམས་རླུང་ལྟ་ བུ་འདིས་བདག་གིར་བཟུང་བས་བདུད་སྡིག་ཅན་གྱི་མགུལ་པར་ཁྱི་རོ་རུལ་བ་ཐོགས་པ་ལྟ་བུར་སྡུག་བསྔལ་མྱོང་བ་ཡིན་ན་ཁྱི་རོ་ལྟ་བུའི་ལུས་དེ་ལ་སུ་ཞིག་ཆགས་པར་བྱེད། ལུས་གསོ་བའི་ལྟོ་གོས་ཙམ་གྱི་ཕྱིར། སྡིག་པའི་ལས་མི་བྱེད་པ་ཅི་ ཡང་མེད་དེ། བྱ་པ་དང་རྔོན་པ་དང་ཉ་པའི་ལས་བྱེད་ཅིང་མཚམས་མེད་པ་ལྔ་བྱེད་པ་དང༌། དཀོན་མཆོག་གི་དཀོར་རྐུ་ཞིང་འཕྲོག་པ་སོགས་ལྕི་བའི་སྡིག་པ་བྱེད་ལ་གང་གི་དོན་དུ་བྱས་པའི་ལུས་དེ་ནི་ཤུལ་དུ་ཞིག་པར་འགྱུར་ཡང༌། བྱེད་པ་པོའི་སེམས་ རྒྱུན་དེས་ནི་དམྱལ་བ་མནར་མེད་པ་ལ་སོགས་པར་སྡུག་བསྔལ་མི་བཟད་པ་མྱོང་བར་འགྱུར་ལ། འདི་ལྟར་ལུས་ལ་ཆགས་པ་ལྟ་བུའི་གནོད་པ་ནི་དགྲས་ཀྱང་བྱེད་པར་མི་ནུས་ཏེ་དགྲས་ནི་གསོད་པ་དང་ནོར་འཕྲོག་པ་ཙམ་དུ་ཟད་ཀྱི་དམྱལ་

Page: 615 ༄༅། །བར་སྐྱུར་མི་ནུས་པའི་ཕྱིར་རོ། །དེས་ན་སྔར་བསྟན་པ་ལྟར་ལུས་འདི་ནི་ཤ་ཐང་ཆད་ཆད་དུ་དགེ་བ་ལ་བཀོལ་བར་རིགས་ཀྱི་ཞེན་ཞིང་ཆགས་པས་འདི་ཁོ་ན་མཚག་བཟང་བར་བྱེད་མི་རིགས་སོ། །དེའི་ཕྱིར་འདི་གཞན་ ལ་བྱིན་ན་དེའི་འོག་ཏུ་བདག་ཅི་ཟ་ཞེས་དང༌། འདི་གཞན་ལ་བྱིན་ན་བདག་ཅི་ལོངས་སྤྱོད་སྙམ་པ་དེ་ནི་ངན་པ་འདྲེ་ལྟ་བུའི་རྟོག་པ་སྟེ་དབུལ་བའི་རྒྱུ་ཡང་སེར་སྣ་ཁོ་ན་ཡིན་པའི་ཕྱིར་རོ། །གལ་ཏེ་འདི་བདག་ཉིད་ཀྱིས་ལོངས་སྤྱད་ན་གཞན་ལ་ཅི་ ཞིག་སྦྱིན་ཞེས་སེམས་པས་རྒྱལ་པོ་གསེར་མདོག་གིས་རང་གི་བཟའ་བ་འབྲས་བྲེའུ་ཆུང་གང་ཁོ་ན་བདོག་པའི་ཚེ་འདི་ནི་ཟོས་སམ་མ་ཟོས་ཀྱང་འཆི་ཡི་དྲང་སྲོང་འདི་བདག་ལས་བསོད་སྙོམས་མ་ཐོབ་པར་བྱོན་ན་མི་རུང་ངོ་སྙམ་ནས་དེ་རང་རྒྱལ་ལ་ བྱིན་པ་ལྟ་བུ་ནི་ལྷའི་ཚུལ་རྨད་དུ་བྱུང་བའི་བློ་ཡིན་ལ། སྤྱིར་དེ་བཞིན་གཤེགས་པས་ངས་སྦྱིན་པའི་ཕན་ཡོན་མངོན་སུམ་དུ་མཐོང་བ་ལྟ་བུར་སེམས་ཅན་འདི་དག་གིས་ཀྱང་མཐོང་ན་ཁམ་གྱི་ཕྱེད་ཀྱང་སྦྱིན་པར་བྱེད་ཀྱི་ཟ་བར་མི་སྤྲོའ་ཞེས་ གསུངས་ལ། ཡང་ན་སེར་སྣ་ནི་ཡི་དྭགས་ོཀྱི་རྒྱུ་དང་སྦྱིན་པ་ནི་ལྷར་སྐྱེ་བའི་རྒྱུ་འོ་ཞེས་ཀྱང་བཤད་རུང་ངོ༌། །མདོར་ན་བདག་ཉིད་གཅེས་པར་བཟུང་བ་ཁོ་ནས་མཐོང་བ་དང་མ་མཐོང་བའི་སྡུག་བསྔལ་ཐམས་ཅད་བསྐྱེད་པ་ཡིན་ཏེ་ངན་སོང་ གསུམ་ཡང་གཞན་ལ་གནོད་པ་བྱས་པའི་རྣམ་སྨིན་གྱི་འབྲས་བུ་ཁོ་ན་ཡིན་ལ། དེ་ཡང་བདག་གམ་བདག་གི་བའི་ཆེད་ཁོ་ནར་བྱེད་པའི་ཕྱིར། གཞན་ཕྱིར་བདག་ལ་གནོད་བྱས་ན་ཕུན་སུམ་ཚོགས་པ་ཐམས་ཅད་འཐོབ་སྟེ་མགོ་ལ་སོགས་པ་ བཏང་དཀའ་བ་གཞན་གྱི་བསམ་པ་རྫོགས་པའི་ཕྱིར་གཏོང་བ་དང༌། ཡང་ལག་དང་ཉིང་ལག་བཅད་ཀྱང་མི་འཁྲུགས་པའི་བཟོད་པ་སོགས་ཀྱིས་རྫོགས་པའི་སངས་རྒྱས་འགྲུབ་ཅིང༌། གནས་སྐབས་སུ་ལྷ་མིའི་མཆོག་ཟད་མི་ཤེས་པ་འཐོབ་པའི་

Page: 616 ཕྱིར། བདག་ཉིད་ང་རྒྱལ་གྱིས་མཐོ་བར་བསྙེམས་པ་དང་བདག་ཁོ་ན་མཐོ་ལ་གཞན་ཐམས་ཅད་དམའ་བར་བྱ་འདོད་པ་དང༌། བདག་གི་དོན་དུ་གཞན་བྲན་དུ་བཀོལ་བ་སོགས་ནི་ད་ལྟ་མཐོ་བ་ཐོབ་པ་དེ་སྔོན་གཞན་ལ་བཀུར་སྟི་བྱས་ཤིང་ཁྱད་དུ་མ་བསད་ པའི་མྱོང་བ་རྒྱུ་མཐུན་གྱི་འབྲས་བུ་ཡིན་ཡང༌། ད་ལྟ་ང་རྒྱལ་གྱི་རྒྱུ་དེས་ཕྱི་མར་རྣམ་འབྲས་ངན་སོང་གི་སྐྱེ་བ་མང་པོ་དང༌། མྱོང་འབྲས་མཐོ་རིས་སུ་ཐམས་ཅད་ཀྱིས་བརྙས་པའི་གནས་དང༌། བྲན་གི་ཐ་ཆད་དུ་བཀོལ་བ་མྱོང་བར་འགྱུར་ལ། དེ་ལས་ ཟློག་སྟེ་བདག་ལ་དམན་པའི་འདུ་ཤེས་འཇོག་ཅིང་གཞན་ཐམས་ཅད་ལ་མཆོག་ཏུ་བཀུར་ལ། ང་རྒྱལ་སྤངས་ཏེ་གཞན་དོན་དུ་བདག་ལུས་བཀོལ་བ་དེ་ནི་ལྷ་མིའི་མཆོག་འཁོར་བསྒྱུར་དང༌། བརྒྱ་བྱིན་སོགས་འཐོབ་ཅིང་ཐམས་ཅད་ཀྱིས་ཕ་ལྟ་ བར་བྱ་བ་དང་འདུད་པར་བྱ་བའི་གནས་སུ་འགྱུར་རོ། །འདི་ནི་མཐོང་ཆོས་ལ་ཡང་འབྱུང་བ་ཡོད་དེ། ཞིང་དཔོན་མང་བཀུར་གྱི་རྒྱལ་པོས་རང་ཉིད་ལ་མ་བསམས་པར་ཞིང་ཐམས་ཅད་གཞན་ལ་ཆ་མཉམ་དུ་བགོས། ཉིན་མཚན་ གཡེལ་མེད་དུ་ཞིང་རྣམས་བསྲུངས་པས་ཐམས་ཅད་ཀྱི་དྲུག་ཆའི་དཔྱ་ཁྲལ་བྱིན་ཞིང༌། འདིས་བདག་ཅག་བདེ་བར་བསྐྱངས་སོ་ཞེས་དཔོན་དུ་བཀུར་བས་གླིང་འདིར་མིའི་རྒྱལ་པོའི་ཐོག་མར་གྱུར་པ་ལྟ་བུའོ། །མདོར་ན་འཇིག་རྟེན་ན་ བདེ་བ་ཇི་སྙེད་པ་ནི་གཞན་བདེ་བར་འདོད་པ་ལས་བྱུང་སྟེ། གྲོང་ཁྱེར་གཅིག་ན་མི་གཅིག་གིས་གྲོང་གི་སྐྱེ་བོ་རྣམས་བདེ་བའི་ཕྱིར། འབད་ན་དེ་སྤྱི་ཚིས་ཆེ་ཞེས་ཐམས་ཅད་ཀྱིས་བཀུར་བར་མཐོང་ལ། ཕྱི་མར་ཡང་རྒྱུ་དེས་མཐོ་རིས་སུ་འགྲོ་ལ་གཞན་བདེ་ བར་འདོད་པ་ནི་བྱང་ཆུབ་ཀྱི་སེམས་ཀྱི་རྒྱས་འགྱུར་གྱི་རིགས་ཀྱང་ཡིན་ལ། འདི་སྐྱེས་པ་ན་ཐེག་ཆེན་གྱི་རྒྱས་འགྱུར་གྱི་རིགས་སད་པར་ཉེ་བའི་རྟགས་དུ་བའི་སྔོན་དུ་དྲོ་བ་འབྱུང་བ་ལྟ་བུ་ཡིན་པའི་ཕྱིར། འཇིག་རྟེན་ན་སྡུག་བསྔལ་ཇི་སྙེད་

Page: 617 ༄༅། །པ་ནི་རང་ཉིད་ཁོ་ན་བདེ་བར་འདོད་པ་ལས་བྱུང་སྟེ། རང་ཉིད་ཁོ་ནས་རྙེད་ཅིང་གྲགས་ལ་བདེ་ཞིང་བསྟོད་པ་ཞིག་འདོད་ན་རང་ལས་གཞན་པ་རྣམས་ལ་དེ་ལས་ཟློག་པར་འདོད་པར་གདོན་མི་ཟ་ལ། དེའི་ཚེ་གཞན་ལ་ དེ་དག་མི་འབྱུང་བའི་ཕྱིར་དང༌། རང་དང་མཉམ་པ་གཞན་མཐོང་ན་ཕྲག་དོག་གིས་སྡིག་པའི་ལས་མི་བྱེད་པ་ཅི་ཡང་མེད་པས་སོ། །མདོར་ན་མང་དུ་བཤད་ཅི་དགོས་ཏེ། བྱིས་པ་རྣམས་རང་དོན་ཁོ་ན་བྱས་པས་འཁོར་བར་འཁྱམས་པ་དང༌། ཐུབ་པས་ གཞན་དོན་འབའ་ཞིག་མཛད་པས་བླ་ན་མེད་པའི་གོ་འཕང་ཇི་ལྟར་བརྙེས་པ་འདིའི་ཁྱད་པར་ལྟོས་ཤིག་དང་འདི་ོ་ནས་ཤེས་པར་ནུས་སོ། །འདིར་གལ་ཏེ། འཇིག་རྟེན་སྡུག་བསྔལ་ཇི་སྙེད་པ། །དེ་ཀུན་རང་བདེ་འདོད་ལས་བྱུང༌། །ཞེས་ འཆད་ན། འོ་ན་ཉན་རང་གི་རིགས་ཅན་རང་བདེ་འདོད་པ་དེ་སྡུག་བསྔལ་མྱོང་བར་རིགས་ཀྱི་དགྲ་བཅོམ་འཐོབ་མི་རིགས་པར་འགྱུར་རོ་ཞེ་ན། དེ་ནི་འཁོར་བས་འཇིགས་ཤིང་སྐྲག་པས་རང་ཉིད་དེ་ལས་ཐར་བར་འདོད་པ་ཡིན་གྱི་འཁོར་བར་རང་ ཉིད་བདེ་ཞིང་གཞན་སྡུག་བསྔལ་བར་འདོད་པ་མ་ཡིན་ལ། འདིར་ནི་བློ་དེ་ལ་དགོངས་པ་ཡིན་པས་སྐྱོན་དེ་མེད་དོ། །དེས་ན་བདག་གི་བདེ་བ་གཞན་ལ་གཏོང་ཞིང་གཞན་གྱི་སྡུག་བསྔལ་བདག་ལ་ལེན་པས་བདག་གཞན་བརྗེ་བ་འདི་ལྟ་བུ་མ་བྱས་ན་ སངས་རྒྱས་མི་འཐོབ་ཅིང༌། འཁོར་བར་འཁོར་ཕན་ཆད་སྡུག་བསྔལ་རྣམ་པ་གསུམ་པོ་ཁོ་ན་ལས་མི་འདའ་འོ། །སངས་རྒྱས་མ་ཐོབ་ཀྱང་ཉན་རང་གི་ཐར་པ་ཡོད་དོ་སྙམ་ན། གནས་སྐབས་ཐེག་གསུམ་དུ་འཇོག་པའི་ཚེ་ནི་དགྲ་བཅོམ་པ་རྣམས་ཀྱང་ བྱང་ཆུབ་སེམས་དཔའ་ཆེན་པོ་རྣམས་ཀྱི་ཆོ་འཕྲུལ་དང༌། ཡོན་ཏན་མཐོང་བ་ན་བདག་ཉིད་ཐེག་དམན་དུ་ཞུགས་པ་ལ་འགྱོད་ཅིང་གདུང་བའི་མྱ་ངན་སྐྱེད་དེ་སྟོན་པས་ཐེག་ཆེན་གྱི་ཆོས་འདི་སྔོན་དུ་གསུངས་ན་བདག་ཅག་ཐེག་དམན་དུ་མི་འཇུག་པ་ཞིག་ན་

Page: 618 ད་ནི་ཤིང་ཚིག་པ་བཞིན་དུ་ཅི་བྱར་ཡང་མེད་དོ་ཞེས་སྨྲ་བ་དང༌། འོད་སྲུང་ཆེན་པོས་ལི་ཙཱ་ཝི་དྲཱི་མ་མེད་པར་གྲགས་པའི་ཡོན་ཏན་བརྗོད་ནས་བདག་གིས་དེ་ཕྱིན་ཆད་སེམས་ཅན་སུ་ཡང་ཐེག་དམན་ལ་མ་བཙུད་དོ་ཞེས་ཞུས་པའི་ཕྱིར་འབྲས་བུ་ཐོབ་ ཀྱང་ཕྱིས་འགྱོད་གནས་སུ་འགྱུར་བ་ཡིན་ལ། མཐར་ཐུག་ཐེག་པ་གཅིག་ཏུ་འཇོག་པའི་ཚེ་ནི་དམན་མོས་ཁ་དྲང་བའི་ཆེད་དུ་གསུངས་ཀྱང་ཐེག་པ་ཐ་དད་མེད་པས་སངས་རྒྱས་མ་ཐོབ་ཀྱི་བར་དགྲ་བཅོམ་པ་མི་འཐོབ་པའི་ཕྱིར་སྐྱོན་མེད་དོ། ། དེ་ལྟ་མོད་ཀྱི་འཇིག་རྟེན་ཕ་རོལ་ལྟ་ཞོག་མཐོང་ཆོས་ལ་ཡང་ལུས་ལ་འཕངས་པས་ལས་མི་ནུས་པའི་བྲན་གཡོག་གིས་ཟས་གོས་མི་མྱོང་བ་དང་ནོར་ལ་འཕངས་པས་རྔན་པ་མི་སྟེར་བའི་རྗེ་དཔོན་གྱིས་གཡུལ་ལས་རྒྱལ་བ་མི་འཐོབ་པ་ སོགས་མངོན་སུམ་གྱིས་མཐོང་བའི་ཕྱིར་རོ། །དེས་ན་བདག་བདེ་ཞིང་གཞན་སྡུག་བསྔལ་བར་འདོད་པ་འདིས་ནི་འདི་ཕྱིའི་བདེ་སྐྱིད་ཐམས་ཅད་དང་བྲལ་ཏེ་སྡུག་བསྔལ་ཐམས་ཅད་ལེན་པར་བྱེད་པ་ཡིན་ནོ། །དེས་ན་ཉེས་སྐྱོན་ཐམས་ཅད་ནི་ བདག་གཅེས་འཛིན་ལས་བྱུང་ལ་དེ་ཡང་བདག་ཏུ་འཛིན་པ་ལས་བྱུང་བས་ན། འདྲེ་ཆེན་པོ་བདག་ཏུ་འཛིན་པ་དེས་ལུས་སེམས་འདི་ལ་ཅི་ཞིག་བྱ་སྟེ་དགོས་པ་མེད་དོ་ཀོ་ཞེས་སེམས་ལ་བོས་ཏེ་བདག་ཉིད་ལ་བདག་ཉིད་ཀྱིས་གདམས་ པའོ། །བདག་བདེ་བར་འདོད་ན་ཡང་བདག་ཉིད་གཞན་ལ་བཏང་དགོས་ཏེ་དེ་མ་བཏང་ན་སྡུག་བསྔལ་སྤོང་མི་ནུས་པ་མེ་མ་དོར་ན་སྲེག་པ་འདོར་མི་ནུས་པ་བཞིན་ནོ། །དེ་ལྟ་བས་ན་བདག་གཞན་ཐམས་ཅད་ཀྱི་ཉེས་པ་དང་སྡུག་བསྔལ་ ཐམས་ཅད་ཞི་བར་བྱ་བའི་ཕྱིར་སྔར་བདག་ཏུ་བཟུང་བ་འདི་གཞན་ལ་བཏང་ནས་ཕྱིན་ཆད་གཅེས་སྤྲས་མི་བྱ་ཞིང་སྔར་གཞན་དུ་བཟུང་བའི་སེམས་ཅན་འདི་རྣམས་ཕྱིན་ཆད་བདག་ཉིད་དུ་བཟུང་སྟེ་གཅེས་སྤྲས་དང་བཀུར་སྟི་ཐམས་ཅད་འདི་ལ་

Page: 619 ༄༅། །བྱའོ་ཞེས་རང་ངམ་རང་གིས་འཆའོ། །སེམས་ཁྱོད་ད་ནི་སེམས་ཅན་ཐམས་ཅད་ལ་བྱིན་ཟིན་གྱིས་ཕྱིན་ཆད་བདག་ནི་གཞན་དབང་དུ་གྱུར་པ་ཡིན་ནོ་ཞེས་ཤེས་པར་གྱིས་ལ། སུ་ལ་བྱིན་པའི་སེམས་ཅན་ཐམས་ཅད་ཀྱི་དོན་ ལས་གཞན་ཅི་ཡང་མ་སེམས་ཤིག །གལ་ཏེ་སྔར་གྱི་བདག་འཛིན་ངན་པ་གོམས་པས་སེམས་བདག་ཉིད་བདེ་བར་བྱའོ་སྙམ་ན་གཞན་སེམས་ཅན་དབང་བའི་མིག་སོགས་སྐྱེ་མཆེད་དྲུག་གིས་མི་དབང་བའི་སེམས་ཀྱི་བདེ་བ་སྒྲུབ་པར་མི་རིགས་ལ། སེམས་ཅན་དེའི་དོན་དུ་བསྔོས་ཤིང་བྱིན་ལ། དེ་དབང་བའི་མིག་གིས་སེམས་ཅན་དེ་ཉིད་ལ་སྡང་མིག་ཏུ་ལྟ་བ་དང་དེ་དབང་བའི་ངག་དང་ལྕེས་དེ་ཉིད་ལ་སྨོད་པ་དང༌། དེ་དབང་བའི་སེམས་ཀྱིས་དེ་ཉིད་ལ་གནོད་སེམས་སུ་ལྟ་བ་སོགས་ལོག་པར་བྱེད་ མི་རིགས་སོ་ཞེས་ཤེས་པར་གྱིས་ཤིག་པའོ། །དེས་ན་སྔར་བདག་ཏུ་བཟུང་བའི་ལུས་སེམས་གང་ལ་བྱིན་པའི་སེམས་ཅན་དེ་ཉིད་ཁོ་ན་གཙོ་བོར་གྱིས་ལ། ལུས་སེམས་ལ་ཡོན་ཏན་དང་བདེ་བ་དང་ཟས་ནོར་སོགས་ཅི་མཐོང་ཡང་བདོག་པ་དེ་ ཐམས་ཅད་ལུས་སེམས་ཉིད་ལོངས་སྤྱོད་དུ་མ་གཞུག་པར་ཕྲོགས་ལ་སྔར་གཞན་དུ་བཟུང་ཞིང་ཕྱིས་བདག་དང་རྗེ་བོར་བཟུང་བའི་སེམས་ཅན་རྣམས་ལ་བྱིན་ལ་དེ་རྣམས་ལ་ཕན་པ་དང་བདེ་བར་གྱིས་ཤིག་གོ །ད་ནི་དེ་ལག་ཏུ་བླང་བའི་ཕྱིར། སྔར་ ཐོག་མེད་ནས་བདག་ཏུ་བཟུང་བ་དེ་ལ་ཕྲག་དོག་དང༌། ང་རྒྱལ་དང༌། འགྲན་སེམས་སྒོམ་པ་བཤད་པར་བྱ་སྟེ། ཆོས་ཐམས་ཅད་གོམས་པ་ལ་རག་ལས་པ་ཁོ་ན་ཡིན་པས་སྔར་གྱི་ལུས་སེམས་བདག་དང་བདག་གི་གང་ཡང་མ་ཡིན་པ་དེ་ལ་བདག་དང་བདག་ གིར་བཟུང་བ་ལས་ལྡོག་སྟེ། ད་ནི་སེམས་ཅན་དམན་འབྲིང་མཐོ་གསུམ་ཐམས་ཅད་བདག་ཏུ་བྱས་ཏེ་སྔར་བདག་ཏུ་བཟུང་བའི་ལུས་སེམས་དེ་གཞན་དུ་བཟུང་ནས་བདག་ུསེམས་ཅན་རྙེད་གྲགས་སོགས་མེད་པས་དམའ་ལ་གཞན་ལུས་སེམས་

Page: 620 དེ་དེས་མཐོ་ན་དེ་བདག་སེམས་ཅན་གྱིས་མི་བཟོད་པའི་ཕྲག་དོག་སྒོམ་པ་དང༌། བདག་སེམས་ཅན་ནི་རང་བཞིན་གྱིས་དག་པས་མཆོག་ཡིན་གྱི་ལུས་སེམས་ཙམ་ལ་ཕྱིན་ཅི་ལོག་ཏུ་ངར་བཟུང་བ་དཔྱད་མ་བཟོད་པ་འདི་ནི་དམད་པའི་གནས་སོ་ ཞེས་ང་རྒྱལ་སྒོམ་པ་དང༌། ལུས་སེམས་ཙམ་ལ་ཀུན་ཏུ་ཞེན་པར་ཟད་ཀྱི་སྙིང་པོ་མེད་པ་འདི་ནི་བདག་སེམས་ཅན་ལས་ལྷག་ཏུ་མི་གཞུག་གོ་ཞེས་འགྲན་སེམས་སྒོམ་པ་སྟེ་བདག་འཛིན་ལྟར་བཅོས་པའི་གཉེན་པོས་སྤང་བྱའི་བདག་ འཛིན་འཇོམས་པ་དང༌། ཉོན་མོངས་ལྟར་བཅོས་པའི་གཉེན་པོས་ཉོན་མོངས་དངོས་འཇོམས་པ་ཇི་ལྟར་མེས་ཚིག་པའི་རྨ་མེས་གདུངས་པས་ཞི་བར་བྱེད་པ་ལྟ་བུ་གཉེན་པོའི་དམ་པ་གསང་བའི་ཐེག་པ་འདི་ཐེ་ཚོམ་དང་སོམ་ཉིའི་ རྣམ་རྟོག་མེད་པར་བསྒོམ་པར་བྱའོ། །ེ་ཡང་ནམ་ལུས་སེམས་ཙམ་དེ་ལ་རྙེད་པ་དང་བཀུར་སྟི་སོགས་བྱུང་ཞིང་བདེ་བར་སྣང་བ་དང༌། ཚུལ་ཁྲིམས་དང༌། ཐོས་སོགས་ཀྱི་ཡོན་ཏན་དང་ལྡན་པར་སྣང་ལ། སེམས་ཅན་གཞན་དག་དེ་ལས་དམན་ཞིང་ སྡུག་བསྔལ་བར་མཐོང་ནས་དམན་པ་ལ་བརྙས་སེམས་དང་བདག་ལ་ང་རྒྱལ་སྐྱེས་པ་ན་སེམས་ཅན་དམན་པར་སྣང་བ་དེ་ལ་བདག་གི་འདུ་ཤེས་བཞག་སྟེ་ལུས་སེམས་ཙམ་འདི་ནི་འཇིག་རྟེན་གྱིས་བཀུར་སྟི་བྱས་ལ་བདག་སེམས་ཅན་ལ་ནི་ བཀུར་སྟི་མི་བྱེད་དོ། །འདིས་ལོངས་སྤྱོད་རྙེད་པ་ལྟར་བདག་སེམས་ཅན་གྱིས་མ་རྙེད་དོ། །འདི་ནི་གཞན་གྱིས་ཡོན་ཏན་གྱིས་བསྟོད་ལ་བདག་སེམས་ཅན་ལ་ནི་དམད་པར་བྱེད་དོ། །འདི་ནི་བདེ་ཞིང་སྐྱིད་པར་གནས་ལ་བདག་སེམས་ཅན་ནི་སྡུག་ བསྔལ་ལ་ཉམ་ཆུང་ངོ༌། །འདི་ནི་སྐྱིད་པར་སོས་ངལ་དུ་གནས་ལ་བདག་སེམས་ཅན་ནི་ལས་རྣམས་བྱེད་པས་ངལ་ཞིང་དུབ་བོ། །འདི་ནི་འཇིག་རྟེན་ལ་ཆེ་བར་གྲགས་ཤིང་བདག་སེམས་ཅན་ནི་ཡོན་ཏན་མེད་པར་གྲགས་ན་ཡོན་ཏན་མེད་པར་གྲགས་

Page: 621 ༄༅། །པ་དེས་བདག་སེམས་ཅན་ལ་ཅི་བྱ་སྟེ་དམད་པ་ནི་མི་མཁོ་ལ་བདག་སེམས་ཅན་ཀུན་ནི་དམད་པར་བྱ་བ་ཡིན་ཏེ། རང་བཞིན་གྱིས་རྣམ་པར་དག་པ་སྟོབས་སོགས་ཀྱི་ཡོན་ཏན་གྱིས་ཕྱུག་པའི་སྙིང་པོ་ཅན་ཚངས་པ་དང་བརྒྱ་ བྱིན་དང་འཁོར་བསྒྱུར་ལ་སོགས་པ་བྱེ་བ་མང་པོས་བསྒྲུན་དུ་མེད་པའི་སངས་རྒྱས་ཀྱི་གདུང་རིགས་ཆེན་པོ་ཡིན་པའི་ཕྱིར། ལུས་སེམས་ཙམ་ལ་བྱང་ཆུབ་སེམས་དཔའ་ཞེས་བྱ་བ་ལ་སོགས་པའི་མིང་གིས་བཏགས་ནས་ཁོ་རང་ ཆེན་པོར་རློམ་པ་འདིས་བདག་སེམས་ཅན་ལ་བརྙས་པར་མི་རིགས་ཏེ། མཐོ་དམན་ནི་རེས་འགའ་བ་ཙམ་ཡིན་ཞིང་མི་ལ་བལྟོས་ན་བརྒྱ་བྱིན་མཆོག་ཡིན་ཡང་ཚངས་པ་ལ་བལྟོས་ན་བརྒྱ་བྱིན་དམན་པ་ཡིན་པ་ལྟར་བལྟོས་ནས་བཞག་པར་ ཟད་ལ། གང་ཟག་གཅིག་ཉིད་ཀྱང་ཡུལ་ལ་ལར་བཀུར་བ་ལྟར་ཐམས་ཅད་དུ་བཀུར་བར་མ་ངེས་ཤིང༌། ཡུལ་ལ་ལར་བརྙས་པ་ལྟར་ཐམས་ཅད་དུ་བརྙས་པར་ཡང་མ་ངེས་ལ། ཚེ་གཅིག་ལ་བརྒྱ་བྱིན་ལྟ་བུའི་བཀུར་སྟི་མྱོང་ཡང་དེའི་ཕྱི་མ་ལ་བྲན་ཁོལ་ གྱི་ཐ་ཆད་དུ་སྐྱེ་བ་ཡང་ཡོད་པས་རྙེད་སོགས་ནི་མི་རྟག་པའི་ཕྱིར། སྐབས་རེ་འགའ་ན་གང་བས་ཏེ་སུ་ལས་ཀྱང་ལུས་སེམས་ལ་བྱང་ཆུབ་སེམས་དཔའ་བཏགས་པ་འདི་དམན་པའི་སྐབས་ཀྱང་ཡོད་ཅིང་རེས་འགའ་ན་སུ་ལས་ཀྱང་སེམས་ཅན་ བདག་མཆོག་ཏུ་བཀུར་བའི་སྐབས་དེ་ཡང་ཡོད་དོ། །འོན་ཀྱང་ད་ལྟ་ལུས་སེམས་ཙམ་ལ་བྱང་ཆུབ་སེམས་དཔར་བཏགས་པ་འདི་ལ་ཚུལ་ཁྲིམས་སོགས་ཅུང་ཟད་སྣང་ཞིང་བདག་སེམས་ཅན་ལ་དེ་དག་མི་སྣང་མོད་ཀྱིས་དེ་ཡང་བདག་སེམས་ ཅན་གྱི་ཉོན་མོངས་པའི་སྟོབས་ཀྱིས་མི་སྣང་བར་ཟད་ཀྱི་ཉོན་མོངས་པ་འདི་ཡང་གནས་སྐབས་རེས་འགའ་བ་ཡིན་གྱི་བདག་གི་ཆོས་ཉིད་ཀྱིས་རང་དབང་དུ་ཞུགས་པ་མིན་པས་འདིའི་ཚུལ་ཁྲིམས་དང་ལྟ་བ་སོགས་ཡོན་ཏན་ཕྲ་མོ་འདི་ཙམ་

Page: 622 ནི་བདག་སེམས་ཅན་གྱིས་སྒྲུབ་པ་ལ་དཀའ་བ་མེད་དོ། །གལ་ཏེ་འདི་བྱང་ཆུབ་སེམས་དཔར་ཁས་འཆེ་ཞིང་བཟང་པོར་རློམ་ན་ནི་འདིས་བྱང་ཆུབ་སེམས་དཔའི་བྱ་བ་དང་བཟང་པོའི་བྱ་བ་བྱེད་དགོས་ལ། དེ་ལྟ་ན་བདག་སེམས་ཅན་ དམན་པ་ལ་བརྙས་པ་མི་བྱེད་ཀྱི་སྟེང་དུ་ཅི་ནུས་པས་ཁོ་རང་གིས་བདག་ཅག་གསོ་ཞིང་བསྐྱང་བར་ཡང་བྱེད་པར་རིགས་ཏེ། དཔེར་ན། སྨན་པ་མཁས་པར་ཁས་ལེན་ན་ནད་པ་དག་ལ་ཁྲེལ་བགད་ཀྱིས་འདེབས་ཤིང༌། བརྙས་པས་འདོར་བ་དེ་ལྟ་བུ་མི་བྱེད་ པར་ནད་དེ་ཞི་བའི་བདེ་བ་ལ་འགོད་དགོས་པ་ལྟ་བུ་ཡིན་མོད། འདིས་ཀྱང་དེ་ལྟར་བྱེད་ན་བརྙས་པའམ་གནོད་པ་ཅུང་ཟད་བྱས་ཀྱང་ནད་པས་སྨན་པའི་སྤྱོ་བ་བཟོད་པ་ལྟར་བདག་སེམས་ཅན་གྱིས་ཀྱང་དང་དུ་བླང་ཞིང་བཟོད་པར་རིགས་མོད་ ཀྱང༌། འོན་ཏེ་བྱང་ཆུབ་སེམས་དཔར་ཁས་བླངས་པ་འདིས་སེམས་ཅན་བདག་གསོ་ཞིང་སྐྱོང་བར་ཡང་མི་བྱེད་ཀྱི་སྟེང་དུ་ཅིའི་ཕྱིར་བརྙས་པར་བྱེད། འདིའི་ཡོན་ཏན་ཆུང་ངུ་འདི་ལ་བདག་སེམས་ཅན་སྨོན་པར་ཡང་མི་བྱེད་དེ། དེ་ཙམ་གྱིས་ཅི་ ཞིག་བྱ་སྟེ་སེམས་ཅན་བདག་ཉིད་ཡོན་ཏན་ཐམས་ཅད་ཀྱི་ས་བོན་ཅན་ཡིན་པའི་ཕྱིར། དེས་ན་མི་དགེ་བའི་ལས་སྤྱོད་པས་ངན་འགྲོའི་གཡང་ཁར་སང་ལྷུང༌། གནངས་ལྷུང་དུ་གནས་པའི་འགྲོ་བ་རྣམས་ལ་སྙིང་རྗེ་མེད་ཀྱི་སྟེང་དུ་ཁོ་རང་ཡོན་ ཏན་གྱི་རློམ་པ་ཆེན་པོས་ང་རྒྱལ་ནས་དམན་པ་ལ་བརྙས་ཤིང་མཆོག་རྣམས་ལ་བསྡོ་བར་འདོད་པ་འདི་ནི་མི་རིགས་སོ་ཞེས་སྒོམ་པ་སྟེ། དཔེར་ན། བདག་གཙུག་ལག་ཕྲེང་བ་ལྟ་བུས་སེམས་ཅན་དམྱལ་བ་པ་ལ་དམན་པ་དང་བརྙས་པའི་ འདུ་ཤེས་ཞུགས་པའི་ཚེ་དམན་འཛིན་དང་བརྙས་རྟོག་དེ་སེལ་བའི་ཕྱིར། འདི་ལྟར་དམྱལ་བ་པ་བདག་ཏུ་བྱས་ཤིང་གཙུག་ལག་ཕྲེང་བ་གཞན་དུ་བཞག་ནས་སྒོམ་སྟེ། གཙུག་ལག་ཕྲེང་བ་འདི་ནི་གཞན་གྱིས་བཀུར་སྟི་བྱས་ལ་བདག་དམྱལ་

Page: 623 ༄༅། །བ་པ་ལ་མ་བྱས་སོ་ཞེས་པ་ནས་གཙུག་ལག་ཕྲེང་བ་འདི་བདག་དམྱལ་བ་པ་ལྟ་བུ་སོགས་ལ་སྙིང་རྗེ་མེད་ཀྱི་སྟེང་དུ་བརྙས་ཤིང་དམན་པར་འཛིན་ལ། ཁོ་རང་ཡོན་ཏན་གྱིས་རློམ་པས་ཁོ་རང་གི་འགྲན་ཟླར་འཛིན་པའི་ཆོས་སྨྲ་ བ་ལ་སོགས་པ་གཞན་ལ་བསྡོ་བར་འདོད་པ་འདི་ནི་མི་རིགས་སོ་ཞེས་པའི་བར་གྱིས་སྐྱོན་མཚང་བྲུས་ཏེ་སེམས་གཙང་བར་བྱེད་པ་སྟེ། དོན་ལ་བདག་ཉིད་བརྙས་པ་དང་དམད་བྱ་ཡིན་གྱི་གཞན་བརྙས་པ་དང་དམད་པར་བྱ་བ་མ་ཡིན་པར་སྟོན་ཏོ། ། ཕྲག་དོག་ཇི་ལྟར་སྒོམ་པ་བཤད་ནས། ད་ནི་འགྲན་སེམས་སྒོམ་ཚུལ་བཤད་པར་བྱ་སྟེ། དེ་ཡང་བྱང་ཆུབ་སེམས་དཔའས་སེམས་ཅན་གང་ཡང་རུང་བ་ཞིག་ལ་བདག་དང་མཉམ་པར་བཟུང་ནས་འགྲན་སེམས་སྐྱེས་པ་དང༌། དེ་བདག་ལས་ལྷག་ པར་དོགས་པ་སྐྱེས་པ་ན་མཉམ་འཛིན་དང་གཞན་མཐོ་བ་མི་བཟོད་པ་གཞོམ་པའི་ཕྱིར། གཉེན་པོའི་འགྲན་སེམས་འདི་ལྟར་སྒོམ་སྟེ། བྱང་ཆུབ་སེམས་དཔའ་ཉིད་གཞན་དུ་བྱ་ཞིང་འགྲན་ཟླ་སེམས་ཅན་ལ་བདག་གི་འདུ་ཤེས་བཞག་ནས་གང་ རྙེད་བཀུར་དང་གྲགས་པ་ལ་སོགས་པས་ལུས་སེམས་ཙམ་ལ་བྱང་ཆུབ་སེམས་དཔའར་བཏགས་པའི་སྐྱེས་བུ་འདི་ལས་སེམས་ཅན་རང་ཉིད་ཁོ་ན་ཆེས་ལྷག་པར་བྱ་བའི་ཕྱིར། རྩོད་པ་སྟེ་འཐབ་མོ་དགོས་ཀྱང་བྱས་ནས་རྙེད་བཀུར་ལྷག་པར་སྒྲུབ་ལ། ཅི་ནས་བདག་སེམས་ཅན་གྱི་ཡོན་ཏན་ནི་འཇིག་རྟེན་ཀུན་ལ་གྲགས་པར་བྱ་ལ། གཞན་ལུས་སེམས་ཙམ་འདིའི་ཡོན་ཏན་ནི་སུས་ཀྱང་མི་ཐོས་པར་བྱའོ། །བདག་སེམས་ཅན་གྱི་སྐྱོན་ནི་ཤིན་ཏུ་ཆེ་ན་ཡང་རུང༌། ཆུང་ན་ཡང་རུང་སྟེ་གསང་ཞིང་སྦ་ལ། ལུས་སེམས་ཙམ་འདིའི་སྐྱོན་ནི་ཤིན་ཏུ་ཆུང་ངུ་ཡང་འཇིག་རྟེན་ལ་བསྒྲག་པ་དང༌། བདག་སེམས་ཅན་ནི་ཀུན་གྱིས་མཆོད་པ་དང་འདི་ལ་སུས་ཀྱང་ཅིར་ཡང་མི་རྩི་བ་དེ་ལྟར་བྱའོ། །བདག་སེམས་ཅན་ནི་དེང་དུས་དང་ཕྱིས་ནས་ཀྱང་རྙེད་པ་རྙེད་ཅིང་ཐམས་

Page: 624 ཅད་ཀྱིས་བཀུར་སྟི་བྱེད་པ་དང་འདིས་ནི་ཅི་ཡང་མི་རྙེད་ཅིང་སུས་ཀྱང་མི་བཀུར་བ་དེ་ལྟར་བྱའོ། །ལུས་སེམས་ཙམ་ལ་ཐོག་མ་མེད་པ་ནས་ངར་གཅེས་པས་ཞེན་པ་འདི་ནི་ཤིན་ཏུ་མི་རུང་བ་སྟེ་ཉམ་ང་བ་དང་སྡུག་བསྔལ་བར་བྱས་ཏེ། དེ་ལ་བདག་སེམས་ ཅན་ནི་ཡུན་ཤིན་ཏུ་རིང་བས་དགའ་བས་བལྟ་ཞིང་ཁྲེལ་གད་ཀྱིས་གདབ་པར་བྱ་ལ། སེམས་ཅན་བདག་གཅིག་པུར་མ་ཟད་སེམས་ཅན་ཐམས་ཅད་ཀྱིས་ཀྱང་འདི་ཉམ་ཉེས་པ་ལ་བལྟས་ནས་བཞད་གད་དང་སྨོད་པར་བྱེད་པ་ཞིག་བྱའོ་ཞེས་ སེམས་པའོ། །ང་རྒྱལ་སྒོམ་པ་ནི་དེ་ཙམ་དུ་འཁོན་དུ་འཛིན་པའི་རྒྱུ་མཚན་ཅི་ཞེ་ན། ལུས་སེམས་ཀྱི་ཚོགས་པ་ཙམ་ལ་ངར་ཞེན་པ་འདི་ནི་ཁོ་རང་ཉོན་མོངས་ཤིང་སྡུག་བསྔལ་བ་ཡིན་དུ་ཟིན་ཡང་སླར་བདག་སེམས་ཅན་དང་ལྷན་ཅིག་ཏུ་ འགྲན་སྐད་ན་ཉམ་ཆུང་ངུ་འདི་དང་བདག་སེམས་ཅན་ཇི་ལྟར་མཉམ། ཅི་ཐོས་པ་དང༌། ཤེས་རབ་དང༌། གཟུགས་དང༌། རིགས་དང༌། ལོངས་སྤྱོད་གང་གིས་ན་འདི་དང་བདག་མཉམ་མམ་ཅི་སྟེ། དེ་དག་ཅི་ཡང་མེད་པ་འདིས་བདག་སེམས་ཅན་ཐོས་ སོགས་ཐམས་ཅད་དང་ལྡན་པ་འདི་ལ་འགྲན་པར་མི་འོས་པས་སོ། །དེ་ལྟར་བདག་སེམས་ཅན་གྱིས་ཡོན་ཏན་ཆེན་པོ་འདི་ནི་འཇིག་རྟེན་ཀུན་ལ་ཡོངས་སུ་གྲགས་པ་སྟེ། ལུས་སེམས་ཁྱོད་ཀྱིས་ཀྱང་མི་འདོད་བཞིན་དུ་འདི་ཐོས་པས་ ཁྱོད་བ་སྤུ་ལྡང་བའི་དགའ་བ་སྐྱེས་སམ་ཞེས་ཁྱོད་ལ་ཅི་འདྲས་བྱུང་ཞེས་པའི་ཚུལ་གྱིས་བསྟིང་ཚིག་ཏུ་འདྲི་བའོ། །དེ་བས་ན་ཅི་སྟེ་ལུས་སེམས་ཁྱོད་ལ་རྙེད་པ་དང་ལོངས་སྤྱོད་མང་དུ་ཡོད་ཀྱང་ཐམས་ཅད་ཁྱོད་ལོངས་སྤྱད་པར་མི་དབང་ སྟེ། ལུས་སེམས་ཁྱོད་ནི་ངེད་སེམས་ཅན་ལ་སྔོན་ནས་བྱིན་ཟིན་པའི་ཕྱིར། གལ་ཏེ་ལུས་སེམས་ཁྱོད་དེང་སེམས་ཅན་གྱི་ལས་གཞན་དོན་བྱེད་ན་ཁྱོད་ལ་ཟས་གོས་འཚོ་ཙམ་རེ་བྱིན་ནས་ཁྱོད་ལ་མཐུ་རྩལ་ཅི་ཡོད་པ་ཐམས་ཅད་བདག་

Page: 625 ༄༅། །སེམས་ཅན་གྱིས་སྟོབས་ཀྱིས་བླང་བར་བྱ་ལ། ལུས་སེམས་འདི་ནི་བདེ་བ་ལས་ཉམས་པར་བྱ་ཞིང་བདག་སེམས་ཅན་གྱིས་སྣོད་དང་སྦྱར་ཏེ་ཅི་དགོས་པར་བྲན་དུ་བཀོལ་བར་བྱའོ་ཞེས་བསམ་པ་སྟེ། དཔེར་ན། བདག་གཙུག་ ལག་ཕྲེང་བ་སྐྱེས་བུ་མཆོད་སྦྱིན་ལ་འགྲན་སེམས་སྐྱེས་པའི་ཚེ་འགྲན་སེམས་དེ་གཞོམ་པའི་ཕྱིར། མཆོད་སྦྱིན་ལ་བདག་ཏུ་འདུ་ཤེས་བཞག་ནས་གང་གིས་ཁོ་གཙུག་ལག་ཕྲེང་བ་ལ་བདག་མཆོད་སྦྱིན་རང་ནི་ལྷག་པར་བྱ་བའི་ཕྱིར། བདག་གི་རྙེད་དང་ བཀུར་སྟི་ནི་རྩོད་པས་ཀྱང་ངེས་པར་སྒྲུབ་པ་ནས་གཙུག་ལག་ཕྲེང་བ་འདི་ནི་བདག་མཆོད་སྦྱིན་གྱི་སྣོད་དམ། གནས་སྐབས་གང་དགོས་དང་སྦྱར་ནས་བཀོལ་ལོ་ཞེས་པའི་བར་སྒོམ་པ་ལྟ་བུ་སྟེ། མདོར་ན་སེམས་ཅན་འགྲན་ཟླ་མ་ཡིན་གྱི་བདག་འཛིན་ འགྲན་ཟླ་ཡིན་ནོ་ཞེས་སྟོན་པའོ། །འདི་རྣམས་སུ་བི་བྷཱུ་ཏིས། བདག་འཛིན་ནི་ཕྱུགས་ལ་ཡང་ཡོད་དེ་མདའ་རྡོ་འཕེན་པ་མཐོང་ན་འབྲོས་པའི་ཕྱིར། དེས་ན་བདག་འཛིན་ཤེས་པ་ཡིན་པས་དེའི་ཤེས་བྱ་ནི་བདག་ཁོ་ནའོ་ཞེ་ན། དེ་ལ་ བརྗོད་པ་ཤེས་པ་ནི་རྣམ་གཉིས་ཏེ། རྟོག་བཅས་དང༌། རྟོག་མེད་དོ། །དེ་ལ་རྟོག་མེད་ནི་ཤེས་བྱ་ལ་དམིགས་ནས་སྐྱེ་བའི་ཕྱིར། དེ་མེད་ན་མི་འབྱུང་ངོ༌། །བདག་འཛིན་ནི་རྟོག་བཅས་ཡིན་པས་ཡུལ་མེད་ཀྱང་སྐྱེ་སྟེ། གཞན་དུ་ན་བདག་རྒྱལ་པོ་ཡིན་ ནོ་ཞེས་བརྟགས་པས་རྒྱལ་པོར་འགྱུར་དགོས་སོ་ཞེས་བཤད་ལ། འདི་ལ་ཡང་རྟོག་མེད་ལ་ཡུལ་ངེས་པར་དགོས་པར་མ་ངེས་ཏེ། འདུ་ཤེས་མེད་པ་བའི་སྙོམས་འཇུག་ལ་ཡུལ་མེད་པའི་ཕྱིར་དང༌། སྤྱིར་ཡུལ་ཡུལ་ཅན་ནི་སྒྲོ་བཏགས་པས་ ཡིན་གྱི་རང་གི་ངོ་བོ་ཉིད་ཀྱིས་མ་ཡིན་པའི་ཕྱིར་དང༌། བདག་མེད་རྟོགས་པའི་ཤེས་རབ་ལ་ཡང་ཡུལ་ཡོད་པ་མ་ཡིན་ཏེ་རང་ཉིད་རང་གི་ཡུལ་དུ་མི་རུང་ལ་བདག་ནི་མེད་པས་ཡུལ་མ་ཡིན་བདག་མེད་དུ་ཡང་གྲུབ་པ་མེད་པས་བདག་མེད་ཀྱང་ཡུལ་

Page: 626 མ་ཡིན་དེ་དག་ལས་གཞན་པའི་ཡུལ་ཡང་མེད་པའི་ཕྱིར་རོ། །དཀའ་འགྲེལ་ཆུང་ངུ་ལས་ནི། བྱང་ཆུབ་སེམས་དཔའི་ཡོན་ཏན་ལ་ང་རྒྱལ་མང་པར་བྱ་བའི་དོན་དུ་བརྗོད་པ་ནི། གང་བས་དེ་དམན་འདི་ཡོད་ཅིང༌། །ཞེས་བྱ་བའོ། ། སེམས་ཅན་དམན་པ་ཡང་གཞན་ལ་བལྟོས་ནས་ཡོན་ཏན་ཅན་དང་མཆོག་ཏུ་བརྟག་པ་ནི། གང་བས་བདག་མཆོག་དེ་ཡང་ཡོད། །ཅེས་བྱའོ། །སེམས་ཅན་ངན་པ་ལ་ཁྱད་དུ་མི་གསད་པར་བསྟན་པ་ནི། ཚུལ་ཁྲིམས་ལྟ་ བས་རྒུད་སོགས་ནི། །ཞེས་སོགས་སོ། །སེམས་ཅན་ངན་པའི་ཉེས་པ་སེལ་བ་དང༌། དགེ་བ་ལ་འཇུག་པའི་སྡུག་བསྔལ་དང༌། དཀའ་བ་མི་བཟོད་པར་མི་བྱ་བ་ནི། ཅི་ནུས་བདག་གིས་གསོ་དགོས་ཏེ། །གནོད་པ་བདག་གིས་དང་དུ་བླང༌། ། ཞེས་བྱའོ། །སེམས་ཅན་དམན་པ་ལ་མི་ཕན་པའི་བྱང་ཆུབ་སེམས་དཔའི་ཡོན་ཏན་ལ་ཡོན་ཏན་དུ་མི་ལྟ་བ་ནི། འོན་ཏེ་ཞེས་སོགས་སོ། །ཡོན་ཏན་གྱིས་རློམ་ན་དེ་ཉེས་པ་ཡིན་གྱིས་ཡོན་ཏན་མ་ཡིན་པར་བསྟན་པ་ནི། ངན་འགྲོ་ གདུག་པའི་སོགས་སོ་ཞེས་བཀྲལ་ལ། མང་ཞིག་བདག་གི་སྡུག་བསྔལ་གྱི་གནོད་པ་དང་སྦྱར་བར་བྱ་ཞེས་འདོན་ཏོ། །སྤྱིར་རྒྱ་བོད་ཀྱི་འགྲེལ་པ་ཀུན་ན་བདག་འཛིན་ལ་བདག་རྙིང་པ་དང༌། སེམས་ཅན་ལ་བདག་གསར་པ་ཞེས་བཏགས་ ནས་བཤད་སྣང་ཀྱང༌། དེ་ལྟ་ན་གཉི་ག་བདག་ཏུ་མཚུངས་པས་གཞན་མ་ཡིན་པར་འགྱུར་པས་བདག་དང་བདག་བརྗེ་བ་ཞེས་འདོན་རིགས་ཀྱི་བདག་གཞན་བརྗེ་བ་ཞེས་བརྗོད་མི་རིགས་པར་འགྱུར་ལ། སྤྱིར་བདག་ནི་རྟོག་པ་ཡིན་པས་སྐད་ཅིག་གི་ཕྲེང་ བ་ཡིན་གྱིས་ཕྱི་མར་གནས་པ་མེད་པས་འདི་ལ་ནི་རྙིང་པ་རྒན་པོ་ཞིག་གང་ནའང་མེད་དོ། །དེ་ལྟར་སེམས་ཅན་ལ་བདག་ཏུ་བཟུང་ནས་བདག་གཞན་བརྗེ་བ་བསྟན་ཟིན་ནས། ད་ནི་བདག་འཛིན་རང་སོར་བཞག་སྟེ་བདག་གཞན་བརྗེ་བ་སྟོན་ཏོ། །

Page: 627 ༄༅། །དེ་ལ། འདི་ཡིས་བརྒྱ་ཕྲག་ཐམས་ཅད་དུ། །འཁོར་བར་བདག་ལ་གནོད་པ་བྱས། །ཞེས་པ་འདི་སེམས་ཅན་བདག་ཏུ་བྱས་པའི་མཇུག་སྡུད་དུ་ཕལ་ཆེར་གྱི་བཤད་འདུག་ཀྱང་དེ་ལྟ་ན་བདག་སེམས་ཅན་ལ་ གནོད་པ་བྱས་ཞེས་འཆད་དགོས་པས་བཤད་རུང་ཙམ་ཡིན་ཡང་ཧ་ཅང་འབྲེལ་མི་ཆེའོ། །ེས་ན་བདག་འཛིན་འདི་ཡིས་འཁོར་བ་ཐོག་མ་མེད་པ་ནས་བདག་ཏུ་བཟུང་ཡུལ་གྱི་སེམས་འདི་ཉིད་ལ་གནོད་པ་ཁོ་ན་བྱས་ཏེ། སེམས་ ཁྱོད་ཉིད་ཐོག་མ་མེད་པ་ནས་རང་དོན་ཁོ་ན་བྱེད་པར་འདོད་པ་འདིས་དུས་འདས་ཀྱང་སྡུག་བསྔལ་འབའ་ཞིག་མྱོང་བར་ཟད་ལ། ད་ནི་བདག་གཅེས་འཛིན་དེ་ཐོང་ལ་གཞན་དོན་ལ་རབ་ཏུ་འཇུག་པར་གྱིས་དང༌། རང་དོན་གྱི་མཆོག་ནི་གཞན་དོན་ ཡིན་པར་སངས་རྒྱས་ཀྱིས་གསུངས་པ་མི་སླུ་བས་འདིའི་ཕན་ཡོན་མཐའ་ཡས་པ་མཐོང་ནས་ཡིད་ཆེས་པར་འགྱུར་རོ། །སྔོན་ནས་སེམས་ཁྱོད་ཀྱིས་འདི་ལྟར་བྱས་ན་སངས་རྒྱས་ཀྱི་བདེ་བ་འཐོབ་ཀྱི་འཁོར་བའི་སྡུག་བསྔལ་ཟད་མི་ཤེས་པ་ འདི་ལྟ་བུ་མྱོང་མི་དགོས་པ་ཞིག་ན་གཞན་ཕ་མའི་ཁུ་ཁྲག་གི་ཐིགས་པ་ཙམ་ལ་ང་དང་ང་ཡིར་བཟུང་ནས་གཅེས་སྤྲས་བྱས་པས་སྲིད་པའི་སྡུག་བསྔལ་འདི་མྱོང་ངོ༌། །ད་ནི་སྔར་ཁུ་ཁྲག་ལ་བདག་ཏུ་ུབཟུང་བ་དེ་ལྟར་ཁྱོད་ཀྱིས་གཞན་ སེམས་ཅན་ལ་ཡང་བདག་འཛིན་གོམས་པར་གྱིས་ཤིག །དེ་བཞིན་དུ་ད་ནི་གཞན་ཁོ་ན་གཅེས་པར་བཟུང་ནས་གཞན་གྱི་རྟོག་ཆེན་པ་སྟེ་མཚང་ལེན་པའི་བྱ་ར་བ་གྱིས་ལ། བདག་ལ་བདོག་པ་ཅི་མཐོང་ཡང་དེ་ཕྲོགས་ལས་གཞན་སེམས་ ཅན་ལ་བྱིན་ལ་ཕན་བདེར་གྱིས་ཤིག །འཁོར་བ་ཐོག་མེད་ནས་བདག་འཛིན་འདིས་གནོད་པ་བྱས་པས་ད་ནི་བདག་ཉིད་བདེ་བ་སོགས་ལ་ཕྲག་དོག་པར་རིགས་ཀྱི་གཞན་བདེ་བ་ལ་ཕྲག་དོག་པར་མི་རིགས་སོ། །དེ་ཕྱིར་བདག་གི་བདེ་

Page: 628 དགེ་གཞན་སེམས་ཅན་ལ་ཐོངས་ལ་གཞན་སེམས་ཅན་གྱི་སྡིག་སྡུག་བདག་ཉིད་ལ་ལོང་ཞིག །ད་ནི་གཞན་སྐྱོན་ལ་བརྟག་པའི་དུས་མ་ཡིན་གྱི་རྣམ་པ་ཀུན་ཏུ་བདག་ཉིད་ཀྱི་སྐྱོན་ལ་བརྟག་པ་དང༌། བཟོད་སྨྲའི་སྐྱེས་རབས་སུ་རྒྱལ་ པོས་ཉེས་མེད་དུ་ཡན་ལག་བཏུབས་ཀྱང་ཀྱེ་མ་བདག་བཟོད་པའི་སྟོབས་ཆུང་བས་རྒྱལ་པོ་འདིའི་ཁྲོ་བ་གཞིལ་མ་ནུས་སོ་ཞེས་རང་ཉིད་ཀྱི་སྐྱོན་དུ་རྟོག་པ་ལྟར་གཞན་ལ་སྐྱོན་མཐོང་ནའང་དེ་ལྟར་རྟོག་པ་རང་ཉིད་ཀྱི་སྐྱོན་དུ་ངོས་འཛིན་པ་དང༌། གཞན་ གྱིས་གནོད་པ་བྱས་ཀྱང་བདག་གི་ལས་ཀྱིས་ཉེས་སོ་ཞེས་རང་ཉིད་ཀྱི་སྐྱོན་དུ་ཤེས་པར་བྱ་ལ། རང་གིས་ཉེས་པ་ཆུང་ངུ་ཙམ་བྱུང་ནའང་མང་པོའི་མདུན་དུ་མཐོལ་ཞིང་བཤགས་ཏེ་ས་བོན་ཙམ་ཡང་རྒྱུད་ལ་མ་ལུས་པར་བྱོས་ཤིག །དེ་ བཞིན་དུ་བདག་གི་ཡོན་ཏན་སུས་ཀྱང་མི་ཤེས་པར་སྦ་ཞིང་གཞན་གྱི་ཡོན་ཏན་དང་གྲགས་པ་སྒྲོགས་ཞིང་གཞན་རྣམས་ལ་རྗེ་བོའི་འདུ་ཤེས་བཞག་སྟེ་རང་ཉིད་བྲན་ལྟར་བཀོལ་བར་བྱ་ལ། བྱིས་པ་སྐྱོན་གྱི་རང་བཞིན་ཡིན་པའི་ཕྱིར། རང་ ཉིད་སྐྱོན་གྱི་འབྱུང་གནས་སུ་ཤེས་པར་བྱ་ལ། གལ་ཏེ་ཡོན་ཏན་ཅུང་ཟད་མཐོང་ནའང་སོ་སྐྱེའི་ཡོན་ཏན་རྣམས་ནི་གློག་ལྟར་སྐད་ཅིག་ཙམ་དུ་ཟད་པས་གློ་བུར་གྱི་ཆོས་དེས་བསྙེམས་ཤིང་རང་བསྟོད་པར་མི་བྱའོ། །མདོར་ན་སྔོན་ཆད་ བདག་དོན་དུ་བསམས་ནས་གཞན་ལ་གནོད་པ་བྱས་པ་དེ་ཐམས་ཅད་ད་ནི་སེམས་ཅན་ཐམས་ཅད་ཀྱི་བྱང་ཆུབ་ཀྱི་རྒྱུར་བདག་ཉིད་ཁོ་ན་ལ་འབབ་པར་གྱིས་ཤིག །དེ་ལྟར་རྣམ་པ་དུ་མར་བརྟགས་ཏེ་བདག་འཛིན་འདི་ནི་གཉའ་དྲག་ཞེས་པ་ བརྡ་རྙིང་སྟེ་ཆེར་དྲེགས་པར་འགྱུར་བར་ཤེད་སྐྱེད་པར་མི་བྱ་སྟེ། ཅི་ནས་ཀྱང་བག་ཞུམ་ཞིང་གདོང་དམའ་ལ་རབ་ཏུ་ངོ་ཚ་བ་བག་སར་ལྟ་བུ་དང་འཇིགས་ཤིང་སྐྲག་པ་གཤེད་མས་ཟིན་པའི་མི་ལྟ་བུ་དང༌། སྒོ་གསུམ་ཀུན་ནས་བསྡམས་པ་དུལ་

Page: 629 ༄༅། །བའི་དགེ་སློང་ལྟ་བུར་ཐུལ་པར་གྱིས་ཤིག་པའོ། །འདིར་བི་བྷཱུ་ཏིས། ངོ་ཚ་བ་ནི་བྱ་བ་མ་ཡིན་པ་ལས་སོ། །འཇིགས་པ་ནི་དམྱལ་བ་ལས་སོ། །བསྡམས་པ་ནི་དབང་པོ་རྣམས་སོ། །ཞེས་དང༌། དེ་ལྟར་ལུས་ཚར་བཅད་ནས་འདི་མན་སེམས་ཚར་བཅོད་པར་འཆད་ ཅིང༌། དཀའ་འགྲེལ་ཆུང་ངུ་ལས་ནི། ཕྲག་དོག་སོགས་བསྒོམས་པའི་འབྲས་བུ་ནི་ཡིད་ཁྱོད་སོགས་དང༌། དེ་རྣམས་ཀྱིས་བསམ་པ་རྗེས་སུ་སྒྲུབ་པ་བཤད་ནས། སྦྱོར་བ་ལ་རྗེས་སུ་སྒྲུབ་པ་དང༌། སེམས་དབང་དུ་བྱ་བ་གཉིས་ཀྱི། དང་པོ་གཞན་གྱི་རྟོག་ཆེན་སོགས་དང༌། ཕྱི་མ་འཆད་འགྱུར་གྱི། དེ་བྱ་དེ་ལྟར་གནས་བྱ་ཞིང༌། །སོགས་ཚར་ཕྱིན་པའི་བར་དུ་བཤད་དོ། །རྟོག་ཆེན་པ་ནི་ཉན་སྣ་པའི་མིང་ཡིན་པས་ས་བཟང་པས་རྟོག་དཔྱོད་ཆེན་པོ་ གྱིས་ལ་ཞེས་འབྲུ་གཉེར་བའང་སྙིང་པོ་མི་ཆེའོ། །ད་ནི་གཉེན་པོའི་ཤེས་པ་ལ་བདག་ཏུ་བཟུང་སྟེ་ལེགས་པར་འདོམས་པ་འཆད་དེ། དེ་ལྟར་གཞན་ཕན་འབའ་ཞིག་བྱ་ཞིང་སྒོ་གསུམ་སྐད་ཅིག་ཀྱང་དོན་མེད་དུ་མི་གནས་པར་ གཞན་དོན་དུ་འགྱུར་བ་དེ་ལྟ་བུ་ཁོ་ནས་གནས་པར་བྱ་ཡི་སྔར་ཕུང་པོ་ལ་བདག་ཏུ་བཟུང་ནས་བདག་ཉིད་གཅེས་འཛིན་ཁོ་ན་བྱས་པ་དེ་ལྟར་ནི་སེམས་ཁྱོད་ཀྱིས་དེ་ཕྱིན་ཆད་སྐད་ཅིག་ཡར་མི་བྱ་སྟེ། དེ་ལྟ་བུའི་ཚུལ་ལ་རང་གི་སེམས་འདི་ནི་རང་ གི་དབང་དུ་འདུས་ཤིང་དགའ་མགུར་བྱར་ཡོད་པ་རྟ་ཅང་ཤེས་དུལ་བ་ལྟ་བུར་བྱོས་ཤིག །གལ་ཏེ་བླང་དོར་དེ་ལས་འདས་ནས་ད་དུང་ཕྱིན་ཅི་ལོག་ཏུ་སྤྱོད་ན་ནི་སེམས་ཁྱོད་ཚར་བཅད་པར་བྱའོ། །ཞེས་ཅུང་ཟད་བསྡིགས་པ་དང༌། དེ་ལྟར་ གདམས་པས་ཀྱང་སེམས་ཁྱོད་མ་དུལ་བའི་ངན་ལང་བྱེད་ན་ནི་འཁོར་བ་ཐོག་མེད་ནས་ཀྱི་སྐྱོན་དང་ཉེས་རྩ་ཐམས་ཅད་ཕུང་པོ་ལ་བདག་འཛིན་ཅན་གྱི་སེམས་ཁྱོད་ཁོ་ན་ལ་བརྟེན་པར་ཟད་པས་ཁྱོད་ཤིན་ཏུ་གཅེས་སྤྲས་སུ་བྱེད་པའི་ལུས་ལ་

Page: 630 ཟས་གོས་མི་སྦྱིན་པར་བཀོལ་བ་དང༌། སོ་སོར་རྟོག་པའི་ཤེས་རབ་ཀྱི་སྒོ་དུ་མ་དང་སོ་སོ་རང་རིག་པའི་ཡེ་ཤེས་ཀྱིས་ཕུང་པོ་ལ་བདག་ཏུ་འཛིན་པ་ཅན་གྱི་སེམས་ཁྱོད་ལྡང་བ་མེད་པར་ཚར་བཅད་པར་བྱའོ་ཞེས་ཆེར་བསྡིགས་པ་དང༌། འཁོར་བ་ ཐོག་མེད་ནས་ཕུང་པོ་ལ་བདག་འཛིན་ཁྱོད་ཀྱིས་སེམས་རྒྱུན་ཙམ་ཁོ་བོ་བརླག་པ་ཁོ་ནར་བྱས་མོད་ཀྱང་སྔོན་ཁོ་བོས་ཁྱོད་ཀྱི་སྐྱོན་མ་ཤེས་ཤིང་གཉེན་པོའི་ལུས་སྟོབས་མ་རྫོགས་པའི་དུས་དེ་གཞན་ཡིན་ལ། ད་ནི་ཉེས་རྩ་ཐམས་ཅད་ཁྱོད་ལ་ བརྟེན་པ་འདི་ཡང་ངས་མཐོང་ཞིང་ཁྱོད་ནི་ཕྱིན་ཅི་ལོག་གི་འཛིན་སྟངས་གོམས་པ་ཙམ་མ་གཏོགས་ཡུངས་འབྲུ་ཙམ་དུ་ཡང་མི་བདེན་པ་འདི་ཡང་མཐོང་གི་ད་ནི་ཁྱོད་གར་འབྲོས་ཏེ་སེང་གེས་རི་དྭགས་བཟུང་བ་ལྟར་ཁྱོད་ཀྱི་དྲེགས་པ་ཐམས་ཅད་ ངས་གཞོམ་པར་བྱའོ། །ད་ཕྱིན་ཆད་ཕུང་པོ་ལ་བདག་དང་གཅེས་པར་བཟུང་ནས་བདག་བདེ་བར་བྱའོ་སྙམ་པའི་བློ་སྔོན་ནས་ཡོད་པ་དེ་དོར་ཞིག །ལུས་སེམས་ཙམ་ཁྱོད་ནི་གཉེན་པོའི་ཤེས་པ་མཐུ་བརྟས་པ་ང་ཡིས་སེམས་ཅན་ཐམས་ ཅད་ལ་བྱང་ཆུབ་ཀྱི་སེམས་ཉོ་བའི་རིན་དུ་བཙོངས་ཟིན་གྱིས་སེམས་ཅན་ཐམས་ཅད་ཀྱི་བྲན་དུ་གྱུར་པ་ཁྱོད་སྐྱོ་ངལ་དུ་མ་སེམས་པར་ཇོ་བོ་སེམས་ཅན་རྣམས་ལ་རང་གི་ནུས་པ་ཅི་ཡོད་ཀྱིས་ཞོ་ཤ་སྟེ་མཁོ་བེད་གང་ཡོད་ཕུལ་ཞིག་རྣམ་པ་ཀུན་དུ་བག་ མེད་པར་གྱུར་པ་གདོལ་བ་ལྟ་བུའི་སེམས་བདག་འཛིན་ཅན་ཁྱོད་གལ་ཏེ་སེམས་ཅན་ལ་མ་བྱིན་པར་མཐོ་ཞིང་གཅེས་པར་བཟུང་ན་ཁྱོད་ཀྱིས་གཉེན་པོའི་ཤེས་པ་ཅན་གྱི་སེམས་རྒྱུན་ཁོ་བོ་དམྱལ་སྲུང་འཇིགས་སུ་རུང་བ་རྣམས་ལ་སྟེར་བར་ གདོན་མི་ཟ་ལ། སྔར་ཡང་ཐོག་མ་མེད་པ་ནས་ཕུང་པོ་ལ་བདག་འཛིན་ཁྱོད་ལ་གཅེས་སྤྲས་སུ་བྱས་པས་ཁྱོད་ཀྱིས་སེམས་ཁོ་བོ་རེས་འགའ་དམྱལ་སྲུང་རྣམས་ལ་བྱིན་ཏེ་སྲན་མ་ལྟར་བཙོས། ཡུངས་ཀར་ལྟར་བཙིར། ཤིང་ལྟར་བཤགས།

Page: 631 ༄༅། །སྡུག་བསྔལ་ལ་མ་མྱོང་བ་མེད་པ་ལ་གཏད། རེས་འགའ་ཡི་དྭགས་སུ་འཕངས་ཏེ་བཀྲེས་སྐོམ་གྱིས་མནར། རེས་འགའ་དུད་འགྲོར་འཕངས་ཏེ་སྡུག་བསྔལ་ལས་ཐར་དུས་མེད། དེ་ལྟར་སངས་རྒྱས་ཀྱིས་ཀྱང་བགྲང་གིས་ མི་ལང་བ་དེ་ཐམས་ཅད་ཁྱོད་ཁོ་ནས་བཅོལ་བ་ཡིན་ལ། ད་ནི་ཁྱོད་ཀྱི་འཁོན་རྣམས་ཁོ་བོས་ཀྱང་དྲན་ཏེ་ཕྱིན་ཆད་ཕུང་པོ་ལ་བདག་ཏུ་བཟུང་ནས་དེ་བདེ་བར་འདོད་པའི་སེམས་ཁྱོད་རྨི་ལམ་ན་ཡང་མི་རྒྱུ་བ་དེ་ལྟར་གཞོམ་པར་བྱ་ཞིང་རྩད་ནས་དབྱུང་ བར་བྱའོ། །དེ་ལྟར་གཉེན་པོའི་ཤེས་པ་ལ་བདག་ཏུ་བྱས་ཤིང་ཕུང་པོ་ངར་འཛིན་ལ་གཞན་དུ་བཞག་ནས་ཚར་བཅད་པ་བསྟན་ཟིན་ནས། ད་ནི་བདག་གཞན་གྱི་ཐ་སྙད་འཇིག་རྟེན་གྱི་གྲགས་པ་ལྟར་སོར་བཞག་སྟེ། བདག་གཞན་བརྗེ་བ་ དང༌། ལུས་ལ་ཆགས་བྱ་མ་ཡིན་པར་སྟོན་ཏེ། རྒྱུ་མཚན་དེ་རྣམས་ཀྱི་ཕྱིར་ན་སུ་ཞིག་བདག་ཉིད་བདེ་བར་འདོད་ན་བདག་གཅེས་འཛིན་འདོར་བར་བྱ་སྟེ། བདག་ཏུ་ལྟ་བ་དང་གཅེས་པར་འཛིན་པ་མེད་ན་སྡུག་བསྔལ་ཞེས་བྱ་བ་ཤེས་ བྱ་ལ་མི་མཐོང་སྟེ་ཇི་ལྟར་བེམ་པོ་རྣམས་ལ་སྡུག་བསྔལ་མེད་པ་བཞིན་ནོ། །བདག་ཉིད་སྲུང་བར་འདོད་པ་དེས་ཀྱང་གཞན་ཐམས་ཅད་སྲུང་བར་བྱ་སྟེ་ཐམས་ཅད་ཀྱི་ནང་དུ་བདག་ཉིད་ཀྱང་ཞར་ལ་འདུ་བའི་ཕྱིར་དང༌། ཇི་ལྟར་ཡུལ་ཁམས་དེ་བསྲུངས་ན་རང་ཉིད་ཞར་ལ་བསྲུངས་བར་འགྱུར་བ་བཞིན། །དེས་ན་བདག་ལ་ཆགས་པར་མི་བྱ་སྟེ་སེམས་ནི་ངོ་བོ་ཉིད་ཀྱིས་སྟོང་ཞིང་རང་བཞིན་གྱིས་འོད་གསལ་པ་ཡིན་པས་ངོ་བོ་ཉིད་དེ་ལ་ནི་དམིགས་པ་ཙམ་དུ་ཡང་ བྱར་མེད་པ་ཡིན་པས་བདག་གཞན་གང་ཡང་མ་ཡིན་ཞིང་ཆགས་པར་མི་ནུས་ལ། ལུས་འདི་ནི་ཆུ་བུར་ཙམ་སྟེ་བདག་གཞན་གང་ཡང་མ་ཡིན་ལ་སུའི་ཡང་མ་ཡིན་པའི་ཕྱིར་དང༌། ལུས་འདི་ནི་ཅི་ཙམ་བསྐྱངས་པ་དེ་ཙམ་དུ་གཟེ་ རེག་འཕེལ་བ་ཡིན་ལ། སེམས་ཅན་གཅིག་གི་འདོད་པ་ལ་བརྣབ་སེམས་པ་དེའི་བསམ་པ་ནི་ས་འདི་ཐམས་ཅད་གསེར་དུ་གྱུར་ཀྱང་མི་རྫོགས་ཤིང་མི་ཚིམ་སྟེ་ད་དུང་འདི་ཐམས་ཅད་བཻཌཱུརྱ་གྱུར་ཅིང་འཇིག་རྟེན་གྱི་ཁམས་གཞན་དག་ཀྱང་

Page: 632 གསེར་དུ་གྱུར་ནས་བདག་ལ་ཡོད་ན་ཅི་མ་རུང་སྙམ་པ་སོགས་ཐུག་མཐའ་མེད་པའི་ཕྱིར་དང༌། ལོངས་སྤྱོད་དང་བདེ་བ་ཅི་ཐོབ་ཀྱང་ཚིམ་པ་མེད་ཀྱི་སྟེང་དུ་སླར་ཡང་ཆོག་མི་ཤེས་པའི་འདོད་སྲེད་དང་སྒྲུབ་པའི་སྡུག་བསྔལ་ལུས་སེམས་ཉོན་མོངས་པར་ བྱེད་པ་དང༌། དེའི་ཕྱིར་གཞན་ལ་བསམ་ངན་སོགས་བསམ་པ་ཉམས་པ་སྐྱེ་ཞིང་དེ་ལག་ཏུ་ལེན་དུ་ལེན་པའི་སྦྱོར་ངན་ལ་འཇུག་ཅིང་བསམ་པའི་ཆ་ཙམ་ཡང་མ་རྫོགས་པར་ཤི་ནས་ཕྱི་མར་མི་བཟད་པའི་སྡུག་བསྔལ་མཐའ་མེད་དུ་མྱོང་བར་འགྱུར་རོ། ། དེ་ན་སུ་ཞིག་གང་ལ་ཡང་བལྟོས་པ་དང་རེ་བ་དང་ཆགས་པ་མེད་པ་དེ་ལ་ནི་གནས་སྐབས་དང་མཐར་ཐུག་གི་ཕུན་ཚོགས་ཐམས་ཅད་ཟད་མི་ཤེས་པར་འདུ་བ་རྒྱ་མཚོར་ཆུ་བོ་བཞིན་དུ་འཇུག་སྟེ་ནམ་མཁའི་མཛོད་དང་ལག་ན་རིན་པོ་ཆེ་ལ་སོགས་ པའི་རྒྱལ་སྲས་ཆེན་པོ་རྣམས་དང༌། རྫོགས་པའི་སངས་རྒྱས་བཞིན་ནོ། །དེ་བས་ན་ལུས་ལ་ཆགས་ཤིང་ཞེན་པའི་སེམས་སྐྱེ་བའི་སྐབས་དབྱེ་བར་མི་བྱ་ལ་གང་ཞིག་ཕྱི་ནང་གི་དངོས་པོ་གང་རུང་ལ་ཡིད་ཏུ་འོང་བའོ་ཞེས་མི་འཛིན་ཞིང་དེ་ལྟ་ བུ་ལ་ཞེན་པར་མི་བྱེད་པ་དེ་ནི་སེམས་ཀྱི་དངོས་པོའི་ནང་ན་ཤིན་ཏུ་མཆོག་ཡིན་ནོ། །དེས་ན་ཤི་བའི་མཐར་ཤ་རུས་སོ་སོར་འབྲལ་ཞིང་རུས་ཚིགས་སུམ་བརྒྱ་དྲུག་བཅུ་པོ་ཡང་ཐ་དད་དུ་བྱེ་ལ་ཚིགས་རེ་ཡང་དུམ་བུ་མང་པོར་འཐོར་ཞིང་ དུམ་བུ་རེ་ཡང་ཕྱེ་མར་ཞིགས་ཏེ་མཐར་ཐལ་བར་འགྱུར་ཞིང་ཐལ་བ་དེ་ཉིད་ཀྱང་གར་སོང་མི་མངོན་པར་འགྱུར་ལ། ད་ལྟ་གསོན་པར་བཟུང་བའི་དུས་འདི་ཉིད་ནའང་ལུས་ཁོ་རང་ནི་བེམས་པོ་ཡིན་པས་མི་གཡོ་བ་སེང་གེའི་གསོབ་ལྟ་བུ་ ཡིན་ལ་སེང་གེའི་གསོབ་དེའི་ནང་དུ་མིས་ཞུགས་ཏེ་འགྲོ་བ་དང་འཁྱམ་པ་ལྟར་ལུས་ལས་གཞན་ཐ་དད་པའི་སེམས་མི་ལྟ་བུས་ནང་ནས་བསྐྱོད་པ་ན་འགྲོ་བ་དང༌། སྨྲ་བ་ལ་སོགས་པར་སྣང་བ་ངོ་བོ་མི་གཙང་བ་འདུས་པའི་ཕུང་པོ་བརྟགས་ན་

Page: 633 ༄༅། །འཇིགས་སུ་རུང་བ་སྐྱེ་བས་མི་བཟད་པ་འདི་ལྟ་བུའི་ལུས་གཟུགས་ལ་བདག་གོ་ཞེའམ་བདག་གི་ཞེས་ཅིའི་ཕྱིར་འཛིན། དེས་ན་གསོན་པའམ་ཤི་བ་གང་གི་ཚེ་ཡང་སེམས་སྟོང་པ་ཁྱོད་ལ་ལུས་གདོས་བཅས་རོ་ ཁུར་བ་ལྟ་བུས་ཅི་ཞིག་བྱ། ཕྱི་རོལ་གྱི་ས་དང་རྡོ་དང་བོང་བ་སོགས་དང་འདི་ལ་བེམ་པོ་ཡིན་པ་དང་སྙིང་པོ་མེད་པ་དང་འཇིག་པའི་ཆོས་ཅན་ཡིན་པའི་ཆ་ནས་ཁྱད་པར་ཅི་ཞིག་ཡོད་ན་བོང་སོགས་ལ་བདག་གམ་བདག་གི་ཞེས་མི་འཛིན་ལ་ ལུས་འདི་ལ་བདག་གམ་བདག་གི་ཞེས་འཛིན་པའི་རྒྱུ་མཚན་ཅི་ཡོད་ནས་བདག་ལྟའི་ང་རྒྱལ་སེལ་བར་མི་བྱེད་དེ་ཀྱེ་ཧུད་ཅེས་བདག་ལྟའི་འདུ་ཤེས་ལ་དམད་པ་དང༌། དེས་སྐྱོ་བའི་ཚིག་སྟེ་འཇམ་དཔལ་རྣམ་རོལ་གྱི་མདོར། དེ་བཞིན་གཤེགས་ པས་ཚོང་དཔོན་གྱི་བུ་འཇིགས་བྱིན་ལ་སྨད་ཚོང་གི་བུ་མོ་གསེར་མཆོག་འོད་དཔལ་བསྟན་ཏེ། ཁྱོད་ཀྱིས་འདི་ཅིར་མཐོང་དྲིས་པ་ན། འདི་ལུས་རྩ་དང་རྩིག་པ་འདྲ། །སེམས་ནི་བསྟན་ཏུ་མ་མཆིས་ཏེ། །ཞེས་སོགས་ཀྱིས་ལན་བཏབ་པ་ བཞིན་ནོ། །དེས་ན་སྔོན་ཆད་ལུས་འདིའི་འཚོ་ཚིས་ཀྱི་ཁ་ད་ཁོ་ན་བྱས་ཏེ་ཟས་གོས་སོགས་ཀྱི་ཕྱིར་སྡིག་པ་མང་དུ་བསགས་ཤིང་སོག་རུམ་དང་སྲུང་ཚོལ་ལས་བྱུང་བའི་སྡུག་བསྔལ་ཡང་མཐའ་ཡས་པར་མྱོང་ཡང་སྙིང་པོ་མེད་ཀྱི་སྟེང་དུ་ངན་ འགྲོའི་རྒྱུ་མཐའ་ཡས་པ་བསྒྲུབས་མོད་ཀྱང་ལུས་འདི་ནི་ཤིང་སྡོང་ལ་རྩིགཔས་བསྐོར་ཞིང་ཆུས་བྲན་ཡང་དགའ་བ་དང་ཆགས་པ་མེད་ལ། སྟ་རེས་བཅད་ཅིང་དུམ་བུར་བྱས་ཀྱང་ཁོང་ཁྲོ་བ་མེད་པ་ལྟར་ལུས་འདི་ཡང་དེ་ལྟར་ཟད་ན་ཕན་གནོད་ ཅི་ཡང་བྱས་པར་མི་ཤེས་པ་དེ་ཅིའི་ཕྱིར་སྐྱོང༌། སེམས་བདག་གིས་བསྐྱངས་པ་དང་ཕྱིས་བྱ་རྒོད་ཀྱིས་ཟོས་པ་གཉི་གའི་ཚེ་ཡང་སྐྱོང་བ་པོ་ལ་དགའ་བ་དང་ཟ་བ་པོ་ལ་སྡང་བ་མི་འདུག་ན་འདི་ལ་སེམས་བདག་ཅིའི་ཕྱིར་ཆགས། བསྟོད་

Page: 634 དམ་དམད་ཀྱང་བདག་ལ་བསྟོད་དོ་ཞེའམ་དམད་དོ་ཞེས་ཁོ་རང་གིས་དེ་ཉིད་ཤེས་པ་མེད་པ་ལ་ལུས་ལ་བསྟོད་དམད་བྱུང་བ་ལ་སེམས་བདག་གིས་ཆགས་སྡང་བྱེད་པ་འདི་ནི་བོང་བ་ལ་བསྟོད་དམད་བྱུང་བ་ན་ནམ་མཁས་ཆགས་སྡང་བྱེད་པ་ ལྟ་བུར་ཤིན་ཏུ་མི་རིགས་པའོ། །ཡང་ལུས་འདི་ལ་ཕན་པར་འདོད་པ་དེ་སེམས་བདག་གི་བཤེས་སམ་མཛའ་བོ་ཡིན་ནོ་ཞེ་ན། སེམས་ཅན་ཐམས་ཅད་ཀྱང་རང་རང་གི་ལུས་ལ་ཕན་པར་འདོད་པས་དེ་ཐམས་ཅད་ལ་ཅིའི་ཕྱིར་མི་ དགའ། དེ་རྣམས་ལ་སོགས་པའི་རྒྱུ་མཚན་མཐའ་ཡས་པས་ན་སེམས་བདག་གིས་ལུས་འདི་ལ་ཆགས་ཤིང་ཞེན་པར་མི་བྱ་བར་སེམས་ཅན་ཐམས་ཅད་ཀྱི་དོན་དུ་ལུས་འདི་དཀོན་མཆོག་ལ་དབུལ་ཞིང་བསམ་པས་སེམས་ཅན་ ཐམས་ཅད་ལ་རྟག་ཏུ་བཏང་བར་བྱ་ལ། སྦྱོར་བས་ནི་ཚེ་དེ་ལ་ལུས་ཀྱིས་ལེགས་པར་བྱ་བ་རྣམས་ཟིན་ཞིང་ཕ་རོལ་ལ་ཕན་བདེ་ཆེན་པོར་འགྱུར་བའི་སྐབས་མཐོང་ན་ལུས་དེ་དོན་མེད་དུ་ཞིག་མི་འཇུག་པར་སྙིང་པོ་བླང་བའི་ཕྱིར་དངོས་སུ་ ཡང་བཏང་བར་བྱ་སྟེ། རྒྱལ་པོ་ཟླ་འོད་ཀྱི་སྐྱེས་རབས་ལ་སོགས་པ་བཞིན་ནོ། །འོ་ན་ཉན་ཐོས་མི་སྡུག་པ་གོམས་པ་དག་ལྕེབ་དང་གསོད་དུ་འཇུག་པར་བརྩོན་པ་ལྟར་ལུས་འདོར་རམ་ཞེ་ན། ལུས་འདི་ཉེས་པ་མང་པོ་ཅན་ཡིན་མོད་ ཀྱང་དུས་མིན་དུ་མི་འདོར་ཏེ་རང་གི་ལས་ཀྱིས་ཇི་ལྟར་འཕངས་པའི་ཚེ་ཚད་དང་བདེ་སྡུག་སོགས་འབད་རྩོལ་མ་བྱས་པར་ཇི་ལྟར་བྱུང་བ་དེ་ཙམ་ཞིག་སྤྱད་པར་བྱ་བ་ཁོ་ནའོ། །དེས་ན་ལུས་ལ་ཆགས་པའི་བློ་སྤང་བར་བསྟན་གྱི། ལུས་ ཉིད་སྤང་བར་བསྟན་པ་མ་ཡིན་པས་ལུས་སྲུང་བར་བཤད་པ་དང་ཡང་འགལ་བ་མེད་དོ། །ཅི་སྔོན་དུའང༌། ཤུ་བ་མི་ཡི་གཟུགས་འདྲ་བ། ཞེས་སོགས་ལན་དུ་མར་ལུས་ཀྱི་སྐྱོན་བསྟན་པ་མ་ཡིན་ནམ་བཟློས་པའི་སྐྱོན་དུ་

Page: 635 ༄༅། །འགྱུར་རོ་ཞེ་ན། དེ་དག་ནི་རེས་འགའ་ལུས་མི་རྟག་པ་དང༌། རེས་འགའ་ལུས་བཟུང་བས་གནོད་པ་བྱུང་བ་དང༌། རེས་འགའ་བདག་མེད་པར་སྟོན་པས་དགོས་པ་ཐ་དད་ཅིང་འདིར་ནི་ཆགས་བྱ་མ་ཡིན་པར་བསྟན་པས་ཟློས་ པའི་སྐྱོན་མེད་དོ། །གསུམ་པ་བསམ་གཏན་གྱི་སྒྲིབ་པ་བསལ་བ་ནི། དེ་བས་བྱིས་པའི་སྤྱོད་པས་ཆོག །བདག་གིས་མཁས་པའི་རྗེས་སྙེག་སྟེ། །བག་ཡོད་གཏམ་ནི་དྲན་བྱས་ནས། །གཉིད་དང་རྨུགས་པ་བཟློག་པར་བྱ། ། རྒྱལ་སྲས་ཐུགས་རྗེ་ཆེ་རྣམས་ལྟར། །རིགས་པའི་སྲན་ནི་གཟུགས་བྱས་ཏེ། །ཉིན་མཚན་ཕྱེད་པར་མ་འབད་ན། །བདག་གིས་སྡུག་བསྔལ་ནམ་མཐར་ཕྱིན། །ཞེས་གསུངས་ཏེ། དང་པོས་བསམ་གཏན་གྱི་སྒྲིབ་པ་ལྔ་སེལ་བ་ བསྟན། གཉིས་པས་རྩེ་གཅིག་ཏུ་འབད་དགོས་པར་བསྟན་ཏོ། །དེ་ཡང་འདུ་འཛི་ལ་དགའ་བ་དང༌། ཕྱི་ཡོ་བྱད་དང་ནང་སེམས་ཅན་ལ་ཆགས་པ་སོགས་འདོད་པའི་རྣམ་པར་རྟོག་པ་དང༌། ལུས་སེམས་ལ་བདག་དང་བདག་གིར་ལྟ་བས་ཞེན་ ཞིང༌། དེའི་དོན་དུ་ཤ་ཐང་དུ་འབད་པ་སོགས་དེ་རྣམས་ནི་བྱིས་པ་མ་རབས་ཀྱི་སྤྱོད་པ་ཁོ་ན་སྟེ། འཁོར་བ་ཐོག་མ་མེད་པ་ནས་དེ་ལྟ་བུ་ཁོ་ན་ལ་ལོངས་སྤྱད་པ་དེས་ཆོག་ཤེས་ཀྱི་ད་ནི་བྱིས་པའི་སྤྱོད་པ་དེས་སྐྱོ་ཞིང་སྔར་སྤྱད་པ་དེ་ཡང་མཁས་པའི་མདུན་ ན་ངོ་ཚ་ཞིང་འགྱོད་ལ། ད་ནི་ནམ་དུ་ཡང་དེ་དག་ལས་བཟློག་སྟེ་མཁས་པ་སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་སྤྱོད་པའི་རྗེས་སུ་འཇུག་ཅིང་བཟང་པོར་སྤྱོད་པ་ཁོ་ན་རྗེས་སུ་བསྒྲུབ་པར་བྱའོ། །ཞེས་རང་གིས་དམ་བཅས་ཏེ་བག་ཡོད་ཀྱི་ ལེའུར་བཤད་པའི་གཏམ་རྣམས་དྲན་པར་བྱས་ལ་བསམ་གཏན་གྱི་སྒྲིབ་པ་རྣམས་བཟློག་ཅིང་རྩེ་གཅིག་པས་རྣལ་འབྱོར་དུ་བྱའོ། །དེ་ལ་སྒྲིབ་པ་ནི་ལྔ་སྟེ། བཤེས་སྤྲིང་ལས། རྒོད་ཅིང་འགྱོད་དང་གནོད་སེམས་རྨུགས་པ་དང༌། །གཉིད་

Page: 636 དང་འདོད་ལ་འདུན་དང་ཐེ་ཚོམ་སྟེ། །ལྔ་པོ་འདི་དག་བསམ་གཏན་དགེ་བའི་ནོར། །འཕྲོག་པའི་ཆོམ་རྐུན་ལགས་པར་ཐུབ་པས་གསུངས། །ཞེས་པ་ལྟར་རྒོད་འགྱོད་དང༌། གནོད་སེམས་དང༌། གཉིད་རྨུགས་དང༌། འདོད་འདུན་དང༌། ཐེ་ཚོམ་སྟེ་ལྔའོ། །དེ་ལ་ཡུལ་སྣ་ཚོགས་དྲན་ཞིང་འཕྲོ་བ་ནི་རྒོད་པ་དང༌། མི་བྱ་བ་བྱས་པ་སོགས་ལ་འགྱོད་སེམས་ནི་འགྱོད་པ་སྟེ་ཞི་བར་གནས་པའི་གེགས་བྱེད་དོ། །གཞན་ལ་གནོད་སེམས་ནི་ཡིད་མི་བདེ་དང་མཚུངས་པར་ལྡན་པ་ ཞེ་སྡང་གི་ཆ་དང་མཐུན་པ་སྟེ་བདེ་བར་གནས་པ་ལ་གེགས་བྱེད་དོ། །བྱིང་ཞིང་འཐིབས་པ་དང་དེ་བས་ཀྱང་ཆེར་བྱིང་པ་རྨུགས་པ་དང་གཉིད་ཀྱིས་ནོན་པ་ནི་གཉིད་རྨུགས་ཏེ་གསལ་བར་གནས་པ་ལ་གེགས་བྱེད་དོ། །ཕྱི་ཡོ་བྱད་དང་ ནང་སེམས་ཅན་ལ་ཆགས་པའི་རྣམ་རྟོག་ནི་འདོད་པ་ལ་འདུན་པ་སྟེ་ལས་རུང་དུ་གནས་པ་ལ་གེགས་བྱེད་དོ། །འདི་ཏིང་ངེ་འཛིན་དུ་མི་འགྱུར་རམ་སྙམ་པ་སོགས་དོན་མི་འགྱུར་གྱི་སོམ་ཉི་སྐྱེ་བ་ནི་ཐེ་ཚོམ་སྟེ་རྩེ་གཅིག་པར་གནས་པ་ ལ་གེགས་བྱེད་དོ། །འདིར་དོན་འགྱུར་གི་ཐེ་ཚོམ་ཕུང་པོ་འདི་བདག་ཡིན་ནམ་མ་ཡིན་སྙམ་པ་ལས་དཔྱད་པས་མ་ཡིན་པར་མཐོང་ནས་བདག་ཏུ་མི་དམིགས་པར་གནས་པ་ལྟ་བུ་དོན་འགྱུར་གྱི་ཐེ་ཚོམ་ཁ་ཅིག་གིས་ནི་ཞི་ལྷག་གཉིས་ ཀའི་སྣ་འདྲེན་པ་ཡང་ཡོད་ལ། རི་ལ་སོགས་པ་རྟག་ཅིང་འདུག་པས་འདུས་བྱས་མི་རྟག་པར་བཤད་པ་འདི་མི་བདེན་ནམ་སྙམ་པ་ལྟ་བུ་དོན་མི་འགྱུར་གྱི་ཐེ་ཚོམ་གྱིས་ནི་ལོག་ལྟ་འདྲེན་ཞིང་ཞི་ལྷག་གཉིས་ཀ་ལ་གེགས་བྱེད་དོ། ། དེས་ན་དོན་འགྱུར་གྱི་ཐེ་ཚོམ་ཁ་ཅིག་བསམ་གཏན་གྱི་ཉེར་བསྡོགས་སུ་འགྱུར་བ་ཡོད་ཀྱང་ཐེ་ཚོམ་དང་དངོས་གཞི་ལྷན་ཅིག་ཏུ་མི་གནས་པས་ཐེ་ཚོམ་ཙམ་སྒྲིབ་པར་བཤད་པ་ཡིན་ནོ། །དེ་དག་ཕལ་ཆེར་ཡང་འཆི་བའི་འདུ་ཤེས་བསྒོམས་

Page: 637 ༄༅། །པས་སེལ་ལ། ཁྱད་པར་བྱིང་རྒོད་ནི་གནས་ཧ་ཅང་གྲང་བ་དང་མཐོ་བ་དུས་དགུན་ཟས་ཉུང་ཞིང་མི་བཅུད་པ་གྲོགས་རླུང་ཁམས་པ་སྨྲ་བ་མང་པོ་ཅན་དང་ཡུལ་ལ་རྟག་ཏུ་སེམ་པ་སོགས་རྒོད་པའི་རྒྱུ་དང༌། དེ་ལས་ ལྡོག་སྟེ་གནས་དྲོ་ཆེས་པ་སོགས་བྱིང་བའི་རྒྱུ་དེ་དག་སྤངས་པས་སེལ་ལ་ཧ་ཅང་རྩོལ་ཆེས་པས་བྱུང་བའི་བྱིང་རྒོད་ནི་བཏང་སྙོམས་སུ་བྱ་བ་གློད་པའི་མན་ངག་གིས་སེལ་ལོ། །གནོད་སེམས་ཀྱི་གཉེན་པོར་བྱམས་པ་དང་འདོད་ འདུན་གྱི་གཉེན་པོར་མི་རྟག་པ་དང་མི་སྡུག་པ་སྒོམ་ལ། འགྱོད་པ་དང་ཐེ་ཚོམ་ནི་དང་དུ་མི་ལེན་ཞིང་རྗེས་སུ་མི་འབྲེང་བས་སེལ་ལ། སྤྱིར་དགེ་བའི་བཤེས་གཉེན་གྱི་དུས་སུ་ཐབས་མཁས་པས་བསལ་དགོས་ཏེ། མདོ་ལས། དགེ་སློང་མང་ཞིག་ སྔོན་བྱས་པའི་སྡིག་པས་འགྱོད་དེ་རྩེ་གཅིག་པར་མ་གྱུར་པའི་ཚེ་འཇམ་དཔལ་གྱིས་རལ་གྲི་ཐོགས་ཏེ་སྟོན་པའི་སྟེང་དུ་བརྒྱུགས་པས་སྟོན་པས་ང་ནི་བསད་ཟིན་གྱིས་ཐོང་ཞིག་ཅེས་བཀའ་བསྩལ་པ་ན་དེ་རྣམས་འཇམ་དཔལ་ཡང་འདི་ ལྟར་བྱེད་པ་ལས་ན་ལས་འབྲས་རང་བཞིན་མེད་པ་ལྟ་ཞིག་ཅེས་འགྱོད་པ་དང་བྲལ་ཏེ་ཆོས་ཉིད་མཐོང་བར་གསུངས་ལ་འདི་ལ་མཚོན་ཆ་ཐོགས་པའི་ཆོས་ཀྱི་རྣམ་གྲངས། ཞེས་གསུངས་པ་ལྟ་བུ་སྟེ། སྤྱིར་ཐེག་ཆེན་ནི་དགེ་བའི་བཤེས་ གཉེན་ལ་རག་ལས་སོ། །དེས་ན་འདོད་འདུན་ནི་གོང་དུ་རྒྱས་པར་ཟློག་ཟིན་ཞིང་འདིར་གཉིད་རྨུགས་ཀྱིས་མཚོན་ནས་སྒྲིབ་པ་ལྔ་ཟློག་བྱར་བསྟན་ལ། སྤྱིར་ཐེ་ཚོམ་ནི་གཙོ་བོར་ཤེས་རབ་ཀྱིས་སེལ་ལོ། །དེས་ན་མཁས་པ་རྒྱལ་བའི་སྲས་ ཐུགས་རྗེའི་དབང་ཕྱུག་ཆེན་པོ་དེ་རྣམས་ལུས་སྲོག་དང་རང་གི་ཞི་བ་ལ་མི་གཟིགས་པར་བྱང་ཆུབ་སེམས་དཔའི་སྤྱད་པ་སྤྱོད་པ་ལྟར་བདག་གིས་ཀྱང་རང་གིས་རང་ལ་རིགས་པའི་སྲན་བཙུགས་ཏེ་ཉིན་མཚན་ཕྱད་པར་མ་འབད་ན་སྡུག་བསྔལ་གྱི་

Page: 638 མཚོ་ལས་རང་གཞན་སྒྲོལ་མི་ནུས་པས་ད་ནི་རྩེ་གཅིག་ཏུ་འབད་དོ་ཞེས་ཡི་དམ་བཅའ་བའོ། །གསུམ་པ་དོན་བསྡུ་བ་ནི། དེ་བས་སྒྲིབ་པ་བསལ་བའི་ཕྱིར། །ལོག་པའི་ལམ་ལས་སེམས་བསླན་ཏེ། །ཡང་དག་དམིགས་ ལ་རྟག་པར་ཡང༌། །བདག་གིས་མཉམ་པར་བཞག་པར་བྱ། །ཞེས་གསུངས་ཏེ། དེ་ལྟར་རྒྱས་པར་བཤད་ནས། ད་ནི་ལེའུ་འདི་མཐའ་དག་གི་དོན་བསྡུ་བར་བྱ་སྟེ། བྱང་ཆུབ་སེམས་དཔའ་བརྩོན་འགྲུས་དང་ལྡན་པ་དེས་འདུ་འཛི་དང་རྣམ་ གཡེང་གི་ཉེས་པ་མཐོང་ནས་དབེན་པར་སོང་སྟེ། འདོད་པའི་རྣམ་རྟོག་ཐམས་ཅད་ལས་རིང་དུ་ཕྱོགས་ནས་སྐྱིལ་མོ་ཀྲུང་གིས་འདུག་སྟེ། བདག་གཞན་མཉམ་པ་དང་བརྗེ་བའི་བྱང་ཆུབ་ཀྱི་སེམས་དང་ཆོས་ཐམས་ཅད་གཟོད་ནས་དག་པའི་ཤེས་ རབ་དྲི་མ་མེད་པ་ལ་དམིགས་ནས་སེམས་ཅན་ཐམས་ཅད་ཀྱི་དོན་དུ་བྱང་ཆུབ་འཐོབ་པའི་ཕྱིར་སྐད་ཅིག་ཀྱང་མི་གཡེང་བར་མཉམ་པར་བཞག་པར་བྱ་ཞིང་བསམ་གཏན་གྱི་སྒྲིབ་པ་དག་བྱུང་ན་ཟློག་ཞིག་རྩེ་གཅིག་ཏུ་བཞག་པས་དང་པོར་ དམིགས་པ་ལ་རྩེ་གཅིག་པ་འདོད་པའི་ཞི་གནས་སྐྱེ་ལ་སླར་གོང་ནས་གོང་དུ་ཏིང་ངེ་འཛིན་གྱི་རོ་མི་མྱོང་ཞིང་ཆོག་མི་ཤེས་ལ་མཚན་མར་མི་འཛིན་པར་བཞག་པས་བྱང་ཆུབ་ཀྱི་སེམས་ཀུན་རྫོབ་བམ་དོན་དམ་པའི་རྣམ་པ་གང་ལ་དམིགས་ པ་དེ་ཉིད་ལ་ཡན་ལག་ལྔ་དང་ལྡན་པས་རྩེ་གཅིག་ཏུ་གནས་པ་བསམ་གཏན་གྱི་དངོས་གཞི་ཁྱད་པར་ཅན་སྐྱེ་བར་འགྱུར་ལ། དེ་ཡང་གོང་ལྟར་བསྐྱངས་པས་རྟོག་དཔྱོད་དགའ་བདེ་འདུ་བྱེད་ཀྱི་མཚན་རྟོག་ནུབ་ནས་བཞི་པའི་དངོས་གཞི་ ཁྱད་པར་ཅན་འཐོབ་ཅིང་དེ་ལས་གཞན་གྱི་སེམས་ལ་དམིགས་ཏེ་བཞག་པས་གཞན་སེམས་ཤེས་པའི་མངོན་ཤེས་དང་སྔོན་དང་ཕྱི་མའི་གནས་ལ་དམིགས་ཏེ་བཞག་པས་སྔོན་གནས་རྗེས་སུ་དྲན་གྱི་མངོན་ཤེས་སོགས་མངོན་ཤེས་ལྔ་

Page: 639 ༄༅། །སྐྱེ་ལ། དེའི་ཚེ་གཞན་དོན་གྱི་ནུས་པ་གྲུབ་པས་གང་རྫུ་འཕྲུལ་གྱིས་འདུལ་བ་དང་ཆོས་བསྟན་པས་འདུལ་བ་དང་ཚར་བཅད་པས་འདུལ་བ་དང་སྤྱོ་བས་འདུལ་བ་དང་སྤྲོ་བས་འདུལ་བ་དང་དོར་བས་འདུལ་བ་སོགས་གདུལ་བྱའི་ཁམས་དང་ འདུལ་བྱེད་ཀྱི་ཐབས་ཤེས་པས་དུས་ཇི་ལྟར་བ་བཞིན་འཇུག་པས་སྦྱོར་བའི་གཞན་དོན་མཚན་ཉིད་པ་འགྲུབ་པ་ཡིན་ནོ། །དེས་ན། དེ་བས་སྒྲིབ་པ་བསལ་བའི་ཕྱིར། །ལོག་པའི་ལམ་ལས་སེམས་བསླན་ཏེ། །ཞེས་པས་མི་མཐུན་ ཕྱོགས་སྤོང་བ་ཐམས་ཅད་བསྡུས་ཤིང༌། ཡང་དག་དམིགས་ལ། ཞེས་པས་ཡུལ་ལྷག་མཐོང་སྟེ་ཀུན་རྫོབ་དང་དོན་དམ་པའི་བྱང་ཆུབ་ཀྱི་སེམས་དང༌། རྟག་པར་ཡང༌། བདག་གིས་མཉམ་པར་བཞག་པར་བྱ། །ཞེས་པས་ཞི་གནས་ ལ་ཇི་ལྟར་བཞག་པ་རྣམས་ལེགས་པར་བསྡུས་པ་ཡིན་ནོ། །གཙོ་བོའི་དོན་སོ་དྲུག་དང་བཅུ་གཅིག་ཏུ་བསྡུས་པའི་ཚེ་ཡང༌། ལེའུ་འདིའི་སྙིང་པོ་བདག་གཞན་མཉམ་བརྗེའི་བྱང་སེམས་དང་མཚན་ཉིད་འདི་ཁོ་ནར་བཤད་དོ། །འདི་རྣམས་ སུ་འགྲེལ་ཆེན་ལས་ནི། འདི་ལྟར་ཚུལ་ཁྲིམས་ལ་སོགས་པ་ཞི་གནས་ཀྱི་ཚོགས་པ་རྣམས་ལ་གནས་ནས་ཡིད་དང་རྗེས་སུ་མཐུན་པའི་གནས་རྣམས་སུ་སངས་རྒྱས་དང་བྱང་ཆུབ་སེམས་དཔའ་རྣམས་ལ་ཕྱག་འཚལ་བ་སོགས་ བྱས་ཏེ། འགྲོ་བ་མཐའ་དག་གདོན་པའི་བསམ་པས་སྙིང་རྗེ་ཆེན་པོ་ཉིད་མངོན་དུ་བྱས་ཏེ། བདེ་བའི་སྟན་ལ་འདུག་ནས་ལུས་དྲང་པོར་སྲང་སྐྱིལ་མོ་ཀྲུང་བྱས་ནས་ཏིང་ངེ་འཛིན་བསྐྱེད་པར་བྱའོ། །དེ་ལ་དང་པོར་རེ་ཞིག་གང་དངོས་པོ་འདི་ལ་ དཔྱད་པར་བྱ་སྟེ། ཇི་སྲིད་དུ་རྣམ་པ་གང་གིས་དངོས་པོ་མཐའ་དག་བསྡུས་པར་གྱུར་བ་དེ་ལ་སེམས་བརྟན་པར་བྱའོ་ཞེས་སོགས་ཀ་མ་ལ་ཤཱི་ལའི་སྒོམ་རིམ་དྲངས་ནས་བཤད་དོ། །དགེ་བའི་ལྷས། རྨུགས་པ་ནི་སེམས་སློང་བ་སྟེ་ཞེས་

Page: 640 སྣང་ཀྱང་སེམས་སློང་སློང་པོ་ནི་རྒོད་པ་ཡིན་གྱི་རྨུགས་པ་མ་ཡིན་ནོ། །སྤྱིར་སྒྲིབ་གཉིས་བསལ་བའི་ཕྱིར་ཚུལ་བཞིན་ཡིད་བྱེད་ཀྱི་ཞགས་པས་དྲངས་ཤིང་དྲན་པའི་ཐག་པས་དམ་པོར་བཏགས་ལ་ཡང་དག་དམིགས་པ་ལ་རྒྱུན་མི་ འཆད་པར་བཞག་གོ་ཅེས་འབྲུ་གཉེར་ཏོ། །ས་བཟང་པས་ནི། དེ་བས་བྱིས་པའི་སྤྱོད་པས་ཆོག །ཅེས་པ་མན་ཆོད་ལ་དོན་དམ་བྱང་སེམས་སྒོམ་པ་ཞེས་དང༌། དོན་བསྡུས་ལ་མཉམ་བཞག་ཟབ་མོ་སྒོམ་ཚུལ་ཞེས་ས་གཅོད་ལ། རྒྱལ་སྲས་སོགས་ཀྱི་ཤླཽ་ཀ་རྒྱ་དཔེ་ལ་མེད་དོ། །ཅེས་བྲིས་སོ། །བྱང་ཆུབ་སེམས་དཔའི་སྤྱོད་པ་ལ་འཇུག་པ་ལས། བསམ་གཏན་བསྟན་པ་ཞེས་བྱ་བ་སྟེ་ལེའུ་བརྒྱད་པ་རྣམ་པར་བཤད་ཟིན་ཏོ། །

ལེའུ་དགུ་པ། ཤེས་རབ་བསྟན་པ།

Page: 641 ༄༅། །རྟོག་དང་བརྟག་པ་རྣམ་བྲལ་བ། །བློ་ཡི་ཡུལ་མིན་དེ་བཞིན་ཉིད། །ཤེས་རབ་ཕ་རོལ་ཕྱིན་མ་ལ། །དེ་ལྟར་རྟོགས་པའི་ཕྱག་འཚལ་ནས། །གང་ལ་ཐེ་ཚོམ་སྐྱེས་པས་ཀྱང༌། །སྲིད་པ་ཧྲུལ་བོར་བྱེད་ནུས་པ། ། བསམ་གྱིས་མི་ཁྱབ་དེ་ཁོ་ན། །གསལ་བྱེད་ཤེས་རབ་ལེའུ་དགྲོལ། །དེ་ལྟར་ཡང་དག་པའི་བསམ་གཏན་ལ་འབད་པས་ཟད་པ་དང་མི་སྐྱེ་བ་ཤེས་པའི་བར་གྱི་ཤེས་རབ་མངོན་དུ་བྱེད་པའི་ཕྱིར། བསམ་གཏན་གྱི་དེ་མ་ཐག་ཏུ་ཤེས་རབ་ ཀྱི་ཕ་རོལ་ཏུ་ཕྱིན་པ་བཤད་པར་འབྲེལ་ཏེ། འདིར་བི་བྷཱུ་ཏིས། ཤེས་རབ་བསམ་གཏན་མེད་མི་འབྱུང༌། །ཞི་གནས་མེད་ན་དེ་ཡང་མེད། །ཅེས་པའི་དང་པོས་འབྲེལ་བཙལ་ལ། དགེ་ལྷས། མཉམ་པར་བཞག་པ་ལས་དེ་ ཁོ་ན་ཉིད་ཀྱི་བློ་སྐྱེ་བར་འགྱུར་བས། ཞེས་དང༌། དཀའ་འགྲེལ་ཆེན་མོར། ལྷག་མཐོང་གི་མིང་ཅན་ཤེས་རབ་ཀྱི་ཕ་རོལ་ཏུ་ཕྱིན་པ་བསྟན་པའི་ཕྱིར། ཞེས་དང༌། ཤེར་ལེ་ཁོ་ནའི་དཀའ་འགྲེལ་ཆུང་ངུར། བསོད་ནམས་ཀྱི་ཚོགས་ཀྱི་རྒྱུ་སྦྱིན་ སོགས་དང༌། ཡེ་ཤེས་ཀྱི་ཚོགས་ཀྱི་རྒྱུ་ཞི་གནས་ཀྱི་མཚན་ཉིད་བསམ་གཏན་བཤད་ནས་ལྷག་མཐོང་བསྟན་པའི་ཕྱིར། ཞེས་འབྲེལ་བཙལ་ཏོ། །གལ་ཏེ། ལྷག་མཐོང་མེད་པར་ཡང་ནི་ཞི་གནས་མེད། །ཅེས་གསུངས་ལ། ལྷག་མཐོང་ ནི་ལེའུ་འདིས་བསྟན་པར་བྱ་བ་ཡིན་ན་ཤེས་རབ་ལས་བསམ་གཏན་སྐྱེ་དགོས་པས་ལེའུ་སྔ་ཕྱི་གོ་ཟློག་དགོས་པའམ། ཡང་ན་ཞི་གནས་ལ་མ་བསྟེན་པར་ལྷག་མཐོང་མི་སྐྱེ་ལ། ལྷག་མཐོང་ལ་མ་བསྟེན་པར་ཡང་ཞི་གནས་མི་སྐྱེ་བའི་ ཕྱིར། ཕན་ཚུན་རྟོག་པ་བརྟེན་པའི་སྐྱོན་དུ་ཐལ་བར་འགྱུར་རོ་ཞེ་ན། དབང་རྣོན་ལ་ལྷག་མཐོང་མཚན་ཉིད་པ་དང་པོར་སྐྱེས་ཤིང༌། དེ་ལ་རྩེ་གཅིག་ཏུ་མཉམ་པར་བཞག་པས་དོན་གྲུབ་པ་ཡང་ཡོད་ཅིང༌། དབང་བརྟུལ་རྣམས་ཀྱང་ལྷག་མཐོང་

Page: 642 གི་ཆ་ཤས་ཙམ་ལ་དམིགས་ནས་བཞག་པས་ཞི་གནས་སྐྱེ་ལ། དེས་སྒོམ་བྱུང་གི་ཤེར་རབ་ལྷག་མཐོང་གོང་དུ་འཕེལ་ཞིང་དེ་ལས་ཀྱང་ཞི་གནས་བརྟན་པ་བྱ་གཤོག་པ་གཡབ་པའི་ཚུལ་དུ་འབྱུང་ལ། དེ་ལྟར་རང་སའི་ཞི་ལྷག་ཟུང་དུ་ཆུབ་ པ་ཆེར་བརྟན་པས་ངེས་འབྱེད་ཆ་མཐུན་གྱི་ལམ་བགྲོད་དེ་སྐད་ཅིག་གཅིག་གི་ཤེས་རབ་ཀྱིས་ཆོས་ཉིད་མཐོང་བ་མཐོང་བའི་ལམ་སྐྱེས་པ་ནི་ལྷག་མཐོང་མཚན་ཉིད་པ་ཡིན་ལ། དེ་ཉིད་སྒོམ་ལམ་དུ་ཞི་ལྷག་ཟུང་དུ་ཆུད་པར་གོང་ ནས་གོང་དུ་བརྟན་པས་ས་བདུན་པའི་མཐར་མཉམ་རྗེས་ཀྱི་དམིགས་པ་དག་པའི་ལྷག་མཐོང་སྐྱེ་ཞིང༌། དེ་གོང་དུ་བརྟན་པས་ཏིང་ངེ་འཛིན་ཐམས་ཅད་རྫོགས་ཏེ་ས་བཅུ་རྒྱུན་གྱི་ཐ་མར་རྩེ་གཅིག་པའི་ཏིང་ངེ་འཛིན་དང་ཟད་མི་སྐྱེ་ཤེས་པ་ ཟག་པ་ཟད་པའི་ཐབས་ཤེས་པའི་ཤེས་རབ་དབྱེར་མེད་པ་རྡོ་རྗེ་ལྟ་བུའི་ཏིང་ངེ་འཛིན་དེས་དྲི་མ་ཐམས་ཅད་ལྡང་བ་མེད་པར་བཅོམ་སྟེ་སྐད་ཅིག་གཅིག་གི་ཤེས་རབ་ཀྱིས་ཆོས་ཐམས་ཅད་མངོན་པར་རྫོགས་པར་སངས་རྒྱས་པ་ཡིན་ལ། དེ་ནི་ འགོག་པ་ཆེན་པོ་ལས་ལྡང་བ་མེད་པ་ཞི་གནས་ཀྱི་མཐར་ཐུག་པ་དང༌། ཇི་ལྟ་ཇི་སྙེད་མཁྱེན་པ་ལྷག་མཐོང་གི་མཐར་ཐུག་པ་དབྱེར་མེད་པ་བརྙེས་པ་ལས་ཉམས་པ་མེད་པ་ཡིན་ནོ། །དེའི་ཕྱིར་ཞི་ལྷག་རེ་རེའང་ལས་དང་པོ་བ་ཤིན་ཏུ་དབང་བརྟུལ་ ནས་བཟུང་སྟེ་སངས་རྒྱས་ཀྱི་སའི་བར་དུ་རེ་རེའང་དབྱེ་བ་མཐའ་ཡས་པ་དང་བཅས་ཏེ་འགྲོ་བས་བྱེ་བྲག་ཏུ་གང་ཟག་སོ་སོ་ལ་ཞི་ལྷག་སྐྱེད་པ་ནི་དགེ་བའི་བཤེས་གཉེན་གྱིས་དེའི་ཁམས་དང་དབང་པོ་བཞིན་བཀྲི་བར་བྱ་བ་ཡིན་ལ། དེའི་ཚུལ་ མཐའ་དག་ནི་སུས་ཀྱང་བྲིར་མི་ནུས་ལ། འདི་དག་ཏུ་ནི་གཙོ་ཆེ་བའི་དབང་དུ་བྱས་པ་སྤྱི་འགྲོའི་ཚུལ་ཙམ་སྟོན་པ་ཡིན་ལ། དེའི་ཕྱིར་རྗེས་མཐུན་གྱི་ལྷག་མཐོང་ལ་དམིགས་པའི་ཏིང་ངེ་འཛིན་ལ་བསམ་གཏན་དང༌། དེས་བསྐྱེད་པ་དེ་ཁོ་ན་ཉིད་

Page: 643 ༄༅། །མཐོང་བའི་ཤེས་རབ་དངོས་ལ་ལྷག་མཐོང་དུ་བྱས་ཏེ་རྒྱུ་འབྲས་ཀྱི་ཚུལ་གྱིས་བསྟན་པ་ཡིན་ནོ། །གཞུང་དངོས་ལ་ལྔ། ཤེས་རབ་ཀྱི་ཕན་ཡོན། ཤེས་རབ་ངོས་བཟུང་བ། སྟོང་ཉིད་སྒོམ་ཚུལ། དངོས་འཛིན་ དགག་པ། སྟོང་ཉིད་བསྒོམས་པའི་འབྲས་བུ་བསྟན་པའོ། །དང་པོ་ཤེས་རབ་ཀྱི་ཕན་ཡོན་ནི། ཡན་ལག་འདི་དག་ཐམས་ཅད་ནི། །ཐུབ་པས་ཤེས་རབ་དོན་དུ་གསུངས། །དེ་ཡི་ཕྱིར་ན་སྡུག་བསྔལ་དག །ཞི་བར་འདོད་པའི་ཤེས་རབ་སྐྱེད། ། ཅེས་གསུངས་ཏེ། སྦྱིན་པ་ལ་སོགས་པ་ཡན་ལག་ལྔ་པོ་འདི་དག་ཐམས་ཅད་ནི་ཐུབ་པ་བཅོམ་ལྡན་འདས་ཀྱིས་ལུས་སམ། འབྲས་བུ་ཤེས་རབ་སྐྱེད་པའི་དོན་དུ་གསུངས་པ་ཁོ་ན་སྟེ། རྒྱུ་བསོད་ནམས་ཀྱི་ཚོགས་སྦྱིན་སོགས་ལྔ་ལས་ འབྲས་བུ་ཡེ་ཤེས་ཀྱི་ཚོགས་ཤེས་རབ་སྐྱེ་བའི་ཕྱིར་ཏེ། ཡུམ་ལས། བསོད་ནམས་ཀྱི་ཚོགས་མ་བསགས་པར་ཤེས་རབ་ཀྱི་ཕ་རོལ་ཏུ་ཕྱིན་པ་རྣ་ལམ་དུ་ཡང་གྲག་པར་མི་འགྱུར་རོ། །ཞེས་སོ། །དེ་ཡི་ཕྱིར་ན་སྦྱིན་སོགས་ལྔ་པོ་ཙམ་གྱིས་ཆོག་ཤེས་ པར་མི་བྱ་བར་སླར་རང་གཞན་གྱི་སྡུག་བསྔལ་ཐམས་ཅད་དག་ཞི་བར་འདོད་པ་རྣམས་ཀྱིས་ཤེས་རབ་སྐྱེད་པ་ཁོ་ན་ལ་ནན་ཏན་དུ་བྱའོ། །གལ་ཏེ། སྦྱིན་པ་སྦྱིན་པའི་སྔོན་དུ་འགྲོ་བ་ཤེས་རབ་སྟེ། །ཚུལ་ཁྲིམས་བཟོད་དང་བརྩོན་འགྲུས་ བསམ་གཏན་དེ་བཞིན་ནོ། །ཞེས་སྦྱིན་སོགས་ལྔའི་སྔོན་དུ་ཤེས་རབ་དགོས་པར་བཤད་པ་དང་འགལ་ལོ་ཞེ་ན། དེ་ནི་སྦྱིན་སོགས་ཙམ་ལྔ་པོ་དམུས་ལོང་ལྟ་བུ་ཡིན་ལ། ཤེས་རབ་ཀྱི་དམིགས་བུས་ཁྲིད་ན་དེ་རྣམས་ཀྱང་ཕ་རོལ་ཏུ་ཕྱིན་པར་ འཇོག་པ་ལ། ཤེས་རབ་དགོས་པར་བསྟན་པ་ཡིན་ལ། ཤེས་རབ་དེ་ཡང་བསོད་ནམས་མ་བསགས་པར་མི་སྐྱེ་བའི་ཕྱིར་འདིར་ནི་སྦྱིན་སོགས་ལྔ་ཙམ་པོ་བ་ལ་དགོངས་པ་ཡིན་ཏེ། རིན་ཆེན་ཕྲེང་བར། བསོད་

Page: 644 ནམས་ཆུང་བས་ཆོས་འདི་ལ། །ཐེ་ཚོམ་ཙམ་ཡང་མི་སྐྱེ་སྟེ། །འདི་ལ་ཐེ་ཚོམ་སྐྱེས་པས་ཀྱང༌། །སྲིད་པ་ཧྲུལ་པོར་བྱེད་པར་འགྱུར། །ཞེས་གསུངས་པ་བཞིན་ནོ། །གཉིས་པ་ཤེས་རབ་ངོས་བཟུང་བ་ལ་གཉིས། ཤེས་བྱ་བདེན་པ་གཉིས་སྟོང་ཉིད་དུ་སྒྲུབ་ པ་དང༌། དེ་ཤེས་པ་ལམ་དུ་སྒྲུབ་པའོ། །དང་པོ་ལ་བཞི། བདེན་གཉིས་ཀྱི་དབྱེ་བ། མཚན་ཉིད། དེ་སྒྲུབ་པ། དེ་ལ་རྩོད་པ་སྤང་བའོ། །དང་པོ་བདེན་གཉིས་ཀྱི་དབྱེ་བ་ནི། ཀུན་རྫོབ་དང་ནི་དོན་དམ་སྟེ། །འདི་ནི་བདེན་པ་གཉིས་སུ་འདོད། །ཅེས་གསུངས་ ཏེ། འདི་དག་གི་རང་བཞིན་རྒྱས་པར་ལེའུ་བཞི་པའི་སྤྱི་དོན་དུ་བསྟན་ཟིན་ལ། འདིར་ནི་མདོར་བསྡུ་ན་གང་ཤེས་པར་བྱ་བ་ནི། ཀུན་རྫོབ་ཀྱི་བདེན་པ་དང༌། དོན་དམ་པའི་བདེན་པ་སྟེ། རེ་ཞིག་ཤེས་བྱ་འདི་ནི་བདེན་པ་གཉིས་སུ་ངེས་པར་བདག་ཉིད་ ཆེན་པོ་ཞི་བའི་ལྷ་ཉིད་འདོད་དོ། །ཞེས་ཞལ་གྱིས་འཆེས་པའོ། །དེ་ལ་ཀུན་ནི་མང་པོའི་སྒྲ་སྟེ་རྣམ་པ་སྣ་ཚོགས་པར་སྣང་བའི་དོན་ཏོ། །རྫོབ་ནི་བརྫུན་པའི་དོན་ཏེ་ཇི་ལྟར་སྣང་བ་དེར་མི་བདེན་པས་གསོབ་དང༌། གསོག་དང༌། ཡ་མ་རླ་ཙམ་དུ་ཟད་པའི་ དོན་ཏོ། །འོ་ན་ཅིའི་ཕྱིར་ཀུན་རྫོབ་དེ་བདེན་པར་བཞག་ཅེ་ན། རེ་ཞིག་འཇིག་རྟེན་གཞུག་པའི་ཐ་སྙད་ཀྱི་དོན་དུ་སྟེ་འཇིག་རྟེན་པ་རྣམས་ཇི་ལྟར་སྣང་བ་དེར་བདེན་པར་ཞེན་པའི་ཕྱིར་དང༌། གནས་སྐབས་པའི་རིགས་ངོར་ཡང་རྒྱུ་འབྲས་མི་འཁྲུལ་ པར་དོན་བྱེད་ནུས་པར་སྣང་བའི་ཕྱིར། རེ་ཞིག་པའི་བདེན་པར་བཞག་གོ །འདི་ཡང་གཏན་དུ་བའི་བདེན་པ་ནི་མ་ཡིན་ཏེ། དཔྱད་མི་བཟོད་པའི་ཕྱིར་དང༌། འཕགས་པ་རྣམས་ཀྱི་མཉམ་བཞག་གི་ཡུལ་དུ་མི་སྣང་བའི་ཕྱིར་རོ། །ཀུན་རྫོབ་ ལ་བལྟོས་ན་དངོས་པོའི་གནས་ཚུལ་དུ་ཞུགས་པའི་ཕྱིར་དང༌། དོན་དུ་གཉེར་བྱ་ཡིན་པའི་ཕྱིར་དོན་ཞེས་བྱ་ལ། ཐར་འདོད་ལ་ཉེ་བར་མཁོ་ཞིང་འབྲས་བུ་སངས་རྒྱས་ལ་མི་སླུ་བའི་ཕྱིར་དམ་པ་སྟེ་གཞི་མཐུན་པའི་སྒྲའོ། །འདིས་ནི་དོན་དམ་

Page: 645 ༄༅། །པར་བདེན་པ་ཞེས་ཁྱད་གཞི་དང་ཁྱད་ཆོས་ཀྱི་སྒྲར་འདོད་པ་ཡང་བསལ་བ་ཡིན་ནོ། །འདི་ནི་ཆོས་ཐམས་ཅད་ཀྱི་རང་བཞིན་གཉུག་མར་གནས་པ་ཡིན་ཞིང་འཕགས་པ་རྣམས་ཀྱི་མཉམ་བཞག་ཟབ་མོའི་ཡུལ་ཡིན་ པའི་ཕྱིར། ཀུན་རྫོབ་ལ་བལྟོས་ཏེ་གཏན་དུ་བའི་བདེན་པར་བཞག་གོ །མ་ལྟོས་པར་ངོ་བོ་ཉིད་ཀྱིས་ནི་མ་ཡིན་ཏེ་སངས་རྒྱས་ཉིད་ཀྱིས་བདེན་པའམ་བརྫུན་པའི་ཆོས་མ་གཟིགས་པའི་ཕྱིར་རོ། །དང་ཡིག་ནི་ཀུན་རྫོབ་དང་དེ་ལས་གཞན་ པའི་དོན་དམ་ཞེས་འབྱེད་པའི་སྒྲ་ཡང་ཡིན་ལ། འདི་གཉི་གའང་བདེན་པ་ཙམ་དུ་མཚུངས་སོ་ཞེས་བསྡུ་བའི་སྒྲ་ཡང་ཡིན་ནོ། །གཉིས་པ་མཚན་ཉིད་ནི། དོན་དམ་བློ་ཡི་སྤྱོད་ཡུལ་མིན། །བློ་ནི་ཀུན་རྫོབ་ཡིན་པར་བརྗོད། །ཅེས་གསུངས་ཏེ། འོ་ན་འདིར་བདེན་གཉིས་ཀྱི་ཟླས་ཕྱེ་བའི་དོན་དམ་པའི་བདེན་པ་དེ་གང༌། ཀུན་རྫོབ་ཀྱི་བདེན་པ་དེ་གང་ཞེ་ན། གང་སངས་རྒྱས་རྣམས་བྱོན་ཡང་རུང་མ་བྱོན་ཡང་རུང་སྟེ་སངས་རྒྱས་ཀྱིས་ཀྱང་བཅོས་སུ་མེད་པ། ངས་ཀྱང་མ་གཟིགས་མི་གཟིགས་ གཟིགས་པར་མི་འགྱུར་རོ། །ཞེས་སྟོན་པ་ཆོས་ཐམས་ཅད་ཀྱི་རང་བཞིན་རྣལ་མ་རྟོག་བཅས། རྟོག་མེད། མངོན་སུམ། རྗེས་དཔག་སོགས་སྐྱེ་འཕགས་དང་སློབ་མི་སློབ་གང་གི་ཡང་ཤེས་པའི་སྤྱོད་ཡུལ་དུ་མ་གྱུར། མི་འགྱུར། འགྱུར་མི་སྲིད་པའི་ཆོས་ ཀྱི་དབྱིངས་ཇི་བཞིན་པ་ཉིད་འདི་ནི་དོན་དམ་པའི་བདེན་པ་ཞེས་ཐ་སྙད་དུ་བྱས་སོ། །ཅི་ཤེས་པ་གང་གི་ཡང་ཡུལ་མ་ཡིན་ན་དེ་ལ་དམིགས་པར་ཡང་མི་ནུས་པས་དེ་དོན་དམ་པར་ཡང་ཇི་ལྟར་བཞག་ཅེ་ན། སྤྱིར་ཐ་སྙད་རྣམ་པར་འདོགས་པ་ འདི་ཐམས་ཅད་ཀྱང་ཆོས་དེ་མངོན་སུམ་པར་དམིགས་ནས་འདོགས་པ་ནི་མ་ཡིན་ཏེ་ཨུཏྤལ་སྔོན་པོ་ཞེས་ཐ་སྙད་འདོགས་པའི་ཚེ། དེ་དམིགས་པ་པོ་ནི་དབང་ཤེས་དེ་ཡིན་ཡང་དེ་ནི་ཨུཏྤ་ལའི་མིང་གི་ཁྱད་པར་དང༌། སྔོན་པོའི་ཁ་དོག་གི་ཁྱད་པར་རྟོག་པར་

Page: 646 སྟེ་མི་བྱེད་དེ། མངོན་སུམ་རྟོག་མེད་དུ་ཉམས་སུ་མྱོང་བ་ཙམ་དུ་ཟད་པའི་ཕྱིར། ཐ་སྙད་འདོགས་པ་པོ་ནི་དེའི་རྗེས་སུ་འབྲང་བའི་འཛིན་རྟོག་སྟེ་དེས་སྔར་མྱོང་གི་དབང་ཤེས་རྟོག་མེད་དེ་འཛིན་རྟོག་རང་ཉིད་ཡིན་པར་རློམ་ཞིང་ཡུལ་ཨུཏྤལ་ཙམ་དེ་གཞན་དུ་ བཟུང་ནས་མིང་དང་ཁ་དོག་ཏུ་རྟོག་ལ། འདི་ནི་བདག་གིས་མཐོང་ངོ་ཞེས་རློམ་པ་སྟེ། རྫ་མཁན་གྱིས་བྱས་པའི་རྫ་ལ་ཤིང་མཁན་གྱིས་བདག་གིས་བྱས་སོ་ཞེས་རློམ་པ་བཞིན་ནོ། །ཀུན་རྫོབ་ཏུ་རྒྱུན་ལ་རྣམ་པར་དཔྱད་པའི་ཚེ་ཡང་མཐོང་ དུས་ཀྱི་ཨུཏྤལ་དེ་ཡང་གཞན། འཛིན་དུས་ཀྱི་ཨུཏྤལ་དེ་ཡང་གཞན་ཡིན་ལ། དེ་ཉམས་སུ་མྱོང་བའི་དབང་ཤེས་དེ་ཡང་གཞན་འཛིན་རྟོག་དེ་ཡང་གཞན་ཡིན་པ་ཆུའི་རྒྱུན་ལྟ་བུར་ཟད་ལ་མངོན་སུམ་དེས་རྟོག་པར་མི་བྱེད། རྟོག་པ་དེས་ཡུལ་ མ་མྱོང་ན་འདིར་ཨུཏྤ་ལ་ཇི་ལྟ་བུ་ཞིག་ལ་ཤེས་པ་སུ་ཞིག་གིས་དམིགས་ཏེ་དཔྱད་ན་འཁྲུལ་པ་འབའ་ཞིག་ཏུ་མཐོང་བར་ཟད་པའི་ཕྱིར། དཔེར་ན། ཚངས་པའི་འཇིག་རྟེན་ལ་དཔྱོད་པའི་ཚེ་ཚངས་པའི་འཇིག་རྟེན་ནི་འདི་ལྟ་བུ་ཞིག་གོ་ སྙམ་དུ་བརྟགས་པའི་རང་གི་བློ་དོན་སྤྱིའི་རྣམ་པ་ཅན་དེ་ལ། ཚངས་པའི་འཇིག་རྟེན་དུ་ཞེན་ནས་དཔྱོད་པར་ཟད་ཀྱི་དེའི་ཚེ་ཡང་ཚངས་པའི་འཇིག་རྟེན་འདིར་མི་འོང་དཔྱོད་པ་པོ་ཚངས་པའི་འཇིག་རྟེན་དུ་མི་འགྲོ་བས་རང་བློ་ལ་རང་བློས་དཔྱད་པ་ལ་ བདག་གིས་ཚངས་པའི་འཇིག་རྟེན་ལ་དཔྱད་པར་འཁྲུལ་བ་ཡིན་ནོ། །དེས་ན་དོན་དམ་ལ་དམིགས་པའང་འདི་ལྟ་བུར་ཟད་ལ། དེའི་ཕྱིར་ཡང་དོན་དམ་བློ་ཡི་སྤྱོད་ཡུལ་མིན་པ་ཉིད་དོ། །འོ་ན་ཀུན་རྫོབ་ཀྱང་དེ་ལྟར་ཟད་པས་བློའི་སྤྱོད་ཡུལ་ མ་ཡིན་ནོ་ཞེ་ན། ཤིན་ཏུ་བདེན་ཏེ་དེའི་ཕྱིར་ཆོས་ཐམས་ཅད་བདེན་པ་གཅིག་ཏུ་ཡང་གསུངས་ལ། བདེན་རྫུན་ཞེས་བྱ་བ་ཉིད་མི་དམིགས་པར་ཡང་གསུངས་མོད་ཀྱི་འོན་ཀྱང་བྱིས་པ་རྣམས་སྐྲག་པ་སྤང་བའི་ཕྱིར། རེ་ཞིག་ཡུལ་ཡུལ་ཅན་གྱི་རྣམ་

Page: 647 ༄༅། །འཇོག་འཇིག་རྟེན་ལ་གྲགས་པ་ཙམ་རང་སོར་བཞག་སྟེ་ཀུན་རྫོབ་ཀྱི་བདེན་པ་ཞེས་ཐ་སྙད་བྱས་ནས་བྱིས་པ་རྣམས་དཀྲི་བར་བྱེད་པ་ཡིན་ནོ། །ཅིའི་ཕྱིར་དོན་དམ་བློ་ཡི་སྤྱོད་ཡུལ་མིན་ཞེ་ན། བློ་འམ་ཤེས་པ་ནི་ཀུན་ རྫོབ་ཉིད་ཡིན་པར་འདོད་ལ། ཀུན་རྫོབ་ཀྱིས་དོན་དམ་ཡུལ་དུ་བྱེད་མི་སྲིད་པའི་ཕྱིར་རོ། །དོན་དམ་བློ་ཡི་ཡུལ་མིན་པར་གང་གིས་ངེས་ན་འདི་ནི་བསམ་གྱིས་མི་ཁྱབ་པ་ཆོས་ཉིད་ཀྱི་རིགས་པས་ངེས་ཏེ་འཕགས་ཆེན་རྣམས་ཀྱིས་ཆོས་ཀྱི་ དབྱིངས་ལ་མཉམ་པར་བཞག་པ་ན་ཡང་ཇི་ཙམ་དུ་བཞག་པ་དེ་ཙམ་གྱིས་ཕྲ་ཞིང་བསམ་གྱིས་མི་ཁྱབ་པར་གྱུར་ཏེ་མཉམ་པར་བཞག་བྱ་འཇོག་བྱེད་ཉིད་ཞི་བར་འགྱུར་གྱི་ཆོས་དབྱིངས་ཀྱི་མཐའ་རྟོགས་པར་མི་ནུས་པའི་ཕྱིར་དང༌། དེ་བཞིན་གཤེགས་ པ་ཡང་ཆོས་དབྱིངས་ཀྱི་ཚད་གསུང་བར་མི་མཛད་པའི་ཕྱིར་རོ། །དེ་ལྟར་ཆོས་ཀྱི་དབྱིངས་སྨྲ་བསམ་བརྗོད་པའི་ཡུལ་མ་ཡིན་པར་གཟིགས་པ་དེ་ཉིད་ལ་ཆོས་ཉིད་ཁོང་དུ་ཆུད་ཅེས་དང༌། དོན་དམ་པའི་བདེན་པ་གཟིགས་ཞེས་ཐ་ སྙད་དུ་བྱས་ཤིང་ཡུལ་དང་ཡུལ་ཅན་གྱི་སྤྲོས་མཚན་མ་དམིགས་པའི་ཤེས་པ་དེ་ཉིད་ལ་སོ་སོ་རང་རིག་པའི་ཡེ་ཤེས་ཀྱི་ཐ་སྙད་དུ་མཛད་ནས་ཡུལ་ཡུལ་ཅན་དུ་འཛིན་པས་ནི་ཆོས་ཉིད་མི་མཐོང་ལ། ཡུལ་ཡུལ་ཅན་མི་དམིགས་པར་ཤེས་ན་ ཆོས་ཉིད་ལ་འཇུག་པའི་ཕྱིར་སོ་སོ་རང་རིག་པའི་ཡེ་ཤེས་ཀྱིས་ཆོས་ཉིད་རྟོགས་ཞེས་གཞན་ལས་ཐ་སྙད་དུ་མཛད་པ་ཡིན་གྱི་བློས་ཇི་ལྟར་བཏགས་པའི་ཡུལ་ཡུལ་ཅན་དང༌། རྟོགས་བྱ་རྟོགས་བྱེད་ལྟར་ནི་རྣམ་པ་ཐམས་ཅད་དུ་གནས་པ་མ་ཡིན་ ལ། ཡུལ་ཡུལ་ཅན་དང་རྟོགས་བྱ་རྟོགས་བྱེད་ཀྱང་སྒྲོ་བཏགས་པ་ཁོ་ན་ལས་ཡིན་གྱི་རང་གི་ངོ་བོ་ཉིད་ཀྱིས་ནི་ནམ་དུ་ཡང་དེ་ལྟར་ཡོད་པ་མིན་ནོ། །གསུམ་པ་དེ་སྒྲུབ་པ་ནི། དེ་ལ་འཇིག་རྟེན་རྣམ་གཉིས་མཐོང༌། །རྣལ་འབྱོར་པ་དང་ཕལ་པའོ། །

Page: 648 དེ་ལ་འཇིག་རྟེན་ཕལ་པ་ནི། །རྣལ་འབྱོར་འཇིག་རྟེན་གྱིས་གནོད་ཅིང༌། །རྣལ་འབྱོར་པ་ཡང་བློ་ཁྱད་ཀྱིས། །གོང་མ་གོང་མ་རྣམས་ཀྱིས་གནོད། །ཅེས་གསུངས་ཏེ། གལ་ཏེ་སོ་སྐྱེའི་མཐོང་བ་དོན་དམ་མ་ཡིན་མོད་ཀྱང་དོན་དམ་པ་ འཕགས་པ་རྣམས་ཀྱི་དངོས་ཡུལ་ཡིན་པས་འཕགས་པའི་གཟིགས་པ་དོན་དམ་དུ་རིགས་སོ་ཞེ་ན། དེའི་ལན་བསྟན་པའི་ཕྱིར་དུ། དེ་ལ་འཇིག་རྟེན་ན་ཀུན་རྫོབ་ནི་རྣམ་པ་གཉིས་སུ་མཐོང་སྟེ་ཕལ་པ་འཇིག་རྟེན་རྣམས་ཀྱི་མཐོང་བ་དང༌། ལམ་ ལ་ཞུགས་པའི་རྣལ་འབྱོར་པ་རྣམས་ཀྱི་མཐོང་བའོ། །དེ་ལ་འཇིག་རྟེན་ཕལ་པ་ནི་གཉིས་ཏེ། གྲུབ་མཐའ་ལ་མ་ཞུགས་པ་སྐྱེ་བོ་སྤྱི་དང༌། གྲུབ་མཐའ་ལ་ཞུགས་པ་ཕྱི་རོལ་པའོ། །རྣལ་འབྱོར་པ་ཡང༌། གྲུབ་མཐའ་བཞི་སྨྲ་བ་དང༌། ལམ་ལྔ་དང༌། མཐོང་སྒོམ་ལ་ས་བཅུར་ཕྱེ་བས་རྣམ་པ་དུ་མ་སྟེ། དེ་རྣམས་ཀྱང་སྔ་མ་སྔ་མའི་མཐོང་བ་ལ་ཕྱི་མ་ཕྱི་མའི་རིགས་པས་གནོད་པ་སྟེ་གྲུབ་མཐའ་ལ་མ་ཞུགས་པའི་སྐྱེ་བོ་རྣམས་ཀྱི་འདོད་པ་ལ། གྲུབ་མཐའ་ལ་ཞུགས་པའི་ཕྱི་རོལ་པའི་རིགས་ པས་གནོད་དེ། ཕྱི་རོལ་པ་སྒྲ་ཚད་ལ་བྱང་བ་རྣམས་ཀྱིས་དེ་རྣམས་ལ་བ་ལང་ཙམ་དུ་འཛིན་ཞིང༌། འདོད་པ་ལ་ཞེན་པ་རྣམས་ལ་དྲང་སྲོང་རྣམས་ཀྱིས་སྙིང་རྗེའི་ཡུལ་དུ་བྱེད་པའི་ཕྱིར། དེ་ལ་གྲུབ་མཐའ་ལ་ཞུགས་མ་ཞུགས་ཀྱི་འཇིག་ རྟེན་ཕལ་པ་དེ་གཉིས་ཀ་ཕུང་པོ་ལྔ་ལ་གཙང་བདག་བདེ་རྟག་ཏུ་ཞེན་པ་ལ་ནི། ནང་པའི་རྣལ་འབྱོར་པ་བྱེ་བྲག་ཏུ་སྨྲ་བའི་འཇིག་རྟེན་ཀུན་རྫོབ་ཀྱི་རིགས་པ་མི་གཙང༌། བདག་མེད། སྡུག་བསྔལ། མི་རྟག་པར་སྟོན་པས་གནོད་ཅིང༌། རྣལ་འབྱོར་པ་ རྣམས་ཉིད་ཀྱང་རྒྱུད་སྦྱངས་མ་སྦྱངས་དང༌། དབང་པོ་རྣོ་བརྟུལ་ལ་སོགས་པ་བློའི་ཁྱད་པར་མཆོག་དམན་ཆེར་ཡོད་པ་ཉིད་ཀྱིས་ན། འོག་མ་འོག་མ་རྣམས་ཀྱི་འདོད་པ་ལ་གོང་མ་གོང་མ་རྣམས་ཀྱི་རིགས་པའི་གནོད་བྱེད་འབབ་ཅིང་ཆོས་

Page: 649 ༄༅། །བཞིན་གྱི་ལན་ལྡོན་པར་མི་ནུས་པ་སྟེ། བྱེ་སྨྲའི་དོན་ཤེས་ཐུག་ཕྲད་དུ་འདོད་པ་ལ་མདོ་སྡེ་པའི་རྣམ་མེད་འགོག་བྱེད་ཀྱི་རིགས་པས་གནོད་ཅིང༌། བྱེ་མདོ་གཉི་གའི་དོན་ཤེས་ཀྱི་རང་མཚན་རྫས་གྲུབ་ཏུ་འདོད་ པ་ལ་སེམས་ཙམ་པའི་ཕྱི་དོན་འགོག་བྱེད་ཀྱི་རིགས་པས་གནོད་ལ། སེམས་ཙམ་པའི་སེམས་བདེན་པར་འདོད་པ་ལ་དབུ་མ་པའི་གཅིག་དུ་བྲལ་དང་མུ་བཞི་སྐྱེ་འགོག་གིས་གནོད་ལ། དབུ་མ་པའི་སྟོང་ཉིད་ལ་རིགས་པའི་ གནོད་པ་ཆེད་དུ་མི་འབབ་མོད་ཀྱང་དེ་ལ་མོས་པས་སྤྱོད་པ་དྲོད་རྩེ་བཟོད་མཆོག་གི་སྐབས་དང༌། མངོན་སུམ་དུ་སྤྱོད་པ་ས་བཅུ་རྣམས་སུ་སྔ་མའི་མཐོང་བ་ཡང་དག་ཏུ་རློམ་པ་རྣམས་ཕྱི་མ་ཕྱི་མ་ཐོབ་པའི་ཚེ་བུས་པའི་རྩེད་མོ་ལྟར་འགྱུར་ལ། ས་བཅུ་པ་བས་ཇི་ལྟར་གཟིགས་པ་དེ་ཡང་སངས་རྒྱས་ཀྱི་སར་མི་གནས་པའི་ཕྱིར། ཉན་རང་དང་བྱང་སེམས་རྣམས་ཀྱི་བློའི་ཡུལ་མིན་ལ། དེ་བཞིན་གཤེགས་པ་ནི་ཕུང་པོ་ལྔ་གནས་ཡོངས་སུ་གྱུར་པས་འདུ་ཤེས་ཀྱི་རྒྱུ་བ་མི་མངའ་བའི་ཕྱིར་ སངས་རྒྱས་ཀྱི་བློའི་ཡུལ་ཡང་མིན་ཏེ་དེ་ལ་བློ་མི་མངའ་བའི་ཕྱིར་རོ། །གལ་ཏེ་མཁྱེན་པའི་ཡུལ་ཡིན་ནོ་ཞེ་ན། ཆོས་ཐམས་ཅད་རྣམ་པ་ཐམས་ཅད་དུ་མངོན་པར་རྫོགས་པར་སངས་རྒྱས་པ་བརྙེད་པའི་ཕྱིར། ཡུལ་གཞན་མཁྱེན་བྱ་ཞིག་ཤུལ་ དུ་མ་ལུས་ལ། མཁྱེན་བྱ་མེད་པའི་མཁྱེན་པའང་མི་འཐད་པས་ཡང་དག་པར་ན་སངས་རྒྱས་ལ་མཁྱེན་པ་དང་མ་མཁྱེན་པ་ཞེས་བྱ་བ་ཅི་ཡང་མི་མངའོ། །། བཞི་པ་རྩོད་སྤང་ལ། བསྟན་བཤད་གཉིས་ལས། དང་པོ་མདོར་བསྟན་པ་ནི། གཉིས་ཀ་ཡང་ ནི་འདོད་པའི་དཔེས། །འབྲས་བུའི་དོན་དུ་མ་དཔྱད་ཕྱིར། །འཇིག་རྟེན་པ་ཡིས་དངོས་མཐོང་བཞིན། །ཡང་དག་ཉིད་དུ་རྟོག་བྱེད་ཀྱི། །སྒྱུ་མ་ལྟ་བུ་མིན་པས་འདིར། །རྣལ་འབྱོར་པ་དང་འཇིག་རྟེན་རྩོད། །ཅེས་གསུངས་

Page: 650 ཏེ། འོ་ན་བློ་ཐམས་ཅད་འཁྲུལ་བ་ཡིན་ན་འཁྲུལ་པ་ནི་མེད་པ་ཉིད་ཡིན་པས་གཟུགས་སོགས་འཛིན་པའི་ཤེས་པ་གཏན་མེད་པར་འགྱུར་ཞིང༌། དེ་ལྟར་ན་གཟུགས་སྒྲ་སོགས་སྣང་མི་སྲིད་པར་འགྱུར་རོ་ཞེ་ན། གཟུགས་སྒྲ་སོགས་དང་ དེ་འཛིན་པའི་བློར་བཅས་པ་ཡོད་ནས་སྣང་བ་མ་ཡིན་ཡང་རྟེན་འབྲེལ་ཚོགས་པའི་རྫུན་སྣང་གིས་མེད་བཞིན་དུ་སྣང་བ་ཁོ་ན་ཡིན་ཏེ། ཕལ་པ་དང༌། རྣལ་འབྱོར་པ་གཉི་གའམ། རྒོལ་བ་སྔ་ཕྱི་གཉིས་ཀ་ཡང་ནི་མཐུན་པར་མེད་བཞིན་དུ་ སྣང་བར་འདོད་པའི་དཔེ་སྒྱུ་མ་དང་རྨི་ལམ་ལ་སོགས་པས་མཚོན་ནུས་པའི་ཕྱིར། ཡང་བློ་ཐམས་ཅད་འཁྲུལ་པ་ཡིན་ན་སྦྱིན་གཏོང་གི་བློ་ལ་སོགས་པ་ཕར་ཕྱིན་ལྔ་པོ་རྣམས་ཀྱང་ལམ་མ་ཡིན་པར་འགྱུར་རོ་ཞེ་ན། དེ་དག་ནི་རྒྱུ་བསོད་ ནམས་ཀྱི་ཚོགས་ལས་འབྲས་བུ་ཡེ་ཤེས་ཀྱི་ཚོགས་སྐྱེ་ལ། དེ་ལས་སངས་རྒྱས་འཐོབ་པས་ན་གོ་འཕང་དེ་འཐོབ་པའི་དོན་དུ་རེ་ཞིག་བདེན་བརྫུན་དང༌། ཡོད་མེད་སོགས་མ་དཔྱད་པ་ཡང་དག་ཀུན་རྫོབ་ཙམ་གྱིས་འཇུག་པའི་ཕྱིར་སྐྱོན་མེད་ དོ། །མདོར་ན་གྲུབ་མཐའ་ལ་མ་ཞུགས་པ་དང༌། ཞུགས་པའི་འཇིག་རྟེན་པ་ཡིས་ནི་གཟུགས་སོགས་དངོས་པོ་རྣམས་ཇི་ལྟར་མཐོང་བ་འདི་བཞིན་དུ་བདེན་ནོ་སྙམ་ནས་སྣང་མྱོང་ཙམ་ལ་ཡང་དག་པ་ཉིད་དུ་རྟོག་པར་བྱེད་ཀྱི་དཔྱད་མི་བཟོད་ཅིང་ སྣང་ལ་རང་བཞིན་མེད་པ་སྒྱུ་མ་ལྟ་བུར་ཤེས་པ་མིན་པས་ན་སྒྱུ་མ་ལྟར་འཆད་པའི་སྐབས་འདིར་ནི་རྣལ་འབྱོར་པ་དང༌། འཇིག་རྟེན་པ་རྩོད་པ་འབྱུང་བ་ཡིན་ཏེ། སེམས་ཅན་རྣམས་ནི་གནས་ལ་དགའ་ཞིང་ཡུལ་རྣམས་འདོད། །འཛིན་ ལ་གནས་ཤིང་མི་མཁས་བླུན་རྨོངས་མུན་པ་བཞིན། །ཐོབ་པར་བྱ་བའི་ཆོས་ནི་གནས་མེད་འཛིན་མེད་དེ། །དེས་ན་འཇིག་རྟེན་དག་ན་རྩོད་པ་འབྱུང་བ་ཡིན། །ཞེས་དང༌། འཇིག་རྟེན་ང་དང་རྩོད་པར་བྱེད་ཀྱི་ང་ནི་འཇིག་

Page: 651 ༄༅། །རྟེན་དང་རྩོད་པར་མི་བྱེད་དོ། །ཞེས་གསུངས་པ་ལྟར་རོ། །གཉིས་པ་རྒྱས་བཤད་ལ་བརྒྱད། ཚད་མ་དང་འགལ་བ་སྤང་བ། ལུང་དང་འགལ་བ་སྤང་བ། སངས་རྒྱས་མཆོད་པས་བསོད་ནམས་མི་འབྱུང་བར་ ཐལ་བ་སྤང་བ། སེམས་ཅན་ཤི་ནས་མི་སྐྱེ་བར་ཐལ་བ་སྤང་བ། བསད་པའི་སྡིག་པ་མི་འབྱུང་བར་ཐལ་བ་སྤང་བ། སངས་རྒྱས་ཀྱང་སླར་འཁོར་བར་ཐལ་བ་སྤང་བ་སྟེ་ཀུན་རྫོབ་ལ་རྩོད་སྤང་དྲུག་དང༌། སྒྱུ་མ་ཀུན་རྫོབ་ཏུའང་མེད་ པར་ཐལ་བ་སྤང་བ་དང༌། སྨྲ་བའི་རྟེན་མེད་པར་ཐལ་བ་སྤང་བ་སྟེ་དོན་དམ་གྱི་རྩོད་སྤང་གཉིས་བསྟན་པའོ། །དང་པོ་ཚད་མ་དང་འགལ་བ་སྤང་བ་ནི། གཟུགས་སོགས་མངོན་སུམ་ཉིད་ཀྱང་ནི། །གྲགས་པས་ཡིན་གྱི་ཚད་མས་མིན། །དེ་ནི་མི་ གཙང་ལ་སོགས་ལ། །གཙང་སོགས་གྲགས་པ་བཞིན་དུ་བརྫུན། །ཞེས་གསུངས་ཏེ། གཟུགས་སྒྲ་སོགས་ཡང་དག་པར་ཡོད་དེ་མངོན་སུམ་དུ་མྱོང་བའི་ཕྱིར་སྙམ་ན། གཟུགས་མངོན་སུམ་དུ་མཐོང་བ་སོགས་ཉིད་ཀྱང་ནི་ འཇིག་རྟེན་ན་གྲགས་པ་ཙམ་གཅིག་ནས་གཅིག་ཏུ་བརྒྱུད་པ་ལ་ཞེན་ནས་གོམས་པས་དེའི་བློ་སྐྱེ་བར་ཟད་ཀྱི་ཚད་མས་གྲུབ་པ་མིན་ཏེ། ཆུར་འཛིན་གྱི་བག་ཆགས་གོམས་པས་སྒྱུ་མའི་ཆུ་ཀླུང་མཐོང་བ་ན་ཡང་ཆུར་ཞེན་སྐྱེ་བ་བཞིན་ནོ། ། ཏིང་རྒྱལ་ལས་ཀྱང༌། མིག་དང་རྣ་བ་སྣ་ཡང་ཚད་མ་མིན། །ལྕེ་དང་ལུས་དང་ཡིད་ཀྱང་ཚད་མ་མིན། །གལ་ཏེ་དབང་པོ་འདི་དག་ཚད་ཡིན་ན། །སུ་ལ་འཕགས་པའི་ལམ་གྱིས་ཅི་ཞིག་བྱ། །ཞེས་གསུངས་ཤིང༌། གང་ཞིག་དབང་པོ་ལ་དམིགས་པ། །དེ་ཉིད་གལ་ཏེ་དོན་དམ་ན། །དེ་ཉིད་བྱིས་པས་རིག་པས་ན། །དོན་དམ་ཤེས་པས་ད་ཅི་བྱ། །ཞེས་འགྲེལ་ཆེན་དུ་དྲངས་སོ། །དེས་ན་མེད་བཞིན་དུ་སྣང་བ་ལ་མངོན་སུམ་དུ་

Page: 652 མཐོང་བར་འཛིན་པ་དེ་ནི་མི་གཙང་བའི་དངོས་པོ་བཤང་གཅིའི་འབྱུང་གནས་ཀྱི་ལུས་ལ་གཙང་བ་དང༌། སོགས་ཀྱི་སྒྲས་མི་རྟག་པའི་དངོས་པོ་ཆུ་དྲག་ཏུ་འབབ་པ་ལ་ཆུའི་རྒྱུན་རྟག་པར་གྲགས་པ་ལྟ་བུ་བཞིན་ཏེ། མི་བདེན་པ་བརྫུན་ གྱི་རང་བཞིན་ནོ། །གཉིས་པ་ལུང་དང་འགལ་བ་སྤང་བ་ནི། འཇིག་རྟེན་གཞུག་པའི་དོན་དུ་ནི། །མགོན་པོས་དངོས་བསྟན་དེ་ཉིད་དུ། །དེ་དག་སྐད་ཅིག་མ་ཉིད་མིན། །ཀུན་རྫོབ་ཏུ་ཡང་འགལ་ཞེ་ན། །རྣལ་འབྱོར་ཀུན་རྫོབ་ཉེས་མེད་དེ། ། འཇིག་རྟེན་ལ་བལྟོས་དེ་ཉིད་མཐོང༌། །གཞན་དུ་བུད་མེད་མི་གཙང་བར། །དེས་རྟོག་འཇིག་རྟེན་གྱིས་གནོད་འགྱུར། །ཞེས་གསུངས་ཏེ། རང་སྡེ་བྱེ་མདོ་དག་ན་རེ། གཟུགས་སོགས་མེད་ན་འདུས་བྱས་སྐད་ཅིག་མར་གསུངས་ པ་དང་འགལ་ལོ་ཞེ་ན། འཇིག་རྟེན་པ་རྣམས་དེ་ཁོ་ན་ཉིད་ལ་གཞུག་པའི་དོན་དུ་ནི་མགོན་པོས་རགས་པའི་བདེན་རྟོག་ཟློག་པའི་ཕྱིར་འདུས་བྱས་ཐམས་ཅད་ནི་སྐད་ཅིག་མ་ཡིན་གྱི་ཡིད་བརྟན་པར་མི་བྱའོ། །ཞེས་དངོས་སུ་བསྟན་པ་ཙམ་ཡིན་ གྱི། སྐད་ཅིག་མར་གྲུབ་པར་གསུངས་པ་ནི་མ་ཡིན་ཏེ། དཔེར་ན། འདི་ནི་སྒྱུ་མའི་ཆུའོ། །ཞེས་བརྗོད་པ་ན་སྒྱུ་མར་སྟོན་པ་ཡིན་གྱི། ཆུར་གྲུབ་པར་སྟོན་པ་མ་ཡིན་པ་བཞིན་ཏེ། རིགས་པ་དྲུག་ཅུ་པར། དགོས་པའི་དབང་གིས་རྒྱལ་བ་རྣམས། ། ང་དང་ང་ཡི་ཞེས་གསུང་ལྟར། །ཕུང་པོ་ཁམས་དང་སྐྱེ་མཆེད་རྣམས། །དེ་བཞིན་དགོས་པའི་དབང་གིས་གསུངས། །ཞེས་སོ། །དེས་ན་སྐད་ཅིག་མ་དེ་ཉིད་དུ་དེ་དག་ཞེན་པར་བྱ་བ་ནི་མ་ཡིན་ཏེ། དཔྱད་ན་སྐད་ཅིག་མ་ཉིད་དུ་ ཡང་གྲུབ་པ་མིན་པའི་ཕྱིར། འོ་ན་སྐད་ཅིག་མ་དོན་དམ་མིན་ན་ཀུན་རྫོབ་ནི་འཇིག་རྟེན་ལ་ཇི་ལྟར་སྣང་བ་ཙམ་ཡིན་ལ། སྐད་ཅིག་མ་འཇིག་རྟེན་ལ་མི་སྣང་བའི་ཕྱིར། ཀུན་རྫོབ་ཏུ་འཇོག་པར་དེ་བས་ཀྱང་འགལ་བས་ཡང་ན་བདེན་གཉིས་ཀྱིས་

Page: 653 ༄༅། །མ་བསྡུས་པའམ། ཡང་ན་བདེན་པ་གསུམ་པར་ཐལ་ལོ་ཞེ་ན། སྐད་ཅིག་མ་དེ་འཇིག་རྟེན་པའི་ཀུན་རྫོབ་མ་ཡིན་ཡང་རྣལ་འབྱོར་པའི་ཀུན་རྫོབ་ཡིན་པས་ཉེས་པ་དེ་མེད་དོ། །འོ་ན་སྐད་ཅིག་མ་མཐོང་བ་དེ་བདེན་ པ་མཐོང་བ་ཡིན་པར་གསུངས་པ་དང་འགལ་ལོ་ཞེ་ན། མི་འགལ་ཏེ་འཇིག་རྟེན་པའི་ཀུན་རྫོབ་ལ་བལྟོས་ནས་དེ་ཁོ་ན་ཉིད་མཐོང་བར་བརྗོད་པའི་ཕྱིར། གལ་ཏེ་རྣལ་འབྱོར་པའི་ཀུན་རྫོབ་འཇོག་པ་མི་འཐད་དོ་ཞེ་ན། འཐད་དེ་དེ་མ་ བཞག་ན་མི་སྡུག་པ་གོམས་པའི་རྣལ་འབྱོར་པས་བུད་མེད་ལ་ཀེང་རུས་དང་མི་གཙང་བར་ངེས་པར་རྟོགས་ཤིང༌། མཐོང་བ་དེ་འཇིག་རྟེན་པའི་ཀུན་རྫོབ་ཏུ་འཇོག་དགོས་པར་འགྱུར་ལ། དེ་ལྟ་ན་འཇིག་རྟེན་གྱི་གྲགས་པས་གནོད་པར་འགྱུར་ཏེ་འཇིག་ རྟེན་ནི་བུད་མེད་ཁྲུས་བྱས་པ་ལ་གཙང་མཛེས་སུ་འཛིན་པའི་ཕྱིར་རོ། །གསུམ་པ་ནི། སྒྱུ་འདྲའི་རྒྱལ་ལས་བསོད་ནམས་ནི། །ཇི་ལྟར་དངོས་ཡོད་ལ་ཇི་བཞིན། །ཞེས་གསུངས་ཏེ། འོ་ན་སངས་རྒྱས་མཆོད་པས་བསོད་ ནམས་སུ་མི་འགྱུར་བར་ཐལ་ཏེ་སངས་རྒྱས་སྒྱུ་མ་ལྟ་བུ་ཡིན་པའི་ཕྱིར་ཞེ་ན། སྒྱུ་མ་དང་འདྲ་བའི་རྒྱལ་བ་ལ་མཆོད་པ་བྱས་པས་སྒྱུ་མ་ལྟ་བུའི་བསོད་ནམས་འཐོབ་སྟེ། ཇི་ལྟར་ཁྱོད་དོན་སྨྲ་བ་རྣམས་དངོས་པོར་བདེན་པའི་སངས་རྒྱས་ ལ་བསོད་ནམས་བསགས་པས་དངོས་པོར་བདེན་པའི་བསོད་ནམས་འཐོབ་པར་འདོད་པ་དེ་བཞིན་ནོ། །བཞི་པ་ནི། གལ་ཏེ་སེམས་ཅན་སྒྱུ་འདྲ་ན། །ཤི་ནས་ཇི་ལྟར་སྐྱེ་ཞེ་ན། །ཇི་སྲིད་རྐྱེན་རྣམས་ཚོགས་གྱུར་པ། ། དེ་སྲིད་སྒྱུ་མའང་འབྱུང་བར་འགྱུར། །ཡུན་རིང་ཙམ་གྱིས་ཇི་ལྟར་ན། །སེམས་ཅན་བདེན་པར་ཡོད་མ་ཡིན། །ཞེས་གསུངས་ཏེ། གལ་ཏེ་སེམས་ཅན་ཡང་སྒྱུ་མ་འདྲ་བ་ཡིན་ན་དེ་ཤི་ནས་ཇི་ལྟར་སྐྱེ་ཞེ་ན། སྐྱོན་མེད་དེ། ཇི་སྲིད་

Page: 654 དུ་སྒྱུ་མའི་རྐྱེན་སྔགས་དང་སྦྱོར་བ་རྣམས་ཚོགས་པར་གྱུར་པ་དེ་སྲིད་དུ་ནི་སྒྱུ་མའང་འབྱུང་བར་འགྱུར་བ་ལྟར་མ་རིག་པ་ལ་སོགས་པའི་རྒྱུ་རྐྱེན་ཚོགས་པ་དེ་སྲིད་དུ་སེམས་ཅན་སྒྱུ་མ་ལྟ་བུའང་འབྱུང་བར་འགྱུར་རོ། །གལ་ཏེ་སྒྱུ་མ་ནི་གློ་ བུར་བ་ཡིན་པས་མི་བདེན་ལ་སེམས་ཅན་ནི་ཐོག་མ་མེད་པ་ནས་འོངས་པས་བདེན་ནོ་སྙམ་ན་ཡུན་རིང་བར་སྣང་བ་ཙམ་གྱིས་སེམས་ཅན་བདེན་པར་ཡོད་པ་ག་ལ་ཡིན་སྟེ། སྒྱུ་མ་དང་རྨི་ལམ་གྱི་ཡུན་བསྐལ་བ་བརྒྱད་ཁྲི་སོགས་སྣང་བ་ དང་སྐད་ཅིག་མ་གཅིག་ཏུ་སྣང་བ་ལ་བདེན་བརྫུན་གྱི་ཁྱད་པར་མེད་པའི་ཕྱིར་རོ། །ལྔ་པ་ནི། སྒྱུ་མའི་སྐྱེས་བུ་བསད་སོགས་ལ། །སེམས་མེད་ཕྱིར་ན་སྡིག་མེད་དེ། །སྒྱུ་མའི་སེམས་དང་ལྡན་པ་ལ། །བསོད་ནམས་དང་ནི་སྡིག་ པ་འབྱུང༌། །སྔགས་སོགས་རྣམས་ལ་ནུས་མེད་ཕྱིར། །སྒྱུ་མའི་སེམས་ནི་འབྱུང་བ་མེད། །སྣ་ཚོགས་རྐྱེན་ལས་བྱུང་བ་ཡི། །སྒྱུ་མ་དེ་ཡང་སྣ་ཚོགས་ཉིད། །རྐྱེན་གཅིག་གིས་ནི་ཀུན་ནུས་པ། །གང་ན་ཡང་ནི་ཡོད་མ་ཡིན། ། ཞེས་གསུངས་ཏེ། འོ་ན་སེམས་ཅན་བསད་ཀྱང་སྡིག་པར་མི་འགྱུར་བར་ཐལ་ཏེ། སེམས་ཅན་སྒྱུ་མ་ལྟ་བུ་ཡིན་ལ། སྒྱུ་མའི་སྐྱེས་བུ་བསད་པ་ལ་སྡིག་པ་མེད་པའི་ཕྱིར་ཞེ་ན། སྐྱོན་མེད་དེ། སྒྱུ་མའི་སྐྱེས་བུ་བསད་པ་དང༌། སོགས་ཀྱི་སྒྲས་ འཕྲུལ་འཁོར་གྱི་སྐྱེས་བུ་དང་སྤྲུལ་པ་བསད་པ་སོགས་ལ། དེ་དག་ལ་སེམས་མེད་པའི་ཕྱིར། བསད་ཀྱང་སྡིག་པར་འགྱུར་བ་མེད་མོད་སེམས་ཅན་ལ་ནི་དེ་ལྟ་མ་ཡིན་ཏེ། སྒྱུ་མའི་སེམས་དང་ལྡན་པའི་སྒྱུ་མའི་སྐྱེས་བུ་ཡིན་པའི་ཕྱིར། དེས་ན་སྒྱུ་ མའི་སེམས་དང་བཅས་པ་དེ་ལ་ཕན་བཏགས་པ་ལས་ནི་བསོད་ནམས་དང༌། གནོད་པ་བྱས་པ་ལས་ནི་སྡིག་པ་འབྱུང་བ་ཡིན་ནོ། །འོ་ན་སྒྱུ་མའི་སྐྱེས་བུ་ལ་སྒྱུ་མའི་སེམས་མི་འབྱུང་བའི་རྒྱུ་མཚན་ཅི་ཞེ་ན། སྒྱུ་མའི་སྔགས་སོགས་དེ་རྣམས་

Page: 655 ༄༅། །ལ་རྟ་གླང་སོགས་ཀྱི་སྒྱུ་མའི་དབྱིབས་སྐྱེད་པའི་ནུས་པ་ཡོད་ཀྱི་སྒྱུ་མའི་སེམས་སྐྱེད་པའི་ནུས་པ་མེད་པའི་ཕྱིར། དེ་དག་ལ་སྒྱུ་མའི་སེམས་ནི་འབྱུང་བ་མེད་དོ། །སྒྱུ་མའི་མི་སྤྲུལ་ནུས་ན་དེའི་སེམས་ཀྱང་སྤྲུལ་ནུས་སོ་ ཞེ་ན། སྣ་ཚོགས་པའི་རྐྱེན་སོ་སོ་ལས་བྱུང་བའི་སྒྱུ་མ་དེ་ཡང་སྣ་ཚོགས་པ་སོ་སོ་ཡིན་ཏེ། རྟ་གླང་སྐྱེད་པའི་རྐྱེན་གྱིས་ཁང་བཟང་སོགས་མ་ཡིན་ལ། ཁང་བཟང་སྐྱེད་པའི་རྐྱེན་གྱི་རྟ་གླང་མ་ཡིན་པ་ལྟར་རོ། །དེས་ན་རྐྱེན་གཅིག་གིས་ དངོས་པོ་ཀུན་སྐྱེད་པར་ནུས་བ་དེ་འདྲ་བ་ནི་གང་ན་ཡང་ནམ་དུའང་ཡོད་པ་མིན་ནོ། །དྲུག་པ་ནི། གལ་ཏེ་དོན་དམ་མྱ་ངན་འདས། །འཁོར་བ་ཀུན་རྫོབ་དེ་ལྟ་ན། །སངས་རྒྱས་ཀྱང་ནི་འཁོར་འགྱུར་བས། །བྱང་ཆུབ་སྤྱོད་པ་ཅི་ཞིག་ བྱ། །རྐྱེན་རྣམས་རྒྱུན་ནི་མ་ཆད་ན། །སྒྱུ་མའང་ལྡོག་པར་མི་འགྱུར་གྱི། །རྐྱེན་རྣམས་རྒྱུན་ནི་ཆད་པ་ན། །ཀུན་རྫོབ་ཏུ་ཡང་མི་འབྱུང་ངོ༌། །ཞེས་གསུངས་ཏེ། འོ་ན་སྒྲིབ་པ་རང་བཞིན་གྱིས་མེད་ན་གཟོད་ནས་སངས་རྒྱས་པར་ འགྱུར་ལ། དེ་ལྟ་ན་འཁོར་བ་མི་སྲིད་པར་འགྱུར་རོ་ཞེ་ན། གཟོད་ནས་དག་པ་ཡིན་ཡང་དེ་ལྟར་མ་རྟོགས་པའི་དབང་གིས་ཀུན་རྫོབ་ཏུ་འཁོར་བར་སྣང་བ་མི་འགལ་ལོ་ཞེས་སྨྲས་པ་ན། དོན་སྨྲ་བ་ན་རེ། གལ་ཏེ་དོན་དམ་པར་མྱ་ངན་ ལས་འདས་པ་ཡིན་ཡང་འཁོར་བར་ཀུན་རྫོབ་ཏུ་སྣང་བ་མི་འགལ་བ་དེ་ལྟ་ན་སངས་རྒྱས་ནས་ཀྱང་ནི་རིགས་པ་དེ་ཉིད་མཚུངས་པས་སླར་འཁོར་བར་འཁོར་དགོས་པར་འགྱུར་བས་བྱང་ཆུབ་སྤྱོད་པས་ཅི་ཞིག་བྱ་ཞེས་ཟེར་རོ། །དེ་ལ་སྨྲས་ པ། རང་བཞིན་གྱིས་དག་པར་སངས་རྒྱས་དང༌། སེམས་ཅན་ཁྱད་མེད་ཀྱང་ཀུན་རྫོབ་ཏུ་འཁོར་བར་འཁོར་མི་འཁོར་གྱི་ཁྱད་པར་ཡོད་དེ། སངས་རྒྱས་ལ་འཁོར་བའི་རྐྱེན་མ་རིག་པ་དང་སྲིད་ལེན་སོགས་རྒྱུན་ཆད་ཟིན་པའི་ཕྱིར་དང༌། སེམས་ཅན་ལ་

Page: 656 དེ་རྣམས་རྒྱུན་མ་ཆད་པའི་ཕྱིར། དེས་ན་རྐྱེན་རྣམས་རྒྱུན་ནི་མ་ཆད་ན་སྒྱུ་མའང་ལྡོག་པར་མི་འགྱུར་གྱི། ནམ་སྒྱུ་མའི་རྐྱེན་རྣམས་རྒྱུན་ནི་ཆད་པ་ན་ཀུན་རྫོབ་ཏུ་ཡང་སྒྱུ་མ་དེ་མི་འབྱུང་བ་ལྟར་རོ། །བདུན་པ་ནི། གང་ཚེ་འཁྲུལ་པའང་ཡོད་མིན་ ན། །སྒྱུ་མ་གང་གིས་དམིགས་པར་འགྱུར། །གང་ཚེ་ཁྱོད་ལ་སྒྱུ་མ་ཉིད། །མེད་ན་དེ་ཚེ་ཅི་ཞིག་དམིགས། །གལ་ཏེ་དེ་ཉིད་དུ་གཞན་ཡོད། །རྣམ་པ་དེ་ན་སེམས་ཉིད་ཡིན། །གང་ཚེ་སེམས་ཉིད་སྒྱུ་མ་ན། །དེ་ཚེ་ གང་ཞིག་གང་གིས་མཐོང༌། །འཇིག་རྟེན་གྱི་ནི་མགོན་པོས་ཀྱང༌། །ེམས་ཀྱིས་སེམས་མི་མཐོང་ཞེས་གསུངས། །རལ་གྲིའི་སོ་ནི་རང་ལ་རང༌། །ཇི་ལྟར་མི་གཅོད་དེ་བཞིན་ཡིད། །ཇི་ལྟར་མར་མེ་རང་གི་དངོས། ། ཡང་དག་གསལ་བར་བྱེད་བཞིན་ན། །མར་མེ་གསལ་བར་བྱ་མིན་ཏེ། །གང་ཕྱིར་མུན་གྱིས་བསྒྲིབས་པ་མེད། །ཤེལ་བཞིན་སྔོན་པོ་སྔོ་ཉིད་ལ། །གཞན་ལ་བལྟོས་པ་ཡོད་མ་ཡིན། །དེ་བཞིན་འགའ་ཞིག་གཞན་ ལ་ནི། །བལྟོས་དང་ལྟོས་མེད་པ་ཡང་མཐོང༌། །སྔོ་ཉིད་མིན་ལ་སྔོན་པོར་དེ། །བདག་གི་བདག་ཉིད་བྱས་པ་མེད། །མར་མེ་གསལ་བ་ཉིད་དོ་ཞེས། །ཤེས་པས་ཤེས་ཏེ་བརྗོད་ཅེ་ན། །བློ་ནི་གསལ་བ་ཉིད་ཡིན་ ཞེས། །གང་གིས་ཤེས་ནས་དེ་སྐད་བརྗོད། །གང་ཚེ་འགས་ཀྱང་མཐོང་མིན་ན། །གསལ་བ་འམ་ནི་མི་གསལ་བ། །མོ་གཤམ་བུ་ཡི་འགྱིང་བག་བཞིན། །དེ་ནི་བརྗོད་ཀྱང་དོན་མེད་དོ། །གལ་ཏེ་རང་རིག་ཡོད་མིན་ན། ། རྣམ་ཤེས་དྲན་པར་ཇི་ལྟར་འགྱུར། །གཞན་མྱོང་བ་དང་འབྲེལ་བ་ལས། །དྲན་འགྱུར་བྱི་བའི་དུག་བཞིན་ནོ། །རྐྱེན་གཞན་དག་དང་ལྡན་པ་ན། །མཐོང་ཕྱིར་རང་ཉིད་རང་གསལ་ན། །གྲུབ་པའི་མིག་སྨན་སྦྱོར་བ་ལས། །

Page: 657 ༄༅། །བུམ་མཐོང་མིག་སྨན་ཉིད་འགྱུར་མིན། །ཇི་ལྟར་མཐོང་ཐོས་ཤེས་པ་དག །འདིར་ནི་དགག་པར་བྱ་མིན་ཏེ། །འདིར་ནི་སྡུག་བསྔལ་རྒྱུར་གྱུར་པ། །བདེན་པར་རྟོག་པ་བཟློག་བྱ་ཡིན། །སེམས་ལས་སྒྱུ་མ་གཞན་མིན་ ཞིང༌། །གཞན་མིན་པར་ཡང་མི་བརྟག་ན། །དངོས་ན་ཇི་ལྟར་དེ་གཞན་མིན། །གཞན་མིན་ཞེ་ན་དངོས་པོར་མེད། །ཇི་ལྟར་སྒྱུ་མ་བདེན་མིན་ཡང༌། །བལྟ་བྱ་དེ་བཞིན་ལྟ་བྱེད་ཡིད། །ཅེས་གསུངས་ཏེ། དེ་ཡང་གང་ཚེ་སོགས་ རྐང་པ་དང་པོ་གཉིས་ཀྱིས་འཁྲུལ་པ་མེད་ན་སྒྱུ་མ་མི་དམིགས་པར་ཐལ་བའི་རྩོད་པ་བཀོད། གང་ཚེ་ཁྱོད་ལ་སོགས་རྐང་པ་གཉིས་ཀྱིས་དེ་ལ་མཚུངས་པ་བརྗོད། གལ་ཏེ་སོགས་རྐང་པ་གཉིས་ཀྱིས་རྣམ་བདེན་པའི་འདོད་པ་བཀོད། གང་ཚེ་སོགས་ཚིགས་བཅད་ཕྱེད་དང་གཉིས་ཀྱིས་རང་རིག་སྤྱིར་བཀག །ཇི་ལྟར་སོགས་ཚིགས་བཅད་ཕྱེད་དང་ལྔས་རང་གསལ་དུ་འདོད་པ་བཀག །གལ་ཏེ་སོགས་ཚིགས་བཅད་གཉིས་ཀྱིས་རང་རིག་གི་སྒྲུབ་བྱེད་བཀག །ཇི་ལྟར་ སོགས་ཚིགས་བཅད་གཅིག་གིས་བདེན་འཛིན་ཁོ་ན་དགག་བྱར་བསྟན། སེམས་ལས་སོགས་ཚིགས་བཅད་ཕྱེད་དང་གཉིས་ཀྱིས་རྣམ་མེད་པའི་འདོད་པ་བཀག་པ་ཡིན་ནོ། །དེ་ཡང་རྣམ་རིག་སྨྲ་བ་རྣམས་ན་རེ། ཕྱི་རོལ་གྱི་དོན་ རང་བཞིན་མེད་པ་བདེན་མོད་ཀྱང་དབུ་མ་པ་ཁྱོད་ཀྱིས་སྒྱུ་མ་སོགས་རྒོལ་བ་གཉིས་ཀ་ལ་གྲགས་པའི་དཔེར་བཤད་པ་འདི་ཁྱོད་ཉིད་ལ་མ་གྲུབ་སྟེ། གང་གི་ཚེ་འཁྲུལ་པའང་ཡོད་པ་མིན་པར་ཁས་བླངས་ན་སྒྱུ་མ་ཉིད་གང་གིས་དམིགས་ པར་འགྱུར་ཏེ། འཁྲུལ་པ་མེད་ན་སྒྱུ་མ་ལྟ་ག་ལ་ཡོད་པའི་དོན་ཏོ། །དེ་ལ་སྨྲས་པ། སེམས་ཙམ་པ་ཁྱོད་ཉིད་ཕྱི་རོལ་གྱི་དོན་མེད་པར་འདོད་པའི་ཕྱིར། གང་གི་ཚེ་ཁྱོད་ལ་སྒྱུ་མ་ཉིད་ཀྱང་མེད་ན་སྒྱུ་མའི་དཔེ་ཅི་ཞིག་དམིགས་ཞེས་ཁྱབ་པ་ལ་

Page: 658 མཚུངས་པ་བསྒྲེས་སོ། །དེ་ལ་གལ་ཏེ་རྣམ་བདེན་པ་ན་རེ། སྒྱུ་མ་སོགས་ཕྱི་རོལ་གྱི་དོན་དུ་མེད་ཀྱང་སྒྱུ་མ་ལ་སོགས་པའི་དཔེའི་དེ་ཉིད་ཙམ་དུ་ནི་དེར་སྣང་བའི་རྣམ་པ་གཞན་ཡོད་དེ་རྣམ་པ་དེ་ནི་སྣང་བ་པོའི་སེམས་དེ་ཉིད་དུ་བདེན་པ་ཡིན་ ནོ་ཞེ་ན། ཕྱི་རོལ་གྱི་དོན་མེད་ན་ཕྱི་རོལ་དོན་གྱི་རྣམ་པ་ཡོད་པར་འགལ་ཏེ། རི་བོང་གི་རྭ་མེད་ལ་དེའི་རྣམ་པ་ཡོད་པའི་ཁྱད་པར་མི་འཐད་པ་བཞིན་ནོ། །དེ་ལྟ་མོད་ཀྱིས་སེམས་དེ་ཉིད་ཀྱང་བལྟོས་པ་དང་བཅས་པ་དཔྱད་མི་བཟོད་པ་སྒྱུ་མ་ལྟ་ བུ་ཡིན་ཏེ། གཟུགས་ནས་རྣམ་མཁྱེན་གྱི་བར་དང་མྱ་ངན་ལས་འདས་པ་ལས་ཆེས་ལྷག་པའི་ཆོས་ཡོད་ན་དེ་ཡང་སྒྱུ་མ་ལྟ་བུར་གསུངས་པའི་ཕྱིར། དེས་ན་གང་གི་ཚེ་སེམས་དེ་ཉིད་ཀྱང་སྒྱུ་མ་ལྟ་བུ་ཡིན་ན་དེའི་ཚེ་མཐོང་བྱ་གང་ཞིག་མཐོང་ བྱེད་གང་གིས་མཐོང་སྟེ། སེམས་ལས་གཞན་པའི་མཐོང་རྒྱུ་མེད་ལ་སེམས་རང་གིས་རང་མི་མཐོང་བའི་ཕྱིར། འདི་ནི་རིགས་པས་ཀྱང་གྲུབ་སྟེ། རང་ཉིད་རང་ལ་བྱ་བྱེད་འགལ་བའི་ཕྱིར་དང༌། རྣལ་འབྱོར་ཅན་གྱིས་རང་གི་སེམས་ལ་ནང་དུ་ བརྟགས་པ་ན་མཐོང་བྱ་དང་མཐོང་བ་པོ་དུས་མཉམ་དུ་གཞི་གཅིག་ལ་མི་འདུ་ཞིང་ཇི་ཙམ་བརྟགས་པ་དེ་ཙམ་གྱིས་ཟབ་ཅིང་ཕྲ་ལ། མཐར་མཐོང་བྱ་མཐོང་བྱེད་ཀྱི་སྤྲོས་པ་ཉིད་ཞི་བ་སྲད་བུས་མར་མེའི་ཞེང་དང་སྦོམས་ཀྱི་ཚད་གཞལ་བ་ན། ཚད་མ་ལོངས་པར་སྲད་བུ་ཉིད་འཚིག་པ་ལྟར་འགྱུར་བའི་ཕྱིར། ལུང་གིས་ཀྱང་གྲུབ་སྟེ། འཇིག་རྟེན་གྱི་ནི་མགོན་པོས་ཀྱང་སེམས་ཀྱིས་སེམས་མི་མཐོང་ཞེས་གཙུག་ན་རིན་ཆེན་གྱི་མདོ་ལས་གསུངས་ལ། རལ་གྲིའི་སོ་ནི་རང་ལ་ རང་ཇི་ལྟར་མི་གཅོད་པ་དེ་བཞིན་དུ་ཡིད་ཀྱང་རང་ཉིད་གཅིག་པུ་མཐོང་ཡུལ་མཐོང་མཁན་མཐོང་བ་གསུམ་གར་དུ་ཅིག་ཆར་འགྱུར་བ་ནི་གནས་མ་ཡིན་པར་གསུངས་པའི་ཕྱིར་ཏེ། ལང་གཤེགས་ལས། ཇི་ལྟར་རལ་གྲིས་རང་སོ་དང༌། །

Page: 659 ༄༅། །ཇི་ལྟར་སོར་མོ་རང་རྩེ་ལ། །མི་གཅོད་རེག་པར་མི་བྱེད་པ། །དེ་བཞིན་སེམས་ཀྱིས་སེམས་མི་མཐོང༌། །ཞེས་གསུངས་པའི་ཕྱིར། དེ་ལ་རྣམ་རིག་པ་ན་རེ། ཇི་ལྟར་མར་མེ་རང་གིས་མར་མེའི་དངོས་པོ་ཡང་དག་ པར་གསལ་བར་བྱེད་པས་རང་གསལ་ཡིན་པ་བཞིན་དུ་སེམས་ཀྱང་རང་གསལ་བ་ཡིན་ནོ་ཞེ་ན། དེ་ལ་བཤད་པ། དེ་ནི་དཔེ་མ་གྲུབ་སྟེ། གསལ་བ་ནི་མུན་པ་བཀག་ནས་གཟུགས་གསལ་བར་བྱས་པ་ལ་མར་མེས་གསལ་བར་བྱས་ པའི་ཐ་སྙད་དུ་འཇོག་པ་ཡིན་ལ། མར་མེ་རང་ཉིད་ནི་གསལ་བར་བྱ་དགོས་པ་མིན་ཏེ། གང་གི་ཕྱིར་མར་མེ་མུན་གྱིས་བསྒྲིབས་པ་མེད་པའི་ཕྱིར་ཏེ། དབུ་མ་རྩ་བར། མར་མེ་དང་ནི་གང་དག་ན། །དེ་འདུག་པ་ན་མུན་པ་མེད། །མར་མེས་ཅི་ ཞིག་སྣང་བར་བྱེད། །མུན་པ་སེལ་བས་སྣང་བྱེད་ཡིན། །ཞེས་སོ། །ཡང་མར་མེ་རང་གསལ་ཡང་ཡིན་ན་གཞན་ཡང་སྣང་བར་བྱེད་པར་འདོད་དགོས་ལ། དེ་ལྟ་ན་མུན་པས་རང་གཞན་གཉིས་ག་སྒྲིབ་པར་འགྱུར་ཏེ། མར་མེ་རང་དང་ གཞན་གྱི་དངོས། །གལ་ཏེ་སྣང་བར་བྱེད་འགྱུར་ན། །མུན་པའང་རང་དང་གཞན་གྱི་དངོས། །སྒྲིབ་པར་འགྱུར་བར་ཐེ་ཚོམ་མེད། །ཅེས་སོ། །རྣམ་རིག་པ་ན་རེ། སྐྱོན་དེ་མེད་དེ། ཤེལ་དྭངས་པ་སྔོན་པོ་མ་ཡིན་ཡང་དར་སྔོན་པོ་དང་ ཉེ་བའི་རྐྱེན་གྱིས་སྔོན་པོར་སྣང་བ་བཞིན་དུ། རྐྱེན་གཞན་ལ་བལྟོས་པའི་གསལ་བ་དང༌། ཨུཏྤལ་སྔོན་པོ་ཉིད་སོགས་ལ་ནི་རྐྱེན་གཞན་ལ་བལྟོས་པ་ཡོད་པ་མ་ཡིན་པར་རང་བཞིན་གྱིས་སྔོན་པོར་གནས་པ་དེ་བཞིན་དུ། ཆོས་འགའ་ཞིག་རྐྱེན་གཞན་ ལ་ནི་བལྟོས་པ་དང༌། འགའ་ཞིག་བལྟོས་པ་མེད་པར་ངོ་བོ་ཉིད་ཀྱིས་དེ་ལྟར་ཡིན་པ་ཡང་མཐོང་བས་ན་ཤེས་པ་ནི་རྐྱེན་གཞན་ལ་མ་བལྟོས་པར་ངོ་བོ་ཉིད་ཀྱིས་རང་གསལ་བ་ཡིན་ནོ་ཞེ་ན། དེ་དགག་པ་ནི། སྔོན་པོ་དང་རང་རིག་དཔེ་མི་མཚུངས་ཏེ།

Page: 660 ཨུཏྤལ་ལའི་སྔོན་པོ་ནི་ངོ་བོ་ཉིད་ཀྱིས་གཟོད་ནས་སྔོན་པོར་ཡོད་པ་མ་ཡིན་མོད་ཀྱང་འབྱུང་བའི་དྭངས་མའི་རྒྱུ་རྐྱེན་གཞན་གྱིས་སྔོན་པོར་བསྐྱེད་ཟིན་པ་ཡིན་ལ། རང་རིག་རང་གསལ་དུ་ནི་རྒྱུ་རྐྱེན་གྱིས་སྐྱེད་མ་ཟིན་ཅིང་རིག་པ་ནི་རིག་བྱ་དང་རིག་བྱེད་ ལ་བལྟོས་ཤིང་གསལ་བ་ནི་མི་གསལ་བའི་གནས་སྐབས་ལ་བལྟོས་པས་བལྟོས་ཟླ་ཡོད་པ་ན་རྟོག་པ་ཕན་ཚུན་བརྟེན་པའི་སྐྱོན་གྱིས་རང་རིག་རང་གསལ་མི་འགྲུབ་ལ་བལྟོས་ཟླ་མེད་ན་དེ་བས་ཀྱང་མི་འགྲུབ་པའི་ཕྱིར། ཤེལ་དར་ དང་འཆིང་བུའི་སྣོད་ལ་སོགས་པའི་རྐྱེན་གྱིས་སྔོན་པོར་སྣང་མོད་ཀྱང་དེ་ནི་ཤེལ་དྭངས་པའི་ཕྱིར། མ་བསྒྲིབས་པར་དར་རམ་འཆིང་བུའི་སྣོད་དེའི་ཁ་དོག་མཐོང་བར་ཟད་ཀྱི་ཤེལ་སྔོན་པོར་གྱུར་པ་མ་ཡིན་པའི་ཕྱིར། ཤེལ་སྔོན་པོ་ཉིད་མིན་པ་ལ་ རྐྱེན་དེས་ཀྱང་སྔོན་པོར་ཤེལ་དེ་བྱས་པ་མེད་ལ། ཤེལ་བདག་ཉིད་ཀྱིས་བདག་ཉིད་སྔོན་པོར་བྱས་པ་ཡང་མེད་པའི་ཕྱིར་རོ། །དེ་ལྟ་མོད་ཀྱིས་མར་མེ་རང་གསལ་བར་བྱེད་དོ་ཞེས་སུས་ཤེས་ཏེ་བརྗོད་ཅེས་འདྲིའོ། །རྣམ་རིག་པ་ན་རེ། དེ་ནི་ཤེས་ པས་ཤེས་ཏེ་བརྗོད་དོ་ཞེ་ན། འོ་ན་བློ་ནི་རང་གསལ་བ་ཉིད་ཡིན་ནོ་ཞེས་གང་གིས་ཤེས་ནས་དེ་སྐད་བརྗོད། རང་རིག་གིས་སོ་ཞེ་ན། སྒྲུབ་བྱེད་བསྒྲུབ་བྱ་དང་མཚུངས་ཏེ་རང་རིག་ཉིད་སྒྲུབས་ཤིག །རྣམ་རིག་པ་ན་རེ། གལ་ཏེ་རང་རིག་ ཡོད་མིན་ན་སྔོན་མྱོང་བའི་རྣམ་ཤེས་ཕྱིས་དྲན་པར་ཇི་ལྟར་འགྱུར་ཞེ་ན། དབུ་མ་པས་སྨྲས་པ། དེ་ནི་རང་རིག་ཡོད་པས་དྲན་པ་མ་ཡིན་ཏེ། དེ་ཉིད་ཀྱི་ཚེ་རྒྱུ་རྐྱེན་གཞན་ཉམས་སུ་མྱོང་བ་དང་འབྲེལ་བའི་དབང་ལས་སྔོན་གྱི་གནས་སྐབས་ལ་ དམིགས་པའི་དྲན་པ་སྐྱེ་བར་འགྱུར་ཡང་ད་ལྟ་བའི་མྱོང་བ་དེ་ལ་སྔོན་གནས་དྲན་པར་འཁྲུལ་བར་ཟད་ཀྱི་སྔོན་གནས་དེ་ཉིད་ནི་མ་ཡིན་ཏེ། འགགས་ཟིན་པའི་ཕྱིར། འགགས་པ་སླར་སྐྱེ་བ་ནི་གང་དུ་ཡང་མི་སྲིད་དོ། །དེས་ན་སྔོན་

Page: 661 ༄༅། །སྦྲུལ་གྱིས་བདག་ནི་དུག་དྲག་པས་མི་རྣམས་ལ་འཛིན་ཞིང་དེས་མི་རྣམས་འཇིགས་པར་བྱེད་ཀྱི་ཁྱོད་འདྲ་བ་ལ་སུ་ཡང་མི་འཇིགས་སོ་ཞེས་ང་རྒྱལ་གྱིས་སྨྲས་པ་ན། བྱི་བ་ན་རེ། འདི་ནི་ཁྱོད་ཀྱི་དུག་མ་ཡིན་གྱི་ཁོ་རང་གི་རྣམ་ རྟོག་ཏུ་ཟད་དོ། །གལ་ཏེ་ཡིད་མི་ཆེས་ན་མངོན་སུམ་དུ་བྱའོ་ཞེས་གཉིས་ཀར་ལམ་དུ་འདུག་སྟེ་མི་ཞིག་འོངས་པ་ན་བྱི་བས་མི་མངོན་པར་རྐང་པ་ལ་སོ་བཏབ་སྟེ་སྦྲུལ་གྱིས་དེ་དང་ཉེ་བར་ལུས་སྣང་བར་བྱས་པས་མི་དེ་བདག་ལ་སྦྲུལ་གྱི་དུག་གིས་ ཟིན་ཏེ་རྨ་བྱུང་ངོ་ཞེས་བརྒྱལ་ཞིང་ལྟོས་འཕྱེ་བར་བྱེད་ལ། ཡང་མི་ཞིག་འོངས་པ་ན་སྦྲུལ་གྱིས་ལུས་མི་མངོན་པར་རྨུགས་ཏེ་བྱི་བས་རྨུག་པ་པོ་ཡིན་པ་ལྟར་བཅོས་པ་ན། མི་དེ་ན་རེ། བྱི་བས་རྨུགས་པ་ལྟ་ལ་འཇིགས་པ་ཅི་ཡོད་ཟེར་ ནས་ཅི་ཡང་མ་ཉེས་པར་སོང་བ་ལྟ་བུ་ཞེས་བསམ་གཏན་པ་ཡང་མང་པོ་ལ་གྲགས་པ་སྟེ་རང་ཉིད་དུག་ཏུ་དོགས་པའི་དྲན་པ་སྐྱེས་པར་གྱུར་པ་ན་བྱི་བས་རྨུགས་པ་ལ་སྦྲུལ་གྱི་དུག་ཏུ་འདུ་ཤེས་པས་གནོད་པ་ཆེར་སྐྱེད་ཅིང༌། སྦྲུལ་གྱིས་ཟིན་པ་ལ་ ཡང་བྱི་བའི་དུག་ཏུ་འདུ་ཤེས་པ་ན་གནོད་པ་མེད་པ་བཞིན་ཏེ། དཔེར་ན་དོགས་པའི་འདུ་ཤེས་ཀྱིས་ནི་དུག་འདས་པ། །དུག་དེ་ཁོང་དུ་སོང་བ་མེད་ཀྱང་བརྒྱལ་བར་འགྱུར། །ཞེས་གསུངས་པ་དང་ཡང་ཤིན་ཏུ་འབྱོར་རོ། །འདི་ལ་དགེ་ བའི་ལྷས་ཀྱང༌། བྱི་བའི་དུག་ཇི་ལྟར་དྲན་པར་འགྱུར་ཞེས་དྲི་བར་བྱ་སྟེ། དེ་ཡང་དབྱར་གྱི་ཚེ་ན་བྱི་བ་དུག་དང་བཅས་པ་འགྱུར་ལ། དེ་ཡོད་པར་དོགས་པ་ན་སྦྲུལ་གྱི་མཆེ་བས་ཟིན་པའི་རྗེས་ཐོགས་ལ་སྦྲུལ་ནི་མ་མཐོང་ལ། ལུས་ལ་གནོད་པའི་འགྱུར་ བ་མཐོང་བས་བྱི་བའི་དུག་མེད་ཀྱང་དེའི་དུག་གིས་ཟིན་པའི་དྲན་པ་འབྱུང་མོད་ཀྱི་སྦྲུལ་གྱི་དུག་ནི་དེ་བས་གཞན་པ་ཉིད་ཡིན་ནོ། །དེ་བཞིན་དུ་རྨའམ་ལུས་ཀྱི་ནད་གཞན་ལ་བྱི་བའི་དུག་མེད་ཀྱང་དེའི་ཤེས་པ་འབྱུང་བ་ལྟར་རང་རིག་མེད་པ་

Page: 662 ཉིད་དུ་ཡང་རྣམ་པར་ཤེས་པའི་དྲན་པ་འབྱུང་ངོ་ཞེས་དཔེ་དོན་འདི་ལྟར་དུ་བཤད་དོ། །ེ་ལ་རྣམ་རིག་པ་ན་རེ། ཏིང་ངེ་འཛིན་ལ་སོགས་པའི་རྐྱེན་གཞན་དག་དང་ལྡན་པ་ན་གཞན་གྱི་སེམས་ཤེས་པ་དང་རང་གཞན་གྱི་སྔོན་གནས་རྗེས་སུ་ དྲན་པ་མཐོང་བའི་ཕྱིར་རང་རིག་རང་གསལ་བ་ཡོད་དོ་ཞེ་ན། གཞན་སེམས་སོགས་ཤེས་ཀྱང་དེས་སེམས་རང་ཉིད་མཐོང་བ་མ་ཡིན་ཏེ། མིག་གིས་གཟུགས་མཐོང་གིས་མིག་ཉིད་མི་མཐོང་པའི་ཕྱིར་དང་གྲུབ་པའི་མིག་སྨན་གི་ཝང་ལ་ སོགས་པ་སྦྱར་བ་གྲུབ་སྟེ་དྲོ་བ་དང༌། དུ་བ་དང༌། འབར་བར་སྣང་བ་དག་མིག་ལ་བྱུགས་པས་ས་འོག་སོགས་ཐག་རིང་ན་ཡོད་པའི་བུམ་པ་བཟང་པོ་དང་ནོར་བུ་སོགས་མཐོང་ནས་ལེན་པར་བྱེད་ཀྱང་མིག་ལ་བྱུགས་པའི་མིག་སྨན་དེ་ཉིད་དམ་མིག་ ཉིད་མཐོང་བ་མིན་པ་བཞིན་ནོ། །གལ་ཏེ་སྔོན་གནས་སོགས་དྲན་པའི་ཤེས་པ་དེ་ཉིད་རང་གསལ་ཡིན་ཏེ། ཏིང་ངེ་འཛིན་གྱི་རྐྱེན་ལས་གསལ་བྱའི་རང་བཞིན་དུ་སྐྱེས་པའི་ཕྱིར་ཞེ་ན། འོ་ན་བུམ་པ་དེ་ཡང་མིག་སྨན་དང་ལྡན་པའི་ མིག་ཏུ་ཐལ་ཏེ། མིག་གི་རྐྱེན་ལས་གསལ་བྱའི་རང་བཞིན་དུ་སྐྱེས་པའི་ཕྱིར་རོ། །དེས་ན་རིག་བྱ་རང་དང༌། རིག་བྱེད་ཤེས་པ་དང༌། རིག་ཚུལ་གསལ་བར་འཛིན་པ་ནི་སྒྲོ་བཏགས་པ་ཉིད་ཡིན་གྱི་ཤེས་པ་དེ་ཉིད་ཅིག་ཆར་དེ་གསུམ་གར་དུ་ ལྡང་བའི་གནས་མེད་དོ། །འོ་ན་རང་རིག་མེད་པ་དེའི་ཚེ་གཞན་རིག་ཀྱང་མི་འཐད་པས་ཤེས་པ་ཉམས་སུ་མྱོང་བ་དང་གཟུགས་སྒྲ་སོགས་ཉམས་སུ་མྱོང་བ་ཐམས་ཅད་མི་འཐད་པར་འགྱུར་རོ་ཞེ་ན། ཇི་ལྟར་ན་གཟུགས་མཐོང་བ་ དང༌། སྒྲ་ཐོས་པ་ལ་སོགས་པ་ཉམས་སུ་མྱོང་བའི་ཤེས་པ་དག་དེ་ཁོ་ན་ཉིད་ལ་དཔྱོད་པའི་སྐབས་འདིར་ནི་དགག་པར་བྱ་བ་མིན་ཏེ། འཁོར་བའི་སྡུག་བསྔལ་གྱི་རྒྱུར་གྱུར་པ་མཐོང་ཐོས་ཀྱི་ཤེས་སོགས་དེ་དག་ལ་བདེན་པར་ཞེན་པ་ཁོ་ན་ཟློག་པར་

Page: 663 ༄༅། །བྱ་བ་ཡིན་ཏེ། སེམས་ཙམ་པས་དོན་སྨྲ་བའི་ཕྱི་དོན་འགོག་པར་བྱེད་པའི་ཚེ་ཡང་ལོང་བ་དང་འོན་པ་ལྟར་གཟུགས་མི་མཐོང་སྒྲ་མི་ཐོས་པ་ཞིག་སྒྲུབ་པར་མི་བྱེད་ཀྱི། གཟུགས་སྒྲ་ལ་བདེན་འཛིན་འགོག་པ་ཁོ་ན་ དང་མཚུངས་ཏེ། འདིར་ཡང་ཤེས་པ་གསལ་མྱོང་ཙམ་འགོག་པར་མི་བྱེད་ཀྱང་གསལ་མྱོང་དུ་གྲུབ་འཛིན་གྱི་ཞེན་པ་དེ་འགོག་པ་ཡིན་ནོ། །དེས་ན་ཁོ་བོ་ཅག་ལ་དེས་བརྒལ་དུ་མེད་ཀྱང་རྣམ་རིག་པ་ཁྱོད་ཉིད་ལ་གཞན་རིག་མེད་པ་དེའི་ཚེ་ རང་རིག་ཀྱང་མེད་པར་འགྱུར་རོ་ཞེས་ལྡོག་སྟེ་བརྗོད་ན་ལན་གྱིས་དབེན་ནོ། །ཡང་རྣམ་མེད་སྨྲ་བ་ན་རེ། རྣམ་པ་བདེན་པར་འདོད་པ་ལ་སྐྱོན་དེ་དག་འཇུག་མོད་ཀྱང༌། ཁོ་བོ་ཅག་ནི་རྣམ་པ་དེ་ཡང་སྒྱུ་མ་ལྟར་བརྫུན་ལ། སེམས་དང་དེ་ཉིད་དང་ གཞན་དུ་ཡང་བརྗོད་དུ་མེད་པར་འདོད་པས་སྐྱོན་མེད་དོ་ཞེས་ཟེར་རོ། །དེ་ལ་བརྒལ་བ། ཁྱོད་སེམས་ལས་སྒྱུ་མ་གཞན་མིན་པར་འདོད་ཅིང་དེ་ལས་གཞན་གཅིག་པ་ཡང་མིན་པར་འདོད་དེ། དེ་ཉིད་དང་གཞན་དུ་བརྗོད་དུ་མེད་པར་འདོད་ ན་གང་ཚེ་འཁྲུལ་པའང་ཡོད་མིན་ན་སོགས་ཀྱིས་ངེད་ལ་བརྒལ་དུ་ཅི་ཡོད་དེ། ཁྱོད་ཉིད་ཀྱིས་སྒྱུ་མ་མེད་པར་ཁས་བླངས་པའི་ཕྱིར། བདག་གིས་ཁས་མ་བླངས་ཀྱང་གཞན་གྱིས་ཁས་བླངས་པས་འདིར་འགྱུར་རོ་ཞེ་ན། ཆོས་ཐམས་ ཅད་ངོ་བོ་ཉིད་མེད་པར་ཡང་ཁྱོད་ཀྱིས་ཁས་བླངས་པར་འགྱུར་ཏེ་གཞན་གྱིས་ཁས་བླངས་པའི་ཕྱིར། འོན་ཏེ་སྒྱུ་མ་དེ་དངོས་པོར་འདོད་ན་ནི་ཇི་ལྟར་སེམས་ལས་གཞན་མིན་ཏེ། སེམས་ལས་གཞན་ཡིན་དགོས་སོ། །ཅིའི་ཕྱིར་ན་ སྒྱུ་མ་ནི་སྒྱུ་མ་མཁན་གྱིས་རྫས་སྔགས་ཀྱིས་སྤྲུལ་པ་ལ་རག་ལས་ལ་ཤེས་པ་ནི་སྒྱུ་མ་མཁན་ལ་རག་མ་ལས་པའི་ཕྱིར་རོ། །སྒྱུ་མ་དེ་སེམས་ལས་གཞན་མིན་པར་འདོད་ན་ནི་དེ་གཉིས་ཐ་མི་དད་པས་སེམས་དངོས་པོར་མེད་དེ། སྒྱུ་མ་

Page: 664 དངོས་པོར་མེད་པའི་ཕྱིར་རོ། །དེའི་རྩོད་པ་སྤོང་བར་འདོད་ནས་ཇི་ལྟར་ན་སྒྱུ་མ་བདེན་པ་མིན་ཡང་འཇིག་རྟེན་གྱི་བལྟ་བྱ་ཙམ་དུ་གྲགས་པའོ་ཞེ་ན། འོ་ན་ལེགས་ཏེ་ལྟ་བྱེད་ཀྱི་ཡིད་ཀྱང་རང་རིག་སོགས་གང་དུ་ཡང་མི་བདེན་པ་ལྟ་བྱེད་དུ་གྲགས་ པ་ཙམ་དུ་ཤེས་པར་གྱིས་ཤིག །བརྒྱད་པ་རྟེན་མེད་པར་ཐལ་བ་སྤང་པ་ནི། གལ་ཏེ་འཁོར་བ་དངོས་རྟེན་ཅན། །གཞན་དུ་དེ་ནི་མཁའ་འདྲར་འགྱུར། །དངོས་མེད་དངོས་ལ་བརྟེན་པ་ནའང༌། །བྱེད་དང་ལྡན་པར་ཇི་ལྟར་འགྱུར། ། ཁྱོད་ཀྱི་སེམས་ནི་གྲོགས་མེད་པར། །གཅིག་པུ་ཉིད་དུ་འགྱུར་བ་ཡིན། །གང་ཚེ་སེམས་ནི་གཟུང་བྲལ་བ། །དེ་ཚེ་ཐམས་ཅད་དེ་བཞིན་གཤེགས། །དེ་ལྟ་ན་ཡང་སེམས་ཙམ་དུ། །བརྟགས་ལ་ཡོན་ཏན་ཅི་ཞིག་ཡོད། །ཅེས་གསུངས་ ཏེ། རྐང་པ་དང་པོ་གཉིས་ཀྱིས་རྩོད་པ་བཀོད། ལྷག་མས་དེ་བཀག་པའོ། །གལ་ཏེ་རྣམ་རིག་པ་ན་རེ། ཕྱི་དོན་མེད་པའི་ཕྱིར་འཁོར་བ་འདི་དངོས་མེད་ཡིན་མོད་ཀྱང་རང་རིག་པའི་དངོས་པོ་ལ་བརྟེན་པ་ཅན་ཡིན་པས་ན་སྣང་གི་དེ་ནི་གཞན་དུ་ དེ་ལྟ་མིན་ན་ནམ་མཁའ་འདྲ་བར་སྣང་མེད་དུ་འགྱུར་རོ་ཞེ་ན། སྨྲས་པ། དངོས་མེད་ནི་དངོས་པོ་ལ་བརྟེན་པ་ན་ཡང་བྱེད་ལས་དང་ལྡན་པར་ཇི་ལྟར་འགྱུར་ཏེ། རི་བོང་གི་རྭ་ཅི་ལ་བརྟེན་ཡང་འབིགས་པར་མི་ནུས་པ་བཞིན་ནོ། །དེ་འདོད་ན། རྣམ་ རིག་པ་ཁྱོད་ཀྱི་སེམས་ནི་འཁོར་བའི་གྲོགས་མེད་པར་མྱ་ངན་ལས་འདས་པའི་དོན་དམ་པ་གཅིག་པུ་ཉིད་དུ་ཐལ་བར་འགྱུར་བ་ཡིན་ལ། དེ་འདོད་ན། རང་རིག་དོན་དམ་འཁོར་བའི་རྟེན་གྱི་ཕྱིར་ཁས་བླངས་པ་ལ་དགོས་པ་མེད་པར་འགྱུར་རོ། །དེས་ན་ གང་གི་ཚེ་སེམས་ནི་གང་ལ་ཞེན་པའི་དམིགས་པའམ། གཟུང་བ་ཐམས་ཅད་དང་བྲལ་བ་དེའི་ཚེ་ཆོས་ཐམས་ཅད་ཀྱང་དེ་བཞིན་གཤེགས་པའི་རང་བཞིན་ཉིད་ལས་ཐ་མི་དད་པར་མཐོང་ཞིང་གང་མཐོང་བ་དེ་ཉིད་ཀྱང་མཐོང་བ་མེད་པ་ཁོ་ནར་རྟོགས་

Page: 665 ༄༅། །པར་འགྱུར་རོ། །དེ་ལྟ་ཡིན་མོད་ཅེ་ན། དེ་ལྟ་ན་ཡང་ཁྱོད་ཀྱིས་སེམས་ཙམ་དང་དེ་ཡང་རང་རིག་ཏུ་ནན་གྱིས་བཏགས་པ་ལ་དགོས་པ་ཅི་ཞིག་ཡོད་དེ། ནམ་མཁའ་མཐའ་མེད་པར་གོ་ཡང་ནམ་མཁའ་ལ་ཞེན་པས་ཚད་འཇལ་བ་ལ་ དགོས་པ་མེད་པ་བཞིན་ནོ། །འདི་རྣམས་སུ་གསེར་གླིང་པས་གཙོ་བོའི་དོན་སོ་དྲུག་དང༌། བཅུ་གཅིག་དུ་བསྡུས་པ་གཉི་གར་དུ། དེ་ལྟར་དེ་དག་ཐམས་ཅད་ཀྱང༌། །ཐུབ་པས་ཤེས་རབ་དོན་དུ་གསུངས། །དེ་བས་མྱ་ངན་འདས་པ་དང༌། ། བདེ་བ་འདོད་པས་ཤེས་རབ་སྐྱེད། །དོན་དམ་དང་ནི་ཀུན་རྫོབ་སྟེ། །དེ་ནི་བདེན་པ་གཉིས་སུ་འདོད། །དོན་དམ་བློ་ཡི་སྤྱོད་ཡུལ་མིན། །བློ་དང་སྒྲ་ནི་ཀུན་རྫོབ་ཡིན། །དེ་ལ་འཇིག་རྟེན་རྣམ་གཉིས་མཐོང༌། །རྣལ་འབྱོར་པ་དང་ དེ་བཞིན་ཕལ། །དེ་ལ་རྣལ་འབྱོར་འཇིག་རྟེན་གྱིས། །འཇིག་རྟེན་ཕལ་པ་སུན་ཡང་འབྱིན། །གོང་མ་གོང་མའི་ཁྱད་པར་གྱིས། །རྣལ་འབྱོར་པ་ཡང་སུན་འབྱིན་ཏོ། །ཞེས་ཚིགས་བཅད་ཕྱེད་དང་བཞི་པོ་འདིར་ཤེར་ལེ་ཐམས་ཅད་ བསྡུས་ཏེ་བསྟན་ཏོ། །དཀའ་འགྲེལ་ཆེན་མོ་ལས་ནི། དེ་ལྟར་ན་རང་བཞིན་མེད་པ་ཉིད་དངོས་པོ་རྣམས་ཀྱི་གཉུག་མ་ཡིན་ཏེ། དོན་དམ་པའི་རང་བཞིན་གྱིས་གནས་པ་ཡིན་ནོ། །དེ་ཉིད་ལ་སྐྱེས་བུའི་དགོས་པའི་མཆོག་དང་ཁྱད་པར་དུ་འཕགས་ པར་བརྗོད་དོ། །འདི་ལ་ཡང་མངོན་པར་ཞེན་པར་མི་བྱའོ། །གཞན་དུ་ན་དངོས་པོ་ལ་མངོན་པར་ཞེན་པ་དང་སྟོང་པ་ཉིད་ལ་མངོན་པར་ཞེན་པ་ལ་ཁྱད་པར་ཅུང་ཟད་ཀྱང་ཡོད་པ་མ་ཡིན་ཏེ། གཉི་ག་ཡང་བཏགས་པའི་བདག་ཉིད་ཀྱི་སྒྲིབ་པའི་ཕྱིར་རོ། ། མེད་པར་བཏགས་པའི་རང་བཞིན་གྱི་རང་གི་ངོ་བོ་ཅུང་ཟད་ཀྱང་ཡོད་པ་མ་ཡིན་ལ། དངོས་པོ་ལོག་པ་ཡང་དངོས་པོ་མེད་པ་མ་ཡིན་ཏེ། ལོག་པ་རང་བཞིན་མེད་པ་ཡིན་པའི་ཕྱིར་རོ་ཞེས་དང༌། དེའི་ཕྱིར་དངོས་པོ་ལོག་པའི་ངོ་བོ་དངོས་མེད་

Page: 666 ཅེས་བྱ་བ་ཅུང་ཟད་ཀྱང་ཡོད་པ་མ་ཡིན་ནོ། །དངོས་པོ་དང༌། དངོས་པོ་མེད་པ་དག་བརྗོད་པའི་རིམ་པས་མེད་པར་བསྟན་པ་ཡིན་ཏེ། དེ་གཉིས་འདྲེས་པའི་བདག་ཉིད་དམ་གཉི་ག་བཀག་པའི་རང་བཞིན་ཉིད་ནི་ཡོད་པ་མ་ཡིན་ཏེ། དངོས་པོའི་རྣམ་པར་རྟོག་ པ་ཉིད་རྣམ་པར་རྟོག་པ་མཐའ་དག་གི་རྒྱུ་ཡིན་པའི་ཕྱིར། དེ་བཀག་པས་འདི་རྣམ་པ་ཐམས་ཅད་ཉིད་དགག་པ་གཅིག་གིས་བསལ་བ་ཡིན་ནོ། །དེའི་ཕྱིར་ཡོད་པ་དང༌། ཡོད་པ་མ་ཡིན་པ་དང༌། ཡོད་མེད་གཉི་ག་དང༌། གཉི་གའི་བདག་ཉིད་ཀྱང་མ་ཡིན་པ་ལ་ ཅུང་ཟད་ཀྱང་མངོན་པར་ཞེན་པའི་ཡུལ་དུ་བརྟག་པར་མི་བྱའོ། །ཇི་སྐད་དུ། ཤེར་ཕྱིན་ལས། ཚེ་དང་ལྡན་པ་ཤཱ་རིའི་བུ་འདི་ལ་བྱང་ཆུབ་སེམས་དཔའི་ཐེག་པ་བའི་རིགས་ཀྱི་བུའམ་རིགས་ཀྱི་བུ་མོ་ཐབས་མི་མཁས་པས་གཟུགས་སྟོང་པའོ། །ཞེས་ ཡང་དག་པར་ཤེས་པ་ནི་ཞེན་པའོ། །སོགས་ཆོས་གྱི་བར་དུ་སྦྱར་བ་དང༌། ཀུན་རྟོག་ཐམས་ཅད་སྤང་བའི་ཕྱིར། །སྟོང་ཉིད་བདུད་རྩི་སྟོན་མཛད་ལ། །གང་ཞིག་དེ་ལ་ཞེན་གྱུར་ན། །དེ་ཉིད་ཁྱོད་ཀྱིས་ཤིན་ཏུ་དམད། །ཅེས་དང༌། ཡོད་ མིན་མེད་མིན་ཡོད་མེད་མིན། །སོགས་ཀྱང་དྲངས་ཏེ་ཤེས་རབ་ཀྱི་རང་བཞིན་གཏན་ལ་ཕབ་བོ། །བདེན་གཉིས་རྣམ་འཇོག་ལ་ནི། འདི་སྐད་དུ། དེ་ལ་ཀུན་རྫོབ་ཀྱི་བདེན་པ་ནི་འཇིག་རྟེན་པའི་ཕྱིན་ཅི་མ་ལོག་པའི་ངོ་བོ་ཡིན་ལ། དོན་དམ་ པའི་བདེན་པ་ལ་ཡང་བདེན་པ་ནི་བསླུ་བར་མི་བྱེད་པ་ཡིན་ནོ། །དེ་ཁོ་ན་ཉིད་ནི་འཕགས་པ་རྣམས་ཀྱིའོ་ཞེས་པ་ནི་ཁྱད་པར་རོ། །ཞེས་དང༌། དངོས་པོ་འདི་ཐམས་ཅད་རང་བཞིན་གཉིས་འཛིན་པས་ཡང་དག་པར་སྐྱེ་བར་འགྱུར་ཏེ། ཀུན་རྫོབ་དང་དོན་དམ་ པའོ། །དེ་ལ་གཅིག་ནི་མ་རིག་པའི་རབ་རིབ་ཀྱིས་བསྒྲིབས་པའི་མིག་ཅན་ཡང་དག་པ་མ་ཡིན་པའི་བདག་ཉིད་མཐོང་བ་སོ་སོའི་སྐྱེ་བོ་རྣམས་ཀྱི་ཡུལ་བརྫུན་པ་མཐོང་བ་ཉིད་ན་ཡང་དག་པར་ཞེན་ཏོ། །གཞན་ནི་རྣམ་པར་འབྱེད་པའི་མིག་སྨན་གྱི་ཐུར་

Page: 667 ༄༅། །མས་མ་རིག་པའི་ལིང་ཏོག་བསལ་བས་ཡང་དག་པའི་ཤེས་པའི་མིག་ཅན་དེ་ཁོ་ན་ཉིད་རིག་པའི་འཕགས་པ་རྣམས་ཀྱི་ཡང་དག་པའི་ཤེས་པའི་ཡུལ་དུ་གྱུར་པས་རང་བཞིན་རྣམ་པར་བཞག་པ་ཡིན་ནོ། །ཞེས་བྱིས་པའི་ མཐོང་བ་ཀུན་རྫོབ་དང༌། འཕགས་པའི་གཟིགས་པ་དོན་དམ་དུ་བཤད་ཅིང༌། དེ་ལྟར་གྱུར་ན་ཡང་ཀུན་རྫོབ་ནི་མ་རིག་པས་ཉེ་བར་བསྟན་པ་ཡང་དག་པ་མ་ཡིན་པ་སྒྲོ་བཏགས་པའི་རང་བཞིན་ཡིན་པའི་ཕྱིར། རྣམ་པར་དཔྱད་པ་ལས་ལན་བརྒྱ་ ཕྲག་ཏུ་ཉམས་པར་གྱུར་ན་འདི་ཇི་ལྟར་བདེན་པ་ཡིན་ཞེ་ན། བདེན་མོདཀྱི་འོན་ཀྱང་འཇིག་རྟེན་པའི་ཞེན་པ་ལ་ཀུན་རྫོབ་ཀྱི་བདེན་པ་ཞེས་བརྗོད་ཅིང་འཇིག་རྟེན་པ་ཉིད་ཀུན་རྫོབ་ཀྱི་བདེན་པ་ཞེས་འདོད་པ་དེའི་རྗེས་སུ་འབྲངས་ནས་བཅོམ་ལྡན་ འདས་ཀྱིས་དོན་དེ་ཉིད་བཏང་སྙོམས་སུ་བཞག་པས་ཀུན་རྫོབ་ཀྱི་བདེན་པ་ཞེས་གསུངས་ཏེ། དེའི་ཕྱིར་སློབ་དཔོན་གྱིས་འཇིག་རྟེན་ཀུན་རྫོབ་བདེན་པ་དང་ཞེས་ཁྱད་པར་དང་བཅས་ནས་གསུངས་སོ། །དངོས་པོ་ལ་ནི་དོན་དམ་པའི་བདེན་པ་གཅིག་ པུ་ཁོ་ན་ཡིན་ཏེ། དེ་བས་ན་ཅུང་ཟད་ཉམས་པ་མེད་དོ། །མདོ་ལས། དགེ་སློང་དག་འདི་ནི་གཅིག་པུ་སྟེ། དོན་དམ་པའི་བདེན་པ་འདི་ལྟ་སྟེ། མི་སླུ་བ་མྱ་ངན་ལས་འདས་པའི་ཆོས་ཡིན་ལ། འདུས་བྱས་ཐམས་ཅད་ནི་བརྫུན་པ་སླུ་བའི་ཆོས་སོ་ཞེས་དྲངས་ཏེ་ ཡང་དག་པར་དོན་དམ་བདེན་གཅིག་ཏུ་བསྟན་ཏོ། །བློའི་ཡུལ་མིན་ཚུལ་ཡང༌། ཇི་སྐད་དུ། བློ་ནི་ཤེས་པ་ཐམས་ཅད་ཡིན་ཏེ། ཤེས་པ་ཐམས་ཅད་ཀྱི་ཡུལ་ལས་འདས་པའི་ཕྱིར། སྤྱོད་ཡུལ་མ་ཡིན་པ་སྟེ། བློ་དེ་ཐམས་ཅད་ཀྱི་རྣམ་པ་གང་གིས་ ཀྱང་ཡུལ་དུ་བྱ་བར་མི་ནུས་པ་ཡིན་ནོ། །ཞེས་པའི་ཐ་ཚིག་སྟེ་ཇི་ལྟར་དེའི་རང་བཞིན་བསྟན་པར་ནུས། འདི་ལྟར་ཡང་སྤྲོས་པ་ཐམས་ཅད་ལས་རྣམ་པར་གྲོལ་བའི་རང་བཞིན་དེ་བཞིན་ཉིད་དོན་དམ་པའི་བདེན་པ་དེ་ཁོ་ན་ཉིད་ཡིན་པ་དེའི་ཕྱིར་ཅི་ལྟར་ཡང་རྣམ་པར་རྟོག་པས་

Page: 668 མཐོང་བ་མ་ཡིན་ཏེ་ཁྱད་པར་ཐམས་ཅད་དང་བྲལ་བའི་ཕྱིར་རོ། །ཞེས་གཙོ་བོར་རྟོག་ཡུལ་མ་ཡིན་པ་ལ་བཤད་ཅིང༌། ཡང་གྲགས་པས་ཡིན་གྱི་ཚད་མས་མིན་སོགས་ལ་རབ་རིབ་ཅན་གྱི་མཐོང་བའི་ངོར་དགག་པ་ལྷུར་བྱེད་པ་ཉིད་ཀྱིས་ཚིག་འདི་སྨྲས་པ་ཡིན་ཏེ། དེ་སྐད་ སྨྲས་པ་ན་ཡང་བཀག་པའམ་བསྒྲུབ་པ་བྱས་པ་ནི་ཡོད་པ་མ་ཡིན་ནོ། །དེ་ལྟར་དོན་དམ་པ་བརྗོད་པར་བྱ་བ་མ་ཡིན་ཡང་དོན་དམ་པའི་དེ་ཁོ་ན་ཉིད་གཟིགས་པའི་སྒོ་ནས་ཉེ་བར་བརྟག་པ་གཟུང་སྟེ་ཀུན་རྫོབ་བསྟན་པ་ཡིན་ལ། ཀུན་རྫོབ་ཀྱི་ཐ་སྙད་མ་ལུས་པ་སྤངས་ པ་དེས་དངོས་པོའི་རང་བཞིན་སྨྲ་བར་ནུས་པ་མ་ཡིན་ཏེ། ཇི་སྐད་དུ། ཡི་གེ་མེད་པའི་ཆོས་རྣམས་ལ། །ཉན་པ་པོ་གང་སྟོན་པ་གང༌། །ཆོས་གང་ཉན་ཞིང་སྟོན་བྱེད་པ། །སྒྲོ་བཏགས་པས་ན་ཡི་གེ་མེད། །ཅེས་སོ། །དེ་ལྟ་བས་ན་ཐ་སྙད་པའི་བདེན་པ་གཉིས་ ལ་བསྟེན་ནས་དོན་དམ་པ་སྟོན་པ་ཡིན་ཏེ། དོན་དམ་པ་བསྟན་པ་རྟོགས་པས་ཀྱང་དོན་དམ་པ་མངོན་དུ་བྱེད་པ་ཡིན་ཏེ། དེ་ཉིད་དེའི་ཐབས་ཡིན་པའི་ཕྱིར་རོ། །ཞེས་སོགས་དང༌། ལྷའི་བུ། གལ་ཏེ་དོན་དམ་པར་དོན་དམ་པའི་བདེན་པ་ལུས་དང་ངག་དང་ཡིད་ཀྱི་སྤྱོད་ ཡུལ་དུ་གྱུར་ན་ཞེས་སོགས་བདེན་གཉིས་ལ་འཇུག་པའི་མདོ་དྲངས་ཤིང༌། དེ་ཉིད་ཀྱི་ཕྱིར་རྣམ་པར་རྟོག་པ་རྣམས་ཀྱི་ཡུལ་མ་ཡིན་ཏེ། གང་དངོས་པོ་དང་དངོས་པོ་མེད་པ་དང༌། རང་དང་གཞན་གྱི་དངོས་པོ་དང༌། བདེན་པ་དང་བདེན་པ་མ་ཡིན་པ་དང༌། རྟག་པ་དང་ ཆད་པ་དང༌། རྟག་པ་དང་མི་རྟག་་པ་དང༌། བདེ་བ་དང་སྡུག་བསྔལ་བ་དང། ་གཙང་བ་དང་མི་གཙང་བ་དང༌། བདག་དང་བདག་མེད་པ་དང༌། སྟོང་པ་དང་སྟོང་པ་མ་ཡིན་པ་དང༌། གཅིག་དང་དུ་མ་དང༌། སྐྱེ་བ་དང་འགག་པ་ལ་སོགས་པའི་ཁྱད་པར་རྣམས་དེ་ཁོ་ན་ཉིད་ཀྱིས་སྲིད་པ་མ་ ཡིན་ཏེ། འདི་རྣམས་ནི་ཀུན་རྫོབ་ཀྱི་ཆོས་ཡིན་པའི་ཕྱིར་རོ། །ཞེས་རྒྱས་པར་བཀྲལ་ཏེ། འདི་དག་ནི་ཕྱག་བྱ་བའི་གནས་སུ་མཐོང་ངོ༌། །བྱི་བའི་དུག་སོགས་ལ་འགྲེལ་ཆེན་དུ། བྱི་བའི་དུག་ནི་སྐད་ཅིག་གིས་ལུས་ལ་ཕོག་ནས་ཕྱིས་འབྲུག་སྒྲའི་རྐྱེན་གྱིས་

Page: 669 ༄༅། །ལྡང་བ་ལྟར་རོ། །དེའི་ཕྱིར་རང་རིག་པའི་ཤེས་པ་ཅུང་ཟད་ཀྱང་རིག་པ་མ་ཡིན་ཏེ། རྟོགས་བྱ་རྟོགས་བྱེད་རྣམ་པའི་སེམས། །དེ་བཞིན་གཤེགས་པས་གཟིགས་པ་མེད། །གང་དུ་རྟོགས་དང་རྟོགས་བྱེད་པ། །དེ་ལ་བྱང་ཆུབ་སེམས་ཡོད་ མིན། །ཞེས་སོ། །དེ་ལྟར་རྣམ་པར་རྟོག་པ་ཐམས་ཅད་ནུབ་པའི་ཕྱིར། སྒྲིབ་པ་མཐའ་དག་ལས་གྲོལ་བ་སྐྱེའོ་ཞེས་བྱུང་ངོ༌། །བི་བྷཱུ་ཏིས། དོན་དམ་པ་ནི་རྣམ་པ་ཐམས་ཅད་མཁྱེན་པའི་ཡེ་ཤེས་ཀྱིའང་སྤྱོད་ཡུལ་མིན་ཏེ། རང་བཞིན་དང་བློ་བུར་གྱི་དྲི་མས་དག་ པ་དོན་དམ་པ་ལ་དམིགས་པའི་རྡོ་རྗེ་ལྟ་བུའི་ཏིང་ངེ་འཛིན་ནི་སངས་རྒྱས་ཡིན་ལ། དེ་ལ་རྣམ་པའི་ཤས་ཀྱང་མེད་དོ། །ཞེས་སྣང་མོད་ཀྱང་རྡོ་རྗེ་ལྟ་བུའི་ཏིང་ངེ་འཛིན་སངས་རྒྱས་མ་ཡིན་ཏེ། འདིས་ས་བཅུ་པའི་རྒྱུད་ཀྱི་སྒྲིབ་པ་བཅོམ་པ་ཕྱིན་སངས་རྒྱས་སུ་འཇོག་པའི་ཕྱིར། ཆོས་ཐམས་ཅད་སངས་རྒྱས་ཀྱི་ངོ་བོར་འཇོག་པའི་ གནས་སྐབས་ཀྱང་འདི་མ་ཡིན་ནོ། །ཡང་ཇི་ལྟར་སྤྲུལ་པའི་གླང་པོ་ལ་སོགས་པའི་ཚུལ་ཁོ་ན་སྐྱེ་བོས་མཐོང་ལ། སྤྲུལ་མཁན་གྱིས་ཤིང་ལ་སོགས་པ་ཉིད་དུའོ། །ཞེས་པའང་མི་ལེགས་ཏེ། སྤྲུལ་མཁན་གྱིས་ཤིང་དུ་མཐོང་ན། །ཇི་ལྟར་སྒྱུ་མའི་བུད་མེད་ལ། ། དེ་བྱེད་ཉིད་ཀྱང་ཆགས་སྐྱེ་འགྱུར། །ཞེས་པའི་རྩོད་ལན་དོན་མེད་དུ་འགྱུར་བའི་ཕྱིར། ཡང་སྒྱུ་མའི་མི་བསད་པ་ལ་སྲོག་བཅོད་པའི་དངོས་གཞི་མི་འབྱུང་སྟེ་སྲོག་མེད་པའི་ཕྱིར། རྡེག་པས་སྦྱོར་བའི་སྡིག་པ་ནི་འབྱུང་བའང་ཡོད་དོ་ཞེས་པའང་མི་མཛེས་ཏེ། བསད་པས་སྡིག་པར་མི་འགྱུར་ལ་བརྡེགས་པས་སྡིག་པར་འགྱུར་བ་བཞད་གད་ཀྱི་གནས་ཡིན་པའི་ཕྱིར། རྡེག་འདོད་ལས་སོ་ཞེ་ན། འོ་ན་གསོད་འདོད་ཀྱིས་སྡིག་པ་ཅིས་མི་སྐྱེད། དེས་ན་སྒྱུ་མ་ལ་སྒྱུ་མར་ཤེས་པས་བསད་ན་གསོད་འདོད་ཀྱི་ཀུན་སློང་ མཚན་ཉིད་པ་མེད་པས་སྡིག་པར་མི་འགྱུར་བ་ཡིན་ལ། རང་རྒྱུད་པར་ཞེན་ནས་བརྡེགས་སམ་བསད་ན་སུ་ལ་ཡང་བརྡེགས་པ་དང་བསད་པ་གང་ཡང་མེད་མོད་ཀྱང་གསོད་སེམས་དང༌། རྡེག་སེམས་ཀྱིས་ཞེ་སྡང་ལས་གྱུར་པའི་སྡིག་པ་སྐྱེད་དེ་རྨི་ལམ་དུ་བསད་

Page: 670 པ་ལ་སད་ནས་ཡི་རང་བར་བྱེད་ན་སྡིག་པ་སྐྱེད་པར་གསུངས་པ་དང་མཚུངས་པའི་ཕྱིར། དེས་ན། སྒྱུ་མའི་སྐྱེས་བུ་བསད་སོགས་ལ། །ཞེས་པ་ནི་སྒྱུ་མར་ཤེས་པ་ལ་དགོངས་པ་ཡིན་ནོ། །དྲན་འགྱུར་སོགས་ལ། བྱི་བ་ནི་འདིར་བབ་ལ་བྱུག་པ་སྟེ་དེའི་དུག་དེས་ རྨུགས་པའི་རྨས་ལུས་ལ་སྔར་བཀྲམ་པ་ཕྱིས་འབྲུག་སྒྲ་གྲག་པའི་དུས་ན་ལྡང་བར་འགྱུར་ཏེ། ཇི་ལྟར་རྨུགས་པའི་དུས་སུ་དུག་མ་ལངས་ཀྱང་དུས་གཞན་དུ་ལྡང་བ་ལྟར་ཡུལ་མྱོང་བའི་དུས་སུ་རྣམ་ཤེས་མ་མྱོང་ཡང་དུས་གཞན་དུ་དྲན་ཏེ་ཞེས་དང༌། ཇི་ ལྟར་མཐོང་ཐོས་སོགས་ལ། མཐོང་ཐོས་དོན་དམ་པར་མེད་པར་འགྱུར་ཟེར་རམ། ཀུན་རྫོབ་ཏུ་མེད་པར་འགྱུར་ཟེར་ཞེས་དྲིའོ། །དང་པོ་ལྟར་ན་འདོད་པ་སྟེ་ཀུན་རྫོབ་པ་ཀུན་དེ་ལ་མེད་པའི་ཕྱིར་རོ། །ཕྱི་མ་ལྟར་ན་མ་གྲུབ་སྟེ། མཐོང་ཐོས་ཤེས་པ་དགག་པ་མ་ ཡིན་གྱིས་མ་དཔྱད་པར་ཞོག་ཅིག་དོན་དམ་པར་ནི་མ་ཡིན་ཏེ། མཐོང་དང་ཐོས་སོགས་ཐུབ་པ་ཡིས། །བདེན་དང་བརྫུན་པར་མ་གསུངས་སོ། །ཕྱོགས་ལ་ལྡོག་ཕྱོགས་ཡོད་པའི་ཕྱིར། །དེ་གཉིས་དོན་ལ་མེད་པའོ། །ཞེས་དྲངས་སོ། །སེམས་ལས་སྒྱུ་ མ་སོགས་ལ་སེམས་ལས་སྒྱུ་མ་གཞན་ནམ། གཞན་མ་ཡིན་པའམ། གཉི་གའམ། གཉི་ག་མ་ཡིན་པ་སྟེ་མུ་བཞི་གང་ཡིན་ཞེས་དྲིས་ནས། སེམས་ལས་གཞན་མ་ཡིན་ཏེ་སེམས་ཙམ་དུ་གྲུབ་པར་འདོད་པའི་ཕྱིར། གཞན་ཡིན་ན་སེམས་ལས་མ་གཏོགས་པའི་ ཆོས་མེད་པར་འདོད་པའི་ཕྱིར་སྒྱུ་མ་དེ་མེད་པར་འགྱུར་རོ། །གཉི་ག་མ་ཡིན་ཏེ་འགལ་བ་འདུ་བས་སོ། །གཉི་ག་མ་ཡིན་པའོ་ཞེ་ན། གཞན་ཡིན་མིན་གཉིས་གཅིག་མ་ཞུགས་ན་གཅིག་མི་ལྡོག་པས་མུ་བཞི་པ་འདི་ཡིན་པ་མི་སྲིད་དོ་ཞེས་དང༌། གལ་ཏེ་འཁོར་བ་སོགས་ལ། འཁོར་ བ་སེམས་ཡིན་ན་སེམས་རང་བཞིན་གྱིས་འོད་གསལ་བ་ཡིན་པས་རྣམ་བྱང་དུ་ཐལ་ཞིང༌། སེམས་མིན་ན་སེམས་མིན་པའི་དངོས་པོ་ཁས་བླངས་པས་རང་གི་གྲུབ་མཐའ་ཞིག་ལ། འཁོར་བ་དངོས་མེད་ཡིན་ན་དོན་བྱེད་མི་ནུས་པར་འགྱུར་བ་དང༌། ཡང་ན་

Page: 671 ༄༅། །རང་བཞིན་མེད་པས་དབུ་མ་པའི་གྲུབ་པ་ལ་ཞུགས་པར་འགྱུར་རོ་ཞེས་དང༌། སེམས་གཅིག་པུ་དོན་དམ་པར་སྨྲ་ན་དེ་གཟུང་འཛིན་དང་བྲལ་བར་འདོད་དགོས་ཤིང་དེ་ལྟ་ན་སེམས་ཅན་ཐམས་ཅད་སངས་རྒྱས་སུ་ཐལ་ལོ། །ཞེས་བཀྲལ་ཏོ། །དཀའ་ འགྲེལ་ཆུང་ངུ་ལས་ནི། བློའི་སྤྱོད་ཡུལ་མ་ཡིན་པ་ནི་མཚན་ཉིད་ཐམས་ཅད་དང་བྲལ་བ་ལ་བརྗོད་དེ། མཚན་ཉིད་འགའ་ཞིག་ཡོད་ན་ཐམས་ཅད་མཁྱེན་པའི་བློའི་སྤྱོད་ཡུལ་ཡིན་པས་ཁྱབ་པའི་ཕྱིར་ཏེ། ཡོད་མེད་དངོས་པོ་མཁྱེན་པ་པོ། །ཀུན་མཁྱེན་པས་ཀྱང་གང་མ་ གཟིགས། །དེ་ཡི་དངོས་པོ་ཇི་འདྲ་ཞིག །ཤིན་ཏུ་ཞི་བའི་ལྟ་བས་དཔྱོད། །ཅེས་སོ། །དེས་ན་དོན་དམ་པའི་མཚན་ཉིད་ནི་ངོ་བོ་ཉིད་ཐམས་ཅད་དང་བྲལ་བ་ཡིན་ཏེ། མཚན་ཉིད་མེད་པ་ཉིད་དུ་བརྗོད་པའི་ཕྱིར། དཔེར་ན། ཆོས་དང་བྲལ་བ་ཉིད་དེའི་ཆོས་མ་ཡིན་ནམ་ཞེས་པ་ལྟ་བུའོ་ཞེས་ དང༌། བློའི་ཡུལ་ཐམས་ཅད་ནི་ཀུན་རྫོབ་ཀྱི་བདེན་པའི་མཚན་ཉིད་དུ་བརྗོད་པར་ལྟའོ་ཞེས་དང༌། རྣལ་འབྱོར་པ་ནི་རྒྱུན་ཞུགས་སོགས་ནས་རང་རྒྱལ་དང་ས་བཅུའི་བྱང་སེམས་དང་སངས་རྒྱས་སོ། །ཕལ་པ་ནི་སེར་སྐྱ་པ་དང་རྐང་མིག་པ་ལ་སོགས་པའོ་ཞེས་དང༌། སྐད་ ཅིག་མ་དང་བདག་མེད་ལ་སོགས་པ་དོན་དམ་དུ་གསུངས་པ་དང་འགལ་ལོ་ཞེ་ན། འཇིག་རྟེན་གཞུག་པའི་དོན་དུ་ནི་ཞེས་དང༌། རྣལ་འབྱོར་པ་ཞེས་བྱ་བ་དེ་ཁོ་ན་མཐོང་བ་ལ་འདོད་པ་མ་ཡིན་ནམ་དེས་མཐོང་པའི་སྐད་ཅིག་མ་སོགས་ཀུན་རྫོབ་ཇི་ལྟར་ཡིན་ཏེ་དེ་ཁོ་ན་ མ་མཐོང་བར་ཐལ་ལོ་ཞེ་ན། འཇིག་རྟེན་ལ་བལྟོས་དེ་ཉིད་མཐོང་སྟེ་ཐ་མལ་པ་ལས་ལྷག་པ་ལ་རྣལ་འབྱོར་པའི་གྲངས་སུ་འགྲོའ་ཞེས་དང༌། སངས་རྒྱས་ོཀྱང་འཁོར་སྲིད་པར་ཐལ་ཏེ། རང་བཞིན་གྱིས་དག་པ་དང་གློ་བུར་གྱི་སྒྲིབ་པ་ཡོད་པ་མི་འགལ་བའི་ཕྱིར་ཏེ། མ་དག་པའི་གནས་སྐབས་བཞིན་ནོ་ཞེ་ན། རང་བཞིན་གྱིས་དག་པར་སངས་རྒྱས་དང་སེམས་ཅན་ཁྱད་མེད་ཀྱང་ཀུན་རྫོབ་ཏུ་འཁོར་བའི་རྒྱུ་ཡོད་མེད་ཀྱི་ཁྱད་པར་ལས་སོ་ཞེས་དང༌། བྱི་དུག་ལུས་ལ་ཞུགས་པ་ལྟ་མ་ཚོར་ཡང་དེའི་འབྲས་བུ་མཐོང་བ་ལས་བྱི་དུག་ཞུགས་སོ་

Page: 672 ཞེས་དྲན་པ་ལྟར་ཤེས་པ་ཉིད་མ་མྱོང་ཡང་དེ་དང་འབྲེལ་བའི་ཡུལ་མཐོང་བས་བདག་ལ་ཤེས་པ་སྐྱེས་སོ་ཞེས་དྲན་པར་འགྱུར་རོ་ཞེས་དང༌། ཐག་རིང་གི་སྐྱེ་བོའི་སེམས་ཤེས་ན་ཉེ་བར་རང་གི་སེམས་ཅིས་མི་རིག་སྟེ། ཐག་རིང་གི་ཁབ་མཐོང་ན་ཉེ་བའི་བུམ་པ་ཅིས་མི་མཐོང་ཞེ་ན། མིག་ སྨན་བྱུགས་པས་གཏེར་གྱི་བུམ་པ་མཐོང་ན་མིག་སྨན་ཉིད་ཅིས་མི་མཐོང་ཞེས་དང༌། རི་བོང་གི་རྭ་བུམ་པ་ལ་བརྟེན་ནས་འབིགས་པ་སྒྲུབ་མི་ནུས་པ་བཞིན་ནོ་ཞེས་དང༌། འཁོར་བ་ཀུན་རྫོབ་ཀྱི་ཟླ་དང་བྲལ་བས་མྱང་འདས་དོན་དམ་གཅིག་པུར་འགྱུར་ལ། དེ་ལྟ་ན་འབད་ མེད་དུ་ཐར་པ་འཐོབ་པར་ཐལ་ལོ། །དེ་ལྟར་འགྱུར་ན་རང་རིག་འཁོར་བའི་རྟེན་དུ་ཁས་བླངས་ཀྱང་འཁོར་བ་བྱེད་མ་ནུས་པས་རང་རིག་དོན་དམ་ཁས་བླངས་པ་དགོས་མེད་དུ་འགྱུར་རོ་ཞེས་བཀྲལ་ཏོ། །ཤེར་ལེའི་དཀའ་འགྲེལ་ཆུང་ངུར། བྱི་བའི་དུག་གང་དུས་གཅིག་གི་ ཚེ་ཞུགས་ཀྱང་དུས་གཞན་དུ་ནུས་པ་སད་པ་དེ་ལ་རང་རིག་པ་ནི་ཅུང་ཟད་ཀྱང་ཡོད་པ་མ་ཡིན་ནོ་ཞེས་བྱུང་ངོ༌། །ལེགས་བཤད་བསྡུས་པ་ལས་ནི། རྟེན་གྱི་སྒོ་ནས་ལུས་སེམས་ཀྱི་སྡུག་བསྔལ་གཉིས། ངོ་བོའི་སྒོ་ནས་སྡུག་བསྔལ་གྱི་སྡུག་བསྔལ་དང༌། འགྱུར་བ་དང༌། འདུ་བྱེད་ཀྱི་སྡུག་བསྔལ་ཏེ་གསུམ། དུས་ཀྱི་སྒོ་ནས་མཐོང་ཆོས་དང༌། ཕྱི་མ་དང༌། གཏན་གྱི་སྡུག་བསྔལ་དང་གསུམ་སྟེ། སྤང་བྱ་སྡུག་བསྔལ་ངོས་བཟུང་ནས་ཚེ་འདིའི་ཉེར་འཚེ་དང་ངན་སོང་ནི་ལས་འབྲས་ཤེས་པའི་ཤེས་རབ་ཀྱིས་སེལ་ལ། འདུ་བྱེད་ཀྱི་སྡུག་བསྔལ་ནི་ དོན་དམ་རྟོགས་པའི་ཤེས་རབ་ཀྱིས་སྤོང་སྟེ། ཟག་བཅས་ཀྱི་ལས་ཉོན་མོངས་ལས་སྐྱེ་ཞིང་དེ་དངོས་འཛིན་ལས་སྐྱེ་ལ། རང་བཞིན་མེད་པར་རྟོགས་པའི་ཤེས་རབ་ཀྱིས་དེ་རྩ་བ་ནས་འཇོམས་པའི་ཕྱིར་ཏེ། རིགས་པ་དྲུག་ཅུ་པར། དངོས་པོར་ཁས་ལེན་ཡོད་ན་ནི། ། འདོད་ཆགས་ཞེ་སྡང་འབྱུང་བ་ཡི། །ལྟ་བ་མི་བཟད་མ་རུངས་འཛིན། །དེ་ལས་བྱུང་བའི་རྩོད་པར་འགྱུར། །ཞེས་དང༌། གང་ཡང་རུང་བའི་གནས་རྙེད་ནས། །ཉོན་མོངས་སྦྲུལ་གདུག་གཡོན་ཅན་གྱིས། །ཟིན་པར་འགྱུར་རོ་གང་གི་སེམས། །

Page: 673 ༄༅། །གནས་མེད་དེ་དག་ཟིན་མི་འགྱུར། །ཞེས་དྲངས་ཤིང༌། སྦྱོར་བའི་དུས་སུ་གཅིག་དུ་བྲལ་ལ་སོགས་པའི་རིགས་པས་དཔྱད་ཅིང་སོ་སོར་རྟོག་པའི་ཤེས་རབ་ཀྱིས་སྟོང་ཉིད་དུ་ངེས་པར་བྱས་ཏེ་མཉམ་བཞག་གི་དུས་སུ་ཡུལ་འགའ་ ཡང་མ་མཐོང་བའི་བློས་ཅིར་ཡང་མི་རྟོག་པའི་བསམ་གཏན་སྒོམ་པ་སྟེ་ཞེས་དང༌། དེ་ལས་ལངས་ནས་སྣང་བ་རང་བཞིན་མེད་པ་ཉིད་དྲན་པས་རྨི་ལམ་ལྟར་ཤེས་པས་ཆོས་བརྒྱད་ལ་ཆགས་སྡང་མེད་པར་བྱའོ་ཞེས་དང༌། དོན་དམ་སྒོམ་བྱ་ མ་ཡིན་པར་ཐལ། རང་བཞིན་མ་གྲུབ་པའི་ཕྱིར་ཞེ་ན། དོན་དམ་དུ་འདོད་ལ་ཀུན་རྫོ་ཏུ་ཁྱབ་པ་མ་གྲུབ་བོ་ཞེས་དང༌། དོན་དམ་མེད་དགག་ཀྱང་དངོས་འཛིན་གྱི་གཉེན་པོར་འགྱུར་ཞིང་མ་ཡིན་དགག་ཀྱང་སྤྲོས་པའི་གཉེན་པོ་བྱེད་པས་ན་ བསྒོམ་བྱ་མ་ཡིན་པར་མི་འགལ་བ་དང༌། རྨི་ལམ་གྱི་བུ་ཤི་བ་ལོག་ཤེས་ཡིན་ཡང་བུ་ཡོད་འཛིན་སྒྲོ་འདོགས་ཀྱི་གཉེན་པོར་འགྱུར་བ་ལྟར་ཀུན་རྫོབ་སྒྱུ་མ་ལྟ་བུ་ལོག་ཤེས་ཡིན་ཡང་སྤང་བྱ་འགའ་ཞིག་གི་གཉེན་པོར་འགྱུར་བས་སྒོམ་རིགས་ པ་དང༌། འབྲས་བུ་གནས་སྐབས་རང་གི་ཉོན་མོངས་སྤོང་ཞིང་སྙིང་རྗེས་གཞན་དོན་དུ་རྣམ་དག་གི་འཁོར་བ་འཛིན་པ་དང༌། མཐར་ཐུག་རང་བཞིན་མེད་པ་གོམས་པས་འཁྲུལ་པ་ཐམས་ཅད་ཟད་པའི་ཆོས་སྐུ་འཐོབ་ཅིང་སྙིང་རྗེ་དང་སྨོན་ལམ་གྱི་དབང་ གིས་གཞན་དོན་དུ་གཟུགས་སྐུ་འཐོབ་པའོ་ཞེས་དང༌། དོན་དམ་རྣམ་བཅད་དུ་ཤེས་བྱ་ཡིན་ཡང་ཡོངས་གཅོད་དུ་ཤེས་བྱ་མ་ཡིན་པའོ་ཞེས་དང༌། རྣལ་འབྱོར་པ་ཡང་བློ་ཁྱད་ཀྱིས། །ཞེས་པ་འདིར་བདག་མེད་གཉིས་དང༌། སྤྲོས་ མེད་དང༌། མཚན་མེད་དེ་རྣལ་འབྱོར་ས་བཞི་འམ། བདག་མེད་དང༌། དངོས་མེད་དང༌། ཡིད་ལ་མི་བྱེད་པའི་རྣལ་འབྱོར་ཏེ་རྣལ་འབྱོར་ས་གསུམ་མམ། ཡོད་མེད་ལ་དམིགས་པའི་རྣལ་འབྱོར་དང༌། དམིགས་པ་མེད་པའི་རྣལ་འབྱོར་

Page: 674 ཏེ་རྣལ་འབྱོར་ས་གཉིས་བསྟན་ཏོ་ཞེས་འཆད་དོ། །གཉིས་པ་དེ་ཤེས་པ་ལམ་དུ་སྒྲུབ་པ་ལ་གསུམ། སྒྱུ་མར་མཐོང་བ་ལམ་དུ་སྒྲུབ་པ་དང༌། སྟོང་ཉིད་དུ་མཐོང་བ་ལམ་དུ་སྒྲུབ་པ། དེ་གཉི་གའི་བྱེད་པ་བསྡུ་བའོ། །དང་པོ་ལ་དྲུག རྩོད་ པ་སྤང་བ། དངོས་འཛིན་གྱི་གཉེན་པོ་སྟོང་ཉིད་དུ་བསྟན་པ། མཐར་འཛིན་དང་བྲལ་བས་རང་དོན་ཆོས་སྐུ་འཐོབ་པ། དེ་ལས་འབད་མེད་དུ་གཟུགས་སྐུ་འབྱུང་ཚུལ། སྨོན་ལམ་གྱི་དབང་གིས་ཕྲིན་ལས་རྒྱུན་མི་འཆད་ པའི་ཚུལ། སེམས་ལྡན་མིན་ཡང་མཆོད་པས་བསོད་ནམས་འཐོབ་པའོ། །དང་པོ་རྩོད་པ་སྤང་བ་ནི། སྒྱུ་མ་ལྟ་བུར་ཤེས་ན་ཡང༌། །ཇི་ལྟར་ཉོན་མོངས་ལྡོག་འགྱུར་ཏེ། །གང་ཚེ་སྒྱུ་མའི་བུད་མེད་ལ། །དེ་བྱེད་ཉིད་ཀྱང་ཆགས་སྐྱེ་འགྱུར། ། དེ་བྱེད་པ་ནི་ཤེས་བྱ་ལ། །ཉོན་མོངས་བག་ཆགས་མ་སྤངས་པས། །སྟོང་ཉིད་བག་ཆགས་ཉམ་ཆུང་ཉིད། །དེས་ན་དེ་མཐོང་བ་ན་དེ། །ཞེས་གསུང་ཏེ། རྣམ་རིག་པ་ན་རེ། དབུ་མ་པ་ཁྱོད་ཀྱིས་ཆོས་ཐམས་ཅད་སྒྱུ་མ་ལྟ་བུར། ཤེས་ན་ཡང་ཇི་ལྟར་ཉོན་མོངས་ལྡོག་འགྱུར་ཏེ། གང་ཚེ་སྒྱུ་མའི་བུད་མེད་ལ་དེ་བྱེད་པ་པོ་སྒྱུ་མ་མཁན་ཉིད་ཀྱང་ཆགས་པ་སྐྱེ་བར་འགྱུར་བའི་ཕྱིར་ཞེ་ན། དེ་བྱེད་པ་པོ་སྒྱུ་མ་མཁན་ནི་སྒྱུ་མའི་སྔགས་བསྒྲུབས་པར་ཟད་ཀྱི་ཤེས་བྱ་ལ་ཉོན་མོངས་ པ་མགོ་མ་མནན་ཞིང་བག་ཆགས་མ་སྤངས་པ་དེས་ན་སྒྱུ་མའི་བུད་མེད་དེ་མཐོང་བ་ན་དེ་སྟོང་ཉིད་ཀྱི་བག་ཆགས་ཉམ་ཆུང་བའི་ཕྱིར་ཆགས་པ་སྐྱེ་བར་ཟད་དོ། །གཉིས་པ་ནི། སྟོང་ཉིད་བག་ཆགས་གོམས་པས་ན། །དངོས་པོ་ བག་ཆགས་སྤོང་འགྱུར་ཞིང༌། །ཅི་ཡང་མེད་ཅེས་གོམས་པས་ནི། །དེ་ཡང་ཕྱི་ནས་སྤོང་བར་འགྱུར། །གང་ཚེ་གང་ཞིག་མེད་དོ་ཞེས། །བརྟག་བྱའི་དངོས་པོ་མི་དམིགས་པ། །དེ་ཚེ་དངོས་མེད་རྟེན་འབྲེལ་བ། །བློ་ཡི་མདུན་

Page: 675 ༄༅། །དུ་ཇི་ལྟར་གནས། །ཞེས་གསུངས་ཏེ། དེ་ཡང་ཆོས་ཐམས་ཅད་ལ་སྒྱུ་མ་ལྟ་བུའི་འདུ་ཤེས་བསྒོམ་པར་བྱ་སྟེ། དེ་གོམས་པ་ན་སྒྱུ་མ་ཙམ་དུ་ཡང་མི་དམིགས་པ་སྟོང་པའི་རྣམ་པར་མཐོང་བར་འགྱུར་ལ། སྟོང་ཉིད་ དེའི་བག་ཆགས་གོམས་པས་ནི་གཅིག་ཐ་དད་སོགས་སྣ་ཚོགས་པར་འཛིན་པའི་དངོས་པོའི་བག་ཆགས་སྤོང་བར་འགྱུར་ཏེ། ཆོས་ཐམས་ཅད་ལ་ཅི་ཡང་མེད་པར་མཐོང་བར་འགྱུར་རོ། །ཅི་ཡང་མེད་པ་འདི་ཉིད་དོན་དམ་ཡིན་ནམ་ཞེ་ན། འདི་ཡང་ འདུ་ཤེས་ཀྱི་རྣམ་པ་གཉེན་པོའི་གོ་རིམ་དུ་ཟད་ཀྱི་ཡང་དག་པ་ཉིད་ནི་མ་ཡིན་ཏེ། ཅི་ཡང་མེད་པ་ཉིད་དུ་ཡང་མི་གནས་པའི་ཕྱིར་ཏེ། ཀླུའི་ཞབས་ཀྱིས། འཇིག་རྟེན་ལས་འདས་པར་བསྟོད་པར། ཀུན་རྟོག་ཐམས་ཅད་སྤང་བའི་ཕྱིར། །སྟོང་ཉིད་བདུད་ རྩི་སྟོན་མཛད་དེ། །གང་ཞིག་དེ་ལ་ཞེན་གྱུར་པ། །དེ་ཡང་ཁྱོད་ཀྱིས་སྤངས་པ་ལགས། །ཞེས་སོ། །འོན་ཡང་སྤྲོས་པ་འབའ་ཞིག་གིས་ཕུང་བའི་སེམས་ཅན་རྣམས་ཀྱི་སྤྲོས་འཛིན་གྱི་ནད་ཀྱི་གཉེན་པོར་ཅི་ཡང་མེད་པར་མཐོང་བའི་བཀྲུ་ སྨན་འདི་འཇུག་སྟེ། འདི་ནི་གང་ཡང་ཐོབ་པ་དང་མ་ཐོབ་པ་དང༌། བཅིངས་པ་དང་གྲོལ་བ་དང༌། མཐོང་བ་དང་མ་མཐོང་བ་སོགས་ཅི་ཡང་མེད་དོ་ཞེས་སྤྲོས་པ་ཀུན་ཟད་ཀྱི་རྣམ་པར་མཐོང་བ་འདི་ཉིད་གོང་དའདྲིས་ཤིང་གོམས་པས་ནི་ཅི་ཡང་མེད་པར་འཛིན་ པའི་བློ་དེ་ཡང་ཕྱི་ནས་སྤོང་བར་འགྱུར་ཏེ། གང་གི་ཚེ་ཆོས་ཐམས་ཅད་སྒྱུ་མ་ལྟར་མཐོང་བས་བདེན་རྟོག་གི་དངོས་འཛིན་ལོག་ཅིང་གང་ཞིག་ཅི་ཡང་མེད་དོ་ཞེས་བརྟག་པར་བྱ་བའི་དངོས་པོ་མེད་པ་ཉིད་ཀྱང་མི་དམིགས་པ་དེའི་ཚེ་ཆོས་ཐམས་ཅད་ཡོད་ མེད་ལ་སོགས་པའི་དངོས་པོ་གང་དུ་ཡང་མེད་པ་རྟེན་དང་བརྟེན་པ་ལ་སོགས་པའི་འདུ་ཤེས་ཀྱི་རྒྱུ་བ་ཐམས་ཅད་དང་བྲལ་བ་ཡིན་ཡང༌། དངོས་མེད་རྟེན་བྲལ་ཙམ་གྱི་བུད་ཤིང་གི་དངོས་པོ་དེ་ཡང་དེ་ཁོ་ན་ཉིད་ཀྱི་ཤེས་རབ་དྲི་མ་མེད་པ་དུས་མཐའི་

Page: 676 མེ་ལྕེ་ལྟ་བུའི་བློ་ཡི་མདུན་ན་ཇི་ལྟར་གནས་ལ། བུད་ཤིང་ཟད་པ་ན་མེ་ཡང་རང་ཞི་བ་ལྟར་ཤེས་རབ་དྲི་མ་མེད་པའི་བློ་དེ་ཉིད་ཀྱང་གཟོད་མ་ནས་མ་སྐྱེས་མ་འགགས་པའི་ངོ་བོ་ཉིད་དུ་རྟག་ཏུ་ཞི་བ་ཡིན་པ་དེ་ཁོ་ནའི་དབྱིངས་སུ་དེ་ལྟར་ཞི་བ་ ཡིན་ནོ། །གསུམ་པ་ནི། གང་ཚེ་དངོས་དང་དངོས་མེད་དག །བློ་ཡི་མདུན་ན་མི་གནས་པ། །དེ་ཚེ་རྣམ་པ་གཞན་མེད་པ། །དམིགས་པ་མེད་པར་རབ་ཏུ་ཞི། །ཞེས་པ་དང༌། བཞི་པ་ནི། ཡིད་བཞིན་ནོར་བུ་དཔག་བསམ་ཤིང༌། ། ཇི་ལྟར་རེ་བ་ཡོངས་སྐོང་བ། །དེ་བཞིན་གདུལ་བྱར་སྨོན་ལམ་གྱི། །དབང་གིས་རྒྱལ་བའི་སྐུར་སྣང་ངོ༌། །ཞེས་པ་དང༌། ལྔ་པ་་ནི། དཔེར་ན་ནམ་མཁའ་ལྡིང་གི་ནི། །མཆོད་སྡོང་བསྒྲུབས་ནས་འདས་གྱུར་པ། །དེ་འདས་ཡུན་རིང་ ལོན་ཡང་དེས། །དུས་ལ་སོགས་པ་ཞི་བྱེད་བཞིན། །བྱང་ཆུབ་སྤྱོད་དང་རྗེས་མཐུན་པར། །རྒྱལ་བའི་མཆོད་སྡོང་བསྒྲུབས་པ་ཡང༌། །བྱང་ཆུབ་སེམས་དཔའ་མྱ་ངན་ལས། །འདས་ཀྱང་དོན་རྣམས་ཐམས་ཅད་མཛད། ། ཅེས་པ་དང༌། དྲུག་པ་ནི། སེམས་མེད་པ་ལ་མཆོད་བྱས་པས། །ཇི་ལྟར་འབྲས་བུ་ལྡན་པར་འགྱུར། །གང་ཕྱིར་བཞུགས་པའམ་མྱ་ངན་འདས། །མཚུངས་པ་ཁོ་ནར་བཤད་ཕྱིར་རོ། །ཀུན་རྫོབ་བམ་ནི་དེ་ཉིད་དུའང༌། ། རུང་སྟེ་དེ་འབྲས་ལུང་ལས་ཡིན། །དཔེར་ན་བདེན་པའི་སངས་རྒྱས་ལ། །ཇི་ལྟར་འབྲས་བུ་བཅས་པ་བཞིན། །ཞེས་པས་བསྟན་ཏོ། །

Page: 677 ༄༅། །དེ་ཡང་ཐོག་མར་དེ་བཞིན་གཤེགས་པའི་རང་བཞིན་ཅུང་ཟད་བཤད་པར་བྱ་བ་ནི། དེ་ལ་ཉན་ཐོས་སྡེ་པ་རྣམས། །ཟད་དང་མི་སྐྱེ་ཤེས་བྱང་ཆུབ། །མི་སློབ་ཕུང་པོ་ལྔ་འཁོར་བཅས། །རྫོགས་སངས་རྒྱས་སུ་འཇོག་ ཆོས་ཏེ། །དེ་ལྡན་གང་ཟག་སངས་རྒྱས་འདོད། །གྲངས་མེད་གསུམ་བསྐལ་ཚོགས་བསགས་པས། །སྦྱོར་ལམ་སྟན་གཅིག་པ་ཐོབ་པའི། །བྱང་སེམས་སྲིད་ཐ་པ་དེ་ཡིས། །བྱང་ཆུབ་ཤིང་དྲུང་ལམ་ལྷག་མ། །སྐད་ཅིག་གིས་ འཐོབ་འཚང་རྒྱ་སྟེ། །མྱ་ངན་འདས་ན་མར་མེ་ནི། །འགགས་ལྟར་དེ་རྒྱུན་ཆད་པར་འདོད། །ཀུན་ཡང་ཚོགས་དང་ཆོས་སྐུ་དང༌། །ཕྲིན་ལས་ཀྱིས་མཉམ་གཞན་གྱིས་མིན། །ཐེག་པ་ཆེན་པོའི་སྡེ་སྣོད་དུ། །ཕུན་སུམ་ཚོགས་པའི་ སྤངས་རྟོགས་ཀྱི། །མཐར་ཐུག་བརྙེས་པ་རྫོགས་སངས་རྒྱས། །ཆོས་ཀྱི་སྐུ་ཞེས་བྱ་བར་བརྗོད། །དབྱེ་ན་སྐུ་གཉིས་སྐུ་གསུམ་སོགས། །བགྲང་ཡས་རྣམ་དབྱེ་འཇུག་མོད་ཀྱང༌། །མཁའ་བཞིན་ངོ་བོ་དབྱེར་མི་ནུས། །གཅིག་དང་ཐ་དད་ འདིར་མི་དམིགས། །འདི་ནི་སུས་ཀྱང་བསམ་མི་ཁྱབ། །སབཅུའི་བྱང་སེམས་མན་ཆད་ཀྱི། །ཤེས་པ་ཐམས་ཅད་གཅིག་བསྡོམས་ཀྱང༌། །འདི་ཡི་ཆ་ཡང་མི་དཔོགས་མོད། །འོན་ཀྱང་འདི་ལ་དད་ཙམ་གྱི། །ཕན་ཡོན་ཡང་ནི་ཚད་ ཡོད་མིན། །འདི་ལ་ཟབ་མོ་ལྟ་བརྒྱུད་ཀྱི། །མཁས་རྣམས་ཤེས་བྱའི་བུད་ཤིང་ཀུན། །ཡེ་ཤེས་མེ་ཡིས་རྣམ་བསྲེགས་ནས། །སྲེག་བྱེད་ཉིད་ཀྱང་ཞི་བ་ཡི། །ཆོས་དབྱིངས་ཐ་མི་དད་གྱུར་པ། །ཆོས་ཀྱི་སྐུ་སྟེ་སྨོན་ལམ་དང༌། །ཐུགས་ རྗེས་འབད་མེད་གཞན་དོན་འབྱུང༌། །རྒྱ་ཆེན་སྤྱོད་གཞུང་མཁས་རྣམས་ནི། །ཚོགས་བརྒྱད་གནས་ཡོངས་གྱུར་པ་ཡིས། །སྐུ་གསུམ་ཡེ་ཤེས་བཞི་བརྙེས་ཏེ། །ཆོས་དབྱིངས་དག་པ་འཐོབ་པར་བཞེད། །ཆོས་སྐུ་རྣམ་གཉིས་ཤེས་

Page: 678 བྱ་སྟེ། །རང་དོན་དོན་དམ་པ་ཡི་སྐུ། །འདི་ལ་ངོ་བོ་ཉིད་སྐུར་བརྗོད། །གཞན་དོན་ཀུན་རྫོབ་བརྡ་ཡི་སྐུ། །འདི་ལ་ཟབ་པ་ལོངས་སྐུ་དང༌། །རྒྱ་ཆེ་སྤྲུལ་པའི་སྐུ་ཡིས་གཉིས། །ཡང་ན་སྤངས་པ་གྲོལ་བའི་སྐུ། །རྟོགས་པ་ཆོས་ཀྱི་ སྐུར་ཡང་བརྗོད། །དེ་ལ་ངོ་བོ་ཉིད་སྐུ་ནི། །ཟག་མེད་ཆོས་ཀུན་དག་ཐོབ་པ། །རང་བཞིན་དབྱེར་མེད་མཚན་ཉིད་ཅན། །ཡང་ན་ཁྱད་པར་ལྔ་ལྡན་ཏེ། །འདུས་མ་བྱས་ཤིང་རྣམ་དབྱེར་མེད། །དྲི་མེད་རྟོག་མེད་ཆོས་དབྱིངས་སོ། ། གནས་དང་དུས་ཆོས་འཁོར་སྐུ་སྟེ། །ངེས་པ་ལྔ་ལྡན་ལོངས་སྐུ་ཡིན། །འགྲོ་བ་ཀུན་དང་མི་མཉམ་སྐུས། །བསྟན་པའི་བདག་པོར་བསྟན་ནས་ནི། །སྔོན་མེད་ཆོས་འཁོར་བསྐོར་བ་དང༌། །བསླབ་པ་བཅའ་མཛད་མཆོག་སྤྲུལ་ཏེ། ། སྲིད་པ་ཇི་སྲིད་གནས་ཀུན་ཏུ། །འདི་ཡི་རོལ་པ་དཔག་ལས་འདས། །སྐུ་གསུམ་གཅིག་དང་ཐ་དད་སོགས། །གང་དུའང་གནས་པ་མ་ཡིན་ཏེ། །སྤྲོས་པ་ཀུན་ལས་གྲོལ་ཕྱིར་དང༌། །མཚོ་ནི་བརླན་གཤེར་ལས་མི་གཡོ། །རླུང་ གིས་རྦ་རླབས་འབྱུང་བ་ལྟར། །ཆོས་དབྱིངས་ཉིད་ལས་མི་གཡོ་བར། །གཟུགས་སྐུའི་རྣམ་རོལ་སྣང་ཕྱིར་རོ། །སེམས་ཀྱི་རང་བཞིན་དེ་ཉིད་དང༌། །རྣམ་དབྱེར་མེད་པའི་ཆོས་དབྱིངས་ལ། །རང་རྒྱུད་ཀྱིས་བསྡུས་ལས་དང་ནི། །ཉོན་ མོངས་ཤེས་བྱའི་སྒྲིབ་པ་གསུམ། །དག་པའི་རིམ་པས་སྤྲུལ་སྐུ་དང༌། །ལོངས་སྐུ་ཆོས་སྐུར་རིམ་པས་སྣང༌། །ཆོས་ཀྱི་དབྱིངས་ལ་འཕོ་འགྱུར་མེད། །གཟུགས་ལ་སྔ་ཕྱི་མེད་ན་ཡང༌། །རབ་རིབ་ཅུང་ཟད་དག་པ་དང༌། །ཕལ་ཆེར་ དག་དང་ཡོངས་དག་པའི། །དབང་ལས་གཟུགས་མཐོང་ཇི་བཞིན་ནོ། །འོན་ཀྱང་སྔོན་གྱི་སྨོན་ལམ་དང༌། །གདུལ་བྱའི་རྒྱུད་དག་ཆོས་སྐུ་ཡི། །བྱིན་རླབས་གསུམ་ལས་སྣང་བའི་ཕྱིར། །གཟུགས་སྐུ་རྟེན་འབྲེལ་སྐུ་ཞེས་བརྗོད། །

Page: 679 ༄༅། །དོན་དམ་ངོ་བོ་ཉིད་ཀྱི་སྐུ། །རྟེན་འབྲེལ་ལས་ཀྱང་རབ་ཏུ་འདས། །མི་རྟེན་མི་འབྱུང་སྐུ་ཡིན་ནོ། །ཉི་མས་འོད་ཟེར་ཀུན་སྦས་ཏེ། །མེ་ཁྱེར་ཙམ་དུ་བསྟན་པ་ལྟར། །མཐའ་ཡས་ཡོན་ཏན་སྦས་མཛད་དེ། ། རྩྭ་མཆོག་བུ་ག་ཙམ་བསྟན་པ། །མཆོག་གི་སྤྲུལ་སྐུའི་དབང་བྱས་པའི། །སྤུ་ཁུང་གཅིག་གི་ཡོན་ཏན་དང༌། །རྒྱུ་ཡང་བསམ་གྱིས་ཁྱབ་མིན་ཏེ། །དེ་ལྟར་སྐུ་གསུང་ཐུགས་ཀྱི་ནི། །ཡོན་ཏན་གཟུགས་སུ་གྲུབ་སྲིད་ན། །དེ་ཡི་བརྗོད་ མེད་བརྗོད་མེད་ཀྱི། །གཅིག་གི་བྱེ་བའི་ཆ་ཙམ་གྱིས། །ནམ་མཁའི་ཁམས་ནི་ཀུན་བཀང་ནས། །དེ་ནི་དེ་ལས་ལྷག་པར་འགྱུར། །བརྒྱ་བྱིན་རྔ་སྤྲིན་ཚངས་ཉི་མ། །ནོར་བུ་སྒྲ་བརྙན་ནམ་མཁའ་དང༌། །ས་བཞིན་འབད་མེད་རྟོག་བྲལ་བས། ། འགྲོ་ཀུན་ཕན་བདེར་བྱེད་པ་ཡི། །ཕྲིན་ལས་ནམ་ཡང་རྒྱུན་མི་འཆད། །ཆོས་ཀྱི་དབྱིངས་ཀུན་འགེངས་པ་ནི། །སྔོན་གྱི་ཕྲིནལས་ཀུན་ལས་ཀྱང༌། །བྱེ་བ་བརྒྱ་སྟོང་སོགས་བསྒྱུར་བས། །སྐད་ཅིག་རེ་རེ་བཞིན་དུ་ཡང༌། །གོང་ ནས་གོང་དུ་རྣམ་པར་འཕེལ། །མཚན་ཙམ་ཡང་ནི་རྙེད་དཀའ་ཞིང༌། །ཡོན་ཏན་གཞལ་གྱིས་མི་དཔོགས་པ། །འགྲོ་བ་ཀུན་གྱི་མ་འདྲིས་བཤེས། །རྫོགས་པའི་སངས་རྒྱས་མཆོག་དེ་ལ། །བདག་དང་འགྲོ་བ་མ་ལུས་པ། ། དངོས་པོ་ཀུན་གྱིས་འདུད་བྱས་ཏེ། །འདི་ནས་རྣམ་པ་ཐམས་ཅད་དུ། །གཉིས་སུ་མེད་པར་ཕྱག་འཚལ་ལོ། །ཞེས་བྱ་སྟེ། དེ་ཡང་བྱེ་མདོ་རྣམས་ནི། སྤྱིར་ཟད་མི་སྐྱེ་ཤེས་པ་ནི་བྱང་ཆུབ་ཡིན་ཏེ། མཛོད་ལས། ཟད་དང་མི་སྐྱེ་ཤེས་པ་ནི། ། བྱང་ཆུབ། ཅེས་དང༌། དེ་ལ་ཐེག་པ་གསུམ་གྱི་བྱང་ཆུབ་གསུམ་དུ་གསུངས་སོ། །ཁྱད་པར་དུ་སངས་རྒྱས་ནི་མི་སློབ་པའི་ཟག་མེད་ཀྱི་ཕུང་པོ་ལྔ་འཁོར་བཅས་ནི་སངས་རྒྱས་སུ་བྱེད་པའི་ཆོས་སམ་འཇོག་ཆོས་ཡིན་ལ། བྱེ་སྨྲས་དེ་ཉིད་དང༌།

Page: 680 མདོ་སྡེ་པས་དེ་དང་ལྡན་པའི་གང་ཟག་ནི་སངས་རྒྱས་སུ་བརྗོད་དེ། སྐྱབས་ཡུལ་གྱི་སྐབས་སུ། སངས་རྒྱས་དགེ་འདུན་བྱེད་པའི་ཆོས། །མི་སློབ་པ་དང་གཉི་ག་དང༌། །མྱ་ངན་འདས་ལ་སྐྱབས་སུ་འགྲོ། ཞེས་པའི་རང་འགྲེལ་དུ། གང་ཞིག་སངས་རྒྱས་ལ་སྐྱབས་སུ་འགྲོ་བ་དེ་ནི་སངས་རྒྱས་སུ་བྱེད་པའི་ཆོས་མི་སློབ་པ་ལ་སྐྱབས་སུ་འགྲོ་བ་ཡིན་ཏེ། གང་དག་གཙོ་བོར་གྱུར་པས་སྐུ་དེ་སངས་རྒྱས་ཞེས་བརྗོད་པའམ། ཡང་ན་གང་དག་རྙེད་པས་ཐམས་ཅད་ཐུགས་སུ་ ཆུད་པར་བརྗོད་པའི་ཕྱིར་སངས་རྒྱས་ཡིན་པའོ། །དེ་དག་ཀྱང་གང་ཞེ་ན། ཟད་པ་ཤེས་པ་ལ་སོགས་པ་འཁོར་དང་བཅས་པའོ། །གཟུགས་ཀྱི་སྐུ་ནི་སྔ་མ་དང་ཕྱི་མ་ཡང་བྱེ་བྲག་མེད་པའི་ཕྱིར་རོ། །ཞེས་སངས་མ་རྒྱས་པ་བྱང་ཆུབ་ཀྱི་སྙིང་པོར་གཤེགས་པ་ ལ་སོགས་པའི་ཚེ་ཡང་གཟུགས་སྐུ་དང་ལྡན་པར་སྔ་ཕྱི་འདྲ་བས་གཟུགས་སྐུའི་ཆ་ནས་སངས་རྒྱས་སུ་བརྗོད་པ་མ་ཡིན་གྱི་གང་ཤེས་པས་མི་སློབ་པའམ་ཐམས་ཅད་མཁྱེན་པར་འགྱུར་བའི་ཟད་མི་སྐྱེ་ཤེས་པ་འཁོར་བཅས་སམ་ཚུལ་ཁྲིམས་ དང༌། ཏིང་ངེ་འཛིན་དང༌། ཤེས་རབ་དང༌། རྣམ་པར་གྲོལ་བ་དང༌། རྣམ་པར་གྲོལ་བའི་ཡེ་ཤེས་གཟིགས་པའི་ཕུང་པོ་སྟེ། བླ་ན་མེད་པའི་ཟག་མེད་ཀྱི་ཕུང་པོ་ལྔ་དང༌། དེའི་འཁོར་ནི། སངས་རྒྱས་ཆོས་ནི་མ་འདྲེས་པ། །སྟོབས་ལ་སོགས་པ་བཅོ་བརྒྱད་ དོ། །ཞེས་དང་དེའི་རང་འགྲེལ་དུ། གང་དག་སངས་རྒྱས་ཁོ་ནས་ཟད་པ་མཁྱེན་པའི་ཚེ་བརྙེས་པར་འགྱུར་གྱི་གཞན་གྱིས་མ་ཡིན་ནོ། །བཅོ་བརྒྱད་གང་ཞེ་ན། སྟོབས་བཅུ་དང༌། མི་འཇིགས་པ་བཞི་དང༌། དྲན་པ་ཉེ་བར་བཞག་པ་གསུམ་དང༌། ཐུགས་རྗེ་ཆེན་པོའ། །ཞེས་བོཀྲལ་བའི་སངས་རྒྱས་ཀྱི་མི་སློབ་པའི་ཆོས་དེ་རྣམས་ནི་སངས་རྒྱས་སུ་བྱེད་པའི་ཆོསཡིན་ཏེ། དེ་ཐོབ་པ་ཕྱིན་སངས་རྒྱས་སུ་འཇོག་པའི་ཕྱིར་རོ། །དེ་ཡང་ཉོན་མོངས་པ་སྐད་ཅིག་ཐ་མའི་སྔ་མས་བཞག་པའི་ས་བོན་དེ་

Page: 681 ༄༅། །ཡང་སྤངས་པའི་ཕྱིར་ཟད་པ་དང༌། ས་བོན་མེད་པས་སླར་ཉོན་མོངས་སྐྱེ་མི་སྲིད་པའི་ཕྱིར་མི་སྐྱེ་བ་ཤེས་པ་ཡིན་གྱི་གཞན་དུ་ན་འགགས་པ་དང་མི་སྐྱེས་པ་ལ་ཟད་མི་སྐྱེར་བཤད་ན་དེ་གཉིས་ནི་མེད་པ་ཡིན་པས་བཤད་པ་ དོན་མེད་པར་འགྱུར་ཏེ། རང་འགྲེལ་ལས། ཉོན་མོངས་པ་གཉིས་པོ་དེས་ཀྱང་མ་འོངས་པ་སྐྱེད་པའི་ཕྱིར། རྒྱུད་འདི་ལ་ས་བོན་གྱི་དངོས་པོ་བཞག་པ་དེ་ཡང་སྤངས་པ་ཡིན་ཏེ་ཞེས་དང༌། མ་འོངས་པའི་སྡུག་བསྔལ་ལམ་ཉོན་མོངས་པ་ ནི་ས་བོན་མེད་པའི་ཕྱིར། གཏན་དུ་མི་སྐྱེ་བས་སྤངས་པ་ཡིན་ནོ་ཞེས་སོགས་བཤད་དོ། །བྱང་ཆུབ་སེམས་དཔའ་བསྐལ་ཆེན་གྲངས་མེད་པ་གསུམ་དུ་ཚོགས་བསགས་པས་སྦྱོར་བའི་ལམ་སྟན་གཅིག་པ་ཐོབ་པ་དེས་བྱང་ཆུབ་ཀྱི་སྙིང་ པོར་འདུག་ནས་མཐོང་སྒོམ་གྱི་སྒྲིབ་པ་ཐམས་ཅད་ཅིག་ཆར་སྤངས་ཏེ་སངས་རྒྱས་ཀྱི་ཆོས་མངོན་དུ་བྱེད་ལ། སངས་རྒྱས་ཐམས་ཅད་རྒྱུའི་ཚོགས་དང༌། ཆོས་སྐུ་དང༌། ཕྲིན་ལས་ཀྱི་མཚུངས་ཤིང་མཉམ་ལ། རིགས་དང༌། སྐུ་བོངས་དང༌། སྐུ་ཚེའི་ཚད་ ཀྱིས་ནི་ཐ་དད་ཅིང་མྱ་ངན་འདས་ནས་མར་མེ་ཤི་བ་ལྟར་རྒྱུན་ཆད་པར་འདོད་དེ། མཛོད་འགྲེལ་ལས། མར་མེ་ཤི་བར་གྱུར་པ་ལྟར། །དེ་ཡི་སེམས་ནི་རྣམ་པར་ཐར། །ཞེས་གསུངས་པའི་དཔེ་འདི་ཡང་ལེགས་པར་དྲན་པ་ ཡིན་ཏེ། ཇི་ལྟར་མར་མེ་ཤི་བ་ནི་མེད་པ་ལྟར་བཅོམ་ལྡན་འདས་ཀྱི་སེམས་ཀྱི་རྣམ་པར་ཐར་པ་ཡང་དེ་དང་འདྲའོ། །ཞེས་སོ། །འདིར་བོད་ཁ་ཅིག་མི་སློབ་པའི་ཆོས་ཁོ་ན་སངས་རྒྱས་ཡིན་གྱི། གཟུགས་སྐུ་སངས་རྒྱས་མིན་པར་མཛོད་མཛད་པོའི་ དགོངས་པ་སྨྲ་ཞིང་ཤེས་བྱེད་དུ། གལ་ཏེ་མི་སློབ་པའི་ཆོས་ཁོ་ན་སངས་རྒྱས་ཡིན་ན་ཇི་ལྟར་དེ་བཞིན་གཤེགས་པ་ངན་སེམས་ཀྱིས་ཁྲག་ཕྱུང་བས་མཚམས་མེད་པར་འགྱུར། བྱེ་བྲག་ཏུ་སྨྲ་བ་རྣམས་ན་རེ། རྟེན་ལ་གནོད་པ་བྱས་པས་དེ་དག་ལ་

Page: 682 ཡང་གནོད་པ་བྱས་པ་ཡིན་ནོ། །ཞེས་ཟེར་རོ་ཞེས་འོག་ཏུ་བརྒལ་ལན་བཀོད་པ་འདི་འདྲེན་མོད་ཀྱི་དེ་ནི་ལུང་གི་དོན་ཤིན་ཏུ་མ་གོ་བ་ཡིན་ཏེ། མི་སློབ་པའི་ཆོས་ཁོ་ན་སངས་རྒྱས་ཡིན་པར་བྱེ་སྨྲ་ཁ་ཅིག་འདོད་མོད་ཀྱང་དེ་ལྟ་མ་ཡིན་ཏེ། མངོན་པའི་ མདོ་ལས་མ་བཤད་པའི་ཕྱིར་དང༌། སངས་རྒྱས་སུ་བྱེད་པའི་ཆོས་ཞེས་བཤད་པས་རྟེན་སངས་རྒྱས་ཡིན་པ་མ་བཀག་པའི་ཕྱིར་དང༌། གཞན་དུ་ན་སངས་རྒྱས་འཇིག་རྟེན་པའི་སེམས་ལ་གནས་པའི་ཚེ་སངས་རྒྱས་དང་དགྲ་བཅོམ་མ་ཡིན་པར་ཐལ་བས་ གནོད་ཅིང༌། དགེ་སློང་དུ་འཇོག་ཆོས་ཀྱང་དགེ་སློང་གི་ཚུལ་ཁྲིམས་ཡིན་པས་ན་རྟེན་གྱི་གང་ཟག་དེ་ཡང་དགེ་སློང་མ་ཡིན་པར་ཐལ་བའི་ཕྱིར་ཏེ། མཛོད་འགྲེལ་གྱི་དེ་མ་ཐག་ཏུ། བསྟན་བཅོས་ལས་ནི་མི་སློབ་པའི་ཆོས་ཁོ་ན་སངས་ རྒྱས་ཡིན་ནོ། །ཞེས་དེ་སྐད་དུ་མི་འབྱུང་ངོ༌། །འོ་ན་ཇི་སྐད་དུ་འབྱུང་ཞེ་ན། སངས་རྒྱས་སུ་བྱེད་པའི་ཆོས་ཞེས་འབྱུང་སྟེ། དེའི་ཕྱིར་རྟེན་སངས་རྒྱས་ཉིད་དུ་མ་བཀག་པས་དེ་ནི་ཀླན་ཀར་མི་རུང་བ་ཉིད་དོ། །དེ་ལྟ་མ་ཡིན་ན་འཇིག་རྟེན་པའི་སེམས་ལ་ གནས་པ་སངས་རྒྱས་མ་ཡིན་པར་འགྱུར་ལ། དགྲ་བཅོམ་ཡང་མ་ཡིན་པར་འགྱུར་ཞིང༌། དགེ་སློང་དུ་བྱེད་པའི་ཚུལ་ཁྲིམས་ཁོ་ན་ཡང་དགེ་སློང་དུ་འགྱུར་རོ། །ཇི་ལྟར་གང་ཞིག་དགེ་སློང་མཆོད་པར་བྱེད་པ་དེས་ནི་དགེ་སློང་དུ་བྱེད་པའི་ཚུལ་ཁྲིམས་ མཆོད་པར་འགྱུར་བ་བཞིན་དུ། གང་ཞིག་སངས་རྒྱས་ལ་སྐྱབས་སུ་འགྲོ་བ་དེ་ཡང་མི་སློབ་པ་སངས་རྒྱས་སུ་བྱེད་པའི་ཆོས་དག་ལ་སྐྱབས་སུ་འགྲོ་བ་ཡིན་ནོ། །ཞེས་གསུངས་པའི་ཕྱིར། དེས་ན་བྱེ་སྨྲའི་འདོད་པ་དེ་སློབ་དཔོན་གྱིས་བཀག་ནས་ སློབ་དཔོན་ཉིད་ནི་མི་སློབ་པའི་ཆོས་དང་ལྡན་པའི་སྐུ་དེ་སངས་རྒྱས་སུ་བཞེད་པ་ཡིན་ནོ། །དེས་ན་དཔྱད་པའི་ཚེ་མིའི་ལུས་མི་ཡིན་པའམ། སེམས་མི་ཡིན་པ་མི་འགྲུབ་ཀྱང༌། མ་དཔྱད་པའི་ལུས་སེམས་ཀྱི་ཚོགས་པ་ཙམ་ལ་མིར་འཇོག་

Page: 683 ༄༅། །པ་ལྟར་མཚན་དཔེས་བརྒྱན་པའི་སྐུ་དང་མི་སློབ་པའི་ཆོས་ཀྱི་ཚོགས་པ་ཙམ་ལ་སངས་རྒྱས་སམ་དེ་བཞིན་གཤེགས་པ་ཞེས་འཇོག་སྟེ། སྟོན་པ་ལ་ལྷུང་བཟེད་དང༌། ཆོས་གོས་དང༌། དྲི་གཙང་ཁང་ཕུལ་བ་དང༌། གདུགས་ ཚོད་དྲངས་པ་སོགས་བཤད་ལ། མི་སློབ་པའི་ཆོས་ཁོ་ན་ལ་དེ་དག་གིས་ཅི་ཞིག་བྱ། མི་སློབ་པའི་ཆོས་ཁོ་ན་ལ་ནི་རིགས་དང༌། སྐུ་བོངས་དང༌། ཚེ་ཚད་ཀྱིས་མཉམ་མི་མཉམ་བཤད་ག་ལ་དགོས། འདོད་པ་འདི་ལྟ་ན་སྨན་གྱི་བསྟན་བཅོས་ཉིད་སྨན་ པ་ཡིན་པ་དང༌། སྡིག་པ་ཉིད་སྡིག་ཅན་ཡིན་པ་སོགས་སྨྲ་དགོས་ཏེ། བུས་པ་དག་ཀྱང་རྟ་གད་དུ་རྒོད་པར་འགྱུར་རོ། །ད་ནི་ཐེག་ཆེན་གྱི་ལུགས་འཆད་དེ། དེ་ཡང་ཐར་རྒྱན་ལས། རང་བཞིན་སྒྲ་དོན་དབྱེ་བ་དང༌། །རྣམ་གཞག་གྲངས་ ངེས་མཚན་ཉིད་དང༌། །ཁྱད་པར་དང་ནི་དོན་བདུན་གྱིས། །རྫོགས་སངས་རྒྱས་ཀྱི་སྐུ་རྣམས་བསྡུས། །ཞེས་སྡོམ་ཚིག་ཏུ་གསུངས་པ་ལྟར་བཤད་པར་བྱ་སྟེ། དེ་ལ་སངས་རྒྱས་ཀྱི་རང་བཞིན་ནི། སྒྲིབ་གཉིས་བག་ཆགས་ དང་བཅས་པ་སྤངས་ཤིང་ཡེ་ཤེས་བཞི་ལ་དབང་འབྱོར་བས་ཆོས་ཀྱི་དབྱིངས་དང་ཐ་མི་དད་པའི་སྐུ་ནི་རྫོགས་པའི་སངས་རྒྱས་ཏེ། སྒྲིབ་གཉིས་བག་ཉལ་དང་བཅས་པ་མ་སྤངས་ན་སངས་རྒྱས་སུ་མི་འགྲུབ་པའི་ཕྱིར་དང༌། ཡེ་ཤེས་ བཞི་ནི་སྐུ་གསུམ་གྱི་ངོ་བོ་ཉིད་ཡིན་པའི་ཕྱིར་དང༌། གཟོད་མ་ནས་ཆོས་ཀྱི་དབྱིངས་ཀྱི་ངོ་བོར་གནས་པ་ཉིད་བུམ་པ་ཞིག་པ་ན་བུམ་ནང་གི་ནམ་མཁའ་དང་ཕྱིའི་ནམ་མཁའ་ཐ་མི་དད་པ་ལྟར། ཆོས་ཀྱི་དབྱིངས་ཇི་ལྟ་བར་མངོན་པར་བྱང་ཆུབ་པའི་ཕྱིར་ ཏེ། རྒྱུད་བླར། སངས་རྒྱས་ཉིད་ནི་དབྱེར་མེད་པ། །དག་པའི་ཆོས་ཀྱིས་རབ་ཕྱེ་བ། །ི་མཁའ་བཞིན་ཏེ་སྤངས་པ་དང༌། །ཡེ་ཤེས་གཉིས་ཀྱི་མཚན་ཉིད་དོ། །ཞེས་གསུངས་ཅིང༌། ཟབ་མོ་ལྟ་བརྒྱུད་དུ་ཡང་སངས་པ་དང་རྒྱས་པ་

Page: 684 གཉི་གར་འཇོག་པའི་ཕྱིར་རོ། །དེ་ལ་སྤངས་པ་ནི། ཉོན་མོངས་པའི་སྒྲིབ་པ་དང་ཤེས་བྱའི་སྒྲིབ་པ་སྤངས་པ་སྟེ། རྒྱ་ཆེན་སྤྱོད་གཞུང་དུ། སེར་སྣ་ལ་སོགས་རྣམ་རྟོག་གང༌། །དེ་ནི་ཉོན་མོངས་སྒྲིབ་པར་འདོད། །འཁོར་གསུམ་རྣམ་ པར་རྟོག་པ་གང༌། །དེ་ནི་ཤེས་བྱའི་སྒྲིབ་པར་འདོད། །ཅེས་བཞེད་ལ། ཟབ་མོ་ལྟ་བའི་གཞུང་དུ་ཤེས་བྱ་ལ་རྨོངས་པའི་ཆ་ཤེས་སྒྲིབ་ཏུ་འཆད་ཅིང༌། ཏིང་ངེ་འཛིན་དེ་དང་དེ་ལ་གེགས་བྱེད་པ་སྙོམས་འཇུག་གི་སྒྲིབ་པ་ནི་སྒྲིབ་གཉིས་ཅི་རིགས་པར་འདུ་ ལ། དེ་དག་མངོན་གྱུར་བ་ས་ལམ་རྣམས་སུ་སྤངས་ཤིང་མཐར་རྡོར་ཏིང་གིས་བག་ཉལ་ཕྲ་མོ་དྲུངས་ཕྱུང་སྟེ་ལྡང་བ་མེད་པ་ནི་སྤངས་པ་ཕུན་སུམ་ཚོགས་པའོ། །དེ་ལྟར་སྤང་བྱ་ཐམས་ཅད་སྤངས་པ་རབ་ཀྱི་མཐར་སོན་པ་ན་རྟོགས་བྱ་ཐམས་ཅད་ཁོང་དུ་ ཆུད་པ་ནི་ཆོས་ཉིད་དེ་འཇིག་རྟེན་ན་ཡང་མི་ཤེས་པ་ལས་ལོག་པ་ལ་ཤེས་པར་གྲགས་པའི་ཕྱིར། དེས་ན་ཇི་ལྟ་བ་དོན་དམ་དང༌། ཇི་སྙེད་པ་ཀུན་རྫོབ་ཀྱི་ཆོས་ཐམས་ཅད་ཕྱིན་ཅི་མ་ལོག་པར་མཁྱེན་པ་རབ་ཀྱི་མཐར་སོན་པ་ནི་རྟོགས་པ་ཕུན་སུམ་ ཚོགས་པ་སྟེ་ཡེ་ཤེས་རྣམ་པ་བཞིའི་བདག་ཉིད་དོ། །དེ་ལྟར་སྤངས་པ་དང་རྟོགས་པ་གཉི་གའང་ཆོས་ཀྱི་དབྱིངས་ཉིད་ཀྱི་ངོ་བོར་དབྱེར་མི་ཕྱེད་པས་སྨྲ་བསམ་ཤེས་བརྗོད་ཀྱི་ཡུལ་ལས་འདས་ཏེ། དེ་བཞིན་གཤེགས་པ་ཉིད་ཀྱི་གཟིགས་ པའི་ཡུལ་དུ་ཡང་མ་གྱུར་མོད་ཀྱང༌། འབད་མེད་ཀྱི་སྐུ་དང་གསུང་གི་ཕྲིན་ལས་ནམ་མཁའ་དང་མཉམ་པ་རྒྱུན་མི་འཆད་པས་འགྲོ་བ་ཐམས་ཅད་ལ་ཕན་བདེར་འགྱུར་བའི་བྱེད་ལས་དང་ལྡན་པ་འདི་ལ་རྫོགས་པའི་སངས་རྒྱས་ཞེས་ཐ་སྙད་དུམཛད་པ་སྟེ། ཇི་ལྟར་ནོར་བུ་རྡོའི་ཤུན་པས་གཡོགས་པ་ན་ཡང་ནོར་བུ་ལ་ཤུན་པ་འུདྲེ་བ་མེད་ཅིང་ཡོན་ཏན་ཀུན་འབྱུང་དུ་ཡོད་ཀྱང་ཤུན་པ་མ་སྦྱངས་ཀྱི་བར་འོད་དང་ཡོན་ཏན་མི་གསལ་ལ། ཤུན་པ་སྦྱངས་པ་ན་འོད་ཀྱིས་མུན་པ་སེལ་ཞིང་དགོས་འདོད་

Page: 685 ༄༅། །ཐམས་ཅད་འབྱུང་བ་ལྟར། སེམས་ཉིད་ཀྱི་ནོར་བུ་སྒྲིབ་པའི་ཤུན་པ་དང་བཅས་པར་སྣང་བའི་དུས་ཉིད་ནའང་ངོ་བོ་སྒྲིབ་པས་མ་གོས་པའི་ཆ་ནི་སྤངས་པ་རང་བཞིན་གྱིས་གནས་པའི་རིགས་དང༌། ས་བོན་འབྲུ་གཅིག་ལའང་ འབྲས་བུ་གྲངས་མེད་འབྱུང་བའི་ནུས་པ་ཡོད་པ་ལྟར་སྟོབས་སོགས་ཡོན་ཏན་ཐམས་ཅད་འབྱུང་རུང་གི་ནུས་པ་ནོར་བུའི་ཡོན་ཏན་ལྟར་ལྷུན་གྲུབ་ཏུ་གཟོད་ནས་གནས་པའི་ཆ་རྟོགས་པ་རྒྱས་པར་འགྱུར་བའི་རིགས་ཏེ་རིགས་གཉིས་དབྱེར་ མེད་དུ་གནས་པ་ཉིད་བཀྲུ་བ་གསུམ་དང༌། ཕྱི་བ་གསུམ་ལྟ་བུའི་ལམ་གྱིས་སྦྱངས་པས་སྤངས་རྟོགས་རབ་ཀྱི་མཐར་སོན་པ་ཉིད་མངོན་དུ་མཛད་པ་ཡིན་ལ། ཆོས་ཐམས་ཅད་ནི་རྟག་ཏུ་ཆོས་ཀྱི་དབྱིངས་ནམ་མཁའ་ལྟར་འདུ་མ་བྱས་པ་ཁོ་ན་ ཉིད་དུ་གནས་པ་ནི་བུམ་པ་མ་ཞིག་པ་ན་ཡང་བུམ་ནང་གི་ནམ་མཁའ་དང་ཕྱིའི་ནམ་མཁའ་ཐ་དད་མེད་པ་ལྟ་བུ་ཡིན་ལ། བུམ་པ་ཞིག་པ་ན་ཕྱི་ནང་གི་ནམ་མཁའ་དབྱེར་མེད་པར་དབྱེར་མེད་པ་ཉིད་དུ་མངོན་དུ་འགྱུར་བ་ལྟར་སེམས་ཀྱི་རང་བཞིན་གཟོད་མ་ནས་ ཆོས་ཀྱི་དབྱིངས་སུ་གནས་པ་བུམ་ནང་གི་ནམ་མཁའ་ལྟ་བུ་ཡིན་ལ། བུམ་པ་ཞིག་པ་ན་ཕྱི་ནང་གི་ནམ་མཁའ་དབྱེར་མེད་པ་ལྟར་འདུ་བྱེད་ཀྱི་རྣམ་པར་རྟོག་པ་དང་སེམས་ཀྱི་རྒྱུན་བུམ་པ་ལྟ་བུ་རྣམ་པར་ལོག་པ་ན་ཆོས་ཀྱི་དབྱིངས་ཐ་མི་དད་པ་མངོན་དུ་བྱས་ པ་ཡིན་ལ། ནམ་མཁའི་ཚད་སུས་ཀྱང་མི་ཟིན་པ་ལྟར་དེ་བཞིན་གཤེགས་པའི་རང་བཞིན་ནི་སུས་ཀྱང་བསམ་པར་བྱ་བ་མ་ཡིན་ལ། ནམ་མཁའ་ནི་དངོས་པོ་ཐམས་ཅད་ཀྱི་གོ་འབྱེད་པ་ལྟར་སེམས་ཅན་ཐམས་ཅད་ཀྱི་རྟེན་དུ་གྱུར་པ་དང༌། སྟོང་གསུམ་ ནས་ཡུངས་འབྲུའི་ཤུན་པའི་བར་དུ་ཡང་རང་རང་གི་ཚད་དུ་ནམ་མཁའ་སྣང་བ་ལྟར་གདུལ་བྱ་ཐམས་ཅད་ལ་གང་འདུལ་གྱི་སྐུར་འཆར་ལ། ནམ་མཁའ་དེ་ཐམས་ཅད་གཅིག་དང་ཐ་དད་པར་གདགས་པར་མི་ནུས་པ་ལྟར་སངས་རྒྱས་ཀྱི་སྐུ་ཐམས་ཅད་

Page: 686 ཀྱང་གཅིག་པ་དང་ཐ་དད་པར་གདགས་པར་མི་ནུས་པ་དང༌། དེ་བཞིན་གཤེགས་པའི་རྫུ་འཕྲུལ་གྱི་བགྲོད་པ་དང་ལྡན་པའི་སྐྱེས་བུ་ཞིག་གིས་ཤར་ཕྱོགས་ཁོ་ནར་སྐལ་པ་ཞིང་ཐམས་ཅད་ཀྱི་རྡུལ་སྙེད་པར་སོང་ཡང་ད་དུང་ཤར་ཕྱོགས་ཁོ་ནའི་ ནམ་མཁའ་ལས་ཆ་ཤས་འདི་སྙེད་ཅིག་བགྲོད་ལ་ལྷག་མ་འདི་སྙེད་ཅིག་ལུས་སོ་ཞེས་བརྗོད་དུ་མེད་པ་ལྟར་དེ་བཞིན་གཤེགས་པའི་ཡོན་ཏན་ཆ་ཤས་རེ་རེ་ཡང་མཐའ་ནམ་མཁའ་ལྟར་ཡངས་པའོ། །སྒྲིབ་པའི་ཤུན་པ་དེ་ཡང་རབ་རིབ་ ཅན་ལ་སྐྲ་ཤད་དུ་སྣང་བ་ལྟར་ངོ་བོ་ཉིད་ཀྱིས་ནམ་དུ་ཡང་ཡོད་པ་མིན་ཡང་འཁྲུལ་ངོར་སྣང་བར་ཟད་དེ་སྔར་ཡོད་ཕྱིས་འགགས་དང་སྔར་མེད་ཕྱིས་སྐྱེ་སོགས་ནི་རྟག་ཆད་ཀྱི་ལྟ་བར་གསུངས་པའི་ཕྱིར་རོ། །དེས་ན་ཆོས་ཐམས་ཅད་ནི་ཡོད་མེད་ ལ་སོགས་པ་སྒྲོ་བཏགས་པ་དང་སྐུར་བ་བཏབ་པའི་རྣམ་པ་གང་དུ་ཡང་མི་གནས་པ་སུས་ཀྱང་བཅོས་སུ་མེད་པ་ཉིད་དུ་སངས་རྒྱས་མ་རྒྱས་གང་གི་ཚེ་ན་ཡང་ཁྱད་པར་མེད་ཀྱང་དེ་ལྟར་མ་རྟོགས་པས་སྒྲོ་སྐུར་དུ་བྱེད་པ་ནི་འཁོར་བའི་གནས་ སྐབས་དང་དེ་ལྟར་ཡིན་ལ། ཡིན་བཞིན་དུ་ཤེས་པ་ནི་སངས་རྒྱས་ཐོབ་པ་ཞེས་ཐ་སྙད་དུ་བཏགས་མོད་ཀྱི། འདི་ལ་གང་ཐོབ་པའི་རྫས་སམ་དངོས་པོ་འདུས་བྱས་སམ་འདུས་མ་བྱས་སུ་བདེན་པའམ་ཐོབ་པ་པོ་གང་སུ་ཡིན་པ་སོགས་ནི་ཡོད་པ་ མིན་ཏེ་དེའི་ཕྱིར་ནོར་བ་ཟད་པ་ཙམ་ལ་ཐར་བར་གསུངས་པ་ཡིན་ལ། མདོ་ལས། ནམ་མཁའ་ཚོལ་བའམ་ནམ་མཁའ་ལས་ཐར་བར་འདོད་ན་སྐྱེས་བུ་དེས་ནམ་མཁའ་མི་རྙེད་ཅིང་མི་ཐར་བར་གསུངས་པ་ལྟར་ཆོས་ཐམས་ཅད་ཆོས་དབྱིངས་ལས་ གཞན་མ་ཡིན་པ་ཡང་དེ་ལྟ་བུའོ། །དེའི་ཕྱིར་སངས་རྒྱས་ཐོབ་པ་ནི་ཅི་ཡང་མ་ཐོབ་པ་ཞེས་ཀྱང་བྱ་ལ། གོ་འཕང་གི་དམ་པ་ཐོབ་པ་ཞེས་ཀྱང་བྱ། ཆོས་ཐམས་ཅད་རྣམ་པ་ཐམས་ཅད་དུ་མངོན་པར་རྫོགས་པར་སངས་རྒྱས་པ་ཞེས་ཀྱང་བྱ་ལ།

Page: 687 ༄༅། །སངས་རྒྱས་ནི་མིང་ཙམ་སྟེ་ཆོས་གང་ཡང་སངས་མ་རྒྱས་མི་རྒྱ་རྒྱ་བར་མི་འགྱུར་བ་ཞེས་ཀྱང་བྱ། ཆོས་ཐམས་ཅད་ལས་མངོན་པར་འདས་པ་ཞེས་ཀྱང་བྱ་ཞིང༌། ཆོས་གང་ལས་ཀྱང་ཅུང་ཟད་ཀྱང་མ་གཡོས་པ་ཞེས་ཀྱང་བྱ། ཅིར་ཡང་མ་གྲུབ་པའི་སྟོང་པ་ཞེས་ཀྱང་བྱ་ལ། རྟག་པ་བརྟན་པ་ཐེར་ཟུག་པ་གཡུང་དྲུང་གི་སྐུ་ཞེས་ཀྱང་བྱ། ཆོས་གང་ཡང་ཅིར་ཡང་ནམ་དུ་ཡང་མ་གཟིགས་པ་ཞེས་ཀྱང་བྱ་ལ། རྣམ་པ་ཐམས་ཅད་མཁྱེན་ཞིང་གཟིགས་པ་ཞེས་ཀྱང་བྱ་སྟེ། ཡེ་ ཤེས་སྣང་བ་རྒྱན་གྱི་མདོ་ལས། སྐྱེ་བ་མ་མཆིས་པ་དང༌། འགག་པ་མ་མཆིས་པ་ནི་དེ་བཞིན་གཤེགས་པའི་ཚིག་བླ་དྭགས་ཏེ། ཞེས་དང༌། དེ་བཞིན་གཤེགས་པ་རྟག་ཏུ་སྐྱེ་མེད་ཆོས། །ཆོས་རྣམས་ཀུན་ཡང་བདེ་བར་གཤེགས་དང་འདྲ། ། བྱིས་པའི་བློ་ཅན་མཚན་མར་འཛིན་པ་རྣམས། །འཇིག་རྟེན་དག་ན་མེད་པའི་ཆོས་ལ་སྤྱོད། །དེ་བཞིན་གཤེགས་པ་ཟག་མེད་དགེ་བ་ཡི། །ཆོས་ཀྱི་གཟུགས་བརྙན་ཡིན་ཏེ་འདི་ལ་ནི། །དེ་བཞིན་ཉིད་མེད་དེ་བཞིན་གཤེགས་པའང་ མེད། །འཇིག་རྟེན་ཀུན་ཏུ་གཟུགས་བརྙན་ཀུན་ཏུ་སྣང༌། །ཞེས་དང༌། འཇམ་དཔལ་དེ་ལྟར་ན་ནམ་མཁའ་ཇི་ལྟ་བར་བྱང་ཆུབ་ཀྱང་དེ་བཞིན་ནོ། །བྱང་ཆུབ་ཇི་ལྟ་བར་ཆོས་རྣམས་དང༌། སེམས་ཅན་རྣམས་དང༌། ཞིང་རྣམས་དང༌། མྱ་ངན་ལས་འདས་ པའང་དེ་བཞིན་ནོ། །དེའི་ཕྱིར་ཆོས་ཐམས་ཅད་ནི་མྱ་ངན་ལས་འདས་པ་དང་མཉམ་པ་ཞེས་བྱ་སྟེ། གཉེན་པོ་མེད་པ་ཡིན་ལ། གཉེན་པོ་མེད་པའི་ཕྱིར། གཟོད་མ་ན་དག་པ་དང༌། དྲི་མ་མེད་པ་དང༌། གཟོད་མ་ནས་ཉོན་མོངས་པ་མེད་པ་ཡིན་ནོ་ཞེས་དང༌། རྒྱན་སྟུག་པོ་བཀོད་ པར། སངས་རྒྱས་དངོས་པོར་ཡོད་པ་མིན། །སངས་རྒྱས་མེད་པའང་མ་ཡིན་ཏེ། །རྣལ་འབྱོར་ཅན་རྣམས་སངས་རྒྱས་མཐོང༌། །ཞེས་དང༌། ཡོད་དང་མེད་ཀྱི་ཕྱོགས་དང་བྲལ། །སངས་རྒྱས་ཕྱོགས་ནི་དྲི་མ་མེད། །བློ་དང་ཤེས་

Page: 688 བྱ་བྲལ་བ་སྟེ། །ཚད་དང་དབང་པོ་སྤངས་པ་ཡིན། །སེམས་ཤེས་རྣམས་ཀྱི་ཡུལ་མ་ཡིན། །ེ་ནི་གྲོལ་བ་རྣམས་ཀྱི་ཡུལ། །ཞེས་དང༌། ལང་གཤེགས་ལས། མ་སྐྱེས་སྟོང་པ་མཆོག་ཡིན་ཏེ། །སྐྱེས་པའི་སྟོང་པ་འཇིག་པར་ འགྱུར། །སྟོང་པ་དེ་བཞིན་ཉིད་དང་མཐའ། །མྱ་ངན་འདས་དང་ཆོས་ཀྱི་དབྱིངས། །ཡིད་ཀྱིས་ལུས་ནི་སྣ་ཚོགས་པ། །རྣམ་གྲངས་དག་གིས་ངས་བཤད་དོ། །ཞེས་དང༌། ཏིང་རྒྱལ་ལས། སངས་རྒྱས་སྐུ་ནི་དག་པ་སྟེ། །བསོད་ནམས་ བརྒྱ་སྐྱེས་འོད་ཀྱང་གསལ། །དེ་ནི་བར་སྣང་མཚུངས་པ་སྟེ། །དེ་ལ་ཐ་དད་བྱ་བ་མེད། །ཅེས་དང༌། ཇི་ལྟར་ནམ་མཁའ་དེ་བཞིན་དུ། །ང་ཡི་སྐུ་ཡང་བརྗོད་མེད་ཅིང༌། །ཤེས་པར་དཀའ་བར་རབ་ཏུ་བསྟན། །དཔའ་བོ་ཆེན་པོ་ཆོས་ ཀྱི་སྐུ། །སྐུ་ནི་ཆོས་ལས་སྐྱེས་པ་སྟེ། །གཟུགས་ཀྱི་སྐུར་ནི་ནམ་དུ་ཡང༌། །རྒྱལ་བ་གདགས་པར་ཡོང་མི་ནུས། །ཞེས་དང༌། ཆོས་འདི་ལུས་གཟུགས་མེད་པ་སྟེ། །འདི་ལ་ལུས་གཟུགས་གང་ཡང་མེད། །ཆོས་གང་ལུས་གཟུགས་ མེད་པ་ནི། །ེ་ནི་སངས་རྒྱས་སྐུ་ལུས་སོ། །ཞེས་དང༌། ཡེ་ཤེས་ཀྱི་ཕྱག་རྒྱའི་ཏིང་ངེ་འཛིན་གྱི་མདོར། ཤ་ར་དྭ་ཏིའི་བུ། དེ་བཞིན་གཤེགས་པའི་སྐུ་ཡང་དག་པ་འདི་ནི་མིག་ཐམས་ཅད་ཀྱི་ལམ་ལས་ཡང་དག་པར་འདས་པ་ནམ་མཁའ་དང་ མཚུངས་པ་སྟེ། དེ་ནི་ལུས་མེད་པ། མ་བྱས་པ། མ་སྐྱེས་པ། མ་འགགས་པ་སོགས་ནས་མཚན་ཉིད་མེད་པ་མཚན་ཉིད་མེད་པ་མ་ཡིན་པ། མྱ་ངན་ལས་འདའ་བ་མེད་པ་ཡོངས་སུ་མྱ་ངན་ལས་འདས་པ། གནས་པ་མེད་པ་གནས་བ་མེད་པ་མ་ཡིན་པ་ སྟེ། དེ་བཞིན་གཤེགས་པའི་སྐུ་ནི་མཚན་མ་དང༌། མཚན་མ་མེད་པ་ཐམས་ཅད་དང་བྲལ་བའོ། །ཞེས་དང༌། ལུས་དེ་ལུས་མ་ཡིན་ཞིང་ལུས་ལས་ཡོངས་སུ་གྲོལ། །སུས་ཀྱང་མ་བྱས་མ་བཤིག་རྙེད་པར་གྱུར་པའང་མེད། །ཆོས་རྣམས་

Page: 689 ༄༅། །གང་ཡང་ཀུན་ཏུ་ལྡན་མེད་མི་ལྡན་མེད། །ུབདེ་བར་གཤེགས་པ་རྣམས་ཀྱི་སྐུ་དེ་དེ་ལྟར་གདགས། །ཞེས་དང༌། གཟུགས་མེད་སེམས་མེད་གཉིས་མ་ཡིན་ཞིང་གཅིག་ཀྱང་མིན། །དངོས་མེད་དངོས་མེད་མ་ཡིན་ མ་བྱུང་མེད་པ་སྟེ། །ཡང་དག་ཉིད་དུ་རྒྱལ་བའི་སྐུ་དེ་དེ་འདྲའོ། །སྙིང་པོ་དེ་མེད་ཉམ་ཆུང་མ་ཡིན་བཅད་པའང་མེད། །མ་བཅད་མ་བྱུང་ཀུན་ཏུ་མ་བྱུང་ཞིག་པའང་མེད། །ཐོབ་པ་མེད་ཅིང་རྡུལ་ཙམ་དག་ཀྱང་བཤིག་མེད་དེ། །རྡུལ་མེད་ རྣམས་ཀྱི་སྐུ་དེ་དེ་འདྲར་ཤེས་པར་བྱ། །ཞེས་སོགས་དང༌། ཞི་མེད་རབ་ཞི་མ་ཡིན་ཞི་བྲལ་སྦྱོར་བའང་མེད། །ཆགས་མེད་རིག་མེད་འདི་ན་ཆད་པ་སྟོང་པ་བཞིན། །ཡང་ན་ངོ་བོ་ཉིད་ཀྱིས་ནམ་མཁའ་ལྟ་བུ་སྟེ། །དེ་ལྟར་མཐོང་ན་ཉིན་ མཚན་སངས་རྒྱས་མཆོད་པ་ཡིན། །ཞེས་དང༌། རྒྱལ་བ་ལ་ནི་གཟུགས་དང་མཚན་མར་མ་ལྟ་ཞིག །བྱིས་པ་ལྟ་བུས་བདེ་བར་གཤེགས་ལ་སེམས་མ་ལྟ། །གང་གིས་རབ་འབྱོར་ལྟ་བུར་དེ་ནི་མཐོང་གྱུར་བ། །ེས་ནི་སྟོང་གསུམ་ ཀུན་གྱི་སྦྱིན་པ་ཐམས་ཅད་སྦྱངས། །ཞེས་དང༌། ཏོག་ལས། བཅོམ་ལྡན་འདས་བརྗོད་དུ་མེད་པ་དེ་མངོན་པར་རྫོགས་པར་འཚང་རྒྱ་བར་ནུས་ལགས་སམ། བཀའ་བསྩལ་བ། གང་བརྗོད་དུ་མེད་པར་ཤེས་པ་དེ་ཉིད་མངོན་པར་རྫོགས་ པར་འཚང་རྒྱའོ། །དེའི་ཕྱིར་རིགས་ཀྱི་བུ་ཁྱོད་ཉིད་ལ་དྲི་ཡིས་ཇི་ལྟར་བཟོད་པ་བཞིན་དུ་ལན་ཐོབ་ཅིག །གང་ཐམས་ཅད་མཁྱེན་པའི་མིང་འཐོབ་པར་འགྱུར་བའི་རྫས་ཀྱི་མཚན་ཉིད་ཀྱི་དངོས་པོ་གང་ཡང་ཡོད་དམ། གསོལ་པ། གལ་ཏེ་མཆིས་ཞེས་ བགྱིས་ན་ནི་རྟག་པར་འགྱུར། མ་མཆིས་ཞེས་བགྱིས་ན་ནི་ཆད་པར་འགྱུར། དབུ་མའི་ལམ་ནི་དམིགས་སུ་མ་མཆིས་ཏེ། དེ་ནི་མཆིས་པ་ཡང་མ་ལགས་མ་མཆིས་པ་ཡང་མ་ལགས་སོ། །ཞེས་དང༌། མྱང་འདས་ཆེན་པོ་ལས། ཕ་རོལ་དུ་ཕྱིན་པ་

Page: 690 དྲུག་ཀྱང་སྟོང༌། གཟུགས་ནས་རྣམ་མཁྱེན་གྱི་བར་དུ་ཡང་སྟོང༌། དེ་བཞིན་གཤེགས་པ་ཡང་སྟོང༌། ཡོངས་སུ་མྱ་ངན་ལས་འདས་པ་ཡང་སྟོང་སྟེ། ཞེས་དང༌། ནམ་མཁའ་མཛོད། སྙིང་རྗེ་ཆེན་པོ་ངེས་བསྟན། བློ་གྲོས་རྒྱ་མཚོའི་མདོ་རྣམས་ཀྱི་ གླེང་གཞིར། བཅོམ་ལྡན་འདས་ཆོས་ཐམས་ཅད་རྣམ་པ་ཐམས་ཅད་དུ་མངོན་པར་རྫོགས་པར་སངས་རྒྱས་པ་ཞེས་དང༌། བློ་གྲོས་རྒྱ་མཚོའི་མདོར། རིགས་ཀྱི་བུ། སངས་རྒྱས་ཀྱི་ཆོས་གང་ཡང་མེད་དམ། བློ་གྲོས་རྒྱ་མཚོས་སྨྲས་པ། ཚངས་པ་ཆོས་གང་ཡོངས་སུ་མ་གྲུབ་པ་དེ་ལ་ཡོད་པའམ་མེད་པར་ཁས་བླང་དུ་མེད་དོ། །ཆོས་གང་ཡོད་པའམ་མེད་པར་ཁས་བླང་དུ་མེད་པ་དེ་ལ་མངོན་སུམ་དུ་འགྱུར་བ་གང་ཡང་མེད་དོ། །སྨྲས་པ། འོ་ན་དེ་ཇི་ལྟར་སངས་རྒྱས་ཀྱི་ཆོས་ ཞེས་བསྟན། སྨྲས་པ། ཚངས་པ་འདི་ལྟ་སྟེ། དཔེར་ན། ནམ་མཁའ་ལ་ནམ་མཁའ་ཞེས་བསྟན་ཡང་ནམ་མཁའ་ལ་ཡང་དག་པར་ཡོངས་སུ་གྲུབ་པ་མེད་དོ། །དེ་བཞིན་དུ་སངས་རྒྱས་ཀྱི་ཆོས་རྣམས་ལ་སངས་རྒྱས་ཀྱི་ཆོས་རྣམས་ཞེས་བསྟན་ཡང་སངས་ རྒྱས་ཀྱི་ཆོས་རྣམས་ལ་ནི་ཡང་དག་པར་ཡོངས་སུ་གྲུབ་པ་གང་ཡང་མེད་དོ། །ཞེས་དང༌། མ་དྲོས་པའི་མདོར། དེ་ལ་ཡོད་དང་མེད་པ་མཉམ། །དེ་བཞིན་ཉིད་ལ་དེ་བཞིན་ཤེས། །ཆོས་རྣམས་ཀུན་ནི་དེ་བཞིན་ཉིད། །ངས་ནི་དེ་ལྟར་ སངས་རྒྱས་ཏེ། །ཞེས་དང༌། ཚངས་པ་ཁྱད་པར་སེམས་ཀྱི་མདོར། ཕུང་པོ་དག་དང་ཁམས་རྣམས་དང༌། །སྐྱེ་མཆེད་དག་ལ་བྱང་ཆུབ་ཚོལ། །བྱང་ཆུབ་དེ་ཡི་རང་བཞིན་ཏེ། །ེ་ལས་གུད་ན་བྱང་ཆུབ་མེད། །ཅེས་དང༌། དྲི་ མེད་གྲགས་པའི་མདོར། བྱང་ཆུབ་ལ་ནི་སུ་ཡང་མི་གནས་མི་ལྡོག་གིས་བྱམས་པ་ལྷའི་བུ་འདི་དག་བྱང་ཆུབ་ལ་ཀུན་ཏུ་རྟོག་པར་ལྟ་བ་དེ་འདོར་དུ་ཆུག་ཅིག་བྱང་ཆུབ་ནི་ལུས་ཀྱིས་མངོན་པར་རྫོགས་པ་འཚང་རྒྱ་བ་མ་ཡིན། སེམས་ཀྱིས་

Page: 691 ༄༅། །ཀྱང་མ་ཡིན་ཏེ་མཚན་མ་ཐམས་ཅད་ཞི་བའོ། །ཞེས་དང༌། བྱང་ཆུབ་ནི་མིང་ཙམ་སྟེ་མིང་དེ་ཡང་གཡོ་བ་མེད་པའོ། །ཞེས་དང༌། བྱང་ཆུབ་ནི་ལྟ་བར་གྱུར་པ་ཐམས་ཅད་ཆད་པའོ། །ཞེས་དང༌། གང་གི་ཚེ་བདག་དེ་ བཞིན་གཤེགས་བ་ལྟ་འདོད་པ་དེའི་ཚེ་དེ་བཞིན་གཤེགས་པ་མི་མཐོང་བས་ལྟ་ལགས་སོ། །ཞེས་དང༌། ཆོས་ཐམས་ཅད་འབྱུང་བ་མེད་པར་བསྟན་པའི་མདོར། སངས་རྒྱས་ཆོས་ནི་ནམ་མཁའ་མཚུངས་པ་སྟེ། །བླང་དང་དོར་བའི་སྒྲ་ནི་དེ་ལ་ མེད། །རྒྱལ་བ་ནམ་ཡང་བྱང་ཆུབ་སངས་མ་རྒྱས། །དེས་ནི་ནམ་ཡང་སེམས་ཅནབཀྲོལ་བ་མེད། །ཅི་ཡང་མ་ཡིན་ཆོས་འདི་སུས་ཤེས་པ། །ནམ་ཡང་དེ་ནི་ཆོས་ཀུན་ཆགས་མི་འགྱུར། །ཞེས་དང༌། ཟླ་མཆོག་གི་མདོར། བཙུན་ པ་ཤ་ར་དྭ་ཏིའི་བུ། བྱང་ཆུབ་ཅེས་བགྱི་བ་དེ་ཡང་སྤྲོས་པ་ལགས་སོ། །མངོན་པར་རྫོགས་པར་འཚང་རྒྱའོ། །ཞེས་བགྱི་བ་དེ་ཡང་སྤྲོས་བ་ལགས་སོ། །ཞེས་དང༌། མ་སྐྱེས་དགྲའི་འགྱོད་བསལ་གྱི་མདོར། རྒྱལ་པོ་ཆེན་པོ་ཆོས་ཐམས་ཅད་ཤིན་ཏུ་ མྱ་ངན་ལས་འདས་པ་ལ་མྱ་ངན་ལས་འདས་པར་རྟོག་པ་དེ་ཉིད་ཁྱོད་ཀྱི་དམིགས་པ་ཆེན་པོ་ཡིན་ནོ། །ཞེས་དང༌། སུམ་ཅུ་རྩ་གསུམ་པའི་མདོར། ཆོས་ཉིད་མ་གཏོགས་སེམས་གཞན་ནམ། །བྱང་ཆུབ་དག་ཀྱང་མཐོང་བ་མེད། །དེས་ནི་ སེམས་དང་བྱང་ཆུབ་ཀྱང༌། །རྣམ་པ་གཉིས་སུ་མི་མཐོང་སྟེ། །བྱང་ཆུབ་དེ་ཡི་མཚན་ཉིད་གང༌། །སེམས་ཀྱང་དེ་ཡི་མཚན་ཉིད་ཡིན། །ཞེས་དང༌། སུ་ཡང་དག་པར་མཐོང་བ་དེས་ནི་ཅི་ཡང་མི་མཐོང་ངོ༌། །སུ་ཅི་ཡང་མི་མཐོང་བ་དེས་ནི་མཉམ་ པར་མཐོང་སྟེ་མི་མཉམ་པར་མི་མཐོང་ངོ༌། །ཀཽ་ཤཱི་ཀ་དེ་ལྟར་གཟིགས་པ་དེ་ལ་ནི་ཐམས་ཅད་གཟིགས་པ་ཞེས་བྱའོ། །ཞེས་དང༌། སྤྲིན་ཆེན་པོ་ལས། དེ་བཞིན་གཤེགས་པ་རྟག་པའི་སྐུ། །རྟག་པའི་མཚན་རྣམས་ཕུན་སུམ་ཚོགས། །

Page: 692 ཞེས་དང༌། གནས་རྟག་ཡེ་ཤེས་རྟག་པ་སྟེ། །ཞིང་རྟག་རྟག་པའི་རྣམ་པ་ལགས། །མི་རྟག་ཚོགས་ཀྱི་མུན་སེལ་བ། །མི་རྟག་ཚོགས་ནི་ཟད་པར་མཛད། །ཅེས་དང༌། བཅོམ་ལྡན་སངས་རྒྱས་ཆོས་ཀྱི་སྐུ། །དེ་བཞིན་གཤེགས་པ་ཆོས་ ཀྱི་དབྱིངས། །ཞེས་དང༌། རྒྱན་ལས། སངས་རྒྱས་ཉིད་ནི་ཆོས་ཀུན་ལྡན་པའམ་ཡང་ན་ཆོས་ཀུན་བྲལ་བ་སྟེ། །ཞེས་དང༌། ཇི་ལྟར་ནམ་མཁའ་རྟག་ཏུ་ཀུན་སོང་འདོད། །དེ་བཞིན་དེ་ཡང་རྟག་ཏུ་ཀུན་སོང་འདོད། །ཇི་ལྟར་ནམ་མཁའ་ གཟུགས་གྱུར་ཀུན་ཏུ་སོང༌། །དེ་བཞིན་དེ་ཡང་སེམས་ཅན་ཚོགས་ཀུན་སོང༌། །ཞེས་དང༌། སྔ་མ་ཕྱི་མར་ཁྱད་མེད་ཀྱང༌། །སྒྲིབ་པ་ཀུན་གྱི་དྲི་མེད་པ། །དེ་བཞིན་ཉིད་ནི་སངས་རྒྱས་འདོད། །ཅེས་དང༌། དེ་ཕྱིར་སངས་རྒྱས་ཡོད་མིན་ ཞིང༌། །མེད་པར་ཡང་ནི་མི་བརྗོད་དོ། །ེ་ལྟས་སངས་རྒྱས་དེ་སྐད་འདྲི། །ལུང་མ་བསྟན་པའི་ཚུལ་དུ་འདོད། །ཅེས་དང༌། ཐོབ་པར་ལྟ་བ་མེད་རྣམས་ཀྱི། །ཐོབ་པ་ཡང་ནི་དམ་པར་འདད། །ཅེས་སོགས་མདོ་བསྟན་བཅོས་མཐའ་ དག་ལས་རྒྱ་ཆེར་བཤད་དོ། །གཞན་ཡང་བྱང་ས་ལས། སྤངས་པ་རྣམ་པ་གཉིས་དང་ཡེ་ཤེས་རྣམ་པ་གཉིས་ལ་བྱང་ཆུབ་ཏུ་བཤད་པ་དང༌། དག་པའི་ཡེ་ཤེས་དང་ཐམས་ཅད་མཁྱེན་པ་དང་ཆགས་པ་མེད་པའི་ཡེ་ཤེས་དང་ཉོན་མོངས་ བཅོམ་པ་དང་ཉོན་མོངས་ཅན་མ་ཡིན་པའི་མ་རིག་པ་སྤངས་པ་ལ་བྱང་ཆུབ་ཏུ་བཤད་པ་དང༌། སངས་རྒྱས་ཀྱི་ཆོས་མ་འདྲེས་པ་བརྒྱ་བཞི་བཅུ་དང་ཉོན་མོངས་མེད་དང་སྨོན་གནས་མཁྱེན་དང་སོ་སོ་ཡང་དག་པར་རིག་པ་མངའ་བ་ལ་བྱང་ཆུབ་ཏུ་བཤད་ པ་དང༌། སྐུ་དང་སྒྲུབ་པ་དང་ཕུན་ཚོགས་དང་ཡེ་ཤེས་དང་མཐུ་དང་སྤངས་པ་དང་་གནས་པ་དམ་པ་སྟེ་དམ་པ་བདུན་ལྡན་ལ་བྱང་ཆུབ་ཏུ་བཤད་པ་སྟེ་བཤད་ལུགས་ལྔ་དང༌། རྒྱན་གྱི་འགྲེལ་པར་གནས་གྱུར་གསུམ་ཐོབ་པ་ལ་བྱང་ཆུབ་ཏུ་

Page: 693 བཤད་པ་དང༌། སངས་རྒྱས་ཀྱི་སའི་མདོའི་རྗེས་སུ་འབྲངས་ཏེ། དབྱིངས་དང་ཡེ་ཤེས་དབྱེར་མེད་པ་ལ་བྱང་ཆུབ་ཏུ་བཤད་པ་སོགས་མང་དུ་ཡོད་ལ། འདི་དག་ནི་སངས་རྒྱས་ཀྱི་གོ་འཕང་ཁོ་ན་ལ་བྱང་ཆུབ་ཀྱི་སྒྲར་བརྗོད་ པ་ཡིན་ནོ། །སྒྲ་དོན་ནི། སྤངས་པ་ཕུན་ཚོགས་ཀྱི་ཕྱིར་སངས་པ་དང་རྟོགས་པ་ཕུན་ཚོགས་ཀྱི་ཕྱིར་རྒྱས་པ་ཡིན་ལ། བུདྡྷའི་སྒྲ་ཡང་ན་སངས་པ་དང༌། ཡང་ན་རྒྱས་པ་ལ་འཇུག་ཀྱང་བོད་དུ་ཐོག་མའི་ལོ་པཎ་རྣམས་ཀྱིས་མུན་པ་སངས་པའམ་པདྨ་ ཁ་རྒྱས་པ་ལྟ་བུ་ལ་བུདྡྷའི་སྒྲ་བྱུང་ཚེ་སྐབས་ཐོབ་དེ་ཉིད་དུ་སངས་པའམ་རྒྱས་པ་ཞེས་སོ་སོར་བསྒྱུར་ལ། སངས་རྒྱས་ལ་སྒྲ་འདི་བྱུང་ཚེ་དེ་རྣམས་སུ་མི་འཁྲུལ་པའི་ཕྱིར། གཉི་གར་དུ་ཅིག་ཆར་བསྒྱུར་ནས་སངས་རྒྱས་ཞེས་བརྗོད་དགོས་པར་བརྡ་ སྦྱོར་བམ་གཉིས་མ་སོགས་ལས་བཤད་པ་སྟེ། འདི་ལྟ་བུའི་དོན་ཅན་ཆེས་མང་ངོ༌། །དེས་ན། བཅོམ་ལྡན་འདས་ཀྱི་བཤད་པ་ལ། བཞི་བཅོམ་དྲུག་ལྡན་འཆད་པ་དང༌། །ཞེས་སོགས་ཚིག་སྐྱོན་དུ་འཆད་པའང་སྙིང་པོ་མི་ཆེ་སྟེ། བདུད་བཞི་བཅོམ་པ་བཅོམ་པའི་དོན་དང༌། དབང་ཕྱུག་གི་ཡོན་ཏན་དྲུག་དང་ལྡན་པ་ལྡན་པའི་དོན་དུ་བཤད་མི་རུང་ན། རྒྱུད་བརྟག་གཉིས་ལས། དབང་ཕྱུག་ལ་སོགས་ཡོན་ཏན་དང༌། །ལྡན་ཕྱིར་བཅོམ་ལྡན་འདས་ཞེས་བྱ། །ཡང་ན་ ཉོན་མོངས་ལ་སོགས་བདུད། །བཅོམ་ཕྱིར་བཅོམ་ལྡན་འདས་ཞེས་བརྗོད། །ཅེས་བཤད་པ་ལ་ཡང་བརྒལ་དགོས་ལ། གལ་ཏེ་བྷ་ག་ཝན་གྱི་སྒྲ་བཅོམ་པའམ་ལྡན་པ་གང་རུང་ལ་འཇུག་པས་གཉི་གར་དུ་ཅིག་ཆར་འབྲུ་གཉེར་ མི་རིགས་སོ་སྙམ་ན། འོ་ན་བཅོམ་པ་ཞེའམ་ལྡན་པ་ཞེས་གང་རུང་དུ་བརྗོད་དགོས་ཀྱི་གཉི་གར་ཅིག་ཆར་བརྗོད་པའང་མི་རིགས་པར་འགྱུར་བས་བཀས་བཅད་བྱེད་པོའི་ལོ་པཎ་རྣམས་ལ་ཐོག་མར་བརྒལ་བར་བྱོས་ཤིག་དང༌། ཕྱིས་ཁོ་བོ་ཅག་

Page: 694 གིས་བརྟག་པར་བྱའོ། །དེས་ན་བྷ་ག་ཝན་གྱི་སྒྲ་ཡང་སོ་སོར་དགོས་ཚེ་བཅོམ་པ་སོགས་རེ་རེ་བར་བསྒྱུར་ལ། གཉི་གའི་དོན་ཅན་སངས་རྒྱས་ལ་སྒྲ་འདི་བྱུང་ཚེ་བཅོམ་ལྡན་ཞེས་སྒྲ་གཉིས་ཚོགས་དང་ཕྱི་རོལ་པ་རྣམས་ཀྱང་ཚངས་ སོགས་ལ་སྒྲ་འདི་སྦྱོར་བས་དེའི་ཚེ་ལེགས་ལྡན་དུ་བསྒྱུར་ཅིང་ལེགས་ལྡན་དེ་ལས་ལྷག་པར་སྟོན་པའི་ཕྱིར་འདས་སྒྲའི་སྐད་དོད་མེད་ཀྱང་ལྷག་པོར་བོད་སྐད་ལ་བསྣན་ནས་སངས་རྒྱས་ལ་བཅོམ་ལྡན་འདས་ཞེས་བརྗོད་པ་ཡིན་ལ། དེ་བཞིན་དུ་བུདྡྷའི་སྒྲ་སངས་པའམ་རྒྱས་པ་རེ་རེ་བ་ཡིན་ཡང་བོད་སྐད་ལ་མ་རིག་པ་སངས་ཤིང་ཡེ་ཤེས་རྒྱས་པ་ཞེས་འབྲུ་གཉེར་བ་ལ་སྐྱོན་མེད་དེ། འཕགས་ཡུལ་ཉིད་དུའང༌། མ་རིག་གཉིད་ལས་སངས་ཕྱིར་དང༌། །བློ་རྒྱས་གཉིས་ ཕྱིར་སངས་རྒྱས་ཡིན། །ཞེས་འབྲུ་གཉེར་ན་བོད་སྐད་ལ་སྒྲ་གཉིས་ལྡན་དུ་བརྗོད་པའི་ཚེ་ལྟ་ཅི་སྨོས། དེ་བཞིན་དུ་བྱང་ཆུབ་དང་སྤངས་རྟོགས་སོགས་ཀྱང་སྒྲ་དོན་འདི་ལྟ་བུ་ཡིན་ནོ། །དབྱེ་བ་ནི། དཔེར་ན་ནམ་མཁའ་ནི་ཐམས་ཅད་དུ་ཀུན་ ཏུ་སོང་ཞིང་ཁྱད་པར་མེད་པས་ནམ་མཁའ་གཅིག་པུ་ཞེས་བྱ་སྟེ། དབྱེར་མེད་པ་ལྟར་རྫོགས་པའི་སངས་རྒྱས་ཀྱང་ཆོས་ཐམས་ཅད་ལས་འདས་པའམ། ཡང་ན་ཆོས་ཐམས་ཅད་ལས་མ་གཡོས་པའམ། ཡང་ན་ཆོས་ཐམས་ཅད་ཀྱི་ངོ་བོ་ཉིད་དུ་རྟག་ པར་ཞུགས་ལ་ཅིར་ཡང་དམིགས་སུ་མེད་པའི་ཕྱིར་རྫོགས་པའི་སངས་རྒྱས་ནི་གཅིག་པུ་ཉིད་དེ་གང་དུ་ཡང་རྣམ་པར་དབྱེར་མེད་པ་ཞེས་ཀྱང་བྱ་སྟེ། དབྱེ་བ་ནི་བློ་ལ་བལྟོས་ལ་སངས་རྒྱས་ནི་སུའི་ཡང་བློའི་ཡུལ་མ་ཡིན་པའི་ཕྱིར། འདི་ནི་ ངེས་པའི་དོན་གྱི་རྣམ་གྲངས་གཅིག་སྟེ། འཇུག་པ་ལས། ཇི་ལྟར་སྣོད་ཀྱི་དབྱེ་བས་མཁའ་ལ་དབྱེ་བ་མེད་དེ་ལྟར། །དངོས་བྱས་དབྱེ་བ་འགའ་ཡང་དེ་ཉིད་ལ་མེད་དེ་ཡི་ཕྱིར། །རོ་མཉམ་ཉིད་དུ་ཡང་དག་ཐུགས་སུ་ཆུད་པར་མཛད་

Page: 695 ༄༅། གྱུར་ནས། །མཁྱེན་བཟང་ཁྱོད་ཀྱིས་སྐད་ཅིག་གིས་ནི་ཤེས་བྱ་ཐུགས་སུ་ཆུད། །ེས་དང༌། བྱང་ས་ལས། གཞན་ཡང་རྟོག་པའི་ལམ་ཐམས་ཅད་ལས་ཡང་དག་པར་འདས་པའི་ཕྱིར། བསམ་གྱིས་མི་ཁྱབ་པ་ཉིད་དུ་རིག་ པར་བྱའོ། །ཞེས་དང༌། རྒྱན་ལས། ཆོས་རྣམས་ཐམས་ཅད་སངས་རྒྱས་ཉིད། །ཆོས་ནི་གང་ཡང་ཡོད་མ་ཡིན། །ད་ནི་ཆོས་དཀར་རང་བཞིན་ཡང༌། །དེ་ཡིས་དེ་ནི་བརྗོད་མ་ཡིན། །ཞེས་སོ། །འོན་ཀྱང་ནམ་མཁའ་ལ་ཤར་ཕྱོགས་ཀྱི་ནམ་ མཁའ་ཞེས་སོགས་རྣམ་པར་རྟོག་པས་དབྱེ་ཞིང་སྒྲོ་འདོགས་པ་ལྟར། སངས་རྒྱས་ལ་དམིགས་ནས་ཀྱང་རྣམ་པར་དབྱེ་བར་བྱེད་དེ། སྐུ་གཉིས་དང༌། གསུམ་དང༌། བཞི་དང་ལྔ་ནས་མཐའ་ཡས་པའི་བར་དུ་ཡང་དབྱེ་བར་བྱེད་དོ། །དེས་ན་རང་དོན་ དོན་དམ་པའི་སྐུ་དང༌། དེ་ལ་བརྟེན་པ་གཞན་དོན་ཀུན་རྫོབ་པ་བརྡའི་སྐུ་གཉིས་ཏེ། རྒྱུད་བླར། རང་དོན་གཞན་དོན་དོན་དམ་སྐུ་དང་ནི། །དེ་ལ་བརྟེན་པ་ཀུན་རྫོབ་སྐུ་ཉིད་དེ། །ཞེས་སོ། །ཡང་ན་རང་དོན་ཕུན་སུམ་ཚོགས་པའི་ཆོས་སྐུ་ དང༌། དེ་དང་རྒྱུ་མཐུན་པ་གཞན་དོན་གྱི་ཆོས་སྐུ་གཉིས་ཏེ། ཆོས་སྐུ་རྣམ་གཉིས་ཤེས་བྱ་སྟེ། །ཞེས་སོ། །ཡང་ན་རང་དོན་སྤངས་པ་ཕུན་ཚོགས་རྣམ་པར་གྲོལ་བའི་སྐུ་དང༌། གཞན་དོན་རྟོགས་པ་ཕུན་ཚོགས་ཆོས་ཀྱི་སྐུ་གཉིས་ཏེ། མདོར་ན་ ཡེ་ཤེས་གཉིས་པོ་ཡི། །ལས་སུ་འདི་ནི་ཤེས་བྱ་སྟེ། །གྲོལ་བའི་སྐུ་ནི་རྫོགས་པ་དང༌། །ཆོས་ཀྱི་སྐུ་ནི་སྦྱོང་བའོ། །ཞེས་དང༌། རྣམ་གྲོལ་ཆོས་ཀྱི་སྐུ་དག་གིས། །རང་དང་གཞན་གྱི་དོན་བསྟན་ཏེ། །ཞེས་སོ། །ཡང་ན་སྐུ་ རྣམ་པ་གསུམ་སྟེ། གསེར་འོད་དམ་པ་ལས། དེ་བཞིན་གཤེགས་པ་ཐམས་ཅད་ལ་སྐུ་གསུམ་མངའ་སྟེ། ཆོས་ཀྱི་སྐུ་དང༌། ལོངས་སྤྱོད་རྫོགས་པའི་སྐུ་དང༌། སྤྲུལ་པའི་སྐུའོ། །ཞེས་དང༌། སྐུ་གསུམ་གྱི་མདོར། སའི་སྙིང་པོས་གསོལ་པ།

Page: 696 བཅོམ་ལྡན་འདས་ལ་སྐུ་དུ་མངའ། བཀའ་བསྩལ་པ། དེ་བཞིན་གཤེགས་པ་ལ་ནི་སྐུ་གསུམ་མངའ་སྟེ། ཆོས་ཀྱི་སྐུ་དང༌། ལོངས་སྤྱོད་རྫོགས་པའི་སྐུ་དང༌། སྤྲུལ་པའི་སྐུའོ། །ཞེས་སོ། །ཡང་ན་ངོ་བོ་ཉིད་ཀྱི་སྐུའམ། རང་བཞིན་གྱི་སྐུ། ལོངས་ སྤྲུལ་དང་བཅས་པས་གསུམ་སྟེ། རྒྱན་ལས། སངས་རྒྱས་རྣམས་ཀྱི་སྐུ་དབྱེ་བ། །རང་བཞིན་ལོངས་སྤྱོད་རྫོགས་པ་དང༌། །གཞན་ནི་སྤྲུལ་པའི་སྐུ་ཡིན་ཏེ། །དང་པོ་གཉིས་པོའི་རྟེན་ཡིན་ནོ། །ཞེས་དང༌། །སྐུ་གསུམ་ དག་གིས་སངས་རྒྱས་ཀྱི། །སྐུ་བསྡུས་པར་ནི་ཤེས་པར་བྱ། །ཞེས་སོ། །ཡང་ན་ཆོས་སྐུ་དབྱེ་གཞིར་བྱས་ཏེ། དབྱེ་ན་ངོ་བོ་ཉིད་ཀྱི་སྐུ་དང༌། ལོངས་སྤྲུལ་གཉིས་ཀྱིས་སྐུ་གསུམ་སྟེ། མངོན་རྟོགས་རྒྱན་ལས། མདོར་བསྟན་དུ། ཆོས་ཀྱི་སྐུ་ དང་དེ་རྣམ་བརྒྱད། །ཅེས་སྐུ་ཐམས་ཅད་ཆོས་སྐུར་བསྡུས་ཤིང༌། ཕྱིས། ངོ་བོ་ཉིད་ལོངས་རྫོགས་བཅས་དང༌། །དེ་བཞིན་གཞན་པ་སྤྲུལ་པ་ནི། །ཞེས་བསྟན་ལ། འདི་ལ་ཤཱནྟི་པའི་དག་ལྡན་ལས་ཀྱང༌། །ངོ་བོ་ཉིད་ལོངས་ རྫོགས་བཅས་དང༌། །སྤྲུལ་པ་ཞེས་བྱ་རྣམ་གསུམ་ནི། །ཆོས་སྐུ་མཛད་པ་དང་བཅས་པ། །རྣམ་པ་བཞིར་ནི་ཡང་དག་བརྗོད། །ེས་གཞུང་བཏོན་ནས་རྣམ་པ་གསུམ་མཛད་པ་དང་བཅས་པ་ནི་ཆོས་ཀྱི་སྐུ་སྟེ་ཞེས་སྐུ་གསུམ་དུ་ འགྲེལ་བ་ནི་ཚུལ་འདི་ལ་བཤད་པའི་རྣམ་གྲངས་གཅིག་གོ །ཡང་ན་ཟབ་པ་རང་བཞིན་གྱི་སྐུ་དང༌། རྒྱ་ཆེ་བ་ལོངས་སྐུ་དང༌། བདག་ཉིད་ཆེ་བ་སྤྲུལ་སྐུ་དང་གསུམ་སྟེ། རྒྱུད་བླར། དེ་དབྱེ་ཟབ་དང་རྒྱ་ཆེ་དང༌། །བདག་ཉིད་ཆེན་པོ་ཡོན་ཏན་གྱི། ། ཆོས་ཀྱིས་རབ་ཕྱེ་རང་བཞིན་ལ། །སོགས་པའི་སྐུ་གསུམ་དག་གིས་འཇུག །ཞེས་སོ། །ཡང་ན་ཆོས་དབྱིངས་ཤིན་ཏུ་དྲི་མེད་རང་བཞིན་གྱི་ཆོས་སྐུ་དང༌། དེའི་རྒྱུ་མཐུན་གྱི་ཆོས་སྐུ་གཉིས་ཏེ། ཆོས་སྐུ་རྣམ་གཉིས་ཤེས་བྱ་སྟེ། །ཆོས་

Page: 697 ༄༅། །དབྱིངས་ཤིན་ཏུ་དྲི་མེད་དང༌། །དེ་ཡི་རྒྱུ་མཐུན་ཟབ་པ་དང༌། །སྣ་ཚོགས་ཚུལ་ནི་སྟོན་པའོ། །ཞེས་སོ། །རྒྱུ་མཐུན་གྱི་ཆོས་སྐུ་ལ། དབྱེ་ན། གཉིས་ཏེ་ཟབ་པའི་ཆོས་སྐུ་ལོངས་སྤྱོད་རྗོགས་པའི་སྐུ་དང༌། སྣ་ཚོགས་ པའི་ཚུལ་སྟོན་པའི་ཆོས་སྐུ་སྤྲུལ་པའི་སྐུ་སྟེ། མདོར་ན་རྒྱུ་མཐུན་གྱི་ཆོས་སྐུ་གཉིས་རང་བཞིན་གྱི་ཆོས་སྐུ་དང་གསུམ་མོ། །ཡང་ན་སྐུ་བཞི་སྟེ། ངོ་བོ་ཉིད་སྐུ་སོགས་གསུམ་གྱི་སྟེང་དུ་ཆོས་ཀྱི་སྐུ་མཛད་པ་དང་བཅས་པ་བསྣན་པ་སྟེ། ངོ་བོ་ ཉིད་ལོངས་རྫོགས་བཅས་དང༌། །ཞེས་སོགས་ཀྱི་དགོངས་པར་སློབ་དཔོན་སེང་བཟང་སོགས་བཞེད་ལ། སངས་རྒྱས་ཀྱི་སའི་མདོ་ལས། རང་བཞིན་ཆོས་རྫོགས་ལོངས་སྤྱོད་དང༌། །སྤྲུལ་པ་ཐ་དད་འཇུག་པ་ཅན། །སངས་རྒྱས་ རྣམས་ཀྱི་ཆོས་ཀྱི་དབྱིངས། །རྣམ་དག་འདི་ནི་ཡང་དག་བརྗོད། །ཅེས་དངོས་སུ་ཡེ་ཤེས་བཞི་སྐུ་བཞིར་བསྟན་ནས་དེ་ཐམས་ཅད་ཆོས་ཀྱི་དབྱིངས་ཀྱི་ཡེ་ཤེས་དང་དབྱེར་མེད་པར་བཤད་ལ། འདིའི་མདོར་བསྟན་དུ། སངས་རྒྱས་ཀྱི་ས་ནི་ ཆོས་ལྔས་བསྡུས་ཏེ་ཆོས་ཀྱི་དབྱིངས་ཀྱི་ཡེ་ཤེས་དང་ཞེས་སོགས་ཡེ་ཤེས་ལྔར་བཤད་པས་དོན་གྱིས་ཆོས་ཀྱི་དབྱིངས་ཀྱི་སྐུ་སྟེ་སྐུ་ལྔར་ཡང་ཤུགས་ཀྱིས་བསྟན་ཏོ། །མདོར་ན་ཏིང་རྒྱལ་ལས། སངས་རྒྱས་སྐུ་ནི་འདི་ཙམ་ཞེས། ། གལ་ཏེ་ཚད་ནི་རྙེད་གྱུར་ན། །ལྷ་དག་དང་ནི་མི་རྣམས་དང༌། །སྟོན་པ་བྱེ་བྲག་མེད་པར་འགྱུར། །ཞེས་སངས་རྒྱས་ཀྱི་གཟུགས་སྐུ་ལ་བོངས་ཚོད་ལ་སོགས་པའི་ཚད་བཟུང་མི་ནུས་པར་བཤད་པ་ལྟར། སངས་རྒྱས་ཀྱི་སྐུའི་གྲངས་ཀྱང་ གདུལ་བྱའི་རྟོག་པ་ཇི་སྙེད་པར་སྣང་ཞིང༌། འོན་ཀྱང་ནམ་མཁའ་ལ་དབྱེ་བ་ཅི་ཡང་རུང་མོད་ཀྱི་ནམ་མཁའི་ཚད་སུས་ཀྱང་མི་རྙེད་པ་ལྟར། སངས་རྒྱས་ཀྱི་སྐུ་ནི་བསམ་གུྱི་མི་ཁྱབ་པ་ཉིད་ཁོ་ན་སྟེ། ཏིང་རྒྱལ་ལས། ཇི་ལྟར་ནམ་མཁའ་དེ་བཞིན་དུ། །

Page: 698 ང་ཡི་སྐུ་ཡང་བརྗོད་མེད་ཅིང༌། །ཤེས་པར་དཀའ་བར་རབ་ཏུ་བསྟན། །ཞེས་དང༌། ཡེ་ཤེས་ཀྱི་ཕྱག་རྒྱར། ཡང་ན་ངོ་བོ་ཉིད་ཀྱིས་ནམ་མཁའ་ལྟ་བུ་སྟེ། ཞེས་གསུངས་ཤིང༌། བསམ་གྱིས་མི་ཁྱབ་པའི་ཚུལ་རྒྱས་པར་སླད་ཀྱིས་འཆད་པ་དེའི་ ཕྱིར་རོ། །རྒྱུད་བླར། ཆོས་སྐུ་རྣམ་གཉིས་ཤེས་བྱ་སྟེ། །ཞེས་སོགས་འདིའི་དོན་ལ་བོད་ཕལ་ཆེར་གྱིས་རྟོགས་པ་ཆོས་སྐུ་ཆོས་སྐུ་དངོས་དང༌། ཐེག་ཆེན་གྱི་ཆོས་ཟབ་པ་དང་ཐེག་པ་སྣ་ཚོགས་པའི་ཆོས་རྒྱ་ཆེ་བའི་ཆོས་སྐུ་སྟེ་མདོར་ན་ སངས་རྒྱས་ཀྱིས་གསུངས་པའི་ཆོས་ལ་བསྟན་པ་ཆོས་སྐུར་བྱེད་མོད་ཀྱང་དེ་ནི་རྒྱུད་བླའི་དགོངས་པ་མ་ཡིན་ཏེ། རྫོགས་སངས་སྐུ་ནི་འཕྲོ་ཕྱིར་དང༌། །ཞེས་པས་ཆོས་སྐུ་དང༌། དེ་བཞིན་ཉིད་དབྱེར་མེད་ཕྱིར་དང༌། །ཞེས་པས་ དེ་བཞིན་ཉིད་དང༌། རིག་ཡོད་ཕྱིར་ན། ཞེས་པས་རིགས་ཏེ་གསུམ་བསྟན་ལ། འདི་གསུམ་དབྱེར་མེད་པ་ནི་བདེ་གཤེགས་སྙིང་པོ་སྟེ། འདི་ཡི་རང་བཞིན་ཆོས་སྐུ་དང༌། །དེ་བཞིན་ཉིད་དང་རིགས་ཀྱང་སྟེ། །ཞེས་སོ། །དེ་ལ་ སངས་རྒྱས་དང༌། སྦྲང་རྩི་དང༌། སྙིང་པོ་སྟེ་དཔེ་དང་པོ་གསུམ་གྱིས་ཆོས་ཀྱི་སྐུ་བསྟན་པ་སྟེ། དེ་ནི་དཔེ་གསུམ་གཅིག་དང་ནི། །ལྔ་རྣམས་ཀྱིས་ནི་ཤེས་པར་བྱ། །ཞེས་སོ། །ཆོས་སྐུ་དེ་ལ་ཡང་རང་བཞིན་རྣམ་དག་གི་ཆོས་སྐུ་ཉིད་དང༌། དེ་དང་རྒྱུ་མཐུན་པའི་ཆོས་སྐུ་གཉིས་ཏེ། ཆོས་སྐུ་རྣམ་གཉིས་ཤེས་བྱ་སྟེ། །ཆོས་དབྱིངས་ཤིན་ཏུ་དྲི་མེད་དང༌། །དེ་ཡི་རྒྱུ་མཐུན། ཞེས་སོ། །རྒྱུ་མཐུན་ལ། ལོངས་སྐུ་ཟབ་པའི་ཆོས་སྐུ་དང༌། སྤྲུལ་སྐུ་སྣ་ཚོགས་པའི་ཚུལ་སྟོན་པའི་ཆོས་སྐུ་གཉིས་ཏེ། ཟབ་པ་ དང༌། སྣ་ཚོགས་ཚུལ་ནི་སྟོན་པའོ། །ཞེས་སོ། །དེ་ལ་ཆོས་དབྱིངས་ཤིན་ཏུ་དྲི་མ་མེད་པ་ལ་ནི་དཔེ་གཞན་མི་རྙེད་ལ། སངས་རྒྱས་ཉིད་ལའང་དཔེ་གཞན་མི་རྙེད་པས་དེ་གཉིས་མཚུངས་པར་སྦྱར་བ་སྟེ། འཇིག་རྟེན་འདས་ཕྱིར་འཇིག་

Page: 699 ༄༅། །རྟེན་ན། །དེ་ལ་དཔེ་ནི་མི་དམིགས་པས། །དེ་བཞིན་གཤེགས་པ་ཉིད་དང་ཁམས། །འདྲ་བ་ཉིད་དུ་བསྟན་པ་ཡིན། །ཞེས་སོ། །ངེས་པ་ལྔ་དང་ལྡན་ལ་བྱང་འཕགས་ལས་གཞན་གྱི་སྤྱོད་ཡུལ་མ་ཡིན་པས་ཟབ་ཅིང་ ཕྲ་བ་ལོངས་སྐུ་ནི་སྦྲང་རྩི་བཞིན་ཏེ། སྦྲང་རྩི་ཐམས་ཅད་མངར་བར་རོ་གཅིག་པ་ལྟར་དེས་བསྟན་པའི་ཆོས་ཐམས་ཅད་ཐེག་པ་ཆེན་པོ་བསམ་གྱིས་མི་ཁྱབ་པ་ཉིད་དུ་རོ་གཅིག་པའི་ཕྱིར་ཏེ། ཕྲ་མོ་ཟབ་མོའི་ཚུལ་བསྟན་ནི། །སྦྲང་རྩི་རོ་ གཅིག་པ་བཞིན་ཏེ། །ཞེས་སོ། །རྣམ་པ་སྣ་ཚོགས་པ་གང་ལ་གང་འདུལ་གྱི་ཆོས་སྟོན་པ་སྤྲུལ་པའི་སྐུ་ནི་སྙིང་པོ་བཞིན་ཏེ། ས་བོན་སྣ་ཚོགས་པའི་སྦུབས་ན་སྙིང་པོ་སྣ་ཚོགས་པ་ཡོད་པ་ལྟར། དེས་བསྟན་པའི་ཆོས་ཀྱང་གདུལ་བྱའི་དབང་ གིས་སྣ་ཚོགས་པར་སྟོན་པའི་ཕྱིར་ཏེ། རྣམ་པ་སྣ་ཚོགས་ཚུལ་སྟོན་ནི། །སྣ་ཚོགས་སྦུབས་སྙིང་བཞིན་ཤེས་བྱ། །ཞེས་སོ། །རྒྱུ་རང་བཞིན་གནས་རིགས་དག་པས་ཆོས་སྐུ་དང་པོ་དང༌། རྒྱས་འགྱུར་གྱི་རིགས་དག་པས་ཆོས་སྐུ་ཕྱི་མ་གཉིས་མཐོང་ བ་སྟེ། རིགས་འདི་གཉིས་ལས་སངས་རྒྱས་ཀྱི། །སྐུ་གསུམ་འཐོབ་པར་འདོད་པ་སྟེ། །དང་པོས་སྐུ་ནི་དང་པོ་སྟེ། །གཉིས་པ་ཡིས་ནི་ཕྱི་མ་གཉིས། །ཞེས་སོ། །འོ་ན་དཔེ་དང་པོ་གསུམ་གྱིས་ཀྱང་སྐུ་གསུམ་བསྟན་ལ་ཐ་མ་གསུམ་ གྱིས་ཀྱང༌། ངོ་བོ་ཉིད་སྐུ་མཛེས་པ་ནི། །རིན་ཆེན་སྐུ་འདྲར་ཤེས་བྱ་སྟེ། །ཞེས་དང༌། ཆོས་ཆེན་རྒྱལ་སྲིད་ཆེ་ལྡན་ཕྱིར། །རྫོགས་ལོངས་འཁོར་ལོས་བསྒྱུར་བཞིན་ནོ། །ཞེས་དང༌། གཟུགས་བརྙན་གྱི་ནི་རང་བཞིན་ཕྱིར། ། སྤྲུལ་པ་གསེར་གྱི་གཟུགས་ལྟ་བུ། །ཞེས་སྐུ་གསུམ་བསྟན་པས་བཟློས་པར་ཐལ་ལོ་ཞེ་ན། འོ་ན་དཔེ་དགུ་གས་བདེ་གཤེགས་སྙིང་པོ་གཅིག་བསྟན་ཞིང༌། དཔེ་ཐ་མ་གསུམ་གས་སངས་རྒྱས་ཁོ་ན་བསྟན་པས་དེ་དག་ཀྱང་བཟློས་

Page: 700 པར་ཐལ་ལོ། །དེ་དག་དགོས་པ་ཐ་དད་པས་མི་ཟློས་སོ་ཞེ་ན། འདིར་ཡང་དེ་བཞིན་ཏེ། དཔེ་དང་པོ་གསུམ་པོ་རང་བཞིན་གྱི་ཆོས་སྐུ་དཔེ་དང་བྲལ་བ་དང་ཟབ་པའི་ཆོས་སྐུས་རོ་གཅིག་པའི་ཆོས་སྟོན་པ་དང༌། རྒྱ་ཆེ་བའི་ཆོས་སྐུས་སྣ་ཚོགས་པའི་ ཆོས་སྟོན་པའི་བྱེད་ལས་ཤེས་པའི་ཕྱིར་བསྟན་ལ། ཐ་མ་གསུམ་སྐུ་རང་གི་རང་བཞིན་རྟོགས་པའི་ཕྱིར་བཞག་པའི་ཕྱིར་རོ། །གལ་ཏེ་དེ་ལྟ་མིན་ན་དཔེ་དགུ་ནི་བདེ་གཤེགས་སྙིང་པོ་འཆད་བྱེད་ཡིན་པས་ཐེག་ཆེན་གྱི་ཆོས་དང༌། སྣ་ ཚོགས་པའི་ཆོས་གཉིས་བདེ་སྙིང་དུ་ཐལ་བ་དང༌། རིགས་ཁམས་སྦྲང་རྩི་དང་འདྲ་འདི་གཟིགས་ནས། །ཞེས་དང༌། ཟག་པ་མེད་པའི་ཤེས་པ་སྦྲང་མའི་རྩི་དང་འདྲ། །ཞེས་སྦྲང་རྩི་ཁམས་ཉིད་དང༌། སྦྲང་མ་ཞེ་སྡང་གི་བག་ཉལ་དུ་ བཤད་པ་དང༌། དེ་བཞིན་སེམས་ཅན་ལ་ཡོད་ཆོས་ཀྱི་དབང་ཕྱུག་ཉོན་མོངས་སྦུན་ལས་མ་གྲོལ་ལུས། །ཞེས་སྙིང་པོ་སྒྲིབ་བཅས་ཀྱི་ཆོས་སྐུ་དང་ཤུན་པ་གཏི་མུག་གི་བག་ཉལ་དུ་བཤད་པ་གཉི་ག་དང་འགལ་བར་འགྱུར་ཞིང༌། ཐེག་ ཆེན་གྱི་ཆོས་དང༌། སྣ་ཚོགས་པའི་ཆོས་གཉིས་ནི་དྲི་མས་བསྒྲིབས་པ་མི་སྲིད་པའི་ཕྱིར་རོ། །ེས་ན་རོང་སྟོན་ཤེས་བྱ་ཀུན་རིག་གིས། ཟབ་མོ་སྟོན་པའི་གསུང་རབ་ཆོས་ཅན། སྦྲང་རྩི་དང་ཆོས་མཚུངས་ཏེ། གཞན་ལ་དམ་ཆོས་ཟབ་ མོའི་རོ་སྦྱིན་པའི་ཕྱིར། རྒྱ་ཆེན་པོ་སྟོན་པའི་གསུང་རབ་ཆོས་ཅན། སྙིང་པོ་དང་ཆོས་མཚུངས་ཏེ། ཐོགས་པའི་སྒྲིབ་པའི་ཤུན་པ་དང་བྲལ་བའི་ཕྱིར། ཞེས་གསུངས་པའང་སྙིང་པོར་མི་ཆེ་སྟེ། སྦྲང་རྩི་རོ་གཅིག་པ་བཞིན་ཏེ། ཞེས་བཞེད་ ཀྱི་གཞན་ལ་རོ་སྦྱིན་པའི་དོན་ཡང་མིན་ལ་གསུང་རབ་ཐོགས་པའི་སྒྲིབ་པའི་ཤུན་པ་དང་བྲལ་བ་ནི་ག་ལ་སྲིད་དེ། སྒྲིབ་པ་ནི་སེམས་དང་བཅས་པ་ལ་འབྱུང་གི་གསུང་རབ་སེམས་བཅས་སུ་ཁས་ལེན་པ་ནི་ངོ་མཚར་བའི་དམ་བཅར་འགྱུར་བའི་

Page: 701 ༄༅། །ཕྱིར་རོ། །དེས་ན་ཆོས་སྐུ་དབྱེ་གཞིར་བྱས་ཏེ། དབྱེ་ན་ངོ་བོ་ཉིད་སྐུ་ལ་སོགས་པ་གསུམ་དུ་འགྱུར་བ་མངོན་རྟོགས་རྒྱན་གྱི་བཤད་ལུགས་གཅིག་དང༌། ཆོས་སྐུ་དབྱེ་ངོར་བྱས་པའི་སྐུ་གསུམ་དུ་འཇོག་པ་སྐུ་གསུམ་ གྱི་མདོ་ལ་སོགས་པའི་བཞེད་པ་དང༌། ཆོས་སྐུ་དབྱེ་ངོར་བྱས་པའི་སྐུ་བཞིར་འཇོག་པ་སངས་རྒྱས་ཀྱི་སའི་མདོ་ལས་བཤད་པ་དང༌། ཆོས་སྐུ་ཉིད་གསུམ་དུ་འཇོག་པ་རྒྱུད་བླའི་སྐབས་གཅིག་དང༌། གཟུགས་སྐུ་ཁོ་ན་ལ་ ཆོས་སྐུར་འཇོག་པ་རྒྱུད་བླའི། ཆོས་ཀྱི་སྐུ་ནི་སྤྱོད་པའོ། །ཞེས་སོགས་ཀྱི་སྐབས་ཏེ་ཐ་དད་པ་དུ་མར་ཡོད་པས། དེང་སང་གི་ཀློག་པ་པོ་ཕར་ཕྱིན་སྨྲ་བར་རློམ་པ་རྣམས་ཀྱི་འདོད་པས་སྐུའི་རྣམ་བཞག་འཇོག་པ་ནི་རྒྱ་མཚོ་ལས་ཆུ་ ཐིགས་བླངས་ཏེ་རྒྱ་མཚོ་ནི་འདི་ཁོ་ནའོ་ཞེས་སོ་སོར་སྒྲོག་པ་ལྟར་སྣང་ངོ༌། །ད་ནི་སྐུ་དེ་རྣམས་ཀྱི་རང་བཞིན་རྣམ་པར་བཞག་པར་བྱ་སྟེ། དེ་ལ་སྐུ་རྣམ་པར་བཞག་པ་དང༌། ཡེ་ཤེས་རྣམ་པར་བཞག་པ་དང༌། ཕྲིན་ལས་རྣམ་ པར་བཞག་པ་སྟེ་གསུམ་ལས། དང་པོ་དེ་ལ་སྐུ་རྣམ་པར་བཞག་པ་ནི། དེ་ཡང་སྤྱིར་སངས་རྒྱས་དངོས་ནི་ཆོས་ཀྱི་སྐུ་ཁོ་ན་སྟེ། ཅི་ཙ་བསགས་པ་ལའོ་ཞེས་པའི་བྱིངས་ལས་བསྒྲུབས་པ་དྷརྨ་ཏཱ་ཀཱ་ཡ་ཞེས་ཆོས་ཉིད་ཀྱི་ལུས་ཞེས་པའི་སྒྲ་ལས་དངོས་པོའི་ རྐྱེན་བོད་སྐད་ལ་ཉིད་སྒྲའམ་སཾསྐྲྀ་ཏ་ལ་ཏཱ་ཡིག་ཕྱིས་པས་དྷརྨ་ཀཱ་ཡ་ཞེས་སམ་ཆོས་ལུས་ཞེས་བརྗོད་ལ། དེ་ལ་ཞེས་སའི་སྒྲ་སྦྱར་བས་ཆོས་ཀྱི་སྐུ་སྟེ། དཔེར་ན་ཡན་ལག་མ་ཚང་བ་མེད་པའི་ཚོགས་པ་ལ་ལུས་སུ་བརྗོད་པ་ ལྟར་ཆོས་ཐམས་ཅད་ཀྱི་ཆོས་ཉིད་དངོས་པོའི་གནས་ལུགས་ཇི་ལྟ་བ་མ་ཚང་བ་མེད་པར་དབྱེར་མེད་དུ་ཡོངས་སུ་རྫོགས་པ་མངོན་དུ་བྱས་པ་ནི་ཆོས་ཀྱི་སྐུ་སྟེ། བདེན་གཉིས་ཀྱི་འགྲེལ་པར་སློབ་དཔོན་ཞི་བ་འཚོས། ཆོས་རྣམས་

Page: 702 ཀུན་གྱི་ལུས་ཡིན་ཕྱིར། །ཞེས་སོགས་འགྲེལ་བ་ན། ཅིའི་ཕྱིར་ཆོས་ཐམས་ཅད་ཀྱི་ལུས་ཞེས་བྱ་སྙམ་པ་ལ་འགྲོ་བ་ཐམས་ཅད་ཅེས་བྱ་བ་ལ་སོགས་སྨོས་སོ། །དེ་བས་ན་རྣམ་པ་འདི་ལ་ནི་སྐུ་ཞེས་བྱ་བའི་སྒྲ་ནི་ལུས་སུ་བརྗོད་ པར་བྱའོ། །ལུས་ནི་ཚོགས་ཡིན་པའི་ཕྱིར་ཆོས་ཀྱི་སྐུ་ནི་ཆོས་རྣམས་ཀྱི་ཚོགས་ཞེས་བྱ་སྟེ་རྒྱུ་དང་འབྲས་བུས་ཉེ་བར་བཏགས་པའི་ཕྱིར་རོ། །ཅིའི་ཕྱིར་རྒྱུ་ཉིད་ཡིན་སྙམ་པ་ལ་བཤད་པ། འཇིག་རྟེན་པ་དང་འཇིག་རྟེན་ལས་འདས་ པའི་ཡོན་ཏན་ཐམས་ཅད་ཀྱི་རྟེན་ཡིན་པའི་ཕྱིར་རོ། །ཡང་ན་འདིར་འཇིག་རྟེན་ལས་འདས་པའི་ཆོས་རྣམས་སྒྲོགས་ཤིང་བརྗོད་པའི་ཕྱིར་ཆོས་ཀྱི་སྐུ་ཡིན་ནོ། །ཆོས་ཀྱི་དབྱིངས་རྟོགས་ན་འཇིག་རྟེན་དང་འཇིག་རྟེན་ལས་འདས་པའི་ཆོས་ཐམས་ ཅད་བོས་པ་བཞིན་དུ་འདུ་སྟེ། ཟད་པ་ཤེས་ལ་ཟག་བཅས་ཀྱང༌། །ཞེས་འབྱུང་བའི་ཕྱིར་རོ། །ཞེས་སོགས་ཀྱིས་ཆོས་ཐམས་ཅད་ཡོངས་སུ་རྫོགས་པའི་ལུས་ཡིན་པ་དང༌། ཡོན་ཏན་ཐམས་ཅད་ཀྱི་རྟེན་ཡིན་པ་དང༌། ཆོས་ཐམས་ཅད་ ཀྱི་ངོ་བོ་ཉིད་དུ་གནས་པ་སྟེ། དོན་གསུམ་གྱིས་ཆོས་ཀྱི་སྐུར་བཤད་ཅིང༌། རྒྱན་ལས། ཆོས་རྣམས་ཀུན་གྱི་དེ་བཞིན་ཉིད། །སྒྲིབ་གཉིས་དག་པའི་མཚན་ཉིད་དེ། །དངོས་དང༌། ཞེས་ཆོས་ཐམས་ཅད་ཀྱི་དེ་བཞིན་ཉིད་སྒྲིབ་གཉིས་ ཀྱིས་དག་པ་ཐོབ་པ་ནི་བྱང་ཆུབ་དངོས་སུ་བཤད་པའི་ཕྱིར་རོ། །དེ་ལྟར་བཤད་པའི་ཆོས་ཀྱི་སྐུ་འདི་ནི་གང་ལ་སངས་རྒྱས་སུ་བརྗོད་པའི་སངས་རྒྱས་ཉིད་ཇི་ལྟ་བ་ཡིན་ཏེ། བརྒྱད་སྟོང་པ་ལས། དེ་བཞིན་གཤེགས་པ་ནི་གཟུགས་ཀྱི་ སྐུར་མི་ལྟ་སྟེ། དེ་བཞིན་གཤེགས་པ་ནི་ཆོས་ཀྱི་སྐུའོ། །ཞེས་དང༌། ཏིང་རྒྱལ་ལས། དཔའ་བོ་ཆེན་པོ་ཆོས་ཀྱི་སྐུ། །སྐུ་ནི་ཆོས་ལས་སྐྱེས་པ་སྟེ། །ཞེས་དང༌། རྒྱལ་བའི་དབང་པོ་གཟུགས་ཀྱི་སྐུར་མི་ལྟ། །ཞེས་སོ། །ཆོས་

Page: 703 ༄༅། །ཐམས་ཅད་ཀྱི་རང་བཞིན་ནི་དེ་ཁོ་ནར་གནས་མོད་ཀྱང་དེ་ལྟར་གང་གིས་མངོན་དུ་བྱས་པ་དེ་ཉིད་ལ་ཆོས་ཀྱི་སྐུར་མངོན་པར་རྫོགས་པར་སངས་རྒྱས་པ་ཞེས་བྱ་སྟེ་སངས་རྒྱས་གཅིག་པུ་ཉིད་དུ་བཤད་པའི་སྐབས་སོ། ། ཆོས་ཀྱི་སྐུ་དེ་ནི་གོ་འཕང་དེ་ལས་ཉམས་མི་སྲིད་པའི་ཕྱིར། རང་དོན་དོན་དམ་པའི་སྐུ་ཞེས་བྱ་ལ། དེ་ཉིད་སེམས་ཅན་གྱི་ཁམས་རྒྱུད་དང་དབྱེར་མེད་དུ་རྟག་པར་གནས་པ་ལས་སེམས་ཅན་གང་གི་རྒྱུད་ཅུང་ཟད་སྦྱངས་པ་རྣམས་ཀྱིས་དེའི་རང་བཞིན་ རྣམ་པ་དང་བྲལ་བ་ཇི་ལྟ་བར་ནི་མ་མཐོང་ཡང་སྒྲིབ་པའི་རབ་རིབ་ཅུང་ཟད་དག་པའི་རྒྱུས་རྣམ་པ་དང་བཅས་པ་གཟུགས་སྐུའི་རྣམ་པར་སྣང་ཞིང༌། རང་རྒྱུད་དང་ཐ་དད་མེད་ནའང་དངོས་པོའི་བག་ཆགས་ཀྱི་དབང་གིས་རང་ལས་རྒྱུད་ཐ་དད་པ་ ཕྱི་རོལ་ལྟར་སྣང་བ་ནི་གཟུགས་ཀྱི་སྐུ་སྟེ་ཆོས་སྐུ་ཇི་ལྟ་བ་མཐོང་བའི་ཚེ་གཟུགས་སྐུའི་རྣམ་པར་མི་སྣང་བའི་ཕྱིར། ཀུན་རྫོབ་བརྡའི་སྐུ་ཞེས་རྣམ་པར་འཇོག་སྟེ་སྐུ་གཉིས་ཀྱི་རྣམ་གྲངས་གཅིག་གོ །དེས་ན་གཟུགས་སྐུ་གདུལ་བྱའི་མིག་ ཤེས་ཡིན་གྱི་སངས་རྒྱས་མ་ཡིན་ནོ་ཟེར་བ་དག་ཀྱང་སངས་རྒྱས་ནི་ཆོས་ཀྱི་སྐུའོ་ཞེས་པའང་ཐོས་ཤིང་སྣང་བ་སེམས་སུ་བཤད་པས་སེམས་ལས་དོན་གཞན་པའི་དངོས་པོ་མེད་པའང་ཅུང་ཟད་ཁོང་དུ་ཆུད་པས་དེ་ལྟ་ན་གཟུགས་སྐུ་ནི་ཆོས་ སྐུ་མ་ཡིན་པས་སངས་རྒྱས་མ་ཡིན་པར་སྣང་ངོ་སྙམ་པ་དང༌། སྣང་བ་སེམས་ཡིན་ན་གཟུགས་སུ་སྣང་བ་རྣམས་མིག་ཤེས་དང༌། སྒྲར་སྣང་བ་རྣམས་ཉན་ཤེས་སོགས་ཡིན་པར་རིགས་པས་དེ་ལྟ་ན་གཟུགས་སྐུ་ནི་དེའི་མིག་ཤེས་སོ་སྙམ་པ་ཞིག་ ཤར་བ་སྟེ། བཤད་པའི་རྣམ་གྲངས་འདི་ཅུང་ཟད་གོ་ཡང་དཔྱིས་ཕྱིན་པར་སྨྲ་མ་ནུས་པས་ཡོན་པོའི་གཏམ་ཞིག་བྱུང་བར་ཟད་ལ། དེས་ན་འདི་སྐབས་སུ་གཟུགས་སྐུ་མཐོང་བ་ཡང་སེམས་ཅན་གྱི་ཁམས་རྒྱུད་ལ་བུམ་པ་ལ་ནམ་མཁའ་ལྟར་དབྱེར་མེད་དུ་

Page: 704 གནས་པའི་ཆོས་སྐུ་དེ་ཉིད་ཅུང་ཟད་མཐོང་བ་ཡིན་པ་ལ་དགོངས་ནས་རྒྱུད་བླར། ཐེག་པ་འདི་ལ་གནས་པ་རྣམས། །ནང་གི་དམ་པ་ཆོས་སྐུ་ནི། །ཡེ་ཤེས་མིག་གིས་མཐོང་བར་འགྱུར། །ཞེས་དང༌། འདི་ནི་རང་སེམས་སྣང་བ་ཞེས། ། སོ་སོ་སྐྱེ་བོས་མི་ཤེས་མོད། །ཅེས་གསུངས་པ་སྟེ། དེའི་ཕྱིར་ཆོས་གཟུགས་ཀྱི་སྐུ་གཉིས་ཀ་རང་རྒྱུད་ལས་གཅིག་པ་དང་ཐ་དད་པ་གང་ཡང་མ་ཡིན་ནོ། །སངས་རྒྱས་ཆོས་སྐུ་ཉིད་དུ་བཤད་པས་གཟུགས་སྐུ་སངས་རྒྱས་ཀྱི་སྐུ་མ་ ཡིན་པར་སྟོན་པ་ཡང་མ་ཡིན་ཏེ། དཔེར་ན། རིང་སྲེལ་ཅན་གྱི་མཆོད་རྟེན་ཞིག་ལ་སྐྱེ་བོ་མིག་ལྡན་གྱིས་ལྟ་བ་ན་སྐྱ་རེངས་དང་པོའི་དུས་སུ་ར་རི་ཙམ་མཐོང་ཞིང་ནམ་ནངས་ཀར་དེ་བས་ཆེས་གསལ་བ་དང་ཉི་མའི་དཀྱིལ་འཁོར་ཤར་བ་ན་ ཇི་ལྟ་བར་མཐོང་བ་ལྟར་ལས་ཀྱི་སྒྲིབ་པ་དག་པ་སྐྱ་རེངས་དང་པོ་ལྟ་བུའི་ཚེ་མཆོད་རྟེན་ལྟ་བུའི་ཆོས་སྐུ་དེ་ཉིད་ལ་མཆོག་གི་སྤྲུལ་སྐུར་སྣང་བ་དང༌། ཉོན་སྒྲིབ་དག་པ་ནམ་ནངས་ཀ་ལྟ་བུའི་ཚེ་ལོངས་སྐུར་སྣང་བ་དང༌། ཤེས་སྒྲིབ་དག་ པ་ཉི་མའི་དཀྱིལ་འཁོར་ཤར་བ་ལྟ་བུའི་ཚེ་ཆོས་སྐུ་ཇི་ལྟ་བ་ཉིད་མཐོང་བ་མེད་པའི་ཚུལ་དུ་མཐོང་བ་སྟེ། སྐུ་གསུམ་གྱི་མདོར། ཆོས་ཀྱི་སྐུ་ནི་དེ་བཞིན་གཤེགས་པའི་ངོ་གང་ལ་ལྟ་བར་བྱའོ། །ལོངས་སྤྱོད་རྫོགས་པའི་སྐུ་ནི་བྱང་ཆུབ་ སེམས་དཔའི་ངོ་གང་ལ་ལྟ་བར་བྱའོ། །སྤྲུལ་པའི་སྐུ་ནི་མོས་པས་སྤྱོད་པའི་སོ་སོ་སྐྱེ་བོའི་ངོ་གང་ལ་ལྟ་བར་བྱའོ། །ཞེས་སོ། །ཅི་སྣང་ཚུལ་གྱི་སྐུ་གདུལ་བྱའི་མིག་ཤེས་སུ་བཤད་པ་འདི་རྗེ་བཙུན་ངལ་གསོར་ཡང་བཞེད་པ་མ་ཡིན་ནམ་ཞེ་ན། དེ་ནི་རྗེ་ཉིད་ཀྱི་མཁན་པོ་དཔལ་ཆོས་གྲུབ་སེང་གེའི་བཀས་གཞན་སྟོང་གི་གྲུབ་པ་ཟུངས་ཤིག་ཅེས་བཀའ་བསྩལ་པ་སྒྲུབ་ཕྱིར་ཡུམ་དོན་ཇོ་ཟིའི་ལུགས་སུ་བཀྲལ་བ་ཡིན་གྱི་ངེས་པའི་དོན་མ་ཡིན་ནོ་ཞེས་ཡང་ཡང་བཀའ་བསྩལ་

Page: 705 ཞིང༌། ཞིབ་མོར་ཕྱེ་ན་རྗེ་བཙུན་གྱི་རྩ་བ་གཞན་སྟོང་དང༌། སློབ་དཔོན་གྱི་འགྲེལ་པ་རང་སྟོང་དུ་འགྲེལ་བར་མཛད་པས་དོན་གྱིས་ན་གཉི་ག་ལ་ཞེན་བྱ་མིན་པར་བསྟན་པ་ཡིན་ནོ། །ཡང་ན་སྤངས་པ་ཕུན་སུམ་ཚོགས་ པ་ནི་རང་དོན་རྣམ་པར་གྲོལ་བའི་སྐུ་དང༌། རྟོགས་པ་ཕུན་སུམ་ཚོགས་པ་ནི་གཞན་དོན་ཆོས་ཀྱི་སྐུ་ཡིན་ལ། དེ་གཉིས་ཀྱང་ཡང་དག་པར་གཉིས་སུ་མེད་པའི་རྣམ་པ་གཅིག་ཁོ་ན་སྟེ། རྒྱུད་བླར། རྣམ་གྲོལ་ཆོས་ཀྱི་སྐུ་དག་ནི། །རྣམ་གཉིས་ རྣམ་གཅིག་ཤེས་བྱ་སྟེ། །ཞེས་སོ། །འདི་ནི་ཉོན་མོངས་བག་ཆགས་དང་བཅས་པས་གཟོད་ནས་མ་གོས་པ་ཉིད་ལ་མ་གོས་པ་ཉིད་དུ་འགགས་པའི་ཕྱིར། ཟག་པ་མེད་པས་བརྟན་པའི་ཡོན་ཏན་དང༌། དུས་གསུམ་གྱི་ཡུལ་ལ་ཆགས་ཐོགས་ མེད་པའི་ཡེ་ཤེས་འཇུག་པས་ཁྱབ་པ་ཞི་བའི་ཡོན་ཏན་དང༌། ནམ་ཡང་མི་འཇིག་པའི་རང་བཞིན་ཡིན་པས་ན་འདུས་མ་བྱས་པ་རྟག་པའི་ཡོན་ཏན་དང༌། འཇིག་པ་མེད་པ་ཉིད་མི་འགྱུར་བ་རྟག་པའི་གནས་འཕོ་བ་མེད་པའི་ཡོན་ཏན་ཏེ་ བཞི་དང་ལྡན་པ་སྟེ། ཉོན་མོངས་རྣམས་ནི་བག་ཆགས་དང༌། །བཅས་པ་འགགས་ཕྱིར་ཟག་མེད་དེ། །ཆགས་མེད་ཐོགས་པ་མེད་པའི་ཕྱིར། །ཡེ་ཤེས་ཁྱབ་པ་ཉིད་དུ་འདོད། །གཏན་དུ་འཇིག་པ་མེད་པ་ཡི། །རང་བཞིན་ཡིན་ ཕྱིར་འདུས་མ་བྱས། །འཇིག་མེད་ཉིད་ནི་བརྟན་པ་སྟེ། །བརྟན་སོགས་རྣམས་ཀྱིས་དེ་བཤད་དོ། །ཞེས་ཏེ་སྐུ་གཉིས་ཀྱི་རྣམ་གྲངས་གཅིག་གོ །འདི་ལ་ཀུན་མཁྱེན་རོང་སྟོན་གྱིས་ནི་ཉོན་སྒྲིབ་སྤངས་པ་རྣམ་གྲོལ་གྱི་སྐུ་དང༌། ཤེས་སྒྲིབ་སྤངས་པ་ཆོས་ཀྱི་སྐུ་སྟེ་རྣམ་གྲོལ་གྱི་སྐུས་ནི་ཉན་རང་དང་མཚུངས་ལ་ཆོས་ཀྱི་སྐུས་ཁྱད་པར་དུ་བྱས་སོ་ཞེས་པའི་དགོངས་པ་ངེས་འགྲེལ་གྱི་ལུང་འདྲེན་པར་མཛད་མོད་ཀྱང་ཅུང་ཟད་མི་མཚུངས་ཏེ། དགོངས་འགྲེལ་གྱི་ཆོས་

Page: 706 སྐུ་ནི་གནས་གྱུར་ཐོབ་པ་ལ་གསུངས་པའི་ཕྱིར་རོ། །སྐུ་གསུམ་གྱི་རྣམ་པར་བཞག་པ་ལ། ཆོས་སྐུ་དབྱེ་གཞིར་བྱས་པ། དབྱེ་ངོར་བྱས་པ། ཆོས་སྐུ་གསུམ་དུ་འཇོག་པ་སྟེ་གསུམ་ལས། དང་པོ་ཆོས་སྐུ་དབྱེ་གཞིར་བྱས་པལྟར་ན། ཆོས་ཀྱི་སྐུ་ནི་སྔར་ བསྟན་པ་རྫོགས་པའི་སངས་རྒྱས་དངོས་དེ་ཉིད་ཡིན་ལ། དེ་ལ་དབྱེ་ན། ངོ་བོ་ཉིད་ཀྱི་སྐུ་དང༌། ལོངས་སྤྱོད་རྫོགས་པའི་སྐུ་དང༌། སྤྲུལ་པའི་སྐུའོ། །དེ་ལ་ངོ་བོ་ཉིད་ཀྱི་སྐུ་ནི། ཟག་པ་མེད་པའི་ཆོས་རྣམས་རྣམ་པ་ཐམས་ཅད་དུ་ཤིན་ཏུ་རྣམ་པར་དག་པ་ ཐོབ་པ་སྟེ། མངོན་རྟོགས་རྒྱན་ལས། ཐུབ་པའི་ངོ་བོ་ཉིད་སྐུ་ནི། །ཟག་པ་མེད་པའི་ཆོས་གང་དག །ཐོབ་གྱུར་རྣམ་ཀུན་རྣམ་དག་པ། །དེ་དག་རང་བཞིན་མཚན་ཉིད་ཅན། །ཞེས་གསུངས་ལ། ཟག་མེད་ཀྱི་ཆོས་གང་ཞེ་ན། བྱང་ཕྱོགས་ སོ་བདུན་དང༌། ཚད་མེད་བཞི་དང༌། རྣམ་ཐར་བརྒྱད་དང༌། མཐར་གནས་སྙོམས་འཇུག་དགུ་དང༌། ཟད་པར་བཅུ་དང༌། ཟིལ་གནོན་བརྒྱད་དང༌། ཉོན་མོངས་མེད་པའི་ཏིང་ངེ་འཛིན་དང༌། སྨོན་གནས་མཁྱེན་པ་དང༌། མངོན་ཤེས་དྲུག་དང༌། སོ་སོ་ཡང་དག་ པར་རིག་པ་བཞི་དང༌། རྣམ་ཀུན་ཡོངས་སུ་དག་པ་བཞི་དང༌། དབང་བཅུ་དང༌། སྟོབས་བཅུ་དང༌། མི་འཇིགས་པ་བཞི་དང༌། སྲུང་བ་མེད་པ་གསུམ་དང༌། དྲན་ཉེ་གསུམ་དང༌། བསྙེལ་བ་མི་མངའ་བའི་ཆོས་ཉིད་དང༌། བག་ཆགས་བཅོམ་པ་དང༌། ཐུགས་ རྗེ་ཆེན་པོ་དང༌། མ་འདྲེས་པའི་ཆོས་བཅོ་བརྒྱད་དང༌། རྣམ་མཁྱེན་ཉིད་དང༌། རང་བཞིན་རྣམ་པར་དག་པ་ཆོས་ཀྱི་སྐུ་ཉིད་དེ་དེ་རྣམས་སྒྲིབ་བྲལ་དུ་མངོན་སུམ་དུ་བྱས་པ་སྟེ། བྱང་ཆུབ་ཕྱོགས་མཐུན་ཚད་མེད་དང༌། །སོགས་ནས། རྣམ་ པ་ཐམས་ཅད་མཁྱེན་ཉིད་དང༌། །ཆོས་ཀྱི་སྐུ་ཞེས་བརྗོད་པ་ཡིན། །ཞེས་སོ། །ཡང་ན་མཚན་ཉིད་ལྔའམ། ཡོན་ཏན་ལྔ་ལྡན་ནི་ངོ་བོ་ཉིད་ཀྱི་སྐུ་སྟེ། རྒྱུད་བླར། དེ་ལ་སངས་རྒྱས་རྣམས་ཀྱི་ནི། །ངོ་བོ་ཉིད་སྐུ་མཚན་ཉིད་ལྔ། །མདོར་

Page: 707 ༄༅། །ན་ཡོན་ཏན་ལྔ་དང་ནི། །ལྡན་པ་ཉིད་དུ་རིག་པར་བྱ། །ཞེས་སོ། །དེ་ཡང་འདུས་མ་བྱས་པ་དང༌། རྣམ་དབྱེར་མེད་པ་དང༌། སྒྲོ་སྐུར་གྱི་མཐའ་གཉིས་སྤངས་བ་དང༌། སྒྲིབ་གསུམ་ལས་གྲོལ་བ་དང༌། འོད་གསལ་བ་ སྟེ་མཚན་ཉིད་ལྔའོ། །ཅིའི་ཕྱིར་འོད་གསལ་ཞེ་ན། དྲི་མ་མེད་ཅིང་རྟོག་པ་མེད་པ་དང༌། སོ་སོ་རང་རིག་གི་ཤེས་པའི་ཡུལ་ཡིན་པ་དང༌། ཆོས་ཀྱི་དབྱིངས་ངོ་བོ་ཉིད་ཀྱིས་དག་པའི་ཕྱིར་འོད་གསལ་བ་སྟེ། འདུས་མ་བྱས་ཤིང་རྣམ་དབྱེར་ མེད། །མཐའ་གཉིས་དག་ནི་རྣམ་པར་སྤངས། །ཉོན་མོངས་ཤེས་བྱ་སྙོམས་འཇུག་གི། སྒྲིབ་གསུམ་ལས་ནི་ངེས་གྲོལ་ཏེ། །དྲི་མེད་རྣམ་པར་རྟོག་མེད་དེ། །རྣལ་འབྱོར་རྣམས་ཀྱི་ཡུལ་ཡིན་ཕྱིར། །ཆོས་དབྱིངས་ངོ་བོ་ཉིད་ ཀྱིས་ནི། །དག་པའི་ཕྱིར་ན་འོད་གསལ་བ། །ཞེས་སོ། །ཡང་ན་ཚད་མེད་པས་རྒྱ་ཆེ་བའི་ཕྱིར་གཞལ་དུ་མེད་པ་དང༌། མཐའ་ཡས་པས་གྲངས་མེད་པ་དང༌། རྟོག་གེའི་ཡུལ་མིན་ཕྱིར་བསམ་དུ་མེད་པ་དང༌། སངས་རྒྱས་ཉིད་གཅིག་པུ་འབའ་ ཞིག་པར་ཟད་ཀྱི་སུ་དང་ཡང་མི་མཚུངས་པས་མཉམ་པ་མེད་པ་དང༌། བག་ཆགས་དང་བཅས་པའི་དྲི་མ་སྤངས་པའི་ཕྱིར། མཐར་ཐུག་པའི་ཡོན་ཏན་དང་ལྔར་ལྡན་པ་སྟེ། གཞལ་མེད་གྲངས་མེད་བསམ་མེད་པ། །མཉམ་མེད་དག་པའི་ མཐར་ཐུག་པའི། །ཡོན་ཏན་རྣམས་དང་ཡང་དག་པར། །ངོ་བོ་ཉིད་ཀྱི་སྐུ་ལྡན་ཏེ། །རྒྱ་ཆེའི་ཕྱིར་དང་གྲངས་མེད་ཕྱིར། །རྟོག་གེའི་ཡུལ་ནི་མིན་ཕྱིར་དང༌། །འབའ་ཞིག་བག་ཆགས་བཅས་སྤངས་ཕྱིར། །གཞལ་མེད་ལ་སོགས་ གོ་རིམ་བཞིན། །ཞེས་སོ། ཡང་ན་མཚན་ཉིད་གསུམ་ལྡན་ཏེ། རྒྱན་ལས། རང་བཞིན་སྐུ་ནི་མཉམ་པ་དང༌། །ཕྲ་ཞིང་དེ་དང་འབྲེལ་བ་དང༌། །ཞེས་པ་སྟེ། སྤྲོས་པ་ཉེ་བར་ཞི་བའི་མཉམ་པས་ནི་གཟུགས་སྐུ་ལས་ཁྱད་པར་དུ་བྱས་པ་

Page: 708 ཕྲ་བའི་ཕྱིར་འདུས་མ་བྱས་ཀྱིས་མ་བསྡུས་པ་དང༌། ལོངས་སྐུ་དང་འབྲེལ་བས་མ་དག་པ་དང༌། ཅུང་ཟད་དག་པའི་དེ་བཞིན་ཉིད་ལས་ཁྱད་པར་དུ་གྱུར་པའོ། །ངོ་བོ་ཉིད་སྐུ་འདི་ནི་ལོངས་སྤྱོད་རྫོགས་སྐུ་སྣང་བའི་རྒྱུ་སྟེ། དགྱེས་དགུར་ལོངས་ སྤྱོད་བསྟན་པ་ལ། །ལོངས་སྤྱོད་རྫོགས་འབྱོར་རྒྱུར་འདོད་དོ། །ཞེས་སོ། །ཆོས་སྐུ་དབྱེ་ངོར་བྱས་པའི་སྐུ་གསུམ་གྱི་ཚེ། ངོ་བོ་ཉིད་སྐུ་འདི་ཉིད་ལ་ཆོས་ཀྱི་སྐུར་བརྗོད་པ་སྟེ། སྐུ་གསུམ་གྱི་མདོ་ལས། རིགས་ཀྱི་བུ་དེ་བཞིན་གཤེགས་ པའི་སྐུ་གསུམ་ནི་རང་བཞིན་རྣམ་པར་དག་པ་ནི་ཆོས་ཀྱི་སྐུའོ། །ཞེས་དང༌། རིགས་ཀྱི་བུ་དེ་བཞིན་གཤེགས་པའི་ཆོས་ཀྱི་སྐུ་ནི་ནམ་མཁའ་ལྟར་རང་བཞིན་མེད་པའི་དོན་ཏོ། །ཞེས་སོ། །ཆོས་སྐུ་དང་ངོ་བོ་ཉིད་སྐུ་ཐ་དད་དུ་དབྱེ་ངོར་བྱས་ཏེ་སྐུ་བཞིར་ འཇོག་པའི་ཚེ་ནི། སྤངས་པ་ཕུན་ཚོགས་ངོ་བོ་ཉིད་ཀྱི་སྐུ་དང༌། རྟོགས་པ་ཕུན་ཚོགས་ཆོས་ཀྱི་སྐུར་འཇོག་ལ། ཡང་ན་ཆོས་ཀྱི་དབྱིངས་ཇི་ལྟ་བ་མངོན་དུ་བྱས་པ་ངོ་བོ་ཉིད་སྐུ་དང༌། སྤངས་པ་ཕུན་ཚོགས་ཆོས་ཀྱི་སྐུ་དང༌། རྟོགས་པ་ཕུན་ཚོགས་གཟུགས་ཀྱི་ སྐུར་ཡང་བཤད་ལ། ཆོས་སྐུ་གསུམ་དུ་འཇོག་ཚུལ་ནི་བཤད་ཟིན་ཏོ། །སྐུ་ལྔར་རྣམ་པར་འཇོག་པའི་ཚེ་ནི། ཆོས་དབྱིངས་རང་བཞིན་རྣམ་དག་མངོན་དུ་བྱས་པའི་ཆ་ལ་ཆོས་དབྱིངས་ཀྱི་སྐུ་དང༌། རེས་འགའ་ཆོས་ཀྱི་དབྱིངས་ཀྱི་ཡེ་ཤེས་སུའང་ བཤད་ཅིང༌། སྤངས་པ་ངོ་བོ་ཉིད་ཀྱི་སྐུ་དང༌། རྟོགས་པ་ཆོས་ཀྱི་སྐུ་དང༌། གཞན་དོན་བྱེད་ཚུལ་གྱི་ཆ་ནས་གཟུགས་སྐུ་གཉིས་ཏེ་ལྔར་འཇོག་གོ །ཐར་རྒྱན་ལས་ནི། ཆོས་སྐུ་ནི་སྟོང་ཉིད་རྟོགས་པས་ནོར་བ་ཟད་དེ་འཁྲུལ་པ་ལོག་པ་ཙམ་ལ་མིང་ བཏགས་པ་ལས་མཚན་ཉིད་དང་མཚན་གཞིར་གྲུབ་པ་གང་ཡང་མི་མངའ་ལ། དེ་ཐོབ་པས་སྟོབས་སོགས་ཡོན་ཏན་ཐམས་ཅད་འདུ་བའི་ཕྱིར་རང་དོན་གྱི་སྐུའམ་སངས་རྒྱས་དངོས་ཡིན་ལ། དེ་ཐོབ་པ་ལྟ་ཞོག་དེ་ལ་མོས་པ་བྱས་པ་དང༌། ཅུང་

Page: 709 ༄༅། །ཟད་རྟོགས་པ་དང༌། ཕྱོགས་གཅིག་རྟོགས་པ་དང༌། ཕལ་ཆེར་རྟོགས་པ་རྣམས་ཀྱང་ཡོན་ཏན་རིམ་པ་ལྟར་ཅུང་ཟད་དང༌། མང་པོ་དང༌། དཔག་མེད་དང་ལྡན་ཏེ་སྦྱོར་ལམ་པ་དང༌། ཉན་རང་དང༌། ཕྱིར་མི་ལྡོག་པའི་བྱང་སེམས་རྣམས་ ཀྱི་ཡོན་ཏན་རྣམས་རིམ་པས་ཡིན་ལ། ལྡོག་པའི་ཆ་ནས་བཙལ་ན། སངས་རྒྱས་ཐམས་ཅད་ཀྱི་ཆོས་སྐུ་མཚུངས་པས་མཉམ་པ་དང༌། སྤྲོས་པ་དང་བྲལ་བས་ཟབ་པ་དང༌། འདུས་མ་བྱས་པས་རྟག་པ་དང༌། དབྱིངས་དང་ཡེ་ཤེས་ཐ་མི་དད་པས་དབྱེར་ མེད་པ་དང༌། ཡང་དག་པས་ཕྱིན་ཅི་མ་ལོག་པ་དང༌། དྲི་མ་མེད་པས་གཙང་བ་དང༌། རྣམ་པར་མི་རྟོག་པས་འོད་གསལ་བ་དང༌། ལོངས་སྤྱོད་རྫོགས་སྐུའི་རྟེན་དུ་གྱུར་པ་སྟེ་ཡོན་ཏན་བརྒྱད་དང་ལྡན་པ་སྟེ། རྒྱུད་བླའི། ཐོག་མ་དབུས་མཐའ་མེད་ཅིང་རྣམ་ དབྱེར་མེད། །སོགས་འདྲེན་པར་མཛད་དོ། །ེ་ལྟ་བུའི་རྫོགས་པའི་སངས་རྒྱས་དེ་ཉིད་གདུལ་བྱ་ལ་ཇི་ལྟར་སྣང་བའི་ཚུལ་ནི། སངས་རྒྱས་ཉིད་ནི་གཟུགས་སྐུར་སྣང་བ་དང་མི་སྣང་བ་གང་གི་དུས་ནའང་ཁྱད་པར་ཅུང་ཟད་ཀྱང་ མེད་པར། ཆོས་ཉིད་རང་གི་ངོ་བོ་ལས་གཡོ་བ་མི་མངའ་མོད་ཀྱང་ནམ་གདུལ་བྱའི་རྒྱུད་དག་པ་དེའི་ཚེ་གཟུགས་སྐུའི་སྣང་བ་འབྱུང་བ་སྟེ། ཡུམ་གྱི་རྒྱན་ལས། རྒྱུ་ནི་ཡོངས་སུ་སྨིན་གྱུར་ནས། །གང་དང་གང་ལ་གང་དང་ནི། །གང་ཚེ་ བྱ་བ་ཕན་གྱུར་པ། །དེ་དང་དེ་ལ་དེ་སྣང་ངོ༌། །ཞེས་སོ། །དེ་ལ་ལོངས་སྤྱོད་རྫོགས་པའི་སྐུ་ནི། སཾབྷོ་ག་ཀཱའ་ཡ་ཞེས་ཐེག་པ་ཆེན་པོ་འབའ་ཞིག་ལ་རྫོགས་པར་ལོངས་སྤྱོད་པའི་ཕྱིར། ལོངས་སྤྱོད་རྫོགས་སྐུ་ཞེས་བྱ་སྟེ། ཐེག་ཆེན་ཉེ་བར་ལོངས་སྤྱོད་ཕྱིར། །ཞེས་པ་ཉིད་དོ། །མཚན་ཉིད་ནི། མངོན་རྟོགས་རྒྱན་ལྟར་ན། སྐུ་མཚན་དཔེ་དང་ལྡན་ཞིང་ཐེག་ཆེན་འབའ་ཞིག་གསུང་བ་ནམ་ཡང་མྱ་ངན་ལས་མི་འདའ་བ་སྟེ། མཚན་ནི་སུམ་བཅུ་རྩ་

Page: 710 གཉིས་དང༌། །དཔེ་བྱད་བརྒྱད་ཅུའི་བདག་ཉིད་འདི། །ཐེག་ཆེན་ཉེ་བར་ལོངས་སྤྱོད་ཕྱིར། །ཐུབ་པའི་ལོངས་སྤྱོད་རྫོགས་སྐུར་བཞེད། །ཅེས་སོ། །ནམ་ཡང་མྱ་ངན་ལས་མི་འདའ་བ་ནི་དེང་སང་གི་རྩོད་ངོར་བསྣན་པ་སྟེ། ཐེག་གཅིག་ སྟོན་པའི་མཆོག་གི་སྤྲུལ་སྐུས་མ་ངེས་བ་སྤངས་བའི་ཕྱིར་རོ། །ཡང་ན་མཚན་ཉིད་ལྔ་ལྡན་གྱི་སྐུ་སྟེ། ཐེག་ཆེན་གྱི་ཆོས་མཐའ་ཡས་པ་ལ་རྫོགས་པར་ལོངས་སྤྱོད་པ་དང༌། རང་བཞིན་གྱི་སྐུ་མཚན་དཔེ་དང་ལྡན་པ་བྱང་འཕགས་ལ་རྟག་ཏུ་སྣང་ བ་དང༌། འགྲོ་དོན་རྒྱུན་མི་འཆད་པ་དང༌། འབད་མེད་དུ་གདུལ་བྱའི་འདོད་པ་སྐོང་བ་དང༌། ནོར་བུ་ཚོན་དང་ཉེ་བ་ལྟར་དེའི་ངོ་བོ་མིན་པའི་ཆོ་འཕྲུལ་སྣ་ཚོགས་པ་སྟོན་པ་སྟེ་ལྔ་དང་ལྡན་པའོ། །ཇི་སྐད་དུ། རྒྱུད་བླར། སྣ་ཚོགས་ཆོས་ལ་རྫོགས་ ལོངས་སྤྱོད། །རང་བཞིན་ཆོས་འདི་སྣང་ཕྱིར་དང༌། །ཐུགས་རྗེས་དག་པའི་རྒྱུ་མཐུན་པ། །འགྲོ་དོན་རྒྱུན་མི་འཆད་ཕྱིར་དང༌། །རྣམ་པར་རྟོག་མེད་ལྷུན་གྲུབ་པར། །འདོད་བ་ཇི་བཞིན་ཡོངས་སྐོང་ཕྱིར། །ཡིད་བཞིན་ནོར་བུའི་ རྫུ་འཕྲུལ་གྱིས། །རྫོགས་པར་ལོངས་སྤྱོད་རྣམ་པར་གནས། །ཞེས་གསུངས་ཤིང༌། དེའི་དོན་བསྡུ་བའི་ཕྱིར། བརྗོད་དོན་མཛད་རྒྱུན་མི་འཆད་དང༌། །མངོན་པར་འདུ་བྱེད་མེད་པ་དང༌། །དེ་ཡི་ངོ་བོ་མིན་སྟོན་ལ། །འདིར་ནི་ སྣ་ཚོགས་རྣམ་ལྔར་བརྗོད། །ཅེས་སོ། །འདིར། སྣ་ཚོགས་ཆོས་ལ་རྫོགས་ལོངས་སྤྱོད། །ཅེས་སྣ་ཚོགས་སུ་བསྒྱུར་མོད་ཀྱང་སྣ་ཚོགས་པའམ་བི་ཤྭ་དོན་ཤིན་ཏུ་མང་པོ་ལ་ཡང་འཇུག་ཅིང༌། ཤིན་ཏུ་མང་པོ་ནི་གྲངས་མཐའ་ཡས་ པའི་དོན་ཡིན་པས་ཐེག་ཆེན་གྱི་ཆོས་མཐའ་ཡས་པ་ལ་ལོངས་སྤྱོད་པའི་དོན་ཅན་ཡིན་ལ། བརྗོད་བྱ་ནི་དེ་ཁོ་ན་ཉིད་དུ་གཅིག་པས་སྤྲུལ་སྐུ་ལྟར་ཆོས་སྣ་ཚོགས་སྟོན་པ་ལ་གོ་བར་མི་བྱ་ལ། དེས་ན། མཐའ་ཡས་ཆོས་རྫོགས་ལོངས་

Page: 711 ༄༅། །སྤྱོད་དང༌། །ཞེས་བསྒྱུར་ན་བཟང་བར་སྣང་ངོ༌། །ཡང་ན་རང་བཞིན་གྱི་སྐུ་དང་སྤྲུལ་པའི་སྐུ་ལས་རྣམ་པ་དྲུག་གིས་ཐ་དད་པའི་སྐུ་སྟེ། ལོངས་སྤྱོད་རྫོགས་པ་ཁམས་ཀུན་ཏུ། །འཁོར་ཡོངས་སྡུད་དང་ཞིང་དང་ མཚན། །སྐུ་དང་ཆོས་རྫོགས་ལོངས་སྤྱོད་དང༌། །མཛད་པ་དག་གིས་ཐ་དད་དོ། །ཞེས་པ་ལ་དབྱིག་གི་ཞབས་ཀྱི་འགྲེལ་པར། འཁོར་སྡུད་བ་ཐ་དད་དེ། ལོངས་སྐུའི་འཁོར་མ་འདྲེས་པའོ། །ཞིང་ཐ་དད་དེ། གསེར་དང་དངུལ་ དང་བཻཌཱུརྱ་ལ་སོགས་པའི་རང་བཞིན་གྱིས་ཐ་དད་དོ། །མཚན་ཐ་དད་དེ། རྣམ་སྣང་དང་འོད་དཔག་ཏུ་མེད་པ་ལ་སོགས་པའོ། །སྐུ་ཐ་དད་དེ། སྐུའི་ཁ་དོག་དང་ཚད་ལ་སོགས་པའོ། །ཆོས་ལ་རྫོགས་པར་ལོངས་སྤྱོད་པ་ཐ་དད་དེ། ཁ་ཅིག་མདོ་པདྨ་ དཀར་པོ་དང་ཁ་ཅིག་ས་བཅུ་པ་སོགས་གསུང་བའོ། །མཛད་པ་ཐ་དད་དེ། སོ་སོའི་འཁོར་ཐ་དད་དུ་སྨིན་པར་མཛད་པའོ། །ཞེས་པའི་དོན་དུ་བཀྲལ་ལ། འདིར་ཐ་དད་པ་དྲུག་གིས་ཆོས་སྐུ་མཉམ་པ་ལས་ཁྱད་པར་འབྱེད་ཅིང༌། མཛད་ པ་ཐ་དད་པས་སྤྲུལ་སྐུ་ལས་བྱེ་བྲག་ཏུ་འབྱེད་པ་སྟེ་སྤྲུལ་སྐུ་ནི་མཛད་པ་མཚུངས་པར་འཆད་པའི་ཕྱིར་རོ། །གལ་ཏེ་ལོངས་སྐུ་རྣམས་ཞིང་ཐ་དད་ན་ཞིང་ངེས་པ་འོག་མིན་དུ་བཤད་པ་དང་འགལ་ཞིང༌། སྐུ་ཐ་དད་ན་སྐུ་ངེས་པར་ བཤད་པ་དང་འགལ་ལོ་ཞེ་ན། སྤྱིར་ངེས་པ་ལྔ་ནི་ལོངས་སྐུ་རེ་རེའི་དབང་དུ་བྱས་ནས་གསུངས་ལ། ཐ་དད་པ་དྲུག་ནི་ལོངས་སྐུ་ཐམས་ཅད་ཀྱི་དབང་དུ་བྱས་ནས་གསུངས་ཤིང༌། ཞིང་ཐ་དད་ཀྱང་དེ་ཐམས་ཅད་འོག་མིན་དུ་མཚུངས་ལ། འོག་མིན་དེ་ཡང་བསམ་གྱིས་མི་ཁྱབ་པ་ཆོས་ཀྱི་དབྱིངས་སུ་མཚུངས་པས་གནས་ངེས་པ་དང་ཡང་མི་འགལ་ལོ། །སྐུ་ནི་མཚན་དཔེ་ཅན་དུ་མཚུངས་ལ། འོད་དང་ཁ་དོག་དང་སྐུའི་ཚད་ལ་སོགས་པས་ཐ་དད་པའོ། །འོ་ན་སྤྲུལ་

Page: 712 སྐུ་དང་ཁྱད་མེད་དུ་འགྱུར་རོ་ཞེ་ན། ཡབ་ཡུམ་དང༌། གདུང་དང༌། བསོད་སྙོམས་ལ་གཤེགས་པ་དང༌། མྱ་ངན་ལས་འདའ་བ་སོགས་སྟོན་མི་སྟོན་གྱི་ཁྱད་པར་ཡོད་དོ། །དེས་ན་གནས་ངེས་པ་འོག་མིན་དང༌། སྐུ་ངེས་པ་ལོངས་སྐུའི་མཚན་ དཔེ་ཅན་དང༌། ཆོས་ངེས་པ་ཐེག་ཆེན་ཁོ་ན་གསུང་ཞིང༌། དུས་ངེས་པ་སྲིད་པ་ཇི་སྲིད་པར་གནས་པ་ཡིན་ལ། འཁོར་ངེས་པ་སྤྱིར་ས་བཅུའི་བྱང་ཆུབ་སེམས་དཔའ་ལ་སྣང་ཞིང་བྱེ་བྲག་ཏུ་སློབ་དཔོན་ཆོས་བཤེས་ཀྱིས། ས་བཅུ་པ་བ་ཁོ་ན་ལ་སྣང་ བ་ལོངས་སྐུ་གཙོ་བོ་དང༌། ས་དང་པོ་བ་ཡན་ལ་སྣང་བ་ཕལ་པ་སྟེ་གཙོ་ཕལ་གྱི་རྣམ་བཞག་བྱས་ཤིང༌། བདེན་གཉིས་ནས་ཞིང་ཁམས་ཡོངས་སུ་དག་པ་ས་བརྒྱད་པ་ན་ཡོད་པས་དེ་ཡན་ལ་སྣང་བ་དང༌། སྐུ་གསུམ་ལ་འཇུག་ པའི་མདོ་འགྲེལ་ལས། མཐོང་ལམ་གྱི་སྔ་ལོགས་ཆོས་མཆོག་ནས་སྣང་བར་ཡང་བཤད་མོད་ཀྱི་གཙོ་བོར་ས་ཐོབ་པ་ལ་སྣང་བ་ཉིད་བཟུང་ངོ༌། །ཐར་རྒྱན་ལས་ནི། འཁོར་ཞིང་སྐུ་མཚན་མཛད་པ་ཆོས། །ལྷུན་གྱིས་གྲུབ་ དང་རང་བཞིན་མེད། །དེ་ལྟར་མཚན་ཉིད་བརྒྱད་ལྡན་དུ་བཞེད་དོ། །དེ་ལ་སྤྲུལ་སྐུ་ཙམ་གྱི་མཚན་ཉིད་ནི། ལོངས་སྐུའི་དངོས་ཀྱི་གདུལ་བྱར་མ་གྱུར་པའི་འགྲོ་བ་རྣམས་སྲིད་པ་ཇི་སྲིད་པར་གང་ལ་གང་འདུལ་གྱིས་འདུལ་བའི་སྐུ་ནི་ སྤྲུལ་པའི་སྐུ་སྟེ། ཡུམ་རྒྱན་ལས། གང་གིས་སྲིད་པ་ཇི་སྲིད་པར། །འགྲོ་ལ་ཕན་པ་སྣ་ཚོགས་དག །མཉམ་དུ་མཛད་པའི་སྐུ་དེ་ནི། །ཐུབ་པའི་སྤྲུལ་སྐུ་རྒྱུན་མི་འཆད། །ཅེས་དང༌། རྒྱན་ལས། སངས་རྒྱས་སྤྲུལ་ པ་དཔག་མེད་པ། །སྤྲུལ་པའི་སྐུར་ནི་འདོད་པ་སྟེ། །ཞེས་སོ། །དབྱེ་ན། རྒྱན་ལས། བཟོ་དང་སྐྱེ་དང་བྱང་ཆུབ་ཆེ། །མྱ་ངན་འདས་པ་རྟག་སྟོན་པས། །སངས་རྒྱས་སྤྲུལ་པའི་སྐུ་འདི་ལ། །རྣམ་པར་གྲོལ་བའི་ཐབས་

Page: 713 ༄༅། །ཆེན་པོ། །ཞེས་པ་ལྟར་གསུམ་ལས། བྱང་ཆུབ་ཆེན་པོ་སྟོན་པ་མཆོག་གི་སྤྲུལ་པའི་སྐུའི་མཚན་ཉིད་ནི། གདུལ་བྱ་སྨིན་པ་ལ་སྤྲུལ་སྐུར་འཚང་རྒྱ་བའི་མཛད་པ་སྟོན་ཞིང་བསླབ་པ་བཅའ་བ་དང༌། ཆོས་འཁོར་ བསྐོར་བས་བསྟན་པའི་བདག་པོའི་ཕྲིན་ལས་མཛད་པ་སྟེ། ཐུགས་རྗེ་ཆེན་པོས་འཇིག་རྟེན་མཁྱེན། །འཇིག་རྟེན་ཀུན་ལ་གཟིགས་ནས་ནི། །ཆོས་ཀྱི་སྐུ་ལས་མ་གཡོས་པར། །སྤྲུལ་པའི་རང་བཞིན་སྣ་ཚོགས་ཀྱི། །སྐྱེ་བ་ མངོན་པར་སྐྱེ་བ་དང༌། །དགའ་ལྡན་གནས་ནི་འཕོ་བ་དང༌། །ལྷུམས་སུ་འཇུག་དང་བལྟམས་པ་དང༌། །བཟོ་ཡི་གནས་ལ་སྦྱོང་བ་དང༌། །བཙུན་མོའི་འཁོར་དགྱེས་རོལ་བ་དང༌། །ངེས་འབྱུང་དཀའ་བ་སྤྱོད་པ་དང༌། །བྱང་ཆུབ་སྙིང་ པོར་གཤེགས་པ་དང༌། །བདུད་སྡེ་འཇོམས་དང་རྫོགས་པ་ནི། །བྱང་ཆུབ་ཆོས་ཀྱི་འཁོར་ལོ་དང༌། །མྱ་ངན་འདའ་བར་གཤེགས་མཛད་རྣམས། །ཡོངས་སུ་མ་དག་ཞིང་རྣམས་སུ། །སྲིད་པ་ཇི་སྲིད་གནས་པར་སྟོན། ། ཞེས་སོ། །འདུལ་བ་ལ་བསླབ་པའི་གཞི་བཅའ་བ་ནི་སྟོན་པ་ལས་གཞན་སུས་ཀྱང་མི་ནུས་པས་ཐེག་པ་རྣམས་ཀྱི་འདུལ་བ་དང་སྦྱར་ཏེ་མཚན་ཉིད་དུ་སྨོས་སོ། །འདི་རྣམས་ཀྱང་གཙོ་ཆེ་བའི་དབང་དུ་བྱས་ཀྱི་མཆོག་གི་སྤྲུལ་སྐུ་ མ་ལུས་པ་ནི་འདི་ལྟར་མི་ལྟ་སྟེ། དག་པའི་ཞིང་ཁ་ཅིག་ན་བྱང་ཆུབ་སེམས་དཔའ་པདྨ་ལས་བརྫུས་ཏེ་སྐྱེ་ཞིང༌། དེ་མ་ཐག་ཏུ་བྱང་ཆུབ་ཀྱི་ཤིང་དྲུང་དུ་འཚང་རྒྱ་བས་བཟོ་དང་རོལ་རྩེད་སོགས་མི་སྟོན་པ་དང༌། བྱང་ཆུབ་སེམས་ དཔའ་བྱམས་པ་དཀའ་བ་སྤྱོད་པ་དང༌། བདུད་འདུལ་བ་མེད་པར་འཚང་རྒྱ་བ་དང༌། སངས་རྒྱས་ཁ་གཅིག་འོད་དང་བྱིན་རླབས་ཙམ་གྱིས་འདུལ་བས་ངག་ཚིག་གིས་ཆོས་མི་སྟོན་པ་ཡོད་ཅིང༌། དག་པའི་ཞིང་རྣམས་ན་ནི་བསླབ་པ་བཅའ་

Page: 714 བའང་མེད་མོད་ཀྱི། འོན་ཀྱང་སྤང་བླང་སོགས་འོད་དང་བྱིན་རླབས་ལས་རིག་པར་འགྱུར་བས་བསླབ་པ་བཅའ་བ་དང༌། ཆོས་འཁོར་བསྐོར་བའི་དོན་དང་དགོས་པ་ནི་གྲུབ་པར་འགྱུར་རོ། །དེས་ན། ཡོངས་སུ་མ་དག་ཞིང་རྣམས་སུ། །ཞེས་པའང་ ལོངས་སྐུའི་ཞིང་ལ་བལྟོས་ན་སྤྲུལ་སྐུའི་ཞིང་ནི་རགས་པ་ཐོགས་བཅས་སུ་སྣང་ཞིང༌། སྐྱེ་འཇིག་བྱེད་པ་སོགས་ཀྱིས་མ་དག་པ་ཡིན་པར་དགོངས་པ་སྟེ། སྤྱིར་སྤྲུལ་སྐུའི་ཞིང་ཉིད་ལ་ནི་ཡོངས་སུ་མ་དག་པ་དང༌། ཡོངས་སུ་དག་ལ་ཀུན་ ནས་ཉོན་མོངས་པ་དང༌། ཀུན་ནས་ཉོན་མོངས་ལ་ཡོངས་སུ་དག་པ་དང་སྣྲེལ་ཞི་དང་སྤྱིའུ་ཚུགས་ཀྱི་ཞིང་སོགས་དུ་མར་གསུངས་སོ། །དེ་ལ་བཟོ་སྤྲུལ་པའི་སྐུ་ནི། ལྷའི་བུ་ལས་ཐམས་ཅད་པ་སོགས་དང༌། སྐྱེ་བ་སྤྲུལ་པའི་སྐུ་ནི། གང་ ལ་གང་གིས་འདུལ་བ་ངན་སོང་གི་རྣམ་པའི་བར་དང༌། དེ་བཞིན་དུ་གཟིངས་དང་ཟམ་པ་སོགས་བེམ་པོའི་རྣམ་པ་སོགས་ཚད་མེད་པར་སྣང་བས་འགྲོ་བའི་དོན་བྱེད་པ་ཡིན་ཏེ། ཕལ་ཆེན་ལས། ས་དང་ཆུ་དང་མེ་དང་རླུང་གིས་ ཀྱང་སངས་རྒྱས་བཅོམ་ལྡན་འདས་རྣམས་སེམས་ཅན་ལ་ཕྲིན་ལས་སྒྲུབ་བོ་ཞེས་དང༌། སངས་རྒྱས་བཅོམ་ལྡན་འདས་ཀྱི་སྤྱན་གྱི་སྐྱེ་མཆེད་ཀྱིས་སངས་རྒྱས་ཀྱི་ཕྲིན་ལས་གང་སྒྲུབ་པ་དེ་སྙན་གྱི་སྐྱེ་མཆེད་ཀྱིས་ཀྱང་སྒྲུབ་པར་མཛད་ དོ། །དེ་བཞིན་དུ་ཤངས་ལྗགས་སྐུ་ཐུགས་རྣམས་ལ་སྦྱར་ནས་ཐུགས་ཀྱི་སྐྱེ་མཆེད་ཀྱིས་ཕྲིན་ལས་གང་སྒྲུབ་པ་དེ་འཇིག་རྟེན་གྱི་ཁམས་མ་ལུས་པ་ཐམས་ཅད་ཀྱི་དམིགས་པ་དང༌། འཇིག་རྟེན་དང༌། འཇིག་རྟེན་ལས་འདས་པ་སྣ་ཚོགས་ རྣམ་པར་ཕྱེ་བ་ཐམས་ཅད་ཀྱིས་སྒྲུབ་པར་མཛད་དོ་ཞེས་སོ། །སྐྱེ་བ་སྤྲུལ་པའི་སྐུ་ཞེས་པའང་གཞན་ངོར་སྐྱེ་བ་ལ་སོགས་པར་སྣང་བས་དེར་བརྗོད་པ་སྟེ། སངས་རྒྱས་ཉིད་དེར་སྐྱེ་བ་ནི་མ་ཡིན་ཏེ། ཡང་སྲིད་པ་སྤངས་པའི་ཕྱིར་རོ། །

Page: 715 ༄༅། །མཆོག་གི་སྤྲུལ་སྐུའི་དབང་དུ་མཛད་ནས། བྱང་ས་ལས། རྣམ་པ་བཅུས་དེ་བཞིན་གཤེགས་པ་དེ་དག་གི་ཡོན་ཏན་བརྗོད་པ་དང་རྗེས་སུ་དྲན་པ་ཡིན་ཏེ། བཅུ་པོ་གང་ཞེ་ན། འདི་ལྟར་བཅོམ་ལྡན་འདས་དེ་ནི། དེ་ བཞིན་གཤེགས་པ། དགྲ་བཅོམ་པ། ཡང་དག་པར་རྫོགས་པའི་སངས་རྒྱས། རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་བསྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་ རྒྱས། བཅོམ་ལྡན་འདས་ཞེས་བྱ་སྟེ། དེ་ལ་ཕྱིན་ཅི་མ་ལོག་པ་གསུང་བས་ན་དེ་བཞིན་གཤེགས་པའོ། །ཞེས་སོགས་གསུངས་ཏེ། མཆོད་པར་འོས་པས་ན་དགྲ་བཅོམ་པ། ཇི་ལྟ་བ་བཞིན་ཐུགས་སུ་ཆུད་པས་ཡང་དག་པར་རྫོགས་པའི་ སངས་རྒྱས། རིག་པ་གསུམ་དང་ཞབས་ཞི་ལྷག་གཉིས་དང་གཉི་གའི་ཕྱོགས་དང་ལྡན་པས་རིག་པ་དང་ཞབས་སུ་ལྡན་པ། མཆོག་ཏུ་ཁྱད་ཞུགས་པ་དང་མི་ལྡོག་པར་གཤེགས་པས་བདེ་བར་གཤེགས་པ། སེམས་ཅན་དང་འཇིག་ རྟེན་གྱི་ཁམས་ཀྱི་ཀུན་ཉོན་དང་རྣམ་བྱང་གི་རྣམ་པ་ཐམས་ཅད་མཁྱེན་པས་འཇིག་རྟེན་མཁྱེན་པ། སེམས་དུལ་བའི་ཐབས་དམ་པ་མཁྱེན་ཞིང་འཇིག་རྟེན་ན་སྐྱེས་བུ་གཅིག་པུར་གྱུར་པས་སྐྱེས་བུ་འདུལ་པའི་ཁ་ལོ་བསྒྱུར་བ་བླ་ན་ མེད་པ། མིག་དང་ཡེ་ཤེས་དང་དོན་དང་ཆོས་སུ་གྱུར་པའི་ཕྱིར་དོན་གསལ་བ་གཏན་ལ་འབེབས་པ་དང་དོན་ཐམས་ཅད་སྟོན་ཞིང་མི་རྟོགས་པ་རྟོགས་པར་མཛད་པ་དང་ཐེ་ཚོམ་གཅོད་ཅིང་ཟབ་མོའི་གནས་རྣམ་པར་འགྲེལ་ལ་ཡོངས་ སུ་བྱང་བར་མཛད་པ་དང་ཆོས་ཐམས་ཅད་ཀྱི་རྩ་བ་ཡིན་པ་དང་དེས་འདྲེན་ཞིང་ལྷ་མི་ཐམས་ཅད་ལ་སྡུག་བསྔལ་ལས་འབྱུང་ཐབས་སྟོན་པས་ན་ལྷ་དང་མི་ཐམས་ཅད་ཀྱི་སྟོན་པ། དོན་དང་ལྡན་པ་དང་མི་ལྡན་པ་དང་གཉི་ག་མ་ཡིན་

Page: 716 པའི་ཆོས་ཀྱི་ཚོགས་རྣམ་པ་ཐམས་ཅད་དུ་མངོན་པར་རྫོགས་པར་ཐུགས་སུ་ཆུད་པས་ན་སངས་རྒྱས། བདུད་དཔུང་བཅས་ཐམས་ཅད་ཀྱི་གཡུལ་ཆེན་པོ་བཅོམ་པའི་ཕྱིར་བཅོམ་ལྡན་འདས་ཞེས་བྱ་བར་བཤད་དོ། །དེ་ལ་སྐུ་རྣམས་ ཀྱི་འབྱུང་བ་ནི། ཆོས་ཀྱི་སྐུ་ནི། འབྱུང་བ་དང་མི་འབྱུང་བའི་སྤྲོས་པ་ཉེ་བར་ཞི་བ་ཡིན་ལ། ལོངས་སྤྱོད་རྫོགས་པའི་སྐུ་ནི། ནམ་མཁའ་ཇི་སྲིད་པ་ཐམས་ཅད་དུ་རྟག་པར་སྣང་བ་ཞེས་བྱ་སྟེ། འོན་ཀྱང་སྣང་བ་པོའི་སེམས་དཔའ་དེ་སངས་རྒྱས་ པ་ཕྱིན་ཆོས་སྐུ་ཇི་ལྟ་བ་ཉིད་ལས་དེའི་ངོར་གཟུགས་སྐུར་མི་སྣང་མོད་ཀྱང་ཆོས་སྐུ་དེ་ཉིད་ལ་བྱང་སེམས་གཞན་གྱིས་ལོངས་སྐུར་སྣང་བ་རྒྱུན་མི་འཆད་པའི་ཕྱིར་དེ་སྐད་དུ་བརྗོད་དོ། །མཆོག་གི་སྤྲུལ་སྐུ་ནི། མུན་པའི་བསྐལ་པ་ཐམས་ཅད་ ལ་མི་འབྱུང་ཞིང༌། མུན་བསྐལ་མང་པོ་སོང་བའི་མཚམས་ཀྱི་སྒྲོན་མེའི་བསྐལ་པ་རྣམས་ལ་འབྱུང་སྟེ། བསྐལ་པ་གཅིག་ལ་སངས་རྒྱས་གཅིག་ཁོ་ན་འབྱུང་བ་དེའི་སྐུ་ཚེ་དང་བསྟན་པས་བསྐལ་པ་དེ་འཁྱོངས་པ་ནས་བསྐལ་པ་གཅིག་ལ་སངས་ རྒྱས་གངྒཱ་ཀླུང་གི་བྱེ་མ་སྙེད་མང་པོ་འབྱུང་བའི་བར་ཡང་ཡོད་ལ། རྟེན་གྱི་གཙོ་བོ་ཡིན་ལ་བློ་གསལ་བའི་ཕྱིར་མི་རྣམས་ཀྱི་ནང་དང༌། སྐྱེས་པའི་རྟེན་གྱིས་འཚང་རྒྱ་བར་མཛད་ཀྱི་འགྲོ་བ་གཞན་དང་བུད་མེད་ཀྱི་རྟེན་གྱིས་ཀྱང་མ་ཡིན་ནོ། ། བྱང་ཆུབ་སེམས་དཔའ་མང་དུ་སངས་རྒྱས་པ་རྣམས་སངས་རྒྱས་པའི་ཚེ་གཅིག་གམ་ཐ་དད་ཅེ་ན། གང་ཡང་མིན་ཏེ། རྒྱན་ལས། ཆོས་ཀྱི་དབྱིངས་ན་སངས་རྒྱས་རྣམས། །གཅིག་མིན་མང་པོ་ཡང་མ་ཡིན། །སྔོན་གྱི་ལུས་རྗེས་ འབྲེང་ཕྱིར་དང༌། །མཁའ་ལྟར་ལུས་ནི་མེད་ཕྱིར་རོ། །ཞེས་དང༌། རིགས་ཐ་དད་ཕྱིར་དོན་ཡོད་ཕྱིར། །རྫོགས་ཕྱིར་ཐོག་མ་མེད་པའི་ཕྱིར། །སངས་རྒྱས་གཅིག་མིན་དྲི་མེད་གནས། །ཐ་དད་མེད་ཕྱིར་མང་པོའང་མིན། །

Page: 717 ༄༅། །ཞེས་སོ། །ཞིང་གཅིག་ཏུ་སངས་རྒྱས་གཅིག་ཁོ་ན་འབྱུང་སྟེ། བདག་འཇིག་རྟེན་འདྲེན་པ་མེད་པའི་ནང་དུ་བདག་འཇིག་རྟེན་གྱི་འདྲེན་པར་གྱུར་ཅིག་ཅེས་སྨོན་ལམ་བཏབ་པ་གྲུབ་པའི་ཕྱིར་དང༌། སངས་རྒྱས་གཅིག་ གིས་སྟོང་གསུམ་གྱི་ཞིང་དུ་སངས་རྒྱས་ཀྱི་ཕྲིན་ལས་ཐམས་ཅད་མཛད་པར་སྤྱོད་པས་གཉིས་པ་འབྱུང་བ་དོན་མེད་པ་དང༌། སངས་རྒྱས་གཅིག་པུ་ཉིད་མཐོང་ན་དཀོན་པའི་འདུ་ཤེས་ཀྱིས་ཆོས་མཉན་པར་འདུན་པ་སྐྱེ་ལ། མང་པོ་མཐོང་ན་ དེ་ཙམ་དུ་བརྩོན་པར་མི་འགྱུར་བའི་ཕྱིར་དང༌། ཟླ་མེད་པའི་ཚོགས་གཉིས་བསགས་པའི་ཕྱིར་རོ། །ཕྱོགས་བཅུའི་ཞིང་མཐའ་ཡས་པ་རྣམས་སུ་ནི་དུས་མཉམ་པར་དགའ་ལྡན་ནས་འཕོ་བ་ནས་མྱ་ངན་ལས་འདའ་བ་བསྟན་པ་གནས་ པ་སོགས་དུས་མཚུངས་ཤིང་མཚན་གཅིག་པ་ཁོ་ན་འང་གཞལ་དུ་མེད་པ་འབྱུང་སྟེ། སྔོན་བྱང་ཆུབ་སེམས་དཔའ་དཔག་ཏུ་མེད་པ་རྣམས་དུས་མཉམ་པར་ཅིག་ཆར་སེམས་བསྐྱེད་ཅིང༌། སྨོན་ལམ་མཚུངས་པ་རྣམས་ཞིང་ཐ་དད་པར་དུས་ ཅིག་ཏུ་འབྱུང་བའི་ཕྱིར་རོ། །དེ་བཞིན་དུ་དུས་མི་མཚུངས་པར་སྟོན་པ་ནི་དེ་བས་ཀྱང་ཆེས་གཞལ་དུ་མེད་ལ་སངས་རྒྱས་ཐམས་ཅད་ནི་གནས་བཞིས་ཐ་དད་དེ། ཁ་ཅིག་ནི་སྐུ་ཚེ་ཉིན་གཅིག་པ་སོགས་ཀྱང་སྟོན་ལ། ཁ་ཅིག་ནི་སྐུ་ཚེ་བསྐལ་ པ་གངྒ་ཀླུང་གི་བྱེ་སྙེད་ལས་ཀྱང་ཆེས་ལྷག་པར་བཞུགས་སོ། །དེ་བཞིན་དུ་སངས་རྒྱས་འོད་སྲུང་དང༌། སངས་རྒྱས་ཤཱཀྱ་ཐུབ་པ་ཞེས་བྱ་བ་ལ་སོགས་པ་མཚན་ཐ་དད་དོ། །ཁ་ཅིག་ནི་རྒྱལ་རིགས་དང༌། ཁ་ཅིག་ནི་བྲམ་ཟེའི་རིགས་སུ་འབྱུང་ཞིང་རིགས་ དེ་གཉིས་ལས་གཞན་ལ་ནི་མི་འབྱུང་སྟེ། རྗེ་རིགས་སོགས་འཇིག་རྟེན་ན་བཀུར་བའི་རིགས་མ་ཡིན་ལ། རིགས་གཉིས་པོ་དེ་ལས་རེས་བྲམ་ཟེའི་རིགས་མཆོག་ཏུ་འཛིན། རེས་རྒྱལ་རིགས་མཆོག་ཏུ་འཛིན་པས་གང་མཆོག་ཏུ་བཀུར་བའི་ཚེ་

Page: 718 རིགས་དེ་ཉིད་འཛིན་པ་སྟེ། ས་བཅུ་པ་བ་དེས། ིགས་དང་རུས་དང་ཆོ་འབྲང་དང༌། །འཁོར་དང་སྐྱེ་བ་དག་དང་ནི། །ངེས་འབྱུང་བྱང་ཆུབ་ཤིང་རྣམས་ཀྱི། །ཡོན་ཏན་ཕུན་སུམ་ཚོགས་པ་ཡིན། །ཞེས་པའི་ཡོངས་སྦྱོང་བསྒྲུབས་ པའི་ཕྱིར་དང༌། འཇིག་རྟེན་གྱིས་བརྙས་པ་སྤང་བའི་ཕྱིར་རིགས་རུས་ལ་སོགས་པའི་མཆོག་འཛིན་པའོ། །རྒྱལ་རིགས་ལ་ཡང༌། ཉི་མའི་རིགས་དང༌། ཟླ་བའི་རིགས་སོགས་ཐ་དད་དང༌། བྲམ་ཟེ་ལ། འོད་སྲུང་དང༌། བ་ར་དྷཱ་ཛ་དང༌། ཀ་ཏྱཱ་ན་སོགས་ ཏེ་གདུང་ཐ་དད་དོ། །ཁ་ཅིག་ནི་སྐུ་བོངས་ཐེ་བོང་གི་ཚད་ལ་སོགས་པར་སྟོན་ལ། ཁ་ཅིག་ནི་རི་རབ་གངྒཱ་ཀླུང་གི་ཕྱེ་མ་ལས་ལྷག་པའི་སྐུར་ཡང་སྟོན་པས་སྐུ་བོངས་ཐ་དད་དོ། །དེ་བཞི་ལས་གཞན་པ་ཐམས་ཅད་ཀྱིས་མཆོག་གི་ སྤྲུལ་སྐུ་ཐམས་ཅད་མཚུངས་ཤིང་མཉམ་སྟེ་ཁྱད་པར་ཅུང་ཟད་ཀྱང་མེད་དོ། །དེས་ན་སྒྲ་པ་སངྒྷ་ཤྲིས། པགས་པ་གསེར་མདོག་པགས་པ་སྲབ་པ་དང༌། ཞེས་པ་འགྱུར་ཉེས་ཏེ། པགས་པ་མདོག་བཟང་ཞེས་བསྒྱུར་དགོས་ཏེ། སྐུ་ མདོག་སྣ་ཚོགས་པ་ཡོད་པའི་ཕྱིར་ཞེས་དང༌། ཇོ་བོ་རྗེས་སངས་རྒྱས་ཐམས་ཅད་ཀྱི་རང་མདོག་ཛམྦུའི་གསེར་མདོག་ཏུ་འདུག་གསུང་ནས་རིགས་ལྔ་སེར་འཇམ་མཛད་པ་འགོག་པའི་ཕྱིར་དུ། གཞན་དག་གིས། སངས་རྒྱས་གསེར་ མདོག་ཞེས་བྱ་བ། །སངས་རྒྱས་ཕལ་ལ་དགོངས་པ་ཡིན། །གཞན་དུ་སྨན་བླ་ནམ་མཁའི་མདོག །སྔོན་པོ་ཉིད་དུ་མདོ་ལས་བཤད། །ཅེས་འཆད་པའང་སྙིང་པོར་མི་ཆེ་སྟེ། སྤྱིར་གསེར་ལ་སེར་པོས་མ་ཁྱབ་སྟེ། གསེར་ དམར་པོ་དང༌། སྔོན་པོ་སོགས་བཤད་ཅིང༌། གསེར་དམར་པོ་དངོས་སུ་མཐོང་བའི་ཕྱིར། འདིས་ནི་ནོར་ཉམས་ཙམ་ཡང་ཆུང་བར་བསྟན་ནོ། །ནམ་མཁའི་མདོག་སྔོན་པོར་འདོད་པ་ནི་འཇིག་རྟེན་མི་ནག་པའི་གཏམ་དུ་ཟད་དེ། གཞུང་ལུགས་

Page: 719 ༄༅། །པས་ནམ་མཁའ་དངོས་མེད་དུ་འདོད་ལ། ཁ་དོག་ནི་བེམ་པོའི་བྱེ་བྲག་ཁ་དོག་གི་གཟུགས་ཡིན་པས་དངོས་མེད་བེམ་པོར་འདོད་པ་ནི་གྲུབ་མཐའ་སྨྲ་བ་བཞིའི་ནང་ན་མེད་དོ། །ལྷོ་གླིང་གི་ནམ་མཁའ་སྔོན་པོ་སོགས་ བཤད་དོ་སྙམ་ན། དེ་ནི་རི་རབ་ཀྱི་ལྷོ་བཻཌཱུརྱའི་རང་བཞིན་དྭངས་པ་ལ་རྒྱ་མཚོའི་མདངས་ཕོག་པས་སྔོན་པོར་སྣང་བའི་འོད་ཀྱིས་བར་སྣང་གང་པའི་མདོག་ཏུ་བཤད་པ་ཡིན་གྱི་ནམ་མཁའ་ཉིད་སྔོན་པོར་གནས་པར་འཆད་པ་མ་ཡིན་ནོ། །དེ་ལྟ་ མོད་ཀྱི་བཻཌཱུརྱ་སྔོན་པོའ་ོསྙན་པའང་རིན་པོ་ཆེའི་བརྟག་པ་ལ་མི་མཁས་པར་ཟད་དེ། བཻཌཱུརྱ་དཀར་པོ་སོགས་དུ་མ་བཤད་པའི་ཕྱིར་དང༌། སྤྱིར་བཻཌཱུརྱ་ནི་ནམ་མཁའི་མིང་གི་རྣམ་གྲངས་ཡིན་པས་བཻཌཱུརྱ་མཆོག་རྣམས་ནི་ཁ་དོག་གང་ཡང་མ་ ཡིན་པ་ཁ་དོག་མེད་པའི་ཁ་དོག་ཅན་ཞེས་བཤད་པ་ཆུ་དྭངས་པའི་ཁ་དོག་ལྟ་བུ་ཡིན་ལ། ཅུང་ཟད་སྙིགས་མ་རྣམས་ལ་ནི་ཁ་དོག་ཐ་དད་པ་དུ་མར་སྣང་བ་ཡོད་དོ། །སྨན་བླ་སྔོན་པོར་བཤད་པའི་མདོ་བོད་ན་མི་སྣང་སྟེ། སྨན་མདོ་ གཉིས་ལ་ནི་བཻཌཱུརྱ་འོད་ཀྱི་རྒྱལ་པོ་ཞེས་པ་ནི་མཚན་དུ་བཤད་ཀྱི་སྐུ་མདོག་འཆད་བྱེད་མ་ཡིན་ལ། དེ་ལས་གཞན་ཡང་མི་སྣང་བའི་ཕྱིར། ངན་སོང་སྦྱོང་རྒྱུད་ཀྱི་རས་བྲིས་ལ་སྨན་གྱི་བླ་སྔོན་པོ་གཡས་མཆོག་སྦྱིན་གྱིས་ཨ་རུ་ར་འཛིན་པ་ བྲི་བར་བྱའོ། །ཞེས་གསུངས་པ་ནི་མདོ་སྔགས་ཕྱེ་བའི་སྔགས་ཡིན་གྱི་མདོ་མ་ཡིན་ནོ། །དེས་ན་སངས་རྒྱས་ཁ་དོག་ལྔ་དང་ས་གནོན་ལ་སོགས་པ་ལྔའི་ཕྱག་གི་སྟབས་སུ་བསྡུས་པ་ནི་གསང་སྔགས་ནས་སངས་རྒྱས་རྣམས་རིགས་ལྔར་ བསྡུས་པའི་རིགས་སོ་སོའི་སྐུ་མདོག་དང་ཕྱག་རྒྱ་ཐ་དད་དུ་སྦྱར་བ་ཡིན་གྱི་མདོའི་ལུགས་མ་ཡིན་ཏེ། མདོ་ལས། རིགས་ལྔའི་རྣམ་བཞག་གསུངས་པ་མ་མཐོང་བའི་ཕྱིར། སྔགས་ནས་གསུངས་པའི་སྤྲུལ་སྐུ་མདོའི་སངས་རྒྱས་ལ་སྦྱོར་

Page: 720 ན་ནི་སྐུ་མདོག་ནག་པོ་ཞལ་བརྒྱད་ཕྱག་བཅུ་དྲུག་པ་སོགས་ཀྱང་འཆད་དགོས་པར་འགྱུར་རོ། །དེས་ན་མདོའི་ལུགས་ཀྱིས་མཆོག་གི་སྤྲུལ་སྐུ་རྣམས་ཛམྦུ་ཆུ་བའི་གསེར་གྱི་ཁ་དོག་ལྟར་དཀར་སེར་དམར་གསུམ་གའི་མདངས་དང་ ལྡན་པར་མཚུངས་པ་ཡིན་ཏེ། བྱང་ས་ལས། དེ་ལ་སངས་རྒྱས་ཐམས་ཅད་ནི་གནས་བཞི་པོ་སྐུ་ཚེ་དང་མཚན་དང་གདུང་དང་སྐུ་མ་གཏོགས་པ་ཐམས་ཅད་མཚུངས་མཉམ་སྟེ་ཁྱད་པར་མེད་དོ། །ཞེས་གསུངས་ལ། གལ་ཏེ་སྐུ་མདོག་ ཐ་དད་ཡོད་ན་ཐ་དད་རྣམ་པ་ལྔ་འཆད་རིགས་པ་ལས་མ་བཤད་པའི་ཕྱིར་རོ། །མཛོད་ལས་ཀྱང༌། སངས་རྒྱས་ཐམས་ཅད་ཚོགས་དང་ནི། །ཆོས་སྐུ་འགྲོ་བའི་དོན་སྤྱོད་པས། །མཉམ་པ་ཉིད་དེ་སྐུ་ཚེ་དང༌། །རིགས་དང་སྐུ་ བོངས་ཚོད་ཀྱིས་མིན། །ཞེས་དང༌། དེའི་འགྲེལ་པར། སྐུ་ཚེ་དང༌། རིགས་དང༌། གདུང་དང༌། སྐུ་བོངས་ཚོད་དུ་བཅས་པ་ལ་ནི་བྱེ་བྲག་ཡོད་དེ། ཞེས་བཤད་ཀྱི་ཁ་དོག་ཐ་དད་པར་མ་བཤད་ལ། སྐུ་ཞེས་པའང་སྐུ་ཚད་ཡིན་གྱི་དེས་ཁ་ དོག་ཐོན་པ་མ་ཡིན་ནོ། །མཆོག་གི་སྤྲུལ་སྐུས་སྤྲུལ་པའི་སངས་རྒྱས་ལ་ནི་ཁ་དོག་ཐ་དད་སྣ་ཚོགས་ཀྱང་བཤད་ཅིང༌། གདུལ་བྱའི་དབང་གིས་དང་བྱིན་གྱིས་བརླབས་པའི་དབང་གིས་རྣམ་པ་གཞན་དུ་སྣང་བ་ནི་ཡོད་དོ། ེ་ཡང་འཇིག་ རྟེན་ཐམས་ཅད་ལས་ཁྱད་པར་དུ་འཕགས་པའི་ཕྱིར། སྐུའི་ཁྱད་པར། སྟོབས་ཀྱི་ཁྱད་པར། འོད་ཀྱི་ཁྱད་པར། ཆོ་འཕྲུལ་གྱི་ཁྱད་པར། གསུང་གི་ཁྱད་པར། མ་འདྲེས་པའི་ཆོས་ཀྱི་ཁྱད་པར་ཏེ་རྣམ་པ་དུ་མ་དང་ལྡན་ནོ། ། དེ་ལ་སྐུ་ནི། མཚན་སོ་གཉིས་དང༌། དཔེ་བྱད་བརྒྱད་ཅུ་དང༌། རི་མོའི་རྗེས་བརྒྱད་ཅུར་ལྡན་པ་གསེར་བཙོ་མ་སྤུངས་པ་ལྟ་བུ་ལྟ་བས་ཆོག་མི་ཤེས་པ་མཐོང་ན་མི་མཐུན་པ་མེད་པའོ། །དེ་ལ་མཚན་སོ་གཉིས་ནི། ཡུམ་རྒྱན་ལས།

Page: 721 ༄༅། །ཕྱག་ཞབས་འཁོར་ལོའི་མཚན་དང་རུས་སྦལ་ཞབས། །ཞེས་སོགས་ཚིགས་བཅད་ལྔ་དང༌། རྒྱུད་བླར། ལེགས་གནས་འཁོར་ལོས་མཚན་པ་དང༌། །སོགས་ཚིགས་བཅད་དགུས་གསུངས་ཏེ། ཕྱག་ཞབས་ ཀྱི་མཐིལ་ཡོན་ཏན་ཡོངས་སུ་སྡུད་པའི་འཁོར་ལོ་རྩིབས་སྟོང་སོགས་བཀྲ་བ་མུ་ཁྱུད་ཅན་གྱིས་སྤྲས་པ་སྟེ་འཁོར་ལོས་བསྒྱུར་རྒྱལ་ལ་ནི་མུ་ཁྱུད་མེད་པ་མཚོན་ཆའི་འཁོར་ལོ་འབྱུང་བ་ལས་ཁྱད་པར་དུ་བྱེད་དོ། །ཞབས་མཐིལ་མེ་ལོང་ ལྟར་མཉམ་པར་ས་ལ་འབབ་པ་དང༌། སོར་མོ་རྣམས་དྲ་བས་འབྲེལ་བས་སྣོད་ཆེན་པོ་ལྟར་གནས་པ་དང༌། ཕྱག་ཞབས་པདྨའི་ལོ་མ་ལྟར་འཇམ་ཞིང་གཞོན་པ་དང༌། ཕྱག་ཞབས་ཀྱི་མཐེབ་ཆེན་གྱི་རྩ་བའི་སྐྱོང་བཞི། སྒྲོག་རུས་ཀྱི་སྐྱོང་གཉིས། ལྟག་པའི་སྐྱོང་སྟེ། བདུན་པོ་མི་མངོན་པར་ཤས་གང་བས་བདུན་མཐོ་བ་དང༌། སོར་མོ་རིང་བ་དང༌། རྟིང་པ་ཡངས་པས་ཞབས་སྟོད་སྨད་ཞེང་མཉམ་པ་དང༌། སྐུ་ཆེ་བས་འཁོར་གཞན་ལས་བཞི་འགྱུར་གྱིས་འཕགས་ཤིང་ དྲང་ལ་བརྟན་པ་དང༌། ཞབས་ཀྱི་ལོང་བུ་དང་པུས་མོའི་ལྷ་ང་དང་ཕྱག་ངར་གྱི་རུས་འབུར་རྣམས་མི་མངོན་པར་མཉམ་པ་དང༌། བ་སྤུའི་ཁུང་བུ་ཐམས་ཅད་རིན་པོ་ཆེ་འབར་བ་ལྟ་བུའི་བུ་ག་གྱེན་དུ་ཕྱོགས་པ་སྟེ་བཅུ་ཚན་གཅིག་གོ ། བྱིན་པ་རི་དྭགས་ཨེ་ཎྱའི་ལྟ་བུར་ཟླུམ་ཞིང་བྱིན་གྱིས་གཞོལ་བ་དང༌། ཕྱག་དེ་དང་འདྲ་བར་རིང་ཞིང་མཛེས་པ་མ་བཏུད་པར་པུས་མོར་སླེབ་པ་དང༌། འདོམས་ཀྱི་སྦ་བ་སྦུབས་སུ་ནུབ་སྟེ་མི་སྣང་བ་དང༌། པགས་པ་ཛམྦུ་ཆུ་བོའི་ གསེར་བཙོ་མའི་ཁ་དོག་ཏུ་འབར་བ་དྲི་མས་གོས་མི་སྲིད་པ་དང༌། པགས་པ་སྲབ་ཅིང་གཞོན་པ་དཔེ་མེད་པར་འཇམ་ལ་གཉེར་མ་དང་ལྷོད་འཁུམས་མེད་པ་དང༌། བ་སྤུ་རྣམས་བཻཌཱུརྱ་སྔོན་པོའི་མདོག་ཅན་ཕྲ་ཞིང་འོད་འཚེར་བ་རེ་རེ་

Page: 722 ཞིང་གཡས་སུ་འཁྱིལ་བ་དང༌། སྨིན་མཚམས་སུ་མཛོད་སྤུ་དཔེ་མེད་པར་དཀར་ཞིང་འོད་འཚེར་ལ་ཕྲ་ཞིང་འཇམ་པའི་སྤུ་སུམ་བཅུ་རྩ་གཉིས་ཚང་བ་འཐེན་ན་རིང་པོར་ཕྱིན་པ་གཡས་སུ་འཁྱིལ་ཏེ་གནས་པ་དང༌། སྐུ་སྟོད་སེང་གེའི་ རྒྱལ་པོ་ལྟར་ཡངས་ཤིང་རྒྱས་ལ་ཁོ་ལག་ཆེ་བ་དང༌། ཕྲག་མགོ་གཉིས་ཤིན་ཏུ་ལྷུན་ཆེ་ཞིང་ཟླུམ་པ་དང༌། ཕྲག་པའི་ཐལ་གོང་གཉིས་མི་དམའ་བར་རྒྱས་པ་སྟེ་བཅུ་ཚན་གཉིས་སོ། །འཇིག་རྟེན་ན་རོ་མི་ཞིམ་པར་གྲགས་པ་རྣམས་ ཀྱང་འདིའི་ལྗགས་ལ་རོ་བྲོ་བའི་མཆོག་ཏུ་སྣང་བ་དང༌། ནྱ་གྲོ་དྷའི་སྡོང་པོ་ལྟར་ཞེང་དུ་ཇི་ཙམ་པ་མཆུར་ཡང་དེ་ཙམ་པས་སྐུ་མཆུ་ཞེང་གབ་པ་དང༌། དབུའི་གཙུག་ཏོར་རང་གི་སོར་བཞིའི་ཚད་ཀྱིས་དབུས་དྲང་པོར་གྱེན་དུ་འཕགས་ཤིང་དབུ་སྐྲ་ཚོམ་བུ་ཚོམ་བུར་ འཁྱིལ་བའི་ཕྲེང་བས་གཙུག་ཏོར་གྱི་ངོས་དུང་གི་འཁྱིལ་ལྟར་རིམ་པ་ཕྱེད་དང་བཅུ་གསུམ་དུ་འཁྱིལ་བའི་རྩེ་མོའི་གཙུག་འཁྱིལ་ནི་ལྷ་མི་སུས་ཀྱངམཐོང་བར་མི་ནུས་པ་དང༌། ལྗགས་རིང་ཞིང་མཛེས་པ་བརྐྱང་ན་གདོང་ཁེབས་པ་དང༌། ཚངས་པའི་དབྱངས་མངའ་བ་དང༌། ཟ་འགྲམ་སེང་གེ་ལྟར་རྒྱས་པ་དང༌། ཚེམས་ཤིན་ཏུ་དཀར་བ་དྲི་མ་དང་ཟས་ཀྱིས་གོས་མི་སྲིད་པ་དང༌། ཚེམས་རིང་ཐུང་དང་ཆེ་ཆུང་མེད་པར་ཤིན་ཏུ་མཉམ་པ་དང༌། ཚེམས་ཐགས་བཟང་བས་འགུལ་མི་སྲིད་ཅིང་ཟས་ཤིན་ ཏུ་སྲ་བའང་ལན་གཉིས་པ་བལྡད་མི་དགོས་པ་དང༌། མཆེ་བ་བཞི་དང་བཅས་པའི་གྲངས་བཞི་བཅུར་ཚང་བ་དང་བཅུ་ཚན་གསུམ་མོ། །སྤྱན་དཀར་ནག་འབྱེས་ཤིང་སྤྱན་འབྲས་ཤིན་ཏུ་མཐོན་ཏིང་འོད་དང་ལྡན་པ་དང༌། རྫི་མ་བ་མཆོག་གི་རྫི་མ་ལྟར་གནག་ཅིང་སྟུག་པ་སྟེ་སུམ་བཅུ་རྩ་གཉིས་སོ། །འདི་ལ་ཡུམ་རྒྱན་དུ་སྐུ་ཆེ་ཞིང་དྲང་བ་དབྱེ་ངོར་མཛད་དེ་འོད་མི་ཐེ་བའི་སོ་གཉིས་སུ་གསུངས་པ་ནི་ཤེར་ཕྱིན་གྱི་མདོའི་

Page: 723 ༄༅། །ལུགས་དང༌། རྒྱུད་བླར་སྐུ་ཆེ་ཞིང་དྲང་པ་དབྱེ་ངོར་མ་མཛད་པར། འོད་ཀྱི་དཀྱིལ་འཁོར་དང་ལྡན་དང༌། །ཞེས་བགྲངས་པ་ནི་བུ་མོ་རིན་ཆེན་གྱི་མདོའི་དགོངས་པའོ། །མཚན་རྣམས་ཀྱི་རྒྱུ་ཡང༌། བླ་མ་ སྐྱེལ་ལ་སོགས་པ་དང༌། །ཞེས་སོགས་ཀྱིས་སྔོན་བླ་མ་ལ་གསུ་ཞིང་སྐྱེལ་བ་སོགས་ཀྱིས་འཁོར་ལོའི་མཚན་ཐོབ་པ་དང༌། སྡོམ་པ་བརྟན་པས་ཞབས་མཉམ་པ་སོགས་ཏེ་རྒྱས་པར་མདོར་བལྟའོ། །དཔེ་བྱད་ཀྱང༌། ཐུབ་པའི་ སེན་མོ་ཟངས་མདོག་དང༌། །ཞེས་སོགས་ཚིགས་བཅད་བཅུ་གཉིས་ཀྱིས་གསུངས་ཏེ། སྐུ་བཅུད་ཀྱིས་རྒྱས་པའི་ཕྱིར་སེན་མོ་ཟངས་མདོག་ལྟར་དམར་བ་དང༌། མདོག་སྣུམ་པ་དང༌། རིགས་མཐོན་པོར་འཁྲུངས་པས་རིང་ཞིང་མཐོ་བ་དང༌། སོར་མོ་རྣམས་ཟླུམ་པ་དང༌། རྒྱས་པ་དང༌། བྱིན་གྱིས་ཕྲ་བ་དང༌། སྐུ་ལ་རྩ་མི་མངོན་པ་དང༌། རྩ་མདུད་པ་མེད་པ་དང༌། ཞབས་ལོང་བུ་མི་མངོན་པ་དང༌། ཞབས་མཉམ་པ་སྟེ་བཅུ་ཚན་གཅིག་གོ །སེང་གེ་དང༌། གླང་པོ་ཆེ་དང༌། ངང་པ་དང༌། ཁྱུ་མཆོག་ གི་སྟབས་སུ་གཤེགས་པ་དང༌། གཡས་ཕྱོགས་སུ་ལྡོག་པ་དང༌། མཛེས་པ་དང༌། དྲང་པོར་གཤེགས་པ་དང༌། སྐུ་འཁྲིལ་བག་ཆགས་པ་དང༌། བྱི་དོར་བྱས་མ་ཐག་པ་ལྟ་བུ་དང༌། ལྟ་ན་འཚམ་པ་སྟེ་བཅུ་ཚན་གཉིས་སོ། །སྐུ་གཙང་བ་དང༌། འཇམ་ པ་དང༌། དག་པ་དང༌། མཚན་རྣམས་རྫོགས་པ་དང༌། ཁོ་ལག་ཡངས་པ་དང༌། གོམ་པ་སྙོམས་པ་དང༌། སྤྱན་དག་པ་དང༌། གཞོན་ཤ་ཆགས་པ་དང༌། སྐུ་ཤ་མ་ཞུམ་པ་དང༌། རྒྱས་པ་སྟེ་བཅུ་ཚན་གསུམ་པའོ། །སྐུ་ཤིན་ཏུ་གྲིམས་པ་དང༌། ཡན་ལག་རྣམ་ པར་འབྱེས་པ་དང༌། རབ་རིབ་མེད་པས་གཟིགས་པ་དག་པ་དང༌། ལྟ་ཟུར་ཟླུམ་པ་དང༌། སྐེད་སྐབས་ཕྱེད་པ་དང༌། ལྟོ་བ་མ་རྙོངས་པ་དང༌། ཕྱལ་ཕྱང་ངེ་བ་དང༌། ལྟེ་བའི་ཁུང་བུ་གཏིང་ཟབ་པ་དང༌། ནང་གཡས་ཕྱོགས་སུ་འཁྱིལ་པ་དང༌། སྐུ་ལྟ་ན་སྡུག་པ་

Page: 724 སྟེ་བཞི་བཅུའོ། །སྤྱོད་པ་གཙང་བ་དང༌། རྨེ་བའི་མཚན་ནི་མེད་པ་དང༌། ཕྱག་མཐིལ་འཇམ་པ་དང༌། ཕྱག་རིས་མདངས་ཆེ་བ་དང༌། གཏིང་ཟབ་པ་དང༌། དཀྱུས་རིང་བ་དང༌། ཞལ་གདོང་ཧ་ཅང་མི་རིང་བ་དང༌། མཆུ་བིམ་པ་ལྟར་དམར་བ་དང༌། ལྗགས་མཉེན་པ་ དང༌། སྲབ་པ་དང་ལྔ་བཅུའོ། །ལྗགས་དམར་བ་དང༌། གསུང་འབྲུག་སྒྲ་ལྟ་བུ་དང། གསུང་མཉེན་ཞིང་འཇམ་པ་དང། མཆེ་བ་བཞི་ཟླུམ་པ་དང། རྣོ་བ་དང། དཀར་བ་དང། བཞི་པོ་མཉམ་པ་དང། བྱིན་གྱིས་ཕྲ་བ་དང༌། ཤངས་རྒྱུད་མཐོ་བ་དང༌། ཤངས་སྦུབས་གཙང་བ་སྟེ་དྲུག་བཅུ་པའོ། །སྤྱན་ཡངས་པ་དང༌། རྫི་མ་སྟུག་པ་དང༌། སྤྱན་པད་འདབ་འདྲ་བ་དང༌། སྨིན་ཚུགས་རིང་བ་དང༌། སྨིན་མ་འཇམ་པ་དང༌། སྣུམ་པ་དང༌། སྤུ་མཉམ་པ་དང༌། ཕྱག་རིང་ཞིང་རྒྱས་པ་དང༌། སྙན་ཤལ་རིང་ ཞིང་མཉམ་པ་དང༌། གསན་པ་དག་པས་སྙན་མ་ཉམས་པ་སྟེ་བདུན་བཅུ་པའོ། །དཔྲལ་བ་ལེགས་པར་འབྱེས་པ་དང༌། དབྱེས་ཆེ་བ་དང༌། དབུ་གདུགས་ལྟར་རྒྱས་པ་དང༌། དབུ་སྐྲ་བུང་བ་ལྟར་གནག་པ་དང༌། ཚོགས་སྟུག་པ་དང༌། འཇམ་ཞིང་ ཕྲ་བ་དང༌། མ་འཛིངས་པ་དང༌། གྱེན་དུ་མི་གཤོར་བ་དང༌། དྲི་ཞིམ་ཞིང་ཡིད་འཕྲོག་པ་དང༌། ཐུགས་ཀ་དཔལ་གྱི་བེའུ་དང༌། ཕྱག་ཞབས་བཀྲ་ཤིས་ཀྱི་རྟགས་ཀྱིས་བརྒྱན་པ་ནི་བརྒྱད་ཅུ་པའོ། །མཆུ་ནི་བིམྤ་ལྟར་དམར་དང༌། །ཞེས་པ་ལ་ དག་ལྡན་ལས། ཞལ་གཟུགས་གཟུགས་བརྙན་འབྱུང་བ་དང༌། །ཞེས་བཏོན་ནས། ཞལ་ཞེས་བྱ་བ་ནི། ཞལ་གདོང་སྟེ་ཞལ་གདོང་ལ་གཟུགས་ཀྱི་གཟུགས་བརྙན་མངའ་བའོ། །ཞེས་ཞལ་རས་དངས་པ་ལ་ཕྱི་རོལ་གྱི་གཟུགས་ བརྙན་འཆར་བ་ལ་བཤད་དོ། །སྤྱིར་ལོང་བུ་མི་མངོན་པ་དང་ཞབས་མཉམ་པ་དང་རྫི་མ་སྟུག་པ་སོགས་མཚན་དཔེ་གཉིས་ཀར་བགྲངས་པ་རྣམས་མི་ཟློས་པའི་ཚུལ་མཁས་པ་རྣམས་ཀྱིས་བསམ་པར་རིགས་ལ་རྒྱལ་བའི་གསུང་ལ་

Page: 725 ༄༅། །ནི་ངེས་པར་འགལ་ཟློས་མི་སྲིད་དོ། །སྤྱིར་རང་རྒྱལ་རྣམས་ལའང་མཚན་དཔེའི་ཆ་མཐུན་ཙམ་རེ་དང༌། གཙུག་ཏོར་ཡོན་པོར་འབྱུང་བར་གྲགས་ཤིང་འཁོར་ལོས་བསྒྱུར་རྒྱལ་ལ་མཚན་དཔེ་ཐམས་ཅད་འབྱུང་ཡང་ སངས་རྒྱས་ལས་ཅུང་ཟད་མི་གསལ་ཞིང་མི་ལེགས་པ་དང་ཁྱད་པར་དུ་མཛོད་སྤུ་རྫོགས་པ་དང༌། གཙུག་ཏོར་དྲང་པོར་འཕགས་ཤིང་སྤུ་འཁྱིལ་ལྟར་མི་མངོན་པ་ནི་སངས་རྒྱས་ཁོ་ནའི་ཁྱད་ཆོས་ཏེ། དེའི་ཕྱིར། ཐུབ་མཚན་ཡུལ་ན་གནས་པ་ དང༌། །གསལ་ལ་རྫོགས་པས་འཕགས་པ་ཡིན། །ཞེས་སོ། །ཕྱག་ཞབས་ཀྱི་རི་མོའི་མཚན་ནི། འཇམ་དཔལ་གྱི་ཞུས་པའི་མདོ་ལས་གསུངས་པ་སྟེ། འཛམ་གླིང་གི་མི་ཐམས་ཅད་དགེ་བ་བཅུ་ལ་ཞུགས་པའི་བསོད་ནམས་གཅིག་ ཏུ་བསྡོམས་པས་གླིང་བཞི་པའི་འཁོར་ལོས་བསྒྱུར་བ་གཅིག་འགྲུབ་ལ། གླིང་བཞི་པའི་མི་ཐམས་ཅད་འཁོར་བསྒྱུར་དུ་གྱུར་པའི་བསོད་ནམས་ཀྱིས་བརྒྱ་བྱིན་གཅིགབརྒྱ་བྱིན་དེ་སྙེད་ཀྱི་བསོད་ནམས་སྟོང་འགྱུར་གྱིས་བདུད་འདོད་པའི་བདག་ པོ། །བདུད་དེ་སྙེད་ཀྱི་བསོད་ནམས་བརྒྱ་སྟོང་དུ་བསྒྱུར་བས་སྟོང་སྤྱི་ཕུད་ཀྱི་བདག་པོའི་ཚངས་པ། སྟོང་གི་ཚངས་པ་དེ་སྙེད་ཀྱི་བསོད་ནམས་ཀྱིས་སྟོང་གཉིས་བར་མའི་ཚངས་པ། དེ་དེ་སྙེད་ཀྱི་བསོད་ནམས་བརྒྱ་སྟོང་དུ་བསྒྱུར་བས་ སྟོང་གསུམ་གྱི་ཚངས་པ་དབང་ཕྱུག་ཆེན་པོའི་མཆོག་གཅིག་་སྟོང་གསུམ་གྱི་སེམས་ཅན་ཚངས་པ་དེར་གྱུར་པའི་བསོད་ནམས་བྱེ་བ་ཁྲག་ཁྲིག་བརྒྱ་སྟོང་དུ་མས་རང་རྒྱལ་གཅིག །ཕྱོགས་བཅུའི་སེམས་ཅན་ཐམས་ཅད་རང་རྒྱལ་དུ་གྱུར་པའི་བསོད་ ནམས་བྱེ་བ་ཁྲག་ཁྲིག་བརྒྱ་སྟོང་དུ་མས་སྲིད་ཐའི་བྱང་སེམས་གཅིག །ནམ་མཁའི་མཐས་ཀླས་པའི་སེམས་ཅན་ཡོད་དོ་ཅོག་བྱང་ཆུབ་སེམས་དཔའ་སྲིད་ཐ་པར་གྱུར་པའི་བསོད་ནམས་བྱེ་བ་ཁྲག་ཁྲིག་བརྒྱ་སྟོང་དུ་མས་དེ་བཞིན་གཤེགས་

Page: 726 པའི་བ་སྤུའི་ཁུང་བུ་གཅིག །དེ་ལྟར་སྤུ་ཁུང་བརྒྱ་སྟོང་ཕྲག་དགུ་བཅུ་རྩ་དགུ། དེ་ཐམས་ཅད་ཀྱི་བསོད་ནམས་བྱེ་བ་ཁྲག་ཁྲིག་བརྒྱ་སྟོང་དུ་མས་དཔེ་བྱད་བཟང་པོ་གཅིག །དེ་ལྟར་དཔེ་བྱད་བརྒྱད་བཅུ། དེ་ཐམས་ཅད་བྱེ་བ་ཁྲག་ཁྲིག་ བརྒྱ་སྟོང་དུ་མར་བསྒྱུར་བས་རྗེས་ཀྱི་རི་མོའི་མཚན་བརྒྱད་ཅུ་པོ་རེ་རེ་སྟེ། སྡོམ་ནི། གདུགས་དང་རྒྱལ་མཚན་དཔལ་བེའུ། །ཕྲེང་བ་ཀྱོ་བ་ཏང་ཅོད་པན། །དབྱུག་ཐོ་བུམ་པ་གླང་ཆེན་རྟ། །སྟག་དང་ཆུ་སྲིན་ཉ་རུས་སྦལ། ། རྨ་བྱ་ཀ་པིང་ཤང་ཤང་ཏེའུ། །ཙ་ཤ་ངུར་པ་ནེ་ཙོ་དང༌། །ངང་པ་ཐི་བ་ནས་སྨན་མཆོག །འོ་མ་བ་མེན་ཀླུ་ཡི་རྒྱལ། །ར་དང་ཁྱུ་མཆོག་རི་ཡི་དབང༌། །བིལ་ཝ་ལྗོན་ཤིང་ཀྲྀཥྶཱ་ར། །ནོར་བུ་རལ་གྲི་རྡོ་རྗེ་གཞུ། །མདའ་དང་ ཤགྟི་མདུང་རྩེ་གསུམ། །གཤོལ་སྟུན་སྟ་རེ་ཞགས་པ་གྲུ། །མུ་ཏིག་རྒྱན་དང་སྤྲིན་ཆེན་དང༌། །ཚངས་པ་དབང་པོ་ཡུལ་འཁོར་སྲུང༌། །ཆུ་ལྷ་འཕགས་སྐྱེས་མིག་མི་བཟང༌། །ནོར་སྦྱིན་དྲང་སྲོང་ཆེན་པོ་དང༌། །དཔལ་ དང་ཉི་ཟླ་མེ་དང་རླུང༌། །པདྨ་གཡུང་དྲུང་གྲུ་གསུམ་དང༌། །དགེ་བའི་སྟན་དང་རྔ་ཡབ་དང༌། །དུར་ཝའི་རྩ་དང་པུརྡ་ཤ། །ཁྱེའུ་བུ་མོ་རྔ་བོ་ཆེ། །དུང་དང་མྲྀ་ག་གདུབ་བུ་དང༌། །དབུ་རྒྱན་རྣ་ཆ་སོར་གདུབ་དང༌། །རྣ་ཆ་ཕྱང་ ཕྲུལ་ལྡན་པ་དང༌། །མེ་ཏོག་བཟང་པོ་དཔག་བསམ་ཤིང༌། །འཁོར་ལོ་དཔུང་གི་སེང་གེ་སྟེ། རི་མོའི་མཚན་ནི་བརྒྱད་ཅུ་སྟེ། །ཕྱག་ཞབས་རེ་རེའི་མཐིལ་ལའང་ལྡན། །ཞེས་བྱ་སྟེ། འདི་ལ་དངོས་སུ་བརྒྱད་ཅུ་རྩ་གཅིག་སྣང་ ཡང་གཙོ་ཆེ་བ་ལ་དགོངས་ནས་བརྒྱད་ཅུ་ཞེས་གསུངས་པའམ་ཡང་ན་རྣ་ཆ་གཉིས་གཅིག་ཏུ་བྱས་པར་སྣང་ལ། སིངྒྷ་གླིང་ན་སྟོན་པའི་ཞབས་རྗེས་བཞུགས་པའི་ཞལ་བཤུས་པཎྜི་ཏ་ཆུང་ངུ་གཅིག་གིས་ཁྱེར་ནས་རྗེ་ཀརྨ་པ་བདུན་པའི་

Page: 727 ༄༅། །དྲུང་དུ་ཕུལ་ཞིང༌། དེའི་དོན་བསྡུས་ཀྱི་བསྟན་བཅོས་ཆུང་ངུ་ཞིག་ཀྱང་ཡོད་པར་སྣང་ཡང་བསྟན་བཅོས་དེ་མ་རྙེད། ཞབས་རྗེས་དེ་ལ་འདི་བས་རི་མོ་མང་བ་བརྒྱ་རྩ་བརྒྱད་ཀྱི་ཚོད་དང་ལྷ་གནས་ཕལ་ཆེར་དང་ཤང་ཤང་ ལ་མིའམ་ཅི་ཞེས་དང་བྱ་མགོ་དཀར་ཞིག་ལ་ཤང་ཤང་ཏེའུ་ཞེས་ཡི་གེ་བཏབ་ཅིང༌། གྲོང་ཁྱེར་མང་པོ་དང་ཞབས་སོར་གྱི་ནེ་ལེའི་ཚབ་ཏུའང་དུང་གི་རིགས་ཐ་དད་པ་དུ་མ་རེ་ཡོད་ཅིང༌། ཞབས་ཕན་ཚུན་ལ་རི་མོ་མི་གཅིག་པའང་མང་དུ་སྣང་ངོ༌། ། དེའི་རྒྱུ་སྡོམས་པ་བྱེ་བ་ཁྲག་ཁྲིག་བརྒྱ་སྟོང་དུ་མས་མཚན་བཟང་པོ་གཅིགདེ་ལྟར་སོ་གཉིས། རྒྱུ་དེ་རྣམས་གྲངས་མེད་བསམ་གྱིས་མི་ཁྱབ་པར་བསྒྱུར་བས་གསུང་ཆོས་ཀྱི་དུང་འགྲུབ་པར་གསུངས་སོ། །སྟོབས་ཀྱི་ཁྱད་པར་ནི། ཐུན་མོང་གི་མདོ་ལྟར་ན། མི་དང༌། གླང་ཕལ་པ་དང༌། ཁྱུ་མཆོག་དང༌། བལ་གླང་མོ་དང༌། གླང་པོ་ཆེ་དང༌། སྤོས་ཀྱི་གླང་པོ་ཆེ་དང༌། ཚན་པོ་ཆེ་དང༌། རབ་གནོན་དང༌། སྲེད་མེད་ཀྱི་བུ་རྣམས་རེ་རེ་ཞིང་སྔ་མ་བཅུའི་སྟོབས་ཕྱི་མ་གཅིག་ལ་ཡོད་ལ། དེ་བཞིན་ གཤེགས་པའི་ཚིགས་རེ་ལ་སྲེད་མེད་ཀྱི་བུའི་སྟོབས་རེ་མངའ་བར་འཆད་ལ། ཐེག་ཆེན་ཐུན་མོང་མ་ཡིན་པའི་ལུགས་ཀྱིས། མི་དང༌། གླང་དང༌། གླང་སྔོན་པོ་དང༌། གླང་པོ་ཆེ་ཕལ་པ་དང༌། གླང་པོ་ཆེ་འཇིགས་སུ་རུང་བ་དང༌། གླང་པོ་ ཆེ་མོ་འདྲ་བ་དང༌། དགོན་པའི་གླང་པོ་ཆེ་དང༌། རི་འབིགས་བྱེད་ཀྱི་གླང་པོ་ཆེ་དང༌། གླང་པོ་ཆེ་མཚོན་ཆའི་སྡེར་མོ་ཅན་དང༌། གླང་པོ་ཆེ་གཤོལ་མདའ་འཛིན་དང༌། གླང་པོ་ཆེ་ཏིང་ཟིལ་མདོག་དང༌། གླང་པོ་ཆེ་གེལ་པ་དང༌། གླང་པོ་ཆེ་སྔོན་པོ་དང༌། སེར་པོ་ དང༌། དམར་པོ་དང༌། སྐྱ་བོ་དང༌། ཀུ་མུ་དའི་མདོག་དང༌། པདྨ་དཀར་པོའི་མདོག་དང༌། སྤོས་ཀྱི་གླང་པོ་ཆེ་དང༌། སྤོས་གླང་ཆེན་པོ་དང༌། སེང་གེ་རལ་པ་ཅན་ཐབས་ཅན་དང༌། ཚན་པོ་ཆེ་དང༌། ཚན་པོ་ཆེ་ཆེན་པོ་དང༌། དེ་བཞིན་དུ་སྟོབས་མཆོག་རབ་གནོན་དག་

Page: 728 གཉིས་གཉིས་དང༌། ས་བླའི་ལྷའི་བུ་དང༌། དེ་བཞིན་དུ་གཞལ་མེད་ཁང་པ་དང༌། གཤོལ་མདའ་འཛིན་དང༌། ཕྲེང་ཐོགས་དང༌། རྟག་མྱོས་དང༌། རྒྱལ་ཆེན་རིས་བཞི་པའི་ལྷའི་བུ་རྣམས་རེ་རེ་ཞིང་སྔ་མ་བཅུའི་སྟོབས་ཕྱི་མ་རེ་ལ་ཡོད་དོ། ། རིས་བཞི་པའི་ལྷའི་བུ་ཐམས་ཅད་ཀྱི་སྟོབས་ལུས་ངན་གཅིག །དེ་བཅུ་སུམ་བཅུ་རྩ་གསུམ་པའི་ལྷའི་བུ་གཅིགསུམ་བཅུ་རྩ་གསུམ་པ་གཞན་ཐམས་ཅད་ཀྱི་སྟོབས་བརྒྱ་བྱིན་གཅིག །དེ་བཞིན་དུ་བསྒྲེས་ཏེ་འཐབ་བྲལ་དང་རབ་ འཐབ་བྲལ། དགའ་ལྡན་དང་ཡོངས་སུ་དགའ་ལྡན། འཕྲུལ་དགའ་དང་རབ་འཕྲུལ། གཞན་འཕྲུལ་དང་དབང་བསྒྱུར། བདུད་དང་བདུད་གྱི་བདག་པོ་རྣམས་སྔ་མ་བཞིན་དང༌། དེ་ནས་བདུད་ཀྱི་ལྷའི་བུ་ཐམས་ཅད་བདུད་ ཀྱི་བདག་པོར་གྱུར་པའི་སྟོབས་བཅུར་བསྒྱུར་བས་སྲེད་མེད་ཀྱི་བུ་ཕྱེད་ཀྱི་སྟོབས། དེ་ཕྱིན་ཆད་བཅུར་བསྒྱུར་ཏེ་སྲེད་མེད་ཀྱི་བུ་གཅིགསྲེད་མེད་ཀྱི་བུ་ཆེན་པོ་གཅིགབྱང་ཆུབ་སེམས་དཔའ་ངེས་པར་བྱུང་ནས་བསྐལ་པ་བརྒྱ་ལོན་པ། སྟོང༌། ཁྲི། འབུམ། ས་ཡ། བྱེ་བ། བྱེ་བ་བཅུ། བྱེ་བ་བརྒྱ། བྱེ་བ་སྟོང༌། བྱེ་བ་ཁྲི། བྱེ་བ་འབུམ། བྱེ་བ་ས་ཡ་ལོན་པ་རྣམས་རེ་རེ་ཞིང་དང༌། དེ་ནས་མི་སྐྱེའི་བཟོད་ཐོབ། ས་བཅུ་པ། སྲིད་པ་ཐ་མ་པ་རྣམས་རིམ་པར་སྔ་མ་བཅུའི་སྟོབས་ ཕྱི་མ་རེ་ལ་ཡོད་ཅིང་སྲིད་པ་ཐ་མ་པ་དེ་བཙས་མ་ཐག་ས་ལ་གོམ་པ་བདུན་འབོར་བ་དེའི་ཚེ་ཕྱོགས་བཅུའི་སངས་རྒྱས་ཀྱིས་ས་རྡོ་རྗེར་བྱིན་གྱིས་མ་རླབས་ན་ས་ཆེན་པོ་དཔག་ཚད་དྲུག་ཁྲི་ཞོམ་སྟེ་ཆུའི་ཕུང་པོ་ལས་ཤིང་རྟའི་འཕང་ལོ་ཙམ་ འཕྱུར་བར་འགྱུར་རོ། །སྲིད་ཐ་པ་བཙས་མ་ཐག་པ་བཅུའི་སྟོབས་ནི་བྱང་ཆུབ་སེམས་དཔའ་ལང་ཚོའི་མཆོག་ལ་བབ་པ་གཅིག་སྟེ་སྟོབས་དེས་བྱང་ཆུབ་ཀྱི་ཤིང་དྲུང་དུ་འགྲོའོ། །སྟོབས་དེ་འབུམ་ཀྱིས་བྱང་ཆུབ་ཀྱི་སྙིང་པོར་འདུག་གོ །

Page: 729 ༄༅། །དེ་བས་ཆེས་ཚད་མེད་པའི་སྟོབས་ཀྱིས་འཚང་རྒྱའོ། །སེམས་ཅན་ཐམས་ཅད་སེམས་དཔའ་འཚང་རྒྱ་ཀའི་སྟོབས་ལྡན་དུ་གྱུར་པས་དེ་བཞིན་གཤེགས་པའི་སྟོབས་གཅིག་གི་ཆའི་ཆར་ཡང་མི་བཟོད་དེ། དེ་ལྟ་བུའི་ སྟོབས་བཅུ་མངའ་བར་བསོད་ནམས་ཡོངས་སུ་བསྡུས་པའི་ཏིང་ངེ་འཛིན་གྱི་མདོ་ལས་བཤད་ལ། དེ་བཞིན་དུ་མདོ་གཞན་ལས་བ་སྤུའི་ཁུང་བུ་རེར་སྲེད་མེད་ཀྱི་བུའི་སྟོབས་རེ་དང༌། བ་སྤུ་ཐམས་ཅད་ཀྱི་སྟོབས་ཚིགས་རེ་དང༌། དེ་ཐམས་ཅད་ ཀྱི་སྟོབས་དཔེ་བྱད་གཅིག་དང༌། དཔེ་བྱད་ཐམས་ཅད་ཀྱི་སྟོབས་མཚན་སུམ་ཅུའི་རེ་རེ་དང༌། དེ་ཐམས་ཅད་ཀྱི་སྟོབས་མཛོད་སྤུ་དང་དེ་བརྒྱར་འགྱུར་བའི་སྟོབས་གཙུག་ཏོར་དུ་མངའ་བ་སོགས་རྣམ་གྲངས་དུ་མ་གསུངས་སོ། །འོད་ཀྱི་ཁྱད་ པར་ནི། སྤྱིར་ལུང་སྟོན་པར་བཞེད་པའི་ཚེ་ཞལ་འཛུམ་པ་མཛད་ལ། ཆོས་ཉིད་ཀྱིས་ནམ་འཛུམ་པ་མཛད་པ་ན་ཞལ་ནས་འོད་ཤེལ་དང་གསེར་དང་དངུལ་དང་མཐོན་ཀ་ལ་སོགས་པའི་ཁ་དོག་ཅན་བྱེ་བ་ཕྲག་དུ་མ་བྱུང་སྟེ། འཇིག་རྟེན་སྣང་ བར་བྱེད་ཅིང་ངན་སོང་པ་རྣམས་དེས་རེག་མ་ཐག་ཚེ་འཕོས་ཏེ་ལྷ་མིར་སྐྱེ། འོན་ལོང་སོགས་ཀྱི་དབང་པོའི་སྐྱོན་སེལ་འདུ་ཤེས་མེད་པ་པ་སོགས་སད་པར་བྱས་ཏེ་དགེ་བ་ལ་འགོད། སངས་རྒྱས་ཀྱི་ཞིང་མཐའ་ཡས་པར་བྱ་བ་དེ་རྣམས་བྱས་ཏེ་སླར་ འདུས་ནས་སྐུ་ལ་ལན་བརྒྱ་སྟོང་དུ་གཡས་སུ་བསྐོར་ཏེ། གལ་ཏེ་འདས་པའི་ལས་ལུང་སྟོན་པར་བཞེད་ན་སྐུའི་སྣམ་ལོགས་ཏེ་རྒྱབ་དང༌། མ་འོངས་པའི་ལས་ལུང་སྟོན་པར་བཞེད་ན་མདུན་དང༌། དེ་བཞིན་དུ་དམྱལ་བ་དང་ཡི་དྭགས་དང་དུད་ འགྲོ་དང་ལྷ་མིན་དང་ལྷ་མི་དང་འཁོར་ལོས་བསྒྱུར་བ་རྣམས་སུ་ལུང་སྟོན་པར་བཞེད་ན་རིམ་པས་ཞབས་མཐིལ་དང་ཞབས་རྟིང་དང་ལོང་བུ་དང་པུས་མོ་དང་ཕྱག་མཐིལ་དང་ལྟེ་བར་ནུབ་པར་འགྱུར་ལ། ཉན་ཐོས་ལ་ཞལ་དང༌། རང་རྒྱལ་ལ་སྨིན་

Page: 730 མཚམས་དང༌། སངས་རྒྱས་ཀྱི་བྱང་ཆུབ་ཏུ་ལུང་སྟོན་པར་བཞེད་ན་གཙུག་ཏོར་དུ་ནུབ་པར་འགྱུར་ལ། རིམ་གྲོ་པས་དེའི་རྒྱུ་ཞུས་ཏེ་སོ་སོར་ལུང་སྟོན་པར་མཛད་དོ། །གཞན་ཡང་ཕལ་པོ་ཆེར་མཚན་རྒྱ་མཚོ་བཤད་པ་ཡང་འོད་ཀྱི་བདག་ཉིད་དུ་ བཤད་ལ། བྱེ་བྲག་ཏུ་ཚངས་པ་ཁྱད་པར་སེམས་ཀྱི་མདོར། དེ་བཞིན་གཤེགས་པའི་སྐུ་ལ་ལྟ་ནུས་པ་དང་ཆོས་འདྲི་ནུས་པ་སོགས་དེ་ཐམས་ཅད་འོད་སོ་སོས་རེག་པའི་མཐུ་ཡིན་གྱི། གཞན་དུ་ན་དེ་བཞིན་གཤེགས་པའི་སྐུ་ནི་ཉི་མ་ལྟར་མིག་གིས་མི་ བཟོད་ཅིང་མེ་དཔུང་ཆེན་པོ་ལྟར་སྐུ་ལ་སུས་ཀྱང་བསྙེན་མི་ནུས་ན་དྲི་བར་ལྟ་ག་ལ་ནུས་པར་བཤད་དེ། དེ་ཡང་རབ་ཞི་རྣམ་བཀོད་ཀྱི་འོད་ཀྱིས་རེག་པས་སྐུ་ལ་ལྟ་ནུས་ཤིང་མིག་གི་དབང་པོ་མི་ཉམས་པར་བྱེད་དོ། །མི་འཇིགས་པ་སྤོབས་ པའི་འོད་ཀྱིས་དྲི་ལན་བྱེད་ནུས་པར་བྱེད་དོ། །དེ་བཞིན་དུ་དགེ་བ་བསགས་པ་དང་དགེ་བ་རྣམ་བཀོད་དང་བདག་པོ་ཐོབ་པ་དང་ཉོན་མོངས་མེད་དང་རྩེ་གཅིག་དབེན་དང་ཐམས་ཅད་མཁྱེན་པའི་ཡེ་ཤེས་སུ་དབང་བསྐུར་ཐོབ་པ་རྣམས་ཀྱིས་རེག་པས་ རིམ་པས་འཁོར་བསྒྱུར་གྱི་ཆེད་དང་ཚངས་པའི་ཕྱིར་དང་ཉན་ཐོས་དང་རང་རྒྱལ་དང་སངས་རྒྱས་ཀྱི་ཐེག་པ་འདྲི་བར་ནུས་སོ། །ཁྱད་པར་དུ་འགྲོ་བའི་འོད་ཀྱིས་བཞུད་པའི་ཚེ་ཞབས་མཐིལ་གྱིས་རེག་པའི་སྲོག་ཆགས་རྣམས་མཐོ་རིས་སུ་སྐྱེའོ། ། རྒྱན་ཐམས་ཅད་བཀོད་པ་ནི་གྲོང་དུ་གཤེགས་པའི་ཚེ་འབྱིན་ཏེ་ཐམས་ཅད་བདེ་བའི་མཆོག་ཏུ་བྱེད་ཅིང་གྲོང་ཀུན་ནས་བརྒྱན་པར་འགྱུར་རོ། །རྣམ་པར་འཐོར་བ་དང༌། བདེ་བ་སྟོན་པ་དང༌། བྱམས་པས་འཕགས་དང༌། རབ་ཏུ་ཚིམ་བྱེད་དང༌། དྲི་མེད་དང༌། རྣ་བའི་རྗེས་མཐུན་དང་རྣམ་པར་སྤོང་བ་དང༌། ངོ་ཚ་ཤེས་པ་དང༌། མེད་པར་འགྱུར་བ་དང༌། རབ་ཏུ་གཏོང་བ་དང༌། ཡོངས་སུ་གདུང་མེད་དང༌། ཕན་ལྡན་དང༌། འབར་བ་ཅན་དང༌། རྩེ་གཅིག་པ་དང༌། ཡེ་ཤེས་དང༌། རྙོག་མེད་དང༌། ཀུན་འཛིན་དང༌།

Page: 731 ༄༅། །སྤྱོད་ལྡན་དང༌། སྐྱོ་བ་དང༌། དགའ་བ་དང༌། སྣང་བ་ཅན་དང༌། ཀུན་ཏུ་འགྲོ་བ་རྣམས་ཀྱིས་རིམ་པ་ལྟར་འཇིག་རྟེན་མཐའ་ཡས་པ་གཡོ་བ་དང༌། དམྱལ་བ་དང་བྱོལ་སོང་དང་ཡི་དྭགས་ཞི་བ་དང༌། ལོང་བ་ལ་སོགས་པ་ མིག་དང་རྣ་བ་སོགས་དག་པ་དང༌། མི་དགེ་བ་བཅུ་སྤྱོད་པ་རྣམས་དེ་ལས་ལྡོག་པ་དང༌། སྨྱོས་པ་རྣམས་དྲན་པ་འཐོབ་པ་དང༌། ལོག་ལྟ་ཅན་ཡང་དག་པའི་ལྟ་བ་འཐོབ་པ་དང༌། སེར་སྣ་ཅན་སོགས་ཕར་ཕྱིན་དྲུག་པོ་ལ་རིམ་པར་འགོད་པ་དང༌། མ་ དད་པ་རྣམས་དད་པ་འཐོབ་པ་དང༌། ཐོས་པ་ཉུང་བ་རྣམས་ཐོས་པ་འཐོབ་པ་དང༌། བག་མེད་པ་རྣམས་ངོ་ཚ་ཤེས་པ་དང༌། འདོད་ཆགས་དང༌། ཞེ་སྡང་དང༌། གཏི་མུག་ལ་སྤྱོད་པ་རྣམས་ཀྱི་དུག་གསུམ་འཇོམས་པ་དང༌། དུག་གསུམ་ཆ་མཉམ་པ་ལ་ སྤྱོད་པའི་ཆ་མཉམ་པ་སྤོང་བའི་བར་བྱེད་ལ། གཟུགས་ཐམས་ཅད་སྟོན་པའི་འོད་ཀྱིས་དེ་བཞིན་གཤེགས་པའི་སྐུ་ཁ་དོག་སྣ་ཚོགས་དང་ཁ་དོག་ཚད་མེད་པར་མཐོང་བར་བྱེད་དེ་འོད་ཟེར་ལས་བརྩམས་ཏེ་བསྐལ་པར་གསུངས་ཀྱང་ མི་ཟད་པར་བཤད་དོ། །ཆོ་འཕྲུལ་གྱི་ཁྱད་པར་ལ། སྤྱིར་ཆོ་འཕྲུལ་གསུམ་ལས། སྐུ་རྫུ་འཕྲུལ་གྱི་ཆོ་འཕྲུལ་ནི། ཕྱོགས་བཞིའི་ནམ་མཁའ་ལ་སྤྱོད་ལམ་བཞི་མཛད་པ་དང༌། སྟོད་ནས་མེ་འབར། སྨད་ནས་ཆུ་འབྲུབ་པ་སོགས་ཡ་མ་ཟུང་གི་ཆོ་ འཕྲུལ་དང༌། ཉི་ཟླ་དང་ཚངས་གནས་ཀྱི་བར་ཕྱག་གིས་ཉུལ་བ་སོགས་ནི་དྲང་སྲོང་ཉན་རང་དང་བཅས་པའི་ཐུན་མོང་གི་ཆོ་འཕྲུལ་ཡིན་ལ། ཐུན་མོང་མ་ཡིན་པ་ནི། མཛངས་བླུན་ནས་གསུངས་པའི་ཚེས་གཅིག་ནས་བཅོ་ལྔའི་བར་གྱི་ཆོ་ འཕྲུལ་ལྟ་བུ་སྟེ་གཞལ་དུ་མེད་དོ། །བྱེ་བྲག་ཏུ་དགའ་ལྡན་ནས་འཕོ་བའི་ལོ་བརྒྱའི་སྔོན་དུ་སྐུ་བལྟམས་པའི་གནས་དེ་ལག་མཐིལ་ལྟར་མཉམ་པ་དང༌། རྡོ་རྗེའི་ས་གཞིར་འགྱུར་བ་དང༌། རིན་པོ་ཆེའི་ཤིང་གིས་ཁྱབ་པ་དང༌། སྤོས་ཀྱི་སྤྲིན་

Page: 732 འཐུལ་བ་དང་ལྷ་རྫས་ཀྱི་མཆོད་པས་གང་བ་སོགས་ལྟས་བཅུ་འབྱུང་བ་ནས་གང་གི་གདུགས་ལ་བལྟམས་པའི་ཚེ་སངས་རྒྱས་ཐམས་ཅད་ཀྱི་སྐྱེ་བའི་རྣམ་འཕྲུལ་ཚལ་དེར་སྣང་བ་སོགས་འཕོ་བ་དང་བལྟམས་པའི་ཆོ་འཕྲུལ་ནས་བཟུང་སྟེ་སྐུ་ གདུང་རིང་སྲེལ་གྱི་ཆོ་འཕྲུལ་གྱི་བར་མཛད་པ་སོ་སོའི་ཆོ་འཕྲུལ་མཐའ་ཡས་པ་དང༌། ཆོས་གསུང་བ་ན་ལྗགས་ཀྱིས་འཁོར་གྱི་དཀྱིལ་འཁོར་འགེབས་པ་དང་ཆོས་ཀྱི་དབྱིངས་དགང་བ་སོགས་ལྗགས་ཀྱི་ཆོ་འཕྲུལ་དང༌། གྲོང་ ཁྱེར་དུ་གཤེགས་པ་ན་ངམ་གྲོག་དང་ཚེར་མ་སོགས་མེད་ལ། ལག་མཐིལ་ལྟར་མཉམ་ཞིང་རྩ་འཇམ་པོས་ཁེབས་པ་དང༌། མདུན་རོལ་དུ་སྤོས་ཆུའི་ཆར་འབབ། སྟེང་དུ་སྤྲིན་གྱི་བླ་རེ་འབྲེ། རྒྱབ་སོགས་སུ་ཉི་འོད་གསལ། གཡས་གཡོན་ ནས་ཚངས་པ་དང་བརྒྱ་བྱིན་གྱིས་རྔ་ཡབ་གཡོབ་ཅིང་ལྷ་དང་མིས་བསྐོར་ཏེ་གཤེགས་ཤིང༌། གྲོང་ཁྱེར་གང་གི་ཐེམ་པ་ལ་ཞབས་བཞག་མ་ཐག་གྲོང་ཁྱེར་རྣམ་པ་དྲུག་ཏུ་གཡོ་ཞིང་རོལ་མོ་ཐམས་ཅད་མ་བཀྲོལ་བར་སྒྲ་འབྱིན། བཙོན་དུ་ བཅིངས་པ་དང་སྒྲོག་ཏུ་བཅུག་པ་ཐམས་ཅད་རང་གྲོལ། ལོང་བ་རྣམས་མིག་འབྱེ། འོན་པ་རྣམས་རྣ་བ་དགསྨྱོས་པ་རྣམས་དྲན་པ་རྙེད། གཉིད་ཀྱི་ལོག་པ་རྣམས་སད་དེ། ཐམས་ཅད་དགེ་བའི་བསམ་པ་རྫོགས་པར་འགྱུར་བ་དང༌། ཞབས་ ས་ལ་སོར་བཞིས་མི་རེག་ལ། འོན་ཀྱང་ལམ་བར་གྱི་སྲིན་བུ་ཕྲ་མོ་རྣམས་ཀྱི་སྟེང་དུའང་ཞབས་འབབ་ལ། དེས་སྔོན་མ་མྱོང་བའི་བདེ་བས་ཞག་བདུན་འདའ་ཞིང་ལྷར་སྐྱེ་བ་སོགས་གྲོང་དུ་གཤེགས་པའི་ཆོ་འཕྲུལ་དང༌། བསོད་ སྙོམས་བཞེས་པ་ན་མང་དུ་འབུལ་བར་འདོད་པ་རྣམས་ནི་ཀར་ཥ་པ་ཎ་བྱེ་བ་མང་པོའི་འབྲས་ཆན་ཡང་ལྷུང་བཟེད་དུ་མི་དོག་པར་ཤོང་ལ། ཉུང་ངུ་ལས་མི་འབྱོར་པ་རྣམས་ནི་འབྲས་ཆན་གྱི་ཟེགས་མ་ཙམ་ཕུལ་བས་ཀྱང་ཡོངས་སུ་གང་བར་

Page: 733 ༄༅། །མཐོང་ཞིང༌། བཟའ་བ་དང་བཏུང་བ་དང་ལྡག་པའི་བྱེ་བྲག་བརྒྱ་སྟོང་མང་པོ་ལྷུང་བཟེད་དུ་བླུགས་ཀྱང་ཕན་ཚུན་གཅིག་ལ་གཅིག་མ་རེག་ཅིང་མ་འདྲེས་ལ་གོས་པ་མེད་པ་སྣོད་ཐ་དད་ན་གནས་པ་ལྟར་འགྱུར་ལ། དེ་ གང་གི་ཚེའང་ལྷུང་བཟེད་ཀྱི་ཚད་སྔ་མ་ལས་མི་འགྱུར་བ་འདི་ནི་ལྷུང་བཟེད་ཀྱི་ཆོ་འཕྲུལ་ལོ། །གཞན་ཡང་རིགས་ཆེན་པོ་ལས་རབ་ཏུ་བྱུང་བ་རྣམས་ཀྱི་ང་རྒྱལ་སྤང་བ་དང༌། མ་འོངས་པའི་དགེ་འདུན་རྣམས་འཚོ་བས་མི་འཕོངས་བའི་ ཆེད་དང༌། འདི་དག་གི་སྟོན་པ་ཡང་བསོད་སྙོམས་སྤྱོད་ན་འདི་དག་ལྟ་ཅི་སྨོས་ཞེས་སྐྱེ་བོ་རྣམས་སྦྱིན་པར་སེམ་པ་སྐྱེ་བའི་ཆེད་དང༌། སྦྱིན་པ་པོ་རྣམས་ཀྱི་བསོད་ནམས་སྤེལ་བའི་ཆེད་དང༌། རབ་བྱུང་རྣམས་འཚོ་བའི་ཆེད་དུ་ཟང་ཟིང་འཛིན་པ་སྤང་ པའི་ཆེད་དང༌། གྲོང་དུ་གཤེགས་པའི་ཆོ་འཕྲུལ་གྱིས་གདུལ་བ་རྣམས་རྗེས་སུ་བཟུང་བའི་ཆེད་དང༌། ཕ་མ་དང་ཁྱོ་ལ་སོགས་པས་བསྲུངས་པའི་རིགས་ཀྱི་བུ་དང་བུ་མོ་གཅེས་པ་རྣམས་ཀྱིས་མཐོང་བ་དོན་ཡོད་པའི་ཆེད་དང༌། ལྷ་རྣམས་ཀྱིས་དེ་བཞིན་ གཤེགས་པའི་སྐུ་འོད་ཀྱི་གོང་བུ་ལྟ་བུ་ནང་སྦུབས་སྟོང་མི་མངའ་ཞིང་ལོང་ཀ་སོགས་མེད་པ་རྡོ་རྗེ་ལྟར་མཁྲེགས་པ་མཐོང་ནས་འདི་ནི་བཀྲེས་སྐོམ་སོགས་མེད་ཅིང་གསོལ་བར་མི་བྱེད་མོད་ཀྱང་སེམས་ཅན་ལ་སྙིང་བརྩེ་བ་ཁོ་ནས་བསོད་སྙོམས་ ལ་རྒྱུའོ་ཞེས་དད་པ་སྐྱེ་བ་དང༌། འབུལ་བ་པོ་དག་ནི་སྟོན་པས་བདག་གི་བསོད་སྙོམས་ལོངས་སྤྱད་དོ་སྙམ་ནས་དགའ་བ་སྐྱེ་ལ་སྟོན་པ་ནི་བཞེས་པར་མི་མཛད་མོད་ཀྱང་འབུལ་བ་པོ་ལ་བསོད་ནམས་ཚད་མེད་པ་འཐོབ་ཅིང་ཁ་ཟས་དེ་གནས་ གཙང་མའི་ལྷའི་བུ་ཞིག་གིས་རིན་པོ་ཆེའི་གཞོང་པར་ཁྱེར་ཏེ་སངས་རྒྱས་མེད་པའི་འཇིག་རྟེན་གྱི་ཁམས་ཐམས་ཅད་དུ་སོང་ནས་སེམས་ཅན་རྣམས་ཚིམ་པར་བྱེད་ཅིང་དེ་ཟོས་སོ་ཅོག་ཕྱིར་མི་ལྡོག་པ་འཐོབ་པར་འགྱུར་བ་དང༌། སྔོན་གྱི་

Page: 734 སངས་རྒྱས་རྣམས་ཀྱི་ཚུལ་དང་མཚུངས་པ་སྟེ་དགོས་པ་བཅུ་ལས། བསོད་སྙོམས་ལ་གཤེགས་པར་སྟོན་ལ་འདི་ཡང་ཁྱད་པར་གྱི་ཆོ་འཕྲུལ་གཅིག་གོ །དེ་བཞིན་དུ་སྐྱེ་བོ་བྱེ་བ་ཕྲག་མང་པོས་རེ་རེས་ཀྱང་བླ་གོས་བརྒྱ་སྟོང་སྙེད་སྐུ་ ལ་གསོལ་ཡང་ཐུག་པར་ཡང་མི་མངོན། ནང་མ་ཤོས་ཀྱང་སྐུ་ལ་སོར་བཞིས་མི་རེག་ལ། རྣམ་པར་འཐོར་རླུང་གིས་ཀྱང་གཡོ་མི་ནུས་པ་ན་བཟའི་ཆོ་འཕྲུལ་ཏེ། དེ་ལ་སོགས་པ་མཐའ་ཡས་པ་རྣམས་ནི་སྐུ་རྫུ་འཕྲུལ་གྱི་ཆོ་འཕྲུལ་ཏེ། དེ་ལ་ཐུན་མོང་དང་ཐུན་མོང་ མ་ཡིན་པ་གཉིས་ནི་རྫུ་འཕྲུལ་དངོས་ཏེ། དེས་འདུལ་བ་ན་རྫུ་འཕྲུལ་མཛད་ལ། གཞན་དེ་དག་ནི་ཆེད་དུ་སྤྲུལ་པ་མ་ཡིན་ཏེ། རང་བཞིན་གྱིས་སྟོན་པའི་ཆོས་ཉིད་ཡིན་ཡང་རིགས་མཐུན་བསྡུ་བ་ཙམ་གྱིས་ཆོ་འཕྲུལ་དང་པོར་བསྡུས་པ་ཙམ་མོ། ། བརྗོད་དུ་མེད་ཅིང་གང་གིས་ཀྱང་བརྗོད་པར་མི་ནུས་པའི་ཆོས་རྣམས་ལ་ཆོས་ཀྱི་རྣམ་གྲངས་སྣ་ཚོགས་སུ་བརྗོད་པས་གདུལ་བྱ་རྣམས་བརྗོད་དུ་མེད་པའི་དོན་རྟོགས་པ་ལ་འགོད་པ་ནི་ཆོ་འཕྲུལ་བླ་ན་མེད་པ་སྟེ། ཚུལ་ཁྲིམས་འཆལ་བ་ཚར་གཅོད་ པའི་མདོ་ལས། ཤཱ་རིའི་བུས་བཅོམ་ལྡན་འདས་ཀྱིས་མིང་དང་མཚན་མ་མེད་པའི་ཆོས་མིང་དང་མཚན་མས་བསྟན་ཅིང་བརྗོད་དུ་མེད་པའི་ཆོས་བརྗོད་པར་མཛད་པ་ནི་ཆེས་ངོ་མཚར་ཏོ། །ཞེས་གསོལ་བས་དེ་དེ་ བཞིན་ནོ། །ཞེས་སླར་ནམ་མཁའ་ལ་རི་མོ་གསལ་བ་དང་རི་རབ་ཟོས་ནས་ཞུ་བ་དང་མེ་འབར་བའི་ཁྱིམ་དུ་རྩ་ཁུརཆེར་ཐོགས་ཏེ་མ་ཚིག་པར་འབྱུང་འཇུག་བྱེད་པ་དང༌། རྡོའི་གཟིངས་ས་གཞི་ཙམ་གྱིས་རྒྱ་མཚོ་བརྒལ་བ་དང༌། གླིང་བཞི་པའི་འཇིག་རྟེན་ ཁྱེར་ནས་སྦྲང་མའི་བྱིན་པའི་སྐས་ལས་ཚངས་རིས་སུ་འཛེག་པ་དང༌། རླུང་གིས་བསྒུལ་བའི་སྲད་བུ་ཕྲ་མོས་རི་རབ་བཏགས་ཏེ་ནམ་མཁའ་ལ་འཛིན་པ་དང༌། སྟོང་གསུམ་དུ་གངྒཱ་ཙམ་གྱི་ཆར་རྒྱུན་འབབ་པ་ཐིགས་པ་གཅིག་ཀྱང་ས་ལ་མ་ལྷུང་

Page: 735 ༄༅། །བར་བཟེད་པ་དང༌། སྟོང་གསུམ་དུ་རི་རབ་ཙམ་གྱི་རྡོ་ཆར་བབ་པ་དེ་ལྟར་བཟེད་པ་དང༌། མཆིལ་མའི་ཟེར་མ་གཅིག་གིས་སྲེག་བསྐལ་གཞིལ་ཏེ་དབུགས་གཅིག་གིས་འཇིག་རྟེན་སླར་དགོད་པ་དང༌། ལག་མཐིལ་གཅིག་ ཏུ་སེམས་ཅན་ཐམས་ཅད་བཀོད་ཅིང་གཅིག་ཤོས་ཀྱིས་སྟོང་གསུམ་གྱེན་དུ་བཏེགས་ནས་སེམས་ཅན་དེ་ཐམས་ཅད་བློ་གཅིག་ཏུ་བྱེད་པ་བས་ཀྱང་མངོན་པར་འདུ་བྱེད་པ་མེད་པ་དང༌། འབྱུང་བ་མེད་པ་དང༌། མཚན་མ་མེད་པ་དང༌། མཚན་ཉིད་མེད་ པ་དང༌། བསྟན་དུ་མེད་པ་ལ་དེ་བཞིན་གཤེགས་པས་ཆོས་བསྟན་པ་གང་ཡིན་པ་འདི་ནི་ཆེས་ངོ་མཚར་བར་གསུངས་ལ། དབྱངས་ཀྱི་ཡན་ལག་དྲུག་ཅུ་རྩ་བཞི་དང་ལྡན་པའི་གསུང་མངའ་བ་སྟེ། དཀོན་མཆོག་བརྩེགས་པར། རྣམ་ པ་དྲུག་ཅུ་རྩ་བཞི་གང་ཞེ་ན། མཉེན་པའི་གསུང་འབྱུང་བ་དང༌། ཞེས་སོགས་གསུངས་པ་སྡོམ་ཚིག་ཏུ་སྦྱར་ན། མཉེན་འཇམ་ཡིད་འོང་ཡིད་འཐད་ངག །དྲི་མེད་འོད་གསལ་འཇེབས་མཉན་འོས། །མི་ཚུགས་སྙནདུལ་མི་རྩུབ་ དང༌། །མི་བརླང་རབ་དུལ་རྣ་བར་སྙན། །ལུས་སེམས་ཚིམ་བྱེད་སྙིང་དགའ་བྱེད། །དགའ་ཞིང་བདེ་བ་སྐྱེད་པར་བྱེད། །ཡོངས་སུ་མི་གདུང་ཀུན་ཤེས་བྱ། །རྣམ་པར་རིག་བྱ་རྣམ་པར་གསལ། །དགའ་དང་མངོན་པར་ དགའ་བར་བྱེད། །ཀུན་ཏུ་ཤེས་བྱེད་རྣམ་རིག་བྱེད། །རིགས་པ་དང་འབྲེལ་ཟློས་སྐྱོན་མེད། །སེང་གེའི་ང་རོའི་ཤུགས་དང་ལྡན། །གླང་ཆེན་སྒྲ་དང་འབྲུག་གི་དབྱངས། །ཀླུ་དང་དྲི་ཟ་ཀ་པིང་དབྱངས། །ཚངས་དབྱངས་ ཤང་ཤང་ཏེའུའི་དབྱངས། །ལྷ་དབང་དབྱངས་དང་རྔ་ཡི་སྒྲ། །མ་ཁེངས་པ་དང་མི་དམའ་དང༌། །སྒྲ་རྣམས་ཀུན་གྱི་རྗེས་སུ་ཞུགས། །ཚིག་ཟུར་མ་ཆད་ལྡབ་ལྡིབ་མེད། །མ་ཚང་མེད་ཅིང་མ་ཞུམ་དང༌། །མི་ཞན་རབ་

Page: 736 དགའ་ཁྱབ་པ་དང༌། །ཆུབ་དང་རྒྱུན་ཆགས་འབྲེལ་བ་དང༌། །སྒྲ་རྣམས་ཐམས་ཅད་རྫོགས་པར་བྱེད། །དབང་པོ་ཐམས་ཅད་ཚིམ་བྱེད་དང༌། །མ་དམད་མི་འགྱུར་མ་ཏབས་དང༌། །འཁོར་གྱི་དཀྱིལ་འཁོར་ཀུན་ཏུ་གྲག ། འདོད་ཆགས་ཞི་བྱེད་ཞེ་སྡང་འདུལ། །གཏི་མུག་སེལ་བྱེད་བདུད་ཚར་གཅོད། །རྣམ་པ་ཀུན་མཆོག་ལྡན་པའི་གསུང༌། །ཡན་ལག་དྲུག་ཅུ་རྩ་བཞིའོ། །ཞེས་བྱ་ལ། བུ་སྟོན་རིན་པོ་ཆེས་དྲུག་ཅུ་ཁོ་ན་ཡིན་གྱི་རྩ་བཞི་མ་ དག་གོ་ཞེས་གསུང་ཡང༌། མདོ་ཉིད་ལས་རེ་བཞིར་བཤད་པས་སྐྱོན་མེད་ལ། སྙིང་རྗེ་ཆེན་པོ་ངེས་བསྟན་གྱི་མདོ་ལས་ནི། འབྲས་བུ་ཡོད་པའི་ཆོས་སྟོན་པ་དང་ཞེས་སོགས་དེ་བས་མང་བར་གསུངས་ཏེ། སྡོམ་ནི། འབྲས་ཡོད་ ཆོས་སྟོན་ངེས་ཚིག་སྨྲ། །ཁྱད་པར་ལུང་སྟོན་ཀུན་ཤེས་བྱེད། །རྣམ་པར་ཤེས་བྱེད་མཐོ་དམན་མེད། །ཡ་ཡོ་ལྡབ་ལྡིབ་གྱ་གྱུ་མེད། །མི་བརླང་མི་རྩུབ་མ་འཆོལ་བ། །འཇམ་མཉེན་ལས་རུང་ངར་ངར་མིན། །བྱུང་རྒྱལ་ མ་ཡིན་རབ་ཏུ་བརྟགས། །ཧ་ཅང་མྱུར་མིན་ཤིན་ཏུ་ཕྱེ། །ཤིན་ཏུ་ངེས་ཚིག་ཤིན་དགའ་བསྐྱེད། །ཤིན་སྙན་ཤིན་ཏུ་གདངས་ཆེས་སྙན། །ཤིན་གསལ་ཐགས་ཐོགས་མེད་ཅིང་རྫོགས། །སྙན་འབོལ་བསྒྲགས་མཛེསམཆོད་ པར་གྱུར། །རྡུལ་མེད་རྡུལ་བྲལ་ཐ་བ་མེད། །དྲི་མེད་དྲི་བྲལ་རྨོངས་པ་མེད། །ཤིན་ཏུ་ཟུར་ཕྱིན་ཆགས་པ་མེད། །རབ་གྲོལ་འོད་གསལ་དྲང་མི་དམན། །མ་འཛིངས་བདེ་སྐྱེད་དིབ་དིབ་མིན། །ལུས་ཚིམ་སེམས་ཀྱང་ དགའ་བར་བྱེད། །དུག་གསུམ་སྡིག་སེལ་བདུད་ཀྱང་འཇོམས། །རྒོལ་འདུལ་རྣམ་པར་ཤེས་པར་བྱེད། །མཁས་པ་དགའ་བྱེད་རྔའི་སྒྲ་ལྡན། །ཀ་པིང་བརྒྱ་བྱིན་ཚངས་པའི་དབྱངས། །རྒྱ་མཚོའི་རླབས་སྒྲ་གནོད་སྦྱིན་སྒྲ། །

Page: 737 ༄༅། །ས་ཡི་སྒྲ་དབྱངས་ཁྲུང་ཁྲུང་སྒྲ། །རྨ་བྱ་ཁུ་བྱུག་ཤང་ཤང་ཏེའུ། །ངང་རྒྱལ་སེང་གེ་རོལ་མོའི་དབྱངས། །ཀུན་ཤེས་བྱེད་ཅིང་རབ་ཤེས་བྱེད། །ཡིད་འོང་མཉན་འོས་བརྫུན་མིན་ཟབ། །རྣ་བ་བདེ་བྱེད་ དགེ་རྩ་སྐྱེད། །ཚིག་ཡིག་མ་ཉམས་ཚིག་ཡིག་ནི། །ཤིན་ཏུ་ངེས་ཚིག་ལྡན་དོན་ལྡན། །ཆོས་ལྡན་དུས་ལྡན་དུས་ཚིགས་ནི། །ཀུན་ལྡན་དུས་ལས་མི་ཡོལ་བ། །མཆོག་དང་མཆོག་མིན་དབང་པོ་སྟོན། །སྦྱིན་པས་བརྒྱན་ ཞིང་ཚུལ་ཁྲིམས་ཀྱིས། །རྣམ་དག་བཟོད་པས་ཡང་དག་བསྒྲུབས། །བརྩོན་པས་ཤིན་སྦྱངས་བསམ་གཏན་གྱིས། །ལས་སུ་རུང་བྱས་ཤེས་རབ་ཀྱིས། །ངེས་པར་བརྟགས་ཤིང་བྱམས་པས་བརྩམས། །སྙིང་རྗེས་མི་སྐྱོ་ དགའ་བ་ཡིས། །འོད་གསལ་བཏང་སྙོམས་ཀྱིས་ངེས་བརྟགས། །ཐེག་གསུམ་རྣམ་འཇོག་དཀོན་མཆོག་གི། རིགས་རྒྱུན་མི་གཅོད་ཕུང་པོ་གསུམ། །རྣམ་འབྱེད་རྣམ་ཐར་གསུམ་གྱིས་སྦྱངས། །བདེན་དང་ཡེ་ཤེས་ཀྱིས་ཡོངས་ བསྒོས། །མཁས་པས་མ་སྨད་འཕགས་པས་བསྔགས། །ནམ་མཁའི་ཚད་ཀྱི་རྗེས་སུ་འགྲོ། །རྣམ་པ་ཀུན་གྱི་མཆོག་ལྡན་པ། །དེ་ལྟར་རྒྱལ་བའི་ངག་གི་ལས། །ཀུན་གྱི་སྔོན་ཕྱིར་ཡེ་ཤེས་འགྲོ། །ཞེས་བྱ་སྟེ། རྒྱལ་བའི་གསུང་ དབྱངས་ཡན་ལག་དྲུག་ཅུར་ངེས་སོ་སྙམ་པ་དག་སེལ་ཕྱིར་བཀོད་པ་ཡིན་ལ། ཁྱད་པར་ལུང་སྟོན་པ་ནི་མི་སླུ་བས་བཟུང་དུ་རུང་བ་དང་འོད་གསལ་བ་ནི་སེམས་དང་བར་བྱེད་པ་དང༌། མ་འཛིངས་པ་ནི་སྒྲ་རྫར་རྫིར་མ་ཡིན་པ་དང༌། ཕུང་པོ་གསུམ་ རྣམ་པར་འབྱེད་པ་ནི་གང་ཟག་ཡང་དག་པ་ཉིད་དུ་ངེས་པ་དང༌། ལོག་པར་ངེས་པ་དང༌། མ་ངེས་པའི་ཕུང་པོ་སྟེ་གསུམ་འབྱེད་པར་རིགས་ལ། ཕར་ཕྱིན་དྲུག་གིས་བསྒྲུབས་པ་སོགས་ནི་ཕར་ཕྱིན་བརྒྱ་ཉི་ཤུ་རྩ་གཅིག་གི་མཚན་དཔེ་ལ་རྣམ་

Page: 738 འབྲས་བཤད་པ་དང་རིགས་བསྒྲེས་ན་གསུང་མཐའ་ཡས་པ་སྦྱིན་པའི་འབྲས་བུ་གསུང་དག་པ། ཚུལ་ཁྲིམས་ཀྱི་འབྲས་བུ་གསུང་སྙན་པ། བཟོད་པའི་འབྲས་བུ་གསུང་མི་ངལ་ཞིང་དབུགས་ཁུག་གིས་བར་དུ་མ་ཆོད་པ། བརྩོན་འགྲུས་ཀྱི་འབྲས་བུ་ གསུང་ཐོས་པས་སེམས་རྩེ་གཅིག་པ་འཐོབ་པ། བསམ་གཏན་གྱི་འབྲས་བུ་གང་གིས་ཐོས་པའི་དུག་གསུམ་སེལ་བ། ཤེས་རབ་ཀྱི་འབྲས་བུར་ཐོབ་ལ་འདི་ལ་རགས་པར་བརྩིས་ན་ཡན་ལག་བརྒྱ་དང་ལྔར་སྣང་ངོ༌། །གཞན་ཡང་གསུང་ཧ་ ཅང་ཆེ་བའི་རྣར་གཟན་པ་མ་ཡིན་པ་དང༌། ཧ་ཅང་ཆུང་བས་མི་གསལ་བ་མ་ཡིན་པ་དང༌། ཞབས་ཀྱི་དྲུང་དང༌། སྟོང་གསུམ་ཐམས་ཅད་ཀྱི་མཐའི་བར་ཡང་ཁྱད་མེད་པར་ཐོས་པ་དང་སུས་ཐོས་ཀྱང་རྣ་བ་དག་པར་འགྱུར་བས་འོན་པའི་སྐྱོན་སེལ་བ་དང༌། ཀ་ལ་པིངྐ་དང་རྨ་བྱ་དང་ཚངས་དབྱངས་སོགས་གང་ལ་མོས་པ་དེར་ཐོས་པ་དང་འགྲོ་བ་སོ་སོའི་སྐད་དུ་གོ་བ་དང་མང་ཉུང་དང་ཚིག་དོན་ཐམས་ཅད་གང་ལ་གང་གིས་འདུལ་བ་དེ་ཙམ་དུ་ཐོས་ཤིང་དེས་གདུལ་བྱ་དེའི་དོན་འགྲུབ་པ་དང་ངག་ཀུན་ནས་ སློང་བའི་བློ་མི་མངའ་བ་དང་སྒྲའི་གནས་ཁོག་པ་བརྒྱད་ལས་བྱུང་བ་མ་ཡིན་པ་སྟེ་དེ་ལྟ་བུ་སོགས་ནི་གསུང་ཀུན་ཏུ་བརྗོད་པའི་ཆོ་འཕྲུལ་ལོ། །ཐུགས་ཀྱི་ཆོ་འཕྲུལ་ནི། སྟོན་པ་ཟབ་མོ་སྣང་བའི་ཏིང་ངེ་འཛིན་ལ་སྙོམས་པར་ཞུགས་པ་ན་སྤྱན་ རས་གཟིགས་དང་ཤཱ་རིའི་བུ་ལ་ལན་དང་དྲི་བའི་སྤོབས་པ་སྐྱེས་ཏེ་ཤེས་རབ་ཀྱི་ཕ་རོལ་ཏུ་ཕྱིན་པའི་སྙིང་པོ་བསྟན་པ་ལྟ་བུ་དང༌། དེ་བཞིན་གཤེགས་པའི་སྤྱོད་ཡུལ་དང་ཡེ་ཤེས་བསམ་གྱིས་མི་ཁྱབ་པའི་མདོར། འཁོར་འདུས་པ་དེ་ཐམས་ ཅད་ལས་ཁ་ཅིག་གིས་དེ་བཞིན་གཤེགས་པ་དགའ་ལྡན་ནས་འཕོ་བ་ནས་རིང་སྲེལ་བགོད་པ་དང་འདས་ནས་བསྐལ་པ་བརྗོད་དུ་མེད་པ་སོང་བའི་བར་ཐ་དད་དུ་སྣང་བ་དང༌། གསེར་དང་མུ་ཏིག་དང་མཐོན་ཀ་ལྟ་བུའི་ཁ་དོག་ཐ་དད་པར་སྣང་བ་དང༌།

Page: 739 ༄༅། །སྐུ་མདོམ་གང་བ་ནས་སྲིད་རྩེ་ལ་ཐུག་པའི་བར་ཐ་དད་དུ་སྣང་བ་དང༌། ཆོས་ཀྱི་སྒོ་ཐ་དད་པ་སྣ་ཚོགས་སྟོན་པར་སྣང་བ་ན་འཇམ་དཔལ་དང་སྒྲིབ་སེལ་གྱི་དྲིས་ལན་གྱིས་དེ་བཞིན་གཤེགས་པ་རྟོག་པ་དང་འབད་པ་མེད་ བཞིན་གང་འདུལ་གྱི་ཁ་དོག་དང༌། དབྱིབས་དང༌། ཆོས་དང༌། དུས་སུ་སྣང་བ་ནི་ཉི་མ་རྟོག་མེད་དུ་རྒྱུ་བ་ལ་ཡུལ་སོ་སོ་ན་ཤར་བ་དང༌། ནུབ་པ་དང༌། གུང་དུ་རྟོག་པ་དང༌། བཻཌཱུརྱ་རས་སོ་སོའི་སྟེང་དུ་བཞག་པས་ཁ་དོག་ཐ་དད་པར་སྣང་པ་སོགས་དཔེ་མང་ པས་གཏན་ལ་ཕབ་པ་ལྟར་དང་། ནམ་མཁའི་མདོག་གིས་འདུལ་བའི་བཟོད་པ་བསྟན་པར། དེ་བཞིན་གཤེགས་པ་སྐར་མདའི་མདོག་གིས་འདུལ་བའི་ཏིང་ངེ་འཛིན་ལ་སྙོམས་པར་ཞུགས་པ་ན་སྟོན་པ་དྲང་སྲོང་རྒན་པོ་ རལ་པ་ཅན་མེའི་སྦྱིན་སྲེག་བྱེད་པའི་མེ་འོད་ཁ་དོག་སྣ་ཚོགས་པས་འཇིག་རྟེན་ཐམས་ཅད་སྣང་བར་བྱས་ཏེ། ཕྱོགས་བཅུའི་སངས་རྒྱས་བྱང་སེམས་ཐམས་ཅད་ཀྱང་དྲང་སྲོང་དུ་གྱུར་པས་བརྟུལ་ཞུགས་ཀྱིས་གྲོལ་བར་སྨྲ་བ་ཐམས་ཅད་ཐེག་ གསུམ་དུ་བཏུལ་བ་ལ་སོགས་མདོར་ན་དེ་བཞིན་གཤེགས་པ་ནི་ཆོས་ཉིད་ཇི་ལྟ་བ་ཡོངས་སུ་རྫོགས་པ་འགོག་པ་ཆེན་པོ་ལས་གཡོ་བ་ནམ་ཡང་མེད་བཞིན་དུ། བསོད་ནམས་ཐམས་ཅད་བསྡུས་པ་དང༌། དམ་པའི་ཆོས་པདྨ་དཀར་པོ་དང༌། ཆོས་ཐམས་ཅད་ཀྱི་ཚུལ་ངེས་པར་སྟོན་པ་དང༌། མྱ་ངན་ལས་འདས་པ་ཆེན་པོ་ལ་སོགས་ཏིང་ངེ་འཛིན་གྱི་སྒོ་མཐའ་ཡས་པ་ལ་སྙོམས་པར་འཇུག་ཅིང་ལྡང་བར་ཡང་མཛད་ལ། ཏིང་ངེ་འཛིན་དེའི་མཐུས་བསོད་ནམས་ཐམས་ཅད་ བསྡུས་པའི་ཏིང་ངེ་འཛིན་གྱི་མདོ་དང༌། དམ་ཆོས་པད་དཀར་གྱི་མདོ་དང༌། བསྐལ་པ་བཟང་པོའི་མདོ་དང༌། མྱང་འདས་ཀྱི་མདོ་སོགས་ཆོས་ཀྱི་རྣམ་གྲངས་དེ་དང་དེ་སྟོན་པའི་སྣང་བ་གདུལ་བྱ་ལ་འབྱུང་སྟེ། ཐེག་ཆེན་གྱི་མདོ་ཕལ་མོ་ཆེ་རྒྱུ་ཏིང་ངེ་

Page: 740 འཛིན་དེ་ལས་མིང་དུ་བྱས་པ་ཡིན་ལ། དེ་བཞིན་གཤེགས་པ་ནི་ཅི་ཡང་གསུང་པར་མི་མཛད་ཀྱང་གདུལ་བྱ་སོ་སོ་ལ་སྣང་བ་དེ་ལྟ་བུས་འདུལ་བ་ནི་ཐུགས་བསམ་གྱིས་མི་ཁྱབ་པ་ཏིང་ངེ་འཛིན་གྱི་ཆོ་འཕྲུལ་ལོ། །གསུང་གི་ཁྱད་པར་ནི་གསུང་ གི་ཆོ་འཕྲུལ་ཉིད་དེ་ཅུང་ཟད་བསྟན་ཟིན་ཏོ། །མ་འདྲེས་པའི་ཆོས་ཀྱི་ཁྱད་པར་ནི། ཆོས་གཟུགས་ཀྱི་སྐུ་མ་ཕྱེ་བའི་དབང་དུ་མཛད་ནས། བྱང་ས་ལས། མ་འདྲེས་པའི་ཆོས་བརྒྱ་དང་བཞི་བཅུར་བཤད་དེ། ཇི་སྐད་ དུ། དེ་ལ་སངས་རྒྱས་ཀྱི་ཆོས་བརྒྱ་བཞི་བཅུ་ནི་འདི་དག་ཡིན་ཏེ། སྐྱེས་བུ་ཆེན་པོའི་མཚན་སོ་གཉིས་དང༌། དཔེ་བྱད་བཟང་པོ་བརྒྱད་ཅུ་དང༌། རྣམ་པ་ཐམས་ཅད་དུ་ཡོངས་སུ་དག་པ་བཞི་དང༌། སྟོབས་བཅུ་དང༌། མི་འཇིགས་པ་བཞི་དང༌། དྲན་ པ་ཉེ་བར་བཞག་པ་གསུམ་དང༌། སྲུང་བ་མེད་པ་གསུམ་དང༌། སྙིང་རྗེ་ཆེན་པོ་དང༌། བསྙེལ་བ་མི་མངའ་བའི་ཆོས་ཉིད་དང༌། བག་ཆགས་ཡང་དག་པར་བཅོམ་པ་དང༌། རྣམ་པ་ཐམས་ཅད་དང༌། མཆོག་མཁྱེན་པའོ། །ཞེས་སོ། །གཙོ་བོར་ཆོས་ཀྱི་ སྐུའི་དབང་དུ་བྱས་ན། སྟོབས་བཅུ་དང༌། མི་འཇིགས་པ་བཞི་དང༌། མ་འདྲེས་པའི་ཆོས་བཅོ་བརྒྱད་ཀྱིས་བྲལ་བའི་ཡོན་ཏན་སོ་གཉིས་ཏེ། དང་པོའི་སྐུ་ནི་སྟོབས་ལ་སོགས། །བྲལ་བའི་ཡོན་ཏན་རྣམས་དང་ལྡན། །ཞེས་སོ། ། དེ་ཡང་རྒྱུ་དགེ་བ་ལས་འབྲས་བུ་བདེ་བ་འབྱུང་བ་ཞེས་བྱ་བ་འདི་ནི་གནས་སོ། །རྒྱུ་མི་དགེ་བ་ལས་འབྲས་བུ་བདེ་བ་འབྱུང་བ་ཞེས་བྱ་བ་འདི་ནི་གནས་མ་ཡིན་པའོ། །སྟོང་ཉིད་ལ་མོས་པས་བཟོད་པ་འཐོབ་པ་ནི་གནས་སོ། །དམིགས་པ་ཅན་གྱིས་ བཟོད་པ་འཐོབ་པ་ནི་གནས་མ་ཡིན་པའོ། །ཞེས་པ་ལ་སོགས་པ་གནས་ལ་གནས་དང་གནས་མ་ཡིན་པ་ལ་གནས་མ་ཡིན་པར་མཁྱེན་པ་ནི་སྟོབས་དང་པོ་གནས་དང་གནས་མིན་མཁྱེན་པའི་སྟོབས་ཏེ། སྙིང་རྗེ་ཆེན་པོ་ངེས་བསྟན་གྱི་མདོ་

Page: 741 ༄༅། །ལས། ས་ཀུན་འགྲུམ་པར་འགྱུར་ཡང་སྲིད། །ནམ་མཁའ་གཡོ་བར་འགྱུར་ཡང་སྲིད། །སངས་རྒྱས་གནས་མིན་བཤད་པ་ནི། །གནས་སུ་འགྱུར་བ་མི་སྲིད་དོ། །ཞེས་སོ། །དེས་ན་བོད་ཁ་ཅིག་ལས་དཀར་ རྣམ་སྨིན་གནག་པ་སོགས་འདོད་པ་ཡང་དེ་བཞིན་གཤེགས་པའི་སྟོབས་དང་པོ་ལ་རྒོལ་བར་ཟད་དོ། །མཐོང་ཆོས་ལ་སྨིན་པ་དང་ཕྱི་མར་སྨིན་པ་དང་ལན་གྲངས་གཞན་ལ་སྨིན་པ་དང་སྨིན་པར་མ་ངེས་པ་སོགས་མཁྱེན་པ་ནི་ལས་ ཀྱི་རྣམ་སྨིན་མཁྱེན་པའི་སྟོབས་སོ། །གདུལ་བྱ་གང་དབང་པོ་རྣོ་བ་དང་རྟུལ་བ་དང་བར་མ་སོགས་མཁྱེན་པ་ནི་དབང་པོ་མཁྱེན་པའི་སྟོབས་སོ། །ཁམས་ཐ་དད་པ་མཁྱེན་པ་ནི་ཁམས་མཁྱེན་པའི་སྟོབས་ཏེ། མདོ་ལས། འཇིག་རྟེན་ གནས་པའི་ཁམས་དང་རབ་ཏུ་གནས་པ་དང་རྗེས་སུ་ཁྲིད་པ་དང་ཐོགས་པ་དང་སྦྱོར་བ་དང་བསམ་པ་དང་ངེས་པར་སེམ་པ་དང་བརྟེན་པའི་ཁམས་ཏེ་བརྒྱད་དུ་བཤད་དོ། །དེ་བཞིན་དུ་མོས་པ་མཁྱེན་པ་དང༌། འཁོར་བའི་རྒྱུ་ མཁྱེན་པ་ཀུན་འགྲོ་མཁྱེན་པ་དང༌། ཐར་པའི་རྒྱུ་མཁྱེན་པ་རྣམ་བྱང་མཁྱེན་པའམ་ཡང་ན་རང་བཞིན་མཁྱེན་པར་བྱས་ཀྱང་མི་འགལ་ཏེ། མདོ་ལས། འཁོར་བ་ནི་ཀུན་ནས་ཉོན་མོངས་པའི་མཚན་ཉིད་དུ་མཁྱེན་ཏོ། །རྣམ་བྱང་ ནི་རང་བཞིན་གྱིས་འོད་གསལ་བའི་མཚན་ཉིད་དུ་མཁྱེན་ཏོ། །ཞེས་སོ། །སྔོན་དང་ཕྱི་མའི་གནས་མཁྱེན་པ་དང༌། ལྷ་ཡི་མིག་མཁྱེན་པ་དང༌། ཐར་ལམ་འབྲས་བུ་དང་བཅས་པ་མཁྱེན་པ་ཟག་ཟད་མཁྱེན་པའི་སྟོབས་ཏེ་རྣམ་ པ་བཅུའོ། །དེ་དག་གི་རྒྱུ་ཡང་སྔོན་སེམས་སྐྱེད་དང༌། དམ་བཅའ་བརྟན་པ་དང༌། གཞན་ལ་ལས་འབྲས་བསྟན་པ་དང༌། དབང་པོ་དང་འཚམ་པར་བསྟན་པ་དང༌། གཞན་གྱི་ཁམས་དང་མཐུན་པར་ཞུགས་པ་དང༌། མོས་པ་བཞིན་ཞུགས་པ་དང༌།

Page: 742 ཐེག་པ་ཐམས་ཅད་ལ་གོམས་པ་དང༌། ཏིང་ངེ་འཛིན་ལྷུར་བྱས་པ་དང༌། དགེ་བ་ཆུད་མ་གསན་པ་དང༌། སེམས་ཅན་ལ་ལྷག་པའི་བསམ་པས་གནས་པ་དང༌། ཟག་པ་ཟད་པའི་དོན་དུ་ཆོས་བསྟན་པ་ལས་རེ་རེ་ཞིང་གྲུབ་བོ། །མི་འཇིགས་ པ་བཞི་ནི། འཁོར་གྱི་ནང་དུ་ངས་ཆོས་ཐམས་ཅད་མངོན་པར་རྫོགས་པར་སངས་རྒྱས་སོ་ཞེས་བྱང་ཆུབ་བརྙེས་པ་དང༌། ཉོན་མོངས་པ་འདི་དག་ནི་ཐར་པའི་གེགས་སོ་ཞེས་སྤང་བྱ་བསྟན་པ་དང༌། གང་ལ་འཕགས་ལམ་ཡན་ལག་བརྒྱད་སྣང་བ་ དེ་ལ་མྱ་ངན་ལས་འདས་པ་ཡོད་དོ་ཞེས་ཐར་པའི་ལམ་བསྟན་པ་དང༌། ངས་སྒྲིབ་པ་བག་ཉལ་དང་བཅས་པ་སྤངས་སོ་ཞེས་སེང་གེའི་སྒྲ་བསྒྲགས་པ་ལ་ལྷ་མིར་གྱུར་པ་སུས་ཀྱང་ཆོས་བཞིན་དུ་རྒོལ་བ་མེད་པས་འཁོར་གྱི་ནང་དུ་མི་འཇིགས་པ་ བཞིའོ། །མ་འདྲེས་པའི་ཆོས་བཅོ་བརྒྱད་ནི། སྐུ་འཁྲུལ་པ་མི་མངའ་བ་དང༌། གསུང་ཅ་ཅོ་མི་མངའ་བ་དང༌། ཐུགས་དྲན་པ་ཉམས་པ་མི་མངའ་བ་དང༌། མཉམ་པར་མ་བཞག་པའི་ཐུགས་མི་མངའ་བ་དང༌། འདུ་ཤེས་སྣ་ཚོགས་པ་མི་མངའ་བ་དང༌། མ་བརྟགས་པའི་བཏང་སྙོམས་མི་མངའ་བ་སྟེ། སྤྱོད་པ་མ་འདྲེས་པ་དྲུག་དང༌། འདུན་པ་དང༌། བརྩོན་འགྲུས་དང༌། དྲན་པ་དང༌། ཤེས་རབ་དང༌། རྣམ་པར་གྲོལ་བ་དང༌། རྣམ་པར་གྲོལ་བའི་ཡེ་ཤེས་གཟིགས་པ༌། རྣམས་རེ་རེ་ཞིང་ཉམས་པ་མི་མངའ་བ་ སྟེ་རྟོགས་པ་མ་འདྲེས་པ་དྲུག་དང༌། སྐུ། གསུང༌། ཐུགས་ཀྱི་མཛད་པ་ཐམས་ཅད་ལ་ཡེ་ཤེས་སྔོན་དུ་འགྲོ་ཞིང་ཡེ་ཤེས་རྗེས་སུ་འཇུག་པ་ཕྲིན་ལས་མ་འདྲེས་པ་གསུམ་དང༌། འདས་པ་དང༌། མ་འོངས་པ་དང༌། ད་ལྟར་བ། ཐམས་ཅད་ལ་ཆགས་ ཐོགས་ཀྱི་སྒྲིབ་པ་མེད་པར་ཡེ་ཤེས་ཀྱི་གཟིགས་པ་འཇུག་པ་ནི་ཡེ་ཤེས་མ་འདྲེས་པ་གསུམ་སྟེ། དེ་ལྟར་བཅོ་བརྒྱད་དོ། །གཞན་ཡང་སངས་རྒྱས་ཀྱི་ཟག་མེད་ཀྱི་ཡོན་ཏན་འདི་དག་མདོ་སྡེ་རྒྱན་ལས་སྡེ་ཚན་ཉེར་གཅིག་ཏུ་གསུངས་ཏེ།

Page: 743 ༄༅། །སེམས་ཅན་རྣམས་ལ་བརྩེ་བ་ཅན། །སོགས་ཀྱིས་ཚད་མེད་བཞི། ཐུབ་པ་སྒྲིབ་ཀུན་ངེས་པར་གྲོལ། །ཞེས་པས་གཟུགས་ཅན་གཟུགས་ལ་ལྟ་བ་དང༌། གཟུགས་ཅན་མ་ཡིན་པ་གཟུགས་ལ་ལྟ་བའི་རྣམ་ ཐར་གཉིས་ཀྱིས་སྤྲུལ་པའི་སྒྲིབ་པ་ལས་གྲོལ། ཁྱད་པར་སྡུག་པའི་རྣམ་ཐར་གྱིས་སྡུག་མི་སྡུག་སྤྲུལ་པ་ལ་ཆགས་སྡང་གི་སྒྲིབ་པ་ལས་གྲོལ། གཟུགས་མེད་ཀྱི་རྣམ་ཐར་བཞིས་རོ་མྱོང་གི་སྒྲིབ་པ་ལས་གྲོལ། འདུ་ཤེས་དང་ཚོར་བ་འགོག་ པའི་རྣམ་ཐར་གྱིས་འགོག་པའི་སྒྲིབ་པ་ལས་གྲོལ་བ་སྟེ་རྣམ་ཐར་བརྒྱད་བསྟན་ཏོ། །འཇིག་རྟེན་ཐམས་ཅད་ཟིལ་གྱིས་གནོན། །ཞེས་པས་ཟིལ་གནོན་བརྒྱད་དང༌། ཁྱོད་ཀྱི་མཁྱེན་པས་ཤེས་བྱ་ཁྱབ། །ཐུགས་གྲོལ་ཁྱོད་ ལ་ཕྱག་འཚལ་ལོ། །ཞེས་པས་ཟད་པར་བཅུ་བསྟན་ཏོ། །སེམས་ཅན་དག་ནི་ཐམས་ཅད་ཀྱི། །སོགས་ཀྱིས་ཉོན་མོངས་མེད་པའི་ཏིང་ངེ་འཛིན་དང༌། །ལྷུན་གྱི་གྲུབ་ཅིང་ཆགས་མི་མངའ། །སོགས་ཀྱིས་སྨོན་ གནས་མཁྱེན་པ་དང༌། རྟེན་དང་སོགས་ཀྱིས་ཚིག་དང༌། དོན་དང༌། ངེས་ཚིག་དང༌། སྤོབས་པ་སྟེ་སོ་སོ་ཡང་དག་པར་རིག་པ་བཞི། གཤེགས་ནས་སོགས་ཀྱིས་རྫུ་འཕྲུལ་དང༌། ལྷའི་རྣ་བ་དང༌། གཞན་གྱི་སེམས་ཤེས་པ་དང༌། སྔོན་གནས་རྗེས་སུ་ དྲན་པ་དང༌། ལྷའི་མིག་དང༌། ཟག་པ་ཟད་པ་སྟེ་མངོན་ཤེས་དྲུགལུས་ཅན་སོགས་ཀྱིས་མཚན་དཔེ། །ལེན་དང་གནས་དང་གཏོང་བ་དང༌། །ཞེས་པས་དམིགས་པ་ཡང་དགསྤྲུལ་དང་ཡོངས་སུ་བསྒྱུར་བ་དང༌། །ཞེས་པས་ རྟེན། ཏིང་ངེ་འཛིན་དང༌། ཞེས་པས་ཐུགས། ཡེ་ཤེས་ལ། །མངའ་བརྙེས་ཁྱོད་ལ་ཕྱག་འཚལ་ལོ། །ཞེས་པས་ཤེས་རབ་ཡོངས་སུ་དག་པ་སྟེ་ཡོངས་དག་བཞིའོ། །ཐབས་དང་སོགས་ཀྱིས་སྟོབས་བཅུ། རང་གཞན་

Page: 744 སོགས་ཀྱིས་མི་འཇིགས་པ་བཞི། སྲུང་མེད། ཅེས་པས་སྐུ་གསུང་ཐུགས་སྲུང་བ་མེད་པ་གསུམ། བསྙེལ་བ་མི་མངའ་བ་སོགས་ཀྱིས་སྐུ་གསུང་ཐུགས་དྲན་པ་ཉེ་བར་བཞག་པ་གསུམ། ཀུན་མཁྱེན་སོགས་ཀྱིས་བག་ཆགས་ ཡང་དག་བཅོམ་པ། སེམས་ཅན་སོགས་ཀྱིས་བསྙེལ་བ་མི་མངའ་བ། འཇིག་རྟེན་སོགས་ཀྱིས་ཐུགས་རྗེ་ཆེན་པོ། སྤྱོད་པ་སོགས་ཀྱི་མ་འདྲེས་པ་བཅོ་བརྒྱད། སྐུ་གསུམ་སོགས་ཀྱིས་རྣམ་པ་ཐམས་ཅད་མཁྱེན་ པ། འཛིན་པ་མི་མངའ་སོགས་ཀྱིས་ཕ་རོལ་ཏུ་ཕྱིན་པ་དྲུགདམ་པའི་དོན་ནི་གྲུབ་པ་སྟེ། །ས་ཀུན་ལས་ནི་ངེས་པར་འབྱུང༌། །སེམས་ཅན་ཀུན་གྱི་མཆོག་ཏུ་གྱུར། །སེམས་ཅན་ཐམས་ཅད་རྣམ་གྲོལ་མཛད། །ཡོན་ཏན་ མི་ཟད་མཉམ་མེད་ལྡན། །འཇིག་རྟེན་དག་དང་དཀྱིལ་འཁོར་ནའང༌། །སྣང་ལ་ལྷ་དང་མི་རྣམས་ཀྱིས། །རྣམ་པ་ཀུན་ཏུ་མི་མཐོང་ངོ༌། །དེ་ལྟ་ན་ཡང་དེ་ཡི་མཐུས། །གདུལ་བྱའི་སྐལ་བ་ཇི་བཞིན་དུ། །སྲིད་པ་ཇི་སྲིད་ གནས་ཀྱི་བར། །དེ་ཡི་མཛད་པ་རྒྱུན་མི་འཆད། །ཅེས་པས་སངས་རྒྱས་ཉིད་ཀྱི་རང་བཞིན་གསུངས་སོ། །རྣམ་པ་གཅིག་ཏུ་ན་སངས་རྒྱས་ཀྱི་ཆོས་ཐམས་ཅད་མ་འདྲེས་པ་ཁོ་ནར་སྣང་སྟེ། སྐུ་བལྟམས་མ་ཐག་པ་ན་ཡང་ སེམས་ཅན་གྱི་ཁམས་ཐམས་ཅད་ལ་གཟིགས་པས་རང་ལས་ལྷག་པ་ལྟ་ག་ལ་ཞིག་སྟེ་ཅུང་ཟད་མཉམ་པ་ཡང་མ་གཟིགས་པས་འདི་ཐམས་ཅད་དྲང་བར་ནུས་སོ་ཞེས་ཆེར་བཞེད་ཅིང་གོམ་པ་བདུན་འབོར་བའི་ཕྱིར་དང༌། ཡོན་ཏན་གྱི་ རྣམ་པ་རེ་རེའང་སེམས་ཅན་ཐམས་ཅད་ཀྱི་བསོད་ནམས་གཅིག་ཏུ་བསྡུས་པས་གངྒཱ་ཀླུང་གི་བྱེ་མའི་ཆར་ཡང་གཞལ་དུ་མེད་པའི་དགེ་བའི་རྩ་བས་བསྒྲུབས་པའི་ཕྱིར་རྒྱུ་བསམ་གྱིས་མི་ཁྱབ་པ་དང༌། ཉིད་ཀྱིས་སྐབས་ཕྱེ་བ་དང་བྱིན་

Page: 745 ༄༅། །གྱིས་བརླབས་པ་མ་གཏོགས་ཉན་རང་ལྟ་ཞོག་སྲིད་ཐ་པའི་བྱང་སེམས་ཀྱིས་ཀྱང་དེའི་གོམ་པ་འདེགས་པ་དང་འདོར་བ་ཙམ་ཡང་ཤེས་པར་མི་ནུས་པའི་ཕྱིར་དང༌། ནམ་མཁའ་དང་སེམས་ཅན་དང་ཆོས་དབྱིངས་དང་ སངས་རྒྱས་ཀྱི་ཡོན་ཏན་གྱི་ཚད་ནི་དེ་བཞིན་གཤེགས་པ་ཉིད་ཀྱང་གསུང་བར་མི་མཛད་པའི་ཕྱིར་རོ། །དེས་ན་གཟུགས་སྐུ་གཉིས་ཀྱི་ཡོན་ཏན་ནི་ཇི་ལྟར་ཉི་མའི་དཀྱིལ་འཁོར་གྱིས་རང་གི་འོད་སྦས་ཏེ་སྲིན་བུ་མེ་ཁྱེར་དུ་བསྟན་པ་ཙམ་ སྟེ། གཟུགས་སྐུའི་ཡོན་ཏན་དཔེ་ཟླ་མ་མཆིས་མོད་ཀྱང༌། དེས་ནི་ཡོན་ཏན་གྱི་ཞིང་རྡུལ་སྙེད་ཀྱི་ཆའི་ཆ་གཅིག་ཀྱང་བསྟན་པ་མ་ཡིན་ལ། དེའི་ཕྱིར། གང་དག་ང་ལ་གཟུགས་སུ་མཐོང༌། །གང་དག་ང་ལ་སྒྲར་ཤེས་པ། །ལོག་པའི་ ལམ་དུ་ཞུགས་པ་ཡི། །སྐྱེ་བོ་དེ་ཡིས་ང་མི་མཐོང༌། །ཞེས་དང༌། དགེ་རྩ་ཡོངས་འཛིན་གྱི་མདོ་ལས། བཟང་སྐྱོང༌། དེ་དག་ནི་དམིགས་པ་དང་སྤྲོས་པ་དང༌། མངོན་པར་འདུ་བྱེད་པ་དང༌། འཇིག་རྟེན་པའི་ཡང་དག་པའི་ལྟ་བས་ངའི་ ལས་དང་བྱེད་པ་ལ་འཇུག་པར་བྱེད་ཅིང༌། སངས་རྒྱས་ཀྱི་ཡེ་ཤེས་ཅུང་ཟད་ཙམ་བརྗོད་པར་བྱེད་པ་གང་ཡིན་པ་དེ་དང༌། དེ་དག་ནི་ངའི་བསྔགས་པ་མ་ཡིན་པ་སྨྲ་བ་དག་སྟེ་དེ་དག་ངེས་པར་འབྱུང་བ་མ་ཡིན་པར་སྨྲ་བའོ། །ཞེས་ང་སྨྲའོ། །བཟང་ སྐྱོང་དེ་བཞིན་གཤེགས་པའི་བསྔགས་པ་སྨྲ་བ་དང་གསུངས་པ་སྨྲ་བ་དེ་དག་ཀྱང་གང་ཞེ་ན། བཟང་སྐྱོང༌། ཆོས་ཐམས་ཅད་འཛིན་པ་མེད་པ་དག་དང༌། སྤྲོས་པ་དང༌། མངོན་པར་འདུ་བྱེད་པ་དང༌། དུས་གསུམ་རྗེས་སུ་ཚོལ་བ་དང༌། ཡི་གེ་དང་འདོར་ བའི་བར་མེད་པ་དག་སྟེ། བཟང་སྐྱོང༌། དེ་དག་ནི་དེ་བཞིན་གཤེགས་པའི་བསྔགས་པ་སྨྲ་བ་དག་དང༌། གདགས་པ་མི་བྱེད་པ་དག་དང༌། སངས་རྒྱས་ཀྱི་སྲས་དག་དང༌། ཆོས་ལས་སྐྱེས་པ་དག་ཡིན་ནོ། །ཞེས་དང༌། གཟུགས་ཀྱི་སྐུར་ནི་ནམ་དུ་

Page: 746 ཡང༌། །རྒྱལ་བ་གདགས་པར་ཡོང་མི་ནུས། །ཞེས་དང༌། སུ་དག་ཆོས་ཀྱི་སྐུར་ལྟ་བ། །དེ་དག་གིས་ནི་འདྲེན་པ་མཐོང༌། །ཞེས་དང༌། རྒྱལ་བ་ལ་ནི་གཟུགས་དང་མཚན་མར་མ་ལྟ་ཞིག །བྱིས་པ་ལྟ་བུས་བདེ་བར་ གཤེགས་ལ་སེམས་མ་ལྟ། །གང་གིས་རབ་འབྱོར་ལྟ་བུར་ང་ནི་མཐོང་གྱུར་པ། །དེས་ནི་སྟོང་གསུམ་ཀུན་གྱི་སྦྱིན་པ་ཐམས་ཅད་སྦྱངས། །ཞེས་དགེ་སློང་རྣམས་ཉིན་རེ་བཞིན་དུས་གསུམ་དུ་སྟོན་པ་ལྟ་བ་ལས་ཚེ་དང་ལྡན་ པ་རབ་འབྱོར་ནི་གསོ་སྦྱོང་གི་ཚེ་ལས་མི་འོང་ནས་དེའི་རྒྱུ་ཞུས་པས་རབ་འབྱོར་གྱིས་ནི་དེ་བཞིན་གཤེགས་པ་ནི་ལྟར་མེད་པར་ཤེས་པས་མི་འོང་སྟེ་དེ་ལྟར་མཐོང་ན་སངས་རྒྱས་ཡང་དག་པ་མཐོང་བ་ཡིན་ནོ། །ཞེས་གསུངས་པ་སྟེ། འདི་དག་ གིས་གཟུགས་སྐུ་ཙམ་གྱིས་སངས་རྒྱས་ཡོངས་སུ་རྫོགས་པ་མ་ཡིན་ཏེ། ཇི་ལྟར་ནམ་མཁའ་མཐའ་ཡས་པ་ལས་རྩྭ་མཆོག་གི་བུ་ག་མཐོང་བ་ཙམ་མོ་ཞེས་སྟོན་པ་ཡིན་གྱི་གཟུགས་ཀྱི་སྐུ་སངས་རྒྱས་ཀྱི་སྐུ་མ་ཡིན་པར་སྟོན་པ་ཡང་ མ་ཡིན་ཏེ། སྔོན་ངས་དགེ་བའི་རྩ་བ་འདི་སྤྱད་པས་མཚན་འདི་དང་ལྡན་པར་གྱུར་ཏོ་ཞེས་སོགས་ཞལ་གྱིས་བཞེས་པའི་ཕྱིར་དང༌། གང་དག་ང་ལ་གཟུགས་སུ་མཐོང༌། །ཞེས་གསུང་བ་པོ་ཉིད་སངས་རྒྱས་སུ་ཞལ་གྱིས་ བཞེས་པའི་ཕྱིར་དང༌། མི་འཇིགས་པ་བཞི་བརྙེས་པས་དེ་ལ་སུས་ཀྱང་འཚང་མ་རྒྱས་སོ་ཞེས་ཆོས་མཐུན་གྱིས་རྒོལ་མི་ནུས་པའི་ཕྱིར་དང༌། དགེ་སློང་དག་ངའི་སྐུ་ལ་ལྟོས་ཤིག་དེ་བཞིན་གཤེགས་པའི་སྐུ་ལྟ་བ་ནི་རྙེད་པར་དཀའ་འོ་ཞེས་ གཟུགས་ཀྱི་སྐུ་ཉིད་དེ་བཞིན་གཤེགས་པའི་སྐུར་ཞལ་གྱིས་བཞེས་པའི་ཕྱིར་རོ། །དེས་ན་ནམ་མཁའ་ལ་རྩྭ་མཆོག་གི་བུ་གར་བལྟ་བར་མི་བྱའོ། །ཞེས་བསྟན་པ་ན་རྩ་མཆོག་གི་སྦུབས་ཀྱི་ནམ་མཁའ་ནམ་མཁའ་མ་ཡིན་ནོ། །ཞེས་སྟོན་

Page: 747 ༄༅། །པ་མ་ཡིན་པ་ལྟར་ཤེས་པར་བྱའོ། །གཟུགས་ཀྱི་སྐུ་སངས་རྒྱས་ཀྱི་སྐུ་ཡིན་མོད་ཀྱང་ཆོས་གཟུགས་ཕྱེ་བ་ན་གཟུགས་ཀྱི་ཆ་ཉིད་ནི་སངས་རྒྱས་ཉིད་དུ་རྣམ་པར་མ་བཞག་སྟེ། དྲིན་ལན་གསབ་པའི་མདོ་ ལས། བཅོམ་ལྡན་འདས་གང་སངས་རྒྱས་ལ་སྐྱབས་སུ་མཆི་བ་དེ་གཟུགས་ཀྱི་སྐུ་ལ་སྐྱབས་སུ་མཆི་འམ་ཆོས་ཀྱི་སྐུ་ལ་སྐྱབས་སུ་མཆི། བཀའ་བསྩལ་པ། ཆོས་ཀྱི་སྐུ་ལ་སྐྱབས་སུ་འགྲོ་ཡི་གཟུགས་ཀྱི་སྐུ་ལ་སྐྱབས་སུ་ འགྲོ་བ་ནི་མ་ཡིན་ཏེ་གཟུགས་སངས་རྒྱས་མ་ཡིན་པའི་ཕྱིར་རོ། །གསོལ་པ། གཟུགས་ཀྱི་སྐུ་སངས་རྒྱས་མ་ལགས་ན་ཅིའི་སླད་དུ་གཟུགས་ཀྱི་སྐུ་ལ་ཁྲག་ཕྱུང་བས་མཚམས་མ་མཆིས་པའི་ལས་བགྱིས་པར་འགྱུར། བཀའ་ བསྩལ་པ། གཟུགས་ཀྱི་སྐུ་ནི་ཆོས་ཀྱི་སྐུའི་སྣོད་ཡིན་ཏེ་ཆོས་ཀྱི་སྐུའི་གནས་སོ། །དེ་བས་ན་ཆོས་ཀྱི་སྐུ་ལ་གནོད་པ་བྱས་པས་མཚམས་མེད་པའི་ལས་སུ་འགྱུར་གྱི་གཟུགས་ཀྱི་སྐུ་སངས་རྒྱས་ཡིན་ནས་མཚམས་མེད་པའི་ལས་སུ་འགྱུར་ བ་ནི་མ་ཡིན་ནོ། །ཞེས་སོ། །འདི་ནི་སངས་རྒྱས་མྱ་ངན་ལས་འདས་པའི་སྐུ་གདུང་སངས་རྒྱས་ཀྱི་སྐུ་གདུང་ཡིན་ཡང༌། སངས་རྒྱས་སུ་མི་འཇོག་པ་ལྟ་བུ་སྟེ། སྤྱིར་དྲིན་ལན་གསབ་པ་ཐེག་ཆེན་གྱི་མདོ་ཡིན་མོད་ཀྱང༌། གཟུགས་སྐུ་ ཆོས་སྐུའི་རྟེན་དུ་བཤད་པ་འདི་ནི་ཐེག་དམན་དུ་དེ་བཞིན་གཤེགས་པ་བེམ་ཤེས་གཉིས་ཚོགས་ཀྱི་སྐྱེས་བུར་འཇོག་པ་ལྟར་གསུངས་པ་སྟེ། ཐེག་ཆེན་ཉིད་ཀྱི་ཐུན་མོང་མ་ཡིན་པའི་རྣམ་བཞག་ནི་མ་ཡིན་ནོ། །ཐེག་ཆེན་ཉིད་ཀྱི་དབང་ དུ་བྱས་ན་ཡང་དག་པར་ན་རྫོགས་པའི་སངས་རྒྱས་ནི་ཡིན་མིན་ལས་རྣམ་པར་གྲོལ་བ་ཡིན་ཏེ། ཡིན་མིན་ནི་བློས་བཟུང་བར་ཟད་ལ། སངས་རྒྱས་ཉིད་ལ་བློ་མི་མངའ་ཞིང་སེམས་ཅན་སུའི་བློས་ཀྱང་སངས་རྒྱས་གཞལ་བར་མི་ནུས་པའི་ཕྱིར། འོན་ཀྱང་

Page: 748 ཐ་སྙད་ཙམ་དུ་ནི་ངོ་བོ་ཉིད་ཀྱི་སྐུ་རང་བཞིན་གྱིས་རྣམ་པར་དག་པ་ནམ་མཁའ་ལྟ་བུ་ལས་མ་གཡོ་བར་གཟུགས་སྐུ་གཉིས་ཉེ་བར་སྣང་བའི་ཕྱིར། གཟུགས་སྐུ་ནི་ངོ་བོ་ཉིད་ཀྱི་སྐུ་ལས་གཅིག་པ་དང་ཐ་དད་པ་གང་ཡང་མ་ཡིན་ལ། གཟུགས་སྐུ་ གཉིས་པོ་ཡང་ངོ་བོ་ཉིད་སྐུ་ཉིད་ལ་གདུལ་བྱའི་མཐོང་བ་ཐ་དད་པར་ཟད་པའི་ཕྱིར། གཅིག་པ་དང་ཐ་དད་པ་གང་ཡང་མ་ཡིན་ནོ། །འོན་ཀྱང་བེམ་ཤེས་གཉིས་ཚོགས་ལྟར་འདོད་པ་སེལ་བའི་ཆེད་དུ་ངོ་བོ་ཉིད་ཀྱི་སྐུ་ནམ་མཁའ་ལྟར་རྟེན་ དང་གཟུགས་སྐུ་ཉི་ཟླ་ལྟར་དེ་ལ་བརྟེན་པའམ། ངོ་བོ་ཉིད་ཀྱི་སྐུ་ནམ་མཁའ་ལྟ་བུ་ཐུགས་རྗེ་ཆེན་པོ་སྤྲིན་ལྟ་བུ་གཟུགས་སྐུ་ཆར་ལྟ་བུར་ཡང་བཤད་དེ། རྒྱན་ལས། དང་པོ་གཉིས་པོའི་རྟེན་ཡིན་ནོ། །ཞེས་དང༌། ཇོ་བོའི་སྙིང་པོ་ བསྡུ་བར། སྐུ་གསུམ་འབྱུང་བའི་མཚན་ཉིད་ཀྱང༌། །སྟོང་ཉིད་ནམ་མཁའ་ལྟ་བུ་ལས། །རྩོལ་མེད་ཐུགས་རྗེའི་སྤྲིན་འབྱུང་ཞིང༌། །སྐུ་གཉིས་བདུད་རྩིའི་ཆར་རྒྱུན་གྱིས། །ཁམས་གསུམ་ཐ་བའི་རྒྱུད་བརླན་ཏེ། །བྱང་ ཆུབ་སྙིང་པོའི་ས་བོན་ལས། །དགེ་བའི་ལོ་ཏོག་སྨིན་པར་འགྱུར། །ཞེས་སོ། །དེས་ན་སྤྲིན་དང་ཆར་ནི་ནམ་མཁའ་ལས་གཅིག་ཐ་དད་གང་དུ་ཡང་གདགས་མི་ནུས་པ་ལྟར་ཤེས་པར་བྱའོ། །ཡང་ན་ཆོས་ཀྱི་སྐུ་ནམ་མཁའ་ལྟ་བུ། ལོངས་སྐུ་སྤྲིན་ལྟ་བུ། སྤྲུལ་སྐུ་ཆར་ལྟ་བུ་ཡང་ཡིན་ཏེ། སྐུ་གསུམ་གྱི་མདོར། རིགས་ཀྱི་བུ་དེ་བཞིན་གཤེགས་པའི་ཆོས་ཀྱི་སྐུ་ནི་ནམ་མཁའ་ལྟར་རང་བཞིན་མེད་པའི་དོན་ཏོ། །ལོངས་སྤྱོད་རྫོགས་པའི་སྐུ་ནི་སྤྲིན་ལྟར་འབྱུང་བའི་དོན་ཏོ། ། སྤྲུལ་པའི་སྐུ་ནི་སངས་རྒྱས་ཐམས་ཅད་ཀྱི་ཕྲིན་ལས་ཏེ་ཆར་པ་ལྟ་བུས་ཐམས་ཅད་བརླན་པའི་དོན་ཏོ། །ཞེས་དང༌། རང་བཞིན་རྣམ་པར་དག་པ་ནི་ཆོས་ཀྱི་སྐུའོ། །ཏིང་ངེ་འཛིན་རྣམ་པར་དག་པ་ནི་ལོངས་སྤྱོད་རྫོགས་པའི་སྐུའོ། །སྤྱོད་

Page: 749 ༄༅། །པ་རྣམ་པར་དག་པ་ནི་སངས་རྒྱས་ཐམས་ཅད་ཀྱི་སྤྲུལ་པའི་སྐུའོ། །ཞེས་དང༌། ཆོས་ཀྱི་སྐུ་ནི་སངས་རྒྱས་ཐམས་ཅད་དང་རང་བཞིན་མཐུན་པར་གནས་སོ། །ལོངས་སྤྱོད་རྫོགས་པའི་སྐུ་ནི་སངས་རྒྱས་ཐམས་ཅད་དང༌། ཏིང་ངེ་འཛིན་མཐུན་པར་གནས་སོ། །སྤྲུལ་པའི་སྐུ་ནི་སངས་རྒྱས་ཐམས་ཅད་དང་ཕྲིན་ལས་མཐུན་པར་གནས་སོ་ཞེས་སོ། །དེས་ན་སངས་རྒྱས་ཉིད་ནི་སྤངས་རྟོགས་དང་སྐུ་གསུང་ཐུགས་དང་སྐུ་དང༌། ཡེ་ཤེས་སོགས་ཐམས་ཅད་ ཡོངས་སུ་རྫོགས་པའི་ཆོས་ཀྱི་སྐུ་ལ་འཇོག་ལ། སངས་རྒྱས་ཀྱི་སྐུའི་སྒྲ་ཙམ་ནི་དེ་ལས་སྐུ་བྱེ་བྲག་ཏུ་ཕྱེ་བ་རེ་རེ་ལ་ཡང་འཇུག་ཅིང༌། ཡེ་ཤེས་ལ་སྐུར་འཇོག་པ་ཡང་སླད་ཀྱིས་འཆད་པས་སངས་རྒྱས་ཉིད་དང་སངས་རྒྱས་ཀྱི་སྐུ་ཙམ་ལ་ ཀུན་རྫོབ་ཏུ་སྒྲ་རྒྱ་ཆེ་ཆུང་གི་ཁྱད་པར་རྩོད་ངོར་འཇོག་རིགས་སོ། །ཇི་ལྟར་འཚང་རྒྱ་བའི་ཚུལ་ལ། རྒྱུའི་ཐེག་པ་ཁོ་ནའི་དབང་དུ་བྱས་ནས་ཀྱང་མདོ་སོ་སོའི་དགོངས་པས་སྐུ་གསུམ་གྱི་འཚང་རྒྱ་ཚུལ་ཐ་དད་པ་གསུམ་དང༌། ཤིང་རྟའི་སྲོལ་ གཉིས་ཀྱི་བཞེད་པས་ཐ་དད་པ་གཉིས་སོ། །དེ་ཡང་རང་དོན་ཆོས་ཉིད་ཀྱི་སྐུར་འཚང་རྒྱ་བ་ནི། སྤྱིར་བྱིས་པའི་ཡུལ་མ་ཡིན་མོད། རེས་འགའ་ནི་མི་སྐྱེ་བའི་ཆོས་ལ་བཟོད་པ་ཐོབ་པ་ཉིད་ལ་ཡང་བཤད་དེ། ཡེ་ཤེས་ཀྱི་ཕྱག་རྒྱའི་མདོ་ལས། འཇམ་དཔལ། ངས་ཏིང་ངེ་འཛིན་འདི་ལ་གནས་ནས་བཅོམ་ལྡན་འདས་མར་མེ་མཛད་མཐོང་མ་ཐག་ཏུ་བྱང་ཆུབ་ཐོབ་བོ། །གསོལ་པ། འོ་ན་ཅིའི་སླད་དུ་སླར་བསྐལ་པ་གྲངས་མ་མཆིས་བར་འཁོར་བ་ན་འཁོར། བཀའ་བསྩལ་པ། སངས་ རྒྱས་ཀྱི་བྱ་བ་བྱེད་ཅིང་སེམས་ཅན་ཡོངས་སུ་སྨིན་པར་བྱ་བ་དང༌། སྔོན་གྱི་སྨོན་ལམ་ཕུན་སུམ་ཚོགས་པ་ཐོབ་པར་བྱ་བའི་ཕྱིར། བསྐལ་པ་གྲངས་མེད་པར་འཁོར་བ་ན་འཁོར་མོད་ཀྱི་འོན་ཀྱང༌། འཇམ་དཔལ། དེར་ངས་བྱང་ཆུབ་དང༌། དེ་ཉིད་དུ་ངས་

Page: 750 ཡོངས་སུ་མྱ་ངན་ལས་འདས་པ་བཟང་ངོ༌། །ཞེས་གསུངས་ཏེ་རང་བཞིན་གྱིས་རྣམ་པར་དག་པའི་ཆོས་ཉིད་ཇི་ལྟ་བ་རྟོགས་པ་ཉིད་ཀྱི་ཕྱིར་ཆོས་སྐུར་སངས་རྒྱས་པར་རྣམ་པར་བཞག་པ་སྟེ། འདི་ལ་དགོངས་ནས་རྒྱུད་བླའི་ཐོགས་མེད་འགྲེལ་ཆེན་དུ། ས་ བརྒྱད་པར་ཆོས་ཐམས་ཅད་རྣམ་པ་ཐམས་ཅད་དུ་མངོན་པར་རྫོགས་པར་སངས་རྒྱས་པ་བརྙེས་པས་སངས་རྒྱས་དཀོན་མཆོག་གྲུབ་པ་དང༌། ས་དགུ་པར་སོ་སོ་ཡང་དག་པར་རིག་པ་བཞི་ཐོབ་པས་ཆོས་དཀོན་མཆོག་གྲུབ་པ་དང༌། ས་བཅུ་པར་འཁོར་ རྣམས་སྐལ་མཉམ་དུ་སྨིན་པས་དགེ་འདུན་དཀོན་མཆོག་གྲུབ་པར་བཞག་ལ། འདི་ནི་ངོ་བོ་ཉིད་ཀྱི་སྐུ་ལ་ཆོས་སྐུའི་ཐ་སྙད་དུ་སྦྱར་བའི་འཚང་རྒྱ་ཚུལ་གྱི་རྣམ་གྲངས་གཅིག་གོ །འོ་ན་ཆོས་སྐུར་སངས་རྒྱས་ནས་སླར་ས་ལྷག་མ་གཉིས་ བགྲོད་དགོས་པར་འགྱུར་རོ་ཞེ་ན། འདི་ནི་སྔོན་གྱི་སྨོན་ལམ་རྣམས་རྫོགས་པར་བྱ་བ་དང༌། སེམས་ཅན་ཡོངས་སུ་སྨིན་པར་བྱེད་པ་ཞེས་བྱ་བ་གདུལ་བྱ་རྣམས་ཕ་རོལ་ཏུ་ཕྱིན་པ་རྣམས་ལ་སྦྱར་ཏེ་གཟུགས་སྐུ་མཐོང་རུང་དུ་སྒྲུབ་པའི་ཕྱིར། གཞན་ རྒྱུད་ཀྱི་དྲི་མ་སྦྱོང་བ་དང༌། རྫ་ནི་འཇིམ་པ་དང་རྫ་མཁན་ལ་བལྟོས་པ་ལྟར་ཆོས་ཐམས་ཅད་ནི་རྒྱུ་ལ་བལྟོས་པའི་ཕྱིར། སྐུ་ཕུན་སུམ་ཚོགས་པ་མཚན་དཔེ་ལ་སོགས་པ་དང༌། ཞིང་ཕུན་སུམ་ཚོགས་པ་རྣམས་ཀྱི་རྒྱུ་སྒྲུབ་པའི་ཕྱིར། གདུལ་བྱ་དེས་ གདུལ་བྱའི་ངོར་འཁོར་བར་སྟོན་པ་སྟེ། དེའི་ཚེ་ན་ཡང་གདུལ་བྱ་སྨིན་ཟིན་གྱི་ངོར་ཞིང་གཞན་དུ་སྤྲུལ་སྐུར་སྟོན་པ་དང༌། གདུལ་བྱ་ས་ཐོབ་པའི་ངོར་ལོངས་སྐུར་སྟོན་པ་རྒྱུན་མི་འཆད་ཅིང༌། དེ་ཐམས་ཅད་ཀྱི་ཚེ་ནའང་རང་གི་ངོ་བོ་ནི་ཆོས་ཉིད་དེ་བཞིན་ ཉིད་ལས་གཡོ་བ་རྡུལ་ཙམ་ཡང་མེད་དོ། །དེས་ན་དག་པའི་ས་གསུམ་ལ་གནས་པ་ལ་ནི་སངས་རྒྱས་དང་མཚུངས་པའི་བྱང་ཆུབ་སེམས་དཔའ་ཞེས་བྱའོ། །འོ་ན་འདི་དག་སངས་རྒྱས་ཡིན་ནམ་བྱང་ཆུབ་སེམས་དཔའ་ཡིན་ཞེ་

Page: 751 ༄༅། །ན། གཞན་ངོར་གང་ལ་གང་གིས་འདུལ་བ་དེར་སྣང་བར་འགྱུར་ལ། རང་ངོ་ནས་གང་ཡང་མ་ཡིན་ཏེ། སངས་རྒྱས་སམ་བྱང་ཆུབ་སེམས་དཔའ་ཞེས་བྱ་བའི་ཆོས་གང་ཡང་མ་གཟིགས་པའི་ཕྱིར་ཏེ། ཅི་ཡང་ མངོན་དུ་མ་བྱས་པའི་ཚུལ་གྱིས་ཆོས་ཉིད་ཇི་ལྟ་བ་མངོན་དུ་བྱས་ལ། སངས་རྒྱས་དང་བྱང་ཆུབ་སེམས་དཔའ་ནི་སྒྲོ་བཏགས་པའི་ཐ་སྙད་དུ་ཟད་པའི་ཕྱིར་ཏེ། བརྒྱད་སྟོང་པར། བདག་གིས་བྱང་ཆུབ་སེམས་དཔའ་ཞེས་དགྱི་བའི་ཆོས་ དེ་ཡང་དག་པར་རྗེས་སུ་མ་མཐོང༌། ཤེས་རབ་ཀྱི་ཕ་རོལ་ཏུ་ཕྱིན་པ་ཞེས་བགྱི་བའི་ཆོས་དེ་ཡང་ཡང་དག་པར་རྗེས་སུ་མ་མཐོང་ན་བྱང་ཆུབ་སེམས་དཔའ་གང་ལ་ཤེས་རབ་ཀྱི་ཕ་རོལ་ཏུ་ཕྱིན་པ་གང་ཞིག་རྗེས་སུ་བསྟན་པར་བྱ། འོན་ཀྱང་དེ་ ལྟར་བསྟན་པ་ལ་མི་སྐྲག་མི་དངངས་ན་བྱང་ཆུབ་སེམས་དཔའ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་གནས་པར་རིག་པར་བྱའོ། །ཞེས་བསྟན་པ་ལྟར་རོ། །དཔའ་བར་འགྲོ་བའི་ཏིང་ངེ་འཛིན་གྱི་མདོ་ལས་ནི། དེ་དག་ཏིང་ངེ་འཛིན་དེའི་མཐུར་ བཤད་དེ། ཇི་སྐད་དུ། བློ་གྲོས་བརྟན་པ། ང་ཛམྦུའི་གླིང་འདིར་ད་ལྟ་ན་ཡང་ཆོས་ཀྱི་འཁོར་ལོ་བསྐོར་ལ་ཛམྦུའི་གླིང་གཞན་དག་ཏུ་ནི་ད་དུང་མངོན་པར་རྫོགས་པར་འཚང་མ་རྒྱས་པར་ཡང་ཤེས། ལ་ལར་ནི་ཡོངས་སུ་མྱ་ངན་ལས་འདས་ པར་ཡང་ཤེས། ལ་ལར་ནི་སེམས་དང་པོ་སྐྱེད་པར་ཡང་ཤེས་ཏེ་ཞེས་དང༌། འདི་ནས་སྟེང་དུ་སངས་རྒྱས་ཀྱི་ཞིང་གངྒཱ་དྲུག་ཅུའི་བྱེ་སྙེད་འདས་པ་ན་སྒྲོན་མ་གཅིག་པའི་ཞིང་ཐེག་པ་གཅིག་པ་ཞིང་གི་ཡོན་ཏན་བསྐལ་པར་བཤད་ཀྱིས་མི་ རྫོགས་པ་ན་སངས་རྒྱས་ཡོན་ཏན་གྱི་ཆོས་ཐམས་ཅད་སྟོན་པར་སྣང་བ་རྣམ་འཕྲུལ་རྒྱལ་པོ་དེ་ང་ཉིད་དོ། །ཞེས་དང༌། འཇམ་དཔལ་གྱིས་གསོལ་པ་བཅོམ་ལྡན་འདས་སྔོན་བསྐལ་པ་རྣམ་པར་སྣང་བ་ཞེས་བགྱི་བ་ཞིག་བྱུང་སྟེ། དེ་ལ་

Page: 752 བདག་གིས་ལན་བྱེ་བ་ཁྲག་ཁྲིག་བརྒྱ་སྟོང་ཕྲག་སུམ་ཅུ་རྩ་དྲུག་ཏུ་རང་སངས་རྒྱས་ཀྱི་ཐེག་པས་ཡོངས་སུ་མྱ་ངན་ལས་འདས་སོ་ཞེས་དང༌། སྔོན་བསྐལ་པ་བསམ་གྱིས་མི་ཁྱབ་པའི་སྔོན་རོལ་ཏུ་ལྷོ་ཕྱོགས་སུ་ཞིང་འདི་ནས་ཞིང་ སུམ་སྟོང་འདས་པར་འཇིག་རྟེན་གྱི་ཁམས་མཉམ་པ་ཞེས་བྱ་བ་ཡོངས་སུ་དག་པར་སངས་རྒྱས་ཀླུའི་རིགས་མཆོག་གིས་བྱང་ཆུབ་སེམས་དཔའ་བྱེ་བ་བདུན་ཅུ། ཉན་ཐོས་བྱེ་བ་བརྒྱད་ཅུ། རང་རྒྱལ་བྱེ་བ་བརྒྱ་སྟོང་ཕྲག་གོ་དྲུག་སྨིན་པར་ མཛད་ནས་ཕྱིས་ཉན་ཐོས་དཔག་ཏུ་མེད་པར་གྱུར་ཏེ་སྐུ་ཚེ་ལོ་བཞི་ཁྲི་སྐུ་གདུང་རྒྱས་ཏེ་མཆོད་རྟེན་བྱེ་བ་ཕྲག་སོ་དྲུག་དམ་པའི་ཆོས་བོ་སྒོ་འབུམ་གནས་པ་དེ་འཇམ་དཔལ་འདི་ཉིད་དོ་ཞེས་དང༌། སུམ་ཅུ་རྩ་གསུམ་པའི་མདོར། ཤར་ དུ་གླིང་བཞི་ཁྲི་ཉིས་སྟོང་འདས་པའི་ཞིང་རྡུལ་བྲལ་ན་རྒྱལ་བ་རྡུལ་བྲལ་བློ་གྲོས་ཞེས་ཉན་ཐོས་པ་ལ་ཆོས་སྟོན་པ་འདིའི་སུམ་ཅུ་རྩ་གསུམ་པའི་ལོངས་སྤྱོད་ཅན་དང༌། ལྷོར་ཁྲི་བརྒྱད་སྟོང་ན་གླིང་བཞི་རིན་ཆེན་འབྱུང་བ་གསེར་ དངུལ་ཤེལ་རྡོ་སྙིང་སྟེ་བཞི་ལས་གྲུབ་པར་རྒྱལ་བ་རིན་ཆེན་ཕུང་པོ་ཞེས་པ་རང་རྒྱལ་གྱི་རིགས་ཅན་འདུལ་བ་དང༌། ནུབ་ཏུ་ཁྲི་ཉིས་སྟོང་ན་རིན་ཆེན་སྣ་ཚོགས་ཅན་རིན་ཆེན་བདུན་ལས་གྲུབ་པ་བུད་མེད་མེད་པ་འདིའི་དགའ་ལྡན་ གྱི་ལོངས་སྤྱོད་ཅན་བརྫུས་སྐྱེས་སུ་འབྱུང་བ་ན་རྒྱལ་བ་རིན་ཆེན་འབྱུང་ཞེས་བྱང་ཆུབ་སེམས་དཔའི་སྡེ་སྣོད་རྡོ་རྗེའི་ཚིག་འཁོར་གསུམ་ཡོངས་སུ་ཆད་པའི་ཕྱིན་དྲུག་ལས་གཞན་མི་གསུང་བ་དང༌། བྱང་སུམ་ཁྲི་དྲུག་སྟོང་ན་ཞིང་ འཇིགས་མེད་གསེར་དངུལ་ལས་གྲུབ་པ་སྙིགས་མ་དང་མི་ཁོམ་པ་མེད་པར་འཇིགས་མེད་སྦྱིན་ཞེས་ཐེག་གསུམ་སྟོན་པ་དེས་བྱང་ཆུབ་ཤིང་དྲུང་དུ་འདུག་ཚེ་བདུད་བློ་གྲོས་བཟང་པོ་སོགས་ཁྲག་ཁྲིག་བདུན་ཅུ་རྩ་གཉིས་ལྷགས་པ་

Page: 753 ༄༅། །ལ་དེ་སྙེད་ཀྱི་ཤིང་དྲུང་དུ་གནས་པར་སྤྲུལ་པས་གང་ལ་བར་ཆད་བྱ་བ་མ་ཤེས་པ་ལ་ཐམས་ཅད་སྤྲུལ་པ་ལྟར་བསྟན་པས་བདུད་རྣམས་སེམས་བསྐྱེད་པ་དང༌། ཤར་ལྷོ་བརྒྱད་ཁྲི་བཞི་སྟོང་ན་ཞིང་ཀུན་ནས་ སྣ་ཚོགས་ཅན་རེག་ན་བདེ་བ་མནན་ན་ནེམ་པ་རྩྭ་སོར་བཞིས་ཁེབས་པ་མིག་མང་རིས་རིན་པོ་ཆེའི་དྲ་བས་ཁེབས་པ་དབུས་ན་གྲོང་ཁྱེར་བཟང་མཆོག་ཨངྒྷ་དང་མཱ་ག་དྷ་དང་ཀུ་རུའི་སེམས་ཅན་ལས་ཆེས་མང་བ་གནས་པ་ཤིང་སྦྲང་རྩི་འབྱུང་ བ་ཞེས་རྟག་ཏུ་ལོ་འདབ་མེ་ཏོག་འབྲས་བུ་ཅན་རོ་བརྒྱ་པ་སུས་འདབ་མ་གཅིག་ཟོས་ཀྱང་བདེ་བས་ཉིན་ཞག་བདུན་འཚོ་བ་དེ་བཞིན་གཤེགས་པ་འཁོར་བཅས་ཀྱི་གདུགས་ཚོད་རན་པ་ན་ཤིང་དེ་དག་མགོ་དུད་དེ་མེ་ཏོག་དང་འབྲས་བུ་ ལྷུང་བཟེད་དུ་ལྷུང་བ་སྤྱོད་པ་ན་རྒྱལ་བ་མེ་ཏོག་སྣ་ཚོགས་ཅན་དང༌། ལྷོ་ནུབ་བདུན་ཁྲི་ན་ཞིང་རྣམ་ཕྱེའི་བློ་གྲོས་གླིང་རེ་ལ་རྒྱལ་པོ་བརྒྱད་ཁྲི་ཅན་ན་རྒྱལ་བ་འོད་ཟེར་རབ་འགྱེད་ཐེག་གསུམ་པ་དང༌། ནུབ་བྱང་ལྔ་ཁྲི་ལྔ་སྟོང་ན་སྤོས་ལྡན་ གྱི་ཞིང་འཛམ་གླིང་འདིས་སྤོས་སྲང་གཅིག་གི་རིན་དུ་མི་ཆོག་པའི་སྦྲུལ་སྙིང་ལས་བྱས་པ་གཞན་འཕྲུལ་གྱི་ལྷའི་བཀོད་པ་ཅན་མི་ཐམས་ཅད་མཚན་དཔེ་ཚང་བ་བསམ་གཏན་གྱི་ཟས་ཅན་ན་རྒྱལ་བ་སྤོས་འགྱེད་འོད་ཟེར་ཅན་ཐེག་གཅིག་པ་ དང༌། བྱང་ཤར་བཞི་ཁྲི་ཉིས་སྟོང་ན་ཞིང་མྱ་ངན་གྱིས་འཇོམས་པ་ཆེས་སྙིགས་མ་གཟུགས་ངན་པ་ས་རྩུབ་ཚེར་ཅན་ཟླ་དྲུག་ཏུ་ཆར་མི་འབབ་པས་འབྲུ་མ་རུང་བ་ཆུ་འབྲུ་མར་གྱི་སྙིགས་མའི་མདོག་དྲི་ཅན་མི་དགེ་བཅུ་སྤྱོད་པ་ན་རྒྱལ་པོ་སྡང་ ཆགས་ཞེས་འབངས་ཀྱི་འབྲུ་ནོར་ཐམས་ཅད་མཛོད་དུ་འབྲུབ་པ་ཆད་པས་གཟིར་བ་ཕལ་ཆེར་ངན་འགྲོར་སྐྱེ་བ་ན་རྒྱལ་བ་སྙིང་རྗེའི་སེམས་ཡིད་ལ་བྱེད་པ་ཞེས་བྱ་བ་ལོ་བདུན་བརྒྱར་ཆོས་བསྟན་པས་གཅིག་གིས་ཀྱང་ཆོས་མ་རྟོགས་མོད་

Page: 754 ཀྱི་སྐྱོ་བ་མེད་པར་གང་དུ་གཤེགས་པར་སྐྱེ་བོ་དེ་དག་གིས་སྤྱོས་བརྒྱད་བཀག་སྨོད་གཤུང་ཡང་སྙིང་རྗེས་ཡོངས་སུ་རྒྱུ་བ་ལོ་བདུན་བརྒྱའི་འོག་ཏུ་ཁྲག་ཁྲིག་སུམ་བརྒྱ་སོ་དྲུག་འབྲས་བུ་བཞི་ལ་བཀོད་ནས་ལས་ཀྱི་སྒྲིབ་པས་དེར་སྐྱེས་ བའི་བྱང་ཆུབ་སེམས་དཔའ་ལྔའི་དོན་དུ་ད་ལྟ་ཡང་བཞུགས་པ་དེ་རྣམས་སྟོན་པ་ཉིད་ཡིན་ཞིང་དེ་བཞིན་དུ་སྟོང་གསུམ་འདི་ཁོ་ན་ནའང་མཛད་པ་སོ་སོ་ལ་གནས་པའི་རྒྱལ་བ་དང་ཚངས་པ་དང་བརྒྱ་བྱིན་སོགས་གཟུགས་སྣ་ཚོགས་པར་ ཀུན་ཏུ་སྣང་ལ་དེ་ལྟར་འཇིག་རྟེན་ཐམས་ཅད་དུ་སྣང་བར་གསུངས་པའི་ཕྱིར་རོ། །འདི་ལྟ་བུ་རྣམས་ལ་ནི་མཉམ་པ་ཉིད་གསུམ་ལ་དགོངས་སོ་ཞེས་རྟོག་པར་མི་བྱ་སྟེ། གཅིག་དང་ཐ་དད་གང་དུ་ཡང་གདགས་སུ་མེད་དོ། །འོན་ཀྱང་ འཆད་ཚུལ་འདི་ནི་བསམ་གྱིས་མི་ཁྱབ་པའི་ཚུལ་ཡིན་པས་ཆོས་སྤོང་བའི་སྐྱེ་བོ་དག་ལ་སྒྲག་པར་མི་བྱ་ཞིང་གནས་སྐབས་སུ་ས་དང་ལམ་གྱི་རིམ་པ་ཇི་སྐད་བཤད་པ་ཉིད་ཁས་བླང་བར་བྱ་ཞིང་དེའི་ཕྱིར་དབུ་མ་པ་ཆོས་ཀྱི་བཤེས་གཉེན་ གྱིས་ས་དང་པོ་མི་སྐྱེ་བའི་ཆོས་ལ་བཟོད་པ་ཆུང་ངུ་དང་ས་བརྒྱད་པ་འབྲིང་དང་སངས་རྒྱས་ཀྱི་ས་མི་སྐྱེ་བའི་ཆོས་ལ་བཟོད་པ་ཆེན་པོར་ཡང་བཤད་པ་ཡིན་ནོ། །ལོངས་སྐུར་འཚང་རྒྱ་བའི་ཚུལ་ནི། ས་བཅུ་པའི་མདོ་ལས་བཤད་པ་ལྟར་ ཏེ། ས་བཅུ་ཡོངས་སུ་རྫོགས་པའི་བྱང་ཆུབ་སེམས་དཔའ་དེ་ཉིད་སྟོང་གསུམ་འབུམ་ཕྲག་མཐའ་ཡས་པའི་རྡུལ་སྙེད་ཀྱི་ཞིང་གི་ཚད་ཀྱི་རིན་པོ་ཆེ་ཐམས་ཅད་པའི་པདྨ་རྡོ་རྗེའི་ཟེ་བ་ཅན་རྡུལ་དེ་སྙེད་ཀྱི་པདྨའི་འཁོར་ཅན་བྱུང་སྟེ་དེའི་པདྨའི་ གཙོ་བོ་ལ་བྱང་ཆུབ་སེམས་དཔའ་མཚན་དཔེ་ཡོངས་སུ་རྫོགས་པ་དེ་དེ་དང་འཚམ་པའི་ལུས་སུ་གྱུར་པས་སྐྱིལ་ཀྲུང་གིས་འདུག་ཅིང༌། སྐལ་མཉམ་གྱི་འཁོར་རྣམས་ཀྱང་པདྨ་སོ་སོ་ལ་འདུག་ནས་བྱང་ཆུབ་སེམས་དཔའ་དེས་གཙུག་ཏོར་ནས་

Page: 755 ༄༅། །དེ་བཞིན་གཤེགས་པ་ཐམས་ཅད་བསྐུལ་བའི་འོད་ཟེར་བཀྱེ་སྟེ། སངས་རྒྱས་ཐམས་ཅད་ལ་མཆོད་པའི་སྤྲིན་སྤྲོ་བས་མཆོད་ཅིང༌། བརྒྱ་སྟོང་དུ་བསྐོར་བས་སྐུ་ལ་རེག་པ་ན་བྱང་ཆུབ་སེམས་དཔའ་དེ་མངོན་པར་དབང་ བསྐུར་བའི་དུས་ལ་བབ་པར་གཟིགས་ནས་སངས་རྒྱས་ཐམས་ཅད་ཀྱིས་མངོན་པར་དབང་བསྐུར་བའི་འོད་ཟེར་ཆེན་པོ་ཕྱུང་སྟེ་བྱང་ཆུབ་སེམས་དཔའ་དེ་ཀུན་ནས་སྣང་བར་བྱས་ཏེ། དེའི་གཙུག་ཏོར་དུ་ནུབ་པར་གྱུར་པའི་མོད་ལ་མངོན་པར་རྫོགས་ པའི་སངས་རྒྱས་ཉིད་མངོན་དུ་བྱས་པ་ཡིན་ནོ། །སྤྲུལ་སྐུར་འཚང་རྒྱ་བའི་ཚུལ་ནི། རྒྱ་ཆེ་རོལ་པ་སོགས་ལས་བཤད་པ་ལྟར་ཏེ། སྟོན་པས་དགའ་ལྡན་ནས་འཕོ་བ་སོགས་མཛད་པ་སོ་སོ་བསྟན་ནས་བྱང་ཆུབ་ཀྱི་ཤིང་དྲུང་དུ་གཤེགས་ ཏེ། ཐུན་མོང་གི་གདུལ་བྱ་ལ་ལྷའི་རྩྭ་རེག་ན་འཇམ་པའི་གདིང་བ་དང་རྒྱལ་སྲས་རྣམས་ཀྱི་ངོར་ཞིང་ཚད་མེད་ཅིང་ཡོངས་སུ་དག་པར་བྱང་ཆུབ་ཤིང་གི་ཚད་མཐའ་ཡས་ཤིང་རྒྱན་དཔག་ཏུ་མེད་པའི་དྲུང་དུ་གཞལ་མེད་ཁང་རྒྱན་དང་བཀོད་པ་བསྐལ་པར་ བཤད་ཀྱིས་མི་རྫོགས་པ་གཞལ་མེད་ཁང་གི་འཁོར་མཐའ་ཡས་པ་དང་བཅས་པའི་དབུས་སུ་སེང་གེའི་ཁྲི་བསམ་གྱིས་མི་ཁྱབ་པའི་བཀོད་པ་ཅན་ལ་བཞུགས་ནས་འཚང་རྒྱ་བར་སྣང་ཞིང༌། ཐུན་མོང་གི་གདུལ་བྱའི་ངོར་བདུད་བཏུལ་ཏེ་ཐོ་ རེངས་སྐད་ཅིག་གཅིག་གི་ཤེས་རབ་ཀྱིས་འཚང་རྒྱ་བར་སྟོན་ཏོ། །དེ་ལྟར་འཚང་རྒྱ་བ་དང་ལས་དང་པོ་བ་ནས་ངན་སོང་གི་གཟུགས་ཀྱི་བར་གང་འདུལ་དུ་གདུལ་བྱ་ཐམས་ཅད་ལ་རྟག་པར་སྣང་ཡང༌། དེ་བཞིན་གཤེགས་པ་ཉིད་ནི་ཆོས་ ཉིད་ཇི་ལྟ་བ་ཉིད་ལས་གཡོ་བ་མེད་ལ། གདུལ་བྱ་དང་གདུལ་བྱེད་དུ་མི་རྟོག་ལ་གཟུགས་སྐུར་ལྡང་བར་ཡང་མི་འགྱུར་མོད་ཀྱི་གཟུགས་སྐུའི་རྣམ་པ་དེ་ཐམས་ཅད་ཆོས་ཀྱི་སྐུ་ལས་གཞན་པ་ཡང་མ་ཡིན་ནོ། །དེ་ལ་འཛམ་གླིང་པའི་ཚེ་

Page: 756 ལོ་བརྒྱ་པའི་དུས་སུ་སངས་རྒྱས་པར་བསྟན་པ་འོ་སྐོལ་གྱི་སྟོན་པ་ཉིད་སྐུ་གསེར་གྱི་མདོག་ཅན་ཁྲུ་བཅུ་དྲུག་པ་ཞེས་མི་ལས་བཞི་འགྱུར་གྱིས་ཆེ་བར་ཐུན་མོང་དུ་སྣང་བ་ལྟར་རྒྱལ་ཆེན་བཞི་པ་ནས་འོག་མིན་གྱི་ལྷའི་བར་གྱིས་ཀྱང་སོ་སོ་ལས་ བཞི་འགྱུར་གྱིས་སྐུ་ཆེ་བར་སྣང་ཞིང༌། དེབཞིན་དུ་འཇིག་རྟེན་གྱི་ཁམས་གཞན་གྱི་མི་ལུས་ཚད་རི་རབ་ཞིང་གི་རྡུལ་སྙེད་ལས་ཆེ་བ་རྣམས་ཀྱིས་ཀྱང་རང་ལས་བཞི་འགྱུར་གྱིས་འཕགས་པར་སྣང་བ་ནི་སྤྲུལ་སྐུ་ལ་བལྟོས་པའི་རང་བཞིན་གྱི་སྐུ་ ཡིན་ལ། དེ་ལྟར་སྣང་ཡང་སྐུ་དེ་ནི་ནམ་མཁའི་ཁམས་དང་གཉིས་སུ་མེད་ཅིང༌། ནམ་མཁའ་ཇི་སྲིད་པ་ཁྱབ་པར་གནས་ལ་བ་སྤུའི་སྦུབས་རེ་ལ་ཡང་སངས་རྒྱས་ཀྱི་ཞིང་གཞལ་དུ་མེད་པ་ཆགས་འཇིག་གནས་པར་བྱེད་པ་སྟེ། སྤྱན་རས་གཟིགས་ཀྱི་ བ་སྤུའི་ཁུང་བུ་རྣམས་ལ་འཇིག་རྟེན་གྱི་ཁམས་མཐའ་ཡས་པ་གསུངས་པ་དང༌། ཕལ་ཆེན་ལས། བྱང་ཆུབ་སེམས་དཔའ་ཀུན་སྣང་མཛོད་ཀྱི་སྙིང་པོས་བྱུང་བ་སོགས་བཅུ་འཁོར་མཐའ་ཡས་པས་བསྐོར་བ་ཕྱོགས་བཅུ་ནས་སྟོན་པའི་སྤྱན་ སྔར་ལྷགས་པའི་ཚེ་སྟོན་པ་དང་ཀུན་བཟང་མ་གཏོགས་པའི་འོད་ཐམས་ཅད་ཟིལ་གྱིས་མནན་ཀུན་ཏུ་བཟང་པོ་མ་གཏོགས་འཁོར་ཐམས་ཅད་ཏབ་ཏོབ་ཏུ་ལངས། སུས་ཀྱང་བྱང་ཆུབ་སེམས་དཔའ་དེ་དག་ཞིང་ག་ལས་འོངས་མ་ཤེས་པ་ ན་སྟོན་པས་ཀུན་བཟང་ལ་དྲིས་ཤིག་གསུང་སྟེ། དྲིས་པས་དད་པས་གསོལ་བ་ཐོབ་ལ་སྟོན་པའི་སྐུ་ལ་ལྟོས་ཤིག་ཟེར་ཏེ། བལྟས་པས་ཞབས་མཐིལ་གྱི་འཁོར་ལོ་གཉིས་ལ་ཆོས་དབྱིངས་འཁོར་ལོའི་ཞིང་ན་སངས་རྒྱས་ཆོས་དབྱིངས་ རྒྱན་གྱི་རྒྱལ་པོ་བཞུགས་པ་སོགས་བྱིན་པ་དང་པུས་མོ་དང་ལྟ་ཟུར་དང་ལྟེ་བ་དང་ཐུགས་ཀ་དང་ཕྲག་པའི་ལྷུན་དང་ཞལ་དང་སྨིན་མཚམས་དང་གཙུག་ཏོར་ཏེ་བཅུ་ན་ཞིང་ཐ་དད་པ་སངས་རྒྱས་དང་བཅས་པ་མཐོང་སྟེ་ཞིང་རེ་རེའི་ཚད་

Page: 757 ༄༅། །ཀྱང་ཆོས་དབྱིངས་ཀྱིས་བཀླས་ཤིང་རྒྱན་དང་བཀོད་པ་གཞལ་དུ་མེད་པ་དེ་དག་ནས་སེམས་དཔའ་ེ་རྣམས་འོངས་བར་མཐོང་བ་ལྟ་བུའོ། །དེ་ལ་ཟབ་མོ་ལྟ་རྒྱུད་ཀྱི་མཁས་པ་རྣམས་ནི། ཤེས་བྱའི་བུད་ཤིང་གི་ ཚོགས་ཐམས་ཅད་རང་བཞིན་མེད་པར་སྒོམ་པའི་ལམ་རྣམས་སུ་སྦྱངས་པས་དངོས་འཛིན་གྱི་བརླན་དང་བྲལ་བ་རབ་ཏུ་སྐམ་པའི་ལྷག་མ་ཙམ་དེ་ཉིད་ཀྱང་ས་བཅུ་རྒྱུན་གྱི་ཐ་མར་སྐད་ཅིག་གཅིག་དང་ལྡན་པའི་ཤེས་རབ་རྡོ་རྗེ་ལྟ་བུའི་ ཏིང་ངེ་འཛིན་གྱི་མེ་ལྕེས་སྐད་ཅིག་གིས་ལྷག་མ་མེད་པར་བསྲེགས་ཏེ། བུད་ཤིང་མེད་ན་མེ་ཡང་མེད་པའི་ཕྱིར། སྲེག་བྱེད་མེ་ལྟ་བུའི་ཡེ་ཤེས་ཉིད་ཀྱང་དབྱིངས་སུ་ཞི་བས་ཆོས་ཀྱི་དབྱིངས་ཇི་ལྟ་བ་མངོན་དུ་བྱས་པ་ནི་ཆོས་ཀྱི་སྐུ་སྟེ། འཇུག་པར། ཤེས་བྱའི་བུད་ཤིང་སྐམ་པོ་མ་ལུས་པ། །བསྲེགས་པས་ཞི་དེ་རྒྱལ་རྣམས་ཆོས་སྐུ་སྟེ། །དེ་ཚེ་སྐྱེ་བ་མེད་ཅིང་འགག་པའང་མེད། །སེམས་འགགས་པ་དེ་སྐུ་ཡིས་མངོན་སུམ་མཛད། །ཅེས་སོ། །ཇི་ལྟར་རྫ་མཁན་གྱིས་སྔོན་འབད་ པས་བསྐོར་བའི་འཁོར་ལོ་དེ་ནི་ཕྱིས་འབད་པ་མེད་ན་ཡང་འཁོར་ཞིང༌། དེ་ལས་རྫ་འགྲུབ་པ་ལྟར་རམ། མཁའ་ལྡིང་གི་མཆོད་སྡོང་སྒྲུབ་པ་པོ་དེ་འདས་ནས་ཡུན་རིང་དུ་ལོན་ཡང་དུག་ཞི་བའི་ནུས་པ་བྱེད་པ་ལྟར། ཆོས་སྐུ་ཉིད་འབད་པ་དང༌། རྟོག་པ་མེད་ ཀྱང་སྔོན་གྱི་སྨོན་ལམ་དང༌། ཐུགས་རྗེས་གདུལ་བྱ་ལ་ལོངས་སྤྲུལ་སོགས་གང་གདུལ་དུ་སྣང་བ་རྟག་པར་རྒྱུན་མི་འཆད་ཅིང་ཆོས་སྟོན་པར་སྣང་ལ། དེ་ཐོས་པས་འཇིག་རྟེན་གྱི་སྐྱེ་བོས་ཀྱང་དེ་ཁོ་ན་ཉིད་རིག་པར་འགྱུར་པ་ནི་གཟུགས་ཀྱི་སྐུ་སྟེ། དེ་ཡི་ལོངས་སྤྱོད་རྫོགས་སྐུའི་བསོད་ནམས་ཀྱིས། །ཟིན་དང་སྤྲུལ་པ་མཁའ་གཞན་ལས་དེའི་མཐུས། །སྒྲ་གང་ཆོས་ཀྱི་དེ་ཉིད་སྟོན་འབྱུང་བ། །དེ་ལས་འཇིག་རྟེན་གྱིས་ཀྱང་དེ་ཉིད་རིག །ཇི་ལྟར་རྫ་མཁན་སྟོབས་ཆེན་ལྡན་

Page: 758 པས་འདིར། །ཡུན་རིང་འབད་པས་ཆེས་བསྐོར་འཁོར་ལོ་ནི། །དེ་རྩོལ་ད་ལྟ་སྐྱེ་བ་མེད་བཞིན་དུའང༌། །འཁོར་ཞིང་བུམ་པ་ལ་སོགས་རྒྱུར་མཐོང་ལྟར། །དེ་བཞིན་ད་ལྟ་སྐྱེས་རྩོལ་མེད་བཞིན་དུ། །ཆོས་ཀྱི་བདག་ཅན་སྐུ་ ཉིད་ལ་ཞུགས་དེའི། །འཇུག་པ་སྐྱེ་བའི་སྒོ་དང་སྨོན་ལམ་གྱིས། །ཁྱད་པར་གྱིས་འཕགས་ལས་ཆེས་བསམ་མི་ཁྱབ། །ཅེས་དང༌། ཞི་སྐུ་དཔག་བསམ་ཤིང་ལྟར་གསལ་གྱུར་ཅིང༌། །ཡིད་བཞིན་ནོར་བུ་ཇི་བཞིན་རྣམ་མི་རྟོག །འགྲོ་ གྲོལ་བར་དུ་འཇིག་རྟེན་འབྱོར་སླད་རྟག །འདི་ནི་སྤྲོས་དང་བྲལ་ལ་སྣང་བར་འགྱུར། །ཞེས་དང༌། དཔེར་ན་ནམ་མཁའ་ལྡིང་གི་ནི། །སོགས་འཆད་པར་འགྱུར་བའི་ཕྱིར། འདིར་མེ་དང་བུད་ཤིང་གཉི་ག་ལོག་པས་ཅི་ཡང་མེད་པ་ ལྟར་ཆོས་ཀྱི་སྐུ་ཅང་མེད་དུ་གོ་བར་མི་བྱ་སྟེ། ཡོད་མེད་ཉིད་དངོས་འཛིན་ཡིན་ལ། དེ་ནི་ཡེ་ཤེས་ཀྱི་བུད་ཤིང་ཡིན་པའི་ཕྱིར་དང༌། བུད་ཤིང་ཟད་པའི་མེ་ལྟར་རྒྱུན་མཐའི་ཏིང་འཛིན་གྱི་ཡེ་ཤེས་དེ་ཉིད་ཀྱང་རང་ཞི་བས་མ་བཅོས་པའི་ཆོས་ཀྱི་དབྱིངས་ ཇི་ལྟ་བར་གྱུར་པ་ལ་ཆོས་སྐུ་བརྙེས་པ་ཞེས་བྱ་སྟེ། སེམས་འགགས་པ་དེ་སྐུ་ཡིས་མངོན་སུམ་མཛད། །ཅེས་དང༌། འོག་མིན་དུ་ནི་གང་གི་དོན་དུ་འབད་གྱུར་གོ་འཕང་མཆོག་ཞི་བ། །ཡོན་ཏན་མཐའ་དག་མཐར་ཐུག་མཚུངས་པ་ མེད་དེ་ཁྱོད་ཀྱིས་བརྙེས། །ཞེས་དང༌། མཁྱེན་བཟང་ཁྱོད་ཀྱི་སྐད་ཅིག་གིས་ནི་ཤེས་བྱ་ཐུགས་སུ་ཆུད། །ཅེས་སོ། །འདིས་ནི་ཉན་རང་གི་ལྷག་མེད་མྱང་འདས་ལྟར་དབུ་མའི་ལུགས་ལ་ཡང་སངས་རྒྱས་མར་མེ་ཤི་བ་ལྟར་རྒྱུན་ ཆད་པར་འདོད་པ་བསལ་བ་ཡིན་ཏེ། འདོད་པ་དེ་ལྟ་ན། སྐུ་ཡིས་མངོན་སུམ་མཛད། །ཅེས་དང༌། གོ་འཕང་མཆོག་ཞི་བ། ཞེས་ཐོབ་བྱར་བསྟན་པ་དང༌། ཁྱོད་ཀྱིས་བརྙེས། ཞེས་བྱང་ཆུབ་མངོན་སུམ་དུ་མཛད་པར་བཤད་

Page: 759 ༄༅། །པ་འདི་རྣམས་དང་དངོས་སུ་འགལ་བའི་ཕྱིར་རོ། །ཟབ་མོ་ལྟ་བའི་གཞུང་དུ་སངས་རྒྱས་ལ་ཡེ་ཤེས་མི་མངའ་བར་བཤད་པ་ཡང་རྒྱུན་མཐའི་རྡོར་ཏིང་གི་ཡེ་ཤེས་ཉིད་དབྱིངས་སུ་ཞི་བ་དང༌། སྤྱིར་ཡུལ་དང་ཡུལ་ཅན་ནི་ ཆོས་རྣམས་ཀྱི་རང་བཞིན་ལ་ནམ་དུ་ཡང་ཐ་དད་མེད་ཀྱང་དེ་ལྟར་མ་ཤེས་པས་སྒྲོ་བཏགས་པས་ཐ་དད་དུ་ཞེན་པར་ཟད་ལ། ཡུལ་ཡུལ་ཅན་གཟོད་ནས་མི་གཉིས་པའི་དབྱིངས་རྟོགས་པའི་ཕྱིར། རྟོགས་བྱའི་ཡུལ་ལ་རྟོགས་བྱེད་ཀྱི་ཡེ་ཤེས་འཇུག་ པ་མི་མངའ་བའི་ཕྱིར་དང༌། དངོས་པོ་ཞེན་པ་མཐའ་དག་ལྡོག་དགོས་པས་ཡེ་ཤེས་ལ་གྲུབ་ཞེན་སྤང་བའི་ཕྱིར་དང༌། ཆོས་ཐམས་ཅད་ཀྱི་རང་བཞིན་ཅིར་ཡང་དམིགས་སུ་མེད་པ་ལྟར་ཡེ་ཤེས་ཀྱི་རང་བཞིན་ཀྱང་དཔྱད་ན་དེ་ལྟར་ཟད་པས་ཡེ་ཤེས་ མི་མངའ་བར་འཆད་པ་ཡིན་གྱི། སྤྱིར་ཡེ་ཤེས་བཞི་ལ་སོགས་པ་གཏན་ནས་མེད་པར་རྣམ་པ་ཀུན་ཏུ་འཆད་པ་ནི་མ་ཡིན་ཏེ། དེ་དག་ནི་སྐུའི་མིང་གིས་བཤད་པ་དང༌། ཡེ་ཤེས་ཀྱི་མིང་གིས་བཤད་པའི་ཁྱད་པར་ལས་མེད་ལ། སྐུ་རྣམ་པ་གསུམ་འདིར་ཡང་ ཞལ་གྱིས་བཞེས་པའི་ཕྱིར། མདོར་ན་སྐྱེ་བ་བཀག་ནས་སྐྱེ་མེད་དུ་འདོད་པ་མ་ཡིན་པ་ལྟར་ཡེ་ཤེས་གྲུབ་པར་ཞེན་པ་འགོག་པ་ཡིན་གྱི་མ་གྲུབ་པར་འཇོག་པ་མ་ཡིན་ལ། འདི་ནི་སྐུ་ལ་ཡང་མཚུངས་ཏེ་ཡོད་མེད་ལ་སོགས་པ་ནི་བྱིས་པའི་ དངོས་འཛིན་ཁོ་ན་ཡིན་པའི་ཕྱིར་རོ། །ཁྱད་པར་སློབ་དཔོན་ཆེན་པོ་ཞི་བའི་ལྷ་ཉིད་ནི། ལྟ་བ་དབྱིངས་དང་ཡེ་ཤེས་དབྱེར་མེད་དུ་བཞེད་པར་ཇོ་བོ་རྗེས་བཤད་ལ། སྤྱིར་དབུ་མ་པས་མྱུ་གུའི་སྐྱེ་བ་འགོག་པ་ན་སྐྱེ་བ་ལ་བདེན་པར་ཞེན་པ་དེ་ འགོག་པ་ཡིན་གྱི། སྤྱིར་སོ་ནམ་འགོག་པ་མ་ཡིན་པ་ལྟར་འདིར་ཡང་གོ་བར་བྱའོ། །རྒྱ་ཆེན་སྤྱོད་པའི་གཞུང་གིས་བཤད་པ་ནི། ཡེ་ཤེས་རྣམ་པར་བཞག་པ་དང་ལྷན་ཅིག་བཤད་པར་བྱ་སྟེ། དེ་ཡང་སྐུ་གསུམ་གྱི་མདོ་ལས། ཀུན་གཞིའི་

Page: 760 རྣམ་པར་ཤེས་པ་གནས་སུ་དག་པ་ནི་མེ་ལོང་ལྟ་བུའི་ཡེ་ཤེས་ཏེ་ཆོས་ཀྱི་སྐུའོ། །ཉོན་མོངས་པའི་ཡིད་གནས་སུ་དག་པ་ནི་མཉམ་པ་ཉིད་ཀྱི་ཡེ་ཤེས་སོ། །ཡིད་ཀྱི་རྣམ་པར་ཤེས་པ་གནས་སུ་དག་པ་ནི་སོ་སོར་ཀུན་ཏུ་རྟོག་པའི་ཡེ་ཤེས་ཏེ། ལོངས་སྤྱོད་ རྫོགས་པའི་སྐུའོ། །སྒོ་ལྔའི་རྣམ་པར་ཤེས་པ་གནས་སུ་དག་པ་ནི་བྱ་བ་སྒྲུབ་པའི་ཡེ་ཤེས་ཏེ་སྤྲུལ་པའི་སྐུའོ། །ཞེས་དང༌། སངས་རྒྱས་ཀྱི་སའི་མདོར། ཤིན་ཏུ་འདུས་སངས་རྒྱས་ཀྱི་ས་ནི་ཆོས་ལྔས་བསྡུས་ཏེ། ལྔ་གང་ཞེ་ན། འདི་ལྟ་སྟེ། ཆོས་ ཀྱི་དབྱིངས་རྣམ་པར་དག་པ་དང༌། མེ་ལོང་ལྟ་བུའི་ཡེ་ཤེས་དང༌། མཉམ་པ་ཉིད་ཀྱི་ཡེ་ཤེས་དང༌། སོ་སོར་རྟོག་པའི་ཡེ་ཤེས་དང༌། བྱ་བ་སྒྲུབ་པའི་ཡེ་ཤེས། ཞེས་སོ། །ཡེ་ཤེས་དེ་དག་གི་རང་བཞིན་ཡང་མདོ་གཉིས་ཀྱི་དགོངས་པ་བཞིན་བཤད་ པར་བྱ་སྟེ། དེ་ལ་ཆོས་ཀྱི་དབྱིངས་རྣམ་པར་དག་པ་ནི་ནམ་མཁའི་དཔེས་བསྟན་ཏེ། ནམ་མཁའ་ནི་གཟུགས་ཐམས་ཅད་ལ་གོ་འབྱེད་ཀྱང་གཟུགས་ཐམས་ཅད་དང་གཅིག་དང་ཐ་དད་གང་ཡང་མ་ཡིན་པ་དང༌། གཟུགས་ཀྱིས་མི་གོས་པ་དང་གོ་འབྱེད་པར་མི་རྩོལ་བ་དང་སྐྱེ་འཇིག་གི་གོ་འབྱེད་ ཀྱང་སྐྱེ་འཇིག་མེད་པ་དང༌། འཕེལ་འགྲིབ་དང་མཐའ་དབུས་དང་འཆགས་འཇིག་ཐམས་ཅད་དེ་ལ་སྣང་ཡང༌། ནམ་མཁའ་ཉིད་ལ་དེ་དག་མེད་པ་དང༌། རྣམ་པར་མི་འགྱུར་བ་དང༌། གཟུགས་ཀུན་གྱི་མཚན་ཉིད་མ་ཡིན་པ་དང༌། ཞིང་ཐམས་ཅད་སྣང་ཡང་མངོན་ པར་འདུ་བྱེད་པ་མེད་པ་ལྟར། ཆོས་ཀྱི་དབྱིངས་ཀྱང་འཁོར་འདས་ཐམས་ཅད་ལ་གོ་འབྱེད་ཀྱང་དེ་ཐམས་ཅད་དང་གཅིག་ཐ་དད་གང་ཡང་མ་ཡིན་པ་ནས་མངོན་པར་འདུ་བྱེད་པ་མེད་པའི་བར་དུ་དེ་ཁོ་ན་བཞིན་གནས་ལ། སེམས་ཅན་ཐམས་ཅད་ཀྱི་ སེམས་ཀྱི་དབྱིངས་དང་ཐ་དད་མེད་ལ་སེམས་ཅན་གྱི་ཉེས་པས་ཀྱང་མི་གོས་པ་སྟེ། ཇི་སྐད་དུ། ནམ་མཁའ་ནི་གཟུགས་ཐམས་ཅད་དང་ཐ་མི་དད་པར་ཞུགས་ཀྱང་གཟུགས་ཀྱི་ཉེས་པ་རྣམས་ཀྱིས་ཀྱང་མི་གོས་སོ། །དེ་བཞིན་དུ་དེ་བཞིན་གཤེགས་

Page: 761 ༄༅། །པ་རྣམས་ཀྱི་ཆོས་ཀྱི་དབྱིངས་རྣམ་པར་དག་པ་ཡང་སེམས་ཅན་ཐམས་ཅད་དང་སེམས་མཉམ་པ་ཉིད་ཀྱི་ས་ཡོངས་སུ་གྲུབ་པར་ཐ་མི་དད་པར་ཞུགས་ཀྱང་སེམས་ཅན་གྱི་ཉེས་པ་རྣམས་ཀྱིས་ཀྱང་མི་གོས་སོ། །ཞེས་སོ། །སྤྱིར་ གསང་སྔགས་སུ་ཡེ་ཤེས་ལྔར་བཤད་ཅིང༌། མཚན་ཉིད་ཐེག་པར་ཆོས་ཀྱི་དབྱིངས་ལ་ཡེ་ཤེས་ཀྱི་ཐ་སྙད་མ་སྦྱར་བར་ཡེ་ཤེས་བཞིར་བཤད་པ་མང་ལ། སངས་རྒྱས་ཀྱི་སའི་མདོ་འདིར། མདོར་བསྟན་དུ། ཆོས་དབྱིངས་ལ་ཡེ་ཤེས་ཀྱི་ཐ་སྙད་མ་སྦྱར་ ཡང་རྒྱས་བཤད་དུ་ཡེ་ཤེས་དང་པོ་ཞེས་ཡེ་ཤེས་ལྔར་བཤད་ལ། གནས་གྱུར་པ་ནི་སྔར་དྲི་བཅས་ཀྱི་གནས་སྐབས་ལས་ཕྱིས་དྲི་མས་དག་པའི་གནས་སྐབས་གཞན་དུ་གྱུར་པའི་དོན་ཡིན་ལ། ཆོས་ཀྱི་དབྱིངས་འདི་ནི་རྣམ་པ་ཀུན་ཏུ་གཟོད་ནས་དག་ པའི་ཕྱིར་གནས་གྱུར་པ་ཡང་མེད་དོ། །ཀུན་གཞིའི་རྣམ་པར་ཤེས་པ་དྲི་མས་དག་པ་ནི་མེ་ལོང་ལྟ་བུའི་ཡེ་ཤེས་སམ་ཆོས་ཀྱི་སྐུ་ཞེས་བྱ་སྟེ། མེ་ལོང་དྭངས་པ་ནི་བཞིན་སྣང་བ་དང་སྐྱོན་ཡོན་སྟོན་པ་དང་ལྷང་ངེར་གནས་པ་དང་གཟུགས་བརྙན་གྱི་རྒྱུ་ ཡིན་པ་དང་གཟུགས་བརྙན་དེར་མི་གནས་པ་དང་གཟུགས་བརྙན་དེ། དེ་ལ་ལྡན་མི་ལྡན་གང་ཡང་མ་ཡིན་པ་དང༌། སྒོ་ཀུན་ནས་སྣང་བ་དང༌། ཐམས་ཅད་ཀྱང་སྣང་དུ་རུང་བས་ཡོངས་སུ་རྒྱར་ཆད་པ་མེད་པ་དང༌། ལོང་བ་དང་བསྐལ་དོན་དུ་གྱུར་པ་རྣམས་ཀྱིས་ མི་མཐོང་བ་ལྟར། སྐུ་འདི་ཡང་གཟུགས་སྐུ་སྣང་བ་དང༌། ཆོས་སྟོན་པ་དང༌། རང་བཞིན་གྱིས་འོད་གསལ་བ་དང༌། ཡེ་ཤེས་ཀྱི་གཟུགས་བརྙན་གྱི་རྒྱུ་ཡིན་པ་དང༌། སྐུ་དེ་ཉིད་གཟུགས་སྐུ་དེར་མི་གནས་པ་དང༌། གཟུགས་སྐུ་གཉིས་དེ་ལ་ལྡན་མི་ལྡན་གང་ཡང་ མ་ཡིན་པ་དང༌། སྒོ་ཀུན་ནས་སྣང་བ་དང༌། གང་འདུལ་དུ་སྣང་བས་རྒྱར་ཆད་པ་མེད་པ་དང༌། སྣོད་མིན་གྱིས་མི་སྣང་བ་དང༌། ཆོས་ཀྱི་ཕོངས་པའི་ལས་ཅན་གྱིས་མི་མཐོང་བའི་ཕྱིར་མེ་ལོང་གི་དཔེ་དང་སྦྱར་རོ། །ཆོས་ཀྱི་སྐུ་འདི་ཉིད་མི་གནས་པའི་མྱ་

Page: 762 ངན་ལས་འདས་པ་དངོས་ཀྱང་ཡིན་ཏེ། རྒྱན་ལས། རྟེན་ནི་གཞན་དུ་གྱུར་པ་ན། །སངས་རྒྱས་དྲི་མེད་གནས་ལ་ནི། །མི་གནས་མྱ་ངན་འདས་པ་ཡི། །འབྱོར་པ་དམ་པ་འཐོབ་པར་འགྱུར། །ཞེས་རྟེན་ཀུན་གཞི་གནས་གྱུར་པ་མི་གནས་པའི་ མྱ་ངན་ལས་འདས་པར་བཤད་པའི་ཕྱིར་རོ། །ཉོན་ཡིད་གནས་གྱུར་པ་ནི་ཆོས་ཐམས་ཅད་མཉམ་པ་ཉིད་དུ་རྟོགས་པའི་ཡེ་ཤེས་ཏེ། འདི་ལ་མཚན་དང་བདག་པོ་དང་དགའ་བ་མཉམ་པ་ཉིད་ཡོངས་སུ་གྲུབ་པ་དང༌། རྟེན་འབྲེལ་ཉམས་མྱོང་མཉམ་ པ་ཉིད་དང༌། མཚན་ཉིད་མེད་པ་དང༌། བྱམས་པ་ཆེན་པོ་དང་སྙིང་རྗེ་ཆེན་པོ་དང༌། གཟུགས་སྐུ་སྟོན་པ་དང༌། བཟུང་འོས་ཀྱི་ཚིག་དང་ཉེར་ཞི་དང་རོ་གཅིག་པ་དང༌། བདེ་སྡུག་རོ་གཅིག་པ་དང༌། ཡོན་ཏན་ཤིན་ཏུ་བསྐྱེད་པ་མཉམ་པ་ཉིད་ཡོངས་ སུ་གྲུབ་པ་སྟེ་མཉམ་པ་ཉིད་ཡོངས་སུ་གྲུབ་པ་བཅུར་བཤད་དོ། །དྲུག་པ་ཡིད་ཀྱི་རྣམ་པར་ཤེས་པ་གནས་གྱུར་པ་ནི་ཆོས་ཐམས་ཅད་མ་འདྲེས་པ་སོ་སོར་ཇི་ལྟ་བ་བཞིན་མཁྱེན་པའི་ཡེ་ཤེས་ཡིན་ལ། འདི་དང་མཉམ་ཉིད་ཡེ་ཤེས་གཉིས་ལ་ནི་ལོངས་སྤྱོད་རྫོགས་པའི་སྐུར་བརྗོད་ ཅིང༌། ཡང་ན་མཉམ་ཉིད་ཡེ་ཤེས་གཟུགས་སྐུ་གཉིས་ཐུན་མོང་གི་རྒྱུར། སེམས་ཅན་རྣམས་ལ་མོས་པ་བཞིན། །སངས་རྒྱས་སྐུ་ནི་ངེས་པར་སྟོན། །ཞེས་པ་ལྟར་སྦྱར་ནས་འདི་ཉིད་ལོངས་སྐུར་བཞག་གོ །འདི་ལ་ནི་རྒྱལ་བའི་ ཆོས་ཀྱི་གནས་དང༌། ཇི་སྙེད་མཁྱེན་པའི་ཡེ་ཤེས་ཀྱི་རྒྱུ་དང༌། ཡོན་ཏན་གྱིས་གང་བ་དང་ཤིན་ཏུ་རྣམ་པར་ཕྱེ་བ་དང༌། འགྲོ་བ་ཀུན་སྣང་བ་དང༌། ཁམས་གསུམ་པོ་སྣང་བ་དང༌། མྱང་འདས་ཀྱི་ཆོས་སྣང་བ་དང༌། མི་འཁྲུགས་པ་དང༌། མི་རྨོངས་པས་བསྐོར་བ་རྣམས་ ཀྱིས་འགྲོ་བའི་གནས་མཁྱེན་པ་ནས་ཁོར་ཡུག་ཆེན་པོ་ལ་སོགས་པ་མཁྱེན་པའི་བར་རྒྱ་ཆེར་སྦྱར་རོ། །འདི་ལ་ཡུལ་དེ་དག་ངོ་བོ་ཉིད་ཀྱིས་ཡོད་ནས་གཟིགས་པའམ། ཡུལ་ཡུལ་ཅན་གྱི་བག་ཆགས་ཀྱི་དབང་ལས་མཐོང་བར་སྣང་བ་མ་ཡིན་

Page: 763 ༄༅། །མོད་ཀྱང༌། ཆུ་དྭངས་པ་མཐོང་བ་ན་དེ་དང་ཐ་མི་དད་པའི་ཟླ་གཟུགས་དང་ཆུ་གཉེར་སོགས་ཀྱང་མཐོང་བ་ལྟར། ཆོས་ཀྱི་དབྱིངས་མཁྱེན་པ་ན་དེ་དང་ཐ་མི་དད་པའི་ཆོས་ཅན་རྟེན་འབྲེལ་གྱི་ཚོགས་ཀྱང་ལྷག་མ་མ་ལུས་པར་མཁྱེན་པ་སྟེ། འདིའི་དབང་དུ་མཛད་ནས། རྨ་བྱའི་མདོངས་ནི་གཅིག་པུ་ཡི། །རྒྱུ་ཡི་དབྱེ་བ་ཇི་སྙེད་པ། །ཀུན་མཁྱེན་མིན་པས་ཤེས་བྱ་མིན། །དེ་མཁྱེན་པས་ན་ཀུན་མཁྱེན་ཉིད། །ཅེས་དང༌། མཁྱེན་པའི་སྐད་ཅིག་གཅིག་གིས་ནི། །ཤེས་བྱའི་ དཀྱིལ་འཁོར་ཀུན་ཁྱབ་པ། །ཞེས་དང༌། མཁྱེན་བཟང་ཁྱོད་ཀྱིས་སྐད་ཅིག་གིས་ནི་ཤེས་བྱ་ཐུགས་སུ་ཆུད། །ཅེས་སོ། །དེ་ལྟར་སྒྲིབ་མེད་དུ་ཐམས་ཅད་མཁྱེན་པའི་ཆ་ནས་ཡུལ་སྣང་བར་བཤད་པ་སྟེ། ཇི་སྐད་དུ། དེ་བཞིན་གཤེགས་ པ་རྣམས་ཀྱི་སོ་སོར་རྟོགས་པའི་ཡེ་ཤེས་ལ་ཡང་རྒྱུ་དང་འབྲས་བུར་བཅས་པའི་རྣམ་པ་རབ་ཏུ་དབྱེ་བ་མཐའ་ཡས་པ་དང་ལྡན་པའི་འགྲོ་བ་ལྔ་དག་སྣང་ངོ་ཞེས་སོ། །དེས་ན་ཨུཏྤལ་སྔོན་པོ་ལྟ་བུ་གཅིག་ལ་ཡང་དེའི་ཁ་དོག་དང་ཟེའུ་འབྲུ་ལ་ སོགས་པ་རྣམས་ཀྱི་རྒྱུ་རྐྱེན་ཐ་དད་པ་རྣམས་དང་དེའི་ས་བོན་གྱི་ཐོག་མ་ནས་གང་དང་གང་དུ་ཇི་ལྟར་བརྒྱུད་པ་དང་མ་འོངས་པ་ཕྱི་མཐའི་བར་དུ་དེའི་ས་བོན་གྱི་རྒྱུན་ལས་ཇི་ལྟར་འཕེལ་ཞིང་གང་དུ་འགག་པ་རྣམས་ཇི་ལྟ་བར་མཁྱེན་པ་སྟེ། དཔེར་ན། མི་ཞིག་ གིས་སྐྲ་རྩེ་བྱེ་བའི་ཆས་ཆུ་ཐིགས་གཅིག་བླངས་ཏེ། བཅོམ་ལྡན་འདས་ཀྱི་དྲུང་དུ་འོངས་ནས་ཀྱེ་གཽ་ཏ་མ་བདག་གི་ཆུ་འདི་ཁྱོད་ལ་བཅོལ་གྱིས་འདི་སྲོག་ཆགས་ལ་བླུད་པར་མི་བྱ། སྐམ་པར་མི་བྱ་སྟེ་མ་གོང་པར་བཅོལ་ལོ་ཞེས་བཅོལ་ལ་སྟོན་པས་ དེ་རྒྱ་མཚོ་ཆེན་པོར་འཕངས་ཏེ། རྒྱ་མཚོ་ཆེན་པོ་དེ་ཡང་རླུང་གིས་བརྡབས་དཀྲུགས་པས་ཆུ་ཐིགས་དེ་ཡང་རྣམ་པ་དུ་མར་འཐོར་ལ། དེ་ནས་ལོ་དཔག་ཏུ་མེད་པའམ་བསྐལ་པ་མང་པོ་འདས་ནས་མི་དེ་འོངས་ཏེ། ཀྱེ་གཽ་ཏ་མ་བདག་གི་ཆུ་དེ་སླར་བྱིན་ཅིག་

Page: 764 ཅེས་ཟེར་ན་ཆུ་དེའི་རྡུལ་ཕྲ་རབ་རྣམས་རྒྱ་མཚོའི་ཕྱོགས་གང་དང་གང་ན་གནས་པ་ལེགས་པར་མཁྱེན་ཏེ་གཅིག་ཏུ་བསྡུས་ནས་དེ་ལས་ཆུའི་རྡུལ་ཕྲ་རབ་གཅིག་ཀྱང་རྒྱ་མཚོར་མ་ལུས་ཤིང་རྒྱ་མཚོའི་ཆུ་ལས་རྡུལ་ཕྲ་རབ་གཅིག་ཀྱང་དེ་ལ་མ་འདྲེས་ པར་སླར་མི་དེ་ལ་བྱིན་པར་བྱེད་དོ། །ཞེས་གསུངས་པ་ལྟ་བུའོ། །དེས་ན་ཆོས་རེ་རེའི་ཡང་རྣམ་པ་མ་ལུས་པ་ཇི་ལྟ་བར་མཁྱེན་ཏེ། སོ་སོར་རྟོགས་པའི་ཡེ་ཤེས་མངའ་བའི་ཕྱིར། དེའི་ཚེ་ཡང་གང་གཟིགས་པའི་ཡུལ་ཡུལ་ཅན་ནམ་མཆོག་དམན་ སོགས་སམ་གཅིག་ཐ་དད་ལ་སོགས་པར་གཟིགས་པ་མི་མངའ་སྟེ། མཉམ་པ་ཉིད་ཀྱི་ཡེ་ཤེས་མངའ་བའི་ཕྱིར། མཁྱེན་པ་ལ་འབད་རྩོལ་མི་མངའ་སྟེ། མེ་ལོང་ལྟ་བུའི་ཡེ་ཤེས་མངའ་བའི་ཕྱིར། དེ་ཐམས་ཅད་གཅིག་ཐ་དད་ལ་སོགས་ པར་གདགས་སུ་མེད་ལ་གཟིགས་མ་གཟིགས་གང་ཡང་མ་ཡིན་ཏེ། ཆོས་ཀྱི་དབྱིངས་ལས་ནམ་ཡང་མི་གཡོ་བའི་ཕྱིར། དེས་ན་ཟབ་མོ་ལྟ་བའི་གཞུང་དུ་ཡེ་ཤེས་ཙམ་ཡང་མི་མངའ་བར་བཤད་པ་ནི་རྣམ་རིག་པ་ཡེ་ཤེས་གྲུབ་པར་ འཛིན་པ་དེ་གཞིག་པའི་ཕྱིར་བསྟན་གྱི་སངས་རྒྱས་བེམ་པོའམ་ཆད་སྟོང་དུ་སྟོན་པ་མ་ཡིན་ལ། སྤྱིར་ཛྙ་ནའི་སྒྲས་སེམས་ཅན་གྱི་ཤེས་པ་བརྗོད་ཚེ་ཤེས་པའམ། རྣམ་ཤེས་དང་སངས་རྒྱས་ཀྱི་ཤེས་པ་བརྗོད་ཚེ་ཡེ་ཤེས་སུ་བསྒྱུར་དགོས་པར་ལོ་ པཎ་གྱིས་བཀའས་བཅད་པ་ཡིན་གྱི་སྐད་དོད་ཐ་དད་མེད་ལ། རྣམ་ཤེས་དང་ཡེ་ཤེས་འབྱེད་པའི་ཚེ་ཡང་དག་བྱ་གཟུང་འཛིན་གྱི་སེམས་ལ་རྣམ་ཤེས་དང༌། རང་བཞིན་གྱིས་འོད་གསལ་བའི་ཆོས་ཉིད་ལ་ཡེ་ཤེས་ཀྱི་སྒྲས་བཤད་པ་ཡིན་ཞིང༌། འདི་ནི་ཡོད་མེད་ལ་སོགས་པ་སྒྲོ་སྐུར་གྱི་རྣམ་པ་གང་དུ་ཡང་མི་གནས་པའི་ཕྱིར་རོ། །དེས་ན་སངས་རྒྱས་ལ་ཡེ་ཤེས་མངའ་མི་མངའ་རྩོད་པ་ཡང་ཕྱོགས་རེའི་བློ་སྟེ། སོ་སོར་རྟོགས་པའི་ཡེ་ཤེས་ཀྱི་ཆ་ནས་མི་མངའ་བར་གདགས་སུ་མེད་ལ། ཆོས་ཀྱི་

Page: 765 ༄༅། །དབྱིངས་ཀྱི་ཆ་ནས་མངའ་བར་གདགས་སུ་མེད་ཅིང༌། སྤྱིར་སོ་སྐྱེ་རྣམས་ལ་ད་ལྟར་སྣང་བ་གཟུགས་སོགས་ཀྱི་འཆར་སྒོ་མ་འགགས་ཙམ་འདི་ལ་ཡང་སོ་སོ་རང་རིག་པའི་ཤེས་པས་བརྟགས་ན་སྣང་མི་སྣང་དང༌། ཡོད་མེད་གང་ དུ་ཡང་གདགས་སུ་མེད་པ་འདི་ཤེས་པར་གྱིས་ཤིག་དང་ཡང་དག་པའི་ཚུལ་ལ་ཉེ་བར་འགྱུར་རོ། །གཞན་དུ་ན་སྒྲ་དོན་འདྲེས་འཛིན་གྱི་རྣམ་རྟོག་གཅིག་ཐ་དད་པ་དང༌། ཡོད་མེད་སོགས་ལ་ཁྱིམ་པ་རྣམས་འདུ་ཤེས་ཇི་ལྟར་འཇུག་པ་ལྟར་ཞེན་ ཏེ། དེས་སངས་རྒྱས་ལ་ཡོད་དོ། །མེད་དོ། །ཞེས་སོགས་བརྗོད་པ་འདི་ནི་སངས་རྒྱས་ལ་སྐུར་པ་མི་བཟད་པ་འདེབས་པ་ཁོ་ནར་སྣང་ངོ༌། །དེས་ན་ཡོད་མེད་ལ་སོགས་པ་ནི་རྟོག་པས་སྒྲོ་བཏགས་པ་ཡིན་ལ། སངས་རྒྱས་རྟོག་ཡུལ་མ་ཡིན་པ་གོ་བར་ གྱིས་ཤིག །མིག་སོགས་སྒོ་ལྔའི་རྣམ་ཤེས་ཡུལ་ཡུལ་ཅན་ལྟར་སྣང་བ་དང་བཅས་པ་གནས་གྱུར་པ་ནི་སྔོན་ཐོག་མ་མེད་པ་ནས་སེམས་ཅན་ཐམས་ཅད་ཀྱི་དོན་སྒྲུབ་པར་ཐུགས་བསྐྱེད་ཅིང༌། འབད་པ་མཐར་ཕྱིན་པས་འབད་རྩོལ་དང༌། རྟོག་པ་མེད་ བཞིན་གཞན་དོན་ནམ་མཁའ་དང་མཉམ་པ་རྒྱུན་མི་འཆད་པར་འབྱུང་བ་བྱ་བ་སྒྲུབ་པའི་ཡེ་ཤེས་སམ་སྤྲུལ་པའི་སྐུ་ཞེས་བྱ་སྟེ། སྐུ་དང་ཡེ་ཤེས་གཞན་ཐམས་ཅད་ཀྱི་བྱེད་ལས་ཡིན་ཏེ། ཇི་སྐད་དུ། བྱ་བ་སྒྲུབ་པའི་ཡེ་ཤེས་ནི་བཟོ་སྤྲུལ་པ་དང༌། སྐྱེ་བ་སྤྲུལ་པ་དང༌། གསུང་གི་འདུ་བྱེད་དང༌། བསླབ་པ་འཆའ་བ་དང༌། ཐེ་ཚོམ་སེལ་བ་དང༌། སེམས་ཤེས་པ་དང༌། ཡང་དག་པར་འགོད་པ་དང་མཚན་མ་བརྗོད་པ་དང༌། ལན་གདབ་པ་སོགས་ནི་དེའི་ལས་སོ། །ཞེས་སོ། །མདོ་སྡེའི་རྒྱན་ལས་ནི། གནས་ གྱུར་པ་དང་ཡེ་ཤེས་བཞི་སོ་སོར་འཆད་དེ། དབང་པོ་ལྔ་རྣམས་གཞན་གྱུར་ན། །དོན་ཀུན་འཇུག་དང་ཐམས་ཅད་ཀྱི། །ཡོན་ཏན་བརྒྱ་ཕྲག་བཅུ་གཉིས་འབྱུང༌། །འབྱོར་པ་དམ་པ་འཐོབ་པར་འགྱུར། །ཞེས་གཟུགས་

Page: 766 ཕུང་གནས་གྱུར་པ་དང༌། རྣམ་ཤེས་ཀྱི་ཕུང་པོ་ལ། ཉོན་ཡིད། དབང་ཤེས། རྣམ་རྟོག །ཀུན་གཞི་སྟེ་བཞི་ནི། ཡིད་ནི་གཞན་དུ་གྱུར་པ་ན། །འབྱོར་དང་མཐུན་སྤྱོད་མི་རྟོག་པའི། །ཡེ་ཤེས་ཤིན་ཏུ་དྲི་མེད་ལ། །འབྱོར་པ་དམ་པ་ཐོབ་ པར་འགྱུར། །དོན་བཅས་འཛིན་པ་གཞན་གྱུར་ན། །ཇི་ལྟར་འདོད་བཞིན་ལོངས་སྤྱོད་དག །བསྟན་ཕྱིར་ཞིང་ནི་དག་པ་ལ། །འབྱོར་པ་དམ་པ་ཐོབ་པར་འགྱུར། །རྣམ་རྟོག་གཞན་དུ་གྱུར་པ་ན། །དུས་རྣམས་རྟག་ཏུ་ཡེ་ཤེས་དང༌། ། ལས་རྣམས་ཀུན་ལ་ཐོགས་མེད་ལ། །འབྱོར་པ་དམ་པ་ཐོབ་པར་འགྱུར། །རྟེན་ནི་གཞན་དུ་གྱུར་པ་ན། །སངས་རྒྱས་དྲི་མེད་གནས་ལ་ནི། །མི་གནས་མྱ་ངན་འདས་པ་ཡི། །འབྱོར་པ་དམ་པ་ཐོབ་པར་འགྱུར། །ཅེས་ཚིགས་ བཅད་རེ་རེས་བསྟན་ལ། ཚོར་བ་གནས་གྱུར་ནི། འཁྲིག་པ་གཞན་དུ་གྱུར་པ་ན། །སངས་རྒྱས་བདེ་བར་གནས་པ་དང༌། །མོ་མཐོང་ཉོན་མོངས་མེད་པ་ལ། །འབྱོར་པ་དམ་པ་ཐོབ་པར་འགྱུར། །འདུ་ཤེས་གནས་གྱུར་ནི། ནམ་མཁའི་ འདུ་ཤེས་གཞན་གྱུར་ན། །བསམས་པའི་དོན་ནི་འབྱོར་པ་དང༌། །འགྲོ་གཟུགས་རྣམ་པར་འབྱེད་པ་ལ། །འབྱོར་པ་དམ་པ་ཐོབ་པར་འགྱུར། །ཞེས་དངོས་སུ་བཅུ་གཅིག་དང༌། དེ་ལྟར་སངས་རྒྱས་དྲི་མེད་པའི། །གནས་ན་གཞན་ གྱུར་དཔག་མེད་ལ། །བསམ་ཡས་བྱ་བ་སྒྲུབ་པ་ཡི། །འབྱོར་པ་དམ་པ་ཐོབ་པར་འགྱུར། །ཞེས་གནས་གྱུར་ཚད་མེད་པར་བཤད་ལ། མེ་ལོང་ཡེ་ཤེས་ནི་ཡེ་ཤེས་གཞན་གསུམ་གྱི་རྟེན་ཏེ། མེ་ལོང་ཡེ་ཤེས་མི་གཡོ་ བ། །ཡེ་ཤེས་གསུམ་ནི་དེ་ལ་བསྟེན། །མཉམ་པ་ཉིད་དང་སོ་སོར་རྟོགས། །བྱ་བ་སྒྲུབ་པ་ཁོ་ནའོ། །ཞེས་སོ། །མེ་ལོང་ཡེ་ཤེས་དེ་ཡང་མཚན་ཉིད་བརྒྱད་ལྡན་ཏེ། མེ་ལོང་ཡེ་ཤེས་ང་ཡི་མེད། །ཡོངས་སུ་མ་ཆད་རྟག་ཏུ་

Page: 767 ༄༅། །ལྡན། །ཤེས་བྱ་ཀུན་ལ་མ་རྨོངས་ལ། །རྟག་ཏུ་དེ་ལ་མངོན་ཕྱོགས་མིན། །ཡེ་ཤེས་ཀུན་གྱི་རྒྱུ་མཚན་ཕྱིར། །ཡེ་ཤེས་འབྱུང་གནས་ཆེན་པོ་འདྲ། །ལོངས་སྤྱོད་རྫོགས་པའི་སངས་རྒྱས་ཉིད། །ཡེ་ཤེས་ གཟུགས་བརྙན་འབྱུང་བའི་ཕྱིར། །ཞེས་པ་སྟེ། ང་ཡི་བ་མེད་དེ་བདག་འཛིན་ལོག་པའི་ཕྱིར། ཡུལ་རྒྱར་ཆད་པ་མེད་པར་ཡོངས་སུ་འཇུག་སྟེ། ཆོས་དབྱིངས་ལ་ཆོས་དབྱིངས་ལྟར་འཇུག་པའི་ཕྱིར་དང༌། དབྱིངས་དང་གཉིས་སུ་མེད་པའི་ ཕྱིར། དུས་རྟག་ཏུ་ལྡན་པར་བརྗོད་དེ། ནམ་ཡང་ཉམས་པ་མེད་པའི་ཕྱིར། ཤེས་བྱ་ཀུན་ལ་མ་རྨོངས་ཏེ། ཤེས་བྱའི་སྒྲིབ་པ་སྤངས་པའི་ཕྱིར། ཡུལ་ཤེས་བྱ་ལ་ནམ་ཡང་མངོན་པར་ཕྱོགས་པ་མིན་ཏེ། གཅིག་དང་ཐ་དད་ཀྱི་འདུ་ཤེས་མི་ མངའ་བའི་ཕྱིར། འདི་ལས་ཡེ་ཤེས་གཞན་གསུམ་འབྱུང་བའི་ཕྱིར་རིན་པོ་ཆེའི་འབྱུང་གནས་ལྟ་བུ་སྟེ། སངས་རྒྱས་སྐྱེ་བ་འབྱུང་བའི་མདོ་ལས། སངས་རྒྱས་བཅོམ་ལྡན་འདས་ནི་རྣམ་པ་ཐམས་ཅད་མཁྱེན་པའི་རྟེན་གྱི་ཡེ་ཤེས་དང་ལྡན་ པའི་ཕྱིར་ཡེ་ཤེས་དེ་ནི་རིན་པོ་ཆེའི་འབྱུང་གནས་ཆེན་པོ་ལྟ་བུའོ། །ཞེས་སོ། །ཡེ་ཤེས་འདིའི་རང་བཞིན་ཆོས་ཀྱི་སྐུ་ཡིན་མོད་ཀྱང་འདི་ལས་ལོངས་སྐུ་སྣང་བའི་ཕྱིར། ལོངས་སྤྱོད་རྫོགས་པའི་སངས་རྒྱས་ཉིད། །ཅེས་རྟེན་གྱི་ཆ་ནས་བཤད་ པའམ་ཡང་ན་རང་བཞིན་ཐ་མི་དད་པའི་ཆ་ནས་བཞག་གོ །མདོར་ན་ཡེ་ཤེས་གཞན་གསུམ་མམ་གཟུགས་སྐུ་གཉིས་གཟུགས་བརྙན་ལྟ་བུ་འབྱུང་བའི་རྒྱུ་ཡིན་པའི་ཕྱིར། མེ་ལོང་ལྟ་བུའི་ཡེ་ཤེས་ཞེས་བྱའོ། །མཉམ་ཉིད་ཡེ་ཤེས་ནི་ ཡོན་ཏན་དྲུག་ལྡན་ཏེ། མཉམ་ཉིད་ཡེ་ཤེས་སེམས་ཅན་ལ། །སྒོམ་པ་དག་པ་ལས་འདོད་དོ། །མི་གནས་ཞི་བར་ཞུགས་པ་ནི། །མཉམ་ཉིད་ཡེ་ཤེས་ཡིན་པར་འདོད། །དུས་རྣམས་ཀུན་ཏུ་བྱམས་པ་དང༌། །ཐུགས་རྗེ་ཆེན་

Page: 768 པོ་དག་དང་ལྡན། །སེམས་ཅན་རྣམས་ལ་མོས་པ་བཞིན། །སངས་རྒྱས་སྐུ་ནི་ངེས་པར་སྟོན། །ཞེས་པ་སྟེ། ཞེས་པ་སྟེ། རྒྱུ་ནི། ཚོགས་སྦྱོར་དུ་བདག་གཞན་མཉམ་པའི་སེམས་བསྒོམས་ཤིང་དེ་འཕགས་ལམ་དུ་ཤིན་ཏུ་དག་པ་ལས་ཐོབ་པའོ། ། ཡུལ་ནི། སེམས་ཅན་ཐམས་ཅད་ལ་དམིགས་པའོ། །ངོ་བོ་ནི། གང་ལ་ཡང་མི་གནས་པའི་ཞི་བར་རྟག་ཏུ་ཞུགས་པས་མི་མཉམ་པའི་ཆོས་མ་གཟིགས་པའོ། །གྲོགས། བྱམས་པ་དང་ཐུགས་རྗེ་ཆེན་པོ་རྟག་ཏུ་མངའ་བ་སྟེ། སངས་རྒྱས་བཅོམ་ལྡན་ འདས་མཐོང་ན་སེམས་ཅན་ཐམས་ཅད་རྟག་ཏུ་དགའ་བར་བྱེད་པའི་ཕྱིར་ཡེ་ཤེས་ཟླ་བ་ཆེན་པོ་ལྟ་བུ་ཞེས་སོ། །སེམས་ཅན་གྱི་མོས་པ་བཞིན་གཟུགས་ཀྱི་སྐུ་སྣང་བའི་རྟེན་བྱེད་པའོ། །སོར་རྟོག་ཡེ་ཤེས་ནི་མཚན་ཉིད་བཞི་ལྡན་ཏེ། སོ་སོར་རྟོགས་པའི་ཡེ་ཤེས་ནི། །ཤེས་བྱ་ཀུན་ལ་རྟག་མི་ཐོགས། །ཏིང་ངེ་འཛིན་དང་གཟུངས་རྣམས་ཀྱི། །གཏེར་དང་འདྲ་བ་ཁོ་ན་ཡིན། །འཁོར་གྱི་དཀྱིལ་འཁོར་རྣམས་སུ་ནི། །འབྱོར་བ་ཐམས་ཅད་སྟོན་མཛད་པ། ། ཐེ་ཚོམ་ཐམས་ཅད་གཅོད་པ་ཡི། །ཆོས་ཆེན་ཆར་ནི་རབ་ཏུ་འབེབས། །ཞེས་པ་སྟེ། ཐམས་ཅད་མཁྱེན་པ་དང༌། གཟུངས་ཏིང་ཐམས་ཅད་ཀྱི་གཏེར་དང༌། བྱང་འཕགས་ལ་ལོངས་སྐུ་སྟོན་པ་དང༌། ཆོས་སྟོན་པ་རྒྱུན་མི་འཆད་པའོ། །སྤྲུལ་པའི་སྐུ་ སྟོན་པ་ནི་བྱ་བ་སྒྲུབ་པའི་ཡེ་ཤེས་ཏེ། ཁམས་རྣམས་ཀུན་ཏུ་སྣ་ཚོགས་ཤིང༌། །དཔག་མེད་བསམ་ཡས་སྤྲུལ་པ་ཡིས། །སེམས་ཅན་ཀུན་གྱི་དོན་སྒྲུབ་པའོ། །ཞེས་སོ། །ིའི་ཕྱིར་ཡེ་ཤེས་བཞིར་བཞག་པ་ཡང༌། འཛིན་པའི་ཕྱིར་དང་ སེམས་མཉམ་ཕྱིར། །ཡང་དག་ཆོས་རབ་སྟོན་ཕྱིར་དང༌། །བྱ་བ་སྒྲུབ་པ་ཉིད་ཀྱི་ཕྱིར། །ཡེ་ཤེས་བཞི་པོ་ཡང་དག་འབྱུང༌། །ཞེས་སོ། །དེ་ལྟར་མདོ་དང་རྒྱན་ལས་ཡེ་ཤེས་བཞི་ཉིད་སྐུ་གསུམ་དུ་བསྟན་ལ། འགྲེལ་བྱེད་རྣམས་ཀྱིས་ཡེ་

Page: 769 ༄༅། །ཤེས་རྟེན་དང་སྐུ་བརྟེན་པར་བཀྲལ་མོད་ཅི་ལྟར་ཡང་མི་འགལ་ལོ། །དེ་ལ་ཕྲིན་ལས་ཀྱི་རྣམ་པར་བཞག་པ་ལ། ཡུམ་རྒྱན་ལྟར་ན་ཕྲིན་ལས་ཀྱི་ངོ་བོ་ནི། འཁོར་བ་ཇི་སྲིད་པར་གདུལ་བྱ་འདུལ་བའི་ཕྲིན་ལས་ཉེར་བདུན་པོ་ མེད་དུ་རྒྱུན་མི་འཆད་པ་སྟེ། དེ་བཞིན་འཁོར་བ་ཇི་སྲིད་འདིའི། །ལས་ནི་རྒྱུན་མི་འཆད་པར་འདོད། །འགྲོ་རྣམས་ཞི་བའི་ལས་དང་ནི། །བསྡུ་རྣམ་བཞི་ལ་དགོད་པ་དང༌། །ཀུན་ནས་ཉོན་མོངས་བཅས་པ་ཡི། །རྣམ་པར་བྱང་བ་རྟོགས་པ་དང༌། ། སེམས་ཅན་རྣམས་དོན་ཇི་བཞིན་གྱི། །དོན་དང་ཕ་རོལ་ཕྱིན་དྲུག་དང༌། །སངས་རྒྱས་ལམ་དང་རང་བཞིན་གྱིས། །སྟོང་པ་ཉིད་དང་གཉིས་ཟད་དང༌། །བརྡ་དང་དམིགས་པ་མེད་པ་དང༌། །ལུས་ཅན་རྣམས་ནི་ཡོངས་སྨིན་དང༌། །བྱང་ ཆུབ་སེམས་དཔའི་ལམ་དང་ནི། །མངོན་པར་ཞེན་པ་ཟློག་པ་དང༌། །བྱང་ཆུབ་འཐོབ་དང་སངས་རྒྱས་ཞིང༌། །རྣམ་པར་དག་དང་ངེས་པ་དང༌། །སེམས་ཅན་དོན་ནི་ཚད་མེད་དང༌། །སངས་རྒྱས་བསྟེན་སོགས་ཡོན་ཏན་དང༌། །བྱང་ཆུབ་ ཡན་ལག་ལས་རྣམས་ནི། །ཆུད་མི་ཟ་དང་བདེན་མཐོང་དང༌། །ཕྱིན་ཅི་ལོག་ནི་སྤངས་པ་དང༌། །དེ་གཞི་མེད་པའི་ཚུལ་དང་ནི། །རྣམ་པར་བྱང་དང་ཚོགས་དང་ནི། །འདུས་བྱས་འདུས་མ་བྱས་པ་ལ། །ཐ་དད་ཡོངས་སུ་མི་ཤེས་ན། ། མྱ་ངན་འདས་ལ་འགོད་པ་སྟེ། །ཆོས་ཀྱི་སྐུ་ཡི་ཕྲིན་ལས་ནི། །རྣམ་པ་ཉི་ཤུ་བདུན་དུ་བཞེད། །ཅེས་པ་སྟེ། མི་ཁོམ་པ་ཞི་བར་བྱས་ནས་དལ་འབྱོར་ལ་དགོད་པ་ནས་མི་གནས་པའི་མྱ་ངན་ལས་འདས་པ་ཉིད་ལ་དགོད་པའི་བར་ཏེ་གྲངས་སུ་ཆད་ པར་བརྗོད་པའོ། །གྲངས་སུ་མ་ཆད་པ་ནི་མཐའ་ཡས་ཏེ་བདུད་ཀྱི་ལས་ཀྱང་སངས་རྒྱས་ཀྱི་ཕྲིན་ལས་སུ་འགྱུར་བའི་ཕྱིར་ཏེ། བློ་གྲོས་རྒྱ་མཚོའི་མདོ་ལས། ལྷག་པའི་བསམ་པ་ལ་ཡང་དག་པར་ཞུགས་པའི་བྱང་ཆུབ་སེམས་དཔའ་རྣམས་ལ་

Page: 770 ཇི་ལྟར་བདུད་ཀྱི་ལས་བྱེད་པ་དེ་ལྟ་དེ་ལྟར་བྱང་ཆུབ་སེམས་དཔའ་རྣམས་ཆེས་སྟོབས་དང་ལྡན་པའི་བརྩོན་འགྲུས་རྩོམ་མོ། །བཙུན་པ་ཤ་ར་དྭ་ཏིའི་བུ་ཁྱོད་ཀྱིས་རྣམ་གྲངས་འདིས་ཀྱང་གང་གིས་བྱང་ཆུབ་སེམས་དཔའ་རྣམས་ལ་བདུད་ཀྱི་ལས་བྱེད་པ་དེ་ ཉིད་སངས་རྒྱས་ཀྱི་ཕྲིན་ལས་སུ་བརྗོད་ཀྱི་བདུད་ཀྱི་ལས་ནི་མིན་པ་དེ་ལྟར་རིག་པར་བྱའོ། །ཞེས་གསུངས་ཤིང༌། སངས་རྒྱས་ཀྱི་ཕྲིན་ལས་སུ་མི་འགྱུར་བའི་ཆོས་འགའ་ཡང་མེད་པར་གསུངས་པའི་ཕྱིར་རོ། །རྒྱུད་བླ་ལྟར་ན། ལྷུན་གྲུབ་དང༌། རྒྱུན་མི་འཆད་གཉིས་ལྡན་གྱི་གཞན་དོན་ཚད་མེད་པ་སྟེ། གདུལ་བྱའི་ཁམས་དང་གདུལ་བའི་ཐབས་དང་ནི། །གདུལ་བྱའི་ཁམས་ཀྱི་གདུལ་བའི་བྱ་བ་དང༌། །ེ་ཡི་ཡུལ་དང་དུས་སུ་གཤེགས་པ་ལ། །ཁྱབ་བདག་རྟག་ཏུ་ལྷུན་ གྱིས་གྲུབ་པར་འཇུག །ཅེས་སོ། །དེ་བཞིན་དུ་ཁྱབ་པ་དང་རྟག་པ་གཉིས་ལྡན་ནམ། ཟབ་པ་དང་རྒྱ་ཆེ་བ་གཉིས་ལྡན་དུ་ཡང་རུང་སྟེ། འཇུག་པར། ཟབ་མོ་སྟོང་པ་ཉིད་ཡིན་ཏེ། །ཡོན་ཏན་གཞན་རྣམས་རྒྱ་ཆེ་བའོ། །ཞེས་པའི་ ཞར་ལས་འབྱུང་ངོ༌། །བོད་གཞན་དག་བྱ་བ་ཡུལ་ལ་ཡོད་པའི་ཕྲིན་ལས་དང༌། བྱེད་པ་པོ་ལ་ཡོད་པའི་ཕྲིན་ལས་ཞེས་འདོན་ཡང་ཕྲིན་ལས་དེ་གདུལ་བྱ་ལ་ལྡན་པ་མ་ཡིན་ཏེ། དཔེར་ན། ཉི་མའི་འོད་ཟེར་ནི་ཉི་མ་ཉིད་ལ་ལྡན་གྱི་ཉི་མ་ལ་ ལྡན་པ་དང་པདྨ་ལ་ལྡན་པ་གཉིས་སུ་འཇོག་མི་རིགས་པ་བཞིན་ནོ། །ཕྲིན་ལས་ཇི་ལྟར་མཛད་པའི་ཚུལ་ནི། འབད་པ་དང་རྩོལ་བ་མེད་པར་ལྷུན་གྱིས་གྲུབ་ཅིང་རྒྱུན་མི་འཆད་པར་འཇུག་པ་སྟེ། ཡེ་ཤེས་སྣང་བ་རྒྱན་གྱི་མདོ་ལས་གསུངས་ པའི་དོན་བསྡུས་ནས་དཔེ་དགུས་རྒྱུད་བླར་བསྟན་པ་སྟེ། དེ་ཡང་སངས་རྒྱས་ཀྱི་ཕྲིན་ལས་ཆོས་ཅན། འབད་རྩོལ་མེད་པར་ལྷུན་གྲུབ་ཏུ་འཇུག་པར་དམ་བཅའ། ཐུགས་རྟོག་པ་མེད་པའི་དབྱིངས་དང་ཡེ་ཤེས་མངའ་བའི་ཕྱིར། ཞེས་པ་ནི་

Page: 771 ༄༅། །གཏན་ཚིགས་ཏེ། དཔེ་ནི། བརྒྱ་བྱིན་གྱི་གཟུགས་སོགས་དགུ་བཞིན་ནོ། །ཞེས་སྦྱོར་བ་དགོད་པར་བྱ་སྟེ། འབད་རྩོལ་བྲལ་བ་དམ་བཅའ་སྟེ། །རྟོག་མེད་ཐུགས་ནི་གཏན་ཚིགས་སོ། །རང་བཞིན་དོན་ནི་སྒྲུབ་དོན་ དུ། །དཔེ་ནི་བརྒྱ་བྱིན་གཟུགས་སོགས་བཞིན། །ཞེས་སོ། །དེ་ལ་དཔེ་དང་པོ་སྐུ་རྟོག་མེད་དུ་འགྲོ་དོན་མཛད་པ་ནི། བརྒྱ་བྱིན་གྱི་གཟུགས་ཀྱི་དཔེས་བསྟན་ཏེ། ལྷ་ཡུལ་གྱི་ས་གཞི་བཻཌཱུརྱ་དག་པར་གྱུར་པ་ལ་ལྷའི་དབང་པོ་བརྒྱ་བྱིན་རྣམ་པར་ རྒྱལ་བའི་ཁང་བཟང་ན་བདེ་བར་སྤྱོད་པའི་གཟུགས་བརྙན་ས་གཞི་དེ་ལ་སྒྲིབ་མེད་དུ་མཐོང་བའི་མི་རྣམས་བརྒྱ་བྱིན་དེ་འཐོབ་པའི་ཆེད་དུ་དགེ་བ་བྱེད་ཅིང་སྨོན་ལམ་བཏབ་པས་བརྒྱ་བྱིན་དུ་སྐྱེ་ལ། གཟུགས་བརྙན་དེ་ལ་རྟོག་པ་དང་གཡོ་བ་ མེད་པ་ལྟར། དེ་བཞིན་གཤེགས་པ་ཆོས་ཀྱི་དབྱིངས་ན་ཟག་མེད་ཀྱི་བདེ་བ་ལ་སྤྱོད་པའི་གཟུགས་བརྙན་གདུལ་བྱའི་རྒྱུད་དག་པའི་བཻཌཱུར་གྱི་ས་གཞི་ལ་སྣང་བ་ན་དེ་འཐོབ་པའི་ཆེད་དུ་ཚོགས་བསགས་ཤིང་སྨོན་ལམ་བཏབ་པས་སངས་རྒྱས་ འཐོབ་པར་འགྱུར་བ་ནི་སྐུ་འབད་རྟོག་མེད་པར་སྣང་བས་དོན་མཛད་པ་བརྒྱ་བྱིན་གྱི་དཔེ་དང་པོ་སྟེ། ཇི་ལྟར་བཻཌཱུར་དག་པ་ཡི། །རང་བཞིན་ས་སྟེང་འདི་གྱུར་ཏེ། །དག་ཕྱིར་ལྷ་ཡི་དབང་པོ་དེ། །ལྷ་ཡི་བུ་མོའི་ཚོགས་དང་བཅས། ། རྣམ་པར་རྒྱལ་བའི་ཁང་བཟང་དང༌། །ལྷ་གནས་དེ་ལས་གཞན་དག་དང༌། །དེ་ཡི་གཞལ་ཡས་སྣ་ཚོགས་དང༌། །ལྷ་རྫས་རྣམ་མང་དེ་མཐོང་ངོ༌། །དེ་ནས་སྐྱེས་པ་བུད་མེད་ཚོགས། །ས་ཡི་སྟེང་ན་གནས་པ་རྣམས། །སྣང་བ་དེ་ནི་མཐོང་གྱུར་ ནས། །ངེད་ཀྱང་རིང་པོར་མི་ཐོགས་པར། །ལྷ་དབང་འདི་འདྲར་གྱུར་ཅིག་ཅེས། །དེ་འདྲའི་སྨོན་ལམ་འདེབས་བྱེད་ཅིང༌། །དེ་འཐོབ་དོན་དུ་དགེ་བ་ནི། །ཡང་དག་བླངས་ཏེ་གནས་པར་གྱུར། །དེ་དག་དགེ་བའི་ལས་དེས་ནི། །འདི་སྣང་

Page: 772 ཙམ་ཞེས་དེ་ལྟ་བུར། །ཤེས་པ་མེད་ཀྱང་ས་སྟེང་ནས། །འཕོས་ཏེ་ལྷ་རུ་སྐྱེ་བར་འགྱུར། །སྣང་བ་དེ་ནི་ཤིན་ཏུ་ཡང༌། །རྟོག་པ་མེད་ཅིང་གཡོ་བ་མེད། །དེ་ལྟ་མོད་ཀྱི་ས་སྟེང་ན། །དོན་ཆེན་པོས་ནི་ཉེ་བར་གནས། །དེ་བཞིན་དད་སོགས་ དྲི་མེད་ཅན། །དད་སོགས་ཡོན་ཏན་གོམས་པ་ཡི། །རང་སེམས་ལ་སྣང་རྫོགས་སངས་རྒྱས། །མཚན་དང་དཔེ་བྱད་དང་ལྡན་པ། །འཆག་པ་དང་ནི་བཞེངས་པ་དང༌། །བཞུགས་པ་དང་ནི་གཟིམས་པ་དང༌། །སྤྱོད་ལམ་སྣ་ཚོགས་ མཛད་པ་ཅན། །ཞི་བའི་ཆོས་ནིགསུང་བ་དང༌། །མི་གསུང་མཉམ་པར་བཞག་གྱུར་པ། །ཆོ་འཕྲུལ་རྣམ་པ་སྣ་ཚོགས་དག །མཛད་པ་གཟི་མདངས་ཆེན་པོ་ཅན། །སེམས་ཅན་རྣམས་ཀྱིས་མཐོང་བར་འགྱུར། །དེ་མཐོང་ནས་ ཀྱང་འདོད་ལྡན་པས། །སངས་རྒྱས་ཉིད་ཕྱིར་རབ་སྦྱོར་ཏེ། །དེ་རྒྱུ་ཡང་དག་བླངས་ནས་ནི། །འདོད་པའི་གོ་འཕང་འཐོབ་པར་བྱེད། །སྣང་བ་དེ་ནི་ཤིན་ཏུ་ཡང༌། །རྟོག་མེད་གཡོ་བ་མེད་པ་ཉིད། །དེ་ལྟ་ན་ཡང་འཇིག་རྟེན་ན། །དོན་ ཆེན་པོས་ནི་ཉེ་བར་གནས། །འདི་ནི་རང་སེམས་སྣང་བ་ཞེས། །སོ་སོ་སྐྱེ་བོས་མི་ཤེས་མོད། །དེ་ལྟ་ན་ཡང་གཟུགས་མཐོང་དེ། །དེ་དག་ལ་ནི་དོན་ཡོད་འགྱུར། །རིམ་གྱིས་དེ་མཐོང་ལ་བརྟེན་ནས། །ཐེག་པ་འདི་ལ་གནས་པ་རྣམས། ། ནང་གི་དམ་པ་ཆོས་སྐུ་ནི། །ཡེ་ཤེས་མིག་གིས་མཐོང་བར་འགྱུར། །ཞེས་སོ། །སྔོན་དུ་བཤད་པ་ལྟར་འདིས་ནི་གཟུགས་སྐུ་ཆོས་སྐུའི་མཐུ་དང༌། སྔོན་གྱི་སྨོན་ལམ་གྱི་དབང་དང༌། གདུལ་བྱའི་རྒྱུད་དག་པ་སྟེ་གསུམ་ལས་སྣང་བ་རྟེན་འབྲེལ་ གྱི་སྐུར་འཆད་པ་ཡིན་གྱི་གདུལ་བྱའི་མིག་ཤེས་སུ་སྟོན་པ་མ་ཡིན་ཏེ། བརྒྱ་བྱིན་གྱི་གཟུགས་བརྙན་མཐོང་བ་དེ་སོ་སོའི་མིག་ཤེས་ཁོ་ན་ཡིན་ན་བདག་རྐྱེན་བརྒྱ་བྱིན་མེད་ཀྱང་སྣང་དགོས་པ་དང༌། ཡུལ་གྱི་རྐྱེན་ས་གཞི་མ་དག་ན་ཡང་འཆར་དགོས་པར་

Page: 773 ༄༅། །ཐལ་བའི་ཕྱིར། དེས་ན་དེ་དག་ཚོགས་པའི་དབང་གིས་མེད་བཞིན་དུ་ཡང་སྣང་བ་རྟེན་འབྲེལ་གྱི་སྐུ་སྟེ་ཆོས་ཐམས་ཅད་ཀྱང་འདི་ལྟར་ཤེས་པར་བྱའོ། །སེམས་ཀྱི་རང་བཞིན་གཟོད་ནས་དྲི་མས་སྟོང་ཞིང་ཡོན་ཏན་གྱིས་ འོད་གསལ་བ་ཡོད་མེད་དང༌། བདེན་བརྫུན་ལ་སོགས་པ་སྒྲོ་སྐུར་གྱི་དངོས་པོར་མི་གནས་པས་བློའི་ཡུལ་མིན་པ་ཀུན་ལ་རྒྱར་མ་ཆད་ཅིང་གང་གི་ཡང་ཕྱོགས་སུ་མ་ལྷུང་བ་འདི་ལ་ཆོས་ཀྱི་དབྱིངས་ཞེས་བྱ་སྟེ། འདས་པའི་དེ་བཞིན་ཉིད་གང་མ་ བྱོན་དེ་བཞིན་ཉིད། །ད་ལྟར་དེ་བཞིན་ཉིད་གང་དགྲ་བཅོམ་དེ་བཞིན་ཉིད། །ཆོས་ཀུན་དེ་བཞིན་ཉིད་འདི་ཐམས་ཅད་བྱེ་བྲག་མེད། །ཅེས་གསུང་པ་ལྟར། སངས་རྒྱས་དང་བྱང་ཆུབ་སེམས་དཔའ་དང་ཉན་ཐོས་དང་རང་རྒྱལ་དང་སེམས་ཅན་ ཐམས་ཅད་ཀྱི་ཡང་སེམས་ཀྱི་དབྱིངས་ཐ་དད་པ་མེད་པ་ནམ་མཁའི་ཁམས་གཟུགས་ཐམས་ཅད་ལ་ཀུན་ཏུ་སོང་བ་ལྟ་བུ་འདིའི་ཕྱིར། ཆོས་དབྱིངས་ལས་གཞན་པའི་ཆོས་མ་གཟིགས་པར་ཡང་གསུངས་ལ། སངས་རྒྱས་ཐམས་ཅད་གང་དུ་མངོན་པར་རྫོགས་ པར་འཚང་རྒྱ་བའི་གནས་དང༌། གང་རྟོགས་པས་འཚང་རྒྱ་བའི་ཐབས་དང༌། གང་གི་ངོ་བོར་འཚང་རྒྱ་བའི་རང་བཞིན་ཐམས་ཅད་ཀྱང་འདི་ཁོ་ན་ཡིན་ལ། འདི་ཉིད་ལས་མི་གཡོ་བ་ནི་སངས་རྒྱས་ཀྱི་གནས་པ་སྟེ་རྟག་ཏུ་འདི་ཉིད་ཀྱིས་གནས་ཤིང་འདི་ནི་ གནས་མི་གནས་མི་དམིགས་པའི་ཕྱིར་ན། མི་གནས་པའི་གནས་པར་བརྗོད་ཅིང་སེམས་ཅན་དང་འབྲེལ་བ་མེད་ཀྱང་སེམས་ཅན་གྱི་ཁམས་རྒྱུད་ཀྱང་འདི་ལས་གཞན་མ་ཡིན་པའི་ཕྱིར། སངས་རྒྱས་ཐམས་ཅད་རྟག་ཏུ་སེམས་ཅན་གྱི་ཁམས་རྒྱུད་ལ་ བཞུགས་པར་ཡང་གསུངས་ཤིང༌། རང་རྒྱུད་ཀྱི་ཁམས་འདིའི་མཐུ་ལས་དགེ་བའི་བློ་སྐྱེ་དགེ་བའི་བཤེས་གཉེན་དང་གཟུགས་ཀྱི་སྐུ་མཐོང་ཞིང་དེས་རྒྱུད་སྦྱངས་པས་རང་རྒྱུད་ཀྱི་ཆོས་སྐུ་ཇི་ལྟ་བ་མཐོང་ནུས་པའི་ཕྱིར་ན། གལ་ཏེ་སངས་རྒྱས་ཁམས་མེད་

Page: 774 ན། །སྡུག་ལ་སྐྱོ་བར་མི་འགྱུར་ཞིང༌། །མྱ་ངན་འདས་ལ་འདོད་པ་དང༌། །དོན་གཉེར་སྨོན་པའང་མེད་པར་འགྱུར། །ཞེས་ཁམས་ཀྱི་མཐུ་དང༌། འདི་ནི་རང་སེམས་སྣང་བ་ཞེས། །སོ་སོའི་སྐྱེ་བོས་མི་ཤེས་མོད། །ཅེས་རང་རྒྱུད་ཀྱི་དབྱིངས་དང་ དགེ་བའི་མཐུ་ཚོགས་པའི་གཟུགས་བརྙན་ཡིན་པ་དང༌། ནང་གི་དམ་པ་ཆོས་སྐུ་ནི། །ཡེ་ཤེས་མིག་གིས་མཐོང་བར་འགྱུར། །ཞེས་འདི་ལ་བརྟེན་ནས་རང་རྒྱུད་ཀྱི་ཆོས་སྐུ་ཉིད་ཇི་ལྟ་བ་མཐོང་འགྱུར་དུ་གསུངས་པ་ཡིན་ནོ། །དེས་ན་ གཟུགས་ཀྱི་སྐུ་ཙམ་གྱིས་སངས་རྒྱས་ཡོངས་སུ་རྫོགས་པར་ཡང་མི་ལྟ་ལ། ཆོས་ཀྱི་སྐུ་ལས་གཞན་དུའང་མི་ལྟ་ཞིང༌། དེ་བཞིན་དུ་མཐོང་བ་པོའི་སེམས་ཁོ་ནར་ཡང་མི་ལྟ་ལ། སེམས་ལས་གཞན་དུ་ཡང་མི་ལྟ་སྟེ། འདིའི་ཕྱིར་ཡང་ཆོས་ ཐམས་ཅད་རྟེན་འབྲེལ་ཙམ་དུ་གསུངས་པ་ཡིན་ལ། ཆོས་སྐུ་སྟོང་ཉིད་ཀྱི་ཕྱིར་གཟུགས་སྐུ་རྟེན་འབྲེལ་དུ་འཆར་རུང་ཞིང་གཟུགས་སྐུ་རྟེན་འབྲེལ་ཉིད་ལས་གཞན་པའི་ཆོས་སྐུ་ཡང་དམིགས་སུ་མེད་དེ། དེའི་ཕྱིར། གང་ཕྱིར་རྟེན་ འབྱུང་མ་ཡིན་པའི། །ཆོས་འགའ་ཡོད་པ་མ་ཡིན་ནོ། །དེ་ཕྱིར་སྟོང་ཉིད་མ་ཡིན་པའི། །ཆོས་འགའ་ཡོད་པ་མ་ཡིན་ནོ། །ཞེས་པ་འདི་ཉིད་འབྲས་བུ་དབུ་མ་སྐུ་གཉིས་ཟུང་འཇུག་གི་སྐབས་སུ་ཡང་ཤེས་པར་བྱའོ། །དེས་ ན་རང་སྟོང་བར་འདོད་པ་ཁ་ཅིག་སངས་རྒྱས་ཅང་མེད་དུ་འདོད་པ་དང༌། གཞན་སྟོང་བར་འདོད་པ་ཁ་ཅིག་སངས་རྒྱས་རྟག་རྫས་སུ་ཁས་ལེན་པ་ནི་སངས་རྒྱས་ཀྱི་བསྟན་པ་རྣམ་པར་གཞིག་པ་ཡིན་ཏེ། རྫོགས་པའི་སངས་རྒྱས་ལ་ཡང་རྟག་ཆད་ གང་རུང་དུ་སྨྲ་བ་དེས་རྟག་ཆད་ཀྱི་མཐར་མི་སྨྲ་བའི་ཆོས་གཞན་ཅི་ཞིག་ཡོད་ལ། གང་རྟག་ཆད་ཀྱི་མཐར་སྨྲ་བ་ནི་ངའི་རྗེས་འབྲང་མ་ཡིན། ང་ཡང་དེའི་སྟོན་པ་མ་ཡིན་ནོ། །ཞེས་ཡང་ཡང་གསུངས་པའི་ཕྱིར་རོ། །དེ་བཞིན་གཤེགས་པ་

Page: 775 ༄༅། །རྟག་པའི་སྐུ། །རྟག་པའི་མཚན་རྣམས་ཕུན་སུམ་ཚོགས། །ཞེས་སོགས་བཤད་པའང་མུ་སྟེགས་པས་དབང་ཕྱུག་རྟག་པ་རང་བྱུང་གི་ཚད་མར་འདོད་པ་ལྟར་གསུངས་པ་མ་ཡིན་ཏེ། སོར་ཕྲེང་ལ་ཕན་པའི་མདོར། མི་ དགེ་བ་ཅན་རྣམས་དགེ་བ་ལ་འགོད་པའི་ཕྱིར་ངའི་ལུས་ཡང་ཡང་བཏང་བས་ན་ངའི་ལུས་མ་སྐྱེས་པའི་སྐུར་གྱུར་ཏོ། །ཞེས་སོགས། མི་བདེན་པར་སྨྲ་བ་རྣམས་བདེན་པ་ལ་བཀོད་པས་བདེན་པ་རྟག་པའི་སྐུ་ཐོབ་པ་དང༌། ཆོས་སྲུང་ཕྱིར་ལུས་བཏང་ བས་འདུས་མ་བྱས་ཀྱི་སྐུ་ཐོབ་པ་སོགས་ནས། བདེ་སྙིང་རྟག་པའི་དབྱིངས་མ་བཅབས་པར་བསྟན་པས་རྟག་པའི་སྐུ་ཐོབ་པ་སོགས་དགེ་བའི་རྣམ་འབྲས་ཁོ་ནར་གསུངངས་པའི་ཕྱིར། ཡང་ལོངས་སྐུ་སངས་རྒྱས་དངོས་ཏེ། སྒྱུ་མ་མཁན་ལྟ་བུ་ དང་སྤྲུལ་སྐུ་ནི་སྒྱུ་མའི་སྐྱེས་བུ་ལྟར་དེའི་སྤྲུལ་པར་འདོད་པ་ཡང་མི་ལེགས་ཏེ། ཆུ་དང་ནམ་མཁར་ཟླ་གཟུགས་བཞིན། །དེ་མཐོང་བ་ཡང་རྣམ་པ་གཉིས། །ཞེས་ལོངས་སྐུ་ནམ་མཁའི་ཟླ་གཟུགས་དང༌། སྤྲུལ་སྐུ་ཆུ་ནང་གི་ཟླ་གཟུགས་ལྟར་ བཤད་མོད་ཀྱང༌། བྱེ་མདོའི་ལུགས་ཀྱིས་ཆུ་ནང་གི་ཟླ་གཟུགས་ནི་ཟླ་གཟུགས་ལྟར་སྣང་ཡང་ཟླ་གཟུགས་མ་ཡིན་པར་འདོད་པ་དང་མི་མཚུངས་ཏེ། ཆུ་ནང་གི་ཟླ་གཟུགས་དང་ནམ་མཁའི་ཟླ་གཟུགས་ནི་དེ་ཉིད་དང་གཞན་གང་ཡང་མ་ཡིན་ཏེ། གལ་ཏེ་ཟླ་གཟུགས་དངོས་སམ་གཅིག་ཡིན་ན་ཡང་ཆུ་ནང་ན་ཟླ་བ་ཡོད་པར་འགྱུར་ཞིང་ཟླ་གཟུགས་དངོས་མ་ཡིན་པའམ་ཐ་དད་ཡིན་ན་ཡང་ནམ་མཁའི་ཟླ་བ་སྒྲ་གཅན་ལས་གྲོལ་མ་གྲོལ་སོགས་ཟླ་གཟུགས་ཀྱིས་མཚོན་མི་ནུས་དགོས་ པའི་ཕྱིར། དེས་ན་དེ་གཉིས་གཅིག་སྟེ། དེ་ཉིད་དང་གཞན་ཏེ་ཐ་དད་པ་གང་ཡང་མ་ཡིན་ཞིང་ཟླ་གཟུགས་སུ་བདེན་མི་བདེན་གང་དུ་ཡང་བརྗོད་པར་མི་ནུས་ཏེ། འདི་ཇི་ལྟར་སྣང་བའི་རྒྱུ་མཚན་ནི་སོ་སོ་སྐྱེ་བོས་མི་ཤེས་སོ། །དེ་ལྟ་མོད་ཀྱི་འདོད་

Page: 776 པ་དེ་ལྟ་ན་སངས་རྒྱས་ལ་ངན་སེམས་ཀྱིས་ཁྲག་ཕྱུང་བའི་མཚམས་མེད་ཀྱི་ལས་མི་སྲིད་པར་འགྱུར་ཏེ། ལོངས་སྐུ་ལ་དེ་སུས་ཀྱང་མི་ནུས་ཤིང་སྤྲུལ་སྐུ་ནི་སྒྱུ་མའི་སྐྱེས་བུ་ཡིན་པས་སྒྱུ་མའི་སྐྱེས་བུ་བསད་སོགས་ལ་སེམས་མེད་ཕྱིར་ན་སྡིག་པ་མེད་པའི་ཕྱིར། སྤྲུལ་པའི་སྐུ་ ཞེས་པའང་སྤྲུལ་པ་ཡིན་གྱི་སངས་རྒྱས་མ་ཡིན་པར་སྟོན་པ་ནི་མ་ཡིན་ཏེ། སྤྲུལ་པ་དང་མཚུངས་པའི་སྐུ་དང་སྒྱུ་མ་དང་མཚུངས་པའི་སྐུ་ཞེས་བཤད་པར་གོ་བར་བྱའོ། །གཞན་ཡང་བསྟན་པའི་བདག་པོ་མཆོག་གི་སྤྲུལ་སྐུ་རྣམས་སངས་རྒྱས་ཀྱི་སྐུར་ མི་འདོད་པ་རྣམས་ཀྱིས། མུ་སྟེགས་པ་རྣམས་ཀྱིས་དགེ་སྦྱོང་གཽ་ཏ་མ་ནི་སྒྱུ་མ་སྟེ་བདེན་པའི་དངོས་པོ་མེད་དོ། །ཞེས་དང༌། འཇིག་རྟེན་ན་ཐམས་ཅད་མཁྱེན་པ་མི་སྲིད་ཅིང་དགེ་སྦྱོང་གཽ་ཏ་མ་ནི་སངས་རྒྱས་དང་ཐམས་ཅད་མཁྱེན་པ་མ་ཡིན་ནོ། །ཞེས་ སྨྲ་བ་འདིའི་ལན་ལྡོན་པར་མི་ནུས་ཀྱི་སྟེང་དུ་ལེགས་སོ། །ལེགས་སོ། །དེ་དེ་བཞིན་ནོ། །ཞེས་སྨྲས་པར་འགྱུར་ལ། འདི་སྐད་བདག་གིས་ཐོས་པ་དུས་གཅིག་ན་བཅོམ་ལྡན་འདས་རྒྱལ་པོའི་ཁབ་ན་བཞུགས་ཏེ། ཞེས་སོགས་སྡུད་པ་པོས་བརྗོད་པ་འདི་ ཐམས་ཅད་བརྫུན་དུ་ཁས་ལེན་དགོས་ཏེ། རྒྱལ་པོའི་ཁབ་ན་བཞུགས་པ་དེ་བཅོམ་ལྡན་འདས་མ་ཡིན་པའི་ཕྱིར། མཛད་པ་བཅུ་གཉིས་ཀྱང་སངས་རྒྱས་ཀྱི་མཛད་པ་མ་ཡིན་པར་འགྱུར་ཞིང༌། བསྟན་པ་འདི་ཡང་སངས་རྒྱས་ཀྱི་བསྟན་པ་མ་ ཡིན་པར་ཁས་ལེན་དགོས་སོ། །དེས་ན་ཐར་རྒྱན་ལས། གཟུགས་སྐུ་གཉིས་ནི་ཆོས་ཀྱི་སྐུའི་བྱིན་རླབས་དང༌། གདུལ་བྱའི་སྣང་བ་དང༌། སྔོན་གྱི་སྨོན་ལམ་སྟེ་དེ་གསུམ་འཛོམ་པ་ལས་བྱུང་བར་ཤེས་པར་བྱ་སྟེ། ཆོས་དབྱིངས་ཀྱི་བྱིན་རླབས་འབའ་ ཞིག་ལས་བྱུང་བ་ཡིན་ན་ནི་ཆོས་དབྱིངས་ཀྱིས་སེམས་ཅན་ཐམས་ཅད་ལ་ཁྱབ་པས་ཀུན་འབད་མེད་དུ་གྲོལ་བར་རིགས་ལ། ཡང་ན་སེམས་ཅན་ཐམས་ཅད་སངས་རྒྱས་དང་ཞལ་མཇལ་བར་རིགས་སོ། །གདུལ་བྱའི་སྣང་བ་འབའ་ཞིག་ཡིན་ན་ནི་མེད་

Page: 777 ༄༅། །པ་སྣང་བ་དེ་ལོག་ཤེས་ཡིན་ལ། ལོག་ཤེས་ལ་བརྟེན་ནས་འཚང་རྒྱ་ན་སེམས་ཅན་ཐམས་ཅད་ཀྱིས་ཐོག་མེད་ནས་ལོག་ཤེས་ལ་སྤྱད་པས་ད་ཙམ་ན་ཀུན་སངས་རྒྱས་པར་རིགས་སོ། །སྨོན་ལམ་འབའ་ཞིག་ལས་བྱུང་བ་ཡིན་ན་ རྫོགས་པའི་སངས་རྒྱས་སྨོན་ལམ་ལ་མངའ་མ་བརྙེས་ན་སངས་རྒྱས་སུ་མི་འགྱུར་ལ་བརྙེས་ན་སེམས་ཅན་ཐམས་ཅད་ཀྱི་དོན་དུ་བཏབ་པའི་ཕྱིར། སྨོན་ལམ་གྱི་སྒོ་ནས་ཀུན་འབད་མེད་དུ་གྲོལ་བར་ཡང་རིགས་པ་ལ་དེ་ལྟར་རེ་རེ་ཞིང་མི་འདུག་པས་ན་དེ་གསུམ་ འཛོམ་པའི་མཐུ་ལས་བྱུང་བ་ཡིན་ནོ་ཞེས་བཞེད་དོ། །དེས་ན་སངས་རྒྱས་བེམ་ཤེས་གཉིས་ཚོགས་ཀྱི་སྐྱེས་བུ་དང་འདུས་བྱས་ཡིན་པར་ཞེན་པ་ཐེག་དམན་པའི་བློ་སེལ་བའི་ཕྱིར་སངས་རྒྱས་གཟུགས་སུ་མི་གནས་པར་ཡང་སྟོན་ལ། སྤྱིར་ གཟུགས་སྐུའི་སྣང་བ་འདི་གཟུགས་ཕུང་གིས་བསྡུས་པ་མ་ཡིན་ཏེ་གཟུགས་ཕུང་གནས་གྱུར་ཟིན་པའི་ཕྱིར་དང༌། འདོད་པ་དག་གིས་མ་གོས་པ་ཞེས་སོགས་ཀྱིས་ཁམས་གསུམ་ལས་འདས་པར་གསུངས་པའི་ཕྱིར་དང༌། སྲིད་ཞིས་མ་བསྡུས་ཕྱིར། ཞེས་སྲིད་ཞི་གང་གིས་ཀྱང་མ་བསྡུས་པར་གསུངས་པའི་ཕྱིར་རོ། །དེས་ན་གཟུགས་ལས་འདས་ཀྱང་གཟུགས་ཐམས་ཅད་པར་སྟོན་པ། སྒྲས་མ་བསྡུས་ཀྱང་ཡན་ལག་ཐམས་ཅད་པའི་གསུང་དབྱངས་མངའ་བ། ཁམས་གསུམ་ལས་ འདས་ཀྱང་ཁམས་གསུམ་ལས་མི་གཡོ་བ། སེམས་ཅན་གྱི་ཡུལ་མིན་ཡང་སེམས་ཅན་རེ་རེ་ལ་ཡང་གང་འདུལ་གྱི་སྐུ་མཐའ་ཡས་པར་སྣང་བ། མཐའ་དབུས་རྣམ་པར་གྲོལ་བ་ནམ་མཁའི་ཁམས་ཀྱིས་ཀྱང་དཔེར་མི་ནུས་པར་ཚད་ལས་ གྲོལ་ཡང་སེམས་ཅན་ཐམས་ཅད་ཀྱི་ཕན་བདེའི་གཞི་གཅིག་པོར་གྱུར་པ་འདི་ལ། རང་ཅག་རྣམས་ཀུན་ནས་དང་བ་དང༌། སྐྱབས་སུ་འཛིན་པ་དང༌། གོ་འཕང་འདོད་པར་བྱའི། རང་ཅག་མཚོ་མ་དྲོས་པ་ཙམ་གྱི་ཟབས་ཀྱི་ཚད་ལ་རྨོངས་པ་རྣམས་

Page: 778 ཀྱིས་རྒྱ་མཚོ་ཆེན་པོ་གངྒཱ་ཀླུང་གི་བྱེ་མ་སྙེད་ཀྱིས་མི་བསྒྲུན་པའི་སངས་རྒྱས་ཀྱི་ཆུ་གཏེར་ཆེན་པོ་འདིའི་ཚད་བཟུང་བར་མི་བྱའོ། །དཔེ་དང་པོ་འདི་ཡང༌། རང་བཞིན་ས་སྟེང་འདི་གྱུར་ཏེ། །ཞེས་འཛམ་གླིང་གི་ས་འདི་བཻཌཱུརྱ་གྱུར་པ་ ལ་གཟུགས་བརྙན་འཆར་བར་བཤད་པ་ལྟར་དངོས་སུ་ཡོད་ཅིང་ཕལ་ཆེར་གྱིས་དེ་ལྟར་འགྲེལ་ཡང་ས་གཞི་འདི་ལ་ཤར་ན་བརྒྱ་བྱིན་ས་འོག་ཏུ་འོང་བར་མི་རིགས་པས་གཟུགས་བརྙན་དུ་སྐྱེ་བོས་ཀྱང་གོ་བར་འགྱུར་ལ་དེ་ལྟ་ན། འདི་སྣང་ ཙམ་ཞེས་དེ་ལྟ་བུར། །ཤེས་པ་མེད་ཀྱང༌། ཞེས་པ་དང་འགལ་ལོ། །དེས་ན་ཐར་རྒྱན་ལས། དཔེར་ན་ལྷ་དབང་བརྒྱ་བྱིན་དེ་ལྷའི་བུ་མོའི་ཚོགས་དང་བཅས་ནས་རྣམ་པར་རྒྱལ་བའི་ཁང་བཟང་ན་བཞུགས་པ་ལ་ཁང་བཟང་དེ་བཻཌཱུརྱའི་ རང་བཞིན་དག་ཅིང་དང་བ་ཡིན་པས་བརྒྱ་བྱིན་གྱི་གཟུགས་བརྙན་ཁང་བཟང་གི་ཕྱི་རོལ་དུ་སྣང་བ་འབྱུང་ངོ༌། །ཞེས་བཤད་དོ། །དེས་ན་འདི་ལ་ཤེལ་དྭངས་པའི་ནང་གི་གཟུགས་བཞིན་མ་བསྒྲིབས་པར་མཐོང་བ་བྱང་འཕགས་ལ་ལོངས་སྐུར་ སྣང་བའི་དཔེ་དང་མེ་ལོང་དྭངས་པ་ལ་གཟུགས་བརྙན་བཞིན་དུ་དངོས་པོ་ཤིན་ཏུ་དྭངས་པ་ལ་ཡུལ་ཉེ་བའི་གཟུགས་བརྙན་སྣང་བ་ཆོས་ཉིད་ཡིན་པས་ལས་ཀྱི་སྒྲིབ་པའི་རྙོག་པ་མེད་པའི་སེམས་ཅན་དག་པ་ལ་སྤྲུལ་སྐུར་སྣང་བའི་དཔེ་ གཉིས་སུ་འགྱུར་ལ། ས་སྟེང་འདི་ཞེས་པ་ཡི་གེའམ་འགྱུར་གྱི་སྐྱོན་ཞིག་སྟེ། ས་སྟེང་དེ་གྱུར་ཏེ། ཞེས་བརྗོད་ན་ལེགས་པར་སྣང་ངོ༌། །བཻཌཱུརྱ་དག་པའི་གཞི་ལ་འཆར་བའི་རྣམ་བཅད་གཅིག་གིས་ས་ཕལ་པ་ལ་མི་སྣང་བ་ལྟར་ སྐལ་མེད་ལ་གཟུགས་སྐུ་མི་སྣང་བ་ཡང་སྟོན་ཏེ། རྒྱན་ལས། ཇི་ལྟར་ཆུ་ཡི་སྣོད་ཆག་ན། །ཟླ་བའི་གཟུགས་བརྙན་མི་སྣང་ངོ༌། །དེ་བཞིན་སེམས་ཅན་ངན་པ་ལ། །སངས་རྒྱས་གཟུགས་ཀྱང་མི་སྣང་ངོ༌། །ཇི་ལྟར་མེ་

Page: 779 ༄༅། །ནི་གཞན་དུ་འབར། །གཞན་དུ་ཞི་བར་འགྱུར་བ་ལྟར། །དེ་བཞིན་སངས་རྒྱས་སེམས་ཅན་ལ། །སྣང་དང་མི་སྣང་ཤེས་པར་བྱ། །ཞེས་སོ། །དཔེ་གཉིས་པ་གསུང་རྟོག་པ་མེད་པར་འགྲོ་དོན་མཛད་པ་ལྷའི་རྔའི་ དཔེ་ནི། སུམ་བཅུ་རྩ་གསུམ་པའི་ལྷ་རྣམས་ཀྱི་སྟེང་གི་ནམ་མཁའ་ལ་ལྷ་རྣམས་ཀྱི་དགེ་བའི་རྒྱུ་དང་སངས་རྒྱས་ཀྱི་ཐུགས་རྗེ་ལས་གྲུབ་པའི་ཆོས་ཀྱི་རྔ་བོ་ཆེ་གཟུགས་སུ་མ་གྲུབ་ཅིང་ལྟར་མེད་ལ་བརྡུང་བའི་རྩོལ་བ་མེད་པར་རང་བྱུང་གི་ཆོས་ཀྱི་སྒྲ་ འབྱུང་བ་ཞིག་ཡོད་དེ། དེས་ལྷ་རྣམས་བག་མེད་པ་ལས་ལྡོག་པ་དང་ལྷ་རྣམས་ནི་རྒྱལ་ལོ། །ལྷ་མ་ཡིན་རྣམས་ནི་ཕམ་མོ་ཞེས་པའི་སྒྲས་ལྷ་རྣམས་དབུགས་ཕྱིན་ཅིང་ལྷ་མིན་རྣམས་ས་འོག་ཏུ་འབྲོས་པར་བྱེད་པ་ལྟར་དེ་བཞིན་གཤེགས་པའི་ ཆོས་ཀྱི་གསུང་ཡང་དེ་ལྟ་བུ་སྟེ། ཇི་ལྟར་ལྷ་ནང་ལྷ་རྣམས་ཀྱི། །རྔ་སྒྲ་རང་གི་ལས་ལས་བྱུང༌། །དེ་བཞིན་འཇིག་རྟེན་ཐུབ་པའི་ཆོས། །གསུང་བ་རང་གི་ལས་ལས་བྱུང༌། །སྔོན་གྱི་དཀར་པོའི་མཐུ་ཡིས་ནི། །འབད་དང་གནས་དང་ ཡིད་གཟུགས་དང༌། །རྣམ་པར་རྟོག་པ་མེད་བཞིན་དུ། །མི་རྟག་སྡུག་བསྔལ་བདག་མེད་དང༌། །ཞི་བའི་སྒྲ་ཡིས་བག་མེད་པའི། །ལྷ་རྣམས་ཐམས་ཅད་ཡང་ནས་ཡང༌། །ཆོས་ཀྱི་རྔས་ནི་སྐུལ་བྱེད་ལྟར། །དེ་བཞིན་ཁྱབ་བདག་འབད་ སོགས་དང༌། །བྲལ་ཡང་འགྲོ་བ་མ་ལུས་པ། །སངས་རྒྱས་གསུང་གིས་ཁྱབ་མཛད་དེ། །སྐལ་ལྡན་རྣམས་ལ་ཆོས་སྟོན་ཏོ། །ཞེས་དང༌། ཇི་ལྟར་ལྷ་ཡི་གྲོང་ན་རྔ་སྒྲའི་རྒྱུས་བྱུང་མི་འཇིགས་སྦྱིན་པ་ནི། །ཉོན་མོངས་གཡུལ་དུ་ འཇུག་ཚེ་ལྷ་མིན་ལས་རྒྱལ་རྩེད་མོ་སེལ་བ་བཞིན། །དེ་བཞིན་འཇིག་རྟེན་དག་ན་བསམ་གཏན་གཟུགས་མེད་ལ་སོགས་རྒྱུས་བྱུང་བ། །སེམས་ཅན་ཉོན་མོངས་སྡུག་བསྔལ་རབ་འཇོམས་ཞི་བ་བླ་མེད་ལམ་ཚུལ་བརྗོད། །ཅེས་པ་

Page: 780 སྟེ། བག་མེད་སེལ་བ་ནི་སྐྱེས་བུ་ཆུང་འབྲིང་གི་ལམ་དང༌། ལྷ་མིན་སྐྲག་པ་ནི་བདུད་འཇོམས་པ་དང༌། ལྷ་རྣམས་དབུགས་འབྱིན་པ་ནི་ཐེག་ཆེན་གྱི་གཏམ་གྱིས་བྱང་ཆུབ་ཏུ་ལུང་སྟོན་པའི་དོན་དུ་སྦྱར་བར་བྱའོ། །རྒྱན་ལས་ཀྱང༌། ཇི་ལྟར་རྔ་དག་མ་ བརྡུངས་པར། །སྒྲ་དག་ཀུན་ཏུ་འབྱུང་བ་ལྟར། །དེ་བཞིན་རྒྱལ་བ་བཟོ་མེད་པར། །བཤད་པ་དག་ནི་ཀུན་ཏུ་འབྱུང༌། །ཞེས་སོ། །དཔེ་གསུམ་པ་ཐུགས་རྟོག་པ་མེད་པར་འགྲོ་དོན་མཛད་པ་སྤྲིན་གྱི་དཔེ་ནི། བར་སྣང་ཁྱབ་ཅིང་ཡན་ལག་ བརྒྱད་དང་ལྡན་པའི་ཆུས་གང་བའི་སྤྲིན་དེ་ནི་འབད་རྩོལ་དང་རྣམ་རྟོག་མེད་ཅིང་ལོ་ཐོག་འཕེལ་བར་ཤེས་པས་ཆར་ལ་དགའ་བའི་མི་དང༌། ལས་ཀྱི་ཆར་འབབ་པ་ན་མེའི་སེར་བ་དང་ཐོག་ཏུ་འབབ་བས་ཆར་ལ་མི་དགའ་བའི་ཡི་དྭགས་དང༌། ཆར་བབ་ མ་བབ་ལ་ཁྱད་པར་མེད་པ་བྱ་རོག་སོགས་བར་མའི་བློ་ཅན་གསུམ་ག་ལ་བལྟོས་པ་མེད་པར། བསིལ་ཞིམ་དང་འཇམ་ཡང་ཞིང་གཙང་། །འཐུངས་ན་ལྟོ་དང་མགྲིན་པ་ལ། །མི་གནོད་འདི་ནི་ཡན་ལག་བརྒྱད། །དེ་ལྟ་བུ་ཁོ་ནའི་ ཆར་རྒྱ་མཚོ་ཆེན་པོ་ནི་ཆར་ཐམས་ཅད་ཀྱིས་མི་ངོམས་ཤིང་འཛེད་པར་ནུས་པའི་ཕྱིར། གཉའ་ཤིང་ཙམ་ནས་ཆར་གྱི་རྒྱུན་སྦ་ལྕག་དང་སོག་སྦུགས་ཀྱི་ཚད་ལ་སོགས་པའི་བར་འབེབས་ཤིང་དེ་ལྟ་བུ་སས་མི་ཐེག་པའི་ཕྱིར། ས་གཞིའི་སྟེང་དུ་ནི་ཆར་ ཐིགས་རགས་པ་དང་བར་མ་དང་ཕྲ་མོ་འབེབས་ལ་ཡན་ལག་བརྒྱད་ལྡན་གྱི་ཆུ་དེ་ཡང་ས་གཞི་མཆོག་དམན་བར་མ་དོ་དང་ནུས་པ་སྣ་ཚོགས་པ་ཅན་དུ་སོན་པ་ན་དྲི་རོ་ནུས་པ་སྣ་ཚོགས་སུ་སོ་སོར་འགྱུར་བ་ལྟར། སངས་རྒྱས་ཀྱི་ཐུགས་རྗེའི་སྤྲིན་ཆོས་ ཀྱི་དབྱིངས་ཁྱབ་ཅིང་ཟག་མེད་ཀྱི་ཡོན་ཏན་གྱིས་གང་བ་དེ་ལས་འབད་རྩོལ་མེད་ཅིང་སྐལ་ལྡན་ཆོས་ལ་གུས་པ་དང་བདུད་ཀྱི་རེས་ཆོས་ལ་ལྡང་བ་དང་བར་མར་གནས་པ་སྟེ། གསུམ་ག་ལ་བལྟོས་པ་མེད་པར་ཆོས་ཀྱི་ཆར་འབེབས་ལ། དེ་ཡང་

Page: 781 ༄༅། །བསམ་གྱིས་མི་ཁྱབ་པའི་ཆོས་ཀྱི་འཁོར་ལོ་རྣམས་ནི་སོ་སོ་སྐྱེ་བོ་རྣམས་ཀྱིས་མཉན་པ་ལྟ་ཞོག་མོས་པ་ཙམ་དུ་ཡང་དཀའ་བས་བྱང་འཕགས་རྒྱ་མཚོ་དང་འདྲ་བ་ཁོ་ན་ལ་འབེབས་ཤིང་ཆར་ཐིགས་ཕྲ་མོ་ལྟ་བུ་མངོན་མཐོའི་ ཐེག་པ་དང༌། བར་མ་ལྟ་བུ་ཉན་རང་གི་ཐེག་པ་དང༌། སྦོམ་པོ་ལྟ་བུ་ཐེག་ཆེན་ཐུན་མོང་བ་རྣམས་ནི་སོ་སྐྱེ་ས་ལྟ་བུའི་རྒྱུད་ལ་འབེབས་ལ་འཕགས་ལམ་ཡན་ལག་བརྒྱད་དང༌། སྟོང་པ་ཉིད་དུ་རོ་གཅིག་པའི་ཆོས་ཀྱི་འཁོར་ལོ་དེ་ཡང་གདུལ་བྱའི་ དབང་གིས་ཐེག་པ་སྣ་ཚོགས་སུ་སྣང་བར་འགྱུར་བ་སྟེ། ཇི་ལྟར་དབྱར་གྱི་དུས་ན་སྤྲིན། །ལོ་ཐོག་ཕུན་སུམ་ཚོགས་པའི་རྒྱུ། །ཆུ་ཡི་ཕུང་པོ་འབད་མེད་པར། །ས་ལ་རྒྱུན་དུ་འབེབས་པ་ལྟར། །དེ་བཞིན་ཐུགས་རྗེའི་སྤྲིན་ ལས་ནི། །རྒྱལ་བའི་དམ་ཆོས་ཆུ་ཡི་ཆར། །འགྲོ་བའི་དགེ་བའི་ལོ་ཐོག་རྒྱུ། །རྣམ་པར་རྟོག་པ་མེད་པར་འབེབས། །ཞེས་དང༌། ཇི་ལྟར་བསིལ་དང་ཞིམ་དང་འཇམ་པ་དང༌། །ཡང་བའི་ཆུ་ནི་སྤྲིན་དེ་ལས་འཐོན་པ། ། ས་ལ་བ་ཚྭ་ལ་སོགས་གནས་འབྲེལ་བས། །རྣམ་པ་མང་པོའི་རོར་ནི་འགྱུར་བ་བཞིན། །དེ་བཞིན་འཕགས་པའི་ཡན་ལག་བརྒྱད་ཆུའི་ཆར། །རབ་ཡངས་བརྩེ་སྤྲིན་སྙིང་པོ་ལས་འཐོན་པ། །འགྲོ་བའི་རྒྱུད་ཀྱི་གནས་ཀྱི་དབྱེ་ བ་ལས། །རྣམ་པ་མང་པོའི་རོ་དང་ལྡན་པར་འགྱུར། །ཞེས་དང༌། དཔྱིད་མཐར་སྤྲིན་མེད་པ་ན་མི་དང་མཁའ་མི་རྒྱུ་བའི་བྱ་དག་དང༌། །དབྱར་ཚེ་ས་ལ་ཆར་འབབ་པ་ན་ཡི་དྭགས་དག་ནི་སྡུག་པ་ལྟར། །སྙིང་རྗེའི་སྤྲིན་ཚོགས་དག་ གི་ཆོས་ཆུ་བྱུང་དང་མ་བྱུང་བ་ལས་ཀྱང༌། །ཆོས་འདོད་པ་དང་ཆོས་ལ་སྡང་བའང་འཇིག་རྟེན་དག་ན་དཔེ་དེ་ཉིད། །ཐིགས་པ་རགས་འབེབས་རྡོ་ཚན་དང་ནི་རྡོ་རྗེའི་མེ་ནི་འབེབས་པ་ན། །སྲོག་ཆགས་ཕྲ་དང་རི་སུལ་སོང་བ་དག་ལ་ཇི་ལྟར་

Page: 782 སྤྲིན་ལྟོས་མེད། །ཅེས་སོ། །གང་སྟོན་པ་དམ་པའི་ཆོས་ནི་བདེན་པ་བཞི་སྟེ། ནད་ནི་ཤེས་བྱ་ནད་ཀྱི་རྒྱུ་ནི་སྤང་བྱ་ལ། །བདེར་གནས་འཐོབ་བྱ་སྨན་ནི་བསྟེན་པར་བྱ་བ་ལྟར། །སྡུག་བསྔལ་རྒྱུ་དང་དེ་འགོག་པ་དང་དེ་བཞིན་ལམ། ། ཤེས་བྱ་སྤང་བྱ་རིག་པར་བྱ་ཞིང་བསྟེན་པར་བྱ། །ཞེས་སོ། །འདིར། ཐེག་པ་མཆོག་ལ་དང་བ་དང༌། །བར་མ་དང་ནི་སྡང་བ་ཡི། །ཕུང་པོ་གསུམ་ནི་མི་དག་དང༌། །རྨ་བྱ་དང་ནི་ཡི་དྭགས་འདྲ། །ཞེས་གཞུང་བཏོན་ནས་ཆར་ལ་དགའ་མི་དགའ་ མེད་པའི་བར་མར་གནས་པ་ནི་ཕལ་ཆེར་གྱིས་རྨ་བྱར་འབྲུ་གཉེར་ལ་ཀུན་མཁྱེན་རོང་སྟོན་སོགས་བྱེའུ་རྩེ་ཏ་ཀ་ཞེས་ཆར་འདོད་བྱེའུར་འབྲུ་གཉེར་མོད་ཀྱང་དེ་གཉིས་ཀ་མ་ཡིན་ཏེ་རྨ་བྱ་ནི་ཆར་སྤྲིན་མཐོང་ན་ཆེས་དགའ་བ་སྟེ། དགའ་ བ་རྒྱས་པའི་མིག་དག་བྱང༌། །ཆུ་འཛིན་སྤྲིན་ལ་གཏོད་པར་བྱེད། །ཅེས་སྙན་ངག་གི་གཞུང་ལས་འདོན་ལ། ཆར་འདོད་བྱེའུ་ནི་ཆར་ལ་སྲོག་བལྟོས་པ་སྟེ། ཆར་འདོད་བྱེའུ་སྐོམ་ན་ཡང༌། །ས་ལ་འབབ་པའི་ཆུ་མི་འཐུང༌། ། ཞེས་སྒྲོག་པའི་ཕྱིར། དེས་ན་འདི་ནི། འདབ་ཆགས་དང་ནི་ཡི་དྭགས་འདྲ། །ཞེས་གཞུང་བཏོན་ནས་བྱ་ཙམ་དུ་འབྲུ་གཉེར་བ་ལེགས་སོ། །བཞི་པ་འབད་མེད་དུ་སྤྲུལ་པ་སྣང་བ་ཚངས་པའི་དཔེ་ནི། ཇི་ལྟར་ཚངས་ཆེན་ དེ་རང་གི་གནས་ན་ཚད་མེད་པ་བཞིས་རྟག་ཏུ་གནས་པ་ལས་གཡོ་བ་མེད་ལ། ལྷའི་གཞལ་མེད་ཁང་གཞན་ཐམས་ཅད་དུ་ཡང་ཚངས་པ་རེ་རེ་ཡང་མངོན་པར་སྣང་བ་ལྟར། སངས་རྒྱས་ཉིད་ཆོས་སྐུ་ལས་མ་གཡོས་བཞིན་དུ་ལོངས་སྤྲུལ་སོགས་ ནས་གང་འདུལ་ཀྱི་སྐུའི་བཀོད་པ་སེམས་ཅན་ཐམས་ཅད་ལ་འབྱུང་བ་སྟེ། ཇི་ལྟར་ཚངས་པ་ཚངས་པ་ཡི། །གནས་ནས་འཕོ་བ་མེད་བཞིན་དུ། །ལྷ་ཡི་གནས་ནི་ཐམས་ཅད་དུ། །སྣང་བ་འབད་མེད་སྟོན་པ་ལྟར། །དེ་བཞིན་ཐུབ་

Page: 783 ༄༅། །པ་ཆོས་སྐུ་ལས། །བསྐྱོད་པ་མེད་པར་ཁམས་ཀུན་ཏུ། །སྐལ་ལྡན་རྣམས་ལ་འབད་མེད་པར། །སྤྲུལ་པ་དག་ནི་སྟོན་པར་མཛོད། །ཅེས་སོ། །ལྔ་པ་ཡེ་ཤེས་རྟོག་མེད་ཉི་མའི་དཔེ་ནི། ཇི་ལྟར་ཉི་མ་ནི་ནམ་མཁའི་ དབྱིངས་སུ་འཆར་བ་དང་འོད་ཟེར་འགྱེད་པ་དང༌། མུན་པ་སེལ་བ་དང༌། པདྨ་ཁ་འབྱེད་པ་དང༌། ཀུ་མུད་ཟུམ་པར་བྱེད་པ་དང༌། འབད་རྩོལ་དང༌། རྟོག་པ་མེད་པ་དང༌། ཆུ་སྣོད་ཐམས་ཅད་དུ་གཟུགས་བརྙན་སྣང་བ་དང༌། རི་མཐོན་པོ་ནས་བརྩམས་ཏེ་རིམ་གྱིས་འབབ་ པ་སྟེ་ཆོས་བརྒྱད་དང་ལྡན་པ་ལྟར་སངས་རྒྱས་ཀྱི་ཡེ་ཤེས་ཀྱང་ཆོས་གཟུགས་ཀྱི་སྐུའི་ནམ་མཁར་འཆར་བ་དང༌། ཡེ་ཤེས་ཆགས་ཐོགས་མེད་པའི་འོད་ཟེར་འགྱེད་པ་དང༌། གདུལ་བྱའི་བློའི་མུན་པ་སེལ་བ་དང༌། སྣོད་ལྡན་གྱི་པདྨ་འབྱེད་པ་དང༌། བདུད་དང་ མུ་སྟེགས་ཀྱི་ཀུ་མུད་ཟུམ་པར་བྱེད་པ་དང༌། དེ་གང་ལ་ཡང་བལྟོས་པ་དང་འབད་རྩོལ་མི་མངའ་བ་དང༌། གདུལ་བྱ་ཐམས་ཅད་ལ་འཚམ་པར་སྣང་བ་དང༌། གདུལ་བྱ་དབང་པོ་ཡོངས་སུ་སྨིན་པ་ནས་སྔ་རིམ་གྱིས་ཕྲིན་ལས་འཇུག་པའི་ཕྱིར་ཏེ། ཇི་ལྟར་ ཉི་མས་གདུངས་པས་དུས་གཅིག་ཚེ་ཉིད་ལ། །པད་སོགས་རྒྱས་དང་ཀུ་མུ་ད་ནི་རབ་ཟུམ་པ། །ུཆུ་སྐྱེས་བྱེ་དང་ཟུམ་པའི་ཡོན་ཏན་སྐྱོན་དག་ལ། །ཉི་མ་རྟོག་མེད་འདིར་ནི་འཕགས་པའི་ཉི་དེ་བཞིན། །ཇི་ལྟར་ཉི་མ་རྟོག་མེད་པར། ། རང་འོད་ཅིག་ཆར་སྤྲོས་པ་ཡིས། །པདྨ་རྒྱས་པར་བྱེད་པ་དང༌། །གཞན་དག་ཟུམ་པར་བྱེད་པ་ལྟར། །དེ་བཞིན་དེ་བཞིན་གཤེགས་པ་ཡི། །ཉི་མ་དམ་ཆོས་འོད་ཟེར་དག །གདུལ་བྱའི་སྐྱེ་བོའི་པདྨ་ལ། །རྣམ་པར་རྟོག་པ་མེད་ པར་འཇུག །ཆོས་དང་གཟུགས་ཀྱི་སྐུ་དག་གི། །བྱང་ཆུབ་སྙིང་པོའི་མཁར་ཤར་བའི། །ཀུན་མཁྱེན་ཉི་མ་འགྲོ་བར་ནི། །ཡེ་ཤེས་འོད་ཟེར་སྤྲོ་བར་མཛད། །གང་ཕྱིར་གདུལ་བྱ་དག་པ་ཡི། །ཆུ་ཡི་སྣོད་ནི་ཐམས་ཅད་ལ། །

Page: 784 བདེ་གཤེགས་ཉི་མའི་གཟུགས་བརྙན་ནི། །དཔག་ཏུ་མེད་པ་ཅིག་ཆར་འཆར། །རྟག་ཏུ་ཐམས་ཅད་ལ་ཁྱབ་པའི། །ཆོས་དབྱིངས་ནམ་མཁའི་དཀྱིལ་དུ་ནི། །སངས་རྒྱས་ཉི་མ་གདུལ་བྱ་ཡི། །རི་ལ་ཇི་ལྟར་འོས་པར་འབབ། ། ཇི་ལྟར་རྒྱ་ཆེན་འོད་ཟེར་སྟོང་ལྡན་ཉི་ཤར་འདི། །འཇིག་རྟེན་ཀུན་ཏུ་སྣང་བར་བྱས་ནས་རིམ་གྱིས་ནི། །མཆོག་དང་བར་མ་དམན་པའི་རི་ལ་འབབ་དེ་བཞིན། །རྒྱལ་བའི་ཉི་མ་སེམས་ཅན་ཚོགས་ལ་རིམ་གྱིས་འབབ། །ཅེས་སོ། ། མདོ་རྒྱན་ལས་ནི། འོད་ཟེར་དཔག་མེད་འདྲེས་ཤིང་འབྱུང་ལ་བྱ་བ་གཅིག་ལ་འཇུག་པ་དང༌། ཉི་མའི་འོད་ཟེར་གཅིག་བྱུང་ན་འོད་ཟེར་ཀུན་འབྱུང་བ་དང༌། བདག་གིར་བྱ་བ་མེད་པ་དང༌། གཅིག་གིས་ཐམས་ཅད་སྣང་བ་བྱེད་པ་དང༌། སྤྲིན་ལ་སོགས་ པས་བསྒྲིབས་ན་མི་སྣང་བའི་དཔེ་ལྔ་དང་སྦྱར་ནས་གསུངས་ཏེ། ཇི་ལྟར་ཉི་མའི་དཀྱིལ་འཁོར་གྱི། །འོད་ཟེར་དཔག་ཏུ་མེད་འདྲེས་ཤིང༌། །རྟག་ཏུ་བྱ་བ་གཅིག་ལ་འཇུག །འཇིག་རྟེན་ལ་ཡང་སྣང་བར་བྱེད། །དེ་བཞིན་ཟག་མེད་ དབྱིངས་ན་ཡང༌། །སངས་རྒྱས་དཔག་ཏུ་མེད་འདྲེས་ཤིང༌། །མཛད་པ་གཅིག་ནི་མཛད་པ་ལ། །ཡེ་ཤེས་སྣང་བར་མཛད་པར་འདོད། །དཔེར་ན་ཉི་མའི་འོད་ཟེར་གཅིག །བྱུང་ན་འོད་ཟེར་ཀུན་འབྱུང་བ། །དེ་བཞིན་ཡེ་ཤེས་ འབྱུང་ཞེས་བྱ། །ཇི་ལྟར་ཉི་མའི་འོད་ཟེར་དག །འཇུག་ལ་བདག་གིར་བྱ་བ་མེད། །དེ་བཞིན་སངས་རྒྱས་ཡེ་ཤེས་ཀྱང༌། །འཇུག་ལ་བདག་གིར་མཛད་མི་མངའ། །ཉི་མའི་འོད་ཟེར་གཅིག་བཏང་བས། །འགྲོ་བ་སྣང་ བར་བྱེད་པ་ལྟར། །དེ་བཞིན་ཤེས་བྱ་ཐམས་ཅད་ལ། །སངས་རྒྱས་ཡེ་ཤེས་ཅིག་ཆར་སྣང༌། །ཇི་ལྟར་ཉི་མའི་འོད་ཟེར་རྣམས། །སྤྲིན་ལ་སོགས་པས་སྒྲིབ་པར་འདོད། །དེ་བཞིན་སངས་རྒྱས་ཡེ་ཤེས་རྣམས། །སེམས་

Page: 785 ༄༅། །ཅན་གྱི་ནི་ཉེས་པས་སྒྲིབ། །ཅེས་སོ། །དྲུག་པ་ཐུགས་ཀྱི་གསང་བ་བསམ་གྱིས་མི་ཁྱབ་པ་དགོས་འདོད་འབྱུང་བ་ནི། ནོར་བུའི་དཔེས་བསྟན་ཏེ། རྙེད་པར་དཀའ་བ་དང༌། རྟོག་པ་མེད་པ་དང༌། གསོལ་བ་འདེབས་པ་ ལ་དགོས་འདོད་སྩོལ་བ་སྟེ་ཆོས་གསུམ་དང་སྦྱར་ནས། གང་ཕྱིར་རྒྱ་མཚོ་ས་འོག་གནས་དེ་ལ་སྡོད་པས། །ཇི་ལྟར་ནོར་བུ་བཟང་པོ་འགྲོ་འདིར་རབ་རྙེད་དཀའ། །དེ་བཞིན་འགྲོ་བ་ཤིན་ཏུ་སྐལ་ངན་ཉོན་མོངས་ཟིན། །ཡིད་འདིར་ བདེ་གཤེགས་མཐོང་བ་རྙེད་དཀར་ཤེས་པར་བྱ། །ཞེས་དང༌། ཇི་ལྟར་ཡིད་བཞིན་ནོར་བུ་ནི། །རྟོག་པ་མེད་ཀྱང་ཅིག་ཆར་དུ། །སྤྱོད་ཡུལ་གནས་པ་རྣམས་ཀྱི་ནི། །བསམ་ཀུན་སོ་སོར་རྫོགས་བྱེད་ལྟར། །དེ་བཞིན་སངས་ རྒྱས་ཡིད་བཞིན་ལ། །བསྟེན་ནས་བསམ་པ་ཐ་དད་རྣམས། །སྣ་ཚོགས་ཆོས་ནི་ཐོས་འགྱུར་ཡང༌། །དེ་ནི་དེ་ལ་རྣམ་མི་རྟོག །ཞེས་སོ། །རྒྱན་ལས་ནི། ཇི་ལྟར་ནོར་བུ་འབད་མེད་པར། །རང་གི་འོད་ནི་སྟོན་པ་ལྟར། ། སངས་རྒྱས་རྣམས་ཀྱང་གཟོ་མེད་པར། །དེ་བཞིན་མཛད་པ་ངེས་པར་སྟོན། །ཞེས་སོ། །བདུན་པ་གསུང་གི་གསང་བ་ནི། སྒྲ་བརྙན་གྱི་དཔེས་སྟོན་ཏེ། བྲག་ཆ་ནི་ཐོས་པ་པོའི་སེམས་ལས་སྣང་བ་རྐྱེན་སྒྲ་དང་གཅོང་རོང་གི་ ཚོགས་པ་ཙམ་ལས་མེད་བཞིན་དུ་གསལ་བར་གྲག་ཀྱང་བྲག་དང་རྣ་བ་དང་བར་གྱི་ནམ་མཁའ་སོགས་གང་ན་ཡང་མི་གནས་པ་ལྟར་རྒྱལ་བའི་གསུང་གདུལ་བྱ་ལ་སྣང་བ་ཡང་དེ་ལྟ་བུ་སྟེ། ཇི་ལྟར་སྒྲ་བརྙན་གྱི་ནི་སྒྲ། །གཞན་གྱི་ རྣམ་རིག་ལས་བྱུང་བ། །རྣམ་རྟོག་མེད་ཅིང་གཟོ་མེད་ལ། །ཕྱི་དང་ནང་ན་མི་གནས་ལྟར། །དེ་བཞིན་དེ་བཞིན་གཤེགས་པའི་གསུང༌། །གཞན་གྱི་རྣམ་རིག་ལས་བྱུང་བ། །རྣམ་པར་རྟོག་དང་གཟོ་མེད་ཅིང༌། །ཕྱི་དང་

Page: 786 ནང་ན་གནས་མ་ཡིན། །ཞེས་སོ། །བརྒྱད་པ་ཐུགས་ཀྱི་གསང་བ་ནི། ནམ་མཁའི་དཔེས་བསྟན་ཏེ། ནམ་མཁའ་ནི་ཅུང་ཟད་ཙམ་དུ་ཡང་མ་གྲུབ་པ་དང༌། སྣང་དུ་མེད་པ་དང༌། དམིགས་པར་མི་ནུས་པ་དང༌། རྟེན་མེད་པ་དང༌། མིག་གི་ལམ་ལས་འདས་པ་དང༌། གཟུགས་མེད་པ་དང༌། བསྟན་དུ་མེད་པ་དང༌། རྒྱ་ཆེ་ཆུང་ངམ་མཐོ་དམན་སོགས་སྣང་ལ་དེར་མི་གནས་པ་སྟེ་ཆོས་བརྒྱད་དང་ལྡན་པ་ལྟར་རྒྱལ་བའི་ཐུགས་ཀྱང་དེ་བཞིན་ཏེ། ཅུང་ཟད་མེད་ཅིང་སྣང་བ་མེད། །དམིགས་པ་མེད་ཅིང་རྟེན་མེད་ལ། །མིག་ གི་ལམ་ལས་རབ་འདས་པ། །གཟུགས་མེད་བསྟན་དུ་མེད་པ་ཡི། །མཁའ་ལ་ཇི་ལྟར་མཐོ་དང་དམའ། །མཐོང་ཡང་དེ་ནི་དེ་ལྟ་མིན། །དེ་བཞིན་ཐམས་ཅད་སངས་རྒྱས་ལ། །མཐོང་ཡང་དེ་ནི་དེ་ལྟ་མིན། །ཞེས་སོ། །རྒྱན་ལས་ནི། ཀུན་ འགྲོའི་དོན་གྱིས་བཤད་དེ། ཇི་ལྟར་ནམ་མཁའ་རྟག་ཏུ་ཀུན་སོང་འདོད། །དེ་བཞིན་དེ་ཡང་རྟག་ཏུ་ཀུན་སོང་འདོད། །ཇི་ལྟར་ནམ་མཁའ་གཟུགས་གྱུར་ཀུན་ཏུ་སོང༌། །དེ་བཞིན་དེ་ཡང་སེམས་ཅན་ཚོགས་ཀུན་སོང༌། །ཞེས་སོ། །ཡང་ན་ ནམ་མཁའ་ལ་འཇིག་རྟེན་གྱི་བྱ་བ་རྒྱུན་མི་འཆད་པ་ལྟར་སངས་རྒྱས་ཀྱི་མཛད་པ་རྒྱུན་མི་འཆད་པ་དང་ནམ་མཁའ་ལ་བྱ་བ་ཉམས་ཤིང་ཡང་འབྱུང་བ་ལྟར་རྒྱལ་བའི་ཕྲིན་ལས་སྐྱེ་འབྲིར་སྣང་བའི་དོན་དུའང་བཤད་དེ། ཇི་ལྟར་མཁའ་ལ་འཇིག་རྟེན་ གྱི། །བྱ་བ་རྒྱུན་མི་འཆད་པར་སྣང༌། །དེ་བཞིན་ཟག་མེད་དབྱིངས་ན་ཡང༌། །རྒྱལ་བའི་མཛད་པ་རྒྱུན་མི་འཆད། །ི་ལྟར་མཁའ་ལ་རྟག་ཏུ་ནི། །བྱ་བ་ཉམས་ཤིང་འབྱུང་བ་ལྟར། །དེ་བཞིན་ཟག་མེད་དབྱིངས་ན་ཡང༌། །སངས་རྒྱས་ ཕྲིན་ལས་སྐྱེ་ཞིང་འབྲི། །ཞེས་སོ། །དགུ་པ་ཐུགས་རྗེ་ཆེན་པོ་ནི་ས་གཞིའི་དཔེས་བསྟན་ཏེ། རྩི་ཤིང་དང་ལོ་ཐོག་ཐམས་ཅད་སྐྱེ་བ་དང་འཕེལ་བ་དང་བརྟན་པ་དང་ཡངས་པར་འགྱུར་བའི་རྟེན་བྱེད་ལ་རྣམ་པར་རྟོག་པ་མེད་པ་ལྟར་སངས་རྒྱས་ཀྱི་

Page: 787 ༄༅། །ཐུགས་རྗེ་ནི་སེམས་ཅན་ཐམས་ཅད་ཀྱི་དགེ་བའི་རྟེན་བྱེད་ཀྱང་རྟོག་པ་མེད་པ་སྟེ། ཇི་ལྟར་ས་ལ་སྐྱེ་བ་ཀུན། །རྟོག་མེད་ས་ལ་བརྟེན་ནས་ནི། །འཕེལ་དང་གནས་དང་ཡང་འགྱུར་ལྟར། །དེ་བཞིན་རྫོགས་ པའི་སངས་རྒྱས་ས། །རྣམ་རྟོག་མེད་པ་ལ་བརྟེན་ནས། །འགྲོ་བའི་དགེ་བའི་རྩ་བ་ནི། །མ་ལུས་པ་ནི་འཕེལ་བར་འགྱུར། །ཞེས་སོ། །ཕྱོགས་ཙམ་བསྟན་པའི་ཕྱིར། དཔེ་དེ་དག་གིས་བསྟན་མོད་ཀྱང་ཡང་དག་པར་ན་དེ་བཞིན་གཤེགས་ པ་ནི་དཔེ་ལས་འདས་པ་ཡིན་ཏེ། སངས་རྒྱས་གཟུགས་བརྙན་ལྟ་བུ་སྟེ། །དབྱངས་དང་མི་ལྡན་དེ་འདྲ་མིན། །ལྷ་ཡི་རྔ་བཞིན་ཐམས་ཅད་དུ། །དོན་བྱེད་མིན་པ་དེ་འདྲ་མིན། །སྤྲིན་ཆེན་དང་མཚུངས་དོན་མེད་པའི། །ས་བོན་སྤོང་ བ་དེ་འདྲ་མིན། །ཚངས་ཆེན་བཞིན་དུ་གཏན་དུ་ནི། །སྨིན་པར་བྱེད་མིན་དེ་འདྲ་མིན། །ཉི་མའི་གཟུགས་བཞིན་གཏན་དུ་ནི། །མུན་པ་འཇོམས་མིན་དེ་འདྲ་མིན། །ཡིད་བཞིན་ནོར་འདྲ་འབྱུང་བ་ནི། །རྙེད་པར་མི་དཀའ་དེ་འདྲ་མིན། ། སྒྲ་བརྙན་བཞིན་སྟེ་རྐྱེན་ལས་ནི། །བྱུང་བ་དེ་དང་འདྲ་བའང་མིན། །ནམ་མཁའ་དང་འདྲ་དགེ་བ་ཡི། །གཞི་མིན་དེ་དང་འདྲ་བའང་མིན། །ཞེས་དཔེ་དེ་དག་ལས་འདས་པར་བསྟན་ཞིང༌། འཇིག་རྟེན་འཇིག་རྟེན་ལས་འདས་པའི། ། འགྲོ་བའི་ཕུན་ཚོགས་མ་ལུས་པ། །དེ་གནས་པ་ཡི་རྟེན་བྱེད་ཕྱིར། །ས་ཡི་དཀྱིལ་འཁོར་དག་དང་འདྲ། །ཞེས་རྟེན་གྱི་ཆ་ནས་སླར་ས་གཞི་དང་སྦྱར་མོད། ཡང་དག་པར་ན་ས་གཞིའི་དཔེ་ལས་ཀྱང་འདས་ཏེ། ས་གཞི་ལྟ་ བུར་ཐོགས་བཅས་ཀྱི། །མཚན་མར་གྲུབ་པ་དེ་འདྲ་མིན། །ཞེས་ཀྱང་འཐོབ་བོ། །དེ་ལྟར་སྐུ་དང༌། ཡེ་ཤེས་དང༌། ཕྲིན་ལས་རྣམ་པར་བཞག་པ་བཤད་ནས། གྲངས་ངེས་ནི། ཐར་རྒྱན་ལས། དགོས་པ་ལ་བལྟོས་ནས་རང་དོན་དུ་

Page: 788 ཆོས་སྐུ་དང༌། གཞན་དོན་དུ་གཟུགས་སྐུ་གཉིས་དང༌། གསུམ་དུ་ངེས་ཏེ་ཆོས་སྐུ་ནི་ཡོན་ཏན་ཐམས་ཅད་ཀྱི་རྟེན་ཡིན་པས་དེ་ཐོབ་ན་སྟོབས་སོགས་ཀྱི་ཡོན་ཏན་ཐམས་ཅད་བོས་བ་ལྟར་འདུ་ཞིང་མ་ཐོབ་ཀྱང་ཚོགས་སྦྱོར་བ་དང༌། ཉན་ཐོས་དང༌། རང་ རྒྱལ་དང༌། བྱང་ཆུབ་སེམས་དཔའ་རྣམས་ཀྱི་ཡོན་ཏན་ཐམས་ཅད་རིམ་བཞིན་ཆོས་སྐུ་ལ་མོས་པ་བྱས་པ་དང༌། ཅུང་ཟད་རྟོགས་པ་དང༌། ཕྱོགས་གཅིག་རྟོགས་པ་དང༌། ཕལ་ཆེར་རྟོགས་པའི་ཡོན་ཏན་ཡིན་པའི་ཕྱིར་དང༌། དག་མ་དག་གི་གདུལ་བྱ་གཉིས་ ལ་བལྟོས་ནས་གཟུགས་སྐུ་གཉིས་སོ། །ཞེས་སྐུ་གསུམ་གྱི་གྲངས་ངེས་གསུངས་ལ། དེ་བཞིན་དུ་སྐུ་གཅིག་ནས་སྐུ་མཐའ་ཡས་པའི་བར་ལའང་དགོས་པ་ལ་བལྟོས་ཏེ་རང་སྐབས་ཀྱི་གྲངས་ངེས་རྣམ་པར་བཞག་པར་བྱའོ། །མཚན་ཉིད་ནི། རྣམ་པར་བཞག་པའི་ཞར་ལ་རྒྱ་ཆེར་བཤད་དོ། །ཁྱད་པར་ནི། གསུམ་སྟེ་མཉམ་པའི་ཁྱད་པར། རྟག་པའི་ཁྱད་པར། སྣང་བའི་ཁྱད་པར་རོ། །དང་པོ་མཉམ་པའི་ཁྱད་པར་ནི། སངས་རྒྱས་ཐམས་ཅད་ཀྱི་ཆོས་ཀྱི་སྐུ་ནི་རྟེན་ཆོས་དབྱིངས་ཐ་དད་མེད་པའི་ ཕྱིར་དང༌། ལོངས་སྐུ་ནི་དགོངས་པ་ཐ་དད་མེད་པ་དང༌། སྤྲུལ་སྐུ་ནི་ཕྲིན་ལས་ཐུན་མོང་དུ་གྱུར་པའི་ཕྱིར་རེ་རེ་ཞིང་མཉམ་པ་སྟེ། རྒྱན་ལས། དེ་དག་རྟེན་དང་དགོངས་པ་དང༌། །ཕྲིན་ལས་ཀྱིས་ནི་མཉམ་པ་ཉིད། །ཅེས་སོ། །རྟག་པའི་ ཁྱད་པར་ནི། ཆོས་ཀྱི་སྐུ་སྐྱེ་འགག་གནས་པ་མི་དམིགས་པའི་ཕྱིར་རང་བཞིན་གྱིས་རྟག་པ་དང༌། ལོངས་སྐུ་སྐུ་དང་ཆོས་སྟོན་པ་རྒྱུན་མི་འཆད་པའི་ཕྱིར་རྒྱུན་མི་འཆད་པའི་རྟག་པ་དང༌། སྤྲུལ་སྐུ་ནི་ཞིང་ལ་ལར་མི་སྣང་བར་གྱུར་ཀྱང་དེ་བས་ཆེས་ མང་བའི་ཞིང་རྣམས་ན་དང་པོ་སེམས་བསྐྱེད་པ་ནས་དགའ་ལྡན་ནས་འཕོ་བ་སོགས་མཐའ་ཡས་སྟོན་པའི་ཕྱིར་རྒྱུན་གྱི་རྟག་པ་ཞེས་བྱ་སྟེ། རང་བཞིན་དང་ནི་རྒྱུན་མི་འཆད། །རྒྱུན་གྱིས་དེ་དག་རྟག་པ་ཉིད། །ཅེས་སོ། །རྒྱུད་བླ་ལས་ནི།

Page: 789 ༄༅། །རྒྱུ་མཐའ་ཡས་དང་སེམས་ཅན་ཟད་མེད་དང༌། །བརྩེ་དང་མཁྱེན་དང་འཕྲུལ་དང་ཕུན་ཚོགས་ལྡན། །ཆོས་ཀྱི་དབང་ཕྱུག །ཅེས་གཟུགས་སྐུ་རྟག་པའི་རྒྱུ་མཚན་བདུན་དང༌། འཆི་བའི་བདུད་བཅོམ་དང༌། །ངོ་བོ་མེད་ ཕྱིར་འཇིག་རྟེན་མགོན་པོ་རྟག །ཞེས་ཆོས་སྐུ་རྟག་པའི་རྒྱུ་མཚན་གསུམ་བསྟན་ཏེ། དང་པོ་ཡི་ནི་རྒྱུ་བདུན་གྱིས། །གཟུགས་ཀྱི་སྐུ་ཡི་རྟག་པ་སྟེ། །ཕྱི་མ་གསུམ་གྱིས་སྟོན་པ་ནི། །ཆོས་ཀྱི་སྐུ་ཡི་རྟག་པ་ཉིད། །ཅེས་སོ། །དེ་ལྟར་ སྐུ་གསུམ་ལ་རྟག་པ་གསུམ་བཤད་པ་འདི་ཡང་སངས་རྒྱས་མི་རྟག་པ་ཡིན་ན་གོ་འཕང་ལ་ཡིད་བརྟན་དུ་མི་རུང་བ་སྤྲིན་གཏེར་མཚན་དུ་བཞག་མི་རུང་བ་ལྟར་འགྱུར་བས་མི་རྟག་པར་འཛིན་པ་སེལ་ཕྱིར་ཆོས་སྐུ་གཟོད་མ་ནས་དག་པ་ལ་ རང་བཞིན་གྱིས་རྟག་པའི་ཐ་སྙད་དང༌། ལོངས་སྐུ་མྱ་ངན་ལས་འདའ་བ་མེད་པ་དང༌། སྤྲུལ་སྐུ་གཞན་དོན་རྒྱུན་མི་འཆད་པ་ལ་རྟག་པའི་ཐ་སྙད་སྦྱོར་བ་ཆུ་འདི་རྟག་ཏུ་འབབ་བོ་ཞེས་བཤད་པ་ལྟ་བུ་ཡིན་གྱིས་བོད་བསྡུས་གྲྭ་བའི་རྟག་མི་རྟག་ལྟ་ བུར་གོ་བར་མི་བྱའོ། །སྣང་བའི་ཁྱད་པར་ནི། ཆོས་ཀྱི་དབྱིངས་ལ་རང་རྒྱུད་ཀྱི་ལས་ཀྱི་སྒྲིབ་པ་དག་པས་སྤྲུལ་སྐུ་དང༌། ཉོན་སྒྲིབ་དག་པས་ལོངས་སྐུ་དང༌། ཤེས་སྒྲིབ་དག་པས་ཆོས་སྐུ་སྣང་བ་སྟེ་ཐར་རྒྱན་ལས་ཇི་ལྟར་གསུངས་པ་ཉིད་ དོ། །མདོར་ན་སྐུ་གསུང་ཐུགས་དང་ཡེ་ཤེས་དང་ཕྲིན་ལས་ཐམས་ཅད་རྣམ་པར་དབྱེར་མེད་པའི་བདག་ཉིད་རྫོགས་པའི་སངས་རྒྱས་འདི་ནི་སྤངས་པ་དང་རྟོགས་པ་ཉམས་པ་མི་མངའ་ཞིང་ཆོས་ཉིད་ཀྱི་སྐུ་འཕོ་འགྱུར་བྲི་གང་མེད་པ་ལ་ དགོངས་ནས་རྟག་པ་དང་བརྟན་པ་དང་བདེན་པ་དང་གཡུ་དྲུང་གི་སྐུར་ཡང་གསུངས་ལ། དངོས་པོ་དང་མཚན་མ་གང་དུ་ཡང་མ་གྲུབ་ཅིང་བློའི་ཡུལ་མིན་པའི་ཆ་ནས་མིང་ཙམ་དུ་ཡང་གསུངས་ཀྱང་ཡོད་མེད་ལ་སོགས་གང་དུ་ཡང་

Page: 790 མི་གནས་པར་ཤིང་རྟའི་སྲོལ་གཉིས་ཀ་བཞེད་པ་མཚུངས་ཏེ། དབུ་མ་རྩ་བར། སྟོང་པས་དེ་བཞིན་གཤེགས་སྟོང་པ། །ཇི་ལྟ་བུར་ན་འདོགས་པར་འགྱུར། །སྟོང་ངོ་ཞེས་ཀྱང་མི་བརྗོད་ཅིང༌། །མི་སྟོང་ཞེས་ཀྱང་མི་བྱ་ལ། །གཉིས་ དང་གཉིས་མིན་མི་བྱ་སྟེ། །གདགས་པའི་དོན་དུ་བརྗོད་པར་ཟད། །རྟག་དང་མི་རྟག་ལ་སོགས་བཞི། །ཞི་བ་འདི་ལ་ག་ལ་ཡོད། །མཐའ་དང་མཐའ་མེད་ལ་སོགས་བཞི། །ཞི་བ་འདི་ལ་ག་ལ་ཡོད། །ཅེས་དང༌། གང་དག་ སངས་རྒྱས་སྤྲོས་འདས་ཤིང༌། །ཟད་པ་མེད་ལ་སྤྲོས་བྱེད་པ། །སྤྲོས་པས་ཉམས་པ་དེ་ཀུན་གྱིས། །དེ་བཞིན་གཤེགས་པ་མཐོང་མི་འགྱུར། །དེ་བཞིན་གཤེགས་པའི་རང་བཞིན་གང༌། །དེ་ནི་འགྲོ་འདིའི་རང་བཞིན་ཡིན། ། དེ་བཞིན་གཤེགས་པའི་རང་བཞིན་མེད། །འགྲོ་བ་འདི་ཡི་རང་བཞིན་མེད། །ཅེས་དང༌། བཅོམ་ལྡན་མྱ་ངན་འདས་གྱུར་ནས། །ཡོད་པར་མི་མངོན་དེ་བཞིན་དུ། མེད་དོ་ཞཻའམ་གཉི་ག་དང༌། །གཉིས་མིན་ཞེས་བྱར་མི་མངོན་ནོ། ། བཅོམ་ལྡན་བཞུགས་པར་གྱུར་ན་ཡང༌། །ཡོད་པར་མི་མངོན་དེ་བཞིན་དུ། །མེད་དོ་ཞཻའམ་གཉི་ག་དང༌། །གཉིས་མིན་ཞེས་བྱར་མི་མངོན་ནོ། །ཞེས་དང༌། རྒྱན་ལས། སྔ་མ་ཕྱི་མར་ཁྱད་མེད་ཀྱང༌། །སྒྲིབ་པ་ཀུན་གྱི་དྲི་མ་མེད། ། དེ་བཞིན་ཉིད་འདི་སངས་རྒྱས་འདོད། །དག་པ་མ་ཡིན་མ་དག་མིན། །སྟོང་པ་ཉིད་ནི་རྣམ་དག་པས། །བདག་མེད་མཆོག་གི་བདག་ཐོབ་པས། །སངས་རྒྱས་དག་པའི་བདག་ཐོབ་ཕྱིར། །བདག་ཉིད་ཆེན་པོའི་བདག་ཏུ་འགྱུར། ། དེ་ཕྱིར་སངས་རྒྱས་ཡོད་མིན་ཞིང༌། །མེད་པར་ཡང་ནི་མི་བརྗོད་དོ། །དེ་ལྟས་སངས་རྒྱས་དེ་སྐད་འདྲི། །ལུང་མ་བསྟན་པའི་ཚུལ་དུ་འདོད། །ཅེས་སོ། །དེས་ན་རྫོགས་པའི་སངས་རྒྱས་ནི་སུས་ཀྱང་བསམ་གྱིས་མི་ཁྱབ་པ་ཁོ་ན་ཡིན་

Page: 791 ༄༅། །ཏེ། འཇུག་པར། རྣམ་རྟོག་མི་མངའ་ཁྱོད་ཀྱིས་སྲིད་མཐའི་བར། །སྐད་ཅིག་དེ་རེ་རེ་ལ་སྤྱོད་སྣ་ཚོགས། །ཇི་སྙེད་སྟོན་པ་དེ་སྙེད་ཛམྦུའི་གླིང༌། །མ་ལུས་རྡུལ་གང་དེ་དག་ལ་གྲངས་མེད། །ཅེས་དང༌། ནམ་མཁའ་ མེད་པས་འདབ་ཆགས་ལྡོག་པར་མི་འགྱུར་གྱི། །འདི་ནི་རང་མཐུ་ཟད་པས་ལྡོག་པར་འགྱུར་དེ་བཞིན། །སློབ་མ་དང་བཅས་རྒྱལ་བའི་སྲས་རྣམས་སངས་རྒྱས་ཀྱི། །ཡོན་ཏན་མཁའ་འདྲ་མཐའ་ཡས་མ་བརྗོད་ལྡོག་པར་འགྱུར། ། དེ་ཕྱིར་བདག་ལྟས་ཁྱོད་ཡོན་འདི་དག་ནི། །ཤེས་པ་དང་ནི་བརྗོད་པར་ནུས་འགྱུར་རམ། །ཞེས་དང༌། བདེ་བར་གཤེགས་པ་མ་ལུས་ཕྱོགས་ཞིང་སངས་རྒྱས་ཡུལ་དག་ན། །ཕྲ་རབ་རྡུལ་གྱི་རྡུལ་རྣམས་བདོག་པར་གྱུར་པ་ཇི་སྙེད་ པ། །བྱང་ཆུབ་མཆོག་རབ་དམ་པར་གཤེགས་པའི་བསྐལ་པ་དེ་སྙེད་དེ། །འོན་ཡང་ཁྱོད་ཀྱི་གསང་འདི་བསྙད་པར་བགྱི་བ་མ་ལགས་སོ། །ཞེས་དང༌། རྒྱན་ལས། ཆོས་ཀྱི་དབྱིངས་ལ་སངས་རྒྱས་ཀྱི། །མཚན་ཉིད་དང་ནི་གནས་ པ་དང༌། །ཕྲིན་ལས་ཟབ་པ་འདི་བཤད་པ། །མཁའ་ལ་ཚོན་གྱིས་རི་མོ་འབྲི། །ཞེས་དང༌། སངས་རྒྱས་རྣམས་ཀྱི་འབྱོར་པ་ནི། །གང་གིས་གང་དུ་ཇི་ལྟར་དང༌། །ཇི་ཙམ་དུས་དང་འཇུག་པ་ནི། བསམ་ཡས་དཔག་ཏུ་མེད་ པར་འདོད། །ཅེས་དང༌། ཟླ་བ་སྒྲོན་མ་ལས། ཇི་ལྟར་ནམ་མཁའ་དེ་བཞིན་དུ། །ང་ཡི་སྐུ་ཡང་བརྗོད་མེད་ཅིང༌། །ཤེས་པར་དཀའ་བར་རབ་ཏུ་བསྟན། །ཞེས་དང༌། རྒྱུད་བླ་ལས། རྒྱུ་མཚན་དྲུག་གི་དང་པོ་ལྔས་ཆོས་སྐུ་བསམ་ གྱིས་མི་ཁྱབ་པ་དང༌། དྲུག་པས་གཟུགས་སྐུ་བསམ་མི་ཁྱབ་ཏུ་བསྟན་པའི་ཕྱིར་ཏེ། ངག་ཡུལ་མིན་ཕྱིར་དོན་དམ་གྱིས་བསྡུས་ཕྱིར། །རྟོག་གནས་མིན་ཕྱིར་དཔེ་ལས་འདས་པའི་ཕྱིར། །བླ་ན་མེད་ཕྱིར་སྲིད་ཞིས་མ་བསྡུས་ཕྱིར། །

Page: 792 རྒྱལ་ཡུལ་འཕགས་རྣམས་ཀྱིས་ཀྱང་བསམ་མི་ཁྱབ། །ཅེས་ངག་གི་སྨྲ་བསམ་གྱི་ཡུལ་མ་ཡིན་པ་དང༌། དོན་དམ་གྱིས་བསྡུས་པ་དང༌། རྟོག་པའི་གནས་མིན་པ་དང༌། དཔེ་ལས་འདས་པ་དང༌། བླ་ན་མེད་པ་སྟེ་ལྔས་ནི་ཆོས་སྐུ་བསམ་གྱིས་མི་ ཁྱབ་པར་སྒྲུབ་ཅིང་སྲིད་ཞིས་མ་བསྡུས་ལ། ཐམས་ཅད་ཀྱི་རྣམ་པར་སྣང་ཡང་དེའི་དངོས་པོ་མ་ཡིན་པས་ནི་གཟུགས་སྐུ་བསམ་མི་ཁྱབ་ཏུ་སྒྲུབ་པ་སྟེ། རྒྱུ་ལྔ་དག་གིས་ཕྲ་བའི་ཕྱིར། །ཆོས་སྐུ་བསམ་མི་ཁྱབ་པ་སྟེ། །དྲུག་པས་དེ་ ཡི་དངོས་མིན་ཕྱིར། །གཟུགས་སྐུ་བསམ་མི་ཁྱབ་པའོ། །ཞེས་སོ། །དེས་ན་སངས་རྒྱས་ཀྱི་གནས་འདི་ནི་དབང་ཐོབ་པའི་བྱང་སེམས་ཀྱིས་ཀྱང་མི་རྟོགས་པ་སྟེ། བླ་མེད་ཡེ་ཤེས་ཐུགས་རྗེ་ཆེ་སོགས་ཡོན་ཏན་གྱིས། ། ཡོན་ཏན་ཕ་རོལ་བྱོན་པའི་རྒྱལ་བ་བསམ་མི་ཁྱབ། །དེས་ན་རང་བྱུང་རྣམས་ཀྱི་ཐ་མའི་ཚུལ་འདི་ནི། །དྲང་སྲོང་ཆེན་པོ་དབང་ཐོབ་རྣམས་ཀྱིས་ཀྱང་རིག་མིན། །ཞེས་སོ། །མདོར་ན་ངའམ་ང་འདྲ་བས་གང་ཟག་ གི་དྲོད་བཟུང་གི་གང་ཟག་གིས་གང་ཟག་གི་དྲོད་བཟུང་བར་མི་བྱའོ། །ཞེས་གསུངས་ན། གང་ཟག་གིས་སངས་རྒྱས་ཀྱི་དྲོད་ཇི་ལྟར་བཟུང་སྟེ། ཇི་ལྟར་དུ་ཡང་བསམ་གྱིས་མི་ཁྱབ་པའི་གནས་འདི་ལ་བདག་ཅག་རྣམས་མོས་པ་དང༌། ཡིད་ཆེས་པ་དང༌། རྗེས་སུ་ཡི་རང་བ་དང༌། གོ་འཕང་འདི་འདོད་པ་དང༌། བསྒྲུབ་པར་བྱའི་འདིའི་ཚད་བཟུང་བར་མི་བྱའོ། །གནས་འདི་བདག་གི་ཡུལ་མིན་ཡང༌། །རྒྱལ་བའི་བྱིན་རླབས་ལ་བརྟེན་ནས། །ཕྱོགས་ ཙམ་གསལ་བར་བྱས་འདིའི་དགེས། །ཀུན་གྱིས་གོ་འཕང་འདི་འགྲུབ་ཤོག །

Page: 793 ༄༅། །དེ་ལྟར་ཐོབ་བྱ་སངས་རྒྱས་ཀྱི་རང་བཞིན་གཏན་ལ་ཕབ་ནས། ད་ནི་གཞུང་གི་དོན་དངོས་ལ་འཇུག་པར་བྱ་སྟེ། དེ་ལྟར་སྨོན་པའི་བྱང་ཆུབ་ཏུ་སེམས་བསྐྱེད་ཅིང་འཇུག་པའི་བྱང་ཆུབ་ཀྱི་སེམས་ཀྱི་ངོ་བོ་ཕ་རོལ་ཏུ་ ཕྱིན་པ་རྣམས་ས་དང་ས་རྣམས་སུ་མངོན་པར་སྦྱངས་པས་དོན་དམ་བྱང་ཆུབ་ཀྱི་སེམས་སྟོང་པ་ཉིད་དང་སྙིང་རྗེ་ཆེན་པོ་རོ་གཅིག་པ་ཆོས་གང་ལའང་མི་གནས་པའི་གནས་པ་ཅན་སུས་ཀྱང་གང་དུ་ཇི་ལྟར་ཡང་གོམས་སུ་བྱར་མེད་པའི་དོན་ ལ་གོམས་པ་རབ་ཀྱི་མཐར་སོན་པས་སྐད་ཅིག་གཅིག་དང་ལྡན་པའི་ཤེས་རབ་ཀྱིས་དེ་ཁོ་ན་ཉིད་མཐོང་བ་མེད་པའི་ཚུལ་གྱིས་མཐོང་བ་གང་གི་ཚེ་དངོས་པོ་དང་དངོས་མེད་དང་འདིར་དག་སྒྲ་ནི་གཉིས་ཚིག་མེད་པར་མང་ཚིག་ལ་འགྱུར་ ཁྱད་དུ་གོ་བར་བྱ་སྟེ། དངོས་དངོས་མེད་ཀྱིས་མཚོན་ནས་འཁོར་འདས་དང་འདུས་བྱས་དང་འདུས་མ་བྱས་དང་སྟོང་པ་དང་མི་སྟོང་པ་དང་རྟག་པ་དང་མི་རྟག་པ་དང་བདེན་པ་དང་བརྫུན་པ་དང་ཀུན་རྫོབ་དང་དོན་དམ་ལ་སོགས་པའི་ཆོས་སུ་དམིགས་པ་གང་ཡང་ཤེས་རབ་དྲི་ མ་མེད་པའི་བློ་ཡང་དག་པ་དེའི་མདུན་ན་མི་གནས་པ་སྟེ། ངོ་བོ་ཉིད་ཀྱིས་ཆོས་འདི་དག་ནི་རྣམ་པ་འགར་ཡང་དེ་ལྟར་གནས་པ་མ་ཡིན་པ་ཉིད་དེ་ལྟར་མངོན་དུ་བྱས་པས་ཆོས་གང་ཡང་མ་གཟིགས་མི་གཟིགས་གཟིགས་པར་མི་འགྱུར་བ་རབ་ཀྱི་ མཐར་སོན་པ་སྟེ། དཔེར་ན། ནམ་མཁའ་ལ་སྐྲ་ཤད་ངོ་བོ་ཉིད་ཀྱིས་རིང་པོ་དང་ཐུང་ངུ་དང་ཤིན་ཏུ་ཕྲ་བའི་ཟླུམ་པོ་དང་འཛིངས་པ་དང་མ་འཛིངས་པ་ལ་སོགས་པ་གང་ཡང་རྣམ་པ་ཐམས་ཅད་དུ་མི་གནས་མོད་ཀྱི་རབ་རིབ་ཅན་གྱི་ངོར་སྐྲ་ཤད་སྣ་ཚོགས་པར་སྣང་ ཞིང་སྨན་དང་སྔགས་ཀྱི་མཐུས་རབ་རིབ་སྦྱངས་ཏེ་ཡོངས་སུ་བྱང་བ་ན། སྐྲ་ཤད་དེ་དག་ལས་འཛིངས་པ་ལྟ་བུ་འཁོར་བའི་ཆོས་དང་མ་འཛིངས་པ་ལྟ་བུ་མྱང་འདས་ཀྱི་ཆོས་དང་རིང་པོ་ཀུན་རྫོབ་དང་ཕྲ་བ་དོན་དམ་དང་ཟླུམ་པོ་ཕྲ་མོ་ལྟ་བུ་ཐ་ན་ཆོས་དབྱིངས་སུ་

Page: 794 དམིགས་པ་ཡང་ཉེ་བར་ཞི་བར་ཡིན་ལ། དེའི་ཚེ་གང་ཐོབ་པའི་བྱང་ཆུབ་དང་གང་གིས་འཐོབ་པ་པོ་བྱང་ཆུབ་སེམས་དཔའ་དང་གང་དུ་འཐོབ་པའི་གནས་འོག་མིན་ལ་སོགས་པ་དང༌། ཇི་ལྟར་འཐོབ་པའི་ཚུལ་འཚང་རྒྱ་བའི་གོ་རིམ་སོགས་འདུ་ བྱས་པའི་རྣམ་པ་དེ་དག་དང་དེ་དག་ལས་གཞན་པའི་རྣམ་པ་གང་ཡང་མེད་ཅིང་བྱང་ཆུབ་ཉིད་ཀྱང་དམིགས་སུ་མེད་ལ་དམིགས་སུ་ཡོད་མེད་ཉིད་ཀྱང་དམིགས་པ་མེད་པར་ཆོས་ཀྱི་དབྱིངས་ཇི་ལྟ་བ་ཉིད་དུ་གཅིག་དང་ཐ་དད་དུ་གདགས་མི་ནུས་པར་ རྣམ་པ་ཐམས་ཅད་དུ་དངོས་པོ་ཐམས་ཅད་ཚུལ་ཐམས་ཅད་པས་རབ་ཏུ་གཟོད་མ་ནས་ཞི་བ་ཉིད་ཇི་ལྟ་བ་དེ་ལྟར་ཞི་བ་ཉིད་དེ་འདིའི་རང་བཞིན་ཉིད་ནི་རྫོགས་པའི་སངས་རྒྱས་ཐམས་ཅད་ཉིད་ཀྱང་སྨྲ་བསམ་བརྗོད་པར་མི་མཛད་དོ། །འོན་ཀྱང་དེ་ཉིད་ གདུལ་བྱ་ལ་མཚོན་པའི་ཆེད་དུ་གནས་ཆོས་ཀྱི་དབྱིངས་ཐམས་ཅད་པ་འོག་མིན་སྟུག་པོ་བཀོད་པར་སྐད་ཅིག་གཅིག་དང་ལྡན་པའི་ཤེས་རབ་ཀྱིས་རང་དོན་དོན་དམ་པའི་སྐུར་ཆོས་གང་ཡང་མངོན་པར་རྫོགས་པར་འཚང་རྒྱ་བ་མེད་པའི་ཚུལ་གྱིས་ སངས་རྒྱས་སོ་ཞེས་སྟོན་པར་མཛད་དོ། །དེའི་ཚེ་རང་དང་གཞན་ལ་སོགས་པའི་དམིགས་པ་ཐམས་ཅད་རྣམ་པར་ལོག་ཅིང་འདུ་ཤེས་ཀྱི་རྒྱུ་བ་རྣམ་པར་ཆད་ལ་འདུ་ཤེས་མེད་པ་ཡང་མ་ཡིན་པ་ཀུན་སློང་གི་རྣམ་པ་ཅི་ཡང་མི་མངའ་མོད་ཀྱི། རྩོམ་པ་ཐམས་ཅད་དགའ་ཕྱིར་ཏེ། །ཞེས་པ་ལྟར་སྔོན་ཐོག་མ་མེད་པ་ནས་རང་དོན་ལ་བལྟོས་པ་རྡུལ་ཙམ་ཡང་མེད་པར་གཞན་ཕན་འབའ་ཞིག་ཁོ་ནར་དགོངས་པའི་གོམས་པ་རབ་ཀྱི་མཐར་སོན་ཞིང་སྨོན་ལམ་བསམ་གྱིས་མི་ཁྱབ་པ་རྣམས་ གྲུབ་པའི་ཕྱིར། ནམ་མཁའ་ལྟར་སྤྲོས་པ་ཞི་བ་དེའི་ཚེ་འབད་རྩོལ་མེད་པར་སྨོན་ལམ་དང་ཐུགས་རྗེའི་དབང་གིས་སེམས་ཅན་ཐམས་ཅད་ཀྱི་དོན་ཅིག་ཆར་དུ་རྒྱུན་མི་འཆད་པར་གྲུབ་པར་འགྱུར་ཏེ། ཇི་ལྟར་ཡིད་བཞིན་གྱི་ནོར་བུ་རྟོག་པ་མེད་པར་གསོལ་

Page: 795 ༄༅། །བ་འདེབས་པོ་ལ་དགོས་འདོད་སྩོལ་བ་དང་དཔག་བསམ་གྱི་ཤིང་ལས་གོས་དང་རྒྱན་དང་བཟའ་བཏུང་སོགས་གང་འདོད་བླང་དུ་འབྱུང་བ་དེ་བཞིན་དུ་གདུལ་བྱའི་ཚོགས་ལ་སྨོན་ལམ་གྱི་དབང་གིས་ཕྲིན་ལས་འཇུག་པར་འགྱུར་ ཏེ། དེ་ཡང་གདུལ་བྱ་དག་པ་རྣམས་ལ་ཡིད་བཞིན་གྱི་ནོར་བུ་ལྟ་བུའི་ལོངས་སྤྱོད་རྫོགས་པའི་སྐུར་སྣང་བས་ཆོས་ཀྱི་དགོས་འདོད་རྒྱ་མཚོ་ལྟ་བུ་སྩོལ་ལ། ཅུང་ཟད་དག་པ་རྣམས་ལ་མཆོག་གི་སྤྲུལ་པའི་སྐུ་དཔག་བསམ་གྱི་ཤིང་ལྟ་བུར་སྣང་ བས་ལས་དང་པོ་པ་རྣམས་ལ་མངོན་མཐོའི་ཐེག་པ་བཟའ་བཏུང་ལྟ་བུ་དང༌། གདུལ་བྱ་ཐུན་མོང་པ་དག་ལ་ངེས་ལེགས་ཀྱི་ཐེག་པ་གོས་ལྟ་བུ་དང༌། གདུལ་བྱ་ཁྱད་པར་ཅན་རྣམས་ལ་ཐེག་ཆེན་གྱི་ཆོས་རྒྱན་གྱི་མཆོག་ལྟ་བུ་སྩོལ་བར་མཛད་ལ། མ་སྨིན་ པ་རྣམས་ལ་བྱང་ཆུབ་སེམས་དཔའ་དང་ཉན་རང་དང་ཚངས་སོགས་ནས་གཟིངས་དང་ཟམ་པ་ལ་སོགས་པའི་བར་སྲིད་པ་དང༌། མི་སྲིད་པའི་རྣམ་པ་གང་དུ་ཡང་སྣང་བས་དོན་ཆེན་པོ་མཛད་དེ། དེའི་ཕྱིར་ཆོས་ཀྱི་སྐུ་གང་དུ་ཡང་མི་གནས་པ་དེ་ཉིད་རྒྱལ་ བའི་གཟུགས་ཀྱི་སྐུར་སྣང་བ་གདུལ་བྱ་ལ་འབྱུང་ངོ༌། །དཔེར་ན། ནམ་མཁའ་ལྡིང་གི་རིགས་སྔགས་གྲུབ་པའི་སྐྱེས་བུས་རྒྱ་མཚོའི་འགྲམ་དུ་རིན་པོ་ཆེ་ལས་མཆོད་སྡོང་བྱས་ཏེ་དེའི་རྩེར་མཁའ་ལྡིང་གི་གཟུགས་བྱས་ཏེ་སྔགས་ཀྱིས་བསྒྲུབས་ནས་ ཕྱིས་ཅི་ཞིག་ན་སྒྲུབ་པ་པོ་དེ་དུས་ལས་འདས་པར་གྱུར་ལ། དེ་འདས་ནས་ཡུན་ཤིན་ཏུ་རིང་མོ་ལོ་བྱེ་བ་ཕྲག་མང་པོ་ལོན་ཡང་མཆོད་སྡོང་དེས་གཞན་གྱི་མཐོང་བའི་དུག་དང༌། རྫི་ཡི་དུག་དང༌། ཁོང་དུ་སོང་བ་དང་རེག་པའི་དུག་ལ་སོགས་པ་དང་ཀླུ་ནད་ཀྱིས་གཟིར་བ་ རྣམས་མཐོང་བ་དང་རེག་པས་ཀྱང་ཞི་བར་བྱེད་པ་ལ་སྔ་མ་དང་ཁྱད་པར་མེད་པ་དེ་བཞིན་དུ་བྱང་ཆུབ་སེམས་དཔས་བྱང་ཆུབ་སྤྱོད་པའི་རྗེས་སུ་མཐུན་པས་རྒྱལ་བའི་མཆོད་སྡོང་བསྒྲུབས་པ་དེ་ཡང་སྔོན་བྱང་ཆུབ་སེམས་དཔར་གང་ལས་མིང་

Page: 796 འདོགས་པའི་སེམས་དང་སེམས་བྱུང་གི་རྒྱུན་དེ་ནི་རྡོ་རྗེ་ལྟ་བུའི་ཏིང་ངེ་འཛིན་གྱིས་དེ་ཁོ་ན་ཉིད་རྟོགས་པའི་མོད་ལ་རྣམ་པར་ལོག་ཅིང་འཁོར་བ་དང་མྱང་འདས་ཀྱི་གནས་ལས་འདས་ཏེ། ཆོས་ཀྱི་དབྱིངས་སུ་བྱང་ཆུབ་པས་བདག་གཞན་གྱི་དམིགས་ པ་མེད་ཀྱང་སེམས་ཅན་ཐམས་ཅད་ཀྱི་དོན་རྣམས་མ་ལུས་པར་མཛད་པའི་ཕྲིན་ལས་རྟོག་མེད་དུ་འབྱུང་བ་ཡིན་ནོ། །དངོས་སྨྲ་བ་ན་རེ། འོ་ན་རྫོགས་པའི་སངས་རྒྱས་ལ་སེམས་མི་མངའ་བ་ཡིན་ན་སེམས་མེད་པ་ལ་མཆོད་པ་བྱས་པས་ཇི་ལྟར་ འབྲས་བུ་དང་ལྡན་པའི་དགེ་བའི་ལས་སུ་འགྱུར་ཞེ་ན། གང་གི་ཕྱིར་སངས་རྒྱས་ཞལ་བཞུགས་པ་ལ་གདུགས་ཚོད་སོགས་ཀྱིས་མཆོད་པ་བྱས་པའམ་མྱ་ངན་ལས་འདས་པའི་སྐུ་གདུང་གི་རིང་སྲེལ་སོགས་ལ་མཆོད་པ་བྱས་པ་ནི་བསོད་ནམས་ ཁྱད་མེད་དུ་མཚུངས་པ་ཉིད་དུ་བཤད་པའི་ཕྱིར་ཏེ། མེ་ཏོག་བརྩེགས་པའི་གཟུངས་ལས། གང་གིས་སངས་རྒྱས་མཐོང་ནས་དད་པའི་སེམས་ཀྱིས་མཆོད་པ་བྱས་པ་དང༌། གང་གིས་དེ་བཞིན་གཤེགས་པའི་རིང་སྲེལ་གྱི་མཆོད་རྟེན་ལ་མཆོད་ པ་བྱས་པའི་བསོད་ནམས་ནི་མཉམ་པར་ཤེས་པར་བྱའོ། །ཞེས་དང༌། གང་གིས་བཞུགས་པ་ལ་མཆོད་དང༌། །མྱ་ངན་འདས་པའི་སྐུ་གདུང་ལ། །སེམས་ནི་དད་པ་མཉམ་པ་ཡིས། །མཆོད་པའི་བསོད་ནམས་མཉམ་པ་འབྱུང༌། ། ཞེས་དང༌། བྱང་ཆུབ་སེམས་པའི་སྡེ་སྣོད་ལས། གང་ཞིག་བཞུགས་ལ་མཆོད་པ་དང༌། །གང་ཡང་མྱ་ངན་འདས་པ་ཡི། །རིང་སྲེལ་ཡུངས་འབྲུ་ཙམ་མཆོད་པ། །སེམས་ཀྱང་མཚུངས་ལ་འབྲས་བུའང་མཚུངས། །ཞེས་སོགས་ དང༌། འདུལ་བ་ལུང་སྨན་གྱི་གཞི་ལས་ཀྱང་གསུངས་པའི་ཕྱིར་རོ། །གལ་ཏེ་ཅི་སྒྱུ་མ་ལྟ་བུའི་སངས་རྒྱས་ལ་མཆོད་པས་འབྲས་བུ་འབྱུང་བ་དེ་ཀུན་རྫོབ་ཏུ་ཡིན་ནམ་དོན་དམ་དུ་ཡིན་ཞེས་འདྲི་ན། ལན་ནི་དེ་རེ་ཞིག་ཀུན་རྫོབ་བམ་དེ་ཁོ་ན་

Page: 797 ༄༅། །ཉིད་གང་དུ་ཡིན་ནའང་རུང་སྟེ། བསོད་ནམས་ཀྱི་ལས་ནི་འབྲས་བུ་གྱ་ནོམ་པ་དང་བཅས་པར་ཐེག་པ་ཆེ་ཆུང་གཉིས་ཀའི་ལུང་ལས་གསུངས་པའི་ཕྱིར། ཡིད་ཆེས་པར་བྱ་བ་ཡིན་གྱི་འདི་ལ་ནི་བདེན་པ་གཉིས་རེ་ཞིག་དཔྱད་མི་དགོས་ ཏེ་སྟོན་པ་ཉིད་ཀྱིས་ཀྱང་བདེན་གཉིས་མ་དཔྱད་པར་བཀའ་བསྩལ་བའི་ཕྱིར། རིན་ཆེན་ཕྲེང་བར། དོན་འདི་ལ་ནི་རྒྱལ་བ་ལས། །ལྷག་པའི་ཚད་མ་གཞན་ཡོད་མིན། །ཞེས་དང༌། རྒྱུད་བླར། གང་ཕྱིར་རྒྱལ་ལས་ཆེས་མཁས་འགའ་ཡང་ འཇིག་རྟེན་འདི་ན་ཡོད་མིན་ཏེ། །དེ་ཕྱིར་དྲང་སྲོང་རང་ཉིད་ཀྱིས་བཞག་མདོ་སྟེ་གང་ཡིན་དེ་མི་དཀྲུགས། །ཞེས་པ་ལྟར་རོ། །ཡང་ན་ལན་གྱི་རྣམ་གྲངས་འདི་ཡང་གཟིགས་ཏེ་སེམས་མེད་པ་ལ་མཆོད་པ་བྱས་པས་ཀྱང་ཕན་ཡོན་འབྱུང་སྟེ། མཆོད་རྟེན་ དང་གླེགས་བམ་མཆོད་པའི་ཕན་ཡོན་བཞིན་ནོ། །སྒྱུ་མ་ལྟ་བུའི་སངས་རྒྱས་ལ་མཆོད་པ་བྱས་པས་བསོད་ནམས་ཀྱང་སྒྱུ་མ་ཙམ་དུ་འབྱུང་སྟེ། དཔེར་ན། ཁྱེད་ཅག་དངོས་སྨྲ་བ་རྣམས་བདེན་པའི་སངས་རྒྱས་ལ་མཆོད་པ་བྱས་པས་ཇི་ལྟར་འབྲས་བུ་ བདེན་པ་དང་བཅས་པ་འབྱུང་བར་འདོད་པ་བཞིན་ནོ། །འདི་རྣམས་སུ་དགེ་བའི་ལྷས། སྟོང་པ་ཉིད་ནི་དེ་ཁོ་ན་ཉིད་ཀྱི་ཡེ་ཤེས་སོ། །དེ་ཡི་ས་བོན་ནི་བག་ཆགས་སོ། །དེའི་སྒོམ་པ་ནི་སྒོམ་པ་ཤིན་ཏུ་གོམས་པར་བསྐྱེད་པ་སྟེ། དེས་ནི་དངོས་པོའི་ བག་ཆགས་གཟུགས་ལ་སོགས་པར་རྟོགས་པའི་ས་བོན་སྤོང་ཞིང་སེལ་བར་བྱེད་དོ། །ཅུང་ཟད་མེད་ཅེས་བྱ་བ་ནི་དངོས་པོ་དང་དངོས་པོ་མེད་པ་དག་གོ་ཞེས་སོགས་ནས་དེ་ལྟར་ལྷག་མ་དང་བཅས་པའི་མྱ་ངན་ལས་འདས་པ་བཤད་ནས་ལྷག་ མེད་བསྟན་པའི་ཕྱིར། གང་ཚེ་ལ་སོགས་པའོ་ཞེས་དང༌། རྒྱལ་བའི་སྐུ་བསྒྲུབས་ནས་བྱང་ཆུབ་སེམས་དཔའ་སེམས་དང་བཅས་པ་འདས་པར་གྱུར་ཀྱང་གདུལ་བྱ་དང་སྨོན་ལམ་རྣམ་པར་དག་པའི་ཤུགས་གཉིས་ཀྱིས་སེམས་ཅན་ཐམས་

Page: 798 ཅད་ཀྱི་དོན་མཛད་པར་འགྱུར་གྱི་ཉན་ཐོས་ལྟར་ཡོངས་སུ་མྱ་ངན་ལས་འདའ་བ་ནི་མ་ཡིན་ནོ། །ཞེས་དང༌། སྔར་ནི་སྒྱུ་མ་དང་མཉམ་པའི་སེམས་དེ་ལས་བསོད་ནམས་སྐྱེ་བར་བཤད་ལ། ད་ལྟར་མེད་དུ་ཟིན་ཡང་ཞེས་བྱ་བ་ནི་འདིར་ ཁྱད་པར་རོ། །བསོད་ནམས་ཀྱི་འབྲས་བུ་མཚུངས་པ་དེ་ཡང་ལུང་གི་ཚད་མ་ལས་གྲུབ་པ་ཡིན་པས་ཀུན་རྫོབ་ཏུའམ་དོན་དམ་པ་གང་ཡིན་ཡང་སངས་རྒྱས་བཞུགས་པ་ལ་མཆོད་པ་བྱས་པ་དང་འདྲ་བར་འབྲས་བུ་དང་བཅས་པ་ཡིན་ནོ། །ཞེས་ བཤད་དོ། །བི་བྷཱུ་ཏིས་ནི། སྟོང་ཉིད་ལ་མངོན་པར་ཞེན་པ་ཡང་སྐྱོན་ནོ་ཞེ་ན། དངོས་པོའམ་སྟོང་པ་ཉིད་ཅི་ཡང་མེད་ཅེས་གོམས་པས་ཕྱིས་སྟོང་ཉིད་ཀྱི་བག་ཆགས་ཀྱང་སྤོང་སྟེ། ཐབས་ནི་གྲུ་ལྟ་བུ་ཡིན་པའི་ཕྱིར་རོ། །ཞེས་དང༌། གང་གི་ཚེ་དོན་དམ་ ཡོད་པའི་དངོས་པོ་མེད་པ་ལ་དངོས་མེད་ཀྱང་མེད་པས་དེ་གཉིས་བློའི་མདུན་དུ་མི་སྣང་ལ་དངོས་པོ་དང་དངོས་མེད་མ་ཡིན་པའི་ཕུང་པོ་གསུམ་པ་ཡང་མེད་པས་དམིགས་པ་མེད་པ་རྟེན་མེད་པ་བུད་ཤིང་ཟད་པའི་མེ་བཞིན་དུ་བློ་མྱ་ངན་ལས་ འདས་སོ། །ཞེས་དང༌། རྒྱལ་བའི་སྐུ་མཚན་དཔེར་ལྡན་པ་སྣང་བར་འགྱུར་རོ། །གང་ལས་ཤེ་ན། གདུལ་བྱའི་དགེ་བའི་རྩ་བ་ཡོངས་སུ་སྨིན་པ་དང་བཅོམ་ལྡན་འདས་ཀྱི་སྨོན་ལམ་ལས་སོ། །ཞེས་དང༌། དུག་སེལ་བའི་སྨན་པ་སྔགས་ཀྱི་ནུས་པ་ ཐོབ་པས་ཤིང་ལ་སོགས་པའི་སྡོང་པོ་སྔགས་ཀྱིས་བསྒྲུབས་ནས་བདག་མེད་ཀྱང་འདིས་དུག་ཐམས་ཅད་སེལ་བར་གྱུར་ཅིག་སྙམ་དུ་བསམས་ནས་ཤི་སྟེ་ཡུན་རིང་ལོན་ཡང་དུག་དང་གདོན་གྱིས་བརླམས་པ་སོགས་སེལ་བ་ལྟར། ཞེས་དང༌། འདིར་རིགས་པ་མི་དགོས་ཏེ་དེ་འབྲས་ལུང་ལས་ཡིན་ནོ། །ཞེས་དང༌། དབུ་མ་པའི་ཀུན་རྫོབ་དང་ཁྱེད་ཀྱི་དོན་དམ་པར་འདི་ཁས་ལེན་དགོས་སོ། །ཞེས་འཆད་དོ། །དཀའ་འགྲེལ་ཆུང་ངུ་ལས་ནི། སྒྱུ་མར་རྟོག་པ་མི་སྤང་ངམ་ཞེ་ན་མ་ཡིན་

Page: 799 ༄༅། །ནོ། །ཞེས། ཅི་ཡང་མེད་ཅེས་གོམས་པས་ནི། །ཞེས་སོ། །མེད་འཛིན་ཉིད་ཀྱང་སྤང་བ་ནི། །གང་ཚེ་གང་ཞིག་མེད་དོ་ཞེས། །སོགས་ཏེ་མེད་པ་གང་ཡིན་ཞེས་འདྲི་ན་བུམ་པའོ། །ཞེས་ལན་བརྗོད་པ་འཇིག་རྟེན་ན་མཐོང་བས་བུམ་པ་ མ་གྲུབ་ན་དེ་ལ་བརྟེན་པའི་དགག་པ་ཡང་མི་འགྲུབ་པས་མེད་པ་ཉིད་ཀྱང་མི་དམིགས་སོ། །འོ་ན་དེ་ཁོ་ན་མཐོང་བ་མཐར་ཐུག་པའི་སངས་རྒྱས་ཀྱི་མཁྱེན་པས་ཅི་ཞིག་མཐོང་སྙམ་ན། དོན་ལ་ནི་ཤེས་པ་འགའ་ཡང་མི་འཇུག་པས་དེ་མཐོང་བའི་ཤེས་པ་ སྐྱེ་བ་མེད་དོ། །ཞེས་སྟོན་པ་ནི། གང་ཚེ་དངོས་དང་དངོས་མེད་དག །སོགས་ཏེ་གཟུགས་ཀྱི་རྣམ་པ་ཐམས་ཅད་མ་དམིགས་པ་ལ་ནམ་མཁའ་མཐོང་བར་བརྗོད་པ་བཞིན་དུ་མཚན་མའི་རྣམ་པ་ཐམས་ཅད་མ་དམིགས་པ་ཉིད་ལ་མཚན་མ་མེད་པའི་དབྱིངས་ ཞེས་བརྗོད་པར་ཟད་དེ། རྒྱུད་བླ་མར། ལོངས་སྤྱོད་རྒྱུ་ཀུན་རབ་ཞི་དང༌། །རྣམ་པར་རྟོག་པ་མེད་པའི་ཐུགས། །ཞེས་སོ། །དེ་ལྟར་སྐད་ཅིག་གཅིག་དང་ལྡན་པའི་ཤེས་རབ་ཀྱིས་ཆོས་ཐམས་ཅད་ཀྱི་དེ་བཞིན་ཉིད་མངོན་པར་རྫོགས་པར་སངས་ རྒྱས་ནས་དེའི་རྗེས་ལ་རྣམ་པར་གྲོལ་བའི་ལམ་མངོན་དུ་གྱུར་པ་ན། མེ་ལོང་ལྟ་བུའི་ཡེ་ཤེས་རྟག་ཏུ་འཇུག་པ་ནི་ལོངས་སྐུ་ཡིན་ལ་དེ་ལས་འཇིག་རྟེན་ཐམས་ཅད་དུ་སོ་སོའི་བསམ་པ་བཞིན་གྱི་སྤྲུལ་པ་སྣ་ཚོགས་འཇུག་པ་སྤྲུལ་པའི་སྐུ་བརྙེས་པའོ། ། ཞེས་དང༌། མེ་ལོང་ལྟ་བུ་དེ་ནི་གཟུགས་སྐུ་སྣང་བའི་བདག་པོའི་རྒྱུ་ཡིན་པའམ་གཟུགས་ཀྱི་རྒྱུ་ཡིན་ཏེ། ཞེས་དང༌། སྤྲུལ་པ་ནི་གཟུགས་སྐུ་སྣང་བའི་མཚན་ཉིད་ཀྱི་གཟུགས་སྐུ་ཡིན་ཏེ་འཇིག་རྟེན་ལ་གཟུགས་སུ་མཐོང་བའི་ཕྱིར་ཞེས་ བཤད་ལ། ཀུན་རྫོབ་བམ་ནི་དེ་ཉིད་དུའང༌། །སོགས་ལ་དཀའ་འགྲེལ་ཆུང་བ་ན་བཤད་པ་མི་སྣང་ལ། ཤེར་ལེའི་དཀའ་འགྲེལ་ཆུང་བ་ལས་ནི། སངས་རྒྱས་ཉིད་དང་སྦྱིན་པ་ལ་སོགས་པའི་འབྲས་བུ་ལུང་གི་དབང་ལས་ཡིན་ན་དེའི་ཚེ་

Page: 800 ཀུན་རྫོབ་ཏུའམ་དོན་དམ་ཡིན་ཡང་སླ་སྟེ་ཁྱད་པར་ཅི་ཡོད་ཅེས་བཀྲལ་ཏོ། །ས་བཟང་བས་ནི། ཀུན་རྫོབ་གཟུགས་སྐུའམ་དོན་དམ་ཆོས་སྐུ་ལའང་རུང་སྟེ། ཞེས་དང༌། སྔོན་བྲམ་ཟེ་ཤངྐུ་ནིས་བསྒྲུབས་པའི་མཆོད་སྡོང་ཞེས་འབྲུ་གཉེར་ཏོ། ། ཇོ་བོ་ཆེན་པོ་ལས་བརྒྱུད་པའི་སྤྱོད་འཇུག་གི་ཟིན་བྲིས་འགའ་ན་སྔོན་བྲམ་ཟེ་ཤྲི་ཤངྐུ་ཞེས་བྱ་བ་ཡོད་པའི་ས་ཕྱོགས་སུ་ཀླུ་ནད་ཀྱིས་ཐམས་ཅད་གཙེས་ནས་དེས་ཀླུ་དབང་དུ་བྱེད་པའི་སྔགས་ཚོལ་དུ་ཕྱིན་པས་བུད་མེད་ནག་མོ་ཞིག་བུ་ཆུང་བསྙལ་ཏེ་ ཡུར་མ་བྱེད་པ་ན་བུ་ཆུང་དེ་ངུ་བ་ལ་བུད་མེད་དེས་ཡུངས་ཀར་གཏོར་བས་སྦྲུལ་ནག་པོ་ཅིག་བྱུང་ནས་དེ་ལ་ལྕེས་བལྡགས་པས་ཤི་བ་ལྟར་གྱུར། ཡུར་མ་ཟིན་པ་ན་རྫས་གཞན་ཞིག་གཏོར་བས་སྦྲུལ་དཀར་པོ་ཅིག་བྱུང་སྟེ་བལྡགས་པས་ སོས་པར་མཐོང་ནས། དེ་ལ་རིག་སྔགས་ཞུས་པས་ཁྱི་ནག་མོའི་འོ་མ་ཕུལ་བརྒྱད་འཐུང་དུ་བཅུག་པ་ན་བདུན་འཐུང་ནས་གང་མ་ཡོག་པས་ཀླུ་བདུན་དབང་དུ་འདུས་ལ་བརྒྱད་པ་མཐའ་ཡས་དབང་དུ་མ་འདུས་པས་བྱིས་པ་ཞིག་གིས་སོགས་ཕྲག་ཏུ་ དུག་སྒོར་འོང་དེའི་ཚེ་རྒྱ་མཚོའི་ལྦུ་བ་ལོང་ལ་འཐུང་ཞིག་ཟེར་ཏེ། བྲམ་ཟེ་དེས་མང་པོའི་ནད་ཞི་བར་བྱས་ཕྱིས་མཐའ་ཡས་ཀྱི་གནོད་པ་ལ་རྒྱ་མཚོའི་ལྦུ་བ་མ་འབྱོར་བས་ཤི་བའི་རོ་མཆིས་བྲང་དེས་མཁའ་ལྡིང་གི་མཆོད་སྡོང་ལ་བཀལ་བས་ སོས་ཏེ་ཡུན་རིང་པོར་མི་རྣམས་ལ་ཕན་པ་བྱས་ནས་མཆོད་སྡོང་དེས་དུག་ཐམས་ཅད་ཞི་བར་ནུས་པའི་སྨོན་ལམ་བཏབ་པོ་ཞེས། བྲམ་ཟེ་ཤངྐུའི་སྔོན་ནས་ཡོད་པ་ལྟར་སྣང་ལ་སྤྱིར་དཔེ་འདིའི་ཁུངས་གསལ་བ་ཡོད་ངེས་པས་བཙལ་བར་རིགས་སོ། ། གཉིས་པ་སྟོང་ཉིད་ཀྱི་མཐོང་བ་ལམ་དུ་སྒྲུབ་པ་ལ་གཉིས། ལུང་གིས་སྒྲུབ་པ་དང༌། རིགས་པས་སྒྲུབ་པའོ། །དང་པོ་ལུང་གིས་སྒྲུབ་པ་ལ་ཡང་གསུམ། རྩོད་པ་དགོད་པ། ལུང་གི་ལན་མདོར་བསྟན་པ། ཐེག་པ་ཆེན་པོ་བཀར་སྒྲུབ་པའོ། །དང་པོ་ནི།

Page: 801 ༄༅། །བདེན་པ་མཐོང་བས་གྲོལ་འགྱུར་གྱི། །སྟོང་ཉིད་མཐོང་བས་ཅི་ཞིག་བྱ། །ཞེས་པ་དང༌། གཉིས་པ་ནི། གང་ཕྱིར་ལུང་ལས་ལམ་འདི་ནི། །མེད་པར་བྱང་ཆུབ་མེད་པར་གསུངས། །ཞེས་པ་དང༌། གསུམ་པ་ནི། གལ་ཏེ་ཐེག་ཆེན་མ་གྲུབ་ན། །ཁྱོད་ཀྱི་ལུང་ནི་ཇི་ལྟར་གྲུབ། །གང་ཕྱིར་གཉིས་ཀ་ལ་འདི་གྲུབ། །དང་པོ་ཁྱོད་ལ་འདི་མ་གྲུབ། །རྐྱེན་གང་གིས་ནི་དེར་ཡིད་ཆེས། །དེ་ནི་ཐེག་ཆེན་ལ་ཡང་མཚུངས། །ངག་གང་མདོ་སྡེ་ལ་ འཇུག་དེ། །གལ་ཏེ་སངས་རྒྱས་གསུང་འདོད་ན། །ཐེག་ཆེན་ཕལ་ཆེར་ཁྱེད་ཅག་གི། མདོ་དང་མཚུངས་འདོད་མིན་ནམ་ཅི། །གལ་ཏེ་མ་བརྟགས་གཅིག་གིས་ནི། །ཐམས་ཅད་སྐྱོན་དང་བཅས་འགྱུར་ན། །མདོ་མཚུངས་གཅིག་ གིས་ཐམས་ཅད་ནི། །རྒྱལ་བས་གསུངས་པ་ཅིས་མ་ཡིན། །ངག་གང་འོད་སྲུང་ཆེན་པོ་ལ། །སོགས་པས་གཏིང་མ་དཔོགས་གྱུར་པ། །དེ་ནི་ཁྱོད་ཀྱིས་མ་རྟོགས་པས། །གཟུང་བྱ་མིན་པར་སུ་ཞིག་བྱེད། །དེ་ནི་ཐེག་ཆེན་ལ་ཡང་ མཚུངས། །གཞན་གཉིས་འདོད་པས་བདེན་ན་ནི། །རིག་བྱེད་སོགས་ཀྱང་བདེན་པར་འགྱུར། །ཐེག་ཆེན་རྩོད་བཅས་ཕྱིར་ཞེ་ན། །ལུང་ལ་མུ་སྟེགས་པ་རྣམས་དང༌། །ལུང་གཞན་ལ་ཡང་རང་གཞན་དག །རྩོད་བཅས་ ཡིན་ཕྱིར་དོར་བྱར་འགྱུར། །ཞེས་གསུངས་ཏེ། རྐང་པ་དང་པོ་དྲུག་གིས་མཚུངས་པ་བརྗོད། ངག་གང་སོགས་ཚིགས་བཅད་གཅིག་གིས་མདོ་སྡེ་ལ་འཇུག་པ་ལ་སོགས་པར་བསྒྲུབས། གལ་ཏེ་སོགས་ཚིགས་བཅད་ གཅིག་གིས་ལྡོག་ཚུལ་གྱིས་དགག་ནུས་ན་རྗེས་འགྲོའི་ཚུལ་གྱིས་སྒྲུབ་ནུས་པར་སྟོན། ངག་སོགས་རྐང་པ་ལྔས་རང་གིས་མ་རྟོགས་པ་གཞན་འགོག་བྱེད་ཀྱི་གཏན་ཚིགས་མ་ཡིན་པར་སྟོན། གཞན་སོགས་རྐང་པ་དྲུག་གིས་

Page: 802 གཉིས་ཀས་འདོད་པ་དང་རྩོད་བཅས་ཀྱི་རྟགས་ཀྱིས་དངོས་རྟགས་གང་དུ་ཡང་སྒྲུབ་མི་ནུས་པར་བསྟན་ཏོ། །གཉིས་པ་ནི། བསྟན་རྩ་དགེ་སློང་ཉིད་ཡིན་ན། །དགེ་སློང་ཉིད་ཀྱང་དཀའ་བར་གནས། །སེམས་ནི་དམིགས་དང་ བཅས་རྣམས་ཀྱི། །མྱ་ངན་འདས་པའང་དཀའ་བར་གནས། །ཉོན་མོངས་སྤངས་པས་གྲོལ་ན་དེའི། །དེ་མ་ཐག་ཏུ་དེར་འགྱུར་རོ། །ཉོན་མོངས་མེད་ཀྱང་དེ་དག་ལ། །ལས་ཀྱི་ནུས་པ་མཐོང་བ་ཡིན། །རེ་ཞིག་ཉེར་ལེན་ སྲེད་པ་ནི། །མེད་ཅེས་ངེས་པ་ཉིད་ཅེ་ན། །སྲེད་འདི་ཉོན་མོངས་ཅན་མིན་ཡང༌། །ཀུན་རྨོངས་བཞིན་དུ་ཅི་སྟེ་མེད། །ཚོར་བའི་རྐྱེན་གྱིས་སྲེད་པ་ཡིན། །ཚོར་བ་དེ་དག་ལ་ཡང་ཡོད། །དམིགས་པ་དང་ནི་བཅས་པའི་ སེམས། །འགའ་ཞིག་ལ་ནི་གནས་པར་འགྱུར། །སྟོང་ཉིད་དང་ནི་བྲལ་བའི་སེམས། །འགགས་པ་སླར་ཡང་སྐྱེ་འགྱུར་ཏེ། །འདུ་ཤེས་མེད་པའི་སྙོམས་འཇུག་བཞིན། །ཞེས་གསུངས་ཏེ། དང་པོས་སྟོང་ཉིད་མ་ རྟོགས་ན་དོན་དམ་གྱི་དགེ་སློང་དང་མྱང་འདས་མི་འཐོབ་པར་བསྟན། ཉོན་མོངས་སོགས་ཚིགས་བཅད་ཕྱེད་དང་གསུམ་གྱིས་དགྲ་བཅོམ་པ་རྣམས་ཀྱང་ལས་ལས་མ་གྲོལ་བར་བསྟན། དམིགས་པ་སོགས་རྐང་པ་ལྔས་ སྟོང་ཉིད་མ་རྟོགས་ན་སྐྱེ་བའི་རྒྱུན་མི་འཆད་པར་བསྟན་ཏོ། །གསུམ་པ་གཉི་གའི་བྱེད་པ་བསྡུ་བ་ནི། དེས་ན་སྟོང་ཉིད་བསྒོམ་པར་བྱ། །རྨོངས་པ་སྡུག་བསྔལ་ཅན་དོན་དུ། །ཆགས་དང་འཇིགས་མཐའ་ལས་གྲོལ་བར། ། འཁོར་བར་གནས་པ་འགྲུབ་འགྱུར་བ། །འདི་ནི་སྟོང་ཉིད་འབྲས་བུ་ཡིན། །དེ་བས་སྟོང་པ་ཉིད་ཕྱོགས་ལམ། །སུན་འབྱིན་པ་ནི་འཐད་མ་ཡིན། །དེས་ན་ཐེ་ཚོམ་མི་ཟ་བར། །སྟོང་པ་ཉིད་ནི་བསྒོམ་པར་བྱ། །

Page: 803 ༄༅། །ཉོན་མོངས་ཤེས་བྱའི་སྒྲིབ་པ་ཡི། །མུན་པའི་གཉེན་པོ་སྟོང་པ་ཉིད། །མྱུར་དུ་ཐམས་ཅད་མཁྱེན་འདོད་པས། །དེ་ནི་ཇི་ལྟར་སྒོམ་མི་བྱེད། །དངོས་གང་སྡུག་བསྔལ་སྐྱེད་བྱེད་པ། །དེ་ལ་སྐྲག་པ་སྐྱེ་འགྱུར་ མོད། །སྟོང་ཉིད་སྡུག་བསྔལ་ཞི་བྱེད་པ། །དེ་ལ་འཇིགས་པ་ཇི་ལྟར་སྐྱེ། །ཞེས་གསུངས་ཏེ། རྐང་པ་ལྔས་སྟོང་པ་ཉིད་བསྒོམས་པའི་འབྲས་བུ་བཤད། ཚིགས་བཅད་གཅིག་གིས་ཐེ་ཚོམ་སྤོང་བར་གདམས། ལྷག་མས་ ཤིན་ཏུ་སྒོམ་རིགས་པར་བསྟན་པའོ། །དེ་ཡང་ཉན་ཐོས་གྲུབ་མཐའ་པ་ན་རེ། བདེན་པ་བཞི་ལ་རྣམ་པ་བཅུ་དྲུག་ཏུ་མཐོང་བས་འཁོར་བ་ལས་གྲོལ་བར་འགྱུར་བ་ཡིན་གྱི་སྟོང་པ་ཉིད་མཐོང་བས་ཅི་ཞིག་བྱ་ཞེས་ཟེར་ན། གང་ གི་ཕྱིར་སྟོན་པ་ཉིད་ཀྱི་ལུང་ལས་སྟོང་ཉིད་མཐོང་བའི་ལམ་འདི་ནི་མེད་པར་གྱུར་ན་བྱང་ཆུབ་འཐོབ་པ་མེད་པར་གསུངས་ཏེ། རྒྱལ་བའི་ཡུམ་ལས། དངོས་པོའི་འདུ་ཤེས་ཅན་ལ་ཤེས་རབ་ཀྱི་ཕ་རོལ་ཏུ་ཕྱིན་པ་སྒོམ་པ་མེད་དོ། །ཏིང་ངེ་ འཛིན་དང་གཟུངས་ཀྱི་སྒོ་ཐམས་ཅད་དང༌། སྟོབས་དང༌། མི་འཇིགས་པ་དང༌། སོ་སོ་ཡང་དག་པར་རིག་པ་ནས་སངས་རྒྱས་ཀྱི་ཆོས་མ་འདྲེས་པ་སྒོམ་པའི་བར་དུ་མེད་དོ། །ཞེས་དང༌། མཉམ་པ་ཉིད་ལ་འཇུག་པའི་མདོ་ལས། འཇམ་ དཔལ་སྟོང་པ་ཉིད་ཡིད་ལ་བྱེད་པས་བྱང་ཆུབ་གསུམ་པོ་འཐོབ་པ་འདི་ནི་གནས་ཡོད་ཅིང་སྐབས་ཡོད་དོ། །དངོས་པོའི་འདུ་ཤེས་ཅན་གྱིས་བྱང་ཆུབ་གསུམ་འཐོབ་པ་འདི་ནི་གནས་མེད་ཅིང་སྐབས་མེད་དོ། །ཞེས་དང༌། རྒྱལ་བ་འདས་ དང་མ་བྱོན་ཕྱོགས་བཅུར་གང་བཞུགས་པ། །ཀུན་ལམ་ཕ་རོལ་ཕྱིན་པ་འདི་ཡིན་གཞན་མ་ཡིན། །ཞེས་སོགས་རྒྱ་ཆེར་གསུངས་པའི་ཕྱིར། དེ་ལ་ཉན་ཐོས་ཀྱི་འཕགས་པ་ཐེག་ཆེན་སྤོང་བ་ནི་མི་སྲིད་དེ་དགྲ་བཅོམ་པ་

Page: 804 གང་ཐེག་པ་ཆེན་པོ་འདི་ཐོས་ནས་མངོན་པར་དང་བར་མི་འགྱུར་བ་ནི་གནས་མ་ཡིན་ཞིང་སྐབས་མེད་པར་གསུངས་ལ། རྒྱུན་ཞུགས་ཀྱི་བར་ཡང་དེས་ཕྱོགས་མཚོན་ནུས་པའི་ཕྱིར། འདུ་ཤེས་ཉི་ཤུ་ལས་གང་ཡང་རུང་བ་ཐོབ་པ་བསམ་ གཏན་ལྷུར་བྱེད་པ་རྣམས་ཀྱང་ཐེག་ཆེན་སྤོང་བ་སྤྱིར་ཉུང་སྟེ། དེ་དག་ཀྱང་རང་རྒྱུད་ཀྱི་གནས་སྐབས་ལ་རྟོག་པ་ལྷུར་བྱེད་པ་མང་བའི་ཕྱིར། འོན་ཀྱང་བསམ་གཏན་བཞི་པའི་དངོས་གཞི་ཐོབ་ནས་འདུ་ཤེས་དང་ཚོར་བ་བཀག་པ་འདུ་ ཤེས་མེད་པའི་སྙོམས་འཇུག་ཐོབ་པ་ན་བདག་དགྲ་བཅོམ་ཐོབ་བོ་སྙམ་དུ་འཛིན་པ་དགྲ་བཅོམ་པར་མངོན་པའི་ང་རྒྱལ་ཅན་ཞེས་བྱ་བ་འདིས་ཐེག་ཆེན་སྤོང་བ་སྲིད་དེ། དཀོན་མཆོག་ཟ་མ་ཏོག་གི་མདོ་ལས་བཤད་པའི་ཕྱིར་དང༌། སྤྱིར་དྲང་སྲོང་མངོན་ཤེས་ལྔ་ལྡན་གྱིས་སྔོན་གནས་རྗེས་སུ་དྲན་པའི་མངོན་ཤེས་ཀྱིས་སྐྱེ་བ་སྔ་མ་ལྔ་བརྒྱ་མཐོང༌། དེ་ཕན་མ་མཐོང་བས་དེ་ཕན་བདག་མེད་དོ་ཞེས་སོགས་སྐྱེ་བ་སྔ་ཕྱི་གྲངས་ཅན་གྱི་ལོག་པའི་གྲུབ་མཐའ་བྱུང་བའི་ཕྱིར་རོ། ། དེས་ན་གཙོ་བོར་ཉན་ཐོས་རྟོག་གེ་པ་སྡེ་སྣོད་གསུམ་ལས་གང་ཡང་རུང་བའི་ཚིག་ཙམ་འཛིན་ཞིང་དེ་ལ་རིག་གྲོལ་གྱི་སྤོབས་པར་རློམ་པས་ཁེངས་པ་པཎྜི་ཏ་ལ་སོགས་པར་གྲགས་ཤིང་ཁས་འཆེ་བ་དག་ནི་སངས་རྒྱས་ཀྱི་ཆེས་བསམ་ གྱིས་མི་ཁྱབ་པ་མི་ཤེས་པར་རང་གི་ཤེས་པའི་སྦྲང་མའི་འདོམ་ལྟ་བུས་ཆོས་ཀྱི་ནམ་མཁའ་མཐའ་ཡས་པའི་ཚད་འཛིན་ཞིང་ཟིན་པར་རློམ་སྟེ། དེ་དང་མ་མཐུན་ནོ་ཅོག་ཆོས་མིན་པར་སྨྲ་ཞིང་ཁོང་ཁྲོ་བས་གཤེ་ཞིང་སྤོང་བར་བྱེད་དེ། སྤྲིན་ཆེན་ པོ་དང་རྔ་བོ་ཆེ་ལ་སོགས་ལས་རྒྱ་གར་གྱི་ཡུལ་དབུས་དང༌། ནུབ་ཕྱོགས་དང༌། ཤར་ཕྱོགས་ལ་སོགས་པར་ཐེག་ཆེན་སྤོང་བ་ཉན་ཐོས་པར་ཁས་འཆེ་བ་འདི་སྙེད་རེ་འབྱུང་ཞིང་དེ་ཐམས་ཅད་ཆོས་སྤངས་པའི་སྒྲིབ་པས་ངན་འགྲོ་མཐའ་ཡས་པར་

Page: 805 ༄༅། །གཞོལ་བར་ལུང་བསྟན་པ་ལྟ་བུ་དང༌། བོད་ཡུལ་འདིར་ཡང་མཐའ་བཞི་བསལ་བའི་ལྟ་བ་ལ་ཡོད་མིན་མེད་མིན་པ་ཞེས་འགོག་པ་དང༌། བློ་བྲལ་ཡིད་ལ་མི་བྱེད་པའི་སྒོམ་པ་ལ་རྒྱ་ནག་ཧ་ཤང་གི་ལུགས་ཞེས་འདོར་ བ་དང༌། རྣམ་རྟོག་གི་རང་བཞིན་ཆོས་ཉིད་དུ་བསྟན་པ་དང་བླང་དོར་མེད་པར་བསྟན་པ་སོགས་ལ་ལོག་པའི་ཆོས་ཚད་མེད་པར་འཛིན་པ་པོ་སྨྲ་བའི་ཉི་མར་རློམ་པ་མཐའ་ཡས་པར་བྱུང་ཞིང་རྗེས་འབྲངས་རྣམས་ཀྱིས་ཀྱང་ད་ལྟའི་བར་དུའང་དེའི་ ཆོས་སྤོང་གི་རྡོ་རྟའི་ངག་སྒྲོས་རྒྱ་ཆེར་སྤེལ་ཞིང་ས་འོག་གི་སྒོ་འབྱེད་པར་སྣང་བའི་ཕྱིར། དེས་ན་དེ་ལྟ་བུའི་སྐལ་ངན་ཤིང་སྲིན་ལྟ་བུ་དག་ན་རེ། ཐེག་པ་ཆེན་པོ་བྱ་བ་མེད་དེ། ཤཱ་རིའི་བུ་ལ་སོགས་པ་སྟོན་པའི་དངོས་ཀྱི་འཁོར་རྣམས་ ཀྱིས་མ་ཐོས་པའི་ཕྱིར། གལ་ཏེ་ཐོས་ན་བདག་ཅག་ཉན་ཐོས་རྣམས་ལ་འོང་རིགས་པ་ལས་མ་བྱུང་བའི་ཕྱིར་དང༌། མདོ་སྡེ་ལ་འཇུགའདུལ་བ་ལ་སྣང༌། ཆོས་ཉིད་དང་མི་འགལ་ན་བཀར་གསུངས་པ་ལས་ཐེག་ཆེན་ནི་དེ་ལྟ་བུ་མ་ཡིན་ པའི་ཕྱིར་ཏེ། ངེད་ཀྱི་མདོ་སྡེ་ལ་མི་འཇུག་པ་ལ་སོགས་པའི་ཕྱིར་ཞེས་ཟེར་རོ། །དེ་ལ་སྨྲས་པ། གལ་ཏེ་ཐེག་ཆེན་བཀའ་ཡིན་པར་མ་གྲུབ་ན། ཉན་ཐོས་པ་ཁྱོད་ཀྱི་ལུང་སྡེ་སྣོད་གསུམ་ནི་བཀའ་ཡིན་པར་ཇི་ལྟར་གྲུབ་ཅེས་དྲིའོ། ། གང་གི་ཕྱིར་ཡུ་བུ་གཉི་ག་ལ་འདི་གྲགས་ཤིང་གྲུབ་པས་སོ་ཞེ་ན། ཅི་ཁྱོད་ཀྱིས་ཐོག་མ་མེད་པ་ནས་འདི་བཀར་ཡིད་ཆེས་པ་ཡིན་ནམ། ཕྱིས་དགེ་བའི་བཤེས་གཉེན་གྱི་མཐུས་བཀར་ཤེས་པ་ཡིན། དང་པོ་ལྟར་ནི་མ་ཡིན་ཏེ། ཁྱོད་ བྱིས་པ་སྐྱེས་མ་ཐག་པ་ཤེད་མ་བྱེ་བའི་དུས་དང་གྲུབ་མཐའ་ལ་མ་ཞུགས་པས་བཀའི་ཐ་སྙད་ལ་ཡང་རྨོངས་པའི་ཁྱིམ་པའི་དུས་ན་འདི་བཀའ་ཡིན་པར་ཁྱོད་ལ་མ་གྲུབ་པའི་ཕྱིར། དགེ་བའི་བཤེས་གཉེན་ལ་སོགས་པའི་རྐྱེན་གང་

Page: 806 གིས་ནི་སྟོན་པ་སངས་རྒྱས་དང༌། བསྟན་པ་དམ་ཆོས་དང༌། འདྲེན་པ་དགེ་འདུན་ལ་དེ་དང་དེར་ཡིད་ཆེས་པ་ཡིན་ན་ནི་འདི་ཐེག་ཆེན་ལ་ཡང་མཚུངས་ཏེ། ཐེག་ཆེན་གྱི་དགེ་བའི་བཤེས་གཉེན་དང༌། ཟབ་རྒྱས་ཀྱི་སྡེ་སྣོད་ཀྱི་རྐྱེན་ལས་ཆོས་གཟུགས་ ཀྱི་སྐུ་བསམ་གྱིས་མི་ཁྱབ་པ་དང་ཐེག་ཆེན་གྱི་སྡེ་སྣོད་མཐའ་ཡས་པ་དང་བྱང་ཆུབ་སེམས་དཔའི་དགེ་འདུན་རྨད་དུ་བྱུང་བ་ལ་ཡིད་ཆེས་སྐྱེ་བའི་ཕྱིར་རོ། །ཤཱ་རིའི་བུ་སོགས་ཉན་ཐོས་ཆེན་པོ་རྣམས་ཀྱིས་མ་གསན་པ་ཡང་མ་ཡིན་ཏེ། ཐེག་ཆེན་གྱི་མདོ་ཆེན་པོ་རྣམས་ཀྱི་གླེང་གཞིར་དེ་དག་གི་མཚན་སྨོས་ཤིང་བྱངཆུབ་སེམས་དཔའ་ཆེན་པོ་རྣམས་དང་དེ་དག་དྲིས་ལན་གྱིས་ཆོས་གཏན་ལ་ཕབ་པའི་ཕྱིར། ཐེག་ཆེན་གྱི་སྣོད་དུ་མ་གྱུར་པའི་ཉན་ཐོས་ཕྱོགས་རེ་བས་མ་ཐོས་ ཤིང་མ་མྱོང་བ་ནི་ཐེག་ཆེན་མེད་པར་སྒྲུབ་པའི་རྟགས་ཡང་དག་ཏུ་མི་འགྱུར་ཏེ། པདྨ་ལས་བུང་བས་སྦྲང་རྩི་བླངས་པ་མི་སྲིད་དེ། པདྨ་ལ་སྦྲང་རྩི་ཡོད་ན་པདྨའི་རྩ་བར་རྟག་ཏུ་ཞེན་པའི་སྲིན་བུ་དང་སྦལ་པ་དག་གིས་མྱོང་དགོས་པ་ལས་མ་མྱོང་བའི་ཕྱིར་ཞེས་པ་དང་ཁྱད་པར་ཅི་ཡོད། ངག་གང་མདོ་སྡེ་ལ་འཇུགའདུལ་བ་ལ་སྣང༌། ཆོས་ཉིད་དང་མི་འགལ་བའི་ཚིག་དེ། གལ་ཏེ་སངས་རྒྱས་ཀྱི་གསུང་ཡིན་པར་འདོད་མོད། འོ་ན་ཉན་ཐོས་ཀྱི་སྡེ་སྣོད་གསུམ་པོ་དེ་ཡང་བཀའ་མ་ཡིན་པར་འགྱུར་ཏེ་ཐེག་ཆེན་གྱི་མདོ་སྡེ་ལ་མི་ འཇུགའདུལ་བ་ལ་མི་སྣང༌། ཆོས་ཉིད་དང་འགལ་བའི་ཕྱིར། སྐྱོན་མེད་དེ་ཉན་ཐོས་ཉིད་ཀྱི་མདོ་སྡེ་ལ་འཇུག་པ་ལ་སོགས་པའི་ཕྱིར་སྙམ་ན། འོ་ན་ཐེག་ཆེན་གྱི་ཆོས་ཀྱང་ཐེག་ཆེན་ཉིད་ཀྱི་མདོ་སྡེ་ལ་འཇུག་པ་ལ་སོགས་པས་བཀར་ ཅིས་སྒྲུབ་མི་ནུས། དེས་ན་ཐེག་ཆེན་ཕལ་ཆེར་ཡང་ཁྱོད་ཅག་གི་མདོ་དང་མཚུངས་ཏེ་གནས་སྐབས་དེ་དང་དེར་གསུངས་པའི་བཀའ་ཡིན་པར་ཅིས་མི་འདོད། འདིར་མ་ཡིན་ནམ་ཞེས་འདྲི་ཚིག་ལྟ་བུར་བསྒྱུར་བ་ནི་འགྱུར་

Page: 807 ༄༅། །ནུས་པ་ཆུང་སྟེ་ཅིས་མི་འདོད་ཅེས་ཁྱོད་ཀྱང་མི་འདོད་བཞིན་དུ་ཁས་ལེན་དགོས་པར་འགྱུར་རོ་ཞེས་པའི་དོན་དུ་འཆད་དོ། །གལ་ཏེ་བདག་ཅག་གི་མདོ་ནི་མི་རྟག་པ་སོགས་སྟོན་ལ། ཐེག་ཆེན་ནི་སྟོང་ཉིད་སྟོན་ པས་བཀའ་མ་ཡིན་ནོ་ཞེ་ན། རྣམ་པར་མ་བརྟགས་པའམ་རྒྱུ་མཚན་མི་མཚུངས་པ་གཅིག་གིས་ནི་གཞུང་ལུགས་དེ་ཐམས་ཅད་སྐྱོན་དང་བཅས་པར་སྒྲུབ་ནུས་པར་འགྱུར་ན། ཐེག་ཆེན་གྱི་མདོ་ཆོས་ཅན། བཀའ་མ་ཡིན་ཏེ། ཉན་ཐོས་ཀྱི་ མདོ་ལྟར་མི་རྟག་པ་མ་བསྟན་པའི་ཕྱིར། ཞེས་སྒྲུབ་ངག་བཀོད་པར་འགྱུར་ལ། འདི་ལ་རྟགས་ཀྱང་མི་འགྲུབ་མོད་ཀྱང་རེ་ཞིག་ལྡོག་པའི་མཚུངས་པ་བསྒྲེས་ཏེ། འོ་ན་ཐེག་ཆེན་གྱི་མདོ་ཆོས་ཅན། བཀའ་ཡིན་ཏེ། ཉན་ཐོས་ ཀྱི་མདོ་དང་མཚུངས་པར་བདེན་བཞི་དང་བྱང་ཕྱོགས་སོ་བདུན་བསྟན་པའི་ཕྱིར། ཞེས་ཁྱེད་ཅག་གི་མདོ་དང་མཚུངས་པའི་རིགས་པ་གཅིག་གིས་ཐེག་ཆེན་གྱི་མདོ་ཐམས་ཅད་ནི་རྒྱལ་བས་གསུངས་པར་ཡང་སྒྲུབ་ནུས་པ་ཅིས་མ་ཡིན། དེས་ན་དགོངས། ལྡེམ་དགོངས་རྣམ་པ་མཐའ་ཡས་པའི་དོན་ཅན་གྱི་ཐེག་པ་ཆེན་པོའི་ངག་གང་དག་འོད་སྲུང་ཆེན་པོ་དང༌། ཤཱ་རིའི་བུ་ལ་སོགས་པ་དག་གིས་ཀྱང་གཏིང་དཔོགས་པར་མ་གྱུར་ལ། ཤཱ་རིའི་བུ་ལ་ཟབ་མོའི་གནས་མཐའ་ དག་དྲིས་པ་ན་སྤོབས་པ་གཏུགས་པས་ལན་གྱིས་བཀལ་བའི་ཚེ་ཅི་ཁྱོད་དེ་བཞིན་གཤེགས་པས་ཤེས་རབ་ཅན་གྱི་མཆོག་དུ་ལུང་མ་བསྟན་ནམ། ཉན་ཐོས་ཕྱོགས་གཅིག་པའི་ཤེས་པ་དང་ལྡན་པ་རྣམས་ཀྱི་དབང་དུ་མཛད་ནས་ བདག་ཤེས་རབ་ཅན་གྱི་མཆོག་ཏུ་བསྟན་གྱི་བྱང་ཆུབ་སེམས་དཔའ་བསམ་གྱིས་མི་ཁྱབ་པའི་ཤེས་པ་དང་ལྡན་པ་རྣམས་ཀྱི་དབང་དུ་མཛད་ནས་ནི་མ་ཡིན་ནོ་ཞེས་ལན་འདེབས་ཤིང༌། བུ་མོ་ཟླ་མཆོག་དང༌། བུད་མེད་འགྱུར་བ་དང༌། དྲི་མ་མེད་

Page: 808 པར་གྲགས་པ་སོགས་ཀྱི་སྤོབས་པས་ཉན་ཐོས་ཆེན་པོ་རྣམས་ཟིལ་གྱིས་ནོན་པར་བསྟན་པའི་ཕྱིར། དེ་ལྟ་བུའི་བསམ་གྱི་མི་ཁྱབ་པའི་དོན་ཅན་དེ་ནི་ཁྱེད་ཅག་རྟོག་གེ་ཕྱོགས་གཅིག་པའི་ཤེས་པ་ཅན་གྱིས་མ་རྟོགས་པ་རྒྱུ་མཚན་ དུ་བྱས་ནས་ཐེག་པ་ཆེན་པོ་ཚད་མར་བཟུང་བྱ་མིན་པར་ཅིའི་ཕྱིར་བྱེད། གལ་ཏེ་ཁ་ཅིག་གིས་མ་ཤེས་པ་ལས་ཡང་དག་མིན་པར་སྒྲུབ་ནུས་ན་དེ་ནི་ཐེག་དམན་ལ་ཡང་མཚུངས་ཏེ་བ་ལང་གིས་མ་རྟོགས་པའི་ཕྱིར། གཞན་ཡང་ ཁྱོད་ཀྱིས། གང་ཕྱིར་གཉིས་ཀ་ལ་འདི་གྲུབ། །ཅེས་ལན་བཏབ་པ་འདི་ཡང་རྗེས་འགྲོའི་ཚུལ་ཡང་མ་ངེས་པ་ཡིན་ཏེ། གལ་ཏེ་རྒོལ་བ་རང་གཞན་གཉི་གས་རེ་ཞིག་གྲུབ་པར་འདོད་པས་བདེན་པ་ཡིན་ན་ནི་རིག་བྱེད་བཞི་སོགས་ཀྱང་ བདེན་པར་ཁས་བླང་བྱར་འགྱུར་ཏེ་ཕྱི་ནང་གཉིས་ཀས་རེ་ཞིག་ཁས་ལེན་པའི་ཕྱིར། གལ་ཏེ་མི་མཚུངས་ཏེ་ཐེག་ཆེན་ནི་བཀའ་ཡིན་མིན་རྩོད་པ་དང་བཅས་པའི་ཕྱིར་ཞེ་ན། འོ་ན་ཐེག་དམན་གྱི་ལུང་ལ་ཡང༌། ཀྱེ་མ་མང་ཐོས་ གང་སྨྲ་བ། །དེ་ནི་སྤྱང་ཀིའི་རྗེས་བཞིན་ནོ། །ཞེས་སོགས་ཀྱིས་ཕྱི་རོལ་གྱི་མུ་སྟེགས་པ་རྣམས་དང་རྩོད་བཅས་ཡིན་ཞིང༌། སངས་རྒྱས་པའི་ལུང་གཞན་ལ་ཡང་རང་སྡེ་གཞི་ཐམས་ཅད་ཡོད་པར་སྨྲ་བ་དང༌། གཞན་མང་བཀུར་ བ་ལ་སོགས་པ་སྡེ་པ་བཅོ་བརྒྱད་པོ་དག་རྩོད་པ་དང་བཅས་པ་ཡིན་པའི་ཕྱིར་ཐེག་དམན་གྱི་ལུང་ཡང་དོར་བྱར་ཐལ་བར་འགྱུར་རོ། །ངག་གང་སོགས་ཀྱི་ཤླཽ་ཀ་འདི་མ་འབྲེལ་བས་སློབ་དཔོན་གྱི་གསུང་མིན་ནོ་ཞེས་འགྲེལ་ཆེན་མཁན་པོ་ དང་བི་བྷཱུ་ཏིས་འཆད་ལ། དགེ་ལྷ་དང་དཱ་ན་ཤྲིས་འང་འདི་སྒྲུབ་པ་ལྷུར་བྱེད་ཀྱི་གཞུང་ཡིན་པས་འབྲེལ་མ་རྩིས་པར་གསུངས་སོ་ཞེས་འཆད་མོད། འདི་ལ་མ་འབྲེལ་བའི་སྐྱོན་ཅི་ཡང་མེད་དེ། ཐེག་ཆེན་གྱི་དོན་ནི་བསམ་གྱིས་མི་ཁྱབ་སྟེ་

Page: 809 ༄༅། །སྔོན་འོད་སྲུང་ཆེན་པོ་ལ་སོགས་པས་གཏིང་དཔོགས་པར་མ་ནུས་པ་དེ་ཁྱེད་ཅག་གིས་ག་ལ་དཔོགས་ཞེས་ཐེག་ཆེན་གྱི་རང་གཞུང་ཚད་མར་མཛད་དེ་ལན་བཏབ་པའི་ཕྱིར། གལ་ཏེ་འདི་སློབ་དཔོན་གྱི་གསུང་མིན་ ན་ཤླཽ་ཀ་ཞེས་པ་རྒྱ་ཆུངས་ཏེ། དེ་ནི་ཐེག་དམན་ལ་ཡང་མཚུངས། །ཞེས་པའི་རྐང་པ་འདི་ཡང་བརྗོད་བྱས་སྟོང་པའི་ཕྱིར་རོ་ཞེས་བདག་ཁོ་ན་སེམས་སོ། །དེ་ལྟ་མོད་ཀྱི་བོད་ཀྱི་ཡུལ་འདི་ན་ནི་ཉན་ཐོས་པར་ཁས་བླངས་པས་ཐེག་ཆེན་ འགོག་པར་མི་བྱེད་ཀྱི་ཐེག་ཆེན་པར་ཁས་བླངས་པ་ཁོ་ནས་ཐེག་པ་ཆེན་པོའི་ཟབ་གནད་རྣམས་འགོག་པར་བྱེད་ལ། །དེ་ལྟར་ཆོས་སྤོང་གི་སྲོལ་ཆེན་པོ་གསར་དུ་ཕྱེ་བ་ལ་ཆོས་དང་ཆོས་མ་ཡིན་པ་རྣམ་པར་ཕྱེའོ་ཞེས་སྒྲོག་པ་འདི་ནི་ཐར་འདོད་ལ་ གཡང་ས་ཆེན་པོ་ཞིག་སྣང་ངོ༌། །འདི་དག་ཏུ་དགེ་བའི་ལྷས་ནི། དང་པོ་ཁྱོད་ལ་འདི་མི་འགྲུབ། །ཅེས་པ་ཐེག་ཆེན་མེད་པར་འཚང་རྒྱ་བར་མི་འགྱུར་ལ། དེ་མེད་པར་ཁྱོད་ཀྱི་ལུང་གྲུབ་པ་ཡང་མ་ཡིན་ནོ་ཞེས་བཤད་ལ། དཀའ་འགྲེལ་ ཆུང་ངུར། བདེན་པ་སྟེ་ཡང་དག་པར་ཡོད་པའི་དངོས་པོ་མཐོང་བས་གྲོལ་བར་འགྱུར་གྱི་ཅི་ཡང་མ་གྲུབ་པ་མཐོང་བས་ནི་མ་ཡིན་ནོ་ཞེས་ཕྱོགས་སྔ་བཀོད་ཅིང༌། ཤེར་ལེའི་དཀའ་འགྲེལ་ཆུང་ངུ་ལས་ནི། གཉི་ག་ལ་ཞེས་པ་ནི་རྒོལ་བ་ དང་ཕྱིར་རྒོལ་བ་གཉིས་ཀ་ལ་གྲུབ་པའོ། །དང་པོ་ཁྱོད་ལ་འདི་མ་གྲུབ་ཅེས་པ་ནི་ཁས་བླངས་པའི་སྔོན་རོལ་དུ་མ་གྲུབ་པ་སྟེ་ཞེས་འབྲུ་གཉེར་ཏོ། །ས་བཟང་པས་ནི། ཐེག་དམན་ནི་ཐེག་ཆེན་ཐེག་དམན་གྱི་གང་ཟག་གཉི་གས་བཀར་འདོད་ པས་བཀའ་ཡིན་ལ། ཐེག་ཆེན་ནི་ངེད་ཉན་ཐོས་པས་བཀར་མི་འདོད་པའི་ཕྱིར་བཀའ་མ་ཡིན་ནོ་ཞེ་ན། འོ་ན་ཐེག་དམན་གྱི་ལུང་ལ་ཡང་དང་པོར་གཞན་ཡིད་ཆེས་མ་ཞུགས་པའི་དུས་ན་བཀའ་ཡིན་པར་མ་གྲུབ་པར་འགྱུར་རོ་ཞེས་བཤད་སྣང་ངོ༌། །

Page: 810 བཅོམ་ལྡན་འདས་བྱམས་པས། མདོ་སྡེ་རྒྱན་ལས། ཐེག་ཆེན་བཀར་སྒྲུབ་ཚུལ་ཡང་ཞར་ལ་བཤད་པར་བྱ་སྟེ། དེ་ལ་ཐེག་ཆེན་སྤོང་བ་པོ་ནི་རང་བཞིན་གྱིས་དབང་པོ་དམན་པ་དང༌། སྡིག་གྲོགས་ཀྱིས་ཟིན་པ་སྟེ། དམན་པར་མོས་ཤིང་ ཁམས་ཀྱང་ཤིན་ཏུ་དམན། །གྲོགས་པོ་དམན་པ་དག་གིས་ཡོངས་བསྐོར་བ། །ཟབ་ཅིང་རྒྱ་ཆེ་ལེགས་པར་བཤད་པའི་ཆོས། །འདི་ལ་གལ་ཏེ་མོས་མེད་གྲུབ་པ་ཡིན། །ཞེས་སོ། །སྤོང་ཚུལ་ནི། ཉན་ཐོས་ཀྱི་ཐེག་པ་ལས་དགྲ་ བཅོམ་ཐོབ་པ་མང་ཆེས་པས་བདུད་ཀྱིས་ཐེག་པ་ཆེན་པོ་འཁོར་བ་མ་སྟོངས་ཀྱི་བར་དུ་གཞན་དོན་དུ་འཁོར་བར་གནས་དགོས་པར་བསྟན་པས་ཐམས་ཅད་དེ་ལ་ཞུགས་ཏེ་དགྲ་བཅོམ་ཐོབ་པ་ཉུང་ངུར་གྱུར་པས་ན་ཐར་པའི་བར་ཆད་དུ་ བསྟན་ཏོ། །ཞེས་ཟེར་རོ། །ཡང་ཁ་ཅིག་གིས་ཐེག་ཆེན་འདི་རྟོག་གེ་པས་བསྟན་པ་ལ་བཞད་གད་བྱ་བའི་ཕྱིར་སྦྱར་བ་ཡིན་ཏེ་རྟོག་གེ་རྒྱང་འཕེན་གྱི་གཞུང་ལས་ཀྱང་ཅི་ཡང་མེད་པར་སྟོན་ལ། འདི་ལས་ཀྱང་གཟུགས་ནས་རྣམ་མཁྱེན་གྱི་ བར་དུ་མེད་པར་སྟོན་པའི་ཕྱིར། བཀའི་མཚན་ཉིད་ནི། འཁོར་བའི་གཉེན་པོར་གྱུར་ཅིང་ལྟ་བ་ཕྱིན་ཅི་མ་ལོག་པ་སྟོན་པ་ཡིན་ལ། འདིས་འཁོར་བའི་གཉེན་པོ་མི་བྱེད་དེ། འཁོར་བར་ཡུན་རིང་དུ་གནས་དགོས་པར་སྟོན་པའི་ཕྱིར། ལྟ་བ་ཕྱིན་ཅི་ལོག་སྟེ་མེད་པར་སྟོན་པའི་ཕྱིར། དེས་ན་བཀའ་མ་ཡིན་ནོ་ཞེས་ཟེར་རོ། །དེ་ལ་རིགས་པ་བདུན་གྱིས་ལོག་རྟོག་ཟློག་པར་མཛད་དེ། སྔར་ལུང་མ་བསྟན་ལྷན་ཅིག་བྱུང༌། །སྤྱོད་ཡུལ་མ་ཡིན་གྲུབ་པ་དང༌། ། ཡོད་དང་མེད་ན་ཡོད་མེད་དང༌། །གཉེན་པོ་དང་ནི་སྒྲ་གཞན་ཕྱིར། །ཞེས་སོ། །དེ་ཡང་བདུད་ཀྱི་སྦྱར་བ་མ་ཡིན་ཏེ། གལ་ཏེ་ཡིན་ན་སངས་རྒྱས་འོད་སྲུང་གིས་ཀྲི་ཀིའི་རྨི་ལམ་ལུང་བསྟན་པ་ལྟར་ཐེག་པ་ཆེན་པོ་བྱ་བ་བདུད་ཀྱིས་བྱས་

Page: 811 ༄༅། །པ་འབྱུང་ངོ༌། །ཞེས་ལུང་སྟོན་རིགས་པ་ལས་དེ་ལྟར་མ་བསྟན་པའི་ཕྱིར། གལ་ཏེ་མ་མཁྱེན་པས་སམ་ཆེད་ཆུང་ངུར་མཛད་པའམ་མ་འོངས་པའི་དུས་ཀྱིས་བསྐལ་བས་མ་གཟིགས་ཏེ་ལུང་མ་བསྟན་ཏོ་སྙམ་ན་དེ་ མི་རིགས་ཏེ། ཤེས་བྱ་ཐམས་ཅད་ལ་མངོན་སུམ་གྱི་སྤྱན་མངའ་བའི་ཕྱིར་དང༌། སངས་རྒྱས་ཀྱི་བསྟན་པ་ལས་བླ་ལྷག་པའི་བྱ་བ་མེད་པས་དེ་ལ་གནད་པ་གནོད་ཆེན་པོ་བཏང་སྙོམས་སུ་བཞག་མི་རུང་བ་དང༌། འདས་པ་དང་མ་འོངས་པའི་དུས་ལ་ཡེ་ ཤེས་སྒྲིབ་པ་མི་མངའ་བའི་ཕྱིར་ཏེ། སངས་རྒྱས་རྣམས་ནི་མངོན་སུམ་སྤྱན། །བསྟན་པ་དག་ཀྱང་སྲུང་བར་མཛད། །དུས་ལའང་ཡེ་ཤེས་མ་བསྒྲིབས་པས། །དེ་ཕྱིར་བཏང་སྙོམས་མི་རུང་ངོ༌། །ཞེས་སོ། །གཞན་ཡང་བར་ ཆད་ཡིན་ན་བར་དུ་བཅད་བྱའི་ཆོས་སྔར་བྱུང་བའི་རྗེས་སུ་གཅོད་བྱེད་ཀྱི་ཆོས་འབྱུང་དགོས་པ་ལས་ཐེག་ཆེན་ཐེག་དམན་ནི་དུས་མཉམ་པར་ལྷན་ཅིག་ཏུ་འབྱུང་བ་ཡིན་པས་དེ་ལ་བཅད་བྱ་གཅོད་བྱེད་དུ་ཇི་ལྟར་བཞག །འདི་ནི་ཐེག་དམན་ པ་ཧ་ཅང་མི་སྐྲག་པར་བྱ་བ་དང་བཀྲི་བའི་ཕྱིར་གསུངས་པ་སྟེ། ཡང་དག་པར་ཐེག་དམན་ནི་བསྟན་པ་འདི་ལ་ལྔ་སྡེ་ལ་གསུངས་པ་དང་པོར་ཟད་ལ། ཐེག་ཆེན་ནི་དགའ་ལྡན་ནས་འཕོ་ཁར་ཆོས་སྣང་བའི་སྒོ་བརྒྱ་རྩ་བརྒྱད་བསྟན་པ་ནས་སངས་ རྒྱས་པའི་ཚེ་སངས་རྒྱས་ཕལ་པོ་ཆེ་གསུངས་པ་སོགས་འཁོར་ལོ་དང་པོའི་སྔོན་དུ་བསྟན་པའི་ཆོས་ཀྱི་ཕུང་པོ་ཡང་མཐའ་ཡས་སོ། །རྟོག་གེ་པས་སྦྱར་བ་མ་ཡིན་ཏེ། རྟོག་གེ་ནི་བྱིས་པ་ལ་བརྟེན་པ་དང་སྙིང་པོ་མེད་པས་མ་ངེས་པ་དང་ཡང་ དག་པའི་དོན་ལ་མ་ཁྱབ་པ་དང་ཀུན་རྫོབ་སྟོན་པ་ཡིན་ཏེ། རྟོག་གེ་བརྟེན་ཞིང་མ་ངེས་ལ། །མ་ཁྱབ་ཀུན་རྫོབ་སྐྱོ་བ་ཅན། །བྱིས་པ་ལ་ནི་བརྟེན་པར་འདོད། །དེ་ཕྱིར་འདི་ནི་དེའི་ཡུལ་མིན། །ཞེས་ཟབ་ཅིང་རྒྱ་ཆེ་བའི་གནས་

Page: 812 འདི་ལྟ་བུ་རྟོག་གེ་པའི་སྤྱོད་ཡུལ་མ་ཡིན་པའི་ཕྱིར། རྟོག་གེ་པ་གཞན་གྱི་ཡུལ་མ་ཡིན་ཡང་དྲང་སྲོང་སེར་སྐྱ་ལ་སོགས་པ་ཐམས་ཅད་མཁྱེན་པར་གྱུར་ཏེ་སངས་རྒྱས་པའི་རྟོག་གེ་པ་ཁྱད་པར་ཅན་ཞེས་བྱ་བས་བྱས་སོ་ཞེས་དང༌། ཡང་བཅོམ་ལྡན་འདས་ ལས་གཞན་པའི་སངས་རྒྱས་ཞིག་གིས་བསྟན་ཏོ་ཟེར་ན། འོ་ན་ཐེག་ཆེན་བཀའ་ཡིན་པར་གྲུབ་སྟེ། སངས་རྒྱས་འོད་སྲུང་གི་བཀའ་དང་སངས་རྒྱས་ཤཱཀྱ་ཐུབ་པའི་བཀའ་བཀའ་ཡིན་པར་མཚུངས་པ་བཞིན་ནོ། །དེ་ལྟ་མོད་ཀྱི་ཞིང་གཅིག་ཏུ་ སྟོན་པ་གཉིས་པ་མི་འབྱུང་བར་ཐེག་དམན་གྱི་མདོ་ལས་ཀྱང་བཤད་པས་ཁྱོད་ཉིད་ཀྱིས་མདོ་དང་འགལ་བ་ཁས་བླངས་པར་འགྱུར་ཏེ། སེར་སྐྱ་སངས་རྒྱས་པའི་བཀའ་དང་སྟོན་པ་ལས་གཞན་པའི་སངས་རྒྱས་ད་ལྟར་ཞིང་འདི་ཉིད་དུ་བྱུང་ བར་ཁས་བླངས་པའི་ཕྱིར། ཡང་ཐེག་པ་ཆེན་པོ་ཅིག་ཡོད་དམ་མེད། ཡོད་ན་འདི་ཁོ་ན་ཡིན་པར་རིགས་ཏེ་འདི་ལས་གཞན་ཡོད་ན་སྣང་དུ་རུང་བ་ལས་གཞན་མ་དམིགས་པའི་ཕྱིར། གལ་ཏེ་མེད་ན་སངས་རྒྱས་འཐོབ་ བྱེད་ཀྱི་ཐབས་མེད་པར་འགྱུར་ལ། དེ་ལྟ་ན་སངས་རྒྱས་མི་སྲིད་པས་ཐེག་དམན་ཡང་སངས་རྒྱས་ཀྱི་བཀའ་མ་ཡིན་པར་འགྱུར་རོ། །གལ་ཏེ་ཉན་ཐོས་ཀྱི་ཐེག་པ་འདི་ཉིད་ཐེག་པ་ཆེན་པོ་ཡིན་ནོ་ཞེ་ན། ཉན་ཐོས་ཀྱི་ཐེག་པ་འདི་ནི་སངས་ རྒྱས་སྒྲུབ་པའི་ཐབས་ཀྱི་ཐེག་ཆེན་མིན་ཏེ་ཕ་རོལ་ཏུ་ཕྱིན་པ་བཅུ་མ་ཚང་བ་དང༌། རང་དོན་ཉི་ཚེ་ཙམ་སྒྲུབ་པས་བྱང་ཆུབ་ཆེན་པོའི་ལམ་དང་འགལ་བ་དང་རྫོགས་སྨིན་སྦྱོང་བའི་ཐབས་མིན་པའི་ཕྱིར་ཏེ། མ་ཚང་བ་དང་འགལ་བ་དང༌། ། ཐབས་མིན་དེ་ལྟར་མ་བསྟན་ཕྱིར། །ཉན་ཐོས་ཀྱི་ནི་ཐེག་པ་འདི། །ཐེག་ཆེན་ཆོས་ཞེས་བྱ་བ་མིན། །ཞེས་སོ། །དེས་ན་ཉན་རང་གི་ཐེག་པ་འདི་ནི་བསམ་པ་དམན་པ་རང་དོན་ཉི་ཚེ་བ་ལ་སེམས་པ་དང༌། བསྟན་པ་དམན་པ་འཁོར་

Page: 813 ༄༅། །བ་ལས་ཐར་ཐབས་ཙམ་ལས་མ་བསྟན་པ་དང༌། སྦྱོར་བ་དམན་པ་ཐབས་ཤེས་ཁྱད་པར་ཅན་གྱིས་མ་ཟིན་པ་དང༌། རྟོན་པ་དམན་པ་ཚོགས་ཆུང་ངུ་དང་གང་ཟག་གི་བདག་མེད་ཙམ་ལ་ཡིད་རྟོན་པ་དང༌། དུས་བསམ་གྱིས་ མི་ཁྱབ་པའི་བསྐལ་བར་གོ་ཆ་བསྒོ་བར་མི་ནུས་པས་མྱུར་དུ་མྱང་འདས་ཉི་ཚེ་བ་འདོད་པས་དུས་འགལ་བའི་ཕྱིར་ཐེག་དམན་ཞེས་བྱ་བ་ཡིན་ཏེ། བསམ་པ་དང་ནི་བསྟན་པ་དང༌། །སྦྱོར་བ་དང་ནི་རྟོན་པ་དང༌། །དུས་འགལ་ཕྱིར་ན་དམན་པ་གང༌། ། དེ་ནི་དམན་པ་ཁོ་ན་ཡིན། །ཞེས་སོ། །གཞན་ཡང་བསམ་གྱིས་མི་ཁྱབ་པའི་དོན་སྟོན་པས་རང་གི་མདོ་སྡེ་ལ་འཇུག །ཉོན་མོངས་བག་ཆགས་དང་བཅས་པ་འཇོམས་པས་རང་གི་འདུལ་བ་ལ་སྣང༌། ཟབ་པ་དང་རྒྱ་ཆེ་བའི་ཆོས་ཉིད་དང་མི་ འགལ་བའི་ཕྱིར། བཀའ་བཏགས་ཀྱི་ཕྱག་རྒྱ་གསུམ་གྱིས་བཅིངས་པས་བཀའ་ཡང་དག་པ་ཡིན་ཏེ། རང་གི་ཉིད་ལ་འཇུག་པ་དང༌། །རང་གི་འདུལ་ལའང་སྣང་ཕྱིར་དང༌། །ཟབ་པའི་ཕྱིར་དང་རྒྱ་ཆེའི་ཕྱིར། །ཆོས་ཉིད་དང་ནི་ འགལ་བ་མེད། །ཅེས་སོ། །རང་ཉིད་ཀྱི་འཁོར་བ་འཇོམས་པ་ལྟ་ཞོག་སེམས་ཅན་ཚད་མེད་པ་འཁོར་བ་ལས་སྒྲོལ་བའི་ཕྱིར་གཉེན་པོའི་མཆོག་ཡིན་ལ། ཀུན་རྫོབ་ཀྱི་བདེན་པ་དང་བསོད་ནམས་ཀྱི་ཚོགས་དང་གཟུགས་ཀྱི་སྐུ་སྟེ། ཡོངས་ སུ་སྨིན་པར་བྱ་བའི་ཕྱིར་རྒྱ་ཆེ་བའི་ཆོས་དང༌། དོན་དམ་པའི་བདེན་པ་དང་ཡེ་ཤེས་ཀྱི་ཚོགས་དང་ཆོས་ཀྱི་སྐུ་སྟེ་རྣམ་པར་མི་རྟོག་པ་ཟབ་པའི་ཆོས་གཉིས་སྟོན་པ་འདི་ནི་བླ་ན་མེད་པའི་ཐབས་ཆེན་པོ་ཡིན་པའི་ཕྱིར་ཏེ། རྒྱ་ཆེའི་ཕྱིར་དང་ཟབ་ པའི་ཕྱིར། །ཡོངས་སུ་སྨིན་དང་རྣམ་མི་རྟོག །དེ་ཕྱིར་འདི་ལས་གཉིས་བསྟན་ཏེ། །འདི་ནི་བླ་ན་མེད་པའི་ཐབས། །ཞེས་སོ། །མེད་པ་ལ་སོགས་པ་ཡང་དགོངས་པ་དང༌། ལྡེམ་པོར་དགོངས་པའི་ཚིག་གིས་སྒྲ་གཞན་དུ་བསྟན་

Page: 814 པར་བྱ་བ་ཡིན་གྱི་སྒྲ་ཇི་བཞིན་དུ་བཟུང་བྱ་མ་ཡིན་ཏེ། ཟབ་མོ་ལྟ་བའི་གཞུང་དུ་སྒྲོ་སྐུར་གྱི་མཐའ་སེལ་ཕྱིར་གསུངས་ཤིང༌། རྒྱ་ཆེན་སྤྱོད་པའི་གཞུང་དུ་ངོ་བོ་ཉིད་མེད་པ་རྣམ་པ་གསུམ་ལ་དགོངས་ནས་གསུངས་པར་འཆད་ཀྱི་དེ་ཁོ་ནར་ཞེན་པར་ བྱ་བ་ནི་མ་ཡིན་ཏེ། དེ་ལས་གཞན་དང་གཞན་མེད་ཤིན་ཏུ་ཟབ་ཅིང་རྗེས་སོང་ཕྱིར། །སྣ་ཚོགས་སྟོན་ཅིང་མང་པོའི་སྒོ་ནས་རྟག་ཏུ་སྟོན་དང་ལྡན། །ཇི་སྐད་བཤད་བཞིན་བཅོམ་ལྡན་དགོངས་པ་ཤིན་ཏུ་ཟབ། །མཁས་པ་རྣམས་ ཀྱིས་ཚུལ་བཞིན་བརྟགས་ན་ཆོས་འདིས་སྐྲག་མི་འགྱུར། །ཞེས་སོ། །དེས་ན་དོན་ཟབ་ཅིང་རྒྱ་ཆེ་བའི་ཐེག་ཆེན་གྱི་སྡེ་སྣོད་མཉན་ཞིང་ཐོས་པར་བྱས་པས་དེའི་དོན་ཚུལ་བཞིན་དུ་ཡིད་ལ་བྱེད་པ་ཏིང་ངེ་འཛིན་དང༌། རྗེས་སུ་མཚུངས་ པ་སྐྱེ་ལ་དེ་ལས་ཡང་དག་པའི་དོན་ལ་ངེས་པ་ཐོབ་པའི་ཤེས་རབ་ཁྱད་པར་ཅན་སྐྱེ་སྟེ། འདི་ན་དང་པོར་ཐོས་ལ་བརྟེན་ནས་ཚུལ་བཞིན་ཡིད་བྱེད་འབྱུང༌། །ཚུལ་བཞིན་ཡིད་ལ་བྱེད་ལས་ཡང་དག་དོན་ཡུལ་ཡེ་ཤེས་འབྱུང༌། ། དེ་ལས་ཆོས་འཐོབ་དེ་ཡོད་དེ་ལས་བློ་གྲོས་རབ་ཏུ་སྐྱེ། །ཞེས་སོ། །དེས་ན་ཆོས་སྤོང་བར་བྱེད་པའི་རྒྱུ་ནི་བློ་དམན་ཞིང་དད་པ་ཆུང་བ་དང༌། ཅུང་ཟད་ཤེས་པ་ལ་སོགས་པའི་ང་རྒྱལ་གྱིས་ཆེར་བསྙེམས་པ་དང༌། དྲང་བའི་དོན་ཅན་གྱི་མདོ་སྡེ་ ལ་གཅིག་ཏུ་ཞེན་པ་དང༌། རྙེད་བཀུར་ལ་སྲེད་པ་དང༌། གྲོགས་སམ་ཡོངས་འཛིན་ངན་པ་ཆོས་སྤོང་ལ་དགའ་བ་བསྟེན་པ་ལས་འབྱུང་སྟེ། རྒྱུད་བླར། བློ་དམན་ཕྱིར་དང་དཀར་མོས་བྲལ་ཕྱིར་ལོག་པའི་ང་རྒྱལ་ལ་བསྟེན་ཕྱིར། ། དམ་ཆོས་ཕོངས་པས་བསྒྲིབས་པའི་བདག་ཕྱིར་དྲང་དོན་དེ་ཉིད་ངེས་འཛིན་ཕྱིར། །རྙེད་ལ་བརྐམ་ཕྱིར་ལྟ་བའི་དབང་ཕྱིར་ཆོས་སུན་འབྱིན་པ་བསྟན་པའི་ཕྱིར། །ཆོས་འཛིན་བསྲིངས་ཕྱིར་མོས་པ་དམན་ཕྱིར་དགྲ་བཅོམ་རྣམས་ཀྱི་

Page: 815 ༄༅། །ཆོས་སྤོང་བྱེད། །ཅེས་སོ། །ཆོས་སྤོང་ལས་འཇིགས་པའི་ལས་གཞན་ཅི་ཡང་མེད་དེ། མཚམས་མེད་པ་ལྔའི་ལས་ཀྱིས་དཔེར་ཡང་མི་བཟོད་དེ་མཚམས་མེད་ནི་འགྱོད་པས་བཤགས་པར་འགྱུར་མོད་ཀྱང་ཆོས་ སྤོང་ནི་འགྱོད་པར་མི་བྱེད་ཀྱི་སྟེང་དུ་དེ་ཉིད་ལ་མཆོག་ཏུ་ལྟ་བའི་ཕྱིར་ཏེ། ཇི་ལྟར་ཟབ་མོའི་ཆོས་ཉམས་དེ་བཞིན་མཁས་པ་རྣམས་ཀྱིས་མེ་དང་ནི། །མི་བཟད་སྦྲུལ་གདུག་གཤེད་མ་དང་ནི་ཐོག་ལའང་ཤིན་ཏུ་འཇིགས་མི་བྱ། །མེ་སྦྲུལ་ དགྲ་དང་རྡོ་རྗེའི་མེས་ནི་སྲོག་དང་བྲལ་བ་ཙམ་བྱེད་དེ། །དེ་ལས་མནར་མེད་རྣམས་ཀྱི་འགྲོ་བ་ཤིན་ཏུ་འཇིགས་པར་འགྲོ་མི་འགྱུར། །གང་ཞིག་ཡང་ཡང་སྡིག་གྲོགས་བསྟན་པས་སངས་རྒྱས་ངན་སེམས་ལྡན་གྱུར་དང༌། །ཕ་མ་དགྲ་བཅོམ་ གསོད་པ་བྱ་བ་མིན་བྱེད་མཆོག་ཚོགས་འབྱེད་པའི་མི། །དེ་ཡང་ཆོས་ཉིད་ངེས་པར་བསམས་ན་མྱུར་དུ་དེ་ལས་འཐར་འགྱུར་གྱི། །གང་ཞིག་ཡིད་ནི་ཆོས་ལ་སྡང་བ་དེ་ལ་ཐར་པ་ག་ལ་ཡོད། །ཅེས་སོ། །མདོར་ན་མངོན་པར་ཞེན་ པས་སྨྲ་བ་ནི་ཆོས་སྤོང་ལས་མི་འདའ་སྟེ། རྣམ་པར་འཐག་པ་བསྡུས་པའི་མདོ་ལས། མི་ཕམ་པ་སེམས་ཅན་གྱི་འདུ་ཤེས་དང་ཆོས་ཀྱི་འདུ་ཤེས་ལ་གནས་པ་རྣམས་ལ་ནི་ལས་མངོན་པར་འདུ་བྱ་བ་ཡོད་དེ་མི་དམིགས་པ་ལ་ནི་མེད་དོ་ཞེས་དང༌། འཇམ་དཔལ་དེ་བཞིན་གཤེགས་པས་གསུངས་པའི་བཀའ་ལ་ལ་ལ་ནི་བཟང་བར་འདུ་ཤེས་ལ་ལ་ལ་ངན་པར་འདུ་ཤེས་ན་དེ་ནི་ཆོས་སྤོང་བའོ། །ཞེས་དང༌། འདི་ནི་རིགས་པའོ། །འདི་ནི་མི་རིགས་པའོ། །ཞེས་ཟེར་ན་ཆོས་སྤོང་བའོ་འདི་ནི་བྱང་ ཆུབ་སེམས་དཔའ་རྣམས་ཀྱི་ཆེད་དུ་གསུངས་སོ། །འདི་ནི་ཉན་ཐོས་རྣམས་ཀྱི་ཆེད་དུ་གསུངས་སོ་ཞེས་ཟེར་ན་ཆོས་སྤོང་བའོ། །འདི་ནི་བྱང་ཆུབ་སེམས་དཔའི་བསླབ་པའོ། །འདི་ནི་བསླབ་པ་མ་ཡིན་པའོ་ཞེས་ཟེར་ན་ཆོས་སྤོང་བའོ། །ཞེས་གསུངས་

Page: 816 ཤིང༌། ཆོས་སྨྲ་བའི་སྤྱོད་པ་དང་ཚིག་དང་དོན་དང་འགལ་བཟློས་སོགས་ཀྱི་སྐྱོན་འདོགས་པ་ཐམས་ཅད་དང་བཀའ་ལ་ཐེ་ཚོམ་དང་སྤོང་ལེན་གྱི་འདུ་ཤེས་ཐམས་ཅད་ཀྱང་ཆོས་སྤོང་དུ་གསུངས་ཤིང༌། སྔོན་དེ་བཞིན་གཤེགས་པ་དྲི་མེད་འོད་འཕྲོ་ ལས་བྱུང་བའི་གྲགས་པའི་བསྟན་པ་ལ་ད་ལྟའི་སངས་རྒྱས་ཚེ་དཔག་མེད་དགེ་སློང་འཚོ་བ་ཡོངས་དག་ཅེས་རྣམ་པར་འཐག་པའི་མདོ་དྲུག་ཁྲི་དང་མདོ་སྡེ་བྱེ་བ་བཅུ་བཟུང་བར་གྱུར་ནས་མོས་པ་བཞིན་བསྟན་པས་སྐྱེ་བོ་དཔག་མེད་ཐེག་གསུམ་ དུ་བཏུལ་ལ། དེ་བཞིན་གཤེགས་པ་ཉིད་དགེ་སློང་ཆོས་ཞེས་རྣམ་པར་འཐག་པའི་མདོ་སྟོང་བཟུང་བ་བསམ་གཏན་བཞི་པ་ཐོབ་ཅིང་སྦྱངས་ཡོན་དང་ལྡན་པར་གྱུར་ཏེ། སྟོང་པ་ཉིད་ཁོ་ན་ལས་གཞན་བཀའ་མ་ཡིན་པར་སྟོན་ཞིང་སྔ་མའི་ཆོས་ ལ་སྐུར་པ་བཏབ་པས་བསྐལ་པ་བདུན་ཅུར་དམྱལ་བར་སྐྱེས་བསྐལ་པ་དྲུག་བཅུར་བྱང་ཆུབ་ཀྱི་སེམས་བརྗེད་དེ། དེ་ནས་དེ་བཞིན་གཤེགས་པ་ཀུན་ནས་སྤོས་རིན་པོ་ཆེའི་འོད་ཀྱིས་སེམས་བསྐྱེད་དུ་བཅུག་ཀྱང་ཚེ་རབས་དགུ་ཁྲིར་དུད་ འགྲོ་དང་དྲུག་ཁྲིར་མི་དབུལ་པོར་གྱུར་ཀྱང་དེ་ཐམས་ཅད་དུ་ལྕེ་མེད་པར་གྱུར་པར་གསུངས་ཤིང༌། ཆོས་སྤངས་པ་ང་འཚང་རྒྱ་བ་ན་ཡང་བདུད་འབྱུང་བ་དང་སྙིགས་མའི་དུས་དང་བསྟན་པ་ལ་བར་ཆད་མང་དུ་འབྱུང་བར་གསུངས་ལ། ཆོས་ ཐམས་ཅད་འབྱུང་བ་མེད་པར་བསྟན་པའི་མདོ་ལས། སྔོན་སངས་རྒྱས་རི་རབ་ལྟར་མངོན་པར་འཕགས་པའི་རྒྱལ་པོའི་བསྟན་པ་ལ། དེ་བཞིན་གཤེགས་པ་མི་བསྒུལ་བ་དགེ་སློང་སྤྱོད་པ་རྣམ་དག་ཅེས་བྱ་བ་དབང་པོ་ཤེས་པ་དམིགས་པར་མི་ལྟ་ བ་ཐབས་ལ་མཁས་པའི་སྤྱོད་པ་ཅན་འཁོར་བཅས་བྱུང་ལ། སྟོན་པ་ཉིད་དགེ་སློང་སྤྱོད་པའི་བློ་གྲོས་ཞེས་བྱ་བ་མངོན་ཤེས་ལྔ་ཐོབ་པ་ཚུལ་ཁྲིམས་ཅན་འདུལ་བ་ལ་མཁས་པ་སྦྱངས་ཡོན་དང་དབེན་པར་དགའ་བ་འཁོར་དེ་ལྟ་བུ་དང་

Page: 817 ༄༅། །ལྡན་པ་བྱུང་སྟེ་སྔ་མ་དེ་ལ་ཚུལ་ཁྲིམས་འཆལ་བའོ། །ཞེས་དམད་ཅིང་དེའི་ཆོས་ལའང་སྐུར་པ་བཏབ་པས་ཚེ་འཕོས་ནས་ངན་འགྲོའི་སྡུག་བསྔལ་མི་བཟད་པ་སོགས་སྔ་མ་ལྟར་མྱོང་བར་བཤད་ཅིང༌། འཇམ་དཔལ་གྱིས་ཀྱང་ སྔོན་དེ་བཞིན་གཤེགས་པ་སེང་གེའི་ང་རོ་རྔ་སྒྲའི་རྒྱལ་པོའི་ཞིང་སྣང་བ་ཆེན་པོར་ད་ལྟའི་སངས་རྒྱས་གཟི་བརྗིད་སྟུག་པོ་དྲི་མེད་ཉི་ཟླ་ཟིལ་གནོན་དེ་ཆོས་སྨྲ་བ་རབ་ཏུ་དགའ་བའི་དབང་པོ་ཞེས་བྱ་བ་ཐབས་ཀྱི་སྤྱོད་པ་ཅན་བླང་དོར་དུ་མི་རྟོག་ཅིང་ ཆོས་ཐམས་ཅད་ནི་འདོད་ཆགས་ཀྱི་ངོ་བོ་ཉིད་དོ། །ཞེ་སྡང་དང་གཏི་མུག་གི་ངོ་བོ་ཉིད་དོ། །སྒྲིབ་པ་མེད་པའོ། །སྤྱོད་པ་ཐམས་ཅད་ཀྱང་མཚན་ཉིད་གཅིག་པའོ། །ཞེས་དབང་པོ་རྣོ་བ་མགོ་སྨོས་པས་འཚལ་བ་རྣམས་ལ་བསྟན་ཏེ་བཟོད་པ་ལ་བཀོད། དེའི་ཚེ་ འཇམ་དཔལ་ཉིད་ཆོས་སྨྲ་བ་རྒྱལ་བའི་བློ་གྲོས་ཞེས་བསམ་གཟུགས་ཐོབ་པ་སྦྱངས་ཡོན་ཅན་འདུ་འཛིའི་ཉེས་པ་དང་གཅིག་པུ་དབེན་པའི་བསྔགས་པ་བརྗོད་པར་གྱུར་ཏེ། ཅི་ཞིག་ན་ཆོས་སྨྲ་བ་སྔ་མའི་སློབ་མ་ཁྱིམ་བདག་ཅིག་གི་ནང་ དུ་བསོད་སྙོམས་སྤྱད་ནས་ཁྱིམ་བདག་གི་བུ་བཟོད་པ་ཐོབ་པ་དེ་ལ་ཆོས་བསྟན་ནས་ཆོས་སྨྲ་བ་སྔ་མ་དེས་ནི་ལོག་པར་བསྟན་ཏོ། །ཞེས་ཆོས་དང་གང་ཟག་ལ་བསྐུར་བ་བཏབ་པ་ན་ཁྱིམ་བདག་གི་བུ་དེས་སྨྲས་པ་བཙུན་པ་ཁྱེད་ཀྱིས་འདོད་ཆགས་ ཇི་ལྟར་མཁྱེན་ཀུན་ནས་ཉོན་མོངས་པར་ཤེས་སོ། །འོ་ན་འདོད་ཆགས་དེ་ནང་ན་མཆིས་སམ་ཕྱི་རོལ་ན་མཆིས། འདོད་ཆགས་ནི་ནང་ན་ཡང་མེད་ཕྱི་རོལ་ན་ཡང་མེད་དོ། །དེ་ལྟར་འདོད་ཆགས་ནང་ནའང་མ་མཆིས། ཕྱི་རོལ་ནའང་མ་མཆིས། ཕྱོགས་ མཚམས་ཀུན་ནའང་མ་མཆིས་ཏེ། དེ་ལྟར་ལགས་ན་དེ་ནི་མ་སྐྱེས་པ་ལགས་ཏེ་གང་མ་སྐྱེས་པ་དེ་ལ་ཀུན་ནས་ཉོན་མོངས་པའམ་རྣམ་པར་བྱང་བ་ཅི་ཞིག་མཆིས། དེ་ཐོས་ནས་དགེ་སློང་དེ་ཁྲོས་འཁྲུགས་ནས་བསོད་སྙོམས་ཀྱང་མ་བླངས་པར་མཆིས་

Page: 818 ཏེ་དགེ་འདུན་གྱི་ནང་དུ་ཆོས་སྨྲ་བ་སྔ་མ་ལ་དཔྱས་པ་དང༌། ཆོས་སྨྲ་བ་སྔ་མས་དགེ་འདུན་གྱི་ནང་དུ་སྨྲས་པ། འདོད་ཆགས་མྱ་ངན་འདས་པར་གསུངས། །ཞེ་སྡང་གཏི་མུག་དེ་བཞིན་ཏེ། །བྱང་ཆུབ་དེ་དག་གནས་ཉིད་ཡིན། །སངས་རྒྱས་ བྱང་ཆུབ་བསམ་མི་ཁྱབ། །འདོད་ཆགས་གང་གིས་རྣམ་བརྟགས་པ། །ཞེ་སྡང་གཏི་མུག་དེ་བཞིན་ཏེ། །སངས་རྒྱས་བྱང་ཆུབ་དེ་ལ་རིང༌། །གནམ་དང་ས་གཉིས་ཇི་བཞིན་ནོ། །བྱང་ཆུབ་འདོད་ཆགས་གཉིས་ནི་གཉིས་སུ་མེད། ། འཇུག་པ་གཅིག་པ་མཉམ་ཉིད་ལྡན་པ་སྟེ། །འདི་དག་ཆོས་ལ་བྱིས་པ་གང་འཇིགས་པ། །དེ་དག་སངས་རྒྱས་བྱང་ཆུབ་རིང་བ་ཡིན། །འདོད་ཆགས་སྐྱེ་མིན་འཇིག་པ་མ་ཡིན་ཏེ། །སེམས་ཀྱང་ཀུན་ནས་ཉོན་མོངས་འགྱུར་བ་མེད། ། གང་ཞིག་དམིགས་པའི་བདག་ལ་བློ་ཆགས་པ། །འདོད་ཆགས་ངན་སོང་དེ་དག་ལྟུང་བར་བྱེད། །ཅེས་དང༌། གང་ཞིག་ཚུལ་ཁྲིམས་རློམ་པས་མྱོས་གྱུར་པ། །དམིགས་པའི་ལྟ་ལ་རབ་གནས་དེ་ལ་ནི། །བྱང་ཆུབ་མེད་ཅིང་སངས་ རྒྱས་ཆོས་ཀྱང་མེད། །ཅེས་དང༌། འདུས་མ་བྱས་དང་འདུས་བྱས་སུས་མཐོང་བ། །དེ་དག་འཁོར་བའི་ཆོས་ལས་གཞར་མི་འགྲོ། གང་གིས་ཁམས་དེ་མཉམ་པ་ཉིད་རྟོགས་པ། །དེ་མྱུར་སྐྱེས་བུ་སངས་རྒྱས་མཆོག་ཏུ་འགྱུར། ། གང་གིས་སངས་རྒྱས་ཆོས་དང་སངས་རྒྱས་དག །ཐམས་ཅད་ཀུན་ཏུ་ནམ་ཡང་མ་མཐོང་ན། །ཆོས་རྣམས་ཀུན་གྱིས་གོས་པ་མེད་པ་སྟེ། །བདུད་བཅོམ་བྱང་ཆུབ་མངོན་པར་འཚང་ཡང་རྒྱ། །ཞེས་དང༌། སངས་རྒྱས་ཆོས་ནི་ནམ་མཁའ་ མཚུངས་པ་སྟེ། །སོགས་དང༌། ཆོས་རྒྱལ་དམ་པའི་ཆོས་འདི་མི་གཡོ་ཞིང༌། །དངོས་མེད་མཚན་ཉིད་མེད་ལ་ཚུལ་གཅིག་པར། །ངོ་བོ་ཉིད་ཀྱིས་སྟོང་ཆོས་མ་ཐོས་པར། །གཡང་ས་ཆེན་པོར་བྱིས་པ་དེ་དག་ལྟུང༌། །ཞེས་སོགས་

Page: 819 ༄༅། །བསྟན་པས། ལྷ་སྟོང་ཕྲག་སོ་གཉིས་མི་སྐྱེ་བའི་ཆོས་ལ་བཟོད་པ་ཐོབ། དགེ་སློང་སྟོང་ཕྲག་བརྒྱད་ཅུས་དགྲ་བཅོམ་པ་ཐོབ། དགེ་སློང་རྒྱལ་བློ་དེ་ཤི་ནས་ངན་འགྲོ་མཐའ་ཡས་པ་མྱོང་ཞིང་མིར་ཡང་མི་སྙན་པ་ཐོབ། བསྐལ་པ་བརྒྱ་སྟོང་མང་པོར་རྒྱལ་བའི་མཚན་མི་ཐོས་པ་དང༌། ཚེ་རབས་སྟོང་ཕྲག་དུན་བཅུ་རྩ་དྲུག་ཏུ་རབ་བྱུང་ལས་ཕྱིར་བབས། ཚེ་རབས་སྟོང་ཕྲག་མང་པོར་དབང་པོ་བརྟུལ་པོར་གྱུར། འོན་ཀྱང་ཚིགས་བཅད་དེ་ཐོས་པའི་རྒྱུས་ལས་བྱང་ བའི་འོག་ཏུ་གར་སྐྱེས་ཀྱང་བཟོད་པ་འདི་ལྟ་བུ་ཐོབ་སྟེ། བྱང་ཆུབ་སེམས་དཔའ་སྟོང་པ་ཉིད་སྨྲ་བ་རྣམས་ཀྱི་མཆོག་འཇམ་དཔལ་ཉིད་དུ་གྱུར་པར་གསུངས་ནས། བཅོམ་ལྡན་འདས་དེ་ལྟ་ལགས་པས་བྱང་ཆུབ་སེམས་དཔའི་ཐེག་པ་ལ་ ཞུགས་པའམ་ཉན་ཐོས་ཀྱི་ཐེག་པ་ལ་ཞུགས་པ་གང་ཡང་རུང་སྟེ། དེ་ལྟ་བུའི་སུག་ལས་ཀྱི་སྒྲིབ་པ་མི་འཚལ་ཞིང་དེ་ལྟ་བུའི་སྡུག་བསྔལ་མི་འཚལ་ན་དེས་དམ་པའི་ཆོས་སྤང་བར་མི་བགྱིའོ། །དམ་པའི་ཆོས་ལ་འཕྱ་བར་མི་བགྱིའོ། །ཆོས་གང་ལ་ ཡང་ཁོང་ཁྲོ་བར་མི་བགྱིའོ། །ཞེས་གསུངས་ཤིང༌། རྣམ་པར་འཐག་པ་བསྡུག་པའི་མདོ་ཉིད་ལས། འཇམ་དཔལ་མངོན་པར་ཞེན་པ་ལ་བྱང་ཆུབ་སེམས་དཔའི་སྤྱོད་པའོ། །ཞེས་ང་མི་སྨྲའོ། །ཁྱིམ་ལ་ཆགས་པ་ལ་འཚོ་བ་རྣམ་པར་དག་པའོ། །ཞེས་ ང་མི་སྨྲའོ། །གཉིས་སུ་སྟོན་པ་རྣམསི་ཆོས་ཀྱིས་ཕོངས་པ་ལས་སྒྲོལ་བར་ང་མི་སྨྲའོ། །གཅིག་ཏུ་སྟོན་པ་རྣམས་ངན་སོང་ལས་གྲོལ་བར་ང་མི་སྨྲའོ། །སྨྲ་བ་ལ་དགའ་བ་རྣམས་ཡོངས་སུ་དག་པའོ་ཞེས་ང་མི་སྨྲའོ། །འཇམ་དཔལ་ངས་ནི་གངྒཱའི་ ཀླུང་གི་བྱེ་མ་ཇི་སྙེད་ཀྱི་ཆོས་ཀྱི་སྒོ་རྣམས་མི་དམིགས་པའི་ཚུལ་གྱིས་བསྟན་ཏོ། །དེ་བཞིན་དུ་དམིགས་པ་དང་བཅས་པ་དང༌། སྟོང་པ་ཉིད་དང༌། སེམས་ཅན་དུ་འདུ་ཤེས་པའི་སྒོ་ནས་དང་མཚན་མ་མེད་པ་དང༌། རྣམ་པར་རྟོག་པ་དང་

Page: 820 སྨོན་པ་མེད་པ་དང༌། གང་ཟག་དང་གང་ཟག་མེད་པ་དང༌། ཡོད་པ་དང་མེད་པ་དང༌། འདུས་བྱས་དང་འདུས་མ་བྱས་དང༌། དྲང་བ་དང་དྲང་བ་མེད་པ་དང༌། གསང་བ་དང་གསང་བ་མེད་པ་དང༌། འཁོར་བ་དང་མྱ་ངན་ལས་འདས་པ་དང༌། འཇིག་རྟེན་ དང་འཇིག་རྟེན་ལས་འདས་པ་དང༌། འདོད་ཆགས་དང་ཞེ་སྡང་དང་གཏི་མུག་དང་སྤང་བའི་སྒོའི་བར་དུ་རེ་རེ་ཡང་དེ་སྙེད་རེ་བསྟན་ཏེ། འཇམ་དཔལ་དེ་ཐམས་ཅད་ཀྱང་མི་རྟག་པའི་ཚུལ་གྱིས་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་ཡིན་ན་ དེ་ལས་ཕྱོགས་ཀྱི་ཡང་ཕྱོགས་གཅིག་ཤེས་པས་དེ་བཞིན་གཤེགས་པ་ལ་སྐུར་པ་འདེབས་སོ། །ཞེས་དང༌། ཆོས་སྤངས་པ་དེས་ལོ་བདུན་ཉིན་ཞག་གཅིག་རེ་ཡང་དུས་གསུམ་དུ་བཤགས་ན་འབྱང་སྟེ་ཉེ་ན་བསྐལ་པ་བཅུས་བཟོད་པ་ འཐོབ་པར་འགྱུར་རོ། །ཞེས་དང༌། སྔོན་དུ་ཆོས་འདི་མ་སླབས་པར་སྨྲས་ན་ཉམས་པར་གསུངས་ལ། སེམས་ཅན་མཉམ་པ་ཉིད་དང་ཆོས་དང་བྱང་ཆུབ་དང་ལྷག་མཐོང་མཉམ་པ་ཉིད་དེ་མཉམ་པ་ཉིད་བཞི་ལ་གནས་པས་སྨྲ་བར་བྱའི་ གཞན་དུ་ཉམས་པར་འགྱུར་རོ། །ཞེས་དང༌། རྒྱན་ལས། མི་རིགས་པ་ཡི་གཟུགས་ལའང་མི་རིགས་ན། །ཐེ་ཚོམ་ཟ་བའི་ཆོས་ལ་སྨོས་ཅི་དགོས། །དེ་ཕྱིར་བཏང་སྙོམས་བཞག་ལེགས་ཉེས་པ་མེད། །ཅེས་གསུངས་པ་ཡིན་ ནོ། །བོད་ཀྱི་ཡུལ་འདི་ན་ནི་རྟོག་གེ་ལ་སོགས་པ་ཅུང་ཟད་ཤེས་པས་ཤིན་ཏུ་དྲེགས་ཏེ་ཆོས་ཐམས་ཅད་ལ་ཚད་འཛིན་ཞིང་མདོ་རྒྱུད་ཀུན་ནས་བཤད་པ་མེད་དོ། །ཞེས་ལ་དོར་དུ་སྨྲ་ཞིང༌། རྒྱ་གར་དུ་ཟླ་བ་གྲགས་པ་དང་བོད་དུ་ཁོ་བོ་མ་གཏོགས་པ་ དབུ་མའི་ལྟ་བ་ཤེས་པ་མེད་དོ། །ཞེས་སོགས་སྒྲོག་པ་ལ་མཁས་པའི་མཆོག་ཏུ་འཇོག་པར་སྣང་ཡང་དེ་ལྟ་བུ་དག་ནི་རེ་ཞིག་བརྟག་པར་བྱ་བའི་གནས་ཡིན་གྱི་སྐྱབས་སུ་འཛིན་པ་ཁུ་འཕྲིག་ཟ་ལ། དེའི་ཕྱིར་ལང་གཤེགས་ལས། བློ་གྲོས་

Page: 821 ༄༅། །ཆེན་པོ་མང་དུ་ཐོས་པ་ཞེས་བྱ་བ་ནི་འདི་ལྟ་སྟེ། དོན་ལ་མཁས་པ་ཡིན་གྱི་སྒྲ་ལ་མཁས་པ་མ་ཡིན་ནོ། །དེ་ལ་དོན་ལ་མཁས་པ་ནི་གང་མུ་སྟེགས་བྱེདཀྱི་སྨྲ་བ་ཐམས་ཅད་དང་མ་འདྲེས་པར་སྨྲ་བ་ཡིན་ཏེ། ནམ་བདག་ཀྱང་མི་ ལྟུང་གཞན་ཡང་མི་ལྟུང་བར་བྱེད་པ་དེ་ནི་བློ་གྲོས་ཆེན་པོ་དེ་ལྟར་དོན་ལ་མང་དུ་ཐོས་པ་དང་ལྡན་པ་ཡིན་ནོ། །ཞེས་དང༌། བུ་རམ་ཤིང་ཤུན་སྙིང་པོ་ཅི་ཡང་མེད། །དགའ་བར་བྱ་བའི་རོ་ནི་ནང་ན་འདུག །ཤུན་པ་ཟོས་པའི་མིས་ནི་བུ་རམ་ རོ། །ཞིམ་པོ་རྙེད་པར་ནུས་པ་མ་ཡིན་ནོ། །ཤུན་པ་ལྟ་བུ་འདི་ལ་ཚིག་ཡིན་ཏེ། །རོ་ལྟ་བུ་ནི་འདི་ལ་དོན་སེམས་ཡིན། །ཞེས་ཚིག་འབྲུ་ནི་ཧ་ཅང་སྙིང་པོ་མི་ཆེ་བར་སྟོན་པ་ཡིན་ལ། བཅོམ་ལྡན་འདས་ཤཱཀྱ་ཐུབ་པའི་བསྟན་པས་རྒྱ་ གར་དུ་མི་གཅིག་དང་བོད་དུ་མི་གཅིག་ལས་གྲོལ་བར་མ་བྱས་ན་བཅོམ་ལྡན་འདས་དེའི་ཕྲིན་ལས་ཅི་ཞིག་འདྲ། དེས་ན་ཐེག་པ་ཆེན་པོ་བསམ་གྱི་མི་ཁྱབ་པའི་གནས་འདི་མོས་པ་དང་ཡིད་ཆེས་པར་དཀའ་བས་སངས་རྒྱས་མང་པོ་ལ་ བསྐལ་པ་དུ་མར་ཡོ་བྱད་ཐམས་ཅད་ཀྱིས་བསྟབས་པ་ལས་མདོ་འདི་མི་སྤོང་བ་དང་དད་པ་ཙམ་ཕན་ཡོན་ཆེའོ། །ཞེས་སྦྱིན་པ་དང་མཆོད་པ་དེ་དག་ལས་ཐེག་ཆེན་གྱི་ཆོས་ལ་མོས་པ་དང་རྗེས་སུ་ཡི་རང་བ་ཙམ་ཕན་ཡོན་ཆེ་བར་ཤེས་ཕྱིན་ སོགས་ཐེག་ཆེན་གྱི་མདོ་རེ་རེ་ཞིང་བཤད་པ་ཡིན་ལ། དེའི་ཕྱིར། བླ་མའི་རྒྱུད་ལས། བློ་ལྡན་རྒྱལ་བའི་ཡུལ་འདི་ལ་མོས་པ། །སངས་རྒྱས་ཡོན་ཏན་ཚོགས་ཀྱི་སྣོད་འགྱུར་ཏེ། །བསམ་མེད་ཡོན་ཏན་ཚོགས་ལ་མངོན་དགའ་ བས། །སེམས་ཅན་ཀུན་གྱི་བསོད་ནམས་ཟིལ་གྱིས་གནོན། །གང་ཞིག་བྱང་ཆུབ་དོན་དུ་གཉེར་བས་གསེར་ཞིང་ནོར་བུས་སྤྲས་པ་ནི། །སངས་རྒྱས་ཞིང་རྡུལ་མཉམ་པ་ཉིན་རེ་ཆོས་རྒྱལ་རྣམས་ལ་རྟག་འབུལ་ལ། །གཞན་

Page: 822 གང་འདི་ལས་ཚིག་ཙམ་ཐོས་ཤིང་ཐོས་ནས་ཀྱང་ནི་མོས་ན་འདི། །སྦྱིན་པ་ལས་བྱུང་དགེ་བ་དེ་ལས་བསོད་ནམས་ཆེས་མང་འཐོབ་པར་འགྱུར། །བློ་ལྡན་གང་ཞིག་བླ་མེད་བྱང་ཆུབ་འདོད་པས་བསྐལ་པ་དུ་མར་ཡང༌། །ལུས་ངག་ ཡིད་ཀྱིས་འབད་པ་ཆེན་པོས་ཚུལ་ཁྲིམས་དྲི་མེད་སྲུང་བྱེད་ལ། །གཞན་ཡང་འདི་ལས་ཚིག་ཙམ་ཐོས་ཤིང་ཐོས་ནས་ཀྱང་ནི་མོས་ན་འདི། །ཚུལ་ཁྲིམས་ལས་བྱུང་དགེ་བ་དེ་ལས་བསོད་ནམས་ཆེས་མང་འཐོབ་པར་འགྱུར། ། གང་ཞིག་འདི་ན་སྲིད་པ་གསུམ་གྱི་ཉོན་མོངས་མེ་འཇིལ་བསམ་གཏན་ནི། །ལྷ་དང་ཚངས་གནས་མཐར་སོན་རྫོགས་པའི་བྱང་ཆུབ་འཕོ་མེད་ཐབས་སྒོམ་ལ། །གཞན་གང་འདི་ལས་ཚིག་ཙམ་ཐོས་ཤིང་ཐོས་ནས་ཀྱང་ནི་མོས་ན་འདི། ། བསམ་གཏན་ལས་བྱུང་དགེ་བ་དེ་ལས་བསོད་ནམས་ཆེས་མང་འཐོབ་པར་འགྱུར། །ཞེས་དགེ་བ་གཞན་ལྟ་ཞོག་འཇུག་སེམས་ཁྱད་པར་བས་ཟིན་པས་དངོས་པོ་ཁྱད་པར་ཅན་གསེར་གྱི་སངས་རྒྱས་ཀྱི་ཞིང་ནོར་བུས་སྤྲས་པ་གྲངས་ཞིང་ གི་རྡུལ་དང་མཉམ་པ་ཉིན་རེ་ཞིང་སངས་རྒྱས་གངྒཱ་རླུང་གི་བྱེ་མ་སྙེད་ལ་འབུལ་བའི་སྦྱིན་པ་དེ་ལྟ་བུ་བསྐལ་པར་བྱེད་པ་དང༌། བླ་ན་མེད་པའི་བྱང་ཆུབ་ཀྱི་ཕྱིར་ཚུལ་ཁྲིམས་དག་པ་བསྐལ་པ་མང་པོར་སྲུང་བ་དང༌། བསམ་གཏན་བཞི་ པའི་བར་དང་སྨོན་འཇུག་གི་བྱང་ཆུབ་ཀྱི་སེམས་རིང་དུ་སྒོམ་པའི་དགེ་བ་དེ་ཐམས་ཅད་རྡོ་རྗེའི་གནས་བདུན་ལས་གང་ཡང་རུང་བ་དང་ལྡན་པའི་ཚིག་ཅུང་ཟད་ཙམ་ཐོས་ཤིང་ཐོས་ནས་མི་སྤོང་བར་མོས་པར་བྱེད་ན་དགེ་བ་འདིས་དགེ་བ་སྔ་མ་དེ་ཐམས་ཅད་ ཟིལ་གྱིས་གནོན་ཏེ་སྔ་མ་ལས་བསོད་ནམས་ཆེས་མང་བ་འཐོབ་པར་མདོ་རྣམས་ལས་རེ་རེ་ཞིང་གསུངས་པའི་ཕྱིར། རིགས་པས་ཀྱང་གྲུབ་སྟེ། སྦྱིན་པས་ནི་ལོངས་སྤྱོད་ཙམ་འཐོབ་ལ། ཚུལ་ཁྲིམས་ཀྱིས་མཐོ་རིས་ཀྱི་ལུས་དང༌།

Page: 823 ༄༅། །བསྒོམས་པས་ནི་ཉོན་མོངས་ཀྱི་སྒྲིབ་པ་ཙམ་སྤོང་བར་བྱེད་པར་ཟད་ཀྱི་སྒྲིབ་པ་ཐམས་ཅད་ཀྱི་དངོས་གཉེན་མི་བྱེད་ལ། དེ་ཁོ་ན་ཉིད་མཐོང་བའི་ཤེས་རབ་ཀྱིས་ནི་སྒྲིབ་གཉིས་བག་ཆགས་དང་བཅས་པ་རྩ་བ་ནས་སྤོང་ལ། ཤེས་རབ་དེ་སྐྱེ་བའི་རྒྱུ་ནི་ཆོས་ཀྱི་རྣམ་གྲངས་ཟབ་མོ་འདི་ལྟ་བུ་ཐོས་པ་ཁོ་ན་ཡིན་པའི་ཕྱིར་ཏེ། གང་ཕྱིར་སྦྱིན་པས་ལོངས་སྤྱོད་དག་ནི་སྒྲུབ་བྱེད་ལ། །ཁྲིམས་ཀྱིས་མཐོ་རིས་བསྒོམས་པས་ཉོན་མོངས་སྤོང་བྱེད་ཅིང༌། །ཤེས་རབ་ཉོན་ མོངས་ཤེས་བྱ་ཀུན་སྤོང་དེ་ཡི་ཕྱིར། །འདི་མཆོག་ཉིད་དེ་དེ་ཡི་རྒྱུ་ནི་འདི་ཐོས་ཡིན། །ཞེས་བཅོམ་ལྡན་འདས་བྱམས་པས་ལུང་དང་རིགས་པ་གཉིས་ཀར་གྱིས་སྒྲུབ་པར་མཛད་དོ། །དེ་ལྟར་ཐེག་ཆེན་གྱི་ཆོས་འདི་བློ་དམན་གྱིས་མོས་ པར་དཀའ་ཞིང་སྤངས་ན་རེ་ཞིག་རྣམ་སྨིན་ལྕི་བར་མྱོང་དགོས་ཀྱང་ཐོས་པ་ཙམ་དེ་ཉིད་ཀྱིས་སེམས་ཅན་དེའི་སྲིད་པ་ཕྱི་མཐའ་ཅན་དུ་ནི་བྱེད་པས་ཐོས་པའི་ཕན་ཡོན་ནི་གཞལ་དུ་མེད་དེ། བྱང་ཆུབ་སེམས་དཔའི་སྤྱོད་པ་བསྟན་པའི་མདོ་ལས། ཁྱེའུ་རིན་ཆེན་བྱིན་སྐྱེས་ནས་ལོ་གསུམ་ལོན་པ་སྔོན་སྟོན་པ་ཐུགས་དང་པོ་བསྐྱེད་པའི་ཚེ། དེས་བཟོད་པ་ཐོབ་ནས་བསྐལ་པ་སུམ་འབུམ་ལོན་པ་དེས་ཆོས་ཐམས་ཅད་བླང་དོར་བྱར་མེད་པར་བསྟན་པ་ན་འཇམ་དཔལ་གྱིས་དྲིས་པ་ཁྱོད་ཀྱི་ཆོས་ སྟོན་པ་ནི་དེ་འདྲ་ན་ལས་དང་པོ་བའི་བྱང་ཆུབ་སེམས་དཔའ་རྣམས་ལ་ཇི་སྐད་སྟོན། དེས་སྨྲས་པ། འདོད་ཆགས་མ་སྤང་ཞིགཞེ་སྡང་མ་གཞིལ་ཞིགགཏི་མུག་མ་སེལ་ཞིགའཇིག་ཚོགས་ལས་གྱེན་དུ་མ་སྐྱོད་ཅིག་སོགས་ནས་སངས་རྒྱས་ ཡིད་ལ་མ་བྱེད་ཅིགཆོས་མ་སེམས་ཞིགདགེ་འདུན་ལ་མཆོད་པ་མ་བྱེད་ཅིགབསླབ་པ་དག་ལ་མ་ལེན་ཞིགསྲིད་པ་ཉེ་བར་ཞི་བ་དོན་དུ་མ་གཉེར་ཞིག་ཆུ་བོ་ལས་མ་རྒལ་ཞིག་ཞེས་གདམས་ངག་འདི་ལྟ་བུ་འདི། ལས་དང་པོ་པའི་བྱང་ཆུབ་སེམས་དཔའ་

Page: 824 ལ་གདམས་པར་བྱ། རྗེས་སུ་བསྟན་པར་བྱའོ། །དེའི་ཅིའི་ཕྱིར་ཞེ་ན་ཆོས་ཐམས་ཅད་ཀྱི་ཆོས་ཉིད་ནི་གནས་པ་ཁོ་ན་ཡིན་པའི་ཕྱིར་རོ་བྱིས་པ་དེ་དག་ནི་སྐྱེ་བ་དང་འགག་པའི་ཆོས་སུ་ལུང་སྟོན་པར་བྱེད་དོ། །ཆོས་ཀྱི་དབྱིངས་འདི་ནི་རྣམ་པར་མི་རྟོག་པས་རབ་ ཏུ་ཕྱེ་བ་ཡིན་ཏེ། ཆོས་འདི་རྣམས་ཀྱི་རང་བཞིན་དེ་ལྟར་རྗེས་སུ་རྟོགས་པ་གང་ཡིན་པ་དེ་ནི་བྱང་ཆུབ་བོ། །ཞེས་དེ་ལྟར་གདམས་ན་གལ་ཏེ་མི་སྐྲག་མི་དངངས་ཤིང་དངང་བར་མི་འགྱུར་ན། ཨེ་མ་བྱང་ཆུབ་སེམས་དཔའ་འདི་ནི་ཕྱིར་མི་ལྡོག་པ་སྟེ་ ཕྱིར་མི་ལྡོག་པའི་སའི་སྐལ་པ་ཅན་ཡིན་ནོ་སྙམ་དུ་ཤེས་པར་བྱ་སྟེ་གདམས་ངག་འདིས་ཡང་དང་ཡང་དུ་དགའ་བ་བསྐྱེད་པར་བྱའོ། །ཞེས་སྨྲས་པ་དང༌། དེའི་ཚེ་དམིགས་པ་ཅན་གྱི་དགེ་སློང་བརྒྱད་མ་མོས་ཏེ་འཁོར་དེ་ནས་སོང་བ་དང་ ཁ་ནས་ཁྲག་དྲོན་མོ་བསྐྱུགས་ཏེ་ཤི་ནས་དམྱལ་བ་ངུ་འབོད་དུ་སྐྱེས་སོ། །འཇམ་དཔལ་གྱིས་ཁྱེའུ་ཁྱོད་ཀྱི་ཆོས་ཀྱི་རྣམ་གྲངས་དེ་དགེ་སློང་དེ་དག་ལ་དེ་ཙམ་དུ་གནོད་པ་ལ་ལྟོས། དེ་ནས་བཅོམ་ལྡན་འདས་ཀྱིས་བཀའ་བསྩལ་པ། འཇམ་དཔལ་ཁྱོད་དེ་སྐད་མ་ཟེར་ཅིག །དེ་དག་གིས་ཆོས་འདི་མ་ཐོས་ན་བསྐལ་པ་ས་ཡར་བདེ་འགྲོར་ཡང་མི་སྐྱེ་ན་འཚང་རྒྱ་བ་ལྟ་ཅི་སྨོས། ཆོས་འདི་སོམ་ཉི་དང་བཅས་པས་ཐོས་པ་འདིས་དེང་ཁོ་ན་དམྱལ་བ་ལས་ཐར་ཏེ་དགའ་ ལྡན་གྱི་ལྷར་སྐྱེས་སོ། །བསྐལ་པ་དྲུག་ཅུ་རྩ་བརྒྱད་དུ་སངས་རྒྱས་ཁྲག་ཁྲིག་བཅུ་མཉེས་པར་བྱེད་ཅིང་ཐམས་ཅད་དུ་བརྫུས་སྐྱེས་ཀྱི་འཁོར་བསྒྱུར་དུ་གྱུར་ནས་སངས་རྒྱས་དྲི་མེད་འོད་ཅེས་པར་འགྱུར་རོ། །ཞེས་ལུང་བསྟན་པ་དང༌། ལྷའི་བུ་དེ་དག་ལྷགས་ཏེ་བཅོམ་ལྡན་འདས་ཆོས་ཀྱི་རྣམ་གྲངས་འདི་ལ་བདག་ཅག་ཡི་རང་ངོ༌། །ཞེས་གསོལ་བའི་མོད་ལ་དེ་དག་ཕྱིར་མི་ལྡོག་པར་གྱུར་ཏོ། །ཞེས་གསུངས་ཤིང༌། འཇམ་དཔལ་གནས་པའི་མདོ་ལས། དེ་དཔྱོད་པ་མེད་

Page: 825 ༄༅། །ཅིང་སྤྲོས་པ་མེད་ལ་ཉེ་བར་ཞི་སྟེ་ཡོད་དོ། །ཞེའམ་མེད་དོ་ཞེའམ་ཡོད་ཀྱང་ཡོད་ལ་མེད་ཀྱང་མེད་དོ་ཞེའམ་ཡོད་པ་ཡང་མ་ཡིན་མེད་པ་ཡང་མ་ཡིན་ནོ། །ཞེས་དེ་སྐད་གང་དུ་ཡང་ཁས་མི་ལེན་ཏོ་ནམ་ཁས་མི་ལེན་པ་དེ་ན་ དམིགས་པ་མེད་དོ། །དེ་དམིགས་པ་ཐམས་ཅད་དང་བྲལ་བས་སེམས་མེད་ཅིང་སེམས་དང་བྲལ་ཏེ་གནས་མེད་པའི་ཚུལ་གྱིས་དགེ་སྦྱོང་གི་ཆོས་ལ་གནས་པ་ཞེས་བྱའོ། །ཞེས་བསྟན་པས་དགེ་སློང་བཞི་རྒྱས་དགྲ་བཅོམ་རྒྱ་འཁྲུགས་ ཏེ་ལུས་དེས་དམྱལ་བ་ངུ་འབོད་དུ་ལྷུང་བ་ལ། ཆོས་འདི་མ་ཐོས་ན་དེ་རྣམས་ངེས་པར་དམྱལ་བར་ལྟུང་ན་ཆོས་འདི་ཐོས་པས་དམྱལ་བའི་སྡུག་བསྔལ་སྐད་ཅིག་ཙམ་ལས་མ་རེག་པར་ཡུད་ཀྱིས་དགའ་ལྡན་གྱི་ལྷར་སྐྱེས་ལ་བྱམས་པའི་ འདུས་པ་དང་པོར་དགྲ་བཅོམ་པ་འཐོབ་པར་ལུང་བསྟན་ལ། ཆོས་ཀྱི་ཕྱག་རྒྱའི་མདོ་ལས་ཀྱང༌། སོ་སོ་སྐྱེ་བོའི་ཆོས་ལས་ཀྱང་མ་འདས་ཤིང་ཟག་པ་མེད་པའི་ཆོས་ཀྱང་མ་ཐོབ་པ་ནི་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་ བ་འཇིག་རྟེན་ལས་འདས་པར་བསྙེན་པར་རྫོགས་པ་སྟེ། དེས་དད་པས་བྱིན་པ་ལོངས་སྤྱོད་པར་འོས་ལ་གཞན་ནི་ལོག་པར་རབ་ཏུ་བྱུང་བའོ། །ཞེས་བཀའ་བསྩལ་ཅིང༌། ཤཱ་རིའི་བུ་དང༌། རབ་འབྱོར་གྱིས་དེའི་དོན་གཏན་ལ་ཕབ་པས་དགེ་སློང་བདུན་ བརྒྱས་དགྲ་བཅོམ་བརྒྱ་མ་མོས་པས་ལངས་ལྔས་སྤངས་ཏེ་ལུས་དེས་དམྱལ་བར་ལྷུང་བ་སྐད་ཅིག་གིས་ཐར་བར་གསུངས་ལ། འདི་ལྟ་བུ་གཞན་ཡང་མང་དུ་ཡོད་དེ། དེས་ན་མཁས་པར་ཞལ་གྱིས་འཆེས་པ་རྣམས་ཆོས་ཀྱི་ཚད་མི་འཛིན་ཞིང་ རང་གཞུང་སྣ་རེ་དང་མ་མཐུན་པ་ཙམ་དང་བྱིས་པའི་སློབ་དཔོན་རྣམས་ཀྱི་ངག་སྒྲོས་སམ་ཡིག་ཆ་སྣ་རེ་དང་མ་མཐུན་པ་ཙམ་གྱིས་ཆོས་མི་སྤོང་བར་ཞུའོ། །ཞེས་བདག་གིས་གཅིག་ཏུ་གསོལ་བ་འདེབས་སོ། །དེ་ལྟར་ལུང་གིས་སྒྲུབ་པ་འཕྲོས་

Page: 826 དོན་དང་བཅས་ཏེ་རྒྱ་ཆེར་བཤད་ནས་རིགས་པས་སྒྲུབ་པ་ཡང༌། ཐེག་ཆེན་ལ་མ་བསྟེན་ན་སངས་རྒྱས་ཀྱི་བསྟན་པ་རྫོགས་པར་མི་རྙེད་དེ་བསྟན་པའི་རྩ་བ་ནི་དགེ་སློང་ཉིད་ཡིན་མོད་ན་ཡང་དགེ་སློང་ཉིད་ཀྱང་ཤིན་ཏུ་དཀའ་བར་གནས་པའི་ ཕྱིར། ཅི་འདུལ་བ་ལས་དགེ་སློང་ནི་ལྔ་སྟེ། མིང་གི་དགེ་སློང་དང༌། ཁས་འཆེ་བའི་དགེ་སློང་དང༌། སློང་བའི་ཕྱིར་དགེ་སློང་དང༌། ཉོན་མོངས་པ་བཅོམ་པའི་དགེ་སློང་ངོ༌། །དེ་ལས་འདིར་ནི་ཆོས་འདི་པའི་གསོལ་བ་དང་བཞིའི་ལས་ཀྱིས་བསྙེན་པར་ རྫོགས་པ་གང་ཡིན་པ་དེ་ནི་དགེ་སློང་ཞེས་བྱ་བར་དགོངས་སོ། །ཞེས་གསོལ་བཞིའི་ཆོ་གས་སྡོམ་པ་ཕོག་པ་ཉིད་དགེ་སློང་དུ་གསུངས་པས་དེ་ཙམ་དུ་དཀའ་བ་མ་ཡིན་ནོ་སྙམ་ན། དེ་ནི་རེ་ཞིག་བྱིས་པ་རྗེས་སུ་བཟུང་བའི་སྒོ་ཙམ་དུ་ཟད་ལ་ དགེ་སློང་ཡང་དག་པ་ནི་དོན་དམ་པའི་དགེ་སློང་དུ་དགོངས་པ་ཡིན་ཞིང་དེ་ནི་ཉོན་མོངས་པ་བཅོམ་པ་ཡིན་ལ་ཉོན་མོངས་པ་རྫོགས་པར་བཅོམ་པ་ནི་སངས་རྒྱས་ཁོ་ན་ཡིན་པའི་ཕྱིར། དེས་ན་སེམས་ནི་དམིགས་པ་དང་བཅས་པ་རྣམས་ཀྱི་ ནི་མྱ་ངན་ལས་འདས་པ་ཡང་དཀའ་བར་གནས་ཏེ། དམ་ཆོས་པད་དཀར་ལས། ཉན་ཐོས་ཁྱེད་ཅག་མྱ་ངན་མ་འདས་ཏེ། །ཞེས་དང༌། ཐེག་པ་གཅིག་སྟེ་གཉིས་སུ་ཡོད་མ་ཡིན། །བཀྲི་བའི་དོན་དུ་ཐེག་པ་གསུམ་བསྟན་ཏོ། ། དགེ་སློང་ཁྱེད་ཅག་དེ་ཕྱིར་དེ་རིང་ངས། །འདི་ཙམ་གྱིས་ནི་མྱ་ངན་མི་འདའ་སྟེ། །ཁྱེད་ཀྱིས་ཐམས་ཅད་མཁྱེན་པའི་ཡེ་ཤེས་ཕྱིར། །བརྩོན་འགྲུས་རླབས་ཆེན་དམ་པ་བསྐྱེད་པར་གྱིས། །ཞེས་དང༌། འཕགས་པ་ཤཱ་རིའི་བུས། སྔོན་ ཚེ་བདག་ནི་ལྟ་ལ་ཆགས་གྱུར་པ། །མུ་སྟེགས་ཅན་གྱིས་བཀུར་བའི་ཀུན་ཏུ་རྒྱུ། །དེ་ནས་མགོན་པོས་བདག་གི་བསམ་མཁྱེན་ནས། །ལྟ་བ་དགྲོལ་ཕྱིར་མྱ་ངན་འདའ་བ་གསུངས། །ལྟ་བར་གྱུར་པ་དེ་དག་ཀུན་ལས་བཀྲོལ། །

Page: 827 ༄༅། །བདག་གིས་སྟོང་པ་ཉིད་ཀྱི་ཆོས་ཐོབ་སྟེ། །དེ་ཕྱིར་བདག་ནི་མྱ་ངན་འདས་སྙམ་བགྱིད། །མྱ་ངན་འདས་ཞེས་བགྱི་བ་དེ་མ་ལགས། །གང་ཚེ་སངས་རྒྱས་སེམས་ཅན་གཙོར་གྱུར་ཏེ། །ལྷ་མི་གནོད་སྦྱིན་སྲིན་ པོས་མདུན་དུ་བདར། །སུམ་ཅུ་རྩ་གཉིས་མཚན་གྱི་གཟུགས་ལྡན་པ། །དེ་ཚེ་མ་ལུས་མྱ་ངན་འདས་པ་ལགས། །ཞེས་གསོལ་བ་སོགས་མདོ་མང་པོ་ལས་རྒྱ་ཆེར་བཤད་ཅིང༌། དེས་ན་སངས་རྒྱས་མ་ཐོབ་པར། །མྱ་ངན་འདས་ པ་མི་འཐོབ་སྟེ། །འོད་དང་འོད་ཟེར་སྤངས་ནས་ནི། །ཉི་མ་ལྟ་བར་མི་ནུས་བཞིན། །ཞེས་བཅོམ་ལྡན་འདས་བྱམས་པ་བཞེད་པའི་ཕྱིར་དང༌། སྟོང་ཉིད་མ་རྟོགས་ན་དམིགས་པ་ལས་མི་འདའ་ལ། དམིགས་པ་དང་བཅས་པས་བཟོད་ པ་འཐོབ་པ་ནི་གནས་མ་ཡིན་པར་གསུངས་ན་བཟོད་པ་ཡང་མི་འཐོབ་པ་དེ་ལ་བྱང་ཆུབ་ལྟ་ག་ལ་འཐོབ་པའི་ཕྱིར། སྟོང་ཉིད་མ་རྟོགས་ཀྱང་ཉོན་མོངས་པ་ལས་གྲོལ་ན་དེ་ཉིད་བྱང་ཆུབ་བོ་ཞེ་ན། འོ་ན་ཉོན་མོངས་ལས་གྲོལ་བ་དེའི་དེ་མ་ ཐག་ཏུ་སྤངས་པ་ཕུན་སུམ་ཚོགས་པར་ཐལ་བར་འགྱུར་རོུ། །འདོད་མི་ནུས་ཏེ། ཉོན་མོངས་མངོན་གྱུར་པ་མེད་ཀྱང་ཐེག་དམན་གྱི་དགྲ་བཅོམ་དུ་འདོད་པ་དེ་དག་ལ་སྔོན་མའི་ལས་ཀྱིས་འཕངས་པའི་འབྲས་བུ་མཽངྒལ་གྱི་བུ་ཀུན་ཏུ་ རྒྱུས་ཡན་ལག་བཅོམ་པ་དང༌། འཆར་ཀ་ཆོམ་རྐུན་པའི་དཔོན་གྱིས་དབུ་བཅད་པ་དང༌། སྒུར་ཆུང་ཞག་བདུན་སྨྱུང་བར་གྱུར་པའི་མཐར་ཐལ་སྐྱོ་གསོལ་བ་དང༌། ཉེ་སྡེ་སྦྲུལ་དུག་ཅན་གྱིས་ཟིན་པ་སོགས་དུ་མ་བཤད་པ་དང༌། ཉོན་མོངས་པའི་བག་ ཆགས་དགྲ་བཅོམ་པ་ཆུ་འཐུང་གིས་ཞེ་སྡང་གི་བག་ཆགས་ལས་གྲེ་ལས་སྐྱེས་ཀྱི་མཆོད་རྟེན་བཤིག་པ་དང༌། ཁ་ཅིག་བུད་མེད་ལ་བཟང་མོ་ཞེས་འབོད་པ་དང་རྟ་གད་དུ་རྒོད་པ་སོགས་བཤད་པ་དང༌། ཀུན་དགའ་བོའི་སྲིང་མོའི་

Page: 828 བུ་གཉིས་ལོ་བདུན་པ་ལ་དགེ་ཚུལ་དང་དགྲ་བཅོམ་ཐོབ་ནས་ཆུ་ལེན་པ་ན་བུམ་པ་ནམ་མཁའ་ལ་སྔོན་དུ་བཏང་ནས་བདག་ཉིད་ཕྱི་ནས་འོང་བ་སོགས་རྫུ་འཕྲུལ་གྱི་རྩེད་མོ་བྱེད་པ་དང༌། བ་ལང་བདག་མཛའ་བའི་བག་ཆགས་ཀྱིས་ཇོ་ བོ་གང་པོ་ཞེས་འབོད་པ་སོགས་ལས་ཀྱི་བག་ཆགས་དང་ལྡན་པར་མཐོང་བ་ཡིན་པའི་ཕྱིར་རོ། །གལ་ཏེ་དེ་བདེན་མོད་ཀྱང་རེ་ཞིག་སྲིད་པ་ཕྱི་མ་ཉེ་བར་ལེན་པའི་སྲེད་པ་ནི་མེད་ཅེས་ངེས་པ་ཉིད་དོ་ཞེ་ན། ཉན་རང་གི་དགྲ་བཅོམ་ པར་འདོད་པ་དེ་དག་ལ་ཉོན་མོངས་པ་ཅན་གྱི་མ་རིག་པ་མེད་ཀྱང་ཉོན་མོངས་ཅན་མ་ཡིན་པའི་མ་རིག་པ་ཡོད་པས་ཤེས་བྱ་ཐམས་ཅད་ལ་ཡེ་ཤེས་འཇུག་མི་ནུས་པ་ཡིན་ལ། དེས་ན་དེ་དག་ལ་སྲེད་པ་འདི་ཡང་ཉོན་མོངས་ཅན་ཡོད་པ་མིན་ ཡང་ཉོན་མོངས་ཅན་མིན་པའི་ཀུན་ནས་རྨོངས་པ་ཡོད་པ་དེ་བཞིན་དུ་ཉོན་མོངས་ཅན་མ་ཡིན་པའི་སྲེད་པ་ཅི་སྟེ་མེད་དེ། ཁ་ཟས་ཚོལ་བ་དང་སྨན་བསྟེན་པ་སོགས་མཐོང་བའི་ཕྱིར་རོ། །འོ་ན་སངས་རྒྱས་ལ་ཡང་དེར་ཐལ་ལོ་སྙམ་ན་མ་ཡིན་ ཏེ། སངས་རྒྱས་བསོད་སྙོམས་ལ་གཤེགས་པ་སོགས་ཀྱི་དགོས་པ་ནི་སྔར་བསྟན་ཟིན་ཏོ། །གཞན་ཡང་ཉན་རང་དེ་དག་ལ་སྲེད་པ་ཡོད་དེ་ཚོར་བའི་རྐྱེན་གྱིས་སྲེད་པ་འབྱུང་བ་ཡིན་ལ། ཚོར་བ་ནི་དེ་དག་ལ་ཡང་ཡོད་པའི་ཕྱིར། འོ་ན་སྲེད་ པ་ལས་ལེན་པ་དང་དེ་ལས་སྲིད་པ་འབྱུང་བས་དེ་དག་སྲིད་པར་སྐྱེ་བ་ཡང་ཡོད་པར་ཐལ་ལོ་ཞེ་ན། ལས་ཉོན་མངོན་གྱུར་པས་འཕགས་པའི་ལེན་སྐྱེ་མེད་ཀྱང་བག་ཆགས་ཕྲ་མོས་བསྒོས་པ་མ་རིག་བག་ཆགས་ཀྱི་ས་ལ་བརྟེན་པ་བསམ་ གྱིས་མི་ཁྱབ་པའི་འཆི་འཕོ་བར་བསྒྱུར་བའི་ལེན་སྐྱེ་ནི་ཡོད་དེ། དེའི་ཕྱིར་དེ་དག་གིས་མ་རིག་བག་ཆགས་ཀྱི་ས་སྤངས་པའི་གཙང་བ་དམ་པ་དང་བསམ་གྱིས་མི་ཁྱབ་པའི་འཆི་འཕོ་སྤངས་པའི་རྟག་པ་དམ་པའི་ཕ་རོལ་ཏུ་སོན་པ་མ་ཐོབ་པར་

Page: 829 ༄༅། །དཔལ་ཕྲེང་གི་མདོ་སོགས་ལས་གསུངས་སོ། །དེས་ན་ཡུལ་གང་ལ་དམིགས་པ་དང་བཅས་པའི་སེམས་ཀྱིས་ཏིང་ངེ་འཛིན་འགའ་ཞིག་ལ་ནི་བསྐལ་པ་མང་པོར་གནས་པར་འགྱུར་བ་ཡོད་མོད་ཀྱང་སྙིང་པོར་མི་ཆེ་སྟེ། སྟོང་པ་དེ་ཁོ་ན་ཉིད་རྟོགས་པ་དང་ནི་བྲལ་བའི་སེམས་ནི་ལན་གཅིག་འགགས་པ་ན་ཡང་སླར་ཡང་རྐྱེན་གཞན་ལས་སྐྱེ་བར་འགྱུར་ཏེ། ཇི་ལྟར་འདུ་ཤེས་མེད་པ་བའི་སྙོམས་འཇུག་བསྐལ་པ་ཆེན་པོ་བརྒྱད་ཁྲི་བཞི་སྟོང་སོགས་སུ་སེམས་རྒྱུན་ ཆད་ཀྱང་སླར་ཡང་སད་དེ་འཁོར་བའི་གནས་གཞན་དུ་སྐྱེ་བ་བཞིན་ནོ། །དེས་ན་སྒོམ་པ་པོ་བདག་དང་གང་ཟག་སུ་ཡང་མ་དམིགས་ཤིང་གང་བསྒོམ་པར་བྱ་བ་འདུས་བྱས་སམ་འདུས་མ་བྱས་སམ་རྟག་པའམ་མི་རྟག་པའམ་བདེན་ པའམ་བརྫུན་པའི་རྣམ་པ་ཅི་ཡང་མ་མཐོང་བས་འདུ་ཤེས་ཅི་ཡང་མི་ལེན་ཅིང་མི་འདོར་ལ་གང་ཞིག་ཇི་ལྟར་དུ་སྒོམ་པའི་ཚུལ་ཅིར་ཡང་མི་དམིགས་ལ་དམིགས་པ་དང་མ་དམིགས་པར་འཛིན་པ་ཡང་ཤེས་པ་དྲི་མ་མེད་པའི་མདུན་ན་མེད་ པས་སུ་ཞིག་གང་དུ་ཅི་ལ་ཡང་མི་གནས་ཤིང་ཅིའི་རྣམ་པར་ཡང་མ་མཐོང་བ་འདི་ནི་ཡང་དག་པའི་དོན་མཐོང་བ་དང༌། གང་དུ་སུས་ཅི་ཡང་སྒོམ་དུ་མེད་པར་ཤེས་པས་དེ་ཉིད་ལས་མི་གཡོ་བ་ནི་སྟོང་པ་ཉིད་སྒོམ་པ་ཞེས་བྱ་བ་ཡིན་ཏེ། མདོ་ལས། དེས་གང་གི་ཚེ་སེམས་དང་དམིགས་པ་ཡང་དག་པར་རྗེས་སུ་མི་མཐོང་བ་དེའི་ཚེ་ཡང་དག་པ་མཐོང་བ་ཡིན་པས། ཞེས་དང༌། ཏིང་རྒྱལ་ལས། ཆོས་རྣམས་རྙེད་མེད་རྙེད་པ་སྟེ། །རྙེད་པ་ལ་ཡང་རྙེད་པ་མེད། །དེ་ལྟར་ཆོས་རྣམས་གང་ ཤེས་པ། །བྱང་ཆུབ་དམ་པ་རྟོགས་པར་འགྱུར། །ཞེས་དང༌། ནམ་མཁའ་གཟུང་བ་མེད་པར་བཤད། །དེ་ལ་གཟུང་བ་མི་རྙེད་དེ། །ཆོས་ཀྱི་རང་བཞིན་འདི་ཉིད་ཡིན། །གཟུང་བ་མེད་པ་ནམ་མཁའ་འདྲ། །དེ་ལྟ་བུར་ནི་ཆོས་བསྟན་ཏེ། །

Page: 830 དེ་ལ་གང་ཡང་མཐོང་བ་མེད། །སུ་དག་ཆོས་འདི་མི་མཐོང་བ། །དེ་ཡི་ཆོས་འདི་བསམ་མི་ཁྱབ། །ཅེས་དང༌། བསོད་ནམས་ཐམས་ཅད་བསྡུས་པའི་མདོར། ཆོས་རྣམས་འདི་དག་དམིགས་མེད་ན། །མི་མཁས་དམིགས་པར་བྱེད་པ་དག ། དེ་དག་སྡུག་བསྔལ་མི་སྒྲོལ་ཞིང༌། །དེ་དག་རྣམས་ཀྱི་སྡུག་བསྔལ་འཕེལ། །ཅེས་དང༌། ཆོས་རྣམས་ལ་ཇི་ལྟ་བ་བཞིན་དུ་མཐོང་བ་གང་ཞེ་ན། འདི་ལྟ་སྟེ་མཐོང་བ་མེད་པ་ཁོ་ནའོ། །ཞེས་སོགས་རྒྱ་ཆེར་བཤད་ལ། སྟོང་པ་ཉིད་འདི་ལ་གནས་པ་ ནི་བྱམས་པའི་མཆོག་དང༌། ཕ་རོལ་ཏུ་ཕྱིན་པ་ཐམས་ཅད་དང༌། དམ་པའི་ཆོས་ཡོངས་སུ་འཛིན་པའི་མཆོག་དང༌། ཚུལ་ཁྲིམས་དག་པའི་མཆོག་ཡིན་ཏེ། ལྗོན་པའི་མདོར། རོལ་མོའི་སྒྲ་ལས། ཇི་ལྟར་བདག་མེད་རྟོགས་ནས་ནི། །བྱམས་ པས་འགྲོ་བ་ཁྱབ་པར་བྱེད། །བདག་མེད་པ་དང་བྱམས་པ་དག །དེ་ལ་ཇི་ལྟར་མཚུངས་པར་འགྱུར། །འོད་ཟེར་གྱི་རྩེའི་པདྨ་ལ་གནས་པའི་སྤྲུལ་པའི་བྱང་སེམས་རྣམས་ཀྱིས་ལན་བཏབ་པ། གང་དག་སྟོང་ཉིད་རབ་ཤེས་པ། །དེས་ ནི་བདག་མེད་ཁོང་དུ་ཆུད། །གང་གིས་འགྲོ་བ་སྟོང་ཤེས་པ། །དེ་ནི་དེ་ཡི་བྱམས་པ་མཆོག །ཞེས་དང༌། ནམ་མཁའ་མཛོད་ལས། གང་ཆོས་ཐམས་ཅད་མི་འཛིན་པ་དེ་ནི་གཏོང་བའི་མཆོག་གོ་ཞེས་སོགས་དྲུག་ག་ལ་སྦྱར་བ་དང༌། ཏིང་རྒྱལ་ལས། སུ་དག་སྟོང་པ་ཞི་ལ་དགའ་བ་ནི། །དེ་དག་རྒྱལ་བའི་ཆོས་འདི་གཟུང་བ་ཡིན། །སུ་དག་ཏིང་འཛིན་འདི་ནི་འཛིན་གྱུར་པ། །དེ་དག་ང་ཡི་བསྟན་ལ་རབ་བྱུང་ཞིང༌། །དགེ་སློང་བསྙེན་རྫོགས་གསོ་སྦྱོང་ལས་རྣམས་ བྱས། །ཞེས་སོགས་མདོ་སྡེ་རྒྱ་མཚོ་ལྟ་བུ་ལས་མང་དུ་བཤད་དོ། །དེའི་ཕྱིར་ཡང་དག་པའི་དོན་དམིགས་པ་ཐམས་ཅད་ལས་འདས་པ་འདི་ཉིད་ཁོ་ན་ཅི་ཡང་མི་སྒོམ་པའི་ཚུལ་གྱིས་བསྒོམ་པར་བྱའོ། །འདི་བསྒོམས་པ་ལས་འབྲས་བུ་ཅི་

Page: 831 ༄༅། །ཞིག་འབྱུང་ཞེ་ན། གང་དང་གང་དུ་འདུ་ཤེས་པ་དང་དམིགས་པའི་རྣམ་པ་ཐམས་ཅད་ཀྱང་ལོག་སྟེ་ཆོས་གང་ཡང་གང་གིས་ཐོབ་ཏུ་མེད་པར་ཤེས་པས་མྱ་ངན་ལས་འདས་པ་ལ་རེ་བ་ཟད། རྨི་ལམ་ལ་རྨི་ལམ་དུ་ཤེས་པ་ ལྟར་སྡུག་བསྔལ་ངོ་བོ་ཉིད་ཀྱིས་མི་དམིགས་པར་ཤེས་པས་འཁོར་བ་ལ་འཇིགས་པ་མེད་ཅིང་ཆོས་ཐམས་ཅད་རྣམ་པར་བཏགས་པ་ཙམ་ལས་ངོ་བོ་ཉིད་ཅིར་ཡང་མི་གནས་ཤིང་གང་དུ་ཡང་མི་གནས་པ་དེ་ཉིད་སེམས་ཀྱི་དབྱིངས་སྟོང་ཞིང་འོད་ གསལ་བ་འདི་ཉིད་ཁོ་ནར་མཐོང་བས་ཆོས་ཐམས་ཅད་རང་གི་ལག་མཐིལ་ན་གནས་པ་ལྟ་བུར་འདོད་གུར་རང་དབང་དུ་བྱེད་པས་འཁོར་འདས་ཐམས་ཅད་ཀྱི་རྒྱུ་ཚོགས་རྟེན་ཅིང་འབྲེལ་བར་འབྱུང་བ་ལ་དབང་ཐོབ་ཅིང་ཤིན་ཏུ་མཁས་པས། འདི་ ལྟར་མ་རྟོགས་པའི་སེམས་ཅན་གྱི་ཚོགས་ལ་སྙིང་རྗེ་བཟོད་མེད་དུ་འཇུག་ཅིང༌། དེའི་ཚེ་ཡང་བདག་དང་སེམས་ཅན་དུ་དམིགས་པ་མེད་ལ་སྙིང་རྗེ་ཆེན་པོ་འཕེལ་བ་དེ་ཙམ་གྱིས་སེམས་ཅན་དང་སེམས་ཅན་མ་ཡིན་པ་དང་སྡུག་བསྔལ་དང་བདེ་བ་ལ་ སོགས་པར་གཟོད་ནས་མི་དམིགས་པ་དོན་དམ་པའི་མཐོང་བ་ཉི་མའི་དཀྱིལ་འཁོར་ལྟ་བུ་ཁོ་ན་རྒྱས་ཤིང་འཕེལ་ལ། དེ་ལྟར་དོན་དམ་པའི་མཐོང་བ་བརྟན་ཅིང་འཕེལ་བ་ན་སྙིང་རྗེ་ཆེན་པོ་ཉི་མའི་འོད་ཟེར་ལྟ་བུ་དེ་བས་ཀྱང་རྒྱས་པར་འགྱུར་ ཞིང་སེམས་ཅན་མ་གཟིགས་ལ་སྙིང་རྗེ་ཆེན་པོ་མངའ་བ་དང་བདག་ཉིད་མ་གཟིགས་ལ་བདག་ཉིད་སེམས་ཅན་ཐམས་ཅད་ཀྱི་རྟེན་དུ་མཛད་པ་དང་ཐོབ་པར་བྱ་བ་གང་ཡང་མ་གཟིགས་ལ་བྱང་ཆུབ་ཆེན་པོར་འགྲོ་བ་རྣམས་འགོད་པ་དང་ནམ་མཁའ་ ལས་གང་དུ་ཡང་འདར་མེད་པ་ལྟར་སུ་ཡང་གང་དུ་འདར་ཡོད་པར་མ་གཟིགས་ཀྱང་སེམས་ཅན་འཁོར་བ་ལས་སྒྲོལ་བར་སྟོན་པ་འཇིག་རྟེན་ན་འགལ་བའི་སྤྱོད་ལྡན་འདི་རྣམས་ཀྱི་སྤྱོད་ཚུལ་སུས་རྟོགས་པར་ནུས་ཏེ། དེས་ན་བྱང་ཆུབ་སེམས་

Page: 832 དཔའ་ནམ་མཁའ་ལྟ་བུ་འདི་རྣམས་ལ་བདག་ཅག་སྦྲང་བུའི་བགྲོད་པ་ཅན་རྣམས་ཀྱི་འདོམ་གྱིས་ཚད་གཞལ་བའི་ངལ་བས་ཅི་བྱ་སྟེ། གུས་པ་དང་གཅིག་ཏུ་གུས་པས་རྗེས་སུ་ཡི་རང་བ་དང་ཡོན་ཏན་ལ་བསྔགས་པ་དང་བདག་ཉིད་ཀྱང་འདི་ ལྟ་བུར་འདོད་པ་ཁོ་ན་ལྷུར་བྱོས་ཤིག །དེས་ན་དམིགས་པ་སྣ་ཚོགས་ཀྱིས་ཐོག་མ་མེད་པ་ནས་རྨོངས་པ་སྡུག་བསྔལ་གྱི་རྒྱུ་ལ་གཅིག་ཏུ་བརྩོན་ཞིང་འབྲས་བུ་ལ་སྡང་བར་ལྟ་བ་རང་གིས་རང་སྡུག་བསྔལ་བ་ཅན་དུ་བྱས་པ་རང་གཡོས་ཀྱི་ འདམ་དུ་རང་ཚུད་ནས་ཅི་བྱ་གཏོལ་དང་བྲལ་བ་འདི་རྣམས་ཀྱི་དོན་དུ་རྩེ་གཅིག་ཏུ་འབད་པ་སྨན་པ་མཁས་པ་ནད་པའི་དོན་དུ་འབད་པ་ལྟར་གྱུར་ཅིང༌། དེ་ཁོ་ན་ཉིད་ཤེས་པས་བྱས་པ་གང་དུ་བྱིང་བའི་འདམ་གྱི་ཟབ་ཐུང་ཞིང་མཆུ་ ཞེང་ཆུང་བར་ཤེས་པ་ལྟར་འཁོར་བའི་རང་བཞིན་ཁོང་དུ་ཆུད་པས་རང་ཉིད་འདམ་ལྟ་བུའི་འཁོར་བ་ལ་ཆགས་པ་དང་འཇིགས་པ་གཉིས་ཀ་ལས་གྲོལ་བར་གྱུར་ཅིང་སེམས་ཅན་འབྱིན་པའི་ནུས་པའང་བདག་ཉིད་ལ་ཡོད་པར་ཤེས་ནས་ནམ་ མཁའ་ཇི་སྲིད་པར་འཁོར་བར་གཞན་དོན་དུ་གནས་པ་འགྲུབ་པར་འགྱུར་བ་འདི་ནི་སྟོང་པ་ཉིད་བསྒོམས་པའི་དངོས་ཀྱི་འབྲས་བུ་ཡིན་ཏེ། བཅོམ་ལྡན་འདས་བྱམས་པས། བདག་སྲེད་མ་ལུས་ཤེས་རབ་ཀྱིས་བཅད་དེ། །སེམས་ཅན་སྲེད་ ཕྱིར་བརྩེ་ལྡན་ཞི་འཐོབ་མིན། །དེ་ལྟར་བློ་བརྩེ་བྱང་ཆུབ་ཐབས་བསྟེན་པས། །འཕགས་པ་འཁོར་བའམ་མྱ་ངན་འདས་མི་འགྱུར། །ཞེས་དང༌། ཤེས་པས་སྲིད་ལ་མི་གནས་ཤིང༌། །སྙིང་རྗེས་ཞི་ལ་མི་གནས་དང༌། ། ཞེས་སོ། །ཇི་ལྟར་འབྲས་བུ་ལོ་ཏོག་འདོད་ལ་རྒྱུ་སོ་ནམ་འགོག་པ་ནི་འཇིག་རྟེན་ན་གནག་རྫིས་ཀྱང་དམད་པར་བྱ་བ་ཡིན་པ་དེ་བས་ན། འབྲས་བུ་བྱང་ཆུབ་འདོད་པ་རྣམས་ཀྱིས་རྒྱུ་སྟོང་པ་ཉིད་ཀྱི་ཕྱོགས་ལ་སུན་འབྱིན་པ་དང་སྐུར་བ་འདེབས་པ་ནི་

Page: 833 ༄༅། །འཐད་པ་མ་ཡིན་ནོ། །དེས་ན་སྡིག་གྲོགས་ཀྱི་ངག་ལ་ཡིད་མི་རྟོན་ཞིང་ཐེ་ཚོམ་མི་ཟ་བར་སྟོང་པ་ཉིད་དངོས་པོའི་གནས་ལུགས་ཆོས་ཐམས་ཅད་ཀྱི་ངོ་བོ་ཉིད་གང་ཡིན་པ་འདི་ཁོ་ན་སྒོམ་པར་བྱའོ། །ཅི། འཁོར་བར་གནས་ པ་འགྲུབ་འགྱུར་བ། །འདི་ནི་སྟོང་ཉིད་འབྲས་བུ་ཡིན། །ཞེས་འདོན་པ་ལྟར་ན་འདིས་འཁོར་བ་ལས་ཐར་བ་མི་འཐོབ་པ་ཞིག་གོ་སྙམ་ན་སྤྱིར་འཁོར་འདས་སྟོང་ཉིད་དུ་ཤེས་པ་ཁོ་ནས་སྲིད་ཞི་གཉི་གའི་སྒྲོག་རང་བརྡལ་དུ་སོང་བ་འདི་ཉིད་ ཉན་རང་གི་ཐར་པ་འབུམ་གྱིས་ཀྱང་དོ་ཟླ་མིན་པའི་ཐར་པ་ཡིན་མོད་ཀྱང་སྨན་པ་མཁས་པ་ནད་པའི་ཚོགས་མི་འདོར་བ་ལྟར་སྙིང་རྗེས་གཞན་དོན་དུ་འཁོར་བར་གནས་པ་པདྨ་འདམ་གྱིས་མ་གོས་པ་ལྟར་ཟད་པས་འདི་ལ་ནི་འཁོར་བ་པར་མིང་བརྗོད་ དེ་སྨན་པ་ནད་པར་མི་བརྗོད་པ་བཞིན་ནོ། །དེ་ལྟ་མོད་ཀྱི་ཉོན་མོངས་པ་དང་ཤེས་བྱའི་སྒྲིབ་པའི་ཚོགས་ནང་གི་མུན་པ་སྟུག་པོ་དེ་ཁོ་ན་ཉིད་ལ་སྒྲིབ་པར་བྱེད་པ་འདིའི་དངོས་ཀྱི་གཉེན་པོ་ནི་སྟོང་པ་ཉིད་ཁོ་ན་ཡིན་ཏེ། ཚོགས་སྦྱོར་དུ་སྟོང་ཉིད་ལ་ མོས་པས་ཞུགས་པ་ལས་མཐོང་བའི་ལམ་དུ་ནམ་མཁའ་ཐ་དད་མེད་པ་ལྟ་བུའི་སྟོང་ཉིད་ཀུན་འགྲོའི་ཚེ་ཚུལ་གྱིས་རྟོགས་ཤིང་སྒོམ་པའི་ལམ་རྣམས་སུ་གློ་བུར་གྱི་དྲི་མ་བསལ་སྟོབས་ཀྱིས་འཇིག་རྟེན་གྱི་ཁམས་ཚད་མེད་པའི་ནམ་མཁའ་ནས་སྐྲ་རྩེ་བྱེ་བའི་ ཆའི་སྦུབས་ཀྱི་ནམ་མཁའི་བར་རེ་རེ་ཞིང་གི་རྒྱ་ཚད་དང་ཁྱད་པར་རྣམས་ཀྱང་ཇི་ལྟ་བར་ཁོང་དུ་ཆུད་པ་ལྟ་བུར་སྟོང་པ་ཉིད་ཡོན་ཏན་གྱི་རྣམ་པ་ཐམས་ཅད་པ་རེ་རེ་ཞིང་མངོན་དུ་བྱས་ཏེ། མཐར་གཅིག་དང་ཐ་དད་ལས་འདས་པའི་ནམ་མཁའི་ཁམས་དུས་གསུམ་ གྱིས་བསྡུས་པ་ཐམས་ཅད་སྐད་ཅིག་གིས་ཅིག་ཆར་དུ་ཁོང་དུ་ཆུད་པ་ལྟར་སངས་རྒྱས་དང༌། བྱང་ཆུབ་སེམས་དཔའ་དང༌། ཉན་ཐོས་དང༌། རང་སངས་རྒྱས་དང༌། སེམས་ཅན་ཐམས་ཅད་དང༌། ཕུང་པོ་ལྔ་དང༌། ཁམས་བཅོ་བརྒྱད་དང་སྐྱེ་མཆེད་བཅུ་གཉིས་དང་སྤང་

Page: 834 བྱ་དང་ཐོབ་བྱ་ཐམས་ཅད་ལ་རྟག་པར་རྗེས་སུ་ཞུགས་པའི་ཆོས་དབྱིངས་སམ་སྟོང་ཉིད་དེ་ཐམས་ཅད་གཅིག་པ་དང་ཐ་དད་པ་ལས་འདས་པ་ཇི་ལྟ་བ་ཉིད་དུ་སྐད་ཅིག་གིས་ཅིག་ཆར་ཁོང་དུ་ཆུད་པ་ན་རྫོགས་པའི་སངས་རྒྱས་ཐོབ་བོ། །ཞེས་འཇིག་རྟེན་ཀུན་ རྫོབ་ལ་བལྟོས་ནས་རྣམ་པར་འཇོག་གོ །དེས་ན་མྱུར་དུ་ཐམས་ཅད་མཁྱེན་པ་ཉིད་འཐོབ་པར་འདོད་ཀྱང་རུང་གཞན་དོན་དུ་ནམ་མཁའ་ཇི་སྲིད་པར་འཁོར་བར་གནས་པར་འདོད་པ་བྱང་ཆུབ་སེམས་དཔའ་འདོད་ཆེན་པའི་བརྟུལ་ཞུགས་འཛིན་པས་ཀྱང་ རུང་སྟེ་དེ་འཐོབ་པའི་རྒྱུ་ནི་སྟོང་ཉིད་ཤེས་པ་ཁོ་ན་ཡིན་པས་སྟོང་པ་ཉིད་དེ་ནི་ཇི་ལྟར་ན་སྒོམ་པར་མི་བྱེད་དེ་འདི་ཁོ་ན་སྒོམ་པར་རིགས་སོ། །བདག་ཅག་ནི་མ་སྦྱངས་པས་སྟོང་ཉིད་ལ་སྐྲག་གོ་ཞེ་ན། དངོས་པོ་གང་སྡུག་བསྔལ་སྐྱེད་པར་བྱེད་པ་དེ་ལ་སྐྲག་ པ་སྐྱེ་བར་འགྱུར་བ་ནི་འཇིག་རྟེན་ན་རིགས་མོད་ཀྱང་ཕན་པར་བྱེད་པ་དེ་ལ་སྐྲག་པ་ནི་འཇིག་རྟེན་ན་མི་རིགས་པར་འཇོག་སྟེ། ནད་ལ་སྐྲག་པར་བྱེད་ཀྱི་སྨན་དང་སྨན་པ་ལ་སྐྲག་པར་མི་བྱེད་པ་བཞིན་ནོ། །དེས་ན་སྟོང་པ་ཉིད་འདིས་ནི་དངོས་འཛིན་ གྱི་ནད་དང་སྡུག་བསྔལ་ཐམས་ཅད་ཞི་བར་བྱེད་པའི་ཕྱིར་སྨན་དང་སྨན་པའི་མཆོག་ལྟ་བུ་ཡིན་ན་དེ་ལ་འཇིགས་པ་ཇི་ལྟར་སྐྱེ་སྟེ་འདི་ནི་ཐེ་ཚོམ་མེད་པར་དད་པར་བྱ་བ་ཡིན་ནོ། །འདི་དག་ཏུ་དགེ་བའི་ལྷས། དགེ་སློང་གི་སྡོམ་པའི་རྩ་བ་བཞི་གང་ལ་ཡོད་ པ་དེ་ནི་དགེ་སློང་ཉིད་དེ་དེ་ཉིད་ཀྱང་དཀའ་བས་གནས་པ་ནི་མུ་སྟེགས་པ་དང་རྩོད་པ་དང་བཅས་པས་སོ། །ཞེས་ལུང་གཞན་ལ་ཡང་རྩོད་བཅས་ཀྱི་ཕྱིར་གྱི་ཁྱབ་མཚུངས་ཀྱི་ན་ཡམས་སུ་བཀོད་ཅིང༌། ཉེ་བར་དམིགས་པ་ཡོད་པ་རྣམས་ཀྱིས་ཇི་སྲིད་ ཕུང་པོར་འཛིན་པ་ཡོད་པ་དེ་སྲིད་ངར་འཛིན་གྱི་ང་རྒྱལ་བྱེད་ལ་ལས་དང་སྐྱེ་བ་ཡོད་པ་དེ་ལྟ་ན་མྱ་ངན་ལས་འདས་པ་ཡང་དཀའ་འོ། །གལ་ཏེ་བདེན་པ་མཐོང་བས་ཉོན་མོངས་སྤོང་བའི་ཕྱིར་མི་དཀའ་འོ་ཞེ་ན། དེའི་ཕྱིར་ཉོན་མོངས་སོགས་སོ། །ཞེས་དང༌། གཞན་

Page: 835 ༄༅། །དག་ན་རེ། ཉོན་མོངས་ཅན་དང་ལུང་མ་བསྟན་པའི་སྲེད་པ་དང་འདོད་ཁམས་ཀྱི་མི་དགེ་བ་ནི་འདིར་ཡང་སྲིད་འབྱུང་བའི་དབང་དུ་བྱས་པ་ཡིན་ཏེ། དེ་ཡང་དགའ་བའི་འདོད་ཆགས་དང་བཅས་པ་ནི་ཉོན་མོངས་པ་དང་བཅས་པ་ ཡིན་ན་ཉོན་མོངས་མེད་ཀྱང་ཞེས་ཅིའི་ཕྱིར་རྟོག་ཞེས་སྨྲ་ན་འདི་ལྟར་དགོངས་ཏེ་གཏི་མུག་ཀྱང་ཉོན་མོངས་པའི་ས་པ་ཆེན་པོ་ཡིན་པས་ཉོན་མོངས་ཅན་ཡིན་ལ་དེའི་བག་ཆགས་ཀྱང་ཀུན་ཏུ་རྨོངས་པའི་ཉོན་མོངས་ཅན་མ་ཡིན་པའི་མི་ཤེས་པ་ནི་ སེམས་དམིགས་པ་དང་བཅས་པ་འདི་ལ་ཡོད་པར་འདོད་དོ། །དེ་བཞིན་དུ་ཉོན་མོངས་ཅན་གྱི་སྲེད་པ་ལ་ཡང་བག་ཆགས་ཉོན་མོངས་ཅན་མ་ཡིན་པ་ཡོད་དེ། དེ་ཡང་ཚོར་བ་ཡིན་ནོ། །དེ་ཉོན་མོངས་པ་ཅན་མ་ཡིན་ཡང་ལྷན་ཅིག་བྱེད་པའི་རྐྱེན་དང་ ཕྲད་ན་ཉོན་མོངས་ཅན་དུ་སྐྱེད་དོ། །ཞེས་ཡང་སྒྲས་སྟོན་ཏོ། །དེས་ན་སྲེད་འདི་ཞེས་སོགས་སྨོས་སོ། །རྒྱུ་རྣམས་ནི་འབྲས་བུ་ངེས་པར་སྐྱེད་པ་མ་ཡིན་ནོ་ཞེ་ན། དམིགས་པ་ཞེས་སོགས་སྨོས་ཏེ་ཞེས་སོགས་སྣང་མོད། དགྲ་བཅོམ་ལ་ཉོན་ མོངས་མེད་ཀྱང་ཞེས་སྨོས་མི་རིགས་པར་དོགས་པ་བསླང་ནས་གཏི་མུག་ཉོན་མོངས་ཡིན་ལ་ཞེས་ལན་བཏབ་པ་འདི་ནི་དཔྱད་པའི་གཞིའོ། །བི་བྷཱུ་ཏིས་ནི། ཉོན་མོངས་ཟད་པ་ནི་དགེ་སློང་ཡིན་ཏེ་དེ་ནི་སྟོང་ཉིད་མ་རྟོགས་ན་མི་འགྲུབ་བོ་ཞེས། ཉོན་མོངས་པ་ལས་གྲོལ་ན་དེའི། སོགས་ཀྱིས་དེ་སྒྲུབ་པ་དགེ་སློང་དཀའ་བར་གནས་པ་དང༌། སེམས་ནི་དམིགས་དང་སོགས་རྐང་པ་གཉིས་པོ་སླར། དམིགས་པ་ནི་སེམས་ཀྱིས་སྒྲུབ་པ་ལ་མྱང་འདས་དཀའ་བར་སྟོན་པ་ཞེས་བཀྲལ་ ཞིང་འོ་ན་ཡང་དག་པར་སྡུག་བསྔལ་མེད་ན་འཁོར་བར་གནས་ནས་ཅི་བྱ་ཞེ་ན། ཀུན་རྫོབ་ཏུ་སེམས་ཅན་དམིགས་པའི་ཕྱིར་རོ་ཞེས་རྩོད་པ་སྤངས་སོ། །དཀའ་འགྲེལ་ཆུང་བ་ལས་ནི། དགེ་སློང་ལྔ་ལས་འདིར་ཉོན་མོངས་བཅོམ་པའི་དགེ་སློང་བཟུང་

Page: 836 སྟེ་སྟོང་ཉིད་མེད་ན་ལྷག་བཅས་མྱང་འདས་ཀྱི་དགེ་སློང་མེད་པར་ཐལ་བའོ། །ཉོན་མོངས་བཅོམ་པ་ནི་བསྟན་པའི་རྩ་བ་ཡིན་ཏེ། དགྲ་བཅོམ་པའི་ཚོགས་ཀྱིས་བསྟན་པ་སྡུད་འཛིན་སྲུང་བའི་ཕྱིར། ཁ་ཆེ་ལ་སོགས་པའི་ཡུལ་སོ་སོར་ད་ལྟར་ཡང་ བསྟན་པ་བཟུང་བ་དང་སྲུང་བའི་དོན་དུ་གནས་པར་བཤད་པའི་ཕྱིར། སྟོང་ཉིད་མེད་པར་ཉོན་མོངས་པ་བཅོམ་པ་ཇི་ལྟར་མི་འཐད་ན་དེའི་ས་བོན་མ་སྤངས་པས་ཡང་སྐྱེ་བའི་ཕྱིར། ཡང་ན་ཉོན་མོངས་བཅོམ་པ་འཐད་ཀྱང་ལྷག་མེད་ཀྱི་ མྱང་འདས་མི་འཐད་དོ་ཞེས་སེམས་ནི་དམིགས་དང་སོགས་སོ། །འོན་ཏེ་ཡང་སྲིད་མི་ལེན་པས་སྔོན་འཕངས་པའི་ཕུང་པོ་ཟད་པ་ན་མྱང་འདས་སོ། །ཞེས་དོགས་པ་བསུ་བའི་ཕྱིར་རེ་ཞིག་སོགས་སོ། །ངར་འཛིན་གྱི་ཕུང་པོ་དོན་གཉེར་ དེ་དག་ལ་མེད་ཀྱང་ཕུང་པོ་དོན་གཉེར་གྱི་སྲེད་པ་ནི་ཡོད་དེ་ཁ་ཟས་དོན་དུ་གཉེར་བ་ཡོད་པའི་ཕྱིར། དེའི་རྒྱུ་ཚང་བས་ཀྱང་ཡོད་པར་སྟོན་ཏེ། ཚོར་བའི་རྐྱེན་གྱིས་སོགས་ཏེ་བསམ་གྱིས་མི་ཁྱབ་པའི་འཆི་འཕོ་ཡོད་པར་རྒྱུད་བླ་དང༌། དཔལ་ ཕྲེང་གི་མདོ་སོགས་ལས་བཤད་དོ་ཞེས་སྣང་བ་ལ་ནི། ཉོན་མོངས་བཅོམ་པ་དགེ་སློང་གི་མཆོག་ཏུ་ཁྱེད་ཅག་ཉིད་འདོད་དེ་དགྲ་བཅོམ་གྱིས་བསྟན་པའི་བྱ་བ་དངོས་རྣམས་བྱེད་པའི་ཕྱིར། ཞེས་ཐེག་དམན་གྱི་གཞུང་དང་སྦྱར་བ་ཁས་ལེན་དུ་བཅུག་ནས་ སླར་སྟོང་ཉིད་མ་རྟོགས་ན་ཉོན་མོངས་པ་སྤོང་མི་ནུས་ལ། དེས་ན་ཐེག་དམན་ལ་མྱང་འདས་དང་དགྲ་བཅོམ་ཡང་མེད་དོ། །ཞེས་ཐེག་ཆེན་གྱི་རང་གཞུང་ཚད་མར་བྱས་ཏེ་བརྒལ་བ་ཞིག་ཡིན་པར་སྣང་ངོ༌། །ཤེར་ལེ་ཁོ་ནའི་བཀའ་འགྲེལ་ཆུང་ངུ་ལས་ ནི། དགེ་སློང་དཀའ་བར་གནས་ཏེ་རྩོད་བཅས་ཡིན་པའི་ཕྱིར་དང་ཉོན་མོངས་བཅོམ་པ་དཀའ་བ་གཉི་གར་འབྲུ་གཉེར་ཏོ། །གསུམ་པ་སྟོང་ཉིད་སྒོམ་ཚུལ་ལ། བདག་མེད་གཉིས་ལས། དང་པོ་གང་ཟག་གི་བདག་མེད་སྒོམ་པ་ལ་ལྔ།

Page: 837 ༄༅། །སྤྱིར་བདག་མ་གྲུབ་པར་སྟོན་པ། བྱེ་བྲག་ཏུ་གྲངས་ཅན་པའི་འདོད་པ་དགག་པ། རིགས་པ་ཅན་པ་དགག་པ། བདག་མེད་ཀྱང་ལས་འབྲས་མི་འགལ་བ། ཞར་ལ་དཔྱོད་པ་བ་དང་རང་སྡེ་གནས་མ་བུ་པའི་གང་ཟག་ འགོག་པའོ། །དང་པོ་་ནི། གལ་ཏེ་བདག་འགའ་ཡོད་ན་ནི། །ཅི་ཡང་རུང་ལས་འཇིགས་འགྱུར་ན། །བདག་ཉིད་འགའ་ཡང་ཡོད་མིན་པས། །འཇིགས་པར་འགྱུར་བ་སུ་ཞིག་ཡིན། །སོ་དང་སྐྲ་སེན་བདག་མ་ཡིན། །བདག་ནི་ རུས་པ་ཁྲག་མ་ཡིན། །སྣབས་མིན་བད་ཀན་མ་ཡིན་ཏེ། །ཆུ་སེར་དང་ནི་རྣག་ཀྱང་མིན། །བདག་ནི་ཞག་དང་རྡུལ་མིན་ཏེ། །གློ་མཆིན་དག་ཀྱང་བདག་མ་ཡིན། །ནང་རོལ་གཞན་ཡང་བདག་མིན་ཏེ། །བདག་ནི་ཕྱི་ས་གཅིན་མ་ ཡིན། །ཤ་དང་པགས་པ་བདག་མིན་ཏེ། །དྲོད་དང་རླུང་ཡང་བདག་མ་ཡིན། །བུ་ག་བདག་མིན་རྣམ་ཀུན་དུ། །རྣམ་ཤེས་དྲུག་ཀྱང་བདག་མ་ཡིན། །ཞེས་གསུངས་ཏེ། ཚིགས་བཅད་དང་པོས་སྐྲག་པ་པོའི་བདག་མེད་པར་ བསྟན། ལྷག་མས་ལུས་བདག་མ་ཡིན་པར་བསྟན། ཚིག་རྐང་ཐ་མས་སེམས་བདག་མ་ཡིན་པར་བསྟན་ཏོ། །གཉིས་པ་་ནི། གལ་ཏེ་སྒྲ་ཡི་ཤེས་རྟག་ན། །ཐམས་ཅད་ཚེ་ན་སྒྲ་འཛིན་འགྱུར། །ཤེས་བྱ་མེད་ན་ཅི་རིགས་ན། །གང་གིས་ ཤེས་པ་ཞེས་བརྗོད་བྱེད། །གལ་ཏེ་ཤེས་མེད་ཤེས་ཡིན་ན། །ཤིང་ཡང་ཤེས་པར་ཐལ་བར་འགྱུར། །དེས་ན་ཤེས་བྱ་ཉེར་གནས་པ། །མེད་པར་ཤེས་པ་མེད་ཅེས་ངེས། །དེ་ཉིད་ཀྱིས་ནི་གཟུགས་ཤེས་ན། །དེ་ཚེ་ཐོས་ པའང་ཅི་སྟེ་མིན། །གལ་ཏེ་སྒྲ་མི་ཉེ་ཕྱིར་ན། །དེ་ན་དེ་ཡི་ཤེས་པའང་མེད། །སྒྲ་འཛིན་རང་བཞིན་གང་ཡིན་པ། །དེས་གཟུགས་འཛིན་པར་ཇི་ལྟར་འགྱུར། །གཅིག་ནི་ཕ་དང་བུ་ཉིད་དུ། །བཏགས་ཡིན་ཡང་དག་ཉིད་མིན་ཏེ། །

Page: 838 ཇི་ལྟར་སྙིང་སྟོབས་རྡུལ་དང་ནི། །མུན་པ་བུ་མིན་ཕ་ཡང་མིན། །དེ་ནི་སྒྲ་འཛིན་དང་ལྡན་པའི། །རང་བཞིན་དུ་ནི་མཐོང་མ་ཡིན། །གར་མཁན་ལྟ་བུའི་ཚུལ་གཞན་གྱིས། །དེ་ཉིད་མཐོང་ན་དེ་རྟག་མིན། །གལ་ཏེ་ཚུལ་གཞན་དེ་ ཉིད་ན། །གཅིག་ཉིད་དེ་ནི་སྔོན་མེད་ཅིག །གལ་ཏེ་ཚུལ་གཞན་བདེན་མིན་ན། །དེ་ཡི་རང་གི་རང་བཞིན་སྨྲོས། །ཤེས་ཉིད་ཅེ་ན་དེ་ལྟ་ན། །སྐྱེས་ཀུན་གཅིག་ཏུ་ཐལ་བར་འགྱུར། །སེམས་པ་སེམས་མེད་དེ་དག་ཀྱང༌། །གཅིག་ འགྱུར་གང་ཕྱིར་ཡོད་ཉིད་མཚུངས། །གང་ཚེ་བྱེ་བྲག་ཕྱིན་ཅི་ལོག །དེ་ཚེ་འདྲ་བའི་རྟེན་གང་ཡིན། །ཞེས་གསུངས་ཏེ། དང་པོ་གཉིས་ཀྱིས་སྒྲ་འཛིན་རྟག་པ་བཀག །དེ་ཉིད་ཀྱིས་སོགས་ཕྱེད་དང་གཉིས་ཀྱིས་དེས་གཟུགས་འཛིན་པ་ བཀག །གཅིག་ནི་སོགས་ཕྱེད་དང་གཉིས་ཀྱིས་བལྟོས་པའི་དཔེ་བརྗོད་པ་བཀག །ལྷག་མས་རྟག་པ་དང་གཅིག་པུར་བདེན་པ་བཀག་པའོ། །གསུམ་པ་རིགས་པ་ཅན་པ་དགག་པ་ནི། སེམས་མེད་པ་ཡང་བདག་མིན་ཏེ། །སེམས་མེད་ཉིད་ ཕྱིར་བུམ་སོགས་བཞིན། །འོན་ཏེ་སེམས་དང་ལྡན་པའི་ཕྱིར། །ཤེས་ན་མི་ཤེས་འཇིག་པར་ཐལ། །ཅི་སྟེ་བདག་ལ་འགྱུར་མེད་ན། །སེམས་པས་དེ་ལ་ཅི་ཞིག་བྱས། །དེ་ལྟར་ཤེས་མེད་བྱ་བྲལ་བ། །ནམ་མཁའ་བདག་ཏུ་བྱས་པར་ འགྱུར། །ཞེས་གསུངས་ཏེ། སྔ་མས་སེམས་མེད་པའི་བདག་བཀགཕྱི་མས་དེ་འགྱུར་མེད་དུ་འདོད་པ་བཀག་གོ །བཞི་པ་ནི། གལ་ཏེ་བདག་ནི་ཡོད་མིན་ན། །ལས་འབྲས་འབྲེལ་བ་རིགས་མིན་ཏེ། །ལས་བྱས་ནས་ནི་ཞིག་ པས་ན། །སུ་ཡི་ལས་སུ་འགྱུར་ཞེ་ན། །བྱ་བ་འབྲས་གཞི་ཐ་དད་དང༌། །དེ་བདག་བྱེད་པ་མེད་པར་ཡང༌། །ཡུ་བུ་གཉིས་ཀ་ལ་གྲུབ་པས། །འདིར་བརྩད་དོན་མེད་མ་ཡིན་ནམ། །རྒྱུ་ལྡན་འབྲས་བུ་དང་བཅས་པར། །མཐོང་བ་འདི་ནི་སྲིད་

Page: 839 ༄༅། །མ་ཡིན། །རྒྱུན་གཅིག་ལ་ནི་བརྟེན་ནས་སུ། །བྱེད་པོ་སྤྱོད་པོ་ཞེས་བྱར་བསྟན། །ཞེས་གསུངས་ཏེ། དང་པོས་རྩོད་པ་བཀོད། གཉིས་པས་བདག་བྱེད་པ་པོ་མེད་པ་རྒོལ་བ་གཉིས་ཀ་ལ་མཚུངས་པར་བསྟན། གསུམ་པས་རྒྱུ་ འབྲས་དུས་མཉམ་མི་སྲིད་པར་བསྟན་ཏོ། །ལྔ་པ་་ནི། འདས་དང་མ་འོངས་པ་ཡི་སེམས། །བདག་མིན་དེ་ནི་མེད་པའི་ཕྱིར། །འོན་ཏེ་སྐྱེ་སེམས་བདག་ཡིན་ན། །དེ་ཞིག་ན་ཡང་བདག་མེད་ན། །དཔེར་ན་ཆུ་ཤིང་སྡོང་པོ་དག །ཆ་ཤས་ཕྱེ་ ན་འགའ་མེད་པ། །དེ་བཞིན་རྣམ་པར་དཔྱད་པ་ཡིས། །བཙལ་ན་བདག་ཀྱང་ཡང་དག་མིན། །གལ་ཏེ་སེམས་ཅན་ཡོད་མིན་ན། །སུ་ལ་སྙིང་རྗེ་བྱ་ཞེ་ན། །འབྲས་བུའི་དོན་དུ་ཁས་བླངས་པའི། །རྨོངས་པས་བཏགས་པ་གང་ཡིན་པའོ། ། སེམས་ཅན་མེད་འབྲས་སུ་ཡི་ཡིན། །བདེན་ཏེ་འོན་ཀྱང་རྨོངས་ལས་འདོད། །སྡུག་བསྔལ་ཉེ་བར་ཞི་དོན་དུ། །འབྲས་བུའི་རྨོངས་པ་ཟློག་མི་བྱ། །སྡུག་བསྔལ་རྒྱུ་ཡི་ང་རྒྱལ་ནི། །བདག་ཏུ་རྨོངས་པས་འཕེལ་བར་འགྱུར། །དེས་ཀྱང་ བདག་ཏུ་མེད་ཅེ་ན། །བདག་མེད་བསྒོམ་པ་མཆོག་ཡིན་ནོ། །ཞེས་གསུངས་ཏེ། དང་པོའི་ཕྱེད་སྔ་མས་འདས་མ་འོངས་བདག་མ་ཡིན་པ་དང༌། ཕྱེད་ཕྱི་མས་ད་ལྟ་བ་བདག་མ་ཡིན་པར་བསྟན། དེ་ནས་ཚིགས་བཅད་གཅིག་གིས་བདག་མི་ རྙེད་པར་བསྟན། ལྷག་མས་སེམས་ཅན་མེད་ན་སྙིང་རྗེ་མི་འཐད་པའི་རྩོད་པ་སྤངས་པའོ། །དེ་ཡང༌། སྟོང་ཉིད་སྡུག་བསྔལ་ཞི་བྱེད་པ། །དེ་ལ་འཇིགས་པ་ཇི་ལྟར་སྐྱེ། །ཞེས་སྟོང་ཉིད་འཇིགས་པའི་གནས་མིན་པར་བསྟན་ནས། དེ་ལྟ་མོད་ ཀྱི་གལ་ཏེ་འཇིགས་པ་པོ་བདག་འགའ་ཞིག་ཡོད་ན་ནི་འཇིགས་གནས་ཅི་ཡང་རུང་བ་ལ་འཇིགས་པར་འགྱུར་ལ་རག་མོད་ནའང་བདག་ཉིད་ནི་འགའ་ཞིག་སྟེ་ཆུང་ངུ་ཙམ་ཡང་ཡོད་པ་མིན་པས་འཇིགས་པར་མི་རིགས་ཏེ། ཐོག་མར་འཇིགས་པར་

Page: 840 འགྱུར་བ་པོ་དེ་སུ་ཞིག་ཡིན་བརྟག་པར་བྱོས་ཤིག་གོ །གལ་ཏེ་ལུས་བདག་གོ་ཞེ་ན། ཡན་ལག་གི་ཚོགས་པ་ལས་གཞན་པའི་ལུས་ནི་མེད་ལ་ཡན་ལག་དེ་རྣམས་ནི་བདག་མ་ཡིན་ཞིང་དེ་རྣམས་ལ་ཡང་བདག་མེད་དེ་འདི་ལྟར་སོ་དང་སྐྲ་དང་སེན་ མོ་ནི་རུས་པ་དང་སྤུ་ཡིན་གྱི་བདག་མ་ཡིན་ལ་བདག་ནི་རུས་པ་དང་སྤུ་ལ་སོགས་པར་མི་རིགས་སོ། །དེ་བཞིན་དུ་ཁྲག་ནི་བདག་མ་ཡིན་ལ་བདག་ཀྱང་ཁྲག་མ་ཡིན་ནོ། །སྣབས་མིན་བད་ཀན་མ་ཡིན་ཏེ། །ཆུ་སེར་དང་ནི་རྣག་ཀྱང་མིན་ཏེ་ དེ་དག་ནི་ལྗན་ལྗིན་ཡིན་ལ། བདག་ལྗན་ལྗིན་དུ་མི་རིགས་ཤིང་ལྗན་ལྗིན་བདག་ཏུ་ཡང་མི་རིགས་པའི་ཕྱིར། བདག་ནི་ཞག་དང་རྡུལ་མིན་ཏེ། དེ་གཉིས་ནི་ནང་གི་ཆུ་ཁམས་སུ་ཟད་དོ། །གློ་མཆིན་དག་ཀྱང་བདག་མ་ཡིན། ནང་རོལ་ གཞན་ཡང་བདག་མིན་ཏེ་དེ་དག་ནི་ཤར་ཟད་པའི་ཕྱིར། བདག་ནི་ཕྱི་ས་གཅིན་མ་ཡིན་ཏེ་དེ་གཉིས་ནི་ཟས་སྐོམ་གྱི་སྙིགས་མ་ཡིན་པའི་ཕྱིར། ཤ་དང་པགས་པ་དང་རུས་པ་དང་རྩ་དང་རྒྱུས་པ་ཡང་བདག་མ་ཡིན་ཏེ་དུར་ཁྲོད་དུ་བོར་བའི་ཤ་ སོགས་བདག་དང་བདག་གི་གང་ཡང་མ་ཡིན་པར་མཐོང་ལ་ལུས་འདིའི་ཤ་སོགས་དང་དེ་དག་ལ་ཁྱད་པར་མ་མཐོང་བའི་ཕྱིར། དེ་རྣམས་ཀྱིས་ལུས་ཀྱི་ས་ཁམས་དང༌། ཆུ་ཁམས་བདག་མ་ཡིན་པར་བསྟན་ལ། དེ་བཞིན་དུ་དྲོད་མེའི་ཁམས་དང་རླུང་འབྱུང་ འཇུག་གནས་པ་དབུགས་ཀྱི་ཆ་ཡང་བདག་མ་ཡིན་ཏེ། ཇི་ལྟར་ཐབ་ཀའི་མེ་བདག་མ་ཡིན་པ་དང་སྦུད་པའི་རླུང་བདག་མ་ཡིན་པ་བཞིན་ནོ། །རྣ་བ་ལ་སོགས་པ་ནང་གི་བུ་ག་གཞན་དང་གཞན་རྣམས་ཀྱང་བདག་མ་ཡིན་ཏེ། ཕྱིའི་སྐར་ཁུང་བདག་ མ་ཡིན་པ་བཞིན་ནོ། །གལ་ཏེ་ལུས་བདག་མ་ཡིན་མོད་སེམས་བདག་ཡིན་ནོ་ཞེ་ན། རྣམ་པ་ཀུན་ཏུ་ཡུལ་ལ་འཇུག་པའི་མིག་གི་རྣམ་ཤེས་ལ་སོགས་པ་དྲུག་པོ་འདི་དག་ཀྱང་བདག་མ་ཡིན་ཏེ། འདི་དག་ནི་ཡུལ་གཟུགས་སོགས་ལ་བརྟེན་ནས་

Page: 841 ༄༅། །སྐྱེ་ཡི་བདག་ནི་རྐྱེན་ལ་རག་ལས་པར་མི་རིགས་པ་དང་བདག་གི་མིག་གི་རྣམ་ཤེས་ཞེས་འདི་དག་ལ་བདག་གི་བའི་འདུ་ཤེས་འཇུག་པའི་ཕྱིར། བདག་ཡིན་ན་བདག་གི་བར་འགལ་ཏེ་བདག་ཀྱང་ཡིན་ལ། བདག་གི་རྟ་ ཡང་ཡིན་པ་མི་སྲིད་པ་ལྟ་བུའི་ཕྱིར། ཚོགས་དྲུག་པོ་ལས་གཞན་པའི་སཻམས་ཀྱང་མེད་དེ། རྣམ་པར་ཤེས་པ་ནི་ཤེས་པའི་ཚོགས་གཅིག་ཁོ་ན་ཡིན་ལ་དེ་ཉིད་ཡུལ་གྱི་དབང་གིས་དྲུག་ཏུ་བཞག་པའི་ཕྱིར། ཀུན་གཞིའི་རྣམ་ཤེས་བདག་ གོ་ཞེ་ན། དེ་ནི་ཐེག་ཆེན་གྱི་སྐབས་ལས་གཞན་དུ་མ་བསྟན་ཏེ། ལེན་པའི་རྣམ་པར་ཤེས་པ་ཟབ་ཅིང་ཕྲ། །ས་བོན་ཐམས་ཅད་ཆུ་བོ་བཞིན་དུ་འབབ། །བདག་ཏུ་རྟོག་པར་གྱུར་ན་མི་རུང་ཞེས། །དེ་ནི་བྱིས་པ་རྣམས་ལ་ངས་མ་བསྟན། །ཞེས་སོ། ། ཀུན་གཞིའི་རྣམ་ཤེས་རྣམ་པར་བཞག་པའི་ཚེ་ནའང་དེ་ཡང་བདག་མ་ཡིན་ཏེ་དེ་ལ་ཡང་བདག་གི་བའི་འདུ་ཤེས་འཇུག་པའི་ཕྱིར་དང༌། སྤྱིར་རྒྱུ་མེད་དུ་ལྟ་བ་ལྡོག་ཕྱིར། ཀུན་གཞི་ནི་དགོངས་པས་གསུངས་ཀྱི་ངོ་བོ་ཉིད་ཀྱིས་ཡོད་པ་མ་ཡིན་ཏེ། སངས་རྒྱས་ཀྱི་སར་མི་གནས་པའི་ཕྱིར་དང༌། མཐར་ཐུག་ཀུན་གཞི་མེད་པའི་ཆོས་ཀྱི་འཁོར་ལོ་གཙོ་བོར་སྟོན་པའི་ཕྱིར་དང༌། གང་ཀུན་གཞི་འདོད་པ་དེ་ནི་ཆོས་འདོད་པ་མ་ཡིན་ནོ། །ཞེས་གསུངས་པའི་ཕྱིར། ལུས་སེམས་དེ་དག་ལས་གཞན་པའི་ བདག་ཡོད་ན་རང་ཉིད་སྣང་བར་རིགས་ཏེ་རང་ཉིད་ལ་རང་ལྐོག་ཏུ་གྱུར་པ་མི་སྲིད་པའི་ཕྱིར། དེ་ཡང་མི་སྣང་བ་ལས་ན་བདག་དེ་ནི་ཀུན་རྫོབ་བམ་དོན་དམ་དུའང་རུང་དཔྱད་པའམ་ཐ་སྙད་དུའང་རུང་སྟེ་ནམ་དུ་ཡང་སྲིད་པ་མ་ཡིན་ནོ། །དེ་ལ་གྲངས་ ཅན་པ་ན་རེ། ཤེས་པ་ནི་བདག་ཡིན་ལ་དེ་དང་བཅས་པའི་སྐྱེས་བུ་ནི་རང་གི་ངོ་བོ་སྟེ། དེའི་འདོད་པ་ལས་རྡུལ་མུན་སྙིང་སྟོབས་གསུམ་ཆ་མཉམ་པ་ནི་རང་བཞིན་ཏེ་རྟག་པ་ཡིན་ལ། ཆ་མི་མཉམ་པ་ནི་འགྲོ་བ་ཞེས་བྱ་བ་སྐྱེ་འཇིག་ཅན་ཡིན་ཞིང་རྟག་

Page: 842 པ་དང་འདྲེས་པ་ལས་ཆེན་པོའམ་བློ། དེ་ལས་ང་རྒྱལ། དེ་ལས་སྒྲ་སོགས་དེ་ཙམ་ལྔ་བློ་མེ་ལོང་ངོས་གཉིས་པ་ལྟ་བུ་ལ་འཕོས་པ་ལས་བདག་ལ་གཟུགས་བརྙན་ལྟར་སྣང་ཞིང་མྱོང་ལ་བློས་ཞེན་པ་དེ་སྐྱེས་བུས་སེམས་པར་བྱེད་དོ། །དེས་ན་བདག་ དེ་ནི་རྟག་ཏུ་སྒྲའི་ཤེས་པ་ལ་སོགས་པའི་རང་བཞིན་ཅན་ཡིན་ནོ། །ཞེས་ཟེར་རོ། །དེ་དགག་པ་ནི། གལ་ཏེ་ཁྱོད་ལྟར་སྒྲའི་ཤེས་པ་དེ་རྟག་པ་ཡིན་ན་ནི་འོ་ན་དུས་ཐམས་ཅད་ཀྱི་ཚེ་ན་ཤེས་པས་སྒྲ་འཛིན་པས་སྒྲ་རྒྱུན་མི་འཆད་པར་གྲག་པར་ ཐལ་བའི་ཕྱིར། དུང་འབུད་པ་དང་པི་ཝང་སྒྲེང་བ་སོགས་ཀྱི་རྩོལ་བ་ལ་མ་ལྟོས་པར་དུང་སྒྲ་དང་པི་ཝཾ་གི་སྒྲ་རྒྱུན་མི་འཆད་པར་འགྱུར་རོ། །རེས་འགའ་ཡུལ་སྒྲ་མི་ཉེ་བས་དེ་ཡི་ཚེ་སྒྲ་མི་འབྱུང་ངོ་ཞེ་ན། ཤེས་བྱ་སྒྲ་མི་ཉེ་བས་མེད་པ་དེའི་ སྐབས་ན་ཤེས་པ་དེས་ཅི་ཞིག་རིག་ན་གང་གིས་དེ་ལ་སྒྲའི་ཤེས་པ་ཞེས་བརྗོད་པར་བྱེད་པ་སྨོས་ཤིག །གལ་ཏེ་ཤེས་བྱ་སྒྲ་མེད་པ་དེའི་ཚེ་ཡང་སྒྲའི་ཤེས་པ་ཡིན་ནོ་ཞེ་ན། འོ་ན་ཡུལ་ཤེས་མི་དགོས་པའི་ཕྱིར་ལྗོན་ཤིང་ཡང་ཤེས་པར་ཐལ་ བར་འགྱུར་རོ། །དེས་ན་ཤེས་བྱ་ཉེ་བར་གནས་པ་མེད་པར་ཤེས་པ་སྐྱེ་བ་མེད་ཅེས་ངེས་པའི་ཕྱིར་སྒྲ་མེད་ན་ཡང་སྒྲ་འཛིན་གྱི་ཤེས་པ་ཡོད་པར་མ་སྨྲ་ཞིག །གལ་ཏེ་སེམ་པ་རྟག་པ་དེ་ཉིད་ཀྱིས་ནི་སྒྲ་མི་ཤེས་པའི་ཚེ་ནའང་ཡུལ་ཉེ་བ་ན་གནས་པའི་ གཟུགས་ཤེས་སོ་ཞེ་ན། འོ་ན་དེའི་ཚེ་སྒྲ་ཐོས་པའང་ཅིས་ཏེ་མིན་ཏེ་སྒྲའི་ཤེས་པར་རྟག་པའི་ཕྱིར། གཞན་ཡང་དུང་དཀར་མཐོང་བ་ན་དུང་སྒྲ་ཐོས་དགོས་པར་འགྱུར་ཏེ། དུང་དཀར་དེ་དུང་སྒྲའི་རྟེན་ཡིན་ལ། སེམས་རྟག་པ་དེས་ཉེ་བའི་དུང་ གཟུགས་མཐོང་ཞིང་དུང་སྒྲ་དང་དུང་གཟུགས་ལ་ཡུལ་ཉེ་རིང་གི་ཁྱད་མེད་པའི་ཕྱིར་ཞེས་པར་ཡང་འཐོབ་བོ། །གལ་ཏེ་ཡུལ་སྒྲ་ཐག་མི་ཉེ་བའི་ཕྱིར་ན་སྒྲ་མེད་དོ་ཞེ་ན། དེ་ལྟ་ན་སྒྲ་དེའི་ཤེས་པ་ཡང་མེད་དེ་རི་བོང་གི་རྭ་མེད་ན་དེ་ཡི་ཤེས་

Page: 843 ༄༅། །པ་ག་ལ་ཡོད་པ་ལྟར་རོ། །དེ་ལྟར་ཡིན་མོད་ཅེ་ན། འོ་ན་སྒྲའི་ཤེས་པ་རྟག་པའི་དམ་བཅའ་ཉམས་སོ། །ཡང་དྲི་བར་བྱ་སྟེ། ཅི་སྒྲ་འཛིན་པའི་རང་བཞིན་གང་ཡིན་པའི་ཤེས་པ་དེས་གཟུགས་འཛིན་པར་ཇི་ལྟར་འགྱུར། ཁོ་ན་རེ། སྐྱེས་བུ་གཅིག་ཉིད་ཕ་ལ་བལྟོས་ནས་བུ་དང་བུ་ལ་བལྟོས་ནས་ཕར་འཇོག་པ་བཞིན་ནོ་ཞེ་ན། སྐྱེས་བུ་གཅིག་ལ་ནི་རེས་ཕ་དང་རེས་བུ་ཉིད་དུ་འདོགས་པ་ནི་བལྟོས་ནས་བཏགས་པ་ཡིན་གྱི་ཡང་དག་པ་ཉིད་དུ་མ་ཡིན་ལ། མ་ལྟོས་ པའི་ཚེ་ཕ་བུ་གང་ཡང་མ་ཡིན་པས་སོ། །འདི་ལྟར་ཁྱོད་འདོད་པའི་སྙིང་སྟོབས་བདེ་བ་དང་རྡུལ་སྡུག་བསྔལ་དང་མུན་པ་གཏི་མུག་དེ་རྣམས་ནི་བུ་མིན་ཕ་ཡང་མིན་ཏེ་གང་ལ་ཡང་མ་ལྟོས་པའི་ཕྱིར། རྣམ་འགྱུར་ལ་བལྟོས་སོ་ཞེ་ན། མ་ལྟོས་ པའི་དུས་སུ་རྡུལ་མུན་སྙིང་སྟོབས་དེ་ནི་སྒྲ་འཛིན་དང་ལྡན་པའི་རང་བཞིན་ཉིད་དུ་ནི་སུས་ཀྱང་མཐོང་བ་མ་ཡིན་ནོ། །གལ་ཏེ་ཟློས་གར་མཁན་གྱིས་སྐད་ཅིག་རེར་སྲིད་སྒྲུབ་དང་འཇིགས་སྡེ་སོགས་ཀྱི་གཟུགས་ཐ་དད་འཛིན་པ་ལྟར་ཤེས་པ་དེ་ ཉིད་ཚུལ་གཞན་གྱིས་རྣམ་པ་གཞན་འཛིན་ནོ་ཞེ་ན། ཁྱོད་ཀྱིས་དེ་ལྟ་བུ་ཉིད་དུ་མཐོང་ན་ཤེས་པ་དེ་རྟག་པ་མིན་པར་ངེས་ཏེ་སྐད་ཅིག་གིས་འགྱུར་བའི་ཕྱིར་རོ། །གལ་ཏེ་གར་མཁན་གྱིས་ཚུལ་གཞན་ཐ་དད་འཛིན་ཡང་གར་མཁན་གཅིག་ པོ་དེ་ཉིད་ཡིན་པ་ལྟར་རྣམ་པ་ཐ་དད་འཛིན་ཡང་སྒྲ་འཛིན་པའི་ཤེས་པ་རྟག་པ་ཅན་གྱི་བདག་གཅིག་པོ་དེ་ཉིད་ཡིན་པས་སྐྱོན་མེད་དོ་ཞེ་ན། འོ་ན་སྒྲ་འཛིན་གྱི་ཤེས་པ་རྟག་པ་ཅན་གྱི་བདག་གཅིག་པུ་ཉིད་ཀྱང་ཡིན་ལ། གཟུགས་འཛིན་དང་དྲི་ འཛིན་ལ་སོགས་པ་དངོས་པོ་སྣ་ཚོགས་སུ་འགྱུར་བ་ཡང་ཡིན་ན་དེ་ནི་འཇིག་རྟེན་ན་སྔོན་མེད་ཅིང་མི་སྲིད་པ་གཅིག་གོ་ཞེས་བསྟིངས་སོ། །གཞན་ཡང་བདག་དེ་སྒྲ་དེ་ཙམ་གྱི་ཤེས་པར་རྟག་ན་གཟུགས་དེ་ཙམ་ལ་སོགས་པ་དེ་ཙམ་ལྔ་

Page: 844 གའི་ཤེས་པར་རྟག་དགོས་ལ། དེ་ལྟ་ན་ཡུལ་དང་དབང་པོ་མེད་ཀྱང་གཟུགས་སོགས་ལྔ་ཀ་རྟག་ཏུ་འཛིན་དགོས་པར་འགྱུར་ལ་དེ་ལྟ་ན་དམུས་ལོང་དང་འོན་པའི་བདག་དང་གཉིད་ལོག་པ་དང་བརྒྱལ་བའི་དུས་ཀྱི་བདག་ཇི་ལྟར་བྱ། གལ་སྟེ་ བདག་རྟག་གཅིག་དེ་ཚུལ་གཞན་དེར་བདེན་པ་མིན་པས་རྟག་གཅིག་དང་མི་འགལ་ལོ་ཞེ་ན། འོ་ན་བདག་དེ་ཡི་རང་གི་རང་བཞིན་གང་ཡིན་པ་སྨྲོས་ཤིག །ཤེས་པ་ཙམ་ཉིད་དོ་ཞེ་ན། དེ་ལྟ་ན་སྐྱེ་བོ་ཀུན་གཅིག་ཏུ་ཐལ་བར་འགྱུར་ཏེ་ བདག་ཤེས་པ་ཙམ་གཅིག་ཏུ་ཁྱད་མེད་པའི་ཕྱིར། ཁྱོད་ཉིད་འདོད་པའི་སེམ་པ་ཅན་གྱི་སྐྱེས་བུ་དེ་དང་སེམས་མེད་པའི་གཙོ་བོ་དེ་དག་ཀྱང་གཅིག་ཏུ་ཐལ་བར་འགྱུར་ཏེ་གང་གི་ཕྱིར་བདག་གཅིག་ཡིན་པའི་ཕྱིར་རོ། །གལ་ཏེ་རང་བཞིན་དང་སྐྱེས་ བུ་ནི་ཡོད་པ་ཉིད་དུ་མཚུངས་པས་གཅིག་པ་འདོད་དོ་ཞེ་ན། གང་གི་ཚེ་སྐྱེས་བུ་སེམས་བཅས་དང་རང་བཞིན་སེམས་མེད་ཀྱི་བྱེ་བྲག་ཁྱད་པར་བ་ཁྱོད་ཀྱིས་བཞག་པ་དེ་ནི་ཕྱིན་ཅི་ལོག་པ་ཡིན་ཏེ་དེའི་ཚེ་ཁྱད་ཆོས་སེམས་བཅས་དང་སེམས་མེད་དེ་ གཉིས་གཅིག་ཏུ་འདུ་བའམ་འདྲ་བའི་ཁྱད་གཞི་འམ་རྟེན་གང་ཡིན་ཏེ་དེ་གཉིས་ལས་གཞན་པའི་དེ་གཉིས་ཀྱི་གཞི་གང་ཡང་ན་ང་ལ་དེ་གཉིས་ཀྱང་ཕན་ཚུན་གཅིག་ཏུ་གཅིག་མི་འདུ་བའི་ཕྱིར་གཅིག་པར་ཡང་མི་འགྱུར་རོ། །འདི་རྣམས་ སུ་དགེ་བའི་ལྷས་ནི། བད་སའི་བུ་ལ་སོགས་པས་བདག་དང༌། སྲོག་དང༌། གང་ཟག་ཅེས་བྱ་བར་ཡོད་པར་འདོད་པ་སུན་དབྱུང་བ་དང༌། གྲངས་ཅན་པ་དག་ཀྱང་ཤེས་པ་ལ་བདག་ཅེས་འདོགས་ལ་ཞེས་སོགས་ཀྱིས་ཕྱོགས་སྔ་བརྗོད་ཅིང་འགོག་ པ་དང༌། སྒྲ་ལ་སོགས་པ་གང་ན་རྟག་ཏུ་མི་གནས་པས་དུས་ཐམས་ཅད་དུ་མ་ཐོས་པ་ཡིན་ནོ་ཞེ་ན། ཤེས་བྱ་མེད་ན་ཅི་རིག་ན། །གང་གིས་ཤེས་པ་ཞེས་བརྗོད་བྱེད། །ཅེས་བཀག་པ་དང༌། གཟུགས་འཛིན་དང་སྒྲ་འཛིན་གཅིག་

Page: 845 ༄༅། །ན་ནི་དབང་པོ་ལྔར་བཏགས་པ་ཡང་དོན་མེད་པར་འགྱུར་རོ། །ཞེས་དང༌། ཕ་ལས་བུ་འབྱུང་བ་ལྟར་རང་བཞིན་ལས་སྐྱེས་བུ་དང༌། དེ་ལས་བློ་དང༌། དེ་ལས་ང་རྒྱལ་དང༌། དེ་ལས་དེ་ཙམ་ལྔ་སོགས་རིམ་པར་སྐྱེ་བ་ཡང་རང་ བཞིན་རྟག་པ་གཅིག་པུ་ཉིད་ཡིན་ན་མི་འཐད་དོ། །ཞེས་དང༌། གཅིག་པུ་ཉིད་ཡིན་ཡང་དུ་མར་གདགས་སུ་རུང་སྟེ་སྐྱེས་བུ་གཅིག་ཉིད་ལ་ཕ་དང་བུ་གཉི་གར་བརྗོད་པ་ལྟར་རོ་ཞེ་ན། སྙིང་སྟོབས་ལ་སོགས་པ་དེ་དག་ཀྱང་གཅིག་པུ་བསྟན་ པའི་རྣམ་པར་འགྱུར་བ་ཙམ་དུ་བཏགས་ཀྱི་འགྲོ་བ་ནི་སྐྱེས་པ་མ་ཡིན་པས་ཡང་དག་པར་ན་སྙིང་སྟོབས་སོགས་ནི་ཕ་ཡང་མ་ཡིན་ལ་བུ་ཡང་མ་ཡིན་ནོ་ཞེས་དང༌། སྒྲའི་ཤེས་པ་དེ་ཉིད་གར་མཁན་དང་འདྲ་བར་གཟུགས་ཀྱི་ཤེས་པར་སྣང་ བ་ཡིན་ནོ་ཞེ་ན། དེ་ལྟ་ན་ཤེས་པ་དེ་གར་མཁན་ལྟར་མི་རྟག་པར་འགྱུར་རོ། །གལ་ཏེ་དེ་ཉིད་རང་བཞིན་གཞན་ཡིན་ནོ་ཞེ་ན། དེའི་གཅིག་པ་ཉིད་འདི་ནི་སྔོན་ཆད་མེད་པ་ཡིན་ཏེ་གཞན་ལ་ཡང་གཅིག་པ་ཉིད་འདི་ནི་ཕན་ཚུན་འགལ་བའི་ཕྱིར་རོ། །དེ་ ལྟར་གཅིག་པ་བཀག་པ་ན་རང་བཞིན་གཞན་ཡིན་པར་ནི་འཛིན་པ་ཡིན་ཏེ་དེ་ལྟར་མེད་དོ་ཞེ་ན། དེ་ལྟ་ན་བདག་དེའི་རང་བཞིན་ནམ་ངོ་བོ་ཉིད་ཇི་ལྟ་བུ་ཡིན་པ་སྨྲོས་ཤིག །ཤེས་པ་ཉིད་དོ་ཞེ་ན། སྐྱེས་བུ་ཐམས་ཅད་གཅིག་ཏུ་ཐལ་བར་འགྱུར་ཏེ་གྲོལ་ བ་དང་མ་གྲོལ་བའི་སྐྱེས་བུ་རྣམས་གཅིག་ཁོ་ནར་འགྱུར་བའི་སྐྱོན་ཡོད་དོ། །གཞན་ཡང་སེམས་དང་བཅས་པའི་སྐྱེས་བུ་དང་སེམས་མེད་པའི་སྐྱེས་བུ་གཉིས་གཅིག་པ་ཁོ་ནར་ཐལ་ལོ། །གྲངས་ཅན་པ་ན་རེ། ཤེས་པ་དང་རང་བཞིན་ནི་ ཡོད་པར་མཉམ་ཞིང་མཚུངས་པས་གཅིག་པ་འདོད་དོ་ཞེ་ན། དབུ་མ་པས་གང་ཚེ་སོགས་སྨོས་ཏེ་སྐྱེས་བུ་དང་རང་བཞིན་གཉིས་སེམས་ཡོད་མེད་ཀྱི་བྱེ་བྲག་གི་ཁྱད་པར་མེད་ཅིང་རིམ་རིམ་མིན་གྱི་བྱེད་པ་དང་བྲལ་བས་རི་བོང་གི་རྭ་ལྟར་མེད་

Page: 846 པ་ཁོ་ན་ཡིན་ན་དེའི་ཚེ་འདྲ་བའི་སྐྱེས་བུ་གང་ཞིག་ཡིན་ཏེ་ཅི་ཡང་མེད་དོ། །དེས་ན་གཅིག་པ་ཡང་མ་ཡིན་ནོ། །འདི་དག་གིས་ནི་རྒྱུ་ལ་སོགས་པའི་སྤྱི་དང་རང་གི་མཐུན་པ་དག་ཀྱང་བསལ་བ་ཡིན་ནོ་ཞེས་བཀྲལ་ཏོ། །བི་བྷུ་ཏིས་ནི། གང་གི་ཚེ་ བདག་ཅེས་བྱ་བ་དཔྱད་པས་ཚིག་དང་རྟོག་པ་མ་ཡིན་པ་གཞན་མེད་པ་དེའི་ཚེ་འཇིགས་པ་སུ་ལ་ཡོད་དེ། བདག་གིའང་ད་ལྟར་ཡོངས་གྱུར་མེད། །དེས་ནི་བྱིས་པ་སྐྲག་པར་འགྱུར། །མཁས་པ་འཇིགས་པ་བཟད་པའོ། །ཞེས་དྲངས་ པ་དང༌། གར་མཁན་གྱི་དཔེ་མི་འཐད་དེ་དང་པོའི་ཚུལ་སྤངས་ནས་གཞན་གྱི་ཚུལ་འཛིན་པ་བསྒྲུབ་བྱ་དང་མི་མཚུངས་པའི་ཕྱིར། ཞེས་དང༌། གར་མཁན་དེ་ཉིད་ཡིན་ལ་རང་བཞིན་གཞན་དུ་བརྗོད་ན་དེའི་ཚེ་འདི་ལྟ་བུ་གཅིག་ནི་སྔར་མེད་པ་ ཡིན་ནོ། །དེ་ཉིད་དུ་གཞན་ཐ་དད་པས་འགལ་ཚབས་ཅན་ཡིན་ནོ། །གལ་ཏེ་ཤེས་པ་ཉིད་དང་གཟུགས་སོགས་འཛིན་པ་སྟེ་ཚུལ་གཉིས་པ་ཅན་ཡིན་ལ། གཟུགས་འཛིན་སོགས་ཀྱི་ཚུལ་དེ་ཤེལ་གྱི་ཁ་དོག་བཞིན་ཡུལ་ལ་བལྟོས་པ་ཡིན་པས་མི་ བདེན་ནོ་ཞེ་ན། འོ་ན་དེའི་རང་བཞིན་གྱི་ཚུལ་གང་ཡིན། ཤེས་པ་ཉིད་དོ་ཞེ་ན། འོ་ན་སྒྲ་འཛིན་དང་གཟུགས་འཛིན་གྱི་ཤེས་པ་ཐ་དད་པ་གཉིས་གཅིག་ཏུ་འདོད་པ་ལྟར་སྐྱེས་བུ་ཐམས་ཅད་གཅིག་ཏུ་ཐལ་ཏེ་ཤེས་པར་ཐ་མི་དད་པའི་ཕྱིར། ཡང་དབྱེ་བ་དོར་ནས་ཚུལ་གང་རུང་གཅིག་ཏུ་བྱེད་ན་སེམས་པ་ནི་སྐྱེས་བུའི་ཆོས་ཡིན་ལ་སེམས་པ་མ་ཡིན་པ་ནི་རང་བཞིན་ལ་སོགས་པའི་ཆོས་ཡིན་པ་དེ་གཉིས་ཐ་མི་དད་དུ་འགྱུར་ཏེ་གཉིས་ཀ་ཡོད་པར་མཚུངས་པའི་ཕྱིར། འདོད་དོ་ཞེ་ན། དངོས་པོ་རྣམས་ཀྱི་བྱེ་བྲག་གང་ཚེ་བརྫུན་ཡིན་པ་དེའི་ཚེ་འདྲ་བའི་རྟེན་གང་ཡིན་ཏེ་དངོས་པོ་ཐ་དད་པ་འདྲ་བ་མང་པོ་ཡོད་ན་འདྲ་བའི་སྒོ་ནས་གཅིག་ཏུ་བྱེད་པ་ཡིན་ཏེ་དེ་ནི་མེད་དོ་ཞེས་བཀྲལ་ཏོ། །ཤེར་ལེའི་འགྲེལ་ཆུང་དུ། ཆུ་སེར་ནི་ཟ་བ་

Page: 847 ༄༅། །ཕྲུགས་པ་ལས་བྱུང་བའི་ཁུ་བ་རུལ་བའོ། །ཞག་ནི་ནང་ན་གནས་པའི་ཁུ་བ་རུལ་བའོ། །ཞེས་བཤད་པ་དེ་ནི་མ་ཡིན་ཏེ། ཆུ་སེར་ནི་ཤ་ཁྲག་ལས་སྐྱེས་པའི་ཆུ་ཤིན་ཏུ་དྭངས་པ་དང༌། ཞག་ནི་ལུས་ཀྱི་སྣུམ་འཁྱིལ་བ་ཡིན་ ལ་ཁྲག་ལ་སོགས་པ་འདི་རྣམས་རུལ་ན་རྣག་ཏུ་འགྱུར་བ་ཡིན་ནོ། །དེར། གཅིག་ཉིད་དེ་ནི་སྔོན་མེད་དེ། །ཞེས་པ་བདག་གཅིག་པུ་ཡང་ཡིན་ལ་རང་བཞིན་གཞན་ཡང་ཡིན་པ་འགལ་བས་སྔོན་མེད་ཀྱི་ངོ་མཚར་དུ་འགྱུར་བར་འབྲུ་བསྣན་ ཞིང་བདག་གི་ངོ་བོ་ཤེས་པ་ཡིན་ན་ཤེས་པའི་རང་བཞིན་ཙམ་དུ་ཐམས་ཅད་ཁྱད་པར་མེད་པས་སྐྱེས་བུ་ཀུན་གཅིག་ཏུ་ཐལ་བ་དང༌། སྐྱེས་བུ་དང་རང་བཞིན་ཡང་གཅིག་པ་སྟེ་ཡོད་པར་མཚུངས་པའི་ཕྱིར། གཞན་ཡང་གང་ཚེ་བྱེ་བྲག་ཅེས་པ་གཟུགས་ སོགས་འཛིན་པ་འདིའི་ཁྱད་པར་གང་ཡིན་པ་དེ་གལ་ཏེ་མི་བདེན་པས་ཕྱིན་ཅི་ལོག་ཏུ་བརྗོད་ན་དེའི་ཚེ་འདྲ་བའི་རྟེན་ཉིད་མེད་པར་འགྱུར་ཏེ་བ་ལང་དང་བ་མིན་གྱི་འདྲ་བ་ཉིད་བཞིན་དུ་ཁྱད་པར་གཟུང་བ་མེད་ན་མེད་པའི་ཕྱིར་རོ། །ཁྲ་བོ་དང་སེར་སྐྱ་ དག་ཁྱད་པར་ལྡན་པ་ནི་མ་ཡིན་ཏེ་དེ་དག་ཁོ་ན་ལ་བ་ལང་གི་སྒྲས་བརྗོད་པར་བྱ་བ་ཡིན་པའི་ཕྱིར་རོ་ཞེས་འབྲུ་གཉེར་ཏོ། །འགྲེལ་ཆེན་ལས་ནི། ཕན་ཚུན་བལྟོས་ནས་ཕ་བུར་བཞག་ཀྱང་མ་ལྟོས་པའི་ཚེ་ཕ་བུ་གང་ཡང་མ་ཡིན་ཏེ། གྲངས་ཅན་པ་ ཉིད་ཡོན་ཏན་གསུམ་ཆ་མཉམ་པའི་ཚེ་གཙོ་བོ་རྟག་པ་འགྲོ་བ་མ་ཡིན་པ་དང༌། ཆ་མི་མཉམ་པ་ལས་འགྲོ་བ་མི་རྟག་པར་འགྱུར་བར་འདོད་ཀྱང་གནས་སྐབས་རྣམ་འགྱུར་ལ་བལྟོས་ཏེ་བཞག་པར་ཟད་ཀྱི་དོན་དམ་པར་སྔ་ཕྱི་ཁྱད་མེད་ཅིང་རང་བཞིན་ གཅིག་ཏུ་འདོད་པ་ལྟར་རོ། །ཞེས་དང༌། ཡང་ཤེས་པའི་བྱེ་བྲག་གཟུགས་འཛིན་སོགས་དེ་ཙམ་ལྔའི་རྣམ་འགྱུར་ནི་ཕྱིན་ཅི་ལོག་ཏུ་སྣང་བས་མེད་པ་ཡིན་ནོ་ཞེ་ན། དེའི་ཚེ་ཤེས་པ་ཙམ་དུ་འདྲ་བའི་རྟེན་གང་ཡིན་ཏེ་མ་གྲུབ་པའི་ཕྱིར། ཞེས་པའི་དོན་ཅན་

Page: 848 དུ་འབྲུ་གཉེར་ཏོ། །མདོར་ན། ཡོད་ཉིད་མཚུངས། ཞེས་པའི་གཞུང་འདི་རང་བཞིན་དང་སྐྱེས་བུ་གཅིག་སྟེ་ཡོད་པར་མཚུངས་པའི་ཕྱིར་ཞེས། གྲངས་ཅན་པའི་ལན་ཡིན་པར་དགེ་བའི་ལྷས་བཞེད་ལ། གཞན་རྣམས་ཀྱིས་སྐྱེས་བུ་དང་རང་བཞིན་ གཅིག་པར་ཐལ་ཏེ་ཡོད་པར་མཚུངས་པའི་ཕྱིར། ཞེས་རང་གཞུང་ཡིན་པར་བཞེད་དོ། །དེ་ལྟར་བདག་སེམས་བཅས་སུ་འདོད་པ་གྲངས་ཅན་པ་ཁེགས་པ་ན། རིགས་པ་ཅན་པ་ན་རེ། བདག་སེམས་བཅས་སུ་ཁས་བླངས་ན་སྐྱོན་དེ་རྣམས་ འཇུག་མོད། ཁོ་བོ་ཅག་ནི་སེམས་མེད་དུ་ཁས་ལེན་ཏོ་ཞེ་ན། སེམས་མེད་པ་ཡང་བདག་མ་ཡིན་ཏེ་སེམས་མེད་པ་ཉིད་ཀྱི་ཕྱིར། དཔེར་ན་བུམ་པ་དང་སྣམ་བུ་ལ་སོགས་པ་བཞིན་ནོ། །ཁོ་ན་རེ། འོན་ཏེ་བདག་ལ་སེམས་མེད་ཀྱང་ཡོན་ཏན་ གྱི་ཁྱད་པར་ཤེས་པ་ཞེས་བྱ་བ་དང་འཕྲད་པས་སེམས་དང་བཅས་པར་འགྱུར་རོ་ཞེ་ན། འོ་ན་བདག་དེ་སེམས་དང་ལྡན་པའི་ཕྱིར་ཤེས་པ་ཡིན་པར་འགྱུར་ལ། དེ་ལྟ་ན་སྔར་མི་ཤེས་པར་ཁས་བླངས་པ་དེ་ཞིག་པར་ཐལ་ལ། སྔར་ཤེས་པ་དང་མི་ལྡན་ པ་ཕྱིས་ལྡན་པར་ཁས་བླངས་པའི་ཕྱིར་བདག་དེ་རྟག་པར་འདོད་པ་དང་ཡང་འགལ་ལོ། །ཇི་སྟེ་བདག་རྟག་པ་ལ་འགྱུར་བ་མེད་དོ་སྙམ་ན། འོ་ན་ཤེས་པའམ་སེམས་པའི་ཡོན་ཏན་དེས་བདག་དེ་ལ་ཤེས་པ་སྐྱེ་བའི་ཐབས་ཅི་ཞིག་བྱས་ལའམ་བྱ་སྟེ་ རྟག་པ་ལ་བྱ་བྱེད་ཅི་ཡང་མི་ནུས་པའི་ཕྱིར། དེ་ལྟར་ཤེས་པ་མེད་ཅིང་བྱ་བྱེད་དང་བྲལ་བ་དེ་ལ་བདག་ཏུ་འདོགས་ན་ནམ་མཁའ་ལ་བདག་ཏུ་བཏགས་པར་འགྱུར་བས་ཕྱིན་ཆད་ནམ་མཁའ་ལ་བདག་ཏུ་ཟུངས་ཤིག་པའོ། །དེ་ལྟར་ལྷན་སྐྱེས་དང༌། ཀུན་ བཏགས་ཀྱིས་བདག་མེད་པར་བསྟན་པའི་ཚེ་གཟེགས་ཟན་པ་ལ་སོགས་པ་ན་རེ། གལ་ཏེ་བདག་ནི་ཡོད་མིན་ན་ལས་དང་འབྲས་བུའི་འབྲེལ་བ་རིགས་པ་མིན་པར་ཐལ་ཏེ། བྱེད་པ་པོའི་བདག་མེད་ཅིང་ལས་དེ་ཉིད་བྱས་ནས་ནི་ཟིན་པའི་

Page: 849 ༄༅། །འོག་ཏུ་ཞིག་པས་ན་ཕྱིན་ཆད་སུའི་ལས་སུ་འགྱུར་ཏེ་སུ་ཞིག་ལ་འབྲས་བུ་སྨིན་ཞེ་ན། ཁྱོད་ཀྱང་བདག་རྟག་པ་བྱ་བྱེད་མེད་པར་འདོད་ཅིང་ངེད་སངས་རྒྱས་པ་ཡང་བདག་མེད་པར་འདོད་པས་ལས་གངགིས་ཡང་བྱ་བ་རྒྱུའི་དུས་དང་ཟིན་པ་ འབྲས་བུའི་དུས་ནི་གཞི་དང་རྟེན་ཐ་དད་ཅིང་སྔ་ཕྱི་ཡོད་པ་དང༌། དེ་གཉིས་ཀའི་དུས་ནའང་བདག་གིས་བྱ་བ་བྱེད་པ་ཅི་ཡང་མེད་པར་ཡུ་བུ་ཕྱོགས་གཉིས་ཀ་ལའང་འདི་མཚུངས་པར་ཁས་ལེན་པས་ཁྱོད་ཀྱིས་འདིར་བརྩད་པ་ནི་ཁྱོད་ཉིད་ལ་ལྡོག་པས་དོན་ མེད་པ་མ་ཡིན་ནམ། ཆོས་གཅིག་ཁོ་ན་ལ་བལྟོས་ཏེ་ཅིག་ཆར་རྒྱུ་དང་ཡང་ལྡན་ཞིང་འབྲས་བུ་དང་ཡང་བཅས་པ་ཞེས་བྱ་བ་མཐོང་བ་འདི་ནི་འཇིག་རྟེན་ན་སྲིད་པ་མ་ཡིན་ཏེ། དཔེར་ན་པདྨའི་ས་བོན་ཡང་མ་ཞིག་ལ་མྱུ་གུ་ཡང་སྐྱེས་ཅིང་མྱུ་གུ་ལས་ མ་འདས་ལ་མེ་ཏོག་ཀྱང་ཁ་བྱེ་བ་དང་མེ་ཏོག་གི་འདབ་མ་ཡང་མ་བྲུལ་ཞིང་འབྲས་བུ་ཡང་སྨིན་པ་ནི་མི་སྲིད་པ་བཞིན་ནོ། །ཁྱེད་རང་གི་སྟོན་པས་ལས་བྱེད་པ་པོས་འབྲས་བུ་མྱོང་བར་གསུངས་སོ་ཞེ་ན། ཆུ་ལ་བདག་ཅི་ཡང་མེད་ཅིང་སྔ་ཕྱི་ ཐ་དད་པ་ཡིན་ཡང་རྒྱུན་གྱིས་གཅིག་ཏུ་འཇོག་པ་ལྟར་བདག་ཅི་ཡང་མེད་ཀྱང་སེམས་ཀྱི་རྒྱུད་གཅིག་ལ་བརྟེན་ནས་སུ་སྔ་མ་ལས་བྱེད་པའི་དུས་སུ་བྱེད་པ་པོ་དང་ཕྱིས་འབྲས་བུ་མྱོང་བའི་དུས་སུ་སྤྱོད་པ་པོ་ཞེས་བྱ་ཞིང་བྱེད་པ་པོའི་བདག་ མེད་ཅིང་བྱེད་པ་པོའི་སེམས་དེ་ཉིད་དུ་འགགས་ཀྱང་དེའི་རྒྱུན་ཙམ་གྱིས་རྣམ་སྨིན་ཆུད་མི་ཟ་བར་མྱོང་ངེས་སུ་བསྟན་པ་ཡིན་ནོ། །དེའི་ཚེ་དཔྱོད་པ་བ་ལ་སོགས་པ་ན་རེ། སེམས་ཀྱི་རྒྱུན་དེ་ཉིད་བདག་ཡིན་ནོ་ཞེ་ན། དེ་ཡང་མ་ཡིན་ཏེ་སེམས་ནི་ རྒྱུན་གྱི་རྣམ་པ་ཅན་ཡིན་ལ། དེ་ལ་འདས་པ་དང་མ་འོངས་པའི་སེམས་ནི་བདག་མ་ཡིན་ཏེ། འདས་པ་དེ་ནི་འགགས་ཟིན་ནས་ད་ལྟར་མེད་པ་ཁ་སང་གི་མར་མེ་ལྟ་བུའི་ཕྱིར་དང༌། མ་འོངས་པ་ནི་མ་སྐྱེས་པས་ད་ལྟར་མེད་དེ་སང་གི་འཇའ་ཚོན་ད་ལྟ་མེད་

Page: 850 པ་ལྟ་བུའི་ཕྱིར། འོན་ཏེ་ད་ལྟར་སྐྱེས་ལ་མ་འགགས་པའི་སེམས་བདག་ཡིན་ནོ་ཞེ་ན། འདི་ཡང་ཤིན་ཏུ་ཕྲ་བའི་དུས་གསུམ་གྱི་ཆ་དང་ལྡན་པ་ཡིན་ཏེ་ཞིབ་མོར་དཔྱད་ན་ད་ལྟ་བ་དམིགས་པར་མི་ནུས་ལ་རགས་པར་བྱས་ན་ཡང་བདག་ཏུ་བཟུང་བའི་ཚེ་བཟུང་བྱ་ དེ་ཞིག་ཟིན་པས་དེ་ལྟ་ན་ཡང་ད་ལྟར་བ་བདག་ཡིན་པ་མེད་དོ། །དེ་ལ་རང་སྡེ་གནས་མ་བུ་པ་ན་རེ། བདག་ནི་ཕུང་པོ་ལས་དེ་ཉིད་དང་གཞན་གང་དུ་ཡང་བརྗོད་དུ་མེད་དོ་ཞེས་ཟེར་རོ། །དེ་ཡང་མ་ཡིན་ཏེ་དཔེར་ན་ཆུ་ཤིང་གི་སྡོང་པོ་དག་ལ་སྟ་ རེས་བཅད་ཅིང་དུམ་བུར་བྱས་ལ་དེ་རེ་རེ་ཡང་ཆ་ཤས་སུ་རྣམ་པར་ཕྱེ་སྟེ་ད་ནི་འདི་རྣམས་གང་ལ་ཆུ་ཤིང་གི་སྡོང་པོ་གནས་སྙམ་དུ་བརྟགས་ན་ཆ་ཤས་དེ་དག་མ་གཏོགས་ཆ་ཤས་ཅན་གྱི་སྡོང་པོ་འགའ་ཡང་མེད་པར་མཐོང་ལ། ཆ་ཤས་དེ་དག་ཀྱང་ རེ་རེ་ཞིང་སྡོང་པོ་མ་ཡིན་པར་མཐོང་ནས་ཆུ་ཤིང་གི་སྡོང་པོར་ཞེན་པ་རྣམ་པར་ལོག་པ་དེ་བཞིན་དུ། ཕྱི་ནང་གི་ཕུང་པོ་ཐམས་ཅད་ལ་རིགས་པས་རྣམ་པར་དཔྱད་པ་ཡིས་བཙལ་ན་དེ་ཉིད་དང་གཞན་དུ་བརྗོད་དུ་མེད་པའི་བདག་དེ་ཉིད་ཀྱང་ཡང་དག་པ་མིན་པར་ མཐོང་སྟེ་བདག་ཅེས་བྱ་བ་གང་ཡང་མཐོང་བར་མི་འགྱུར་རོ། །དེ་ལྟར་དུ་བདག་མེད་ན་བདག་དང་སེམས་ཅན་དང་གང་ཟག་ནི་སྒྲ་རྣམ་གྲངས་པ་ཡིན་པས་སེམས་ཅན་ཡང་མེད་པར་ཁས་བླངས་པར་འགྱུར་ལ། གལ་ཏེ་སེམས་ཅན་ཉིད་ཀྱང་ ཡོད་པ་མིན་པ་དེའི་ཚེ་ན་སུས་སུ་ལ་སྙིང་རྗེ་བསྒོམ་པར་བྱ་སྟེ་ཐེག་ཆེན་པ་ཉིད་ཀྱིས་སྙིང་རྗེ་བསྒོམ་བྱའི་གཙོ་བོར་བཤད་པ་དང་འགལ་ལོ་ཞེ་ན། སྤྱིར་ཤེས་རབ་ཀྱིས་མ་དཔྱད་པའི་སྐབས་སུ་འབྲས་བུ་རྫོགས་པའི་སངས་རྒྱས་འཐོབ་པའི་ དོན་དུ་སྙིང་རྗེའི་དབང་གིས་གཞན་དོན་དུ་ཁས་བླངས་པའི་དམ་བཅའ་ཙམ་ཡིན་ལ། དཔྱད་པའི་ཚེ་བདག་དང་སེམས་ཅན་དང་སྡུག་བསྔལ་གང་ཡང་རྨི་ལམ་གྱི་དངོས་པོ་ཙམ་དུ་ཡང་མ་གྲུབ་པར་ཤེས་པ་ན་དེ་ལྟར་མ་རྟོགས་པས་བདག་དང་གཞན་

Page: 851 ༄༅། །དང་སྡུག་བསྔལ་དུ་ལྟ་བའི་གཏི་མུག་གི་ཕུང་པོས་ཀུན་ནས་རྨོངས་པས་བདག་གཞན་སོགས་བདེན་པར་སྒྲོ་བཏགས་ཤིང་འདོགས་པར་བྱེད་པ་གང་ཡིན་པ་འདི་རྣམས་ལ་བརྩེ་བ་བརྒྱ་ཕྲག་ཏུ་འཕེལ་བར་འགྱུར་རོ། ། འོ་ན་ཆེད་དུ་བྱ་བའི་ཡུལ་སེམས་ཅན་མེད་ན་དེའི་ཆེད་དུ་འབྲས་བུ་སངས་རྒྱས་འཐོབ་པ་དེ་ཡང་སུ་ཡི་དོན་དུ་ཡིན་ཞེ་ན། ཤིན་ཏུ་བདེན་ཏེ་འོན་ཀྱང་དེ་ལྟར་མ་ཤེས་པའི་རྨོངས་པ་རྣམས་ལས་བརྩམས་ཏེ་དེ་རྣམས་ཀྱི་དོན་བྱ་བར་འདོད་དོ། ། གཞན་དོན་དུ་སངས་རྒྱས་འཐོབ་འདོད་ཀྱང་འབྲས་བུའི་རྨོངས་པ་ཡིན་ནོ་ཞེ་ན། མཐར་ཐུག་དོན་དམ་ལ་བལྟོས་ན་ཡིན་མོད་ཀྱང་སེམས་ཅན་ཐམས་ཅད་ཀྱི་སྡུག་བསྔལ་ཉེ་བར་ཞི་བར་བྱ་བའི་དོན་དུ་འབྲས་བུའི་རྨོངས་པ་འདི་ནི་རྨོངས་པར་ཤེས་ཀྱང་ རེ་ཞིག་ལྡོག་པར་མི་བྱ་སྟེ་སྨན་པ་རྣམས་ཀྱང་དུག་གི་རིགས་ཁ་ཅིག་ནད་ཀྱི་གཉེན་པོར་ངེས་པར་བསྟེན་པ་བཞིན་ནོ། །འོན་ཀྱང་འབྲས་བུའི་རྨོངས་པ་འདི་ནི་ཆེད་དུ་མ་སྤངས་ཀྱང་ཅི་ཞིག་ན་མེ་ཏོག་ཡལ་བ་ན་དྲི་ལྟར་མ་རིག་པའི་གཉིད་ལས་ སངས་པའི་ཚེ་རང་བཞིན་གྱིས་དག་པར་འགྱུར་རོ། །འོ་ན་རེ་ཞིག་ལམ་གྱི་རྟེན་དུ་འབྲས་བུའི་རྨོངས་པ་མི་ལྡོག་པར་ལྟར་བདག་འཛིན་ཡང་བསྟེན་པར་འོས་སོ་ཞེ་ན། ཆུར་མཚུངས་ཀྱང་ཡན་ལག་བརྒྱད་ལྡན་བསྟེན་པར་ བྱེད་ཀྱི་དུག་ཆུ་དང་རྡོའི་ཆུ་ནི་དེ་ལྟ་མིན་པ་ལྟར་རྨོངས་པར་མཚུངས་ཀྱང་འབྲས་བུའི་རྨོངས་པ་བཞིན་དུ་བདག་འཛིན་ནི་བསྟེན་པར་མི་བྱེད་དེ། སྡུག་བསྔལ་མཐའ་དག་གི་རྒྱུའི་ངོ་བོ་བྱེད་པའི་ང་རྒྱལ་ནི་བདག་ཏུ་རྨོངས་པ་འདི་ལས་འཕེལ་བར་འགྱུར་བའི་ ཕྱིར། དེ་བས་ན་ཅིས་ཀྱང་བདག་འཛིན་ལས་ལྡོག་པར་བྱའོ། །དེ་ནས་ཅི་བྱ་ཞེ་ན། ཆོས་ཐམས་ཅད་བདག་མེད་ཅིང་སྤྲོས་པ་ཉེ་བར་ཞི་བ་འདི་ཁོ་ན་སྒོམ་པར་བྱ་སྟེ་འདི་ནི་མཆོག་གི་བྱ་བ་ཕུལ་དུ་བྱུང་བ་ཡིན་ནོ། །དགེ་བའི་ལྷས་ནི་ལུས་

Page: 852 དང་སེམས་སེམས་བྱུང་གི་ཚོགས་པ་བདག་ཏུ་འདོད་དོ་ཞེ་ན། ཆུ་ཤིང་གི་དཔེས་བཀག་སྟེ་རིན་ཆེན་ཕྲེང་བའི་ལུང་མདོ་ཙམ་སྨོས་སོ། །རྒྱུ་གཅིག་ལ་ནི་སོགས་ལ་ནི་བི་བྷུ་ཏིས། གང་ཕྱིར་རྒྱུ་ནི་གང་ཉིད་དུ། །ལས་ཀྱི་བག་ཆགས་རྣམ་ གཞག་པ། །དེ་ཉིད་དུ་ནི་འབྲས་སྨིན་བྱེད། །རས་བལ་ལ་ནི་དམར་པོ་བཞིན། །ཞེས་ཏེ་རས་བལ་གྱི་ས་བོན་ཚོས་ཀྱི་ཁུ་བས་ཡང་ཡང་བྱུགས་པའི་མྱུ་གུ་ནས་འབྲས་བུའི་བར་དམར་པོ་ཁོ་ནར་སྐྱེ་བ་ལྟར་ཐ་དད་ཡིན་ཡང་སེམས་ཀྱི་རྒྱུན་གང་གིས་ ལས་བྱས་པ་དེ་ཉིད་དུ་འབྲས་བུ་སྨིན་པའི་ཕྱིར་ཀླན་ཀ་མི་འབྱུང་ངོ༌། །ཞེས་དང༌། ཉེ་བར་བསྡུས་ཤིང་བཤད་དེ་ཞེས་ཆུ་ཤིང་གི་སྡོང་པོའི་དཔེ་བསྟན་ཏོ། །སྡུག་བསྔལ་ཉེ་བར་ཞི་དོན་དུ། །སོགས་ལ་རྨོངས་པ་ནི་སྲིད་པ་ལ་འཇུག་པའི་རྒྱུ་དང་ ལྡོག་པའི་རྒྱུའོ། །ཞེས་ལྡོག་པའི་རྒྱུ་སྙིང་རྗེ་སོགས་མི་འགོག་པ་དང༌། འཇུག་པའི་རྒྱུ་བདག་འཛིན་འགོག་པར་བསྟན་ཏོ། །ཁ་ཅིག་གིས་བདག་མེད་དེ་ལས་ཀྱང་འཁོར་བ་ལྡོག་པར་ངེས་པ་མེད་དོ་ཞེ་ན། ཡོད་དེ། བདག་ལྟའི་ས་བོན་སྤངས་པའི་ ཕྱིར། །སླར་མི་ལྡོག་པ་ཉིད་ཡིན་ནོ། །ཞེས་དང༌། དེ་བཞིན་གཤེགས་པའི་གསང་བའི་མདོར། ཞི་བའི་བློ་གྲོས་འདི་ལྟ་སྟེ་ཤིང་གི་རྩ་བ་བཅད་པས་ཡལ་ག་དང་ལོ་འདབ་ཐམས་ཅད་སྐམ་པར་འགྱུར་རོ། །དེ་བཞིན་དུ་འཇིག་ཚོགས་ལ་ ལྟ་བ་ཉེ་བར་ཞི་བས་ཉོན་མོངས་པ་ཐམས་ཅད་ཞི་བར་འགྱུར་རོ། །ཞེས་པ་འདྲེན་ཏོ། །གཉིས་པ་ཆོས་ཀྱི་བདག་མེད་ནི་དྲན་པ་ཉེ་བར་བཞག་པ་བཞིའི་སྒོ་ནས་སྒོམ་སྟེ། འདི་ལ་གཉིས། སྤྱིའི་དོན་དང༌། གཞུང་དོན་དངོས་སོ། །དང་པོ་ནི། དྲན་པ་ཉེར་བཞག་བཤད་པར་བྱ། །དམིགས་ཡུལ་ལུས་ཚོར་སེམས་ཆོས་བཞི། །ངོ་བོ་དེ་ཤེས་ཤེས་རབ་ཡིན། །གྲོགས་ནི་དྲན་ཤེས་དང་མཚུངས་ལྡན། །སྒོམ་ཚུལ་ལུས་ནི་མི་གཙང་དང༌། །ཚོར་བ་སྡུག་བསྔལ་སེམས་མི་

Page: 853 ༄༅། །རྟག །ཆོས་ཀུན་བདག་མེད་ཉིད་དུ་སྒོམ། །འབྲས་བུ་ལུས་ལ་གཙང་འཛིན་ལོག །མ་ཆགས་སྡུག་བསྔལ་བདེན་པ་ཤེས། །ཚོར་ཀུན་ཟུག་རྔུར་ཤེས་པ་ཡིས། །སྲེད་ལྡོག་ཀུན་འབྱུང་སྤོང་བར་བྱེད། །སེམས་ནི་སྐད་ ཅིག་མར་མཐོང་བས། །གང་ཟག་མེད་ཤེས་ལམ་སྒོམ་བྱེད། །ཆོས་ཀུན་བདག་མེད་མཐོང་བ་ཡིས། །གཏི་མུག་བྲལ་ཏེ་འགོག་པ་འཐོབ། །རང་ཉིད་གྲོལ་བ་འཐོབ་པའི་ཕྱིར། །རང་རྒྱུད་ཀྱིས་བསྡུས་ལུས་སོགས་ལ། །དམིགས་ ནས་སྒོམ་ཞིང་དེར་འཛིན་པ། །ཉི་ཚེའི་ཐེག་པའི་དྲན་ཉེ་སྟེ། །གཞན་དོན་བྱང་ཆུབ་འདོད་པའི་ཕྱིར། །ནམ་མཁའ་མཉམ་པའི་དུས་གསུམ་གྱི། །ལུས་སོགས་ལ་དམིགས་སྒོམ་བྱེད་ཅིང༌། །མི་གཙང་སྡུག་བསྔལ་མི་རྟག་དང༌། །བདག་ མེད་ཙམ་དུའང་མི་དམིགས་པ། །རྒྱལ་བའི་སྲས་ཀྱི་ལམ་ཆེན་ཡིན། །དེ་ཕྱིར་རྣམ་པ་བཅུ་བཞི་ཡིས། །ཐེག་ཆེན་དྲན་ཉེ་ཁྱད་པར་འཕགས། །ཞེས་བྱ་སྟེ། དེ་ཡང་མངོན་པ་གོང་མ་ལས། དྲན་པ་ཉེ་བར་བཞག་པ་རྣམས་ ནི། དམིགས་པ་དང༌། ངོ་བོ་ཉིད་དང༌། གྲོགས་དང༌། སྒོམ་པ་དང༌། བསྒོམས་པའི་འབྲས་བུར་རིག་པར་བྱའོ། །ཞེས་གསུངས་ཏེ། འཁོར་བ་པ་རྣམས་ལུས་ལ་བདག་གི་རྟེན་དང་ཚོར་བ་ལ་བདག་གིས་ལོངས་སྤྱད་བྱ་དང་སེམས་ལ་བདག་ཏུ་བཟུང་བྱ་དང༌། ཆོས་ལ་བདག་འཆིང་གྲོལ་གྱི་རྒྱུར་འཛིན་ལ། དེ་བཞི་ལ་ཀུན་ནས་ཞེན་པས་འཁོར་བ་སྐྱེད་པའི་ཕྱིར་ལུས་དང་ཚོར་བ་དང་སེམས་དང་ཆོས་ཏེ་བཞི་ནི་གང་ལ་དམིགས་པའི་ཡུལ་ལོ། །ངོ་བོ་ནི། ལུས་ཚོར་སེམས་ཆོས་བཞིའི་རང་བཞིན་ ཤེས་པའི་ཤེས་རབ་ཡིན་ཏེ་ལུས་མི་གཙང་བར་ཤེས་པ་ལུས་དྲན་ཉེར་བཞག་གི་ངོ་བོ་ཡིན་ལ། དེ་ནི་ཀུན་རྫོབ་ལ་བལྟོས་ཏེ་རང་བཞིན་ཇི་ལྟ་བར་ཤེས་པའི་ཤེས་རབ་ཡིན་པ་ལ་སོགས་པའི་ཕྱིར་དང༌། མཛོད་ལས་ཀྱང༌། དྲན་པ་ཉེར་བཞག་

Page: 854 ཤེས་རབ་སྟེ། །ཞེས་སོ། །གྲོགས་ནི། ཤེས་རབ་དེ་ཉིད་དྲན་པ་དང་ཤེས་བཞིན་གྱིས་ཟིན་པས་མི་བརྗེད་ཅིང་དེ་དང་ལྷན་ཅིག་ཏུ་སྐྱེས་པའི་སེམས་བྱུང་ཀུན་འགྲོ་ལྔ་དང་མཚུངས་པར་ལྡན་པ་སྟེ། དེ་དག་མེད་ན་ཉེ་བར་བཞག་པ་མི་འགྲུབ་པའི་ཕྱིར། དེ་ཡང་གང་དྲན་པ་ནི་ཤེས་རབ་དེ་ཉིད་དོ། །ཉེ་བ་ནི་རིང་བོ་མ་ཡིན་པ་སྟེ་བར་གཞན་གྱིས་མ་ཆོད་པ་ཡིན་ལ་བཞག་པ་ནི་དྲན་པ་དེ་ཉིད་ལ་སེམས་པ་བསླན་པ་སྟེ་དྲན་པའི་རྒྱུན་ལ་ཤེས་བཞིན་གྱིས་གནས་པའི་ཕྱིར་དྲན་པ་ཉེ་བར་བཞག་པ་ཞེས་བྱའོ། ། ཇི་ལྟར་སྒོམ་པའི་ཚུལ་ལ་བཞི་ལས། རང་གཞན་གྱི་ལུས་མི་གཙང་བའི་འདུས་པ་ཡིན་པ་ལ་ཡིན་པར་ཤེས་པར་བྱེད་པ་ནི། ལུས་དྲན་ཉེ་སྟེ། བྱེ་བྲག་ཏུ་འདུ་ཤེས་ཉི་ཤུའི་ནང་ནས་འཆི་བའི་འདུ་ཤེས་དང༌། མི་སྡུག་པ་དང༌། རྣམ་པར་བསྔོས་པ་དང༌། རྣམ་པར་ བརྣགས་པ་དང༌། རྣམ་པར་བམ་པ་དང༌། རྣམ་པར་འབུས་གཞིགས་པ་དང༌། རྣམ་པར་ཟོས་པ་དང༌། རྣམ་པར་དམར་བ་དང༌། རྣམ་པར་འཐོར་བ་དང༌། རུས་གོང་གི་འདུ་ཤེས་ཏེ་བཅུ་སྒོམ་པའོ། །ཚོར་བ་དྲན་ཉེ་ནི། ཚོར་བ་བདེ་བ་ལ་ཆགས་ཤིང་སྡུག་བསྔལ་ ལ་སྡང་བ་དང་བར་མ་ལ་རྨོངས་པའི་གཉེན་པོ་སྟེ། མདོ་ལས། ཟག་བཅས་ཐམས་ཅད་སྡུག་བསྔལ་ལོ། །ཞེས་ཡང་ཡང་གསུངས་པ་དང༌། འདི་ལྟར་གང་ཅི་ཚོར་ཡང་རུང་འདི་ནི་སྡུག་བསྔལ་ལོ་ཞེས་བཀའ་བསྩལ་པ་ལྟར་ཤེས་པར་བྱས་ལ་ སྒོམ་པ་སྟེ། འདི་ལྟར་སྡུག་བསྔལ་ཉིད་དུ་མངོན་པ་རྣམས་ནི་སྡུག་བསྔལ་གྱི་སྡུག་བསྔལ། ཚོར་བ་བདེ་བར་འཛིན་པ་འདི་རྣམས་ནི་འགྱུར་བའི་སྡུག་བསྔལ། ལུས་བཟུང་བ་ཙམ་དང་སེམས་རྣམ་པར་ཤེས་པ་ཙམ་ཡན་ཆོད་གནས་སྐབས་ཅི་སྤྱོད་ཀྱང་འདུ་བྱེད་ཀྱི་ སྡུག་བསྔལ་ཡིན་ལ། དེ་ལ་འདུ་བྱེད་ཀྱི་སྡུག་བསྔལ་ནི་འབྲས་ནད་མ་སྨིན་པའི་དུས་ཚོར་བ་བཏང་སྙོམས་པར་གནས་པ་ལྟ་བུ། འགྱུར་བའི་སྡུག་བསྔལ་ནི་འབྲས་ཆན་དུག་གིས་བསྲེས་པ་ཟ་བའི་དུས་ཞིམ་པར་མངོན་པ་ལྟ་བུ། སྡུག་བསྔལ་གྱི་སྡུག་བསྔལ་ནི་

Page: 855 ༄༅། །དུག་སྨིན་ཏེ་ནད་ཀྱི་ཚོར་བ་མྱོང་བ་ལྟ་བུའམ་འབྲས་སྟེང་དུ་ཕོལ་བྱུང་བ་ལྟ་བུ་སྟེ། མདོར་ན་མི་རྟག་པ་ལ་སྡུག་བསྔལ་གྱི་འདུ་ཤེས་དང༌། ཟས་ལ་མི་མཐུན་པའི་འདུ་ཤེས་དང༌། འཇིག་རྟེན་ཐམས་ཅད་ལ་མངོན་པར་མི་དགའ་བའི་ འདུ་ཤེས་དང༌། ཉེས་དམིགས་ཀྱི་འདུ་ཤེས་དང༌། སྤོང་བའི་འདུ་ཤེས་དང༌། འདོད་ཆགས་དང་བྲལ་བའི་འདུ་ཤེས་ཏེ་དྲུག་བསྒོམ་པར་བྱའོ། །སེམས་དྲན་ཉེ་ནི། སེམས་ལ་རྟག་པ་དང་གཅིག་ཏུ་ཞེན་པའི་གཉེན་པོ་སྟེ་འདུས་བྱས་ཐམས་ཅད་ནི་མི་རྟག་ པའོ། །ཞེས་གསུངས་པ་ལྟར་སྤྲིན་དང་རླངས་པ་དང་དུ་བ་དང་མེ་ལྕེ་ལ་སོགས་པའི་གཟུགས་དེ་དང་དེར་སྐད་ཅིག་ཀྱང་མི་གནས་པ་དང་ཆུའི་རྒྱུན་དང་རླུང་གི་གཡོ་བ་སོགས་རང་དུས་དེར་སྐད་ཅིག་ཀྱང་མི་གནས་ཤིང་སྔ་མ་དེ་ཕྱི་མ་མ་ཡིན་པ་དང་དེ་ཡང་ དེ་ཡི་ཕྱི་མར་མི་གནས་པ་སོགས་ཀྱི་དཔེས་སེམས་ལ་བརྟགས་པ་ན་སེམས་མྱོང་ཤེས་ཀྱི་རྒྱུན་ཙམ་པ་འདི་སྐད་ཅིག་ཡང་མི་གནས་ལ་སྔ་མ་དེ་ཕྱི་མ་མ་ཡིན་ལ་སྔ་ཕྱི་བར་མཚམས་ཀྱང་མེད་པས་སྐད་ཅིག་ཙམ་དུའང་མི་རྟག་ལ་གཅིག་དང་དུ་མར་གདགས་ སུ་མེད་པ་འདི་ཤེས་པར་བྱེད་པ་སྟེ་འདུས་བྱས་ཐམས་ཅད་ལ་མི་རྟག་པའི་འདུ་ཤེས་སྒོམ་པར་བྱའོ། །ཆོས་དྲན་ཉེ་ནི། དྲུག་ཡིད་ཀྱི་ཡུལ་དུ་སྒྲོ་འདོགས་པ་ཆོས་ཀྱི་ཁམས་དང་ཆོས་ཀྱི་སྐྱེ་མཆེད་རྣམས་ལ་དེ་དང་དེར་ཞེན་པའི་གཉེན་པོ་སྟེ། རྟེན་ཞིང་འབྲེལ་ བར་འབྱུང་བ་ལུགས་འབྱུང་ལུགས་ལྡོག་བསམ་པ་དང༌། ཐེག་ཆེན་དུ་གཅིག་དུ་བྲལ་དང་མུ་བཞི་སྐྱེ་འགོག་ལ་སོགས་པའི་རྟགས་དང་རྒྱུ་མཚན་གྱིས་དཔྱད་པས་ཆོས་གང་དང་གང་དུ་འཆིང་བ་དང་གྲོལ་བ་མ་དམིགས་པར་ཤེས་པ་སྟེ་འགོག་པའི་འདུ་ ཤེས་དང་སྟོང་པ་ཉིད་དུ་སོ་སོར་རྟོག་པ་འདུ་ཤེས་སྒོམ་པའོ། །འབྲས་བུ་ནི། ལུས་སོགས་བཞི་ལ་གཙང་བདེ་རྟག་བདག་ཏུ་ཞེན་པའི་ཕྱིན་ཅི་ལོག་བཞིས་རྒྱུ་བྱས་ཏེ་སྐྱེ་གནས་ངན་པ་བླངས་པར་ཤེས་པས་ལུས་ལ་མ་ཆགས་ཤིང་ལུས་མི་འདོད་པ་

Page: 856 སྡུག་བསྔལ་ཤེས་པ་དང༌། ཚོར་བ་སྡུག་བསྔལ་དུ་ཤེས་པས་སྲེད་པ་དང་བྲལ་བ་ཀུན་འབྱུང་སྤོང་བ་དང༌། བདག་ཏུ་ཞེན་པའི་གཞི་སེམས་མི་རྟག་པར་མཐོང་བས་ངར་ཞེན་པ་ལོག་སྟེ་བདག་ཆད་ཀྱིས་དོགས་པའི་མྱང་འདས་ལ་སྐྲག་པ་དང་བྲལ་བས་ རིམ་གྱིས་འགོག་པ་མངོན་དུ་བྱེད་པ་དང༌། ཆོས་ཐམས་ཅད་སྟོང་ཉིད་ནམ་མཁའ་ལྟ་བུ་དང་རྟེན་འབྲེལ་སྒྱུ་མ་ལྟ་བུ། ཐ་མི་དད་པར་རིག་པས་རྨོངས་པ་དང་བྲལ་ཏེ་ལམ་བདེན་ལ་འཇུག་པ་དང༌། ཟག་བཅས་ཀྱི་ལུས་ཚོར་སེམས་ཆོས་བཞི་ ལས་འདས་ཏེ་ཟག་མེད་ཀྱི་ལུས་ཚོར་སེམས་ཆོས་ལ་དབང་ཐོབ་པ་སྟེ། དབུས་མཐའ་ལས། གནས་ངན་ལེན་ཕྱིར་སྲིད་རྒྱུའི་ཕྱིར། །གཞི་ཡི་ཕྱིར་དང་མ་རྨོངས་ཕྱིར། །བདེན་པ་བཞི་ལ་འཇུག་བྱ་བས། །དྲན་པ་ཉེ་བར་བཞག་པ་ སྒོམ། །ཞེས་སོ། །དེ་ཡང་རང་དོན་དུ་ཞི་བ་དོན་གཉེར་གྱི་བློས་རང་གིས་ཟིན་པའི་ཕུང་པོ་ལྔ་ཙམ་དང་གཞན་སྣང་རུང་གི་ཡུལ་ན་གནས་པའི་སྐྱེ་བོ་ཙམ་ལ་དམིགས་ནས་སྒོམ་ཞིང་མི་གཙང་བ་ལ་སོགས་པར་འཛིན་པ་ནི་ཐེག་དམན་གྱི་དྲན་ཉེ་ སྒོམ་པ་ཡིན་ལ། བྱང་ཆུབ་ཀྱི་སེམས་ཀྱིས་ཟིན་པས་ནམ་མཁས་ཁྱབ་ཚད་ཀྱི་དུས་གསུམ་གྱི་ཕུང་སོགས་ལ་དམིགས་ནས་སྒོམ་ཞིང་གཙང་བདེ་རྟག་བདག་ཏུ་འཛིན་པ་ལོག་ལ་མི་གཙང་བ་སོགས་སུ་ཡང་དམིགས་སུ་མེད་པའི་སྟོང་ཉིད་ལ་ འཇུག་པ་ནི་ཐེག་ཆེན་གྱི་དྲན་ཉེ་ཡིན་ལ། དེ་ནི། རྒྱན་ལས། བློ་ལྡན་དྲན་པ་ཉེར་བཞག་པ། །སྒོམ་པ་རྣམ་པ་བཅུ་བཞི་ཡིས། །མཚུངས་པ་མེད་པའི་ཕྱིར་ན་དེ། །དེ་ཡིས་གཞན་ལས་ཁྱད་པར་འཕགས། །ཞེས་གསུངས་ཏེ། རྟེན་ཐེག་ ཆེན་གྱི་ཆོས་ཟབ་རྒྱས་ལས་སྐྱེས་པའི་ཤེས་རབ་དང༌། གཉེན་པོ་སྒྲོ་སྐུར་གྱི་མཐའ་གཉིས་ཀ་བསལ་བའི་ཤེས་རབ་དང༌། ཐེག་ཆེན་གྱི་བདེན་བཞི་ལ་བདག་གཞན་འཇུག་པ་དང༌། ཆོས་བསམ་གྱིས་མི་ཁྱབ་པ་ལ་དམིགས་པ་དང༌། ཐམས་ཅད་ནམ་མཁའ་

Page: 857 ༄༅། །ལྟར་ཡིད་ལ་བྱེད་པ་དང༌། སྲིད་ཞིར་མི་གནས་པ་ཐོབ་པ་དང༌། ཕ་རོལ་ཏུ་ཕྱིན་པ་རྣམས་དང་མཐུན་པ་དང༌། གདུལ་བྱའི་མོས་པ་བཞིན་གྱི་རྗེས་སུ་འཇུག་པ་དང༌། ལུས་སྒྱུ་མ་ལྟ་བུ་ཚོར་བ་རྨི་ལམ་ལྟ་བུ་སེམས་ནམ་མཁའ་ལྟ་བུ་ཆོས་གློ་བུར་ དུ་བྱུང་བ་སྤྲིན་ལྟ་བུར་ཡོངས་སུ་ཤེས་པ་དང༌། བསམས་བཞིན་དུ་བརྒྱ་བྱིན་དང་འཁོར་སྒྱུར་ལྟ་བུ་ལུས་མཆོག་འཛིན་ཞིང་ཚོར་བའི་མཆོག་མྱོང་ཡང་ཉོན་མོངས་པ་མེད་པའི་སྐྱེ་བ་ཐོབ་དང༌། དབང་པོ་རྣོ་ཞིང་ཐབས་མཁས་པས་སྒོམ་པ་ཆུང་ངུས་ཀྱང་ གཞན་གྱི་ཆེན་པོ་ཟིལ་གྱིས་གནོན་པ་དང༌། བྱང་ཆུབ་དམ་པའི་མཆོག་ཉིད་དུ་རོ་གཅིག་པར་འགྱུར་བ་དང༌། མྱ་ངན་ལས་འདས་པ་ཐོབ་ནས་ཀྱང་མི་ཟད་པའི་སྒོམ་པ་དང་ལྡན་པ་དང༌། ས་བཅུ་དང་སངས་རྒྱས་ཀྱི་འབྲས་བུ་འགྲུབ་པ་སྟེ། བཅུ་བཞིས་ཁྱད་ པར་དུ་འཕགས་པ་སྟེ། རྟེན་དང་གཉེན་པོ་དག་དང་ནི། །དེ་བཞིན་དུ་ནི་འཇུག་པ་དང༌། །དམིགས་པ་དང་ནི་ཡིད་བྱེད་དང་། །ཐོབ་པས་སྒོམ་པ་ཁྱད་པར་འཕགས། །མཐུན་དང་རྗེས་སུ་འཇུག་པ་དང༌། །ཡོངས་སུ་ཤེས་དང་སྐྱེ་བ་དང༌། ། ཆེན་པོ་དང་ནི་མཆོག་ཉིད་དང༌། །སྒོམ་དང་ཡང་དག་འགྲུབ་པས་གཞན། །ཞེས་སོ། །གཉིས་པ་གཞུང་དོན་ལ་དྲན་པ་ཉེར་བཞག་བཞི་ལས། དང་པོ་ལུས་དྲན་ཉེ་ལ་གཉིས། ཡན་ལག་སོ་སོ་ལུས་མ་ཡིན་པ་དང༌། ཡན་ལག་ ཅན་དགག་པའོ། །དང་པོ་ནི། ལུས་ནི་རྐང་པ་བྱིན་པ་མིན། །བརླ་དང་རྐེད་པའང་ལུས་མ་ཡིན། །ལྟོ་དང་རྒྱབ་ཀྱང་ལུས་མ་ཡིན། །བྲང་དང་དཔུང་པའང་ལུས་མ་ཡིན། །རྩིབས་ལོགས་ལག་པའང་ལུས་མ་ཡིན། །མཆན་ཁུང་ ཕྲག་པའང་ལུས་མ་ཡིན། །ནང་རོལ་རྣམས་ཀྱང་དེ་མིན་ལ། །མགོ་དང་མགྲིན་པའང་ལུས་མིན་ན། །འདི་ལ་ལུས་ནི་གང་ཞིག་ཡིན། །ཞེས་གསུངས་ཏེ། རྐང་པ་བརྒྱད་ཀྱིས་ཆ་ཤས་རེ་རེ་ཞིང་ལུས་མ་ཡིན་པ་དང༌། ཐ་མས་ལུས་སྒྲོ་

Page: 858 བཏགས་སུ་བསྟན་ཏོ། །གཉིས་པ་ནི། གལ་ཏེ་ལུས་འདི་ཐམས་ཅད་ལ། །ཕྱོགས་རེ་ཡིས་ནི་གནས་གྱུར་ན། །ཆ་རྣམས་ཆ་ལ་གནས་གྱུར་མོད། །དེ་རང་ཉིད་ནི་གང་ལ་གནས། །གལ་ཏེ་བདག་ཉིད་ཀུན་གྱི་ལུས། །ལག་སོགས་ རྣམས་ལ་གནས་ན་ནི། །ལག་སོགས་དེ་དག་ཇི་སྙེད་པ། །དེ་སྙེད་ཀྱི་ནི་ལུས་སུ་འགྱུར། །ཕྱི་དང་ནང་ན་ལུས་མེད་ན། །ཇི་ལྟར་ལག་སོགས་ལ་ལུས་ཡོད། །ལག་སོགས་རྣམས་ལས་གཞན་མེད་ན། །དེ་ནི་ཇི་ལྟར་ཡོད་པ་ཡིན། ། དེས་ན་ལུས་མེད་ལག་སོགས་ལ། །རྨོངས་པ་ཡིས་ནི་ལུས་བློར་འགྱུར། །དབྱིབས་སུ་ཡོད་པའི་ཁྱད་པར་གྱིས། །ཐོ་ཡོར་ལ་ནི་མིའི་བློ་བཞིན། །ཇི་སྲིད་རྐྱེན་ཚོགས་དེ་སྲིད་དུ། །ཐོ་ཡོར་སྐྱེས་བུ་ལྟར་སྣང་བ། །དེ་བཞིན་ཇི་སྲིད་ལག་ སོགས་ལ། །དེ་ཡོད་དེ་སྲིད་དེར་ལུས་སྣང༌། །དེ་བཞིན་སོར་མོའི་ཚོགས་ཡིན་ཕྱིར། །ལག་པའང་གང་ཞིག་ཡིན་པར་འགྱུར། །དེ་ཡང་ཚིགས་ཀྱི་ཚོགས་ཡིན་ཕྱིར། །ཚིགས་ཀྱང་རང་གི་ཆས་ཕྱེ་བས། །ཆ་ཡང་རྡུལ་དུ་ཕྱེ་བ་སྟེ། ། རྡུལ་དེའང་ཕྱོགས་ཆའི་དབྱེ་བ་ཡིས། །ཕྱོགས་དབྱེའང་ཆ་ཤས་དང་བྲལ་ཕྱིར། །མཁའ་བཞིན་དེས་ན་རྡུལ་ཡང་མེད། །དེ་ལྟར་རྨི་ལམ་ལྟ་བུ་ཡི། །གཟུགས་ལ་དཔྱོད་ལྡན་སུ་ཞིག་ཆགས། །གང་ཚེ་དེ་ལྟར་ལུས་མེད་པ། ། དེ་ཚེ་སྐྱེས་གང་བུད་མེད་གང༌། །ཞེས་གསུངས་ཏེ། དང་པོ་གསུམ་གྱིས་ཆ་ཤས་ཐམས་ཅད་ལ་ལུས་གནས་པ་བཀག །དེ་ནས་གཉིས་ཀྱིས་ལུས་ཐོ་ཡོར་ལ་མིར་ཞེན་ལྟར་བསྟན། དེ་ནས་གཉིས་ཀྱིས་དཔྱད་ན་ཡན་ལག་དང་ཉིང་ ལག་ཀྱང་མི་འགྲུབ་པར་བསྟན། ཐ་མས་དེས་ན་གཟུགས་རྨི་ལམ་ལྟར་བསྟན་པའོ། །དེ་ཡང་ཡན་ལག་སྣ་ཚོགས་པའི་འདུས་པ་འདི་ལ་ལུས་ཞེས་བརྗོད་ཅིང་དེར་ཞེན་པར་བྱེད་ན། རེ་ཞིག་བདག་ཉིད་ཀྱིས་བརྟག་པར་རིགས་ཏེ་ཅི་ལུས་

Page: 859 ༄༅། །ཞེས་བྱ་བ་དེ་གང་ཞིག་ལ་ཟེར་ལུས་ནི་རྐང་པ་དང་བྱིན་པ་ཡང་མིན་ལ། དེ་བཞིན་དུ། བརླ་དང་རྐེད་པའང་ལུས་མ་ཡིན། །ལྟོ་དང་རྒྱབ་ཀྱང་ལུས་མིན་ཏེ། །བྲང་དང་དཔུང་པའང་ལུས་མ་ཡིན། །རྩིབས་ལོག་ ལག་པའང་ལུས་མིན་ཏེ། །མཆན་ཁུང་ཕྲག་པའང་ལུས་མ་ཡིན། །ནང་རོལ་རྣམས་ཀྱང་དེ་མིན་ལ། །དེ་བཞིན་དུ་མགོ་བོ་དང་མགྲིན་པ་དང་དེ་ལས་གཞན་པའི་ཆ་ཤས་སོ་སོའང་ལུས་མིན་པར་རང་གིས་ཀྱང་ངེས་པར་སྣང་ན་ད་ནི་འདི་ལ་ལུས་ཞེས་བྱ་ བ་གང་ཞིག་ཡིན་ཏེ་འདི་ནི་མིང་ཙམ་སྟེ་སྒྲོ་བཏགས་པ་ཁོ་ནར་ཟད་དོ། །དེའི་ཚེ་བྱེ་བྲག་པ་ལ་སོགས་པ་ན་རེ། དེ་རྣམས་ནི་ལུས་ཀྱི་ཆ་ཤས་ཡིན་ལ་ཆ་ཤས་ཅན་གྱི་ལུས་དངོས་དེ་ནི་ཆ་ཤས་ཐམས་ཅད་ལ་ཁྱབ་པར་གནས་སོ། །ཞེས་ཟེར་ ཞིང་བོད་ཕྱི་མ་ཁ་ཅིག་ཀྱང་ཆ་ཤས་ཅན་བརླན་གཤེར་ཕོར་གང་གི་སྟེང་ན་ཆ་ཤས་བདུད་རྩི་དང་རྣག་ཁྲག་ལ་སོགས་པ་དྲུག་གནས་སོ་ཞེས་ཟེར་རོ། །དེ་ལ་བརྒལ་བ། གལ་ཏེ་ལུས་ཉིད་ནི་ཆ་ཤས་ཐམས་ཅད་ལ་ཕྱོགས་རེ་ཡིས་ནི་གནས་པར་ གྱུར་ན་མགོ་ལྟ་བུ་ཆ་ཤས་སོ་སོ་བ་རྣམས་ཆ་ཤས་སོ་སོ་ཉིད་ལ་གནས་པར་གྱུར་ཏོ་ཞེས་སྒྲོ་འདོགས་ན་འདོགས་སུ་ཟད་མོད་ལུས་དེ་རང་ཉིད་ནི་ཆ་ཤས་དེ་རྣམས་ཀྱི་ནང་ནས་གང་ལ་གནས་ཞེས་དྲིའོ། །གལ་ཏེ་ལུས་བདག་ཉིད་དེ་ཆ་ཤས་ཀུན་གྱི་ལུས་ལག་པ་ལ་སོགས་ པ་རྣམས་ལ་རེ་རེ་ཞིང་གནས་པར་འདོད་ན་ནི་ལག་པ་ལ་གནས་པའི་ལུས་དང་རྐང་པ་ལ་གནས་པའི་ལུས་ཞེས་སོགས་ལག་སོགས་འདི་དག་གི་གྲངས་ཇི་སྙེད་པ་དེ་སྙེད་ཀྱི་ལུས་སུ་འགྱུར་བས་ལུས་ཆེས་མང་པོར་འགྱུར་ལ། ལག་པ་ལ་གནས་ པའི་ལུས་ལ་ཡང་གཡས་གཡོན་གྱི་ལུས་གཉིས་དང་རེ་རེ་ལ་ཡང་ཚིགས་ཀྱི་ལུས་གསུམ་དང་སོར་མོའི་ལུས་ལྔ་དང་ཚིགས་ཆུང་གི་ལུས་བཅོ་ལྔ་སོགས་ནས་ཐ་ན་རྡུལ་ཕྲ་རབ་ཀྱི་བར་གྱི་ལུས་དེ་སྙེད་དུ་ཐལ་བར་འགྱུར་རོ། །འདོད་མི་ནུས་ཏེ། དེ་ལྟ་ན་

Page: 860 ཆ་ཤས་རེ་རེ་ཞིང་ལུས་སུ་ཐལ་བས་ཁྱབ་བྱེད་ཆ་ཤས་ཅན་གྱི་ལུས་ཁས་བླངས་པ་ཉམས་པའི་ཕྱིར་དང་སྐྱེས་བུ་གཅིག་ལ་རྡུལ་ཕྲ་རབ་ཀྱི་གྲངས་ཀྱི་ལུས་ཡོད་པ་ཆེས་ངོ་མཚར་བའི་གནས་སོ། །དེས་ན་ཕྱི་བེམ་པོར་སྣང་བ་དང་ནང་ཤེས་པར་ སྣང་བ་འདི་གང་ནའང་དཔྱད་ན་ལུས་ཞེས་བྱ་བ་རྡུལ་ཙམ་ཡང་མེད་པར་མཐོང་ན་ཇི་ལྟར་ན་ལག་སོགས་ལ་ལུས་ཡོད་ཅེས་སྨྲ་སྟེ་ལག་སོགས་ཐལ་བར་བྱས་ཀྱང་དེའི་ནང་ནས་ལུས་མི་རྙེད་དོ། །གལ་ཏེ་ཆ་ཤས་འདི་རྣམས་མ་ཡིན་པའི་ལུས་གཅིག་ ཡིན་པར་འདོད་ན། དེ་ལྟ་ན་སྲོག་དབང་གི་བར་དུ་བཏུབས་ཀྱང་ལུས་ལ་གནོད་པར་མི་འགྱུར་ཏེ་ལུས་ནི་དེ་དག་ལས་གཞན་ཡིན་པའི་ཕྱིར། དེས་ན་ལག་སོགས་ཀྱི་ཆ་ཤས་རེ་རེ་ཞིང་ལུས་མ་ཡིན་ལ་ཆ་ཤས་དེ་རྣམས་ལས་གཞན་ནའང་ལུས་མེད་ན་ ལུས་དེ་ནི་ཇི་ལྟར་ན་ཡོད་པ་ཡིན་ཏེ་མིང་ཙམ་དུ་ཤེས་སོ། །དེས་ན་ཆ་ཤས་ཅན་ནམ་གཞན་ཡང་རུང་སྟེ་ལུས་ཞེས་བྱ་བ་གཏན་མེད་ཀྱང་ལག་སོགས་ཀྱི་འདུས་པ་ལ་སེམས་གཏི་མུག་གི་རྨོངས་པ་ཡིས་ནི་ལུས་ཀྱི་བློ་སྐྱེ་བར་འགྱུར་བ་ཡིན་ ཏེ། ཇི་ལྟར་མི་དང་ཐོ་ཡོར་རྒྱང་ནས་ལྟ་ན་ནག་ཡོར་ཙམ་དུ་འདྲ་བའི་དབྱིབས་སུ་ཡོད་པའི་ཁྱད་པར་གྱིས་ཐོ་ཡོར་ལ་ནི་མི་ཞིག་སྣང་ངོ་སྙམ་པའི་བློ་སྐྱེ་བ་བཞིན་ནོ། །གལ་ཏེ་ཐོ་ཡོར་ལ་དུས་ཐུང་ངུ་ཙམ་ཞིག་ཏུ་མིར་འཁྲུལ་པར་ཟད་ལ་ ལག་སོགས་ལ་ལུས་བློ་ཡུན་རིང་དུ་འབྱུང་བས་མི་འདྲའོ་ཞེ་ན། ཇི་སྲིད་དེའི་རྒྱུ་རྐྱེན་ཚོགས་པ་དེ་སྲིད་དུ་ནི་ཐོ་ཡོར་ལ་ཡང་སྐྱེས་བུ་ལྟར་སྣང་བ་སྐྱེ་བ་དེ་བཞིན་དུ་ཇི་སྲིད་ལག་སོགས་ལ་ཡང་རྒྱུ་རྐྱེན་དེ་ཡོད་པ་དེ་སྲིད་དུ་ལུས་བློར་སྣང་བ་སྐྱེ་བས་ཁྱད་ པར་མེད་དོ། །དེ་ལྟར་ལུས་རིལ་པོར་འཛིན་པ་ཟློག་པར་མ་ཟད་ཆ་ཤས་ཀྱང་དཔྱད་ན་མི་འགྲུབ་སྟེ། དེ་ཡང་སོར་མོའི་ཚོགས་ཡིན་ཕྱིར། །ལག་པའང་གང་ཞིག་ཡིན་པར་འགྱུར། །དེ་ཡང་ཚིགས་ཀྱི་ཚོགས་ཡིན་ཕྱིར། །ཚིགས་

Page: 861 ༄༅། །ཀྱང་རང་གི་ཆས་ཕྱེ་བས། །ཆ་ཡང་རྡུལ་དུ་ཕྱེ་བ་སྟེ། །རྡུལ་དེའང་ཕྱོགས་ཆའི་དབྱེ་བ་ཡིས། །ཕྱོགས་དབྱེ་ཆ་ཤས་དང་བྲལ་ཕྱིར། །དེས་ན་ནམ་མཁའ་བཞིན་ཏེ་དེའི་ཕྱིར་རྡུལ་ཡང་དམིགས་སུ་མེད་དོ། །དེ་ལྟར་རྨི་ལམ་ ལྟ་བུ་ཡི། །གཟུགས་ལ་དཔྱོད་ལྡན་སུ་ཞིག་ཆགས། །གང་ཚེ་དེ་ལྟར་ལུས་མེད་པ། །དེ་ཚེ་སྐྱེས་གང་བུད་མེད་གང༌། །སྟེ་སྐྱེས་པ་དང་བུད་མེད་ནི་དབང་པོའི་ཁྱད་པར་ལས་བཞག་པར་ཟད་ལ་དབང་པོ་དེ་ཡང་ལུས་སུ་ཞེན་པ་ལས་འབྱུང་ ལ་ལུས་ཉིད་མི་དམིགས་པར་ཤེས་ནས་དེའི་ཁྱད་པར་ལྟ་ཤུལ་དུ་ག་ལ་ལུས་པའི་དོན་ཏོ། །འདིར་དགེ་བའི་ལྷས། གླེགས་བམ་ལ་ལར་སྲིད་དུ་ལུས་ལ་ཞེས་སྨྲོས་པ་ལ་ནི་རྣམ་གྲངས་གཞན་དུ་འཆད་དེ་ཇི་སྲིད་གཏི་མུག་གི་སྐྱོན་ ཚོགས་པ་དེ་སྲིད་དུ་ལུས་ལ་སྐྱེས་བུ་མེད་དུ་ཟིན་ཡང་སྐྱེས་བུར་སྣང་ངོ༌། །དེ་བཞིན་དུ་ལག་སོགས་ལ་ཡང་རྐྱེན་གྱི་ཚོགས་པ་ཡོད་པ་དེ་སྲིད་ལུས་སུ་རྨོངས་པ་སྐྱེའོ། །ཞེས་ན་ཡམས་གཞན་ཡང་བཤད་དོ། །འགྲེལ་ཆུང་ལས་ཀྱང༌། ན་ཡམས་ གཅིག་ཏུ་ཐོ་ཡོར་ལ་སྐྱེས་བུར་འཁྲུལ་བ་ལྟར་ལག་སོགས་ལ་ལུས་སུ་འཁྲུལ་པ་ནས་རྡུལ་ལས་རྩའི་བར་དུ་འཁྲུལ་ལོ་ཞེས་སོ་ཞེས་འབྲུ་ཡང་བསྣན་ནས། ཇི་སྲིད་རྐྱེན་ཚོགས་སོགས་ཀྱི་ཤླཽ་ཀ་འདི་ཕྱིས་བཅུག་པའོ། །ཞེས་སྣང་ངོ༌། ། གཉིས་པ་ཚོར་བའི་དྲན་ཉེ་ལ་བཞི་སྟེ། ཚོར་བ་ཉིད་མ་གྲུབ་པ། ཚོར་བའི་རྒྱུ་མེད་པ། གང་ཚོར་བའི་ཡུལ་མེད་པ། ཚོར་བའི་འཛིན་པ་མེད་པའོ། །དང་པོ་ནི། སྡུག་བསྔལ་དེ་ཉིད་དུ་ཡོད་ན། །ཇི་སྟེ་རབ་དགའ་ལ་མི་གནོད། །བདེ་ན་མྱ་ ངན་གདུང་སོགས་ལ། །ཞིམ་སོགས་ཅི་སྟེ་དགའ་མི་བྱེད། །སྟོབས་དང་ལྡན་པས་ཟིལ་མནན་ཕྱིར། །གལ་ཏེ་དེ་མྱོང་མ་ཡིན་ན། །གང་ཞིག་ཉམས་མྱོང་བདག་ཉིད་མིན། །དེ་ནི་ཚོར་བ་ཇི་ལྟར་ཡིན། །སྡུག་བསྔལ་ཕྲ་མོ་ཉིད་དུ་

Page: 862 ཡོད། །འདི་ཡིས་རགས་པ་བསལ་མིན་ནམ། །དེ་ནི་དེ་ལས་གཞན་འགའ་ཙམ། །ཞེ་ན་ཕྲ་ཉིད་དེ་ཡང་དེའི། །གལ་ཏེ་འགལ་རྐྱེན་སྐྱེས་པས་ན། །སྡུག་བསྔལ་སྐྱེས་པ་མིན་ན་ནི། །ཚོར་བར་རྟོག་པ་མངོན་ཞེན་ཉིད། །ཡིན་ཞེས་བྱ་བར་ གྲུབ་མིན་ནམ། །དེ་ཉིད་ཕྱིར་ན་འདི་ཡིན་ནི། །གཉེན་པོར་རྣམ་དཔྱོད་འདི་སྒོམ་སྟེ། །རྣམ་བརྟགས་ཞིང་ལས་བྱུང་བ་ཡི། །བསམ་གཏན་རྣལ་འབྱོར་པ་ཡི་ཟས། །ཞེས་གསུངས་ཏེ། དང་པོས་སྡུག་བསྔལ་དོན་དམ་དུ་མེད་པར་བསྟན། གཉིས་པས་བདེ་བས་ཟིལ་གྱིས་མནན་པར་འདོད་པ་བཀགགཉིས་ཀྱིས་སྡུག་བསྔལ་ཕྲ་མོར་ཡོད་པ་བཀག །ཐ་མས་ཚོར་བ་རང་བཞིན་མེད་པར་བསྟན་ཏོ། །གཉིས་པ་ཚོར་བའི་རྒྱུ་མེད་པར་བསྟན་པ་ནི། གལ་ཏེ་དབང་དོན་བར་བཅས་ ན། །དེ་དག་གང་དུ་ཕྲད་པར་འགྱུར། །བར་མེད་ན་ཡང་གཅིག་ཉིད་དེ། །གང་ཞིག་གང་དང་འཕྲད་པར་འགྱུར། །རྡུལ་ཕྲན་རྡུལ་ཕྲན་ལ་འཇུག་མེད། །དེ་ནི་སྐབས་མེད་མཉམ་པ་ཡིན། །མ་ཞུགས་པ་ལ་འདྲེས་མེད་ཅིང༌། །མ་འདྲེས་པ་ལ་ ཕྲད་པ་མེད། །ཆ་མེད་པ་ལའང་ཕྲད་པ་ཞེས། །བྱ་བ་ཇི་ལྟར་འཐད་པར་འགྱུར། །ཕྲད་པ་དང་ནི་ཆ་མེད་པར། །གལ་ཏེ་མཐོང་ན་བསྟན་པར་གྱིས། །རྣམ་ཤེས་ལུས་མེད་པ་ལ་ནི། །ཕྲད་པ་འཐད་པ་མ་ཡིན་ཉིད། །ཚོགས་པའང་ དངོས་པོ་མེད་ཕྱིར་ཏེ། །སྔར་ནི་ཇི་ལྟར་རྣམ་དཔྱད་བཞིན། །དེ་ལྟར་རེག་པ་ཡོད་མིན་ན། །ཚོར་བ་གང་ལས་འབྱུང་བར་འགྱུར། །ངལ་འདི་ཅི་ཡི་དོན་དུ་ཡིན། །གང་གིས་གང་ལ་གནོད་པར་འགྱུར། །གང་ཚེ་ཚོར་པོ་འགའ་མེད་ ཅིང༌། །ཚོར་བའང་ཡོད་པ་མ་ཡིན་པ། །དེ་ཚེ་གནས་སྐབས་འདི་མཐོང་ནས། །སྲེད་པ་ཅི་ཕྱིར་ལྡོག་མི་འགྱུར། །ཞེས་གསུངས་ཏེ། ཚིགས་བཅད་སྔ་མ་གསུམ་གྱིས་དབང་དོན་ཕྲད་པ་བཀག །གཅིག་གིས་རྣམ་ཤེས་ལ་ཕྲད་པ་མི་

Page: 863 ༄༅། །འཐད་པར་བསྟན། ལྷག་མས་དེས་ན་རེག་པ་མེད་པས་ཚོར་བ་མི་འབྱུང་བར་བསྟན་ཏོ། །གསུམ་པ་ཚོར་བའི་ཡུལ་མེད་པ་ནི། མཐོང་བའམ་ནི་རེག་པ་ཡང༌། །རྨི་ལམ་སྒྱུ་འདྲའི་བདག་ཉིད་ཀྱིས། །ཞེས་པ་དང༌། བཞི་པ་ཚོར་བའི་འཛིན་པ་མེད་པ་ནི། སེམས་དང་ལྷན་ཅིག་སྐྱེས་པའི་ཕྱིར། །ཚོར་བ་དེ་ཡིས་མཐོང་མ་ཡིན། །སྔ་དང་ཕྱི་མར་སྐྱེས་པས་ཀྱང༌། །དྲན་པར་འགྱུར་གྱིས་མྱོང་མ་ཡིན། །རང་གིས་བདག་ཉིད་མྱོང་མིན་ན། །གཞན་ དག་གིས་ཀྱང་མྱོང་མ་ཡིན། །ཚོར་པོ་འགའ་ཡང་ཡོད་མིན་ཏེ། །དེས་ན་ཚོར་བ་དེ་ཉིད་མིན། །དེ་ལྟར་བདག་མེད་ཚོགས་འདི་ལ། །འདི་ཡིས་ཅི་སྟེ་གནོད་པ་བྱེད། །ཅེས་གསུངས་ཏེ། དང་པོས་དུས་གསུམ་གྱི་ཚོར་འཛིན་བཀག ། གཉིས་པས་ཚོར་བ་པོ་མེད་པར་བསྟན། རྐང་པ་གཉིས་ཀྱིས་བརྗོད་བྱའི་དོན་སྤྱིར་བསྡུས་པའོ། །དེ་ཡང་ཚོར་བ་ནི་མིག་གིས་འདུས་ཏེ་རེག་པའི་རྐྱེན་གྱིས་ཚོར་བ་སོགས་དྲུག་གམ། བསྡུ་ན་བདེ་སྡུག་བར་མ་གསུམ་དུ་འདུ་བའི་ཕྱིར། རེ་ཞིག་སྡུག་ བསྔལ་གྱི་ཚོར་བ་སྡུག་བསྔལ་དེ་ཉིད་དུ་བདེན་ཞིང་ཡོད་པར་ངེས་ན་ཅིའི་ཕྱིར་རབ་ཏུ་དགའ་བདེའི་ཚོར་བ་ལ་ཅིས་མི་གནོད་དེ་སྡུག་བསྔལ་གྱི་ཚོར་བ་ཉིད་དུ་བདེན་པས་བདེ་བ་ཚོར་དུས་ན་ཡང་སྡུག་བསྔལ་དེ་ཉིད་ཡོད་པའི་ཕྱིར། བདེ་བ་དོན་དམ་ པར་ཡོད་ན་ཡང་མྱ་ངན་དང་སྡུག་བསྔལ་གྱིས་གདུངས་པ་སོགས་ཀྱི་གནས་སྐབས་ལའང་རོ་ཞིམ་པ་སོགས་ལ་དགའ་བ་དང་ཅི་སྟེ་ཡིད་བདེ་ཞིང་དགའ་བར་མི་བྱེད་དེ་བདེ་བ་དོན་དམ་དུ་བདེན་ལ་དེ་དང་ལྡན་པའི་སེམས་ཡིན་པའི་ཕྱིར། སྡུག་ བསྔལ་གྱི་ཚོར་བ་ཡོད་མོད་ནའང་བདེ་བ་སྟོབས་དང་ལྡན་པས་ཟིལ་གྱིས་མནན་པའི་ཕྱིར། གལ་ཏེ་བདེ་བ་མྱོང་བའི་སྐབས་དེར་སྡུག་བསྔལ་དེ་མྱོང་བ་མ་ཡིན་ནོ་ཞེ་ན། གང་ཞིག་བདེ་བ་ཉམས་སུ་མྱོང་བས་ཟིལ་གྱིས་མནན་པའི་བདག་ཉིད་ཅན་

Page: 864 གྱི་སྡུག་བསྔལ་དེ་ནི་སྡུག་བསྔལ་མ་ཡིན་ཏེ་སྡུག་བསྔལ་ནི་ཚོར་ཞིང་ཉམས་སུ་མྱོང་བ་ལ་འདོགས་ན་སུས་ཀྱང་ཉམས་སུ་མ་མྱོང་བ་དེ་ནི་ཚོར་བ་ཇི་ལྟར་ཡིན། གལ་ཏེ་སྡུག་བསྔལ་ཕྲ་མོ་ཉིད་དུ་ཡོད་པས་རྒྱུན་ཆད་པ་ཡང་མ་ཡིན་ནོ་ཞེ་ན། འོ་ན་ དེའི་ཚེ་སྡུག་བསྔལ་ཕྲ་མོ་མྱོང་ཞིང་ཡོད་པ་འདིས་དེའི་དུས་ཀྱི་བདེ་བ་རགས་པ་ཡང་བསལ་བ་མིན་ནམ་སྟེ་སྡུག་བསྔལ་ཕྲ་མོ་དང་བདེ་བ་རགས་པ་ཤེས་པ་གཅིག་གིས་དུས་ཅིག་ཆར་མྱོང་བ་མི་སྲིད་པའི་ཕྱིར། སྡུག་བསྔལ་ཕྲ་མོ་དེ་ནི་བདེ་བ་ རགས་པ་དེ་ལས་གཞན་པའི་དུས་འགའ་ཞིག་ཏུ་སྐྱེ་བས་སྐྱོན་མེད་དོ་ཞེ་ན། སྡུག་བསྔལ་ཕྲ་མོ་ཉིད་དེ་ཡང་བདེ་བ་རགས་པ་དེའི་འགལ་རྐྱེན་དུ་གྱུར་པས་ན་སྡུག་བསྔལ་དེ་ཡོད་བཞིན་དུ་བདེ་བ་དེ་སྐྱེ་མི་སྲིད་པར་འགྱུར་ལ། སྡུག་བསྔལ་དེ་ནི་དོན་ དམ་པར་ཡོད་པས་ནམ་ཡང་བདེ་བ་སྐྱེ་བ་མི་སྲིད་པར་ཐལ་བར་འགྱུར་རོ། །གལ་ཏེ་སྡུག་བསྔལ་ནི་རང་བཞིན་གྱིས་རྟག་པར་སྐྱེས་པ་མིན་ཏེ་རྒྱུ་རྐྱེན་ཚོགས་པ་ལས་བྱུང་བ་ཙམ་མོ་ཞེ་ན་ནི། དེ་ལྟ་ན་རྒྱུ་རྐྱེན་བརྫུན་པ་ཚོགས་པ་ལས་ གནས་སྐབས་གཞན་དུ་སྣང་བ་ཙམ་དེ་ལ་ཚོར་བ་བདེ་སྡུག་བར་མར་རྟོག་ཅིང་དེ་ཡང་དག་ཏུ་འཛིན་པ་ནི་ཕྱིན་ཅི་ལོག་ཏུ་མངོན་པར་ཞེན་པ་ཁོ་ན་ཉིད་ཡིན་ནོ་ཞེས་བྱ་བར་འགྲུབ་པ་མིན་ནམ། དེ་ཉིད་ཀྱི་ཕྱིར་ན་བདེ་སོགས་ཀྱི་ཚོར་བ་ལ་ བདེན་པར་ཞེན་པ་འདི་ཡི་ནི་གཉེན་པོར་ཚོར་བ་རང་གི་ངོ་བོ་ལ་རྣམ་པར་དཔྱོད་པ་འདི་སྒོམས་ཤིག་དང་ཚུལ་བཞིན་དུ་རྣམ་པར་བརྟགས་པའི་ཞིང་ས་གཤིན་པོ་ལས་སྐྱེས་པའི་བསམ་གཏན་གྱི་མྱུ་གུ་ཤེས་རབ་ཀྱི་འབྲས་བུས་ལྕིད་ བ་སྤྲོས་པའི་སྦུན་པ་དང་བྲལ་བ་འདི་ནི་ཤེས་རབ་དམ་པ་ལ་སྤྱོད་པའི་རྣལ་འབྱོར་པ་རྣམས་ཀྱི་བདེ་བར་འཚོ་བའི་ཟས་ཀྱི་དམ་པའོ། །དེའི་ཚེ་རང་སྡེ་བྱེ་སྨྲ་བ་ན་རེ། དབང་ཤེས་དང་ཡུལ་ཕྲད་པ་ནི་རེག་པ་ཡིན་ལ། དེ་ལས་ཚོར་བ་ནི་དོན་དམ་

Page: 865 ༄༅། །པར་སྐྱེའོ་ཞེ་ན། དྲིས་པ། ཅི་དབང་དོན་བར་བཅས་སུ་སྐྱེའམ་བར་མེད་དུ་སྐྱེ། གལ་ཏེ་དབང་ཤེས་དང་དོན་གྱི་བར་རྣམ་པའམ་དེ་ལས་གཞན་གང་ཡང་རུང་བས་ཆོད་པ་དང་བཅས་ཏེ་སྐྱེ་ན་དབང་དོན་དེ་དག་གང་དུ་ཕྲད་པར་ འགྱུར་ཏེ་བར་གཞན་གྱིས་ཆོད་པའི་ཕྱིར། འོན་ཏེ་བར་མེད་དུ་འདོད་ན་ཡང་དབང་དོན་འཕྲད་པ་ན་དེ་གཉིས་གཅིག་ཉིད་དུ་འདྲེ་བར་འགྱུར་ཏེ་བར་གཞན་གྱིས་མ་ཆོད་པའི་ཕྱིར། དེས་ན་དབང་དོན་གང་དང་གང་ཞིག་ཕྲད་པར་འགྱུར་ཏེ་དཔྱད་ ན་ཕྲད་པ་ཉམས་སོ། །གལ་ཏེ་རགས་པ་ཕྲད་པ་མ་ཡིན་གྱི་རྡུལ་ཕྲ་རབ་ཕྲད་པའོ་ཞེ་ན། རྡུལ་ཕྲ་རབ་ནི་རྡུལ་ཕྲ་རབ་རང་ཉིད་ལ་འཇུག་པ་མེད་དེ་རྡུལ་ཕྲ་རབ་དེ་ཡི་རང་བཞིན་ནི་གོ་སྐབས་གཞན་ནམ་བུ་ག་མེད་པ་མཉམ་པ་ཆ་མེད་གཅིག་ ཡིན་པར་ཉན་ཐོས་པ་ཁྱོད་ཉིད་འདོད་པའི་ཕྱིར། དེས་ན་ཆུ་ལ་ཆུ་ལྟར་གཅིག་ལ་གཅིག་མ་ཞུགས་པ་ལ་འུདྲེས་པ་མེད་ཅིང་མ་འདྲེས་པ་ལ་ནི་ཐུག་ཕྲད་དུ་ཕྲད་པ་མེད་ལ་ཕྱོགས་དང་སྐད་ཅིག་གི་ཆ་མེད་པ་ལ་ཡང་ཕྲད་པ་ཞེས་བྱ་བ་ཇི་ལྟར་ན་ འབད་པར་འགྱུར་དེའི་ཕྱིར་ཕྲད་པ་དང་ནི་སྐད་ཅིག་དང་ཕྱོགས་ཀྱི་ཆ་མེད་པར་གཞི་མཐུན་པ་དེ་ལྟ་བུ་གལ་ཏེ་ཁྱོད་ཀྱིས་མཐོང་ན་ཁོ་བོ་ལ་བསྟན་པར་གྱིས་ཤིག་དང་ངོ་མཚར་གྱི་རྙེད་པ་བྱིན་པར་བྱའོ། །སྤྱིར་ཡང་ལུས་ཅན་ལ་ཕྲད་པ་ཡོད་ མོད། རྣམ་ཤེས་ལུས་མེད་པ་ལ་ནི་ཕན་ཚུན་ཕྲད་པ་འཐད་པ་མ་ཡིན་པ་ཉིད་དོ། །གལ་ཏེ་རྣམ་ཤེས་ལའང་ཚོགས་པ་ལས་ཕྲད་པ་ཞག་གོ་ཞེ་ན། ཚོགས་པའང་དཔྱད་ན་དངོས་པོ་མེད་པའི་ཕྱིར་ཏེ་སྔར་ནི་ཕྲེང་བ་དང་དམག་སོགས་ཀྱི་ དཔེས་ཇི་ལྟར་རྣམ་པར་དཔྱད་པ་བྱས་པ་བཞིན་ནོ། །དེ་ལྟར་དབང་དོན་ཕན་ཚུན་དུ་རེག་པ་ཡོད་པ་མིན་ན་དེའི་ཚོར་བ་གང་ལས་འབྱུང་བར་འགྱུར་ཏེ། མེ་མེད་ན་དུ་བ་བཞིན་ནོ། །གལ་ཏེ་རྒྱུ་མ་མཐོང་ན་ཡང་ཚོར་བ་ཙམ་ཞིག་ཡོད་དོ་ཞེ་ན།

Page: 866 རྒྱུ་མེད་ཀྱང་འབྲས་བུ་ཡོད་པར་འདོད་པའི་ངལ་བ་འདི་ལྟ་བུ་ཅིའི་དོན་དུ་ཡིན་ཏེ་ངལ་བ་འདིས་ཅི་བྱ། དེས་ན། གང་ཚེ་ཚོར་པོ་ཡོད་མིན་ཞིང༌། །ཚོར་བའང་ཡོད་པ་མ་ཡིན་པ། །དེ་ཚེ་གནས་སྐབས་འདི་མཐོང་ནས། །སྲེད་པ་ཅི་ཕྱིར་ ལྡོག་མི་འགྱུར། །ཏེ་ཚོར་བ་ལས་སྲེད་པ་འབྱུང་ལ་རྒྱུ་འགགས་ན་འབྲས་བུ་ལྡོག་པའི་ཕྱིར་རོ། །གཞན་ཡང་གང་ཚོར་བའི་ཡུལ་ཞིག་ཡོད་ན་ཚོར་ལ་རག་མོད་ཀྱང་གང་མཐོང་བའམ་གང་ལ་རེག་པར་སྣང་བའི་ཡུལ་འདི་ཡང་ཇི་ལྟར་རྨི་ ལམ་ན་མཐོང་རེག་དང་སྒྱུ་མའི་མཐོང་རེག་འདྲ་བའི་བདག་ཉིད་ཀྱིས་གནས་པ་ཡིན་གྱི་དེ་ལས་གཞན་དུ་ཅུང་ཟད་ཀྱང་མེད་པའི་ཕྱིར། གཞན་ཡང་ཚོར་བ་ཡང་དག་པར་མེད་དེ་དེ་སེམས་ཀྱིས་མི་མྱོང་བའི་ཕྱིར། དེ་ལ་སེམས་ཀྱི་སྐད་ཅིག་དང་ཚོར་བའི་སྐད་ཅིག་ ལྷན་ཅིག་ཏུ་སྐྱེས་པ་ན་ནི་ཚོར་བ་དེ་ཡིས་སེམས་དེ་ཡང་མཐོང་བ་མ་ཡིན་ལ། སེམས་དེས་ཚོར་བ་དེ་ཡང་མཐོང་བ་མ་ཡིན་ཏེ་དུས་མཉམ་ལ་བྱ་བྱེད་འགལ་བའི་ཕྱིར། ཚོར་བ་སྔ་ལོགས་དང་སེམས་ཕྱི་མར་སྐྱེས་པས་ཀྱང་སྔ་ལོགས་ཀྱི་ཚོར་བ་ དེ་དྲན་པར་འགྱུར་གྱི་ཕྱི་མའི་སེམས་ཀྱིས་མྱོང་བ་མིན་ཏེ་འགགས་ཟིན་པའི་ཕྱིར། དཔེར་ན་ཁ་སང་གི་གྲང་རེག་དེ་རིང་ཡིད་ལ་བྱེད་པ་བཞིན་ནོ། །སེམས་སྔ་ལ་ཚོར་བ་འཕྱི་ནའང་སྐྱོན་དེ་ཉིད་ཀྱིས་རེག་གོ །ཚོར་བ་རང་གིས་ཚོར་བ་བདག་ཉིད་ མྱོང་བའང་མིན་ཏེ་མིག་རང་གིས་རང་མི་མཐོང་བ་ལྟ་བུའི་ཕྱིར། ཚོར་བ་རང་ལས་གཞན་པ་དག་གིས་ཀྱང་མྱོང་བ་མ་ཡིན་ཏེ་གཟུགས་ཀྱིས་སྒྲ་མི་མྱོང་བ་བཞིན་ནོ། །དེ་ལྟར་དཔྱད་པ་ན་ཤེས་རབ་དྲི་མ་མེད་པའི་མདུན་ན་གང་ཞིག་ཚོར་བ་དང་གང་ གིས་ཚོར་བ་པོ་དང་ཇི་ལྟར་ཚོར་བ་འགའ་ཡང་ཡོད་པ་མིན་ཏེ། དེས་ན་ཚོར་བ་ནི་མ་དཔྱད་པ་འཁྲུལ་ངོར་སྒྲོ་བཏགས་པས་སྣང་བ་ཡིན་གྱི་དཔྱད་ན་དེ་ཁོ་ན་ཉིད་མིན་ནོ། །དེ་ལྟར་ཆོས་དང་གང་ཟག་གི་བདག་མེད་པ་ལུས་སེམས་ཀྱི་ཚོགས་པ་སྒྱུ་མ་ཙམ་

Page: 867 ༄༅། །འདི་ལ་སྒྲོ་བཏགས་པའི་ཚོར་བ་འདིས་ཕན་པའམ་གནོད་པར་ཅི་ཞིག་བྱེད་དེ་སྒྱུ་མའི་ནམ་མཁའ་ལ་སྒྱུ་མའི་མེ་ཆུས་མི་གནོད་པ་བཞིན་ནོ། །འདི་ནི་ཚོར་བའི་དྲན་ཉེ་ཡང་དག་པར་སྒོམ་པ་ཡིན་ཏེ། འཇམ་དཔལ་གང་གིས་ཚོར་ བ་ཉིད་མི་དམིགས་ན་དེ་ནི་ཚོར་བ་ལ་ཚོར་བའི་རྗེས་སུ་ལྟ་བའི་དྲན་པ་ཉེ་བར་བཞག་པའོ། །ཞེས་སོ། །འདིར་དགེ་བའི་ལྷས་ནི། རྣམ་པར་མི་རྟོག་པའི་བསམ་གཏན་དེ་ནི་ཟག་པ་མེད་པའི་ཟས་དེ་ཁོ་ན་རྟོགས་པའི་མཚན་ཉིད་ཅན་དེ་གང་ལ་ཡོད་པ་ དེ་ནི་རྣལ་འབྱོར་པར་འགྱུར་ཏེ། ཐོས་པ་ལས་བསམ་པ། དེ་ལས་སྒོམ་པ། དེ་ལས་དེ་ཁོ་ན་ཉིད་ཀྱི་ཡེ་ཤེས་སྐྱེ་བ་ཡིན་པའི་ཕྱིར་ཏེ། ཇི་ལྟར་སྒྱུ་མའི་སེང་གེས་སྒྱུ་མའི་གླང་པོ་ཆེ་གསོད་པ་ནི་ཡང་དག་པ་ཉིད་དུ་མ་ཡིན་པ་བཞིན་དུ་དེ་ཁོ་ན་ཉིད་རྣམ་པར་དཔྱོད་པས་ལོག་ པར་རྣམ་པར་རྟོག་པ་ཡང་དག་པར་མེད་བཞིན་དུ་འཇོམས་པ་ཡིན་ནོ། །ཞེས་དང༌། སྲེད་པ་ཅི་ཕྱིར་ལྡོག་མི་འགྱུར། །སོགས་ལ། འདི་དག་གིས་ནི་གཟེགས་ཟན་པ་ལ་སོགས་པ་ཡང་སུན་ཕྱུང་བ་ཡིན་ཏེ་དེ་རྣམས་འདི་སྐད་དུ། རྫས་ནི་རྣམ་ པ་གཉིས་ཡོད་དེ་མཐོང་བར་བྱ་བ་དང་རེག་པར་བྱ་བའོ། །དབང་དོན་ཕྲད་པ་ལས་བྱུང་བའི་ཤེས་པ་ནི་མངོན་སུམ་མོ་ཟེར་ན་དཔྱད་པའི་ཚུལ་འདིས་རྫས་སམ་ཕྲད་པ་ཡོད་པ་མ་ཡིན་ནོ། །ཡང་ན་གཟུགས་སོགས་ཀྱི་རྫས་བུམ་སོགས་དང་འདྲ་བར་མཐོང་བའམ་ རེག་ཏུ་ཟིན་ཡང་ཡོད་པ་མ་ཡིན་ནོ། །ཀྱང་སྒྲས་ནི་ཀུན་རྫོབ་ཏུ་ཁས་ལེན་པ་སྟེ་དོན་དམ་པར་ནི་མཐོང་རེག་གང་ཡང་མེད་དོ། །ཞེས་སོ། །བི་བྷུ་ཏིས་ནི། ཚོར་བ་ནི་མངོན་ཞེན་ཉིད་ཡིན་ཏེ་གཅིག་གི་བདེ་བ་དེ་ཉིད་གཞན་ལ་སྡུག་བསྔལ་དུ་འགྱུར་བ་སྟེ། སྔར་གང་ཐོས་ཀྱང་སྡུག་བསྔལ་སྐྱེ། །དེ་དུས་གཞན་དུ་མཐོང་ན་དགའ། །དེས་བས་ཚོར་བ་དང་དེའི་རྒྱུ་བཏགས་པ་ཁོ་ནའོ། །ཡང་བཤད་པ། སྦྲུལ་གྱིས་རྨ་བྱ་བདེ་བར་འགྱུར། །དུག་ནི་བཅུད་ལེན་གོམས་ལ་བདེ། །གནོད་པར་བྱེད་པའི་

Page: 868 ཚེར་མ་ནི། །ཁྱད་པར་རྔ་མོའི་ཁ་ལ་བདེ། །ཞེས་སོགས་སུ་བཀྲལ་ཏོ། །འགྲེལ་ཆུང་ལས་ནི། ཕྲ་མོར་ཡོད་པས་ཚོར་བ་དེ་ཁོ་ནར་ཡོད་ལ་རགས་པ་བསལ་བས་དགའ་བ་ལ་མི་གནོད་པ་ཡང་མི་འགལ་ལོ། །ཚོར་བའི་མཚན་ཉིད་ལས་ འདས་པར་ཡང་མི་ཐལ་ཏེ་མྱོང་བའི་ཕྱིར་རོ། །འདི་ལྟར་ང་ནི་དེ་ལས་གཞན་འགའ་ཙམ་སྟེ་སྡུག་བསྔལ་ཕྲ་མོ་དེ་ནི་བདེ་བ་ཆེན་པོ་ལས་གཞན་པ་བདེ་བ་ཕྲ་མོའི་བདག་ཉིད་བདེ་བ་ཕུལ་དུ་ཕྱིན་པས་སྟོང་པའོ་ཞེ་ན། །སྡུག་བསྔལ་ཕྲ་མོ་ཉིད་དུ་ཡོད། །འདི་ཡིས་རགས་པ་བསལ་ མིན་ནམ། །དེ་ནི་དེ་ལས་གཞན་འགའ་ཙམ། །ཞེ་ན་་་་་་་༌། །ཞེས་པའི་བར་གཞན་གཞུང་དུ་བྱས་ནས། ་་་་་ཕྲ་ཉིད་དེ་ཡང་དེའི། །སོགས་ཀྱིས་བཀག་པར་བསྟན་ཏོ། །གསུམ་པ་སེམས་དྲན་ཉེ་ལ་ཡང་གཉིས། སེམས་མ་གྲུབ་པ་དང༌། ཡུལ་ མ་གྲུབ་པའོ། །དང་པོ་སེམས་མ་གྲུབ་པ་ནི། ཡིད་ནི་དབང་རྣམས་ལ་མི་གནས། །གཟུགས་སོགས་ལ་མིན་བར་ནའང་མིན། །ནང་ཡང་སེམས་མིན་ཕྱི་མིན་ཞིང༌། །གཞན་དུ་ཡང་ནི་རྙེད་མ་ཡིན། །གང་ཞིག་ལུས་མིན་གཞན་དུ་མིན། །འདྲེས་མིན་ ལོགས་སུ་འགར་མེད་པ། །དེ་ནི་ཅུང་ཟད་མིན་དེའི་ཕྱིར། །སེམས་ཅན་རང་བཞིན་མྱ་ངན་འདས། །ཞེས་པ་དང༌། གཉིས་པ་ཡུལ་མ་གྲུབ་པ་ནི། ཤེས་བྱ་ལས་སྔར་ཤེས་ཡོད་ན། །དེ་ནི་ཅི་ལ་དམིགས་ལས་སྐྱེ། །ཤེས་དང་ཤེས་བྱ་ལྷན་ཅིག་ན། །དེ་ནི་ ཅི་ལ་དམིགས་ནས་སྐྱེ། །འོན་ཏེ་ཤེས་བྱ་ཕྱིས་ཡོད་ན། །དེ་ཚེ་ཤེས་པ་གང་ལས་སྐྱེ། །ཞེས་གསུངས་ཏེ། དེའི་ཡང་རྐང་པ་དང་པོ་དྲུག་གིས་སེམས་དཔྱད་མི་བཟོད་པ་དང༌། ཐ་མ་གཉིས་ཀྱིས་གཟོད་ནས་དག་པར་བསྟན་ལ། ཕྱི་མ་ལ་ཡང༌། ཤེས་བྱ་སྔ་མ་དང༌། དུས་མཉམ་པ་དང༌། ཤེས་བྱ་འཕྱི་བའི་སྐྱོན་རྐང་པ་གཉིས་གཉིས་ཀྱིས་བསྟན་ཏོ། །དེ་ཡང་ཚོར་བ་ཡོད་དེ་ཚོར་བ་པོ་སེམས་ཡོད་པས་སོ་སྙམ་ན། སེམས་སམ་ཡིད་དེ་ཉིད་ནི་ནང་མིག་སོགས་ཀྱི་དབང་པོ་རྣམས་ལ་མི་གནས་

Page: 869 ༄༅། །ཤིང་ཕྱི་གཟུགས་སོགས་ཀྱི་ཡུལ་ལ་ཡང་མིན་ལ་དེ་གཉིས་ཀྱི་བར་ནའང་གནས་པ་མིན་ཏེ། དེས་ན་གང་ནའང་མི་གནས་པ་དེ་ནི་ངོ་བོ་ཉིད་ཀྱིས་ཡོད་པ་མ་ཡིན་ནོ། །སུ་ཞིག་སེམས་ཡིན་ཞེས་བརྟགས་ན་ནང་དབང་པོ་ཡང་སེམས་ མིན་ལ་ཕྱི་ཡུལ་ཡང་སེམས་མིན་ཞིང་ཕྱི་ནང་དེ་ལས་གཞན་དུ་ཡང་ནི་སེམས་ཐ་དད་པར་རྙེད་པ་མིན་ཏེ་སུ་ཡང་སེམས་ཡིན་པ་པོ་མ་མཐོང་ན་ད་ནི་སེམས་ཞེས་གང་ཞིག་ལ་འདོགས། གལ་ཏེ་ཡིད་ཉིད་དབང་པོ་ཡིན་ན་དབང་པོ་ལ་མི་གནས་པ་ག་ལ་ ཡིན་སྙམ་ན། སྤྱིར་ཡིད་དབང་དང་ཡིད་རྟོག་སོགས་ནི་ཁྱད་གཞི་ཡིད་ལ་དམིགས་ནས་དེའི་རྟོག་མེད་མངོན་སུམ་གྱི་སྐབས་ལ་དབང་པོ་དང་དེའི་རྗེས་སུ་འཇུག་པའི་འཛིན་རྟོག་ལ་ཡིད་རྟོག་ཏུ་བཞག་མོད། དེའི་ཚེ་ཡང་ཁྱད་གཞི་ཡིད་ཁྱད་ཆོས་ ཡིད་དབང་ལ་གནས་སོ། །ཞེས་མི་རུང་སྟེ་ལུས་ལག་པ་ལ་གནས་སོ་ཞེས་བྱར་མི་རུང་བ་བཞིན་ནོ། །ཡིད་ཉིད་ཡིད་དབང་དུ་འདོད་ན་རང་ཉིད་ལ་རང་གནས་པ་ཇི་ལྟར་རུང༌། གང་ལ་གང་གནས་པ་ནི་ཐ་དད་པའི་ཆོས་ལ་ཡིན་གྱི་ཐ་མི་དད་པ་ ལ་གནས་པར་ཇི་ལྟར་བཞག །དེས་ན་གང་ཞིག་ཡིད་དེ་ནི་ལུས་ཀྱང་མིན་ལ་ལུས་ལས་གཞན་དུའང་མིན་ཞིང་ལུས་དང་འདྲེས་པའང་མིན་ལ་ལུས་ལས་ལོགས་སུ་ཡང་འགར་ཡང་མཐོང་དུ་མེད་དེ། དེ་ནི་རང་གི་ངོ་བོ་ཅུང་ཟད་དུ་ཡང་མཐོང་བ་མིན་ པ་དེའི་ཕྱིར་སེམས་ཅན་གྱི་སེམས་ཀྱི་རང་བཞིན་གཟོད་མ་ནས་མྱ་ངན་ལས་འདས་པ་སྤྲོས་པས་མ་གོས་པ་ཉིད་དོ། །གལ་ཏེ་ཤེས་པ་ཡང་དག་པར་ཡོད་དེ་ཡུལ་ཤེས་བྱ་རང་བཞིན་གྱིས་ཡོད་པའི་ཕྱིར་སྙམ་ན། འོ་ན་ཤེས་བྱ་དང་ཤེས་པ་སྔོན་ དུ་གང་བྱུང་ཞེས་དྲི་བར་བྱའོ། །གལ་ཏེ་ཤེས་པ་སྔ་ན་ཤེས་བྱ་ལས་སྔར་ཤེས་པ་ཡོད་པར་འགྱུར་ལ། དེ་ལྟ་ན་ཤེས་པ་དེ་ནི་ཅི་ལ་དམིགས་ནས་སྐྱེ་སྟེ་ཤེས་བྱ་ལས་གཞན་པའི་ཡུལ་མེད་ལ་ཤེས་བྱ་ནི་བྱུང་མ་ཟིན་པའི་ཕྱིར། ཤེས་པ་དང་

Page: 870 ཤེས་བྱ་ལྷན་ཅིག་དུས་མཉམ་དུ་བྱུང་ངོ་ཞེ་ན། ཤེས་པ་དེ་ནི་ཅི་ལ་དམིགས་ནས་སྐྱེ་སྟེ་དུས་མཉམ་པ་ནི་བྱ་བྱེད་འགལ་བས་ན་གཞལ་བར་མི་བྱེད་པའི་ཕྱིར། འོན་ཏེ་ཤེས་བྱ་ཕྱིས་ཡོད་ན། །དེ་ཚེའང་ཤེས་པ་གང་ལས་སྐྱེ། །དེ་ལྟར་ ན་ཆོས་རྣམས་ཐམས་ཅད་ཀྱི་སྐྱེ་འགག་གནས་པ་དང་ཡུལ་ཡུལ་ཅན་སོགས་ནི་བག་ཆགས་གོམས་པའི་འཁྲུལ་རྒྱུན་ལ་ཞེན་ཏེ་སྒྲོ་བཏགས་པར་ཟད་ཀྱི་ཡང་དག་པའི་ཤེས་པའི་ངོར་དེ་དག་ཡོད་པ་མིན་ནོ། །སྤྱིར་འགྲེལ་བྱེད་ཕལ་ཆེར་གྱིས་ནང་ ཡང་སེམས་མིན་སོགས་ལ་ནང་ན་ཡང་གནས་པ་མིན་ལ་ཞེས་འབྲུ་གཉེར་ཡང་དེ་ལྟ་ན་དབང་རྣམས་ལ་མི་གནས་དང་བཟློས་པར་འགྱུར་ཞིང་ནང་ཡང་ཞེས་པའི་ཡང་སྒྲའི་ནུས་པ་ཡང་ཉམས་པར་འགྱུར་བས་དེ་ལྟར་དུ་བཀྲལ་བར་མི་བྱའོ། ། དེ་ལྟར་སེམས་གཟོད་ནས་དག་པར་མཐོང་བ་ནི་སེམས་དྲན་ཉེ་སྟེ། གཙུག་ན་རིན་ཆེན་གྱི་མདོ་ལས། དེ་སེམས་ཀུན་ཏུ་ཚོལ་བ་ན་སེམས་དེ་ནི་ནང་དང་ཕྱི་དང་གཉི་ག་དང་ཕུང་ཁམས་སྐྱེ་མཆེད་རྣམས་ལ་ཡང་དག་པར་རྗེས་སུ་མི་མཐོང་ངོ༌། །ཞེས་དང༌། འཇམ་དཔལ་གང་གིས་སེམས་མིང་ཙམ་དུ་ཤེས་ན་དེ་ནི་སེམས་ལ་སེམས་ཀྱིས་རྗེས་སུ་ལྟ་བའི་དྲན་པ་ཉེ་བར་བཞག་པའོ། །ཞེས་སོ། །དགེ་བའི་ལྷས་ནི། གཟུགས་སོགས་ནི་སྐད་ཅིག་ཡིན་པའི་ཕྱིར་ཆ་ཤས་མེད་པས་ཅིག་ཆར་འཇུག་ལ། ཆ་ཤས་དང་བཅས་ན་ཡང་དངོས་པོ་མེད་པའི་ཕྱིར་སེམས་ཀྱི་སྐད་ཅིག་མ་སྔ་མ་ནི་མེད་པ་ཉིད་དོ། །ཤེས་པ་དང་ཤེས་བྱ་ལྷན་ཅིག་སྲང་གི་མདའ་ལྟར་ཡོད་དུ་ཟིན་ཡང་གཅིག་གི་རྒྱུ་གཅིག་མ་ཡིན་པས་ཡང་དག་པར་དེ་གཉི་ག་ཡང་མེད་པ་ཡིན་ནོ། །ཞེས་སོ། ། ཤེར་ལེའི་འགྲེལ་ཆུང་ལས་ནི། དེ་ཚེ་ཤེས་པ་གང་ལས་སྐྱེ་སྟེ་གདོད་མ་ནས་མ་སྐྱེས་པའི་ཕྱིར། ཞེས་སོ། །བཞི་པ་ཆོས་དྲན་ཉེ་ལ་གསུམ། ཆོས་ཐམས་ཅད་སྐྱེ་མེད་དུ་བསྟན་པ། ཧ་ཅང་ཐལ་བ་སྤང་བ། ཐུག་མེད་དུ་ཐལ་བ་སྤང་

Page: 871 ༄༅། །བའོ། །དང་པོ་ནི། དེ་ལྟར་ཆོས་རྣམས་ཐམས་ཅད་ཀྱི། སྐྱེ་བ་རྟོགས་པར་འགྱུར་མ་ཡིན། །ཞེས་པ་དང༌། གཉིས་པ་ནི། གལ་ཏེ་དེ་ལྟར་ཀུན་རྫོབ་མེད། །དེ་ལ་བདེན་གཉིས་ག་ལ་ཡོད། །དེ་ཡང་ཀུན་རྫོབ་གཞན་ གྱིས་ན། །སེམས་ཅན་མྱ་ངན་ག་ལས་འདའ། །འདི་ནི་གཞན་སེམས་རྣམ་རྟོག་སྟེ། །དེ་ནི་རང་གི་ཀུན་རྫོབ་མིན། །ཕྱིས་དེ་ངེས་ན་དེ་ཡོད་དེ། །མིན་ན་ཀུན་རྫོབ་མེད་པ་ཉིད། །ཅེས་གསུངས་ཏེ། དང་པོས་བརྒལ་བ་བཀོད། ཕྱི་མས་ ལན་བཏབ་པའོ། །གསུམ་པ་ནི། རྟོག་དང་བརྟག་པར་བྱ་བ་དག །གཉིས་པོ་ཕན་ཚུན་བརྟེན་པ་ཡིན། །ཇི་ལྟར་གྲགས་པ་ལ་བརྟེན་ནས། །རྣམ་པར་དཔྱད་པ་ཐམས་ཅད་བརྗོད། །གང་ཚེ་རྣམ་པར་དཔྱད་པ་ཉིད། །རྣམ་དཔྱོད་ཀྱིས་ནི་ དཔྱོད་བྱེད་ན། །དེ་ཚེ་རྣམ་དཔྱོད་དེ་ཡང་ནི། །རྣམ་དཔྱོད་ཕྱིར་ན་ཐུག་པ་མེད། །དཔྱད་བྱ་རྣམ་པར་དཔྱད་བྱས་ནས། །རྣམ་དཔྱོད་ལ་ནི་རྟེན་ཡོད་མིན། །རྟེན་མེད་ཕྱིར་ན་མི་སྐྱེ་སྟེ། དེ་ཡང་མྱ་ངན་འདས་པར་བརྗོད། །ཅེས་གསུངས་ཏེ། རྐང་ པ་དང་པོ་གཉིས་ཀྱིས་རྩོད་པ་བཀོད། རྐང་པ་གཉིས་ཀྱིས་ལན་བཏབ། རྐང་པ་གཉིས་ཀྱིས་ཕ་རོལ་གྱི་ཡང་ལན་བརྗོད། ལྷག་མས་དེ་ཡི་དོགས་པ་བསལ་བའོ། །དེ་ཡང་ལུས་དང་ཚོར་བ་དང་སེམས་སུ་ཞེན་པ་དེ་ལྟར་ཟློག་པ་ན་དེ་རྣམས་ ལས་གཞན་པའི་ཆོས་ཤུལ་ན་མེད་པའི་ཕྱིར་ཆོས་ཐམས་ཅད་ཀྱང་རང་བཞིན་མེད་པར་ཁོང་དུ་ཆུད་པར་འགྱུར་ལ། དེ་ལྟར་ཆོས་རྣམས་ཐམས་ཅད་ཀྱི་སྐྱེ་བ་རྟོགས་པར་འགྱུར་བ་མ་ཡིན་པར་ཤེས་པས་སྐྱེ་བའི་འཛིན་པ་ལས་ལོག་ཅིང་དེའི་ཕྱིར་འགག་པ་ དང་གནས་པརཡང་མི་དམིགས་པས་སྤྲོས་པ་དང་གཟོད་ནས་བྲལ་བར་ཁོང་དུ་ཆུད་པར་འགྱུར་རོ། །དེའི་ཚེ་རྣམ་རིག་པ་དང་དངོས་སྨྲ་བ་དག་ན་རེ། གལ་ཏེ་ཐམས་ཅད་སྐྱེ་མེད་ཡིན་པ་དེ་ལྟ་ན་ཀུན་རྫོབ་མེད་པར་འགྱུར་ལ། ཀུན་རྫོབ་མེད་པར་འདོད་

Page: 872 པ་དེ་ལ་ནི་བདེན་པ་གཉིས་ག་ལ་ཡོད་དེ་སྔར་བདེན་གཉིས་རྣམ་པར་བཞག་པ་དང་འགལ་ལོ། །ཀུན་རྫོབ་དེ་ཡང་ཀུན་རྫོབ་རང་གི་ངོ་བོ་ནས་བཞག་པ་མིན་པར་རྒྱུ་མཚན་གཞན་གྱིས་བལྟོས་ཏེ་བཞག་པ་སྨིག་རྒྱུ་ལ་ཆུར་ཞེན་ནི་སྨིག་རྒྱུས་བཞག་པ་ མིན་པར་དེར་ཞེན་གྱི་བློ་ཀུན་རྫོབ་པ་གཞན་གྱིས་བཞག་པ་ལྟར་རོ་ཞེ་ན། འོ་ན་སེམས་ཅན་མྱ་ངན་ག་ལ་འདའ་སྟེ་ཀུན་རྫོབ་མེད་ན་སེམས་ཅན་མེད་པའི་ཕྱིར་རམ་སངས་རྒྱས་ཟིན་ཡང་གཞན་གྱིས་མ་རིག་པ་ཅན་དུ་འཇོག་སྲིད་པའི་ཕྱིར་རོ། །ཞེས་རྒོལ་བའི་རྩོད་ པ་དང༌། ལན་གྱི་དོགས་པ་བསུས་ནས་སླར་བརྒལ་བར་རློམ་པ་བཀོད་ནས། དེའི་ལན་གདབ་ཕྱིར། འདི་ནི་གཞན་སེམས་རྣམ་རྟོག་སྟེ། །དེ་ནི་རང་གི་ཀུན་རྫོབ་མིན། དེ་ལྟར་སངས་རྒྱས་པ་དང་མ་རྒྱས་པར་བཞག་པ་འདི་ནི་གཞན་སེམས་ཀྱི་རྣམ་ པར་རྟོག་པ་ལས་བཏགས་པ་ཡིན་ཏེ། དེ་ནི་སངས་རྒྱས་རང་གི་ངོ་བོ་ནས་ཀུན་རྫོབ་གཟིགས་པས་སངས་རྒྱས་པའམ་མ་རྒྱས་པར་བཞག་པ་མ་ཡིན་ཏེ། ཆོས་ཐམས་ཅད་གཟོད་མ་ནས་ངོ་བོ་ཉིད་ཀྱིས་ཅི་ཡང་མ་ཡིན་པར་གཟིགས་ཤིང༌། བདེན་བརྫུན་ལ་སོགས་ པའི་འདུ་ཤེས་རྣམ་པར་ལོག་པའི་ཕྱིར། སྤྱིར་ཡང་སྟོང་ཉིད་ནམ་མཁའ་འམ་རྒྱ་མཚོ་ལྟ་བུ་ལ་རྟེན་ཅིང་འབྲེལ་བར་འབྱུང་བ་ཀུན་རྫོབ་པ་སྤྲིན་ནམ་ཆུ་རླབས་ལྟ་བུ་སྣང་དུ་རུང་ཞིང་རྒྱ་མཚོ་དང་དེའི་རླབས་ནི་གཅིག་གམ་ཐ་དད་དུ་གདགས་པར་མི་ནུས་པ་ལྟ་བུ་ སྟེ། དོན་དམ་ཆོས་ཀྱི་སྐུ་མངོན་དུ་བྱས་པ་ན་གཞན་སྣང་ལ་ཀུན་རྫོབ་གཟུགས་ཀྱི་སྐུ་འབད་མེད་དུ་འབྱུང་བ་ཡིན་ལ། ད་ལྟར་ཡང་ཀུན་རྫོབ་ངོ་བོ་ཉིད་ཀྱིས་མེད་པ་དང་ཀུན་རྫོབ་ཏུ་སྣང་བ་སྣ་ཚོགས་འབྱུང་བ་ནི་མི་འགལ་ཏེ། ཆུ་ནང་གི་ཟླ་གཟུགས་མི་བདེན་ པ་དང་སྣང་བ་མི་འགལ་བ་བཞིན་ནོ། །ཕྱིས་དེ་ངེས་ན་དེ་ཡོད་དེ། །མིན་ན་ཀུན་རྫོབ་མེད་པ་ཉིད། །ཕྱི་ནས་ཁྱེད་ཅག་གིས་ཀྱང་དེ་ལྟ་བུ་ངེས་ཤིང་ཁོང་དུ་ཆུད་ན་དོན་དམ་སྐྱེ་མེད་དང༌། ཀུན་རྫོབ་སྒྱུ་མ་ལྟ་བུར་ཡོད་པ་མི་འགལ་བ་དེ་ཁོང་དུ་ཆུད་པར་

Page: 873 ༄༅། །འགྱུར་ལ། དོན་དམ་སྐྱེ་མེད་མ་ཡིན་ན་ནི་ཀུན་རྫོབ་མེད་པ་ཉིད་དུ་ཁྱེད་ཅག་མི་འདོད་བཞིན་དུ་ཁས་ལེན་དགོས་ཏེ། གང་ལ་སྟོང་ཉིད་མི་རུང་བ། །དེ་ལ་ཅི་ཡང་རུང་མ་ཡིན། །སོགས་དང༌། གལ་ཏེ་སྟོང་ཉིད་མ་ཡིན་ན། །འཕགས་ པའི་བདེན་པ་བཞི་པོ་རྣམས། །ཁྱོད་ལ་མེད་པར་ཐལ་བར་འགྱུར། །ཞེས་སོགས་གསུངས་པའི་ཕྱིར། གལ་ཏེ་གང་གིས་རྟོག་པར་བྱ་བ་ཤེས་པ་ལ་བལྟོས་ནས་གང་བརྟག་པར་བྱ་བ་ཤེས་བྱ་འཇོག་ཅིང་ཤེས་བྱ་ལ་བལྟོས་ནས་ཀྱང་ཤེས་པར་འཇོག་ པ་དག་ཡིན་པ་དེའི་ཚེ་ན་ཤེས་པ་དང་ཤེས་བྱ་གཉིས་པོ་རྟོག་པ་ཕན་ཚུན་བརྟེན་པ་ཡིན་པས་ནམ་ཡང་རྣམ་པར་དཔྱོད་མི་ནུས་པར་འགྱུར་རོ་ཞེ་ན། དེ་ལྟར་དཔྱད་ན་རྟོག་པ་ཕན་ཚུན་བརྟེན་པའི་ཕྱིར། གཉི་གའང་མི་འགྲུབ་པ་ནི་དོན་དམ་པའི་གནས་སྐབས་ ཡིན་ལ། རེ་ཞིག་ཀུན་རྫོབ་རྣམ་འཇོག་གི་སྐབས་འདིར་ནི་རྒོལ་བ་གཉི་ག་ལ་གྲགས་པའི་ཆོས་གཟུགས་ལ་སོགས་པ་མ་དཔྱད་པའི་ངོར་ཇི་ལྟར་གྲགས་པ་འདི་ཙམ་ལ་བརྟེན་ནས་རྣམ་པར་དཔྱད་པ་ཐམས་ཅད་གཞན་གྱི་ལོག་རྟོག་ཟློག་པའི་དགོས་པ་ རྒྱུ་མཚན་དུ་བྱས་ནས་བརྗོད་པ་སྟེ་རྣམ་དཔྱོད་ཉིད་ཀྱང་ངོ་བོ་ཉིད་ཀྱིས་དེར་བདེན་པ་ནི་མ་ཡིན་ནོ། །འོ་ན་རྣམ་དཔྱོད་དེ་ཉིད་ཀྱང་རྣམ་དཔྱོད་གཞན་གྱིས་དཔྱོད་དགོས་སོ་ཞེ་ན། གལ་ཏེ་རྣམ་པར་དཔྱད་པ་ཡང༌། །རྣམ་དཔྱོད་ཀྱིས་ནི་དཔྱོད་བྱེད་ན། ། དེ་ཚེ་རྣམ་དཔྱོད་དེ་ཡང་ནི། །རྣམ་དཔྱོད་ཕྱིར་ན་ཐུག་པ་མེད་པར་ཐལ་བར་འགྱུར་མོད། དེ་ལྟར་ཡང་མ་ཡིན་ཏེ། དཔྱད་བྱ་ཕ་རོལ་གྱི་ལོག་རྟོག་ཇི་སྙེད་པ་དེ་སྙེད་དུ་དཔྱོད་བྱེད་ཤེས་རབ་ཀྱིས་རྣམ་པར་དཔྱད་པར་བྱས་པ་ན་ཕ་རོལ་གྱི་ ལོག་རྟོག་ལྡོག་ཅིང་དེ་ལོག་པ་ན་རྣམ་དཔྱོད་ཀྱི་དགོས་པ་གྲུབ་པས་རྣམ་དཔྱོད་ཉིད་ཀྱང་རང་ཞི་བར་འགྱུར་ཏེ་དགོས་པ་འདིའི་ཕྱིར་རྣམ་པར་དཔྱོད་པར་ཟད་ཀྱི། རྣམ་དཔྱོད་ཉིད་ལ་ནི་རྟེན་ནམ་ངོ་བོ་ཁྱད་པར་བ་ཡོད་པ་མིན་ལ། ལོག་རྟོག་

Page: 874 ལྡོག་ཟིན་པའི་རྗེས་སུ་རྟེན་ནམ་དགོས་པ་མེད་པའི་ཕྱིར་ན་རྣམ་དཔྱོད་ཉིད་ཀྱང་མི་སྐྱེ་སྟེ་ཤིང་བསྲེགས་ཟིན་པ་ན་མེ་རང་ལྡོག་པ་བཞིན་དང༌། ཟླ་མཆོག་གི་མདོ་ལས་ཀྱང༌། བུ་མོ་ཁྱོད་ཀྱི་སྤོབས་པ་འདི་སུས་བྱིན། གནས་བརྟན་ཉིད་ཀྱིས་བསྩལ་ཏེ་ གནས་བརྟན་གྱིས་མ་དྲིས་ན་བདག་གི་སྤོབས་པ་འདི་མི་སྐྱེ་བའི་ཕྱིར། ཞེས་སོ། །དེ་ལྟར་སྒྲོ་སྐུར་གྱི་ཞེན་པ་ལོག་པ་ན་ཆོས་རྣམས་ཀྱི་རང་བཞིན་བསལ་བཞག་བྱར་མེད་པ་སྟོང་ཞིང་འོད་གསལ་བ་ཙམ་འདི་ནི་ཆོས་རྣམས་ཀྱི་གཉུག་མ་སྟེ་དེ་ཡང་ གཟོད་མ་ནས་མྱ་ངན་འདས་པ་ཉིད་དུ་བརྗོད་དོ། །ེ་ལྟར་ཆོས་འདུས་བྱས་སམ་འདུས་མ་བྱས་གང་ཡང་མི་དམིགས་པས་དགེ་བ་དང་མི་དགེ་བར་འཛིན་པ་ཡང་རྣམ་པར་ལོག་པ་ནི་ཆོས་དྲན་ཉེར་བཞག་ཀྱང་དག་པ་སྟེ། འཇམ་དཔལ་གང་གིས་ དགེ་བ་དང་མི་དགེ་བའི་ཆོས་མི་དམིགས་ན་དེ་ནི་ཆོས་ལ་ཆོས་ཀྱི་རྗེས་སུ་ལྟ་བའི་དྲན་པ་ཉེ་བར་བཞག་པའོ། །ཞེས་སོ། །འདི་རྣམས་སུ་དགེ་བའི་ལྷས། ཀུན་རྫོབ་བློའི་རང་བཞིན་དུ་འདོད་ན་རང་རིག་མ་གྲུབ་པའི་ཕྱིར་བློ་ཡང་མེད་པས་བདེན་པ་ གཉིས་མེད་ལ། ཡང་ན་ཀུན་རྫོབ་རྒྱུད་གཞན་གྱིས་སམ་ཕྱི་མའི་དབང་གིས་ཀུན་རྫོབ་ཏུ་གྱུར་ན་ལོགས་གཅིག་ཏུ་གྲུབ་པའི་ཕྱིར་སེམས་ཅན་མྱ་ངན་ལས་མི་འདའ་སྟེ་ཀུན་རྫོབ་གཞན་པར་བཏགས་པས་མྱ་ངན་ལས་གང་འདའ། གླེགས་བམ་ལ་ལར། དེ་བས་མྱ་ངན་འདས་མེད་ཅེས། །ཟེར་ཏེ་དེར་ཡང་འོན་ཏེ་ཀུན་རྫོབ་གཞན་ཡིན་པར་གྲུབ་ན་གཞན་དུ་བྱས་པ་ཡིན་པས་སེམས་ཅན་མྱ་ངན་ལས་འདའ་བར་མི་འགྱུར་རོ་ཞེས་རྩོད་པ་ན་ཡམས་དང་བཅས་བཀོད་ནས། གཞན་སེམས་རྣམ་ རྟོག་ཅེས་བྱ་བ་ནི་གཞན་གྱིའམ་གཞན་པ་སྟེ་གཞན་གྱི་རྒྱུད་དུ་འམ་ཕྱི་མའི་རྒྱུད་དུ་སེམས་ཡོད་པར་རྟོག་པའི་ཀུན་རྫོབ་པའོ། །སེམས་སྨོས་པ་ནི་བརྡ་སྤྲོད་པ་རྣམས་ཀྱི་རྟོག་པ་ལས་དགར་བའོ། །ཕྱོགས་གཞན་གྱིས་སེམས་སུ་བཏགས་པ་དེ་

Page: 875 ༄༅། །ནི་འདིར་བཟུང་བར་མི་བྱ་སྟེ། རབ་བྱེད་འདི་ནི་སྒྲུབ་པ་སྙིང་པོར་བྱས་པའི་ཕྱིར་རོ། །རྣམ་རྟོག་སྨོས་པ་ནི། སེམས་དེ་ཡང་བརྫུན་པར་སྟོན་པ་སྟེ་དེའི་ཕྱིར་རང་གི་སོགས་སྨོས་སོ། །དེ་ལྟར་གཞན་སུ་ཞིག་ཡིན་ཞེ་ན། དེ་ནི་སོགས་ཏེ་ གང་རང་གི་ཀུན་རྫོབ་ཏུ་མེད་པ་དེ་ནི་དེའི་འོག་ཏུ་རྣམ་པར་དཔྱད་པ་ཉིད་ཀྱིས་མེད་པ་ཁོ་ནར་ངེས་པ་ཡིན་ལ། སྔར་རྣམ་པར་མ་གཞིག་པའི་ཉམས་དགའ་བའི་རྣམ་པ་ཡོད་པ་ཡིན་ནོ། །དེ་ཉིད་ཚོལ་ལ་ཐོག་མར་ནི། །ཐམས་ཅད་ཡོད་ཅེས་བརྗོད་པར་བྱ། ། དོན་རྣམས་རྟོགས་ཤིང་ཆགས་མེད་ན། །དེ་ཡི་འོག་ཏུ་དབེན་པའོ། །ཞེས་པ་ལྟར་རོ། །མ་བརྟགས་པའི་གོང་དུ་དེ་ཡོད་ན་ཕྱིས་བརྟགས་པས་ཀྱང་རྣམ་པར་བསལ་བར་མི་ནུས་སོ། །ཞེས་དངོས་སུ་ཀུན་རྫོབ་རང་བཞིན་གྱིས་མེད་པ་ཁོ་ན་བསྒྲུབས་པར་ སྣང་ཡང་ཞེན་དོན་མ་བརྟགས་ན་ཉམས་དགའ་བ་ཙམ་དང་དཔྱད་ན་མེད་པ་མི་འགལ་བར་འཆད་པར་སྣང་ངོ༌། །བི་བྷཱུ་ཏིས། ཆོས་ཐམས་ཅད་མ་སྐྱེས་མ་འགགས་པ་ཡིན་ན་ཀུན་རྫོབ་མེད་པས་བདེན་གཉིས་དང་བསོད་ནམས་གསོག་པ་མེད་པར་ འགྱུར་རོ། །གལ་ཏེ་རྒྱུད་གཞན་གྱི་བློས་བཞག་པའི་ཀུན་རྫོབ་ཡོད་ན་དོན་དམ་འབའ་ཞིག་པ་མ་ཡིན་གྱི་ཀུན་རྫོབ་ཀྱང་གཞན་གྱི་བློས་རྣམ་པར་བཞག་ན་སེམས་ཅན་མྱ་ངན་ལས་ག་ལ་འདའ། སྟོང་པ་ཡང་རྟོག་པས་ཡུལ་དུ་བྱེད་པས་ཀུན་རྫོབ་ པར་འགྱུར་རོ། །དོན་དམ་རྟོགས་ནས་སྤྲོས་པ་ཐམས་ཅད་མི་དམིགས་པས་སེམས་ཅན་གང་མྱ་ངན་ལས་འདའ། དེ་ཡང་བློས་དམིགས་པས་མྱ་ངན་ལས་འདས་པར་མི་འགྲོ་བློས་ཀུན་རྫོབ་བརྗོད་པས་མྱ་ངན་ལས་འདས་པ་ཡང་ཀུན་ རྫོབ་པར་འགྱུར་རོ་ཞེས་རྩོད་པ་བཀོད་ནས། ལན་འདི་ནི་སོགས་ཏེ། མྱ་ངན་ལས་འདས་པ་པོ་ལས་གཞན་འཆད་པ་པོ་དེའི་བློ་ཡུལ་དུ་བྱས་པས་དེ་ཡི་རྣམ་རྟོག་འདི་ཡིན། མྱ་ངན་ལས་འདས་པ་ལ་ཀུན་རྫོབ་མི་རིགས་ཏེ་དེ་ནི་མྱ་ངན་ལས་

Page: 876 འདས་པ་ཁོ་ནའོ། །གང་གི་ཕྱིར་རང་གི་ཀུན་རྫོབ་ཀྱིས་དེ་མེད་པ་ཉིད་དེ། དེ་ལ་རང་གི་རྟོག་པ་ཐམས་ཅད་འགགས་པའི་ཕྱིར་རོ། །གཞན་གྱི་ཀུན་རྫོབ་ཀྱིས་ཀྱང་ཇི་ལྟར་ཞེ་ན། སྨྲས་པ། ཕྱིས་དེ་ལ་སོགས་པ་སྟེ། འདི་ཡོད་ན་འདི་འབྱུང་ཞེས་རྟེན་ ཅིང་འབྲེལ་བས་རྣལ་འབྱོར་པ་ལ་གཞན་གྱི་རྟོག་པ་སྣང་ངོ༌། །རྩ་བའི་ཏིང་ངེ་འཛིན་གྱི་དངོས་གཞིའི་རྗེས་སུ་གཞན་གྱི་རྟོག་པ་ཤེས་པས་རྣལ་འབྱོར་པ་ལ་ཀུན་རྫོབ་ཡོད་དོ། །རྡོ་རྗེ་ལྟ་བུའི་ཏིང་ངེ་འཛིན་གྱིས་སངས་རྒྱས་རྣམས་ཀྱི་ཆོས་ཀྱི་ སྐུ་ཆོས་ཐམས་ཅད་མི་དམིགས་པའོ། །དེ་ལས་ལོངས་སྤྱོད་རྫོགས་པའི་སྐུ། མངོན་ཤེས་དྲུག །ཐམས་ཅད་མཁྱེན་པ་ཉིད་དེ། མེ་ལོང་ལྟ་བུའི་ཡེ་ཤེས་ཏེ་ཡེ་ཤེས་ཀྱི་མེ་ལོང་ལས་འདས་པ་དང་མ་འོངས་པ་དང་ད་ལྟར་བ་ཐག་ཉེ་བ་དང་རིང་བ་འཆར་བའི་ རགས་པས་དངོས་པོ་ཐམས་ཅད་སྣང་བའི་ཕྱིར། འོ་ན་འདས་མ་འོངས་མེད་པས་ཇི་ལྟར་སྣང་ཞེ་ན། ཇི་ལྟར་ཐག་རིང་བ་ཡང་དེ་ལྟར་ཏེ། སངས་རྒྱས་ངོ་མཚར་བསོད་ནམས་ཤེས་རབ་འབྱུང་གནས་ཡིན་ཕྱིར་ཕྱོགས་དང་རང་བཞིན་གྱིས། ། རིང་བ་གཟིགས་ལྟར་དུས་རིང་འདས་ལ་སོགས་པ་ཅི་སྟེ་མི་གཟིགས་སོ། །དེ་གཉིས་རིགས་པ་མཚུངས་པས་རིགས་དྲུག་འཁོར་ལོ་ཐོག་མཐའ་བར་མ་དང་བྲལ་བ། །གཟིགས་ཏེ་དེ་ལྟར་འགྲོ་བ་ཐོག་མེད་དང་ནི་སྟོན་པ་ཐམས་ཅད་མཁྱེན་པ་གྲུབ། ། ཅེས་སོ། །དེས་གང་བཤད་པ། འཁོར་བ་ཐོག་མཐའ་མེད་པ་ཡིན་ན་དེའི་ཚེ་དེ་མི་ཤེས་པས་ཐམས་ཅད་མཁྱེན་པར་ཇི་ལྟར་འགྲུབ་ཅེས་བྱ་བ་ནི་མེད་དེ་རིགས་དྲུག་གི་འཁོར་ལོ་ལ་ཐོག་མ་དང་མཐའ་མ་མེད་དེ་འོན་ཀྱང་མངོན་སུམ་གྱིས་གཟིགས་སོ། །དེ་ བས། ཐམས་ཅད་མཁྱེན་ལ་འགྲོ་བ་དག །མ་ལུས་ད་ལྟ་བ་བཞིན་སྣང༌། །ཐ་མལ་ལྟ་བ་ལ་བལྟོས་ནས། །རིང་བ་གསུམ་ནི་བཤད་པ་ཡིན། །ལོངས་སྐུ་གདུལ་བྱ་དང་སྨོན་ལམ་གྱི་དབང་གིས་སྤྲུལ་པའི་སྐུ་དང་མཉམ་པ་ཉིད་ཀྱི་ཡེ་

Page: 877 ༄༅། །ཤེས་ལ་སོགས་པ་ཡང་ངོ༌། །དེ་བས་དོན་དམ་པར་སྐྱེ་བ་ལ་སོགས་པ་མེད་ཀྱང་ཀུན་རྫོབ་ཡོད་པར་མི་འགལ་ལོ། །འོ་ན་རྣལ་འབྱོར་པས་གཞན་སེམས་ཤེས་པའི་མངོན་ཤེས་ཀྱིས་གཞན་གྱི་རྣམ་རྟོག་ཤེས་ཀྱི་བཏགས་པའི་ དངོས་པོ་ཇི་ལྟར་ཤེས་ཞེ་ན། སྨྲས་པ། རྟོག་པའི་བློ་དང་དེས་བཏགས་པའི་ཤེས་བྱ་འདི་གཉིས་ཕན་ཚུན་བལྟོས་པ་ཅན་ཡིན་པས་རྟོག་པའི་ཡུལ་ཡང་ཤེས་སོ། །འོ་ན་དཔྱོད་པའི་རྟེན་གང་ཡིན། ཀུན་རྫོབ་མ་ཡིན་ཏེ་བཀག་པས་སོ། །དོན་ དམ་མ་ཡིན་ཏེ་དེ་ལ་དཔྱོད་པ་མི་སྲིད་པས་སོ་ཞེ་ན། སྨྲས་པ། ཇི་ལྟར་འཇིག་རྟེན་ལ་གྲགས་པའི་དངོས་པོ་དང་དཔྱོད་པ་ལ་བརྟེན་ནས་འདིར་སྐྱེ་བོ་ལ་གོ་བར་བྱ་བའི་ཕྱིར་བརྗོད་དོ། །ཞེས་རྡོར་ཏིང་གིས་བག་ཆགས་བཅོམ་པའི་ཚེ་རང་གི་ངོ་བོ་ནས་ཀུན་རྫོབ་ མེད་པ། འདི་ནི་སོགས་རྐང་པ་གཉིས་ཀྱི་འབྲུ་དང༌། མེ་ལོང་ལྟ་བུའི་ཡེ་ཤེས་ཀྱིས་ཀུན་རྫོབ་མཁྱེན་པ། ཕྱིས་དེ་ངེས་ན་དེ་ཡོད་དེ། ཞེས་པའི་དོན་དུ་བཤད་ནས། རྟོག་པ་ཤེས་ཀྱང་ཡུལ་ཇི་ལྟར་ཤེས་ཞེ་ན། རྟོག་དང་སོགས་ཀྱིས་ལན་ བཏབ་པར་འཆད་པར་སྣང་ཡང་མིན་ན་ཀུན་རྫོབ་མེད་པ་ཉིད་ལ་འབྲུ་མི་སྣང་ངོ༌། །འགྲེལ་ཆུང་ལས་ནི། དེ་ལྟར་དཔྱད་ན་ཀུན་རྫོབ་ཀྱང་མེད་པར་འགྱུར་བས་བདེན་གཉིས་ག་ལ་ཡོད་དེ་ཁས་བླངས་དང་འགལ་ལོ། །འོན་ཏེ་འཁྲུལ་ ཤེས་ཀུན་རྫོབ་པ་དེ་འཁྲུལ་པ་གཞན་གྱི་ངོར་ཡང་ཡོད་པས་དེ་ཁོ་ནར་དཔྱད་ན་མེད་ཀྱང་ཀུན་རྫོབ་ཏུ་མེད་པ་མ་ཡིན་ནོ། །ཞེས་དོགས་པ་བསུ་བ་ནི། དེ་ཡང་ཀུན་རྫོབ་གཞན་གྱིས་ན། །ཞེས་བྱའོ། །འདི་སུན་འབྱིན་པ་ནི། སེམས་ཅན་མྱ་ངན་ག་ལ་ འདའ། །ཞེས་བྱ་བ་སྟེ། སངས་རྒྱས་ཀྱང་འཁྲུལ་བ་ཅན་གཞན་གྱི་བསམ་པ་ལ་མ་རིག་པ་དང་བཅས་པར་སྣང་བས་ཀུན་རྫོབ་ཏུ་འཁོར་བར་འགྱུར་ཏེ་སེམས་ཅན་གཞན་བཞིན་ནོ་ཞེས་བྱ་བ་ནི་ཕྱོགས་སྔ་མའོ། །འདི་ནི་གཞན་སེམས་རྣམ་རྟོག་སྟེ། །

Page: 878 ཞེས་བྱ་བ་ནི་སངས་རྒྱས་དང་མ་རིག་པ་ལ་སོགས་པ་དེ་ནི་གཞན་གྱི་རྣམ་པར་རྟོག་པས་སྦྱར་བ་ཙམ་མོ། །དེ་ནི་རང་གི་ཀུན་རྫོབ་མིན། །སངས་རྒྱས་རང་གིས་ཉམས་སུ་མྱོང་བ་མ་ཡིན་པས་ཀུན་རྫོབ་ཏུ་མ་རིག་པར་མི་ཐལ་ལོ། །འོ་ན་སེམས་ ཅན་གྱི་མ་རིག་པ་དང་སྡུག་བསྔལ་ཀུན་རྫོབ་ཏུ་ཇི་ལྟར་ཡོད་ཅེ་ན། ཕྱིས་དེ་ངེས་ན་དེ་ཡོད་དེ། །རྒྱུའི་སེམས་སྔ་མ་ཁོ་ནའི་མཇུག་ཐོགས་སུ་འབྲས་བུ་མ་རིག་པ་དང་སྡུག་བསྔལ་ཕྱི་མར་ཡོད་ན་ནི་དེ་ཡོད་པ་ཡིན་ནོ། །མིན་ན་ཀུན་རྫོབ་མེད་ པ་ཉིད། །རྒྱུ་ཡོད་པ་ཉིད་ན་ཡོད་པ་ཡིན་ཏེ་རང་གི་རྒྱུད་ཀྱིས་གཞན་གྱི་རྣམ་པར་རྟོག་པ་ལ་མ་བལྟོས་པར་རྒྱུ་འབྲས་མྱོང་བ་མེད་ན་ནི་ཀུན་རྫོབ་ཏུ་ཡང་མེད་པ་ཡིན་ཏེ། རི་བོང་གི་རྭ་བཞིན་ནོ། །ཞེས་གཞན་གྱིས་བློས་བཏགས་མ་བཏགས་ཅི་ཡིན་ཡང་ རང་གིས་མ་མྱོང་ན་ཀུན་རྫོབ་ཏུ་ཡང་མེད་ལ་རང་གིས་མྱོང་ན་ཀུན་རྫོབ་ཏུ་ཡོད་པར་བཞག་གོ །ཞེས་པའི་དོན་དུ་བཀྲལ་ཏོ། །ཤེར་ལེའི་འགྲེལ་ཆུང་ནི། དེ་ཡང་ཞེས་སོགས་ནི་གཞན་གྱི་དོགས་པ་བསུ་བའོ། །གང་ཀུན་རྫོབ་ཡིན་པ་དེ་ནི། ཀུན་རྫོབ་གཞན་གྱིས་བཏགས་པ་ཡིན་ཏེ་སྨིག་རྒྱུ་ལ་ཆུར་རྟོག་པ་ནི་ཆུར་སྣང་གི་ཀུན་རྫོབ་ཀྱི་བློ་གཞན་གྱིས་བཏགས་པ་ཡིན་ནོ། །དེ་བཞིན་དུ་མྱ་ངན་ལས་འདས་པའི་སངས་རྒྱས་ལའང་བྱང་ཆུབ་སེམས་དཔའ་ལ་སོགས་པ་གཞན་གྱི་ཤེས་པས་ དམིགས་པ་ཡིན་ནོ། །དེས་ན་སངས་རྒྱས་ཀྱང་དོན་དམ་པར་མྱ་ངན་ལས་མ་འདས་པར་འགྱུར་རོ་ཞེ་ན། སློབ་དཔོན་གྱིས་གཞན་སེམས་ཞེས་སོགས་གསུངས་ཏེ་བདག་གིས་སངས་རྒྱས་ཀྱི་ཤེས་པ་མཐོང་ངོ༌། །སྙམ་པ་འདི་ི་གཞན་རང་ཉིད་དེ་ལྟ་དེ་ལྟར་ སྣང་བའི་རྣམ་པར་རྟོག་པ་ཡིན་ལ། གཞན་གྱིས་གཞན་དྲངས་པ་ཙམ་གྱིས་ཀྱང་ཀུན་རྫོབ་ཏུ་ཡོད་པར་འགྱུར་བ་མ་ཡིན་ནོ། །དེ་སྟེ་སངས་རྒྱས་ཉིད་ཀྱིས་རང་གི་ཤེས་པ་ཉམས་སུ་མྱོང་བའི་ཕྱིར་ཀུན་རྫོབ་ཏུ་ཡོད་པ་ཡིན་ནོ་ཞེ་ན། དེ་ལྟར་ནི་

Page: 879 ༄༅། །མ་ཡིན་ཏེ། དེ་ནི་རང་གི་ཀུན་རྫོབ་མིན། །གལ་ཏེ་སངས་རྒྱས་ལ་ཀུན་རྫོབ་འདོད་ན་དེའི་ཚེ་ཀུན་རྫོབ་པའི་ཤེས་པ་ཡོད་པའི་ཕྱིར་ན། དོན་དམ་པའི་ཤེས་པ་དེ་ཉིད་ཀྱང་མ་ཐོབ་པར་འགྱུར་རོ། །འོ་ན་ཀུན་རྫོབ་ཇི་ལྟར་ རྣམ་པར་གནས་སྙམ་ན་ཕྱིས་དེ་སོགས་གསུངས་ཏེ། གང་ཞིག་རྒྱུའི་ཕྱིས་ངེས་པ་ཞེས་བྱ་བ་གདོན་མི་ཟ་བར་འབྱུང་བ་ཡིན་པ་དེའི་ཚེ་ན་དེའི་འབྲས་བུ་ཡིན་ལ་གཅིག་ཤོས་ནི་རྒྱུ་ཡིན་ནོ། །ཞེས་པའི་ཐ་སྙད་རྐྱེན་ཉིད་འདི་པ་ཙམ་གྱི་མཚན་ ཉིད་ཡིན་ན་ནི་དེའི་ཚེ་ཀུན་རྫོབ་ཡོད་དོ་ཞེས་བརྗོད་ལ། འོན་ཏེ་དེའི་ཚེ་དེ་མེད་ན་ཀུན་རྫོབ་མེད་དོ་ཞེས་བརྗོད་དོ། །འོན་ཏེ་འདི་སྙམ་དུ་གལ་ཏེ་ཤེས་པ་དང་ཤེས་བྱ་དེ་ཁོ་ན་མ་ཡིན་ན་དེའི་ཚེ་འདི་ནི་རྟོག་པ་ཡིན་ལ་འདི་ནི་བཏགས་པ་ཡིན་ནོ། །ཞེས་པའི་ཐ་སྙད་ཇི་ལྟར་ ཞེ་ན། རྟོག་དང་ཞེས་སོགས་གསུངས་ཏེ་ཕན་ཚུན་བརྟེན་པ་ཞེས་བྱ་བའི་ཐ་སྙད་འདི་ནི་བཏགས་པ་ཡིན་ནོ་ཞེས་སོགས་སུ་བཀྲལ་ཏེ། སངས་རྒྱས་ལ་ཀུན་རྫོབ་པའི་ཤེས་པ་མེད་པས་རང་གིས་རང་ཉམས་སུ་མྱོང་བ་མེད་ལ། ཆོས་ཐམས་ཅད་སྐྱེ་ མེད་ཡིན་ན་ཀུན་རྫོབ་མེད་པས་བདེན་གཉིས་ག་ལ་ཡོད། ཀུན་རྫོབ་ནི་རྒྱུ་སྔ་མ་ལས་འབྲས་བུ་ཕྱི་མ་སྐྱེ་བར་ངེས་ན་ཡོད་པར་འདོགས་ཤིང་དེ་སྐྱེ་བ་མེད་ན་ཀུན་རྫོབ་མེད་དོ་ཞེས་འདོགས་ལ། ཤེས་པ་དང་ཤེས་བྱ་ཡང་དག་པར་མེད་ཀྱང་རྟོག་པ་ དང་བརྟག་པ་ལ་བརྟེན་ནས་འཇིག་རྟེན་གྱི་གྲགས་པ་ལྟར་བརྗོད་དོ་ཞེས་པའི་དོན་དུ་སྣང་ངོ༌། །ས་བཟང་པ་ན་རེ། ཆོས་ཐམས་ཅད་སྐྱེ་མེད་ཡིན་ན། ཀུན་རྫོབ་མེད་པས་བདེན་གཉིས་ག་ལ་ཡོད། ཀུན་རྫོབ་ནི་གཞན་འཁྲུལ་བློས་བཏགས་ པ་ཡིན་ན་སེམས་ཅན་རང་བཞིན་གྱིས་མྱ་ངན་ལས་མ་འདས་པར་འགྱུར་རོ་ཞེ་ན། ཀུན་རྫོབ་འདི་ནི་གཞན་འཁོར་བ་པའི་སེམས་ཀྱི་རྣམ་རྟོག་ཡིན་པས་དཔྱད་ན་མེད་ལ། མྱང་འདས་དེ་རང་གི་ངོ་བོ་ཀུན་རྫོབ་ཏུ་སྣང་བ་འདི་མིན་པར་དོན་དམ་

Page: 880 འགྱུར་མེད་དུ་གནས་པ་ཡིན་ནོ། །རྒྱུ་ལས་ཕྱིས་འབྲས་བུ་དེ་འབྱུང་བར་ངེས་ཤིང་རྟོགས་པ་ཡོད་པ་ན་རྒྱུ་འབྲས་སྣང་ཙམ་དུ་བདེན་པ་དེ་ཡོད་པས་བདེན་གཉིས་རྣམ་འཇོག་འཐད་ལ། དེ་ལྟ་མིན་པར་སྣང་ཙམ་འདི་འགགས་པ་ན་ཀུན་རྫོབ་མེད་ པ་ཉིད་ཡིན་ཡང་མྱང་འདས་བདེན་གཅིག་གྲུབ་པས་སྐྱོན་མེད་དོ་ཟེར་བ་ནི་དོན་དམ་བདེན་འཛིན་བློ་ལ་གཤིན་ཆེས་པ་ཉིད་བརྗོད་པར་སྣང་མོད་ཀྱང༌། བདེན་གཉིས་མི་འཐད་པར་ཐལ། ཀུན་རྫོབ་མེད་པའི་ཕྱིར། ཞེས་པའི་རྩོད་པ་ལ་དོན་དམ་པར་ རྟགས་ལ་འདོད་ལན་བྱིན་ཞིང་བདེན་གཉིས་འཐད་པར་ཐལ། བདེན་གཅིག་འཐད་པའི་ཕྱིར་གྱི་ཁྱབ་པ་རང་གིས་བཅས་པས་གཞན་དག་ལ་བཞད་གད་ཀྱི་དགའ་སྟོན་བྱིན་པར་སྣང་ངོ༌། །བཞི་པ་དངོས་འཛིན་དགག་པ་ལ་གཉིས། དངོས་པོ་ ལ་སྒྲུབ་བྱེད་མེད་པར་བསྟན་པ་དང༌། གནོད་བྱེད་ཡོད་པར་བསྟན་པའོ། །དང་པོ་ནི། གང་གི་ལྟར་ན་འདི་གཉིས་བདེན། །དེ་ཉིད་ཤིན་ཏུ་དཀའ་བར་གནས། །གལ་ཏེ་ཤེས་དབང་ལ་དོན་གྲུབ། །ཤེས་ཡོད་ཉིད་ལ་རྟེན་ཅི་ཡོད། ། འོན་ཏེ་ཤེས་བྱ་ལས་ཤེས་གྲུབ། །ཤེས་བྱ་ཡོད་ལ་རྟེན་ཅི་ཡོད། །དེ་སྟེ་ཕན་ཚུན་དབང་གིས་ཡོད། །གཉིས་ཀ་ཡང་ནི་མེད་པར་འགྱུར། །གལ་ཏེ་བུ་མེད་ཕ་མིན་ན། །བུ་ཉིད་གང་ལས་བྱུང་བ་ཡིན། །བུ་མེད་པར་ནི་ཕ་མེད་པ། ། དེ་བཞིན་དེ་གཉིས་མེད་པ་ཉིད། །མྱུ་གུ་ས་བོན་ལས་སྐྱེས་ཤིང༌། །ས་བོན་དེ་ཉིད་ཀྱིས་རྟོགས་བཞིན། །ཤེས་བྱ་ལས་སྐྱེས་ཤེས་པ་ཡིས། །དེ་ཡོད་པར་ནི་ཅིས་མི་རྟོགས། །མྱུ་གུ་ལས་གཞན་ཤེས་པ་ཡིས། །ས་བོན་ཡོད་ཅེས་ རྟོགས་འགྱུར་ན། །གང་ཕྱིར་ཤེས་བྱ་དེ་རྟོགས་པས། །ཤེས་པ་ཡོད་ཉིད་གང་ལས་རྟོགས། །ཞེས་གསུངས་ཏེ། རྐང་པ་དང་པོ་གཉིས་ཀྱིས་མདོར་བསྟན། རྐང་པ་དྲུག་གིས་ཤེས་པ་དང་ཤེས་བྱ་མི་འགྲུབ་པར་བསྟན། ཚིགས་བཅད་

Page: 881 ༄༅། །གཅིག་གིས་དེའི་དཔེ་བཤད། ཚིགས་བཅད་གཅིག་གིས་ས་མྱུག་གི་དཔེ་དང་མི་མཚུངས་པར་བསྟན་ཏོ། །ེ་ཡང་དངོས་པོར་སྨྲ་བ་རྣམས་གང་གི་ལུགས་ལྟར་ན་རྣམ་པར་དཔྱད་བྱ་དཔྱོད་བྱེད་འདི་གཉིས་ངོ་བོ་ཉིད་ཀྱིས་ བདེན་པར་འགྱུར་ལ། དཔྱད་བྱ་དཔྱོད་བྱེད་བདེན་པ་དེ་གཉིས་ནི་ཤིན་ཏུ་དཀའ་བར་གནས་པས་སུས་ཀྱང་མི་འགྲུབ་སྟེ། དཔྱད་བྱ་དཔྱོད་བྱེད་ནི་ཕན་ཚུན་གཅིག་ལ་གཅིག་བལྟོས་ཤིང་མ་བལྟོས་པའི་ཚེ་ན་ནི་གཉི་ག་མེད་པའི་ཕྱིར། དོན་སྨྲ་བ་ན་རེ། གལ་ཏེ་ཤེས་པ་དང་དབང་པོ་ལས་ཕྱི་དོན་གཟུགས་སོགས་འགྲུབ་བོ་ཞེ་ན། ཐོག་མར་ཤེས་པ་ཡོད་པ་ཉིད་ལ་རྟེན་ནམ་འཐད་པ་ཅི་ཞིག་ཡོད་སྨྲོས་ཤིག །འོན་ཏེ་ཡུལ་ཤེས་བྱ་ཡོད་པ་ལས་ཡུལ་ཅན་ཤེས་པ་གྲུབ་བོ་ཞེ་ན། ཡུལ་ཤེས་བྱ་ཡོད་པ་ ལའང་རྟེན་གྱི་གཏན་ཚིགས་ཅི་ཡོད། དེ་སྟེ་ཤེས་པ་ལས་ཤེས་བྱ་འགྲུབ་ཅིང་ཤེས་བྱ་ལས་ཤེས་པ་འགྲུབ་པས་ཕན་ཚུན་བལྟོས་པའི་དབང་གིས་ཡོད་དོ་ཞེ་ན། འོ་ན་མ་ལྟོས་པའི་ཚེ་གཉི་ག་ཡང་ནི་མེད་པར་འགྱུར་ཏེ་ཤེས་པ་ལ་མ་ལྟོས་ པར་ཤེས་བྱ་མེད་ཅིང་ཤེས་བྱ་ལ་མ་ལྟོས་པར་ཤེས་པ་མེད་པའི་ཕྱིར། དཔེར་ན་ཕས་བསྐྱེད་པ་ལ་བལྟོས་ཏེ་བུ་དང༌། བུ་སྐྱེད་པ་ལ་བལྟོས་ཏེ་ཕར་འཇོག་པའི་ཕྱིར། གལ་ཏེ་དེས་བསྐྱེད་པའི་བུ་མེད་ན་ནི་དེ་ཕ་མིན་ནོ། །དེ་བཞིན་དུ་ཕ་མེད་ན་ནི་བུ་ཉིད་ གང་ལས་བྱུང་བ་ཡིན། གང་ལ་དེས་སྐྱེད་པའི་བུ་མེད་པར་ནི་དེ་ཕར་འཇོག་བྱེད་མེད་པས་དེ་བཞིན་དུ་མ་ལྟོས་པའི་ཚེ་ཕ་བུ་དེ་གཉིས་ཀ་མེད་པ་ཉིད་བཞིན་ནོ། །གལ་ཏེ་མྱུ་གུ་ས་བོན་ལས་སྐྱེ་ཞིང་ས་བོན་ཡོད་པར་མྱུ་གུ་དེ་ཉིད་ཀྱིས་རྟོགས་ པར་འགྱུར་བ་བཞིན། ཤེས་བྱ་ལས་སྐྱེས་པའི་ཤེས་པ་ཡིས་ཀྱང་ཤེས་བྱ་དེ་ཡོད་པར་ཅིས་མི་རྟོགས་ཤེ་ན། དེ་ནི་དཔེ་མི་མཚུངས་ཏེ་མྱུ་གུ་ལས་དོན་གཞན་ཞིང་ཐ་དད་པའི་ཤེས་པ་ཡིས་ས་བོན་ཡོད་ཅེས་རྟོགས་པར་འགྱུར་བ་ཡིན་ལ། གང་

Page: 882 གི་ཕྱིར་ཤེས་བྱ་ལས་སྐྱེས་པའི་ཤེས་པ་དེས་ཤེས་བྱ་ཡོད་ཅེས་རྟོགས་པར་འགྱུར་ན་ཤེས་པ་ཡོད་པ་ཉིད་དེ་ལས་གཞན་པའི་ཤེས་པ་གང་གིས་རྒྱུ་མཚན་གང་ལས་རྟོགས་ཏེ། ཤེས་བྱ་ལས་སྐྱེས་པའི་ཤེས་པ་ལས་གཞན་པའི་ཤེས་པ་གང་ གིས་རྟོགས་བྱེད་ཀྱི་ཤེས་པ་གཞན་མ་དམིགས་པའི་ཕྱིར་རོ། །དགེ་བའི་ལྷས་ནི། འདི་དག་རྟོག་དང་བརྟག་པར་བྱ་བ་དག །གཉིས་པོ་ཕན་ཚུན་བརྟེན་པ་ཡིན། །ཞེས་པའི་རྒྱས་བཤད་དུ་འཆད་ཅིང༌། ཤེས་པ་ཡོད་ཉིད་གང་ལས་ རྟོགས་ཏེ་རང་རིག་མེད་པའི་ཕྱིར་ཞེས་སྣང་ངོ༌། །གཞན་ཁ་ཅིག་གིས་ཀྱང་འདི་དག་ཆོས་དྲན་ཉེར་བཞག་ཉིད་དུ་སྦྱར་རོ། །གཉིས་པ་གནོད་བྱེད་ལ་གཉིས། སྤྱི་དོན་དང༌། གཞུང་གི་དོན་ཏོ། །དང་པོ་སྤྱི་དོན་ནི། སྤྱིར་དབུ་མའི་སྐབས་སུ་སྤྲོས་པ་ སེལ་བྱེད་ཀྱི་རྟགས་ཆེན་ལྔ་ལས་བལྟོས་ཏེ་འབྱུང་བ་རྟེན་འབྲེལ་གྱི་རིགས་པ་ནི། སྣང་ཙམ་འདི་ཆོས་ཅན། རང་བཞིན་གྱིས་མེད་དེ། རྟེན་འབྲེལ་ཡིན་པའི་ཕྱིར། སྒྱུ་མ་བཞིན་ནོ། །ཞེས་པ་དགག་པའི་དབང་དུ་བྱས་པ་དང༌། ཡང་དེ་ཆོས་ ཅན། རི་བོང་གི་རྭ་ལྟར་མེད་པ་ཡང་མ་ཡིན་ཏེ། རྟེན་འབྲེལ་ཡིན་པའི་ཕྱིར། སྒྱུ་མ་བཞིན། ཞེས་པ་སྒྲུབ་པའི་གཏན་ཚིགས་ཏེ་ཕྱི་མ་ཀུན་རྫོབ་རྣམ་འཇོག་གི་ཆེད་དུ་ཡིན་ལ། རྟེན་འབྲེལ་དེ་ལ་ཡང་མར་མེ་སྐྱེས་པས་འོད་སྐྱེ་བ་ལྟ་བུ་བརྟེན་ནས་སྐྱེས་པ་དང༌། རིང་པོ་ལ་བལྟོས་ཏེ་ཐུང་ངུ་ལྟ་བུ་བརྟེན་ནས་བཏགས་པའི་རྟེན་འབྲེལ་གཉིས་ཏེ། རིན་ཆེན་ཕྲེང་བར། འདི་སྐྱེས་པས་ན་འདི་སྐྱེ་ཕྱིར། །མར་མེ་སྐྱེས་པས་འོད་བཞིན་ནོ། །འདི་ཡོད་ན་ནི་འདི་འབྱུང་དཔེར། །ཐུང་ངུ་ཡོད་ན་རིང་པོ་བཞིན། ། ཞེས་སོ། །གཞུང་འདིར་ནི་ཆོས་ཐམས་ཅད་སྒྱུ་མ་ལྟ་བུར་བསྟན་པའི་ཞར་ལས་ཤེས་པའི་ཕྱིར་ཆེད་དུ་མ་བསྟན་ཏོ། །དེ་ལས་གཞན་པ་དགག་པའི་གཏན་ཚིགས་བཞི་ལས་ངོ་བོ་ལ་དཔྱོད་པ་གཅིག་དུ་བྲལ་ནི། མྱུ་གུ་ཆོས་ཅན། ཡང་དག་པར་མ་

Page: 883 ༄༅། །གྲུབ་སྟེ། གཅིག་དང་དུ་མ་གང་དུ་ཡང་མ་གྲུབ་པའི་ཕྱིར། ཞེས་པ་སྟེ་འདིར་ནི་དྲན་པ་ཉེར་བཞག་ལ་སོགས་པར་འདུས་སོ། །ཇི་ལྟར་སྐྱེ་ཚུལ་ལ་དཔྱོད་པ་མུ་བཞི་སྐྱེ་འགོག་ཀྱང་སྐྱེ་བ་འགོག་པའི་ཞར་ལས་ཤེས་པར་འགྱུར་རོ། ། དེས་ན་རྒྱུ་ལ་དཔྱད་པ་རྡོ་རྗེ་གཟེགས་མ་དང༌། འབྲས་བུ་ལ་དཔྱད་པ་ཡོད་མེད་སྐྱེ་འགོག་གི་གཏན་ཚིགས་གཉིས་འདིར་དངོས་སུ་འཆད་པ་སྟེ། དེ་ལ་རྡོ་རྗེ་ལྟར་གང་ལ་ཡང་མི་ཐོགས་པའི་ཕྱིར་རྡོ་རྗེ་གཟེགས་མ་ཞེས་བྱ་བ་ནི་དབུ་མ་རྩ་བའི་གཞུང་གིས་ བཤད་པར་བྱ་སྟེ། བདག་ལས་མ་ཡིན་གཞན་ལས་མིན། །གཉིས་ལས་མ་ཡིན་རྒྱུ་མེད་མིན། །དངོས་པོ་གང་དག་གང་ན་ཡང༌། །སྐྱེ་བ་ནམ་ཡང་ཡོད་མ་ཡིན། །ཞེས་གསུངས་སོ། །དེ་ལ་རྒྱུ་མེད་དུ་འདོད་པ་ཚུ་རོལ་མཛེས་པ་བ་དང༌། བདག་སྐྱེ་ འདོད་པ་གྲངས་ཅན་པ་དང༌། གཉི་ག་ལས་སྐྱེ་བར་འདོད་པ་གཅེར་བུ་པའི་གྲུབ་པ་རྣམས་ནི་དབུ་ཚད་ཀྱི་གཞུང་མཐའ་དག་གིས་འགོག་ལ། གཞན་སྐྱེ་སྨྲ་བ་སེམས་ཙམ་མན་གྱི་རང་སྡེ་གསུམ་འདོད་པ་ནི་དབུ་མའི་གཞུང་གིས་སེལ་ཏོ། །དེ་ཡང་བདག་ གི་ཡོངས་སུ་འཛིན་པ་རྒྱལ་བ་ཐམས་ཅད་མཁྱེན་པའི་དབུ་མའི་མན་ངག་ལས། མྱུ་གུ་ཆོས་ཅན། སྐྱེ་བ་མེད་དེ། མཐའ་བཞི་གང་རུང་གི་སྐྱེ་བ་དང་བྲལ་བའི་ཕྱིར། སྦལ་པའི་རལ་པ་བཞིན་ནོ། །དེ་ལ་སློབ་དཔོན་བྷ་བྱས་རྩ་བའི་གཏན་ཚིགས་བཀོད་ ནས་ཕྱོགས་ཆོས་སྒྲུབ་བྱེད་དུ་རང་རྒྱུད་ཀྱི་གཏན་ཚིགས་བཞི་འགོད་ལ། བསྙེངས་བྲལ་ཟླ་བའི་ཞབས་ཀྱིས་ནི་མཐའ་བཞིའི་སྐྱེ་བ་བཀག་ཙམ་ལ་དམ་བཅའི་མིང་གིས་བཏགས་ཏེ་བཞག་ལ། དེའི་ལྡོག་ཕྱོགས་ལ་འགལ་བ་བརྗོད་པའི་ཐལ་ འགྱུར་དང༌། རྒྱུ་མཚན་མཚུངས་པའི་མགོ་སྙོམས་ཀྱི་སྒོ་ནས་གནོད་པ་བསྟན་པར་མཛད་ཀྱི་རྩ་བའི་གཏན་ཚིགས་མི་འགོད་ཅིང་ཕྱོགས་ཆོས་ཚད་མས་གྲུབ་པའི་གཏན་ཚིགས་མི་བཞེད་དོ། །འདི་ཙམ་ལས་ཐལ་རང་དུ་བྱེད་པ་ཡིན་གྱི་གཉིས་

Page: 884 པོའི་ལྟ་བ་ལ་བཟང་ངན་གྱི་ཁྱད་པར་ཡོད་པ་ནི་མ་ཡིན་ཏེ་གཉི་གས་སྤྲོས་པའི་ཚོགས་མ་ལུས་པ་བཀག་པའི་སྤྲོས་བྲལ་ཁས་ལེན་ལ། དེ་གཉིས་ཀྱི་སྤྲོས་པ་འགོག་པའི་ཚུལ་ལ་བཟང་ངན་གྱི་ཁྱད་པར་ཀུན་མཁྱེན་གྱིས་ཀྱང་མ་གཟིགས་པའི་ཕྱིར། ཅི་སྟེ་རང་རྒྱུད་པའི་ལྟ་བ་ལ་སྤྲོས་པའི་ལྷག་མ་ཅུང་ཟད་ལུས་སོ་སྙམ་ན་མ་ཡིན་ཏེ་སྤྲོས་བྲལ་སྟོན་པའི་ཚུལ་ལ་ཟླ་བའི་ཞབས་ཀྱི་གཞུང་ལས་རང་རྒྱུད་པའི་གཞུང་ལྷག་པར་གསལ་བའི་ཕྱིར་ཏེ། དབུ་མ་རྒྱན་ལས། དམ་པའི་དོན་དང་མཐུན་པའི་ ཕྱིར། །འདི་ནི་དམ་པའི་དོན་ཞེས་བྱ། །ཡང་དག་ཏུ་ན་སྤྲོས་པ་ཡི། །ཚོགས་རྣམས་ཀུན་ལས་དེ་གྲོལ་ཡིན། །སྐྱེ་བ་ལ་སོགས་མེད་པའི་ཕྱིར། །སྐྱེ་མེད་ལ་སོགས་སྲིད་མ་ཡིན། །ཞེས་དང༌། ཡུལ་མེད་པ་ལ་དགག་པའི་སྒྲ། །སྦྱོར་བ་སྲིད་ པ་ཡོད་མ་ཡིན། །ཞེས་དང༌། བདེན་གཉིས་ལས། སྐྱེ་བ་ལ་སོགས་བཀག་པ་ཡང༌། །ཡང་དག་པ་དང་མཐུན་ཕྱིར་འདོད། །དགག་བྱ་ཡོད་པ་མ་ཡིན་པས། །ཡང་དག་ཏུ་ན་བཀག་མེད་གསལ། །བཏགས་པའི་རང་གི་ངོ་བོ་ཡི། །བཀག་ པ་བཏགས་མིན་ཇི་ལྟར་འགྱུར། །དེ་བས་འདི་ནི་ཀུན་རྫོབ་ཏུ། །ཡང་དག་དོན་ཡིན་ཡང་དག་མིན། །ཡང་དག་ཉིད་དུ་གཉིས་མེད་དེ། དེ་ནི་སྤྲོས་པ་མེད་པ་ཡིན། །འཇམ་དཔལ་གྱིས་ནི་ཡང་དག་དྲིས། །རྒྱལ་བའི་སྲས་པོ་མི་གསུང་ བཞུགས། །ཞེས་སོགས་རྒྱ་ཆེར་གསུངས་སོ། །རྣལ་འབྱོར་སྤྱོད་པ་བས་གཟུང་འཛིན་གཉིས་སྟོང་གི་ཡེ་ཤེས་སྤྲོས་བྲལ་དུ་བཤད་པ་ནི་ཡེ་ཤེས་དེ་ཉིད་ཀྱི་ངོར་སྤྲོས་བྲལ་ཡིན་མོད་སྤྱིར་སྤྲོས་པའི་ལྷག་ལུས་པའི་ཕྱིར་ཁྱབ་པའི་སྤྲོས་བྲལ་མ་ཡིན་ནོ། ། དེས་ན་ཐལ་རང་གི་ཁྱད་པར་ནི་གཞི་དུས་སུ་ཀུན་རྫོབ་གྲུབ་མཐའ་སྨྲ་བ་དང་སྒོ་བསྟུན་ནས་འཇོག་པ་དང་འཇིག་རྟེན་གྱི་གྲགས་པ་དང་བསྟུན་ནས་འཇོག་པ་དང༌། དོན་དམ་རྣམ་འཇོག་གི་ཚེ་ཡུལ་ཆོས་ཅན་ཀུན་རྫོབ་པ་ཁས་ལེན་མི་ལེན་དང༌། ཡུལ་ཐ་

Page: 885 ༄༅། །སྙད་ཀྱི་བདེན་པ་ལ་མི་བསླུ་བའི་ཚད་མ་ཁས་ལེན་མི་ལེན་དང༌། ལམ་དུས་སུ་སྣང་སྟོང་ནམ་མཁའ་ལྟ་བུ་ལ་མཉམ་པར་འཇོག་པ་དང་བདེན་སྟོང་སྒྱུ་མ་ལྟ་བུ་ལ་འཇོག་པ་དང༌། འབྲས་དུས་སུ་ཇི་སྙེད་མཁྱེན་པའི་ཡེ་ཤེས་ཀྱི་རང་ སྣང་ལ་ཀུན་རྫོབ་ཀྱི་རྣམ་པ་འཆར་མི་འཆར་གྱི་ཁྱད་པར་དང་སྤྲོས་པ་ཅིག་ཆར་དུ་འགོག་པ་དང་རིམ་གྱིས་འགོག་པའི་ཁྱད་པར་ཡོད་ལ། དབང་རྣོན་ཅིག་ཆར་དུ་འཇུག་པ་ལ་ཐལ་འགྱུར་བ་དང་དབང་བརྟུལ་རིམ་གྱིས་འཇུག་པ་ལ་རང་རྒྱུད་པ་ལེགས་པ་ ཡིན་ནོ། །རྣལ་འབྱོར་པའི་ཀུན་རྫོབ་འགའ་ཞིག་ཐལ་རང་གཉི་གས་ཀྱང་རིགས་པས་དཔྱད་ནས་ཁས་ལེན་དགོས་པ་ཡོད་དེ། ལྟ་བ་བཀར་བཏགས་ཀྱི་ཕྱག་རྒྱ་བཞི་དང་བདེན་སྟོང་སྤྲོས་བྲལ་གྱི་རྣམ་པ་བཞིན་ནོ། །འདི་ཡང་རིགས་པས་དཔྱད་པའི་ཆ་ ནས་ཀུན་རྫོབ་ཏུ་འཇོག་པ་མ་ཡིན་གྱི་དཔྱད་དོན་ལ་མཚན་མར་བཟུང་བའི་ཆ་ནས་ཀུན་རྫོབ་ཏུ་བཞག་པའོ། །ཞེས་བཀའ་བསྩལ་ཏོ། །དེ་ཡང་བདག་ལས་སྐྱེ་བ་མེད་དེ། བདག་ཉིད་གྲུབ་མ་ཟིན་ན་མེད་པའི་ཕྱིར་རྒྱུར་མི་རུང་ལ། གྲུབ་ཟིན་ན་གྲུབ་ཟིན་སླར་ ཡང་སྐྱེ་བ་དོན་མེད་དུ་འགྱུར་བའི་ཕྱིར་དང་མཐའ་ཐུག་པ་མེད་པར་རྟག་ཏུ་སྐྱེ་བར་ཐལ་བའི་ཕྱིར་ཏེ། སངས་རྒྱས་བསྐྱངས་ཀྱི་འགྲེལ་པ་ཚིག་གསལ་དུ་དྲངས་པ། དངོས་པོ་རྣམས་བདག་ལས་སྐྱེ་བ་མེད་དེ། དེ་དག་གི་སྐྱེ་བ་དོན་མེད་པ་ཉིད་དུ་འགྱུར་བའི་ཕྱིར་དང༌། ཤིན་ཏུ་ཐལ་བར་འགྱུར་བའི་ཕྱིར་རོ། །དངོས་པོ་བདག་གི་བདག་ཉིད་དུ་ཡོད་པ་རྣམས་ལ་ནི་ཡང་སྐྱེ་བ་དགོས་པ་མེད་དོ་ཅི་སྟེ་ཡོད་ཀྱང་སྐྱེ་ན་ནམ་ཡང་མི་སྐྱེ་བར་མི་འགྱུར་རོ། །ཞེས་སོ། །འདི་ལ་སློབ་དཔོན་ལེགས་ལྡན་བྱེད་ཀྱིས། དོན་དམ་པར་ནང་གི་སྐྱེ་ མཆེད་རྣམས་བདག་ལས་སྐྱེ་བ་མེད་པར་ངེས་ཏེ་ཡོད་པའི་ཕྱིར། དཔེར་ན། ཤེས་པ་ཡོད་པ་བཞིན་ནོ། །ཞེས་རང་རྒྱུད་ཀྱི་རྟགས་བཀོད་པ་ལ་སློབ་དཔོན་ཟླ་བས། འདིར་དོན་དམ་པ་ཞེས་བྱ་བའི་ཁྱད་པར་ཅིའི་ཕྱིར་ཉེ་བར་བཀོད་པ་ཡིན། གལ་ཏེ་འཇིག་རྟེན་

Page: 886 གྱིས་ཀུན་རྫོབ་ཏུ་སྐྱེ་བར་ཁས་བླངས་པ་དགག་པར་བྱ་བ་མ་ཡིན་པའི་ཕྱིར་དང༌། འགོག་ན་ཡང་ཁས་བླངས་པས་གདོན་པར་ཐལ་བའི་ཕྱིར་རོ་ཞེ་ན། འདི་ནི་རིགས་པ་མ་ཡིན་ཏེ་བདག་ལས་སྐྱེ་བ་ནི་ཀུན་རྫོབ་ཏུ་ཡང་ཁས་མ་བླངས་པའི་ཕྱིར། ཞེས་དང༌། གཞན་གྱི་ ལུགས་ལ་བལྟོས་ཏེ་ཁྱད་པར་དུ་བྱས་སོ་ཞེ་ན། དེ་ཡང་རིགས་པ་མ་ཡིན་ཏེ། དེ་དག་གིས་རྣམ་པར་བཞག་པ་ནི་ཀུན་རྫོབ་ཏུ་ཡང་ཁས་བླངས་པ་མེད་པའི་ཕྱིར། ཞེས་དང༌། འཇིག་རྟེན་པས་ཀྱང་བདག་ལས་སྐྱེ་བར་མི་རྟོག་སྟེ་འཇིག་རྟེན་པས་ནི་བདག་དང་གཞན་ ལས་ཞེས་བྱ་བ་དེ་ལྟ་བུའི་རྣམ་པར་དཔྱོད་པ་འཇུག་པ་མེད་པར་བྱས་ནས་རྒྱུ་ལས་འབྲས་བུ་འབྱུང་ངོ་ཞེས་བྱ་བ་འདི་ཙམ་ཞིག་རྟོག་པ་ཡིན་ནོ། །སློབ་དཔོན་ཡང་དེ་ལྟར་རྣམ་པར་བཞག་པ་མཛད་པ་ཡིན་ཏེ། དེའི་ཕྱིར་རྣམ་པ་ཐམས་ཅད་དུ་ཁྱད་པར་དོན་མེད་པ་ཉིད་དེ། ཞེས་བྱ་བར་ངེས་སོ། །གཞན་ཡང་གལ་ཏེ་ཀུན་རྫོབ་ཏུ་སྐྱེ་བ་དགག་པར་འདོད་ནས་ཁྱད་པར་འདི་འགོད་པར་བྱེད་པ་ནི་དེའི་ཚེ་རང་ལ་གཞི་མ་གྲུབ་པའི་ཕྱོགས་ཀྱི་ཉེས་པའམ་གཞི་མ་གྲུབ་པའི་གཏན་ཚིགས་ཀྱི་སྐྱོན་དུ་འགྱུར་ཏེ། རང་གིས་དོན་དམ་པར་མིག་སོགས་ སྐྱེ་མཆེད་རྣམས་ཁས་མ་བླངས་པའི་ཕྱིར་རོ། །ཞེས་དང༌། གལ་ཏེ་མིག་ལ་སོགས་པ་ཀུན་རྫོབ་པ་རྣམས་དོན་དམ་པར་སྐྱེ་བ་འགོག་པའི་ཕྱིར་དོན་དམ་པ་སྨྲོས་པ་ནི་སྐྱེ་བ་འགོག་པའི་ཁྱད་པར་ཡིན་ནོ་ཞེ་ན། དེ་ལྟ་ན་ནི་འོ་ན་མིག་ལ་སོགས་པའི་ཀུན་རྫོབ་པ་རྣམས་དོན་ དམ་པར་སྐྱེ་བ་ཡོད་པ་མ་ཡིན་ཏེ། ཞེས་བརྗོད་པར་བྱ་བར་འགྱུར་ན་དེ་སྐད་དུ་ཡང་མ་བསྟན་ཏོ་ཞེས་སོགས་ཀྱིས་བརྒལ་བར་མཛད་དེ། འཇིག་རྟེན་ནམ་གྲངས་ཅན་གྱིས་ཀུན་རྫོབ་ཏུ་སྐྱེ་བ་ཁས་བླངས་པ་འགོག་པའི་ཕྱིར། དོན་དམ་པར་ཞེས་པ་སྦྱོར་ན་ནི་དེ་དག་ གིས་བདེན་པ་གཉིས་མ་བཞག་པར་རང་གར་སྐྱེའོ། །ཞེས་པ་ཙམ་འདོད་པ་ཡིན་ལ་སློབ་དཔོན་ཀླུའི་ཞབས་ཀྱིས་ཀྱང་དེ་ཙམ་ཞིག་འགོག་པར་མཛད་ཀྱི་བདེན་གཉིས་ཕྱེ་ནས་བཀག་པ་མ་ཡིན་ལ། བདག་སྐྱེ་ནི་འཇིག་རྟེན་གྱིས་ཁས་མི་ལེན་པས་དོན་དམ་པར་ཞེས་སྦྱར་བ་

Page: 887 ༄༅། །ལ་དགོས་པ་མེད་ཅིང་ཀུན་རྫོབ་ཏུ་སྐྱེ་བ་འགོག་པའི་ཕྱིར་ཡིན་ན་སློབ་དཔོན་ལེགས་ལྡན་ཉིད་ཀྱང་དོན་དམ་པར་མིག་སོགས་སྐྱེ་མཆེད་ཡོད་པར་མི་འདོད་པས་ཡོད་པ་རྟགས་སུ་བཀོད་པ་དེ་མ་གྲུབ་པའི་གཏན་ཚིགས་སུ་འགྱུར་ལ། མིག་ སོགས་ཀུན་རྫོབ་ཡིན་པ་ཤེས་པའི་ཆེད་དུ་ཡིན་ན་མིག་སོགས་ཀུན་རྫོབ་པ་རྣམས་དོན་དམ་པར་སྐྱེ་བ་མེད་དེ་ཞེས་སྨྲ་དགོས་པས་དོན་དག་ཏུ་མ་ཕྱིན་པའི་སྐྱོན་ཡོད་དོ་ཞེས་བཀག་ནས། བདེན་གཉིས་སུ་རྣམ་པར་མ་དཔྱད་པ་འཇིག་རྟེན་དང་ཕྱི་རོལ་པའི་སྐབས་དང་ བདེན་གཉིས་རྣམ་པར་བཞག་པ་སངས་རྒྱས་པའི་སྐབས་གང་དུ་ཡང་མཐའ་བཞི་ལས་སྐྱེ་བ་ནི་ནམ་ཡང་མེད་པར་བཞེད་པ་ཡིན་ལ། འདིས་ནི་བོད་ཕྱི་རབས་ཀྱི་དབུ་མ་ཐལ་འགྱུར་བར་རློམ་པ་དམིགས་པའི་ལྟ་བ་སྟུག་པོས་ཟིན་པ་དག་དབུ་མའི་རྟགས་འགོད་ པ་ན་དོན་དམ་པར་ཞེས་སམ་ཡང་དག་པར་རམ་དཔྱད་ན་ཞེས་སོགས་མ་སྦྱར་ན་ཀུན་རྫོབ་ལ་སྐུར་པ་བཏབ་པའི་ཉེས་པ་ཡོད་དོ། །ཞེས་སྒྲོག་པ་དང་མ་དཔྱད་པ་དང་ཅུང་ཟད་དཔྱད་པ་དང་ཤིན་ཏུ་དཔྱད་པའི་སྐབས་གསུམ་དུ་སྨྲ་བ་རྣམས་ཀྱང་སློབ་དཔོན་ཟླ་བའི་རྗེས་ འབྲངས་མིན་པར་ཤིན་ཏུ་གསལ་བ་ཡིན་ནོ། །དེས་ན་མ་དཔྱད་པའི་ཚེ་འཇིག་རྟེན་གྱི་གྲགས་པ་ལྟར་ཁས་ལེན་ཅུང་ཟད་དཔྱད་པའི་ཚེ་འཁོར་བ་མེད་པ་སོགས་དང་དྭངས་སྙིགས་ཕྱེ་ནས་སྙིགས་མ་ལ་མེད་པས་ཁྱབ་པ་སོགས་ཁས་ལེན་ཤིན་ཏུ་དཔྱད་པའི་ཚེ་དོན་ དམ་པ་གང་ཡིན་ཞེས་འདྲི་ན་ཁོ་བོ་ཅི་ཡང་མི་སྨྲའོ་ཞེས་འཆད་པ་ཡང་ལྕགས་སེར་སྐྱ་ཛམྦུའི་ཀླུང་གི་སུ་ཝརྞར་རྫུ་བ་ཞིག་སྟེ་དབུ་མ་ཉིད་ཀྱི་ལུགས་ལས་རིགས་པས་མ་དཔྱད་པའི་སྐབས་ནི་དང་པོར་བསོད་ནམས་མ་ཡིན་པ་ལྡོག་པའི་འཁོར་ལོ་མངོན་མཐོའི་ཐེག་ པ་ཡིན་ལ། དབུ་མ་ཉིད་ཀྱི་རིགས་པས་ཕྱི་ནང་གི་གྲུབ་མཐའི་འཛིན་པ་ཟློག་པ་ནི་བར་པ་བདག་ཟློག་གི་སྐབས་ཡིན་ཞིང་མཐར་ཐུག་དེ་ཁོ་ན་ཉིད་དུ་ཞེན་པ་ཡང་རྣམ་པར་བསལ་བ་ནི་ལྟ་ཞི་ཀུན་ཟློག་གི་སྐབས་ཡིན་པས་འདི་ལ་ནི་སུས་ཀྱང་དབྲི་བསྣན་བྱ་མི་

Page: 888 དགོས་ལ། བར་པ་བདག་ལྡོག་གི་སྐབས་གཅིག་པུ་ལ་དེ་གསུམ་ག་སྦྱར་ནས་སྙིགས་མ་མེད་འཛིན་དང་དྭངས་མ་ཡོད་འཛིན་བསྐྱེད་ཅིང་ལན་མི་འདེབས་པ་ཙམ་མཐར་ཐུག་གི་དོན་དུ་ལྟ་བ་འདི་ནི་དབུ་མའི་དོན་ཤེས་པ་དག་ལ་ནི་བཞད་གད་ཀྱི་དངོས་པོ་བྱིན་ པ་ཡིན་མོད་ཀྱང་མི་ཤེས་པའི་ཐར་འདོད་ཁ་ཅིག་ལ་ནི་སྐྱི་གཡའ་བའི་གནས་བྱིན་པ་ཡིན་ནོ། །དེས་ན་འཇམ་དཔལ་གྱིས་དྲི་མ་མེད་པར་གྲགས་པ་ལ་ཡང་དག་པའི་དོན་དྲིས་པ་ན་ལན་མ་བཏབ་པ་དེ་ལན་གྱི་དམ་པར་བཤད་པ་དང་བྱིས་པ་གཅིག་ གིས་དྲིས་པ་ལ་གཅིག་ཤོས་ཀྱིས་ལན་མ་བཏབ་པ་གཉིས་ག་ལ་མཚུངས། བྱང་ཆུབ་སེམས་དཔའ་སྲིད་མཐའ་པ་བྱང་ཆུབ་ཀྱི་ཤིང་དྲུང་དུ་བཞུགས་པ་དང༌། ལྷས་བྱིན་ནི་མ་པའི་ཤིང་དྲུང་དུ་འཁོད་པའི་ཁྱད་པར་ཤེས་པར་གྱིས་ཤིག །གལ་ཏེ་འདི་མཚུངས་ སོ་སྙམ་ན་བ་ལང་གི་མདུན་དུ་དོན་དམ་དྲིས་ཤིག་དང་ཁྱེད་འདོད་པའི་ལན་གྱི་མཐར་ཐུག་དེ་ལས་འབྱུང་བར་འགྱུར་རོ། །མུ་གཉིས་པ་འགོག་པ་ནི། སློབ་དཔོན་སངས་རྒྱས་བསྐྱངས་ཀྱིས་དངོས་པོ་རྣམས་གཞན་ལས་སྐྱེ་བ་མེད་དེ། ཐམས་ཅད་ལས་ཐམས་ ཅད་སྐྱེ་བར་འགྱུར་བའི་ཕྱིར་རོ། །ཞེས་དང༌། ཟླ་བའི་ཞབས་ཀྱིས། དངོས་པོ་རྣམས་ནི་གཞན་ལས་སྐྱེ་བ་ཡང་མ་ཡིན་ཏེ་གཞན་མེད་པའི་ཕྱིར། ཞེས་དང༌། འཇུག་པར། གཞན་ལ་བརྟེན་ནས་གཞན་ཞིག་འབྱུང་བར་འགྱུར་ན་ནི། །འོ་ན་མེ་ལྕེ་ལས་ ཀྱང་མུན་པ་སྟུག་པོ་འབྱུང་འགྱུར་ཞིང༌། །ཐམས་ཅད་ལས་ཀྱང་ཐམས་ཅད་སྐྱེ་བར་འགྱུར་ཏེ་གང་གི་ཕྱིར། །སྐྱེད་པར་བྱེད་པ་མ་ཡིན་མ་ལུས་ལ་ཡང་གཞན་ཉིད་མཚུངས། །ཞེས་སོ། །དེ་ཡང་རྒྱུ་རྐྱེན་ལས་སྐྱེ་ན་རྒྱུ་རྐྱེན་ནི་བཞི་ཁོ་ན་སྟེ། རྐྱེན་རྣམ་ བཞི་སྟེ་རྒྱུ་དང་ནི། །དམིགས་པ་དང་ནི་དེ་མ་ཐག །བདག་པོ་ཡང་ནི་དེ་བཞིན་ཏེ། །རྐྱེན་ལྔ་པ་ནི་ཡོད་མ་ཡིན། །ཞེས་སོ། །དཔེར་ན་སཱ་ལིའི་མྱུ་གུའི་རང་བཞིན་དེ་ནི་རྒྱུའི་རྐྱེན་ཆུ་ལུད་དང༌། དམིགས་པའི་རྐྱེན་སྟོན་ཐོག་དང༌། དེ་མ་ཐག་པའི་རྐྱེན་ས་བོན་

Page: 889 ༄༅། །གྱི་སྐད་ཅིག་ཕྱི་ལོགས་དང༌། བདག་པོའི་རྐྱེན་འདེབས་པ་པོ་གང་ལ་ཡང་ཡོད་པ་མིན་ཏེ། དངོས་པོ་རྣམས་ཀྱི་རང་བཞིན་ནི། །རྐྱེན་ལ་སོགས་ལ་ཡོད་མ་ཡིན། །ཞེས་སོ། །གཅིག་དུ་བྲལ་གྱིས་དཔྱད་ན་བདག་ཉིད་མི་འགྲུབ་ན། དེ་ ལ་བལྟོས་པའི་གཞན་ག་ལ་ཡོད་དེ། བདག་གི་དངོས་པོ་ཡོད་མིན་ན། །གཞན་དངོས་ཡོད་པ་མ་ཡིན་ནོ། །ཞེས་སོ། །རྐྱེན་ཆུ་ལུད་ལྟ་བུ་དེ་བྱ་བ་མྱུ་གུ་སྐྱེད་པ་ལྟ་བུ་དང་ལྡན་ན་རྟག་ཏུ་མྱུ་གུ་སྐྱེད་དགོས་ལ། མི་ལྡན་ན་ནམ་ཡང་བྱ་བ་མེད་པར་འགྱུར་ལ། བྱ་བ་མེད་ ན་རྐྱེན་དུ་ཅིས་འཇོག་སྟེ། བྱ་བ་རྐྱེན་དང་ལྡན་མ་ཡིན། །རྐྱེན་དང་མི་ལྡན་བྱ་བ་མེད། །བྱ་བ་མི་ལྡན་རྐྱེན་མ་ཡིན། །ཞེས་སོ། །འོན་ཀྱང་འདི་དག་ལ་བརྟེན་ནས་སྐྱེ་བས་རྐྱེན་ཡིན་ནོ་ཞེ་ན། ནམ་མི་སྐྱེ་བ་དེ་སྲིད་ནི་རྐྱེན་མ་ཡིན་ལ། སྐྱེས་ཟིན་ནས་ནི་རྐྱེན་མི་དགོས་པས་ གང་གི་ཚེ་རྐྱེན་དུ་འགྱུར་ཏེ། འདི་དག་ལ་བརྟེན་སྐྱེ་བས་ན། །དེ་ཕྱིར་འདི་དག་རྐྱེན་ཞེས་གྲགས། །ཇི་སྲིད་མི་སྐྱེ་དེ་སྲིད་དུ། །འདི་དག་རྐྱེན་མིན་ཇི་ལྟར་མིན། །མེད་དམ་ཡོད་པའི་དོན་ལ་ཡང༌། །རྐྱེན་ནི་རུང་བ་མ་ཡིན་ཏེ། །མེད་ན་གང་གི་རྐྱེན་དུ་འགྱུར། །ཡོད་ ན་རྐྱེན་གྱིས་ཅི་ཞིག་བྱ། །ཞེས་སོ། །ེས་ན་ཆོས་གང་ཡང་ཡོད་པ་དང་མེད་པ་ནི་རྣམ་པར་བརྟགས་ན་འཇིག་སྟེ་མི་འགྲུབ་པ་དེའི་ཚེ་རྒྱུ་ཉིད་ཇི་ལྟར་འགྲུབ་སྟེ། གང་ཚེ་ཆོས་ནི་ཡོད་པ་དང༌། །མེད་དང་ཡོད་ཉིད་མི་འགྲུབ་པ། །ཇི་ལྟར་སྒྲུབ་བྱེད་རྒྱུ་ཞེས་བྱ། ། དེ་ལྟ་མིན་ན་མི་རིགས་སོ། །ཞེས་སོ། །དམིགས་པའི་རྐྱེན་ཡང་དེ་བཞིན་དུ་མི་འགྲུབ་སྟེ། ཡོད་པའི་ཆོས་འདི་དམིགས་པ་ནི། །མེད་པ་ཁོ་ན་ཉེ་བར་བསྟན། །ཇི་སྟེ་ཆོས་ནི་དམིགས་མེད་ན། །དམིགས་པ་ཡོད་པར་ག་ལ་འགྱུར། །ཞེས་སོ། ། སྐད་ཅིག་སྔ་མ་འགགས་མ་ཐག་པ་ཕྱི་མའི་དེ་མ་ཐག་རྐྱེན་དུ་གྲགས་མོད་ཀྱང་སྐྱེ་བ་མེད་པས་འགགས་པ་མི་འཐད་པ་དང༌། འགགས་པ་ནི་མེད་པ་ཡིན་པས་རྐྱེན་དུ་ཡང་མི་རུང་བས་དེ་མ་ཐག་རྐྱེན་ཡང་མི་འགྲུབ་སྟེ། ཆོས་རྣམས་སྐྱེས་པ་མ་ཡིན་ན། །འགགས་པ་

Page: 890 འཐད་པ་མི་འགྱུར་རོ། །དེ་ཕྱིར་དེ་མ་ཐག་ཅི་རིགས། །འགགས་ན་རྐྱེན་ཡང་གང་ཞིག་ཡིན། །ཞེས་སོ། །བཅོམ་ལྡན་འདས་ཀྱིས་འདི་ཡོད་པས་འདི་འབྱུང༌། འདི་སྐྱེས་པས་འདི་སྐྱེ་སྟེ་མ་རིག་པའི་རྐྱེན་གྱིས་འདུ་བྱེད་དོ། །ཞེས་སོགས་གསུངས་པ་མ་ཡིན་ནམ་ ཞེ་ན། ཚིག་གསལ་ལས། དེ་ལ་རྟེན་ཅིང་འབྲེལ་བར་འབྱུང་བའི་སྐྱེ་བ་ལ་སོགས་པ་དག་བསྟན་པ་གང་ཡིན་པ་དེ་དག་ནི་མ་རིག་པའི་རབ་རིབ་དང་བྲལ་བ་དག་གི་ཡེ་ཤེས་ཟག་པ་མེད་པའི་ཡུལ་གྱི་རང་བཞིན་ལ་བལྟོས་ནས་ནི་མ་ཡིན་ནོ། །འོ་ན་ཅི་ཞེ་ན། མ་རིག་པའི་ རབ་རིབ་ཀྱིས་བློ་གྲོས་ཀྱི་མིག་ཉམས་པར་བྱས་པ་དག་གི་ཤེས་པའི་ཡུལ་ལ་བལྟོས་ནས་ཡིན་ནོ། །དེ་ཁོ་ན་གཟིགས་པ་ལ་བལྟོས་ནས་ནི་བཅོམ་ལྡན་འདས་ཀྱིས་དགེ་སློང་དག་འདི་ནི་བདེན་པ་དམ་པ་སྟེ། འདི་ལྟ་སྟེ། བསླུ་བ་མེད་པའི་ཆོས་ཅན་མྱ་ངན་ལས་འདས་པའོ། །འདུ་ བྱེད་ཐམས་ཅད་ནི་བརྫུན་པ་བསླུ་བའི་ཆོས་ཅན་ནོ། །ཞེས་བྱ་བ་ལ་སོགས་པ་གསུངས་སོ། །ཞེས་ལུང་མང་པོས་བསྒྲུབས་སོ། །དེས་ན་རྐྱེན་སོ་སོ་ལ་འབྲས་བུ་དེ་མི་གནས་པས་མེད་པ་ཡིན་ན་མེད་པ་ཇི་ལྟར་སྐྱེ། མེད་ན་ཡང་སྐྱེ་ན་རྒྱུ་མ་ཡིན་པ་དག་ལས་ཀྱང་སྐྱེ་བར་འགྱུར་ ཏེ། དངོས་པོ་རང་བཞིན་མེད་རྣམས་ཀྱི། །ཡོད་པ་གང་ཕྱིར་ཡོད་མིན་ན། །འདི་ཡོད་པས་ན་འདི་འབྱུང་ཞེས། །བྱ་བ་འདི་ནི་འཐད་མ་ཡིན། །རྐྱེན་རྣམས་སོ་སོ་འདུས་པ་ལ། །འབྲས་བུ་དེ་ནི་མེད་པ་ཉིད། །རྐྱེན་རྣམས་ལ་ནི་གང་མེད་པ། །དེ་ནི་ རྐྱེན་ལས་ཇི་ལྟར་སྐྱེ། །ཅི་སྟེ་དེ་ནི་མེད་ན་ཡང༌། །རྐྱེན་དེ་དག་ལས་སྐྱེ་འགྱུར་ན། །རྐྱེན་མ་ཡིན་པ་དག་ལས་ཀྱང༌། །ཅི་ཡི་ཕྱིར་ན་སྐྱེ་མི་འགྱུར། །ཞེས་སོ། །འབྲས་བུ་ནི་རྐྱེན་ལ་རག་ལས་པའི་ཕྱིར་འབྲས་བུ་རྐྱེན་གྱི་རང་བཞིན་ཅན་ཡིན་ནོ་ཞེ་ན། རྐྱེན་ ཉིད་ཀྱང་རང་གི་རང་བཞིན་དུ་མེད་ན་འབྲས་བུའི་རང་བཞིན་དུ་ཅི་སྟེ་ཡོད། རྐྱེན་ལ་མ་བལྟོས་པའི་འབྲས་བུའང་མེད་དེ། དེས་ན་རྒྱུ་རྐྱེན་ནི་སྒྲོ་བཏགས་པ་ཁོ་ན་སྟེ། འབྲས་བུ་རྐྱེན་གྱི་རང་བཞིན་ན། །རྐྱེན་རྣམས་བདག་གི་རང་བཞིན་མིན། །བདག་དངོས་མིན་

Page: 891 ༄༅། །ལས་འབྲས་བུ་གང༌། དེ་ནི་ཇི་ལྟར་རྐྱེན་རང་བཞིན། །དེ་ཕྱིར་རྐྱེན་གྱི་རང་བཞིན་མིན། །རྐྱེན་མིན་རང་བཞིན་འབྲས་བུ་ནི། །ཡོད་མིན་འབྲས་བུ་མེད་པས་ན། །རྐྱེན་མིན་རྐྱེན་དུ་ག་ལ་འགྱུར། །ཞེས་སོ། །མཐའ་ལྷག་མ་ གཉིས་ནི་ཚིག་གསལ་ལས། དངོས་པོ་རྣམས་ནི་གཉི་ག་ལས་ཀྱང་སྐྱེ་བ་མ་ཡིན་ཏེ། ཕྱོགས་གཉི་ག་ལ་སྨྲས་པའི་ཉེས་པར་ཐལ་བར་འགྱུར་བའི་ཕྱིར་དང༌། རེ་རེ་ལ་བསྐྱེད་པའི་ནུས་པ་མེད་པའི་ཕྱིར་ཏེ། གལ་ཏེ་རེ་རེས་བྱས་གྱུར་ན། །སྡུག་བསྔལ་གཉི་གས་བྱས་པར་ འགྱུར། །ཞེས་འཆད་པར་འགྱུར་རོ། །རྒྱུ་མེད་པ་ལས་ཀྱང་མི་སྐྱེ་སྟེ། །རྒྱུ་མེད་ན་ནི་འབྲས་བུ་དང༌། །རྒྱུ་ཡང་འཐད་པར་མི་འགྱུར་རོ། །ཞེས་སོགས་འཆད་འགྱུར་གྱི་སྐྱོན་དུ་ཐལ་བ་དང༌། གལ་ཏེ་རྒྱུ་ཡིས་སྟོང་ན་འགྲོ་བ་འདི་དག་གཟུང་བྱ་མིན། །ཇི་ལྟར་ ནམ་མཁའི་ཨུཏྤ་ལ་ཡི་དྲི་དང་ཁ་དོག་བཞིན། །ཞེས་སོགས་ཀྱི་ཉེས་པར་ཐལ་ལོ་ཞེས་བཤད་དོ། །འབྲས་བུ་ལ་དཔྱད་པ་ཡོད་མེད་སྐྱེ་འགོག་གི་གཏན་ཚིགས་ནི། སྣང་ཙམ་འདི་ཆོས་ཅན། རང་བཞིན་མེད་དེ། ཡོད་པ་ཡང་མི་སྐྱེ་ལ་མེད་པ་ཡང་མི་སྐྱེ་བའི་ཕྱིར་ཏེ། སྒྱུ་མ་བཞིན་ནོ། །ཞེས་འགོད་དོ། །དེ་ཡང་རྒྱུ་ལ་འབྲས་བུ་ད་ལྟར་ཡོད་པ་སྐྱེ་བར་འདོད་པ་གྲངས་ཅན་པ་དང༌། མ་འོངས་པ་ན་ཡོད་པར་སྐྱེ་བར་འདོད་པ་རང་སྡེ་བྱེ་སྨྲ་དང༌། སྔར་མེད་གསར་དུ་སྐྱེ་བར་འདོད་པ་རང་སྡེ་གཞན་ཁ་ཅིག་གོ །དེ་ཡང་ད་ལྟ་ས་བོན་ལ་ མྱུ་གུ་ཡོད་ན་སླར་སྐྱེ་བ་དོན་མེད་པར་ཐལ་ལ། ངོ་བོ་གྲུབ་ཀྱང་མངོན་གསལ་དུ་སྐྱེར་ཡོད་དོ་ཞེ་ན། ངོ་བོའི་ཆ་ནས་སླར་སྐྱེ་བ་དོན་མེད་པ་དང་མངོན་གསལ་གྱི་ཆ་ནས་མེད་པ་སྐྱེ་བར་འགྱུར་རོ། །མ་འོངས་པ་ན་ཡོད་པའང་མི་སྐྱེ་སྟེ་དངོས་པོ་མ་སྐྱེས་པ་ཞིག་ད་ལྟ་ག་ཤེད་ན་ ཡོད་ན་དེ་མ་འོངས་པ་ན་སྐྱེ་བར་རིགས་ཀྱང་དེ་མེད་པའི་ཕྱིར་ཅི་ཞིག་སྐྱེ་བར་འགྱུར་ཏེ། གལ་ཏེ་དངོས་པོ་མ་སྐྱེས་པ། །འགའ་ཞིག་གང་ན་ཡོད་གྱུར་ན། །དེ་ནི་སྐྱེ་འགྱུར་དངོས་པོ་དེ། །མེད་ན་ཅི་ཞིག་སྐྱེ་བར་འགྱུར། །ཞེས་སོ། །སྔར་མེད་པ་སྐྱེ་

Page: 892 ན་རི་བོང་གི་རྭ་ཡང་སྐྱེ་བར་ཐལ་བ་དང༌། ཐམས་ཅད་ཀྱང་སྐྱེ་བར་ཐལ་ཏེ། རྒྱུ་ལ་མ་ལྟོས་པའི་ཕྱིར་ཏེ། ཅི་སྟེ་སྐྱེ་བ་མེད་སྐྱེ་ན། །ཐམས་ཅད་དེ་བཞིན་སྐྱེ་བར་འགྱུར། །ཞེས་སོ། །དེ་ལྟར་རིགས་པ་ཆེན་པོ་རྣམས་ཀྱིས་རྣམ་པར་དཔྱད་པ་ན་རྒྱུ་དང་རྒྱུ་མེད་དང་ སྐྱེ་འགག་ལ་སོགས་པར་འཛིན་པ་སྒྲོ་སྐུར་གྱི་རྣམ་པར་རྟོག་པ་ཐམས་ཅད་ལོག་པ་ནི་འདིའི་དགོས་པ་ཡིན་ཏེ། འཇུག་པར། སོ་སོ་སྐྱེ་བོ་རྣམས་ནི་རྟོག་པས་བཅིངས། །མི་རྟོག་རྣལ་འབྱོར་པ་ནི་གྲོལ་བར་འགྱུར། །རྟོག་རྣམས་ལོག་པར་གྱུར་པ་གང་ ཡིན་དེ། །རྣམ་པར་དཔྱད་པའི་འབྲས་བུར་མཁས་རྣམས་གསུང༌། །ཞེས་སོ། །གཉིས་པ་གཞུང་དོན་ལ་གཉིས། རྒྱུ་ལ་དཔྱད་པ་རྡོ་རྗེ་གཟེགས་མ་དང༌། འབྲས་བུ་ལ་དཔྱད་པ་ཡོད་མེད་སྐྱེ་འགོག་གོ །དང་པོ་རྒྱུ་ལ་དཔྱད་པ་རྡོ་རྗེ་གཟེགས་མ་ལ་ལྔ། རྒྱུ་མེད་དུ་སྐྱེ་བ་དགག་པ། གཞན་སྐྱེ་དགག་པ་བཞི། རང་སྐྱེ་དགག་པ་གསུམ། ཡུལ་མེད་པར་དགག་པའི་བློ་ཚད་མར་བསྟན་པ། ཚད་མས་ངེས་པའི་དོན་བརྗོད་པའོ། །དང་པོ་ནི། རེ་ཞིག་འཇིག་རྟེན་མངོན་སུམ་གྱིས། །རྒྱུ་རྣམས་ཐམས་ཅད་མཐོང་བ་ཡིན། །པདྨའི་སྡོང་བུ་ སོགས་དབྱེ་ནི། །རྒྱུ་ཡི་དབྱེ་བས་བསྐྱེད་པ་ཡིན། །རྒྱུ་དབྱེ་གང་གིས་བྱས་ཤེ་ན། །སྔར་གྱི་རྒྱུ་དབྱེ་ཉིད་ལས་སོ། །ཅི་ཕྱིར་རྒྱུ་ཡིས་འབྲས་སྐྱེད་ནུས། །སྔར་གྱི་རྒྱུ་ཡི་མཐུ་ཉིད་ལས། །ཞེས་གསུངས་ཏེ། རྐང་པ་དང་པོ་གཉིས་ཀྱིས་རྒྱུ་འཇིག་རྟེན་གྱིས་ དངོས་སུ་མཐོང་བར་བསྟན། གཉིས་ཀྱིས་སྡོང་བུ་དང་འདབ་མ་སོགས་རྒྱུའི་དབྱེ་བ་ཡོད་པར་བསྟན། ལྷག་མས་དེ་རྣམས་སྔ་མའི་རྒྱུན་ལས་སྐྱེ་བར་བསྟན་ཏོ། །དེ་ཡང་རྒྱང་འཕེན་པ་ཁ་ཅིག་རྒྱུ་གཏན་མེད་དུ་འདོད་ལ། ཁ་ཅིགསྲན་ཟླུམ་ཚེར་མ་གཟངས་ རིང་རྣོ་བ་དང༌། །རྨ་བྱའི་སྒྲོ་གཤོག་རི་མོ་བཀྲ་བ་དང༌། །ཉི་ཤར་ཆུ་བོ་ཐུར་དུ་འབབ་པ་རྣམས། །སུས་ཀྱང་མ་བྱས་ངོ་བོ་ཉིད་ཀྱི་རྒྱུ། །ཞེས་རང་བཞིན་གྱིས་བྱུང་བའི་ཕྱིར་ངོ་བོ་ཉིད་རྒྱུ་འོ་ཞེས་ཟེར་རོ། །དེ་ལ་སྨྲས་པར་རེ་ཞིག་རྒྱུ་མེད་པ་ཡང་མ་ཡིན་ལ་

Page: 893 ༄༅། །ངོ་བོ་ཉིད་ཀྱིས་ཀྱང་མ་ཡིན་ཏེ། འཇིག་རྟེན་ན་མངོན་སུམ་གྱིས་མྱུ་གུའི་རྒྱུ་ས་བོན་ཡིན་པ་ལ་སོགས་པ་རྒྱུ་རྣམས་ཐམས་ཅད་མཐོང་བ་ཡིན་པའི་ཕྱིར། རྨ་བྱའི་སྒྲོ་གཤོག་ཁ་དོག་སྣ་ཚོགས་པ་ཅན་གྱི་ཁ་དོག་སོ་སོའི་རྒྱུ་ཐ་དད་ པར་ཡོད་ལ། དེ་བཞིན་དུ་པདྨའི་སྡོང་བུ་དང་ལོ་མ་དང༌། ཟེ་འབྲུ་དང༌། གེ་སར་དང༌། ཁ་དོག་ཐ་དད་པ་ལ་སོགས་པའི་དབྱེ་བ་ནི། སོ་སོའི་རྒྱུའི་དབྱེ་བ་ཉིད་ཀྱིས་བསྐྱེད་པ་ཉིད་དེ། ས་བོན་གཅིག་ལ་རྒྱུའི་རྣམ་པ་དེ་དག་དབྱེར་མེད་དུ་གནས་ལ། འདི་ནི་ཆོས་ཅན་ཇི་ སྙེད་པ་ལ་མ་བསྒྲིབས་པ་རྣམས་ཀྱི་སྤྱན་གྱི་ཡུལ་ཡིན་གྱི་བྱིས་པས་མི་ཤེས་སོ། །རྒྱུའི་དབྱེ་བ་དེ་དག་གང་གིས་བྱས་གལ་ཏེ་བྱེད་པ་པོ་མེད་ན་ནི་དེ་མེད་པར་གྲུབ་བོ་ཞེ་ན། སྐད་ཅིག་སྔ་མ་སྔ་མའི་རྒྱུའི་དབྱེ་བ་ཉིད་ལས་ཕྱི་མ་ཕྱི་མ་རིམ་པས་འགྲུབ་ པའོ། །ཅིའི་ཕྱིར་རྒྱུ་ཡིས་འབྲས་བུ་སྐྱེད་པར་ནུས་ཤེ་ན། སྔར་གྱི་རྒྱུ་ཐོག་མ་མེད་པའི་མཐུ་གཅིག་ནས་གཅིག་ཏུ་བརྒྱུད་པའི་རྟེན་འབྲེལ་ལས་སོ། །གཞན་ཡང་རྒྱུ་མེད་པར་འདོད་ཅིང་དེའི་གཏན་ཚིགས་ཀྱང་འགོད་པ་ནི་སྐད་ཅིག་གིས་འགལ་ བ་ཡིན་ཏེ་གཏན་ཚིགས་ནི་གོ་བར་བྱེད་པའི་རྒྱུ་ཡིན་ལ། དེ་ཡོད་ན་རྒྱུ་གཞན་ཡང་ཡོད་པར་འགྲུབ་པའི་ཕྱིར་རོ། །གཉིས་པ་རྒྱུ་གཞན་ལས་སྐྱེ་བ་དགག་པ་ལ་བཞི། དབང་ཕྱུག་མ་གྲུབ་པར་བསྟན། དེའི་འབྲས་བུ་མི་སྲིད་པར་བསྟན། སྐྱེད་ བྱེད་དུ་འགལ་བར་བསྟན། རྡུལ་ཕྲ་དགག་པའོ། །དང་པོ་ནི། དབང་ཕྱུག་འགྲོ་བའི་རྒྱུ་ཡིན་ན། །རེ་ཞིག་དབང་ཕྱུག་གང་ཡིན་སྨྲོས། །འབྱུང་རྣམས་ཞེ་ན་དེ་ལྟ་མོད། །མིང་ཙམ་ལ་ཡང་ཅི་ཞིག་ངལ། །འོན་ཀྱང་ས་སོགས་དུ་མ་དང༌། །མི་ རྟག་གཡོ་མེད་ལྷ་མིན་ཞིང༌། །འགོད་བྱ་ཉིད་དང་མི་གཙང་བས། །དེ་ནི་དབང་ཕྱུག་ཉིད་མ་ཡིན། །དབང་ཕྱུག་མཁའ་མིན་གཡོ་མེད་ཕྱིར། །བདག་མིན་སྔར་ནི་བཀག་ཟིན་ཕྱིར། །བསམ་མིན་པ་ཡི་བྱེད་པོ་ཡང༌། །བསམ་མིན་བརྗོད་པས་

Page: 894 ཅི་ཞིག་བྱ། །ཞེས་གསུངས་ཏེ། དང་པོ་གཉིས་ཀྱིས་འབྱུང་བ་བཞི་དབང་ཕྱུག་མིན་པར་བསྟན། ཐ་མས་ནམ་མཁའ་དང་བསམ་དུ་མེད་པ་དབང་ཕྱུག་མིན་པར་བསྟན་ཏོ། །གཉིས་པ་ནི། དེས་བསྐྱེད་འདོད་པའང་གང་ཞིག་ཡིན། །བདག་ན་དེ་དང་ས་ སོགས་དང༌། །དབང་ཕྱུག་ངོ་བོའང་རྟག་མིན་ནམ། །ཤེས་པ་ཤེས་བྱ་ལས་སྐྱེས་དང༌། །ཐོག་མེད་བདེ་སྡུག་ལས་ལས་ཡིན། །དེ་ཡིས་གང་ཞིག་སྐྱེད་པ་སྨྲོས། །ཞེས་གསུངས་ཏེ། དང་པོས་དེས་སྐྱེད་པ་མེད་པར་བསྟན། གཉིས་ཀྱིས་བདག་དབང་ཕྱུག་ ཏུ་འདོད་པ་བཀགགསུམ་གྱིས་ལས་ཀྱིས་སྐྱེད་པར་བསྟན་ཏོ། །གསུམ་པ་ནི། རྒྱུ་ལ་ཐོག་མ་མེད་ཡིན་ན། །འབྲས་བུ་ཐོག་མ་ག་ལ་ཡོད། །རྟག་ཏུ་ཅི་ཕྱིར་བྱེད་མིན་ཏེ། །དེ་ནི་གཞན་ལ་བལྟོས་པ་མིན། །དེས་བྱས་མིན་གཞན་ཡོད་མ་ཡིན། ། དེས་འདི་གང་ལ་བལྟོས་པར་འགྱུར། །གལ་ཏེ་བལྟོས་ན་ཚོགས་པ་ཉིད། །རྒྱུ་ཡིན་འགྱུར་གྱིས་དབང་ཕྱུག་མིན། །ཚོགས་ན་མི་བསྐྱེད་དབང་མེད་ཅིང༌། །དེ་མེད་པར་ནི་སྐྱེད་དབང་མེད། །གལ་ཏེ་དབང་ཕྱུག་མི་འདོད་བཞིན། །བྱེད་ན་གཞན་གྱི་དབང་དུ་ ཐལ། །འདོད་ནའང་འདོད་ལ་རག་ལས་འགྱུར། །བྱེད་ནའང་དབང་ཕྱུག་ག་ལ་ཡིན། །ཞེས་གསུངས་ཏེ། དང་པོ་རྣམས་ཀྱིས་ཚོགས་པ་རྒྱུར་བསྟན་ཞིང༌། ཐ་མའི་ཚིགས་བཅད་ཀྱིས་དབང་ཕྱུག་ལ་རང་དབང་མེད་པར་བསྟན་ཏོ། །བཞི་པ་ནི། གང་དག་རྡུལ་ ཕྲ་རྟག་སྨྲ་བ། །དེ་དག་ཀྱང་ནི་སྔར་ཟློག་ཟིན། །ཞེས་གསུངས་ཏེ། དེ་ཡང་བྱེ་བྲག་པ་ལ་སོགས་པ་ན་རེ། དབང་ཕྱུག་ཅེས་བྱ་བའི་ལྷ་གཙང་བ། ཡང་བ། མཆོད་པར་འོས་པ། རྟག་པ། གཅིག་པུར་ཀུན་ཏུ་འགྲོ་བའི་བྱེད་པ་པོ་ཐམས་ཅད་ལ་རང་དབང་དུ་བྱེད་པ་ཡོད་ དེ། གང་ཞིག་ཕྲ་ཞིང་གཅིག་པུ་སྐྱེ་གནས་འདུག །སོགས་དང༌། རྐྱེན་ལྡན་གཞན་པ་ཐམས་ཅད་ཀྱི། །རྒྱུ་ནི་དབང་ཕྱུག་བྱེད་པར་བརྗོད། །སེམས་མེད་པས་ནི་རང་གི་འབྲས། །རང་ཉིད་ཀྱིས་ནི་རྩོམ་ནུས་མིན། །ཞེས་ཟེར་རོ། །དེ་ལ་དྲིས་པ།

Page: 895 ༄༅། །དབང་ཕྱུག་འགྲོ་བའི་རྒྱུ་ཡིན་ན། །རེ་ཞིག་དབང་ཕྱུག་གང་ཡིན་སྨོས། །ཁོ་ན་རེ། འབྱུང་བ་ཆེན་པོ་རྣམས་ལ་དབང་ཕྱུག་ཏུ་འདོད་དོ་ཞེ་ན། དེ་ལྟ་མོད་ཀྱི་འབྱུང་བ་རྣམས་རྒྱུ་ཡིན་པར་ངེད་ཀྱང་འདོད་པས་འབྱུང་བ་དང་དབང་ཕྱུག་གི་མིང་ཐ་དད་ པ་ཙམ་ལ་ནི་རྩོད་པས་ཅི་ཞིག་ངལ་བར་བྱ་སྟེ་མི་རྩོད་དོ། །འོན་ཀྱང་ཁྱོད་ཉིད་ཀྱི་ལུགས་ལ་འགལ་ཏེ་ས་སོགས་འབྱུང་བ་ནི་དུ་མ་ཡིན་ལ། དབང་ཕྱུག་གཅིག་པུར་འདོད་པའི་ཕྱིར་དང༌། ས་སོགས་ནི་མི་རྟག་ཅིང་དབང་ཕྱུག་རྟག་པར་འདོད་པ་དང༌། ས་སོགས་ནི་ གཡོ་བ་མིན་པས་སེམས་མེད་ལ་དབང་ཕྱུག་སེམས་བཅས་སུ་འདོད་པ་དང༌། ས་སོགས་ནི་ལྷ་མིན་ཞིང་རྐང་པས་འགོང་བར་བྱ་བ་ཉིད་ཡིན་ལ། དབང་ཕྱུག་ནི་ལྷ་དང་མཆོད་འོས་སུ་འདོད་པའི་ཕྱིར་དང༌། ས་སོགས་ནི་མི་གཙང་བས་ཁྱབ་ལ་དབང་ཕྱུག་ནི་གཙང་བར་ འདོད་པའི་ཕྱིར་ཁྱོད་རང་གི་ལུགས་ལ་འབྱུང་བ་དེ་ནི་དབང་ཕྱུག་ཉིད་མ་ཡིན་ནོ། །གལ་ཏེ་ནམ་མཁའ་དབང་ཕྱུག་གོ་ཞེ་ན། དབང་ཕྱུག་ནི་ནམ་མཁའ་མིན་ཏེ་དབང་ཕྱུག་ནི་གཡོ་བ་ཡིན་ལ་ནམ་མཁའ་གཡོ་བ་མེད་པའི་ཕྱིར། བདག་དབང་ཕྱུག་ཡིན་ནོ་ཞེ་ན། ནམ་དུ་ཡང་ མི་སྲིད་པའི་བདག་ནི་དབང་ཕྱུག་མིན་ཏེ་བདག་སྔར་ནི་བཀག་ཟིན་པའི་ཕྱིར། བསམ་དུ་མེད་པ་ཞིག་དབང་ཕྱུག་གོ་ཞེ་ན། བསམ་བྱ་མིན་པའི་བྱེད་པོ་དབང་ཕྱུག་དེ་ཡང་བསམ་པར་བྱ་བ་མིན་ན་བརྗོད་པར་ཡང་མི་ནུས་པས་དེ་ལ་དབང་ཕྱུག་ཅེས་བརྗོད་པས་ཅི་ཞིག་ བྱ། དེ་ལྟར་ན་དབང་ཕྱུག་མ་གྲུབ་པས་དེས་བསྐྱེད་པའི་ཆོས་གཞན་ཞིག་འདོད་པའང་གང་ཞིག་ཡིན། གལ་ཏེ་ཐམས་ཅད་བདག་གིས་སྤྲུལ་པས་བདག་ནི་དབང་ཕྱུག་གོ་ཞེ་ན། དབང་ཕྱུག་ནི་གཅིག་པུ་དེ་དང་རྟག་པ་དེ་ཡིན་པར་འདོད་ན་དེས་ས་སོགས་ དངོས་པོ་ཐམས་ཅད་དུས་ཅིག་ཆར་དུ་རྟག་ཏུ་སྤྲུལ་པར་ཐལ་བ་དང༌། ཡང་ན་ནམ་ཡང་མི་སྤྲུལ་བར་ཐལ་ཏེ། དབང་ཕྱུག་དེའི་ངོ་བོའང་རྟག་པ་ཡིན་པར་འདོད་པ་མིན་ནམ། དེས་ན་ཤེས་པ་དང་ཤེས་བྱ་ནི་ཕན་ཚུན་བལྟོས་པ་ལས་སྐྱེས་པ་དང་ཐོག་མ་མེད་པའི་

Page: 896 བདེ་སྡུག་ཀྱང་རང་གི་ལས་ལས་སྐྱེས་པ་ཡིན་གྱི་མིང་ཁོ་ནར་ཟད་པའི་དབང་ཕྱུག་དེ་ཡིས་ནི་གང་ཞིག་སྐྱེད་པ་སྨྲོས་ཤིགགཞན་ཡང་རྒྱུ་དབང་ཕྱུག་དེ་ལ་སྔོན་གྱི་ཐོག་མའི་མཐའ་ཡོད་པ་མིན་ན་དེ་ལས་བྱུང་བའི་འབྲས་བུའི་ཐོག་མ་ལྟ་ག་ལ་ཡོད། དེ་འདོད་ན། འབྲས་བུ་སར་བྱུང་གཏན་མི་སྲིད་པར་ཐལ་ལོ། །གལ་ཏེ་དབང་ཕྱུག་དེ་ཐམས་ཅད་བྱེད་པ་པོ་ཡིན་ན་དེས་ཆུ་ལེན་པ་དང་མེ་འབུད་པ་སོགས་ཀྱང་རྟག་ཏུ་ཅིའི་ཕྱིར་བྱེད་པ་མིན་ཏེ། དེ་ལྟ་ན་དབང་ཕྱུག་གིས་བྱེད་མོད་བྲན་གཞན་གསོ་བས་ཅི་ཞིག་བྱ། དབང་ཕྱུག་ ཁོ་ནས་བྱེད་པ་དེ་ནི་རྒྱུ་གཞན་ལ་བལྟོས་པ་མིན་མོད། ཆོས་འདི་དག་ནི་རྒྱུ་གཞན་ལ་བལྟོས་པར་འཇིག་རྟེན་གྱིས་མངོན་སུམ་གྱིས་མཐོང་སྟེ། མེ་འདོད་ན་བུད་ཤིང་དགོས་ཀྱིས་དབང་ཕྱུག་གིས་ཅི་ཞིག་བྱ། དབང་ཕྱུག་དེས་བྱས་པ་མིན་པ་གཞན་ཡོད་པ་ མིན་ན་རྫ་དང་མར་མེ་ལ་སོགས་པ་དེ་འདི་དག་རྒྱུ་རྐྱེན་གཞན་གང་ལ་བལྟོས་པར་འགྱུར་ཏེ། བལྟོས་པར་མི་རིགས་ཀྱང་རྫ་ནི་དབང་ཕྱུག་གིས་མི་བྱེད་པར་རྫ་མཁན་གྱིས་བྱེད་པ་དང༌། མར་མེ་ནི་དབང་ཕྱུག་ལས་མི་སྐྱེའི་སྣུམ་དང་སྡོང་བུ་དང་ཀོང་བུ་དང་མེ་ ལས་འབྱུང་བར་མཐོང་བའི་ཕྱིར། གལ་ཏེ་རྒྱུ་དེ་དག་ལ་བལྟོས་ན་ནི་ཚོགས་པ་ཉིད་རྒྱུ་ཡིན་པར་འགྱུར་གྱི་དབང་ཕྱུག་ནི་མིན་ཏེ་རྒྱུ་རྐྱེན་དེ་དག་ཚོགས་ན་ནི་དབང་ཕྱུག་གིས་མི་སྐྱེ་བར་འདོད་ཀྱང་མི་སྐྱེ་བའི་དབང་མེད་ཅིང་ཚོགས་པ་དེ་མེད་པར་ནི་སྐྱེད་པར་ འདོད་ཀྱང་སྐྱེ་བའི་དབང་ཡོད་པ་མིན་ནོ། །ཡང་དྲིས་པ། ཅི་དབང་ཕྱུག་དེ་མི་འདོད་བཞིན་དུ་དངོས་པོ་བྱེད་དམ་འདོད་ནས་བྱེད། གལ་ཏེ་དབང་ཕྱུག་རང་ཉིད་མི་འདོད་བཞིན་དུ་བྱེད་ན་དེ་གཞན་གྱི་དབང་ཅན་དུ་ཐལ་ཏེ། བྲན་ལྟར་མི་འདོད་ཀྱང་བྱེད་དགོས་ པའི་ཕྱིར། འདོད་ནས་བྱེད་དོ་ཞེ་ན། ཡང་འདོད་པ་ལ་རག་ལས་ཤིང་དེའི་རྗེས་སུ་འབྲངས་བའི་ཕྱིར་འདོད་པའི་གཞན་དབང་ཅན་དུ་འགྱུར་ལ། གཉི་ག་ལྟར་ཡང་རང་དབང་ཅན་ཉམས་པས་དེ་ལྟ་ན་རང་དབང་ཅན་གྱི་དབང་ཕྱུག་ག་ལ་ཡིན། དེ་ལྟར་བྱེ་བྲག་པ་

Page: 897 ༄༅། །སོགས་བཀག་ནས་གཞན་དཔྱོད་པ་བ་ལ་སོགས་པ་གང་དག་རྡུལ་ཕྲ་ཆ་མེད་རྟག་པར་ཡོད་པ་ལས་འཇིག་རྟེན་བརྟན་གཡོ་ཐམས་ཅད་སྐྱེ་བར་སྨྲ་བ་དེ་དག་ཀྱང་འཐད་པ་མ་ཡིན་ཏེ་རྡུལ་ཕྲ་ཆ་མེད་རྟག་པ་མི་འགྲུབ་སྟེ། ཉི་ཤུ་བར། དྲུག་གིས་ ཅིག་ཆར་སྦྱར་བ་ན། །ཕྲ་རབ་རྡུལ་ཆ་དྲུག་ཏུ་འགྱུར། །དྲུག་པོ་དག་ནི་ཆ་མེད་ན། །གོང་བུའང་རྡུལ་ཕྲན་ཙམ་དུ་འགྱུར། །ཞེས་པས་ཆ་མེད་མི་འགྲུབ་ཅིང་རྡུལ་ཕྲ་རབ་གསེར་ཡིན་ན་དེ་བསགས་པའི་རི་བོ་ཡང་གསེར་ཡིན་དགོས་པ་ལྟར་རྡུལ་ཕྲ་རབ་རྟག་པ་ཡིན་ ན་དེ་བསགས་པའི་རི་ར་བ་ཁང་ཁྱིམ་ཡང་རྟག་པར་ཐལ་བའི་ཕྱིར། དེས་ན་ལུགས་དེ་དག་ཀྱང་ནི། ཕྱོགས་དབྱེའང་ཆ་ཤས་དང་བྲལ་ཕྱིར། །མཁའ་བཞིན་དེས་ན་རྡུལ་ཡང་མེད། །ཅེས་སོགས་སུ་སྔར་བཟློགས་ཟིན་ཏོ། །འདིར་དགེ་བའི་ལྷས། ཁྱེད་ནི་འདི་ལྟར་གཅིག་པ་ཉིད་དང་རྟག་པ་དང་བློ་གྲོས་བཟང་པོ་དང་ལྡན་པ་དང་ལྷ་ཉིད་ཡིན་པ་དེས་ན་ལིངྒ་ལ་སོགས་པ་ཉིད་འགོང་བྱ་མིན་པར་གཙང་བར་འདོད་པའི་ཕྱིར་རོ། །གལ་ཏེ་ནམ་མཁའ་དབང་ཕྱུག་ཡིན་པར་འདོད་ན་དེ་ཡང་བྱ་བ་དང་འདོད་པའི་སྤྱོད་པ་ དང་བྲལ་བས་དབང་ཕྱུག་མ་ཡིན་ནོ། །ཉི་ཟླ་མཆོད་པར་བྱེད་པ་ལ་སོགས་པའི་བདག་ཉིད་ཅན་གྱི་བདག་ཀྱང་དབང་ཕྱུག་དེ་མ་ཡིན་ཏེ། སོ་དང་སྐྲ་སེན་བདག་མ་ཡིན། །ལ་སོགས་པར་བཀག་ཟིན་པའི་ཕྱིར། གལ་ཏེ་དབང་ཕྱུག་དེ་བསམ་གྱིས་མི་ཁྱབ་པ་ཡིན་ནོ་ ཞེ་ན། དེའི་བྱེད་པ་ཉིད་ཀྱང་བསམ་གྱི་མི་ཁྱབ་པ་ཡིན་པས་ི་ཞིག་བརྗོད་དུ་ཡོད་དེ། གང་བསམ་གྱིས་མི་ཁྱབ་པ་བརྗོད་པའི་ཡུལ་ཇི་ལྟར་ཡིན་དེ་ལྟ་ན་དེས་དངོས་པོ་ཅི་འབྱིན་ཞིང་སྐྱེད་པར་འདོད། གལ་ཏེ་བདག་ཅེས་བྱ་བ་འབྱིན་པར་འདོད་ན་དེ་ནི་རྟག་ཅིང་བརྟན་ པར་ཁྱོད་སྨྲ་བས་དབང་ཕྱུག་དང་འདྲ་བ་མ་ཡིན་ནོ། །ཞེས་སོགས་བཤད་དོ། །བི་བྷུ་ཏིས། རིགས་པ་ཅན་པ་ལ་སོགས་པ་ན་རེ། བཅོམ་ལྡན་འདས་འགྲོ་བ་སྣ་ཚོགས་སྤྲུལ་པ་ལ་མཁས་པ་རྟག་ཏུ་ནུས་པ་མ་ཉམས་པ་ཐོག་མར་གྱུར་པ་རྟག་པ་ཐམས་ཅད་མཁྱེན་པ་

Page: 898 དབང་ཕྱུག་སྟེ་དེས་འགྲོ་བ་རྒྱུ་དང་བཅས་པའི་ལུས་དང་ཁམས་དང་རི་དང་རྒྱ་མཚོ་ལ་སོགས་པ་བྱེད་པ་དང་གནས་པ་དང་འཇིག་པའི་རྒྱུ་དབང་ཕྱུག་ཆེན་པོའོ། །ཞེས་ཕྱོགས་སྔ་བརྗོད་དོ། །གསུམ་པ་རང་སྐྱེ་འགོག་པ་ལའང༌། གྲངས་ཅན་པའི་གཙོ་བོ་འགོག་པ། བདེ་སོགས་ རྟག་པར་འདོད་པ་སེལ་བ། རྒྱུ་ལ་འབྲས་བུ་གནས་པར་འདོད་པ་འགོག་པའོ། །དང་པོ་ནི། གཙོ་བོ་རྟག་པ་འགྲོ་བ་ཡི། །རྒྱུ་ཡིན་པར་ནི་གྲངས་ཅན་འདོད། །སྙིང་སྟོབས་རྡུལ་དང་མུན་པ་ཞེས། །བྱ་བའི་ཡོན་ཏན་མཉམ་གནས་ནི། །གཙོ་བོ་ཞེས་བྱར་ རབ་བརྗོད་དེ། །མི་མཉམ་འགྲོ་བ་ཡིན་པར་བརྗོད། །གཅིག་ལ་རང་བཞིན་གསུམ་ཉིད་ནི། །རིགས་མིན་དེས་ན་དེ་ཡོད་མིན། །དེ་བཞིན་ཡོན་ཏན་ཡོད་མིན་ཏེ། །དེ་ཡང་སོ་སོར་རྣམ་གསུམ་ཕྱིར། །ཡོན་ཏན་མེད་ན་སྒྲ་སོགས་ཀྱང༌། །ཡོད་ཉིད་ཤིན་ཏུ་རྒྱང་ རིང་འགྱུར། །སེམས་མེད་གོས་ལ་སོགས་པ་ལ། །བདེ་སོགས་ཡོད་པར་སྲིད་པའང་མིན། །དངོས་རྣམས་དེ་རྒྱུའི་རང་བཞིན་ན། །དངོས་པོ་རྣམ་དཔྱོད་ཟིན་མིན་ནམ། །ཁྱོད་ཀྱི་རྒྱུ་ཡང་བདེ་སོགས་ཉིད། །དེ་ལས་སྣམ་སོགས་འབྱུང་བའང་མེད། །སྣམ་སོགས་ ལས་ནི་བདེ་སོགས་ཡིན། །དེ་མེད་ཕྱིར་ན་བདེ་སོགས་མེད། །ཅེས་གསུངས་ཏེ། ཚིགས་བཅད་ཕྱེད་དང་གཉིས་ཀྱིས་ཕྱོགས་སྔ་བརྗོད། ཚིགས་བཅད་གཅིག་གིས་ཡོན་ཏན་བཀག །རྐང་པ་གཉིས་ཀྱིས་དེས་བསྐྱེད་པའི་སྒྲ་སོགས་བཀག །ལྷག་མས་ས་སོགས་ ལ་བདེ་སོགས་ཡོད་པར་ཧ་ཅང་ཐལ་བ་འཕངས་སོ། །གཉིས་པ་ནི། བདེ་སོགས་རྟག་པ་ཉིད་དུ་ཡང༌། །ནམ་ཡང་དམིགས་པ་ཡོད་མ་ཡིན། །བདེ་སོགས་གསལ་བ་ཡོད་ཉིད་ན། །མྱོང་བ་ཅི་ཕྱིར་འཛིན་མ་ཡིན། །དེ་ཉིད་ཕྲ་མོར་གྱུར་ན་དེ། །རགས་དང་ ཕྲ་བ་ཇི་ལྟར་ཡིན། །རགས་པ་དོར་ནས་ཕྲ་འགྱུར་བས། །ཕྲ་རགས་དེ་དག་མི་རྟག་ཉིད། །དེ་བཞིན་དངོས་པོ་ཐམས་ཅད་ནི། །མི་རྟག་ཉིད་དུ་ཅིས་མི་འདོད། །རགས་པ་དེ་ལས་གཞན་མིན་ན། །བདེ་བ་གསལ་བར་མི་རྟག་ཉིད། །ཅེས་གསུངས་ཏེ། དང་པོས་

Page: 899 ༄༅། །མ་མྱོང་བའི་རྟགས་ཀྱིས་བདེ་སོགས་རྟག་ཏུ་ཡོད་པ་མ་ཡིན་པར་བསྟན། རྐང་པ་གཉིས་ཀྱིས་རྟག་པ་ལ་རགས་ཕྲ་མི་རིགས་པར་བསྟན། ལྷག་མས་བདེ་སོགས་མི་རྟག་པར་བསྟན་ཏོ། །གསུམ་པ་ནི། གལ་ཏེ་མེད་པ་འགའ་ཡང་ནི། །སྐྱེ་ མིན་མེད་ཕྱིར་ཞེས་འདོད་ན། །གསལ་བ་མེད་པར་སྐྱེ་བ་ནི། །ཁྱོད་མི་འདོད་ཀྱང་གནས་པ་ཉིད། །གལ་ཏེ་རྒྱུ་ལ་འབྲས་གནས་ན། །ཟན་ཟ་མི་གཙང་ཟ་བར་འགྱུར། །རས་ཀྱི་རིན་གྱིས་རས་བལ་གྱི། །ས་བོན་ཉོས་ལ་བསྒོ་བར་གྱིས། །འཇིག་རྟེན་ རྨོངས་པས་མ་མཐོང་ན། །དེ་ཉིད་ཤེས་ཀྱིའང་བཞག་དེ་ཉིད། །ཤེས་ཏེ་འཇིག་རྟེན་ལ་ཡང་ནི། །ཡོད་པས་ཅི་སྟེ་མཐོང་མ་ཡིན། །འཇིག་རྟེན་ཚད་མ་ཉིད་མིན་ན། །གསལ་བར་མཐོང་བའང་བདེན་མ་ཡིན། །ཞེས་གསུངས་ཏེ། དང་པོས་དོན་གྱིས་ གཞན་སྐྱེ་ཁས་བླངས་པར་བསྟན། གཉིས་པས་རྒྱུ་འབྲས་དུས་མཉམ་ན་ཧ་ཅང་ཐལ་བ་བཀོད། ལྷག་མས་དེའི་ལན་བཀག་པའོ། །དེ་ཡང་གཙོ་བོ་རྟག་པ་ནི་བརྟན་གཡོའི་འགྲོ་བ་ཡི་རྒྱུ་ཡིན་པར་ནི་མུ་སྟེགས་གྲངས་ཅན་པ་འདོད་དེ། སྙིང་སྟོབས་དང་རྡུལ་དང་ མུན་པ་ཞེས་བྱ་བའི་ཡོན་ཏན་གསུམ་ཆ་མཉམ་པར་གནས་པ་ཆོས་ལྔ་ལྡན་ནི་གཙོ་བོ་ཞེས་བྱ་བར་རབ་ཏུ་བརྗོད་དེ་རྟག་པ་ཡིན། བེམ་པོ་ཡིན། མི་སྣང་བ་ཡིན། གཅིག་པུ་ཡིན། རང་བཞིན་ཡིན་ལ། རྣམ་འགྱུར་མ་ཡིན་པར་འདོད་ཅིང༌། རྒྱུ་ཁོ་ན་ཡིན་གྱི་འབྲས་བུ་མ་ཡིན་པར་ འདོད་ལ། ཡོན་ཏན་གསུམ་ཆ་མི་མཉམ་པའི་སྐབས་ན་འགྲོ་བ་ཞེས་བྱ་བ་ཡིན་པར་བརྗོད་དེ། དེ་ལ་ཉེར་བཞི་ལས། བདག་ནི་ཆོས་ལྔ་དང་ལྡན་ཏེ། རིག་པ་ཡིན། རྟག་པ་ཡིན། གཅིག་པུ་ཡིན། སྐྱེ་བུའི་རྒྱུད་དུ་གཏོགས་པ་ཡིན། བྱེད་པ་པོ་མ་ཡིན་པའི་ཟ་བ་པོ་ཡིན་ པའོ། །གཙོ་བོ་ལས་ཆེན་པོའམ་བློ་ཞེས་བྱ་བ་ཤེལ་གྱི་མེ་ལོང་ངོས་གཉིས་པ་ལྟ་བུ་སྐྱེ་ལ། དེ་ལས་ང་རྒྱལ། དེ་ལས་བློའི་དབང་པོ་དང༌། རྣ་བའི་དབང་པོ་སོགས་ལྔ་དང༌། ལས་ཀྱི་དབང་པོ་ངག་སོགས་ལྔ་དང༌། ལམ་བློ་གཉི་གའི་དབང་པོ་ཡིད་དེ་དབང་པོ་བཅུ་

Page: 900 གཅིག་དེ་ལས་སྒྲ་དེ་ཙམ་སོགས་དེ་ཙམ་ལྔ། དེ་ལས་ནམ་མཁའ་སོགས་འབྱུང་བ་ལྔ་སྟེ་ཉེར་གསུམ་པོ་རིམ་པར་འབྱུང་ལ། དེ་ལས་དབང་པོ་བཅུ་གཅིག་དང་འབྱུང་བ་ལྔ་ནི་རྒྱུ་ཁོ་ནར་འདོད་ལ་བློ་ལ། བདག་དང་ཡུལ་གཉི་གའི་རྣམ་པ་གཅིག་ཆར་ཤར་བས་སྐྱེས་ བུས་ཡུལ་ལོངས་སྤྱོད་ཅིང་དེ་གཙོ་བོས་བྱས་པར་སྐྱེས་བུས་ཤེས་པ་ན་གཙོ་བོ་ཁ་སྐྱེངས་ཏེ་རྣམ་འགྱུར་མི་བྱེད་པས་གཙོ་བོ་དང་བྲལ་ཏེ་བདག་གྲོལ་ལོ་ཞེས་ཟེར་རོ། །དེ་ལ་བརྒལ་བ། གཙོ་བོ་གཅིག་པུ་ལ་རང་བཞིན་གསུམ་ཉིད་ནི་ཡོད་པར་རིགས་པ ་མིན་ཏེ། གཙོ་བོ་གཅིག་བུ་མིན་པར་གསུམ་དུ་ཐལ་བའི་ཕྱིར། གལ་ཏེ་གསུམ་དུ་ཡོད་ཀྱང་གཅིག་ཡིན་པ་མི་འགལ་ལོ་ཞེ་ན། འོ་ན་བུམ་པ་དང་སྣམ་བུའང་གཉིས་སུ་ཡོད་ཀྱང་གཅིག་ཡིན་པ་མི་འགལ་བར་ཐལ་ལོ། །དེས་ན་ཆ་མཉམ་པའི་གཙོ་བོར་ནི་ ཡོད་པ་མ་ཡིན་ནོ། །དེ་བཞིན་དུ་ཡོན་ཏན་རྡུལ་མུན་སྙིང་སྟོབས་གསུམ་པོ་དེ་ཉིད་ཡོད་པ་མིན་ཏེ་ཡོད་ན་སྣང་དུ་རུང་བ་ལས་གང་ནའང་མ་དམིགས་པའི་ཕྱིར་དང༌། དེ་ཡང་སོ་སོར་རྡུལ་གྱི་རྡུལ་སོགས་རྣམ་པ་གསུམ་རེར་ཁྱོད་ཉིད་འདོད་པའི་ཕྱིར་ན་ཐུག་མེད་དུ་ཐལ་ བས་སོ། །དེ་ལྟར་ཡོན་ཏན་དེ་ཉིད་མེད་ན་དེ་ལྡན་གྱི་གཙོ་བོས་བསྐྱེད་པའི་སྒྲ་སོགས་དེ་ཙམ་དང་འབྱུང་བ་རྣམས་ཀྱང་ཡོད་པ་ཉིད་ཤིན་ཏུ་རྒྱང་རིང་བར་འགྱུར་ཏེ། མོ་གཤམ་གྱི་བུ་མེད་ན་དེ་ཡི་རྒན་གཞོན་མེད་པ་བཞིན་ནོ། །འགྲོ་བ་ཉེར་གསུམ་པོ་ཐམས་ཅད་ ཡོན་ཏན་བདེ་སོགས་གསུམ་དང་ལྡན་པར་མི་རིགས་ཏེ། སེམས་མེད་པའི་ས་ལ་སོགས་པ་ལ་བདེ་བ་སྙིང་སྟོབས་དང་སྡུག་བསྔལ་རྡུལ་དང་མུན་པ་གཏི་མུག་གི་ཚོར་མྱོང་ཡོད་པའང་སྲིད་པ་མིན་པའི་ཕྱིར། འང་སྒྲས་ནི་ཡོན་ཏན་གསུམ་ཉིད་མེད་པར་མ་ཟད་ཅེས་ པའི་དོན་ཏོ། །གལ་ཏེ་དངོས་པོ་རྣམས་བདེ་སོགས་དེའི་རྒྱུའི་རང་བཞིན་ཡིན་པས་ན་ས་སོགས་ལས་བདེ་སོགས་དེ་སྐྱེའོ་སྙམ་ན། དངོས་པོ་དེ་ཉིད་རྡུལ་ཕྲ་རབ་ནས་ཚོགས་པའི་བར་དུ་ཡང་སྔར་རྣམ་པར་དཔྱད་དེ་བཀག་ཟིན་པ་ཉིད་མིན་ནམ། དེ་ལྟ་མོད་

Page: 901 ༄༅། །ཀྱིས་གྲངས་ཅན་ཁྱོད་ཀྱི་ལུགས་ཀྱིས་རྒྱུ་ཡང་བདེ་སོགས་ཉིད་ཡིན་པར་འདོད་ན་དེ་ལས་སྣམ་བུ་ལ་སོགས་འབྱུང་བ་མེད་དེ། བདེ་བ་ལས་སྣམ་བུ་སྐྱེ་བ་ནི་སུས་ཀྱང་མ་མཐོང་བའི་ཕྱིར། ཁྱོད་ཀྱི་གྲུབ་མཐའ་དེ་བས་ནི་སྣམ་སོགས་ལས་ནི་བདེ་ སོགས་སྐྱེའོ། །ཞེས་བརྗོད་ན་འོས་པར་འགྱུར་ཏེ་སྣམ་སོགས་ཀྱི་གོས་དེ་མེད་ན་དྲོ་བའི་བདེ་སོགས་དེ་མེད་པའི་ཕྱིར་ནའོ། །དེ་ལྟར་ན་ནི་བདེ་སོགས་ཀྱི་རྒྱུ་སྣམ་སོགས་ཡིན་ལ། སྣམ་སོགས་ཀྱི་རྒྱུ་བདེ་སོགས་ཡིན་པའི་ཕྱིར། ནམ་དུ་ཡང་སྣམ་སོགས་དང་བདེ་སོགས་གང་ཡང་ འགྲུབ་པར་མི་འགྱུར་རོ། །གཞན་ཡང་གཙོ་བོ་དང་ཡོན་ཏན་དེ་དག་རྟག་པ་མ་ཡིན་ཏེ། དེའི་འབྲས་བུ་བདེ་སོགས་རྟག་པ་ཉིད་དུ་ཡང་ནམ་ཡང་དམིགས་པ་ཡོད་པ་མ་ཡིན་པའི་ཕྱིར། བདེ་སོགས་རྟག་པར་ཡོད་ཀྱང་མ་མྱོང་བར་ཟད་དོ་ཞེ་ན། དེ་བདེ་བ་ལ་སོགས་པའི་གསལ་ བ་སྟེ་བྱེ་བྲག་གམ་ཁྱད་པར་ཡོད་པ་ཉིད་ཡིན་ན་མྱོང་བ་ཅིའི་ཕྱིར་འཛིན་པ་མ་ཡིན་ཏེ་ཤེས་པ་ནི་མྱོང་བ་ཡིན་ན་མི་མྱོང་ན་མྱོང་བར་འགལ་བའི་ཕྱིར་རོ། །ཡང་མྱོང་བ་དེ་ཉིད་ཕྲ་མོར་གྱུར་པས་ན་དེ་མི་འཛིན་ནོ་ཞེ་ན། བདེ་སོགས་གཅིག་ལ་རགས་པ་དང་ཕྲ་བ་གཉིས་འཇོག་ པའང་ཇི་ལྟར་སྲིད་པ་ཡིན། བདེ་སོགས་དེ་སྐད་ཅིག་གིས་རགས་པ་དོར་ནས་ཕྲ་བར་གྱུར་པས་ན་ཕྲ་རགས་སྣ་ཚོགས་སུ་འགྱུར་བ་དེ་དག་ནི་མི་རྟག་པ་ཉིད་དུ་ངེས་ཏེ། དེ་ལྟ་ན་ཡོན་ཏན་རྟག་པ་ཉམས་སོ། །བདེ་སོགས་མི་རྟག་པར་ངེས་པར་མཐོང་ན་ནི་དེ་བཞིན་དུ་དངོས་པོ་ ཐམས་ཅད་ནི་མི་རྟག་པ་ཉིད་དུ་ཅིས་མི་འདོད་དེ། མི་རྟག་པར་ངེས་པར་འགྱུར་ལ། བདེ་སོགས་ཀྱི་རགས་པ་དང་ཕྲ་བ་ཡང་བདེ་སོགས་ལས་གཞན་མིན་པར་འདོད་ན་བདེ་བ་དང་སྡུག་བསྔལ་སོགས་ནི་རྐྱེན་ལས་སྐྱེ་བ་དང་གནས་སྐབས་རེས་འགའ་བ་ཡིན་པ་དང་ཕན་ཚུན་ འགལ་རྐྱེན་དུ་འགྱུར་བའི་ཕྱིར་མི་རྟག་པ་ཉིད་དུ་རང་གིས་མངོན་སུམ་དུ་ཤེས་སོ། །དེ་ལྟར་དཔྱད་པ་ན་གཙོ་བོ་རྒྱུ་མ་ཡིན་པ་བདེན་མོད་ཀྱང་རང་ཉིད་རྒྱུ་ཡིན་ཏེ། གལ་ཏེ་མེད་པ་འགའ་ཡང་ནི་སྐྱེ་བ་མིན་ལ་རྒྱུ་གཞན་ཡང་མེད་པའི་ཕྱིར་རང་ཉིད་ལས་རང་སྐྱེ་བར་གོར་མ་

Page: 902 ཆག་གོ་ཞེས་འདོད་ན། ཁྱོད་ཀྱིས་རང་སྐྱེ་མ་མཐོང་ཡང་འོལ་ཚོད་ཀྱིས་རང་སྐྱེ་ཁས་ལེན་དགོས་སོ་ཞེས་སྨྲས་པ་ལྟར་རྒྱུའི་ཚོགས་གསལ་བ་མེད་པར་ཡང་སྐྱེ་བ་ནི་ཁྱོད་མི་འདོད་ཀྱང་ཁས་ལེན་དགོས་པར་གནས་པ་ཉིད་དོ། །དེ་ལྟ་མོད་ཀྱིས་གལ་ཏེ་རྒྱུ་ལ་འབྲས་བུ་ གནས་པར་འདོད་ན་འབྲས་ཆན་ལ་སོགས་པའི་ཟན་ཟ་བ་ནི་མི་གཙང་བ་བཤང་བ་ཟ་བར་འགྱུར་ཏེ། རྒྱུ་ཟས་ལ་འབྲས་བུ་བཤང་བ་གནས་པའི་ཕྱིར་དང༌། རས་ཀྱི་རིན་གྱིས་རས་བལ་གྱི་ས་བོན་སྲན་མ་ལྟ་བུ་དེ་ཉོས་ལ་ཁྱོད་རང་གོས་སུ་བསྒོ་བར་གྱིས་ཤིག་སྟེ་རྒྱུ་རས་བལ་ གྱི་ས་བོན་ཉིད་ལ་འབྲས་བུ་རས་བལ་དང་རས་ཡུག་གནས་པའི་ཕྱིར། གལ་ཏེ་རྒྱུ་ལ་འབྲས་བུ་ཡོད་མེད་ཀྱང་འཇིག་རྟེན་རྨོངས་པས་མ་མཐོང་བའོ་ཞེ་ན། དེ་ཉིད་ཤེས་པར་རློམ་པ་ཁྱོད་ཉིད་ཀྱིས་རས་ཀྱི་རིན་གྱིས་རས་བལ་གྱི་ས་བོན་ཉོས་ནས་ས་བོན་ཉིད་གོས་སུ་བསྒོ་བ་སྔར་སྣམ་ བུར་བཞག་པ་དེ་ཉིད་བྱོས་ཤིག །དེ་ལྟ་མོད་ཀྱི་ཁྱོད་ཀྱིས་རྒྱུ་རས་ཀྱི་ས་བོན་ལ་འབྲས་བུ་རས་ཡུག་ཡོད་པར་ཤེས་པ་ཡིན་ན་རྒྱུ་རས་བལ་ལས་འབྲས་བུ་རས་ཡུག་འགྲུབ་པར་ཤེས་པ་ཙམ་ཞིག་འཇིག་རྟེན་ལ་ཡང་ནི་ཡོད་པས་འཇིག་རྟེན་པ་རྣམས་ཀྱིས་ཀྱང་རས་ཀྱི་ས་བོན་ལ་རས་ཡུག་ ཡོད་པ་ཅི་སྟེ་མཐོང་བ་མ་ཡིན་ཏེ་མཐོང་དགོས་སོ། །གལ་ཏེ་འཇིག་རྟེན་གྱིས་མ་མཐོང་བ་སྐྱོན་མིན་ཏེ་འཇིག་རྟེན་ཚད་མ་ཉིད་མིན་ནོ་སྙམ་ན། འོ་ན་སྐྱེ་བ་སོགས་གསལ་བར་མཐོང་བའང་བདེན་པ་མ་ཡིན་ལ། བདག་དང་གཙོ་བོ་སོགས་བཏགས་པའང་འཇིག་རྟེན་ བཞིན་བདེན་པ་མ་ཡིན་ནོ། །བཞི་པ་ཡུལ་མེད་པར་དགག་པའི་བློ་ཚད་མར་བསྟན་པ་ནི། གལ་ཏེ་ཚད་མ་ཚད་མིན་ན། །དེས་གཞལ་བརྫུན་པར་མི་འགྱུར་རམ། །དེ་ཉིད་དུ་ན་སྟོང་པ་ཉིད། །སྒོམ་པ་དེ་ཕྱིར་མི་འཐད་འགྱུར། །བཏགས་པའི་དངོས་ལ་མ་ རེག་པར། །དེ་ཡི་དངོས་མེད་འཛིན་མ་ཡིན། །དེ་ཕྱིར་བརྫུན་པའི་དངོས་གང་ཡིན། །དེ་ཡི་དངོས་མེད་གསལ་བར་བརྫུན། །དེས་ན་རྨི་ལམ་བུ་ཤི་བ། །དེ་མེད་སྙམ་པའི་རྣམ་རྟོག་ནི། །དེ་ཡོད་རྣམ་པར་རྟོག་པ་ཡི། །གེགས་ཡིན་དེ་ཡང་བརྫུན་པ་ཡིན། །

Page: 903 ༄༅། །ཞེས་གསུངས་ཏེ། དང་པོས་བརྒལ་བ་བཀོད། གཉིས་པས་བརྫུན་པ་ཙམ་དུ་བསྟན། གསུམ་པས་དེ་དངོས་འཛིན་གྱི་གཉེན་པོར་བསྟན་པའོ། །ལྔ་པ་ཚད་མས་ངེས་པའི་དོན་བརྗོད་པ་ནི། དེ་བས་དེ་ལྟར་རྣམ་དཔྱད་པས། །འགའ་ཡང་ རྒྱུ་མེད་ཡོད་མ་ཡིན། །སོ་སོ་བའམ་འདུས་པ་ཡི། །རྐྱེན་རྣམས་ལ་ཡང་གནས་མ་ཡིན། །གཞན་ནས་འོངས་པའང་མ་ཡིན་ལ། །གནས་པ་མ་ཡིན་འགྲོ་མ་ཡིན། །རྨོངས་པས་བདེན་པར་གང་བྱས་འདི། །སྒྱུ་མ་ལས་ནི་ཁྱད་ཅི་ཡོད། །ཞེས་གསུངས་ ཏེ། གཞན་རྣམས་ཀྱིས་དཔྱད་ན་རྒྱུ་མི་འགྲུབ་པར་བསྟན། རྐང་པ་ཐ་མ་གཉིས་ཀྱིས་ཐམས་ཅད་སྒྱུ་མ་ལྟ་བུར་བསྟན་ཏོ། །དེ་ཡང་གལ་ཏེ་རྒོལ་བ་དག་ན་རེ། ཁྱེད་དབུ་མ་པའི་ལུགས་ལ་གང་འཇལ་བྱེད་ཀྱི་ཚད་མ་ཐམས་ཅད་ཀྱང་ཡང་དག་པར་ཚད་མ་མིན་པར་འདོད་ ན། དེས་གཞལ་བའི་ཆོས་ཀྱང་བརྫུན་པར་མི་འགྱུར་རམ། དབུ་མ་པ་ཉིད་ཀྱི་རྣམ་པར་དཔྱོད་པ་དེ་ཉིད་ལྟར་དུ་དཔྱད་ན་སྟོང་པ་ཉིད་ཀྱང་མི་འགྲུབ་པས་སྟོང་ཉིད་སྒོམ་པ་དེ་ཡང་མི་འཐད་པར་འགྱུར་རོ་ཞེ་ན། གང་བཏགས་པའི་དངོས་པོ་ཙམ་པ་དེ་ལ་མ་རེག་པ་སྟེ་མ་བསྟེན་ པར་དེ་ཡི་དངོས་མེད་སྟོང་ཉིད་ཀྱང་འཛིན་པའམ། འཇོག་ནུས་པ་མ་ཡིན་ཏེ། ནམ་མཁའི་ཐ་སྙད་ལ་མ་བརྟེན་ན་ནམ་མཁའ་དངོས་མེད་དུ་ཡང་འཇོག་མི་ནུས་པའི་ཕྱིར། དེའི་ཕྱིར་བརྫུན་པའི་དངོས་པོ་སྣང་ཙམ་པ་དེ་ལ་སེམས་ཅན་རྣམས་བདེན་པར་ཞེན་པས་འཁོར་བར་ལྟུང་ ལ། དེ་ཉིད་མི་བདེན་པ་སྒྱུ་མ་ཙམ་དུ་ཤེས་ན་དེ་ཡི་གཉེན་པོར་འགྱུར་མོད་ཀྱང་དངོས་པོར་སྣང་བ་བརྫུན་པ་དེའི་དངོས་མེད་དུ་བཏགས་པ་སྟོང་ཉིད་དེ་ཡང་གསལ་བར་བརྫུན་པ་ཡིན་ལ། སྒྱུ་མའི་སེང་གེས་སྒྱུ་མའི་གླང་པོ་ཆེ་གསོད་པ་ལྟར་བདེན་པར་རྟོག་པའི་དངོས་འཛིན་གྱི་གཉེན་ པོར་སྟོང་ཉིད་དུ་ཤེས་པའི་དངོས་འཛིན་དེ་འཇུག་པ་ཡིན་ནོ། །དེས་ན་རྨི་ལམ་དུ་བུ་སྐྱེས་ནས་ཤི་བར་རྨིས་ན་སྐྱེས་པ་དང་ཤི་བ་དེ་གཉི་ག་རྨི་ལམ་དུ་ཁྱད་མེད་མོད་ཀྱང་སྐྱེས་པར་མཐོང་བ་དེ་ལས་བུ་ཡོད་དོ་སྙམ་པའི་བློ་སྐྱེ་ལ། ཤི་བར་སྣང་བ་ན་བུ་དེ་ནི་ཤི་ནས་མེད་དོ་

Page: 904 སྙམ་པའི་རྣམ་རྟོག་འབྱུང་ཞིང་དེ་ནི་བུ་དེ་ཡོད་ཏོ་སྙམ་པའི་རྣམ་པར་རྟོག་པ་དེའི་གེགས་ཡིན་ལ། བུ་ཡོད་པ་དང་མེད་པ་དེ་གཉི་ག་ཡང་རྨི་ལམ་དུ་མཚུངས་པས་བརྫུན་པ་ཉིད་ཡིན་པ་ལྟར་རོ། །དེ་བས་དེ་ལྟར་རྣམ་པར་དཔྱད་པས་ཆོས་འགའ་ཡང་རྒྱུ་མེད་དུ་སྐྱེ་བ་ཡང་ ཡོད་པ་མིན་ལ། རྒྱུ་སོ་སོ་བའམ་མང་པོ་འདུས་པ་ཡི་རྐྱེན་རྣམས་ལ་ཡང་འབྲས་བུ་གནས་པ་མ་ཡིན་ཞིང་རྒྱུ་གཞན་ནས་འོངས་བ་ཡང་མ་ཡིན་ལ་རྒྱུ་ལ་འབྲས་བུ་གནས་པའང་མ་ཡིན་ཞིང་འབྲས་བུ་བསྐྱེད་ནས་རྒྱུ་འགགས་འགྲོ་བའང་མ་ཡིན་ཏེ་རྨོངས་པས་བདེན་པར་ གང་བྱས་ཤིང་བཟུང་བ་འདི་ཐམས་ཅད་ནི་སྒྱུ་མ་ལས་ནི་ཁྱད་པར་ཅི་ཡོད་དེ། སྒྱུ་མ་ལྟ་བུར་ཤེས་པར་བྱ་སྟེ། དེའི་ཕྱིར་ཡུམ་ལས་གཟུགས་ནས་མྱ་ངན་ལས་འདས་པའི་བར་དང་དེ་ལས་ཆེས་ལྷག་པའི་ཆོས་ཡོད་ན་དེ་ཡང་སྒྱུ་མ་ལྟ་བུར་བསྟན་པ་ཡིན་ནོ། །འདི་རྣམས་སུ་དགེ་ བའི་ལྷས། གྲངས་ཅན་འགོག་ཚེ། གོས་སོགས་རྒྱུའི་རང་བཞིན་དུ་གྱུར་པས་རྒྱུ་ཡིན་ལ། དེའི་འབྲས་བུ་གོས་སོགས་ཡིན་པས་དེ་ལ་བདེ་བ་སོགས་ཡོད་ལ། དེ་མེད་ན་དེ་ལས་བདེ་སོགས་སྐྱེ་བར་མི་འགྱུར་རོ། །ཞེས་འདོད་པ་བཀོད་ཅིང་དངོས་པོ་རྣམ་དཔྱད་མ་ཡིན་ ནམ་ཞེས་པས་བཀག་པར་བསྟན་ལ། བདེ་སོགས་རྟག་པ་ཡིན་ན་དུས་ཐམས་ཅད་དུ་ཡོད་པར་ཐལ་བ་དང༌། ཡང་རྟག་པ་དེ་གསལ་བའི་ཚེ་བདེ་བར་སྣང་གི་ནུས་པའི་ཚུལ་དུ་མི་གསལ་བའི་ཚེ་མི་སྣང་ངོ་ཞེ་ན། བདེ་བའི་གསལ་བ་ཡོད་ཉིད་ན། །སོགས་ཀྱིས་བཀག་ པ་དང༌། ཕྲ་རགས་ཀྱི་གནས་སྐབས་ཐ་དད་ཀྱང་གནས་སྐབས་ཅན་བདེ་སོགས་རྟག་པས་སྐྱོན་མེད་དོ་ཞེ་ན། རགས་པ་དོར་ནས་ཕྲ་གྱུར་པས། །སོགས་ཀྱིས་བརྒལ་ལ། གནས་སྐབས་དེའི་གཞི་རྟག་གོ་སྙམ་ན། ཕྲ་རགས་དེ་དག་མི་རྟག་ཉིད། །ཅེས་པས། བཀག་པ་དང༌། གསལ་བར་མཐོང་བའང་བདེན་མ་ཡིན། །སོགས་ལ། སྒྲ་སོགས་ཡོད་པ་ལ་མངོན་སུམ་གྱིས་བསལ་བ་བསྟན་ནས་འང་སྒྲས་རྗེས་དཔག་དང་ལུང་ལ་ཡོད་པ་ཡང་བདེན་པ་མ་ཡིན་པར་བསྟན་ནོ། །ཞེས་དང༌། སྒྱུ་མས་སྤྲུལ་པ་སོགས་ཀྱི་གཞུང་

Page: 905 ༄༅། །ཡང་དཀྱུས་གཅིག་ཏུ་བཤད་དོ། །ཤེར་ལེའི་འགྲེལ་ཆུང་ལས་ནི། བདེ་སོགས་གསལ་བ་ཞེས་པ་འདིས་སློབ་དཔོན་འབྲས་བུའི་ཚོགས་ཉིད་གསལ་བའི་སྒྲར་བརྗོད་པར་གྲངས་ཅན་པ་འདོད་པར་དགོངས་སོ་ཞེས་དང༌། སྟོང་ཉིད་མི་ འཐད་པའི་ལན་དུ། དངོས་པོ་དང་དངོས་པོ་མེད་པ་དག་གི་བཀག་པ་ནི་སྟོང་ཉིད་ཡིན་ནོ། །ཞེས་མི་བརྗོད་དེ་དོན་དམ་པར་ན་དེ་དག་གི་དགག་པ་ནི་དུས་གསུམ་དུ་ཡང་སྒྲུབ་པ་དང་དགག་པའི་ངོ་བོར་བྱ་མི་ནུས་པའི་ཕྱིར་རོ། །འོ་ན་ཅི་ཞེ་ན། དངོས་པོ་ཉིད་དུ་སྒྲོ་བཏགས་པ་དེ་དོགས་ པར་བཅས་པ་འགོག་པ་ཡིན་ནོ། །ཞེས་དང༌། མཇུག་སྡུད་ཀྱི་རྒྱུ་མེད་དང༌། སོ་སོ་བ་དང༌། འདུས་པ་དང་གཞན་ནས་འོངས་བ་རྣམས་ཀྱིས་རིམ་པ་ལྟར་རྒྱུ་མེད་དུ་སྨྲ་བ་དང༌། དབང་ཕྱུག་པ་དང༌། རྒོལ་བ་གཞན་དང༌། དུས་འཕོ་བར་སྨྲ་བ་རྣམས་འགོག་པ་བསྡུས་པར་བཤད་ཅིང༌། སྒྱུ་མས་སྤྲུལ་པ་སོགས་ཀྱི་གཞུང་ཡང་འདི་ཉིད་ཀྱི་སྒྲུབ་བྱེད་དུ་བཀོད་དོ། །གཉིས་པ་ཡོད་མེད་སྐྱེ་འགོག་གི་གཏན་ཚིགས་ལ། རྟགས་ཀྱི་རང་བཞིན་དང༌། ཚད་མས་ངེས་པའི་དོན་གཉིས་ལས། དང་པོ་རྟགས་ཀྱི་རང་བཞིན་ནི། སྒྱུ་མས་སྤྲུལ་པ་གང་ཡིན་དང༌། །རྒྱུ་རྣམས་ཀྱིས་ནི་ གང་སྤྲུལ་པ། །དེ་ནི་གང་ནས་འོངས་གྱུར་ཅིང༌། །གང་དུ་འགྲོ་བའང་བརྟག་པར་གྱིས། །གང་ཞིག་གང་ནི་ཉེ་བ་ཡིས། །མཐོང་འགྱུར་དེ་མེད་ན་མིན་པ། །བཅོས་བུ་གཟུགས་བརྙན་དང་མཚུངས་པ། །དེ་ལ་བདེན་གཉིས་ཇི་ལྟར་ཡོད། ། དངོས་པོ་ཡོད་པར་གྱུར་པ་ལ། །རྒྱུ་ཡིས་དགོས་པ་ཅི་ཞིག་ཡོད། །འོན་ཏེ་དེ་ནི་མེད་ན་ཡང༌། །རྒྱུ་ཡི་དགོས་པ་ཅི་ཞིག་ཡོད། །བྱེ་བ་ཕྲག་བརྒྱའི་རྒྱུ་ཡིས་ཀྱང༌། །དངོས་པོ་མེད་པ་བསྒྱུར་དུ་མེད། །གནས་སྐབས་དེ་དངོས་ཇི་ལྟར་ཡིན། །དངོས་གྱུར་ གཞན་ཡང་གང་ཞིག་ཡིན། །མེད་ཚེ་དངོས་ཡོད་སྲིད་མིན་ན། །དངོས་པོ་ཡོད་པར་ནམ་ཞིག་འགྱུར། །དངོས་པོ་སྐྱེ་བར་མ་གྱུར་བར། །དངོས་མེད་དེ་ནི་འབྲལ་མི་འགྱུར། །དངོས་མེད་དེ་དང་མ་བྲལ་ནའང༌། །དངོས་པོ་ཡོད་པའི་སྐབས་མི་སྲིད། །དངོས་པོའང་

Page: 906 མེད་པར་འགྱུར་མིན་ཏེ། །རང་བཞིན་གཉིས་སུ་ཐལ་འགྱུར་ཕྱིར། །ཞེས་གསུངས་ཏེ། ཚིགས་བཅད་དང་པོས་སྒྱུ་མ་ལྟར་འགྲོ་འོང་གནས་པ་མེད་པར་བསྟན། གཉིས་པས་གཟུགས་བརྙན་ལྟར་མི་བདེན་པར་བསྟན། དེ་ནས་ཚིགས་བཅད་ཕྱེད་དང་གཉིས་ ཀྱིས་ཡོད་མེད་གང་ཡིན་ཡང་རྒྱུ་མི་དགོས་པར་བསྟན། ལྷག་མས་དངོས་མེད་དངོས་པོར་འགྱུར་བ་དང་དངོས་པོ་དངོས་མེད་དུ་འགྱུར་བ་བཀག་པའོ། །གཉིས་པ་ཚད་མས་ངེས་པའི་དོན་ཡང༌། དེ་ལྟར་འགག་པ་ཡོད་མིན་ཞིང༌། །དངོས་པོའང་ཡོད་མིན་དེ་ཡི་ཕྱིར། །འགྲོ་བ་འདི་དག་ ཐམས་ཅད་ནི། །རྟག་ཏུ་མ་སྐྱེས་མ་འགགས་ཉིད། །འགྲོ་བ་རྨི་ལམ་ལྟ་བུ་སྟེ། །རྣམ་པར་དཔྱད་ན་ཆུ་ཤིང་འདྲ། །མྱ་ངན་འདས་དང་མ་འདས་པའང༌། །དེ་ཉིད་དུ་ནི་ཁྱད་པར་མེད། །ཅེས་གསུངས་ཏེ། དང་པོས་ཆོས་ཐམས་ཅད་སྐྱེ་འགགས་མེད་པར་བསྟན། ཕྱི་མས་འཁོར་འདས་མི་དམིགས་པར་བསྟན་ཏོ། །དེ་ཡང་སྒྱུ་མའི་སྔགས་སོགས་ཀྱིས་སྤྲུལ་པའི་སྒྱུ་མའི་སྣང་བ་གང་ཡིན་པ་དང་རྒྱུ་མཚན་ཉིད་པར་རློམ་པའི་རྒྱུ་རྐྱེན་གྱིས་ནི་གང་སྤྲུལ་པའི་དངོས་པོར་སྣང་ཙམ་པ་འདི་ལ་ནི་ཁྱད་པར་ཅུང་ཟད་ཀྱང་མེད་དེ། དེ་གཉི་གའང་ ནི་གང་ནས་འོངས་བར་གྱུར་ཅིང་གང་དུ་འགྲོ་བ་དང་ད་ལྟ་ཇི་ལྟར་གནས་པའང་བརྟག་པར་གྱིས་ཤིག་དང་དེ་དག་གང་ཡང་རྙེད་པར་མི་འགྱུར་རོ། །དེས་ན་དངོས་པོ་གང་ཞིག་མེ་ལོང་དང་གཟུགས་ཉེ་བ་ན་གཟུགས་བརྙན་ལྟར་རྒྱུ་རྐྱེན་གང་ནི་ཉེ་བ་ཡིས་མཐོང་བར་འགྱུར་ལ། རྒྱུ་རྐྱེན་ཉེ་བ་དེ་མིན་ན་མཐོང་ བ་མིན་པ་ཟློས་གར་མཁན་གྱི་གླང་པོ་ཆེ་ལྟ་བུ་བཅོས་བུར་བྱས་པ་དང༌། མེ་ལོང་གི་གཟུགས་བརྙན་དང་མཚུངས་པ་དཔྱད་མི་བཟོད་ཅིང་མ་བརྟགས་ན་ཉམས་དགའ་བ་ཙམ་དེ་ལ་བདེན་པ་ཉིད་ཇི་ལྟར་ཡོད། ཆོས་གང་ཡོད་པའང་རྒྱུ་ལ་མི་ལྟོས་ཤིང་མེད་པའང་རྒྱུ་ལ་མི་ ལྟོས་ཏེ། དངོས་པོ་ཡོད་པར་གྱུར་པ་ལ། །རྒྱུ་ཡིས་དགོས་པ་ཅི་ཞིག་ཡོད། །འོན་ཏེ་དེ་ནི་མེད་ན་ཡང༌། །རྒྱུ་ཡིས་དགོས་པ་ཅི་ཞིག་ཡོད། །བྱེ་བ་བརྒྱ་ཕྲག་རྒྱུ་ཡིས་ཀྱང༌། །དངོས་པོ་མེད་པ་བསྒྱུར་དུ་མེད། །གལ་ཏེ་དངོས་པོ་མེད་པའི་གནས་

Page: 907 ༄༅། །སྐབས་ཉིད་ཕྱིས་དངོས་པོ་འགྱུར་རོ་ཞེ་ན། དངོས་མེད་ཀྱི་གནས་སྐབས་དེ་ཉིད་ཕྱིས་དངོས་པོར་འགྱུར་བ་ཇི་ལྟར་ཡིན་ཏེ། ནམ་མཁའི་པདྨ་ཕྱིས་ཆུ་ནང་གི་ཨུཏྤ་ལར་མི་འགྱུར་བ་བཞིན་ནོ། །དེ་མི་འགྱུར་ཡང་གནས་སྐབས་གཞན་ ཞིག་དངོས་པོར་འགྱུར་རོ་ཞེ་ན། དངོས་པོར་འགྱུར་བའི་གནས་སྐབས་གཞན་ཡང་གང་ཞིག་ཡིན་ཏེ། དངོས་པོ་དང་དངོས་མེད་གང་ཡང་མ་ཡིན་པ་དེ་འདྲ་བ་མི་སྲིད་པའི་ཕྱིར། དེས་ན་དངོས་པོ་ཡོད་མེད་དང་དེའི་གནས་སྐབས་དང་དེ་ལས་གཞན་པའང་དངོས་པོར་ འགྱུར་བ་མེད་པ་དེའི་ཚེ་དངོས་པོ་ཡོད་པའང་སྲིད་པ་མིན་ན་སྔར་ནས་དངོས་པོར་ཡོད་པ་ཞིག་སྐྱེ་བར་ནམ་ཞིག་འགྱུར་ཏེ། རི་བོང་གི་རྭ་ཙམ་སྲིད་པ་མིན་ན་རི་བོང་དཀར་པོའི་རྭ་ཤེལ་ལྟར་དྭངས་པ་སྐྱེ་བ་ལྟ་ག་ལ་ཡོད། གཞི་གཅིག་ལ་བལྟོས་ཏེ་དངོས་པོ་སྐྱེ་བར་ མ་གྱུར་པ་དེ་སྲིད་ཏུ་དངོས་མེད་དེ་ནི་འབྲལ་བ་མི་འགྱུར་ལ། དངོས་མེད་དང་མ་བྲལ་ན་ནི་དེ་ལ་དངོས་པོ་ཡོད་པའི་སྐབས་ཀྱང་མི་སྲིད་དོ། །དེས་ན་དངོས་པོ་ནི་སྔར་ཡོད་པ་ལས་ཕྱིས་མེད་པར་འགྱུར་བ་མིན་ལ། འང་གི་སྒྲས་སྔར་མེད་པ་ལས་ཕྱིས་ཡོད་པར་འགྱུར་བའང་ མིན་ཏེ། དངོས་པོ་གཅིག་ཉིད་ཡོད་མེད་ཀྱི་རང་བཞིན་གཉིས་སུ་སྟེ་གཉི་གར་དུ་ཅིག་ཆར་ཐལ་བར་འགྱུར་བའི་ཕྱིར། དེ་ལྟར་སྐྱེ་བ་མེད་པས་འགག་པ་དང༌། གནས་པ་ཡང་ཡོད་པ་མིན་ཞིང༌། སྐྱེ་འགག་མེད་པས་དངོས་པོ་འདུས་བྱས་ཡོད་པ་མིན་ལ། འང་གི་སྒྲས་དེའི་བལྟོས་ ཟླ་འདུས་མ་བྱས་སམ་དངོས་མེད་ཀྱང་ཡོད་པ་མིན་ལ། དེ་དག་ལས་གཞན་པ་ཡང་ཡོད་པ་མིན་པ་དེའི་ཕྱིར་ན། འགྲོ་བ་འདི་དག་ཐམས་ཅད་ནི། །རྟག་ཏུ་མ་སྐྱེས་མ་འགགས་ཉིད། །འགྲོ་བ་རྨི་ལམ་ལྟ་བུ་སྟེ། །ཆུ་ཤིང་བཞིན་དུ་སྙིང་པོ་མེད། །མྱ་ངན་ འདས་དང་མ་འདས་པ། །དེ་ཉིད་དུ་ན་ཁྱད་པར་མེད། །དེས་ན་ཇི་ལྟར་རྨི་ལམ་གྱི་ཆུ་དང་སྐམ་ས་ལྟར་འཁོར་བ་དང་མྱ་ངན་ལས་འདས་པ་ཡང་སྒྲོ་བཏགས་པ་གཉེན་པོའི་རྣམ་པར་རྟོག་པ་ཙམ་སྟེ། ཆོས་ཐམས་ཅད་ནི་རྟག་ཏུ་བློ་ལས་འདས་པ་སྨྲ་བསམ་བརྗོད་དུ་མེད་པ་

Page: 908 ངོ་བོ་ཉིད་ཀྱིས་གཟོད་མ་ནས་རྣམ་པར་དག་པ་ཁོ་ནའོ། །དགེ་བའི་ལྷས། ཆུ་ཤིང་གཤག་ཅིང་ཕྱེ་ནས་བརྟགས་ན་སྙིང་པོ་མི་རྙེད་པ་ལྟར། ཞེས་སྣང་ཡང་ཆུ་ཤིང་གཤག་ན་ནང་ཁོང་སྟོང་ཡིན་པས་སྙིང་པོ་མེད་པར་འཆད་པ་ཡིན་གྱི། ཆ་ཤས་ཕྱེ་ནས་སྙིང་པོ་མི་རྙེད་པ་ ཁོ་ན་ནི་ཤིང་གཞན་ལ་ཡང་མཚུངས་པས་དེ་ལྟ་ན། ཆུ་ཤིང་སྙིང་པོ་མེད་དོ་ཞེས། །འཇིག་རྟེན་ན་ནི་དཔེར་བྱེད་ཀྱང༌། །ཞེས་སོགས་ཆུ་ཤིང་ངེས་བཟུང་དུ་བྱས་པའི་དགོས་པ་འཇིག་པར་འགྱུར་རོ། །ཤེར་ལེའི་འགྲེལ་ཆུང་ལས། དེ་ལྟར་སྐྱེ་བ་བཀག་ནས་དེ་ ལྟར་སོགས་ཀྱིས་འཇིག་པ་འགོག་པ་ཞེས་བཤད་དོ། །ལྔ་པ་སྟོང་ཉིད་བསྒོམས་པའི་འབྲས་བུ་ལ་གསུམ། ཉོན་མོངས་ཀྱིས་མི་འཕྲོགས་པས་སྲིད་པ་ལས་འདའ་བ་དང༌། མ་རྟོགས་པ་ལ་སྙིང་རྗེ་སྐྱེ་བས་ཞི་བར་མི་ལྟུང་བ་སྟེ། རང་དོན་གྱི་ཡོན་ཏན་གཉིས་དང༌། སེམས་ཅན་ཐམས་ཅད་སྐྱོབ་པ་གཞན་དོན་གྱི་ཡོན་ཏན་ནོ། །དང་པོ་ཉོན་མོངས་ཀྱིས་མི་འཕྲོགས་པས་སྲིད་པ་ལས་འདའ་བ་ནི། དེ་ལྟར་སྟོང་པའི་དངོས་རྣམས་ལ། །ཐོབ་པ་ཅི་ཡོད་ཤོར་ཅི་ཡོད། །གང་གིས་རིམ་གྲོ་བྱས་པའམ། །ཡོངས་སུ་བརྙས་པའང་ཅི་ཞིག་ཡོད། །བདེའམ་སྡུག་བསྔལ་གང་ལས་ཡིན། །མི་དགར་ ཅི་ཡོད་དགར་ཅི་ཡོད། །དེ་ཉིད་དུ་ནི་བཙལ་བྱས་ན། །གང་ཞིག་སྲེད་ཅིང་གང་ལ་སྲེད། །དཔྱད་ན་གསོན་པའི་འཇིག་རྟེན་འདི། །གང་ཞིག་འདིར་ནི་འཆི་འགྱུར་ཏེ། །འབྱུང་འགྱུར་གང་ཡིན་བྱུང་གྱུར་གང༌། །གཉེན་གང་བཤེས་ཀྱང་གང་ཞིག་ཡིན། ། ཐམས་ཅད་ནམ་མཁའ་འདྲ་བར་ནི། །བདག་འདས་ཡོངས་སུ་བཟུང་བར་གྱིས། །ཞེས་གསུངས་ཏེ། ཚིགས་བཅད་ཕྱེད་དང་གཉིས་ཀྱིས་འདོད་པའི་ཆོས་བརྒྱད་ཀྱིས་མི་གཡོ་བར་བསྟན། གཅིག་གིས་འཁོར་བའི་རྒྱུ་ཁམས་གསུམ་གྱི་སྲེད་པའི་དངོས་གཉེན་དུ་ བསྟན། ཐ་མས་ཐམས་ཅད་ནམ་མཁའ་ལྟར་མཐོང་བར་བསྟན་པའོ། །གཉིས་པ་ནི། བདག་ཉིད་བདེ་བར་འདོད་རྣམས་ནི། །འཐབ་དང་སྤྲོ་བའི་རྒྱུ་དག་གིས། །རབ་ཏུ་འཁྲུག་དང་དགའ་བར་བྱེད། །མྱ་ངན་འབད་རྩོལ་རྩོད་པ་དང༌། །ཕན་ཚུན་གཅོད་དང་

Page: 909 ༄༅། །འབིགས་པ་དང༌། །སྡིག་པ་དག་གིས་ཚེགས་ཆེན་འཚོ། །བདེ་འགྲོར་ཡང་དང་ཡང་འོངས་ཏེ། །བདེ་བ་མང་པོ་སྤྱད་སྤྱད་ནས། །ཤི་ནས་ངན་སོང་སྡུག་བསྔལ་ནི། །ཡུན་རིང་མི་བཟད་རྣམས་སུ་ལྟུང༌། །སྲིད་པ་ན་ནི་གཡང་ས་ མང༌། །དེར་ནི་དེ་ཉིད་མིན་འདི་འདྲ། །དེར་ཡང་ཕན་ཚུན་འགལ་བས་ན། །སྲིད་ན་དེ་ཉིད་འདི་འདྲ་མེད། །དེར་ཡང་དཔེ་མེད་མི་བཟད་པའི། །སྡུག་བསྔལ་རྒྱ་མཚོ་མཐའ་ལས་འདས། །དེར་ནི་དེ་ལྟར་སྟོབས་ཆུང་ཞིང༌། །དེར་ནི་ཚེ་ཡང་ཐུང་བ་ཉིད། །དེར་ཡང་ གསོན་དང་ནད་མེད་ཀྱི། །བྱེད་དང་བཀྲེས་ནའི་ངལ་བ་དང༌། །གཉིད་དང་འཚེ་བ་དེ་བཞིན་དུ། །བྱིས་དང་འགྲོགས་པ་དོན་མེད་ཀྱིས། །ཚེ་ནི་དོན་མེད་མྱུར་འདའ་ཡིས། །རྣམ་དཔྱོད་ཤིན་ཏུ་རྙེད་པར་དགའ། །དེར་ཡང་རྣམ་གཡེང་གོམས་པ་ནི། །ཟློག་ པའི་ཐབས་ནི་ག་ལ་ཡོད། །དེར་ཡང་ངན་སོང་ཆེན་པོར་ནི། །ལྟུང་ཕྱིར་བདུད་ནི་བརྩོན་པར་བྱེད། །དེར་ནི་ལོག་པའི་ལམ་མང་ཞིང༌། །ཐེ་ཚོམ་ལས་ཀྱང་བརྒལ་དཀའ་སྟེ། །སླར་ཡང་དལ་བ་རྙེད་དཀའ་ཞིང༌། །སངས་རྒྱས་འབྱུང་རྙེད་ཤིན་ཏུ་དཀའ། ། ཉོན་མོངས་ཆུ་བོ་སྤང་དཀའ་སྟེ། །ཀྱེ་མ་སྡུག་བསྔལ་བརྒྱུད་པར་འགྱུར། །ད་ལྟར་ཤིན་ཏུ་སྡུག་བསྔལ་ཡང༌། །རང་སྡུག་མི་མཐོང་གང་ཡིན་པ། །སྡུག་བསྔལ་ཆུ་བོར་གནས་འདི་དག །ཀྱེ་ཧུད་མྱ་ངན་བྱ་བར་འོས། །དཔེར་ན་འགའ་ཞིག་ཡང་ཡང་ ཁྲུས། །བྱས་ཏེ་ཡང་ཡང་མེར་འཇུག་པ། །དེ་ལྟར་ཤིན་ཏུ་སྡུག་བསྔལ་བར། །གནས་ཀྱང་བདག་ཉིད་བདེར་རློམ་བཞིན། །དེ་ལྟར་རྒ་དང་འཆི་མེད་པ། །བཞིན་དུ་སྤྱོད་པས་གནས་རྣམས་ལ། །དང་པོ་ཉིད་དུ་བསད་བྱས་ནས། །ངན་སོང་ལྟུང་བ་ མི་བཟད་འོང༌། །ཞེས་གསུངས་ཏེ། ཚིགས་བཅད་ཕྱེད་དང་གཉིས་ཀྱིས་སྡིག་སྤྱོད་ལ་སྙིང་བརྩེ་བ། དེ་ནས་གཅིག་གིས་མཐོ་རིས་པ་རྣམས་ལ་སྙིང་བརྩེ་བ། ཚིགས་བཅད་ཕྱེད་དང་གཉིས་ཀྱིས་འཁོར་བ་ཐམས་ཅད་སྡུག་བསྔལ་དུ་བསྟན་པ།

Page: 910 དེ་ནས་གཉིས་ཀྱིས་མིར་སྐྱེས་ཀྱང་རྣམ་དཔྱོད་འདི་ལྟ་བུ་རྙེད་དཀའ་བར་བསྟན། དེ་ནས་ཕྱེད་དང་གཉིས་ཀྱིས་རྙེད་ཀྱང་བདུད་ཀྱི་ལས་ལྡོག་དཀའ་བར་བསྟན། ལྷག་མས་དེ་ལྟ་བུའི་སེམས་ཅན་འདི་རྣམས་ཤིན་ཏུ་སྙིང་རྗེའི་ཡུལ་དུ་བསྟན་ཏོ། །གསུམ་ པ་ནི། དེ་ལྟར་སྡུག་བསྔལ་མེས་གདུངས་ལ། །བསོད་ནམས་སྤྲིན་ལས་ལེགས་བྱུང་བའི། །རང་གིས་བདེ་བའི་ཚོགས་ཆར་གྱིས། །ཞི་བྱེད་པར་བདག་ནམ་ཞིག་འགྱུར། །ནམ་ཞིག་དམིགས་པ་མེད་ཚུལ་དུ། །གུས་པར་བསོད་ནམས་ཚོགས་བསགས་ ཏེ། །དམིགས་པས་ཕུང་བར་གྱུར་རྣམས་ལ། །སྟོང་པ་ཉིད་ནི་སྟོན་པར་འགྱུར། །ཞེས་གསུངས་ཏེ། དང་པོས་སེམས་ཅན་གྱི་ཕན་བདེའི་རྟེན་དུ་འགྱུར་བ་དང༌། གཉིས་པས་ཆོས་ཀྱི་འཁོར་ལོ་བསྐོར་བས་འགྲོ་ཀུན་བྱང་ཆུབ་ལ་འགོད་པར་བསྟན་ཏོ། །དེ་ཡང་ ཀུན་རྫོབ་བྱང་ཆུབ་ཀྱི་སེམས་ཀྱི་མྱུ་གུ་ལྟ་བུ་གོམས་པར་བྱས་པས་དོན་དམ་པའི་བྱང་ཆུབ་ཀྱི་སེམས་སྙེ་མ་ལྟ་བུ་སྐྱེ་བར་འགྱུར་ལ། དངོས་འཛིན་གྱི་ནད་ཐམས་ཅད་རྩ་བ་ནས་འབྱིན་པའི་གཉེན་པོ་སངས་རྒྱས་ཐམས་ཅད་ཀྱི་ཆོས་ཀྱི་སྙིང་པོ་ཟབ་མོ་ཤེས་རབ་ཀྱི་ཕ་རོལ་ཏུ་ཕྱིན་པ་ དོན་དམ་པའི་བྱང་ཆུབ་ཀྱི་སེམས་སྤྲོས་པ་ཐམས་ཅད་ཉེ་བར་ཞི་བ་དེ་ཁོ་ན་ཉིད་དེ་ལྟར་དུ་གོམས་པ་ན་ཆོས་ཐམས་ཅད་ཀྱི་རང་བཞིན་གཟོད་ནས་རྣམ་པར་དག་པ་སྨྲ་བསམ་ཤེས་བརྗོད་ཀྱི་ཡུལ་མ་ཡིན་པ་ཉིད་དེ་ལྟར་དུ་མཐོང་བར་འགྱུར་ལ། དེའི་ཚེ་སྣང་གྲག་ཙམ་གྱི་ཆོས་འདི་ ཐམས་ཅད་ནི་རང་བཞིན་གྱིས་སྟོང་པའི་དངོས་པོ་རྨི་ལམ་གྱི་སྣང་བ་ལྟར་ཁོང་དུ་ཆུད་པས་གཟུགས་བརྙན་ཙམ་གྱི་ཆོས་འདི་རྣམས་ལ། འདོད་པ་དང༌། མི་འདོད་པ་དང༌། རེ་བ་དང༌། དོགས་པ་དང༌། བླང་བ་དང༌། དོར་བའི་བློ་རང་བཞིན་གྱིས་འཇིག་པར་འགྱུར་ཏེ། དེ་དག་ལ་ནི། ཐོབ་པ་ཅི་ཡོད་ ཤོར་ཅི་ཡོད། །གང་གིས་རིམ་གྲོ་བྱས་པའམ། །ཡོངས་སུ་བརྙས་པ་ཅི་ཞིག་ཡོད། །བདེ་བ་འམ་སྡུག་བསྔལ་གང་ལས་ཡིན། །མི་དགར་ཅི་ཡོད་དགར་ཅི་ཡོད། །དེ་ཆོས་བརྒྱད་ལ་ཆགས་སྡང་ཞར་ལ་འཇིག་པར་འགྱུར་རོ། །བྱིས་པ་རྣམས་གང་ལ་ཞེན་

Page: 911 ༄༅། །པའི་ཡུལ་དེ་དག་ལ་མཁས་པ་རྣམས་ཇི་སྙམ་དུ་ཡང་མི་བྱེད་མོད། འདི་ཙམ་ནི་དེ་དག་ལ་ཡོན་ཏན་ཡང་མ་ཡིན་ཏེ། འཇིག་རྟེན་ན་འཆིང་བ་ཀུན་ལྡན་དུ་མཚུངས་པའི་སྐྱེ་བོ་དག་ཀྱང་བུས་པ་རྣམས་གང་ལ་ཞེན་པའི་བྱེ་མའི་ཁང་བུ་ དང་འཇིམ་པའི་རྟ་གླང་སོགས་ལ་རྒན་པོ་རྣམས་ཅིར་ཡང་མི་སྙམ་པ་སྣང་བའི་ཕྱིར་རོ། །ཡང་དག་པ་དེ་ཁོ་ན་ཉིད་དུ་སོ་སོར་རྟོག་པའི་ཤེས་རབ་ཀྱིས་གཞལ་བྱ་བཙལ་ཞིང་སོ་སོ་རང་རིག་པའི་ཡེ་ཤེས་ཀྱིས་མཉམ་པར་བཞག་པར་བྱས་ན་སྲེད་པ་པོ་གང་ཞིག་ཡུལ་གང་ ལ་སྲེད་ཅིང་རྒྱུ་མཚན་གང་ལས་སྲེད་དེ་རྨི་ལམ་གྱི་སྨིག་རྒྱུ་ལ་རྨི་ལམ་གྱི་རི་དྭགས་སྲེད་པ་ལྟར་ཆོས་ཐམས་ཅད་དེ་ཁོ་ན་ལྟར་མཐོང་བར་འགྱུར་ལ། དེ་ལྟར་ཚུལ་བཞིན་དཔྱད་པ་ན་སྔར་མ་རྟོགས་པའི་དུས་བདེན་བདེན་འདྲ་ཞིང་གསོན་པོ་ལྟར་སྣང་བའི་འཇིག་རྟེན་ གྱི་སྣང་བ་འདི་ཐམས་ཅད་ནི་གང་ཞིག་ཤེས་རབ་དྲི་མ་མེད་པའི་མདུན་འདིར་ནི་འཆི་བའམ་ཤི་བ་ལྟར་འགྱུར་ཏེ་རྫུན་པའི་ཕུགས་སྐད་ཅིག་གིས་དིབ་པར་འགྱུར་ཏེ་བྱ་བ་ཅི་ཡང་མི་བྱེད་དོ། །དེའི་ཚེ་འབྱུང་འགྱུར་མ་འོངས་པ་དེ་གང་ཞིག་ཡིན་ལ། བྱུང་ཟིན་པར་གྱུར་པར་འཛིན་པ་ འདས་པའི་ཆོས་དེ་གང་ཞིག་ཡིན། མཛའ་བའི་གཉེན་བཤེས་དང་ཀྱང་གི་སྒྲས་མི་མཛའ་བར་བཏགས་པ་དགྲ་ཡང་གང་ངམ་སུ་ཞིག་ཡིན་ཏེ་ཆོས་ཐམས་ཅད་ནི་གཟོད་ནས་ངོ་བོ་ཉིད་ཀྱིས་ནམ་མཁའ་དང་འདྲ་བ་དངོས་པོ་མེད་ལ། བསམ་དུ་མེད་པ་མཐའ་དང་ཚད་མི་ དམིགས་པ་གང་དུ་ཡང་མཐོང་དུ་མེད་ལ། ནམ་གྱི་ཚེ་འང་མ་མཐོང་བ་མེད་པ་འདི་ལྟ་བུར་ནི་བྱང་ཆུབ་སེམས་དཔའ་བདག་ཉིད་དང༌། བདག་ཉིད་དང་སྐལ་བ་འདྲ་བའི་བློ་གྲོས་ཅན་རྣམས་ཀྱིས་ཀྱང་ཡོངས་སུ་བཟུང་བར་གྱིས། ཁོང་དུ་ཆུད་པར་གྱིས། ཀུན་ཆུབ་པར་གྱིས། ནན་ཏན་ དུ་གྱིས་ཤིགཞེས་གདམས་ངག་འདོམས་པ་དང་བཅས་པའོ། །འོ་ན་འཁོར་བའི་རྒྱུ་ནི་སྲེད་པ་ཡིན་ལ་སྟོང་ཉིད་བསྒོམས་པས་སྲེད་པ་ལྡོག་པའི་ཕྱིར་ཉན་རང་གི་དགྲ་བཅོམ་དུ་འགྱུར་ལ། དེ་ལྟ་ན་ཉན་རང་ནི་ཐེག་ཆེན་པའི་གཡང་སར་བཤད་པ་དང་འགལ་ལོ་ཞེ་ན།

Page: 912 དེ་ལྟར་འཁོར་བ་གཞི་རྩ་དང་བཅས་པ་ཁོང་དུ་ཆུད་པས་མྱ་ངན་ལས་འདས་པ་ལག་མཐིལ་དུ་འོངས་པ་ཡིན་མོད་ཀྱང་དེ་ལ་རྡུལ་ཕྲ་རབ་ཙམ་དུ་ཡང་རྩི་བར་མི་བྱེད་དེ། ཆོས་ཐམས་ཅད་གཟོད་མ་ནས་མྱ་ངན་ལས་འདས་པ་ངོ་བོ་ཉིད་ཀྱིས་བྱང་ཆུབ་པ་ཁོ་ན་ཉིད་དུ་མཐོང་བས་གསེར་ གྱི་རི་བདུན་གྱི་ངོས་སུ་སོན་པའི་མིས་ར་གན་གྱི་དུམ་བུ་ལ་གསེར་དུ་གུས་པ་མི་སྐྱེད་པ་བཞིན་ནོ། །དེ་ལྟ་མོད་ཀྱི་དེ་ལྟར་མ་རྟོགས་པའི་སེམས་ཅན་ལ་སྙིང་རྗེ་ཆེན་པོ་ཁོ་ན་བཟོད་མེད་དུ་འཇུག་ཅིང་དེའི་ཚེ་ཡང་སེམས་ཅན་དང་སྡུག་བསྔལ་དུ་ཅུང་ཟད་ཀྱང་དམིགས་པ་མེད་ལ། དེ་ ཙམ་གྱིས་བཟློགས་སུ་མེད་པའི་སྙིང་རྗེ་ཆེན་པོ་ཁོ་ན་འཕེལ་བར་འགྱུར་བ་སྟེ། བྱང་ཆུབ་སེམས་དཔའ་རྣམས་ཀྱི་ཚུལ་ཆེན་པོ་འདི་ལྟ་བུ་ནི་རང་ཅག་བྱིས་པའི་སྐྱེ་བོ་རྣམས་ཀྱིས་ཡིད་ཆེས་པ་དང་མོས་པ་ལྟ་ཞོག་མཉན་པ་ཙམ་དུ་ཡང་དཀའ་སྟེ། སྟོད་ནས་མེ་འབར་ཞིང༌། སྨད་ནས་ ཆུ་འབྲུབ་པའི་ཡ་མ་ཟུང་གི་ཆོ་འཕྲུལ་བྱེ་བ་བརྒྱ་ཕྲག་གིས་བསྒྲུན་དུ་མེད་པའི་ཆོ་འཕྲུལ་ཡ་མ་ཟུང་རྨད་དུ་བྱུང་བ་ནི་འདི་ཡིན་ནོ། །དེ་ལྟ་མོད་ཀྱིས་མ་རྒན་སྨྱོན་པ་ལྟ་བུ་ཅི་བྱ་མཚང་བརླག་པ་འདི་རྣམས་ཀྱི་ངང་ཚུལ་ལ་བལྟས་ན་བདག་ཅག་བྱིས་པར་མཚུངས་པ་འདི་ རྣམས་ཀྱང་གཅིག་ལ་གཅིག་སྙིང་རྗེས་བཟོད་མི་ནུས་པར་སྣང་ན་བསྐལ་པ་མཐའ་ཡས་པར་བྱམས་པ་དང་སྙིང་རྗེ་ལ་གོམས་པ་བདག་གི་བདེ་བ་ལ་བལྟོས་པ་རྣམ་པ་ཐམས་ཅད་དུ་སྤངས་པ་སྐུ་གསུང་ཐུགས་ཡོན་ཏན་ཕྲིན་ལས་ཐམས་ཅད་སེམས་ཅན་ཁོ་ནའི་ཆེད་དུ་བཟུང་བ་ དེ་རྣམས་ཀྱི་སྙིང་རྗེ་ཆེན་པོའི་ཆུ་ཀླུངབགྲང་དུ་མེད་པ་འབད་པ་དང་རྟོག་པ་མེད་པར་རང་བཞིན་གྱིས་འབབ་པ་རྒྱུན་མི་འཆད་པ་བྲི་གང་དུ་མི་མངོན་པ་རྟག་ཆད་ཀྱི་འགྲམ་ངོགས་སྤངས་པ་ཟག་མེད་ཀྱི་ཡོན་ཏན་མཐའ་ཡས་པའི་རིན་པོ་ཆེས་དང་བ་སྐྱེ་འགྲོ་ཐམས་ཅད་ཀྱི་རྟེན་ གནས་གཅིག་པུ་པར་གྱུར་པ་དེ་དག་གི་བརླབས་ཕྲེང་ཅིའི་ཕྱིར་མི་གཡོ། དེ་ཡང་བདག་ཅག་གི་ཕ་མའི་ཚོགས་འདི་རྣམས་བདག་ཉིད་བདེ་བར་འདོད་པས་སྡིག་པའི་ལས་མི་བྱེད་པ་ཅི་ཡང་མེད་དེ། བདག་འགྲན་ཟླ་མེད་པར་འདོད་པས་ཕ་རོལ་པོ་གསོད་པར་བྱེད་ལ། རྒྱུ་དེས་

Page: 913 ༄༅། །བདག་ཉིད་སྐྱེ་བ་མཐའ་ཡས་པར་དམྱལ་བ་ཡང་སོས་སུ་སྐྱེ་བས་ཉིན་རེ་ལ་ལན་ཁྲི་ཕྲག་ཏུ་ཕན་ཚུན་གསོད་པ་མྱོང་ལ། དེ་ལས་ཐར་ནས་ཀྱང་གང་དུ་སྐྱེས་པར་ཚེ་ཐུང་ཞིང་ནད་མང་ལ་གཞན་གྱིས་གསོད་པར་བྱེད་པ་ཁོ་ན་མྱོང་ལ། ད་དུང་བྱེད་པ་རྒྱུ་ མཐུན་ལ་སྤྱོད་པས་སྲོག་གཅོད་པ་ལ་དགའ་ཞིང་མོས་པས་དེ་ལས་ལྡོག་པར་དཀའ་ཞིང་ཡང་དེའི་རྣམ་སྨིན་གྱི་འབྲས་བུས་དམྱལ་བ་སོགས་སུ་ཟོ་ཆུན་གྱི་རྒྱུན་ལྟར་འཁོར་ཏེ་སྡུག་བསྔལ་ལས་ཐར་དུས་མེད་དོ། །ཁ་ཅིག་ནི་ཕྱུག་ཅིང་འབྱོར་བར་འདོད་ནས་གཞན་གྱི་ ལོངས་སྤྱོད་འཕྲོག་པ་དང་རྐུ་བས་མ་བྱིན་པར་ལེན་ལ། དེའི་རྣམ་སྨིན་གྱི་འབྲས་བུ་དམྱལ་བ་དང༌། ཡི་དྭགས་ཀྱི་གནས་གྲངས་མེད་པར་སྡུག་བསྔལ་གྱི་དམྱལ་ཐག་བཅད་ནས་གཞན་གང་དུ་སྐྱེས་པ་དེར་ཡང་དབུལ་ཞིང་འཕོངས་ལ་ཡོ་བྱད་རྐུ་འཕྲོག་ལ་འཆོར་བ་ཁོ་ན་དང༌། མེ་ཆུས་ཆུད་ འཛའ་བ་སོགས་རང་ལ་ཕན་མི་ཐོགས་ཤིང་གནས་མིན་དུ་གོད་པ་ཤ་སྟག་འབྱུང་ལ། བག་ཆགས་ཀྱི་དབང་གིས་གང་དུ་སྐྱེས་ན་ཡང་མ་བྱིན་པར་ལེན་པ་ལ་མོས་ཤིང་ལྡོག་པར་དཀའ་ལ་ཡང་དེའི་རྣམ་སྨིན་གྱི་འབྲས་བུ་མྱོང་བ་སོགས་རྒྱུན་མི་འཆད་པར་འཁོར་རོ། །དེ་བཞིན་ དུ་སྤོང་བ་བདུན་ག་ལ་འདི་ལྟ་བུར་ཤེས་པར་བྱ་སྟེ། ཚེ་འདིའི་དེ་རིང་ཕྱིན་གྱི་ཟས་གོས་ལོངས་སྤྱོད་ཐམས་ཅད་བཙོངས་ནས་རེག་དུག་ཐུན་གཅིག་ཉོས་ནས་རང་ལུས་ལ་འབྱུག་པ་ལྟར་ཚེ་འདིའི་བདེ་བ་ལྟར་སྣང་སྣ་རེ་རེའི་ཆེད་དུ་འདི་ཕྱིན་གྱི་སྐྱེ་བ་འབུམ་དང་བྱེ་བ་དང་ཁྲག་ཁྲིག་མཐའ་ ཡས་པའི་བདེ་སྐྱིད་ཐམས་ཅད་འཚོང་བ་ཁོ་ན་ཡིན་ནོ། །དེ་བཞིན་དུ་སྐྱེ་བ་གཏན་གྱི་ཕ་མ་ཐམས་ཅད་འཁོར་བའི་སྡུག་བསྔལ་དར་དྲག་ཡུན་རིང་མཐའ་མེད་དུ་མྱོང་བ་འདི་ལ་མྱ་ངན་མི་བྱེད་ལ་ཚེ་གཅིག་པོ་འདིའི་ཉེ་དུར་བཟུང་བ་མགྲོན་ཁང་དུ་ཞག་གཅིག་ཚོགས་པའི་མགྲོན་པོ་ ཙམ་པ་འདིའི་གཅིག་ཤི་བ་ན་མྱ་ངན་གྱིས་འགྲེ་ལྡོག་པ་དང༌། ལོངས་སྤྱོད་ཀྱི་རྒྱུ་སྦྱིན་པ་ལ་མི་འབད་པར་དོན་མེད་ཏུ་ཚོང་ལ་སོགས་པས་ཐང་ཤ་ཆད་པར་འབད་ལ། ཟས་གོས་ཙམ་ཞིག་གི་ཆེད་ཏུ་མི་བྱ་བ་མེད་པའི་ཚེགས་ཆེན་པོས་ཚོལ་ཞིང་འཚོ་བར་བྱེད་པ་སྟེ།

Page: 914 དེས་ན། བདག་ཉིད་བདེ་བར་འདོད་རྣམས་ནི། །འཐབ་དང་སྤྲོ་བའི་རྒྱུ་དག་གིས། རབ་ཏུ་འཁྲུག་དང་དགའ་བར་བྱེད། །མྱ་ངན་འབད་རྩོལ་རྩོད་པ་དང༌། །ཕན་ཚུན་གཅོད་དང་འབིགས་པ་དང༌། །སྡིག་དག་གིས་ནི་ཚེགས་ཆེན་འཚོ་བ་འདི་རྣམས་ལ་སུ་ཞིག་སྙིང་མི་ བརྩེ། ཡང་རིང་སྲེལ་ཅན་གྱི་མཆོད་རྟེན་ལ་ཕྱག་གཅིག་བྱས་པས་གསེར་གྱི་ས་གཞིའི་བར་དུ་ལུས་ཁྱོན་གྱིས་གང་ཁྱབ་པ་དེའི་བྱེ་མ་ཇི་སྙེད་པ་སྟོང་དུ་བསྒྱུར་བའི་གྲངས་དེ་སྙེད་ཀྱི་འཁོར་ལོས་བསྒྱུར་བ་འཐོབ་པར་གསུངས་པ་ལྟར། དགེ་བའི་ལས་སྣ་རེས་ཀྱང་ལྷ་མིའི་ལུས་འབུམ་ ཕྲག་མང་པོ་འཐོབ་པར་ནུས་པ་ཡོད་ལ། དགེ་བ་དེ་རྣམས་ཆུད་མ་ཟོས་ན་ལྷ་མིའི་ལུས་དེ་སྙེད་འཐོབ་ལ། དེ་རྣམས་སུ་རྒྱལ་སྲིད་ལ་སོགས་པའི་འབྱོར་པ་ཆེན་པོ་མཐའ་ཡས་པ་སྤྱོད་ཅིང་མི་ལོ་འབུམ་ཕྲག་མང་པོར་འཚོ་བར་ནུས་པ་སོགས་འབྱུང་མོད་ཀྱང་སླར་དགེ་བ་ཁྱད་པར་ཅན་མ་ སྐྱེད་ན་སྔར་གྱི་ཕན་བྱེད་ཀྱི་དགེ་བ་དེ་རྣམས་ཟད་པའི་འོག་ཏུ་སླར་ཡང་ངན་འགྲོར་འཁོར་ཞིང་སྡུག་བསྔལ་མི་བཟད་པ་མྱོང་བར་འགྱུར་བ། བདེ་འགྲོར་ཡང་དང་ཡང་འོངས་ཏེ། །བདེ་བ་མང་པོ་སྤྱད་བྱས་ནས། །ཤི་ནས་ངན་སོང་སྡུག་བསྔལ་ནི། །ཡུན་རིང་མི་བཟད་རྣམས་སུ་ལྟུང་ བ་དེ་དག་ལ་ཁྱད་པར་དུ་ཡང་བརྩེ་བར་རིགས་སོ། །དེས་ན་འཁོར་བ་འདི་ནི་གང་ལ་ཡང་ཡིད་བརྟན་པར་མི་ནུས་པ། གཏིང་འཇིགས་པ། ཡ་ང་བ། འཇིགས་སུ་རུང་བའི་གནས་ཁོ་ན་སྟེ་སྲིད་པ་ན་ནི་དེ་འདྲ་བའི་གཡང་ས་མང་ལ་གང་དུ་སྐྱེས་པ་དེར་ཡང་ནི་སྙིང་པོ་ཅན་དེ་ཁོ་ན་ཉིད་མིན་པ་ ལྟུང་ཞིང་འགྱེས་པ་འདི་འདྲ་བ་ཁོ་ནའོ། །གང་དུ་སྐྱེས་པ་དེར་ཡང་བདེ་བ་ལ་ཆགས་ཤིང་སྡུག་བསྔལ་ལ་སྡང་བར་བྱེད་པ་ཕན་ཚུན་འགལ་བའི་བློ་ཁོ་ནའི་གཞན་དབང་དུ་གྱུར་པས་ན་བདེ་བ་འདོད་པའི་ཕྱིར་སྡུག་བསྔལ་སྒྲུབ་པ་ཁོ་ན་ལ་བརྩོན་པར་འགྱུར་གྱི། སྲིད་པ་འདི་ན་ནི་བདེ་སྡུག་ གི་རང་བཞིན་མི་བདེན་པར་ཤེས་པའི་དེ་ཁོ་ན་ཉིད་ལ་འཇུག་པ་འདི་འདྲ་བ་ནི་རྨི་ལམ་ཙམ་ན་ཡང་མེད་དོ། །དེས་ན་རྨི་ལམ་ན་བདེ་སྡུག་དང་མྱོང་བ་པོ་གང་ཡང་མེད་ཀྱང་དེ་ལྟར་མ་རྟོགས་རིང་འཁྲུལ་ངོར་སྣ་ཚོགས་པ་མྱོང་བར་སྣང་བ་ལྟར་འཁོར་བ་གང་དུ་སྐྱེས་པ་དེར་ཡང་དཔེ་མེད་མི་བཟད་

Page: 915 ༄༅། །པའི་སྡུག་བསྔལ་རྒྱ་མཚོ་མཐའ་ལས་འདས་པ་མྱོང་བར་སྣང་སྟེ། སྒྱུ་མའི་གཉེན་དང་བྲལ་བའི་སྡུག་བསྔལ་བཞིན་ནོ། །བདེ་འགྲོ་མཐོ་རིས་པ་རྣམས་ཀྱང་གཉེན་པོའི་སྟོབས་ཆུང་ཞིང་ཚེ་ཐུང་ལ་ཇི་སྲིད་གསོན་པ་དེར་ཡང་ནད་ཀྱིས་མནར་བ་དང་ནད་མེད་པ་ནའང་བྲེལ་ ཕོངས་སྣ་ཚོགས་པས་དུབ་ཅིང་བྱིས་པར་གྱུར་པ་དང༌། འགྲོགས་པ་དང་གཞན་གྱིས་དབང་མེད་དུ་བཀོལ་ཏེ་འགྲོ་བ་སོགས་སྣ་ཚོགས་པར་སྡུག་བསྔལ་བས་དོན་མེད་དུ་ཚེ་ཟད་པར་འགྱུར་གྱི་དམ་པའི་ཆོས་ཀྱི་རྣམ་པར་དཔྱོད་པ་འདི་ལྟ་བུ་ནི་ནམ་ཡང་རྙེད་པར་དཀའ་སྟེ། དེར་ནི་དེ་ལྟར་སྟོབས་ཆུང་ ཞིང༌། །དེར་ནི་ཚེ་ཡང་ཐུང་བ་ཉིད། །དེར་ཡང་གསོན་ནའང་ནད་མེད་ཀྱི། །བྱེད་དང་བཀྲེས་ནའི་ངལ་བ་དང༌། །གཉིད་དང་འཚེ་དང་དེ་བཞིན་དུ། །བྱིས་དང་འགྲོགས་སོགས་དོན་མེད་ཀྱིས། །ཚེ་ནི་དོན་མེད་ཀྱིས་འདའ་ཡི། །རྣམ་དཔྱོད་ཤིན་ཏུ་རྙེད་པར་དཀའ། ། གལ་ཏེ་ཆོས་ལ་འཇུག་པ་ལན་རེ་བརྙེད་སྲིད་ཀྱང་ཚེ་རབས་མཐའ་ཡས་པར་རྣམ་གཡེང་ཁོ་ན་ལ་གོམས་པའི་ཕྱིར། རྣམ་གཡེང་ལས་སེམས་ལྡོག་པར་དཀའ་ཞིང་ཕུང་པོ་ལ་ཆགས་པ་ཕུང་པོའི་བདུད་དང༌། ཉོན་མོངས་པའི་སེམས་ཉོན་མོངས་པའི་བདུད་ཀྱི་དབང་དུ་གྱུར་པས་ངན་ འགྲོར་འཕེན་ལ། མ་རིག་པའི་རྟེན་འབྲེལ་ལས་སྣང་བ་ལྷའི་བུའི་བདུད་ཀྱིས་ཀྱང་དགེ་བའི་བཤེས་གཉེན་ལྟར་བཅོས་ནས་ཆོས་ལྟར་བཅོས་པ་དང༌། ཐེག་པ་ཆེན་པོ་ལྟར་བཅོས་པ་དང་དབུ་མ་ལྟར་བཅོས་པ་དང་གསང་སྔགས་ལྟར་བཅོས་པ་སྣ་ཚོགས་བསྟན་པས་མཐོ་རིས་དང་ ཐར་པའི་གེགས་བྱེད་ལ། ལམ་ལྟར་བཅོས་པ་ཆེས་མང་བ་དེའི་ཕྱིར་ལམ་གྱི་གོལ་ས་མང་ལ། ཡང་དག་པའི་དོན་ལ་ནི་སྐྱེ་བོ་དག་ཡིད་ཆེས་པར་དཀའ་ལ་ལམ་གོལ་བ་ལ་ནི་མོས་པ་མང་བའི་ཕྱིར་ལམ་གྲུབ་པ་ནི་ཆེས་ཉུང་བ་སྟེ། དེར་ཡང་རྣམ་གཡེང་གོམས་པ་ནི། ། ལྡོག་པའི་ཐབས་ནི་ག་ལ་ཡོད། །དེར་ཡང་ངན་སོང་ཆེན་པོར་ནི། །ལྟུང་ཕྱིར་བདུད་ནི་བརྩོན་པར་བྱེད། །དེར་ནི་ལོག་པའི་ལམ་མང་ཞིང༌། །ཐེ་ཚོམ་ལས་ཀྱང་བརྒལ་བར་དཀའ་སྟེའོ། །མི་ལུས་རྙེད་ཅིང་ཆོས་དང་ཕྲད་པའི་དུས་ལོང་བས་ཕྱགས་བདར་གྱི་གསེབ་

Page: 916 ནས་ནོར་བུ་རྙེད་པ་ལྟ་བུ་འདི་ལ་མ་འབད་ན་ཕྱིས་འགྲུབ་པར་དཀའ་སྟེ། སླར་ཡང་དལ་བ་རྙེད་དཀའ་ཞིང༌། །སངས་རྒྱས་འབྱུང་རྙེད་ཤིན་ཏུ་དཀའ། །ཉོན་མོངས་ཆུ་བོ་སྤང་དཀའ་སྟེ། །ཀྱེ་མ་སྡུག་བསྔལ་བརྒྱུད་པར་འགྱུར། །ཞེས་འཁོར་བ་མཐའ་མེད་དུ་འཁྱམ་ དགོས་པའི་དོན་ཏོ། །དེ་ལྟར་སྡུག་བསྔལ་འབའ་ཞིག་གིས་ཐོག་མ་མེད་པ་ནས་སྐད་ཅིག་ཀྱང་བར་མ་ཆད་པར་མནར་ཡང་མི་སྐྱོའི་སྟེང་དུ་སྡུག་བསྔལ་མ་ཐོབ་ཀྱིས་དོགས་པ་ཕྱེ་མ་ལེབ་མེ་ལ་ལྕེབ་པ་ལྟ་བུ་འབའ་ཞིག་ཏུ་གནས་པ་འོན་ཀྱང་བདག་ཉིད་བདེ་བར་རློམ་ཞིང་ང་རྒྱལ་ ལ་འཆི་བ་མེད་པར་རྟག་ཏུ་ཚེ་འདིས་གནས་ཆོག་པ་ཙམ་དུ་འཛིན་པ་འདི་རྣམས་ལ་དང་པོ་ཉིད་དུ་གུད་པས་ནོར་འཇོམས་པ་དང༌། རྒས་པས་ལང་ཚོ་འཇོམས་པ་དང༌། ན་བས་ནད་མེད་པ་འཇོམས་པ་དང༌། འབྲལ་བས་འདུས་པ་འཇོམས་པ་དང༌། འཆི་བས་སྲོག་འཇོམས་པ་རྣམས་ཀྱིས་རིམ་ པར་བསད་ནས་སླར་ངན་སོང་མི་བཟད་པ་མྱོང་དགོས་པ་འདི་རྣམས་ལ་ཐབས་ཇི་ལྟར་བྱས་ན་རུང་ཞེས་བཟོད་མེད་དུ་དགོངས་པ་སྟེ། དེ་ལྟར་ཤིན་ཏུ་སྡུག་བསྔལ་མང༌། །རང་སྡུག་མི་མཐོང་གང་ཡིན་པ། །སྡུག་བསྔལ་ཆུ་བོར་གནས་འདི་དག །ཀྱེ་ཧུད་མྱ་ངན་བྱ་བར་འོས། ། དཔེར་ན་འགའ་ཞིག་ཡང་ཡང་ཁྲུས། །བྱས་ཏེ་ཡང་ཡང་མེར་འཇུག་པ། །དེ་ལྟར་ཤིན་ཏུ་སྡུག་བསྔལ་བར། །གནས་ཀྱང་བདག་ཉིད་བདེར་རློམ་བཞིན། །དེ་ལྟར་རྒ་དང་འཆི་མེད་པ། །བཞིན་དུ་སྤྱོད་པས་གནས་རྣམས་ལ། །དང་པོ་ཉིད་དུ་བསད་བྱས་ནས། ། ངན་སོང་ལྟུང་བ་མི་བཟད་འོང༌། །ཞེས་ཤིན་ཏུ་ཐུགས་རྗེ་བའི་ཚིག་གོ །དེ་ལྟར་ཤེས་རབ་དྲི་མ་མེད་པས་གླང་པོ་ཆེ་ས་སྲུང་གི་བུས་མཚོའི་ཚད་ལོངས་པས་ཇི་མི་སྙམ་པར་འཇུག་པ་ལྟར། འཁོར་བའི་ཚད་ལོངས་པས་སྐྲག་པ་མེད་ཅིང་ཆོས་ཐམས་ཅད་ལ་རང་དབང་དུ་ བྱེད་ཀྱང་བདག་ཉིད་སྙིང་རྗེའི་གཞན་དབང་དུ་གྱུར་པས་དེ་དག་གི་མ་རིག་པ་ལ་སོགས་པ་ནི་སེམས་ཅན་གྱི་གནས་ཚུལ་མ་ཡིན་པ་གློ་བུར་བར་མཁྱེན་པས་གཞོམ་ནུས་པ་དང༌། སེམས་ཅན་གྱི་ཁམས་གཟོད་ནས་དག་པའི་ཕྱིར། བྱང་ཆུབ་ཀྱི་ངོ་བོ་ཉིད་དུ་གནས་པས་ཀུན་ཀྱང་

Page: 917 ༄༅། །བྱང་ཆུབ་ཀྱི་སྐལ་བ་ཅན་དུ་གཟིགས་ཤིང་མ་རིག་པ་གློ་བུར་བ་དེ་སེལ་བ་ལ་དཀའ་བ་མེད་པར་གཟིགས་ནས་སྒྱུ་མ་ལ་སྒྱུ་མར་མ་ཤེས་པས་སྡུག་བསྔལ་བ་ལྟ་བུ་དེ་དག་གི་དོན་དུ་མཐའ་ཡས་པའི་ཐུགས་བསྐྱེད་ཅིང་བསམ་གྱིས་མི་ཁྱབ་པའི་གོ་ཆ་བསྒོ་ བར་མཛད་པ་ནི་ཆོས་ཉིད་ཡིན་ཏེ། དེའི་ཕྱིར། དེ་ལྟར་སྡུག་བསྔལ་མེས་གདུངས་ལ། །བསོད་ནམས་སྤྲིན་ལས་ལེགས་བྱུང་བའི། །རང་གི་བདེ་བའི་འཚོག་ཆས་ཀྱིས། །ཞི་བྱེད་པར་བདག་ནམ་ཞིག་འགྱུར། །ཞེས་ཕན་བདེའི་ཡོ་བྱད་ཐམས་ཅད་ཀྱིས་སེམས་ཅན་ ཐམས་ཅད་གནས་སྐབས་དང༌། མཐར་ཐུག་ཐམས་ཅད་དུ་སྡུག་བསྔལ་སེལ་ཞིང་ཚིམ་པར་བྱེད་པ་དང༌། ནམ་ཞིག་དམིགས་པ་མེད་ཚུལ་དུ། །གུས་པས་བསོད་ནམས་ཚོགས་བསགས་ཏེ། །དམིགས་པས་ཕུང་བར་གྱུར་རྣམས་ལ། །སྟོང་པ་ཉིད་ནི་སྟོན་པར་འགྱུར། ། ཞེས་ཤེས་རབ་དྲི་མ་མེད་པ་ཡེ་ཤེས་ཀྱི་ཚོགས་ལས་མི་གཡོ་བར་ཐབས་ཕ་རོལ་ཏུ་ཕྱིན་པ་ལྔ་རྫོགས་པར་བསྒྲུབས་ཏེ་བླ་ན་མེད་པའི་བྱང་ཆུབ་མངོན་དུ་བྱས་ནས་དམིགས་པ་དང་མཚན་མ་དང་ཞེན་པ་ཁོ་ནས་རང་གཡོས་ཀྱི་འདམ་དུ་རང་ཚུད་པའམ་དར་གྱི་སྲིན་བུ་རང་གི་ ཁ་ཆུས་བཅིངས་པ་ལྟར་སྡུག་བསྔལ་བར་གྱུར་པའི་སེམས་ཅན་འདི་རྣམས་ལ་དམིགས་པ་དང་མཚན་མར་ལྟ་བ་དྲུངས་ནས་འབྱིན་པ་ཤེས་རབ་ཀྱི་ཕ་རོལ་ཏུ་ཕྱིན་པ་སྟོང་པ་ཉིད་ཟབ་མོའི་ཆོས་ཀྱི་འཁོར་ལོ་བསྐོར་ཏེ། རང་རྒྱུད་ཀྱི་ཆོས་སྐུ་མངོན་དུ་བྱེད་པ་ལ་འགོད་པ་དེ་ལྟ་བུར་བདག་ ནམ་གྱི་ཚེ་འགྱུར་ཞིག་གུ་ཞེས་སྨོན་པས་ཐུགས་བསྐྱེད་པ་སྟེ། འདི་ལྟར་ཤེས་པས་སྲིད་པ་ལ་མི་གནས་ཤིང༌། སྙིང་རྗེས་ཞི་བ་ལ་མི་གནས་པ་འདི་ནི་ཐེག་པ་ཆེན་པོ་ཡོངས་སུ་རྫོགས་ཤིང་ཡོངས་སུ་ཚང་བ་ཡིན་ལ། གང་བསྒོམ་པར་བྱ་བ་སྟོང་ཉིད་སྙིང་རྗེ་དང༌། དེ་སྒོམ་པའི་ཕན་ ཡོན་དང༌། དེའི་བྱེད་ལས་ཐམས་ཅད་ཀྱང་ལྷན་ཅིག་ཏུ་བསྟན་པ་ཡིན་ནོ། །འདིར། བདེ་བའི་འཚོག་ཆས་ཀྱིས། ཞེས་བཏོན་ན་འཚོག་ཆས་ནི་ཡོ་བྱད་མཁོ་རྒུའི་དོན་ཡིན་པས་རྫོགས་ལྡན་གྱི་སྤྲིན་ལས་མཁོ་དགུ་འབྱུང་བ་ལྟར་ཞེས་བྱ་ལ། གཞུང་དུ་མར། རང་གི་བདེ་

Page: 918 བའི་ཚོགས་ཆར་གྱིས། །ཞེས་ཡོད་པ་ལྟར་ན་སྤྲིན་ལས་ཆར་འབྱུང་བ་ལྟར་ཞེས་བཤད་པར་བྱའོ། །འདི་རྣམས་སུ་དགེ་བའི་ལྷས་ནི། རྙེད་སོགས་ཆོས་བརྒྱད་དང་སྲེད་པ་ལ་སོགས་པ་ཐམས་ཅད་བརྫུན་ཡིན་ནོ། །ཞེས་བསྟན་པའི་ཕྱིར་དེ་ལྟར་སྟོང་པའི་སོགས་སོ་ཞེས་དང༌། དེ་དག་ཀྱང་སྲེད་པ་ལས་བྱུང་བས་ན་དེ་ཉིད་དུ་ནི་སོགས་དང༌། མི་འཆི་བ་སོགས་ལ་སྲེད་དགོས་སོ་ཞེ་ན། གསོན་པོའི་སོགས་ཏེ་ཞེས་དཔྱད་ན་འཆི་བ་དང་གསོན་པ་མི་འགྲུབ་པའི་དོན་དུ་འབྲུ་གཉེར་ཞིང༌། བྱུང་བ་དང་འབྱུང་འགྱུར་གྱི་ཡུལ་ལ་སྲེད་དོ་ཞེ་ན། འབྱུང་འགྱུར་སོགས་དང༌། གཉེན་བཤེས་སོགས་ལ་སྲེད་དོ་ཞེ་ན། གཉེན་གང་སོགས་དང༌། དེ་ཐམས་ཅད་མ་སྐྱེས་པའི་ཕྱིར་ན་ནམ་མཁའ་ལྟ་བུ་ཡིན་པ་དང༌། གཞུང་འདི་བདག་དང་སྐལ་བ་མཉམ་པའི་དོན་དུ་བྱས་པ་ཡིན་པས་བདག་འདྲ་བས་བཟུང་བར་གྱིས་ཞེས་དང༌། བདེ་བ་དང་སྡུག་བསྔལ་གྱི་སེམས་ ཡོད་དོ་ཞེ་ན། བདག་ཉིད་སོགས་ཀྱིས་དེ་རྣམས་སྒྱུ་མ་ལྟར་བསྟན་པ་དང༌། དེ་ཡང་ཕན་ཚུན་འགལ་བ་སྟེ་ཚ་གྲང་ལ་སོགས་པ་དག་དང་སེམས་ཅན་གཞན་དག་ཀྱང་ཕན་ཚུན་མི་མཐུན་པར་གྱུར་པས་གནས་པ་ན་སྲེད་མིན་ཞེས་བྱ་བ་སྲེད་པ་མེད་པར་མ་གྱུར་གྱི་བར་དུ་དེ་ཁོ་ན་ཉིད་མ་ཡིན་པ་འདི་ མེད་པར་མི་འགྱུར་གྱི་ཞེས་དང༌། བསོད་ནམས་སྤྲིན་ནི་བསོད་ནམསཀྱི་ཕུང་པོ་འོ་ཞེས་དང༌། བསགས་པ་ནི་ཉེ་བར་བསྡུས་པའོ་ཞེས་འབྲུ་བཀྲལ་ཏོ། །བི་བྷུ་ཏིས། དེ་ཁོ་ན་ཉིད་མི་ཤེས་པས་བརྫུན་པ་ལ་མངོན་པར་ཞེན་ན་རང་ཉིད་ཀྱིས་རང་སྡུག་པར་བྱེད་དེ། དེ་ལྟར་བཤད་པའི་ལམ་ གྱིས་ཐམས་ཅད་རང་བཞིན་མེད་པ་ལ་གང་རུང་ལས་ཅི་ཐོབ་གང་རུང་གི་སུ་ཞིག་ལ་ཤོར་ཞེས་སོགས་དང༌། དཔྱད་ན་གསོན་པའི་འཇིག་རྟེན་གང་ཡིན་ཏེ། མེད་པས་སོ་གང་ཞིག་འདིར་འཆི་བར་འགྱུར་ཏེ་གང་བྱུང་བར་གྱུར་ཞེས་སོགས་དང༌། ཐམས་ཅད་ནམ་མཁའ་དང་འདྲ་བ་བདེན་པའི་ དོན་གོམས་པ་ཁྱད་པར་བའི་མཐུ་ལས་བྱུང་བའི་རྣལ་འབྱོར་པའི་ཡེ་ཤེས་ལ་སྣང་ངོ༌། །དེ་བཞིན་དུ་བདག་འདྲ་བ་གཞན་གྱིས་ཀྱང་དེ་ཁོ་ན་ཉིད་ཐེ་ཚོམ་མེད་པར་བཟུང་བར་བྱའོ་ཞེས་དང༌། བྱིས་པ་རྣམས་འཐབ་པའི་རྒྱུས་རབ་ཏུ་འཁྲུག་སྤྲོ་བའི་རྒྱུས་དགའ་བར་བྱེད་དོ་ཞེས་སོགས་དང༌། སྲིད་པ་

Page: 919 ༄༅། །དེ་ནི་དེ་ཉིད་མ་ཡིན་པ་གཟུགས་སོགས་འདི་འདྲ་བས་རྨོངས་པར་བྱེད་པ་དང༌། དེའི་དོན་དུ་ཕན་ཚུན་དུ་འགལ་བ་འབྱུང་སྟེ་མུ་བཞི་དང་བྲལ་བའི་དེ་ཉིད་མི་རྟོགས་པས་སོ་སོགས་དང༌། རྒྱང་འཕེན་པ་དང༌། དཔྱོད་པ་པ་སོགས་ལམ་ལོག་པ་མང་བས་ཞེས་དང༌། བསད་ དེ་སོགས་ལ་ན་རྒས་འཆི་གུད་ཀྱི་རི་བོ་བཞིས་ཕྱོགས་བཞི་ནས་ཕྱེ་མར་རློག་པ་རྒྱལ་པོ་ལ་གདམས་པའི་མདོ་དྲངས་ཤིང༌། ཚིགས་བཅད་ཐ་མ་གཉིས་ཀྱི་དང་པོས་མངོན་མཐོ་ལ་སྦྱོར་བ་དང༌། ཕྱི་མས་ངེས་ལེགས་ལ་སྦྱོར་བར་བཤད་དོ། །འགྲེལ་ཆུང་ལས་ནི། དེ་ལྟར་སྟོང་པའི་ཞེས་སོགས་ནི་ ཡོན་ཏན་དང༌། སྐྱོན་ཁྱད་པར་མེད་པར་སྟོན་པའོ། །ད་ནི་བྱིས་པ་མ་རིག་པས་ལྡོངས་པ་རྣམས་ཀྱི་མ་རིག་པའི་སྤྱོད་པ་སྟོན་པ་བདག་ཉིད་སོགས་ཏེ། ཞེས་དང༌། འོན་ཏེ་འཁོར་བའི་སྡུག་བསྔལ་སྐྱེ་བ་ལ་ཡང་དག་པའི་ཤེས་པ་ཉིད་རྒྱུར་ཅི་སྟེ་མི་འདོད་ཅེ་ན། དེར་ཡང་ཞེས་སོགས་ཏེ། གང་ ཤིན་ཏུ་མི་བཟད་པའི་ཚོར་བས་གནོད་པ་འཁོར་བའི་ཕན་ཚུན་འགལ་བའི་ངལ་བ་ཆེན་པོ་འདི་འདྲ་བ་ཡོད་པ་དེར་ཡང་དག་པའི་ཤེས་པ་འདི་ལྟ་བུ་སྲིད་པའི་རྒྱུར་འཐད་པ་མ་ཡིན་ནོ། །ཞེས་པ་གཅིག་ཏུ་ངེས་པའོ། །དེར་ཡང་ཞེས་སོགས་ནི་དེ་ཁོ་ནར་མེད་པ་ཉིད་གསལ་བར་བྱེད་དོ་ཞེས་དང༌། གསོན་པར་རེ་བ་དང༌། ནད་མེད་པར་རེ་བ་དང༌། གཞན་ལ་བསྟེན་པ་ལ་སོགས་པའི་བྱེད་པས་སོ་ཞེས་དང༌། ལོག་པའི་ལམ་ཞེས་པ་ལོག་པའི་ལྟ་བར་ལྷུང་བའོ་ཞེས་དང༌། དེ་ལྟར་རྒ་དང་སོགས་ཀྱིས་མང་དུ་སྨྲས་པས་ཅི་བྱ་སྟེ་འདི་ཐམས་ཅད་མ་རིག་པའི་རྣམ་པར་འགྱུར་བ་ཡིན་ པར་བསྟན་ཏོ་ཞེས་དང༌། འཁོར་གསུམ་མི་དམིགས་པས་བསོད་ནམས་ཀྱི་ཚོགས་བསྒྲུབས་ཏེ་ནམ་ཞིག་གཞན་ལ་སྟོན་པར་འགྱུར་ཞེས་སམ། གསུམ་མི་དམིགས་པས་ཚོགས་གཉིས་བསྒྲུབས་ཏེ་དམིགས་པ་ཅན་རྣམས་ལ་སྟོང་ཉིད་སྟོན་པར་ནམ་འགྱུར་ཞེས་དོན་རྣམ་པ་གཉིས་ སུ་བཤད་དོ། །བོད་ཁ་ཅིག་ནི། ཤེས་རབ་ཐོབ་པའི་བྱ་བ་ལ་རང་གིས་སྟོང་ཉིད་སྒོམ་ཚུལ་དང་གཞན་ལ་སྙིང་རྗེ་སྒོམ་ཚུལ་ལོ། །དང་པོ་དེ་ལྟར་སྟོང་པའི་སོགས་དང༌། གཉིས་པ་བདག་ཉིད་བདེ་བར་སོགས་ལ་འཆད་པ་ནི་ས་བཅད་མི་མཛེས་པར་སྣང་སྟེ། སྙིང་

Page: 920 རྗེའང་རང་ཉིད་ཀྱིས་སྒོམ་དགོས་པའི་ཕྱིར། དེས་ན་གནས་ལུགས་སྟོང་ཉིད་སྒོམ་པ་དང་དེ་ལྟར་མ་རྟོགས་པ་ལ་སྙིང་རྗེ་སྒོམ་པ་ཞེས་བཤད་ན་ལེགས་སོ། །བྱང་ཆུབ་སེམས་དཔའི་སྤྱོད་པ་ལ་འཇུག་པ་ལས། ཤེས་རབ་ཀྱི་ཕ་རོལ་ཏུ་ཕྱིན་པའི་ལེའུ་སྟེ་དགུ་པ་རྣམ་པར་ཕྱེ་བའོ། །

ལེའུ་བཅུ་པ། བསྔོ་བ་བསྟན་པ།

Page: 921 ༄༅། །དེ་ལྟར་བརྩམས་པའི་དགེ་བ་ལེགས་པའི་ཚོགས་ཉིད་དུ་བསྔོ་བར་འབྲེལ་བའི་ཕྱིར། ད་ནི་ཡོངས་སུ་བསྔོ་བའི་ལེའུ་བཤད་པར་བྱའོ། །འདི་ལ་གཉིས། བསྔོ་བ་སྤྱིའི་དོན་དང༌། གཞུང་གི་དོན་ཏོ། །དང་པོ་བསྔོ་བ་སྤྱིའི་དོན་ལ་ཡང༌། གང་བསྔོ་ བའི་དགེ་བ་ངོས་བཟུང༌། གང་དུ་བསྔོ་བའི་དམིགས་ཡུལ་བཤད། དགོས་པ་གང་གི་ཆེད་དུ་བསྔོ་བ་བསྟན། བསྔོ་བའི་བྱེད་ལས་ཀྱི་ཕན་ཡོན་བཤད། ཇི་ལྟར་བསྔོ་བའི་ཚུལ་བསྟན། བསྔོ་བའི་ཆོ་ག་ཉིད་བཤད་པ་སྟེ་དོན་དྲུག་ལས། དང་པོ་་ནི། རང་གིས་བགྱིས་པའི་དགེ་བ་དེ་གཙོ་བོར་བྱས་ནས་འདུས་བྱས་ དང༌། འདུས་མ་བྱས་པའི་དགེ་བ་ཇི་སྙེད་དོ་ཅོག་གཅིག་ཏུ་བསྡུས་ནས་བསྔོ་བ་སྟེ། རྡོ་རྗེ་རྒྱལ་མཚན་གྱི་བསྔོ་བ་བཅུ་པའི་ཚིགས་སུ་བཅད་པར། འགྲོ་ཀུན་དགེ་བ་ཇི་སྙེད་ཡོད་པ་དང༌། །བྱས་དང་བྱེད་འགྱུར་དེ་བཞིན་བྱེད་པ་དང༌། །ཞེས་སོ། །དེ་ཡང་སེམས་ཅན་ཐམས་ཅད་ཀྱི་ སེམས་ཀྱི་རང་བཞིན་གཟོད་མ་ནས་རྣམ་པར་དག་པ་སངས་རྒྱས་ཐམས་ཅད་ཀྱི་ངོ་བོ་ཉིད་དུ་ཞུགས་པ་གང་ཡིན་པ་འདི་ནི། རྣམ་པ་ཐམས་ཅད་དུ་སྤྲོས་མཚན་གྱིས་མ་གོས་པ་ཆོས་ཀྱི་དབྱིངས་ཇི་ལྟ་བར་གནས་ཤིང༌། འདི་རྟོགས་པ་ལས་བླ་ན་མེད་པའི་སངས་རྒྱས་ཐོབ་པར་འཇོག་པའི་ ཕྱིར་སངས་རྒྱས་ཀྱི་རིགས་ཞེས་བྱ་ལ། འདིའི་ཡང་རང་བཞིན་རྣམ་དག་གི་ཆ་ནི་རང་བཞིན་དུ་གནས་པའི་རིགས་དང༌། སྟོབས་སོགས་ཡོན་ཏན་ཐམས་ཅད་འབྱུང་རུང་ས་བོན་ལྟར་གནས་པ་ནི་རྒྱས་འགྱུར་གྱི་རིགས་ཞེས་བྱ་སྟེ། ངོ་བོ་ཉིད་དེ་ཁོ་ན་ཡོན་ཏན་འབྱུང་རུང་དུ་གནས་ཤིང༌། ཡོན་ཏན་ འབྱུང་རུང་དེ་ཁོ་ན་ངོ་བོ་ཉིད་ཀྱིས་རྣམ་པར་དག་པས་ན། དབྱེར་མེད་པ་ཇི་ལྟར་ནམ་མཁའ་ཆོས་གང་གིས་ཀྱང་མ་བསྡུས་ཤིང་ཅིར་ཡང་མ་གྲུབ་པ་དང༌། ཐམས་ཅད་ལ་གོ་འབྱེད་པ་གཉིས་དབྱེར་མེད་པ་ལྟ་བུ་འདི་ནི་དགེ་བ་ཐམས་ཅད་ཀྱི་གཞི་རྟེན་ཡང་ཡིན་ལ། གང་ལས་དགེ་བ་འབྱུང་བའི་ གནས་ཀྱང་ཡིན་ཞིང༌། འདི་ཉིད་ལ་ཡང་དག་པའི་དགེ་བར་ཡང་གསུངས་ཏེ། རྒྱན་སྟུག་པོ་བཀོད་པའི་མདོ་ལས། རྒྱལ་པོ་སེམས་ནི་བསམ་མི་ཁྱབ། །རྟག་ཏུ་རང་བཞིན་འོད་ཅན་ནོ། །དེ་བཞིན་གཤེགས་པའི་སྙིང་པོ་སྟེ། །རྡོ་བ་རྣམས་ཀྱི་གསེར་

Page: 922 བཞིན་གནས། །ཞེས་དང༌། ཀུན་གཞི་ངང་ལུགས་དགེ་བ་ནི། །རྒྱལ་སྲས་རྣམས་ཀྱིས་མཐོང་ཐོས་ཏེ། །ཀུན་གཞི་མཆོག་ཏུ་དགེ་བ་ནི། །ཐམས་ཅད་ལུས་ལ་ཞེན་པ་སྟེ། །ཞེས་དང༌། ཀུན་གཞི་དྲི་མེད་བསོད་ནམས་ཀྱིས། །དེ་བཞིན་གཤེགས་ པར་འགྱུར་བ་ཡིན། །ཞེས་དང༌། ས་རྣམས་སྣ་ཚོགས་ཀུན་གཞི་སྟེ། །བདེ་གཤེགས་སྙིང་པོ་དགེ་བའང་དེ། །སྙིང་པོ་དེ་ལ་ཀུན་གཞིའི་སྒྲས། །དེ་བཞིན་གཤེགས་པ་སྟོན་པར་མཛད། །ཅེས་སོ། །དེ་ཡང་དགེ་བའི་སྒྲ་ནི་བྱས་པའི་ལས་ལ་འཇུག་པ་དང༌། དངོས་པོ་རྣམས་ཀྱི་ངོ་བོ་ཉིད་ལ་འཇུག་པའི་སྐབས་གཉིས་ཡོད་དེ། དེ་ཡང་སྦྱིན་སོགས་བྱས་པའི་ལས་ལ་འཇུག་པའི་ཚེ་ནི་འདི་ནི་ལེགས་པར་བྱས་སོ། །དགེ་བར་བྱས་སོ། །བྱ་བར་འོས་པ་བྱས་སོ། །ཞེས་པའི་དོན་གྱིས་དགེ་བའི་སྒྲར་འཇོག་པ་ཡིན་ལ། ཆོས་ཉིད་རང་ བཞིན་གྱིས་དག་པ་ལ་དགེ་བར་བཤད་པ། ཀུན་གཞི་ངང་ལུགས་དགེ་བ་ནི། །ཞེས་དང༌། ཀུན་གཞི་མཆོག་ཏུ་དགེ་བ་ནི། །ཞེས་བཤད་པ་ལྟ་བུ་ནི་བྱས་པའི་དགེ་བར་བཞག་པ་མ་ཡིན་ཡང་ངོ་བོ་ཉིད་ཀྱིས་རྣམ་པར་དག་ལ། འདིའི་མཐུས་དགེ་བློ་རྣམས་སྐྱེ་བ། གལ་ཏེ་སངས་རྒྱས་ཁམས་མེད་ན། །སྡུག་ལ་སྐྱོ་བར་མི་འགྱུར་ཞིང༌། །ཞེས་སོགས་གསུངས་པ་ལྟར། མི་དགེ་བ་དང་ལུང་དུ་མ་བསྟན་པའི་ཕྱོགས་ན་མི་གནས་ཤིང་དགེ་བ་འབྱུང་བ་དང་གནས་པའི་རྟེན་བྱེད་པའི་ཆ་ནས་རང་བཞིན་རྣམ་དག་གི་དགེ་བར་བཤད་པ་ཡིན་ཏེ། དཔེར་ན། མི་ཞིག་སྦྱིན་གཏོང་སོགས་རྒྱ་ཆེན་པོ་ལ་འཇུག་པ་ན་འདིས་ནི་དགེ་བ་བྱས་ཏེ། སྐྱེས་བུ་དགེ་བ་ཅན་ཡིན་ནོ་ཞེས་སྒྲོག་ལ། ཡང་མི་ཞིག་དངོས་སུ་སྦྱིན་པ་སོགས་མི་བྱེད་བར་གཉུག་མར་གནས་ཀྱང༌། རང་བཞིན་གྱིས་རྒྱུད་དྲང་ཞིང་ཀུན་ལ་གཉེན་གཤིན་པ་ཞིག་ ན་མི་འདི་ནི་རང་བཞིན་གྱིས་དགེའོ་ཞེས་འཇོག་པ་ལྟ་བུ་ཡིན་ནོ། །དེས་ན་མཐོ་རིས་སམ། ཐར་པ་ཙམ་མམ། ཐམས་ཅད་མཁྱེན་པའི་གོ་འཕང་དངོས་སམ། བརྒྱུད་ནས་འཐོབ་པར་བྱེད་པའི་རྒྱུ་གང་གི་རྒྱུད་ལ་གནས་པ་ནི་གང་བསྔོ་རྒྱུའི་དགེ་བའི་མཚན་ཉིད་ཡིན་ལ།

Page: 923 ༄༅། །དབྱེ་ན། མངོན་མཐོ་ངེས་ལེགས་ཀྱི་དགེ་བ་གཉིས་སམ། ཟག་བཅས་ཟག་མེད་ཀྱི་དགེ་བ་གཉིས་སམ། འདུས་བྱས་མ་བྱས་ཀྱི་དགེ་བ་གཉིས་ལ་སོགས་པ་དུ་མར་འགྱུར་ལ། འདུས་བྱས་པའི་དགེ་བ་ལ་སེམས་པ་དང༌། བསམས་པའི་དགེ་བ་ གཉིས་སམ། སྒོ་གསུམ་གྱི་དགེ་བ་གསུམ་ལ་སོགས་པར་འགྱུར་ལ། ཁྱད་པར་ཐེག་ཆེན་ལ་ཕ་རོལ་ཏུ་ཕྱིན་པ་དང༌། ཕ་རོལ་ཏུ་ཕྱིན་པ་མ་ཡིན་པ་གཉིས་སུ་འགྱུར་ཞིང༌། སྤྱིར་བྱེད་པ་པོ་དང་གང་བྱས་པ་དང༌། ཇི་ལྟར་བྱས་པའི་ཚུལ་སོགས་ལས་དབྱེ་བ་མཐའ་ཡས་པར་ཡང་འགྱུར་རོ། །དེས་ན་ འགྲོ་ཀུན་དགེ་བ་ཇི་སྙེད་ཡོད་པ་ཞེས་གསུངས་པ་ཡང་ངོ་བོ་ཉིད་རང་བཞིན་གྱིས་དགེ་བ་འདི་མེད་པའི་སེམས་ཅན་མི་སྲིད་པས་འགྲོ་ཀུན་གྱི་དགེ་བ་ཇི་སྙེད་ཡོད་པ་དང་ཞེས་ཕྱོགས་གཅིག་དེ་ལ་དགོངས་ཤིང༌། དེའི་མཐུས་སྦྱིན་སོགས་ཀྱི་དགེ་བ་བྱེད་པའི་སེམས་ཅན་ཡང་མང་ཞིག་ ཡོད་པས་དེ་དག་གིས་བྱས་པ་དང༌། བྱེད་པར་འགྱུར་བ་དང༌། བྱེད་བཞིན་པ་ཐམས་ཅད་ཅེས་གསུངས་པ་ཡིན་ནོ། །འདི་ལྟར་མིན་ན་འགྲོ་ཀུན་དགེ་བ་ཇི་སྙེད་ཡོད་པ་ཞེས་པའི་སྒྲ་མི་རིགས་ཏེ། སེམས་ཅན་གྱི་ནང་ན་མི་ཁོམ་པར་སྐྱེས་པ་ནི་ནམ་མཁའ་ཇི་ཙམ་པ་དེ་ཙམ་དང་དགེ་བ་བྱེད་པའི་ ལྷ་མི་དངོས་ནི་དེ་ལས་རྩ་མཆོག་གི་བུ་ག་ཙམ་ཡིན་ལ། མི་ཁོམ་པར་སྐྱེས་པ་དགེ་བ་བྱེད་པ་ནི་མི་སྲིད་པ་ཙམ་ཡིན་ན་སེམས་ཅན་ཐམས་ཅད་ཀྱི་དགེ་བ་ཇི་སྙེད་ཡོད་པ་ཞེས་ག་ལ་གསུང༌། དེས་ན་དགེ་བ་བེམ་པོའི་རྫས་རིག་བྱེད་མ་ཡིན་པའི་གཟུགས་སུ་གྲུབ་པར་ འདོད་པ་བྱེ་བྲག་ཏུ་སྨྲ་བས་རང་འདོད་ཀྱིས་བཏགས་པ་ཡིན་ལ། མངོན་པ་ལས། འདུས་མ་བྱས་ཀྱི་དགེ་བ་མ་བཤད་པ་ཙམ་གྱིས་ཀྱང་འདུས་མ་བྱས་པའི་དགེ་བ་ཁེགས་པ་མ་ཡིན་ཏེ། མངོན་པ་ནི་དེང་སང་བོད་ན་གདགས་པ་དང༌། མཛོད་དང༌། ཀུན་ལས་བཏུས་ལ་འདོད་པར་ ཟད་ལ། འདི་དག་ལས་སྔ་མ་གཉིས་ནི་ཐེག་དམན་གྱི་ལུགས་ཁོ་ན་དང་ཀུན་ལས་བཏུས་ཀྱང་ཐུན་མོང་གི་མངོན་པ་ཙམ་ཡིན་ལ། ཐུན་མོང་མ་ཡིན་པའི་ཐེག་ཆེན་རྒྱ་མཚོ་ལྟ་བུའི་འདུས་མ་བྱས་ཀྱི་དགེ་བ་ལ་སོགས་པའི་རྣམ་བཞག་མི་རིགས་ཏེ། ཐུན་མོང་གི་མངོན་པ་

Page: 924 ལས་མ་བཤད་པའི་ཕྱིར་སྙམ་པ་འདི་འདྲའི་རིགས་པ་ནི་བདུད་ཀྱི་གྲིབ་མ་ཁོ་ནར་ཟད་དེ། འོ་ན་ཕ་རོལ་ཏུ་ཕྱིན་པ་བཅུ་དང༌། ས་བཅུ་དང༌། བྱང་ཆུབ་སེམས་དཔའི་ཆོས་བསམ་གྱིས་མི་ཁྱབ་པ་རྣམས་དང༌། འབྲས་བུ་གསང་སྔགས་ཀྱི་ཆོས་རྣམས་ཀྱང་ཁེགས་པར་འགྱུར་ཏེ། ཐུན་མོང་གི་མངོན་པ་ལས་ མ་བཤད་པའི་ཕྱིར། དེས་ན་ཐེག་པ་ཆེན་པོར་དགེ་བ་ཞེས་བྱ་བའི་དངོས་པོ་རྫས་གྲུབ་ཅིག་འཇོག་པ་ནི་མ་ཡིན་ཏེ་ཟབ་མོ་ལྟ་བའི་གཞུང་དུ་མངོན་མཐོ་དང་ངེས་ལེགས་ཀྱི་རྒྱུར་རུང་བའི་སྟོང་ཉིད་རྟེན་འབྱུང་གི་ཚོགས་པ་དང༌། རྒྱ་ཆེན་སྤྱོད་གཞུང་དུ་གཞན་དབང་རྟེན་འབྲེལ་ ཙམ་ལ་ཀུན་ནས་བཏགས་པའི་ཚུལ་གྱིས་འཇོག་ལ། འདུས་བྱས་མ་བྱས་ཀྱང་རྟོག་པའི་སྒྲོ་བཏགས་གོམས་པས་སོ་སོར་འཛིན་པ་ཙམ་ལས་རང་བཞིན་ཐ་དད་པ་ཅི་ཡང་མེད་པས་དགེ་བ་ལ་འདུས་བྱས་གྱིས་ཁྱབ་ཅིང་འདུས་མ་བྱས་ཀྱི་དགེ་བ་མི་སྲིད་དོ་སྙམ་དུ་ཆེ་ཐང་དུ་ ངལ་ཞིང་དུབ་པ་དེ་ལྟ་བུ་ཅི་ཡང་མི་དགོས་ཏེ། ཐོག་མ་ཁོ་ནར་འདུས་བྱས་མ་བྱས་ནི་ཐ་སྙད་དུ་སྒྲོ་བཏགས་པ་སྟེ་ཆོས་གང་ཡང་དེ་ལྟར་བཏགས་པའི་དུས་དང་མ་བཏགས་པའི་དུས་གང་ནའང་འདུས་བྱས་སམ་འདུས་མ་བྱས་ཞེས་བྱ་བར་གནས་པ་ནི་འགའ་ཡང་ཡོད་པ་ མ་ཡིན་པའི་དོན་འདི་ཐམས་ཅད་ཀྱིས་གོ་བར་གྱུར་ཅིག །གང་དུ་བསྔོ་ན། བླ་ན་མེད་པའི་བྱང་ཆུབ་ཁོ་ནར་སྟེ། ཡུམ་ལས། དགེ་བའི་རྩ་བ་ཐམས་ཅད་ཀྱང་རྣམ་པ་ཐམས་ཅད་མཁྱེན་པ་ཉིད་མ་གཏོགས་པར་ཉན་ཐོས་ཀྱི་སའམ་རང་སངས་རྒྱས་ཀྱི་སར་ཡོངས་སུ་བསྔོར་མི་ འཇུག་པའོ། །ཞེས་སོ། །གང་གི་དོན་དུ་བསྔོ་བ་ནི། བདག་ཉིད་གཅིག་པུའི་དོན་དུ་མ་ཡིན་པར་སེམས་ཅན་ཐམས་ཅད་ཀྱི་གཏན་དོན་དུ་བསྔོ་བ་སྟེ། འགྲོ་བའི་དོན་དུ་བྱང་ཆུབ་ཕྱིར་ནི་ཐམས་ཅད་བསྔོ། །ཞེས་དང༌། ཁྱད་པར་འཕགས་བསྟོད་ལས། །བསོད་ནམས་ བྱས་པའི་ཚོགས་དག་ནི། །སེམས་ཅན་རྣམས་ལ་ཡོངས་བསྔོ་བར། །བཅོམ་ལྡན་ཁྱོད་ཀྱིས་གང་གསུངས་པ། །དེ་གཞན་བསྟན་བཅོས་ལས་མ་བཤད། །ཅེས་སོ། །ཕན་ཡོན་ནི། ཆུ་ཐིགས་པ་གཅིག་རྒྱ་མཚོ་ཆེན་པོར་འཕངས་ན་རྒྱ་མཚོ་མ་ཟད་ཀྱི་

Page: 925 ༄༅། །བར་ཆུ་ཐིགས་དེ་མི་ཟད་པ་ལྟ་བུ་སྟེ། ཕན་ཡོན་འདིའི་ཁུངས་དེང་སང་བོད་ཡུལ་བ་ཕལ་ཆེར་བློ་གྲོས་རྒྱ་མཚོས་ཞུས་པའི་མདོ་ལས། ཇི་ལྟར་ཆུ་ཐིགས་རྒྱ་མཚོ་ཆེ་ནང་ལྷུང༌། །རྒྱ་མཚོ་མ་ཟད་བར་དུ་དེ་མི་འཛད། །དེ་བཞིན་བྱང་ཆུབ་ ཡོངས་བསྔོས་དགེ་བ་ཡང༌། །བྱང་ཆུབ་མ་ཐོབ་བར་དུ་དེ་མི་འཛད། །ཅེས་འདྲེན་ཡང་བློ་གྲོས་རྒྱ་མཚོས་ཞུས་པའི་མདོ་ན་འདི་མི་མཐོང་ལ། བློ་གྲོས་མི་ཟད་པས་བསྟན་པའི་མདོ་ན་ཚིག་ལྷུག་པར་ཡོད་དོ། །ཇི་ལྟར་བསྔོ་ཚུལ་ནི། སྦྱིན་པ་པོ་དང༌། ཡུལ་དང༌། སྦྱིན་པ་ ཉིད་དེ་འཁོར་གསུམ་གྱི་རྣམ་པ་གང་ལ་ཡང་མངོན་པར་ཞེན་པ་མེད་པ་སྒྱུ་མའི་སྐྱེས་བུ་ལ་སྒྱུ་མའི་ལོངས་སྤྱོད་སྦྱིན་ཞིང་བསྔོ་བ་ཞིག་ལ་སྒྱུ་མར་ཤེས་པའི་མིས་རྟོག་པ་ལྟ་བུ་འཁོར་གསུམ་གྱི་རྣམ་པ་ཙམ་ཞིག་འགག་མེད་དུ་སྣང་ཡང་ངོ་བོ་ཉིད་ཀྱིས་ཀྱང་གང་དུ་ཡང་མི་གནས་པའི་རང་ བཞིན་ཤེས་པས་བསྔོ་བ་སྟེ། ཡུམ་རྒྱན་ལས། ཡོངས་སུ་བསྔོ་བ་ཁྱད་པར་ཅན། །དེ་ཡི་བྱེད་པ་མཆོག་ཡིན་ནོ། །དེ་ནི་དམིགས་མེད་རྣམ་པ་ཅན། །ཕྱིན་ཅི་མ་ལོག་མཚན་ཉིད་དོ། །ཞེས་དང༌། སྦྱིན་པ་སྦྱིན་བྱ་ལེན་པོ་གཏོང་བོས་སྟོང༌། །འཇིག་རྟེན་འདས་ པའི་ཕ་རོལ་ཕྱིན་ཞེས་བྱ། །གསུམ་པོ་དག་ལ་ཆགས་སྐྱེས་གྱུར་པ་ན། །འཇིག་རྟེན་པ་ཡི་ཕ་རོལ་ཕྱིན་ཞེས་བརྗོད། །ཅེས་སོ། །དེ་ལྟར་རང་བཞིན་ཤེས་པས་བསྔོ་བ་ནི། དམིགས་པའི་དུག་མེད་པ་འཁོར་གསུམ་རྣམ་པར་དག་པའི་བསྔོ་བ་ཡིན་ལ། ཀུན་ནས་མངོན་པར་ ཞེན་པས་བསྔོ་བ་ནི། དུག་དང་བཅས་པ་སྟེ། ཡོངས་བསྔོ་གལ་ཏེ་སེམས་སུ་འདུ་ཤེས་འབྱུང་འགྱུར་ཞིང༌། །བྱང་ཆུབ་འདུ་ཤེས་ཡོངས་བསྔོ་སེམས་ཅན་འདུ་ཤེས་ན། །འདུ་ཤེས་ཕྱིར་ན་ལྟ་གནས་སེམས་ནི་གསུམ་ལ་ཆགས། །དམིགས་པ་ཡོད་པས་ ཡོངས་སུ་བསྔོས་པར་ཆུད་མ་ཡིན། །གང་ལ་འདི་ལྟར་ཆོས་འདི་འགགས་ཤིང་ཟད་པ་དང༌། །གང་དུ་ཡོངས་སུ་བསྔོ་བ་དེ་ཡང་ཟད་པ་དང༌། །ཆོས་ཀྱི་ཆོས་ལ་ནམ་ཡང་མི་བསྔོ་ཤེས་གྱུར་ན། །དེ་ལྟར་རབ་ཏུ་ཤེས་པས་ཡོངས་སུ་བསྔོས་པ་ཡིན། །གལ་ཏེ་

Page: 926 མཚན་མར་བྱེད་ན་དེ་ནི་བསྔོ་མ་ཡིན། །ཅི་སྟེ་མཚན་མ་མེད་ན་བྱང་ཆུབ་བསྔོ་བ་ཡིན། །ཇི་ལྟར་དུག་དང་འདྲེས་པའི་ཁ་ཟས་བཟང་ཟ་བ། །དཀར་པོའི་ཆོས་ལ་དམིགས་པའང་དེ་འདྲར་རྒྱལ་བས་གསུངས། །ཞེས་སོ། །འོ་ན་འཁོར་གསུམ་རྣམ་པར་དག་པ་ དེ་ནི་གཙོ་བོར་འཕགས་པའི་ཡུལ་དུ་སྣང་ལ། དམིགས་པའི་བསྔོ་བ་ནི། དུག་བཅས་ཡིན་པའི་ཕྱིར། སོ་སྐྱེ་ལས་དང་པོ་པས་དགེ་བ་མི་བསྔོ་འམ་ཞེ་ན། སྤྱིར་སོ་སྐྱེ་ཡིན་ཡང་དགེ་བའི་བཤེས་གཉེན་གྱིས་ལེགས་པར་ཟིན་པ་རྣམས་ནི་འཁོར་གསུམ་རྣམ་པར་དག་པ་དང་རྗེས་སུ་མཐུན་ པའི་ཤེས་རབ་ཡོད་ཅིང༌། སྤྱིར་བླ་ན་མེད་པའི་མཆོད་པ་དང་ཡི་རང་བཤད་པ་ལྟར། འདིར་ཡང་བདག་ལྟ་བུས་གང་ཞིག་གང་དུ་ཡང་དག་པར་བསྔོ་བ་མི་ཤེས་མོད་ཀྱི། སངས་རྒྱས་རྣམས་ཀྱིས་ཇི་ལྟར་མཁྱེན་པའི་རྣམ་པ་དང་འབྱུང་བ་དང་མཚན་ཉིད་གང་ཡིན་པ་དེ་ ལྟར་ཡོངས་སུ་བསྔོའ། །ཞེས་བོསྔོ་བ་འདི་ནི་དུག་མེད་པ་ཡང་དག་པའི་བསྔོ་བར་འགྱུར་བ་ཡིན་ཏེ། སངས་རྒྱས་རྣམས་ཀྱིས་འཁོར་གསུམ་གཟོད་ནས་དག་པ་ཁོ་ནར་གཟིགས་པའི་ཕྱིར། དེས་ན་དེ་ལྟས་འདི་ལྟར་ཡོངས་སུ་བསྔོ་བ་བསླབ་བྱ་སྟེ། ཇི་ལྟར་རྒྱལ་བ་དེ་དག་དགེ་ བ་དེ་མཁྱེན་པའི། །རྣམ་པ་གང་ཡིན་འབྱུང་གང་མཚན་ཉིད་གང་ཡིན་ལ། །རྗེས་སུ་ཡི་རང་དེ་ལྟ་དེ་ལྟར་ཡོངས་སུ་བསྔོ། །དེ་ལྟར་བསོད་ནམས་བྱང་ཆུབ་ཡོངས་སུ་བསྔོ་བྱེད་ན། །དུག་མེད་སངས་རྒྱས་མི་སྤོང་རྒྱལ་བས་གསུངས་པ་སྨྲ། །དེ་ལྟར་ཡོངས་ བསྔོ་དཔའ་བོས་འཇིག་རྟེན་དམིགས་ཅན་གྱི། །བྱང་ཆུབ་སེམས་དཔའ་ཇི་སྙེད་ཐམས་ཅད་ཟིལ་གྱིས་གནོན། །ཞེས་གསུངས་ལ། ལས་དང་པོ་པས་ཀྱང་སྒྲུབ་པར་མི་ནུས་པ་མ་ཡིན་ནོ། །དེས་ན་ཆོས་ཉིད་བསྔོ་རྒྱུའི་དགེ་རྩར་འདོད་པ་དུག་བཅས་ཡིན་ནོ། །ཞེས་ པའང་རང་གིས་དུག་བཅས་དུག་མེད་ཀྱི་བསྔོ་བའི་རྣམ་བཞག་གསར་པ་བཅས་ནས་གཞན་ལ་སུན་ཅི་ཕྱིན་གྱིས་རྒོལ་བ་ཡིན་ཏེ། བསྔོ་བ་དུག་བཅས་སུ་འཇོག་བྱེད་ཁྱེད་ཀྱིས་བཤད་པ་དེ་ནི་སངས་རྒྱས་ཀྱི་བཀའ་མཐོང་བ་ན་མི་སྣང་བའི་ཕྱིར་རོ། །གལ་ཏེ་ཆོས་ཉིད་བསྔོ་རྒྱུའི་

Page: 927 ༄༅། །དགེ་རྩའོ་སྙམ་པ་དེ་དམིགས་པ་ཡིན་པའི་ཕྱིར་ན་དུག་བཅས་སོ་ཞེ་ན། འོ་ན་ཆོས་ཉིད་བསྔོ་རྒྱུའི་དགེ་རྩ་མ་ཡིན་ནོ་སྙམ་པ་དེ་ཡང་དམིགས་པ་ཡིན་པས་དུག་བཅས་སུ་ཅིས་མི་མཚུངས། བསྔོ་བས་འགྱུར་ན་འདུས་བྱས་འགྱུར། །མི་འགྱུར་ བསྔོས་པ་དོན་མེད་འགྱུར། །ཞེས་པ་ཡང་མཁས་པ་ལ་འོས་པའི་གསུང་མ་ཡིན་ཏེ། བསྔོ་རྒྱུའི་དགེ་བ་དེ་བསྔོས་པ་ལས་དགེ་བ་བྱེད་པ་པོ་དེའི་རྒྱུད་ལ་གང་དུ་བསྔོས་པའི་ཡོན་ཏན་དེ་འཐོབ་པར་འགྱུར་བ་ཡིན་གྱི་དགེ་བ་དེ་བསྔོ་ཡུལ་དེར་འགྱུར་བ་ག་ལ་ ཡིན། གལ་ཏེ་བསྔོ་རྒྱུའི་དགེ་བ་དེ་བསྔོ་ས་དེར་འགྱུར་འགྲོ་ན། བསོད་ནམས་འདི་ཡིས་ཐམས་ཅད་གཟིགས་པ་ཉིད། །ཐོབ་ནས་ཞེས་པ་བསོད་ནམས་དེ་ཉིད་སངས་རྒྱས་སུ་འགྱུར་བ་སོགས་ཁས་ལེན་དགོས་ལ། ཕ་རོལ་ཏུ་ཕྱིན་པ་དྲུག་བྱེད་པ་པོའི་བྱང་ཆུབ་ སེམས་དཔའ་དེ་འཚང་རྒྱ་བ་ཡིན་གྱི་ཕ་རོལ་ཏུ་ཕྱིན་པ་འཚང་རྒྱ་བ་ནི་བསྐལ་བཟང་གི་སངས་རྒྱས་བཞི་པ་འདིའི་བསྟན་པའི་རྣམ་གཞག་ལ་མེད་དོ། །དེ་ལྟ་མོད་ཀྱི་སླར་དྲི་བར་བྱ་སྟེ། སྦྱིན་པ་བྱིན་པ་ལས་བྱུང་བའི་དགེ་བ་སྐད་ཅིག་མ་དང་པོ་དེ་བསྔོས་པས་འགྱུར་ རམ་མི་འགྱུར། མི་འགྱུར་ན་བསྔོ་བ་དོན་མེད་དུ་ཁྱེད་རང་གིས་བཤད་ལ། འགྱུར་ན་སྐད་ཅིག་མ་དང་པོ་དེ་ནི་སྐད་ཅིག་དེ་ཉིད་དུ་འགག་ལ། འགགས་པ་སླར་གཞན་དུ་འགྱུར་བ་ན་ཤེས་བྱ་ལ་མེད་དོ། །དེས་ན་སྔོན་དུ་སྦྱིན་པ་ཙམ་པོ་བ་བྱས་ལ་ཕྱིས་བྱང་ཆུབ་ ཀྱི་སེམས་སྐྱེས་ཏེ་སྔར་གྱི་དགེ་བ་དེ་ལ་ཕྱིས་སྙགས་ཀྱི་ཚུལ་གྱིས་བྱང་ཆུབ་ཏུ་བསྔོས་པ་ན་དཔྱད་པའི་ཚེ་དགེ་བ་དེ་རང་གི་ངོ་བོ་སྐད་ཅིག་སྐད་ཅིག་གི་ཕྲེང་བ་རྣམས་རང་དུས་སོ་སོར་འགགས་ཤིང་བག་ཆགས་ཀྱི་རྒྱུན་ཀུན་གཞི་ལ་དབྱེར་མེད་དུ་གནས་པ་དེ་ཡང་གང་དུ་ ཡང་རྣམ་པ་གཞན་གྱུར་མེད་མོད་ཀྱི་བྱེད་པ་པོའི་བསམ་པ་རྒྱ་ཇེ་ཆེར་སོང་བའི་མཐུ་ལས་རྣམ་པར་སྨིན་པ་ཕུལ་དུ་བྱུང་བ་གོང་ནས་གོང་དུ་འཐོབ་པའི་ཕྱིར། དགེ་བ་ཙམ་པོ་བ་ཐེག་ཆེན་དགེ་བར་གནས་གྱུར་པ་དང༌། ཟག་བཅས་ཀྱི་དགེ་བ་ཟག་མེད་དུ་གྱུར་པ་

Page: 928 སོགས་ཀུན་རྫོབ་མ་དཔྱད་པའི་ཐ་སྙད་དུ་བཞག་པ་སྟེ། སྔར་རང་དོན་ཡིད་བྱེད་ཀྱིས་བློས་དགེ་བ་བྱས་ལ། ཕྱིས་གང་ཟག་དེ་བྱང་ཆུབ་སེམས་དཔར་གྱུར་པའི་ཚེ་དགེ་བའི་རྒྱུན་དེ་ལ་ཐ་དད་མེད་ཀྱང་རང་དོན་ཡིད་བྱེད་ཀྱི་བློ་དང་བྲལ་ལ། བྱང་ཆུབ་ཀྱི་སེམས་དང་ལྡན་པའི་ རྒྱུད་ཀྱི་དགེ་བ་ཡིན་པའི་ཕྱིར། རྟེན་གྱི་གང་ཟག་གི་ཆ་ནས་ཐེག་དམན་གྱི་དགེ་བ་ཐེག་ཆེན་གྱི་དགེ་བར་གནས་གྱུར་ཏོ། །ཞེས་འཇོག་པ་ཡིན་གྱི་དགེ་བ་ཉིད་ནི་གང་དུ་ཡང་འགྱུར་བ་མ་ཡིན་ནོ། །གཞན་ཡང་གང་དུ་བསྔོས་པ་དེར་དགེ་བ་དེ་འགྱུར་བར་འདོད་ན། རྡོ་རྗེ་རྒྱལ་ མཚན་གྱི་བསྔོ་བ་དྲུག་པར། ཆོས་ཉིད་ཀུན་ཏུ་འགྲོ་བ་ཅི་འདྲ་བ། །དེ་བཞིན་དེ་དག་ཡོངས་སུ་བསྔོ་བར་བྱེད། །ཅེས་ཆོས་ཉིད་ཇི་ལྟ་བ་བཞིན་དུ་བསྔོ་བར་གསུངས་པས་དེའི་ཚེ་བསྔོ་རྒྱུའི་དགེ་བ་འདུས་བྱས་དེ་ཆོས་ཉིད་དུ་འགྱུར་དགོས་པས་དེའི་ཚེ་ཁྱེད་རང་གིས་ ཆོས་ཉིད་བསྔོ་བའི་འབྲས་བུ་ཡིན་པ་དང༌། འདུས་བྱས་འདུས་མ་བྱས་སུ་འགྱུར་བ་ཞིག་ཞལ་གྱིས་བཞེས་པར་འགྱུར་ལ། དེ་ལྟ་ན་དགེ་བ་བསྔོས་པས་འགྱུར་ནས་ཆོས་ཉིད་དུ་གྱུར་པའི་ཕྱིར་ཆོས་ཉིད་འདུས་བྱས་ཡིན་པར་ཁྱེད་རང་ལ་ཆེས་ཐལ་བ་ཡིན་ནོ། །གཞན་ཡང༌། གལ་ཏེ་ཆོས་དབྱིངས་དགེ་བ་ཉིད། །ཡིན་ན་ཧ་ཅང་ཐལ་འགྱུར་ཏེ། །ཆོས་ཀྱི་དབྱིངས་ལས་མ་གཏོགས་པའི། །ཆོས་གཞན་མེད་ཕྱིར་སྡིག་པ་དང༌། །ལུང་མ་བསྟན་ཡང་དགེ་བར་འགྱུར། །ཞེས་པ་འདི་ནི་དེང་སང་གི་ཀློག་པ་པོ་ཐམས་ཅད་ལ་རླུང་ ལྟར་གྲགས་པའི་ཤེས་བྱ་སྒོག་གཏུན་མ་ཚིགས་བཅད་དུ་བྱས་པ་ཡིན་ཏེ། གལ་ཏེ་ཤེས་བྱ་དངོས་མེད་ཉིད། །ཡིན་ན་ཧ་ཅང་ཐལ་འགྱུར་ཏེ། །ཤེས་བྱ་ཉིད་ལས་མ་གཏོགས་པའི། །ཆོས་གཞན་མེད་ཕྱིར་བྱས་པ་དང༌། །མི་རྟག་པ་ཡང་དངོས་མེད་ འགྱུར། །ཞེས་ཟེར་བ་ཡིན་པས་ཀློག་པ་པོ་ཐམས་ཅད་ལ་བཞད་གད་ཀྱི་དངོས་པོ་བྱིན་པ་ཡིན་ནོ། །དེ་ལྟ་མོད་ཀྱི་ཁྱེད་རང༌། ཆོས་ཀྱི་དབྱིངས་ནི་འདུས་མ་བྱས། །ཞེས་གསུངས་པ་ཡིན་ལ། དེའི་ཚེ། གལ་ཏེ་ཆོས་དབྱིངས་འདུས་མ་བྱས། །ཡིན་ན་ཧ་ཅང་

Page: 929 ༄༅། །ཐལ་འགྱུར་ཏེ། །ཆོས་ཀྱི་དབྱིངས་ལས་མ་གཏོགས་པའི། །ཆོས་གཞན་མེད་ཕྱིར་སྡིག་པ་དང༌། །ལུང་མ་བསྟན་ཡང་འདུས་མ་བྱས། །ཡིན་པ་ཉིད་དུ་ཐལ་བར་འགྱུར། །ཞེས་ཁོ་བོ་སྨྲ་སྟེ་འདི་ནི་གཟུར་གནས་ཀྱི་ངོར་ལན་དང་ བྲལ་བ་ཡིན་ནོ། །དེ་ལྟར་དོགས་པའི་གནས་ཅུང་ཟད་ཀྱང་བསལ་ནས། མདོར་ན་ཆོས་ཀྱི་དབྱིངས་གཟོད་ནས་རྣམ་པར་དག་ཅིང་དམིགས་མཚན་གྱིས་མ་གོས་པའི་རང་བཞིན་ཡང་དག་པར་ཤེས་པས་བདག་དང༌། སེམས་ཅན་དང༌། བྱང་ཆུབ་དང༌། དགེ་བའང་ཆོས་ཉིད་ཀྱི་ ཚུལ་གང་ཡིན་པ་དེ་ཁོ་ནར་མཐོང་བས་དམིགས་མཚན་གྱི་འདུ་ཤེས་ལོག་ཅིང་རྒྱུ་རྐྱེན་གྱི་དབང་ལས་སྒྲུབ་ཏུ་མི་རུང་བའི་ཆོས་ཀྱང་མི་སྲིད་པ་རྟེན་འབྲེལ་གྱི་ཚུལ་མཁྱེན་པས་བསྔོ་བ་དང་སྨོན་ལམ་གྱི་ཚོགས་མཐའ་ཡས་པ་ལ་འཇུག་པ་འདི་ནི་དམིགས་མེད་ཀྱི་བསྔོ་བ་ ཞེས་བྱ་བ་ཡིན་ནོ། །ལས་དང་པོ་པ་བློ་ཆུང་བ་ཁ་ཅིག་ནི་ཐོག་མར་རྒྱུ་དགེ་བ་དང་འབྲས་བུ་བྱང་ཆུབ་ལ་ཡིད་ཆེས་པ་ཁོ་ན་བསྐྱེད་པར་བྱ་སྟེ། ནན་ཏན་གྱིས་གུས་པས་བསྔོར་བཅུག་པས་དད་པ་གོང་དུ་འཕེལ་བར་འགྱུར་ཏེ། ཇོ་བོ་ལ་རྒན་མོ་ཞིག་གིས་གསེར་གཡུ་ཕུལ་བ་ ན་དགེ་བ་འདི་སེམས་ཅན་ཐམས་ཅད་ལ་སྟེར་སྙམ་པས་མཐུན་གྱུར་གྱིས་ཤིག་གསུངས་པ་ན་སེམས་ཅན་ལ་མི་སྟེར་ང་རང་གི་དོན་དུ་བསྔོ་བ་ཞུ་ཞེས་ཞུས་པས་ཐེག་ཆེན་གྱི་རིགས་ཅན་མིན་པར་འདུག་ཀྱང་དགེ་བ་ལ་ཡིད་ཆེས་པའི་གཏམ་ཡིན་གསུང་ནས་མཉེས་པར་གྲགས་ པ་ལྟ་བུའོ། །དེའི་ཕྱིར་དགོངས་གཅིག་པས་ཆེད་དུ་མཚན་མར་བཟུང་སྟེ་བསྔོ་བ་གནད་ཟབ་ཅེས་འཆད་པ་ཡང་ཕྱི་མ་འདི་ལ་དགོངས་པ་ཡིན་ནོ། །ཡུམ་རྒྱན་ལས་ནི། ཡོངས་སུ་བསྔོ་བ་ཁྱད་པར་ཅན། །དེ་ཡི་བྱེད་པ་མཆོག་ཡིན་ནོ། །ཞེས་ངོས་བཟུང་ནས། དབྱེ་ན་བཅུ་གཅིག་སྟེ། དེ་ནི་དམིགས་མེད་རྣམ་པ་ཅན། །ཕྱིན་ཅི་མ་ལོག་མཚན་ཉིད་དོ། །དབེན་དང་སངས་རྒྱས་བསོད་ནམས་ཚོགས། །རང་བཞིན་དྲན་པའི་སྤྱོད་ཡུལ་ཅན། །ཐབས་མཁས་མཚན་མ་མེད་པ་དང༌། །སངས་རྒྱས་རྗེས་སུ་ཡི་རང་དང༌། །

Page: 930 ཁམས་གསུམ་གཏོགས་པ་མ་ཡིན་དང༌། །ཆུང་དང་འབྲིང་དང་ཆེན་པོ་ཡི། །བསྔོ་བ་གཞན་ནི་རྣམ་གསུམ་དང༌། །བསོད་ནམས་ཆེ་འབྱུང་བདག་ཉིད་དོ། །ཞེས་གསུངས་ཏེ། མཚན་མར་འཛིན་པ་མེད་པས་བསྔོ་བ་དམིགས་མེད་ཀྱི་བསྔོ་བ་དང༌། དེ་ལ་ཡང་ མ་ཞེན་པས་བསྔོ་བ་ཕྱིན་ཅི་མ་ལོག་པའི་བསྔོ་བ་དང༌། ངོ་བོ་ཉིད་ཀྱིས་ཞི་བར་ཤེས་པ་དབེན་པའི་བསྔོ་བ་དང༌། དགེ་བ་ཐམས་ཅད་ཀྱང་འདས་པ་ནི་འགགས་མ་འོངས་པ་མ་སྐྱེས་ད་ལྟ་བ་རང་བཞིན་མེད་པར་ཤེས་པས་བསྔོ་བ་རང་བཞིན་དྲན་པའི་བསྔོ་བ་དང༌། སྲིད་ཞི་གཉི་གར་མི་ལྟུང་བ་ ཐབས་མཁས་པའི་བསྔོ་བ་དང༌། དུག་དང་བྲལ་བ་མཚན་མེད་ཀྱི་བསྔོ་བ་དང༌། ཆོས་ཉིད་ཇི་ལྟ་བར་རྗེས་སུ་ཡི་རང་ཞིང་ཆོས་ཉིད་ཇི་ལྟ་བ་དང་སངས་རྒྱས་རྣམས་ཀྱིས་མཁྱེན་པ་ཇི་ལྟ་བར་ཡོངས་སུ་བསྔོ་བ་སངས་རྒྱས་ཐམས་ཅད་ཀྱིས་གནང་བའི་བསྔོ་བ་དང༌། ཆོས་ཐམས་ཅད་དུ་མ་ཆུད་ ཅིང་བསྔོ་བ་ཉིད་ཀྱང་མི་དམིགས་པ་ཁམས་གསུམ་དུ་མ་གཏོགས་པའི་བསྔོ་བ་དང༌། མཚན་མ་མེད་པར་བསྔོས་པས་སྟོང་གསུམ་གྱི་སེམས་ཅན་རྣམས་ཀྱི་དགེ་བ་བཅུ་ནས་གཟུགས་མེད་བཞི་དང་མངོན་ཤེས་ལྔའི་བར་གྱི་དགེ་བ་ཐམས་ཅད་ཟིལ་གྱིས་གནོན་པ་ནི་བསོད་ནམས་ ཆེན་པོ་འབྱུང་བའི་ཡོངས་སུ་བསྔོ་བ་ཆུང་ངུ་དང༌། དམིགས་པ་མེད་ཅིང་མ་ཆགས་པར་བསྔོས་པས་སྟོང་གསུམ་གྱི་སེམས་ཅན་རང་རྒྱལ་དུ་གྱུར་པ་ལ་གཅིག་གིས་ཇི་སྲིད་འཚོའི་བར་གྱི་ཡོ་བྱད་ཐམས་ཅད་ཀྱིས་བསྟབས་པའི་བསོད་ནམས་ཟིལ་གྱིས་གནོན་པ་ནི་དེ་ འབྲིང་དང༌། གཞན་མ་ཡིན་པའི་དེ་བཞིན་ཉིད་ཀྱིས་བསྔོས་པས་སྟོང་གསུམ་གྱི་སེམས་ཅན་བྱང་ཆུབ་སེམས་དཔར་གྱུར་པ་རེ་རེ་ལ་ཡང་ཕྱོགས་བཅུ་རེ་རེའི་ཡང་ཞིང་གངྒཱའི་བྱེ་སྙེད་ཀྱི་སེམས་ཅན་དེ་ཐམས་ཅད་ཀྱིས་ཡོ་བྱད་ཐམས་ཅད་ཀྱིས་བསྐལ་པ་གངྒཱའི་བྱེ་སྙེད་དུ་ བསྙེན་བཀུར་བའི་བསོད་ནམས་ཟིལ་གྱིས་གནོན་པ་དེའི་བསྔོ་བ་ཆེན་པོ་སྟེ། ཐ་མ་གསུམ་ནི་ཆགས་མེད་ཀྱིས་བསྔོས་པས་བསོད་ནམས་ཆེན་པོ་འབྱུང་བའི་ཡོངས་སུ་བསྔོ་བ་གསུམ་ཡིན་ལ། མདོར་ན་སྟོང་གསུམ་གྱི་སེམས་ཅན་བྱང་ཆུབ་སེམས་དཔར་གྱུར་པའི་

Page: 931 ༄༅། །དམིགས་བཅས་ཀྱི་བསོད་ནམས་ཐམས་ཅད་དམིགས་མེད་ཀྱི་བསྔོ་བ་གཅིག་གིས་ཟིལ་གྱིས་གནོན་པ་ཡིན་ནོ། །དེ་ལ་བསྔོ་བའི་ཆོ་ག་ནི། དཀོན་མཆོག་གི་རྟེན་དང་མཆོད་པ་བཤམ། ཁྲུས་དང་གཙང་སྦྲ་བྱས་ཏེ་ཕྱོགས་བཅུའི་སངས་རྒྱས་དང་བྱང་ཆུབ་ སེམས་དཔའ་ཐམས་ཅད་མངོན་སུམ་དུ་བཞུགས་པར་མོས་ཏེ་མཆོད་པ་ཕུལ་ནས་བསྔོ་བ་འགྲུབ་པ་དང༌། བདེན་ཚིག་གིས་བྱིན་གྱིས་རློབ་པར་གསོལ་བ་གདབ། གཞན་དོན་དུ་དགེ་བ་བསྔོ་བར་བྱའོ་ཞེས་བྱང་ཆུབ་ཀྱི་སེམས་བསྐྱེད། ཆོས་ཀྱི་རང་བཞིན་བློའི་ཡུལ་ མ་ཡིན་པའི་དེ་ཁོ་ན་ཉིད་སྨྲ་བསམ་བརྗོད་བྲལ་གྱི་གནས་ལུགས་ལ་མཉམ་པར་བཞག་སྟེ་དེ་ལྟར་མ་རྟོགས་པའི་སེམས་ཅན་གྱི་དོན་དུ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ་བྱ་བ་ལ་སོགས་པས་མཁྱེན་པར་གསོལ་ཏེ། འཇམ་དཔལ་དཔའ་བོས་ཇི་ལྟར་མཁྱེན་པ་དང༌། །ཀུན་ཏུ་བཟང་པོ་དེ་ཡང་དེ་བཞིན་ཏེ། །དེ་དག་ཀུན་གྱི་རྗེས་སུ་བདག་སློབ་ཅིང༌། །དགེ་བ་འདི་དག་ཐམས་ཅད་རབ་ཏུ་བསྔོ། །ཞེས་སོགས་ཀྱིས་རང་གིས་བསྔོ་བའམ། གཞན་གྱི་རྗེས་ཟློས་བྱ་བས་བསམ་པ་ཐག་ པ་ནས་བསྔོ་བར་བྱའོ། །བསྔོ་བའི་ཚིག་ནི། སྤྱིར་ལས་ཀྱི་སྒྲིབ་པ་རྒྱུན་གཅོད་པའི་མདོའི་ཕུང་པོ་གསུམ་པ་ལས་བྱུང་བ། ཐོག་མ་དང་ཐ་མ་མ་མཆིས་པའི་འཁོར་བ་ན་འཁོར་བའི་ཚེ་བདག་གིས་དགེ་བའི་རྩ་བ་འདུས་བགྱིས་པར་གྱུར་པ་ཞེས་སོགས་དང༌། བསམ་ པ་ཐམས་ཅད་ཡོངས་སུ་རྫོགས་པར་བྱེད་པའི་བསྔོ་བའི་མདོ་ལས། གང་སངས་རྒྱས་ཐམས་ཅད་སྔོན་བྱང་ཆུབ་སེམས་དཔར་གྱུར་བས་ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པར་མཛད་པ་འདི་ལྟ་སྟེ། ཞེས་སོགས་དང༌། འགྲོ་བ་ཐམས་ཅད་ཡོངས་སུ་ སྐྱོབ་པར་བྱེད་པའི་བསྔོ་བའི་མདོ་ལས། བསོད་ནམས་ཐམས་ཅད་སེམས་ཅན་ཐམས་ཅད་ཀྱི་བླ་ན་མེད་པ་ཐམས་ཅད་མཁྱེན་པའི་ཡེ་ཤེས་འཐོབ་པར་བགྱི་བའི་སླད་དུ་ཡོངས་སུ་བསྔོ་བར་བགྱིའོ། །ཞེས་སོགས་དང༌། ཡོངས་སུ་བསྔོ་བའི་རྒྱལ་པོ་སྔགས་དང་བཅས་

Page: 932 པ་ལས། རྣམ་པ་ཀུན་མཆོག་ལྡན་པ་ཡི། །སྟོང་པ་ཤེས་པའི་ཏིང་ངེ་འཛིན། །ཞེས་སོགས་ཚིགས་བཅད་ལྷུག་སྔགས་དང་བཅས་པ་རྒྱས་པར་གསུངས་ལ། འདི་རྣམས་མདོར་བསྡུས་ཏེ་བདག་གིས་ཡན་ལག་བཞི་པར་ཡང་བྲིས་ཡོད་དོ། །སྟོན་པ་ སངས་རྒྱས་པའི་ཚེ་བྱང་ཆུབ་ཀྱི་ཤིང་དྲུང་ལས་མ་གཡོས་པར་འོག་མིན་གྱི་བར་དུ་ལྷ་གནས་སོ་སོར་སྐུ་སྣང་ཞིང་ཕྱོགས་བཅུ་ནས་བྱང་ཆུབ་སེམས་དཔའི་འཁོར་འདུས་ནས་དམ་པའི་ཆོས་བགྲོ་བ་སངས་རྒྱས་ཕལ་པོ་ཆེའི་ཆོས་ཀྱི་རྣམ་གྲངས་ལས་རབ་དགའ་ལྡན་དུ་ ཕྱོགས་བཅུའི་ཞིང་དེ་བཞིན་གཤེགས་པ་རྡོ་རྗེ་རྒྱལ་མཚན་དང༌། རིན་ཆེན་རྒྱལ་མཚན་ལ་སོགས་པ་བཅུའི་ཞིང་ནས་བྱང་ཆུབ་སེམས་དཔའི་གཙོ་བོ་རྡོ་རྗེ་རྒྱལ་མཚན་དང༌། རིན་ཆེན་རྒྱལ་མཚན་ལ་སོགས་པ་དེ་བཞིན་གཤེགས་པ་སོ་སོ་དང་མཚན་གཅིག་པ་རེ་རེ་ཡང་རང་དང་མིང་ གཅིག་པའི་བྱང་ཆུབ་སེམས་དཔའ་ཞིང་གི་རྡུལ་སྙེད་ཀྱིས་བསྐོར་བ་ལྷགས་ཏེ། ཕྱོགས་བཅུར་འཁོད་ནས་རང་རང་གི་སྟོན་པས་བསྟན་པའི་ཆོས་བགྲོ་བའི་ཚེ། ཐོག་མར་བྱང་ཆུབ་སེམས་དཔའ་རྡོ་རྗེ་རྒྱལ་མཚན་གྱིས། དེ་བཞིན་གཤེགས་པ་རྡོ་རྗེ་རྒྱལ་མཚན་དེས་བསྟན་པའི་བསྔོ་བ་བཅུ་བསྟན་ པ་བམ་པོ་བདུན་བཤད་དེ། དགེ་བའི་རྩ་བ་འདིས་སྡུག་བསྔལ་གྱི་ཕུང་པོ་ཐམས་ཅད་རྣམ་པར་ཟློག་པའི་ཕྱིར། བདག་སེམས་ཅན་ཐམས་ཅད་ཀྱི་གནས་སུ་གྱུར་ཅིག །ཅེས་སོགས་དང་པོ། སེམས་ཅན་ཐམས་ཅད་ཀྱི་འདུ་ཤེས་དང་ཚོར་བ་འགོག་པའི་ཡོངས་སུ་བསྔོ་བ་དང༌། ཀུན་ཏུ་བཟང་པོའི་མཆོད་སྤྲིན་གྱི་གཙུག་ལག་ཁང་གྲངས་མེད་པས་སངས་རྒྱས་ཐམས་ཅད་ལ་བསྙེན་བཀུར་བྱས་པར་གྱུར་ཅིག །ཅེས་སོགས་གཉིས་པ། མི་ཕྱེད་པ་དང་ལྡན་པའི་བསྔོ་བ་དང༌། ཡོངས་སུ་བསྔོ་བ་འདིས་སངས་རྒྱས་བཅོམ་ལྡན་འདས་དེ་དག་སངས་རྒྱས་ ཀྱི་རྣམ་པར་སྤྱོད་པའི་བདེ་བ་བསམ་གྱིས་མི་ཁྱབ་པ་དང་ཕྱི་ཕྱིར་ཞིང་ལྡན་པར་གྱུར་ཅིག །ཅེས་སོགས་གསུམ་པ། སངས་རྒྱས་ཐམས་ཅད་ཡང་དག་པར་སྐྱེད་པའི་བསྔོ་བ་དང༌། འདི་ལྟར་ཡང་དག་པའི་མཐའ་ཐམས་ཅད་དུ་རྗེས་སུ་སོང་ཞིང་དངོས་པོ་ཐམས་ཅད་ཀྱི་རྗེས་སུ་

Page: 933 ༄༅། །སོང་བ་དང༌། འགྲོ་བ་དང༌། སེམས་ཅན་དང༌། ཞིང་དང༌། ཆོས་དང༌། ནམ་མཁའ་དང༌། དུས་གསུམ་དང༌། འདུས་བྱས་དང༌། འདུས་མ་བྱས་དང༌། སྤྱད་པའི་སྒྲ་ཐམས་ཅད་ཀྱི་རྗེས་སུ་སོང་བ་དེ་བཞིན་དུ། དགེ་བའི་རྩ་བ་འདི་དག་ཀྱང་དུས་གསུམ་གྱི་སངས་རྒྱས་སྐྱེ་བ་ཐམས་ཅད་ དུ་རྒྱས་པར་ཁྱབ་པར་གྱུར་ཅིག །ཅེས་སོགས་བཞི་པ། ཐམས་ཅད་དུ་རྗེས་སུ་སོང་བའི་སྔོ་བ་དང༌། གང་ཇི་སྙེད་དུ་སྔོན་གྱི་འདས་པའི་དུས་འབྱམས་ཀླས་པའི་འཇིག་རྟེན་གྱི་ཁམས་ཤིན་ཏུ་བསྟན་པ་གྲངས་ལས་འདས་པ་དེ་བཞིན་གཤེགས་པ་ཐམས་ཅད་ཀྱི་ཡེ་ ཤེས་ཀྱིས་ཐུགས་སུ་ཆུད་པ་རྣམས་སུ་སངས་རྒྱས་ཀྱི་ཞིང་གི་རྒྱན་ཡོངས་སུ་དག་པ་བྱུང་བ་དང་ཞེས་སོགས་ལྔ་པ། བསོད་ནམས་མི་ཟད་པའི་བསྔོ་བ་སྟེ། འདིའི་ཚིགས་བཅད་དུ། ལས་ཀྱི་རྣམ་པ་གང་གི་སྐྱེ་ལྡན་ཞིང༌། །རང་བཞིན་གང་དང་མཚན་ཉིད་གང་ཡིན་དང༌། ། དེ་ན་ཅི་འདྲའི་ཆོས་ཉིད་ཡོད་པ་དག །དེ་བཞིན་དེ་དག་དག་པར་ཡོངས་སུ་བསྔོ། །ཞེས་ཀྱང་བཤད་དོ། །ཟས་སྟེར་བ་ན་སེམས་ཅན་ཐམས་ཅད་ཡེ་ཤེས་ཀྱི་ཁ་ཟས་དང༌། ཆགས་པ་མེད་པའི་ཟས་དང༌། དགའ་བའི་ཟས་དང༌། ཟང་ཟིང་མེད་པའི་ཟས་དང༌། ཡེ་ཤེས་ཀྱིས་འཚོ་ བ་ཆོས་ཀྱིས་འཚོ་བ་དགེ་བའི་རྩ་བས་ཡོངས་སུ་བཟུང་བའི་ཆོས་ཀྱི་སྐུ་དང༌། ཡེ་ཤེས་ཀྱི་སྐུ་ལ་ཡང་དག་པར་སྤྱོད་པས་བྱིན་པའི་གནས་གང་དང༌། སྙིང་བརྩེ་བའི་ཁ་ཟས་རབ་ཏུ་ལེན་པར་གྱུར་ཅིག་ཅེས་སོགས་དྲུག་པ། དགེ་བ་ཐམས་ཅད་དང་མཉམ་ཉིད་ཀྱི་རྗེས་སུ་སོང་བ་སྟེ། འདིར་ཡང༌། ཆོས་ཉིད་ཀུན་ཏུ་འགྲོ་བ་ཇི་འདྲ་བ། །དེ་བཞིན་དེ་དག་ཡོངས་སུ་བསྔོ་བར་བགྱིད། །ཅེས་གསུངས་སོ། །སེམས་ཅན་ཐམས་ཅད་ཀྱི་རེ་བ་རྫོགས་པའི་ཕྱིར་བསྔོའ། །ཞེས་སོོགས་བདུན་པ། འགྲོ་བ་ཐམས་ཅད་དང་མཉམ་ཉིད་ཀྱི་རྗེས་སུ་སོང་བའི་ བསྔོ་བ་དང༌། དགེ་བའི་རྩ་བ་ཐམས་ཅད་ཀྱང་གཉིས་སུ་མེད་པའི་ཐམས་ཅད་མཁྱེན་པ་ཉིད་ལ་ཚུལ་གྱིས་རྒྱུད་གཅིག་ཏུ་གྱུར་པས་འདི་ལྟར་བསྔོ་སྟེ་ཞེས་བརྒྱད་པ། དེ་བཞིན་ཉིད་ཀྱི་མཚན་ཉིད་ཀྱི་རང་བཞིན་དུ་བསྔོ་བ་དང༌། འདིར་ཡང༌། དེ་བཞིན་ཉིད་ཀྱི་མཚན་ཉིད་

Page: 934 ཅི་འདྲ་དང༌། དེ་བཞིན་ཉིད་ཀྱི་ངང་ཚུལ་ཇི་འདྲ་དང༌། །དེ་བཞིན་ཉིད་ཀྱི་རང་བཞིན་ཇི་འདྲ་བ། །དེ་འདྲར་ལས་རྣམས་ཀུན་ཀྱང་ཡོངས་སུ་བསྔོ། །ཞེས་སོ། །འདི་ལྟར་ཆགས་པ་དང་གྲོལ་ཞིང་བཅིངས་པ་མེད་པའི་སེམས་སུ་ཀུན་དུ་བཟང་པོའི་ལུས་རབ་ཏུ་ གྲུབ་པར་གྱུར་ཅིག་ཅེས་སོགས་དགུ་པ། ཆགས་པ་དང་བཅིངས་གྲོལ་མེད་པའི་བསྔོ་བ་དང༌། སངས་རྒྱས་དེ་དག་ཐམས་ཅད་ཀྱིས་ཡང་དག་པར་དགོངས་ཏེ། འཇིག་རྟེན་གྱི་ཁམས་གཅིག་ཏུ་བྱང་ཆུབ་ཀྱི་སྤྱད་པ་སྤྱོད་པར་གྱུར་ཅིག །དེ་ཇི་ལྟ་བར་འཇིག་རྟེན་གྱི་ཁམས་ཆོས་ དབྱིངས་ཀྱིས་བཀླས་པ་ནམ་མཁའི་མཐས་གཏུགས་པ་མ་ལུས་པ་ཐམས་ཅད་དུ་ཡང་བྱང་ཆུབ་ཀྱི་སྤྱད་པ་སྤྱོད་པར་གྱུར་ཅིག །ཅེས་སོགས་བཅུ་པ། ཆོས་དབྱིངས་ཚད་མེད་པའི་ཡོངས་སུ་བསྔོ་བ་ཡིན་ལ། འདིར། རྡོ་རྗེ་རྒྱལ་མཚན་རྒྱལ་བས་གང་གསུངས་པ། །ཡོངས་ བསྔོ་དམ་པ་མཆོག་དང་ཕུལ་ཡང་ཡིན། །ཞེས་དེ་བཞིན་གཤེགས་པ་རྡོ་རྗེ་རྒྱལ་མཚན་གྱིས་གསུངས་པར་བསྟན་ཏོ། །དེས་ན་རྡོ་རྗེ་རྒྱལ་མཚན་རང་ཉིད་ཀྱིས། བྱས་དང་བྱེད་འགྱུར་བྱེད་པ་རྣམས། །ཞེས་བྱང་ཆུབ་སེམས་དཔའ་རྡོ་རྗེ་རྒྱལ་མཚན་ ཉིད་ཀྱི་གཞུང་ཡིན་པར་འབྲུ་གཉེར་བའང་གླེགས་བམ་དེ་བསྐལ་དོན་དུ་གྱུར་པའི་བཤད་པའོ། །མདོར་ན་དེ་ལྟ་བུའི་ཚུལ་རྣམས་ཀྱིས་བསྔོ་ཞིང་མཐར་བདེན་པའི་སྟོབས་བརྗོད་པས་བརྟན་པར་བྱའོ། །བོད་སྔ་རབས་པ་རྣམས་བསྔོ་བའི་ཚེ་གཏོར་མ་གཏོང་བ་ དང་ཆུ་རྒྱུན་སྦྲེང་བའི་ལག་ལེན་བྱུང་བ་ལ་རྗེ་ས་པཎ་གྱིས་ནན་གྱིས་འགོག་མོད་ཀྱང༌། སྤྱིར་རྒྱ་གར་ན་སྦྱིན་པ་པོས་བྱིན་ཟིན་པ་དང་ལེན་པ་པོས་བླངས་ཟིན་པའི་ཚད་ཤེས་པའི་ཕྱིར། སྦྱིན་ཡུལ་གྱི་ལག་ཐིལ་གཡས་པར་ཏིལ་དང་གསེར་ཅུང་ཟད་བླུགས་ཏེ་སྦྱིན་པ་པོས་ རིལ་བ་ནས་ཆུ་རྒྱུན་དེའི་སྟེང་དུ་བླུག་པ་ནི་བྱིན་ཟིན་པ་དང་བླངས་ཟིན་པའི་ཚད་ཡིན་ཏེ། ཟ་མ་ཏོག་གི་མདོ་ལས། སྤྲུལ་པའི་མིའུ་ཐུང་གིས་ཆུ་རྒྱུན་གསེར་དང་ཏིལ་བཅས་བླངས་པར་བཤད་པ་དང༌། རྒྱལ་བྱེད་ཀྱི་ཚལ་འབུལ་བའི་ཚེ་ཁྱིམ་བདག་གིས་རིལ་བའི་ཆུ་

Page: 935 ༄༅། །རྒྱུན་བླུགས་པ་ན་ཐོགས་ནས་འབྱུང་དུ་མ་བཏུབ་པས་སྟོན་པས་ས་ཕྱོགས་དེ་ཁྱོད་ཀྱིས་སྔོན་དེ་བཞིན་གཤེགས་པ་དྲུག་ལ་ཕུལ་ཟིན་གྱིས་ཕྱོགས་གཞན་དུ་བྲིམས་ཤིག་གསུངས་ཏེ་དེ་ཆུ་རྒྱུན་བྱུང་བར་གསུངས་པ་ཡིན་ནོ། །དེས་ན་བོད་ ཕྱི་རབས་ན་སྲོལ་འདི་མི་སྣང་ཡང་མངའ་བདག་ཁྲི་རལ་གྱིས་གསར་བཅད་མཛད་དུས་བྲེ་སྲང་ཡན་རྒྱ་གར་དབུས་དང་བསྟུན་པར་བཤད་པས་སྲོལ་འདི་ཡོད་སྲིད་ཅིང༌། དེ་མིན་ནའང་པཎྜི་ཏ་རྣམས་ཀྱིས་རྒྱ་གར་གྱི་ལུགས་བྱེད་པ་བྱུང་ནས་ཡོན་དབུལ་བ་དང་བསྔོ་བ་ བྱེད་པ་བར་གཞན་གྱིས་མཆོད་པར་འབྱུང་བས་སྔོན་ཡོན་ཕུལ་བའི་ཐ་ཚིག་ཏུ་གྲགས་པ་དེ་བྱས་པ་ལ་བསྔོ་བ་ལ་དགོས་པར་ཕྱིས་གོ་བ་འབྱམས་པ་ཡིན་སྲིད་མོད་ཀྱང་འདི་ནི་བྱས་ཀྱང་རྒྱ་གར་གྱི་ཡུལ་སྲོལ་བྱས་པར་འགྱུར་ལ། མ་བྱས་ཀྱང་དོན་ཅི་ཡང་ཆད་པར་མི་ འགྱུར་རོ། །གཉིས་པ་གཞུང་གི་དོན་ལ་གཉིས། བསྔོ་བ་དངོས་དང༌། བཀའ་དྲིན་དྲན་པའི་ཕྱག་གིས་བསྟན་བཅོས་ཀྱི་མཐའ་བསྡུ་བའོ། །དང་པོ་བསྔོ་བ་དངོས་ལ་གསུམ། གཙོ་བོར་གཞན་དོན་དུ་བསྔོ་བ། ཞར་ལ་རང་དོན་དུ་བསྔོ་བ། སངས་རྒྱས་ཀྱི་བསྟན་པའི་དོན་དུ་ བསྔོ་བའོ། །དང་པོ་གཞན་དོན་དུ་བསྔོ་བ་ལ་ཡང༌། འགྲོ་བ་ཕལ་པའི་དོན་དུ་བསྔོ་བ་དང༌། མཆོག་གི་དོན་དུ་བསྔོ་བའོ། །དང་པོ་འགྲོ་བ་ཕལ་པའི་དོན་དུ་བསྔོ་བ་ལ་ཡང༌། སྤྱིར་བསྔོ་བ། ངན་སོང་གསུམ་གྱི་སྡུག་བསྔལ་ཞི་བར་བསྔོ་བ། མཐོ་རིས་པའི་སྡུག་བསྔལ་ཞི་བར་བསྔོ་བའོ། །དང་པོ་་ནི། བདག་ གིས་བྱང་ཆུབ་སྤྱོད་པ་ལ། །འཇུག་པ་རྣམ་པར་བརྩམས་པ་ཡི། །དགེ་བ་གང་དེས་འགྲོ་བ་ཀུན། །བྱང་ཆུབ་སྤྱོད་ལ་འཇུག་པར་ཤོག །ཕྱོགས་རྣམས་ཀུན་ན་ལུས་དང་སེམས། །སྡུག་བསྔལ་ནད་པ་ཇི་སྙེད་པ། །དེ་དག་བདག་གི་བསོད་ནམས་ཀྱིས། ། བདེ་དགའ་རྒྱ་མཚོ་འཐོབ་པར་ཤོག །དེ་དག་སངས་རྒྱས་བདེ་ཐོབ་ཀྱི། །བར་དུ་བདེ་ལས་ཉམས་མ་གྱུར། །འགྲོ་བ་བླ་ན་མེད་པ་ཡི། །བདེ་བ་རྒྱུན་མི་འཆད་པར་ཤོག །ཅེས་གསུངས་ཏེ། དང་པོས་སེམས་ཅན་ཐམས་ཅད་བྱང་ཆུབ་ཀྱི་ལམ་དུ་འཇུག་པར་

Page: 936 བསྔོས། གཉིས་པས་སེམས་ཅན་གྱི་ནད་ཞི་བར་བསྔོས། ཐ་མས་ཐམས་ཅད་ཕན་བདེ་འཐོབ་པར་བསྔོས་པའོ། །དེ་ཡང་སློབ་དཔོན་ཉིད་ཀྱིས་མདོ་བསྟན་བཅོས་ཐམས་ཅད་ཀྱི་སྙིང་པོ་འདི་ལྟ་བུ་སྐབས་དེ་ཉིད་དུ་གཞུང་འདོན་པའི་ཚུལ་གྱིས་ཐོགས་མེད་དུ་བརྩམས་ པ་འདིས་ནི་ཐེག་ཆེན་གྱི་སྡེ་སྣོད་རྒྱ་མཚོ་ཆེན་པོ་ལྟ་བུར་འཇུག་པར་མི་ནུས་པ་རྣམས་ཀྱིས་ཀྱང་འདི་ལྟ་བུ་ཐོས་པའི་མོད་ལ་ཡིད་བཞིན་གྱི་ནོར་བུ་ལྟ་བུའི་བྱང་ཆུབ་ཀྱི་སེམས་ཐེག་ཆེན་གྱི་ངོ་བོ་ཐོབ་པར་འགྱུར་ལ། གང་ཟག་གཅིག་ཁོ་ན་བྱང་ཆུབ་ཀྱི་སེམས་ལ་བཞག་པའི་ ཕན་ཡོན་ཡང་མཐའ་མེད་ན་འགྲོ་བ་མཐའ་ཡས་པ་ལྟ་ཅི་སྨོས་ཏེ། དེའི་ཕྱིར་བསོད་ནམས་དང་ཡེ་ཤེས་ཀྱི་ཚོགས་གཞལ་དུ་མེད་པ་ཆོས་ཀྱི་རྣམ་གྲངས་འདི་གསུངས་པའི་དུས་དེ་ཁོ་ནར་ཡང་ཐོབ་པ་དེ་ཉིད་བསྔོ་རྒྱུའི་གཙོ་བོར་བྱས་ཏེ། དགེ་བ་དེ་ཡི་མཐུས་སེམས་ཅན་ཐེག་ཆེན་ དུ་མ་ཞུགས་པ་ཐམས་ཅད་ཀྱང་བྱང་ཆུབ་ཀྱི་སྤྱོད་པ་འདི་ལྟ་བུ་ལ་འཇུག་ཅིང༌། ཞུགས་པ་རྣམས་སླར་མི་ལྡོག་པར་གོང་ནས་གོང་དུ་འཇུག་པར་གྱུར་ཅིག་པའོ། །བྱེ་བྲག་ཏུ་ལུས་སེམས་སྡུག་བསྔལ་གྱིས་མནར་བའི་ནད་པ་ཐམས་ཅད་དགེ་བ་འདིའི་མཐུས་ནད་ཐམས་ཅད་ ལྡང་བ་མེད་པར་ཞི་སྟེ་ལུས་རྣལ་དུ་ཕེབས་པས་བདེ་བ་དང་སེམས་རྣལ་དུ་ཕེབས་པས་དགའ་བ་ཆེན་པོ་འཐོབ་པར་གྱུར་ཅིག །དེ་དག་གི་དགའ་བདེ་དེ་ཡང་སངས་རྒྱས་མ་ཐོབ་ཀྱི་བར་དུ་མི་ཉམས་པར་གོང་དུ་འཕེལ་ཞིང༌། མདོར་ན་འགྲོ་ བ་ཐམས་ཅད་ཀྱང་བླ་ན་མེད་པ་སྲིད་ཞི་ལས་འདས་པའི་ཟག་མེད་ཀྱི་བདེ་བ་འཐོབ་ཅིང་མི་ཉམས་ལ་རྟག་ཏུ་དེས་འཚོ་བར་གྱུར་ཅིག་པའོ། །འདི་ནི་དེའི་དུས་ཡམས་ནད་མི་ངས་ཀྱི་འཚེ་བ་ཞིག་ཡོད་པར་ཞི་བྱེད་དུ་གཙོ་བོར་དགོངས་པ་འདྲ་ལ། སྤྱིར་སེམས་ཅན་ཐམས་ཅད་གཏན་ དུ་མ་རིག་པའི་གཅོང་གིས་ཟིན་ཞིང་དེ་ལས་དུག་གསུམ་གྱི་ཀུན་ལྡང་སྐྱེ་ལ། དེས་རླུང་མཁྲིས་བད་ཀན་སྐྱེད་ཅིང་དེ་གསུམ་ཆ་མ་སྙོམས་པ་དང་འཕེལ་ཟད་འཁྲུགས་པ་ལ་ནད་དུ་གྲགས་ཤིང༌། མི་ལ་ནི་ནད་བཞི་བརྒྱ་རྩ་བཞིར་ཟད་མོད་ཀྱང་དུད་འགྲོ་ནས་མནར་མེད་པའི་བར་ལ་སྔ་

Page: 937 ༄༅། །མ་བརྒྱ་སྟོང་ཕྲག་མང་པོར་བསྒྱུར་བའི་ནད་ཕྱི་མ་ཕྱི་མ་ལ་རིམ་པས་ཡོད་པའི་ཕྱིར། རྒྱུ་དང་འབྲས་བུའི་སྒོ་ནས་སེམས་ཅན་སྤྱིའི་དོན་དུ་བསྔོ་བར་བཤད་ཀྱང་རུང་ངོ༌། །གསེར་གླིང་པས་གཙོ་བོའི་དོན་སོ་དྲུག་གི་ཚེ་བསྔོ་ལེའི་ཚིགས་བཅད་དང་པོ་གསུམ་ གྱིས་བསྔོ་ལེ་མཐའ་དག་བསྡུས་ལ། བཅུ་གཅིག་ཏུ་བཀྲལ་ཚེ་ཚིགས་བཅད་དང་པོ་ཁོ་ནས་བསྡུས་ཏེ་བཤད་དོ། །གཉིས་པ་ངན་སོང་གསུམ་གྱི་སྡུག་བསྔལ་ཞི་བར་བསྔོ་བ་ལ། སྤྱིའི་དོན་དང༌། གཞུང་གི་དོན་ཏོ། །དང་པོ་ལ། དམྱལ་བ་ནི། ན་ར་ཀ་ཞེས་སྡུག་བསྔལ་དྲག་པོས་དམྱལ་ཐག་བཅད་པའི་ཕྱིར་ དམྱལ་བ་ཞེས་བྱའོ། །གནས་ནི། འཛམ་གླིང་འདིའི་འོག་དཔག་ཚད་ཉི་ཁྲི་གཞལ་བ་ན་མནར་མེད་ཀྱི་དམྱལ་བ་ཡོད་ལ། དེའི་སྟེང་ན་གཞན་བདུན་པོ་ཡོད་དེ། མཛོད་ལས། འདི་འོག་སྟོང་ཕྲག་ཉི་ཤུ་ན། །མནར་མེད་པའོ་དེ་ཙམ་མོ། །དེ་ཡི་སྟེང་ན་དམྱལ་བ་ བདུན། །ཞེས་སོ། །དེ་ལ་ཐེག་དམན་གྱི་མངོན་པར་མནར་མེད་ཀྱི་རྒྱ་འཕངས་གཉི་གར་དཔག་ཚད་ཉི་ཁྲི་རེ་ཡོད་ལ། ཐེག་ཆེན་དུ་ནི་ཚད་མེད་དེ་མྱང་འདས་ཆེན་པོར་མཚམས་མེད་བརྒྱད་བྱས་པའི་དམྱལ་བ་པའི་ལུས་ལ་ཡང་དཔག་ཚད་བརྒྱད་ཁྲི་ཡོད་པ་དང༌། ཕལ་ཆེན་ལས་ཐེག་ཆེན་ལ་སྐུར་པ་བཏབ་པའི་དམྱལ་བ་པའི་ལྕེ་ལ་ཡང་དཔག་ཚད་འབུམ་ཡོད་པར་བཤད་པའི་ཕྱིར་རོ། །དབྱེ་བ་ནི། ཐུན་མོང་བ་ལྟར་ན་ཚ་དམྱལ་བརྒྱད། གྲང་དམྱལ་བརྒྱད། ཉི་ཚེ་ཉེ་ཁོར་སྟེ་བཅུ་དྲུག་གོ །སྡུག་བསྔལ་གྱི་ཁྱད་པར་ནི། ཡང་སོས་ སུ་སེམས་ཅན་མཐོང་ཚད་དགྲ་མི་ཤ་པོ་ལྟ་བུར་མཐོང་ཞིང་བླངས་ཚད་མཚོན་དུ་གྱུར་པས་ཕན་ཚུན་བསྣུན་ཏེ་འཆི་ལ། དེ་མ་ཐག་ལས་ཀྱི་རླུང་གྲང་མོའམ་སོས་པར་གྱུར་ཅིག་ཅེས་པའི་སྒྲ་ལས་སྐད་ཅིག་གིས་སོས་ཏེ་ཡང་སྔར་ལྟར་ཁོ་ན་བྱེད་དོ། །ཐིག་ནག་ཏུ་ནི། གཤིན་ རྗེས་ལུས་ལ་ཐིག་ནག་པོ་མཐའ་ཡས་པར་བཏབ་སྟེ་ལྕགས་སྲེག་གི་སོག་ལེ་དང་སྟ་རེ་དང་སྟེའུ་སོག་ལེ་མེ་འབར་བས་གཤག་གཏུབ་གཞོག་ལ། སྟོད་གཤོག་པ་ན་སྨད་ཀྱི་རྨ་འཚོ་ལ། སྨད་གཤོག་པ་ན་སྟོད་སོས་ཏེ་སྡུག་བསྔལ་བའོ། །བསྡུས་འཇོམས་ནི། ལྕགས་

Page: 938 ཀྱི་རི་ཆེན་པོ་སྲོག་ཆགས་སྣ་ཚོགས་པའི་གདོང་ཅན་ཆ་ལང་ལྟར་འཐབ་པའི་བར་དུ་ལུས་ཕྱེ་མར་བྱེད་ཅིང་རི་གྱེས་པ་ན་ལུས་འཚོ་ལ་ཡང་རི་འཐབ་པས་འཇོམས་པའོ། །ངུ་འབོད་པ། ལྕགས་བསྲེགས་ཀྱི་ཁང་པར་སྲེག་པ་དང༌། ངུ་འབོད་ཆེན་པོ། ལྕགས་ ཁང་ཉིས་རིམ་ལ་སོགས་པར་སྲེག་གོ །ཚ་བ་པ། ལྕགས་བསྲེགས་ཀྱི་ཕྲུ་བར་ལྕགས་ཁུས་འཚེད་པ་དང༌། རབ་ཏུ་ཚ་བ་པ། ལྕགས་བསྲེགས་ཀྱི་གསལ་ཤིང་རྩེ་གསུམ་པས་སྨད་ནས་འབུགས་ཤིང་ནང་ཐམས་ཅད་མེར་འབར་བས་བ་སྤུ་ཐམས་ཅད་ནས་མེ་ལྕེ་ འབྱུང་བ་དང་ལྕགས་ལེབ་མེ་འབར་བས་དཀྲི་བ་དང་ཀེང་རུས་ཙམ་ལུས་པ་ན་ལྕགས་བསྲེགས་ཀྱི་ས་གཞི་ལ་བཀྲམ་པས་ཤ་སྐྱེ་ཞིང་ཡང་འཚེད་པ་སོགས་དང༌། མནར་མེད་དུ་ལྕགས་ཁང་རིམ་པ་མཐའ་ཡས་པའི་ནང་དུ་མུན་པའི་རང་བཞིན་གྱི་མེ་ལྕེ་ནག་པོས་ སྲེག་ཅིང་སྲེག་བཞིན་པ་དེ་ཉིད་ལས་ལྕགས་བསྲེགས་ཀྱི་ཞིབ་མར་མེ་དང་ལྷན་ཅིག་འབྲུ་ལྟར་བཀྲབ་པ་དང༌། རྔོ་བ་དང་ལྕགས་བསྲེགས་ཀྱི་རང་འཐག་ལ་འཐག་པ་དང༌། ལྕེ་བརྒྱངས་ནས་ལྕགས་བསྲེགས་ཀྱི་རྨོན་པ་དོར་སྟོང་ལ་སོགས་པས་རྨོ་བ་སོགས་མཐའ་ཡས་ཏེ་སྡུག་བསྔལ་ ལ། བར་མཚམས་སྐད་ཅིག་ཀྱང་མེད་པའི་ཕྱིར་མནར་མེད་པ་ཞེས་བྱ་ལ། འདིའི་སྡུག་བསྔལ་ཇི་ལྟ་བར་ཐོས་ན་ལྷ་མི་སུ་ཡང་ཁྲག་བསྐྱུགས་ཏེ་འཆི་བས་ཇི་བཞིན་དུ་མ་གསུངས་པར་བཤད་ལ། སྤྱིར་མིའི་མེ་དང༌། ཁོར་ཡུག་གི་མེ་དང༌། དུས་མཐའི་མེ་རྣམས་སྔ་མ་ལས་ བདུན་འགྱུར་གྱིས་ཕྱི་མ་ཚ་ལ། དེ་ལས་ཡང་སོས་ཀྱི་མེ་བདུན་འགྱུར་གྱིས་ཚ་ཞིང༌། དེ་བཞིན་མནར་མེད་ཀྱི་བར་དུ་བདུན་འགྱུར་གྱིས་འོག་མ་འོག་མ་ཚ་ལ། དམྱལ་བ་འོག་མ་འོག་མ་ལ་གོང་མ་གོང་མའི་སྡུག་བསྔལ་ཐམས་ཅད་ཚང་བར་ཡོད་ཀྱི་སྟེང་དུ་རང་གནས་ཀྱི་ སྡུག་བསྔལ་དེ་ལྷག་པོར་མྱོང་ངོ༌། །ནད་ཀྱང་མིའི་ནད་རིགས་བཞི་བརྒྱ་རྩ་བཞི་བརྒྱར་བསྒྱུར་བའི་ནད་དུད་འགྲོ་དང་དེ་སྟོང་དུ་བསྒྱུར་བ་ཡི་དྭགས་ལ་ཡོད་ཅིང་དེ་ཐམས་ཅད་བྱེ་བ་མང་པོར་བསྒྱུར་བ་ཡང་སོས་དང་དེ་མཐའ་ཡས་པ་རིམ་པར་བསྒྱུར་བ་འོག་མ་འོག་

Page: 939 ༄༅། །མ་ལ་ཚང་བར་ཡོད་དོ། །ཉེར་འཁོར་བ་ནི། མངོན་པ་ལྟར་ན་ཚ་དམྱལ་བརྒྱད་པོའི་ཕྱོགས་བཞི་པོ་རེ་རེ་ན་མེ་མར་མུར་པུས་ནུབ་ཙམ་གྱི་ས་གཞི་དང༌། རོ་མྱགས་མི་གཙང་བའི་འདམ་འབུ་མཆུ་རྣོན་གྱིས་གང་བ་དང༌། སྤུ་གྲིའི་སོ་ གཏམས་པ་རྩྭ་ལྟར་སྐྱེས་ཤིང་རལ་གྲིའི་ལོ་མ་ཅན་གྱི་ནགས་ཚལ་དང༌། ཁྲོ་ཆུ་ཁོལ་མའི་ཆུ་བོ་རབ་མེད་དེ་ལྷག་པའི་འཁོར་བཞི་བཞི་ཡོད་པས་ཚ་དམྱལ་རེ་རེ་ལ་འཁོར་བཅུ་དྲུག་སྟེ། བརྒྱད་པོ་ཀུན་ལ་ལྷག་བཅུ་དྲུག །མེ་མར་མུར་དང་རོ་མྱགས་འདམ། ། སྤུ་གྲིའི་ལམ་སོགས་ཆུ་བོ་ཡིན། །ཞེས་སོ། །ཚ་དམྱལ་གཙོ་བོ་ལས་ཐར་ཡང་དེ་དག་ཏུ་མེ་མར་མུར་ལ་རྐང་པ་བཞག་པ་ན་རུས་པར་འགྲོ་ལ་བཏེག་པ་ན་ཤ་གསར་པ་གཞོན་ཤ་ཅན་སྐྱེ་བ་དང༌། འདམ་དུ་ཚུད་དེ་འབུ་རྣམས་ཀྱིས་རུས་པ་ཐམས་ཅད་འབུགས་པ་ དང༌། སྤུ་གྲིས་རྐང་པ་གཅོད་ཅིང་བཏེག་པ་ན་སོས་པ་དང་ཤིང་གྲིབ་ལ་འཁོད་པ་ན་ལས་ཀྱི་རླུང་གིས་རལ་གྲི་རྣམས་ལྷུང་བས་ལུས་ཕྱེ་མར་བྱེད་ཅིང་ཡང་སོས་པ་དང༌། འགྱུར་བྱེད་ཀྱི་ཆུ་བོར་ལྷུང་སྟེ་འཚེད་ཅིང་ལྕགས་བསྲེགས་ཀྱི་ཉ་བོ་ཆེ་ཟ་བ་དང༌། གཤིན་ རྗེས་ལྕགས་བསྲེགས་ཀྱི་ཉ་རྒྱ་དང་ལྕགས་ཀྱུས་བཤར་ནས་ལྕགས་བསྲེགས་ཀྱི་གཞིར་རྔོད་པ་རྣམས་ལོ་མཐའ་ཡས་པར་མྱོང་ངོ༌། །ཚེ་ཚད་ནི། མི་ལོ་ལྔ་བཅུ་ལ་ཞག་དང་དེ་སུམ་ཅུ་ལ་ཟླ་བ་དེ་བཅུ་གཉིས་ལོར་བྱས་པའི་ལོ་ལྔ་བརྒྱ་ནི་ལྷ་རྒྱལ་ཆེན་རིས་བཞི་པའི་ ཚེ་ཡིན་ལ། དེ་བཞིན་དུ་གོང་མ་གཉིས་འགྱུར་དུ་བསྒྲེས་པས་སུམ་བཅུ་རྩ་གསུམ་པ་མི་ལོ་བརྒྱ་ལ་ཞག་ཏུ་བྱས་པའི་ལོ་སྟོང༌། འཐབ་བྲལ་བ་ཉིས་བརྒྱ་ལ་ཞག་ཏུ་བྱས་པའི་ལོ་ཉིས་སྟོང༌། དགའ་ལྡན་པ་མི་ལོ་བཞི་བརྒྱ་ལ་ཞག་ཏུ་བྱས་པའི་ལོ་བཞི་སྟོང༌། འཕྲུལ་ དགའ་བ་མི་ལོ་བརྒྱད་བརྒྱ་ལ་ཞག་ཏུ་བྱས་པའི་ལོ་བརྒྱད་སྟོང༌། གཞན་འཕྲུལ་དབང་བྱེད་པ་མི་ལོ་སྟོང་དང་དྲུག་བརྒྱ་ལ་ཞག་ཏུ་བྱས་པའི་ལོ་ཁྲི་དྲུག་སྟོང་རྣམས་སོ་སོའི་ཚེ་ཚད་ཡིན་ལ། དེ་ལས་རྒྱལ་ཆེན་རིས་བཞིའི་ཚེ་ཚད་ལ་ཞག་གཅིག་ཏུ་བྱས་པའི་ལོ་ལྔ་བརྒྱ།

Page: 940 ཡང་སོས་པའི་ཚེ་ཚད་ནས། གཞན་འཕྲུལ་དབང་བྱེད་པའི་ཚེ་ཚད་ལ་ཞག་ཏུ་བྱས་པའི་ལོ་ཁྲི་དྲུག་སྟོང་ཚ་བ་པའི་ཚེ་ཚད་ཡིན་ལ། རབ་ཏུ་ཚ་བས་བར་བསྐལ་ཕྱེད། མནར་མེད་ཀྱིས་བར་བསྐལ་གཅིག་ཡིན་ཏེ། མི་རྣམས་ཀྱི་ལོ་ལྔ་བཅུ་ལ། ། འདོད་ལྷ་འོག་མའི་ཉིན་ཞིག་གཅིག །དེ་ཡིས་ཚེ་ལོ་ལྔ་བརྒྱའོ། །གོང་མ་གཉིས་ཀ་ཉིས་འགྱུར་ཉིད། །ཡང་སོས་ལ་སོགས་དྲུག་རིམ་བཞིན། །འདོད་ལྷའི་ཚེ་དང་ཉིན་ཞག་མཉམ། །དེ་ཡིས་དེ་དག་རྣམས་ཀྱི་ཚེ། །འདོད་པའི་ལྷ་དང་འདྲ་བ་ ཡིན། །རབ་ཏུ་ཚ་ཕྱེད་མནར་མེད་ནི། །བར་གྱི་བསྐལ་པའོ། །ཞེས་སོ། འདིའི་ཞར་ལས་ཚ་བའི་ཚེ་ཚད་ནི། བར་བསྐལ་གྱི་བཞི་ཆ་ཡིན་པར་ཡང་དོན་གྱིས་ཐོབ་པས་ད་ལྟའི་བསྐལ་པ་འདིའི་བར་བསྐལ་གྱི་ཚད་ཀྱང་ཤེས་ནུས་ཏེ། དེ་ལྟ་ན། ཁྲག་ཁྲིག་ཆེ་ གཅིག་ཁྲག་ཁྲིག་གསུམ། །ཐེར་འབུམ་ཆེ་གཉིས་ཐེར་འབུམ་བདུན། །དུང་ཕྱུར་གཅིག་དང་ས་ཡ་བཞིའི། །མི་ལོ་བར་བསྐལ་གཅིག་ཡིན་ནོ། །ཞེས་བྱའོ། །གྲང་དམྱལ་ནི། ཆུ་བུར་ཅན་དང༌། ཆུ་བུར་རྡོལ་བ་ཅན་དང༌། ཨ་ཆུ་དང༌། ཀྱི་ཧུད་ཟེར་བ་དང༌། སོ་ཐམ་ ཐམ་པ་དང༌། ཨུཏྤལ་དང༌། པདྨ་དང༌། པདྨ་ཆེན་པོ་ལྟར་གས་པ་དང་རྣམ་པ་བརྒྱད་དེ། ཆུ་བུར་ཅན་སོགས་གྲང་བརྒྱད་གཞན། །ཞེས་སོ། །གནས་ནི། སྤྱིར་རི་བོ་གངས་ཅན་གྱི་འོག་ན་ཡོད་པར་བཤད་ལ། སྡུག་བསྔལ་ནི་མིང་དང་མཐུན་པ་སྟེ་ཐ་མ་ནི་ཤིན་ཏུ་དམར་ ལ་ལུས་བྱེ་བ་ལ་སོགས་པར་གས་པའོ། །ཚེ་ཚད་ནི། མ་ག་དྷའི་ཏིལ་ཁལ་བརྒྱད་ཅུ་པའི་བང་བ་ནས་ལོ་བརྒྱ་རེ་ལ་ཏིལ་འབྲུ་རེ་ཕྱུང་བས་ཟད་པ་ནི་ཆུ་བུར་ཅན་གྱི་ཚེ་ཡིན་ལ། དེ་ཉི་ཤུ་ཆུ་བུར་རྡོལ་བ་ཅན་གྱི་ཚེ་དང༌། དེ་བཞིན་དུ་ཉི་ཤུས་བསྒྱུར་བ་འོག་མ་འོག་མའི་ ཚེ་སྟེ་ཐ་མའི་ཚེ་ལ་ནི་ཏིལ་སྦྱང་ཐེར་འབུམ་གཅིག་དང་དུང་ཕྱུར་གཉིས་བྱེ་བ་བརྒྱད་ཡོད་དོ། །ཉི་ཚེ་བ་ནི། མྱ་ངམ་གྱི་ཐང་དང་རྒྱ་མཚོའི་འགྲམ་སོགས་གནས་མ་ངེས་པར་སྡུག་བསྔལ་མ་ངེས་པ་སྣ་ཚོགས་མྱོང་བ་ཚེ་ཚད་ཀྱང་མ་ངེས་པ་སྟེ། གྲོ་བཞིན་སྐྱེས་དང༌། དགེ་

Page: 941 ༄༅། །འདུན་འཚོ་དང༌། དཔལ་སྐྱེས་ཀྱིས་གཟིགས་པ་ལྟ་བུའོ། །དྲན་པ་ཉེར་བཞག་ལས་ནི། རྩ་བ་བཞི་ཆང་ཆོས་ལ་དམད་པ་རྒྱུ་འབྲས་ལ་ལོག་པར་བལྟས་པ་མཚམས་མེད་རྣམས་ཐམས་ཅད་སྤྱད་པ་མནར་མེད་ཀྱི་རྒྱུ་ནས་སྲོག་གཅོད་གཅིག་ པུ་ཡང་སོས་ཀྱི་རྒྱུའི་བར་དང༌། དེ་སོ་སོ་ལ་ནང་ཚན་གྱི་བྱེད་ལས་ཀྱིས་དམྱལ་བ་རེ་རེ་ལ་འཁོར་བཅུ་དྲུག་པོ། མི་གཙང་འདམ་དང་ལྕགས་ཀྱིས་བསྒྱུར། །སློང་འཚེད་གནོད་པ་མ་ཞི་དང༌། མུན་པ་ཀུན་དུ་མི་དགའ་བ། །ཚོར་བ་བདེ་དང་ནད་ཐམས་ ཅད། །མཚོན་འབབ་གནོད་པ་དྲག་པོ་དང༌། །ནེ་ལེ་ནག་འདྲ་གཞན་གྱུར་དང༌། །སྡུག་བསྔལ་གྱིས་གནོད་པདྨའི་ཕྲེང༌། །འཚེའུ་དང་གནོད་པ་བདོ་བ་སྟེ། །ཡང་སོས་འཁོར་ནི་བཅུ་དྲུག་ཡིན། །ཞེས་སོགས་ཐ་དད་པར་བཤད་དོ། །ཡི་དྭགས་ལ་ཡང༌། པྲི་ཏ་ ཞེས་བཀྲེས་ཤིང་གདུང་བས་ན་ཡི་དྭགས་ཞེས་བྱ་ལ། གནས་ནི། དཔག་ཚད་ལྔ་བརྒྱའི་ས་འོག་ན་ཡི་དྭགས་ཀྱི་གྲོང་ཁྱེར་ཆེན་པོ་སེར་སྐྱ་ཞེས་པ་ན་གཙོ་བོར་གནས་ཤིང་ཁ་འཐོར་བ་མྱ་ངམ་གྱི་ཐང་སོགས་སྣ་ཚོགས་ན་ཡོད་ལ། གཙོ་བོ་རྣམས་གཤིན་རྗེར་གཏོགས་པ་གཞན་སྲོག་ གིས་འཚོ་བ་དང་ཕལ་བ་རྣམས་ཕྱིའི་སྒྲིབ་པ་ཅན་ལ་སོགས་པ་སྟེ། ཏཱའ་ལ་ཡ་ཐོག་བསྐམས་འདྲའི་ཡི་དྭགས་གཟུགས། །བལྟས་པ་ཙམ་གྱིས་ཆུ་རླུང་རྒྱུན་སྐེམ་ཞིང༌། །ལྗོན་ཤིང་འབྲས་བུ་མེད་འགྱུར་དེ་དག་གོ །ཞེས་སོགས་ཀྱི་སྡུག་བསྔལ་མྱོང་བ། ཚེ་ཚད། མིའི་ཟླ་བ་ལ་ཞག་ཏུ་བྱས་པའི་ལོ་ལྔ་བརྒྱ་སྟེ། ཟླ་བ་ཉིན་ཞག་གི་ལྔ་བརྒྱ། །ཞེས་སོ། །དུད་འགྲོ་ནི། ཏྲཱིརྱ་ཀ་ཞེས་དུད་ཅིང་འགྲོ་བས་ན་དེ་སྐད་བྱ་ལ། གནས་ནི། གཙོ་བོ་རྒྱ་མཚོ་ཆེན་པོ་ཡིན་ལ། ཁ་འཐོར་བ་ངན་སོང་དང༌། མཐོ་རིས་ཕལ་ཆེར་ན་ཡོད་ལ། དབྱེ་ན། རྐང་མང༌། རྐང་བཞི། རྐང་གཉིས། རྐང་མེད་བཞིར་ཐར་རྒྱན་ལས་གསུངས་སོ། །སྡུག་བསྔལ་ནི། ཀླུ་རྣམས་ལ་ལོངས་སྤྱོད་ལྷ་ལྟ་བུ་ཡོད་ཀྱང་བྱེ་ཚན་གྱི་ཆར་ཞག་རེ་ལ་དུས་གསུམ་དུ་འབབ་པས་ལུས་སྲེག་པ་དང་ནམ་མཁའ་ལྡིང་གིས་ཟ་བ་སོགས་ཡོད་ལ། སྤྱིར་དུད་འགྲོ་

Page: 942 རྣམས་ཆེ་བས་ཆུང་བ་ཟ་ཞིང་ཆུང་བས་ཆེ་བ་འབུགས་པ་སོགས་རྟག་ཏུ་དགྲ་ཁོ་ནའི་ནང་ན་གནས་ལ། ཚེ་ཚད་རིང་བ་བསྐལ་པའི་ཚེ་དང༌། ཕྲ་མོ་ཁ་ཅིག་ཉིན་རེ་ལ་ལན་ཁྲི་ལ་སོགས་པར་སྐྱེ་འཆི་བྱེད་པ་ཡོད་དོ། །དེ་ལྟར་ངན་སོང་པ་རྣམས་དེ་ཙམ་དུ་སྡུག་བསྔལ་ལ་ སྐྱོབ་པ་སུ་ཡང་མེད་པས་དགེ་བའི་མཐུས་དེ་རྣམས་ཀྱི་སྡུག་བསྔལ་ཞི་བའི་ཆེད་དུ་བསྔོས་པའོ། །གཉིས་པ་གཞུང་གི་དོན་ནི། འཇིག་རྟེན་ཁམས་ན་དམྱལ་བ་དག །གང་དག་ཇི་སྙེད་ཡོད་པ་རྣམས། །དེ་དག་ཏུ་ནི་ལུས་ཅན་རྣམས། །བདེ་ཆེན་བདེ་བས་ དགའ་བར་ཤོག །གྲང་བས་ཉམ་ཐག་དྲོ་ཐོབ་ཤོག །བྱང་ཆུབ་སེམས་དཔའི་སྤྲིན་ཆེན་ལས། །བྱུང་བའི་ཆུ་བོ་མཚོ་ཡས་ཀྱིས། །ཚ་བས་ཉམ་ཐག་བསིལ་བར་ཤོག །རལ་གྲི་ལོ་མའི་ནགས་ཚལ་ཡང༌། །དེ་ལ་དགའ་ཚལ་སྡུག་གུར་ ཤོག །ཤལ་མ་ལི་ཡི་སྡོང་པོ་དག །དཔག་བསམ་ཤིང་དུ་འཁྲུངས་པར་ཤོག །མཐིང་རིལ་ངུར་པ་དག་དང་ངང་པ་དང༌། །བཞད་སོགས་སྐད་སྙན་འབྱིན་པས་མཛེས་གྱུར་ཅིང༌། །པདྨ་དྲི་བསུང་ཆེ་ལྡན་མཚོ་དག་གིས། །དམྱལ་བའི་ས་ཕྱོགས་དག་ནི་ཉམས་ དགར་ཤོག །སོལ་ཕུང་དེ་ཡང་རིན་ཆེན་ཕུང་པོར་གྱུར། །ས་སྲེག་ཤེལ་གྱི་ས་གཞི་བསྟར་བར་ཤོག །བསྡུས་འཇོམས་རི་བོ་རྣམས་ཀྱང་མཆོད་པའི་སྤྲིན། གཞལ་མེད་ཁང་གྱུར་བདེ་གཤེགས་གང་བར་ཤོག །མདག་མ་རྡོ་བསྲེགས་མཚོན་གྱི་ ཆར་པ་ཡང༌། །དེང་ནས་བཟུང་སྟེ་མེ་ཏོག་ཆར་པར་གྱུར། །ཕན་ཚུན་མཚོན་གྱིས་འདེབས་པ་དེ་ཡང་ནི། །དེང་ནས་རྩེ་ཕྱིར་མེ་ཏོག་འཕེན་པར་ཤོག །ཆུ་བོ་རབ་མེད་མེ་དང་འདྲ་ནང་བྱིང་བ་དག །ཤ་ཀུན་ཞིག་གྱུར་རུས་གོང་མེ་ཏོག་ཀུན་དའི་མདོག ། བདག་གི་དགེ་བའི་སྟོབས་ཀྱིས་ལྷ་ཡི་ལུས་ཐོབ་ནས། །ལྷ་མོ་རྣམས་དང་དལ་གྱིས་ལྷན་ཅིག་འབབ་གནས་ཤོག །ཅི་ཕྱིར་འདི་ན་གཤིན་རྗེའི་མི་དང་ཁྭ་དང་བྱ་རྒོད་མི་བཟད་རྣམས་སྐྲག་བྱེད། །ཀུན་ནས་མུན་བསལ་བདེ་དགའ་བསྐྱེད་པའི་མཐུ་བཟང་

Page: 943 ༄༅། །འདི་ཀོ་སུ་ཡི་མཐུ་སྙམ་སྟེ། །གྱེན་དུ་བལྟས་པས་ནམ་མཁའི་དཀྱིལ་ན་ཕྱག་ན་རྡོ་རྗེ་འབར་བ་བཞུགས་མཐོང་ནས། །རབ་ཏུ་དགའ་བའི་ཤུགས་ཀྱིས་སྡིག་དང་བྲལ་ནས་དེ་དང་ལྷན་ཅིག་འགྲོགས་པར་ཤོག །།མེ་ཏོག་ཆར་པ་སྤོས་ཆུ་ དང་འདྲེས་བབ་པ་ཡིས། །དམྱལ་བའི་མེ་དག་ཆིལ་ཆིལ་གསོད་པ་མཐོང་གྱུར་ནས། །གློ་བུར་བདེ་བས་ཚིམ་པ་འདི་ཅི་བསམས་པ་དང༌། །སེམས་དམྱལ་རྣམས་ཀྱིས་ཕྱག་ན་པདྨ་མཐོང་བར་ཤོག །གྲོགས་དག་འཇིགས་པ་བོར་ལ་རིངས་པར་ཚུར་ ཤོག་ཡུ་བུའི་ཐད་དུ་ནི། །གང་གི་མཐུ་ཡིས་སྡུག་བསྔལ་ཐམས་ཅད་བྲལ་ཞིང་དགའ་བའི་ཤུགས་ཕྱིན་ལ། །འགྲོ་བ་ཀུན་སྐྱོབ་བྱང་ཆུབ་སེམས་དང་འོད་དང་བརྩེ་བ་སྐྱེས་གྱུར་པ། །གཞོན་ནུ་ཟུར་ཕུད་ཅན་འབར་འཇིགས་པ་མེད་པར་བྱེད་པ་ཅིག་ཞིག་ བྱོན། །ཁྱོད་ཀྱིས་ལྷ་བརྒྱའི་ཅོད་པན་དག་གིས་ཞབས་ཀྱི་པདྨ་ལ་མཆོད་ཅིང༌། །ཐུགས་རྗེས་བརླན་སྤྱན་དབུ་ལ་མེ་ཏོག་དུ་མའི་ཚོགས་ཀྱི་ཆར་འབབ་པ། །ཁང་བརྩེགས་ཡིད་འོང་ལྷ་མོ་སྟོང་ཕྲག་བསྟོད་དབྱངས་སྒྲོག་ལྡན་འདི་ལྟོས་ཞེས། ། འཇམ་དབྱངས་དེ་འདྲ་མཐོང་ནས་ད་ནི་སེམས་དམྱལ་ཅ་ཅོ་འདོན་པར་ཤོག །དེ་ལྟར་བདག་གི་དགེ་རྩས་ཀུན་ཏུ་བཟང་ལ་སོགས། །བྱང་ཆུབ་སེམས་དཔའ་སྒྲིབ་པ་མེད་སྤྲིན་བདེ་བ་དང༌། །བསིལ་ཞིང་དྲི་ཞིམ་ངད་ལྡང་ཆར་པ་འབེབས་མཐོང་ནས། ། སེམས་ཅན་དམྱལ་བ་དེ་དག་མངོན་པར་དགའ་གྱུར་ཅིག །དུད་འགྲོ་རྣམས་ནི་གཅིག་ལ་གཅིག །ཟ་བའི་འཇིགས་དང་བྲལ་བར་ཤོག །སྒྲ་མི་སྙན་པའི་མི་བཞིན་དུ། །ཡི་དྭགས་རྣམས་ནི་བདེ་གྱུར་ཅིག །འཕགས་པ་སྤྱན་རས་གཟིགས་དབང་ གིས། །ཕྱག་ནས་འབབ་པའི་འོ་རྒྱུན་གྱིས། །ཡི་དྭགས་རྣམས་ནི་ཚིམ་བྱས་ཤིང༌། །ཁྲུས་བྱས་རྟག་ཏུ་བསིལ་བར་ཤོག །ཅེས་ཚིགས་བཅད་བཅུ་གཉིས་ཀྱིས་དམྱལ་བའི་སྡུག་བསྔལ་ཞི་བར་བསྔོས་པ་སྟེ། དེའི་ཡང་ཚིགས་བཅད་དང་པོས་འཇིག་རྟེན་

Page: 944 ཐམས་ཅད་ཀྱི་དམྱལ་བ་པ་ཡོད་དོ་ཅོག་གི་སྤྱིའི་སྡུག་བསྔལ་ཞི་བ་དང༌། ཚིག་རྐང་གཅིག་གིས་དེ་ལས་གྲང་དམྱལ་བའི་སྡུག་བསྔལ་ཞི་བ་དང༌། ཚིག་རྐང་གསུམ་གྱིས་ཚ་དམྱལ་པ་སྤྱིའི་སྡུག་བསྔལ་ཞི་བ་དང༌། རལ་གྲི་སོགས་ཚིགས་བཅད་གཅིག་གིས་ ཉེ་འཁོར་པའི་དོན་དང༌། མཐིང་རིལ་སོགས་ཕྱེད་དང་གཉིས་ཀྱིས་ཁྱད་པར་མནར་མེད་པའི་དོན་དང༌། དེ་ནས་གཅིག་གིས་བསྡུས་འཇོམས་པའི་དོན་དང༌། ཕྱེད་ཀྱིས་ཡང་སོས་པའི་དོན་ཏེ་དེ་རྣམས་ཀྱི་སྡུག་བསྔལ་རང་བཞིན་གྱིས་ཞི་བར་བསྔོས་པ་ཡིན་ ལ། སླར་ཡང་ཆུ་བོ་སོགས་ཀྱི་ཚིགས་བཅད་ཀྱིས་སློབ་དཔོན་ཉིད་ཀྱི་དགེ་བའི་མཐུས་སྡུག་བསྔལ་ཞི་བ་དང༌། གཅིག་གིས་ཕྱག་ན་རྡོ་རྗེའི་མཐུ་དང༌། མེ་ཏོག་སོགས་གཅིག་གིས་སྤྱན་རས་གཟིགས་ཀྱི་མཐུ་དང༌། གྲོགས་དག་སོགས་གཉིས་ཀྱིས་འཇམ་ དབྱངས་ཀྱི་མཐུ་དང༌། དེ་ལྟར་སོགས་ཐ་མས་བྱང་ཆུབ་སེམས་དཔའ་གཞན་ཐམས་ཅད་ཀྱི་མཐུས་ཞི་བར་བསྔོས་པའོ། །དེ་ནས་ཚིག་རྐང་གཉིས་ཀྱིས་དུད་འགྲོའི་སྡུག་བསྔལ་ཞི་བ་དང༌། ཚིགས་བཅད་ཕྱེད་དང་གཉིས་ཀྱིས་ཡི་དྭགས་ཀྱི་སྡུག་བསྔལ་ཞི་བར་ བསྔོས་པའོ། །དེ་དག་གཞན་ནི་རྟོགས་པར་སླ་ལ། བྱང་ཆུབ་སེམས་དཔའི་མོས་པ་དང་ཏིང་ངེ་འཛིན་གྱི་མཐུ་ལས་སྤྲིན་ཆེན་པོ་གློ་བུར་དུ་བྱུང་བའི་ཆར་གྱིས་དམྱལ་མེ་གཞིལ་བ་དང༌། མཐིང་རིལ་དང་བཞད་དཀར་ནི་ཆུ་བྱའི་རྣམ་གྲངས་ཏེ་དམྱལ་བའི་ས་གཞི་ ཐམས་ཅད་པདྨའི་མཚོ་བསིལ་བ་ཆུ་བྱ་དང་བཅས་པར་གྱུར་ཅིག་པའོ། །གཞན་སྟོབས་ཀྱིས་ཞི་བར་བྱེད་པ་ནི་འཕགས་པ་སྤྱན་རས་གཟིགས་དབང་ཕྱུག་གིས་སྔོན། བདག་གིས་ངན་སོང་གནས་ལ་ཕྱོགས་གྱུར་ན། །ངན་སོང་གནས་རྣམས་ཞིག་ཅིང་ སྟོང་གྱུར་ཅིག །ཅེས་སོགས་ཀྱི་སྨོན་ལམ་མཛད་པ་གྲུབ་པ་དང༌། ཏིར་མེད་པ་སྐེམས་པ་ཞེས་བྱ་བའི་ཏིང་ངེ་འཛིན་གྱི་མཐུ་ལས་ངན་འགྲོ་སྟོངས་པར་མཛད་པ་སྟེ། ཟ་མ་ཏོག་བཀོད་པ་ལས། སྤྱན་རས་གཟིགས་དབང་ཕྱུག་དེ་དམྱལ་བ་མནར་མེད་པར་ཞུགས་

Page: 945 ༄༅། །མ་ཐག་ཏུ་ལྕགས་ཁང་ཐམས་ཅད་ནི་ཞིགདམྱལ་བའི་ཕྲུ་ཆེན་རྣམས་ནི་འཐོར་མེ་ནི་ཞི་སྟེ་རྫིང་བུ་བསིལ་བར་གྱུར། དམྱལ་བ་པ་དེ་རྣམས་སྐད་ཅིག་གིས་ཚེ་འཕོས་པས་དམྱལ་སྲུང་རྣམས་གཤིན་རྗེའི་མདུན་དུ་དོང་ནས་སེམས་ཅན་དམྱལ་བ་ འདིར་སྐྱེས་བུ་འདོད་པའི་གཟུགས་ཅན་ཞིག་འོངས་མ་ཐག་བདག་ཅག་གི་ལས་ཀྱིས་བས་པར་གྱུར་ཏོ། །ཞེས་གསོལ་ཞིང་གཤིན་རྗེའི་རྒྱལ་པོས་བལྟས་ན་སྤྱན་རས་གཟིགས་བཞུགས་པར་མཐོང་ནས་བསྟོད་ཅིང་ཕྱག་བཙལ་བ་དང༌། དེ་ནས་སྤྱན་རས་གཟིགས་ ཡི་དྭགས་ཀྱི་ཡུལ་དུ་སོང་བ་དང་ཡི་དྭགས་ཁ་ནས་མེ་འབར་བ་ཡན་ལག་འཇག་མ་ལྟར་ཕྲ་བ་ལུས་རི་བོ་ཙམ་པ་རྡུལ་གྱི་གྲངས་ཙམ་བདག་ཅག་བཀྲེས་སོ། །སྐོམ་མོ། །ཞེས་དེའི་མདུན་ན་རྒྱུག་པ་དང་དེས་ཕྱག་ཞབས་ཀྱི་སོར་མོ་བཅུ་ལས་ཆུ་བོ་ཆེན་པོ་བཅུ་ཕབ་ སྟེ་ཡི་དྭགས་དེ་རྣམས་ཀྱིས་མང་དུ་འཐུངས་བས་བཀྲེས་སྐོམ་ཞི་སྟེ། བདེ་བ་ཅན་དུ་བྱང་ཆུབ་སེམས་དཔའ་འདོད་པ་སྦྱིན་པ་ཞེས་མིང་མཐུན་པར་སྐད་ཅིག་ལ་སྐྱེས་པར་གསུངས་པ་ལྟ་བུ་སྟེ། སྤྱན་རས་གཟིགས་ཇི་ལྟ་བ་དེ་ལྟར་ཕྱག་ན་རྡོ་རྗེ་ལ་སོགས་པ་རྒྱལ་སྲས་དེ་ཐམས་ ཅད་ཀྱིས་རེ་རེ་ཞིང་ཡང་ངན་འགྲོ་འདོན་པའི་ཕྲིན་ལས་དེ་ལྟ་བུ་མཛད་པར་གྱུར་ཅིག་པའོ། །སྒྲ་མི་སྙན་པའི་མི་བཞིན་ཞེས་པ་ནི། བྱང་སྒྲ་མི་སྙན་ན་ངག་འཁྱལ་མ་གཏོགས་སྤོང་བ་དྲུག་པོ་མེད་པ་དང་གོས་དང་རྒྱན་དང་ལོངས་སྤྱོད་ཐམས་ཅད་དཔག་བསམ་ གྱི་ཤིང་ལས་འབྱུང་བས་བདག་གིར་བྱ་བ་མེད་པ་དང༌། ལོ་སྟོང་འཚོ་ཞིང་གློ་བུར་དུ་འཆི་བ་མེད་པ་དང༌། འཆི་བའི་ཞག་བདུན་མ་གཏོགས་ནད་མེད་ཅིང་མི་དགེ་བའི་མཚམས་སྦྱོར་མེད་པས་ཤི་ནས་ཀྱང་ལྷ་མི་གང་རུང་དུ་སྐྱེ་བའི་ཕྱིར་གླིང་གཞན་ལ་བལྟོས་ན་བདེ་ བའི་ཕྱིར་དཔེར་བྱས་པའོ། །གཉིས་པ་གཙོ་བོར་མཐོ་རིས་པའི་དོན་དུ་བསྔོ་བ་ལ་གཉིས་ལས། དང་པོ་རྒུད་པ་ཞི་བར་བསྔོ་བ་ནི། ལོང་བ་རྣམས་ཀྱིས་མིག་མཐོང་ཞིང༌། །འོན་པས་རྟག་ཏུ་སྒྲ་ཐོས་ཤོག །ལྷ་མོ་སྒྱུ་འཕྲུལ་བཞིན་དུ་ནི། །

Page: 946 སྦྲུམ་མའང་གནོད་མེད་བཙའ་བར་ཤོག །གཅེར་བུ་རྣམས་ཀྱིས་གོས་དག་དང༌། །བཀྲེས་པ་རྣམས་ཀྱིས་ཟས་དག་དང༌། །སྐོམ་པ་རྣམས་ཀྱིས་ཆུ་དག་དང༌། །བཏུང་བ་ཞིམ་པོ་ཐོབ་པར་ཤོག །བཀྲེན་པ་རྣམས་ཀྱི་ནོར་ཐོབ་ཤོག །མྱ་ ངན་ཉམ་ཐག་དགའ་འཐོབ་ཤོག །ཡི་ཆད་རྣམས་ཀྱང་ཡི་སོས་ཤིང༌། །བརྟན་པ་ཕུན་སུམ་ཚོགས་པར་ཤོག །སེམས་ཅན་ནད་པ་ཇི་སྙེད་པ། །མྱུར་དུ་ནད་ལས་ཐར་བར་གྱུར། །འགྲོ་བའི་ནད་ནི་མ་ལུས་པ། །རྟག་ཏུ་འབྱུང་བ་མེད་པར་ཤོག ། སྐྲག་པ་རྣམས་ནི་འཇིགས་མེད་ཤོག །བཅིངས་པ་རྣམས་ནི་གྲོལ་བར་གྱུར། །མཐུ་མེད་རྣམས་ནི་མཐུ་ལྡན་ཞིང༌། །ཕན་ཚུན་སེམས་ནི་མཉེན་གྱུར་ཅིག །མགྲོན་པ་དག་ནི་ཐམས་ཅད་ལ། །ཕྱོགས་རྣམས་ཐམས་ཅད་བདེ་བར་ཤོག །གང་གི་ དོན་དུ་འགྲོ་བྱེད་པ། །དེ་འབད་མི་དགོས་གྲུབ་གྱུར་ཅིག །གྲུ་དང་གྲུ་ཆེན་ཞུགས་པ་རྣམས། །ཡིད་ལ་བསམས་པ་གྲུབ་གྱུར་ཏེ། །ཆུ་ཡི་ངོགས་སུ་བདེར་ཕྱིན་ནས། །གཉེན་དང་ལྷན་ཅིག་དགའ་བར་ཤོག །མྱ་ངམ་ལམ་གོལ་འཁྱམས་པ་རྣམས། ། མགྲོན་པ་དག་དང་ཕྲད་གྱུར་ནས། །ཆོམ་རྐུན་སྟག་སོགས་འཇིགས་མེད་པར། །མི་ངལ་བདེ་བླག་འདོང་བར་ཤོག །དགོན་སོགས་ལམ་མེད་ཉམ་ང་བར། །བྱིས་པ་རྒན་པོ་མགོན་མེད་པ། །གཉིད་ལོག་མྱོས་ཤིང་རབ་མྱོས་རྣམས། །ལྷ་དག་ སྲུང་བར་བྱེད་པ་ཤོག །ཅེས་གསུངས་ཏེ། ཚིག་རྐང་དང་པོ་གཉིས་ཀྱིས་ལོང་འོན་སོགས་དབང་པོ་སྐྱོན་ལྡན་རྣམས་ཀྱི་དབང་པོའི་སྐྱོན་རབ་རིབ་སོགས་ཞི་ནས་དབང་པོ་ཡོངས་སུ་དག་པ་མིག་གསལ་བ་དང་རྣ་བ་གསང་བ་དང་སྨྲ་མཁས་པ་དང་དྲན་པ་དང་ ལྡན་པ་སོགས་འཐོབ་པར་གྱུར་ཅིག་པའོ། །དེ་ནས་ཚིག་རྐང་གཉིས་ནི་སྦྲུམ་མ་རྣམས་ནི་མ་བུ་གཉི་གར་ཤིན་དུ་སྡུག་བསྔལ་ཞིང་བཙའ་བའི་ཚེ་མའི་ལུས་ཀྱི་ཚིགས་རྣམས་འབྱེད་པའི་ཟུག་རྔུ་དང༌། བཙའ་བ་པོ་ནི་ལྕགས་སྲེགས་ཀྱི་འཇུར་མིག་ནས་དྲངས་པ་ལྟར་

Page: 947 ༄༅། །སྡུག་བསྔལ་ལ་གཉི་ག་འཚོ་འཆི་ཕྱེད་མའི་སྐབས་ཡིན་པས་དེ་གཉི་ག་བཙའ་བའི་ཟུག་རྔུ་མེད་པས་བཙའ་ཞིང་འཚོ་བར་གྱུར་ཅིག་པའོ། །གཅེར་བུ་སོགས་ཚིགས་བཅད་གཅིག་གིས་ནི་གོས་དང་མལ་ཆ་དང་ཟས་སྐོམ་གྱིས་ཕོངས་པ་ རྣམས་ཀྱིས་དེ་དག་ཕུན་སུམ་ཚོགས་པ་རྙེད་པར་གྱུར་ཅིག་པའོ། །དེ་ནས་ཚིག་རྐང་གཅིག་གིས་དབུལ་པོས་ལོངས་སྤྱོད་རྙེད་པ་དང༌། གཅིག་གིས་མཛའ་བཤེས་དང་བྲལ་བ་ལ་སོགས་པའི་མྱ་ངན་ཞི་བ་དང༌། ཚིག་རྐང་གཉིས་ཀྱིས་སྲོ་ཤི་ཞིང་ཡི་ཆད་ པ་རྣམས་ཀྱི་སེམས་ཀྱི་རེ་བ་རྫོགས་པས་ཡི་སོས་པར་གྱུར་ཅིག་པའོ། །དེ་ནས་ཚིགས་བཅད་གཅིག་གིས་ནད་བྱུང་བ་ཞི་ཞིང་སུ་ལ་ཡང་ནད་མི་འབྱུང་བར་གྱུར་ཅིག་པའོ། །དེ་ནས་ཚིག་རྐང་གཅིག་གིས་མེ་དང༌། ཆུ་དང༌། སྦྲུལ་དང༌། ཐོག་དང༌། གཅན་གཟན་གཏུམ་ པོ་དང༌། ཤ་ཟ་དང༌། ཆོམ་རྐུན་དང༌། ཆད་པ་སོགས་འཇིགས་པ་བརྒྱད་དམ་བཅུ་དྲུག་གིས་སྐྲག་པ་རྣམས་འཇིགས་པ་ལས་ཐར་བའི་དོན་དང༌། གཅིག་གིས་བཙོན་དུ་བཅིངས་པ་རྣམས་བདེ་བར་ཐར་བ་དང༌། གཉིས་ཀྱིས་ལུས་སེམས་ཀྱི་མཐུ་ཆུང་བ་རྣམས་མཐུ་ སྟོབས་དང་ལྡན་ལ། དེས་དྲེགས་པ་མེད་པར་སེམས་མཉེན་ཞིང་དགེ་བར་གྱུར་ཅིག་པའོ། །དེ་ནས་ཚིགས་བཅད་གསུམ་ནི་ལམ་དུ་ཞུགས་པའི་མགྲོན་པོ་རྣམས་ཀྱི་དོན་དུ་བསྔོ་བ་སྟེ། དང་པོས་དེ་ཐམས་ཅད་ལམ་དུ་འཇིགས་པ་མེད་ཅིང་བདེ་བར་བགྲོད་ལ་དོན་ ཚེགས་ཆུང་ངུས་གྲུབ་པའི་ཆེད་དང༌། གཉིས་པས་གངྒཱ་ལ་སོགས་པ་བརྒལ་བའི་ཕྱིར་གྲུའི་བྱེ་བྲག་རྣམས་སུ་ཞུགས་པ་དང་རྒྱ་མཚོའི་གྲུ་བོ་ཆེར་ཞུགས་ཏེ་འདོང་བ་རྣམས་ནི་ཁྱད་པར་དུ་སྲོག་ལ་དོགས་པ་ཆེ་བས་དེ་དག་གི་གྲུ་ཉེ་ཞོ་མེད་ཅིང་བསམས་པ་གྲུབ་ནས་ རང་གནས་སུ་ཕྱིན་པའི་ཆེད་དང༌། ཐ་མས་མྱ་ངམ་གྱི་ཐང་དང་དགོན་དུང་ཚ་སྒོ་ཅན་ལ་སོགས་པར་ལམ་འཁྱམས་ཏེ་ཅི་བྱ་གཏོལ་མེད་པ་རྣམས་ལམ་སྟོན་པ་དང་གྲོགས་དང་ཕྲད་ཅིང་བདེ་བར་ཕྱིན་པར་བསྔོས་པ་སྟེ་ངལ་ཞིང་དུབ་ལ་སླར་འཇིགས་པས་ཉེན་པ་འདི་

Page: 948 དག་ཤིན་དུ་སྙིང་རྗེ་བའི་ཕྱིར་རོ། །ཚིགས་བཅད་ཕྱི་མས་ནི་དབུལ་པོ་སོགས་སློང་བའི་ཆེད་དང་ཁ་ཅིག་གཞན་གྱི་བྲན་དུ་གྱུར་པས་བ་ལང་སོགས་འཚོ་བའི་ཕྱིར་དགོན་པ་ཉམ་ང་བར་གཅིག་པུས་འདུག་པ་དང་གཉིད་ཀྱིས་ལོག་པ་དང་གང་དག་ཆང་གིས་ར་རོ་བས་ འཕྱན་པ་དེ་དག་ལ་ལྷ་དག་གིས་བསྲུངས་ཏེ་གནོད་སྦྱིན་དང་ཤ་ཟས་འཚེ་བ་མེད་པར་གྱུར་ཅིག་པའོ། །གཉིས་པ་འབྱོར་པ་ཕུན་སུམ་ཚོགས་པར་བསྔོ་བ་ནི། མི་དལ་ཀུན་ལས་ཐར་པ་དང༌། །དད་དང་ཤེས་རབ་བརྩེར་ལྡན་ཞིང༌། །ཟས་དང་སྤྱོད་པ་ཕུན་ ཚོགས་ནས། །རྟག་ཏུ་ཚེ་རབས་དྲན་གྱུར་ཅིག །ཐམས་ཅད་ནམ་མཁའ་མཛོད་བཞིན་དུ། །ལོངས་སྤྱོད་ཟད་པ་མེད་པར་ཤོག །རྩོད་པ་མེད་ཅིང་འཚེ་མེད་པ། །རང་དབང་དུ་ནི་སྤྱོད་པར་ཤོག །སེམས་ཅན་གཟི་བརྗིད་ཆུང་ངུ་དག །དེ་དག་གཟི་བརྗིད་ ཆེན་པོར་ཤོག །དཀའ་ཐུབ་ཅན་གང་གཟུགས་ངན་པ། །གཟུགས་བཟང་ཕུན་སུམ་ཚོགས་གྱུར་ཅིག །འཇིག་རྟེན་བུད་མེད་ཇི་སྙེད་པ། །དེ་དག་སྐྱེས་པ་ཉིད་གྱུར་ཅིག །མ་རབས་རྣམས་ནི་མཐོ་ཐོབ་ཅིང༌། །ང་རྒྱལ་དག་ཡང་བཅོམ་པར་ཤོག ། བདག་གི་བསོད་ནམས་འདི་ཡིས་ནི། །སེམས་ཅན་ཐམས་ཅད་མ་ལུས་པ། །སྡིག་པ་ཐམས་ཅད་སྤངས་ནས་ནི། །རྟག་ཏུ་དགེ་བ་བྱེད་པར་ཤོག །བྱང་ཆུབ་སེམས་དང་མི་འབྲལ་ཞིང༌། །བྱང་ཆུབ་སྤྱོད་ལ་གཞོལ་བ་དང༌། །སངས་རྒྱས་རྣམས་ཀྱིས་ ཡོངས་བཟུང་ཞིང༌། །བདུད་ཀྱི་ལས་ཀྱང་སྤོང་བར་ཤོག །སེམས་ཅན་དེ་དག་ཐམས་ཅད་ནི། །ཚེ་ཡང་དཔག་མེད་རིང་བར་ཤོག །རྟག་ཏུ་བདེ་བར་འཚོ་འགྱུར་ཞིང༌། །འཆི་བའི་སྒྲ་ཡང་གྲག་མ་གྱུར། །དཔག་བསམ་ཤིང་གི་སྐྱེད་མོས་ཚལ། །སངས་ རྒྱས་དང་ནི་སངས་རྒྱས་སྲས། །ཆོས་ཉན་སྒྲོགས་པས་གང་བ་ཡིས། །ཕྱོགས་རྣམས་ཐམས་ཅད་གང་བར་ཤོག །ཐམས་ཅད་དུ་ཡང་ས་གཞི་དག །གསེག་མ་ལ་སོགས་མེད་པ་དང༌། །ལག་མཐིལ་ལྟར་མཉམ་བཻཌཱུརྱའི། །རང་བཞིན་འཇམ་པོར་

Page: 949 ༄༅། །གནས་གྱུར་ཅིག །འཁོར་གྱི་དཀྱིལ་འཁོར་ཡོད་དགུར་ཡང༌། །བྱང་ཆུབ་སེམས་དཔའ་མང་པོ་དག །རང་གི་ལེགས་པས་ས་སྟེང་དག །བརྒྱན་པར་མཛད་པས་བཞུགས་གྱུར་ཅིག །ལུས་ཅན་ཀུན་གྱིས་བྱ་དང་ནི། །ཤིང་དང་འོད་ ཟེར་ཐམས་ཅད་དང༌། །ནམ་མཁའ་ལས་ཀྱང་ཆོས་ཀྱི་སྒྲ། །རྒྱུན་མི་འཆད་པར་ཐོས་པར་ཤོག །དེ་དག་རྟག་ཏུ་སངས་རྒྱས་དང༌། །སངས་རྒྱས་སྲས་དང་ཕྲད་གྱུར་ཅིག །མཆོད་པའི་སྤྲིན་ནི་མཐའ་ཡས་པས། །འགྲོ་བའི་བླ་མ་མཆོད་པར་ཤོག ། ལྷ་ཡང་དུས་སུ་ཆར་འབེབས་ཤིང༌། །ལོ་ཏོག་ཕུན་སུམ་ཚོགས་པར་ཤོག །རྒྱལ་པོ་ཆོས་བཞིན་བྱེད་གྱུར་ཅིག །འཇིག་རྟེན་དག་ཀྱང་དར་བར་ཤོག །སྨན་རྣམས་མཐུ་དང་ལྡན་པ་དང༌། །གསང་སྔགས་བཟླས་བརྗོད་འགྲུབ་པར་ཤོག །མཁའ་ འགྲོ་སྲིན་པོ་ལ་སོགས་པ། །སྙིང་རྗེའི་སེམས་དང་ལྡན་གྱུར་ཅིག །སེམས་ཅན་འགའ་ཡང་སྡུག་མ་གྱུར། །སྡིག་པར་མ་གྱུར་ན་མ་གྱུར། །འཇིགས་དང་བརྙས་པར་མི་འགྱུར་ཞིང༌། །འགའ་ཡང་ཡིད་མི་བདེ་མ་གྱུར། །ཞེས་གསུངས་ཏེ། དང་པོས་ཐམས་ཅད་དལ་འབྱོར་གཉིས་དང་ལྡན་ཞིང་ཚེ་རབས་དྲན་པའི་མངོན་ཤེས་དང་ལྡན་པར་བསྔོས། གཉིས་པས་བྱང་ཆུབ་སེམས་དཔའ་ནམ་མཁའ་མཛོད་ནི་ནམ་མཁའ་ལས་ཅི་བསམས་པ་འབྱུང་ཞིང་ཟད་པ་མེད་པ་ལྟར་ཐམས་ཅད་ནམ་མཁའི་མཛོད་ཀྱི་ཏིང་ ངེ་འཛིན་དང་དེ་ལས་བྱུང་བ་ནམ་མཁའི་མཛོད་འཐོབ་པར་བསྔོས། གསུམ་པས་གཟི་བརྗིད་ཕུན་སུམ་ཚོགས་པར་བསྔོས། དེ་ནས་ཚིག་རྐང་གཉིས་ཀྱིས་བུད་མེད་རྣམས་སྐྱེས་པའི་དངོས་པོ་འཐོབ་པ་དང༌། གཉིས་ཀྱིས་མ་རབས་ཀྱི་གནས་ལས་འདའ་བར་བསྔོས་པ་ སྟེ་བུད་མེད་ནི་ཕལ་ཆེར་གཞན་དབང་དུ་གྱུར་པ་དང༌། སྙིང་སྟོབས་ཆུང་བ་དང༌། ཉོན་མོངས་པ་མང་ཞིང༌། གཉེན་པོ་ཆུང་ལ་ནད་ཀྱང་སྐྱེས་པ་ལས་སོ། །གཉིས་ཀྱིས་མང་བ་དང་མངལ་འཛིན་པའི་སྡུག་བསྔལ་ཆེ་ཞིང་བུད་མེད་ཀྱི་རྟེན་ལ་སངས་རྒྱས་དང༌། འཁོར་ལོས་བསྒྱུར་བ་དང༌། རང་སངས་

Page: 950 རྒྱས་དང༌། བརྒྱ་བྱིན་དང༌། འཇིག་རྟེན་སྐྱོང་བ་སྟེ་མཆོག་ལྔ་མི་འབྱུང་ལ། རྟེན་གྱི་གཙོ་བོ་སྐྱེས་པ་ཁོ་ན་ཡིན་ལ་བུད་མེད་རབ་ཏུ་ཕྱུང་བས་བསྟན་པ་ལོ་ལྔ་བརྒྱ་འགྲིབས་པས་ན་དེ་དག་བུད་མེད་ཀྱི་དངོས་པོ་ལས་འདའ་བའི་ཕྱིར་དང༌། མ་རབས་གདོལ་པ་ལ་སོགས་པ་ རྣམས་དམད་པའི་ལས་སྤངས་ཏེ་མཐོན་པོར་འགྱུར་ཞིང༌། འོན་ཀྱང་མ་རབས་ལ་མཐོན་པོའི་གནས་བྱུང་བ་ཕལ་ཆེར་ནི་ང་རྒྱལ་ཆེ་ཞིང་གནས་མིན་གྱི་བྱ་བ་བྱེད་པས་རང་གཞན་གཉི་ག་བརླག་པ་ཝ་སྐྱེས་ལ་དུད་འགྲོའི་རྒྱལ་པོའི་གནས་བྱུང་བ་ལྟ་བུ་མང་བས་ན་དེ་དག་ མཐོན་པོ་ཐོབ་ཀྱང་ང་རྒྱལ་མེད་པར་གྱུར་ཅིག་པར་བསྔོས་པའོ། །དེ་ནས་ཚིགས་བཅད་གསུམ་གྱིས་ཐམས་ཅད་དགེ་སྡིག་གི་བླང་དོར་ཚུལ་བཞིན་དུ་བྱེད་པ་དང༌། ཐེག་ཆེན་དུ་ཞུགས་ཏེ་བདུད་ལས་སྤོང་བ་དང༌། མཐོ་རིས་ཀྱི་ཡོན་ཏན་བདུན་ཚང་ཞིང་ཚེ་ཕུན་སུམ་ ཚོགས་པར་རིམ་པས་བསྔོས་པ་སྟེ་དེ་རྣམས་ནི་གཙོ་བོར་སེམས་ཅན་ཡོངས་སུ་སྨིན་པའི་དོན་དུ་བསྔོས་པ་ཡང་ཡིན་ནོ། །དེ་ནས། དཔག་བསམ་ཤིང་གི་སྐྱེད་མོས་ཚལ། །ལ་སོགས་པའི་ཚིགས་སུ་བཅད་པ་བཞིས་ནི་གནས་ཐམས་ཅད་ཕུན་སུམ་ཚོགས་པར་བསྔོ་ བ་སྟེ། དང་པོས་འཇིག་རྟེན་གྱི་ཁམས་ཐམས་ཅད་དཔག་བསམ་གྱི་ཤིང་གོས་དང་རྒྱན་དང་བཟའ་བཏུང་གི་འབྱུང་གནས་ཅི་འདོད་བླང་དུ་ཡོད་པས་གང་བ་སྐྱེད་མོས་ཚལ་ལྟར་ཡིད་དུ་འོང་བ་སངས་རྒྱས་དང་བྱང་ཆུབ་སེམས་དཔའ་ཆོས་སྒྲོག་པས་གང་བར་གྱུར་ཅིག་པ་དང༌། གཉིས་པས་ས་ཕལ་པ་དང་མཐོ་དམན་སོགས་མེད་པར་ལག་མཐིལ་ལྟར་མཉམ་པའི་བཻཌཱུརྱའི་ས་གཞི་གསེར་གྱིས་མིག་མང་རིས་སུ་བྲིས་པ་རེག་ན་འཇམ་པའི་རྩ་རྨ་བྱའི་མགྲིན་པའི་མདོག་ཅན་གྱིས་ཁེབས་པར་གྱུར་ཅིག་པ་དང༌། གསུམ་པས་དེ་ཐམས་ཅད་དུ་ བྱང་ཆུབ་སེམས་དཔའ་མཚན་དཔེ་རྫོགས་པས་གང་ཞིང་བརྒྱན་པར་གྱུར་ཅིག་པ་དང༌། བཞི་པས་ནམ་མཁས་ཀླས་པའི་ཞིང་དེ་ཐམས་ཅད་དུ་འབྱུང་བ་བཞི་དང་ནམ་མཁའ་ལས་ཆོས་ཀྱི་སྒྲ་རྟག་པར་འབྱུང་ཞིང་སེམས་ཅན་ཐམས་ཅད་སྨིན་པར་གྱུར་ཅིག་པ་

Page: 951 ༄༅། །སྟེ། འདི་རྣམས་ནི་སློབ་དཔོན་ཉིད་ཀྱི་ཞིང་དག་སྦྱོར་དང་སངས་རྒྱས་ཀྱི་ཞིང་ཡོངས་སུ་སྦྱོང་པའི་སྨོན་ལམ་ཡང་ཡིན་ནོ། །འདི་མན་ནི་འཇིག་རྟེན་ཐམས་ཅད་ཕུན་སུམ་ཚོགས་པར་བསྔོ་བ་སྟེ། ཚིགས་བཅད་དང་པོས་སེམས་ཅན་ཐམས་ ཅད་དགེ་བའི་བཤེས་གཉེན་དང་ཕྲད་ཅིང་མཆོད་པའི་ལས་ལ་བརྩོན་པར་གྱུར་ཅིག་པ་དང༌། རྐང་པ་གཉིས་ཀྱིས་ཆར་དུས་སུ་འབབ་ཅིང་ལོ་ཏོག་དང་འབྲུས་འབྱོར་པ་དང༌། རྐང་པ་གཅིག་གིས་ཆོས་བཞིན་གྱི་རྒྱལ་པོ་ཤ་སྟག་འབྱུང་བ་དང༌། ལྷག་མས་ རྒྱུ་དེ་དག་ལས་ལྷ་མིའི་འགྲོ་བ་མང་དུ་འཕེལ་ཞིང་དར་བར་གྱུར་ཅིག་པའོ། །སྨན་རྣམས་ཀྱི་རྐང་པ་གཅིག་གིས་སྨན་དང་འབྲུ་བཅུད་ཐམས་ཅད་བཅུད་ཆེ་ཞིང་ནུས་པ་དང་ལྡན་པའི་ཆེད་དང༌། གཅིག་གིས་ཕན་བྱེད་ཀྱི་གསང་སྔགས་སྒྲུབ་པ་པོ་རྣམས་ཀྱང་ངག་ ནུས་དང་ལྡན་ཞིང་རིག་པ་དེ་མྱུར་དུ་འགྲུབ་པར་འགྱུར་བའི་ཆེད་དང༌། གཉིས་ཀྱིས་ཤ་ཟ་དང་གནོད་སྦྱིན་དང་སྲིན་པོ་རྣམས་གདུག་པའི་སེམས་ཞི་ཞིང་ཁྱད་པར་མཁའ་འགྲོ་ཞེས་བྱ་བ་ཕྲ་མེན་ཕོ་མོ་ཉིན་པར་མིའི་ལུས་སུ་གནས་ཤིང་མཚན་མོ་རྫུ་འཕྲུལ་གྱིས་འགྲོ་བས་ གཞན་ལ་གནོད་པ་བྱེད་པ་འདི་ལ་རྒྱ་གར་ན་འཇིགས་པ་ཆེན་པོར་ལྟ་བའི་ཕྱིར་དེ་རྣམས་ཀྱི་གདུག་རྩུབ་ཞི་ཞིང་སྙིང་རྗེ་དང་ལྡན་པར་བསྔོ་བའོ། །ཚིགས་བཅད་ཐ་མས་ནི་མདོར་ན་སུ་ཡང་རུང་སྟེ། སེམས་ཅན་འགའ་ཡང་སྡུག་མ་གྱུར། །སྡིག་པར་མ་གྱུར་ན་མ་གྱུར། །འཇིགས་དང་བརྙས་ པར་མི་འགྱུར་ཞིང༌། །འགའ་ཡང་ཡིད་མི་བདེ་བར་མ་གྱུར་ཅིག །ཞེས་དོན་བསྡུས་པ་སྟེ། འདིའི་ཚིག་རྐང་གཉིས་པ་འདི་གླེགས་བམ་ཕལ་ལ་ཆད་སྣང་བས་ངེས་པར་གཞུག་གོ །གཉིས་པ་མཆོག་གི་དོན་དུ་བསྔོ་བ་ནི། གཙུག་ལག་ཁང་རྣམས་ཀློག་ པ་དང༌། །ཁ་ཏོན་གྱིས་རྒྱས་ལེགས་གནས་ཤོག །རྟག་ཏུ་དགེ་འདུན་མཐུན་པ་དང༌། །དགེ་འདུན་དོན་ཡང་འགྲུབ་པར་ཤོག །བསླབ་པ་འདོད་པའི་དགེ་སློང་དག །དབེན་པ་དག་ཀྱང་འཐོབ་པར་ཤོག །གཡེང་བ་ཐམས་ཅད་སྤངས་ནས་ནི། །སེམས་

Page: 952 ནི་ལས་རུང་སྒོམ་གྱུར་ཅིག །དགེ་སློང་མ་རྣམས་རྙེད་ལྡན་ཞིང༌། །འཐབ་དང་གནོད་པ་སྤོང་བར་ཤོག །དེ་བཞིན་རབ་ཏུ་བྱུང་བ་ཀུན། །ཚུལ་ཁྲིམས་ཉམས་པ་མེད་གྱུར་ཅིག །ཚུལ་ཁྲིམས་འཆལ་བས་ཡིད་བྱུང་ནས། །རྟག་ཏུ་སྡིག་པ་ཟད་བྱེད་ ཤོག །བདེ་འགྲོ་དག་ཀྱང་ཐོབ་གྱུར་ནས། །དེར་ཡང་བརྟུལ་ཞུགས་མི་ཉམས་ཤོག །མཁས་པ་རྣམས་ནི་བཀུར་བ་དང༌། །བསོད་སྙོམས་དག་ཀྱང་རྙེད་པར་ཤོག །རྒྱུད་ནི་ཡོངས་སུ་དག་པ་དང༌། །ཕྱོགས་རྣམས་ཀུན་ཏུ་གྲགས་པར་ཤོག །ངན་སོང་ སྡུག་བསྔལ་མི་མྱོང་ཞིང༌། །དཀའ་བ་སྤྱད་པ་མེད་པར་ཡང༌། །ལྷ་ལས་ལྷག་པའི་ལུས་ཀྱིས་ནི། །དེ་དག་སངས་རྒྱས་མྱུར་འགྲུབ་ཤོག །སེམས་ཅན་ཀུན་གྱི་ལན་མང་དུ། །སངས་རྒྱས་ཐམས་ཅད་མཆོད་བྱེད་ཅིང༌། །སངས་རྒྱས་བདེ་བ་བསམ་ཡས་ ཀྱིས། །རྟག་ཏུ་བདེ་དང་ལྡན་གྱུར་ཅིག །བྱང་ཆུབ་སེམས་དཔའ་རྣམས་ཀྱི་ནི། །འགྲོ་དོན་ཐུགས་ལ་དགོངས་འགྲུབ་ཤོག །མགོན་པོ་ཡིས་ནི་གང་དགོངས་པ། །སེམས་ཅན་རྣམས་ལ་བདེ་འབྱོར་ཤོག །དེ་བཞིན་རང་སངས་རྒྱས་རྣམས་དང༌། །ཉན་ཐོས་ རྣམས་ཀྱང་བདེ་གྱུར་ཅིག །ཅེས་གསུངས་ཏེ། དེ་ཡང་ཚིགས་བཅད་དང་པོས་ནི་དགེ་འདུན་གནས་བཅས་ཀྱི་དོན་དུ་བསྔོས་པ་སྟེ། དེ་ཡང་གཙུག་ལག་ནི་གཞུང་ལུགས་ཀྱི་མིང་གི་རྣམ་གྲངས་ཡིན་ལ། དེ་འཛིན་པའི་གང་ཟག་གི་གནས་ནི་གཙུག་ལག་ཁང་པ་ ཞེས་བྱའོ། །བོད་ཕྱི་རབས་འདི་ན་འདུལ་བའི་ལུང་སྡེ་བཞིའི་གླེགས་བམ་བཞུགས་ན་གཙུག་ལག་ཁང་ཡིན་ནོ། །ཞེས་མཁས་པར་རློམ་པ་མཐའ་དག་གིས་མགྲིན་གཅིག་ཏུ་སྒྲོག་ཅིང་བླུན་པོ་དག་གིས་དེའི་རྗེས་ཟློས་བྱེད་མོད་ཀྱང་དེ་དག་གིས་ནི་འདུལ་བ་མི་ཤེས་པར་ གསལ་ཏེ། འདི་ནི་ཉེར་དགའི་གཙུག་ལག་ཁང་ངོ༌། །འདི་ནི་དགའ་བོའི་འོ། །འདི་ནི་ཁོ་བོའི་གཙུག་ལག་ཁང་སྟེ་ཞེས་བྲང་ཁང་ལ་གཙུག་ལག་ཁང་དུ་བཤད་པ་མ་ཐོས་པར་ཟད་ཅིང༌། ཕྱི་རོལ་བའི་གཙུག་ལག་ཁང་ཞེས་བཤད་པ་རྣམས་དྲན་པར་བྱོས་ཤིག །མདོར་ན་

Page: 953 ༄༅། །ཆོས་འདི་པའི་ཐེག་པ་ཆེ་ཆུང་གི་གཙུག་ལག་ཁང་དང༌། གཙུག་ལག་ཁང་ཆེན་པོ་དང༌། ཁྱམས་དང༌། བཀད་ས་དང༌། དགོན་པའི་བསྟི་གནས་ལ་སོགས་པ་དེ་ཐམས་ཅད་དུ་རབ་ཏུ་བྱུང་བ་ཀློག་པ་པོ་རྣམས་སྡེ་སྣོད་གསུམ་པོ་ཀློག་པའི་ཁ་ཐོན་བྱེད་པས་ གང་ཞིང་རྒྱས་ལ། བསམ་གཏན་པའི་གནས་རྣམས་སུ་བསམ་གཏན་ལ་ཤིན་དུ་མཉམ་པར་བཞག་པ་རྣམས་ཀྱིས་གང་བ་དང༌། དེ་ཐམས་ཅད་དུ་དགེ་འདུན་རྣམས་མཐུན་པ་དང་མི་ཕྱེད་པ་འོ་མ་དང་འོ་མ་གཅིག་ཏུ་འདྲེས་པ་ལྟ་བུར་གྱུར་པས་སྟོན་པའི་ བསྟན་པ་གསལ་པར་བྱེད་ཅིང༌། ཀློག་པ་ལས་རིག་གྲོལ་གྱི་སྤོབས་པ་ཐོབ་ཅིང་བསམ་གཏན་ལས་འབྲས་བུ་བཞི་དང་ས་བཅུ་སོགས་ཐོབ་པས་དགེ་འདུན་དེ་ཐམས་ཅད་ཀྱི་བསླབ་པ་གསུམ་གྱི་དོན་མཐར་ཕྱིན་པ་གྲུབ་པར་གྱུར་ཅིག་པ་སྟེ། སྔོན་སྟོན་པ་ཉིད་ལ་སྦྲིད་ པ་བྱུང་བ་ན་སྐྱེ་དགུའི་བདག་མོ་གཽ་ཏ་མིས་བཅོམ་ལྡན་འདས་རིང་དུ་འཚོ་བར་གྱུར་ཅིག་ཅེས་བརྗོད་པ་འོག་མིན་གྱི་བར་དུ་གྲགས་པ་ན་སྟོན་པས་དེ་སྐད་ཅེས་མི་བརྗོད་པར་དགེ་འདུན་མཐུན་པར་གྱུར་ཅིག་ཅེས་བརྗོད་པར་བྱ་སྟེ་ང་ནི་དགེ་འདུན་མཐུན་པ་ཉིད་བཞེད་དོ། །ཞེས་ གསུངས་པས་འདི་ནི་སྟོན་པའི་དགོངས་པ་རྫོགས་པར་བྱེད་པའི་སྨོན་ལམ་ཡང་ཡིན་ནོ། །ཚིགས་བཅད་གཉིས་པས་དགེ་སློང་གི་དོན་དུ་སྤྱིར་བསྔོ་བ་སྟེ། སྤྱིར་སློང་མོས་འཚོ་བ་ལ་དགེ་སློང་དུ་བཞག་པ་སློང་བའི་ཕྱིར་དགེ་སློང་དང༌། མིང་གི་དགེ་སློང་མིང་གང་དགེ་ སློང་ཞེས་བྱ་བ་དང༌། ཁས་འཆེ་བའི་དགེ་སློང་བྲམ་ཟེ་ལ་སོགས་པ་བདག་ཅག་དགེ་སློང་དང་དགེ་སྦྱོང་དང་བྲམ་ཟེའོ་ཞེས་ཁས་ཆེ་བ་ལ་དགེ་སློང་དུ་བཞག་པ་དང༌། རྒྱན་གྱིས་བརྒྱན་པར་བྱས་ཀྱང་ཆོས་སྤྱོད་ཅིང༌། །སོགས་ཟག་པ་ཟད་པ་ལ་དགེ་སློང་དུ་ བྱས་པ་སྟེ་སྤྱིར་རྣམ་གྲངས་བཞི་དང༌། དེ་ལས་ཆོས་འདི་པའི་གསོལ་བ་དང་བཞིའི་ལས་ཀྱིས་བསྙེན་པར་རྫོགས་པ་གང་ཡིན་པ་དེ་ནི་དོན་འདིར་དགེ་སློང་ཡིན་པར་དགོངས་སོ་ཞེས་པ་ལྟར་དགེ་སློང་གི་སྡོམ་པ་ཐོབ་ལ་མ་ཉམས་པ་ནི་སྐབས་འདིའི་དགེ་སློང་

Page: 954 ཡིན་ཏེ་དགེ་སློང་མ་ཟུར་དུ་བཀར་ནས་བཤད་པ་དང་བསླབ་པ་འདོད་པ་ཞེས་པའི་མཐུ་ལས་སོ། །དེ་ལྟར་བསླབ་པ་གསུམ་འདོད་པའི་དགེ་སློང་རྣམས་ཀྱི་བསླབ་པ་དག་པའི་རྒྱུ་ནི་ལུས་ངག་འདུ་འཛིས་དབེན་པ་དང་སེམས་རྣམ་གཡེང་གིས་དབེན་པ་ཡིན་པས་ལུས་ སེམས་ཀྱི་དབེན་པ་ཐོབ་པར་གྱུར་ཅིག་པ་སྟེ། དག་སྒྲའི་གཉིས་ཚིག་གིས་ལུས་སེམས་ཀྱི་དབེན་པ་གཉིས་འདྲེན་ཏོ། །གཡེང་བ་སྤོང་བའི་ཚིག་གིས་ནི་དབེན་པ་དེ་གཉིས་གསལ་བར་བྱེད་པ་སྟེ། ལུས་ཀྱི་གཡེང་བ་བྱ་བ་སྣ་ཚོགས་པ་དང་ངག་གི་གཡེང་བ་བྲེ་མོ་དང༌། ངག་འཁྱལ་བ་དང་སེམས་ཀྱི་གཡེང་བ་ཡུལ་ལ་སེམས་པ་ཐམས་ཅད་སྤངས་ནས་སེམས་དུལ་ཞིང་ལས་སུ་རུང་བས་འདུ་ཤེས་ཉི་ཤུ་དང༌། བྱང་ཆུབ་ཀྱི་སེམས་གཉིས་དང༌། སྒྱུ་མ་ལྟ་བུ་དང༌། ནམ་མཁའ་ལྟ་བུའི་ཏིང་ངེ་འཛིན་སྒོམ་པར་གྱུར་ཅིག་པའོ། །ཚིགས་བཅད་གསུམ་ པས་དགེ་སློང་མའི་དོན་དུ་བསྔོས་པ་སྟེ། དགེ་སློང་མ་རྣམས་ནི་འཁོར་གྱི་གཙོ་བོ་མ་ཡིན་པའི་ཕྱིར། ཡོ་བྱད་རྙེད་པར་དཀའ་ཞིང་རྙེད་པ་ཆུང་བའི་ཕྱིར། དགེ་སློང་ཉེར་དགའས་དགྲ་བཅོམ་མ་ཨུཏྤ་ལའི་མདོག་ཅན་ལས་རས་ཟུང་བཟང་པོ་བླངས་བས་ཨུཏྤ་ལའི་མདོག་ཅན་ ཆོས་གོས་ཀྱིས་འཕོངས་པའི་ཚེ་འདི་ལྟར་བུད་མེད་ནི་རྙེད་པ་ཆུང་ཞིང་ཚེགས་ཆེན་པོས་འཚོ་བ་ཡིན་པས་དགེ་སློང་མ་ཉེ་དུ་མ་ཡིན་པ་ལས་དགེ་སློང་གིས་གོས་སློང་བར་མི་བྱའོ་ཞེས་བཅས་པ་མཛད་པའོ། །དེས་ན་དགེ་སློང་མ་རྣམས་ནི་ཆོས་གོས་དང་བསོད་སྙོམས་ལ་ སོགས་པའི་རྙེད་པ་ཆེན་པོ་དང་ལྡན་ཞིང་རྙེད་སླ་བར་གྱུར་ཅིག་པའོ། །བུད་མེད་ནི་རང་བཞིན་གྱིས་འཐབ་ཀྲོལ་ལ་དགའ་ཞིང་ཟས་ལ་གདུ་བའི་ཕྱིར། སྟོན་པས་དེ་གཉིས་ལས་བྱུང་བའི་བསླབ་པ་སོར་བཤགས་དང་ལྷག་མ་མང་དུ་བཅས་པ་སྟེ། དེའི་ཕྱིར་དགེ་སློང་མ་རྣམས་ འཐབ་དཀྲོལ་སྤོང་ཞིང་རྒྱུད་འཇམ་པོར་གྱུར་ཅིག་པའོ། །དེ་ནས་ཚིགས་བཅད་ཕྱེད་དང་གཉིས་ཀྱིས་རབ་བྱུང་སྤྱིའི་དོན་དུ་བསྔོས་པ་སྟེ། མདོར་ན་རབ་ཏུ་བྱུང་བ་ནི་ཚུལ་ཁྲིམས་ཁོ་ནས་ཕྱེ་བ་ཡིན་པས་དེ་ཐམས་ཅད་ཚུལ་ཁྲིམས་དང་ལྡན་ཞིང་མི་ཉམས་པ་དང༌། ཚུལ་

Page: 955 ༄༅། །འཆལ་གྱིས་ཡིད་བྱུང་སྟེ་སེམས་ཤིན་ཏུ་གཙང་བས་གནས་པས་ཟག་པ་ཟད་པ་འཐོབ་པ་དང༌། གལ་ཏེ་ཟག་པ་མ་ཟད་པར་ཤི་འཕོས་ན་ཡང་ཚུལ་ཁྲིམས་ཀྱི་མཐུས་བདེ་འགྲོ་ལྷ་མི་གང་རུང་དུ་སྐྱེ་ཞིང༌། དེར་ཡང་སྔོན་གྱི་གནས་རྗེས་སུ་ དྲན་པས་འདོད་པ་ལ་མི་འཇུག་པར་ལྷ་རྣམས་ཀྱི་ལྷའི་དྲང་སྲོང་དུ་འགྱུར་བའམ་མི་རྣམས་སུ་ཁྱིམ་ནས་ཁྱིམ་མེད་པར་རབ་ཏུ་བྱུང་སྟེ་ཤི་འཕོས་ཀྱང་སྔ་མའི་བརྟུལ་ཞུགས་ཉམས་པ་མེད་པར་གྱུར་ཅིག་པའོ། །འདི་ལ་སྐྱེ་བ་སྔ་མ་ཇི་སྲིད་འཚོའི་བར་ཁས་བླངས་བའི་ དུས་ཀྱི་ཆ་ཕྱོགས་གཅིག་བཏང་ཡང་སྤོང་སེམས་ཀྱི་ངོ་བོ་མ་ཉམས་པ་སྟེ། བར་དོ་དང༌། སྐྱེ་བ་ཕྱི་མ་ལ་ཡང་བདག་དགེ་སློང་སྟེ་འདི་ལྟ་བུ་བྱར་མི་རུང་ངོ་ཞེས་དྲན་པ་དང་ཤེས་བཞིན་རྒྱུན་མི་ཆད་པས་སྔ་མའི་བརྟུལ་ཞུགས་མ་ཉམས་པ་ཞེས་བྱའོ། །གལ་ཏེ་ཕྱི་མར་ བརྟུལ་ཞུགས་མ་ཉམས་པར་ཡོད་ན་སྔ་མའི་སྡོམ་པ་ཇི་སྲིད་འཚོ་བར་གྱི་སྡོམ་པར་འགལ་ལོ་ཞེ་ན། ཇི་སྲིད་འཚོའི་བར་ཁས་བླངས་པ་འདི་ནི་འཇིག་རྟེན་ན་ང་མ་ཤིའི་བར་ཞེས་ཡུན་རིང་བའི་མཐར་འཇོག་པ་ལྟར་ཇི་སྲིད་འཚོའི་བར་ཁས་ལེན་ན་དེ་ཚུན་གྱི་གནས་ སྐབས་གཞན་ལ་ལྟ་ཅི་སྨོས་ཞེས་ཉན་ཐོས་རང་ལུགས་ནས་ཡུན་རིང་བའི་ཕྱིར་མཐར་བཞག་པ་སྟེ་སངས་མ་རྒྱས་ཀྱི་བར་ལེན་པ་ལྟ་བུ་ནི་བློར་མ་ཤོང་བས་རང་གི་བློར་ཤོང་ཚོད་ཀྱི་དུས་ཀྱི་རིང་མཐའ་ཁས་བླངས་པ་ཡིན་གྱི། བདག་ཇི་སྲིད་འཚོའི་བར་སྲུང་ལ་ཤི་ནས་མི་སྲུང་ ངོ་ཞེས་རྣམ་བཅད་བྱས་པ་མ་ཡིན་པ་འདི་གོ་བར་གྱིས་ཤིག །དེ་ནས་ཚིགས་བཅད་གཉིས་ཀྱིས་མཁས་པའི་དོན་དུ་བྱེ་བྲག་ཏུ་བསྔོས་པ་སྟེ། སྤྱིར་ཤེས་བྱ་ལ་མཁས་པའི་རྒྱུ་ནི་སྐྱེ་བ་སྔ་མ་རྣམས་སུ་མང་དུ་སྦྱངས་པ་དང༌། ཆོས་ཀྱི་སྦྱིན་པ་བྱས་པ་དང༌། ཚེ་འདིར་སྐྱེ་བས་ཐོབ་ པའི་ཤེས་རབ་དང་ལྡན་པའམ་མི་ལྡན་ཡང་རུང་སྟེ་དགེ་བའི་བཤེས་གཉེན་བསྟེན་ཞིང་དཀའ་བས་སྦྱངས་པ་རྣམས་ནི་མཁས་པར་འགྱུར་བའི་རྒྱུ་ཡིན་ལ། རྙེད་པའི་རྒྱུ་ནི་ཚེ་རབས་གཞན་དུ་སྦྱིན་པ་བཏང་བ་ལས་འབྱུང་ཞིང༌། བཀུར་སྟིའི་རྒྱུ་ཡང་ཚེ་རབས་གཞན་

Page: 956 དུ་ཕ་མ་དང་བླ་མའི་གནས་ལ་བཀུར་སྟི་བྱས་པ་དང་གཞན་ཁྱད་དུ་མ་བསད་ཅིང་ང་རྒྱལ་སྤངས་པ་ལས་བྱུང་བའི་ཕྱིར། མཁས་པ་འཐོབ་པ་དང་རྙེད་བཀུར་འཐོབ་པ་ནི་རྒྱུ་ཐ་དད་ཡིན་པས་མཁས་པ་རྙེད་བཀུར་དང་མི་ལྡན་པ་ཡོད་ལ། དེའི་ཚེ་ཁ་ཅིག་ཁོ་བོ་ལྟ་བུ་ལ་རྙེད་ བཀུར་མི་འབུལ་བར་བླུན་པོ་འདི་དང་འདི་ལ་འབུལ་ལོ་ཞེས་ང་རྒྱལ་དང་ཕྲག་དོག་དང་ཞུམ་པ་ཅིག་ཆར་སྐྱེད་པ་དུ་མ་ཡོད་པས་དེའི་ཕྱིར་རིག་གནས་ཆུང་བ་ལྔ་ཙམ་ཤེས་པའི་པཎྜི་ཏ་ཆུང་བའམ། རིག་གནས་དང་ཁྱད་པར་སྡེ་སྣོད་གསུམ་དང་ཐེག་པ་ཆེན་པོའི་སྡེ་སྣོད་ དང་རྒྱུད་སྡེ་རྒྱ་མཚོ་ལྟ་བུ་ཤེས་པའི་མཁས་པ་རྣམས་ལ་སོ་སོ་ལ་ཇི་འཚམ་པའི་བཀུར་སྟི་མཐོན་པོའི་གོ་འཕང་འཇོག་ཅིང་སྐྱེ་བོས་འདུད་པ་དང་ལོངས་སྤྱོད་ཀྱི་རྙེད་པ་ཆེན་པོ་དང་ལྡན་པར་གྱུར་ཅིག་པའོ། །ཇི་ལྟར་མུ་གེའི་དུས་གཞོན་ནུ་མ་སྐྱེས་དགྲས་ལྷས་བྱིན་འཁོར་ བཅས་ལ་ཤིང་རྟ་ལྔ་བརྒྱ་ཁ་ཟས་བསོད་པས་གང་བས་རྟག་ཏུ་མཆོད་ཅིང༌། རྫུ་འཕྲུལ་མ་ཐོབ་པའི་དགེ་སློང་རྣམས་འཚོ་བས་ཕོངས་པའི་ཚེ་སྟོན་པས་ལྷས་བྱིན་གྱི་རྙེད་པ་དང་བཀུར་སྟི་ནི་སྦ་དང་སྨྱིག་མའི་འབྲུ་དང༌། དྲེའུ་མོ་སྦྲུམ་པ་ལྟ་བུར་བལྟ་བར་བྱ་སྟེ་སྐྱེ་བོ་ངན་པ་ནི་རྙེད་པ་ དང་བཀུར་སྟིས་ཕུང་བར་འགྱུར་རོ། །ཞེས་གསུངས་པ་ལྟར། ཡོན་ཏན་ཤེས་སམ་མི་ཤེས་ཀྱང་རུང་སྟེ་སྐྱེ་བོ་རང་བཞིན་ངན་པ་ཁ་ཅིག་ནི་རྙེད་བཀུར་ཅུང་ཟད་ཐོབ་ན་རིགས་ངན་མདུན་ན་འདོན་གྱི་སྟན་ལ་བཞག་པ་ལྟར་དྲེགས་ཤིང་རང་གཞན་ཕུང་བར་བྱེད་པ་ཡོད་པས་དེའི་ཕྱིར་མཁས་ པ་རྣམས་རྙེད་བཀུར་ཐོབ་ཀྱང་ང་རྒྱལ་དང་ཕྲག་དོག་མེད་པར་རྒྱུད་ཡོངས་སུ་དག་ཅིང་མཁས་པའི་གྲགས་པ་འཐོབ་པར་གྱུར་ཅིག་པའོ། །དེ་ལ་མཁས་པ་ཡང་དག་པ་ནི། ཆོས་ཀྱི་ཚད་འཛིན་པར་མི་བྱེད་ལ་རྒྱུ་འབྲས་ལ་མཁས་པའི་ཕྱིར། ཆོས་སྤོང་དང་གང་ཟག་ལ་དམོད་པར་མི་བྱེད་ མོད་ཀྱང་ཕྱོགས་རེས་ཁེངས་པ་ཁ་ཅིག་ནི་གཞན་ཐམས་ཅད་ལ་བ་ལང་ལྟར་ལྟ་ཞིང་རྩོད་པ་དང་རྩོམ་པ་ན་ཡང་ཚིག་རྩུབ་རྣམ་སྨིན་མི་བཟད་པ་འབྱུང་བ་མང་དུ་འཕེན་ལ། ཆོས་སྤོང་དང་གང་ཟག་སྤོང་བའི་ལས་ཆེར་གསོག་ཅིང་རྒྱུ་དེས་ཕྱི་མར་ངན་འགྲོའི་གནས་མི་བཟད་པ་ལེན་པ་

Page: 957 ༄༅། །ཡོད་པས་དེ་རྣམས་ལ་དགོངས་ནས་མཁས་པ་དེ་དག་ངན་སོང་དུ་མི་ལྟུང་ཞིང་ཕྱི་མར་ཡང་དལ་བ་འཐོབ་ལ་བརྩོན་པ་མེད་པར་ཡང་བྱང་ཆུབ་མྱུར་དུ་འཐོབ་པར་གྱུར་ཅིག་པའོ། །དེ་ནས་གཅིག་གིས་སེམས་ཅན་ཐམས་ཅད་བདེ་བ་དང་བདེ་བའི་ རྒྱུ་དང་ལྡན་པར་བསྔོས་པ་སྟེ། སངས་རྒྱས་ཐམས་ཅད་མཆོད་པར་བྱེད་ཅིང་དེ་ཡི་འབྲས་བུ་བདེ་བ་དམ་པ་འཐོབ་པར་གྱུར་ཅིག་པའོ། །དེ་ནས་གཅིག་གིས་རྒྱལ་བ་དང་རྒྱལ་སྲས་རྣམས་ཀྱི་བཞེད་པ་རྫོགས་པར་བསྔོས་པ་སྟེ། དེ་རྣམས་ཀྱི་བཞེད་པའི་གཙོ་བོ་ནི་འགྲོ་ བའི་དོན་ཁོ་ན་ཡིན་པས་དེ་ཇི་ལྟར་དགོངས་པ་དེ་བཞིན་དུ་གྲུབ་པར་གྱུར་ཅིག་པའོ། །དེ་བཞིན་དུ་མགོན་པོ་སངས་རྒྱས་རྣམས་ཀྱིས་ཇི་ལྟར་དགོངས་པའི་ཕྲིན་ལས་དེ་ཉིད་སེམས་ཅན་རྣམས་ལ་བདེ་ཞིང་གྱ་ནོམ་པས་འབྱོར་བར་གྱུར་ཅིག་པའོ། །ཚིག་རྐང་ཐ་མ་ གཉིས་ཀྱིས་ཉན་རང་གི་དོན་དུ་བསྔོས་པ་སྟེ། སངས་རྒྱས་དང་ཉན་ཐོས་མེད་པ་ན་འཇིག་རྟེན་ན་ཡོན་གནས་གཅིག་པུ་བར་གྱུར་པ་སྔོན་སངས་རྒྱས་མེད་པའི་ཞིང་ཁམས་སྟོང་པར་སྐྱེ་བ་དང༌། གདུལ་བྱ་ལ་ལུས་ཀྱིས་ཆོས་སྟོན་གྱི་ངག་གིས་མི་སྟོན་པ་དང༌། སློབ་དཔོན་མེད་པར་ རང་གིས་བྱང་ཆུབ་མངོན་དུ་བྱེད་པར་གྱུར་ཅིག་ཅེས་པའི་སྨོན་ལམ་ཆེན་པོ་གསུམ་བཏབ་ཅིང་ཚོགས་བསགས་པས་སངས་རྒྱས་ཀྱི་བསྟན་པ་མེད་པའི་དུས་སུ་སྲིད་པ་ཐ་མ་ལ་མིར་སྐྱེས་ནས་སྐྱེ་བས་མཁན་སློབ་མེད་པར་རྟགས་རང་གིས་བླངས་ནས་རབ་ཏུ་བྱུང་ཞིང་རྟེན་ འབྲེལ་ལུགས་འབྱུང་ལྡོག་ལ་བརྟགས་པས་སྲིད་པའི་སྲེད་པ་ཟད་པས་རང་གིས་བྱང་ཆུབ་འབྲིང་པོ་མངོན་དུ་བྱས་པ་ནི་རང་སངས་རྒྱས་ཏེ། སྔོན་བསྐལ་པ་ཉི་ཤུར་ཚོགས་བསགས་པ་ཚོགས་སྦྱོང་ཆུང་ངུ་དང༌། ལྔ་བཅུར་བསགས་པ་ཆེན་པོ་དང༌། དེའི་བར་ཅི་རིགས་བསགས་པ་ འབྲིང་སྟེ། ཚོགས་སྤྱོད་ཀྱི་རང་རྒྱལ་གསུམ་ནི་ནགས་སམ་གཙུག་ལག་ཁང་སོགས་ན་དགེ་འདུན་གྱི་སྡེའི་ཚུལ་དུ་བཞུགས་ལ། དཔོན་སློབ་ཀྱི་རྣམ་པར་བཞག་པ་ནི་མེད་དོ། །བསྐལ་པ་བརྒྱར་ཚོགས་བསགས་པ་ནི་བསེ་རུ་ལྟ་བུ་དབང་པོ་རྣོན་པོ་སྟེ་ནགས་ན་གཅིག་པུ་ཁོ་

Page: 958 ནར་གནས་སོ། །འདི་དག་ནི་བསོད་སྙོམས་སྤྱོད་ཅིང་བསོད་སྙོམས་ཕུལ་བ་རྣམས་ཀྱིས་དགེ་བ་མཐའ་ཡས་པ་སྐྱེད་ལ་དད་པ་རྣམས་ཀྱི་དགའ་བ་སྤེལ་བ་དང་མ་དད་པ་རྣམས་འགྱོད་པ་སྐྱེད་པའི་ཕྱིར་རྫུ་འཕྲུལ་སྟོན་ཞིང༌། རྣག་གི་ལུས་ཀྱིས་སྐྱོ་བའི་ཕྱིར་ཧ་ཅང་ རིང་དུ་མི་བཞུགས་པར་ཆོ་འཕྲུལ་དང་བཅས་ཏེ་མྱ་ངན་ལས་འདའོ། །ཉན་ཐོས་ནི་ཤྲ་ཝ་ཀ་ཞེས་ཐོས་པ་སྒྲོག་པའི་ཕྱིར་ཉན་ཐོས་ཞེས་བྱ་ལ། སྤྱིར་ཉན་ཐོས་ནི་སློབ་མའི་མིང་གི་རྣམ་གྲངས་ཀྱང་ཡིན་པས་གཅེར་བུ་པའི་ཉན་ཐོས་ཞེས་སོགས་ཕྱི་རོལ་པ་ལ་ཡང་ ཐ་སྙད་ཡོད་དོ། །ནང་པའི་ཉན་ཐོས་ལ་ནི་ལམ་ལ་ཞུགས་པའི་ཉན་ཐོས་དང༌། གྲུབ་མཐའ་ཁས་ལེན་གྱི་ཉན་ཐོས་གཉིས་ཡིན་ལ། ལྔ་སྡེ་དང༌། ཉེ་བའི་ལྔ་སྡེ་དང༌། འོད་སྲུང་སོགས་སྟོན་པའི་འཁོར་སྟོང་ཉིས་བརྒྱ་ལྔ་བཅུའི་དགེ་འདུན་ནམ་ལྔ་སྟོང་གི་དགེ་འདུན་ནི་གཙོ་ བོ་ཡིན་ལ། སྟོན་པ་བཞུགས་དུས་ནས་བསྟན་པའི་བཏད་རབས་བདུན་གྱི་བར་མཐའ་ཡས་པ་བྱུང་བ་རྣམས་ནི་དགྲ་བཅོམ་ཐོབ་པ་ཤས་ཆེ་ལ། གཞན་ཡང་རྒྱུན་ཞུགས་དང༌། ལན་གཅིག་ཕྱིར་འོང་དང༌། ཕྱིར་མི་འོང་བ་རྣམས་ཀྱི་ཞུགས་གནས་གང་རུང་ཐོབ་པ་ཤས་ཆེ་ བས་འཕགས་པའི་ཉན་ཐོས་ཞེས་བྱ་ལ། འདི་དག་བྱེ་མདོའི་གྲུབ་མཐའ་སྨྲ་བར་མ་ངེས་ཏེ། འཕགས་པ་རབ་འབྱོར་ཤེས་ཕྱིན་སྟོན་པའི་མཆོག་ཏུ་བཤད་པ་དང༌། མདོ་སྡེ་ཆེན་པོ་རྣམས་ན་དེ་རྣམས་ཀྱིས་ཐེག་ཆེན་གྱི་ཆོས་བསྟན་པ་ཆེས་མང་ཞིང༌། རྣལ་འབྱོར་རྒྱུད་ མན་ཆད་ཀྱི་དཀྱིལ་འཁོར་དུ་ཡང་ཆུད་པས་རྒྱུད་སྡེ་དག་ཕལ་ཆེར་གྱི་གླེང་གཞིར་ཡོད་པ་དང༌། བླ་མེད་ཀྱི་འང་སངས་རྒྱས་ཐོད་པའི་རྒྱུད་ཉན་པའི་འཁོར་དུ་བཤད་པ་དང༌། གསང་སྔགས་བྱིན་གྱིས་རློབ་པར་ཡང་བྱེད་དེ། འདུས་པ་རིན་པོ་ཆེའི་ཏོག་ལས། བདུད་གཞོན་ནུ་ལྔ་བཅུ་ལྔ་བཅུས་ཉན་ཐོས་ཆེན་པོ་བཞི་ལ་དགེ་སྦྱོང་གླུ་ལོངས་ཅིག་ གར་བྱོས་ཤིག་ཅེས་ཀྱལ་ཀ་བྱས་པ་ན་སྔོན་མ་ཐོས་པའི་གླུ་བླང་ངོ་ཞེས། ཕུང་པོ་དག་གིས་ཤིན་ཏུ་ཆོགཅེས་སོགས་ཀྱི་ཚིགས་བཅད་དང༌། གསང་སྔགས་སྨྲས་པས་བདུད་དེ་དག་བཏུལ་བར་བཤད་པ་དང༌། དགྲ་བཅོམ་པས་བྱས་པའི་རིག་སྔགས་བཅད་དོ་ཞེས་

Page: 959 ༄༅། །སོགས་འབྱུང་བའི་ཕྱིར། དེ་ཡང་འབྲས་བུ་བཞི་ནི། ཉན་ཐོས་ཀྱི་མཐོང་ལམ་སྐད་ཅིག་མ་བཅུ་དྲུག་ཐོབ་པ་གཞིར་བྱས་ནས་དེའི་སྟེང་ནས་སྒོམ་སྤང་སྤངས་ཚུལ་གྱིས་ཁྱད་པར་དུ་བྱས་པ་ཡིན་ཏེ། དེ་ལ་འདོད་ཁམས་ཀྱི་ཉོན་མོངས་ཆེན་པོའི་ཆེ་འབྲིང་ ཆུང་གསུམ། འབྲིང་གི་ཆེ་འབྲིང་ཆུང་གསུམ། ཆུང་ངུའི་ཆེ་འབྲིང་ཆུང་གསུམ་སྟེ་འདོད་ཉོན་དགུ། དེ་བཞིན་དུ་བསམ་གཏན་བཞི་དང༌། གཟུགས་མེད་བཞི་རེ་རེ་ལ་དགུ་དགུ་སྟེ་སྒོམ་པས་སྤང་བྱའི་ཉོན་མོངས་བརྒྱད་ཅུ་རྩ་གཅིག་ནི་སྤང་བྱའོ། །དེ་ལ་མཐོང་ལམ་ཁོ་ན་ ཐོབ་ལ་འདི་དག་ལས་གང་ཡང་མ་སྤངས་ཤིང་སྤོང་བར་ཡང་མི་རྩོམ་ན་ཉན་ཐོས་མཐོང་ལམ་པ་ཁོ་ན་ཡིན་གྱི་འབྲས་བུ་བཞི་གང་ལ་ཡང་ཞུགས་པ་དང་གནས་པ་གང་ཡང་མ་ཡིན་ནོ། །འོན་ཀྱང་དྲང་སྲོང་ཉི་མ་གུང་པ་འཁོར་བཅས་བསྙེན་པར་རྫོགས་པའི་གསོལ་བ་ བྱས་པས་མཐོང་ལམ་དང༌། ཕྱིར་མི་འོང་ལྷན་ཅིག་ཏུ་ཐོབ་པ་ལྟ་བུ་ལ་དགོངས་ནས། བཅུ་དྲུག་པ་ལ་དེ་འབྲས་གནས། །ཞེས་འཆད་པ་ཡིན་ནོ། །འདོད་ཉོན་ཆེན་པོ་སྐོར་གསུམ་སྤོང་བའི་ཕྱིར་བརྩོན་པ་དང་ཁྱད་པར་དེའི་བར་ཆད་མེད་ལམ་ལ་གནས་པ་ནི་འབྲས་བུ་ དང་པོ་རྒྱུན་ཞུགས་ལ་ཞུགས་པའི་ཕྱིར་རྒྱུན་ཞུགས་ཞུགས་པ་ཞེས་བྱ་ལ། འདོད་ཉོན་གསུམ་པ་སྤངས་པའི་རྣམ་གྲོལ་ལམ་ཐོབ་པ་དེའི་ཚེ་རྒྱུན་ཞུགས་ཀྱི་འབྲས་བུ་ཐོབ་པ་ཡིན་ལ། འདི་ལ་དབང་བརྟུལ་སྲིད་པ་ལན་བདུན་པ་ཞེས་བྱ་བ་ལྷའི་སྐྱེ་སྲིད་བར་སྲིད་བདུན་རེ་མིའི་ སྐྱེ་སྲིད་བར་སྲིད་བདུན་རེ་སྟེ། སྲིད་པ་ཉི་ཤུ་རྩ་བརྒྱད་ན་སྔོན་ལྷ་མི་གང་གི་རྟེན་ལ་མཐོང་ལམ་ཐོབ་པ་དེའི་རྟེན་གྱིས་དགྲ་བཅོམ་འཐོབ་པ་དང༌། དབང་འབྲིང་རིགས་གནས་རིགས་སྐྱེ་སྟེ་ལྷ་མིའི་སྐྱེ་སྲིད་བར་སྲིད་གཉིས་རེས་སྔར་ལྟར་དགྲ་བཅོམ་འཐོབ་པ་དང༌། དབང་ རྣོན་རྒྱུན་ཞུགས་འབྲས་གནས་ཁྱད་པར་ཅན་ཚེ་དེ་ཉིད་ལ་སྒོམ་སྤང་ལྷག་མ་ཅིག་ཆར་དུ་སྤངས་ནས་དགྲ་བཅོམ་འཐོབ་པའོ། །སྤྱིར་རང་ལམ་གྱི་སྒོམ་སྤང་མངོན་གྱུར་པ་མ་སྤངས་ན་འབྲས་བུ་དེ་ཐོབ་པར་མི་འཇོག་སྟེ་མཐོང་སྤང་མ་སྤངས་ན་མཐོང་ལམ་པར་མི་འཇོག་

Page: 960 པ་བཞིན་ནོ། །འོན་ཀྱང་ཙམ་པོ་བ་རྣམས་ཀྱིས་ས་བོན་མ་སྤངས་པའི་ཕྱིར། འབྲས་གནས་སྒོམ་སྤང་བྱ་མ་ཟད། །ཅེས་གསུངས་པ་ཡིན་ནོ། །འདོད་ཉོན་དྲུག་པའི་སྤོང་གཉེན་ལ་ཞུགས་པ་ཕྱིར་འོང་ཞུགས་པ་དང༌། དེ་སྤངས་པ་ལན་གཅིག་ཕྱིར་འོང་སྟེ། འདོད་ཁམས་ སུ་སྐྱེ་བ་ཕྱི་མ་གཅིག་ལེན་པའི་ཕྱིར། དེ་སྐད་ཅེས་བྱ་ལ་ཕྱི་མ་དེ་ཉིད་ལ་དགྲ་བཅོམ་འཐོབ་པ་ནི་ཕྱིར་འོང་འབྲས་གནས་ཁྱད་པར་ཅན་ཚེ་གཅིག་བར་ཆད་གཅིག་པ་ཞེས་བྱའོ། །འདོད་ཉོན་དགུ་པའི་སྤོང་གཉེན་ལ་གནས་པ་ནི། ཕྱིར་མི་འོང་ཞུགས་པ་དང་དེ་སྤངས་པའི་རྣམ་ གྲོལ་ལམ་ཐོབ་པ་ནི་ཕྱིར་མི་འོང་སྟེ་འདོད་ཁམས་སུ་སྐྱེ་བ་མི་ལེན་པའི་ཕྱིར་དེ་སྐད་ཅེས་བྱ་ལ། གཟུགས་ཁམས་དང་གཟུགས་མེད་ཁམས་ཀྱི་རྟེན་ལ་མྱ་ངན་ལས་འདའ་བ་སྐྱེས་ནས་འདའ་བ་དང༌། གཟུགས་མེད་ན་བར་དོ་མེད་ཅིང་གཟུགས་ཀྱི་བར་སྲིད་ཀྱི་རྟེན་ལ་འདའ་ བ་བར་འདའ་བ་དང༌། དེ་རེ་རེ་ལ་ཡང་འབད་རྩོལ་ཡོད་མེད་ཀྱིས་མངོན་པར་འདུ་བྱེད་པ་དང་བཅས་ཏེ་འདའ་བ་དང༌། འདུ་བྱེད་པ་མེད་པར་འདའ་བ་གཉིས་ཏེ་ཕྱིར་མི་འོང་འདའ་བ་རྣམས་དང༌། ཚངས་རིས་ནས་ཚངས་ཆེན་དུ་སྐྱེ་བ་སོགས་བར་དུ་རེ་རེ་བཞག་ཅིང་སྐྱེ་བ་འཕར་ བ་དང༌། དེ་ནས་འོད་ཆུང༌། དེ་ནས་ཚད་མེད་འོད་སོགས་ཀྱི་རིམ་པས་ཕྱེད་འཕར་ཞིང་ཕྱེད་མི་འཕར་བས་སྐྱེ་བ་ཕྱེད་འཕར་དང༌། ཐམས་ཅད་དུ་གོ་རིམ་གྱིས་སྐྱེ་བ་གནས་ཐམས་ཅད་དུ་འཆི་འཕོ་བ་སྟེ་གོང་འཕོ་གསུམ། མཐོང་ཆོས་ལ་ཞི་བ་དང་ལུས་ཀྱིས་མངོན་སུམ་དུ་ བྱེད་པ་གཉིས་ཏེ་ཕྱིར་མི་འོང་རྣམས་སོ། །སྲིད་ཉོན་དགུ་པ་ཞེས་བྱ་བ་སྲིད་རྩེའི་ཉོན་མོངས་ཆུང་ངུའི་ཆུང་ངུའི་སྤོང་གཉེན་བར་ཆད་མེད་ལམ་ལ་གནས་པ་ནི་དགྲ་བཅོམ་ཞུགས་པ་དང༌། དེ་སྤངས་པའི་རྣམ་གྲོལ་ལམ་ཐོབ་པ་ནི་དགྲ་བཅོམ་པའི་འབྲས་བུ་ཐོབ་པ་སྟེ་འདི་ལ་དབང་ བརྟུལ་ཤེས་རབ་རྐྱང་པས་གྲོལ་བ་ནི་མངོན་ཤེས་དང་རྫུ་འཕྲུལ་མེད་པའི་ཕྱིར་རྒྱན་མེད་ཅེས་བྱ་ལ། འདི་ལས་དབང་པོ་རྣོན་པོར་འཕོ་མི་ནུས་པ་ནི་གནས་པ་ལས་མི་བསྐྱོད་པའི་ཆོས་ཅན་གྱི་དགྲ་བཅོམ་པ་ཡིན་ལ། མཐར་གནས་སྙོམས་འཇུག་དགུ་སྒྲུབ་ནུས་

Page: 961 ༄༅། །པ་ནི་རྟོགས་པའི་འོས་སུ་གྱུར་པའི་དགྲ་བཅོམ་པ་ཡིན་ནོ། །དབང་རྣོན་ནི། མཐར་གནས་སྙོམས་འཇུག་བརྒྱད་ཐོབ་ཅིང་ཤེས་རབ་ཀྱིས་གྲོལ་བ་ནི་བསམ་གཏན་བཞི་པ་ན་མངོན་ཤེས་ཀྱི་ལམ་ཡོད་ལ་དེ་ཐོབ་པའི་ཕྱིར་དགྲ་བཅོམ་པ་རྒྱན་ཅན་ ཞེས་བྱ་ལ། ཉམས་པའི་ཆོས་ཅན་གྱི་དགྲ་བཅོམ་པ་ནི་ཁ་ཅིག་དགྲ་བཅོམ་གྱི་སྤངས་རྟོགས་གཉི་ག་ལས་ཉམས་པ་དང༌། རེ་རེ་ལས་ཉམས་པ་སོགས་འདོད་ཀྱང་འདི་ནི་མཐོང་ཆོས་བདེར་གནས་ལས་ཉམས་པ་ཚེ་དང་ལྡན་པ་མཽངྒལ་གྱི་བུ་མཐར་ཀུན་ཏུ་རྒྱུས་བཀྲོང་ ངེས་ཀྱི་ལས་ཡོད་པ་ལྟ་བུ་མཐོང་བའི་ཆོས་ལ་བདེ་བར་གནས་པ་ལས་ཉམས་པ་ལ་འཇོག་གོ །དེ་ལྟ་བུའི་དགྲ་བཅོམ་པ་ཁ་ཅིག་དེའི་སྔུན་དུ་མྱ་ངན་ལས་འདའ་བ་ནི་བདག་གསོད་པའི་ཆོས་ཅན་གྱི་དགྲ་བཅོམ་པ་དང༌། དེ་ལྟ་བུ་ཁ་ཅིག་དབང་པོ་བསྡམས་ཏེ་བདག་ཉིད་སྲུང་ བ་ཡོད་པས་རྗེས་སུ་སྲུང་བའི་དགྲ་བཅོམ་པ་ཞེས་འཇོག་པ་ཡིན་ནོ། །འདི་རྣམས་མཐར་ཐུག་ཐེག་གསུམ་དུ་འཇོག་པ་དྲང་དོན་གྱི་མདོའི་ལུགས་ཀྱིས་ཐེག་པ་གསུམ་ལས་ཆུང་ངུར་ཞུགས་པ་སྟེ་དགྲ་བཅོམ་པ་སླར་ཡང་སྲིད་མི་ལེན་པར་འཆད་དོ། །མཐར་ཐུག་ ཐེག་གཅིག་ཏུ་རྣམ་པར་བཞག་པ་ངེས་དོན་གྱི་མདོ་རྣམས་སུ་ཐེག་ཆེན་ཉིད་ཀྱི་ཆ་རེ་ལ་ཉན་རང་གི་ཐེག་པར་མིང་བཏགས་ཤིང་བྱང་ཆུབ་སེམས་དཔའ་ཉིད་ལ་ཉན་ཐོས་ཀྱི་སྒྲར་བཤད་པ་ཡིན་གྱི་ཐེག་ཆེན་ཁོ་ན་ལས་གཞན་པའི་ཐེག་པ་མེད་པར་འཆད་དོ། །འདིའི་ཚེ་བྱང་ ཆུབ་ཀྱི་རྒྱུན་ལ་ཞུགས་པས་རྒྱུན་ཞུགས་ཞེས་སོགས་དགོངས་པས་བསྟན་པར་ཕྱིར་མི་ལྡོག་པ་འཁོར་ལོའི་མདོ་དང༌། དམ་ཆོས་པདྨ་དཀར་པོ་ལས་རྒྱས་པར་བཤད་དོ། །གྲུབ་མཐའ་ཁས་ལེན་གྱི་ཉན་ཐོས་ནི། སྤྱིར་སྡེ་པ་བཅོ་བརྒྱད་དང༌། ཁྱད་པར་བྱེ་བྲག་ཏུ་སྨྲ་བ་ དང༌། མདོ་སྡེ་པ་སྟེ་གོང་དུ་བསྟན་ཟིན་ཏོ། །དེ་ལྟ་བུའི་ཉན་རང་དེ་དག་སྲིད་པའི་འཇིགས་པ་མེད་པས་མྱ་ངན་ལས་འདས་པ་རྣམ་པར་གྲོལ་བའི་བདེ་བ་དང་ལྡན་པ་ཡིན་མོད་ཀྱང་དགྲ་བཅོམ་པ་རྣམས་ཀྱང་སྡུག་བསྔལ་གྱི་ཕུང་པོའི་ལྷག་མ་ཞེས་བྱ་བ་སྐུ་ཚེ་འདིའི་

Page: 962 ཕུང་པོ་ལྔ་མ་སྤངས་པ་དེ་སྲིད་ཕུང་པོ་ལ་གཤེད་མ་མཚོན་ཐོགས་པ་ཕྱི་བཞིན་འབྲང་བ་དང༌། ཁམས་བཞི་ལ་སྦྲུལ་གདུག་བཞི་ཕྲག་ལ་ཐོགས་པ་ལྟར་འདུ་བྱེད་ཀྱི་སྡུག་བསྔལ་གྱིས་ཀུན་ཏུ་འཇིགས་པས། འབྲུ་མར་གང་བའི་སྣོད་བསྐུར་ཏེ། །ཞེས་སོགས་ལྟར་ ཉམ་ང་བ་ཡོད་པས་དེ་དང་བྲལ་ཏེ་བསམ་གཏན་དང་རྣམ་པར་ཐར་པའི་བདེ་བས་ཚིམ་པར་གྱུར་ཅིག་པའི་དོན་ཏོ། །སྐབས་འདིར། ལྷ་དང་ལྷ་མིན་མི་རྣམས་ཡིད། །གུས་བཅས་རྟག་ཏུ་མཆོད་པར་ཤོག །ཞེས་པ་རྒྱ་དཔེ་ལ་ཡོད་དོ་ཞེས་ལོ་ཙྭ་བ་ཁ་ཅིག་འཆད་དོ། ། གཉིས་པ་ཞར་ལ་རང་དོན་དུ་བསྔོ་བ་ནི། །བདག་ཀྱང་འཇམ་དབྱངས་བཀའ་དྲིན་གྱིས། །ས་རབ་དགའ་བ་ཐོབ་བར་དུ། །རྟག་ཏུ་ཚེ་རབས་དྲན་པ་དང༌། །རབ་ཏུ་འབྱུང་བ་འཐོབ་པར་ཤོག །བདག་ནི་ཁ་ཟས་གྱི་ནས་ཀྱང༌། །ཉམས་དང་ལྡན་ཞིང་འཚོ་བར་ ཤོག །ཚེ་རབས་ཀུན་དུ་དབེན་གནས་པ། །ཕུན་སུམ་ལྡན་པ་ཐོབ་གྱུར་ཅིག །གང་ཚེ་ལྟ་བར་འདོད་པའམ། །ཅུང་ཟད་འདྲི་བར་འདོད་ན་ཡང༌། །མགོན་པོ་འཇམ་དབྱངས་དེ་ཉིད་ནི། །གེགས་མེད་པར་ཡང་མཐོང་བར་ཤོག །ཕྱོགས་བཅུ་ནམ་མཁའི་མཐས་ གཏུགས་པའི། །སེམས་ཅན་ཀུན་དོན་སྒྲུབ་པའི་ཕྱིར། །ཇི་ལྟར་འཇམ་དཔལ་སྤྱོད་མཛད་པ། །བདག་སོགས་སྤྱོད་པའང་དེ་འདྲར་ཤོག །ཇི་སྲིད་ནམ་མཁའ་གནས་པ་དང༌། །འགྲོ་བ་ཇི་སྲིད་གནས་གྱུར་པ། །དེ་སྲིད་བདག་ནི་གནས་གྱུར་ཏེ། འགྲོ་བའི་ སྡུག་བསྔལ་སེལ་བར་ཤོག །འགྲོ་བའི་སྡུག་བསྔལ་གང་ཅིའང་རུང། །དེ་ཀུན་བདག་ལ་སྨིན་གྱུར་ཅིག །བྱང་ཆུབ་སེམས་དཔའི་དགེ་འདུན་གྱིས། །འགྲོ་བ་བདེ་ལ་འགོད་པར་ཤོག །ཅེས་གསུངས་ཏེ། དེ་ཡང་ཚིགས་བཅད་དང་པོས་ཁེངས་སྐྱུང་ཞིང་ གཞན་གྱི་ང་རྒྱལ་གཞོམ་པ་སྟེ། ཁ་ཅིག་མངོན་པར་རྟོགས་པའི་ཡོན་ཏན་ཅུང་ཟད་ཀྱིས་ཁེངས་ཏེ་བདག་ནི་བརྟུལ་ཞུགས་གྲུབ་པའོ་ཞེས་བསྙེམས་པ་དག་གཞོམ་པའི་ཕྱིར། བདག་ཀྱང་ས་དང་པོ་རབ་ཏུ་དགའ་བ་མ་ཐོབ་ཀྱི་བར་དུ་གར་སྐྱེ་ཡང་ཚེ་རབས་དྲན་པ་དང་རབ་ཏུ་འབྱུང་བ་ཁོ་

Page: 963 ༄༅། །ནར་གྱུར་ཅིག །ཅེས་གསུངས་ཏེ། སློབ་དཔོན་གྱི་ངོ་མཚར་གྱི་བཀོད་པ་དེ་ལྟ་བུ་མཐོང་བ་དེ་ཡང་འདི་ལྟར་སྨོན་ལམ་མཛད་ན་བདག་འདྲ་བ་ལྟ་ག་ལ་ཞིག་སྙམ་ནས་འཁོར་དེ་ནས་དྲེགས་པ་ཅན་མང་པོ་ཞིག་འདིས་བཏུལ་བར་གདོན་མི་ཟའོ། །དེ་བཞིན་དུ་ ཁམ་གྱི་ཟས་ལ་མ་ལྟོས་ཤིང་སྒོ་གསུམ་བྱང་ཆུབ་ཀྱི་མི་མཐུན་ཕྱོགས་ཀྱིས་དབེན་ཞིང་སངས་རྒྱས་ཀྱི་རྒྱུའི་ཡོན་ཏན་ཕུན་ཚོགས་འཐོབ་པ་དང༌། དུས་ཐམས་ཅད་དུ་འཇམ་དཔལ་ལ་སོགས་པའི་དགེ་བའི་བཤེས་གཉེན་དང་མི་འབྲལ་ཞིང་དེའི་ངག་ཇི་ལྟ་བར་སྒྲུབ་པ་དང༌། སེམས་ཅན་ཐམས་ཅད་ཀྱི་དོན་དུ་འཇམ་དཔལ་དང༌། སྤྱན་རས་གཟིགས་དང༌། ཀུན་ཏུ་བཟང་པོ་དང༌། ཕྱག་ན་རྡོ་རྗེ་དང༌། ནམ་མཁའ་མཛོད་དང༌། སངས་རྒྱས་མཐའ་ཡས་པའི་མཚན་བཟུང་བ་ལས་དེ་དག་གི་མཚན་བཟུང་བ་ཕན་ཡོན་ཆེ་བར་གསུངས་པའི་བྱང་ཆུབ་སེམས་དཔའ་བཞི་ པོ་ཡེ་ཤེས་བླ་མ་དང༌། འོད་ཀྱི་ཏོག་དང༌། སྨོན་ལམ་བློ་གྲོས་དང༌། དབང་པོ་ཞི་བ་རྣམས་དང༌། གཞན་ཡང་བཟང་སྐྱོང་དང༌། ཕུག་སྦས་དང༌། འདམ་བུས་བྱིན་ལ་སོགས་པ་སྐྱེས་བུ་དམ་པ་ལྔ་བརྒྱ་དང༌། སྐྱེས་བུ་དམ་པ་བཅུ་དྲུག་དང་བརྒྱད་དང་མདོར་ན་བྱང་ཆུབ་སེམས་དཔའ་མཐུ་བོ་ཆེ་དེ་ཐམས་ཅད་ ཀྱི་སྤྱོད་པ་ནི་རེ་རེ་ལ་ཡང་ཀུན་གྱིས་འཇུག་པས་ན་བདག་ཀྱང་དེ་ཐམས་ཅད་ཀྱི་མཛད་པ་ཇི་ལྟ་བ་བཞིན་དུ་བདག་ཉིད་རྟག་པར་སྤྱོད་པ་དང་སྤྱོད་པ་དེ་ཐམས་ཅད་ཀྱང་ནམ་མཁའི་མཐའ་ཇི་ཙམ་པ་དང་སེམས་ཅན་གྱི་མཐའ་ཇི་ཙམ་པ་དེ་ཙམ་དུ་དུས་དང་རྒྱར་ཆད་པ་མེད་པས་འགྲོ་བ་ཐམས་ཅད་ཀྱི་ མདུན་ན་བདག་ཉིད་གནས་ཏེ། སྡུག་བསྔལ་ཐམས་ཅད་སེལ་ཞིང་བདེ་བ་ཐམས་ཅད་སྦྱིན་པར་བྱེད་པ་དང༌། བདག་གི་བདེ་བ་དང་གཞན་གྱི་སྡུག་བསྔལ་བརྗེ་བ་མངོན་སུམ་དུ་འགྲུབ་ཅིང༌། མདོར་ན་བདག་ལ་སོགས་པ་བྱང་ཆུབ་སེམས་དཔའ་ཐམས་ཅད་ཀྱི་དགེ་བའི་མཐུ་ཀུན་གཅིག་ཏུ་བསྡོམས་ ཏེ་སེམས་ཅན་ཐམས་ཅད་གནས་སྐབས་དང་མཐར་ཐུག་གི་བདེ་བ་ཐམས་ཅད་ལ་འགོད་པར་བསྔོས་པ་སྟེ་ཚིགས་སུ་བཅད་པ་རེ་རེ་ཞིང་བསྟན་ཏོ། །གསུམ་པ་བསྟན་པའི་དོན་དུ་བསྔོ་བ་ནི། འགྲོ་བའི་སྡུག་བསྔལ་སྨན་གཅིག་པུ། །བདེ་བ་ཐམས་ཅད་འབྱུང་བའི་གནས། །

Page: 964 བསྟན་པ་རྙེད་དང་བཀུར་བསྟི་དང༌། །བཅས་ཏེ་ཡུན་རིང་གནས་གྱུར་ཅིག །ཅེས་གསུངས་ཏེ། འགྲོ་བ་ཐམས་ཅད་ཀྱི་སྡུག་བསྔལ་རྒྱུ་དང་བཅས་པ་སེལ་བའི་ཕྱིར། སྨན་གྱི་དམ་པ་དང་གནས་སྐབས་འཁོར་བའི་བདེ་འབྲས་དང་མཐར་ཐུག་གི་བདེ་བ་བྱང་ཆུབ་དམ་པ་ གང་ལས་འབྱུང་བའི་གནས་ནི་སངས་རྒྱས་ཀྱི་བསྟན་པ་དམ་པའི་ཆོས་གཅིག་པུ་ཁོ་ན་སྟེ་དེའི་ཕྱིར་ལུང་གི་བསྟན་པ་སྡེ་སྣོད་གསུམ་ནི། ཀློག་པ་དང༌། ཁ་ཏོན་གྱིས་རབ་ཏུ་རྒྱས་ཤིང་མི་ནུབ་ལ། རྟོགས་པའི་བསྟན་པ་བསླབ་པ་གསུམ་ནི་རྩེ་གཅིག་ཏུ་ཚུལ་བཞིན་སྒྲུབ་པ་ ལྷུར་བྱེད་པས་རབ་ཏུ་རྒྱས་ཤིང༌། དེ་དག་གི་རྟེན་ལུང་གི་གླེགས་བམ་དང་སྐུ་གཟུགས་དང་མཆོད་རྟེན་དང་དམ་པའི་ཆོས་འཛིན་པའི་གང་ཟག་སྨྲ་བར་བཅས་པ་ཐམས་ཅད་ལ་ཡང་ལྷ་རྣམས་ཀྱིས་ཆེར་བསྔགས་པ་དང༌། མེ་ཏོག་དང་སྤོས་ཆུ་དང་ཙནྡ་ནའི་ཕྱེ་མའི་ཆར་ལ་ སོགས་པས་མཆོད་པ་དང་ཀླུ་དང་གནོད་སྦྱིན་དང་དྲི་ཟ་དང་ལྟོས་འཕྱེ་ལ་སོགས་པ་འགྲོ་བ་ཐམས་ཅད་ཀྱིས་མཆོད་ཅིང་བསྔགས་པ་དང་གང་མི་རྣམས་ཀྱི་ནང་ན་རྒྱལ་པོ་དང་རྒྱལ་ཕྲན་དང་བཙུན་མོ་དང་བློན་པོ་དང་བྲམ་ཟེ་དང་རྒན་རབས་དང་ཡུལ་མིར་བཅས་པ་དང་ཆོས་འདི་ ལས་ཕྱི་རོལ་པའི་དགེ་སྦྱོང་རྣམས་ཀྱིས་ཀྱང་གཙུག་ཏུ་གུས་པར་བཀུར་ཞིང་མཆོད་པའི་ཡོ་བྱད་ཀྱི་ཁྱད་པར་མཐའ་ཡས་པས་རྟག་ཏུ་མཆོད་པ་དང་བཅས་ཏེ་ཛམྦུའི་གླིང་འདི་དང་སངས་རྒྱས་ཀྱི་ཞིང་ཐམས་ཅད་དང་ལྷ་ཀླུ་ལ་སོགས་པའི་འགྲོ་བའི་གནས་ཐམས་ཅད་དུ་ཡང་ ནམ་ཡང་ནུབ་པ་མེད་པས་གནས་པར་གྱུར་ཅིག་པའོ། །གཉིས་པ་བཀའ་དྲིན་དྲན་པའི་ཕྱག་གིས་བསྟན་བཅོས་ཀྱི་མཐའ་བསྡུ་བ་ནི། གང་གི་དྲིན་གྱིས་དགེ་བློ་བྱུང༌། །འཇམ་པའི་དབྱངས་ལ་ཕྱག་འཚལ་ལོ། །གང་གི་དྲིན་གྱིས་བདག་དར་བ། །དགེ་བའི་ བཤེས་ལའང་བདག་ཕྱག་འཚལ། །ཞེས་གསུངས་ཏེ། ཡོན་ཏན་ཐམས་ཅད་དགེ་བའི་བཤེས་གཉེན་ལས་བྱུང་བར་སྟོན་པ་དང་བྱས་པ་ཤེས་ཤིང་དྲིན་དུ་གཟོ་བ་ནི་དམ་པའི་བྱ་བར་སྟོན་པའི་ཕྱིར་དང༌། བདག་གིས་འདི་ལྟ་བུ་ཤེས་སོ་ཞེས་ང་རྒྱལ་མི་མངའ་

Page: 965 ༄༅། །བ་ཉིད་ཀྱིས་དེ་ཐམས་ཅད་དགེ་བའི་བཤེས་གཉེན་གྱི་དྲིན་དུ་མཁྱེན་པས་བསྟན་བཅོས་ཀྱི་ཐ་མར་དགེ་བར་ཡང་དགེ་བའི་བཤེས་གཉེན་ལ་ཆེད་དུ་བརྗོད་པས་བསྔགས་པ་སྟེ། སློབ་དཔོན་ཉིད་ལ་དགེ་བའི་བློ་བྱང་ཆུབ་ཀྱི་སེམས་དང་པོར་ སྐྱེས་པ་དང༌། མཐར་དེ་ཁོ་ན་ཉིད་རྟོགས་པའི་བར་ཐམས་ཅད་འཇམ་དཔལ་གྱིས་བྱིན་གྱིས་བརླབས་པ་ཁོ་ནའི་ཕྱིར་དེ་ཉིད་ལ་ཕྱག་འཚལ་བ་དང༌། རབ་ཏུ་བྱུང་བ་དང་དགེ་སློང་གི་བསླབ་པ་སོགས་སྟེར་བས་ཐུགས་ཀྱི་དགེ་བ་དར་བར་མཛད་པ་མཁན་པོ་རྒྱལ་བའི་ལྷ་ལ་སོགས་ པའི་དགེ་བའི་བཤེས་གཉེན་རྣམས་ལ་ཡང་བཀའ་དྲིན་དྲན་པའི་ཕྱག་མཛད་པའོ། །བྱང་ཆུབ་སེམས་དཔའི་སྤྱོད་པ་ལ་འཇུག་པ་ལས། བསྔོ་བ་བསྟན་པ་ཞེས་བྱ་བ་སྟེ་ལེའུ་བཅུ་པ་རྣམ་པར་ཕྱེ་བའོ། །

བསྟན་བཅོས་ཀྱི་མཇུག་བསྡུ་བ།

གསུམ་པ་ཐ་ མར་དགེ་བ་བསྟན་བཅོས་ཀྱི་མཇུག་བསྡུ་བ་ནི། བྱང་ཆུབ་སེམས་དཔའི་སྤྱོད་པ་ལ་འཇུག་པ་སློབ་དཔོན་ཤཱནྟ་དེ་ཝས་མཛད་པ་རྫོགས་སོ། །ཞེས་མཛད་བྱང་དང༌། རྒྱ་གར་གྱི་མཁན་པོ་སརྦ་ཛྙཱ་དེ་ཝ་སྟེ་ཐམས་ཅད་མཁྱེན་པའི་ལྷ་དང༌། ཞུས་ཆེན་གྱི་ལོ་ཙཱ་བ་བནྡྷེ་དཔལ་བརྩེགས་ ཀྱིས་ཁ་ཆེའི་དཔེ་དང་བསྟུན་ནས་ཞུས་ཏེ་འདི་ནི་སྤྱིར་ཆོས་རྒྱལ་ཁྲི་སྲོང་གི་དུས་བསྒྱུར་ནས་ཕྱིས་མངའ་བདག་ཁྲི་རལ་གྱི་དུས་གསར་བཅད་ཀྱིས་གཏན་ལ་ཕབ་པའོ། །སླར་པཎྜི་ཏ་དྷརྨ་ཤྲི་བྷ་ཏྲ་ཆོས་དཔལ་བཟང་པོ་དང༌། ཞུས་ཆེན་གྱི་ལོ་ཙཱ་བ་བནྡྷེ་རིན་ཆེན་བཟང་པོ་དང་ཤཱཀྱ་ བློ་གྲོས་ཀྱིས་ཡུལ་དབུས་ཀྱི་དཔེ་དང་འགྲེལ་བ་དང་བསྟུན་ཏེ་བསྒྱུར་ལ། ཕྱིས་བལ་ཡུལ་གྱི་པཎྜི་ཏ་སུ་མ་ཏི་ཀིརྟི་ལེགས་པའི་བློ་གྲོས་གྲགས་པ་དང༌། རྔོག་ལོ་ཙཱ་བ་བློ་ལྡན་ཤེས་རབ་ཀྱིས་འགྲེལ་པ་དང་བསྟུན་ནས་བསྒྱུར་བཅོས་པ་སྟེ། དེ་རེ་རེ་ཞིང་ཡང་རྒྱ་སྐད་ལས་བོད་ སྐད་དུ་བསྒྱུར། སྐད་གཉིས་ཅར་དུ་ཕན་ཚུན་བཀླགས་ཏེ་ཞུས་ཆེན་བགྱིས། དེ་ནས་བཤད་ཉན་གྱིས་གཏན་ལ་ཕབ་སྟེ་དར་ཞིང་རྒྱས་པར་མཛད་པ་སྟེ་འགྲེལ་པས་ཀྱང་དཔྱིས་ཕྱིན་པར་གཏན་ལ་ཕབ་པ་ལེགས་པར་གྲུབ་བོ། །ཐེག་

Page: 966 མཆོག་ཀུན་ལས་དམ་པའི་དམ་པ་བྱང་ཆུབ་སེམས་ཀྱི་བགྲོད་པ་ཆེ། །རྒྱལ་སྲས་ཀུན་ལས་ཆེས་རབ་རྨད་བྱུང་ཞི་ལྷའི་ཞབས་ཀྱིས་རྣམ་བཤད་གཞུང༌། །བསྟན་བཅོས་ཀུན་གྱི་བླ་མའི་བླ་མ་བྱང་ཆུབ་སྤྱོད་འཇུག་ཕུལ་བྱུང་འདི། །རྒྱ་བོད་འགྲེལ་བཤད་ཀུན་ ལས་རྨད་བྱུང་མཆོག་གི་མཆོག་ཏུ་དེང་འདིར་བཀྲལ། །འདི་ནི་བདག་གི་བློ་གྲོས་མཐུ་མིན་ཏེ། །ཉིན་བྱེད་མཐུ་ལས་པདྨ་རྣམ་རྒྱས་དང༌། །ནོར་བུའི་མཐུ་ལས་འགྲོ་བའི་ལོངས་སྤྱོད་ལྟར། །འདི་ནི་རྒྱལ་བའི་བྱིན་བརླབས་མཐུར་ལྟོས་ཤིག །རྨོངས་ པའི་མུན་ནག་ལྡང་བ་མེད་པར་བྱེད། །མཁས་རློམ་མེ་ཁྱེར་རྣམས་ཀྱི་དྲེགས་པ་འཇིལ། །ལོག་སྨྲ་མཚན་རྒྱུའི་བྱ་རྣམས་མི་སྨྲར་འགྱུར། །དེ་ཕྱིར་འདི་ནི་ཉིན་བྱེད་ཤར་བ་འདྲ། །རིགས་ཆད་གྱུར་ཀྱང་དད་པའི་སྤུ་ལོང་གཡོ། །སྲིད་པར་ཞེན་རྣམས་སྐྱོ་ བའི་གདུང་བ་སྤེལ། །རྒྱལ་སྲས་རྣམས་ཀྱི་བརྩེ་ཆེན་ཆགས་རབ་བསྐུལ། །དེ་ཕྱིར་འདི་ནི་མ་ལ་ཡ་རླུང་འདྲ། །སྣ་ཚོགས་ལྟ་བའི་མུན་ནག་འཐིབས་པོ་སེལ། །དམན་པར་མོས་པའི་བློ་ཡི་པདྨ་འཛུམ། །བྱང་ཆུབ་སེམས་ཀྱི་ཀུ་མུཏ་རྒྱས་པར་བྱེད། ། དེ་ཕྱིར་འདི་ནི་ཆ་རྫོགས་ཟླ་བ་འདྲ། །རྒྱལ་བའི་གསུང་རབ་ཆུ་བོ་མཐའ་དག་འདུས། །སྔོན་མེད་ལེགས་བཤད་ནོར་བུ་བྱེ་བས་གཏམས། །ཟབ་རྒྱས་དོན་གྱི་གཏིང་མཐའ་མི་མངོན་པ། །དེ་ཕྱིར་འདི་ནི་ཆུ་གཏེར་ཆེན་པོ་བཞིན། །གསུང་རབ་མཐའ་ དག་ཀུན་གྱི་བང་མཛོད་དེ། །བསྟན་བཅོས་ཀུན་གྱི་གླེགས་བམ་གཅིག་པུ་ཉིད། །ཡང་དག་ལམ་སྟོན་དགེ་བའི་བཤེས་ཀྱི་མཆོག །ཐར་འདོད་རྣམས་ལ་སྐྱེས་ཀྱི་དམ་པ་ཡིན། །གྲགས་ལྡན་མཁས་པ་མང་ལ་སྣང་བཞིན་དུ། །བསྐལ་དོན་གྱུར་ པའི་དོན་མཆོག་མཐའ་ཡས་རྣམས། །ཕྱིན་ཅི་མ་ལོག་གསལ་བར་གཏན་ལ་ཕབ། །འདི་ལྟའི་ལེགས་བཤད་ཕྱིན་ཆད་འབྱུང་བར་དཀའ། །དེང་དུས་བསྟན་པའི་གཟུགས་བརྙན་འདི་མཐོང་ན། །དཔྱོད་ལྡན་སྙིང་གི་ཟུང་རྔུ་ལྡང་འགྱུར་མོད། །

Page: 967 འོན་ཀྱང་ལེགས་པར་བཤད་པ་འདི་མཐོང་ན། །རྒྱལ་བསྟན་སླར་ཡང་བྱུང་ཞེས་ཡིད་སོས་འགྱུར། །དམ་པའི་ཆོས་ནི་ཀུན་གྱིས་བཀུར་བྱ་ཡིན། །ལེགས་བཤད་གང་ན་འདུག་ཀྱང་བླང་བར་འོས། །དེ་བས་གྲུབ་མཐའི་ ཕྱོགས་ལྷུང་རབ་སྤོངས་ལ། །ཀུན་གྱིས་གཞུང་ལུགས་འདི་ལ་འཇུག་པར་མཛོད། །འཇམ་མགོན་ཞི་བའི་ལྷ་ཡི་བྱིན་བརླབས་ཀྱིས། །རང་བྱུང་དམ་པའི་ཆོས་ཀྱི་སྒྲ་རུ་ཤར། །བདག་གིས་ཡི་གེར་བགྱིས་པ་ཙམ་དུ་ཟད། །དེ་ཕྱིར་ནོངས་པས་ གོས་པར་མི་སེམས་སོ། །འདིར་འབད་དགེ་བ་གཟུགས་སུ་གྲུབ་ན་ནམ་མཁའི་ཁོངས་མི་ཤོང༌། །དེ་ཡི་ཕ་མཐའ་རྒྱལ་ལས་གཞན་གྱི་ཡུལ་མིན་མོད། །དེ་ཉིད་ངེས་པར་དཀོན་མཆོག་གསུམ་ལ་རབ་ཏུ་དད་པས་དབུལ། །ཀུན་ནས་མཉེས་བྱེད་མཐའ་ཡས་ མཆོད་པའི་སྤྲིན་ཚོགས་ཉིད་གྱུར་ཅིག །དགེ་བ་འདི་དང་དགེ་བ་གཞན། །མ་ལུས་གཅིག་ཏུ་བསྡོམས་བྱས་ནས། །ཐོག་མེད་དུས་ནས་མར་གྱུར་པའི། །སེམས་ཅན་ཀུན་ལ་སྦྱིན་པར་བགྱི། །རང་གིས་རང་ཉིད་ངལ་བྱས་པ། །སྡུག་བསྔལ་རྒྱ་ མཚོ་རབ་སྐམས་ཏེ། །གཟོད་ནས་དག་པའི་ཆོས་ཀྱི་དབྱིངས། །ཇི་བཞིན་མངོན་དུ་བྱེད་གྱུར་ཅིག །དེ་ལྟར་མ་རྟོགས་སེམས་ཅན་ལ། །སྙིང་རྗེའི་རྦ་རླབས་ཆེར་གཡོ་བས། །ཀུན་ཀྱང་བླ་ན་མེད་པ་ཡི། །ཐེག་པ་ཆེ་འདིར་འཇུག་གྱུར་ཅིག ། རྒྱལ་དང་རྒྱལ་བའི་སྲས་ཀུན་གྱི། །སྨོན་ལམ་ཀུན་ལ་བདག་འཇུག་སྟེ། །དེ་ཀུན་ཐམས་ཅད་བདག་གིས་སྒྲུབ། །ཀུན་གྱི་ཕྲིན་ལས་གཅིག་པུར་ཤོག །ཤཱཀྱའི་བསྟན་མཆོག་མི་ནུབ་སླར་ཡང་སོས། །གདུལ་བྱའི་རྒྱུད་ལ་རབ་ཏུ་དར་ཞིང་ རྒྱས། །བསྟན་པའི་དབྱེན་མེད་མཐུན་ཞིང་མི་ཕྱེད་པས། །གངས་ཅན་ལྗོངས་འདི་བདེ་ལེགས་ཀྱིས་རྒྱས་ཤོག །གང་ལས་ཡོན་ཏན་ཐམས་ཅད་འབྱུང་བའི་གནས། །དཀོན་མཆོག་ཀུན་གྱི་ངོ་བོར་དབྱེར་མེད་པ། །རིགས་བདག་དཔལ་

Page: 968 ལྡན་བླ་མའི་ཞབས་པད་ལ། །བཀའ་དྲིན་དྲན་པས་རྟག་ཏུ་ཕྱག་འཚལ་ལོ། །བྱང་ཆུབ་སེམས་དཔའི་སྤྱོད་པ་ལ་འཇུག་པའི་གཞུང་དོན་རྣམ་པར་བཤད་པ་ཐེག་པ་ཆེན་པོའི་ཆོས་ཀྱི་རྒྱ་མཚོ་ཟབ་རྒྱས་མཐའ་ཡས་པའི་སྙིང་པོ་ཞེས་བྱ་བ་འདི་ནི་གཞུང་བསྡུས་ དོན་དུ་བཅིངས། ཚིག་དོན་རགས་པར་བཤད། དཀའ་བའི་གནས་བྱེ་བྲག་ཏུ་ཕྱེ། མེད་དུ་མི་རུང་བའི་སྤྱིའི་དོན་རྣམས་ཀྱང་གཏན་ལ་ཕབ། རྒྱ་བོད་ཀྱི་འགྲེལ་པ་མཐའ་དག་གི་ཁྱད་པར་ཐ་དད་པ་བརྗོད། གཙོ་བོར་རྒྱལ་བའི་གསུང་རབ་ཆེན་པོ་རྣམས་དང་ཤིང་རྟའི་སྲོལ་ གཉིས་ཀྱི་བསྟན་བཅོས་ཁོ་ན་དཔང་དུ་བྱས། ཇི་ལྟར་ཉམས་སུ་ལེན་པའི་མན་ངག་གི་ཚུལ་རྒྱུད་ལ་སྦྱོར་བ་ཁོ་ནའི་ཆེད་དུ་རིག་པའི་གནས་དང༌། སྡེ་སྣོད་དང་རྒྱུད་སྡེའི་ཕྱོགས་ཙམ་འཛིན་པ་དུས་ཀྱི་དབང་གིས་ཆོས་སྨྲ་བའི་རེ་མོས་སུ་སོན་ཞིང་གངས་ཅན་གྱི་དབུས་འགྱུར་ཚལ་ ལྷ་ལྡན་གྱི་ལྗོངས་སུ་བྱུང་བ་ཤཱཀྱའི་དགེ་སློང་དུ་ཁས་འཆེ་བ་མི་ཕམ་ཆོས་ཀྱི་རྒྱལ་པོ་དོན་ཐམས་ཅད་ཡོངས་སུ་གྲུབ་པ་མིང་གཞན་གཙུག་ལག་རྒྱ་མཚོའི་ཕྲེང་བ་ཅན་གྱིས་གཞན་ལ་ཕན་པའི་ལྷག་པའི་བསམ་པ་ཁོ་ནས་གངས་ཅན་གྱི་ལྷོའི་ཆ་གྲུབ་པའི་རི་བོ་འཕགས་མའི་ སྐུར་ལྷུན་གྱིས་གྲུབ་པའི་བསམ་གཏན་གྱི་ཁང་བུར་མགོ་བརྩམས་ཏེ། གངས་ཅན་གྱི་ལྗོངས་འདིར་བཀའ་བརྒྱུད་དུ་གྲགས་པ་ཐམས་ཅད་ཀྱི་ཆུ་རྒྱུན་གྱི་འབྱུང་གནས་རི་བོ་གངས་ཅན་ལྟ་བུར་གྱུར་པ། གདན་ས་ཆེན་པོ་དཔལ་གྲོ་བོ་ལུང་སྲས་མཁར་སྤྲུལ་པའི་ཕོ་ བྲང་དུ། རང་ལོ་ང་གསུམ་པ་མེ་འབྲུག་གི་ལོ་སྟེ་སྤྱི་ལོ་ལ་སངས་རྒྱས་མི་འགྱུར་ལྷུན་གྱིས་གྲུབ་པའི་གཙུག་ལག་ཁང་ཆེན་པོ་ལེགས་པར་གྲུབ་པ་དང་ལྷན་ཅིག་པར་ཐ་སྐར་གྱི་ཟླ་བའི་དཀར་ཚེས་བཅུ་གཉིས་ཀྱི་སྔ་དྲོ་ལེགས་པར་གྲུབ་པའོ། །སེམས་ཅན་ཐམས་ཅད་ལ་ཕན་བདེ་ རྒྱ་ཆེན་པོ་འབྱུང་ལ་དར་ཞིང་རྒྱས་པར་གྱུར་ཅིག །

Page: 969 ༄༅། །སྭསྟི། ཕན་བདེ་ཀུན་གྱི་འབྱུང་གནས་ཟླ་མེད་པ། །རྐང་གཉིས་གཙོ་བོ་ཐུབ་དབང་གང་དེ་དང༌། །དེ་ཡི་བསྟན་པ་ལུང་རྟོགས་དམ་པའི་ཆོས། །ཇི་བཞིན་ཐུགས་ལ་བསྐྲུན་མཛད་དགེ་འདུན་སྟེ། །སྐྱབས་གནས་ དཀོན་མཆོག་གསུམ་ལ་ཕྱག་བགྱིའོ། །སྣ་ཚོགས་པདྨ་རི་བོང་འཛིན་པའི་སྟེང༌། །གཞོན་ནུའི་ཚུལ་འཛིན་རིན་ཆེན་རྒྱན་གྱིས་སྤྲས། །ཐུགས་རྗེའི་འོད་ཀྱིས་འགྲོ་བའི་བློ་མུན་རྣམས། །སེལ་མཛད་འཇམ་པའི་མགོན་ལ་ ཕྱག་འཚལ་ལོ། །གང་གི་ཏིང་འཛིན་གཅིག་གི་རྣམ་འཕྲུལ་གྱིས། །འགྲོ་ཀུན་བྱམས་པ་ཆེ་ལ་འགོད་མཛད་ཅིང༌། །རྒྱལ་བའི་རྒྱལ་ཚབ་དམ་པར་འཚོ་གཞེས་པ། །རྒྱལ་སྲས་མ་ཕམ་པ་དེར་ཕྱག་བགྱིའོ། །ཐེག་པ་མཆོག་ གི་ཤིང་རྟའི་སྲོལ་བཟུང་ནས། །བསྟན་པ་ཆེས་ཆེར་གསལ་བར་མཛད་པ་ཡི། །རྒྱལ་བས་ལུང་བསྟན་འགྲོ་བའི་བཤེས་གཅིག་པོ། །འཕགས་མཆོག་ཀླུ་སྒྲུབ་སྙིང་པོ་ལ་ཕྱག་འཚལ། །ཐུབ་དབང་རྣམས་ཀྱི་བསྟན་པ་ དམ་པའི་ཆོས། །ཇི་སྙེད་མཁྱེན་པའི་མངའ་བདག་འདྲེན་མཆོག་གང༌། །ཐར་པའི་ལམ་སྟོན་འགྲོ་རྣམས་སྒྲོལ་མཛད་པ། །ཀུན་མཁྱེན་ཆེན་པོ་ཞི་བའི་ལྷ་ལ་འདུད། །ཆོས་ཀུན་ཇི་བཞིན་གཟིགས་པའི་མཁྱེན་པ་ཅན། ། འགྲོ་བ་བུ་ལྟར་སྐྱོབ་པའི་བརྩེ་བ་ཅན། །ཐར་འདོད་རེ་བ་སྐོང་བའི་ནུས་པ་ཅན། །འགྲོ་བའི་མགོན་པོ་ཞི་བའི་ལྷ་ལ་འདུད། །གྲངས་མེད་བསྐལ་པ་རྒྱ་མཚོའི་སྔོན་རོལ་ནས། །བྱང་ཆུབ་མཆོག་གི་གོ་འཕང་བརྙེས་གྱུར་ཀྱང༌། ། སླར་ཡང་སྙིགས་མའི་འགྲོ་ལ་བརྩེར་དགོངས་ཏེ། །རྒྱལ་སྲས་སེམས་དཔའི་ཚུལ་འཛིན་དེ་ལ་འདུད། །ཆོས་ཀྱི་རྒྱལ་པོ་འགྲོ་བ་ཀུན་གྱི་སྐྱབས་གནས་དཔུང་གཉེན་གཅིག་པུ་པ། །དོན་གཉིས་ཡོངས་སུ་གྲུབ་པས་ཤཱཀྱའི་

Page: 970 རྒྱལ་པོ་ཇི་ལྟ་ཇི་བཞིན་དུ། མཐའ་ཡས་འགྲོ་བའི་ཚོགས་ལ་ཟབ་མོའི་ཆོས་ཀྱི་ཆར་ཆེན་འབེབས་མཁས་པ། བདག་སོགས་འགྲོ་བའི་སྐྱབས་གཅིག་གཙུག་ལག་རྒྱ་མཚོའི་ཕྲེང་བ་འཛིན་དེར་འདུད། །ཆོས་ཀུན་སྒྲིབ་བྲལ་མཁྱེན་པའི་མཁྱེན་པ་ ནམ་མཁའ་ལྟ་བུ་ཡངས། །དམིགས་མེད་འགྲོ་ལ་བརྩེ་བའི་བརྩེ་བ་ཆུ་གཏེར་ལྟ་བུར་རྒྱས། །འགྲོ་ཀུན་སྨིན་གྲོལ་སར་འགོད་ས་བཅུའི་བྱང་ཆུབ་སེམས་དཔའ་ཆེ། །ལྷ་མི་ཀུན་གྱི་བླ་མའི་བླ་མ་རྒྱལ་སྲས་ཐུ་བོ་ཁྱོད་ལ་འདུད། །མཁས་མཆོག་ཁྱོད་ཀྱི་ བསྟན་བཅོས་བསྟན་པའི་ཉིང་ཁུ་ཕྱུང་བ་གང༌། །རིན་ཆེན་བྱང་ཆུབ་སེམས་ཀྱི་འབྱུང་གནས་གཅིག་པུ་ཟླ་མེད་པ། །ཐུབ་བསྟན་ཉིན་མོར་བྱེད་པའི་སྣང་བ་འདི་ལྟ་བྱུང་བ་དང༌། །བཤེས་གཉེན་དམ་པའི་ཚོགས་རྣམས་མཆོག་གི་བདེ་བས་ཚིམ་པར་གྱུར། ། དེས་ན་དུས་གསུམ་རྒྱལ་བ་མ་ལུས་པའི། །རྣམ་འཕྲུལ་ཛམྦུ་གླིང་གི་སྐྱེས་ཆེན་མཆོག །ཞི་བའི་ལྷ་དང་མཁས་མཆོག་བླ་མ་ཡི། །བཞེད་གཞུང་རྒྱས་པར་འགྲེལ་དང་བཅས་པ་འདི། །རྒྱལ་བསྟན་མི་ནུབ་སླར་ཡང་འཕེལ་བ་དང༌། །རྒྱལ་སྲས་ སེམས་དཔའི་པད་ཚལ་རྒྱས་ཕྱིར་དང༌། །རྒྱས་འགྲེལ་འདི་ཡང་མང་དུ་སྤེལ་བྱའི་ཕྱིར། །རྒྱལ་བའི་ཐུགས་རྗེ་བྱིན་རླབས་ལ་བརྟེན་ནས། །མི་ཟད་ཡི་གེའི་གཟུགས་སུ་བགྱིས་པ་ཡིན། །གང་འདི་ཉེས་པའི་དྲི་མས་རྣམ་དབེན་ཡང༌། ། ཡི་གེའི་ལམ་ལས་དྲངས་པར་གྱུར་པའི་ཕྱིར། །དེ་ཡི་ཆད་ལྷག་ནོར་འཁྲུལ་སེལ་བ་སོགས། །རྗེ་བཙུན་དམ་པའི་སྤྱན་རས་ཀྱིས་བཙས་ཤིང༌། །བདག་གིས་ཕྱག་གཡོག་དོ་དམ་བགྱིས་པ་ལགས། །སྨོན་པ་རྣམ་པར་དག་པས་གཞི་བཟུང་སྟེ། །འཇུག་ པ་མཆོག་གིས་གནས་འདིར་འབད་པ་ལ། །ཐོག་མར་རྗེ་བཙུན་དམ་པས་བྱིན་གྱིས་བརླབས། །ཡི་དམ་ཆོས་སྐྱོངས་ཚོགས་ཀྱིས་བར་ཆད་བསལ། །དེ་ཡི་འབྲས་བུ་དེང་འདིར་མངོན་དུ་གྱུར། །ཁྱད་པར་མཚུངས་མེད་བླ་མའི་ཐུགས་ཀྱི་སྲས་མཆོག་

Page: 971 ༄༅། །སྤྱན་སྔ་བ། །འཇམ་དཔལ་དབྱངས་དང་དབྱེར་མེད་མཁྱེན་པའི་རྒྱ་མཚོ་ཟབ་པ་ཅན། །བདག་སོགས་རྣམས་ཀྱི་བཤེས་གཉེན་གང་དེས་དུས་རྣམས་ཐམས་ཅད་དུ། །བཀའ་དྲིན་ཆེས་ཆེར་བསྩལ་བའི་མཐུ་ལས་དེང་འདིར་ཚར་ཕྱིན་ཏོ། ། ཚོགས་གཉིས་ལྷུན་པོའི་དཔལ་གྱིས་མངོན་མཐོ་ཞིང༌། །དགེ་ལེགས་བྱེ་བའི་སྤྲིན་གྱིས་རབ་སྟུག་པ། །ལྷོ་རྒྱུད་བྱ་ཡུལ་དཔོན་ས་སྐུ་མཆེད་ཀྱིས། །རིག་བྱེད་མཁན་གྱི་རྫོང་བཀོད་ཐམས་ཅད་གནང༌། །གང་གི་མཁྱེན་པས་རྗེ་བཙུན་དམ་པ་ཡི། །ཐུགས་ཀྱི་ པདྨ་འཛུམ་པར་བྱེད་པ་པོ། །ཆོས་ཀྱི་སྤྱན་ལྡན་བྱམས་པ་དོན་གྲུབ་པ། །སྐུ་མཆེད་གཉིས་ཀྱིས་བཟོ་བོའི་དོ་དམ་སོགས། །འདི་ཡི་ཕྱོགས་སུ་མཛད་བཟང་གྲངས་ལས་འདས། །མདོར་ན་བསྟན་པའི་སྦྱིན་བདག་རྒྱལ་མཁར་ནས། །བྱང་ཆུབ་ སེམས་མ་བསོད་ནམས་རྒྱལ་མོ་ནི། །སྲས་བཅས་རྣམས་ཀྱིས་ཐུགས་བསམ་དག་པ་ཡིས། །འདི་ཉིད་པར་དུ་སྒྲུབ་པའི་སྦྱིན་བདག་མཛད། །ཡིག་རིས་ཟློས་གར་བསྒྱུར་བར་བྱེད་པ་པོ། །རྒྱལ་བའི་སྲས་ཀྱི་སྤྱོད་ཚུལ་ལ་གནས་པ། །གངས་ཅན་གཡོ་ རུའི་རྒྱུད་དུ་བྱུང་བ་ཡི། །ཚེ་དབང་བརྟན་པ་ཞེས་བྱ་གང་དེའོ། །བརྐོས་ཀྱི་རིག་བྱེད་རྒྱ་མཚོའི་མཐར་སོན་པ། །ཚེ་བཀྲས་དར་པོ་ལ་སོགས་མཁས་པ་ཆེ། །བཅུ་ཕྲག་གཅིག་གིས་དབྱར་ལོ་བཞི་ཡི་བར། །ཐུགས་བསམས་རྣམ་པར་དག་པས་པར་དུ་ བསྒྲུབས། །གནས་འདིར་ལག་བདེ་པ་ཡི་ཚོགས་རྣམས་ཀྱིས། །ལུས་སེམས་ངལ་བར་གྱུར་ཀྱང་བཟོད་བྱས་ཏེ། །ཐམས་ཅད་ཆོས་དང་མཐུན་པར་མཛད་བྱུང་བ། །གང་དེ་དོན་ཅན་ཡིན་ནོ་ཤེས་ལྡན་དག །འདིར་འབད་དགེ་བ་མཁའ་ལྟར་མཐའ་ཡས་དེས། །

Page: 972 མཉམ་མེད་ཤཱཀྱའི་རྒྱལ་པོའི་བསྟན་པ་མཆོག །ལུང་དང་རྟོགས་པའི་བདག་ཉིད་ཅན་འདི་ཉིད། །ཇི་སྲིད་བསྐལ་པའི་བར་དུ་གནས་གྱུར་ཅིག །དེ་ཉིད་འཛིན་དང་སྐྱོང་བར་བྱེད་པ་ཡི། །སྐྱེས་ཆེན་དམ་པ་ཇི་སྙེད་ཐམས་ཅད་དང༌། །ཁྱད་པར་རྗེ་བཙུན་དཔལ་ལྡན་བླ་མ་ཡི། །ཞབས་ པད་འགྲོ་བའི་གཙུག་ཏུ་བརྟན་པར་ཤོག །བསླབ་གསུམ་རྣམ་པར་དག་པས་ལེགས་སྤྲས་ཤིང༌། །རིག་གྲོལ་གཉིས་དང་ལྡན་པའི་དགེ་འདུན་གྱིས། །སྟོང་གསུམ་མི་མཇེད་འཇིག་རྟེན་ཁམས་འདི་ནི། །ཐམས་ཅད་གང་ཞིང་བསྟན་པ་འཕེལ་ བར་ཤོག །བདག་གི་ཕ་མས་གཙོས་པའི་སེམས་ཅན་རྣམས། །བསོད་ནམས་ཡེ་ཤེས་ཚོགས་གཉིས་མཐར་ཕྱིན་ཏེ། །རྒྱལ་བའི་གོ་འཕང་མྱུར་དུ་འཐོབ་པ་དང༌། །འགྲོ་ཀུན་སྒྲོལ་བའི་མཐུ་དང་ལྡན་པར་ཤོག །བདག་སོགས་འཁོར་བའི་སེམས་ཅན་ཐམས་ ཅད་ཀྱང༌། །རྨི་ལམ་ཙམ་གྱི་ཚེ་འདིའི་སྣང་བ་ལ། །ཞེན་ཞིང་ཆགས་ནས་ཉེས་ལྟུང་མི་གསོག་པར། །ཅི་བྱེད་དམ་པའི་ལམ་དུ་འགྲོ་བར་ཤོག །ཕ་མའི་རང་བཞིན་འགྲོ་བའི་དོན་གྱི་ཕྱིར། །བྱང་ཆུབ་བླ་མེད་སྒྲུབ་པ་མ་གཏོགས་པ། །རང་ཉིད་ཞི་བདེ་དོན་དུ་གཉེར་བའི་བློ། །རྨི་ལམ་དུ་ཡང་འབྱུང་ བར་མ་གྱུར་ཅིག །སྐྱེ་བ་འདི་ནས་ཚེ་རབས་ཐམས་ཅད་དུ། །གང་ནས་གང་དུ་སྐྱེ་བར་འགྱུར་ན་ཡང༌། །དལ་འབྱོར་གཉིས་ལྡན་རྟེན་མཆོག་འཐོབ་པ་དང༌། །རྗེ་བཙུན་དམ་པ་ཁྱེད་ཀྱིས་རྗེས་འཛིན་ཤོག །ཁྱོད་ཞལ་མངོན་སུམ་ལྟ་བའི་སྐལ་ལྡན་ཞིང༌། །ཁྱོད་གསུང་ཉན་པའི་གདུལ་བྱར་གྱུར་ལགས་ མོད། །འདི་དུས་ཚེ་འདིའི་སྣང་བས་མི་སླུ་བར། །དམ་ཆོས་གཤའ་མ་སྙིང་ནས་ནུས་པར་ཤོག །སངས་རྒྱས་ཀུན་གྱི་ངོ་བོ་བླ་མ་ལ། །བཟོད་གླགས་མེད་པའི་དད་པ་བརྟན་པ་དང༌། །དེ་ཉིད་དང་ནས་རང་སེམས་ཆོས་ཀྱི་སྐུ། །མངོན་སུམ་རང་ཞལ་རང་གིས་མཇལ་བར་ཤོག །གྲོང་ ཡུལ་ལ་སོགས་ཆགས་སྡང་འབྱུང་གནས་བོར། །གོང་མའི་བཞུགས་གནས་དབེན་པའི་རི་ཁྲོད་དུ། །མི་དགེའི་བཤེས་གཉེན་དེ་དག་མི་འབྱུང་ཞིང༌། །བསམ་གཏན་ཏིང་འཛིན་གོང་དུ་སྤེལ་བར་ཤོག །རྙེད་པས་བསྒྲུབས་པའི་རྙེད་པའི་ཚོགས་རྣམས་དང༌། །ལོག་པའི་

Page: 973 ༄༅། །འཚོ་བ་ཐམས་ཅད་ཡོངས་སྤངས་ཏེ། །ཆོག་ཤེས་ནོར་བུའི་དཀོར་མཛོད་ལ་བརྟེན་ནས། །བྱང་ཆུབ་སྒྲུབ་ལ་བར་ཆད་མེད་པར་ཤོག །རིགས་དྲུག་སེམས་ཅན་ཕ་མའི་འཁོར་ལོ་ལ། །ཆགས་སྡང་ཉེ་རིང་ལ་སོགས་མི་བྱེད་པར། །མཉམ་ ཉིད་བྱང་ཆུབ་སེམས་མཆོག་སྐྱེ་བ་དང༌། །ཀུན་བཟང་སྨོན་ལམ་ཐམས་ཅད་འགྲུབ་པར་ཤོག །བདག་ལ་གནོད་ཅིང་སྡང་བར་བྱེད་པ་རྣམས། །ཞེ་སྡང་དྲག་པོས་བསྐུལ་བས་དབང་མེད་ཅིང༌། །རང་ལ་བཟོད་པའི་བཤེས་གཉེན་ཡིན་པས་ན། ། དེ་ལ་ལྷག་པར་བརྩེ་བ་འཕེལ་བར་ཤོག །བདག་ལ་བྱམས་ཤིང་ངེས་པར་བྱེད་རྣམས་ཀྱང༌། །རྣམ་དཀར་ལས་ཀྱི་འབྲེལ་པ་ཟབ་པས་ན། །དེ་དག་རྒྱུ་དེ་ཉིད་ལ་བརྟེན་ནས་སུ། །བླ་མེད་བྱང་ཆུབ་མྱུར་དུ་འཐོབ་པར་ཤོག །མདོར་ན་བདག་གཞན་ སེམས་ཅན་ཐམས་ཅད་ཀུན། །ཆོས་ཀྱི་རྩ་བ་རྒྱུ་འབྲས་སྲོག་བཞིན་སྲུང༌། །དེ་ཡི་ངང་ནས་ས་ལམ་རིམ་རྫོགས་ཏེ། །དལ་འབྱོར་དོན་ལྡན་ཉིད་དུ་འགྱུར་བར་ཤོག །དེ་ལྟའི་དགེ་བ་མ་ལུས་གཅིག་བསྡོམས་པའི། ། མཐུ་ནུས་བྱིན་གྱིས་བརླབས་ཀྱི་བྱེད་པའི་མཐུས། །ས་སྐྱོང་བསྟན་འཛིན་རྒྱལ་པོ་གང་དེ་ཡི། །ཐུགས་དགོངས་ཐམས་ཅད་དེང་འདིར་རྫོགས་གྱུར་ཅིག །དེ་ཡི་ཐུགས་རྒྱུད་དག་པའི་དབྱིངས་དེ་ལ། །ཉེས་ལྟུང་སོགས་ཀྱི་གོས་པར་མི་ འགྱུར་ཡང༌། །གློ་བུར་དྲི་མས་གལ་ཏེ་བསྒྲིབས་སྲིད་ན། །བདག་གི་དགེ་བའི་རྩ་བ་འདི་ཡི་མཐུས། །མུན་པའི་ཀློང་དུ་ཉི་མ་ཤར་བ་ལྟར། །སྐད་ཅིག་ཙམ་གྱིས་བྱང་ཞིང་དག་གྱུར་ཅིག །ཚོགས་གཉིས་རྫོགས་ཤིང་སྒྲིབ་པ་ཀུན་བྱང་སྟེ། །རྒྱལ་སྲས་

Page: 974 སྤྱོད་པ་དཔག་ཏུ་མེད་པ་ཡིས། །ཕ་རོལ་ཕྱིན་པ་ཐམས་ཅད་རབ་བགྲོད་དེ། །མྱུར་དུ་བྱང་ཆུབ་མཆོག་ལ་རེག་གྱུར་ཅིག །མདོར་ན་འདིར་འབད་དགེ་བ་མཐའ་ཡས་མོད། །དེ་ཀུན་བདག་འབྲས་བསྔོ་ཚུལ་མི་ཤེས་པས། །དུས་གསུམ་རྒྱལ་བས་ ཇི་ལྟར་བསྔོས་པ་བཞིན། །བདག་ཀྱང་དེ་ལྟར་ཡོངས་སུ་བསྔོ་བར་བགྱི། །གནས་སྐབས་ཕྱོགས་བཅུའི་འཇིག་རྟེན་ཁམས་ཀུན་དུ། །ཆར་ཆུ་དུས་འབབ་ལོ་ཕྱུགས་རྟག་ཏུ་ལེགས། །ནད་མཚོན་མུ་གེའི་ཚོགས་རྣམས་ཀུན་ཞི་ནས། ། རྫོགས་ལྡན་བཞིན་དུ་འཇིག་རྟེན་དར་བར་ཤོག །དཀོན་མཆོག་རྒྱ་མཚོ་ཀུན་གྱི་བྱིན་རླབས་དང༌། །བདག་གི་ལྷག་བསམ་དག་པའི་དགེ་བའི་མཐུས། །འཇིག་རྟེན་འཇིག་རྟེན་འདས་པའི་བཀྲ་ཤིས་ཀུན། །དེང་འདིར་ཐོགས་པ་མེད་ པར་འབྱུང་གྱུར་ཅིག །སྦྱིན་བདག་རྣམས་ཀྱི་འགལ་རྐྱེན་ཀུན་ཞི་ཞིང༌། །མཐུན་རྐྱེན་ཐམས་ཅད་ཆོས་དང་མི་འགལ་བར། །ཡར་ངོ་འི་ཟླ་ལྟར་འཕེལ་ཞིང་རྒྱས་པ་དང༌། །བཀྲ་ཤིས་བདེ་ལེགས་ཕུན་སུམ་ཚོགས་པར་ཤོག ། ཉིན་མོ་བདེ་ལེགས་མཚན་བདེ་ལེགས། །ཉི་མའི་གུང་ལ་བདེ་ལེགས་ཤིང༌། །ཉིན་མཚན་རྟག་ཏུ་བདེ་ལེགས་པ། །དཀོན་མཆོག་གསུམ་གྱི་བཀྲ་ཤིས་ཤོག །བྱང་ཆུབ་སེམས་དཔའི་སྤྱོད་པ་ལ་འཇུག་པའི་བསྟན་བཅོས་ ཀྱི་རྣམ་པར་བཤད་པ་ཟབ་རྒྱས་མཐའ་ཡས་པའི་སྙིང་པོ་ཕྱུང་བ་ཞེས་བྱ་བ། རྗེ་བཙུན་དཔལ་ལྡན་བླ་མ་དམ་པའི་ཞལ་སྔ་ནས་བསྩལ་བ་འདི་ཉིད་བདག་ཤཱཀྱའི་དགེ་སློང་ཆོས་རྒྱལ་བསྟན་པ་རབ་རྒྱས་ཀྱིས་དོ་དམ་ཆེད་གཉེར་དུ་བགྱིས་ཏེ་བསྟན་པ་དང་

Page: 975 ༄༅། །སེམས་ཅན་ལ་ཕན་པ་རྒྱ་ཆེན་པོ་འབྱུང་བའི་སླད་དུ་འཕགས་པའི་ཡུལ་ན་དོན་གྲུབ་ཅེས་བྱ་བ་ཉི་འོག་པའི་རྩིས་ལུགས་ལས་ས་མོ་ལུག་གི་ལོར་གྲགས་པ་དེའི་དབྱར་ལོ་ནས་པར་གྱི་དབུ་བརྩམས་སྟེ་རྔ་ཆེན་ཞེས་གྲགས་པ་ཆུ་ཕོ་ཁྱི་ལོའི་དབྱར་ ནང་དུ་བཀའ་བརྒྱུད་ཀྱི་ཆུ་བོ་ཇི་སྙེད་པའི་འབྱུང་གནས་རྗེ་བཙུན་མར་པ་ཉིད་ཀྱི་གདན་ས་ཆེན་པོ་ལྷོ་གནས་མཆོག་དཔལ་གྱི་གྲོ་བོ་ལུང་སྲས་མཁར་སྤྲུལ་པའི་ཕོ་བྲང་སངས་རྒྱས་མི་འགྱུར་ལྷུན་གྱིས་གྲུབ་པའི་གཙུག་ལག་ཁང་དཔལ་ཀརྨ་རིག་འཛིན་གྲུབ་མཆོག་སྡེར་ པར་དུ་གྲུབ་པར་བགྱིས་པའོ། །བཀྲ་ཤིས་དཔལ་འབར་འཛམ་གླིང་རྒྱན་དུ་ཤོག །ན་མོ་བུདྡྷཱ་ཡ། ན་མོ་དྷརྨཱ་ཡ། ན་མཿསངྒཱ་ཡ། ཨོཾ་ཡེ་དྷརྨཱ་ཧེཏུ་པྲ་བྷཝཱ་ཧེ་ཏུནྟེ་ཥཱནྟ་ཐཱ་ག་ཏོ་ཧྱ་བ་དཏྲ། ཏེ་ཥཱཉྩ་ཡོ་ནི་རོ་དྷ་ཨེ་ཝཾ་བཱདཱི་མཧཱ་ཤྲ མ་ཎ་ཡེ་སྭཱཧཱ། །མཾག་ལཾབྷ་ཝནྟུ། །

སྤྱོད་འཇུག་རྣམ་བཤད་ཐེག་ཆེན་ཆོས་ཀྱི་རྒྱ་མཚོ། གསུམ་པ། ->