སྤྱོད་འཇུག་རྣམ་བཤད་ཐེག་ཆེན་ཆོས་ཀྱི་རྒྱ་མཚོ། སྟོད་ཆ།
Page: 1 ༄༅། །བྱང་ཆུབ་སེམས་དཔའི་སྤྱོད་པ་ལ་འཇུག་པའི་རྣམ་པར་བཤད་པ་ཐེག་ཆེན་ཆོས་ཀྱི་རྒྱ་མཚོ་ཟབ་རྒྱས་མཐའ་ཡས་པའི་སྙིང་པོ་ཞེས་བྱ་བ་བཞུགས་སོ། །
Page: 2 ༄༅༅། །བྱང་ཆུབ་སེམས་དཔའི་སྤྱོད་པ་ལ་འཇུག་པའི་རྣམ་པར་བཤད་པ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། ། ཕན་བདེ་ཀུན་གྱི་གཞིར་གྱུར་རྫོགས་སངས་རྒྱས། །དེའི་རྒྱུ་གཅིག་པོ་རིན་ཆེན་བྱང་ཆུབ་སེམས། །གང་ཐུགས་ལ་གནས་ཀུན་ལའང་ཕྱག་བྱས་ཏེ། །བདག་ཀྱང་བྱང་ཆུབ་ སྤྱོད་ལ་འཇུག་པར་བྱ། །ཐེག་པ་ཆེན་པོའི་བསྟན་བཅོས་ནམ་མཁའི་ཚད་ཀྱིས་གཞལ་དུ་མེད་པའི་ནང་ནས་འཕགས་པའི་ཡུལ་ན་ཉི་ཟླ་ལྟར་གྲགས་ཅིང་མཁས་མཆོག་ བརྒྱ་རྩ་བརྒྱད་ཀྱིས་བཀྲལ་བ་བྱང་ཆུབ་སེམས་དཔའི་སྤྱོད་པ་ལ་འཇུག་པ་ལེའུ་བཅུ་དང་ཤློ་ཀ་སྟོང་གི་བདག་ཉིད་ཅན་འདི་ནི་གང་བཤད་པར་བྱ་བའི་ཆོས་སོ། །ཅི་འདི་མཛད་ པ་པོ་སུ་ཞེ་ན། དེ་ནི་སློབ་དཔོན་ཆེན་པོ་ཞི་བའི་ལྷ་ཞེས་བྱ་སྟེ། དེ་ནི་སློབ་དཔོན་ཀྲིཥྞ་པས། ས་སྟེང་འཇམ་དབྱངས་གཉིས་པ་ཞེས་པར་མཁས་རྣམས་བསྟོད་པ། ཞེས་དང༌།
Page: 3 ༄༅༅། །བི་བྷུ་ཏིས། རྒྱལ་བའི་བསྟན་ལ་བདག་ཉིད་ཆེ། །སྐྱེས་བུ་མང་པོ་བྱོན་མོད་ཀྱི། །ཞི་བའི་ལྷས་མཛད་དང་འདྲ་བའི། །ཉམས་དང་དགོངས་པ་གཞན་མི་རྙེད། །ཅེས་དང༌། ཤེར་འབྱུང་གི་འགྲེལ་པར། འདིར་འཕགས་པ་ཞི་བའི་ལྷ་དེ་གསུང་རབ་མཐའ་དག་གི་དོན་གྱི་དེ་ཁོ་ན་ཉིད་རྟོགས་ཅིང་ཏིང་ངེ་འཛིན་གྱི་ཆེ་བའི་བདག་ཉིད་བརྙེས་པ། ཞེས་སོགས་དང༌། སྟན་བཅོས་ རྩོམ་ཞིང་མཁའ་ལ་གཤེགས། །བྱང་སེམས་བསླབ་པ་མཐར་ཕྱིན་པ། །ཤཱནྟ་དེ་ཝ། ཞེས་རྡོ་རྗེ་གདན་པ་ཆེན་པོའི་གྲུབ་ཐོབ་ཀྱི་འདུ་བར་བསྔགས་པ་དེའོ། །དེའི་ཡོན་ཏན་མདོར་བསྡུས་ཏེ་རང་ གིས་ཆེད་དུ་དད་པའི་ངོར་བསྔགས་པ་ནི། བཅོམ་ལྡན་འཇམ་དཔལ་རྡོ་རྗེས་བྱིན་གྱིས་བརླབས། །རྡོ་རྗེའི་རྣལ་འབྱོར་མ་ཡིས་རྗེས་སུ་བཟུང༌། །ཆོས་ཀྱི་ཕུང་པོ་བརྒྱད་ཁྲི་བཞི་སྟོང་ཀུན། ། མངོན་གྱུར་གཟིགས་པ་ཞི་བའི་ལྷ་ལ་འདུད། །ཙནྡན་ཤིང་གི་རལ་གྲིའི་འོད་ཟེར་གྱིས། །རྒྱལ་པོ་འཁོར་དང་བཅས་པའི་དྲེགས་པ་བཏུལ། །གདུལ་བྱའི་ཚོགས་རྣམས་ཡང་དག་ལམ་ལ་ བཀོད། །ཡེ་ཤེས་གཟིགས་པ་ཐོགས་མེད་མངའ་དེར་འདུད། །རྩེ་གཅིག་ནང་དུ་ཡང་དག་བཞག་པ་ཡིས། །བརྒྱད་ཁྲི་བཞི་སྟོང་ཏིང་འཛིན་སྒོ་ལ་འཇུག །ཤིན་ཏུ་སྤྲོས་མེད་སྤྱོད་མཆོག་བྷུ་
Page: 4 སུ་ཀུས། །ལམ་མཆོག་བདེ་བླག་རྫོགས་ལ་ཕྱག་འཚལ་ལོ། །མཁས་པའི་པཎ་ཆེན་ཁྲི་ཕྲག་བརྒྱ་སྟོང་བཅས། །སྐྱེ་བོའི་འཁོར་ཚོགས་རྒྱ་མཚོ་ཟིལ་མནན་སྟེ། །སྔོན་མེད་བྱང་ཆུབ་སྤྱོད་གཞུང་བཀའ་བསྩལ་ཚེ། །བློ་གྲོས་མི་ཟད་གཏེར་ཞེས་བསྔགས་དེར་འདུད། ། དངོས་དང་དངོས་མེད་ཤེས་མདུན་མི་གནས་ཅེས། །གསུང་ཚེ་ནམ་མཁའི་དབྱིངས་སུ་འཕགས་ནས་ནི། །འཇམ་པའི་དབྱངས་བཅས་སྲབ་མོའི་སྤྲིན་བཞིན་ཡལ། །གསུང་གིས་དམ་ཆོས་རྫོགས་པར་བསྟན་དེར་འདུད། །མི་བརྗེད་གཟུངས་ཐོབ་པཎྜི་ཏ་རྣམས་ ཀྱིས། །བྱང་ཆུབ་སྤྱོད་པར་འཇུག་པའི་གཞུང་ཚོགས་བསྡུས། །རང་གི་བསྟན་བཅོས་རྣམ་པ་གཉིས་དང་བཅས། །ལུང་བསྟན་རྗེས་གནང་མཛད་ལ་ཕྱག་འཚལ་ལོ། །ཤཾ་ཀར་གྲུབ་པའི་མུ་སྟེགས་རྣལ་འབྱོར་པས། །མཁའ་ལ་རྡུལ་ཚོན་དཀྱིལ་འཁོར་ བྲིས་པའི་ཚེ། །ཟད་པར་ཡེ་ཤེས་རླུང་གི་ཏིང་འཛིན་གྱིས། །རྣམ་པར་གཏོར་ཏེ་ལྷག་མེད་མཛད་ལ་འདུད། །ཕྱིན་ཆད་མུ་སྟེགས་ཕམ་པའི་ཡུལ་ཞེས་གྲགས། །སངས་རྒྱས་བསྟན་པའི་རྒྱལ་མཚན་རབ་ཏུ་བཙུགས། །ཡང་དག་ལམ་གྱི་སྣང་བ་རྒྱས་ མཛད་པ། །བདུད་ཀྱི་ཕྱོགས་ལས་རྣམ་པར་རྒྱལ་དེར་འདུད། །བསོད་སྙོམས་ལྷུང་བཟེད་གང་གི་འབྲས་ཆན་ཡང༌། །རྒྱ་ཆེན་མོས་པའི་སྟོབས་ཀྱིས་བྱིན་བརླབས་ཏེ། །སློང་དང་ཡ་མཚན་ཅན་རྣམས་ཚིམ་མཛད་ནས། །ཕྱིན་ཅི་མ་ལོག་ལམ་ལ་བཀོད་ དེར་འདུད། །གདོལ་པ་མོ་དང་ཆང་ཚོང་ཐ་ག་པ། །བྲམ་ཟེ་རྔོན་པ་ཞིང་པ་སོགས་རྗེས་བཟུང༌། །ཕྱག་རྒྱ་ཆེན་པོ་མཆོག་གི་ལམ་ལ་བཀོད། །གྲུབ་མཆོག་ཀུན་གྱི་བླ་མར་གྱུར་དེར་འདུད། །འཕགས་པའི་ཡུལ་དུ་མཁས་དང་གྲུབ་པའི་ཚོགས། །ནམ་མཁའི་ སྐར་ཚོགས་ལས་འདས་བྱོན་མོད་ཀྱང༌། །ཀུན་གྱི་དབུས་ན་ཉི་མའི་དཀྱིལ་འཁོར་ལྟར། །རྩོད་པ་མེད་པར་གྲགས་ལ་ཕྱག་འཚལ་ལོ། །རྒྱ་མཚོ་ལྟ་བུའི་བསྟན་བཅོས་བགྲང་ཡས་ཀྱང༌། །ཐར་འདོད་བྱང་ཆེན་ལམ་དུ་གཞུག་པ་ལ། །བདུད་རྩིའི་ཉིང་ཁུ་
Page: 5 ༄༅། །སྟེར་བྱེད་ཁྱོད་ལས་སུ། །དེ་ཕྱིར་སྟོན་པ་གཉིས་པ་ཁྱོད་ལ་འདུད། །ཁྱོད་སྐུ་མངོན་སུམ་ལྟ་བའི་སྐལ་མེད་ཀྱང༌། །ཁྱོད་གསུང་འཛིན་པའི་གདུལ་བྱར་གྱུར་པའི་ཕྱིར། །བརྩེ་བ་ཆེན་པོས་ཐུགས་རྗེས་ཟུང་མཛོད་ལ། །ཇི་ལྟར་གཟིགས་པའི་ཡེ་ ཤེས་བདག་ལ་སྩོལ། །ཞེས་བྱའོ། །
སྤྱི་བཤད་ལས། རྩོམ་པ་པོ་བཤད་པ།
[edit]དེའི་བྱོན་ཚུལ་ལ་རྒྱ་གར་བ་སྤྱི་ལ་གྲགས་པ་ནི། བི་བྷུ་ཏིའི་འགྲེལ་པར། ལྷོའི་ཕྱོགས་ནཱ་ག་རར་མིའི་བདག་པོ་འཇམ་དཔལ་གོ་ཆའི་བཙུན་མོ་ཆེན་མོ་རྡོ་རྗེ་རྣལ་འབྱོར་མའི་ངོ་བོའི་སྲས་སུ་འཁྲུངས་ཏེ་འཇིག་རྟེན་གྱི་ཡོན་ཏན་ཐམས་ཅད་ རྫོགས་པ་ན་རྒྱལ་ཚབ་ཏུ་དབང་བསྐུར་ཁའི་ཚེ་ཡུམ་དེས་ཆུ་ཤིན་ཏུ་ཚ་བས་ཁྲུས་བྱས་ཏེ་དེའི་ཚ་རེག་མ་བཟོད་པ་ན་ཡུམ་ན་རེ་སྙིགས་དུས་ཀྱི་རྒྱལ་པོ་བྱས་ན་སེམས་ཅན་ལ་གནོད་པ་ཆེར་བྱས་ནས་དམྱལ་བར་འདི་བས་ཆེས་ཚ་བའི་སྡུག་སྔལ་མྱོང་དགོས་ཀྱིས་རྒྱལ་སྲིད་ སྤོངས་ལ་བྷཾ་ག་ལར་སོང་དང་འཇམ་པའི་དབྱངས་ཀྱིས་བྱིན་གྱིས་རློབ་བོ་ཅེས་གསུང་པ་ན་བཀའ་སྤྱི་བོར་བླངས་ཏེ་རྟ་མཆོག་ལྗང་གུ་ལ་ཞོན་ནས་ཞག་དུ་མར་ཡིད་ལ་བྱེད་པ་གཞན་མེད་པར་ཕྱིན་པ་ན་བྷཾ་ག་ལའི་ནགས་ཚལ་གྱི་ཐ་མར་བུ་མོ་རིན་པོ་ཆེ་ཞིག་གིས་རྟ་བཟུང་ནས་ བབས་ཏེ་ངལ་སོས། དུག་གི་ཆུ་འཐུང་བ་ལྡོག་སྟེ་བདུད་རྩིའི་ཆུས་ངོམས་པར་བྱས། ཤ་བསྲེགས་པ་བྱིན་སྟེ་བཀྲེས་པ་ལས་བསྐྱབས། ཁོ་མོའི་བླ་མ་འཇམ་པའི་རྡོ་རྗེ་གྲུབ་པ་ནགས་ཚལ་འདིའི་དབུས་ན་བཞུགས་སོ་ཞེས་པས་དབུགས་ཕྱུང་སྟེ་དེར་སོང་ ནས་གསོལ་བ་བཏབ་པས་སྨིན་གྲོལ་གྱི་རིམ་པས་རྗེས་སུ་བཟུང་སྟེ་ལོ་བཅུ་གཉིས་སུ་བསྟེན་པས་འཇམ་པའི་དབྱངས་མངོན་སུམ་དུ་མཛད་སྟེ་བླ་མས་ཡུལ་དབུས་སུ་སོང་ཞིག་པར་བཀས་གནང་སྟེ་ཙནྡན་གྱི་རལ་གྲི་ཞིག་རྟེན་དུ་བཟུང་སྟེ་མཱ་ག་དྷའི་རྒྱལ་ པོའི་བློན་པོ་མི་གཡོ་བའི་སྡེ་ཞེས་པའི་མིང་བཟུང་ནས་ཆོས་ཡིད་ལ་བྱེད་ཅིང་བཞུགས་པ་ན་ཅི་ཞིག་ན་རྟ་པ་གཞན་རྣམས་ཀྱིས་དེའི་ཕུན་ཚོགས་མ་བཟོད་ནས་རྒྱལ་པོ་ལ་འདི་ནི་ཤིང་གི་རལ་གྲིས་ཁྱེད་བསྟེན་པར་བྱེད་ཏོ་ཅེས་ཡང་ཡང་སྨྲས་པ་ན་རྒྱལ་པོས་རྟ་
Page: 6 པ་ཐམས་ཅད་ཀྱི་རལ་གྲི་ལྟའོ་ཞེས་འགའ་ཞིག་རིམ་པར་བལྟས་ནས་སློབ་དཔོན་ལ་བསྒོ་བ་ན་བདག་གི་རལ་གྲི་ནི་ཁྱེད་ཀྱིས་ལྟ་བར་མི་ནུས་སོ་ཞེས་བཀག་ཀྱང་མ་ཟློས་པ་ན་འོ་ན་དབེན་པར་སྤྱན་ཡ་གཅིག་ཁོབ་ལ་ཡ་གཅིག་གིས་གཟིགས་ཅིག་དེ་ལྟར་བྱས་པ་ན་རལ་གྲི་ཅུང་ ཟད་ཕྱུང་བ་ཙམ་གྱི་འོད་ཟེར་གྱིས་སྤྱན་མ་བཀབ་པ་ས་ལ་ལྷུང་བ་ན་རལ་གྲི་སླར་བཅུག་མིག་འབྲས་སྔར་ཤུལ་དུ་བཟློག་སྟེ་ཟུག་རྔུ་མེད་པར་བྱས་ནས་སྐད་ཅིག་གིས་མི་སྣང་བར་ནཱ་ལེནྡཱར་གཤེགས་ཏེ་མི་གཡོ་བའི་སྡེར་རབ་ཏུ་བྱུང་ནས་ཞི་བའི་ལྷར་ བཏགས་སོ། །དེར་རྟག་དུ་འོད་གསལ་ལ་གནས་པས་བུ་སུ་ཀུར་གྲགས་ཏེ་མ་རུངས་པ་འགའ་ཞིག་གིས་བསྐྲད་པའི་ཕྱིར་ཆོ་འཕྲུལ་གྱི་དུས་སུ་ཆོས་འདོན་པ་ལོ་ལོ་བཞིན་ཡོད་པའི་ཆོས་སྟོན་པ་པོར་བསྐོས་པ་ན་བདག་གིས་མི་ཤེས་ཅེས་སྨྲས་ཀྱང་མ་བཟློགས་ནས་ ཕྱི་རོལ་དབང་ལྡན་གྱི་མཚམས་སུ་གོ་སྐབས་ཡངས་པར་སེང་ཁྲི་དང་མཆོད་པ་ཆེན་པོ་བཤམས། སྐྱེ་བོ་བསྡུས་ནས་སྤྱན་དྲངས་པ་ན་བདག་གི་གཞུང་གསུམ་ལས་སྤྱོད་འཇུག་གདོན་པར་འོས་སོ་ཞེས་དགོངས་ནས་སྔར་དྲང་སྲོང་གིས་གསུངས་པའམ་དེའི་རྗེས་ལ་ བྱུང་བའམ་གང་གདོན་ཞེས་དྲིས་པ་ན་ངོ་མཚར་སྐྱེས་ཏེ་གཞན་པ་འདོན་པར་ཞུས་པས་དེས་ཀྱང༌། གང་ཚེ་དངོས་དང་དངོས་མེད་དག །ཞེས་སོགས་ཀྱི་བར་དུ་སྤྱོད་འཇུག་བཏོན་སྟེ། དེའི་ཚེ་མཐོང་ལམ་ཡང་མངོན་དུ་གྱུར། འཕགས་པ་འཇམ་དཔལ་ཡང་སྟེང་ གི་ནམ་མཁའ་ལ་གཞན་དག་གིས་ཀྱང་སྣང༌། དེ་མ་ཐག་འཇམ་དཔལ་དང་བཅས་པ་མི་སྣང་བར་གྱུར་སྟེ་གསུང་ནམ་མཁའ་ལ་གྲག་པས་སྤྱོད་འཇུག་ཚར་བར་གསུངས། དེ་ནས་དེ་མ་མཐོང་བས་འགྱོད་པའི་སྐྱེ་བོ་རྣམས་ཀྱིས་བྲང་ཁང་བལྟས་པས་བསྟན་བཅོས་གསུམ་པོ་ བརྙེད་སྟེ་མཁས་པ་རྣམས་ཀྱིས་འཇིག་རྟེན་དུ་གྲགས་པར་བྱས་སོ་ཞེས་བཤད་ཏོ། །གཏམ་གཞན་ལས་བརྒྱུད་པ་བོད་ཀྱི་ཤ་ལུ་པཎྜི་ཏས་བྲིས་པ་ནི། ལྷག་པའི་ལྷ་མཉེས་ནཱ་ལེནྡའི། །བཀོད་པ་ཕུན་ཚོགས་རྩོད་པ་བཟློག །ཡ་མཚན་ཅན་དང་སྤྲང་པོ་
Page: 7 ༄༅། །དང༌། །རྒྱལ་པོ་མུ་སྟེགས་ཅན་བཏུལ་བའོ། །ཞེས་ངོ་མཚར་གྱི་གཏམ་བདུན་དུ་འཆད་སྟེ་རྒྱལ་པོའི་སྲས་ཞི་བའི་གོ་ཆ་ཞེས་བྱ་བ་ཡིན་ལ་ཆུང་ངུ་ནས་རྣལ་འབྱོར་པ་ཞིག་ལ་འཇམ་དཔལ་རྣོན་པོའི་སྒྲུབ་ཐབས་ཞུས་ཏེ་བསྒྲུབས་ པས་ཞལ་མཐོང་ཞིང་རྟག་དུ་གདམས་ངག་ནོད་པ་ལས་ཅི་ཞིག་ན་ཡབ་འདས་ཏེ་སང་ཉིན་རྒྱལ་པོར་དབང་བསྐུར་བའི་དོ་ནུབ་འཇམ་དཔལ་ཁྲི་དེ་ལ་བཞུགས་ནས། བུ་གཅིག་འདི་ནི་ང་ཡི་སྟན་ཡིན་སྟེ། །ང་ནི་ཁྱོད་ཀྱི་དགེ་བའི་བཤེས་གཉེན་ཡིན། །ང་དང་ ཁྱོད་གཉིས་སྟན་གཅིག་ལ་འདུག་པ། །འདི་ནི་རྣམ་པ་ཀུན་ཏུ་རིགས་མ་ཡིན། །གསུང་བ་རྨིས་པས་རྒྱལ་སྲིད་སྤངས་ཏེ་བྲོས་ནས་ནཱ་ལེནྡར་སྦྱོར་ལམ་པ་རྒྱལ་བའི་ལྷ་ལས་རབ་ཏུ་བྱུང་སྟེ་ཞི་བའི་ལྷར་བཏགས་ཏེ་ངོ་མཚར་གྱི་གཏམ་དང་པོའོ། །དེར་རྗེ་བཙུན་ལ་ ཆོས་གསན་ཞིང་ཤིན་དུ་སྤྲོས་མེད་ཀྱི་སྤྱོད་པ་མཛད་པས་གཞན་དག་གིས་འདི་ལ་ནི་ཟ་ཉལ་འདོར་བའི་འདུ་ཤེས་ལས་མེད་ཏོ་ཅེས་བུ་སུ་ཀུའམ་འདུ་ཤེས་གསུམ་པར་བསྒྲགས་ཏེ་གནས་ནས་དབྱུང་བའི་ཕྱིར་མདོ་འདོན་པར་བསྒོས་པ་ཁས་མ་བླངས་པ་ན་མཁན་པོ་ལ་ཞུས་ པས་ཁྱེད་ཉིད་ཀྱིས་བསྒོས་ཅིག་གསུང་སྟེ་སླར་བསྒོས་པས་ཞལ་གྱིས་བཞེས་པ་ན་སྐྱེ་བོའི་ཚོགས་བསྡུས། ཁྲི་ཆེན་པོ་བཤམས་པ་ལ་གཞན་གྱིས་ཇི་ལྟར་གཤེགས་མ་མཐོང་བར་བཞུགས་ནས་སྔར་གྲགས་པའམ་མ་གྲགས་པའམ་གང་གདོན་ཞེས་ གསུང་བ་ན་མ་གྲགས་པ་འདོན་པ་ཞུས་པས་སྤྱོད་འཇུག་ཤར་གྱིས་གསུངས་ཏེ་ནམ་མཁའ་ལ་ཇེ་མཐོར་གྱུར་ནས། གང་ཚེ་དངོས་དང་གི་སྐབས་སུ་སྐུ་གཟུགས་མི་སྣང་བར་གྱུར་སྟེ་གསུང་འབའ་ཞིག་གིས་རྫོགས་པར་མཛད་ནས་རྙེད་བཀུར་མི་བཞེད་པའི་ཕྱིར་ལྷོ་ ཕྱོགས་མཆོད་རྟེན་དཔལ་ཡོན་ཅན་དུ་གཤེགས་ཅིང་དེར་གཟུངས་ཐོབ་པའི་པཎྜི་ཏ་རྣམས་ཀྱིས་བསྡུས་པས་ཤློ་ཀ་སྟོང་དང་དེ་ལྷག་པ་དང་སྟོང་མ་ལོངས་པ་སྟེ་གསུམ་དུ་བྱུང་ཞེས་ཟེར་ལ་ཁ་ཅིག་ནི་ཁ་ཆེ་བ་རྣམས་ཀྱིས་ཤུ་ལོ་ཀ་བདུན་བརྒྱ་ལེའུ་དགུར་བསྡུས་ཅིང་
Page: 8 ཡུལ་དབུས་པ་རྣམས་ཀྱིས་ཤུ་ལོ་ཀ་སྟོང་ལེའུ་བཅུར་བསྡུས་སོ་ཞེས་ཀྱང་ཟེར་ཞིང་བསླབ་བཏུས་མདོ་བཏུས་ཀྱང་མ་ཤེས་པས་སྤྱན་འདྲེན་དུ་བཏང་བ་ན་གཤེགས་སུ་མ་བཞེད་སྟེ་སྤྱོད་འཇུག་ཤློ་ཀ་སྟོང་དེ་ཚད་མར་གྱིས་ཅིག །བསྟན་བཅོས་གཉིས་ཁོ་བོའི་བྲང་ཁང་གི་གདུང་ སེབ་ན་པཎྜི་ཏའི་ཡི་གེ་ཕྲ་མོས་བྲིས་པ་ཡོད་ཏོ་ཅེས་གསུང་སྟེ་གཏམ་གཉིས་པའོ། །དེ་ནས་མུ་སྟེགས་ཀྱི་རྩོད་པ་ཟློག་པ་དང༌། ཡ་མཚན་ཅན་ཞེས་པ་ངོ་ཚ་བའི་གནས་རྟག་ཆད་ཀྱི་ལྟ་བ་འཛིན་པའི་མུ་སྟེགས་པ་མང་པོའི་ནང་དང༌། སྤྲང་པོ་སྟོང་ཙམ་གྱི་ནང་ དུ་བཞུགས་ཏེ་ཞག་མང་པོར་ཡུལ་ངན་བྱུང་བས་དེ་དག་བྲུ་བས་ཉེན་སྟེ་སུ་ཟས་སྟེར་ནུས་པ་དེ་དཔོན་དུ་བསྐོ་བར་བྱས་པས་སློབ་དཔོན་གྱིས་འབྲས་ཆན་ལྷུང་བཟེད་རེ་བླངས་པས་ཐམས་ཅད་ཚིམ་པར་བྱས་ཏེ་ཡང་དག་པའི་ལྟ་བར་བཀོད་པ་ནི་ངོ་མཚར་གྱི་གཏམ་གསུམ་ པ་དང་བཞི་པ་དང་ལྔ་པའོ། །ཡང་རྒྱལ་པོ་ཆེན་པོ་ཞིག་གི་སྐུ་སྲུང་བ་མཛད་སྟེ་ཤིང་གི་རལ་གྲི་འོད་ཟེར་འགྱེད་པར་བསྟན་པས་འཁོར་བཅས་བཏུལ་བ་ནི་དྲུག་པ་དང་མུ་སྟེགས་ཀྱི་སྟོན་པ་ཤངྐར་དེ་ཝས་ཞག་བདུན་ན་ནམ་མཁའ་ལ་དབང་ཕྱུག་གི་དཀྱིལ་འཁོར་ འབྲི་ཡིས་དེ་བཤིག་ནུས་ན་ཕྱི་རོལ་པ་ཐམས་ཅད་ནང་པར་འཇུག་ཅིང་མ་ནུས་ན་ཐམས་ཅད་ཕྱི་རོལ་པར་འཇུག་དགོས་སོ་ཞེས་བསྒྲགས་པ་ན་བཤིག་པར་ཁས་ལེན་པ་མ་བྱུང་བས་ནང་པ་རྣམས་ཉམ་ང་བ་ན་སློབ་དཔོན་འདི་གཅེར་བུ་ཁྲུད་མ་ཕོ་བའི་ཚིགས་མས་འཚོ་ བའི་སྤྱོད་པ་མཛད་པ་ན་རྒྱལ་པོའི་བྲན་མོས་ཁྲུད་མ་ཕོ་བ་སློབ་དཔོན་གྱི་སྐུ་ལ་ཟེར་མ་ཕོག་པ་ན་ལྕགས་བསྲེགས་ལ་ཕོག་པ་ལྟར་ཁོལ་བ་མཐོང་ནས་རིམ་གྱིས་བསྙད་པས་རྣལ་འབྱོར་པར་ཤེས་ཏེ་གནས་བརྟན་དང་རྒྱལ་པོས་གསོལ་བ་བཏབ་པས་གཞིག་པར་ཞལ་ གྱིས་བཞེས་ཏེ་རས་ཟུང་གཉིས་དང་ཆུའི་བུམ་པ་དང་མེ་དང་ཤིང་སྟ་གོན་གྱིས་ཤིག་གསུང༌། ཕྱི་ཉིན་མུ་སྟེགས་པས་ནམ་མཁའ་ལ་ཐིག་བཏབ་སྟེ་སོང༌། དེའི་ཕྱི་ཉིན་སྔ་དྲོ་སྐྱེ་བོ་ཐམས་ཅད་འདུས། མུ་སྟེགས་པ་དེས་ནམ་མཁའ་ལ་དཀྱིལ་འཁོར་རྡུལ་ཚོན་
Page: 9 ༄༅། །གྱིས་བྲིས་པ་ཤར་སྒོ་ཙམ་ཟིན་པའི་ཚེ་སློབ་དཔོན་གྱིས་ཏིང་ངེ་འཛིན་མཛད་པས་ཚུབ་མ་ཆེན་པོ་བྱུང་སྟེ་དཀྱིལ་འཁོར་རྨེག་མེད་པར་ཁྱེར། མུ་སྟེགས་ཀྱི་སྟོན་པ་ཡང་རླུང་གིས་བདས་པའི་བྱེའུ་ལྟར་འཐོར། ལྗོན་ཤིང་དང་ཁང་པ་ ཡང་ལྡེག་ཅིང་སྐྱེ་བོ་རྣམས་ཀུན་དུ་བྱེར་བ་ན་སློབ་དཔོན་གྱིས་རྒྱལ་པོ་ཡབ་ཡུམ་བཙལ་སྟེ་ཆུས་རྡུལ་བཀྲུས་རས་གཡོགས་མེས་བསྲོས་ཏེ་བདེ་བར་བྱས། ཡུལ་པ་དེ་ཐམས་ཅད་སངས་རྒྱས་པར་གྱུར་སྟེ་མུ་སྟེགས་ཕམ་པའི་ཡུལ་དུ་གྲགས་པ་ནི་གཏམ་ བདུན་པའོ་ཞེས་བཤད་ཏོ། །གླིང་ཕྲན་དང་བཅས་པའི་ཛམྦུའི་གླིང་ན་སྟོན་པ་དང་མཚུངས་པར་གྲགས་ཅིང་བོད་ཡུལ་བ་རྣམས་ལ་བཀའ་དྲིན་མཚུངས་པ་མེད་པ་དཔལ་མར་མེ་མཛད་ཀྱི་བཞེད་པ་ནི་འདི་ཡིན་སྟེ། ཕ་རོལ་ཏུ་ཕྱིན་པའི་ཐེག་པ་ལ་གྲགས་པའི་ ཡོན་ཏན་ལྔ་དང༌། སྔགས་ཀྱི་ཐུན་མོང་མ་ཡིན་པའི་ཡོན་ཏན་བརྒྱད་སྟེ་བཅུ་གསུམ་དང་ལྡན་ནོ། །དེ་ཡང་སློབ་དཔོན་འདི་བྲམ་ཟེ་མདུན་ན་འདོན་སྦྱིན་སྲེག་དང་སྨྲེང་འདོན་གཙོ་བོར་བྱེད་པའི་སྲས་ཆེ་བ་ཡིན། དཔུན་གསུམ་ཡོད། ནམ་ཞིག་རྒྱལ་པོའི་ སྲས་ཀླུས་བྱིན་པ་ཞིག་བཙས་པའི་ཚེ་སྨྲེང་འདོན་དང་ཁྲུས་དང་སྦྱིན་སྲེག་བྱས་པས་ཀླུའི་ཚོགས་ཁྲོས་ནས་བྲམ་ཟེའི་བུ་ནུ་འོ་གཉིས་བསད། ཡབ་སྲས་གཉིས་ཀྱང་ནད་ཀྱིས་ཐེབས་ནས་འཆིར་ཉེ་བའི་ཚེ་ཡབ་བྲམ་ཟེས་རྒྱལ་པོ་ལ་ཁྱེད་ཀྱི་དོན་བྱས་པས་ངེད་སྤད་ འཆི་བར་འདུག་པས་ང་འཆི་ཀར་སེམས་སྐྱེད་བྱེད་པས་དེའི་བླ་མ་དང་འབྱོར་པ་ཞུའོ་བྱས་པས་རྒྱལ་པོས་དེ་འཆི་སེམས་ཁྱད་པར་ཅན་དུ་ཤེས་ཏེ་བླ་མ་བཙལ་བས་མ་རྙེད། དེར་མཆོད་གནས་དགེ་སློང་བདུན་བརྒྱ་ཡོད་པ་ལ་ཞུས་པས་དེ་རྣམས་ཀྱིས་འཇམ་དཔལ་ རྣོན་པོའི་སྐུ་ཅིག་ལ་མཆོད་པ་ཆེན་པོ་བྱས། ཆོ་གའི་ཡི་གེ་ལག་དུ་གཏད་སྟེ་སྐུའི་མདུན་དུ་སེམས་སྐྱེད་ཏུ་བཅུག་གོ །དེའི་ཚེ་བུ་དེའི་ནད་ཀྱང་སོས་འཇམ་དཔལ་ཞལ་མཐོང་སྟེ་ཆོས་ཀྱང་བཤད་ཏོ། །དེར་ཕ་འཆི་ཀ་མ་དེས་རྒྱལ་པོ་ལ་བུ་འདིའི་ནད་སོས་པས་
Page: 10 བློན་པོ་ཆེན་པོར་ཆུག་ཞིག་ཞེས་ཞུས་ཏེ་བློན་པོའི་མཆོག་དུ་ཡང་བཅུག །དེས་རྒྱལ་བློན་འབངས་བཅས་ཕ་རོལ་ཏུ་ཕྱིན་པ་དྲུག་ལ་སྦྱར་སྟེ་གཅིག་གིས་གཅིག་གི་སྤྱོད་པ་ལ་རྗེས་སུ་བསྔགས་པར་ཡང་གྱུར། རྒྱལ་པོ་དེ་ཡང་མགོ་གཅོད་པ་སོགས་ཀྱི་ཁྲིམས་ ལས་ལྡོག་དུ་བཅུག་སྟེ་བྱམས་པས་སྐྱོང་དུ་བཅུག །རྒྱུ་དེས་སྐྱེ་བོ་ཐམས་ཅད་ཀྱང་བདེ་བས་ཁྱབ་བོ། །དེ་ནི་སྐྱེ་བ་བདུན་གྱི་སྔོན་རོལ་དུ་གདོལ་པའི་བ་ལང་རྫིར་གྱུར་སྟེ་དད་པ་དང་ལྡན་པས་ནགས་ན་བསམ་གཏན་པ་མང་པོ་བཞུགས་པ་ལ་ཉིན་རེ་ཞིང་མེ་ཏོག་དང་ ཤིང་ཏོག་གིས་མཆོད་པས་དེ་རྣམས་ཀྱིས་དེ་བསྙེན་གནས་ལ་ཡང་བཀོད། འཇམ་དཔལ་གྱི་སྐུ་གཅིག་ལ་བསྟེན་ནས་སྐྱབས་འགྲོ་དང་སྨོན་སེམས་ཅིག་སྐྱེད་བཅུག་གོ །དགེ་བ་དེས་སྐྱེ་བ་ཕྱི་མ་ལ་བྲམ་ཟེར་སྐྱེས་ཏེ་བྱང་སྡོམ་དང་ལྡན་པར་གྱུར་ཏོ། །རྒྱུ་ དེ་དག་ལས་ཚེ་དེར་ཡོན་ཏན་གྱི་ཚོགས་དེ་ལྟ་བུ་ཐོབ་པ་སྟེ། དེ་ཡང་བཀའ་བཞིན་བསྒྲུབས་པའི་ཡོན་ཏན་དང༌། ཕན་བདེ་གཞན་ལ་གཏོང་བའི་ཡོན་ཏན་དང༌། སྤྱོད་པ་ལ་རྗེས་སུ་བསྔགས་པ་དང༌། རྒྱལ་པོ་བྱམས་པའི་ཁྲིམས་ཅན་དང༌། བདེ་བ་ཁྱབ་བྱེད་ཀྱི་ཡོན་ཏན་སྟེ་མཚན་ཉིད་ཐེག་པ་དང་ཐུན་མོང་གི་ཡོན་ཏན་ལྔ་ཚང་བའོ། །གསང་སྔགས་ཀྱི་ཡོན་ཏན་བརྒྱད་ནི། ཡུལ་དེ་ན་རྒྱལ་པོ་མཐོང་ན་དགའ་བའི་བུ་མོ་རོལ་པ་མོ་ཞེས་བྱ་བས་གདོལ་པ་མོ་ལྔ་བརྒྱ་བསྡུས་ཏེ་དྲང་སྲོང་ཀུན་དུ་ རྒྱུ་ཅེས་པ་ལ་གདམས་ངག་ནོད་པ་ན་དེས་དགེ་སྦྱོང་དང་དྲང་སྲོང་སོགས་གང་ན་འདུག་པ་ལ་མི་ཚངས་པར་སྤྱོད་པའི་དངོས་པོ་བྱས་ན་དེའི་བྱིན་རླབས་བདག་གིས་འཐོབ་ཅིང་དེའི་སྤྱོད་པ་ཡང་གྲོལ་བར་འགྱུར་རོ་ཞེས་བསྟན་པས་དེ་རྣམས་ཀྱིས་ཚུལ་དེ་ལྟ་བུས་ མང་ཞིག་བརྟུལ་ཞུགས་དང་ཕྲལ་སྟེ་ནགས་ཚལ་དང་བསྟི་གནས་ཀུན་དུ་རྒྱུ་བ་ན་སློབ་དཔོན་གྱིས་དེ་རྣམས་གདུལ་བའི་ཕྱིར་དྲང་སྲོང་མདོག་གནག་ཞིང་སྐྲ་དང་ཨག་ཚོམས་སེར་བ་ཤིང་ཤུན་ཐོགས་པར་སྤྲུལ་སྟེ་ནགས་བདེ་བ་བཀོད་པར་བཞུགས་པ་ན། བུ་མོ་
Page: 11 ༄༅། །དེ་དག་འོངས་ཏེ་མཐོང་བ་ཙམ་གྱིས་འཇིགས་ཅིང་སྐྲག་གོ །དེར་དྲང་སྲོང་གིས་ང་ནི་གནོད་སྦྱིན་ཡིན་སྟེ་བདག་ཏུ་འཛིན་པའི་སྲོག་གཅོད་པའོ། །ལོག་པའི་ལྟ་བ་ཅན་རྣམས་བསད་སྟེ་ཡང་དག་པར་གཞུག་པའོ། །ཞེས་ བསྒྲགས་པས་དེ་ཐམས་ཅད་དད་པར་གྱུར་སྟེ་གདམས་པ་བསྟན་པས་ཕྱག་རྒྱ་ཆེན་པོའི་དངོས་གྲུབ་ཐོབ་སྟེ་ནགས་དེ་ཡང་རིན་པོ་ཆེས་བརྒྱན་ཞིང་གྲུབ་པ་འབའ་ཞིག་གིས་གང་བར་མཐོང་ངོ༌། །དེ་བཞིན་དུ་ཆང་ཚོང་ལྷན་ཅིག་སྐྱེས་པའི་རྡོ་རྗེ་ཅེས་པའི་ཆང་གིས་ སྐྱེ་བོ་རྣམས་རྨོངས་པར་བྱེད་པ་ལ་ཆང་ཉོ་བ་ལྟར་བྱས་ནས་ཁྱོད་ཀྱི་ཆང་འདི་ནི་འཇིག་རྟེན་གྱི་བྱ་བ་ཐམས་ཅད་འཆོར། ཕྱི་མར་རང་གཞན་ངན་སོང་དུ་འགྲོ་བས་སྤང་བར་རིགས་ཀྱི་ང་ལ་ལྷན་ཅིག་སྐྱེས་པའི་ཆང་ཞེས་བྱ་བ་དེ་བཞིན་གཤེགས་པ་ཐམས་ཅད་ཀྱིས་གསོལ་ བ་ཞིག་ཡོད་པ་ཁྱོད་ལ་བྱིན་ནོ་ཞེས་བྱིན་གྱིས་བརླབས་པས་གྲོལ་སྟེ་དེས་འགྲོ་བ་དཔག་དུ་མེད་པ་སྨིན་གྲོལ་དུ་བྱས་སོ། །ཡང་བྲམ་ཟེ་ཁྲུས་དང་གཙང་སྦྲ་བྱེད་པ་འབུམ་ཕྲག་མང་པོ་ཡོད་པར་བྲམ་ཟེ་རྒན་པོར་སྤྲུལ་ནས་བྱོན་སྟེ་ཁྲུས་བྱས་པ་འདིས་ཕྱིའི་དྲི་མའམ་ནང་ གི་དྲི་མའམ་གང་འདག་པར་བལྟ། དེ་དག་ན་རེ་གཉིས་ཀ་འདག་པར་བལྟའོ། །སློབ་དཔོན་གྱིས་གསུངས་པ། ཕྱིའི་དྲི་མ་འདག་མོད། ནང་གི་དྲི་མ་དུས་འགར་བཀྲུས་པས་འདག་ན་དུས་ཐམས་ཅད་ཏུ་ཆུ་ནང་ན་གནས་པའི་ཉ་དང་སྦལ་པ་སོགས་ཅིས་མི་འདག་ ཞེས་སྨྲས་པས་དེ་རྣམས་ཐེ་ཚོམ་སྐྱེས་ཏེ། སྐྱེས་བུ་དམ་པ་འོ་ན་ཐབས་གང་གིས་འདག་པར་འགྱུར་ཞེས་དྲིས་པས་ཕྱི་གཟུང་བའི་ཡུལ་མེད་པས་དག་པར་བྱ་བ་དང་ནང་འཛིན་པའི་སེམས་མེད་པས་དག་པར་བྱ་བའོ་ཞེས་བསྟན་པས་དེ་རྣམས་གྲོལ་བར་གྱུར་ ཏོ། །དེ་བཞིན་དུ་རྒྱལ་པོའི་ཞིང་པ་ལྔ་བརྒྱའི་གཙོ་བོ་ཞིང་པ་པདྨའི་རྡོ་རྗེ་དང༌། ཨོ་རྒྱན་ན་ཐ་ག་པ་རྣམས་ཀྱི་གཙོ་བོ་ཐ་ག་པ་གྲུབ་པའི་རྡོ་རྗེ་བྱ་བ་དག་རང་རང་གི་ལས་ཀྱི་མཐའ་སྐྱོ་བ་ན་དེ་མ་ཐག་སློབ་དཔོན་དེར་གཤེགས་ཏེ་དབང་བསྐུར་ཞིང་བྱིན་གྱིས་བརླབས་
Page: 12 པས་གྲོལ་བར་གྱུར་སྟེ་དེ་དག་གིས་རང་རང་གི་འཁོར་རྣམས་གྲོལ་བར་བྱས་སོ། །ཡང་བྷ་དྷ་ལྦ་བྱ་བ་རྟག་དུ་རྔོན་པ་བྱེད་པ་ཞིག་གིས་ཀྲྀཥྞ་སཱ་ར་ཞིག་ལ་མདའ་བཀང་བས་དེ་ན་རེ། ཚུལ་ཁྲིམས་ཀྱིས་ནི་མཐོ་རིས་འཐོབ། །བསམ་གཏན་གྱིས་ནི་ཁྱད་པར་འགྱུར། ། སྡིག་པ་ཡིས་ནི་ངན་སོང་སྟེ། །རྨོངས་ཅིང་རྨོངས་པ་དེ་བཞིན་ནོ། །ཞེས་ཟེར་བས། སྔོན་གྱི་བག་ཆགས་སད་སྟེ་དད་པ་སྐྱེས་པའི་དུས་ཁོ་ནར་སློབ་དཔོན་བྱོན་སྟེ་དེ་སྨིན་གྲོལ་དུ་བྱས་སོ། །མུ་སྟེགས་བཏུལ་བ་ནི་ཕལ་ཆེར་སྔ་མ་དང་མཚུངས་པ་ལས་ འདིར་ཁྱད་པར་ནི་ཡུལ་གངྒཱ་པ་ཏ་ལ་བྱ་བར་བྲག་ཕུག་གི་གཙུག་ལག་ཁང་ཆེན་པོ་ཞིག་ན་མུ་སྟེགས་པ་ལྔ་བརྒྱ་དང་ནང་པ་མང་དུ་ཚོགས་ནས་སྒོམ་ཞིང་ཡོན་བདག་རྒྱལ་པོ་དཔའ་བོའི་དབང་པོས་བྱིན་གྱིས་བྱེད་པ་ལས་མུ་སྟེགས་པ་ན་རེ་རྫུ་འཕྲུལ་བསྟན་ལ་སུ་ ཕམ་པ་དེ་མཆོད་གནས་སུ་མི་གནང་ངོ་ཞེས་ཟེར་སྟེ་ནང་པའི་ནང་ན་རྫུ་འཕྲུལ་ཤེས་པ་མེད་པའི་ཚེ་སློབ་དཔོན་གྱིས་ཚིགས་མས་འཚོ་བའི་སྤྱོད་པས་དེར་བྱོན་པ་ན་ཁྲུད་ཆུ་ཕོག་པ་ཁོལ་བའི་ཆོ་འཕྲུལ་མཐོང་ནས་གསོལ་བ་བཏབ་པར་བཞེད་ཏོ། །དེ་དག་ཏུ་ནང་གི་ ཡོན་ཏན་རྫོགས་ཚུལ་ནི་དང་པོར་འཇམ་དཔལ་གྱིས་སེམས་ལ་དབང་ཐོབ་པའི་དངོས་གྲུབ་ཅེས་བྱ་བ་གནང་བས་རང་ཉིད་ཉོན་མོངས་པའི་དབང་དུ་མི་འགྲོ་ཞིང་གཞན་འདུལ་བའི་ནུས་པ་དང་ལྡན་པར་གྱུར་སྟེ་གདོལ་པ་མོ་རྣམས་བཏུལ་ཏོ། །དེ་བཞིན་དུ་རྫུ་ འཕྲུལ་གྱི་སྟོབས་ཀྱིས་འཇུག་པ་དང༌། དབང་པོ་སྦྱོང་བ་དང༌། སྒོམ་པའི་ཉམས་རྫོགས་པ་དང༌། སེམས་ཀྱི་ཆོ་འཕྲུལ་ཀུན་དུ་སྣང་བ་དང༌། རྫུ་འཕྲུལ་ཤུགས་ཀྱིས་གྲུབ་པ་རྣམས་གནང་བས་རིམ་བཞིན་ཆང་ཚོང་དང་བྲམ་ཟེ་དང་ཞིང་པ་དང་ཐ་ག་པ་དང་ རྔོན་པ་བཏུལ་ཏོ། །བདུན་པར་སྐྱབས་གནས་རྫོགས་པ་ཅེས་བྱ་བ་གནང་བས་མུ་སྟེགས་ཀྱི་དཀྱིལ་འཁོར་བཤིག་གོ །དེ་ཐམས་ཅད་ཀྱང་སྐུའི་བཀོད་པ་ཡིན་གྱི་སློབ་དཔོན་དངོས་ནི་རྒྱལ་པོའི་བློན་པོ་ལས་གཡོ་བ་མེད་ལ་རྫུ་འཕྲུལ་དུ་མ་བསྟན་ཀྱང་དེ་དག་
Page: 13 ༄༅། །གིས་སློབ་དཔོན་གྱི་ཡོན་ཏན་མ་འཕྲིགས་པ་ན་སྟོན་མོ་ཞིག་གི་དུས་རང་རང་གི་ལག་ཆ་ཅི་ཡོང་ཐོགས་ནས་ཕོ་བྲང་ལ་སྐོར་བ་བྱེད་པ་ན་སློབ་དཔོན་གྱིས་རལ་གྲི་ཤུབས་བཅས་ཐོགས་པ་མཐོང་བས་རྒྱལ་པོས་དྲིས་པ་ན་མི་རུང་བ་ཞིག་ཡོད་ ཟེར། ཅིས་ཀྱང་ཕྱུང་ཞིག་བྱས་པས་སྤྱན་ཡ་གཅིག་ཁོབ་ཅིག་ཟེར་སྟེ་ཕྱེད་ཤུབས་ནས་ཕྱུང་བའི་འོད་ཟེར་གྱིས་སྤྱན་གཅིག་ཞར། དེར་རྣལ་འབྱོར་པར་རིག་ནས་བཀུར་སྟི་བྱེད་པར་འདོད་པ་ན་གངྒཱ་པ་ཏ་ལར་བྲོས་ཏེ་དེ་ཕྱིན་རྒྱལ་པོའི་འཁོར་ན་མི་སྣང་ངོ༌། །དེར་ རྒྱལ་པོའི་མཆོད་གནས་དགེ་སློང་ཨེ་ལ་དྷ་རི་ཡང་ཕྱིར་སོང་སྟེ་ཁོང་གཉིས་ཀྱིས་གཙུག་ལག་ཁང་དེ་ཝ་མ་ཏིར་ཕྱིན་ནས་སློབ་དཔོན་གྱིས་དགེ་སློང་དྷ་ར་ཤྲཱི་ནཱ་མ་ལས་རབ་ཏུ་བྱུང་སྟེ་སློབ་སྦྱང་མ་བྱས་པར་འོད་གསལ་སྒོམ་ཞིང་བཞུགས་སོ། །དེའི་ཚེ་སངས་རྒྱས་ པ་ན་ད་ལྟར་གྱི་ཤེས་པའི་རྒྱུན་འདིས་སྤྱོད་པར་བྱེད་ཏམ། འོན་སྟེ་ཤེས་པ་ཙམ་ཡང་མི་དམིགས་སྙམ་ནས་འཕགས་པ་ལ་དྲིས་པས། རྐྱེན་གྱི་སྟོབས་ཀྱིས་ལྟེ་བ་འཁོར། །ཞེས་སོགས་རྐང་པ་བཅུ་གཉིས་གསུངས། དེ་མ་གོ་ནས་ཞུས་པས་སྤྱོད་ འཇུག་ལེའུ་བཅུའི་དོན་གསུངས། ཡང་སངས་རྒྱས་པའི་ཚེ་ཡེ་ཤེས་ཙམ་ཡང་མི་དམིགས་ན་སེམས་ཅན་གྱི་དོན་ཇི་ལྟར་བྱེད་སྙམ་ནས་འཕགས་པ་ལ་དྲིས་པས་ངའི་རལ་གྲི་ཡིད་ལ་གྱིས་ཅིག་གསུང༌། དེ་མ་གོ་ནས་དྲིས་པས་རྣམ་འཕྲུལ་འདི་ལ་ལྟོས་ ཅིག་གསུང་སྟེ་མཚོ་ཆེན་པོ་ཅིག་གི་ནང་ན་གསེར་གྱི་ཉ་དང་ལྕགས་ཀྱི་སྡིགས་པ་ཡོད་པ། མཚོ་ནང་ནས་པདྨའི་སྡོང་པོ་ཁ་གསུམ་དུ་གྱེས་པའི་དབུས་མའི་སྟེང་ན་མཆོད་རྟེན་བང་རིམ་བཞི་སྲོག་ཤིང་འཁོར་ལོ་བཅུ་གསུམ་ཆར་ཁབ་ཏོག་རྒྱན་དང་བཅས་པའི་ དབུས་ན་འཇམ་དཔལ་འཁོར་ལོས་བསྒྱུར་བའི་ཆ་ལུགས་སུ་བཞུགས་པ། བུམ་པའི་ནང་ན་ཤཱཀྱ་ཐུབ་པ་བཞུགས་པ་ལ་ཕྱོགས་བཞི་ན་རྒྱལ་ཆེན་བཞིས་ལྷུང་བཟེད་འབུལ་བ། ནམ་མཁའི་སྤྲིན་སེབ་ན་བྱང་ཆུབ་སེམས་དཔའ་ནམ་མཁའི་སྙིང་པོ་དང་དེའི་
Page: 14 མདུན་ན་སྐྱ་རེངས་ཕྲིན་སྐྱེལ་བའི་ཚུལ་དུ་འདུག་པ། མཚོའི་མཐའ་ན་ལྷ་སྲིན་སྡེ་བརྒྱད་ཀྱིས་བསྐོར་བ། མཚོ་ནང་ན་དཔག་བསམ་གྱི་ཤིང་སྐྱེས་པའི་སྟེང་ན་འཁོར་ལོས་བསྒྱུར་རྒྱལ་རིན་ཆེན་བདུན་ཉེ་བའི་རིན་ཆེན་བདུན་དང་བཅས་པ། མཚོའི་ཕྱོགས་བཞི་ ནས་ཆུ་བཞི་འབབ་པ། པད་སྡོང་ཁ་གསུམ་གྱི་གཡས་ངོས་ལ་ཉན་ཐོས་ཀྱི་མཆོད་རྟེན་གཡོན་ལ་རང་རྒྱལ་གྱི་མཆོད་རྟེན་དང་རི་བོང་གཉིས་ཡོད་པ། མཆོད་རྟེན་གསུམ་གྱི་འོག་ན་པ་ཏྲ་འཁྱིལ་བ་མང་དུ་ཡོད་པའི་འོག་ན་ཚེས་གཅིག་གི་ཟླ་བ་ཡོད་པ། དེའི་གོང་ན་གསེར་གྱི་འཁོར་ལོ་རྩིབས་བཅུ་གཉིས་པ། དེའི་གོང་ན་གླང་པོ་ཆེ་ཐལ་ཀར་གསེར་གྱིས་བརྒྱན་པའི་སྟེང་ན་གདུགས་དཀར་པོ་ཡོད་པ། འཇམ་དཔལ་དེའི་ཕྱག་གཉིས་ན་ཨུཏྤལ་རེ་རེའི་སྟེང་ན་རལ་གྲི་རེ་ཡོད་པ། དེའི་ཡུ་བ་ལ་དེ་བཞིན་གཤེགས་ པའི་མཛོད་པུ་ལྟ་བུའི་ཐིག་ལེ་རེ་ཡོད་པ། རལ་གྲིའི་ལོགས་ལ་ཐིག་ལེ་བཅུ་གསུམ་རེ་ཡོད་པ། རལ་གྲིའི་རྩེ་མོ་གཉིས་ན་རིན་པོ་ཆེ་འོད་འབར་བ་རེ་རེ་ཡོད་པ། དབུའི་གཙུག་ཏོར་གྱི་ཐད་ཀར་རལ་གྲི་གཉིས་རྩེ་མོ་ཕྲད་པས་རིན་པོ་ཆེའི་མྱུ་གུ་ཅིག་བྱུང་ བ། དེའི་སྟེང་ན་རིན་པོ་ཆེ་འབར་བ་ཅིག་ཡོད་པ་རྣམས་བསྟན་ཏོ། །དེ་ལས་སློབ་དཔོན་གྱིས་བསླབ་བཏུས་ཀྱི་དོན་རྣམས་སུ་གོ་ནས་ལྟ་བ་དབྱིངས་དང་ཡེ་ཤེས་གཉིས་སུ་མེད་པ་བྱ་བ་བྱུང་སྟེ་དབྱིངས་ཆོས་ཉིད་ཡེ་ཤེས་མེ་ལོང་ལྟ་བུ། གཉིས་སུ་མེད་པ་ ཆོས་སྐུ་སྤྲོས་བྲལ། དེས་སྨོན་ལམ་གྱི་མཐུས་སེམས་ཅན་གྱི་དོན་མཛད་པ་བྱ་བ་བསྒྲུབ་པའི་ཡེ་ཤེས་ཡིན་པར་རྟོགས་སོ། །དེ་ལྟར་མ་རྟོགས་པ་རྣམས་ལ་བཤད་ལུགས་གསུམ་སྟེ་དབང་པོ་རབ་མགོ་སྨོས་པས་གོ་བ་རྣམས་ལ་འཁོར་ལོས་བསྒྱུར་བ་ལ་དཔེ་ བླངས་ཏེ་རྩ་བའི་དོན་དགོས་འབྲེལ་ཡན་ལག་བདུན་འཁོར་ལོས་བསྒྱུར་བའི་ལོངས་སྤྱོད་ལྟར་བཤད་པ་དང༌། འབྲིང་དྲང་ཞིང་བྲིད་དགོས་པ་ལ་མཚོ་ཆེན་པོ་ཆུ་བོ་བཞི་འབབ་པ་ལ་དཔེ་བྱས་ནས་གཞུང་ཉེ་བར་བསྡུ་བའི་ཡན་ལག་ལྔ་ཆུ་བོ་ལྟར་བཤད་པ་
Page: 15 ༄༅། །དང་དཔག་བསམ་གྱི་ཤིང་ལྟར་མིང་ཚིག་ལས་སྤྲོས་ཏེ་གདུང་བ་བཅད་པའི་ཡན་ལག་ལྗོན་ཤིང་གི་ལོ་འདབ་ལྟར་བཤད་པ་གཉིས་སོ། །དབང་པོ་ཐ་མ་རྣམ་པར་ཕྱེ་སྟེ་སྤྲོས་ནས་འཆད་དགོས་པ་ལ་སྔ་མ་གསུམ་དང༌། སྐུ་ གསུམ་ཆོས་ཅན་རིག་པའི་ཆ་དང་ཆོས་ཉིད་དབྱིངས་ཀྱི་ཆ་དང་དགག་བྱ་མི་མཐུན་པའི་ཆ་དང་དྲུག་པོ་ཤེས་པར་བྱ་བའི་ཕྱིར་སྔར་གྱི་རྣམ་འཕྲུལ་ལ་དཔེ་ཆུང་ཞིག་མཛད་ཏོ། །དེ་ནས་ཨེ་ལ་དྷ་རིས་གསོལ་བ་བཏབ་ནས་བསླབ་སྤྱོད་གཉིས་ཡི་གེར་བཀོད་ཏོ། ། དེ་ལྟར་ཡོན་ཏན་བསམ་གྱིས་མི་ཁྱབ་ན་ཡང་ཕྱི་རོལ་ཏུ་ཟ་ཉལ་འདོར་གསུམ་ལས་མ་མཛད་པས་བྷུ་སུ་ཀུར་བཏགས་སོ། །དེར་གནས་དེ་ན་འདུལ་བ་འཛིན་པ་ཤྲཱི་ནཱ་མ་བྱ་བས་དཔོན་བྱས་ཏེ་ཐེག་གསུམ་གྱི་མདོ་རེ་མོས་སུ་འདོན་པ་ལས་ལན་གཅིག་རྐྱལ་གའི་ ཆེད་ཏུ་ཁྲི་ཆེན་པོ་བཤམས་ཏེ་སློབ་དཔོན་ལ་བསྐོས་པ་སོགས་གཞན་སྔ་མ་དང་འདྲའོ། །སློབ་དཔོན་ནམ་མཁའ་ལ་བཞུད་ནས་བྲང་ཁང་དུ་བལྟས་པས་དགེ་སློང་ཨ་ལ་དྷ་རི་འདུག་སྟེ་སློབ་དཔོན་གྱི་ཆོས་ཤེས་སམ་དྲིས་པས་བསླབ་སྤྱོད་གཉིས་ཤེས་ཟེར་སྟེ་དེ་ཡང་ དངོས་གྲུབ་བརྙེས་པ་རྫུ་འཕྲུལ་དང་ལྡན་པར་གྲགས་སོ། །དེ་ནས་ཟ་ཧོར་གྱི་སློབ་དཔོན་དཔའ་བོ་རྡོ་རྗེ་བྱ་བས་ཐོས་ནས་ཉི་མ་དྲུག་བཅུར་ཕྱིན་སྟེ་གངྒཱ་པ་ཏ་ལ་དྲིས་པས་བྲམ་ཟེ་རྒན་པོ་ཅིག་ན་རེ་འདི་ག་ན་ཡོད་ཟེར་སྟེ་གཙུག་ལག་ཁང་ཞིགས་པོ་ཅིག་ན་བསོད་ སྙོམས་པ་ཅིག་འདུག །དེ་ལ་དྲིས་པས་འདི་ན་ང་མིན་པ་མེད་ཟེར། དེ་རྐང་པ་ས་ལ་མི་རེག་པར་མཐོང་ནས་དད་པ་ན་ས་ལ་མི་རེག་པ་ལ་དད་ན་བྱ་ལ་ཡང་དད་པར་རིགས་གསུང༌། བྱ་ལ་རྟོགས་པ་མེད་ཁྱེད་ལ་ཡོད་པས་དད་ཏོ་བྱས་ཏེ་བརྐྱང་ཕྱག་ བཙལ་བས་རྡོག་པ་བརྒྱབ་ནས་བྲོས་ཕྱིན་པས་མ་སླེབ། ཡང་གཙུག་ལག་ཁང་དེར་ཕྱིན་ཙ་ན་རྟ་ཅིག་མགོ་མཇུག་གཉི་གས་རྩྭ་ཟ་བ་ཞིག་འདུག །འདི་འདྲེ་ཡིན་ནམ་སྙམ་པ་ལ་དེ་ན་རེ་སངས་རྒྱས་ལ་རེ་བ་དང་འཁོར་བ་ལ་དོགས་པ་ཡང་འདྲེ་
Page: 16 ཡིན་ཟེར། ཕྱག་བྱས་པས་མགོ་ལ་རྨུགས་ནས་བྲོས། དེར་གྲོང་དུ་སྨན་པ་དྲིས་པས་བྲམ་ཟེ་རྒན་པོ་ཅིག་གིས་བཅོས་པས་སོས་ཏེ། དེ་ན་རེ། ལུས་ཀྱི་རྨ་ནི་འཚོ་སླ་སྟེ། །སེམས་ཀྱི་རྨ་ནི་འཚོ་བར་དཀའ། །ཟེར་རོ། །དེར་སྔར་གྱི་གཙུག་ལག་ཁང་དེར་ཕྱིན་པས་ གཅན་གཟན་བཀྲེས་པ་མང་དུ་བྱུང་བས་སྔར་བདག་གིས་ལུས་དོན་མེད་ཁོ་ནར་བྱས། ད་རེས་ནི་དོན་དང་བཅས་ཏེ་བླ་མ་དང་ཆོས་ཚོལ་ཕྱིར་དཀའ་བ་ཡང་སྤྱད། ལུས་འདིས་ཀྱང་འདི་རྣམས་ལ་ཕན་གདགས་སུ་བྱུང་སྙམ་ནས་ཚེ་རབས་ཐམས་ཅད་ཏུ་དགེ་སློང་ ཨེ་ལ་དྷ་རི་དང་ཕྲད་པར་གྱུར་ཅིག་ཞེས་སྨོན་ལམ་བཏབ་སྟེ་ཟར་བཅུག་པས་ཁྲག་གིས་བོག་སྟེ་བརྒྱལ་སངས་པ་ན་མདུན་ན་བླ་མ་བྱོན་འདུག་སྟེ་ཁྱོད་དུས་ཐམས་ཅད་ཏུ་ཅི་ལ་སྨོན་ཟེར་རོ། །བདག་སངས་རྒྱས་འཐོབ་པའི་ཐབས་འདོད་ཏོ་བྱས་པས་དེ་ལ་སེམས་ བཟང་པོ་དགོས་པ་ཡིན་ཁྱོད་ལ་ཡོད་ཏམ་ཟེར། ཡོད་ཅེས་ལོ་རྒྱུས་བསྙད་པས་འགྱོད་པ་མེད་ཏམ་ཟེར། འགྱོད་པ་མེད་པའི་བདེན་ཚིག་བརྗོད་པས་ལུས་སྔ་ཁོ་ལྟར་གྱུར་སྟེ། དེ་དག་ནི་ཁྱོད་ཀྱི་བག་ཆགས་སྦྱང་བའི་ཆེད་ཏུ་བསྟན་ནོ་ཞེས་གསུང་སྟེ་བྱིན་ གྱིས་བརླབས་པས་མཆོག་གི་དངོས་གྲུབ་ཐོབ་སྟེ་གཙུག་ལག་ཁང་དེ་ཡང་ཕུན་སུམ་ཚོགས་པར་མཐོང་ངོ༌། །དེའི་ཚེ་བྲམ་ཟེ་ཉི་མ་གྲགས་ཅེས་བྱ་བ་ཞིག་མི་རྣམས་ཟས་ནོར་ལ་འཐབ་རྩོད་བྱས་ཏེ་འཆི། ང་ཚེ་ཉི་ཟླ་དང་མཉམ་ན་དེའི་འོག་དུ་ཟས་ནོར་ཐམས་ཅད་ ངས་བྱར་འོད་ཟེར་ནས་ཚེ་རིང་བར་བྱེད་པའི་རིག་སྔགས་ཁོ་ན་འདོན་ཏོ། །ནམ་ཞིག་ན་དྲང་སྲོང་རིག་གནས་རྒྱལ་བ་ན་རེ། ནང་དུ་འདོད་པ་མ་སྤངས་ན། །ཀརྵ་པ་ཎའི་ཆར་བབ་ཀྱང༌། །འདོད་པ་དག་གིས་ངོམས་མི་འགྱུར། །གངས་ཀྱི་རི་དང་མཉམ་པ་ ཡི། །གསེར་གྱི་རི་བོ་ཡོད་གྱུར་ཅིང༌། །ལྷ་ཡི་ལོངས་སྤྱོད་ཡོད་གྱུར་ཀྱང༌། །འདོད་པ་དག་གིས་ངོམས་མི་འགྱུར། །འདོད་པ་ཆེ་བའི་གང་ཟག་ནི། །རྒྱལ་པོ་གྲགས་པ་མཐའ་ཡས་བཞིན། །སྟེང་ནས་འོག་དུ་ལྟུང་བར་འགྱུར། །འཇིག་རྟེན་
Page: 17 ༄༅། །དག་ན་ཚེ་རིང་བ། །དམྱལ་བ་དང་ནི་ཡི་དྭགས་ཏེ། །གཞན་ཤིའི་ལོངས་སྤྱོད་མྱོང་བ་མེད། །རིགས་ཀྱི་བུ་ཁྱོད་ཤེས་པར་གྱིས། །ཅེས་སྨྲས་པས་སྐྱོ་བར་གྱུར་སྟེ་དེ་ཙམ་ན་ཚེ་ཉི་ཟླ་དང་མཉམ་པ་ཡང་གྲུབ་པོ། །དེར་སངས་རྒྱས་པའི་ ཆོས་སྒྲུབ་པའི་ཕྱིར་ལོ་བཅུར་ཐེག་ཆེན་གྱི་ཆོས་དང་བླ་མ་བཙལ་བས་མ་རྙེད་སྟེ་བཅུ་གཅིག་པ་ལ་འཕགས་པའི་བླ་མ་ཚོལ་བའི་ཕྱིར་འཇམ་དཔལ་བཞུགས་ཟེར་ནས་རི་བོ་རྩེ་ལྔ་ལ་ཕྱིན། ཁར་ས་པཱ་ཎ་དང༌། དཔལ་གྱི་རི་དང༌། རྟ་མཆོག་གི་ཕོ་བྲང་དུ་ཡང་ ཕྱིན་ནས་ལོག་པ་ན་ལམ་དུ་ལོང་བ་ཞིག་དང་ཕྲད་སྟེ་གཏམ་བྱས་པས་དེ་ན་རེ་ངས་ཀྱང་ཐམས་ཅད་ཏུ་ཕྱིན་ངོ་མཚར་ཅན་མང་པོ་ཡོད་ཟེར་སྟེ་ཅི་ཡང་མ་མཐོང༌། གྲག་ཤོས་སུ་ལོང་ཁྲིད་འདི་བྱུང་ཟེར་བས་འོ་ན་ང་ཡང་ལོང་ཁྲིད་ལྟ་བུའི་བླ་མ་ཞིག་ལ་བསྟེན་དགོས་པར་ འདུག་སྙམ་ནས་མི་རྣམས་ལ་དྲིས་པས་སློབ་དཔོན་དཔའ་བོ་རྡོ་རྗེ་བྱ་བའི་གྲུབ་ཐོབ་ཡོད་ཟེར་ནས་གཙུག་ལག་ཁང་དེར་ཕྱིན་པས་ཕྲད་པ་ཙམ་གྱིས་བྱིན་རླབས་ཞུགས། བླ་མས་ཕྱག་སྤྱི་བོར་བཞག་སྟེ་མ་ཧཱ་ཤྲཱི་རཏྣ་བོ་དྷི་ས་ཏྭ་མ་ཧཱ་ས་ཏྭ་གསུང་སྟེ་མིང་ བཏགས། རྣལ་འབྱོར་གྱི་དབང་ཕྱུག་ཆེན་པོར་གྱུར་པ་ནི་ཚེ་གྲུབ་པ་མ་ཧཱ་ཤྲཱི་རཏྣའོ། །དེ་ལ་གསེར་གླིང་པས་གསན་སྟེ་ཛམྦུའི་གླིང་གི་གླིང་ཕྲན་རིན་པོ་ཆེ་སྣ་ཚོགས་ཡོད་པ་ཞིག་དུ་རྒྱལ་པོའི་སྲས་སུ་འཁྲུངས་མ་ཐག་སི་ན་སི་ཞེས་དཀོན་མཆོག་གི་སྐྱབས་འགྲོ་ བྱེད་པ་ཞིག་བྱུང༌། དེ་དུས་མུ་སྟེགས་ཀྱི་བསྟན་པ་ཡོད་ཀྱང་རྒྱལ་པོའི་སྲས་སུ་སོང་བས་གནོད་པ་མ་ནུས། རིང་པོ་མ་ལོན་པར་ནགས་ནས་ཐུབ་པའི་ལུགས་སྐུ་ཅིག་བརྙེད་པ་ལ་མཆོད་པ་བྱས་པས་གླིང་དེ་བདུན་འགྱུར་གྱིས་བཟང་བར་གྱུར་པས་མི་རྣམས་ ཀྱང་དཀོན་མཆོག་ལ་མོས་ཏེ་རྒྱལ་བུ་འཛམ་གླིང་དུ་ཆོས་ཚོལ་དུ་བཏང༌། རྡོ་རྗེ་གདན་དུ་སྲིན་པོ་མཆོད་པ་བྱེད་པ་དང་འཛོམ་སྟེ་གང་ཟག་དམ་པ་ཐམས་ཅད་དུས་དེར་འདུ་བ་ཡིན་པས་སྐྱེས་ཆེན་མང་དུ་བྱོན་པ་ལས་སློབ་དཔོན་ཚེ་གྲུབ་པ་ལ་རྒྱལ་བུ་དད་པར་གྱུར་སྟེ་
Page: 18 ཞག་བདུན་དུ་འགྲོགས། དེ་ནས་སློབ་དཔོན་བཙལ་བས་མ་རྙེད་རྨི་ལམ་ན་བྱིས་པ་གཉིས་གླུ་ལེན་པ། རང་ཡུལ་འཁོར་དང་ལོངས་སྤྱོད་བོར། །སྨྱོན་པ་ཅིག་གི་རྩད་མ་ཆོད། །རིང་ནས་ཕུང་ངམ་མྱུར་དུ་ཕུང༌། །རིགས་དང་བཟང་སྟེ་ཤེས་རབ་ཆུང༌། ། ཟེར་བས་སང་ནས་མ་དགའ་སྟེ་རང་ཡུལ་དུ་འགྲོ་སྙམ་མོ། །དེར་བུ་མོ་གཉིས་གླུ་ལེན་པ་ན་རེ། གཉེན་དང་མཛའ་བཤེས་མང་པོ་དང༌། །ཡུལ་དང་ཁང་ཁྱིམ་ནོར་ཆེན་དང༌། །ཟས་སྐོམ་ནོར་གྱི་ལོངས་སྤྱོད་མང༌། །མྱ་ངན་སྐྱེ་བར་འགྱུར་བ་ཡིན། །ཆོས་ དང་རིང་པར་འགྱུར་བ་ཡིན། །ནོར་མ་རྙེད་ཀྱི་ཚོང་པ་དག །ཡུལ་དུ་སྟོང་པར་ལྡོག་པ་འདྲ། །ཟེར་བས་ངེད་ལ་ཟེར་སྙམ་ཙ་ན་མི་སྣང་བར་སོང༌། དེ་ཆོས་སྐྱོང་མར་འདུག་པ་ལ་དྲི་ས་མེད་སྙམ་ནས་རྡོ་རྗེ་གདན་དུ་ལོ་བདུན་མཆོད་པ་བྱེད་ཅིང་བསྡད་པས་རྒན་ མོ་ཞིག་ན་རེ། སྐམ་སར་ཆུ་ཆུང་དྲངས་པ་བཞིན། །ཉིན་དང་མཚན་མོ་འདས་པ་ཡིས། །མི་རྣམས་ཚེ་ནི་ཟད་པར་བྱེད། །རྨོངས་པ་ལོང་ཡོད་མ་ཟེར་ཞིག །ཟེར་ནས་མི་སྣང་ངོ༌། །དེར་རྒྱལ་བུས་རྟག་ཏུ་ངུ་བཞིན་དུ་བླ་མ་ཁོ་ན་ཡིད་ལ་བྱས་པས་རྨི་ལམ་ན་ སློབ་དཔོན་ན་རེ་རྒྱལ་སྲིད་ནི་དམན་པའོ་འཆིང་བའོ་ཁྱོད་ཀྱིས་ཆོས་ཀྱི་རྒྱལ་སྲིད་འཛིན་ནུས་སམ་ལན་གསུམ་གསུངས་སྟེ་ཁས་བླངས་པ་ན་གཉིད་སད་སྟེ་སློབ་དཔོན་མདུན་ན་བཞུགས་སོ། །དེར་སློབ་དཔོན་གྱིས་བྱིན་གྱིས་བརླབས་ཏེ་གདམས་ངག་ཐམས་ཅད་སྣོད་ གཅིག་ནས་གཅིག་ཏུ་བྱོ་བ་ལྟར་གྱུར། མཚན་ཆོས་ཀྱི་གྲགས་པར་བཏགས་ཏེ་གསེར་གླིང་དུ་བྱོན་ནས་མུ་སྟེགས་པ་ཐམས་ཅད་ནང་པ་ལ་བཀོད། སྙན་པས་ཕྱོགས་ཐམས་ཅད་ཁྱབ་བོ། །དེར་ཇོ་བོ་རྗེ་ལྷ་གཅིག་གིས་དཀའ་བ་སྤྱད་ནས་བྱོན་སྟེ་ལོ་བཅུ་གཉིས་ དུ་དབུ་རྔས་སྤྲེལ་ནས་བསྟེན་སྟེ་ཡོན་ཏན་ཐམས་ཅད་ཡོངས་སུ་རྫོགས་པར་མཛད་ཏོ། །དེ་ལྷ་བཙུན་བྱང་ཆུབ་སེམས་དཔས་དགའ་བ་མཐའ་ཡས་པས་བོད་ཡུལ་དུ་སྤྱན་དྲངས། བོད་རྣམས་ཀྱི་བླང་དོར་གྱི་མིག་ཕྱེ་ཡང་དག་པའི་ལམ་ལ་བཀོད་བསྟན་
Page: 19 ༄༅། །པ་ཉིན་མོ་ལྟར་མཛད་ཏོ། །དེ་ལྟར་མཛད་པའི་ཚུལ་མི་མཚུངས་པ་དུ་མར་བསྟན་ཀྱང་འདི་ལྟ་བུ་ནི་དད་པའི་གནས་ཡིན་གྱི་མཚན་མར་བཟུང་བྱའི་གནས་ནི་མ་ཡིན་ནོ། །འོན་ཀྱང་མདོ་བཏུས་བསླབ་བཏུས་གཉིས་སྔོན་ནས་བརྩམས་ པའི་བསྟན་བཅོས་ཡིན་ལ་སྤྱོད་པ་ལ་འཇུག་པ་ནི་སེང་གེའི་ཁྲི་ལ་སྤྱན་དྲངས་ནས་སྔར་མ་གྲགས་པ་གདོན་པར་ཞུས་པའི་མོད་ལ་དོ་ཧའི་ཚུལ་དུ་ཐོགས་པ་མེད་པར་ཤར་གྱིས་གསུངས་པར་གདོན་མི་ཟ་སྟེ། བསྟན་བཅོས་རྩོམ་ཞིང་མཁའ་ལ་གཤེགས། ། ཅེས་གསུངས་པས་ཀྱང་ངེས་སོ། །འོན་ཀྱང་ལོ་རྒྱུས་སྔ་མ་དེ་དག་ན་དེའི་སྔུན་དུ་བརྩམས་ཟིན་པ་ལྟ་བུ་ཤ་སྟག་བྲིས་སྣང་བ་དང༌། ས་བཟང་མ་ཏིས། བརྩམ་ཞེས་བཤད་ཀྱང་རང་གི་ཐུགས་ཡུལ་དུ་བརྩམས་ཟིན་པའོ་ཞེས་ཟེར་བ་སོགས་ནི་སྐྱེས་བུ་དམ་ པ་ཆོས་ཀྱི་རྒྱ་མཚོ་ལུད་པ་ལྟ་བུ་ལ་ཡིད་མི་ཆེས་པའི་སྐྱེ་བོ་བློ་ཆུང་གི་ངག་སྒྲོས་བར་བར་དུ་ཆུད་པར་ཟད་སྟེ་དེ་ལྟ་ན། བསྟན་བཅོས་བཤར་ཞིང་མཁའ་ལ་གཤེགས། །ཅེས་འདོན་རིགས་པར་འགྱུར་རོ། །
སྤྱི་བཤད་ལས། འཆད་ཉན་གྱི་རྒྱུད་པ་བྱུང་ཚུལ།
[edit]དེ་ལྟ་བུའི་བསྟན་བཅོས་ཆེན་པོ་འདི་དག་ བདག་ཅག་གི་རྩ་བའི་བླ་མའི་བར་དུ་དགེ་བའི་བཤེས་གཉེན་གྱི་རྒྱུན་ལས་ཇི་ལྟར་འོངས་པ་ནི། རྒྱལ་བའི་སྲས་མཆོག་འཇམ་དཔལ་གཞོན་ནུའི་ཞབས། །སྙིགས་དུས་འགྲོ་བའི་སྐྱབས་གཅིག་ཞི་བའི་ལྷ། །ཡེ་ཤེས་ལུས་ཅན་ཨེ་ལ་དྷ་རི་དང༌། ། དཔའ་བོའི་རྡོ་རྗེ་བདུད་ལས་རྣམ་པར་རྒྱལ། །མཆོག་ཐུན་དངོས་གྲུབ་མཆོག་བརྙེས་མ་ཧཱ་ཤྲཱི། །བསྟན་པའི་བདག་པོ་གསེར་གླིང་ཆོས་ཀྱི་གྲགས། །ཡང་དག་ལམ་རབ་སྟོན་མཛད་ཨ་ཏི་ཤ། །གཞུང་ལུགས་ཀུན་མཁྱེན་ནག་ཚོ་ཚུལ་ཁྲིམས་རྒྱལ། ། སྒྲུབ་པ་ལྷུར་མཛད་རོང་བ་ཕྱག་སོར་བ། །གདམས་པའི་ཉིང་ཁུ་འཛིན་མཛད་ཞུ་ལེན་པ། །ཐེག་མཆོག་ལམ་ལ་གནས་པ་ཆུ་ལག་པ། །བསླབ་གསུམ་དག་པ་སྣར་ཐང་གྲོ་མོ་ཆེ། །དག་པའི་ཐུགས་མངའ་སངས་རྒྱས་སྒོམ་པོ་བ། །ཐམས་
Page: 20 ཅད་མཁྱེན་པ་མཆིམས་སྟོན་ནམ་མཁའ་གྲགས། །སྨྲ་བའི་སེང་གེ་རྒོལ་བ་ཟིལ་གནོན་དང༌། །བརྟན་མཁས་ཡོན་ཏན་ཀུན་ལྡན་བརྩོན་སེང་པ། །གཞུང་ལུགས་མཐའ་དག་འཛིན་པ་བྱང་ཆུབ་གྲགས། །སྡོམ་བརྩོན་དུལ་བའི་ཐུགས་མངའ་དོན་ གྲུབ་དཔལ། །བསྟན་པའི་རྒྱལ་མཚན་འཛིན་པ་དཔལ་བཟང་པོ། །སོག་དབོན་རིགས་པའི་རལ་གྲི་རིན་ཆེན་བཟང༌། །མཐོང་ཐོས་དོན་ལྡན་རྒྱལ་བ་ཀརྨ་པ། །དཔལ་འབྱོར་དོན་གྲུབ་བརྙེས་པ་གོའི་ཤྲིའི་ཞབས། །མཆོག་གི་གྲུབ་ཐོབ་སངས་ རྒྱས་མཉན་པ་ཆེ། །དུས་གསུམ་རྒྱལ་བ་གཅིག་བསྡུས་མི་བསྐྱོད་ཞབས། །རྩ་བརྒྱུད་བླ་མ་རྣམས་ལ་ཕྱག་འཚལ་ལོ། །ཡང་ན་དེ་ཉིད་ལས། ཇོ་བོའི་འོག་དུ། རྒྱལ་བའི་འབྱུང་གནས་བཤེས་གཉེན་སྟོན་པ་མཆོག །འཕགས་པའི་གནས་ བརྟན་ཆེན་པོ་པུ་ཏོ་བ། །དྲང་སྲོང་ཆེན་པོ་ཤ་ར་ཡོན་ཏན་གྲགས། །གཏུམ་སྟོན་ཆེན་པོ་དཔལ་ལྡན་གྲོ་མོ་ཆེ། །ཞང་བཙུན་ཞང་སྟོན་སངས་རྒྱས་སྒོམ་པའི་ཞབས། །གཞན་སྔ་མ་བཞིན་ནོ། །རྔོག་ལུགས་ཀྱི་སྤྱོད་འཇུག་ནི། འཇམ་པའི་དབྱངས་ དང་འཕགས་མཆོག་ཞི་བའི་ལྷ། །མི་བརྗེད་གཟུངས་ཐོབ་རྣམས་དང་ཛེ་ཏ་རི། །ཟླ་གྲགས་མ་ན་ཀ་ཤྲི་ཀ་ན་ཀ། གྲགས་པའི་བློ་མཆོག་རྔོག་ལོ་ཆེན་པོའི་ཞབས། །ཚེ་སྤོང་ཞང་དང་ཉང་བྲན་ཆོས་ཡེ་ཤེས། །གཙང་ནག་པ་དང་དཔལ་ལྡན་གྲོ་མོ་ཆེ། ། མན་སྔ་མ་ལྟར་རོ། །བདག་གིས་རྗེ་སྨྱག་ལོ་པཎ་ཆེན་ལས་བཀའ་དྲིན་ནོད་པ་ནི། སྣར་ཐང་པ་དཔལ་ལྡན་གྲོ་མོ་ཆེའི་བར་རྔོག་ལུགས་ལྟར་ཡིན་ལ། དེ་ནས། མཆིམས་སྟོན་ནམ་གྲགས་སྐྱི་སྟོན་ཤཱཀྱ་འབུམ། །སྐྱི་སྟོན་འཇམ་དབྱངས་ཀུན་མཁྱེན་ ཇོ་ནང་པ། །མ་ཏི་པཎ་ཆེན་ས་བཟང་འཕགས་པ་དང༌། །ཀུན་བཟང་དཀོན་མཆོག་རྒྱ་མཚོ་བསོད་སེང་བ། །བུདྡྷ་རཏྣ་པཎ་ཆེན་ངག་དབང་གྲགས། །རྩ་རྒྱུད་བླ་མ་རྣམས་ལ་ཕྱག་འཚལ་ལོ། །ཡང་ན་དེ་ཉིད་ལས་རྔོག་ལོའི་རྗེས་སུ། རྨད་བྱུང་
Page: 21 ༄༅། །རིགས་པའི་བྱུང་ཆེན་རིན་ཆེན་གྲགས། །མཁས་བཙུན་དམ་པ་སྟོད་ལུང་རྒྱ་དམར་བ། །མཁས་མཆོག་འགྲན་ཟླ་བྲལ་བ་ཕྱྭ་བའི་ཞབས། །འཇད་པ་སྟོན་སྐྱབས་བཤེས་གཉེན་མུས་སྲང་པ། །འདུལ་འཛིན་དམ་པ་ གཙང་སོ་བསོད་ནམས་མཛེས། །སྦྱངས་ཡོན་འཛིན་པ་བྱང་དཔལ་བདེ་བ་དཔལ། །གྲགས་པ་གཞོན་ནུ་བྱང་སེམས་བསོད་གྲགས་པ། །རྒྱལ་བའི་སྲས་པོ་ཐོགས་མེད་བཟང་པོ་དཔལ། །མ་ཏི་པཎ་ཆེན་མན་སྔར་ལྟར་སྟེ་ཐེག་པ་ཆེན་པོ་དགེ་བའི་ བཤེས་གཉེན་ལ་རག་ལས་པའི་ཕྱིར་བཀའ་དྲིན་མི་བསྐྱུང་པའི་ཕྱིར་བརྒྱུད་པ་བརྗོད་པའོ། །
སྤྱི་བཤད་ལས། གཞུང་དངོས་ཀྱི་སྤྱི་བཤད།
[edit]འདི་ཇི་ལྟར་འཆད་པའི་ཚུལ་ལ་སློབ་དཔོན་གསེར་གླིང་པ་ཆེན་པོས། ལུས་རྟེན་དལ་འབྱོར་སེམས་རྟེན་དགེ། ཕན་ཡོན་བསམ་དང་བྱང་སེམས་བཟུང༌། ། རང་སེམས་སྲུང་ཞིང་དྲན་ཤེས་འབད། །བཟོད་བརྩོན་བསམ་ཤེས་སྔོ་བ་སྟེ། །གཙོ་བོའི་དོན་ནི་བཅུ་གཅིག་ཡིན། །ཞེས་དོན་བཅུ་གཅིག་དུ་བསྡུས་པ་དང༌། ཡང་ཅུང་ཟད་ཞིབ་པར་ཕྱེ་ནས་དོན་སོ་དྲུག་དུ་བསྡུ་བར་ཡང་མཛད། སློབ་དཔོན་ཀྲྀཥྞ་ པས་ནི་ལུས་ཀྱི་དབྱེ་སྒོ་གསུམ་དུའང་བཤད་སྟེ། བསྟན་བཅོས་འབྱུང་བའི་རྒྱུ་ཕ་རོལ་ཏུ་ཕྱིན་པ་དྲུག་བསྙད་བཀའ་དྲིན་དྲན་པའི་ཕྱག་སྟེ་ལུས་དང་པོ་དང༌། བྱང་ཆུབ་སེམས་དཔའི་ལམ་འབྲས་བུ་དང་བཅས་པ་བསྟན་པ་ལུས་གཉིས་པ་དང༌། ལེགས་པའི་ ལྷ་ལ་ཕྱག་འཚལ་བ་དང་གཞུང་གི་ཚོགས་ཐ་དད་ཏུ་དབྱེ་བ་སྟེ་ལུས་གསུམ་པའོ་ཞེས་སོ། །འདིར་ནི་རྣམ་པ་གསུམ་སྟེ། ཐོག་མར་དགེ་བ་བསྟན་བཅོས་ལ་འཇུག་པའི་བྱ་བ། བར་དུ་དགེ་བ་བསྟན་བཅོས་དངོས། ཐ་མར་དགེ་བ་མཇུག་གི་བྱ་བའོ། །དང་པོ་ལ། མཚན་དོན་ནི། རྒྱ་གར་སྐད་དུ། བོདྷི་ས་ཏྭ་ཙཱརྱ་ཨ་ཝ་ཏ་ར། བོད་སྐད་དུ། བྱང་ཆུབ་སེམས་པའི་སྤྱོད་པ་ལ་འཇུག་པ། ཞེས་དང་། འགྱུར་ཕྱག་ནི། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །ཞེས་པ་སྟེ། སྒྱུར་བྱེད་ཀྱི་པཎྜི་ཏ་དང་།
Page: 22 ལོ་ཙཱ་བས་བཀོད་པའོ། །གཉིས་པ་ལ་གསུམ། བསྟན་བཅོས་རྩོམ་པ་ལ་འཇུག་པའི་བྱ་བ། བསྟན་བཅོས་དངོས། བརྩམས་པའི་དགེ་བ་སྔོ་བའོ། །དང་པོ་ལའང༌ཕྱག་བྱ་བ། རྩོམ་པར་དམ་བཅའ་བ། ཇི་ལྟར་རྩོམ་པའི་ཚུལ་ཏེ་དངོས་བསྟན་གྱི་བཤད་ ཚུལ་དང་། དགོས་སོགས་ཆོས་ལྔ་བསྟན་པ་ཤུགས་བསྟན་གྱི་བཤད་ཚུལ་ལོ། དང་པོ་ཕྱག་བྱ་བ། བདེ་གཤེགས་ཆོས་ཀྱི་སྐུ་མངའ་སྲས་བཅས་དང་། །ཕྱག་འོས་ཀུན་ལའང་གུས་པས་ཕྱག་བཙལ་ཏེ། །ཞེས་གསུངས་ཏེ། དེ་ཡང་ཕྱག་འཚལ་བའི་དགོས་པ་ ནི་གཞུང་འདི་བཤད་པའི་དོན་དུ་འཚལ་བས་ན་ཏེ་ཞེས་པ་ལྷག་བཅས་ཀྱི་སྒྲ་དང་འབྲེལ་ལ་དེའི་ཚེ་བཙལ་ཟིན་པའི་དོན་ནོ། །ཡུལ་ནི། མཛེས་པའམ་ལེགས་པ་དང༌། ཡོངས་སུ་རྫོགས་པ་དང༌། མཐར་ཐུག་པའི་དོན་གསུམ་ལ་འཇུག་པའི་ཉེར་བསྒྱུར་སུ་ཡིག་དང༌། ཡང་ན་འགྲོ་བའམ་གཤེགས་པ་དང༌། ཡང་ན་སྤངས་རྟོགས་གང་རུང་ལ་འཇུག་པའི་ག་ཏ་སྦྱར་བ་སུ་ག་ཏ་ཞེས་པ་ནི་དོན་དུ་མ་ལ་འཇུག་སྟེ། སྲིད་པ་ལས་འདས་པར་གཤེགས་པ་ནི་ཕྱི་རོལ་པ་སྲིད་རྩེ་ནས་ཀྱང་སླར་ལྡོག་པ། ཁྱོད་ཀྱི་བསྟན་ལས་ཕྱིར་ཕྱོགས་ པའི། །སྐྱེ་བོ་མ་རིག་གིས་ལྡོངས་པ། །སྲིད་རྩེའི་བར་དུ་ཕྱིན་ནས་ཀྱང་། །སྡུག་བསྔལ་ཡང་འབྱུང་སྲིད་པ་གྲུབ། །ཅེས་གསུངས་པ་ལས་ཁྱད་པར་དུ་བྱས་སོ། །ཡང་ན་སླར་མི་ལྡོག་པར་གཤེགས་པ་སྟེ་རྒྱུན་ཞུགས་སྲིད་པ་ལན་བདུན་པ་འདོད་པར་ འཁོར་བ་དང་ཕྱིར་མི་འོང་ཁམས་གོང་དུ་འཁོར་བ་ལས་ཁྱད་པར་དུ་བྱེད་དོ། །ཡང་ན་མཐར་ཐུག་བར་གཤེགས་པ་སྟེ་ཉན་ཐོས་དང་རང་སངས་རྒྱས་སྒྲིབ་པའི་བག་ཉལ་མ་སྤངས་པ་ལས་ཁྱད་པར་དུ་བྱེད་དོ། །དེ་བཞིན་དུ་སྤངས་པ་ལ་སྦྱར་བ་གསུམ་ དང་རྟོགས་པ་ལ་སྦྱར་བ་ཡང་གསུམ་མོ། །དེའི་ཕྱིར་བདེ་བར་གཤེགས་པ་ཞེས་བྱ་ལ་དེའི་རང་བཞིན་ནི་ཆོས་ཀྱི་སྐུ་སྟེ་ང་ནི་འཇིག་ཚོགས་ཀྱི་ལུས་སུ་མ་ལྟ་བར་ཆོས་ཀྱི་སྐུར་ལྟོས་ཤིག །ཞེས་གསུངས་སོ། །བདེ་གཤེགས་ཆོས་ཀྱི་སྐུ་མངའ་བ་དེ་འཐོབ་
Page: 23 ༄༅། །པའི་ཆེད་དུ་ཞུགས་པའི་བྱང་ཆུབ་སེམས་དཔའ་རྣམས་ནི་དེའི་སྲས་ཡིན་ཏེ་སངས་རྒྱས་ཀྱི་གདུང་འཚོབ་པའི་ཕྱིར་རོ། །ཆོས་ཀྱི་སྐུ་ཞེས་པའི་ཚིག་གི་ནུས་པ་གཅིག་གིས་ཆོས་དཀོན་མཆོག་ཡང་བསྟན་སྟེ། གང་ཆགས་པ་དང་བྲལ་ བའི་འགོག་བདེན་ནི་ཆོས་དཀོན་མཆོག་གི་མཐར་ཐུག་ཡིན་ལ། གནས་སྐབས་ལམ་གྱི་བདེན་པ་རྣམས་ནི་སྲས་བྱང་སེམས་ཀྱི་རྒྱུད་ལ་ལྡན་པའི་ཕྱིར། རྒྱ་དཔེ་ལ། བདེ་གཤེགས་སྲས་བཅས་ཆོས་ཀྱི་སྐུ་མངའ་བ། །ཞེས་སངས་རྒྱས་དང་། དགེ་འདུན་གྱི་ཐུགས་ ལ་མངའ་བའི་ཆོས་ཞེས་འགྲེལ་བར་ཤེར་འབྱུང་གིས་བཤད་དོ། དེ་ལྟར་ཐེག་ཆེན་གྱི་དཀོན་མཆོག་གསུམ་མམ་སངས་རྒྱས་སྲས་བཅས་དེ་ནི་སངས་རྒྱས་འདོད་པ་རྣམས་ཀྱི་སྐྱབས་ཡུལ་དང་ཕྱག་ཡུལ་གཉི་ག་ཡིན་ལ། ཉན་ཐོས་དང་རང་སངས་ རྒྱས་རྣམས་ནི་ལམ་གོལ་བ་སེབ་ལམ་ཆུང་ངུ་ལྟ་བུར་ཞུགས་པའི་ཕྱིར། སངས་རྒྱས་དོན་དུ་གཉེར་བ་རྣམས་ཀྱི་ཕྱག་གི་ཡུལ་ཡིན་ཡང་། སྐྱབས་ཡུལ་ནི་མ་ཡིན་ཏེ། ལམ་མི་མཚུངས་པའི་ཕྱིར། དེས་ན་རེ་ཞིག་ཕྱག་གི་འོས་ཙམ་དུ་གྱུར་པ་དེ་དག་ལ་ཡང་ ཕྱག་འཚལ་བའི་དོན་ཏོ། །ཤེར་འབྱུང་གིས་ནི། ཕྱག་འོས་ནི་མཁན་པོ་ལ་སོགས་པ་ལ་བཤད་དོ། །ཕྱག་གི་ངོ་བོ་ནི། སྒོ་གསུམ་འདུད་པ་སྟེ་ང་རྒྱལ་སྤངས་པ་མཚོན་པའི་ཆེད་དོ། །འང་གི་སྒྲས་ནི་ཉན་རང་དེ་དག་སྐྱབས་ཡུལ་མ་ཡིན་ཡང་ཞེས་ མཚོན་པར་བྱེད་དོ། །དེ་ལྟར་ཐོག་མར་ཡུལ་མཆོག་ལ་གུས་པའི་ཕྱག་བྱས་པས་གཞན་དད་པ་ལ་སྦྱོར། ང་རྒྱལ་སྤངས་པས་དམ་པར་མཚོན་ནུས། བསོད་ནམས་ཀྱི་ལས་དེས་བརྩམས་པ་མཐར་ཕྱིན་པར་འགྱུར་བའོ། །གཉིས་པ་ནི། སྟེ་ ཞེས་ལྷག་མ་འདྲེན་པའི་ཚིག་བརྗོད་ནས་ཕྱག་བཙལ་ཏེ་ཅི་བྱེད་ཅེས་པའི་དོན་ནོ། །ལན་ནི། བདེ་གཤེགས་སྲས་ཀྱི་སྡོམ་ལ་འཇུག་པ་ནི། །ལུང་བཞིན་མདོར་བསྡུས་ནས་ནི་བསྟན་པར་བྱ། །ཞེས་པ་སྟེ། བདེ་གཤེགས་སྲས་ཀྱི་སྡོམ་ལ་
Page: 24 འཇུག་པ་ཅེས་པས་བརྗོད་བྱ་དང་དགོས་པ་དོན་ཆེན་པོ་ཅན་དུ་ཤེས་པར་འགྱུར་ལ། ལུང་བཞིན་ཞེས་པས་རང་གཟོ་མ་ཡིན་པ་དང༌། མདོར་བསྡུས་པའི་ཚིག་གིས་ལུང་ཉིད་བཟློས་ཏེ་བརྗོད་པ་ཡང་མ་ཡིན་པར་རྒྱ་ཆེན་པོ་མདོར་བསྡུས། དོན་ཁོངས་ན་ གནས་པའི་དཀའ་བའི་གནས་བཀྲོལ། འཁྲུགས་པ་གོ་རིམ་དུ་བསྡེབས་ཏེ་མན་ངག་ཏུ་བསྡུས་ནས་བསྟན་པར་བྱའོ། །དེ་ལྟར་སྟོན་པར་ཡང་ནུས་ཏེ། བདག་ཀྱང་འཇམ་དབྱངས་བཀའ་དྲིན་གྱིས། །ཞེས་དང་། གང་གི་དྲིན་གྱིས་དགེ་བློ་བྱུང༌། ། ཞེས་དེ་ཐམས་ཅད་དགེ་བའི་བཤེས་གཉེན་འཇམ་པའི་དབྱངས་ཀྱི་བཀའ་དྲིན་དུ་བཞེད་པའི་ཕྱིར་རོ། །གསུམ་པ་ནི། སྔོན་ཆད་མ་བྱུང་བ་ཡང་འདིར་བརྗོད་མེད། །སྡེབ་སྦྱོར་མཁས་པའང་བདག་ལ་ཡོད་མིན་སྟེ། །དེ་ཕྱིར་གཞན་དོན་བདག་གིས་ འདི་མ་བྱས། །རང་གི་ཡིད་ལ་སྒོམ་ཕྱིར་ངས་འདི་བརྩམས། །དགེ་བ་གོམས་ཕྱིར་བདག་གི་དད་པའི་ཤུགས། །འདི་དག་གིས་ཀྱང་རེ་ཞིག་འཕེལ་འགྱུར་ལ། །བདག་དང་སྐལ་བ་མཉམ་པ་གཞན་གྱིས་ཀྱང་། །ཅི་སྟེ་འདི་དག་མཐོང་ན་དོན་ ཡོད་འགྱུར། །ཞེས་གསུངས་ཏེ། ཅི་ཁྱེད་ཅག་སྔོན་མ་གྲགས་པ་ཐོན་ཞིག་ཞེས་ཟེར་ན། སྔོན་ཆད་གཏན་མ་གྲགས་པ་སངས་རྒྱས་ཀྱིས་མ་གསུངས་པ་དེ་ལྟ་བུ་ནི་གདོན་པར་ག་ལ་ནུས་ཞེས་ཅུང་ཟད་བསྟིང་བར་མཛད་ནས། སངས་རྒྱས་ཀྱི་བཀའི་རྗེས་ སུ་འཇུག་པ་ཞིག་གདོན་པར་དགྱི་བ་ཡིན་མོད་ཀྱང་རྟོག་གེ་ལ་ཆགས་པའི་མཁས་པ་ཕལ་ཆེར་ནི་སྒྲ་དང་མངོན་བརྗོད་དང་ལྕི་ཡང་གི་སྡེབ་སྦྱོར་དང་ཚིག་དོན་གྱི་རྒྱན་སྙན་པས་མིང་ཚིག་ཡི་གེ་ཕུན་སུམ་ཚོགས་པ་ཙམ་ཞིག་ལྷུར་བྱེད་ཀྱི་གང་དེའི་བསྟན་བྱ་དེ་བྱང་གྲོལ་གྱི་རྒྱུ་ཡིན་མིན་དཔྱོད་པར་ མི་བྱེད་ལ་རྟོག་གེའི་ཚིག་མཛེས་པ་ཙམ་དེ་དག་ནི་འཚེ་པ་དང་འདོད་པའི་བསྟན་བཅོས་ཐམས་ཅད་ལ་ཡང་ཡོད་ལ་གཙང་བ་དང་མི་གཙང་བ་གང་ཡང་བླུགས་སུ་རུང་བ་སྣོད་སྟོང་པ་ལྟ་བུའི་སྡེབ་སྦྱོར་ལ་སོགས་པ་དེ་དག་ལ་སྙིང་པོ་མེད་སྟེ། དྲུག་བཅུ་པའི་འབྲས་
Page: 25 ༄༅། །ཆན་བྲེའུ་ཆུང་གང་ལ་སྡེབ་སྦྱོར་ཕུན་སུམ་ཚོགས་པའི་ཚིག་གིས་དྲངས་པ་དང་བ་ལང་རྫིའི་ཚིག་གིས་དྲངས་པ་གཉིས་ཁ་དོག་དང་རོ་ནུས་བཟང་ངན་དུ་མ་མཐོང་བའི་ཕྱིར། དེ་ལྟར་མང་པོ་དགའ་བའི་སྡེབ་སྦྱོར་སོགས་དེ་དག་ནི་བདག་གིས་མི་ ཤེས་སོ། །ཞེས་ཁེངས་པ་སྐྱུང་པའི་ཚུལ་གྱིས་དེ་དག་ལ་སྙིང་པོ་མེད་པར་བསྟན་ནས། བདག་ནི་དོན་ཕུན་སུམ་ཚོགས་པ་སངས་རྒྱས་ཀྱི་ལམ་མ་ནོར་ཞིང་ཚང་བ་ཞིག་གོ་སླ་བ་ཁོ་ནའི་ངག་གིས་བརྗོད་པར་བྱེད་ལ། དེའི་ཚེ་ཚིག་གི་སྦྱོར་བ་ལྷུར་བྱེད་པ་དག་སྡེབ་སྦྱོར་ དང་སྒྲ་བཟང་པོ་མེད་དོ་ཅེས་མི་འཇུག་ཅིང༌། མང་དུ་ཐོས་པ་མངོན་པའི་ང་རྒྱལ་དང་ལྡན་པ་དག་བདག་ནི་ཁྱོད་ཀྱི་བསྟན་བཅོས་ལ་མི་རེའོ་ཞེས་ཁེངས་པས་མི་འདུད་པ་སྲིད་ལ། མ་དད་པ་ཆོས་ཀྱི་སྣོད་མིན་པ་སྟོན་པའི་ཕྱིར་འཁོར་དེ་ཕལ་ཆེར་ཡང་བྷུ་སུ་ཀུ་ཞེས་ སློབ་དཔོན་ལ་བརྙས་པར་བྱེད་པས་ཁྱེད་ཅག་བདག་གི་ཆོས་ལ་མི་འཇུག་གོ་ཞེས་སྟོན་པའི་ཕྱིར། དེ་ཕྱིར་གཞན་དོན་བདག་གིས་འདི་མ་བྱས། །ཞེས་ཁྱེད་རྣམས་ཀྱི་དོན་དུ་འདི་བྱེད་པ་མ་ཡིན་སྟེ་སྣོད་མ་ཡིན་པའི་མཚན་ཉིད་མཐོང་བའི་ཕྱིར། འོན་ཀྱང་ ཁྱེད་རྣམས་ཀྱིས་བསྐུལ་བའི་རྐྱེན་ཙམ་ལས་གཙོ་བོར་རང་གི་རྒྱུད་འདུལ་ཞིང་གོམས་པ་གོང་དུ་དཔེལ་བའི་ཆེད་དུ་རྩོམ་ལ། རྒྱུ་དེས་བདག་ཉིད་ཀྱི་དད་པའི་ཤུགས་གོང་ནས་གོང་དུ་རྒྱས་པ་རང་དོན་གྱི་ཡོན་ཏན་འབྱུང་ལ། གཞན་དོན་དུའང་མི་འགྱུར་བ་ ནི་མ་ཡིན་ཏེ། འཁོར་གྱི་ཚོགས་འདི་ལས་ཀྱང་སེམས་ནི་གློ་བུར་བ་ཡིན་པའི་ཕྱིར། ཆོས་ཀྱི་གཏམ་འདིས་དད་པའི་དབང་པོ་གསོས་ཐེབས་པ་ཡང་འབྱུང་སྲིད་པ་དང་། བདག་ལས་སྐལ་བ་མཆོག་རྣམས་འདི་ལ་མི་ལྟོས་མོད་ཀྱང་ད་ལྟར་དང་མ་འོངས་ པ་ན་ཡང་རུང་སྟེ་བདག་དང་སྐལ་བ་མཚུངས་པའམ་དམན་པ་དག་གིས་ཀྱང་རུང་སྟེ་བསྟན་བཅོས་འདི་ལྟ་བུ་དག་མཐོང་བ་ན་ཡང་དག་པའི་ལམ་ལ་འཇུག་པ་སྲིད་པས་དོན་ཆེན་པོར་འགྱུར་བའི་ཕྱིར་དང་། སྤྱིར། རྩོམ་པ་ཐམས་ཅད་དགའ་ཕྱིར་སྟེ། །ཞེས་
Page: 26 འཆད་པར་འགྱུར་བ་ལྟར་སེམས་ཅན་ཐམས་ཅད་ཀྱི་གཏན་དོན་དུ་མ་དམིགས་པའི་དགེ་བ་ནི་བྱང་ཆུབ་སེམས་དཔའ་མཆོག་ལ་མེད་པའི་ཕྱིར་རོ། །ཞེས་དགོངས་པ་ཡིན་ནོ། །དེ་ལྟར་ཁེངས་པ་བསྐྱུངས་པས་རྩོམ་པ་པོས་ཐམས་ཅད་མཁྱེན་པར་ཁས་མ་བླངས་ པའི་ཕྱིར། རྒོལ་བ་ཉུང་བར་འགྱུར་བ་དང༌། རྩོམ་པ་པོར་ང་རྒྱལ་མེད་པར་མཐོང་ནས་སེམས་དང་ཞིང་བསྟན་བཅོས་ལ་འཇུག་པར་འགྱུར་བ་དང་། བརྒལ་ལན་བྱེད་པ་ནའང་འདིས་དེ་ཙམ་གྱི་མཁས་པར་ཁས་བླངས་སོ། །ཞེས་སུན་ཅི་ཕྱིན་གྱིས་མི་རྒོལ་ བའི་དགོས་པའང་འབྱུང་ངོ་། །བོད་ཕྱི་རབས་འདི་ན་ནི་ང་རྒྱལ་གྱི་བསྙེམས་པ་སྙིང་གི་ཤུན་པར་མི་ཚུད་པ་འཆང་བཞིན་དུ་སྔོན་གཞན་གྱིས་བྱས་པ་མཐོང་བའི་རྟགས་ཀྱིས་ཁེངས་བསྐྱུང་འབྲི་བ་མང་དུ་མཐོང་མོད་ཀྱི་དེ་དག་ནི་ཆོས་ལ་ཡང་དབང་ཟ་ཞིང་ལས་ འབྲས་ལ་ཅིར་ཡང་མི་རྩི་བར་སྣང་བས་སྨྲར་ཅི་ཡོད། སྐྱེས་བུ་དམ་པ་འདི་དག་གིས་ཁེངས་བསྐྱུང་བ་ནི་རང་གི་ང་རྒྱལ་སྤངས་པའི་གཟིགས་ངོ་ནས་ཇི་སྐད་གསུང་བ་དེ་ཁོ་ན་ལྟར་གཟིགས་ཤིག་གཟིགས་པ་ལྟར་གསུང་བས་ང་རྒྱལ་གྱིས་སེང་གེར་རློམ་བཞིན་ཁེངས་བསྐྱུང་ གི་ཝ་སྐད་འབྱིན་པ་དེ་ལྟ་མ་ཡིན་ནོ། །འདིར་མཚོ་སྣ་པ་ཆེན་པོའི་དཀའ་འགྲེལ་ལེགས་བཤད་བསྡུས་པར། གལ་ཏེ་ཁེངས་བསྐྱུང་འདི་ཐལ་ཆེས་ཏེ་གཞན་དོན་གྱི་བསམ་པ་མེད་ན། བདག་དང་སྐལ་བ་མཉམ་པ་གཞན་གྱིས་ཀྱང༌། །ཞེས་པ་ དང་འགལ། སྐབས་ཀྱི་བརྗོད་བྱ་དང་ཡང་འགལ་ཏེ། གཙོ་ཆེར་གཞན་གྱི་དོན་བསམ་མོ། །ཞེས་འཆད་པའི་ཕྱིར་ཞེ་ན། བརྒྱུད་ནས་གཞན་དོན་གྱི་བསམ་པ་ཡོད་ཀྱང་དངོས་སུ་གཞན་དོན་གྱི་བསམ་པ་མེད་ཅེས་གསུངས་པའོ། །དངོས་སུ་ཡང་གཞན་ དོན་གྱི་བསམ་པ་ཞར་བྱུང་གིས་ནི་ཡོད་སྟེ། བདག་དང་སྐལ་མཉམ་གཞན་ལ་ཕན་འདོད་པའོ། །གཉིས་པ་རང་ལ་ཕན་པ་གཙོ་བོ་ཡིན་པ་ནི། རང་གི་ཡིད་ལ་སྒོམ་ཕྱིར། །ཞེས་སོ། །འོ་ན། ད་དུང་བདག་ལ་རང་གི་དོན། །ཡོད་སྙམ་སེམས་
Page: 27 ༄༅། །པ་དེ་བོར་ཞིག །ཞེས་གསུངས་པ་དང་འགལ་ལོ་ཞེ་ན། མི་འགལ་ཏེ་དངོས་སུ་རང་རྒྱུད་ལ་སྒོམ་ཕྱིར་བརྩམས་ཀྱང་བརྒྱུད་ནས་གཞན་དོན་འགྲུབ་པའི་ཆེད་དུ་སྒོམ་པའི་ཕྱིར། ཞེས་སོགས་གསུངས་མོད་ཀྱང་འདི་ནི་སྔ་ མ་ལྟར་བཤད་ན་ལེགས་ཀྱི། གཞན་དོན་དུ་མ་བྱས་ཞེས་པ་སེམས་ཅན་གྱི་དོན་དུ་སངས་རྒྱས་འཐོབ་ཕྱིར་མ་བྱས་ཞེས་དང་། རང་དོན་དུ་བྱས་ཞེས་པ་རང་ཉིད་གཅིག་པུ་ཞི་བདེའི་དོན་དུ་བྱས་དགོས་ཞེས་པར་འབྲུ་གཉེར་བའི་དོགས་སློང་ག་ལ་དགོས། བརྒྱུད་ ནས་གཞན་དོན་གྱི་བསམ་པ་ད་ལྟ་ཡོད་ན་དེ་ཉིད་ད་ལྟ་དངོས་སུ་ཡོད་པ་ཡང་ཡིན་ལ། གཞན་དོན་གྱི་བསམ་པ་ཞར་བྱུང་གིས་ད་ལྟ་ཡོད་ན་ཡང་གཞན་དོན་གྱི་བསམ་པ་ད་ལྟ་ཡོད་པར་ཁས་ལེན་དགོས་པའི་ཕྱིར་རོ། །མདོར་ན་བསྟན་བཅོས་འདི་ནི་ བཤད་པ་དང་ཐོས་རྩོད་ལྷུར་བླང་བའི་ཕྱིར་མ་ཡིན་གྱི་རྩེ་གཅིག་དུ་བདག་གཞན་གྱི་རྒྱུད་ལ་བསྒྲུབ་པར་བྱ་བའི་ཆེད་ཏོ། །ཞེས་ཤེས་པར་བྱ་བའི་ཆེད་དོ། །བཞི་པ་ནི། གང་བདེ་བར་གཤེགས་པའི་སྲས་ཀྱི་སྡོམ་པ་ནི་འདིར་བརྗོད་བྱ་ཡིན་ལ། དེ་ལ་ འཇུག་པའི་བསྟན་བཅོས་འདི་ནི་རྗོད་བྱེད་དོ། །རྗོད་བྱེད་འདི་ཁོང་དུ་ཆུད་པ་ན་བྱང་སྡོམ་དེའི་མི་ཐོབ་པ་འཐོབ་བྱེད། ཐོབ་པ་སྲུང་ཚུལ། ཉམས་ན་ཕྱིར་བཅོས་རྣམས་ཤེས་པས་ཚུལ་བཞིན་དུ་སྲུང་ཞིང་བྱང་ཆུབ་སེམས་དཔའི་སྤྱོད་པ་དག་པར་འགྱུར་ བ་ནི་དགོས་པའོ། །དེ་ལས་ཆོས་ཀྱི་སྐུ་མངའ་བའི་བདེ་བར་གཤེགས་པ་འཐོབ་པ་ནི་དགོས་པའི་དགོས་པའམ་ཉིང་དགོས་ཡིན་ལ། བྱང་ཆུབ་འཐོབ་པ་དེ་ནི་བསམ་སྦྱོར་དག་པ་ལ་བལྟོས། དེ་ནི་བསྟན་བཅོས་འདི་ལྟ་བུ་ལ་བལྟས། དེ་ནི་བརྗོད་བྱ་ བྱང་སྡོམ་ལ་བལྟོས་པས་མེད་ན་མི་འབྱུང་གི་གོ་རིམ་དུ་གནས་པ་ནི་འབྲེལ་པ་སྟེ། དགོས་སོགས་ཆོས་ལྔ་དང་ལྡན་པར་མཐོང་བས་དཔྱོད་ལྡན་འཇུག་པའི་སྒོར་འགྱུར་ལ། བསྟན་བཅོས་ལུས་ཀྱི་དབང་དུ་བྱེད་ན། ཀུན་རྫོབ་དོན་དམ་གྱི་བྱང་ཆུབ་
Page: 28 ཀྱི་སེམས་བརྗོད་བྱ། དེ་དག་པར་བྱེད་པ་ཕ་རོལ་ཏུ་ཕྱིན་པའི་ཚུལ་རྣམས་རྗོད་བྱེད། ཆོས་གཟུགས་ཀྱི་སྐུ་འཐོབ་པ་དགོས་པ། བསྔོ་བས་བསྟན་པ་སེམས་ཅན་ཐམས་ཅད་ཀྱི་ཕན་བདེའི་གཞིར་འགྱུར་བ་ཉིང་དགོས་དང་། འབྲེལ་པ་ཤུགས་ ཀྱིས་ཐོབ་ལ། ཡང་མཆོད་བརྗོད་ཀྱི་ཚིགས་བཅད་དང་པོས་བརྗོད་བྱ་དང་། རྗོད་བྱེད་གཙོ་བོར་བསྟན་ནས་ཕྱི་མ་གཉིས་ཀྱིས་དགོས་ཉིང་དགོས་བསྟན་ཏོ། །ཅེས་རྒྱ་བོད་ཁ་ཅིག་འཆད་དོ། །གཉིས་པ་བསྟན་བཅོས་དངོས་ལ། ལམ་གྱི་རྟེན་དལ་འབྱོར་ བཤད་པ། ལམ་གྱི་དངོས་གཞི་བྱང་ཆུབ་ཀྱི་སེམས་བཤད་པ། འབྲས་བུ་སྐུ་གཉིས་ཞར་ལ་བསྟན་པའོ། །དང་པོ་ལ་གཉིས། ལུས་རྟེན་དལ་འབྱོར་རྙེད་དཀའ་བ་དང་། གནས་ལ་དད་པའི་དགེ་བློ་ཁྱད་པར་དུ་རྙེད་དཀའ་བར་བསྟན་པའོ། ། དང་པོ་ནི། དལ་འབྱོར་འདི་ནི་རྙེད་པར་ཤིན་ཏུ་དཀའ། །སྐྱེས་བུའི་དོན་གྲུབ་ཐོབ་པར་གྱུར་པ་ལ། གལ་སྟེ་འདི་ལ་ཕན་པ་མ་སྒྲུབས་ན། །ཕྱི་ནས་ཡང་དག་འབྱོར་བར་ག་ལ་འགྱུར། །ཞེས་གསུངས་ཏེ། དམྱལ་བ་ཡི་དྭགས་དུད་འགྲོ་དང་། ། ཀླ་ཀློ་ཚེ་རིང་ལྷ་དང་ནི། །ལོག་ལྟ་སངས་རྒྱས་ཀྱིས་སྟོང་བ། །ལྐུགས་པ་འདི་དག་མི་ཁོམ་བརྒྱད། དེ་དེར་མ་སྐྱེས་པས་ཆོས་བྱར་ཁོམ་པའི་ཕྱིར་དལ་བའོ། མི་ཉིད་དབུས་སྐྱེས་དབང་པོ་ཚང་། ལས་མཐའ་མ་ལོག་གནས་ལ་དད། ། ཅེས་པ་རང་གི་འབྱོར་པ་ལྔ་དང་། སངས་རྒྱས་བྱོན་དང་དེས་ཆོས་གསུངས། །བསྟན་པ་གནས་དང་དེའི་རྗེས་འཇུག །གཞན་ཕྱིར་སྙིང་ནི་བརྩེ་བའོ། །ཞེས་གཞན་འབྱོར་ལྔའོ། །གང་གིས་རྙེད་པར་དཀའ་ན་མི་ཁོམ་པར་སྐྱེས་པ་རྣམས་ཀྱིས་ སོ། །ཇི་ལྟར་ན་མདོ་ལས་ས་ཆེན་པོ་དང་སེན་མོའི་སྟེང་གི་སའི་དཔེ་མཛད་པ་དང་། རྒྱ་མཚོ་ཆེར་གཡེངས་གཉའ་ཤིང་གི །ཅེས་འཆད་པར་ཡང་འགྱུར་ལ། རྒྱལ་པོ་ཆེན་པོ་དལ་བ་ཕུན་སུམ་ཚོགས་པ་ཡང་རྙེད་པར་དཀའ། ཞེས་སོགས་གསུངས་སོ། །
Page: 29 ༄༅། །དེས་ན་ལྷ་ལས་རྣམ་པ་དུ་མས་ལྷག་པའི་ལུས་རྟེན་འདི་ཐོབ་ནས་དོན་མེད་དུ་མི་འགྱུར་བར་རང་གིས་འབད་པར་བྱའོ། །གཉིས་པ་ནི། ཇི་ལྟར་མཚན་མོ་མུན་ནམ་སྤྲིན་རུམ་ནང་། །གློག་འགྱུ་སྐད་ཅིག་བར་སྣང་སྟོན་པ་ ལྟར། །དེ་བཞིན་སངས་རྒྱས་མཐུ་ཡིས་བརྒྱ་ལམ་ན། །འཇིག་རྟེན་བསོད་ནམས་བློ་གྲོས་ཐང་འགའ་འབྱུང་། །དེ་ལྟས་དགེ་བ་ཉམ་ཆུང་འདི་ལ་བརྟག །ཅེས་གསུངས་ཏེ། དེ་ལས་རང་འབྱོར་ལྔའི་ནང་ཚན་གནས་ལ་དད་པའི་དགེ་བའི་བློ་ཁྱད་པར་ཅན་དེ་ནི་བརྒྱ་ལམ་ན་ལན་རེ་འབྱུང་བར་ ཟད་སྟེ་ཇི་ལྟར་མཚན་མོ་གློག་གི་འོད་ནི་བརྒྱ་ལམ་ན་འབྱུང་ཞིང་ཡུད་ཙམ་སྣང་བར་བྱེད་ཀྱི་རིང་དུ་མ་ཡིན་པ་བཞིན་ཡིན་ལ། དེ་ཡང་རྒྱུ་རྐྱེན་ཆུང་ངུའམ་སྟེས་དབང་ཙམ་གྱིས་སྐྱེ་བ་མ་ཡིན་སྟེ། སངས་རྒྱས་བཅོམ་ལྡན་འདས་རྣམས་ཀྱི་བྱིན་རླབས་དང་རང་གི་ ཁམས་ཀྱི་ནུས་པ་དང་། དགེ་བའི་རྒྱུ་རྐྱེན་མང་པོ་འདུས་པ་ལས་སྐྱེ་བ་སྟེ། དཀའ་འགྲེལ་ཆེན་མོར། སངས་རྒྱས་བཅོམ་ལྡན་འདས་ཉིད་ཕན་པ་དང་བདེ་བ་ལ་སྦྱོར་བའི་ཕྱིར་སྐལ་བ་ཅན་དང་སྐལ་བ་ཅན་མ་ཡིན་པའི་སེམས་ཅན་གྱི་རྒྱུད་ལ་གཟིགས་ཅིང་རྟག་ཏུ་བཞུགས་ཏེ་ གང་གི་ཚེ་གང་དུ་ཐབས་གང་གིས་གང་ལ་སྐལ་བ་དང་ལྡན་པ་གང་ཡིན་པ་ལ་གཟིགས་ནས། དེའི་ཚེ་དེར་ཐབས་དེ་དང་དེ་བྱིན་གྱིས་རློབ་བར་མཛད་ཅིང་། སྐལ་བ་དང་མི་ལྡན་པའི་གནས་སྐབས་སུ་བཏང་སྙོམས་ཀྱིས་བཞུགས་སོ། །དེ་ལྟར་ན་དེ་བཞིན་ གཤེགས་པའི་བྱིན་གྱིས་བརླབས་ཀྱིས་ཅི་ཞིག་ལྟར་ན་རྙེད་པར་དཀའ་བ་བརྙེད་པ་འབྱུང་བའི་ཕྱིར། འཇིག་རྟེན་སྟེ་སྐྱེ་བོའི་བསོད་ནམས་ཕན་པ་དང་བདེ་བའི་རྒྱུ་དགེ་བའི་ལས་རྣམས་ལ་བློ་གྲོས་ཡུད་ཙམ་ཞིག་འབྱུང་སྟེ་དེ་ནི་དེར་མི་བརྟན་པའི་ཕྱིར་དང་། འཁོར་བ་ ཐོག་མ་མེད་པར་འཇིག་རྟེན་གྱི་མི་དགེ་བའི་ཕྱོགས་ཉིད་ལ་གོམས་པའི་ཕྱིར་རོ་ཞེས་བྱུང་ངོ་། །དེ་ལྟ་བས་ན་དགེ་བའི་བློ་སྐྱེ་བར་དཀའ་ཞིང་འཇིག་པར་སླ་བས་ཉམ་ཆུང་ལ་ཕན་ཡོན་ཆེན་པོ་ཅན་མུན་ནག་གི་གློག་ལས་ཀྱང་ཆེས་བྱེ་བ་ཕྲག་མང་པོར་དཀོན་པ་
Page: 30 བདག་ཅག་བྱིས་པ་རྣམས་ལ་ཡང་ཡུད་ལན་རེ་ཙམ་འབྱུང་བ་གང་ཡིན་པ་འདི་ནི་ཤིན་ཏུ་སྐྱོང་ཞིང་སྲུང་བ་ལ་ནན་ཏན་བྱ་སྟེ་འདིའི་ཆེད་དུ་ལུས་དང་སྲོག་འདོར་བར་བྱའི་ལུས་སྲོག་གི་ཆེད་དུ་ནི་འདི་བཏང་བར་མི་བྱའོ། །ཇི་ལྟར་མི་བཏང་ཞེ་ན་ལུས་དང་སེམས་ ཀྱི་གནས་སྐབས་ལ་བརྟག་པ་དང་སེམས་སྲུང་བ་རྒྱས་པར་འཆད་པ་རྣམས་ཏེ་སྐྱེ་བར་དཀའ་བའི་དགེ་བ་བྱང་ཆུབ་ཀྱི་སེམས་མི་ཉམས་པར་སྲུང་བ་འདིས་ནི་སྤྱོད་པ་ལ་འཇུག་པའི་གཞུང་འདི་ཚར་ཕྱིན་པ་ཡིན་ནོ། །
Page: 31 ༄༅། །གཉིས་པ་ལམ་གྱི་དངོས་གཞི་བྱང་ཆུབ་ཀྱི་སེམས་སྒོམ་པ་ལ་གཉིས། སྤྱིའི་དོན་གྱིས་གོ་བར་བྱ་བ་དང་། གཞུང་གི་དོན་གོ་རིམ་དུ་བསྟན་པའོ། །དང་པོ་ནི། བྱང་ཆུབ་སེམས་དེ་བཤད་པར་བྱ། །རྒྱུ་དང་ངོ་བོ་དབྱེ་བ་དང་། ། ཆོ་ག་བསླབ་བྱ་ཕན་ཡོན་དང་། །ཉམས་པའི་ཉེས་དམིགས་ཕྱིར་བཅོས་སོ། །ཞེས་དོན་བརྒྱད་ལས་སྐྱེ་བའི་རྒྱུ་ནི། རྒྱལ་བས་བྱིན་བརླབས་རིགས་སད་དང་། །དད་དང་སྙིང་སྟོབས་ཕུན་ཚོགས་ལྡན། །བྱང་ཆུབ་སེམས་རབ་སྐྱེ་བའི་རྒྱུ། ཁྱད་ པར་བྱམས་བརྩེ་བསྒོམས་པས་སྐྱེ། །ཞེས་བྱ་སྟེ། སངས་རྒྱས་ཀྱི་བྱིན་རླབས་ཀྱི་མཐུས་སྐྱེ་སྟེ་སངས་རྒྱས་འཇིག་རྟེན་དུ་བྱུང་བ་ན་སེམས་ཅན་རྣམས་རང་རང་གི་དགེ་བའི་རྩ་བ་སད་པར་འགྱུར་བའི་ཕྱིར། རིགས་སད་པ་ལ་སྐྱེ་སྟེ། རྒྱན་ལས། ཡོན་ ཏན་ཤིན་ཏུ་རྒྱ་ཆེན་བྱང་ཆུབ་ང་བསྐྱེད་ཕྱིར། །བདེ་དང་སྡུག་བསྔལ་ཆེན་པོ་ཞི་བ་འཐོབ་བྱའི་ཕྱིར། །བདག་དང་གཞན་ལ་ཕན་བདེ་བྱེད་པ་འབྲས་བུའི་ཕྱིར། །རིགས་མཆོག་དེ་ནི་རྩ་བ་བཟང་པོ་ལྟ་བུ་ཡིན། །ཞེས་སོ། །དད་པ་ལས་སྐྱེ་སྟེ། མདོ་ལས། རྒྱལ་དང་རྒྱལ་བའི་ཆོས་ལ་གང་དད་ཅིང་། །རྒྱལ་སྲས་རྣམས་ཀྱི་སྤྱོད་ལ་དད་བྱེད་པ། །བྱང་ཆུབ་བླ་ན་མེད་ལ་དད་གྱུར་ནས། །སྐྱེས་བུ་དམ་པ་རྣམས་ཀྱི་སེམས་སྐྱེའོ། །ཞེས་དང་། བསླབ་བཏུས་ལས། སྡུག་བསྔལ་མཐར་ འབྱིན་འདོད་པ་དང་། །བདེ་བའི་མཐར་ཡང་ཕྱིན་འདོད་པས། །དད་པའི་རྩ་བ་བརྟན་བྱ་སྟེ། །བྱང་ཆུབ་ལ་ཡང་བློ་བརྟན་བྱ། །ཞེས་སོ། །ཆོས་བཅུ་པའི་མདོ་ལས་རྒྱུ་བཞིས་སྐྱེ་བར་གསུངས་ཏེ། སེམས་དེ་ཉིད་ཀྱི་ཕན་ཡོན་མཐོང་བ་དང་། དེ་ བཞིན་གཤེགས་པ་ལ་དད་པ་དང་སེམས་ཅན་གྱི་སྡུག་བསྔལ་མཐོང་བ་དང་དགེ་བའི་བཤེས་གཉེན་གྱིས་ཡང་དག་པར་བསྐུལ་བའོ་ཞེས་སོ། །བྱང་ས་ལས་ཀྱང་རྒྱུ་བཞིར་གསུངས་ཏེ། རིགས་ཕུན་སུམ་ཚོགས་པ་ནི་བྱང་ཆུབ་སེམས་དཔའི་སེམས་སྐྱེ་
Page: 32 བའི་རྒྱུ་དང་པོའོ། །སངས་རྒྱས་དང་བྱང་ཆུབ་སེམས་དཔའ་དང་དགེ་བའི་བཤེས་གཉེན་གྱིས་ཡོངས་སུ་ཟིན་པ་ནི་གཉིས་པའོ། །སེམས་ཅན་རྣམས་ལ་སྙིང་རྗེ་བ་ནི་གསུམ་པའོ། །འཁོར་བའི་སྡུག་བསྔལ་དང་དཀའ་བ་སྤྱོད་པའི་སྡུག་བསྔལ་ཡུན་རིང་ བ་སྣ་ཚོགས་པ་དྲག་པོ་བར་ཆད་མེད་པས་ཀྱང་མི་འཇིགས་པ་འདི་ནི་བྱང་ཆུབ་སེམས་དཔའི་སེམས་སྐྱེ་བའི་རྒྱུ་བཞི་པའོ། །ཞེས་སོ། །ཁྱད་པར་དུ་ཀུན་རྫོབ་བྱང་ཆུབ་ཀྱི་སེམས་ནི་གྲོགས་ཐེག་ཆེན་པ་དང་འགྲོགས་པའི་རྒྱུ་དང་རྒྱུ་རང་བཞིན་གྱིས་ཐེག་ ཆེན་དུ་རིགས་ངེས་པ་དང་དགེ་རྩས་རྒྱས་འགྱུར་གྱི་རིགས་འཕེལ་བ་དང་ཐེག་ཆེན་གྱི་ཆོས་ཐོས་པ་དང་དགེ་བ་མང་དུ་བྱས་པས་རྒྱུད་ཀྱི་བསོད་ནམས་འཕེལ་བ་ལས་བདག་རྒྱུད་ལ་ངང་གིས་སྐྱེས་པའམ་ཡང་ན་གཞན་གྱིས་བདག་ལ་བསྟན་པའི་སྒོ་གསུམ་ གྱི་རྣམ་པར་རིག་བྱེད་ལས་སྡོམ་པ་བླངས་པའི་ཚུལ་གྱིས་སྐྱེ་བ་རྣམས་ཡིན་ལ་དེ་རྣམས་ཀྱི་ནང་ནས་གྲོགས་སྟོབས་ལས་སྐྱེ་བ་ནི་སྤྱིར་མི་བརྟན་པ་ཤས་ཆེ་ལ་རྒྱུའི་སྟོབས་ལ་སོགས་པས་སྐྱེ་བ་ནི་བརྟན་ཞིང་མི་ཟློག་པ་སྟེ། གྲོགས་སྟོབས་རྒྱུའི་ སྟོབས་རྩ་བའི་སྟོབས། །ཐོས་སྟོབས་དགེ་བ་གོམས་པ་ལས། །མི་བརྟན་པ་དང་བརྟན་འབྱུང་བ། །གཞན་གྱིས་བརྟན་པའི་སེམས་སྐྱེད་བཤད། །ཅེས་སོ། །འདིར་གྲོགས་སྟོབས་ཞེས་པ་དགེ་བའི་བཤེས་གཉེན་གྱི་དོན་དུ་གཞན་གྱིས་ འཆད་ཀྱང་ཐེག་ཆེན་གྱི་རྩ་བ་དགེ་བའི་བཤེས་གཉེན་ཡིན་པས་དེ་ལས་སྐྱེས་པ་ནི་ཤིན་ཏུ་བརྟན་པ་ཡིན་ལ། འདི་ནི་གང་ཟག་མ་ངེས་པའི་རིགས་ཅན་ཉན་ཐོས་དང་རང་སངས་རྒྱས་དང་ཐེག་ཆེན་གང་གི་མདོ་སྡེ་ཐོས་པའམ་གྲོགས་དང་འགྲོགས་པས་ དེའི་དབང་དུ་འགྱུར་བ་ཡོད་པས་དེ་ལ་དགོངས་པ་ཡིན་ནོ། །ཁྱད་པར་དོན་དམ་བྱང་སེམས་ཀྱི་རྒྱུ་ནི་སངས་རྒྱས་མཉེས་པར་བྱས་པ་དང་ཚོགས་གཉིས་བསགས་པ་སྟེ། རྫོགས་པའི་སངས་རྒྱས་རབ་མཉེས་བྱས། །བསོད་ནམས་ཡེ་ཤེས་
Page: 33 ༄༅། །ཚོགས་རབ་བསགས། །ཆོས་ལ་མི་རྟོག་ཡེ་ཤེས་ནི། །སྐྱེས་ཕྱིར་དེ་ནི་དམ་པར་འདོད། །། ཅེས་སོ། །ཁྱད་པར་དུ་སྙིང་རྗེ་ལས་བྱང་ཆུབ་ཀྱི་སེམས་སྐྱེ་ཞིང་སྙིང་རྗེ་ནི་བྱམས་པ་ལས་སྐྱེ་བ་སྟེ། རྒྱན་ལས། དེ་ཡི་རྩ་བ་ སྙིང་རྗེར་འདོད། །ཅེས་དང་། སྙིང་རྗེའི་ཆུ་བ་བྱམས་པ་སྟེ། །ཞེས་དང་། རྩ་བ་སྙིང་རྗེ་མེད་གྱུར་ན། །དཀའ་སྤྱོད་བཟོད་པ་ཉིད་མི་འགྱུར། །བློ་ལྡན་སྡུག་བསྔལ་མ་བཟད་ན། །སེམས་ཅན་དོན་སེམས་ཉིད་མི་འགྱུར། །ཞེས་སོ། །དེས་ ན་དང་པོར་བྱམས་པ་བསྒོམ་པ་ནི། དབྱེ་བ་དམིགས་ཡུལ་རྣམ་པ་དང་། །སྒོམ་ཐབས་འབྱོངས་ཚད་ཕན་ཡོན་དྲུག། སེམས་ཅན་ཆོས་དང་དམིགས་མེད་དེ། །བྱམས་པའི་དབྱེ་བ་རྣམ་པ་གསུམ། །དམིགས་དང་མི་དམིགས་ལས་ཤེས་བྱ། ། སེམས་ཅན་ལ་དམིགས་བྱམས་པ་ནི། །རྩ་བའོ་དམིགས་ཡུལ་འགྲོ་ཀུན་ཡིན། །རྣམ་པ་བྱམས་ཤིང་ཡིད་འོང་བློས། །བདེ་དང་ཕྲད་པར་འདོད་པའོ། །དང་པོར་ཕ་མའི་དྲིན་བསམ་ཞིང་། །འགྲོ་ཀུན་ཕ་མར་ཤེས་པས་སྒོམ། །རང་ཉིད་ བདེ་འདོད་ཟད་ན་འབྱོངས། །ཕན་ཡོན་མཆོད་པའི་དམ་པར་འགྱུར། །སྦྱིན་པའི་མཆོག་ཡིན་རང་གཞན་སྲུང་། །བྱམས་ཆོས་ཡོན་ཏན་བརྒྱད་འཐོབ་བོ། །ཞེས་བྱ་སྟེ་དབྱེ་ན་བྱམས་པ་གསུམ་སྟེ། བློ་གྲོས་མི་ཟད་པས་བསྟན་པའི་མདོ་ལས། སེམས་ཅན་ལ་དམིགས་པའི་བྱམས་པ་ནི་སེམས་དང་པོ་བསྐྱེད་པའི་བྱང་ཆུབ་སེམས་དཔའ་རྣམས་ཀྱིའོ་ཆོས་ལ་དམིགས་པའི་བྱམས་པ་ནི་སྤྱོད་པ་ལ་ཞུགས་པའིའོ་དམིགས་པ་མེད་པའི་བྱམས་པ་ནི་མི་སྐྱེ་བའི་ཆོས་ལ་བཟོད་པ་ཐོབ་ པའི་བྱང་ཆུབ་སེམས་དཔའ་རྣམས་ཀྱིའོ་ཞེས་གསུངས་ཏེ། སེམས་ཅན་ལ་དམིགས་ནས་སྐྱེ་བ་དང་བདག་དང་གང་ཟག་དང་སེམས་ཅན་སོགས་སྒྲོ་བཏགས་པ་ཙམ་དུ་གོ་བས་དེར་ཞེན་པ་མེད་ཀྱང་གཞན་དུ་སྣང་བའི་ཆོས་ཙམ་ལ་དམིགས་ནས་སྐྱེ་བ་
Page: 34 དང་ཆོས་གང་ཡང་མི་དམིགས་ན་ཡང་གོམས་པའི་དབང་ཙམ་གྱིས་འཇུག་སྟེ་རྣམ་པ་གསུམ་མོ། །དེ་ལས་འདིར་དང་པོ་སེམས་ཅན་ལ་དམིགས་པའི་བྱམས་པ་དེ་བསྒོམ་པར་བྱའོ། །དེའི་དམིགས་ཡུལ་ནི་སེམས་ཅན་ཐམས་ཅད་ལ་ མཉམ་པར་དམིགས་པའོ། །རྣམ་པའམ་ངོ་བོ་ནི་སེམས་ཅན་ལ་ཡིད་དུ་འོང་ཞིང་བྱམས་པའི་བློ་འཇམ་ཞིང་དེས་པ་མངོན་སུམ་གྱི་རྣམ་པ་ཅན་མས་བུ་གཅིག་པོ་རིང་ཞིག་དུ་མ་མཐོང་བ་ལས་ཕྱིས་དང་པོར་མཐོང་མ་ཐག་པའི་བློ་ལྟ་བུ་སྟེ་དེས་དྲངས་ ནས་འདི་བདེ་ན་ཅི་མ་རུང་སྟེ་སྙམ་པའི་བློ་སྐྱེའོ། །ཆེར་ཞིག་སེམས་ཅན་བདེ་བ་དང་ཕྲད་པར་འདོད་པའི་བློ་བྱམས་པའི་མཚན་ཉིད་ཟེར་མོད། བྱམས་པ་སྐད་ཅིག་མ་དང་པོ་མངོན་སུམ་པ་རྟོག་པའི་ཟླ་མེད་པ་དེ་བྱམས་པ་དངོས་ཡིན་ལ་དེ་ལ་ མཚན་ཉིད་དེས་མ་ཁྱབ་སྟེ་བདེ་བ་དང་ཕྲད་འདོད་ནི་དེ་ལས་ཕྱིས་སྐྱེས་པའི་རྟོག་པ་ཡིན་པའི་ཕྱིར། དེས་ན་ཐར་རྒྱན་དུ། རྣམ་པ་ནི་བདེ་བ་དང་ཕྲད་པར་འདོད་པའི་བློའོ་ཞེས་པའང་ཕྱིས་ཀྱི་བྱེད་ལས་ལ་དགོངས་ནས་རྩིང་གེར་མཛད་པའོ། །སྒོམ་ ཐབས་ནི། རྩ་བ་དྲིན་དྲན་པ་ལ་རག་ལས་པས་སེམས་ཅན་གྱི་དྲིན་བསམ་མོ། །དེ་ཡང་དང་པོར་ཚེ་འདིའི་དྲིན་ཆེ་ཤོས་མའི་དྲིན་བསམ་སྟེ། བརྒྱད་སྟོང་པ་ལས། མ་འདིས་བདག་ཅག་བསྐྱེད་པ་འདི་ནི་དཀའ་བ་བྱེད་པ་བདག་ཅག་གི་སྲོག་ བྱིན་པ་འཇིག་རྟེན་ཀུན་སྟོན་པ་ཡིན་ནོ་ཞེས་ལུས་བསྐྱེད་པ་དཀའ་བ་སྤྱད་པ་སྲོག་བྱིན་པ་འཇིག་རྟེན་བསྟན་པའི་དྲིན་ཏེ་བཞིའོ། །དེ་ཡང་། ནུར་ནུར་མེར་མེར་སོགས་ནས་ལྟོ་བར་བསྐྱངས། །གནོད་པའི་སྤྱོད་སྤངས་ལུས་ཀྱི་དྭངས་མས་བསྐྱེད། ། ངོ་ཚ་ན་ཚ་སྡུག་བསྔལ་ཁྱད་དུ་བསད། །སྐྱེས་ནས་མིག་འབྲས་ལས་ཀྱང་གཅེས་པར་བསྐྱངས། །བདག་ཅག་རྣམ་ཤེས་གཅིག་པུ་འོངས་པ་ལ། །ལུས་རྟེན་ཙམ་འདི་བྱིན་པ་ཁོ་ན་མིན། །བཀྲེས་སྐོམ་ཚ་གྲང་ཕོངས་གུད་ཀུན་ལས་བསྐྱབས། །
Page: 35 ༄༅། །རང་གིས་སྦྱང་ཕངས་ལོངས་སྤྱོད་ཐམས་ཅད་བྱིན། །། བུ་ཡི་ཆེད་དུ་སྡིག་སྡུག་མཐའ་ཡས་བསྒྲུབས། །ཕ་མ་མཛའ་བཤེས་ཐམས་ཅད་བློས་བཏང་སྟེ། །སུ་ཡིན་མེད་པའི་བསམ་བརླག་དེ་ལ་འདམས། ། བྱམས་པས་བལྟས་ཤིང་སྙན་སྨྲས་དགོས་རྒུ་བྱིན། །མེ་ཆུ་དུག་མཚོན་གཡང་ས་ཀུན་ལས་བསྐྱབས། །མོ་རྩིས་གཏོ་དང་ཀློག་དང་ཆོ་ག་སོགས། །ན་དོགས་ཤི་དོགས་རིམ་གྲོར་ཆེ་རྒུ་བྱས། །ཟ་གྱོན་འགྲོ་འདུག་སྨྲ་དང་བཤང་གཅི་འདོར། ། དེ་སོགས་ཐ་དད་སྦྱོང་བ་ཐམས་ཅད་བསླབས། །དེ་བས་བསམ་ཤེས་བུ་ཡིས་བསམས་པ་ན། །ཕ་མའི་དྲིན་ལན་གཞལ་གྱིས་མི་ཁོར་ཡང་། འདི་གཅིག་པུའི་ཕ་མ་མ་ཡིན་ཏེ། །མ་ཡི་ཐུག་མཐའ་རྒྱ་ཤུག་། མ་ཡི་ཐུག་མཐའ་རྒྱ་ཤུག་ཚིག་གུ་ཙམ། །རིལ་བུར་ བགྲངས་ཀྱང་ས་ཡིས་མི་ལང་གསུངས། །ཕ་མ་གཅིག་གཅིག་ཁོ་ན་མ་ཡིན་ཏེ། །མཐའ་ཡས་འགྲོ་ཀུན་གཏན་གྱི་ཕ་མར་མཚུངས། །རེ་རེའི་དྲིན་ལན་གཞལ་གྱིས་མི་ཁོར་རོ། །ཞེས་བྱ་བའི་དོན་བསམས་པས་ཚེ་འདིའི་ཕ་མ་ལ་བྱམས་པ་ ཤས་མི་བཟོད་པ་བ་སྤུ་ལྡང་ཞིང་མཆི་མ་འཁྲུག་པ་རྐང་གི་ཁོང་ནས་སྐྱེས་ཤིང་དེ་བརྟན་པ་ཕ་མ་དྲན་པ་ཙམ་གྱིས་དེ་ལྟར་འབྱུང་ན་མདོ་ལས། འཇིག་རྟེན་གྱི་ཁམས་ཀྱི་ས་རྡོ་དང་རྩི་ཤིང་ནགས་ཚལ་ཐམས་ཅད་རྒྱ་ཤུག་གི་ཚིག་གུ་ཙམ་དུ་སྐྱེས་བུ་གཅིག་གིས་བྱས་ ལ་སྐྱེས་བུ་གཉིས་པས་དེ་རྣམས་གྲངས་སུ་བགྲངས་པས་ཟད་པའི་དུས་སྲིད་ཀྱི་སེམས་ཅན་གཅིག་གིས་བདག་གི་མ་བྱས་པ་ནི་བགྲང་བར་མི་ནུས་སོ་ཞེས་སོགས་ཀྱི་དོན་བསམས་ཏེ་སེམས་ཅན་ཐམས་ཅད་རེ་རེས་དེ་སྙེད་དུ་ཕ་མ་བྱས་ཤིང་དྲིན་དེ་ལྟ་བུ་ཡོད་པ་ཐམས་ཅད་ ལྟ་དེ་ལྟར་མཉམ་ཉིད་དུ་སྐྱེས་ཏེ་སེམས་ཅན་དྲན་པའམ་མཐོང་བ་ཙམ་གྱིས་དེ་ལྟར་འབྱུང་ན་བྱམས་པ་ཚད་མེད་པ་སྟེ། བྱང་ཆུབ་སེམས་དཔས་སེམས་ཅན་ལ། །བུ་གཅིག་པ་ལ་བྱ་བ་བཞིན། །རྐང་གི་ཁོང་ནས་བྱམས་པ་ཆེ། དེ་ལྟར་རྟག་ཕན་
Page: 36 བྱེད་པར་འདོད། །ཅེས་སོ། །དེའི་ཚེ་རང་བདེ་འདོད་ཀྱི་རྟོག་པ་རྨི་ལམ་ན་ཡང་ཟད་དེ་གཞན་བདེ་འབའ་ཞིག་སེམས་པ་ན་བྱམས་པ་འབྱོངས་པ་སྟེ། བློ་ལྡན་རྣམས་ཀྱི་བརྩེ་བས་བྱམས་པ་ནི། ཁ་ན་མ་ཐོ་མེད་ཅིང་འཇིག་རྟེན་འདས། །ཞེས་སོ། །ཕན་ཡོན་ནི། མཆོད་ པའི་ནང་ནས་མཆོག་ཡིན་ཏེ་ཟླ་བ་སྒྲོན་མ་ལས། མཆོད་པ་ཚད་མེད་རྣམ་མང་ཇི་སྙེད་པ། །ཞིང་ནི་བྱེ་བ་ཁྲག་ཁྲིག་གཏམས་སྙེད་དུ། །སྐྱེས་བུ་མཆོག་ལ་མཆོད་པ་དེ་བྱས་པས། །བྱམས་པའི་སེམས་ལ་གྲངས་དང་ཆར་མི་ཕོད། །ཅེས་སོ། །སྦྱིན་པ་ ཆེན་པོར་འགྱུར་ཏེ་རིན་ཆེན་ཕྲེང་བར། རྫེའུ་ཚོང་སུམ་བརྒྱའི་ཁ་ཟས་དག། ཉིན་རེ་དུས་གསུམ་བྱིན་པ་ཡིས། བྱམས་པ་ཡུད་ཙམ་ཐང་གཅིག་གི། །བསོད་ནམས་དག་ལ་ཆར་མི་ཕོད། །ཅེས་དང་། སྔགས་ལས་སྦྱིན་པ་བཞི་པར་གསུངས་ལ་དེའི་ སྔ་མ་སྔ་མ་བས་ཕྱི་མ་ཕྱི་མ་ཕན་ཡོན་ཆེ་བའི་ཕྱིར། རང་གི་སྲུང་བར་འགྱུར་ཏེ་བྱམས་པ་ལ་མཉམ་པར་བཞག་པའི་ལུས་ལ་མཚོན་ཆ་ཡང་མེ་ཏོག་གི་ཆར་དུ་འགྱུར་བར་གསུངས་པ་རྣམས་དང་། གཞན་གྱི་སྲུང་བར་འགྱུར་ཏེ་རྒྱལ་པོ་བྱམས་པའི་སྟོབས་ ཀྱིས་འབངས་ཐམས་ཅད་ལ་བྱམས་པས་ཁྱབ་པར་བྱས་པས་མི་མ་ཡིན་སུས་ཀྱང་དེ་དག་ལ་གནོད་པར་མ་ནུས་པའི་ཕྱིར་རོ། །བྱང་ཆུབ་མ་ཐོབ་ཀྱི་བར་དུ་བྱམས་པའི་ཕན་ཡོན་བརྒྱད་འཐོབ་སྟེ། རིན་ཆེན་ཕྲེང་བར། ལྷ་མི་བྱམས་པར་འགྱུར་བ་དང་། ། དེ་དག་གིས་ཀྱང་སྲུང་བ་དང་། །ཡིད་བདེ་བ་དང་བདེ་མང་དང་། །དུག་དང་མཚོན་གྱིས་གནོད་མེད་དང་། །འབད་པ་མེད་པར་དོན་འཐོབ་དང་། །ཚངས་པའི་འཇིག་རྟེན་སྐྱེ་འགྱུར་ཏེ། །གལ་ཏེ་གྲོལ་བར་མ་གྱུར་ཀྱང་། །བྱམས་ཆོས་ཡོན་ཏན་ བརྒྱད་འཐོབ་བོ། །ཞེས་སོ། །དེ་ལྟར་བྱམས་པ་དང་ལྡན་ན་སེམས་ཅན་ཁོ་ན་སེམས་པར་འགྱུར་ལ་དེའི་ཚེ་སེམས་ཅན་སྡུག་བསྔལ་འབའ་ཞིག་ལ་ལོངས་སྤྱོད་པར་མཐོང་བས་སྙིང་རྗེ་བཟོད་མེད་དུ་འབྱུང་ངོ་། །དེས་ན་སྙིང་རྗེ་ནི། སྙིང་རྗེ་སྒོམ་ཚུལ་བཤད་
Page: 37 ༄༅། །པར་བྱ། །དབྱེ་བ་དམིགས་ཡུལ་རྣམ་པ་དང་། སྒོམ་ཐབས་འབྱོངས་ཚད་ཕན་ཡོན་དྲུག། དམིགས་པའི་དབང་གིས་དབྱེ་བ་གསུམ། དམིགས་པའི་ཡུལ་ནི་སེམས་ཅན་ཀུན། །གཞན་གྱི་སྡུག་བསྔལ་མི་བཟོད་བློ། ། སྙིང་རྗེ་ཡི་ནི་ངོ་བོ་ཡིན། །དེ་ལས་སྡུག་བསྔལ་འབྲལ་འདོད་སྐྱེ། །སྒོམ་ཐབས་མར་གྱུར་འགྲོ་བ་ཀུན། །སྡུག་བསྔལ་གསུམ་གྱིས་མནར་ཚུལ་བསམ། །འབྱོངས་ཚད་འགྲོ་བ་སྐྱོབ་པའི་ཆེད། །ཅི་བྱ་མཚང་བརླག་གིས་དུས་འདའ། །ཕན་ཡོན་ཐེག་ ཆེན་མཆོག་གི་གཞི། །དམན་པའི་གཡང་ལས་རྣམ་པར་སྲུང་། །རྫོགས་སངས་རྒྱས་ཀྱི་རྩ་བའོ། །ཞེས་བྱ་སྟེ། དབྱེ་ན་གསུམ་ལས། སེམས་ཅན་གྱི་སྡུག་བསྔལ་མཐོང་ནས་སྙིང་རྗེ་སྐྱེ་བ་ནི་སེམས་ཅན་ལ་དམིགས་པའི་སྙིང་རྗེའོ། རང་རྒྱུ་ འབྲས་ཤེས་ཤིང་རྟག་པ་དང་རིལ་པོར་འཛིན་པ་ལས་ལོག་པ་ན་དེ་ལྟར་མ་ཤེས་པ་རྣམས་ལ་སྙིང་རྗེ་སྐྱེ་བ་ནི་ཆོས་ལ་དམིགས་པའི་སྙིང་རྗེ་སྟེ། འདི་ལ་ནི་རང་གིས་འདུས་བྱས་མི་རྟག་པར་མཐོང་བ་ན་རྟག་འཛིན་ཅན་རྣམས་ལ་སྙིང་རྗེ་སྐྱེ་བ་སོགས་གཉེན་པོའི་ ཆོས་ཀྱི་དབྱེ་བ་ཇི་སྙེད་པ་དེ་སྙེད་ཀྱིས་དབྱེ་བ་འབྱུང་ངོ་། །རང་གིས་ཆོས་ཐམས་ཅད་སྟོང་པ་ཉིད་དུ་རྟོགས་ཙམ་ན་དེ་ལྟར་མ་རྟོགས་པ་ལ་སྙིང་རྗེ་སྐྱེ་བ་ནི་དམིགས་མེད་ཀྱི་སྙིང་རྗེ་སྟེ། འདི་ནི་ས་གོང་ནས་གོང་དུ་རིམ་གྱིས་འཕེལ་བས་ཚད་མེད་དེ། བྱང་ཆུབ་ སེམས་དཔའ་མཉམ་བཞག་པས། །གོམས་པའི་སྟོབས་ཀྱིས་རྫོགས་པ་ན། །དངོས་འཛིན་གདོན་གྱིས་ཟིན་པ་ལ། ཁྱད་པར་དུ་ཡང་སྙིང་རྗེ་སྐྱེ། །ཞེས་དང་། གཞན་དོན་བརྩོན་ལྡན་སྙིང་རྗེའི་བདག་ཉིད་འདི། གང་ཚེ་མནར་མེད་ལ་ཡང་ དགར་འཛིན་པ། །དེ་འདྲ་བ་དག་སྲིད་ན་གཞན་རྟེན་ཅན། །སྡུག་བསྔལ་འབྱུང་བ་རྣམས་ཀྱིས་ག་ལ་འཇིགས། །ཞེས་སོ། །དེ་ལས་འདིར་སེམས་ཅན་ལ་དམིགས་པའི་སྙིང་རྗེ་བསྒོམ་པར་བྱ་སྟེ། དེ་ལ་དམིགས་པའི་ཡུལ་ནི་སེམས་ཅན་ཐམས་ཅད་
Page: 38 ལ་སྒོམ་པ་སྟེ་ཕ་མར་གྱུར་པ་དེ་ཐམས་ཅད་ལའོ། །ཁྱད་པར་དུ་བཀྲེན་ཞིང་དབུལ་བ་དང་མ་རུངས་པ་སྡིག་པའི་ལས་མི་བཟད་པ་བྱེད་པ་དང་ཞེ་སྡང་དང་ཆགས་པས་ཀུན་ནས་འཁྲུགས་པ་དང་བག་མེད་པ་བྱིས་པ་ལྟ་བུ་དང་གཞན་དབང་གིས་བསྡམས་ཏེ་ བདེ་བར་བྱར་མེད་པ་དང་བདག་ཏུ་འཛིན་པ་ལ་སོགས་པ་ལོག་པར་ཞེན་པ་རྣམས་ལ་ལྷག་པར་དུ་སྐྱེ་སྟེ། བཀྲེན་ལ་བརྩེ་དང་མ་རུངས་པ་ལ་བརྩེ། །ཀུན་འཁྲུགས་ལ་བརྩེ་བག་མེད་རྣམས་ལ་བརྩེ། །ཡུལ་གྱི་གཞན་དབང་ཅན་ལ་སྙིང་རྗེ་དང་། ། ལོག་པར་མངོན་པར་ཞེན་ལ་སྙིང་རྗེའོ། །ཞེས་སོ། །ཡང་ངན་སོང་གི་སྡུག་བསྔལ་མི་བཟད་པ་མྱོང་བ་སོགས་ལས་ཀྱང་རྒྱུ་སྡིག་པ་རྔམས་པོ་ཆེ་འགྱོད་པ་མེད་པར་སྤྱོད་པའི་རྒྱལ་པོ་ལ་སོགས་པ་ལྷག་པར་བརྩེ་བའི་གནས་ཏེ་ཉིན་རེ་ལ་ཡང་ངན་སོང་མུ་མཐའ་ མེད་པའི་རྒྱུ་སོག་པའི་ཕྱིར་རོ། །རྣམ་པ་ནི་གཞན་གྱི་སྡུག་བསྔལ་མ་བཟོད་པའི་ཤེས་པ་རྩེ་གཅིག་པ་མངོན་སུམ་རྟོག་མེད་ཀྱི་རྣམ་པ་ཅན་ནི་སྙིང་རྗེ་དངོས་ཡིན་དེས་དྲངས་ནས་སྡུག་བསྔལ་དང་བྲལ་འདོད་ཀྱི་རྟོག་པ་སྐྱེ་ལ་མ་དཔྱད་པའི་ངོར་དེ་གཉིས་ དུས་གཅིག་ཏུ་ཡོད་པར་འཁྲུལ་ཞིང་ཞིབ་མོར་ནང་དུ་རྗེས་ཀྱི་ཤེས་པས་དཔྱད་པ་ན་གཅིག་པ་ཡང་མ་ཡིན་ལ་མགལ་མེའི་འཁོར་ལོ་ལྟར་འཇུག་པ་མྱུར་བས་མཚམས་ཕྱེད་པར་དཀའ་བ་ཞིག་གོ། སྒོམ་ཚུལ་ནི་རྩ་བའི་མ་ལ་སྦྱར་ནས་སྒོམ་སྟེ། མ་དེ་ མེ་ཕུང་ཆེན་པོས་འཚིག་ན་བདག་གིས་མི་བཟོད་པ་ལྟར་ཚ་དམྱལ་དུ་སྐྱེས་པའི་མ་རྣམས་ལ་སྦྱར་ཏེ་སྒོམ་པ་སོགས་རིམ་གྱིས་སྦྱང་ཞིང་སྡུག་བསྔལ་དང་སྡུག་བསྔལ་གྱི་རྒྱུ་དང་བྲལ་བར་གྱུར་ཅིག་པའི་བློ་དྲག་ཏུ་བསྒོམ་མོ། །ཀྱེ་མ། བདག་གི་ཕ་མ་མང་པོ་ཞིག ། དམྱལ་བ་ཡང་སོས་གནས་སུ་ལྷུང་། །མཐོང་ཚད་དགྲར་འཁྲུལ་བླངས་ཚད་མཚོན། །ཉིན་རེ་ལ་ཡང་ལན་ཁྲིར་འཆི། །ལ་ལ་བསྡུས་འཇོམས་ལྕགས་ཀྱི་རི། །། ཆ་ལང་རྡེབ་འདྲས་འཚིར་ཞིང་འཇོམས། །ཁ་ཅིག་ལུས་ཀུན་ཐིག་
Page: 39 ༄༅། །ནག་བཏབ། །གཤེག་ཅིང་གཞོག་ལ་འདྲལ་ཞིང་འབུགས། །ལ་ལ་ལྕགས་ཀྱི་ཟངས་ཆེན་ནང་། །འབྲས་སམ་སྲན་མ་བཞིན་དུ་འཚེད། །ཁ་ཅིག་མེ་ཕུང་འབར་བ་ཡིས། །གོ་མཚམས་མེད་པར་གཏམས་པའི་ནང་། ། འཇིགས་པའི་སྒྲ་ཙམ་འབྱིན་ལ་བརྟེན། །མང་ཞིག་ལྕགས་སྲེག་འབར་བའི་ཁང་། །དཔག་ཚད་ཁྲི་ཕྲག་མང་ལྡན་པར། །མེ་ལྕེ་ནག་པོས་ཀུན་ནས་སྲེག། ལ་ལ་རོ་ཉེའི་འདམ་ན་བྱིང་། །ལ་ལ་རབ་མེད་ཆུ་བོར་ལྷུང་། །ལ་ལ་རལ་ གྲིའི་ཆར་གྱིས་གཏུབ། །བདག་གི་བུ་འདིའི་ཁ་འཚིག་ཅེས། །ཟས་སྐོམ་ཚ་བར་ཕུས་འདེབས་པ། །ཚུན་གྱིས་བདག་ཉིད་བསྐྱངས་པའི་མ། །དེ་ཀུན་མི་བཟད་ཚ་བ་ཡི། །སྡུག་བསྔལ་འདི་འདྲ་ད་ལྟ་མྱོང་། །ཁ་ཅིག་བསྐལ་པར་བསགས་ པ་ཡི། །ཆབ་རོམ་མུན་ནག་ཆེན་པོ་རུ། །གྲང་བས་ཉེན་ཏེ་གས་ཤིང་འཇིག། དེ་དག་ཀུན་གྱིས་སྔོན་ཡང་ཡང་། །རང་གི་དྲོད་ཀྱིས་བདག་བསྲོས་ན། །ད་ལྟ་གྲང་དམྱལ་འདི་ལྟ་མྱོང་། །རང་གི་ནུ་ཞོས་བདག་བསྐྱངས་ཅིང་། ། ཟས་སྐོམ་འཇམ་པོས་གསོ་བྱེད་པའི། །བདག་གི་མ་དེ་ད་ལྟ་ན། །ཡི་དྭགས་ཁབ་ཀྱི་ཁ་ཅན་གྱུར། །ལོ་བརྒྱ་མང་པོ་དག་ཏུ་ཡང་། །ཆུ་ཐིགས་ཙམ་ཡང་མ་མྱོང་ངོ་། །བདག་ལ་བཟའ་བཏུང་ཚུན་བསླབས་པའི། །མ་རྣམས་དུད་འགྲོའི་གནས་ ན་ལྟུང་། །བཟའ་དང་བཟའ་མིན་ཙམ་ཞིག་ཀྱང་། །རྨོངས་པའི་མུན་པས་མ་འཚལ་ལོ། །བདག་ནི་མེ་ཆུ་གཡང་ས་ལས། །སྲུང་བྱེད་ཕ་མ་དེ་ཀུན་ནི། །མཐོ་རིས་ལྷ་དང་མིར་གྱུར་ཀྱང་། །ངན་འགྲོའི་གཡང་ལ་རང་གིས་འཕྱོང་། ། ཞེ་སྡང་མེ་དང་སྲེད་པའི་ཆུ་ཆུས། །མནར་ལ་བདག་གིས་ཕན་མ་ནུས། །དེ་བཞིན་མིར་སྐྱེས་ཐམས་ཅད་ཀྱང་། །སྡུག་བསྔལ་རྣམ་པ་བརྒྱད་ཀྱིས་མནར། །ལྷ་མིན་འཐབ་རྩོད་ཡང་སོས་འདྲ། །འདོད་པའི་ལྷར་སྐྱེས་འཆི་འཕོ་ཡི། །སྡུག་
Page: 40 བསྔལ་རིགས་དྲུག་ཀུན་ལས་ལྷག། ཅེས་སྡུག་བསྔལ་གྱི་སྡུག་བསྔལ་བསམ་པ་དང་། ཇི་ལྟར་ཕྲ་མེན་བུ་རྣམས་ནི། །མ་ལ་དགའ་བར་སེམས་པ་དང་། །ལྕགས་ཀྱུའི་རྩེ་ཡི་ཁ་ཟས་ལ། །ཉ་ཡིས་ཞིམ་བློས་མྱང་བ་དང་། །དུག་ཅན་ཁ་ཟས་ ཟ་བ་ལྟར། །ཚེ་འདིའི་ལོངས་སྤྱོད་སྣ་རེ་ལ། །བདེ་བར་འཁྲུལ་ཏེ་ཕ་མའི་ཚོགས། །འདི་ཀུན་སྨྱོན་པ་ལྟ་བུར་སྣང་། །ཞེས་འགྱུར་བའི་སྡུག་བསྔལ་དང་། ནད་ཆེན་ལྡན་པ་གཉིད་ལོག་དང་། །སྦྱར་བའི་དུག་ཟོས་མ་སྨིན་ལྟར། ། ཁམས་གོང་ལྷ་ཡི་འགྲོ་བ་ཡང་། །རྟག་ཏུ་མ་རིག་གཉིད་ཀྱིས་ཁྱབ། །མདོར་ན་འདུ་ཤེས་འདུ་བྱེད་ཙམ། །རྣམ་པར་ཤེས་ཙམ་སྡུག་བསྔལ་ཏེ། །ཟུག་རྔུ་རབ་ཏུ་མ་ཞི་བ། །འབྲས་དང་གནོད་བྱེད་ཉིད་ཡིན་ལ། །ཡིན་པར་མ་ཤེས་རེ་ སྙིང་རྗེ། །ཞེས་བྱ་སྟེ་དེ་ལ་སོགས་པའི་དོན་བསམ་ཞིང་སྡུག་བསྔལ་དང་བྲལ་བར་འདོད་པའི་བློ་སྐྱེད་པ་དང་དེ་རྣམས་ཀྱི་ཆེད་དུ་འཕགས་པ་སྤྱན་རས་གཟིགས་དབང་ཕྱུག་ལ་གསོལ་བ་དྲག་ཏུ་གདབ་པར་བྱའོ། །། འབྱོངས་པའི་ཚད་ནི་སྒོ་གསུམ་ གྱིས་མི་བཟོད་པ་ཙམ་དང་གཞན་སྡུག་བསྔལ་ལས་སྐྱོབ་པའི་ཆེད་དུ་མི་བཟོད་པའི་གནས་མེད་པ་ན་འབྱོངས་པའོ། །ཕན་ཡོན་ནི་ཐེག་པ་ཆེན་པོའི་ལམ་གྱི་དངོས་གཞི་ཡིན་ཏེ་སྤྱན་རས་གཟིགས་ཀྱི་རྣམ་ཐར་ལས། གཅིག་ཡོད་ན་སངས་རྒྱས་ཀྱི་ཆོས་ ཐམས་ཅད་ལག་མཐིལ་དུ་བཞག་པ་ལྟ་བུར་འགྱུར་ཏེ་གཅིག་གང་ཞེ་ན་སྙིང་རྗེ་ཆེན་པོའོ་ཞེས་དང་། ཆོས་ཡང་དག་པར་སྡུད་པའི་མདོ་ལས། བཅོམ་ལྡན་འདས་འདི་ལྟ་སྟེ་འཁོར་ལོས་བསྒྱུར་བའི་རྒྱལ་པོའི་འཁོར་ལོ་རིན་པོ་ཆེ་གང་དུ་མཆིས་པ་དེར་དཔུང་ གི་ཚོགས་ཐམས་ཅད་མཆིའོ་དེ་བཞིན་དུ་སྙིང་རྗེ་ཆེན་པོ་གང་དུ་མཆིས་པ་དེར་སངས་རྒྱས་ཀྱི་ཆོས་ཐམས་ཅད་མཆིའོ་ཞེས་སོ། །ཉན་རང་ལས་སྲུང་སྟེ། སྙིང་རྗེས་ཞི་ལ་མི་གནས་དང་། །ཞེས་སོ། །རྫོགས་པའི་སངས་རྒྱས་ཀྱི་རྩ་བ་ལྟ་བུ་ཡིན་ཏེ་དེ་བཞིན་
Page: 41 ༄༅། །གཤེགས་པའི་གསང་བའི་མདོ་ལས། གསང་བའི་བདག་པོ་ཐམས་ཅད་མཁྱེན་པའི་ཡེ་ཤེས་དེ་ནི་སྙིང་རྗེའི་རྩ་བ་ལས་བྱུང་བ་ཡིན་ནོ་ཞེས་སོ། །དེ་ལྟར་བྱམས་པ་དང་སྙིང་རྗེ་རིམ་པར་སྒོམ་པ་ནི་བྱང་ཆུབ་ཀྱི་སེམས་དངོས་སུ་སྐྱེ་ བའི་རྒྱུ་གྲུང་པོ་ཡིན་ནོ། །ངོ་བོ་ནི། འགྲོ་ཀུན་འདྲེན་ཕྱིར་རྫོགས་སངས་རྒྱས། །བདག་གིས་འཐོབ་པར་འདོད་པ་དང་། །སྟོང་ཉིད་སྙིང་རྗེ་དབྱེར་མེད་པ། །བྱང་ཆུབ་སེམས་ཀྱི་ངོ་བོ་ཡིན། །ཞེས་བྱ་སྟེ་མདོ་སྡེ་རྒྱན་ལྟར་ན་དོན་བཞི་དང་ལྡན་པས་བྱང་ཆུབ་དང་སེམས་ ཅན་ལ་དམིགས་པའི་སེམས་ཁྱད་པར་ཅན་ཡིན་ཏེ། སྤྲོ་བ་ཆེ་དང་རྩོམ་པ་ཆེ། །དོན་ཆེ་བ་དང་འབྱུང་བ་ཆེ། །བྱང་ཆུབ་སེམས་དཔའི་སེམས་པ་སྟེ། །དོན་གཉིས་ལྡན་པའི་སེམས་འབྱུང་བ། །ཞེས་སོ། །དེ་ཡང་དགོས་པ་ཁྱད་པར་ཅན་ དུ་མཐོང་ནས་མི་སྐྱོ་བས་འཇུག་པ་སྤྲོ་བ་ཆེན་པོ་དང་བསམ་གྱིས་མི་ཁྱབ་པའི་གོ་ཆ་བགོ་བ་བརྩོན་པ་ཆེན་པོ་དང་རང་གཞན་ཐམས་ཅད་ཀྱི་དོན་གྱི་མཆོག་སྒྲུབ་པ་དོན་ཆེན་པོ་དང་བླ་ན་མེད་པའི་བྱང་ཆུབ་གདོན་མི་ཟ་བར་འགྲུབ་པ་འབྱུང་བ་ཆེན་པོ་སྟེ་རྣམ་པ་ བཞིའི་སྒོ་ནས་འབྲས་བུ་བྱང་ཆུབ་དང་ཆེད་དུ་བྱ་བ་སེམས་ཅན་ལ་དམིགས་པའི་བློ་གཉིས་ལྡན་གྱི་དོན་ནོ། །ཡུམ་གྱི་རྒྱན་ལྟར་ན་གཞན་དོན་དུ་སངས་རྒྱས་འཐོབ་འདོད་ཀྱི་སེམས་ཏེ། སེམས་སྐྱེད་པ་ནི་གཞན་དོན་ཕྱིར། །ཡང་དག་རྫོགས་པའི་ བྱང་ཆུབ་འདོད། །ཞེས་སོ། །དེ་ཡང་བྱང་ཆུབ་རང་སེམས་ཅན་གྱིས་ནི་སེམས་སྐྱེད་ཀྱི་དམིགས་པ་བསྟན་པ་ཡིན་ཏེ། བྱང་ས་ལས། དེ་ལྟ་བས་ན་སེམས་སྐྱེད་པ་དེ་ནི་བྱང་ཆུབ་ལ་དམིགས་པ་དང་སེམས་ཅན་ལ་དམིགས་པ་ཡིན་ནོ་ཞེས་སོ། །བྱང་ཆུབ་ ལ་དམིགས་པ་ནི་ཐེག་པ་ཆེན་པོའི་ཡེ་ཤེས་འཚོལ་བར་དམིགས་པ་སྟེ། མདོ་རྒྱན་ལས། དེ་བཞིན་དེ་ཡི་ཡེ་ཤེས་འཚོལ་བར་དམིགས་པའོ། །ཞེས་སོ། །སེམས་ཅན་ལ་དམིགས་པ་ནི་སེམས་ཅན་མ་ལུས་པ་ལ་དམིགས་པ་སྟེ། ནམ་མཁའི་མཐའས་
Page: 42 གཏུགས་གྱུར་པ་ཇི་ཙམ་པར། །སོགས་སོ། །དབྱེ་བ་ནི། དབྱེ་སྒོ་ས་མཚམས་དཔེ་ངོ་བོ། །ས་མཚམས་ཀྱིས་ཕྱེ་མོས་སོགས་བཞི། །དཔེ་ཡིས་ས་སོགས་ཉི་ཤུ་གཉིས། །ངོ་བོ་ཀུན་རྫོབ་དོན་དམ་གཉིས། །ཀུན་རྫོབ་སྨོན་འཇུག་རྣམ་གཉིས་ སོ། །སངས་རྒྱས་འཐོབ་འདོད་སྨོན་པ་སྟེ། །སྒྲུབ་པར་བྱེད་པ་འཇུག་པའོ། །རྒྱལ་སྲས་བསླབ་པ་ཁས་བླངས་ནས། །བྱང་སེམས་སྡོམ་པ་ལྡན་པར་བརྗོད། །ཅེས་བྱ་སྟེ། དབྱེ་སྒོ་གསུམ་ལས། ས་མཚམས་ཀྱིས་ཕྱེ་ན་ཚོགས་སྦྱོར་གྱི་དུས་མོས་པ་ ལས་བྱུང་བ་དེ་ནས་ས་བདུན་པ་རིང་དུ་སོང་བའི་བར་ལ་ལྷག་བསམ་དག་པ་ལས་བྱུང་བ་དག་ས་གསུམ་ལ་རྣམ་པར་སྨིན་པ་ལས་བྱུང་བ་སངས་རྒྱས་ཀྱི་སར་སྒྲིབ་པ་སྤངས་པའི་སེམས་སྐྱེད་དང་བཞིར་དབྱེ་སྟེ། སེམས་སྐྱེད་དེ་ནི་ས་རྣམས་ལ། །མོས་དང་ ལྷག་བསམ་དག་པ་དང་། །རྣམ་པར་སྨིན་པ་གཞན་དུ་འདོད། །དེ་བཞིན་སྒྲིབ་པ་སྤངས་པའོ། །ཞེས་སོ། །ཕལ་པོ་ཆེ་ལས་སོ་སོ་སྐྱེ་བོའི་སེམས་སྐྱེད་དང་དེ་ནས་ས་བཅུ་ལ་སེམས་སྐྱེད་བཅུར་གསུངས་སོ། གྲོགས་དང་དཔེས་དབྱེ་ན་ཉི་ཤུ་རྩ་ གཉིས་ཏེ། དེ་ཡང་ས་གསེར་ཟླ་བ་མེ། །གཏེར་དང་རིན་ཆེན་འབྱུང་གནས་མཚོ། །རྡོ་རྗེ་རི་སྨན་བཤེས་གཉེན་དང་། །ཡིད་བཞིན་ནོར་བུ་ཉི་མ་གླུ། །རྒྱལ་པོ་མཛོད་དང་ལམ་པོ་ཆེ། །བཞོན་པ་བཀོད་མའི་ཆུ་དང་ནི། །སྒྲ་སྙན་ཆུ་བོ་སྤྲིན་ རྣམས་ཀྱིས། །རྣམ་པ་ཉི་ཤུ་རྩ་གཉིས་སོ། །ཞེས་སོ། །དེའི་དོན་ཡང་མདོ་རྒྱན་གྱི་འགྲེལ་པ་ལྟར་ན། འདུན་པ་བསམ་སྦྱོར་ལྷག་བསམ་དང་། །ཕ་རོལ་ཕྱིན་པ་རྣམ་པ་དྲུག། ཚད་མེད་མངོན་ཤེས་བསྡུ་དངོས་དང་། སོ་སོ་ཡང་དག་ རིག་སྟོན་པ། །ཚོགས་གཉིས་ཞི་ལྷག་གཟུངས་དང་སྤོབས༎བགྲོད་གཅིག་ལམ་དང་ཐབས་མཁས་ལྡན། །ཞེས་བྱ་ལ། མངོན་རྟོགས་རྒྱན་ལྟར་ན། འདུན་པ་བསམ་པ་ལྷག་བསམ་སྦྱོར། །ཕ་རོལ་ཕྱིན་བཅུ་མངོན་པར་ཤེས། །ཚོགས་གཉིས་
Page: 43 ༄༅། །བྱང་ཕྱོགས་བརྩེ་ལྷག་མཐོང་། །གཟུངས་སྤོབས་ཆོས་ཀྱི་སྐྱེད་ཚལ་དང་། །བགྲོད་གཅིག་ལམ་དང་ཆོས་ཀྱི་སྐུའོ། །ཞེས་སྡོམ་། ཞེས་སྡོམ་དུ་བྱས་པ་ལས་འདུན་པ་དང་སར་མཚུངས་པ་ནས་ཐབས་མཁས་པའམ་ཆོས་ཀྱི་སྐུ་དང་སྤྲིན་ དུ་མཚུངས་པའི་བར་སྦྱར་རོ། །འགྲེལ་པ་དོན་གསལ་ལས་ནི། དེ་ལ་སེམས་སྐྱེད་དང་པོ་གསུམ་ནི་ཆུང་ངུ་དང་འབྲིང་དང་ཆེན་པོ་ཉིད་ཀྱིས་ལས་དང་པོ་པའི་སས་བསྡུས་ལ་དེའི་འོག་ཏུ་གཅིག་ནི་ས་དང་པོ་ལ་འཇུག་པའི་ལམ་གྱིས་བསྡུས་སོ། ། དེའི་འོག་ཏུ་བཅུ་ནི་རབ་ཏུ་དགའ་བ་ལ་སོགས་པ་ས་བཅུས་བསྡུས་ཏེ་མཐོང་བ་དང་སྒོམ་པའི་ལམ་གྱི་སྤྱོད་ཡུལ་ཅན་ཡིན་ནོ། །དེའི་འོག་ཏུ་ལྔ་ནི་ཁྱད་པར་གྱི་ལམ་གྱིས་བསྡུས་སོ། །དེའི་འོག་ཏུ་སེམས་སྐྱེད་པ་གསུམ་ནི་སྦྱོར་བ་དང་དངོས་གཞི་ དང་མཇུག་གི་སྒོ་ནས་སངས་རྒྱས་ཀྱི་སས་བསྡུས་ཏེ་དེ་ལྟར་ན་སེམས་སྐྱེད་པའི་རབ་ཏུ་དབྱེ་བ་ནི་ལས་དང་པོ་པའི་ས་ནས་བཟུང་སྟེ་སངས་རྒྱས་ཀྱི་སའི་བར་གྱིས་བསྡུས་པ་ཡིན་ནོ་ཞེས་ཐ་མ་གསུམ་སངས་རྒྱས་ཀྱི་སར་བཤད་ཅིང་། རྒྱན་དུ། རྒྱལ་སྲས་ རྣམས་ཀྱི་སེམས་སྐྱེད་པ། །སྤྲིན་དང་འདྲ་བར་བསྟན་པ་ཡིན། །ཞེས་སྤྲིན་ལྟ་བུ་བྱང་སེམས་ཀྱི་སེམས་སྐྱེད་དུ་བཤད་ཀྱང་འགལ་བ་མེད་དེ་དོན་གསལ་དུ་བྱེ་བྲག་གི་མིང་གིས་ཞིབ་མོར་བསྟན་ཞིང་རྒྱན་དུ་སྤྱིའི་མིང་གིས་རགས་པར་བསྟན་པའི་ ཕྱིར་རོ། །ངོ་བོའི་སྒོ་ནས་དབྱེ་ན་ཀུན་རྫོབ་དང་དོན་དམ་གཉིས་ཏེ་དགོངས་པ་ངེས་འགྲེལ་ལས། དེ་ཡང་རྣམ་པ་གཉིས་ཏེ་དོན་དམ་པའི་བྱང་ཆུབ་ཀྱི་སེམས་དང་ཀུན་རྫོབ་བྱང་ཆུབ་ཀྱི་སེམས་སོ་ཞེས་སོ། །དོན་དམ་བྱང་ཆུབ་སེམས་ནི་སྟོང་ཉིད་སྙིང་རྗེའི་ སྙིང་པོ་ཅན་གསལ་ལ་མི་གཡོ་བ་སྤྲོས་པའི་མཐའ་དང་བྲལ་བ་སྟེ་དེ་ཉིད་ལས། དེ་ལ་དོན་དམ་བྱང་ཆུབ་ཀྱི་སེམས་དེ་ནི་འཇིག་རྟེན་ལས་འདས་པ་སྤྲོས་པའི་མཐའ་དང་བྲལ་བ་ཤིན་ཏུ་གསལ་བ་དོན་དམ་པའི་ཡུལ་ཅན་དྲི་མ་མེད་པ་མི་གཡོ་བ་རླུང་
Page: 44 མེད་པའི་མར་མེའི་རྒྱུན་ལྟར་ཤིན་ཏུ་གསལ་བའོ་ཞེས་སོ། །ཀུན་རྫོབ་སེམས་སྐྱེད་ཀྱང་དེ་ཉིད་ལས་ཀུན་རྫོབ་བྱང་ཆུབ་ཀྱི་སེམས་ནི་སྙིང་རྗེས་སེམས་ཅན་མཐའ་དག་འཁོར་བ་ནས་འདོན་པར་དམ་བཅས་པའོ་ཞེས་སོ། དོན་དམ་སེམས་ སྐྱེད་དེ་ནི་ཆོས་ཉིད་ཀྱིས་ཐོབ་པ་ས་དང་པོ་ཡན་ཆད་ན་ཡོད་པ་སྟེ་མདོ་རྒྱན་འགྲེལ་པར། དོན་དམ་པའི་སེམས་བསྐྱེད་པ་དེ་ཡང་ས་དང་པོ་རབ་ཏུ་དགའ་བ་ལ་ཡིན་པས་ཞེས་སོ། །ཀུན་རྫོབ་སེམས་སྐྱེད་ཀྱང་མདོར་བསྡུས་ན་སྨོན་པ་དང་འཇུག་པ་ གཉིས་སོ། །འདི་གཉིས་ཀྱི་ཁྱད་པར་ལ་དྀཥྚ་སེ་ན་ལ་སོགས་པ་ནི་འཇིག་རྟེན་པའི་ལམ་གྱིས་བསྡུས་པ་སྨོན་པ་དང་འདས་ལམ་གྱིས་བསྡུས་པ་འཇུག་པར་བཞེད་ཅིང་ཨ་བྷྱ་དང་སྨྲ་ཏི་སོགས་ནི་འདུན་ལྡན་སེམས་སྐྱེད་སོགས་དང་པོ་གསུམ་སྨོན་པ་དང་ཕྱི་མ་ བཅུ་དགུ་འཇུག་པར་འདོད་དེ། འདུན་སོགས་གསུམ་གྱི་དབྱེ་བ་ཡིས། །སྨོན་པའི་སེམས་ནི་རྣམ་པ་གསུམ། །འཇུག་པའི་སེམས་ཞེས་བྱ་བ་ནི། །རྣམ་པ་བཅུ་དགུ་དག་ཏུ་འདོད། །ཅེས་སོ། །རྒྱ་མཚོའི་སྤྲིན་ལ་སོགས་བྱང་ཆུབ་ཀྱི་བློ་ཆོ་གས་ མ་སྐྱེད་པ་སྨོན་པ་དང་ཆོ་གས་སྐྱེད་པ་འཇུག་པར་འདོད་ལ། རྒྱ་ཆེན་སྤྱོད་རྒྱུད་དང་ཇོ་བོ་ཆེན་པོ་ནི་འབྲས་བུ་ལ་དམ་བཅའ་བ་སྨོན་པ་དང་དེའི་རྒྱུ་ལ་དམ་བཅའ་བ་འཇུག་པར་བཞེད་དེ། མངོན་པ་ཀུན་ལས་བཏུས་ལས། སེམས་སྐྱེད་པ་ནི་གཉིས་ཏེ། ཁྱད་པར་ཅན་མ་ཡིན་པ་དང་ཁྱད་པར་ཅན་ནོ། །ཁྱད་པར་ཅན་མ་ཡིན་པ་ནི་ཀྱེ་མ་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་ཤོག་ཅིག་སྙམ་པའོ། །ཁྱད་པར་ཅན་ནི་དེ་ལྟར་སྦྱིན་པའི་ཕ་རོལ་ཏུ་ཕྱིན་ པ་རྫོགས་པར་ཤོག་ཅིག་སྙམ་པ་ནས་ཤེས་རབ་ཀྱི་བར་རོ་ཞེས་སོ། །ཡང་ཁ་ཅིག་ཕྱིར་མི་ལྡོག་པ་མ་ཐོབ་ཀྱི་བར་དུ་སྨོན་པ་དང་ཐོབ་ནས་འཇུག་པར་འདོད་པ་ལ་སོགས་པའོ། །ཟབ་མོ་ལྟ་རྒྱུད་དང་སློབ་དཔོན་ཉིད་ཀྱི་བཞེད་པ་ནི། འགྲོ་བར་འདོད་དང་
Page: 45 ༄༅། །འགྲོ་བ་ཡི། །བྱེ་བྲག་ཇི་ལྟར་ཤེས་པ་ལྟར། །དེ་བཞིན་མཁས་པས་འདི་གཉིས་ཀྱི། །བྱེ་བྲག་རིམ་བཞིན་ཤེས་པར་བྱ། །ཞེས་འཆད་པར་འགྱུར་བ་ལྟར་སེམས་ཅན་ལ་སྙིང་རྗེ་དང་སངས་རྒྱས་མཐོང་བ་ལ་སོགས་པའི་རྒྱུ་ལས་ བྱང་ཆུབ་འཐོབ་པར་འདོད་པའི་བློ་ཙམ་སྐྱེ་བ་ཆོ་ག་ལ་མ་བསྟེན་པ་དང་། ཡང་། ཇི་ལྟར་སྔོན་གྱི་བདེ་གཤེགས་ཀྱིས། །བྱང་ཆུབ་ཐུགས་ནི་བསྐྱེད་པ་ལྟར། །དེ་བཞིན་དུ་ནི་བདག་གིས་ཀྱང་། །བྱང་ཆུབ་སེམས་ནི་བསྐྱེད་པར་བགྱི། །ཞེས་ ཁས་བླངས་པ་ལྟ་བུ་ཆོ་གས་བླངས་པ་འགྲོ་བར་འདོད་པ་ལྟ་བུ་ནི་སྨོན་པའི་སེམས་དང་དེའི་སྡོམ་པ་ཡང་དག་པར་བླངས་པ་ཕྱིན་ཆད་འགྲོ་བཞིན་པ་ལྟ་བུ་འཇུག་པའི་སེམས་སུ་བཞེད་ལ། དབུ་མ་སྒོམ་རིམ་ལས་ཀྱང་། འགྲོ་བ་མཐའ་དག་ལ་ཕན་པའི་ སངས་རྒྱས་སུ་གྱུར་ཅིག་ཅེས་ཐོག་མར་དོན་དུ་གཉེར་བ་ནི་སྨོན་པའི་སེམས་སོ། །གང་ཡན་ཆད་སྡོམ་པ་བཟུང་སྟེ་ཚོགས་རྣམས་ལ་ཞུགས་པ་དེ་ནི་འཇུག་པའི་སེམས་སོ་ཞེས་སོ། །ས་བཟང་པ་ན་རེ། ཤེར་འབྱུང་གི་འགྲེལ་ཆེན་དུ་སེམས་དེ་བྱང་ ཆུབ་ཀྱི་སྤྱོད་པས་མ་ཡིན་པ་སྨོན་པ་དང་ཟིན་པ་འཇུག་པར་འདོད་དོ་ཞེས་ཟེར་ཡང་ཤེར་འབྱུང་ནི་སློབ་དཔོན་ཞི་བའི་ལྷ་ཉིད་དང་བཞེད་པ་མཐུན་ཏེ་འགྲེལ་ཆེན་ལས་སེམས་སྔ་མ་སྔོན་དུ་སོང་བ་ཉིད་གང་ནས་བཟུང་སྟེ་སྡོམ་པ་ལེན་པའི་ཚོགས་རྣམས་ལ་རབ་ཏུ་ འཇུག་པ་དེ་ནི་འཇུག་པ་བྱང་ཆུབ་ཀྱི་སེམས་སོ་ཞེས་བྱང་སྡོམ་གྱིས་ཟིན་མ་ཟིན་ལ་གསལ་བར་བཤད་དོ། །སློབ་དཔོན་ཞི་བའི་ལྷའི་དགོངས་པ་ཡང་སྨོན་སེམས་ལ་ཆོ་ག་མཐའ་གཅིག་ཏུ་མི་དགོས་པར་བཞེད་པ་ཡང་མ་ཡིན་ཏེ་སེམས་སྐྱེད་དང་སྡོམ་ པ་སོ་སོར་ལེན་པ་དང་སྟབས་གཅིག་ཏུ་ལེན་པ་གཉིས་ཀ་གསུངས་པའི་ཕྱིར་རོ། །ལེགས་བཤད་བསྡུས་པར། ཇོ་བོས་འབྲས་བུ་ལ་དམ་བཅའ་བ་སྨོན་སེམས་དང་རྒྱུ་ལ་དམ་བཅའ་བ་འཇུག་སེམས་སུ་གསུངས་པ་ཕྱོགས་སྔར་བྱས་ནས་བྱང་ཆུབ་ཀྱི་
Page: 46 རྒྱུ་ལ་དམ་བཅའ་བ་ལ་སེམས་སྐྱེད་ཀྱིས་མ་ཁྱབ་པའི་སྐྱོན་ཡོད་དེ། སེམས་སྐྱེད་པ་ནི་གཞན་དོན་ཕྱིར། །ཡང་དག་རྫོགས་པའི་བྱང་ཆུབ་འདོད། །ཅེས་པའི་མཚན་ཉིད་མ་ཚང་བའི་ཕྱིར་དང་། བྱང་ས་ལས་ཀྱང་། སེམས་སྐྱེད་པ་དང་བྱང་ ཆུབ་སེམས་དཔའི་བསླབ་པ་ཞེས་མིང་འདོགས་སོ་སོར་མཛད་པའི་ཕྱིར་ཞེས་འགོག་པ་ལ་ནི་སྙིང་པོ་མ་མཐོང་སྟེ། ཐལ་བསྡུས་ལས། དེ་ལ་སྨོན་པའི་བྱང་ཆུབ་ཀྱི་སེམས་ནི་འབྲས་བུ་ལ་དམ་བཅའ་བ་ཡིན་ལ་འཇུག་པའི་བྱང་ཆུབ་ཀྱི་སེམས་ནི་ རྒྱུ་ལ་དམ་བཅའ་བ་ཡིན་ན་ཞེས་པའི་དགོངས་པ་བླངས་ནས་བདག་གིས་གཞན་དོན་དུ་སངས་རྒྱས་འཐོབ་པར་བྱའོ་ཞེས་བསམ་པ་ནི་འབྲས་བུ་ལ་དམ་བཅའ་བ་སྨོན་སེམས་ཡིན་ལ། བདག་གིས་སེམས་ཅན་གྱི་དོན་དུ་སངས་རྒྱས་འཐོབ་པར་ བྱའོ་དེའི་ཆེད་དུ་བདག་གིས་སྦྱིན་པའི་གཏོང་བ་དང་གཏོང་བ་ཆེན་པོ་བྱའོ་སྙམ་པ་འདི་ལྟ་བུ་རྒྱུ་སྒྲུབ་པར་དམ་བཅའ་བ་སྟེ་འཇུག་པའི་སེམས་སོ། །དེའི་ཚེ་ཕྱི་མ་ལ་སེམས་སྐྱེད་ཀྱི་མཚན་ཉིད་མ་ཚང་བར་བརྒལ་དུ་ཅི་ཡོད། ཀུན་བཏུས་ཀྱི་ ལུང་དང་ཡང་འགལ་ལོ། །སེམས་སྐྱེད་དང་སྡོམ་པའི་མིང་ཐ་དད་པས་ཀྱང་བརྒལ་ལན་འདི་ལ་ཕན་གནོད་དུ་འགྱུར་བ་མ་མཐོང་ངོ་། །སྤྱིར་བདག་ཀྱང་དེ་བཞིན་གཤེགས་པའི་སྐུ་འདི་ལྟ་བུར་གྱུར་ན་ཅི་མ་རུང་སྙམ་པའི་སྨོན་པ་ལ་སེམས་ སྐྱེད་དུ་བྱས་པ་དང་། བདག་ཀྱང་མ་འོངས་པ་ན་སྐུ་འདི་ལྟ་བུ་འཐོབ་པར་གྱུར་ཅིག་ཅེས་སྨོན་ལམ་ལ་སེམས་སྐྱེད་དུ་བྱས་པ་དང་། སྦྱིན་པ་འདི་ཡིས་ཤཱཀྱའི་རིགས་སྐྱེས་ཏེ། །ཡོན་ཏན་རིགས་རུས་མཉམ་པའི་སངས་རྒྱས་གྱུར། ། སྲིད་མཐའི་བར་གྱི་ཉམ་ཐག་བཅིངས་པ་རྣམས། །ཞི་བ་རྒྱ་ཆེན་འཇིགས་མེད་སྒྲོལ་བར་ཤོག། ཅེས་པ་ལྟ་བུ་བསྔོ་བ་ལ་སེམས་སྐྱེད་དུ་བཏགས་པ་ལྟ་བུ་སྐབས་དུ་མར་ཡོད་ལ། སངས་རྒྱས་འདོད་པའི་བློ་ལ་ཡང་བདག་འཇིག་རྟེན་
Page: 47 ༄༅། །འདྲེན་པ་མེད་པ་རྣམས་ཀྱི་འདྲེན་པར་གྱུར་ཅིགཅེས་སོགས་རྒྱལ་པོ་རང་ཉིད་རྒྱལ་སར་ཕྱུང་ནས་འབངས་ལ་ཁྲིམས་བཅའ་བར་འདོད་པ་ལྟ་བུ་རྒྱལ་པོ་ལྟ་བུའི་སེམས་སྐྱེད་དང་། དགེ་བ་འདིས་བདག་དང་སེམས་ཅན་ ཐམས་ཅད་སངས་རྒྱས་འཐོབ་པར་གྱུར་ཅིག་ཅེས་བསྔོས་པ་མཉན་པ་བདག་གཞན་ལྷན་ཅིག་ཏུ་ཕ་རོལ་ཏུ་ཕྱིན་འདོད་པ་ལྟ་བུའི་སེམས་དང་། བདག་ནི་བྱང་ཆུབ་རིངས་ཚུལ་དུ། །འཚང་རྒྱར་མོས་ཤིང་སྤྲོ་བ་མེད། །སེམས་ཅན་གཅིག་གི་དོན་དུ་ཡང་། ། ཕྱི་མཐའི་བར་དུ་གནས་པར་བགྱི། །ཞེས་པ་ལྟ་བུ་བདག་དོན་ལ་མི་རྟོག་པ་རྫི་བོ་ལྟ་བུའི་སེམས་སྐྱེད་པ་སྟེ་དུ་མར་ཡོད་ལ། བྱང་ཆུབ་སེམས་དཔའ་ཆེན་པོ་རྣམས་ནི་བྱང་ཆུབ་འདོད་པར་མི་བྱེད་དེ་བྱང་ཆུབ་སེམས་དཔའི་སྤྱོད་པ་བསྟན་པའི་མདོ་ལས། ཁྱེའུ་ རིན་ཆེན་བྱིན་སྐྱེས་ནས་ལོ་གསུམ་ལོན་པ་སྟོན་པ་ཐུགས་དང་པོ་བསྐྱེད་པའི་ཚེ་དེས་བཟོད་པ་ཐོབ་ནས་བསྐལ་བ་སུམ་འབུམ་ལོན་པའི་བྱང་ཆུབ་སེམས་དཔའ་དེས་སྟོན་པ་སྲང་དུ་གཤེགས་པ་ན་མ་མའི་ཕང་པ་ནས་མཆོངས་ཏེ་རྩེ་བའི་ཡོ་བྱད་ཀྱི་གསེར་གྱི་ པདྨ་དེ་བཞིན་གཤེགས་པ་ལ་ཕུལ་ནས། དེ་ཕྱིར་མེ་ཏོག་ཕུལ་བ་འདིས། བདག་ལ་རྣམ་སྨིན་འབྲས་མ་གྱུར། །དངོས་པོ་ཐམས་ཅད་གཅོད་སླད་དུ། །པདྨ་འདི་ནི་བདག་གིས་ཕུལ། །ཞེས་རྣམ་སྨིན་མེད་པར་བསྔོས་པ་དང་། ཚངས་པ་ ཁྱད་པར་སེམས་ཀྱི་མདོ་ལས། ལི་ཙཱ་ཝི་དྲ་བ་ཅན་གྱི་འོད་སྟོན་པས་བྱང་ཆུབ་ཏུ་ལུང་བསྟན་པའི་ཚེ། ས་བདག་ནི་བྱང་ཆུབ་མི་འདོད་བྱང་ཆུབ་ཏུ་མི་རྟོག་འཚང་རྒྱ་བར་མི་འདོད་ན་ཅིའི་སླད་དུ་ལུང་བསྟན། བཀའ་བསྩལ་པ། དཔེར་ན་མི་ཞིག་ གིས་མེ་ཆེན་པོ་སྦར་ཏེ་རྩྭ་དང་ཤིང་དང་སྦར་སྦུར་དག་འཛུད་པར་བྱེད་ཅིང་འཚིག་པར་མ་གྱུར་ཅིག་ཅེས་ཟེར་ན་དེ་འཚིག་པར་མི་འགྱུར་རམ། གསོལ་པ་དེ་ནི་མ་ལགས་ཏེ་འཚིག་པར་འགྱུར་རོ། །བཀའ་བསྩལ་པ། བཞིན་དུ་བྱང་ཆུབ་སེམས་དང་བླ་
Page: 48 མེད་དགེ་བའི་རྩ་བ་རྒྱ་ཆེར་བསགས་ཏེ་བྱང་ཆུབ་མི་དམིགས་མི་འདོད་ན་ཡང་བྱང་ཆུབ་འཐོབ་པར་འགྱུར་རོ་ཞེས་སོགས་རྒྱ་ཆེར་བཤད་པས་བྱང་ཆུབ་སེམས་དཔའ་ནམ་མཁའ་ལྟ་བུ་རྣམས་ཀྱི་སེམས་སྐྱེད་ཀྱི་རྒྱ་མཚོ་མཐའ་ཡས་པས་འཇུག་པ་ནི་རང་ ཅག་བྱིས་པ་རྣམས་ཀྱི་སྤྱོད་ཡུལ་མ་ཡིན་ནོ། །འོ་ན་སངས་རྒྱས་འཐོབ་པར་མི་འདོད་ན་སྨོན་སེམས་བཏང་བར་འགྱུར་རོ་ཞེ་ན་སྔར་སངས་རྒྱས་དེ་དངོས་པོར་འཛིན་པ་ལས་ལོག་སྟེ་ནམ་མཁའ་ལ་ཐོབ་མ་ཐོབ་མི་དམིགས་པ་ལྟར་ཤེས་པས་ གང་འཐོབ་པ་དང་གང་གིས་འཐོབ་པ་སོགས་ཀྱི་དངོས་འཛིན་ལོག་པས་དོན་དམ་སེམས་སྐྱེད་ཀྱི་མིང་དུ་འཕོས་པ་ཡིན་གྱི་སྨོན་པ་བཏང་བ་ནི་དངོས་འཛིན་གྱི་བྱེ་བྲག་ཁོ་ནའོ། །གཞན་ཡང་སྐྱེས་བུ་དམ་པ་བྱང་ཆུབ་སེམས་དཔའ་རྣམས་མཐོང་བ་ན་ དེ་ལྟ་བུར་བདག་ཉིད་སྨོན་པར་བྱེད་པ་ཡང་རྗེས་སུ་མཐུན་པའི་བྱང་ཆུབ་ཀྱི་སེམས་ཙམ་དུ་འགྱུར་ཏེ་མི་སྐྱེ་བའི་བཟོད་པར་བསྔོས་པའི་ཕ་རོལ་ཏུ་ཕྱིན་པ་དྲུག་ནི་རིང་དུ་འཁོར་བའི་ཕ་རོལ་ཏུ་ཕྱིན་པ་ཞེས་བཤད་པའི་ཕྱིར་རོ། །ཕྲ་རགས་ཀྱིས་དབྱེ་ན་ རགས་པ་བརྡ་ལས་བྱུང་བ་དང་ཕྲ་བ་ཆོས་ཉིད་ཀྱིས་ཐོབ་པ་སྟེ་དེང་སང་ནི་ཆོ་གས་སྐྱེ་བ་དང་སྒོམ་སྟོབས་ཀྱིས་སྐྱེ་བ་ལ་གྲགས་སོ། །ཆོ་ག་ལས་སྐྱེས་པ་བྱང་ཆུབ་སེམས་དཔའི་བསླབ་པ་ལ་སློབ་པར་ཁས་བླངས་པའི་སྟོབས་ཀྱིས་ཐོབ་པ་ནི་སྐབས་འདིར་ བྱང་ཆུབ་སེམས་དཔའི་སྡོམ་པ་ཞེས་བྱ་སྟེ། ཇི་ལྟར་སྔོན་གྱི་བདེ་གཤེགས་ཀྱིས། །བྱང་ཆུབ་ཐུགས་ནི་བསྐྱེད་པ་དང་། །བྱང་ཆུབ་སེམས་དཔའི་བསླབ་པ་ལ། །དེ་དག་རིམ་བཞིན་གནས་པ་ལྟར། །བདག་ཀྱང་འགྲོ་ལ་ཕན་དོན་དུ། །བྱང་ ཆུབ་སེམས་ནི་སྐྱེད་བགྱི་ཞིང་། །བྱང་ཆུབ་སེམས་དཔའི་བསླབ་པ་ལ། །རིམ་པ་བཞིན་དུ་བསླབ་པར་བགྱི། །ཞེས་པའི། བྱང་ཆུབ་ཐུགས་ནི་སྐྱེད་བགྱི་ཞིང་། །ཞེས་པས་སེམས་སྐྱེད་དང་། བྱང་ཆུབ་སེམས་དཔའི་བསླབ་པ་ལ། རིམ་པ་
Page: 49 ༄༅། །བཞིན་དུ་བསླབ་པར་བགྱི། །ཞེས་པས་བྱང་སྡོམ་སྟེ་གཉིས་ཀ་ལྷན་ཅིག་ཏུ་ལེན་པའོ། །ཡང་ན་དང་པོར། ཇི་ལྟར་སྔོན་གྱི་བདེ་གཤེགས་ཀྱིས། །བྱང་ཆུབ་ཐུགས་ནི་བསྐྱེད་པ་ལྟར། །དེ་བཞིན་འགྲོ་ལ་ཕན་དོན་དུ། ། བྱང་ཆུབ་སེམས་ནི་སྐྱེད་པར་བགྱི། །ཞེས་ཁས་བླངས་པ་སེམས་སྐྱེད་ཡིན་ལ་བྱང་སྡོམ་མ་ཡིན་པའི་མུ་སྟེ་འདི་ལ་བྱང་ཆུབ་འཐོབ་པའི་ཆེད་དུ་སྦྱིན་སོགས་ལ་བརྩོན་ན་འཇུག་སེམས་དང་། སེམས་ཙམ་བསྐྱེད་ལ་བརྩོན་པ་མི་བྱེད་ན་སྨོན་རྐྱང་སྟེ་ འདི་དག་ལ་རང་སྟོབས་ཀྱིས་སྐྱེས་པ་དང་གཞན་རྐྱེན་གྱིས་སྐྱེས་པ་དང་ཁས་བླངས་ཀྱིས་སྐྱེས་པ་སྟེ་སྣ་ཚོགས་པ་ཡོད་དོ། །ཡང་དང་པོར་སེམས་སྐྱེད་ཐོབ་པ་ཞིག་ཕྱིས་བྱང་སྡོམ་ཁོ་ན་ལེན་པར་འདོད་ནས། ཇི་ལྟར་སྔོན་གྱི་བདེ་གཤེགས་ཀྱིས། ། བྱང་ཆུབ་སེམས་དཔའི་བསླབ་པ་ལ། །དེ་དག་རིམ་བཞིན་གནས་པ་ལྟར། །བདག་ཀྱང་འགྲོ་ལ་ཕན་དོན་དུ། །བྱང་ཆུབ་སེམས་དཔའི་བསླབ་པ་ལ། །རིམ་པ་བཞིན་དུ་བསླབ་པར་བགྱི། །ཞེས་ཁས་བླངས་པ་ནི་བྱང་སྡོམ་ཁོ་ན་ལེན་པའི་མུའོ། ། མདོར་ན་གཞན་དོན་དུ་སངས་རྒྱས་འཐོབ་པའི་ཕྱིར་སྤང་བྱ་སྤོང་སེམས་དང་བསྒྲུབ་བྱ་སྒྲུབ་སེམས་ཀྱི་བློ་བརྟན་པོར་སྐྱེས་པ་མཚན་གཞི། བྱང་སྡོམ་ཡིན་པར་མཚོན། གཞན་དོན་དུ་སངས་རྒྱས་འཐོབ་པའི་ཆེད་དུ་བྱང་ཆུབ་སེམས་དཔའི་བསླབ་པ་ལ་སློབ་པར་ དམ་བཅས་པའི་སེམས་ཁྱད་པར་ཅན་མཚན་ཉིད་དོ། །དབྱེ་ན་ཚུལ་ཁྲིམས་རྣམ་པ་གསུམ་སྟེ་མི་མཐུན་ཕྱོགས་སྤོང་བ་སྡོམ་པའི་ཚུལ་ཁྲིམས་དང་རང་རྒྱུད་ལ་དགེ་བ་སྒྲུབ་པ་དགེ་བ་ཆོས་སྡུད་ཀྱི་ཚུལ་ཁྲིམས་དང་གཞན་ལ་ཕན་བདེ་སྒྲུབ་པ་ སེམས་ཅན་དོན་བྱེད་ཀྱི་ཚུལ་ཁྲིམས་ཏེ་ལྷག་པའི་ཚུལ་ཁྲིམས་ཀྱི་བསླབ་པ་ཡིན་ལ། དེས་སེམས་ཏིང་ངེ་འཛིན་ཐོབ་པ་ལྷག་པའི་ཏིང་ངེ་འཛིན་དང་། དེ་ལས་ཆོས་རབ་ཏུ་རྣམ་འབྱེད་ཀྱི་ཤེས་རབ་ཐོབ་པ་ལྷག་པའི་ཤེས་རབ་སྟེ་རྒྱུ་དང་འབྲས་
Page: 50 བུའི་གོ་རིམ་མེད་ན་མི་འབྱུང་དུ་གནས་སོ། །འདིར་ལེགས་བཤད་བསྡུས་པར། གཞན་དོན་དུ་བྱང་སྡོམ་གྱི་ཆོ་གས་བླངས་པའི་སེམས་པ་དགེ་བ་རྒྱུན་ཆགས་བྱང་སྡོམ་གྱི་མཚན་ཉིད། དེ་ཡང་གཞན་དོན་དུ་བྱང་སྡོམ་གྱི་ཞེས་པས་དམན་པའི་ སྡོམ་པ་གསལ། སེམས་པ་དགེ་བ་ཞེས་པས་སྡོམ་མིན་བསལ། རྒྱུན་ཆགས་ཞེས་པས་བར་མའི་དགེ་བ་བསལ་བར་འདོད་ཀྱང་། མ་ངེས་ཏེ། ས་བརྒྱད་པའི་བྱང་སེམས་འགོག་ལ་མཉམ་པར་བཞག་པའི་གནས་སྐབས་ཀྱི་དེ་རྒྱུད་ཀྱི་བྱང་ སྡོམ་ཆོས་ཅན། མཚན་ཉིད་དེར་ཐལ་ཏེ་བྱང་སྡོམ་ཡིན་པའི་ཕྱིར། འདོད་ན་སེམས་པ་དགེ་བ་རྒྱུན་ཆགས་ཅན་ཡིན་པར་ཐལ། གཞན་དོན་དུ་བྱང་སྡོམ་གྱི་ཆོ་གས་བླངས་པའི་སེམས་པ་དགེ་བ་རྒྱུན་ཆགས་ཅན་ཡིན་པའི་ཕྱིར། འདོད་ན་དེ་དེ་ མ་ཡིན་པར་ཐལ། སེམས་སེམས་བྱུང་གི་རྒྱུ་བ་དང་བྲལ་བའི་ཕྱིར་ཏེ། འགོག་པའི་སྙོམས་འཇུག་ལ་སྙོམས་པར་ཞུགས་པའི་སྐབས་ཡིན་པའི་ཕྱིར། གཞན་ཡང་བྱང་སྡོམ་གྱི་བྱ་བའི་གཙོ་བོ་གཞན་དོན་ཡིན་པས་བྱང་སྡོམ་གྱི་ཆོ་གས་ བླངས་པ་ཞེས་པས་གཞན་དོན་དོན་གཉེར་དུ་འགྲུབ་པའི་ཕྱིར་དེ་ཟུར་དུ་སྨོས་པའང་ཟློས་པའི་སྐྱོན་ནོ། །ཡང་ས་བཟང་པས། སེམས་སྐྱེད་ནི་སྔར་བཤད་པ་ལྟར་སྨོན་འཇུག་གཉིས་ཀའི་བདག་ཉིད་ཅན་ཡིན་ལ། སྡོམ་པ་ནི་ལུས་དང་ལོངས་ སྤྱོད་ལ་ལྟོས་པ་མེད་པར་སྒོ་གསུམ་གྱིས་རྣམ་པ་ཐམས་ཅད་དུ་གཞན་ལ་ཕན་པར་ཞུགས་པ་འཇུག་པའི་བདག་ཉིད་ཅན་ཏེ་ཐེག་པ་ཆེན་པོ་པའི་རྒྱུད་ཀྱིས་བསྡུས་པའི་ཚུལ་ཁྲིམས་སོ་ཞེས་ཟེར་བ་ཡང་དཔྱད་པའི་གཞི་སྟེ་ལུས་དང་ལོངས་སྤྱོད་ལ་ ལྟོས་པ་མེད་པར་སྒོ་གསུམ་གྱིས་རྣམ་པ་ཐམས་ཅད་དུ་གཞན་ལ་ཕན་པར་ཞུགས་པ་དེ་བརྟེན་པ་སྡོམ་པའི་ཆོས་ཡིན་ནམ་རྟེན་གང་ཟག་གི་ཆོས་ཡིན། དང་པོ་ལྟར་ན་སྡོམ་པ་རང་གི་ལུས་དང་ལོངས་སྤྱོད་ལ་ལྟོས་པ་མེད་པར་སྒོ་གསུམ་གྱིས་གཞན་
Page: 51 ༄༅། །ཕན་བྱེད་པ་དེ་བྱང་ཆུབ་སེམས་དཔའ་ལས་ཀྱང་ངོ་མཚར་ཆེའོ། །གཉིས་པ་ལྟར་ན་བྱང་སྡོམ་རྒྱུད་ལྡན་ཐམས་ཅད་ལུས་དང་ལོངས་སྤྱོད་ལ་ལྟོས་པ་མེད་པར་སྒོ་གསུམ་གྱིས་རྣམ་པ་ཐམས་ཅད་དུ་གཞན་ལ་ཕན་པར་ཞུགས་ པ་ཡིན་ན་ར་དང་རི་དྭགས་ཀྱི་ཤིང་རྟས་འགྲོ་བ་ལྟ་བུའི་བྱང་ཆུབ་སེམས་དཔའ་མི་སྲིད་པ་དང་བྱང་ཆུབ་སེམས་དཔའ་ཕྱིར་ལྡོག་པ་མི་སྲིད་པ་དང་བྱང་ཆུབ་སེམས་དཔའ་ཐམས་ཅད་དབང་པོ་ཡོངས་སུ་སྨིན་པ་ཤ་སྟག་ཏུ་ཐལ་བས་འདི་འགྲུབ་ན་སྨོན་པའི་གནས་སུ་བཟང་ཡང་མི་འགྲུབ་སྟེ་ལྷ་ཆེན་པོ་དང་སྒྲ་ ཆེན་པོ་དང་སྙིང་སྟོབས་ཆེན་པོ་མཆེད་གསུམ་གྱིས་སྟག་མོ་བཀྲེས་པ་བུ་བཅས་མཐོང་བ་ན་ཡང་སུ་རང་གི་ཤས་འདིའི་བཀྲེས་པ་སེལ་བ་སུ་ཡོད་ཅེས་གླེང་བ་ན་གཅེན་གཉིས་ཀྱིས་དེ་ལྟ་བུ་སུས་ཀྱང་མི་ནུཤིང་གཅུང་གིས་རང་ཅག་རྣམས་ལྟ་བུ་ལ་ དཀའ་བ་ཡིན་མོད་ཀྱི་སྐྱེས་བུ་ཆེན་པོ་ཚེ་རབས་མང་པོར་གོམས་པ་རྣམས་ལ་དེ་ལྟ་བུ་ག་ལ་དཀའ་ཞེས་སྨྲས་ཤིང་མཐར་གཅེན་གཉིས་བྲིད་དེ་རང་གི་ལུས་བྱིན་པའི་འོག་ཏུ་གཅེན་གཉིས་ཀྱིས་ཀྱང་། འདི་ཡིས་བདག་གི་ཉེས་པ་བསྒྲགས་པ་སྙམ། ཞེས་བརྗོད་ པར་བཤད་པའི་ཕྱིར་དང་བྱང་ཆུབ་སེམས་དཔའ་རྣམས་ཉིད་ཀྱི་ནང་ཚན་གྱི་དབང་པོ་རྣོ་བརྟུལ་དང་བརྩོན་པ་ཆེ་ཆུང་དང་ཐབས་ལ་མཁས་མི་མཁས་ཀྱི་ཁྱད་པར་མཐའ་ཡས་པ་དེ་ལྟ་བུ་ནི་སེམས་ཅན་གྱི་ཁམས་གཞན་ལ་མ་མཐོང་བའི་ཕྱིར་རོ། །ཅི་ཚུལ་ཁྲིམས་གསུམ་ པོ་འདི་དག་གཅིག་གམ་ཐ་དད་ཅེ་ན། སྤྱིར་བྱེད་ལས་ཀྱི་ཆ་ནས་ཐ་དད་པར་བཤད་ལ་ཆོས་ཀྱི་སྦྱིན་པ་ལྟ་བུ་དངོས་སེམས་ཅན་དོན་བྱེད་ཀྱི་ཚུལ་ཁྲིམས་སུ་འགྱུར་ཞིང་རྒྱུ་དེས་རང་རྒྱུད་ལ་དགེ་བའི་ཆོས་སྡུད་དུ་འགྱུར་བ་དང་། ཤུགས་ཀྱིས་དེ་ནས་བསྟན་ པ་ལྟར་སྤང་བྱ་སྤོང་བས་བདག་གཞན་གཉིས་ཀ་ལ་ཉེས་སྤྱོད་སྡོམ་པའི་ཚུལ་ཁྲིམས་སྐྱེད་པ་སོགས་རེ་རེ་ཡང་བརྒྱུད་ནས་ཚུལ་ཁྲིམས་གསུམ་གར་དུ་འགྱུར་བ་ཤིན་ཏུ་མང་ལ་དཔེར་ན་ཆུ་གཅིག་གིས་དྲི་མ་བཀྲུ་བ་དང་བརླན་པ་དང་ངོམས་པ་སྟེ་བྱེད་ལས་གསུམ་བྱེད་པ་ལྟར་དོན་གྱིས་ཚུལ་ཁྲིམས་
Page: 52 གསུམ་གར་དུ་འགྱུར་བ་ཤིན་ཏུ་མང་ངོ་། །ཚུལ་ཁྲིམས་གསུམ་དུ་ངེས་པའི་རྒྱུ་མཚན་ནི། བྱང་ས་ལས། ཉོན་མོངས་པ་མེད་པར་རང་གི་སེམས་གནས་པར་བྱེད་པ་དང་བདག་གིས་སངས་རྒྱས་ཀྱི་ཆོས་ཡོངས་སུ་སྒྲུབ་པར་བྱེད་པ་དང་སེམས་ཅན་ཡོངས་སུ་སྨིན་ པར་བྱེད་པ་སྟེ་བྱང་ཆུབ་སེམས་དཔའི་བྱ་བ་ཐམས་ཅད་གསུམ་པོ་དེ་དག་ཏུ་ས་སྤྱིར་ཟད་པའི་ཕྱིར་རོ་ཞེས་སོ། །གོ་རིམ་ཡང་གཙོ་བོར་སྔ་མ་ལས་ཕྱི་མ་འབྱུང་བ་རྒྱུ་འབྲས་ཀྱི་གོ་རིམ་དུ་བཞག་གོ། བཞི་པ་ཆོ་ག་ལ་ཐེག་པ་ཆེན་པོ་ནི་ནམ་མཁའ་ལྟར་མཐའ་ཡས་པས་ སྤྱིར་བསམ་གྱིས་མི་ཁྱབ་ཀྱང་ད་ལྟ་རྒྱ་བོད་ན་ཐེག་ཆེན་གྱི་ཤིང་རྟའི་སྲོལ་ཆེན་པོ་རྣམ་པ་གཉིས་ཏེ་འཕགས་པ་འཇམ་དཔལ་གྱིས་སློབ་དཔོན་ཀླུ་སྒྲུབ་རྗེས་སུ་བཟུང་སྟེ་དེ་ལས་བརྒྱུད་པ་ཟབ་མོ་ལྟ་བའི་གཞུང་དང་། འཕགས་པ་བྱམས་པས་སློབ་དཔོན་ ཐོགས་མེད་རྗེས་སུ་བཟུང་སྟེ་དེ་ལས་བརྒྱུད་པ་རྒྱ་ཆེན་སྤྱོད་པའི་གཞུང་སྟེ་གཉིས་ཡིན་ལ་དེས་ན་བྱང་ཆུབ་ཏུ་སེམས་སྐྱེད་པའི་ཆོ་གའང་ཤིང་རྟའི་སྲོལ་གཉིས་སོ། །ཆོས་རྗེ་ས་སྐྱ་པས། བྱང་ཆུབ་སེམས་སྐྱེད་ཆོ་ག་ཡང་། །དབུ་མ་སེམས་ཙམ་ལུགས་གཉིས་ ཡོད། །དཔེར་ན་ནས་ཀྱི་ས་བོན་ནི། །གྲང་དྲོ་ཀུན་ཏུ་སྐྱེ་བ་ལྟར། །དེ་བཞིན་དབུ་མ་པ་ཡི་ཡང་། །སེམས་སྐྱེད་མཆོག་དམན་ཀུན་ལ་སྐྱེ། །དཔེར་ན་འབྲས་ཀྱི་ས་བོན་ནི། །དྲོ་བའི་ཡུལ་དུ་སྐྱེ་བ་ལྟར། །དེ་བཞིན་སེམས་ཙམ་པ་ཡི་ཡང་། ། སེམས་སྐྱེད་སྡིག་ཅན་ལ་མི་སྐྱེ། །ཞེས་སོགས་བཤད་པ་ནི་ཐོགས་མེད་སྐུ་མཆེད་སེམས་ཙམ་པ་ཡིན་པས་དེ་ལས་བརྒྱུད་པའི་ཕྱིར་སེམས་ཙམ་པའི་ལུགས་སོ་ཞེས་བསམས་པར་ཟད་མོད་ཀྱང་། བྱམས་པ་ཐོགས་མེད་ཀྱིས་གསུངས་ཤིང་། །ཀླུ་ སྒྲུབ་ཀྱང་ནི་བཞེད་པ་ཡི། །ཞེས་པའི་འགྲེལ་པར། བྱམས་པ་ནི་ས་བཅུ་པ་ལ་གནས་པའོ་ཐོགས་མེད་ནི་ས་གསུམ་པ་ལ་གནས་པའོ་ཀླུ་སྒྲུབ་ནི་ས་དང་པོ་ལ་གནས་པའོ་ཞེས་བཤད་པས་ཀླུ་སྒྲུབ་ས་དང་པོ་བ་ལས་ཐོགས་མེད་ས་གསུམ་པ་བ་རྟོགས་
Page: 53 ༄༅། །པ་དམའ་བར་ཡང་མི་རིགས་ལ། དབྱིག་གཉེན་གདུལ་བའི་དོན་དུ་སེམས་ཙམ་གསུངས་པར་བཤད་པས་ཀྱང་སེམས་ཙམ་པ་དངོས་མ་ཡིན་པར་གྲུབ་ཅིང་དབྱིག་གཉེན་གྱིས་ཡུམ་དོན་སེམས་ཙམ་དུ་བཀྲལ་བ་ཡང་ རང་གིས་ཡུམ་དོན་རྟོགས་པ་སེམས་ཙམ་གྱི་ལྟ་བའི་དྲིན་ལས་བྱུང་བའི་དྲིན་དུ་གཟོ་བའི་ཆེད་ཡིན་པར་བཤད་པས་ཀྱང་འགྲེལ་པ་རྩོམ་དུས་ན་དབྱིག་གཉེན་ཡང་དབུ་མའི་ལྟ་བ་ཐུགས་ལ་འཁྲུངས་པར་དོན་གྱིས་འཕངས་པ་ཡིན་པའི་ཕྱིར་རོ། ། གཞན་ཡང་དབུ་སེམས་ནི་ལྟ་བའི་མིང་ཡིན་ལ་དེ་ཡང་རང་རིག་བདེན་པར་འདོད་པ་སེམས་ཙམ་པ་དང་དེ་ཡང་མི་བདེན་པར་འདོད་པ་དབུ་མ་པ་ཡིན་ལ་སེམས་སྐྱེད་ཀྱི་ཆོ་ག་འདི་གཉིས་ལ་རང་རིག་ཁས་ལེན་མི་ལེན་གྱི་ཁྱད་པར་བཤད་པ་མེད་པའི་ཕྱིར། དབྱིག་གཉེན་སེམས་ཙམ་པ་ཡིན་དུ་བཅུག་ཀྱང་དེ་ལས་བརྒྱུད་པས་སེམས་ཙམ་པའི་ལུགས་སུ་འགྱུར་ན་འོ་ན་རྒྱ་ཆེན་སྤྱོད་གཞུང་གི་སེམས་སྐྱེད་ཆོ་ག་འདི་ཆོས་ཅན་དབུ་མའི་ལུགས་ཡིན་པར་ཐལ་ཏེ་དབུ་མ་པ་ལས་བརྒྱུད་པའི་ཕྱིར་སྟེ་འཕགས་གྲོལ་ བཙུན་གྲོལ་གཉིས་དབུ་མ་པ་ཡིན་པའི་ཕྱིར། དེས་ན་རྒྱ་ཆེན་སྤྱོད་གཞུང་ནི་སེམས་ཙམ་གྱི་ལྟ་བ་མིན་ཏེ་སེམས་ཙམ་གྱི་ལྟ་བ་ལ་ངེས་པར་དབུ་མའི་རིགས་པས་གནོད་དེ་རྣལ་འབྱོར་པ་ཡང་བློ་ཁྱད་ཀྱིས་གོང་མ་གོང་མ་རྣམས་ཀྱིས་གནོད་པའི་ཕྱིར། རྒྱ་ཆེན་སྤྱོད་གཞུང་གིས་ཆོས་ཐམས་ཅད་མཚན་ཉིད་གསུམ་གྱིས་གཏན་ལ་ཕབ་སྟེ་དག་པ་གཉིས་ལྡན་གྱི་ཆོས་ཉིད་གཙཙོ་བོར་འཆད་པ་དང་། ཟབ་མོ་ལྟ་བའི་གཞུང་ཆོས་ཐམས་ཅད་བདེན་གཉིས་ཀྱིས་གཏན་ལ་ཕབ་སྟེ་ཇི་ལྟར་བློས་བཏགས་པ་ལྟར་ མི་གནས་པ་རང་བཞིན་རྣམ་དག་གི་སྟོང་ཉིད་གཙོ་བོར་སྟོན་པ་འདི་གཉིས་ནི་གཅིག་གི་ངེས་དོན་ལ་གཅིག་གི་རིགས་པས་གནོད་པ་མ་ཡིན་ཏེ་གདུལ་བྱའི་དབང་གིས་འཆད་ཚུལ་ཐ་དད་ཀྱང་གཉིས་ཀ་ལས་མཐོང་བའི་ལམ་དུ་ཆོས་ཉིད་མཐོང་བ་ན་ཐ་དད་པ་
Page: 54 མ་དམིགས་པའི་ཕྱིར། དཔེ་དེ་དག་ཀྱང་བྱིས་པ་མགུ་བྱེད་དུ་ཟད་དེ། ནས་ཀྱི་ས་བོན་ཆོས་ཅན་གྲང་དྲོ་ཀུན་ཏུ་མི་སྐྱེ་བར་ཐལ་ཏེ་ཧ་ཅང་གྲང་བར་མི་སྐྱེ་སྟེ་གངས་རིའི་རྩེར་མི་སྐྱེ་བའི་ཕྱིར། ཧ་ཅང་དྲོ་བར་མི་སྐྱེ་སྟེ་མེའི་ནང་དུ་མི་སྐྱེ་བའི་ཕྱིར། འདོད་ན་གྲང་ དྲོ་ཀུན་ཏུ་སྐྱེ་བ་ཉམས་སོ། །སེམས་ཙམ་ལུགས་ཀྱི་སེམས་སྐྱེད་སྡིག་ཅན་ལ་མི་སྐྱེ་ན་ནི་སོ་སྐྱེ་ལ་མི་སྐྱེ་བར་འགྱུར་སྟེ་སྡིག་པ་གཏན་མེད་ཀྱི་སོ་སྐྱེ་ཡང་དཀའ་བའི་ཕྱིར་དང་ཡང་མཚམས་མེད་བྱས་པ་ལྟ་བུའི་སྡིག་པ་ཅན་འགྱོད་འཇིགས་དྲག་པོས་ བྱང་ཆུབ་ཀྱི་སེམས་ལ་འཇུག་ན་ཁྱད་པར་དུ་སྐྱེ་རིགས་པའི་ཕྱིར་རོ། །གཞན་ཡང་ཟབ་མོ་ལྟ་རྒྱུད་ཀྱི་ཆོ་གས་སེམས་བསྐྱེད་ནས་སླར་རྒྱ་ཆེན་སྤྱོད་གཞུང་གི་སེམས་སྐྱེད་ལེན་མི་རིགས་པར་ཐལ། དེ་གཉིས་ལ་དབུ་སེམས་ཀྱི་ཁྱད་པར་ཡོད་ལ་སྔར་ དབུ་མའི་ལྟ་བ་སྐྱེས་ནས་ཕྱིས་སེམས་ཙམ་པར་འགྱུར་བ་མི་སྲིད་པའི་ཕྱིར། གཞན་ཡང་སྐྱབས་འགྲོ་དང་ཡན་ལག་བདུན་པ་དང་ལམ་གྱི་ཆོས་མཐའ་དག་ལ་དབུ་སེམས་གཉིས་སུ་དབྱེ་རིགས་པར་ཐལ། སེམས་སྐྱེད་ལ་དེ་ལྟར་དབྱེ་རིགས་པའི་ ཕྱིར། གལ་ཏེ་དེ་འདོད་དེ་དབུ་མའི་ལྟ་བས་ཟིན་པས་དེ་དག་བྱས་ན་དབུ་མའི་ལུགས་དང་སེམས་ཙམ་གྱི་ལྟ་བས་ཟིན་པས་བྱས་ནས་སེམས་ཙམ་ལུགས་སུ་འགྱུར་རོ་སྙམ་ན་འོ་ན་དབུ་མའི་ལྟ་བ་ལ་གནས་པས་ཆོ་ག་གཉིས་གང་ལས་སེམས་བསྐྱེད་ཀྱང་དབུ་མའི་ ལུགས་དང་། སེམས་ཙམ་གྱི་ལྟ་བ་ལ་གནས་པས་ལུགས་དེ་གཉིས་གང་ལས་སེམས་བསྐྱེད་། དེས་ན་ཀྱང་སེམས་ཙམ་ལུགས་སུ་ཁས་ལེན་དགོས་པས་རྩ་བའི་དམ་བཅའ་ཉམས་སོ། སེམས་སྐྱེད་ཀྱི་ཆོ་ག་ལ་དབུ་སེམས་ཀྱི་གཞུང་ཐ་དད་དུ་བཏགས་ པ་འདིས་ནི་སེམས་སྐྱེད་གཉིས་པོ་ལ་ལྟ་བ་ཐ་དད་ཡོད་པར་གོ་བ་དང་མཆོག་དམན་ཡོད་པར་འཁྲུལ་པ་སྐྱེ་ཞིང་རྒྱ་ཆེན་སྤྱོད་གཞུང་གི་སྐྱེས་ཆེན་རྣམས་ལ་སེམས་ཙམ་པའོ་ཞེས་བརྙས་པ་སྐྱེ་བའི་དགག་བྱ་ཡོད་པས་དེ་ལྟར་མི་འདོད་པར་ཤིང་རྟའི་སྲོལ་སོ་
Page: 55 ༄༅། །སོའི་ལུགས་ཞེས་འདོད་པར་བྱའོ། །ཐུན་མོང་དུ་གང་ལས་བླང་བའི་ཡུལ་ནི། བླ་མ་སྡོམ་ལ་གནས་ཤིང་མཁས། །ནུས་དང་ལྡན་ལས་བླང་བར་བྱ། །མེད་ན་རྟེན་ནམ་དཀོན་མཆོག་ལས། །ཞེས་བྱ་སྟེ། འདི་ལ་གཉིས་ ཏེ་སློབ་དཔོན་ཡོད་པ་དང་མེད་པའོ། །དེ་ཡང་སློབ་དཔོན་གྱི་སྤྱན་སྔར་འགྲོ་བ་ལ་སྲོག་གམ་ཚངས་ཀྱི་བར་ཆད་དུ་འགྱུར་བ་ཡོད་ན་ཐག་ཉེ་བར་བཞུགས་ཀྱང་སློབ་དཔོན་མེད་པ་ཞེས་བྱ་སྟེ་དལ་འབྱོར་གྱི་རྟེན་དང་དགེ་བའི་བློ་རྙེད་དཀའ་བས་ན་དེར་མི་འགྲོ་ བར་སྐུ་གཟུགས་སམ་དཀོན་མཆོག་ལས་བླང་བར་བྱ་ལ། དེ་མེད་ན་ཐག་རིང་པོ་ན་བཞུགས་ཀྱང་སློབ་དཔོན་ཡོད་པ་ཞེས་བྱ་སྟེ་ངོ་ཚ་དང་ཁྲེལ་ཡོད་ཀྱི་རྟེན་དུ་འགྱུར། སྤང་བླང་གི་ལུང་སྟོན། རང་གི་འདོད་པ་དྲིར་ཡོད་པའི་ཕྱིར་ངེས་པར་སློབ་དཔོན་ལས་ བླང་བར་བྱའོ། །སློབ་དཔོན་གྱི་མཚན་ཉིད་ནི་བྱང་སྡོམ་འབོགས་ཆོག་ལ་མཁས་པ། ཐོབ་ལ་མ་ཉམས་པ། བརྡ་སྤྲོད་པར་ནུས་པ། བརྩེ་བས་སློབ་མ་སྐྱོང་བ་སྟེ་ཆོས་བཞི་ལྡན་གྱི་སྐྱེས་བུ་ཆེན་པོ་སྟེ། ལམ་སྒྲོན་ལས། ཡང་དག་མཚན་ཉིད་ ལྡན་པ་ཡི། །བླ་མ་བཟང་ལས་སྡོམ་པ་བླང་། །སྡོམ་པའི་ཆོ་ག་ལ་མཁས་དང་། །བདག་ཉིད་གང་ཞིག་སྡོམ་ལ་གནས། །སྡོམ་པ་འབོགས་བཟོད་སྙིང་རྗེར་ལྡན། །བླ་མ་བཟང་པོར་ཤེས་པར་བྱ། །ཞེས་སོ། །ཡང་ན་ཐེག་པ་ཆེན་པོའི་ཚིག་ དོན་ལ་མཁས་ཤིང་བྱང་སྡོམ་བརྟན་པའི་སྐྱེས་ཆེན་ཏེ། རྟག་པར་དགེ་བའི་བཤེས་གཉེན་ནི། །སོགས་སོ། །བླ་མ་མེད་ན་སྐུ་གཟུགས་ཀྱི་སྤྱན་སྔར་སྨོན་འཇུག་གང་ལེན་པའི་ཚིག་རྣམས་སྙིང་ཐག་པ་ནས་ལན་གསུམ་དུ་བརྗོད་པས་འཐོབ་སྟེ། བྱང་ས་ལས། གལ་ཏེ་ཡོན་ཏན་དག་དང་ལྡན་པའི་གང་ཟག་མེད་པར་གྱུར་ན་བྱང་ཆུབ་སེམས་དཔས་དེ་བཞིན་གཤེགས་པའི་སྐུ་གཟུགས་ཀྱི་སྤྱན་སྔར་བདག་ཉིད་ཀྱིས་བྱང་ཆུབ་སེམས་དཔའི་ཚུལ་ཁྲིམས་ཀྱི་སྡོམ་པ་ཡང་དག་པར་བླང་བར་བྱ་སྟེ་ཞེས་སོ། །
Page: 56 སྐུ་གཟུགས་ཀྱང་མ་རྙེད་ན་མདུན་གྱི་ནམ་མཁར་སངས་རྒྱས་དང་བྱང་ཆུབ་སེམས་དཔའ་རྣམས་མངོན་སུམ་དུ་བསྒོམས་ནས་སྨོན་འཇུག་གང་ལེན་པའི་ཚིག་ལན་གསུམ་བརྗོད་པས་འཐོབ་སྟེ། བསླབ་བཏུས་ལས། ཡང་དེ་ལྟ་བུའི་དགེ་བའི་བཤེས་ གཉེན་མེད་ན་ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་རྣམས་མངོན་སུམ་དུ་བསྒོམས་ལ་སྡོམ་པ་བདག་ཉིད་ཀྱི་སྟོབས་དང་སྦྱར་ལ་བླང་བར་བྱ་སྟེ་ཞེས་སོ། །གང་གིས་ལེན་པའི་རྟེན་ནི། རིགས་སད་སྐྱབས་སོང་སྨོན་ པའི་རྟེན། །སོ་ཐར་སྨོན་ལྡན་འཇུག་པའི་རྟེན། །ཞེས་བྱ་སྟེ། ཐེག་པ་ཆེན་པོའི་རིགས་ཡོད་ཅིང་སད་པ་དཀོན་མཆོག་ལ་སྐྱབས་སུ་སོང་བ་ནི་སྨོན་སེམས་སྐྱེ་བའི་རྟེན་ཡིན་ཏེ་ཐེག་ཆེན་གྱི་རིགས་མེད་པའམ་ཡོད་ཀྱང་མ་སད་ན་ཐེག་ཆེན་གྱི་ བསམ་པ་ཁྱད་པར་ཅན་མི་སྐྱེ་བའི་ཕྱིར་དང་། སྡོམ་པ་ཀུན་ལ་ཡོད་མོད་ཀྱི། །སྐྱབས་སུ་མ་སོང་བ་ལ་མེད་། །ཅེས་གྲགས་པའི་ཕྱིར། དེའི་སྟེང་དུ་སོ་ཐར་རིས་གང་རུང་དང་ལྡན་ཞིང་སྨོན་པའི་སེམས་སྐྱེས་པ་ནི་བྱང་སྡོམ་གྱི་རྟེན་ཡིན་ཏེ། སྡོམ་པ་རྒྱ་ཆེན་ དེ་ཡི་རྟེན། །ཞེས་དང་། ལམ་སྒྲོན་ལས། སོ་སོར་ཐར་བ་རིས་བདུན་གྱི། །རྟག་ཏུ་སྡོམ་གཞན་ལྡན་པ་ལ། །བྱང་ཆུབ་སེམས་དཔའི་སྡོམ་པ་ཡི། །སྐལ་བ་ཡོད་ཀྱི་གཞན་དུ་མིན། །ཞེས་དང་། འཁོར་ལོས་བསྒྱུར་བའི་རྒྱལ་པོ་ཁང་བཟང་ གཙང་བར་བཞུགས་སུ་གསོལ་རིགས་པ་ལྟར་བྱང་ཆུབ་ཀྱི་སེམས་ཀྱི་རྒྱལ་པོ་ཡང་སྡོམ་པས་བསྡམས་པ་གཙང་བའི་རྒྱུད་ལ་བཞུགས་སུ་གསོལ་བར་རིགས་པའི་འི་ཕྱིར་དང་སོ་ཐར་ནི་གཞན་གནོད་སྤོང་བ་ཡིན་ལ་བྱང་སྡོམ་ནི་གཞན་ལ་ཕན་འདོགས་པ་ ཡིན་པས་གནོད་པ་ལས་མ་ལོག་པར་ཕན་གདགས་པ་མི་སྲིད་པའི་ཕྱིར་རོ། །ཐར་རྒྱན་ལས། གལ་ཏེ་གཞན་དག་ན་རེ་སོ་ཐར་དེ་བྱང་སྡོམ་སྐྱེ་བའི་རྟེན་དུ་མི་འཐད་དེ་ཟ་མ་དང་མ་ནིང་གས་ལ་སོ་ཐར་མི་སྐྱེ་ལ་བྱང་སྡོམ་སྐྱེ་བར་བཤད་པའི་ཕྱིར།
Page: 57 ༄༅། །གནས་པའི་རྟེན་དུ་མི་འཐད་དེ་སོ་ཐར་ནི་ཤི་འཕོས་པས་གཏོང་ལ་བྱང་སྡོམ་དེས་མི་གཏོང་བའི་ཕྱིར་རོ་ཞེ་ན། ལན་ནི་སོ་ཐར་ལ་བསམ་པའི་ཁྱད་པར་གྱིས་རིགས་གསུམ་ཡོད་དེ་རིས་བདུན་པོ་དེ་ཁམས་དང་ལྷ་ལ་སོགས་ལ་སོ་གསུམ་གྱི་བདེ་བ་འདོད་པའི་བསམ་ པས་བླངས་པ་ལེགས་སྨོན་གྱི་ཚུལ་ཁྲིམས་དང་རང་གི་སྡུག་བསྔལ་གཏན་དུ་སྤང་བར་འདོད་པའི་བསམ་པས་བླངས་པ་ཉན་ཐོས་ཀྱི་ངེས་འབྱུང་གི་ཚུལ་ཁྲིམས་དང་བྱང་ཆུབ་ཆེན་པོ་འཐོབ་པར་འདོད་པའི་བསམ་པས་བླངས་པ་བྱང་ཆུབ་སེམས་དཔའི་སྡོམ་པའི་ ཚུལ་ཁྲིམས་སོ། །དེ་ལྟར་གསུམ་ལས་སྔ་མ་གཉིས་ནི་ཟ་མ་སོགས་ལ་མི་སྐྱེ་ཞིང་ཤི་འཕོས་པས་གཏོང་ལ་ཉམས་ན་སླར་གསོ་མི་རུང་བའི་ཕྱིར་བྱང་སྡོམ་གྱི་རྟེན་མིན་ལ། བྱང་ཆུབ་སེམས་དཔའི་སྡོམ་པའི་ཚུལ་ཁྲིམས་ནི་ཟ་མ་སོགས་ལའང་སྐྱེ་བ་དང་ ཤི་འཕོས་ཀྱང་མི་གཏོང་བ་དང་ཉམས་ཀྱང་གསོར་རུང་བའི་ཕྱིར་བྱང་སྡོམ་སྐྱེ་བའི་རྟེན་ཡང་ཡིན་ལ་གནས་པའི་རྟེན་ཡང་ཡིན་ཏེ་མདོ་རྒྱན་འགྲེལ་པར། སེམས་དེའི་རྟེན་གང་ཞེ་ན་བྱང་ཆུབ་སེམས་དཔའི་ཚུལ་ཁྲིམས་ཀྱི་སྡོམ་པ་ནི་རྟེན་ནོ་ཞེས་གསུངས་སོ། ། ཡང་ན་སྐྱེ་བའི་རྟེན་དུ་དགོས་ལ་གནས་པའི་རྟེན་དུ་མ་ངེས་ཏེ་ཟག་མེད་ཀྱི་སྡོམ་པའི་རྟེན་དུ་བསམ་གཏན་གྱི་སྡོམ་པ་བཞིན་ནོ་ཞེས་གསུངས་སོ། །བྱང་ཆུབ་སེམས་དཔའི་སོ་ཐར་དེ་ཡང་ལེན་པའི་ཆོ་ག་ལོགས་སུ་མི་དགོས་ཏེ་སྔར་ཉན་ཐོས་ཀྱི་བསླབ་པ་བླངས་ པ་ཉིད་བསམ་པ་ཁྱད་པར་ཅན་གྱིས་ཟིན་པ་ན་གནས་འགྱུར་ནས་བྱང་ཆུབ་སེམས་དཔའི་སྡོམ་པར་འགྱུར་བ་ཡིན་ཏེ་དམན་པའི་སེམས་བཏང་ཡང་སྤོང་བའི་སེམས་པ་མ་བཏང་བའི་ཕྱིར་རོ་ཞེས་བཤད་དེ་སོ་སོ་ཐར་རིས་བདུན་ལས་གང་རུང་ལེན་པ་ཉིད་ཀྱི་ཚེ་ སེམས་སྐྱེད་ཀྱིས་ཟིན་ན་དེ་བྱང་ཆུབ་སེམས་དཔའི་སོ་ཐར་ཡིན་པས་དེ་བྱང་སྡོམ་གྱི་རྟེན་དངོས་ཡིན་ལ། སྔར་ལེགས་སྨོན་ནམ་ངེས་འབྱུང་གིས་བླངས་པ་ཡིན་ཀྱང་སེམས་སྐྱེད་པ་ན་འཁོར་བའི་བདེ་བ་འཐོབ་འདོད་དང་རང་དོན་དུ་ཞི་བ་འཐོབ་འདོད་དང་
Page: 58 བྲལ་ཞིང་གཞན་དོན་དུ་བྱང་ཆུབ་འཐོབ་འདོད་དུ་གནས་འགྱུར་ལ་སྤོང་སེམས་འདོར་བའི་ཕྱིར་དེ་ཉིད་བྱང་ཆུབ་སེམས་དཔའི་སྡོམ་པའི་ཚུལ་ཁྲིམས་སུ་གྱུར་པས་བྱང་སྡོམ་གྱི་རྟེན་དུ་རུང་བའོ། །སྔ་མ་གཉིས་བྱང་སྡོམ་གྱི་རྟེན་མ་ཡིན་ཞེས་པ་ཡང་ དམན་པའི་བསམ་པ་དེ་མ་སྤངས་ཀྱི་བར་དུ་སྟེ་དམན་པའི་བསམ་པ་དང་སེམས་སྐྱེད་གཞི་གཅིག་ལ་མཉམ་དུ་མི་འདུ་བའི་ཕྱིར། གནས་པའི་རྟེན་དུ་མ་ངེས་ཏེ་དགེ་སློང་བྱང་ཆུབ་སེམས་དཔས་བསླབ་པ་ཕུལ་བའི་ཚུལ་གྱིས་གཞན་དོན་སྤྱོད་པ་ཡོད་ པའི་ཕྱིར་རོ། །ཐེག་ཆེན་སོ་ཐར་ཤི་འཕོས་པས་མི་གཏོང་ན་ལྷ་དང་བྱིས་པའི་དགེ་སློང་སྲིད་པར་ཐལ་ལོ་ཟེར་མོད། ལྷའི་དགེ་སློང་བྱམས་པ་མགོན་པོ་དང་མངོན་པར་དགའ་བར་སྐྱེས་སོ་ཅོག་རང་བཞིན་གྱི་དགེ་སློང་དུ་བཤད་པས་དེར་སྐྱེས་མ་ཐག་རྣམས་ བྱིས་པའི་དགེ་སློང་དུ་ཁོ་བོས་ཁས་བླང་ངོ་། །དེ་གཉིས་འདུལ་བའི་སྡེ་སྣོད་རྣམས་ལས་བཀག་ཅེས་པའང་ཐེག་དམན་དང་ཐེག་ཆེན་གྱི་འདུལ་བ་གང་ལས་བཀག །དང་པོ་ལྟར་ན་བཀག་པར་ཟད་དོ། །གཉིས་པ་ལྟར་ན་སྒྲུབ་བྱེད་བཀོད་ལ་ཁུངས་སྟོན་ཞིག །དེ་ཡང་ཆོ་ག་ དངོས་ནི། བླ་མ་བརྒྱུད་པའི་མན་ངགགིས། །ཆོ་གའི་གཙོ་བོ་རྣམ་པ་གཉིས། །ཅེས་བྱ་སྟེ། དེ་ཡང་ཤིང་རྟའི་སྲོལ་གཉིས་ཏེ་ཐར་རྒྱན་ལས། བྱང་ཆུབ་ཀྱི་སེམས་དེ་བླང་བའི་ཆོ་ག་ནི་བླ་མ་མཁས་པ་དག་གི་བརྒྱུད་པའི་མན་ངག་ལས་ཚུལ་ ལུགས་ཐ་དད་པ་དུ་མ་སྣང་ངོ་། །དེ་ལྟར་སྣང་ཡང་ནི་འདིར་འཕགས་པ་འཇམ་དཔལ་ནས་སློབ་དཔོན་ཀླུ་སྒྲུབ་ན་མར་ལ་བརྒྱུད་པ་སློབ་དཔོན་ཞི་བ་ལྷའི་ལུགས་དང་འཕགས་པ་བྱམས་པ་ནས་སློབ་དཔོན་ཐོགས་མེད་ན་མར་བརྒྱུད་པ་ཇོ་བོ་ གསེར་གླིང་པའི་ལུགས་དང་གཉིས་སུ་ཤེས་པར་བྱའོ་ཞེས་སོ། །ཆོ་ག་དངོས་ནི། འཇམ་དཔལ་དབྱངས་ཀྱིས་ལེགས་བསྟན་པ། །ཀླུ་སྒྲུབ་ཞི་ལྷའི་གདམས་ངག་ནི། །མཆོད་པ་སྐྱབས་འགྲོ་སྡིག་བཤགས་དང་། །ཡི་རང་བསྐུལ་
Page: 59 ༄༅། །གསོལ་སྔོ་བ་སྟེ། །སྦྱོར་བའི་ཆོ་ག་རྣམ་པ་བདུན། །དངོས་གཞི་སེམས་སྐྱེད་སྡོམ་བཟུང་གཉིས། །རྗེས་ནི་དབུགས་དབྱུང་གཞན་གཟེངས་བསྟོད། །ཅེས་པ་སྟེ་གཞན་རྣམས་རིམ་པས་གཞུང་དུ་རྒྱས་པར་འཆད་ལ་ དངོས་གཞི་ནི་མདོར་བསྡུ་ན་སྤྱོད་འཇུག་གི་གཞུང་བཞིན་སེམས་སྐྱེད་དང་སྡོམ་པ་ཅིག་ཆར་ལེན་པའམ་ཐ་དད་དུ་ལེན་པ་གང་མོས་པ་ཚར་གསུམ་གྱིས་བླང་ལ། རྒྱས་པར་ནི་བསླབ་བཏུས་སུ་གསུངས་པ་ལྟར། རྗེ་བཙུན་འཇམ་དཔལ་ སྔོན་རྒྱལ་པོ་ནམ་མཁའ་ཞེས་བྱ་བར་གྱུར་པ་ན་སངས་རྒྱས་འབྲུག་སྒྲ་དབྱངས་ཀྱི་རྒྱལ་པོའི་སྤྱན་སྔར་སེམས་སྐྱེད་དང་སྡོམ་པ་སྟབས་གཅིག་ཏུ་ནོད་པ་ལྟར་བདག་ཅག་གིས་ཀྱང་སྟབས་གཅིག་ཏུ་ནོད་པར་བྱ་སྟེ། འཁོར་བ་ཐ་མ་མེད་པ་ཡི། །སྔུན་ གྱི་ཐ་མ་ཇི་སྲིད་པ། །། དེ་སྲིད་སེམས་ཅན་ཕན་དོན་དུ། །སྤྱོད་པ་དཔག་ཡས་སྤྱད་པར་བགྱི། །འཇིག་རྟེན་མགོན་པོའི་སྤྱན་སྔ་འདིར། །བྱང་ཆུབ་མཆོག་ཏུ་སེམས་སྐྱེད་དོ། །འགྲོ་བ་ཐམས་ཅད་མགྲོན་གཉེར་ཏེ། །དབུལ་ཞིང་ཕོངས་ལས་ སྒྲོལ་བར་བྱ། །དེ་རིང་ཕན་ཆད་གལ་ཏེ་ཡང་། །བདག་གིས་འདོད་ཆགས་སེམས་སྐྱེད་ན། །ཕྱོགས་བཅུ་དག་ན་བཞུགས་པ་ཡི། །སངས་རྒྱས་ཐམས་ཅད་བསླུས་པར་འགྱུར། །བྱང་ཆུབ་ནམ་ཞིག་འཐོབ་བར་དུ། །ཐ་བའི་སེམས་དང་ གནོད་སེམས་དང་། །ཕྲག་དོག་དང་ནི་སེར་སྣ་ཡང་། །དེ་རིང་ཕན་ཆད་མི་བྱའོ། །ཚངས་པའི་སྤྱོད་པ་བདག་གིས་སྤྱད། །སྡིག་པའི་འདོད་པ་ཡོངས་སུ་བཏང་། །ཚུལ་ཁྲིམས་སྡོམ་དང་དེས་པ་ལ། །སངས་རྒྱས་རྗེས་སུ་བསླབ་པར་བྱ། ། བདག་ནི་བྱང་ཆུབ་རིངས་ཚུལ་དུ། །འཚང་རྒྱར་མོས་ཤིང་སྤྲོ་བ་མེད། །ཕྱི་མཐའི་ཐུག་གི་བར་དུ་ཡང་། །སེམས་ཅན་གཅིག་ཕྱིར་སྦྱང་བར་བགྱི། །ཚད་མེད་བསམ་གྱིས་མི་ཁྱབ་པའི། །སངས་རྒྱས་ཞིང་ནི་སྦྱང་བར་བྱ། །ཕྱོགས་རྣམས་བཅུ་པོ་ཐམས་
Page: 60 ཅད་དུ། །བདག་གི་མིང་ནི་གྲགས་པར་བགྱི། །ལུས་དང་ངག་གི་ལས་རྣམས་ཀྱང་། །རྣམ་པ་ཀུན་ཏུ་བདག་གིས་སྦྱང་། །ཡིད་ཀྱི་ལས་ཀྱང་སྦྱང་བར་བྱ། །མི་དགེའི་ལས་ནི་སྤྱད་མི་བྱ། །ཞེས་ལན་གསུམ་དུ་བརྗོད་པས་བླང་ངོ་། །འཇུག་ པའི་སྡོམ་པ་སྐྱེ་བ་གཏན་དུ་བཟུང་ན་ཚེ་རབས་གཞན་ལ་མི་དྲན་པས་ཉམས་པར་འགྱུར་རོ་ཞེ་ན་དེ་ལྟར་མི་འགྱུར་ཏེ་ཚེ་རབས་ཐམས་ཅད་དུ་རབ་ཏུ་འབྱུང་བར་སྨོན་ལམ་འདེབས་པ་མི་འཁྲུགས་པའི་ས་བསླབ་པར་མདོ་འདི་ཉིད་ལས་ གསུངས་པའི་ཕྱིར་རོ། །རྗེས་དཀོན་མཆོག་ལ་གཏང་རག་གི་མཆོད་པ་རྒྱ་ཆེན་པོ་དབུལ་ཞིང་དོན་ཆེན་པོ་བརྙེད་པའི་དགའ་སྤྲོ་བསྒོམས་ནས་བདག་དབུགས་དབྱུང་གཞན་གཟེངས་བསྟོད། བྱང་ཆུབ་ཀྱི་སེམས་མི་བརྗེད་པའི་སྨོན་ལམ་གདབ་ བོ། །གཉིས་པ་རྒྱ་ཆེན་སྤྱོད་རྒྱུད་ཀྱི་ལུགས་ལ་སྨོན་པའི་སེམས་བསྐྱེད་པ་དང་། འཇུག་པའི་སྡོམ་པ་བཟུང་བའོ། །། དང་པོ་ནི། རྒྱལ་བ་བྱམས་པས་ཉེར་བསྟན་པའི། །མན་ངག་ལས་བྱུང་ཆོ་ག་ནི། །གསོལ་གདབ་ཚོགས་བསག་སྐྱབས་ འགྲོའི་མཆོག། སྨོན་པའི་སྦྱོར་བ་རྣམ་པ་གསུམ། །དངོས་གཞི་བྱང་ཆུབ་མཆོག་སེམས་སྐྱེད། །དགའ་སྐྱེད་བསླབ་བྱ་བརྗོད་པའི་རྗེས། །འདི་ནི་སྨོན་པའི་ཆོ་གའོ། །ཞེས་བྱ་སྟེ། སྦྱོར་དངོས་རྗེས་གསུམ་གྱི་དང་པོ་ལ་ཡང་གསུམ། གསོལ་བ་གདབ་པ། ཚོགས་བསག་པ། སྐྱབས་འགྲོ་ཁྱད་པར་ཅན་བྱ་བའོ། །དང་པོ་ནི། སློབ་མས་དགེ་བའི་བཤེས་གཉེན་གྱི་མདུན་དུ་སོང་ནས་ཕྱག་བྱ། བླ་མས་དེ་འཁོར་བ་ལ་སྐྱོ་བ་བསྐྱེད། སེམས་ཅན་ལ་སྙིང་རྗེ་བསྐྱེད། སངས་རྒྱས་ ལ་འདོད་པ་བསྐྱེད། བླ་མ་ལ་གུས་པ་བསྐྱེད་པར་བྱའོ། །དེ་ནས་སློབ་དཔོན་དགོངས་སུ་གསོལ། ཇི་ལྟར་སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བཅོམ་ལྡན་འདས་རྣམས་དང་ས་ཆེན་པོ་ལ་རབ་ཏུ་
Page: 61 ༄༅། །ཞུགས་པའི་བྱང་ཆུབ་སེམས་དཔའ་རྣམས་ཀྱིས་དང་པོར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཆེན་པོར་ཐུགས་བསྐྱེད་པ་དེ་བཞིན་དུ་བདག་མིང་འདི་ཞེས་བགྱི་བ་ཡང་སློབ་དཔོན་གྱིས་བླ་ན་མེད་པ་ཡང་དག་པར་རྫོགས་ པའི་བྱང་ཆུབ་ཆེན་པོར་སེམས་སྐྱེད་པར་མཛད་དུ་གསོལ་ཞེས་ལན་གསུམ་གྱིས་གསོལ་བ་གདབ་བོ། །གཉིས་པ་ནི། དང་པོར་དཀོན་མཆོག་ལ་ཕྱག་བྱ་མཆོད་པ་འབྱོར་ཚད་དུ་བཤམས་པ་དང་ཡིད་ཀྱིས་སྤྲུལ་བ་དབུལ། དེ་ཡང་དགེ་སློང་གི་སྡོམ་ པ་དགེ་འདུན་ལས་འཐོབ་པ་ལྟར་བྱང་ཆུབ་ཀྱི་སེམས་རྣམ་པ་གཉིས་ནི་བསོད་ནམས་ཀྱི་ཚོགས་བསགས་པ་ལས་འཐོབ་པ་ཡིན་ནོ། །དེ་ཡང་རང་ལ་འབྱོར་བ་ཆེ་བར་ཡོད་ན་ཆེ་བར་བཏང་དགོས་ཏེ། བདེ་གཤེགས་གྲགས་བྱིན་འཛམ་གླིང་རྒྱལ་པོའི་ཚེ། ། དེ་བཞིན་གཤེགས་པ་ཟླ་བའི་ཏོག་དེ་ལ། །གཙུག་ལག་ཁང་པ་བྱེ་བ་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །ཞེས་སོ། །འབྱོར་བ་ཆུང་ན་ཆུང་ངུ་རེ་ཕུལ་བས་ཀྱང་སྐྱེ་སྟེ། བདེ་གཤེགས་འོད་འཕྲོ་གྲོང་ཁྱེར་བསྟེན་པའི་ཚེ། །དེ་བཞིན་ གཤེགས་པ་མཐའ་ཡས་འོད་དེ་ལ། །རྩྭ་ཡི་སྒྲོན་མེ་དག་ནི་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །ཞེས་སོ། །ཅི་ཡང་མ་འབྱོར་བས་ཐལ་མོ་སྦྱར་བ་དང་ཕྱག་ཙམ་གྱིས་ཀྱང་ཆོག་སྟེ། དེ་བཞིན་གཤེགས་པ་ཡོན་ཏན་ཕྲེང་ལྡན་གྱིས། ། དེ་བཞིན་གཤེགས་པ་འགྱིང་ལྡན་བཞུད་དེ་ལ། །སངས་རྒྱས་ཕྱག་འཚལ་ཐལ་མོ་ལན་གསུམ་སྦྱར། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །ཞེས་སོ། །གསུམ་པ་ནི། ཐུན་མོང་མ་ཡིན་པའི་སྐྱབས་འགྲོ་གོང་དུ་བཤད་པ་འདིར་བྱའོ། ། དངོས་གཞི་ནི་སེམས་ཅན་ཐམས་ཅད་ལ་བྱམས་པ་སྒོམ། དེའི་སྡུག་བསྔལ་ལ་སྙིང་རྗེ་སྐྱེད། དེ་ལས་སྐྱོབ་ནུས་པ་སངས་རྒྱས་ལས་མེད་པས་བདག་གིས་དེ་ཐོབ་པར་བྱས་ཏེ་སྡུག་བསྔལ་ལས་བསྐྱབ་བོ་ཞེས་སེམས་ཐག་པ་ཕྱོགས་བཅུ་ན་
Page: 62 བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། སློབ་དཔོན་བདག་ལ་དགོངས་སུ་གསོལ། བདག་མིང་འདི་ཞེས་བགྱི་བ་སྐྱེ་བ་འདི་དང་སྐྱེ་བ་གཞན་དག་ཏུ་སྦྱིན་པ་ལས་བྱུང་བ་དང་ཚུལ་ཁྲིམས་ལས་བྱུང་ བ་དང་སྒོམ་པ་ལས་བྱུང་བའི་དགེ་བའི་རྩ་བ་བགྱིས་པ་བགྱིད་དུ་བསྩལ་བ་དང་བགྱིད་པ་ལ་རྗེས་སུ་ཡི་རང་བ་དེས་ཇི་ལྟར་སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བཅོམ་ལྡན་འདས་རྣམས་དང་ས་ཆེན་པོ་ལ་ རབ་ཏུ་ཞུགས་པའི་བྱང་ཆུབ་སེམས་དཔའ་ཆེན་པོ་རྣམས་ཀྱིས་དང་པོར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཆེན་པོར་ཐུགས་བསྐྱེད་པ་དེ་བཞིན་དུ། བདག་མིང་འདི་ཞེས་བགྱི་བས་ཀྱང་དུས་འདི་ནས་བཟུང་སྟེ་ཇི་སྲིད་བྱང་ཆུབ་སྙིང་པོ་ལ་མཆིས་ ཀྱི་བར་དུ་སེམས་ཅན་མ་བརྒལ་བ་རྣམས་བསྒྲལ་བ་དང་མ་གྲོལ་བ་རྣམས་འགྲོལ་བ་དང་དབུགས་མ་ཕྱིན་པ་རྣམས་དབུགས་དབྱུང་བ་དང་ཡོངས་སུ་མྱ་ངན་ལས་མ་འདས་པ་རྣམས་ཡོངས་སུ་མྱ་ངན་ལས་བཟློ་བའི་སླད་དུ་བླ་ན་མེད་པ་ཡང་དག་པར་རྫོགས་ པའི་བྱང་ཆུབ་ཆེན་པོར་སེམས་བསྐྱེད་པར་བགྱི། །ཞེས་ལན་གསུམ་གྱིས་བླང་ངོ་། །དེ་ཡང་མ་བརྒལ་བ་ནི་ངན་སོང་གསུམ་སྟེ་ངན་སོང་གི་སྡུག་བསྔལ་རྒྱ་མཚོ་ལྟ་བུ་ལས་མ་བརྒལ་བའི་ཕྱིར། བསྒྲལ་བ་ནི་དེ་དག་མངོན་མཐོ་ལྷ་མི་ལ་དགོད་པར་ བྱ་བའོ། །མ་གྲོལ་བ་ནི་ལྷ་མི་རྣམས་ཏེ་ཉོན་མོངས་ཀྱི་འཆིང་བ་ལྕགས་སྒྲོག་ལྟ་བུས་བསྡམས་པའི་ཕྱིར། འགྲོལ་བ་ནི་དེ་བཀྲོལ་ནས་ཐར་བ་ལ་འགོད་པའོ། །དབུགས་མ་ཕྱིན་པ་ནི་ཉན་རང་སྟེ་ཐེག་པ་ཆེན་པོར་དབུགས་མ་ཕྱིན་པའི་ཕྱིར། དབུགས་དབྱུང་བ་ནི་དེ་དག་བསམ་པ་སེམས་སྐྱེད་དང་སྦྱོར་བ་ཕར་ཕྱིན་དྲུག་གིས་དབུགས་ཕྱུང་སྟེ་ས་བཅུ་ལ་འགོད་པའོ། །ཡོངས་སུ་མྱ་ངན་ལས་མ་འདས་པ་ནི་བྱང་ཆུབ་སེམས་དཔའ་རྣམས་ཏེ་མི་གནས་པའི་མྱང་འདས་མ་ཐོབ་པའི་ཕྱིར་རོ། །
Page: 63 ༄༅། །ཡོངས་སུ་མྱ་ངན་ལས་བཟློ་བ་ནི་དེ་དག་ངས་རྒྱས་ཀྱི་གོ་འཕང་ལ་དགོད་པའོ། །སླད་དུ་ནི་དགོས་ཆེད་དེ་རྣམས་བྱ་བའི་ཆེད་དུ་འཚང་རྒྱ་བར་དམ་བཅའ་བའོ། །རྗེས་དགའ་སྤྲོ་སྐྱེད། བསླབ་བྱ་ཡང་གོ་བར་བྱའོ། ། དེ་ལྟར་སྨོན་པའི་སེམས་སྐྱེས་པ་དེ་ནི་བྱང་ཆུབ་སེམས་དཔའ་ཞེས་བྱ་སྟེ་བྱང་ཆུབ་དང་སེམས་ཅན་ལ་དམིགས་པ་དང་དཔའ་ཞིང་སྙིང་སྟོབས་དང་ལྡན་པའི་ཕྱིར་རོ། །གཉིས་པ་འཇུག་པའི་སྡོམ་པ་བཟུང་བ་ལ་ཡང་སྦྱོར་དངོས་རྗེས་གསུམ་སྟེ། འཇུག་ པའི་སྡོམ་པ་བཟུང་བའི་ཕྱིར། །གསོལ་གདབ་ཐུན་མོང་བར་ཆད་དྲི། །མཆོད་དབུལ་མྱུར་དུ་སྦྱིན་པར་གསོལ། །ཐུན་མོང་མིན་པའི་བར་ཆད་དྲི། །བསླབ་པ་ཁས་བླང་དགའ་བ་སྒོམ། །དེ་ནི་སྦྱོར་བའི་ཆོས་བདུན་ནོ། །དངོས་གཞི་བྱང་སེམས་ སྡོམ་པ་བླང་། །མཇུག་ཆོག་མཁྱེན་པར་གསོལ་བ་དང་། །ཕན་ཡོན་བསྟན་དང་གསང་བར་གདམས། །བསླབ་བྱ་གཏང་རག་དང་རྣམ་ལྔས། །འཇུག་པའི་སྡོམ་པ་བྱིན་པའོ། །དེ་ཡང་། སློབ་དཔོན་ལས་བདག་བྱང་ཆུབ་སེམས་དཔའི་ཚུལ་ ཁྲིམས་ཀྱི་སྡོམ་པ་ཡང་དག་པར་བླངས་པ་ལེན་པར་འཚལ་གྱིས་དེ་ལ་གནོད་པ་མ་མཆིས་ན་བདག་ལ་ཐུགས་བརྩེ་བའི་སླད་དུ་ཅུང་ཟད་གསན་ཞིང་སྩལ་བའི་རིགས་སོ་ཞེས་ལན་གསུམ་གྱིས་གསོལ་བ་གདབ། ཐུན་མོང་གི་བར་ཆད་དྲི་བ་ལ་གསུམ་ ལས། དང་པོ་སྙིང་སྟོབས་ལ་བརྟག་པ་ནི། སེམས་ཅན་ཐམས་ཅད་སྨིན་པར་བྱེད་པའི་བསླབ་པ་རྣམས་ལ་སློབ་ནུས་སམ། ཞིང་ངས་མེད་པ་སྦྱོང་བ་དང་སངས་རྒྱུས་གྲངས་མེད་པ་མཉེས་པར་བྱེད་པ་ལ་སློབ་ནུས་སམ། ཉམས་ན་ཉེས་ དམིགས་ཆེ་བས་ཉེས་དམིགས་དེས་མི་འཇིགས་སམ། ཕན་ཡོན་ཚད་མེད་པའི་བསླབ་པ་དེ་ལ་སློབ་པར་སྤྲོའམ་ཞེས་དྲི། སློབ་མས་ནུས། མི་འཇིགས། སྤྲོ་ལགས་ཞེས་ལན་གདབ། གཉིས་པ་ཤེས་རབ་ལ་བརྟག་པ་ནི། ཁྱོད་ཀྱིས་བྱང་ཆུབ་
Page: 64 སེམས་དཔའི་སྡེ་སྣོད་ཀྱི་མ་མོ་ཐོས་སམ། ཤེས་སམ། དད་དམ། སྲུང་བར་ནུས་སམ་དྲི། སློབ་མས་ཅུང་ཟད་ཐོས། ཅུང་ཟད་ཤེས། ཤིན་ཏུ་དད། སྲུང་བར་ནུས་ཞེས་ལན་གདབ། གསུམ་པ་འདུན་པ་ལ་བརྟག་པ་ནི། རིགས་ཀྱི་བུ་ཁྱོད་ཉོན་ ཅིགཁྱོད་འདི་ལྟར་སེམས་ཅན་མ་བརྒལ་བ་རྣམས་། བསྒྲལ་བ་དང་སོགས་འོག་ནས་འབྱུང་བའི་མཐར་སངས་རྒྱས་ཀྱི་གདུང་རྒྱུན་མི་འཆད་པར་འདོད་དམ། དེ་ལ་ཁྱོད་ཀྱིས་བསམ་པ་བརྟན་པ་དང་ཡི་དམ་བརྟན་པར་བྱའོ། །གཞན་དང་འགྲན་པའི་ ཆེད་དུ་མ་ཡིན་ནམ། གཞན་གྱིས་ནན་གྱིས་ལེན་དུ་བཅུག་པ་མ་ཡིན་ནམ། ཞེས་དྲི་ཞིང་འདོད་ལགས། མ་ལགས་ཞེས་ལན་གདབ་བོ། །སློབ་དཔོན་མེད་པའི་ཚེ་བར་ཆད་དྲི་ལན་མི་དགོས་ལ། བདག་སེམས་ཅན་མ་བརྒལ་བ་རྣམས་བསྒྲལ་ བ་དང་མ་གྲོལ་བ་རྣམས་འགྲོལ་བ་དང་དབུགས་མ་ཕྱིན་པ་རྣམས་དབུགས་དབྱུང་བ་དང་ཡོངས་སུ་མྱ་ངན་ལས་མ་འདས་པ་རྣམས་ཡོངས་སུ་མྱ་ངན་ལས་བཟློ་བ་དང་སངས་རྒྱས་ཀྱི་གདུང་རྒྱུན་མི་འཆད་པར་འདོད་ཅིང་དེ་དག་ལ་བདག་སེམས་སྐྱེད་པ་ བརྟན་པ་དང་ཡི་དམ་བརྟན་པར་བགྱིའོ། །ཞེས་ལན་གཅིག་བརྗོད། ཚོགས་གསོག་པ་ནི། དངོས་སུ་བཤམས་དང་ཡིད་ཀྱིས་སྤྲུལ། །བདག་པོས་ཡོངས་སུ་མ་བཟུང་དང་། །བླ་ན་མེད་པའི་མཆོད་པའི་ཚོགས། །མ་ལུས་བློ་ཡིས་བླངས་ཏེ་ འབུལ། །བདག་གི་ལུས་དང་ལོངས་སྤྱོད་དང་། །དུས་གསུམ་དགེ་བའི་དངོས་པོ་ཀུན། །མ་ལུས་དཀོན་མཆོག་སྤྱན་སྔར་འབུལ། །འགྲོ་བའི་སྐྱབས་གྱུར་འཚང་རྒྱ་ཤོག། ཅེས་པ་ཙམ་མམ་ཆོ་ག་གཞན་གྱིས་ཀྱང་མཆོད་པ་དང་ལུས་ཕུལ་ ལ་བདག་ལ་བྱང་ཆུབ་སེམས་དཔའི་ཚུལ་ཁྲིམས་ཀྱི་སྡོམ་པ་ཡང་དག་པར་བླང་བ་མྱུར་དུ་སྩལ་དུ་གསོལ་ཞེས་གསུམ་གྱིས་མྱུར་དུ་སྦྱིན་པར་གསོལ་བ་གདབ། ཐུན་མོང་མ་ཡིན་པའི་བར་ཆད་དྲི་བའི་ཕྱིར། ཁྱོད་བྱང་ཆུབ་སེམས་དཔའ་
Page: 65 ༄༅། །ཡིན་ནམ། བྱང་ཆུབ་ཏུ་སྨོན་ལམ་བཏབ་བམ་ཞེས་དྲི་ཞིང་ཡིན་ནོ། །བཏབ་བོ་ཞེས་ལན་གདབ། བསླབ་པའི་གནས་གོ་བར་བྱས་ནས། བྱང་ཆུབ་སེམས་དཔའ་རྣམས་ཀྱི་བསླབ་པའི་གཞི་རྣམས་དང་བྱང་ཆུབ་སེམས་ དཔའ་ཐམས་ཅད་ཀྱི་ཚུལ་ཁྲིམས་དེ་དག་བདག་ལས་ལེན་པར་འདོད་དམ་ཞེས་དྲི་ལན་བྱའོ། །སློབ་དཔོན་མེད་ན་དེ་གཉིས་བསྡམས་ནས། བདག་མིང་འདི་ཞེས་བགྱི་བ་བྱང་ཆུབ་སེམས་དཔའ་ལགས་ཤིང་བྱང་ཆུབ་ཏུ་སྨོན་ལམ་བཏབ་པ་ལགས་ སོ། །བྱང་ཆུབ་སེམས་དཔའ་ཐམས་ཅད་ཀྱི་བསླབ་པའི་གཞི་རྣམས་དང་བྱང་ཆུབ་སེམས་དཔའ་ཐམས་ཅད་ཀྱི་ཚུལ་ཁྲིམས་དེ་དག་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལས་བླང་བར་འཚལ་ལོ་ཞེས་ལན་གཅིག་བརྗོད་དོ། །དེ་ནས་ད་ ལྟ་བྱང་ཆུབ་སེམས་དཔའི་སྡོམ་པ་སྐྱེ་བར་འགྱུར་རོ་ཞེས་དགའ་བ་སྒོམ་པ་སྟེ་སྦྱོར་བའི་ཆོས་བདུན་ནོ། །ཐར་རྒྱན་དུ་སྦྱོར་བ་ལ་ཆོས་བཅུར་གསུངས་ཀྱང་དེང་སང་ལག་ཏུ་བླང་བ་ལྟར་བྱས་སོ། །དངོས་གཞི་ནི་གཞན་དོན་དུ་སངས་རྒྱས་འཐོབ་ པའི་ཆེད་དུ་བླངས་ནས་སྲུང་སེམས་སྐྱེད། སློབ་དཔོན་གྱིས་རིགས་ཀྱི་བུ་མིང་འདི་ཞེས་བྱ་བ་ཁྱོད་བདག་བྱང་ཆུབ་སེམས་དཔའ་མིང་འདི་ཞེས་བྱ་བ་ལ་བྱང་ཆུབ་སེམས་དཔའི་བསླབ་པའི་གཞི་ཐམས་ཅད་དང་བྱང་ཆུབ་སེམས་དཔའི་ཚུལ་ཁྲིམས་ཐམས་ ཅད་དེ་སྡོམ་པའི་ཚུལ་ཁྲིམས་དང་དགེ་བའི་ཆོས་སྡུད་པ་དང་སེམས་ཅན་གྱི་དོན་བྱེད་པའི་ཚུལ་ཁྲིམས་གང་ལ་འདས་པའི་བྱང་ཆུབ་སེམས་དཔའ་ཐམས་ཅད་ཀྱིས་བསླབ་པ་དང་མ་བྱོན་པའི་བྱང་ཆུབ་སེམས་དཔའ་ཐམས་ཅད་སློབ་པར་འགྱུར་བ་དང་ ཕྱོགས་བཅུ་དག་ན་ད་ལྟར་བྱུང་བའི་བྱང་ཆུབ་སེམས་དཔའ་ཐམས་ཅད་ད་ལྟར་སློབ་པའི་བྱང་ཆུབ་སེམས་དཔའི་བསླབ་པའི་གཞི་ཐམས་ཅད་དང་བྱང་ཆུབ་སེམས་དཔའི་ཚུལ་ཁྲིམས་ཐམས་ཅད་དེ་སྡོམ་པའི་ཚུལ་ཁྲིམས་དང་དགེ་བའི་ཆོས་སྡུད་པ་དང་
Page: 66 སེམས་ཅན་གྱི་དོན་བྱེད་པའི་ཚུལ་ཁྲིམས་དེ་ཐམས་ཅད་ཡང་དག་པར་ནོད་དམ་ཞེས་དྲི་ཞིང་། ནོད་ལགས་ཞེས་ལན་གདབ་པ་ཚར་གསུམ་གྱིས་འབོགས་སོ། །སློབ་དཔོན་མེད་ན་བདག་མིང་འདི་ཞེས་བགྱི་བ་ཕྱོགས་བཅུའི་དེ་བཞིན་ གཤེགས་པ་དང་ས་ཆེན་པོ་ལ་ཞུགས་པའི་བྱང་ཆུབ་སེམས་དཔའ་ཐམས་ཅད་ལ་གསོལ་བར་འཚལ་ཏེ་དེ་དག་གི་སྤྱན་སྔར་བྱང་ཆུབ་སེམས་དཔའི་བསླབ་པའི་གཞི་ཐམས་ཅད་དང་སོགས་བརྗོད་ནས་མཐར་དེ་ཐམས་ཅད་བདག་གིས་ཡང་ དག་པར་བླང་ངོ་ཞེས་ལན་གསུམ་མོ། །དངོས་གཞིའི་ཆོ་གའོ། །མཇུག་མཁྱེན་པར་གསོལ་བ་ནི་སློབ་དཔོན་ཁོ་ནས་ཕྱོགས་བཅུར་ཕྱག་དང་མཆོད་པ་བྱས་ལ་པུས་བཙུགས་ཐལ་སྦྱར་གྱིས། བྱང་ཆུབ་སེམས་དཔའ་མིང་འདི་ཞེས་བགྱི་ བས་བདག་བྱང་ཆུབ་སེམས་དཔའ་མིང་འདི་ཞེས་བགྱི་བ་ལས་བྱང་ཆུབ་སེམས་པའི་ཚུལ་ཁྲིམས་ཀྱི་སྡོམ་པ་ཡང་དག་པར་བླངས་པ་ལ་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་རྣམས་དཔང་དུ་གྱུར་པར་ཕྱོགས་བཅུའི་འཇིག་རྟེན་གྱི་ཁམས་ མཐའ་ཡས་མུ་མེད་པ་དག་ཏུ་བཞུགས་པའི་འཕགས་པའི་མཆོག་ལྐོག་ཏུ་གྱུར་ཀྱང་ཆོས་ཐམས་ཅད་ལ་ལྐོག་ཏུ་མ་གྱུར་པའི་ཐུགས་མངའ་བ་ཐམས་ཅད་ལ་མཁྱེན་པར་གསོལ་ལོ་ཞེས་ལན་གསུམ་བརྗོད་སྟེ་ཕྱག་བྱ། སློབ་དཔོན་མེད་ན་རང་གིས་དེ་ལྟར་བྱས་ཏེ། བདག་བྱང་ ཆུབ་སེམས་དཔའ་མིང་འདི་ཞེས་བགྱི་བས་བྱང་ཆུབ་སེམས་དཔའི་ཚུལ་ཁྲིམས་ཀྱི་སོགས་བརྗོད། ཕན་ཡོན་བསྟན་པ་ནི། སློབ་དཔོན་གྱིས། རིགས་ཀྱི་བུ་ཁྱོད་ཉོན་ཅིགའདི་ནི་ཆོས་ཉིད་ཡིན་ཏེ་གང་གི་ཚེ་བྱང་ཆུབ་སེམས་དཔའི་ ཚུལ་ཁྲིམས་ཀྱི་སྡོམ་པ་ཡང་དག་པར་ལེན་པའི་ལས་བརྗོད་པ་རྫོགས་པ་དེའི་ཚེ་ཕྱོགས་བཅུའི་སངས་རྒྱས་ཀྱི་ཞིང་ཐམས་ཅད་དུ་སངས་རྒྱས་དང་བྱང་ཆུབ་སེམས་དཔའ་རྣམས་ལ་འདི་ལྟ་བུའི་ལྟས་འབྱུང་བར་འགྱུར་ཏེ་ས་གཡོ་བར་འགྱུར།
Page: 67 ༄༅། །ལྷའི་རྔ་བོ་ཆེ་གྲག་པར་འགྱུར་མེ་ཏོག་གི་ཆར་འབབ་པར་འགྱུར། སངས་རྒྱས་དང་བྱང་ཆུབ་སེམས་དཔའ་དེ་དག་གིས་འདི་ལྟར་སངས་རྒྱས་ཀྱི་ཞིང་ག་གེ་མོ་ཞིག་ན་བྱང་ཆུབ་སེམས་དཔའ་མིང་འདི་ཞེས་བགྱི་བས་བྱང་ཆུབ་ སེམས་དཔའ་མིང་འདི་ཞེས་བགྱི་བ་ལས་བྱང་ཆུབ་སེམས་དཔའི་ཚུལ་ཁྲིམས་ཀྱི་སྡོམ་པ་ཡང་དག་པར་མནོས་སོ་ཞེས་ཡང་དག་པར་མཁྱེན་པར་འགྱུར་རོ། །དེ་ལ་སངས་རྒྱས་བཅོམ་ལྡན་འདས་དེ་དག་དང་བྱང་ཆུབ་སེམས་དཔའ་དེ་དག་ གིས་ཆོས་ཀྱི་བརྩེ་བས་བུ་དང་སྤུན་ཟླར་དགོངས་པ་མཛད། དེ་ལྟར་དགོངས་པ་མཛད་པས་བྱང་ཆུབ་སེམས་དཔའ་དེའི་བསོད་ནམས་དང་ཡེ་ཤེས་ཀྱི་ཚོགས་རབ་ཏུ་འཕེལ་བར་འགྱུར་རོ་ཞེས་བརྗོད་ཅིང་སློབ་དཔོན་མེད་ཁ་དེ་ལྟར་འགྱུར་ བར་ཡིད་ཆེས་པས་ཀྱང་འགྲུབ། གསང་བར་གདམས་པ་ནི། བྱང་ཆུབ་སེམས་དཔའ་མིང་འདི་ཞེས་བགྱི་བ་ཁྱོད་ཉོན་ཅིགབྱང་ཆུབ་སེམས་དཔའི་སྡོམ་པ་ཡང་དག་པར་བླངས་པ་འདི་དད་པ་མེད་པ་རྣམས་ཀྱི་མདུན་དུ་སྨྲ་བར་མི་བྱ་སྟེ་གང་གི་ཕྱིར་ དད་པ་མེད་པ་རྣམས་ལ་བྱང་ཆུབ་སེམས་དཔའི་སྡོམ་པ་རབ་ཏུ་བསྟན་ན་དད་པ་མེད་པའི་སེམས་ཅན་དེ་དག་གིས་བྱང་ཆུབ་སེམས་དཔའི་སྡོམ་པ་ལ་མ་དད་པས་སྤོང་བར་བྱེད་དེ་དེས་ན་ཇི་སྙེད་བྱང་ཆུབ་སེམས་དཔའི་སྡོམ་པ་ལ་གནས་པའི་བསོད་ནམས་ཀྱི་ ཕུང་པོ་དང་ལྡན་པར་གྱུར་པ་དེ་སྙེད་ཀྱི་བསོད་ནམས་མ་ཡིན་པའི་ཕུང་པོ་མ་དད་པ་དེ་ལ་ལྡན་པར་འགྱུར་རོ། །གང་གི་ཕྱིར་བྱང་ཆུབ་སེམས་དཔས་སེམས་ཅན་སྡུག་བསྔལ་ཐམས་ཅད་ལས་ཡོངས་སུ་སྲུང་བར་བྱ་བ་ཡིན་པས་སྡིག་པ་ལས་ལྡོག་པར་བྱ་ སྟེ་དེའི་ཕྱིར་མཆོག་ཏུ་དགེ་བའི་བྱང་ཆུབ་ཀྱི་སེམས་གསང་བར་བྱ་བ་ཡིན་ནོ་ཞེས་གདམ་ཞིང་སློབ་དཔོན་མེད་ན་རང་གིས་དེ་ལྟར་ཡིད་ལ་ངེས་པར་བྱའོ། །དེ་ནས་བསླབ་བྱ་ཇི་ལྟར་འཚམ་པ་བསྟན་ཞིང་མཇུག་ཏུ་གཏང་རག་གི་མཆོད་བསྟོད་རྒྱས་བསྡུས་ཅི་རིགས་
Page: 68 བྱའོ། །རྒྱ་ཆེན་སྤྱོད་རྒྱུད་ཀྱི་ཆོ་ག་ལག་ཏུ་བླང་བ་བཤད་ཟིན་ཏོ། །འདིར་ཤིང་རྟའི་སྲོལ་གཉིས་ཀྱི་ཆོ་ག་ལས་སྐྱེས་པའི་སེམས་སྐྱེད་དེ་གཅིག་གམ་ཐ་དད་ཅེ་ན། འདི་ལ་ཆོས་རྗེ་ས་སྐྱ་པ་སོགས་ཤིན་ཏུ་ཐ་དད་ཅིང་མཆོག་དམན་ཡོད་པར་བཞེད་ལ། ལེགས་བཤད་བསྡུས་པར་ཡང་གཞུང་འདི་གཉིས་དང་པོ་ལེན་པའི་ཆོ་ག་མི་འདྲ་བར་དུ་བསྲུང་བྱ་ལྟུང་བའི་གྲངས་མི་འདྲ་ཐ་མར་ཕྱིར་བཅོས་མི་འདྲ། དང་པོ་ལེན་ཆོག་མི་འདྲ་སྟེ་བྱང་ས་ལས་སྡིག་བཤགས་མ་གསུང་སྟེ་སྡིག་བཤགས་ནི་འགྱོད་ ཅིང་ཡིད་གདུང་བ་དང་བཅས་པ་ཡིན་ལ་བྱང་ཆུབ་ཀྱི་སེམས་ནི་ཤེས་རྒྱུད་དགའ་བ་རྒྱས་པ་ལ་སྐྱེ་བར་དགོངས་སོ། །གཞུང་འདིར་སྡིག་བཤགས་རྒྱས་པར་གསུངས་ཏེ་རས་དྲི་མ་མེད་པ་ཙཱརལ་ཚོན་འཛིན་པ་ལྟར་རྒྱུད་དག་པ་ལ་བྱང་སྡོམ་སྐྱེ་བར་དགོངས་སོ། ། བྱང་ས་ལས་ཕྱག་མཆོད་ཙམ་མ་གཏོགས་ཡན་ལག་བདུན་པ་ཚང་བར་མ་གསུང་ལ་གཞུང་འདིར་ཚང་བར་གསུངས་སོ། བྱང་ས་ལས་བྱང་སྡོམ་གྱི་སྔོན་དུ་བསླབ་པ་བརྗོད་པ་དང་བར་ཆད་དྲི་བ་གསུང་ལ་འདིར་དེ་དག་མ་གསུངས་སོ། །དངོས་ གཞིའི་ཆོ་ག་ལ་ཡང་སེམས་སྐྱེད་དང་སྡོམ་པ་གཉིས་ཀའི་བརྗོད་ཚུལ་མི་འདྲ་བ་ཡོད་དོ། །མཇུག་ཆོག་ལ་ཡང་བསླབ་པ་བརྗོད་པ་ཡོད་མེད་སོགས་ཀྱི་ཁྱད་ཡོད་དོ། །བར་དུ་བསྲུང་བྱ་ལ་ཁྱད་ཡོད་དེ་བྱང་སར་རྩ་ལྟུང་བཞིར་བཤད་ལ་འདིར་རྒྱལ་པོའི་ ལྔ་བློན་པོའི་ལྔ་ལས་དང་པོ་བའི་ལྟུང་བ་བརྒྱད་ཐུན་མོང་དུ་བྱང་སེམས་མི་གཏང་བ་དང་བཅུ་དགུར་གསུངས་པའི་ཕྱིར་རོ། །ཕྱིར་བཅོས་མི་འདྲ་སྟེ་བྱང་ས་ལས། སྡོམ་པ་སླར་ཡང་བླང་བར་བྱ། །ཟག་པ་འབྲིང་ནི་གསུམ་ལ་བཤགས། །གཅིག་གི་ མདུན་དུ་ལྷག་མ་རྣམས། །ཞེས་འཆད་ལ། བསླབ་བཏུས་སུ་བྱང་ཆུབ་སེམས་དཔའ་ནམ་མཁའི་སྙིང་པོ་ལ་འཆགས་པའི་ཐབས་ཞུ་དགོས་པའི་ཕྱིར་ཞེས་སྣང་ལ་གཞན་མང་ཞིག་ཀྱང་ཐ་དད་པར་འདོད་དོ། །སྤྱིར་དེ་གཉིས་ཀྱི་བྱང་ཆུབ་ཀྱི་སེམས་དེ་
Page: 69 གཅིག་གམ་ཐ་དད་ཅེས་དྲིས་པ་ལ་ཆོ་ག་ཐ་དད་དོ་ཞེས་སོགས་ནི་མཁས་པའི་ལན་མིན་ལ། ཐ་དད་ཚུལ་དེ་དག་ཀྱང་བསླབ་བཏུས་ཀྱི་རྒྱ་དཔེ་འདི་གཉིས་ཤིན་ཏུ་མི་གཅིག་སྟེ་གཅིག་ལཉྩ་དང་གཅིག་ཝརྟུ་ལར་བྲིས་པའི་ཕྱིར་ཞེས་པའི་ རིགས་པ་ཁོ་ནར་སྣང་ངོ་། །ཁྱེད་རང་ལྟར་ནའང་བྱང་སའི་ལུགས་ཀྱི་འབོགས་ཆོག་ལས་ཆོས་ཅན། བྱང་སྡོམ་མི་སྐྱེ་བར་ཐལ་ཏེ་རས་དག་པ་ལ་ཚོན་འཛིན་པ་ལྟར་རྒྱུད་དག་པ་ལ་སྐྱེ་དགོས་པ་ལས་བཤགས་པས་རྒྱུད་དག་པར་མ་བྱས་པའི་ཕྱིར། ཡང་ སྤྱོད་འཇུག་གི་སེམས་སྐྱེད་ཀྱི་ཆོ་ག་འདི་ལས་ཆོས་ཅན། བྱང་སྡོམ་མི་སྐྱེ་བར་ཐལ། བྱང་སྡོམ་ནི་ཤེས་རྒྱུད་དགའ་བ་རྒྱས་པ་ལས་སྐྱེ་ལ་འདིར་ནི་སྡིག་པ་ལ་འགྱོད་ཅིང་བཤགས་པས་ཡིད་གདུང་བར་བྱས་པའི་ཕྱིར། སོ་སོའི་རྟགས་ཁྱབ་རང་གིས་ ཁས་བླངས་ཟིན་ཏོ། །སྤྱིར་སྡིག་པས་འགྱོད་ཅིང་བཤགས་པ་ལས་སེམས་དང་བར་བྱས་ཤིང་སྡིག་པའི་གཉེན་པོ་ཡང་ང་ཆུབ་ཀྱི་སེམས་ལས་ལྷག་པ་མེད་པར་བསྟན་ཟིན་པས་གཉེན་པོ་ལ་ནན་ཏན་གྱིས་འཇུག་པར་འདོད་པ་འདི་ཉིད་ཤེས་རྒྱུད་དགའ་ བ་རྒྱས་པ་ཡིན་གྱི་སྡིག་པ་ལ་འགྱོད་པར་མ་མཐོང་བའི་སེམས་ང་རྒྱལ་དང་བཅས་པ་ཙམ་པོ་བ་དེ་འདྲ་བྱང་ཆུབ་ཀྱི་སེམས་སྐྱེ་བའི་དགའ་བ་རྒྱས་པ་ག་ལ་ཡིན། སྤྱིར་ཧ་ཅང་སྤྲོ་བ་དང་ཞུམ་པའི་དུས་སུ་གཉེན་པོ་མི་སྐྱེའི་བར་མའི་སེམས་ལས་སྐྱེ་བར་གསུངས་ པས་སེམས་དགའ་བ་རྒྱས་པ་ལ་བྱང་སྡོམ་སྐྱེ་ཞེས་པའང་འབྲེལ་ཆུང་ངོ་། །བྱང་སར་ཕྱག་མཆོད་ཙམ་ལས་མ་གསུང་པའང་ཡན་ལག་ལྷག་མ་ལྔ་མི་དགོས་པའི་རྣམ་བཅད་ཀྱང་ག་ལ་ཡིན། བར་ཆད་དྲི་བ་ཡང་བསྡུ་ན་ཁྱོད་བྱང་ཆུབ་ཀྱི་སེམས་ ཞེ་ནས་ལེན་འདོད་ཅིང་སྤང་བླང་ལ་སློབ་ནུས་སམ་ཞེས་འདྲི་བར་འདུ་ལ། དེ་ནི་སེམས་སྐྱེད་དོན་གཉེར་གྱིས་འོངས་པར་གོ་ན་མ་དྲིས་རུང་དེ་ལྟར་གོ་བའི་ཕྱིར། གོམ་པ་འདོར་བ་མཐོང་བཞིན་དུ་ཁྱོད་ཀྱིས་གོམ་པ་འདོར་ནུས་སམ་ཞེས་དྲི་མི་དགོས་
Page: 70 པ་བཞིན་ནོ། །དངོས་གཞི་ཡང་ཁྱད་པར་མེད་དེ་སེམས་སྐྱེད་གཉིས་ཚིག་དོན་མཚུངས་ཤིང་སྡོམ་པ་ལེན་ཆོག་གཉིས་ཚིག་དོན་མཚུངས་པའི་ཕྱིར། དེ་ཡང་བྱང་ས་ལས། ཇི་ལྟར་སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་ པའི་སངས་རྒྱས་རྣམས་དང་ས་ཆེན་པོ་ལ་རབ་ཏུ་ཞུགས་པའི་བྱང་ཆུབ་སེམས་དཔའ་ཆེན་པོ་རྣམས་ཀྱིས་དང་པོར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཆེན་པོར་ཐུགས་བསྐྱེད་པ་དེ་བཞིན་དུ། ཞེས་བྱ་བ་འདི་དང་། ཇི་ལྟར་སྔོན་གྱི་བདེ་ གཤེགས་ཀྱིས། །བྱང་ཆུབ་ཐུགས་ནི་བསྐྱེད་པ་ལྟར། །ཞེས་པ་འདི་གཉིས་ལ་དོན་མི་འདྲ་བ་ཅི་ཞིག་ཡོད། མ་བརྒལ་བ་རྣམས་བསྒྲལ་བར་བྱ་བའི་ཕྱིར་ཞེས་སོགས་ཀྱི་དགོས་པ་བྱང་སའི་ཆོ་གར་ཡོད་ལ་སྤྱོད་འཇུག་གི་ཆོ་གར་དངོས་སུ་མ་སྨོས་ མོད་ཀྱི་དོན་གྱིས་ཚང་བ་ཡིན་ཏེ་ཇི་ལྟར་སྔོན་གྱི་སངས་རྒྱས་རྣམས་ཀྱིས་ཐུགས་བསྐྱེད་པ་ལྟར་བདག་གིས་སྐྱེད་དོ་ཞེས་ཁས་བླངས་པས་སྔོན་གྱི་སངས་རྒྱས་ཐམས་ཅད་ཀྱི་སེམས་སྐྱེད་ལ་ཅིག་ཆར་དུ་ཞུགས་ཤིང་ཁས་བླངས་པ་ཡིན་ན་མ་བརྒལ་བ་བསྒྲལ་བ་སོགས་ དེའི་ལྷག་མར་ཅི་ཞིག་ལུས། བྱང་སྡོམ་གྱི་ཚིག་དོན་གཉིས་ཀ་ཁྱད་མེད་དེ། ཇི་ལྟར་སྔོན་གྱི་བདེ་གཤེགས་ཀྱིས། །བྱང་ཆུབ་སེམས་དཔའི་བསླབ་པ་ལ། །དེ་དག་ཇི་ལྟར་གནས་པ་ལྟར། །བདག་ཀྱང་འགྲོ་ལ་ཕན་དོན་དུ། །བྱང་ཆུབ་ སེམས་དཔའི་བསླབ་པ་ལ། །དེ་དག་རིམ་བཞིན་གནས་པར་བགྱི། །ཞེས་ཁས་བླངས་པ་འདི་དང་། བྱང་སར། ཁྱོད་དུས་གསུམ་གྱི་བྱང་ཆུབ་སེམས་དཔའི་བསླབ་པའི་གཞི་ཐམས་ཅད་དང་བྱང་ཆུབ་སེམས་དཔའི་ཚུལ་ཁྲིམས་ཐམས་ཅད་ དེ་སྡོམ་པའི་ཚུལ་ཁྲིམས་དང་སོགས་ཀྱིས་དེ་ཐམས་ཅད་བདག་ལས་བླང་བར་འདོད་དམ་ཞེས་དྲིས་པ་ལ་འཚལ་ལགས་པར་ཁས་བླངས་པ་འདི་གཉིས་ལ་རྒྱ་ཆེ་ཆུང་ཅུང་ཟད་ཀྱང་མི་མངོན་ཏེ་སྔོན་གྱི་བདེ་གཤེགས་ཀྱི་སྒྲས་ད་ལྟར་དང་མ་འོངས་པའང་
Page: 71 ༄༅། །མཚོན་པའི་ཕྱིར་དང་། མདོར་ན་གཉིས་ཀ་ཡང་བདག་བྱང་ཆུབ་སེམས་དཔའ་ཐམས་ཅད་ཀྱི་བསླབ་པ་ལ་སློབ་བོ་ཞེས་པས་བྱང་སྡོམ་འཛིན་ཞིང་སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་ཇི་ལྟར་ཐུགས་བསྐྱེད་ པ་ལྟར་སེམས་སྐྱེད་དོ་ཞེས་པས་སེམས་སྐྱེད་འཛིན་པ་ཁོ་ན་ཡིན་པའི་ཕྱིར། མཇུག་ཆོག་ལའང་བསླབ་པ་བརྗོད་པ་ལ་ཆོ་གར་མིང་བཏགས་རུང་མ་བཏགས་རུང་གནས་སྐབས་དེ་ཉིད་དམ་དེ་ལས་གཞན་དུའང་རུང་སྟེ་སྤང་བླང་གི་གནས་རྒྱས་བསྡུས་གང་ ཡང་རུང་བ་རེ་གཉིས་ཀ་ལ་སྟོན་པར་མཚུངས་ཤིང་འདུལ་བ་ལས་རང་གིས་མཁན་པོ་བྱས་ཏེ་རབ་ཏུ་ཕྱུང་ནས་བཤད་པ་ལ་བཀོད་པ་ནི་སླའི་སྤང་བླང་གི་ལུང་མི་འབོགས་པ་ནི་དེ་ལྟ་མ་ཡིན་ནོ་ཞེས་གསུངས་པ་དང་ཚུལ་མཚུངས་པའི་ཕྱིར་རོ། །དེས་ན་ཆོ་གའི་ དོན་ལ་ཁྱད་པར་མེད་ན་ཡང་གནས་སྐབས་སྤྱོད་འཇུག་གི་ལུགས་ནི་གདུལ་བྱ་བསྡུས་པ་ལ་དགའ་བའི་ངོར་དོན་གཙོ་བོར་བསྡུས་ཏེ་བྱ་བ་ཉུང་ངུས་བསྟན་ལ། བྱང་སར་ནི་སྤྲོས་པ་ལ་དགའ་བའི་ངོར་དེ་ཉིད་རྣམ་པ་དུ་མར་ཕྱེ་ནས་རྒྱས་པར་བསྟན་པ་སྟེ་ཆོ་ གའི་ངོ་བོ་ནི་གཅིག་ཁོ་ནའོ། །བསྟན་བྱ་བྱང་ཆུབ་ཀྱི་སེམས་ལ་ཡང་ཁྱད་པར་མེད་དེ་སྙིང་རྗེས་གཞན་དོན་དང་འབྲས་བུ་བྱང་ཆུབ་ལ་དམིགས་པའི་བློ་སྐྱེད་པར་མཚུངས་ཤིང་གཞན་དོན་དུ་སངས་རྒྱས་འཐོབ་འདོད་ཀྱི་བློ་བློ་སེམས་སྐྱེད་ཡིན་པ་དང་དེའི་ ཕྱིར་བྱང་ཆུབ་སེམས་དཔའི་བསླབ་པ་ལ་སློབ་པར་དམ་བཅའ་བའི་བློ་བྱང་སྡོམ་ཡིན་པར་གཉིས་ཀ་ལ་མཚུངས་པའི་ཕྱིར། གཞན་དུ་ན་སྤྱོད་འཇུག་དང་བྱང་ས་གཉིས་བྱང་ཆུབ་དང་སེམས་ཅན་སོགས་ཀྱང་ཐ་དད་དུ་ངོས་འཛིན་དགོས་པར་ཐལ་བར་འགྱུར་རོ། ། གལ་ཏེ་སྤྱོད་འཇུག་ལས་སེམས་སྡོམ་ལྷན་ཅིག་ཏུ་འཛིན་པར་ཡང་བཤད་ལ། བྱང་སར་བྱང་སྡོམ་གྱི་སྔོན་དུ་སེམས་བསྐྱེད་དགོས་པས་ཁྱད་ཡོད་དོ་སྙམ་ན། བྱང་སར་སྨྲོས་པ་ལ་དགའ་བའི་ངོར་དང་བྱང་ཆུབ་སེམས་དཔའ་རིམ་ཅན་དུ་འཇུག་པ་ཤས་ཆེ་
Page: 72 བའི་དབང་དུ་མཛད་ནས་སྔོན་དུ་སེམས་བསྐྱེད་ཅིང་བྱང་ཆུབ་སེམས་དཔའི་སྡེ་སྣོད་ལ་ཅི་རིགས་པར་སྦྱངས་ཏེ་སླར་སྡོམ་པ་ལེན་པའི་དབང་དུ་མཛད་ནས་དེ་ལྟར་དུ་གསུངས་ལ། སྤྱོད་འཇུག་ཏུ་དབང་པོ་རྣོ་བ་བསྡུས་པ་ལ་མོས་པ་དང་ཅིག་ཆར་འཇུག་པའི་ དབང་དུ་བྱས་ནས་སེམས་སྡོམ་ལྷན་ཅིག་ཏུ་ནོད་པར་བསྟན་མོད་ཀྱང་། སེམས་སྡོམ་ལྷན་ཅིག་ཏུ་ནོད་པའི་ཚེ་ཡང་སྔོན་དུ་སེམས་བསྐྱེད་དེ་ནས་སྡོམ་པ་ནོད་པས་རྟེན་དང་བརྟེན་པར་ཡོད་ལ་ཚིགས་བཅད་གཅིག་གིས་གཉིས་ཀ་ལེན་པ་དང་འཇུག་པ་ཉེ་བ་ སྐད་ཅིག་མ་མང་པོས་བར་མ་ཚོད་པར་ལེན་པས་ལྷན་ཅིག་ཏུ་ལེན་པའི་སྒྲར་བརྗོད་ཀྱི་ཞིབ་མོར་དཔྱད་ན་ལྷན་ཅིག་མ་ཡིན་ཏེ་སྔ་ཕྱིར་ཡོད་པའི་ཕྱིར། དེས་ན་སེམས་སྐྱེད་རྟེན་དང་སྡོམ་པ་བརྟེན་པ་ཡིན་པའང་གཉི་ག་ལ་ཁྱད་མེད་དོ། །སྲུང་ཚུལ་ དང་ཕྱིར་བཅོས་ཀྱང་གཉི་ག་དོན་མི་འགལ་བར་འོག་ཏུ་འཆད་དོ། །ལྔ་པ་བསླབ་བྱ་ལ་སྨོན་པའི་བསླབ་བྱ་དང་འཇུག་པའི་བསླབ་བྱའོ། །དང་པོ་ནི། སེམས་ཅན་གཅིག་ཀྱང་བློས་མི་སྤང་། །རྟག་ཏུ་སེམས་དེའི་ཕན་ཡོན་བསམ། ། ཚོགས་གཉིས་བསག་ལ་བརྩོན་པར་བྱ། །ཡང་ཡང་བྱང་ཆུབ་སེམས་གཉིས་སྦྱང་། །ནག་པོའི་ཆོས་བཞི་སྤངས་ནས་ནི། དཀར་པོའི་ཆོས་བཞི་བསྟེན་པར་བྱ། །ཞེས་ལྔ་སྟེ་སེམས་ཅན་གང་ཡང་རུང་བས་བདག་གི་སེམས་སུན་ ཕྱུང་སྟེ་ང་ནི་ནམ་ཡང་ཁྱོད་ལ་ཕན་མི་འདོགས་སོ་སྙམ་པའམ་ཕྲད་པར་མ་གྱུར་ཅིག་སྙམ་པ་ནི་སེམས་ཅན་དེ་བློས་སྤངས་པའི་བློ་སྟེ་ཐུན་ཚོད་འདས་ན་བྱང་སེམས་འཆོར་རོ། །འདི་ལ་སེམས་ཅན་གཞན་ཐམས་ཅད་བློས་སྤངས་ནི་ཉན་རང་གི་ཡིད་ བྱེད་སྐྱེས་ན་མ་གཏོགས་མི་འབྱུང་བས་གཅིག་ཁོ་ན་མཚན་གཞིའི་དཔེར་བྱས་སོ། །དེས་ན། ཕན་བཏགས་ལན་དུ་གནོད་བྱས་ན། །ཡང་ལན་སྙིང་རྗེ་ཆེན་པོས་བསླན། །ཛམྦུ་གླིང་གི་སྐྱེས་མཆོག་ནི། །ཉེས་པའི་ལན་ཡང་ལེགས་
Page: 73 ༄༅། །པས་ལྡོན། །ཞེས་པ་དང་། མ་དྲོས་པས་ཞུས་པའི་མདོ་ལས། བྱང་ཆུབ་སེམས་དཔའ་ཆོས་གཅིག་དང་ལྡན་ན་རྣམ་པ་ཐམས་ཅད་ཀྱི་མཆོག་དང་ལྡན་པའི་སངས་རྒྱས་ཀྱི་ཆོས་རྣམས་ཡོངས་སུ་འཛིན་ཏོ་ཆོས་གཅིག་པུ་ གང་ཞེ་ན་སེམས་ཅན་བློས་ཡོངས་སུ་མི་གཏང་བའོ་ཞེས་གསུངས་པ་ལྟར་བསླབ་པ་ནི་མི་འཆོར་བའི་ཐབས་སོ། །རྟག་ཏུ་བྱང་ཆུབ་ཀྱི་སེམས་ཀྱི་ཕན་ཡོན་བསམ་པ་ནི་བྱང་སེམས་མི་ཉམས་པའི་ཐབས་ཏེ་ཇོ་བོ་ཆེན་པོ་ཡང་། ངན་འགྲོ་ལས་ནི་ ལྡོག་བགྱིད་ཅིང་། །མཐོ་རིས་ལམ་ནི་རབ་སྟོན་ལ། །རྒ་ཤི་མེད་པར་འདྲེན་བྱེད་པ། །བྱང་ཆུབ་སེམས་ལ་ཕྱག་འཚལ་ལོ། །ཞེས་དང་། གང་ལ་སེམས་ཀྱི་དམ་པ་རིན་ཆེན་དེ། །སྐྱེས་པ་དེ་ཡི་སྐུ་ལ་ཕྱག་འཚལ་ཞིང་། །སོགས་ ཤར་ཤར་གསུང་བར་གྲགས་པ་ལྟ་བུའོ། །གསུམ་པ་ནི། ཚོགས་ཀྱི་གཏམ་ལས། དེ་རིང་བདག་གིས་བསོད་ནམས་དང་། །ཡེ་ཤེས་ཚོགས་ནི་གང་བྱ་དང་། །སེམས་ཅན་ཕན་པ་གང་བྱ་ཞེས། །བྱང་ཆུབ་སེམས་དཔས་རྟག་ཏུ་བསམ། ། ཞེས་པ་ལྟར་དགེ་བའི་འདུན་པ་སྔོན་དུ་བཏང་སྟེ་བསོད་ནམས་ཀྱིཚོགས་ཆོས་སྤྱོད་བཅུ་དང་བསྡུ་དངོས་བཞི་དང་ཚུལ་ཁྲིམས་གསུམ་ལ་སོགས་པ་ཐབས་ཀྱི་སྤྱོད་པ་རྣམས་རྟག་པར་བྱ་ལ་དེ་རྣམས་ཀྱང་ཡེ་ཤེས་ཀྱི་ཚོགས་འཁོར་གསུམ་ཡོངས་དག་ ཏུ་ཤེས་པས་བྱ་སྟེ་དེ་ལྟར་སྔགས་ཐུང་གཅིག་བཟླས་པ་ཡན་ཡང་ཚོགས་གཉིས་ཟུང་འཇུག་ཏུ་རྟག་པར་གསོག་པ་ནི་སེམས་དེའི་སྟོབས་སྐྱེད་པའོ། །བཞི་པ་ནི། རྒྱུ་ཡི་བྱམས་དང་སྙིང་རྗེ་སྒོམ། །ཉིན་མཚན་ཐུན་དྲུག་སེམས་སྐྱེད་བླང་། ། བདག་གཞན་བརྗེ་བའི་གཏོང་ལེན་སྦྱང་། །། འདི་ནི་བྱང་ཆུབ་སེམས་སྦྱངས་པའོ། །ཞེས་པ་སྟེ་བྱམས་པ་དང་སྙིང་རྗེ་སྒོམ་པ་ནི་རྒྱུ་ལ་སྦྱངས་པའོ། །བྱང་ཆུབ་ཀྱི་སེམས་ཡང་ཡང་བླང་བ་ནི་སེམས་དངོས་སྦྱངས་པའོ། །བདག་གི་དགེ་བདེ་སེམས་ཅན་
Page: 74 ལ་བྱིན་ཞིང་གཞན་གྱི་སྡིག་སྡུག་བདག་ལ་ལེན་པའི་གཏོང་ལེན་སྤྱད་པ་ནི་བསམ་སྦྱོར་གཉིས་ཀའི་སྒོ་ནས་བྱང་ཆུབ་སེམས་ཀྱི་སྤྱོད་པ་སྦྱངས་པའོ། །ལྔ་པ་ནི། བླ་མ་དང་ནི་མཆོད་འོས་སླུ། །འགྱོད་གནས་མིན་ལ་གཞན་འགྱོད་སྐྱེད། །རྒྱལ་སྲས་ གཞན་ལ་ཁྲོ་བས་སྐུར། །སེམས་ཅན་ལ་ནི་གཡོ་སྒྱུས་སྤྱོད། །འདི་རྣམས་ནག་པོའི་ཆོས་བཞི་སྟེ། །བྱང་སེམས་ཉམས་དང་བརྗེད་པའི་རྒྱུ། །བཟློག་པ་དཀར་པོའི་ཆོས་བཞི་སྟེ། །རྟག་པར་མི་བརྗེད་རྒྱུ་ཡིན་ནོ། །དེ་ཡིས་སྨོན་པའི་ བསླབ་བྱ་བཤད། །ཅེས་པ་སྟེ། བླ་མ་དང་མཆོད་འོས་མཁན་སློབ་དང་སྦྱིན་གནས་སོགས་ལ་སླུ་སེམས་ཀྱིས་རྫུན་ལ་སོགས་པས་མགོ་བསྐོར་ན་དེ་དག་གིས་ཚོར་རུང་མ་ཚོར་རུང་དགྱེས་རུང་མ་དགྱེས་རུང་ཁམ་ཆེ་རུང་ཆུང་རུང་མགོ་འཁོར་རུང་མ་འཁོར་ རུང་ཐུན་ཚོད་ལས་འདས་ན་བྱང་སེམས་འཆོར་རོ། །དེ་བཞིན་དུ་གཞན་འགྱོད་པའི་གནས་མིན་པ་དགེ་བ་བྱས་པ་ལ་ཤེས་བཞིན་དུ་འགྱོད་པ་བསྐྱེད་ན་སྐྱེས་རུང་གཉིས་པའོ། །སེམས་བསྐྱེད་པའི་གང་ཟག་ལ་ཞེ་སྡང་གིས་མི་སྙན་པ་བརྗོད་ ན་ཅི་ལྟ་བུས་བརྗོད་ཀྱང་ཐོས་མ་ཐོས་དགའ་མ་དགའ་ཅི་ཡིན་ཡང་གསུམ་པའོ། །སེམས་ཅན་གང་ཡང་རུང་བ་ཞིག་ལ་གཡོ་ཟོལ་ཞིག་བྱས་ན་ཚོར་མ་ཚོར་དགའ་མ་དགའ་ཕན་གནོད་ཅིར་གྱུར་ཀྱང་ནག་པོའི་ཆོས་བཞི་པ་སྟེ་འདི་བཞི་ག་ལ་ཐུན་ཚོད་ཀྱི་ ནང་ཁོངས་སུ་བཤགས་བསྡམ་གྱིས་མ་སླེབ་ན་འཆོར་ལ་བའོ། །དེ་དག་གི་གཉེན་པོར་དཀར་པོའི་ཆོས་ཀྱང་བཞི་སྟེ་ཤེས་བཞིན་དུ་སྲོག་གི་ཕྱིར་ཡང་རྫུན་མི་སྨྲ་བ་དང་། སེམས་ཅན་ཐམས་ཅད་དགེ་བ་ལ་འགོད་ཅིང་ཁྱད་པར་ཐེག་ཆེན་ལ་འགོད་པ་དང་། སེམས་བསྐྱེད་པའི་བྱང་ཆུབ་སེམས་དཔའ་ཐམས་ཅད་ལ་སངས་རྒྱས་ཀྱི་འདུ་ཤེས་བཞག་ཅིང་ཡོན་ཏན་ཕྱོགས་བཅུར་བསྒྲག་པ་དང་། སེམས་ཅན་ལ་ལྷག་པའི་བསམ་པས་གནས་པའོ། །འདི་དག་ནི་འོད་སྲུང་གིས་ཞུས་པའི་མདོ་ལས་གསུངས་སོ། །
Page: 75 ༄༅། །གཉིས་པ་འཇུག་པའི་བསླབ་བྱ་ལ་དགག་པའི་བསླབ་བྱ་དང་། སྒྲུབ་པའི་བསླབ་བྱ་གཉིས། དང་པོ་ལ། བྱང་སའི་ལུགས་ནི། རྙེད་དང་བཀུར་སྟིར་ཆགས་པ་ཡིས། །བདག་བསྟོད་གཞན་ལ་སྨོད་པ་དང་། །སྡུག་ བསྔལ་མགོན་མེད་གྱུར་པ་ལ། །སེར་སྣས་ཆོས་ནོར་མི་སྟེར་དང་། །གཞན་གྱིས་བཤགས་ཀྱང་མི་ཉན་པར། །ཁྲོས་ནས་གཞན་ལ་འཚོག་པ་དང་། །ཐེག་པ་ཆེན་པོ་སྤོང་བྱེད་ཅིང་། །དམ་ཆོས་འདྲར་སྣང་སྟོན་པའོ། །ཞེས་རྩ་ལྟུང་བཞིའམ་བརྒྱད་ དེ་ཀུན་དཀྲིས་ཆེན་པོས་སྤྱད་ན་བྱང་སྡོམ་འཆོར་ཏེ་དགེ་སློང་གི་ཕམ་པ་བཞིན་ནོ། །ཀུན་དཀྲིས་འབྲིང་དང་ཆུང་དུས་བྱས་པ་ནི་ལྷག་མ་དང་ལྟུང་བྱེད་བཞིན་ནོ། །དཀོན་མཆོག་གསུམ་ལ་གསུམ་མི་མཆོད། །འདོད་པའི་སེམས་ཀྱི་རྗེས་སུ་འཇུག།། རྒན་པ་རྣམས་ལ་གུས་མི་བྱེད། །དྲིས་པ་ལ་ནི་ལན་མི་འདེབས། །མགྲོན་པོས་བདག་གིར་མི་བྱེད་ཅིང་། །གསེར་ལ་སོགས་པ་ལེན་མི་བྱེད། །ཆོས་འདོད་པ་ལ་སྦྱིན་མི་བྱེད། །ཚུལ་ཁྲིམས་འཆལ་རྣམས་ཡལ་བར་འདོར། །ཕ་རོལ་དད་ཕྱིར་ སློབ་མི་བྱེད། །སེམས་ཅན་དོན་ལ་བྱ་བ་ཆུང་། །སྙིང་བརྩེར་བཅས་ན་མི་དགེ་མེད། །འཚོ་བ་ལོག་པ་དང་དུ་ལེན། །འཕྱར་ནས་རབ་ཏུ་རྒོད་ལ་སོགས། །འཁོར་བ་གཅིག་པུར་བགྲོད་པར་སེམས། །གྲགས་པ་མ་ཡིན་མི་སྤོང་བ། །ཉོན་མོངས་ བཅས་ཀྱང་འཆོས་མི་བྱེད། །གཤེ་ལ་ལན་དུ་གཤེ་ལ་སོགས། །ཁྲོས་པ་རྣམས་ནི་ཡལ་བར་འདོར། །ཕ་རོལ་ཤེད་ཀྱིས་འཆགས་པ་སྤོང་། །ཁྲོས་པའི་སེམས་ཀྱི་རྗེས་སུ་འཇུག། རྙེད་བཀུར་འདོད་ཕྱིར་འཁོར་རྣམས་སྡུད། །ལེ་ལོ་ལ་ སོགས་སེལ་མི་བྱེད། །ཆགས་པས་བྲེ་མོའི་གཏམ་ལ་བསྟེན། ཏིང་ངེ་འཛིན་གྱི་དོན་མི་ཚོལ། །བསམ་གཏན་སྒྲིབ་པ་སྤོང་མི་བྱེད། །བསམ་གཏན་རོ་ལ་ཡོན་ཏན་བལྟ། །ཉན་ཐོས་ཐེག་པ་སྤོང་བར་བྱེད། །རང་ཚུལ་ཡོད་བཞིན་དེ་ལ་
Page: 76 བརྩོན། །བརྩོན་མིན་ཕྱི་རོལ་བསྟན་བཅོས་བརྩོན། །བརྩོན་པར་བྱས་ཀྱང་དེ་ལ་དགའ། །ཐེག་པ་ཆེན་པོ་སྤོང་བར་བྱེད། །བདག་ལ་བསྟོད་ཅིང་གཞན་ལ་སྨོད། །ཆོས་ཀྱི་དོན་དུ་འགྲོ་མི་བྱེད། །དེ་ལ་སྨོད་དང་ཡི་གེར་བསྟེན། །དགོས་པའི་ གྲོགས་སུ་འགྲོ་མི་བྱེད། །ནད་པའི་རིམ་གྲོ་བྱ་བ་སྤོང་། །སྡུག་བསྔལ་སེལ་བར་མི་བྱེད་དང་། །བག་མེད་པ་ལ་རིགས་མི་སྟོན། །བྱས་ལ་ལན་དུ་ཕན་མི་འདོགས། །གཞན་གྱི་མྱ་ངན་སེལ་མི་བྱེད། །ནོར་འདོད་པ་ལ་སྦྱིན་མི་བྱེད། །འཁོར་ རྣམས་ཀྱི་ནི་དོན་མི་བྱེད། །གཞན་གྱི་བློ་དང་མཐུན་མི་འཇུག། ཡོན་ཏན་བསྔགས་པ་སྨྲ་མི་བྱེད། །རྐྱེན་དུ་འཚམ་པར་ཚར་མི་གཅོད། །རྫུ་འཕྲུལ་བསྡིགས་ལ་སོགས་མི་བྱེད། །སྙིང་བརྩེར་ལྡན་ཞིང་བྱམས་ཕྱིར་དང་། །སེམས་དགེ་བ་ལ་ཉེས་པ་མེད། ། ཅེས་པའི་ཉེས་བྱས་བཞི་བཅུ་རྩ་དྲུག་ནི་འདུལ་བའི་ཉེས་བྱས་དང་མཚུངས་སོ། །བསླབ་བཏུས་སུ་ནི་ནམ་མཁའ་སྙིང་པོའི་མདོ་ལས་གསུངས་པ་ལྟར། དཀོན་མཆོག་གསུམ་གྱི་དཀོར་འཕྲོག་དང་། །དམ་པའི་ཆོས་ནི་སྤོང་བ་དང་། །རྟགས་ཅན་ཆད་ པས་གཅོད་པ་དང་། །མཚམས་མེད་ལྔ་ཡི་ལས་བྱེད་དང་། །ཆད་པར་ལྟ་བ་འཛིན་པ་སྟེ། །བྱང་སེམས་རྒྱལ་པོའི་རྩ་ལྟུང་ལྔ། །གྲོང་དང་ལྗོངས་དང་གྲོང་ཁྱེར་དང་། །གྲོང་བརྡལ་ཡུལ་འཁོར་འཇོམས་པ་སྟེ། །བྱང་སེམས་བློན་པོའི་ རྩ་ལྟུང་ལྔ། །བདེ་གཤེགས་སྐུ་འཇོམས་ཁྲག་འབྱིན་དང་། །རྩ་བའི་ཕམ་པ་རྣམ་བཞི་སྟེ། །རབ་ཏུ་བྱུང་བའི་རྩ་ལྟུང་ལྔ། །མ་སྦྱངས་པ་ལ་སྟོང་ཉིད་སྟོན། །ཐེག་ཆེན་ལ་ཞུགས་ཕྱིར་ཟློག་དང་། །སོ་ཐར་སྤངས་ཏེ་ཐེག་ཆེན་སྦྱོར། །སློབ་ མའི་ཐེག་པ་ལ་སྨོད་དང་། །རྙེད་ཕྱིར་བདག་བསྟོད་གཞན་སྨོད་དང་། །ཟབ་མོ་བཟོད་པར་རྫུན་སྨྲ་དང་། །རྔན་པར་དཀོན་མཆོག་དཀོར་སྦྱིན་ལེན། །སྤོང་རྫས་ཁ་ཏོན་པར་སྦྱིན་ཏེ། །ལས་དང་པོ་ཡི་ལྟུང་བ་བརྒྱད། །ཅེས་བྱ་སྟེ་འདི་ལ་
Page: 77 ༄༅། །མདོ་ལྟར་ན་བློན་པོ་ལ་དཀོན་མཆོག་གི་རྫས་འཕྲོག་ཡུལ་འཇོམས་ཆོས་སྤོང་རྟགས་ཅན་ལ་འཚེ་མཚམས་མེད་བྱེད་པ་སྟེ་ལྟུང་བ་ལྔ་དང་གྲོང་གྲོང་ཁྱེར་སོགས་ཀྱི་དབྱེ་བས་ཕྱེ་བ་ལྔ་སྟེ་ལྟུང་བ་བཅུར་གསུངས་ཀྱང་སྔ་མ་ལྔ་ རྒྱལ་པོ་དང་ཐུན་མོང་དུ་བསྡུས་ནས་ཐུན་མོང་མ་ཡིན་པའི་གྲོང་སོགས་ལྔ་བྱེ་བྲག་ཏུ་ཕྱེ་བ་བསྟན་བཅོས་ཀྱི་ལུགས་ལྟར་བཤད་པ་ཡིན་ལ་འགྲེལ་ལས་བློན་པོའི་ལྟུང་བ་གཅིག་ཅེས་ཀྱང་བཤད་དོ། །མདོར་ཉན་ཐོས་ཀྱི་རྩ་ལྟུང་ལྔ་ནི་ཕམ་པ་ བཞི་དང་དེ་བཞིན་གཤེགས་པའི་སྐུ་འཇོམས་ཤིང་ཁྲག་འབྱིན་པའོ་ཞེས་གསུངས་པས་བཤད་ཀྱི་དེང་སང་འདྲེན་པ་ཉུང་བར་སྣང་ངོ་། །འདིར་གཞན་རྣམས་གོ་སླ་ལ་རྟགས་ཅན་ཆད་པས་གཅོད་པ་ནི། ཚུལ་ཁྲིམས་འཆལ་བའི་དགེ་སློང་ལའང་། ངུར་སྨྲིག་འཕྲོག་དང་རྡེག་པ་དང་། །བཙོན་རར་གཞུག་པར་བྱེད་པ་དང་། །རབ་ཏུ་བྱུང་ལས་འབེབས་པ་དང་། །ཞེས་རྟགས་ཀྱི་ཆ་ཙམ་འཛིན་པའི་གང་ཟག་ཀྱང་སྡུད་པ་ཡིན་ལ་དེ་ལ་གནོད་པ་ཅི་བྱས་ཀྱང་རྩ་ལྟུང་ངོ་། །གང་གི་ཁུ་བ་ལས་ བདག་ཉིད་ཀྱི་ལུས་ཀྱི་རྒྱུར་གྱུར་པ་ནི་ཕ་དང་། གང་གི་ཟླ་མཚན་ལས་བདག་གི་ལུས་བསྐྱེད་པ་ནི་མ་དང་། ཁམས་གསུམ་གྱི་ཉོན་མོངས་སྤངས་པ་ནི་དགྲ་བཅོམ་པ་ཡིན་ལ་དེ་རྣམས་བསད་པ་དང་། དེ་བཞིན་གཤེགས་པ་སུས་ཀྱང་བསད་པར་མི་ ནུས་མོད་ཀྱི་ངན་སེམས་ཀྱིས་སྐུ་ལས་མཚལ་ཕྱུང་ཞིང་བྱུང་བ་དང་། བསྟན་པ་འདི་ལ་འཁོར་ལོའི་དབྱེན་ལྷས་བྱིན་གྱིས་བྱས་པ་ལས་གཞན་མི་འབྱུང་མོད་ཀྱང་བསམ་པ་མ་དག་པ་དག་པས་ལས་ཀྱི་དབྱེན་དང་ཟང་ཟིང་གི་ཆེད་དུ་དགེ་འདུན་ཕྱེ་བའི་དབྱེན་སྟེ་ འདི་ལྔ་ནི་ལས་ཤིན་ཏུ་མི་བཟད་པ་ཡིན་ཞིང་ཤི་མ་ཐག་བར་དོ་མེད་པར་མནར་མེད་དུ་སྐྱེ་བས་ན་མཚམས་མེད་པའི་ལས་ལྔའོ། །ཆད་པར་ལྟ་བ་ནི་ལས་དཀར་ནག་གི་འབྲས་བུ་མེད་པར་ལྟ་བ་དང་ཚེ་ཕྱི་མ་མེད་པར་ལྟ་བའོ། །གང་ན་མི་རིགས་བཞི་ཡོད་པ་
Page: 78 གྲོང་དང་། བཟོ་རིགས་བཅོ་བརྒྱད་ཡོད་པ་གྲོང་ཁྱེར་དང་གྲོང་ཁྱེར་དུ་མ་ཡོད་པ་གྲོང་གི་བརྡལ་དང་བརྡལ་དུ་མ་ཡོད་པ་ཡུལ་ལྗོངས་དང་ཡུལ་ལྗོངས་དུ་མ་ཡོད་པ་ཡུལ་འཁོར་དུ་བརྒྱད་སྟོང་པའི་འགྲེལ་པར་བཤད་དོ། །མ་སྦྱངས་པ་ལ་སྟོང་ཉིད་སྟོན་པ་ནི་ དེ་མ་དད་ཅིང་སྐྲག་པར་འགྱུར་བ་ལ་སྟེ་དད་ན་ཉེས་པ་མེད་དོ། །ཐེག་ཆེན་ལ་ཞུགས་པ་ཕྱིར་ལྡོག་པ་ལ་ཡང་ཐེག་དམན་དུ་རིགས་ངེས་པར་མཐོང་ན་ཉེས་པ་མེད་དམ་སྙམ་མོ། །ཐེག་དམན་དུ་ཞུགས་པ་ཐེག་ཆེན་དུ་སྦྱོར་བ་ལ་ཐེག་ཆེན་གྱི་སྣོད་ལྡན་ དུ་མཐོང་ན་ཉེས་པ་མེད་དོ། །སློབ་པ་ཉན་ཐོས་ཀྱི་ཐེག་པ་ལ་སྨོད་པ་ཡང་གཞན་ཐེག་ཆེན་ལ་གཟུད་པའི་དགོས་པ་མཐོང་ནས་ཐེག་དམན་ལ་སྨོད་པ་ལྟར་སྟོན་ན་ཉེས་པ་མེད་དོ། །རྙེད་བཀུར་གྱི་ཕྱིར་བདག་བསྟོད་གཞན་སྨོད་དང་བདག་ནི་ཆོས་ཟབ་མོ་ལ་ བཟོད་པ་ཐོབ་པའོ་ཞེས་མི་ཆོས་བླ་མའི་རྫུན་སྨྲ་བ་དང་། རྒྱལ་རིགས་དང་དགེ་སྦྱོང་ཕྱེ་ནས་དགེ་སྦྱོང་སོགས་དཀོན་མཆོག་གི་རྫས་རྒྱལ་རིགས་ལ་གསང་དུ་སྟེར་བ་དང་སྟེར་འཇུག་པའམ་བྱིན་པ་ལེན་པ་དང་། སྤོང་བ་བསམ་གཏན་པ་དེང་སང་བོད་ན་ སྒོམ་ཆེན་པར་གྲགས་པའི་ལོངས་སྤྱོད་ཕྲོགས་ཏེ་ཀློག་པ་ཁ་ཏོན་པ་དེང་སང་མཚན་ཉིད་པར་གྲགས་པ་ལ་སྟེར་དུ་འཇུག་པ་དང་སྟེར་བ་སྟེ་བྱེད་པ་པོ་དང་བྱེད་དུ་འཇུག་པ་པོའམ་སྟེར་བ་པོ་དང་ལེན་པ་པོ་གཉིས་ཀ་ལ་རྩ་བའི་ལྟུང་བ་སྟེ་ཕམ་པ་དང་མཚུངས་ལ་ ཕྱི་མ་འདི་བཞི་ལ་ལྟུང་མེད་མི་སྲིད་དོ། །འདིར་ཉེས་བྱས་ནི་མི་ཟད་པ་བརྒྱད་ཅུ་སྟེ། གཞན་གྱི་སྡུག་བསྔལ་ཡིད་མི་བདེ། །ནུས་བཞིན་ཞི་བར་མི་བྱེད་དང་། །བདེ་དང་ཡིད་བདེ་མི་སྐྱེད་པ། །ལྟུང་བའི་གཞི་སྟེ་ལུས་སེམས་ཀྱི། །རྟེན་གྱིས་ ཕྱེ་ན་རྣམ་པ་བཞི། །ད་ལྟ་དང་ནི་མ་འོངས་པའི། །དུས་ཀྱིས་ཕྱེ་བས་རྣམ་པ་བརྒྱད། །དེ་ཆེད་སྒོ་གསུམ་མི་བརྩོན་དང་། །ཕན་པའི་རྒྱུ་རྐྱེན་མི་ཚོལ་དང་། །གཉེན་པོའི་ཕྱོགས་ལ་མི་འབད་པ། །དེ་ལྟར་རྗེས་སུ་སྒྲུབ་པའི་སྒོ། །གསུམ་
Page: 79 ༄༅། །གྱིས་ཕྱེ་བས་ཉི་ཤུ་བཞི། །བདེ་སྡུག་ཡལ་འདོར་ལྟུང་བའོ། །སྡུག་བསྔལ་ཡིད་མི་བདེ་ཆེན་པོའི། །གཉེན་པོར་ཆུང་ངུ་མི་སྐྱེད་པ། །ལྟུང་བའི་གཞི་སྟེ་འདི་ཕྱི་ཡི། །སྐྱེ་བས་ཕྱེ་བ་རྣམ་པ་བཞི། །རང་གཞན་རྒྱུད་ ཀྱིས་ཕྱེ་བས་བཞི། །བདེ་དང་ཡིད་བདེ་ཆེན་པོའི་ཕྱིར། །ཆུང་ངུ་ཉམས་པར་མི་བྱེད་པ། །ལྟུང་བའི་གཞི་སྟེ་སྐྱེ་བ་དང་། །རྒྱུད་ཀྱིས་ཕྱེ་བས་རྣམ་པ་བརྒྱད། །སྒྲུབ་པ་ཡལ་བར་འདོར་བ་ཡི། །ལྟུང་བ་རྣམ་པ་བཅུ་དྲུག་གོ། དེ་ལྟར་ བཞི་བཅུ་རེ་རེ་ལའང་། །རེ་ཞིག་ཡལ་བར་འདོར་བ་དང་། །གཏན་དུ་འདོར་བས་རྣམ་པ་གཉིས། །ཕན་ཡོན་ཉེས་དམིགས་མི་ཟད་པའི། །ཡན་ལག་ལྟུང་བ་བརྒྱད་ཅུའོ། །ཞེས་བྱུང་སྟེ་ཉེས་བྱས་ཇི་ལྟ་བ་བཞིན་ནོ། །དེ་ཡང་བྱང་ ས་ལས་བྱང་ཆུབ་སེམས་དཔའ་རབ་ཏུ་བྱུང་བ་གཙོ་ཆེ་བའི་དབང་དུ་མཛད་ནས་དེ་ལ་འབྱུང་ཉེ་བ་རྣམས་སྤང་བར་བཅས་པ་ཡིན་ལ། ནམ་སྙིང་གི་མདོར་ཁྱིམ་པའི་རྟེན་ཅན་གྱི་བྱང་སེམས་ལ་གཙོ་བོར་དགོངས་ནས་དེ་ལ་འབྱུང་ཉེ་བ་རྣམས་སྤོང་བར་ བཅས་པ་སྟེ། རྒྱལ་པོ་བྱང་ཆུབ་སེམས་དཔའ་དང་བློན་པོ་བྱང་ཆུབ་སེམས་དཔའ་དང་ལས་དང་པོ་པའི་བྱང་ཆུབ་སེམས་དཔའ་གསུམ་གར་གྱིས་ཀྱང་རྩ་ལྟུང་དེ་གསུམ་གར་སྤང་དགོས་པར་མཚུངས་ཤིང་། བྱང་སའི་ལུགས་ཀྱི་སྡོམ་ལྡན་གྱིས་ ཀྱང་དེ་རྣམས་མ་སྤངས་ན་རང་གི་བསླབ་བྱ་རྣམས་ཀྱང་སྲུང་བར་མི་ནུས་མེད་ཀྱང་གཙོ་བོར་རྒྱལ་པོ་སོགས་སོ་སོའི་མིང་གིས་བསྟན་པས་འཇིགས་པ་སྐྱེ་ཞིང་འདི་ནི་བདག་ལ་ནན་ཏན་གྱིས་གདམས་སོ་ཞེས་སྲུང་བར་འགྱུར་བས་ན་སོ་སོའི་མིང་གིས་ བསྟན་པ་ཡིན་ལ་ཞིབ་མོར་དཔྱད་ན་ལུགས་ཕན་ཚུན་གྱི་ལྟུང་བ་གཅིག་གི་ཁོངས་སུ་གཅིག་ཤོས་འདུ་བས་ན་གནས་སྐབས་ཀྱི་ཐ་སྙད་ཐ་དད་པ་ཙམ་མོ། །ཕྱོགས་མཐུན་གྱི་ལྟུང་བ་གཞན་སྤང་བ་ཐེག་ཆེན་གྱི་མདོ་སྡེ་སྣ་ཚོགས་ལས་ཐོར་བུར་གསུངས་
Page: 80 པ་ནི། གཞན་ཡང་ལྟུང་བའི་ཕྱོགས་མཐུན་ནི། །ལུས་ངག་ཡིད་ཀྱི་མི་དགེ་བ། །རྣམ་པ་བཅུ་པོ་རྣམ་པར་སྤང་། །རྙེད་དང་མ་རྙེད་གྲགས་མ་གྲགས། །བདེ་སྡུག་བསྟོད་སྨད་འཇིག་རྟེན་གྱི། །ཆོས་བརྒྱད་པོ་ལ་པོ་ལ་ཆགས་སྡང་སྤང་། ། ཡུལ་མི་ཉི་དུ་དགྲ་གནོད་སེམས། །རྣམ་འཚེ་ཁྱད་གསོད་ཁ་ཟས་སོགས། །མི་འཆི་བ་ཡི་རྟོག་པ་སྟེ། །ལོག་པའི་རྟོག་པ་བརྒྱད་པོ་སྤང་། །ཚུལ་འཆོས་ཁ་གསག་འཐོབ་ཀྱིས་འཇལ། །གཞོགས་སློང་རྙེད་པས་རྙེད་ཚོལ་ཏེ། །ལོག་ པའི་འཚོ་བ་རྣམ་ལྔ་སྤང་། །རྒྱལ་པོའི་ཕོ་བྲང་གདོལ་པའི་གནས། །ཤན་པ་གཟུགས་ཚོང་ཆང་ཚོང་གནས། །སྤྱོད་ཡུལ་མིན་པ་རྣམ་ལྔ་སྤང་། །སྡིག་པའི་གྲོགས་དང་འགྲོགས་པ་སྤང་། །སྡིག་ལྟ་འཛིན་དང་ཉན་རང་གི། ཡིད་ལ་བྱེད་ པ་སྐྱེད་པ་དང་། །དམིགས་པར་ལྟ་དང་རློམ་སེམས་དང་། །ལུང་བསྟན་མངོན་པར་ཞེན་པ་དང་། །དབེན་པར་དགའ་བས་གཞན་སྨོད་དང་། །ཕན་ཚུན་མི་མཐུན་རྩོད་པ་དང་། །རྒྱལ་སྲས་གཞན་ལ་ཁོང་ཁྲོ་སོགས། །བདུད་ཀྱི་ལས་རྣམས་ རབ་ཏུ་སྤང་། །ལྟ་བས་གཟིངས་པ་རྣམ་པར་སྤང་། །མུ་སྟེགས་གསང་ཚིག་ཚོལ་བ་དང་། ཁྱིམ་ལ་ལྟ་ཞིང་འཁྲེན་པ་དང་། །རྒྱལ་སྲས་གཞན་ལ་ཕྲག་དོག་དང་། །མ་ཟོས་མདོ་སྡེ་སྤོང་བ་སྟེ། །དགེ་བ་འཛད་པའི་རྒྱུ་བཞི་སྤང་། །རྡོ་རྗེ་ རྡོ་རྗེས་འཇོམས་པ་ལྟར། །རྒྱལ་སྲས་ཕན་ཚུན་ཞེ་སྡང་བ། །ཁོ་ནས་འཇོམས་ཕྱིར་ཁྲོ་བ་སྤང་། །འཛམ་གླིང་སྐྱེ་བོའི་སྲོག་བཅད་ཅིང་། །བདོག་པ་ཐམས་ཅད་ཕྲོགས་པ་བས། །སེམས་དཔའ་གཞན་གྱི་ཟས་ཁམ་གཅིག། དུད་འགྲོ་ གཅིགལ་སྟེར་བ་ཡི། །དགེ་བའི་བར་ཆད་བྱེད་པ་ནི། །ཆེས་ཆེར་ལྕི་སྟེ་ཆར་མི་ཕོད། །དེ་བས་དགེ་བའི་བར་ཆད་སྤང་། །མངོན་པའི་ང་རྒྱལ་གྱིས་ཁེངས་པ། །དེ་ལ་ཡོན་ཏན་ཆུ་མི་འཇུག། དེ་བས་ཁེངས་པ་རབ་སྤངས་ཏེ། ང་རྒྱལ་
Page: 81 ༄༅། །མེད་པ་ཉིད་དུ་བྱ། །འདི་རྣམས་མདོ་སྡེ་སྣ་ཚོགས་པར། །རྒྱལ་བས་རབ་ཏུ་བཀག་པ་ཉིད། །ཐམས་ཅད་ཡོད་སྨྲའི་གཞུང་ལས་ཀྱང་། །ཚངས་པར་མཚུངས་སྤྱོད་གྲོགས་བརྙས་པའི། །ལྟུང་བ་ལྟ་བུའི་སྡིག་ གཞན་མེད། །བསགས་པའི་དགེ་ཀུན་དེ་ཡིས་འཛད། །། དེ་བས་མགལ་དུམ་ཙམ་ལ་ཡང་། །གནོད་སེམས་སྐྱེད་པར་མི་བྱ་ན༑། སེམས་བཅས་ལུས་ལ་ལྟ་ཅི་སྨོས། །དེ་ཕྱིར་བརྒྱ་ལམ་ཙམ་ན་ཡང་། །ཁེངས་པ་སྤང་བར་བྱ་ཞེས་བཤད། ། མདོར་ན་བླང་དོར་ཅི་ཡང་རུང་། །མ་བརྟགས་མ་དཔྱད་ཚམ་ཚོམ་གྱིས། །འཇུག་གམ་ལྡོག་ན་རྨོངས་པ་སྟེ། །འདི་ལས་ལྟུང་བ་ཀུན་སྐྱེད་བྱེད། །ཆོས་བཞིན་དཔྱད་ནས་དགག་དགོས་ཀྱི། །ལྕི་ཡང་ཕན་ཡོན་ཉེས་དམིགས་བཅས། །ལེགས་པར་ ཤེས་ནས་འདོར་བའམ། །ལེན་པ་ལྟུང་བ་མེད་པའོ། །དེ་ལྟར་སྤང་བྱ་ཤེས་ནས་ནི། །སྤོང་བའི་ཡི་དམ་བརྟན་བསྐྱེད་ནས། །ནམ་ཡང་ལྟུང་བས་མ་གོས་བྱ། །གོས་ན་འཕྲལ་དུ་བཤགས་ཤིང་བསྡམ། །རྒྱལ་དང་རྒྱལ་སྲས་ཐམས་ཅད་ ལ། །ཕྱག་འཚལ་མཁྱེན་པར་གསོལ་ནས་ནི། །འགྱོད་ཅིང་གནོད་པས་མཐོལ་ཞིང་བཤགས། །ཕྱིན་ཆད་སྡོམ་སེམས་བརྟན་པར་བྱ། །མདོ་འདོན་གཟུངས་བཟླ་མཆོད་རྟེན་གདབ། །དེ་སོགས་དགེ་བ་ཕལ་ཆེར་ནི། །ལྟུང་བའི་གཉེན་པོར་མི་ འགྱུར་མེད། །ཆོས་ཀུན་གཟོད་ནས་མ་དམིགས་པའི། །སྟོང་ཉིད་ལ་མོས་གཉེན་པོའི་མཆོག། ཀུན་ནས་ཉོན་མོངས་ཆོས་རྣམས་ཉིད། །གཟོད་ནས་རྣམ་བྱང་ཉིད་དུ་ཤེས། །འཁོར་བའི་ཁམས་ཉིད་མྱང་འདས་ཀྱི། །དབྱིངས་སུ་གང་གིས་ མཐོང་བ་དེ། །སྒྲིབ་པའི་གཡུལ་ལས་རྒྱལ་ཞེས་གསུངས། །ཞེས་ཐེག་པ་ཆེན་པོའི་མདོ་སྡེ་སྣ་ཚོགས་ལས་གསུངས་པ་རྣམས་སྐྱེས་ཆེན་དུ་མས་བཤད་པ་ལྟར་བསྡུས་ཏེ་བརྗོད་པའོ། །རྩ་ལྟུང་ལས་གཞན་པ་སྡོམ་པའི་གཏོང་རྒྱུ་ཡོད་ཏམ་
Page: 82 ཞེ་ན། སྐྱབས་འགྲོ་བཏང་དང་སྨོན་སེམས་ལོག། བསླབ་པ་ཕུལ་དང་ལོག་ལྟ་སྐྱེས། །ཉན་རང་ཡིད་བྱེད་སྐྱེས་པ་དང་། །སེམས་ཅན་བློ་ཡིས་སྤངས་པ་རྣམས། །བྱང་སྡོམ་རྩད་ནས་གཏོང་བའི་རྒྱུ། །རྩ་བའི་ལྟུང་བས་ཉམས་ཤིང་འཇིག།། ཉེས་བྱས་སོགས་ཀྱིས་ན་སྨད་དོ། །ཞེས་བྱ་སྟེ་སྐྱབས་འགྲོ་དང་སྨོན་སེམས་བཏང་ན་བྱང་སྡོམ་རྩ་བ་ནས་གཏོང་སྟེ་རྩིག་པ་ཞིག་ནས་རི་མོ་མི་གནས་པ་བཞིན་ཏེ་རྟེན་ལོག་པའི་ཕྱིར་རོ། །བྱང་སྡོམ་གྱི་བསླབ་པ་ཕུལ་ན་གཏོང་སྟེ་སྡོམ་པ་ལས་ ཕྱིན་ཅི་ལོག་ཏུ་ཁས་བླངས་པའི་ཕྱིར། ལོག་ལྟ་སྐྱེས་ན་གཏོང་སྟེ་ཐར་པ་དང་ལས་འབྲས་མེད་པར་འཛིན་པས་དགེ་བའི་རྟེན་ཆད་པའི་ཕྱིར། ཉན་རང་གི་ཡིད་བྱེད་སྐྱེས་པ་སྟེ་བདག་བྱང་ཆུབ་ཆེན་པོས་ཅི་ཞིག་བྱ་རང་ཉིད་ཞི་བ་འཐོབ་པར་བྱའོ་སྙམ་ན་ གཏོང་སྟེ་སྨོན་སེམས་ཀྱི་མི་མཐུན་ཕྱོགས་སྐྱེས་པའི་ཕྱིར། སེམས་ཅན་བློས་སྤངས་ན་གཏོང་སྟེ་དེས་སྨོན་སེམས་གཏོང་ལ་རྟེན་ལོག་ན་བརྟེན་པ་མི་གནས་པའི་ཕྱིར་རོ། །རྩ་ལྟུང་ཁ་ཅིག་གིས་གཏོང་ལ་ཁ་ཅིག་གིས་རྩ་བ་མི་གཏོང་ཡང་ཉམས་ཤིང་ནུས་ མེད་དུ་བྱེད་དོ། །དེ་ལྟར་དགག་པའི་བསླབ་བྱ་བཤད་ནས། གཉིས་པ་ནི། སྒྲུབ་པའི་བསླབ་བྱ་ཕར་ཕྱིན་དྲུག། བསྡུ་ན་ཚུལ་ཁྲིམས་རྣམ་གསུམ་སྤྱད། །ཅེས་བྱ་སྟེ། སྒྲུབ་པའི་བསླབ་བྱ་ནི་ཕ་རོལ་ཏུ་ཕྱིན་པ་དྲུག་གམ་བསླབ་པ་གསུམ་མམ་ ཚུལ་ཁྲིམས་རྣམ་པ་གསུམ་སྟེ་བྱང་ཆུབ་སེམས་དཔས་སྤྱད་པར་བྱ་བ་མཐའ་དག་སྟེ་གཞུང་གིས་རྒྱས་པར་འཆད་དོ། །དྲུག་པ་ཕན་ཡོན་ནི། རྒྱལ་བའི་སྲས་ཀྱི་ནང་དུ་ཆུད། །བསླབ་པ་ཀུན་གྱི་རྟེན་དུ་འགྱུར། །སྡིག་པའི་ཕུང་པོ་རྩད་ནས་ གཅོད། །རྫོགས་སངས་རྒྱས་ཀྱི་རྩ་བ་ཚུགས། །བསོད་ནམས་དཔག་ཏུ་མེད་པ་འཐོབ། །སངས་རྒྱས་ཐམས་ཅད་མཉེས་པར་འགྱུར། །སེམས་ཅན་ཀུན་ལ་ཕན་པ་མཆོག། མྱུར་དུ་རྫོགས་འཚང་རྒྱ་བ་སྟེ། །སྨོན་སེམས་ཕན་ཡོན་རྣམ་པ་
Page: 83 ༄༅། །བརྒྱད། །རང་དོན་བསོད་ནམས་རྒྱུན་མི་འཆད། །གཞན་དོན་མཐའ་ཡས་འབྱུང་བ་སྟེ། །ཁྱད་པར་འཇུག་པའི་ཕན་ཡོན་གཉིས། །གྲངས་སུ་ཆད་པར་བསྟན་པའོ། །མདོར་ན་གནས་སྐབས་མཐར་ཐུག་གི། །ཕན་བདེ་ ཐམས་ཅད་། །འབྱུང་བ་ནི། །གྲངས་སུ་མ་ཆད་ཕན་ཡོན་ནོ། །ཞེས་བྱ་སྟེ། དང་པོ་ནི། བྱང་ཆུབ་ཀྱི་སེམས་མེད་ན་སྤྱོད་པ་ཕུན་ཚོགས་ཅི་ཡོད་ཀྱང་ཐེག་ཆེན་པར་མི་ཆུད་སངས་རྒྱས་མི་འཐོབ་ལ་བྱང་ཆུབ་ཀྱི་སེམས་སྐྱེས་མ་ཐག་ཐེག་ཆེན་པར་ཆུད་རྒྱལ་ སྲས་ཀྱི་མིང་ཐོབ་པ་སྟེ། བྱང་ས་ལས། སེམས་དེ་སྐྱེས་མ་ཐག་ཏུ་བླ་ན་མེད་པའི་བྱང་ཆུབ་ཐེག་པ་ཆེན་པོ་ལ་ཞུགས་པ་ཡིན་ཏེ་ཞེས་དང་། བྱང་ཆུབ་སེམས་སྐྱེས་གྱུར་ན་སྐད་ཅིག་གིས། །བདེ་གཤེགས་རྣམས་ཀྱི་སྲས་ཞེས་བརྗོད་བྱ་ཞིང་། ། འཇིག་རྟེན་ལྷ་མིར་བཅས་པས་ཕྱག་བྱར་འགྱུར། །ཞེས་འཆད་པར་འགྱུར་བའི་ཕྱིར་རོ། །གཉིས་པ་ནི། བྱང་ས་ལས། སེམས་བསྐྱེད་པ་དེ་ནི་བྱང་ཆུབ་སེམས་དཔའི་བསླབ་པ་རྣམས་ཀྱི་རྟེན་ཡིན་ཏེ་ཞེས་སོ། །གསུམ་པ་ནི། གཉེན་པོ་དགེ་ བའི་ནང་ན་བྱང་ཆུབ་ཀྱི་སེམས་མཆོག་ཡིན་པས་སྡིག་པ་འཛོམས་པའི་ཕྱིར་ཏེ། དེས་ནི་དུས་མཐའི་མེ་བཞིན་སྡིག་ཆེན་རྣམས། །སྐད་ཅིག་གཅིག་གིས་ངེས་པར་སྲེག་པར་བྱེད། །ཅེས་འཆད་པར་འགྱུར་བའི་ཕྱིར། བཞི་པ་ནི། སེམས་ཅན་ གྱི་རྒྱུད་ས་གཞི་ལྟ་བུ་ལ་རྫོགས་པའི་སངས་རྒྱས་ཀྱི་ལྗོན་ཤིང་བསྐྲུན་པའི་རྩ་བ་ཚུགས་པ་ཡིན་ཏེ་བྱང་ས་ལས། སེམས་བསྐྱེད་པ་དེ་ནི་བླ་ན་མེད་པ་ཡང་དག་པར་རྫོགས་བའི་བྱང་ཆུབ་ཀྱི་རྩ་བ་ཡིན་ནོ་ཞེས་སོ། །ལྔ་པ་ནི། དཔས་བྱིན་གྱིས་ ཞུས་པའི་མདོ་ལས། བྱང་ཆུབ་སེམས་ཀྱི་བསོད་ནམས་གང་། །གལ་ཏེ་དེ་ལ་གཟུགས་མཆིས་ན། །ནམ་མཁའི་ཁམས་ནི་ཀུན་བཀང་ནས། དེ་ནི་དེ་ལས་ལྷག་པར་འགྱུར། །ཞེས་དང་། རིན་ཆེན་ཕྲེང་བར། སྐྱེས་བུ་གང་ཞིག་བྱང་
Page: 84 ཆུབ་སེམས། །སྐད་ཅིག་ཙམ་ཞིག་སྒོམ་བྱེད་ན། །དེ་ཡི་བསོད་ནམས་ཕུང་པོ་འདི། །རྒྱལ་བ་ཡིས་ཀྱང་བགྲང་མི་སྤྱོད། །ཅེས་སོ། །དྲུག་པ་ནི། དཔས་བྱིན་གྱི་མདོ་ལས། གངྒཱའི་བྱེ་མའི་གྲངས་སྙེད་ཀྱི། །སངས་རྒྱས་ཞིང་རྣམས་ མི་གང་གིས། །རིན་ཆེན་དག་གིས་ཡོངས་བཀང་སྟེ། །བདེ་གཤེགས་རྣམས་ལ་ཕུལ་བ་བས། །གང་གིས་ཐལ་མོ་སྦྱར་བགྱིས་ཏེ། །བྱང་ཆུབ་ཏུ་ནི་སེམས་བཏུད་ན། །མཆོད་པ་འདི་ནི་ཁྱད་པར་འཕགས། །ཞེས་དང་། སྒྱུ་མ་ལྟ་བུའི་ ཏིང་ངེ་འཛིན་གྱི་མདོ་ལས། ལུས་ཅན་ཀུན་ལ་ཕན་པའི་ཕྱིར། །བྱང་ཆུབ་ཏུ་ནི་སེམས་བསྐྱེད་ན། །མཚན་མཆོག་སུམ་ཅུ་གཉིས་ལྡན་པའི། །སངས་རྒྱས་དག་ལ་མཆོད་པར་འགྱུར། །མི་གང་གིས་ནི་སངས་རྒྱས་ཞིང་། །གངྒཱའི་ བྱེ་མའི་གྲངས་སྙེད་དག། མེ་ཏོག་རྣམས་ཀྱིས་བཀང་བྱས་ཏེ། །འཇིག་རྟེན་མགོན་ལ་ཕུལ་བ་བས། །གང་གིས་འདིར་ནི་ཐལ་སྦྱར་ཏེ། །བྱང་ཆུབ་ཏུ་ནི་སེམས་འཇུག་ན། །འདི་ནི་བསོད་ནམས་ཆེས་མང་སྟེ། །དེ་ལ་ཚད་ནི་ཡོད་མ་ ཡིན། །བྱང་ཆུབ་སེམས་ནི་ཅི་འདྲ་བ། །དེ་ལྟར་བློ་མཆོག་གིས་བསྟན་པ། །དེ་འདྲའི་མཆོད་པ་གང་ཡང་མེད། །དེ་འདྲ་པ་ཡི་དཔལ་ཡང་མེད། །ཅེས་སོ། །བདུན་པ་ནི། སྡོང་པོ་བཀོད་པ་ལས། འཇིག་རྟེན་པ་ཐམས་ཅད་ལ་ཕན་པས་ རྟེན་ལྟ་བུའོ་ཞེས་དང་། བྱང་ཆུབ་སེམས་མེད་རྒྱལ་འབྱུང་འཇིག་རྟེན་ཡོད་མེད་ན། །འབྲས་བུ་བརྒྱ་བྱིན་ཚངས་པ་ཉན་ཐོས་ག་ལ་འབྱུང་། །ཞེས་སོ། །བརྒྱད་པ་ནི། བྱང་ས་ལས། སེམས་དེ་སྐྱེས་ན་མཐའ་གཉིས་ལ་མི་གནས་ཏེ་མྱུར་དུ་མངོན་པར་ རྫོགས་པར་འཚང་རྒྱ་བར་འགྱུར་རོ་ཞེས་སོ། །འཇུག་སེམས་ལ་ནི་དེའི་སྟེང་དུ་ཁྱད་པར་བ་གཉིས་ཏེ། སེམས་དེ་ཡང་དག་བླངས་གྱུར་པ། །དེ་ནས་བཟུང་སྟེ་གཉིད་ལོག་གམ། །ཞེས་སོགས་དང་། གང་ཞིག་བདེ་བས་ཕོངས་པ་དང་། །
Page: 85 ༄༅། །སྡུག་བསྔལ་མང་ལྡན་དེ་དག་ལ། །བདེ་བ་ཀུན་གྱིས་ཚིམ་པ་དང་། །ཞེས་སོགས་འཆད་པར་འགྱུར་རོ། །མདོར་ན་འཁོར་བའི་བདེ་བ་ཐམས་ཅད་ནི་བྱང་ཆུབ་ཀྱི་སེམས་ལ་བརྟེན་པའམ་དེས་བསྐྱབས་པ་སྟེ་ལྗོན་ཤིང་གིས་ བསྐྱབས་པར་རྩྭ་འཕེལ་བ་ལྟ་བུ། ཉན་རང་གི་ཡོན་ཏན་ཐམས་ཅད་ནི་བྱང་ཆུབ་ཀྱི་སེམས་ཀྱི་ཕྱོགས་གཅིག་གི་འབྲས་བུ། བྱང་ཆུབ་སེམས་དཔའི་ཡོན་ཏན་ཐམས་ཅད་ནི་བྱང་ཆུབ་ཀྱི་སེམས་ཀྱི་གནས་སྐབས་ཀྱི་འབྲས་བུ། སངས་རྒྱས་ཀྱི་ ཡོན་ཏན་ཐམས་ཅད་ནི་བྱང་ཆུབ་ཀྱི་སེམས་ཀྱི་མཐར་ཐུག་གི་འབྲས་བུ་སྟེ་འཁོར་འདས་ཀྱི་ཡོན་ཏན་ཐམས་ཅད་བྱང་ཆུབ་ཀྱི་སེམས་ལས་བྱུང་བ་ཡིན་ནོ། །བདུན་པ་ཉམས་པའི་ཉེས་དམིགས་ནི། སེམས་མཆོག་དེ་ལས་ཉམས་གྱུར་ན། །རྒྱལ་ཀུན་ མི་མཉེས་འགྲོ་ཀུན་བསླུས། །རང་གཞན་དོན་ཉམས་ངན་འགྲོར་འགྲོ། །དེ་བས་འབད་དེ་སེམས་འདི་བསྲུང་། །ཞེས་བྱ་སྟེ། ངན་འགྲོ་མུ་མཐའ་མེད་པར་འཁོར། གཞན་དོན་ལས་ཉམས། ས་འཐོབ་པ་ལ་རིང་དུ་འགོར་བ་སྟེ། སེམས་ཅན་དེ་དག་ ཀུན་བསླུས་པས། །བདག་གི་འགྲོ་བ་ཅི་འདྲར་འགྱུར། །ཞེས་དང་། འདི་ལྟར་དེ་ནི་བྱུང་གྱུར་ན། །སེམས་ཅན་ཀུན་གྱི་དོན་ལ་དམན། །ཞེས་དང་། ས་འཐོབ་པ་ལ་ཡུན་རིང་ཐོགས། །ཞེས་སོགས་རེ་རེ་ཞིང་འཆད་པར་འགྱུར་རོ། །བརྒྱད་པ་ ཕྱིར་བཅོས་ནི། རྩ་བའི་ལྟུང་བ་ཆེན་པོ་རྣམས། །བྱང་ཆུབ་སེམས་དཔའི་ཚོགས་ལ་བཤགས། །སྡོམ་པ་སླར་ཡང་བླང་བར་བྱ། །ཟག་པ་འབྲིང་ནི་གསུམ་ལ་བཤགས། །གཅིག་གི་མདུན་དུ་ལྷག་མ་རྣམས། །གཞན་ཡང་རྒྱལ་སྲས་ནམ་སྙིང་གི ། མཚན་ནས་བརྗོད་ཅིང་ཕྱག་འཚལ་ནི། །རྨི་ལམ་སྐལ་འཚམ་ལུས་བསྟན་ཏེ། །དེ་ཡིས་ལྟུང་བ་ལས་སློང་བྱེད། །མ་གྲུབ་ན་ནི་སྐྱ་རེངས་ལ། །གསོལ་བ་བཏབ་ན་དེ་ཡིས་སྦྲོན། །གཞན་ཡང་ཉིན་མཚན་ཐུན་དྲུག་ཏུ། །ཕུང་པོ་གསུམ་
Page: 86 པ་ལ་སོགས་པས། །འཆགས་ལ་ཉེས་པའི་ཆུས་མི་གོས། །ཆོས་ཀུན་གཟོད་ནས་ཞི་བ་སྟེ། །མཁའ་དང་སྒྱུ་མ་ལྟར་ཤེས་ནས། །འགྲོ་ལ་སྙིང་རྗེ་མི་འདོར་བ། །དེ་ལ་ཉེས་པའི་གནས་མི་དམིགས། །ཞེས་བྱ་སྟེ། སྡོམ་པ་ཉི་ཤུ་པར། སྡོམ་ པ་སླར་ཡང་ང་བར་བྱ། །ཞེས་སླར་བླང་བ་ལས་བཤགས་པ་དངོས་སུ་མ་བྱུང་བས་དེ་ལྟར་འཆད་པ་མང་མོད་ཀྱང་སྔ་མ་རྩ་ལྟུང་ཆེན་པོ་བྱུང་བ་ལ་འགྱོད་པས་བཤགས་ཤིང་བསྡམས་ནས་སླར་ལེན་པ་ཁོ་ནར་རིགས་ཏེ་ཐེག་པ་ཐམས་ཅད་ཀྱི་འདུལ་བར་ གང་ལས་ལྟུང་བ་བྱུང་བ་ཉེས་པའི་གཞི་དེ་བཏང་ཞིང་མ་བསྡམས་པར་ཕྱིར་བཅོས་མི་འཆགས་པར་མཚུངས་པའི་ཕྱིར་དང་། ཟག་པ་འབྲིང་ནི་གསུམ་ལ་བཤགས། །ཞེས་པའི་ཤུགས་ཀྱིས་ཀྱང་། ཟག་པ་ཆེན་པོ་ཚོགས་ལ་བཤགས། །ཞེས་འཐོབ་ པའི་ཕྱིར་རོ། །སླར་ཡང་སྔར་གྱི་ཆོ་གས་དགེ་བའི་བཤེས་གཉེན་ཡོད་པའམ་མེད་པ་ལས་བླང་བར་བྱ་སྟེ་དེས་སོར་ཆུད་པར་འགྱུར་རོ། །འདིར་གཙང་ནག་པས་བྱང་སྡོམ་ཉམས་པ་ལན་བདུན་གྱི་བར་དུ་བསྐྱར་དུ་རུང་ཞིང་དེ་ནས་མི་རུང་བར་བཤད་པ་ལ་ མཚོ་སྣ་པ་ཆེན་པོས་དེ་ནི་འདུལ་བ་ལས་སྐྱེས་པ་ལ་ལན་བདུན་དུ་བསྙེན་རྫོགསབསྐྱར་རུང་བར་བཤད་པའི་རིགས་བསྒྲེས་པར་ཟད་དེ་བྱང་སྡོམ་ལ་བདུན་གྱི་ངེས་པར་བཟུང་བ་མེད་དོ་ཞེས་འཆད་དོ། །ཀུན་དཀྲིས་འབྲིང་གིས་བྱས་པའི་ཕ་མ་འདུ་རྣམས་ནི་ ཟག་པ་འབྲིང་པོ་སྟེ་བྱང་ཆུབ་སེམས་དཔའ་ལ་བཤགས་ཤིང་སླར་བསྡམས་པས་སོར་ཆུད་དོ། །ཀུན་དཀྲིས་ཆུང་ངུས་བསྐྱེད་པ་ནི་བྱང་ཆུབ་སེམས་དཔའ་གཅིག་ལ་བཤགས་ཤིང་ཕྱིས་བསྡམ་པའོ། །དེ་ལས་གཞན་པའི་ཉེས་བྱས་རྣམས་ནི་ཕུང་པོ་ གསུམ་པ་བརྗོད་པས་འདག་པའོ། གསུམ། སྤྱིར་བཤགས་ཚད་དུས་ལས་འདས་ན་ཇི་ཙམ་འདས་པ་ལྟར་ཆད་པ་ཆེ་བ་འདུལ་བར་སྤོ་མགུ་སྤྱོད་པ་སོགས་ལ་བཅབས་པའི་གྲངས་ཀྱིས་སྤྱོད་པ་ལྟར་དོན་གྱིས་སྡོམ་པ་ཐམས་ཅད་ལ་མཚུངས་པས་རྩ་ལྟུང་
Page: 87 ༄༅། །བྱུང་ནས་ལོའམ་ཟླ་བ་ལ་སོགས་པ་ལོན་ན་བཤགས་བསྡམ་དང་གཉེན་པོ་ལ་ནན་ཏན་ཆེར་བྱ་དགོས་པར་གྲུབ་བོ། །གཞན་ཡང་བྱང་ཆུབ་སེམས་དཔའ་ལས་དང་པོ་པ་ལ་ལྟུང་བ་བྱུང་བ་རྣམས་བྱང་ཆུབ་སེམས་དཔའ་ནམ་ མཁའི་སྙིང་པོ་ལ་གསོལ་ན་དེས་སྨོན་ལམ་གྱི་དབང་གིས་སེལ་བར་བྱེད་དེ་དེའི་སྤྱི་བོ་ལ་བརྒྱ་བྱིན་ཐོགས་པའི་ནོར་བུ་འོད་འབར་བ་འཛིན་པ་ལས་དང་པོ་པའི་བྱང་ཆུབ་སེམས་དཔའ་རྩ་ལྟུང་ལས་སློང་ནུས་པའི་རྟགས་སུ་འཆང་བར་གསུངས་སོ། ། དེས་ན་བྱང་ཆུབ་སེམས་ཅན་དེས་ཁྲུས་དང་གཙང་སྦྲ་བྱ་སྤོས་བཏུལ་ཏེ་བྱང་ཆུབ་སེམས་དཔའ་ནམ་མཁའི་སྙིང་པོའི་མཚན་ནས་བརྗོད་དེ་ཕྱག་འཚལ་ན་ནམ་མཁའི་སྙིང་པོས་དངོས་སམ་རྨི་ལམ་དུ་མི་ནས་བྱའི་བར་སྐལ་བ་འཚམ་པའི་གཟུགས་ ཀྱིས་ལྟུང་བ་ལས་འབྱིན་པའི་ཐབས་སྟོན་པར་·ར་འགྱུར་ལ། གལ་ཏེ་མ་བྱུང་ན་ཐོ་རངས་ལངས་ཏེ་ལྷའི་བུ་སྐྱ་རེངས་ལ་སྐྱ་རེངས་སྐྱ་རེངས་ཐུགས་རྗེ་ཆེན་པོ་ཅན་སྐལ་བ་ཆེན་པོ་ཅན་ཁྱོད་ཛམྦུའི་གླིང་དུ་ཤར་མ་ཐག་ཏུ་བདག་ལ་ཐུགས་རྗེས་ཁྱབ་པར་མཛོད་ ཅིགབྱང་ཆུབ་སེམས་དཔའ་ནམ་མཁའི་སྙིང་པོ་ཐུགས་རྗེ་ཅན་ལ་བདག་གི་ཚིག་གིས་སྦྲོན་ཏེ་བདག་གི་རྨི་ལམ་དུ་ཡང་དེ་སྟོན་པར་འགྱུར་ཞིང་གང་གིས་ཐབས་དེས་ལྟུང་བ་བཤགས་པར་འགྱུར་བ་དང་འཆགས་པའི་ཐེག་པ་ཆེན་པོ་ལ་ཐབས་དང་ ཡེ་ཤེ་འཐོབ་པར་མཛོད་ཅིག་ཅེས་སྨྲས་ནས་གཉིད་ལོག་ན་སྐྱ་རེངས་ཤར་ཚེ་ནམ་སྙིང་རྨི་ལམ་དུ་སྐལ་བ་བཞིན་སྟོན་པས་ལྟུང་བ་འཆགས་པ་སྟོན་ནོ་ཞེས་གསུངས་སོ། །གཞན་ཡང་གང་གིས་དབེན་པར་བྱང་ཆུབ་སེམས་དཔའ་ནམ་སྙིང་ལ་ ཕྱག་བྱས་ཏེ། ཨ་ག་རུའམ་རྒྱ་སྤོས་སམ་དུས་ཀྱི་རྗེས་སུ་འབྲང་བས་བདུགས་ཏེ་ཐལ་མོ་སྦྱར་ནས་ཕྱོགས་མཚམས་ཀུན་ཏུ་ཡན་ལག་ལྔས་ཕྱག་འཚལ་ནས། ཏཏྲཱཐཱ། སུ་མྲྀ་ཤ་སུ་མྲྀ་ཤ་སུ་མྲྀ་ཤ་ཀཱ་རུ་ཎི་ཀ །ཙ་ར་ཙ་ར་བི་ཙ་ར་ས་ཙ་ར། ཀཱ་རུ་ཎི་ཀ་
Page: 88 མུ་ར་མུ་ར། བེ་ག་དྷ་རི་མ་ཙ་མེ། བྷུ་ཛ་པཱ་ད་ཀཱ་རུ་ཎི་ཀཙིནྟ་མ་ཎི་པཱུ་ར་ཡ་ཀཱ་རུ་ཎི་ཀསརྦ་ཤ་མེ་སྠཱ་པཱ་ཡ་ཨཛྙཱ་དྷ་རི། སྤུ་གུང་སྤུ་གུང་། རུ་ཏི་བི་བེ་ཀ་གུང་དྲྀཥྚི་བི་བེ་ཀ་གུང་པཱུ་ར་ཡ་ཀཱ་རུ་ཎི་ཀ་པཱུ་ར་ཡནྟུ་མ་མ་ཨ་ཤ །སརྦ་པཉྫཙ་ཨ་ཤོ་ཀ་ག་ཏི་སྭཱ་ཧཱ། འདི་ལན་དུ་མར་བཟླས་ཏེ་ཉལ་ན་དེས་རྨི་ལམ་དུ་མི་ནས་བྱའི་བར་སྐལ་བ་འཚམ་པའི་གཟུགས་བསྟན་ཏེ་ཚུལ་གཅིག་པའི་ཆོས་སྟོན་པར་འགྱུར་རོ་ཞེས་གསུངས་པས་བཤགས་པའི་ཚེའང་གཟུངས་འདི་བརྗོད་ན་ལེགས་སོ་སྙམ་མོ། །དེ་བཞིན་དུ་ ཏིང་ངེ་འཛིན་སྟེར་བའི་གཟུངས་ཀྱང་འདིར་བཤད་དོ། །ཡང་བྱང་ཆུབ་སེམས་དཔའ་ཚོགས་པ་ནས་གཅིག་གི་བར་དུ་བཤགས་ཡུལ་མ་རྙེད་ན་ཡང་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཡིད་ཀྱིས་མངོན་སུམ་དུ་བྱས་ཏེ་ཕུང་པོ་གསུམ་པ་ ལ་སོགས་པས་བཤགས་ཤིང་སྡོམ་པར་དམ་བཅས་ནས་སླར་བླངས་པས་ཀྱང་ཐམས་ཅད་སོར་ཆུད་པར་བྱེད་དེ་ཐེག་པ་ཆེན་པོ་འདི་ནི་སེམས་ཀྱི་ལས་ཁོ་ན་གཙོ་བའི་ཕྱིར་རོ། །དེ་ལྟར་ཀུན་རྫོབ་བྱང་ཆུབ་ཀྱི་སེམས་ཇི་ལྟར་ཉམས་སུ་བླང་པ་བཤད་ ནས། དོན་དམ་པའི་བྱང་ཆུབ་ཀྱི་སེམས་ཇི་ལྟར་སྒོམ་པ་ཡང་ཅུང་ཟད་བཤད་པར་བྱ་སྟེ། དེ་ཡང་དོན་དམ་བྱང་སེམས་ཀྱི་ངོ་བོ་ནི་གསང་འདུས་རྩ་རྒྱུད་ལས། དངོས་པོ་ཐམས་ཅད་དང་བྲལ་བ། །ཕུང་པོ་ཁམས་དང་སྐྱེ་མཆེད་དང་། །གཟུང་ དང་འཛིན་པ་རྣམ་པར་སྤངས། །ཆོས་བདག་མེད་པ་མཉམ་ཉིད་པས། །རང་སེམས་གདོད་ནས་མ་སྐྱེས་པ། །སྟོང་པ་ཉིད་ཀྱི་རང་བཞིན་ནོ། །ཞེས་གསུངས་ཤིང་འདི་ཀླུའི་ཞབས་ཀྱིས་འགྲེལ་པར་མཛད་པ་བྱང་ཆུབ་སེམས་འགྲེལ་ཡིན་ལ། སྤང་ བཀོང་ཕྱག་རྒྱའི་མདོ་དང་ཀླུའི་ཞབས་ཉིད་ཀྱི་དོན་དམ་སེམས་སྐྱེད་ཀྱི་ཆོ་གར་ཡང་། དངོས་པོ་ཐམས་ཅད་དང་བྲལ་བ་ཕུང་པོ་དང་ཁམས་དང་སྐྱེ་མཆེད་དང་གཟུང་བ་དང་འཛིན་པ་རྣམ་པར་སྤངས་པ་ཆོས་བདག་མེད་པ་མཉམ་པ་ཉིད་ཀྱིས་རང་གི་སེམས་གདོད་མ་
Page: 89 ༄༅། །ནས་མ་སྐྱེས་པ་སྟོང་པ་ཉིད་ཀྱི་ངོ་བོ་ཉིད་ཀྱི་བྱང་ཆུབ་ཀྱི་སེམས་བསྐྱེད་པར་བགྱིའོ་ཞེས་ཚིགས་སུ་བཅད་པ་ལྷུག་པར་བཀྲོལ་ཏེ་གསུངས་ལ་འཕགས་ཀླུའི་ཆོ་ག་དེ་ཉིད་ལ་བརྟེན་ནས་འབོགས་པ་དང་ལེན་པའི་རྒྱུན་བྱུང་བ་ལ། ཆོས་རྗེ་ ས་སྐྱ་པས། དོན་དམ་སེམས་སྐྱེད་ཅེས་བྱ་བ། །བསྒོམས་པའི་སྟོབས་ཀྱིས་སྐྱེ་མོད་ཀྱི། །ཆོ་གའི་སྒོ་ནས་འདི་མི་སྐྱེ། །གལ་ཏེ་ཆོ་གས་སྐྱེ་བ་ན། །བརྡ་ལས་བྱུང་བའི་སེམས་སྐྱེད་འགྱུར། །ཞེས་སོགས་མང་དུ་གསུངས་མོད་ཀྱང་རེ་ཞིག་བརྟག་ པར་བྱ་སྟེ། ཅི་སྔགས་ལུགས་ཀྱི་དོན་དམ་སེམས་སྐྱེད་ཡོད་དམ་མེད། གལ་ཏེ་ཡོད་ན། ཁྱེད་རང་ལྟར་ན་དེ་ཆོས་ཅན། ཚོ་ག་ལས་སྐྱེ་བར་ཐལ། སྔགས་ཀྱི་ལུགས་ཡིན་པའི་ཕྱིར། མ་ཁྱབ་ན། མདོ་དང་སྔགས་ཀྱི་ཁྱད་པར་ནི། །ཆོ་གའི་བྱ་བ་ ཡོད་མེད་ཡིན། །ཟེར་བ་དང་འགལ། འདོད་ན་དེ་ཆོས་ཅན། བརྡ་ལས་བྱུང་བའི་སེམས་སྐྱེད་དུ་ཐལ། ཆོ་ག་ལས་སྐྱེས་པའི་སེམས་སྐྱེད་ཡིན་པའི་ཕྱིར། འདོད་ན། མ་ཡིན་པར་ཐལ། དོན་དམ་སེམས་སྐྱེད་ཡིན་པའི་ཕྱིར་ཏེ་འཁོར་གསུམ་ག་ལ་ ལན་གྱིས་དབེན་ནོ། །ཡང་དབུ་སེམས་ཀྱི་སེམས་སྐྱེད་གཉིས་ཆོས་ཅན། སྔགས་ལུགས་སུ་ཐལ། ཆོ་ག་ལས་སྐྱེས་པ་ཡིན་པའི་ཕྱིར། འདོད་ན་དེ་གཉིས་ལ་ཆོས་ཅན། དབང་བསྐུར་ཡོད་པར་ཐལ། གསང་སྔགས་ཡིན་པའི་ཕྱིར། མ་ཁྱབ་ན། དབང་བསྐུར་མེད་པས་གསང་སྔགས་མིན། །ཟེར་བ་དང་འགལ་ལོ། །སྤྱིར་ཡང་ཆོ་ག་ཞེས་བྱ་བ་ནི་དེ་འགྲུབ་པའི་ཐབས་ཀྱི་བྱ་བའི་མིང་སྟེ་དཔེར་ན་སོ་ནམ་གྱི་བྱ་བ་ལ་སོ་ནམ་གྱི་ཆོ་ག་ཞེས་གྲགས་པ་དང་། རྒྱ་མཚོ་ལས་ནོར་བུ་ལེན་པའི་ཐབས་ལ་དེའི་ཆོ་ག་ གྲགས་པ་ལྟ་བུའི་ཕྱིར། དེས་ན་ཀུན་རྫོབ་སེམས་སྐྱེད་ཀྱང་དོན་དམ་སེམས་སྐྱེད་སྐྱེ་བའི་ཆོ་ག་ཡིན་ཏེ་དེ་སྐྱེ་བའི་ཐབས་ཡིན་པའི་ཕྱིར། །དེས་ན་ཆོ་གའི་མིང་ཙམ་ལ་དེ་ཙམ་དུ་ཞེན་པ་ནི་མཁས་པའི་རྣམ་འགྱུར་ག་ལ་ཡིན། དོན་དམ་སེམས་སྐྱེད་སྒོམ་
Page: 90 སྟོབས་ཀྱིས་སྐྱེ་ཞེས་པའང་ད་ལྟ་མ་བླངས་པར་བསྒུགས་ནས་བསྡད་པས་ནམ་ཞིག་ན་ཆུ་ལས་ལྦུ་བ་ལྟར་སྐྱེར་རེ་བ་ཞིག་མ་གཏོགས་ད་ལྟ་ནས་བསྒོམས་པས་གོང་ནས་གོང་དུ་ཇེ་གསལ་དུ་འགྱུར་ཏེ་ཇི་ལྟ་བ་མངོན་དུ་བྱེད་པ་ཞིག་ཏུ་ཁྱེད་ཅག་གིས་མ་གོ་ བ་འདྲ་སྟེ་དེ་ལྟ་ན་ཁྱེད་རྣམས་ཀྱིས་ཡུན་རིང་པོར་བསྒུགས་ཤིག་དང་དེའི་འབྲས་བུ་ཅི་འདྲ་བ་ཞིག་བལྟའོ། །དེས་ན་དོན་དམ་པའི་བྱང་ཆུབ་ཀྱི་སེམས་ནི་ད་ལྟ་ནས་གཙོ་བོར་མཉམ་པར་བཞག་པ་སྒོམ་པའི་སྟོབས་ཀྱིས་སྐྱེད་པ་སྟེ། བྱང་ཆུབ་སེམས་འགྲེལ་ ལས། བྱང་ཆུབ་སེམས་དཔའ་གསང་སྔགས་ཀྱི་སྒོའི་སྤྱད་པ་སྤྱོད་པ་རྣམས་ཀྱིས་དེ་ལྟར་ཀུན་རྫོབ་ཀྱི་རྣམ་པས་བྱང་ཆུབ་ཀྱི་སེམས་སྨོན་པའི་རང་བཞིན་ཅན་བསྐྱེད་ནས་དོན་དམ་པའི་བྱང་ཆུབ་ཀྱི་སེམས་ནི་གཙོ་བོར་སྒོམ་པའི་སྟོབས་ཀྱིས་བསྐྱེད་པར་བྱ་བ་ ཡིན་ལ་དེའི་ཕྱིར་དེའི་རང་བཞིན་བཤད་པར་བྱའོ་ཞེས་རྒྱུད་ལ་བསྒོམ་བྱར་བསྟན་ནོ། །གལ་ཏེ་འདིའི་ཁུངས་གསང་བ་འདུས་པ་ཡིན་ཞིང་སྔགས་ཀྱི་བྱང་སེམས་ཀྱིས་བསྒྲུབ་བྱར་བསྟན་པའི་ཕྱིར་ཕར་ཕྱིན་ཐེག་པར་འདི་བཤད་ན་གསང་སྒྲོགས་སུ་ འགྱུར་རོ་ཞེ་ན། སྟོན་པ་ཉིད་ཀྱིས་རྒྱུད་དུ་ཚིགས་བཅད་ཀྱིས་བཀའ་བསྩལ་ཞིང་སྤང་བཀོང་ཕྱག་རྒྱའི་མདོར་ཚིགས་ལྷུག་པས་བཀའ་བསྩལ་བས་མདོ་སྔགས་གཉི་གར་དུ་ཚིག་བཅད་ལྷུག་ལས་ཁྱད་པར་གཞན་མེད་པར་གསུངས་པ་དེ་ཅིའི་ཕྱིར་གསང་ སྒྲོགས་སུ་འགྱུར། དོན་འདི་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་མཐོང་བ་ཉིད་སྙིང་པོར་དྲིལ་ཏེ་གསུངས་པར་སྣང་བས་ཤེར་ཕྱིན་སྟོང་ཕྲག་བརྒྱ་པ་སོགས་སྔགས་བླ་མེད་ཀྱི་གསང་སྒྲོགས་སུ་མི་འགྱུར་བ་བཞིན་ནོ། །དེ་ཡང་སྟོང་ཉིད་སྙིང་རྗེ་དབྱེར་ མེད་ཀྱི་མཐོང་བ་ནི་དོན་དམ་པའི་བྱང་ཆུབ་ཀྱི་སེམས་ཀྱི་ངོ་བོ་སྟེ། སངས་རྒྱས་རྣམས་ཀྱིས་བྱང་ཆུབ་སེམས། །ཁམས་དང་ཕུང་སོགས་རྣམ་རིག་གི། རྟོག་པ་རྣམས་ཀྱིས་མ་བསྒྲིབས་ཤིང་། །རྟག་ཏུ་སྟོང་ཉིད་མཚན་ཉིད་བཞེད། །སྙིང་རྗེས་
Page: 91 ༄༅། །བརླན་པའི་སེམས་ཀྱིས་ནི། །འབད་པས་བསྒོམ་པར་བྱ་བ་ཡིན། །ཞེས་སོ། །སྟོང་ཉིད་ཇི་ལྟ་བུ་ཞིག་ཅེ་ན། སྟོང་པ་ཉིད་ནི་བསྟན་དུ་མེད་ལ་གང་གི་ཡང་ངོ་བོར་མི་གནས་མོད་ཀྱང་ལས་དང་པོ་བ་ལ་སྒྲོ་བཏགས་ ཀྱི་རྣམ་པར་རྟོག་པ་རིམ་གྱིས་བསལ་བས་ངེས་པར་བྱེད་དེ། དེ་ཡང་། དངོས་པོ་ཐམས་ཅད་དང་བྲལ་བ་ནི་མདོར་བསྟན་པ་སྟེ་ཆོས་འདི་ཐམས་ཅད་ནི་ཇི་ལྟར་སྒྲོ་བཏགས་པ་དེ་ལྟར་ཡང་མི་གནས་ལ། སྒྲོ་མ་བཏགས་པའི་དུས་ཀྱི་རང་བཞིན་ འདིའོ་ཞེས་བྱ་བར་ཡང་མེད་དེ་གཟོད་མ་ནས་དངོས་པོ་ཐམས་ཅད་ཀྱིས་སྟོང་པའོ། །དེ་ཡང་མུ་སྟེགས་པ་རྣམས་ཀྱིས་བདག་ཏུ་བཏགས་པ་གཞོམ་པའི་ཆེད་དུ་སྟོན་པས་བདག་གཅིག་ཏུ་འཛིན་པ་གཞིག་པའི་ཕྱིར་ཕུང་པོ་ལྔ་དང་བདག་ཀུན་ལ་ཁྱབ་ པ་གཞིག་པའི་ཕྱིར་ཁམས་བཅོ་བརྒྱད་དང་ཟ་བ་པོའི་བདག་རང་དབང་ཅན་གཞིག་པའི་ཕྱིར་སྐྱེ་མཆེད་བཅུ་གཉིས་བསྟན་ནོ། །དེ་ལ་ཉན་ཐོས་གྲུབ་མཐའ་པ་རྣམས་ཀྱིས་དེར་མངོན་པར་ཞེན་པས་ཕྲ་བ་རང་མཚན་གྱི་དངོས་པོ་དོན་དམ་པར་འཛིན་པ་ ན་དེ་གཞོམ་པའི་ཕྱིར་གཟུང་འཛིན་དུ་སྣང་བའི་ཆོས་ཐམས་ཅད་ནི་སེམས་ལས་གཞན་མ་ཡིན་པར་བསྟན་ནོ། །དེ་ལ་ཡང་རྣལ་འབྱོར་སྤྱོད་པ་བ་རྣམས་ཀྱིས་སོ་སོ་རང་རིག་གི་སེམས་དོན་དམ་དུ་ཞེན་པའི་འཁྲུལ་བ་སྐྱེས་པ་ན་སེམས་ཉིད་ཀྱང་དམིགས་ སུ་མེད་པར་བསྟན་པ་སྟེ། བདག་ཏུ་འཛིན་པ་བཟློག་པའི་ཕྱིར། །ཕུང་པོ་ཁམས་སོགས་བསྟན་པ་ཡིན། །སེམས་ཙམ་པོ་ལ་གནས་ནས་ནི། །སྐལ་ཆེན་རྣམས་ཀྱིས་དེ་ཡང་སྤང་། །རྣམ་པར་ཤེས་པར་སྨྲ་བ་ལ། །སྣ་ཚོགས་འདི་ ནི་སེམས་སུ་གྲུབ། །རྣམ་ཤེས་རང་བཞིན་གང་ཞེ་ན། །ད་ནི་དེ་ཉིད་བཤད་བྱ་སྟེ། །། འདི་དག་ཐམས་ཅད་སེམས་ཙམ་ཞེས། །ཐུབ་པས་བསྟན་པར་གང་མཛད་དེ། །བྱིས་པ་རྣམས་ཀྱི་སྐྲག་པ་ནི། །སྤང་བའི་ཕྱིར་ཡིན་དེ་ཉིད་མིན། །
Page: 92 ཀུན་བཏགས་དང་ནི་གཞན་དབང་དང་། །ཡོངས་སུ་གྲུབ་པ་ཉིད་འདི་ནི། །སྟོང་ཉིད་བདག་ཉིད་གཅིག་པུ་ཡི། །ངོ་བོ་སེམས་ལ་བཏགས་པ་ཡིན། །ཐེག་ཆེན་དགའ་བའི་བདག་ཉིད་ལ། །ཆོས་ལ་བདག་མེད་མཉམ་པ་ཉིད། །སེམས་ ནི་གདོད་ནས་མ་སྐྱེས་ཏེ། །སངས་རྒྱས་ཀྱིས་ནི་མདོར་བསྡུས་གསུངས། །ཞེས་དང་། སེམས་འདི་མིང་ཙམ་ཡིན་པ་སྟེ། །མིང་ལས་གཞན་དུ་འགའ་ཡང་མེད། །མིང་ཙམ་དུ་ནི་རྣམ་རིག་ལྟ། །མིང་ཡང་རང་བཞིན་མེད་པ་ཡིན། ། ནང་ངམ་དེབཞིན་ཕྱི་རོལ་ལམ། །ཡང་ན་གཉི་གའི་བར་དག་ཏུ། །རྒྱལ་བ་རྣམས་ཀྱིས་སེམས་མ་རྙེད། །དེ་ཕྱིར་སྒྱུ་མའི་རང་བཞིན་སེམས། །ཁ་དོག་དབྱིབས་ཀྱི་དབྱེ་བའམ། །གཟུང་བ་དང་ནི་འཛིན་པའམ། །སྐྱེས་པ་བུད་མེད་མ་ནིང་ སོགས། །ངོ་བོར་སེམས་ནི་གནས་པ་མིན། །མདོར་ན་སངས་རྒྱས་རྣམས་ཀྱིས་ནི། །གཟིགས་པར་མ་གྱུར་གཟིགས་མི་འགྱུར། །རང་བཞིན་མེད་པའི་རང་བཞིན་ཅན། །ཇི་ལྟ་བུར་ན་གཟིགས་པར་འགྱུར། ར་འགྱུར། །ཞེས་ཏེ་་ཇི་ལྟར་སེམས་ཀྱི་ རང་བཞིན་ཅི་ཡང་མ་ཡིན་གང་དུའང་མི་འདུ་ཅི་ཡང་བྱར་མེད་སུས་ཀྱང་མཐོང་དུའང་མེད་མ་མཐོང་དུའང་མེད་གཉིས་མིན་དུ་མི་གནས་པ་དེ་བཞིན་དུ་ཆོས་ཐམས་ཅད་དེ་ཁོ་ན་སྟེ་གང་ལའང་གཅིག་པ་དང་ཐ་དད་པར་མ་མཐོང་བ་འདི་ནི་ཆོས་ཀྱི་བདག་མེད་པ་མཉམ་ པ་ཉིད་ཅེས་བྱའོ། །དེ་ལྟར་རང་གི་སེམས་གདོད་མ་ནས་ངོ་བོ་མེད་ཅིང་གནས་མེད་ལ་སྐྱེ་བ་དང་འགག་པ་མ་ཡིན་པར་མཐོང་བ་འདི་ནི་སྟོང་པ་ཉིད་ཅེས་ཀུན་རྫོབ་ཏུ་ཐ་སྐད་དུ་བྱ་བ་སྟེ། བརྩེར་ལྡན་ཀུན་གྱིས་དུས་གསུམ་དུ། །སྟོང་པ་མཁའ་ དང་མཚུངས་པརམཁྱེན། །དེ་ཕྱིར་ཆོས་རྣམས་ཀུན་གྱི་གཞི། །ཞི་ཞིང་སྒྱུ་མ་དང་མཚུངས་པར། །གཞི་མེད་སྲིད་པ་འཇིག་བྱེད་པའི། །སྟོང་ཉིད་འདི་ནི་རྟག་ཏུ་སྒོམ། །ཞེས་སོ། །ཇི་ལྟར་སྒོམ་ཞེ་ན། གང་ཡང་མ་དམིགས་ཅིང་འཛིན་པ་
Page: 93 ༄༅། །ལས་ལོག་པ་ཙམ་ལ་སྒོམ་པར་ཐ་སྙད་དུ་བྱས་པ་སྟེ། སེམས་ལ་དམིགས་པ་མེད་པ་ཡི། །གནས་པ་ནམ་མཁའི་མཚན་ཉིད་ཡིན། །དེ་དག་སྟོང་ཉིད་སྒོམ་པ་ནི། །ནམ་མཁའ་སྒོམ་པར་བཞེད་པ་ཡིན། །ཞེས་སོ། ། སྟོང་ཉིད་དེ་ཆད་པར་ལྟ་བ་མ་ཡིན་ནམ་ཞེ་ན་རྟག་ཆད་ནི་དངོས་འཛིན་ཅན་རྣམས་ལ་ཡོད་ཀྱི་རང་བཞིན་ཤེས་པ་རྣམས་ལ་མེད་དེ། སྟོང་ཉིད་རང་བཞིན་དུ་བརྗོད་པས། །འགའ་ཞིག་ཆད་པར་སྨྲས་པ་མིན། །དེས་ནི་རྟག་པ་ཉིད་དུ་ཡང། ། འགའ་ཞིག་སྨྲས་པ་མ་ཡིན་ནོ། །ཞེས་སོ། །དེས་ན་ཆོས་ཐམས་ཅད་ནི་རྒྱུ་རྐྱེན་ཚོགས་པ་ལས་མེད་བཞིན་དུ་སྣང་བ་སྒྱུ་མ་ཙམ་ཞིག་སྟེ་དེ་ལ་ཀུན་རྫོབ་ཏུ་བརྗོད་ལ་དེའི་ཚེའང་དེ་ཉིད་རང་གི་ངོ་བོ་གཟོད་ནས་དག་པ་ལ་དོན་དམ་པར་འདོགས་པར་ཟད་ཀྱི་ཀུན་རྫོབ་ ལས་གཞན་དུ་དོན་དམ་པ་རྟག་བརྟན་ཀྱང་མེད་དེ་ཆོས་གཅིག་ལ་བསམ་པའི་དབང་གིས་མིང་ཐ་དད་དུ་བྱས་པ་སྒྱུ་མའི་ན་ཆུང་ལ་སྒྱུ་མར་མ་ཤེས་པའི་ཆ་ནས་བཟང་མོ་ཞེས་བརྗོད་པ་དང་སྒྱུ་མར་ཤེས་ནས་སྒྱུ་མའི་བུད་མེད་ཅེས་སྨྲས་ཀྱང་དེ་གཉིས་ལ་ གཞི་ཐ་དད་མི་དམིགས་པ་བཞིན་ཏེ། ཀུན་རྫོབ་ལས་ནི་ཐ་དད་པར། །དེ་ཉིད་དམིགས་པ་མ་ཡིན་ཏེ། །ཀུན་རྫོབ་སྟོང་པ་ཉིད་དུ་བཤད། །སྟོང་ཉིད་ཁོ་ན་ཀུན་རྫོབ་ཡིན། །མེད་ན་མི་འབྱུང་ངེས་པའི་ཕྱིར། །བྱས་དང་མི་རྟག་ཇི་བཞིན་ནོ། ། ཞེས་སོ། །དེ་ལྟར་ཆོས་རྣམས་ཀྱི་དངོས་པོའི་གནས་ཚུལ་སྟོང་པ་ཉིད་དུ་ཤེས་ནས་དེ་ལ་རྩེ་གཅིག་ཏུ་གནས་པ་ནི་སྟོང་ཉིད་སྒོམ་པ་ཡིན་ལ་དེའི་ཚེ་དེ་ལྟར་མ་རྟོགས་པའི་སེམས་ཅན་སྒྱུ་མ་ལྟ་བུ་ལ་སྙིང་རྗེ་འབད་མེད་དུ་འབྱུང་ཞིང་ཆོས་ཐམས་ཅད་སུའི་ཡང་ མ་ཡིན་པར་རིག་པས་གང་ལའང་ཆགས་པ་མེད་པར་ཐམས་ཅད་གཏོང་། ཆུ་ནང་དུ་ལྷ་དང་སྲིན་པོའི་གཟུགས་བརྙན་ལྷནཅིག་ཏུ་ཤར་བ་ལྟར་འཁོར་འདས་གཉིས་ཀའང་དེ་ཙམ་དུ་མཐོང་བས་སྲིད་པས་མི་སྐྲག་ཞི་བ་ལ་མི་རེ་བར་ནམ་མཁའ་མ་
Page: 94 སྟོངས་ཀྱི་བར་དུ་གཞན་དོན་ལ་བརྩོན་པར་འགྱུར་བ་ནི་སྟོང་ཉིད་བསྒོམས་པའི་འབྲས་བུ་ཡིན་ཏེ། དེ་ལྟར་སྟོང་པ་ཉིད་འདི་ནི། །རྣལ་འབྱོར་པ་ཡིས་སྒོམ་བྱས་ན། །གཞན་གྱི་དོན་ལ་ཆགས་པའི་བློ། །འབྱུང་བར་འགྱུར་བར་ཐེ་ཚོམ་མེད། ། ཅེས་དང་། གང་ཞིག་བསྒོམས་པས་བརྟན་པ་ཡང་། །གཞན་གྱི་སྡུག་བསྔལ་གྱིས་བྲེད་ནས། །བསམ་གཏན་བདེ་བ་དོར་ནས་ཀྱང་། །མནར་མེད་པར་ཡང་འཇུག་པར་བྱེད། །འདི་ནི་ངོ་མཚར་འདི་བསྔགས་འོས། །འདི་ནི་དམ་པའི་ཚུལ་ ལུགས་མཆོག། དེ་དག་རྣམས་ཀྱིས་རང་ལུས་དང་། །ནོར་རྣམས་བྱིན་པ་ངོ་མཚར་མིན། །ཆོས་རྣམས་སྟོང་པ་འདི་ཤེས་ནས། །ལས་དང་འབྲས་བུ་བསྟེན་པ་གང་། །དེ་ནི་ངོ་མཚར་བས་ངོ་མཚར། །རྨད་བྱུང་བས་ཀྱང་རྨད་དུ་བྱུང་། །སེམས་ ཅན་སྐྱབས་པའི་བསམ་པ་ཅན། །དེ་དག་སྲིད་པའི་འདམ་སྐྱེས་ཀྱང་། །དེ་བྱུང་ཉེས་པས་མ་གོས་པ། །ཆུ་ཡིས་པད་མའི་འདབ་མ་བཞིན། །ཞེས་དང་རྒྱན་ལས། དེ་ཡིས་ཆོས་ཀུན་སྒྱུ་མ་ལྟ་བུ་དང་། །སྐྱེ་བ་སྐྱེད་མོས་ཚལ་འགྲོ་ལྟར་རྟོགས་ པས། །འབྱོར་བའི་དུས་དང་རྒུད་པའི་དུས་ནའང་འདི། །ཉོན་མོངས་སྡུག་བསྔལ་དག་གིས་འཇིགས་པ་མེད། །རང་གི་ཡོན་ཏན་སེམས་ཅན་ཕན་འདོགས་དགའ། །བསམ་བཞིན་སྐྱེ་བ་རྫུ་འཕྲུལ་རྣམ་པར་འཕྲུལ། །རྒྱན་དང་སྟོན་ མོ་ས་མཆོག་བརྩེ་དགའ་བ། །སྙིང་རྗེའི་བདག་ཉིད་མིན་པ་རྣམས་ལ་མེད། །གཞན་དོན་བརྩོན་ལྡན་སྙིང་རྗེའི་བདག་ཉིད་འདི། །གང་ཚེ་མནར་མེད་ལ་ཡང་དགར་འཛིན་པ། །དེ་འདྲ་བ་དག་སྙིང་ན་གཞན་བསྟེན་ཅན། །སྡུག་བསྔལ་ འབྱུང་བ་རྣམས་ཀྱིས་ག་ལ་འཇིགས། །ཞེས་སོ། །དེ་ལྟར་དོན་དམ་པའི་བྱང་ཆུབ་ཀྱི་སེམས་ཤེས་རབ་དྲི་མ་མེད་པས་སྲིད་པ་ལ་མི་གནས་ཤིང་སྙིང་རྗེ་ཆེན་པོས་ཞི་བ་ཉན་རང་གི་མཐའ་ལ་མི་གནས་པ་དེ་ཉིད་ལ་མི་གནས་པའི་མྱ་ངན་ལས་འདས་པ་
Page: 95 ༄༅། །ཞེས་བྱ་སྟེ་བྱང་ཆུབ་སེམས་འགྲེལ་དེ་ཉིད་ལས། འཁོར་བ་མྱ་ངན་འདས་པ་ལ། །བདག་ཉིད་ཆེ་དེ་མི་གནས་པས། །དེ་ཕྱིར་སངས་རྒྱས་རྣམས་ཀྱིས་ནི། །མི་གནས་མྱ་ངན་འདས་པར་བཤད། །ཅེས་སོ། །དེས་ན་ དོན་དམ་བྱང་སེམས་ཆོས་ཐམས་ཅད་ཀྱི་རང་བཞིན་ཁོང་དུ་ཆུད་པ་འདི་མེད་ན་ཀུན་རྫོབ་བྱང་སེམས་ཉིད་ཀྱང་སྲུང་བར་མི་ནུས་ཏེ་མྱུར་དུ་འཇིག་པར་འགྱུར་ལ་དོན་དམ་པའི་རང་བཞིན་གྱི་ཕྱོགས་འདི་ཤེས་པ་ན་ཚོ་གའི་མིང་ཅན་གྱིས་བླངས་ཀྱང་ རུང་མ་བླངས་ཀྱང་རུང་སྟེ་ཀུན་རྫོབ་བྱང་ཆུབ་ཀྱི་སེམས་བཟོད་པར་དཀའ་བ་བཅོས་མ་མ་ཡིན་པ་སྙིང་རྗེ་ཟློག་ཏུ་མེད་པའི་ཤུགས་ཀྱིས་དྲངས་པ་སྨོན་ལམ་གྱི་རྣམ་པ་མཐའ་ཡས་པ་ལ་འཇུག་པ་དེ་ལྟ་བུ་ནི་ཉིན་རེ་ལ་ཡང་ལན་ཆེས་མང་པོར་བཟློག་མི་ནུས་པར་དེ་ནས་སྐྱེ་ བ་ཡིན་ནོ། །གལ་ཏེ་དོན་དམ་བྱང་སེམས་ད་ལྟ་བསྒོམ་བྱ་མིན་ཏེ་དེ་འཕགས་ལམ་ན་ཡོད་པའི་ཕྱིར་སྙམ་ན་འོ་ན་སྦྱིན་སོགས་དྲུག་ཀྱང་དཱ་ལྟ་བསྒྲུབ་བྱ་མིན་ཏེ་ས་དང་པོ་ནས་དྲུག་པའི་བར་ལ་རེ་རེ་ཡོད་པའི་ཕྱིར། རྗེས་སུ་ཡི་རང་ཡང་ད་ལྟ་བསྒོམ་བྱ་ མིན་ཏེ་དེ་ཟག་བཅས་སྒོམ་ལམ་ན་ཡོད་པའི་ཕྱིར། སྨོན་ལམ་ཡང་ད་ལྟ་གདབ་བྱ་མིན་ཏེ་དེ་ས་དགུ་པ་ན་ཡོད་པའི་ཕྱིར། བསྔོ་བ་ཡང་བལྟ་བྱར་མི་རུང་སྟེ་དེ་བསྔོ་བ་སྒོམ་ལམ་ན་ཡོད་པའི་ཕྱིར། དེས་ན་མི་མཛངས་པ་དག་བུ་རམ་གྱི་ཞིང་དང་འབྲས་ སཱ་ལུའི་ཞིང་རྨོད་ཅིང་བསྐྲུན་པའི་ཞིང་ལས་ཀྱི་མཐའ་ལ་གཅིག་ཏུ་བརྩོན་པའི་འགྲམ་དུ་བྱིས་པ་རྩེ་བ་དག་འདུས་ཏེ་འདི་ནི་འདི་འདྲའོ་འདི་ནི་རིངས་སོ་འདི་ནི་གདབ་ཉེས་སོ་ཞེས་སྣ་ཚོགས་པར་སྨྲ་བ་བཞིན་དུ་འཆི་བས་སྐྲག་ཅིང་མི་ལུས་དོན་ལྡན་དུ་འདོད་པའི་ སྐྱེས་བུ་རྣམས་རྩེ་གཅིག་ཏུ་དམ་པའི་ལམ་སྒྲུབ་པ་ན་མཁས་པའི་མིང་ཅན་ཚེ་འདིའི་ཟང་ཟིང་གི་འདུན་མ་གྲུབ་པས་ཆོག་པ་དུ་མས་ཁྱེད་ཅག་གི་དེ་ནི་ནོར་རོ་འདི་ནི་ཐུངས་སོ་ས་བོན་ལ་མི་འཐད་དོ་ཆོ་གས་སྐྱེའོ་མི་སྐྱེའོ་ཞེས་གཞན་གྱི་དགེ་བ་ལ་ཕྲག་དོག་པའི་སྙད་འདོགས་སྣ་ཚོགས་པ་བགྱིད་པ་
Page: 96 རྣམས་ཀྱི་ཚིག་གིས་སེམས་མི་གཡོ་བར་རྩེ་གཅིག་ཏུ་རང་གི་ཡང་དག་པའི་ལམ་སྒྲུབ་པར་བྱོས་ཅིག །དེས་ན། ཀུན་རྫོབ་སྒྱུ་མ་ལྟ་བུ་སྟེ། །དེ་ཉིད་གཟོད་ནས་སྟོང་པ་ཉིད། །ཆོས་རྣམས་ནམ་མཁའ་ཇི་འདྲ་བར། །ཤེས་པའི་མཉམ་བཞག་གོམས་ པར་བྱ། །དེ་ལྟར་མ་རྟོགས་སེམས་ཅན་ལ། །སྙིང་རྗེས་རྟག་ཏུ་ཕན་པ་སྤྱད། །འདི་ནི་དོན་དམ་སེམས་མཆོག་ཡིན། །དེ་ལྟར་ཀུན་རྫོབ་དོན་དམ་གྱི། །བྱང་ཆུབ་སེམས་གཉིས་ལྷུར་བྱེད་པ། །དེ་ནི་སངས་རྒྱས་ཐམས་ཅད་ཀྱི། །ཕྲིན་ལས་གཅིག་ ཏུ་གནས་པ་ཡིན། །ཞེས་བྱའོ། །བྱང་ཆུབ་ཀྱི་སེམས་སྤྱིའི་རྣམ་པར་བཞག་པ་བཤད་ཟིན་ཏོ། །
ལེའུ་དང་པོ། བྱང་ཆུབ་ཀྱི་སེམས་ཀྱི་ཕན་ཡོན་བཤད་པ།
[edit]Page: 97 ༄༅། །གཉིས་པ་གཞུང་གི་དོན་གོ་རིམ་དུ་བཤད་པ་ལ་གསུམ། བྱང་ཆུབ་ཀྱི་སེམས་ཀྱི་ཕན་ཡོན་བཤད་པ། བྱང་ཆུབ་ཀྱི་སེམས་ཇི་ལྟར་བླང་ཚུལ། ཐོབ་པ་མི་ཉམས་པར་སྲུང་ཚུལ་ལོ། །དང་པོ་ལ་མ་མཐོང་བའི་ཕན་ཡོན། མཐོང་ཆོས་ཀྱི་ཕན་ཡོན། དཔེ་དྲུག་གིས་བསྔགས་པ་སྟེ་ཐུན་མོང་གི་ཕན་ཡོན་གསུམ། འཇུག་སེམས་ཀྱི་ཕན་ཡོན་ཁྱད་པར་དུ་བཤད་པའོ། །དང་པོ་མ་མཐོང་བའི་ཕན་ཡོན་ལ་ཡང་། སྡིག་པ་སེལ་བ། རང་ལ་ཕན་པ། གཞན་སྐྱོབ་པ། སྐྱེས་བུ་གསུམ་གའི་ལམ་གྱི་ རྟེན་དུ་འགྱུར་བ་སྟེ་བཞིའོ། །དང་པོ་སྡིག་པ་སེལ་བ་ནི། སྡིག་པ་སྟོབས་ཆེན་ཤིན་དུ་མི་བཟད་པ། །དེ་ནི་རྫོགས་པའི་བྱང་ཆུབ་སེམས་མིན་པ། །དགེ་གཞན་གང་གིས་ཟིལ་གྱིས་ནོན་པར་འགྱུར། །ཞེས་གསུངས་ཏེ། འགྲེལ་པ་ཕལ་མོ་ཆེར་དེ་ལྟས་ཅེས་པའི་ རྐང་པའང་འདི་ལ་སྦྱར་རོ། །འདི་ལ་སྡིག་པ་དྲུངས་འབྱིན་པ་ནི་དོན་དམ་བྱང་སེམས་ཀྱི་ཕན་ཡོན་ཡིན་ཡང་ཀུན་རྫོབ་ཀྱི་སྨོན་པས་ཀྱང་མངོན་གྱུར་བ་མགོ་གནོན་ནུས་ཏེ། སེམས་སྐྱེད་པ་ལས་ཀྱི་སྒྲིབ་པ་ཆེན་པོ་དང་ལྡན་ཡང་ངན་སོང་དུ་མ་སོང་བ་མང་དུ་བཤད་ པའི་ཕྱིར་རོ། །གཉིས་པ་ནི། བསྐལ་པ་དུ་མར་རབ་དགོངས་མཛད་པ་ཡི། །ཐུབ་དབང་རྣམས་ཀྱིས་འདི་ཉིད་ཕན་པར་གཟིགས། །ཅེས་པའོ། །གསུམ་པ་ནི། །འདིས་ནི་ཚད་མེད་སྐྱེ་བོའི་ཚོགས་རྣམས་ཀྱིས། །བདེ་མཆོག་བདེ་བླག་ཉིད་དུ་འཐོབ་ པར་བྱེད། །ཅེས་གསུངས་ཏེ། སྐྲ་འབལ་བ་སོགས་ཀྱི་གདུང་བ་མེད་པར་འཇུག་པས་བདེ་མཆོག་དང་བདེ་བླག་སྟེ། བདེ་ནས་བདེ་བར་འགྲོ་བ་ལ། །སེམས་ཤེས་སུ་ཞིག་སྒྱིད་ལུག་འགྱུར། ཞེས་འཆད་པར་འགྱུར་རོ། །འོ་ན་བྱམས་པའི་སྟོབས་ཀྱི་
སྐྱེས་རབས་སོགས་ཇི་ལྟ་ཞེ་ན། ཕ་རོལ་གྱི་སྡུག་བསྔལ་གྱིས་རང་སྡུག་བསྔལ་བར་གྱུར་པའི་བློ་ཅན་རྣམས་ནི་དེ་འདྲ་བ་ལ་བདེ་བ་ཉིད་དུ་མཐོང་བར་འགྱུར་རོ་ཞེས་དཀའ་འགྲེལ་ཆེན་མོར་རོ། །བཞི་པ་ནི། སྲིད་པའི་སྡུག་བསྔལ་བརྒྱ་ཕྲག་གཞོམ་འདོད་ཅིང་། །
Page: 98 སེམས་ཅན་མི་བདེ་བསལ་བར་འདོད་པ་དང་། །བདེ་མང་བརྒྱ་ཕྲག་སྤྱོད་པར་འདོད་པས་ཀྱང་། །བྱང་ཆུབ་སེམས་ཉིད་རྟག་ཏུ་གཏང་མི་བྱ། །ཞེས་གསུངས་ཏེ། འཁོར་བའི་བདེ་བ་འདོད་པས་ཀྱང་སེམས་བསྐྱེད་པར་བྱ་སྟེ། འཁོར་བའི་བདེ་འབྲས་ཐམས་ ཅད་བསྐལ་བ་བྱེ་བར་མྱོང་ཡང་དེས་རྒྱུ་ལ་བྲི་གང་དུ་མི་མངོན་པའི་ཕྱིར། རང་ཉིད་ཞི་བ་འདོད་པས་ཀྱང་བྱང་ཆུབ་ཏུ་སེམས་བསྐྱེད་པར་བྱ་སྟེ། མྱུར་དུ་འཁོར་བ་ལས་ཐར་བར་འདོད་པས་ཀྱང་བྱང་ཆུབ་ཏུ་སེམས་བསྐྱེད་པར་བྱའོ། །ཞེས་དང་། མཆོག་ཟུང་མྱུར་དུ་ ཐར་བར་འདོད་པས་ཐེག་དམན་དུ་སེམས་བསྐྱེད་པ་ཡིན་ཡང་། ང་བྱང་ཆུབ་མ་ཐོབ་ཀྱི་བར་དུ་འདི་གཉིས་ཐར་བར་མ་ནུས་སོ། ཞེས་སོ། །སེམས་ཅན་སྐྱབས་པར་འདོད་པས་ཀྱང་སེམས་བསྐྱེད་པར་བྱ་སྟེ། དེའི་རྒྱུ་ནི་དེ་ཁོ་ན་ཡིན་པའི་ཕྱིར་རོ། །གཉིས་པ་ནི། བྱང་ཆུབ་སེམས་སྐྱེས་གྱུར་ན་སྐད་ཅིག་གིས། །འཁོར་བའི་བཙོན་རར་བསྡམས་པའི་ཉམ་ཐག་རྣམས། །བདེ་གཤེགས་རྣམས་ཀྱི་སྲས་ཞེས་བརྗོད་བྱ་ཞིང་། །འཇིག་རྟེན་ལྷ་མིར་བཅས་པས་ཕྱག་བྱར་འགྱུར། །ཞེས་གསུངས་ཏེ། སྨོན་ པའི་བྱང་ཆུབ་ཀྱི་སེམས་སྐྱེས་མ་ཐག་དེ་ཉིད་དུ་འཁོར་བའི་རྒྱ་མཚོ་གནག་རྗེས་ཙམ་དུ་བྱས་ཏེ་རྒྱལ་བའི་སྲས་ཀྱི་མིང་འཐོབ། ཚངས་པ་ལ་སོགས་པའི་ལྷས་ཕྱག་བྱེད། བྱང་ཆུབ་སེམས་དཔའ་འོ། །ཞེས་བཀུར་སྟིའི་གནས་སུ་འགྱུར་བའི་ཕྱིར་ཏེ། འདུལ་ བའི་ལུང་ལས། རྒྱལ་པོ་གསལ་རྒྱལ་གྱིས་སྟོན་པ་ལ། རབ་བྱུང་གི་ཕན་ཡོན་ཞུས་པས་ཁྱོད་ཉིད་ལ་དྲི་བར་བྱ་སྟེ། ཁྱོད་ཀྱི་བྲན་གོ་རེ་ལོང་མངག་གཞུག་པ་ཅི་དགོས་བྱེད་པ་ཞིག་ད་ལྟ་ངའི་ཐད་དུ་རབ་ཏུ་བྱུང་སྟེ། བསྙེན་པར་རྫོགས་ན་ཕྱིན་ཆད་དེས་ཁྱོད་ཀྱི་ རྐང་པ་བཀྲུ་བ་དང་གོ་རེ་ལོང་བྱེད་དམ། གསོལ་པ་བཅོམ་ལྡན་འདས་དེ་མི་བགྱིད་དེ་གཞན་དུ་ན་དེའི་ཞབས་ལ་བདག་གིས་ཕྱག་བྱ་བ་དང་བདག་གིས་དེའི་རྐང་པ་བཀྲུ་བར་བྱ་བར་འགྱུར་རོ། །བཀའ་བསྩལ་པ། རྒྱལ་པོ་ཆེན་པོ་དེ་ལྟ་བས་ན་དོན་
Page: 99 ༄༅། །འདིས་ཀྱང་ངས་རབ་ཏུ་བྱུང་བའི་ཕན་ཡོན་བཤད་པ་མ་ཡིན་ནམ། ཞེས་གསུངས་པ་ལྟ་བུའོ། གསུམ་པ་དཔེ་དྲུག་གིས་བསྔགས་པ་ནི། དམན་པ་མཆོག་ཏུ་བསྒྱུར་བ་གསེར་འགྱུར་གྱི་རྩིའི་དཔེ། རིན་དང་མཐུ་ཆེ་བ་ནོར་ བུའི་དཔེ། འབྲས་བུ་ཟད་མི་ཤེས་པ་དཔག་བསམ་གྱི་ཤིང་གི་དཔེ། མྱོང་བར་ངེས་པའི་སྡིག་པ་འཇོམས་པ་དཔའ་བོའི་དཔེ། མྱོང་བར་མ་ངེས་པ་འཇོམས་པ་མེའི་དཔེ། ཕན་ཡོན་རྒྱས་པར་མདོ་ལས་བསྟན་ཚུལ་ལོ། །དང་པོ་ནི། གསེར་ འགྱུར་རྩི་ཡི་རྣམ་པ་མཆོག་ལྟ་བུར། །མི་གཙང་ལུས་འདི་བླངས་ནས་རྒྱལ་བའི་སྐུ། །རིན་ཆེན་རིན་ཐང་མེད་པར་བསྒྱུར་བས་ན། །བྱང་ཆུབ་སེམས་ཞེས་བྱ་བ་རབ་བརྟན་གཟུང་། །ཞེས་གསུངས་ཏེ། གསེར་གྱི་རིགས་ཆེན་པོ་དངུལ་ ཆུར་སྣང་བས་ལྕགས་ཐམས་ཅད་གསེར་དུ་བྱེད་ཀྱང་དེ་ལྕགས་སཀྱིས་ཉམས་མི་ནུས་པ་ལྟ་བུའོ། །འདིར་སྡོང་པོ་བཀོད་པ་ན། གསེར་དུ་སྣང་བའི་དངུལ་ཆུ་ཞེས་ཡོད་ཀྱང་། འགྱུར་རམ་བར་དུ་མ་དག་པ་ཞིག་སྟེ་རོ་བཅུད་ཆེན་པོ་དེ་ནི་རྣམ་པ་དངུལ་ཆུར་ ཡོད་ལ་ངོ་བོ་གསེར་གྱི་མཆོག་ཡིན་པས་དེས་ཕྲད་མ་ཐག་ལྕགས་ཁམས་ཀྱི་རོ་ཐམས་ཅད་ཕུག་ནས་གསེར་གྱི་ཁམས་འབའ་ཞིག་པར་བྱེད་པར་མདོ་མྱང་འདས་སོགས་དང་། རྒྱུད་དུས་འཁོར་སོགས་ལས་བཤད་པའི་ཕྱིར་རོ། །གཉིས་པ་ནི། འགྲོ་ བའི་དེད་དཔོན་གཅིག་བུ་ཚད་མེད་བློས། །ལེགས་པར་ཡོངས་སུ་བརྟགས་ན་རིན་ཆེན་བས། །འགྲོ་བའི་གནས་དང་བྲལ་བར་འདོད་པ་རྣམས། །རིན་ཆེན་བྱང་ཆུབ་སེམས་ལེགས་བརྟན་པར་གཟུང་། །ཞེས་གསུངས་ཏེ། དཀའ་འགྲེལ་ ཆེན་མོར། འགྲོ་བ་ཚོང་བརྡལ་པ་རྣམས་ལ་ཀྱེ་བྱང་ཆུབ་ཀྱི་སེམས་ཀྱི་ནོར་བུ་ཁོ་ན་ཉོས་ཤིག །ཞེས་གཏན་ཚིགས་དང་བཅས་ནས་འདོམས་པ་སྟེ། ཉི་ཟླའི་འོད་ཀྱིས་ཁྱབ་པ་ཚུན་ཆད་ཀྱི་དངོས་པོ་ཀུན་གྱིས་རིན་པོ་ཆེ་དབང་གི་རྒྱལ་པོའི་རིན་དུ་མི་ཆོག་པ་
Page: 100 ལྟར། བྱང་ཆུབ་ཀྱི་སེམས་ཀྱི་རིན་དུ་ཉན་རང་མན་གྱི་དགེ་བ་ཐམས་ཅད་ཀྱིས་མི་ཆོག་པར་གསུངས་པ་དྲངས་སོ། །གསུམ་པ་ནི། དགེ་བ་གཞན་ཀུན་ཆུ་ཤིང་བཞིན་དུ་ནི། །འབྲས་བུ་བསྐྱེད་ནས་ཟད་པར་འགྱུར་བ་ཉིད། བྱང་ཆུབ་སེམས་ཀྱི་ལྗོན་ ཤིང་རྟག་པར་ཡང་། །འབྲས་བུ་འབྱིན་པས་མི་ཟད་འཕེལ་བར་འགྱུར། །ཞེས་གསུངས་ཏེ། དགེ་བ་གཞན་རྣམས་ནི་སྦ་དང་སྨྱུག་མ་དང་ཆུ་ཤིང་ལྟར་འབྲས་བུ་ལན་གཅིག་ཕྱུང་ནས་རྩ་བ་སྐམ་ལ་བྱང་ཆུབ་ཀྱི་སེམས་ནི་ནྱ་གྲོ་དྷ་ལ་སོགས་པ་ ལྟར་འབྲས་བུ་ཟད་མི་ཤེས་པའོ། བཞི་པ་མྱོང་བར་ངེས་པའི་སྡིག་པ་འཇོམས་པ་དཔའ་བོའི་དཔེ་ནི། སྡིག་པ་ཤིན་ཏུ་མི་བཟད་བྱས་ན་ཡང་། །དཔའ་ལ་བརྟེན་ན་འཇིགས་པ་ཆེ་ལས་ལྟར། གང་ལ་བརྟེན་ནས་ཡུད་ཀྱིས་སྒྲོལ་འགྱུར་བ། །དེ་ལ་བག་ཅན་རྣམས་ཀྱིས་ཅིས་མི་བསྟེན། ། ཞེས་གསུངས་ཏེ། རྒྱལ་པོ་མ་སྐྱེས་དགྲ་ལྟ་བུའང་བྱང་ཆུབ་ཀྱི་སེམས་ཀྱི་མཐུས་ཚེ་དེ་ལ་སྒྲ་བྱུང་གི་བཟོད་པ་ཐོབ་པར་འགྱོད་བསལ་གྱི་མདོ་ལས་བཤད་པ་ལྟ་བུའོ། །ལྔ་པ་མྱོང་བར་མ་ངེས་པ་འཇོམས་པ་མེའི་དཔེ་ནི། དེས་ནི་དུས་མཐའི་མེས་བཞིན་སྡིག་ཆེན་རྣམས། །སྐད་ཅིག་གཅིག་གིས་ ངེས་པར་སྲེག་པར་བྱེད། །ཅེས་གསུངས་ཏེ། དུས་མཐའི་མེས་དངོས་པོ་ཐམས་ཅད་ཀྱང་སྲེག་པ་ལྟར་མྱོང་བར་ངེས་མ་ངེས་སོགས་ཀྱི་མི་དགེ་བའི་ལས་ལམ་ཐམས་ཅད་ནུས་མེད་དུ་བྱེད་པའོ། །འོ་ན་ལས་ཆུད་མི་འཛའ་བར་གསུངས་པ་དང་འགལ་ ལོ་ཞེ་ན། མི་འགལ་ཏེ་བསོད་ནམས་ཀྱི་ཚོགས་ནམ་མཁའི་ཁོངས་ལྟ་བུར་ཆུད་པས་རྒྱ་མཚོ་ལན་ཚྭ་སྲང་གཅིག་ལྟར་མི་མངོན་པ་དང་། གཉེན་པོ་སྟོབས་ལྡན་གྱིས་ཟིལ་གྱིས་མནན་པས་ནུས་མེད་དུ་བྱས་པས་བསྲེགས་པ་ཉིད་ཡིན་པའི་ཕྱིར་དང་། མ་སྤྱད་པར་ལས་མི་ཟད་པ་ཡང་གཉེན་པོས་མ་ཟིན་པ་ལ་དགོངས་ལ་འདི་ནི་སྡིག་པ་ཐམས་ཅད་རྩ་བ་ནས་མེད་པར་བྱེད་པའི་ཐབས་ཆེན་པོ་ཡིན་པའི་ཕྱིར་དང༌། སེམས་ཅན་ཐམས་ཅད་སྡུག་བསྔལ་ཀུན་ལས་བཏོན་ཏེ་བདེ་བ་ཐམས་ཅད་ལ་སྦྱར་བར་
Page: 101 ༄༅། །སེམས་ཤིང་། སྔར་བྱས་ཀྱི་སྡིག་པ་རྣམས་རྣམ་པར་སུན་འབྱིན་ཟད་པར་བྱེད་པའི་ཕྱིར་རོ། །ཞེས་འགྲེལ་ཆེན་ལས་སོ། །འདི་ནི་འགྲེལ་པ་མཁན་པོ་དང༌། རྔོག་ལོའི་ལུགས་ལྟར་མ་དཔྱད་པར་བཤད་པ་སྟེ། གཙང་ནག་པ་ན་ རེ། མྱོང་ངེས་ཀྱི་སྡིག་པ་མེད་དེ་མྱོང་ངེས་ནི་རྒྱུ་ནུས་པ་ཐོགས་མེད་ལ་འཇོག་ན་དེ་ནི་སྐད་ཅིག་གཉིས་པར་འབྲས་བུ་འབྱིན་པ་ཡིན་ལ། སྡིག་པ་ནི་ནུས་པ་ཐོགས་བཅས་ཡིན་ལ་ཐོགས་བཅས་ལ་མྱོང་བར་མ་ངེས་པས་ཁྱབ་བོ། །དེས་ན་འབྲས་བུ་སྡུག་བསྔལ་ ལས་སྐྱོབ་པ་དང་རྒྱུ་སྡིག་པ་ལས་སྐྱོབ་པ་ལ་སྐྱེལ་མ་དང་མེའི་དཔེའོ། །ཞེས་འཆད་དོ། །དྲུག་པ་ཕན་ཡོན་རྒྱས་པར་མདོ་ལས་བསྟན་ཚུལ་ནི། དེ་ཡི་ཕན་ཡོན་དཔག་ཏུ་མེད་པ་དག །བྱམས་མགོན་བློ་དང་ལྡན་པས་ནོར་བཟང་བཤད། །ཅེས་གསུངས་ཏེ། ཕན་ཡོན་མཐའ་ཡས་མོད་ ཀྱི་རགས་པ་ཞིག་སྡོང་པོས་བརྒྱན་པར་བྱམས་པས་གསུངས་པ་ལ་ལྟོས་ཤིག་ཞེས་པ་སྟེ། དཔེ་ཉིས་བརྒྱ་ལྷག་པ་ཅིག་རང་དོན་གྱི་ཡོན་ཏན། གཞན་དོན་གྱི་ཡོན་ཏན། མི་མཐུན་པའི་ཕྱོགས་གཅོད་པའི་ཡོན་ཏན། མཐུ་ཕུན་ཚོགས་འགྲུབ་པའི་ཡོན་ཏན་ཏེ་ དོན་བཞིར་བསྡུས་ཏེ་བསྟན་ལ། དེ་ཚིགས་བཅད་དུ་བསྡུས་པ་ནི། ཇི་ལྟར་ས་བོན་ཞིང་དང་ས་ཆུ་རླུང་། །མེ་དང་ཟླ་བ་ཉི་མ་སྒྲོན་མ་མིག །ལམ་དང་མུ་སྟེགས་གཞོན་པ་སྒོ་ཁང་བཟང་། །སྐྱེད་ཚལ་གནས་རྟེན་གཞི་དང་ཕ་མ་དང༌། །མ་མ་རྒྱལ་པོ་ ལྷ་དབང་རྒྱ་མཚོ་རི། །ཁོར་ཡུག་གངས་རི་སྤོས་དང་ལྡང་པའི་ངོགས། །ནམ་མཁའ་པདྨ་གླང་ཆེན་ཅང་ཤེས་རྟ། །ཁ་ལོ་བསྒྱུར་བ་སྨན་དང་ས་འོག་ཉིད། །རྡོ་རྗེ་སྤོས་སྣོད་མེ་ཏོག་མཆོག་དང་ནི། །ཁ་བའི་ཙནྡན་དཀར་མིན་ཨ་ག་རུ། །ལྟ་ན་ སྡུག་པའི་སྨན་རྒྱལ་འབྲལ་བྱེད་སྨན། །དབང་པོ་ངལ་སོས་པོ་དང་དཔལ་ལྷབ་ལྷུབ། །བསྐལ་མེ་སྨན་མཆོག་རྩ་བ་མ་གྲུབ་པ། །ཀླུ་ཡི་རིན་ཆེན་ཆུ་དྭངས་ཡིད་བཞིན་འབྱུང་། །བུམ་བཟང་འདོད་སྦྱིན་ཤིང་དང་ངང་རིས་གོས། །
Page: 102 ཤིང་བལ་གཤོལ་དང་མདེའུ་ཐུང་མདའ་དང་མདུང་། །གོ་ཆ་རལ་གྲི་སྤུ་གྲིའི་སོ་དང་ནི། །སྟེའུ་ཁ་དབང་པོའི་རུ་མཚོན་སྟ་རེ་དང་། །མཚོན་ཆ་ལག་པ་རྐང་པ་མིག་མཁན་ཉིད། །སྐམ་པ་ཚེར་ཟངས་མཛའ་བོ་ནོར་གཙུག་ལག ། གཏེར་དང་ཆུ་མིག་མེ་ལོང་པད་མ་དཀར། །ཆུ་ཀླུང་ཀླུ་རྒྱལ་འཚོ་བའི་དབང་པོ་དང་། །བདུད་རྩི་སྙི་དང་མཆིལ་པ་སྤོས་ཀྱི་སྣོད། །དུག་སྨན་སྔགས་དང་རླུང་དཀྱིལ་རིན་ཆེན་གླིང་། །རིགས་དང་འབྱུང་གནས་ཚོང་འདུས་ཆུ་ཡི་ཁམས། །སྦྲང་རྩི་ ལམ་སྣོད་ཆར་པ་གནས་ཁབ་ལེན། །བཻཌཱུརྱ་དང་དབང་སྔོན་ཐོ་རེངས་རྔ་། །ཆུ་འབབ་ཛམྦུའི་གསེར་རྒྱན་རི་རབ་དང༌། །སྐྱབས་དོན་དབྱིག་དང་མཆོད་སྦྱིན་གྱི་ཡོ་བྱད། །རྒན་པ་གླེང་གཞི་མདོ་དང་རྫི་བོ་དང༌། །སྲུངས་མ་དབང་པོའི་མིག་འཕྲུལ་ ཆུའི་ཞགས་པ། །དབང་པོའི་མ་དང་མཆོད་རྟེན་ལྟ་བུ་ཡི། །བྱང་ཆུབ་སེམས་ཀྱི་ཡོན་ཏན་བརྗོད་མི་ལང༌། །རྒྱལ་དང་རྒྱལ་སྲས་ཡོན་ཏན་ཅི་ཡོད་པ། །དེ་ཀུན་བྱང་ཆུབ་སེམས་ཀྱི་མཐུར་ལྟོས་ཅིག །གང་གིས་བྱང་ཆུབ་སེམས་མཆོག་ དེ་བསྐྱེད་པ། །དེ་ཡི་ཡོན་ཏན་ཚད་མེད་ཕུན་སུམ་ཚོགས། །ཇི་ལྟར་འཇིགས་མེད་ཅེས་བྱའི་རྩི་ཡོད་དེ། །དེ་འཆང་དེ་ལ་འཇིགས་པ་ལྔ་མི་འབྱུང༌། །དེ་བཞིན་ཀུན་མཁྱེན་སེམས་ཀྱི་རྩི་འཆང་དེ། །ཡུལ་གྱི་དུག་དང་འདོད་ཆགས་མེས་ མི་ཚུགས། །ཀུན་རྟོག་ཏུ་བས་མི་འཆི་ཉོན་མོངས་ཀྱི། །མཚོན་གྱིས་མི་ཆོད་སྲིད་པའི་ཆུས་མི་འཁྱེར། །ཇི་ལྟར་མཆུ་ཡི་རྩི་འཆང་ན། །དྲི་ཡིས་སྦྲུལ་ཀུན་འབྱེར་བ་ལྟར། །བྱང་ཆུབ་སེམས་ཀྱི་རྩི་ཡི་དྲིས། །ཉོན་མོངས་སྦྲུལ་ཚོགས་ འབྱེར་བར་བྱེད། །གཞན་གྱིས་མི་ཐུབ་རྩི་བཅངས་པས། །དགྲ་ལས་ཀུན་དུ་རྒྱལ་བ་ལྟར། །ཀུན་མཁྱེན་ཐུབ་དཀའི་སེམས་འཆང་བ། །བདུད་དང་ཕས་རྒོལ་ཀུན་ལས་རྒྱལ། །སྡུག་བསྔལ་ཟུག་རྔུ་ཀུན་འབྱིན་རྣམ་སེལ་རྩི་དང་
Page: 103 ༄༅། །མཚུངས། །ལྟ་ན་སྡུག་པའི་རྩི་ལྟར་ཉོན་མོངས་ནད་ཀུན་སེལ། །རྩི་ཡི་ཤིང་ཆེན་སྦྱོར་བའི་ཤུན་པས་རྨ་འཚོ་ཞིང་། །ཤུན་པ་སླར་སྐྱེ་དེ་བཞིན་བྱང་སེམས་ཀྱིས་བསྐྲུན་པ། །ཀུན་མཁྱེན་སེམས་ཀྱིས་ལས་ཉོན་རྨ་འཚོ་ ཉམས་མི་ནུས། །རྩ་བ་མ་གྲུབ་ཤིང་གིས་འཛམ་གླིང་རྣམ་འཕེལ་ལྟར། །བྱང་ཆུབ་སེམས་ཀྱིས་འགྲོ་ཀུན་དགེ་བ་ཡོངས་སུ་འཕེལ། །དགའ་བ་འཐོབ་པའི་རྩི་བཞིན་དུ། །བཅངས་པས་ལུས་སེམས་ནད་མེད་བྱེད། །རྩི་མཆོག་དྲན་པ་འཐོབ་ པ་ལྟར། །བཅངས་པས་དྲན་པ་རྣམ་དག་འཐོབ། །ཇི་ལྟར་པད་མ་ཆེན་པོའི་རྩི། །ཟོས་པས་བསྐལ་པའི་ཚེ་ཐུབ་ལྟར། །བྱང་ཆུབ་སེམས་ཀྱི་རྩི་ཟོས་པ། །གྲངས་མེད་བསྐལ་པའི་ཚེ་ལ་དབང་། །མི་སྣང་བ་ཡི་རྩི་བཅངས་པ། །འགྲོ་བ་ཀུན་གྱིས་ མི་མཐོང་ལྟར། །བྱང་ཆུབ་སེམས་ལྡན་འདྲེས་སྤྱོད་ཀྱང་། །བདུད་ཀྱི་ཡུལ་ཀུན་གྱིས་མི་མཐོང་། །རིན་ཆེན་ཡོངས་སུ་སྡུད་པ་ཡི། །ནོར་བུ་རྒྱ་མཚོ་གནས་དེ་སྲིད། །བསྐལ་མེ་འབར་ཡང་ཏ་ལ་ཡི། །སྲིད་ཙམ་སྐེམ་པར་ནུས་མིན་ལྟར། ། བྱང་ཆུབ་སེམས་ཀྱི་ནོར་བུའི་མཆོག །གང་གི་ཡིད་མཚོར་གནས་རྣམས་ཀྱི། །དགེ་བའི་ཆུ་གཏེར་རྐྱེན་རྣམས་ཀྱིས། །མི་འཕྲོག་ཆུད་ཟར་འགྱུར་བ་མེད། །འོད་འདུས་ནོར་བུ་ཇི་བཞིན་དམན་པའི་སེམས། །རིན་ཆེན་རྒྱན་མང་ཀུན་ནས་ཟིལ་ གྱིས་གནོན། །ཆུ་དྭངས་བཞིན་དུ་ཉོན་མོངས་འདམ་རྙོག་སེལ། །ཆུ་འགྲོགས་བཅངས་ལྟར་འཁོར་བའི་ཆུར་མི་འབྱིང་། །ཀླུ་ནོར་གོ་ཆའི་རིན་ཆེན་སུས་ཐོགས་པ། །སྦྲུལ་གྱི་གནོད་ལས་རྣམ་པར་རྒྱལ་བ་ལྟར། །སེམས་སྐྱེད་རིན་ཆེན་ཐོགས་ པའི་རྒྱལ་བའི་སྲས། །ཁམས་གསུམ་ཀུན་ཏུ་འགྲོ་ཡང་ཉམས་པ་མེད། །ཡིད་བཞིན་རྒྱལ་པོ་ལྟར་བུར་དགོས་དགུ་འབྱུང༌། །མེ་ཤེལ་བཞིན་དུ་ཤེས་རབ་ཉི་ཟེར་གྱིས། །ཕོག་པའི་མོད་ལ་ཡེ་ཤེས་མེ་ཆེན་འབྱིན། །ཟླ་བས་མཛེས་ལྟར་སྔོ་
Page: 104 བའི་ཟླ་ཟེར་གྱིས། །ཕོག་ན་དགེ་བའི་སྨོན་ལམ་ཆུ་རྒྱུན་འབྱིན། །སྙིང་རྗེ་ཆེན་པོའི་རིན་ཆེན་སེམས། །གཙུག་གི་ནོར་བུར་མངོན་ཐོགས་པའི། །རྒྱལ་སྲས་ཀླུ་ཡི་དབང་པོ་ནི། །མི་ཁོམ་གནོད་པའི་འཇིགས་པ་མེད། །བྱང་ཆུབ་སེམས་ ཀྱི་ནོར་བུ་གང༌། །རིན་ཆེན་འགྲོ་བའི་རྒྱན་དམ་པ། །འགྲོ་ཀུན་བསམ་པ་སྐོང་བ་ལས། །ནམ་ཡང་བྱང་བར་མི་འགྱུར་རོ། །ནོར་བུ་རིན་ཆེན་ལྟ་བུར་མུན་པ་སེལ། །དབང་སྔོན་ལྟ་བུར་ཁ་དོག་གཅིག་ཏུ་བྱེད། །བཻཌཱུརྱ་བཞིན་དྲི་མེད་འོད་ཀྱང་ གསལ། །རྣམ་དག་འོད་བཞིན་རིན་ཆེན་ཀུན་ལས་འཕགས། །མེ་འབྱུང་ལྟ་བུར་མུན་པ་རབ་ཏུ་སེལ། །ཐེག་དམན་འཆིང་བུ་ཟིལ་གནོན་ནོར་བུ་ཉིད། །དབང་རྒྱལ་ཉི་ཟླའི་གཟུགས་བརྙན་རྒྱན་སྟོན་ལྟར། །འཁོར་བར་གནས་ཀྱང་རྒྱལ་ཡུལ་ གཟུགས་བརྙན་སྟོན། །དེ་ལ་ལོངས་སྤྱོད་ཐམས་ཅད་ཀྱིས། །རིན་དུ་མི་ཆོག་ཇི་ལྟ་བར། །ལྷ་མི་ཉན་རང་དགེ་ཀུན་གྱིས། །རྒྱལ་སྲས་སེམས་ཀྱི་རིན་མི་ཆོག །རྒྱ་མཚོའི་རྒྱན་བཞིན་ཀུན་མཁྱེན་གྱི། །ཆུ་གཏེར་རྒྱན་ཀུན་སྣང་བར་བྱེད། ། བླ་མེད་ཡིད་བཞིན་རྒྱལ་པོ་ལས་གཞན་གྱིས། །ཟིལ་གྱིས་མི་ནོན་ལྷ་རྫས་ཛམྦུའི་གསེར། །རིན་ཆེན་སེམས་ཀྱི་ཀླུ་དབང་གྲུབ་པ་ནི། །ཉོན་མོངས་སྦྲུལ་གྱི་ཚོགས་ལ་རང་དབང་བྱེད། །རྒྱལ་སྲས་མི་ཞུམ་སེམས་ཀྱི་མཚོན་ཐོགས་པ། ། ཉོན་མོངས་དགྲ་ཡིས་མི་ཚུགས་རབ་ཏུ་དཔའ། །བླ་མེད་སེམས་ཀྱི་ལྷ་རྫས་སྦྲུལ་སྙིང་ནི། །ལྷག་བསམ་གཅིག་གི་ཡོན་ཏན་དྲི་ཡིས་ཀྱང་། །ཆོས་དབྱིངས་རབ་འགེངས་ཉན་རང་བཅས་པ་ཡིས། །འཇིག་རྟེན་ཀུན་གྱི་དགེ་བ་ཟིལ་གྱིས་གནོན། ། ཇི་ལྟར་ཁ་བའི་ཙནྡན་ནི། །གདུང་སེལ་བསིལ་བ་དེ་བཞིན་དུ། །ཉོན་མོངས་གདུང་སེལ་ཡེ་ཤེས་ཀྱི། །ལུས་ཀྱང་རབ་ཏུ་སིམ་བར་བྱེད། །རྒྱལ་སྲས་རི་དབང་དྲུང་འོངས་ཀུན། །ཀུན་མཁྱེན་གསེར་མདོག་གཅིག་ཏུ་བསྒྱུར། །ལྗོན་ཤིང་
Page: 105 ༄༅། །སུས་ཀྱང་མི་ཚུགས་དང་། །ཀུན་ནས་འདུ་བའི་ཤུན་ཕྲགས་ཀྱི། །དྲི་ཞིམ་འབྱུང་བ་དེ་འདྲ་བ། །འཛམ་གླིང་མེ་ཏོག་གཞན་ལ་མེད། །དེ་བཞིན་སེམས་སྐྱེད་ཀྱིས་བསྐྲུན་པའི། །སྨོན་ལམ་དང་ནི་ཡེ་ཤེས་ཀྱི། །དྲི་ཞིམ་ དེ་ལྟ་ཉན་ཐོས་དང་། །རང་སངས་རྒྱས་པ་ཀུན་ལའང་མེད། །ཤིང་མཆོག་དེ་དག་ཁ་འབུས་ན། །མེ་ཏོག་མང་པོའི་འབྱུང་གནས་ཉིད། །དེ་ལྟར་རིན་ཆེན་སེམས་ཀྱི་ཤིང་། །དགེ་བས་ཀུན་ནས་ཁ་འབུས་པ། །ཟག་བཅས་ཟག་པ་མེད་པ་ཡི། ། བྱང་ཆུབ་མེ་ཏོག་འབྱུང་གནས་ཉིད། །ཡོངས་འདུའི་མེ་ཏོག་གིས་བསྒོས་པའི། །གོས་སམ་ཏིལ་མར་དྲི་དེ་ལྟ། །གཞན་ལ་ཡོད་པ་མིན་དེ་ལྟར། །རྒྱལ་སྲས་ཚེ་གཅིག་སེམས་བསྐྱེད་པའི། །ཡོན་ཏན་དྲི་ཞིམ་ངད་ལྡང་བས། །ཕྱོགས་བཅུའི་ རྒྱལ་བའི་དྲུང་འགེངས་པ། །དེ་ལྟ་བསྐལ་པ་འབུམ་ཕྲག་ཏུ། །གོམས་པའི་སློབ་མ་རྣམས་ལའང་མེད། །རྒྱ་མཚོ་གནོད་བྲལ་ནས་སྐྱེ་བ། །ན་ལི་ཀི་རི་ཞེས་བྱའི་ཤིང་། །རྩ་བ་ནས་ནི་འབྲས་བུའི་བར། །འགྲོ་བའི་སྨན་དུ་མི་འགྱུར་མེད། ། བརྩེ་དང་སྨོན་ལམ་གྱིས་བསྐྲུན་པའི། །རྒྱལ་སྲས་སེམས་ཀྱང་དེ་འདྲ་སྟེ། །ཐོག་མའི་སེམས་ནས་རྒྱལ་བའི་བར། །ཀུན་ཀྱང་འགྲོ་བའི་ཉེར་འཚོ་ཉིད། །གསེར་དུ་སྣང་བའི་དངུལ་ཆུ་ཡིས། །ལྕགས་ཀུན་གསེར་དུ་སྒྱུར་བྱེད་ཀྱང་། ། ལྕགས་ཀྱིས་ངན་པར་བསྒྱུར་མི་ནུས། །བྱང་ཆུབ་བསྔོས་པའི་དགེ་བའི་རོས། །ལས་ཉོན་ལྕགས་ཀུན་དྲུངས་འབྱིན་ཡང་། །དེ་ནི་ལས་དང་ཉོན་མོངས་ཀྱིས། །ནམ་ཡང་ཉམས་པར་བྱར་མི་ནུས། །མེ་ནི་ཆུང་ཡང་ཇི་ཙམ་རྐྱེན་དང་ཕྲད་ པ་དེ་སྙེད་འབར་བ་ལྟར། །ཚོགས་གཉིས་བུད་ཤིང་སྤེལ་བ་དེ་སྲིད་ཡེ་ཤེས་འོད་ཀྱི་སྣང་བ་འབྱིན། །རིན་ཆེན་སེམས་ཀྱི་མར་མེ་གཅིག་ལས་དུས་གསུམ་རྒྱལ་བའི་མར་མེའི་ཚོགས། །མངོན་པར་སྤེལ་ཡང་སེམས་ཀྱི་སྒྲོན་མེ་དེ་ནི་མི་ཟད་ཐུག་
Page: 106 པ་མེད། །བྱང་ཆུབ་སེམས་ཀྱི་སྒྲོན་མེ་ཆུང་ངུས་ཀྱང་། །ཐོག་མེད་བསགས་པའི་ལས་ཉོན་མུན་པ་སེལ། །སྨོན་ལམ་སྡོང་བུ་སྙིང་རྗེའི་མར་ལྡན་པ། །དེ་སྲིད་བླ་མེད་སེམས་ཀྱི་སྒྲོན་མེ་འབར། །སེམས་མཆོག་ལྷ་ཡི་ཛམྦུའི་གསེར་གྱི་ རྒྱན། །མི་ལྡོག་རྒྱལ་སྲས་དབང་བསྒྱུར་རྒྱལ་པོ་ཡི། །མགོ་བོར་ཐོགས་དེ་བྱིས་པ་ཉན་རང་བཅས། །འཇིག་རྟེན་ཡོན་ཏན་རྒྱན་གྱིས་འཕྲོག་པ་མེད། །ཐམས་ཅད་མཁྱེན་སེམས་སེང་གེའི་ང་རོ་ཡིས། །དམིགས་པར་གནས་པའི་རི་དྭགས་ཀུན་ འབྱེར་ཡང་། །དང་པོའི་སེམས་ལྡན་རྒྱལ་སྲས་སེང་གེའི་བུ། །བཙས་མ་ཐག་པ་རྣམས་ཀྱང་དགའ་བར་བྱེད། །སྟོང་ཉིད་སེང་གེའི་རྒྱུས་པས་རྒྱུད་བྱས་པ། །རིན་ཆེན་བྱང་ཆུབ་སེམས་ཀྱི་པི་ཝང་སྒྲས། །སྲིད་པར་དགའ་བའི་པི་ཝང་རྒྱུད་ འཆད་དེ། །ཉན་རང་གཏམ་གྱི་སྒྲ་དག་འགག་པར་འགྱུར། །ཉོན་མོངས་ར་དང་མ་ཧེའི་འོ་མའི་མཚོར། །ཀུན་མཁྱེན་སེམས་ཀྱི་སེང་གེའི་འོ་མ་ནི། །ཐིགས་གཅིག་བླུགས་པས་དེ་ཀུན་ཟད་འགྱུར་ཏེ། །ཉན་རང་དམན་པའི་རྣམ་ཐར་ འདུ་མི་ནུས། །རྒྱལ་སྲས་ཀ་ལ་པིངྐའི་ཕྲུ་གུ་ནི། །སྲིད་པའི་སྒོ་ངའི་སྦུབས་ན་གནས་པ་ཡི། །ལྷག་བསམ་ང་རོས་ཉན་རང་གངས་རིའི་བྱ། །སྟོབས་ཡོངས་རྫོགས་པའི་དབྱངས་ཀུན་ཟིལ་གྱིས་གནོན། །རྒྱལ་བ་མཁའ་ལྡིང་དབང་ པོའི་རིགས་བྱུང་བ། །དང་པོའི་སེམས་ལྡན་བཙས་མ་ཐག་པ་ཡི། །སྙིང་རྗེའི་གཤོག་རླུང་ལྷག་བསམ་མིག་དག་པ། །དེ་ནི་ཉན་ཐོས་རྣམས་དང་རང་རྒྱལ་གྱི། །བྱ་གཞན་འདབ་མ་ཡོངས་སུ་རྫོགས་ལའང་མེད། །སྟོབས་ཆེན་གྱིས་ སྦྱང་མདེའུ་ཐུང་ལྟ། །ཉེས་པའི་གོ་ཆ་མ་ལུས་འབིགས། །མཐུ་ཆེན་བརྔམས་ཤིང་ཁྲོས་པ་ལྟར། །སྙིང་རྗེས་རྔམས་པའི་ལྷག་བསམ་གདོང༌། །སེམས་སྐྱེད་ཐོར་བུ་ལྡན་དེ་བསྲིང་། །བདུད་ཀྱི་འགྲོ་བས་ཐུབ་པ་མེད། །འཕོང་ལ་
Page: 107 ༄༅། །མཁས་པའི་མཆན་བུ་ལྟར། །མ་བྱང་ན་ཡང་གཞན་དག་གི། སྟོབས་ཀྱི་ཤེས་པ་ཟིལ་གྱིས་གནོན། །འཕོང་གི་རྒྱུས་ལ་དང་པོ་ཉིད། །རྐང་སྟབས་གོམས་པར་བྱེད་པ་ལྟར། །ཀུན་མཁྱེན་གོ་འཕང་འདོད་པ་རྣམས། ། ལྷག་པའི་བསམ་པ་གོམས་པར་བྱེད། །སྒྱུ་མའི་མཁན་པོས་སྔགས་བསྒྲུབས་ཏེ། །སྒྱུ་མའི་རྣམ་འཕྲུལ་སྟོན་པ་ལྟར། །སེམས་སྐྱེད་སྨོན་ལམ་བསྒྲུབས་ནས་ནི། །རྒྱལ་བའི་ཆོ་འཕྲུལ་ཡོངས་སུ་སྟོན། །སྒྱུ་མའི་རིག་སྔགས་གཟུགས་ མེད་ཀྱང་། །མོས་པ་ཙམ་གྱིས་སྤྲུལ་བ་ལྟར། །ཀུན་མཁྱེན་སེམས་ནི་གཟུགས་མེད་ཀྱང་། །གོམས་པས་ཆོས་དབྱིངས་མངའ་དབང་བསྒྱུར། །བྱི་ལས་བལྟས་པས་བྱི་བའི་ཚོགས། །སྐྲག་ཞིང་འབྱེར་བ་དེ་བཞིན་དུ། །ལྷག་བསམ་ སྦྱོར་བ་ཆུང་ངུས་ཀྱང༌། །ལས་དང་ཉོན་མོངས་རབ་ཏུ་འབྱེར། །ཛམྦུའི་གསེར་གྱི་རྒྱན་གྱིས་ནི། །རྒྱན་གཞན་ཟིལ་གྱིས་གནོན་པ་ལྟར། །བྱང་ཆུབ་སེམས་ཀྱི་རྒྱན་བཟང་པོས། །ཉན་རང་ཡོན་ཏན་ཟིལ་གྱིས་གནོན། །ཁབ་ལོང་གིས་ནི་སྲ་ བ་ཡི། །ལྕགས་སྒྲོག་ཀུན་ནས་འཇིག་པ་ལྟར། །རིན་ཆེན་སེམས་ཀྱི་ལྟ་བ་དང༌། །མ་རིག་སྲེད་པའི་སྒྲོག་ཀུན་འཇིག །ཁབ་ལོང་ཁམས་ནི་གར་གནས་པར། །ཕལ་པའི་ལྕགས་ཀུན་མི་གནས་ལྟར། །ལས་ཉོན་རྣམས་དང་ཉན་ རང་གི། རྣམ་ཐར་ཀུན་ཀྱང་ཡོངས་སུ་འབྱེར། །གང་གིས་ཆུ་སྲིན་ཚིལ་ཟོས་པ། །ཆུར་གནས་ཀུན་གྱིས་མི་གནོད་ལྟར། །བྱང་སེམས་ཆ་གཅིག་ཟོས་པ་ཡང༌། །ལས་དང་ཉོན་མོངས་ཀྱིས་མི་འཇིགས། །ཐེག་པ་དམན་པའི་རྣམ་ གྲོལ་གྱི། །ཆུ་སྲིན་གྱིས་ཀྱང་གནོད་མི་ནུས། །རིན་ཆེན་སེམས་ཀྱི་བདུད་རྩི་སུས་འཐུངས་པ། །དེ་ནི་དམན་པའི་འཇིགས་པ་ཀུན་ལས་རྒྱལ། །རྐུ་བ་གྲུབ་ལྟར་བདུད་ཀུན་གྱིས་མི་མཐོང་། །ཆོས་ཀྱི་རྒྱལ་པོར་བསྟེན་དེ་འཇིགས་ཀུན་
Page: 108 བྲལ། །ལྷག་བསམ་ཆུས་བརླན་དམན་པའི་མེས་མི་འཇིགས། །སེམས་སྐྱེད་ཐུབ་དཀའི་དཔའ་བོ་ལ་བརྟེན་པ། །དེ་ནི་སྤྱོད་པ་ངན་པའི་དགྲས་མི་འཇིགས། །བརྒྱ་བྱིན་རྡོ་རྗེ་ཐོགས་པ་ཇི་བཞིན་དུ། །བདུད་དང་ཕས་ཀྱི་རྒོལ་བའི་ལྷ་ མིན་འཇོམས། བཅུད་ཚིམ་པར་འཐུངས་པའི་སྐྱེས་བུ་བཞིན། །དམན་པར་མི་འཆི་སྐྱོ་བའི་རྒ་ནད་མེད། །སྨན་སྦྱོང་ཀུན་ལ་ཆུ་སྔོན་འགྲོ་བ་ལྟར། །རྒྱལ་སྲས་སྤྱོད་ཀུན་སྔོན་དུ་སེམས་སྐྱེད་འགྲོ། མི་ཡི་བགྱི་ཀུན་སྲོག་དབང་སྔོན་ འགྲོ་ཉིད། །རྒྱལ་བའི་ཆོས་ཀུན་བྱང་ཆུབ་སེམས་ཀྱིས་སྒྲུབ། །སྲོག་དབང་འགགས་པ་འཚོ་བར་མི་ནུས་ལྟར། །རིན་ཆེན་སེམས་དང་བྲལ་ན་འཚང་མི་རྒྱ། །རྒྱ་མཚོ་དུག་གིས་གདུག་པར་མི་ནུས་ལྟར། །སྲིད་ཞིའི་བློ་ཡིས་རིན་ཆེན་ སེམས་མི་གོས། །སེམས་ཀྱི་དམ་པ་ཉིན་མོར་བྱེད་པའི་དཔལ། །ཟག་མེད་དམན་པའི་སར་འོད་ཀུན་ལས་རྒྱལ། །རྒྱལ་བུ་གཞོན་ནུས་རིགས་དང་དབང་གིས་ནི། །བློན་པོའི་མཆོག་ཀུན་ཟིལ་གྱིས་གནོན་པ་ལྟར། །དང་པོའི་ལས་ཅན་ རྒྱལ་བའི་སྲས་ཀྱིས་ཀྱང་། །ཉན་རང་སྙིང་རྗེའི་མཐུ་ཡིས་ཟིལ་གྱིས་གནོན། །བློན་པོ་ཆེས་ཆེར་གཙོ་བོས་ཀྱང༌། །རྒྱལ་བུ་གཞོན་ནུར་ཕྱག་བྱེད་ཅིང་། །དེས་ཀྱང་རིམ་གྲོའི་ཚུལ་བྱེད་ལྟར། །ཉན་རང་རྣམས་དང་རྒྱལ་སྲས་ལྟོས། །ཀུན་ མཁྱེན་སེམས་ཀྱི་མཚན་ལྡན་ཕྱིར། །རྒྱལ་སྲས་འཆིང་བ་ཀུན་ལྡན་ཡང༌། །ཉན་རང་མཆོག་དང་མཉམ་པ་མིན། །སེམས་སྐྱེད་རིན་ཆེན་ཡོངས་དག་ཡང་། །འགྲོ་མིག་རབ་རིབ་ཀྱི་ཁེབས་ལ། །ཤུན་པར་ལྡན་པ་ཉིད་དུ་སྣང༌། ། རྩི་སྨན་ཀུན་བསྡུས་སྦྱར་བའི་གཟུགས། །མཐོང་དམ་འགྲོགས་པས་ནད་འཇིལ་ལྟར། །ཐབས་ཤེས་དགེ་ཀུན་ལས་བསྒྲུབས་པའི། །རྒྱལ་སྲས་འགྲོ་བའི་སྨན་མཆོག་ཡིན། །བྱང་ཆུབ་སེམས་ཀྱི་གོས་བཟང་ངང་རིས་ཅན། །དེ་ནི་
Page: 109 ༄༅། །ཉོན་མོངས་འདམ་གྱིས་གོས་མི་འགྱུར། །སྨོན་པའི་འཁྲུལ་འཁོར་སྤྱི་བོར་བྱང་ཆུབ་ཀྱི། །སེམས་ཀྱི་གཟེར་ལྡན་དེ་ནི་རྒྱལ་སྲས་ཀྱི། །སྤྱོད་པ་ཀུན་ལས་མཐུ་ལྡན་སྨོན་ལམ་དང་། །ཡེ་ཤེས་ཡོངས་སུ་གྲུབ་ཕྱིར་འགྱེས་ མི་འགྱུར། །བྱང་ཆུབ་སེམས་ཀྱི་གཟེར་དང་མི་ལྡན་པའི། །བྱང་ཆུབ་ཡན་ལག་སྦྱར་བའི་འཁྲུལ་འཁོར་གྱིས། །དགོས་པ་ཡོངས་སུ་སྒྲུབ་པར་ནུས་མ་ཡིན། །གླང་པོའི་སྙིང་ཞེས་དཀར་མིན་ཨ་ག་རུས། །བདུགས་ན་རྒྱལ་པོའི་དཔུང་ཚོགས་ མཁའ་ལ་འགྲོ། དེ་བཞིན་བྱང་ཆུབ་སེམས་ཀྱིས་བདུགས་པ་ཡི། །དགེ་བ་ཐམས་ཅད་རྒྱལ་བའི་མཐར་ཐུག་འགྲོ། བྱང་ཆུབ་སེམས་ཀྱི་རྡོ་རྗེ་རིན་ཆེན་ནི། །དམན་པའི་རིན་ཆེན་ཁུངས་ནས་མི་འབྱུང་སྟེ། །སྙིང་རྗེ་ཆེན་པོ་རྡོ་རྗེའི་འབྱུང་ ཁུངས་སམ། །རྒྱལ་བར་དམིགས་པའི་གསེར་གྱི་ཁུངས་ནས་འབྱུང༌། །ཤིང་རྒྱལ་རྩ་བ་མི་དམིགས་ཀྱང་། །ཤིང་ཀུན་ལ་ནི་རྒྱས་པར་སྣང་། །ཀུན་མཁྱེན་སེམས་ཀྱི་དགེ་བའི་མཐའ། །མི་དམིགས་ན་ཡང་རྒྱལ་སྲས་ཀྱི། །ཡོན་ཏན་ འཇིག་རྟེན་ཀུན་ཁྱབ་མཐོང་། །ཇི་ལྟར་རྡོ་རྗེ་རིན་པོ་ཆེ། །ངན་པའི་སྣོད་ཀྱིས་བཟུང་མི་ནུས། །ཐམས་ཅད་འབིགས་བྱེད་བྲག་ཀུན་འཇིག །ཆག་ཡང་གསེར་རྒྱན་ཟིལ་གྱིས་གནོན། །དུམ་བུར་གྱུར་ཀྱང་ཕོངས་པ་སེལ། །ཆུང་ཡང་རིན་ ཆེན་གཞན་ཀུན་གཅོག །བསོད་ནམས་དམན་པའི་ལག་མི་ཕྱིན། །བརྟག་མི་མཁས་པས་ཤེས་མི་ནུས། །འཇུ་བར་མི་ནུས་དེའི་མཚོན་ཆ། །སྟོབས་ཆེན་ཕལ་གྱིས་འདེགས་མི་ནུས། །མི་ཚུགས་པ་མེད་ཁ་མི་འབབ། །རྡོ་རྗེ་ཉིད་ ཀྱི་གཞི་ལས་གཞན། །ས་ཕྱོགས་ཕལ་པས་བརྟེན་མི་ནུས། །རྡོ་རྗེའི་ས་གཞི་སྲ་བ་ཡིས། །ཆུ་འཛག་མི་འགྱུར་ས་མི་འཇིག །ཆུ་ཡིས་མི་འདྲུལ་མེས་མི་འཚིག །རྒྱལ་བ་བལྟམས་དང་བྱང་ཆུབ་གནས། །རྡོ་རྗེའི་གཞི་ལས་གཞན་
Page: 110 དག་གིས། །བརྟེན་པར་ནུས་པ་སྲིད་མ་ཡིན། །དཔེ་དེ་རྣམས་ཀྱིས་རིམ་བཞིན་དུ། །བྱང་ཆུབ་སེམས་ཀྱི་རྡོ་རྗེ་ཡང༌། །མོས་ཞན་ཚུལ་འཆལ་སེར་སྣ་ཅན། །སེམས་ཅན་ངན་པས་བཟུང་མི་ནུས། །ལྷག་བསམ་བརྟན་གང་དེ་ ཡི་སྣོད། །ཆོས་ཀུན་ཕུག་སྟེ་རྟོགས་པར་བྱེད། །ལྟ་བའི་བྲག་རི་ཀུན་ཀྱང་འཇིག །ཉམས་ཀྱང་ཉན་རང་ཟིལ་གྱིས་གནོན། །ནན་ཏན་མེད་ཀྱང་སྲིད་པ་ན། །ཕོངས་པ་རྣམ་པར་སེལ་བ་འཐོབ། །དམིགས་པ་ཤིན་ཏུ་ཆུང་ངུས་ཀྱང་། །མི་ ཤེས་པ་ཀུན་རྣམ་པར་གཅོག །དགེ་བ་ངན་ངོན་ལྡན་པ་ཡི། །ལྷ་མིས་འཐོབ་པར་མི་འགྱུར་རོ། །ཤེས་རབ་འཆལ་བས་ཡོན་ཏན་གྱི། །ཁྱད་པར་ཤེས་པར་ནུས་མ་ཡིན། །རྐྱེན་གཞན་གྱིས་ནི་ཞུ་མི་ནུས། །རྒྱལ་སྲས་སྟོབས་ ཆེན་ཤུགས་དྲག་ལས། །ཉན་རང་གིས་ཀྱང་ཐེག་མ་ཡིན། །ཡེ་ཤེས་གཞན་གྱིས་བརྡུགས་པ་དེར། །མི་ཐོགས་ཡོངས་སུ་བཟོད་པར་འགྱུར། །རྒྱལ་སྲས་སྨོན་ལམ་རྡོ་རྗེ་གང་། །སེམས་སྐྱེད་གཞི་ཡི་བཟུང་བར་ནུས། ། ཡོངས་སུ་བསྔོས་པའི་རྡོ་རྗེའི་གཞིར། །དགེ་བ་ཀུན་ནས་འཛག་པ་མེད། །ལྷག་བསམ་རྡོ་རྗེའི་གཞིས་བརྟེན་པའི། །སྨོན་ལམ་ས་ཆེན་དམའ་མི་འགྱུར། །ལས་ཉོན་ཆུ་ཡིས་མི་འདྲུལ་ཞིང༌། །སྡུག་བསྔལ་མེ་ཡིས་འཚིག་མ་ཡིན། ། བླ་མེད་བྱང་ཆུབ་སྤྱོད་པ་ཀུན། །ཐམས་ཅད་མཁྱེན་པའི་སེམས་སྐྱེད་ནི། །སྨོན་ལམ་ཡེ་ཤེས་ལྡན་པ་ཡི། །རྡོ་རྗེ་སྲ་བའི་ལྟེ་བ་ལས། །སེམས་གཞན་གྱིས་ནི་བཟུང་མི་ནུས། །ཐམས་ཅད་མཁྱེན་པ་ཉིད་དུ་མངོན་པར་སེམས་བསྐྱེད་པ། ། ཡོན་ཏན་དེ་དང་གཞན་ཀུན་གྱིས་ཀྱང་བརྒྱན་པ་སྟེ། །གང་གིས་བདུད་རྩི་འདྲ་བའི་སེམས་མཆོག་བསྐྱེད་པ་རྣམས། །ཡོན་ཏན་རྒྱ་ཆེན་དེ་ལྟ་ཐོབ་ཅིང་འཐོབ་པར་འགྱུར། །ཞེས་བདག་གིས་ནོར་བཟང་གི་རྟོགས་བརྗོད་དུ་བསྡུས་པ་ཡིན་ནོ། །
Page: 111 ༄༅། །བཞི་པ་འཇུག་པའི་ཕན་ཡོན་ཁྱད་པར་དུ་བཤད་པ་ལ། དབྱེ་བ། མཚན་ཉིད། སྨོན་པའི་ཕན་ཡོན། འཇུག་པའི་ཕན་ཡོན་རྒྱས་བཤད། དེས་ན་བྱང་ཆུབ་སེམས་དཔའ་སྡིག་པ་དང་བསོད་ནམས་ཀྱི་ཞིང་ ཁྱད་པར་ཅན་དུ་བསྟན་པའོ། །དང་པོ་དབྱེ་བ་ནི། བྱང་ཆུབ་སེམས་དེ་མདོར་བསྡུས་ན། །རྣམ་པ་གཉིས་སུ་ཤེས་བྱ་སྟེ། །བྱང་ཆུབ་སྨོན་པའི་སེམས་དང་ནི། །བྱང་ཆུབ་འཇུག་པ་ཉིད་ཡིན་ནོ། །ཞེས་གསུངས་ཏེ། བྱང་ཆུབ་སེམས་དེ་མདོར་ བསྡུ་ན་སྨོན་འཇུག་རྣམ་པ་གཉིས་སོ། །གཉིས་པ་མཚན་ཉིད་ནི། འགྲོ་བར་འདོད་དང་འགྲོ་བ་ཡི། །བྱེ་བྲག་ཇི་ལྟར་ཤེས་པ་ལྟར། །དེ་བཞིན་མཁས་པས་འདི་གཉིས་ཀྱི། །བྱེ་བྲག་རིམ་བཞིན་ཤེས་པར་བྱ། །ཞེས་གསུངས་ཏེ། དེ་ཇི་ ལྟ་བུ་ཞེ་ན། ཡུལ་གཞན་དུ་འགྲོ་བར་འདོད་ལ་འགྲོ་བའི་བྱ་བ་དང་བྲལ་བ་ལྟར་བྱང་ཆུབ་འཐོབ་པར་སྨོན་ལ་སྒྲུབ་པའི་བརྩོན་པ་དང་བྲལ་བ་དེ་ནི་སྨོན་པ་བྱང་ཆུབ་ཀྱི་སེམས་དང་། ནམ་སྦྱོར་བས་སྒྲུབ་པར་འདོད་པས་བྱང་ཆུབ་སེམས་དཔའི་ སྡོམ་པ་བླངས་པ་ཕྱིན་ཆད་ནི་འཇུག་པའི་བྱང་ཆུབ་ཀྱི་སེམས་སོ། །འགྲེལ་ཆེན་ལས། སེམས་གང་སྨོན་པ་ལས་སྐྱེས་པ་སྦྱིན་སོགས་ལ་འཇུག་པ་དང་བྲལ་བ་དེ་ནི་སྨོན་པ་བྱང་ཆུབ་ཀྱི་སེམས་ཏེ་འདི་ལྟར། འགྲོ་བ་ཐམས་ཅད་སྐྱབ་ པའི་ཕྱིར་སངས་རྒྱས་སུ་གྱུར་ཅིག་ཞེས་དང་པོ་ཁོ་ནར་སྨོན་པའི་སེམས་ལྟ་བུའོ། །འཇུག་པ་ཉིད་ལ་སེམས་པའམ་འཇུག་པ་ཉིད་ཀྱི་སེམས་ཏེ་སེམས་དེའི་རང་བཞིན་ཡིན་པའི་ཕྱིར་རོ། །སེམས་སྔ་མ་སྔོན་དུ་སོང་བ་ཉིད་གང་ནས་བཟུང་སྟེ་ སྡོམ་པ་ལེན་པ་སྔོན་དུ་འགྲོ་བས་ཚོགས་རྣམས་ལ་རབ་ཏུ་འཇུག་པ་དེ་ནི་འཇུག་པའི་བྱང་ཆུབ་ཀྱི་སེམས་སོ། །བསྟན་པའི་རིམ་པས་རྣམ་པ་གཉིས་ཡིན་ཏེ་དབྱེ་བ་ནི་དེ་དག་ཁོ་ནའོ་ཞེས་བྱ་བར་ཉིད་ཀྱི་སྒྲས་བསྟན་ཏོ། །ཀྱང་གི་སྒྲས་ཕན་
Page: 112 ཚུན་སྡུད་བ་ཡིན་ཏེ་གཉི་གའང་བྱང་ཆུབ་ཀྱི་སེམས་ཡིན་པར་བསྟན་ཏོ། །དེས་ནི་སྔ་མ་བྱང་ཆུབ་ཀྱི་སེམས་མ་ཡིན་ནོ་སྙམ་པའི་དོགས་པ་བསལ་བ་ཡིན་ཏེ་དཔའ་བར་འགྲོ་བའི་མདོ་ལས་བཙན་ཐབས་སུ་སེམས་བསྐྱེད་པ་སངས་རྒྱས་ཀྱི་རྒྱུར་ བཤད་པ་དང་། སྡོང་བརྒྱན་ལས། བྱང་ཆུབ་ཏུ་སེམས་སྐྱེད་པ་དཀོན་ནོ། །དེ་བས་ཀྱང་བྱང་ཆུབ་ཏུ་འཇུག་པ་དཀོན་ནོ། །ཞེས་སོ། །དེ་ཡང་སྐྱེས་བུ་གང་ཞིག་མངོན་པར་འདོད་པའི་ཡུལ་དུ་ཕྱིན་པར་བྱ་བའི་ཆེད་དུ་འགྲོ་བར་འདོད་པ་ནི་འགྲོ་ བར་བསམས་པ་སྟེ་འགྲོ་བ་ཉིད་ནི་མ་ཡིན་ནོ། །ཡང་གཞན་ནི་དེར་ཕྱིན་པར་བྱ་བའི་ཆེད་དུ་འཇུག་པ་སྟེ་འགྲོ་བ་ཉིད་དོ། །ཅི་ལྟར་ནི་ཇི་བཞིན་དུའོ། །དེ་སྒྲུབ་པ་དང་བྲལ་བ་ཡིན་དུ་ཆུག་མོད་ཀྱི་དེ་ལྟར་ནའང་སངས་རྒྱས་ཀྱི་རྒྱུ་ཉིད་དུ་རེ་ ཞིག་བཞག་སྟེ། དགེ་བ་གཞན་ལས་ཆེན་པོ་ཡིན་པར། རྟག་པར་ཡང་། འབྲས་བུ་ཆེ་འབྱིན། སོགས་ཀྱི་ཁྱད་པར་དུ་བྱས་པའི་ཕྱིར་ཏེ། རྡོ་རྗེ་ཕ་ལམ་ཆག་ཀྱང་གསེར་གྱི་རྒྱན་ཟིལ་གྱིས་གནོན་པའི་དཔེ་དང་སྦྱར་བའི་ཕྱིར་ དང་། རྒྱལ་པོ་ལ་གདམས་པ་ལས། ཁྱོད་སྤྱོད་ལམ་ཅི་བྱེད་ཀྱང་བྱང་ཆུབ་ལ་འདུན་པ་མ་བརྗེད་པ་དང་དགེ་བ་ཐམས་ཅད་ལ་ཡི་རང་ཞིང་། དེ་དག་དཀོན་མཆོག་ཐམས་ཅད་ལ་ཕུལ་ནས་དགེ་བ་སེམས་ཅན་ཐམས་ཅད་དང་ཐུན་མོང་དུ་བྱས་ནས་བྱང་ ཆུབ་ཏུ་སྔོས་ཤིག །དེ་ལྟ་ན་ཁྱོད་རྒྱལ་པོའི་བྱ་བ་ཡང་མི་ཉམས་ལ་བྱང་ཆུབ་ཀྱི་ལམ་ཡང་རྫོགས་པར་འགྱུར་རོ། །བྱང་ཆུབ་ཀྱི་སེམས་ཀྱི་རྣམ་སྨིན་ལས་ཁྱོད་ལྷ་མིའི་རྒྱལ་པོ་མཐའ་ཡས་པ་མྱོང་ཡང་བསོད་ནམས་དེའི་ཆ་ཙམ་ཡང་མི་རྫོ གས་སོ། །ཞེས་གསུངས་སོ། །དེས་ན་སྤྱོད་པ་དང་བྲལ་བའི་བྱང་ཆུབ་ཀྱི་སེམས་ལ་ཡང་བརྙས་པར་མི་བྱ་སྟེ་དེས་ཀྱང་འཁོར་བའི་བདེ་བ་མཐའ་ཡས་པ་སྐྱེད་པའི་ཕྱིར་རོ། །ཞེས་རྒྱ་ཆེར་བཤད་ཏོ། །འོན་ཀྱང་རྒྱལ་པོ་ལ་གདམས་པ་དེ་ནི་སྤྱོད་
Page: 113 ༄༅། །པ་དང་བྲལ་བ་མ་ཡིན་པར་མཐོང་སྟེ་སྤྱོད་པའི་གཙོ་བོ་སེམས་ཡིན་ལ། དེ་ལུས་ངག་ཅི་སྤྱོད་ཀྱང་སེམས་བྱང་ཆུབ་ཀྱི་སེམས་དང་། ཡི་རང་དང་། དགེ་བ་གཏོང་བ་དང་། དེ་གཞན་དོན་དུ་བསྔོ་བ་བཞི་དང་ལྡན་པའི་ཕྱིར། དེ་ལྟ་མོད་ཀྱི་ རྒྱལ་པོ་ཁྱོད་ནི་བྱ་བ་མང་བྱེད་པ་མང་བས་ཁྱོད་ཀྱིས་བྱང་ཆུབ་སེམས་དཔའི་བསླབ་པ་མཐའ་དག་ལ་སློབ་མི་ནུས་ཀྱིས་འདི་ཙམ་ཞིག་ལ་སློབ་པར་གྱིས་ཤིག་ཞེས་བསླབ་པ་བསྡུས་ཏེ་གསུངས་པ་པྲཛིའི་བུ་ལ་ཁྲིམས་ཉིས་བརྒྱ་ལྔ་བཅུ་རྩ་གསུམ་སྒོ་ གསུམ་གྱི་ཁ་ན་མ་ཐོ་བ་སྤོང་བར་བསྡུས་ཏེ་བསྟན་པ་ལྟ་བུ་ཡིན་ལ། དགྲ་བཅོམ་རང་རྒྱལ་སེམས་བྲལ་བྱང་ཆུབ་སེམས་དགའ་ན། །དཔའ་བོ་རྟག་ཏུ་མཉམ་བཞག་ཡིན་པར་ཤེས་པར་བྱ། །ཞེས་བྱང་ཆུབ་ཡིད་བྱེད་དང་མ་བྲལ་ན་ཡང་ བྱང་ཆུབ་སེམས་དཔའི་སྤྱོད་པ་དག་པ་ཡིན་པའི་ཕྱིར་རོ། །དེས་ན་སངས་རྒྱས་འཐོབ་པ་ལ་རེས་འགའ་སྨོན་པ་དྲག་ཏུ་སྐྱེས་ཤིང་འཐོབ་པར་དགའ་བ་ཡོད་ཀྱང་དེའི་སྤྱོད་པ་སྒོ་གསུམ་གྱིས་མི་སྒྲུབ་པར་གཉུག་མར་གནས་པས་འཚོ་བ་ནི་སྤྱོད་པ་དང་བྲལ་ བར་འཇོག་དགོས་སོ། །དཀའ་འགྲེལ་ཆུང་ངུ་ལས་ནི། འགྲོ་བའི་བྱ་བ་ལ་དམིགས་པའི་བློ་གཉིས་པོ་འགྲོ་བའི་བྱ་བ་ཉམས་སུ་མྱོང་མ་མྱོང་གཉིས་ཀར་དུ་ཡོད་ཀྱང་ངོ་བོ་ཐ་དད་པ་ལྟར་བློ་འདི་གཉིས་ཀྱང་སྐྱེ་འཕགས་གཉི་ག་ལ་ཡོད་ཀྱང་ངོ་བོ་ཐ་དད་ ར་བཤད་དོ། །གསུམ་པ་སྨོན་པའི་ཕན་ཡོན་ནི། བྱང་ཆུབ་སྨོན་པའི་སེམས་ལས་ནི། །འཁོར་ཚེ་འབྲས་བུ་ཆེ་འབྱུང་ཡང་། །ཇི་ལྟར་འཇུག་པའི་སེམས་བཞིན་དུ། །བསོད་ནམས་རྒྱུན་ཆགས་འབྱུང་བ་མིན། །ཞེས་གསུངས་ཏེ། སྨོན་འཇུག་ གི་ཕན་ཡོན་གྱི་ཁྱད་པར་ངོས་བཟུང་བའོ། །བཞི་པ་འཇུག་པའི་ཕན་ཡོན་རྒྱས་བཤད་ལ། ཕན་ཡོན་དངོས་བཤད། དེ་ལུང་གིས་སྒྲུབ་པ། སྨོན་པ་ཕན་ཡོན་དང་ལྡན་པའི་འཐད་པ་གསུམ། འཇུག་པ་ཕན་ཡོན་ཆེ་བའི་འཐད་པ་ལྔ་བཤད་པའོ། །དང་པོ། གང་ནས་
Page: 114 བཟུང་སྟེ་སེམས་ཅན་ཁམས། མཐའ་ཡས་རབ་ཏུ་སྒྲོལ་བའི་ཕྱིར། །མི་ལྡོག་པ་ཡི་སེམས་ཀྱིས་སུ། །སེམས་དེ་ཡང་དག་བླངས་གྱུར་པ། །དེ་ནས་བཟུང་སྟེ་གཉིད་ལོག་གམ། །བག་མེད་གྱུར་ཀྱང་བསོད་ནམས་ཤུགས། །རྒྱུན་མི་ འཆད་པར་དུ་མ་ཞིག །ནམ་མཁའ་མཉམ་པར་རབ་ཏུ་འབྱུང་། །ཞེས་གསུངས་ཏེ། འདི་ལ་དཀའ་འགྲེལ་ཆུང་ངུར། གང་ནས་བཟུང་སྟེ་ཞེས་བྱ་བ་སྟེ་ཆོས་ཀྱི་དབྱིངས་མཐོང་ནས་ཕ་རོལ་ཏུ་ཕྱིན་པའི་སྤྱོད་པ་མཚན་ཉིད་པ་ཐོབ་པའི་འོག་ཏུ་ནི་ཆུ་ བོའི་རྒྱུན་བཞིན་དུ་གནས་སྐབས་ཐམས་ཅད་དུ་བསོད་ནམས་རྒྱུན་མི་འཆད་པ་ཡིན་ནོ། །ཞེས་དང་། ཡང་བྱང་ཆུབ་སེམས་དཔའི་སྡོམ་པ་མ་བླངས་པའི་སྨོན་ལམ་ནི་སྨོན་པ་ཡིན་ལ་བླངས་པའི་ནི་འཇུག་པ་ཡིན་ནོ། །ཞེས་བྱང་སའི་ཚུལ་ཁྲིམས་ ལེའུའི་འགྲེལ་པ་མཁན་རྒྱ་མཚོའི་སྤྲིན་གྱིས་བཤད་པ་ནི། བཏགས་པ་ལ་དགོངས་པའམ་ཡང་ན་འཁྲུལ་བར་ངེས་སོ་ཞེས། སོ་སྐྱེ་ལ་འཇུག་སེམས་མེད་པ་ལྟར་བཤད་ཀྱང་བྱང་སེམས་རྒྱལ་བློན་གྱི་རྩ་ལྟུངདང་ཕམ་པ་དང་འདྲ་བའི་ཆོས་སོགས་འཇུག་ སེམས་ཀྱི་སྤང་བྱ་འདི་རྣམས་ནི་ངེས་པར་སོ་སོ་སྐྱེ་བོ་ལ་འབྱུང་ཉེ་བ་ཁོ་ན་ཡིན་པའི་ཕྱིར་དང་། གཞན་དུ་ན་འཇུག་པ་སེམས་སྐྱེད་དང་དོན་དམ་པའི་སེམས་སྐྱེད་གཅིག་པར་འགྱུར་རོ། །དེས་ན་སོ་སོ་སྐྱེ་བོའི་སྐབས་ཁོ་ན་ལ་སྨོན་འཇུག་གཙོ་བོར་ བཞག་པ་ཡིན་ལ། དུས་གང་ནས་བཟུང་སྟེ་སེམས་ཅན་ཐམས་ཅད་སྒྲོལ་བའི་ཆེད་དུ་དུས་གསུམ་གྱི་བྱང་ཆུབ་སེམས་དཔའ་ཐམས་ཅད་དང་མཚུངས་པའི་བྱང་ཆུབ་སེམས་དཔའི་བསླབ་བྱ་ལ་སློབ་པར་ཁས་བླངས་ཤིང་སྒྲུབ་འདོད་ཀྱི་བློ་བརྟན་པོར་ སྐྱེས་པ་ནི་འཇུག་སེམས་སྐྱེས་པ་ཡིན་ལ། དེ་ཕྱིན་ཆད་གཉིད་དང་བརྒྱལ་བ་དང་ར་རོ་བ་སོགས་བག་མེད་པའི་དབང་དུ་གྱུར་ཏེ་གསལ་པོར་མི་དྲན་པའི་གནས་སྐབས་ན་ཡང་བསོད་ནམས་ནམ་མཁའ་དང་མཉམ་པ་རྒྱུན་མི་འཆད་པར་འབྱུང་ན་དེ་
Page: 115 ༄༅། །ལས་གཞན་པ་དགེ་བའི་འདུན་པ་དང་བཅས་པའི་དུས་ན་ལྟ་ཅི་སྨོས་པའོ། །གཉིས་པ་དེ་ལུང་གིས་སྒྲུབ་པ་ནི། འདི་ནི་འཐད་པ་དང་བཅས་པར། །ལག་བཟང་གིས་ནི་ཞུས་པ་ལས། །དམན་མོས་སེམས་ཅན་དོན་གྱི་ཕྱིར། ། དེ་བཞིན་གཤེགས་པ་ཉིད་ཀྱིས་གསུངས། །ཞེས་གསུངས་ཏེ། དཀོན་མཆོག་བརྩེགས་པའི་འདུས་པ་ཉེར་དྲུག་པ་ལག་བཟང་ངམ་དཔུང་བཟང་གིས་ཞུས་པའི་མདོ་ལས། མཛའ་བོའི་བུ་མོའི་གཏམ་གྱི་སྒོ་ནས་འོག་ནས་འབྱུང་བའི་ཚིགས་ སུ་བཅད་པའི་དོན་འདི་དག་དམན་པ་ལ་མོས་པའི་གཉེན་པོར་བཀའ་བསྩལ་བའོ། །ལེགས་བཤད་བསྡུས་པར་ནི། དེ་བཞིན་གཤེགས་པ་ཉིད་ཀྱིས་གསུངས། །གང་གསུངས་ན། ལག་བཟང་། བྱང་ཆུབ་སེམས་དཔའ་རྣམས་ ཀྱིས་བྱང་ཆུབ་ཏུ་སེམས་བསྐྱེད་པ་དང་། བྱང་ཆུབ་ཀྱི་སེམས་རྗེས་སུ་དྲན་པ་དང༌། བྱང་ཆུབ་ཀྱི་སེམས་སྒོམ་པ་དང་། བྱང་ཆུབ་ཏུ་སྨོན་པ་དེ་ནི་གཏོང་བ་ཆེན་པོ་གྲངས་མེད་ཅིང་དཔག་ཏུ་མེད་པ་ཡིན་ནོ། །དེ་ཅིའི་ཕྱིར་ཞེ་ན། སེམས་ཅན་ཐམས་ཅད་ལ་ཆོས་ ཀྱི་ཆར་སྦྱིན་པར་འདོད་པ་དེ་ནི་གཏོང་བ་ཐམས་ཅད་ཀྱི་ནང་ན་མཆོག་ཡིན་པའི་ཕྱིར་རོ། །ཞེས་གསུངས་པ་འདི་ཁུངས་ཡིན་ནོ། །ཞེས་ཉང་བྲན་དང༌། གཙང་ནག་པ་སོགས་འཆད་པར་བཤད་དོ། །གསུམ་པ་སྨོན་པ་ཕན་ཡོན་དང་ལྡན་པའི་འཐད་པ་གསུམ་ལ། དམིགས་པ་རྒྱ་ཆེ་བ་དང་། དཀོན་པ་དང་། ཕན་འདོགས་ཆེ་བའི་རྟགས་ཀྱིས་ཕན་ཡོན་ཆེ་བར་སྒྲུབ་པ་ལས། དང་པོ་དམིགས་པ་རྒྱ་ཆེ་བ་ནི། སེམས་ཅན་རྣམས་ཀྱི་ཀླད་ནད་ཙམ། །བསལ་ལོ་སྙམ་དུ་བསམས་ན་ཡང་། །ཕན་འདོགས་བསམ་པ་དང་ལྡན་ཏེ། །བསོད་ནམས་དཔག་མེད་ལྡན་ འགྱུར་ན། །སེམས་ཅན་རེ་རེའི་མི་བདེ་བ། །དཔག་ཏུ་མེད་པ་བསལ་འདོད་ཅིང་། །རེ་རེའང་ཡོན་ཏན་དཔག་མེད་དུ། །སྒྲུབ་པར་འདོད་པ་སྨོས་ཅི་དགོས། །ཞེས་གསུངས་ཏེ། མཛའ་བོའི་བུ་མོས་མའི་མགོ་ལ་འགོངས་པའི་སེམས་
Page: 116 ཅན་སུ་ཡང་འདིར་མ་འོང་ཞིག་དེ་ཐམས་ཅད་ཀྱི་སྡུག་བསྔལ་བདག་གིས་ནོད་དོ། །ཞེས་སྡུག་བསྔལ་ཉི་ཚེ་བ་ཞིག་སེལ་བར་བསམས་པ་ལ་བསོད་ནམས་དཔག་ཏུ་མེད་པ་ཐོབ་ན། སེམས་ཅན་ཐམས་ཅད་ཀྱི་སྡུག་བསྔལ་ཐམས་ཅད་གཏན་དུ་བསལ་ནས་ བདེ་བ་ཐམས་ཅད་སྦྱིན་པར་འདོད་པ་ལ་ལྟ་ཅི་སྨོས་སོ། །གཉིས་པ་དཀོན་པ་ནི། ཕ་འམ་ཡང་ན་མ་ཡང་རུང་། སུ་ལ་འདི་འདྲའི་ཕན་སེམས་ཡོད། །ལྷ་དང་དྲང་སྲོང་རྣམས་ཀྱང་རུང་། །ཚངས་པ་ལ་ཡང་འདི་ཡོད་དམ། །སེམས་ཅན་དེ་དག་ ཉིད་ལ་སྔོན། །རང་གི་དོན་དུའང་འདི་འདྲའི་སེམས། །རྨི་ལམ་དུ་ཡང་མ་རྨིས་ན། །གཞན་གྱི་དོན་དུ་ག་ལ་སྐྱེ། །གཞན་དག་རང་གི་དོན་དུ་ཡང་། །མི་འབྱུང་སེམས་ཅན་དོན་སེམས་གང་། །སེམས་ཅན་རིན་ཆེན་ཁྱད་པར་འདི། ། སྔ་ན་མེད་པའི་རྨད་ཅིག་འཁྲུངས། །ཞེས་གསུངས་སོ། །གསུམ་པ་ཕན་འདོགས་ཆེ་བའི་རྟགས་ཀྱིས་ཕན་ཡོན་ཆེ་བར་སྒྲུབ་པ་ནི། འགྲོ་བ་ཀུན་གྱི་དགའ་བའི་རྒྱུ། །སེམས་ཅན་སྡུག་བསྔལ་རྩིར་གྱུར་པ། །རིན་ཆེན་སེམས་ཀྱི་བསོད་ནམས་གང་། །དེ་ལ་ཇི་ལྟར་གཞལ་གྱིས་ལང༌། །ཞེས་ གསུངས་པའོ། །བཞི་པ་འཇུག་པ་ཕན་ཡོན་ཆེ་བའི་འཐད་པ་ལྔ་བཤད་པ། གསུམ་པ་ལ། སྦྱོར་བས་ཟིན་པ། བྱེད་པ་མང་བ། ལན་ལ་མི་ལྟོས་པ། སྒྲུབ་པ་རྒྱ་ཆེ་བའི་རྟགས་ཀྱི་རེ་རེ་ཞིང་ཕན་ཡོན་ཆེ་བ་དང་། དེའི་ཕྱིར་བྱང་ཆུབ་སེམས་དཔའ་རྨད་དུ་བྱུང་བར་བསྟན་པའོ། །དང་པོ་ནི། ཕན་པར་ བསམས་པ་ཙམ་གྱིས་ཀྱང་། སངས་རྒྱས་མཆོད་ལས་ཁྱད་འཕགས་ན། །སེམས་ཅན་མ་ལུས་ཐམས་ཅད་ཀྱི། །བདེ་དོན་བརྩོན་པ་སྨོས་ཅི་དགོས། །ཞེས་གསུངས་ཏེ། ཚད་མེད་པ་སྒོམ་པ་ཙམ་ཡང་བསོད་ནམས་ཆེ་ན་སེམས་ ཅན་གྱི་དོན་སྦྱོར་བས་སྒྲུབ་པ་སྨོས་ཅི་དགོས་ཏེ། དཔའས་བྱིན་གྱི་མདོར། སངས་རྒྱས་ཞིང་ནི་མི་གང་གིས། །རིན་ཆེན་བདུན་གྱིས་བཀང་བྱས་ཏེ། །འཇིག་རྟེན་མགོན་ལ་ཕུལ་བ་བས། གང་གིས་ཐལ་མོ་སྦྱར་བྱས་ཏེ། །བྱང་ཆུབ་ཏུ་ནི་སེམས་
Page: 117 ༄༅། །བསྐྱེད་ན། གང་ལ་མཐའ་ནི་མ་མཆིས་པའི། །མཆོད་པ་འདི་ནི་ཁྱད་པར་འཕགས། །ཞེས་སོ། གཉིས་པ་བྱེད་པ་མང་བ་་ནི། སྡུག་བསྔལ་འདོར་འདོད་སེམས་ཡོད་ཀྱང་། །སྡུག་བསྔལ་ཉིད་ལ་མངོན་པར་རྒྱུགབདེ་བ་འདོད་ཀྱང་གཏི་ མུག་པས། རང་གི་བདེ་བ་དགྲ་ལྟར་འཇོམས། །གང་ཞིག་བདེ་བས་ཕོངས་བ་དང་། སྡུག་བསྔལ་མང་ལྡན་དེ་དག་ལ། །བདེ་བ་ཀུན་གྱིས་ཚིམ་པ་དང་། །སྡུག་བསྔལ་ཐམས་ཅད་གཅོད་བྱེད་ཅིང་། །གཏི་མུག་ཀྱང་ནི་སེལ་བྱེད་པ། ། དེ་དང་དགེ་མཚུངས་ག་ལ་ཡོད། །དེ་འདྲའི་བཤེས་ཀྱང་ག་ལ་ཡོད། །བསོད་ནམས་དེ་འདྲའང་ག་ལ་ཡོད། །ཅེས་གསུངས་ཏེ། ཕན་པ་དང་མི་ཕན་པ་འཐོབ་སྤོང་ལ་སེམས་ཅན་རང་རང་མཁས་མོད་གཞན་གྱིས་བྱར་ཅི་ཡོད་ཅེ་ན། སེམས་ ཅན་དེ་རྣམས་ཀྱིས་བདེ་བ་དང་སྡུག་བསྔལ་ངོས་མ་ཟིན་ཞིང་། སྡུག་བསྔལ་གྱི་རྒྱུ་ལ་བདེ་བར་འཁྲུལ་བ་དབུལ་བ་སྤོང་བའི་ཕྱིར་ནོར་རྐུ་བ་སོགས་ཕྱིན་ཅི་ལོག་ཏུ་སྤྱོད་པས་སྡུག་བསྔལ་འབའ་ཞིག་འགྲུབ་པ་དེ་རྣམས་ལ་བདེ་བ་སྟེར་བ་དང་། སྡུག་བསྔལ་འཇོམས་ པ་དང་གཏི་མུག་གི་བློ་སེལ་བར་ནུས་ན་དེ་བས་ལྷག་པའི་དོན་དང་དགེ་བ་གཞན་ག་ལ་ཡོད་དེ་ཕན་འདོགས་པའི་བཤེས་དེ་འདྲ་བ་ནི་གཞན་ཡོད་པ་མིན་ནོ། །གསུམ་པ་ལན་ལ་མི་ལྟོས་པ་ནི། ཕན་བཏགས་ལན་ལྡོན་གང་ཡིན་པ། དེ་ཡང་རེ་ཞིག་བསྔགས་ འོས་ན། མ་བཅོལ་ལེགས་པར་བྱེད་པ་ཡི། །བྱང་ཆུབ་སེམས་དཔའ་སྨོས་ཅི་དགོས། །ཞེས་གསུངས་སོ། །བཞི་པ་སྒྲུབ་པ་རྒྱ་ཆེ་བའི་རྟགས་ཀྱི་རེ་རེ་ཞིང་ཕན་ཡོན་ཆེ་བ་ནི། འགྲོ་བ་ཉུང་ཟད་ནར་མའི་ཟས་སྦྱོར་དང་། །སྐད་ཅིག་ཟས་ཙམ་སྦྱིན་པར་བྱེད་པ་དང་། །བརྙས་བཅས་ ཉིན་ཕྱེད་འགྲངས་པར་བྱེད་པ་ཡང་། དགེ་བ་བྱེད་པ་ཡིན་ཞེས་སྐྱེ་བོས་བཀུར། །ཞེས་གསུངས་ཏེ། མི་རྣམས་ཞིང་དམན་པ་འགྲོ་བ་ཉུང་ཟད་ལ་དང་། དུས་དམན་པ་ལན་གཅིག་གམ་འགའ་ཟུང་ཙམ་དང་། དངོས་པོ་དམན་པ་ཟས་སྐོམ་
Page: 118 ཙམ་དང་། སྦྱོར་བ་དམན་པ་བརྙས་པ་དང་བཅས་ཤིང་མ་གུས་ལ་ང་རྒྱལ་བ་དང་། ཕན་འདོགས་དམན་པ་ཉིན་ཕྱེད་ཙམ་འགྲངས་པ་སྟེ་དེ་ཙམ་བྱིན་པ་ལ་ཡང་དགེ་བ་བྱེད་པར་བཀུར་ན་བྱང་ཆུབ་སེམས་དཔའ་ནི་དེ་ལྟ་བུ་མ་ཡིན་ནོ། །ལྔ་པ་ནི། སེམས་ཅན་གྲངས་མཐའ་ཡས་ལ་ཡུན་རིང་དུ། བདེ་བར་གཤེགས་ཀྱི་བདེ་བ་བླ་ན་མེད། །ཡིད་ལ་བསམས་པ་མཐའ་དག་རྫོགས་བྱེད་པ། །རྟག་ཏུ་སྦྱིན་པ་ལྟ་ཞིག་སྨོས་ཅི་དགོས། །ཞེས་གསུངས་ཏེ། དེ་དག་ལྔ་ལས་ཟློག་ པའི་དགེ་བ་བྱེད་པ་དེ་ནི་བསམ་གྱིས་མི་ཁྱབ་པ་སྟེ། སྲེད་མེད་ཀྱི་བུས་ཞུས་པ་ལས། ཡོད་དེ་ཡོད་ན་ལག་པ་འདོད་པ་ལ་ལག་པ་སྦྱིན་པར་བྱེད་དོ། །ཞེས་སོགས་གསུངས་སོ། །ལྔ་པ་ནི། གང་ཞིག་དེ་འདྲའི་རྒྱལ་སྲས་སྦྱིན་བདག་ལ། །གལ་སྟེ་ ངན་སེམས་སྐྱེད་པར་བྱེད་ན་དེ། །ངན་སེམས་བསྐྱེད་པའི་གྲངས་བཞིན་བསྐལ་པར་ནི། །དམྱལ་བར་གནས་པར་འགྱུར་ཞེས་ཐུབ་པས་གསུངས། །འོན་ཏེ་གང་ཞིག་ཡིད་རབ་དང་བྱེད་ན། །དེ་ཡི་འབྲས་བུ་དེ་བས་ལྷག་པར་འཕེལ། ། རྒྱལ་སྲས་རྣམས་ལ་དོ་གལ་ཆེན་པོས་ཀྱང་། །སྡིག་པ་མི་འབྱུང་དགེ་བ་ངང་གིས་འཕེལ། །གང་ལ་སེམས་ཀྱི་དམ་པ་རིན་ཆེན་དེ། །སྐྱེས་པ་དེ་ཡི་སྐུ་ལ་ཕྱག་འཚལ་ཞིང་། །གང་ལ་གནོད་པ་བྱས་ཀྱང་བདེར་འབྲེལ་བ། །བདེ་བའི་ འབྱུང་གནས་དེ་ལ་སྐྱབས་སུ་མཆིས། །ཞེས་གསུངས་ཏེ། དད་པའི་སྟོབས་སྐྱེས་པ་ལ་འཇུག་པ་ཕྱག་རྒྱའི་མདོ་ལས། འཇམ་དཔལ་རིགས་ཀྱི་བུའམ་རིགས་ཀྱི་བུ་མོ་གང་ལ་ལས་གངྒཱའི་ཀླུང་གི་བྱེ་མ་སྙེད་ཀྱི་མཆོད་རྟེན་བཤིག་པའམ་ བསྲེགས་ལ་རིགས་ཀྱི་བུའམ་རིགས་ཀྱི་བུ་མོ་གཞན་གང་ཞིག་གིས་ཐེག་པ་ཆེན་པོ་ལ་མོས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ལ་གནོད་སེམས་དང་། ཐ་བ་དང་། ཁོང་ཁྲོ་བའི་སེམས་བསྐྱེད་ཅིང་སྤྱོས་ཏེ་བརྒྱད་ན། འདི་ནི་དེ་བས་ཆེས་གྲངས་
Page: 119 ༄༅། །མེད་པའི་སྡིག་པ་སྐྱེ་བར་འགྱུར་རོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་ལས་འཁྲུངས་པ་ནི་སངས་རྒྱས་སོ། །སངས་རྒྱས་ལས་བྱུང་བ་ནི། མཆོད་རྟེན་དང་བདེ་བའི་ཡོ་བྱད་ཐམས་ཅད་དང་ལྷའི་རིས་ཐམས་ཅད་དོ་ བྱང་ཆུབ་སེམས་དཔའ་ལ་དམ་པ་མ་ཡིན་པར་བྱས་ན་སངས་རྒྱས་ཐམས་ཅད་ལ་དམ་པ་མ་ཡིན་པར་བྱས་པར་འགྱུར་རོ། །བྱང་ཆུབ་སེམས་དཔའ་ལ་དམ་པར་བྱས་ན་སངས་རྒྱས་ཐམས་ཅད་ལ་དམ་པར་བྱས་པར་འགྱུར་རོ། །ཞེས་དང་། རབ་ ཞི་རྣམ་ངེས་ཀྱི་མདོར། འཇམ་དཔལ་བྱང་ཆུབ་སེམས་དཔའས་བྱང་ཆུབ་སེམས་དཔའ་ལ་ཁོང་ཁྲོ་བའི་སེམས་བསྐྱེད་ཅིང་བརྙས་པའི་སེམས་བསྐྱེད་པ་དེ་སྲིད་དུ་དེས་བདག་བསྐལ་པར་དམྱལ་བར་གནས་པར་བྱ་དགོས་སོ་ཞེས་གོ་ཆ་བགོ་བར་བྱའོ། །ཞེས་སོ། ། གལ་ཏེ་དེ་བཞིན་གཤེགས་པ་ལ་ངན་སེམས་ཀྱི་ཁྲག་ཕྱུང་བས་ཀྱང་དེ་ལྟར་སྨིན་པར་མ་བཤད་ལ། འཇིག་རྟེན་གསུམ་ན་དེ་བཞིན་གཤེགས་པ་ལས་ལྷག་པ་མེད་ན་འདི་ཇི་ལྟར་རིགས་ཅེ་ན། དེ་བཞིན་གཤེགས་པ་ལ་སུས་ཀྱང་ངན་སེམས་སྐྱེད་པར་ མི་ནུས་ཏེ་བསྐལ་པ་གྲངས་མེད་པར་སེམས་ཅན་ཐམས་ཅད་ལ་བྱམས་པའི་ཐུགས་བསྒོམས་པའི་ཕྱིར་འདིའི་སྐུ་ལ་མཚོན་གྱིས་མི་ཚུགས་སོ། །ཞེས་བསྟན་པའི་ཕྱིར་དང་། འདིར་ལས་ཀྱི་རྣམ་སྨིན་ཀྱང་དངོས་པོ་ལ་མ་བསྟན་སྟེ་སངས་རྒྱས་རྣམས་ནི་ལས་ ཀྱི་རྣམ་སྨིན་དང་བྲལ་བའི་ཕྱིར་རོ། དེས་ན་གདུལ་བྱ་འདུལ་བའི་ཕྱིར་སྐབས་ཕྱེ་སྟེ་དྲང་དོན་དུ་བསྟན་གྱི་ངེས་པའི་དོན་མ་ཡིན་ནོ། །བྱང་ཆུབ་སེམས་དཔའ་ལ་གནོད་པ་བྱས་བས་ནི་སངས་རྒྱས་ཉིད་རྩ་བ་དང་བཅས་པ་བཅོམ་ཞིང་ཉེ་བར་བཅོམ་པ་ ཡིན་ཏེ། ལྷ་དང་བཅས་པའི་འཇིག་རྟེན་གྱི་དོན་ཉེ་བར་བཅོམ་པར་འགྱུར་བའི་ཕྱིར་རོ། །འོན་ཀྱང་བྱང་ཆུབ་སེམས་དཔའ་ལ་དད་ན་བསོད་ནམས་དེ་བས་ཀྱང་ཆེས་ལྷག་པར་སྐྱེ་སྟེ། འཇམ་དཔལ་གལ་ཏེ་ཡོངས་སུ་བརྟག་པ་ཉེ་བར་བཟུང་སྟེ་ཕྱོགས་བཅུའི་
Page: 120 འཇིག་རྟེན་གྱི་ཁམས་ཀྱི་སེམས་ཅན་ཐམས་ཅད་ཀྱི་མིག་བཏོན་པར་གྱུར་ལ། ཡང་ཡོངས་སུ་བརྟག་པ་ཉེ་བར་བཟུང་སྟེ། གལ་ཏེ་རིགས་ཀྱི་བུའམ་རིགས་ཀྱི་བུ་མོ་བྱམས་པའི་སེམས་ལ་གནས་པ་འགའ་ཞིག་གིས་དེ་དག་ཐམས་ཅད་ཀྱི་མིག་སྐྱེད་པར་བྱེད་པ་དེ་ བས་འཇམ་དཔལ་རིགས་ཀྱི་བུའམ་རིགས་ཀྱི་བུ་མོ་གང་གཞན་ཞིག་གིས་ཐེག་པ་ཆེན་པོ་ལ་མོས་པའི་བྱང་ཆུབ་སེམས་དཔའ་ལ་སེམས་དང་བས་ལྟ་ན་འདི་ནི་དེ་བས་ཆེས་བསོད་ནམས་ལྷག་པར་སྐྱེའོ། །ཞེས་སོ། །དོ་གལ་ཆེན་པོས་ཞེས་སོགས། འཆད་ལུགས་གཉིས་ཏེ། འགྲེལ་ཆེན་དང་། བི་བྷུ་ཏིས་ནི། བྱང་ཆུབ་སེམས་དཔའི་སྒོ་གསུམ་གྱི་སྤྱོད་པ་མཐའ་དག་དང་བས་བསྐྱེད་པའི་ཕྱིར་དང་། བྱང་ཆུབ་ཀྱི་སེམས་ཀྱི་མཐུ་ལས་ཡིན་པའི་ཕྱིར། བྱང་ཆུབ་སེམས་དཔའ་རྣམས་ལ་འགའ་ཞིག་གིས་གནོད་ པ་བྱེད་པའི་སེམས་སྐྱེ་བར་མི་འགྱུར་ཏེ། འཇམ་དཔལ་གྱི་རྣམ་ཐར་ལས། རིན་པོ་ཆེའི་རྒྱལ་པོ་ཡིད་བཞིན་གྱི་ནོར་བུ་ཅོད་པན་ལ་ཐོགས་པའི་ཀླུའི་རྒྱལ་པོ་རྣམས་ལ་ཕ་རོལ་གྱི་འཇིགས་པ་དང་གནོད་པ་མི་འབྱུང་ངོ་། །དེ་བཞིན་དུ་བྱང་ཆུབ་ཀྱི་སེམས་ དང་སྙིང་རྗེ་ཆེན་པོའི་རྒྱལ་པོའི་ཡིད་བཞིན་གྱི་ནོར་བུ་ཅོད་པན་ལ་བཅིངས་པའི་བྱང་ཆུབ་སེམས་དཔའ་ལ་ངན་སོང་དང་ངན་འགྲོ་ཕ་རོལ་གྱི་འཇིགས་པ་དང་གནོད་པ་མི་འབྱུང་ངོ༌། །ཞེས་གསུངས་པ་ཡིན་ན་དེའི་ཕྱིར་དེ་རྣམས་ལ་དོན་མ་ཡིན་པ་འཕེལ་བའི་ འབྲས་བུ་རྩུབ་པ་ཅིའི་ཕྱིར་འབད་ཅིང་རྩོལ་བར་བྱེད། དེའི་ཕྱིར་དེ་རྣམས་ལ་དགའ་བ་དང་དང་བ་དང་མཆོག་ཏུ་དགའ་བ་ངང་གིས་སྐྱེའོ་ཞེས་འཆད་ཀྱང་། ལུང་དེ་འབྱོར་བར་མ་མཐོང་སྟེ་ངན་སོང་དང་ངན་འགྲོའི་འཇིགས་པ་མི་འབྱུང་ཞེས་མི་ཁོམ་པར་མི་ སྐྱེ་བའི་དོན་ཅན་དུ་སྣང་ལ། འདིར་ནི་བྱང་ཆུབ་སེམས་དཔའ་ལ་གཞན་གྱིས་གནོད་པ་བྱེད་མི་ནུས་པའི་ལུང་འདྲེན་རིགས་པའི་ཕྱིར་རོ། །འོན་ཀྱང་བྱང་ཆུབ་སེམས་དཔའ་བྱམས་པའི་རང་བཞིན་ཅན་ཉིད་ཀྱིས་མཐོང་བས་ཀྱང་ཞེ་སྡང་ཞི་ཞིང་
Page: 121 ༄༅། །དགའ་བ་སྐྱེ་བ་ཤས་ཆེ་བས་བྱང་ཆུབ་སེམས་དཔའ་ལ་གནོད་པའི་བློ་སྐྱེ་བ་ཉུང་བར་བཤད་ན་རུང་ངོ་། །འོ་ན་སྟོན་པ་བྱང་ཆུབ་སེམས་དཔའི་དུས་ལྷས་བྱིན་གྱིས་རྟག་ཏུ་གནོད་པ་བྱེད་པ་སོགས་ཅི་ཞིག་ཞེ་ན། དེ་ནི་ སྔོན་བྲམ་ཟེ་རྒྱ་མཚོའི་རྡུལ་གྱི་ཚེ་འཚོ་པ་བ་ཞིག་གིས་སྤྱོད་པའི་གྲོགས་བགྱིད་པར་སྨོན་ལམ་བཏབ་སྟེ་ཁྱོད་སྦྱིན་པ་ལ་སྤྱོད་པ་ན། བདག་གིས་མགོ་དང་རྒྱལ་སྲིད་སོགས་གཞན་གྱིས་སློང་མི་ནུས་པ་སློང་ཞིང་སྟེར་ལ། དེས་ཁྱོད་ཀྱི་བསམ་པ་རྫོགས་པར་གྱུར་ ཅིག་སོགས་ནས་ཁྱོད་བཟོད་པ་ལ་སྤྱོད་པ་ན་བདག་གིས་གཞི་མེད་པར་ཁྱོད་ཀྱི་ཡན་ལག་དང་ཉིང་ལག་དང་སྲོག་གི་བར་དུ་གཅོད་ཅིང་། དེས་ཁྱོད་འཁྲུག་པ་མེད་པར་བཟོད་པ་ཡོངས་སུ་དག་སྟེ་ཕ་རོལ་ཏུ་ཕྱིན་པ་མྱུར་དུ་རྫོགས་པར་གྱུར་ཅིག །ཞེས་དང་། འཁོར་གཞན་མང་པོས་ཀྱང་དེ་དང་མཐུན་པར་སྨོན་ལམ་བཏབ་པའི་དབང་གིས་ཡིན་གྱི། གཞན་དུ་ན་བྱང་ཆུབ་སེམས་དཔའ་ལ་སྡང་བས་བལྟས་པའི་རྣམ་སྨིན་མཐའ་ཡས་པས་ཚེ་རབས་ཐམས་ཅད་དུ་རྗེས་སུ་འབྲང་བར་ག་ལ་འགྱུར། གཞན་ ཡང་གླང་པོ་ཆེའི་ཕྲ་བ་ནི་གླང་པོ་ཆེ་ཉིད་ཀྱིས་བཟོད་ཀྱི་བོང་བུས་མི་བཟོད་དོ། །དེ་བཞིན་དུ་བྱང་ཆུབ་སེམས་དཔའ་ལ་བྱང་ཆུབ་སེམས་དཔའ་ཉིད་ཀྱིས་གནོད་པར་བྱེད་ཀྱི་གཞན་གྱིས་གནོད་པ་བྱེད་མི་ནུས་སོ། །ཞེས་གསུངས་པའི་ཕྱིར། འོན་ཀྱང་བྱང་ཆུབ་ སེམས་དཔའ་ཉམས་པར་ཡང་འདིས་བྱེད་དེ། དཔེར་ན། རྡོ་རྗེ་ཕ་ལམ་ནི་རྡོ་རྗེ་ཕ་ལམ་མ་ཡིན་པས་གཅོག་པར་མི་ནུས་སོ། །དེ་བཞིན་དུ་བྱང་ཆུབ་སེམས་དཔའ་ཡང་བྱང་ཆུབ་སེམས་དཔའ་གཞན་ལ་གནོད་པ་བྱས་པ་མ་ཡིན་པས་ཉམས་པར་མི་ནུས་སོ། ། ཞེས་སོགས་བཤད་དོ། །དགེ་བའི་ལྷས་ནི། གཞན་གྱིས་གནོད་པ་བྱས་ཀྱང་དེ་བྱང་ཆུབ་སེམས་དཔའ་ལ་གནོད་པར་མི་འགྱུར་བའི་དོན་དུ་འཆད་ལ། འདི་ནི་ཕན་གནོད་ནི་ཀུན་ཏུ་བཏགས་པ་ཙམ་ལས་རང་གི་ངོ་བོས་ཅི་ཡང་མ་ཡིན་ལ། བྱང་ཆུབ་
Page: 122 སེམས་དཔའ་རྣམས་ཀྱིས་ཆོས་རྣམས་ཀྱིས་ངོ་བོ་ཉིད་གང་ལས་མི་འདའ་བ་འདི་དག་གཟིགས་པའི་ཕྱིར་དང་། ཕན་གནོད་ཀྱི་ཡུལ་བདག་ཏུ་འཛིན་པ་མི་མངའ་བའི་ཕྱིར་དང༌། ཆོས་ཐམས་ཅད་ནི་རྒྱུ་རྐྱེན་གྱི་རྟེན་ཅིང་འབྲེལ་བར་འབྱུང་བ་ འཁྲུལ་འཁོར་གྱི་སྐྱེས་བུའི་བྱ་བ་ལྟར་གཟིགས་པའི་ཕྱིར་དང༌། ཐམས་ཅད་ཀྱང་ཡང་དག་པའི་མཐའ་དང་། ངོ་བོ་ཉིད་ཀྱིས་མཚུངས་ཤིང་མཉམ་པར་གཟིགས་པའི་ཕྱིར་ན་ཕན་གནོད་དུ་བཏགས་པ་འདི་དག་ནི་བྱེ་མའི་ཁང་བུ་ལ་ཞེན་པའི་བྱིས་ པའི་སྤྱོད་ཡུལ་ན་བྱེ་མའི་ཁང་བུ་ཞིག་པ་དང་མ་ཞིག་པ་ལྟ་བུ་ཡིན་གྱི་དེ་དཔྱོད་ལྡན་རྒན་པོའི་ངོར་མ་ཡིན་པ་ལྟར་རོ། །དེ་ལྟ་མོད་ཀྱི་སུ་ཞིག་ཁྲོས་འཁྲུགས་ཏེ་གནོད་པའི་རྣམ་པ་ཐམས་ཅད་བྱང་ཆུབ་སེམས་དཔའ་ལ་བྱེད་པ་ན་བྱང་ཆུབ་ སེམས་དཔའ་དེ་གནོད་པར་རྟོག་པ་དང་ཁོན་དུ་འཛིན་པ་མི་མངའ་མོད་ཀྱང་དེ་ཉིད་ཁོ་ནས་དགེ་བའི་ཆོས་མཐའ་ཡས་པ་འཕེལ་བར་བྱེད་དེ་འདི་ལྟར་བདག་གཞན་མ་གཟིགས་པའི་ཤེས་རབ་དང་། ཆོས་ཐམས་ཅད་ངོ་བོ་ཉིད་ཀྱིས་མཉམ་པ་དང་། དེ་ལྟར་ མ་ཤེས་པ་ལ་ལྷག་པར་བརྩེ་བ་དང་། སེམས་ཅན་གྱི་ངོ་བོར་མ་ཞུགས་པའི་འཁྲུལ་པ་གློ་བུར་བ་འདི་དག་བདག་གིས་སྦྱང་བར་ནུས་སོ་ཞེས་སྙིང་སྟོབས་དང༌། དེའི་ཕྱིར་སེམས་ཅན་ཐམས་ཅད་ཀྱི་ཉེས་པ་འདི་དག་བདག་གིས་བསལ་བར་ བྱའོ་ཞེས་བྱང་ཆུབ་ཀྱི་སེམས་ཏེ་གཉེན་པོའི་ཕྱོགས་ཐམས་ཅད་མེ་ལ་བུད་ཤིང་བསྣན་པ་ལྟར་སྐྱེ་བའི་རྒྱུར་འགྱུར་བའི་ཕྱིར། འདི་ནི་ཤིན་དུ་འཆད་པར་རིགས་སོ། །དེས་ན་སྔ་མས་ནི། རྒྱལ་སྲས་རྣམས་ལ་དོ་གལ་ཆེན་པོས་ཀྱང་གཞན་གྱིས་ གནོད་པའི་བློ་སྐྱེ་བར་དཀའ་བས་སྡིག་པ་བྱེད་པ་འབྱུང་རིང་ལ། ཡུལ་ཁྱད་པར་ཅན་དུ་མཐོང་ནས་བཀུར་སྟི་བྱས་པ་ལ་སོགས་པའི་དགེ་བ་ལྷག་པར་འཕེལ་ལོ། །ཞེས་འབྲུ་བསྣན་ཞིང༌། ཕྱི་མས་ནི་རྒྱལ་སྲས་རྣམས་ལ་ནི་གཞན་གྱིས་དོ་གལ་
Page: 123 ༄༅། །ཆེན་པོའི་སྒོ་ནས་གནོད་པར་རློམ་པས་ལུས་སྲོག་འཇིག་པ་སོགས་བྱས་ཀྱང་བྱང་ཆུབ་སེམས་དཔའ་དེའི་རྒྱུད་དཀྲུག་པར་མི་ནུས་ཤིང་སླར་དགེ་བའི་བློ་མཐའ་ཡས་པ་སྐྱེད་པའི་གྲོགས་བྱེད་དོ། །ཞེས་འབྲུ་གཉེར་བའོ། །མདོར་ ན་བྱང་ཆུབ་ཀྱི་སེམས་ཁོ་ན་ཕན་ཡོན་མཐའ་ཡས་པར་གཟིགས་པས་བྱང་ཆུབ་སེམས་ལ་ཁོང་དུ་ཆུད་མི་ནུས་པའི་ངོ་མཚར་བ་སྐྱེས་ནས་དེ་གང་གི་རྒྱུད་ལ་སྐྱེས་པས་བྱང་ཆུབ་སེམས་དཔའ་དང་སངས་རྒྱས་སུ་འཇོག་པ་དེ་ལ་ བདག་ཕྱག་འཚལ་ལོ་ཞེས་གློ་བུར་དུའང་ཆེད་དུ་བརྗོད་པར་མཛད་ལ། བྱང་ཆུབ་སེམས་དཔའ་ལ་གནོད་པ་བྱས་ཀྱང་གནོད་པའི་རྐྱེན་དེ་ཉིད་ཁོ་ན་དེས་རྗེས་སུ་འཛིན་པའི་རྒྱུར་གྱུར་ཏེ་མཐར་ཐུག་བྱང་ཆུབ་ཀྱི་བདེ་བར་འབྲེལ་པར་མཛད་པ་ མདོར་ན་ཕན་གནོད་ཅིས་འབྲེལ་ནའང་དོན་ཆེན་པོ་དང་ལྡན་པས་བདེ་བའི་འབྱུང་གནས་སུ་གྱུར་པ་དེ་ལ་ཧ་ཅང་ངོ་མཚར་བས་སྐབས་མ་ཡིན་པར་ཡང་བསྟོད་པའི་ཚིག་བརྗོད་པའོ། །འདི་ནི་འགྲེལ་ཆེན་ལས། དེ་ལ་གནོད་པ་བྱེད་པར་ བརྒྱ་ལམ་ན་ནུས་ཀྱང་དེ་ཉིད་རྒྱུ་མཚན་དུ་བྱས་ནས་རྒྱུ་འགའ་ལས་དེ་ལ་དད་པ་སྐྱེ་བས་མྱ་ངན་ལས་འདས་པའི་བདེ་བ་དང་འབྲེལ་བ་གནོད་སྦྱིན་ལྔས་བྱམས་པའི་སྟོབས་ལ་བཞིན་ནོ། །ཡང་ན། གང་དག་བདག་ལ་ཁ་ཟེར་རམ། །སོགས་ སྨོན་ལམ་གྱི་དབང་གིས་མཐར་བདེ་བར་འབྲེལ་བ་དང་། ཡང་བུ་སྡུག་པས་རྩེད་མོ་བྱས་པ་ལྟར་གཟིགས་ནས་ཐུགས་རྗེ་ཆེན་པོས་བདེ་བའི་རྒྱུར་འགྱུར་བ་བཟོད་ལེ་ལས་འཆད་པ་ལྟར་རོ། །ཞེས་འཆད་དོ། །བྱང་ཆུབ་སེམས་དཔའ་ལ་ ངན་སེམས་སྐྱེས་པས་ཀྱང་དམྱལ་བར་འཕེན་པ་དང་གནོད་པ་བྱས་པས་བདེ་བར་འབྲེལ་བ་འགལ་ལོ་ཞེ་ན། དགེ་བའི་ལྷས་ནི། གནས་སྐབས་ཐ་དད་དེ་དང་པོར་ངན་སེམས་ལས་རྣམ་སྨིན་སྡུག་བསྔལ་མྱོང་ཡང་ཕྱིས་འབྲེལ་བའི་རྒྱ་ལས་ཐར་
Page: 124 བར་འགྱུར་བའོ། །ཞེས་བཤད་ལ། ལེགས་བཤད་བསྡུས་པར་ནི། རྣམ་སྨིན་གྱི་འབྲས་བུ་ཚེ་ཕྱི་མ་སྡུག་བསྔལ་མྱོང་ཡང་སྐྱེས་བུ་བྱེད་འབྲས་ཚེ་འདིར་བདེ་བ་དང་འབྲེལ་བ་སྟེ་བྱང་ཆུབ་སེམས་དཔའ་རྣམས་ནི་ད་ལྟ་ནས་གནོད་ལན་དུ་ཕན་འདོགས་ པའི་ཕྱིར་རོ། །ཡང་ན་གནོད་པ་བྱས་པས་གནས་སྐབས་རྣམ་སྨིན་སྡུག་བསྔལ་མྱོང་ཡང་ནམ་ཞིག་ན་དེའི་ཐུགས་རྗེ་དང་། སྨོན་ལམ་གྱིས་འདྲེན་པ་སྟེ། བཟོད་སྨྲའི་སྐྱེས་རབས་བཞིན་ནོ། །ཡང་ན་ངན་སེམས་ཡོད་པའི་གནོད་པ་བྱས་ན་སྡུག་ བསྔལ་མྱོང་ཡང་ངན་སེམས་མེད་པའི་གནོད་པས་བདེ་བར་འབྲེལ་ཏེ། བྱམས་པའི་སྟོབས་ཀྱི་སྐྱེས་རབས་བཞིན་ནོ། །ཞེས་བཤད་ཀྱང་འདི་འདྲ་བ་དག་རིགས་པར་མི་ཆེ་སུ། །གནོད་སྦྱིན་ལྔས་ཤ་ཁྲག་སློང་པའང་ངན་སེམས་མེད་པ་མིན་ཏེ། ཡུལ་དེའི་སེམས་ ཅན་སུའི་ཡང་མདངས་དབྲོག་པར་མ་ནུས་པའི་རྒྱུ་རྒྱལ་པོའི་བྱམས་པ་ཡིན་པར་གོ་ནས་རྒྱལ་པོ་ལ་མི་བཟོད་པ་སྐྱེས་ཤིང་དེ་སྦྱིན་བ་ལ་དགའ་བས་བདག་གིས་གནོད་པར་ནུས་སོ་ཡང་སྙམ་ནས་ཟས་སློང་ཞིང་དེས་གཞན་གྱི་ཤ་ཁྲག་བྱིན་ན་ཉིན་རེ་ཞིང་ ཡང་སྟེར་བར་འགྱུར་བས་བདག་ཅག་གི་དོན་དེ་ཉིད་དོ་སྙམ་པ་དང༌། དེ་ཉིད་ཀྱིས་བྱིན་ན་རྒྱུ་དེས་རྒྱལ་པོ་བསད་པར་ནུས་སོ་སྙམ་ནས་ཕྲག་དོག་དང་བརྐམ་པ་དང་གླགས་ལྟ་བའི་བློས་བསླངས་པར་བཤད་པའི་ཕྱིར་རོ། ཡང་ངན་སེམས་མེད་པའི་ གནོད་པའང་འགྲུབ་པར་དཀའ་སྟེ་ངན་སེམས་ནི་གནོད་པར་འདོད་པ་ཡིན་ལ། གནོད་་པར་འདོད་པ་མེད་ན་གནོད་པ་མི་བྱེད་པའི་ཕྱིར། དེས་ན་ཕན་གནོད་ནི་བྱེད་ལས་ཀྱིས་མི་འཇོག་གི་བསམ་པས་འཇོག་པ་སྟེ། རྒྱུ་འདིས་འདི་བསད་པར་བྱའོ་སྙམ་ནས་ ཟས་སྟེར་གོས་བསྐོན་ནའང་གནོད་པར་འཇོག་ལ། འདིའི་ནད་བསལ་བར་བྱའོ་སྙམ་ནས་མེ་བཙའ་དང་ཐུར་མ་འདེབས་ཀྱང་ཕན་པར་འཇོག་པའི་ཕྱིར། འོན་ཀྱང་ཡུལ་དེ་ལ་ཕན་གནོད་དུ་བསམས་ནས་བྱས་ཀྱང་དེར་མ་གྱུར་པ་ནི་ཡོད་དོ། །
Page: 125 ༄༅། །བཟོད་སྨྲའི་སྐྱེས་རབས་བཞིན་ཞེས་པ་ལའང་ཐེག་ཆེན་ཐུན་མོང་མ་ཡིན་པ་ལྟར་ན་དེ་དག་སྔོན་གྱི་སྨོན་ལམ་གྱི་སྤྱོད་པའི་གྲོགས་ཡིན་ལ། གནས་སྐབས་གདུལ་བྱ་ཁ་ཅིག་ལ་ངན་སོང་དུ་སོང་བར་སྟོན་ཡང་དེ་གནས་ཚུལ་ མིན་ཏེ་ཕ་རོལ་ཏུ་ཕྱིན་པ་དྲུག་གི་གྲོགས་བྱ་བར་འདོད་པ་ཁོ་ནས་གྲོགས་བྱས་ཏེ་དགེ་བ་འཕེལ་བར་བྱས་པས་གྲོགས་བྱེད་པོ་ངན་སོང་དུ་འགྲོ་བ་མི་སྲིད་པའི་ཕྱིར། ཚེ་ཕྱི་མར་སྡུག་བསྔལ་མྱོང་ཡང་ད་ལྟ་བདེ་བ་མྱོང་བས་བདེ་བར་འབྲེལ་བར་བཞག་ན་ ཧ་ཅང་ཐལ་ཆེས་ཏེ་ཚོང་པ་བཅོམ་པ་དང་ཡོ་བྱད་ཕྲོགས་པའང་བདེ་བར་འབྲེལ་བར་ཐལ་བའི་ཕྱིར་རོ། །བཤད་པ་དང་པོ་ཡང་ཧ་ཅང་རྒྱུ་མཚན་མི་བཟང་ལ། དེས་ན་དེ་འདྲའི་རྒྱལ་སྲས་སོགས་ནི་ངེས་པའི་དོན་ཏེ་བྱང་ཆུབ་སེམས་དཔའ་ནི་ལྷ་ དང་བཅས་པའི་འཇིག་རྟེན་གྱི་རྟེན་གནས་གཅིག་པུ་ཡིན་པས་དེ་ལས་གཉན་པའི་ཞིང་གཞན་མེད་པའི་ཕྱིར་ཉེས་པ་ཆེས་ལྕི་བར་གྲུབ་བོ། །བྱང་ཆུབ་སེམས་དཔའ་ལ་ཉེས་པ་བྱས་པ་དེ་བྱང་ཆུབ་སེམས་དཔའ་དེས་མ་སྐྱབས་ན་ངན་སོང་ལས་ ཐར་བ་མེད་པའི་ཚོད་ཡིན་ཡང་གང་ཞིག་ས་ལ་འགྱེལ་བ་ས་ལ་བསྟེན་ཏེ་ལྡང་བ་ལྟར། བྱང་ཆུབ་སེམས་དཔའ་དེ་ཉིད་ཀྱིས་སྐྱོབ་པར་བྱེད་དེ་གང་བདག་གིས་སེམས་ཅན་ཐམས་ཅད་སྐྱབས་པར་ཞུགས་པ་ཡིན་ན་བདག་ལ་བསྟེན་ནས་གཞན་ ངན་སོང་དུ་ལྟུང་བར་ཅིའི་ཕྱིར་བྱེད། ཐོག་མ་འདི་ཙམ་སྐྱབས་པར་མ་ནུས་ན་གཞན་སུ་ཞིག་སྐྱོབ་པར་ནུས་སྙམ་སྟེ་དེ་ཁོ་ན་སྐྱོབ་པའི་ཆེད་དུ་དགེ་བའི་རྩ་བ་ཐམས་ཅད་དང་སྦྱོར་བ་ཐམས་ཅད་ཀྱིས་སྐྱབས་པར་བརྩོན་པར་བྱེད་པའི་ཕྱིར། བྱང་ཆུབ་སེམས་ དཔའི་མཐུས་མྱུར་དུ་འཐར་བར་འགྱུར་བས་བདེ་བར་འབྲེལ་བ་ཞེས་བཤད་ན་ལེགས་སོ། །བྱང་ཆུབ་སེམས་དཔའི་སྤྱོད་པ་ལ་འཇུག་པ་ལས། བྱང་ཆུབ་ཀྱི་སེམས་ཀྱི་ཕན་ཡོན་གྱི་ལེའུ་སྟེ་དང་པོའོ། །
Page: 126 ཤོག་ངོས་སྟོང་པ།
ལེའུ་གཉིས་པ། སྡིག་པ་བཤགས་པ།
[edit]Page: 127 ༄༅། །ལེའུ་གཉིས་པ་ལ་མཚམས་སྦྱར་བ་ནི། དཀའ་འགྲེལ་ཆུང་ངུར། དེ་ལྟར་ཕན་ཡོན་བརྗོད་པས་སྤྲོ་བ་ཐོབ་པ་དེ་ལ་གཟུང་བའི་ཆོ་ག་སྟོན་ཏོ་ཞེས་སོ། །ལེགས་བཤད་བསྡུས་པར་རས་སྣུམ་དང་ དྲི་མས་དག་པ་ལ་ཚོན་འཛིན་པ་ལྟར་བྱང་ཆུབ་ཀྱི་སེམས་ཀྱི་ཚོན་འཛིན་པ་ལ་ཤེས་རྒྱུད་སྡིག་ལྟུང་དག་པ་དགོས་པས་དྲི་མ་སྦྱང་བའི་ཕྱིར་ཡན་ལག་བདུན་པ་སྐྱབས་འགྲོ་དང་བཅས་པ་བསྟན་ཏོ། །དེ་ཡང་ཐོག་མ་མེད་པ་ནས་སྒྲིབ་པ་ གསུམ་སྟེ་བྱ་འོས་མ་བྱས་པ་དང་མི་བྱ་བ་བྱས་པ་དང་བྱ་བ་བྱས་པ་ཆུད་ཟོས་པའོ། །དང་པོ་ལ་ཡུལ་ཁྱད་པར་ཅན་ལ་དད་གུས་མ་བྱས་པ་དང༌། ནོར་ལ་ཆགས་པས་མཆོད་སྦྱིན་མ་བྱས་པ་དང༌། ལོག་པར་ཞེན་པས་ཡང་དག་པའི་སྐྱབས་ མ་བཟུང་བའོ། །དེ་གསུམ་གྱི་གཉེན་པོར་ཕྱག་དང་མཆོད་པ་དང་སྐྱབས་སུ་འགྲོ་བ་གོ་རིམ་ལྟར་བཞག་གོ །མི་བྱ་བ་བྱས་པ་ལ་གཉིས་ཏེ་རང་གིས་མི་དགེ་བ་བྱས་པ་དང༌། གཞན་གྱི་དགེ་བ་ལ་བར་ཆོད་བྱས་པའོ། །དང་པོའི་གཉེན་པོར་ སྡིག་བཤགས་སོ། །གཉིས་པའི་གཉེན་པོར་རྗེས་སུ་ཡི་རང་བ་སོགས་གསུམ་མོ། །དགེ་བ་བྱས་ཀྱང་ཆུད་ཟོས་པའི་གཉེན་པོར་བྱང་ཆུབ་ཏུ་བསྔོ་བ་རྣམ་པར་བཞག་གོ་ཞེས་བཤད་ཏོ། །བཀའ་འགྲེལ་ཆུང་ངུར་ནི། ཐོག་མེད་ཀྱི་ལས་ཀྱི་ སྒྲིབ་པ་བཞི་སྟེ་རང་གིས་མི་དགེ་བ་སྤྱད་པ་དང༌། གཞན་གྱི་དགེ་བའི་བར་ཆད་བྱས་པ་དང༌། ཆོས་སྤངས་པ་དང༌། ལོག་པར་སྨོན་པའོ། །དང་པོའི་གཉེན་པོར་ཤགས་པ། གཉིས་པའི་གཉེན་པོར་ཡི་རང༌། གསུམ་པའི་གཉེན་ པོར་བསྐུལ་གསོལ་གཉིས། བཞི་པའི་གཉེན་པོར་བསྔོ་བའོ་ཞེས་བཤད་ཏོ། །སློབ་དཔོན་ཀྲྀཥྞ་པས་ནི། མཆོད་དང་བདག་དབུལ་སྡིག་འཆགས་དང༌། །ཁྲུས་གསོལ་སྐུ་དབྱི་གོས་རྒྱན་བྱུག །མེ་ཏོག་ཆལ་འགྲམ་ཕྲེང་བ་དབུལ། །
Page: 128 སྤོས་དང་ལྷ་བཤོས་སྒྲོན་མཎྜལ། །གཞལ་ཡས་ཁང་དང་གདུགས་རོལ་མོ། །སྨོན་ལམ་མཐུ་ཡིས་མཆོད་ཚོགས་དབུལ། །བླ་མེད་མཆོད་དང་བསྟོད་པར་སྨོན། །ཕྱག་དང་སྐྱབས་འགྲོ་སྡིག་འཆགས་དང༌། །ཡི་རང་བསྐུལ་གསོལ་ སྨོན་ལམ་གདབ། །ཅེས་ཉི་ཤུ་རྩ་བདུན་པོ་དག་གིས་སེམས་སྦྱང་བར་བཤད་ཏོ། །མདོར་ན་སེམས་བཟུང་བའི་ཆོ་ག་ལ་གསུམ། སྦྱོར་བ། དངོས་གཞི། རྗེས་སོ། །དང་པོ་སྦྱོར་བ་ལ་བདུན། མཆོད་པ། སྐྱབས་འགྲོསྡིག་བཤགས། རྗེས་སུ་ཡི་རང་། བསྐུལ་བ། གསོལ་བ། བསྔོ་བ་སྟེ་བདུན་ནོ། །དང་པོ་མཆོད་པ་ལ། བདག་དབང་བའི་དངོས་པོས་མཆོད་པ། བདག་གིར་མ་བཟུང་བའི་དངོས་པོས་མཆོད་པ། ལུས་དབུལ་བ། བློས་སྤྲུལ་པའི་མཆོད་པ་བཅུ་གཅིགབླ་ན་མེད་པའི་མཆོད་པ་སྟེ་ རྙེད་པའི་མཆོད་པ་ལྔ་དང་། བཀུར་སྟིའི་མཆོད་པ་བསྟོད་ཕྱག་གཉིས་སོ། །དང་པོ་བདག་དབང་བའི་དངོས་པོས་མཆོད་པ་ནི། རིན་ཆེན་སེམས་དེ་གཟུང་བར་བྱ་བའི་ཕྱིར། །དེ་བཞིན་གཤེགས་པ་རྣམས་དང་དམ་པའི་ཆོས། དཀོན་མཆོག་དྲི་མ་མེད་དང་སངས་རྒྱས་སྲས། །ཡོན་ ཏན་རྒྱ་མཚོ་རྣམས་ལ་ལེགས་པར་མཆོད། །ཅེས་གསུངས་ཏེ། རིན་ཆེན་སེམས་དེ་གཟུང་བར་བྱ་བའི་ཕྱིར་གྱིས་ཆེད་དུ་བྱ་བའོ། །ཞེས་གཞན་རྣམས་སུ་བསྟན་ལ། དཀའ་འགྲེལ་ཆེན་མོར། རིན་ཆེན་སེམས་དེ་བདག་གིས་གཟུང་བྱའི་ཕྱིར། ། ཞེས་བདག་ཉིད་ལེན་པོར་བསྟན་ཏོ། །ལེགས་པར་མཆོད་ནི་དངོས་པོའོ། །གཞན་རྣམས་ནི་ཞིང་ངམ་ཡུལ་ཏེ་ཡོན་ཏན་གྱི་རྒྱ་མཚོ་དཀོན་མཆོག་གསུམ་ལ་བདག་གིས་དངོས་སུ་བཤམས་པ་འདིས་མཆོད་པའི་དོན་ཏོ། །དཀོན་མཆོག་ཐམས་ཅད་ འདིར་མཆོད་ཡུལ་དུ་མངོན་དུ་གྱུར་ཏམ་ཞེ་ན། དེ་མ་གྱུར་ཀྱང་མངོན་སུམ་དུ་གྱུར་མ་གྱུར་ལ་མཆོད་པའི་ཕན་ཡོན་ཁྱད་མེད་དེ། རྒྱན་ལས། སངས་རྒྱས་རྣམས་ལ་གོས་ལ་སོགས། །མངོན་སུམ་མངོན་སུམ་མིན་པར་མཆོད། །ཅེས་སོ། །གཉིས་པ་ནི།
Page: 129 ༄༅། །མེ་ཏོག་འབྲས་བུ་ཇི་སྙེད་ཡོད་པ་དང་། །སྨན་གྱི་རྣམ་པ་གང་དག་ཡོད་པ་དང་། །འཇིག་རྟེན་རིན་ཆེན་ཇི་སྙེད་ཡོད་པ་དང་། །ཆུ་གཙང་ཡིད་དུ་འོང་བ་ཅི་ཡོད་དང༌། །རིན་ཆེན་རི་བོ་དང་ནི་དེ་བཞིན་དུ། །ནགས་ཚལ་ ས་ཕྱོགས་དབེན་ཞིང་ཉམས་དགའ་དང་། །ལྗོན་ཤིང་མེ་ཏོག་རྒྱན་སྤྲས་སྤུད་པ་དང་། །ཤིང་གང་འབྲས་བཟང་ཡལ་ག་དུད་པ་དང་། །ལྷ་སོགས་འཇིག་རྟེན་ན་ཡང་དྲི་དང་ནི། །སྤོས་དང་དཔག་བསམ་ཤིང་དང་རིན་ཆེན་ཤིང་། །མཚོ་དང་ རྫིང་བུ་པད་མས་བརྒྱན་པ་དག །ངང་པ་ཤིན་ཏུ་སྐད་སྙན་ཡིད་འོང་ལྡན། །མ་རྨོས་འཁྲུངས་པའི་ལོ་ཏོག་རྣམ་པ་དང་། །གཞན་ཡང་མཆོད་པར་འོས་པའི་རྒྱན་རྣམས་ནི། །ནམ་མཁའ་རབ་འབྱམས་ཁམས་ཀྱི་མཐས་གཏུགས་པ། །ཡོངས་སུ་བཟུང་ བ་མེད་པ་དེ་དག་ཀུན། །བློ་ཡིས་བླངས་ནས་ཐུབ་པ་སྐྱེས་ཀྱི་མཆོག །སྲས་དང་བཅས་པ་རྣམས་ལ་ལེགས་འབུལ་ན། ཡོན་གནས་དམ་པ་ཐུགས་རྗེ་ཆེ་རྣམས་ཀྱིས། བདག་ལ་བརྩེར་དགོངས་བདག་གི་འདི་དག་བཞེས། །བདག་ནི་བསོད་ ནམས་མི་ལྡན་བཀྲེན་ཆེན་ཏེ། །མཆོད་པའི་ནོར་གཞན་བདག་ལ་ཅང་མ་མཆིས། །དེས་ན་གཞན་དོན་དགོངས་པའི་མགོན་གྱིས་འདི། བདག་གི་དོན་སླད་ཉིད་ཀྱི་མཐུས་བཞེས་ཤིག །ཞེས་གསུངས་ཏེ། འདིར་ནམ་མཁའ་རབ་འབྱམས་ཀྱི་ཤློ་ ཀ་ནི། མེ་ཏོག་འབྲས་བུ་ཇི་སྙེད་ཡོད་པ་དང་། །ཅེས་སོགས་་རེ་རེའི་མཐར་ཡང་སྦྱར་བར་བྱའོ། །ཞེས་དཀའ་འགྲེལ་ཆེན་མོར་རོ། །སྤུད་པ་ནི་རྒྱན་གྱིས་ཤིན་དུ་སྤྲས་པའི་དོན་ནོ། །ཡལ་ག་དུད་པ་ནི་གུག་པ་སྟེ་ས་ལ་རེག་པ་ལྟ་བུ་དང་། མ་རྨོས་ པ་ནི་ཐོང་གཤོལ་གྱིས་མ་སློག་པར་རོ། །ཞེས་སོ། །ཅིའི་ཕྱིར་བདག་པོས་མ་བཟུང་བ་འདི་རྣམས་ཀྱིས་མཆོད་ཅེ་ན། བདག་ནི་སོགས་ཀྱིས་དེའི་རྒྱུ་མཚན་བསྟན་ཏོ། །གསུམ་པ་ལུས་དབུལ་བ་ནི། རྒྱལ་དང་དེ་སྲས་རྣམས་ལ་བདག་གིས་ནི། །བདག་གི་ལུས་
Page: 130 ཀུན་གཏན་དུ་དབུལ་བར་བགྱི། །སེམས་དཔའ་མཆོག་རྣམས་བདག་གི་ཡོངས་བཞེས་ཤིག །གུས་པས་ཁྱེད་ཀྱི་འབངས་སུ་མཆི་བར་བགྱི། །བདག་ནི་ཁྱེད་ཀྱིས་ཡོངས་སུ་བཟུང་བས་ན། །སྲིད་ན་མི་འཇིགས་སེམས་ཅན་ཕན་པར་བགྱི། ། སྔོན་གྱི་སྡིག་ལས་ཡང་དག་འདའ་བགྱིད་ཅིང་། །སྡིག་པ་གཞན་ཡང་སླན་ཆད་མི་བགྱིད་དོ། །ཞེས་གསུངས་ཏེ། བདག་ལ་བདོག་པ་ནི། ལུས་ཁོ་ནར་ཟད་ལ་འདི་ཕུལ་ནས་ཁྱེད་ཀྱི་བཀའ་བཞིན་སྒྲུབ་པའི་དོན་ཏོ། །དེ་རྣམས་ནི་དངོས་པོ་རྫས་ སུ་ཡོད་པས་མཆོད་པ་ཡིན་ལ། བཞི་པ་བློས་སྤྲུལ་པ་ནི། ཁྲུས་ཀྱི་ཁང་པ་ཤིན་དུ་དྲི་ཞིམ་པ། །ཤེལ་གྱི་ས་གཞི་གསལ་ཞིང་འཚེར་བ་བསྟར། །རིན་ཆེན་འབར་བའི་ཀ་བ་ཡིད་འོང་ལྡན། །མུ་ཏིག་འོད་ཆགས་བླ་རེ་བྲེས་པ་དེར། ། དེ་བཞིན་གཤེགས་དང་དེ་ཡི་སྲས་རྣམས་ལ། །རིན་ཆེན་བུམ་པ་མང་པོ་སྤོས་ཀྱི་ཆུས། །ཡིད་འོང་ལེགས་པར་བཀང་བ་གླུ་དང་ནི། །རོལ་མོར་བཅས་པ་དུ་མས་སྐུ་ཁྲུས་གསོལ། །དེ་དག་སྐུ་ལ་མཚུངས་པ་མེད་པའི་གོས། །གཙང་ ལ་དྲི་རབ་བསྒོས་པས་སྐུ་ཕྱིའོ། །དེ་ནས་དེ་ལ་ཁ་དོག་ལེགས་བསྒྱུར་བའི། །ན་བཟའ་ཤིན་ཏུ་དྲི་ཞིམ་དམ་པ་དབུལ། །གོས་བཟང་སྲབ་ལ་འཇམ་པ་སྣ་ཚོགས་དང་། །རྒྱན་མཆོག་བརྒྱ་ཕྲག་དེ་དང་དེ་དག་གིས། །འཕགས་པ་ཀུན་ཏུ་བཟང་ དང་འཇམ་དབྱངས་དང་། འཇིག་རྟེན་དབང་ཕྱུག་སོགས་ལའང་བརྒྱན་པར་བགྱི། །སྟོང་གསུམ་ཀུན་ཏུ་དྲི་ངད་ལྡང་བ་ཡི། །དྲི་མཆོག་རྣམས་ཀྱིས་ཐུབ་དབང་ཀུན་གྱི་སྐུ། །གསེར་སྦྱངས་བཙོ་མ་བྱི་དོར་བྱས་པ་ལྟར། །འོད་ཆགས་ འབར་བ་དེ་དག་བྱུག་པར་བགྱི། །ཐུབ་དབང་མཆོད་གནས་མཆོག་ལ་ཡིད་འོང་བའི། མེ་ཏོག་མན་དྷ་ར་དང་པད་མ་དང་། །ཨུཏྤ་ལ་སོགས་དྲི་ཞིམ་ཐམས་ཅད་དང་། །ཕྲེང་བ་སྤེལ་ལེགས་ཡིད་འོང་རྣམས་ཀྱིས་མཆོད། །སྤོས་མཆོག་
Page: 131 ༄༅། །ཡིད་འཕྲོག་དྲི་ངད་ཁྱབ་པ་ཡི། །བདུག་པའི་སྤྲིན་ཚོགས་རྣམས་ཀྱང་དེ་ལ་དབུལ། །ཞལ་ཟས་བཟའ་བཏུང་སྣ་ཚོགས་བཅས་པ་ཡི། །ལྷ་བཤོས་རྣམས་ཀྱང་དེ་ལ་དབུལ་བར་བགྱི། །གསེར་གྱི་པདྨ་མཚར་དུ་ དངར་བ་ཡི། །རིན་ཆེན་སྒྲོན་མེ་རྣམས་ཀྱང་དབུལ་བར་བགྱི། །ས་གཞི་བསྟར་བ་སྤོས་ཀྱི་བྱུགས་པ་དེར། །མེ་ཏོག་ཡིད་འོང་སིལ་མ་དགྲམ་པར་བགྱི། །གཞལ་མེད་ཕོ་བྲང་བསྟོད་དབྱངས་ཡིད་འོང་ལྡན། །མུ་ཏིག་རིན་ཆེན་རྒྱན་འཕྱང་མཛེས་ འབར་བ། །དཔག་ཡས་ནམ་མཁའི་རྒྱན་གྱུར་དེ་དག་ཀྱང་། །ཐུགས་རྗེའི་རང་བཞིན་ཅན་ལ་དབུལ་བར་བགྱི། །རིན་ཆེན་གདུགས་མཛེས་གསེར་གྱི་ཡུ་བ་ཅན། །ཁོར་ཡུག་རྒྱན་གྱི་རྣམ་པ་ཡིད་འོང་བརྒྱན། །དབྱིབས་ལེགས་ལྟ་ན་སྡུག་པ་བསྒྲེང་ བ་སོགས། །རྟག་ཏུ་ཐུབ་དབང་རྣམས་ལ་དབུལ་བར་བགྱི། །དེ་ལས་གཞན་ཡང་མཆོད་པའི་ཚོགས། རོལ་མོ་དབྱངས་སྙན་ཡིད་འོང་བ། །སེམས་ཅན་སྡུག་བསྔལ་སིམ་བྱེད་པའི། །སྤྲིན་རྣམས་སོ་སོར་གནས་གྱུར་ཅིག །དམ་ཆོས་ དཀོན་མཆོག་ཐམས་ཅད་དང་། །མཆོད་རྟེན་རྣམས་དང་སྐུ་གཟུགས་ལ། །རིན་ཆེན་མེ་ཏོག་ལ་སོགས་ཆར། །རྒྱུན་མི་འཆད་པར་འབབ་པར་ཤོག །ཞེས་གསུངས་ཏེ། དེ་ཡང་ཚིགས་བཅད་ཕྱེད་དང་གསུམ་གྱིས་ཁྲུས་གསོལ་བ། དེ་ནས་ ཕྱེད་དང་གཉིས་ཀྱིས་གོས་རྒྱན་དབུལ་བ། གཅིག་གིས་བྱུགས་པ། གཅིག་གིས་མེ་ཏོགརྐང་པ་གཉིས་ཀྱིས་སྤོས། རྐང་པ་གཉིས་ཀྱིས་ལྷ་བཤོས། ཤློ་ཀ་ཕྱེད་ཀྱིས་སྒྲོན་མེ། ཕྱེད་དང་གཉིས་ཀྱིས་བཞུགས་ཁང་། གཅིག་གིས་གདུགས་ ཀྱིས་མཚོན་ཏེ་ཆེན་པོ་ལ་འོས་པའི་ཡོ་བྱད་རྣམས། གཅིག་གིས་གླུ་དང་རོལ་མོ། དེ་ནས་གཅིག་གིས་དཀོན་མཆོག་གི་རྟེན་ཐམས་ཅད་ལ་མཆོད་པ་རྟག་ཏུ་བྱིན་གྱིས་རློབ་པའི་སྨོན་ལམ་སྟེ་བཅུ་གཅིག་གོ །དེ་ཡང་ཤེལ་གྱི་ས་གཞི་
Page: 132 བསྟར་བ་ནི། བརྐྱང་ནུལ་གྱི་ཞལ་བ་ལེགས་པར་བདར་ཞིང་ཕྱིས་པས་འོད་འཚེར་བ་སྟེ་ལྟ་བུའི་དོན་དུ་འཁྲུལ་བར་མི་བྱའོ། །ཚིགས་བཅད་ཕྱེད་ཀྱིས་ན་བཟའ་བརྐྱང་པ་སྨོས་ལ། དེ་ནས་ཚིགས་བཅད་གཅིག་གིས་གོས་དང་རྒྱན་ལྷན་ཅིག་ཏུ་སྨོས་ པ་ནི་དང་པོ་མཆོག་གི་སྤྲུལ་སྐུ་རྒྱན་སྤངས་པ་ཚངས་སྤྱོད་ཀྱི་ཆ་བྱད་ཅན་རྣམས་ལ་དབུལ་བ་དང་། ཕྱི་མ་བྱང་ཆུབ་སེམས་དཔའ་ཁྱིམ་པའི་རྟགས་འཆང་བ་རྣམས་ལ་དབུལ་བའི་དོན་ཏེ་མཆོག་གི་སྤྲུལ་སྐུ་ལ་རྒྱན་དབུལ་བ་ནི་མི་རིགས་པའི་སྦྱིན་ པར་འགྱུར་བའི་ཕྱིར་རོ། །སྟོང་གསུམ་ཀུན་ཏུ་དྲི་ངད་ལྡང་བའི་སྤོས་ནི། འོག་མིན་གྱི་སྦྲུལ་གྱི་སྙིང་པོ་སོགས་ཡིན་ལ། སྟོང་གསུམ་ནི་མངོན་པ་ལས་བཤད་པ་ལྟར། གླིང་བཞི་བྱེ་བ་ཕྲག་བརྒྱ་པ་ཉིད་བཟུང་ངོ་། །གསེར་བཙོ་མ་ནི་ཁ་སྦྱར་དུ་བསྐོལ་བ་ ལ་སོགས་པས་ནང་གི་དྲི་མ་སྦྱངས་པ་སྟེ། བྱི་དོར་བྱས་པ་ནི་རོ་ཙ་ན་ལ་སོགས་པའི་ནོར་བུས་ཕྱིས་པ་དང་། སྦྱངས་པ་ནི་བུལ་ཏོག་དང་ལན་ཚྭ་དང་སྐྱུ་རུ་ར་ལ་སོགས་པས་ཕྱིའི་དྲི་མ་སྦྱངས་པ་སྟེ། དེ་ལྟ་བུ་ཡང་ཡིན་ལ་གསེར་ཡང་ཡིན་པ་སྟེ། འཇིག་རྟེན་ ལ་གྲགས་པས་བརྗོད་ཀྱི་སྟོན་པའི་སྐུའི་མཛེས་པ་ལ་ནི་དཔེ་ཅུང་ཟད་ཀྱང་མེད་དོ། །ཞེས་འགྲེལ་ཆེན་ལས་སོ། །འགྲེལ་ཆེན་དུ། མཱ་ལི་ཀ་ནི་པར་ཤི་ཥའོ། །ཞེས། མེ་ཏོག་མན་དྷ་ར་དང་བར་ཤི་ཥ། ཞེས་འདོན་ནོ། །བདུག་པའི་སྤྲིན་ནི་སྤྲིན་འཁྲིགས་ པའམ་ཡང་ན་སྤྲིན་གྱེན་དུ་འགྲོ་བ་ལྟ་བུར་འཕྱུར་བའོ། །ཞེས་སོ། །གསེར་གྱི་པད་མ་ནི་གསེར་གྱི་ཀོང་བུ་པད་མའི་དབྱིབས་ཅན་ཡིན་ལ། མཚར་དུ་དངར་བ་ནི་དེ་མང་དུ་སྦྲེངས་པའི་གྲལ་བྱས་པ་སྟེ་དེར་ཙམ་པ་ཀའི་མར་དང་ལི་ཤིའི་མར་དང་། ཛ་ཏིའི་ མར་དང་། འབྲུ་མར་བསུང་ཅན་སྦྱར་བའི་མར་མེ་དང་། ལ་ལར་ནི་ནོར་བུ་རིན་པོ་ཆེ་བཞག་པས་སྣང་བ་བྱེད་པ་སྟེ་ནོར་བུ་མཆོག་གིས་དཔག་ཚད་བརྒྱ་ལ་སོགས་པར་མུན་པ་སེལ་བའི་ཕྱིར་དང་། སྒྲོན་མེ་ཕལ་པ་ནི་སྦྲུལ་ལ་སོགས་པའི་སྲོག་ཆགས་འདུ་དུ་
Page: 133 ༄༅། །བ་བཀུ་མིག་ལ་གནོད་ལ། རིན་པོ་ཆེའི་སྒྲོན་མེ་ནི་དེ་ལས་ལྡོག་སྟེ་ཡི་དྭགས་དང་དུད་འགྲོ་འབྱེར་མིག་ལ་ཕན་པས་མཆོག་ཏུ་གྱུར་པའོ། །ས་གཞི་བསྟར་བ་ཞེས་པའི་ཚིགས་བཅད་ཕྱེད་ཀྱིས། གང་དུ་གཞལ་མེད་ཁང་བྱ་བའི་ གཞིའི་ཁྱད་པར་ཡང་སྟོན་ལ། ཀུན་ཏུ་གྲགས་པའི་མཎྜལ་གྱི་མཆོད་པ་ཡང་བསྡུའོ། །གཞལ་ཡས་ཁང་ནི་རིན་པོ་ཆེ་ཐམས་ཅད་པ་ལས་བྱས་པ་དཔག་ཚད་བརྒྱ་སྟོང་གི་ཁྱོན་དང་ལྡན་ཞིང་མང་དུ་བརྩེགས་པས་ནམ་མཁའ་གང་སྟེ་སྤྲིན་ལ་ རེག་པ་ལྟ་བུར་སྣང་བ། ལྷའི་བུ་དང་བུ་མོ་འམ་མིའི་གཞོན་ནུ་དང་གཞོན་ནུ་མ་གླུ་གར་དང་བསྟོད་དབྱངས་སྒྲོག་པས་གང་བའོ། །གདུགས་ཀྱིས་མཚོན་པ་ནི་རྔ་ཡབ་ནོར་བུའི་ཡུ་བ་ཅན་དང་སེང་གེའི་ཁྲི་རྐང་རྟེན་ཅན་དང་གཟིམས་ཆ་ལ་སོགས་པའོ། དེས་ན། དབྱིབས་ལེགས་ལྟ་ན་སྡུག་པ་སྒྲེང་བ་སོགས། །ཞེས་འབྲུ་གཉེར་ཏེ། དཀའ་འགྲེལ་ཆུང་ངུའི་ལུགས་སོ། །རོལ་མོ་ནི་སྒྱུ་རྩལ་དྲུག་བཅུ་རྩ་བཞི་ལས། རོལ་མོར་གཏོགས་པ་བཅོ་བརྒྱད་དེ། བྲོ་དང་རྔ་ཆེན་རྔ་ཕྲན་དང་། །རྫ་རྔ་ཁ་ གཅིག་རྫ་རྔ་ཆེ། པི་ཝཾ་རྒྱུད་གཅིག་རྒྱུད་གསུམ་པ། རྒྱུད་མང་ལྕགས་ཀྱི་སིལ་ཁྲོལ་དང་། འཁར་བའི་སིལ་ཁྲོལ་ཕེག་རྡོབ་པ། །རྔ་མུ་ཀུཎྜ་པ་ཊ་ཧ། །སིལ་སྙན་གླུ་དབྱངས་ལྡན་པ་དང་། །རོལ་ཆེན་པི་ཝཾ་གླིང་བུ་བསྒྱུར། །འཁོར་ བའི་རྔ་དང་བཅོ་བརྒྱད་དོ། །ཞེས་བསྡུས་པའོ། །དབྱངས་ནི། གླུ་དབྱངས་སུ་གཏོགས་པ་བདུན་ཏེ། བར་མ་དྲང་སྲོང་ས་འཛིན་པ། །དྲུག་ལྡན་ལྔ་ལྡན་བློ་གསལ་བ། །འཁོར་བསྟན་པ་སྟེ་རྣམ་པ་བདུན། ཞེས་པ་ཡིན་ལ། དཀའ་འགྲེལ་ ཆེན་མོར། དབྱངས་ནི་ས་འཛིན་ལ་སོགས་བདུན་དང༌། དེའི་དབྱེ་བས་ཀ་མོ་ད་ལ་སོགས་པ་ཤིན་ཏུ་མང་བས་རྒྱ་མཚོའོ། །ཞེས་སོ། །དམ་ཆོས་དཀོན་མཆོག་ཐམས་ཅད་ནི་ཆོས་འཛིན་པའི་གང་ཟག་ཐམས་ཅད་ཀྱི་ཐད་དང་གླེགས་བམ་དང་། ཐ་ན་དེ་ལས་ཤོག་བུ་
Page: 134 རེ་རེའམ་གཅིག་གི་དུམ་བུ་ཙམ་རླུང་གིས་བདས་པའི་ས་ཕྱོགས་ཡན་ཆད་ཡིན་ལ། མཆོད་རྟེན་ནི་རིང་སྲེལ་གྱི་གནས་ཏེ། སྐུར་བཅས་སྐུར་ནི་མེད་པ་ཡི། །ཞེས་ཞལ་ཕྱག་དང་བཅས་པའི་རྣམ་པར་གཏོད་པ་ནི་སྐུར་བཅས་དང་། བང་རིམ་ལ་ སོགས་པ་ཅན་ནི་སྐུར་མེད་པའི་མཆོད་རྟེན་ཞེས་ཚིགས་བཅད་བཞི་པར་གསུངས་ལ། འདིར་ནི་སྐུར་བཅས་ལ་སྐུ་གཟུགས་ཞེས་ཟུར་དུ་སྨོས་ཏེ། མདོར་ན་རྒྱུ་དང་བཟོ་བོ་དང་ཚད་ཅི་འདྲ་ནའང་རུང་ཐ་ན་དེ་དག་གི་དུམ་བུར་གྱུར་པ་ཡང་བསྡུ་སྟེ། དེ་ཐམས་ ཅད་དུ་མཆོད་པའི་ཆར་འབབ་པར་གྱུར་ཅིག་པའོ། །ལྔ་པ་བླ་ན་མེད་པའི་མཆོད་པ་ནི། ཇི་ལྟར་འཇམ་དབྱངས་ལ་སོགས་པས། །རྒྱལ་བ་རྣམས་ལ་མཆོད་མཛད་པ། །དེ་བཞིན་བདག་གིས་དེ་བཞིན་གཤེགས། །མགོན་པོ་སྲས་དང་བཅས་རྣམས་མཆོད། ། ཅེས་གསུངས་ཏེ། མདོར་ན་བདག་ཅག་གིས་ནི་ཇི་ལྟར་མཆོད་པར་བྱ་བ་དང་ཇི་ལྟར་མཉེས་པར་འགྱུར་བ་མི་ཤེས་ལ། དེ་ནི་འཕགས་ཆེན་རྣམས་ཉིད་ཀྱིས་མཁྱེན་པར་འཐད་པས་ན་སངས་རྒྱས་རྣམས་སྔོན་བྱང་ཆུབ་སེམས་དཔར་གྱུར་པ་ན། ཇི་ལྟ་བུས་ མཆོད་པར་མཛད་པ་དེ་ལྟ་བུས་བདག་གིས་ཀྱང་མོས་པས་མཆོད་པར་བགྱིའོ། །ཞེས་བསམ་པ་སྟེ་འདི་དབང་བཅུ་རྫོགས་པ་རྣམས་ཀྱི་བློ་ཤིན་ཏུ་རྣམ་པར་དག་པས་བྱིན་གྱིས་རློབ་པའི་ཕྱིར་ན་མ་དག་པའི་བློ་ཅན་གྱི་མཆོད་པ་ཐམས་ཅད་ཟིལ་གྱིས་གནོན་ པས་བླ་ན་མེད་པའི་མཆོད་པའོ། །འདིར་གཞན་ཡང་དམིགས་པ་དང་བཅས་པས་བླ་ན་མེད་པའི་མཆོད་པར་འགྱུར་བ་ནི་བྱང་ཆུབ་ཀྱི་སེམས་སྒོམ་པ་སྟེ། མཁས་པས་བྱང་ཆུབ་སེམས་བསྒོམས་ན། རྒྱལ་བ་སྲས་དང་བཅས་པ་ལ། །མཆོད་ པ་འདི་ནི་དམ་པ་སྟེ། །ཞེས་སོ། །དམིགས་པ་མེད་པ་བདག་མེད་པ་ལ་བཟོད་པ་ནི་བླ་ན་མེད་པའི་མཆོད་པ་མཆོག་ཡིན་ཏེ། ལྷའི་བུ་བློ་གྲོས་རབ་གནས་ཀྱི་མདོ་ལས། བྱང་ཆུབ་འདོད་པའི་བྱང་ཆུབ་སེམས་དཔའ་ཡིས། །བསྐལ་བ་བྱེ་
Page: 135 ༄༅། །བ་གངྒཱའི་བྱེ་སྙེད་དུ། མེ་ཏོག་སྤོས་དང་དེ་བཞིན་ཟས་སྐོམ་དག །ཕུལ་ནས་མི་མཆོག་སངས་རྒྱས་མཆོད་པ་བས། །གང་གིས་གང་ལས་བདག་དང་སྲོག་དང་ནི། །གང་ཟག་མ་མཆིས་དེ་འདྲའི་ཆོས་འདི་དག །ཐོས་ ནས་དེ་ལ་འོད་གསལ་བཟོད་ཐོབ་པ། །དེ་ཡིས་མི་མཆོག་དམ་པ་མཆོད་པ་ལགས། །ཅེས་དང་། སེང་གེའི་སྒྲ་ཆེན་གྱི་མདོ་ལས། གང་འདུ་ཤེས་དང་མཚན་མ་སྐྱེད་པར་མི་བྱེད་པ་དེ་ནི་དེ་བཞིན་གཤེགས་པ་མཆོད་པ་ཡིན་ནོ། །བླང་དོར་མེད་པ་དང་ གཉིས་སུ་མེད་པར་འཇུག་པ་དེ་ནི། དེ་བཞིན་གཤེགས་པ་མཆོད་པ་ཡིན་ནོ། །གྲོགས་པོ་དག་དེ་བཞིན་གཤེགས་པའི་སྐུ་ནི་དངོས་པོ་མེད་པའི་མཚན་ཉིད་ཡིན་པས་དེ་ནི། དངོས་པོའི་འདུ་ཤེས་ལ་གནས་པས་མཆོད་པར་སླ་བ་མ་ཡིན་ནོ། །ཞེས་གསུངས་སོ། ། མཆོད་པ་འདི་རྣམས་ནི། དམ་ཚིག་གསུམ་བཀོད་ལས། ཐབས་མཁས་སྐྱེས་པའི་རིན་པོ་ཆེའི་རི་བོ་དང་སོགས་ནས་ཡོངས་སུ་བཟུང་བ་མེད་པ་རྣམས་དབུལ་བར་བྱའོ། །ཞེས་སོགས་དང༌། དཀོན་མཆོག་སྤྲིན་དང་ཕལ་པོ་ཆེའི་མདོ་ལས་བསྟན་པའོ། ། དེ་ལྟར་བརྙེད་པའི་མཆོད་པ་བསྟན་ནས། བཀུར་སྟིའི་མཆོད་པ་ལ་གཉིས་ཀྱི། དང་པོ་བསྟོད་པ་ནི། ཡོན་ཏན་རྒྱ་མཚོ་རྣམས་ལ་བདག །བསྟོད་དབྱངས་ཡན་ལག་རྒྱ་མཚོས་བསྟོད། །བསྟོད་དབྱངས་སྙན་སྤྲིན་དེ་དག་ལ། །ངེས་པར་ཀུན་ཏུ་ འབྱུང་གྱུར་ཅིག །ཅེས་གསུངས་ཏེ། ཡོན་ཏན་གྱི་རྒྱ་མཚོ་དཀོན་མཆོག་གསུམ་པོ་དེ་ལའོ། །བདག་ནི་བྱེད་པ་པོ་སྟེ་ལུས་གངྒཱའི་ཀླུང་གི་བྱེ་མ་སྙེད་ལ་སོགས་པར་བྱིན་གྱིས་བརླབས་ཤིང་ལུས་རེ་ལ་ཡང་མགོ་མཐའ་ཡས་པ་དང་། དེ་རེ་རེ་ཡང་ལྕེ་ མཐའ་ཡས་ཅིང་ལྕེ་རེ་རེས་ཀྱང་ཡོན་ཏན་གྱི་ཁྱད་པར་བརྒྱ་སྟོང་བརྗོད་ཅིང༌། དེ་ཡང་སྐད་ཀྱི་གཏང་རག་དབྱངས་ཀྱི་ཡན་ལག་རྒྱ་མཚོ་དང་ལྡན་པས་བསྟོད་པར་བྱེད་དེ། ཕལ་ཆེན་ལས། གཞི་དང་སྙིང་པོ་མེ་ཏོག་གིས་བརྒྱན་པའི་འཇིག་རྟེན་གྱི་ཁམས་མང་པོ་ལ་
Page: 136 དབང་བའི་འཁོར་ལོས་བསྒྱུར་བའི་རྒྱལ་པོ་རིན་ཆེན་མང་གི་བུ་མོ་རྣམས་ཀྱི་ཚུལ་ལྟ་བུ་ཡིན་ལ། སྤྱིར་ཡོན་ཏན་ཁྱད་པར་ཅན་ལ་ཤེས་ནས་ཡི་རང་བས་ཀྱང་བསོད་ནམས་དཔག་ཏུ་མེད་དེ། བསྐལ་བཟང་ལས། དེ་བཞིན་གཤེགས་པ་བརྩོན་འགྲུས་ མཐའ་ཡས་ཆོས་ཐམས་ཅད་ཀྱི་ཚུལ་ལ་ངེས་པར་རྟོན་པའི་ཏིང་ངེ་འཛིན་སྟོན་པ་ན། རྒྱལ་པོ་བསོད་ནམས་མེ་ཏོག་བུ་སྟོང་དང༌། བཙུན་མོ་སྟོང་དུ་བཅས་པ་དེས་བདག་ཅག་གིས་འདི་མི་ཤེས་མོད་ཀྱི་འོན་ཀྱང་རྗེས་སུ་ཡི་རང་བར་བྱའོ། །ཞེས་འཁོར་དང་ བཅས་པས་རྗེས་སུ་ཡི་རང་བར་བྱས་པ་ལས་བསོད་ནམས་ཆེར་ཐོབ་པར་གསུངས་ཤིང་། སྔོན་སངས་རྒྱས་སྐར་རྒྱལ་རིའི་ཕུག་ན་ཟད་པར་མེའི་ཏིང་ངེ་འཛིན་ལ་བཞུགས་པ་ལ། འོ་སྐོལ་གྱི་སྟོན་པ་འདི་བྱང་ཆུབ་སེམས་དཔར་གྱུར་པས་རྐང་པ་གཅིག་གིས་ འགྲེང་བས་བསྐོར་ཞིང་། ཞག་བདུན་དུ་ཚིགས་བཅད་གཅིག་གིས་བསྟོད་པས་བསྐལ་པ་དགུའི་ཚོགས་བཟླུམས་པར་བཤད་པའི་ཕྱིར་རོ། །བསྟོད་པའི་སྒྲ་དེ་ཡང་དཀོན་མཆོག་ཐམས་ཅད་ཀྱི་སྤྱན་སྔར་རྒྱུན་མི་འཆད་པར་གྲགས་པར་གྱུར་ཅིག་ཅེས་མོས་ ཅིང་བསྔོ་བ་སྟེ། ནོར་བཟང་གིས་བྱམས་པ་ལ། ཕྱག་བྱས་པའི་ཚེ་ཁྱོད་ཀྱི་ཕྱག་འདི་སངས་རྒྱས་ཐམས་ཅད་དང་། འཇམ་དཔལ་ལ་སོགས་པ་ཐམས་ཅད་དང་། མཆོད་རྟེན་ཐམས་ཅད་ཀྱི་སྤྱན་སྔར་ཅིག་ཆར་དུ་འབྱུང་ངོ༌། །ཞེས་དང༌། དེ་ལྟ་ན་ཡང་ཁྱོད་འཇམ་དཔལ་ གྱི་རྐང་པའི་དྲུང་ལས་གཡོ་བ་མེད་དོ། །ཅེས་གསུངས་པ་ལྟ་བུ་སྟེ་ཚུལ་འདི་དག་ནི་བསམ་གྱིས་ཁྱབ་པ་མ་ཡིན་ནོ། །གཉིས་པ་ཕྱག་ནི། དུས་གསུམ་གཤེགས་པའི་སངས་རྒྱས་ཀུན། །ཆོས་དང་ཚོགས་ཀྱི་མཆོག་བཅས་ལ། །ཞིང་རྡུལ་ཀུན་ གྱི་གྲངས་སྙེད་ཀྱི། །ལུས་བཏུད་ནས་ནི་བདག་ཕྱག་འཚལ། །བྱང་ཆུབ་སེམས་ཀྱི་གཞི་རྣམས་དང་། །མཆོད་རྟེན་ཀུན་ལ་བདག་ཕྱག་འཚལ། །མཁན་པོ་དེ་བཞིན་སློབ་དཔོན་དང་། །བརྟུལ་ཞུགས་མཆོག་ལ་ཕྱག་འཚལ་ལོ། །
Page: 137 ༄༅། །ཞེས་གསུངས་ཏེ། ཞིང་རྡུལ་ཀུན་གྱི་གྲངས་སྙེད་ཀྱི་ལུས་ནི་བདག་གི་ལུས་དེ་ཙམ་དུ་མོས་པ་སྟེ། ཞིང་ཞེས་བྱ་བ་ནི་སྟོང་གསུམ་མི་མཇེད་དམ་གཞི་དང་སྙིང་པོ་མེ་ཏོག་གིས་བརྒྱན་པ་ལ་སོགས་པའོ། །རྡུལ་ནི་ཕྲ་རབ་སྟེ། ཆོས་ མངོན་པ་ལས། ཕྲ་རབ་རྡུལ་དང་རྡུལ་ཕྲན་དང་། །ལྕགས་ཆུ་རི་བོང་ལུག་དང་གླང་། །ཉི་ཟེར་རྡུལ་དང་སྲོ་མ་དང་། །དེ་ལས་བྱུང་དང་དེ་བཞིན་ནས། །སོར་ཚིགས་ཞེས་བྱ་གོང་བདུན་འགྱུར། །ཞེས་སྔ་མ་བདུན་ལ་ཕྱི་མ་རེར་བཤད་པའི་ རྩ་བའི་རྡུལ་དེའོ། །ཞིང་དེ་ལ་རྡུལ་ཇི་ཙམ་མཆིས་པའི་གྲངས་དང་མཉམ་པར་བདག་གི་ལུས་ཀྱང་དེ་སྙེད་མོས་པས་འདུད་པའོ། །གང་ལ་ན་དུས་གསུམ་གྱི་ཕྱོགས་བཅུའི་དཀོན་མཆོག་ཐམས་ཅད་ལ་སྟེ་ཕྱག་གཅིག་ཀྱང་དེ་ཐམས་ཅད་ལ་ཅིག་ཆར་ འདུད་པའི་བློའོ། །འདི་ཇི་ལྟར་ནུས་ཤེ་ན། བསམ་པའི་དབང་གིས་ཏེ་སེམས་ཀུན་ནས་དད་པས་འདུད་པ་ནི་ཕྱག་ཡང་དག་པ་ཡིན་ལ། སེམས་ལ་ནི་རྒྱབ་མདུན་དང་ཤར་ནུབ་མི་དམིགས་པས་ཐམས་ཅད་ལ་ཅིག་ཆར་དུ་དད་པར་བྱར་ནུས་པའི་ཕྱིར་རོ། ། ཅི་འདས་པའི་སངས་རྒྱས་རྣམས་ད་ལྟར་མེད་པ་མ་ཡིན་ནམ་ཞེ་ན། མ་ཡིན་ཏེ་གདུལ་བྱའི་དབང་མ་གཏོགས་སངས་རྒྱས་སུ་ཡང་མྱ་ངན་ལས་འདས་པ་མ་མཐོང་བར་ཁྱིམ་བདག་ནན་ཁུགས་ཀྱི་རྣམ་ཐར་ལས་གསུངས་པའི་ཕྱིར་དང་། སྤྱིར་ཡངཡང་ཆོས་ ཐམས་ཅད་ལ་དམིགས་པའི་བློ་གཞན་སྐྱེ་བ་དང་མཚུངས་པའི་ཕྱིར་རོ། །བྱང་ཆུབ་སེམས་ཀྱི་གཞི་ནི་སྔོན་བྱང་ཆུབ་སེམས་དཔའ་རྣམས་ཀྱིས་གང་དུ་གཏོང་བ་དང༌། གཏོང་བ་ཆེན་པོ་སོགས་ཕ་རོལ་ཏུ་ཕྱིན་པ་དྲུག་གི་སྤྱོད་པ་སྤྱད་པའི་ས་ཕྱོགས་རྣམས་ཏེ་ སྟོན་པ་ཉིད་ཀྱིས་ཀྱང་། སྙིང་སྟོབས་ཆེན་པོའི་རུས་བུ་ས་གཞི་ལས་ཕྱུང་བ་ལ་ཕྱག་མཛད་དེ། འདི་དག་གིས་ང་རྫོགས་པའི་བྱང་ཆུབ་ཐོབ་བོ། །ཞེས་གསུངས་པའི་ཕྱིར། མཆོད་རྟེན་ནི་བིམྦ་དང་། ཁང་བུ་དང་། རྒྱལ་མཚན་ལྟར་གྲགས་པ་བརྒྱད་དང་བཅུ་གཉིས་དང་
Page: 138 བྱེ་བ་ལ་སོགས་པ་སྟེ། མདོར་ན་འཕགས་པ་རྣམས་ཀྱི་རིང་སྲེལ་རྣམ་པ་བཞི་ལས་གང་ཡང་རུང་བའམ་ཐམས་ཅད་བཞུགས་པའོ། །བརྟུལ་ཞུགས་མཆོག་ནི་བརྟུལ་ཞུགས་ཉིད་དང་དེ་དང་ལྡན་པའི་གང་ཟག་སྟེ། སྐྱེས་བུ་ཟུང་བཞི་གང་ཟག་ཡ་བརྒྱད་
དང་ཆོས་བཞིན་དུ་ཚངས་པར་སྤྱོད་པ་ཐམས་ཅད་ལའོ། །གཉིས་པ་སྐྱབས་འགྲོ་ལ། སྤྱིའི་ཚུལ་གྱིས་གཏན་ལ་དབབ་པ་དང༌། གཞུང་ཇི་ལྟ་བར་བཤད་པ་གཉིས། དང་པོ་ལ་ཐུན་མོང་དང༌། ཐུན་མོང་མ་ཡིན་པའི་སྐྱབས་འགྲོ་གཉིས། དང་
པོ་ལ། རྒྱུ་དང་ཡུལ་དང་ངོ་བོ་དབྱེ། །དུས་དང་ངེས་ཚིག་ཆོ་ག་དང༌། །བསླབ་བྱ་དང་ནི་ཕན་ཡོན་དང་། །ཉམས་པའི་ཉེས་དམིགས་སླར་གསོ་བའོ། །ཞེས་བཅུ་གཅིག་ལས་རྒྱུ་ནི་ལས་འབྲས་ལ་ཡིད་ཆེས་པའི་དད་པ་དང༌། དཀོན་མཆོག་
ལ་དང་བའི་དད་པ་དང༌། དེའི་ཡོན་ཏན༌ལ༌འདོད༌པའི༌དད༌པ༌སྟེ༌གསུམ༌གའམ་གང་རུང་དང་ལྡན་པ་དང༌། དགེ་བའི་བཤེས་གཉེན་དང་ཕྲད་པ་ནི་སྐྱབས་སུ་འགྲོ་བའི་བློ་སྐྱེ་བའི་རྒྱུའོ། །ཡུལ་ནི། སངས་རྒྱས་སྐུ་གཉིས། ཆོས་མྱ་ངན་ལས་འདས་པ།
དགེ་འདུན་གང་ཟག་བརྒྱད་དེ། སྐྱབས་འགྲོ་བདུན་བཅུ་པར། ཐུབ་པའི་དབང་པོའི་སྐུ་གཉིས་དང་། མྱ་ངན་འདས་དང་གང་ཟག་བརྒྱད། དེ་ལ་གུས་པས་སྐྱབས་འགྲོ་གང་། །གསུམ་ལ་སྐྱབས་སུ་སོང་བ་ཡིན། །ཞེས་སོ། །
ངོ་བོ་ནི། འཁོར་བའི་འཇིགས་པ་ལས་ཐར་བའི་ཆེད་དུ་དཀོན་མཆོག་ལ་སྐྱབས་གནས་སུ་འཛིན་པའི་བློ་སྟེ། དེ་ཡང་སངས་རྒྱས་ལ་སྟོན་པ་དང༌། ཆོས་ལ་ལམ་དང་། དགེ་འདུན་ལ་གྲོགས་ཀྱི་ཆེད་དུ་སྐྱབས་སུ་འགྲོ་བའོ། །དབྱེ་ན། ངན་སོང་གིས་
འཇིགས་ཏེ་མཐོ་རིས་ཀྱི་ཆེད་དུ་སྐྱབས་སུ་འགྲོ་བ་ལེགས་སྨོན་གྱི་སྐྱབས་འགྲོ་དང༌། འཁོར་བས་འཇིགས་ཏེ་མྱང་འདས་འཐོབ་པའི་ཆེད་དུ་སྐྱབས་སུ་འགྲོ་བ་ངེས་འབྱུང་གི་སྐྱབས་འགྲོ་གཉིས་ཏེ། ཐུན་མོང་གི་སྐྱབས་འགྲོ་མཚན་ཉིད་པ་ནི་ཕྱི་མ་
Page: 139 ༄༅། །འདི་ཁོ་ནའོ། །དུས་ནི་ཇི་སྲིད་འཚོའི་བར་དུ་ཁས་ལེན་པའོ། །ངེས་ཚིག་ནི། འཁོར་བའི་འཇིགས་ལས་སྐྱོབ་པ་དང་། །བླ་མེད་གནས་སུ་འགྲོ་བའི་ཕྱིར། །སྐྱབས་འགྲོ་ཞེས་ནི་བརྗོད་པ་ཡིན། །ཞེས་སོ། །ཆོ་ག་ནི། སློབ་དཔོན་དུ་འོས་པ་ལ་ཕྱག་བྱས་ཏེ་ཙོག་བུ་ཐལ་མོ་སྦྱར་ནས་བཙུན་པའམ་བྱེ་བྲག་ཏུ་སྨྲ་བའི་ལུགས་དགེ་སློང་ཁོ་ནས་འབོགས་དགོས་ཀྱང༌། མདོ་སྡེ་པ་ཡན་གྱི་ལུགས་ལ། དགེ་བསྙེན་གྱིས་ཕོག་ཀྱང་སྐྱེ་བས་གལ་ཏེ། བླ་མ་ཁྱིམ་པ་ཡིན་ན་རིགས་ཀྱི་བུའམ་ རིགས་ཀྱི་བུ་མོ་བདག་ལ་དགོངས་སུ་གསོལ། བདག་མིང་འདི་ཞེས་དགྱི་བ་དུས་འདི་ནས་བཟུང་སྟེ། ཇི་སྲིད་འཚོའི་བར་དུ་རྐང་གཉིས་རྣམས་ཀྱི་མཆོག་སངས་རྒྱས་ལ་སྐྱབས་སུ་མཆིའོ། །འདོད་ཆགས་དང་བྲལ་བ་རྣམས་ཀྱི་མཆོག་ཆོས་ལ། ཚོགས་རྣམས་ཀྱི་མཆོག་དགེ་འདུན་ལ། ཞེས་ལན་གསུམ་གྱིས་བླང་ངོ༌། །སློབ་དཔོན་གྱིས་ཐབས་ཡིན་ནོ་དང་། སློབ་མས་ལེགས་སོ་བརྗོད་ཅིང་བསླབ་བྱ་བཤད་བར་བྱའོ། །བསླབ་བྱ་ནི། སྤྱིར་ཐོས་པའི་སའི་བསྡུ་བར། སྦྱོར་བས་དགེ་ བའི་རྟེན་སྒྲུབ་པ་དང་། དབང་པོ་མི་རྒོད་པར་བྱ་བ་དང༌། བསླབ་པའི་གཞི་བླང་བ་དང་། སེམས་ཅན་ལ་སྙིང་རྗེ་བར་བྱ་བ་དང༌། དུས་དུས་སུ་དཀོན་མཆོག་མཆོད་པར་བྱ་བ་ལ་བསླབ་པར་གསུངས་ལ། ཁྱད་པར་དུ་ཇོ་བོའི་ལུགས་ ཀྱིས་ཁྱད་པར་གྱི་བསླབ་བྱ་གསུམ། ཆ་མཐུན་གྱི་གསུམ། ཐུན་མོང་གི་ལྔ་སྟེ། བཅུ་གཅིག་ལ་བསླབ་པར་གསུངས་ཏེ། ཚངས་པ་ལ་སོགས་པ་འཇིག་རྟེན་པའི་ལྷ་ལ་ཕྱག་མི་འཚལ། །སེམས་ཅན་ལ་འཚེ་བ་སྤང༌། མུ་སྟེགས་ཅན་ལ་མི་བསྟེན་ པ་ནི་ཁྱད་པར་གྱི་བསླབ་བྱ་གསུམ་སྟེ། མྱང་འདས་ཀྱི་མདོར། གང་ཞིག་སངས་རྒྱས་སྐྱབས་སོང་བ། །དེ་ནི་ཡང་དག་དགེ་བསྙེན་ཏེ། །ནམ་དུ་ཡང་ནི་ལྷ་གཞན་ལ། །འདུད་པར་བྱེད་པ་མ་ཡིན་ནོ། །དམ་པའི་ཆོས་ལ་སྐྱབས་སོང་བ། །
Page: 140 འཚེ་ཞིང་གནོད་པའི་སེམས་དང་བྲལ། །དགེ་འདུན་ལ་ནི་སྐྱབས་སོང་ནས། །མུ་སྟེགས་ཅན་ལ་ཕྱོགས་མི་བྱ། །ཆ་མཐུན་གསུམ་ནི། སངས་རྒྱས་ཀྱི་རྟེན་ཅི་འདྲ་ན་ཡང་རུང་སྟེ་སྭ་ཚའི་ཆག་དུམ་གྱི་བར་ལ་གུས་པར་བྱ། ཆོས་མི་སྤང་ཞིང་ཡིག་ འབྲུ་རེ་ལའང་གུས་པ་སྐྱེད། རབ་ཏུ་བྱུང་བ་ལྟ་ཅི་སྨོས་ཏེ་ངུར་སྨྲིག་གི་ཚལ་བུ་འཛིན་པ་ལའང་སྟོན་པ་ལྟར་བལྟ་བར་བྱའོ། །ཐུན་མོང་གི་ལྔ་ནི། རྙེད་དཀའ་བས་ན་སྲོག་དང་གཙིགས་དང་བྱ་དགའི་ཆེད་དུའང་དཀོན་མཆོག་མི་སྤང༌། ན་ཚ་སྐྱིད་ སྡུག་ཅི་བྱུང་ཡང་མོ་བོན་མི་བྱ་བར་དཀོན་མཆོག་ལ་བློ་འགེལ། ལོངས་སྤྱོད་ཐམས་ཅད་ཀྱི་ཕུད་དབུལ། དུས་དང་དུས་སུ་མཆོད་བ་ལ་བསླབ་ཅིང་ཕྱོགས་གར་འགྲོ་ཡང་དེའི་སངས་རྒྱས་ལ་ཕྱག་བྱ། ཕན་ཡོན་རྗེས་སུ་དྲན་པས་ཉིན་ལན་གསུམ་ མཚན་ལན་གསུམ་དུ་སྐྱབས་འགྲོ་ལ་འབད་པར་བྱའོ། །ཕན་ཡོན་ནི། བསྡུ་བར། སྲུང་བ་ཆེན་པོ་དང་ལྡན་པ་དང༌། ལོག་པར་མོས་པའི་སྒྲིབ་པ་འཛད་པ་དང༌། སྐྱེས་བུ་དམ་པར་ཆུད་པ་དང༌། དཀར་པོའི་ལྷ་རྣམས་ཀྱི་ཡིད་དུ་འོང་བ་སྟེ་བཞི་དང་། བསོད་ ནམས་ཆེན་པོ་དང། དགའ་བ་དང་། ཏིང་ངེ་འཛིན་དང། རྣམ་དག་སྟེ་བཞི་འཐོབ་པར་གསུངས་ལ། ཇོ་བོས་བརྒྱད་དུ་གསུངས་ཏེ། ནང་པར་གཏོགས་དང་སྡོམ་པའི་རྟེན། །མི་སོགས་གནོད་པས་མི་ཚུགས་དང་། །སྡིག་པ་འཛད་དང་བསོད་ནམས་འཕེལ། ། ངན་སོང་མི་ལྟུང་ཁྱད་པར་ལམ། །བླ་མེད་བྱང་ཆུབ་འཐོབ་པར་འགྱུར། །ཞེས་ནང་པ་སངས་རྒྱས་པར་གཏོགས་པ་དང༌། སྡོམ་པ་ཐམས་ཅད་ཀྱི་རྟེན་དུ་འགྱུར་བ་དང༌། གཞན་གྱི་གནོད་པས་མི་ཚུགས་པ་དང༌། སྡིག་པ་ཐམས་ཅད་འདག་པ་དང༌། བསོད་ནམས་ ཆེར་འཐོབ་པ་དང༌། ཤི་འཕོས་ནས་མི་ཁོམ་པར་མི་ལྟུང་བ་དང༌། ལམ་ཁྱད་པར་ཅན་རྒྱུད་ལ་སྐྱེ་བ་དང༌། མཐར་མྱ་ངན་ལས་འདས་པ་འཐོབ་པར་འགྱུར་བ་སྟེ་བརྒྱད་དོ། །ཉམས་བའི་ཉེས་དམིགས་ནི། ཕན་ཡོན་ལས་ལྡོག་པ་སྟེ་སྐྱབས་མེད་པས་འཇིགས་
Page: 141 ༄༅། །ཅིང་ཡ་ང་། བྱིན་རླབས་མེད་པས་བྱ་བ་ལ་མཐུ་ཆུང་། རྟེན་མེད་པས་སྡོམ་པ་ཐམས་ཅད་གྱང་འགྱེལ་བའི་རི་བོ་ལྟར་འཇིག་པའོ། །ཉམས་ན་སླར་གསོ་བ་ནི། དཀོན་མཆོ་གི་རྟེན་ནམ་སློབ་དཔོན་ལ་ཕྱག་དང་མཆོད་བ་བྱས་ཏེ་སྔ་མ་ ལྟར་བླངས་བས་སོར་ཆུད་པ་སྟེ། གྲངས་ཚད་ཀྱི་རྣམ་པར་བཞག་བ་མེད་དོ། །གཉིས་པ་ཐེག་ཆེན་གྱི་སྐྱབས་འགྲོ་ནི། སྡོམ་ཚིག་སྔ་མ་བཞིན་ལས། རྒྱུའི་ཁྱད་པར་ནི། ཐེག་ཆེན་གྱི་རིགས་སད་ཅིང་གཙོ་བོར་སྙིང་རྗེ་དབང་གིས་ལེན་པ་སྟེ། རྒྱན་ལས། འདི་ནི་དེ་དངོས་འདོད་པས་ཁས་ལེན་དེ་ཡང་སྙིང་རྗེ་ལས་རིག་བྱ། ཞེས་སོ། །ཡུལ་ནི། སངས་རྒྱས་ཆོས་ཀྱི་སྐུ། ཆོས་ཐེག་ཆེན་གྱི་འགོག་ལམ། དགེ་འདུན་ཕྱིར་མི་ལྡོག་པའི་བྱང་ཆུབ་སེམས་དཔའ་སྟེ། དཀོན་མཆོག་གསུམ་རེ་རེ་ཡང་ཡོན་ཏན་དྲུག་ ལྡན་དུ་རྒྱུད་བླར་བཤད་པ་དེ་ལ། གནས་སྐབས་སུ་སྐྱབས་སུ་འགྲོ་ཞིང་། མཐར་ཐུག་གི་སྐྱབས་ཡུལ་ནི་ཆོས་ཀྱི་སྐུ་ཁོ་ན་སྟེ། སྐྱབས་ནི་སངས་རྒྱས་ཉག་གཅིག་ཡིན། །ཞེས་སོ། །དེ་དག་ནི་གཞན་རྒྱུད་ཀྱིས༌བསྡུས༌པ་ལ་སྐྱབས་སུ་འགྲོ་ བས་རྒྱུའི་སྐྱབས་འགྲོ་ཞེས་བྱ་ལ། བདག་ཉིད་སྐྱབས་ཡུལ་དེར་སྒྲུབ་པར་མོས་པ་ནི་འབྲས་བུའི་སྐྱབས་འགྲོ་སྟེ། དྲག་ཤུལ་ཅན་གྱིས་ཞུས་པའི་མདོ་ལས། ཇི་ལྟར་ན་སངས་རྒྱས་ལ་སྐྱབས་སུ་སོང་བ་ཡིན་ཞེ་ན། སངས་རྒྱས་ཀྱི་སྐུ་སྐྱེས་བུ་ཆེན་ པོའི་མཚན་སུམ་བཅུ་རྩ་གཉིས་ཀྱིས་བརྒྱན་པ་བསྒྲུབ་པར་བྱའོ་སྙམ་དུ་མངོན་པར་འདུ་བྱེད་དེ། དེ་ལྟར་ན་སངས་རྒྱས་ལ་སྐྱབས་སུ་སོང་བ་ཡིན་ནོ། །ཇི་ལྟར་ན་ཆོས་ལ་སྐྱབས་སུ་སོང་བ་ཡིན་ཞེ་ན། བདག་མངོན་པར་རྫོགས་པར་སངས་རྒྱས་ནས་ལྷ་ དང་མི་དང་ལྷ་མ་ཡིན་དུ་བཅས་པའི་འཇིག་རྟེན་ལ་ཆོས་ཀྱི་བགོ་བཤའ་བྱའོ་སྙམ་དུ་དྲན་པ་འཐོབ་སྟེ། དེ་ལྟར་ན་ཆོས་ལ་སྐྱབས་སུ་སོང་བ་ཡིན་ནོ། །ཇི་ལྟར་ན་དགེ་འདུན་ལ་སྐྱབས་སུ་སོང་བ་ཡིན་ཞེ་ན། དགེ་འདུན་གྱི་ཡོན་ཏན་སྒྲུབ་བའི་ཕྱིར་ཆོས་སྟོན་
Page: 142 ཏོ་སྙམ་དུ་དྲན་པ་འཐོབ་སྟེ། དེ་ལྟར་ན་དགེ་འདུན་ལ་སྐྱབས་སུ་སོང་བ་ཡིན་ནོ། །ཞེས་སོ། །འདི་ལྟར་ན་བྱང་ཆུབ་ཀྱི་སེམས་དང་། འབྲས་བུའི་སྐྱབས་འགྲོ་ནི་མིང་ཐ་དད་ཀྱི་མཚན་གཞི་ཐ་མི་དད་པར་ངེས་སོ། །བོད་མང་དག་རང་རྒྱུད་ལ་འབྱུང་འགྱུར་ལ་ སྐྱབས་སུ་འགྲོ་བ་འབྲས་བུའི་སྐྱབས་འགྲོ་ཞེས་ཟེར་མོད། དེ་ཉིད་སླར་དྲི་བར་བྱ་སྟེ་འབྱུང་འགྱུར་ལ་ཇི་ལྟར་སྐྱབས་སུ་འགྲོ། །བདག་རྒྱུད་ལ་མ་འོངས་པ་ན་དཀོན་མཆོག་གསུམ་འབྱུང་བས་དེ་ལ་བདག་སྐྱབས་སུ་མཆིའོ། །ཞེས་རྟོག་པ་འདི་མ་ཡིན་གྲང༌། དེ་ལྟ་ ན་ནི་ཞིང་འདིར་ཕྱིས་ལོ་ཏོག་སྐྱེ་བར་འགྱུར་བས་དེ་བཟའ་བར་བྱའོ། །ཞེས་ཞིང་འགྲམ་དུ་བཀྲེས་པར་སྒུག་པ་དང་ཁྱད་ཅི་ཞིག །དེས་ན་བདག་རྒྱུད་ཀྱི་ཁམས་བདེ་བར་གཤེགས་པའི་སྙིང་པོ་དེ་ཉིད་དྲི་མ་དང་བཅས་པའི་སངས་རྒྱས་ཡིན་ལ། དེ་ཉིད་འགོག་ལམ་ འབྱུང་རུང་གི་རྒྱུར་གནས་ཅིང་དྲི་མས་ཅུང་ཟད་དག་པ་ན་རྟེན་གྱི་གང་ཟག་དེ་དགེ་འདུན་དུ་བགྲང་བའི་ཕྱིར། དཀོན་མཆོག་གསུམ་གྱི་ངོ་བོར་གཟོད་མ་ནས་གནས་པར་ཤེས་པས། དེའི་དྲི་མ་སྦྱོང་བ་ལ་འབད་པར་བྱེད་ཀྱི་དབུལ་པོས་ཁང་འོག་གི་གཏེར་རྙེད་པ་ན། བུ་ལོན་མི་ལེན་པ་ལྟར་གཞན་ནས་མི་ཚོལ་བའི་ངེས་པ་སྐྱེས་པ་འདི་ལ་འབྲས་བུའི་སྐྱབས་འགྲོར་གདགས་སོ། །ངོ་བོ་ནི། ཀུན་འགྲོའི་དོན་དང༌། ཁས་ལེན་གྱི་དོན་དང་། རྟོགས་པ་དང༌། ཟིལ་གནོན་ཏེ་དོན་བཞི་ལྡན་གྱི་སྐྱབས་འགྲོ་སྟེ། རྒྱན་ལས། ཀུན་ཏུ་ འགྲོ་དང་ཁས་ལེན་རྟོགས་དང་ཟིལ་གནོན་པར། །དབྱེ་བའི་རང་བཞིན་དོན་རྣམ་བཞི་ཡི་ཁྱད་པར་གྱིས། །ཐེག་བ་མཆོག་ཕྱིར་དཀོན་མཆོག་སྐྱབས་རབ་སོང་བ་གང་། །དེ་ཉིད་སྐྱབས་སུ་སོང་བ་རྣམས་ཀྱི་མཆོག་ཞེས་བྱ། །ཅེས་དང་། དེའི་ཕན་ཡོན་ ཡང་། གང་ཕྱིར་དང་པོར་ངེས་པར་བྱ་བ་འདི་དཀའ་སྟེ། །དེ་ནི་བསྐལ་པ་སྟོང་ཕྲག་དུ་མར་སྒྲུབ་པར་དཀའ།་།གང་ཕྱིར་གྲུབ་ན་སེམས་ཅན་ཕན་བྱེད་དོན་ཆེན་ཏེ། །དེ་ཕྱིར་ཐེག་ཆེན་འདི་ལ་སྐྱབས་དོན་མཆོག་ཡིན་ནོ། །ཞེས་སོ། །དེ་ཡང་སེམས་ཅན་
Page: 143 ༄༅། །ཐམས་ཅད་བསྒྲལ་བ་དང་། ཐེག་པ་དང་། ལམ་ཐམས་ཅད་ཀྱི་མཐར་འབྱིན་པ་དང༌། འཁོར་འདས་རང་བཞིན་གཅིག་པར་ཤེས་པ་ནི་ཀུན་འགྲོའི་དོན་ཏེ། གང་ཞིག་སེམས་ཅན་ཐམས་ཅད་བསྒྲལ་བར་ཞུཌ་པ་དང༌། ཐེག་ པ་ཡེ་ཤེས་ཀུན་ཏུ་འགྲོ་བ་མཁས་པར་ལྡན། །གང་ཞིག་མྱ་ངན་འདས་ལ་འཁོར་ཞི་རོ་གཅིག་པ། །དེ་འདྲའི་བློ་ལྡན་དེ་འདིར་ཀུན་འགྲོར་ཤེས་པར་བྱ། །ཞེས་སོ། །སྤྲོ་བས་བྱང་ཆུབ་ཆེན་པོ་དོན་དུ་གཉེར་བ་དང༌། དཀའ་བ་སྤྱོད་པ་ལ་ཇི་མི་ སྙམ་པ་དང༌། སངས་རྒྱས་ཐམས་ཅད་དང་མཉམ་པ་ཉིད་སྒྲུབ་པར་མོས་པ་ནི་ཁས་ལེན་གྱི་དོན་ཏེ། གང་ཞིག་དགའ་བ་མང་པོས་བྱང་ཆུབ་མཆོག་དོན་གཉེར། །གར་ཞིག་སྐྱོ་བ་མེད་པར་དཀའ་བ་ཡང་དག་སྤྱོད། །གང་ཞིག་རྣམ་སངས་རྒྱས་ ནས་སངས་རྒྱས་ཀུན་མཉམ་འགྱུར། །བློ་ལྡན་དེ་ནི་ཁས་ལེན་མཆོག་ཏུ་ཤེས་པར་བྱ། །ཞེས་སོ། །ཡང་བྱང་ཆུབ་ཀྱི་སེམས་ཀྱི་ས་བོན་དང་། ཤེས་རབ་ཀྱི་མ་དང་། སྙིང་རྗེའི་མ་མས་ཟིན་པས་སངས་རྒྱས་ཀྱི་སྲས་སུ་སྐྱེས་པ་ཡང་ཁས་ལེན་གྱི་དོན་ གཅིག་ཤོས་ཏེ། སངས་རྒྱས་སྲས་ཀྱི་མཆོག་ཏུ་ལེགས་པར་གང་སྐྱེས་པ། །སེམས་དང་ཤེས་རབ་དག་ནི་ཚོགས་ལྡན་སྙིང་རྗེ་འདིའི། །ས་བོན་མ་དང་མངལ་གནས་མ་མ་མཚུངས་པ་མེད། །བློ་ལྡན་དེ་ནི་ཁས་ལེན་མཆོག་ཏུ་ཤེས་པར་བྱ། ། ཞེས་སོ། །སྐྱེས་བུ་ཆེན་པོའི་མཚན་དང་སྟོབས་དང་ཞི་བ་ཐོབ་པ་དང་སེམས་ཅན་གདུལ་བའི་ཐབས་ཤེས་པ་དང་། འོད་ཟེར་ཆེན་པོས་དབང་བསྐུར་བས་ཆོས་ལ་དབང་ཐོབ་པ་དང་། འཁོར་གྱི་དཀྱིལ་འཁོར་སྟོན་པ་དང་། བསླབ་པ་བཅའ་བ་དང་ཕ་རོལ་ཏུ་ ཕྱིན་པ་ཀུན་གྲུབ་པ་དང༌། བྱང་ཆུབ་ཆེན་པོ་འབའ་ཞིག་པར་གྱུར་བ་དང་། སྐུ་གསུང་ཐུགས་ཀྱི་གསང་བ་གསུམ་འཛིན་པ་དང་། གཞན་དོན་ནམ་མཁའ་ལྟ་བུ་རྒྱུན་མི་འཆད་པ་དང་། བདེ་བ་དང་རྟག་པའི་སྐུ་ཐོབ་ཅིང་སྲིད་ཞི་ལས་རྣམ་པར་གྲོལ་བ་རྟོགས་པའི་
Page: 144 དོན་དང༌། ཉན་རང་དུ་བཅས་པའི་དགེ་བ་ཟིལ་གྱིས་མནན་ནས་བསྔོ་བ་ཟིལ་གནོན་གི་དོན་ཏེ། སྣ་ཚོགས་མཚན་རྣམས་ཀུན་གྱིས་དེ་ལུས་བརྒྱན། །སེམས་ཅན་ཐམས་ཅད་སྨིན་པར་བྱེད་སྟོབས་ཐོབ། །སངས་རྒྱས་བདེ་ཆེན་མཐའ་ཡས་ ཞི་བ་རྙེད། །སེམས་ཅན་ཀུན་སྐྱབས་ཐབས་ཆེན་བཤམས་པ་ཤེས། །སངས་རྒྱས་ཀུན་གྱིས་འོད་ཟེར་ཆེན་པོས་དབང་བསྐུར་བྱིན། །དེ་ནི་ཆོས་ལ་དབང་བ་ཀུན་དང་ཡང་དག་ལྡན། །སངས་རྒྱས་འཁོར་གྱི་དཀྱིལ་འཁོར་སྟོན་པའི་རྣམ་པ་ཤེས། ། བསླབ་པ་བཅའ་བས་ཚར་གཅོད་ཕན་འདོགས་བྱེད་ལ་བརྩོན། །བློན་པོ་ཆེན་བོ་ལྟ་བུར་ཕ་རོལ་ཕྱིན་ལ་འཇུག་པའི་ཕྱིར། །བྱང་ཆུབ་ཆེན་པོའི་ཕྱོགས་མཐུན་བརྔལ་ལ་རྟག་ཏུ་སྤྱན་འབྱེད་ཕྱིར། །གསང་བའི་གནས་ནི་རྣམ་གསུམ་རྟག་ཏུ་ཡང་ དག་འཛིན་པའི་ཕྱིར། །སེམས་ཅན་མང་དོན་རྟག་ཏུ་རྒྱུན་མི་འཆད་པར་རབ་བྱེད་ཕྱིར། །བསོད་ནམས་ཕུང་ཚན་སྲིད་གསུམ་བླ་མ་སྲིད་པའི་བདེ་བ་དང༌། །སྡུག་བསྔལ་ཕུང་པོ་ཆེན་པོ་རབ་ཞི་བློ་མཆོག་བདེ་བ་དང༌། །ཆོས་མང་ཕུང་པོ་མཆོག་དང་ རྟག་པའི་སྐུ་སྟེ་དགེ་བའི་ཚོགས། །བག་ཆགས་ཟློག་ཅིང་སྲིད་དང་ཞི་ལས་རྣམ་པར་གྲོལ་བ་འཐོབ། །བློ་ལྡན་ཉན་ཐོས་ཚོགས་བཅས་དགེ་བ་རྒྱ་ཆེན་དོན་ཆེན་དང་། །མཐའ་ཡས་རྟག་རྒྱུན་མི་འཆད་ཟད་མི་ཤེས་པས་ཟིལ་གྱིས་གནོན། ། ཞེས་སོ། །ཡང་ན་སངས་རྒྱས་འཐོབ་པར་འདོད་པ་ངོ་བོའི་དོན། སྙིང་རྗེ་ཆེན་པོ་རྒྱུའི་དོན། ཀུན་མཁྱེན་ལ་དམིགས་པ་འབྲས་བུའི་དོན། ཕན་བདེ་སྒྲུབ་པ་ལ་སྐྱོ་བ་མེད་པ་ལས་ཀྱི་དོན། ཐེག་པ་ཐམས་ཅད་ཀྱི་ཡོན་ཏན་མ་ལུས་པར་སྒྲུབ་པ་ལྡན་པའི་དོན་། བརྡ་དང་ཆོས་ ཉིད་ཀྱིས་ཐོབ་པ་སོགས་དབྱེ་བ་མཐའ་ཡས་པ་འཇུག་པའི་དོན་ཏེ། དོན་དྲུག་ལྡན་གྱི་སྐྱབས་འགྲོ་ཞེས་ཀྱང་བྱ་སྟེ། འདི་ནི་དེ་དངོས་འདོད་པས་ཁས་ལེན་དེ་ཡང་སྙིང་རྗེ་ལས་རིག་བྱ། །དེ་ལས་རྣམ་པ་ཀུན་མཁྱེན་ཕན་དང་བདེ་བྱེད་དཀའ་ལ་སྐྱོ་བ་མེད། །
Page: 145 ༄༅། །ངེས་པར་འབྱུང་ལ་ཐེག་པ་ཀུན་གྱིས་བརྟོན་པའི་ཡོན་ཏན་རྟག་ཏུ་ལྡན། །བརྡ་དང་ཆོས་ཉིད་ཐོབ་པ་བློ་ལྡན་རྣམས་ཀྱི་སྐྱབས་འགྲོ་འདི་མཆོག་ཡིན། །ཞེས་སོ། །དབྱེ་ན། རྒྱུ་དང༌། འབྲས་བུའི་སྐྱབས་འགྲོ་གཉིས་ཏེ་བཤད་ཟིན་
ལ། ཡང་ན་རགས་པ་བརྡ་ལས་བྱུང་བ་དང་། ཕྲ་བ་ཆོས་ཉིད་ཀྱིས་ཐོབ་པ་གཉིས་ཏེ། དང་པོ་ནི། ཆོ་གས་ཕོག་བའམ་ལུས་ངག་གི་རྣམ་རིག་ལས་སྐྱེས་པ་ཡིན་ལ། ཕྱི་མ་ནི་རིགས་སད་སྟོབས་ཀྱིས་སམ་དཀོན་མཆོག་གི་བྱིན་རླབས་སམ་སྒོམ་སྟོབས་ཀྱིས་ཐོབ་པའོ། །
དེ་ཉིད་ལ་ཀུན་རྫོབ་དང་། དོན་དམ་པའི་སྐྱབས་འགྲོ་ཞེས་ཀྱང་བྱ་སྟེ། བརྡ་ལས་བྱུང་བ་ནི་སླུ་བའི་ཆོས་ཅན་ཡིན་ལ། ཆོས་ཉིད་ཀྱིས་ཐོབ་པ་ནི་དོན་དམ་པའི་ངོ་བོ་ཉིད་ཡིན་པའི་ཕྱིར། ཆོས་ཉིད་ཀྱིས་ཇི་ལྟར་འཐོབ་ཅེ་ན། ཆོས་ཐམས་ཅད་ཀྱི་རང་བཞིན་ཇི་ལྟ་བ་བཞིན་
སྒྲོ་སྐུར་མེད་པར་མཐོང་བ་སྟེ། མ་དྲོས་པས་ཞུས་པའི་མདོ་ལས། རིགས་ཀྱི་བུ། གང་གི་ཕྱིར་བྱང་ཆུབ་སེམས་དཔའས་ཆོས་ཐམས་ཅད་བདག་མེད་པ་དང་། སེམས་ཅན་མེད་པ་དང༌། སྲོག་དང༌། གང་ཟག་མེད་པར་ཤེས་ནས་གཟུགས་སུ་མ་ཡིན། མཚན་མར་མ་ཡིན། ཆོས་
སུ་མ་ཡིན་པར་དེ་བཞིན་གཤེགས་པ་ཡང་དག་པར་རྗེས་སུ་མཐོང་བ་དེ་ལྟ་བུ་ནི་ཟང་ཟིང་མེད་པའི་སེམས་ཀྱིས་སངས་རྒྱས་ལ་སྐྱབས་སུ་སོང་བ་ཡིན་ནོ། །དེ་བཞིན་གཤེགས་པའི་ཆོས་ཉིད་གང་ཡིན་པ་དེ་ནི་ཆོས་ཀྱི་དབྱིངས་སོ། །ཆོས་ཀྱི་དབྱིངས་གང་
ཡིན་པ་དེ་ནི་ཐམས་ཅད་ཀྱི་རྗེས་སུ་སོང་བ་ཞེས་བྱ་སྟེ། དེ་ལྟར་ཆོས་ཐམས་ཅད་ཆོས་ཀྱི་དབྱིངས་ཀྱི་རྗེས་སུ་སོང་བར་མཐོང་བ་དེ་ལྟ་བུ་ནི་ཟང་ཟིང་མེད་པའི་སེམས་ཀྱིས་ཆོས་ལ་སྐྱབས་སུ་སོང་བ་ཡིན་ནོ། །གང་ཆོས་ཀྱི་དབྱིངས་འདུས་མ་བྱས་པར་རབ་ཏུ་
སྒོམ་པ་དང༌། ཉན་ཐོས་ཀྱི་ཐེག་པ་ལ་འདུས་མ་བྱས་པ་སྟོན་པ་དང་། འདུས་བྱས་དང༌། འདུས་མ་བྱས་གཉིས་སུ་མེད་པ་འདི་ལྟ་བུ་ནི་ཟང་ཟིང་མེད་པའི་སེམས་ཀྱིས་དགེ་འདུན་ལ་སྐྱབས་སུ་སོང་བ་ཡིན་ནོ། །ཞེས་སོ། །དུས་ནི། བླ་ན་མེད་པའི་བྱང་ཆུབ་མ་ཐོབ་
Page: 146 ཀྱི་བར་ཏེ་སེམས་ཅན་ཐམས་ཅད་ཇི་སྲིད་གནས་པ་དང༌། ནམ་མཁའ་ཇི་སྲིད་གནས་པའི་བར་ཏེ་འདོར་བའི་དུས་མེད་དོ། །ངེས་ཚིག་ནི། རྒྱན་ལས། འཚེ་བ་དག་ནི་ཐམས་ཅད་དང༌། །ངན་སོང་དང་ནི་ཐབས་ཡིན་དང་། །འཇིག་ཚོགས་ཐེག་པ་དམན་དག་
ལས། །སྐྱོབ་ཕྱིར་སྐྱབས་ཀྱི་དམ་པ་ཡིན། །ཞེས༌ལྔ༌ལས༌སྐྱོབ་བར༌བཤད༌པའི༌དང༌པོ་བཞི་ལས། ཐུན་མོང་གི་སྐྱབས་འགྲོས་ཀྱང་སྐྱོབ་ལ་འདིར་ནི་གཙོ་བོར་ཐེག་དམན་ལས་སྐྱོབ་པ་ཡིན་ནོ། །ཆོ་ག་ལ་ནི། ཐེག་ཆེན་གྱི་སློབ་དཔོན་ནམ་མེད་ན་སྐུ་གཟུགས་
སམ་སངས་རྒྱས་རྣམས་ཡིད་ཀྱིས་བསམས་པས་ཀྱང་རུང་སྟེ། དེའི་སྤྱན་སྔར་ཕྱག་མཆོད་བྱས་ནས། ཕྱོགས་བཅུའི་སངས་རྒྱས་དང༌། བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། སློབ་དཔོན་ཡོད་ན་སློབ་དཔོན་ནམ་བཙུན་པའམ་
རིགས་ཀྱི་བུ་བདག་ལ་དགོངས་སུ་གསོལ། བདག་མིང་འདི་ཞེས་བགྱི་བ་སེམས་ཅན་ཐམས་ཅད་སྐྱབ་པའི་ཆེད་དང༌། སངས་རྒྱས་ཀྱི་གདུང་རྒྱུན་མི་འཆད་པར་བྱ་བའི་སླད་དུ་དུས་འདི་ནས་བཟུང་སྟེ། བྱང་ཆུབ་སྙིང་པོ་ལ་མཆིས་ཀྱི་བར་དུ་ཡང་དག་པར་
རྫོགས་པའི་སངས་རྒྱས་རྐང་གཉིས་ཀྱི་མཆོག་ལ། སྐྱབས་སུ་མཆི་སྟེ་ཐུགས་རྗེ་ཆེན་པོ་དང་ལྡན་པ་ཐམས་ཅད་མཁྱེན་པ་ཐམས་ཅད་གཟིགས་པ་འཇིགས་པ་ཐམས་ཅད་དང༌བྲལ་བ་སྐྱེས་བུ་ཆེན་པོ་སྐྱེས་བུ་ཁྱུ་མཆོག་བསམ་གྱིས་མི་ཁྱབ་པའི་སྐུ་བླ་ན་
མེད་པའི་སྐུ་ཆོས་ཀྱི་སྐུ་མངའ་བ་ལ་སྐྱབས་སུ་མཆིའོ། །ཆོས་འདོད་ཆགས་དང་བྲལ་བའི་མཆོག་ལ་སྐྱབས་སུ་མཆི་སྟེ། བླ་ན་མེད་པ་དེ་བཞིན་གཤེགས་པ་ལ་མངའ་བ་ཞི་བ༌ཆོས༌ཀྱི༌སྐུ༌སོ༌སོ༌རང༌གིས༌རིག༌པ༌ལ༌སྐྱབས་སུ་མཆིའོ། །དགེ་
འདུན་དུལ་བ་ཚོགས་ཀྱི་མཆོག་ལ་སྐྱབས་སུ་མཆི་སྟེ། ཕྱོགས་བཞིའི་འཕགས་པ་ཕྱིར་མི་ལྡོག་པའི་བྱང་ཆུབ་སེམས་དཔའ་ཆེན་པོའི་དགེ་འདུན་ལ་སྐྱབས་མཆིའོ། །ཞེས་ལན་གསུམ་དང་ཐབས་ལེགས་བྱ། རྗེས་སུ་བསླབ་བྱ་བཤད་དོ། །
Page: 147 ༄༅། །བསླབ་བྱ་ནི། སྔ་མའི་སྟེང་དུ་དགེ་བ་ཐམས་ཅད་གཞན་དོན་དུ་བྱང་ཆུབ་ཏུ་བསྔོ། ཉན་རང་གི་ཞི་བདེ་དོན་དུ་གཉེར་བའི་བློ་སྤང་། སེམས་ཅན་ལ་ཕན་བདེ་ཅི་ཐོགས་ལ་འབད་བར་བྱའོ། །ཕན་ཡོན་ནི། ཐེག་ཆེན་ པར་ཆུད་པས་ཉན་རང་ལས་ཀྱང་བསམ་པས་ཁྱད་པར་དུ་འཕགས་ཤིང༌། ཡེ་ཤེས་ཁྱད་པར་ཅན་དང༌། བླ་ན་མེད་པའི་བྱང་ཆུབ་འཐོབ་པར་འགྱུར་བ་སྟེ། རྒྱན་ལས། སྐྱབས་སུ་འགྲོ་བ་འདིར་སོང་དོན་ཆེན་ཏེ། །དེ་ནི་ཚད་མེད་ཡོན་ཏན་ཚོགས་ འཕེལ་འགྱུར། །འགྲོ་བ་འདི་ལ་སྙིང་རྗེའི་བསམ་པས་ཁྱབ། །མཚུངས་མེད་འཕགས་ཆེན་ཆོས་ཀྱང་རྒྱས་པར་བྱེད། །ཅེས་སོ། །ཉམས་པའི་ཉེས་དམིགས་ནི། གཞན་དོན་གྱི་བློ་ཉམས་ན་ཉན་རང་དུ་ལྟུང་ཞིང་སྐྱབས་འགྲོ་བཏང་ན་སྲིད་ པར་ལྟུང་བའོ། །ཉམས་ན་སླར་གསོ་བ་ནི། སློབ་དཔོན་ནམ་རྟེན་ནམ་དཀོན་མཆོག་ཡིད་ཀྱི་ཡུལ་དུ་དམིགས་ཏེ། བླངས་པས་སོར་ཆུད་ལ་སྤྱིར་ཐེག་ཆེན་གྱི་གཉེན་པོ་ནི། མི་མཐུན་པའི་བློ་སྐྱེས་པའི་དེ་མ་ཐག་སླར་ལྡོག་ཅིང་གཉེན་པོ་ལ་བསྟེན་པ་ཁོ་ན་ གཙོ་ཆེའོ། །གཉིས་པ་སྐྱབས་འགྲོ་ལ་གཞུང་དོན་ནི། བྱང་ཆུབ་སྙིང་པོར་མཆིས་ཀྱི་བར། །སངས་རྒྱས་རྣམས་ལ་སྐྱབས་སུ་མཆི། །ཆོས་དང་བྱང་ཆུབ་སེམས་དཔའ་ཡི། །ཚོགས་ལའང་དེ་བཞིན་སྐྱབས་སུ་མཆི། །ཞེས་གསུངས་ཏེ། བྱང་ཆུབ་ སྙིང་པོར་མཆིས་ཀྱི་བར་ཏེ་དུས་ཀྱི་ངེས་བཟུང་ངོ་། །ཐེག་ཆེན་གྱི་དཀོན་མཆོག་གསུམ་ནི་ཡུལ་ངེས་བཟུང་དུ་བྱ་བ་སྟེ་བདག་ཉིད་དང་། དགོས་པ་ཤུགས་ལ་འཕངས་སོ། །འགྲེལ་ཆེན་ལས། སྙིང་པོའི་སྒྲ་འདི་ནི་སྙིང་པོའི་ཚིག་གི་སྟེ་འོ་མའི་སྙིང་པོར་ མར་གྱི་སྙིང་པོ་ཞེས་བྱ་བ་བཞིན་ནོ། །དེ་ལྟར་ན་ཇི་སྲིད་དུ་བྱང་ཆུབ་ཀྱི་སྙིང་པོ་ཡང་དག་པར་རྫོགས་པའི་བྱང་ཆུབ་མ་ཐོབ་ཀྱི་བར་དུ་ཞེས་པའི་དོན་ནོ། །སྐྱབས་ཀྱི་དོན་ནི་སྐྱོབ་པའི་དོན་ཡིན་ལ། མཆི་བ་ནི་དེའི་བཀའ་ཡོངས་སུ་སྐྱོང་བ་ཡིན་ཏེ་གང་ཞིག་གང་ལ་
Page: 148 སྐྱབས་སུ་འགྲོ་བ་དེ་ནི། དེའི་བཀའ་ལས་འདའ་བ་མ་ཡིན་པའི་དོན་ནོ། །ཞེས་སོ། །གསུམ་པ་སྡིག་བཤགས་ལ། སྤྱི་གཞུང་གཉིས་ལས། དང་པོ་ནི། གང་སྦྱང་བའི་སྡིག་པ་ནི། དུག་གསུམ་གྱིས་ཀུན་ནས་བསླང་སྟེ་བཅས་རང་གི་ཁ་ན་མ་ཐོ་བ་བགྱིས་པའམ།
བགྱིད་དུ་བསྩལ་བའམ། བགྱིད་པ་ལ་རྗེས་སུ་ཡི་རང་བ་ལས་བྱུང་བ་མངོན་མཐོ་དང་ངེས་ལེགས་ལ་སྒྲིབ་པར་བྱེད་པའི་ལས་ནི་འདིར་གང་བཤགས་པར་བྱ་བ་མི་དགེ་བའི་ལས་ཀྱི་མཚན་ཉིད་དོ། །དེ་ཡང་དུག་གསུམ་ནི་ཀུན་སློང་སྟེ། །འདོད་ཆགས་
ཞེ་སྡང་གཏི་མུག་གསུམ། །དེས་བསྐྱེད་ལས་ནི་མི་དགེ་བ། །ཞེས་པས་དུག་གསུམ་གྱིས་ཀུན་ནས་བསླང་ན་རྣམ་པ་དགེ་བར་སྣང་ཡང་ངོ་བོ་མི་དགེ་བ་ཉིད་དོ། །བཅས་པ་ནི་སྡོམ་པ་གང་བླངས་པ་དང་འགལ་བའི་ཆ་རྣམས་ཡིན་ལ། རང་བཞིན་
ནི་སྡོམ་པ་མ་བླངས༌པར༌སྦྱང༌པའི༌མི་དགེ་བ་བཅུའོ། །ཁ་ན་མ་ཐོ་བ་ནི་བྱ་བར་མི་རིགས་པའི་ཆ་ནས་དེ་སྐད་བརྗོད་དོ། །བགྱིས་པ་དང༌། བགྱིད་དུ་བསྩལ་བ་དང༌། བགྱིད་པ་ལ་རྗེས་སུ་ཡིི་རང་བ་ནི་འབྲས་བུ་མཚུངས་པ་སྟེ། དམག་ལ་སོགས་
པར་དོན་གཅིག་ཕྱིར། །ཐམས་ཅད་བྱེད་པ་པོ་བཞིན་ལྡན། །ཞེས་སོ། །བྱང་ཆུབ་སེམས་དཔའས་སེམས་ཅན༌ཐམས༌ཅད༌གྱི༌སྡིག༌པ༌ཡང༌། བདག་ཉིད་ཀྱིས་བསྡུས་ནས་བཤགས་བར་བྱ་སྟེ། རྒྱལ་པོ་མ་སྐྱེས་དགྲས། བདག་སེམས་ཅན་ཐམས་ཅད་
ཀྱི་ནོངས་པ་ཡང་འཆགས་པར་བགྱིའོ། །ཞེས་གསོལ་པ་ན། སྟོན་པས། རྒྱལ་པོ་ཆེན་པོ་ཁྱེད་རང་ཉིད་ཀྱི་ཉེས་པ་འཆགས་པར་མ་ཟད། སེམས་ཅན་ཐམས་ཅད་ཀྱི་ནོངས་པ་འཆགས་པར་བྱེད་པ་ནི། རྒྱལ་པོ་ཆེན་པོ་ཁྱོད་ཡང་ལེགས་སོ། །ཞེས་བཀའ་བསྩལ
་བའི་ཕྱིར་རོ། །སྦྱོང་བྱེད་ནི། སྟོབས་བཞི་སྟེ། ཆོས་བཞི་བསྟན་པའི་མདོ་ལས། བྱམས་པ་བྱང་ཆུབ་སེམས་དཔའ་ཆོས་བཞི་དང་ལྡན༌ན༌སྡིག༌པ༌བྱས༌ཤིང༌བསགས༌པ་ཟིལ་གྱིས་གནོན་པར་འགྱུར་རོ། །བཞི་གང་ཞེ་ན། རྣམ་པར་སུན་འབྱིན་པའི་སྟོབས་
Page: 149 ༄༅། །དང༌། གཉེན་པོ་ཀུན་ཏུ་སྤྱོད་པའི་སྟོབས་དང། སོར་ཆུད་པར་བྱེད་པའི་སྟོབས་དང༌། རྟེན་གྱི་སྟོབས་སོ། །དེ་ལ་དང་པོ་ནི། མི་དགེ་བའི་ལས་བྱས་ནས་དེ་ལ་འགྱོད་པ་མང་བ་ཡིན་ནོ། །གཉིས་པ་ནི། མི་དགེ་བའི་ལས་བྱས་ཀྱང་དགེ་བའི་ ལས་ལ་ཤིན་ཏུ་བརྩོན་པའོ། །གསུམ་པ་ནི། སྡོམ་པ་ཡང་དག་པར་བླངས་ནས་སྡིག་པ་མི་བྱེད་པའི་སྡོམ་པ་ཐོབ་པའོ། །བཞི་པ་ནི། སངས་རྒྱས་དང༌། ཆོས་དང༌། དགེ་འདུན་ལ་སྐྱབས་སུ་འགྲོ་བ་དང༌། བྱང་ཆུབ་ཀྱི་སེམས་མི་གཏོང་བ་སྟེ། ཞེས་དང༌། ཤར༌ནས༌ ནུབ་ཀྱི་རྒྱ་མཚོ༌ལ་ཐུག་པར་ཆུ་བོ་ཆེན་པོ་ཕ་མཐའ་མི་མངོན་པ་ཞིག་དྲག་པོར་འབབ་ལ། དེ་བཞིན་དུ་ཕྱོགས་གསུམ་ག་ལས་འབབ་ན་བྱེ་མའི་ཕུང་པོ་དེ་ཆུ་བོ་གཅིག་གིས་ཀྱང་རྨེག་མེད་པར་བྱེད་ན། བཞིས་ལྟ་ཅི་སྨོས་པའི་དཔེས་བསྟན་ཏོ། །བཤགས་ཚུལ་ནི། སྐྱེ་བོ་མང་པོ་འདུས་པ་དང་ཡུལ་ཁྱད་པར་ཅན་གྱི་སྤྱན་སྔར་བདག་གིས་མི་བྱ་བ་བྱས་སོ། །ཞེས་འགྱོད་པའི་སྨྲེ་སྔགས་དང་བཅས་ཏེ་སྒྲོག་པ་མཐོལ་བ་དང༌། སྔར་བྱས་པ་ལ་ཁོང་དུ་དུག་འཐུངས་པ་ལྟ་བུའི་འགྱོད་པ་བསྐྱེད་ནས་ད་ནི་སྲོག་ལ་བབ་ཀྱང་མི་བྱ་བར་ཁས་ལེན་ པ་ནི་སྟོབས་གཉིས་ཀྱི་སྒོ་ནས་བཤགས་པ་དངོས་ཡིན་ལ། སྐྱབས་འགྲོ་དང་བྱང་སེམས་འཛིན་པ་རྟེན་གྱི་སྟོབས་དང་། སྡིག་པའི་གཉེན་པོར་དགེ་བ་སྒྲུབ་པ་གཉེན་པོའི་སྟོབས་ལག་ཏུ་བླང་ངོ་། །གཉེན་པོ་ཇི་ལྟ་བུ་ཞེ་ན། སྡིག་པའི་གཉེན་པོར་དགེ་བ་སྤྱོད་པ་སྟེ། མངོན་པ་ཀུན་བཏུས་ལས། མི་མཐུན་པའི་ཕྱོགས་ཀྱི་ལས་ལས་ནི་གཉེན་པོའི་ལས་སྟོབས་དང་ལྡན་པར་ལྟ་སྟེ། མི་མཐུན་པའི་ཕྱོགས་ཀྱི་འབྲས་བུས་འཕངས་སུ་ཟིན་ཡང་གཉེན་པོའི་སྟོབས་ཀྱིས་གཞན་དུ་སྒྱུར་བར་བྱེད་པའི་ཕྱིར་རོ། །ཞེས་སོ། །དེ་ཡང་ དེ་བཞིན་གཤེགས་པའི་མཛོད་ལས་ནི། སྟོང་པ་ཉིད་བསྒོམས་པས་སྡིག་པ་འབྱང་བར་གསུངས་སོ། །རྡོ་རྗེ་གཅོད་པ་ལས། མདོ་སྡེ་ཟབ་མོ་བཏོན་པས་དང༌། དམ་ཚིག་གསུམ་བཀོད་དང༌། དཔུང་བཟང་གི་རྒྱུད་ལས། བཟླས་པས་དང༌། མེ་ཏོག་བརྩེགས་
Page: 150 པའི་གཟུངས་ལས། དེ་བཞིན་གཤེགས་པའི་མཆོད་རྟེན་མཆོད་པས་དང༌། དེ་བཞིན་གཤེགས་པའི་སྐུ་གཟུགས་ཀྱི་ལེའུ་ལས། སྐུ་གཟུགས་བཞེངས་པས་སྡིག་པ་འདག་པར་གསུངས་སོ། །གཉེན་པོ་དེ་ཡང་ སྡིག་པ་ཇི་སྙེད་བྱས་པ་དེ་སྙེད་བྱ་དགོས་ སམ་ཞེ་ན་མ་ཡིན་ཏེ། མྱ་ངན་ལས་འདས་ཆེན་གྱི་མདོ་ལས། དགེ་བ་གཅིག་གིས་ཀྱང་སྡིག་པ་མང་པོ་འཇོམས་ཏེ། ཞེས་དང༌། རྡོ་རྗེ་ཆུང་ངུས་རི་རབ་བམ་མེ་ཆུང་ངུས་རྩྭ་ཤིང་ངམ། དུག་ཆུང་ངུས་སེམས་ཅན་འཇོམས་པ་ལྟར༌དགེ་བ་ཆུང༌ངུས༌ཀྱང༌སྡིག༌པ་ཆེན་ པོ་འཇོམས་པས་ན་དོན་དུ་གཉེར་བ་ཆེན་པོ་ཉིད་དོ། །ཞེས་སོ། །ཕན་ཡོན་ནི། བྱམས་པ་སེང་གེ་སྒྲའི་མདོ་ལས། མི་ཤེས་པས་ནི་གང་བྱས་པའི། །སྡིག་པའི་ལས་ནི་བཤགས་པར་དགྱི། །མཁས་པས་ཉེས་པ་བཤགས་ན་ནི། །ལས་དང་ ལྷན་ཅིག་མི་གནས་སོ། །ཞེས་དང༌། གསེར་འོད་ལས། གང་གིས་བསྐལ་བ་སྟོང་རྣམས་སུ། །སྡིག་པ་ཤིན་ཏུ་མི་བཟད་བགྱིས། །ལན་གཅིག་རབ་ཏུ་བཤགས་པ་ཡིས། །དེ་དག་ཐམས་ཅད་བྱང་བར་འགྱུར། །ཞེས་གསུངས་ཅིང་། དེ་ཡང་སུན་འབྱིན་པའི་སྟོབས་ཀྱིས་སྡིག་པ་འདག་པ་ནི། ཁ་དྲག་གི་བུ་ལོན་མ་ཁོར་བ་ལ་ཞུ་བ་བྱས་པ་ལྟ་བུ། གཉེན་པོའི་སྟོབས་ཀྱིས་འདག་པ་མི་གཙང་བའི་འདམ་དུ་ཆུད་པ་ཕྱུང་ནས་བཀྲུས་པ་ལྟ་བུ། ཉེས་པ་ལས་ཟློག་པའི་སྟོབས་ཀྱིས་འདག་ པ་ཆུ་རྒྱུན་གནོད་པ་ཅན་གྱི་འོལ་ཁ་བསྒྱུར་བ་ལྟ་བུ། རྟེན་སྐྱབས་སེམས་ཀྱིས་འདག་པ་ཁ་ཉེན་གྱིས་ཁ་བཙན་ལ་འཇུས་པའམ་དུག་གི་གཉེན་པོར་སྨན་བསྟེན་པ་ལྟ་བུ་སྟེ། གཅུང་དགའ་བོ་བུད་མེད་ལ་ཆགས་པ་དང༌། སོར་ཕྲེང་ཅན་མི་སྟོང་དུ་ གཅིག་གིས་མ་ཚང་བ་བསད་པ་དང༌། མཐོང་ལྡན་དང༌། བདེ་བྱེད་ཕ་མ་བསད་པའང་སྟོབས་རེ་རེ་ཉམས་སུ་བླངས་པས་དགྲ་བཅོམ་པ་ཐོབ་པ་སྟེ། གང་ཞིག་སྔོན་ཆད་བག་མེད་གྱུར་པ་ལས། ཕྱིས་ནས་བག་དང་ལྡན་པར་གྱུར་དེ་ཡང་། །ཟླ་བ་སྤྲིན་
Page: 151 ༄༅། །བྲལ་ལྟ་ར་རྣམ་མཛེས་ཏེ། །དགའ་བོ་སོར་ཕྲེང་མཐོང་ལྡན་བདེ་བྱེད་བཞིན། །ཞེས་དང༌། ལུང་རྣམ་འབྱེད་ལས། གང་གིས་སྡིག་པའི་ལས་བྱས་པ། །དགེ་བ་ཡིས་ནི་འགོག་བྱེད་དེ། །ཉི་ཟླ་སྤྲིན་ལས་ བྱུང་བ་བཞིན། །འཇིག་རྟེན་འདིར་ནི་དེ་སྣང་འགྱུར། །ཞེས་དང༌། ལས་རྣམ་འབྱེད་ལས། ཤིན་དུ་མི་བཟང་ལས་རྣམས་བྱས་པ་ནི། །བདག་ལ་རྣམ་པར་སྨོད་པས་སྲབས་པར་འགྱུར། །རབ་ཏུ་གཤེག་དང་སྔོམ་པར་བྱེད་པ་ཡིས། ། དེ་དག་ཤིན་ཏུ་རྩད་ནས་གཏོན་པ་བཞིན། །ཞེས་སོ། །དེ་ལྟར་བཤེགས་པས་སྡིག་པ་དག་པའི་རྟགས་རྨི་ལམ་དུ་འབྱུང་སྟེ་སྐུལ་བྱེད་ཀྱི་གཟུངས་ལས། རྨི་ལམ་ན་ཟས་ངན་སྐྱགས་པ་དང་། ཞོ་དང་འོ་མ་ལ་སོགས་པ་འཐུངས་པ་དང་ཉི་མ་དང་ ཟླ་བ་མཐོང་བ་དང་ནམ་མཁའ་ལ་འགྲོ་བ་དང་མི་འབར་བ་དང་མཧེ་དང་མི་ནག་པོ་ཐུབ་པ་དང་དགེ་སློང་དང་དགེ་སློང་མའི་དགེ་འདུན་མཐོང་བ་དང་། འོ་མ་འབྱུང་བའི་ཤིང་དང་གླང་པོ་ཆེ་དང་ཁྱུ་མཆོག་དང་རི་དང་སེང་གེའི་ཁྲི་དང་ཁང་བཟང་གི་སྟེང་དུ་འཛེགས་ པ་དང་ཆོས་ཉན་པ་ལ་སོགས་པ་རྨིས་ན་སྡིག་པ་དང་འབྲལ་བ་འགྱུར་སྟེ་ཞེས་སོ། །འོན་ཀྱང་དེ་ལ་རློམ་སེམས་སུ་མི་བྱའོ། །སྒྲིབ་བ་ཉིད་གཟོད་མ་ནས་རང་བཞིན་གྱིས་དག་པར་མཐོང་ཞིང་སྒྲིབ་པའི་རང་བཞིན་ཉིད་ཆོས་ཐམས་ཅད་ཀྱི་རང་ བཞིན་དུ་མཉམ་པར་མཐོང་ན་སྒྲིབ་པ་སྦྱང་དུ་མེད་སྟེ་ལས་ཀྱི་སྒྲིབ་པ་རྣམ་དག་གི་མདོ་ལས། །དགེ་སློང་དྲི་མེད་འོད་ཕམ་པ་བྱུང་བ་ལ་སྟོན་པས་ཆོས་ཐམས་ཅད་སྒྱུུ་མ་ལྟ་བུ་དང་སྐད་ཅིག་མར་བསྟན་ཞིང་ཆོས་ཐམས་ཅད་ནི་བཏགས་པ་སྟེ་ཕྱིན་ཅི་ལོག་ལས་ བྱུང་བའི་ཆོས་ཐམས་ཅད་ནི་ནམ་མཁའ་ལྟར་ཡོངས་སུ་དག་སྟེ་དྲི་མ་མེད་པའོ་ཞེས་སོགས་བསྟན་པས་བྱང་ཆུབ་ཏུ་སེམས་སྐྱེས་ཅིས་བསྐལ་པ་བཟང་པོའི་འོག་ཏུ་འཚང་རྒྱ་བར་ལུང་བསྟན་པ་དང་། ཡུལ་འདེ་དག་ནི་དུག་མེད་སྟོང་པ་སྟེ། །དངོས་པོར་
Page: 152 དམིགས་པ་ཐམས་ཅད་བཟུང་དུ་མེད། །ཅེས་སོགས་གསུངས་སོ། །གསུམ་པ་སྡིག་བཤགས་གཞུང་དོན་ལ་བཞི། རྣམ་པར་སུན་དབྱུང་བ་དང་། རྟེན་བཟུང་བ་དང་། གཉེན་པོ་ལ་འབད་པ་དང་། སོར་ཆུད་པར་བྱ་པའོ། །དང་པོ་རྣམ་པར་སུན་དབྱུང་བ་ལ་ཡང་བཞི། བྱས་པའི་རྣམ་ གྲངས་ལ་བརྟགས་ནས་འགྱོད་པ་སྐྱེད་པ། མྱུར་དུ་འཆི་བར་དོགས་པས་སུན་འབྱིན་པ། དོན་མེད་པར་བརྟགས་པས་སུན་འབྱིན་པ། རྣམ་སྨིན་ལ་འཇིགས་པས་སུན་དབྱུང་བའོ། །དང་པོ་རྣམ་པར་སུན་དབྱུང་བ་ནི། ཕྱོགས་རྣམས་ཀུན་ན་བཞུགས་པ་ཡི། ། རྫོགས་སངས་རྒྱས་དང་རྒྱལ་བའི་སྲས། །ཐུགས་རྗེ་ཆེན་པོ་མངའ་རྣམས་ལ། །ཐལ་མོ་སྦྱར་ཏེ་གསོལ་བ་ནི། །ཐོག་མ་མེད་ལྡན་འཁོར་བ་ནས། །ཚེ་རབས་འདིའམ་གཞན་དག་ཏུ། །བདག་གིས་མ་འཚལ་སྡིག་བགྱིས་པའམ། བགྱིད་དུ་ བསྩལ་བ་ཉིད་དང་ནི། །གཏི་མུག་འཁྲུལ་བས་བདག་ནོན་ཏེ། རྗེས་སུ་ཡི་རང་གང་བགྱིས་པ། །ནོངས་པ་དེ་ནི་འགྱོད་བགྱིས་ནས། བསམ་པ་ཐག་པས་མགོན་ལ་བཤགས། །བདག་གིས་དཀོན་མཆོག་གསུམ་དང་ནི། །ཕ་མའམ་བླ་མ་ གཞན་དག་ལ། །ཉོན་མོངས་སྒོ་ནས་ལུས་ངག་དང་། །ཡིད་ཀྱིས་གནོད་བགྱིས་གང་ལགས་དང༌། །ཉེས་པ་དུ་མའི་སྐྱོན་ཆགས་པའི། །སྡིག་ཅན་བདག་གིས་སྡིག་པ་གང་། །ཤིན་དུ་མི་བཟད་བགྱིས་པ་དེ། །ཐམས་ཅད་འདྲེན་པ་རྣམས་ལ་ བཤགས། །ཞེས་གསུངས་ཏེ། བདག་གིས་མ་འཚལ་ཞེས་པ་ནི་བདག་ཉིད་གཏི་མུག་ཆེན་པོར་བསྟན་ཏོ། །བགྱིས་པ་ནི་རང་གིས་སྒོ་གསུམ་གྱིས་སོ། །དགྱིད་དུ་བསྩལ་བ་ནི་ངག་དང་ཡིད་ཀྱིས་གཞན་བྱེད་དུ་བཅུག་པའོ། །ཡི་རང་བ་ནི་གཞན་ གྱིས་སྡིག་པ་བྱས་པ་ལ་ཡིད་ཀྱི་དགའ་བར་བྱེད་པའོ། །འགྱོད་བགྱིས་ནས་ཅེས་པ་ནི་དམྱལ་བ་ལ་སོགས་པར་མི་དགེ་བའི་རྣམ་སྨིན་ཐོས་པས་འཇིགས་པའོ། །དེ་ལ་དཀོན་མཆོག་གསུམ་ནི་བླ་ན་མ་མཆིས་པའི་ཞིང་དང་། ཕ་ལ་སོགས་པ་ནི་ཕན་
Page: 153 ༄༅། །བཏགས་པའི་ཞིང་ཡིན་ཏེ། དེ་ལ་གནོད་པས་ནི་སྡུག་བསྔལ་གྱི་རྣམ་པར་སྨིན་པ་རྒྱ་ཆེ་ཞིང་དྲག་པ་ཡིན་པའི་ཕྱིར་རོ། །ཁྱད་པར་དགེ་འདུན་གྱི་རྫས་གང་ཟག་གིས་མ་བྱིན་པར་ལེན་པ་ནི། ཆེས་ལྕི་སྟེ་གལ་ཏེ་ཞལ་དུ་འདུ་བའི་སྒོ་ ཞིག་ཡིན་ན། འདི་ནི་རྣམ་སྨིན་མ་མྱོང་བར་མི་འདག་པར་དྲན་པ་ཉེར་བཞག་ལས་གསུངས་སོ། །མི་བཟད་པ་ནི་མེ་སྟག་ལས་མེ་ཆེན་མཆེད་པ་ལྟ་བུ་སྟེ་རྒྱུའི་དུས་ན་ཆུང་ཡང་རྣམ་སྨིན་གྱི་དུས་ན་འཇིགས་སུ་རུང་བའི་ཕྱིར་རོ། །གཉིས་པ་ནི། བདག་ ནི་སྡིག་པ་མ་བྱང་བའི། །སྔོན་དུ་འགུམ་པར་འགྱུར་དུ་མཆི། །ཇི་ལྟར་འདི་ལས་ངེས་ཐར་བར། །མྱུར་བའི་ཚུལ་གྱིས་བསྐྱབ་ཏུ་གསོལ། །ཡིད་བརྟན་མི་རུང་འཆི་བདག་འདི། །བྱས་དང་མ་བྱས་མི་སྡོད་པས། །ན་དང་མི་ན་ཀུན་གྱི་ཡང་། ། གློ་བུར་ཚེ་ལ་ཡིད་མི་བརྟན། །ཞེས་གསུངས་ཏེ། འཆི་བའི་དུས་མ་ངེས་པས་སྡིག་པ་མ་བྱང་བར་ཤི་དོགས་པའོ། །གསུམ་པ་ནི། ཐམས་ཅད་བོར་ཏེ་ཆས་དགོས་པ། །བདག་གིས་དེ་ལྟར་མ་ཤེས་ནས། །མཛའ་དང་མི་མཛའི་དོན་གྱི་ཕྱིར། ། སྡིག་པ་རྣམ་པ་སྣ་ཚོགས་བྱས། །མི་མཛའ་རྣམས་ཀྱང་མེད་འགྱུར་ཞིང་། །མཛའ་བ་རྣམས་ཀྱང་མེད་པར་འགྱུར། །བདག་ཀྱང་མེད་པར་འགྱུར་བ་སྟེ། །དེ་བཞིན་ཐམས་ཅད་མེད་པར་འགྱུར། །རྨི་ལམ་ཉམས་སུ་མྱོང་བ་བཞིན། །དངོས་ པོ་གང་དང་གང་སྤྱད་པ། །དེ་དེ་དྲན་པའི་ཡུལ་དུ་འགྱུར། །འདས་པ་ཐམས་ཅད་མཐོང་མི་འགྱུར། །རེ་ཞིག་གསོན་ཚེ་འདི་ཉིད་ལའང་། །མཛའ་དང་མི་མཛའ་དུ་མ་འདས། །དེ་དག་དོན་དུ་བྱས་པའི་སྡིག །མི་བཟད་གང་ཡིན་མདུན་ ན་གནས། །དེ་ལྟར་བདག་ནི་གློ་བུར་ཞེས། བདག་གིས་རྟོགས་པར་མ་གྱུར་བས། །གཏི་མུག་ཆགས་དང་ཞེ་སྡང་གིས། །སྡིག་པ་རྣམ་པ་དུ་མ་བྱས། །ཞེས་གསུངས་ཏེ། ཅིའི་ཆེད་དུ་བྱས་ཅེ་ན། ཐམས་ཅད་བོར་ནས་རང་གཅིག་བུར་འགྲོ་དགོས་
Page: 154 པ་མ་ཤེས་པར་མཛའ་བ་སྐྱོང་བ་དང་། མི་མཛའ་བ་གཞོམ་པའི་དོན་དུ་བྱས་སོ། །སུའི་ཆེད་དུ་བྱས་པ་དེས་མྱོང་ངོ་ཞེ་ན། དེ་དག་ཐམས་ཅད་མེད་པར་གྱུར་ཀྱང་རྣམ་སྨིན་ནི་རང་གི་མདུན་ལྟ་བུ་ཕྱི་མའི་སེམས་ཁོ་ན་ལ་གནས་སོ། །བཞི་པ་ནི། ཉིན་མཚན་ སྡོད་པ་ཡོང་མེད་པར། །ཚེ་འདི་རྟག་ཏུ་གོད་འགྱུར་ཞིང་། །སྣོན་པ་གུད་ནས་ཡོང་མེད་ན། །བདག་ལྟ་འཆི་བར་ཅིས་མི་འགྱུར། །བདག་ནི་མལ་ན་འདུག་བཞིན་དུ། །གཉེན་བཤེས་ཀུན་གྱིས་མཐའ་བསྐོར་ཡང་། །སྲོག་འཆད་པ་ཡི་ཚོར་བ་ དག །བདག་ཉིད་གཅིག་པུས་མྱོང་བར་འགྱུར། །གཤིན་རྗེའི་ཕོ་ཉས་ཟིན་པ་ལ། །གཉེན་གྱི་ཅི་ཕན་བཤེས་ཅི་ཕན། །དེ་ཚེ་བསོད་ནམས་གཅིག་སྐྱོབ་ན། །དེ་ཡང་བདག་གིས་མ་བསྟེན་ཏོ། །མགོན་པོ་བག་མེད་བདག་གིས་ནི། ། འཇིགས་པ་འདི་འདྲ་མ་འཚལ་ནས། །མི་རྟག་ཚེ་འདིའི་ཆེད་དག་ཏུ། །སྡིག་པ་མང་པོ་ཉེ་བར་བསྒྲུབས། །སྐྱེ་བོ་ཡན་ལག་གཅོད་པའི་སར། །དེ་རིང་ཁྲིད་པའང་བྲེད་གྱུར་ཏེ། ཁ་སྐམ་མིག་རྩ་ངན་ལ་སོགས། སྔར་ལས་གཞན་དུ་འགྱུར་ སྣང་ན། །གཤིན་རྗེའི་ཕོ་ཉ་འཇིགས་འཇིགས་ལྟའི། །ཤ་ཚུགས་ཅན་གྱིས་བཟུང་གྱུར་ཅིང་། །འཇིགས་ཆེན་ནད་ཀྱིས་ཐེབས་གྱུར་པ། །རབ་ཏུ་ཉམ་ཐག་སྨོས་ཅི་དགོས། །སུ་ཞིག་འཇིགས་ཆེན་འདི་ལས་བདག །ལེགས་པར་སྐྱོབ་ པར་བྱེད་འགྱུར་ཞེས། བྲེད་ཤ་འཐོན་པའི་མིག་བགྲད་ནས། །ཕྱོགས་བཞིར་སྐྱབས་དག་ཚོལ་བར་བྱེད། །ཕྱོགས་བཞིར་སྐྱབས་མེད་མཐོང་ནས་ནི། །དེ་ནས་ཀུན་ཏུ་ཡི་མུག་འགྱུར། གནས་དེར་སྐྱབས་ཡོད་མ་ཡིན་ན། །དེ་ཚེ་ བདག་གིས་ཇི་ལྟར་བྱ། །ཞེས་གསུངས་ཏེ། དེ་ཡང་མྱུར་དུ་འཆི་ངེས་པ། འཆི་ཀའི་གནད་གཅོད། དེའི་ཚེ་དགེ་བ་མ་སྒྲུབས་པས་འགྱོད་པར་འགྱུར་བ། སྡིག་པ་སྤྱད་པས་འགྱོད་པར་འགྱུར་བ། འཆི་བ་ལ་སྐྲག་པར་རིགས་པ། ཀུན་ཏུ་
Page: 155 ༄༅། །སྐྱབས་ཚོལ་བ། སྐྱབས་མ་རྙེད་ནས་སྡུག་བསྔལ་བ་རྣམས་རིམ་པ་ལྟར་ཚིགས་བཅད་རེས་བསྟན་ཞིང་། ལྔ་པ་ཚིགས་བཅད་གཉིས་ཀྱིས་བསྟན་ཏོ། །གཉིས་པ་རྟེན་གྱི་སྟོབས་ནི། དེ་བས་རྒྱལ་བ་འགྲོ་བའི་མགོན། ། འགྲོ་བ་སྐྱོབ་པའི་དོན་བརྩོན་པ། །སྟོབས་ཆེན་འཇིགས་པ་ཀུན་སེལ་ལ། །དེ་རིང་ཉིད་ནས་སྐྱབས་སུ་མཆི། །དེ་ཡིས་ཐུགས་སུ་ཆུད་པའི་ཆོས། །འཁོར་བའི་འཇིགས་པ་སེལ་བ་དང་། །བྱང་ཆུབ་སེམས་དཔའི་ཚོགས་ལ་ཡང་། ། དེ་བཞིན་ཡང་དག་སྐྱབས་སུ་མཆི། །བདག་ནི་འཇིགས་པས་རྣམ་སྐྲག་ནས། །ཀུན་ཏུ་བཟང་ལ་བདག་ཉིད་འབུལ། འཇམ་པའི་དབྱངས་ལའང་བདག་ཉིད་ཀྱིས། །བདག་གི་ལུས་འདི་དབུལ་བར་དགྱི། །ཐུགས་རྗེས་སྤྱོད་པ་མ་ འཁྲུལ་བ། སྤྱན་རས་གཟིགས་མགོན་དེ་ལ་ཡང་། །ཉམ་ཐག་ང་རོས་འོ་དོད་འབོད། །སྡིག་ལྡན་བདག་ལ་སྐྱབ་ཏུ་གསོལ། །འཕགས་པ་ནམ་མཁའི་སྙིང་པོ་དང་། ས་ཡི་སྙིང་པོ་དག་དང་ནི། །ཐུགས་རྗེ་ཆེ་མགོན་ཐམས་ཅད་ལ། ། སྐྱབས་ཚོལ་སྙིང་ནས་འོ་དོད་འབོད། །གང་ཞིག་མཐོང་ནས་གཤིན་རྗེ་ཡི། །ཕོ་ཉ་ལ་སོགས་སྡང་བ་རྣམས། །སྐྲག་ནས་ཕྱོགས་བཞིར་འབྱེར་བྱེད་པ། །རྡོ་རྗེ་ཅན་ལའང་སྐྱབས་སུ་མཆི། །སྔོན་ཆད་ཁྱེད་ཀྱི་བཀའ་ལས་འདས། ད་ནི་ འཇིགས་པ་ཆེ་མཐོང་ནས། །ཁྱེད་ལ་སྐྱབས་སུ་མཆི་ལགས་ཀྱིས། །འཇིགས་པ་མྱུར་དུ་བསལ་དུ་གསོལ། །ཞེས་གསུངས་ཏེ། དེ་ལྟ་བུ་འབྱུང་བར་ངེས་པ་སྐྱེས་པས་འཇིགས་ཤིང་སྐྲག་པ་དང་། སྐྱབས་གཞན་མ་རྙེད་པསསྡུག་བསྔལ་བ་དང་། སྐྱབས་ལ་ཡིད་ཆེས་པའི་བློ་བཅོས་མིན་གྱིས་ད་ལྟ་ནས་སངས་རྒྱས་དང་ཆོས་དང་། བྱང་ཆུབ་སེམས་དཔའི་ཚོགས་ལ་ཅི་བྱ་མཚང་བརླག་གི་ཚུལ་གྱིས་སྐྱབས་སུ་འགྲོ་ཞིང༌། ཁྱད་པར་དུ་སངས་རྒྱས་མཐའ་ཡས་པའི་བསོད་ནམས་བ་སྤུའི་ཁུང་བུ་
Page: 156 ལ་གནས་ཀྱང་སྨོན་ལམ་གྱི་དབང་གིས་བྱང་ཆུབ་སེམས་དཔར་སྟོན་པ་ཀུན་ཏུ་བཟང་པོ་དང་། ད་ལྟར་ཕྱོགས་བཅུའི་སངས་རྒྱས་ཕལ་མོ་ཆེ་ཞིག་འཇམ་དཔལ་གཞོན་ནུར་གྱུར་པས་སྔོན་བྱང་ཆུབ་ཏུ་བཙུད་པ་ཡིན་པས་སངས་རྒྱས་མཐའ་ཡས་ པའི་བླ་མར་གྱུར་ཀྱང་། བྱང་ཆུབ་སེམས་དཔའི་ཚུལ་ལས་མི་གཡོ་བ་འཇམ་དཔལ་དང༌། མཚན་ཐོས་པ་ཙམ་གྱིས་སྡུག་བསྔལ་ཐམས་ཅད་སྐྱོབ་པར་སྨོན་ལམ་བཏབ་སྟེ་མཚན་བྱིན་གྱིས་བརླབས་པ་སྤྱན་རས་གཟིགས་དབང་ཕྱུག་དང་། བྱང་ཆུབ་ སེམས་དཔའ་ཐམས་ཅད་ཀྱི་ལྟུང་བ་སེལ་བའི་སྨོན་ལམ་ཅན་ནམ་མཁའི་སྙིང་པོ་དང་། བདུད་ཀྱིས་མི་འཁྲུགས་པ་སའི་སྙིང་པོ་དང་། གང་མཐོང་བ་ཙམ་གྱིས་བདུད་དང་གཤིན་རྗེའི་དཔུང་མཐར་བྱེད་པ་ཕྱག་ན་རྡོ་རྗེ་དང༌། ལ་སོགས་པས་བྱམས་པ་ དང་སྒྲིབ་པ་ཐམས་ཅད་རྣམ་པར་སེལ་བ་ལ་སོགས་བྱང་ཆུབ་སེམས་དཔའ་ཐུགས་རྗེ་ཅན་དེ་རྣམས་ལ་སྐྱབས་སུ་མཆི་ཞིང་ལུས་ཕུལ་ཏེ་གསོལ་བ་འདེབས་པའོ། །བདག་ཉིད་འབུལ་ཅེས་དང་བདག་ཉིད་ཀྱིས་ཞེས་པ་ནི་གཞན་གྱིས་བྱེད་དུ་ བཅུག་པ་སོགས་མ་ཡིན་པར་རང་ཉིད་ཁོ་ནས་སེམས་ཐག་པ་ནས་སྐྱབས་སུ་གསོལ་ཏེ། སྔོན་ཆད་སྡིག་པ་ཅི་ཡང་མི་བྱ་སྟེ། །ཞེས་སོགས་ཀྱི་ཁྱེད་ཀྱི་བཀའ་ལས་འདས་མོད་ཀྱང་། ད་ནི་ནམ་དུ་ཡང་བཀའ་ལས་མི་འདའ་བས་བདག་རྗེས་སུ་ཟུངས་ ཤིག་པའོ། །གོང་དུ་བྱང་ཆུབ་སྙིང་པོར་སོགས་ཀྱིས་སྐྱབས་སུ་སོང་བ་ནི་ལམ་ཐམས་ཅད་ཀྱི་གཞིའི་སྐྱབས་འགྲོ་དངོས་བཟུང་བ་ཡིན་ལ། འདི་ནི་རྟེན་གྱི་སྟོབས་སུ་གློ་བུར་གྱི་འཇིགས་པས་དཀོན་མཆོག་ར་མདར་སྦྲན་པ་ཡིན་པས་ཟློས་པའི་སྐྱོན་ མེད་དོ། །གསུམ་པ་གཉེན་པོ་ལ་འབད་པ་ནི། ཐ་མལ་ནད་ཀྱིས་འཇིགས་ན་ཡང་། །སྨན་པའི་ངག་བཞིན་བྱ་དགོས་ན། །འདོད་ཆགས་ལ་སོགས་ཉེས་བརྒྱ་ཡི། །ནད་ཀྱིས་རྟག་བཏབ་སྨོས་ཅི་དགོས། །དེ་གཅིག་གིས་ཀྱང་འཛམ་གླིང་ན། །གནས་པའི་མི་ཀུན་
Page: 157 ༄༅། །རླག་བྱེད་ལ། དེ་དག་གསོ་བའི་སྨན་གཞན་ནི། །ཕྱོགས་རྣམས་ཀུན་ནས་མི་རྙེད་ན། །དེ་ལ་སྨན་པ་ཐམས་ཅད་མཁྱེན། །ཟུག་རྔུ་ཐམས་ཅད་འབྱིན་པ་བཀའ་ལྟར་མི་བྱེད་སེམས་པ་ནི། །ཤིན་ཏུ་གཏི་མུག་སྨད་པའི་ གནས། །གཡང་ས་ཐ་མལ་ཆུང་ངུ་ལའང་། །བག་ཡོད་གནས་པར་བྱ་དགོས་ན། །དཔག་ཚད་སྟོང་དུ་ལྟུང་བ་ཡི། །ཡུན་རིང་གཡང་ས་སྨོས་ཅི་དགོས། །དེ་རིང་ཁོ་ན་མི་འཆི་ཞེས། །བདེ་བར་འདུག་པ་རིགས་མ་ཡིན། །བདག་ནི་མེད་པར་ འགྱུར་བའི་དུས། །དེ་ནི་གདོན་མི་ཟ་བར་འབྱུང་། །བདག་ལ་མི་འཇིགས་སུ་ཡིས་བྱིན། །འདི་ལས་ཇི་ལྟར་ངེས་ཐར་འགྱུར། །གདོན་མི་ཟ་བར་མེད་འགྱུར་ན། ཅི་ཕྱིར་བདག་ཡིད་བདེ་བར་འདུག །ཅེས་གསུངས་ཏེ། ཅིའི་ཕྱིར་ བཀའ་ལས་མི་འདའ་ཞེ་ན། ཚིགས་བཅད་དང་པོའོ། །ཉོན་མོངས་པའི་ནད་ནི་ཤིན་ཏུ་འཇིགས་པར་སྟོན་པ་ལ་གཉིས་པའོ། །སྨན་པ་སངས་རྒྱས་གཅིག་པུར་སྟོན་པ་ནི་གསུམ་པའོ། །གཡང་སའི་དཔེས་བཟློས་ཏེ་བསྟན་པ་ནི་བཞི་པའོ། ། སྡིག་པ་སྦྱོང་བ་ལས་རིངས་པའི་བྱ་བ་གཞན་མེད་པར་སྟོན་པ་ནི་ཤློ་ཀ་གཉིས་སོ། །བཞི་པ་ནི། སྔོན་ཆད་མྱོང་སྟེ་ཞིག་པ་ལས། བདག་ལ་ལྷག་པ་ཅི་ཡོད་ན། །བདག་ནི་དེ་ལ་མངོན་ཞེན་ནས། །བླ་མའི་བཀའ་དང་འགལ་བར་བྱས། ། གསོན་ཚེ་འདི་དང་དེ་བཞིན་དུ། །གཉེན་དང་བཤེས་པ་རྣམ་སྤངས་ནས། །གཅིག་པུར་ག་ཤེད་འགྲོ་དགོས་ན། །མཛའ་དང་མི་མཛའ་ཀུན་ཅི་རུང་། །མི་དགེ་བ་ལས་སྡུག་བསྔལ་འབྱུང་། །དེ་ལས་ཇི་ལྟར་ངེས་ཐར་ཞེས། །ཉིན་མཚན་ རྟག་ཏུ་བདག་གིས་ནི། །འདི་ཉིད་འབའ་ཞིག་བསམ་པར་རིགས། །བདག་ནི་མི་ཤེས་གཏི་མུག་པས། །རང་བཞིན་ཁ་ན་མ་ཐོའམ། །བཅས་པའི་སྡིག་པ་གང་ཡིན་ལས། །གང་ཡང་རུང་བ་བགྱིས་པ་རྣམས། །མགོན་པོའི་སྤྱན་སྔར་མངོན་
Page: 158 སུམ་དུ། །ཐལ་སྦྱར་སྡུག་བསྔལ་འཇིགས་སེམས་ཀྱིས། ཡང་དང་ཡང་དུ་ཕྱག་འཚལ་ཏེ། །དེ་དག་ཐམས་ཅད་བཤགས་པར་བགྱི། །འདྲེན་པ་རྣམས་ཀྱིས་བདག་གི་སྡིག །ནོངས་པ་ལགས་པར་བཟུང་དུ་གསོལ། འདི་ནི་བཟང་པོ་ མ་ལགས་པས། །སླན་ཆད་བདག་ནི་ཡོང་མི་བགྱིད། །ཅེས་གསུངས་ཏེ། ཚིགས་བཅད་དང་པོ་གསུམ་གྱིས་འགྱོད་པའི་རྒྱུ་མཚན་བསམས། བཞི་པ་དང་། ལྔ་པ་དང་། ཚིགས་བཅད་ཕྱེད་ཀྱིས་མཐོལ་ཞིང་བཤགས། དེ་ནས་ཕྱེད་ཀྱིས་སླན་ ཆད་སྡོམ་པར་དམ་བཅས་པའོ། །བྱང་ཆུབ་སེམས་དཔའི་སྤྱོད་པ་ལ་འཇུག་པ་ལས། སྡིག་པ་བཤགས་པ་གཙོ་བོར་སྟོན་པའི་ལེའུ་སྟེ་གཉིས་པ་རྣམ་པར་ཕྱེ་བའོ། །
ལེའུ་གསུམ་པ། བྱང་ཆུབ་ཀྱི་སེམས་ཡོངས་སུ་བཟུང་བ།
[edit]ལེའུ་གསུམ་པ་ལ་འབྲེལ་ནི་བཤགས་པའི་འོག་ཏུ་ཡི་རང་སོགས་འབྱུང་བར་འབྲེལ་ལོ། །དེས་ན་བཞི་པ་རྗེས་སུ་ཡི་རང་ལ་སྤྱི་གཞུང་གཉིས། དང་པོ་ལ་ངོ་བོ་ནི། རང་གཞན་གྱིས་བྱས་པའི་དགེ་བ་ལ་རབ་ཏུ་དགའ་ཞིང་ཡི་རང་ པའི་བློའོ། །དབྱེ་ན། རྒྱུ་དགེ་བ་ལ་རྗེས་སུ་ཡི་རང་བ་དང་འབྲས་བུ་བདེ་བ་ལ་རྗེས་སུ་ཡི་རང་བ་སྟེ་གཉིས་སམ། ཡི་རང་བྱའི་དགེ་བས་ཕྱེ་ན་རྣམ་པ་དུ་མར་འགྱུར་རོ། །སྒོམ་ཚུལ་ནི། འགྲེལ་ཆེན་ལས། རྗེས་སུ་ཡི་རང་བ་ནི་གསུམ་སྟེ་ལུས་ངག་ཡིད་ ཀྱིས་སོ། །ལུས་ཀྱིས་ནི་བ་སྤུ་ལྡང་བ་མཆི་མ་འཁྲུགས་པ་ལུས་འདར་བ་ལ་སོགས་པས་སོ། །ངག་གིས་ནི་ལེགས་པར་བྱས་སོ། །རབ་ཏུ་བྱས་སོ། །བཟང་པོ་ཞིག་བྱས་སོ། །ཞེས་བརྗོད་ཅིང༌ཡི་རང་བར་བྱེད་པའོ། །སེམས་ཀྱིས་ནི་སེམས་རབ་ཏུ་དང་བས་ཡང་དག་ པར་དགའ་བར་བྱེད་པའོ། །ཞེས་སོ། །ཕན་ཡོན་ནི། ཕ་རོལ་གྱི་དགེ་བ་ལས་ཆེས་ལྷག་པ་འཐོབ་པ་སྟེ་རྒྱལ་པོ་གསལ་རྒྱལ་གྱིས་ཉིན་བདུན་དུ་སྟོན་པ་འཁོར་བཅས་ལ་བསྙེན་བཀུར་བ་ལ་མུ་ཏོ་བ་ཞིག་གིས་རྗེས་སུ་ཡི་རང་བར་བྱས་པས་སྟོན་
Page: 159 ༄༅། །པས་རྒྱལ་པོ་ཁྱོད་ཀྱི་དགེ་བ་བསྔོའམ། ཁྱོད་ཀྱི་འདི་ལ་བསྟེན་ནས་འདི་ལས་ཆེས་ལྷག་པའི་བསོད་ནམས་ཐོབ་པ་དེའི་དགེ་བ་བསྔོ། ཞེས་གསུངས་པ་ན་བདག་གི་འདི་ལས་ཆེས་ལྷག་པ་སུ་ཞིག་སྙམ་ནས་དེ་བསྔོ་བར་ཞུས་པས་ མུ་ཏོ་བས་རྗེས་སུ་ཡི་རང་བསྒོམས་པའི་དགེ་བ་བསྔོ་བར་མཛད་ལ། ཉིན་བདུན་པ་ལ་བློན་པོ་རྣམས་ཀྱི་མུ་ཏོ་བ་སེམས་འཁྲུག་ཏུ་བཅུག༌པས༌རྒྱལ༌པོའི༌དགེ༌བ༌བསྔོ༌བར༌མཛད་པར་གསུངས་པ་དང་། །མི་ལྡོག་བྱང་ཆུབ་མཆོག་ལ་རབ་ཏུ་ཞུགས་ པ་ཡི། །སེམས་སྐྱེད་པ་ལ་བསམ་པ་ཐག་པས་ཡི་རང་བ། །སྟོང་གསུམ་རི་རབ་སྲང་ལ་གཞལ་ཡང་ཚད་བཟུང་རུང་། །རྗེས་སུ་ཡི་རང་དགེ་བ་དེ་ནི་དེ་ལྟ་མིན། །དགེ་བ་དོན་གཉེར་ཕན་འདོད་སེམས་ཅན་ཇི་སྙེད་པ། །ཀུན་གྱི་བསོད་ནམས་ ཕུང་པོ་ལ་ཡང་ཡི་རང་འགྱུར།། ཞེས་དང༌། སྲིད་པ་གསུམ་ན་སེམས་ཅན་མ་ལུས་ཇི་སྙེད་པ། །ཡོངས་སུ་བརྟག་པ་བཟུང་སྟེ་དེ་དག་ཐམས་ཅད་ཀྱིས། །འཇིག་རྟེན་མཁྱེན་པ་སངས་རྒྱས་དགྲ་བཅོམ་རང་རྒྱལ་ལ།། བསྐལ་པ་མཐའ་ཡས་ སྦྱིན་བྱིན་ཉན་ཐོས་ལེགས་ཚོལ་ན། །བྱང་ཆུབ་སེམས་དཔའ་མཁས་པ་ཐབས་མཁས་གང་ཞིག་གིས། །དེ་དག་བསོད་ནམས་བྱ་བའི་དངོས་ལ་ཡི་རང་ནས། །སེམས་ཅན་དོན་དུ་བྱང་ཆུབ་མཆོག་རབ་ཡོངས་བསྔོ་ན། །ཡོངས་སུ་བསྔོས་པས་ དགེ་བ་དེ་ཀུན་ཟིལ་གྱིས་གནོ་། །ནོར་བུ་མཆིང་བུའི་ཕུང་པོ་ཆེན་པོར་གྱུར་པ་ཡང༌། །རིན་ཆེན་བཻཌཱུརྱ་གཅིག་དེ་ཀུན་ཟིལ་གྱིས་གནོན། །དེ་བཞིན་འགྲོ་ཀུན་སྦྱིན་པའི་ཕུང་པོ་རྒྱ་ཆེན་ཀུན། །རྗེས་སུ་ཡི་རང་བྱང་ཆུབ་སེམས་དཔས་ཟིལ་ གྱིས་གནོན། །ཞེས་ཁམས་གསུམ་གྱི་སེམས་ཅན་ཐམས་ཅད་ཉན་ཐོས་ཀྱི་ལམ་དུ་ཞུགས་ནས་སངས་རྒྱས་དང་རང་སངས་རྒྱས་དང་དགྲ་བཅོམ་པ་རྣམས་ལ་མཆོད་པ་བྱེད་ཅིང་ཉན་ཐོས་ཀྱི་བྱང་ཆུབ་ཏུ་བསྔོ་བ་རེ་རེ་ཞིང་བྱེད་ལ་བྱང་ཆུབ་སེམས་དཔས་
Page: 160 བསྒོམས་ནས་དེའི་དགེ་བ་སངས་རྒྱས་སུ་བསྔོས་པས་སྔ་མ་དེ་ཐམས་ཅད་ཟིལ་གྱིས་གནོན་ ནུས་བར་དཔེ་དང་བཅས་ནས་བཤད་པའི་ཕྱིར་རོ།།གཞུང་ནི། སེམས་ཅན་ཀུན་གྱི་ངན་སོང་གི། སྡུག་བསྔལ་ངལ་ བསོའི་དགེ་བ་དང་། །སྡུག་བསྔལ་ཅན་དག་བདེར་གནས་ལ། །དགའ་བས་རྗེས་སུ་ཡི་རང་ངོ་། །བྱང་ཆུབ་རྒྱུར་གྱུར་དགེ་བསགས་པ། །དེ་ལ་རྗེས་སུ་ཡི་རང་ངོ་། །ལུས་ཅན་འཁོར་བའི་སྡུག་བསྔལ་ལས། །ངེས་པར་ཐར་ལ་ཡི་རང་ངོ་། ། སྐྱོབ་པ་རྣམས་ཀྱི་བྱང་ཆུབ་དང་། །རྒྱལ་སྲས་ས་ལའང་ཡི་རང་ངོ་། །སེམས་ཅན་ཐམས་ཅད་བདེ་མཛད་པའི། །ཐུགས་སྐྱེད་དགེ་བ་རྒྱ་མཚོ་དང་། །སེམས་ཅན་ཕན་པར་མཛད་པ་ལ། །དགའ་བས་རྗེས་སུ་ཡི་རང་ངོ་། །ཞེས་གསུངས་ཏེ། རྒྱུ་བསོད་ ནམས་ཆ་མཐུན་དང་། དེའི་འབྲས་བུ་མངོན་མཐོའི་བདེ་བ། ཐར་པ་ཆ་མཐུན་གྱི་དགེ་བ། ཉན་རང་གི་བྱང་ཆུབ། ཐེག་ཆེན་གྱི་འབྲས་བུ་སངས་རྒྱས་དང་ས་བཅུ། རྒྱུ་ཐེག་ཆེན་གྱི་ལམ་སྒྲུབ་པ་རྣམས་ལ་སྔ་མ་རྣམས་ཚིག་རྐང་གཉིས་རེ་དང་ཐ་མ་ཤློ་ཀ་གཅིག་ གིས་བསྟན་པ་ཡིན་ནོ། ལྔ་པ་བསྐུལ་བ་ནི། ཕྱོགས་རྣམས་ཀུན་གྱི་སངས་རྒྱས་ལ། །ཐལ་མོ་སྦྱར་ཏེ་གསོལ་བ་ནི། །སེམས་ཅན་སྡུག་བསྔལ་མུན་འཐོམས་ལ། ཆོས་ཀྱི་སྒྲོན་མེ་སྦར་དུ་གསོལ། །ཞེས་གསུངས་ཏེ། ཕྱོགས་བཅུའི་སངས་རྒྱས་གང་ད་ ལྟར་མངོན་པར་རྫོགས་པར་སངས་རྒྱས་ནས། སུ་ལ་བསྟན་ཀྱང་གོ་བར་མི་ནུས་པས། །ཞེས་གསུངས་པ་ལྟ་བུ། གཞན་གྱིས་རྟོགས་དཀའ་བར་མཁྱེན་པ་དང་། དམ་པའི་ཆོས་ནི་སངས་རྒྱས་ཉིད་ལས་དཀོན་པར་སྟོན་པ་དང་། དགེ་བ་སྐྱེད་པའི་ ཕྱིར་གཞན་གྱིས་གསོལ་བ་འདེབས་སུ་གཞུག་པའིདུས་ལ་གཞེས་ཏེ་འོ་སྐོལ་གྱི་སྟོན་པས་སངས་རྒྱས་ནས་ཞག་ཞེ་དགུར་ཐུན་མོང་གི་གདུལ་བྱ་ལ་ཆོས་མ་བསྟན་པ་དང་། དེ་ནས། གཞན་གྱིས་གསོལ་བ་བཏབ་ལ་ང་མི་ལྟོས། །སྐྱེ་བོ་འདི་ཀུན་
Page: 161 ༄༅། །ཚངས་ལ་དད་པ་སྟེ། །དེ་ཡིས་གསོལ་བ་བཏབ་ནས་ཆོས་འཁོར་བསྐོར། །ཞེས་བསྟན་པ་ལྟར། སངས་རྒྱས་ཁ་ཅིག་དེ་བས་ཡུན་ཐུང་བ་དང་། ཁ་ཅིག་ལོ་མང་པོ་དང་སྐུ་ཚེ་རིང་བ་ལ་ལ་བསྐལ་པའི་བར་དང་། དེ་བཞིན་གཤེགས་པ་ ལ་ལ་ལོ་དཔག་ཏུ་མེད་པར་བཞུགས་ཀྱང་ཆོས་མ་བསྟན་པར་མཐར་ཉིན་གཅིག་ཁོ་ན་ཆོས་བསྟན་ཏེ་མྱ་ངན་ལས་འདའ་བར་མཛད་པ་ཡང་གསུངས་པས་དེ་ལྟ་བུ་རྣམས་ལ་དད་པས་དམིགས་ཏེ་ཆོས་སྟོན་པར་གསོལ་བ་འདེབས་པ་ཤློ་ཀ་གཅིག་གོ །འདིར་ རང་ཚངས་པར་བསྒོམས་ཏེ་གསེར་གྱི་འཁོར་ལོ་ཕུལ་ནས་བསྐུལ་བར་མོས་ཅེས་ཟེར་བ་ནི་གསང་སྔགས་དང་བསྲེས་པ་སྟེ། འོན་ཀྱང་མོས་པའི་སྟོབས་ཙམ་གྱིས་ཡིན་ན་འགལ་བ་མེད་དོ། །དྲུག་པ་གསོལ་བ་ནི། རྒྱལ་བ་མྱ་ངན་འདའ་བཞེད་ལ། ཐལ་མོ་སྦྱར་ཏེ་ གསོལ་བ་ནི། །འགྲོ་འདི་ལྡོངས་པར་མི་འགོད་ཅིང་། །བསྐལ་བ་གྲངས་མེད་བཞུགས་པར་གསོལ། །ཞེས་གསུངས་ཏེ། ཆོས་ཀྱི་སྐུ་མྱ་ངན་ལས་འདའ་བ་མེད་ཀྱང་མཆོག་གི་སྤྲུལ་སྐུ་ནི་གདུལ་བྱ་ལ་དཀོན་པར་སྟོན་པ་དང་རྟག་འཛིན་ཟློག་པ་དང༌། སྐུ་གདུང་གྱེས་པའམ་རིལ་པོས་གདུལ་བྱ་རྣམས་ཀྱི་ཆེད་དང་བཀའ་བསྡུ་བ་དང་བསྟན་པའི་གནས་ཚད་སོགས་ཀྱི་ཕྲིན་ལས་ལྷག་མ་མང་པོ་སྟོན་དགོས་པའི་ཕྱིར་མྱ་ངན་ལས་འདའ་བ་ངེས་པར་སྟོན་ལ། དེ་ཡང་སྟོན་པས་ཀུན་དགའ་བོ་མྱ་ངན་ལས་ མི་འདའ་བར་གསོལ་བ་འདེབས་སུ་གཞུག་པའི་ཕྱིར། ཀུན་དགའ་བོ་གང་རྫུ་འཕྲུལ་གྱི་རྐང་པ་བཞི་ལ་བསྟེན་ཏེ་བསྒོམ་མང་དུ་བྱས་པ་དེ་ནི་འདོད་ན་བསྐལ་པའམ་བསྐལ་པ་ལས་ལྷག་གི་བར་དུ་ཡང་འདུག་གོ །དེ་བཞིན་གཤེགས་པས་ཀྱང་ རྫུ་འཕྲུལ་གྱི་རྐང་པ་བཞི་ལ་བསྟེན་བསྒོམ་མང་དུ་མཛད་པས་བཞེད་ན་བསྐལ་པའམ་བསྐལ་པ་ལས་ལྷག་གི་བར་དུ་ཡང་བཞུགས་སོ། །ཞེས་ལན་གསུམ་གསུངས་ཀྱང་། ཀུན་དགའ་བོ་བདུད་ཀྱིས་ཐེབས་པས་ཅི་ཡང་མ་གསོལ་བ་ན་ཉིན་མོར་སྤྱོད་
Page: 162 དུ་སོང་ཞིག་ཅེས་གསུངས་པའི་འོག་ཏུ་སྡིག་ཅན་གྱིས་མྱ་ངན་ལས་འདའ་བར་གསོལ་བ་བཏབ། མགར་བའི་བུ་ཙུནྡས་མྱ་ངན་ལས་མི་འདའ་བར་གསོལ་བ་བཏབ་པས་གཉིས་ཀ་དགའ་བའི་ཕྱིར་སྐུ་ཚེའི་ཚད་ཟླ་བ་གསུམ་བྱིན་གྱིས་བརླབས་པ་ལྟ་ བུ་སྟེ། ཕྱོགས་བཅུའི་སངས་རྒྱས་དེ་ལྟ་བུ་མཐའ་ཡས་པ་རྣམས་ལ་དམིགས་ཏེ་མྱ་ངན་ལས་མི་འདའ་བར་གསོལ་བ་གདབ་པ་ཤློ་ཀ་གཅིག་གོ །བདུན་པ་བསྔོ་བ་ལ་གསུམ། བསྔོ་བ་དངོས། ལུས་སོགས་སེམས་ཅན་ལ་བཏང་བ། སྨོན་ལམ་རྒྱ་ ཆེར་གདབ་པའོ། དང་པོ་བསྔོ་བ་དངོས་ནི། དེ་ལྟར་འདི་དག་ཀུན་བྱས་ཏེ། །དགེ་བ་བདག་གིས་གང་བསགས་པ། །དེས་ནི་སེམས་ཅན་ཐམས་ཅད་ཀྱི། །སྡུག་བསྔལ་ཐམས་ཅད་སེལ་བར་ཤོག །འགྲོ་བ་ནད་པ་ཇི་སྲིད་དུ། །ནད་སོས་གྱུར་གྱི་བར་དུ་ནི། ། སྨན་དང་སྨན་པ་ཉིད་དག་དང༌། །དེ་ཡི་ནད་གཡོག་བྱེད་པར་ཤོག །ཟས་དང་སྐོམ་གྱི་ཆར་ཕབ་སྟེ། བཀྲེས་དང་སྐོམ་པའི་གནོད་པ་བསལ། །མུ་གེའི་བསྐལ་པ་བར་མའི་ཚེ། བདག་ནི་ཟས་དང་སྐོམ་དུ་གྱུར། །སེམས་ཅན་ཕོངས་ཅིང་ དབུལ་བ་ལ། །བདག་ནི་མི་ཟད་གཏེར་གྱུར་ཏེ། །ཡོ་བྱད་མཁོ་རྒུ་སྣ་ཚོགས་སུ། །མདུན་ན་ཉེ་བར་གནས་གྱུར་ཅིག །ཅེས་གསུངས་ཏེ། གཞན་དོན་དུ་སྤྱིར་བསྔོ་བ་དང་། ནད་དང་། བཀྲེས་པ་དང་། ཕོངས་པ་སེལ་བ་སྟེ་བཞི་ལ་ཚིགས་བཅད་རེ་རེས་བསྔོ་ བ་གསུངས་ལ། ནད་དང་མུ་གེ་ནི་མ་འོངས་པ་དེའི་བསྐལ་པའི་དུས་ཏེ། མཛོད་ལས། དེ་ནས་ལས་ཀྱི་ལམ་ལྷག་པས། །ཚེ་ཐུང་ལོ་ནི་བཅུ་པར་འགྱུར། །བསྐལ་པ་མཚོན་དང་ནད་དང་ནི། །མུ་གེ་རྣམས་ཀྱིས་མཐར་ཕྱིན་ཏོ། ཞག་ རྣམས་དང་ནི་ཟླ་བ་དང་། །ལོ་བདུན་དག་སྟེ་གོ་རིམ་བཞིན། །ཞེས་མི་རྣམས་ཚེ་ལོ་བཅུ་པའི་དུས་དེར་ཐོག་མར་མཚོན་གྱི་བསྐལ་པ་ཞག་བདུན་གྱིས་དམྱལ་ཐག་པར་བྱེད་དོ། །དེའི་ལྷག་མ་རྣམས་ནད་ཀྱི་བསྐལ་པ་ཞག་བདུན་དང་ཟླ་བ་བདུན་
Page: 163 ༄༅། །གྱིས་དམྱལ་ཐག་གཅོད་དོ། །དེའི་ལྷག་མར་ལུས་པ་རྣམས་མུ་གེའི་བསྐལ་པ་ཞག་བདུན་ཟླ་བ་བདུན་ལོ་བདུན་གྱིས་ལྷག་མ་ཙམ་དུ་བྱེད་ལ། དེ་ནས་རྫོགས་ལྡན་གྱི་མགོ་རྩོམ་པར་འགྱུར་བའོ། །དེས་ན་སྤྱིར་སེམས་ཅན་གྱི་ ནད་སོགས་སྡུག་བསྔལ་ཐམས་ཅད་དང་ཁྱད་པར་ནད་མཚོན་མུ་གེའི་བསྐལ་པ་བར་མ་བ་དེ་རྣམས་ཁོ་ན་ཤིན་ཏུ་སྡུག་བསྔལ་ཞིང་སྐྱབས་གཞན་མེད་པར་གཟིགས་པས་དེ་རྣམས་ཀྱི་དོན་དུ་བསྔོ་བ་སྟེ། མཚོན་གྱི་བསྐལ་པ་བར་མའི་ཚེ། བདག་ནི་ མཐོང་བ་ཙམ་གྱིས་ཀྱང་། །ཞེ་སྡང་གདུག་རྩུབ་ཀུན་ཞི་ནས། །བྱམས་པ་ཆེ་ལ་གནས་གྱུར་ཅིག །ཅེས་པའང་དོན་གྱིས་འཐོབ་བམ་སྙམ་མོ། །འགྲོ་བ་ནད་པ་སོགས་ནི་ནད་ཀྱི་བསྐལ་པ་ལས་སྐྱབས་པའི་དོན་དུ་བསྔོ་བའོ། །ཟས་དང་སོགས་ནི་མུ་གེའི་ བསྐལ་པ་ལས་སྐྱབས་པར་བསྔོ་བའོ། །སེམས་ཅན་ཕོངས་ཤིང་སོགས་ནི་མིས་རྣམས་ཕོངས་པ་ལས་སྡིག་པ་ལ་འཇུག་པར་གཟིགས་ནས་དེའི་ཆེད་དུ་ལྷག་པར་བསྔོ་བའོ། །འགྲེལ་ཆེན་ལས། འདི་ནི་རྡོ་རྗེ་རྒྱལ་མཚན་གྱི་བསྔོ་བ་ལས་དགེ་ བའི་རྩ་བ་འདིས་བདག་སྡུག་བསྔལ་གྱི་ཕུང་པོ་ཐམས་ཅད་ཟློག་པའི་ཕྱིར་སེམས་ཅན་ཐམས་ཅད་ཀྱི་གནས་སུ་གྱུར་ཅིག །ཡོངས་སུ་སྒྲོལ་བའི་ཕྱིར་སྐྱོབ་པ། འཇིགས་པ་ཐམས་ཅད་ལས་སྲུང་བའི་ཕྱིར་སྐྱབས། ས་ཐམས་ཅད་ཀྱི་རྗེས་སུ་འགྲོ་བའི་ཕྱིར་ རྟེན། ཤིན་ཏུ་གྲུབ་བདེ་འཐོབ་པའི་ཕྱིར་དཔུང་གཉེན། རབ་རིབ་མེད་པའི་ཡེ་ཤེས་ཀུན་ཏུ་སྟན་པའི་ཕྱིར་སྣང་བ། མ་རིག་པའི་མུན་པ་ཟློག་པའི་ཕྱིར་སྒྲོན་མེར་གྱུར་ཅིག་ཅེས་སོགས་ཀྱིས་ཡོངས་སུ་བསྔོ་བ་དེ་ཡང་ལྷག་པའི་བསམ་པས་ཡོངས་སུ་བསྔོའི་ ཚིག་ཙམ་གྱིས་ནི་མ་ཡིན་ནོ། །དགའ་བ་མགུ་བ་རབ་ཏུ་དང་བ་རབ་ཏུ་དགའ་བ་མཉེན་པ་བྱམས་པ་མཛའ་བ་ཕན་གདགས་པའི་སེམས་ཀྱིས་ཡོངས་སུ་བསྔོའོ། །ཞེས་སོ། །གཉིས་པ་ནི། ལུས་དང་དེ་བཞིན་ལོངས་སྤྱོད་དང་། །དུས་གསུམ་དགེ་
Page: 164 བ་ཐམས་ཅད་ཀྱང་། །སེམས་ཅན་ཀུན་གྱི་དོན་གྱི་ཕྱིར། །ཕངས་པ་མེད་པར་བཏང་བར་བྱ། །ཐམས་ཅད་བཏང་བས་མྱ་ངན་འདའ། །བདག་བློ་མྱ་ངན་འདས་པ་སྒྲུབ། །ཐམས་ཅད་གཏོང་བར་ཆབས་གཅིག་ལ། སེམས་ཅན་རྣམས་ལ་བཏང་ བ་མཆོག །བདག་གིས་ལུས་ཅན་ཐམས་ཅད་ལ། །ལུས་འདི་ཅི་བདེར་བྱིན་ཟིན་གྱིས། །རྟག་ཏུ་གསོད་དང་སྨོད་པའམ། །བརྡེག་སོགས་ཅི་དགར་བྱེད་ལ་རག །བདག་གི་ལུས་ལ་རྩེ་བྱེད་དམ། ཅོ་འདྲི་ག་ཞའི་རྒྱུ་བྱེད་ཀྱང་། །བདག་གི་ ལུས་འདི་བྱིན་ཟིན་གྱིས། །འདི་ཡི་ཁ་ཏས་ཅི་ཞིག་བྱ། །དེ་ལ་གནོད་པར་མི་འགྱུར་བའི། །ལས་གང་ཡིན་པའང་བྱེད་དུ་ཆུག །ཅེས་གསུངས་ཏེ། དང་པོས་ནི་ལུས་ལོངས་སྤྱོད་དགེ་བར་བཅས་པ་སེམས་ཅན་ལ་བྱང་ཆུབ་ཀྱི་རྒྱུར་གཏོང་ བར་དམ་འཆའ་བའོ། །གཉིས་པས་དེའི་འཐད་པ་སྟོན་ཏེ་དེ་རྣམས་མ་བཏང་ན་བྱང་ཆུབ་མི་འཐོབ་ལ་བདག་ནི་བྱང་ཆུབ་སྒྲུབ་པའི་ཕྱིར་དང་། ལུས་ལོངས་སྤྱོད་བློས་མ་བཏང་ན་ཡང་འཆི་བའི་དུས་འཇོག་དགོས་ཀྱང་དོན་ཅིར་ཡང་མི་འགྱུར་ལ། དེས་ ན་ད་ལྟ་ནས་སེམས་ཅན་ལ་བཏང་ན་དོན་ཆེན་པོར་འགྱུར་བའི་ཕྱིར་རོ། །དེ་ནས་གཉིས་ཀྱིས་བྱིན་པ་གོ་བར་བྱས་ཏེ་ད་ནི་ལུས་ལོངས་སྤྱོད་ལ་བདག་གིར་བཟུང་བའི་གཟེ་རེག་མི་བྱའོ་ཞེས་དམ་འཆའ་བ་དང་། དེ་ནས་ཕྱེད་ཀྱིས་ལས་འཆོལ་བ་པོ་ རང་ལ་མི་གནོད་པའི་ལས་དེ་ལ་བཀོལ་ཞིག་ཅེས་འདོམས་པར་བྱེད་པའོ། །འགྲེལ་ཆེན་ལས་ནི། དུས་གསུམ་གྱི་དགེ་བ་གཏོང་ན་མ་འོངས་པའི་དགེ་བ་ད་ལྟ་ཇི་ལྟར་གཏོང་ཞེ་ན། བདེན་མོད་དེའི་དུས་ཀྱི་ཞེན་པ་ལྡོག་པ་དང་ད་ལྟར་ཡང་ བསམ་པ་དག་པ་འཕེལ་བའི་ཆེད་དོ། །ལྟོས་པ་མེད་པ་ནི་བདག་དོན་ལ་སྟེ་ཅིའི་ཕྱིར་གཏོང་ན་སེམས་ཅན་ཀུན་གྱི་དོན་སྒྲུབ་ཕྱིར་རོ། །འདི་ནི་བློ་གྲོས་མི་ཟད་པའི་མདོ་ལས། དགེ་བའི་སེམས་དང་སེམས་ལས་བྱུང་བ་རྣམས་དྲན་ལ་རྗེས་
Page: 165 ༄༅། །སུ་དྲན་ནས་ཀྱང་བྱང་ཆུབ་ཏུ་ཡོངས་སུ་བསྔོ་བ་འདི་ནི་འདས་པ་ལ་མཁས་པའོ། །གང་མ་འོངས་པའི་དགེ་བའི་རྩ་བ་ངེས་པར་སེམ་ཞིང་བྱང་ཆུབ་ལ་མངོན་དུ་ཕྱོགས་པའི་ལས་སེམས་པ་སྟེ་བདག་ལ་དགེ་བའི་སེམས་སྐྱེ་བ་འགྱུར་བ་ གང་ཡིན་པ་དེ་དག་ཐམས་ཅད་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་བ་འདི་ནི་མ་འོངས་པ་ལ་མཁས་པའོ། །སོགས་དང༌། ཐམས་ཅད་གཏོང་བ་ལ་མོས་པ་ཡོངས་སུ་རྫོགས་ཏེ་གཏོང་བའི་སེམས་ཀྱི་ཤུགས་ཀྱིས་ལུས་ཀྱི་སྦྱོར་བ་དེས་ ཡོངས་སུ་འཛིན་པ་ཐམས་ཅད་གཏོང་སྟེ་ཡོངས་སུ་འཛིན་པ་འདི་ནི་སྲིད་པའི་སྡུག་བསྔལ་ཐམས་ཅད་ཀྱི་རྩ་བ་སྟེ་དེ་ལས་གྲོལ་བ་ཞེས་བྱའོ། །ཞེས་སོ། །རང་དོན་དུ་ཅུང་ཟད་མི་སྲུང་དམ་ཞེ་ན། ཐམས་ཅད་གཏོང་བར་སོགས་ཏེ། བྱང་ཆུབ་ སེམས་དཔའི་སོ་སོར་ཐར་པ་ལས། ཤཱ་རིའི་བུ་གཞན་ཡང་བྱང་ཆུབ་སེམས་དཔའ་ནི་ཆོས་ཐམས་ཅད་ལ་གཞན་གྱིར་འདུ་ཤེས་སྐྱེད་པར་བྱེད་དེ་དངོས་པོ་འགའ་ཡང་མི་ལེན་ཏོ། །སོགས་དང་། སྲེད་མེད་ཀྱི་བུའི་མདོར། གཏོང་བའི་བློ་མི་འཇུག་ པའི་དངོས་པོ་སྲེལ་བར་མི་བྱའོ། །སོགས་དང༌། བློ་གྲོས་མི་ཟད་པའི་མདོའི་འབྱུང་བཞིས་སེམས་ཅན་ལ་སྒོ་སྣ་ཚོགས་ནས་ཕན་འདོགས་ཚུལ་རྣམས་དྲངས་སོ། །གསུམ་པ་ནི། བདག་ལ་དམིགས་ནས་ནམ་དུ་ཡང་། །འགའ་ཡང་དོན་མེད་མ་གྱུར་ ཅིག །བདག་ལ་དམིགས་ནས་གང་དག་གིས། །ཁྲོའམ་དད་པའི་སེམས་བྱུང་ན། །དེ་ཉིད་རྟག་ཏུ་དེ་དག་གིདོན་ཆེན་འགྲུབ་པའི་རྒྱུར་གྱུར་ཅིག །གང་དག་བདག་ལ་ཁ་ཟེར་རམ། །གཞན་དག་གནོད་པ་བྱེད་པའམ། །དེ་བཞིན་ཕྱར་ ག་གཏོང་ཡང་རུང་། །ཐམས་ཅད་བྱང་ཆུབ་སྐལ་ལྡན་གྱུར། །བདག་ནི་མགོན་མེད་རྣམས་ཀྱི་མགོན། །ལམ་ཞུགས་རྣམས་ཀྱི་དེད་དཔོན་དང་། །བརྒལ་འདོད་རྣམས་ཀྱི་གྲུ་དང་ནི། །གཟིངས་དང་ཟམ་པ་ཉིད་དུ་གྱུར། །གླིང་དོན་གཉེར་
Page: 166 ལ་གླིང་དང་ནི། །མར་མེ་འདོད་ལ་མར་མེ་དང་། །གནས་མལ་འདོད་ལ་གནས་མལ་དང་། །བདག་ནི་ལུས་ཅན་བྲན་འདོད་པ། །ཀུན་གྱི་བྲན་དུ་འགྱུར་བར་ཤོག །ཡིད་བཞིན་ནོར་དང་བུམ་པ་བཟང་། རིག་སྔགས་གྲུབ་དང་སྨན་ཆེན་དང་། །དཔག་བསམ་གྱི་ནི་ཤིང་ དག་དང་། །ལུས་ཅན་རྣམས་ཀྱི་འདོད་འཇོར་གྱུར། །ས་སོགས་འབྱུང་བ་ཆེན་པོ་དང་། །ནམ་མཁའ་བཞིན་དུ་རྟག་པར་ཡང་། །སེམས་ཅན་དཔག་ཏུ་མེད་པ་ཡི། །རྣམ་མང་ཉེར་འཚོའི་གཞིར་ཡང་ཤོག །དེ་བཞིན་ནམ་མཁའི་མཐས་ གཏུགས་པའི། །སེམས་ཅན་ཀུན་ལ་རྣམ་ཀུན་ཏུ། །ཐམས་ཅད་མྱ་ངན་འདས་བར་དུ། །བདག་ནི་ཉེར་འཚོའི་གཞིར་ཡང་ཤོག །ཅེས་གསུངས་ཏེ། དང་པོའི་ཚིག་རྐང་དྲུག་གིས་བདག་ཉིད་ལ་སུས་ཇི་ལྟར་དམིགས་པའི་བློ་སྐྱེས་ཀྱང་ བློ་དེ་ཉིད་གང་ཟག་དེ་ལ་དོན་ཆེན་པོའི་རྒྱུར་འགྱུར་བར་སྨོན་པ་དང༌། དེ་ནས་ཚིགས་བཅད་གཅིག་གིས་གནོད་ལན་ཕན་བདེར་འབྲེལ་བར་སྨོན་པའོ། །དེ་ནས་གཉིས་ཀྱིས་སེམས་ཅན་ལ་ཇི་ལྟར་མཁོ་བ་དེ་དང་དེར་འགྱུར་བར་སྨོན་པ་སྟེ། རྟའི་ རྒྱལ་པོ་བཱ་ལ་ཧར་གྱུར་པས་སྲིན་མོའི་གླིང་ནས་འབྱིན་པ་ལ་སོགས་པའོ། །གླིང་དོན་གཉེར་ལ་གླིང་དང་ནི། །ཞེས་པ་ལ་གཞན་དག་རྒྱ་དཔེར་དཱི་པཾ་ཞེས་མར་མེའི་སྐད་དོད་ཡོད་པ་རྒྱ་དཔེ་བཀླག་ཉེས་པའམ་མ་དག་པས་དཱི་པ་ཞེས་བཀླགས་ནས་གླིང་ དུ་བསྒྱུར་བར་ཟད་དོ་ཟེར་ཡང་། མར་མེ་འདོད་ལ་མར་མེ་དང༌། །ཞེས་པར་འགྲེལ་ཆེན་དང་བི་བྷུ་ཏིའི་འབྲུ་སྣང་ཞིང་། འོན་ཀྱང་རྔོག་འགྱུར་ཕལ་ཆེར་ན། གླིང་དོན་གཉེར་ལ་ཞེས་ཁོ་ན་སྣང་བས་རྒྱ་དཔེ་ཐ་དད་པ་སྙམ་མོ། །དེ་ནས་ཡིད་ བཞིན་ནོར་ལ་སོགས་པའི་ཚིགས་བཅད་གཉིས་ཀྱིས་འབད་རྩོལ་དང་རྟོག་པ་མེད་པར་ལྷུན་གྱིས་གྲུབ་པ་སངས་རྒྱས་ཀྱི་སའི་ཕྲིན་ལས་འགྲུབ་པར་སྨོན་པ་དང་། དེ་ནས་གཅིག་གིས་དེ་ལྟར་སེམས་ཅན་གཅིག་ལ་ཇི་ལྟ་བ་བཞིན་དུ་སེམས་
Page: 167 ༄༅། །ཅན་ཐམས་ཅད་ལ་རྟག་པར་འགྲུབ་པའི་སྨོན་ལམ་མོ། །དེ་ལ་གནས་མལ་ནི་ཞག་མལ་གྱི་བསྟི་གནས་ཏེ་མཚན་མོའི་ལྷ་མོ་རྣམས་ཀྱི་རྣམ་ཐར་ལས་མུན་པར་སྣང་བ་བསྐྱེད་པ་དང་གནས་མལ་སྟོབ་པ་སོགས་དེ་དག་གི་ཕྲིན་ ལས་སུ་གསུངས་སོ། །ཡིད་བཞིན་གྱི་ནོར་བུ་ནི་དགོས་འདོད་ཐམས་ཅད་འབྱུང་བའོ། །བུམ་པ་བཟང་པོ་ནི་སྔགས་ཀྱིས་བསྒྲུབས་ནས་གྲུབ་པ་ན་དེ་ནས་གང་འདོད་པ་འབྱུང་བ་སྟེ། དགེ་སློང་དགྲ་བཅོམ་ནི་བུམ་པ་ནས་ཐེག་པ་ཆེན་པོའི་སྡེ་སྣོད་མཐའ་ ཡས་པ་ཕྱུང་སྟེ་ལྟ་བར་བཤད་པ་ལྟར་རོ། །རིག་སྔགས་མ་གྲུབ་པ་རྣམས་ལ་མྱུར་དུ་འགྲུབ་པའི་མཐུ་སྩོལ་བའམ། ཡང་ན་རལ་གྲི་དང་མིག་སྨན་དང་ལྷམ་སོགས་གྲུབ་པའི་རྫས་སུ་གྱུར་པས་དོན་སྟེར་བའོ། །སྨན་ཆེན་པོ་ནི་ལྷ་དང་ལྷ་ མ་ཡིན་ལ་སོགས་པའི་བཅུད་ལེན་གྱི་བདུད་རྩི་ཚེ་བསྐལ་པར་འཚོ་བ་དང་རིག་འཛིན་གྱི་ལུས་སུ་བྱེད་པའོ། །དཔག་བསམ་གྱི་ཤིང་ནི་འདོད་དགུ་སྟེར་བའི་ཤིང་སྟེ་དེ་ལས་གང་འདོད་བླང་དུ་འབྱུང་བའོ། །འདོད་འཇོར་གྱུར་བ་ནི་འདོད་རྒུ་འཇོ་ བའི་བ་ལྟ་བུའི་དོན་ཏེ་ཇི་ལྟར་འདོད་པའི་དོན་གྱི་འབྱུང་གནས་སུ་གྱུར་ཅིག་པའོ། །ས་སོགས་ནི་འབད་རྩོལ་དང་རྣམ་རྟོག་མེད་པར་དོན་བྱེད་པའི་དཔེའོ། །འདི་རྣམས་ནི་རྡོ་རྗེ་རྒྱལ་མཚན་གྱི་བསྔོ་བ་རྣམ་པ་བཅུ་ལ་སོགས་པ་རྒྱལ་སྲས་ཆེན་པོ་ རྣམས་ཀྱི་བསྔོ་བའི་རྒྱ་མཚོ་མཐའ་ཡས་པ་འདུས་པའོ། །འདིར་དོགས་པ་འདི་འབྱུང་བའི་གནས་ཡོད་དེ། ཅི་གཅིག་གི་དགེ་བ་གཅིག་ཤོས་ལ་བྱིན་པས་གཅིག་ཤོས་ལ་མི་ཕན་ན་དོན་མེད་ལ། ཕན་ན་ལས་མ་བྱས་པ་དང་ཕྲད་པའི་ཉེས་ པར་ཐལ་བས་རྒྱུ་འབྲས་ཀྱི་རྣམ་བཞག་འཇིག་གོ །ཡང་གཞན་གྱིས་བདག་ལ་གནོད་པ་བྱས་པ་འདིས་འདི་བདེ་བ་འཐོབ་པར་གྱུར་ཅིག་སྙམ་པ་འདི་འགྲུབ་བམ་མི་འགྲུབ་མི་འགྲུབ་ན་བསྔོས་པ་དོན་མེད་པར་འགྱུར་ལ། འགྲུབ་ན་རྒྱུ་མི་དགེ་བ་
Page: 168 བྱས་པས་འབྲས་བུ་བདེ་བ་འབྱུང་བར་ཐལ་ལོ། །ཡང་མར་མེ་འདོད་ལ་མར་མེར་འགྱུར་བ་སོགས་འདི་གནས་དང་གནས་མིན་གྱི་བསྔོ་བ་གང་ཡིན། གནས་ཀྱི་བསྔོ་བ་ཡིན་ན་མར་མེ་དང་གནས་མལ་དང་ནོར་བུ་སོགས་ནི་བེམ་པོ་ཡིན་པས་བྱང་ཆུབ་ སེམས་དཔའ་བེམ་པོར་འགྱུར་བ་ཡོད་པར་ཐལ་ལོ། གནས་མིན་གྱི་བསྔོ་བ་ཡིན་ན་བསྔོས་པ་དོན་མེད་དེ་མི་འགྲུབ་པའི་ཕྱིར་རོ། །ཞེས་དོགས་པར་འགྱུར་རོ། །དེ་ལ་སྐྱོན་དང་པོ་མེད་དེ། ལས་བྱས་པ་དང་ཕྲད་ཀྱི་མ་བྱས་པ་དང་མི་ཕྲད་པ་དང་གཞན་ བྱས་ཀྱི་ལས་ལ་གཞན་མི་དབང་ནི་ཐེག་པ་ཐུན་མོང་གི་ལས་འབྲས་ཀྱི་རྣམ་གཞག་ཕྱོགས་གཅིག་པའི་དབང་དུ་མཛད་པ་ཡིན་། འདིར་སངས་རྒྱས་དང་བྱང་ཆུབ་སེམས་དཔའ་མཆོག་རྣམས་ནི་ལས་ལ་དབང་ཐོབ་པས་ལས་སེམས་ཀྱི་སྒྱུར་ཁ་ ཙམ་དུ་མཁྱེན་ཞིང་ཅི་ཡང་བྱར་མེད་པ་དང་ཇི་ལྟར་ཡང་གཏུབ་པ་དབྱེར་མེད་པར་མཁྱེན་པས་ལས་བྱིན་གྱིས་རློབ་པར་མཛད་པའི་ཕྱིར་ཏེ། འདི་ནི་ཐེག་དམན་ན་ཡང་མི་རྣམས་སེན་མོའི་སྟེང་དུ་ཞིང་རྨོས་བས་འཚོ་བར་བྱེད་པ་བྱུང་རུང་ངའི་ཉན་ཐོས་རྣམས་བསོད་ སྙོམས་ཀྱིས་ཕོངས་པར་མི་འགྱུར་ཏེ། གལ་ཏེ་དེ་བཞིན་གཤེགས་པ་བྱང་ཆུབ་མ་ཐོབ་ན་འཁོར་ལོས་བསྒྱུར་བའི་རྒྱལ་པོར་འགྱུར་བའི་དགེ་བ་ཁོ་ན་བགྲང་ལས་འདས་པར་ཡོད་ལ། དེ་ཐམས་ཅད་སྟོན་པ་ཉིད་ཀྱི་ལོངས་སྤྱོད་དུ་སྨིན་པར་འགྱུར་བ་རྣམས་ བདག་གིར་མ་མཛད་པར་མ་འོངས་པའི་ཉན་ཐོས་རྣམས་ལ་རྗེས་སུ་གནང་བའི་ཕྱིར་རོ་ཞེས་བཤད་པའི་ཕྱིར། འཇིག་རྟེན་གྱི་ནོར་ལྷ་རྣམས་ཀྱིས་ཀྱང་སྐྱེ་བ་ཕྱི་མར་སྨིན་རྒྱུའི་ལོངས་སྤྱོད་ཚེ་འདིར་བསྒྱུར་བར་ནུས་ཤིང་དེ་ལྟར་བུ་ལོན་སྔ་ནུད་དུ་བླངས་ པས་འབྲས་བུ་ཆུང་ངུར་བྱས་པར་ཡིན་ཡང་དེ་ལའཇིག་རྟེན་པ་རྣམས་ནོར་ལྷས་དངོས་གྲུབ་བྱིན་པར་གྲགས་པའི་ཕྱིར། འོ་ན་སེམས་ཅན་ཐམས་ཅད་ཀྱི་མི་དགེ་བའི་ལས་གཏན་མེད་དུ་ཡང་སངས་རྒྱས་ཀྱིས་ཅིའི་ཕྱིར་བྱིན་གྱིས་མི་རློབ་ཅེ་ན། འདི་ནི་
Page: 169 ༄༅། །སངས་རྒྱས་རང་ངོས་ནས་དེ་ལྟར་བརླབས་པ་ཡིན་ཏེ། ཆོས་ཐམས་ཅད་རྣམ་པ་ཐམས་ཅད་དུ་སངས་རྒྱས་པ་ཁོ་ནར་གཟིགས་པས་མ་དག་པའི་ཁམས་གཞན་མ་གཟིགས་པའི་ཕྱིར། འོན་ཀྱང་གཞན་སྣང་ལ་དེར་སྣང་བར་མ་ངེས་ ཏེ། མིག་ལྡན་གྱིས་གཟུགས་གསལ་བར་མཐོང་བའི་མདུན་ན་ལོང་བ་ལ་དེ་ལྟར་མ་ཡིན་པའི་ཕྱིར། འོན་ཀྱང་མིག་ལྡན་གྱིས་གཟུགས་མཐོང་བ་ལ་བརྟེན་ནས་སྨན་པ་བོས་ཏེ་ལོང་བའི་རབ་རིབ་བསལ་ཏེ་ཕྱེ་བས་དེས་ཀྱང་གཟུགས་མཐོང་བར་འགྱུར་ བའི་ཕྱིར། མིག་ལྡན་ཀྱིས་གཟུགས་མཐོང་བ་དེ་ལོང་བའི་རབ་རིབ་དག་བྱེད་ཀྱི་རྒྱུར་འགྱུར་བ་ལྟར་སངས་རྒྱས་ཀྱིས་མ་དག་པ་མ་གཟིགས་པ་ཁོ་ནས་སེམས་ཅན་རྣམས་ཀྱིས་མ་དག་པར་མཐོང་བ་རབ་རིབ་ཅན་ལྟ་བུ་ལ་བརྩེ་བས་བྱང་ཆུབ་ལ་འགོད་པའི་རྒྱུར་ འགྱུར་བ་ཡིན་ནོ། །དེས་ན་གནས་འཇོག་གི་བུ་སྦྲང་རྩི་ཅན་འདོད་ན་རྒྱ་མཚོ་ཆེན་པོ་བཞི་ཡང་སྦྲང་རྩིར་འགྱུར་བའི་ཕྱིར། དགྲ་བཅོམ་པ་སྒུར་ཆུང་གི་ཐལ་སྐྱོ་ལྷུང་བཟེད་གང་པོ་ལྟ་སྨོས་ཀྱང་ཅི་དགོས་ལ། འོན་ཀྱང་དགྲ་བཅོམ་པ་སྒུར་ཆུང་གིས་ཐ་ མའི་ཉིན་ལ་དེ་ཐལ་སྐྱོ་ལས་གཞན་དུ་མི་འགྱུར་བར་ཡང་སྣང་བ་ལྟར་ཇི་ལྟར་ཡང་བསྒྱུར་ནུས་པ་དང་ལས་ཆུད་ཀྱང་མི་འཛའ་བ་དབྱེར་མེད་པ་འདི་ནི་བསམ་གྱིས་མི་ཁྱབ་པའི་གནས་ཡིན་ཏེ་སངས་རྒྱས་ཀྱི་སྤྱོད་ཡུལ་ལོ། །གནས་སྐབས་སུ་ནི་དགེ་ བ་ལ་བདག་གིར་མ་བྱས་པར་ཡོངས་སུ་བཏང་བ་ནི་དགེ་བ་མཐའ་ཡས་པར་བྱེད་པའི་རྒྱུའོ། །སྐྱོན་གཉིས་པ་ཡང་མེད་དེ། བྱང་ཆུབ་སེམས་དཔའ་ལ་གནོད་པ་བྱས་པ་དེ་བདེ་བའི་རྒྱུ་མ་ཡིན་མོད་ཀྱང་བྱང་ཆུབ་སེམས་དཔའ་རང་ཉིད་ནི་ཕ་རོལ་གྱིས་ ཅི་བྱས་ཀྱང་ལེགས་པར་འཛིན་པའམ་སྒྱུ་མ་ལྟ་བུ་ལས་ཕན་གནོད་དུ་རྟོག་པ་མེད་པས་བྱང་ཆུབ་སེམས་དཔའ་ནས་གཞལ་ན་གནོད་པ་མ་ཡིན་ལ། བཟང་ངན་གྱིས་འབྲེལ་བ་ཙམ་དེ་ཉིད་གདུལ་བྱ་དེ་བྱང་ཆུབ་སེམས་དཔས་རྗེས་སུ་འཛིན་པའི་རྒྱུར་
Page: 170 འགྱུར་བའི་ཕྱིར་ཏེ། དྲང་སྲོང་བཟོད་པར་སྨྲ་བ་ལ་རྒྱལ་པོས་གནོད་པ་བྱས་པའི་ཚེ་རྒྱལ་པོ་ཁྱོད་ཀྱིས་ངའི་ཡན་ལག་དང་ཉིང་ལག་དྲས་ཤིང་དྲས་ཤིང་བཏུབས་པ་ལས་ན་ངས་ཀྱང་བྱང་ཆུབ་ཐོབ་ནས་ཁྱོད་ཀྱི་ཉོན་མོངས་པ་དྲས་ཤིང་དྲས་ཤིང་གཏུབ་ པར་བྱའོ་ཞེས་ཞལ་གྱིས་བཞེས་ཏེ་བྱང་ཆུབ་བརྙེས་པའི་ཐོག་མ་ཁོ་ནར་རྒྱལ་པོ་དེ་ཀཽཎྜི་ནྱར་གྱུར་པ་ལ་ཁྱོད་ཀྱིས་ཆོས་ཀུན་ཤེས་སམ་ཞེས་ལན་གསུམ་དུ་རྨེད་པས་ཉོན་མོངས་པ་གཏུབས་ཤིང་དགྲ་བཅོམ་པར་བཀོད་པ་ལྟ་བུའི་ཕྱིར་རོ། །སྐྱོན་ གསུམ་པ་ཡང་མེད་དེ། ཐུན་མོང་གི་ཐེག་པ་དང་བསྟུན་པའི་ལན་ལྟར་ན། སྒྱུ་མ་མཁན་གྱིས་སྤྲུལ་པའི་རྟ་དང་གླང་པོ་ཆེ་ལ་མི་རྣམས་ལོངས་སྤྱོད་པར་བྱེད་པ་ལྟར་བྱང་ཆུབ་སེམས་དཔའི་སྨོན་ལམ་གྱི་མཐུས་བྱུང་བའི་དངོས་པོ་ཉིད་སེམས་ཅན་ རྣམས་ཀྱི་རྟེན་དུ་འགྱུར་བ་སྟེ་བསྐལ་བཟང་གི་སངས་རྒྱས་རྣམས་ཀྱིས་ཞིང་དག་སྦྱོར་གྱིས་བསྒྲུབས་པའི་སྣོད་ཀྱི་འཇིག་རྟེན་འདི་ཇི་ལྟར་སེམས་ཅན་རྣམས་ཀྱི་རྟེན་གནས་སུ་གྱུར་པ་བཞིན་ནོ། །འོ་ན་བརྒལ་འདོད་རྣམས་ཀྱི་གྲུ་དང་ནི། །སོགས་ ཕ་རོལ་ཏུ་བརྒལ་བར་འདོད་པ་ལ་བདག་ཆུ་བོ་ལ་གྲུ་དང་རྒྱ་མཚོ་ལ་གཟིངས་དང་ཆུ་ཕྲན་ལ་ཟམ་པར་གྱུར་ཅིག་ཅེས་བདག་ཉིད་ཕན་པའི་དངོས་པོ་དེ་དང་དེར་འགྱུར་པར་སྨོན་ལམ་བཏབ་པ་འདི་མ་ཐེབས་པར་འགྱུར་རོ་ཞེ་ན། རྒྱུ་སྨོན་ལམ ་གྱི་སྐབས་སུ་ནི་འགྲུབ་མི་འགྲུབ་དང་གནས་གནས་མིན་སོགས་མི་སེམས་པར་སྙིང་རྗེ་ཆེན་པོས་ཅི་བྱ་གཏོལ་རང་བྲལ་བ་ཁོ་ནའི་གཞན་དབང་དུ་གྱུར་པས་མ་བཟོད་དེ་འདེབས་པ་ཡིན་ལ། འབྲས་བུ་སྨོན་པ་དེ་གྲུབ་པའི་དུས་ན་བདག་ཉིད་གྲུ་གཟིངས་ སོགས་སུ་མ་གྱུར་ཀྱང་བདག་ཉིད་ཀྱི་སྨོན་ལམ་གྱི་མཐུས་གྲུབ་པའི་གྲུ་གཟིངས་སོགས་ཀྱིས་འགྲོ་བ་སྒྲོལ་བར་བྱེད་པས་སྐྱོན་མེད་དོ་ཅེས་ལན་གྱི་རྣམ་གྲངས་གཅིག་གོ །བདག་ཉིད་ཀྱི་ལུས་འགྲོ་བ་མ་ལུས་པའི་བཟའ་བཏུང་དུ་སྤྱད་པ་
Page: 171 ༄༅། །ནི་ཉ་རོ་ཧི་ཀའི་སྐྱེས་རབས་དང་། སྲིན་བུ་ཀེ་ཏ་ཀ་བརྒྱད་ཁྲི་བསྐྱབས་པ་དང་། གླང་ཆེན་གྱི་སྐྱེས་རབས་སོགས་རྒྱ་ཆེར་བཤད་ལ། སྤྱིར་མར་མེའི་བྱ་བ་བྱས་པ་བདེ་བྱིན་གྱིས་ཕྱག་ལ་མེ་སྦར་ཏེ་མཚན་མོ་ཚོང་པ་ལམ་འཁྱམས་ པ་རྣམས་བསྒྲལ་བ་དང་། གྲུའི་བྱ་བ་བྱས་པ་རུས་སྦལ་གྱིས་རྒྱ་མཚོར་ལྷུང་བའི་ཚོང་པ་ལྔ་དང་ལྔ་བརྒྱ་བསྒྲལ་བ་སོགས་གསུངས་སོ། །ཤིན་ཏུ་ངེས་པའི་དོན་དུ་ན། བེམ་ཤེས་གང་ཟག་རྣམས་ཤིན་ཏུ་འགལ་བར་རྟོག་པ་འདི་ནི་བྱིས་ པའི་མཐོང་བ་དང་ཐེག་དམན་གྲུབ་མཐའ་པ་རྣམས་ཀྱི་རྟོག་པ་ལ་ཕྱོགས་གཅིག་ཏུ་ཞེན་པ་སྟེ། ཇི་ལྟར་རྨི་ལམ་ན་སྣང་བ་དང་སྤྲུལ་པའི་བེམ་ཤེས་གང་ཟག་དེ་དག་ལ་བེམ་པོའི་ཆོས་དང་ཤེས་པའི་ཆོས་གང་ཟག་གི་ཆོས་ཀྱི་ཁྱད་པར་ ཅི་ཞིག །དེས་ན་བེམ་པོར་གྲགས་པས་གང་ཟག་གི་བྱ་བ་བྱེད་པ་ཤིང་མཁན་མཁས་པའི་འཁྲུལ་འཁོར་དང༌། འཚོ་བྱེད་གཞོན་ནུའི་སྨན་གྱི་བུ་མོ་སོགས་གསུངས་པའང་ཡང་དག་པར་ན་བེམ་ཤེས་གང་ཟག་ཐ་དད་པའི་འཛིན་པ་གཞིག་ པའི་ཆེད་དེ་ཆོས་ཐམས་ཅད་ནི་ཇི་ལྟར་བློས་བཟུང་བ་དེ་ལྟར་གནས་པ་མ་ཡིན་ནོ། །འདི་ནི་བསམ་གྱིས་མི་ཁྱབ་པའི་ངོ་བོ་སྟེ་ལན་གྱི་རྣམ་གྲངས་གཅིག་གོ །དེ་ལྟར་ལུས་ལོངས་སྤྱོད་བཏང་བ་སོགས་བསྔོ་བའི་འཕྲོས་དོན་དུ་བྱས་པ་ནི་ བོད་འགྲེལ་དག་གི་ལུགས་ཡིན་ལ། བསྡུས་དོན་དུ། དངོས་གཞི་ལ་གཉིས། སྨོན་པའི་སེམས་མངོན་དུ་བཞག་པ་གསུམ་དང་། དེ་བྱང་ཆུབ་ཀྱི་བར་དུ་བར་མ་དོར་ཡལ་བར་མི་འདོར་བར་དམ་བཅའ་བའོ། །དང་པོ་ལ་ལུས་སོགས་ ལ་ལྟོས་མེད་དུ་བྱང་ཆུབ་ཆེན་པོ་འཐོབ་པར་དམ་བཅའ་བ་ནི་ལུས་སོགས་ཀྱིས་བསྟན་པའི་ཚིགས་བཅད་ཕྱེད་དང་ལྔའོ། །གཉིས་པ་ཆུད་མི་ཟ་བར་སྨོན་པ་ནི། ཚིགས་བཅད་ཕྱེད་དང་གསུམ་མོ། །གསུམ་པ་ལོངས་སྤྱོད་པའི་རྒྱུར་སྨོན་
Page: 172 ནི། ཚིགས་བཅད་ལྔས་བསྟན་ཏོ་ཞེས་དངོས་གཞིར་བསྡུས་ཏེ་བཤད་དོ། །གཉིས་པ་དངོས་གཞི་ནི། ཇི་ལྟར་སྔོན་གྱི་བདེ་གཤེགས་ཀྱིས། །བྱང་ཆུབ་ཐུགས་ནི་བསྐྱེད་པ་དང་། །བྱང་ཆུབ་སེམས་དཔའི་བསླབ་པ་ལའང་། །དེ་དག་ རིམ་བཞིན་གནས་པ་ལྟར། །དེ་བཞིན་འགྲོ་ལ་ཕན་དོན་དུ། །བྱང་ཆུབ་སེམས་ནི་སྐྱེད་བགྱི་ཞིང་། །དེ་བཞིན་དུ་ནི་བསླབ་པ་ལའང་། །རིམ་པ་བཞིན་དུ་བསླབ་པར་བགྱི། །ཞེས་གསུངས་ཏེ། འདིར་དངོས་སུ་སེམས་སྐྱེད་དང་སྡོམ་པ་ ལྷན་ཅིག་ཏུ་བཟུང་བ་ཡིན་ལ། སོ་སོར་འདོད་ན་ཡང་དེ་ལྟར་བཟུང་བའི་དབྱེ་བསྡུ་ཤེས་པར་བྱའོ། །འདི་ནི་སློབ་དཔོན་ནམ་རྟེན་ནམ་དཀོན་མཆོག་གི་སྤྱན་སྔར་ལན་གསུམ་དུ་བླངས་པས་སྐྱེ་བར་འགྱུར་རོ། །གསུམ་པ་རྗེས་ལ། བདག་ཉིད་དབུགས་ དབྱུང་བ་དང༌། གཞན་གཟེངས་བསྟོད་པ་གཉིས་ཀྱི། དང་པོ་ལ་ཡང་། རང་དོན་གྲུབ་པས་དང་། གཞན་དོན་གྲུབ་པས་དགའ་བ་སྐྱེད་པའོ། །དང་པོ་ནི། དེ་ལྟར་བློ་དང་ལྡན་པ་ཡིས། །རབ་དང་བྱང་ཆུབ་སེམས་བཟུང་ནས། །མཇུག་ཀྱང་རྒྱས་པར་ བྱ་བའི་ཕྱིར། །སེམས་ནི་འདི་ལྟར་གཟེངས་བསྟོད་དོ། །དེང་དུས་བདག་ཚེ་འབྲས་བུ་ཡོད། །མི་ཡི་སྲིད་པ་ལེགས་པར་ཐོབ། དེ་རིང་སངས་རྒྱས་རིགས་སུ་སྐྱེས། །སངས་རྒྱས་སྲས་སུ་ད་འགྱུར་ཏོ། །ད་ནི་བདག་གིས་ཅི་ནས་ཀྱང་། རིགས་ དང་མཐུན་པའི་ལས་བརྩམ་སྟེ། །སྐྱོན་མེད་བཙུན་པའི་རིགས་འདི་ལ། །རྙོག་པར་མི་འགྱུར་དེ་ལྟར་བྱ། །ལོང་བས་ཕྱགས་བདར་ཕུང་པོ་ལས། །ཇི་ལྟར་རིན་ཆེན་རྙེད་པ་ལྟར། །དེ་བཞིན་ཇི་ཞིག་ལྟར་སྟེས་ནས། བྱང་ཆུབ་སེམས་འདི་ བདག་ལ་སྐྱེས། །ཞེས་གསུངས་ཏེ། ཚིགས་བཅད་དང་པོས་མཚམས་སྦྱར། གཉིས་པས་རང་གི་དོན་གྲུབ་པར་ཆེད་དུ་བརྗོད། གསུམ་པས་རིགས་སུན་མི་འབྱིན་པར་དམ་བཅའ། བཞི་པས་བྱང་ཆུབ་ཀྱི་སེམས་ཤིན་ཏུ་རྙེད་དཀའ་བའི་དཔེ་
Page: 173 ༄༅། །བསྟན་ཏོ། །དེ་ཡང་དབུགས་དབྱུང་བ་དང་གཟེངས་བསྟོད་པའི་རྒྱུ་མཚན་ནི་བྱང་ཆུབ་ཀྱི་སེམས་མཇུག་ཀྱང་རྒྱས་པར་བྱ་བ་སྟེ་སྲུང་བ་དང་དག་པ་དང་དཔེལ་བའི་ཕྱིར་རོ། །སྔོན་ཐོག་མེད་དུ་འཁོར་ཡང་བྱང་ཆུབ་ཀྱི་སེམས་མ་ སྐྱེས་ལ་དེང་ཁོ་ན་སྐྱེས་པས་དེང་དུས་བདག་ཚེ་འབྲས་བུ་ཡོད་ཅེས་བྱའོ། །དེ་རིང་སངས་རྒྱས་རིགས་སུ་སྐྱེས་ཏེ་བྱང་ཆུབ་ཀྱི་སེམས་སྐྱེས་པ་ཙམ་གྱིས་སངས་རྒྱས་ཀྱི་རིགས་སུ་འགྱུར་བའི་ཕྱིར་རོ། །སངས་རྒྱས་སྲས་སུ་ད་གྱུར་ཏོ་ཞེས་དགའ་བ་དང་ དོན་བཞིན་གྱི་ང་རྒྱལ་ཁྱད་པར་ཅན་ཡིད་ལ་བྱེད་པས་དམན་པའི་སེམས་དོར་རོ། །སྐྱོན་མེད་ནི་ཐོག་ཐ་བར་མར་དག་པའོ། །རྙོག་པ་སྟེ་སྡིག་པར་མི་འགྱུར་བའོ། །དེ་ཡང་ནོར་བུ་རིན་པོ་ཆེ་ནི་གཅེས་སྤྲས་མང་པོས་མཛོད་བཙན་པོར་ཟ་ མ་ཏོག་ཏུ་རྒྱ་དུ་མས་བཏབ་སྟེ་འཇོག་པའི་ཕྱིར་ཕྱི་རོལ་ལམ་པོ་ཆེར་ཕྱགས་བདར་གྱི་ཕུང་པོར་ལྷུང་བར་མི་འགྱུར་ལ་བརྒྱ་ལ་ལྷུང་སྲིད་ཀྱང་ལོང་བས་བརྙེས་མི་སྲིད་པ་ལྟར་ཐམས་ཅད་མཁྱེན་པའི་སེམས་རིན་པོ་ཆེ་དེ་འདྲ་ཡང་ཉན་ཐོས་དང་རང་སངས་ རྒྱས་མིག་ལྡན་ལྟ་བུས་མ་རྙེད་པར་བདག་ཅག་སོ་སྐྱེ་ལོང་བ་ལྟ་བུས་རྙེད་པ་འདི་ནི་ཤིན་དུ་ངོ་མཚར་བ་སྟེ་སངས་རྒྱས་ཀྱི་བྱིན་རླབས་ཁོ་ནའི་སྟབས་ལེགས་ཀྱིས་རྙེད་པས་ཏེ་པོར་བསྟེས་པའོ། གཉིས་པ་ལ་གསུམ། སྡུག་བསྔལ་སེལ་བར་ ནུས་པ། སྒྲིབ་པ་སེལ་བར་ནུས་པ། ཕན་བདེ་སྒྲུབ་པར་ནུས་པས་དགའ་བ་སྐྱེད་པའོ། །དང་པོ་་ནི། འགྲོ་བའི་འཆི་བདག་འཛེམས་བྱེད་པའི། །བདུད་རྩིའི་མཆོག་ཀྱང་འདི་ཡིན་ནོ། །འགྲོ་བའི་དབུལ་བ་སེལ་བ་ཡི། །མི་ཟད་གཏེར་ཡང་འདི་ ཡིན་ནོ། །འགྲོ་བའི་ནད་རབ་ཞི་བྱེད་པའི། །སྨན་གྱི་མཆོག་ཀྱང་འདི་ཡིན་ནོ། །སྲིད་ལམ་འཁྱམས་ཤིང་དུབ་པ་ཡི། །འགྲོ་བ་ངལ་གསོའི་ལྗོན་ཤིང་ཡིན། །འགྲོ་བ་ཐམས་ཅད་ངན་འགྲོ་ལས། །སྒྲོལ་བར་བྱེད་པའི་སྤྱི་སྟེགས་ཡིན། །
Page: 174 ཅེས་གསུངས་ཏེ། འཆི་བ་སེལ་བ། དབུལ་བ་སེལ་བ། ནད་སེལ་བ། དུབ་པ་སེལ་བ། ངན་སོང་གི་སྡུག་བསྔལ་སེལ་བ་སྟེ་ལྔ་པོ་རྐང་པ་གཉིས་རེས་བསྟན་ཏོ། །དེ་ཡང་འཆི་བ་མེད་པ་ནི་སངས་རྒྱས་ཡིན་ལ། དེ་འཐོབ་པར་བྱེད་པའི་ཕྱིར་དང་ སེམས་ཅན་འཇིག་རྟེན་དང་འཇིག་རྟེན་ལས་འདས་པའི་བདེ་བས་དབུལ་བ་རྣམས་ལ་འདི་ལས་དགོས་འདོད་ཀྱི་གཏེར་འབྱུང་བའི་ཕྱིར་དང༌། ནད་ཀྱི་གཙོ་བོ་ནི་དུག་གསུམ་ཡིན་ལ། རླུང་མཁྲིས་བད་ཀན་ཡང་དེས་བསྐྱེད་པར་ཟད་ལ། དེ་སེལ་བའི་ སྨན་གཅིག་བུ་ཡིན་པའི་ཕྱིར་དང་། འཁོར་བ་མཐའ་མེད་དུ་འཁྱམས་པས་དུབ་པ་རྣམས་ངལ་གསོ་བའི་རྟེན་ཡིན་པའི་ཕྱིར་དང་། འགྲོ་བ་ངན་འགྲོ་ལས་སྒྲོལ་བའི་ཐབས་འདི་ལས་གཞན་མེད་པའི་ཕྱིར་ཏེ་རིམ་པར་སྦྱར་རོ། །གཉིས་པ་ནི། འགྲོ་བའི་ ཉོན་མོངས་གདུང་སེལ་བའི། །སེམས་ཀྱི་ཟླ་བ་ཤར་བ་ཡིན། །འགྲོ་བའི་མི་ཤེས་རབ་རིབ་དག །དཔྱིས་འབྱིན་ཉི་མ་ཆེན་པོ་ཡིན། །ཅེས་གསུངས་ཏེ། དེ་ཡང་རྐང་པ་གཉིས་གཉིས་ཀྱིས་ཉོན་སྒྲིབ་དང་ཤེས་སྒྲིབ་སེལ་བའི་ཕན་ཡོན་ བསྟན་པ་སྟེ། ཉོན་མོངས་པ་ནི་ཚད་པས་གདུངས་པ་ལྟར་རྒྱུད་སྲེག་པ་སྟེ་དེ་སེལ་བ་ལ་བཅོ་ལྔའི་ཟླ་འོད་ལྟ་བུའོ། །མི་ཤེས་པས་ཤེས་བྱ་ལ་བསྒྲིབས་པ་ནི་མུན་པའམ་ནང་གི་རབ་རིབ་ཡིན་ལ་དེ་སེལ་བས་ན་ཉི་མ་ལྟ་བུའོ། །གསུམ་པ་་ནི། དམ་ཆོས་འོ་མ་བསྲུབས་པ་ལས། །མར་གྱི་ཉིང་ཁུ་ཕྱུང་བ་ཡིན། །འགྲོ་བའི་མགྲོན་པོ་སྲིད་པའི་ལམ་རྒྱུ་ཞིང་། །བདེ་བའི་ལོངས་སྤྱོད་སྤྱད་པར་འདོད་པ་ལ། །འདི་ནི་བདེ་བའི་མཆོག་ཏུ་ཉེར་གནས་ཏེ། །སེམས་ཅན་མགྲོན་ཆེན་ཚིམ་ པར་བྱེད་པ་ཡིན། །ཅེས་གསུངས་ཏེ། དེ་ཡང་རྐང་པ་གཉིས་ཀྱིས་ཕན་པ་སྒྲུབ་པ་དང་། ཚིགས་བཅད་གཅིག་གིས་བདེ་བ་སྒྲུབ་ནུས་པར་སྟོན་ཏེ། ཐེག་པ་ཆེན་པོའི་ཆོས་ཀྱི་འོ་མའི་རྒྱ་མཚོ་བསྲུབས་པ་ལས་ཕྱུང་བ་མར་གྱི་ཉིང་ཁུ་ལྟ་བུ་ནི་བྱང་ཆུབ་
Page: 175 ༄༅། །ཀྱི་སེམས་འདི་ཁོ་ན་སྟེ་གཞན་གཉིས་པ་མེད་དོ། །བྱང་ཆུབ་མ་ཐོབ་ཀྱི་བར་དུ་ཡང་འདི་ཕྱིའི་རང་གཞན་གྱི་བདེ་བའི་རྒྱུ་ནི་བྱང་ཆུབ་ཀྱི་སེམས་ཁོ་ན་སྟེ། བྱང་ཆུབ་སེམས་མེད་རྒྱལ་འབྱུང་འཇིག་རྟེན་ཡོད་མེད་ན། །འབྲས་ བུ་བརྒྱ་བྱིན་ཚངས་པ་ཉན་ཐོས་ག་ལ་འབྱུང་། །ཉི་མའི་དཀྱིལ་འཁོར་གང་ཚེ་འོད་ཀྱི་དྲ་བ་འགྱེད། །དེ་ཚེ་སེམས་ཅན་ལས་བྱེད་བརྩོན་པ་དེ་བཞིན་དུ། །མཁས་པའི་ཤེས་ཕྱིར་འཇིག་རྟེན་བྱང་ཆུབ་སེམས་བྱུང་ན། །ཡེ་ཤེས་ཀྱིས་ནི་སེམས་ ཅན་ཡོན་ཏན་ཆོས་དང་ལྡན། །དཔེར་ན་མ་དྲོས་གནས་པའི་ཀླུ་བདག་མེད་གྱུར་ན། ཛམྦུའི་གླིང་འདིར་ཆུ་ཀླུང་འབབ་པར་ག་ལ་འགྱུར། །ཆུ་ཀླུང་མེད་ན་མེ་ཏོག་འབྲས་བུ་འབྱུང་མི་འགྱུར། །རྒྱ་མཚོ་ལ་ཡང་རིན་ཆེན་གཟུགས་མང་མེད་པར་ འགྱུར། །དེ་བཞིན་འདིར་ཡང་བྱང་ཆུབ་སེམས་མེད་བདེ་གཤེགས་ཀྱི། །ཡེ་ཤེས་འཇིག་རྟེན་འདི་དག་ཀུན་ཏུ་ག་ལ་འབྱུང་། །ཡེ་ཤེས་མེད་ན་ཡོན་ཏན་འཕེལ་མེད་བྱང་ཆུབ་མེད། །རྒྱ་མཚོ་འདྲ་བའི་སངས་རྒྱས་ཆོས་ཀྱང་མེད་པར་འགྱུར། ། ཅེས་སོ། །གཉིས་པ་ནི། བདག་གིས་དེ་རིང་སྐྱོབ་པ་ཐམས་ཅད་ཀྱི། །སྤྱན་སྔར་འགྲོ་བ་བདེ་གཤེགས་ཉིད་དང་ནི། །བར་དུ་བདེ་ལ་མགྲོན་དུ་བོས་ཟིན་གྱིས། །ལྷ་དང་ལྷ་མིན་ལ་སོགས་དགའ་བར་གྱིས། །ཅེས་གསུངས་ཏེ། བདག་གིས་ ནི་བོད་པ་པོ་སྦྱིན་བདག་ངེས་བཟུང་དུ་བྱས་པའོ། །དེ་རིང་ནི་དུས་ཏེ་བྱང་ཆུབ་ཀྱི་སེམས་སྐྱེད་མ་ཐག་པ་དེ་ནས་སོ། །སྐྱོབ་པ་ཐམས་ཅད་ཀྱི་སྤྱན་སྔར་ཅེས་དཔང་པོ་ངེས་བཟུང་དུ་བྱས་པ་སྟེ་འདི་ལ་ཁྱེད་རྣམས་དཔང་པོའོ་ཞེས་པའི་ཐ་ཚིག་གོ །འགྲོ་ བ་ནི་མགྲོན་ངེས་བཟུང་དུ་བྱས་པ་ལྷ་དང་ལྷ་མ་ཡིན་ལ་སོགས་པ་སེམས་ཅན་ཐམས་ཅད་དོ། །བདེ་གཤེགས་ཉིད་དང་ནི་བར་དུ་བདེ་བ་ལ་མགྲོན་དུ་བོས་པ་ནི་སྦྱིན་བྱ་ངེས་བཟུང་དུ་ཁས་བླངས་པ་སྟེ་མཐར་ཐུག་བདེ་གཤེགས་ཉིད་དང་གནས་སྐབས་
Page: 176 སུ་བདེ་བ་ཐམས་ཅད་སྦྱིན་པར་དམ་བཅས་པའོ། །དེ་ལྟར་ན་ཁྱེད་རྣམས་དགའ་བ་དང་བཅས་པས་སྤྲོ་སྲིངས་ཤིག་པའོ། །དེ་ལྟར་ན་ཆར་པ་བབས་པ་ན་སཱ་ལུ་སྐྱེས་སོ་ཅེས་ཟེར་བ་ལྟར་རྒྱུ་འབྲས་གཞན་དུ་མི་འཁྲུལ་བའི་ཕྱིར་བྱང་ཆུབ་ཀྱི་སེམས་སྐྱེས་པ་ ན་རང་གཞན་ཐམས་ཅད་ཀྱི་ཕན་བདེ་གྲུབ་པོ་ཞེས་བརྗོད་པར་བྱའོ། །བྱང་ཆུབ་སེམས་དཔའི་སྤྱོད་པ་ལ་འཇུག་པ་ལས། བྱང་ཆུབ་ཀྱི་སེམས་ཡོངས་སུ་བཟུང་བ་སྟེ་ལེའུ་གསུམ་པ་རྣམ་པར་ཕྱེ་བའོ།
ལེའུ་བཞི་པ། བག་ཡོད་པ་བསྟན་པ།
[edit]Page: 177 ༄༅། །ལེའུ་བཞི་པ་ལ་ལེའུའི་འབྲེལ་ནི། དེ་ལྟར་བསམ་པ་ཕུན་སུམ་ཚོགས་པ་བྱང་ཆུབ་ཏུ་སེམས་བསྐྱེད་ནས་སྦྱོར་བ་ཕུན་སུམ་ཚོགས་པ་བག་ཡོད་པས་སྒྲུབ་དགོས་པར་འབྲེལ་ཏེ། དཀའ་འགྲེལ་ཆུང་ངུར། དེ་ལྟར་སེམས་ བསྐྱེད་པ་བརྗོད་ནས་ད་ནི་བསླབ་པ་ཉམས་སུ་བླང་བ་འཆད་དོ། །ཞེས་སོ། །དེ་ཡང་ངོ་བོ་ནི། ཐེག་ཆེན་གྱི་བསླབ་པ་གསུམ་མམ་ཕ་རོལ་ཏུ་ཕྱིན་པ་བཅུའམ་བསྡུ་ན་སེམས་སྲུང་བ་ཁོ་ན་ཡིན་ལ། ཕ་རོལ་ཏུ་ཕྱིན་པ་ཐབས། སྨོན་ལམ། སྟོབས། ཡེ་ཤེས་ཏེ་ལྷག་ མ་བཞི་པོ་ཤེར་ཕྱིན་དུ་འདུ་ལ། བསླབ་པ་གསུམ་ཡང་ཕ་རོལ་ཏུ་ཕྱིན་པ་དྲུག་ཏུ་འདུ་བས་འདིར་སྦྱིན་པ་སྤྱི་འགྲོར་བཏང་ཞིང་ཚུལ་ཁྲིམས་ལ་ཤེས་བཞིན་གྱི་སྒྲས་སྨོས་ལ། ཕ་རོལ་ཏུ་ཕྱིན་པ་ལྷག་མ་རྣམས་གོ་རིམ་དུ་བསྟན་ཏེ། བག་ཡོད་པ་ནི་ཐམས་ཅད་ཀྱི་ རྩ་བ་ཡིན་པས་ཐོག་མར་བསྟན་པའོ། །དེས་ན་ཐོབ་པ་མི་ཉམས་པར་སྲུང་བའི་ཚུལ་ལ་གཉིས། རྩ་བ་བག་ཡོད་པ་ལ་རག་ལས་པར་བསྟན་པ་དང་། ཕ་རོལ་ཏུ་ཕྱིན་པ་དྲུག་པོ་རེ་རེ་ཞིང་ཉམས་སུ་བླང་བའོ། །དང་པོ་་ལ། སྤྱིའི་དོན་གྱིས་ཕ་རོལ་ཏུ་ཕྱིན་ པ་གཏན་ལ་དབབ་པ་དང༌། གཞུང་གི་དོན་གྱིས་བག་ཡོད་བྱེ་བྲག་ཏུ་བཤད་པའོ། །དང་པོ་ལ་གཉིས། སྤྱིའི་དོན་དང་། སོ་སོའི་དོན་བཤད་པའོ། །དང་པོ་ནི། རྒྱན་དང་ཐེག་བསྡུས་ལས་བཤད་པ་ལྟར། སྡོམ་ནི། གྲངས་དང་མཚན་ཉིད་གོ་ རིམ་དང་། །ངེས་ཚིག་གོམས་བྱའི་ཡོན་ཏན་དང་། །རབ་དབྱེ་བསྡུ་དང་མི་མཐུན་ཕྱོགས། །ཡོན་ཏན་ཕན་ཚུན་རྣམ་ངེས་བཅུ། །ཞར་ལ་སྤེལ་དང་དག་པའང་བཤད། །ཅེས་བྱ་སྟེ། དང་པོ་གྲངས་ངེས་ལ་བརྒྱད། མངོན་མཐོ་ངེས་ལེགས་ དོན་གཉིས་དང་། གཞན་དོན་ཐེག་ཆེན་མཐའ་དག་སྡུད། །ལམ་ཀུན་སྡུད་དང་བསླབ་པ་གསུམ། །སྤང་བྱ་ལ་བལྟོས་འགྲུབ་པ་བཞི། །དེ་ལྟར་གྲངས་ངེས་རྣམ་པ་བརྒྱད། །ཅེས་བྱ་སྟེ། དེ་ཡང་མངོན་མཐོ་ལྷ་མིའི་བདེ་བའི་རྒྱུ་དང་ངེས་ལེགས་
Page: 178 བྱང་ཆུབ་ཀྱི་རྒྱུའི་དབང་དུ་བྱས་ནས་ཕར་ཕྱིན་ལ་དྲུག་ཏུ་ངེས་ཏེ། ལོངས་སྤྱོད་ཀྱི་དོན་དུ་སྦྱིན་པ། ལུས་ཀྱི་དོན་དུ་ཚུལ་ཁྲིམས། འཁོར་གྱི་དོན་དུ་བཟོད་པ་སྟེ་མངོན་མཐོའི་བདེ་ལེགས་ཀྱི་རྒྱུ་གསུམ། ཡོན་ཏན་འཕེལ་བའི་དོན་དུ་བརྩོན་འགྲུས། ཞི་གནས་ཀྱི་དོན་དུ་བསམ་ གཏན། ལྷག་མཐོང་གི་དོན་དུ་ཤེས་རབ་སྟེ་ངེས་ལེགས་ཀྱི་རྒྱུ་གསུམ་དང་དྲུག་ཏུ་ངེས་པའི་ཕྱིར་ཏེ། རྒྱན་ལས། ལོངས་སྤྱོད་དང་ལུས་ཕུན་སུམ་ཚོགས་པ་དང་། །འཁོར་རྩོམ་ཕུན་སུམ་ཚོགས་པ་མངོན་མཐོ་དང་། །རྟག་ཏུ་ཉོན་མོངས་དབང་ཉིད་མི་ འགྲོ་དང་། །བྱ་བ་རྣམས་ལ་ཕྱིན་ཅི་མ་ལོག་པའོ། །ཞེས་སོ། །ཡང་སྦྱིན་སོགས་གསུམ་གྱིས་གཞན་དོན་དང་། བརྩོན་སོགས་གསུམ་གྱིས་རང་དོན་སྒྲུབ་པའི་ཕྱིར་ཡང་དྲུག་སྟེ། སེམས་ཅན་དོན་ལ་རབ་བརྩོན་པ། །གཏོང་དང་མི་གནོད་བཟོད་པས་བྱེད། ། གནས་དང་གྲོལ་བ་གཞིར་བཅས་པས། །རང་དོན་རྣམ་པ་ཐམས་ཅད་སྦྱོང་། །ཅེས་སོ། །ཡང་གཞན་དོན་ཁོ་ནའི་དབང་དུ་བྱས་ནས་ཀྱང་ལོངས་སྤྱོད་ཀྱིས་མི་ཕོངས་པར་བྱེད་པ་སྦྱིན་པ་ནས་ངེས་དོན་ལེགས་པར་བརྗོད་པ་ཤེས་རབ་ཀྱི་བར་དུ་བཞག་སྟེ། མི་ཕོངས་པ་དང་རྣམ་པར་མི་འཚེ་དང་། །རྣམ་འཚེ་བཟོད་དང་བྱ་བས་མི་སྐྱོ་དང་། །དགའ་བྱེད་ལེགས་པར་བརྗོད་པ་དེ་ཡི་ཕྱིར། །གཞན་གྱི་དོན་ནི་རང་གི་དོན་མཆོག་ཡིན། །ཞེས་སོ། །ཡང་ཐེག་ཆེན་ཐམས་ཅད་དྲུག་པོ་འདིར་འདུ་བས་ཀྱང་ཡིན་ཏེ། ལུས་ལོངས་སྤྱོད་ལ་མི་ལྟ་བ་སྦྱིན་ཚུལ་གཉིས་རྣམ་པར་མི་རྟོག་པའི་རྣལ་འབྱོར་ལ་གནས་པ་ཐ་མ་གཉིས། དེ་དག་ལ་མི་སྐྱོ་ཞིང་གུས་པ་བཟོད་བརྩོན་ཡིན་པའི་ཕྱིར་ཏེ། ལོངས་སྤྱོད་མངོན་པར་མི་དགའ་དང་། །རབ་གུས་གཉིས་ལ་མི་སྐྱོ་དང་། ། རྣལ་འབྱོར་རྣམ་པར་མི་རྟོག་པ། །ཐེག་ཆེན་མཐའ་དག་འདིར་ཟད་དོ། །ཅེས་སོ། །ཡང་ལམ་མཐའ་དག་དྲུག་པོ་འདིར་འདུ་བས་ཀྱང་སྟེ། སྦྱིན་ཚུལ་གྱིས་མ་ཆགས་པའི་ལམ། བཟོད་པས་སེམས་ཅན་མི་གཏོང་པའི་ལམ། བརྩོན་འགྲུས་ཀྱིས་འཕེལ་
Page: 179 ༄༅། །བའི་ལམ། བསམ་གཏན་གྱིས་རྣམ་གཡེང་སྡོམ་པའི་ལམ། ཤེས་རབ་སྒྲིབ་པ་སྦྱོང་བའི་ལམ་ཡིན་པའི་ཕྱིར་ཏེ། ཡུལ་རྣམས་ལ་ནི་མ་ཆགས་ལམ། །དེ་ཐོབ་རྣམ་གཡེང་སྡོམ་པའི་གཞན། སེམས་ཅན་མི་གཏོང་འཕེལ་ བ་དང་། །སྒྲིབ་པ་རྣམ་པར་སྦྱོང་བའི་གཞན། །ཞེས་སོ། །ཡང་བསླབ་པ་ཐམས་ཅད་གསུམ་དུ་འདུ་ལ། དེའི་ཕྱིར་ཡང་སྦྱིན་སོགས་གསུམ་ཚུལ་ཁྲིམས་ཀྱི་བསླབ་པ། བསམ་གཏན་ཏིང་ངེ་འཛིན་གྱི་བསླབ་པ། ཤེར་ཕྱིན་ཤེས་རབ་ཀྱི་བསླབ་པ། བརྩོན་ འགྲུས་དེ་ཐམས་ཅད་ཀྱི་གྲོགས་སུ་བཞག་པ་སྟེ། བསླབ་གསུམ་དབང་དུ་མཛད་ནས་ནི། །རྒྱལ་བས་ཕ་རོལ་ཕྱིན་པ་དྲུག །ཡང་དག་བཤད་དེ་དང་པོ་གསུམ། །ཐ་མ་གཉིས་ཀྱིས་རྣམ་པ་གཉིས། །གཅིག་ནི་གསུམ་ཆར་ལ་ཡང་གཏོགས། ། ཅེས་སོ། །དེ་ལྟར་དྲུག་ནི་རྒྱན་ལས་བཤད་ལ། ཐེག་བསྡུས་ལས་ནི། འཁོར་བ་ལས་མི་འཕགས་པའི་རྒྱུ་ལོངས་སྤྱོད་དང་ཁྱིམ་ཐབ་ལ་ཆགས་པའི་གཉེན་པོར་དང་པོ་གཉིས། འཕགས་ཀྱང་ལྡོག་པའི་རྒྱུ་ལོག་སྒྲུབ་དང་སྐྱོ་བའི་གཉེན་པོར་བར་མ་གཉིས། མ་ལོག་ ཀྱང་ཆུད་ཟ་བའི་རྒྱུ་རྣམ་གཡེང་དང་གཏི་མུག་གི་གཉེན་པོར་ཕྱི་མ་གཉིས་ཏེ་སྤང་བྱ་ལ་བལྟོས་ནས་གྲངས་ངེས་དང་། ཡང་སངས་རྒྱས་ཀྱི་ཆོས་འགྲུབ་པ་བཞིའི་དབང་དུ་བྱས་ནས་ཀྱང་དྲུག་ཏུ་བཞག་སྟེ་དང་པོ་བཞིས་སེམས་མི་གཡེང་བའི་རྒྱུ་ སྒྲུབ། ལྔ་པས་མི་གཡེང་བ་ཐོབ། དྲུག་པས་དེ་ཁོ་ན་ཉིད་ཤེས། དེ་ལས་སྟོབས་སོགས་ཀྱི་ཡོན་ཏན་འཐོབ་པའོ། །མཚན་ཉིད་ནི། རྟེན་དངོས་ཆེད་དུ་བྱ་བ་དང་། །ཐབས་མཁས་སྔོ་བ་རྣམ་དག་སྟེ། །དམ་པ་དྲུག་ལྡན་དགེ་བ་ཡིན། །ཡང་ན་ཁྱད་ པར་བཞི་ལྡན་དགེ། ཆགས་མེད་བདུན་ལྡན་དགེ་བ་འང་། །ཡང་ན་འཁོར་གསུམ་རྣམ་དག་པའི། །ཤེས་རབ་ཀྱིས་ཟིན་དགེ་བ་སྟེ། །ཕ་རོལ་ཕྱིན་པའི་མཚན་ཉིད་འདོད། །ཅེས་བྱ་སྟེ། ཐེག་བསྡུས་ལྟར་ན། རྟེན་དམ་པ་བྱང་ཆུབ་ཀྱི་སེམས་
Page: 180 དང་། དངོས་པོ་དམ་པ་གཞི་ཐམས་ཅད་ལ་འཇུག་པ་དང་། ཆེད་དུ་བྱ་བ་དམ་པ་སེམས་ཅན་ཐམས་ཅད་ཀྱི་ཕན་བདེའི་ཆེད་དང་། ཐབས་མཁས་དམ་པ་འཁོར་གསུམ་མི་རྟོག་པའི་ཤེས་རབ་ཀྱི་ཟིན་པ་དང་། བསྔོ་བ་དམ་པ་བྱང་ཆུབ་ཆེན་པོར་སྔོ་བ་དང་། རྣམ་དག་ དམ་པ་སྒྲིབ་གཉིས་དག་པར་བྱེད་པ་སྟེ་དམ་པ་དྲུག་ལྡན་གྱི་དགེ་བའི་རྩ་བ་ནི་སྐབས་འདིར་བསྟན་བྱ་ཕ་རོལ་ཏུ་ཕྱིན་པའི་མཚན་ཉིད་དོ། །ཁ་ཅིག་དམ་པ་དྲུག་དང་ལྡན་པ་ཕ་རོལ་ཏུ་ཕྱིན་པའི་མཚན་ཉིད་དུ་སྨྲ་བ་ལ་ནི་ཁྱབ་ཆེས་པའི་སྐྱོན་ཡོད་ དེ། འོ་ན་ས་དང་པོ་ལ་གནས་པའི་བྱང་སེམས་ཆོས་ཅན། ཕ་རོལ་ཏུ་ཕྱིན་པ་ཡིན་པར་ཐལ། དམ་པ་དྲུག་ལྡན་ཡིན་པའི་ཕྱིར་ཏེ་ཆོས་དྲུག་པོ་རེ་རེ་ནས་ཚང་བའི་ཕྱིར། འདོད་ན། ལམ་དང་མཐར་ཐུག་གི་འབྲས་བུ་གང་རུང་ཡིན་པར་ཐལ། ཕ་རོལ་ཏུ་ཕྱིན་པ་ཡིན་པའི་ཕྱིར། འདོད་ན། དེ་མ་ཡིན་པར་ཐལ་ཏེ་ས་དང་པོ་བའི་གང་ཟག་ཡིན་པའི་ཕྱིར་རོ། །ཡང་ན་མི་མཐུན་པའི་ཕྱོགས་འཇོམས་པ་དང་། རྣམ་པར་མི་རྟོག་པའི་ཡེ་ཤེས་དང་ལྡན་པ་དང་། སེམས་ཅན་ཐམས་ཅད་ཀྱི་འདོད་པ་ རྫོགས་པར་བྱེད་པའི་རིགས་སུ་གནས་པ་དང་། སེམས་ཅན་རྣམས་ཐེག་པ་གསུམ་ལ་སྨིན་པར་བྱེད་པ་སྟེ་ཁྱད་པར་བཞི་ལྡན་གྱི་དགེ་བ་འདིར་བསྟན་གྱི་ཕ་རོལ་ཏུ་ཕྱིན་པའི་མཚན་ཉིད་དེ། མདོ་སྡེ་རྒྱན་དུ། སྦྱིན་པ་མི་མཐུན་ཕྱོགས་ཉམས་དང་། ། རྣམ་པར་མི་རྟོག་ཡེ་ཤེས་ལྡན། འདོད་པ་ཐམས་ཅད་ཡོངས་རྫོགས་བྱེད། །སེམས་ཅན་རྣམ་སྨིན་བྱེད་རྣམ་གསུམ། །ཞེས་སོ། །ཕར་ཕྱིན་རེ་རེ་ལ་དེ་ལྟར་བཤད་པའི་ཤུགས་ཀྱིས་ཕ་རོལ་ཏུ་ཕྱིན་པ་སྤྱིའི་མཚན་ཉིད་ཀྱང་དེ་ལྟར་འཐོབ་པའི་ ཕྱིར་རོ། །ཡང་ན་ཆགས་མེད་བདུན་ལྡན་གྱི་སྦྱིན་སོགས་ཀྱི་དགེ་བ་སྟེ། རྒྱན་ཉིད་ལས། བྱང་ཆུབ་སེམས་དཔའི་སྦྱིན་པ་ནི། །མ་ཆགས་མི་ཆགས་ཆགས་པ་མེད། །ཆགས་པ་ཉིད་ཀྱང་མ་ཡིན་ལ། མ་ཆགས་མི་ཆགས་ཆགས་པ་མེད། །
Page: 181 ༄༅། །ཅེས་རང་གི་མི་མཐུན་པའི་ཕྱོགས་སེར་སྣ་ཚུལ་འཆལ་སོགས་ལ་མ་ཆགས་པ་དང་། ཕྱི་ཤོལ་མེད་པས་མི་ཆགས་པ་དང་། ཆོག་པར་མི་འཛིན་པས་ཆགས་པ་མེད་པ་དང་། སྦྱིན་པ་ལན་ལ་རེ་བའམ་ཚུལ་ཁྲིམས་སྲིད་པར་སྨོན་པ་ ནས་ཤེས་རབ་ཐབས་དང་བྲལ་བ་སོགས་མ་དག་པ་མེད་པས་ཆགས་པ་ཉིད་ཀྱང་མ་ཡིན་པ་དང་། རྣམ་སྨིན་ལ་མི་རེ་བས་མ་ཆགས་པ་དང་། བག་ལ་ཉལ་ལ་མི་ཆགས་པ་དང་། རྣམ་གཡེང་ལ་ཆགས་པ་མེད་པ་དང་བདུན་ཏེ། རེ་རེ་ཞིང་དེ་ལྟར་གསུངས་པའི་ ཕྱིར་རོ། །ཡང་ན་འཁོར་གསུམ་རྣམ་པར་དག་པའི་ཤེས་རབ་ཁྱད་པར་ཅན་གྱིས་ཟིན་པའི་སྦྱིན་སོགས་ཀྱི་དགེ་བའང་འདི་སྐབས་ཀྱི་ཕ་རོལ་ཏུ་ཕྱིན་པའི་མཚན་ཉིད་དུ་འགྱུར་ཏེ། སྦྱིན་པ་སྦྱིན་པའི་སྔོན་དུ་འགྲོ་བ་ཤེས་རབ་ཡིན། །ཚུལ་ཁྲིམས་བཟོད་ དང་བརྩོན་འགྲུས་བསམ་གཏན་དེ་བཞིན་ནོ། །ཞེས་དང་། ཤེས་རབ་མེད་ན་མིག་མེད་ཕ་རོལ་ཕྱིན་ལྔ་འདིས། །དམིགས་བུ་མེད་པས་བྱང་ཆུབ་རེག་པར་ནུས་མ་ཡིན། །གང་ཚེ་ཤེས་རབ་ཀྱིས་ནི་རབ་ཏུ་ཟིན་གྱུར་པ། །དེ་ཚེ་མིག་རྙེད་གྱུར་ཞིང་འདི་ ཡི་མིང་འཐོབ་བོ། །ཞེས་སོ། །གང་དངོས་པོའམ་མཚན་མར་ཞེན་པའི་སྦྱིན་སོགས་ནི་སྦྱིན་སོགས་ཡིན་ཡང་ཕ་རོལ་ཏུ་ཕྱིན་པ་མ་ཡིན་ཏེ། ཤེས་རབ་ཀྱི་མིག་དང་བྲལ་བའི་ཕྱིར་ཏེ། ཤེས་རབ་མེད་ན་སོགས་དང་། གང་ཚེ་ཤེས་རབ་ཀྱིས་ནི་རབ་ཏུ་ཟིན་གྱུར་ པ། །དེ་ཚེ་མིག་རྙེད་གྱུར་ཅིང་འདི་ཡི་མིང་འཐོབ་བོ། །ཞེས་སོ། །ཡང་ན་ནི་དངོས་མཚན་གྱི་སྦྱིན་སོགས་ལ་འཇིག་རྟེན་པའི་ཕར་ཕྱིན་དང༌། ཤེས་རབ་ཁྱད་པར་ཅན་གྱིས་ཟིན་པ་ལ་འཇིག་རྟེན་ལས་འདས་པའི་ཕར་ཕྱིན་དུ་འཇོག་སྟེ། འཇུག་པ་ལས། སྦྱིན་པ་སྦྱིན་བྱ་ལེན་པོ་གཏོང་པོས་སྟོང༌། །འཇིག་རྟེན་འདས་པའི་ཕ་རོལ་ཕྱིན་ཞེས་བྱ། གསུམ་པོ་དག་ལ་ཆགས་སྐྱེས་གྱུར་པ་ན། །འཇིག་རྟེན་པ་ཡི་ཕ་རོལ་ཕྱིན་ཞེས་བརྗོད། །ཅེས་སོ། །འོན་ཀྱང་འཇིག་རྟེན་པའི་ཕར་ཕྱིན་ནི་ཕར་ཕྱིན་གྱི་མིང་
Page: 182 ཙམ་དུ་ཟད་ཀྱི་ཕར་ཕྱིན་མ་ཡིན་ལ། བྱང་སེམས་ཚོགས་སྦྱོར་པའི་སྦྱིན་སོགས་ནི་ཕར་ཕྱིན་གྱི་རྒྱུའམ་རྗེས་སུ་མཐུན་པ་ཡིན་ལ། འཕགས་རྒྱུད་ཀྱི་དམིགས་མེད་ཀྱི་བྱམས་བརྩེ་སོགས་ནི་བྱམས་པ་སྦྱིན་པ་བཞི་པར་གསུངས་པས་དེར་སྡུད་པའམ་ཕལ་ཆེར་ ནི་བསམ་གཏན་དང་ཤེས་རབ་ཏུ་འདུ་བ་ཡིན་ལ་དེའི་ཕྱིར། ཐེག་ཆེན་མཐའ་དག་འདིར་ཟད་དོ། །ཞེས་ཐེག་ཆེན་མཐའ་དག་དངོས་དང་བརྒྱུད་པའི་སྒོ་ནས་ཕར་ཕྱིན་དྲུག་ཏུ་བསྡུས་པ་ཡིན་ལ། ཉན་རང་ལ་ནི་ཕ་རོལ་ཏུ་ཕྱིན་པ་མེད་ཅིང་མཐར་ཐུག་ པ་ནི་སངས་རྒྱས་ཁོ་ན་ལ་མངའ་བ་ཡིན་ཏེ། བཤད་སྦྱར་ལས། བསེ་རུ་ལྟ་བུ་རྣམས་ལ་ནི། ཕ་རོལ་ཕྱིན་དྲུག་མིང་ཡང་མེད། །བཅོམ་ལྡན་ཉག་གཅིག་ཕ་རོལ་ཕྱིན། །དྲུག་གི་སྤྱི་ལ་བཞུགས་པ་ལགས། །ཅེས་སོ། །འོ་ན་ཉན་ཐོས་ཀྱི་ས་ ལ་སློབ་པར་འདོད་པས་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་ལ་བསླབ་པར་བྱའོ། །ཞེས་སོགས་གསུངས་པ་མ་ཡིན་ནམ་ཞེ་ན། དེ་ནི་ཤེར་ཕྱིན་གྱི་གདུལ་བྱ་ཡིན་ཡང་གནས་སྐབས་ཉན་རང་ལ་མོས་པ་དག་ཁ་དྲང་བའི་ཆེད་དང་། ཉན་རང་གི་རྣམ་པར་གྲོལ་བ་ ཡང་གང་ཟག་དང་གཟུང་བའི་བདག་མེད་རྟོགས་པ་ལ་བལྟོས་ཤིང་དེ་ཤེར་ཕྱིན་གྱི་ཆ་ཤས་སུ་འགྱུར་བ་ཙམ་ལ་དགོངས་ནས་བསྟན་པ་སྟེ། ལྷའི་བུ་ཉིས་བརྒྱ་བྱང་ཆུབ་ནི་ཡུན་རིང་པོས་སྒྲུབ་དགོས་སོ་ཞེས་སྐྱོ་ནས་ཕྱིར་ལྡོག་པ་གདུལ་བའི་དོན་དུ་འཁོར་བ་ལས་ མྱུར་དུ་ཐར་བར་འདོད་པས་ཀྱང་བྱང་ཆུབ་ཏུ་སེམས་བསྐྱེད་པར་བྱའོ། །ཞེས་གསུངས་པ་བཞིན་ནོ། །དེས་ན་མཚོན་བྱ་རེ་ལ་ཡང་མཚན་ཉིད་མཐའ་ཡས་པ་འཇུག་པ་ཡོད་དེ། ཇི་སྲིད་ཕ་རོལ་གྱིས་མཚན་གཞིའི་སྟེང་དུ་མིང་དོན་གྱི་འབྲེལ་བ་སྒྲོ་འདོགས་ ཆོད་པར་མ་ངེས་ཀྱི་བར་དུ་མཚན་ཉིད་བརྗོད་དགོས་ལ། དེ་ངེས་ནས་སྐབས་དོན་གྲུབ་ཟིན་པའི་ཕྱིར། མཚན་ཉིད་བརྗོད་དགོས་པའང་མ་ཡིན་ནོ། །དེའི་ཕྱིར་རིགས་གཏེར་ལས། མཚན་ཉིད་གཉིས་ཀྱིས་འཇོག་ན་ནི། །མཚོན་བྱ་དེ་ཡང་གཉིས་སུ་འགྱུར། །
Page: 183 ༄༅། །ཞེས་བཤད་པའང་མཁས་པ་ལ་མི་འོས་ཏེ་མཚན་ཉིད་ནི་དོན་དང༌། མཚོན་བྱ་ནི་མིང་ཡིན་ལ། དོན་རེ་ལ་ཡང་མིང་མཐའ་ཡས་པ་འཇུག་པ་མངོན་བརྗོད་ཀྱི་བསྟན་བཅོས་སོགས་ལས་གསལ་བ་དང་། མིང་རེ་ཡང་དོན་མང་པོས་ གཏན་ལ་འབེབས་པ་ཆོས་ཀྱི་དབྱིངས་ཁོ་ན་ཡང་ཁྱབ་པ་དང༌། མི་དམིགས་པ་དང༌། སྟོང་པ་ཉིད་དང༌། འགྱུར་བ་མེད་པ་སོགས་མཐའ་ཡས་པས་འཆད་པའི་ཕྱིར་དང་། བདེན་པ་གཉིས་ཞེས་བྱ་བ་འདི་ཁོ་ན་ལ་གྲུབ་མཐའ་སྨྲ་བ་བཞིས་མཚན་ཉིད་ཐ་དད་དུ་འཇོག་པའི་ ཕྱིར་བདེན་གཉིས་བཞིར་ཐལ་བར་འགྱུར་རོ། །ཞེས་པ་ནི་འཕྲོས་པའི་དོན་ཏོ། །གསུམ་པ་གོ་རིམ་ནི། རྒྱུ་འབྲས་དམན་མཆོག་རགས་ཕྲ་སྟེ། །རྒྱུ་མཚན་གསུམ་ལས་དྲུག་རིམ་བཞིན། །ཞེས་བྱ་སྟེ། ལུས་དང་ལོངས་སྤྱོད་ལ་མ་ཆགས་ པའི་སྦྱིན་པ་དང་ལྡན་ན་བཅས་རང་གི་ཁ་ན་མ་ཐོ་བ་སྲོག་ལ་བབ་ཀྱང་སྡོམ་ནུས་པས་ཚུལ་ཁྲིམས་དང་ལྡན་པར་འགྱུར་ལ། དེ་ཡོད་ན་བཟོད་པ་དང་ལྡན་ཞིང་བཟོད་ལྡན་ནི་བརྩོན་འགྲུས་བརྩམ་པར་གདོན་མི་ཟ་ལ། དེ་ལས་ཏིང་ངེ་འཛིན་སྐྱེ་ཞིང་དེ་ཡིས་རྒྱུད་རྣམ་པར་ གྲོལ་བར་འགྱུར་བ་རྒྱུ་འབྲས་ཀྱི་གོ་རིམ་དང༌། ཡང་ན་སྔ་མ་སྔ་མ་དམན་ལ་ཕྱི་མ་ཕྱི་མ་མཆོག་ཡིན་པས་དམན་མཆོག་གི་གོ་རིམ་དང་། ཡང་ན་སྔ་མ་སྔ་མ་རགས་ཤིང་སྒྲུབ་པར་སླ་ལ་ཕྱི་མ་ཕྱི་མ་ཕྲ་ཞིང་སྒྲུབ་པར་དཀའ་བས་རགས་ཕྲའི་གོ་རིམ་ཡང་ ཡིན་ཏེ། སྔ་མ་ལ་བརྟེན་ཕྱི་མ་སྐྱེ། །དམན་དང་མཆོག་ཏུ་གནས་ཕྱིར་དང་། །རགས་པ་དང་ནི་ཕྲ་བའི་ཕྱིར། དེ་དག་རིམ་པས་བསྟན་པ་ཡིན། །ཞེས་སོ། །བཞི་པ་ངེས་ཚིག་ནི། སྲིད་ཞིའི་ཕ་རོལ་སོང་ཕྱིར་རོ། །ཞེས་བྱ་སྟེ། འཇིག་རྟེན་པ་དང་ཐེག་དམན་གྱི་དགེ་བ་ཟིལ་གྱིས་གནོན་པས་དེ་དག་གི་ཕ་རོལ་ཏུ་སོང་བའམ། ཕྱིན་ཟིན་པའི་ཕྱིར་ཕ་རོལ་ཏུ་ཕྱིན་པ་ཞེས་བྱ་སྟེ། མྱ་ངན་ལས་འདས་པ་ལ་འཁོར་བའི་ཕ་རོལ་ཏུ་སོན་པ་ཞེས་བཏགས་པ་བཞིན་ནོ། །བྱེ་བྲག་ཏུ་
Page: 184 དཱ་ནའི་སྒྲ་ལས་དབུལ་བ་འདོར་བས་སྦྱིན་པ། ཤྲཱི་ལའི་སྒྲ་ལས་བསིལ་བ་འཐོབ་པས་ཚུལ་ཁྲིམས། ཀྵནྟའི་སྒྲ་ལས་ཁྲོ་བ་བཟོད་པའི་ཕྱིར་བཟོད་པ། བཱིརྱའི་སྒྲ་ལས་མཆོག་ལ་སྦྱོར་བའི་ཕྱིར་བརྩོན་འགྲུས། དྷྱ་ནའི་སྒྲ་ལས་ཡིད་འཛིན་ པའི་ཕྱིར་བསམ་གཏན། པྲཛྙཱའི་སྒྲ་ལས་དོན་དམ་ཤེས་པའི་ཕྱིར་ཤེས་རབ་སྟེ། དབུལ་བ་འདོར་བར་བྱེད་པ་དང་། བསིལ་བ་འཐོབ་དང་ཁྲོ་བཟོད་དང་། །མཆོག་སྦྱོར་བ་དང་ཡིད་འཛིན་དང་། །དོན་དམ་ཤེས་པའི་ཕྱིར་བཤད་དོ། །ཅེས་སོ། ལྔ་པ་གོམས་ཚུལ་ནི། དངོས་པོ་ཡིད་བྱེད་བསམ་པ་དང་། ཐབས་དང་དབང་འབྱོར་ལྔས་གོམས་བྱེད། །རྒྱུ་དང་རྣམ་སྨིན་སྨོན་ལམ་དང་། །སོར་རྟོག་དངོས་པོ་ལ་བསྟེན་བཞི། །མོས་པ་རོ་མྱང་ཡི་རང་དང་། །དགའ་བ་ཡིད་བྱེད་ལ་བསྟེན་ བཞི། །མི་ངོམས་ཡངས་དང་དགའ་དང་ཕན། །མ་གོས་དགེ་བའི་བསམ་པ་སྟེ། །བསམ་པ་ལ་བསྟེན་རྣམ་པ་དྲུག །ས་ལ་བསྟེན་པ་གཅིག་པུ་ཉིད། །སྐུ་དང་སྤྱོད་པ་སྟོན་པ་སྟེ། །དབང་འབྱོར་ལ་བསྟེན་རྣམ་པ་གསུམ། །དེ་ལྟར་ རྣམ་པ་བཅོ་བརྒྱད་དོ། །ཞེས་བྱ་སྟེ། རྒྱུ་རིགས་སད་པ། རྣམ་སྨིན་ལུས་ཕུན་སུམ་ཚོགས་པ། སྔོན་གྱི་སྨོན་ལམ་དག་པས། སོ་སོར་བརྟག་པའི་སྟོབས་དང་ལྡན་པ་སྟེ། དངོས་པོ་ལ་བསྟེན་པ་བཞིའོ། །གསུང་རབ་ཟབ་མོ་ལ་དད་པས་མོས་པ་དང་། ཕར་ཕྱིན་དྲུག་ལ་ ཡིད་ཆེས་པས་སྒོམ་པ་རོ་མྱང་དང་། གཞན་གྱི་ཕྱིན་དྲུག་ཐམས་ཅད་ལ་ཡི་རང་བ་དང་། རང་གཞན་ལ་མ་འོངས་པའི་ཚེ་འབྱུང་བའི་ཕྱིན་དྲུག་ལ་མངོན་པར་དགའ་བ་སྟེ། ཡིད་བྱེད་ལ་བསྟེན་པ་བཞིའོ། །བསྐལ་པ་གངྒཱའི་བྱེ་སྙེད་དུ་ལུས་དེ་སྙེད་ཀྱིས་ཞིང་ ཁམས་དེ་སྙེད་རིན་པོ་ཆེ་སྣ་བདུན་གྱིས་བཀང་བ་བྱིན་པ་དང་། དུས་དེ་སྲིད་དུ་ལུས་དེ་སྙེད་ཀྱིས་སྟོང་གསུམ་མེས་གང་བར་བྱང་ཆུབ་ཀྱི་ཆེད་དུ་སྤྱོད་ལམ་བཞི་སྤྱོད་པ་སོགས་ཕར་ཕྱིན་རེ་རེའི་སྤྱོད་པ་ཚད་མེད་པས་ཀྱང་མི་ངོམས་པ་དང་། དེ་ལྟ་བུའི་བསམ་སྦྱོར་རྒྱུན་ཆད་
Page: 185 ༄༅། །མེད་པས་བསམ་པ་ཡངས་པ་དང་། ཕན་ཐོགས་པའི་དགའ་བས་ཕན་བཏགས་པའི་རློམ་སེམས་ཟིལ་གྱིས་གནོན་པ་དགའ་བ་དང་། ཕན་གདགས་ཡུལ་གྱི་འགྲོ་བ་འདི་རྣམས་བདག་གི་བྱང་ཆུབ་ཀྱི་གྲོགས་བྱེད་པས་འདི་རྣམས་ཀྱིས་ བདག་ལ་ཕན་བཏགས་པ་ཡིན་གྱི་བདག་གིས་འདི་རྣམས་ལ་ཕན་བཏགས་པ་ནི་དེའི་ཆར་ཡང་མི་བཟོད་དོ་ཞེས་རྟོག་པ་ཕན་པའི་བསམ་པ་དང་། ལས་དང་རྣམ་སྨིན་ལ་མི་རེ་བ་མ་གོས་པའི་བསམ་པ་དང་། བསོད་ནམས་དེ་ཡང་སེམས་ཅན་ ལ་ཡོངས་སུ་བསྔོ་བ་དགེ་བའི་བསམ་པ་སྟེ། བསམ་པ་ལ་བརྟེན་པ་དྲུག་གོ །འཁོར་གསུམ་དག་པའི་ཤེས་རབ་ཀྱིས་ཟིན་པ་ནི་ཐབས་མཁས་པ་ལ་བསྟན་པ་གཅིག་གོ །ངོ་བོ་ཉིད་དང་ལོངས་སྤྱོད་རྫོགས་སྐུ་ཐོབ་པ་སྐུ་དང་། སྤྲུལ་སྐུ་གང་ འདུལ་དུ་སྟོན་པ་སྤྱོད་པ་དང་། ཕྱིན་དྲུག་ཐོགས་མེད་དུ་སྟོན་པར་ནུས་པ་སྟོན་པ་ལ་དབང་འབྱོར་བ་སྟེ། དབང་འབྱོར་བ་རྣམ་པ་གསུམ་མོ། །དེ་ལྟར་ཡང་། ཐམས་ཅད་སྒོམ་པ་དངོས་པོ་དང་། དེ་བཞིན་ཡིད་ལ་བྱེད་པ་དང་། བསམ་པ་དང་ནི་ ཐབས་དག་དང་། །དབང་འབྱོར་ཉིད་ལ་བསྟེན་པར་བརྗོད། ཅེས་གསུངས་ཤིང་། དབྱིག་གི་ཞབས་ཀྱིས་འགྲེལ་པར་བཅོ་བརྒྱད་དུ་བཀྲལ་ཏོ། །དྲུག་པ་རབ་དབྱེ་ནི། རྒྱས་པར་ཉིས་སྟོང་ཆིག་བརྒྱ་སྟེ། །དུག་གསུམ་ཆ་མཉམ་བཅས་ཕྱེ་བས། ། ཕར་ཕྱིན་བརྒྱད་སྟོང་བཞི་བརྒྱ་སྟེ། །བཅུས་བསྒྱུར་བརྒྱད་ཁྲི་བཞི་སྟོང་ཉིད། །གཟུངས་སྤོབས་ཏིང་ཆོས་སྒོ་དེ་སྙེད། །བསྡུ་ན་ཕྱིན་དྲུག་རེ་རེ་ཡང་། །རྣམ་པ་དྲུག་གམ་གསུམ་དུ་དབྱེ། །ཡང་ན་ཕར་ཕྱིན་རེ་རེ་ཡང་། །ངོ་བོ་རྒྱུ་འབྲས་ལས་ལྡན་འཇུག ། རྣམ་པ་དྲུག་རེར་དབྱེ་བའོ། །ཞེས་བྱ་སྟེ། བསྐལ་བཟང་གི་མདོར་བཤད་པ་སེམས་མ་བསྐྱེད་པའི་སྦྱིན་སོགས་ནི་ཡོངས་སུ་སྦྱོར་བའི་ཕ་རོལ་ཏུ་ཕྱིན་པ་དྲུག་དང་། བསྐྱེད་པའི་ནི་སྣང་བར་བྱེད་པའི་ཕར་ཕྱིན་དྲུག་དང་། སེམས་ཅན་ལ་དམིགས་པ་འཇིག་རྟེན་པའི་ཕྱིན་
Page: 186 དྲུག་དང་། བྱང་ཆུབ་ཀྱི་ཆེད་མིན་པར་གཞན་བདེ་བ་ལ་འགོད་ཕྱིར་བྱེད་པ་སེམས་ཅན་ལ་དམིགས་པའི་ཕྱིན་དྲུག་དང༌། མི་སྐྱེ་བའི་བཟོད་པ་ལ་གནས་པས་བྱེད་པ་གནས་ཀྱི་ཕྱིན་དྲུག་སོགས་ནས། ལེན་པ་མེད་པར་འདས་པ་སོགས་མྱ་ངན་ལས་འདས་པའི་ཕྱིན་ དྲུག་དང་། གདུང་འཐོར་བ་སོགས་ཆོ་འཕྲུལ་གྱི་ཕྱིན་དྲུག་དང་། བསྟན་པ་ལ་རྙེད་པས་མཆོད་ངཔ་སོགས་བསྟན་དབྱེའི་ཕྱིན་དྲུག་དང༌། རིང་སྲེལ་ལ་མཆོད་པ་སོགས་རིང་སྲེལ་གྱི་ཕྱིན་དྲུག་གི་བར་སུམ་བརྒྱ་ལྔ་བཅུ་ལ་ཕར་ཕྱིན་དྲུག་གིས་བསྒྱུར་བས་ཉིས་སྟོང་ཆིག་བརྒྱ་ སྟེ་འདོད་ཆགས་ཀྱི་རྟོག་པ་དེ་སྙེད་ཀྱི་གཉེན་པོའོ། །དེ་བཞིན་དུ་ཞེ་སྡང་དང་གཏི་མུག་དང་དུག་གསུམ་ཆ་མཉམ་གྱི་རྟོག་པ་དེ་སྙེད་རེའི་གཉེན་པོ་དེ་སྙེད་དེ་ཕ་རོལ་ཏུ་ཕྱིན་པ་བརྒྱད་སྟོང་བཞི་བརྒྱར་འགྱུར་ལ། དེ་དག་གི་རྣམ་པ་རེ་རེ་ཡང་བཅུར་འཇུག་པའི་ཕྱིར་བརྒྱད་ཁྲི་ བཞི་སྟོང་དང་། དེ་སྙེད་ཀྱི་ཆོས་ཀྱི་སྒོ་དང་། གཟུངས་དང་། ཏིང་ངེ་འཛིན་གྱི་སྒོ་ཡང་དེ་སྙེད་དུ་འགྱུར་རོ། །ཕར་ཕྱིན་དེ་རྣམས་ཀྱི་སྡོམ་ནི། ཡོངས་སྦྱོང་སྣང་བྱེད་འཇིག་རྟེན་དང་། །སེམས་ཅན་ལ་དམིགས་ཡི་དམ་བརྟན་པས་གནས་འཁོར་བར་བདེ་བའི་ཆེད་དུ་བསྔོས་པ་ འཁོར་བ། །འདོད་ཡོན་གྱིས་བསྡུ་བ་ཀུན་ཉོན་བསྡུ་བ་བཞི་ལྟ་བུ་ཕན་འདོགས་དམིགས་པ་ཅན་གནས་མི་སྐྱེ་བའི་བཟོད་བཅས་བྱང་ཆུབ། །ཐབས་མཁས་པ་ཡེ་ཤེས་གཞན་དོན་དུ་བདག་གི་ལུས་ལོངས་སྤྱོད་སྒྲུབ་པར་བསྔོ་བ་བདག་ལ་ཕན་འདོགས་འབྲས་བུ་གནས་སྐབས་མཐར་ཐུག་གཉིས་གཉིས་འཐོབ་པ་འཐོབ། ། དམིགས་བཅས་རེ་བ་དང་ནི་འདུས་བྱས་ལ་གནས་ཤིང་འདུས་མ་བྱས་འཐོབ་པ་སོགས་གསུམ་རྣམ་གསུམ་ལྟ། །གཞན་ཕན་ལས་བྱེད་འཕགས་ལམ་དང་ལྡན་པ་ལམ་སྦྱངས་བརྩོན་མི་འདོར། །དམན་པར་བསྔོས་པ་རིགས་པ་རང་སྒྲུབ་གཞན་དགོད་བྱ་བ་འདོད་པས་འདུལ་བ་བྱ་བ་མིན། །ང་རྒྱལ་བཅས་ རློམ་པ་བྱ་དཀའ་བརྩམས་པ་སྙིང་རྗེས་ཟིན་པའི་ཐུན་མོང་བ་དགེ་བ་འཁོར་གསུམ་དག་པ་རྣོ། །མི་དམིགས་པ་ཟབ་པ་རྒྱུ་འབྲས་སྣ་ཚོགས་པ་སྣ་ཚོགས་ཡིད་ཀྱི་བཀོད་པའོ། །སྒྲིབ་མེད་ཀྱི་སེམས་ཀྱིས་ཐུག་མེད་སྦྱིན་པས་ཡིད་དྭགས་སྦྱོང་བ་སོགས་སེམས་ཅན་དམིགས་དང་སངས་རྒྱས་ཀྱི་ཡོན་ཏན་
Page: 187 ༄༅། །སྒྲུབ་པ་ཆོས། །སྒྲིབ་པ་ལྔ་སྤོང་བ་སོགས་ཞི་འཁོར་གསུམ་དུ་མི་བལྟ་བ་ལྷག་སེམས་ཅན་ཐམས་ཅད་ཀྱི་ཕྱིར་བསྔོས་པ་ཐམས་ཅད་དམིགས་བཅས་ཕྱོཌ་གཅིག་དང་། །ཡུལ་མཆོག་དམན་ལ་སེམས་མཉམ་པ་ཉམས་མེད་མི་དམིགས་ཤིང་རྒྱུན་བརྟན་བཅས་ མིན་རང་དོན་དུ་མི་བསྔོ་བ་དབུལ་པོ་མིན། །ཕྱིར་མི་ལྡོག་ཤེས་རབ་ཀྱིས་མ་ཟིན་ཞིང་འབད་པ་བརྟན་པ་རྣམ་སྒྲུབས་རྣམ་སྨིན་ལ་མི་རེ་བ་དག་པ། །བསྒྱུར་མི་ནུས་པ་བརྟན་པ་སྲིད་ཞིར་མི་སྨོན་པ་བསྟུན་པ་འཇིག་རྟེན་པ་དང་མ་འདྲེས་པ་ངོམས་བྱང་ཆུབ་ཏུ་མི་བསྔོ་བའི་སོ་སྐྱེའི་འཇིག་རྟེན། ། སྲིད་ཞི་དང་མ་འདྲེས་པ་འཇིག་འདས་དག་ས་པའི་བླ་མེད་ཡོངས་སྦྱོང་གི་གཡེང་བ་མེད། །མི་འཁོར་བ་མི་དམིགས་རྣམ་སྨིན་སེམས་ཅན་དང་ཐུན་མོང་དུ་བསྔོ་བ་འཁོར་བ་ཞིང་དག་པའི་རྒྱུ་ཐུན་མོང་དང་། །གཟུངས་སྤོབས་ཀྱི་རྒྱུ་ཐུན་མོང་མིན་ཕྱི་མ་ལ་འཇུག་ཅིང་སྔ་མའི་རྣམ་འབྲས་ཐོབ་པ་རྣམ་བགོད་ནཻ་ རཉྫ་རའི་དཀའ་སྤྱད་དང་། གངྒཱའི་འགྲམ་དུ་རྒྱུ་སྐར་ཉིས་སྟོང་ལྔ་བརྒྱའི་སྤྲུལ་པར་ཞུགས་ཏེ་མི་དམིགས་པར་གནས་པ་དང༌། འགོག་སྙོམས་སོགས་སྨིན་མེད། །རློམ་པ་མེད་པ་ངོ་བོ་མ་འོངས་པ་དང་འདས་པའི་དངོས་མེད་སེམས་ཅན་ཐམས་ཅད་ལ་བསྔོས་པས་རྒྱ་ཆེ་ཕྱིར་མི་ལྡོག་པ་རྒྱས། །། །ཤེས་རབ་དང་མཚུངས་ ལྡན་མཐའ་ཡས་རབ་བྱུང་གི་ཚོལ་འབྲས་བུ་གཞན་ལ་སྟོབ་བ་བརྒལ་སྲིད་པར་བདེ་འགྲོའི་རྒྱུར་སྒྲུབ་ཅིང་ང་མི་རྒྱལ་བ་མངོན་པར་དགའ། །སྲིད་ཞི་ལ་མི་དགའ་བ་དགའ་མེད་ཆོས་སྦྱིན་སོགས་ཐོས་འཛིན་མི་སྐྱེ་བའི་བཟོད་པར་བསྔོས་པ་སོགས་རིང་དུ་འཁོར། །ཚུལ་བཞིན་ཆད་མེད་བྱང་ཆུབ་ཀྱི་ ཕྱིར་འདོད་དང་བསམ་གཏན་གྱི་ཕྱིར་བསྔོས། །མངོན་ཤེས་སུ་སྨིན་པ་བཟོ་གནས་ཤེས་པར་སྨིན་པ་བྱམས་པས་ཀུན་ནས་བླང་པ་ནས་བརྩེ་དགའ། །བཏང་སྙོམས་ཀྱིས་ཀུན་ནས་བླང་བའི་བར་ལོག་ལྟ་ཅན་འདུལ་ཕྱིར་དུ་དེ་དང་མཐུན་པར་སྤྱོད་པ་ཡང་དག་ལྟ། །སངས་རྒྱས་མ་བྱུང་ ཡང་ཕྱིན་དྲུག་གི་མི་མཐུན་ཕྱོགས་དང་བྲལ་བ་གནས་པ་ཐབས་ཤེས་ཀྱིས་ཟིན་པ་མི་གནས་སྲིད་ཞི་ལས་འདས་པ་གནས་མེད་བསྔོས། །ང་རྒྱལ་སྤངས་པ་ང་རྒྱལ་མི་ལྡོག་པ་བཟོད་པ་བསྟན་པ་གནས་ཕྱིར་བསྔོས་པ་ཕན་འདོགས་དང་། །དམིགས་བཅས་སུ་བསྔོས་པ་ཆོས་ནུབ་པའི་རྒྱུ་མི་འདོགས་
Page: 188 དམིགས་པ་ཅན་ལྷག་བཅས་འཁོར་བར་སྔོ་བ་ལྷག་མེད་ཞིང་མཆོག་ལ་རེ་བ་མེད་པར་བྱིན་པས་བསྐལ་པར་ལུས་ཀྱི་མཐུ་བརྟས་པ་སོགས་རིག །བསྟན་པ་གནས་པའི་ཕྱིར་བསྟན་པ་ལ་གཞན་གཟུང་བ་སོགས་རིག་པའི་ཁྱད་པར་སངས་རྒྱས་འབྱུང་ཚེ་ལུས་འཁོར་ཕུན་ཚོགས་སུ་སྐྱེ་བ་སྒྲུབ་པ་སངས་ རྒྱས་འབྱུང་གཞན་གྱི་བསམ་པ་རྫོགས་པར་བྱེད་པ་དྲན་ལྡན། །མཉམ་ཉིད་ཅན་རྒྱལ་འབྱུང་སྲིད་པ་ལས་བྱུང་བའི་ངེས་འབྱུང་སྒྲུབ་གདམས་ངག་ཅན་མང་ཐོས། །རབ་བྱུང་རྟག་ཏུ་འཐོབ་བྱེད་བསམ་པ་བཞིན་ཆོས་བྱིན་པ་སོགས་རབ་བྱུང་གུས་པས་གཏོང་བ་སོགས་མངོན་ཤེས་གནས་མཆོད་ རྟེན་དང་པོར་ཞལ་བའི་སྦྱིན་པ་དང་དབང་པོ་དང་ལྡན་པའི་ཚུལ་ཁྲིམས་སོགས་མངོན་ཤེས་ཏེ་རྟག་དུ་ལྡན་པར་བྱེད་པ་དེ་རྟག །མི་མཛའ་བ་ལ་གཏོང་བ་སོགས་ལུས་འདོད་འཇིག་རྟེན་པའི་ཕར་ཕྱིན་གནས་སེམས་ཅན་སྨིན་ཕྱིར་རྒྱ་མཚོར་རུས་སྦལ་སོགས་ལྡན་འཇིག་རྟེན་ལ་ཕན་ཕྱིར་ཚངས་པས་ཆང་འཐུང་ ཟློག་པ་སོགས་རྣམ་པར་སྨིན། །རྣམ་སྨིན་ཕྱུང་ཟིན་པ་སྨིན་མེད་ཞི་བར་ཉེ་བ་དགའ་མེད་སྡུག་བསྔལ་ལས་སྐྱོབ་པ་དུས་དང་མར་མེ་བྱིན་པ་སོགས་འོད། །ཞིང་བརྒྱ་འོད་ཀྱིས་འགེངས་པ་སོགས་འོད་ཆེན་གཞན་བདེ་བར་བྱས་པ་འབྲས་བདེ་ཕྱིར་མི་ལྡོག །སེམས་ཅན་ཐམས་ཅད་ལ་བྱིན་པ་སོགས་ དགའ་བ་སྲིད་ཞིར་མི་ཞེན་པ་རྣམ་དག་འཇིག་རྟེན་འདས་པར་དམིགས་པ། །སྐྱེས་པ་ཙམ་གྱིས་སྟོང་གསུམ་ཕྱིན་དྲུག་ལ་བགོད་པ་སོགས་སྐྱེ་བ་འཁོར་སྦྱིན་པ་སོགས་རིགས་གཏན་ཁྲིམས་ལ་ལོ་ཟླར་འགོད་པ་སོགས་འཁོར་བཟང་ཕྲ་མ་སྤངས་པ་སོགས་འཁོར་མི་ཕྱེད། །མགོན་མེད་ལ་བྱིན་པ་སོགས་ རྣམ་སྨིན་དག་པ་རྣམ་སྨིན་མྱུར་དུ་མིག་བྱིན་པ་སོགས་ཕྱོགས་རྣམ་ལྟ་བསྔོས་པས་གཞན་ལ་ཕན་པ་ཡོངས་ཤེས། །བྱང་ཆུབ་ཏུ་བསྔོས་པ་བག་ཡོད་མ་ཐོགས་པར་བྱིན་པ་སོགས་རྫི་བ་མེད་སྙིང་རྗེས་ངན་འགྲོ་སྤང་ཕྱིར་མྱང་འདས། །བརྩེ་བ་དང་མཚུངས་ལྡན་དབང་ཆེ་ལེན་དུ་འཛུད་པ་སོགས་བསྐུལ་ ཁ་ཏོན་པ་ལ་བྱིན་པ་སོགས་བརྗེད་མེད་མཚན་དཔེ། །ཁྱིམ་ནས་མངོན་བྱུང་འབྱུང་བའི་དུས་དང་ཀུན་གཉིད་ཚེ་འབྱུང་བ་སོགས་དུས་ཤེས་དང༌། །བསོད་སྙོམས་ལ་གཤེགས་པ་སོགས་རྣམ་དབྱེ་སློང་མོ་མཛད་རིང་འཕུར་བསྟེན་པ་སོགས་སྲིད་མཐུན་བདུད་བཏུལ་བ་སོགས་རྟོགས་པའོ། །
Page: 189 ༄༅། །སེར་སྐྱར་ལོར་བསྟེན་པ་སོགས་སྤོང་དང་རྡོར་ཏིང་སོགས་རྡོ་རྗེ་འཚང་རྒྱ་ཚེ་ལྷས་བསྟོད་པ་སོགས་སྣང་དུས་མིན་དུ་སྐྱེས་པ་སོགས་ཟིལ་གནོན། །འཚང་རྒྱ་ཚེ་སུའང་མི་བཀྲེས་པ་སོགས་བདུད་འཇོམས་ཤིང་དྲུང་དུ་མི་སྐྱོ་བ་སོགས་གཡོ་མེད་སྐད་ཅིག་གིས་འཚང་རྒྱ་བ་སྐད་ཅིག་ལྡན། ། འགྲོ་བ་གཟིགས་པ་སོགས་མཉམ་པར་མ་བཞག་སངས་རྒྱས་པ་བཞག་བཏང་སྙོམས་མཛད་ནས་བསྐུལ་འཛུད་པ་སོགས་ཡོངས་སྨིན། །ཀུན་མཁྱེན་ལམ་མྱུར་བས་བྱུང་བ་སོགས་ལྷག་མེད་མྱང་འདས་དང་སྐུ་གདུང་སོགས་ལྷག་མ་བཅས། །མི་མཐུན་ཕྱོགས་དང་ལེན་ཞིང་ཀུན་དབྱངས་ཀྱི་ འགོངས་པ་རྟོགས་ཐབས་ཀྱིས་འདུལ་བ་རྒྱ་ཆེ་ཡུལ་གྱིས་ཡིད་བྱུང༌། །རང་ལ་མི་ལྟ་བ་གཞན་དགེ་གཞན་འདུལ་བ་དང་ཡང་སྤོང་བཞི། །། རྫུ་འཕྲུལ་རྐང་བཞི་བསམ་གཏན་བཞི། །། དྲན་ཉེ་བཞི་དང་བདེན་པ་བཞི། །། དབང་པོ་ལྔ་དང་སྟོབས་ལྔ་དང༌། །བྱང་ ཆུབ་ཡན་ལག་འཕགས་ལམ་བཅས། །སློབ་པའི་ཞི་མ་ཐོས་པའི་ཆོས་ཤེས་པ་སོགས་ལྷག་རིག་པ་ལ་སྦྱོར་བ་མྱུར་དུ་ཞུགས་པ་སོགས་རྣམ་པ་གྲོལ། །དགེ་སློང་སོགས་རིས་བརྒྱད་ཀྱི་འཁོར་སྒྲུབ་སོ་སོར་རིག་པ་བཞི། །ཆོས་སྟོན་པས་མི་སྐྱོ་སྦྱིན་ཚུལ་བཟོད་བརྩོན་དང༌། ། བསམ་གཏན་ཤེས་རབ་ལས་བྱུང་བ་སྟེ་གོ་ཆའི་སྒྲུབ་པ་དང༌། །མིག་མཐོང་ན་དགའ་བ་འཐོབ་པ་སོགས་མིག་དང་རྣ་བ་སྣ་ལྕེ་ལུས། །སེམས་ཉོན་མོངས་པ་ཆུང་བ་སོགས་དང་གཞན་སྨིན་པར་བྱ་བ་དང་བདག་ཕན་གྱི་ཕྱིར་བསྔོས་པའི་ཟང་ཟིང་། །ཆོས་བརྒྱན་པར་དོན་ལོངས་ སྤྱོད་སྦྱོང་བ་རྟོགས་པ་སྦྱིན་སོགས་གྱི་སྦྲ་བ་དང་། །སྟོང་ཉིད་མཚན་མེད་སྨོན་པ་མེད། །བྱང་ཆུབ་ཀྱི་སྙིང་པོར་སྐྱིལ་ཀྲུང་གཅིག་གིས་འདའ་བ་སོགས་གཞན་དང་ག་གོན་གྱིས་ཟས་ཕུལ་བ་སོགས་རྣམ་སྨིན་ལྔ་སྡེ་བཏུལ་བ་སོགས་སྦྱོར་བ་དང་། །སྟོབས་བཅུའི་ཕ་རོལ་ཕྱིན་པ་བཅུ། ། མི་འཇིགས་བཞི་དང་ཐུགས་རྗེ་དང༌། །མི་སློབ་པའི་སྤྱན་ལྔའི་ཕ་རོལ་ཕྱིན་པ་ལྔ། །སངས་རྒྱས་ཉིད་རང་བྱུང་སངས་རྒྱས་ཀྱི་རྣམ་རོལ་དེའི་གཏིང་དཔག་དཀའ། །མ་འདྲེས་པ་ཡི་ཆོས་བཅོ་བརྒྱད། །། ཐབས་མཁས་དང་ཡེ་ཤེས་མི་ཐོགས་པ་ཇི་བཞིན་མི་དམིགས་པ་རང་
Page: 190 བཞིན་མཐོང་། །དེའི་ལས་ཤེས་པ་སོགས་ཁམས་གསུམ་སྤྱོད་དང་དམན་ས་བརྒྱད་དེ་རེ་རེ་ལ་རེ་བ་མེད་པ་སོགས། །། གཡོ་མེད་པའི་བྱང་སེམས་ཐོགས་མེད་ཏུ་ཟད་པ་ཤེས་པ་དང་སྲིད་པའི་རྩ་བ་ཆད་པ་སོགས་མི་སྐྱེ་ཤེས། །། བསྟན་པ་གནས་པ་སོགས་བྱིན་རླབས་མངོན་པར་ཤེས་པ་དྲུག ། སངས་རྒྱས་ཀྱི་སྤྱོད་ལམ་ཟང་ཟིང་ལེན་པ་སོགས་ཕན་འདོད་ཉོན་མོངས་མེད། །སྐུ་ཚེའི་འདུ་བྱེད་སྤངས་པ་དང་ལེན་པ་མེད་པར་འདས་པ་སོགས་མྱང་འདས་གདུང་འགྱེས་པ་སོགས་ཆོ་འཕྲུལ་དང་། །བསྟན་པ་ལ་མཆོད་པ་སོགས་བསྟན་དབྱེ་རིང་སྲེལ་རྣམ་པར་དབྱེ་བ་མཆོད་པ་སོགས། །རེ་རེའི་ ཕ་རོལ་ཕྱིན་དྲུག་རེའོ། འདི་ལ་མདོ་ཉིད་ལས། ཕ་རོལ་ཏུ་ཕྱིན་པ་བརྒྱ་ཉི་ཤུ་རྩ་གཅིག །ཞེས་དང་། དེ་ལས་ཕ་རོལ་ཏུ་ཕྱིན་པ་ཉིས་སྟོང་ཆིག་བརྒྱ་ནི་འདོད་ཆགས་སྤྱོད་པ་རྣམས་ལ་ཆོས་བསྟན་པའོ། །དེ་བཞིན་དུ་ཞེ་སྡང་གཏི་མུག་དུག་གསུམ་ཆ་མཉམ་ པ་སྟེ་དེ་དག་གི་ཕ་རོལ་ཏུ་ཕྱིན་པ་བརྒྱད་སྟོང་བཞི་བརྒྱའོ། །དེ་དག་གི་རྣམ་པ་ལ་འཇུག་པ་ཡང་སྟོང་སྟོང་སྟེ་རྣམ་པ་བརྒྱ་བརྒྱ་པོ་རེ་རེའི་ཡང་སྟོང་སྟོང་པོ་དེས་ན་དེ་དག་གི་ཕ་རོལ་ཏུ་ཕྱིན་པ་བརྒྱད་ཁྲི་བཞི་སྟོང་སྟེ། ཏིང་ངེ་འཛིན་དང་། གཟུངས་ཀྱང་དེ་སྙེད་དོ། །ཞེས་གསུངས་པས་ རྩ་བའི་ཕར་ཕྱིན་སུམ་བརྒྱ་ལྔ་བཅུ་དང་དེ་དྲུག་གིས་བསྒྱུར་བས་ཉིས་སྟོང་ཆིག་བརྒྱ་སྟེ་བརྒྱ་ཕྲག་ཉི་ཤུ་རྩ་གཅིག་གོ །དེ་བཞིས་ནི་བརྒྱད་སྟོང་བཞི་བརྒྱའོ། །རྣམ་པ་བརྒྱ་བརྒྱ་པོ་རེ་རེའི་སྟོང་སྟོང་པོ་ཞེས་པ་ནི་ཡི་གེ་ཉམས་པ་ཞིག་སྟེ་བརྒྱས་བསྒྱུར་ན་བརྒྱད་ འབུམ་སོགས་སུ་ལོངས་པས་མངས་ཆེས་པའི་ཕྱིར། དེས་ན་དེ་དག་གི་རྣམ་པ་ལ་འཇུག་པ་ཡང་བཅུ་བཅུ་སྟེ་རེ་རེའི་བཅུ་བཅུ་པོ་དེས་ན་བརྒྱད་ཁྲི་བཞི་སྟོང་ངོ་ཞེས་པར་སྣང་སྟེ་བརྒྱད་སྟོང་བཞི་བརྒྱ་བཅུས་བསྒྱུར་བས་བརྒྱད་ཁྲི་བཞི་སྟོང་དུ་ངེས་པའི་ཕྱིར་རོ། །རྩ་བའི་ཕར་ཕྱིན་སུམ་བརྒྱ་ལྔ་བཅུ་ཚང་དགོས་ཀྱང་དེང་སང་མདོ་རྣམས་ལས་སུམ་བརྒྱ་དང་བཞི་ཙམ་ལས་མི་སྣང་བ་ནི་བཀའི་བསྔ་བ་ཉམས་པ་དང་ཡི་གེ་པའི་སྐྱོན་བརྒྱུད་མར་ཟད་པས་དག་པ་ལས་རྙེད་ན་འདིར་བསྣན་པར་བྱའོ། །ཡང་ན་སྦྱིན་སོགས་རེ་རེ་ལ་
Page: 191 ༄༅། །ནང་ཚན་གྱི་སྦྱིན་སོགས་དྲུག་རེར་དབྱེ་སྟེ་གཞན་སྦྱིན་པ་ནས་ཤེས་རབ་ཀྱི་བར་ལ་འགོད་པ་སྦྱིན་པའི་སྦྱིན་པ་ནས་ཤེས་རབ་ཀྱི་སྦྱིན་པའི་བར་རོ། །དེ་བཞིན་དུ་སོ་སོའི་མི་མཐུན་ཕྱོགས་ཀྱིས་མ་གོས་པ་སོ་སོའི་ཚུལ་ཁྲིམས་སྦྱིན་པའི་དཀའ་ བ་ནས་ཤེས་རབ་ཀྱི་དཀའ་བའི་བར་བཟོད་པ་སོ་སོའི་བཟོད་པ་དེ་ལ་བརྩོན་པ་བརྩོན་འགྲུས། དེས་སེམས་ཟིན་ཏེ་གཞན་དུ་མི་གཡེང་བ་བསམ་གཏན། འཁོར་གསུམ་ཡོངས་སུ་དག་པ་ཤེས་རབ་སྟེ་དྲུག་དྲུག་སུམ་བཅུ་རྩ་དྲུག་ཏུ་འགྱུར་ཏེ། དེ་དག་སོ་སོར་སྦྱིན་ལ་སོགས། ། རྣམ་པ་དྲུག་ཏུ་བསྡུས་པ་ཡིས། །གོ་ཆའི་སྒྲུབ་པ་གང་ཡིན་དེ། །དྲུག་ཚན་དྲུག་གིས་ཇི་བཞིན་བཤད། །ཅེས་སོ། །ཡང་ན་རེ་རེ་ལ་གསུམ་གསུམ་དུ་དབྱེ་སྟེ། ཟང་ཟིང་སྟེར་བ་དང་། སྲོག་སྐྱོབ་པ་སོགས་མི་འཇིགས་པ་དང་། ཆོས་སྟོན་པ་སྟེ་སྦྱིན་བྱས་ཕྱེ་ བ་སྦྱིན་པ་རྣམ་པ་གསུམ་མོ། །ཉེས་སྤྱོད་སྡོམ་པ་དང་། དགེ་བ་ཆོས་སྡུད་དང་། སེམས་ཅན་དོན་བྱེད་དེ་ཚུལ་ཁྲིམས་རྣམ་པ་གསུམ་མོ། །གཞན་གྱི་གནོད་པ་ལ་ཇི་མི་སྙམ་པ་དང༌། ཆོས་ཕྱིར་སྡུག་བསྔལ་དང་ལེན་དང༌། སྟོང་ཉིད་སོགས་ཆོས་ཟབ་མོ་ལ་མི་སྐྲག་པ་ སྟེ་བཟོད་པ་གསུམ་མོ། །དགེ་བ་འདི་བྱའོ་ཞེས་འཕེན་པ་སྔོན་དུ་གཏོང་བ་གོ་ཆ་དང་། དེ་བཞིན་ལག་ཏུ་ལེན་པ་སྦྱོར་བ་དང་། དེས་ཆོག་པར་མི་འཛིན་པ་སྟེ་བརྩོན་འགྲུས་གསུམ་མོ། །ཚེ་འདིའི་མཐོང་ཆོས་ལ་བདེ་བར་གནས་པ་དང༌། མངོན་ཤེས་ལ་སོགས་པ་ཡོན་ ཏན་ཁྱད་པར་ཅན་སྒྲུབ་པ་དང་། མུ་གེ་དང་ནད་སོགས་ཞི་བར་ནུས་པ་སེམས་ཅན་དོན་སྒྲུབ་ཀྱི་བསམ་གཏན་ཏེ་གསུམ་མམ། ཡང་ན་ལང་གཤེགས་ལས། ཤེས་རབ་ཀྱིས་མ་ཟིན་པ་བྱིས་པ་ཉེར་སྤྱོད་ཀྱི་བསམ་གཏན། ཤེས་རབ་ཀྱིས་ཟིན་པ་དོན་རབ་འབྱེད་ པའི་བསམ་གཏན། ཆོས་ཉིད་ལ་འཇུག་པ་དེ་བཞིན་ཉིད་དམིགས་ཀྱི་བསམ་གཏན་ཏེ་བསམ་གཏན་རྣམ་པ་གསུམ་མོ། །ཤེས་རབ་ལ་རྣམ་པར་མི་རྟོག་པའི་སྦྱོར་བ་ལ། འཇུག་པ་དངོས་གཞི་ལ། གནས་པ་རྗེས་ཐོབ་ཤེས་རབ་ཀྱིས་འཇལ་བ་སྟེ་གསུམ་དུ་
Page: 192 ཐེག་བསྡུས་ལས་སོ། །ཡང་ན་འཇིག་རྟེན་པ་དང་། ཉན་རང་དང་། ཐེག་ཆེན་པའི་ཤེས་རབ་གསུམ་སྟེ་རྒྱན་གྱི་འགྲེལ་པར་རོ། །ཡང་ན་ཀུན་རྫོབ་དང༌། དོན་དམ་དང༌། གཞན་དོན་ལ་དམིགས་པ་སྟེ་གསུམ་མམ། ཐོས་བསམ་སྒོམ་གསུམ་ལས་བྱུང་བའི་ཤེས་ རབ་གསུམ་མམ། འཇིག་རྟེན་པ་དང་། འཇིག་རྟེན་ལས་འདས་པ་དམན་པའི་དང་། འཇིག་རྟེན་ལས་འདས་པ་ཆེན་པོའི་ཤེས་རབ་སྟེ་གསུམ་དུ་ཡང་བཤད་དོ། །ཡང་ན་ཕར་ཕྱིན་རེ་རེ་ཡང་དགོངས་དོན་རྣམ་པ་དྲུག་ལྡན་དུ་དབྱེ་སྟེ། ལེན་པ་པོ་འདོད་པའི་ དོན་གཏོང་བ་ངོ་བོའི་དོན་དང༌། མ་ཆགས་པའི་སེམས་པ་དང་ལྡན་པ་རྒྱུའི་དོན། ལུས་ལོངས་སྤྱོད་ཕུན་ཚོགས་འགྲུབ་པ་འབྲས་བུའི་དོན་དང་། རང་གཞན་རྗེས་སུ་འཛིན་ཞིང་ཚོགས་གཉིས་རྫོགས་པ་ལས་ཀྱི་དོན་དང་། སེར་སྣ་མེད་པ་སོགས་ལྡན་པའི་དོན་དང་། ཆོས་ དང་ཟང་ཟིང་དང་མི་འཇིགས་པ་དང་ལྡན་པར་བྱེད་པ་འཇུག་པའི་དོན་དང་དྲུག་ལྡན་ཏེ། དོན་རྣམས་གཏོང་བར་བྱེད་པ་དང་། །རྩ་བ་སེམས་པ་ལ་བརྟེན་དང་། །ལུས་དང་ལོངས་སྤྱོད་ཕུན་ཚོགས་དང་། །གཉིས་རྗེས་འཛིན་དང་རྫོགས་བྱེད་དང་། །དེ་ཡང་ སེར་སྣ་མེད་ལྡན་དང་། །ཆོས་དང་ཟང་ཟིང་མི་འཇིགས་མཐོང་། སྦྱིན་པ་དེ་འདྲར་ཡོངས་ཤེས་ནས། །མཁས་པས་ཡང་དག་སྒྲུབ་པར་བྱེད། །ཅེས་སོ། །ཚུལ་ཁྲིམས་དང་ལྡན་པ། སྡོམ་པས་བསྡམས་པ། ཆོ་ག་དང་། སྤྱོད་ཡུལ་ཕུན་སུམ་ཚོགས་ པ། ཉེས་པ་ཆུང་ངུ་ལ་ཡང་འཇིགས་པར་བལྟ་བ། བསླབ་གཞི་གང་བླངས་པ་ལ་རྫོགས་པར་སློབ་པ་སྟེ་ཡན་ལག་དྲུག་ཚང་བ་ངོ་བོའི་དོན་དང་། ཞི་བ་ཐོབ་འདོད་རྒྱུའི་དོན་དང་། ཕྱི་མ་བདེ་འགྲོ་དང་འཕྲལ་དུ་ཏིང་ངེ་འཛིན་ཐོབ་པ་འབྲས་བུའི་དོན་དང་། ཡོན་ཏན་གྱི་ རྟེན་དང་ཉོན་མོངས་ཞི་བ་དང་གཞན་འཇིགས་པ་མི་སྐྱེ་བ་སྟེ་ལས་ཀྱི་དོན་དང་། རྟག་པར་བསོད་ནམས་ཀྱི་ཚོགས་དང་ལྡན་པ་ལྡན་པའི་དོན་དང༌། བརྡར་བཏགས་པ་ལས་ཐོབ་པ་སོ་ཐར་དང་། ཏིང་འཛིན་ལས་སྐྱེས་པ་བསམ་གཏན་གྱི་སྡོམ་པ་དང་ཆོས་ཉིད་ཀྱིས་
Page: 193 ༄༅། །ཐོབ་པ་ཟག་མེད་ཀྱི་སྡོམ་པ་སྟེ་དབྱེ་བའི་འཇུག་པ་དང་། དེ་དག་གང་ཟག་ལ་ལྡན་པ་རྟེན་གྱི་འཇུག་པ་སྟེ་འཇུག་པའི་དོན་དང་དྲུག་ལྡན་ནི་ཚུལ་ཁྲིམས་ཀྱི་སྟེ། ཡན་ལག་དྲུག་ཞི་བསམ་པས་ཟིན། །བདེ་འགྲོ་གནས་པ་སྦྱིན་ བྱེད་དང་། །རྟེན་དང་ཞི་དང་འཇིགས་པ་མེད། །བསོད་ནམས་ཚོགས་དང་ཡང་དག་ལྡན། །བརྡར་བཏགས་ཆོས་ཉིད་ཐོབ་པ་སྟེ། །སྡོམ་པ་གནས་པ་རྣམས་ལ་ཡོད། །ཚུལ་ཁྲིམས་དེ་འདྲར་ཡོངས་ཤེས་ནས། །མཁས་པས་ཡང་དག་སྒྲུབ་ པར་བྱེད། །ཅེས་སོ། །ཁྲོ་བའི་སྐབས་མི་འབྱེད། སྡུག་བསྔལ་ལ་ཅིར་ཡང་མི་སྙམ། ཆོས་ཟབ་མོ་ཤེས་པ་སྟེ་ངོ་བོའི་དོན་དང་། སྙིང་རྗེ་དང་ཚུལ་ཁྲིམས་དང་ཐོས་པར་ལྡན་པས་སྒོམ་པ་རྒྱུའི་དོན་དང་། འཁོན་མི་མང་དང་དབྱེན་མི་མང་། །བདེ་དང་ཡིད་ བདེ་མང་བ་དང་། །འགྱོད་པ་མེད་པར་འཆི་བ་དང་། །ཕྱི་མ་བདེ་འགྲོར་འགྲོ་བའོ། །ཞེས་པའི་ཡོན་ཏན་ལྔ་འཐོབ་པ་འབྲས་བུའི་དོན་དང་། མདོ་ལས། གང་ཞིག་ཕ་རོལ་འཁྲུགས་ཤེས་ནས། །བདག་ཉིད་དེ་ལ་ཉེར་ཞི་བ། །དེས་ནི་བདག་དང་ ཕ་རོལ་པོ། །གཉིས་ཀ་དག་གི་དོན་བྱེད་དོ། །ཅེས་པ་ལྟར་གཉིས་ཀའི་དོན་བྱེད་པ་ལས་ཀྱི་དོན་དང་། བཟོད་པ་ནི། དཀའ་ཐུབ་རྣམས་ཀྱི་མཆོག་གོ་ཞེས་པ་ལྟར་ཡོན་ཏན་དང་ལྡན་པའི་དོན་དང་། སྐྱེས་ཐོབ་དང་ཏིང་འཛིན་དང་ཆོས་ཉིད་ཀྱི་ཐོབ་ པ་སྟེ་དབྱེ་བ་དང་། རྟེན་ནི་འཇུག་པ་སྟེ་དྲུག་ལྡན་ནི་བཟོད་པའི་སྟེ། མི་འབྱེད་ཇི་མི་སྙམ་ཤེས་དང་། །སྙིང་རྗེས་ཆོས་ལ་བསྟེན་པའི་ཕྱིར། ཕན་ཡོན་ལྔར་ནི་ཡང་དག་བཤད། །དེ་ནི་གཉིས་ཀྱི་དོན་བྱེད་དེ། །དཀའ་ཐུབ་གཙོ་དང་ཡང་དག་ལྡན། ། དེ་ལ་དེ་ནི་རྣམ་གསུམ་འདོད། །བཟོད་པ་དེ་འདྲར་ཡོངས་ཤེས་ནས། །མཁས་པས་ཡང་དག་སྒྲུབ་པར་བྱེད། །ཅེས་སོ། །བརྩོན་འགྲུས་ཀྱི་ནི། དགེ་བ་ལ་སྤྲོ་བས་འཇུག་པ་ངོ་བོའི་དོན་དང༌། འདུན་པ་དྲག་པོ་ལ་བརྟེན་ནས་འབྱུང་བ་རྒྱུའི་དོན། དྲན་ཏིང་
Page: 194 ཤེས་རབ་གོང་དུ་འཕེལ་བ་འབྲས་བུའི་དོན། ཉོན་མོངས་པའི་གཉེན་པོར་འགྱུར་བ་ལས་ཀྱི་དོན། དུག་གསུམ་མེད་པའི་དགེ་བ་དང་ལྡན་པ་ལྡན་པའི་དོན། བསླབ་གསུམ་ལ་བརྩོན་པ་དང་ལུས་སེམས་ཀྱི་བརྩོན་འགྲུས་གཉིས་དང་རྟག་པར་དང་གུས་པའི་ བརྩོན་འགྲུས་གཉིས་དང་། རྟེན་ནི་འཇུག་པ་སྟེ་དོན་དྲུག་ལྡན་ཏེ། དགེ་ལ་ཡང་དག་སྤྲོ་བ་དང་། །དད་དང་འདུན་ལ་བསྟེན་པ་དང་། །དྲན་སོགས་ཡོན་ཏན་འཕེལ་བྱེད་དང་། །ཀུན་ནས་ཉོན་མོངས་གཉེན་པོ་དང་། །མ་ཆགས་ལ་སོགས་ ཡོན་ཏན་ལྡན། །དེ་དག་ལ་ནི་དེ་རྣམས་བདུན། །བརྩོན་འགྲུས་དེ་འདྲར་ཡོངས་ཤེས་ནས། །མཁས་པས་ཡང་དག་སྒྲུབ་པར་བྱེད། །ཅེས་སོ། །བསམ་གཏན་ནི། ངོ་བོ་རྩེ་གཅིག་པ། རྒྱུ་དྲན་བརྩོན། འབྲས་བུ་བདེ་བ། མངོན་ཤེས་དྲུག་སོགས་ལ་དབང་ བསྒྱུར་བ་བྱེད་ལས། ཆོས་ཐམས་ཅད་ཀྱི་གཙོ་བོ་ནི་ཏིང་ངེ་འཛིན་ཏོ་ཞེས་སོགས་ཡོན་ཏན་དང་ལྡན་པ། དགའ་བདེ་གཉིས་སིམ་བདེ་གཉིས་འདུ་བྱེད་བཏང་སྙོམས་རྟེན་དང་བཅས་པ་འཇུག་པའི་དོན་དང་དྲུག་ལྡན་ཏེ། སེམས་ནི་ནང་དུ་གནས་པ་དང་། ། དྲན་དང་བརྩོན་འགྲུས་ལ་བསྟེན་དང་། །བདེ་བ་སྐྱེད་པར་བྱེད་པ་དང་། །མངོན་ཤེས་གནས་ལ་དབང་བསྒྱུར་དང་། །ཆོས་རྣམས་ཀུན་གྱི་གཙོ་བོ་སྟེ། །དེ་དག་ལ་ཡོད་དེ་རྣམ་གསུམ། །བསམ་གཏན་དེ་འདྲར་ཡོངས་ཤེས་ནས། །མཁས་ པས་ཡང་དག་སྒྲུབ་པར་བྱེད། །ཅེས་སོ། །ཤེས་རབ་ཀྱང་ཆོས་དྲུག་ལྡན་ཏེ། ངོ་བོ་ཆོས་རབ་ཏུ་རྣམ་འབྱེད། རྒྱུ་ཞི་གནས། འབྲས་བུ་རྣམ་གྲོལ། འཚོ་བ་དག་ཞིང་ལེགས་བཤད་འབྱུང་བ་བྱེད་ལས། ཤེས་རབ་ནི་ཆོས་ཐམས་ཅད་ཀྱི་མཆོག་གོ་ཞེས་ སོགས་ཀྱི་ཡོན་ཏན་དང་ལྡན་པ། འཇིག་རྟེན་པ་དང་འཇིག་རྟེན་ལས་འདས་པ་དམན་མཆོག་རྟེན་དང་བཅས་པ་འཇུག་པ་དང་དྲུག་ལྡན་ཏེ། ཤེས་བྱ་ཡང་དག་རབ་རྣམ་འབྱེད། །ཏིང་ངེ་འཛིན་ལ་བསྟེན་པ་དང་། །ཀུན་ནས་ཉོན་མོངས་
Page: 195 ༄༅། །ཤིན་ཏུ་གྲོལ། །ཤེས་རབ་འཚོ་བ་ལེགས་བཤད་དང་། །ཆོས་རྣམས་ཀུན་གྱི་མཆོག་ཡིན་ཏེ། དེ་དག་ལ་ཡོད་དེ་རྣམ་གསུམ། །ཤེས་རབ་དེ་འདྲར་ཡོངས་ཤེས་ནས། །མཁས་པས་ཡང་དག་སྒྲུབ་པར་བྱེད། ། ཅེས་སོ། །བདུན་པ་བསྡུ་བ་ནི། མཉམ་བཞག་མ་བཞག་གཉིས་ཀ་དང་། མཚན་ཉིད་རྒྱུ་དང་འབྲས་བུའི་ཕྱིར། །དགེ་ཀུན་ཕར་ཕྱིན་དྲུག་ཏུ་འདུས། །དེ་ནི་ཚོགས་གཉིས་མཚན་ཉིད་དོ། །ཞེས་བྱ་སྟེ། དཀར་ཆོས་ཐམས་ཅད་མཉམ་བཞག་ གིས་ཟིན་མ་ཟིན་གཉིས་སུ་འདུ་ལ། མཉམ་པར་མ་བཞག་པའི་ཆ་ཐམས་ཅད་སྦྱིན་ཚུལ་དུ་འདུ་ཞིང་བཞག་པ་རྣམས་བསམ་ཤེས་གཉིས་དང་གཉི་གའི་ཆ་རྣམས་བཟོད་བརྩོན་ཅི་རིགས་པར་འདུ་བས་དགེ་བ་ཐམས་ཅད་འདིར་འདུས་པ་སྟེ། དཀར་པོའི་ ཆོས་ཀུན་རྣམ་གཡེང་དང་། །མཉམ་བཞག་གཉི་གར་ཤེས་པར་བྱ། ཕ་རོལ་ཕྱིན་པ་གཉིས་དང་གཉིས། །གཉིས་ཀྱིས་ཡོངས་སུ་བསྡུས་པ་ཡིན། །ཞེས་སོ། །ཐེག་བསྡུས་སུ་ནི། སྦྱིན་སོགས་དྲུག་རང་རང་གི་མཚན་ཉིད་ཀྱིས་བསྡུས། དད་སོགས་རྣམས་ཆ་མཐུན་ནམ་རྒྱུས་བསྡུས། སྟོབས་སོགས་རྣམས་འབྲས་བུས་བསྡུས་པའི་ཕྱིར་དགེ་བ་ཐམས་ཅད་ཕྱིན་དྲུག་གིས་བསྡུས་པར་བཤད་དོ། །དེ་ལྟར་དགེ་བ་ཐམས་ཅད་ཕར་ཕྱིན་དྲུག་ཏུ་འདུས་ལ། དྲུག་པོ་ཉིད་ལས་སྦྱིན་ཚུལ་བསོད་ནམས་ཀྱི་ཚོགས། ཤེས་རབ་ཡེ་ཤེས་ཀྱི་ཚོགས། གཞན་གསུམ་གཉིས་ཀར་གཏོགས་པས་ཚོགས་གཉིས་སུ་འདུས་པ་སྟེ། སྦྱིན་དང་ཚུལ་ཁྲིམས་བསོད་ནམས་ཀྱི། །ཚོགས་ཡིན་ཤེས་རབ་ཡེ་ཤེས་ཀྱི། །གསུམ་པོ་གཞན་ནི་གཉིས་ཀའི་སྟེ། །ཞེས་སོ། བརྒྱད་པ་མི་མཐུན་ཕྱོགས་ནི། མི་མཐུན་ཕྱོགས་ནི་མདོར་བསྡུ་ན། །ཉོན་མོངས་ཤེས་བྱའི་སྒྲིབ་པ་གཉིས། །ཕྱེ་ན་སེར་སྣ་ལ་སོགས་དྲུག །ཞེས་བྱ་སྟེ། སེར་སྣ་དང་། འཆལ་ཚུལ་དང་། ཁོང་ཁྲོ་དང་། ལེ་ལོ་དང་། གཡེང་བ་དང་། འཆལ་པའི་ཤེས་རབ་རྣམས་ཉོན་སྒྲིབ་ཡིན་ལ།
Page: 196 འཁོར་གསུམ་དུ་རྣམ་པར་རྟོག་པ་ཤེས་སྒྲིབ་སྟེ། རྒྱུད་བླར། སེར་སྣ་ལ་སོགས་རྣམ་རྟོག་གང་། །དེ་ནི་ཉོན་མོངས་སྒྲིབ་པར་འདོད། །འཁོར་གསུམ་རྣམ་པར་རྟོག་པ་གང་། དེ་ནི་ཤེས་བྱའི་སྒྲིབ་པར་འདོད། །ཅེས་སོ། དགུ་པ་ཡོན་ ཏན་ནི། རྒྱ་ཆེ་བ་དང་ཟང་ཟིང་མེད། དོན་ཆེ་བ་དང་མི་ཟད་པ། །སྦྱིན་སོགས་རེ་རེའང་ཡོན་ཏན་བཞི། ཐུན་མོང་རྒྱ་ཆེན་གཞན་དོན་ནུས། ཁྱད་པར་སྦྱིན་པས་ལོངས་སྤྱོད་ལྡན། །ཚུལ་ཁྲིམས་ཀྱིས་ནི་བདེ་འགྲོ་འཐོབ། །བཟོད་པས་གཟུགས་ བཟང་འཁོར་ཕུན་ཚོགས། །བརྩོན་པས་གཟི་ཆེ་དོན་མྱུར་འགྲུབ། །བསམ་གཏན་གྱིས་ནི་འདོད་ལས་གྲོལ། །རིག་དང་མངོན་ཤེས་ཏིང་འཛིན་འགྲུབ། །ཤེས་རབ་ཀྱིས་ནི་ཆོས་ཀུན་ཤེས། །སྲིད་ཞི་ལས་ནི་ཡང་དག་འདའ། །ཕ་རོལ་ཕྱིན་དང་མི་ ལྡན་པའི། །ཉེས་དམིགས་དེ་ལས་ལྡོག་པའོ། །ཞེས་བྱ་སྟེ། སྦྱིན་པ་གང་ལ་ཅི་འདོད་པ་སྟེར་བ་དང་། ཚུལ་ཁྲིམས་གསུམ་ཀྱི་དང་པོ་སྡོམ་པ་དང་། ཕྱི་མ་གཉིས་བརྩོན་པའི་རང་བཞིན་ཅན་རྟག་ཏུ་བླངས་པ་དང༌། གཏོང་བ་ཆེན་པོ་དང་། གནོད་པ་ཅི་ལ་ཡང་ཇི་མི་ སྙམ་པའི་བཟོད་པ་དང་། གོ་ཆ་དང་། སྦྱོར་བའི་བརྩོན་འགྲུས་ཆེན་པོ་དང་། དཔའ་བར་འགྲོ་བ་སོགས་ཏིང་ངེ་འཛིན་མཐའ་ཡས་པ་དང་། དོན་དམ་དང་ཀུན་རྫོབ་ཀྱི་རྣམ་པ་ཐམས་ཅད་ཡང་དག་པར་ཤེས་པ་སྟེ་ཕར་ཕྱིན་སོ་སོའི་རྒྱ་ཆེ་བའི་ཡོན་ཏན་དང་། སྦྱིན་པ་ ལན་དང་རྣམ་སྨིན་ལ་མི་རེ་བ་དང་། ཚུལ་ཁྲིམས་ཀྱིས་མཐོ་རིས་མི་འདོད་ཅིང་ཐོབ་ཀྱང་མ་ཆགས་པ་དང་། བཟོད་པ་མཐོ་རིས་འདོད་པ་དང་ལན་མི་ནུས་པ་དང་། ཕ་རོལ་ལ་འཇིགས་པ་དང་། ཕན་འདོགས་སུ་རེ་བས་མ་ཡིན་པ་དང་། བརྩོན་འགྲུས་རང་ གཞན་གྱི་ཉོན་མོངས་པ་འཇོམས་པ་དང་། བསམ་གཏན་ཐོབ་ལ་མ་ཉམས་ཀྱང་སྙིང་རྗེས་དམན་པའི་སྐྱེ་བ་ཡང་འཛིན་པ་དང་། ཤེས་རབ་འཁོར་འདས་ལ་ཆགས་པ་མེད་པ་སྟེ་སོ་སོའི་མི་མཐུན་ཕྱོགས་སྤངས་པ་ཟང་ཟིང་མེད་པའི་ཡོན་ཏན་དང༌།
Page: 197 ༄༅། །ཕ་རོལ་ཏུ་ཕྱིན་པ་དེ་དང་དེས་སེམས་ཅན་ཐམས་ཅད་བྱང་ཆུབ་གསུམ་ལ་འགོད་པ་དོན་ཆེན་པོའི་ཡོན་ཏན་དང་། རེ་རེ་ཞིང་ཡེ་ཤེས་ཀྱིས་ཟིན་ཞིང་ཤེས་རབ་སྙིང་རྗེས་ཟིན་པས་ལྷག་མེད་ཀྱི་མྱང་འདས་སུའང་མི་ཟད་པ་མི་ཟད་པའི་ ཡོན་ཏན་ཏེ་བཞི་དང་ལྡན་པ་སྟེ། རྒྱ་ཆེ་བ་དང་ཟང་ཟིང་མེད། །དོན་ཆེ་བ་དང་མི་ཟད་པ། །སྦྱིན་པ་ལ་སོགས་ཐམས་ཅད་ཀྱི། །ཡོན་ཏན་བཞིར་ནི་ཤེས་པར་བྱ། །ཞེས་སྤྱིར་བསྟན་པ་དང་། སོ་སོའི་དབང་དུ་མཛད་ནས། སངས་རྒྱས་སྲས་ རྣམས་སློང་དང་ཕྲད་ན་རང་གི་སྲོག་ཡང་རྟག་ཏུ་གཏོང་། །སྙིང་རྗེས་གཞན་ལས་ལན་ཡང་མི་རེ་འདོད་པའི་འབྲས་བུ་དོན་མི་གཉེར། །སྦྱིན་པ་དེ་ཉིད་ཀྱིས་ཀྱང་སྐྱེ་བོ་ཐམས་ཅད་བྱང་ཆུབ་གསུམ་ལ་འགོད། །སྦྱིན་པ་ཡེ་ཤེས་ཀྱིས་ཡོངས་ཟིན་པས་ འཇིག་རྟེན་དག་ན་མི་ཟད་བཞག །སངས་རྒྱས་སྲས་རྣམས་སྡོམ་དང་བརྩོན་པའི་རང་བཞིན་ཚུལ་ཁྲིམས་གསུམ་རྟག་བླངས། །མཐོ་རིས་མངོན་པར་མི་འདོད་ཡང་དག་ཐོབ་ཀྱང་དེ་ལ་ཆགས་མི་སྐྱེད། །ཚུལ་ཁྲིམས་དེ་ཉིད་ཀྱིས་ཀྱང་སྐྱེ་བོ་ཐམས་ ཅད་བྱང་ཆུབ་གསུམ་ལ་འགོད། །ཚུལ་ཁྲིམས་ཡེ་ཤེས་ཀྱིས་ཡོངས་ཟིན་པས་འཇིག་རྟེན་དག་ན་མི་ཟད་བཞག །སངས་རྒྱས་སྲས་རྣམས་ཤིན་ཏུ་བྱ་དཀའ་དེ་བཞིན་མི་ཡི་གནོད་ཀུན་བཟོད། །མཐོ་རིས་གཉེར་དང་མི་ནུས་པས་མིན་འཇིགས་པས་ མ་ཡིན་ཕན་བལྟས་མིན། །བཟོད་པ་དེ་ཉིད་ཀྱིས་ཀྱང་སྐྱེ་བོ་ཐམས་ཅད་བྱང་ཆུབ་གསུམ་ལ་འགོད། །བཟོད་པ་ཡེ་ཤེས་ཀྱིས་ཡོངས་ཟིན་པས་འཇིག་རྟེན་དག་ན་མི་ཟད་བཞག །རྒྱལ་བའི་སྲས་རྣམས་གོ་ཆར་སྦྱོར་བའི་བདག་ཉིད་བརྩོན་ འགྲུས་དཔེ་མེད་བྱས། བདག་དང་གཞན་གྱི་ཉོན་མོངས་ཚོགས་གཞོམ་བྱང་ཆུབ་དམ་པ་འཐོབ་པར་བྱེད། བརྩོན་འགྲུས་དེ་ཉིད་ཀྱིས་ཀྱང་སྐྱེ་བོ་ཐམས་ཅད་བྱང་ཆུབ་གསུམ་ལ་འགོད། །བརྩོན་འགྲུས་ཡེ་ཤེས་ཀྱིས་ཡོངས་ཟིན་པས་
Page: 198 འཇིག་རྟེན་དག་ན་མི་ཟད་བཞགརྒྱལ་བའི་སྲས་རྣམས་ཏིང་འཛིན་མང་ལྡན་བསམ་གཏན་རྣམ་པ་ཐམས་ཅད་སྒྲུབ། །བསམ་གཏན་བདེ་བའི་ཕུལ་གྱིས་གནས་ཤིང་སྙིང་རྗེས་སྐྱེ་བ་དམན་ལ་བསྟེན། །བསམ་གཏན་དེ་ཉིད་ཀྱིས་ཀྱང་སྐྱེ་བོ་ཐམས་ ཅད་བྱང་ཆུབ་གསུམ་ལ་འགོད། །བསམ་གཏན་ཡེ་ཤེས་ཀྱིས་ཡོངས་ཟིན་པས་འཇིག་རྟེན་དག་ན་མི་ཟད་བཞག །རྒྱལ་བའི་སྲས་རྣམས་དེ་ཉིད་ཤེས་བྱ་གང་ཡིན་མཐའ་དག་རྣམ་ཀུན་ཤེས། །མྱ་ངན་འདས་ལའང་བློ་ཡིས་ཆགས་རབ་མི་སྐྱེད་འཁོར་ བར་སྨོས་ཅི་དགོས། །ཡེ་ཤེས་དེ་ཉིད་ཀྱིས་ཀྱང་སྐྱེ་བོ་ཐམས་ཅད་བྱང་ཆུབ་གསུམ་ལ་འགོད། །ཡེ་ཤེས་སེམས་ཅན་ཡོངས་སུ་བཟུང་བས་འཇིག་རྟེན་དག་ན་མི་ཟད་བཞག །ཞེས་སོ། །ཁྱད་པར་དུ་སྦྱིན་པའི་ཕན་ཡོན་བཞི་སྟེ། རང་གཞན་ གྱི་དབུལ་བ་རྒྱུན་གཅོད། རྣམ་འབྲས་རྟག་ཏུ་ལོངས་སྤྱོད་ཕུན་སུམ་ཚོགས་པ་འཐོབ། སེམས་ཅན་སྨིན་པར་ནུས། བྱང་ཆུབ་འཐོབ་པའོ། །དེ་ལྟར་ཡང་། བྱང་ཆུབ་སེམས་དཔའི་སྦྱིན་པས་ཡི་དྭགས་འགྲོ་བ་གཅོད། །དབུལ་བ་དང་ནི་དེ་བཞིན་ཉོན་མོངས་ ཐམས་ཅད་གཅོད། སྤྱོད་ཚེ་ལོངས་སྤྱོད་མཐའ་ཡས་རྒྱས་པ་འཐོབ་པར་འགྱུར། །ཞེས་དང༌། བཤེས་སྤྲིང་ལས། སྦྱིན་པ་ཚུལ་བཞིན་སྩོལ་གྱིས་ཕ་རོལ་ཏུ། །སྦྱིན་ལས་གཞན་པའི་གཉེན་མཆོག་མ་མཆིས་སོ། །ཞེས་དང་། འཇུག་ པ་ལས། སྐྱེ་བོ་འདི་ཀུན་བདེ་བ་མངོན་འདོད་ཅིང་། །མི་རྣམས་བདེ་བའང་ལོངས་སྤྱོད་མེད་མིན་ལ། །ལོངས་སྤྱོད་ཀྱང་ནི་སྦྱིན་ལས་འབྱུང་མཁྱེན་ནས། །ཐུབ་པས་དང་པོར་སྦྱིན་པའི་གཏམ་མཛད་དོ། །ཞེས་སོ། །གཞན་སྦྱིན་པས་ བསྡུས་ནས་ཆོས་ལ་འགོད་པར་ནུས་ཏེ་བསྡུ་བའི་སྒོ་བཞིའི་དང་པོ་ཟང་ཟིང་གི་སྦྱིན་པ་ཡིན་པའི་ཕྱིར་དང་། སྦྱིན་པས་སྡུག་བསྔལ་གྱུར་པའི་སེམས་ཅན་ཡོངས་སྨིན་བྱེད། །ཅེས་གསུངས་ཤིང་། འཁོར་ལོ་དང་པོའི་གདུལ་བྱ་དགེ་སློང་ལྔ་སྡེ་དང་
Page: 199 ༄༅། །ལྷ་བརྒྱད་ཁྲི་པོ་ཡང་བྱང་ཆུབ་སེམས་དཔའ་རུས་སྦལ་དུ་གྱུར་པས་མི་ལྔ་ལ་མི་འཇིགས་པ་བྱིན་ཞིང་གྲོག་མ་བརྒྱད་ཁྲི་ལ་ལུས་བྱིན་པ་སོགས་སྐྱེས་རབས་མཐའ་ཡས་པར་སྦྱིན་པ་ཁོ་ནས་བསྡུས་པའི་ཕྱིར་རོ། །བྱང་ཆུབ་ སྒྲུབ་པར་སླ་སྟེ་སངས་རྒྱས་ཀྱི་ཡོན་ཏན་ཐམས་ཅད་ཀྱང་ཕར་ཕྱིན་དྲུག་ལྡན་གྱི་འབྲས་བུ་ཁོ་ན་ཡིན་པའི་ཕྱིར་དང་། བྱང་ཆུབ་སེམས་དཔའི་སྡེ་སྣོད་ལས། སྦྱིན་པ་གཏོང་ལ་བྱང་ཆུབ་རྙེད་མི་དཀའ། །ཞེས་དང་། དཀོན་མཆོག་སྤྲིན་ལས། སྦྱིན་པ་ནི་བྱང་ཆུབ་སེམས་དཔའི་བྱང་ཆུབ་བོ། །ཅེས་དང་། བྱང་ས་ལས། དེ་ལྟར་བྱང་ཆུབ་སེམས་དཔའ་རྣམས་སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་འཚང་རྒྱ་བར་འགྱུར་ རོ། །ཞེས་སོ། །བྱེ་བྲག་ཏུ། བྱང་ས་ལས། ཟས་བྱིན་པས་ནི་སྟོབས་ཆེན་འགྱུར། །གོས་བྱིན་པས་ནི་ཁ་དོག་ལྡན། །བཞོན་པ་བྱིན་པས་བདེ་འགྱུར་བརྟན། །མར་མེ་བྱིན་པས་མིག་དང་ལྡན། །ཞེས་སོགས་ཟང་ཟིང་གི་སྦྱིན་པའི་ཕན་ཡོན་དང་། རིན་ཆེན་ཕྲེང་བ་ལས། འཇིགས་ལ་མི་འཇིགས་བྱིན་པ་ཡིས། །བདུད་རྣམས་ཀུན་གྱིས་མི་ཚུགས་ཤིང་། །སྟོབས་པོ་ཆེ་ཡི་མཆོག་ཏུ་འགྱུར། །ཞེས་མི་འཇིགས་པའི་སྦྱིན་པའི་ཕན་ཡོན་དང་། དེ་ཉིད་ལས། ཆོས་འདོད་པ་ལ་སྦྱིན་ པ་དག །སྒྲིབ་པ་མེད་པར་བྱས་པ་ཡིས། སངས་རྒྱས་རྣམས་དང་འགྲོགས་པ་དང་། །འདོད་པ་མྱུར་དུ་འཐོབ་པར་འགྱུར། །ཞེས་སོ། །ཚུལ་ཁྲིམས་ཀྱི་ཕན་ཡོན་ཡང་། མཐོ་རིས་ཀྱི་ལུས་ཕུན་ཚོགས་འཐོབ་པ་དང༌། ཡོན་ཏན་ཐམས་ཅད་ཀྱི་ རྟེན་བྱེད་པ་དང་། ཏིང་ངེ་འཛིན་སྐྱེ་བ་དང་། སྨོན་པ་འགྲུབ་པ་དང་། ལྷ་མིས་བཀུར་བ་སྟེ་གནས་སྐབས་ཀྱི་ཕན་ཡོན་ལྔ་དང་། མཐར་ཐུག་སངས་རྒྱས་འཐོབ་པ་སྟེ། ཁྲིམས་ཀྱིས་དུད་འགྲོའི་འགྲོ་བ་དུ་མའི་ངོ་བོ་དང་། །མི་ཁོམ་བརྒྱད་སྤོང་དེ་ཡིས་དལ་བ་བརྟག་ཏུ་
Page: 200 འཐོབ། ཅེས་དང་། བྱང་ཆུབ་སེམས་དཔའི་སྡེ་སྣོད་ལས། ཤཱ་རིའི་བུ། དེ་ལྟར་ཚུལ་ཁྲིམས་ཡོངས་སུ་དག་པའི་བྱང་ཆུབ་སེམས་དཔའ་དེས་ནི་ལྷ་དང་མིའི་དཔལ་ཕུན་སུམ་ཚོགས་པ་མྱོང་བར་མི་འགྱུར་བ་དེ་གང་ཡང་མེད་དོ། །ཞེས་དང་། སྲེད་ མེད་། ར་བའི་ཀྱི་བུའི་མདོ་ལས། ཚུལ་ཁྲིམས་ཀྱི་ཕུང་པོ་དེ་ལྟ་བུ་དང་ལྡན་པའི་བྱང་ཆུབ་སེམས་དཔའ་དེ་འཁོར་ལོས་བསྒྱུརརྒྱལ་སྲིད་ལས་ཡོངས་སུ་མི་ཉམས་ཏེ་དེ་ལ་ཡང་བག་ཡོད་ཅིང་བྱང་ཆུབ་འདོད་པ་ཡིན་ནོ། །བརྒྱ་བྱིན་ལས་ཡོངས་སུ་མི་ཉམས་ ཏེ་དེ་ལ་ཡང་བག་ཡོད་ཅིང་བྱང་ཆུབ་འདོད་པ་ཡིན་ནོ། །ཞེས་སོ། །ཡོན་ཏན་གྱི་རྟེན་དུ་འགྱུར་བ་ནི། ཁྲིམས་ནི་རྒྱུ་དང་མི་རྒྱུའི་ས་བཞིན་དུ། །ཡོན་ཏན་ཀུན་གྱི་གཞི་རྟེན་ལགས་པར་གསུངས། །ཞེས་དང༌། འཇུག་པར། ཡོན་ཏན་ ཚུལ་ཁྲིམས་ཞིང་དུ་རྣམ་འཕེལ་ན། །འབྲས་བུ་ཉེར་སྤྱོད་ཆད་པ་མེད་པར་འགྱུར། །ཞེས་སོ། །ཏིང་ངེ་འཛིན་སྐྱེ་བ་ནི། ཟླ་བ་སྒྲོན་མ་ལས། ཉོན་མོངས་མེད་པའི་ཏིང་འཛིན་མྱུར་འཐོབ་སྟེ། །འདི་ནི་ཚུལ་ཁྲིམས་རྣམ་དག་ཕན་ཡོན་ནོ། ། ཞེས་དང་། འཇུག་པར། ཞི་གནས་རྒྱུ་ནི་ཚུལ་ཁྲིམས་ལས་གཞན་མེད། །ཅེས་སོ། །སྨོན་པ་འགྲུབ་པ་ནི། ཡབ་སྲས་མཇལ་བའི་མདོར། ཚུལ་ཁྲིམས་རྣམ་དག་གང་བསྲུངས་པ། །སྨོན་ལམ་ཐམས་ཅད་འགྲུབ་པར་འགྱུར། །ཞེས་སོ། ། ལྷ་མིས་བཀུར་བ་ནི། སྲེད་མེད་ཀྱི་བུའི་མདོ་ལས། ཚུལ་ཁྲིམས་ཀྱི་ཕུང་པོ་ལ་གནས་པའི་བྱང་ཆུབ་སེམས་དཔའ་ལ་ལྷ་རྣམས་ཀྱིས་རྟག་ཏུ་ཕྱག་བྱས་པ་ཡིན། ཀླུ་རྣམས་ཀྱིས་རྟག་ཏུ་བསྔགས་པ་ཡིན། གནོད་སྦྱིན་རྣམས་ཀྱིས་རྟག་ཏུ་བསྟོད་པ་ཡིན། དྲི་ ཟ་རྣམས་ཀྱིས་རྟག་ཏུ་མཆོད་པ་ཡིན། བྲམ་ཟེ་དང་རྒྱལ་རིགས་དང་ཚོང་དཔོན་དང་ཁྱིམ་བདག་རྣམས་ཀྱིས་རྟག་ཏུ་གསོལ་བ་ཡིན། སངས་རྒྱས་རྣམས་ཀྱིས་རྟག་ཏུ་དགོངས་པ་ཡིན། ལྷ་དང་བཅས་པའི་འཇིག་རྟེན་གྱིས་རྟག་ཏུ་བཀུར་བ་ཡིན་ཞེས་སོ། །
Page: 201 ༄༅། །མཐར་ཐུག་ནི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་རྫོགས་ནས་འཚང་རྒྱའོ་ཞེས་སོགས་གསུངས་སོ། །བཟོད་པའི་ཕན་ཡོན་ནི་གཟུགས་མཛེས་པ་དང་འཁོར་ཕུན་སུམ་ཚོགས་པ་འཐོབ་པ་དང་དཀའ་ཐུབ་ཀྱི་མཆོག་ ཏུ་འགྱུར་བ་དང་འདི་ཕྱིར་བདེ་བ་དང་མཐར་ཐུག་བྱང་ཆུབ་འཐོབ་པ་སྟེ། བཟོད་པས་གཟུགས་བཟང་དམ་པ་རྒྱ་ཆེན་འཐོབ་འགྱུར་སྟེ། གསེར་མདོག་སྡུག་ཅིང་འགྲོ་བས་ལྟ་བའི་འོས་སུ་འགྱུར། །ཞེས་དང་། འཁོར་ཚེ་བཟོད་པས་མཛེས་སོགས་ དང་། །ནད་མེད་པ་དང་གྲགས་པ་དང་། །ཤིན་ཏུ་ཡུན་རིང་འཚོ་བ་དང་། །འཁོར་ལོས་བསྒྱར་བའི་བདེ་རྒྱས་འཐོབ། །ཅེས་དང་། འདི་ན་བཟོད་ལྡན་དེ་ལ་འགྲོ་བ་དགར་འགྱུར་མཁས། །ཅེས་དང༌། བཟོད་པ་ལྟ་བུའི་དཀའ་ཐུབ་ མེད། །ཅེས་དང་། གང་ཞིག་བསྒྲིམས་ཏེ་ཁྲོ་འཇོམས་པ། །དེ་ནི་འདི་དང་གཞན་དུ་བདེ། །ཞེས་དང་། བཟོད་པ་རྒྱ་ཆེ་ཞིང་ཚད་མེད་ལ་བྱང་ཆུབ་ཆེན་པོའི་འབྲས་བུ་འབྱུང་བ་འདི་དག་ལ་བསྟེན་ན་བྱང་ཆུབ་སེམས་དཔའ་བླ་ན་མེད་པ་ཡང་ དག་པར་རྫོགས་པར་འཚང་རྒྱ་བར་འགྱུར་རོ་ཞེས་སོ། །བརྩོན་འགྲུས་ཀྱི་ཕན་ཡོན་ནི། འཁོར་བར་འཁོར་བའི་ཚེ་བདེ་བའི་མཆོག་རྣམས་འཐོབ་པ་དང་དཀར་པོའི་ཡོན་ཏན་ཐམས་ཅད་འཕེལ་བ་དང་འཇིག་ཚོགས་ལས་བརྒལ་བ་དང་མྱུར་དུ་ བྱང་ཆུབ་འཐོབ་པ་སྟེ། བརྩོན་འགྲུས་ཀྱིས་ནི་སྲིད་གཅོད་འདོད་པ་འཐོབ། །ཅེས་དང༌། བརྩོན་འགྲུས་ཀྱིས་ནི་དཀར་པོའི་ཡོན་ཏན་འགྲིབ་མི་འགྱུར། །ཡེ་ཤེས་མཐའ་ཡས་རྒྱལ་བའི་བང་མཛོད་བརྙེས་པར་འགྱུར། །ཞེས་དང༌། རླུང་མེད་ གཡོ་བ་མེད་པ་བཞིན། །བསོད་ནམས་བརྩོན་འགྲུས་མེད་མི་འབྱུང༌། །ཞེས་དང་། བརྩོན་འགྲུས་ཀྱིས་ནི་འཇིག་ཚོགས་འདས་ནས་གྲོལ། །ཞེས་དང་། བརྩོན་འགྲུས་ཀྱིས་ནི་བྱང་ཆུབ་མཆོག་འཚང་རྒྱ། །ཞེས་དང་། བློ་གྲོས་རྒྱ་མཚོས་
Page: 202 ཞུས་པར། བརྩོས་འགྲུས་བརྩམས་པ་རྣམས་ཀྱིས་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་དཀའ་བ་མ་ཡིན་ནོ་ཞེས་དང་། གང་པོས་ཞུས་པར། རྟག་ཏུ་བརྩོན་འགྲུས་གང་བརྩམས་པ། །འདི་ལ་བྱང་ཆུབ་ཡོངས་མི་དཀའ། །ཞེས་སོ། ། ཡང་ན་ཁྱད་པར་གྱི་དབྱེ་བའི་སྒོ་ནས་ཕན་ཡོན་དྲུག་སྟེ། དགེ་བའི་མཆོག་ཏུ་བསྟན་པ་གཙོ་བོའི་དབྱེ་བ་དང་དགེ་བ་ཐམས་ཅད་འདི་མེད་ན་མི་འབྱུང་བ་རྒྱུའི་དབྱེ་བ་དང་ལུས་སེམས་བདེ་ཞིང་དོན་ཐམས་ཅད་འགྲུབ་པ་ལས་ཀྱི་དབྱེ་བ་དང་རྣམ་པ་དང་རྟེན་དང་། བར་ཆད་རྣམ་པ་བཞིའི་གཉེན་པོས་ཕྱེ་བའི་ཕྱིར་ཏེ། གཙོ་དང་དེ་རྒྱུ་ལས་ཀྱི་དབྱེ་བ་དང་། །རྣམ་པའི་དབྱེ་བ་རྟེན་གྱིས་ཕྱེ་བ་དང་། །བར་ཆད་རྣམ་བཞིའི་གཉེན་པོའི་དབྱེ་བ་ཡིས། བརྩོན་འགྲུས་ཡོངས་ཤེས་བྱ་ཕྱིར་རབ་ཏུ་བསྟན། ། ཞེས་དང་། དེ་འཆད་པ་ན། དགེ་བའི་ཆོས་ཀྱི་ནང་ན་བརྩོན་འགྲུས་མཆོག །འདི་ལྟར་དེ་ལ་བསྟེན་ནས་དེ་རྗེས་ཐོབ། །བརྩོན་འགྲུས་ཀྱིས་ནི་མོད་ལ་བདེར་གནས་མཆོགདངོས་གྲུབ་འཇིག་རྟེན་འདས་དང་འཇིག་རྟེན་གཏོགས། ། ཅེས་སོ། །ཞར་ལ་རྣམ་པའི་དབྱེ་བ་ཡང་། ཐོག་མར་གོ་ཆའི་བརྩོན་འགྲུས་དེ་ལས་ནི། །ཚུལ་བཞིན་རབ་ཞུགས་སྦྱོར་བའི་བརྩོན་འགྲུས་དང་། །མ་ཞུམ་མི་འཁྲུགས་ཆོག་མི་ཤེས་བརྩོན་འགྲུས། །རྣམ་པ་ཐམས་ཅད་སངས་རྒྱས་ རྣམ་རབ་གསུངས། །ཞེས་གོ་ཆ་སྦྱོར་བ་མ་ཞུམ་མི་འཁྲུགས་ཆོག་མི་ཤེས་པ་སྟེ་ལྔ་དང་། རྟེན་གྱིས་ཕྱེ་བ། ཐེག་པ་གསུམ་བརྩོན་སྐྱེ་བོ་ལ་བསྟེན་པའི། །བརྩོན་འགྲུས་ཐ་མ་འབྲིང་དང་མཆོག་གཞན་སྟེ། །བསམ་མནོ་ཞན་དང་རྒྱ་རབ་ ཆེ་ལྡན་ཕྱིར། །དེ་ནི་དོན་ཆུང་བ་དང་དོན་ཆེན་འདོད། ཅེས་ཉན་ཐོས་ཀྱི་བརྩོན་འགྲུས་ཐ་མ་དང༌རང་རྒྱལ་གྱི་འབྲིང་ཐེག་ཆེན་གྱི་མཆོག་ཡིན་ལ། ཡང་ན་ཉན་རང་གི་བརྩོན་འགྲུས་ནི་བསམ་མནོ་ཞན་པ་དང་དོན་ཆུང་བ་ཡིན་ལ་ཐེག་ཆེན་གྱི་བློ་རྒྱ་ཆེ་
Page: 203 ༄༅། །བ་དང་དོན་ཆེན་པོར་བཞག་པ་དང་། ཡང་ལོངས་སྤྱོད་ལ་ཞེན་པ་དང་དེ་ལ་ཆགས་པ་དང་སྦྱིན་པས་སྐྱོ་བ་དང་ཅུང་ཟད་ཀྱིས་ཆོག་པར་འཛིན་པའི་གཉེན་པོར་བརྩོན་འགྲུས་བཞི་བསྟན་ཏེ། བརྩོན་འགྲུས་ལྡན་པ་ ལོངས་སྤྱོད་ཀྱིས་ཕམ་མེད། །བརྩོན་འགྲུས་ལྡན་པ་ཉོན་མོངས་ཀྱིས་ཕམ་མེད། །བརྩོན་འགྲུས་ལྡན་པ་སྐྱོ་བས་ཕམ་པ་མེད། །བརྩོན་འགྲུས་ལྡན་པ་ཐོས་པས་ཕམ་པ་མེད། །ཅེས་སོ། །བསམ་གཏན་གྱི་ཕན་ཡོན་ནི། རྣམ་གཡེང་ཞི་ཞིང་ མངོན་ཤེས་དང་ཤེས་རབ་སྐྱེ་ཉོན་མོངས་པ་ཐམས་ཅད་འཇོམས་སྙིང་རྗེ་སྐྱེ་གནས་སྐབས་འདོད་ཆགས་དང་བྲལ་བའི་ལྷའི་ལུས་འཐོབ་ཅིང་བྱང་ཆུབ་མྱུར་དུ་འཐོབ་པ་སྟེ། བསམ་གཏན་གྱིས་ནི་འདོད་པའི་ཡོན་ཏན་སྨད་པ་འདོར། །ཞེས་དང་། ལམ་སྒྲོན་ལས། ཞི་གནས་གྲུབ་པ་མ་ཡིན་པས། །མངོན་ཤེས་འབྱུང་བ་མ་ཡིན་ལ། །དེ་བཞིན་མངོན་ཤེས་སྟོབས་བྲལ་བས། །སེམས་ཅན་དོན་བྱེད་ནུས་པ་མིན། ཞེས་དང་། བཤེས་སྤྲིང་ལས། བསམ་གཏན་མེད་པར་ཡོད་ ནི་ཤེས་རབ་མེད། །ཅེས་དང༌། རིག་དང་མངོན་པར་ཤེས་དང་ཏིང་འཛིན་མངོན་པར་འགྲུབ། །ཅེས་དང་། ཞི་གནས་རབ་ཏུ་ལྡན་པའི་ལྷག་མཐོང་གིས། །ཉོན་མོངས་རྣམ་པར་འཇོམས་པར་ཤེས་བྱས་ནས། །ཅེས་དང་ཆོས་ཡང་དག་ པར་སྡུད་པའི་མདོ་ལས། ཡིད་མཉམ་པར་བཞག་པས་ཡང་དག་པ་ཇི་ལྟ་བ་བཞིན་མཐོང་བར་འགྱུར་རོ། །ཡང་དག་པ་ཇི་ལྟ་བ་བཞིན་མཐོང་བས་བྱང་ཆུབ་སེམས་དཔའ་སེམས་ཅན་རྣམས་ལ་སྙིང་རྗེ་སྐྱེའོ་ཞེས་དང་། བསམ་གཏན་གྱི་ཕ་རོལ་ཏུ་ ཕྱིན་པ་རྫོགས་ནས་བྱང་ཆུབ་ཏུ་འཚང་རྒྱའོ་ཞེས་སོ། །ཤེས་རབ་ཀྱི་ཕན་ཡོན་ནི་དགེ་བ་ཐམས་ཅད་ཕ་རོལ་ཏུ་ཕྱིན་པར་འཁྲིད་ཁམས་གསུམ་ལས་འདའ་དགེ་བ་ཐམས་ཅད་ཀྱི་འབྲས་བུར་འགྱུར་བདེ་ལེགས་ཐམས་ཅད་འབྱུང་མྱུར་དུ་བྱང་ཆུབ་འཐོབ་
Page: 204 པ་སྟེ། དཔེར་ན་རི་མོའི་ལས་ནི་ཡོངས་ཟིན་མིག་མེད་པ། ཇི་སྲིད་མིག་མ་བྲིས་པར་རྔན་པ་མི་འཐོབ་བཞིན། །གང་ཚེ་འདུས་བྱས་འདུས་མ་བྱས་དང་དཀར་ནག་ཆོས། །ཤེས་རབ་ཀྱིས་ནི་བཤིག་ནས་རྡུལ་ཙམ་མི་དམིགས་ཚེ། །འཇིག་རྟེན་དག་ ན་ཤེས་རབ་ཕ་རོལ་ཕྱིན་གྲངས་འགྲོ། ཞེས་དང༌། དམུས་ལོང་དམིགས་བུ་མེད་པ་བྱེ་བ་ཁྲག་ཁྲིག་རྣམས། །ལམ་ཡང་མི་ཤེས་གྲོང་ཁྱེར་འཇུག་པར་ག་ལ་འགྱུར། །ཤེས་རབ་མེད་ན་མིག་མེད་ཕ་རོལ་ཕྱིན་ལྔ་འདིས། །དམིགས་བུ་མེད་པས་ བྱང་ཆུབ་རེག་པར་ནུས་མ་ཡིན། །ཞེས་དང་། འཇུག་པར། ཇི་ལྟར་ལོང་བའི་ཚོགས་ཀུན་བདེ་བླག་ཏུ། མིག་ལྡན་སྐྱེས་བུ་གཅིག་གིས་འདོད་པ་ཡི། །ཡུལ་དུ་འཁྲིད་པ་དེ་བཞིན་ཤེས་རབ་ཀྱིས། །མིག་ཉམས་ཡོན་ཏན་བླངས་ཏེ་རྒྱལ་བར་ འཁྲིད། །ཅེས་སོ། །སྲིད་པའི་རྩ་བ་གཅོད་དེ། ཤེས་རབ་ཀྱིས་ནི་ཆོས་ཀྱི་རང་བཞིན་ཡོངས་ཤེས་ནས། ཁམས་གསུམ་མ་ལུས་པ་ལས་ཡང་དག་འདའ་བར་འགྱུར། །ཞེས་དང་། རྣམ་འགྲེལ་ལས། སྟོང་ཉིད་ལྟ་བས་གྲོལ་འགྱུར་གྱི། །སྒོམ ་པ་ལྷག་མ་དེ་བརྩོན་ཡིན། །ཞེས་སོ། །དགེ་བ་ཐམས་ཅད་ཀྱང་ཤེས་རབ་སྐྱེད་པའི་ཆེད་ཡིན་ཏེ། ཡན་ལག་འདི་དག་ཐམས་ཅད་ནི། །ཐུབ་པས་ཤེས་རབ་དོན་དུ་གསུངས། །ཞེས་སོ། །བདེ་ལེགས་ཐམས་ཅད་འབྱུང་སྟེ། སངས་རྒྱས་སྲས་ དང་ཉན་ཐོས་རང་རྒྱལ་ལྷ་རྣམས་དང་། །འགྲོ་བ་ཀུན་གྱི་བདེ་སྐྱིད་ཆོས་རྣམས་ཇི་སྙེད་པ། །དེ་ཀུན་ཤེས་རབ་ཕ་རོལ་ཕྱིན་པ་མཆོག་ལས་བྱུང་། །ཞེས་སོ། །མྱུར་དུ་འཚང་རྒྱ་སྟེ། ཤེར་ཕྱིན་བདུན་བརྒྱ་པ་ལས། འཇམ་དཔལ་ཤེས་རབ་ཀྱི་ཕ་རོལ་ ཏུ་ཕྱིན་པ་ལ་སྤྱད་ན་བྱང་ཆུབ་སེམས་དཔའ་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་འགྱུར་རོ། །ཞེས་སོ། །མི་ལྡན་པའི་ཉེས་དམིགས་ནི། སྦྱིན་པ་དང་མི་ལྡན་ན་དབུལ་པོར་འགྱུར། རང་གཞན་གྱི་དོན་
Page: 205 ༄༅། །མི་ནུས་ཏེ། སེར་སྣ་ཅན་ནི་ཡི་དྭགས་གནས་སུ་སྐྱེ་བར་འགྱུར། །གལ་ཏེ་མིར་སྐྱེས་ན་ཡང་དེ་ཚེ་དབུལ་པོར་འགྱུར། །ཞེས་དང༌། འདུལ་བའི་ལུང་ལས་གྲོ་བཞིན་སྐྱེས་ལ་ཡི་དྭགས་ཀྱིས་ལན་བཏབ་པ། བདག་ཅག་ སེར་སྣས་འཇུངས་པ་ཅན། །སྦྱིན་པ་ཅུང་ཟད་མ་བཏང་སྟེ། །བདག་ཅག་ཡི་དྭགས་འཇིག་རྟེན་ལྷགས། །ཅེས་དང་། སྦྱིན་གཏོང་མ་མྱོང་ལོངས་སྤྱོད་མེད། །སེམས་ཅན་བསྡུ་བར་ཡོང་མི་ནུས། བྱང་ཆུབ་འཐོབ་པ་ལྟ་ཅི་སྨོས། ། ཅེས་སོ། ཚུལ་ཁྲིམས་དང་མི་ལྡན་ན་ངན་འགྲོར་འགྲོ་ཆོས་མི་མཐོང༌ཐར་པ་མི་འཐོབ་སྟེ། འཇུག་པར། སྐྱེས་བུ་ཚུལ་ཁྲིམས་རྐང་པ་ཆག་གྱུར་ན། །སྦྱིན་པས་ལོངས་སྤྱོད་ལྡན་ཡང་ངན་འགྲོར་ལྟུང༌། །ཞེས་དང་། ཚུལ་ཁྲིམས་ལྡན་པའི་ མདོར། ཇི་ལྟར་མིག་མེད་གཟུགས་མཐོང་མི་འགྱུར་བ། །དེ་བཞིན་ཚུལ་ཁྲིམས་མེད་ན་ཆོས་མི་མཐོང་། །ཞེས་དང་། ཇི་ལྟར་རྐང་མེད་ལམ་འཇུག་ག་ལ་ནུས། །དེ་བཞིན་ཚུལ་ཁྲིམས་མེད་ན་ཐར་མི་འགྱུར། །ཞེས་སོ། །བཟོད་པ་ དང་མི་ལྡན་ན་ཁོང་ཁྲོས་དགེ་རྩ་འཇོམས་ཞེ་སྡང་གིས་རྟག་ཏུ་སྡུག་བསྔལ་མཛའ་བཤེས་སྐྱོ་བར་འགྱུར་བདུད་ཀྱིས་གླགས་རྙེད་བྱང་ཆུབ་མི་འཐོབ་སྟེ། བྱང་ཆུབ་སེམས་དཔའི་སྡེ་སྣོད་ལས། ཁོང་ཁྲོ་བ་ཞེས་བྱ་བ་ནི་བསྐལ་བ་བརྒྱ་སྟོང་དུ་ བསགས་པའི་དགེ་བའི་རྩ་བ་འཇོམས་པ་སྟེ། ཞེས་དང་། ཞེ་སྡང་ལྟ་བུའི་སྡིག་པ་མེད། །ཅེས་དང་། ཞེ་སྡང་ཟུག་རྔུའི་སེམས་འཆང་ན། །ཡིད་ནི་ཞི་བ་ཉམས་མི་མྱོང་། །དགའ་དང་བདེ་བའམ་མི་འཐོབ་ལ། །གཉིད་མི་འོང་ཞིང་ བརྟན་མེད་འགྱུར། །ཞེས་དང་། མདོར་ན་ཁྲོ་བས་བདེར་གནས་པ། །དེ་ནི་འགའ་ཡང་ཡོད་མ་ཡིན། །ཞེས་དང་། དེ་ཡིས་མཛའ་བཤེས་སྐྱོ་བར་འགྱུར། །སྦྱིན་པས་བསྡུས་ཀྱང་བསྟེན་མི་བྱེད། །ཅེས་དང་། བྱང་ཆུབ་སེམས་དཔའི་སྡེ་སྣོད་ལས།
Page: 206 སེམས་སྡང་བར་གྱུར་པ་ལ་བདུད་ཀྱིས་གླགས་རྙེད་ནས་བར་ཆད་འཇུག་གོ་ཅེས་དང་། སྡང་ཞིང་བཟོད་དང་བྲལ་ལ་བྱང་ཆུབ་ག་ལ་ཡོད། །ཅེས་སོ། །བརྩོན་འགྲུས་དང་མི་ལྡན་པའི་ཉེས་པ་ནི་ལེ་ལོས་དགེ་བ་མི་འགྲུབ། གཞན་དོན་མི་ནུས་བྱང་ཆུབ་མི་ འཐོབ་པ་སྟེ། བློ་གྲོས་རྒྱ་མཚོས་ཞུས་པ་ལས། ལེ་ལོ་ཅན་ལ་ནི་སྦྱིན་པ་མེད་པ་ནས་ཤེས་རབ་ཀྱི་བར་དུ་མེད་ཏོ་ལེ་ལོ་ཅན་ལ་ནི་གཞན་དོན་བྱ་བ་མེད་ཏོ་ལེ་ལོ་ཅན་ལ་ནི་བྱང་ཆུབ་ཤིན་ཏུ་རིང་ཞིང་རྣམ་པར་རིང་ངོ་ཞེས་སོ། །བསམ་གཏན་དང་མི་ལྡན་ན་རྣམ་གཡེང་ ལས་ཉོན་མོངས་ཀྱིས་གནོད། གཞན་དོན་མི་ནུས། ཤེས་རབ་མི་སྐྱེ་སྟེ། སེམས་ནི་རྣམ་པར་གཡེངས་པའི་མི། །ཉོན་མོངས་མཆེ་བའི་ཕྲག་ན་གནས། །ཞེས་དང་། དེ་བཞིན་མངོན་ཤེས་སྟོབས་བྲལ་བས། །སེམས་ཅན་དོན་བྱེད་ནུས་པ་མིན། །ཞེས་དང་། བསམ་གཏན་མེད་པར་ཡང་ནི་ཤེས་རབ་མེད། །ཅེས་སོ། །ཤེས་རབ་ཀྱིས་མ་ཟིན་ན་དགེ་བ་ཐམས་ཅད་ལོང་བ་ལྟ་བུ་ཡིན་ཏེ། ཤེས་རབ་མེད་ན་མིག་མེད་ཕ་རོལ་ཕྱིན་ལྔ་འདིས། །དམིགས་བུ་མེད་པས་བྱང་ཆུབ་རེག་པར་ནུས་མ་ཡིན། །ཞེས་སོ། ། ནམ་ཤེས་རབ་ཀྱིས་ཡོངས་སུ་ཟིན་པ་ན་ཕ་རོལ་ཏུ་ཕྱིན་པར་འགྱུར་ཏེ། གང་ཚེ་ཤེས་རབ་ཀྱིས་ནི་རབ་ཏུ་ཟིན་གྱུར་པ། །དེ་ཚེ་མིག་རྙེད་གྱུར་ཞིང་འདི་ཡི་མིང་འཐོབ་བོ། །ཞེས་སོ། །བཅུ་པ་རྣམ་ངེས་ནི། རེ་རེར་དྲུག་གི་འདུ་བ་དང་། །རེ་རེའང་དྲུག་ཏུ་ དབྱེ་བ་དང་། །རྗོད་བྱེད་དང་འབྲེལ་ཆོས་ཉིད་དང་། །གཅིག་ལས་གཅིག་འགྲུབ་རྒྱུ་མཚན་ཕྱིར། །དྲུག་གམ་གཅིག་ཏུའང་རྣམ་པར་ངེས། ཞེས་བྱ་སྟེ། ཀུན་རྫོབ་དང་དོན་དམ་རེ་རེའི་སྒོ་ནས་ཀྱང་ཕར་ཕྱིན་རེ་རེར་ཕར་ཕྱིན་ཐམས་ཅད་འདུ་ཞིང་རེ་རེའང་ དྲུག་ཏུ་འགྱུར་བས་ཕན་ཚུན་གཅིག་གིས་གཅིག་བསྡུས་ཤིང་རེ་རེའང་དྲུག་ཏུ་དབྱེར་ཡོད་པའི་ཕྱིར་དང༌། རྗོད་བྱེད་གཙོ་བོར་སྦྱིན་པའི་མདོ་སྡེ་ལས་ཀྱང༌ཕ་རོལ་ཏུ་ཕྱིན་པ་གཞན་རྣམས་ཞར་ལ་སྟོན་པས་རྗོད་བྱེད་ཕན་ཚུན་གཅིག་ལ་གཅིག་སྣང་བའི་ཆོས་ཉིད་
Page: 207 ༄༅། །ཀྱི་ཕྱིར་དང༌། སྦྱིན་པས་ལུས་ལོངས་སྤྱོད་ལ་མི་བལྟ་ན་ཚུལ་ཁྲིམས་ལེན་པར་གདོན་མི་ཟ་ཞིང་ཚུལ་ཁྲིམས་རྫོགས་པར་བླངས་ན་ལུས་ལོངས་སྤྱོད་ལ་མི་ཆགས་པ་ལྟ་བུ་གཅིག་ལས་གཅིག་འགྲུབ་པའི་རྒྱུ་མཚན་གྱི་ཕྱིར་སྦྱིན་ པ་གཅིག་པུར་ཐམས་ཅད་ངེས་པ་ནས་ཤེས་རབ་གཅིག་པུར་ངེས་པའི་བར་དུ་ཡང་འགྱུར་ལ་སྤྱིར་སྤང་བྱ་ལ་བལྟོས་ནས་རེ་རེ་ཞིང་དྲུག་ཏུའང་ངེས་པ་སྟེ། ཕན་ཚུན་བསྡུས་ཕྱིར་རབ་དབྱེའི་ཕྱིར། །ཆོས་ཉིད་ཕྱིར་དང་རྒྱུ་མཚན་ཕྱིར། ཕ་རོལ་ཕྱིན་དྲུག་ རྣམ་ཀུན་ཏུ། །རྣམ་པར་ངེས་པར་ཤེས་པར་བྱ། །ཞེས་སོ། །ཞར་ལ་ཐར་རྒྱན་ལས་གསུངས་པ་སྤེལ་བ་དང་དག་པ་གཉིས་ལས་སྤེལ་བ་ནི་སྦྱིན་པ་པོ་དང་སྦྱིན་ཡུལ་དང་སྦྱིན་པ་སྟེ་འཁོར་གསུམ་ག་སྒྱུ་མ་ལྟ་བུར་ཤེས་པས་ཕར་ཕྱིན་སོ་སོའི་བྱེད་ པ་པོ་དང་། ཡུལ་དང་། དངོས་པོ་ལ་མཚན་མར་མི་འཛིན་པ་ནི་ཡེ་ཤེས་ཀྱི་སྟོབས་ཏེ་དེས་ལྷག་པར་བྱེད་པ་སྟེ་འཇིག་རྟེན་ལས་འདས་པར་བྱེད་པའོ། །སྦྱིན་སོགས་དེ་སེམས་ཅན་ཐམས་ཅད་ཀྱི་ཆེད་དུ་བྱེད་ཅིང་བར་དུ་དངོས་པོ་ལ་མི་ཞེན་མཐར་རྣམ་སྨིན་ལ་ མི་རེ་བ་ནི་ཤེས་རབ་ཀྱི་སྟོབས་ཀྱིས་རྒྱས་པར་བྱེད་པ་སྟེ་བསོད་ནམས་ཆེས་མང་པོར་འགྱུར་རོ། །དེའི་དགེ་བ་སེམས་ཅན་ཐམས་ཅད་ཀྱི་དོན་དུ་བྱང་ཆུབ་ཏུ་བསྔོ་བ་ནི་སྔོ་བའི་སྟོབས་ཀྱིས་དཔག་ཏུ་མེད་པ་དང་མི་ཟད་པར་བྱེད་པ་ཅེས་བྱ་ལ་དེ་ལྟར་གསུམ་གྱིས་དགེ་ བ་རྒྱ་ཆེན་པོར་སྤེལ་བ་སྟེ། བྱང་ཆུབ་སེམས་དཔའི་སྡེ་སྣོད་ལས། ཤཱ་རིའི་བུ། བྱང་ཆུབ་སེམས་དཔའ་མཁས་པ་ནི་སྦྱིན་པ་ཉུང་ངུ་ཡང་མང་པོར་བྱེད་དེ་ཡེ་ཤེས་སྟོབས་ཀྱིས་ལྷག་པར་བྱེད་དོ། །ཤེས་རབ་ཀྱི་སྟོབས་ཀྱིས་རྒྱས་པར་བྱེད་ཏོ་སྔོ་བའི་སྟོབས་ ཀྱིས་དཔག་ཏུ་མེད་པར་བྱེད་དོ། །ཅེས་དང་། སྦྱིན་པ་བྱིན་ནས་དངོས་ལ་གནས་པར་བྱེད་པ་མེད། དེ་ནི་ནམ་དུའང་རྣམ་པར་སྨིན་ལ་རེ་བ་མེད། །དེ་ལྟར་གཏོང་བ་མཁས་པ་ཐམས་ཅད་གཏོང་བ་སྟེ། །ཆུང་ངུ་བཏང་ལ་མང་པོ་དཔག་ཏུ་མེད་པར་འགྱུར། །
Page: 208 ཞེས་དང་བྱང་ས་ལས། འབྲས་བུ་ལ་ལྟ་ཞིང་སྦྱིན་པ་བྱིན་པར་ཡང་མི་བྱེད་ཏོ་སྦྱིན་པ་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་བསྔོ་བར་བྱེད་ཏོ་ཅེས་དང༌། བློ་གྲོས་མི་ཟད་པས་བསྟན་པའི་མདོར། བཙུན་པ་ཤ་ར་དྭ་ཏིའི་བུ། དཔེར་ ན་ཆུ་ཐིགས་པ་གཅིག་རྒྱ་མཚོ་ཆེན་པོར་ལྷུང་བར་གྱུར་པ་ནི་བསྐལ་པའི་མཐར་ཐུག་པའི་བར་དུ་བར་མ་དོར་ཟད་པ་མེད་ཏོ། །དེ་བཞིན་དུ་དགེ་བའི་རྩ་བ་བྱང་ཆུབ་ཏུ་བསྔོས་པ་ནི་བྱང་ཆུབ་ཀྱི་སྙིང་པོ་ལ་འདུག་གི་བར་དུ་བར་མ་དོར་འགའ་ཡང་ཟད་པར་མི་ འགྱུར་རོ། །ཞེས་གསུངས་ཏེ་ཕ་རོལ་ཏུ་ཕྱིན་པ་ཐམས་ཅད་ལ་དེ་རྣམས་སྦྱར་བར་བྱའོ། དག་པར་བྱེད་པ་ནི་སྟོང་པས་ཟིན་པས་འཁོར་བའི་རྒྱུར་མི་འགྲོ་ཞིང་སྙིང་རྗེས་ཟིན་པས་ཐེག་དམན་གྱི་རྒྱུར་མི་འགྲོ་བ་སྟེ་སྟོང་ཉིད་སྙིང་རྗེ་ཟུང་དུ་ཆུད་པས་མི་ གནས་པའི་མྱ་ངན་ལས་འདས་པ་འབའ་ཞིག་གི་རྒྱུར་འགྲོ་བས་ན་རྣམ་པར་དག་པ་སྟེ། བསླབ་བཏུས་ལས། སྟོང་ཉིད་སྙིང་རྗེའི་སྙིང་པོ་ཅན། །སྤྱོད་པས་བསོད་ནམས་དག་པར་འགྱུར། །ཞེས་སོ། །སྟོང་པ་ཇི་ལྟ་བུ་ཞེ་ན། གཙུག་ན་རིན་ཆེན་གྱི་མདོ་ལས། དེ་རྒྱ་བཞིས་བཏབ་ནས་སྦྱིན་པར་བྱེད་སྟེ་བཞི་གང་ཞེ་ན་ནང་ལུས་སྟོང་པ་ཉིད་ཀྱི་རྒྱས་གདབ་པ་དང་ཕྱི་ལོངས་སྤྱོད་སྟོང་པ་ཉིད་ཀྱི་རྒྱས་གདབ་པ་དང་སེམས་ཡུལ་ཅན་སྟོང་པ་ཉིད་ཀྱི་རྒྱས་གདབ་པ་དང་ཆོས་བྱང་ཆུབ་སྟོང་པ་ཉིད་ཀྱི་རྒྱས་གདབ་པ་སྟེ་རྒྱ་བཞི་པོ་དེ་ དག་གིས་རྒྱས་བཏབ་ནས་སྦྱིན་པ་བྱིན་པར་བྱེད་ཏོ། །ཞེས་གསུངས་ཏེ་ཕ་རོལ་ཏུ་ཕྱིན་པ་ཐམས་ཅད་ཀྱང་དེ་ལྟར་ཤེས་པར་བྱ་སྟེ་ཕྱི་བསྲུང་བྱའི་ཚུལ་ཁྲིམས་ལ་སོགས་པར་སྦྱར་རོ། །སྙིང་རྗེ་ནི་གཞན་གྱི་སྡུག་བསྔལ་མ་བཟོད་པའི་བློས་ཏེ་རང་བདེ་བའི་ ཆེད་མ་ཡིན་པར་རོ། །དེ་དག་གིས་ནི་ཕ་རོལ་ཏུ་ཕྱིན་པ་སྤྱིའི་རྣམ་པར་བཞག་པ་བཤད་ཟིན་ཏོ། །གཉིས་པ་སོ་སོའི་དོན་ལ་དྲུག་ལས། དང་པོ་སྦྱིན་པ་ནི། དེ་ལས་དང་པོར་སྦྱིན་པ་ནི། །བསམ་དངོས་ཞིང་ཐབས་མ་དག་སྤང་། །བསམ་པ་
Page: 209 ༄༅། །ལོག་དང་དམན་པ་གཉིས། །གཞན་གནོད་ཕྱིར་དང་གྲགས་ཕྱིར་དང་། །འགྲན་ཕྱིར་ལན་ལ་རེ་བ་ནི། །ལོག་པའི་བསམ་པ་ཞེས་བྱ་འོ། །འཁོར་བར་ལོངས་སྤྱོད་འདོད་ཕྱིར་དང་། །ཉན་རང་དུ་སྔོ་དམན་པའི་སེམས། ། ཆང་དུག་མཚོན་ཆ་གནོད་པའི་ཟས། །རྒྱ་རྙི་རྔོན་གྱི་འཕྲུལ་འཁོར་དང་། །མཐུ་དང་བྱད་ཀྱི་ཐབས་ལ་སོགས། །མ་དག་པ་ཡི་དངོས་པོ་ཡིན། །བདུད་རིས་ཐོ་འཚམ་བདུད་ཀྱིས་བརླམས། །སྨྱོས་དང་སེམས་འཁྲུག་ལུས་སློང་དང་། །འགྲངས་ ཤིང་ངོམས་ལ་བཟའ་བཏུང་དང་། །དད་པ་མེད་ལ་དམ་ཆོས་སོགས། །མ་དག་པ་ཡི་ཞིང་ཡིན་ནོ། །མི་དགའ་ཁྲོས་འཁྲུགས་བརྙས་དང་དམོད། །རྡེག་དང་མ་གུས་ཡུན་རིང་དུ། །བརྒྱངས་སོགས་སྦྱིན་ཐབས་མ་དག་པའོ། །དེ་སོགས་མ་དག་ སྦྱིན་པ་སྤང་། །དེ་ལས་བཟློག་པ་དག་པ་སྟེ། །བསམ་པ་སྙིང་རྗེས་སེམས་ཅན་སྐྱོབ། །བྱང་ཆུབ་འདོད་ཕྱིར་སྦྱིན་པ་བརྩམ། །དེ་དང་གཞན་ལ་དངོས་དང་བརྒྱུད། །གང་དུའང་མི་གནོད་ཕན་འགྱུར་བ། །འདི་ནི་དངོས་པོ་དག་པ་སྟེ། ། བྱང་ཆུབ་སེམས་དཔའ་ཐབས་མཁས་པས། །མི་གཏོང་བ་ནི་ཅི་ཡང་མེད། །དཀོན་མཆོག་བླ་མ་ཡོན་ཏན་ཞིང་། ཕ་མ་མཁན་སློབ་ཕན་བཏགས་ཤིང་། །མགོན་མེད་ལ་སོགས་སྡུག་བསྔལ་ཞིང་། །དགྲ་ལ་སོགས་པ་གནོད་བྱེད་ཅིང་། །དེ་ལྟར་ རྣམ་བཞི་གཙོ་བོ་སྟེ། །མདོར་ན་འགྲོ་ཀུན་སྦྱིན་པའི་ཞིང་། སྦྱིན་པའི་ཡུལ་ལ་དགའ་བ་དང་། བཞིན་འཛུམ་འོངས་པ་ལེགས་ཞེས་བརྗོད། །བཀུར་སྟི་ཞེ་སར་ལྡན་པ་ཡིས། །མྱུར་བར་རང་གིས་ལག་བདར་ཏེ། མི་གནོད་དུས་ ལ་བབ་པར་སྦྱིན། །ཡིད་དགའ་སེམས་དང་འགྱོད་མེད་པས། །དགེ་བ་བྱང་ཆུབ་མཆོག་ཏུ་བསྔོ། །འདི་ནི་སྦྱིན་པའི་ཐབས་དག་པ། སྦྱོར་བ་ཕུན་སུམ་ཚོགས་པའོ། འབྲུ་ནོར་རིན་ཆེན་རྒྱན་དང་གོས། །བཞོན་པ་ཁང་བཟང་ས་གཞི་
Page: 210 སོགས། །ཕྱི་ཡི་དངོས་པོ་ཇི་སྙེད་དང་། །རང་ལུས་སུ་གཏོགས་ནང་གི་དངོས། །བུ་སྨད་དག་ནི་གཉི་གའི་དངོས། །ཚེ་འདིའི་ཕ་མ་མ་གཏོགས་པ། །མདོར་ན་བདོག་པ་མ་ལུས་བཏང་། །བྱང་ཆུབ་སེམས་དཔའ་རབ་བྱུང་གིས། །ཆོས་ གོས་གསུམ་ལས་གཞན་པ་དང་། །བསོད་སྙོམས་ཟས་ལས་བགོ་བཤའ་བྱ། །ཡི་གེ་བྲིས་དང་བྲི་ཡོ་བྱད། །གཙོ་བོར་དཀོན་པའི་དམ་ཆོས་བྱིན། །གང་ཞིག་དགྲ་དང་ཆོམ་རྐུན་དང་། །མེ་ཆུ་གཅན་གཟན་ནད་སོགས་ཀྱིས། །མནར་རྣམས་ སྙིང་རྗེས་འཇིགས་བསྐྱབ་བྱ། །ཆོས་འདོད་ཆོས་དང་ཆོས་སྨྲ་ལ། །གུས་ལ་ཟང་ཟིང་མེད་པའི་སེམས། །དག་ཅིང་བྱམས་བརྩེར་ལྡན་པ་ཡིས། །འཆད་པོ་ཀུན་སྤྱོད་རྣམ་དག་པས། །ཡུལ་དང་འཚམ་པའི་དམ་ཆོས་བསྟན། །འདི་ནི་ སྦྱིན་པའི་ནང་ན་མཆོག །ཞེས་བྱ་སྟེ། དེ་ཡང་སྤང་བར་བྱ་བ་མ་དག་པའི་སྦྱིན་པ་དང་། བསྒྲུབ་པར་བྱ་བ་དག་པའི་སྦྱིན་པའོ། །དང་པོ་ནི་བསམ་པ་མ་དག་པ་འགྲན་སེམས་དང་གྲགས་འདོད་དང་གཞན་ལ་གནོད་པའི་ཆེད་དུ་སྦྱིན་པ་སོགས་ ལོག་པའི་བསམ་པ་དང་། སྲིད་པའི་འབྱོར་བ་དང་ཉན་རང་གི་རྒྱུར་བསྔོ་བ་དམན་པའི་བསམ་པ་ནི་བསམ་པ་མ་དག་པ་སྟེ། བྱང་བྱང་ཆུབ་སེམས་དཔའ་ནི་གཞན་དག་བསད་པའམ་བཅིང་བའམ་ཆད་པས་བཅད་པའམ་གོ་རར་གཞུག་ས་པའམ་ བསྐྲད་པའི་ཕྱིར་སྦྱིན་པ་བྱིན་པར་མི་བྱེད་ཏོ་ཞེས་དང་། བྱང་ཆུབ་སེམས་དཔའ་ནི་གྲགས་པ་དང་ཚིགས་སུ་བཅད་པའི་ཕྱིར་ཡང་སྦྱིན་པ་བྱིན་པར་མི་བྱེད་ཏོ་ཞེས་དང༌གཞན་དང་འགྲན་པའི་ཕྱིར་ཡང་སྦྱིན་པ་བྱིན་པར་མི་བྱེད་ཏོ་ཞེས་དང་། དབུལ་བོར་ གྱུར་དུ་དོགས་པའི་འཇིགས་པས་སྦྱིན་པ་བྱིན་པར་མི་བྱེད་ཏོ་བརྒྱ་བྱིན་ཉིད་དང་འཁོར་ལོས་བསྒྱུར་བ་ཉིད་དང་དབང་ཕྱུག་ལ་བརྟེན་ཞིང་སྦྱིན་པ་བྱིན་པར་མི་བྱེད་ཏོ་ཞེས་སོ། །དངོས་པོ་མ་དག་པ་ནི་དངོས་སམ་བརྒྱུད་ནས་ལེན་པ་པོ་འམ་གཞན་ལ་གནོད་
Page: 211 ༄༅། །པར་འགྱུར་བ་དུག་དང་མཚོན་ཆ་དང་རི་དྭགས་ཀྱི་རྒྱ་ལ་སོགས་པ་སྦྱིན་པར་མི་བྱ་ཞིང་གང་ལ་ཕན་པར་འགྱུར་བ་རྣམས་སྦྱིན་པར་བྱ་སྟེ། རིན་ཆེན་ཕྲེང་བར། གང་ལ་དུག་གིས་ཕན་གྱུར་ན། །དེ་ལ་དུག་ཡང་བྱིན་པར་བྱ། ། ཁ་ཟས་མཆོག་ཀྱང་མི་ཕན་ན། །དེ་ལ་དེ་ནི་བྱིན་མི་བྱ། །སྦྲུལ་གྱིས་ཟིན་པ་ཇི་ལྟ་བུར། །སོར་མོ་བཅད་པ་ཕན་བཤད་པ། །དེ་བཞིན་ཐུབ་པས་གཞན་དག་ལ། །མི་བདེ་བ་ཡང་བྱ་བར་གསུངས། ཞེས་སོ། །ཕ་མ་སྦྱིན་པར་ཡང་མི་བྱ་ ཞིང་ཕ་མ་གཏའ་མར་ཡང་མི་གཞུག་ལ་བུ་སྨད་ཀྱང་སྡུག་བསྔལ་གྱིས་གཟིར་ཏེ་མི་འདོད་བཞིན་དུ་གཞན་ལ་སྦྱིན་པར་མི་བྱེད་ལ་ལོངས་སྤྱོད་མང་པོ་དང་མཆོག་ཡོད་བཞིན་དུ་ཉུང་ངུ་དང་དམན་པ་སྟེར་ན་ཡང་དངོས་པོ་མ་དག་པའོ། །ཞིང་མ་དག་པ་ ནི། བདུད་རིས་ཀྱི་ལྷ་དང་བདུད་ཀྱིས་བརླམས་པ་དག་ཐོ་འཚམ་པས་ལུས་སློང་བ་དང་སྨྱོས་པ་དང༌འཁྲུགས་པ་དག་ལུས་སློང་ན་སྦྱིན་པར་མི་བྱ་སྟེ་དེ་དག་ནི་འདོད་པའི་དངོས་པོ་མེད་དེ་བླ་རྡོལ་དུ་ཟད་པའི་ཕྱིར། ཤིན་ཏུ་འབྱོར་བ་ནོར་དང་འགྲངས་ ཤིང་ངོམས་པ་ལ་ཟས་སྐོམ་ལྷག་པར་མི་སྦྱིན་སྟེ། སྐྱེས་རབས་ལས། མི་འདོད་པ་དེ་བྱིན་ཡང་དགར་མི་འགྱུར། །ཆུས་ཁྱེར་བ་ལ་ཆུ་ཡིས་ཅི་ཞིག་བྱ། །ཞེས་སོ། །ཐབས་མ་དག་པ་སྤང་བ་ནི། སློང་བ་པོ་ལ་མི་དགའ་བ་དང་ ཁྲོས་པ་དང་འཁྲུགས་པས་བྱིན་པར་མི་བྱེད་དོ། །ངན་པ་ལ་བརྙས་པ་དང་མ་གུས་པའི་སྤྱོད་ལམ་གྱིས་མི་སྦྱིན་ནོ། །སློང་བ་ལ་འཕྱ་བ་དང་བསྡིགས་པ་དང་སྤ་བཀོང་བས་མི་སྦྱིན་ལ་སློང་བ་པོ་ལ་དགེ་བའི་བཤེས་གཉེན་གྱི་འདུ་ཤེས་དང་གུས་པའི་སྤྱོད་ ལམ་དང་སྙན་པའི་ཚིག་གིས་ལ་གོར་དུ་སྦྱིན་པར་བྱའོ། །དག་པའི་སྦྱིན་པ་སྒྲུབ་པ་ལ་ཡང་གསུམ་ལས་དངོས་པོ་ལ་ཡང་ནང་གི་དངོས་པོ་ནི་རང་གི་ལུས་སུ་གཏོགས་པ་སྟེ་སྲེད་མེད་ཀྱི་བུས་ཞུས་པའི་མདོ་ལས། ཡོད་སྟེ་ཡོད་ན་ལག་པ་
Page: 212 འདོད་པ་ལ་ལག་པ་བྱིན་ནོ་རྐང་པ་འདོད་པ་ལ་རྐང་པ་མིག་འདོད་པ་ལ་མིགཤ་འདོད་པ་ལ་ཤ་ཁྲག་འདོད་པ་ལ་ཁྲག་སྦྱིན་ནོ་ཞེས་སོ། །ཕྱིའི་དངོས་པོ་ཡང་དེ་ལས། ཕྱི་རོལ་གྱི་དངོས་པོ་འདི་ལྟ་སྟེ། ནོར་དང་འབྲུ་དང་དངུལ་དང་གསེར་དང་རིན་པོ་ཆེ་དང་ རྒྱན་དང་རྟ་དང་གླང་པོ་ཆེ་དང་བུ་དང་བུ་མོ་དང་ཞེས་སོགས་གསུངས་སོ། །གང་གིས་གང་གཏོང་བ་ཡང༌ཉེ་བ་འཁོར་གྱིས་ཞུས་པ་ལས། བྱང་ཆུབ་སེམས་དཔའ་ཁྱིམ་པས་ཆོས་ཀྱི་སྦྱིན་པ་དང་ཟང་ཟིང་གི་སྦྱིན་པ་ལ་གནས་པར་བྱའོ། །རབ་ཏུ་བྱུང་ བས་ནི་སྨྱུག་གུ་དང་སྣག་ཚ་དང་གླེགས་བམ་དང་ཆོས་ཀྱི་སྦྱིན་པ་ལ་གནས་པར་བྱའོ་མི་སྐྱེ་བའི་ཆོས་ལ་བཟོད་པ་ཐོབ་བས་ནི་གཏོང་བ་གསུམ་ལ་གནས་པར་བྱའོ་དེ་ལ་གཏོང་བ་ནི་རྒྱལ་སྲིད་གཏོང་བའོ་གཏོང་བ་ཆེན་པོ་ནི་ཆུང་མ་དང་བུ་དང་བུ་མོ་གཏོང་ བའོ་ཤིན་ཏུ་གཏོང་བ་ནི་མགོ་དང་ལག་པ་དང་རྐང་པ་དང་མིག་དང་པགས་པ་དང་རུས་པ་དང་རྐང་ཡོངས་སུ་གཏོང་བའོ་ཞེས་སོ། །ཞིང་རྣམ་པ་བཞི་ལས། ལས་དང་པོ་པས་ནི་གཙོ་བོར་ཡོན་ཏན་དང་ཕན་འདོགས་ཀྱི་ཞིང་ལ་མཆོད་པ་ལྷུར་བྱ་ལ། སྙིང་རྗེ་ཆེར་གོམས་པས་སྡུག་བསྔལ་དང་གནོད་བྱེད་ཀྱི་ཞིང་ལ་གཙོ་བོར་བྱིན་ནོ། །སྦྱིན་ཚུལ་ནི་བསམ་པ་ཕུན་ཚོགས་བྱང་ཆུབ་ཀྱི་སེམས་ཀྱི་སྒོ་ནས་སྦྱོར་བ་བཀུར་སྟི་དང་ལྡན་ཞིང་དུས་སུ་འཚམ་པར་གཏོང་བ་སྟེ། བྱང་ས་ལས། བྱང་ཆུབ་སེམས་ དཔའ་ནི་དད་པ་དང་། བཀུར་སྟི་དང་རང་གི་ལག་པས་དང་དུས་ལ་བབ་པ་དང་གཞན་ལ་མི་གནོད་པར་སྦྱིན་པར་བྱེད་དོ་ཞེས་སོ། །དེ་ལ་དད་པ་ནི་སྦྱིན་པའི་སྔ་རོལ་ཏུ་ཡིད་དགའ་བ་སྦྱིན་པའི་ཚེ་སེམས་དང་བ་བྱིན་ཟིན་ནས་འགྱོད་པ་མེད་པའོ། །བཀུར་སྟི་ ནི་གུས་པས་བྱིན་པའོ་རང་གི་ལག་གིས་ནི་གཞན་ལ་མ་བཅོལ་བར་བྱིན་པའོ་དུས་ལ་བབ་པ་ནི་ཕ་རོལ་ལ་ཕན་པའི་དུས་སུ་བྱིན་པའོ་གཞན་ལ་མི་གནོད་པ་ནི་རང་གི་འཁོར་རྣམས་མྱ་ངན་ལྡང་བར་མི་འགྱུར་བ་དང་གཞན་ལས་བརྐུས་ཕྲོགས་ཀྱི་རྫས་མ་
Page: 213 ༄༅། །ཡིན་པའོ། །ཡང་ན་གསུམ་སྟེ་མངོན་པ་ཀུན་བཏུས་ལས། ཕྱིར་ཞིང་བྱིན་པ་དང་ཕྱོགས་མི་བྱེད་པར་བྱིན་པ་དང་འདོད་པ་ཡོངས་སུ་རྫོགས་པར་བྱེད་པའི་ཕྱིར་རོ་ཞེས་ཏེ་ཡང་ཡང་སྟེར་བ་དང་ཐམས་ཅད་ལ་ཕྱོགས་རིས་མེད་ པར་སྟེར་བ་དང་བསམ་པ་རྫོགས་པར་སྟེར་བའོ། །འཇིགས་པ་ལས་སྐྱོབ་པ་ནི་མི་འཇིགས་པའི་སྦྱིན་པ་སྟེ་ཇི་ལྟར་ནུས་པའི་ཚེ་ཉམས་སུ་བླང་ངོ་། །ཆོས་ཀྱི་སྦྱིན་པ་ནི་ཆོས་དང་གང་ཟག་ལ་དད་པ་དང་ལྡན་པ་དོན་དུ་གཉེར་བ་ལ་བཤད་པར་བྱ་སྟེ། མ་གུས་པ་ལ་ཆོས་མི་བཤད། །ཅེས་སོ། །དེས་ན་དང་པོར་གྱ་ཚོམས་སུ་མི་འཆད་པར་སྣོད་བརྟགས་ཏེ་སྣོད་དང་ལྡན་ན་བཤད་པར་བྱ་སྟེ། ཟླ་བ་སྒྲོན་མའི་མདོ་ལས། ཆོས་ཀྱི་སྦྱིན་པའི་ཆེད་ཀྱི་ཕྱིར། །གལ་ཏེ་ཁྱོད་ལ་གསོལ་འདེབས་ན། ། རབ་རྒྱས་བདག་གིས་མ་སློབས་ཞེས། །ཐོག་མར་ཚིག་དེ་བརྗོད་པར་བྱ། །ཞེས་དང་། འཕྲལ་དུ་བཤད་པར་མི་བྱ་སྟེ། །སྣོད་ལ་བརྟག་པ་བྱས་ནས་བྱ། །གལ་ཏེ་སྣོད་ནི་ཤེས་གྱུར་ན། །གསོལ་མ་བཏབ་ཀྱང་བཤད་པར་བྱ། །ཞེས་སོ། ། བསམ་པ་ནི་རྙེད་བཀུར་དང་བསྟོད་གྲགས་དང༌མཆོད་པ་སོགས་ཟང་ཟིང་ལ་བལྟོས་པ་མེད་ཅིང་སྙིང་རྗེ་ཆེན་པོ་ཉེ་བར་བཞག་པ་ཁོ་ནས་སྟོན་སྟེ། འོད་སྲུང་གི་མདོ་ལས། དག་ཞིང་ཟང་ཟིང་མེད་པའི་སེམས་ཀྱིས་སུ། །ཆོས་ཀྱི་སྦྱིན་བྱེད་རྒྱལ་བས་ རབ་ཏུ་བསྔགས། །ཅེས་དང་། སྡུག་བསྔལ་ཟད་པར་བྱ་ཕྱིར་འཇིག་རྟེན་ཆོས་སྦྱིན་བྱེད། ཅེས་སོ། ཆོས་དངོས་ནི་བྱང་ས་ལས། ཆོས་ཀྱི་སྦྱིན་པ་ནི་ཕྱིན་ཅི་མ་ལོག་པར་ཆོས་སྟོན་པ་དང་རིགས་པར་སྟོན་པ་དང་། བསླབ་པའི་གཞི་ཡང་དག་ པར་ལེན་དུ་འཇུག་པ་སྟེ་ཞེས་གསུངས་ལ། སྤྱིར་སྣོད་བཞིན་དུ་སྟོན་པ་སྟེ་མ་སྦྱངས་པ་ལ་སྟོང་ཉིད་མི་སྟོན་པ་དང་། ཡང་། རྒྱ་ཆེན་ཆོས་ཀྱི་སྣོད་གྱུར་པ། །དམན་པའི་ཆོས་ལ་སྦྱར་མི་བྱ། །ཞེས་དང༌། དྲི་མ་མེད་པར་གྲགས་པས་བསྟན་པའི་མདོར།
Page: 214 སྨན་མ་རྙེད་པ་ནི་སླའི་སྨན་ལོག་པ་རྙེད་པ་ནི་དེ་ལྟ་མ་ཡིན་ནོ་དེ་བཞིན་དུ་ཆོས་མ་ཐོས་པ་ནི་སླའི་བྱང་ཆུབ་འདོད་པས་ཉན་ཐོས་ཀྱི་ཆོས་ཐོས་པ་ནི་དེ་ལྟ་མ་ཡིན་ནོ་ཞེས་བཤད་པའི་ཕྱིར་རོ། །འཆད་ཚུལ་ནི་ལྷ་རྣམས་འདུ་བ་ཡིད་དགའ་བའི་ཕྱིར་ས་ ཕྱོགས་གཙང་མ་རྒྱན་གྱིས་བརྒྱན་ཞིང་སེང་གེའི་ཁྲི་རྐང་རྟེན་ཅན་བཤམས་པ་ལ་ཆོས་སྨྲ་བ་ཁྲུས་དང་གཙང་སྦྲ་དང་བཅས་ཏེ་སྤྱོད་ལམ་ཞི་བས་འདུག་ཅིང་བདུད་ཀྱི་ནུས་པ་གཞོམ་པའི་སྔགས་ཀྱིས་བདུད་ཚར་བཅད་དེ་བྱང་ཆུབ་ཀྱི་སེམས་ཀྱིས་ཟིན་ པས་སྐད་ཀྱི་གཏང་རག་གིས་ཁྱབ་པར་བྱས་ཏེ་བཤད་དོ། །ཉན་པ་པོ་ཡང་སྐྱེས་རབས་ལས། རབ་ཏུ་དམའ་བའི་སྟན་ལ་འདུག །དུལ་བའི་དཔལ་ནི་རྣམ་པར་བསྐྱེད། །དགའ་དང་ལྡན་པའི་མིག་གིས་བལྟ། །ཚིག་གི་བདུད་རྩི་འཐུང་བ་ བཞིན། །དུངས་པ་སྐྱེས་ལ་ཆོས་ཉོན་ཞིག །ཞེས་པ་ལྟར་སློབ་མས་ཀྱང་ང་རྒྱལ་དང་ཁེངས་པ་སྤང་དམ་པའི་ཆོས་ལ་རྙེད་པར་དཀའ་བ་ཡིད་བཞིན་གྱི་ནོར་བུ་རྙེད་པ་ལྟ་བུའི་འདུ་ཤེས་དང་དགེ་བའི་བཤེས་གཉེན་ལ་སངས་རྒྱས་ཀྱི་འདུ་ཤེས་ཉེ་བར་ བཞག་སྟེ་དམ་པའི་ཆོས་རྩེ་གཅིག་ཏུ་མཉན་པ་དང་ཚིག་དོན་ལེགས་པར་འཛིན་པ་དང་ཚུལ་བཞིན་དུ་ཡིད་ལ་བྱེད་པ་དང་ལྡན་པས་མཉན་ཞིང་མཐར་གཉི་གའི་དགེ་བ་བྱང་ཆུབ་ཏུ་བསྔོ་བར་བྱའོ། །ཚུལ་ཁྲིམས་ལེགས་བླངས་བསམ་པ་དག ། ཉམས་ན་ཕྱིར་གསོ་མི་ཉམས་ཕྱིར། །གུས་གནས་ཡོན་ཏན་བཞི་དང་ལྡན། །ཁྱད་པར་སྡོམ་པའི་ཚུལ་ཁྲིམས་ལ། །ཐུན་མོང་སོ་ཐར་རིས་བདུན་ཏེ། གཞན་དོན་བྱང་ཆུབ་རྒྱུར་བླངས་ཕྱིར། །ཐེག་ཆེན་སྡོམ་པའི་ཚུལ་ཁྲིམས་ཡིན། ། ཐུན་མོང་མིན་པ་བྱང་སྡོམ་ཉིད། །བླངས་ཏེ་ཚུལ་བཞིན་བླང་དོར་བྱ། །གཞན་ཡང་ལུས་ཀྱི་མཆོང་རྒྱུག་སོགས། རྨུ་རྒོད་རྩབས་ཧྲལ་སྤྱོད་པ་དང་། །སྨྲ་བ་མང་དང་སྨྲ་བ་རྣོ། །རྙེད་བཀུར་འདུ་འཛིར་ཆགས་པ་སོགས། །སྒོ་གསུམ་
Page: 215 ༄༅། །འདུ་བྱེད་མ་དག་སྤང་། གཉིད་དང་རྨུགས་ལ་ཞེན་མི་བྱ། །བྱང་སྡོམ་ལྡན་པས་དགེ་བའི་ཆོས། །ཅི་སྤྱད་དགེ་བ་ཆོས་སྡུད་ཉིད། །གཞན་ལ་ཕན་པར་བྱེད་པ་ནི། སེམས་ཅན་དོན་བྱེད་ཚུལ་ཁྲིམས་ཏེ། ། བསྡུ་ན་དགེ་བའི་གྲོགས་བྱེད་དང་། །སྡུག་བསྔལ་ཅན་གྱི་སྡུག་བསྔལ་སེལ། །ཐབས་མི་ཤེས་ལ་རིགས་པ་སྟོན། །བྱས་པ་གཟོ་དང་འཇིགས་ལས་སྲུང་། མྱ་ངན་སེལ་དང་ཡོ་བྱད་སྟོབ། །ཆོས་ཀྱིས་འཁོར་སྡུད་གཞན་སེམས་སྲུང་། ། ཡོན་ཏན་མཆོག་གིས་གཞན་དགའ་བྱེད། །ཆོས་བཞིན་ཚར་གཅོད་རྫུ་འཕྲུལ་གྱིས། །སྐྲག་དང་འདུན་པར་བྱེད་པའོ། དེ་ལྟར་ཚུལ་ཁྲིམས་རྣམ་གསུམ་འབད། །བསྡུ་ན་ཐོས་བསམ་སྒོམ་ལ་བརྩོན། །བླ་མ་རྣམས་ལ་བཀུར་སྟི་ བསྟེན། །ནད་པའི་དོན་དུ་སྙིང་རྗེས་འབད། །སྦྱིན་ཞིང་གཞན་གྱི་ཡོན་ཏན་བསྒྲགས། །གཞན་དགེར་ཡི་རང་བརྙས་པ་སྤང་། །མཆོད་དང་བསྔོ་བ་སྨོན་ལམ་འབད། །བརྩོན་ལྡན་བག་ཡོད་དྲན་ཤེས་སྲུང་། །ཟས་ཀྱི་ཚོད་རིག་དབང་པོ་བསྡམ། ། སྲོད་ཐོར་མི་ཉལ་རྣལ་འབྱོར་བརྩོན། །དགེ་བའི་བཤེས་དང་དམ་པར་བསྟེན། །རང་གི་འཁྲུལ་པ་བརྟགས་ནས་སྤོང་། །དེ་ལྟར་དགེ་བ་སྒྲུབ་དང་སྲུང་། །འཕེལ་བར་བྱེད་པ་ཉམས་སུ་བླང་། །ཞེས་བྱ་སྟེ། བྱང་ས་ལས། ཡོན་ཏན་ བཞི་དང་ལྡན་པ་ནི་ཚུལ་ཁྲིམས་ཀྱི་ངོ་བོ་ཉིད་ཡིན་པར་རིག་པར་བྱ་སྟེ་བཞི་གང་ཞེ་ན་ཕ་རོལ་ལས་ལེགས་པར་ཡང་དག་པར་བླངས་པ་དང་བསམ་པ་ཤིན་ཏུ་རྣམ་པར་དག་པ་དང་ཉམས་ན་ཕྱིར་གསོ་བར་བྱེད་པ་དང་མི་ཉམས་པར་བྱ་བའི་ཕྱིར་གུས་པ་བསྐྱེད་ ནས་དྲན་པ་ཉེ་བར་གནས་པའོ་ཞེས་སོ། །དེ་ཡང་ལེན་པ་དང་སྲུང་བར་འདུ་ལ་ལེན་པ་ནི་ཐུན་མོང་གི་སོ་སོར་ཐར་པ་སྟེ་ཀུན་ལས་བཏུས་སུ། །དགེ་སློང་དང་དགེ་སློང་མ་དང་དགེ་སློབ་མ་དང་དགེ་ཚུལ་དང་དགེ་ཚུལ་མ་དང་དགེ་བསྙེན་དང་དགེ་བསྙེན་མ་དང་།
Page: 216 བསྙེན་གནས་པའི་སྡོམ་པའོ་ཞེས་རིས་བརྒྱད་དང་། བྱང་ས་ལས། དེ་ལ་བྱང་ཆུབ་སེམས་དཔའི་སྡོམ་པའི་ཚུལ་ཁྲིམས་ནི་སོ་སོར་ཐར་པའི་སྡོམ་པ་ཡང་དག་པར་བླངས་པ་རིས་བདུན་པོ་དགེ་སློང་དང་དགེ་སློང་མ་དང་དགེ་སློབ་མ་དང་དགེ་ཚུལ་དང་དགེ་ཚུལ་མ་དང་། དགེ་བསྙེན་དང་དགེ་བསྙེན་མ་སྟེ་ཁྱིམ་པ་དང་རབ་ཏུ་བྱུང་བའི་ཕྱོགས་ལ་ཅི་རིགས་པར་རིག་པར་བྱའོ་ཞེས་རིས་བདུན་དུ་གསུངས་ལ་འདི་རྣམས་ཀྱང་གཞན་དོན་དུ་བྱང་ཆུབ་འདོད་པའི་བསམ་པས་བླངས་པའམ་ཕྱིས་དེའི་བསམ་པས་ནམ་ཟིན་པ་ན་བྱང་ ཆུབ་སེམས་དཔའི་སྡོམ་པའི་ཚུལ་ཁྲིམས་ཞེས་བྱ་བ་ཐེག་ཆེན་སོ་ཐར་དུ་འགྱུར་རོ། །དེ་ཡང་སྤང་བྱ་ལྔ་སྤོང་བ་དགེ་བསྙེན། ཡན་ལག་བརྒྱད་རེ་ཞིག་སྲུང་བ་བསྙེན་གནས། རགས་པ་བཅུ་སྤོང་བ་དགེ་ཚུལ། ཐམས་ཅད་སྤོང་བ་དགེ་སློང་ དང་བཞིར་འདུ་སྟེ་ཕ་མ་ནི་རྟེན་གྱིས་ཕྱེ་བར་ཟད་ལ་དགེ་སློབ་མ་གནས་གྱུར་པ་ན་དགེ་ཚུལ་ཕར་མིང་དོན་འཕོ་བས་ན་དགེ་ཚུལ་དུ་འདུ་སྟེ་མཛོད་ལས། སྤང་བྱ་ལྔ་བརྒྱད་བཅུ་དང་ནི། །ཐམས་ཅད་སྤོང་བ་མནོས་པ་ལས། དགེ་བསྙེན་དང་ནི་ བསྙེན་གནས་དང་། །དགེ་ཚུལ་དང་ནི་དགེ་སློང་ཉིད། །ཅེས་སོ། །དེ་ལ་དགེ་བསྙེན་ནི་སྡོམ་པ་བརྒྱད་པར། ཇི་སྲིད་འཚོ་བར་གསོད་དང་རྐུ། །ལོག་པར་གཡེམ་དང་བརྫུན་གྱི་ཚིག །ཆང་གི་གཏུང་བ་རྣམས་ལས་ལྡོག །ཞེས་པ་ལྟར་གཏན་ ཁྲིམས་ལྔ་ཇི་སྲིད་འཚོ་བར་དུ་སྲུང་བ་ནི་ཡོངས་རྫོགས་ཀྱི་དགེ་བསྙེན་ཡིན་ལ། དེ་ལས་གང་ཡང་རུང་བ་གཅིག་སྲུང་བ་སྣ་གཅིག་སྤྱོད་པ་དང་གཉིས་སམ་གསུམ་སྲུང་བ་སྣ་འགའ་སྤྱོད་པ་དང་བཞི་སྲུང་བ་ཕལ་ཆེར་སྤྱོད་པ་དང་གཏན་ཁྲིམས་ལྔའི་ སྟེང་དུ་མི་ཚངས་པར་སྤྱོད་པ་སྤོང་བ་ནི་ཚངས་སྤྱོད་ལ་ཉེར་གནས་ཏེ་ཁ་ཆེ་བྱེ་བྲག་དུ་སྨྲ་བས་ཁས་ལེན་པའི་དགེ་བསྙེན་ལྔ་སྟེ། སྣ་གཅིག་སྤྱོད་པ་ལ་སོགས་པ། །དེ་སྲུང་བ་ལ་སྲུང་ཞེས་གྲག །ཅེས་སོ། །དེ་ལྟར་ལྔ་པོའི་སྟེང་དུ་སྐྱབས་འགྲོ་
Page: 217 ༄༅། །ཁོ་ན་ཁས་བླངས་པ་སྐྱབས་གསུམ་འཛིན་པ་དང་ཚེ་གང་དུ་བསྙེན་གནས་ཡན་ལག་བརྒྱད་སྲུང་བ་གཞོན་ནུ་སྙིང་རྗེ་ཆེར་སེམས་ཀྱི་ལྟ་བུ་ནི་གོ་མིའི་དགེ་བསྙེན་ཏེ་མདོ་སྡེ་པ་ཡན་གྱི་རྣམ་འཇོག་གོ །འདི་ཐམས་ཅད་ ཁྱིམ་པ་ཡིན་ཡང་གོ་མིའི་དགེ་བསྙེན་སྲུང་སླ་བའི་ཕྱིར་རབ་བྱུང་གི་རྟགས་ཀྱི་ཆ་ཙམ་རང་གི་བླངས་ཏེ་དགེ་འདུན་གྱི་གྲལ་མཐར་འདུག་པ་ཙམ་རུང་ངོ་། །བསྙེན་གནས་ནི་གཙོ་བོར་དགེ་བསྙེན་གྱིས་དུས་བཟང་པོ་ལ་བླངས་ནས་སྲུང་བའི་ གསོ་སྦྱོང་ཡིན་ལ་དགེ་བསྙེན་མ་ཡིན་པའི་ཁྱིམ་པས་ཀྱང་བླང་དུ་རུང་སྟེ་ཀུན་ཏུ་རྒྱུ་གཉིས་ཀྱིས་བླངས་པའི་བྱུང་བ་ལྟ་བུ་ཡིན་ལ་སྤང་བྱ་ནི་དགེ་བསྙེན་གྱི་ལྔའི་ལོག་གཡེམ་གྱི་གནས་སུ་མི་ཚངས་སྤྱོད་རྩ་བར་བྱས་ནས་སླར་དུས་མིན་གྱི་ཁ་ཟས་ དང༌། མལ་ཆེ་མཐོ་གཅིག་དུ་བྱས་པ་དང་གར་སོགས་ཕྲེང་སོགས་གཅིག་དུ་བྱས་པ་བསྣན་པ་ནི་ཡན་ལག་བརྒྱད་དོ། །དེ་ཡང་རྟེན་དགེ་སློང་ཁོ་ན་ལས་ཞག་རེ་ཁོ་ན་ལེན་ཞིང་ཞག་དེ་འདས་པ་ན་གཏོང་བར་འདོད་པ་བྱེ་སྨྲའི་ལུགས་ཡིན་ལ། མདོ་ལས་ཁྱིམ་བདག་མགོན་མེད་ཟས་བྱིན་གྱིས་བསྙེན་གནས་ཕོག་པར་གསུངས་པ་ལྟར་དགེ་བསྙེན་དང་རབ་བྱུང་སྡེ་ལྔ་གང་གི་ཕོག་ཡང་སྐྱེ་ལ་ཞག་གཉིས་སམ་གསུམ་སོགས་དང་ཟླ་ཕྱེད་དང་ལོ་དུ་མར་འདོད་ཀྱང་དུས་ངེས་ལེན་ཞིང་ཁས་བླངས་ཀྱི་ དུས་དེ་འདས་པ་ན་གཏོང་བ་ནི་མདོ་སྡེ་པ་ཡན་གྱི་ལུགས་ཏེ་གནས་འཇོག་གིས་ཞུས་པའི་མདོ་ལས་གསུངས་པ་སོགས་ཏེ་གསང་སྔགས་ལས་བསྙེན་གནས་རང་གིས་བླང་བ་ཡང་གསུངས་སོ། །འོན་ཀྱང་ཇི་སྲིད་འཚོ་བར་དུ་ལེན་པའི་བསྙེན་གནས་ མེད་དེ་དེ་ཁས་བླངས་ན་གོ་མིའི་དགེ་བསྙེན་དུ་མིང་འཕོ་བའི་ཕྱིར་རོ། །ཡན་ལག་བརྒྱད་པོ་དེའི་གར་སོགས་ཕྲེང་སོགས་ཐ་དད་ཏུ་ཕྱེ་གསེར་དངུལ་ལེན་སྤོང་བསྣན་པ་ནི་དགེ་ཚུལ་གྱི་སྤང་བྱ་རགས་རྡོག་བཅུ་སྟེ། འདུལ་བ་སུམ་བརྒྱ་པ་ལས།
Page: 218 གང་ཞིག་སྲོག་གཅོད་གཞན་གྱི་ནོར་འཕྲོག་དང་། །མི་ཚངས་སྤྱོད་བརྫུན་བཅོས་པའི་ཆང་ལ་སོགས། །གར་སོགས་ཕྲེང་སོགས་མལ་ཆེ་མཐོ་བ་དང་། །ཕྱི་དྲོའི་ཁ་ཟས་དངུལ་གཉིས་ལེན་པ་སྤོང་། །ཞེས་སོ། །དགེ་ཚུལ་མའི་རྗེས་སུ་ ལོ་གཉིས་སུ་རྩ་བའི་ཆོས་དྲུག་དང་རྗེས་སུ་མཐུན་པའི་ཆོས་དྲུག་སྟེ་བཅུ་གཉིས་སྲུང་བ་བུད་མེད་ཁོ་ན་ལ་ཡོད་པའི་བསླབ་ཚིགས་དགེ་སློབ་མ་དང་། ཕམ་པ་བརྒྱད་ལྷག་མ་ཉི་ཤུ་སོགས་ཁྲིམས་སུམ་བརྒྱ་ལྷག་ཞིག་སྲུང་བ་དགེ་སློང་མ་དང་། ཕམ་པ་བཞི་ལྷག་མ་བཅུ་གསུམ་མ་ངེས་པ་གཉིས་སྤང་ལྟུང་སུམ་བཅུ་ལྟུང་བྱེད་རྐྱང་པ་དགུ་བཅུ་སོར་བཤགས་བཞི་ཉེས་བྱས་བརྒྱ་དང་བཅུ་སྟེ་ཁྲིམས་ཉིས་བརྒྱ་ལྔ་བཅུ་རྩ་གསུམ་ཡན་ལག་དང་བཅས་པ་སྤོང་བ་དགེ་སློང་ཡིན་ལ། དགེ་སློང་ བྱང་ཆུབ་སེམས་དཔའ་ལ་ལྷག་པོ་འཆང་བ་དང་ཟླ་འཇོག་ལ་སོགས་མང་ཞིག་གཞན་དོན་དུ་གནང་ལ་རྩ་བ་བཞི་གཞན་དོན་ཆེན་པོར་འགྱུར་བ་མཐོང་ན་བསྟན་པ་ལ་མི་གནོད་པའི་ཕྱིར་ཉན་ཐོས་ཀྱི་བསླབ་པ་ཕུལ་ནས་སྤྱོད་པར་གསུངས་སོ། ། ཐུན་མོང་མ་ཡིན་པ་ནི་བྱང་སྡོམ་དངོས་ཏེ་སྔར་སེམས་སྐྱེད་དུ་བཤད་ཟིན་ཏོ། །སྒོ་གསུམ་གྱི་འདུ་བྱེད་མ་དག་པ་སྤང་བ་ལ་ལུས་ཀྱི་འདུ་བྱེད་སྤང་བྱ་ནི། ཁྲོ་གཉེར་ངོ་ཟུམ་ཡོངས་སྤང་སྟེ། །སོགས་དང་། ཁ་བཀང་བ་དང་སྒྲ་བཅས་དང་། །ཁ་གདངས་ ནས་ནི་ཟ་མི་བྱ། །སོགས་དང་། མདོར་ན། འཇིག་རྟེན་མ་དད་གྱུར་པ་ཀུན། །མཐོང་དང་དྲིས་ཏེ་སྤང་བར་བྱ། །ཞེས་སོ། །ངག་གི་སྨྲ་བ་མང་པོ་དང་གཞན་གྱི་ཡིད་ལ་གཟན་པའི་རྣོན་པོ་ནི་ཉེས་པའི་འབྱུང་ཁུངས་ཏེ་སྤོབས་པའི་བློ་གྲོས་ཀྱི་མདོ་ ལས། འཇིག་རྟེན་ནག་པོ་འབྱུང་བའི་ཕྱིར། ཡིད་ནི་དུག་གི་རྩ་བ་ཡིན། །ཉེས་པར་སྨྲ་རྣམས་འབྱུང་བའི་ཕྱིར། །ཁ་ནི་སྡིག་པའི་སྒོ་ཉིད་དོ། །ཞེས་དང་། དཀོན་མཆོག་སྤྲིན་ལས། བྱིས་པ་དམ་པའི་ཆོས་ལས་རབ་ཏུ་ཉམས། །
Page: 219 ༄༅། །སེམས་ནི་མི་མཉེན་རབ་ཏུ་རྩུབ་པར་འགྱུར། །ཞི་གནས་ལྷག་མཐོང་དག་དང་རབ་ཏུ་རིང་། །སྨྲ་ལ་དགའ་བའི་ཉེས་པ་འདི་དག་གོ །རྟག་ཏུ་བླ་མ་རྣམས་ལ་གུས་པ་མེད། །སྦགས་པས་གཏམ་དག་ལ་ནི་དགའ་བ་ སྐྱེ། །སྙིང་པོ་མེད་ལ་གནས་ཤིང་ཤེས་རབ་ཉམས། །སྨྲ་ལ་དགའ་བའི་ཉེས་པ་འདི་དག་གོ །ཞེས་སོགས་དང་། ཟླ་བ་སྒྲོན་མའི་མདོ་ལས། གང་གི་འཁྲུལ་པ་ཅི་མཐོང་ཡང་། །དེ་དག་ཉེས་པར་མི་བསྒྲག་སྟེ། ཅི་འདྲ་བ་ཡི་ལས་ བྱས་པའི། །འབྲས་བུ་དེ་འདྲ་འཐོབ་པར་འགྱུར། །ཞེས་དང༌ཆོས་ཐམས་ཅད་འབྱུང་བ་མེད་པར་བསྟན་པའི་མདོ་ལས། བྱང་ཆུབ་སེམས་དཔའ་ལ་ལྟུང་བ་གླེང་ན་བྱང་ཆུབ་དང་རིང་དུ་འགྱུར་རོ་ཕྲག་དོག་གིས་གླེང་ན་བྱང་ཆུབ་དང་རིང་དུ་འགྱུར་ རོ་ཞེས་སོ། །རྙེད་བཀུར་ལ་ཆགས་པ་ནི་ཉེས་པའི་འབྱུང་ཁུངས་ཏེ་ལྷག་བསམ་བསྐུལ་བའི་མདོ་ལས། བྱམས་པ་བྱང་ཆུབ་སེམས་དཔས་རྙེད་པ་དང་བཀུར་སྟི་ནི་འདོད་ཆགས་སྐྱེད་པར་བརྟག་པར་བྱའོ། །དེ་བཞིན་དུ་སྦྱར་ཏེ་ཞེ་སྡང་ སྐྱེད་པ་དང་གཏི་མུག་སྐྱེད་པ་དང་གཡོ་སྐྱེད་པ་དང་སངས་རྒྱས་ཐམས་ཅད་ཀྱིས་མ་གནང་བ་དང་དགེ་བའི་རྩ་བ་འཕྲོག་པ་དང་ཕ་རོལ་འབྲིད་པའི་སྨད་ཚོང་མ་དང་འདྲ་བར་བརྟག་པར་བྱའོ་ཞེས་སོགས་དང༌། ཡབ་སྲས་མཇལ་བའི་མདོར། རྨི་ལམ་ རྨིས་པའི་ཆུ་དག་ནི། །འཐུངས་ཀྱང་ངོམས་པར་མི་འགྱུར་བ། དེ་ལྟར་འདོད་པའི་ཡོན་ཏན་རྣམས། །བསྟེན་ཡང་ངོམས་པར་མི་འགྱུར་རོ། །ཞེས་སོ། །གཉིད་རྨུགས་ལ་ཆགས་ན་དགེ་བ་མཐའ་དག་ལ་སྒྲིབ་སྟེ། གང་ཞིག་གཉིད་ དང་རྨུགས་ལ་དགར་གྱུར་པ། །དེ་ཡི་ཤེས་རབ་ཤིན་ཏུ་ཉམ་ཆུང་འགྱུར། །དེ་ཡི་བློ་ཡང་ཡོངས་སུ་ཉམས་པར་འགྱུར། །ཡེ་ཤེས་ལས་ནི་རྟག་ཏུ་དེ་ཉམས་འགྱུར། །ཞེས་དང༌། གང་ཞིག་གཉིད་དང་རྨུགས་ལ་དགར་གྱུར་པ། །མི་ཤེས་ལེ་ལོ་སྙོམས་ལས་ཤེས་རབ་འཆལ། །
Page: 220 དེ་ལ་མི་མ་ཡིན་པས་གླགས་རྙེད་དེ། །ནགས་ན་གནས་པའི་ཚེ་ན་འཚེ་བར་འགྱུར། །ཞེས་སོ། །དགེ་བ་ཆོས་སྡུད་ཀྱི་ཚུལ་ཁྲིམས་ནི་བྱང་ཆུབ་སེམས་དཔས་དགེ་བ་བྱེད་དོ་ཅོག་ཡིན་ལ་བསྡུ་ན་བྱང་ས་ལས། བྱང་ཆུབ་སེམས་དཔའི་ ཚུལ་ཁྲིམས་ལ་བརྟེན་ཞིང་གནས་ནས་ཐོས་པ་དང་བསམ་པ་དང་སྒོམ་པ་དང་གཅིག་པུར་དགའ་བ་ལ་བརྩོན་པར་བྱའོ། །བླ་མ་རྣམས་ལ་བཀུར་སྟི་དང་རིམ་གྲོ་སྐྱེད་པ་དང༌ནད་པ་ལ་རིམ་གྲོ་དང་ནད་གཡོག་བྱེད་པ་དང་ལེགས་པར་སྦྱིན་ཞིང་ཡོན་ ཏན་བསྒྲགས་པ་དང་གཞན་གྱི་བསོད་ནམས་ལ་ཡི་རང་ཞིང་བརྙས་པ་ལ་བཟོད་པ་དང་དགེ་བ་བྱང་ཆུབ་ཏུ་བསྔོ་ཞིང་སྨོན་ལམ་འདེབས་པ་དང་དཀོན་མཆོག་མཆོད་ཅིང་བརྩོན་འགྲུས་རྩོམ་པ་དང་བག་ཡོད་བར་གནས་པ་དང་། བསླབ་པ་དྲན་པ་དང་ཤེས་ བཞིན་གྱིས་སྲུང་བ་དང་དབང་པོའི་སྒོ་སྲུང་ཞིང་ཟས་ཀྱི་ཚོད་ཤེས་པ་དང༌ནམ་གྱི་ཆ་སྟོད་དང་ཆ་སྨད་ལ་མི་ཉལ་བར་རྣལ་འབྱོར་ལ་བརྩོན་པ་དང༌སྐྱེས་བུ་དམ་པ་དང་དགེ་བའི་བཤེས་གཉེན་ལ་བསྟེན་པ་དང་རང་གི་འཁྲུལ་པ་ལ་བརྟགས་ནས་དེ་འཆགས་ ཅིང་གཏོང་བ་སྟེ་དེ་ལྟ་བུའི་ཆོས་རྣམས་སྒྲུབ་པ་དང་སྲུང་བ་དང་རྣམ་པར་འཕེལ་བར་བྱེད་པ་ནི་དགེ་བ་ཆོས་སྡུད་ཀྱི་ཚུལ་ཁྲིམས་ཞེས་བྱའོ་ཞེས་སོ། །སེམས་ཅན་དོན་བྱེད་ཀྱི་ཚུལ་ཁྲིམས་ནི་སེམས་ཅན་ལ་ཕན་བདེ་སྒྲུབ་པ་ཐམས་ཅད་ཡིན་ཡང་མདོར་བསྡུ་ན་ བཅུ་གཉིས་ཏེ། བྱང་ས་ལས། བྱ་བ་དོན་དང་ལྡན་པ་ལ་གྲོགས་སུ་འགྲོ་བ་དང༌སེམས་ཅན་སྡུག་བསྔལ་བ་རྣམས་ཀྱི་སྡུག་བསྔལ་སེལ་བ་དང༌ཐབས་མི་ཤེས་པ་ལ་རིགས་པ་སྟོན་པ་དང༌བྱས་པ་གཟོ་ཞིང་ཚོར་ཏེ་ལན་དུ་ཕན་འདོགས་པ་དང༌། འཇིགས་པ་རྣམས་ལས་སྲུང་བ་དང་སྡུག་བསྔལ་བ་རྣམས་ཀྱི་མྱ་ངན་སེལ་བ་དང་ཡོ་བྱད་མེད་པ་རྣམས་ལ་ཡོ་བྱད་སྟོབ་པ་དང་ཆོས་ཀྱིས་འཁོར་ལེགས་པར་སྡུད་པ་དང༌སེམས་དང་མཐུན་པར་འཇུག་པ་དང༌ཡང་དག་པའི་ཡོན་ཏན་གྱིས་དགའ་བར་བྱེད་
Page: 221 ༄༅། །པ་དང་། ལེགས་པར་ཚར་གཅོད་པ་དང༌རྫུ་འཕྲུལ་གྱིས་སྐྲག་པ་དང་འདུན་པར་བྱེད་པའོ་ཞེས་སོ། །བཟོད་པར་བྱ་བའི་ཡུལ་རྣམས་ལ། །ཇི་མི་སྙམ་ཕྱིར་བཟོད་པ་སྟེ། །གཞན་གྱི་གནོད་པས་སེམས་མི་འཁྲུག ། གནོད་ལན་མི་བྱེད་ཁོན་མི་འཛིན། །འདི་ནི་བཟོད་པ་དང་པོ་སྟེ། །གནོད་བྱེད་ཉིད་ལའང་དབང་མེད་དང། །ལས་དང་ལུས་དང་སེམས་ཀྱིས་ཉེས། །སྐྱོན་ཅན་ཁྱད་མེད་དུ་འགྱུར་དང༌། །ཕན་འདོགས་དྲིན་ཆེ་སངས་རྒྱས་མཉེས། །ཕན་ ཡོན་ཆེ་བར་བརྟག་པ་སྟེ། །རྒྱུ་མཚན་དགུ་ཡིས་བཟོད་པར་བྱ། །ཡང་ན་ཡིད་དུ་འོང་བ་དང༌། ཆོས་ཙམ་དང་ནི་མི་རྟག་དང། །སྡུག་བསྔལ་བ་དང་ཡོངས་བཟུང་སྟེ། །འདུ་ཤེས་ལྔ་ཡིས་བཟོད་པར་བྱ། །ཆོས་ཕྱིར་ངལ་བས་མི་གཡོ་བ། ། སྡུག་བསྔལ་དང་ལེན་བཟོད་པ་སྟེ། །སྨན་དཔྱད་རྩུབ་མོ་བཟོད་པ་ལྟར། གཙོ་བོར་ཚུལ་ཁྲིམས་རྣམ་གསུམ་གྱི། དཀའ་བ་ཐམས་ཅད་བཟོད་པར་བྱ། ཡང་ན་གནས་ལ་བསྟེན་པ་དང༌། །འཇིག་རྟེན་ཆོས་དང་སྤྱོད་ལམ་དང༌། །ཆོས་ ཡོངས་འཛིན་དང་སློང་མོས་འཚོ། །བརྩོན་པས་དུབ་དང་གཞན་དོན་དང༌། །འཕྲལ་གྱི་བྱ་བ་ལ་བསྟེན་པའི། །སྡུག་བསྔལ་དང་ལེན་བཟོད་པ་བརྒྱད། །ཟབ་མོའི་ཆོས་ཀྱིས་མི་སྐྲག་པ། །ཆོས་ལ་ངེས་སེམས་བཟོད་པ་སྟེ། །དཀོན་ མཆོག་ཡོན་ཏན་དེ་བཞིན་ཉིད། །རྒྱལ་སྲས་མཐུ་དང་རྒྱུ་དང་འབྲས། །འཐོབ་བྱའི་དོན་དང་འཐོབ་པའི་ཐབས། །ཤེས་པར་བྱ་བའི་སྤྱོད་ཡུལ་ཏེ། །མོས་བྱའི་ཡུལ་གྱིས་ཕྱེ་བས་བརྒྱད། ཅེས་བྱ་སྟེ། བྱང་ས་ལས། ཟང་ཟིང་ མེད་པའི་སེམས་དང་སྙིང་རྗེ་འབའ་ཞིག་གིས་ཇི་མི་སྙམ་པ་གང་ཡིན་པ་འདི་ནི་མདོར་བསྡུ་ན་བྱང་ཆུབ་སེམས་དཔའི་བཟོད་པའི་ངོ་བོ་ཉིད་ཡིན་པར་རིག་པར་བྱའོ་ཞེས་སོ། །གནོད་བ་ལ་ཇི་མི་སྙམ་པའི་བཟོད་པ་ནི། སྤྱོད་འཇུག་གི་ལུགས་ཀྱིས་རྣམ་པ་དགུས་སྒོམ་སྟེ།
Page: 222 ཉོན་མོངས་ཀྱིས་བཀོལ་བས་གནོད་བྱེད་ཁོ་རང་ལ་རང་དབང་མེད་པ་དང་རང་གི་ལས་ལས་བྱུང་བ་དང་ལུས་ཡོད་པས་ལན་པ་དང་སེམས་ཀྱིས་ལུས་རྡོས་བཅས་བཟུང་བས་ཉེས་པ་དང༌ལན་བྱས་ན་སྐྱོན་ཅན་ཁྱད་མེད་དུ་འགྱུར་བ་དང་བཟོད་པའི་གྲོགས་ བྱས་པས་ཕན་བཏགས་པར་སོང་བ་དང་དེས་ན་དྲིན་ཆེ་བ་དང་དེ་ལ་བཟོད་པས་སངས་རྒྱས་མཉེས་པར་འགྱུར་བ་དང་ཕན་ཡོན་ཆེ་བར་བརྟགས་ལ་སྒོམ་སྟེ་འོག་ཏུ་རིམ་པར་འཆད་དོ། །བྱང་སའི་ལུགས་ཀྱི་འདུ་ཤེས་ལྔས་སྒོམ་སྟེ། གནོད་བྱེད་ཕ་མར་ ཤེས་པས་ཡིད་དུ་འོང་བའི་འདུ་ཤེས་དང་གནོད་པ་འདི་ནི་རྐྱེན་ལ་རག་ལས་པ་དང་འདུ་ཤེས་ཙམ་ཆོས་ཙམ་སྟེ་བྱེད་པ་པོའམ་མྱོང་བ་པོའི་གང་ཟག་གམ་བདག་མེད་དོ་ཞེས་ལྟ་བ་ཆོས་ཙམ་དུ་རྗེས་སུ་འབྲེང་བའི་འདུ་ཤེས་དང་གནོད་བྱེད་འདི་རང་བཞིན་ གྱིས་འཆི་འོ་ཞེས་མི་རྟག་པའི་འདུ་ཤེས་དང་སེམས་ཅན་ཐམས་ཅད་སྡུག་བསྔལ་གསུམ་གྱིས་མནར་བས་བདག་གིས་འདི་ལ་སྡུག་བསྔལ་སྒྲུབ་པར་མི་བྱའི་འདིའི་སྡུག་བསྔལ་བསལ་བར་བྱའོ་ཞེས་རྟོག་པ་སྡུག་བསྔལ་བའི་འདུ་ཤེས་དང་བདག་གིས་སེམས་ བསྐྱེད་མ་ཐག་ནས་སེམས་ཅན་ཐམས་ཅད་ཡོངས་སུ་བཟུང་བས་འདི་ལ་ལན་མི་རིགས་སོ་ཞེས་ཡོངས་སུ་བཟུང་བའི་འདུ་ཤེས་ཏེ་ལྔས་བཟོད་པར་བྱའོ། །སྡུག་བསྔལ་དང་ལེན་གྱི་བཟོད་པ་ནི་སྤྱིར་ཆོས་ཕྱིར་དཀའ་བ་ཐམས་ཅད་བཟོད་པར་བྱ་ལ་ བྱེ་བྲག་ཏུ་བྱང་ས་ལས་བརྒྱད་དུ་གསུངས་ཏེ་སྡོམ་པ་སྲུང་བ་དང་ཡོ་བྱད་མ་ཚང་བ་སོགས་གནས་ལ་བསྟེན་པ་དང་རྒ་ནད་འཆི་བ་སོགས་འཇིག་རྟེན་གྱི་ཆོས་ལ་བསྟེན་པ་དགུ་དང་འགྲོ་འཆག་ཉལ་འདུག་སྟེ་སྤྱོད་ལམ་བཞི་ལས་འཆག་པ་དང་འདུག་ པས་འདའ་བ་དང་དཀོན་མཆོག་མཆོད་པ་སོགས་ཆོས་ཡོངས་སུ་འཛིན་པ་བདུན་དང་ཁྱིམ་པའི་རྟགས་སྤངས་པས་གཟུགས་དང་ཁ་དོག་སེམས་ངན་པ་འཛིན་པ་སོགས་སློང་མོས་འཚོ་བ་བདུན་དང་བརྩོན་འགྲུས་ཀྱིས་ལུས་སེམས་དུབ་པ་དང་སེམས་ཅན་དོན་
Page: 223 ༄༅། །བྱེད་ཀྱི་ཚུལ་ཁྲིམས་བཅུ་གཅིག་པོ་དང་རབ་བྱུང་གི་ཆོས་གོས་ལྷུང་བཟེད་ཀྱི་ལས་སོགས་དང་ཁྱིམ་པའི་ཞིང་ལས་སོགས་འཕྲལ་གྱི་བྱ་བ་བརྟེན་པ་སྟེ་གཞི་བརྒྱད་པོ་དེ་ལས་བྱུང་བའི་སྡུག་བསྔལ་ཐམས་ཅད་དང་དུ་ལེན་ཞིང་གཞི་ དེས་བརྩོན་འགྲུས་ཀྱང་མི་གཏོང་བའོ། །སྟོང་པ་ཉིད་ལ་སོགས་པ་ཆོས་ཟབ་མོ་མི་སྤང་ཞིང་མོས་པས་རྟོགས་པར་བྱེད་པ་ནི་ཆོས་ལ་ངེས་པར་སེམས་པའི་བཟོད་པ་སྟེ་བྱང་ས་ལས་མོས་བྱའི་ཡུལ་བརྒྱད་དུ་བསྟན་པ་དེའོ། །གཞན་ཡང་ཉམ་ཆུང་ དང་ཆེས་དམའ་བས་བདག་རྗེ་དཔོན་ཆེན་པོ་ལ་གནོད་པ་མི་བཟད་པ་བྱས་པ་ལྟ་བུ་བཟོད་པར་དཀའ་བའི་བཟོད་པ་གསུམ་དང༌། དམའ་བ་དང་མཚུངས་པ་དང་ལྷག་པའི་མཛའ་མི་མཛའ་བར་མ་གསུམ་གྱི་གནོད་པ་བཟོད་པ་ཐམས་ཅད་ཀྱི་སྒོ་ནས་ བཟོད་པ་བཞི་དང་། བཟོད་པའི་ཡོན་ཏན་བལྟ་བདག་ཉིད་ཀྱིས་བཟོད་གཞན་བཟོད་པ་ལ་འགོད་བཟོད་པའི་བསྔགས་པ་བརྗོད་གཞན་བཟོད་པ་ཅན་མཐོང་ན་དགའ་བར་བྱེད་པ་སྟེ་སྐྱེས་བུ་དམ་པའི་བཟོད་པ་ལྔ་དང་། རྣམ་པ་ཐམས་ཅད་པའི་བཟོད་ པ་ནི་རྣམ་སྨིན་ལ་འཇིགས་པས་བཟོད་པ་དང་བྱམས་པས་དང་སངས་རྒྱས་འཐོབ་ཕྱིར་རྒྱུས་དང་རབ་ཏུ་བྱུང་བ་བཟོད་པ་དང་མི་ལྡན་པ་མི་རིགས་པར་ལྟ་བ་ཆོས་ཡང་དག་པར་བླངས་པས་དང་། གོམས་པའི་སྟོབས་རང་བཞིན་གྱིས་དང་སེམས་ཅན་མེད་པར་ མཐོང་བ་ཆོས་ལ་ངེས་པར་སེམས་པས་བཟོད་པ་སྟེ་དྲུག་གམ། ཡང་ན་གནོད་པ་ཐམས་ཅད་དང་ཐམས་ཅད་ཀྱི་དང་ཡུལ་ཐམས་ཅད་དུ་དང་དུས་ཐམས་ཅད་པར་དང་ལུས་ངག་ཡིད་ཀྱིས་ལན་མི་བྱེད་པ་སྒོ་གསུམ་རེ་རེའི་བཟོད་པ་སྟེ་བདུན་ནམ་ཡང་ན་ བསྡམས་པས་བཅུ་གསུམ་མོ། །དེ་བཞིན་དུ་སློང་བ་པོའི་གནོད་པ་བཟོད་པ་སོགས་ཕོངས་ཤིང་འདོད་པའི་བཟོད་པ་བརྒྱད་དང༌། ཆོས་ཕྱིར་ཚ་གྲང་བཟོད་པ་སོགས་འདི་དང་གཞན་དུ་བདེ་བར་འགྱུར་བའི་བཟོད་པ་དགུ་དང་། ཕྱིར་གནོད་པ་མི་བྱེད་
Page: 224 པ་སོགས་རྣམ་པར་དག་པའི་བཟོད་པ་བཅུ་སྟེ། ཕ་རོལ་ཕྱིན་པ་གཞན་ལྔ་ལའང་འདི་ལྟར་སྦྱོར་ཏེ་རྒྱས་པར་བྱང་ས་ཉིད་ལྟའོ། །དེ་ལ་སྤྲོ་བའི་བརྩོན་འགྲུས་ཀྱིས། །ལེ་ལོའི་གཉེན་པོར་འབད་པར་བྱ། །ཉལ་བསྙེས་གཉིད་སོགས་སྙོམས་ལས་ ཀྱི། གཉེན་པོར་མི་རྟག་འཆི་བ་བསམ། བདག་འདྲས་བྱང་ཆུབ་མི་འཐོབ་ཅེས། །སྒྱིད་ལུག་གཉེན་པོར་སྙིང་སྟོབས་སྐྱེད། །ལུང་མ་བསྟན་དང་མི་དགེ་བའི། །བྱ་བ་ངན་ལ་ཞེན་པ་སྤང་། །བདག་གིས་དགེ་ལ་བརྩོན་བྱ་ཞེས། ཐོག་མར་ འཕེན་པའི་གོ་ཆ་བསྒོ། སྦྱོར་བའི་བརྩོན་འགྲུས་རྣམ་གསུམ་སྟེ། །ཉོན་མོངས་སྤང་ཕྱིར་རྩེ་གཅིག་འབད། །དགེ་བ་ཡང་དག་སྒྲུབ་པའི་ཕྱིར། །རྟག་པར་བྱེད་དང་གུས་པས་དང་། །མི་གཡོ་མི་ལྡོག་ང་རྒྱལ་མེད། །ལྔ་ཡིས་ཕར་ཕྱིན་ དྲུག་ལ་འབད། །སེམས་ཅན་དོན་བྱེད་བརྩོན་འགྲུས་ནི། གཞན་དོན་བཅུ་གཅིག་འབད་པའོ། །དགེ་བས་ངོམས་མི་ཤེས་པ་ནི། །ཆོག་པར་མི་འཛིན་བརྩོན་འགྲུས་སོ། །ཞེས་བྱ་སྟེ། སྙོམས་ལས་ཀྱི་ལེ་ལོའི་གཉེན་པོར་བདག་འཆི་ ངེས་པ་དང་། ནམ་འཆི་ཆ་མེད་པ་དང་དེ་རིང་ཡང་མི་འཆི་བའི་གདེང་མེད་པ་རྣམས་རྒྱུ་མཚན་དུ་མས་བསམས་ཏེ་པང་དུ་སྦྲུལ་འོངས་པ་འདོར་བ་ལྟ་བུའི་བརྩོན་འགྲུས་བརྩམ་མོ། །སྒྱིད་ལུག་པའི་ལེ་ལོའི་གཉེན་པོར་། བདག་ལྟ་རིགས་ཀྱི་མིར་སྐྱེས་ཅིང་ ལ་སོགས་པས་ཅིའི་ཕྱིར་མི་ནུས་ཞེས་སྙིང་སྟོབས་སྐྱེས་ཏོ། །དམད་པའི་ལེ་ལོའི་གཉེན་པོར་བྱ་བ་དེ་དག་གི་ཉེས་དམིགས་བརྟག་ཅིང་མི་ལུས་རྙེད་དཀའ་བས་དེ་ལྟ་བུ་བྱར་འཕངས་པར་ཤེས་པས་དོར་རོ། །བརྩོན་འགྲུས་དངོས་ལ། དང་པོ་གོ་ཆའི་ བརྩོན་འགྲུས་ནི། སེམས་ཅན་ཐམས་ཅད་བྱང་ཆུབ་ལ་མ་འཁོད་ཀྱི་བར་དུ་བདག་གིས་དགེ་བའི་བརྩོན་འགྲུས་མི་འདོར་རོ་ཞེས་དམ་འཆའ་ཞིང་བྱེ་བྲག་ཏུ་ལོ་འདི་དང་ཟླ་བ་འདི་དང་ཞག་འདི་དང་ཐུན་ཁོངས་འདིར་བརྩོན་པ་མི་འདོར་རོ་ཞེས་འཕེན་པ་སྔོན་དུ་
Page: 225 ༄༅། །གཏོང་བ་སྟེ། བྱང་ཆུབ་སེམས་དཔའི་སྡེ་སྣོད་ལས། ཤཱ་རིའི་བུ་བསམ་གྱིས་མི་ཁྱབ་པའི་གོ་ཆ་བསྒོ་བར་བྱ་སྟེ་འཁོར་བའི་ཐ་མ་ཇི་ཙམ་པར་བྱང་ཆུབ་ཀྱི་ཕྱིར་བརྩོན་འགྲུས་ལྷོད་པར་མི་བྱ་སྟེ་ཞེས་དང་། གོ་ཆ་བཀོད་པའི་ མདོ་ལས། བྱང་ཆུབ་སེམས་དཔས་སེམས་ཅན་རྣམས། །བསྡུ་ཕྱིར་གོ་ཆ་བསྒོ་བར་བྱ། །སེམས་ཅན་ཚད་ནི་མེད་པའི་ཕྱིར། །གོ་ཆ་བསྒོས་པ་ཚད་མེད་དོ། །ཞེས་དང་བྱང་ས་ལས། བདག་ནི་སེམས་ཅན་གཅིག་སྡུག་བསྔལ་ལས་ཐར་ པར་བྱ་བའི་ཕྱིར་བསྐལ་པ་སྟོང་དང་མཉམ་པར་སེམས་ཅན་དམྱལ་བ་ཁོ་ནར་གནས་དགོས་ན་ཡང་བདག་སྤྲོ་བར་བྱེད་དེ་དུས་ཡུན་ཆེས་ཐུང་བ་དང་སྡུག་བསྔལ་ཆེས་ཆུང་བ་ལྟ་ཅི་སྨོས་སྙམ་པ་དེ་ལྟ་བུ་ནི་བྱང་ཆུབ་སེམས་དཔའི་གོ་ཆའི་བརྩོན་འགྲུས་ ཡིན་ཏེ་ཞེས་སོ། །ཉིན་ཞག་དང་ཐུན་ཁོངས་སོགས་ལའང་གོ་ཆའི་འཕེན་པ་གཏོང་བ་ནི་བརྩོན་འགྲུས་རྒྱུན་མི་འཆད་པ་དང་མི་ངལ་བ་དང་ཤེས་བཞིན་རྟག་ཏུ་འབྱུང་བའི་ཐབས་ཡང་དག་པའོ། །སྦྱོར་བའི་བརྩོན་འགྲུས་ལ་དབྱེ་ན་གསུམ་ ལས། ཉོན་མོངས་བ་སྤང་བ་ལ་བརྩོན་འགྲུས་བྱ་བ་ནི། ཉོན་མོངས་སྟོབས་ཆེན་དགྲ་འདིས་ནི། །གང་དང་ཕྲད་ན་རི་རབ་ཀྱང་། ཐལ་བར་ཡང་ནི་མི་ལུས་པ། །དེར་བདག་སྐད་ཅིག་ཉིད་ལ་འདོར། །ཞེས་སོགས་ཀྱིས་ཉོན་མོངས་ ཀྱི་ཉེས་པ་བསམ་དགྲའི་དམ་པར་ལྟ། ཁྱོད་ཀྱིས་ཁོ་བོ་གར་བརླག་པའི། །སྔོན་གྱི་དུས་དེ་གཞན་ཡིན་གྱིས། །ངས་མཐོང་ད་ཁྱོད་གང་དུ་འགྲོ །སོགས་ཀྱིས་ཚར་བཅད། ཉོན་མོངས་རྣམས་ནི་ཡུལ་ན་མི་གནས་དབང་ཚོགས་ལ་མིན་བར་ ནའང་མིན། །སོགས་ཀྱིས་ངོ་བོ་ཉིད་ཀྱིས་མེད་པར་བརྟགས་ཏེ་ཉོན་མོངས་གང་ཤས་ཆེ་བ་ནས་འབུར་འཇོམས་སུ་སྤང་ངོ༌། །དགེ་བ་སྒྲུབ་པ་ལ་བརྩོན་འགྲུས་བྱ་བ་ནི་ལྔ་ལས། རྟག་ཏུ་བྱེད་པའི་བརྩོན་འགྲུས་ནི་རྒྱུན་མ་ཆད་པར་བྱེད་པ་སྟེ།
Page: 226 དཀོན་མཆོག་སྤྲིན་ལས། འདི་ལ་བྱང་ཆུབ་སེམས་དཔའ་སྤྱོད་ལམ་ཐམས་ཅད་དུ་བརྩོན་འགྲུས་རྩོམ་པ་ན་ཅི་ནས་ལུས་སྐྱོ་བར་མི་འགྱུར་བ་དང་སེམས་སྐྱོ་བར་མི་འགྱུར་བ་དེ་ལྟར་རྩོམ་སྟེ་འདི་ནི་བྱང་ཆུབ་སེམས་དཔའི་རྟག་པའི་བརྩོན་འགྲུས་ཞེས་བྱའོ་ཞེས་ སོ། །གུས་པའི་བརྩོན་འགྲུས་ནི་དགའ་ཞིང་སྤྲོ་བས་བྱེད་པ་སྟེ། དེ་ལྟས་ལས་ཚར་ཕྱིན་བྱའི་ཕྱིར། །ཉི་མ་ཕྱེད་དུས་གདུངས་པ་ཡི། །གླང་ཆེན་མཚོར་ཕྲད་འཇུག་པ་ལྟར། །ལས་དེ་ལ་ཡང་འཇུག་པར་བྱ། །ཞེས་པ་ལྟར་རོ། ། མི་གཡོ་བའི་བརྩོན་འགྲུས་ནི་ཉོན་མོངས་དང་སྡུག་བསྔལ་སོགས་རང་ལས་བྱུང་བའི་རྐྱེན་ཅིས་ཀྱང་མི་གཡོ་བར་བྱེད་པའོ། །མི་ལྡོག་པའི་བརྩོན་འགྲུས་ནི་གཞན་ལས་བྱུང་བའི་རྐྱེན་ཅིས་ཀྱང་དགེ་བ་ལས་མི་ལྡོག་ཅིང་བརྩོན་འགྲུས་འཕྲོ་མི་གཅོད་པའོ། ། ང་རྒྱལ་མེད་པའི་བརྩོན་འགྲུས་ནི་བརྩོན་འགྲུས་བརྩམ་པ་ལ་ང་རྒྱལ་མེད་ཅིང༌ལེ་ལོ་ཅན་ལ་ཡང་མི་བརྙས་པ་སྟེ་དེ་ལྟར་ལྔ་དང་ལྡན་པས་དགེ་བ་ལ་རྟག་ཏུ་འབད་དོ། །གསུམ་པ་སེམས་ཅན་གྱི་དོན་བྱ་བའི་བརྩོན་འགྲུས་ནི་སེམས་ཅན་དོན་བྱེད་ཀྱི་ཚུལ་ ཁྲིམས་བཅུ་གཅིག་པོ་ལ་འབད་པ་བྱེད་པའོ། །དེ་དག་གིས་སྦྱོར་བའི་བརྩོན་འགྲུས་བཤད་པའོ། །ཆོག་པར་མི་འཛིན་པའི་བརྩོན་འགྲུས་ནི་ངོམས་པ་མེད་པ་སྟེ། འཇམ་དཔལ་གྱིས་བསྟན་པའི་མདོར། འཇམ་དཔལ་སྟོན་པའི་དབུར་ གདུགས་དཔག་ཚད་གཅིག་པ་འཛིན་པས་མཆོད་པ་ན། ལྷའི་བུ་མཚམས་བཟང་གིས། འཇམ་དཔལ། ཁྱོད་དེ་བཞིན་གཤེགས་པ་ལ་མཆོད་་ད་དུང་ཡང་ཐུགས་མ་ཚིམ་མམ། འཇམ་དཔལ་གྱིས་སྨྲས་པ། རྒྱ་མཚོ་ཆེན་པོ་ནི་ཆུ་ཡིས་ཆོག་པར་མི་ འཛིན་ནོ་དེ་བཞིན་དུ་བྱང་ཆུབ་སེམས་དཔའ་ནི་བསོད་ནམས་ཀྱིས་ཆོག་པར་མི་འཛིན་ནོ་ཞེས་སོ། །མདོར་ན་གང་ཟག་གཅིག་གི་རྒྱུད་ལ་དགེ་བ་སྣ་གཅིག་སྐྱེད་པའི་དོན་དུའང་བསྐལ་པར་འབད་པས་མི་སྐྱོ་བ་སྟེ། རྒྱལ་སྲས་བརྩོན་འགྲུས་
Page: 227 ༄༅། །མཆོག་ལ་བསྟེན་པ་སྟེ། སེམས་ཅན་ཚོགས་རབ་སྨིན་པར་བྱེད་པ་ན། ཕ་རོལ་སེམས་དགེ་གཅིག་གི་ཕྱིར་ཡང་ནི། །བསྐལ་བ་བྱེ་བ་སྟོང་དུའང་སྐྱོ་མི་འགྱུར། །ཞེས་པ་ལྟར་ཉམས་སུ་བླང་ངོ་། །བསམ་གཏན་ དགེ་ལ་རྩེ་གཅིག་སྟེ། །འདུ་འཛི་རྣམ་གཡེང་ཀུན་སྤངས་ནས། །གཅིག་པུ་དབེན་པར་གནས་པས་འཐོབ། །ཁྱིམ་དང་རྙེད་བཀུར་ལ་སོགས་པ། །འདུ་འཛིར་ཆགས་ལ་ཉེས་པ་མང་། །གཡེང་བས་ཚེ་འདི་དོན་མེད་བྱེད། །དེ་བས་སྒོ་ གསུམ་དབེན་པར་བྱ། །རྫོགས་སངས་རྒྱས་ལ་ཡོ་བྱད་ཚོགས། །ཀུན་གྱིས་བསྙེན་བཀུར་བྱས་པ་བས། །སྒོམ་པར་འདོད་པས་དགོན་པའི་ཕྱོགས། །གོམ་བདུན་བོར་ལ་སངས་རྒྱས་མཉེས། །ངོ་བོའི་སྒོ་ནས་ཞི་ལྷག་གཉིས། ། ཡིད་བྱེད་སྒོ་ནས་དབྱེ་བ་བཞི། །དམན་མཆོག་སྒོ་ནས་དབྱེ་བ་གཉིས། །སྒོམ་ཚུལ་སྦྱོར་བ་དངོས་གཞི་གཉིས། །འདོད་ཆགས་ཞེ་སྡང་གཏི་མུག་དང་། །ཕྲ་དོག་ང་རྒྱལ་ཆ་མཉམ་སྟེ། །དྲུག་གི་གཉེན་པོར་མི་སྡུག་བྱམས། ། རྟེན་འབྲེལ་བདག་གཞན་མཉམ་པ་དང་། །བདག་གཞན་རྗེ་དང་རླུང་ལ་བསླབ། །དེ་ཡང་བདག་ལུས་མི་གཙང་རྫས། །སོ་དྲུག་འདུས་པའི་རང་བཞིན་བསམ། །རྣམ་པར་བམ་དམར་རྣམ་པར་སྔོས། །བརྣགས་དང་འབུས་ གཞིགས་ཀེང་རུས་དང་། །རུས་གོང་འཐོར་དང་ཐི་བའི་མདོག །བལྟ་ཞིང་བདག་ཡང་འདི་འདྲ་བའི། །གནས་སྐབས་འགྱུར་ཞེས་ཤུགས་ཕྱུང་སྒོམ། །སྐྱེས་པ་བུད་མེད་ལ་སོགས་ལུས། །དེ་ལྟར་བལྟ་བས་ཆགས་པ་ལྡོག ། ཞེ་སྡང་ཤས་ཆེ་བྱམས་པའི་བློ། །ཡིད་དུ་འོང་དང་འདྲིས་པ་དང་། །ཐ་མལ་པ་ནས་འགྲོ་ཀུན་བར། །རིམ་པས་བསྐྱེད་ལ་གཅིག་ཏུ་འབད། བྱིང་རྨུགས་གཏི་མུག་ཤས་ཆེ་ན། །རྟེན་ཞིང་འབྲེལ་འབྱུང་སྒོམ་པ་སྟེ། །ཆུ་ལུད་
Page: 228 དྲོད་གཤེར་དུས་ས་བོན། །ས་གཞི་ལ་བརྟེན་མྱུ་གུ་ནས། །སཱ་ལིའི་བར་དུ་འབྱུང་མོད་ཀྱང་། །རེ་རེའང་མི་རྟོག་བྱེད་པོ་མེད། །ཚོགས་པའི་དབང་ལས་སྣང་ཙམ་ཉིད། །ས་བོན་མྱུ་གུར་མི་འགྱུར་ཏེ། །ས་བོན་གཞན་ལ་མྱུ་གུའང་གཞན། ། ས་བོན་མེད་ལས་མྱུ་གུ་མིན། །དཔྱད་ན་མི་བཟོད་སྣང་ཙམ་པ། །སྒྱུ་མའི་ཆུ་ཀླུང་ལྟ་བུ་ཉིད། །ཕྱི་ཡི་རྟེན་ཞིང་འབྲེལ་འབྱུང་ཡིན། །མ་རིག་འདུ་བྱེད་རྣམ་ཤེས་དང་། །མིང་གཟུགས་སྐྱེ་མཆེད་དྲུག་རེག་པ། །ཚོར་བ་སྲེད་ལེན་སྲིད་བ་སྐྱེ། ། རྒ་ཤི་ཡན་ལག་བཅུ་གཉིས་ཏེ། །སྔ་མ་ལ་བསྟེན་ཕྱི་མ་སྐྱེ། །དེ་ལས་མྱ་ངན་སྨྲེ་སྔགས་དང་། །སྡུག་བསྔལ་སྣ་ཚོགས་འབྱུང་བར་འགྱུར། །དེ་ལྟར་ལུགས་འབྱུང་འཁོར་བ་སྟེ། །ལུགས་ལས་ལྡོག་པས་མྱང་འདས་ཡིན། །རེ་རེའང་ ཕྱི་མ་སྒྲུབ་མི་སེམས། །བྱེད་པོ་མེད་ཅིང་བདག་ཀྱང་མེད། སྔ་མ་ཕྱི་མར་མི་འཕོ་ཞིང་། །སྔ་མ་མེད་པར་ཡང་མི་འབྱུང་། །སྔ་མའང་གཞན་ལ་ཕྱི་མའང་གཞན། དཔྱད་ན་མི་བཟོད་སྒྱུ་མ་ཙམ། །དེ་ལྟར་ཤེས་པས་སྲིད་པ་ལྡོག ། རྒྱུ་བཅས་ནང་གི་རྟེན་འབྲེལ་ལོ། ནང་གི་རྟེན་འབྲེལ་རྐྱེན་བཅས་ནི། །ས་ཆུ་མེ་རླུང་མཁའ་རྣམ་ཤེས། །དེ་ལྟར་ཁམས་དྲུག་འདུས་པ་ལས། ལུས་འདི་མངོན་པར་གྲུབ་མོད་ཀྱང་། །དེ་དག་རེ་རེའང་སེམས་པ་མེད། །ཕན་ཚུན་ གཅིག་གིས་གཅིག་མི་ཤེས། བྱེད་པོ་མེད་ཀྱང་འདུས་ཙམ་ལས། །སྣང་བར་ཟད་དེ་དཔྱད་མི་བཟོད། །དེས་ན་བཟོད་ནས་སྟོང་ཉིད་དེ། །དེ་ཉིད་རྟེན་ཞིང་འབྲེལ་འབྱུང་སྣང་། །འདི་ནི་ནམ་ཡང་དབྱེར་མེད་དེ། །ཆུ་དང་ཆུ་རླབས་ཇི་ བཞིན་ནོ། །རྟེན་འབྲེལ་གང་ཤེས་དེས་ཆོས་ཤེས། །དེ་ཡིས་སངས་རྒྱས་ཤེས་སོ་ཞེས། །རྒྱལ་བ་ཉིད་ཀྱིས་རབ་ཏུ་བསྔགས། །ཕྲ་དོག་ཤས་ཆེ་བདག་དང་གཞན། །མཚུངས་པའི་བྱང་སེམས་བསྒོམ་བྱ་སྟེ། བདེ་འདོད་སྡུག་བསྔལ་
Page: 229 ༄༅། །མི་འདོད་དང་། །སོ་སོར་གཅེས་པར་མཚུངས་ཕྱིར་རོ། །རྒྱལ་སྲས་རྣམས་ཀྱི་གསང་བའི་ལམ། །བདག་གཞན་རྗེ་བ་བསྒོམ་བྱ་སྟེ། །བདག་ཉིད་གཅེས་འཛིན་དོར་ནས་ནི། །གཞན་ལ་གཅེས་འཛིན་གོམས་པར་བྱ། །འདི་ཡི་ཕན་ཡོན་ཚད་མེད་ཀྱང་། ། འདིར་ནི་ང་རྒྱལ་གཉེན་པོར་བརྗོད། །རྣམ་རྟོག་མང་བའི་གཉེན་པོར་ནི། །རླུང་གི་རྣལ་འབྱོར་བསྒོམ་བྱ་སྟེ། །བགྲང་དང་རྗེས་འགྲོ་འཇོག་པ་དང་། །རྟོག་བསྒྱུར་ཡོངས་དག་དྲུག་ཏུ་གསུངས། །དེ་ལྟར་སྦྱོར་བས་རྣལ་དུ་དབབ། །རྟོག་བྲལ་ ཤིན་སྦྱངས་རབ་ཏུ་ཞི། །རློམ་སེམས་རོ་མྱང་མཚན་མ་མེད། །འདི་ནི་རྒྱལ་བའི་སྲས་རྣམས་ཀྱི། །མཐོང་ཆོས་བདེར་གནས་བསམ་གཏན་ཡིན། །ཟད་པར་ཟིལ་གནོན་རྣམ་ཐར་སོགས། །ཉན་རང་རྣམས་དང་ཐུན་མོང་དང་། ཉན་རང་ ཡུལ་ལས་ཆེས་འདས་པའི། །ཏིང་འཛིན་རྒྱ་མཚོ་སྒྲུབ་པ་ནི། །ཡོན་ཏན་སྒྲུབ་པའི་བསམ་གཏན་ནོ། །སྣ་ཚོགས་ལུས་ཀྱི་བཀོད་པ་ཡིས། །གཞན་དོན་བཅུ་གཅིག་འབད་པ་སོགས། །སེམས་ཅན་དོན་སྒྲུབ་བསམ་གཏན་ནོ། །ཇི་ལྟར་ བསྒོམ་པར་བྱ་ཚུལ་ནི། །དབེན་པར་སྐྱིལ་ཀྲུང་མཉམ་བཞག་བཅའ། །ནང་དང་མི་གཡོ་བསྡུས་ཏེ་འཇོག །ཉེར་འཇོག་དུལ་བྱེད་ཞི་བར་བྱེད། །ཉེར་ཞི་རྒྱུད་གཅིག་ཏིང་འཛིན་བྱེད། །སེམས་ཀྱི་འཇོག་ཐབས་རྣམ་པ་དགུ། འདི་ཡིས་ ཏིང་འཛིན་རྩེ་གཅིག་སྐྱེ། །དེ་ནས་ཤེས་རབ་དང་ལྡན་པས། །མཚན་ཉིད་སོ་སོར་རིག་པ་དང་། །མོས་པ་རབ་ཏུ་དབེན་པ་དང་། །དགའ་བ་སྡུད་པ་དཔྱོད་པ་དང་། སྦྱོར་བའི་མཐར་ཐུག་དེ་ཡི་འབྲས། །དེ་ལྟར་ཉེར་བསྡོགས་ཡིད་བྱེད་ བདུན། །འདི་ཡིས་བསམ་གཏན་དངོས་གཞི་འགྲུབ། །དེ་ལ་རྟོག་དཔྱོད་དགའ་དང་བདེ། །རྩེ་གཅིག་ཡན་ལག་ལྔ་ལྡན་པ། །འདི་ནི་བསམ་གཏན་དང་པོ་ཡིན། །རྟོག་དཔྱོད་བྲལ་བ་གཉིས་པ་སྟེ། །གསུམ་པ་བདེ་བ་ཁོ་ན་ཅན། །བཞི་པ་བཏང་སྙོམས་རྩེ་གཅིག་པའོ། དེ་ལས་
Page: 230 མངོན་ཤེས་རྣམ་ལྔ་འགྲུབ། །དེ་ལྟར་འདོད་གཟུགས་བསམ་གཏན་ནི། །འཇིག་རྟེན་འདས་པའི་ཤེས་རབ་དང་། །འབྲེལ་བས་ཡང་དག་ལམ་དུ་འགྱུར། །རྒོད་འགྱོད་གཉིད་རྨུགས་ཐེ་ཚོམ་གྱི། །གཉེན་པོར་ཞི་ལྷག་རྣམ་པ་གཉིས། ། ཡང་ན་མི་མཐུན་ཕྱོགས་དྲུག་གི །གཉེན་པོར་སྤོང་བའི་འདུ་བྱེད་བརྒྱད། །བསྡུ་ན་སྒོམ་ཚུལ་སྒྲིམ་གློད་གཉིས། །ཡང་ན་རྒྱལ་བའི་སྐུ་གཟུགས་སོགས། །བཞག་གམ་བསྒོམས་པས་སེམས་ཟིན་ཏེ། །གོང་ནས་གོང་དུ་ཏིང་འཛིན་འགྲུབ། ། གུས་དང་རྒྱུན་དུ་སྦྱོར་བ་ཡི། །བརྩོན་འགྲུས་ལས་ནི་འདི་སྐྱེ་སྟེ། །མདོར་ན་ཐེག་པ་ཆེན་པོ་ནི། །དགེ་བའི་བཤེས་ཀྱི་ལག་ན་གནས། །དེ་ལྟར་བསམ་གཏན་ལྡན་པ་ཡིས། །སྦྱིན་སོགས་ཡོན་ཏན་ཐམས་ཅད་འཐོབ། །ཅེས་བྱ་སྟེ། དགེ་བ་ལ་ སེམས་རྩེ་གཅིག་ཏུ་གནས་པ་ནི་བསམ་གཏན་སྟེ་བྱང་ས་ལས། སེམས་རྩེ་གཅིག་པ་དགེ་བ་ལ་གནས་པ་ཞེས་སོ། །དེ་ནི་ལུས་འདུ་འཛིས་དབེན་པ་དང༌སེམས་རྣམ་གཡེང་གིས་དབེན་པ་ལས་སྐྱེ་སྟེ། ལུས་དང་སེམས་ནི་དབེན་པ་ཡིས། །རྣམ་ པར་གཡེང་བ་མི་འབྱུང་ངོ༌། །ཞེས་སོ། །དེ་ཡང་འདུ་འཛི་ནི་ཁྱིམ་དང་ལོངས་སྤྱོད་དང་རྙེད་བཀུར་སོགས་ཀྱིས་གཡེངས་པ་ཡིན་ལ་དེ་དག་གི་སྐྱོན་མ་མཐོང་བའི་ཕྱིར་ཆགས་པ་སྟེ། དེའི་གཉེན་པོར་འདུ་འཛིའི་ཉེས་དམིགས་བསམ་མོ། །དེ་ཡང་ ལྷག་བསམ་བསྐུལ་བའི་མདོར། བྱམས་པ་འདུ་འཛིའི་ཉེས་དམིགས་ཉི་ཤུ་པོ་འདི་དག་ཡིན་སྟེ་ཉི་ཤུ་གང་ཞེ་ན་ལུས་དང་ངག་དང་ཡིད་ཀྱིས་མ་བསྡམས་པ་ཡིན་ཉོན་མོངས་པ་ཆེ་བ་ཡིན་འཇིག་རྟེན་པའི་གཏམ་གྱིས་ཀྱང་གོས་བ་ཡིན་བདུད་ཀྱིས་གླགས་ བརྙེད་པ་ཡིན། བག་མེད་པ་ལ་བསྟེན་པ་ཡིན་ཞི་གནས་དང་ལྷག་མཐོང་མི་འཐོབ་བ་ཡིན་ཞེས་སོགས་གསུངས་སོ། །ཁྱད་པར་ཁྱིམ་ལ་ཆགས་པའི་ཉེས་པ་ནི་ཟླ་བ་སྒྲོན་མ་ལས། འདོད་པ་དག་ནི་རབ་ཏུ་བསྟེན་བྱེད་ཅིང་། བུ་དང་ཆུང་མ་དག་
Page: 231 ༄༅། །ལ་ཆགས་བསྐྱེད་ནས། །སྨད་པར་བྱ་བའི་ཁྱིམ་ལ་བསྟེན་པ་དེས། །ནམ་ཡང་བླ་མེད་བྱང་ཆུབ་མཆོག་མི་འཐོབ། །ཅེས་དང་། སེམས་ཅན་ཉིད་ལ་ཆགས་བྱས་ན། །ཡང་དག་ཉིད་ལ་ཀུན་ནས་སྒྲིབ། །ཅེས་སོ། ། དེས་ན་དེ་དག་སྤང་བར་བྱ་སྟེ། དེས་ཀྱང་བདག་དོན་མི་བྱེད་ལ། །བདག་ཀྱང་དེ་དོན་མི་འགྱུར་བས། །བྱིས་ལས་ཐག་རིང་བྱོལ་བར་བྱ། །ཅེས་སོ། །རྙེད་བཀུར་དང་གྲགས་པའང་སྙིང་པོ་མེད་དེ། །རྙེད་དང་གྲགས་པའི་ཚོགས་བཅས་ ཏེ། །གང་དུ་འདོད་པ་གཏོལ་མེད་དོ། །ཞེས་སོ། །དེ་ཉིད་སླར་སྡུག་བསྔལ་གྱི་རྒྱུ་བྱེད་དེ། །གང་དང་གང་ལ་ཆགས་གྱུར་པ། །དེ་དང་དེ་བསྡོངས་སྟོང་འགྱུར་དུ། །སྡུག་བསྔལ་ཉིད་དུ་གྱུར་ཞིང་ལྡང༌། །ཞེས་སོ། །དེ་ལྟར་འདུ་འཛི་དེ་དག་གིས་ དབེན་པ་གྲོང་ལས་གཞུ་འདོམ་ལྔ་བརྒྱ་སྟེ་མངོན་པའི་ལུགས་ཀྱི་རྒྱང་གྲགས་གཅིག་འཕགས་པའི་ས་ཕན་ནི་དགོན་པ་སྟེ། བརྡ་རྙིང་ལ་གཡེ་ཞེས་ཀྱང་བྱ་སྟེ་དེར་གཅིག་པུར་གནས་པ་ནི་ལུས་ཀྱི་དབེན་པ་སྟེ་ལུས་ཁྱིམ་གྱི་བྱ་བ་ལ་སོགས་ པས་དབེན་པའི་ཕྱིར་རོ། །དེ་ལྟར་ཏིང་འཛིན་འདོད་པའི་བློས་དགོན་པའི་ཕྱོགས་སུ་གོམ་པ་བདུན་བོར་བ་ཙམ་ལ་འང་ཕན་ཡོན་མང་སྟེ་ཟླ་བ་སྒྲོན་མར། ཟས་དང་སྐོམ་དང་དེ་བཞིན་གོས་རྣམས་དང་། །མེ་ཏོག་སྤོས་དང་ཕྲེང་བ་རྣམས་ ཀྱིས་ནི། །ཁྱུ་མཆོག་རྒྱལ་ལ་བསྙེན་བཀུར་བྱས་མི་འགྱུར། །གང་གིས་བྱང་ཆུབ་རབ་ཏུ་འདོད་བྱེད་ཅིང་། །འདུས་བྱས་ངན་པས་ཡིད་བྱུང་སེམས་ཅན་གྱི། དོན་དུ་དགོན་པའི་ཕྱོགས་སུ་གོམ་བདུན་བོར། །འདི་ནི་དེ་བས་བསོད་ ནམས་ཁྱད་པར་འཕགས། །ཅེས་དང་། དེ་ནི་འདུས་བྱས་རྟག་ཏུ་ཡིད་འབྱུང་འགྱུར། །དེ་ནི་འཇིག་རྟེན་ཅི་ལའང་འདོད་པ་མེད། །ཟག་པ་རྣམས་ནི་རྣམ་པར་འཕེལ་མི་འགྱུར། །ཞེས་དང་། གྲོང་དང་གྲོང་ཁྱེར་དག་ལ་དགའ་སྤོངས་ལ། །
Page: 232 རྟག་ཏུ་དབེན་པའི་ནགས་ཁྲོད་བསྟེན་པར་གྱིས། །བསེ་རུ་ལྟ་བུར་རྟག་ཏུ་གཉིས་མེད་བྱོས། །རིང་པོར་མི་ཐོགས་ཏིང་འཛིན་མཆོག་འཐོབ་འགྱུར། །ཞེས་སོ། །དེ་ལྟར་ལུས་དབེན་པའི་དགོས་པའི་ཡང་སེམས་རྣམ་གཡེང་གིས་དབེན་པར་བྱ་ བ་ཡིན་པས་བདག་དགོན་པར་ཅིའི་ཕྱིར་འོངས་ད་ལྟ་ཇི་ལྟར་གནས་བརྟག་པར་བྱའོ། །ཅིའི་ཕྱིར་འོངས་ན་དྲག་ཤུལ་ཅན་གྱིས་ཞུས་པར། འདུ་འཛིས་འཇིགས་ཤིང་སྐྲག་གོ །རྙེད་བཀུར་སྡིག་གྲོགས་དང་མི་དགེ་བའི་བཤེས་གཉེན་དང་ དུག་གསུམ་དང་བདུད་བཞི་དང་ངན་སོང་གསུམ་གྱིས་འཇིགས་ཤིང་སྐྲག་གོ །བདག་དེ་ལྟ་བུས་སྐྲག་ཅིང་འཇིགས་ནས་དགོན་པར་འོངས་སོ་ཞེས་པ་ལྟར་བསམ་མོ། །ད་ལྟ་ཇི་ལྟར་གནས་བརྟག་སྟེ། ལུས་ཀྱིས་མི་དགེ་བ་སྤྱོད་ཅིང་འདུག་ ན་འོ་ན་བདག་དང་དགོན་པའི་གཅན་གཟན་དང་རྔོན་པ་དང་ཆོམ་རྐུན་ཡང་ཐ་མི་དད་དོ། །ངག་དོན་མེད་སྨྲ་ཞིང་འདུག་ན་དགོན་པའི་བྱ་རྣམས་དང་མཚུངས་སོ། །དུག་གསུམ་གྱི་སེམས་སེམ་ཞིང་འདུག་ན་རི་དྭགས་དང་གཅན་གཟན་རྣམས་དང་ ཁྱད་པར་མེད་དོ་ཞེས་བདག་ཉིད་ལ་བདག་ཉིད་ངོ་ཚ་ཞིང་ཁྲེལ་བའི་འདུ་ཤེས་བཞག་སྟེ་བདག་གིས་སེམས་སྤྱོད་དགོན་པའི་མི་མ་ཡིན་པ་རྣམས་དང་ལྷ་རྣམས་དང་སངས་རྒྱས་ཐམས་ཅད་ཀྱིས་མངོན་སུམ་དུ་གཟིགས་སོ་སྙམ་པས་བག་ཡོད་པར་བྱས་ ཏེ་དགེ་བའི་སེམས་ལ་རྡེའུ་དཀར་པོ་དང་མི་དགེ་བའི་སེམས་ལ་རྡེའུ་ནག་པོ་བཞག་ཅིང་སེམས་སྐད་ཅིག་འང་མི་གཡེང་བར་དམ་བཅས་ཏེ་རྩེ་གཅིག་ཏུ་སྒོམ་མོ། །དེ་ལ་གང་སྒོམ་པ་ནི་ཞི་ལྷག་གི་སྒོ་ནས་གཉིས་ཏེ་ཞི་གནས་ནི་སེམས་ལ་སེམས་ འཇོག་པ་རྩེ་གཅིག་པ་སྟེ་སམ་གཏན་དངོས་ཡིན་ལ་ཇི་ལྟ་བ་ཤེས་པས་དེ་ཁོ་ན་ཉིད་ལ་དམིགས་པ་ནི་ཤེས་རབ་ཀྱི་ཆ་ཡིན་ཞིང་དེ་ཁོ་ན་ཉིད་ལ་དམིགས་པས་རྩེ་གཅིག་ཏུ་བཞག་པ་ནི་ཟུང་དུ་ཆུད་པ་སྟེ་སྐབས་འདིར་བསྟན་གྱི་བསྒོམ་བྱའོ། །ཡིད་
Page: 233 ༄༅། །བྱེད་ཀྱི་སྒོ་ནས་དབྱེ་བ་བཞི་སྟེ་རྟོག་དཔྱོད་གཉིས་ཀ་ཡོད་པ་དང༌རྟོག་པ་ཁོ་ན་ཅན་དང་དཔྱོད་པ་ཁོ་ན་ཅན་དང་གཉི་ག་མེད་པ་སྟེ། ཡིད་ཀྱི་བརྗོད་པས་རྒྱུན་ཆགས་སུ། །བཙལ་བྱ་སོ་སོར་བརྟག་པར་བྱ། །ཡིད་ལ་བྱེད་པ་ བརྗོད་མེད་པ། །རོ་གཅིག་པས་ཀྱང་དཔྱད་པར་བྱ། །ཞེས་སོ། །ཡང་ཞི་གནས་དང་ལྷག་མཐོང་དང་ཟུང་འབྲེལ་ཡིད་ལ་བྱེད་པ་གསུམ་དུ་ཡང་འགྱུར་ཏེ། ཆོས་ཀྱི་མིང་ནི་སྡོམ་པ་ཉིད། །ཞི་གནས་ལམ་དུ་ཤེས་པར་བྱ། །ལྷག་མཐོང་ ལ་ནི་དེ་དོན་རྣམས། །རྣམ་པར་དཔྱོད་པར་ཤེས་པར་བྱ། །ཟུང་དུ་འབྲེལ་བའི་ལམ་དེ་ནི། །བསྡམས་པ་ཡིན་པར་ཤེས་པར་བྱ། །ཞེས་སོ། །ཡང་ན་སེམས་རབ་ཏུ་འཛིན་པ་དང་ཞི་གནས་དང་བཏང་སྙོམས་གསུམ་སྟེ། ཞུམ་པའི་ སེམས་ནི་རབ་བཟུང་ཞིང་། །རྒོད་པ་ཡང་ནི་ཞི་བར་བྱ། །དེ་ནས་དམིགས་པ་དེ་ལ་ནི། མཉམ་པར་གྱུར་ན་བཏང་སྙོམས་བཞག །ཞེས་སོ། རྟག་ཏུ་སྒོམ་པ་དང་། གུས་པར་སྒོམ་པ་གཉིས་སུ་ཡང་འགྱུར་ཏེ། དེ་ལ་རྟག་ཏུ་བྱ་བ་དང་། ། གུས་པར་བྱས་ཏེ་སྦྱར་བ་དང་། །ཞེས་སོ། །དམན་མཆོག་གི་སྒོ་ནས་དབྱེ་ན་གཉིས་ཏེ། ཕྱི་རོལ་པ་དང་ཐུན་མོང་དུ་གྱུར་པ་འཇིག་རྟེན་པའི་སྙོམས་འཇུག་བརྒྱད་དང་འདས་ལམ་གྱིས་ཐོབ་པའི་མཐར་གནས་པའི་སྙོམས་འཇུག་དགུའམ་ཐེག་པ་ གསུམ་གྱི་བསམ་གཏན་རྣམས་སོ། །ཡང་ན་འཇིག་རྟེན་པའི་བསམ་གཏན་ནི། བདེ་བ་ཆུང་བ་དང་འཇིག་ཚོགས་ལ་ཞེན་པ་དང་ཉམས་པར་འགྱུར་བ་དང་རྨོངས་པ་ཉོན་མོངས་དང་བཅས་པས་དམན་པ་དང་། ཉན་རང་གཉིས་ཀྱི་ནི་བདག་གཅིག་ པུ་བདེ་བ་དང་ཞི་བའི་མཐར་ཞེན་པ་དང་ཕུང་པོ་ལྷག་མེད་དུ་ཟད་པར་འགྱུར་བ་དང་ཉོན་མོངས་ཅན་མ་ཡིན་པའི་རྨོངས་པ་དང་བཅས་པའི་ཕྱིར་དེ་གསུམ་གྱི་བསམ་གཏན་དམན་པ་ཡིན་ལ། ཐེག་ཆེན་པའི་ནི་བདེ་བ་ཆེན་པོ་དང་ལྡན་ཞིང་རང་གཞན་
Page: 234 ཐམས་ཅད་བདེ་བ་བྱེད་པ་དང་སྲིད་ཞིའི་མཐའ་ལ་མ་ཞེན་པ་དང་ཉམས་པར་མི་འགྱུར་བ་དང་ནམ་ཡང་མི་ཟད་པ་དང་རྨོངས་པ་མེད་པའི་ཕྱིར་མཆོག་ཡིན་ཏེ། གསུམ་གྱི་བསམ་གཏན་བདེ་བ་ཆུང་། །བདག་བདེ་ཞེན་བཅས་ཡོངས་ཉམས་འགྱུར། ། ཟད་འགྱུར་རྨོངས་དང་བཅས་པར་འདོད། །བྱང་ཆུབ་སེམས་དཔའི་ཟློག་པ་འོ། །ཞེས་སོ། །ཇི་ལྟར་སྒོམ་པ་ལ་སྦྱོར་བ་དང་དངོས་གཉིས་ལས་དང་པོ་སྦྱོར་བ་ནི། འདོད་ཆགས་ཀྱི་གཉེན་པོར་མི་སྡུག་པ་ཞེ་སྡང་གི་གཉེན་པོར་བྱམས་པ་གཏི་ མུག་གི་གཉེན་པོར་རྟེན་འབྲེལ་ཕྲ་དོག་གི་གཉེན་པོར་བདག་གཞན་མཉམ་པའི་བྱང་སེམས་ང་རྒྱལ་གྱི་གཉེན་པོར་བདག་གཞན་བརྗེ་བའི་བྱང་སེམས་ཆ་མཉམ་དང་རྣམ་རྟོག་མང་བའི་གཉེན་པོར་རླུང་ལ་བསླབ་པ་སྟེ་དྲུག་ཡིན་ལ་ཉོན་མོངས་ གང་ཤས་ཆེ་བ་དེའི་གཉེན་པོ་ཉིད་གཙོ་བོར་བསྒོམ་པར་བྱའོ། །དེ་ལ་མི་སྡུག་པ་སྒོམ་པ་ནི་མཛོད་ལས། ཀེང་རུས་ཆགས་བཅས་ཐམས་ཅད་ལ། རུས་པ་རྒྱ་མཚོའི་བར་དུ་ནི། །སྤྲོ་ཞིང་སྡུད་པས་ལས་དང་པོ། ཀེང་རུས་ནས་ནི་ཐོད་ ཕྱེད་བར། །བཏང་བས་སྦྱང་བ་བྱས་པར་བཤད། །སྨིན་མའི་བར་དུ་སེམས་འཛིན་པས། །ཡིད་ལ་བྱེད་པ་རྫོགས་པ་ཡིན། །ཞེས་པ་སྟེ་དང་པོ་ལུས་ནི་ཤ་ཁྲག་པགས་རུས་བད་མཁྲིསམཆིལ་སྣབས་བཤང་གཅི་སོགས་མི་གཙང་ བའི་རྫས་སོ་དྲུག་འདུས་བའི་རང་བཞིན་ཡིན་པ་ཤེས་པར་བྱ་སྟེ་དེ་དག་རེ་རེ་ནས་བསམ། དེ་ནས་གཞན་ཤི་བའི་རོ་ཞག་དུ་མ་ལོན་པ་སྟེ་བམ་པ་དང་རུལ་མྱགས་ཀྱི་སྔོ་བ་དང་དམར་བ་དང་བསྣགས་པ་དང་འབུས་བཤིགས་པ་དང་ཀེང་རུས་མ་ འཐོར་བ་དང་འཐོར་བ་དང་ཆར་ལྷགས་ཀྱིས་རུས་གོང་ཐི་བའི་མདོག་ལྟར་གྱུར་པ་རྣམས་ལ་བརྟག་ཅིང་བདག་གི་ལུས་ཀྱང་འདི་ལས་མ་འདས་སོ་ཞེས་ཡང་ཡང་བསམ་མོ། །ཡང་རང་གི་སྨིན་མཚམས་སུ་ཤུ་བས་རུལ་ཏེ་རུས་པ་དཀར་ལྷག་
Page: 235 ༄༅། །གིས་བྱུང་ཞིང་མཐར་ལུས་ཐམས་ཅད་བམ་པ་ལ་སོགས་པའི་གནས་སྐབས་སོ་སོར་རིམ་པར་གྱུར་ནས་མཐར་ཀེང་རུས་འཐོར་བ་ཡང་རྒྱ་མཚོའི་བར་དུ་ཐོར་གྱི་ཁྱབ་པའམ། ཡང་ན་རྒྱ་མཚོའི་བར་དེ་ལྟ་བུའི་རོས་ཁྱབ་པར་ བསམ་ཞིང་གང་གི་ལུས་ལ་ཆགས་པ་ལ་ཡང་དེ་ལྟར་བསམས་པས་ཆགས་པ་ལྡོག་པར་འགྱུར་རོ། །ཞེ་སྡང་གི་གཉེན་པོར་བྱམས་པ་ནི་སེམས་ཅན་ལ་དམིགས་པའི་བྱམས་པ་སྐྱེ་བ་གཏན་གྱི་ཕ་མར་ཤེས་པས་ཡིད་དུ་འོང་བའི་བློ་ཐོག་ མར་བདག་གི་མཛའ་བོ་ལྟ་བུ་ཡིད་དུ་འོང་བ་ནས་བརྩམས་ཏེ་མཐར་སེམས་ཅན་ཐམས་ཅད་ལ་མཉམ་པར་མ་གྱུར་གྱི་བར་སྒོམ་མོ། །གཏི་མུག་གི་གཉེན་པོར་རྟེན་འབྲེལ་ནི་སཱ་ལཱུ་ལྗང་པའི་མདོ་ལས་གསུངས་པ་ལྟར་ས་བོན་ཆུ་ལུད་དྲོད་ ས་གཞི་དུས་ལ་བརྟེན་ཏེ་མྱུ་གུ་འབྱུང་ཡང་དེ་དག་རེ་རེ་ཡང་མྱུ་གུ་སྐྱེད་པར་སེམས་པ་མེད་ཅིང་མྱུ་གུ་ཡང་སེམས་པ་མེད་ལ་སུས་ཀྱང་མ་བྱས་ན་ཡང་དེ་དག་ཚོགས་པ་ཙམ་ལས་མྱུ་གུར་སྣང་བར་འགྱུར་ལ་དེ་ལ་ས་བོན་ཡང་གཞན་ལ་མྱུ་གུ་ཡང་གཞན། ས་བོན་ཡང་མྱུ་གུར་མི་འགྱུར་ལ་ས་བོན་མེད་པར་ཡང་མི་སྐྱེ་ཞིང་ས་བོན་འགགས་པ་དང་མ་འགགས་པ་ལས་མི་སྐྱེ་ལ་དེ་ལས་གཞན་ནས་ཀྱང་མ་བྱུང་སྟེ་དེ་བཞིན་དུ་སཱ་ལཱུའི་བར་དུ་དེ་ལྟ་བུ་ཡིན་ལ་དེ་ལ་ནི་བདག་གམ་གཞན་ནམ་སྐྱེ་བའམ་མི་སྐྱེ་བ་ཞེས་གདགས་ སུ་མེད་དེ་སྒྱུ་མ་ལྟ་བུའོ། །དེས་ན་དངོས་པོ་ཐམས་ཅད་དེ་ལྟར་ཕྱིའི་རྟེན་འབྲེལ་རྒྱུ་རྐྱེན་དང་བཅས་པའོ། །ནང་གི་རྟེན་འབྲེལ་ལའང་གཉིས་ལས་རྒྱུ་དང་བཅས་པ་ནི་ཤེས་བྱ་དེ་ཁོ་ན་ཉིད་མ་ཤེས་པ་ནི་མ་རིག་པ་སྟེ་དེས་ཀུན་ནས་བསླང་ནས་ ཟག་བཅས་ཀྱི་ལས་དགེ་མི་དགེ་མི་གཡོ་བ་གང་རུང་འདུ་བྱེད་པས་ན་མ་རིག་པའི་རྐྱེན་གྱིས་འདུ་བྱེད་དོ། །ལས་དེའི་བག་ཆགས་གོས་པའི་སེམས་སྐྱེ་བ་ནི་རྣམ་པར་ཤེས་པའོ། །ལས་དེས་མངལ་དུ་ཉིང་མཚམས་སྦྱར་ཏེ་ནུར་ནུར་པོ་སོགས་
Page: 236 སུ་གྲུབ་པ་ནི་མིང་གཟུགས་སོ། །དེ་འཕེལ་བས་མིག་སོགས་རྫོགས་པ་ནི་སྐྱེ་མཆེད་དྲུག་གོ །དེ་ལས་ཡུལ་དབང་ཡིད་བྱེད་གསུམ་འདུས་པ་ནི་རེག་པའོ། །དེ་ལས་བདེ་སྡུག་བཏང་སྙོམས་གང་རུང་མྱོང་བ་ན་ཚོར་བའོ། །དེ་ལ་དགའ་ བའམ་འདོད་པར་ཞེན་པ་ནི་སྲེད་པའོ། །དེའི་རྒྱུ་ལེན་པ་ནི་ལེན་པའོ། །དེས་ཡང་སྲིད་གཞན་འགྲུབ་པའི་རྒྱུ་འཇོག་པ་སྲིད་པའོ། །རྒྱུ་དེས་ཕུང་པོ་ལྔ་གྲུབ་པ་སྐྱེ་བའོ། །སྐྱེས་ནས་ལུས་རྙིང་པ་ནི་རྒ་བ་དང་མཐར་ལུས་འདོར་བ་ནི་འཆི་བ་ སྟེ་རྒ་ཤིའོ། །དེའི་རྐྱེན་གྱིས་མྱ་ངན་དང་སྡུག་བསྔལ་དང་སྨྲེ་སྔགས་འདོན་པ་དང་ཡིད་མི་བདེ་བ་འཁྲུག་པ་རྣམས་འབྱུང་སྟེ་དེ་ལྟར་སྡུག་བསྔལ་གྱི་ཕུང་པོ་ཆེན་པོ་འདི་འབྱུང་བའོ། །འདི་ནི་གཙོ་བོར་འདོད་ཁམས་དང་མངལ་སྐྱེས་ལ་གཙོ་བོར་ དགོངས་ལ་བཅུ་གཉིས་པོ་འདི་ཡང་གསུམ་དུ་འདུ་སྟེ་ཉོན་མོངས་དང་ལས་དང་སྡུག་བསྔལ་ལོ། །དེ་ཡང་མ་རིག་པ་དང་སྲེད་པ་དང་ལེན་པ་དང་གསུམ་ནི་ཉོན་མོངས་པའོ་འདུ་བྱེད་དང་སྲིད་པ་ནི་ལས་སོ་རྣམ་ཤེས་ལ་སོགས་པ་བདུན་ནི་སྡུག་བསྔལ་ སྟེ་དབུ་མ་རྟེན་འབྱུང་ལས། ཐུབ་པས་རྟེན་འབྱུང་གསུངས་དེ་དག །ཉོན་མོངས་ལས་དང་སྡུག་བསྔལ་སྟེ། །གསུམ་པོ་དག་ཏུ་ཟད་པར་འདུས། དང་པོ་བརྒྱད་དགུ་པ་ཉོན་མོངས། །གཉིས་པ་བཅུ་པ་ལས་ཡིན་ཏེ། །ལྷག་མ་ བདུན་ནི་སྡུག་བསྔལ་ཡིན། །ཞེས་སོ། །དེས་ན་མ་རིག་པ་ནི་ས་བོན་འདེབས་མཁན་ལྟ་བུ། ལས་ནི་ཞིང་རྣམ་ཤེས་ནི་ས་བོན་སྲེད་པ་ནི་དྲོད་བཤེར་མིང་གཟུགས་ནི་མྱུ་གུ་གཞན་ནི་ལྗང་བུའི་སྐབས་ལ་སོགས་པ་ལྟ་བུ་སྟེ་འདི་རྣམས་ཀྱང་སྔ་མ་ སྔ་མ་མེད་ན་ཕྱི་མ་ཕྱི་མ་མི་འབྱུང་སྔ་མ་མ་འགགས་པར་ཕྱི་མ་མི་སྐྱེ་ལ་འགགས་ནས་ཀྱང་མི་སྐྱེ་སྔ་མ་ཡང་གཞན་ལ་ཕྱི་མ་ཡང་གཞན་སྔ་མ་ལས་གཞན་ནས་ཀྱང་ཕྱི་མ་མ་བྱུང་སྔ་མ་ཡང་ཕྱི་མ་སྐྱེ་པར་མི་སེམས་ལ་ཕྱི་མ་ཡང་སེམས་པ་མེད།
Page: 237 ༄༅། །སུས་ཀྱང་མ་བྱས་འོང་བ་དང་འགྲོ་བ་མེད་མོད་ཀྱང་རྒྱུ་རྐྱེན་ཚོགས་པ་ཙམ་ལས་འབྲས་བུ་མེད་བཞིན་དུ་སྐྱེད་པར་སྣང་བ་འདི་ནི་ལུགས་སུ་འབྱུང་བ་འཁོར་བའི་རྟེན་འབྲེལ་ཡིན་ལ། དགེ་བའི་བཤེས་གཉེན་གྱི་ མཐུས་ཆོས་ཐམས་ཅད་སྟོང་ཉིད་དུ་རྟོགས་པ་ན་མ་རིག་པའི་གནས་སྐབས་ལོག་པས་དེ་ལ་མ་རིག་པ་འགགས་པ་ཅེས་ཐ་སྙད་དུ་བྱེད་ཀྱི་མ་རིག་པ་ནི་སྔ་ན་ཡང་རྫས་སུ་མེད་ལ་ཕྱིས་གང་དུ་སོང་བ་ཡང་མེད་དོ། །དེས་ལས་སོག་པ་མེད་པས་ འདུ་བྱེད་སོགས་སྔ་མ་སྔ་མ་འགགས་པས་ཕྱི་མ་ཕྱི་མ་འགག་སྟེ་ཡིད་མི་བདེའི་བར་མི་འབྱུང་བ་ནི་མྱ་ངན་ལས་འདས་པ་ཅེས་བྱ་བ་རྟེན་འབྲེལ་ལུགས་ཟློག་སྟེ། དགེ་སློང་དག་འདི་ཡོད་པས་འདི་འབྱུང་འདི་སྐྱེས་པས་འདི་སྐྱེ་སྟེ་འདི་ལྟ་སྟེ་ མ་རིག་པའི་རྐྱེན་གྱིས་འདུ་བྱེད་ནས་ཡིད་མི་བདེ་དང་འཁྲུག་པའི་བར་དུ་འབྱུང་བར་འགྱུར་ཏེ་དེ་ལྟར་ན་སྡུག་བསྔལ་གྱི་ཕུང་པོ་ཆེན་པོ་འབའ་ཞིག་པ་འདི་འབྱུང་བར་འགྱུར་རོ། །དགེ་སློང་དག་འདི་འགགས་པས་འདི་འགག་སྟེ་མ་རིག་པ་འགགས་ པས་འདུ་བྱེད་འགག་པ་སོགས་ནས་སྡུག་བསྔལ་གྱི་ཕུང་པོ་ཆེན་པོ་འབའ་ཞིག་པ་འདི་འགག་པར་འགྱུར་རོ་ཞེས་སོ། །ནང་གི་རྟེན་འབྲེལ་རྐྱེན་དང་འབྲེལ་བ་ནི་ཁམས་དྲུག་འདུས་པ་ལས་ལུས་ཀྱི་རྣམ་པར་གྲུབ་ལ་ཁམས་རེ་རེ་ཞིང་ལུས་ཀྱི་སྲ་བ་སོགས་ སྒྲུབ་པར་མི་སེམ་ཞིང་སྲ་བ་སོགས་ཀྱང་དེས་བསྒྲུབས་པར་མི་རྟོག་ལ་བྱེད་པོ་གཞན་མེད་ཀྱང་ཚོགས་པའི་དབང་ལས་མེད་བཞིན་སྣང་བར་འགྱུར་བ་སྔ་མ་རྣམས་བཞིན་སྟེ་དེ་ལྟར་རྒྱུ་རྐྱེན་ཚོགས་ན་སྣང་བ་རྟེན་ཞིང་འབྲེལ་འབྱུང་དང་རང་བཞིན་སྣང་ བ་མེད་པ་སྟོང་པ་ཉིད་ཐ་མི་དད་པ་སྒྱུ་མ་ལྟ་བུ་འདི་ནི་ཆོས་རྣམས་ཀྱི་གནས་ཚུལ་སྟེ་གང་གིས་རྟེན་འབྲེལ་ཤེས་པ་དེས་ཆོས་ཤེས་ལ་ཆོས་ཤེས་པ་དེས་སངས་རྒྱས་ཤེས་སོ་ཞེས་གསུངས་ཏེ་འདི་ནི་དེ་བཞིན་གཤེགས་པའི་གསུང་གི་གསང་བ་
Page: 238 ཡིན་ནོ། །བདག་གཞན་མཉམ་པའི་བྱང་སེམས་སྒོམ་པ་ནི་བདག་གཞན་གཉི་གའང་བདེ་བ་འདོད་པ་དང་སྡུག་བསྔལ་མི་འདོད་པར་མཚུངས་ཤིང་མཉམ་པར་ཤེས་པར་བྱས་ལ་བདག་མི་འདོད་པ་དེ་གཞན་ལ་ཡང་མི་བྱ་བ་སྟེ། བདག་དང་གཞན་ དུ་མཉམ་པ་ནི། །དང་པོ་ཉིད་དུ་འབད་དེ་སྒོམ། །སོགས་ཀྱི་ཉམས་ལེན་ནོ། །བདག་གཞན་བརྗེ་བ་སྒོམ་པ་ནི། བྱིས་པས་རང་དོན་བྱས་པ་དང་། །ཐུབ་པས་གཞན་གྱི་དོན་མཛད་པ། འདི་གཉིས་ཀྱི་ནི་ཁྱད་པར་ལྟོས། །ཅེས་ སོགས་ཀྱིས་དགོས་པ་བསམས་ཏེ་དངོས་སམ་བསམ་པས་བདག་གིས་བདེ་དགེ་སེམས་ཅན་ལ་བཏང་ཞིང་གཞན་གྱི་སྡུག་བསྔལ་བདག་ལ་བླང་བ་ལ་སེམས་སྦྱོང་བ་སྟེ། བདག་དང་གཞན་དུ་བརྗེ་བྱ་བ། །གསང་བའི་དམ་པ་སྤྱད་པར་བྱ། ། ཞེས་སོགས་ཀྱི་ཉམས་ལེན་ནོ། །རྣམ་རྟོག་རགས་པའི་གཉེན་པོར་རླུང་ལ་བསླབ་པ་ནི་མཛོད་ལས། བགྲང་དང་རྗེས་འགྲོ་འཇོག་བ་དང་། །རྟོག་པ་དང་ནི་བསྒྱུར་བ་དང་། །ཡོངས་དག་རྣམ་པ་དྲུག་ཏུ་འདོད། །ཅེས་གསུངས་ཏེ། དབུགས་ དབྱུང་རྔུབ་ལ་སེམས་གཏད་ནས་དབུགས་ཁུག་བཅུའི་བར་དུ་མ་འཁྲུལ་བར་བགྲང་ཞིང་ཡང་འཕྲོ་བཅད་ཡང་བགྲང་བ་སྟེ། བརྟན་ནས་རིང་དུ་བར་མ་ཆད་པར་བགྲང་ངོ་། །རྗེས་སུ་འགྲོ་བ་ནི་རླུང་འདི་ལུས་ཐམས་ཅད་ལ་ཁྱབ་པའམ་ཚད་ཇི་སྲིད་ དུ་འཇུག་ཞེས་དབུགས་ཀྱི་རྗེས་སུ་བརྟགས་ཏེ་འཇུག་པ་ན་ལྐོག་མ་སྙིང་ག་ལྟེ་བ་བརླ་བྱིན་པ་སོར་མོའི་བར་དུ་འཇུག་པ་དང་འབྱུང་བ་ན་ཕྱིར་མཐོ་གང་འདོམ་གང་ཙམ་དུ་འབྱུང་བར་བལྟའོ། །འཇོག་པ་ནི། སྣ་རྩེ་ནས་རྐང་ཐེབ་ཀྱི་བར་ནོར་བུའི་ ཐག་པ་ལྟར་གནས་པར་བལྟས་ལ་འདིས་ཕན་གནོད་རེག་བྱ་གྲང་དྲོ་ཅི་ཞིག་ཅེས་རྟོག་པའོ། །ཉེ་བར་རྟོག་པ་ནི་རླུང་དེ་ཉིད་ཀྱང་འབྱུང་བ་བཞི་ལྡན་དུ་རྟོག་པ་དང་ཕུང་པོ་ལྔ་ལ་ཡང་ཉེ་བར་རྟོག་གོ །བསྒྱུར་བ་ནི། རླུང་ལ་དམིགས་པ་ལྟར་དམིགས་
Page: 239 ༄༅། །པ་གཞན་ལ་ཡང་བསྒྱུར་ཏེ་སྦྱོར་ལམ་ཆོས་མཆོག་གི་བར་དུ་དགེ་རྩ་སྐྱེད་པའོ། །ཡོངས་སུ་དག་པ་ནི་འབྲས་བུ་སྟེ་རྩེ་གཅིག་པ་ནས་མཐོང་ལམ་སོགས་ལ་འཇུག་གོ །འདི་ལས་སའི་སྙིང་པོ་འཁོར་ལོ་བཅུ་པ་ལས་ ནི་མིང་གི་རྣམ་གྲངས་ཅུང་ཟད་མི་མཚུངས་པར་གསུངས་ཏེ་བགྲང་བ་དང་རྗེས་སུ་འགྲོ་བ་དང་ཞི་གནས་དང་ལྷག་མཐོང་དང་འཇུག་པ་དང་ཡོངས་སུ་དག་པ་ལ་རྟོག་པའོ་ཞེས་གསུངས་ཏེ། དང་པོས་རྟོག་དཔྱོད་ཐུལ་ཞིང་དབུགས་འབྱུང་ བའི་མཚན་ཉིད་ཤེས་པ་དང་གཉིས་པས་རྟོག་དཔྱོད་དང་བྲལ་ཞིང་དབུགས་འཇུག་པ་ལ་མཁས་པ་དང་གསུམ་པས་དབུགས་ཕྱི་ནང་དུ་འབྲེལ་བར་ཤེས་ཤིང་ཏིང་ངེ་འཛིན་འཐོབ་པ་དང་བཞི་པས་དབུགས་ཀྱི་ཟད་པ་ཤེས་ཤིང་སེམས་སེམས་ བྱུང་སོ་སོར་རྟོགས་པ་དང༌ལྔ་པས་ཉེར་ལེན་གྱི་ཕུང་པོ་སྤོང་བར་མཁས་ཤིང་འཕགས་པའི་སར་འཇུག་པའི་སྦྱོར་བ་དང་དྲུག་པས་ཉོན་མོངས་སྤོང་ཞིང་ལྟ་བ་དག་པ་སྟེ་བྱེད་ལས་གཉིས་གཉིས་སུ་བསྟན་ཏོ། །དེ་ལྟར་སྦྱོར་བས་ཉོན་མོངས་ པ་ཞི་བར་བྱས་ཏེ་བསམ་གཏན་དངོས་ལ་གསུམ་ལས་མཐོང་ཆོས་བདེར་གནས་ཀྱི་བསམ་གཏན་ནི་བྱང་ས་ལས། དེ་ལ་བྱང་ཆུབ་སེམས་དཔའ་རྣམས་ཀྱི་བསམ་གཏན་ནི་རྣམ་པར་རྟོག་པ་ཐམས་ཅད་དང་བྲལ་བ་ལུས་སེམས་ཤིན་ཏུ་སྦྱངས་བ་ བསྐྱེད་པ་མཆོག་ཏུ་རབ་ཏུ་ཞི་བ་རློམ་སེམས་དང་བྲལ་བ་རོ་མྱང་བ་མེད་པ་མཚན་མ་ཐམས་ཅད་དང་བྲལ་བ་གང་ཡིན་པ་འདི་ནི་དེ་དག་གི་ཚེ་འདི་ལ་བདེ་བར་གནས་པ་ཡིན་པར་རིག་པར་བྱའོ་ཞེས་སོ། །ཡོན་ཏན་སྒྲུབ་པའི་བསམ་གཏན་ནི་ཐུན་ མོང་བ་ཟད་པར་བཅུ་དང་ཟིལ་གནོན་བརྒྱད་དང་རྣམ་ཐར་བརྒྱད་སོགས་སྒྲུབ་ཅིང་ཐུན་མོང་མ་ཡིན་པ་ཉན་རང་གི་སྤྱོད་ཡུལ་ལས་ཆེས་འདས་པའི་རྣམ་ཐར་དང་གཟུངས་སྤོབས་རྒྱ་མཚོ་སྒྲུབ་པའོ། །སེམས་ཅན་དོན་བྱེད་ནི་ཏིང་ངེ་འཛིན་གྱི་མཐུས་
Page: 240 ལུས་ཀྱི་བཀོད་པ་མཐའ་ཡས་པར་སྤྲུལ་ཏེ་གཞན་དོན་བཅུ་གཅིག་པོ་སྒྲུབ་པའོ། །དེ་ལ་ཏིང་ངེ་འཛིན་ཇི་ལྟར་སྒོམ་ཚུལ་ནི་དབེན་པར་ལུས་སྐྱིལ་ཀྲུང་མཉམ་བཞག་དང་ལྡན་པས་སེམས་གནས་པའི་ཐབས་དགུ་བརྩམ་སྟེ། དེ་ཡང་གང་ཡང་ རུང་བའི་དམིགས་པ་ལ་སེམས་རྩེ་གཅིག་ཏུ་བསྡུས་ཏེ་འཇོག་པ་ནི་ནང་དུ་འཇོག་པ་ཞེས་བྱ་སྟེ། དམིགས་པ་ལ་ནི་སེམས་གཏད་ནས། །ཅེས་སོ། །རང་བཞིན་གྱིས་གཡོ་བའི་སེམས་དེ་ཉིད་མ་ཡེངས་པར་དམིགས་པ་ལ་གཏོད་པ་ནི་ཀུན་ ཏུ་འཇོག་པའམ་མི་གཡོ་བར་འཇོག་པ་སྟེ། དེ་རྒྱུན་རྣམ་པར་གཡེང་མི་བྱ། །ཞེས་སོ། །སེམས་ཅུང་ཟད་ཡེངས་ན་དེ་མ་ཐག་ཏུ་དྲན་པར་བྱས་ལ་སླར་ཡང་འཇོག་པ་ནི་བསྡུས་ཏེ་འཇོག་པའམ་ཡོངས་སུ་འཇོག་པ་སྟེ། རྣམ་གཡེང་མྱུར་ དུ་རྟོགས་བྱས་ནས། །དེ་ལ་སླར་ཡང་བསླན་པར་བྱ། །ཞེས་སོ། །སླར་ཡང་གོང་ནས་གོང་དུ་སེམས་ཕྲ་བར་བསྡུས་ཤིང་འཇོག་པ་ནི་ཉེ་བར་འཇོག་པ་སྟེ། བློ་ལྡན་གོང་ནས་གོང་དུ་ཡང་། །སེམས་ནི་ནང་དུ་བསྡུ་བར་བྱ། །ཞེས་སོ། ། དེས་ཏིང་ངེ་འཛིན་ཅུང་ཟད་སྐྱེས་བས་དགའ་ཞིང་བདེ་བ་སོགས་ཀྱི་ཡོན་ཏན་མཐོང་བས་ཡིད་ཆེས་ཏེ་སྤྲོ་བས་འཇུག་པ་ནི་དུལ་བར་བྱེད་པ་སྟེ། དེ་ནས་ཡོན་ཏན་མཐོང་བའི་ཕྱིར། །ཏིང་ངེ་འཛིན་ལ་སེམས་གདུལ་ལོ། །ཞེས་སོ། །དེ་ནས་ སེམས་ཀྱི་གཡེང་བ་ཕྲ་མོའང་སྐྱོན་དུ་མཐོང་བས་དེས་མ་གོས་པར་བྱེད་པ་ནི་ཞི་བར་བྱེད་པ་སྟེ། རྣམ་གཡེང་ཉེས་པ་མཐོང་ནས་ནི། །དེ་ལ་མི་དགའ་ཞི་བར་བྱ། །ཞེས་སོ། །དེ་ནས་ཆགས་པ་དང་ཡིད་མི་བདེ་སོགས་རྩ་ཉོན་ཉེ་ཉོན་ཕྲ་མོ་ཙམ་ལྡང་ བ་ནས་རིག་པར་བྱས་ཏེ་དེས་མ་གོས་པར་འཇོག་པ་ནི་ཉེ་བར་ཞི་བར་བྱེད་པ་སྟེ། རྣབ་སེམས་ཡིད་མི་བདེ་ལ་སོགས། །ལངས་པ་དེ་བཞིན་ཞི་བར་བྱ། །ཞེས་སོ། །དེ་ནས་འདུ་བྱེད་ཅེས་བྱ་བ་འབད་པ་དང་བཅས་པས་རྒྱུད་གཅིག་པ་སྟེ། དེ་ནས་
Page: 241 ༄༅། །སྡོམ་བརྩོན་ཅན་གྱིས་ནི། །སེམས་ལ་མངོན་པར་འདུ་བྱེད་བཅས། །རང་གི་ངང་གིས་འབྱུང་བ་འཐོབ། །ཅེས་སོ། །དེ་ནས་འབད་མེད་ཏུ་རྩེ་གཅིག་ཏུ་གནས་པ་ནི་ཏིང་ངེ་འཛིན་དུ་བྱེད་པའམ་མཉམ་པར་འཇོག་པ་ཅེས་ བྱ་བ་ཞི་གནས་དངོས་ཏེ། དེ་གོམས་པ་ལས་འདུ་མི་བྱེད། །ཅེས་སོ། །དེས་ན་ཞི་གནས་ལ་འཇུག་པའི་མན་ངག་ནི་དགུ་པོ་དེ་ཙམ་ཞིག་སྟེ་ཤཱནྟི་པའི་ཤེར་ཕྱིན་མན་ངག་ལས། བཅོམ་ལྡན་འདས་ཀྱིས་ཞི་གནས་ནི་རྣམ་པ་དགུར་བཀའ་ བསྩལ་ཏེ་ཇི་ལྟ་བ་བཞིན་དུ་སེམས་ནང་དུ་འཇོག་པར་བྱེད་ཀུན་ཏུ་འཇོག་པར་བྱེད་ཅེས་སོགས་དང་། ཡུམ་ལས། དེ་ལ་སེམས་མཉམ་པར་འཇོག་པར་བྱེད་ཡང་དག་པར་འཇོག་པར་བྱེད་རྣམ་པར་འཇོག་པར་བྱེད་དུལ་བར་བྱེད་ཉེ་བར་དུལ་ བར་བྱེད་ཞི་བར་བྱེད་ཉེ་བར་ཞི་བར་བྱེད་གཅིག་པ་ཉིད་དུ་བྱེད་ཏིང་ངེ་འཛིན་དུ་བྱེད་དོ་ཅེས་སོ། །དེ་ལྟར་ཞི་གནས་དང་ལྡན་པས་བསམ་གཏན་གྱི་དངོས་གཞི་འཐོབ་པར་བྱ་བའི་ཕྱིར་ཉེར་བསྡོགས་ཡིད་བྱེད་བདུན་སྒོམ་སྟེ་ཐོས་བསམ་མམ་སྒོམ་ པ་ལས་བྱུང་བའི་ཤེས་རབ་ཀྱིས་ཆོས་གང་དང་གང་གི་མཚན་ཉིད་ཤེས་པར་བྱས་ཏེ་རྩེ་གཅིག་ཏུ་སེམས་པ་ནི་མཚན་ཉིད་སོ་སོར་རིག་པ་ཡིད་བྱེད་དེ། དེ་ནས་དང་པོར་སྡོམ་བརྩོན་དེ། །མདོ་ཡི་སྡེ་ལ་སོགས་པའི་ཆོས། །མི་གཉིས་དོན་ནི་ རྣམ་འབྱེད་པ། །མདོ་སོགས་མིང་ལ་སེམས་འཇོག་གོ །ཞེས་སོ། །ཚིག་དོན་གྱི་རབ་ཏུ་དབྱེ་བ་ལ་དཔྱོད་ཅིང་མོས་པས་འཇོག་པ་ནི་མོས་པ་ཡིད་བྱེད་དེ། དེ་ནས་དེ་ནི་རིམ་བཞིན་དུ། །ཚིག་རབ་དབྱེ་ལ་དཔྱོད་བྱེད་ཅིང་། །ཞེས་སོ། །སོ་ སོའི་ནང་གསེས་ཕྲ་བ་ལ་དཔྱོད་པས་མཚན་རྟོག་གཞན་མི་འཇུག་པ་ནི་རབ་ཏུ་དབེན་པ་ཡིད་བྱེད་དེ། སོ་སོའི་ནང་ལ་ཚུལ་བཞིན་དུ། །དེ་ཡི་དོན་ཡང་རྣམ་པར་དཔྱོད། །ཅེས་སོ། །དོན་དེ་དག་ངེས་པར་བཟུང་བས་རྩེ་གཅིག་པར་གནས་
Page: 242 སྟེ་དགའ་བདེ་ཐོབ་པ་ནི་དགའ་བ་སྡུད་པ་ཡིད་བྱེད་དེ། དོན་དེ་དག་ནི་ངེས་བཟུང་ནས། །ཅེས་སོ། །ཉོན་མོངས་ཀྱི་ཡུལ་ལས་སླར་སྐྱེ་མི་སྐྱེ་བརྟགས་ཏེ་སྤོང་བ་སོགས་སྔ་མ་རྣམས་ལས་ཀྱང་ཕྲ་ཞིང་ཞིབ་པར་དཔྱོད་པ་ངང་གིས་འཇུག་པ་ནི་ དཔྱོད་པ་ཡིད་བྱེད་དེ། ཆོས་ལ་ཀུན་ནས་སྡོམ་པར་བྱེད། །ཅེས་སོ། །དེ་ལས་ཉོན་མོངས་པའི་གཉེན་པོར་གྱུར་པའི་རྩེ་གཅིག་པ་སྐྱེས་པ་ནི་སྦྱོར་བའི་མཐར་ཐུག་ཡིད་ལ་བྱེད་པ་སྟེ། དེ་ཡི་དོན་ནི་འཐོབ་བྱའི་ཕྱིར། །དེ་ནས་དེ་ནི་སྨོན་པར་ བྱེད། །ཅེས་སོ། །དེ་ནས་བསམ་གཏན་གྱི་དངོས་གཞི་ལ་གེགས་བྱེད་ཀྱི་དྲི་མ་སྐད་ཅིག་གིས་འཇོམས་པར་ནུས་པའི་ཏིང་ངེ་འཛིན་ཕྲ་ཞིང་གསལ་བར་སྐྱེས་པ་སྦྱོར་མཐའི་འབྲས་བུ་ཡིད་ལ་བྱེད་པ་ནི་ཉེར་བསྡོགས་མི་ལྕོགས་པ་མེད་པ་སྟེ་སྐད་ཅིག་ དེ་ཉིད་དུ་བསམ་གཏན་གྱི་དངོས་གཞི་སྐྱེའོ། །ཡིད་བྱེད་བདུན་པ་དེ་ཇི་ལྟར་སྐྱེད་ཅེ་ན་སྔ་མ་ཉེར་བསྡོགས་དག་པ་བ་དྲུག་གི་སྤང་གཉེན་དང་ཏིང་ངེ་འཛིན་ལ་སོ་སོར་ཕྲ་བར་བརྟག་ཅིང་ཡིད་ལ་བྱེད་པ་ཉིད་ཀྱང་མི་དམིགས་པར་བཞག་པས་སྐྱེ་བ་ སྟེ། ཡིད་ཀྱི་བརྗོད་པས་རྒྱུན་ཆགས་སུ། །བཙལ་བྱ་སོ་སོར་བརྟག་པར་བྱ། །ཡིད་ལ་བྱེད་པ་བརྗོད་མེད་པར། །རོ་གཅིག་པས་ཀྱང་དཔྱད་པར་བྱ། །ཆོས་ཀྱི་མིང་ནི་བསྡམས་པའང་འདིའི། །ཞི་གནས་ལམ་དུ་ཤེས་པར་ བྱ། །ཞེས་སོ། དེ་ལྟར་ཉེར་བསྡོགས་མི་ལྕོགས་པ་མེད་པའི་དེ་མ་ཐག་ཏུ་བསམ་གཏན་གྱི་དངོས་གཞི་སྐྱེ་སྟེ་ཙམ་པོ་བ་དང་ཁྱད་པར་ཅན་ཕན་ཡོན་གྱི་ཡན་ལག་དགའ་བདེ་གཉིས་གཉེན་པོའི་ཡན་ལག་རྟོག་དཔྱོད་གཉིས་རྩེ་གཅིག་པ་ངོ་བོའི་ཆ་ སྟེ་ཡན་ལག་ལྔ་དང་ལྡན་པ་སྟེ། མཛོད་ལས། དང་པོ་ལ་ལྔ་རྟོག་དཔྱོད་དང་། །དགའ་དང་བདེ་དང་ཏིང་འཛིན་རྣམས། །ཞེས་སོ། །དེ་བཞིན་དུ་གོང་ནས་གོང་དུ་མཉམ་པར་བཞག་པས་རྟོག་དཔྱོད་ནུབ་སྟེ་ནང་རབ་དང་གཉེན་པོའི་
Page: 243 ༄༅། །ཡན་ལག་དགའ་བདེ་ཕན་ཡོན་གྱི་ཡན་ལགརྩེ་གཅིག་པ་ངོ་བོ་སྟེ་གཉིས་པ་ཡན་ལག་བཞི་ལྡན་དང་། དེ་ནས་དགའ་བ་ནུབ་སྟེ་བཏང་སྙོམས་དང་དྲན་པ་དང་ཤེས་བཞིན་གསུམ་གཉེན་པོའི་ཡན་ལགབདེ་བ་ཕན་ ཡོན། རྩེ་གཅིག་པ་ངོ་བོ་སྟེ་གསུམ་པ་ཡན་ལག་ལྔ་ལྡན་དང་། དེ་ནས་བདེ་བ་ནུབ་སྟེ་བདེ་བ་ཡང་མ་ཡིན་སྡུག་བསྔལ་ཡང་མ་ཡིན་པ་ཕན་ཡོན་གྱི་ཡན་ལག་གཉིས་དང་བཏང་སྙོམས་གཉེན་པོ་རྩེ་གཅིག་ངོ་བོ་སྟེ་བསམ་གཏན་བཞི་པ་ཡན་ ལག་བཞི་ལྡན་ཏེ། མཛོད་ལས། གཉིས་པ་ལ་ནི་ཡན་ལག་བཞི། རབ་དང་དང་ནི་དགའ་ལ་སོགས། །གསུམ་པ་ལ་ལྔ་བཏང་སྙོམས་དང་། །དྲན་དང་ཤེས་བཞིན་བདེ་དང་གནས། ། མཐའ་ན་བཞིར་དྲན་བཏང་སྙོམས་དང་། །བདེ་མིན་སྡུག་མིན་ཏིང་འཛིན་རྣམས། །ཞེས་སོ། །དེ་ལ་རྟོག་དཔྱོད་ནི་མེ་ལྟ་བུ་དགའ་བ་ཆུ་ལྟ་བུ་བདེ་བ་དང་བཅས་པའི་ཡིད་ཀྱི་གཡོ་བ་རླུང་ལྟ་བུ་ལས་བསམ་གཏན་དང་པོ་ན་དེ་གསུམ་ག་ ཡོད་པའི་ཕྱིར་ཚངས་རིས་དང་ཚངས་པའི་མདུན་ན་འདོན་དང་། ཚངས་ཆེན་ཏེ་བསམ་གཏན་དང་པོའི་གནས་གསུམ་མེ་ཆུ་རླུང་གསུམ་གར་གྱིས་འཇིག་པའོ། །གཉིས་པ་ན་རྟོག་དཔྱོད་མེ་ལྟ་བུ་མེད་ལ་གཞན་གཉིས་ལྡན་པའི་ཕྱིར། འོད་ཆུང༌། ཚད་ མེད་འོད། འོད་གསལ་ཏེ་བསམ་གཏན་གཉིས་པའི་གནས་གསུམ་མེས་མི་འཇིག་ལ་ཆུ་དང་རླུང་གིས་འཇིག་པའོ། །གསུམ་པ་ན་དགའ་བ་ཆུ་ལྟ་བུ་ཡང་མེད་ལ་བདེ་བའི་འདུ་བྱེད་གཡོ་བ་རླུང་ལྟ་བུ་ཁོ་ན་ཡོད་པའི་ཕྱིར་དགེ་ཆུང༌ཚད་མེད་དགེ་ དགེ་རྒྱས་ཏེ་བསམ་གཏན་གསུམ་པའི་གནས་གསུམ་རླུང་ཁོ་ན་ལས་གཞན་གྱིས་མི་འཇིག་པའོ། །བསམ་གཏན་བཞི་པ་ན་སྐྱོན་དེ་གསུམ་ག་མེད་པའི་ཕྱིར་སྤྲིན་མེད་བསོད་ནམས་སྐྱེས་འབྲས་བུ་ཆེ་སྟེ་བཞི་པའི་གནས་གསུམ་འབྱུང་བའི་
Page: 244 རྐྱེན་གྱིས་མི་འཇིག་ལ་ནང་གི་སེམས་ཅན་ཤི་འཕོས་པ་ན་ཕྱིའི་གཞལ་མེད་ཁང་མི་སྣང་བའོ། །བཞི་པའི་དངོས་གཞི་ཁྱད་པར་ཅན་ལ་བརྟེན་ནས་མངོན་པར་ཤེས་པའི་ལམ་ལས་རྫུ་འཕྲུལ་གྱི་མངོན་ཤེས་དང་ལྷའི་རྣ་བ་དང་གཞན་སེམས་ ཤེས་པ་དང༌སྔོན་གནས་རྗེས་སུ་དྲན་པ་དང༌ལྷའི་མིག་སྟེ་མངོན་པར་ཤེས་པ་ལྔ་སྐྱེད་པར་བྱེད་ལ་འདས་ལམ་དང་འབྲེལ་ན་ཟག་པ་ཟད་པའི་ཐབས་ཤེས་པ་དང་ཟག་པ་ཟད་པའི་མངོན་པར་ཤེས་པ་ཉིད་ཀྱང་སྐྱེ་སྟེ། བསམ་གཏན་བཞི་པ་ ཤིན་ཏུ་དག་ཐོབ་ནས། །མི་རྟོག་ཡེ་ཤེས་ཡོངས་སུ་བཟུང་བ་ཡིས། །ཇི་ལྟའི་རྣམ་གནས་ཡིད་ལ་བྱེད་པ་ལས། །མངོན་པར་ཤེས་པ་ཐོགས་མེད་འབྱུང་བར་འགྱུར། །ཞེས་སོ། དེ་ལྟར་བཞི་པ་ཐོབ་ནས་གཟུགས་ཀྱི་འདུ་ཤེས་ བཀག་སྟེ་གོང་ནས་གོང་དུ་ཕྲ་བར་བསྒོམས་པས་ནམ་མཁའ་མཐའ་ཡས་དང་རྣམ་ཤེས་མཐའ་ཡས་དང་ཅི་ཡང་མེད་པ་དང་ཡོད་མིན་མེད་མིན་གྱི་སྐྱེ་མཆེད་དེ་གཟུགས་མེད་བཞིའི་ཏིང་ངེ་འཛིན་སྐྱེ་བར་འགྱུར་ལ་དེའི་མཐར་འཕགས་པ་རྣམས་ ཀྱིས་སྡུག་བསྔལ་དང་ཚོར་བ་འགོག་པ་ལ་ཞུགས་པ་ནི་འགོག་པའི་སྙོམས་འཇུག་སྟེ། བསམ་གཏན་བཞི་གཟུགས་མེད་བཞི་འགོག་པ་དང་བཅས་པ་ནི་མཐར་གྱིས་གནས་པའི་སྙོམས་འཇུག་དགུ་ཡིན་ནོ། །སྙོམས་འཇུག་དང་པོ་བརྒྱད་ནི་ འཇིག་རྟེན་དང་འཇིག་རྟེན་ལས་འདས་པའི་ལམ་ཐམས་ཅད་ཀྱི་ཐུན་མོང་བ་ཡིན་ཏེ་ཕྱི་རོལ་པའི་དྲང་སྲོང་རྣམས་ཀྱིས་ཀྱང་སྲིད་རྩེའི་སྐྱེ་མཆེད་ཀྱི་བར་དུ་འགྲུབ་པའི་ཕྱིར་དང་དགྲ་བཅོམ་པ་གཉིས་ཀའི་ཆ་ལས་རྣམ་གྲོལ་རྣམས་དང་རང་སངས་ རྒྱས་རྣམས་ཀྱང་དགུ་ག་ལ་སྙོམས་པར་འཇུག་པའི་ཕྱིར་དང་། བྱང་ཆུབ་སེམས་དཔའ་རྣམས་ཀྱང་ཏིང་ངེ་འཛིན་ཐམས་ཅད་ལ་རྩལ་སྦྱོང་བའི་ཕྱིར་དང་བྱང་ཆུབ་ཀྱི་ཤིང་དྲུང་དུ་འཚང་རྒྱ་བ་ན་ཡང་བསམ་གཏན་བཞི་པའི་མཐར་ཟག་ཟད་ཀྱི་
Page: 245 ༄༅། །ཐབས་ཤེས་པའི་མངོན་ཤེས་ཀྱི་མཐར་ཐུག་རྡོ་རྗེ་ལྟ་བུའི་ཏིང་ངེ་འཛིན་ལས་ཟད་པ་དང་མི་སྐྱེ་བ་མཁྱེན་ནས་འཚང་རྒྱ་བའི་ཕྱིར་དང༌། སྟོན་པ་མྱ་ངན་ལས་འདས་ན་ཡང་བསམ་གཏན་བཞི་པ་ལས་མྱ་ངན་ལས་འདའ་ བའི་ཕྱིར་རོ། །འོན་ཀྱང་བྱང་ཆུབ་སེམས་དཔའ་རྣམས་ཁམས་གོང་དུ་སྐྱེ་བའི་ཕྱིར་བསམ་གཏན་སྒྲུབ་པ་མ་ཡིན་ཏེ། སེམས་ཅན་གྱི་དོན་འབྱུང་བའི་གནས་ནི་གཙོ་བོར་འདོད་ཁམས་པའི་ཡིན་པའི་ཕྱིར་དང་གཟུགས་མེད་དུ་གཞན་དོན་གཏན་ མི་འབྱུང་བའི་ཕྱིར་ཏེ། བསམ་གཏན་ཏིང་ངེ་འཛིན་ལ་གནས་ཀྱང་མཚན་མ་མེད། དེ་ལ་གནས་རྣམས་གལ་ཏེ་ལུས་ནི་ཞིག་གྱུར་ན། །བསམས་པ་ཇི་བཞིན་འདོད་པའི་ཁམས་སུ་ཡང་སྐྱེའོ། །ཞེས་དང་། བྱང་ཆུབ་ཡོན་ཏན་ཕ་རོལ་ ཕྱིན་ཉམས་འགྱུར་འོང་ཞེས། །གཟུགས་མེད་ཁམས་སུ་སྐྱེ་བ་དོན་དུ་གཉེར་མི་བྱེད། །ཅེས་སོ། །དེས་ན་བྱང་ཆུབ་སེམས་དཔའ་རྣམས་བསམ་གཏན་གྱི་བདེ་བ་ཐམས་ཅད་ཐོབ་ཀྱང་ཇི་མི་སྙམ་པས་དོར་ཏེ་འདོད་པའི་ཁམས་སྡུག་བསྔལ་མཐའ་ ཡས་པའི་གསེབ་ཏུ་སྙིང་རྗེ་ཁོ་ནས་ཞུགས་ཏེ་འདོད་པས་མ་གོས་པར་འགྲོ་བའི་དོན་དུབ་པ་མེད་པར་སྤྱོད་པ་ནི་ངོ་མཚར་མཐའ་ཡས་པའི་གནས་ཏེ། བསམ་གཏན་ལྡན་པ་བསམ་གཏན་ཏིང་འཛིན་ཐོབ་ནས་སླར། །ཕྱིར་ཡང་འདོད་པའི་ ཁམས་སུ་གནས་ཤིང་ཆགས་པ་མེད། །ཆུ་ནང་པདྨ་བཞིན་དུ་བྱིས་པའི་ཆོས་མི་གནས། །ཅེས་སོ། །འགོག་པའི་སྙོམས་འཇུག་ནི། སོ་སོ་སྐྱེ་བོས་ནུས་པ་གཏན་མེད་ལ་དགྲ་བཅོམ་པ་དབང་བརྟུལ་རྣམས་ཀྱིས་ཀྱང་འཇུག་མི་ནུས་ཤིང་དགྲ་ བཅོམ་པ་རྣམ་ཐར་བརྒྱད་ལྡན་དང་རང་སངས་རྒྱས་རྣམས་ཀྱིས་ནི་དུས་ཀྱི་འཕེན་པ་ཇི་ཙམ་དུ་བཏང་བ་དེ་ཙམ་དུ་འཇུག་ཞིང་དེ་ནས་ལྡང་ལ། བྱང་ཆུབ་སེམས་དཔའས་ས་དང་པོ་ཐོབ་ནས་འཇུག་པར་ནུས་མོད་ཀྱང་ཡང་དག་མཐའ་དུས་མིན་དུ་མངོན་
Page: 246 དུ་བྱེད་པའི་དགག་བྱ་ཡོད་པའི་ཕྱིར་འདི་ལ་ཞག་བདུན་ལས་ལྷག་པར་མི་འཇོག་པར་སྟོན་པས་བཅའ་བ་མཛད་པ་ཡིན་ལ། ས་བརྒྱད་པ་བ་ཡན་ཆད་ནི་འགོག་པ་ལ་དབང་ཐོབ་པས་སྐད་ཅིག་གིས་ཀྱང་འཇུག་ཅིང་ལྡང་བ་བྱ་ནམ་མཁའ་ལ་ བྱ་བ་བཞིན་དུ་སྤྱོད་ཅིང་མཐར་ཐུག་ངོ་བོ་ཉིད་ཀྱི་སྐུ་འགོག་པ་ཆེན་པོ་ལས་ནམ་ཡང་མི་ལྡང་བར་འགྲོ་བའི་དོན་འབད་མེད་དུ་འབྱུང་བ་ལ་ནི་རྫོགས་པའི་སངས་རྒྱས་ཞེས་བྱའོ། །དེ་ཡང་བསམ་གཏན་གྱི་སྒྲིབ་པ་ནི་ལྔ་སྟེ། རྒོད་འགྱོད་དང་གཉིད་རྨུགས་ དང་གནོད་སེམས་དང་འདོད་འདུན་དང་ཐེ་ཚོམ་མོ། །ཡང་ན་རྒོད། འགྱོད། གཉིད། རྨུགས། ཐེ་ཚོམ་སྟེ་ལྔར་ཡང་བཤད་དོ། །དེ་ལ་ཞི་གནས་ནི་རྒོད་འགྱོད་ཀྱི་གཉེན་པོ་ཡིན་ལ་ལྷག་མཐོང་ནི་གཉིད་རྨུགས་ཀྱི་གཉེན་པོ་ཡིན་ཞིང་ཐེ་ཚོམ་ནི་ གཉི་གས་ཅི་རིགས་སུ་མགོ་གནོན་ཞིང་མཐར་མཐོང་ལམ་དུ་སྤོང་བ་ཡིན་ལ་གཉིད་རྨུགས་དག་པའི་ཚེ་ཞི་གནས་གྲུབ་པ་དང༌རྒོད་འགྱོད་དག་པའི་ཚེ་ལྷག་མཐོང་གྲུབ་པ་ཅེས་གསུངས་ལ། ཞི་གནས་གྲུབ་པ་ནི་ལུས་སེམས་ཤིན་ཏུ་སྦྱངས་པ་ འཐོབ་པར་འགྱུར་ཏེ་སྐྱིལ་མོ་ཀྲུང་གཅིག་གིས་ལོ་ཟླར་འདས་ཀྱང་ཟུག་རྔུ་མེད་ཅིང་ཁམ་གྱི་ཟས་ལ་མ་ལྟོས་པ་དང་སེམས་ལས་སུ་རུང་བས་ཤིན་ཏུ་ཐུལ་བ་གཉེན་པོའི་རང་དབང་ཅན་དུ་འགྱུར་བ་ཡིན་ནོ། །ཡང་ན་བསམ་གཏན་གྱི་མི་མཐུན་པའི་ ཕྱོགས་དྲུག་སྟེ་ལེ་ལོ་དང་དམིགས་པ་བརྗེད་པ་དང་ཞུམ་པ་དང་རྒོད་པ་དང༌བསྒྲིམས་ཆེ་པ་དང་མ་བསྒྲིམས་ཆེས་པའོ། །དེ་དག་གི་གཉེན་པོར་དད་པ་དང་འདུན་པ་དང་རྩོལ་བ་དང་ཤིན་ཏུ་སྦྱངས་པ་དང་དྲན་པ་དང་ཤེས་བཞིན་དང་བཏང་སྙོམས་དང་སེམས་ པ་སྟེ་སྤོང་བའི་འདུ་བྱེད་བརྒྱད་བསྟན་ཏོ། །དེ་ཡང་དང་པོ་བཞི་ནི་ལེ་ལོའི་གཉེན་པོ་དང་དྲན་པ་ནི་དམིགས་པ་བརྗེད་པའི་གཉེན་པོ་དང་ཤེས་བཞིན་ནི་ཞུམ་རྒོད་ཀྱི་གཉེན་པོ་དང་བཏང་སྙོམས་ནི་བསྒྲིམས་ཆེས་པའི་གཉེན་པོ་དང་སེམས་པ་ནི་
Page: 247 ༄༅། །མ་བསྒྲིམས་ཆེས་བའི་གཉེན་པོར་བཞག་གོ །མདོར་ན་དེ་ཐམས་ཅད་སྒྲིམ་པ་དང་གློད་པ་གཉིས་སུ་འདུས་ཏེ་རྣམ་གཡེང་གི་གཉེན་པོར་རྩེ་གཅིག་ཏུ་སྒོམ་པ་སྒྲིམ་པ་དང་བསྒྲིམས་ཆེས་པས་མི་གནས་པ་ན་བཏང་སྙོམས་སུ་ བཞག་པ་གློད་པའོ། །ཡང་ལས་དང་པོ་པས་མེ་ཏོག་གམ་སྐུ་གཟུགས་ལྟ་བུ་མདུན་དུ་བཞག་པ་ལ་རྩེ་གཅིག་ཏུ་བསྡུས་ཏེ་སྒོམ་པའམ་བསྒོམས་པའི་སྐུ་གཟུགས་ལ་སེམས་འཛིན་པའང་སྟེ། ཀ་མ་ལ་ཤཱི་ལའི་དབུ་མའི་སྒོམ་རིམ་དག་ལས། གསུང་རབ་ལ་སྦྱངས་པ་རྣམས་དེའི་ཚིག་དོན་ལ་རྩེ་གཅིག་ཏུ་དམིགས་པས་སྒྲུབ་པ་དབང་རྣོན་གྱི་ཞི་གནས་སྒྲུབ་ཚུལ་དང་། མ་སྦྱངས་པ་རྣམས་སྐུའམ་མེ་ཏོག་སོགས་ལ་སེམས་འཛིན་པ་དབང་བརྟུལ་གྱི་སྒྲུབ་ཚུལ་གཉིས་གསུངས་པ་དང་སྒོམ་ རིམ་ཆུང་བར། གསེར་གྱི་ཁ་དོག་ལྟ་བུའི་སྐུ་ལུས་ཀྱིས། །འཇིག་རྟེན་མགོན་པོ་ཀུན་ཏུ་མཛེས་པ་སྟེ། །དམིགས་པ་དེ་ལ་གང་གིས་སེམས་འཇོག་པ། །བྱང་ཆུབ་སེམས་དཔའ་དེ་མཉམ་བཞག་ཅེས་བྱ། ཞེས་ཏིང་ངེ་འཛིན་རྒྱལ་ པོར་གསུངས་པ་དྲངས་ནས་སངས་རྒྱས་ཀྱི་སྐུ་དེ་ནི་གསེར་བཙོ་མ་ལྟར་སེར་པོ་མཚན་དང་དཔེ་བྱད་ཀྱིས་བརྒྱན་པ་འོད་ཟེར་དང་བཅས་པ་དེ་ལ་འདོད་པ་བསྐྱེད་དེ་འདུན་པ་དང་སེམས་ཀྱི་གནོད་པ་སྤངས་ཏེ་ལུས་དྲང་པོར་སྲང་ལ་སྐུ་དེ་ལྟ་བུ་ལུགས་མའམ་ རི་མོར་བྲིས་པ་མདུན་དུ་བཞག་སྟེ་རྒྱུན་དུ་ཡིད་ལ་བྱས་ན་དེ་ཉིད་དམ་གཞན་ཡན་ལག་ལ་སོགས་པ་ནས་རྫོགས་བར་མངོན་སུམ་དུ་མཐོང་པར་འགྱུར་རོ། །ཞེས་སོགས་གསུངས་ཅིང་ད་ལྟར་གྱི་སངས་རྒྱས་མངོན་སུམ་དུ་བཞུགས་པའི་མདོ་ལས་ ཏིང་ངེ་འཛིན་དེ་སྒྲུབ་པའི་ཐབས་འདི་ཁོ་ནར་གསུངས་པའི་ཕྱིར་རོ། །དེང་སང་བསམ་གཏན་པ་རྣམས་ཀྱིས་དག་པ་དེ་བཞིན་གཤེགས་པའི་སྐུ་ལ་སེམས་འཛིན་པ་ཞེས་འདི་ཞི་གནས་ཀྱི་སྔོན་འགྲོར་སྡུད་མོད་ཀྱང་འདི་ཉིད་ཁོ་ནའང་གྲུབ་ན་ཏིང་ངེ་
Page: 248 འཛིན་མང་པོའི་འབྱུང་ཁུངས་སུ་གསུངས་སོ། ཁ་ཅིག་རྡེའུ་ཤིང་བུ་ལ་སེམས་འཛིན་པ་དང༌སྐུ་ལ་འཛིན་པ་སོགས་བཞད་གད་ཀྱི་གནས་སུ་བྱེད་མོད་ཀྱང་མེ་ཏོག་ལ་འཛིན་པ་སོགས་གསུངས་ལ་དེ་དང་རྡེའུ་སོགས་ལའང་ཁྱད་པར་ཆེར་མི་མངོན་ པའི་ཕྱིར་དང་སོ་སོ་སྐྱེ་བོ་ནི་གོམས་པ་ཉིད་ཀྱི་ཕྱིར་གཟུགས་སོགས་ལ་སེམས་ཟིན་པ་སླ་ཞིང་སྔགས་ཀྱི་སྐྱེད་རིམ་ཐམས་ཅད་ཀྱང་ལྷ་སྐུ་ལ་སེམས་འཛིན་པ་ཁོ་ན་ཡིན་པའི་ཕྱིར་ཆོས་སྤོང་གི་གཏམ་རྣམས་རྣ་བར་བཞག་པར་མི་བྱའོ། །ཏིང་ངེ་ འཛིན་དེ་ཐམས་ཅད་ཀྱང་གུས་པ་དང་རྟག་པར་ཉམས་སུ་ལེན་པའི་བརྩོན་འགྲུས་གཉིས་ལས་སྐྱེ་སྟེ། དེ་ལ་རྟག་ཏུ་བྱ་བ་དང་། །གུས་པར་བྱས་ཏེ་སྦྱར་བར་བྱ། ཞེས་སོ། མདོར་ན་ཐེག་པ་ཆེན་པོ་ནི་དགེ་བའི་བཤེས་གཉེན་ལས་འབྱུང་ལ། ཁྱད་པར་ཏིང་ངེ་འཛིན་དང་ཤེས་རབ་ལ་ནི་དགེ་བའི་བཤེས་གཉེན་ཡང་དག་པའི་དོན་རྟོགས་ཤིང་ཁོང་དུ་ཆུད་པས་སྐྱོན་བཅས་སྐྱོན་མེད་སོགས་རྣམ་པར་ཕྱེ་སྟེ་གདམས་པ་དང་རྗེས་སུ་བསྟན་པ་ལས་ཤེས་པར་བྱའི་གླེགས་བམ་དང་ཡི་གེ་དང་སྤྱི་གཏོལ་ གྱིས་འཇུག་པའི་ངག་ལས་རྙེད་པ་ནི་དེ་ལྟ་མ་ཡིན་ནོ། །མདོར་ན་བསམ་གཏན་དམ་པ་འདི་ནི་འཇིག་རྟེན་དང་འཇིག་རྟེན་ལས་འདས་པའི་ཡོན་ཏན་ཐམས་ཅད་ཀྱི་རྟེན་ཡིན་ཏེ་བསམ་གཏན་དང་ལྡན་ན་སྦྱིན་པ་ནས་ཤེས་རབ་ཀྱི་བར་ཐམས་ ཅད་ངང་གིས་འབྱུང་ངོ་། །དེ་ལྟར་ཕ་རོལ་ཕྱིན་ལྔ་ཡི། །དངོས་འབྲས་ཤེར་ཕྱིན་ཁོ་ན་སྟེ། །ཆོས་ཀུན་ཇི་བཞིན་ཤེས་པའོ། །དེ་ཡང་ཤེས་པར་བྱ་བ་ནི། །རིག་པའི་གནས་དང་བདེན་པ་དང་། །གྲུབ་པའི་མཐའ་དང་སྟོང་ ཉིད་དོ། །རིག་བྱའི་གནས་ནི་ལྔ་ཡིན་ཏེ། །གསོ་བ་བཟོ་དང་སྒྲ་ཚད་དང༌། །ནང་དོན་རིག་པ་ཞེས་བྱ་སྟེ། །བཞི་ནི་ཕྱི་ནང་ཐུན་མོང་ཡིན། །ལྔ་པ་ནང་པ་ཁོ་ནའི་འོ། །བདེན་པ་རྣམ་པར་བཞག་པ་ནི། སྡུག་བསྔལ་ཀུན་འབྱུང་འགོག་ལམ་སྟེ། །འཁོར་ལོ་
Page: 249 ༄༅། །དང་པོར་བདེན་པ་བཞི། །བསྡུ་ན་ཀུན་རྫོབ་དོན་དམ་སྟེ། །འཁོར་ལོ་བར་པར་བདེན་གཉིས་གསུངས། །རྒྱལ་བས་འཁོར་ལོ་ཕྱི་མ་རུ། །མྱ་ངན་འདས་པ་བདེན་གཅིག་བསྟན། །ཕུང་ཁམས་སྐྱེ་མཆེད་ ཀྱིས་བསྡུས་པའི། །སྣོད་བཅུད་སྡུག་བསྔལ་བདེན་པ་སྟེ། །ཟུག་རྔུ་ཉིད་ཕྱིར་སྡུག་བསྔལ་དང་། །འཁྲུལ་ངོར་བདེན་པར་སྣང་ཕྱིར་རོ། །ལས་ཉོན་སྐྱེ་བ་ཀུན་འབྱུང་སྟེ། །སྡུག་བསྔལ་འབྱུང་བའི་རྒྱུའི་ཕྱིར་རོ། །སྡུག་ཀུན་འགགས་པ་ འགོག་བདེན་ཏེ། །འཕགས་ལམ་ཡན་ལག་བརྒྱད་ལམ་བདེན། །མི་སླུའི་ཕྱིར་ན་བདེན་པའོ། །བདེན་གཉིས་རྣམ་འཇོག་དུ་མ་སྟེ། །དོན་བྱེད་ནུས་ཆོས་དོན་དམ་དང༌། །མི་ནུས་ཀུན་རྫོབ་བྱེ་སྨྲའི་ལུགས། །རྐྱེན་གྱིས་བཅོམ་ དང་བསལ་བ་ན། །དེ་བློ་འཇིག་པ་ཀུན་རྫོབ་སྟེ། །དེ་ལས་ལོག་པ་དོན་དམ་ཞེས། །མདོ་སྡེ་པ་ཡིས་སྨྲ་བར་བྱེད། །གཞན་དབང་བདེན་པ་གཉིས་ཀའི་གཞི། ཀུན་ཏུ་བཏགས་པ་ཀུན་རྫོབ་སྟེ། །ཡོངས་གྲུབ་དོན་དམ་བདེན་པ་ ཞེས། །རྣམ་རིག་ཙམ་དུ་སྨྲ་རྣམས་སྒྲོག །འཇིག་རྟེན་འཇིག་རྟེན་འདས་པ་ལ། །ཀུན་རྫོབ་དང་ནི་དོན་དམ་དུ། །བདག་མེད་དྲིས་པའི་མདོ་ལས་གསུངས། །བློ་ཡི་སྤྱོད་ཡུལ་ཀུན་རྫོབ་སྟེ། །བློ་ལས་འདས་པ་དོན་དམ་དུ། །འདིར་ ནི་ཞི་བའི་ལྷ་ཡི་བཞེད། ཀུན་རྫོབ་ལོག་དང་ཡང་དག་གཉིས། །མེད་བཞིན་སྣང་བར་ཁྱད་མེད་ཀྱང་། །འཁྲུལ་ངོར་དོན་བྱེད་པར་སྣང་བ། །མྱུག་གུ་ལ་སོགས་ཡང་དག་སྟེ། །ལྡོག་པ་སྐྲ་སོགས་ལོག་པ་ཉིད། །ཡང་ན་བྱིས་ པས་ལོག་པ་མཐོང་། །འཕགས་པའི་གཟིགས་པ་ཡང་དག་ཉིད། །སྟོང་ཉིད་བཅོ་བརྒྱད་སོགས་དབྱེ་དང༌། །མེད་དགག་མ་ཡིན་དགག་པ་དང༌། །སྒྲུབ་པ་སོགས་སུ་གང་སྟོན་པ། །རྣམ་གྲངས་པ་ཡི་དོན་དམ་སྟེ། །སྨྲ་བསམ་
Page: 250 བརྗོད་བྲལ་འཕགས་རྣམས་ཀྱི། །མཉམ་བཞག་དག་པའི་སྤྱོད་ཡུལ་གང༌། །རྣམ་གྲངས་མིན་པའི་དོན་དམ་དངོས། །ཀུན་རྫོབ་ལས་གཞན་དོན་དམ་མེད། །དོན་དམ་ལས་གཞན་ཀུན་རྫོབ་མིན། །ཡོད་མེད་གཅིག་དང་ ཐ་དད་སོགས། །སྒྲོ་བཏགས་ཉིད་ཕྱིར་དེ་མི་གནས། །བསོད་ནམས་ཚོགས་ཕྱིར་ཀུན་རྫོབ་དང༌། །ཡེ་ཤེས་ཚོགས་ཕྱིར་དོན་དམ་སྟེ། །རེ་ཞིག་དགོས་པ་ལ་བལྟོས་ནས། །བདེན་པ་རྣམ་པ་གཉིས་སུ་བརྗོད། །རྒྱ་ཆེན་ སྤྱོད་པའི་གཞུང་ལུགས་ལས། །ཡོད་མེད་ལ་སོགས་ཀུན་བཏགས་ཏེ། །སྒྱུ་འདྲའི་རྟེན་འབྲེལ་གཞན་གྱི་དབང་། །དེ་ལྟར་ཀུན་རྫོབ་རྣམ་གཉིས་ཕྱེ། །ཡོངས་གྲུབ་མཁའ་འདྲ་དོན་དམ་ཉིད། །མཚན་ཉིད་དང་ནི་སྐྱེ་བ་དང་། ། དོན་དམ་ངོ་བོ་ཉིད་མེད་པ། །གསུམ་གྱིས་སྐྱེ་མེད་ལ་སོགས་བསྟན། །དེ་ཕྱིར་ཤིང་རྟའི་སྲོལ་གཉིས་ཀ། ཀུན་རྫོབ་སྒྱུ་མ་ལྟ་བུ་དང༌། །དོན་དམ་ནམ་མཁའ་ལྟ་བུ་རུ། །བཞེད་ལ་ཁྱད་པར་ཅི་ཡང་མེད། །འཁོར་ལོ་ཐ་མར་བདེན་ གཅིག་སྟེ། །དོན་དམ་ཆོས་དབྱིངས་ཁོ་ན་ལས། །གཞན་འགའང་དམིགས་སུ་མེད་ཕྱིར་རོ། །བདེན་བརྫུན་བཏགས་ཏེ་བཞག་པའི་ཕྱིར། །མཐར་ཐུག་དེ་ཀུན་གང་ཡང་མིན། །བདེན་དང་བརྫུན་པ་བྱ་བའི་ཆོས། །གང་ཡང་ ང་ཡིས་མ་གཟིགས་ཞེས། །རྒྱལ་བ་ཉིད་ཀྱིས་མདོ་ལས་གསུངས། །ཤེས་བྱའང་རང་བཞིན་གྱིས་ཡོད་མིན། །དེ་མེད་པར་ཡང་ཤེས་རབ་མེད། །ཤེས་བྱ་མེད་པའང་མ་ཡིན་ཏེ། །དེ་ཉིད་ཕྱིར་ན་ཤེས་རབ་ཡོད། །ཤེས་དང་ ཤེས་བྱ་བདེན་རྫུན་དང་། །ཡོད་མེད་ཁོ་ན་སྒྲོ་བཏགས་ཏེ། །ཇི་ལྟར་སྒྲོ་བཏགས་དེ་མི་གནས། །དེ་བས་ནོར་བ་ཟད་ཙམ་ལ། །ཐར་པའི་མིང་གིས་བཀའ་བསྩལ་ཏོ། །གྲུབ་མཐའ་ཕྱི་ནང་རྣམ་པ་གཉིས། །རེ་རེའང་རྣམ་པ་བཞི་
Page: 251 ༄༅། །བཞི་སྟེ། །གཙོ་བོའི་ཞལ་བཞི་ལས་བྱུང་བར། །འདོད་ཕྱིར་ཚངས་པ་ཁྱབ་འཇུག་པ། །དབང་ཕྱུག་པ་དང་རྒྱང་འཕེན་ཏེ། །ཕྱི་རོལ་པ་ཡི་གྲུབ་མཐའ་བཞི། །གསུམ་ནི་རྟག་པར་ལྟ་བ་སྟེ། །བཞི་པ་ཆད་པར་སྨྲ་ བའོ། །ནང་པའི་གྲུབ་མཐའ་རྣམ་པ་བཞི། །བྱེ་བྲག་སྨྲ་དང་མདོ་སྡེ་པ། །གཉིས་པོ་ཕྱི་དོན་སྨྲ་བ་སྟེ། །སེམས་ཙམ་རྣམ་པར་རིག་པ་སྨྲ། །དབུ་མ་པ་ཡིས་སྟོང་ཉིད་སྒྲོག །དེ་ལྟར་གྲུབ་མཐའ་རྣམ་བཞི་ཡང་། །ནད་ཀྱི་གཉེན་པོར་ བཀྲུ་སྨན་ལྟར། །སྔ་མའི་གཉེན་པོར་ཕྱི་མ་སྟེ། །ནད་བྱང་བཀྲུ་སྨན་དག་པ་ན། །སྨན་པའི་བྱ་བ་གྲུབ་པ་ལྟར། །སྤང་བྱ་ཤུལ་དུ་མི་གནས་ཤིང་། །གཉེན་པོའི་འཛིན་པའང་དག་པའི་ཚེ། །གྲུབ་མཐའི་དགོས་པ་གྲུབ་པ་སྟེ། ། གྲུབ་མཐའ་བློ་ཡིས་བཏགས་པ་ལས། །ངོ་བོ་ཉིད་ཀྱིས་མ་ཡིན་ནོ། །སྟོང་ཉིད་བརྗོད་དུ་ཡོད་མིན་ཡང༌། །ཐབས་ཀྱི་ཆོས་སྒོར་བསྟན་པ་སྟེ། །སྟོང་ཉིད་ཅེས་བྱ་ཆོས་ཀྱི་དབྱིངས། །དེ་ལ་རྣམ་དབྱེ་དམིགས་སུ་མེད། །དེ་ཕྱིར་ སྟོང་ཉིད་གཅིག་པུ་ཉིད། །འོན་ཀྱང་རྣམ་པ་ཀུན་དཔྱད་དང་། །རྣམ་པ་ཀུན་གྱི་མཆོག་ལྡན་པའི། །སྟོང་ཉིད་རྣམ་པ་གཉིས་སུ་བརྗོད། །ཡང་ན་རྣམ་ཐར་སྒོ་གསུམ་མམ། །བཞི་ཡི་དབྱེ་བས་དེ་སྙེད་དོ། །ཡང་ན་མཚན་ཉིད་ སྟོང་པ་ཉིད་། །དངོས་པོའི་རང་བཞིན་སྲིད་པ་དང་། །མི་སྲིད་བརྗོད་མེད་དོན་དམ་དང་། །ཉི་ཚེའི་སྟོང་པ་ཉིད་དེ་བདུན། །རྒྱས་པར་སྟོང་བྱའི་ཆོས་ཅན་གྱིས། །ཕྱེ་བ་ནང་དང་ཕྱི་དང་ནི་། །ཕྱི་ནང་ཆེན་པོ་སྟོང་ཉིད་དང༌། །དོན་དམ་ འདུས་བྱས་འདུས་མ་བྱས་། །མཐའ་འདས་ཐོག་མཐའ་དོར་བ་མེད། །རང་བཞིན་རང་མཚན་ཆོས་ཀུན་དང༌། །དངོས་པོ་མེད་དང་ངོ་བོ་ཉིད། །སྟོང་ཉིད་རྣམ་པ་བཅུ་དྲུག་གོ །གནས་སྐབས་རྣམ་རྟོག་ཇི་སྙེད་པར། །སྟོང་པ་ཉིད་ཀྱང་དེ་
Page: 252 སྙེད་དེ། །དམིགས་སུ་མེད་པའི་སྟོང་ཉིད་ལ། །བགྲང་དུ་ཡང་ནི་ཅི་ཞིག་ཡོད། །གཟུགས་ཀྱི་རྣམ་པ་ཇི་སྙེད་པར། །ནམ་མཁའ་རྣམ་པར་དབྱེ་བ་དང༌། །ནམ་མཁའ་གང་དུའང་དབྱེར་མེད་པ། །འགལ་བ་མེད་པ་ཇི་བཞིན་ནོ། །གཞན་ མིན་ཕྱིར་ན་དེ་བཞིན་ཉིད། །ཕྱིན་ཅི་མ་ལོག་ཡང་དག་མཐའ། །བཟོད་ནས་འགགས་ཕྱིར་མཚན་མ་མེད། །འཕགས་པའི་སྤྱོད་ཡུལ་ཕྱིར་དོན་དམ། །བྱང་ཆུབ་རྒྱུའི་ཕྱིར་ཆོས་ཀྱི་དབྱིངས། །དེ་སོགས་རྣམ་གྲངས་མིང་གིས་བསྟན། ། དེ་ལ་ཤེས་པར་བྱེད་པོ་ནི། །སོ་སོར་རྟོག་པའི་ཤེས་རབ་དང་། །སོ་སོ་རང་རིག་ཡེ་ཤེས་ཏེ། །སྐྱེ་འཕགས་དབྱེ་བས་རྣམ་པ་གཉིས། །ཇི་ལྟར་ཤེས་པར་བྱ་བ་ནི། །དངོས་དང་དངོས་མེད་དང་གཉི་གའི། །འཛིན་པའི་མཐའ་ཀུན་རྣམ་པར་སྤངས། ། དབུ་མ་ཉིད་ཀྱང་མི་དམིགས་ལ། །གང་ལའང་མི་གནས་པར་གནས་པ། །འདི་ནི་དབུ་མའི་ལམ་ཞེས་བརྗོད། །མཐའ་དབུས་རྣམ་པར་བསལ་བ་ཡི། །ཤེས་རབ་ཐབས་དང་ཟུང་ཆུད་པ། །འདི་ནི་རྣམ་པར་གྲོལ་བའི་ལམ། །འཛིན་པ་ ཐམས་ཅད་ལོག་པ་ལ། །མྱ་ངན་འདས་ཞེས་མིང་དུ་བརྗོད། །འདི་ནི་དངོས་སམ་དངོས་མེད་མིན། །གང་ཡང་མ་སྤངས་མ་ཐོབ་པས། །སྤངས་ཐོབ་འདུ་ཤེས་ཟད་པའི་ཕྱིར། །སྤངས་དང་ཐོབ་པའི་དམ་པར་བརྗོད། །དང་པོར་དངོས་པོའི་ འདུ་ཤེས་ནི། །གཞིག་ཕྱིར་བདག་མེད་རྣམ་པ་གཉིས། །ཕུང་ལྔའི་རྒྱུན་ལ་གང་ཟག་འདོགས། །དེ་ལ་ལོག་ཤེས་ཀྱིས་ངར་ཞེན། །འདིར་ནི་སྲིད་པའི་རྩ་བ་ཡིན། །ང་འམ་བདག་དེ་ཡོད་མིན་ཏེ། །བདེན་པ་མཐོང་བས་མ་གཟིགས་ཕྱིར། ། དཔྱད་ཚེ་རང་གཞན་གཉིས་ཀ་དང་། །གཉིས་མིན་ལས་ཀྱང་མི་སྐྱེ་ཕྱིར། །ལུས་དང་སེམས་དང་མིང་ལ་ཡང༌། །བདག་དེ་ཉེ་བར་མི་དམིགས་ཕྱིར། །ཕུང་པོ་རེ་རེ་ནས་བདག་མིན། །ཚོགས་མིན་གཞན་པའང་མ་ཡིན་ལ། །དེ་དང་
Page: 253 ༄༅། །གཞན་དུ་བརྗོད་མིན་པའང། །དཔྱད་ན་ནམ་ཡང་མ་མཐོང་ཕྱིར། །ཀུན་རྫོབ་ཙམ་དུ་ཡོད་མ་ཡིན། །ཁ་ཅིག་ཕྲ་རབ་རྡུལ་ཆ་མེད། །བར་བཅས་སམ་ནི་བར་མེད་པ། །གཡག་རྔའམ་པོ་ཏི་བསྡམས་པ་ལྟར། ། དམ་པའི་རྫས་སུ་གྲུབ་ཅེས་ཟེར། །ཁ་ཅིག་ལྐོག་ཏུ་གྱུར་བར་སྨྲ། །རྡུལ་དུ་གྲུབ་ན་ཕྱོགས་ཆ་ཡོད། །ཕྱོགས་ཆ་མེད་ན་རྡུལ་རྫས་ཉམས། །གཅིག་མེད་དུ་མ་མི་སྲིད་ལ། །དུ་མ་མ་འདུས་གཅིག་ཡོད་མིན། །དེ་བས་རྡུལ་དེ་གཅིག་གམ་ནི། ། དུ་མར་ཁས་བླང་མི་ནུས་སོ། །ཡུལ་ཤེས་མངོན་སུམ་མི་ཕྲད་དེ། །དབང་པོས་བར་དུ་ཆོད་ཕྱིར་དང༌། །ཡང་ན་ཚེར་མཐོང་ཟུག་འགྱུར་ཕྱིར། །ལྐོག་ཏུ་གྱུར་ལས་མངོན་སུམ་གྱི། །མཐོང་བ་སྐྱེ་བའང་རིགས་མིན་ལ། །རྐྱེན་གྱི་དབང་གིས་ འགྱུར་ཕྱིར་དང༌། །ཇི་ལྟར་བསྒོམས་པ་དེར་སྣང་ཕྱིར། །ཐ་དད་སྣང་བ་ཉིད་ཕྱིར་དང་། །མེད་པ་སྣང་ཕྱིར་རྨི་ལམ་བཞིན། །ཕྱི་རོལ་བཟུང་བའི་དོན་ཡོད་མིན། །ཁ་ཅིག་རང་རིག་རང་གསལ་བའི། །སེམས་ནི་དོན་དམ་ཡོད་པར་སྨྲ། ། སེམས་དེ་སྐད་ཅིག་ཏུ་ཡོད་ན། །དུས་གསུམ་ཆ་ཤས་དུ་མའི་ཕྱིར། །གཅིག་ཏུ་གྲུབ་བར་འདོད་པ་ཉམས། །སྐད་ཅིག་ཙམ་དུ་མེད་ན་ཡང་། །དངོས་མེད་ཉིད་དུ་ཐལ་བར་འགྱུར། །འདོད་ན་རང་རིག་རང་གསལ་ཉམས། །རྫོགས་སངས་ རྒྱས་ཀྱིས་མ་གཟིགས་ཕྱིར། །སེམས་དེ་སུས་ཀྱང་མཐོང་བ་མེད། །གཟུགས་སྒྲ་ལ་སོགས་ཡུལ་མེད་ན། །ཡུལ་ཅན་སེམས་ཀྱང་ག་ལ་ཡོད། །དེས་ན་གང་ཟག་ཆོས་ཀྱི་བདག །དངོས་པོར་ཡོད་པ་མ་ཡིན་ལ། །དངོས་མེད་དུ་ཡང་ གྲུབ་པ་མིན། །དེ་ཕྱིར་འཁོར་བ་དམིགས་སུ་མེད། །དེ་བཞིན་མྱ་ངན་འདས་པ་ཡང་། །དངོས་དང་དངོས་མེད་གཉིས་ཀ་དང་། །གཉི་ག་མིན་པའང་མ་ཡིན་ཏེ། །སྒྲོ་སྐུར་ཀུན་ལས་རྣམ་པར་གྲོལ། །དེ་ཕྱིར་བཅོས་མའི་བློ་ཀུན་ལས། །
Page: 254 ལོག་ལ་ཡང་དག་མཐོང་བ་དང་། །དབུ་མར་གནས་པ་ཞེས་བརྗོད་དོ། །དེས་ན་འཁོར་བ་ཉིད་མྱང་འདས། །སེམས་ཅན་རང་བཞིན་རྫོགསསངས་རྒྱས། །ཆོས་ཀུན་མ་བཅིངས་མ་གྲོལ་བར། །གཟོད་ནས་རྣམ་པར་དག་པའོ། །དེ་ལྟར་ ཤེས་རབ་ཤེས་བྱས་ཏེ། །དབེན་པར་ལུས་སེམས་རྣལ་དུ་དབབ། །ཇི་ལྟར་ཤེས་པའི་དོན་དེ་ལ། །ཅིར་ཡང་མི་སེམས་རྩེ་གཅིག་བཞག །གང་ཡང་སྒོམ་པར་མི་དམིགས་པ། །འདི་ནི་ཤེས་ཕྱིན་སྒོམ་པ་ཡིན། །ཆོས་ཀུན་སྒྱུ་མ་ ལྟར་ཤེས་པས། །རྗེས་ཐོབ་ཚོགས་གཉིས་ཟུང་འཇུག་འབད། །དེ་ལྟར་གོམས་པས་མཉམ་རྗེས་ཀྱི། །མཚན་མའང་བྲལ་ཏེ་རློམ་སེམས་ཞི། །ཡོན་ཏན་རྒྱ་ཆེན་ཀུན་ཐོབ་ནས། །མྱུར་དུ་རྫོགས་པའི་སངས་རྒྱས་འཐོབ། །ཅེས་ བྱ་སྟེ། དེ་ཡང་ཞིང་པ་རྣམས་དཔྱིད་དང་དབྱར་གྱི་འབད་པ་ཐམས་ཅད་ཀྱང་སྟོན་གྱི་འབྲས་བུ་ཁོ་ནའི་ཆེད་དུ་ཡིན་པ་ལྟར་བྱང་ཆུབ་སེམས་དཔའི་དགེ་བའི་ཆོས་ཐམས་ཅད་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་ཁོ་ནའི་ཆེད་དུ་སྟེ། ཡན་ལག་འདི་དག་ ཐམས་ཅད་ནི། །ཐུབ་པས་ཤེས་རབ་དོན་དུ་གསུངས། །ཞེས་འཆད་པར་འགྱུར་རོ། །ཤེས་རབ་དེ་ཡང་ཤེས་བྱ་ཕྱིན་ཅི་མ་ལོག་པར་ཤེས་པའམ་ཇི་བཞིན་དུ་ཤེས་པ་སྟེ། ཤེས་རབ་ཀྱིས་ནི་ཆོས་ཀྱི་རང་བཞིན་ཡོངས་ཤེས་ནས། ། ཞེས་སོ། །ཤེས་རབ་ཀྱི་མཚན་ཉིད་ཆོས་རབ་ཏུ་རྣམ་འབྱེད་དུ་གསུངས་པ་མ་ཡིན་ནམ་ཞེ་ན་འདི་གཉིས་ནི་རྒྱུ་དང་འབྲས་བུའི་ཁྱད་པར་དུ་ཟད་དེ་ཆོས་སོ་སོ་གཅིག་ཐ་དད་དང་དེའི་ངོ་བོ་སོགས་རྣམ་པར་འབྱེད་ཅིང་ཚུལ་བཞིན་དུ་རྟོག་པ་ནི་རྒྱུ་ཡིན་ ལ། དེ་ལས་དེ་ཇི་ལྟ་བར་ཤེས་པའི་ཤེས་རབ་སྐྱེ་བའི་ཕྱིར་རྒྱུ་ལ་འབྲས་བུའི་མིང་གིས་བརྗོད་པའོ། །དེ་ཡང་གང་ཤེས་པར་བྱ་བ་ཡུལ། གང་གིས་ཤེས་པར་བྱེད་པ་ཡུལ་ཅན། ཇི་ལྟར་ཤེས་པར་བྱ་བའི་ཚུལ། ཤེས་ནས་གོམས་
Page: 255 ༄༅། །པར་བྱ་བའོ། །དང་པོ་ལ་གང་ཤེས་པར་བྱ་བ་རིག་གནས་དང་བདེན་པ་དང་གྲུབ་པའི་མཐའ་དང་སྟོང་ཉིད་ཏོ། །དེ་ལ་རིག་གནས་ནི་ལྔ་སྟེ་ཡོན་ཏན་གྱི་རྟེན་ལུས་འཚོ་པར་བྱེད་པ་ནི་གསོ་བ་རིག་པ་སྟེ་ཡན་ལག་ བརྒྱད་དོ། །འཇིག་རྟེན་པའི་ཤེས་བྱ་ལ་མི་རྨོངས་པ་བཟོ་རིག་པ་སྟེ་བཟོའི་གནས་བཅོ་བརྒྱད་ལ་སོགས་པའོ། །རང་བཞིན་དང་རྐྱེན་དག་རྣམ་འགྱུར་གྱིས་ལེགས་པར་སྦྱར་བས་སྨྲ་བའི་སཾསྐྲཏ་སྟོན་པ་ནི་སྒྲ་སྟེ་ཐམས་ཅད་མཁྱེན་པས་ ལུང་དུ་སྟོན་པ་ལ་སོགས་པ་སྟེ་ཡན་ལག་ནི་མངོན་བརྗོད་སྙན་ངགསྡེབ་སྦྱོར་ཟློས་གར་རྣམས་སོ། །སྒྲུབ་པ་དང་སུན་འབྱིན་གྱི་གནས་སྟོན་པ་ནི་ཚད་མའི་རིག་པ་སྟེ་ནང་པའི་སྡེ་བདུན་མདོ་བཅས་ལ་སོགས་པའོ། །སྡེ་སྣོད་གསུམ་ནི་ ནང་རིག་པ་སྟེ་ཐར་པའི་ཐབས་སྟོན་པའོ། །སྔ་མ་བཞི་ནི་མཐོང་བའི་ཆོས་ལ་ཡ་རབས་དང་མཁས་པར་ཆུད་ཅིང་སྐྱེ་བོས་བསྔགས་པ་དང་བསམ་པ་དག་པས་ཟིན་ན་བརྒྱུད་ནས་མངོན་མཐོ་དང་ངེས་ལེགས་ཀྱི་ལམ་དུ་འགྱུར་རུང་ཙམ་སྟེ་ཕྱི་ནང་ཐུན་མོང་ གི་རིག་པ་ཡིན་ལ་རྒྱ་གར་ན་ཁྱིམ་པ་མཆོག་ཕལ་གྱིས་སློབ་པར་བྱེད་དོ། །ནང་རིག་པ་ནི་སངས་རྒྱས་ཀྱི་བསྟན་པ་ཁོ་ན་ཡིན་ལ་སྤྱིར་སྒྲ་ཚད་གཉིས་ཚར་བཅད་ཀྱི་ཆེད་དང་བཟོ་གསོ་གཉིས་རྗེས་བཟུང་གི་རྒྱུ་དང་ནང་རིག་པ་ཐམས་ཅད་མཁྱེན་པའི་ རྒྱུར་བསླབ་པ་སྟེ་རྒྱན་ལས། རིག་པའི་གནས་ལྔ་དག་ལ་མཁས་པར་མ་བྱས་ན། །འཕགས་མཆོག་གིས་ཀྱང་ཐམས་ཅད་མཁྱེན་ཉིད་མི་འགྱུར་ཏེ། དེ་ལྟ་བས་ན་གཞན་དག་ཚར་བཅད་རྗེས་བཟུང་དང་། །བདག་ཉིད་ཀུན་ཤེས་བྱ་ ཕྱིར་དེ་ལ་དེ་བརྩོན་བྱ། །ཞེས་དང་། བྱང་ས་ལས། དེ་ལ་བྱང་ཆུབ་སེམས་དཔའི་ཤེས་རབ་ཀྱི་ངོ་བོ་ཉིད་གང་ཞེ་ན་ཤེས་བྱ་ཐམས་ཅད་ལ་འཇུག་པ་དང་ཤེས་བྱ་ཐམས་ཅད་ལ་ཞུགས་པ་ཆོས་རྣམས་རབ་ཏུ་རྣམ་པར་འབྱེད་པ་གང་ཡིན་པ་ནང་དང༌།
Page: 256 གཏན་ཚིགས་དང་གསོ་བ་དང་སྒྲ་དང་བཟོ་དང་ལས་ཀྱི་གནས་ཀྱི་རིག་པ་ལ་དམིགས་ནས་འཇུག་པ་འདི་ནི་བྱང་ཆུབ་སེམས་དཔའ་རྣམས་ཀྱི་ཤེས་རབ་ཀྱི་ངོ་བོ་ཉིད་ཡིན་པར་རིག་པར་བྱའོ་ཞེས་སོ། །དེ་ལ་བདེན་པ་ནི་འཁོར་ལོ་དང་པོར་རྣམ་པར་ བཞིར་བསྟན་སྟེ་ཤེས་པར་བྱ་བ་སྡུག་བསྔལ་གྱི་བདེན་པ་སྤང་བྱ་ཀུན་འབྱུང་གི་བདེན་པ་བསྒོམ་བྱ་ལམ་གྱི་བདེན་པ་ཐོབ་བྱ་འགོག་པའི་བདེན་པ་སྟེ། ནད་ནི་ཤེས་བྱ་ནད་ཀྱི་རྒྱུ་ནི་སྤང་བྱ་ལ། །བདེར་གནས་འཐོབ་བྱ་སྨན་ནི་བསྟེན་པར་བྱ་ བ་ལྟར། །སྡུག་བསྔལ་རྒྱུ་དང་དེ་འགོག་པ་དང་དེ་བཞིན་ལམ། །ཤེས་བྱ་སྤང་བྱ་རིག་པར་བྱ་ཞིང་བསྟེན་པར་བྱ། །ཞེས་སོ། །ཟུག་རྔུའམ་གནོད་པའི་བདག་ཉིད་ཁོ་ནའི་ཕྱིར་འཁོར་བ་ཐམས་ཅད་ནི་སྡུག་བསྔལ་གྱི་བདེན་པ་སྟེ་ཕུང་པོ་ནི་ལྔ། ཁམས་ནི་བཅོ་བརྒྱད་སྐྱེ་མཆེད་ནི་བཅུ་གཉིས་ཀྱིས་བསྡུས་པ་རྣམས་ཏེ་མྱོང་ཚུལ་གྱི་སྒོ་ནས་དབྱེ་ན། ཚོར་བ་སྡུག་བསྔལ་དུ་མངོན་པ་སྡུག་བསྔལ་གྱི་སྡུག་བསྔལ་བདེ་བར་མངོན་པ་འགྱུར་བའི་སྡུག་བསྔལ་བཏང་སྙོམས་པར་མངོན་པའམ་ཆེར་མི་ཚོར་བ་ འདུ་བྱེད་ཀྱི་སྡུག་བསྔལ་ཏེ་རྣམ་པ་གསུམ་མོ། །དེའི་རྒྱུ་ནི་ཟག་བཅས་ཀྱི་ལས་དང་ཉོན་མོངས་པ་ཡིན་ལ་དེ་ལས་ཁམས་གསུམ་དུ་སྐྱེ་བ་འགྲུབ་པས་ན་ཀུན་འབྱུང་རྣམ་པ་གསུམ་མོ། །དེ་ལྟར་སྡུག་བསྔལ་དང་ཀུན་འབྱུང་ནི་འཁྲུལ་ངོར་བདེན་ པ་ལྟར་སྣང་ཞིང་རྒྱུ་འབྲས་མི་སླུ་བས་རེ་ཞིག་བདེན་པར་བཞག་གོ །བསླབ་གསུམ་མམ་འཕགས་ལམ་ཡན་ལག་བརྒྱད་ཁོ་ནའམ་ཡང་ན་བྱང་ཆུབ་ཀྱི་ཕྱོགས་ཀྱི་ཆོས་སོ་བདུན་པོ་ཐམས་ཅད་ལམ་གྱི་བདེན་པ་སྟེ་འཁོར་བ་རྒྱུ་འབྲས་དེ་ལས་ འདའ་བར་བྱེད་པའི་ཐབས་སོ། །སྡུག་བསྔལ་དང་ཀུན་འབྱུང་ཟད་ཅིང་སླར་མི་སྐྱེ་བ་ཤེས་པ་ནི་འགོག་པ་སྟེ་དེ་དག་ས་བོན་དང་བཅས་པ་འགགས་པའི་ཕྱིར་རོ། །དེ་ལ་འགོག་པ་ནི་སྤངས་པ་ཉམས་པ་མེད་པས་གོ་འཕང་ལ་ཡིད་བརྟན་དུ་རུང་བའི་
Page: 257 ༄༅། །ཕྱིར་དང་ལམ་བདེན་ནི་རང་གི་འབྲས་བུ་ལ་མི་སླུ་བའི་ཕྱིར་བདེན་པར་བཞག་གོ །འཁོར་ལོ་བར་པར་ནི་གཙོ་བོར་བདེན་པ་གཉིས་སུ་བསྟན་ཏེ་ཡབ་སྲས་མཇལ་བར། འཇིག་རྟེན་མཁྱེན་པས་གཞན་ལ་མ་གསན་པར། །བདེན་པ་ འདི་གཉིས་ཀྱི་ནི་རྣམ་དབྱེ་མཛད། །གང་ཞིག་ཀུན་རྫོབ་གཞན་ནི་དོན་དམ་སྟེ། །བདེན་པ་གསུམ་པ་གཞན་ནི་མ་མཆིས་སོ། །ཞེས་དང་། དབུ་མ་རྩ་བར། སངས་རྒྱས་རྣམས་ཀྱིས་ཆོས་བསྟན་པ། །བདེན་པ་གཉིས་ལ་ཡང་དག་བརྟེན། །འཇིག་ རྟེན་ཀུན་རྫོབ་བདེན་པ་དང་། །དམ་པའི་དོན་གྱི་བདེན་པའོ། །གང་དག་བདེན་པ་འདི་གཉིས་ཀྱི། །རྣམ་དབྱེ་རྣམ་པར་མི་ཤེས་པ། །དེ་དག་སངས་རྒྱས་བསྟན་པ་ནི། །ཟབ་མོའི་དེ་ཉིད་རྣམ་མི་ཤེས། །ཞེས་སོ། །དེ་ཡང་བདེན་པ་འདི་གཉིས་ སུ་མི་འདུ་བའི་ཆོས་མེད་པས་བདེན་པ་གསུམ་པ་མེད་པར་གསུངས་ཀྱི་རྣམ་གྲངས་ཀྱི་སྒོ་ནས་མེད་པར་བསྟན་པ་ནི་མ་ཡིན་སྟེ་བདེན་པ་བཞི་ཡང་སྔ་མ་གསུམ་ཀུན་རྫོབ་དང་བཞི་པ་དོན་དམ་པར་འདུ་བར་དཔལ་ཕྲེང་གི་མདོ་ལས། བཅོམ་ལྡན་འདས་འཕགས་ པའི་བདེན་པ་བཞི་པོ་འདི་ལས་བདེན་པ་གསུམ་ནི་མི་རྟག་པ་ལགས་སོ་བདེན་པ་གཅིག་ནི་རྟག་པ་ལགས་སོ་ཞེས་དང༌གང་རྟག་པ་དེ་ནི་མི་སླུ་བའི་ཆོས་ཅན་ལགས་སོ་ཞེས་གསུངས་ལ། བློ་གྲོས་མི་ཟད་པའི་མདོར། གཞན་ཡང་བྱང་ཆུབ་སེམས་ དཔའི་བདེན་པ་ནི་རྣམ་པ་གསུམ་སྟེ་གསུམ་གང་ཞེ་ན་གང་འདི་ཀུན་རྫོབ་ཀྱི་བདེན་པ་དང༌དོན་དམ་པའི་བདེན་པ་དང་མཚན་ཉིད་ཀྱི་བདེན་པའོ་དེ་ལ་ཀུན་རྫོབ་ཀྱི་བདེན་པ་གང་ཞེ་ན་འཇིག་རྟེན་གྱི་ཐ་སྙད་དང་ཡི་གེ་དང་སྒྲ་བརྡས་བསྟན་པ་ཇི་སྙེད་པའོ། ། དོན་དམ་པའི་བདེན་པ་ནི་གང་ལ་སེམས་ཀྱི་རྒྱུ་བ་མེད་པ་སྟེ་ཡི་གེ་ལྟ་ཅི་སྨོས། མཚན་ཉིད་ཀྱི་བདེན་པ་ནི་གང་འདི་ཐམས་ཅད་མཚན་ཉིད་གཅིག་པ་སྟེ་མཚན་ཉིད་གཅིག་པོ་ཡང་མཚན་ཉིད་མེད་པའོ་དེ་ལ་བྱང་ཆུབ་སེམས་དཔའི་ཀུན་རྫོབ་ཀྱི་བདེན་
Page: 258 པ་བསྟན་པས་ཀྱང་ཡོངས་སུ་མི་སྐྱོ། དོན་དམ་པའི་བདེན་པ་མངོན་སུམ་དུ་བྱེད་པར་ཡང་མི་ལྟུང་མཚན་ཉིད་ཀྱི་བདེན་པས་བདེན་པ་གཅིག་ཏུ་རྟོགས་ཀྱང་སེམས་ཅན་རྣམས་ཀྱང་ཡོངས་སུ་སྨིན་པར་བྱེད་པ་འདི་ནི་བྱང་ཆུབ་སེམས་དཔའ་བདེན་པ་ལ་མཁས་པ་ཞེས་བྱའོ། ། གཞན་ཡང་བདེན་པ་རྣམ་པ་གཉིས་ཏེ་གང་འདི་ཐ་སྙད་ཀྱི་བདེན་པ་དང༌དོན་དམ་པའི་བདེན་པའོ་ཞེས་བདེན་པ་གསུམ་པ་མཚན་ཉིད་ཀྱི་བདེན་པ་ཞིག་གསུངས་ཀྱང་དེ་ནི་བདེན་པ་གཉི་ག་མཚན་ཉིད་མེད་པར་བསྡུས་པའི་ཕྱིར་བདེན་གཉིས་དོན་དམ་དུ་དབྱེར་མེད་ པར་བསྟན་པས་ན་མཚན་ཉིད་ཀྱི་བདེན་པའང་དོན་དམ་བདེན་པར་འདུས་ཤིང་དེ་མ་ཐག་ཏུ་སླར་བདེན་པ་གཉིས་སུ་བཀའ་བསྩལ་བའི་ཕྱིར་རོ། །འོ་ན་བདེན་པ་དེ་གཉིས་ཇི་ལྟ་བུ་ཞེ་ན། བྱེ་བྲག་ཏུ་སྨྲ་བ་ནི་དོན་དམ་པར་དོན་བྱེད་ནུས་པ་དོན་དམ་དང་དེ་མི་ནུས་པའི་ ཆོས་ཀུན་རྫོབ་ཏུ་འདོད་སྟེ་རྣམ་འགྲེལ་ལས། དོན་དམ་དོན་བྱེད་ནུས་པ་གང་། །དེ་འདིར་དོན་དམ་ཡིན་པར་བརྗོད། །གཞན་ནི་ཀུན་རྫོབ་ཡོད་པ་སྟེ། །ཞེས་གསུངས་ཏེ་དོན་རང་མཚན་རྡུལ་ཕྲ་རབ་ཕྱོགས་ཀྱི་ཆ་མེད་དང་ཤེས་པ་སྐད་ཅིག་ཆ་མེད་དོན་ དམ་དུ་གྲུབ་པར་འདོད་དོ། །མདོ་སྡེ་པས་ནི་འཇིག་བྱེད་ཐོ་བ་ལ་སོགས་པས་བཅོམ་པ་ན་རང་འཛིན་གྱི་བློ་འདོར་བ་དང་གཉེན་པོས་བསལ་བ་ན་དེའི་བློ་མི་འཇུག་པ་ཀུན་རྫོབ་དང་དེ་ལས་ཟློག་པ་དོན་དམ་སྟེ་མཛོད་ལས། གང་ལ་བཅོམ་དང་བློ་ཡིས་གཞན། ། བསལ་ན་དེ་བློ་མི་འཇུག་པ། །བུམ་ཆུ་བཞིན་དུ་ཀུན་རྫོབ་ཏུ། །ཡོད་དེ་དོན་དམ་ཡོད་གཞན་ནོ། །ཞེས་སོ། །སེམས་ཙམ་པ་ནི་གཞན་དབང་གི་ཤེས་པ་ནི་སྒྱུ་མའི་སྤྲུལ་གཞི་རྡེའུ་ཤིང་བུ་ལྟ་བུ་ཡིན་ལ་མ་རིག་པ་སྔགས་ལྟ་བུས་བསླད་པའི་གཟུང་བ་དང་ འཛིན་པ་རྟ་གླང་དུ་སྣང་བ་ལྟ་བུའི་ཀུན་བཏགས་ནི་ཀུན་རྫོབ་དང༌ཀུན་བཏགས་དེས་སྟོང་པའི་གཞན་དབང་གི་ཤེས་པ་རང་རིག་རང་གསལ་བ་ནི་དོན་དམ་པའི་བདེན་པར་འདོད་ལ། སྟོང་གཞི་ཆོས་ཉིད་དེ་བཞིན་ཉིད་སྟོང་བྱ་གློ་བུར་གྱི་དྲི་མས་སྟོང་པ་ལ་དོན་
Page: 259 ༄༅། །དམ་གཞན་སྟོང་ཆེན་པོར་འདོད་པ་དང་གཟུང་འཛིན་གཉིས་མེད་ཀྱི་ཡེ་ཤེས་དོན་དམ་པའི་བདེན་པར་གྲུབ་པར་འདོད་པ་ཕྱི་དུས་བོད་ཡུལ་ན་མང་དུ་ཡོད་པའང་རྣམ་རིག་པའི་བདེན་གཉིས་འཇོག་མཚམས་དེ་ཁོ་ན་ལ་མིང་བཟང་པོས་ཁྱད་པར་ དུ་བྱས་པ་ཁོ་ནའོ། །དབུ་མ་པ་ནི་མཐར་ལྟ་ཞི་ཀུན་ཟློག་གི་སྐབས་སུ་ཆོས་ཐམས་ཅད་སྤྲོས་པ་ཉེ་བར་ཞི་བས་བདེན་པ་གཉིས་སུའང་བཞག་ཏུ་མེད་མོད་ཀྱི་བར་པ་བདག་ཟློག་གི་སྐབས་སུ་རེ་ཞིག་བདེན་པ་གཉིས་སུ་བསྟན་སྟེ་དབུ་མ་རྩ་བར། གལ་ཏེ་འདི་དག་ ཀུན་སྟོང་ན། །འབྱུང་བ་མེད་ཅིང་འཇིག་པ་མེད། །འཕགས་པའི་བདེན་པ་བཞི་པོ་རྣམས། །ཁྱོད་ལ་མེད་པར་ཐལ་བར་འགྱུར། །སོགས་ནས། འཇིག་རྟེན་པ་ཡི་ཐ་སྙད་ནི། །ཀུན་ལའང་གནོད་པ་བྱེད་པ་ཡིན། །ཞེས་པའི་བར་གྱི་འཁོར་ འདས་ཀྱི་རྣམ་འཇོག་ཐམས་ཅད་མེད་པར་ཐལ་བའི་རྩོད་པ་བཀོད་ནས་དེའི་ལན་དུ། དེ་ལ་བཤད་པ་ཁྱོད་ཀྱིས་ནི། །སྟོང་ཉིད་དགོས་དང་སྟོང་ཉིད་དང་། །སྟོང་ཉིད་དོན་ནི་མ་རྟོགས་པས། །དེ་ཕྱིར་དེ་ལྟར་གནོད་པ་ཡིན། །སངས་རྒྱས་རྣམས་ཀྱིས་ ཆོས་བསྟན་པ། །བདེན་པ་གཉིས་ལ་ཡང་དག་བསྟེན། །ཞེས་སོགས་ཀྱིས་ལན་བཏབ་སྟེ་རྣམ་པ་རྟེན་ཞིང་འབྲེལ་པར་འབྱུང་བ་ཙམ་གྱིས་ཅིར་ཡང་སྣང་དུ་རུང་བ་ནི་ཀུན་རྫོབ་དང་དེ་ཉིད་སྣང་དུས་ཉིད་ན་ཡང་རང་གི་ངོ་བོ་ཇི་ལྟར་བཏགས་པ་དང་སྣང་བ་དེར་མ་ གྲུབ་ཅིང་ངོ་བོ་ཅི་ཡང་མ་ཡིན་པ་ནི་དོན་དམ་པའི་བདེན་པ་སྟེ། རྟེན་ཅིང་འབྲེལ་པར་འབྱུང་བ་གང་། །དེ་ནི་རྟེན་ནས་གདགས་པ་སྟེ། །དེ་ཉིད་དབུ་མའི་ལམ་ཡིན་ནོ། །ཞེས་སོ། །ཀུན་རྫོབ་དེ་ལ་ཡང་རབ་རིབ་ཅན་གྱི་ ངོར་སྐྲ་ཤད་དང་མིག་བཙིར་བས་ཟླ་གཉིས་མཐོང་བ་སོགས་ཡུལ་ལོག་པའི་ཀུན་རྫོབ་དང༌གྲུབ་མཐའ་ངན་པའི་རྟོག་པ་ལྟ་བུ་ཡུལ་ཅན་ལོག་པ་སྟེ་ལོག་པའི་ཀུན་རྫོབ་དང་། དེ་ལས་གཞན་པ་རྟེན་འབྲེལ་ཚོགས་པའི་བརྫུན་སྣང་མ་བརྟགས་པའི་ཤེས་ངོར་གསལ་བར་
Page: 260 སྣང་ཞིང་དཔྱད་མི་བཟོད་པ་འདི་རྣམས་རེ་ཞིག་བདེན་པ་ལྟར་སྣང་བ་དང་འཇིག་རྟེན་ལ་ཡང་དག་པར་གྲགས་པའི་ཆ་ནས་ཡང་དག་ཀུན་རྫོབ་ཅེས་བྱ་སྟེ། ཇོ་བོའི་དབུ་མ་བདེན་ཆུང་ལས། ཀུན་རྫོབ་རྣམ་པ་གཉིས་སུ་འདོད། །ལོག་པ་དང་ནི་ཡང་དག་གོ །དང་པོ་ གཉིས་ཏེ་སྐྲ་ཟླ་དང་། །གྲུབ་མཐའ་ངན་པའི་རྟོག་པའོ། །མ་བརྟགས་གཅིག་པུ་ཉམས་དགའ་བ། །སྐྱེ་བ་དང་ནི་འཇིག་པའི་ཆོས། །དོན་བྱེད་ནུས་དང་ལྡན་པ་ནི། །ཡང་དག་ཀུན་རྫོབ་ཡིན་པར་འདོད། །ཅེས་སོ། སྨྲ་བསམ་བརྗོད་དུ་མེད་པའི་ དེ་ཁོ་ན་ཉིད་དོན་དམ་བདེན་པ་སྟེ། ཐོག་མ་ཐ་མ་མེད་ཞི་བ། །དངོས་དང་དངོས་མེད་རྣམ་པར་སྤངས། །རྣམ་པར་རྟོག་མེད་དམིགས་པ་བྲལ། །གནས་པ་མེད་ཅིང་གནས་མེད་པ། །འགྲོ་འོང་མེད་ཅིང་དཔེ་དང་བྲལ། བརྗོད་དུ་མེད་ཅིང་ལྟར་མེད་པ། ། འགྱུར་བ་མེད་པ་འདུས་མ་བྱས། །རྣལ་འབྱོར་པ་ཡིས་དེ་རྟོགས་ན། །ཉོན་མོངས་ཤེས་བྱའི་སྒྲིབ་པ་སྤོང་། །ཞེས་སོ། །དཀོན་མཆོག་སྤྲིན་ལས་ཀྱང་། དེ་ལྟ་བས་ན་གང་མིང་འདོགས་པ་དང་ཐ་སྙད་དེ་ནི་ཀུན་རྫོབ་ཅེས་བྱའོ་ཞེས་དང་རིགས་ཀྱི་བུ་ དོན་དམ་པ་ནི་བརྗོད་དུ་མེད་པ་སྟེ་ཞི་བ་ཉིད་ཏོ་ཅེས་སོ། །ཡང་ན་བྱིས་པ་རྣམས་ཀྱིས་མེད་བཞིན་དུ་སྣང་བར་མི་ཤེས་པར་བདག་གཞན་ལ་སོགས་པ་སྣ་ཚོགས་པར་སྒྲོ་སྐུར་དུ་བྱེད་པས་ན་ཀུན་རྫོབ་ཙམ་མཐོང་ལ་ཀུན་རྫོབ་ཀྱི་བདེན་པ་མ་མཐོང་བ་ཞེས་སམ་ལོག་པའི་ཀུན་ རྫོབ་མཐོང་གི་ཡང་དག་པའི་ཀུན་རྫོབ་མ་མཐོང་བ་ཞེས་བྱ་ལ་འཕགས་པ་རྣམས་ཀྱིས་སྒྱུ་མ་མཁན་སྒྱུ་མ་ལ་ལྟ་བ་ལྟར་གཟིགས་པའི་ཕྱིར་ན་ཀུན་རྫོབ་མ་གཟིགས་ལ་ཀུན་རྫོབ་ཀྱི་བདེན་པ་གཟིགས་པའམ་ལོག་པའི་ཀུན་རྫོབ་མ་གཟིགས་ལ་ཡང་དག་པའི་ཀུན་རྫོབ་ གཟིགས་པ་ཞེས་ཀྱང་བྱ་སྟེ་གསང་སྔགས་ཀྱི་རྒྱུད་སྡེར་ཀུན་རྫོབ་ནི་གཟུང་འཛིན་གྱི་སྣང་བ་སྟེ་དེའི་བདེན་པ་ནི་ཆུ་ཟླ་ལྟ་བུའོ་ཞེས་གསུངས་པ་དང་། ཡང་དག་ཉིད་དུ་རྟོག་བྱེད་ཀྱི། །སྒྱུ་མ་ལྟ་བུ་མིན་པས་འདིར། །རྣལ་འབྱོར་པ་དང་འཇིག་རྟེན་རྩོད། །
Page: 261 ༄༅། །ཅེས་སོ། རྣམ་པ་གཅིག་ཏུ་ན་འཇིག་རྟེན་པའི་ཆོས་ནི་ཀུན་རྫོབ་ཀྱི་བདེན་པ་དང༌འཇིག་རྟེན་ལས་འདས་པའི་ཆོས་ནི་དོན་དམ་པའི་བདེན་པ་སྟེ་བདག་མེད་པ་དྲིས་པའི་མདོ་ལས། ཀུན་རྫོབ་དང་ནི་དོན་དམ་སྟེ། །དབྱེ་བ་གཉིས་སུ་ ཡང་དག་བཤད། །ཀུན་རྫོབ་འཇིག་རྟེན་པ་ཡི་ཆོས། །དོན་དམ་འཇིག་རྟེན་འདས་པའོ། །ཀུན་རྫོབ་ཆོས་ལ་ཞུགས་པ་ཡིས། །སེམས་ཅན་ཉོན་མོངས་དབང་དུ་འགྲོ། །དོན་དམ་ཡོངས་སུ་མ་ཤེས་པས། །འཁོར་བར་ཡུན་རིང་འཁོར་བར་ འགྱུར། །ཞེས་སོ། །འདིར་བདག་ཉིད་ཆེན་པོ་ཞི་བའི་ལྷ་ཉིད་ཀྱི་བཞེད་པ་ནི་བློའི་སྤྱོད་ཡུལ་དུ་གྱུར་པ་ཀུན་རྫོབ་ཀྱི་བདེན་པ་དང་བློ་ལས་འདས་པའི་ཆོས་དོན་དམ་པའི་བདེན་པ་སྟེ། དོན་དམ་བློ་ཡི་སྤྱོད་ཡུལ་མིན། །བློ་ཉིད་ཀུན་རྫོབ་ཡིན་པར་འདོད། ། ཅེས་འཆད་པར་འགྱུར་རོ། །འོ་ན་དོན་དམ་བློའི་སྤྱོད་ཡུལ་མ་ཡིན་ན་བློ་དང་ཤེས་པ་དོན་གཅིག་པའི་ཕྱིར་དོན་དམ་པ་སོ་སོ་རང་རིག་པའི་ཡེ་ཤེས་ཀྱི་སྤྱོད་ཡུལ་དུ་བཤད་པ་དང་འགལ་ལོ་ཞེས་པའམ་ཡང་ཁ་ཅིག་ནི་བློའི་ཡུལ་དུ་བྱར་རུང་བ་ཤེས་བྱའི་མཚན་ཉིད་ཡིན་པའི་ ཕྱིར་དོན་དམ་ཤེས་བྱ་མ་ཡིན་པར་ཐལ་ལོ་ཞེས་ཀྱང་དོགས་སྲིད་དོ། །དེ་ལ་འཕགས་པ་རྣམས་ཀྱི་སོ་སོ་རང་རིག་པའི་ཡེ་ཤེས་ཀྱིས་རང་རྒྱུད་ཀྱི་ཆོས་ཉིད་ཇི་ལྟ་བ་བཞིན་གཟིགས་པ་འགོག་པར་མི་མཛད་ཀྱང་དེ་ནི་ཕྱིན་ཅི་ལོག་གི་འཛིན་པ་ཐམས་ཅད་ལོག་སྟེ་རང་ རྒྱུད་ཀྱི་དབྱིངས་རིག་གཉིས་སུ་མེད་པ་དེ་ཉིད་རྟོག་པའི་ལྷད་མེད་པ་མཚོ་ལ་རླུང་ཞི་བས་རླབས་དང་བྲལ་བ་ལྟ་བུར་གྱུར་པ་ལ་ཡུལ་ཡུལ་ཅན་གྱི་དམིགས་པ་མེད་ཀྱང་དེ་ལས་ལངས་པའི་རྗེས་ཐོབ་ཀྱི་ཤེས་པས་དབྱིངས་ལ་རྟོགས་བྱ་དང་རིག་པ་ལ་རྟོགས་བྱེད་ཀྱི་ཐ་ སྙད་དུ་སྦྱར་ཏེ། སོ་སོ་རང་རིག་པའི་ཡེ་ཤེས་ཀྱིས་དོན་དམ་རྟོགས་ཞེས་ཚིག་ཏུ་བརྗོད་པར་ཟད་ཀྱི་མཉམ་བཞག་དེ་ལ་ནི་རྟོགས་མ་རྟོགས་སོགས་ཀྱི་བློའི་མཚན་མ་ཕྲ་མོ་ཙམ་ཡང་མེད་ན་རང་རིག་མི་རིག་གི་འཛིན་པ་ལྷག་མར་ཅི་ཞིག་ལུས་ཏེ་ལངྐར་གཤེགས་པ་
Page: 262 ལས། བློ་གྲོས་ཆེན་པོ་མུ་སྟེགས་ཅན་གྱི་ལྟ་བ་ངན་པ་རྣམ་པར་རྟོག་པའི་བསམ་པ་ལ་མངོན་པར་ཞེན་པ་དག་ཡོད་པ་དང་མེད་པའི་ཕྱོགས་དང་གཅིག་དང་ཐ་དད་དང༌གཉིས་ཀ་དང་གཉིས་ཀ་མ་ཡིན་པའི་སྨྲ་བ་ལ་མངོན་པར་ཞེན་ཅིང་དམ་པའི་ཆོས་ལ་སྐུར་པ་རྣམས་ བདག་དང་གཞན་དག་ཀྱང་ལོག་པར་ལྷུང་བར་བྱེད་ཏོ་ཞེས་དང༌། འཕགས་པའི་ཡེ་ཤེས་སོ་སོ་རང་གིས་རིག་པར་བྱ་བའི་རང་བཞིན་གཉིས་ལས་རྣམ་པར་གྲོལ་བའི་དངོས་པོའི་རང་བཞིན་དུ་ཡོད་དོ་ཞེས་རྣམ་པར་རྟོག་པར་འགྱུར་ཏེ་བློ་གྲོས་ཆེན་པོ་རྣལ་འབྱོར་ ཅན་སེམས་དང་ཡིད་དང་རྣམ་པར་ཤེས་པའི་གནས་ཤིན་ཏུ་གྱུར་པ་རང་གི་སེམས་སྣང་བའི་གཟུང་བ་དང་འཛིན་པའི་རྣམ་པར་རྟོག་པ་རབ་ཏུ་སྤངས་པ་དེ་བཞིན་གཤེགས་པའི་ས་འཕགས་པ་སོ་སོ་རང་རིག་པའི་ཡེ་ཤེས་ཐོབ་པ་རྣམས་ལ་ནི་དངོས་པོ་དང་དངོས་པོ་མེད་པའི་ འདུ་ཤེས་མི་འབྱུང་ངོ༌། །དེ་འཇུག་ཏུ་ཟིན་ན་ནི་དེ་ཉིད་དེའི་བདག་དང་གསོ་བ་དང་སྐྱེས་བུ་དང་གང་ཟག་ཏུ་འཛིན་པར་འགྱུར་རོ་ཞེས་སོ། །དེ་ལ་དགོངས་ནས་སློབ་དཔོན་གྱིས་དོན་དམ་ལ་མཚན་འཛིན་ལྡོག་པའི་ཆེད་དུ་སོ་སོ་རང་རིག་གི་ཡེ་ཤེས་སོགས་ཀྱང་སྐབས་དེར་ ཞལ་གྱིས་མ་བཞེས་པ་སྟེ་དེ་བཞེས་ན་སེམས་ཙམ་པའི་རང་རིག་གྲུབ་ཞེན་གྱི་བློ་གཞོམ་དཀའ་བར་འགྱུར་ཞིང་རྩོད་ངོར་དེ་བདག་ཅག་གི་དོན་དམ་དུ་སྨྲ་བའི་རང་རིག་དེའོ་ཞེས་ཁས་ལེན་པར་འགྱུར་བའི་ཕྱིར་དང༌དོན་དམ་སོ་སོ་རང་རིག་གི་ཤེས་པའི་ཡུལ་ལོ་སྙམ་པ་ ཙམ་གྱིས་ཆོས་ཉིད་ལ་ཉེ་བར་མི་འགྱུར་ལ་དམིགས་གཏད་ཀྱི་མཚན་མ་ཐམས་ཅད་བསལ་བ་འདིས་ནི་ཆོས་ཉིད་ལ་དོན་སྤྱིའི་ཚུལ་གྱིས་མོས་པས་སྤྱོད་པ་ལ་གེགས་མེད་དུ་འགྱུར་བའི་ཕྱིར་སྐྱོན་དང་པོ་མེད་དོ། །སྐྱོན་གཉིས་པ་ཡང་མེད་དེ་བློའི་ཡུལ་དུ་བྱར་རུང་བ་ ཤེས་བྱའི་མཚན་ཉིན་ཏུ་སྨྲ་བ་ནི་ལས་དང་པོ་བའི་བྱིས་པ་ལ་བློ་གྲོས་ཀྱི་ཁ་འབྱེད་པའི་ཕྱིར་བསྟན་པར་ཟད་ཀྱི་དེའི་ཚེ་ཡང་གསལ་ཞིང་ཡུལ་རིག་པའི་བློ་ཤེས་པའི་མཚན་ཉིད་དུ་སྨྲ་བས་དེ་གཉིས་རྟོག་པ་ཕན་ཚུན་བརྟེན་པའི་སྐྱོན་དུ་འགྱུར་ཏེ་རིག་བྱ་བློའི་ཡུལ་དུ་བྱར་རུང་བ་
Page: 263 ༄༅། །ནི་རིག་བྱེད་གསལ་ཞིང་ཡུལ་རིག་པའི་བློ་སྔོན་དུ་སོང་བ་ལ་བལྟོས། རིག་བྱེད་གསལ་ཞིང་ཡུལ་རིག་པའི་བློ་དེ་ཡང་རིག་བྱ་བློའི་ཡུལ་དུ་བྱར་རུང་བ་སྔོན་དུ་སོང་བ་ལ་བལྟོས་པས་ནམ་དུ་ཡང་རྒྱུ་མཚན་ངེས་པར་མི་འགྱུར་ལ། སྤྱིར་ཡང་ ཤེས་བྱ་དང་ཤེས་བྱེད་ནི་བྱིས་པ་རྣམས་ཀྱིས་མི་ཤེས་པས་སྒྲོ་བཏགས་པ་དང་སངས་རྒྱས་ཀྱི་བསྟན་པ་ལ་ཡང་། མིང་དུ་བརྗོད་པ་མ་མཛད་ན། །འཇིག་རྟེན་ཐམས་ཅད་རྨོངས་པར་འགྱུར། །དེ་བས་རྨོངས་པ་སྤང་བའི་ཕྱིར། །མགོན་པོས་མིང་དུ་བརྗོད་པ་ མཛད། །ཅེས་པ་ལྟར་དགོས་པའི་དབང་གིས་རེ་ཞིག་བསྟན་པར་ཟད་ཀྱི་ངེས་པར་ན་ཤེས་པ་དང་ཤེས་བྱ་ནི་ངོ་བོ་ཉིད་ཀྱིས་དེར་ཡོད་པ་མ་ཡིན་ཏེ་ཆོས་ཐམས་ཅད་ནི་གཟོད་ནས་དག་པ་ཁོ་ནར་བསྟན་པའི་ཕྱིར་རོ། །འོ་ན་དོན་དམ་ཤེས་བྱ་ཡིན་ནམ་མིན་ཞེ་ན། ལས་ དང་པོ་པ་རྣམས་ལ་ནི་ཀུན་རྫོབ་ཤེས་པས་ནི་འཇིག་རྟེན་གྱི་ཐ་སྙད་ཁོང་དུ་ཆུད་པར་ཟད་ཀྱི་སྙིང་པོ་ཆེས་ཆེ་བ་མ་ཡིན་ལ་དོན་དམ་པ་ཤེས་པས་སྲིད་པ་ལས་འདའ་བའི་ཕྱིར་ཤེས་པར་བྱ་རྒྱུ་ཡང་དག་པ་ནི་དོན་དམ་ཁོ་ནའོ་ཞེས་སྟོན་ཏེ་དོན་དམ་ལ་གཞུག་པའི་དགོས་པ་ཁྱད་ པར་ཅན་ཡོད་པའི་ཕྱིར། མང་དུ་སྦྱངས་པ་དོན་དམ་པ་དངོས་མཚན་དུ་རྟོག་པ་རྣམས་ལ་ནི་དོན་དམ་ནི་ཤེས་པར་བྱ་བ་ཙམ་ཡང་མ་ཡིན་ཏེ་ཤེས་བྱ་དང་ཤེས་བྱེད་ནི་ཀུན་རྫོབ་ཀྱི་ཐ་སྙད་ཁོ་ནར་ཟད་དོ་ཞེས་སྟོན་ཏེ་དོན་དམ་ལ་ཡུལ་དང་ཡུལ་ཅན་དུ་ཞེན་པའི་སྤྲོས་མཚན་ ལྡོག་ཞིང་དེ་ལོག་པ་ན་དོན་དམ་ཤེས་པ་ལ་གེགས་བྱེད་ཕྲ་མོར་བྱེད་པའི་ཕྱིར་རོ། །ནམ་དོན་དམ་ཡང་དག་པ་ཤེས་པ་དེ་ན་ནི་ཤེས་བྱ་ཤེས་བྱེད་དང་བདེན་བརྫུན་ལ་སོགས་པའི་མཐོང་བ་ལྷག་མར་མི་ལུས་ཏེ་ཆོས་ཉིད་ཇི་ལྟ་བ་བཞིན་གྱིས་འཇུག་གོ །བོད་མང་ཞིག་ ཐ་སྙད་ཚད་མས་རྙེད་པའི་རྙེད་དོན་ནམ་མ་བརྟགས་པ་ཐ་སྙད་པའི་ཤེས་ངོར་རྙེད་པ་ཀུན་རྫོབ་བདེན་པའི་མཚན་ཉིད་དང་རིག་ཤེས་ཚད་མས་རྙེད་པའི་རྙེད་དོན་ནམ་མཐར་ཐུག་རིགས་པའི་ཤེས་ངོར་རྙེད་པ་དོན་དམ་བདེན་པའི་མཚན་ཉིད་དུ་འདོད་ཅིང་། འཇུག་
Page: 264 པ་ལས། དངོས་ཀུན་ཡང་དག་བརྫུན་པར་མཐོང་བ་ཡིས། དངོས་སྙེད་ངོ་བོ་གཉིས་ནི་འཛིན་པར་འགྱུར། །ཡང་དག་མཐོང་ཡུལ་གང་ཡིན་དེ་ཉིད་དེ། །མཐོང་བ་བརྫུན་པ་ཀུན་རྫོབ་བདེན་པར་གསུངས། །ཅེས་པའི་དགོངས་པར་སྨྲ་བ་ཆེས་མང་ཞིང་། ལེགས་བཤད་བསྡུས་པར་ཡང་དེ་ཉིད་རྩལ་དུ་བཏོན་ཏེ་བློའི་ཡུལ་དུ་ཇི་ལྟར་སྣང་བ་ཀུན་རྫོབ་ཀྱི་མཚན་གཞི་སྟེ་ཕྱི་དོན་གྱི་དངོས་པོ་གཟུགས་སྒྲ་སོགས་རྟོག་མེད་མ་འཁྲུལ་བ་གཞན་རིག་མངོན་སུམ་གྱི་ཡུལ་དང་ནང་ཤེས་པའི་དངོས་པོ་བདེ་སྡུག་སོགས་རང་རིག་ མངོན་སུམ་གྱི་ཡུལ་དང་ཟླ་གཉིས་སོགས་དངོས་མེད་གསལ་སྣང་རྣམས་རྟོག་མེད་འཁྲུལ་པའི་ཡུལ་དང༌དངོས་མེད་མི་གསལ་བར་སྣང་བ་དོན་སྤྱི་རྣམས་རྟོག་པའི་ཡུལ་ལོ། །བློའི་ཡུལ་ལས་འདས་པ་དོན་དམ་པའི་མཚན་གཞི་སྟེ་དོན་ཤེས་དངོས་མེད་སོགས་ ཀྱི་སྤྲོས་པ་ཐམས་ཅད་དང་བྲལ་བ་རྣམ་གྲངས་མ་ཡིན་པའི་དོན་དམ་ཡིན་ལ་ཡོངས་དཔྱོད་སྤྲོས་བྲལ་དུ་གྲུབ་པའི་ཆོས་རྣམས་ནི་རྣམ་གྲངས་པའི་དོན་དམ་མོ། །དེ་ཡང་ཀུན་རྫོབ་མཚན་གཞི་སྣང་བ་སྣ་ཚོགས་ནི་སྣང་བ་འཛིན་པ་ཐ་སྙད་པའི་ཤེས་པས་ངེས་ལ་དོན་དམ་གྱི་ མཚན་གཞི་སྤྲོལ་བྲལ་ནི་མཐར་ཐུག་ཚོལ་བའི་རིགས་པས་ངེས་ཏེ་གཟུགས་སོགས་ལ་གཅིག་དུ་བྲལ་གྱི་རིགས་པས་དཔྱད་ན་རྟག་པ་དོན་དངོས་དང་མི་རྟག་པ་ཤེས་དངོས་ཏེ་དངོས་པོ་གང་ཡང་མ་གྲུབ་ཅིང་དངོས་མེད་དུ་ཡང་མ་གྲུབ་པར་ངེས་ཏེ་མཐར་ཐུག་ཚོལ་བའི་རིགས་ངོར་སྤྲོས་པ་ཐམས་ཅད་ཁེགས་པས་དོན་ དམ་པའི་མཚན་གཞི་སྤྲོས་པ་ཀུན་བྲལ་དུ་ངེས་ལ་སྤྲོས་པ་མ་རྙེད་པ་དེ་ལ་སྤྲོས་བྲལ་རྙེད་ཅེས་བཏགས་ལ། གཟུགས་སོགས་ཇི་ལྟར་སྣང་བ་འདི་ཐ་སྙད་པའི་ཤེས་པ་ལ་སྣང་ཞིང་རིགས་ངོར་ཁེགས་པས་ན་སྣང་བ་སྒྱུ་མ་ལྟ་བུ་སྟེ་ཐ་སྙད་པའི་ཤེས་ངོར་བརྙེད་པ་ཙམ་ཀུན་ རྫོབ་བདེན་པ་དང་རིགས་ངོར་མ་རྙེད་པ་དོན་དམ་བདེན་པ་ཞེས་ཐ་སྙད་པའི་ཤེས་པས་ངེས་ལ། སྣང་བའི་རང་བཞིན་སྟོང་ཉིད་རྣམ་གྲངས་ཀྱི་དོན་དམ་དང་ཀུན་རྫོབ་ནི་ལྡོག་པ་དེ་ཉིད་དུ་བརྗོད་དུ་མེད་ཅིང་ངོ་བོ་གཞན་དུ་བརྗོད་དུ་མེད་པ་སྟེ་བྱས་པ་དང་མི་རྟག་པ་བཞིན་ནོ། །
Page: 265 ༄༅། །ཆོས་ཉིད་ཅིར་ཡང་མ་གྲུབ་པ་ནི་རྣམ་གྲངས་མ་ཡིན་པའི་དོན་དམ་སྟེ་དེ་ནི་ལྡོག་པ་དང་ངོ་བོ་གཉིས་ཀུན་རྫོབ་དེ་ཉིད་དང་གཞན་དུ་བརྗོད་དུ་མེད་དེ་ཅིར་ཡང་མ་གྲུབ་པའི་ཕྱིར་རོ། །གྲངས་ངེས་པ་ཡང་རིགས་པས་དཔྱད་བཟོད་མི་བཟོད་གཉིས་ དངོས་འགལ་ཡིན་པས་གཉིས་ལས་མང་བ་ཁེགས་ལ་གཉི་ག་བློ་ངོར་གྲགས་ཤིང་ཕན་ཚུན་གཞི་གཅིག་ཏུ་མི་འདུ་བས་གཉིས་ལས་ཉུང་བ་ཁེགས་སོ། །གལ་ཏེ་དོན་དམ་པའི་བདེན་པ་ཅིར་ཡང་མ་གྲུབ་པ་ཡིན་ན་བདེན་གཉིས་ཀྱི་ཡ་གྱལ་དུ་མི་འཐད་ཏོ་ ཅེ་ན་བདེན་མོད་ཀྱང་རྟོག་གེ་པ་དྲང་བའི་ཕྱིར་དེ་དང་ཐ་སྙད་བསྟུན་པ་ཡིན་ནོ་ཞེས་སྣང་ངོ་། །དེ་ལ་ཅུང་ཟད་དཔྱད་པར་བྱ་སྟེ་ཅི་མ་བརྟགས་པ་ཐ་སྙད་པའི་ཤེས་ངོ་ཞེས་པ་དེ་རྟོག་དཔྱོད་ཀྱིས་ཟླས་ཕྱེ་བའི་ཞིབ་མོར་མ་བརྟགས་པ་ལ་ཟེར་རམ་འོན་ཏེ་མིང་འདོགས་ པ་ལ་སོགས་པར་མ་བཏགས་པ་ཙམ་པོ་བ་ལ་ཟེར། དང་པོ་ལྟར་ན་རྡུལ་ཕྲ་རབ་བསམ་པ་སོགས་རྟོག་དཔྱོད་ཀྱིས་ཞིབ་མོར་བསམས་པ་རྣམས་ཀུན་རྫོབ་མ་ཡིན་པར་འགྱུར་ལ་ཕྱི་མ་ལྟར་ན་མིང་དུ་བཏགས་པ་རྣམས་ཀུན་རྫོབ་མ་ཡིན་པར་འགྱུར་རོ། །ཐ་སྙད་ པ་དེ་ཡང་ཐ་སྙད་དུ་ཞེན་ནས་འཛིན་པ་ལ་བྱེད་དམ་ཐ་སྙད་ཡིན་པ་ཙམ་ལ་བྱེད། དང་པོ་ལྟར་ན་གཉིད་དང་བརྒྱལ་བའི་དུས་ཀྱི་ཤེས་པ་དང་འདུ་ཤེས་མེད་པ་སོགས་ལ་མ་ཁྱབ་བོ། །ཕྱི་མ་ལྟར་ན་དོན་དམ་བདེན་པ་ཡང་ཀུན་རྫོབ་ཏུ་ཐལ་བར་འགྱུར་རོ། ། རིགས་ངོར་རྙེད་པ་ཞེས་པའང་དངོས་སྨྲ་བའི་འདོད་པ་ལ་ཞེན་པའི་ཚིག་སྟེ་རྟེན་འབྲེལ་ཚོགས་པའི་བརྫུན་སྣང་གཟུགས་སུ་སྣང་ཙམ་པ་ལ་དེར་ཡོད་ཞེན་གྱི་བློས་འཛིན་པ་ལྟར་རྒྱུ་རྐྱེན་གྱི་དབང་ལས་ཤེས་པའི་གནས་སྐབས་ཕྱི་མ་ཞིག་སྣང་བ་ལ་དེ་བརྙེད་པར་ཞེན་པར་ ཟད་ཀྱི་དབུ་མ་པའི་རིགས་ངོར་བརྙེད་པའི་ཆོས་གཏན་མི་སྲིད་ཅིང་དེ་ལ་བལྟོས་པའི་མ་རྙེད་པ་ཡང་བཞག་ཏུ་མེད་པའི་ཕྱིར། དེས་ན་བྱིས་པ་རྣམས་ཀྱིས་ཡུལ་ཅན་གྱི་ཤེས་པས་ཡུལ་ཞིག་རྙེད་པར་འཛིན་པ་འདི་ནི་ཆོས་ཀྱི་བདག་འཛིན་དངོས་ཡིན་ལ་དེ་
Page: 266 གཞོམ་པའི་ཕྱིར་བདེན་གཉིས་རྣམ་པར་བཞག་པའི་སྒོ་ནས་བདག་མེད་པར་བསྟན་པ་ཡིན་ན་རྙེད་འཛིན་ལྡོག་དགོས་པ་དེའི་ཚེ་ཡང་ཤེས་ངོར་རྙེད་པ་ཞེས་སོགས་བདེན་གཉིས་ཀྱི་མཚན་ཉིད་དུ་སྦྱོར་བ་ནི་རང་ཉིད་སྟོང་པ་ཉིད་ལ་ཡིད་མ་ཆེས་པས་གཞན་ལ་ཡང་ འཁྱོག་འགྲོས་ཀྱིས་དམིགས་པར་ལྟ་བ་སྐྱེས་པ་ཞིག་གོ །ཁྱད་པར་ཏུ་མཐར་ཐུག་རིགས་པའི་ཤེས་ངོར་བརྙེད་པའི་ཆོས་ནི་གཏན་མི་སྲིད་དེ་སྟོན་པ་ཉིད་ཀྱིས་ཀྱང་ང་བྱང་ཆུབ་ཀྱི་སྙིང་པོར་འདུག་ནས་ཆོས་གང་ཡང་ཁོང་དུ་མ་ཆུད་དོ་ཞེས་སོགས་གསུངས་པའི་ཕྱིར། གལ་སྟེ་ མཐར་ཐུག་གི་རིགས་ངོར་རྙེད་མི་སྲིད་ཀྱང་མ་རྙེད་པ་དེ་ཀ་ལ་དོན་དམ་དུ་འདོགས་སོ་ཞེ་ན་འོ་ན་རིགས་ངོར་མ་རྙེད་པ་མཚན་ཉིད་དུ་སྦྱོར་བར་རིགས་ཀྱི་མ་རྙེད་པ་འཆད་པའི་ཚེ་རྙེད་པ་ཞེས་སྦྱར་བ་ལ་དགོས་པ་ཅི་ཞིག་གུ། སྤྱིར་མ་རྙེད་བ་ཙམ་ཡང་དོན་དམ་ག་ལ་ཡིན་ཏེ་རྙེད་མ་ རྙེད་ནི་སྤྲོས་པ་ཡིན་ལ་དོན་དམ་སྤྲོས་བྲལ་དུ་འདོད་པའི་ཕྱིར། གཞན་ཡང་ཐ་སྙད་པའི་ཚད་མ་རྙེད་པ་ཞེས་སོགས་དང་དོན་རིག་མངོན་སུམ་གྱི་ཡུལ་ཞེས་སོགས་རྟོག་གེའི་ཐ་སྙད་ལས་དྲངས་པའང་དབུ་མའི་སྐབས་སུ་ཧ་ཅང་བབ་པ་མིན་སྟེ་བདེན་ཆུང་ལས། མངོན་སུམ་དང་ནི་རྗེས་སུ་དཔག །སངས་རྒྱས་པ་ཡིས་དེ་གཉིས་བཟུང་། །གཉིས་པོས་སྟོང་ཉིད་རྟོགས་སོ་ཞེས། །ཚུ་རོལ་མཐོང་བའི་རྨོངས་པ་སྨྲ། །ཞེས་དང་། མངོན་སུམ་རྗེས་དཔག་དགོས་པ་མེད། །མུ་སྟེགས་རྒོལ་བ་ཟློག་པའི་ཕྱིར། མཁས་ པ་རྣམས་ཀྱིས་བྱས་པ་ཡིན། །ལུང་ལས་ཀྱང་ནི་གསལ་པོ་རུ། །རྟོག་བཅས་རྟོག་པ་མེད་པ་ཡི། །ཤེས་པ་གཉིས་ཀྱིས་མི་རྟོག་ཅེས། སློབ་དཔོན་མཁས་པ་བྷ་བྱས་གསུངས། །ཞེས་སོ། །གལ་ཏེ། དངོས་སྙེད་ངོ་བོ་གཉིས་ནི་འཛིན་པར་འགྱུར། ། ཞེས་པ་འདིས་རིགས་ངོར་བརྙེད་པ་བསྟན་ཏོ་སྙམ་ན་དེ་ནི་དངོས་པོ་ཇི་སྙེད་པ་ལ་འཛིན་ཚུལ་གཉིས་འཇུག་སྟེ་མཐོང་བ་བརྫུན་པ་དང་ཡང་དག་པའོ་ཞེས་བསྟན་པ་ཡིན་གྱི་ཤེས་ངོར་རྙེད་པ་ཞེས་བསྟན་པ་མ་ཡིན་པས་ཡི་གེའི་འཇུག་པའང་ཤེས་པར་གྱིས་ཅིག །
Page: 267 ༄༅། །བློའི་ཡུལ་དུ་ཇི་ལྟར་སྣང་བ་ཀུན་རྫོབ་ཀྱི་མཚན་གཞི་དང་བློའི་ཡུལ་ལས་འདས་པ་དོན་དམ་པའི་མཚན་གཞིར་འདོད་པའང་མི་འཐད་སྟེ་དེ་གཉིས་ནི་སོ་སོའི་མཚན་ཉིད་དུ་བྱས་ཀྱང་མི་འགལ་ལ་མཚོན་བྱ་དང་མཚན་གཞི་ལ་རྒྱ་ཆེ་ཆུང་ གི་ཁྱད་པར་མི་སྣང་བའི་ཕྱིར་ཏེ་ཚ་ཞིང་སྲེག་པའི་མཚན་གཞིར་ཙནྡན་གྱི་དམར་འབར་བ་ལྟ་བུ་འགོད་དགོས་ཀྱི་མེ་སྤྱི་ལྡོག་ཙམ་དགོད་པར་བྱ་བ་མ་ཡིན་པ་བཞིན་ནོ། །ཡོངས་དཔྱོད་སྤྲོས་བྲལ་དུ་གྲུབ་པའི་ཆོས་ཞེས་པའང་བརླན་ཞིང་གཤེར་བའི་མེ་ཞེས་ པ་ལྟར་ཚིག་གཅིག་ལ་འགལ་བ་གཞི་མཐུན་དུ་ཁས་བླངས་པ་ཡིན་ཏེ་སྤྲོས་བྲལ་ཡིན་ན་གྲུབ་མ་གྲུབ་གང་དུའང་འགལ་བའི་ཕྱིར། གལ་སྟེ་སྤྲོས་པ་དང་བྲལ་བ་ཙམ་ལ་སྤྲོས་བྲལ་དུ་གྲུབ་པར་ཐ་སྙད་བྱས་སོ་ཞེ་ན་འོ་ན་རྣམ་བཅད་སྤྲོས་པ་དང་བྲལ་བ་ རྣམ་གྲངས་མིན་པའི་དོན་དམ་དང་ཡོངས་དཔྱོད་སྤྲོས་བྲལ་དུ་གྲུབ་པ་རྣམ་གྲངས་ཀྱི་དོན་དམ་དུ་འདོད་པ་ཉམས་ཏེ་དེ་གཉིས་གཅིག་པའི་ཕྱིར་རོ། །དོན་དམ་གྱི་མཚན་གཞི་སྤྲོས་བྲལ་ལ་ནི་མཐར་ཐུག་ཚོལ་བའི་རིགས་པས་ངེས་ཏེ་ཞེས་པའང་སྤྱིར་སྤྲོས་བྲལ་ ནི་དོན་དམ་གྱི་མིང་གི་རྣམ་གྲངས་ཡིན་པའི་ཕྱིར་དོན་དམ་གྱི་མཚན་གཞི་མིན་ལ་བདེ་སྡུག་གི་ཚོར་བ་སྤྲོས་བྲལ་དུ་མཐོང་བ་ལྟ་བུ་དོན་དམ་གྱི་མཚན་གཞིར་འོས་ལ་དོན་དམ་དེ་མཐར་ཐུག་ཚོལ་བའི་རིགས་པས་མངོན་སུམ་དུ་བྱེད་མི་ནུས་ཏེ་དེ་ཐོས་བསམ་སྒོམ་པའི་ དངོས་ཡུལ་མ་ཡིན་པའི་ཕྱིར་ཏེ། རྒྱུད་བླར། ཕྲ་ཕྱིར་ཐོས་པའི་ཡུལ་མ་ཡིན། །དོན་དམ་ཡིན་ཕྱིར་བསམ་པའི་མིན། །ཆོས་ཉིད་ཟབ་ཕྱིར་འཇིག་རྟེན་པའི། སྒོམ་པ་ལ་སོགས་ཡུལ་མ་ཡིན། །ཞེས་སོ། །རྟག་པ་དོན་དངོས་དང་། མི་རྟག་པ་ཤེས་ དངོས་ཞེས་པའང་སངས་རྒྱས་པ་ལ་ཐ་སྙད་མི་མཛེས་ཏེ་འདུས་བྱས་ཐམས་ཅད་མི་རྟག་པར་བཤད་པས་རྟག་པའི་ཕྱི་དོན་མི་རྙེད་པའི་ཕྱིར་དང༌ཕྱི་དོན་དང་ཤེས་པ་ལ་རྟག་མི་རྟག་གི་ཁྱད་པར་འགའ་ཡང་མེད་པའི་ཕྱིར། གལ་སྟེ་འཇིག་རྟེན་པ་རྣམས་ཕྱི་དོན་ལ་རྟག་
Page: 268 པར་འཛིན་པས་སོ་ཞེ་ན་འཇིག་རྟེན་པའི་མཐོང་བ་ཚད་མར་བྱེད་ན་གྲུབ་པའི་མཐས་ཅི་ཞིག་བྱ། གལ་ཏེ་རྒྱུན་ལ་རྟག་པར་ཐ་སྙད་བྱས་སོ་ཞེ་ན་འོ་ན་ཤེས་པ་མི་རྟག་པར་ཅིའི་ཕྱིར་ཟུར་དུ་སྨྲ། གཟུགས་སོགས་ཇི་ལྟར་སྣང་བ་འདི་ཐ་སྙད་པའི་ཤེས་པ་ལ་ སྣང་ཞིང་རིགས་ངོར་ཁེགས་པས་ན་སྣང་བ་སྒྱུ་མ་ལྟ་བུ་སྟེ་ཞེས་པའང་རིགས་པས་དཔྱད་རུང་མ་དཔྱད་རུང་སྣང་བ་སྒྱུ་མ་ལྟ་བུ་ལས་མི་འདའ་བ་ཁོང་དུ་མ་ཆུད་པར་རིགས་པས་དཔྱད་པ་སྣང་ཡང་མ་གྲུབ་པར་མཐོང་བའི་ཚེ་སྒྱུ་མ་ལྟ་བུའོ་སྙམ་པར་སྣང་ཡང་དེ་ལྟ་མ་ ཡིན་ཏེ་སྒྱུ་མ་ལ་སྒྱུ་མར་ཤེས་པའི་གང་ཟག་སྒྱུ་མའི་སྣང་བ་ལ་ལོངས་སྤྱོད་པ་དང་སྒྱུ་མ་ལ་སྒྱུ་མར་མ་ཤེས་པའི་གང་ཟག་སྒྱུ་མའི་སྣང་བ་ལ་ལོངས་སྤྱོད་པ་གཉིས་བརྫུན་པར་ཤེས་མ་ཤེས་ཀྱི་ཁྱད་པར་ཡོད་མོད་ཀྱང་སྒྱུ་མ་ཡིན་པར་ཁྱད་པར་མེད་པའི་ཕྱིར། དེས་ན་དཔྱད་རུང་མ་དཔྱད་རུང་། རྟོགས་རུང་མ་རྟོགས་རུང༌། ཆོས་འདི་ཐམས་ཅད་ནི་ཅིར་ཡང་མ་གྲུབ་ལ་རྐྱེན་གྱིས་ཅིར་ཡང་སྣང་དུ་རུང་བ་ཙམ་ལས་རྣམ་པ་ཀུན་ཏུ་འདའ་བ་མ་ཡིན་ནོ། །བདེན་གཉིས་ངོ་བོ་གཅིག་ཐ་དད་དང༌། ལྡོག་པ་གཅིག་ཐ་དད་ཀྱི་རྣམ་བཞག་ བྱས་པ་དེ་ཡང་རྟོག་གེ་པའི་ཐ་སྙད་སྦྱར་བར་ཟད་སྟེ་ལྡོག་པ་གཞན་སེལ་སོགས་ཀྱི་རྣམ་བཞག་ཐེག་ཆེན་དུ་མ་གསུངས་ཤིང་དགོངས་པ་ངེས་འགྲེལ་ལས། འདུ་བྱེད་ཁམས་དང་དོན་དམ་མཚན་ཉིད་དག །གཅིག་དང་ཐ་དད་བྲལ་བའི་མཚན་ཉིད་དེ། ། གཅིག་དང་ཐ་དད་ཉིད་དུ་གང་སེམས་པ། །དེ་དག་ཚུལ་མིན་ཡིད་བྱེད་ཞུགས་པ་ཡིན། །ཞེས་གཅིག་ཐ་དད་དང་བྲལ་བའི་ཆོས་ལ་གཅིག་ཐ་དད་དུ་རྟོག་པ་ནི་ཚུལ་མིན་ཡིད་བྱེད་དུ་གསུངས་པའི་ཕྱིར་རོ། །གྲངས་ངེས་དེའང་འཐད་པར་མ་མཐོང་སྟེ་རིགས་ པས་དཔྱད་བཟོད་མི་བཟོད་རྟོག་གེ་པ་ལ་འགལ་བ་ཡིན་དུ་ཆུག་ཀྱང་དབུ་མ་པ་ལ་རིགས་པས་དཔྱད་བཟོད་ཀྱི་ཆོས་མེད་པའི་ཕྱིར་དང་བདེན་པ་གཉིས་ལས་མང་བ་གསུམ་དང་བཞི་ཡང་བཤད་པའི་ཕྱིར་དང་བདེན་གཉིས་གཞི་གཅིག་ཏུ་ཡང་མི་འདུ་བ་མ་ཡིན་
Page: 269 ༄༅། །སྟེ་སྐབས་འགར་ཇི་ལྟར་བརྗོད་པ་ཐམས་ཅད་ཀུན་རྫོབ་ཁོ་ན་ཡིན་པས་དོན་དམ་ཡང་ཀུན་རྫོབ་ཏུ་བསྡུས་ནའང་མི་འགལ་ཞིང་། ཡང་ན་ཀུན་རྫོབ་ནི་འཁྲུལ་པ་ཁོ་ནར་ཟད་པས་འཁྲུལ་དུས་ཉིད་ནའང་ཐག་ཁྲའི་སྦྲུལ་ལྟར་མི་ བདེན་ལ་ཆོས་ཐམས་ཅད་ཀྱི་རང་ངོ་ནི་ཆོས་ཉིད་གཟོད་ནས་དག་པ་ཁོ་ན་ལས་མི་འདའ་བས་དོན་དམ་བདེན་གཅིག་ཏུ་ཡང་གསུངས་པའི་ཕྱིར་རོ། །བདེན་པ་གཉིས་ལས་ཉུང་བ་ཁེགས་པ་རང་ཚིག་དང་ཡང་འགལ་ཏེ་དོན་དམ་བདེན་གཉིས་ཀྱི་ཡ་གྱལ་དུ་ མི་འཐད་པའི་རྩོད་པ་བཀོད་ནས་རང་གིས་བདེན་ལན་བཏབ་པའི་ཕྱིར་རོ། །སྤྱིར་དོན་དམ་མེད་དགག་ཏུ་འདོད་པ་དང༌དོན་དམ་མ་ཡིན་དགག་ཏུ་འདོད་པ་དང༌དོན་དམ་རྟག་བརྟན་གྱི་སྒྲུབ་པར་འདོད་པ་སོགས་མང་མོད་ཀྱང་རེ་ཞིག་ཕ་རོལ་གྱི་གྲུབ་འཛིན་ལྡོག་པའི་ཕྱིར་ མེད་དགག་ཏུ་འཆད་པ་དང་དེར་ཞེན་པ་ལྡོག་པའི་ཕྱིར་མ་ཡིན་དགག་ཏུ་འཆད་པ་དང་། མེད་པ་ལ་དོན་དམ་དུ་ཞེན་པ་ལྡོག་པའི་ཕྱིར་ཡོན་ཏན་གྱིས་མི་སྟོང་པའི་རྟག་བརྟན་ཏུ་འཆད་ན་ནི་དེ་ཐམས་ཅད་ཀྱང་མི་འགལ་ལ་རང་ཉིད་དེ་དང་དེར་ཞེན་ནས་སྨྲ་ ན་ནི་དེ་ཐམས་ཅད་ཀྱང་དོན་དམ་ལས་རིང་དུ་འགྱུར་ཏེ་དགག་པ་ནི་མེད་འཛིན་དང་སྒྲུབ་པ་ནི་ཡོད་འཛིན་གྱི་བློས་བཏགས་པ་ཡིན་ལ་གང་དུ་འཛིན་པ་ཐམས་ཅད་ནི་གནས་ཚུལ་ལ་བལྟོས་ཏེ་ཕྱིན་ཅི་ལོག་ཁོ་ན་ཡིན་པའི་ཕྱིར། གལ་ཏེ་དོན་དམ་པ་མེད་དགག་ཡིན་ན་ མེད་དགག་ནི་འཇིག་རྟེན་པ་རྣམས་གང་མེད་པར་འཛིན་པ་དེ་ལ་གྲུབ་མཐའ་པས་མེད་དགག་ཏུ་འཆད་པའི་ཕྱིར་དོན་དམ་ཡོད་མེད་ཀྱི་ཟླས་ཕྱེ་བའི་མེད་པ་ཡིན་པར་འགྱུར་ལ། གལ་ཏེ་མ་ཡིན་དགག་གམ་རྟག་བརྟན་གྱི་སྒྲུབ་པ་ཡིན་ན་ཡོད་མེད་ཀྱི་ཟླས་ ཕྱེ་བའི་ཡོད་པ་ཡིན་པར་འགྱུར་རོ། །དེ་གཉི་གའང་མ་ཡིན་ཏེ་ཡོད་འཛིན་ནི་རྟག་ལྟ་དང་། མེད་འཛིན་ནི་ཆད་ལྟ་ཡིན་པའི་ཕྱིར་དང་། གང་ཆོས་རྣམས་ལ་ཡོད་པའང་མེད་པར་ལྟ་བ་དེས་གང་ལ་ལྟ་བ་བྱ་བའི་ཉེ་བར་ཞི་བ་དེ་མི་མཐོང་བའི་ཕྱིར་དང་། དངོས་པོའམ་དངོས་མེད་དུ་ལྟ་བ་ནི་སངས་རྒྱས་ཀྱི་བསྟན་པ་ལ་དེ་ཉིད་མཐོང་བ་མ་ཡིན་པའི་ཕྱིར་དང་། སྟོན་པས་ཡོད་མེད་གཉིས་ཀ་བཀག་པའི་ཕྱིར་དང་། དོན་དམ་པ་ལྟ་ཞོག་ཀུན་རྫོབ་ཉོན་མོངས་པའང་དཔྱད་ན་
Page: 270 ཡོད་མེད་གང་དུའང་མི་འགྲུབ་སྟེ་རང་བཞིན་གྱིས་ཡོད་ན་ཡང་སྤོང་མི་ནུས་ཤིང་མེད་ན་ཡང་སྤོང་མི་ནུས་པའི་ཕྱིར་དང༌། དངོས་པོ་དང་དངོས་མེད་ནི་འདུས་བྱས་ཡིན་པས་དོན་དམ་འདུས་བྱས་སུ་ཐལ་བ་དང༌། དེ་བཞིན་གཤེགས་པ་མྱ་ངན་ལས་འདས་པ་དང་ བཞུགས་པ་གང་གི་ཚེ་ནའང་ཡོད་མེད་སོགས་མཐའ་བཞིར་མི་གནས་པའི་ཕྱིར་དང་། ཡོད་མེད་ནི་མཐའ་ཁོ་ན་ཡིན་པའི་ཕྱིར་དང་། ཡོད་མེད་དུ་འཛིན་པ་ནི་རློམ་སེམས་ཡིན་ལ་བདེན་པ་མཐོང་བའི་ངོར་རློམ་སེམས་གང་ཡང་མི་འཇུག་པའི་ཕྱིར་ཏེ་དབུ་མ་ རྩ་བར། ཡོད་ཅེས་བྱ་བ་རྟག་པར་འཛིན། །མེད་ཅེས་བྱ་བ་ཆད་པར་ལྟ། དེ་ཕྱིར་ཡོད་དང་མེད་པ་ལ། །མཁས་པས་གནས་པར་མི་བྱའོ། །ཞེས་དང་། བློ་ཆུང་གང་དག་དངོས་རྣམས་ལ། ཡོད་པ་ཉིད་དང་མེད་ཉིད་དུ། ལྟ་ བ་དེས་ནི་བལྟ་བྱ་བ། །ཉེ་བར་ཞི་བ་ཞི་མི་མཐོང་། །ཞེས་དང་། དེ་ལ་ཡོད་དོ་མེད་དོ་ཞེས། །རྟོག་པ་དག་ནི་ལྡོག་པར་འགྱུར། །ཞེས་དང་། གང་དག་བདག་དང་དངོས་པོ་རྣམས། དེ་བྱས་ཉིད་དང་ཐ་དད་པར། །སྟོན་པ་དེ་དག་བསྟན་ དོན་ལ། །མཁས་སོ་སྙམ་དུ་མི་སེམ་མོ། །ཞེས་དང་། གང་དག་རང་བཞིན་གཞན་དངོས་དང་། །དངོས་དང་དངོས་མེད་ཉིད་བལྟ་བ། །དེ་དག་སངས་རྒྱས་བསྟན་པ་ལ། །དེ་ཉིད་མཐོང་བ་མ་ཡིན་ནོ། །བཅོམ་ལྡན་དངོས་དང་དངོས་མེད་པ། ། མཁྱེན་པས་ཀ་ཏྱ་ན་ཡི་ནི། །གདམས་ངག་ལས་ནི་ཡོད་པ་དང་། །མེད་པ་གཉིས་ཀའང་དགག་པར་མཛད། །ཅེས་དང་། གལ་ཏེ་ལ་ལའི་ཉོན་མོངས་པ། །གང་དག་རང་བཞིན་གྱིས་ཡོད་ན། །ཇི་ལྟ་བུར་ན་སྤོང་བར་འགྱུར། །ཡོད་པ་སུ་ཞིག་སྤོང་བར་བྱེད། ། གལ་ཏེ་ལ་ལའི་ཉོན་མོངས་པ། །གང་དག་རང་བཞིན་གྱིས་མེད་ན། །ཇི་ལྟ་བུར་ན་སྤོང་བར་འགྱུར། །མེད་པ་སུ་ཞིག་སྤོང་བར་བྱེད། །ཅེས་དང་། ཇི་ལྟར་མྱ་ངན་འདས་པ་ནི། །དངོས་དང་དངོས་མེད་གཉིས་མིན་ཏེ། མྱ་ངན་འདས་པ་འདུས་མ་བྱས། །
Page: 271 ༄༅། །དངོས་དང་དངོས་མེད་འདུས་བྱས་ཡིན། །ཞེས་དང་། བཅོམ་ལྡན་མྱ་ངན་འདས་གྱུར་ནས། །ཡོད་པར་མི་མངོན་དེ་བཞིན་དུ། །མེད་དོ་ཅེ་དང་གཉི་ག་དང་། །གཉིས་མིན་ཞེས་ཀྱང་མི་མངོན་ནོ། །བཅོམ་ལྡན་བཞུགས་པར་གྱུར་ན་ཡང་། ། ཡོད་པར་མི་མངོན་དེ་བཞིན་དུ། །མེད་དོ་ཅེ་འམ་གཉི་ག་དང་། །གཉིས་མིན་ཞེས་ཀྱང་མི་མངོན་ནོ། །ཞེས་དང་། ཏིང་འཛིན་རྒྱལ་པོ་ལས། རྟོག་ཅན་དག་གིས་ཡོད་དང་མེད་ཅེས་བྱ། །དེ་ལྟར་དཔྱོད་པ་སྡུག་བསྔལ་ཞི་མི་འགྱུར། །ཡོད་དང་མེད་ཅེས་བྱ་ བ་གཉི་ག་མཐའ། །གཙང་དང་མི་གཙང་འདི་ཡང་མཐའ་ཡིན་ཏེ། །དེ་ཕྱིར་གཉི་གའི་མཐའ་ནི་རྣམ་སྤངས་ནས། །མཁས་པས་དབུས་ལའང་གནས་པར་ཡོང་མི་བྱེད། །ཡོད་དང་མེད་ཅེས་བྱ་བ་རྩོད་པ་སྟེ། །གཙང་དང་མི་གཙང་འདི་ཡང་རྩོད་ པ་ཡིན། །རྩོད་པར་གྱུར་པ་སྡུག་བསྔལ་ཞི་མི་འགྱུར། །རྩོད་པ་མེད་པར་གྱུར་པ་སྡུག་བསྔལ་འགག །ཞེས་དང་ཏོག་གཟུངས་ལས། གང་ཐམས་ཅད་མཁྱེན་པའི་མིང་འཐོབ་པར་འགྱུར་བའི་རྫས་ཀྱི་མཚན་ཉིད་ཀྱི་དངོས་པོ་གང་ཡང་ཡོད་དམ། གསོལ་པ། གལ་ཏེ་མཆིས་ཞེས་བགྱིས་ན་ནི་རྟག་པར་འགྱུར་མ་མཆིས་ཞེས་བགྱིས་ན་ནི་ཆད་པར་འགྱུར་དབུ་མའི་ལམ་ནི་དམིགས་སུ་མ་མཆིས་ཏེ་དེ་ནི་མཆིས་པ་ཡང་མ་ལགས་མ་མཆིས་པ་ཡང་མ་ལགས་སོ་ཞེས་དང་། ནམ་མཁའ་མཛོད་ཀྱི་མདོ་ལས། ཡང་དག་མཐའ་ ལ་གང་གནས་པ། །དངོས་པོ་དང་ནི་དངོས་མེད་ཀྱི། །ལྟ་བ་མཁས་པས་མི་འཛིན་ཏོ། སྟོང་པ་ཉིད་ནི་སྒྲ་ཡིས་བསྒྲགས། །སྒྲ་ལ་སྟོང་པ་ཉིད་མེད་དེ། །དེ་ནི་སྒྲ་མེད་བརྗོད་པ་མེད། །ཅེས་དང་། བློ་གྲོས་རྒྱ་མཚོའི་མདོ་ལས། ཚངས་པ་ཆོས་ གང་ཡོངས་སུ་གྲུབ་པ་མེད་པ་དེ་ལ་ཡོད་པའམ་མེད་པར་ཁས་བླང་དུ་མེད་དོ་ཆོས་གང་ཡོད་པའམ་མེད་པར་ཁས་བླང་དུ་མེད་པ་དེ་ལ་མངོན་སུམ་དུ་འགྱུར་བ་གང་ཡང་མེད་དོ་ཅེས་དང་། དེ་བཞིན་གཤེགས་པའི་ཡེ་ཤེས་ཀྱི་ཕྱག་རྒྱའི་ཏིང་ངེ་འཛིན་གྱི་མདོར།
Page: 272 མཁས་པ་ཡོད་དང་མེད་པར་འདུ་ཤེས་མེད། །རིག་དང་མ་རིག་གཉིས་སུ་འདུ་ཤེས་མེད། །ཐ་སྙད་ཙམ་སྟེ་དེ་ལ་སྙིང་པོ་མེད། །ཅེས་དང་། མ་དྲོས་པའི་མདོར། གང་ཞིག་ལམ་ནི་དངོས་བྱེད་མིན། དངོས་མེད་དངོས་པོ་མེད་དེ་མིན། །དངོས་དང་དངོས་ མེད་བྲལ་བ་སྟེ། །མཆོག་གི་ལམ་ནི་སྒོམ་པའོ། །ཞེས་དང་། དེ་ལ་ཡོད་དང་མེད་པ་མཉམ། །དེ་བཞིན་ཉིད་ལ་དེ་བཞིན་ཤེས། །ཆོས་རྣམས་ཀུན་གྱི་དེ་བཞིན་ཉིད། །ངས་ནི་དེ་ལྟར་སངས་རྒྱས་ཏེ། །ཞེས་དང་སྡོང་པོས་ཞུས་པར། གང་ནའང་ ཡོད་དང་མེད་པ་མེད་མོད་ཀྱི། རྒྱུ་ལ་བརྟེན་ནས་ཆོས་རྣམས་འབྱུང་བས་ན། །མཁའ་ལ་གློག་མཐོང་འཇིག་པ་ལྟ་བུར་ནི། སེམས་ཀྱི་འཁྲི་ཤིང་དེ་ལྟར་ཤེས་པར་བྱ། །ཞེས་དང་། ཚངས་པ་ཁྱད་པར་སེམས་ཀྱི་མདོར། གང་ལ་བདེན་པ་མེད་ཅིང་བརྫུན་པ་ མེད་པ་དེ་ནི་འཕགས་པ་རྣམས་ཀྱི་བདེན་པ་ཡིན་པར་རིག་པར་བྱའོ་ཞེས་གསུངས་ཏེ་དེ་ལ་སོགས་པ་ཐེག་ཆེན་གྱི་མདོ་བསྟན་བཅོས་མཐའ་དག་ལས་མགྲིན་གཅིག་ཏུ་གསུངས་སོ། །དེས་ན་དོན་དམ་པ་ཡོད་མེད་སོགས་མཐའ་བཞི་གང་རུང་དུ་ཁས་ལེན་ན་དེ་དབུ་མ་ པ་མ་ཡིན་པར་ཤེས་པར་བྱ་སྟེ། ཡོད་མིན་མེད་མིན་ཡོད་མེད་མིན། །གཉིས་ཀའི་བདག་ཉིད་མིན་པའང་མིན། །མཐའ་བཞི་ལས་ནི་རྣམ་གྲོལ་བ། །དེ་ཉིད་དབུ་མ་པ་ཡིས་རིག །ཞེས་སོ། །དེ་ལྟ་མོད་ཀྱི་བོད་ཀྱི་ཕྱི་རབས་འདི་ན་གཞུང་འདི་ལྟ་བུ་འགྲེལ་ པ་ན་ཁ་ཅིག་ཀུན་རྫོབ་ངོ་བོ་ཉིད་ཀྱིས་ཡོད་པ་མ་ཡིན་པ་ལ་སྐྲག་སྟེ་ཀུན་རྫོབ་མེད་པ་མ་ཡིན་དོན་དམ་ཡོད་པ་མ་ཡིན། ཞེས་དང་ཀུན་རྫོབ་ཏུ་མེད་པ་མ་ཡིན་དོན་དམ་དུ་ཡོད་པ་མ་ཡིན་ཞེས་དོན་གྱིས་ན་ཀུན་རྫོབ་ཀྱི་འཁྲུལ་སྣང་ངོ་བོ་ཉིད་ཀྱིས་ཡོད་ཅིང་དོན་དམ་རི་བོང་གི་རྭ་ ལྟར་ཅང་མེད་དུ་འཛིན་པའི་ལོག་ཤེས་ཤིག་འཁྱོག་འགྲོས་ཀྱི་བསྐྱང་བ་དང་། ཁ་ཅིག་སྟོང་པ་ཉིད་སྤྲོས་པ་ཉེ་བར་ཞི་བའི་གནས་ལ་སྐྲག་སྟེ་དོན་དམ་ཞིག་ངེས་པར་གྲུབ་དགོས་སོ་སྙམ་ནས་ཀུན་རྫོབ་ཡོད་པ་མ་ཡིན་དོན་དམ་མེད་པ་མ་ཡིན་ཞེས་སོགས་ཀྱིས་
Page: 273 ༄༅། །དོན་དམ་ལ་གྲུབ་འཛིན་གྱི་ཞེན་པ་དངོས་སུ་བསྐྱེད་པ་དག་མཐོང་མོད་ཀྱི། དེ་དག་ནི་ཚད་པའི་ནད་རྒྱས་པ་ལ་ག་བུར་གཏོང་བ་ན་ངེས་པར་ནིམ་པ་དང་པི་པི་ལིང་གི་ཁུ་བས་བསྲེ་དགོས་སོ་ཞེས་སམ། སྨན་ཅི་གཏོང་ཡང་དུག་ཧ་ལ་ཧ་ལ་དང་བསྲེ་དགོས་སོ། ། ཞེས་སྨྲ་བ་ལྟ་བུ་སྟེ་གཞུང་ལུགས་དེ་འགོག་པའི་ཕྱིར་གཞུང་ལུགས་དེ་སྨྲ་བ་ལྟར་བཅོས་པ་བུར་བྱས་ཏེ་ཕའི་རབས་གཅོད་པ་ཞེས་བྱ་བ་ཡིན་ཏེ། དེ་ལྟར་བཤད་དུ་རུང་ན་གཞུང་དེ་དག་ཕྱི་རོལ་པས་ཀྱང་ཁས་བླང་བྱར་འགྱུར་ཏེ། རྒྱང་འཕེན་པས་ཚེ་སྔ་མ་དང་ཕྱི་མ་ཡོད་པ་ མ་ཡིན་ད་ལྟ་བའི་གང་ཟག་གི་བདག་མེད་པ་མ་ཡིན་ནོ། །ཞེས་སམ་སངས་རྒྱས་པའི་ཐར་པ་ཡོད་པ་ྨ་ཡིན་ཕྱི་རོལ་པ་ལ་ཐར་པ་མེད་པ་མ་ཡིན་ཞེས་སོགས་འདོད་པ་ཐམས་ཅད་ཀྱིས་འབྲུ་བསྣན་དུ་མི་རུང་བ་ཅི་ཡང་མི་འབྱུང་ངོ་། །ཡང་བོད་ཡུལ་ན་ཉི་ཟླ་ལྟར་གྲགས་ པའི་མཁས་པ་ཁ་ཅིག་མཐའ་གཉིས་ཀྱི་དབུས་ངེས་པར་ཁས་ལེན་དགོས་ཏེ། དེ་ནི་དོན་དམ་གཞན་སྟོང་ཆེན་པོ་རྟག་པའི་དངོས་པོ་མི་འགྱུར་བ་ཐེར་ཟུག་པ་བློ་བུར་གྱི་དྲི་མས་སྟོང་ཞིང་། སྟོབས་སོགས་ཀྱི་ཡོན་ཏན་ཐམས་ཅད་ཀྱིས་མི་སྟོང་བ་ཡེ་ཤེས་ཀྱི་རྒྱལ་ཁམས་ཆེན་པོའོ། ། ཞེས་འཆད་མོད། སྤྱིར་སངས་རྒྱས་ཀྱི་ཆོས་ཀྱི་ཚུལ་མཐའ་ཡས་པས་མེད་པ་ལ་དོན་དམ་དུ་ཞེན་པ་ཉི་ཚེའི་སྟོང་འཛིན་སེལ་བའི་ཕྱིར་དང་། གདུལ་བྱ་དག་པ་རྟག་ཆད་ཀྱི་མཐའ་ལས་གྲོལ་བས་ཇི་ལྟར་བསྟན་ཡང་སྒྲོ་སྐུར་གྱི་དམིགས་པ་མི་སྐྱེ་བ་རྣམས་ལ་ཆོས་ཉིད་ རྟག་བརྟན་དུ་བཤད་པ་མང་དུ་ཡོད་མོད་ཀྱང་དེ་དག་ནི་ནད་བྱང་ཞིང་ལུས་སྟོབས་རྫོགས་པའི་སྐྱེས་བུ་ནི་རོ་བཅུད་བཟང་པོའི་ཁ་ཟས་ཐམས་ཅད་ལ་ལོངས་སྤྱོད་པ་ལྟ་བུ་ཡིན་ལ། དམིགས་པར་ལྟ་བའི་བད་ཀན་གྱི་ནད་ལྕི་བས་ཟིན་པ་སྟོང་ཉིད་ཀྱི་བཀྲུ་སྨན་གྱིས་སྦྱང་དགོས་པའི་ སྐབས་སུ་དེ་ལྟ་མ་ཡིན་ཏེ། མཐའ་དབུས་ནི་ཕན་ཚུན་བལྟོས་ཏེ་བཞག་པ་ཡིན་པས་མཐའ་བཀག་ན་དེའི་དབུས་མི་འགྲུབ་སྟེ་མཐའ་མེད་པའི་དབུས་འཇིག་རྟེན་ན་མི་སྲིད་པའི་ཕྱིར། དབུས་ཡོད་ན་དེ་ལ་བལྟོས་པའི་མཐའ་ཡང་ཡོད་དེ་རྡུལ་ཕྲ་རབ་གཅིག་ལ་
Page: 274 ཡང་གཡས་གཡོན་དབུས་གསུམ་དུ་འགྱུར་ཞིང་དེའི་དབུས་ཀྱི་ཆ་ཁོ་ན་ལའང་རང་སའི་གཡས་གཡོན་དབུས་གསུམ་དུ་འགྱུར་བ་སོགས་ཇི་སྲིད་དབུས་སུ་འཛིན་པ་ཡོད་པ་དེ་སྲིད་གཡས་གཡོན་སོགས་མཐའི་འཛིན་པ་ཡང་འཇུག་པའི་ཕྱིར། ལུང་གིས་ཀྱང་གྲུབ་སྟེ་རྒྱལ་ པོ་ཤར་པའི་མདོ་ལས། མཐའ་གཉིས་མེད་ཕྱིར་དབུས་ཀྱང་ཡོད་མ་ཡིན། །ཞེས་སོ། །དེས་ན། དེ་ཕྱིར་གཉིས་ཀའི་མཐའ་ནི་རྣམ་སྤངས་ནས། །མཁས་པས་དབུས་ལའང་གནས་པར་ཡོད་མི་བྱེད། །ཅེས་དང་། ད་ལྟར་གྱི་སངས་རྒྱས་མངོན་སུམ་དུ་བཞུགས་ པའི་ཏིང་ངེ་འཛིན་གྱི་མདོ་ལས། བཟང་སྐྱོང༌། གང་ལ་ལ་ཞིག་ཅི་ཡང་མེད་ཅིང་མ་སྐྱེས་ཏེ་ཡོངས་སུ་མ་གྲུབ་པའི་ཆོས་ལ་ཆོས་ཐམས་ཅད་ནི་ཞི་བའོ། །ཞེས་རྟོག་པ་འདི་ནི་མཐའ་གཅིག་གོ་མ་ཞི་བའོ། །ཞེས་རྟོག་པ་ནི་མཐའ་གཉིས་པའོ། །བཟང་སྐྱོང་། གང་ཞི་བ་དང་མ་ཞི་བའི་ མཐའ་འདི་གཉིས་མི་དམིགས་པ་དང་མི་རྟོག་པ་དང་རྣམ་པར་མ་གྲུབ་པ་དང་ཡིད་ལ་མི་བྱེད་པ་དང་ཀུན་ཏུ་མི་སྤྱོད་པ་འདི་ནི་བགྲང་བའི་ཚུལ་དང་འཇིག་རྟེན་པའི་ཀུན་རྫོབ་ཀྱིས་བསྟན་པས་དབུ་མའི་ལམ་ཞེས་བྱ་སྟེ་དོན་དམ་པར་ནི་འདི་ལ་མཐའ་དང་དབུས་དམིགས་སུ་མེད་དོ། ། ཞེས་མཐའ་དབུས་ནི་ཀུན་རྫོབ་ཡིན་པར་བསྟན་གྱི་དོན་དམ་པར་མ་གསུངས་ཤིང་། ཡང་བྱང་ཆུབ་སེམས་དཔའ་སེམས་དཔའ་ཆེན་པོས་ཡེ་ཤེས་ལ་མངོན་པར་འདོད་པར་བྱའི་ཡེ་ཤེས་ལ་མངོན་པར་ཞེན་པར་མི་བྱ་བའོ་ཞེས་ཡེ་ཤེས་ཞེན་པ་མི་བྱ་བར་གསུངས་སོ། ། དེས་ན་ཡོད་མེད་དབུས་སོགས་ཀྱི་སྤྲོས་པར་ལྟ་བ་དེས་ནི་སངས་རྒྱས་མི་མཐོང་སྟེ། དབུ་མར་རྩ་བར། རྟག་དང་མི་རྟག་ལ་སོགས་བཞི། །ཞི་བ་འདི་ལ་ག་ལ་ཡོད། །མཐའ་དང་མཐའ་མེད་ལ་སོགས་བཞི། ཞི་བ་འདི་ལ་ག་ལ་ཡོད། །གང་གིས་ དེ་བཞིན་གཤེགས་ཡོད་ཅེས། །འཛིན་པ་སྟུག་པོ་བཟུང་གྱུར་བ། །དེ་ནི་མྱ་ངན་འདས་པ་ལ། །མེད་ཅེས་རྣམ་པར་རྟོག་པར་བྱེད། །ཅེས་དང་། གང་དག་སངས་རྒྱས་སྤྲོས་འདས་ཅིང་། །ཟད་པ་མེད་ལ་སྤྲོས་བྱེད་པ། །སྤྲོས་པས་ཉམས་པ་དེ་ཀུན་
Page: 275 ༄༅། །གྱིས། །དེ་བཞིན་གཤེགས་པ་མཐོང་མི་འགྱུར། །ཞེས་དང༌། མྱ་ངན་འདས་པ་དངོས་པོ་ཡང་། །མིན་ན་དངོས་མེད་ག་ལ་ཡིན། །ཞེས་དང་། རིན་ཆེན་ཕྲེང་བར། མྱ་ངན་འདས་པ་དངོས་མེད་པའང་། །མིན་ན་དངོས་པོ་ག་ ལ་ཡིན། །ཞེས་དང་། དངོས་པོ་དངོས་པོ་མེད་འཛིན་པ། །ཟད་ལ་མྱ་ངན་འདས་ཞེས་བྱ། །ཞེས་སོ། །རྣམ་ཤེས་ཀྱི་རྒྱལ་ཁམས་དང་ཡེ་ཤེས་ཀྱི་རྒྱལ་ཁམས་ཐ་དད་པ་ཡོད་པའང་མ་ཡིན་ཏེ། དེ་བཞིན་གཤེགས་པའི་རང་བཞིན་གང་། ། དེ་ནི་འགྲོ་འདིའི་རང་བཞིན་ཡིན། །དེ་བཞིན་གཤེགས་པ་རང་བཞིན་མེད། །འགྲོ་བ་ཀུན་གྱི་རང་བཞིན་མེད། །ཅེས་དང་། འཁོར་བ་མྱ་ངན་འདས་པ་ལས། །ཁྱད་པར་ཅུང་ཟད་ཡོད་མ་ཡིན། །མྱ་ངན་འདས་པ་འཁོར་བ་ལས། ཁྱད་པར་ ཅུང་ཟད་ཡོད་མ་ཡིན། །མྱ་ངན་འདས་མཐའ་གང་ཡིན་པ། དེ་ནི་འཁོར་བའི་མཐའ་ཡིན་ཏེ། དེ་གཉིས་ཁྱད་པར་ཅུང་ཟད་ནི། །ཤིན་དུ་ཕྲ་བའང་ཡོད་མ་ཡིན། །ཞེས་སོ། །དེས་ན་དོན་དམ་ལ་ཡོད་འཛིན་གྱི་བློ་བརྟན་པོར་ཞེན་པ་འདི་ནི་ འདིའི་ཁུངས་སུ་སྨྲ་བའི་གསུང་རབ་ཆེན་པོ་རྣམས་ཀྱི་དགོངས་པ་མ་ཡིན་ཏེ། རྒྱན་སྟུག་པོ་བཀོད་པའི་མདོར། སངས་རྒྱས་དངོས་པོར་ཡོད་བ་མིན། སངས་རྒྱས་མེད་པའང་མ་ཡིན་ཏེ། རྣལ་འབྱོར་ཅན་རྣམས་སངས་རྒྱས་མཐོང་། ། ཞེས་དང་། བདག་དང་བདག་མེད་སྨྲ་བ་རྣམས། །ཡོད་དང་མེད་པའི་སྨྲ་བས་བཅོམ། །ཞེས་དང་། འདི་ལ་མེད་དམ་ཅུང་ཟད་དམ། །བདག་དང་བདག་མེད་ག་ལ་ཡོད། །ཅེས་དང་། ཡོད་དང་མེད་ཀྱི་ཕྱོགས་དང་བྲལ། །སངས་རྒྱས་ ཕྱོགས་ནི་དྲི་མ་མེད། །བློ་དང་ཤེས་བྱ་བྲལ་བ་སྟེ། །ཚད་དང་དབང་པོ་སྤངས་པ་ཡིན། །སེམས་ཤེས་རྣམས་ཀྱི་ཡུལ་མ་ཡིན། །དེ་ནི་གྲོལ་བ་རྣམས་ཀྱི་ཡུལ། །ཞེས་སོ། །གལ་ཏེ་དོན་དམ་གྱི་རང་བཞིན་གཅིག་ཡོད་ན་ཆོས་ཐམས་ཅད་
Page: 276 ལ་མཚན་ཉིད་མི་འདྲ་བ་མེད་པར་ཐལ་བ་དང་། དོན་དམ་གྱི་སྟོང་ཉིད་ངེས་པར་གྲུབ་ན་སྟོང་ཉིད་དེ་དངོས་འཛིན་གཞོམ་བྱེད་མ་ཡིན་པར་གཞོམ་བྱ་ཡིན་པར་གཞོམ་བྱ་ཡིན་པར་འགྱུར་ཏེ་དེ་ཉིད་ལས། གལ་ཏེ་ཆོས་ཀྱི་རང་ཞིན་ནམ། །མཚན་ཉིད་གཅིག་གཅིག་ ཡོད་གྱུར་ན། །དེ་ཚེ་ཆོས་དང་མཚན་ཉིད་ལ། །མཚན་ཉིད་མི་འདྲ་མེད་པར་འགྱུར། །ཞེས་དང་། དེ་སྟེ་སྟོང་པའི་དངོས་ཡོད་ན། །འཇིག་བྱེད་མ་ཡིན་གཞིག་བྱར་འགྱུར། །ཞེས་དང་། ལྟ་བ་ཇི་སྙེད་གང་ཡང་རུང་། ལུས་ཅན་རྣམས་ལ་ ཡོད་པ་ཡི། །ལྟ་བ་རྣམ་པར་སྤང་བའི་ཕྱིར། །སྟོང་པ་ཉིད་ཀྱི་ཚུལ་བསྟན་ཏོ། །ཞེས་སོ། །དགོངས་པ་ངེས་འགྲེལ་ལས་ནི། ཀུན་བཏགས་པའི་མཚན་ཉིད་གང་ཞེ་ན་ཇི་ཙམ་དུ་རྗེས་སུ་ཐ་སྙད་གདགས་པའི་ཕྱིར་ཆོས་རྣམས་ཀྱི་ངོ་བོ་ཉིད་ དམ་བྱེ་བྲག་ཏུ་མིང་དང་བརྡར་རྣམ་པར་བཞག་པ་གང་ཡིན་པའོ། །གཞན་གྱི་དབང་གི་མཚན་ཉིད་གང་ཞེ་ན་ཆོས་རྣམས་ཀྱི་རྟེན་ཞིང་འབྲེལ་པར་འབྱུང་བ་ཉིད་དེ་འདི་ལྟ་སྟེ་འདི་ཡོད་པས་འདི་འབྱུང་སོགས་ནས་སྡུག་བསྔལ་གྱི་ཕུང་པོ་ཆེན་པོ་འབའ་ ཞིག་པ་འདི་འབྱུང་བར་འགྱུར་རོ་ཞེས་པའི་བར་གང་ཡིན་པའོ། །ཡོངས་སུ་གྲུབ་པའི་མཚན་ཉིད་གང་ཞེ་ན་ཆོས་རྣམས་ཀྱི་དེ་བཞིན་ཉིད་གང་ཡིན་པ་སྟེ་ཞེས་སོགས་དང་། རབ་རིབ་ཀྱི་སྐྱོན་ལྟར་ཀུན་བཏགས་རབ་རིབ་ཀྱི་མཚན་མ་ལྟ་བུ་གཞན་དབང་རབ་ རིབ་དག་པ་ལྟ་བུ་ཡོངས་གྲུབ་ཏུ་གསུངས་པས་ཡོད་མེད་སོགས་ནི་ཀུན་བཏགས་ཡིན་པའི་ཕྱིར་དོན་དམ་ཡོད་པར་ཁས་བླངས་ན་ཡོངས་གྲུབ་ཀུན་བཏགས་སུ་ཁས་བླངས་པར་འགྱུར་རོ། །ང་གཤེགས་ལས་ཀྱང་མ་འོངས་བ་ན་མུ་སྟེགས་པའི་བསམ་ པ་ལ་ཞེན་པ་རྣམས་འཕགས་པའི་ཡེ་ཤེས་སོ་སོ་རང་གིས་རིག་བྱར་དངོས་པོའི་རང་བཞིན་དུ་ཡོད་པར་རྟོག་པར་འགྱུར་རོ་ཞེས་མ་འོངས་པ་ལུང་བསྟན་པ་དང་འཕགས་པ་ལ་དེ་ལྟ་བུའི་འདུ་ཤེས་ག་ལ་འཇུག་སྟེ་དེ་འཇུག་ན་བདག་འཛིན་དུ་འགྱུར་རོ་ཞེས་
Page: 277 ༄༅། །འགོག་པར་མཛད་པ་གོང་དུ་དྲངས་ཟིན་པ་དང༌། ཡོད་མེད་དུ་སྨྲ་བ་ལ་ཞེན་པ་དེ་རྣམས་ཀྱིས་ཆོས་རྣམས་ཀྱིས་ཆོས་ཐམས་ཅད་སྐྱེ་བ་མེད་པར་སྨྲ་བ་རྣམས་ལ་མེད་པ་པ་ཞེས་སྐུར་པ་འདེབས་པ་འབྱུང་བར་ལུང་བསྟན་ཞིང་། ཁྱོད་ཀྱི་ཤེས་རབ་ཐུགས་རྗེ་ཡིས། ། ཁྱོད་ཀྱིས་ཡོད་དང་མེད་མ་དམིགས། །ཅེས་དང་། མགལ་མེའི་འཁོར་ལོ་སྨིག་རྒྱུ་དགམེད་པར་མི་ལ་རབ་ཏུ་སྣང་། །དེ་བཞིན་རྟག་དང་མི་རྟག་དང་། །གཅིག་དང་གཉིས་ཀ་གཉིས་མིན་དང་། །ཐོག་མ་མེད་ཀྱི་ཉེས་འབྲེལ་བས། །བྱིས་པ་རྨོངས་ པ་རབ་ཏུ་རྟོག །ཅེས་དང་། བློ་ཡིས་རྣམ་པར་བརྟགས་ན་ནི། །གཞན་དབང་མེད་ཅིང་བཏགས་པ་མེད། །གྲུབ་པའི་དངོས་པོ་ཡོད་མེད་ན། །བློ་ཡིས་ཅི་ཞིག་རྣམ་པར་བརྟག །ཅེས་དང་། ཡོད་མིན་མེད་མིན་ཡོད་མེད་མིན། །དེ་ལྟར་འཇིག་ རྟེན་ནམ་མཐོང་ན། དེ་ཚེ་སེམས་ཀྱང་རྣམ་ལྡོག་སྟེ། །བདག་མེད་པར་ཡང་རྟོགས་པར་འགྱུར། །ཞེས་དང་། ཇི་ལྟར་བྱིས་པས་རྣམ་བཏགས་བཞིན། །དེ་སྟེ་མཐོང་བཞིན་དེ་ཡོད་ན། །ཐམས་ཅད་ཡང་དག་མཐོང་བར་འགྱུར། །ཞེས་དང་། ཡོད་པའི་ཟླས་གྲངས་མེད་པ་སྟེ། །མེད་པའང་ཡོད་པའི་ཟླས་གྲངས་སོ། །དེ་བས་མེད་པར་ཤེས་མི་བྱ། །ཡོད་པར་ཡང་ནི་མི་རྟོག་གོ །ཅེས་དང་། ཇི་སྲིད་སེམས་ནི་འཇུག་པའི་བར། དེ་སྲིད་འཇིག་རྟེན་རྒྱང་འཕེན་ཡིན། །འཇིག་རྟེན་རང་གི་སེམས་ མཐོང་ན། །རྣམ་པར་རྟོག་པ་མི་འཇུག་གོ །ཅེས་དང་། རྟག་དང་མི་རྟག་བྱས་པ་དང་། །མ་བྱས་པ་དང་གཞན་མིན་གཞན། །དེ་ལ་སོགས་པ་ཐམས་ཅད་ནི། །འཇིག་རྟེན་རྒྱང་འཕེན་ཚུལ་ཡིན་ནོ། །ཞེས་དང་། ཀུན་རྫོབ་ཏུ་ནི་ཐམས་ཅད་ ཡོད། །དམ་པའི་དོན་དུ་ཡོད་མ་ཡིན། །ཞེས་དང་། མ་འོངས་པ་དང་འདས་པ་དང་། །ནམ་མཁའ་གང་དག་མྱ་ངན་འདས། །ཀུན་རྫོབ་ཏུ་ནི་དེ་དག་བཤད། །དམ་པའི་དོན་དུ་ཡི་གེ་མེད། །ཅེས་དང་། སྤྲོས་པ་ཐམས་ཅད་ཞི་བའི་ཕྱིར། །ཤེས་རབ་
Page: 278 ནོར་བར་མི་འཇུག་སྟེ། །ཇི་སྲིད་ནོར་བར་རྣམ་རྟོག་པ། །དེ་སྲིད་རྨོངས་པས་སེམས་འཇུག་གོ །ཅེས་དང་། རང་བཞིན་མེད་དང་དངོས་པོ་དང་། །སྟོང་པ་རྟག་དང་མི་རྟག་རྣམས། །སྐྱེ་བར་སྨྲ་བའི་ལྟ་བ་སྟེ། །མི་སྐྱེ་སྨྲ་བའི་མ་ཡིན་ནོ། །ཞེས་སོ། ། མྱ་ངན་འདས་ཆེན་གྱི་མདོར། སྔོན་ཝ་ར་ཎ་སཱིར་ནི་བརྩོན་འགྲུས་འབྲིང་རྣམས་ལ་མི་རྟག་པ་དང་སྡུག་བསྔལ་བ་དང་སྟོང་པ་དང་བདག་མེད་པ་བསྟན་ཏོ། །ད་རྩྭ་མཆོག་གི་གྲོང་ཁྱེར་འདིར་ནི་ཆོས་ཀྱི་འཁོར་ལོ་བསྐོར་བ་ན་རྟག་པ་དང་བདེ་བ་དང་བདག་ཡོངས་ སུ་དག་པ་སྟོན་ཏོ་ཞེས་གཙོ་བོར་མི་རྟག་པ་ལ་སོགས་པ་སྐུར་འདེབས་ཀྱི་མཐར་ཞེན་པ་ལྡོག་པའི་ཕྱིར་ཆོས་ཀྱི་སྐུ་ཡོན་ཏན་བཞི་ལྡན་གཙོ་བོར་སྟོན་མོད་ཀྱང་ཆོས་ཉིད་རྣམ་པར་དག་པ་ནམ་ཡང་རྣམ་པར་མ་དག་པར་མི་འགྱུར་བ་སོགས་ལ་རྟག་པའི་དོན་དུ་འཆད་ པ་ཡིན་གྱི་དངོས་འཛིན་གྱི་རྟག་རྫས་ཤིག་བསྟན་པ་མ་ཡིན་སྟེ། དེ་ཉིད་ལས་ཡོད་པ་ཡང་མ་ཡིན་ལ་མེད་པ་ཡང་མ་ཡིན་པ་ནི་སྟོང་པ་ཉིད་ཀྱི་སྟོང་པ་ཞེས་བྱའོ་ཡིན་པ་ཡང་མ་ཡིན་ལ་མ་ཡིན་པ་ཡང་མ་ཡིན་པ་ནི་སྟོང་པ་ཉིད་ཀྱི་སྟོང་པ་ཞེས་བྱའོ་རིགས་ཀྱི་བུ་ ས་བཅུ་པ་ལ་གནས་པའི་བྱང་ཆུབ་སེམས་དཔའས་ཀྱང་དེ་ལས་ཕྱོགས་ཅུང་ཟད་རྡུལ་གྱི་ཆ་ཤས་ཙམ་རྟོགས་པར་འགྱུར་པ་ཡིན་ན་གཞན་གྱིས་ལྟ་སྨོས་ཀྱང་ཅི་དགོས་རིགས་ཀྱི་བུ་དེ་ལྟར་སྟོང་པ་ཉིད་ཀྱི་སྟོང་པ་ཉིད་ནི་ཉན་ཐོས་ཀྱི་སྟོང་པ་ཉིད་དང་ཐུན་མོང་དུ་འགྱུར་པ་ མིན་སྟེ་དེ་ནི་བྱང་ཆུབ་སེམས་དཔའ་སྟོང་ཉིད་ཀྱི་སྟོང་ཉིད་ལ་ཡོངས་སུ་རྟོག་པ་ཞེས་བྱའོ་ཞེས་དང་། མྱང་འདས་རྒྱ་ནག་འགྱུར་ལས། བྱང་ཆུབ་སེམས་དཔའ་སེམས་དཔའ་ཆེན་པོ་ཡོངས་སུ་མྱ་ངན་ལས་འདས་པ་ཆེན་པོ་སྒོམ་པས་ནི་ཆོས་ཐམས་ཅད་ལ་ཅི་ཡང་ མི་མཐོང་ངོ་གང་མཐོང་བ་ཡོད་པས་ནི་སངས་རྒྱས་ཀྱི་རང་བཞིན་མི་མཐོང་ལ་ཤེས་རབ་ཀྱི་ཕ་རོལ་ཏུ་ཕྱིན་པ་ཡང་སྒོམ་མི་ནུས་ཤིང་ཡོངས་སུ་མྱ་ངན་ལས་འདས་པ་ཆེན་པོ་མི་འཐོབ་སྟེ་དེའི་ཕྱིར་བྱང་ཆུབ་སེམས་དཔའས་ཆོས་ཐམས་ཅད་ལ་རང་བཞིན་མེད་པར་མཐོང་ངོ་། །
Page: 279 ༄༅། །རིགས་ཀྱི་བུ་བྱང་ཆུབ་སེམས་དཔའ་ཏིང་ངེ་འཛིན་མཐོང་བའི་རྐྱེན་གྱིས་སྟོང་པ་མཐོང་བ་མ་ཡིན་གྱི་ཤེས་རབ་ཀྱི་ཕ་རོལ་ཕྱིན་པ་ནས་སྦྱིན་པའི་བར་དུ་ཡང་སྟོང་མིག་དང་རྣམ་པར་ཤེས་པ་དང་དེ་བཞིན་གཤེགས་པ་དང་ཡོངས་སུ་མྱ་ངན་ ལས་འདས་པ་དང་ཡང་སྟོང་སྟེ་དེ་བས་ན་བྱང་ཆུབ་སེམས་དཔའས་ཆོས་ཐམས་ཅད་ཀུན་སྟོང་པར་མཐོང་ངོ༌ཞེས་དང་། རིགས་ཀྱི་བུ་སངས་རྒྱས་ཀྱི་རང་བཞིན་ཞེས་བྱ་བ་ནི་དོན་དམ་པ་སྟོང་པའོ་དོན་དམ་པ་སྟོང་པ་ནི་ཡེ་ཤེས་ཞེས་བྱའོ་དེ་ལ་སྟོང་པ་ཞེས་བྱ་བ་དང་ མི་སྟོང་བ་ཞེས་བྱ་བ་གཉི་ག་མི་མཐོང་བའོ་ཞེས་སོ། །མདོ་འདིར་འོ་མ་ཡོད་ན་མར་འབྱུང་བ་ལྟར་སེམས་ཡོད་ན་སངས་རྒྱས་འཐོབ་པས་སེམས་ཅན་ལ་སངས་རྒྱས་ཀྱི་རང་བཞིན་ཡོད་པར་བསྟན་ལ་གདུལ་བྱའི་དབང་གིས་བདག་ལ་བདག་མེད་དང་བདག་ མེད་ལ་བདག་ཏུའང་འཆད་པ་དང་། དམུས་ལོང་གིས་གཟུགས་མི་མཐོང་བ་ལྟར་སེམས་ཅན་རྣམས་ཀྱིས་རང་གི་རང་བཞིན་རྡོ་རྗེ་མཐུ་བོ་ཆེ་ལྟ་བུ་མི་མཐོང་བ་དང་འོ་མའི་ནང་ན་ཞོ་མེད་ཀྱང་འོ་མ་ལས་ཞོ་འབྱུང་བའི་ཆ་ནས་འོ་མ་ལ་ཞོ་ཡོད་ཏོ་ཞེས་བསྟན་པ་ ལྟར་སེམས་ཅན་ལ་སངས་རྒྱས་ཀྱི་རང་བཞིན་ཡོད་པར་བསྟན་པ་ཡང་དེ་བཞིན་དུ་གསུངས་ཅིང་། མེད་པ་ལ་ཡང་ཡོང་གིས་མེད་པ་དང་རེས་འགའ་མེད་པ་དང་ཉུང་བའི་ཕྱིར་མེད་པ་དང་མ་མྱོང་བས་མེད་པ་དང་ཆོས་ངན་པ་འཛིན་པའི་ཕྱིར་མེད་པ་དང་ལྟོས་ཟླ་ མ་མཆིས་པས་མེད་པ་སྟེ་དྲུག་དང༌། རྒྱུ་ལ་སྐྱེ་བའི་རྒྱུ་དང་གསལ་བའི་རྒྱུ་སྟེ་གཉིས་སམ་སེམས་ཅན་གྱི་སངས་རྒྱས་ཀྱི་རང་བཞིན་གྱི་བདེན་པའི་རྒྱུ་སེམས་ཅན་རྣམས་དང་རྐྱེན་གྱི་རྒྱུ་ཕ་རོལ་ཏུ་ཕྱིན་པ་རྣམས་སུ་གསུངས་ཅིང་དད་པ་དང་ཚད་མེད་བཞི་དང་ས་བཅུ་སོགས་ ཀྱང་སངས་རྒྱས་ཀྱི་རང་བཞིན་དུ་བཤད་ལ་ཆོས་ཐམས་ཅད་མ་ངེས་པ་རྐྱེན་གྱི་སྟོབས་ཅན་དུ་ཡང་ཡང་གསུངས་ཤིང་། མི་མཐོང་བ་ལ་ཡང་རིང་བས་མི་མཐོང་བ་ནམ་མཁའི་བྱ་རྗེས་ཉེ་བས་མི་མཐོང་བ་རྫི་མ་ཞིགས་པས་མི་མཐོང་བ་འདས་པ་འདུ་ཤེས་འཁྲུགས་
Page: 280 པས་མི་མཐོང་བ་དང་ཕྲ་བས་མི་མཐོང་བ་དང༌། བསྒྲིབས་པས་མི་མཐོང་བ་དང་མང་བས་མི་མཐོང་བ་འབྲས་ཕུང་གི་ཏིལ་འདྲ་བས་མི་མཐོང་བ་སྲན་ཕུང་དུ་སྲན་རྡོག་གཅིག་བཞག་པ་སྟེ་བརྒྱད་དུ་གསུངས་པས་ཆོས་ཀྱི་རྣམ་གྲངས་འདི་རྣམ་པ་ཐམས་ཅད་པ་ལྟ་བུར་ཡོད་ ཀྱང་དོན་གྱི་སྙིང་པོར་གང་དུའང་ཞེན་བྱ་མིན་པར་གསུངས་ཏེ། རིགས་ཀྱི་བུ་གལ་ཏེ་གང་ཞིག་ངེས་པར་སེམས་ཅན་ཐམས་ཅད་ལ་སངས་རྒྱས་ཀྱི་རང་བཞིན་ཡོད་དོ་ཅེའམ་ངེས་པར་སངས་རྒྱས་ཀྱི་རང་བཞིན་མེད་དོ་ཅེས་སྨྲ་ན་དེ་ཡང་སངས་རྒྱས་དང་ཆོས་དང་ དགེ་འདུན་ལ་སྐུར་བའོ་རིགས་ཀྱི་བུ་དེའི་ཕྱིར་ངས་མདོ་སྡེ་ལས་མི་རྣམ་པ་གཉིས་ཀྱིས་སངས་རྒྱས་དང་ཆོས་དང་དགེ་འདུན་ལ་སྐུར་བར་འགྱུར་ཏེ་མི་དད་པ་ཞེ་སྡང་གི་སེམས་དང་བཅས་པ་དང་དད་ཀྱང་དོན་མི་ཤེས་པའོ་ཞེས་བསྟན་ཏོ། །ཞེས་གསུངས་པས་ མཐའ་གཅིག་ཏུ་རྟག་མི་རྟག་གང་དུ་སྨྲ་ནའང་དོན་དམ་ལ་སྐུར་བར་འགྱུར་རོ། །སྤྲིན་ཆེན་པོ་ལས། དངོས་སུ་སྒྱུ་མ་ལྟ་བུ་སོགས་ལྡེམ་པོའི་ངག་དང་རྟག་པ་ཞི་བ་སྒྲ་ཇི་བཞིན་པར་གསུངས་ཀྱང་བློས་རྟག་པར་བསམ་ནུས་པའི་དོན་དམ་གསུངས་པ་མ་ཡིན་སྟེ། བཅོམ་ལྡན་སངས་རྒྱས་ཆོས་ཀྱི་སྐུ། །དེ་བཞིན་གཤེགས་པ་ཆོས་ཀྱི་དབྱིངས། །བཅོམ་ལྡན་སྐུ་ནི་དེ་འདྲ་ལ། །ཆོས་བསྟན་པ་ཡང་དེ་འདྲ་སྟེ། །ཞེས་དང༌། བཅོམ་ལྡན་སངས་རྒྱས་བསམ་མི་ཁྱབ། །ཅེས་སངས་རྒྱས་ཀྱི་སྐུ་དང་སངས་རྒྱས་ཀྱི་ ཆོས་མཚུངས་ལ་དེ་བསམ་གྱིས་མི་ཁྱབ་པར་ཡང་ཡང་བཤད་པའི་ཕྱིར་རོ། །སོར་ཕྲེང་ལ་ཕན་པའི་མདོར་དེ་བཞིན་གཤེགས་པའི་སྙིང་པོ་རྟག་བརྟན་གཡུང་དྲུང་དུ་གསུངས་ཀྱང་མེད་པ་ལ་དོན་དམ་དུ་འཛིན་པ་སེལ་བའི་ཕྱིར་སྟེ། འཇམ་དཔལ་ཀྱེ་མ་འཇིག་ རྟེན་ན་དམ་པའི་ཆོས་འཇིག་པའི་སྐྱེས་བུ་གཉིས་ཡོད་དེ་གང་ཤིན་ཏུ་སྟོང་པ་ཉིད་དུ་བལྟ་བ་དང༌གང་འཇིག་རྟེན་ན་བདག་ཏུ་སྨྲ་བ་སྟེ་འདི་གཉིས་ནི་དམ་པའི་ཆོས་འཇིག་པ་དང་དམ་པའི་ཆོས་ཁ་དབུབ་པའོ་ཞེས་ཅང་མེད་ཀྱི་སྟོང་པ་འགོག་པར་མཛད་ཅིང་ཉན་རང་
Page: 281 ༄༅། །གི་ཐར་པ་ནི་མར་མེ་ཤི་བ་ལྟར་རྒྱུན་ཆད་དུ་འདོད་པ་དང་ལྷག་མེད་མྱང་འདས་ཀྱིས་གཞན་དོན་མི་ནུས་ལ་རྫོགས་པའི་སངས་རྒྱས་ནི་ཡོན་ཏན་ཐམས་ཅད་ཀྱིས་བརྒྱན་ཞིང་གཞན་དོན་ནམ་མཁའ་དང་མཉམ་པ་རྒྱུན་མི་འཆད་པའི་ཁྱད་པར་བསྟན་ པའི་ཕྱིར་ཉན་རང་གི་ཐར་པ་དངོས་མེད་དང་བདག་མེད་དང་གཟུགས་མེད་དུ་བཞག་ཅིང་ཐེག་ཆེན་གྱི་ཐར་པ་དངོས་པོ་དང་བདག་དང་གཟུགས་ཅན་དུ་བསྟན་པ་ཡིན་གྱི་ཐེག་ཆེན་གྱི་ཐར་པ་རྡོས་བཅས་སུ་བསྟན་པ་མ་ཡིན་ལ་ཅང་མེད་ཀྱི་སྟོང་པ་ནི་དབུ་མ་པའི་སྟོང་ ཉིད་ག་ལ་ཡིན་སྟེ་རྩ་ཤེར། སྟོང་པ་ཉིད་ལ་བལྟ་ཉེས་ན། །ཤེས་རབ་ཆུང་རྣམས་ཕུང་བར་འགྱུར། །ཇི་ལྟར་སྦྲུལ་ལ་བཟུང་ཉེས་དང་། །རིག་སྔགས་སྒྲུབ་པ་ལོག་པ་བཞིན། །ཞེས་དང་། རྒྱལ་བ་རྣམས་ཀྱི་སྟོང་པ་ཉིད། །ལྟ་ཀུན་ ངེས་པར་འབྱིན་པར་གསུངས། །གང་ཞིག་སྟོང་པ་ཉིད་ལྟ་བ། །དེ་ཉིད་སྒྲུབ་ཏུ་མེད་པར་གསུངས། །ཞེས་སོ། །དེས་ན་སྟོང་ཉིད་ནི་ཞེན་པ་དང་བཅས་པས་ཤེས་མི་ནུས་ཏེ། དེ་ཕྱིར་ཞེན་པས་ཆོས་འདི་ཡི། །གཏིང་རྟོགས་དཀའ་བར་མཁྱེན་ གྱུར་ནས། །ཐུབ་པའི་ཐུགས་ནི་ཆོས་བསྟན་ལས། །རབ་ཏུ་ལོག་པར་གྱུར་པ་ཡིན། །ཞེས་སོ། །དེ་བཞིན་དུ་རྔ་བོ་ཆེའི་མདོ་ལས། བདེ་སྙིང་དང་སངས་རྒྱས་རྟག་པར་བཤད་པ་ཡང་ཅི་ཡང་མེད་པ་ལ་དོན་དམ་དུ་འཛིན་པའི་ནང་པ་རྣམས་མུ་སྟེགས་མགོ་ རེག་ཏུ་བསྟན་ནས་མེད་འཛིན་གཞིག་པའི་ཕྱིར་བསྟན་ཏོ། །མདོར་ན་ཡོད་མེད་ནི་བློའི་འཛིན་སྟངས་ཡིན་ལ་བློས་ཇི་ལྟར་བཟུང་ཡང་གནས་ཚུལ་མ་ཡིན་ཞིང་བློས་འཛིན་པར་ནུས་པའི་ཆོས་གཏན་མེད་ཀྱང་ཕྱིན་ཅི་ལོག་གོམས་པས་འཛིན་པ་དང་ཟིན་པར་ རློམ་སེམས་སུ་བྱེད་པར་ཟད་དོ། །དེས་ནི་བློས་བཟུང་བ་མ་ཡིན་པའི་ངོ་བོ་ཉིད་ཀྱིས་ཡོད་པའམ་མེད་པ་ནི་མི་སྲིད་ལ་བློས་བཟུང་བའི་ཡོད་མེད་ཉིད་མི་བདེན་ཏེ། གང་ཞིག་ཡོད་པ་མ་ཡིན་དེ་ནི་མེད་ཅེས་བྱ། །བྱིས་པ་རྣམས་ཀྱིས་དེ་བཏགས་ཡོད་
Page: 282 དང་མེད་པར་བྱེད། །ཡོད་དང་མེད་པ་འདི་གཉིས་མེད་པའི་ཆོས་ཡིན་ཏེ། །བྱང་ཆུབ་སེམས་དཔའ་གང་གིས་འདི་ཤེས་ངེས་པར་འབྱུང༌། །ཞེས་དང༌། སེམས་ཅན་རྣམས་ནི་གནས་ལ་དགའ་ཞིང་ཡུལ་རྣམས་འདོད། །འཛིན་ལ་གནས་ ཤིང་མི་མཁས་བླུན་རྨོངས་མུན་པ་བཞིན། །འཐོབ་པར་བྱ་བའི་ཆོས་ནི་གནས་མེད་འཛིན་མེད་དེ། །དེས་ན་འཇིག་རྟེན་དག་ན་རྩོད་པ་འབྱུང་བ་ཡིན། །ཞེས་དང་། དགོངས་པ་ངེས་འགྲེལ་ལས། དེ་ལ་འདུས་བྱས་ནི་འདུས་བྱས་ཀྱང་མ་ཡིན་འདུས་མ་ བྱས་ཀྱང་མ་ཡིན། འདུས་མ་བྱས་ཀྱང་འདུས་བྱས་ཀྱང་མ་ཡིན་འདུས་མ་བྱས་ཀྱང་མ་ཡིན་དེ་འདུས་བྱས་དང་འདུས་མ་བྱས་ནི་སྟོན་པས་ཀུན་ཏུ་བཏགས་པའི་ཚིག་ཀུན་ཏུ་རྟོག་པ་ལས་བྱུང་བ་ཐ་སྙད་དུ་བརྗོད་པ་སྟེ་གཏན་ཡོངས་སུ་མ་གྲུབ་པའི་ཕྱིར་རོ། །ཞེས་སོ། ། དེས་ན། བྱིས་པ་བདག་ཉིད་ཀྱིས་ནི་མཁའ་ལ་མདུད་པ་བོར། །དཔེར་ན་དོགས་པའི་འདུ་ཤེས་ཀྱིས་ནི་དུག་འདས་པ། །དུག་དེ་ཁོང་དུ་སོང་བ་མེད་ཀྱང་བརྒྱལ་བར་འགྱུར། །དེ་ལྟར་བྱིས་པ་བདག་དང་བདག་གིར་ཁས་ལེན་པ། བདག་དེར་འདུ་ ཤེས་ཡང་དག་མི་རྟག་སྐྱེ་ཞིང་འཆི། །ཞེས་པ་ལྟར་སེམས་ཅན་རྣམས་མ་ཡིན་པ་ལ་ཡིན་པར་འཛིན་པའི་ཕྱིན་ཅི་ལོག་གི་འཆིང་བས་དར་གྱི་སྲིན་བུ་རང་གི་ཁ་ཆུས་འཆིང་བ་ལྟ་བུ་ཁོ་ན་ལ་ཐུགས་རྗེའི་དབང་གིས་འཛིན་པ་དེ་གཞིག་པའི་ཕྱིར་སྨྲ་བསམ་ བརྗོད་དུ་མེད་པའི་ཆོས་རྣམས་སྨྲ་བསམ་བརྗོད་པའི་ཚུལ་གྱིས་རྣམ་པ་ཐམས་ཅད་པར་བསྟན་ནས་སྨྲ་བསམ་བརྗོད་བྲལ་གྱི་ཆོས་ཉིད་ཇི་ལྟ་བ་ལ་འགོད་པར་མཛད་པ་སྟེ། ཕྱིར་མི་ལྡོག་པ་འཁོར་ལོའི་མདོར། ཀུན་དགའ་བོས་ཆེད་དུ་བརྗོད་པ། །མྱ་ངན་ འདས་མེད་འདས་པ་ཞེས། །འཇིག་རྟེན་མགོན་པོས་བརྗོད་པར་མཛད། ནམ་མཁའ་མདུད་པ་བོར་ནས་ནི། བདག་ཉིད་ཀྱིས་ནི་རབ་ཏུ་བཀྲོལ། །ཆགས་པ་མི་མངའ་ཆོས་སྟོན་པ། །སངས་རྒྱས་ཐབས་ལ་མཁས་པ་པོ། །འདིར་
Page: 283 ༄༅། །གསུངས་ཅི་ཡང་མ་མཆིས་ལ། །འོན་ཀྱང་གསུང་བ་བརྗོད་པ་མཛད། །ཅེས་སོ། །ཡོད་མེད་དེ་བློས་ཇི་ལྟར་བཟུང་བ་ཡིན་ཞེ་ན། དཔེར་ན་བ་ལང་གི་རྭ་ངོ་བོ་ཉིད་ཀྱིས་ཡོད་པ་དང་རི་བོང་གི་རྭ་ངོ་བོ་ཉིད་ཀྱིས་མེད་པར་བདེན་པ་ཞིག་མ་ ཡིན་ཡང་བ་ལང་དང་ཁྱུ་མཆོག་གི་མགོ་ལ་ཀྲོང་ཀྲོང་བོ་ཞིག་མཐོང་ལ་དེའི་ཚེ་འདི་ནི་རྭ་སྟེ་འདི་ལ་ནི་རྭ་ཡོད་དོ་ཅེས་མཚན་མར་བཟུང་ངོ་ཕྱིས་ཞིག་ན་རི་བོང་མཐོང་ལ་བ་ལང་དང་ཁྱུ་མཆོག་གི་མགོ་ལ་སྔར་མཐོང་བ་དེ་རི་བོང་གི་མགོ་ལ་མ་མཐོང་བས་འདི་ལ་རྭ་མེད་དོ་ཅེས་ མཚན་མར་བྱས་ཏེ་ཐ་སྙད་དུ་བརྗོད་པ་གྲགས་པ་ལས་བ་ལང་རྭ་ཡོད་དང་རི་བོང་རྭ་མེད་དུ་གྲགས་པར་གྱུར་པ་སྟེ་གལ་ཏེ་བ་ལང་ལ་རྭ་ཡོད་དུ་འཛིན་པའི་བློ་མ་སྐྱེས་ན་རི་བོང་ལ་རྭ་མེད་དུ་འཛིན་པའི་བློ་མི་སྐྱེ་སྟེ་སྟུག་པོ་བཀོད་པའི་མདོ་ལས། གོ་ཀརྞ་དང་ཁྱུ་མཆོག་གི ། རུ་ཆེན་རྣམ་པར་མཐོང་བ་དང་། །འདི་བདེན་གཞན་དུ་མི་འགྱུར་ཞེས། །སེང་སྟག་བོང་བུ་ལ་སོགས་པའི། །རྭ་རྣམས་ལ་ནི་མེད་ཅེས་སྟེ། །ཡོད་དང་མེད་པའི་ལྟ་བ་ཡང་། །མི་མཁས་རྣམས་ལ་རབ་ཏུ་འབྱུང་། །དེ་ལྟར་གཞན་གྱི་རྭ་མཐོང་ བས། །བོང་བུའི་མེད་ཅེས་རྣམ་རྟོག་འབྱུང་། །ཇི་སྟེ་གཞན་གྱི་མ་མཐོང་ན། །བོང་བུའི་མེད་སྙམ་དེ་མི་འབྱུང་། །ལོག་པར་དམིགས་པའི་རྒྱུ་ཡི་ཕྱིར། །འདི་ནི་མེད་ཅེས་རྟོག་པ་འབྱུང༌། །ཞེས་སོ། དེ་ལྟར་ཡོད་མེད་དུ་བཟུང་ཡང་ཡོད་ མེད་དེར་བདེན་པ་ནི་མ་ཡིན་ཏེ་བ་ལང་དང་རི་བོང་གི་གཟུགས་བརྙན་ཆུ་ནང་དུ་ལྷན་ཅིག་ཤར་བ་དང་སྒྱུ་མ་སྤྲུལ་པ་དང་རྨི་ལམ་ན་སྣང་བའི་བ་ལང་རྭ་ཡོད་དང་རི་བོང་རྭ་མེད་གཉིས་ཀ་གཟུགས་བརྙན་འགགས་པ་དང་སྒྱུ་མ་བཤིག་པ་དང་གཉིད་སད་པ་ན་མི་བདེན་ པར་ངེས་པ་སྐྱེ་ལ། གཟུགས་བརྙན་མ་འགགས་པ་དང་སྒྱུ་མ་སྣང་བཞིན་པ་དང་རྨི་ལམ་རྨི་བཞིན་པའི་ཚེ་ནའང་དེ་གཉིས་ཀྱི་རྭ་ཡོད་མེད་ལ་བདེན་བརྫུན་གྱི་ཁྱད་པར་ཅུང་ཟད་ཀྱང་མེད་དེ་ཁྱད་གཞི་བ་ལང་དང་རི་བོང་ཉིད་སྣང་དུས་དེ་ན་ཡང་ཡོད་པ་མིན་ན་ཁྱད་ཆོས་
Page: 284 རྭ་ཡོད་མེད་ལྟ་ག་ལ་ཞིག །དེས་ན་ཡོད་མེད་དང་ཡིན་མིན་བདེན་བརྫུན་སོགས་ནི་རང་ཉིད་ཀྱིས་སྒྲོ་བཏགས་པ་བྱིས་པ་བདག་ཉིད་ཀྱིས་ནི་མཁའ་ལ་མདུད་པ་བོར་བ་ལྟ་བུ་དང་དར་གྱི་སྲིན་བུ་རང་གི་ཁ་ཆུའི་རྒྱུན་བཅད་ན་འཆིང་བྱེད་གཞན་མེད་པ་ལྟ་བུར་ངེས་ཏེ་སྨིག་རྒྱུ་ ལ་ཆུར་འཛིན་ལྟ་བུའི་འཛིན་པ་ལོག་པ་ཙམ་ལ་དེ་ཁོ་ན་ཉིད་མཐོང་བ་དང་དོན་དམ་མཐོང་ཞེས་ཐ་སྙད་དུ་བྱས་པ་སྟེ་དེའི་ཚེ་ཡང་སྔར་མེད་མཐོང་བ་དང་སྔར་ཡོད་འགགས་པ་ནི་ཅི་ཡང་མེད་དེ་སྨིག་རྒྱུ་ལ་ཆུ་བསྐམས་པའམ་ཆུ་མེད་བསྣན་པ་ཅི་ཡང་མེད་མོད་ཀྱང་སྔར་ཆུ་འཛིན་ མ་ལོག་པ་ན་བཏུང་བའི་ཆེད་དམ་གཟིངས་དང་ཟམ་པ་ཚོལ་བ་སོགས་ཀྱིས་ངལ་ལ་ཆུ་འཛིན་ལོག་པ་ན་དེ་ལྟ་བུ་མི་དགོས་པར་ཤེས་ཏེ་ངལ་བ་བཞིན་ནོ། །མདོར་ན་ཇི་ལྟར་སྣང་ཙམ་པ་ལ་སྒྲོ་སྐུར་གྱི་འཛིན་པ་སེལ་བ་ཡིན་གྱི་དངོས་སྣང་འདི་མེད་པར་བྱས་པ་སྟོངས་སྐལ་ གྱི་ནམ་མཁའ་ལྟ་བུ་ཞིག་སྒྲུབ་པ་མ་ཡིན་སྟེ། འདིར་ནི་མཐོང་ཐོས་ཤེས་པ་དག །དགག་པར་བྱ་བ་མ་ཡིན་ཏེ། །སྡུག་བསྔལ་ཀུན་གྱི་རྒྱུར་གྱུར་པ། །བདེན་པར་རྟོག་པ་ཟློག་བྱ་ཡིན། །ཞེས་འཆད་པར་འགྱུར་ལ་སྨིག་རྒྱུ་ལ་ཆུར་འཛིན་ལོག་པའི་ཚེ་སྔོ་ཕྲིག་གི་ རྣམ་པ་ཙམ་དེ་སྣང་མི་སྣང་ལ་བལྟོས་པ་ཅི་ཡང་མེད་པ་བཞིན་དུ་ཇི་ལྟར་སྣང་བ་ལ་དེ་དང་དེར་བདེན་ཞེན་གྱི་བློ་འཇིག་རྟེན་པའི་ཤེས་པ་དང་། ཇི་ལྟར་སྣང་བ་དེ་གཉེན་པོས་བསལ་ཞིང་མེད་པར་བྱས་ནས་ཁང་རུལ་ཞིག་པའི་ནམ་མཁའ་འམ་མར་མེ་ཤི་བ་ལྟ་བུ་དོན་དམ་དུ་ འཛིན་པ་སྟེ་དབུ་མའི་སྟོང་ཉིད་མ་གོ་བར་ཡོན་པོར་བཟུང་བ་ཉི་ཚེ་བའི་སྟོང་ཉིད་ཅེས་བྱ་བ་དེ་གཉི་ག་ལོག་པ་ན་སྣང་གྲག་གི་ཆོས་སྒྱུ་མ་ཙམ་འདི་ནི་རྒྱུ་རྐྱེན་ཚོགས་ན་སྣང་ལ་མ་ཚོགས་ན་མི་སྣང་བར་སྔ་མ་སྒྲོ་སྐུར་མ་ལོག་པ་དང་ཕྱི་མ་ལོག་པའི་སྐབས་གཉི་ག་ཁྱད་པར་མེད་ ཀྱང་རང་བཞིན་ཤེས་མ་ཤེས་ཀྱི་ཁྱད་པར་ཡོད་པས་དེ་ཕྱིན་སྣང་མི་སྣང་ལ་ལྟོས་པ་རྡུལ་ཙམ་ཡང་མེད་དེ་རྨི་ལམ་ལ་རྨི་ལམ་དུ་ཤེས་པའི་སྐྱེས་བུ་རྨི་ལམ་གྱི་སྣང་བ་ལ་ལོངས་སྤྱོད་པ་ལྟར་འགྱུར་སྟེ་འདི་ལྟར་གནས་པ་ནི་པདྨ་ཆུ་ནང་ན་ཆུས་མ་གོས་པར་གནས་པ་ལྟར་
Page: 285 ༄༅། །སྲིད་པ་ན་ཡང་སྲིད་པའི་སྐྱོན་གྱིས་མ་གོས་པར་གནས་པ་ཡིན་ལ། དེས་ནི་ཆོས་ཐམས་ཅད་སུས་ཀྱང་ཅི་ཡང་མཐོང་བ་དང་མ་མཐོང་བ་དང་གཉི་ག་དང་གཉིས་མིན་གང་ཡང་མེད་ཅིང་ཅི་ཡང་མ་ཡིན་པར་མཐོང་བ་ཡིན་ལ་དེ་ལ་ནི་ཡང་དག་མཐོང་ བ་ཞེས་བྱ་ལ་དེ་ནི་གདུལ་བྱའི་དབང་གིས་སྟོན་པ་མ་གཏོགས་པར་རང་ཉིད་ནི་འདུ་ཤེས་དང་དམིགས་པའི་འཇུག་པ་ལས་ལོག་ཅིང་བདེན་པའམ་མི་བདེན་པར་རློམ་སེམས་པ་ལ་སོགས་པ་རློམ་སེམས་ཐམས་ཅད་ལོག་པ་ཡིན་སྟེ། ཡེ་ཤེས་སྣང་བ་རྒྱན་གྱི་མདོ་ལས། གང་གིས་རྟེན་ཞིང་འབྲེལ་པར་འབྱུང་བ་མཐོང་བ་དེས་ཆོས་མཐོང་ངོ་གང་གི་ཆོས་མཐོང་བ་དེས་དེ་བཞིན་གཤེགས་པ་མཐོང་ངོ༌ཞེས་གསུངས་པ་སྟེ་ཇི་ལྟར་ཡོངས་སུ་ཚོལ་བ་ན་ཅི་ཡང་མི་མཐོང་བ་དེ་ལྟར་མཐོང་ངོ་དེ་ལ་ཅི་ཡང་ཞེས་བྱ་བ་གང་ཞེ་ན་འདི་ལྟ་སྟེ་སེམས་ དང་དམིགས་པ་སྟེ་དེས་གང་གི་ཚེ་སེམས་དང་དམིགས་པ་ཡང་དག་པར་རྗེས་སུ་མི་མཐོང་བ་དེའི་ཚེ་ཡང་དག་པ་མཐོང་བ་ཡིན་པས་དེ་བཞིན་གཤེགས་པས་ཆོས་དེ་དག་དེ་ལྟར་མཉམ་པ་ཉིད་ཀྱིས་མངོན་པར་རྫོགས་པར་སངས་རྒྱས་སོ་ཞེས་དང་དགོངས་པ་ངེས་འགྲེལ་ ལས། བློ་གྲོས་ཡངས་པ་གང་གི་ཕྱིར་བྱང་ཆུབ་སེམས་དཔའ་ནང་གི་སོ་སོ་ལེན་པ་མི་མཐོང་ལེན་པའི་རྣམ་པར་ཤེས་པ་ཡང་མི་མཐོང་ལ་ཀུན་གཞི་དང་ཀུན་གཞིའི་རྣམ་ཤེས་དང་བསགས་པ་དང་སེམས་དང་མིག་དང་གཟུགས་དང་མིག་གི་རྣམ་པར་ཤེས་པ་ནས་ལུས་ ཀྱི་རྣམ་པར་ཤེས་པའི་བར་དང་ནང་གི་སོ་སོ་རང་གི་ཡིད་ཀྱང་མི་མཐོང་ལ་དེ་ཡང་ཡང་དག་པ་ཇི་ལྟ་བ་བཞིན་དུ་ཡིན་པ་དེ་ནི་བྱང་ཆུབ་སེམས་དཔའ་དོན་དམ་པ་ལ་མཁས་པ་ཞེས་བྱ་སྟེ་དེ་བཞིན་གཤེགས་པ་ཡང་བྱང་ཆུབ་སེམས་དཔའ་དོན་དམ་པ་ལ་མཁས་ པ་དེ་ནི་སེམས་དང་ཡིད་དང་རྣམ་པར་ཤེས་པའི་གསང་བ་ལ་མཁས་པ་ཡིན་པར་འདོགས་སོ་ཞེས་དང་། ཏིང་འཛིན་རྒྱལ་པོ་ལས། ཇི་ལྟར་བར་སྣང་ནམ་མཁའ་བཞིན། །ཆོས་ཀྱི་མཚན་ཉིད་དེ་འདྲ་བར། །སྔོན་གྱི་མཐའ་དང་ཕྱི་མའི་མཐའ། །
Page: 286 ད་ལྟར་བྱུང་བའང་མཐོང་བར་འགྱུར། །ནམ་མཁའ་བཟུང་བ་མེད་པར་བཤད། །དེ་ལ་བཟུང་བ་མི་རྙེད་དེ། །ཆོས་ཀྱི་རང་བཞིན་དེ་ཉིད་ཡིན། །བཟུང་བ་མེད་པ་ནམ་མཁའ་འདྲ། །དེ་ལྟ་བུར་ནི་ཆོས་བསྟན་ཏེ། །དེ་ལ་གང་ཡང་མཐོང་བ་མེད། ། སུ་དག་ཆོས་འདི་མི་མཐོང་བ། །དེ་ཡི་ཆོས་རྣམས་བསམ་མི་ཁྱབ། །ཅེས་དང་། དཔའ་བར་འགྲོ་བའི་ཏིང་ངེ་འཛིན་གྱི་མདོ་ལས། བྱིས་པ་སོ་སོའི་སྐྱེ་བོ་རྣམས་ནི་རང་གི་རྟོག་པའི་ཕྱིན་ཅི་ལོག་གིས་བཅིངས་སོ་འདུ་ཤེས་སུ་འཛིན་པ་དང་གཡོ་ བ་དང་རློམ་སེམས་དང་སྤྲོས་པས་མཐོང་བ་དང་ཐོས་པ་དང་བྱེ་བྲག་ཕྱེད་པ་དང་རྣམ་པར་ཤེས་པའི་རྣམ་པར་རྟོག་པས་བཅིངས་པ་ཡིན་སྟེ་འདི་ལ་ཆོས་གང་ཡང་བཅིངས་པ་ཡང་མེད་གྲོལ་བ་ཡང་མེད་སྟེ་ཆོས་ཐམས་ཅད་ནི་རང་བཞིན་གྱིས་རྣམ་པར་གྲོལ་ བས་གྲོལ་བ་སྟེ་ཆོས་ཐམས་ཅད་ནི་རང་བཞིན་གྱིས་མ་བཅིངས་མ་གྲོལ་བའོ། །ཞེས་བདུད་སྡིག་ཅན་བཅིངས་པ་མེད་ཀྱང་རང་གིས་བཅིངས་པར་མཐོང་བ་ལྟར་སེམས་ཅན་ཐམས་ཅད་དེ་ལྟ་བུར་བསྟན་པ་དང་། བསོད་ནམས་ཐམས་ཅད་བསྡུས་ པའི་ཏིང་འཛིན་གྱི་མདོ་ལས། གང་གི་ཚེ་ཆོས་ཐམས་ཅད་རང་བཞིན་གྱིས་རྣམ་པར་ཞི་བ་དང་རང་བཞིན་གྱིས་སྙོམས་པར་ཞུགས་པ་དང་གཏན་དུ་མ་སྐྱེས་པ་དང་མ་བྱུང་བ་དང་གཏན་དུ་ཡོངས་སུ་མྱ་ངན་ལས་འདས་བར་མཐོང་བ་དང་གང་མཐོང་བ་དེ་ ཡང་མི་མཐོང་པ་དང་ཇི་ལྟར་མི་མཐོང་བ་དང་རྣམ་པར་མི་མཐོང་བ་དེ་ལྟར་མཐོང་ན་ཚུལ་བཞིན་དུ་མཐོང་བ་ཞེས་བྱའོ་ཞེས་དང་། ཆོས་རྣམས་ལ་ཇི་ལྟ་བ་བཞིན་དུ་མཐོང་བ་གང་ཞེ་ན་འདི་ལྟ་སྟེ་མཐོང་བ་མེད་པ་ཁོ་ནའོ་ཞེས་དང་ཏོག་ལས། བཅོམ་ལྡན་ འདས་བརྗོད་དུ་མ་མཆིས་པའི་ཆོས་གང་མངོན་པར་རྫོགས་པར་འཚང་རྒྱ་བར་ནུས་ལགས་སམ། བཀའ་བསྩལ་པ་གང་གིས་བརྗོད་དུ་མེད་པར་ཤེས་པ་དེ་ཉིད་མངོན་པར་རྫོགས་པར་འཚང་རྒྱའོ་ཞེས་དང་། དཀོན་མཆོག་ཟ་མ་ཏོག་ལས། འཇིག་རྟེན་
Page: 287 ༄༅། །སྟེ་བདག་ཅག་མྱ་ངན་ལས་འདས་པ། ལས་འདས་པའི་ཤེས་རབ་ཀྱིས་ཅུང་ཟད་ཀྱང་མི་མཐོང་སྟེ་བདག་ཅག་ལྷག་མཐོང་དོན་དུ་མི་གཉེར་རོ་ཁམས་གསུམ་ཐམས་ཅད་ནི་རྣལ་འབྱོར་པ་དགོན་པ་སྟེ་བདག་ཅག་དགོན་པ་དོན་དུ་མི་གཉེར་རོ་ཆོས་ཐམས་ཅད་ནི་ཤིན་ཏུ་ཡོངས་སུ་མྱ་ངན་ལས་ འདས་པ་སྟེ་བདག་ཅག་མྱ་ངན་ལས་འདས་པ་དོན་དུ་མི་གཉེར་རོ་ཞེས་དང་། དཀོན་མཆོག་འབྱུང་གནས་ཀྱི་མདོར། ཆོས་ལ་ཆོས་ཀྱིས་མཐོང་མ་མཆིས། །ཆོས་ཀྱིས་ཆོས་རྣམས་མི་རིག་སྟེ། །ཤེས་པ་པོ་དང་ཆོས་རྣམས་ཀྱང་། །གཉི་ག་འདི་ནི་ཡོང་མ་མཆིས། །ཞེས་དང་། བྱང་ ཆུབ་སེམས་དཔའི་སྤྱོད་ཡུལ་གྱི་ཐབས་ཀྱི་རྣམ་འཕྲུལ་བསྟན་པའི་མདོ་ལས། མཚན་མ་ཐམས་ཅད་མ་མཐོང་བ་དེ་ནི་དེ་བཞིན་གཤེགས་པ་མཐོང་བའོ་ཞེས་དང་། བློ་གྲོས་རྒྱ་མཚོས་ཞུས་པའི་མདོ་ལས། དེའི་མིག་ནི་ཤེས་རབ་ཀྱིས་རྣམ་པར་ལྟ་བ་དང་ ཤེས་རབ་ལ་གནས་པ་དང་ཤེས་རབ་ཏུ་ཡང་དག་པར་འདུ་བའོ་ཤེས་རབ་ཀྱང་རྒྱུ་བ་མེད་པ་སྤྲོས་པ་མེད་པ་སྟེ་དེ་ནི་མཐོང་བ་ཡང་མ་ཡིན་མི་མཐོང་བ་ཡང་མ་ཡིན་ནོ་དེ་ཅིའི་ཕྱིར་ཞེ་ན་མཐོང་བ་དང་མི་མཐོང་བ་དེ་གཉི་ག་ཡང་མཐའ་སྟེ་མཐོང་བ་དང་མ་མཐོང་ བའི་མཐའ་གཉིས་དང་བྲལ་བ་ནི་སངས་རྒྱས་མཐོང་བའོ་ཞེས་དང་། མ་དྲོས་པས་ཞུས་བར། འཇམ་དཔལ་གྱིས་སྨྲས་པ་གནས་བརྟན་གྱི་སེམས་རྣམ་པར་གྲོལ་ལམ་འོད་སྲུང་ཆེན་པོས་སྨྲས་པ་རྣམ་པར་གྲོལ་ལོ་གནས་བརྟན་གྱི་སེམས་དེ་གང་གིས་ བཅིངས་ནས་གང་ལས་རྣམ་པར་གྲོལ། འཇམ་དཔལ་གལ་ཏེ་སེམས་བཅིངས་པར་གྱུར་ན་ནི་རྣམ་པར་མི་གྲོལ་ཏེ་རྣམ་པར་གྲོལ་བའི་ཡེ་ཤེས་མཐོང་བར་མི་འགྱུར་རོ། །གནས་བརྟན་སེམས་བཅིངས་པ་མེད་ན་རྣམ་པར་གྲོལ་བ་གང་ཡིན། འཇམ་དཔལ་ གང་བཅིངས་པ་མེད་པར་ཤེས་པ་དེ་ཉིད་རྣམ་པར་གྲོལ་བའོ་ཞེས་དང་། ཆོས་ཐམས་ཅད་འབྱུང་བ་མེད་པར་བསྟན་པའི་མདོ་ལས། ཅི་ཡང་མ་ཡིན་ཆོས་འདི་སུས་ཤེས་པ། །ནམ་ཡང་དེ་ནི་ཆོས་ཀུན་ཆགས་མི་འགྱུར། །ཞེས་དང་། བུ་མོ་ཟླ་མཆོག་
Page: 288 ལུང་བསྟན་པར། བྱང་ཆུབ་ཅེས་དགྱི་བ་དེ་ཡང་སྤྲོས་པ་ལགས་སོ་མངོན་པར་རྫོགས་པར་འཚང་རྒྱ་བར་འགྱུར་རོ་ཞེས་དགྱི་བ་དེ་སྤྲོས་པ་ལགས་སོ་ཞེས་དང་། སུམ་བཅུ་རྩ་གསུམ་པའི་མདོར། སུ་ཡང་དག་པར་མཐོང་བ་དེས་ནི་ཅི་ཡང་མི་ མཐོང་ངོ་སུ་ཅི་ཡང་མི་མཐོང་བ་དེས་ནི་མཉམ་པར་མཐོང་སྟེ་མི་མཉམ་པར་མི་མཐོང་ངོ་ཀོ་ཤཱི་ཀ་དེ་ལྟར་གཟིགས་པའི་དེ་བཞིན་གཤེགས་པ་ནི་ཐམས་ཅད་གཟིགས་པ་ཞེས་བྱའོ་ཞེས་དང་། ཆོས་ཡང་དག་པར་སྡུད་པ་ལས། རྒྱུ་དང་རྐྱེན་མཐོང་བས་ སྟོང་པ་ཉིད་མཐོང་ངོ་སྟོང་པ་ཉིད་མཐོང་བ་ནི་མཐོང་བ་མ་མཆིས་པའོ་ཆོས་མི་མཐོང་བ་ནི་ཡང་དག་པ་མཐོང་བའོ་ཞེས་སོགས་རྒྱ་ཆེར་བཤད་ཏོ། །དེ་ལྟར་ཁོང་དུ་ཆུད་པ་དེ་ལ་མི་སླུ་བའི་ཕྱིར་ཡང་དག་པ་མཐོང་བ་ཞེས་ཀྱང་བྱ། འཇིག་རྟེན་པའི་མཐོང་བ་ལས་ ལོག་པའི་ཕྱིར་ཅི་ཡང་མ་མཐོང་ཞེས་ཀྱང་བྱ། དངོས་འཛིན་ལས་ལོག་པའི་ཕྱིར་སྟོང་པ་ཉིད་མཐོང་བ་ཞེས་ཀྱང་བྱ་མི་སྟོང་བ་དང་སྟོང་བ་གཉི་ག་མ་དམིགས་པའི་ཕྱིར་སྟོང་མི་སྟོང་ལས་གྲོལ་བ་ཞེས་ཀྱང་བྱ། སྟོང་པ་ཉིད་ཀྱང་མིང་ཙམ་དུ་ཟད་པའི་ཕྱིར་སྟོང་ པ་མ་མཐོང་བ་ཞེས་ཀྱང་བྱ་ཡོན་ཏན་ཐམས་ཅད་དེ་ལས་འབྱུང་བའི་ཕྱིར་རྣམ་ཀུན་མཆོག་ལྡན་གྱི་སྟོང་ཉིད་མཐོང་བ་ཞེས་ཀྱང་བྱ་གང་ཟག་དང་ཆོས་ཀྱི་བདག་འཛིན་ལས་ལོག་པའི་ཕྱིར་བདག་མེད་མཐོང་བ་ཞེས་ཀྱང་བྱ་བདག་དང་བདག་མེད་ཀྱི་འཛིན་པ་གཉི་ག་ ལོག་པའི་ཕྱིར་བདག་དམ་པ་མཐོང་བ་ཞེས་ཀྱང་བྱ་སེམས་སུ་འདུ་ཤེས་པ་ལོག་པའི་ཕྱིར་སེམས་རྣམ་པར་ལོག་པ་ཞེས་ཀྱང་བྱ་གཟོད་མ་ནས་གནས་པའི་རང་གི་སེམས་དེའི་གནས་ཚུལ་ཇི་ལྟ་བ་དེ་གདོད་ཤེས་པའི་ཕྱིར་རང་གི་སེམས་རྟོགས་པའམ་མཐོང་ བ་ཞེས་ཀྱང་བྱ་སྟེ། ཡང་དག་མཐོང་ན་རྣམ་པར་གྲོལ། །ཞེས་དང༌། ཆོས་ཐམས་ཅད་ལ་ཅི་ཡང་མི་མཐོང་ངོ༌ཞེས་དང་། སྒྱུ་མ་ལྟ་བུའི་ཏིང་ངེ་འཛིན་གྱི་མདོ་ལས། ཆོས་ཐམས་ཅད་སྟོང་པར་རྟོགས་པ་དེས་སྒྱུ་མ་ལྟ་བུའི་ཏིང་ངེ་འཛིན་འཐོབ་
Page: 289 ༄༅། །སྟེ། ཞེས་དང་རྩ་ཤེར། གལ་ཏེ་མི་སྟོང་ཅུང་ཟད་ཡོད། །སྟོང་པ་ཅུང་ཟད་ཡོད་པར་འགྱུར། །སྟོང་མིན་ཅུང་ཟད་ཡོད་མིན་ན། །མི་སྟོང་ཡོད་པར་ག་ལ་འགྱུར། །ཞེས་དང་། ཁྱེའུ་བཞིའི་ཏིང་ངེ་འཛིན་གྱི་མདོ་ལས། གང་ གིས་སྟོང་པ་སྟོང་ཤེས་ཤིང་། །སྟོང་པ་དེ་ལའང་མི་སེམས་ལ། །གང་དག་སྟོང་ཉིད་མི་མཐོང་བ། །དེ་དག་སྟོང་ཉིད་ཤེས་པ་ཡིན། །ཞེས་དང་རྒྱུད་བླར། རྣམ་པ་ཀུན་གྱི་མཆོག་ལྡན་པའི། །སྟོང་པ་ཉིད་ནི་གཟུགས་སུ་བརྗོད། ། ཅེས་དང་། བདག་དང་བདག་མེད་སྤྲོས་པ་དག །ཉེ་བར་ཞི་བ་དམ་པའི་བདག །ཅེས་དང་། དེ་ཚེ་སེམས་ཀྱང་རྣམ་ལྡོག་སྟེ། །ཞེས་དང་། འཇིག་རྟེན་རང་གི་སེམས་མཐོང་ན། །རྣམ་པར་རྟོག་པ་མི་འཇུག་གོ །ཅེས་དང་། འདའ་ཁ་ཡེ་ ཤེས་ལས། སེམས་རྟོགས་ན་ཡེ་ཤེས་ཡིན་པས་སངས་རྒྱས་གཞན་དུ་མི་བཙལ་བའི་འདུ་ཤེས་བསྒོམ་པར་བྱའོ་ཞེས་སོ། །དེས་ན་དེ་རྣམས་རྟོག་གེའི་ཚིག་གི་འགལ་བ་འདུ་བར་ཞེན་ནས་གཅིག་སྙིང་པོར་བཟུང་སྟེ་ཤོས་གཅིག་འགོག་པ་རྣམས་ནི་བློ་ གྲོས་ཀྱི་མཐུ་ཆུང་ཞིང་དེ་ཁོ་ན་ཉིད་ཀྱི་ཕྱོགས་ལ་མིག་རྒྱང་ཐུང་བ་དང་ཐེག་ཆེན་གྱི་གཞུང་ལུགས་ཀྱི་རྒྱ་མཚོ་མི་ཤེས་པར་ཟད་ཏོ། །མདོར་ན་དོན་དམ་པ་ཞེན་ཡུལ་དུ་བྱས་ཏེ་མིང་ཚིག་ཡི་གེས་ཐ་སྙད་དུབརྗོད་པ་ནི་རྣམ་གྲངས་པའི་དོན་དམ་དང༌འཕགས་པ་རྣམས་ཀྱི་ མཉམ་བཞག་སོ་སོ་རང་གིས་རིག་པའི་ཡེ་ཤེས་ཀྱིས་ཇི་ལྟར་གཟིགས་པ་ནི་རྣམ་གྲངས་མ་ཡིན་པའི་དོན་དམ་དངོས་ཏེ་དབུ་མ་རྒྱན་ལས། སྐྱེ་བ་ལ་སོགས་བཀག་པ་ཡང་། །ཡང་དག་པ་དང་མཐུན་ཕྱིར་བཞེད། །སྐྱེ་མེད་སྤྲོས་ཀུན་ཞི་བ་ལ། །དོན་དམ་ཞེས་ པའི་བརྡ་མཛད་དོ། །ཞེས་སོ། །དེས་ན་རྣམ་གྲངས་པའི་དོན་དམ་ནི་བློས་བཏགས་པའི་ཕྱིར་དོན་དམ་ཡང་དག་པ་མིན་ཡང་དོན་དམ་ཡང་དག་པར་གཞུག་པའི་ཐབས་དངོས་ཡིན་པའི་ཕྱིར་དོན་དམ་པའི་ཁོངས་སུ་བསྡུས་པ་སྟེ་དེའི་ཕྱིར་རྣམ་གྲངས་པའི་དོན་དམ་
Page: 290 ཞེས་བཤད་པའོ། །དོན་དམ་པའི་བདེན་པ་དེ་ཡང་ཀུན་རྫོབ་ལས་གཞན་དུ་བཙལ་བར་བྱ་བ་མ་ཡིན་ཏེ། རྒྱན་སྟུག་ལས། སྟོང་པ་ཉིད་དང་མི་རྟག་ཉིད། །རྟག་དུ་དངོས་དང་གཅིག་འགྱུར་ཏེ། ཡོད་དང་མེད་པའི་རང་བཞིན་ཡང་། །དེ་བཞིན་གཅིག་ པ་ཉིད་དུ་འགྱུར། །ཞེས་དང་། དེ་བཞིན་དངོས་རྣམས་སྟོང་ཉིད་དང་། །ལྷན་ཅིག་རབ་ཏུ་འབྱུང་བ་སྟེ། ཕན་ཚུན་རྣམ་པ་ཐ་དད་དུ། །དེ་དག་དགོས་པ་མི་སྒྲུབ་བོ། །ཞེས་དང་། མྱང་འདས་ལས། རིགས་ཀྱི་བུ་ཀུན་རྫོབ་ཀྱི་བདེན་པ་ཉིད་དོན་དམ་པའི་ བདེན་པའོ། །ཞེས་རང་བཞིན་ཐ་མི་དད་པ་ལ་དགོངས་ནས་གསུངས་ལ། དེའི་དོགས་པ་སེལ་བའི་ཕྱིར། བཅོམ་ལྡན་འདས་དེ་ལྟ་ན་བདེན་པ་གཉིས་སུ་མ་མཆིས་སོ། །བཀའ་བསྩལ་པ། རིགས་ཀྱི་བུ་ཤིན་ཏུ་ཐབས་མཁས་པས་སེམས་ཅན་གྱི་ཆེད་དུ་བདེན་པ་གཉིས་ བསྟན་ཏོ། །ཚིག་ཏུ་སྨྲ་བ་ལྟར་ན་གཉིས་ཏེ་འཇིག་རྟེན་གྱི་ཆོས་དང་འདས་པའི་ཆོས་སོ། །འཇིག་རྟེན་ལས་འདས་པའི་གང་ཟག་གང་གིས་ཤེས་པ་དེ་ནི་དོན་དམ་པའི་བདེན་པ་ཞེས་བྱའོ། །འཇིག་རྟེན་པའི་གང་ཟག་གང་གིས་ཤེས་པ་དེ་ནི་ཀུན་རྫོབ་ཀྱི་བདེན་པ་ཞེས་བྱའོ། །ཞེས་མཐོང་ བ་པོའི་ཆ་ནས་གཉིས་སུ་བཞག་པའི་ཕྱིར་དང་། ཏིང་རྒྱལ་ལས། གཟུགས་ཀྱི་རང་བཞིན་གཞན་ཡིན་ལ། །སྟོང་ཉིད་གཞན་དུ་མ་གསུངས་ཏེ། །གང་གིས་གཟུགས་ནི་རབ་ཤེས་པ། །དེས་ནི་སྟོང་ཉིད་རབ་ཏུ་ཤེས། །གང་གིས་སྟོང་ཉིད་རབ་ཤེས་པ། ། དེས་ནི་མྱ་ངན་འདས་པ་ཤེས། རྣམ་པ་འདི་ནི་མི་ཤེས་པས། །དམིགས་པ་ཅན་རྣམས་རབ་ཏུ་བརླག །ཞེས་ཕུང་པོ་ལྔ་ཀ་ལ་སྦྱར་བ་དང་། འདུ་ཤེས་རང་བཞིན་ཡེ་ཤེས་ཏེ། དེ་ལྟར་འདུ་ཤེས་མེད་པར་འགྱུར། །འདུ་ཤེས་དངོས་པོ་རྣམ་རིག་ན། ། དངོས་པོ་མེད་པར་འགྱུར་ཞེས་བསྟན། །ཞེས་དང་། དཀོན་མཆོག་ཟ་མ་ཏོག་ལས། ཉོན་མོངས་པ་རྣམས་དང་སངས་རྒྱས་ཀྱི་ཆོས་རྣམས་ལ་ཐ་དད་པར་བྱ་བ་ནི་ཅུང་ཟད་ཀྱང་མེད་དོ། །ཞེས་དང་། དཀོན་མཆོག་འབྱུང་གནས་ཀྱི་མདོར། མི་གཉིས་བྱེ་བྲག་མ་མཆིས་
Page: 291 ༄༅། །ཆོས་ཉིད་དུ། །བདེ་བར་གཤེགས་པས་ཆོས་ཀུན་བསྟན་པར་མཛད། །ཅེས་དང་། གང་དག་དེ་བཞིན་འདི་དག་འདུས་བྱས་ཏེ། །གཅིག་ཤོས་འདུས་མ་བྱས་ཞེས་རྣམ་གཉིས་སྨྲ། །དེ་དག་བདེ་གཤེགས་བསྟན་པའི་ཆོས་རྣམས་ལ། ། ནན་ཏན་དགྱི་བར་སྤྲོ་བའི་མི་མ་ལགས། །འདི་ན་མི་གཉིས་ཆོས་ཞེས་གང་སྨྲ་བ། །དེ་དག་སྟོན་པའི་བཀའ་ལ་མི་གནས་ཏེ། །བདེ་བར་གཤེགས་པས་ཆོས་རྣམས་གང་བསྟན་པ། །དེ་ལ་གཉིས་དང་མི་གཉིས་ཆོས་མ་མཆིས། །ཞེས་དང་། རྒྱ་མཚོའི་མདོ་ ལས། རྐྱེན་ལས་སྐྱེས་པ་གང་ཡིན་དེ་མ་སྐྱེས། །དེ་ལ་སྐྱེ་བ་ངོ་བོ་ཉིད་ཀྱིས་མེད། །རྐྱེན་ལ་རག་ལས་གང་ཡིན་སྟོང་པར་གསུངས། །སྟོང་ཉིད་གང་ཤེས་དེ་ནི་བག་ཡོད་པའོ། །ཞེས་དང་། དྲི་མ་མེད་པར་གྲགས་པའི་མདོ་ལས། གཟུགས་ཉིད་སྟོང་པ་སྟེ་ གཟུགས་བཤིག་པས་སྟོང་པ་མ་ཡིན་གྱི་གཟུགས་ཀྱི་རང་བཞིན་སྟོང་པའོ་ཞེས་སོགས་ཕུང་པོ་ལྔ་ཀ་ལ་སྦྱར་བ་དང་། རྔ་བོ་ཆེའི་མདོ་ལས། དེ་ནི་སེམས་དང་བྱང་ཆུབ་ཀྱང་། །རྣམ་པ་གཉིས་སུ་མི་མཐོང་སྟེ། བྱང་ཆུབ་ཀྱི་ནི་མཚན་ཉིད་གང་། ། སེམས་ཀྱང་དེ་ཡི་མཚན་ཉིད་ཡིན། །ཞེས་དང་། ཆོས་ཐམས་ཅད་འབྱུང་བ་མེད་པར་བསྟན་པའི་མདོ་ལས། བྱང་ཆུབ་འདོད་ཆགས་ཉིད་ནི་གཉིས་སུ་མེད། །འཇུག་པ་གཅིག་པ་མཉམ་ཉིད་ལྡན་པ་སྟེ། །འདི་དག་ཆོས་ལ་བྱིས་པ་གང་འཇིགས་ པ། །དེ་དག་སངས་རྒྱས་བྱང་ཆུབ་རིང་བ་ཡིན། །ཞེས་དང་། ཆོས་ཡང་དག་པར་སྡུད་པའི་མདོར། སྟོང་ཉིད་དང་ཉོན་མོངས་པ་ནི་མི་གཉིས་ཏེ་གཉིས་སུ་དབྱེར་མ་མཆིས་སོ་ཞེས་སོགས་རྒྱ་ཆེར་གསུངས་པའི་ཕྱིར། ཇི་ལྟར་སྣང་ཙམ་གྱི་ཆོས་ལ་བརྗོད་ ཚུལ་དང་མཐོང་བ་པོ་དང་འཛིན་ཚུལ་གྱི་ཆ་ནས་བདེན་པ་གཉིས་སུ་བཞག་པར་ཟད་ཀྱི་དེ་ནི་དུང་དང་དཀར་པོ་ལྟར་གཅིག་པ་དང་ཐ་དད་པ་གང་དུ་ཡང་གདགས་པར་མི་ནུས་ཏེ་ཡང་དག་པར་ན་གཅིག་ཐ་དད་ཉིད་རང་གི་ངོ་བོ་ཉིད་ཀྱིས་མི་དམིགས་པའི་ཕྱིར་དང་།
Page: 292 གཅིག་ཐ་དད་ནི་བློས་སྒྲོ་བཏགས་པ་ཁོ་ན་ཡིན་ལ་བློས་ཇི་ལྟར་བཟུང་ཡང་དེར་མི་གནས་པའི་ཕྱིར། དེས་ན་བདེན་ཆུང་ལས། རྟོག་མེད་ཚུལ་གྱིས་བརྟགས་པས་ན། །སྟོང་ཉིད་མཐོང་ཞེས་ཐ་སྙད་བཏགས། །མ་མཐོང་བ་ཉིད་དེ་མཐོང་བར། །ཤིན་ དུ་ཟབ་པའི་མདོ་ལས་གསུངས། །དེ་ལ་མཐོང་དང་མཐོང་བྱེད་མེད། །ཅེས་སོགས་ཅི་ཡང་མ་མཐོང་བ་ལ་ཡང་དག་པ་མཐོང་བར་བཤད་པ་ཐམས་ཅད་ཇི་ལྟར་ནམ་མཁའ་འདི་ཅིར་ཡང་མི་མཐོང་བ་མཐོང་བར་རང་གིས་མངོན་སུམ་དུ་ངེས་པ་འདི་འདྲ་བ་ ཞིག་སྟེ། ནམ་མཁའ་མཐོང་ཞེས་སེམས་ཅན་ཚིག་ཏུ་རབ་བརྗོད་པ། །ནམ་མཁའ་ཇི་ལྟར་མཐོང་ཞེས་དོན་འདི་བརྟག་པར་གྱིས། །གང་གིས་དེ་ལྟར་མཐོང་བ་དེ་ཡིས་ཆོས་ཀུན་མཐོང་། །མཐོང་བ་དཔེ་གཞན་གྱིས་ནི་བསྙད་པར་ནུས་མ་ཡིན། །ཞེས་ གསུངས་པ་ལྟར་ཡིན་གྱི་མིག་བཙུམས་པས་གཟུགས་མ་མཐོང་བ་ལྟ་བུའི་རྨོངས་ཤིང་བསྒྲིབས་པས་མ་མཐོང་བ་དེ་ལྟ་བུར་གོ་བར་མི་བྱ་སྟེ་དཔལ་ཡེ་ཤེས་གྲགས་པའི་ཕར་ཕྱིན་སྒོམ་རིམ་ལས་ཀྱང་། ཆོས་ཐམས་ཅད་མཐོང་དུ་ཟིན་ཡང་མཐོང་བ་མེད་པ་ཁོ་ན་ ཡིན་སྟེ་དེ་ལྟ་བུ་ཉིད་ལ་མཐོང་བ་མེད་པ་ཞེས་མངོན་པར་འདོད་ཀྱི་གཉིད་ལོག་པའམ་མིག་བཙུམས་པ་དང་འདྲ་བར་གང་ཡིད་ལ་བྱེད་པ་དེ་ནི་མ་ཡིན་ནོ་ཞེས་སོ། །དེ་ལྟར་ཟབ་མོ་ལྟ་བའི་གཞུང་གི་བདེན་གཉིས་རྒྱས་པར་བཤད་ནས། ཞར་ལ་རྒྱ་ཆེན་སྤྱོད་པའི་ ལུགས་ཀྱང་མདོ་ཙམ་བསྟན་པར་བྱ་སྟེ། ཀུན་བཏགས་ནི་ཀུན་བཏགས་པའི་ཀུན་རྫོབ་དང་གཞན་དབང་ཤེས་པའི་ཀུན་རྫོབ་དང༌ཡོངས་གྲུབ་ཏུ་བརྗོད་པ་བརྗོད་པའི་ཀུན་རྫོབ་དང་ཀུན་རྫོབ་རྣམ་པ་གསུམ་སྟེ། དབུས་མཐའ་རྣམ་འབྱེད་ལས། བཏགས་པ་ དང་ནི་ཤེས་པ་དང་། །དེ་བཞིན་བརྗོད་པ་རགས་པ་ཡིན། །ཞེས་སོ། །དེ་བཞིན་ཉིད་ནི་དོན་དམ་པའི་དོན་དམ་པ་དང་མྱ་ངན་ལས་འདས་པ་ཐོབ་པ་དོན་དམ་པ་དང་ལམ་ནི་སྒྲུབ་པ་དོན་དམ་པ་དང་དོན་དམ་རྣམ་པ་གསུམ་སྟེ། དོན་དང་ཐོབ་དང་སྒྲུབ་པ་ནི།
Page: 293 ༄༅། །དོན་དམ་རྣམ་པ་གསུམ་དུ་འདོད། །ཅེས་སོ། །དེ་ལ་ངོ་བོ་ཉིད་མེད་པ་གསུམ་སྟེ་ཀུན་བཏགས་པ་མིང་ཚིག་ལ་སོགས་པར་རབ་རིབ་ལ་སྐྲ་ཤད་དུ་འཛིན་པ་ལྟ་བུ་ནི་སྒྲོ་བཏགས་པ་ཁོ་ནར་ཟད་པས་གཏན་མེད་པའི་ཕྱིར་མཚན་ཉིད་ངོ་བོ་ཉིད་མེད་ པ་དང་གཞན་དབང་རྟེན་ཅིང་འབྲེལ་བར་འབྱུང་བ་སྐྲ་ཤད་དུ་སྣང་བ་ལྟ་བུ་ནི་སྒྱུ་མ་ལྟར་སྣང་ཡང་རང་བཞིན་མེད་པའི་ཕྱིར་སྐྱེ་བ་ངོ་བོ་ཉིད་མེད་པ་ཡིན་ལ། ཡོངས་གྲུབ་ལས་གང་ཟག་གི་བདག་མེད་ཀྱང་གང་ཟག་སྒྱུ་མའི་ཆུ་ལྟ་བུ་ལ་གཉེན་པོ་སྒྱུ་མའི་གཟིངས་ལྟ་བུ་ ཡིན་པས་གཞན་དབང་དུ་འདུ་ཡང་དོན་དམ་རྟོགས་བྱེད་ཀྱི་རྒྱུ་ཡིན་པས་དོན་དམ་པ་ངོ་བོ་ཉིད་མེད་པའི་ཆར་གཏོགས་སོ། །ཡོངས་གྲུབ་ལས་གང་ལ་བརྩོན་པས་བྱང་ཆུབ་འཐོབ་པ་ཆོས་ཀྱི་བདག་མེད་པ་དང་རྣམ་པར་དབྱེ་བ་མེད་པའི་ཆ་ནི་ནམ་མཁའ་གང་ དུ་ཡང་མ་གྲུབ་པ་དང་ཐམས་ཅད་དུ་སོང་བ་ལྟ་བུའམ་སྐྲ་ཤད་ངོ་བོ་ཉིད་ཀྱིས་ཡོད་པ་མ་ཡིན་པ་གར་ཡང་སོང་བ་མེད་པར་རྣམ་པར་དག་པ་ལྟ་བུ་ནི་དོན་དམ་པ་ངོ་བོ་ཉིད་མེད་པ་སྟེ་ངོ་བོ་ཉིད་མེད་པ་རྣམ་པ་གསུམ་ལ་དགོངས་ནས་སྐྱེ་བ་མེད་པ་ལ་སོགས་པའི་ ཚིག་གིས་བསྟན་པ་སྟེ་དགོངས་པ་ངེས་འགྲེལ་ལས། ཡོན་ཏན་འབྱུང་གནས་དེ་ལ་ཆོས་རྣམས་ཀྱི་ཀུན་ཏུ་བཏགས་པའི་མཚན་ཉིད་གང་ཞེ་ན་ཇི་ཙམ་དུ་རྗེས་སུ་ཐ་སྙད་གདགས་པའི་ཕྱིར་ཆོས་རྣམས་ཀྱི་ངོ་བོ་ཉིད་དམ་བྱེ་བྲག་ཏུ་མིང་དང་བརྡར་རྣམ་པར་ བཞག་པ་གང་ཡིན་པའོ། །གཞན་གྱི་དབང་གི་མཚན་ཉིད་གང་ཞེ་ན་ཆོས་རྣམས་ཀྱི་རྟེན་ཅིང་འབྲེལ་བར་འབྱུང་བ་ཉིད་འདི་ལྟ་སྟེ་འདི་ཡོད་པས་འདི་འབྱུང་ལ་འདི་སྐྱེས་པའི་ཕྱིར་འདི་སྐྱེ་བ་འདི་ལྟ་སྟེ་མ་རིག་པའི་རྐྱེན་གྱིས་འདུ་བྱེད་རྣམས་སོ་ཞེས་བྱ་བ་ ནས་སྡུག་བསྔལ་གྱི་ཕུང་པོ་ཆེན་པོ་འབའ་ཞིག་པ་འདི་འབྱུང་བར་འགྱུར་རོ་ཞེས་བྱ་བའི་བར་གང་ཡིན་པའོ། །ཡོངས་སུ་གྲུབ་པའི་མཚན་ཉིད་གང་ཞེ་ན་ཆོས་རྣམས་ཀྱི་དེ་བཞིན་ཉིད་གང་ཡིན་པ་སྟེ་བྱང་ཆུབ་སེམས་དཔའ་རྣམས་ཀྱིས་བརྟུལ་བའི་རྒྱུ་དང་ཚུལ་བཞིན་
Page: 294 ཡིད་ལ་བྱས་པའི་རྒྱུས་དེ་རྟོགས་ཤིང་དེ་རྟོགས་པ་གོམས་པར་བྱས་པ་ཡང་དག་པར་གྲུབ་པས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་བར་དུ་འགྲུབ་བ་གང་ཡིན་པའོ་ཞེས་དང་། རབ་རིབ་ཀྱི་སྐྱོན་ལྟ་བུ་ཀུན་བཏགས་རབ་རབ་ཀྱི་མཚན་མ་ལྟ་ བུ་གཞན་དབང་རབ་རིབ་དག་པ་ལྟ་བུ་ཡོངས་གྲུབ་བོ་ཞེས་དང༌། དོན་དམ་ཡང་དག་འཕགས་འདི་ལྟ་སྟེ་དཔེར་ན་ནམ་མཁའི་མེ་ཏོག་ཇི་ལྟ་བ་དེ་ལྟ་བུར་ནི་མཚན་ཉིད་ངོ་བོ་ཉིད་མེད་པ་བལྟ་བར་བྱའོ། །སྒྱུ་མ་བྱས་པ་ཇི་ལྟ་བ་དེ་ལྟ་བུར་ནི་སྐྱེ་བ་ངོ་བོ་ ཉིད་མེད་པ་ཉིད་ཀྱང་བལྟ་བར་བྱ་ལ་དོན་དམ་པ་ངོ་བོ་ཉིད་མེད་པ་དེ་ལས་གཅིག་ཀྱང་བལྟ་བར་བྱའོ། །ནམ་མཁའི་གཟུགས་ཀྱི་ངོ་བོ་ཉིད་མེད་པ་ཙམ་གྱིས་རབ་ཏུ་ཕྱེ་བ་དང་ཐམས་ཅད་དུ་སོང་བ་དེ་ལྟ་བུར་ནི་དོན་དམ་པ་ངོ་བོ་མེད་པ་ཉིད་ལས་ཆོས་བདག་མེད་ པས་རབ་ཏུ་ཕྱེ་བ་དང་ཐམས་ཅད་དུ་སོང་བ་གཅིག་བལྟ་བར་བྱ་སྟེ་ངོ་བོ་ཉིད་མེད་པ་གསུམ་པོ་དེ་དག་ལ་དགོངས་ནས་ཆོས་ཐམས་ཅད་ངོ་བོ་ཉིད་མེད་པའོ་ཞེས་བསྟན་ཏོ་ཞེས་སོ། །བོད་ཡུལ་འདི་ན་ཟབ་མོ་ལྟ་རྒྱུད་ཀྱི་དགོངས་པ་རིགས་པས་དཔྱད་པའི་ལྷག་ མར་ཅི་ཡང་མེད་པའི་མེད་དགག་རང་སྟོང་དང་། རྒྱ་ཆེན་སྤྱོད་བརྒྱུད་ཀྱི་དགོངས་པ་དོན་དམ་གཞན་སྟོང་ལྷག་མར་རྟག་བརྟན་ཏུ་ལུས་པའི་ཡོད་པ་ལ་འཆད་ཅིང་སོ་སོར་ཡང་དག་པའི་དོན་དུ་ཞེན་ནས་གཅིག་ཤོས་རྟག་ཆད་གང་རུང་གི་ལྟ་བར་འཕུལ་མོད་ཀྱི་ ཡོད་མེད་གཉིས་ཀ་ཟབ་མོ་ལྟ་རྒྱུད་ཀྱི་དོན་དམ་ཡང་མ་ཡིན་ལ་རྒྱ་ཆེན་སྤྱོད་བརྒྱུད་ཀྱི་དོན་དམ་ཡང་མ་ཡིན་སྟེ། ཡོད་ཅེས་བྱ་བ་རྟག་པར་ལྟ། །མེད་ཅེས་བྱ་བ་ཆད་པར་ལྟ། །དེ་ཕྱིར་ཡོད་དང་མེད་པ་ལ། །མཁས་པས་གནས་པར་མི་བྱའོ། ། ཞེས་བཞེད་ཅིང་རྒྱ་ཆེན་སྤྱོད་བརྒྱུད་དུ་ཡང་ཡོད་མེད་ནི་ཀུན་བཏགས་ཏེ་ནམ་མཁའི་མེ་ཏོག་ལྟར་གཏན་མེད་དུ་བཞེད་པའི་ཕྱིར། ཤིང་རྟའི་སྲོལ་འདི་གཉིས་ཀྱང་དགོངས་པ་གཅིག་སྟེ་སྔར་བཤད་པའི་བདེན་གཉིས་དེ་ཉིད་ཀྱི་ཀུན་རྫོབ་ལ་གཉིས་སུ་ཕྱེ་སྟེ་མིང་
Page: 295 ༄༅། །སོགས་སྒྲོ་བཏགས་ཁོ་ནར་ཟད་པ་ལ་ཀུན་བཏགས་དང་རྟེན་འབྲེལ་ཚོགས་པའི་བརྫུན་སྣང་མེད་བཞིན་སྣང་བ་ལ་གཞན་དབང་དུ་བཏགས་ལ་དོན་དམ་བདེན་པ་ལ་ཡོངས་གྲུབ་ཏུ་གསུངས་པ་ཁོ་ནའི་ཕྱིར་དང་། དོན་དམ་སྤྲོས་པ་ཉེར་ཞིར་ བསྟན་པར་གཉི་ག་མཚུངས་པའི་ཕྱིར་སྟེ་ནམ་མཁའ་ལ་སྐྲ་ཤད་ངོ་བོ་ཉིད་ཀྱིས་ཡོད་པ་མིན་ལ་སྣང་དུས་དེ་ཉིད་ན་ཡང་མི་བདེན་པའི་དཔེས་ཀུན་རྫོབ་སྒྱུ་མ་ལྟ་བུར་གཉི་གས་བསྟན་པའི་ཕྱིར་དང་། ནམ་མཁའ་གང་དུའང་མ་གྲུབ་ལ་ཀུན་ཏུ་སོང་བ་ལྟར་དོན་ དམ་པ་ཅི་ཡང་མ་ཡིན་ལ་ཆོས་ཐམས་ཅད་ལ་རྗེས་སུ་མ་སོང་བ་ཡང་མེད་པ་སྨྲ་བསམ་བརྗོད་བྲལ་གྱི་ངོ་བོ་ཉིད་དུ་གཉི་ག་མཐུན་པའི་ཕྱིར་རོ། །དེས་ན་སྒྲོ་སྐུར་གྱི་མཐར་འཛིན་བསལ་བ་ལ་དེ་ཁོ་ན་ཉིད་རྟོགས་པའི་མིང་དུ་ཟབ་མོ་ལྟ་རྒྱུད་ལས་གསུངས་ལ། རབ་རིབ་ལོག་པས་སྐྲར་སྣང་ལོག་པ་ན་ནམ་མཁའ་ཇི་ལྟ་བ་བཞིན་མཐོང་བར་རྗོད་པ་ལྟར་ཀུན་བཏགས་ལོག་པས་གགཞན་དབང་གི་མཚན་མའང་ལོག་པ་ལ་ཡོངས་གྲུབ་མཐོང་བའི་ཐ་སྙད་དུ་རྒྱ་ཆེན་སྤྱོད་པའི་གཞུང་ལས་གསུངས་པའི་ཕྱིར་འདི་གཉིས་ལ་ཁྱད་པར་ ཕྲ་མོའང་མ་མཐོང་ངོ་། །ཁ་ཅིག་དོན་དམ་གཞན་སྟོང་ནི་ཡོད་མེད་ལས་འདས་པའི་ཡོད་པའོ་ཞེས་ཟེར་བ་སོགས་ནི་གཡོའི་ཚིག་སྟེ། འོ་ན་ཁོ་བོས་དེ་ཡོད་མེད་ལས་འདས་པའི་མེད་པར་ཁས་བླངས་ན་སྐྱོན་ཅི། ཡང་ཡོད་མེད་ལས་འདས་པའི་ཡོད་ པ་ལས་ཀྱང་འདས་པའི་མེད་པར་ཁས་བླངས་ན་ཡང་ཅིས་འགོག །དེས་ན་སངས་རྒྱས་ཀྱི་བསྟན་པ་ལ་མ་གྲགས་པའི་ཐ་སྙད་སངས་རྒྱས་ཀྱི་བསྟན་པའི་གསེབ་ཏུ་མ་གཞུག་ཅིག །དེས་ན་སེམས་ཙམ་ཕྱོགས་གཅིག་སྨྲ་བ་རྣམས་ཀྱིས་གཞན་དབང་ཀུན་བཏགས་ ཀྱིས་སྟོང་པ་ཡོངས་གྲུབ་ཏུ་སྨྲ་བ་ནི་རྒྱ་ཆེན་སྤྱོད་གཞུང་གི་དགོངས་པ་མ་ཤེས་པར་རང་བློས་བཞག་སྟེ་ཀུན་བཏགས་རབ་རིབ་ཀྱི་ནད་དང་གཞན་དབང་དེས་སྐྱེད་པའི་སྐྲར་སྣང་དང་ཡོངས་གྲུབ་རབ་རིབ་དག་པ་ལྟ་བུར་གསུངས་པས་རབ་རིབ་ཀྱི་ནད་དག་པ་ན་སྐྲ་ཤད་དུ་སྣང་
Page: 296 བ་ལྡོག་པའི་ཕྱིར་གཞན་དབང་གི་མཚན་མ་ཡང་དག་པར་ལོག་པའི་ཚེ་དེ་ལ་དམིགས་ནས་སྐྱེད་པའི་ཀུན་བཏགས་ཀྱང་གནས་པ་མ་ཡིན་ནོ། །ཁ་ཅིག་ཟབ་མོ་ལྟ་བའི་གཞུང་དུ་སྐྱེ་བ་མེད་པ་སོགས་སྒྲ་ཇི་བཞིན་པར་བཤད་ཅིང་རྒྱ་ཆེན་སྤྱོད་གཞུང་དུ་ངོ་བོ་ཉིད་ མེད་པ་རྣམ་པ་གསུམ་ལ་དགོངས་ནས་གསུངས་པར་བཤད་པས་སྒྲ་ཇི་བཞིན་པ་མ་ཡིན་པར་བཤད་དོ་སྙམ་ན། ཟབ་མོ་ལྟ་རྒྱུད་དུ་ཡང་སྐྱེ་མེད་སོགས་མཐར་ཐུག་ཏུ་སྒྲ་ཇི་བཞིན་པ་མ་ཡིན་ཏེ་སྐྱེ་བ་ཡོད་ན་དེ་མེད་པ་མི་འགྲུབ་ཅིང་སྐྱེ་བ་མེད་ན་ཡང་དེ་ལ་ བལྟོས་པའི་སྐྱེ་མེད་མི་འགྲུབ་པའི་ཕྱིར་ན་རེ་ཞིག་ལས་དང་པོ་པའི་སྐྱེ་འགག་ཏུ་འཛིན་པ་ལྡོག་པའི་ཕྱིར་སྐྱེ་མེད་བསྟན་པར་ཟད་པས་དགོངས་པ་ཅན་ཏུ་འགྱུར་བའི་ཕྱིར་རོ། །འོ་ན་བདེན་པ་གཉིས་སུ་ཇི་ལྟར་ངེས་ཅེ་ན། ཐབས་བསོད་ནམས་ཀྱི་ཚོགས་སྟོན་པའི་ ཕྱིར་ཐ་སྙད་ཀུན་རྫོབ་ཀྱི་བདེན་པ་བཞག་ལ། དེ་ལས་བྱུང་བ་ནི་ཐ་སྙད་དང་བྲལ་བ་དོན་དམ་པའི་བདེན་པ་རྟོགས་པ་ཡེ་ཤེས་ཀྱི་ཚོགས་ཡིན་ལ་བྱང་ཆུབ་ནི་ཚོགས་གཉིས་བསགས་པ་ལ་བལྟོས་པའི་ཕྱིར་བདེན་པ་གཉིས་སུ་བཞག་པ་སྟེ། འཇུག་པ་ ལས། ཐབས་སུ་གྱུར་པ་ཀུན་རྫོབ་བདེན་པ་དང་། ཐབས་ལས་བྱུང་བ་དོན་དམ་བདེན་པ་དག །གཉིས་པོའི་དབྱེ་བ་གང་གིས་མི་ཤེས་པ། །དེ་དག་ལོག་པར་རྟོག་པས་ངན་འགྲོར་འགྲོ །ཞེས་དང༌རྩ་ཤེར། ཐ་སྙད་ལ་ནི་མ་བརྟེན་པར། ། དམ་པའི་དོན་ནི་རྟོགས་མི་འགྱུར། །དམ་པའི་དོན་ནི་མ་རྟོགས་ན། །མྱ་ངན་འདས་པ་འཐོབ་མི་འགྱུར། །ཞེས་དང་བདེན་ཆུང་ལས། ཡང་དག་ཀུན་རྫོབ་རྣམས་ཀྱི་སྐས། །མེད་པར་དོན་དམ་ཁང་ཆེན་གྱི། །སྟེང་དུ་འགྲོ་བར་འདོད་པ་ནི། ། མཁས་ལ་རུང་བ་མ་ཡིན་ནོ། །ཞེས་སོ། །གཞན་དག་ནི་ཡུལ་ལ་དཔྱད་བཟོད་མི་བཟོད་གཉིས་སུ་ངེས་ཤིང་བློ་ལ་འཁྲུལ་མ་འཁྲུལ་གཉིས་དང་གང་ཟག་ལ་འཁོར་འདས་གཉིས་སུ་ངེས་པས་ན་བདེན་པ་གཉིས་སུ་ངེས་སོ་ཞེས་ཟེར་མོད་ཀྱང་མཐར་ཐུག་གི་དཔྱད་
Page: 297 ༄༅། །བཟོད་ནི་མི་སྲིད་ལ། གནས་སྐབས་པའི་དཔྱད་བཟོད་ནི་ལོག་པའི་ཀུན་རྫོབ་ལ་བལྟོས་ཏེ་ཡང་དག་ཀུན་རྫོབ་ཀྱང་ཡིན་ལ་གཟུགས་སྐུ་གཉིས་ཀྱང་ཡང་དག་པའི་ཀུན་རྫོབ་ཡིན་པས་བློ་འཁྲུལ་པའི་ཡུལ་དུ་ཐལ་བ་དང༌། སོར་ཕྲེང་ལ་ ཕན་པའི་མདོ་སོགས་ཀྱི་དགོངས་པ་ལྟར་ན་ཐེག་དམན་གྱི་མྱང་འདས་ནི་དོན་དམ་མ་ཡིན་པར་ཡང་བཤད་པས་འཆད་ཚུལ་དེས་གྲངས་ངེས་འཆད་ནུས་པར་མ་མཐོང་ངོ་། །འོ་ན་རྣམ་པ་ཐམས་ཅད་དུ་བདེན་པ་བཞིའམ་གཉིས་སུ་ངེས་སམ་ཞེ་ན་དགོས་པའི་ དབང་གིས་དེ་ལྟར་བསྟན་མོད་ཀྱི་ངེས་པའི་དོན་དུ་སྡུག་བསྔལ་དང་ཀུན་འབྱུང་ནི་ངོ་བོ་ཉིད་ཀྱིས་དེ་དང་དེར་མི་གནས་ཤིང་ལམ་བདེན་ཡང་གཟིངས་ལྟར་མཐར་ཐུག་འདོར་བའི་ཕྱིར་བདེན་པ་མ་ཡིན་ལ་ཀུན་རྫོབ་ནི་བརྫུན་པའི་རང་བཞིན་གསོབ་དང་གསོག་དང་ཡ་ མ་རླ་ཁོ་ན་ཡིན་པས་བདེན་པར་མི་འགྱུར་བའི་ཕྱིར་ཆོས་ཐམས་ཅད་གཟོད་མ་ནས་ངོ་བོ་ཉིད་ཀྱིས་འགགས་པའི་འགོག་པ་ཆེན་པོ་མི་གནས་པའི་མྱ་ངན་ལས་འདས་པ་ཁོ་ན་དོན་དམ་པ་དང་བདེན་པ་གཅིག་བུ་པ་སྟེ། བློ་གྲོས་མི་ཟད་པས་བསྟན་པའི་མདོར། གཞན་ཡང་བདེན་པ་ནི་གཅིག་སྟེ་གཉིས་སུ་མེད་ཏོ་ཞེས་དང་། དེ་བཞིན་གཤེགས་པའི་ཡེ་ཤེས་ཀྱི་ཕྱག་རྒྱའི་ཏིང་ངེ་འཛིན་གྱི་མདོར། སྐྱེ་བ་མེད་པ་བདེན་པ་གཅིག་ཡིན་ན། །དེ་ལ་ཁ་ཅིག་བདེན་པ་བཞི་ཞེས་འཛེར། ཞེས་གསུངས་ཤིང་། ཆོས་ཐམས་ཅད་ཚུལ་གཅིག་པར་བཤད་པའི་ཆོས་ཀྱི་རྣམ་གྲངས་ཐམས་ཅད་བདེན་གཅིག་ཁོ་ན་བསྟན་པ་ཡིན་ནོ། །ཤིན་དུ་ངེས་པའི་དོན་དུ་ནི་བདེན་པ་དང་བརྫུན་པ་གང་ཡང་མ་བསྟན་ཏེ། དེ་ལ་ཁ་ཅིག་བདེན་པ་བཞི་ཞེས་འཛེར། །བྱང་ཆུབ་ སྙིང་པོར་འདུག་ནས་བདེན་གཅིག་ཀྱང་། གྲུབ་པར་མ་མཐོང་བཞི་ལྟ་ག་ལ་ཞིག །ཞེས་དང་ཚངས་པ་ཁྱད་པར་སེམས་ཀྱི་མདོར། ཚངས་པ་ལྟོས་ཤིག་ང་བྱང་ཆུབ་ཀྱི་སྙིང་པོར་འདུག་ནས་བདེན་པའམ་བརྫུན་པ་ཞེས་བྱ་བ་ཁོང་དུ་མ་ཆུད་དོ་ཞེས་
Page: 298 དང་། རྩ་ཤེར། དམིགས་པ་ཐམས་ཅད་ཉེར་ཞི་ཞིང་། །སྤྲོས་པ་ཉེར་ཞི་ཞི་བ་སྟེ། །སངས་རྒྱས་ཀྱི་ནི་གང་དུ་ཡང་། །སུ་ལའང་ཆོས་འགའ་མ་བསྟན་ཏོ། །ཞེས་གསུངས་ཤིང་། ཤེས་པ་དང་ཤེས་བྱ་ཡང་ཕན་ཚུན་རྟོག་པ་བརྟེན་པའི་ཕྱིར་ མཐར་ཐུག་གཉི་ག་མི་འགྲུབ་ལ་ཕྱིན་ཅི་ལོག་ཏུ་སེམས་པའི་སྒྲོ་སྐུར་གྱི་དམིགས་པ་ལས་ལོག་པ་ཙམ་ཁོ་ན་ལ་ཡང་དག་པ་མཐོང་བའམ་ཆོས་ཀྱི་དབྱིངས་ལ་གནས་པ་ཞེས་ཐ་སྙད་དུ་བྱས་པ་སྟེ། མདོ་སྡེ་རྒྱན་ལས་ཀྱང་། དེ་ཕྱིར་ཐར་པ་ནོར་བ་ཟད་ཙམ་ ཡིན། །ཞེས་དང་། འདི་ལ་དོན་དམ་ཚུལ་གྱིས་ཞི་བ་དང་། །སྐྱེ་བ་དེ་གཉིས་ཁྱད་པར་ཅི་ཡང་མེད། །ཅེས་དང་རྩ་ཤེར། གང་ལ་མྱ་ངན་འདས་སྐྱེད་མེད། །འཁོར་བ་བསལ་བའང་ཡོད་མིན་པ། །དེ་ལ་འཁོར་བ་ཅི་ཞིག་ཡིན། །མྱ་ངན་འདས་པ་ཅི་ ཞིག་བརྟག །ཞེས་གསུངས་ཏེ་དམིགས་པ་ཐམས་ཅད་ལས་རྣམ་པར་ལོག་པ་ལྟ་ཞི་ཀུན་ཟློག་གི་སྐབས་འདིར་ཡང་ཤིང་རྟའི་སྲོལ་གཉིས་ཀ་དགོངས་པ་ཐ་མི་དད་པའོ། །དེས་ན་རྣམ་རིག་པ་དག་གིས་སེམས་བདེན་པར་འདོད་པ་ཡང་རྒྱ་ཆེན་སྤྱོད་ པའི་དགོངས་པ་མིན་ཏེ། དེ་ནས་སེམས་ཀྱང་མེད་པ་ཉིད་དུ་རྟོགས། །བློ་དང་ལྡན་པས་གཉིས་པོ་མེད་རིག་ནས། དེ་མི་ལྡན་པས་ཆོས་ཀྱི་དབྱིངས་ལ་གནས། །ཞེས་བཞེད་པའི་ཕྱིར་རོ། །ཤེས་བྱ་བདེན་པའི་རྣམ་པར་བཞག་པ་བཤད་ ཟིན་ཏོ།། །། ཤེས་བྱ་གྲུབ་མཐའ་ལ་ཡང་ཕྱི་ནང་གཉིས་ལས་གཉི་ག་འང་གྲུབ་མཐའ་བཞི་བཞི་སྟེ། ཕྱི་རོལ་པ་རྣམས་ཀྱང་སྟོན་པ་སྲིད་རལ་ཅན་གྱི་ཞལ་བཞི་ལས་གྲུབ་མཐའ་བཞི་གསུངས་པར་གྲགས་ཤིང་། དཔལ་དུས་ཀྱི་འཁོར་ལོ་ལས་ ཀྱང་དུས་ཀྱི་འཁོར་ལོའི་ཞལ་བཞི་ལས་སྐྱེ་གནས་བཞི་དང་ཚངས་པ་པ་དང་ཉི་མ་པ་དང་གཅེར་བུ་པ་དང་སྐྲ་ཅན་པ་སྟེ་ཕྱི་རོལ་པའི་གྲུབ་མཐའ་བཞི་དང་། ནང་པའི་གྲུབ་མཐའ་བཞི་དང་སྐུ་བཞི་ལ་སོགས་བཞི་ཆོས་ཇི་སྙེད་པ་སྤྲོས་པར་གསུངས་པའི་ཕྱིར་རོ། །དེས་ན་ཕྱི་རོལ་པ་ལ་ཚངས་
Page: 299 ༄༅། །པ་པ་དང༌ཁྱབ་འཇུག་པ་དང་དབང་ཕྱུག་པ་དང་ཕུར་བུ་པ་སྟེ་སྟོན་པའི་མིང་གིས་བཏགས་པ་བཞི་ཡིན་ལ། ཚངས་པ་པ་ནི་བྲམ་ཟེ་སྟེ་ཚངས་པའི་ཞལ་བཞི་ལས་བསྟན་པའི་ཚེའི་རིག་བྱེད་དང་བརྡ་སྤྲོད་དང་སྙན་ངག་གི་དང་སྲིད་སྲུང་ དང་ངེས་བརྗོད་དེ་རིག་བྱེད་བཞི་པོ་འདུས་མ་བྱས་པའི་རྟག་པ་ཡིན་ལ་བྲམ་ཟེ་དང་རྒྱལ་རིགས་ལས་གཞན་པས་ཀློག་མི་རུང་བ་དང་ཚངས་པའི་ཁ་དང་དཔུང་པ་དང་བརླ་དང་རྐང་པ་སྟེ་བཞི་ལས་བྲམ་ཟེ་དང་རྒྱལ་རིགས་དང་རྗེ་རིགས་དང༌རྨངས་རིགས་རྣམས་ སྐྱེས་པ་དང་ཨ་ཤྭ་མེ་དྷ་ཞེས་པ་རྟ་དཀར་པོ་བསད་པའི་མཆོད་སྦྱིན་གྱིས་གྲོལ་བར་སྨྲ་བའོ། །ཁྱབ་འཇུག་པ་ནི་ཁྱབ་འཇུག་འཇིག་རྟེན་གྱི་བྱེད་པོ་དང་གླུ་ཆོས་སུ་སྨྲ་ལ་འདིའི་ནང་ཚན་བྱེ་བྲག་པ་དང་རིགས་པ་ཅན་པའོ། །དབང་ཕྱུག་པའམ་ཞི་བ་པ་ ནི། དེ་བྱེད་པོར་འདོད་ཅིང་འཁྲིག་པ་ཆོས་སུ་སྨྲ་ལ་ནང་ཚན་གྲངས་ཅན་པ་དང༌གཟེགས་ཟན་པ་དང་དཔྱོད་པ་པའོ་དེ་ཐམས་ཅད་ནི་བདག་དང་དུས་གསུམ་རྟག་ཅིང་རང་བཞིན་དང་ཡོན་ཏན་དང་ཐམས་ཅད་དུ་ཁྱབ་པར་འདོད་ལ་ཁྱད་པར་གྲངས་ཅན་པ་ནི་རྡུལ་མུན་སྙིང་ སྟོབས་གསུམ་ཆ་མཉམ་པ་གཙོ་བོ་སྟེ་བྱེད་པ་པོ་དང༌རྟག་པར་འདོད་ཅིང་རང་བཞིན་ཡིན་ལ་རྣམ་འགྱུར་མ་ཡིན་པའོ། །ཤེས་རིག་ནི་བདག་ཡིན་ལ་དེ་དང་ལྡན་པའི་སྐྱེས་བུ་ནི་བདག་ཤེས་རིག་གི་སྐྱེས་བུ་སྟེ་རྣམ་འགྱུར་ལ་ལོངས་སྤྱོད་པ་པོ་ཡིན་གྱི་རང་བཞིན་ དང་རྣམ་འགྱུར་གཉི་ག་མ་ཡིན་ནོ། །གཙོ་བོ་ལས་བློའམ་ཆེན་པོ་ཞེས་བྱ་བ་ཤེལ་གྱི་མེ་ལོང་ངོས་གཉིས་པ་ལྟ་བུ་སྐྱེ་ལ་དེ་ལས་ང་རྒྱལ་དེ་ལས་མིག་སོགས་དབང་པོ་ལྔ་དེ་ལས་ངག་སོགས་ལས་དབང་ལྔ་དེ་ལས་ཡིད་དེ་ལས་སྒྲ་སོགས་དེ་ཙམ་ ལྔ་དེ་ལས་ནམ་མཁའ་སོགས་འབྱུང་བ་ལྔ་སྟེ་གཙོ་་བོས་བྱས་པའི་རྣམ་འགྱུར་ཉེར་གསུམ་མོ། །བློ་ལ་ནང་ནས་བདག་དང་ཕྱི་ནས་རྣམ་འགྱུར་གཉི་གའི་རྣམ་པ་ཤར་བ་སྐྱེས་བུས་ལོངས་སྤྱོད་ལ་ཡོན་ཏན་གསུམ་ཆ་མི་མཉམ་པའི་ཚེ་འགྲོ་བ་ཞེས་བྱ་བ་མི་
Page: 300 རྟག་པར་འདོད་ཅིང་སྐྱེས་བུས་རྣམ་གྱུར་དེ་གཙོ་བོས་བྱས་ནས་བདག་ལ་ལོངས་སྤྱོད་དུ་བཅུག་པར་ཤེས་པ་ན་གཙོ་བོ་བསྐྱེངས་ཏེ་རྣམ་འགྱུར་བྱེད་མི་ནུས་པ་ནི་ཐར་པ་འདོད་ཏོ། །རིགས་པ་ཅན་པས་དེ་ཉིད་ལས་བདག་དེ་སེམས་པ་མེད་པར་འཆད་ཏོ། ། ཕུར་བུ་པ་ལ་གཉིས་ལས་རྒྱང་འཕེན་པ་ནི་ཆང་ལ་སྐྱེ་བ་སྔ་ཕྱི་མེད་ཀྱང་ཨ་རུ་ར་དང་བུ་རམ་སོགས་སྦྱར་བས་སྐྱེ་བ་ལྟར་འབྱུང་བ་འདུས་པའི་དབང་གིས་མི་དང་དུད་འགྲོ་སོགས་མངོན་པར་གསལ་བའི་སེམས་ཅན་དང་ཤིང་སོགས་མི་གསལ་བའི་སེམས་ཅན་སྐྱེ་ བ་སྟེ་ཚེ་སྔ་ཕྱི་མེད་དོ་ཞེས་ཆད་པར་བལྟའོ། །གཅེར་བུ་པའམ་ཟད་བྱེད་པ་ནི་རྒྱལ་བ་པའམ་མཆོད་འོས་པའམ་ནམ་མཁའི་གོས་ཅན་པ་ཞེས་ཀྱང་བྱ་སྟེ་སྲོག་རྟག་པ་ལུས་ཚད་དང་མཉམ་པར་ཡོད་ཅིང་སྲིད་པ་གསུམ་རྟག་པའི་སྟེང་ན་ཐར་པ་གདུགས་དཀར་པོ་ གན་རྐྱལ་དུ་བྱས་པའི་དབྱིབས་ཅན་དཔག་ཚད་འབུམ་ཕྲག་ཞེ་ལྔ་པ་ཡོད་སྟེ་དེར་ཆུད་ནས་མི་ལྡོག་པར་འདོད་ཅིང་ལྗོན་ཤིང་སོགས་ཀྱང་ཆུ་འཐུངས་ནས་སྐྱེ་བའི་ཕྱིར་སྲོག་དང་བཅས་པར་སྨྲ་ལ་མུ་སྟེགས་དེ་རྣམས་སོ་སོའི་ནང་ཚན་གྱི་དབྱེ་བ་ཆེས་མང་ལ་ རྒྱང་འཕེན་པ་མ་གཏོགས་ཚངས་པ་ལ་སོགས་པའི་ལྷ་ལ་སྐྱབས་གནས་སུ་འཛིན་པ་ཁོ་ནའོ། །དེ་དག་དང་ཕྱོགས་མཐུན་པ་ཀླ་ཀློ་སྟག་གཟིག་པ་ནི་ལྷ་མ་ཡིན་ལ་སྐྱབས་སུ་འཛིན་ཞིང༌རསྨ་ཎ་བྱེད་པོར་འདོད་ལ་དེ་མ་མཉེས་ན་ལུས་འདིས་དམྱལ་བར་ བསྐྱུར་ལ་མཉེས་ན་ཐར་བའི་ཕྱིར་སྲོག་གི་མཆོད་སྦྱིན་གྱིས་དེ་མགུ་བར་འདོད་དོ། །དེ་དག་ཡང་རེ་རེ་ཞིང་མ་ཡིན་ཏེ་རིག་བྱེད་བཞི་ནི་མི་རྟག་པར་མངོན་སུམ་གྱིས་མཐོང་ལ་མིང་ཚིག་ཡི་གེར་ཡོད་པ་དང་སྔོན་ཚངས་པས་བཀླགས་ཤིང་ད་ལྟའང་བྲམ་ཟེས་ ཁས་ཀློག་པའི་ཕྱིར་རྟག་པ་མིན་ལ། རིགས་བཞི་ཡང་ཚངས་པ་གཅིག་པུ་ལས་སྐྱེས་པའི་ཕྱིར་དཔུན་དུ་ཐལ་བས་རིགས་ལ་བཟང་ངན་མེད་པར་འགྱུར་བ་དང༌སྔོན་དྲང་སྲོང་རྒྱས་པས་བུ་ནེ་ཙོ་མཆོད་སྦྱིན་ལ་སྦྱར་བ་ན་དེས། མཆོད་སྡོང་བཙུགས་ནས་ཕྱུགས་བསད་སྟེ།
Page: 301 ༄༅། །ཁྲག་འདམ་བྱས་པས་མཐོ་རིས་སུ། །གལ་ཏེ་འགྲོ་བ་དེ་ལྟ་ན། །དམྱལ་བར་གང་གི་འགྲོ་བར་འགྱུར། །ཞེས་སུན་ཕྱུང་བའི་ཕྱིར་རོ། །དབང་ཕྱུག་སོགས་ཀྱིས་ཐམས་ཅད་བྱེད་ན་རྨོན་གླང་དང་བྲན་གྱི་བྱ་བ་རྣམས་ཀྱང་བྱེད་
པར་འགྱུར་ལ། ད་ལྟ་ན་ཤིན་ཏུ་ངལ་ཞིང་ཐམས་ཅད་ཀྱི་བྲན་དུ་ཐལ་བའི་ཕྱིར་དང་། རྫ་སོགས་དབང་ཕྱུག་གིས་མི་བྱེད་པར་བཟོ་བོས་བྱེད་པར་མངོན་སུམ་གྱིས་མཐོང་བའི་ཕྱིར་དང་། བདག་རྟག་པ་གཅིག་པུ་ཐམས་ཅད་དུ་འགྲོ་ན་གཉེན་གྱི་བདག་རྟག་པར་ཡོད་པའི་
ཕྱིར་དེ་དང་བྲལ་བའི་སྡུག་བསྔལ་མི་འབྱུང་བ་དང་སུ་ཡང་འཆི་བར་མི་འགྱུར་ཏེ་དེའི་བདག་རྟག་པའི་ཕྱིར་དང་། ཡང་ན་ལྷས་བྱིན་ཤི་བ་ན་མཆོད་སྦྱིན་ཡང་འཆི་བར་འགྱུར་ཏེ་དེ་གཉིས་བདག་གཅིག་པའི་ཕྱིར་དང་། དུས་རྟག་པ་ཡིན་ན་ཁྱབ་འཇུག་གི་གནས་སྐབས་
བཅུ་སོགས་ཀྱང་མི་རིགས་པར་འགྱུར་རོ། །ཁྱད་པར་གྲངས་ཅན་པ་ནི། ཡོན་ཏན་ཅན་སྒྲ་རྟག་པར་འགྱུར་ཏེ་ཡོན་ཏན་ནམ་མཁའ་རྟག་པའི་ཕྱིར་དང་། དུང་སྒྲ་སོགས་རྐྱེན་ལ་མ་ལྟོས་པར་རྟག་ཏུ་འབྱུང་བར་ཐལ་བ་དང༌། གཙོ་བོ་གཅིག་ལ་རང་བཞིན་
གསུམ་མི་འཐད་པས་གཙོ་བོ་དེ་མེད་ལ་དེ་མེད་ན་དེས་བྱས་པའི་རྣམ་འགྱུར་ཡང་མི་སྲིད་པ་སོགས་དང༌། རིགས་ཅན་པ་ལ། སེམས་མེད་ན་བདག་ཏུ་འགལ་བ་སོགས་ཀྱིས་གཞུང་དུ་རྒྱ་ཆེར་འགོག་པར་འགྱུར་རོ། །འབྱུང་བ་འདུས་པས་དབང་པོ་དང་བཅས་
པའི་སེམས་འགྲུབ་ན་མངོན་པར་མི་གསལ་བའི་སེམས་ཅན་དུ་འདོད་པ་རྣམས་ཀྱང་དབང་པོ་དང་བཅས་པའི་སེམས་ལྡན་དུ་འགྱུར་ལ། ཡང་ན་མངོན་པར་གསལ་བའི་སེམས་ལྡན་དུ་འདོད་པ་རྣམས་ལའང་དབང་བཅས་ཀྱི་ཤེས་པ་མི་སྐྱེ་བར་འགྱུར་ཏེ། རྒྱུ་
འབྱུང་བ་བཞིར་མཚུངས་པའི་ཕྱིར་དང་། སྔོན་དྲང་སྲོང་གིས་རང་གི་བུ་མོ་ལ་བགྲོད་པར་འདོད་ནས། བཟང་མོ། མ་ཤི་ཚེ་ན་དགའ་མགུར་སྤྱོད། །ཤི་ནས་དེ་ཡི་སྤྱོད་ཡུལ་མིན། །མེ་ཤི་ཐལ་བ་རླུང་ཁྱེར་འདྲ། །ཞེས་ལོག་པར་
Page: 302 སྨྲས་པ་ལས་འཕེལ་བའི་ཕྱིར་རོ། །སྲོག་རྟག་པ་ལུས་ཚད་དང་མཉམ་པ་ཡོད་ན། ཡན་ལག་བཅད་ན་སྲོག་ཆད་པར་ཐལ་བས་སྲོག་རྟག་པ་ཉམས་པར་འགྱུར་བ་དང༌། ཐར་པ་གདུགས་ལྟ་བུ་དེ་ཡང་གཟུགས་ཅན་ཡིན་ན་རྡུལ་བསགས་པ་ཡིན་དགོས་ ལ། དེ་ལྟ་ན་འདུས་བྱས་ཡིན་པས་མི་རྟག་པར་འགྱུར་བའི་ཕྱིར་དང་། བུར་ཤིང་གི་དབྱུག་པ་དུམ་བུ་བརྒྱར་བྱས་པ་ན་སྲོག་བརྒྱར་འགྱུར་བའམ། ཡང་ན་ཆད་པར་འགྱུར་ལ། གང་ལྟར་འདོད་རུང་སྲོག་རྟག་པ་དང་འགལ་ཞིང་འཆད་པར་འདོད་ན་དུམ་བུ་དེ་དག་ས་ ལ་བཙུགས་པ་ན་མི་སྐྱེ་བར་ཐལ་ལ། འདོད་མི་ནུས་ཏེ་མངོན་སུམ་གྱིས་བསལ་བའི་ཕྱིར་རོ། །རམྨ་ཎས་ཐམས་ཅད་བྱེད་ན་རཊྨ་ཎ་ཉིད་ཀྱང་དེས་བྱས་པར་འགྱུར་ལ། བདག་ཉིད་ཀྱིས་བདག་ཉིད་བྱེད་པ་མི་སྲིད་པའི་ཕྱིར་དང་དེ་ཐམས་ཅད་ཀྱི་བྱེད་པོ་ཡིན་ན། དེས་བྱས་པའི་ཕྱུགས་མཆོད་སྦྱིན་དུ་བསད་པས་དེ་མ་མཉེས་པར་འགྱུར་ལ། ཡང་ན་མཆོད་སྦྱིན་བྱས་ཀྱང་བྱེད་པ་པོ་ལ་ཕན་པར་མི་འགྱུར་ཏེ་མཆོད་སྦྱིན་བྱེད་པོ་ཡང་རརྨ་ཎ་ཁོ་རང་དུ་ཟད་པའི་ཕྱིར་དང་། ལུས་འདི་བོར་ནས་ལུས་འདིས་དམྱལ་བར་ལྟུང་མི་སྲིད་ པའི་ཕྱིར་རོ། །ནང་པ་ལ་ཡང་བྱེ་མདོ་དབུ་སེམས་ཀྱི་གྲུབ་མཐའ་བཞི་སྟེ། རྡོ་རྗེ་སྙིང་འགྲེལ་ལས། སངས་རྒྱས་པ་ལ་བཞི་པ་དང༌། །ལྔ་པ་ཐུབ་པའི་དགོངས་པ་མིན། །ཞེས་གྲུབ་མཐའ་ལྔ་པ་དང༌། སྡེ་སྣོད་བཞི་པ་མེད་པར་བཤད་ ཅིང་། བརྟག་གཉིས་ཀྱི་རྒྱུད་ལས་ཀྱང་། དེ་ལ་བྱེ་བྲག་སྨྲ་བ་བསྟན། །མདོ་སྡེ་པ་ཡང་དེ་བཞིན་ནོ། །རྣལ་འབྱོར་སྤྱོད་པ་དེ་ལས་ཕྱིས། །དེ་ཡི་རྗེས་སུ་དབུ་མ་བསྟན། །ཞེས་སོ། །དེ་ལ་བྱེ་བྲག་ཏུ་སྨྲ་བ་ནི། འདུས་མ་བྱས་གསུམ་པོ་རྟག་པ་ སྟེ་བཏགས་ཡོད་ཙམ་དང་། བེམ་ཤེས་ལྡན་མིན་འདུ་བྱེད་དེ་གསུམ་པོ་ནི་དངོས་པོ་རྫས་ཡོད་འདུས་བྱས་ཡིན་ལ། དུས་གསུམ་ཡང་རྫས་སུ་གྲུབ་ཅིང་རྫས་ཡོད་ཀྱི་རགས་པ་རྣམས་སྤྱི་མཚན་ཀུན་རྫོབ་དང༌། ཕྲ་བ་དོན་རང་མཚན་དང་ཤེས་པ་རང་མཚན་ནི་
Page: 303 ༄༅། །བདེན་པར་ཡོད་པར་སྨྲ་ཞིང་། མུ་སྟེགས་ཀྱིས་བཏགས་པའི་བདག་དང་བྱེད་པ་པོ་མེད་ལ་དོན་ཤེས་ཐུག་ཕྲད་རྣམ་མེད་རྗེན་ཆར་དུ་འཛིན་པར་འདོད་དེ། དུས་འཁོར་རྩ་རྒྱུད་ལས་གསུངས་པ་འགྲེལ་ཆེན་དྲི་མེད་འོད་དང་། འཇམ་དཔལ་རང་གི་ལྟ་བའི་འདོད་པ་མདོར་བསྟན་པ་དག །ཛེ་ཏ་རིའི་བདེ་བར་གཤེགས་པའི་གཞུང་རྣམ་འབྱེད་དང་། ཨཱརྱ་དེ་ཝའི་ཡེ་ཤེས་སྙིང་པོ་ཀུན་ལས་བཏུས་པ་རྣམས་སུ་ཚིག་མཐུན་པར་དྲངས་པ་ལསནམ་མཁའ་དང་ནི་འགོག་པ་གཉིས། ། འདུས་མ་བྱས་གསུམ་རྟག་པ་སྟེ། །འདུས་བྱས་ཐམས་ཅད་སྐད་ཅིག་མ། །བདག་གིས་སྟོང་ཞིང་བྱེད་པོ་མེད། །དབང་སྐྱེས་བློ་ནི་རྣམ་མེད་ཀྱིས། ཕྲ་རབ་བསགས་པ་དངོས་སུ་རིག །ཁ་ཆེའི་གཞུང་གི་ཆུ་གཏེར་ཆེ། །བྱེ་བྲག་སྨྲ་བའི་ གཞུང་འདོད་འགྱུར། །ཞེས་སོ། །འདུས་མ་བྱས་གསུམ་པོ་མེད་ཅིང་། ཕྱི་དོན་རང་མཚན་ལྐོག་ན་མོར་ཡོད་པ་ལ་ཤེས་པས་དམིགས་པ་ན་སྐད་ཅིག་གཉིས་པར་ཤེས་པ་དེ་ཡུལ་དེའི་རྣམ་པར་སྐྱེས་པ་བ་འདི་ཡིན་ཞིང་འདི་ནི་ཤེས་པ་ཡིན་ལ། ལྡན་མིན་འདུ་བྱེད་དང་། དུས་རྒྱ་ལས་འབུར་ལྟ་བུ་ནི་དོན་གྱི་རྣམ་པ་སྟེ་ཇི་ལྟར་ སྣང་གསུམ་དང༌། རིག་བྱེད་མ་ཡིན་པའི་གཟུགས་དངོས་པོར་མེད་པར་འདོད་དེ། ཤེས་པ་རྣམ་བཅས་སྐྱེད་བྱེད་ན་ནི། །དབང་པོའི་སྤྱོད་ཡུལ་སྣང་བ་མིན། །ནམ་མཁའ་མོ་ གཤམ་བུ་དང་མཚུངས། །འགོག་པ་གཉིས་ཀྱང་ནམ་མཁའ་བཞིན། །འདུ་བྱེད་བེམ་པོ་ཡོད་མ་ཡིན། །དུས་གསུམ་རྗེས་འགྲོ་དག་ཀྱང་མེད། །ཐོགས་པ་མེད་པའི་གཟུགས་ཡོད་མིན། །ཞེས་པ་མདོ་སྡེ་པ་ཡིས་རིག །ཞེས་སོ། ། བྱེ་མདོ་དེ་གཉི་གའང་མྱང་འདས་ཐོབ་པ་ན་མར་མེ་ཤི་བ་ལྟར་རྒྱུན་འཆད་པར་འདོད་དོ། །རྣམ་རིག་པ་ནི། རྡུལ་ཕྲ་རབ་སོགས་ཕྱི་དོན་དང་བདག་མེད་ལ་ཇི་ལྟར་སྣང་བ་འདི་ནི་སེམས་ཡིན་ཏེ་རྨི་ལམ་ལྟ་བུའོ། །སེམས་དེ་ཡང་གཟུང་བའི་རྣམ་པ་འཛིན་
Page: 304 པའི་སེམས་ནི་འཁྲུལ་བ་ཡིན་པས་མི་བདེན་ཡང་གཟུང་འཛིན་གཉིས་མེད་ཀྱི་རྣམ་ཤེས་སམ་ཡེ་ཤེས་རང་རིག་རང་གསལ་བ་གྲུབ་པར་འདོད་དེ། ཡན་ལག་ཅན་ཞེས་བྱ་བ་མེད། ཕྲ་རབ་རྡུལ་རྣམས་ཡོད་པ་མིན། རྨི་ལམ་ཉམས་སུ་མྱོང་བ་ བཞིན། །དམིགས་པ་མེད་པར་རབ་ཏུ་སྣང་། །གཟུང་དང་འཛིན་པ་རྣམ་གྲོལ་བའི། རྣམ་པར་ཤེས་པ་དོན་དམ་ཡོད། །ཅེས་པ་རྣལ་འབྱོར་སྤྱོད་པའི་གཞུང་། །རྒྱ་མཚོའི་ཕ་རོལ་ཕྱིན་རྣམས་སྒྲོག །ཅེས་སོ། དབུ་མ་པ་ནི། རྣམ་ཤེས་སམ་ ཡེ་ཤེས་དེ་ཡང་ཡང་དག་པར་ཡོད་པ་མ་ཡིན་ཏེ་གཅིག་དང་དུ་མས་བརྟགས་ན་མི་འཐད་པའི་ཕྱིར་དང་། མཐའ་བཞི་གང་དུའང་མི་གནས་པའི་ཕྱིར་ཏེ། རྣམ་ཤེས་དེ་ཡང་དོན་དམ་དུ། །ཡོད་པར་མཁས་རྣམས་མི་འདོད་དེ། །གཅིག་དང་དུ་མའི་ རང་བཞིན་དང་། །བྲལ་བས་ནམ་མཁའི་པདྨ་བཞིན། །ཡོད་མིན་མེད་མིན་ཡོད་མེད་མིན། །གཉི་གའི་བདག་ཉིད་མིན་པའང་མིན། །མཐའ་བཞི་རྣམ་པར་གྲོལ་བ་ཡི། །དེ་ཉིད་དབུ་མ་པ་ཡིས་རིག །ཞེས་སོ། །དེ་རྣམས་ཀྱང་ཕྱི་མ་ཕྱི་མས་ སྔ་མ་སྔ་མ་འགོག་སྟེ། དེ་ཡང་། ཁ་ཅིག་ཕྲ་རབ་རྡུལ་ཆ་མེད། །ཅེས་སོགས་གོང་དུ་དྲངས་ཏེ་བཤད་ན། རྡུལ་ཕྲ་རབ་ཆ་མེད་མི་སྲིད་དེ་རྡུལ་དེ་ལ་ཕྱོགས་དྲུག་ལ་ལྟ་བའི་ངོས་ཡོད་དམ་མེད། ཡོད་ན་ཆ་དྲུག་ཏུ་ཐལ་ལ། མེད་ན་ཕྱོགས་ དྲུག་གའི་ངོས་ཤར་ཕྱོགས་ལྟ་བུ་གཅིག་ཁོ་ན་ན་གནས་པར་ཐལ་ཞིང་། དེ་ལྟ་རགས་པ་རི་ལ་སོགས་པ་ལའང་དེ་ཅིས་མི་མཚུངས་ཏེ། ཉི་ཤུ་པ་ལས། དྲུག་གིས་གཅིག་ཆར་སྦྱར་བ་ན། །ཕྲ་རབ་རྡུལ་ཆ་དྲུག་ཏུ་འགྱུར། །དྲུག་པོ་དག་ཀྱང་གོ་གཅིག་ན། །གོང་བུའང་རྡུལ་ཕྲ་ཙམ་དུ་ འགྱུར། །ཞེས་སོ། །དེ་བཞིན་དུ་རྡུལ་དེ་གཅིག་དུ་མ་གྲུབ་སྟེ་དུ་མ་འདུས་པ་ལ་གཅིག་ཏུ་འདོགས་ལ། དེའི་སྔོན་དུ་དུ་མ་མ་གྲུབ་པའི་ཕྱིར། དུ་མར་མ་གྲུབ་སྟེ་གཅིག་དང་གཅིག་ཤོས་དང་ཡང་གཅིག་ཤོས་ཚོགས་པ་ལ་དུ་མར་འཇོག་ལ། དེ་ལས་གཅིག་ཤོས་གཞན་
Page: 305 ༄༅། །མ་གྲུབ་པའི་ཕྱིར། ཤེས་པས་དོན་རྣམ་མེད་རྗེན་ཆར་དུ་འཛིན་མི་ནུས་ཏེ། དེ་ནུས་ན་ལོང་བས་ཀྱང་གཟུགས་རྗེན་ཆར་དུ་འཛིན་པ་དང༌། དབང་པོ་ལ་མ་ལྟོས་པར་ཐལ་ཞིང་བལྟོས་ན་དབང་པོས་བར་དུ་ཆོད་པས་རྗེན་ཆར་མིན་ལ། གལ་ཏེ་དབང་པོ་དང་བཅས་པས་རྗེན་ཆར་དུ་འཛིན་ན་དབང་པོ་དང་ཡུལ་སྐྱེས་བུ་དཔྲལ་བ་ཕྲད་པ་ལྟར་དངོས་སུ་དགོས་ལ། དེ་ལྟ་ན་མེ་འཛིན་པའི་འཚིག་པ་དང༌། ཚེར་མ་འཛིན་ཚེ་མིག་དབང་ལ་འཛུག་པ་སོགས་སུ་ཐལ་བའི་ཕྱིར་རོ། །མདོ་སྡེ་ པའི་ཕྱི་དོན་ལྐོག་ན་མོ་དེ་ཡང་མེད་དེ། དེ་ཡོད་ན་དེ་ཤེས་པས་འཛིན་མི་ནུས་ཏེ་རྣམ་པས་བར་དུ་ཆོད་པའི་ཕྱིར་དང༌། འབེན་ལ་དམིགས་ཏེ་མདའ་འཕངས་པ་ན་སྐད་ཅིག་གཉིས་པར་མདའ་འབེན་གྱི་རྣམ་པར་མི་འཆར་བ་ལྟར་དང༌། སངས་རྒྱས་ལ་དམིགས་པ་ན་ ཤེས་པ་སངས་རྒྱས་ཀྱི་རྣམ་པར་འཆར་ན་སླར་སྒྲིབ་པའི་རྣམ་པར་འཆར་མི་སྲིད་པར་འགྱུར་རོ། །དེས་ན་ཕྱི་རོལ་གྱི་དོན་ནི་ཡང་དག་པར་གྲུབ་པ་མིན་ཏེ་སྐད་ཅིག་གིས་ཁྲོ་ལ་སྐད་ཅིག་གིས་མཛའ་བ་ལྟ་བུ་སྣང་བ་རྐྱེན་གྱིས་འགྱུར་བའི་ཕྱིར་དང་། མི་སྡུག་པ་ གོམས་པས་ས་གཞི་ཀེང་རུས་ཀྱིས་ཁྱབ་པར་མཐོང་བ་ལྟ་བུ་ཇི་ལྟར་བསྒོམས་པ་དེ་དང་དེར་སྣང་བའི་ཕྱིར་དང༌། བྲག་ལོགས་ནས་གཞལ་བའི་ནམ་མཁའ་སྟོང་པ་ལ་ཡང་མིས་གཡང་དུ་འདུ་ཤེས་པ་དང༌། བྱ་རྣམས་ཀྱིས་ལམ་དུ་འདུ་ཤེས་པ་དང་། མནར་མེད་ཀྱི་ དམྱལ་བ་པ་རྣམས་ཀྱིས་མེ་ལྕེས་གང་བར་འདུ་ཤེས་པ་དང་། ལྷའི་མིག་ཅན་རྣམས་ཀྱིས་སྲོག་ཆགས་སྣ་ཚོགས་ཀྱི་གནས་སུ་འདུ་ཤེས་པ་དང་། ལྷ་རྣམས་ཀྱིས་གཞལ་མེད་ཁང་པར་འདུ་ཤེས་པ་སོགས་སྣང་བ་ཐ་དད་པའི་ཕྱིར་ཏེ། དེང་སང་ཆུ་ལ་མཐོང་སྣང་དྲུག་ ཞེས་ཀུན་གྱིས་འཆད་ཀྱང་སྣང་གཞིའི་ཆུ་གྲུབ་པར་ཞེན་པ་ཁོ་ན་སྣང་བས་དེ་བསལ་བའི་ཕྱིར་ནམ་མཁའ་དཔེར་བྱས་པ་ཡིན་ཏེ། དཔལ་མར་མེ་མཛད་ཀྱིས། སྟོང་གཞི་འདོད་པ་སེམས་ཙམ་པའི་ལུགས་ཡིན་ནམ་མཁའ་ལ་སྔགས་ཀྱིས་བཏབ་པས་རྟ་གླང་དུ་སྣང་བ་ལྟ་བུ་
Page: 306 ཡིན། ཞེས་གསུངས་པ་ལྟར་སྣང་གཞི་ཆུ་དང་། ནམ་མཁའ་ལ་ཁྱད་པར་མེད་དེ་རྨི་ལམ་ལ་སྣང་གཞི་མེད་ཀྱང་འཁྲུལ་པའི་བག་ཆགས་ཁོ་ནས་སྣང་བ་ལྟ་བུའི་ཕྱིར་དང་། དེས་ན་ཇི་ལྟར་སྣང་ཡང་དེ་དང་དེར་སྣང་དུས་དེ་ཉིད་ན་ཡང་མེད་པའི་ཕྱིར་ན་རྨི་ལམ་ལྟ་བུ་ ཁོ་ན་སྟེ། ལང་གཤེགས་ལས། བག་ཆགས་ཀྱིས་ནི་དཀྲུགས་པའི་སེམས། །དོན་དུ་སྣང་བ་རབ་ཏུ་འབྱུང་། །དོན་ཡོད་མ་ཡིན་སེམས་ཉིད་དེ། །ཕྱི་རོལ་དོན་མཐོང་ལོག་པའོ། །ཞེས་དང་། འཇིག་རྟེན་སྐྱེས་འཇིགས་མ་མཆིས་ཏ། །ནམ་མཁའི་ མེ་ཏོག་རབ་ཏུ་འདྲ། །ཞེས་དང། །སྒྱུ་མ་རོ་ལངས་འཁྲུལ་འཁོར་དང་། །རྨི་ལམ་གློག་དང་སྤྲིན་ལྟ་བུར། །ནམ་ཡང་རྒྱུད་གསུམ་རྣམ་ཆད་པར། །སྐྱེ་བས་མཐོང་ན་རྣམ་པར་འཐར། །ཞེས་དང་། དངོས་པོ་ཐམས་ཅད་ཡོད་པར་ནི། །ཇི་ལྟར་བྱིས་ པས་རྣམ་བཏགས་བཞིན། །དེ་སྟེ་མཐོང་བཞིན་དེ་ཡོང་ན། །ཐམས་ཅན་ཡང་དག་མཐོང་པར་འགྱུར། །ཞེས་དང། ཏིང་འཛིན་རྒྱལ་པོོར། སྒྱུ་མ་བྱེད་པ་དག་གིས་གཟུགས་སྤྲུལ་སྟེ། །རྟ་དང་གླང་པོ་ཤིང་རྟ་སྣ་ཚོགས་སྣང་། །དེ་ལ་ཇི་ལྟར་སྣང་བ་ གང་ཡང་མེད། །ཆོས་རྣམས་ཐམས་ཅད་དེ་ལྟར་ཤེས་པར་གྱིས། །ཇི་ལྟར་བུ་མོ་གཞོན་ནུའི་རྨི་ལམ་ན། །བུ་ཕོ་བྱུང་ཞིང་ཤི་བ་དེ་མཐོང་ནས། །བྱུང་ན་དགའ་ཞིང་ཤི་ན་མི་དགའ་ལྟར། །ཆོས་རྣམས་ཐམས་ཅད་དེ་ལྟར་ཤེས་བར་གྱིས། །ཅེས་དང་ གཙང་བ་ནམ་མཁའ་བཞིན། །ཞེས་དང་རྩ་ཤེས། །སྐྱེ་དང་གནས་དང་འཇིག་པ་དག །མ་གྲུབ་ཕྱིར་ན་འདུས་བྱས་མེད། །འདུས་བྱས་ཏབ་ཏུ་མ་གྲུབ་པས། །འདུས་མ་བྱས་ནི་ཇི་ལྟར་འགྲུབ། །རྨི་ལམ་ཇི་བཞིན་སྒྱུ་མ་བཞིན། །དྲི་ཟའི་གྲོང་ཁྱེར་ཇི་
Page: 307 ༄༅། །བཞིན་དུ། །དེ་བཞིན་སྐྱེ་དང་དེ་བཞིན་གནས། །དེ་བཞིན་དུ་ནི་འཇིག་པ་གསུངས། །ཞེས་དང་། བདག་མེད་པ་དྲིས་པའི་མདོར། མུ་སྟེགས་པ་རྣམས་ཀྱི་སྨྲས་པ། འོ་ན་འདིར་གང་ཞིག་དམིགས་པར་འགྱུར། ཐེག་པ་ཆེན་པོ་པ་ རྣམས་ཀྱིས་སྨྲས་པ་དམིགས་པར་གྱུར་པ་ནི་ཅི་ཡང་མེད་དོ། །ཅི་ནམ་མཁའ་ལྟར་སྟོང་པ་ཉིད་ཡིན་ནམ་གྲོགས་པོ་དག་དེ་དེ་བཞིན་ཏེ་ནམ་མཁའ་ལྟར་སྟོང་ཉིད་ཡིན་ནོ། །གལ་ཏེ་དེ་ལྟ་ཡིན་ན་རྩེ་བ་དང་རྒོད་པ་དང་ངུ་བ་དང་རོལ་བ་དང་ཁྲོ་བ་དང་ང་རྒྱལ་ དང་ཕྲ་དོག་དང་ཕྲ་མ་ལ་སོགས་པ་ཇི་ལྟར་ལྟ་བར་དགྱི། སྒྱུ་མ་རྨི་ལམ་དང་མིག་འཕྲུལ་དང་འདྲ་བ་ཡིན་ནོ། །དེ་དག་ཇི་ལྟ་བུ་ལགས། སྒྱུ་མ་ནི་མཚོན་པ་ཙམ་མོ། །རྨི་ལམ་ནི་སོ་སོར་སྣང་བ་ཙམ་སྟེ་བཟུང་བར་བྱ་བ་མིན་ཞིང་རང་བཞིན་གྱིས་སྟོང་པ་ཡོད་པ་ མ་ཡིན་པའི་ངོ་བོ་ཉིད་དོ། །མིག་འཕྲུལ་ནི་བཅོས་མ་ཙམ་དུ་དགོས་པའོ། །ཞེས་སོ། །གལ་ཏེ་གཟུགས་སོགས་ཡོད་དེ་མངོན་སུམ་དུ་སྣང་བའི་ཕྱིར་སྙམ་ན། འདི་ནི་མ་རིག་པས་བསླད་པས་མེད་ཀྱང་སྣང་བ་རབ་རིབ་ཅན་ལ། སྐྲ་ཤད་དང་མིག་བཙིར་བའི་ངོར་ ཟླ་གཉིས་ལྟ་བུ་ཡིན་ཏེ། ཏིང་རྒྱལ་ལས། མིག་དང་རྣ་བ་སྣ་ཡང་ཚད་མ་མིན། །ལྕེ་དང་ལུས་དང་ཡིད་ཀྱང་ཚད་མ་མིན། །གལ་ཏེ་དབང་པོ་འདི་དག་ཚད་ཡིན་ན། །སུ་ལ་འཕགས་པའི་ལམ་གྱིས་ཅི་ཞིག་བྱ། །ཅེས་དང་། རྩ་ཤེར། འབྱུང་ བ་དང་ནི་འཇིག་པ་དག །མཐོང་ངོ་སྙམ་དུ་ཁྱོད་སེམ་ན། །འབྱུང་བ་དང་ནི་འཇིག་པ་དག །གཏི་མུག་ཉིད་ཀྱིས་མཐོང་བ་ཡིན། །ཞེས་སོ། །སེམས་ཀྱང་དོན་དམ་དུ་ཡོད་པ་མ་ཡིན་ཏེ་རང་གཞན་གཉི་གས་མི་མཐོང་བའི་ཕྱིར་དང་། མ་བརྟགས་ན་ཤེས་པར་ མྱོང་ཙམ་པ་དེ་ཡང་དཔྱད་ན་སྐད་ཅིག་མར་ཟད་ཅིང་། སྐད་ཅིག་མ་དེ་ཡང་གནས་པ་མེད་པས་རྒྱུན་ཙམ་ཡང་མི་འགྲུབ་པའི་ཕྱིར་དང་། བསྒྲིབས་པ་མེད་པའི་ཕྱིར་རང་གསལ་དུ་མི་འགྲུབ་པ་དང༌། རིག་བྱ་རིག་བྱེད་ནི་ཕན་ཚུན་བལྟོས་པ་ཡིན་པས་རང་རིག་ཏུ་ཡང་མི་
Page: 308 འགྲུབ་པའི་ཕྱིར་ཏེ། གང་ཚེ་ཁྱོད་ལ་སྒྱུ་མ་ཉིད། །ཅེས་སོགས་ཀྱིས་གཞུང་དུ་རྒྱས་པར་འགོག་ལ། ལང་གཤེགས་ལས་ཀྱང་། འདི་ལ་རྣམ་རིག་གང་ཡང་མེད། །མཁའ་ལ་སྨིག་རྒྱུ་ཇི་བཞིན་ཏེ། །ཆོས་རྣམས་དེ་ལྟར་རབ་ཤེས་ན། ཅུང་ ཟད་དུ་ཡང་ཁས་བླང་མེད། རྣམ་རིག་འདི་ནི་མིང་ཙམ་སྟེ། །མཚན་ཉིད་ཀྱིས་ནི་ཡོད་པ་མིན། །ཞེས་སོགས་དང་། རྒྱན་སྟུག་ལས། སེམས་མེད་ཙམ་པོའང་ཡོད་མ་ཡིན། །ཚད་དང་གཞལ་དང་གཉི་ག་མེད། །ཅེས་དང་། འོད་སྲུང་གི་མདོ་ ལས། འོད་སྲུང་། སེམས་ནི་ནང་ན་ཡང་མེད་ཕྱི་རོལ་ན་ཡང་མེད་གཉི་གའི་བར་ན་ཡང་མི་དམིགས་སོ། །འོད་སྲུང་། སེམས་ནི་དཔྱད་དུ་མེད་པ། བསྟན་དུ་མེད་པ། བསྟེན་དུ་མེད་པ། སྣང་བ་མེད་པ། རྣམ་པར་རིག་པ་མེད་པ། གནས་པ་མེད་པའོ། །འོད་སྲུང་། སེམས་ནི་ སངས་རྒྱས་ཐམས་ཅད་ཀྱིས་ཀྱང་མ་གཟིགས་མི་གཟིགས་གཟིགས་པར་མི་འགྱུར་རོ། །ཞེས་དང་། ཤེས་བྱ་མེད་ན་ཅི་རིག་ན། །གང་གིས་ཤེས་པ་ཞེས་བརྗོད་བྱེད། །དེས་ན་ཤེས་བྱ་ཉེར་གནས་པ། །མེད་པར་ཤེས་པ་མེད་ཅེས་ངེས། ཞེས་འཆད་ པར་འགྱུར་རོ། །གལ་ཏེ་ཀུན་གཞིའི་རྣམ་ཤེས་དོན་དམ་དུ་ཡོད་དོ་ཅེ་ན། དེ་ནི་སྟོང་ཉིད་ལ་སྐྲག་པའི་གང་ཟག་རྗེས་སུ་བཟུང་ཕྱིར་དབྱིངས་རང་བཞིན་གྱིས་དག་པའི་ཁམས་ལ་ཀུན་གཞིའི་མིང་དུ་དགོངས་པས་གསུངས་པ་ཡིན་གྱི་ངེས་པའི་དོན་མ་ཡིན་ཏེ། རྒྱན་སྟུག་ལས། འདི་དག་ཀུན་གཞི་མེད་པ་སྟེ། །སྟོང་ཉིད་ཀུན་གཞིའི་རྣམ་པའོ། །ཞེས་དང་། སྙིང་པོ་ཀུན་གཞིར་བསྒྲགས་པ་ཡང་། །བློ་ཆུང་རྣམས་ཀྱིས་མི་ཤེས་སོ། །ཞེས་དང་། ནམ་མཁའ་མཛོད་ཀྱི་མདོར། ཀུན་གཞི་མེད་པས་ ཆོས་ཐམས་ཅད་དམིགས་པ་མེད་པ་དང་ཀུན་གཞི་དང་བྲལ་བས་ཆོས་ཐམས་ཅད་ཀུན་གཞི་མེད་པ་སྟེ། ཞེས་དང༌། དྲི་མ་མེད་པར་གྲགས་པའི་མདོ་ལས། གང་ཀུན་གཞི་ལ་དགའ་བ་དེ་ནི་ཆོས་འདོད་པ་མ་ཡིན་གྱི་ཀུན་གཞི་འདོད་པའོ། །ཞེས་དང་།
Page: 309 ༄༅། །མ་དྲོས་པའི་མདོ་ལ་སོགས་པར་ཀུན་གཞི་མེད་པའི་ཆོས་ཀྱི་འཁོར་ལོ་ཞེས་ནན་ཏན་གྱིས་བསྔགས་པའི་ཕྱིར་རོ། །མདོར་ན་སྤང་བྱ་འཇིག་ལྟ་ལ་སོགས་ཀྱི་གཉེན་པོར་གཉེན་པོའི་ལྟ་བ་བཀྲུ་སྨན་ལྟ་བུ་ཕྱི་མ་ཕྱི་མས་སྔ་མ་སྔ་མའི་ འཛིན་པ་སྦྱངས་ནས་མཐར་དབུ་མ་ཙམ་དུ་ཡང་དམིགས་སུ་མེད་པ། ལྟ་བ་ཐམས་ཅད་རྣམ་པར་ལོག་སྟེ་ཆོས་གང་ཡང་བླ་བའམ་དོར་བར་བྱ་བ་མ་མཐོང་སྟེ་གང་ཡང་བཅོས་སུ་མེད་པར་ཤེས་པ་ན་གཉེན་པོའི་ལྟ་བ་རྣམས་ཀྱི་སྐབས་དོན་གྲུབ་པ་ནད་དང་ བཀྲུ་སྨན་གཉིས་ཀ་དག་སྟེ་ལུས་རྣལ་དུ་ཕེབས་པ་ན་སྨན་གྱི་སྐབས་དོན་གྲུབ་པ་བཞིན་ནོ། །ཤེས་བྱ་གྲུབ་པའི་མཐའ་ཅུང་ཟད་བཤད་ཟིན་ཏོ། །ཤེས་བྱ་སྟོང་པ་ཉིད་བཤད་པ་ནི། དབུས་མཐའ་ལས། སྟོང་པ་ཉིད་ནི་ མདོར་བསྡུ་ན། །མཚན་ཉིད་དང་ནི་རྣམ་གྲངས་དང༌། །དེ་ཡི་དོན་དང་དབྱེ་བ་དང་། །སྒྲུབ་པ་དག་སྟེ་ཤེས་པར་བྱ། །ཞེས་ལྔ་ལས། མཚན་ཉིད་ནི། གཟུང་འཛིན་གཉིས་ཀྱི་དངོས་པོར་མེད་ལ་དངོས་མེད་ཏུའང་མ་གྲུབ་པ་གཅིག་ཐ་དད་དམ་ཡོད་ མེད་གང་དུའང་མི་གནས་པ་ནི་སྟོང་པ་ཉིད་དེ། གཉིས་དངོས་མེད་པའི་དངོས་མེད་པའི། །དངོས་པོ་སྟོང་པའི་མཚན་ཉིད་དོ། །ཡོད་པ་མ་ཡིན་མེད་པའང་མིན། །ཐ་དད་གཅིག་པའི་མཚན་ཉིད་མིན། །ཞེས་སོ། །རྣམ་གྲངས་ནི། མིང་ མཐའ་ཡས་པས་འཇུག་ཡང་བསྡུ་ན་གཞན་དུ་མི་འགྱུར་བས་དེ་བཞིན་ཉིད་དང༌། ཕྱིན་ཅི་མ་ལོག་པར་མཐོང་བས་ཡང་དག་པའི་མཐའ་དང༌། སྤྲོས་མཚན་འགགས་པས་མཚན་མ་མེད་པ་དང་། འཕགས་པའི་སྤྱོད་ཡུལ་གྱི་ཕྱིར་དོན་དམ་པ་དང་། འཕགས་པའི་ཆོས་ཀྱི་ རྒྱུའི་ཕྱིར་ཆོས་ཀྱི་དབྱིངས་ཞེས་བྱ་སྟེ། སྟོང་པ་ཉིད་ནི་མདོར་བསྡུ་ན། །དེ་བཞིན་ཉིད་དང་ཡང་དག་མཐའ། །མཚན་མ་མེད་དང་དོན་དམ་དང་། ཆོས་ཀྱི་དབྱིངས་ནི་རྣམ་གྲངས་སོ། །ཞེས་དང༌། གཞན་མིན་ཕྱིན་ཅི་མ་ལོག་དང་། །དེ་འགགས་
Page: 310 འཕགས་པའི་སྤྱོད་ཡུལ་དང་། །འཕགས་པའི་ཆོས་ཀྱི་རྒྱུ་ཡི་ཕྱིར། རྣམ་གྲངས་དོན་དེ་གོ་རིམ་བཞིན། །ཞེས་སོ། །དབྱེ་བ་ནི། སྤྱིར་ཆོས་ཀྱི་དབྱིངས་ལ་སྟོང་ཉིད་ཀྱི་མིང་དུ་བཤད་པ་ཙམ་ཡིན་གྱི་སྟོང་པ་ཉིད་ནི་གང་དུ་ཡང་བརྗོད་དུ་མེད་དེ། གཅིག་དུ་ཡང་མི་གནས་མོད་ཀྱི་ཀུན་རྫོབ་ཀྱི་བརྗོད་པས་སྟོང་ཉིད་གཅིག་བུ་ཞེས་ཀྱང་བྱ་སྟེ། ཡེ་ཤེས་སྣང་བ་རྒྱན་གྱི་མདོ་ལས། སྟོང་པ་སྟོང་པ་ཞེས་བརྗོད་ཀྱང་སྟོང་པ་ནི་བརྗོད་པར་བྱ་བ་མ་ཡིན་ཏེ་ཆོས་ཐམས་ཅད་ཀྱི་འཇུག་པ་ནི་དེ་ལྟ་བུ་ཡིན་ནོ། ། ཞེས་སོ། །ཡང་ན་རྣམ་པ་གཉིས་ཏེ། བློས་དཔྱད་པ་ཉི་ཚེ་པ་རྣམ་པ་ཀུན་དཔྱད་ཀྱི་སྟོང་ཉིད་དང་། ཡོན་ཏན་གྱི་རྣམ་པ་ཐམས་ཅད་དང་ལྡན་པ་རྣམ་ཀུན་མཆོག་ལྡན་གྱི་སྟོང་ཉིད་དེ། རྡོ་རྗེ་ཐེག་པའི་རྒྱུད་སྡེར། རྣམ་པ་ཀུན་དཔྱད་སྟོང་པ་ཉིད། །ཆུ་ཤིང་བཞིན་ དུ་སྙིང་པོ་མེད། །རྣམ་པ་ཀུན་གྱི་མཆོག་ལྡན་པའི། །སྟོང་ཉིད་དེ་དང་འདྲ་མ་ཡིན། །ཞེས་དང་། ཏིང་རྒྱལ་ལས། ཉི་ཚེའི་སྟོང་བའི་མུ་སྟེགས་ཅན་དག་གི། བྱིས་པ་དག་དང་མཁས་པ་རྩོད་མི་བྱེད། །ཅེས་སོ། །འདི་ལ་ཡང་ཁ་ཅིག་དོན་དམ་ པའི་དམྱལ་བ་ལ་སོགས་པ་ཐམས་ཅད་ཀྱི་རྣམ་པ་དང་ལྡན་པར་འཆད་ཀྱང་། དེ་ལྟ་ན་འཁོར་བའི་རྣམ་ཀུན་མཆོག་ལྡན་གྱི་སྟོང་ཉིད་དུ་འགྱུར་ལ། དོན་དམ་པའི་དམྱལ་བ་ཡོད་ན་སངས་རྒྱས་དང་དམྱལ་བ་གཞི་མཐུན་ཁས་ལེན་དགོས་སོ། །དེས་ན། སྦྱིན་དང་ཚུལ་ཁྲིམས་བཟོད་ལ་སོགས། རྣམ་པ་ཀུན་གྱི་མཆོག་ལྡན་པའི། །སྟོང་པ་ཉིད་ནི་གཟུགས་སུ་བརྗོད། །ཅེས་ཕ་རོལ་དུ་ཕྱིན་པ་སོགས་གཉེན་པོའི་རྣམ་ཀུན་མཆོག་ལྡན་གྱི་སྟོང་ཉིད་དེ། སྟོང་ཉིད་ཀྱང་ཡིན་ལ། བླ་ན་མེད་པའི་བྱང་ཆུབ་ ཀྱང་འཐོབ་པར་བྱེད་པའོ། །འདི་ཡང་ཤེར་ཕྱིན་གྱི་མདོ་སོགས་ལས་བཤད་པའི་སྟོང་པ་ཉིད་ཀླུའི་ཞབས་ཀྱིས་རྩ་ཤེ་ལ་སོགས་པར་གང་བཀྲལ་བའི་སྟོང་ཉིད་དེ་ཁོ་ན་རྣམ་ཀུན་མཆོག་ལྡན་གྱི་སྟོང་ཉིད་ཡིན་ཏེ། སྤྲོས་མཚན་གྱི་དམིགས་པ་རབ་རིབ་
Page: 311 ༄༅། །ལྟ་བུ་ཉེ་བར་ཟློག་ནས་ས་དང་ལམ་དང་འབྲས་བུའི་ཡོན་ཏན་ཐམས་ཅད་ཉེ་བར་སྦྱོར་བའི་ཕྱིར། དེས་ན་སྟོང་གཟུགས་ཕྲ་མོ་ལ་སོགས་པ་ལ་རྣམ་ཀུན་མཆོག་ལྡན་གྱི་སྟོང་ཉིད་དུ་ཞེན་ནས་དབུ་མའི་ལྟ་བ་ལ་སྨོད་པ་ནི་ ལེགས་པ་མ་ཡིན་ནོ། །ཁ་ཅིག་འཁོར་ལོ་བར་པར་བཤད་པའི་དབུ་མ་ནི་རང་སྟོང་དང་། འཁོར་ལོ་ཐ་མར་བཤད་པའི་དབུ་མ་ནི་གཞན་སྟོང་ངོ་ཟེར་ཡང་འཁོར་ལོ་བར་པར་ཤེས་རབ་ཀྱི་ཕ་རོལ་ཏུ་ཕྱིན་པ་བཤད་ཟིན་པས་འཁོར་ལོ་ཐ་མ་དེ་ཤེས་ཕྱིན་མ་ཡིན་པར་ དོན་གྱིས་ཁས་བླངས་ལ། ཕ་རོལ་ཏུ་ཕྱིན་པ་གཞན་ལྔ་པོ་གང་རུང་དུ་ཡང་མི་འདུ་བའི་ཕྱིར་ཐེག་ཆེན་མ་ཡིན་པར་འགྱུར་རོ། །གལ་ཏེ་བསམ་གཏན་ནོ་ཞེ་ན། དེའི་དངོས་འབྲས་རང་སྟོང་དུ་འགྱུར་བས་ལྟ་བའི་མཐར་ཐུག་ཏུ་འདོད་པ་དང་འགལ་ལོ། །ཡང་ན་དྲི་ བཅས་དྲི་མེད་ཀྱི་དབྱེ་བས་གཉིས་ཏེ། དབུས་མཐར། ཀུན་ནས་ཉོན་མོངས་རྣམ་པར་དགདེ་ནི་དྲི་བཅས་དྲི་མ་མེད། །ཆུ་ཁམས་གསེར་དང་ནམ་མཁའ་རྣམས། དག་པ་བཞིན་དུ་དག་པར་འདོད། །ཅེས་སོ། གཞན་ཡང་སྟོང་པ་ཉིད་དང༌། མཚན་མ་མེད་ པ་དང༌། སྨོན་པ་མེད་པ་སྟེ་རྣམ་པར་ཐར་པའི་སྒོ་གསུམ་མམ། མངོན་པར་འདུ་མི་བྱེད་པའི་སྒོ་སྟེ་སྟོང་པ་ཉིད་རྣམ་པ་བཞིའོ། །ཡང་ན་རྣམ་པ་བདུན་ཏེ། ལང་གཤེགས་ལས། བློ་གྲོས་ཆེན་པོ་མདོར་ན་སྟོང་པ་ཉིད་རྣམ་པ་བདུན་ཏེ། འདི་ལྟར་མཚན་ཉིད་སྟོང་པ་ ཉིད་དང་། དངོས་པོའི་རང་བཞིན་སྟོང་པ་ཉིད་དང་། སྲིད་པ་སྟོང་པ་ཉིད་དང་། མི་སྲིད་པ་སྟོང་པ་ཉིད་དང་། ཆོས་ཐམས་ཅད་བརྗོད་དུ་མེད་པ་སྟོང་པ་ཉིད་དང༌། དོན་དམ་པ་འཕགས་པའི་ཡེ་ཤེས་སྟོང་པ་ཆེན་པོ་ཉིད་དང་། གཅིག་གིས་གཅིག་སྟོང་པ་ཉིད་དང་བདུན་ནོ། ། དེ་ལ་མཚན་ཉིད་སྟོང་པ་ཉིད་གང་ཞེ་ན། འདི་ལྟར་དངོས་པོ་ཐམས་ཅད་ནི་རང་དང་སྤྱིའི་མཚན་ཉིད་ཀྱིས་སྟོང་ངོ་། །ཞེས་སོགས་ཏེ། འདིའི་བདུན་པ་ནི་དེང་སང་གཞན་སྟོང་དུ་གྲགས་པ་འདི་ལྟ་བུ་སྟེ། དེ་ཉིད་ལས། གཅིག་གིས་གཅིག་སྟོང་པ་གང་ཞེ་ན།
Page: 312 འདི་ལྟ་སྟེ། གང་ལ་ཅི་མེད་པ་དེ་ནི་དེས་སྟོང་པ་ཞེས་བྱའོ། །དཔེར་ན། རི་དྭགས་འཛིན་གྱི་མའི་ཁང་བཟང་ན། རྟ་གླང་དང་ར་ལུག་སོགས་ཀྱིས་སྟོང་ཡང་དགེ་སློང་དང༌། དགེ་སློང་མས་སྟོང་པ་མ་ཡིན་པ་ལྟ་བུ་སྟེ་གཅིག་གིས་གཅིག་སྟོང་པ་འདི་ནི་ཐ་ཤལ་ཏེ་ཁྱོད་ ཀྱིས་ཡོངས་སུ་སྤང་བར་བྱའོ། །ཞེས་སོ། །དེས་ན་ཀ་བ་བུམ་པས་སྟོང་པ་སྣམ་བུའི་སྟོང་ཉིད་དུ་སྨྲ་བ་ལྟ་བུ་འདི་དེང་སང་མཆོག་ཏུ་བྱེད་པ་མང་མོད་ཀྱི་རྒྱལ་བའི་དགོངས་པར་མ་མཐོང་ངོ་། །ཡང་ན་སྟོང་པ་ཉིད་བཅོ་བརྒྱད་དེ། ཟ་བ་པོ་མིག་སོགས་ནང་གི་སྐྱེ་མཆེད་ དྲུག་སྟོང་པ་ནང་སྟོང་པ་ཉིད་དང་། བཟའ་བྱ་གཟུགས་སོགས་ཕྱིའི་སྐྱེ་མཆེད་དྲུག་སྟོང་པ་ཕྱི་སྟོང་པ་ཉིད་དང་། ཕྱི་ནང་དེ་གཉི་གའི་ལུས་སྟོང་པ་ཕྱི་ནང་སྟོང་པ་ཉིད་དང་། གནས་ཀྱི་གཞི་སྣོད་ཀྱི་འཇིག་རྟེན་སྟོང་པ་ཆེན་པོ་སྟོང་པ་ཉིད་དང་། སྟོང་པ་དེ་དག་ཀྱང་སྟོང་ པར་མཐོང་བ་སྟོང་པ་ཉིད་སྟོང་པ་ཉིད་དང་། དོན་དམ་པ་སྟོང་པ་དོན་དམ་པ་ཉིད་དང་། ལམ་གྱི་དགེ་བ་འདུས་བྱས་སྟོང་པ་འདུས་བྱས་སྟོང་པ་ཉིད་དང་། མྱ་ངན་ལས་འདས་པའི་དགེ་བ་འདུས་མ་བྱས་ཀྱི་དགེ་བ་སྟོང་པ་འདུས་མི་བྱས་ཀྱི་སྟོང་པ་ཉིད་དང་། ཕན་གདགས་ཡུལ་ སེམས་ཅན་མཐའ་ལས་འདས་པ་སྟོང་བ་མཐའ་ལས་འདས་པ་སྟོང་པ་ཉིད་དང་། བློས་དོར་དུ་མི་རུང་བའི་འཁོར་བ་ཐོག་མཐའ་མེད་པ་སྟོང་པ་ཐོག་མ་དང་ཐ་ཆམེད་པའི་སྟོང་ཉིད་དང་། མྱ་ངན་ལས་འདས་ཀྱང་དགེ་བ་མི་ཟད་པར་བྱ་བ་སྟོང་པ་དོར་བ་མེད་པ་སྟོང་པ་ཉིད་དང་། རིགས་རང་བཞིན་གྱིས་དག་པ་གློ་བུར་གྱི་དྲི་མས་ཀྱང་སྟོང་པ་རང་བཞིན་སྟོང་པ་ཉིད་དང་། འཐོབ་བྱ་མཚན་དཔེ་སྟོང་པ་རང་གི་མཚན་ཉིད་ཀྱི་སྟོང་པ་ཉིད་དང་། དག་བྱ་སངས་རྒྱས་ཀྱི་ཆོས་སྟོབས་སོགས་སྟོང་པ་ཆོས་ཐམས་ཅད་ཀྱི་སྟོང་པ་ཉིད་དང༌། གང་ཟག་དང་ཆོས་ཀྱི་བདག་ སྟོང་པ་དངོས་པོ་མེད་པ་སྟོང་པ་ཉིད་དང་། བདག་གིས་སྟོང་པའི་ངོ་བོར་རང་བཞིན་གྱིས་ཡོད་པ་སྟོང་པ་དངོས་པོ་མེད་པའི་ངོ་བོ་ཉིད་ཀྱི་སྟོང་པ་ཉིད་དང་བཅུ་དྲུག་སྟེ། དབུས་མཐའ་ལས། ཟ་བོ་བཟའ་བ་དེ་ཡི་ལུས། །གནས་ཀྱི་གཞི་ཡི་སྟོང་པ་ཉིད་། །དེ་ཡང་གང་
Page: 313 ༄༅། །གིས་ཇི་ལྟར་མཐོང་། །གང་ཕྱིར་དེ་ཡང་སྟོང་པ་ཉིད་། །དགེ་གཉིས་འཐོབ་པར་བྱ་བའི་ཕྱིར་། །རྟག་ཏུ་སེམས་ཅན་ཕན་བྱའི་ཕྱིར་། །འཁོར་བ་བཏང་བར་མི་བྱའི་ཕྱིར་། །དགེ་བ་མི་ཟད་བྱ་བའི་ཕྱིར་། །རིགས་ཀྱང་རྣམ་པར་དག་ བྱའི་ཕྱིར་། །མཚན་དང་དཔེ་བྱད་འཐོབ་བྱའི་ཕྱིར་། །སངས་རྒྱས་ཆོས་རྣམས་དག་བྱའི་ཕྱིར། །བྱང་ཆུབ་སེམས་དཔའས་སྒྲུབ་པར་བྱེད། །གང་ཟག་དང་ནི་ཆོས་རྣམས་ཀྱི། དངོས་པོ་མེད་འདིར་སྟོང་པ་ཉིད། །དེ་དངོས་མེད་པའི་དངོས་ཡོད་པ། །དེ་ནི་དེ་ལས་ སྟོང་ཉིད་གཞན། །ཞེས་སོ། །རང་སྟོང་པ་རང་གི་ངོ་བོ་སྟོང་པ་ཉིད་དང་། གཞན་སྟོང་པ་གཞན་གྱི་སྟོང་པ་ཉིད་བསྣན་པས་སྟོང་ཉིད་བཅོ་བརྒྱད་དང་ཉི་ཤུ་ཡང་འགྱུར་རོ། །འདི་རྣམས་ཀྱང་ཆོས་དེ་དང་དེ་དག་ཡོད་པའམ་མེད་པ་ལ་སྟོང་པར་མི་འདོགས་ཏེ་ གཟོད་མ་ནས་རང་བཞིན་གྱིས་རྣམ་པར་དག་པ་སྨྲ་བསམ་ཤེས་བརྗོད་ཀྱི་ཡུལ་མ་ཡིན་པ་ལ་དེ་དང་དེའི་སྟོང་ཉིད་དུ་གསུངས་པ་སྟེ། ཏིང་རྒྱལ་ལས། ངོ་བོ་ཉིད་སྟོང་རང་བཞིན་འོད་གསལ་བ། བདག་མེད་ཆོས་རྣམས་དེ་ཡིས་རྣམ་རིག་ན། །དེ་ལ་ནམ་ ཡང་སྡོམ་པ་མེད་མི་འགྱུར། །ཞེས་དང་། དེ་བཞིན་གཤེགས་པའི་སྙིང་རྗེ་ཆེན་པོ་ངེས་བསྟན་ལས། འདི་ལ་དོན་དམ་པ་གང་སྟོང་པ་ཞེས་བྱ་བའི་ཆོས་གང་ཡང་མི་དམིགས་སུ་མེད་མོད་ཀྱང་སྟོང་པ་སྟོང་པ་ཞེས་བརྗོད་དོ། །ཇི་ལྟར་ནམ་མཁའ་ལ་ནམ་མཁའ་ ཞེས་བརྗོད་ཀྱང་ནམ་མཁའ་ནི་བརྗོད་པར་བྱ་བ་མ་ཡིན་པ་དེ་བཞིན་དུ་སྟོང་པ་ལ་སྟོང་པ་ཞེས་བརྗོད་ཀྱང་སྟོང་པ་ནི་བརྗོད་པར་བྱ་བ་མ་ཡིན་ནོ། །ཞེས་དང་། ནམ་མཁའ་མཛོད་ཀྱི་མདོ་ལས། ནམ་མཁའ་ལ་ནི་མཐོ་བ་མེད། །དམའ་བའང་ཡོད་པ་མ་ཡིན་ཏེ། །གང་གི་ མཚན་ཉིད་མཐོ་དམན་མེད། །དེ་ལ་འདུང་བ་ག་ལ་ཡོད། །ཅེས་དང་། ཡང་དག་མཐའ་ལ་གང་གནས་པ། །དངོས་པོ་དང་ནི་དངོས་མེད་ཀྱི། །ལྟ་བ་མཁས་པས་མི་འཛིན་ཏོ། སྟོང་པ་ཉིད་ནི་སྒྲ་ཡིས་བསྒྲགས། །སྒྲ་ལ་སྟོང་པ་ཉིད་མེད་དེ། །
Page: 314 དེ་ནི་སྒྲ་མེད་བརྗོད་པ་མེད། །དེ་ཕྱིར་སྟོང་པ་ཉིད་ཅེས་བྱ། །སངས་རྒྱས་ཀུན་གྱིས་བཤད་ཀྱང་ནི། །སྟོང་པ་ཉིད་ནི་བརྗོད་དུ་མེད། །གང་དེ་སྟོང་ཞེས་བྱ་བ་ཡང་། །དེ་ཡི་དོན་ནི་བརྗོད་དུ་མེད། །ཅེས་སོ། །དེས་ན་དེ་ཁོ་ན་ཉིད་རིག་པ་རྣམས་ཀྱི་ངོར་ དངོས་པོར་བསྟན་པ་དང༌། དངོས་མེད་དུ་བསྟན་པ་དང་། མཚན་མ་དང་་བཅས་པ་བསྟན་པ་དང་། མཚན་མ་མེད་པར་བསྟན་པ་སོགས་བསྟན་པ་ཐམས་ཅད་ཀྱང་སྟོང་པ་ཉིད་ཁོ་ན་བསྟན་པ་ཡིན་ཏེ། དེ་ཐམས་ཅད་ཀྱང་སྟོང་ཉིད་ལས་མི་གཡོ་བའི་ཕྱིར་དང་། དེ་དག་ལས་ གཞན་པའི་སྟོང་ཉིད་ཀྱང་མི་དམིགས་པའི་ཕྱིར་རོ། །སྒྲུབ་པ་ནི། འོ་ན་སྟོང་ཉིད་ཁོ་ན་ཡིན་ན་ལམ་སྒྲུབ་མི་དགོས་སམ་ཞེ་ན་དགོས་ཏེ། དེ་ལྟར་མ་རྟོགས་པའི་བློ་བུར་གྱི་དྲི་མ་སྦྱང་དགོས་ལ་རང་བཞིན་གྱིས་དག་པ་ཁོ་ནས་ཆོག་ན་སེམས་ཅན་ཐམས་ཅད་ འབད་དུ་མེད་དུ་གྲོལ་བར་ཐལ་བ་དང་། རང་བཞིན་གྱིས་མ་དག་ན་ཡང་འབད་པ་དོན་མེད་དུ་འགྱུར་བའི་ཕྱིར་ཏེ། གལ་ཏེ་ཉོན་མོངས་དེ་མ་གྱུར། །ལུས་ཅན་ཐམས་ཅད་གྲོལ་བར་འགྱུར། །གལ་ཏེ་རྣམ་དག་དེ་མ་གྱུར། །འབད་པ་འབྲས་བུ་ མེད་པར་འགྱུར། ཉོན་མོངས་མ་ཡིན་མི་མོངས་མིན། །དེ་ནི་དག་དང་མ་དག་མིན། །ཞེས་སོ། །གང་ཤེས་པར་བྱ་བ་བཤད་ཟིན་ཏོ། །དེ་ལ་གང་གིས་ཤེས་པར་བྱེད་པ་ནི། ཤེས་པའི་ཁྱད་པར་སྟེ་སྐྱེ་བས་ཐོབ་པ་དང་། ཐོས་བསམ་དང༌། སྒོམ་པ་ལས་སྐྱེས་པ་སྦྱོར་བྱུང་གི་སོ་སོར་རྟོག་པའི་བློ་དང་། དེ་ཁོ་ན་ཉིད་རང་གིས་རང་རྟོགས་པ་མེད་པའི་ཚུལ་གྱིས་རྟོགས་པ་སོ་སོ་རང་རིག་པའི་ཡེ་ཤེས་ཏེ། གཙོ་བོར་སོ་སོ་སྐྱེ་བུ་རྣམས་ཀྱིས་སོ་སོར་རྟོག་པའི་ཤེས་རབ་ཀྱིས་འཇུག་ཅིང་སོ་སོ་རང་རིག་པའི་ཡེ་ ཤེས་རྗེས་མཐུན་པས་ཀྱང་འཇུག་ལ། འཕགས་པ་རྣམས་ཀྱིས་ནི་ཡང་དག་པའི་རྟོག་པ་དང་སོ་སོ་རང་རིག་པའི་ཡེ་ཤེས་ཁོ་ནས་ཤེས་པར་བྱེད་དོ། །ཇི་ལྟར་ཤེས་པར་བྱ་བ་ནི། དེ་བཞིན་གཤེགས་པའི་སྙིང་རྗེ་ཆེན་པོ་ངེས་བསྟན་ལས། ཉན་ཐོས་རྣམས་
Page: 315 ༄༅། །ཀྱི་རྣམ་གྲོལ་སྒྲ་ཕྱིར་འགྲོ། རང་སངས་རྒྱས་ཀྱི་བརྟེན་ནས་སྐྱེས་པའོ། །སངས་རྒྱས་མ་སྨད་རྣམས་ཀྱི་རྣམ་གྲོལ་ནི། །ཆགས་ལས་རབ་འདས་དྲི་མེད་ནམ་མཁའ་འདྲ། །སེམས་ནི་སྔོན་ནས་བཅིངས་པར་མ་གྱུར་ཏེ། ། སེམས་རྒྱུན་འདི་དག་རང་བཞིན་རྣམ་པར་གྲོལ། །ཇི་ལྟར་རྣམ་གྲོལ་དེ་ལྟར་ཡང་དག་ཤེས། །ཤེས་ནས་རྣམ་གྲོལ་གང་ཡང་ཉམས་པ་མེད། །ཅེས་གསུངས་པ་ལྟར། ཉན་རང་གི་ནི་སྒྲ་དང་རྟེན་བྱུང་ཙམ་ལས་རྟོགས་པར་བྱེད་ལ། ཐེག་པ་ཆེན་ པོའི་ནི་ཆོས་ཐམས་ཅད་ངོ་བོ་ཉིད་ཀྱིས་རྟག་ཏུ་ཇི་ལྟར་གནས་པ་དེ་རིག་པ་ཡིན་ལ། དེ་ནི་བཅིངས་གྲོལ་ལ་སོགས་པ་སྒྲོ་བཏགས་པ་དང་སྐུར་པ་བཏབ་པའི་རྣམ་པ་ཐམས་ཅད་ལས་ལོག་པ་སུས་ཀྱང་མ་བྱས་མ་བཅོས་པའི་རང་བཞིན་ཉིད་རྣལ་དུ་ ཕེབས་པ་སྟེ། ཆོས་ཐམས་ཅད་གཟོད་མ་ནས་དག་པར་ཤེས་པས་གང་ཡང་བླང་བའམ་འདོར་བའི་དམིགས་པ་ཞི་བའོ། །དེ་ཡང་ཇི་ལྟར་ཤེས་པར་བྱ་བ་འདི་ནི། ཐར་རྒྱན་ལས། དངོས་པོར་འཛིན་པའི་སྐྱོན་དང་། དངོས་མེད་དུ་འཛིན་པའི་སྐྱོན་དང་། འཛིན་ པ་གཉིས་ཅར་གྱི་སྐྱོན་དང་། གྲོལ་བར་འགྱུར་བའི་ལམ་དང་། གྲོལ་བའི་རང་བཞིན་མྱ་ངན་ལས་འདས་པ་སྟེ་དྲུག་གའང་བདག་མེད་གཉིས་སུ་བསྡུས་ནས་གསུངས་པ་ལྟར་བསླབ་སྟེ། དེ་ཡང་བདག་འཛིན་གྱི་སྐྱོན་ནི་སྒྱུ་མ་ལྟར་རང་བཞིན་མེད་ཀྱང་ ཐོག་མེད་ནས་སེམས་ལ་གནས་ནས་ལྷུན་གྱིས་གྲུབ་པའི་ཆོས་ཀྱི་སྐུ་མཚན་མའི་ཚང་ཚིང་དུ་སྦས་ནས་འཁོར་བར་འཁྱམ་དུ་འཇུག་པ་ཞིག་སྟེ། རྒྱལ་པོ་ཤར་པ་ལ་གདམས་པའི་མདོ་ལས། རྣམ་རྟོག་བདག་ཏུ་འཛིན་པའི་དགྲ་ཆེན་པོ། འདི་ནི་སྒྱུ་བཞིན་དངོས་པོ་མེད་བཞིན་དུ། །ཐོག་མ་མེད་ནས་བདག་ལ་གནས་ནས་ནི། །བདག་གི་ཆོས་སྐུ་ཡིད་བཞིན་རིན་ཆེན་དེ། །གཟོད་མའི་མུ་ནས་དགྲ་འདིས་བརྐུས་ནས་སུ། །མཚན་མའི་ཚང་ཚིང་གསེབ་ཏུ་སྦས་ནས་བཞག །
Page: 316 དུང་འཆིང་ཞིང་འཁོར་བར་འཁྱམ་དུ་འཇུག །འཇིག་རྟེན་དགྲས་ནི་བསད་ནས་ནོར་འཕྲོག་ཙམ། དེ་ལ་བཟོད་བྱས་བསོད་ནམས་ཚོགས་ཀྱང་རྫོགས། །དགྲ་འདིས་ཞི་བདེ་ཐར་པའི་སྲོག་ཀྱང་གཅོད། །འདི་བསྟན་བསོད་ཉམས་འཁོར་ བའི་འདམ་དུ་འཆིང་། །གསོལ་པ། དགྲ་ཆེན་པོ་དེ་དང་ཇི་ལྟར་འཐོབ་པར་དགྱི། །བཀའ་བསྩལ་པ། རྣམ་རྟོག་དགྲ་ལ་རྒོད་བའི་ཤོམ་ར་ཡང་། །དད་པས་སྦྱིན་དང་ཚུལ་ཁྲིམས་མཁར་བརྩིགས་ཏེ། །བདེ་བས་དཔུང་བྱས་བཟོད་པའི་གོ་ གྱོན་ལ། །བརྩོན་འགྲུས་ལྕག་ཐོགས་བསམ་གཏན་གཞུ་བདུངས་ཏེ། །བདག་མེད་སྟོང་པའི་མདའ་ཡིས་བདག་འཛིན་བསད། །ཅེས་སོ། །བདག་མེད་དེ་ཡང་རྣམ་པ་གཉིས་ཏེ། གང་ཟག་གི་བདག་མེད་དང་། ཆོས་ཀྱི་བདག་མེད་དོ། །དེ་ལ་ གང་ཟག་ནི། ཕུང་པོ་ལྔའི་རྒྱུན་ཙམ་ལ་བཏགས་པ་སྟེ། ལུང་སིལ་བུ་ལས། རྒྱུན་ལ་གང་ཟག་ཞེས་སུ་བརྗོད། །ཅེས་གསུངས་ལ། རྒྱུ་ལས་ཉོན་གྱིས་གང་བ་ལས་ཕུང་པོའི་ཟག་པ་འགྲུབ་པའི་ཕྱིར་གང་ཟག་ཞེས་བྱ་ལ། སེམས་དང་བཅས་པས་སེམས་ ཅན་དང་། ཟུངས་ཡིན་པའི་ཕྱིར་སྲོག་དང་། གསོ་བར་བྱ་དགོས་པའི་ཕྱིར་གསོ་བ་དང་། ནུས་པ་དང་ལྡན་པའི་ཕྱིར་སྐྱེས་བུ་དང་། ཐོག་མར་བྱུང་བའི་ཕྱིར་ཤེད་བུ་དང་ཤེད་ལས་སྐྱེས་ཞེས་སོགས་བྱེད་པའི་སྐྱེས་བུའི་མིང་གི་རྣམ་གྲངས་མཐའ་ཡས་པར་བཏགས་པའོ། ། དེ་ལ་རྣམ་པར་ཤེས་པས་ངའོ་ཞེས་འདུ་ཤེས་པར་བྱེད་པ་ནི་གང་ཟག་གི་བདག་ཏུ་འཛིན་པ་སྟེ་དེ་ལས་བདག་གི་བར་དུ་འདུ་ཤེས་པ་སྐྱེ་ལ། བདག་དང་བདག་གིར་འཛིན་པ་འདི་ནི་ནམ་མཁའ་ལ་མདུད་པ་འབོར་བར་འདོད་པ་ལྟ་བུ་ཕྱིན་ཅི་ལོག་ཁོ་ན་ཡིན་པས་ གཏི་མུག་རབ་ཏུ་རྨོངས་པ་ཡིན་ལ། དེས་ཆགས་སྡང་གཉིས་བསྐྱེད་ཅིང་དུག་གསུམ་དེས་ཀུན་ནས་བསླང་སྟེ་མི་དགེ་བའི་ལས་ཀྱིས་ངན་འགྲོ་དང་། དགེ་བས་མཐོ་རིས་དང་མི་གཡོ་བའི་ལས་ཀྱིས་ཁམས་གོང་དུ་འཆིང་བས་བྱིས་པ་རང་གཡོས་ཀྱི་འདམ་དུ་
Page: 317 ༄༅། །རང་བྱིང་བ་ལྟར་འཁོར་བ་འགྲུབ་པ་མེད་ཀྱང་རྨི་ལམ་འཁྲུལ་པ་ལྟར་འཁོར་བ་ཡིན་ལ། ལྷན་སྐྱེས་ཀྱི་བདག་འཛིན་འདི་ལ་དམིགས་ནས་ཕྱི་རོལ་པ་རྣམས་ཀྱི་ལྟ་བ་ཐ་དད་ཐམས་ཅད་འཇུག་ཀྱང་ང་དེ་ནི་ཕུང་པོ་ལ་དམིགས་ནས་ བློས་བཟུང་བ་ཁོ་ན་ལས་གང་ན་ཡང་རྡུལ་ཙམ་མེད་དེ། བདག་མེད་པ་ཅེས་པ་དེ་བཤད་དུ་གསོལ། བཀའ་བསྩལ་པ། གང་ཟག་བདག་མེད་རྒྱལ་པོ་མཉན་པར་གྱིས། །གང་ཟག་ལྔ་ཕུང་རྒྱུན་ཡིན་ཅི་ཕྱིར་ན། །རྒྱུ་ནི་ལས་དང་ཉོན་མོངས་ བས་གང་ནས། །འབྲས་བུ་ཕུང་པོར་ཟག་སྟེ་དེ་ཡི་བདག །བདག་ནི་སེམས་ཅན་སོ་སོའི་ལུས་འདི་ལ། །ང་དང་བདག་ཏུ་བཟུང་ནས་ཆགས་གྱུར་ཏེ། །བདག་ནི་ན་དང་ཤི་བཀྲེས་གྲང་གིས་དོགས། །དེ་ལས་དམིགས་ནས་མུ་སྟེགས་ལྟ་རྣམས་ འཇུག །ཞེས་དང་། རྣམ་འགྲེལ་ལས། བདག་ཡོད་ན་ནི་གཞན་དུ་ཤེས། །བདག་གཞན་ཆ་ལས་འཛིན་དང་སྡང་། །འདི་དག་དང་ནི་ཡོངས་འབྲེལ་ལས། །ཉེས་པ་ཐམས་ཅད་འབྱུང་བར་འགྱུར། །ཞེས་སོ། །བདག་ཏུ་བཟུང་བའི་ དུས་ཉིད་ན་ཡང་བདག་ནི་རྡུལ་ཙམ་ཡང་མེད་མོད་ཀྱང༌། འདུ་ཤེས་ཕྱིན་ཅི་ལོག་གི་འཛིན་པ་ཁོ་ནས་བདག་ནའོ་སྐྱེའོ་ཞེས་སོགས་སུ་རྟོག་ཅིང་སྣང་བར་འགྱུར་ཏེ། ཟས་དུག་མེད་ཟོས་པ་ལ་ཡང་དུག་ཏུ་དོགས་པ་ན་བརྒྱལ་བར་འགྱུར་བ་བཞིན་ཏེ། བྱིས་པ་བདག་ ཉིད་ཀྱིས་ནི་མཁའ་ལ་མདུང་པ་བོར། དཔེར་ན་དོགས་པའི་འདུ་ཤེས་ཀྱི་ནི་དུག་འདས་པ། །ཞེས་སོགས་གསུངས་པའི་ཕྱིར། དེས་ན་བདག་དེ་ནི་ཀུན་རྫོབ་ཐ་སྙད་ཙམ་དུ་ཡང་ཡོད་པ་མིན་ཏེ། མིང་དང་ལུས་ཀྱི་ཆ་ཤས་དང་སྤྱི་དང་སེམས་རྣམས་རེ་ རེ་ཞིང་བདག་མིན་ལ། དེ་ལས་གཞན་ནའང་མེད་པའི་ཕྱིར་ཏེ། ང་འམ་བདག་དེ་ཡོད་པ་མ་ཡིན་ཏེ། །ཕུང་པོ་འདི་ལ་བཏགས་ནས་འཁྲུལ་བ་ཡིན། །མིང་ནི་བདག་མ་ཡིན་ཏེ་བཏགས་པ་ཙམ། །ལུས་ནི་བདག་མ་ཡིན་ཏེ་ཤ་རུས་ཚོགས། །
Page: 318 འབྱུང་ཆེན་འདུས་པ་ཕྱི་རོལ་རྩིག་པ་འདྲ། །སེམས་ཀྱང་བདག་མ་ཡིན་ཏེ་དངོས་པོ་མེད། །ཅེས་དང་། སོ་དང་སྐྲ་སེན་བདག་མ་ཡིན། །ཞེས་སོགས་ཀྱིས་གཞུང་དུ་ཡང་རྒྱས་པར་འཆད་པར་འགྱུར་རོ། །དེ་ལྟར་དཔྱད་པ་ན་སྔར་བདག་ཏུ་བཟུང་ བ་ལ་ངོ་ཚ་བའི་གནས་སུ་མཐོང་ཞིང་བདག་དང་བདག་གིར་འཛིན་པ་ལོག་པ་དེ་ནི་གང་ཟག་གི་བདག་མེད་རྟོགས་པ་ཞེས་བྱ་ཡི་ངར་འཛིན་མ་ལོག་བཞིན་དུ་ང་ལ་བདག་མེད་དོ་ཅེས་ཚིག་གིས་བཤར་བ་ལ་བདག་མེད་སྒོམ་པར་སྨྲ་བ་དང་། བདག་འཛིན་ ཀྱང་ངའོ་སྙམ་པ་འདི་མ་ཡིན་པའི་རྟགས་ཀྱིས་དགག་བྱའི་བདག་འཛིན་ཞིག་ཚོལ་དགོས་པར་སྨྲ་བ་དང་། བོད་ཁ་ཅིག་དོན་དམ་དུ་བདག་མེད་ཀྱང་ཀུན་རྫོབ་ཏུ་བདག་ཁས་མ་བླངས་ན་ལས་འབྲས་ཀྱི་རྟེན་མེད་པ་དང་། བསོད་ནམས་གསོག་པ་པོ་མེད་པར་ཐལ་བས་ ཀུན་རྫོབ་ཏུ་བདག་ངེས་པར་ཡོད་དོ་ཞེས་སོགས་སྨྲ་བ་ནི་བསྟན་པ་སྨྲ་བའི་ཟོལ་གྱིས་བསྟན་པ་གཞིག་པ་ཡིན་ཏེ། བདག་མེད་དོ་སྙམ་ཞིང་ཚིག་ཏུ་བརྗོད་པ་དེ་བདག་མེད་སྒོམ་པ་དངོས་ཡིན་ན། བཟའ་བར་བྱའོ་སྙམ་ཞིང་བཟའོ་ཞེས་ཚིག་ཏུ་བརྗོད་ན་དེ་ བཟའ་བ་ཉིད་ཡིན་པ་དང༌། བདག་འགྲོ་འོ་སྙམ་པ་དེ་འགྲོ་བ་ཉིད་ཡིན་པ་སོགས་འཇིག་རྟེན་གྱི་བྱ་བ་ཐམས་ཅད་ལ་ཡང་དེར་ཐལ་ཞིང་། མཚན་མོ་མུན་ཁུང་དུ་འདུག་ནས་སྣང་བའོ་སྣང་བའོ་ཞེས་བརྗོད་ན་དེ་སྣང་བ་ཡིན་པར་འགྱུར་ལ། འདོད་མི་ནུས་ཏེ། མངོན་སུམ་ གྱིས་བསལ་བའི་ཕྱིར། ངའོ་སྙམ་པའི་བདག་འཛིན་འདིས་བསྐྱེད་ནས་མེད་བཞིན་དུ་སྣང་བའི་འཁོར་བ་འདིས་འདི་ཙམ་དུ་སྡུག་བསྔལ་ན་ད་དུང་འདི་བས་ཕྲ་ཞིང་གཞོམ་དཀའ་བ་རྟགས་ཀྱིས་དགག་བྱའི་བདག་འཛིན་རྙེད་དགོས་པར་སྟོན་པ་ནི། སྨན་གྱི་སྔོན་དུ་དུག་ ཧ་ལ་ཧ་ལ་ངེས་པར་སྦྱིན་དགོས་པར་སྨྲ་བ་ཉིད་དུ་མཐོང་ལ། གང་ཟག་དང་བདག་དང་ངར་སྨྲ་བ་དེ་ནི་སངས་རྒྱས་ཀྱི་བསྟན་པ་མ་ཡིན་ཏེ། མདོ་ལས། བདག་ཏུ་འདུ་ཤེས་གང་གནས་དང་། །སེམས་ཅན་འདུ་ཤེས་གང་གནས་པ། །འོད་སྲུང་དེ་དག་
Page: 319 ༄༅། །བསྟན་འདི་ལ། མུ་སྟེགས་ཅན་ཞེས་ངས་བཤད་དོ། །ཞེས་དང་། ཚུལ་ཁྲིམས་འཆལ་བ་ཚར་གཅོད་པའི་མདོར། ཤཱ་རིའི་བུ་གང་དག་བདག་དང་། སེམས་ཅན་དང་། སྲོག་དང༌། གང་ཟག་ཏུ་ལྟ་བ་དང་ལྡན་པ་དེ་དག་ཐམས་ཅད་ ནི་ཆོས་འདུལ་བ་འདི་ལ་བདུད་ཀྱིས་བྱིན་གྱིས་བརླབས་པ་ཡིན་པར་གསུང་ངོ༌། །དེ་དག་ནི་སངས་རྒྱས་ཀྱི་བྱང་ཆུབ་ལ་ཉེ་བར་འཚོ་བར་མི་འགྱུར་རོ། །བདུད་ཀྱི་ཕྱོགས་ཀྱང་རབ་ཏུ་རྒྱས་པར་འགྱུར་རོ། །བདུད་ཀྱི་བྱ་བ་ཡང་བྱེད་པར་འགྱུར་རོ། །ཞེས་དང་། ཤཱ་རིའི་བུ་གང་དག་ བདག་དང་སེམས་ཅན་དང་སྲོག་དང་གང་ཟག་དུ་ལྟ་བ་དང་ལྡན་པ་དེ་དག་ཐམས་ཅད་ནི། ཆོས་འདུལ་བ་འདི་ལ་བདུད་ཀྱི་ཕྱོགས་ཅེས་བྱའོ། །ཞེས་གསུངས་ཤིང་། དེ་དག་ནི་ངའི་འཁོར་མ་ཡིན་ལ། ང་ཡང་དེ་དག་གི་སྟོན་པ་མ་ཡིན་ཞིང་དེ་དག་ལ་དད་པས་བྱིན་པའི་རྫས་ཆུ་ ཕོར་གང་ཡང་མ་གནང་ངོ་། །ཞེས་མདོ་དེར་ཡང་ཡང་གསུངས་པའི་ཕྱིར་རོ། །ལས་འབྲས་ཀྱི་རྟེན་ཡང་བདག་མ་ཡིན་ཏེ། ཐེག་དམན་དུ་ཕུང་ལྔའི་རྒྱུན་ལ་སྡོམ་སྡོམ་མིན་གྱི་བེམས་པོའི་རྫས་ལྡན་མིན་འདུ་བྱེད་ཀྱི་ཐོབ་པས་ཉེ་བར་བསྡམས་པར་འདོད་པའི་ཕྱིར་ དང་། ཐེག་ཆེན་དུ་ཡང་རྒྱ་ཆེན་སྤྱོད་པའི་གཞུང་ལས་ཀུན་རྫོབ་ཏུ་ཀུན་གཞིའི་རྣམ་ཤེས་རྟེན་དུ་འཇོག་ཅིང་། ཟབ་མོ་ལྟ་བའི་གཞུང་དུ་ཀུན་རྫོབ་ཏུ་རྟེན་ཞིང་འབྲེལ་བར་འབྱུང་བའི་སེམས་རྒྱུན་ཙམ་རྟེན་དུ་འཇོག་ལ། ཡང་དག་པར་ན་ལས་འབྲས་ལ་ རྟེན་ཡོད་པ་ཡང་མིན་ཏེ་ཆོས་ཐམས་ཅད་གཞི་རྟེན་དང་བྲལ་བར་ཡང་ཡང་དུ་གསུངས་པའི་ཕྱིར་རོ། །དེས་ན་ལས་འབྲས་ཀྱི་བདག་ཏུ་སྨྲ་བ་ནི་ཐེག་པ་ཆེ་ཆུང་གང་གི་ཡང་ཚུལ་མི་ཤེས་པའི་མི་དགེ་བའི་བཤེས་གཉེན་གྱིས་ཟིན་པ་མུ་སྟེགས་མགོ་ རེག་ཉིད་དུ་སུས་ཀྱང་རྟོགས་པར་སླའོ། །དེ་ལྟར་གང་ཟག་གི་བདག་མེད་བཤད་ནས། ད་ནི་ཆོས་ཀྱི་བདག་མེད་བཤད་པར་བྱ་སྟེ། དེ་ལ་ཆོས་ནི་གཟུགས་སོགས་ཕྱི་ནང་དང་འཁོར་འདས་ཀྱིས་བསྡུས་པའི་དངོས་པོ་ཐམས་ཅད་ལ་བྱ་སྟེ་བྱེད་པ་མེད་ལ་རང་
Page: 320 རང་གི་མཚན་ཉིད་འཛིན་པའི་ཕྱིར་རོ། །དེ་རྣམས་ལ་ཡོད་པའམ་མེད་པའམ་དེ་དག་གི་དབུས་སོགས་སུ་ཞེན་ཞིང་འཛིན་པ་ནི་ཆོས་ཀྱི་བདག་ཏུ་འཛིན་པ་ཡིན་ལ། མཚན་མར་འཛིན་པའི་ལོག་རྟོག་འདི་ནི་ལྷ་དང་མིར་བཅས་པའི་འགྲོ་བ་ལ་མཐུན་པར་ ཡོད་ཀྱང་ཇི་ལྟར་བཏགས་པ་དེ་ལྟར་མེད་དེ། དེ་དག་ལོག་རྟོག་མཚན་མར་བཅས་པ་ཡང་། །ལྷ་མི་མཐུན་པ་ཡིན་ཏེ་དེ་མེད་དོ། །ཞེས་སོ། །ཇི་ལྟར་མེད་ན་སྣང་ཙམ་པ་འདི་ལས་ལོགས་སུ་སྟོང་པ་ཉིད་བཙལ་དུ་མེད་དེ་སྣང་དུས་འདི་ཉིད་ ན་ཡང་ཆུ་ཟླ་ལྟར་དེར་ཡོད་པ་མ་ཡིན་པ་དང་། སྐད་ཅིག་ཡང་མི་གནས་པས་མི་རྟག་པ་དང་། རྐྱེན་གྱིས་བཤིག་པའམ་བཅོམ་པ་ན་རྒྱུན་ཆད་པས་འགགས་པར་མཐོང་བ་སོགས་འདི་དག་ཁོ་ན་ལ་སྟོང་པའི་མིང་གིས་བསྙད་པའི་ཕྱིར་ཏེ། ཅི་ཕྱིར་ཞེ་ན་ ཕྱི་ནང་ཆོས་འདི་ལ། །དངོས་འདི་སྤངས་ནས་སྟོང་ཉིད་མི་བཙལ་གྱི། །སྣང་བ་ཉིད་ན་སྟོང་པ་ཉིད་ཡིན་ཕྱིར། །བཤིག་བཅོམ་མི་རྟག་ཙམ་ལ་སྟོང་མིང་བཏགས། །ཞེས་སོ། ཅིའི་ཕྱིར་སྣང་བ་ལྟར་མ་གྲུབ་ཅེ་ན། ཡོད་མེད་དབུས་དང་གསུམ་དུ་ མི་གནས་པའི་ཕྱིར་ཏེ། དེ་ལ་ཡོད་པར་འཇིག་རྟེན་ན་གྲགས་པ་ནི་འཁོར་འདས་གཉིས་སོ། །འཁོར་བ་ཡང་ཡུལ་དང་སེམས་གཉིས་སུ་ངེས་ཏེ། སྣང་ལ་རང་བཞིན་མེད་པར་ཅིས་མངོན་ན། །ཡོད་མེད་དབུས་དང་གསུམ་དུ་མི་གནས་ཕྱིར། ། ཡོད་པར་གྲགས་པ་འཁོར་བ་མྱ་ངན་འདས། །འཁོར་བའི་རང་བཞིན་ཡུལ་སེམས་རྣམ་གཉིས་ཏེ། །ཞེས་སོ། དེ་ཡང་ཡུལ་གྲུབ་པ་མེད་དེ། རགས་པ་འཇིག་རྟེན་གྱི་ཁམས་ཀྱང་དཔག་ཚད་དུ་མ་འདུས་པ་ཡིན་ལ། དཔག་ཚད་རེ་རེ་ཞིང་རྒྱང་གྲགས་ བརྒྱད་དོ། །རྒྱང་གྲགས་རེ་རེ་ནི་འདོམ་ལྔ་བརྒྱའི་ཕུང་པོ་ཡིན་ལ། འདོམ་རེ་ཡང་ཁྲུ་བཞི་དང་ཁྲུ་རེ་ནི་སོར་ཉེར་བཞི་ཡིན་ལ། དེ་བཞིན་དུ། སོར་མོ་ནས་དང་ཤིག་སྲོ་མ། །ཉི་རྡུལ་གླང་ལུག་རི་བོང་ཆུ། །ལྕགས་རྡུལ་རྡུལ་ཕྲན་རྡུལ་ཕྲ་རབ། ཞེས་པ་རྣམས་
Page: 321 ༄༅། །སྔ་མ་རེ་རེ་ལ་ཕྱི་མ་བདུན་བདུན་དུ་འགྱུར་ལ། རྡུལ་ཕྲ་རབ་དེ་ཡང་ཕྱོགས་དྲུག་ལ་སོགས་པའི་ཆས་ཕྱེ་ཞིང་། དེ་རེ་རེ་ཡང་དེ་ལྟར་ཕྱེ་བས་ཡུལ་ཅི་ཡང་ལྷག་མར་མ་ལུས་པའི་ཕྱིར་ཏེ། ཡུལ་འདི་དངོས་པོ་མེད་པར་འདི་ལྟར་བརྟག ། རགས་སྣང་རྡུལ་བཤིག་རྡུལ་ཡང་ཆས་བཤིགས་མེད། །དངོས་སྣང་ཐམས་ཅད་སེམས་ཡིན་རྨི་ལམ་བཞིན། །ཞེས་སོ། སེམས་དེ་ཉིད་ཀྱང་རྣམ་པར་བརྟགས་ན་གང་དུ་ཡང་མ་གྲུབ་ཅི་ཡང་མ་ཡིན་པ་ཞིག་སྟེ། དེའི་ཕྱིར་འཁོར་བ་ནི་རང་ བཞིན་གྱིས་སྟོང་པ་སྐྱུ་མ་ལྟ་བུ་སྟེ། སེམས་ཀྱང་ཁ་དོག་གཉིས་སོགས་རྣམས་དང་བྲལ། །དེ་ལྟར་འཁོར་བ་སྟོང་ཞིང་བདག་མེད་དོ། །ཞེས་སོ། །གལ་ཏེ་མྱ་ངན་ལས་འདས་པ་ཡོད་དོ་ཞེ་ན། དེ་ནི་འཁོར་བ་ལ་བལྟོས་ཏེ་བཞག་པ་ ཡིན་ལ། བལྟོས་ཟླ་འཁོར་བ་མ་གྲུབ་ན་བལྟོས་ཆོས་མྱ་ངན་ལས་འདས་པའང་ག་ལ་འགྲུབ་སྟེ། འཁོར་བ་མེད་པས་མྱ་ངན་འདས་པའང་མེད་དོ། །ཅེས་སོ། །འོ་ན་དོན་དམ་པར་ཅི་ཡང་མེད་དམ་ཞེ་ན། འཇིག་རྟེན་ལ་ཤིན་ཏུ་བདེན་པར་གྲགས་པའི་ ཡོད་པ་མ་གྲུབ་ན་འཇིག་རྟེན་པས་ཀྱང་དམད་པར་བྱ་བའི་མེད་པ་ནི་དེ་བས་ཀྱང་ག་ལ་གྲུབ་སྟེ། ཡོད་པ་མ་གྲུབ་པས་ན་མེད་པའང་མེད། ཅེས་སོ། །འོ་ན་མཐའ་དེ་གཉིས་ཀྱི་དབུས་ཤིག་ཡང་དག་པར་ཡོད་དམ་ཞེ་ན། མཐའ་མེད་ན་དེའི་དབུས་ག་ལ་ ཡོད་དེ། མཐའ་གཉིས་མེད་ཕྱིར་དབུས་ཀྱང་མེད་པ་ཡིན། དེ་ལྟར་རྒྱལ་པོས་བདག་མེད་བསྒོམས་བྱས་ན། །བདག་འཛིན་འཁོར་བ་རྩད་ནས་ཆོད་པར་འགྱུར། །ཞེས་སོ། །དེ་ལྟར་འཁོར་འདས་ཀྱི་ཆོས་གང་ཡང་བློས་བཟུང་བར་བྱ་ བ་མ་ཡིན་པར་ཤེས་ཤིང་ཇི་ཙམ་བློས་བཟུང་བ་ཐམས་ཅད་ཕྱིན་ཅི་ལོག་ཏུ་གོ་ནས་ཡོད་མེད་དབུས་གསུམ་ལ་སོགས་པའི་སྒྲོ་སྐུར་གྱི་འཛིན་པ་ཐམས་ཅད་རྣམ་པར་ལོག་པ་འདི་ནི་བདག་ཏུ་འཛིན་པ་ལས་ལོག་པའི་ཕྱིར། བདག་མེད་མཐོང་བའམ་རྟོགས་
Page: 322 པ་ཞེས་ཀྱང་བྱ། སྒྲོ་སྐུར་གྱི་རྣམ་པ་ལོག་པས་མེད་འཛིན་ཀྱང་མི་འཇུག་པའི་ཕྱིར། བདག་དང་བདག་མེད་ཀྱི་སྤྲོས་པ་ཞི་བ་ཞེས་ཀྱང་བྱ་སྟེ། མྱང་འདས་རྒྱ་གར་མ་ལས། བྱིས་པ་རྣམས་ནི་སངས་རྒྱས་ཀྱིས་བདག་མེད་པར་གསུངས་པ་ལ་ཆོས་ ཐམས་ཅད་མེད་པར་འཛིན་ཏོ། །ཤེས་རབ་ཅན་རྣམས་ཀྱིས་ནི་བདག་ཡོད་པ་དང་བདག་མེད་པ་གཉིས་སུ་མེད་པར་ཤེས་ཏེ་དེ་ནི་ཤེས་རབ་ཅན་རྣམས་ཀྱི་རང་བཞིན་ཡིན་ནོ། །ཞེས་དང་། དྲི་མ་མེད་པར་གྲགས་པའི་མདོ་ལས། བདག་དང་བདག་མེད་པ་གཉིས་ སུ་མེད་པ་དེ་ནི་བདག་མེད་པའི་དོན་ཏོ། །ཞེས་སོ། །དེས་ན་བདག་ཏུ་ཞེན་པ་རྣམས་གདུལ་བའི་ཕྱིར། བདག་མེད་པར་ཡང་བསྟན་ཞིང་། བདག་མེད་ལ་ཞེན་པའམ་སྐྲག་པ་རྣམས་གདུལ་བའི་ཕྱིར་བདག་ཏུ་ཡང་བསྟན་ལ། ཡང་དག་པར་བདག་དང་བདག་ མེད་གཉི་གའང་སྒྲོ་བཏགས་པ་ལས་ངོ་བོ་ཉིད་ཀྱིས་མ་ཡིན་པར་ཡང་བསྟན་པས་གདུལ་བྱའི་སེམས་ཀྱི་འཛིན་པ་ལྡོག་པ་ཁོ་ན་ཙམ་སྟེ། རྩ་ཤེར། བདག་གོ་ཞེས་ཀྱང་བཏགས་གྱུར་ཅིང་། བདག་མེད་ཅེས་ཀྱང་བསྟན་པར་གྱུར། །སངས་རྒྱས་ རྣམས་ཀྱིས་བདག་དང་ནི། བདག་མེད་འགའ་མེད་ཅེས་ཀྱང་བསྟན། །བརྗོད་པར་བྱ་བ་ལྡོག་པ་སྟེ། སེམས་ཀྱི་སྤྱོད་ཡུལ་ལྡོག་པས་སོ། །ཞེས་སོ། །དེའི་ཕྱིར་བཟོད་པ་ཐོབ་པའི་བྱང་ཆུབ་སེམས་དཔའ་རྣམས་ནི་བདག་དང་བདག་མེད་དང་ སྟོང་པ་དང་མི་སྟོང་པ་སོགས་བསྟན་པ་ཐམས་ཅད་ཀྱིས་མི་སྐྲག་པ་ཡིན་པར་གསུངས་སོ། །དེ་ལྟར་ཤེས་རབ་ཤེས་པར་བྱ་བ་བཤད་ནས། དེ་ཇི་ལྟར་གོམས་པར་བྱ་བ་ནི། སྔོན་འགྲོ་སེམས་རྣལ་དུ་དབབ་སྟེ། ཤེས་ཕྱིན་བདུན་བརྒྱ་པ་ལས། རིགས་ ཀྱི་བུའམ་རིགས་ཀྱི་བུ་མོས་དབེན་པའི་མལ་སྟན་བསྟེན་པར་བྱ། འདུ་འཛི་མེད་པ་ལ་དགའ་བར་བྱ། མཚན་མ་ཐམས་ཅད་ཡིད་ལ་མི་བྱེད་པར་སྐྱིལ་ཀྲུང་བཅས་ཏེ་འདུག་ནས། ཞེས་གསུངས་པ་ལྟར་བསླབ་བོ། །མཉམ་བཞག་དངོས་ནི། དེ་ལྟར་ཆོས་ཐམས་
Page: 323 ༄༅། །ཅད་གཟོད་མ་ནས་རང་བཞིན་གྱིས་ཞི་ཞིང་བློའི་ཡུལ་མ་ཡིན་པར་ཤེས་པས་བཅོས་མ་ཅི་ཡང་མི་དགོས་པར་གོ་སྟེ་རང་བབས་སུ་ཆུ་བོའི་རྒྱུན་ལྟར་རྩེ་གཅིག་ཏུ་གནས་པར་འགྱུར་ལ། དབང་པོ་དམན་པས་དེ་ལྟར་མ་གྱུར་ན་ཡང་ཡོད་ མེད་དང་བླང་དོར་སོགས་ཅི་ལ་ཡང་མི་སེམ་ཞིང་གང་ཡང་ཆེད་དུ་ཡིད་ལ་བྱ་བ་མེད་པར་འཇོག་པ་སྟེ། བདུན་བརྒྱ་པ་ལས། ཆོས་གང་ལ་ཡང་བླང་བའམ་བཟུང་བའམ་དོར་བ་མ་མཆིས་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པ་སྒོམ་པ་ལགས་སོ། །གང་ ཅི་ལ་ཡང་མི་གནས་པ་དེ་ཉིད་ཤེས་རབ་ཀྱི་ཕ་རོལ་ཕྱིན་པ་སྒོམ་པ་ལགས་སོ། །གང་ལ་ཡང་མི་སེམ་ལ་རྣམ་པར་མི་རིག་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པ་སྒོམ་པ་ལགས་སོ། །ཞེས་དང་། བརྒྱད་སྟོང་པ་ལས། ཤེས་རབ་ཀྱི་ཕ་རོལ་ཏུ་ཕྱིན་པ་སྒོམ་པ་ འདི་ནི་ཆོས་གང་ཡང་མི་སྒོམ་པ་ལགས་སོ། །ཞེས་དང་། ཤེས་རབ་ཀྱི་ཕ་རོལ་ཏུ་ཕྱིན་པ་སྒོམ་པ་འདི་ནི་ནམ་མཁའ་སྒོམ་པ་ལགས་སོ། །ཞེས་སོ། །ནམ་མཁའ་ཇི་ལྟར་སྒོམ་ན། དེ་ཉིད་ལས། ནམ་མཁའ་རྟོག་པ་མེད་པ་ཉིད་པས་ཤེས་རབ་ཀྱི་ཕ་རོལ་ཏུ་ཕྱིན་ པ་རྟོག་པ་མེད་པ་ཉིད་དོ། །ཞེས་དང་། སྐྱེ་བ་མེད་དང་སྐྱེ་བ་གཉི་གར་མི་རྟོག་པ། །འདི་ནི་ཤེས་རབ་ཕ་རོལ་ཕྱིན་མཆོག་སྤྱོད་པ་ཡིན། །ཞེས་དང་། ཏིང་རྒྱལ་ལས། ཆོས་ནི་རྡུལ་ཙམ་ཡོད་མེད་དེ། །རྡུལ་ཅེས་བྱ་བ་འང་ཡོད་མ་ཡིན། །ཆོས་རྣམས་ དམིགས་སུ་མེད་པ་སྟེ། །དེ་ཕྱིར་ཏིང་ངེ་འཛིན་ཞེས་བྱ། །ཞེས་དང་། འདུ་ཤེས་འདི་ནི་སྤང་སྙམ་དུ། །གང་གི་འདུ་ཤེས་འབྱུང་བ་དེ། །འདུ་ཤེས་སྤྲོས་ལ་སྤྱོད་པ་སྟེ། །ཞེས་དང༌། བསམ་པ་ དག་ན་མི་སེམ་ན། །བསམ་པ་ཐམས་ཅད་མེད་པར་འགྱུར། །ཞེས་དང་། ད་ལྟར་གྱི་སངས་རྒྱས་མངོན་སུམ་དུ་བཞུགས་པའི་ཏིང་ངེ་འཛིན་གྱི་མདོ་ལས། སྒོམ་དང་མི་སྒོམ་ཅུང་ཟད་འདིར་མ་བྱེད། །ཏིང་འཛིན་འདི་ནི་ཐོབ་པར་དཀའ་
Page: 324 མི་འགྱུར། །ནམ་མཁའི་འདུ་ཤེས་ལ་ནི་གནས་བྱས་ན། ཕྲ་རབ་རྡུལ་གྱི་ཆོས་ཉིད་འགག་པར་འགྱུར། །ཞེས་དང་། བློ་གྲོས་རྒྱ་མཚོའི་མདོ་ལས། ཆོས་རྣམས་ཡིད་ལ་མི་བྱེད་དེ། །ལྷག་པར་བྱེད་པ་རྣམ་པར་སྤོང་། །ཆོས་རྣམས་ ཐམས་ཅད་མཉམ་ཉིད་དུ། །ཡང་དག་ཉིད་ཏུ་ཁོང་དུ་ཆུད། །ཅེས་དང་། དྲན་མེད་ཡིད་ལ་བྱར་མེད་པའི། །དྲན་པ་ཉེ་བར་བཞག་པ་སྟོན། །ཞེས་དང་། སྤོང་བས་སྤང་དུ་མེད་པར་ནི། །ཡང་དག་སྤོང་བ་རབ་ཏུ་བསྟན། ། ཞེས་སོགས་བྱང་ཕྱོགས་ཐམས་ཅད་ལ་དེ་ལྟར་སྦྱར་བ་གསུངས་ཤིང་། མ་དྲོས་པའི་མདོ་ལས། དངོས་པོར་འདུ་ཤེས་གང་གིས་ཀྱང་། །ལམ་སྒོམ་ནུས་པ་མ་ཡིན་ཏེ། །ལམ་འདི་ལ་ནི་འདི་ལྟ་བུར། །དངོས་པོར་འདུ་ཤེས་ཡོད་མ་ཡིན། ། དངོས་པོ་དངོས་པོར་བྱེད་པས་མིན། །དངོས་མེད་དངོས་པོ་མེད་བྱེད་པས། །ནམ་མཁའ་རྣམ་དག་དང་འདྲ་བའི། །ལམ་སྒོམ་ནུས་པ་མ་ཡིན་ནོ། །ཞེས་དང་། བདག་ཏུ་ལམ་སྒོམ་མ་ཡིན་ལ། །བདག་མེད་སྒོམ་པའང་མ་ཡིན་ཏེ། །འདི་ ལྟར་གཉིས་སུ་མེད་པའི་ལམ། །གྲུབ་ཅིང་བདེ་བ་བླ་ན་མེད། །ཅེས་དང་། ཇོ་བོ་རྗེའི་དབུ་མའི་མན་ངག་ལས། བར་སྐབས་དེར་ཤེས་པ་ཅིར་ཡང་མི་རྟོག་ཅིར་ཡང་མི་འཛིན་དྲན་པ་དང་ཡིད་ལ་བྱེད་པ་ཐམས་ཅད་སྤངས་ཏེ་ཇི་སྲིད་དུ་མཚན་མ་འམ། རྣམ་པར་རྟོག་པའི་དགྲ་འམ། ཆོམ་རྐུན་མ་ལངས་ཀྱི་བར་དུ་དེ་ལྟ་བུ་ལ་ཤེས་པ་གནས་པར་བྱའོ། །ཞེས་སོ། །འདིར་བསམ་གཏན་པ་དག་གིས་དུས་གསུམ་གྱི་རྟོག་པའི་རྗེས་སུ་མི་འབྲང་བར་འཇོག་པར་སྨྲས་པ་ལ། ཡིད་ལ་མི་བྱེད་པ་ཧྭ་ཤང་གི་ལུགས་ སོ། །ཞེས་སོགས་འགོག་པར་བྱེད་པ་མང་དུ་མཐོང་མོད་ཀྱང་དེ་ལྟར་མ་ཡིན་ཏེ། མཚན་མོ་བཟང་པོའི་མདོ་ལས། དགེ་སློང་ཆོས་གསུམ་དང་ལྡན་ན་དགེ་སློང་མཚན་མོ་བཟང་པོའི་མདོ་སྡེ་ལ་གནས་པ་ཞེས་བྱའོ། །གསུམ་གང་ཞེ་ན། འདས་པ་ལ་རྗེས་སུ་ཕྲད་
Page: 325 ༄༅། །པར་མི་བྱེད་པ་དང་། མ་འོངས་པ་ལ་རེ་བ་མེད་པ་དང་། ད་ལྟར་བྱུང་བའི་ཆོས་རྣམས་ཀྱིས་མི་འཕྲོག་པར་གནས་པའི་ཆོས་ཅན་ཏེ། ཆོས་གསུམ་པོ་དེ་དག་དང་ལྡན་ན་དགེ་སློང་མཚན་མོ་བཟང་པོའི་མདོ་སྡེ་ལ་གནས་པ་ཞེས་བྱའོ། ། ཞེས་དང༌། འདས་ལ་རྗེས་སུ་ཕྲད་མི་བྱེད། །མ་འོངས་པ་ལ་རེ་བ་མེད། །འདས་པ་གང་ཡིན་དེ་འགགས་ཏེ། །མ་འོངས་པ་ནི་མ་ཕྱིན་པའོ། །གང་དག་ད་ལྟར་བྱུང་བའི་ཆོས། །དེ་དང་དེ་ལ་རབ་བལྟས་ནས། །རྣམ་པར་རྟོག་པས་ མི་འཕྲོགས་པར། །དེ་དག་ཐམས་ཅད་ཁོང་དུ་ཆུད། །ཅེས་དང་། བློ་གྲོས་རྒྱ་མཚོའིམདོ་ལས། འདས་པའི་འདུ་ཤེས་ནི་ཟད་པའོ། །མ་འོངས་པའི་འདུ་ཤེས་ནི་མ་ཕྱིན་པའོ། །ད་ལྟར་བྱུང་བའི་འདུ་ཤེས་རྣམས་ནི་གནས་པ་མེད་པ་སྟེ། གང་དུས་གསུམ་དུ་འདུ་ ཤེས་མི་དམིགས་པ་ནི་འདུ་ཤེས་ཡོངས་སུ་ཤེས་པའོ། །ཞེས་སོ། །དེ་ལྟ་མོད་ཀྱི་དུས་གསུམ་གྱི་རྟོག་པ་ཡིད་ལ་བྱེད་བཞིན་པར་ཐོས་པ་དང་བསམ་པ་དང་སྒོམ་པ་གང་ཡང་བྱེད་པར་ནུས་སམ་མི་ནུས་རང་གིས་བརྟག་པར་གྱིས་ཤིག་དང་ཤེས་པར་འགྱུར་རོ། ། དེས་ན་དུས་གསུམ་གྱི་ཡིད་བྱེད་འགོག་གོ་ཞེས་ཚིག་ཏུ་བརྗོད་ཅིང་དེ་ལྟར་རྒྱུན་མ་ཆད་པར་རྟོག་པ་ཞིག་ཡིན་གྲང་སྙམ་དུ་རང་གི་བློ་ལ་གཤིན་པ་དེར་བཟུང་ནས་འགོག་པའམ། ཡང་ན་གཉིད་ལོག་པའམ་བརྒྱལ་བ་ལྟ་བུ་ཞིག་གོ་སྙམ་ནས་འགོག་པར་སྣང་ མོད་ཀྱང་དེ་ལྟ་བུ་མ་ཡིན་ཏེ། རྣམ་རྟོག་གཞན་གྱིས་མི་གཡེང་བར་དམིགས་པ་ལ་རྩེ་གཅིག་ཏུ་འཇོག་དགོས་པའི་དོན་ཡིན་ལ། དེ་བཀག་ན་བསམ་གཏན་ཐམས་ཅད་བཀག་པར་འགྱུར་རོ། །དེས་ན་ཡིད་ལ་མི་བྱེད་པ་ཡང་། སྤྱིར་བསམ་གཏན་ གྱི་དམིགས་པ་གང་ཡིན་པ་དེ་ལས་གཞན་པའི་ཡུལ་ཡིད་ལ་མི་བྱེད་པའི་དོན་ཡིན་ལ། ཁྱད་པར་དོན་དམ་པ་ལ་དམིགས་པའི་ཚེ་དོན་དམ་ཞེས་ཀྱང་མི་འཛིན་པར་འཇོག་པའི་དོན་ཡིན་གྱི་གཉིད་ལ་སོང་བ་ལྟར་གོ་བར་མི་བྱ་ལ། སྤྱིར་བསམ་གཏན་སྒོམ་
Page: 326 མ་མྱོང་བར་བསམ་གཏན་ལ་དགག་སྒྲུབ་བྱས་ན་དེ་ལྟ་བུ་མང་དུ་འབྱུང་བས་མ་བསླབས་པའི་ཤེས་བྱ་ལ་རྣམ་བཞག་མ་བྱེད་པར་རང་རང་གི་རྣག་པའི་དོན་པོ་རྙེད་བཀུར་ལ་འབད་པར་བྱོས་ཤིག །མདོར་ན་ཤེས་རབ་ཀྱིས་ཆོས་གང་ཡང་ཡོད་མེད་ལ་སོགས་ པ་ཅིར་ཡང་མི་གནས་པར་མཐོང་བ་མེད་པའི་ཚུལ་གྱིས་མཐོང་བ་དེ་ཉིད་ལ་མ་ཡེངས་ཤིང་མི་རྟོག་པར་བཞག་པ་ནི་ཐེག་པ་ཆེན་པོའི་མདོ་སྔགས་ཀྱི་བསམ་གཏན་ཐམས་ཅད་ཀྱི་སྙིང་པོ་གཅིག་ཏུ་འདུས་པའོ། །དེ་ལྟར་གཙོ་བོར་ཟབ་མོ་ལྟ་བའི་གཞུང་ གི་ཚུལ་བཤད་ནས། ཞར་ལ་རྒྱ་ཆེན་སྤྱོད་པའི་གཞུང་གི་ཤེས་རབ་ཤེས་པར་བྱ་བའང་ཅུང་ཟད་བརྗོད་ན། ཀུན་བཏགས་ནི། སྒྲོ་བཏགས་དུས་ན་ཡང་མེད་པས་མེད་པའི་སྟོང་པ་ཉིད་དང་། གཞན་དབང་ནི། སྣང་ཡང་རང་བཞིན་མེད་པས་ཡོད་པ་མ་ཡིན་པའི་སྟོང་ པ་ཉིད་དང་། ཆོས་རྣམས་ཀྱི་ཆོས་ཉིད་ཡོངས་གྲུབ་ནི། གཟོད་མ་ནས་དག་པས་རང་བཞིན་གྱི་སྟོང་ཉིད་དུ་ཤེས་ནས་གང་དུའང་མི་དམིགས་པར་འཇོག་པ་སྟེ། རྒྱན་ལས། མེད་པའི་སྟོང་པ་ཉིད་ཤེས་ཤིང་། །དེ་བཞིན་ཡོད་མིན་སྟོང་ཉིད་དང་། །རང་བཞིན་ སྟོང་པ་ཉིད་ཤེས་ན། །སྟོང་ཉིད་ཤེས་པར་དེ་བརྗོད་དོ། །ཅེས་དང་། མེད་པ་གང་ཡིན་དེ་ཉིད་ནི། །ཡོད་པ་ཡིན་ནི་དམ་པར་འདོད། །རྣམ་པ་ཀུན་ཏུ་མི་དམིགས་པ། དམིགས་པ་ཡི་ནི་དམ་པར་འདོད། །ཅེས་དང་། སེམས་ལས་ གཞན་མེད་པར་ནི་བློས་རིག་ནས། །དེ་ནས་སེམས་ཀྱང་མེད་པ་ཉིད་དུ་རྟོགས། །བློ་དང་ལྡན་པས་གཉིས་པོ་མེད་རིག་ནས། །དེ་མི་ལྡན་པས་ཆོས་ཀྱི་དབྱིངས་ལ་གནས། །ཞེས་སོ། །འདིར་ཁ་ཅིག་བློ་བུར་གྱི་དྲི་མ་མེད་པར་ཤེས་ཤིང་ དོན་དམ་ཡོད་པར་ཤེས་པའི་ངང་ནས་རྣམ་པར་མི་རྟོག་པར་འཇོག་པ། ཡེ་ཤེས་ལྡན་པ་ཡོད་མེད་ཤེས། །ཞེས་དང༌། མདོ་ལས། ཡོད་པ་ལ་ཡོད་པ་དང་མེད་པ་ལ་མེད་པར་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །ཞེས་པའི་དོན་
Page: 327 ༄༅། །མོད་ཀྱང་ཡོད་མེད་ཀྱི་དོན་ནི་སྔར་བཤད་ཟིན་ལ། དྲི་མ་མེད་འཛིན་དང་དོན་དམ་ཡོད་འཛིན་གྱི་ངང་ནས་མི་རྟོག་པར་འཇོག་པ་ནི་ངོ་མཚར་ཆེའོ། །དེས་ན་ཤེས་རབ་ཟབ་མོས་ཅི་ཡང་མི་མཐོང་བར་མཐོང་བ་ཉིད་ ལ་མཉམ་པར་བཞག་བྱ་འཇོག་བྱེད་མེད་པའི་ཚུལ་གྱིས་འཇོག་པ་ཉིད་ཡང་དག་པའི་བསམ་གཏན་དང་ཤེས་རབ་ཟུང་དུ་འབྲེལ་བ་ཡིན་པར་ཤིང་རྟའི་སྲོལ་གཉི་ག་བཞེད་པ་གཅིག་གོ །དེ་ལྟར་མཉམ་པར་འཇོག་པའི་ཚེ་བྱིང་པའམ་རྨུགས་ན་ མི་རྟག་པ་སྒོམ་པ་དང་། རྟེན་འབྲེལ་བསམ་པས་སེལ་ལ། རྒོད་ན་སེམས་བཏང་སྙོམས་སུ་བྱ་བ་གློད་པའི་མན་ངག་གིས་སེལ་ཞིང་རླུང་གི་རྣལ་འབྱོར་དྲུག་གིས་བྱིང་རྒོད་གཉི་ག་ཡང་སེལ་ལོ། །དེ་ལས་ལངས་པའི་རྗེས་ཐོབ་ཏུ་བདག་གཞན་སྣོད་ བཅུད་ཐམས་ཅད་སྒྱུ་མའམ་རྨི་ལམ་གྱི་སྣང་བ་ཙམ་དུ་ཤེས་པས་ཞེན་པ་མེད་པར་སྦྱིན་སོགས་བསོད་ནམས་ཀྱི་ཚོགས་ཅི་ནུས་བསག་པར་བྱ་སྟེ། གང་ཞིག་ཕུང་པོ་ལྔ་དག་སྒྱུ་མ་འདྲར་ཤེས་ཅིང་། །་མ་གཞན་དང་ཕུང་པོ་གཞན་དུ་མི་བྱེད་ལ། ། སྒྱུ་མ་སྣ་ཚོགས་འདུ་ཤེས་བྲལ་ཞིང་ཉེ་བར་ཞི་སྤྱོད་པ་། །འདི་ནི་ཤེས་རབ་ཕ་རོལ་ཕྱིན་མཆོག་སྤྱོད་པ་ཡིན། །ཞེས་དང་། དབུ་མའི་མན་ངག་ལས། གང་གི་ཚེ་ལྡང་བར་འདོད་ན་དལ་བུས་སྐྱིལ་མོ་ཀྲུང་བཤིག་ལ་ལངས་ཏེ་སྒྱུ་མ་ལྟ་བུའི་ཡིད་ཀྱིས་ལུས་ དང་ངག་དང་ཡིད་ཀྱིས་དགེ་བའི་ལས་ཅི་ནུས་བྱའོ། །ཞེས་སོ། གལ་ཏེ་ཤེས་རབ་སྟོང་པ་ཉིད་ཁོ་ནས་ཆོག་པར་རློམ་ནས་ཐབས་བསོད་ནམས་ཀྱི་ཚོགས་སྤོང་ན་ལམ་གོལ་བར་འགྱུར་ཏེ། བདེན་ཆུང་ལས། ཡང་དག་ཀུན་རྫོབ་ཁྱད་བསད་ནས། ། སྟོང་པ་ཉིད་ལ་གོམས་བྱེད་ན། །ཀུན་རྫོབ་རྒྱུ་འབྲས་དགེ་སྡིག་སོགས། །འཇིག་རྟེན་ཕ་རོལ་བསླུས་པར་འགྱུར། ཅུང་ཟད་ཐོས་པ་ལ་བསྟེན་ཏེ། །རྣམ་པར་དབེན་པར་མི་ཤེས་ཤིང་། །མི་གང་བསོད་ནམས་མི་བྱེད་པ། །སྐྱེས་བུ་
Page: 328 ཐ་ཤལ་དེ་དག་བརླག །ཞེས་དང་། རྒྱ་མཚོའི་མདོ་ལས། བདུད་ཀྱི་ལས་ནི་གཉིས་ཏེ་ཤེས་རབ་དང་བྲལ་བའི་ཐབས་དང་། ཐབས་དང་བྲལ་བའི་ཤེས་རབ་སྟེ་གཉི་གའང་བདུད་ཀྱི་ལས་སུ་ཤེས་པས་སྤང་བར་བྱའོ། །ཞེས་དང་། དྲི་མེད་གྲགས་ པའི་མདོར། ཐབས་ཀྱིས་མ་ཟིན་པའི་ཤེས་རབ་ནི་འཆིང་བའོ། །ཐབས་ཀྱིས་ཟིན་བའི་ཤེས་རབ་ནི་ཐར་པའོ། །ཤེས་རབ་ཀྱིས་མ་ཟིན་པའི་ཐབས་ནི་འཆིང་བའོ། །ཤེས་རབ་ཀྱིས་ཟིན་པའི་ཐབས་ནི་ཐར་པའོ། །ཞེས་གསུངས་ཏེ། ཤེས་རབ་སྟོང་ ཉིད་ཀྱི་མཐོང་བས་མ་ཟིན་པའི་སྦྱིན་སོགས་ལྔ་ནི་ཐབས་རྐྱང་པ་ཡིན་ལ་ཐབས་ཁྱད་ཏུ་བསད་པའི་སྟོང་རྐྱང་དུ་ལྟ་བ་ནི་ཤེས་རབ་རྐྱང་པ་ཡིན་ལ། དེ་གཉིས་ཀ་སྤངས་ནས་ཤེས་རབ་ཀྱིས་རང་བཞིན་ཤེས་པས་དགེ་བ་ཉིད་ལའང་མི་ཆགས་ཤིང་མི་ཞེན་པའི་ སྒོ་ནས་བསོད་ནམས་ཀྱི་ཚོགས་ངོམས་པ་མེད་པར་སྤྱོད་པ་ནི་ཐབས་ཤེས་ཡ་མ་བྲལ་བ་ཡང་དག་པའི་ལམ་སྟེ། ག་ཡ་གོ་རིའི་མདོ་ལས། ཐེག་པ་ཆེན་པོའི་ལམ་ནི་མདོར་བསྡུས་ན་གཉིས་ཏེ་ཐབས་དང་ཤེས་རབ་བོ། །ཞེས་དང་། ལྗོན་པའི་མདོར། ཤེས་ རབ་ཀྱི་ནི་སྟོང་པར་རྟོགས། །ཐབས་ཀྱིས་སེམས་ཅན་རྣམས་ལ་ལྟ། །སྙིང་རྗེས་ཡོངས་སུ་སྨིན་པར་བྱེད། །དེ་ནི་མྱ་ངན་འདས་པར་འགྲོ། ཞེས་དང་། བདེན་ཆུང་ལས། དེ་ལྟར་ལྟ་ལ་མ་རྨོངས་ཤིང་། །སྤྱོད་པ་ཤིན་ཏུ་དག་གྱུར་ན། ། གོལ་བའི་ལམ་དུ་མི་འགྲོ་ཞིང་། །འོག་མིན་གནས་སུ་འགྲོ་བར་འགྱུར། །ཞེས་སོ། །གལ་ཏེ་ཡང་དག་པའི་མཉམ་བཞག་ལ་རྩེ་གཅིག་ཏུ་བརྟན་ན་དེ་ཉིད་ཁོ་ན་གཙོ་བོར་བྱ་སྟེ་ཕ་རོལ་ཏུ་ཕྱིན་པ་ཐམས་ཅད་ཀྱི་ངོ་བོ་ཉིད་ཡིན་པའི་ཕྱིར་ཏེ། ནམ་མཁའ་མཛོད་ཀྱི་མདོ་ལས། འདི་ལ་གང་ཆོས་ཐམས་ཅད་མི་འཛིན་པ་དེ་ནི་གཏོང་བའི་མཆོག་གོ །ཞེས་སོགས་རྒྱ་ཆེར་བཤད་པའི་ཕྱིར་དང་། ཕ་རོལ་ཏུ་ཕྱིན་པ་སྔ་མ་རྣམས་ཀྱི་དངོས་འབྲས་ཡིན་པའི་ཕྱིར། གལ་ཏེ་མཉམ་བཞག་ལ་མི་བརྟན་ནས་
Page: 329 ༄༅། །ལུས་ངག་གི་དགེ་བ་གཙོ་བོར་བྱ་སྟེ། བདེན་ཆུང་ལས། སྤྱིར་ན་མཉམ་བཞག་སེམས་བརྟན་ན། ལུས་ངག་དགེ་བ་གཙོར་མི་བྱ། །གལ་ཏེ་མཉམ་བཞག་མི་བརྟན་ན། །ལུས་ངག་དགེ་བ་ཅི་ནུས་བྱ། །ཞེས་པ་ལྟར་རོ། ། དེ་ལྟར་ཚུལ་བཞིན་དུ་འབད་པ་ན་མཉམ་རྗེས་ཀྱང་ཐ་མི་དད་པར་འགྱུར་ཞིང་མཉམ་པར་བཞག་པ་ཉིད་ཀྱང་མ་མཐོང་བས་མཉམ་རྗེས་ཀྱི་རློམ་སེམས་ཀྱང་འཇིག་པར་འགྱུར་ཏེ། བདག་ནི་མཉམ་བར་བཞག་ཞེ་འམ་ལངས་ཞེས་རློམ་སེམས་མེད། ། ཅི་ཕྱིར་ཞེ་ན་ཆོས་ཀྱི་རང་བཞིན་ཡོངས་ཤེས་ཕྱིར། །ཞེས་སོ། །དེ་ལྟར་སྟོང་ཉིད་ཤེས་ཕྱིན་གྱི་ངང་ལ་དར་ཅིག་གནས་ཀྱང་ཕན་ཡོན་ཚད་མེད་དེ། དེ་ཁོ་ན་ཉིད་བསྟན་པའི་མདོ་ལས། ཤཱ་རིའི་བུ། གང་གིས་བསྐལ་པའི་བར་དུ་ཉན་པ་བས་ གང་གིས་སེ་གོལ་ཏོག་པ་ཙམ་ཞིག་ཏུ་དེ་ཁོ་ན་ཉིད་ཀྱི་ཏིང་ངེ་འཛིན་བསྒོམས་ན་བསོད་ནམས་འཕེལ་ལོ། །ཤཱ་རིའི་བུ། དེ་ལྟ་བས་ན་དེ་ཁོ་ན་ཉིད་ཀྱི་ཏིང་ངེ་འཛིན་འདི་གཞན་ལ་ནན་ཏན་གྱིས་གདམ་པར་བྱའོ། །ཤཱ་རིའི་བུ། སངས་རྒྱས་སུ་ལུང་བསྟན་པའི་བྱང་ ཆུབ་སེམས་དཔའ་ཐམས་ཅད་ཀྱང་ཏིང་ངེ་འཛིན་འདིལ་གནས་པ་ཤ་སྟག་གོ །ཞེས་སོ། །དེ་ལྟར་ཤེས་རབ་གོམས་པས་གནས་སྐབས་སུ་དགེ་བ་ལ་བག་ཡོད་པར་འགྱུར། ཉོན་མོངས་པ་ཤས་ཆུང་། སེམས་ཅན་ལ་སྙིང་རྗེ་སྐྱེ། སྒྲུབ་པ་ལ་ནན་ཏན་ཏུ་ བྱེད། གཡེང་བ་ཐམས་ཅད་སྤོང་། ཚེ་འདི་ལ་མ་ཆགས་ཤིང་ཞེན་པ་སྤོང་བར་འགྱུར། རང་གཞན་ཐམས་ཅད་ཀྱི་གནས་སྐབས་དང་མཐར་ཐུག་གི་བདེ་ལེགས་ཐམས་ཅད་འབྱུང་བར་འགྱུར་ཏེ། རིན་ཆེན་ཕྲེང་བར། སྟོང་པ་ཉིད་ལ་གོམས་པ་ཡིས། ། དགེ་བ་དག་ལ་བག་ཡོད་འཐོབ། །ཅེས་སོགས་དང་། སངས་རྒྱས་སྲས་དང་ཉན་ཐོས་རང་རྒྱལ་ལྷ་རྣམས་དང་། །འགྲོ་བ་ཀུན་གྱི་བདེ་སྐྱིད་ཆོས་རྣམས་ཇི་སྙེད་པ། །དེ་ཀུན་ཤེས་རབ་ཕ་རོལ་ཕྱིན་པ་མཆོག་ལས་བྱུང་། །
Page: 330 ཞེས་སོ། །དེ་དག་གིས་ཕ་རོལ་ཕྱིན་པ་སྤྱི་དང་བྱེ་བྲག་རྣམ་པར་བཤད་ཟིན་ཏོ། །རྒྱལ་དང་རྒྱལ་སྲས་ཐམས་ཅད་ཀྱི། བགྲོད་པ་གཅིག་པའི་ལམ་གྱི་དངོས། །ཕ་རོལ་ཕྱིན་པ་འདི་བཤད་དགེས། །འགྲོ་འདིས་ཇི་བཞིན་རྟོགས་གྱུར་ཅིག །
Page: 331 ༄༅། །གཉིས་པ་བག་ཡོད་པ་བསྟན་པ་གཞུང་གི་དོན་ལ། མདོར་བསྟན་པ། རྒྱས་པར་བཤད་པའོ། །དང་པོ་མདོར་བསྟན་པ་ནི།རྒྱལ་བའི་སྲས་ཀྱིས་དེ་ལྟ་བུར། །བྱང་ཆུབ་སེམས་རབ་བརྟན་བཟུང་ནས། །ཞེས་པས་བྱང་ཆུབ་ ཀྱི་སེམས་ལ་བག་བྱ་བ་དང་། གཡེལ་བ་མེད་པར་རྟག་ཏུ་ཡང་། །བསླབ་ལས་མི་འདའ་འབད་པར་བྱ། །ཞེས་པས་བསླབ་པ་ལ་བག་བྱ་བ་མདོར་བསྟན་ཏོ། །འདིར་འགྲེལ་ཆེན་ལས། སྒྲུབ་པ་སྙིང་པོར་བྱེད་པ་ལ་བྱང་ཆུབ་ཡོད་ཀྱི་ སོགས་ག་ཡ་གོ་རིའི་མདོ་དང་། ཏིང་རྒྱལ་གྱི་སྒྲུབ་པ་སྙིང་པོར་བྱེད་པར་འགྱུར་བར་ཁྱོད་ཀྱིས་བསླབ་པར་བྱའོ། །ཞེས་དྲངས་ཤིང་སྒྲུབ་ཚུལ་ཕར་ཕྱིན། ཚད་མེད། བསྡུ་དངོས་བཞི་ཤེས་པའི་ཕྱིར། བློ་གྲོས་མི་ཟད་པ་དང་། དཀོན་མཆོག་སྤྲིན་སོགས་ལྟ་བར་ཁ་ འཕངས་སོ། །རྒྱས་བཤད་ལ་ཡང་དེ་ལྟར་གཉིས་ལས། དང་པོ་བྱང་ཆུབ་སེམས་ལ་བག་བྱ་བ་ལ་གཉིས། མི་དོར་བའི་འཐད་པ་དང་། དོར་བའི་ཉེས་དམིགས་གསུམ་བསྟན་པའོ། །དང་པོ་མི་དོར་བའི་འཐད་པ་ནི། བབ་ཅོལ་བརྩམས་པ་གང ་ཡིན་པའམ། །གང་ཞིག་ལེགས་པར་མ་བརྟགས་པ། དེ་ནི་དམ་བཅའ་བྱས་གྱུར་ཀྱང་། །བྱ་འམ་བཏང་ཞེས་བརྟག་པའི་རིགས། །སངས་རྒྱས་རྣམས་དང་དེ་ཡི་སྲས། ཤེས་རབ་ཆེན་པོས་གང་བརྟགས་ཤིང་། །བདག་ཉིད་ཀྱིས་ ཀྱང་བརྟགས་བརྟགས་པ། །དེ་ལ་བཤོལ་དུ་ཅི་ཞིག་ཡོད། །ཅེས་གསུངས་ཏེ། སངས་རྒྱས་དང་དེའི་སྲས་བརྟགས་པ་ནི་མདོ་སྡེ་རྣམས་ལས་ཕན་ཡོན་རྒྱ་ཆེར་བསྟན་པ་ཡིན་ལ། བདག་ཉིད་ཀྱིས་བརྟགས་པ་ནི་ཕན་ཡོན་ཐོས་ནས་དོ་ གལ་གྱིས་ཞུགས་པའི་ཕྱིར་རོ། །ས་ཐོབ་པ་གཉིས་པ་དོར་བའི་ཉེས་དམིགས་གསུམ་བསྟན་པ་ལ། ངན་འགྲོར་འགྲོ་བ། གཞན་དོན་ལས་ཉམས་པ། ལ་ཐོགས་པའོ། །དང་པོ་ངན་འགྲོར་འགྲོ་བ། གལ་ཏེ་དེ་ལྟར་དམ་བཅས་ནས། །ལས་ཀྱིས་སྒྲུབ་པར་མ་བྱས་ན། །སེམས་ཅན་དེ་དག་
Page: 332 ཀུན་བསླུས་པས། །བདག་གི་འགྲོ་བ་ཅི་འདྲར་འགྱུར། །དངོས་པོ་ཕལ་པ་ཅུང་ཟད་ལའང་། །ཡིད་ཀྱིས་སྦྱིན་པར་བསམས་བྱས་ནས། མི་གང་སྦྱིན་པར་མི་བྱེད་པ། །དེ་ཡང་ཡི་དྭགས་འགྱུར་གསུངས་ན། །བླ་ན་མེད་པའི་བདེ་བ་ལ། ། བསམ་པ་ཐག་པས་མགྲོན་གཉེར་ནས། འགྲོ་བ་ཐམས་ཅད་བསླུས་བྱས་ན། །བདེ་འགྲོར་ཇི་ག་འགྲོ་འགྱུར་རམ། །མི་གང་བྱང་ཆུབ་སེམས་བཏང་ཡང་། །དེ་དག་ཐར་བར་བྱེད་པ་ནི། །ལས་ཚུལ་བསམ་གྱིས་མི་ཁྱབ་སྟེ། །ཐམས་ ཅད་མཁྱེན་པ་ཁོ་ནས་མཁྱེན། །ཞེས་གསུངས་ཏེ། ཚིགས་བཅད་དང་པོས་སེམས་ཅན་ཐམས་ཅད་བསླུས་པས་ཉེས་དམིགས་ཆེ་བར་བསྟན། གཉིས་ཀྱིས་དེའི་འཐད་པ་བརྗོད། གཅིག་གིས་བྱང་ཆུབ་ཀྱི་སེམས་བཏང་ན་ཐར་བའི་སྐབས་ མེད་པ་ཙམ་དུ་བསྟན་ཏོ། །དེ་ཡང་དྲན་ཉེ་ལས་བསམས་ནས་མ་བྱིན་ན་ཡི་དྭགས་དང་དམ་བཅས་ནས་མ་བྱིན་ན་དམྱལ་བར་འགྲོ་བར་གསུངས་ལ། བློ་གྲོས་རྒྱ་མཚོའི་མདོ་ལས། རྒྱལ་པོ་ལྟ་བུས་སྐྱེ་བོ་རྣམས་མགྲོན་དུ་བོས་ནས་མ་བྱིན་ན་ འཕྱ་བའི་དཔེ་དང་སྦྱར་ཏེ་རྒྱ་ཆེར་བཤད་དོ། །བསམ་པ་ཐག་པས་མགྲོན་དུ་མཉེར་བ་ནི། བདག་གིས་དེ་རིང་སྐྱོབ་པ་ཐམས་ཅད་ཀྱི། །སོགས་སྐད་གསང་མཐོན་པོས་སྨྲས་ཤིང་མ་རྒལ་བ་བསྒྲལ་བར་བྱའོ། །ཞེས་ཆེད་དུ་བརྗོད་ཟིན་པའི་ ཕྱིར་རོ། །ཆོས་ཡང་དག་པར་སྡུད་པའི་མདོ་ལས། བྱང་ཆུབ་ཏུ་སེམས་བསྐྱེད་ནས་བཏང་ན་བརྫུན་དུ་སྨྲ་བའི་ཐ་ཆད་ཡིན་ནོ། །ཞེས་སོ། །བྱང་སེམས་བཏང་ནས་ཐར་པ་འཐོབ་པ་སྲིད་དམ་ཞེ་ན། འདི་ནི་སངས་རྒྱས་ཁོ་ནའི་ཡུལ་ཏེ་གཞན་གྱིས་མི་ཤེས་སོ། ། འགྲེལ་ཆེན་དུ། འོ་ན་ཤཱ་རིའི་བུས་སེམས་བསྐྱེད་ནས་སངས་རྒྱས་སྟོང་ཕྲག་བཅུ་བསྙེན་བཀུར་ཏེ་བྱང་ཆུབ་ཀྱི་སྤྱད་པ་སྤྱོད་པ་ན་བདུད་ཀྱིས་ཐོ་བརྩམས་པས་བྱང་ཆུབ་ཀྱི་སེམས་བཏང་ངོ་། །ཞེས་ཐོས་ན་འོན་ཀྱང་ཉན་ཐོས་ཀྱི་བྱང་ཆུབ་ཐོབ་ནས་གཞན་
Page: 333 ༄༅། །དོན་ནུས་པ་འདི་ཇི་ལྟར་དྲང་ཞེ་ན། ཞེས་སོགས་ཏེ་འདི་ལྟ་བུ་སངས་རྒྱས་ལས་གཞན་གྱི་ཡུལ་མ་ཡིན་ནོ། །རིགས་པ་འདི་སྣང་སྟེ། ཤཱ་རིའི་བུས་ཐར་པའི་སེམས་རྣམ་པ་ཐམས་ཅད་ཏུ་ཡོངས་སུ་བཏང་བ་ནི་མ་ ཡིན་ཏེ་རྫོགས་པའི་བྱང་ཆུབ་ཀྱི་སེམས་བཏང་ནའང་ཉན་ཐོས་ཀྱི་བྱང་ཆུབ་ཐོབ་པའི་ཕྱིར་རོ། །ཞེས་གཞན་དོན་གྱི་བློ་བཏང་རུང་བྱང་ཆུབ་ལ་དམིགས་པ་མ་བཏང་བས་ཉན་བྱང་ཐོབ་པར་འཆད་ཅིང་། དགེ་བའི་ལྷས་ནི། སྔར་བཏང་ཡང་ཕྱིས་བླངས་པའི་ཕན་ ཡོན་དུ་འཆད་དོ། །དེ་ཡང་པད་དཀར་ལས། ཤཱ་རིའི་བུ་སྔོན་སེམས་བསྐྱེད་དེ་སངས་རྒྱས་སྟོང་ཕྲག་བཅུ་ལ་བསྙེན་བཀུར་བྱས་པ་ཞིག་ལ། བདུད་ཀྱིས་བྲམ་ཟེར་སྤྲུལ་ནས་ལག་པ་བསླངས་པས་གཡས་པ་བཅད་དེ་གཡོན་པས་བྱིན་པ་ན། གཡོན་པ་ མི་གཙང་བས་བྱིན་པ་མི་འདོད་ཟེར་ཏེ་ས་ལ་བསྐྱུར་བས་སེམས་སྐྱེད་བཏང་ནས་ཉན་ཐོས་ཀྱི་ཐེག་པར་ཞུགས་པར་གསུངས་པ་བྱུང་མོད་ཀྱི་དྲང་བའི་དོན་ནམ་ངེས་པའི་དོན་གང་དུ་གསུངས་བརྟག་པར་དཀའ་ལ། དམ་ཆོས་པད་དཀར་དུ། དེ་བཞིན་གཤེགས་ པ་པདྨའི་འོད་དུ་འཚང་རྒྱ་བར་ལུང་བསྟན་ཞིང་། ཤེས་ཕྱིན་གྱི་མདོ་ལྟར་ན། མི་སྐྱེ་བའི་ཆོས་ལ་བཟོད་པ་མ་ཐོབ་པར་བྱང་ཆུབ་ཏུ་ལུང་མི་སྟོན་པའི་ཕྱིར་ཏེ། གང་ཚེ་ང་ནི་ཕ་རོལ་ཕྱིན་པའི་མཆོག་འདི་དང་། །མཐུན་པར་སྨྲ་གྱུར་དེ་ཚེ་སྔོན་གྱི་སྐྱེས་ མཆོག་གིས། མ་འོངས་པ་ཡི་དུས་ན་འཚང་རྒྱ་འགྱུར་རོ་ཞེས། །ང་ལུང་བསྟན་པར་གྱུར་ཅེས་རྒྱལ་བ་དེ་སྐད་གསུང་། །ཞེས་སོ། །དེས་ན་བསྟན་བཅོས་མཛད་པ་པོ་ཉིད་ཀྱིས་སངས་རྒྱས་ཀྱི་ཐུན་མོང་མ་ཡིན་པའི་ཡུལ་དུ་བཞག་པའི་ ཕྱིར། བདག་ཅག་གི་རྣམ་པར་རྟོག་པས་དེའི་རྒྱུ་མཚན་བསམ་མི་ནུས་པས་རེ་ཞིག་ངལ་གསོ་བར་བྱས་པ་ལེགས་སོ། །གཉིས་པ་གཞན་དོན་ལས་ཉམས་པ་ནི། དེ་ནི་བྱང་ཆུབ་སེམས་དཔའ་ལ། །ལྟུང་བའི་ནང་ན་ལྕི་བ་སྟེ། །འདི་ལྟར་དེ་ནི་བྱུང་གྱུར་ན། །སེམས་
Page: 334 ཅན་གྱི་དོན་ལ་དམན། །གང་གཞན་སྐད་ཅིག་འདི་ཡི་ནི། །བསོད་ནམས་བར་ཆད་གེགས་བྱེད་པ། །སེམས་ཅན་དོན་ལ་དམན་གྱུར་བས། །དེ་ཡི་ངན་འགྲོ་མུ་མཐའ་མེད་། །སེམས་ཅན་གཅིག་གི་བདེ་བ་ཡང་། བཤིག་ ན་བདག་ཉིད་ཉམས་འགྱུར་ན། །ནམ་མཁའ་མ་ལུས་མཐའས་བཀླས་པའི། །ལུས་ཅན་བདེ་བཤིག་སྨོས་ཅི་དགོས། །ཅེས་གསུངས་ཏེ། གཞན་དོན་མི་ནུས་པ་དང་། བྱང་ཆུབ་སེམས་དཔའི་བསོད་ནམས་ཀྱི་གེགས་བྱས་ན་རྣམ་ སྨིན་མི་ཟད་པ་དང་། དེའི་འཐད་པ་རྣམས་རིམ་པར་སྟོན་ནོ། །དེ་ཡང་རང་དོན་ཡིད་བྱེད་ཀྱི་བློ་ནི་བྱང་ཆུབ་སེམས་དཔའ་ལ་ལྟུང་བའི་ནང་ན་ལྕི་བ་ཡིན་ཏེ། གལ་ཏེ་བསྐལ་བ་བྱེ་བར་དགེ་བའི་ལས་ལམ་བཅུ། །སྤྱོད་ཀྱང་དགྲ་ བཅོམ་རང་རྒྱལ་ཐེག་པར་འདོད་བསྐྱེད་ན། །དེ་ཚེ་ཚུལ་ཁྲིམས་སྐྱོན་བྱུང་ཚུལ་ཁྲིམས་ཉམས་པ་ཡིན། །སེམས་སྐྱེད་དེ་ནི་ཕས་ཕམ་པས་ཀྱང་ཤིན་ཏུ་ལྕི། །ཞེས་སོ། །རང་ཉིད་ལྟུང་བས་བཅོམ་པས་རྣམ་སྨིན་གྱི་འབྲས་བུ་བཟོད་དཀའ་བ་ མྱོང་དགོས་ན་གཞན་སྐྱབས་པར་ག་ལ་ནུས་པའོ། །འགྲེལ་ཆེན་དུ། གང་གཞན་སྐད་ཅིག་འདི་ཡི་ནི། །ཞེས་འདོན་ཏེ་སྐད་ཅིག་ཀྱང་ཞེས་བྱ་བ་ལ་མིག་བཙུམས་པའི་བར་དང་། ཡུད་ཙམ་པ་དང་། ཆུ་ཚོད་ཕྱེད་དང་། ཐུན་ཕྱེད་ལ་སོགས་པའི་དུས་རེ་ ཞིག་ཞོག་སྐད་ཅིག་ཅིག་ཙམ་ཀྱི་བར་དུ་ཡང་སྟེ་བསོད་ནམས་ཀྱི་གེགས་བྱེད་པ་དེའི་ངན་འགྲོའི་གྲངས་བགྲང་བར་མི་ནུས་སོ། །ཅིའི་ཕྱིར་ཞེ་ན། རབ་ཞི་རྣམ་ངེས་ཀྱི་ཆོ་འཕྲུལ་གྱི་མདོར། གཅིག་གིས་འཛམ་གླིང་པ་ཐམས་ཅད་ཀྱི་བདོག་པ་ཐམས་ ཅད་ཕྲོགས་ཏེ་སྲོག་དང་ཕྲལ་ལ། གཅིག་གིས་བྱང་ཆུབ་སེམས་དཔའི་དགེ་བའི་སེམས་ཐ་ན་དུད་འགྲོའི་སྐྱེ་ནས་སུ་སྐྱེས་པ་ལ་ཁམ་གཅིག་ཙམ་སྟེར་བའི་བར་དུ་གཅོད་ན་དེ་ནི་དེ་བས་ཆེས་རྣམ་སྨིན་གྲངས་མེད་པར་སྐྱེད་དེ་མི་དགེ་བ་སྔ་མས་བརྒྱའི་
Page: 335 ༄༅། །ཆར་ཡང་མི་འགྲོ་བ་ནས་རྒྱུའི་བར་དུ་ཡང་མི་བཟོད་པར་གསུངས་པ་དྲངས་སོ། །གསུམ་པ་ས་ཐོབ་པ་ལ་ཐོགས་པ་ནི། དེ་ལྟར་ལྟུང་བ་སྟོབས་ལྡན་དང་། །བྱང་ཆུབ་སེམས་སྟོབས་ལྡན་པ་དག །འཁོར་བར་རེས་ཀྱིས་འདྲེ་བྱེད་ན། ། ས་འཐོབ་པ་ལ་ཡུན་རིང་ཐོགས། །དེ་ལྟས་ཇི་ལྟར་དམ་བཅས་བཞིན། །བདག་གིས་གུས་པར་བསྒྲུབ་པར་བྱ། །ཞེས་གསུངས་ཏེ། གལ་ཏེ་སླར་བླངས་བས་སྐྱེའོ་སྙམ་ན་བརྩོན་འགྲུས་ཀྱི་མཐུ་ཆུང་བ་དེས་ནི་བླངས་ཀྱང་ཡང་ལྟུང་བས་ འཇོམས་པར་འགྱུར་ལ། དེ་ལྟར་རེ་མོས་ཀྱིས་གླང་ཆེན་ཁྲུས་ལྟར་ནམ་ཡང་གཙང་བའི་ས་འཐོབ་པར་མི་འགྱུར་རོ། །དེས་ན་བྱང་ཆུབ་ཀྱི་སེམས་ལ་བག་ཡོད་པས་མ་ཉམས་པར་ཐོག་མ་ཉིད་ནས་འབད་དགོས་ཏེ། གོམས་ན་སླ་བར་མི་འགྱུར་བའི། ། དངོས་དེ་གང་ནའང་ཡོད་མ་ཡིན། །ཞེས་འཆད་པར་འགྱུར་ཞིང་། སྐྱེ་བོ་གསོ་ཐིགས་ལས། ལུས་ཅན་རྣམས་ཀྱི་སྐྱོན་ཡོན་ནི། །ཐམས་ཅད་གོམས་པའི་རྩ་བ་ཅན། །གོམས་པའང་རང་ལ་རག་ལས་པས། །དེ་བས་ཡོན་ཏན་གོམས་ པ་མཆོག །ཞེས་སོ། །གཉིས་པ་བསླབ་པ་ལ་བག་བྱ་བ་ལ། ཉེས་པ་ལས་ལྡོག་པ་ལ་བག་བྱ་བ་བཞི། དགེ་བ་སྒོམ་པ་ལ་བག་བྱ་བ་གསུམ། ཉོན་མོངས་པ་སྤང་བ་ལ་བག་བྱ་བ་གསུམ། མཇུག་བསྡུ་བ་སྟེ་བཞིའོ། །དང་པོ་ནི། དེང་ནས་བརྩོན་ པར་མ་བྱས་ན། །འོག་ནས་འོག་ཏུ་འགྲོ་བར་འགྱུར། །སེམས་ཅན་ཐམས་ཅད་ཕན་མཛད་པའི། །སངས་རྒྱས་གྲངས་མེད་འདས་གྱུར་ཀྱང་། །བདག་ནི་རང་གི་ཉེས་པས་དེའི། །གསོ་བའི་སྤྱོད་ཡུལ་མ་གྱུར་ཏོ། །ད་དུང་དེ་བཞིན་ བདག་བྱེད་ན། །ཡང་དང་ཡང་དུའང་དེ་བཞིན་ཏེ། །ངན་འགྲོར་ནད་དང་འཆིང་བ་དང་། །གཅོད་དང་བཤགས་སོགས་མྱོང་བར་འགྱུར། །དེ་བཞིན་གཤེགས་པ་འབྱུང་བ་དང་། །དད་དང་མི་ལུས་ཐོབ་པ་དང་། དགེ་གོམས་རུང་བ་དེ་
Page: 336 ལྟ་བུ། །དཀོན་ན་ནམ་ཞིག་འཐོབ་པར་འགྱུར། །ནད་མེད་ཉི་མ་འདི་ལྟ་བུར། །ཟས་བཅས་འཚེ་བ་མེད་ཀྱང་ནི། །ཚེ་ནི་སྐད་ཅིག་བསླུ་བ་སྟེ། །ལུས་ནི་ཐང་ཅིག་བརྙན་པོ་བཞིན། །བདག་གི་སྤྱོད་པ་འདི་འདྲས་ནི། །མི་ཡི་ལུས་ཀྱང་ འཐོབ་མི་འགྱུར། །མི་ལུས་ཐོབ་པར་མ་གྱུར་ན། །སྡིག་པ་འབའ་ཞིག་དགེ་བ་མེད། །གང་ཚེ་དགེ་སྤྱད་སྐལ་ལྡན་ཡང་། །དགེ་བ་བདག་གིས་མ་བྱས་ལ། །ངན་སོང་སྡུག་བསྔལ་ཀུན་རྨོངས་པ། །དེ་ཚེ་བདག་གིས་ཅི་བྱར་ ཡོད། །དགེ་བ་དག་ཀྱང་མ་བྱས་ལ། །སྡིག་པ་དག་ཡང་ཉེར་བསགས་ན། །བསྐལ་པ་བྱེ་བ་བརྒྱར་ཡང་ནི། །བདེ་འགྲོའི་སྒྲ་ཡང་ཐོས་མི་འགྱུར། །དེ་ཉིད་ཕྱིར་ན་བཅོམ་ལྡན་གྱིས། །རྒྱ་མཚོ་ཆེར་གཡེངས་གཉའ་ཤིང་གི ། བུ་གར་རུས་སྦལ་མགྲིན་ཆུད་ལྟར། མི་ཉིད་ཤིན་ཏུ་འཐོབ་དཀར་གསུངས། །ཅེས་གསུངས་ཏེ། ཚིགས་བཅད་ཕྱེད་དང་གསུམ་གྱིས་ངན་འགྲོར་འགྲོ་བ། དེ་ནས་གཅིག་གིས་དལ་བ་མི་འཐོབ་པ། གཅིག་གིས་ཐོབ་ཀྱང་མི་ བརྟན་པ། ཚིགས་བཅད་བཞིས་ངན་འགྲོར་དགེ་བ་བྱར་མེད་པ་རྣམས་བསྟན་ཏོ། །དེ་ཡང་དེང་ནས་ཞེས་པ་ནི་དགེ་བའི་བློ་སྐྱེས་པའི་དུས་ད་ལྟ་འདི་ཉིད་ནས་སོ། །རང་ཉིད་ཀྱིས་བརྩོན་པར་མ་བྱས་ན་ཐར་པ་གཞན་གྱིས་སྦྱིན་དུ་མེད་དེ། ཐར་པ་བདག་ལ་རག་ལས་འདི་ལ་ནི། གཞན་གྱིས་གྲོགས་དགྱིར་ཅི་ཡང་མ་མཆིས་སོ། །ཞེས་སོ། །སངས་རྒྱས་མང་དུ་འབྱུང་བས་དེ་དག་གིས་བདག་འདུལ་བར་འགྱུར་རོ་ཞེ་ན། སྔོན་སངས་རྒྱས་དཔག་མེད་འདས་པས་བདག་མ་བཏུལ་ བ་བ་འདི་ཡིན་ན་ད་དུང་རང་གིས་རང་སྣོད་མ་ཡིན་པར་བྱས་ན་ངན་འགྲོར་ལྟུང་གི་སངས་རྒྱས་དང་ཕྲད་པར་མི་འགྱུར་རོ། །དེ་བཞིན་གཤེགས་པ་འབྱུང་བ་སོགས་གཞན་འབྱོར་ལྔ་དང་དད་དང་མི་ལུས་སོགས་རང་ཆ་འབྱོར་ལྔ་དང་ལྡན་པ་དགེ་བ་
Page: 337 ༄༅། །གོམས་པར་བྱར་ཡོད་པའི་རྟེན་འདི་ལྟ་བུ་ནི་ཕྱིས་འཐོབ་པར་དཀའ་བས་འདི་ལྟ་བུ་དོན་ཆུང་ངུར་འཛད་དུ་འཕངས་སོ། །ཐོབ་ཟིན་པ་འདིས་ཆོག་མོད་སྙམ་ན་ད་ལྟ་ནད་སོགས་ཀྱི་འཚེ་བ་མེད་ཅིང་བདེ་བ་ལྟར་གནས་ པས་ཉིན་མཚན་འདའ་མོད་ཀྱང་མ་ཚོར་བར་མྱུར་དུ་འཆི་སྟེ་ཚེ་ནི་སྐད་ཅིག་ཙམ་ལ་རྟག་པར་ཞེན་པའི་སླུ་བ་ཅན་དང་ལུས་འདི་འབྱུང་བཞིའི་གཡར་པོ་ཡིན་པའི་ཕྱིར་རོ། །མི་ལུས་ཕྱིས་ཐོབ་པའི་ཚེ་བྱའོ་སྙམ་ན་བདག་གི་ད་ལྟའི་སྤྱོད་པ་འདིས་ནི་ ངན་འགྲོར་ལྟུང་བར་ཟད་ཀྱི་མི་ལུས་མི་འཐོབ་བོ། ངན་འགྲོར་དགེ་བ་བྱའོ་ཞེ་ན། དེ་ནི་མི་ཁོམ་པའི་གནས་ཡིན་པའི་ཕྱིར། དགེ་བའི་བློ་ཙམ་ཡང་ག་ལ་ཡོད་དེ་བདག་ཉིད་ངན་སོང་གི་སྡུག་བསྔལ་གྱིས་རྨོངས་པ་བ་ལང་ལ་སོགས་པར་གྱུར་པའི་ ཚེ་དགེ་བ་ཇི་ལྟར་བྱ། ངན་འགྲོ་ལས་ཐར་ནས་བྱའོ་ཞེ་ན། ངན་འགྲོར་སྐྱེས་པའི་ཚེ་དགེ་བ་ནི་མིང་ཡང་མེད་ལ་སྡིག་པ་ནི་ཉིན་རེར་ཡང་གྲངས་མེད་པ་སོག་སྟེ། དཔེར་ན། ཁྲ་དང་སྤྱང་ཀི་སོགས་དགེ་བ་བྱེད་པ་ནི་མ་མཐོང་ལ་སྡིག་པ་ནི་ཉིན་རེ་བཞིན་རྣམ་པ་ དུ་མ་བྱེད་པར་མཐོང་བའི་ཕྱིར་ན། ངན་འགྲོ་དེ་ལས་ནམ་ཞིག་ཐར་བར་འགྱུར་ཏེ་རི་གཟར་པོ་ལས་ཕ་བོང་ལྟུང་བ་ནི་གྱེན་དུ་མི་ཟློག་ལ་ཐུར་དུ་རང་བཞིན་གྱིས་འགྲོ་བ་ལྟ་བུའི་ཕྱིར་ཏེ། བདེ་འགྲོར་སྐྱེ་བ་ལྟ་ཞོག་སྒྲ་ཐོས་པའང་དཀའོ། །དེའི་ཕྱིར་དལ་ འབྱོར་རྙེད་དཀའ་བའི་ཚུལ། དགའ་བོ་ལ་བསྟན་པའི་མདོར། དཔེར་ན་ཡོངས་སུ་བརྟག་པ་ཉེ་བར་བཟུང་སྟེ་འཛམ་བུ་གླིང་ཐམས་ཅད་རྒྱ་མཚོ་ཆེན་པོའི་ཆུ་གཅིག་གི་གཞིར་གྱུར་ལ། དེར་ཡང་གཉའ་ཤིང་བུ་ག་གཅིག་པ་ཡོངས་སུ་འཕྱོ་བ་ལ་ཤར་ནས་ རླུང་གིས་ནུབ་ཀྱི་འགྲམ་དང་ནུབ་ནས་རླུང་གིས་ཤར་གྱི་འགྲམ་དུ་འཁྱེར་ཞིང་དེ་བཞིན་དུ་ཕྱོགས་ཐམས་ཅད་དུ་འགྲོའོ། །རྒྱ་མཚོ་དེ་ན་རུལ་སྦལ་ཞར་བ་ཞིག་གནས་ཤིང་དེ་ཡང་ལོ་བརྒྱ་འདས་པ་དང་མགྲིན་པ་བཏེགས་ནས་ལྟའོ། །ཇི་ལྟར་འགའ་ཞིག་ཏུ་
Page: 338 འདི་འདྲ་བའི་ཚོགས་པ་ཡོད་པར་གྱུར་པ་སྟེ་གཉའ་ཤིང་གང་ཡིན་པ་མིག་ཞར་བ་དེའི་ཕྱོགས་སུ་སོང་བར་གྱུར་པ་དང་དེ་ལ་མི་ལྟ་ན་ཡང་དེའི་མགྲིན་པ་བུ་ག་དེར་ཆུད་པ་བཞིན་དུ་མིའི་ལུས་ཐོབ་པ་ཡང་དེ་བཞིན་ནོ། །ཞེས་བསྟན་ཏོ། །གཉིས་པ་ དགེ་བ་སྒོམ་པ་ལ་བག་བྱ་བ་གསུམ། སྐད་ཅིག་གཅིག་བྱས་སྡིག་པས་ཀྱང་། །བསྐལ་པར་མནར་མེད་གནས་འགྱུར་ན། །ཐོག་མེད་འཁོར་བར་བསགས་སྡིག་གིས། །བདེ་འགྲོར་མི་འགྲོ་སྨོས་ཅི་དགོས། །དེ་ཙམ་ཁོ་ན་མྱོང་གྱུར་ནས། །དེ་ནི་རྣམ་ཐར་མི་འགྱུར་ཏེ། །འདི་ལྟར་ དེ་ནི་མྱོང་བཞིན་དུ། །སྡིག་པ་གཞན་དག་རབ་ཏུ་སྐྱེ། །འདི་འདྲའི་དལ་བ་རྙེད་གྱུར་ནས། །བདག་གིས་དགེ་གོམས་མ་བྱས་ན། འདི་ལས་བསླུས་པ་གཞན་མེད་དེ། །འདི་ལ་རྨོངས་པའང་གཞན་མེད་དོ། །གལ་ཏེ་བདག་ གིས་དེ་རྟོགས་ནས། །རྨོངས་པས་ཕྱིས་ཀྱང་སྒྱིད་ལུག་ན། །འཆི་བར་འགྱུར་བའི་དུས་ཀྱི་ཚེ། །མྱ་ངན་ཆེན་པོ་ལྡང་བར་བར་འགྱུར། །དམྱལ་མེ་བཟོད་དཀས་ཡུན་རིང་དུ། །བདག་གི་ལུས་ལ་བསྲེགས་གྱུར་ན། །འགྱོད་པ་མི་བཟད་མེ་ འབར་བས། །སེམས་གདུང་འགྱུར་བར་གདོན་མི་ཟ། །ཤིན་དུ་རྙེད་དཀའ་ཕན་པའི་ས། །ཅི་ཞིག་ལྟར་སྟེས་བརྙེད་གྱུར་ནས། །བདག་ཉིད་ཤེས་དང་ལྡན་བཞིན་དུ། །ཕྱིར་ཡང་དམྱལ་བ་དེར་ཁྲིད་ན། །སྔགས་ཀྱིས་རྨོངས་པར་བྱས་ བ་བཞིན། །བདག་ལ་འདིར་སེམས་མེད་དུ་ཟད། །ཅེས་གསུངས་ཏེ། ཚིགས་བཅད་དང་པོས་སྔོན་བསགས་པའི་སྡིག་པ་མང་བ་དང་། གཉིས་པས་སྡིག་པ་རང་ཟད་དུ་འགྱུར་མི་སྲིད་པ་དང༌། ཚིགས་བཅད་ཕྱེད་དང་ལྔས་གཉེན་པོའི་དགེ་བ་ ལ་འབད་དགོས་པར་བསྟན་པ་ཡིན་ལ། འདི་ལ་ཡང་མི་ལུས་ཐོབ་དུས་དགེ་བ་མ་བྱས་ན་རང་གི་རང་བསླུས་པར་བསྟན་པ་དང་། ཕྱི་དུས་སུ་འགྱོད་པ་དང་། དམྱལ་བར་སྐྱེས་པའི་ཚེ་འགྱོད་པ་དང་། ལས་འབྲས་གོ་བཞིན་དུ་རང་གིས་རང་
Page: 339 ༄༅། །དམྱལ་བར་ཁྲིད་ན་སེམས་མེད་པར་ཟད་པ་སྟེ། སྔ་མ་གསུམ་ཚིགས་བཅད་རེ་རེ་དང་། ཐ་མ་ཚིགས་བཅད་ཕྱེད་དང་གཉིས་ཀྱིས་བསྟན་ཏོ། །དེ་ཡང་བདག་གིས་སྡིག་པ་ཆེར་མ་བྱས་སོ་ཞེ་ན། ཕ་མ་གསོད་པ་སོགས་ མཚམས་མེད་ཀྱི་ལས་ཡུད་ཙམ་རེ་བྱས་པས་ཀྱང་འབྲས་བུ་མནར་མེད་དུ་བསྐལ་པར་གནས་དགོས་ན་བདག་རྒྱུད་ལ་ཐོག་མ་མེད་པ་ནས་སྡིག་པ་དེ་ལྟ་བུ་བྱས་པའི་བག་ཆགས་དཔག་མེད་ཡོད་ཀྱང་རང་གིས་མི་ཤེས་པའོ། །ཕ་མ་གསོད་པ་ལྟ་བུའང་ རིང་དུ་འགོར་བ་མ་ཡིན་ཏེ་ལས་ཀྱི་དངོས་གཞི་འཆི་སེམས་སྐད་ཅིག་མ་གཅིག་གིས་ཆོག་པའི་ཕྱིར། སྤྱིར་བྱ་རྗོགས་ཀྱི་སྐད་ཅིག་མ་ནི་བསྐལ་པ་ལ་སོགས་ཀྱང་ཡིན་མོད་ཀྱང་འདིར་ནི་མིག་འཛུམ་སོགས་ལ་སྐད་ཅིག་ཏུ་འཇོག་པ་འཇིག་རྟེན་ལ་ གྲགས་པ་ལྟར་ཡིན་ལ། མིག་འཛུམ་ལ་ཆ་ཤས་བརྒྱ་དྲུག་བཅུར་ཕྱེ་བའི་ཆ་གཅིག་ལ་དུས་མཐའི་སྐད་ཅིག་ཏུ་འཇོག་པ་ནི་རེ་ཞིག་ཐེག་དམན་གྱི་རྣམ་འཇོག་གོ །འགྲེལ་ཆེན་ལས་ནི། གང་ཡང་སྦྱོར་བའི་སྐད་ཅིག་མ་མང་མོད་ཀྱི་དེ་ལྟ་ན་ཡང་ དངོས་གཞི་མཚམས་མེད་པ་ནི་སྐད་ཅིག་མ་གཅིག་ཉིད་ལ་འགྲུབ་པར་འགྱུར་བའམ། ཡང་ན་ཤིན་ཏུ་མྱུར་བས་སྐད་ཅིག་མ་མང་པོ་ལའང་སྐད་ཅིག་མ་གཅིག་གི་སྒྲར་བརྗོད་པ་མིག་འཛུམ་དུ་མ་སོང་བའི་བྱ་བ་ལའང་མིག་འཛུམ་གཅིག་ལ་བྱས་སོ་ ཞེས་འཇིག་རྟེན་ན་སྒྲོག་པ་ལྟ་བུའོ། །བསྐལ་པ་ནི་བར་བསྐལ་གཅིག་སྟེ་མནར་མེད་པའི་ཚེའོ། །ཞེས་སོ། །ཡང་རྣམ་སྨིན་གྱི་འབྲས་བུ་དེ་ཙམ་ཞིག་མྱོང་བ་ཁོ་ནས་ཐར་བར་མི་འགྱུར་ཏེ་འགྲོ་བའི་སྐྱེ་གནས་གཞན་ཁྲི་ཕྲག་དུ་མ་བརྒྱུད་པས་མྱོང་བའི་རྒྱུ་ མཐུན་སྤྱོད་ཅིང་། ཡང་དེའི་ཚེ་ལས་ཀྱི་བག་ཆགས་ངན་པས་བྱེད་པ་རྒྱུ་མཐུན་སྔོན་བྱས་ཀྱི་སྡིག་པ་དེ་ལྟ་བུ་མང་དུ་སྤྱོད་པ་ལ་ལས་དེ་རེ་རེ་ཡང་རྣམ་སྨིན་རྒྱུ་མཐུན་དང་བཅས་པ་ནི་བསྐལ་པ་མང་པོས་ཚར་ཕྱིན་དགོས་པའི་ཕྱིར་རོ། །དེ་བས་ན་ད་ལྟ་དལ་བ་
Page: 340 རྙེད་དུས་འདི་ཁོ་ནར་མ་འབད་ན་ཕྱིས་འགྱོད་པ་ཆེན་པོ་སྐྱེ་སྟེ་མྱ་ངམ་གྱི་ཐང་ལ་ཁུར་ཆེན་པོ་ལྕི་བ་འཇིག་ཏུ་ཉེ་བ་ཁྱེར་ནས་འགྲོ་ལ། དེས་ལ་བསྡད་ནས་བཅོས་ན་ཡང་ལངས་མི་ནུས་པར་མཐོང་ནས་ངལ་བཞིན་དུ་འགྲོ་བ་ལས་གྱི་དབུས་ཞིག་ ཏུ་ངལ་སྟེགས་གྲིབ་བསེལ་ཆུ་གཙང་མ་དང་བཅས་པ་ཕྲད་ལ་དེར་ལེ་ལོས་མ་བཅོས་པར་ཕྱིན་པས་ཡང་མྱ་ངམ་གྱི་ཐང་སྔ་མ་བས་ཆེ་བ་མཐོང་ནས་ཆེས་འགྱོད་པར་འགྱུར་བ་ལྟར། ངལ་བ་འདི་མེད་དུ་ཟད་ན་འཆི་ཁར་འགྱོད་པ་དང་། དམྱལ་བར་ སྡུག་བསྔལ་གྱི་དབང་གིས་སྐྱེ་བ་བདུན་བརྒྱུད་དུ་དྲན་ཞིང་གཤིན་རྗེའི་སྐྱེས་བུས་ཀྱང་དལ་བ་ཕུན་སུམ་ཚོགས་པ་ཐོབ་ནས་དོན་མེད་དུ་བྱས་ཏེ་འདིར་འོང་བ་ཞེས་སྤྱོས་ཤིང་བརྡེགས་པའི་ཚེ་ཆེས་འགྱོད་པ་སྐྱེ་བའི་ཕྱིར། དེས་ན་དལ་བ་ཡང་སྟེས་དབང་ གིས་བརྙེད། ཆོས་སྒྲུབ་པའི་བློ་ཙམ་དང་ཡང་ལྡན་བཞིན་དུ་ད་དུང་བག་མེད་སེམས་ཀྱི་དབང་དུ་བཏང་ནས་རང་གི་རང་ངན་འགྲོར་ཁྲིད་ན་ནི་བདག་གི་སེམས་འདིས་ཅི་ཞིག་བྱ་སྟེ་སེམས་མེད་པ་ཁོ་ནར་ཟད་པའི་དོན་ཏོ། །གསུམ་པ་ཉོན་ མོངས་སྤང་བ་ལ་བག་བྱ་བ་ལ། བསམ་པས་མི་མཐུན་པར་ལྟ་བ་གསུམ། སྦྱོར་བས་མི་སྐྱོ་བར་བྱ་བ་གསུམ། སྤང་ནུས་པར་སྤྲོ་བ་སྐྱེད་པ་གཉིས་ཏེ་གསུམ་མོ། །དང་པོ་ལ་ཡང༌། གནོད་པའི་རྣམ་པར་བརྟག་པ་བཞིམི་བཟོད་པར་ བསྟན་པ། ང་རྒྱལ་སྐྱེད་པ་སྟེ་གསུམ་མོ། །དང་པོ་ལ་ཡང་། རང་དབང་མེད་པར་བྱེད་པ། སྡུག་བསྔལ་ལ་སྦྱོར་བ། རྟག་ཏུ་འབྲང་བ། བསྟེན་དུ་མི་རུང་བར་བསྟན་པ་སྟེ་བཞི་ལས། དང་པོ་ནི། ཅིས་རྨོངས་བདག་གིས་མ་ཤེས་ཏེ། ། བདག་གི་ཁོང་ན་ཅི་ཞིག་ཡོད། །ཞེ་སྡང་སྲེད་སོགས་དགྲ་རྣམས་ནི། །རྐང་ལག་ལ་སོགས་ཡོད་མིན་ལ། དཔའ་མཛངས་མིན་ཡང་ཇི་ཞིག་ལྟར། །དེ་དག་གིས་བདག་བྲན་བཞིན་བྱས། །བདག་གིས་སེམས་ལ་གནས་བཞིན་དུ། །
Page: 341 ༄༅། །དགའ་མགུར་བདག་ལ་གནོད་བྱེད་པ། །དེ་ལའང་མི་ཁྲོ་བཟོད་པ་ནི། །གནས་མིན་བཟོད་པ་སྨད་པའི་གནས། །ཞེས་གསུངས་ཏེ། ཅི་རྨོངས་པ་འདི་ལྟ་བུ་སྐྱེ་བའི་རྒྱུ་བདག་གི་ཁོང་ན་ཅི་ཞིག་ཡོད་ཅེས་རྣམ་པར་བརྟག་ གོ །བརྟགས་པ་ན་ཞེ་སྡང་ལ་སོགས་པ་ཀུན་ནས་ཉོན་མོངས་པ་འདི་རྣམས་ཡིན་པར་མཐོང་ངོ་། །དེའི་ཚེ་འདི་རྣམས་ལ་སྒྱུ་རྩལ་དང་མི་ཞུམ་པའི་དཔའ་བ་དང་ཚོད་རིག་པའི་མཛངས་པ་དང་ཚན་པོ་ཆེ་ལ་སོགས་པའི་སྟོབས་དང་རྐང་ལག་གི་ཤེད་ དང་བསྣུན་པའི་མཚོན་ཆ་སོགས་གཞན་ལས་ཁྱད་པར་དུ་གྱུར་པ་ཅི་ཞིག་ཡོད་པ་སོ་སོར་བརྟག་པར་བྱའོ། །དེ་ལྟར་བརྟགས་པ་ན་དེ་ལྟ་བུ་ཅི་ཡང་མ་མཐོང་སྟེ་ཉོན་མོངས་པའི་སེམས་འདི་ནི་ཆུ་ལས་ཆུ་བུར་ལྟར་སྐད་ཅིག་གིས་སྐྱེ་ཞིང་དེ་ཉིད་ དུ་འཇིག་ལ་གང་ནས་ཀྱང་མ་འོངས་གང་དུ་ཡང་མི་འགྲོ་གང་ནའང་མི་གནས་ལ་ངོ་བོ་ཉིད་ཀྱིས་སྟོང་པ་གསོག་དང་གསོབ་དང་ཡ་མ་བརླ་ཞིག་སྟེ། འོ་ན་སྙིང་པོ་མེད་པ་འདིས་བདག་བྲན་བཞིན་དུ་བྱེད་པ་ཅིའི་ཐ་ཚིག་ཞེས་བདག་ཉིད་ཀྱིས་བདག་ཉིད་ལ་ ངོ་ཚ་བ་དང་བཞད་གད་ཀྱི་བློ་སྐྱེའོ། །ཡང་བརྟགས་པ་ན་འདི་ལ་ནི་བདག་གི་སེམས་ལས་གཞན་པའི་རྟེན་ནི་འགའ་ཡང་མ་མཐོང་ངོ༌། །འདི་སེམས་ཀྱི་ངོ་བོ་ཉིད་ཀྱིས་ཀྱང་མ་ཡིན་པར་མཐོང་སྟེ་འདི་ནི་ཕྱིན་ཅི་ལོག་གི་བཅོས་མ་གོམས་པ་ ཙམ་ཞིག་སྟེ་འོན་ཀྱང་བདག་ཉིད་གང་ལ་རྟེན་བཅས་པའི་སེམས་དེ་ཁོ་ན་ལ་གནོད་པར་བྱེད་པས་རང་བཞིན་གྱིས་དགྲར་གྱུར་པ་འདི་ལ་ནི་བཟོད་པར་མི་བྱ་སྟེ་གནས་མ་ཡིན་པའི་བཟོད་པ་ནི་འཇིག་རྟེན་ན་སྨད་པའི་གནས་ཡིན་པའི་ཕྱིར་རོ། ། དེས་ན་བཅོམ་ལྡན་འདས་ཀྱིས་རྒྱལ་པོ་ཤར་པ་ལ། རྒྱལ་པོ་ཆེན་པོ་དགྲ་འདི་མ་ཡིན་པའི་དགྲ་ཆེན་པོ་ཤར་གཉེར་བ་གཞན་ཞིག་ཡོད་དོ། །ཞེས་བདག་ཏུ་འཛིན་པ་དགྲར་བསྟན་པས། རྒྱལ་པོས་གསོལ་པ། སྔར་བདག་གིས་དགྲ་མ་ཡིན་པ་ཞིག་དགྲར་བཟུང་
Page: 342 ད་ནི་བདག་གིས་དགྲ་ཡང་དག་པ་ངོས་ཟིན་ཏེ་འདི་གདུལ་བར་བྱའོ། །ཞེས་གསོལ་བ་ལྟ་བུའོ། །འགྲེལ་ཆེན་ལས། ཞེ་སྡང་སྲེད་སོགས་ནི། སྲིད་པའི་རྩ་བ་ཕྲ་རྒྱས་དྲུག །འདོད་ཆགས་ཁོང་ཁྲོ་དེ་བཞིན་དུ། །ང་རྒྱལ་དང་ནི་མ་རིག་པ། །ལྟ་བ་ ཐེ་ཚོམ་དེ་དག་བཅུ། །ཞེས་པའི་ལྟ་བ་ལ། འཇིག་ལྟ། མཐར་ལྟ། ལོག་ལྟ། ལྟ་བ་མཆོག་འཛིན་བརྟུལ་ཞུགས་མཆོག་འཛིན་ཏེ་ལྔར་ཕྱེ་བས་བཅུ། དེ་ལ་ལམ། ཁམས། བདེན་པས་ཕྱེ་བས་དགུ་བཅུ་རྩ་བརྒྱད་དུ་འགྱུར་ལ། བྱང་སེམས་ཀྱི་ནི་བརྒྱ་ ཉི་ཤུ་རྩ་གཉིས་སོ། །ཞེས་སོ། །གཉིས་པ་སྡུག་བསྔལ་ལ་སྦྱོར་བ་ནི། གལ་ཏེ་ལྷ་དང་ལྷ་མིན་རྣམས། ཐམས་ཅད་བདག་ལ་དགྲར་ལངས་ཀྱང་། དེ་དག་གིས་ཀྱང་མནར་མེད་པའི། །མེ་ནང་ཁྲིད་ཅིང་གཞུག་མི་ནུས། །ཉོན་མོངས་སྟོབས་ཆེན་ དགྲ་འདིས་ནི། །གང་དང་ཕྲད་ན་རི་རབ་ཀྱང་། །ཐལ་བར་ཡང་ནི་མི་ལུས་པ། །དེར་བདག་སྐད་ཅིག་གཅིག་ལ་འདོར། །ཞེས་གསུངས་ཏེ། དགྲ་གཞན་པས་འདི་གནོད་པ་ཆེ་སྟེ་འདིས་ནི་ཚ་བའི་ཁྱད་པར་རི་རབ་ཀྱང་སྐད་ཅིག་གིས་ སྲེག་ནུས་པའི་དམྱལ་བ་མནར་མེད་པའི་མེ་ལྕེར་ཡང་བདག་ཡུད་ཀྱིས་འདོར་ནུས་སོ། །གསུམ་པ་རྟག་ཏུ་འབྲང་བ་ནི། བདག་གི་ཉོན་མོངས་དགྲ་བོ་གང་། །དུས་རིང་ཐོག་མཐའ་མེད་པ་ལྟར། །དགྲ་གཞན་ཀུན་ཀྱང་དེ་ལྟ་བུར། །ཡུན་རིང་ཐུབ་པ་མ་ ཡིན་ནོ། །ཞེས་གསུངས་ཏེ། དགྲ་གཞན་ནི་ཚེ་རབས་ཐམས་ཅད་རྗེས་སུ་མི་འབྲང་སྟེ་ཤི་འཕོས་ནས་ལས་བཞིན་སོ་སོར་སྐྱེའོ། །ཉོན་མོངས་པ་འདི་ནི་དེ་ལྟ་མིན་ཏེ་སེམས་དང་ཐ་མི་དད་པར་རྗེས་སུ་འབྲང་ངོ་། །བཞི་པ་བསྟེན་དུ་མི་རུང་བར་བསྟན་པ་ནི། མཐུན་པར་ རིམ་གྲོ་བསྟེན་བྱས་ན། ཐམས་ཅད་ཕན་དང་བདེ་བྱེད་མོད། །ཉོན་མོངས་རྣམས་ནི་བསྟེན་བྱས་ན། །ཕྱིར་ཞིང་སྡུག་བསྔལ་གནོད་པ་བྱེད། །ཅེས་གསུངས་ཏེ། དགྲ་གཞན་ནི་བསྟེན་ན་ཕན་འདོགས་ཀྱང་ཉོན་མོངས་འདི་ནི་གང་གིས་
Page: 343 ༄༅། །བསྟེན་པ་དེ་ཕུང་བར་བྱེད་དོ། །གཉིས་པ་མི་བཟོད་བསྐྱེད་པ་ནི། དེ་ལྟར་ཡུན་རིང་རྒྱུན་ཆགས་དགྲར་གྱུར་པ། །གནོད་པའི་ཚོགས་རབ་འཕེལ་བའི་རྒྱུ་གཅིག་པུ། །བདག་གི་སྙིང་ལ་ངེས་བར་གནས་འཆའ་ ན། །འཁོར་བར་འཇིགས་མེད་དགའ་བར་ག་ལ་འགྱུར། །འཁོར་བའི་བཙོན་རའི་སྲུང་མ་དམྱལ་སོགས་སུ། །གསོད་བྱེད་གཤེད་མར་གྱུར་པ་འདི་དག་ནི། །གལ་ཏེ་བློ་གནས་ཆགས་པའི་དྲ་བ་ན། །གནས་ན་བདག་ལ་བདེ་བ་ག་ ལ་ཡོད། །ཅེས་གསུངས་ཏེ། དགྲ་དེ་ལྟ་བུ་བདག་གི་སྙིང་ངམ་སེམས་ལ་རྟག་པར་བཞག་ནས་ཡིད་བདེར་འདུག་པ་མི་རིགས་ཏེ་དམྱལ་བའི་གཤེད་མ་ལ་སོགས་པའི་རྒྱུ་ཡང་དགྲ་འདི་ཁོ་ན་ཡིན་ཏེ་འདི་ཡོད་ན་དེ་དག་ཡོད་པའི་ཕྱིར་རོ། གསུམ་པ་ང་རྒྱལ་སྐྱེད་པ་ནི། དེ་ལྟར་ཇི་སྲིད་བདག་གིས་དགྲ་འདི་མངོན་སུམ་དུ། །ངེས་པར་མ་བཅོམ་དེ་སྲིད་བདག་འདིར་བརྩོན་མི་འདོར། །རེ་ཞིག་གནོད་བྱེད་ཆུང་ངུ་ལ་ཡང་ཁྲོས་གྱུར་པའི། །ང་རྒྱལ་བདོ་རྣམས་དེ་མ་བཅོམ་པར་གཉིད་མི་འོང༌། །ཞེས་ གསུངས་ཏེ། སྲོག་ལ་བབ་ཀྱང་འདི་ཡལ་བར་མི་འདོར་བར་འཇོམས་པའི་གོ་ཆ་བསྒོ་བའོ། །གཉིས་པ་སྦྱོར་བས་མི་སྐྱོ་བར་བྱ་བ་ལ་གསུམ། མི་སྦྱོར་བའི་ཉེས་པ་བསྟན། སྦྱོར་བའི་ཕན་ཡོན་གསུམ་བཤད། སྦྱོར་བ་ལྷུར་བླང་བའི་ཐབས་ སོ། །དང་པོ་མི་སྦྱོར་བའི་ཉེས་པ་བསྟན་ནི། རང་བཞིན་འཆི་བས་སྡུག་བསྔལ་གྱུར་པའི་ཉོན་མོངས་དག །གཡུལ་ངོར་དངར་ཚེ་ནན་གྱིས་གཞོམ་པར་འདོད་པ་ཡང་། མདའ་མདུང་མཚོན་གྱིས་ཕོག་པའི་སྡུག་བསྔལ་ཁྱད་བསད་ནས། །དོན་མ་གྲུབ་པར་ཕྱིར་ཕྱོགས་འབྱེར་ བར་མི་བྱེད་ན། །རྟག་ཏུ་སྡུག་བསྔལ་ཀུན་གྱི་རྒྱུར་གྱུར་པ། །རང་བཞིན་དགྲར་ངེས་གཞོམ་བརྩོན་བདག་ལ་དེང་། །སྡུག་བསྔལ་བརྒྱ་ཕྲག་རྒྱུར་གྱུར་གང་གིས་ཀྱང་། །ཡི་ཆད་སྒྱིད་ལུག་མི་འགྱུར་སྨོས་ཅི་དགོས། །ཞེས་གསུངས་ཏེ། རང་
Page: 344 བཞིན་གྱིས་འཆི་བ་སྟེ་མ་བསད་རུང་འཆི་བའོ། །དགྲ་དེ་ལྟ་བུ་ཡང་འཇོམས་ན་ནང་གི་དགྲ་འདི་ལྟ་ཅི་སྨོས་པས་འདི་འཇོམས་པའི་སྡུག་བསྔལ་ཐམས་ཅད་བཟོད་པར་རིགས་པའོ། །གཉིས་པ་ལ་རང་དོན། གཞན་དོན། དམ་བཅའ་མཐར་འབྱིན་ པའོ། །དང་པོ་རང་དོན་ནི། དོན་མེད་དགྲ་ཡིས་རྨ་སྲོལ་གཏོད་པ་ཡང་། །ལུས་ལ་རྒྱན་དང་འདྲ་བར་སྤེལ་བྱེད་ན། །དོན་ཆེན་སྒྲུབ་ཕྱིར་ཡང་དག་བརྩོན་གྱུར་པ། །བདག་ལ་སྡུག་བསྔལ་ཅི་ཕྱིར་གནོད་བྱེད་ཡིན། །ཞེས་པའོ། །གཉིས་པ་གཞན་དོན་ནི། ཉ་པ་ གདོལ་པ་ཞིང་པ་ལ་སོགས་པ། རང་གི་འཚོ་བ་ཙམ་ཞིག་སེམས་པ་ཡང་། །གྲང་དང་ཚ་ལ་སོགས་པའི་གནོད་བཟོད་ན། །འགྲོ་བའི་བདེ་ཕྱིར་བདག་ལྟས་ཅིས་མི་བཟོད། །ཅེས་པའོ། །གསུམ་པ་དམ་བཅའ་མཐར་འབྱིན་པ་ནི། ཕྱོགས་བཅུ་ནམ་མཁའི་མཐས་ གཏུགས་པའི། །འགྲོ་བ་ཉོན་མོངས་ལས་སྒྲོལ་བར། །དམ་བཅས་གང་ཚེ་བདག་ཉིད་ཀྱང་། །ཉོན་མོངས་རྣམས་ལས་མ་གྲོལ་བ། །བདག་གི་ཚོད་ཀྱང་མི་ཤེས་པར། །སྨྲ་བ་ཇི་ལྟར་སྨྱོན་པ་མིན། །ཞེས་པའོ། གསུམ་པ་སྦྱོར་བ་ལྷུར་ བླང་བ་ནི། དེ་ལྟས་ཉོན་མོངས་གཞོམ་པ་ལ། །རྟག་ཏུ་ཕྱིར་མི་ལྡོག་པར་བྱ། །འདི་ལ་ནན་གྱིས་ཞེན་བྱ་ཞིང་། །འཁོན་དུ་བཟུང་ནས་གཡུལ་སྤྲད་དེ། །རྣམ་པ་དེ་འདྲའི་ཉོན་མོངས་པ། །ཉོན་མོངས་འཇོམས་བྱེད་མ་གཏོགས་སོ། ། བདག་ནི་བསྲེགས་ཏེ་བསད་གྱུར་ཏམ། །བདག་གི་མགོ་བོ་བཅད་ཀྱང་སླའི། །རྣམ་པ་ཀུན་ཏུ་ཉོན་མོངས་པའི། དགྲ་ལ་འདུད་པར་མི་བྱའོ། །ཞེས་གསུངས་ཏེ། སྤང་བྱའི་ཉོན་མོངས་ལ་འཁོན་དུ་བཟུང་ནས་འཇོམས་པའི་ཉོན་ མོངས་ཏེ་སྤང་བྱའི་བྱས་པ་དྲན་པའི་འཁོན་འཛིན་འཇོམས་པར་ནུས་པའི་ང་རྒྱལ་གཅིག་ཆར་དུ་འཇོམས་པའི་ཞེ་སྡང་རྣམས་སྐྱེད་དེ། སྤང་བྱའི་ཉོན་མོངས་ཀྱི་དབང་དུ་སྐད་ཅིག་ཀྱང་མི་གཏོང་བའོ། གསུམ་པ་སྤང་ནུས་པར་སྤྲོ་བ་སྐྱེད་པ་ལ། རྟེན་
Page: 345 ༄༅། །གཞན་མེད་པར་བསྟན་པ་དང་། རང་བཞིན་མེད་པར་བསྟན་པའོ། །དང་ཐོ་རྟེན་གཞན་མེད་པར་བསྟན་པ་ནི། ཐ་མལ་དགྲ་བོ་ཡུལ་ནས་ཕྱུང་ཡང་ནི། །ཡུལ་གཞན་དག་ཏུ་གནས་ཤིང་ཡོངས་བཟུང་ནས། །ནུས་པ་བརྟས་ནས་དེ་ནས་ ཕྱིར་ལྡོག་གི། ཉོན་མོངས་དགྲ་ཚུལ་དེ་དང་འདྲ་མ་ཡིན། །ཉོན་མོངས་ཉོན་མོངས་ཤེས་རབ་མིག་གིས་སྤང་། བདག་ཡིད་ལས་བསལ་གང་དུ་འགྲོ་བར་འགྱུར། །གང་དུ་གནས་ནས་བདག་གནོད་བྱ་ཕྱིར་འོང་། །བློ་ཞན་ བདག་ལ་བརྩོན་པ་མེད་པར་ཟད། །ཅེས་གསུངས་ཏེ། དགྲ་གཞན་ལས་འདི་སྤང་བར་སླ་སྟེ་རང་གི་སེམས་ལས་བསལ་ནས་གང་དུ་གནས་ས་མེད་པའི་ཕྱིར་རོ། །གཉིས་པ་ནི། ཉོན་མོངས་རྣམས་ནི་ཡུལ་ན་མི་གནས་དབང་ཚོགས་ ལ་མིན་བར་ནའང་མིན། །དེ་ལས་གཞན་ནའང་མིན་ན་འདི་དག་གར་གནས་འགྲོ་བ་ཀུན་གནོད་བྱེད། །འདི་ནི་སྒྱུ་འདྲ་དེ་ཕྱིར་སྙིང་ལ་འཇིགས་སྤོངས་ཤེས་ཕྱིར་བརྩོན་པ་བསྟེན། །དོན་མེད་ཉིད་དུ་བདག་ལ་དམྱལ་སོགས་རྣམས་སུ་ཅི་ སྟེ་གནོད་པ་བྱེད། །ཅེས་གསུངས་ཏེ། ཤེས་རབ་མིག་གིས་ཇི་ལྟར་སྤང་ན་ཁ་ནང་དུ་ཕྱོགས་ལ་ཉོན་མོངས་པར་སྣང་བའི་ཤེས་པ་དེ་ཉིད་ལ་སོ་སོ་རང་རིག་པས་ལྟོས་ཤིག །དེའི་ངོ་བོ་འམ་རང་བཞིན་ནི་ཇི་ལྟ་བུ་ཞིག་གང་ཞིག་ན་གནས་པ་སོགས་ ལེགས་པར་རྟོགས་ཤིག་དང༌། དེ་ལྟར་བརྟགས་པ་ན་ཡུལ་གཟུགས་སོགས་དྲུག་ལ་མི་གནས་བདག་རྐྱེན་དབང་པོ་དྲུག་ལ་མི་གནས་ཡུལ་དབང་གི་བར་ན་མི་གནས། དེ་ལསགཞན་ནའང་མི་གནས་ཏེ་དེ་ནི་མ་བརྟགས་པའི་དུས་ན་བདེན་པ་ ལྟར་སྣང་བའི་བློ་ཕྱིན་ཅི་ལོག་གི་རང་བཞིན་ཞིག་སྟེ་བརྟགས་པ་ན་བྱུང་སོང་གནས་པ་དང་བྲལ་བ་ཅི་ཡང་མ་ཡིན་པ་ངོ་བོ་ཉིད་ཀྱིས་མ་སྐྱེས་པ་གཟོད་མ་ནས་རྣམ་པར་དག་ཅིང་། འོད་གསལ་བ་ཞིག་སྟེ་འདི་ལ་རང་བཞིན་ཅི་ཡང་མེད་དོ། །དེ་ལྟར་མེད་ Page: 346 ཀྱང་རྐྱེན་ལས་སྐྱེ་བ་ལྟར་སྣང་ལ་དེའི་ཚེ་ཡང་སྐྱེ་བ་མེད་པ་ཉིད་ཀྱིས་འདི་ནི་སྒྱུ་མ་ལྟ་བུའོ། །དེས་ན་འདི་ལྟ་བུ་སྤང་མི་ནུས་སོ་ཞེས་འཇིགས་པར་མི་བྱ་སྟེ་འདིའི་རང་བཞིན་ཤེས་པའི་ཤེས་རབ་གྱིས་བརྩོན་པར་གྱིས་ཤིག་པའོ། །འགྲེལ་ཆེན་ལས་ ནི། ཉོན་མོངས་ནི་ཡུལ་ལ་མི་གནས་ཏེ་ཡུལ་ཡིད་འོང་སོགས་མཐོང་ཡང་དབང་པོ་བསྡམས་པ་རྣམས་ཉོན་མོངས་མི་སྐྱེ་བའི་ཕྱིར་དང་བརྟགས་ན་རྡུལ་ཕྲ་རབ་ཙམ་ཡང་མ་མཐོང་བའི་ཕྱིར། མིག་སོགས་དབང་པོ་ལ་མི་གནས་ཏེ་ཆོས་ལ་སེམས་ པ་ལ་སོགས་པའི་ཚེ་དབང་པོ་ཡོད་ཀྱང་མི་དམིགས་པའི་ཕྱིར། ཡུལ་དབང་གི་དབུས་ནའང་མེད་དེ་སྣང་དུ་རུང་བ་ལས་མ་དམིགས་པའི་ཕྱིར། དེ་དག་ལས་གཞན་ནའང་མེད་དེ་རྩ་བ་མེད་པ་སྟོང་པ་བློ་བུར་བ་ཉིད་དེ་ཡང་དག་པ་མ་ཡིན་པའི་ རྟོག་པ་ཙམ་ལས་བྱུང་བའོ། །འདི་ནི་སྒྱུ་འདྲ་སྟེ། དཔེར་ན། སྒྱུ་མ་ནི་དེའི་རྣམ་པས་སྟོང་ཡང་སྔགས་དང་སྨན་གྱི་མཐུ་ལས་རྐྱེན་འདི་ཙམ་གྱིས་དེ་ཁོ་ན་ཉིད་དུ་མེད་ཀྱང་། གླང་པོ་ཆེ་ལ་སོགས་པའི་རྣམ་པར་སྣང་བ་དེ་བཞིན་དུ་ཉོན་མོངས་པ་འདི་རྣམས་ཀྱང་ཕྱིན་ ཅི་ལོག་གི་རྒྱུ་མཚན་དང་། ཚུལ་བཞིན་མ་ཡིན་པ་ཡིད་ལ་བྱེད་པ་ལས་བྱུང་བ་སྟེ་རྐྱེན་འདི་དག་ཙམ་གྱིས་ཁོ་ན་མེད་པ་ཉིད་སྣང་ངོ་། །དེའི་ཕྱིར་སྙིང་ལ་འཇིགས་པ་སྤོངས་ཏེ་ཉོན་མོངས་པ་རྣམས་ལའོ། །རྣམ་པར་དཔྱད་ན་བརྫུན་པ་འདི་ཅི་ཞིག་ཏུ་རུང་སྟེ་ དེའི་ཕྱིར་བརྩོན་པ་བསྟེན་ཞིག་སྟེ་སྤྲོ་བར་གྱིས་ཤིག་པའོ། །ཤེས་ཕྱིར་ནི་དེ་ཁོ་ན་ཉིད་རབ་ཏུ་འབྱེད་པས་རྟོགས་པའི་དོན་དུའོ། །ཞེས་བཀྲལ་ཏོ། །མཇུག་བསྡུ་བ་ནི། དེ་ལྟར་རྣམ་བསམས་ཇི་སྐད་བཤད་པ་ཡི། །བསླབ་པ་སྒྲུབ་པའི་ཆེད་ དུ་འབད་པར་བྱ། སྨན་པའི་ངག་མ་མཉན་ན་སྨན་དག་གིས། །བཅོས་དགོས་ནད་པ་སོས་པ་ག་ལ་ཡོད། །ཅེས་གསུངས་ཏེ། སྔར་བཤད་པ་དེ་རྣམས་མ་བརྗེད་པར་ཚུལ་བཞིན་བསམས་ནས་བྱང་ཆུབ་སེམས་དང་བསླབ་པ་སྒྲུབ་པ་
Page: 347 ༄༅། །ལ་འབད་པར་བྱས་ན་བྱང་ཆུབ་འཐོབ་ཀྱི་གཞུང་བཀླགས་པ་དང་ཐོས་པའི་ཤེས་རབ་གྱིས་གོ་བ་ཙམ་གྱིས་མི་ཕན་ཏེ་སྨན་དཔྱད་བཀླགས་པས་ནད་མི་སེལ་བ་བཞིན་ནོ། །འདི་ནི་དཀའ་འགྲེལ་ཆུང་ངུར་། བག་ཡོད་ཀྱི་ དོན་བསྡུར་སྦྱར་ལ། འགྲེལ་ཆེན་ལས་ནི། དེ་ལྟར་སྔར་གྱི་ལེའུ་དེ་དག་ཐམས་ཅད་ཀྱི་དོན་བསྡུ་བའི་ཕྱིར། དེ་ལྟར་རྣམ་བསམས་སོགས་ཤློ་ཀ་གཅིག་སྟེ། བསླབ་པ་གང་ཞེ་ན། དཀོན་མཆོག་སྤྲིན་ལས། བདག་སོ་སོ་ཐར་པ་ཁོ་ནས་འཚང་མི་ རྒྱའི་བདག་གིས་མདོ་གཞན་ལས་བྱང་ཆུབ་སེམས་དཔའི་སྤྱོད་པ་དང་བསླབ་པའི་གནས་བཅས་པ་དེ་དག་ལ་བསླབ་པར་བྱའོ། །ཞེས་དང་། འདི་ཉིད་དུ། བདག་གིས་ལུས་དང་ལོངས་སྤྱོད་དང་། །དགེ་བ་དུས་གསུམ་སྐྱེས་པ་རྣམས། ། སེམས་ཅན་ཀུན་ལ་བཏང་བ་དང་། །དེ་སྲུང་དག་པ་སྤེལ་བའོ། །ཞེས་མདོར་བསྡུས་པའོ། །ཡང་བྱང་ཆུབ་སེམས་དཔའི་སོ་སོ་ཐར་པའི་མདོ་ལས། བྱང་ཆུབ་སེམས་དཔས་བསྐལ་པ་བྱེ་བ་ན། ཐ་ན་འདུག་པ་ཙམ་གྱི་བདེ་བ་འདོད་ པའི་སེམས་གཅིག་བསྐྱེད་ནའང་དེ་ལ་མངས་པར་འདུ་ཤེས་པ་བསྐྱེད་པ་སྟེ་དེའི་ཕྱིར་སྨན་པའི་ངག་མ་མཉན་ན། ཞེས་སོགས་གསུངས་ལ། འདིར་མི་ཟད་པ་བརྒྱད་བཅུ། བསླབ་བཏུས་སུ་ཁ་འཕངས་ཤིང་། བསླབ་པ་རྩོམ་པ་ཙམ་འབྲས་བུ་ཆེ་བར་རབ་ཞི་ རྣམ་ངེས་ཀྱི་མདོར་འཕངས་སོ། །བྱང་ཆུབ་སེམས་དཔའི་སྤྱོད་པ་ལ་འཇུག་པ་ལས། བག་ཡོད་བསྟན་པ་སྟེ་ལེའུ་བཞི་པ་རྣམ་པར་ཕྱེ་བའོ། །
ལེའུ་ལྔ་པ། ཤེས་བཞིན་བསྲུང་བ།
[edit]ལེའུ་ལྔ་པ་། ཤེས་བཞིན་སྲུང་བ་། ལེའུ་ལྔ་པ་ལ་ལེའུའི་འབྲེལ་ནི། དཀའ་འགྲེལ་ཆུང་ངུར། དེ་ལྟར་ཕ་རོལ་ཏུ་ཕྱིན་པ་ཐམས་ཅད་ཀྱི་ཐུན་མོང་གི་རང་བཞིན་བག་ཡོད་པ་བཤད་ནས། ད་ནི་སོ་སོའི་རང་བཞིན་འཆད་དོ། །ཞེས་སོ། །དེས་ན་གཉིས་ས་པ་ཕ་རོལ་ཏུ་ཕྱིན་པ་
Page: 348 དྲུག་རེ་རེ་ཞིང་ཉམས་སུ་ལེན་པ་ལ་དྲུག །སྦྱིན་པ་མདོར་བསྡུས་ཏེ་བསྟན། སེམས་སྲུང་པའི་ཚུལ་ཁྲིམས་བཤད། བཟོད་པ། བརྩོན་འགྲུས། བསམ་གཏན། ཤེས་རབ་རྣམས་རེ་རེ་ཞིང་བཤད་པའོ། །དང་པོ་ནི། དཀའ་འགྲེལ་ཆུང་ ངུར། དེ་ཡང་སྦྱིན་པའི་ཕ་རོལ་ཏུ་ཕྱིན་པ་དང་པོར་འཆད་པའི་སྐབས་ཡིན་ཡང་འདིར་མ་བཤད་དེ་གཏོང་བའི་ངོ་བོ་ནི། སེམས་སྐྱེད་པའི་སྐབས་སུ་བདག་གི་ལུས་ལོངས་སྤྱོད་དང་དུས་གསུམ་གྱི་དགེ་བ་ཐམས་ཅད་བཏང་བར་བརྗོད་པས་བཤད་ཟིན་ པའི་ཕྱིར་དང་། སྦྱིན་པ་ཉམས་སུ་ལེན་པའི་སྤྱོད་པ་ནི་སེམས་ཅན་དོན་བྱེད་གྱི་ཚུལ་ཁྲིམས་འཆད་པར་ཟང་ཟིང་དང་ཆོས་ཀྱིས་སེམས་ཅན་བསྡུ་བའི་སྤྱོད་པ་བརྗོད་དགོས་པའི་ཕྱིར། དེས་ན་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའི་རང་བཞིན་དྲན་པ་དང་ ཤེས་བཞིན་སྲུང་བ་འཆད་དོ། །ཞེས་སོ། །འགྲེལ་ཆེན་ལས་ནི། སེམས་བསྐྱེད་པའི་བྱང་སེམས་ཀྱིས་ལུས་བཏང་བ་ཡང་སྲུང་བ་དང་། སྦྱང་བ་དང་། སྤེལ་བ་དག་བྱ་སྟེ་གང་གི་ཕྱིར། སེམས་ཅན་རྣམས་ཀྱི་ཡོངས་སྤྱད་ཕྱིར། །ལུས་ལ་སོགས་པ་སྦྱིན་པར་བྱ། །མ་སྲུངས་ལོངས་ སྤྱོད་ག་ལས་འོང་། །གང་མི་སྤྱོད་པས་ཅི་ཞིག་སྦྱིན། །དེ་བས་སེམས་ཅན་ཡོངས་སྤྱད་ཕྱིར། །དགེ་བའི་བཤེས་གཉེན་མི་བཏང་ཞིང་། །མདོ་སྡེ་དག་ལ་རྟག་ལྟ་བས། །ལུས་ལ་སོགས་པ་སྲུང་བར་བྱ། །ཞེས་བསྟན་ཏོ། ། ལུས་སོགས་སྲུང་བ་ཡང་བསླབ་པ་བསྲུངས་པ་ལས་འགྱུར་གྱི་གཞན་དུ་དམྱལ་བ་ལ་སོགས་པར་ལྟུང་བའི་ཕྱིར། སྡོམ་པ་བཟུང་ནས་གནང་བ་བྱེད་པ་དང་བཀག་པ་མི་བྱེད་པ་ནི་བསླབ་པ་སྲུང་བ་སྟེ་སྲུང་བར་འདོད་པས་ནི་བདག་གི་སེམས་ སྲུང་བར་བྱའོ། །ཞེས་སྦྱིན་པ་གོང་དུ་བཤད་ཟིན་ཅིང་ད་དུང་འཆད་པར་ཡང་འགྱུར་ལ། དེ་ཡང་ལུས་དང་། ལོངས་སྤྱོད་དང་། དགེ་བ་གཏོང་བ་ལ་ཡང་དེ་དག་སྲུང་བ་དང༌། དག་པ་དང་། སྤེལ་དགོས་ལ། དེ་ཡང་ཚུལ་ཁྲིམས་ལ་རག་ལས་པས་དེ་བསྟན་
Page: 349 ༄༅། །ཏོ། །ཞེས་སོ། །དེས་ན་དྲན་ཤེས་བཞིན་གྱི་སྒོ་ནས་སེམས་སྲུང་བའི་ཚུལ་ཁྲིམས་འཆད་པ་ལ་ལྔ། བསླབ་པའི་ངོ་བོ་སེམས་སྲུང་བ། དེའི་ཐབས་དྲན་པ་དང་ཤེས་བཞིན། དེའི་སྤྱོད་པ་ལ་བསླབ་པ། བསླབ་པ་ཕུན་སུམ་ ཚོགས་བྱེད་ཀྱི་ཡན་ལགསེམས་། ཤེས་བཞིན་སྲུང་བའི་མཚན་ཉིད་མདོར་བརྗོད་པའོ། །དང་པོ་བསླབ་པའི་ངོ་བོ་སེམས་སྲུང་བལ་གསུམ། བསྲུངས་པས་ཐམས་ཅད་བསྲུངས་བར་འགྱུར་བ། ཐམས་ཅད་སེམས་ལ་རག་ལས་པར་བསྟན་པ། དེས་ན་སེམས་ སྲུང་བ་ལ་འབད་པའོ། །དང་པོ་སེམས་བསྲུངས་པས་ཐམས་ཅད་བསྲུངས་བར་འགྱུར་བ་ནི། བསླབ་པ་སྲུང་བར་འདོད་པ་ཡིས། །རབ་ཏུ་བསྒྲིམས་ནས་སེམས་སྲུང་སྟེ། སེམས་འདི་སྲུང་བར་མ་བྱས་ན། །བསླབ་པ་སྲུང་བར་ཡོང་མི་ནུས། །སེམས་ཀྱིས་གླང་པོ་ཡན་བཏང་བས། །མནར་ མེད་གནོད་པ་བྱེད་པ་ལྟར། །གླང་ཆེན་མ་ཐུལ་མྱོས་པ་ཡིས། །འདི་ན་དེ་འདྲའི་གནོད་མི་བྱེད། །ཀུན་ནས་དྲན་པའི་ཐག་པ་ཡིས། །སེམས་ཀྱི་གླང་པོ་དམ་བཏགས་ན། །འཇིགས་པ་ཐམས་ཅད་མེད་འགྱུར་ཞིང་། །དགེ་བ་ཐམས་ཅད་ ལག་ཏུ་འོང་། །སྟག་དང་སེང་གེ་གླང་ཆེན་དྲེད། སྦྲུལ་དང་དགྲ་རྣམས་ཐམས་ཅད་དང་། །སེམས་ཅད་དམྱལ་བའི་སྲུང་མ་དང་། བྱད་མ་དེ་བཞིན་སྲིན་པོ་རྣམས། །སེམས་འདི་གཅིག་པུ་བརྟགས་པ་ཡིས། །དེ་དག་ཐམས་ཅད་བཏགས་ པར་འགྱུར། །སེམས་འདི་གཅིག་པུ་བཏུལ་བ་ཡིས། །དེ་དག་ཐམས་ཅད་ཐུལ་བར་འགྱུར། །ཞེས་གསུངས་ཏེ། ཚིགས་བཅད་དང་པོས་མདོར་བསྟན། གཉིས་པས་སེམས་མ་ཐུལ་བ་ཉེས་པའི་འབྱུང་ཁུངས་སུ་བསྟན། གསུམ་པས་ སེམས་ཐུལ་བ་ཡོན་ཏན་གྱི་འབྱུང་ཁུངས་སུ་བསྟན། དེ་ནས་གཉིས་ཀྱིས་སེམས་བཏུལ་བས་འཇིགས་པ་ཐམས་ཅད་ཐུལ་བར་བསྟན་པའོ། །འགྲེལ་ཆེན་ལས། དྲན་པ་དེ་ཉིད་ནི་ཐག་པ་དང་འདྲ་བ་སྟེ་འཆིང་བའི་ཐབས་ཡིན་པའི་ཕྱིར།
Page: 350 ཀུན་ནས་ནི་རྣམ་པ་ཐམས་ཅད་དུ་སྟེ་དམ་པ་མ་ཡིན་པའི་ཕྱོགས་ལ་འཇུག་པ་འགེགས་པའི་ཕྱིར་རོ། །སྟག་སོགས་ཀྱི་གནོད་པ་ཡང་ལས་ཀྱིས་བསྐྱེད་ལ། ལས་ཀྱང་སེམས་ཡིན་ཏེ་སེམས་པ་ལས་ཡིན་ལ། ཞེས་གསུངས་ཤིང་། ངག་དང་ལུས་ཀྱི་ ལས་ཀྱང་སེམས་ཉིད་ཀྱིས་ཀུན་ནས་སློང་བའི་ཕྱིར། དེ་མེད་པར་དེ་དག་མི་འབྱུང་བས་བསམ་པའི་ལས་ཞེས་བརྗོད་པའི་ཕྱིར། ལས་ལས་འཇིག་རྟེན་སྣ་ཚོགས་སྐྱེས། །ལས་ནི་སེམས་པ་དང་དེས་བྱས། །སེམས་པ་ཡིད་ཀྱི་ལས་ ཡིན་ཏེ། །དེས་བསྐྱེད་ལུས་དང་ངག་གི་འོ། །ཞེས་སོ། །གནོད་སེམས་མེད་ན་ནི་སུ་ཡང་གནོད་པ་མི་བྱེད་དེ། འཇིག་རྟེན་ན་ནི་སྡིག་པའི་སེམས། །མེད་ལ་སྡང་དང་འཇིགས་པ་མེད། གང་གིས་སེམས་ནི་དབང་བྱས་པ། དེ་ཡི་བདེ་བ་ཉམས་ པ་མེད། །དེའི་ཕྱིར་འདི་སྐད་དུ། སེམས་དུལ་བ་ནི་ལེགས་པ་སྟེ། སེམས་དུལ་བས་ནི་བདེ་བ་འཐོབ། །ཅེས་གསུངས་སོ། །ཞེས་སོ། །གཉིས་པ་ཐམས་ཅད་སེམས་ལ་རག་ལས་པར་བསྟན་པ་ལ་གཉིས། ཉེས་པ་ཐམས་ཅད་སེམས་ལ་རག་ལས་པ་དང་། ཡོན་ཏན་ཐམས་ཅད་སེམས་ ལ་རག་ལས་པའོ། །དང་པོ་ཉེས་པ་ཐམས་ཅད་སེམས་ལ་རག་ལས་པ་ནི། འདི་ལྟར་འཇིགས་པ་ཐམས་ཅད་དང་། །སྡུག་བསྔལ་དཔག་ཏུ་མེད་པ་ཡང་། སེམས་ལས་བྱུང་བ་ཡིན་ནོ་ཞེས། །ཡང་དག་གསུང་བ་ཉིད་ཀྱིས་བསྟན། །སེམས་ཅན་དམྱལ་བའི་མཚོན་ཆ་ རྣམས། །སུ་ཞིག་གིས་ནི་ཆེད་དུ་བྱས། །ལྕགས་སྲེག་ས་གཞི་སུ་ཡིས་བྱས། །མེ་སོགས་དེ་དག་གང་ལས་བྱུང་། །དེ་འདྲ་དེ་དག་ཐམས་ཅད་ཀྱང་། །སྡིག་སེམས་བྱུང་བར་ཐུབ་པས་གསུངས། །དེ་ལྟར་འཇིག་རྟེན་གསུམ་པོ་ན། ། སེམས་ལས་འཇིགས་པ་གཞན་འགའ་མེད། །ཅེས་གསུངས་ཏེ། ཚིགས་བཅད་དང་པོས་ལུང་དང་སྦྱར། ཚིག་རྐང་དྲུག་གིས་གནོད་པ་ཐམས་ཅད་སྡིག་སེམས་ཀྱི་འཁྲུལ་སྣང་དུ་བསྟན། ཚིག་རྐང་གཉིས་ཀྱིས་དོན་བསྡུས་པའོ། །
Page: 351 ༄༅། །དེ་ཡང་འགྲེལ་ཆེན་ལས། དངོས་པོའི་དེ་ཁོ་ན་ཉིད་གསུང་པའི་ཕྱིར་ཡང་དག་གསུང་པ་བཅོམ་ལྡན་འདས་ཀྱིས་དཀོན་མཆོག་སྤྲིན་ལས། སེམས་ནི་ཆོས་ཐམས་ཅད་ཀྱི་སྔོན་དུ་འགྲོ་བ་སྟེ་སེམས་ཡོངས་སུ་ཤེས་ན་ ཆོས་ཐམས་ཅད་ཡོངས་སུ་ཤེས་པར་འགྱུར་རོ། །ཞེས་གསུངས་སོ། །གཞན་ཡང་། འཇིག་རྟེན་སེམས་ཀྱིས་ཁྲིད་པ་སྟེ། །སེམས་ཀྱིས་སེམས་ནི་མི་མཐོང་ངོ་། དགེ་འམ་ཡང་ན་མི་དགེ་བའི། །ལས་ནི་སེམས་ཀྱིས་གསོག་པར་བྱེད། སེམས་ནི་མགལ་མེ་བཞིན་དུ་འཁོར། །སེམས་ནི་རླབས་དང་འདྲ་བར་གཡོ། སེམས་ནི་ནགས་ཀྱི་མེ་བཞིན་སྲེག །སེམས་ནི་ཆུ་ཆེན་བཞིན་དུ་བསྐྱོད། །ཅེས་གསུངས་ཏེ། དེ་ལྟར་ཉེ་བར་བརྟགས་པས་སེམས་ལ་དྲན་པ་ཉེ་བར་བཞག་ནས་ གནས་ཏེ་སེམས་ཀྱི་དབང་དུ་མི་འགྲོའོ། །འོན་ཀྱང་དེ་ཡི་དབང་དུ་སེམས་ཉིད་འགྲོ་བར་འགྱུར་ཏེ་དེའི་དབང་དུ་སེམས་གྱུར་པ་ན་ཆོས་ཐམས་ཅད་དབང་དུ་གྱུར་པ་ཡིན་ནོ། །ཞེས་སོ། །སྡིག་སེམས་ཡིན་པར་ཐུབ་པས་གསུངས། །ཞེས་པ་ནི་དྲན་ཉེ་ ལས། སེམས་ནི་དགྲ་དང་དགྲ་ཆེན་ཏེ། །སེམས་ལས་གཞན་པའི་དགྲ་མེད་དེ། །གཙུབ་ཤིང་རང་གིས་རང་སྲེག་ལྟར། །སེམས་ནི་རང་གི་སེམས་ཀྱིས་སྲེག །ཅེས་དང་། འགྲོ་བ་རྣམ་འབྱེད་ཀྱི་མདོ་ལས། ལྕགས་ཀྱིས་གཞི་འབར་ ཞིང་ཚ། །འབར་བའི་མེ་ལྕེས་ཀུན་ནས་ཁྱབ། །ལྕགས་ཀྱི་སོག་ལེ་རྣོན་པོ་ཡིས། །ལུས་གཅིག་ཆ་ཤས་བརྒྱར་གཤེག་པ། །ལུས་ངག་ཡིད་ཀྱི་སྡིག་པ་ཅན། རྣམས་ཀྱི་སེམས་ལས་བྱུང་བ་ཡིན། །ཞེས་དང་། རྡོ་རྗེ་སྙིང་ པོའི་མདོར། འཇམ་དཔལ་སེམས་ཅན་དམྱལ་བ་པ་རྣམས་ནི་ཡོད་པ་མ་ཡིན་པ་ལ་བྱིས་པ་སོ་སོའི་སྐྱེ་བོ་རྣམས་ཀྱི་ཕྱིན་ཅི་ལོག་གིས་བསྒྲུབས་ཏེ་རང་རང་གི་རྣམ་པར་རྟོག་པ་ལས་བྱུང་བའོ། །ཞེས་དང་། ས་བཅུ་པའི་མདོར། ཀྱེ་རྒྱལ་བའི་
Page: 352 སྲས་དག་ཁམས་གསུམ་པོ་འདི་དག་ནི་སེམས་ཙམ་མོ། །ཞེས་སོ། །ལྕགས་བསྲེགས་ས་གཞི་སུ་ཡིས་བྱས། །ཞེས་སོགས་ནི་རིགས་པས་ཀྱང་སྒྲུབ་བཞེད་པ་སྟེ། སྡིག་སེམས་ཀྱི་འཁྲུལ་སྣང་མ་གཏོགས་རང་བཞིན་གྱིས་དེ་ལྟ་བུ་ ཞིག་ཡོད་ན་གོང་དུ་མནར་མེད་ཀྱི་མེ་ལ་རི་རབ་ཀྱང་བྱ་སྒྲོ་བསྲེགས་པའི་ཚོད་ལས་མི་འབྱུང་བར་བསྟན་པ་ལྟར་ས་ཆེན་པོ་འདི་སྐད་ཅིག་གིས་ཀྱང་ཅིས་མི་སྲེགཡང་དེ་དང་ཉེ་བ་ཉིད་དུ་གྲང་བའི་དམྱལ་བའི་ཁྱག་རོམ་གྱི་གཞི་ཇི་ལྟར་གནས། མེ་ནི་བུད་ཤིང་ལ་བལྟོས་ན་དེའི་བུད་ཤིང་གང་ཞིག་ཅེས་རྣམ་པར་དཔྱད་པའོ། །དེས་ན་ཕྱི་རོལ་པ་རྣམས་ཚངས་པའི་ལུང་གིས་གྲུབ་པར་སྨྲ་བ་ལྟ་བུ་མ་ཡིན་ཏེ། འདི་ནི་སོ་སོ་ཡང་དག་པའི་རིག་ངོར་ཡང་སྡིག་སེམས་ཀྱི་སྣང་བ་མེད་བཞིན་དུ་སྣང་ བ་ཁོ་ན་ལས་གཞན་ཅི་ཡང་མ་ཡིན་ནོ། །གཉིས་པ་ཡོན་ཏན་ཐམས་ཅད་སེམས་ཡིན་པར་བསྟན་པ་ནི། སྤྱིར་ཚིགས་བཅད་དགུ་སྟེ། དེ་ལ་ཡང་ཕ་རོལ་ཏུ་ཕྱིན་པ་དྲུག་པོ་རེ་རེ་ཞིང་སེམས་ཡིན་པར་སྟོན་ཏེ། དེ་ཡང་སྦྱིན་པ་སེམས་ལས་གཞན་མ་ ཡིན་པ་ནི། གལ་ཏེ་འགྲོ་བ་དབུལ་བོར་བས། །སྦྱིན་པའི་ཕ་རོལ་ཕྱིན་ཡིན་ན། ད་དུང་འགྲོ་བཀྲེན་ཡོད་ན་སྔོན། །སྐྱོབ་པ་ཇི་ལྟར་ཕ་རོལ་ཕྱིན། །བདོག་པ་ཐམས་ཅད་འབྲས་བཅས་ཏེ། སྐྱེ་བོ་ཀུན་ལ་གཏོང་སེམས་ཀྱིས། ། སྦྱིན་པའི་ཕ་རོལ་ཕྱིན་གསུངས་ཏེ། །དེ་ལྟས་དེ་ནི་སེམས་ཉིད་དོ། །ཞེས་གསུངས་ཏེ། འགྲོ་བ་ཐམས་ཅད་དབུལ་བ་དང་བྲལ་བར་བྱས་པ་སྦྱིན་པའི་ཕར་ཕྱིན་རྫོགས་པའི་ཚད་དུ་ཁ་ཅིག་གིས་སྨྲས་སོ། །འོ་ན་སྔོན་བྱོན་གྱི་སངས་རྒྱས་ཐམས་ ཅད་ཀྱིས་སྦྱིན་པའི་ཕར་ཕྱིན་མ་རྫོགས་པར་ཐལ་ཏེ། ད་དུང་འགྲོ་བ་དབུལ་པོ་སྣང་བའི་ཕྱིར། ཞེས་བཀག་ནས་འོ་ན་ཅི་ཞེ་ན། སེར་སྣ་དང་བྲལ་བས་བདོག་པ་ཐམས་ཅད་ཆགས་མེད་དུ་ཐམས་ཅད་ལ་ཐམས་ཅད་དུ་གཏོང་བའི་བློ་ནི་སྦྱིན་པའི་ཕར་ཕྱིན་གྱི་
Page: 353 ༄༅། །མིང་དུ་འཇོག་སྟེ། དཀོན་མཆོག་སྤྲིན་ལས། སྦྱིན་པའི་ཕ་རོལ་ཏུ་ཕྱིན་པ་གང་ཞེ་ན། བདོག་པ་ཐམས་ཅད་འབྲས་བུ་དང་བཅས་ཏེ་གཞན་ལ་བཏང་བར་སེམས་པའོ། །ཞེས་དང་། ཡེ་ཤེས་རྨད་དུ་བྱུང་བའི་མདོ་ལས། གཏོང་བའི་སེམས་ ཀུན་ཏུ་བསྟེན་པ་དང་གོམས་པར་བྱེད་པ་དང་ལན་མང་དུ་བྱེད་ན་སྦྱིན་པ་ཡོངས་སུ་རྫོགས་པར་འགྱུར་རོ། །ཞེས་སོ། །ཚུལ་ཁྲིམས་སེམས་ཡིན་པ་ནི། ཉ་ལ་སོགས་པ་གང་ཞིག་ཏུ། །དེ་དག་གསོད་མི་འགྱུར་བར་བསྐྲད། །སྤོང་བའི་སེམས་ ནི་ཐོབ་པ་ལས། །ཚུལ་ཁྲིམས་ཕ་རོལ་ཕྱིན་པར་བཤད། །ཅེས་གསུངས་ཏེ། གཞན་གནོད་གཞི་བཅས་མི་བྱའོ་སྙམ་པའི་སྤོང་སེམས་ལ་ཚུལ་ཁྲིམས་སུ་བཤད་དེ། ཚུལ་ཕྱིན་གང་ཞེ་ན། གཞན་ལ་འཚེ་བ་སྤོང་བའི་སེམས་པའོ། །ཞེས་ དང༌། སྔ་མ་ལྟར་སྤོང་བའི་སེམས་ཀུན་ཏུ་བསྟེན་པ་དང་གོམས་པ། ཞེས་སོགས་སོ། །དེས་ན་ཕ་རོལ་ལ་ཕན་པར་གྱུར་ཀྱང་རུང་མ་གྱུར་ཡང་རུང་རང་ཉིད་ཀྱིས་ཕན་པར་བསམས་པའི་ཆ་ནས་དགེ་བར་འཇོག་པ་སྟེ། དཔེར་ན་ཉ་གསོད་ས་ནས་ ཕྱུང་སྟེ་ཆུ་བོ་གཞན་དུ་བཞག་པ་ཙམ་ལ་སྲོག་ཐར་བར་བྱས་པའི་དགེ་བར་འཇོག་མོད་ཀྱང་དེ་སླར་མི་གསོད་པར་ནི་མ་ངེས་ཏེ་དུད་འགྲོ་རྣམས་ནི་དགྲ་བོ་ཁོ་ནའི་ཁྲོད་ན་རྟག་པར་གནས་པ་དང༌། ཆུ་ནང་ན་གནས་པའི་ཕྱིར་དང་། ཆུ་སྲིན་དང༌། སྲམ་དང་ཉ་ལ་སོགས་ པ་ཡང་གཅིག་གི་དགྲ་གཅིག་ཡིན་པས་སོ། །ཉན་ཐོས་ཀྱི་སྡོམ་པ་ལའང་སྲོག་གཅོད་སྤོང་བ་ལྟ་བུ་ཡུལ་སེམས་ཅན་ཐམས་ཅད་ལས་འཐོབ་པར་འཆད་ལ། འདི་ཡང་བདག་གིས་སུ་ཡང་བསད་པར་མི་བྱའོ་སྙམ་པའི་བློར་ཟད་དེ་ལྷ་རྣམས་ དང་ཁམས་གོང་གི་འགྲོ་བ་དང་སྤྱོད་ཡུལ་མི་མཚུངས་པའི་འགྲོ་བ་རྣམས་གསོད་པ་ལྟ་ཞོག་བདག་གིས་བལྟར་ཡང་མེད་མོད་ཀྱང་དེ་དག་ཡང་བསད་པར་མི་བྱའོ་སྙམ་པའི་བློ་དགོས་པའི་ཕྱིར་རོ། །གལ་ཏེ་ཚུལ་ཁྲིམས་སེམས་མ་ཡིན་ཏེ། སྡོམ་
Page: 354 སྡོམ་མིན་བར་མ་ནི་བེམ་པོའི་དབྱེ་བར་བཤད་པའི་ཕྱིར་རོ་སྙམ་ན། དེ་ནི་ཐེག་དམན་གྱི་གཞུང་ལས་ཡིན་གྱི་ཐེག་ཆེན་གྱི་ཚུལ་འདིར་དེ་དག་ལྟ་ཞོག་ཆོས་ཐམས་ཅད་ཀྱང་སེམས་ལས་དོན་གཞན་མ་ཡིན་པ་ཁོ་ནའོ། །འགྲེལ་ཆེན་ལས། སྲོག་གཅོད་ པ་ལ་སོགས་པ་ཁ་ན་མ་ཐོ་བ་ཐམས་ཅད་སྤོང་བའི་སེམས་ཉིད་ནི་ཚུལ་ཁྲིམས་ཡིན་ཏེ་དེའི་རྟེན་དུ་གྱུར་པ་ཕྱི་རོལ་གྱི་ཡུལ་ཟློག་པའི་རང་བཞིན་ནི་མ་ཡིན་ནོ། །གལ་ཏེ་བསད་པ་ལ་སོགས་པའི་ཡུལ་གྱི་དངོས་པོ་མེད་པས་དེ་གསོད་པ་ལ་སོགས་ པ་མེད་པའི་ཕྱིར་ཚུལ་ཁྲིམས་སུ་འགྱུར་རོ་ཞེ་ན། དེའི་ཚེ་ཉ་ལ་སོགས་པ་དང་གཞན་གྱི་བདོག་པ་དང་བུད་མེད་ལ་སོགས་པ་དེ་དག་གང་དུ་མི་མཐོང་བར་འགྱུར་བར་བསྐྲད་པར་བྱ་སྟེ་གཞན་དུ་ན་དེ་དག་གསོད་པ་སོགས་པ་ལ་འཇུག་པས་ན་ཚུལ་ ཁྲིམས་སུ་མི་འགྱུར་རོ། །དེ་ལྟ་མ་ཡིན་པ་དེའི་ཕྱིར་དེ་དག་ཡོད་པ་རྣམས་ལ་ཡང་སྤོང་བའི་སེམས་ནི་འཐོབ་པ་སྟེ་སེམས་ལྡོག་པར་ཡིད་ལ་བྱེད་པ་ནི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པར་འདོད་དེ་དེའི་རང་བཞིན་རིག་པ་རྣམས་འདོད་དོ། །དེ་་བས་ན་ དེ་ཡང་སེམས་ཉིད་ཡིན་ནོ། །ཞེས་བྱུང་བས་ཡུལ་སྤོང་དགོས་སོ་ཞེས་ཟེར་བའི་ཕྱོགས་སྔ་མ་ཞིག་ཀྱང་བྱུང་བར་སྣང་ལ། དེ་ལྟ་ན་སྲོག་གཅོད་པ་སྤོང་བའི་སྔོན་དུ་སེམས་ཅན་ཐམས་ཅད་མི་མཐོང་བའི་སར་སྐྱེལ་བའམ། ཡང་ན་བདག་ཉིད་ཀྱི་མིག་ འབྱིན་དགོས་པས་ཧ་ཅང་ཐལ་བ་ཞིག་གོ །བཟོད་པ་སེམས་ཡིན་པ་ནི། སེམས་ཅན་མི་སྲུན་ནམ་མཁའ་བཞིན། །དེ་དག་གཞོམ་གྱིས་ག་ལ་ལང་། །ཁྲོ་བའི་སེམས་འདི་གཅིག་བཅོམ་ན། །དགྲ་དེ་ཐམས་ཅད་ཆོམས་དང་འདྲ། ། ས་སྟེང་འདི་དག་ཀོས་གཡོག་ཏུ། །དེ་སྙེད་ཀོ་བས་ག་ལ་ལང་། །ལྷམ་ཐིལ་ཙམ་གྱི་ཀོ་བས་ནི། །ས་སྟེང་་ཐམས་ཅད་གཡོགས་དང་འདྲ། །དེ་བཞིན་ཕྱི་རོལ་དངོས་པོ་ཡང་། །བདག་གིས་ཕྱིར་ཟློག་མི་ལང་གིས། །བདག་གི་
Page: 355 ༄༅། །སེམས་འདི་ཕྱིར་ཟློག་བྱའི། །གཞན་རྣམས་བཟློག་གོ་ཅི་ཞིག་དགོས། །ཞེས་གསུངས་ཏེ། དང་པོས་རང་རྒྱུད་ཀྱི་ཁྲོ་བ་འཇོམས་པ། གཉིས་པས་དཔེ་དང་། གསུམ་པས་དགྲ་ཐམས་ཅད་ཐུལ་བར་འགྱུར་བའི་ དོན་དང་སྦྱར་ནས་བསྟན་ཏོ། །དེ་ཡང་གཞན་རྒྱུད་ཀྱི་ཁྲོ་བ་ཞི་བ་བཟོད་པའི་ཕར་ཕྱིན་ནོ་ཞེ་ན། འོ་ན་སྔོན་གྱི་སངས་རྒྱས་རྣམས་བཟོད་པའི་ཕར་ཕྱིན་མ་བརྙེས་པར་འགྱུར་ཏེ་སེམས་ཅན་མི་སྲུན་པ་ད་དུང་རབ་ཏུ་མང་བའི་ཕྱིར། དེས་ན་རང་རྒྱུད་ཀྱི་ཁྲོ་ བ་ཆོམས་པ་བཟོད་ཕྱིན་ཡིན་ཏེ། བཟོད་ཕྱིན་གང་ཞེ་ན། སེམས་ཀུན་ནས་མནར་སེམས་པ་དང་བྲལ་བའོ། །ཞེས་སོ། །དཔེར་ན་ཚེར་མ་ལས་སྐྱོབ་པའི་ཕྱིར་ས་སྟེང་ཀོ་བས་གཡོག་གིས་མི་ལང་མོད་ཀྱང་། ལྷམ་ཐིལ་གྱི་ཀོ་བས་ཚེར་མ་དེ་ཐམས་ཅད༌ ལས༌སྐྱོབ༌ནུས༌པས༌ས༌སྟེང་ཀོ༌བས་གཡོགས་པ་དང་འདྲ་བའི་དོན་གྲུབ་པའི་ཕྱིར། དེ་བཞིན་དུ་གཞན་རྒྱུད་ཀྱི་ཁྲོ་བ་མཐའ་དག་བདག་གིས་ལྡོག་མི་ནུས་ཀྱི་དེའི་ཚེ་རང་རྒྱུད་ཀྱི་ཁྲོ་བ་ཁོ་ན་ཟློག་པར་བྱ་ལ། རང་རྒྱུད་ཀྱི་ཁྲོ་བ་ཞི་ན་གཞན་ཟློག་པར་བྱ་བ་ མེད་དོ། །འགྲེལ་ཆེན་ལས་ནི། གཞན་གནོད་པ་བྱེད་པ་ལ་སོགས་པ་ཡོད་ནའང་སེམས་འཁྲུག་པ་མེད་པ་ཉིད་ནི་བཟོད་པ་ཡིན་ནོ། །ཁྲོ་བ་ལས་སེམས་ལོག་པ་ཉིད་དགྲ་ཐམས་ཅད་བསད་པ་དང་འདྲ་སྟེ་དེས་གནོད་པར་མི་རྩི་བའི་ཕྱིར་དང་ཚེ་རབས་ གཞན་ལ་དགྲ་མི་འབྱུང་བའི་ཕྱིར་རོ། །ཞེས་ཀོ་བའི་དཔེ་བཤད་དོ། །མདོར་ན་བྱང་ཆུབ་སེམས་དཔའ་ལ་ལུས་དང་ལོངས་སྤྱོད་ལ་བསྣུན་པ་དང་ཕྲོགས་པ་ལ་སོགས་པ་བྱས་ཀྱང༌། དེ་ནི་བྱང་ཆུབ་སེམས་དཔའ་ལ་གནོད་པ་མ་ཡིན་ཏེ། ཆོས་ཐམས་ཅད་ རྟེན་ཅིང་འབྲེལ་འབྱུང་གི་གཞན་གྱིར་ཤེས་པས་གང་ཡང་བདག་གི་བར་མ་མཐོང་བའི་ཕྱིར་དང་། ལུས་ལོངས་སྤྱོད་ནི་སེམས་ཅན་ཐམས་ཅད་ལ་བྱིན་ཟིན་པས་ཁོ་རང་དབང་བའི་རྫས་ལ་ཁོ་རང་བསྣུན་འཕྲོག་བྱེད་པ་ལྟར་མཐོང་བའི་ཕྱིར་དང༌།
Page: 356 ཕན་གནོད་ནི་བྱིས་པ་རྣམས་བྱེ་མའི་ཁང་བུ་ལ་ཞེན་པས་དིབ་ན་ངུ་བ་ལྟར་མཐོང་བས་ཆོས་ཐམས་ཅད་ནི་བཞད་གད་ཀྱི་གནས་ཙམ་དུ་ཤེས་པའི་ཕྱིར་དང་། བདག་གིས་ཆེད་དུ་སྦྱིན་པར་བྱ་བ་ཡིན་ན་ཁོ་རང་གིས་བླངས་པ་ནི་ཤིན་ཏུ་ལེགས་པའི་ ཕྱིར་དང་། བཟོད་པའི་དགེ་བའི་བཤེས་གཉེན་དུ་ཤེས་པའི་ཕྱིར་དང་། ལུས་ལོངས་སྤྱོད་སོག་མའི་ཕུང་པོ་ལྟ་བུ་ལས་བཟོད་པའི་ཕ་རོལ་ཏུ་ཕྱིན་པ་ཡིད་བཞིན་གྱི་ནོར་བུ་ལྟ་བུ་འགྲུབ་པས་ཕན་པའི་རབ་ཏུ་མཐོང་བའི་ཕྱིར་དང༌། བཟོད་ པ་སྒོམས་ཤིག་ཅེས་སྟོན་པ་ཙམ་ལས་བཟོད་པ་ལ་དངོས་སུ་སྦྱོར་བ་འདི་ལྟ་བུ་བླ་མས་ཀྱང་མི་ནུས་པའི་ཕྱིར་རོ། །དེས་ན་བྱང་ཆུབ་སེམས་དཔའ་ལ་གནོད་པ་ནི་ཁྲོ་བ་དང་འཁྲུག་པ་ཉིད་ཡིན་ལ་དེ་ནི་བདག་རྒྱུད་ལས་སྐྱེ་བ་ཡིན་གྱི་གཞན་ལས་མི་ འབྱུང་བས་རྐྱེན་ཅིས་ཀྱང་བདག་རྒྱུད་ལ་ཁྲོ་འཁྲུག་གི་སྐབས་མི་འབྱེད་པ་སྟེ། སྐྱེས་རབས་ལས། བྱང་ཆུབ་སེམས་དཔའ་ནགས་སུ་འགྲོ་བ་ན་བུད་མེད་རིན་པོ་ཆེ་ཡང་ཞམ་རིང་དུ་འབྲངས་ཏེ་མ་ཟློག་པས་ཕན་ཚུན་ན་སྡོད་པ་རྒྱལ་པོ་ཞིག་གིས་མཐོང་སྟེ་ཆགས་ པས་དབྲོག་པར་ཡང་འདོད། དྲང་སྲོང་གི་དམོད་པས་ཀྱང་འཇིགས། འདི་འདི་ལ་ཆགས་ན་དམོད་པ་མི་འགྲུབ་བོ་སྙམ་དུ་ཡང་བྱེད་པས་བགམ་པའི་ཕྱིར། ཁྱོད་བུད་མེད་རིན་པོ་ཆེ་འདི་ལྟ་བུ་དང་དགོན་པར་གནས་པ་མི་རིགས་ཏེ་འདི་ལ་འགའ་ཞིག་ གིས་གཙེས་ན་བདག་ལ་ཡང་གྲགས་པ་མ་ཡིན་པར་འགྱུར་རོ། །ཞེས་སྨྲས་པ་ན། རྒྱལ་པོ་ཆེན་པོ་དེ་ཡང་མད་ན། འོན་ཀྱང་། བདག་ལ་གནོད་པ་བྱེད་པ་འདིར་འོངས་ན། ས་རྡུལ་སྟུག་པོ་ཆར་པས་མནན་པ་བཞིན། །བདག་ཉིད་གསོན་བཞིན་ དེ་ནི་ཡོང་མི་བཏང་། །ཞེས་ཞེ་སྡང་ལ་བསམས་ཏེ། དེ་སྐད་སྨྲས་པས། རྒྱལ་པོས་འཕྲོག་པ་པོ་ལ་དེ་སྐད་ཟེར་བར་གོ་ནས་འདི་ལ་དམོད་པ་མེད་དོ་སྙམ་ནས་ཁྱེར་ཏེ་སླར། ཉོན་མོངས་མ་དེ་མཐོང་བཞིན་ཁྱེར་གྱུར་གྱིས། དཀའ་ཐུབ་བསགས་
Page: 357 ༄༅། །པའི་ནུས་པ་ད་སྟོན་ཅིག །ཟེར་བ་ན། བྱང་ཆུབ་སེམས་དཔའས། བདག་གིས་ཁས་འཆེས་དོན་མེད་མ་ཡིན་ཏེ། །བདག་ལ་གནོད་པར་བྱེད་པ་འདིར་བྱུང་ཡང་། །བདག་ཉིད་གསོན་བཞིན་དེ་ནི་ཡོང་མ་བཏང་། ། ཞེས་ཞེ་སྡང་གི་ཉེས་པ་བརྗོད་པས་རྒྱལ་པོ་དུལ་ཏེ་སློབ་མར་གྱུར་པ་ལྟ་བུ་སྟེ། བདག་རྒྱུད་ལས་སྐྱེས་པའི་ཁྲོ་འཁྲུག་སོགས་ལ་གནོད་པར་འཇོག་གི། ཕྱི་རོལ་གྱི་གང་ཟག་དང་། རྐྱེན་གཞན་ལ་ནི་གནོད་པ་ཞེས་མི་བྱའོ། །བརྩོན་འགྲུས་སེམས་ཡིན་ པ་ནི། སེམས་གསལ་གཅིག་སྐྱེད་འབྲས་བུ་གང་། །ཚངས་ལ་སོགས་པ་ཡིན་པ་ལྟར། །ལུས་ངག་བཅས་པའི་འབྲས་བུ་ཡང་། །སྤྱོད་པ་ཞན་པས་དེ་ལྟ་མིན། །ཞེས་གསུངས་ཏེ། མྱང་འདས་ཀྱི་མདོར། མ་སྨད་གཉིས་ ཆུས་ཁྱེར་བ་ན་གཅིག་ལ་གཅིག་བྱམས་པ་དང་ལྡན་པས་དེ་མ་ཤི་ན་རུང་སྟེ་སྙམ་པའི་ངང་དུ་ཚེའི་དུས་བྱས་པས་གཉིས་ཀ་ཚངས་པར་སྐྱེས་པ་ལྟ་བུ་སྟེ། སེམས་གསལ་བ་སྐད་ཅིག་མ་གཅིག་གི་འབྲས་བུ་ཡང་དེ་ལྟ་བུ་ཡིན་ལ། སེམས་ཀྱིས་ལེགས་ པར་མ་ཟིན་པའི་སྤྱོད་པས་ནི་འབྲས་བུ་འབྱིན་དཀའ་བའོ། །དེས་ན་དགེ་བ་ལ་སྤྲོ་ཞིང་བརྩོན་པའི་བློ་ལ་བརྩོན་འགྲུས་སུ་བྱས་པ་སྟེ། བརྩོན་གང་དགེ་ལ་སྤྲོ་བའོ། །ཞེས་འཆད་པར་འགྱུར་རོ། བསམ་གཏན་སེམས་ཡིན་པ་ནི། བཟླས་བརྗོད་དང་ནི་དཀའ་ཐུབ་ཀུན། །ཡུན་རིང་དུས་སུ་སྤྱད་བྱས་ཀྱང་། སེམས་གཞན་གཡེངས་པས་བྱས་པ་ནི། །དེ་ཉིད་རིག་པས་དོན་མེད་གསུངས། །ཞེས་གསུངས་ཏེ། དགེ་བ་ལ་སེམས་རྩེ་གཅིག་པ་ལ་བསམ་གཏན་དུ་གསུངས་ ཀྱི་སེམས་ཡན་པར་བཏང་བའི་ལུས་ངག་གི་སྤྱོད་པ་ནི་དོན་མེད་པ་སྟེ། ཡུམ་ལས། སེམས་གཡེངས་པས་ནི་བདག་གི་དོན་ཡང་འགྲུབ་པར་མི་འགྱུར་ན་གཞན་གྱི་དོན་ལྟ་ཅི་སྨོས། དེའི་ཕྱིར་སེམས་གཡེང་བའི་གོ་སྐབས་ནི་འགའ་ཙམ་ཡང་
Page: 358 དབྱེ་བར་མི་བྱའོ། །ཞེས་སོ། །ཤེས་རབ་སེམས་ཡིན་པ་ནི། གང་གིས་ཆོས་ཀྱི་དོན་པོ་མཆོག །སེམས་ཀྱི་གསང་འདི་མ་ཤེས་ན། །བདེ་འཐོབ་སྡུག་བསྔལ་གཞོམ་འདོད་ཀྱང་། །དེ་དག་དོན་མེད་གྱི་ནར་འཁྱམས། །ཞེས་གསུངས་ཏེ། ཆོས་ཐམས་ཅད་སེམས་ཀྱི་རྗེས་སུ་འབྲང་བའི་ཕྱིར་ཆོས་ཀྱི་གཙོ་བོའོ། །རྟག་ཏུ་འགྲོགས་ཀྱང་རྟོགས་པར་དཀའ་ཞིང་ཐོས་བསམ་སྒོམ་པའི་ཤེས་པས་མི་ཕིགས་ལ་རང་གིས་རང་རྟོགས་པ་ན་འདི་ཙམ་དུ་ཟད་ན། ཅིའི་ཕྱིར་སྔོན་ནས་མི་རྟོགས་སྙམ་ པའི་བློ་སྐྱེ་བར་འགྱུར་བས་ན་སེམས་ཀྱི་གསང་ཞེས་བྱའོ། །འདི་ཞེས་བྱ་བ་ནི་སྐབས་དེར་སློབ་དཔོན་ཉིད་ཀྱིས་ཇི་ལྟར་གཟིགས་པའི་དོན་འདི་ལྟ་བུ་ཞེས་པ་སྟེ་འདི་ཚིག་ད་ལྟ་བ་ལ་འཇུག་པས་སོ། །འདི་མ་ཤེས་པའི་ལམ་ཐམས་ཅད་ནི་ཀུན་ རྫོབ་ཁོ་ནར་ཟད་པས་འཇིག་རྟེན་ལས་འདའ་མི་ནུས་པའི་དོན་ཏོ། །འགྲེལ་ཆེན་དུ། སེམས་བྱིས་པ་རྣམས་ཀྱི་སྤྱོད་ཡུལ་མ་ཡིན་པའི་ཕྱིར་གསང་བའོ། །ཞེས་སོ། །འདི་མ་ཤེས་ན་དོན་མེད་དུ་གྱི་ནར་ཇི་ལྟར་འཁྱམ་ཞེ་ན། ཕྱི་རོལ་པ་རྣམས་ ཀྱིས་མེ་ལྔ་བསྟེན་པ་སོགས་དཀའ་སྤྱད་བརྒྱ་ཕྲག་མང་པོ་བྱེད་མོད་དེ་ངལ་བ་འབྲས་བུར་ཟད་པའི་ཕྱིར་རོ། །དེས་ན་སེམས་སྲུང་བ་ལ་འབད་པར་སྟོན་པ་ནི། དེ་ལྟས་བདག་གི་སེམས་འདི་ནི། །ལེགས་བཟུང་ལེགས་པར་སྲུང་བར་བྱ། ། སེམས་སྲུང་བརྟུལ་ཞུགས་མ་གཏོགས་པ། །བརྟུལ་ཞུགས་མང་པོས་ཅི་ཞིག་བྱ། །མ་གྲངས་གྲོལ་བའི་ཁྲོད་གནས་པས། བསྒྲིམས་ཏེ་རྨ་ཡི་བག་བྱེད་བཞིན། སྐྱེ་བོ་ངན་ཁྲོད་གནས་པས་ཀྱང་། །སེམས་ཀྱི་རྨ་ནི་རྟག་ ཏུ་སྲུང་། །རྨ་ཡི་སྡུག་བསྔལ་ཆུང་ངུ་ཡིས། སྐྲག་པའང་རྨ་ཡི་བག་བྱེད་ན། །བསྡུས་འཇོམས་རིས་འཇོམས་སྐྲག་པ་ཡིས། །སེམས་ཀྱི་རྨ་ལྟ་ཅིས་མི་སྲུང་། །སྤྱོད་པ་འདི་འདྲས་གནས་བྱེད་ན། །སྐྱེ་བོ་ངན་པའི་ཁྲོད་
Page: 359 ༄༅། །གནས་སམ། །བུད་མེད་ཁྲོད་ན་གནས་ཀྱང་རུང་། །སྡོམ་བརྩོན་བརྟན་པ་ཉམས་མི་འགྱུར། །བདག་གི་རྙེད་དང་བཀུར་སྟི་དང་། །ལུས་དང་འཚོ་བ་མེད་སླ་ཞིང་། །དགེ་བ་གཞན་ཡང་ཉམས་སླ་ཡི། །སེམས་ ནི་ནམ་ཡང་ཉམས་མི་བྱ། །ཞེས་གསུངས་ཏེ། དེ་ཡང་ཚིགས་བཅད་དང་པོས་སེམས་སྲུང་བ་མ་གཏོགས་བྱ་བ་གཞན་མེད་པར་བསྟན། གཉིས་པས་སྲུང་ཚུལ་དང་། གསུམ་པས་དེའི་འཐད་པ་བསྟན། བཞི་པས་དེ་ལྟར་སྤྱོད་པ་ལ་ ཉེས་པས་གླགས་མི་རྙེད་པ་དང་། ལྔ་པས་ལུས་སྲོག་དང་དགེ་བ་གཞན་བློས་བཏང་ནས་སེམས་སྲུང་དགོས་པར་བསྟན་ཏོ། །དེས་ན་རང་གི་སེམས་སྲུང་བ་ལས་གཞན་པའི་བརྟུལ་ཞུགས་ཅི་ཡང་བརྩམ་པར་མི་བྱ་སྟེ། སྡོང་རྒྱན་ ལས། བྱང་ཆུབ་སེམས་དཔའི་སྤྱོད་པ་ཐམས་ཅད་ནི་རང་གི་སེམས་ལ་བསྟེན་ཏོ། །ཞེས་དང་། འགྲེལ་ཆེན་དུ། ཆོས་ཡང་དག་པར་སྡུད་པའི་མདོ་དྲངས་པ། བྱང་ཆུབ་སེམས་དཔའ་རྣམ་པར་གནོན་པའི་བློ་གྲོས་ཀྱིས་གསོལ་པ། ཆོས་ཆོས་ ཞེས་དགྱི་བའི་ཆོས་གང་ལགས་པ་དེ་ནི་ཡུལ་ན་མི་གནས་ཕྱོགས་ན་མི་གནས་ཏེ་གཞན་དུ་ན་ཆོས་རང་གི་སེམས་ལ་རག་ལས་པ་ནི་མ་གཏོགས་སོ། །དེ་ལྟ་བས་ན་བདག་གིས་རང་གི་སེམས་ཤིན་ཏུ་བཟུང་བ་དང་ཤིན་ཏུ་སྦྱངས་ཏེ་མཐར་ཐུག་སེམས་ ཐུལ་བ་དང་མཉམ་པར་བརྩམས་པ་དང་ཚར་བཅད་པར་བྱའོ། །དེ་ཅིའི་ཕྱིར་ཞེ་ན། སེམས་གང་ན་མཆིས་པ་དེ་ན་ཡོན་ཏན་དང་ཉེས་པ་རྣམས་མཆིས་ཀྱི། སེམས་མ་མཆིས་པ་ལ་ནི་ཡོན་ཏན་དང་ཉེས་པ་རྣམས་མ་མཆིས་ཏེ། །དེ་ལྟ་བས་ན་བྱང་ཆུབ་སེམས་དཔས་ ཉེས་པ་རྣམས་ལས་སེམས་ཟློག་ནས་ཡོན་ཏན་རྣམས་ལ་འཇུག་སྟེ་དེ་ལྟ་བས་ན་ཆོས་ནི་སེམས་ལ་རག་ལས། བྱང་ཆུབ་ནི་ཆོས་ལ་རག་ལས་ཞེས་དགྱིའོ། །ཞེས་སོ། །མ་གྲངས་པ་ནི་རླངས་པ་མ་ཡོལ་བ་ལྟ་བུ་སྟེ་ཤེད་མ་བྱེ་བའི་དོན་གྱི་བརྡ་རྙིང་
Page: 360 ཡིན་ལ། གྲོལ་བ་ནི་བྱུང་རྒྱལ་ཏུ་བག་མེད་པར་སྤྱོད་པས་མི་སྲུན་པའི་དོན་ཏེ། སྐྱེས་བུ་རྨ་ཅན་ཞིག་བྱིས་པ་རྩེ་བའི་ཁྲོད་ན་གནས་ན་དེ་དག་གིས་ནི་འདིའི་རྨ་ལ་གནོད་ན་མི་རུང་ངོ་ཞེས་མི་བསམ་པར་བྱུང་རྒྱལ་དུ་རྩེ་བས་ན་བདག་ཉིད་རང་གིས་རྨའི་ཟོན་ གྱི་བག་བྱེད་དགོས་པ་ལྟར། རང་བཞིན་གྱིས་ཐོག་མེད་ནས་མ་གྲངས་ཤིང་གྲོལ་བའི་སེམས་ཅན་ཁྱད་པར་སྙིགས་མ་ལས་ཆེས་སྙིགས་པ་འདི་ལྟ་བུའི་དུས་ཀྱི་སེམས་ཅན་གྱི་ནང་ན་གནས་པས་སེམས་ཀྱི་རྨ་སྲུང་བའི་བརྩོན་པ་དཔེ་བས་ཀྱང་བརྒྱ་འགྱུར་ གྱིས་ལྷག་པ་བྱེད་དགོས་ཏེ། ལུས་ཀྱི་རྨ་ནི་རང་བཞིན་གྱིས་ཀྱང་འཚོ་བ་དང་ཤིན་ཏུ་འཇིགས་པ་ཆེ་ཡང་ཤི་ནས་མི་གནོད་ལ། སེམས་ཀྱི་རྨ་ནི་འཚོ་བར་དཀའ་ཞིང་སྐྱེ་བ་ཐམས་ཅད་དུ་རྗེས་སུ་འབྲང་བས་དམྱལ་བ་ལ་སོགས་པར་འཕེན་པའི་ཕྱིར་རོ། །སྤྱོད་ པ་འདིས་ནི་ཞེ་སྡང་གི་ཡུལ་དགྲ་དང་ཆགས་ཡུལ་བུད་མེད་ཀྱི་ནང་སོགས་གང་ན་གནས་ཀྱང་ཆགས་སྡང་གི་ཉེས་པས་མི་གོས་པ་པདྨ་འདམ་ན་གནས་པ་ལྟ་བུར་འགྱུར་ལ། དེས་ན་སེམས་ལ་མི་ཕན་པའི་དགེ་བར་སྣང་བའང་དོར་ཏེ་སེམས་སྲུང་ན་ལུས་སྲོག་ དང་རྙེད་བཀུར་ལྟ་ཅི་སྨོས་ཏེ་ཐམས་ཅད་དོར་ནས་སེམས་སྲུང་བ་ཁོ་ན་ལ་འདེམས་ཅིག་པའོ། །གཉིས་པ་དེའི་ཐབས་དྲན་པ་དང་ཤེས་བཞིན་ལ་གསུམ། མདོར་བསྟན། དྲན་ཤེས་མེད་པའི་སྐྱོན་ལྔ་བཤད། དྲན་པ་སྲུང་ཚུལ་ལོ། །དང་པོ་མདོར་བསྟནནི། སེམས་སྲུང་འདོད་པ་རྣམས་ལ་ ནི། །དྲན་པ་དང་ནི་ཤེས་བཞིན་དག །སྲོག་ལ་བབ་ཀྱང་སྲུངས་ཤིག་ཅེས། །བདག་ནི་དེ་སྐད་འདོམས་པར་བྱེད། །ཅེས་གསུངས་ཏེ། སེམས་སྲུང་བའི་ཐབས་ཅི་ཞེ་ན། བྱང་ཆུབ་ཀྱི་སེམས་མི་བརྗེད་པའི་དྲན་པ་དང་གནང་བཀག་ལས་སྤྱོད་ལམ་ ཐམས་ཅད་དུ་མི་འདའ་བའི་ཤེས་བཞིན་འདི་གཉིས་ནི་སྲོག་ལ་བབ་ཀྱང་མ་ཉམས་པར་སྲུངས་ཤིགཅེས་ཞི་བའི་ལྷ་བདག་ནི་དེ་སྐད་འདོམས་པར་བྱེད་ཀྱི་འདི་ལས་གདམས་ངག་གཞན་གཉིས་པ་མེད་དོ། །ཞེས་པའི་དོན་ཅན་ནོ། །འགྲེལ་ཆེན་ལས།
Page: 361 ༄༅། །ཡང་འདིར་གུས་པ་སྐྱེད་པར་བྱ་བའི་ཕྱིར་བསྟན་བཅོས་མཛད་པོས་སེམས་སྲུང་ཞེས་སོགས་གསུངས་ཏེ། ཐལ་མོ་སྦྱར་ཏེ་གསོལ་བ་འདེབས་སོ། །ཅིའི་དོན་དུ་ཞེ་ན། དྲན་པ་དང་ཤེས་བཞིན་དག་སྟེ་དྲན་པ་འབའ་ཞིག་ ཀྱང་མ་ཡིན་ལ་ཤེས་བཞིན་འབའ་ཞིག་ཀྱང་མ་ཡིན་ནོ། །ཞེས་པ་སྟེ། དང་གི་དོན་དུ་ཕན་ཚུན་དུ་བལྟོས་པས་སོ། །དེ་ལ་དྲན་པ་ནི། གཙུག་ན་རིན་པོ་ཆེའི་མདོ་ལས། དྲན་པ་གང་གིས་ཉོན་མོངས་པ་ཐམས་ཅད་དྲན་པར་མི་འགྱུར་བ་དང་། བདུད་ལས་ཐམས་ཅད་ཀྱི་སྐབས་མི་འབྱེད་པ་དང་། ལམ་ལོག་པའམ་ལམ་ངན་པར་མི་འགྲོ་བ་དང་། དྲན་པ་སྒོ་བ་ལྟ་བུར་གྱུར་པ་གང་གིས་སེམས་དང་སེམས་ལས་བྱུང་བའི་ཆོས་མི་དགེ་བ་ཐམས་ཅད་ཀྱི་སྐབས་མི་འབྱེད་པ་འདི་ནི་ཡང་དག་ པའི་དྲན་པ་ཞེས་བྱའོ། །ཞེས་གསུངས་སོ། །མདོར་ན་དྲན་པ་འདི་ཡིན་ཏེ་གནང་བ་དང་བཀག་པ་གཉིས་ཅི་རིགས་པར་དྲན་པ་ཞེས་བྱའོ། །གང་གི་ཕྱིར་དྲན་པ་མ་བརྗེད་པའོ། །ཞེས་བསྟན་པ་ཡིན་ནོ། །ཤེས་བཞིན་ཡང་ཤེར་ཕྱིན་ལས་ གསུངས་ཏེ་སྤྱོད་ན་ཡང་བདག་སྤྱོད་དོ་ཞེས་རབ་ཏུ་ཤེས་སོ། །འགྲེང་ན་ཡང་བདག་འགྲེང་ངོ་། །འདུག་ན་ཡང་བདག་འདུག་གོ །ཉལ་ན་ཡང་བདག་ཉལ་ལོ་ཞེས་རབ་ཏུ་ཤེས་སོ། །དེའི་ལུས་ཇི་ལྟ་ཇི་ལྟར་གནས་པར་གྱུར་པ་དེ་ལྟ་དེ་ལྟར་རབ་ཏུ་ ཤེས་སོ། །ཞེས་སོགས་གསུངས་ཏེ། ལུས་དང་སེམས་ཀྱི་གནས་སྐབས་ལ། །སོགས་ཀྱིས་འཆད་པར་འགྱུར་རོ། །ཞེས་བཤད་དོ། །གཉིས་པ་དྲན་ཤེས་མེད་པའི་སྐྱོན་ལྔ་བཤད་པ་ལ་ལྔ། དྲན་ཤེས་མེད་པའི་སྐྱོན་བྱ་བ་ལ་མཐུ་ཆུང་བ། ཁྱད་པར་ཤེས་བཞིན་མེད་ པའི་སྐྱོན་ཤེས་རབ་ཕུན་སུམ་ཚོགས་པར་མི་འགྱུར་བ། ཚུལ་ཁྲིམས་ཕུན་སུམ་ཚོགས་པར་མི་འགྱུར་བ། བསགས་པའི་དགེ་བ་འཇིག་པ། མ་བསགས་པའི་དགེ་བ་མི་འགྲུབ་པའོ། །དང་པོ་ནི། ནད་ཀྱིས་དཀྲུགས་པའི་མི་དག་ནི། །
Page: 362 ལས་རྣམས་ཀུན་ལ་མཐུ་མེད་པ། །དེ་བཞིན་རྨོངས་པས་སེམས་དཀྲུགས་པ། །ལས་རྣམས་ཀུན་ལ་མཐུ་མེད་དོ། །ཞེས་གསུངས་ཏེ། དྲན་ཤེས་མེད་པའི་རྨོངས་པས་ནི་བྱ་བ་གང་ཡང་མི་འགྲུབ་པའོ། །གཉིས་པ་ནི། ཤེས་བཞིན་ མེད་པའི་སེམས་ལྡན་པའི། །ཐོས་དང་བསམ་དང་སྒོམ་པ་ཡང་། །གློ་བརྡོལ་བུམ་པའི་ཆུ་བཞིན་དུ། །དྲན་པ་ལ་ནི་དེ་མི་གནས། །ཅེས་གསུངས་ཏེ། བུམ་པ་གློ་བརྡོལ་བར་ཆུ་མི་གནས་པ་ལྟར་ཤེས་བཞིན་མེད་ན་ཐོས་བསམ་ སྒོམ་པ་གང་ཡང་མི་གནས་པའོ། །གསུམ་པ་ཚུལ་ཁྲིམས་ཕུན་སུམ་ཚོགས་པར་མི་འགྱུར་བ་ནི། ཐོས་ལྡན་དད་པ་ཅན་དང་ནི། །བརྩོན་པ་ལྷུར་ལེན་དུ་མ་ཡང་། །ཤེས་བཞིན་མེད་པའི་སྐྱོན་ཆགས་པས། །ལྟུང་བའི་རྙོག་དང་བཅས་པར་འགྱུར། །ཞེས་གསུངས་ཏེ། ཤེས་ བཞིན་མེད་ན་ཐོས་སོགས་ཡོད་ཀྱང་ལྟུང་བ་དང་བཅས་པར་འགྱུར་བའོ། །བཞི་པ་བསགས་པའི་དགེ་བ་འཇིག་པ་ནི། ཤེས་བཞིན་མེད་པའི་ཆོམ་རྐུན་དག །དྲན་པ་ཉམས་པའི་རྗེས་འབྲངས་པས། །བསོད་ནམས་དག་ནི་ཉེར་བསགས་ཀྱང་། །རྐུན་པོས་ཕྲོགས་ བཞིན་ངན་འགྲོར་འགྲོ། །ཞེས་གསུངས་ཏེ། ཤེས་བཞིན་མེད་ན་ཁོང་ཁྲོ་སོགས་སྐྱེ་ལ། དེས་དགེ་བ་འཇོམས་ཏེ། བསྐལ་པ་སྟོང་དུ་བསགས་པ་ཡི། །ཞེས་འཆད་པར་འགྱུར་བའི་ཕྱིར། ལྔ་པ་མ་བསགས་པའི་དགེ་བ་མི་འགྲུབ་པ་ནི། ཉོན་མོངས་ཆོམ་ཀུན་ཚོགས་འདི་ནི། ། གླགས་སྐབས་ཚོལ་བར་བྱེད་པ་སྟེ། །གླགས་རྙེད་གྱུར་ན་དགེ་འཕྲོག་ཅིང་། །བདེ་འགྲོའི་སྲོག་ཀྱང་འཇོམས་པར་བྱེད། །ཅེས་གསུངས་ཏེ། བདག་རྒྱུད་ལ་གནས་པའི་ཉོན་མོངས་པ་ཆོམ་རྐུན་ལྟ་བུ་སྲུང་བ་ལ་ཤེས་བཞིན་གྱི་མེལ་ ཚེ་ལས་གཞན་མེད་པའི་ཕྱིར་རོ། །གསུམ་པ་དྲན་པ་སྲུང་ཚུལ་ནི། དེ་བས་དྲན་པ་ཡིད་སྒོ་ནས། །གུད་དུ་ནམ་ཡང་མི་བཏང་ངོ་། །སོང་ནའང་ངན་སོང་གནོད་པ་དག །དྲན་པར་བྱས་ཏེ་ཉེ་བར་བཞག །བླ་མ་དང་ནི་འགྲོགས་པ་དང་། །མཁན་པོས་
Page: 363 ༄༅། །རྗེས་སུ་བསྟན་པ་དང་། །འཇིགས་པས་སྐལ་ལྡན་གུས་བྱེད་ལ། །དྲན་པ་བདེ་བླག་སྐྱེ་བར་འགྱུར། །སངས་རྒྱས་བྱང་ཆུབ་སེམས་དཔའ་དག །ཀུན་ཏུ་ཐོགས་མེད་གཟིགས་པར་ལྡན། །དེ་དག་ཐམས་ཅད་ སྤྱན་སྔ་ན། །བདག་ནི་རྟག་པར་གནས་སོ་ཞེས། །དེ་ལྟར་ངོ་ཚ་ཤེས་གུས་དང་། །འཇིགས་བཅས་དྲན་པ་རྟག་ཏུ་བཞག །དེས་ནི་སངས་རྒྱས་རྗེས་དྲན་པའང་། །དེ་ལ་ཡང་དང་ཡང་དུ་འབྱུང་། །གང་ཚེ་དྲན་པ་ཡིད་སྒོ་ནས། ། སྲུང་བའི་དོན་དུ་གནས་གྱུར་པ། །དེ་ཚེ་ཤེས་བཞིན་འོང་འགྱུར་ཞིང་། །སོང་བ་དག་ཀྱང་ཕྱིར་འོང་འགྱུར། ཞེས་གསུངས་ཏེ། ཚིགས་བཅད་དང་པོས་དྲན་པ་སྲུང་བ་དངོས་བཤད། གཉིས་པས་དྲན་པ་སྐྱེ་བའི་རྒྱུ་ལྔ་བཤད། གསུམ་པ་དང་བཞི་པས་ཁྱད་པར་གུས་པ་དང་འཇིགས་པ་སྐྱེད་ཚུལ་བཤད། ལྔ་པས་དྲན་པ་བསྲུངས་ན་ཤེས་བཞིན་རང་བཞིན་གྱིས་འོང་བར་བསྟན་ཏོ། །དེ་ཡང་དགེ་བའི་དམིགས་པ་གང་ཡིན་པ་ལས་གཞན་དུ་མ་ཡེངས་པར་བྱས་ ལ་ཅུང་ཟད་ཡེངས་ནའང་དེ་མ་ཐག་ཏུ་ཚོར་བས་སླར་རྩེ་གཅིག་ཏུ་བསྡུ་བ་འདི་ནི་དྲན་པ་སྲུང་བ་དངོས་ཡིན་ལ། དགེ་བའི་བཤེས་གཉེན་ཚུལ་བཞིན་བསྟེན་པ་དང་དེས་སེམས་འདུལ་བའི་གདམས་ངག་གི་གནད་རྗེས་སུ་བསྟན་པ་དང༌། དྲན་པ་ ཉམས་པས་འཇིགས་པ་དང་། རང་བཞིན་གྱིས་རྒྱུད་བཟང་པོ་གོམས་པ་སྐལ་བ་དང་ལྡན་པ་དང་། ལམ་ལ་གུས་པས་བརྩོན་པ་ལྷུར་བྱེད་པ་རྣམས་ལ་ནི་དྲན་པ་བདེ་བླག་ཏུ་སྐྱེ་ཞིང་ཤེས་བཞིན་མི་ཉམས་པའི་རྒྱུའོ། །དེ་ལས་འཇིགས་ པ་དང་གུས་པ་དེ་གང་ཞེ་ན། མིག་ལྡན་གྱི་མདུན་ན་ལོང་བ་འཁོད་བ་ལྟར་སངས་རྒྱས་དང་བྱང་ཆུབ་སེམས་དཔའ་ཞིང་གངྒཱ་ཀླུང་གི་བྱེ་མ་སྙེད་ཀྱི་ཕ་རོལ་དང་མདུན་གྱི་གཞི་འདི་ལ་གཟིགས་པ་དང་གསན་པ་དང་བསམ་པ་མཁྱེན་པ་ལ་རྒྱང་རིང་ཐུང་མི་
Page: 364 མངའ་བ་ཏིང་ངེ་འཛིན་ལས་མ་བཞེངས་པར་ཡང་ཤེས་བྱ་ཐམས་ཅད་ལ་ཡེ་ཤེས་འཇུག་པ་དེ་ཐམས་ཅད་ཀྱི་སྤྱན་སྔ་ན་བདག་རྟག་པར་གནས་ལ་བདག་གི་བསམ་སྤྱོད་ཐམས་ཅད་དེ་རྣམས་ཀྱིས་ཇི་ལྟ་བར་གཟིགས་སོ། །ཞེས་འཇིགས་ཤིང་ངོ་ཚ་ ཤེས་པ་དང་དེ་རྣམས་དང་བསླབ་པ་ལ་གུས་པའི་དྲན་པ་དྲག་ཏུ་སྐྱེད་པའོ། །དེ་ལྟར་བསྒྲུབས་ན་ནི་སངས་རྒྱས་ལ་དམིགས་པའི་བློ་དེ་ཉིད་ལ་སངས་རྒྱས་རྗེས་སུ་དྲན་པ་ཞེས་བྱ་བས་དེ་ཉིད་རྟག་པར་འབྱུང་ཞིང་དྲན་པའི་ས་གཞི་བརྟན་པར་ འགྱུར་ལ། གང་དྲན་པ་མ་ཉམས་པ་དེ་ཉིད་ལ་ཤེས་བཞིན་ཞེས་མིང་དུ་འདོགས་པའི་ཕྱིར་དེ་ལྟ་བུ་ལ་ནི་ཤེས་བཞིན་དཀའ་བ་མེད་པར་སྐྱེའོ། །འགྲེལ་ཆེན་ལས་ནི། གུས་པ་ཞི་གནས་ལ་སྦྱར་ཏེ། ཇི་སྐད་དུ། དྲན་པའི་རྒྱུ་ནི་གུས་པ་དྲག་ པོ་ལས་སྐྱེའོ། །གུས་པ་ཡང་ཞི་གནས་ཀྱི་བདག་ཉིད་ཆེན་པོ་ཁོང་དུ་ཆུད་ནས་ལྷུར་བླང་བ་ལས་སྐྱེ་ཞིང་ཡང་བླ་མ་དང་དམ་པའི་གྲོགས་དང་འགྲོགས་པ་དང་དེའི་གདམས་ངག་ལས་སྤང་བྱས་འཇིགས་པ་དང་བརྙས་པའི་གཉེན་པོའི་ཆོས་ དངོས་པོ་ཀུན་གྱིས་ཕྱོགས་པའི་གུས་པ་དང་ལྡན་ན་སྐྱེའོ། །ངོ་ཚ་ཤེས་གུས་འཇིགས་བཅས་ཞེས་བྱ་བ་ལ་མི་མཐུན་པའི་ཕྱོགས་ལ་འཛེམ་པ་ནི་ངོ་ཚ་ཤེས་པ་དང་བསླབ་པ་ལ་གུས་པ་དང་དེ་ལས་མི་འདའ་བར་འཇིགས་པའོ། །ཞེས་འབྱུང་ལ། འདི་ནི། དེ་ལྟར་ངོ་ཚ་ཤེས་གུས་དང༌། །འཇིགས་བཅས་དྲན་པ་རྟག་ཏུ་བཞག །ཅེས་པའི་འབྲུར་སྣང་ཞིང་གོང་མའི་མཚན་ཉིད་ཀྱི་ནུས་པའི་ཟུར་ལ་བརྟགས་ནའང་ངོ་ཚ་ཤེས་པ་འཐོབ་པར་འདུག་ཅིང་ངོ་ཚ་ཤེས་པ་ནི་གུས་འཇིགས་གཉིས་ ཀར་དུ་མི་འདུ་བས་རྒྱ་དཔེ་ལ་ངེས་པར་ཡོད་པ་ཞིག་ལོ་ཙཱ་བས་ཟུར་ཆད་པར་སྣང་ངོ་། །འགྲེལ་ཆེན་གྱི་གུས་པ་ཞི་གནས་སུ་འབྲུ་གཉེར་བ་འདི་ལ་རྟོག་པ་ཕན་ཚུན་བརྟེན་པའི་སྐྱོན་ནི་སྲིད་པར་སྣང་སྟེ་ཞི་གནས་ནི་དྲན་པ་མེད་ན་མི་འབྱུང་ལ།
Page: 365 ༄༅། །འདིར་དྲན་པའི་རྒྱུའི་གཙོ་བོ་ཡང་ཞི་གནས་སུ་བསྟན་པའི་ཕྱིར་རོ། །དེ་ལྟ་མོད་ཀྱི་ཞི་གནས་ལ་གུས་པའི་མཚན་ཉིད་ཡོད་པར་དཀའ་སྟེ་ཞི་གནས་ནི་དགེ་བ་ལ་རྩེ་གཅིག་པའི་བློ་ཉིད་ཡིན་ལ། གུས་པ་སོགས་ནི་དེས་ དྲངས་པའི་སེམས་བྱུང་གི་རྟོག་པ་གཞན་ཡིན་པའི་ཕྱིར་རོ། །གསུམ་པ་དེའི་སྤྱོད་པ་ལ་བསླབ་པ། གཉིས་པ་སེམས་སྲུང་བའི་སྤྱོད་པ་ལ་བསླབ་པ་ལ་གསུམ། ཉེས་སྤྱོད་སྡོམ་པའི་སྤྱོད་པ་ལ་བསླབ་པ། དགེ་བ་ཆོས་སྡུད་ཀྱི་སྤྱོད་པ་ལ་བསླབ་པ། སེམས་ཅན་དོན་བྱེད་ཀྱི་ སྤྱོད་པ་ལ་བསླབ་པའོ། །དང་པོ་ལ་གཉིས། ལུས་སེམས་ཀྱི་ཁ་ན་མ་ཐོ་བ་སྤང་བ་དང་། རྣམ་པར་གཡེང་བ་ཕྲ་མོ་སྤང་བའོ། །དང་པོ་ལུས་ཀྱི་ཁ་ན་མ་ཐོ་བ་སྤང་བ། ལུས་ཀྱི་ཁ་ན་མ་ཐོ་བ་སྤང་བ། སེམས་ཀྱི་ཁ་ན་མ་ཐོ་བ་སྤང་བ། མི་ནུས་པའི་དུས་ བཏང་སྙོམས་སུ་བྱ་བའོ། །དང་པོ་ལུས་ཀྱི་ཁ་ན་མ་ཐོ་བ་སྤང་བ། རེ་ཞིག་དང་པོར་འདི་འདྲའི་སེམས། །འདི་ནི་སྐྱོན་བཅས་ཤེས་བྱས་ནས། །དེ་ཚེ་བདག་གིས་ཤིང་བཞིན་དུ། །ཟུངས་ཐུབ་པར་ནི་གནས་པར་བྱ། །དོན་མེད་གཡེང་བར་ལྟ་བ་ནི། ། ནམ་ཡང་བདག་གིས་མི་བྱ་སྟེ། ངེས་པར་སེམས་པས་རྟག་ཏུ་ནི། །མིག་ནི་ཕབ་སྟེ་བལྟ་བར་བྱ། །བལྟས་པས་ངལ་གསོའི་ཆེད་དུ་ནི། །རེས་འགའ་ཕྱོགས་སུ་བལྟ་བར་བྱ། འགའ་ཞིག་མིག་ལམ་སྣང་གྱུར་ན། །བལྟས་ལ་ འོངས་པ་ལེགས་ཞེས་བརྗོད། །ལམ་སོགས་འཇིགས་པ་བརྟག་པའི་ཕྱིར། །ཡང་དང་ཡང་དུ་ཕྱོགས་བཞིར་བལྟ། ངལ་གསོ་ཁ་ནི་ཕྱིར་བལྟས་ནས། །རྒྱབ་ཀྱི་ཕྱོགས་སུ་བལྟ་བར་བྱ། །མདུན་དང་རྒྱབ་ཏུ་བརྟག་བྱས་ནས། ། འགྲོ་འམ་ཡང་ན་འོང་བྱ་སྟེ། །དེ་ལྟར་གནས་སྐབས་ཐམས་ཅད་དུ། །དགོས་པ་ཤེས་ནས་སྤྱད་པར་བྱ། །ལུས་ཀྱིས་འདི་ལྟར་གནས་བྱ་ཞེས། །བྱ་བ་བསྡོགས་ནས་དེ་ནས་ནི། །སྐབས་སུ་ལུས་འདི་ཇི་ལྟ་བུར། །གནས་པ་ཡིན་ཞེས་
Page: 366 བལྟ་བར་བྱ། །ཞེས་གསུངས་ཏེ། དང་པོས་རྩ་བ་ཀུན་སློང་ལ་བརྟག་པར་བསྟན། གཉིས་པས་དགོས་མེད་དུ་ལྟ་བ་སྤང་། གསུམ་པ་དང་བཞི་པས་དེའི་གནང་བཀག་བསྟན། ལྷག་མས་མདོར་ན་ལུས་ཀྱི་གནས་སྐབས་དོན་མེད་དུ་མི་ བཞག་པ་བསྟན་ཏོ། །དེ་ཡང་རེ་ཞིག་དང་པོར་ཞེས་བྱ་བ་ནི་སྒོ་གསུམ་གྱི་བྱ་བ་གང་རྩོམ་ཡང་དེའི་ཐོག་མར་སེམས་ཀྱི་ཀུན་སློང་ལ་བརྟག་སྟེ་བྱ་བ་དེ་ཅིའི་ཆེད་དུ་བྱེད་པར་འདོད་ཅེས་ཁ་ནང་དུ་ཕྱོགས་ལ་ཤེས་པའི་གནས་སྐབས་ལ་བརྟག་གོ ། བརྟགས་པ་ན་རྙེད་བཀུར་དང་གྲགས་པ་འདོད་པའམ་གཞན་དང་འགྲན་སེམས་སམ་ང་རྒྱལ་ལམ་གཞན་ལ་གནོད་པར་འདོད་པ་སོགས་ཀྱི་ཀུན་སློང་གིས་ཡིན་པར་འདུག་ན། དེ་ནི་སངས་རྒྱས་ཀྱི་བསྟན་པ་ལ་ཆོས་མ་ཡིན་པ་དང་མི་དགེ་བ་ཁོ་ན་ཡིན་ པས་རྣམ་པ་དགེ་བ་ལྟར་སྣང་ཡང་སྤང་བར་བྱ་སྟེ། འདོད་ཆགས་ཞེ་སྡང་གཏི་མུག་གསུམ། །དེས་བསྐྱེད་ལས་ནི་མི་དགེ་བ། །ཞེས་སོ། །རང་དོན་ཞི་བདེ་འདོད་པའི་བློས་ཡིན་ན་ཉན་རང་གི་དགེ་བར་འགྱུར་ཡང་ཐེག་ཆེན་གྱི་མི་དགེ་བ་ཡིན་ཏེ། ངན་སོང་དུ་སྐྱེས་པ་ནི་བྱང་ཆུབ་སེམས་དཔའ་བྱང་ཆུབ་སྒྲུབ་པ་ལ་གཏན་གྱི་གེགས་མ་ཡིན་གྱི་ཉན་རང་གི་བྱང་ཆུབ་ཏུ་ལྷུང་ན་དེ་གཏན་གྱི་གེགས་ཡིན་པར་བཤད་པའི་ཕྱིར། ཀུན་སློང་ངན་པ་དེ་དག་མཐོང་ན་རང་གི་སྐྱོན་རང་གིས་བཟུང་སྟེ་འདི་འདྲ་ བའི་སེམས་འདི་ནི་སྐྱོན་འདི་དང་བཅས་པའོ། །ཞེས་ཤེས་བར་བྱས་ནས་ཀུན་སློང་དེའི་གཉེན་པོ་འཁོར་བའི་ཉེས་དམིགས་སམ། ཚེ་འདི་སྙིང་པོ་མེད་པའམ། ལས་འབྲས་སམ། བྱང་ཆུབ་ཀྱི་སེམས་སོགས་དངོས་གཉེན་དུ་གང་འགྱུར་བ་ཞིག་བསམས་ཏེ་ཀུན་ སློང་ངན་པ་དེ་ཚར་མ་ཆོད་ཀྱི་བར་གྱི་ཚེ་བདག་གི་ལུས་མི་གཡོ་ངག་མི་སྨྲ་ཡིད་ཀྱིས་ལས་གཞན་མི་བྱེད་པར་ཤིང་སྡོང་བཞིན་དུ་ཟུངས་ཐུབ་པར་གནས་པར་བྱ་ལ། ནམ་ཀུན་སློང་དེ་ཚར་ཆོད་ནས་དགེ་བའི་བློར་འགྱུར་ཏེ་སེམས་ལས་རུང་དུ་གྱུར་པ་
Page: 367 ༄༅། །དེའི་ཚེ་ཡང་། སྤང་བྱ་རྐུ་ཐབས་སུ་ལྡང་མི་ལྡང་དང་། ངན་སེམས་དེ་གཏིང་ནས་ཚར་ཆོད་མ་ཆོད་དལ་བུས་བརྟག་པར་བྱ་ལ། ཀུན་སློང་ཁྱད་པར་ཅན་དུ་མཐོང་ཡང་ཏབ་ཏོབ་ཏུ་མི་རྩོམ་པར་རེ་ཞིག་སེམས་བསྡུས་ཤིང་། མཉམ་པར་བཞག་ པས་ཕན་སེམས་དགྲར་ལངས་ཀྱི་ཕྲེང་དུ་མི་ལྟུང་བའི་དགོས་པ་ཡོད་དོ། །འགྲེལ་ཆེན་དུ། དོན་མེད་པ་གཞན་སྤང་པ་ནི་རེ་ཞིག་སོགས་ཏེ། གཟུགས་ལ་སོགས་པའི་ཡུལ་འབྲས་བུ་མེད་པ་འཛིན་པའི་རྟོག་པ་ཐམས་ཅད་ཉེ་བར་བསྡུས་ ལ་བདག་གིས་གནས་པར་བྱའོ། །ཅི་འདྲ་བར་ཞེ་ན། ཤིང་བཞིན་དུ་ཞེས་ཏེ་མིག་ལ་སོགས་པའི་བྱེད་པས་སྟོང་བའི་ཕྱིར་རོ་ཞེས་ཤིང་བཞིན་དུ་ཞེས་པ་སྤྱིར་དབང་པོ་ནང་དུ་བསྡུས་པར་འབྲུ་གཉེར་མོད་ཀྱང་བཤད་པ་ལྷུར་བྱས་པར་ཟད་དེ། འདིར། འདི་ནི་ སྐྱོན་བཅས་ཤེས་བྱས་ནས། །ཞེས་ཀུན་སློང་སྐྱོན་བཅས་དེ་ཚར་གཅོད་པའི་ཕྱིར་ཤིང་བཞིན་དུ་གནས་དགོས་པའི་ཕྱིར་དང་། ཚར་བཅད་པའི་དགོས་པ་ནི་ཚར་ཆོད་དགོས་པའི་ཕྱིར་རོ། །མིག་ཕབ་སྟེ་ལྟ་བ་ནི་རྟག་པར་གཉའ་ཤིང་གང་ཙམ་གྱི་མདུན་ དུ་ལྟ་བ་སྟེ། དེས་འགྲོ་བ་ན་ལམ་ན་སྲོག་ཆགས་ཡོད་མེད་དང་ཚེར་མ་ཡོད་མེད་སོགས་མཐོང་བས་བདག་གཞན་ལ་མི་གནོད། སེམས་ངང་གིས་གནས་པའི་ཕྱིར་ཏེ་དགེ་སློང་གི་འདུལ་བ་ལས་ཀྱང་དེ་སྐད་བཤད་པ་དང་། གཉའ་ཤིང་གང་ཙམ་ ལྟ་ཞིང་འགྲོ་ལ་སེམས་འཁྲུལ་མེད། །ཅེས་ཕྱིར་མི་ལྡོག་པའི་རྟགས་སུ་ཡང་བཤད་པའི་ཕྱིར་རོ། །འོན་ཀྱང་བྱང་ཆུབ་སེམས་དཔའི་སྤྱོད་པ་ནི་བསམ་པས་འབྱེད་དགོས་པས་ཤིན་ཏུ་ཕྲ་བ་ཡིན་ཏེ་གཉའ་ཤིང་གང་ཙམ་དུ་ལྟ་བ་ན་ཡང་གཞན་ གྱིས་དེར་གོ་དགོས་པའི་ཀུན་སློང་ཡད་ཡུད་འདུག་ན་དེ་ཡང་། འདི་ནི་སྐྱོན་བཅས་ཤེས་བྱས་ནས། །ཞེས་བྱ་བའི་ཤེས་པ་དེ་ཡིན་ཏེ་རྣམ་པ་དུ་མས་ཚར་བཅད་པར་བྱའོ། །གཉའ་ཤིང་གང་ཙམ་ལྟ་བས་དུབ་སྟེ་རབ་རིབ་ཏུ་གྱུར་པ་
Page: 368 སོགས་ནི་ངལ་གསོ་བའི་ཆེད་དུ་ཤེས་བཞིན་དང་ལྡན་པས་ཕྱོགས་སུ་དལ་བུས་བལྟ་བར་བྱའོ། །སྤྱིར་བྱང་ཆུབ་སེམས་དཔས་གཟུགས་ལ་ལྟ་བ་ན་སྒྱུ་མ་ལྟ་བུར་ཡིད་ལ་བྱེད་དོ། །སེམས་ཅན་ལ་ལྟ་བ་ན་རུས་པའི་འཕྲུལ་འཁོར་ བསྐྱོད་པ་ཙམ་དང་། སྡུག་བསྔལ་གྱི་རང་བཞིན་ལ་བརྩེ་བ་དང་། ཕ་མར་རམ་དགེ་བའི་བཤེས་གཉེན་གྱི་འདུ་ཤེས་སམ། བདག་གིས་འདི་དག་བྱང་ཆུབ་ལ་དགོད་པར་བྱའོ། །ཞེས་སམ། རྨི་ལམ་མམ། ནམ་མཁའ་ལྟ་བུར་ཡོངས་སུ་ལྟ་ ཞིང་ཡིད་ལ་བྱེད་དོ། །ལྟ་སྟངས་མི་གཡེང་བ་སོགས་ཀྱང་སེམས་སྲུང་བའི་ཆེད་ཡིན་པས་གཟུགས་སོགས་རང་རྒྱུད་པར་ཞེན་ཞིང་དེ་ལ་བརྟེན་ནས་ཆགས་སྡང་རྨོངས་གསུམ་གྱི་རྟོག་པ་ལུ་གུ་བརྒྱུད་དུ་སྐྱེ་བ་རྣམས་མ་ཚོར་མི་འཇོམས་པར་ དང་དུ་ལེན་པས་དུས་འདའ་ན་ལྟ་སྟངས་མི་གཡོ་ན་ཡང་སྙིང་པོ་མེད་དེ། དེས་ན་ཡང་སེམས་ཀྱི་གནས་སྐབས་ཁོ་ན་ལ་བརྟག་པར་བྱའོ། །གཞན་མཐོང་ན་འོངས་པ་ལེགས་སོ། །ཞེས་བརྗོད་པ་ནི་ཕ་རོལ་པོ་མི་དགའ་བ་སྤང་བའི་དོན་ཏེ། ཡུལ་གྲུ་ཁ་ ཅིག་ན་དེ་ལྟར་མ་སྨྲས་ན་འཕྱ་བའི་ཕྱིར་ཡིན་གྱི་རྣམ་པ་ཐམས་ཅད་དུ་ངེས་པར་དགོས་པ་མ་ཡིན་ནོ། །ལམ་སོགས་སུ་འཇིགས་པ་བརྟག་པ་དང་རྒྱབ་ཏུ་ལྟ་བ་སོགས་ཀྱང་དེའི་དགོས་པ་དང་ལྡན་ན་བྱ་སྟེ་ལུས་སྲུང་བའི་ཡན་ལག་ཏུ་འགྱུར་བའོ། ། འགྲེལ་ཆེན་ལས། ཕྱོགས་ཐམས་ཅད་དུ་བལྟ་དགོས་ན་རྒོད་པའི་རྣམ་པ་སྤང་བའི་ཕྱིར་བསྡད་དེ་བལྟའོ། །ཞེས་སོ། །མདོར་ན་དེས་མཚོན་ནས་སྤྱོད་པ་ཐམས་ཅད་ལ་རིགས་འགྲེ་བ་སྟེ། དེ་ལྟར་གནས་སྐབས་ཐམས་ཅད་དུ། །དགོས་པ་ཤེས་ནས་ སྤྱད་པར་བྱ། །ཞེས་བདག་གཞན་ལ་ཕན་པར་མཐོང་ན་ཤེས་བཞིན་དུ་སྤྱད་ཀྱི་མི་ཕན་པ་དང་སྙིང་པོ་མེད་པའི་ལུང་དུ་མ་བསྟན་པ་རྣམས་ཀྱང་འདོར་བའོ། །ལུས་ཀྱིས་འདི་ལྟར་གནས་བྱ་ཞེས། །ཞེས་པ་ནི་མཚོན་པ་སྟེ། ཉིན་ཞག་འདི་
Page: 369 ༄༅། །དང་། ཐུན་འདི་དང་། ཐུན་ཕྱེད་པ་འདི་དང་། ཆུ་ཚོད་འདིའི་ནང་དུ་བདག་གིས་སྒོ་གསུམ་དོན་ཡོད་པ་འདི་ལྟ་བུས་གནས་པར་བྱའོ། །ཞེས་དམ་བཅའི་གོ་བསྒོས་ཏེ་ཤེས་བཞིན་གྱིས་བསྒྲུབ་པར་བྱ་ལ། སྐབས་སུ་གཉེན་པོའི་ཤེས་པ་རྒྱལ་པོའི་ བཀྲབས་པ་དང་། འདྲ་བས་མྱུལ་ཞིང་ཅི་དམ་ལས་འགལ་ལམ་འོན་ཏེ་མ་འགལ་ཅི་ལྟ་བུས་གནས་ཞེས་རྟོག་ཅིང་འགལ་ན་ཚར་གཅོད་པ་དང་། མ་འགལ་ན་རྗེས་སུ་ཡི་རང་བས་གོང་དུ་སྤེལ་བར་བྱའོ། །གཉིས་པ་སེམས་ཀྱི་ཁ་ན་མ་ཐོ་བ་སྤང་བ་ནི། སེམས་ཀྱི་གླང་ཆེན་མྱོས་པ་ནི། ། ཆོས་ལ་སེམས་པའི་ཀ་ཆེན་ལ། །ཇི་ལྟར་བཏགས་པ་མི་འཆོར་བར། དེ་ལྟར་འབད་པས་ཀུན་གྱིས་བརྟག །ཅི་ནས་ཏིང་འཛིན་བརྩོན་པ་ནི། །སྐད་ཅིག་གཅིག་ཀྱང་མི་འཆོར་བར། །བདག་གི་ཡིད་འདི་གར་སྤྱོད་ཅེས། །དེ་ལྟར་ ཡིད་ལ་སོ་སོར་བརྟག །ཞེས་གསུངས་ཏེ། གླང་པོ་ཆེ་ནི་སྟོབས་ཆེ་ཞིང་རང་བཞིན་གྱིས་མི་སྲུན་པ་ཡིན་ལ། དེ་ཆང་གིས་མྱོས་པས་ནི་གནོད་པ་སྣ་ཚོགས་པ་བྱེད་པ་ལྟར་སེམས་ནི་རང་བཞིན་གྱིས་སྟོབས་ཆེ་ཞིང་མི་སྲུན་ལ། ཉོན་མོངས་པའི་ཆང་གིས་ མྱོས་པས་ནི་མི་བྱེད་པ་ཅི་ཡང་མེད་པས་དེ་གདུལ་བའི་ཕྱིར་དྲན་པའི་ལྕགས་ཀྱུས་སྤྱི་བོ་ནས་བཟུང་སྟེ་བཀུག །ཤེས་བཞིན་གྱི་ལིག་ལིང་རིའི་ཐག་པ་སྲ་བ་ལྔ་བརྒྱས་བརྟོད་དེ་ཆོས་ལ་སེམས་པའི་ཀ་བའམ་སྡོང་ཆེན་ལ་བཏགས་ཏེ་ཇི་ལྟར་ནམ་དུ་ཡང་མི་ འཆོར་བར་དམ་དུ་ཐོགས་ཤིག་པའོ། །ཤེས་བཞིན་ཐག་པ་ལྟ་བུ་དེ་ཡང་གང་ཞེ་ན། ཅི་ནས་ཀྱང་ཏིང་ངེ་འཛིན་ལས་བརྩོན་པ་སྐད་ཅིག་ཀྱང་མ་ཡེངས་པར་བྱ་བའི་འཕེན་པ་བཏང་སྟེ་དྲན་པའི་མེལ་ཚེ་བས་ཡང་ཡང་མྱུལ་ཞིང་བརྟག་པའོ། ། དཀའ་འགྲེལ་ཆུང་ངུར། བརྩོན་པ་ཞེས་བྱ་བ་ནི་དགེ་བའི་དམིགས་པ་ལ་རྩེ་གཅིག་ཏུ་གཏོད་པ་ཙམ་ལ་བྱའི་ཞི་གནས་ཐོབ་པ་ནི་མ་ཡིན་ནོ། །ཞེས་སོ། །འགྲེལ་ཆེན་ལས་ནི། སེམས་ཀྱིས་སོ་སོར་བརྟག་པ་ནི་སེམས་ཀྱི་སོགས་ཏེ། ཟླ་ Page: 370 བ་སྒྲོན་མ་ལས། ཉོན་མོངས་མེད་པའི་ཏིང་འཛིན་མྱུར་འཐོབ་སྟེ། །དེ་ནི་ཚུལ་ཁྲིམས་རྣམ་དག་ཕན་ཡོན་ནོ། །ཞེས་སོ། །དེ་བས་ན་ཏིང་ངེ་འཛིན་གྱི་རྒྱུར་གྱུར་པའི་སྦྱོར་བ་ཇི་སྙེད་པ་གང་ཅི་ཡང་རུང་བ་དེ་དག་ནི་ཚུལ་ཁྲིམས་ཀྱི་རྗེས་སུ་སོང་བ་ཡིན་ པར་རིག་པར་བྱའོ། །དེ་ལྟ་བས་ན་ཏིང་ངེ་འཛིན་དོན་དུ་གཉེར་བས་དྲན་པ་དང་ཤེས་བཞིན་གྱི་ངང་ཚུལ་ཅན་དུ་བྱའོ། །དེ་བཞིན་དུ་ཚུལ་ཁྲིམས་དོན་དུ་གཉེར་བས་ཀྱང་ཏིང་ངེ་འཛིན་ལ་ནན་ཏན་དུ་བྱའོ། །ཞེས་སོ། །གསུམ་པ་ནི། འཇིགས་ དང་དགའ་སྟོན་སོགས་འབྲེལ་བས། གལ་ཏེ་མི་ནུས་ཅི་བདེར་བྱ། །འདི་ལྟར་སྦྱིན་པའི་དུས་དག་ཏུ། །ཚུལ་ཁྲིམས་བཏང་སྙོམས་བྱ་བར་གསུངས། །གང་ཞིག་བསམས་ཏེ་བྱར་བརྩམས་པ། དེ་ལས་གཞན་དུ་མི་བསམ་སྟེ། དེར་གཏད་པ་ཡིས་བསམ་པ་ཡིས། །དེ་ཉིད་རེ་ཞིག་བསྒྲུབ་པར་བྱ། །དེ་ལྟ་ན་ནི་ཀུན་ལེགས་བྱས། །གཞན་དུ་གཉི་གར་མི་འགྱུར་རོ། །ཤེས་བཞིན་མ་ཡིན་ཉེ་ཉོན་མོངས། །དེ་ལྟ་ན་ནི་འཕེལ་མི་འགྱུར། །ཞེས་གསུངས་ཏེ། གང་ཡང་རུང་བའི་འཇིགས་པས་གཡེངས་ཏེ་རྟབ་རྟབ་པོར་གྱུར་པ་དང༌། དགའ་སྟོན་གྱི་འདུས་པ་ཆེན་པོར་གྱུར་པས་ཟིང་ཟིང་པོར་སྤྱོད་པ་ལ་སོགས་དང་། དགེ་བའི་གྲོགས་བྱེད་པ་སོགས་གཞན་དོན་དང་འབྲེལ་བས་གཡེངས་ཏེ། དོན་མེད་གཡེང་བར་ ལྟ་བ་ནི། །ནམ་ཡང་བདག་གིས་མི་བྱ་སྟེ། །ཞེས་སོགས་རྩེ་གཅིག་ཏུ་མཉམ་པར་འཇོག་མི་ནུས་ན་ཇི་ལྟར་བྱ་ཞེ་ན། དེའི་ཚེ་ཅི་བདེ་བར་སྤྱོད་པ་སྟེ་མ་ནུས་པ་ལ་ཉེས་མེད་དུ་གསུངས་པའི་ཕྱིར། །འོན་ཀྱང་གནས་སྐབས་གཞན་དུ་མ་ཡིན་ཏེ། འདུལ་བ་ལས། ངས་ཁྱེད་ལ་ཕོངས་པའི་དུས་སུ་གནང་བ་གང་ཡིན་པ་དེ་དེ་ལས་གཞན་དུ་སྤྱད་པར་མི་བྱའོ། །ཞེས་གསུངས་པ་དང་རྒྱུ་མཚན་མཚུངས་པའི་ཕྱིར། གནང་བ་འདི་ཡང་ལུས་ངག་གི་སྤྱོད་པ་ཕྲ་མོ་རྣམས་ཡིན་གྱི་སེམས་ཀྱི་ཀུན་
Page: 371 ༄༅། །སློང་ལ་བརྟག་མི་དགོས་པ་ནི་མ་ཡིན་ཏེ་འོག་ནས་ནན་གྱིས་འཆད་པར་འགྱུར་བའི་ཕྱིར་རོ། དེའི་ཚེ་ལྟུང་མེད་ཀྱི་རྒྱུ་མཚན་ཅི་ཞེ་ན། འདི་ལྟར་སྦྱིན་པའི་དུས་དག་ཏུ་ཚུལ་ཁྲིམས་བཏང་སྙོམས་བྱ་བར་གསུངས་པའི་ ཕྱིར་ཏེ། བློ་གྲོས་མི་ཟད་པའི་མདོར། སྦྱིན་པའི་དུས་སུ་ཚུལ་ཁྲིམས་ཉེ་བར་བསྡུས་ཏེ་བཏང་སྙོམས་སུ་བྱའོ། །ཞེས་སྤྱིར་ཕན་ཡོན་ཆེ་ཆུང་གི་ཁྱད་ཡོད་མོད་ནའང་གཙོ་བོར་སྦྱིན་པ་སྒྲུབ་པའི་ཚེ་དེ་དང་འགལ་བའི་ཚུལ་ཁྲིམས་ཁ་ཅིག་ཀྱང་ བཏང་སྙོམས་སུ་བཞག་ནས་སྦྱིན་པ་སྒྲུབ་པ་སྟེ། སྤྱིར་ལྕགས་དོར་ཏེ་གསེར་ལེན་པར་བྱེད་མོད་ཀྱང་ལྕགས་ཀྱི་ཕུང་པོ་དུ་མ་དང་གསེར་མ་ཤ་ཀ་གཅིག་ནི་ལྕགས་ལ་འདམ་པར་བྱེད་པ་བཞིན་ནོ། །གལ་ཏེ་གཙོ་བོ་ཚུལ་ཁྲིམས་དོར་ནས་གཙོ་བོ་མ་ ཡིན་པའི་སྦྱིན་པ་ལྷུར་བྱེད་པ་མི་རིགས་ཏེ། ཆུང་ངུའི་ཕྱིར་ནི་ཆེ་མི་བཏང༌། །ཞེས་དང་། གོང་ནས་གོང་དུ་ཁྱད་ཞུགས་སྤྱད། །ཅེས་པ་དང་འགལ་ལོ་ཞེ་ན། དེ་ནི་དགག་བྱ་མཉམ་ཞིང་དགོས་པ་མཚུངས་ན་ཕྱི་མ་སྒྲུབ་པའི་དོན་ཡིན་གྱི་འདི་ནི་ ཕྱི་མ་བས་སྔ་མ་དགོས་པ་ཆེ་བ་སྟེ། ཆོས་སྨྲ་བ་མེ་ཏོག་ཟླ་མཛེས་ཀྱི་ཞག་བདུན་པོ་དེར་བསམ་གཏན་ལ་མཉམ་པར་བཞག་པ་བས་རྒྱལ་པོའི་ཕོ་བྲང་འཁོར་དུ་དེ་སྲིད་ཆོས་བསྟན་པ་ཕན་ཡོན་གཞལ་གྱིས་མི་ལང་བ་ཐོབ་པ་དང་། ཁྱེའུ་སྐར་མ་ལོ་ བཞི་ཁྲི་ཉིས་སྟོང་དུ་ཚངས་པར་སྤྱད་པས་དེ་སྲིད་ཀྱི་ཚོགས་མ་བཟླུམས་ལ། ཕྱིས་བུད་མེད་ཀྱི་སྲོག་སྐྱོབ་པའི་སྙིང་རྗེས་ལོ་བཅུ་གཉིས་སུ་ཚངས་སྤྱོད་བཏང་བས་བསྐལ་པ་འབུམ་གྱི་ཚོགས་རྫོགས་པའི་ཕྱིར་རོ། །ཁྱད་པར་འདིར་ནི་གང་ཐོག་མར་བྱ་ བར་བརྩམས་པའི་སྦྱིན་པ་ལྟ་བུ་དེ་སྲོག་ལ་བབ་ཀྱང་དེ་ཉིད་བསྒྲུབ་པར་བྱ་ལ། དེ་གྲུབ་ནས་ཚུལ་ཁྲིམས་ལ་སོགས་པ་གཞན་བརྩམ་པར་བྱའོ། །དེ་ལྟར་བྱས་ན་ཕྱི་མ་ཡང་གདོན་མི་ཟ་བར་གྲུབ་པར་འགྱུར་བས་སྔ་ཕྱི་ཀུན་ལེགས་པར་བྱས་པར་འགྱུར་
Page: 372 གྱི་སྔ་མ་ཡལ་བར་དོར་ནས་ཕྱི་མ་བརྩམས་ན་ཕྱི་མ་ཡང་མི་འགྲུབ་པས་ན་བྱ་བ་གཉིས་ཀ་ལས་ཉམས་པར་འགྱུར་རོ། །དེས་ན་གང་བརྩམས་པ་དེ་མཐར་ཕྱིན་པར་སྒྲུབ་པར་བྱས་ན་ཤེས་བཞིན་མ་ཡིན་པའི་ཉེ་ཉོན་བརྗེད་ངས་དང་ལེ་ལོ་སོགས་སྤོང་ བར་འགྱུར་བའོ། །འགྲེལ་ཆེན་དུ། གཞན་དུ་གཉིས་ཀར་མི་འགྱུར་རོ། །ཤེས་བཞིན་མ་ཡིན་ཉོན་མོངས་ཀྱང་། །དེ་ལྟ་ན་ནི་འཕེལ་བར་འགྱུར། །ཞེས་གཞུང་འདོན་ཏོ། །ལུགས་ཀྱི་བསྟན་བཅོས་ཙ་ན་ཀར་ཡང་། སྔ་མ་མ་ཚར་ གཞན་བསྒྲུབས་ན། གཉི་ཀ་མི་འགྲུབ་ངལ་བའི་གནས། །རྐང་པ་ཡ་གཅིག་མ་ཚུགས་པར། །ཡ་གཅིག་བཏེག་ན་འགྱེལ་བའི་རྒྱུ། །ཞེས་སོ། གཉིས་པ་རྣམ་པར་གཡེང་བ་ཕྲ་མོ་སྤང་བ་ལ་གཉིས། ལུས་ཀྱི་སྤྱོད་པ་སྲུང་བ་དང་། སེམས་ཀྱི་སྤྱོད་པ་སྲུང་བའོ། །དང་པོ་ལུས་ ཀྱི་སྤྱོད་པ་སྲུང་བ་ལ་གསུམ། གཡེང་བ་ལ་དགའ་བ་སྤང་བ། དོན་མེད་ཀྱི་སྤྱོད་པ་སྤང་བ། གཙོ་བོར་སེམས་ཀྱི་ཀུན་སློང་བརྟག་པའོ། །དང་པོ་ནི། བྲེ་མོའི་གཏམ་ནི་སྣ་ཚོགས་དང་། །ངོ་མཚར་ལྟད་མོ་རྣམ་མང་པོ། །ཀུན་ལ་འཇུག་པར་གྱུར་པ་ན། །དེ་ལ་ཆགས་པ་སྤང་ བར་བྱ། །ཞེས་གསུངས་ཏེ། ཀུ་རེ་དང་ཀྱལ་ཀའི་ཚིག་ནི་བྲེ་མོའི་གཏམ་མོ། །སྒྱུ་མ་ལ་སོགས་པ་ངོ་མཚར་བར་གྲགས་པའི་རྩེད་མོ་ལ་ལྟ་བ་འདུས་པ་ནི་ལྟད་མོའོ། །རེ་ཞིག་གཞན་སེམས་སྲུང་བ་སོགས་ཀྱི་དགོས་པའི་དབང་ལས་དེ་དག་ ལ་འཇུག་དགོས་ནའང་ཞེན་པས་མ་ཡིན་གྱི་སེམས་ནང་དུ་བསྡུ་བ་ཉེ་རྒྱལ་གྱིས། ཤི་རྒྱུས་ཤི་བའི་པགས་པ་དང་། །འཆི་འགྱུར་སྐྱེ་བོ་བཞད་གད་མཁན། །འཆི་བའི་སྐྱེ་བོ་ཚོགས་པ་ལ། །བསམ་ཤེས་སུ་ཞིག་སྐྱོ་མི་འགྱུར། །པང་ ནས་སྐྱེས་ཀྱིས། རྒྱན་རྣམས་ཐམས་ཅད་ཁུར་ཡིན་ཏེ། །གར་རྣམས་ཐམས་ཅད་ཐོ་འཚམས་པ། ཀླུ་རྣམས་ཐམས་ཅད་ངུ་བའི་སྒྲ། །དེ་ལ་བསམ་ཤེས་སུ་ཞིག་དགའ། །ཞེས་སྨྲས་པ་ལྟར། དེ་དག་ནི་སྙིང་རྗེའི་གནས་ཡིན་གྱི་དགའ་བའི་
Page: 373 ༄༅། །གནས་མ་ཡིན་པའི་ཕྱིར་རོ། །གཉིས་པ་དོན་མེད་ཀྱི་སྤྱོད་པ་སྤང་བ་ནི། དོན་མེད་ས་རྐོ་རྩྭ་གཅོད་དང་། །ས་རིས་འབྲི་སོགས་བྱེད་གྱུར་ན། །བདེ་གཤེགས་བསླབ་པ་དྲན་བྱས་ནས། །སྐྲག་པས་དེ་ཡི་མོད་ལ་བཏང་། །ཞེས་གསུངས་ཏེ། དགོས་པ་ ཁྱད་པར་བ་མེད་པར་ལག་དལ་གྱིས་ས་རྐོ་བ་དང་རྩྭ་གཅོད་པ་དང་། ས་གཞི་ལ་ས་རིས་འབྲི་བ་སོགས་ནི། སྲོག་ཆགས་ཕྲ་མོ་འཆི་ཞིང་དགེ་སློང་ལ་བཅས་འགལ་ཡང་ཡིན་ཞིང་དོན་མེད་པའི་ཕྱིར། དྲན་མ་ཐག་ནས་དེ་དག་ལ་འཇུག་པར་མི་བྱའོ། །གསུམ་ པ་གཙོ་བོར་སེམས་ཀྱི་ཀུན་སློང་བརྟག་པ་ལ་བཞི། མདོར་བསྟན་པ། ཉོན་མོངས་པའི་སེམས་ཀྱིས་བྱ་བ་ལ་མི་འཇུག་པ། རྒོད་བག་གི་སེམས་ཀྱིས་བྱ་བ་ལ་མི་འཇུག་པ། དོན་བསྡུ་བའོ། །དང་པོ་མདོར་བསྟན་པ་ནི། གང་ཚེ་སྐྱོད་པར་འདོད་གྱུར་ཏམ། སྨྲ་བར་འདོད་པར་གྱུར་ན་ཡང་། ། དང་པོར་རང་གི་སེམས་བརྟགས་ནས། །བརྟན་པར་རིགས་པ་ལྡན་པར་བྱ། །ཞེས་པ་དང་། གཉིས་པ་ཉོན་མོངས་པའི་སེམས་ཀྱིས་བྱ་བ་ལ་མི་འཇུག་པ་ནི། གང་ཚེ་རང་ཡིད་ཆགས་པ་དང་། །ཁྲོ་བར་མཐོང་བ་དེ་ཡི་ཚེ། །ལས་སུ་མི་བྱ་སྨྲ་མི་བྱ། །ཤིང་བཞིན་དུ་ནི་གནས་པར་བྱ། ། ཞེས་པ་དང་། གསུམ་པ་རྒོད་བག་གི་སེམས་ཀྱིས་བྱ་བ་ལ་མི་འཇུག་པ་ནི། རྒོད་དང་ག་ཞར་བཅས་པ་དང་། །གལ་ཏེ་ང་རྒྱལ་རྒྱགས་ལྡན་པའམ། །མཚང་འབྲུ་བ་ཡི་བསམ་པ་དང་། །གལ་ཏེ་སྐྱོར་འབྱིན་སླུ་སེམས་སམ། །གང་ཚེ་བདག་བསྟོད་ལྷུར་ལེན་པའམ། །གཞན་ ལ་སྨོད་པ་ཉིད་དང་ནི། །གཤེ་བཅས་འགྱེད་དང་བཅས་གྱུར་པ། །དེ་ཚེ་ཤིང་བཞིན་གནས་པར་བྱ། །རྙེད་དང་བཀུར་སྟི་གྲགས་འདོད་པའམ། གཡོག་འཁོར་དོན་དུ་གཉེར་འདོད་པའམ། །བདག་སེམས་རིམ་གྲོ་འདོད་གྱུར་ན། ། དེ་ཚེ་ཤིང་བཞིན་གནས་པར་བྱ། །གཞན་དོན་ཡལ་བར་འདོར་བ་དང་། །རང་དོན་གཉེར་བར་འདོད་པ་དང་། སྨྲ་བར་འདོད་པའི་སེམས་བྱུང་ན། །དེར་ནི་ཤིང་བཞིན་གནས་པར་བྱ། །མི་བཟོད་ལེ་ལོའི་འཇིགས་པ་དང་། །དེ་བཞིན་
Page: 374 སྤྱི་ཏོལ་མུ་ཅོར་དང་། །རང་གི་ཕྱོགས་ཞེན་སེམས་བྱུང་ན། །དེར་ནི་ཤིང་བཞིན་གནས་པར་བྱ། །ཞེས་གསུངས་ཏེ། ཀུན་སློང་ཉོན་མོངས་པ་ཅན་གྱིས་བྱ་བ་ལ་མི་འཇུག་པར་མ་ཟད་ཁ་ན་མ་ཐོ་བའི་ཕྱོགས་སུ་གཏོགས་པ་ལང་ཚོ་དང་ ནད་མེད་པ་སོགས་ཀྱིས་རྒྱགས་པས་དབང་པོ་རྒོད་བག་ཅན་དུ་གྱུར་པས་མ་ཞི་བ་དང་། ག་ཞ་སྟེ་བཞད་གད་སྒྲོག་པ་དང་། ང་རྒྱལ་གྱིས་རྒྱགས་པ་དང་། གཞན་ལ་མཚང་འབྲུ་བར་འདོད་པ་དང་། སྐྱོར་འབྱིན་པ་རྩོད་པ་ཞི་བ་ལ་སྐྱོ་བསྔོགས་ བྱ་བར་འདོད་པའམ་གཡོ་སྒྱུས་གཞན་སླུ་བའི་གྱ་གྱུ་བྱ་བར་འདོད་པའམ། བདག་བསྟོད་གཞན་སྨོད་དམ། ལྟ་བ་ལ་རྩོད་པ་ལྟ་བུ་གཤེ་ཞིང་འགྱེད་པའི་དུས་སམ། རྙེད་སོགས་ལ་འདུན་པའི་བློ་འདུག་པ་དང་། གཞན་དོན་འདོར་བ་དང་རང་ དོན་ལ་དམིགས་པའི་བློ་དང་། མི་བཟོད་པ་ཁྲོ་བ་དང་། ལས་སུ་མི་རུང་བའི་ལེ་ལོ་དང་། ངན་པའི་སྤྱོད་པ་བྱེད་པ་སྤྱི་ཏོལ་དང་། དོན་མེད་དུ་སྨྲ་བ་མུ་ཅོར་གྱི་གཏམ་དང་། རང་གི་ཕྱོགས་ཀུན་ནས་འཛིན་པའི་སེམས་ཀྱི་ཀུན་སློང་འདུག་ན་ དེའི་ཚེ་ཤིང་བཞིན་གནས་པར་བྱའོ། །བཞི་པ་དོན་བསྡུ་བ་ནི། དེ་ལྟར་ཀུན་ནས་ཉོན་མོངས་དང་། །དོན་མེད་བརྩོན་པའི་ཡིད་བརྟགས་ནས། །དེ་ཚེ་དཔའ་བོས་གཉེན་པོ་ཡིས། །དེ་ནི་བརྟན་པོར་བཟུང་བར་བྱ། །ཞེས་གསུངས་ཏེ། འདི་ རྣམས་ནི། རེ་ཞིག་དང་པོ་འདི་འདྲའི་སེམས། །ཞེས་པའི་མཚན་ཉིད་རྒྱས་པར་བཤད་པ་ཡིན་པས་དོན་དེ་ཁོ་ན་ལྟར་སྦྱར་བར་བྱའོ། །འགྲེལ་ཆེན་ལས། སྐྱོར་འབྱིན་ནི་གྱ་གྱུ་ཅན་ནམ་སླུ་སེམས་སོ། །གཤེ་བཅས་ནི་གཞན་གྱི་ཚིག་ལ་དམོད་ པའོ། །འགྱེད་པ་ནི་རྟག་ཏུ་འཐབ་པ་དང་རྩོད་པའི་རྒྱུ་མཚན་ལ་སེམས་པ་སྟེ། འདིར་གཉིས་ཀ་ལ་དེ་དང་བཅས་པར་གནས་པ་ཞེས་ཚིག་བསྡུས་པ་ཡིན་ནོ། །རིམ་གྲོ་ནི་རྐང་པ་འཁྲུ་བ་དང་མཉེ་བ་ལ་སོགས་པའོ། །སྤྱི་ཏོལ་ནི་སྤྱིས་བཙན་པའོ། །མུ་ཅོར་སྨྲ་བ་ནི་
Page: 375 ༄༅། །ཚིག་ངན་པ་ཅན་ནམ་རིགས་མི་རིགས་ལ་ལྟོས་པ་མེད་པར་བྱེད་པའོ། །ཞེས་སོ། །དོན་བསྡུ་འདི་ནི། འགྲེལ་ཆེན་ལས། ཕྱིར་བཅོས་སུ་གསུངས་ཏེ་ད་ནི་ཕྱིར་བཅོས་པའི་ཕྱོགས་ཙམ་གསུངས་པ་དེ་ལྟར་སོགས་ཏེ་ ཉོན་མོངས་པའི་དགྲའི་གཡུལ་ལས་རྣམ་པར་རྒྱལ་བར་བྱ་བའི་ཕྱིར་ག་དར་བྱས་པའི་དཔའ་བོ་སྟེ་བྱང་ཆུབ་སེམས་དཔའ་འོ། །གཉེན་པོ་ནི་མི་སྡུག་པ་ལ་སོགས་པའོ། །བྱང་ཆུབ་སེམས་དཔའ་ཁྱིམ་པའི་དབང་དུ་བྱས་ནས། དྲག་ཤུལ་ཅན་ གྱི་མདོར། དེས་འབྲུའི་ཆང་དང་སྦྱར་བའི་ཆང་བག་མེད་པའི་གནས་སྤང་པར་བྱ་སྟེ་སོགས་དང་། རབ་བྱུང་གི་དབང་དུ་བྱས་ནས། དྲན་པ་དང་ཤེས་བཞིན་ནི་མི་གཡེང་བའོ། །ཞེས་སོ། །དེ་བཞིན་གཤེགས་པའི་གསང་བའི་མདོ་ལས། རིགས་ ཀྱི་བུ་བྱང་ཆུབ་སེམས་དཔའི་ངག་ནི་ཆགས་པའམ། སྡང་བའམ། ཉོན་མོངས་པ་ཅན་ནམ། སྐད་ཅིག་གསལ་བར་བྱས་པའམ། རང་གི་ཕྱོགས་བསྟོད་པའི་ཚིག་གམ། གཞན་གྱི་ཕྱོགས་ཚར་བཅད་པའི་ཚིག་གམ། བདག་ལ་བསྟོད་པ་ལ་རྗེས་སུ་ཆགས་པའི་ ཚིག་གམ། གཞན་གྱི་བསྟོད་པ་ལ་གནོད་པའི་ཚིག་གམ། ཁ་འོག་ཏུ་ལུས་འཁྲུས་པར་མི་བྱེད་པའི་ཚིག་གམ། མངོན་པའི་ང་རྒྱལ་གྱིས་ལུང་སྟོན་པའི་ཚིག་ནི་མི་འབྱིན། ཞེས་གསུངས་སོ། །དེ་ལྟར་ན་འབྲས་བུ་མེད་པའི་སྤྱོད་པ་སྤངས་པས་དོན་མེད་པ་ སྤངས་པའི་ཕྱིར། ལུས་སྲུང་བ་བསྟན་པ་ཡིན་ནོ། །ལུས་སྲུང་བ་གང་ཞེ་ན། དོན་མེད་སྤོང་བའོ། །དེ་ཀུན་གང་གིས་འཐོབ་ཅེ་ན། །འབྲས་བུ་མེད་པའི་སྤྱོད་སྤངས་ལས། །དེ་ཡང་རྟག་ཏུ་དྲན་པས་འགྲུབ། །དྲན་པ་གུས་པ་དྲན་ལས་ བྱུང་། །གུས་ནི་ཞི་གནས་བདག་ཉིད་ཅེས། །ཤེས་པར་གྱུར་ནས་བརྟུན་པ་སྐྱེ། །ཞེས་སོ། །གཉིས་པ་སེམས་ཀྱི་སྤྱོད་པ་སྲུང་བ་ནི། ཤིན་ཏུ་ངེས་དང་རབ་དད་དང་། །བརྟན་དང་གུས་དང་ཞེ་སར་བཅས། །ངོ་ཚ་ཤེས་དང་འཇིགས་དང་བཅས། །ཞི་ཞིང་
Page: 376 གཞན་དགའ་བྱེད་ལ་བརྩོན། །ཕན་ཚུན་མི་མཐུན་བྱིས་པ་ཡི། །འདོད་པ་རྣམས་ཀྱིས་མི་སྐྱོ་ཞིང་། །ཉོན་མོངས་སྐྱེས་པས་འདི་དག་གི། །སེམས་འདི་བྱུང་སྙམ་བརྩེར་ལྡན་དང༌། །ཁ་ན་མ་ཐོ་མེད་དངོས་ལ། །བདག་དང་སེམས་ཅན་ དབང་བྱས་ཤིང་། སྤྲུལ་པ་བཞིན་དུ་ང་མེད་པར། །ཡིད་འདི་རྟག་ཏུ་བཟུང་བར་བྱ། །རིང་ཞིག་ལོན་ནས་དལ་བའི་མཆོག །ཐོབ་པ་ཡང་དང་ཡང་བསམས་ནས། །སེམས་དེ་ལྟ་བུར་རི་རབ་ལྟར། །རབ་ཏུ་མི་གཡོ་བཟུང་བར་བྱ། ། ཞེས་གསུངས་ཏེ། འགྲེལ་ཆེན་ལས། ཤིན་ཏུ་ངེས་པ་ནི་ཐེ་ཚོམ་དང་ཕྱིན་ཅི་ལོག་སྤངས་པའོ། །རབ་དད་ནི་རྟག་ཏུ་དགའ་བ་དང་ཡིད་བདེ་མང་བའོ། །བརྟན་པ་ནི་མ་རྟབས་པའོ། །གུས་པ་དང་ཞེ་ས་ནི་བསྙེན་པར་བྱ་བ་རྣམས་ལ་སེམས་འདུད་པ་སྟེ་དེ་དག་ དང་ལྷན་ཅིག་འཇུག་པའོ། །ཞེས་སོགས་སོ། །ཡང་ན་བླང་དོར་གྱི་གནས་ལ་མ་འཁྲུལ་བས་ཤིན་ཏུ་ངེས་པ་དང་། དེ་ཉིད་ལ་རབ་ཏུ་དད་པ་དང་སེམས་བརྟན་པ་དང་། ཡུལ་མཆོག་ལ་ལུས་སེམས་ཀྱིས་གུས་པ་དང་ངག་གིས་ཞེ་སར་བཅས་ པའམ། ཡང་ན་སེམས་ཅན་ཐམས་ཅད་ལ་ཡང་ཡིན་ཏེ་བྱང་ཆུབ་སེམས་དཔས་ཐམས་ཅད་ལ་སྟོན་པ་ལྟ་བུར་ལྟ་བའི་ཕྱིར་རོ། །སྐྱེས་བུ་དམ་པས་ཁྲེལ་དོགས་པའི་ངོ་ཚ་ཤེས་པ་དང་། རྣམ་སྨིན་ལ་འཇིགས་པ་དང་། རང་རྒྱུད་ཞི་བ་དང་། བསྡུ་བ་བཞིས་གཞན་དགའ་བར་བྱེད་པ་ལ་བརྩོན་པ་དང་། བྱིས་པ་རྣམས་ནི་རང་བཞིན་གྱིས་ཕན་ཚུན་མི་མཐུན་པར་གནས་པས་གཅིག་ལ་ཕན་བཏགས་ན་གཅིག་ཤོས་ཁྲོ་བར་བྱེད་པ་སོགས་མགུ་བར་དཀའ་བ་འདོད་པ་ཐ་དད་པ་དེ་ རྣམས་ཀྱིས་མི་སྐྱོ་ཞིང་སེམས་ཅན་འདི་དག་ནི་རང་བཞིན་གྱིས་རྣམ་པར་དག་པ་ཡིན་ལ། སྐྱོན་འདི་དག་ནི་གློ་བུར་གྱི་ཉན་མོངས་པ་འདིས་བསྐྱེད་པར་ཟད་པས་བདག་གིས་འདི་དག་གི་ཉོན་མོངས་པ་བསལ་བར་བྱའོ། །ཞེས་ལྷག་པར་བརྩེ་བ་དང༌།
Page: 377 ༄༅། །སེམས་འཁྲུག་པ་སོགས་ཉོན་མོངས་པ་ཅན་གྱི་ཁ་ན་མ་ཐོ་བ་མེད་པའི་དགེ་བའི་དངོས་པོ་སེམས་ལས་སུ་རུང་བས་བདག་གཞན་དབང་དུ་བྱས་ཏེ་རྟག་པར་གནས་པ་དང་། སྒྱུ་མའི་སྐྱེས་བུའམ་སྤྲུལ་པ་བཞིན་དུ་ང་དང་ང་ཡིར་ ལྟ་བ་མེད་པ་དེ་ལྟ་བུ་ལ་བདག་གི་སེམས་རྟག་ཏུ་གནས་པར་བྱའོ། །མདོར་ན་དལ་འབྱོར་རྙེད་དཀའ་བ་དང་དགེ་བའི་བློ་སྐྱེ་དཀའ་བ་བསམས་ཏེ་ངེས་སོགས་ཀྱི་དགེ་བའི་བློ་ལ་རྐྱེན་ཆུང་འབྲིང་ཆེན་པོ་གང་གིས་ཀྱང་མི་གནོད་པ་རི་རབ་ལྟར་སྲན་ ཚུགས་པར་བྱའོ། །འདི་ལ་དཀའ་འགྲེལ་ཆུང་ངུར། རང་བཞིན་ལ་སྦྱར་བ་དང་། ཉམས་པ་སྲུང་བ་གཉིས། དང་པོ་ལ་ལུས་སེམས་ཀྱི་རང་བཞིན་ལ་སྦྱར་བ་གཉིས་དང་། ཕྱི་མ་ལའང་ལུས་སེམས་ཀྱི་ཉམས་པ་སྲུང་བ་ཞེས་བཤད་ ཀྱང་བཅས་རང་གི་རང་བཞིན་དང་མི་འཁྲུལ་བའི་ཕྱིར་འདི་ལྟར་སྦྱར་རོ། གཉིས་པ་དགེ་བ་ཆོས་སྡུད་ཀྱི་ཚུལ་ཁྲིམས་ལ་གཉིས། ལུས་ལ་མ་ཆགས་པར་དགེ་བ་ལ་སྦྱོར་བ་དང་། དགེ་བ་སྒྲུབ་པའི་སྤྱོད་པ་ལ་བསླབ་པའོ། །དང་པོ་ ལུས་ལྔ། ལུས་ལ་རྟོག་པ་མེད་པར་བསྟན། ལུས་མི་གཙང་བར་བསྟན། སྙིང་པོ་མེད་པར་བསྟན། མཁོ་བ་མེད་པར་བསྟན། དེ་ལྟར་དགོས་པ་མེད་པ་དེ་ཐབས་ཀྱིས་དགོས་པ་ལ་སྦྱོར་ཞིག་པའོ། །དང་པོ་ལུས་ལ་རྟོག་པ་མེད་པར་བསྟནནི། བྱ་རྒོད་ཤ་ ལ་ཆགས་པ་ཡིས། །ཕན་ཚུན་ཀུན་ནས་བཤལ་ཁྲིད་ཀྱང་། །ལུས་ཁྱོད་མི་དགར་མི་བྱེད་ན། །ད་ལྟ་ཅི་ཕྱིར་ཁ་ཏ་བྱེད། །ལུས་འདི་བདག་གིར་བཟུང་བྱས་ནས། །ཡིད་ཁྱོད་ཅི་ཕྱིར་སྲུང་བར་བྱེད། ཁྱོད་དང་འདི་གཉིས་ སོ་སོ་ན། །དེས་ཀོ་ཁྱོད་ལ་ཅི་ཞིག་བྱ། །ཞེས་གསུངས་ཏེ། ལུས་འདི་ནི་རྟོག་པ་མེད་སེམས་པ་མེད་དེ་དུར་ཁྲོད་དུ་བྱ་རྒོད་ཀྱིས་ཕན་ཚུན་དུ་ཐེན་ཤལ་ཁྲིད་ཀྱང་མི་དགའ་བ་དང་སྲུང་བ་མེད་ལ། ཙནྡ་ན་ལ་སོགས་པས་བྱུགས་ཤིང་མཆོད་ཀྱང་དགའ་
Page: 378 བ་མེད་ན་ད་ལྟ་བདག་གི་ལུས་ཞེས་ཅིའི་ཕྱིར་སྲུང་སྟེ་སྲུང་བ་མི་རིགས་པའོ། །སེམས་ཀྱིས་བདག་གིར་བཟུང་བས་ལུས་ལ་གནོད་ན་སེམས་མི་དགའ་འོ་ཞེ་ན། སུའི་ཡང་མ་ཡིན་པའི་བེམས་པོ་འདི་ལ་སེམས་སྟོང་པ་གང་དུ་ཡང་མི་ཐོགས་ པའི་ཤེས་པ་ཙམ་ཁྱོད་བདག་གིར་འཛིན་པ་ཆེས་མི་རིགས་ཏེ་ཤིན་ཏུ་ཐ་དད་པའི་ཕྱིར། དཔེར་ན་བརྒྱ་བྱིན་གྱིས་ཁྱི་རོ་ལ་བདག་གིར་བྱ་མི་རིགས་པ་བཞིན་ནོ། །འགྲེལ་ཆེན་ལས། ལུས་ལ་ནི་རྣམ་པ་ཐམས་ཅད་དུ་གང་དུ་ཡང་བྱེད་པ་མེད་དེ་ བདག་རང་ཉིད་ལ་ཡང་ནུས་པ་མེད་པའི་ཕྱིར། གཞན་དུ་ན་སེམས་དང་བྲལ་བའི་ལུས་བྱ་རྒོད་ཀྱིས་དྲངས་པ་ཅིས་རང་གིས་མི་སྲུང་། ཅི་ཡིད་བདག་ཉིད་མ་ཡིན་པ་ལ་བདག་ཉིད་དུ་ཁས་བླངས་ནས་ཤ་དང་རུས་པའི་ཚོགས་ལུས་ཀྱི་མིང་ཅན་ལ་ ཅིའི་ཕྱིར་སྲུང་བར་བྱེད། ཅེས་སོ། །གཉིས་པ་ལུས་མི་གཙང་བར་བསྟན་ནི། རྨོངས་པའི་ཡིད་ཁྱོད་ཅི་ཡི་ཕྱིར། །ཤིང་གཟུགས་གཙང་མ་གཟུང་མི་བྱེད། མི་གཙང་ཚོགས་ཀྱི་འཁྲུལ་འཁོར་འདི། །རུལ་པ་བསྲུངས་ཏེ་ཅི་ཞིག་རུང་། །ཞེས་གསུངས་ཏེ། སེམས་ ཁྱོད་ཅིས་ཀྱང་བདག་གིར་འཛིན་ན་ཤིང་སྡོང་གཙང་མ་འདི་ལ་བདག་གིར་བྱོས་ཤིག་སྟེ་བདག་གིར་བཟུང་དུ་ཡོད་པ་ཙམ་དང༌། བཟུང་མ་བཟུང་གང་གི་ཚེ་འང་སུའི་ཡང་མ་ཡིན་པ་ལ་ལུས་དང་ཤིང་གཉིས་ཁྱད་མེད་པའི་ཕྱིར་དང་། ཤིང་འདི་མི་གཙང་བ་ སོ་གཉིས་ཀྱི་གོང་བུ་མ་ཡིན་པའི་ཕྱིར་རོ། །གསུམ་པ་སྙིང་པོ་མེད་པར་བསྟན་པ་ནི། ཐོག་མར་པགས་པའི་རིམ་པ་འདི། །རང་གི་བློ་ཡིས་ཐ་དད་ཕྱེ། །ཤ་ཡང་རུས་པའི་དྲ་བ་ལས། ཤེས་རབ་མཚོན་གྱིས་གུད་དུ་ཕྱེ། །རུས་པ་རྣམས་ཀྱང་དབྱེ་བྱས་ནས། ། རྐང་གི་བར་དུ་བལྟ་བྱ་ཞིང་། །འདི་ལ་སྙིང་པོ་ཅི་ཡོད་ཅེས། །བདག་ཉིད་གྱིས་ནི་བརྟག་པར་གྱིས། །དེ་ལྟར་འབད་དེ་བཙལ་ཡང་དེར། ཁྱོད་ཀྱིས་སྙིང་པོ་མ་མཐོང་ན། །ད་དུང་ཅི་ཕྱིར་ཆགས་ཚུལ་གྱིས། །ཁྱོད་ནི་ལུས་འདི་སྲུང་བར་བྱེད། །
Page: 379 ༄༅། །ཅེས་གསུངས་ཏེ། ལུས་འདི་ལ་སྙིང་པོ་སྲ་མཁྲང་ཅན་ཡུངས་འབྲུ་ཙམ་ཡང་ཡོད་པ་མ་ཡིན་ཏེ། གཞན་གྱི་ལུས་ཞིག་པ་དཔེར་གྱིས་ལ་རང་གི་ལུས་ལ་ཡང་སེམས་ཀྱིས་ཚོལ་ཞིག་པའོ། །བཙལ་བས་སྙིང་པོ་མ་རྙེད་ན་ ནི་ཅི་ཞིག་ལ་ཆགས་པར་བྱེད། བཞི་པ་མཁོ་བ་མེད་པར་བསྟན་པ་ནི། ཁྱོད་ཀྱི་མི་གཙང་བཟར་མི་རུང་། །ཁྲག་ཀྱང་བཏུང་དུ་མི་རུང་ལ། །རྒྱུ་ལྟོའང་གཞིབ་ཏུ་མི་རུང་ན། །ལུས་ཀྱིས་ཁྱོད་ལ་ཅི་ཞིག་བྱ། །ཉིས་ན་ཝ་དང་བྱ་རྒོད་ཀྱིས། ཟས་ཀྱི་དོན་དུ་འདི་སྲུང་ རིགས། །ཞེས་གསུངས་ཏེ། སེམས་ཁྱོད་ལ་ལུས་འདི་མཁོ་བ་ཅུང་ཟད་ཀྱང་མེད་དེ་ཁྱོད་ནི་བཟའ་བཏུང་དོན་དུ་གཉེར་ལ། འདི་ནི་ཁྱོད་ཀྱི་བཟའ་བཏུང་དུ་མི་རུང་བའི་ཕྱིར་དང་གཞན་ཡང་འདིས་ཁྱོད་ལ་ཅི་ཞིག་བྱ། གལ་ཏེ་སྲུང་ན་བྱ་རྒོད་ལ་སོགས་ པས་སྲུང་བར་རིགས་ཏེ་དེ་དག་གིས་ནམ་ཞིག་ན་བཟའ་བར་བྱ་བ་ཡིན་པའི་ཕྱིར་རོ། འདིར་དོགས་པ་འདི་འབྱུང་བའི་གནས་ཡོད་དེ། ལུས་དེ་ཙམ་དུ་སྙིང་པོ་མེད་ན་སྔར་དལ་འབྱོར་གྱི་ལུས་ཞེས་མེད་དུ་མི་རུང་བ་དང་། རྙེད་དཀའ་བ་དང་། ཡོན་ཏན་ ཆེ་བར་བཤད་པ་དང་འགལ་ལོ་སྙམ་པ་ནི་གཅིག་གོ །ཡང་ཁ་ཅིག་འདུལ་བར་སྟོན་པས་མི་སྡུག་པ་སྒོམ་པར་གསུངས་པ་ན་དགེ་སློང་དྲུག་བཅུ་ལུས་ཀྱིས་སྐྱོ་བས་རང་ཉིད་གསོད་དུ་བཅུག་པ་དང་། མང་པོ་ཞིག་ཆུ་ལ་སོགས་པར་ལྕེབས་པར་བཤད་ པ་ལྟར་ལུས་ལ་སྐྱོ་བས་འདིས་ཅི་བྱ་ཞེས་འདོར་བར་འདོད་པའི་བློ་སྐྱེ་བའོ། །དང་པོའི་ལན་ནི། དེ་ནི་གནས་སྐབས་ཐ་དད་དེ་སྔར་ཆོས་ཀྱི་དོན་དུ་མི་ལུས་དགོས་པར་བཤད་པ་ནི་དེ་བཞིན་ཁོ་ན་སྟེ་ངན་འགྲོ་ལ་སོགས་པས་ཆོས་མི་གོ་ཞིང་དེ་དག་ ལ་བལྟོས་ཏེ་མི་ལུས་འདི་ཡོན་ཏན་རྨད་དུ་བྱུང་བའི་ཕྱིར་རོ། །འདིར་ནི་ལུས་ལ་ཞེན་ཞིང་ཆགས་པའི་བློ་འཇོམས་པའི་ཕྱིར། ལུས་ལ་ཆགས་བྱ་མ་ཡིན་པར་བསྟན་པ་སྟེ་ལུས་ལ་ཞེན་ཞིང་ཆགས་ན་ཕ་རོལ་ཏུ་ཕྱིན་པ་དྲུག་ག་མི་འགྲུབ། དམ་
Page: 380 པའི་ཆོས་མཐའ་དག་ལས་རིང་དུ་འགྱུར་བའི་ཕྱིར་རོ། །གཉིས་པའི་ལན་ནི། གཞུང་གིས་འདེབས་པར་འགྱུར་རོ། །འགྲེལ་ཆེན་ལས་ཀྱང་། ཅིའི་ན་དེ་ལ་རྣམ་པ་ཐམས་ཅད་དུ་སྐབས་མི་འབྱེད་དམ་ཞེ་ན། མ་ཡིན་པའི་ཕྱིར་གླ་རྔན་སོགས་གསུངས་ ཏེ་གླ་རྔན་ནི་ལས་ཀྱི་རིན་ནོ། །དེ་རྙེད་ཙམ་ལུས་འགྲོ་བའི་རང་བཞིན་འདི་ལ་བྱིན་ལ། ཀྱེ་ཡིད་ཁྱོད་རང་གིས་དགོས་པ་སྒྲུབས་ཤིག །ཅེས་སོ། །ལྔ་པ་ནི། མིའོ་ཅོག་གི་ལུས་འདི་ནི། །བཀོལ་བར་བྱ་བ་ཉིད་དུ་ཟད། །འདི་ལྟར་ཁྱོད་ཀྱིས་བསྲུངས་ཀྱང་ ནི། །འཆི་བདག་བརྩེ་བ་མེད་པ་ཡིས། འཕྲོགས་ཏེ་བྱ་དང་ཁྱིར་བྱིན་ན། །དེ་ཚེ་ཁྱོད་ཀྱིས་ཅི་བྱར་ཡོད། །བྲན་གཡོག་བཀོལ་དུ་མི་བཏུབ་ལའང་། །གོས་ལ་སོགས་པ་མི་སྦྱིན་ན། །ལུས་འདི་སྙོད་ཀྱང་གཞན་འགྲོ་ན། །ཁྱོད་ཀོ་ཅི་སྟེ་ཤ་ ཐང་གསོ། །འདི་ལ་གླ་རྔན་བྱིན་ནས་ནི། །ད་ནི་རང་དོན་བྱེད་དུ་ཆུག །ཕན་པ་མེད་པ་འདི་ལ་ནི། །ཐམས་ཅད་སྦྱིན་པར་མི་བྱའོ། །འགྲོ་དང་འོང་བའི་རྟེན་ཙམ་དུ། །ལུས་ལ་གྲུ་ཡི་བློ་བཞག་སྟེ། །སེམས་ཅན་རྣམས་དོན་སྒྲུབ་ པའི་ཕྱིར། །ཡིད་བཞིན་གྱི་ནི་ལུས་སུ་སྒྱུར། །ཞེས་གསུངས་ཏེ། རྐང་པ་གཉིས་ཀྱིས་ལུས་དགེ་བ་ལ་བཀོལ་དགོས་པར་བསྟན། དེ་ཡང་ཚིགས་བཅད་གསུམ་གྱིས་རང་དོན་དུ་བཀོལ་བ་དང་། གཅིག་གིས་གཞན་དོན་ལ་བཀོལ་ བར་བསྟན་ཏོ། །དེ་ཡང་མི་འོ་ཅོག་གི་ཞེས་པ་ནི་བདག་ཅག་མིར་སྐྱེས་སོ་ཅོག་གི་ཞེས་པ་སྟེ་ལུས་ཀྱི་དགོས་པ་ནི་དགེ་བ་ལ་བཀོལ་བ་ཁོ་ན་སྟེ། དགེ་སྡིག་ལུང་མ་བསྟན་གང་ལ་བཀོལ་ཡང་ལུས་ཉིད་ནི་རིང་པོར་མི་ཐོགས་པར་འཇོག་ཅིང་ འཇིག་མོད་ཀྱང་། བཀོལ་བ་པོའི་རྣམ་ཤེས་ཀྱི་རྒྱུན་དེ་ཉིད་གང་ནས་གང་དུ་འགྲོ་བར་ལས་དེ་རྗེས་སུ་འབྲངས་ཏེ་སྡིག་པ་ལ་བཀོལ་ན་ངན་སོང་ནས་ངན་སོང་མུ་མཐའ་མེད་པར་གཞོལ་ནས་སྡུག་བསྔལ་མི་བཟད་པ་མྱོང་ལ། དགེ་བ་ལ་བཀོལ་ན་མཐོ་
Page: 381 ༄༅། །རིས་ཀྱི་བདེ་བ་དཔག་ཏུ་མེད་པ་མྱོང་བར་འགྱུར་བའི་ཕྱིར་རོ། །ལུང་དུ་མ་བསྟན་པའི་ལས་ཀྱང་གནས་སྐབས་ཀྱི་བྱ་བ་ཟིན་པ་ཙམ་དེ་ཉིད་འབྲས་བུར་ཟད་དེ། དེ་ལས་གཞན་མི་བསྐྱེད་པ་རྫ་བྱེད་འདོད་ཙམ་ཁོ་ནས་འཇིམ་པ་ ལ་སོགས་པ་ལས་རྫ་བྱས་པའི་འབྲས་བུ་ནི་རྫ་གྲུབ་པ་དེ་ཉིད་དུ་ཟད་དེ། དེ་ལས་རྣམ་པར་སྨིན་པ་གཞན་མེད་དོ། །དེས་ན་ལུང་དུ་མ་བསྟན་པ་སྙིང་པོ་མེད་པ་རྣམས་ཀྱང་དོར་ཏེ་མི་དགེ་བའི་བྱ་བ་སྐད་ཅིག་གི་ཡང་སྐབས་མི་འབྱེད་པར་དགེ་བ་ ཁོ་ན་ལ་ལུས་ལ་འཕངས་པ་དང་། སྐྱོ་བ་དང་། དུབ་པ་དང་། རློམ་སེམས་མེད་པར་བཀོལ་ཞིག་པའོ། དེ་ཡང་ལུས་འདི་འཕངས་མེད་དུ་དགེ་བ་ལ་བཀོལ་དགོས་ཏེ་ནམ་འཇིག་ཆ་མེད་པའི་ཕྱིར། སྐྱོ་དུབ་མེད་པར་བཀོལ་དགོས་ཏེ་སེམས་རང་ཉིད་ ལ་གཏན་དུ་ཕན་པའི་བྱ་བ་འདི་ལས་གཞན་མེད་པའི་ཕྱིར། རློམ་སེམས་དང་ཡུས་མེད་པར་བཀོལ་དགོས་ཏེ། རང་གི་བཀྲེས་པ་སེལ་ཕྱིར་ཟས་ཟ་བ་ལ་གཞན་ལ་ཡུས་བྱས་མེད་པ་བཞིན་ནོ། །དེ་ཡང་ད་ལྟ་ནས་རིངས་པར་བཀོལ་དགོས་ཏེ། ཚེ་ལ་ངེས་པ་མེད་ནམ་འཆི་ཆ་མེད་ཤི་ཕན་ཆད་ལུས་དེས་ཅི་ཡང་བྱར་མེད་པའི་ཕྱིར་རོ། །དེས་ན་ལུས་འདི་ལ་གླ་རྔན་གྱི་དོན་དུ་ཟས་སྐོམ་དང་གོས་དང་སྨན་དང་གནས་མལ་རྣམས་འདོད་པ་བསོད་སྙོམས་ཀྱི་མཐའ་སྤངས་ཤིང་། ངལ་ཞིང་དུབ་པའི་མཐའ་ སྤངས་པ་ཇི་ཙམ་གྱིས་བདེ་བར་འཚོ་ནུས་པ་རེ་བྱིན་ལ། སེམས་དེ་ཉིད་ལ་གཏན་དུ་ཕན་པའི་དགེ་བའི་བྱ་བ་ལ་གཅིག་ཏུ་སྦྱོར་བའི་བྲན་གྱི་ལས་ཚོལ་ཞིག །དེ་ལྟ་མིན་པར་འདི་ལ་བདག་གིར་འདུ་ཤེས་ཏེ་གཅེས་འཛིན་གྱིས་བསོས་ཤིང་རྒྱགས་ལ་ མཚག་བཟང་བར་བྱས་པ་ལ་ནི་སྙིང་པོ་ཅི་ཡང་མེད་དེ། འདི་ནི་ཇི་ཙམ་བསོས་ཀྱང་མཐར་སེམས་དང་མི་འགྲོགས་པར་ཐ་དད་དུ་མི་འགྲོ་ལ་དེའི་ཚེ་ཤི་བའི་རོ་ཚོ་བར་ཟད་ལ་དེས་སེམས་ཁྱོད་ལ་ཅི་ཞིག་ཕན། དེས་ན་སུའི་ཡང་མ་ཡིན་པའི་དངོས་པོ་མི་
Page: 382 གཙང་བའི་འདུས་པ་རུས་པའི་འཁྲུལ་འཁོར་བསྐྱེད་པ་ཙམ་འདི་ལ་ཆགས་ཤིང་བདག་གིར་ཞེན་པས་དངོས་པོ་ཇི་སྙེད་པ་ཐམས་ཅད་ཟས་སྐོམ་དང་གོས་དང་རྒྱན་དུ་བྱས་ཏེ་འདི་ལ་བྱིན་པར་ནི་མི་བྱའོ། །འོན་ཀྱང་ལུས་འདི་ནི་འཁོར་བའི་མཚོ་ལས་ བདག་གཞན་སྒྲོལ་བ་ལ་གྲུ་ཙམ་དུ་འགྱུར་ལ། གྲུ་དེ་ཤིང་དང་ལྕགས་ལ་སོགས་པའི་འདུས་པ་ཡིན་ཞིང་རྟོག་པ་ཅི་ཡང་མེད་ཀྱང་ཆུ་བོ་ལས་སྒྲོལ་ན་མེད་དུ་མི་རུང་ཞིང་། དེ་ལ་ཡང་གཟེར་དང་པྲ་ཚིལ་ལ་སོགས་པས་དུས་དུས་སུ་གྲུ་ཚགས་མ་བྱས་ན་འཇིག་ པ་ལྟར་ལུས་ཀྱི་གྲུ་འདི་ལའང་གྲུ་ཚགས་ལྟ་བུའི་ཟས་གོས་སྨན་གྱིས་བསྐྱངས་ཏེ་བདག་དང་སེམས་ཅན་ཐམས་ཅད་ཀྱི་དོན་དུ་རེ་ཞིག་ཟུང་ལ་མཐར་ཆུ་བུར་མི་གཙང་བའི་ལུས་མི་རྟག་པ་བདག་མེད་པ་གསོབ་གསོག་སྙིང་པོ་མེད་པ་འདི་ལ་བརྟེན་ནས་རྡོ་རྗེའི་ སྐུ་གཙང་བ་དམ་པ་རབ་ཀྱི་མཐར་སོན་པ་རྟག་པ་གཡུང་དྲུང་གི་རང་བཞིན་བདག་དམ་པའི་ཕ་རོལ་ཏུ་ཕྱིན་པའི་དངོས་པོ་མི་ཤིགས་པ་སྙིང་པོར་གྱུར་པ་འགྲོ་བ་ཐམས་ཅད་ཀྱི་རྟེན་གནས་ཡིད་བཞིན་གྱི་ནོར་བུ་ལྟ་བུ་ཆོས་ཀྱི་སྐུ་འཐོབ་པར་གྱིས་ཤིག་པའོ། ། དེ་ལྟར་ལུས་དང་ལོངས་སྤྱོད་ཀྱི་རང་བཞིན་ཤེས་པས་ཆགས་པ་མེད་པར་འགྱུར་ལ། ལུས་དང་ལོངས་སྤྱོད་ལ་མ་ཆགས་པས་ནི་ཕ་རོལ་ཏུ་ཕྱིན་པ་ཐམས་ཅད་འགྲུབ་པར་འགྱུར་གྱི་གཞན་དུ་ན་ལོངས་སྤྱོད་ལ་ཆགས་པས་སྦྱིན་པ་མི་འགྲུབ། ལུས་ལ་ ཆགས་པས་ཚུལ་ཁྲིམས་བཟོད་བརྩོན་གསུམ་མི་འགྲུབ༌། རྒྱུ་དེས་བསམ་གཏན་དང་རྟོགས་པ་ལས་ཉམས་པར་འགྱུར་རོ། །དེའི་ཕྱིར་ལུས་ལ་ཆགས་པར་བྱ་བ་མ་ཡིན་པར་བསྟན་པའོ། །གཉིས་པ་དགེ་བ་སྒྲུབ་པའི་སྤྱོད་པ་ལ་བསླབ་པ་ལ་དྲུག །རྗེས་ཐོབ་ཀྱི་སྤྱོད་པ་སྤྱིར་བསྟན་ པ། གདམས་ངག་དང་དུ་བླང་བ། གཞན་གྱི་བསོད་ནམས་ལ་བསྟོད་པར་བྱ་བ། ཇི་ལྟར་སྨྲ་ཚུལ། མིག་གིས་ལྟ་ཚུལ། དགེ་བ་ཁྱད་པར་ཅན་ཇི་ལྟར་སྒྲུབ་ཚུལ་ལོ། །དང་པོ་རྗེས་ཐོབ་ཀྱི་སྤྱོད་པ་སྤྱིར་བསྟན་པ་ནི། དེ་ལྟར་རང་དབང་ཡོད་ཀྱིས་ཏེ། །རྟག་ཏུ་འཛུམ་པའི་
Page: 383 ༄༅། །བཞིན་དུ་གྱིས། །ཁྲོ་གཉེར་ངོ་ཟུམ་ཡོངས་ཐོང་སྟེ། །འགྲོ་བའི་བཤེས་དང་གསོང་པོར་གྱིས། །ཁྲི་ལ་སོགས་པ་བབ་ཅོལ་དུ། །སྒྲ་དང་བཅས་པར་མི་དོར་རོ། །སྒོ་ཡང་དྲག་ཏུ་མི་དབྱེ་སྟེ། །རྟག་ཏུ་བཅོམ་སྐྱུང་ དགའ་བར་བྱ། །ཆུ་སྐྱར་བྱི་ལ་ཆོམ་རྐུན་དག །སྒྲ་མེད་འཇབ་ཅིང་འགྲོ་བ་ཡིས། །མངོན་པར་འདོད་པའི་དོན་གྲུབ་པ། །ཐུབ་པས་རྟག་ཏུ་དེ་བཞིན་སྤྱད། །ཅེས་གསུངས་ཏེ། སེམས་དུལ་ཞིང་ལས་སུ་རུང་བ་ནི་སྤྱོད་པ་ཐམས་ཅད་ཀྱི་གཞི་ སྟེ་དེ་མེད་ན་རྟ་རྒོད་ལྟར་ཁ་ལོ་བསྒྱུར་བར་མི་ནུས་པའི་ཕྱིར། བཞིན་འཛུམ་པ་དང་བཅས་པས་གསོང་པོ་སྟེ་དྲང་པོ་དང་ཕན་པར་སྨྲ་བར་བྱ་སྟེ། འདི་ལ་ཡང་སེམས་ཐག་པ་ནས་མ་ཡིན་པར་དེ་ལྟར་བྱེད་ན་ངོ་དགའ་དང་གཅམ་བུ་དང་ཁ་གསག་ཡིན་པས་ཡང་ དག་མིན་ལ་སེམས་དང་འདྲེ་བ་ནི་བྱམས་པ་དང་རྗེས་སུ་འབྲེལ་བའོ། །ཁྲི་སོགས་སྒྲ་བཅས་སུ་དྲག་པོར་མི་དོར་བ་དང་སྒོ་བཙན་ཐབས་སུ་དྲག་པོར་མི་འབྱེད་པ་དང་། སྐད་ཆེན་པོ་དགོས་མེད་དུ་མི་འབྱིན་པ་སོགས་ནི་སྲོག་ཆགས་ཕྲ་མོ་མང་པོ་སྐྲག་པས་འཆི་ བ་སོགས་ལས་སྲུང་བ་དང་ཕ་རོལ་པོའི་ཏིང་ངེ་འཛིན་སོགས་ལ་བར་ཆད་དུ་མི་འགྱུར་བ་དང་ཙན་ཐབས་སུ་སྐྲག་པ་མི་སྐྱེ་བ་དང་རང་ཉིད་ཀྱི་ཤེས་བཞིན་མི་ཉམས་པར་འགྱུར་བའི་ཕྱིར་རོ། །དེས་ན་ལུས་ངག་གི་སྤྱོད་ལམ་ཐམས་ཅད་འཇམ་ཞིང་དལ་ ལ་གཞན་གྱི་ཡིད་ལ་མི་གཟན་པ་ངག་གིས་བཅོམ་བསྐྱུངས་ཤིང་མངོན་ཚན་ཆུང་བ་ཁོ་ནས་རང་གི་སྤྱོད་པ་འགྲུབ་པར་བྱ་དགོས་པའོ། །ཆུ་སྐྱར་ལ་སོགས་པའི་དཔེ་ནི་མངོན་ཚན་ཆུང་བར་བྱེད་པའི་དཔེ་ཁོ་ན་སྟེ་དེ་ལས་གཞན་པའི་དཔེ་མ་ཡིན་ནོ། ། ཐུབ་པ་ཞེས་པ་ནི་སྤྱིར་དཀའ་ཐུབ་པ་དང་། དྲང་སྲོང་ངམ། བརྟུལ་ཞུགས་ཅན་མཐའ་དག་ལ་འཇུག་ཀྱང་། སྐབས་འདིར་བྱང་ཆུབ་སེམས་དཔའ་དེས་ཞེས་བྱ་བའི་དོན་ཏོ། །གཉིས་པ་གདམས་ངག་དང་དུ་བླང་བ་ནི། གཞན་ལ་བཞེན་བསྐུལ་འདེབས་མཁས་ཤིང་། །མ་བཅོལ་ཕན་པ་
Page: 384 བྱེད་པའི་ངག །གུས་པས་སྤྱི་བོས་བླག་བྱ་སྟེ། །རྟག་ཏུ་ཀུན་གྱི་སློབ་མར་གྱུར། །ལེགས་པར་སྨྲས་པ་ཐམས་ཅད་ལ། །དགེ་བར་གསུངས་ཞེས་བརྗོད་པར་བྱ། །ཞེས་གསུངས་ཏེ། གཞན་དགེ་བ་ལ་བསྐུལ་བའི་བཞེན་བསྐུལ་ཐབས་ མཁས་པས་འདེབས་པར་བྱ་སྟེ། ཁ་ཅིག་ནི་བསྟོད་ཅིང་བཀུར་སྟི་དང་བཅས་པས་འདུལ་བ་དང༌། དེ་བཞིན་དུ་དམད་ཅིང་དཔྱོས་པ་དང༌། བཞད་གད་དང་བཅས་པ་དང་། གཏམ་གཞན་སྣ་ཚོགས་ལས་འཕྲོས་ཏེ་གླེངས་པ་དང༌། དམ་པའི་ཆོས་ཉིད་ ཀྱི་རིམ་པས་བསྟན་པ་དང་། ཟུར་གྱིས་བསྟན་པ་དང་། ཐ་མལ་པའི་ངག་ཉིད་ཡིན་པར་བཅོས་ཏེ་བསྟན་པས་འདུལ་བ་སྣ་ཚོགས་པར་ཡོད་པས་དེ་དང་དེའི་ཚུལ་གྱིས་བསྟན་པར་བྱ་དགོས་པའི་དོན་ཏོ། །གལ་ཏེ་གཞན་སུ་ཞིག་བདག་ཉིད་ ལས་མཁས་ཀྱང་རུང་མི་མཁས་ཀྱང་རུང་། ཆོས་སྒྲུབ་པ་ཞིག་ཡིན་ཡང་རུང་གདོལ་པ་ལྟ་བུ་ཞིག་ཡིན་ཡང་རུང་། འོས་ཀྱང་རུང་མི་འོས་ཀྱང་རུང་། བཅོལ་ཡང་རུང་མ་བཅོལ་ཡང་རུང་། བསམ་པ་དག་པས་ཡིན་ཡང་རུང་བརྙས་འདོད་པ་སོགས་ཀྱིས་ཡིན་ཡང་ རུང་སྟེ། ཐ་ན་ཚིགས་སུ་བཅད་པ་གཅིག་གམ། རྐང་པ་གཅིག་ཙམ་མམ། དོན་དང་ལྡན་པའི་ཚིག་གཅིག་ཙམ་སྨྲ་བར་བྱེད་ནའང་བདག་གིས་དམ་པའི་ཆོས་དེ་བླང་བར་བྱ་ཞིང་གུས་པར་བྱ་སྟེ། ཁོ་བོ་ནི་རྒྱ་ཆེར་ཤེས་པས་འདི་ཙམ་ལ་མ་ལྟོས་སོ་ཞེ་འམ། འདི་བས་ བདག་མཁས་སོ་ཞེ་འམ། ཁོ་བོས་ཆོས་སྟོན་པར་མ་བཅོལ་ལོ་ཞེ་འམ། འདི་ལས་མཉན་ན་བདག་གི་རྙེད་པ་དང་བཀུར་སྟི་ཉམས་པར་འགྱུར་རོ་སྙམ་དུ་རྟོག་པར་མི་བྱ་སྟེ། བྱང་ཆུབ་སེམས་དཔའ་ནི་རྟག་ཏུ་ཐམས་ཅད་ཀྱི་བྲན་དང་སློབ་མ་ལྟ་བུར་ཁས་ལེན་པའི་ཕྱིར་ ཏེ། སྔོན་བྱང་ཆུབ་སེམས་དཔས། འདི་ནི་གང་གི་ཁྱོར་གྱུར་པའི། །བུད་མེད་དེ་ཡང་མྱ་ངན་འདས། །ཞེས་རི་དྭགས་སྐྱེས་ཀྱིས་བརྗོད་པ་ན། མྱ་ངན་འདས་ཞེས་པའི་ཚིག་ཙམ་ལ་དགྱེས་ནས་མུ་ཏིག་གི་ཕྲེང་བ་གནང་བ་དང་། གནོད་སྦྱིན་དང་
Page: 385 ༄༅། །སྲིན་པོའི་གཟུགས་ཅན་དུ་མ་ལས་རང་གི་ཤས་དམ་པའི་ཆོས་ཚིགས་བཅད་རེ་རེ་ཉོས་པ་དང༌། ཚིགས་བཅད་གཅིག་གི་དོན་དུ་ལུས་ལ་ལྕགས་གཟེར་སྟོང་བཏབ་པ་དང་། མར་མེའི་སྡོང་བུ་སྟོང་བཙུགས་པ་དང་། བདག་དང་བཙུན་ མོ་དང་སྲས་ཏེ་མཆོག་གསུམ་བྱིན་པ་སོགས་སྐྱེས་རབས་རྒྱ་མཚོ་ལྟ་བུའི་ཕྱིར་དང༌། བྱང་ཆུབ་སེམས་དཔའ་རྫུ་འཕྲུལ་ཐོབ་པ་རྣམས་ཀྱང་ཆོས་ཚིགས་བཅད་གཅིག་གི་ཆེད་དུ་སྟོང་གསུམ་མེ་ལྕེས་གང་བ་དུ་མ་བརྒལ་ནས་འགྲོ་བའི་ཕྱིར་རོ། ། དེ་བཞིན་དུ་གཞན་གྱིས་ཆོས་ལེགས་པར་སྨྲ་བ་མཐོང་ན་དེ་ལ་སེམས་ཐག་པ་དང་དངོས་སུ་དག་གིས་ཀྱང་ལེགས་པར་གསུངས་སོ། །རྗེས་སུ་ཡི་རང་ངོ་ཞེས་དགའ་བའི་ཚིག་སྨྲ་བར་བྱ་སྟེ་གལ་ཏེ་ལེགས་པར་སྨྲས་པ་སྟོན་པའི་བཀའ་དང་མི་འགལ་བ་ཡིན་ ནའོ། །གལ་ཏེ་ཆོས་མ་ཡིན་པ་སྟོན་པ་ཞིག་ན་ནི་རིགས་པ་དང་ལུང་གིས་ཚར་བཅད་པར་བྱ་ལ། གལ་ཏེ་དེ་ལྟར་མ་ནུས་པའམ་དགེ་འདུན་འཁྲུག་ལོང་གི་རྒྱུར་འགྱུར་བ་སོགས་མཐོང་ན་ཅི་ཡང་སྨྲ་བར་མི་བྱ་ལ་མཉན་པར་ཡང་མི་བྱ་སྟེ། དམ་ཆོས་ཀྱི་ རྒྱལ་པོ་སོགས་ཀྱི་མདོ་ལས། མ་འོངས་པའི་ཚེ་ཆོས་མ་ཡིན་པ་སྨྲ་བ། དངོས་པོ་དང་མཚན་མ་དང་བདག་ཏུ་ལྟ་བ་དག་གིས་དེ་ལྟར་སྟོན་པ་ན་སྔོན་སངས་རྒྱས་མཐོང་བའི་སར་བུ་བློ་གྲོས་ཅན་ཁ་ཅིག་དེ་ལ་མི་དགའ་ནས་འཁོར་དེ་ནས་ལངས་ཏེ་སོང་ བ་དང༌། སྔོན་སངས་རྒྱས་མཐོང་བའི་ལྷ་རྣམས་དགའ་སྟེ་ད་དུང་སྟོན་པའི་བསྟན་པ་གནས་སོ། །ཞེས་སར་བུ་དེ་དག་ལ་བསྔགས་པར་བཤད་པའི་ཕྱིར་རོ། །འགྲེལ་ཆེན་ལས་ནི། གཞན་ལ་སོགས་ནི་འགྱོད་པ་སེལ་བ་དང་། གདམས་ངག་དང་། རྗེས་སུ་བསྟན་ པའི་ཆོས་ལ་གུས་པ་ཅན་དུལ་བ་ལ་སོགས་པ་མཁས་པ་གསོལ་བ་མ་བཏབ་པར་ཕན་པའི་ཚིག་ནི་སྤྱི་བོས་བླང་བར་བྱ་སྟེ། དེའི་སེམས་སུན་དབྱུང་བར་ཡང་མི་བྱ་ལ་ཁྱད་དུ་བསད་པར་ཡང་མི་བྱའོ། །ཕྲ་དོག་གི་དྲི་མ་རབ་ཏུ་བཀྲུ་བའི་ཕྱིར། ལེགས་
Page: 386 པར་གསུངས་པ་སོགས་ཏེ་ལྷག་པའི་བསམ་པས་སོ། །ཞེས་སོ། །གསུམ་པ་གཞན་གྱི་བསོད་ནམས་ལ་བསྟོད་པར་བྱ་བ་ནི། བསོད་ནམས་བྱེད་པ་མཐོང་གྱུར་ན། །བསྟོད་པས་ལེགས་པར་དགའ་བ་སྐྱེད། །ལྐོག་ན་ཡོན་ཏན་བརྗོད་བྱ་ཞིང་། །ཡོན་ཏན་བརྗོད་ན་རྗེས་སུ་བརྗོད། རང་གི་ཡོན་ཏན་བརྗོད་ན་དེ། །ཡོན་ཏན་ཤེས་པར་རིག་པར་བྱ། །རྩོམ་པ་ཐམས་ཅད་དགའ་ཕྱིར་ཏེ། །དེ་ནི་རིན་གྱིས་ཉོ་ནའང་དཀོན། །དེ་ལྟར་གཞན་བྱས་ཡོན་ཏན་གྱིས། །དགའ་བའི་བདེ་བ་སྤྱད་པར་བྱ། །བདག་ལ་འདིར་གོད་ཡོང་ མེད་ལ། །ཕ་རོལ་ཏུ་ཡང་བདེ་བ་ཆེ། ཉེས་པས་མི་དགའ་སྡུག་བསྔལ་ཞིང་། །ཕ་རོལ་ཏུ་ཡང་སྡུག་བསྔལ་ཆེ། །ཞེས་གསུངས་ཏེ། གཞན་བསོད་ནམས་ཀྱི་ལས་བྱེད་པ་ཐོས་པའམ་མཐོང་ན་དེ་ལ་སེམས་ཐག་པས་ཡི་རང་བར་བྱ་ཞིང་ ཕ་རོལ་པོ་ལ་མི་གནོད་ན་དངོས་སུའང་བསྟོད་ཅིང་ཡི་རང་བར་བྱའོ། །སྤྱིར་གཞན་གྱི་ཡོན་ཏན་བརྗོད་ན་ངོར་མི་བརྗོད་པར་ལྐོག་ན་བརྗོད་པར་བྱ་སྟེ་རློམ་སེམས་དང་། ང་རྒྱལ་མི་སྐྱེ་བའི་ཆེད་དང་། ཡ་རབས་དག་ནི་ངོར་བསྟོད་ན་ངོ་ཚ་བར་བྱེད་ཀྱིས་དགའ་ བར་མི་བྱེད་ལ། ངོར་བསྟོད་ཁ་གསག་དེང་སང་གི་མི་ཆེན་རྣམས་ལ་ཞལ་འཛིན་དང་། དགོངས་ལེན་དང་། གཟིགས་སྐུར་ཞེས་མེད་མི་རུང་དུ་དགོས་པ་འདི་དག་ནི་མ་རབས་མགུ་བྱ་ཡིན་མོད་ཀྱང་གཡོ་སྒྱུའི་བྱེ་བྲག་ཡིན་པའི་ཕྱིར། མཁས་པ་རྣམས་ཀྱིས་དེ་ལ་དགའ་ བ་དང་དེས་འཚོ་བའི་སྐྱེས་བུ་གཉིས་ཀ་རིང་དུ་སྤང་བར་བྱ་བ་ཡིན་པའི་ཕྱིར་རོ། །རང་གི་ཡོན་ཏན་ཕ་རོལ་གྱིས་བརྗོད་པ་མཐོང་ན་ཡོན་ཏན་ཤེས་པ་དང་དེ་ལ་ཕྲག་མི་དོག་པར་བསྔགས་པ་ཙམ་ལ་དགའ་ཞིང་རྗེས་སུ་ཡི་རང་བར་བྱའི་བསྟོད་པསམགུ་བ་དང་ རློམ་སེམས་སུ་ནི་མི་བྱའོ། །མདོར་ན་བྱང་ཆུབ་སེམས་དཔའི་བྱ་བ་ཅི་རྩོམ་ཡང་གཞན་དོན་དུ་ཡིན་ལ། བློ་འདི་ལྟ་བུ་ནི་རིན་གྱིས་ཀྱང་འཇིག་རྟེན་དུ་གཞན་ལ་མི་རྙེད་དོ། །དེ་ལྟར་གཞན་དོན་ཁོ་ན་བསྒྲུབ་པར་བྱ་བ་ཡིན་ན་རང་ཉིད་ཀྱིས་བསྒྲུབས་པ་ལ་མ་
Page: 387 ༄༅། །ལྟོས་པར་སེམས་ཅན་རང་རང་གིས་རྒྱུ་བསོད་ནམས་དང་འབྲས་བུ་བདེ་བ་སྤྱོད་ན་དགའ་བ་བརྒྱ་འགྱུར་དུ་བྱ་བར་རིགས་ཏེ། དེ་ལྟར་གཞན་བྱས་ཡོན་ཏན་གྱིས་བདག་དགའ་བའི་བདེ་བ་སྤྱད་པ་བུ་གཅིག་པོ་ནད་ཆེན་པོ་ལས་ སོས་ཏེ་བདེ་བ་ཐོབ་པ་མས་མཐོང་བ་ན་བུ་ཉིད་ནད་ལས་སོས་པའི་དགའ་བདེ་ལས་དེ་མཐོང་བའི་མ་དགའ་བདེ་ཁྱད་པར་དུ་གྱུར་པ་ལྟ་བུའོ། །དེ་ལྟར་གཞན་བདེས་བདག་དགའ་བ་འདི་ལ་ནི་བདག་ཉིད་ལ་ནི་འདིར་ཀརཥ་པ་ཎ་གཅིག་ གོང་བ་ཡང་མེད་ལ་ཕ་རོལ་ཏུ་ཡང་བསོད་ནམས་ཚད་མེད་པའི་བདེ་བ་འཐོབ་པར་འགྱུར་རོ། །དེ་ལས་ཟློག་སྟེ་གཞན་གྱི་བདེ་བ་མི་བཟོད་པ་དང་ཉེས་པར་དགའ་བའི་བློ་འདིས་ནི་འཕྲལ་དུ་རང་ཉིད་སྡུག་བསྔལ་ཞིང་ཟུག་རྔུ་ཡིད་གདུངས་ལ་ཕ་ རོལ་ཏུ་ཡང་སྡུག་བསྔལ་མི་བཟད་པ་མྱོང་དགོས་པའི་ཕྱིར་རོ། །འགྲེལ་ཆེན་ལས། ལྐོག་ན་སོགས་ནི་ཁ་གསག་ཏུ་དོགས་པ་བཟློག་པའི་ཕྱིར་ཏེ་གཞན་དུ་ན་ཁ་ཅིག་ཁ་གསག་ཡིན་སྙམ་པར་འགྱུར་རོ། །གཞན་གྱིས་དེའི་མངོན་སུམ་དང་གཞན་གྱི་ཡོན་ ཏན་སྨྲ་བར་བྱེད་ན་དེ་དང་མཐུན་པར་སྨྲ་བར་བྱེད་པ་དེའི་མངོན་སུམ་དུ་བརྗོད་པར་བྱའོ། །གཞན་དུ་འདི་ལ་མ་དགའ་འོ་སྙམ་ནས་ཕ་རོལ་གྱི་སེམས་སུན་འབྱིན་པར་བྱེད་དོ། །གཞན་གྱི་ཡོན་ཏན་ལ་མི་བཟོད་པ་སྤང་བ་ནི་དེ་ལྟར་རམ་གལ་ཏེ་ཞེས་ སོགས་སོ། །ཞེས་སོ། བཞི་པ་ཇི་ལྟར་སྨྲ་ཚུལནི། སྨྲ་ན་ཡིད་ཕེབས་འབྲེལ་བ་དང་། །དོན་གསལ་ཡིད་དུ་འོང་བ་དང་། །ཆགས་དང་ཞེ་སྡང་སྤངས་པ་དང་། །འཇམ་ཞིང་རན་པར་སྨྲ་བར་བྱ། །ཞེས་གསུངས་ཏེ། བྱང་ཆུབ་སེམས་དཔས་སྨྲ་བ་ན་བག་ཕབ་སྟེ་ཕ་རོལ་ པོ་ཡིད་ཕེབས་པར་བྱེད་པ་དང་། ཚིག་འབྲེལ་བ་དང་། དོན་གསལ་ཞིང་ཡིད་དུ་འབབ་པ་དང་། དུག་གསུམ་མེད་པའི་ཚིག་དང་། འཇམ་ཞིང་མང་ཉུང་སོགས་རན་ཞིང་འཚམ་པར་སྨྲ་བས་དོན་བྱེད་པ་སྟེ། བློ་གྲོས་རྒྱ་མཚོས་ཞུས་པའི་མདོ་ལས། བྱང་ཆུབ་
Page: 388 སེམས་དཔའ་ལ་ཚིག་གི་འཁྲུལ་པའི་སྐྱོན་དྲུག་བཅུ་རྩ་བཞི་དང་བྲལ་བར་གསུངས་ཏེ། དེའི་སྡོམ་ནི། ཚིག་རྩུབ་རྙོག་དང་གྱོ་མོའི་སྒྲ། །གྲུམ་སྒྲ་ཧ་ཅང་ཆེས་ཆུང་དང་། །དྲག་བརླང་ལྡབ་ལྡིབ་ཅལ་ཅོལ་དང་། །ཏབ་ཏབ་སྨྲ་དང་ཁས་ ཕུབ་ཚིག །ཉམས་པ་ཟུར་དབྱུང་དགོས་པའི་ཚིག །ཚིག་ཞུམ་སབ་སུབ་ཚིག་ནག་ནོག །འབར་བར་བྱེད་ཚིག་བྱིས་པའི་ཚིག །དུས་མི་ཤེས་དང་ཅོ་འདྲིའི་ཚིག །ཆགས་ཚིག་ཞེ་འགྲས་ཚོད་མི་ཤེས། །ལྐུགས་དང་དམན་དང་བརྙས་པའི་ ཚིག །འབྱེད་གཡོ་དྲེགས་དང་ཁྱད་གསོད་ཚིག །ངོ་ཚ་ཞེར་འདེབས་འཁྲུལ་ཞིང་གཤེ། མེད་པས་གླེང་དང་ཡང་དག་མིན། །བརྫུན་ཕྲ་ཚིག་རྩུབ་ངག་ཀྱལ་པ། །ཧ་ཅང་རྣོ་མཉེན་ཕལ་པ་དང་། །ཀུན་དུ་མ་བགྲུངས་དུས་ལས་ལྷག །གནོད་ ཚིག་འབར་བ་འཐོབ་ཀྱིས་འཇལ། །འཐབ་རྩོད་འགྱེད་ཚིག་ཚིག་འགྱུར་བ། །མི་བརྟན་གསང་འཕེལ་མུ་ཅོར་སྨྲ། །གར་གྱི་ལྟད་མོའི་ཚིག་ལྟ་བུ། །ཆོས་འགལ་གཞན་ལ་གནོད་པའི་ཚིག། བདག་བསྟོད་གཞན་སྨོད་སྟིང་བའི་ཚིག །དཀོན་ མཆོག་གསུམ་ལས་འགལ་བ་དང༌། །འཕགས་ལ་སྐུར་པ་འདེབས་པའི་ཚིག །ངོ་མི་ཆོད་པ་ཙམ་གྱི་ཚིག །དེ་ལྟར་དྲུག་བཅུ་རྩ་བཞི་འོ། །དེ་ལྟར་སྐྱོན་དེ་དག་དང་བྲལ་ཞིང་ཡོན་ཏན་ཡང་ཕྱད་པར་ལུང་སྟོན་པ་དང་། ཡང་དག་པ་དང༌། དེ་ཁོ་ན་དང་ བདེན་པ་རྣམ་པར་དགོད་པ་དང་། བདེན་པའི་རྗེས་སུ་འབྲང་བ་དང་། སེམས་ཅན་ཐམས་ཅད་ཀྱི་སྐད་ལ་འཇུག་པ་དང་། བསམ་པ་བཞིན་ཚིམ་པར་བྱེད་པ་སོགས་རྒྱ་ཆེར་བཤད་དོ། །འགྲེལ་ཆེན་དུ། རིགས་པའི་ལས་བྱ་བར་བསླབ་པ་ནི་སྨྲ་ན་སོགས་ཏེ་ཁ་ན་ མ་ཐོ་བ་མེད་པས་ཡིད་ཕེབས་པ་རིམ་པར་གནས་པའི་ཚིག་དང་སོགས་ནས་རན་པའི་ཚིག་ནི་སྒྲ་ཇི་ཙམ་གྱིས་གོ་བར་བྱ་བ་རྟོགས་པར་འགྱུར་བ་སྟེ་དེ་ལས་ཞན་པར་ཡང་མ་ཡིན་ཧ་ཅང་ལྷག་པར་ཡང་མ་ཡིན་པར་བརྗོད་པར་བྱའོ། །ཞེས་སོ། །ལྔ་པ་ནི།
Page: 389 ༄༅། །མིག་གིས་སེམས་ཅན་ལྟ་ན་ཡང་། །འདི་དག་ཉིད་ལ་བརྟེན་ནས་བདག །སངས་རྒྱས་ཉིད་དུ་འགྱུར་རོ་ཞེས། །དྲང་ཞིང་བྱམས་པའི་ཚུལ་གྱིས་ལྟ། །ཞེས་གསུངས་ཏེ། འདིར་ནི་དགེ་བའི་བཤེས་གཉེན་གྱི་འདུ་ ཤེས་ཀྱིས་གཞན་ལ་ལྟ་བ་སྟེ། སྤྱིར་ཆགས་པ་སྤང་བའི་ཕྱིར་འཁྲུལ་འཁོར་གྱི་འདུ་ཤེས་དང༌། བྱམས་པའི་ཕྱིར་ཕ་མའི་འདུ་ཤེས་དང་། སྙིང་བརྩེའི་ཕྱིར་སྡུག་བསྔལ་བའི་འདུ་ཤེས་དང་། ཕ་རོལ་ཏུ་ཕྱིན་པ་དྲུག་གི་ཕྱིར་དགེ་བའི་བཤེས་གཉེན་གྱི་ འདུ་ཤེས་དང་། ཞེན་པ་སྤོང་བའི་ཕྱིར་སྒྱུ་མ་ལྟ་བུའི་འདུ་ཤེས་དང་། ཞིང་ཡོངས་སུ་སྦྱོང་བའི་ཕྱིར་རྣམ་པར་དག་པའི་འདུ་ཤེས་སོགས་སྐབས་སོ་སོའི་དགོས་པ་དང་སྦྱར་རོ། །འགྲེལ་པར། དྲང་པོར་ལྟ་བ་ནི་ཡོན་པོ་དང་གྱ་གྱུ་ཅན་མ་ཡིན་པར་དགའ་བས་ ཚིམ་པར་ཆགས་སྡང་རྨོངས་པ་མེད་པར་ལྟ་བའོ། །ཞེས་སོ། །དྲུག་པ་དགེ་བ་ཁྱད་པར་ཅན་ཇི་ལྟར་སྒྲུབ་ཚུལ་ནི། རྟག་པར་མངོན་ཞེན་གྱིས་བསླང་བའམ། །གཉེན་པོ་ཡིས་ནི་བསླང་བ་ཡིས། །ཡོན་ཏན་ཞིང་དང་ཕན་འདོགས་ཞིང་། །སྡུག་བསྔལ་བ་ལ་དགེ་ཆེན་འགྱུར། ། མཁས་ཤིང་དགའ་དང་ལྡན་བྱས་ནས། །ལས་རྣམས་རྟག་ཏུ་བདག་གིས་བྱ། །ལས་རྣམས་ཀུན་ལ་སུ་ལ་ཡང་། །ལྟོས་པར་བྱ་བ་མ་ཡིན་ནོ། །སྦྱིན་པའི་ཕ་རོལ་ཕྱིན་ལ་སོགས། །གོང་ནས་གོང་དུ་ཁྱད་ཞུགས་སྤྱད། །ཆུང་ངུའི་ ཕྱིར་ནི་ཆེ་མི་བཏང་། །གཙོ་ཆེར་གཞན་གྱི་དོན་བསམ་མོ། །ཞེས་གསུངས་ཏེ། དེ་ཡང་དང་པོས་ཆོས་བཞི་ལྡན་གྱི་དགེ་བ་ནི་དགེ་བ་གཞན་ལས་ཁྱད་པར་འཕགས་པར་བསྟན། གཉིས་པས་རང་ཉིད་ཁོ་ནས་སྒྲུབ་དགོས་པར་བསྟན། གསུམ་པས་དགེ་བས་ཆོག་མི་ཤེས་པར་གོང་མ་ལ་བདམ་དགོས་པར་བསྟན་པའོ། །དེ་ཡང་བཤེས་སྤྲིང་ལས། རྟག་དང་མངོན་པར་ཞེན་དང་གཉེན་པོ་དང་། །ཡོན་ཏན་གཙོ་ལྡན་བཞི་ལས་བྱུང་བའི་ལས། །དགེ་དང་མི་དགེ་རྣམ་
Page: 390 ལྔ་ཆེན་པོ་སྟེ། །དེ་བས་དགེ་བ་སྤྱད་ལ་བརྩོན་པར་གྱིས། །ཞེས་པ་ལྟར་དུས་ཀྱི་ཁྱད་པར་རྟག་ཏུ་བྱེད་པ་དང་། བསམ་པའི་ཁྱད་པར་མངོན་ཞེན་ནམ་འདུན་པ་དྲག་པོས་ཀུན་ནས་བསླང་བ་དང་། གཉེན་པོའི་ཁྱད་པར་བྱང་ཆུབ་ཀྱི་སེམས་དང་དེ་ཁོ་ན་ཉིད་ སྒོམ་པ་སོགས་གཉེན་པོ་ཆེན་པོས་ཟིན་པའམ་ཀུན་ནས་བསླང་བ་ཉིད་དང་། ཞིང་གི་ཁྱད་པར་ཡོན་ཏན་གྱི་ཞིང་དཀོན་མཆོག་གསུམ། ཕན་བཏགས་པའི་ཞིང་ཕ་མ་དང་མཁན་སློབ། སྡུག་བསྔལ་བའི་ཞིང་ནད་པ་དང་མགོན་མེད་རྣམས་ལ་སྦྱིན་པ་ལ་སོགས་ པ་བྱས་པ་ན་ཆུང་ངུ་ལས་མ་བྱས་ཀྱང་དེའི་དགེ་བ་དེ་ནི་བསོད་ནམས་ཀྱི་ལས་གཞལ་དུ་མེད་པར་འགྱུར་བ་ཡིན་ནོ། །དེ་ལྟར་ལས་དང་རྣམ་སྨིན་ལ་མཁས་ཤིང་བསོད་ནམས་ཀྱི་ལས་ལ་ཆེས་དགའ་བས་སུ་ལ་ཡང་གྲོགས་བྱ་བའི་ལྟོས་པ་མེད་པར་ བདག་ཉིད་ཁོ་ནས་ཚར་ཕྱིན་པར་བསྒྲུབ་པར་བྱའོ། །དེ་ཙམ་གྱིས་ཆོག་ཤེས་པར་ཡང་མི་བྱ་སྟེ། སྦྱིན་པའི་ཕ་རོལ་ཏུ་ཕྱིན་པ་ཙམ་ནི་སྒྲུབ་པར་ཆེས་དཀའ་བ་ཡང་མ་ཡིན་ལ། བླ་ན་མེད་པ་ཡང་མ་ཡིན་ཏེ་དགེ་བའི་ཐེམ་སྐས་འོག་མ་ཙམ་དུ་ཟད་པའི་ཕྱིར། དེ་གྲུབ་ནས་དེ་བས་སྒྲུབ་པར་དཀའ་ཞིང་ཕན་ཡོན་ཆེས་ཆེ་བ་ཐེམ་སྐས་གཉིས་པ་ལྟ་བུ་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའི་ཆེད་དུ་ནན་ཏན་ལྷུར་བྱ་ལ། དེ་བཞིན་དུ་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པའི་བར་དུ་གོང་ནས་གོང་དུ་བསྒྲུབ་ པར་བྱ་ལ། དེ་དག་ལས་གཉིས་ནང་འདོམ་པ་ན་ཕན་ཡོན་ཆུང་བ་དེ་དོར་ནས་ཕན་ཡོན་ཆེ་བ་དེ་ཉིད་ལ་འཇུག་དགོས་ལ། ཕན་ཡོན་ཡང་མཚུངས་ན་སྐབས་དེར་གཞན་དོན་དུ་གང་འགྱུར་བ་དེ་སྒྲུབ་པར་བྱའོ། འདིར་འགྲེལ་ཆེན་ལས། གོང་ནས་གོང་ དུ་ནི་སྦྱིན་པ་བས་ཚུལ་ཁྲིམས་ཁྱད་ཞུགས་པ་ལ་སོགས་ཏེ་ཕ་རོལ་ཏུ་ཕྱིན་པ་གཞན་གྱི་རྒྱུར་གོང་མ་མི་བཏང་སྟེ་དེ་དང་འགལ་བ་མི་བསྟེན་པའོ། །ཅི་རྣམ་པ་ཐམས་ཅད་དུ་འམ་མ་ཡིན་ཞེ་ན། སྤྱོད་པའི་སོགས་གསུངས་ཏེ་བྱང་ཆུབ་སེམས་དཔའ་
Page: 391 ༄༅། །རྣམས་ཀྱིས་སྤྱོད་པ་གང་ལ་བསླབ་པ་སྡོམ་པའི་མཚན་ཉིད་གང་ཡིན་པ་དེ་ཉིད་ནི་མི་དགེ་བའི་ཆུ་སྲུང་བའི་ཆེད་དུ་ཆུ་ལོན་བྱས་པའོ། །དེ་ལས་གཞན་དུ་ཞེས་བྱ་བ་ནི་མ་གཏོགས་པ་སྟེ་དེ་ཇི་ལྟར་མི་ཉམས་པར་ཞེས་བྱ་བའི་ དོན་ཏོ། །དེ་བས་ན་ཚོགས་སོག་པར་འདོད་པ་སྙིང་རྗེའི་གཞན་གྱིར་གྱུར་བས་ཐམས་ཅད་བྱ་བར་གསུངས་པ་ཡིན་ནོ་ཞེས་བརྗོད་པ་ནི་དེ་ལྟར་ཞེས་བྱ་བ་ལ་སོགས་པ་ཡིན་ཏེ་ཞེས། གཙོ་ཆེར་གཞན་གྱི་དོན་བསམ་མོ། །དང་། དེ་ལྟར་རིག་ བྱས་གཞན་དོན་བསམ། །ཞེས་པའི་བར་དུ། སྤྱོད་པའི་མཚན་ཉིད་གང་ཡིན་པ། །དེ་ནི་མི་དགེའི་ཆུ་ལོན་ཏེ། །དེ་ལས་གཞན་དུ་མ་གཏོགས་པར། དེ་ཉིད་ཇི་ལྟར་མི་ཉམས་སྲུང་། །ཞེས་པའི་དོན་ཅན་གྱི་བློ་ཀ་གཅིག་གི་འབྲུ་ཡོད་ པ་ད་ལྟར་བོད་དཔེ་རྣམས་དང་རྒྱ་འགྲེལ་གཞན་ལ་མི་སྣང་ངོ་། །གསུམ་པ་སེམས་ཅན་དོན་བྱེད་ཀྱི་ཚུལ་ཁྲིམས་ལ་གསུམ། གཞན་དོན་གཙོ་བོར་བྱ་བ། སེམས་ཅན་བསྡུ་བའི་སྤྱོད་པ། གཞན་སེམས་སྲུང་བར་བསྟན་པའོ། །དང་པོ་ནི། དེ་ལྟར་རིག་བྱས་གཞན་དོན་ལ། །རྟག་ཏུ་བརྩོན་པར་གནས་པར་བྱ། ཐུགས་རྗེ་མངའ་བ་རིང་གཟིགས་པས། །བཀག་པ་རྣམས་ཀྱང་དེ་ལ་གནང་། །ཞེས་གསུངས་ཏེ། དེ་ལྟར་རིག་བྱས་ཞེས་པ་སྔར་བཤད་པ་དེ་རྣམས་འདྲིས་ཤིང་རྒྱུད་ལ་འདྲེས་ པར་བྱ་བའོ། །དེ་ཐམས་ཅད་ཀྱི་དགོས་པ་ནི་རྟག་ཏུ་གཞན་དོན་ལ་བརྩོན་པ་ཡིན་ཏེ་སངས་རྒྱས་དང་བྱང་ཆུབ་སེམས་དཔའི་བྱ་བ་ནི་དེ་ལས་གཞན་མེད་པའི་ཕྱིར། ཐུགས་རྗེ་མངའ་བ་ཕྱི་རྗེས་རྒྱང་རིང་དུ་གཟིགས་པའི་སངས་རྒྱས་ ཀྱིས་བཀག་པའི་དངོས་པོ་སྟེ། རང་དོན་དུ་སྲོག་ལ་བབ་ཀྱང་མི་བྱ་བར་གསུངས་པ་རྣམས་ཀྱང་གཞན་དོན་འབའ་ཞིག་པའི་བློ་ཅན་དེ་ལ་གཞན་དོན་དུ་འགྱུར་བའི་ཚེ་ནི་གནང་བ་ཉིད་དེ། དེད་དཔོན་སྙིང་རྗེ་ཆེན་པོས་བྱང་ཆུབ་སེམས་དཔའ་ལྔ་བརྒྱ་
Page: 392 ཕྱིར་མི་ལྡོག་པའི་བར་ཆད་དུ་མི་འགྱུར་བའི་ཆེད་དང་སྐྱེས་བུ་དེ་ངན་སོང་དུ་མི་ལྟུང་བའི་ཆེད་དུ་མི་ནག་མདུང་ཐུང་ཅན་བསད་པས་བསྐལ་པ་ཁྲིའི་ཚོགས་རྫོགས་པ་དང༌། ཁྱེའུ་སྐར་མས་བུ་མོའི་སྲོག་སྐྱོབ་པའི་ཆེད་དུ་ཚངས་སྤྱོད་བཏང་བས་ བསྐལ་པ་འབུམ་གྱི་ཚོགས་བཟླུམས་པར་གསུངས་པའི་ཕྱིར། ཅི་མི་ནག་མདུང་ཐུང་ཅན་བསད་པས་ངན་སོང་གི་རྣམ་སྨིན་མྱོང་ཞིང་སངས་རྒྱས་ནས་ཀྱང་ཞབས་ལ་སེང་ལྡེང་གི་ཚལ་པ་ཟུག་པ་མ་ཡིན་ནམ་ཞེ་ན། དེ་ནི་སྲིད་པ་ཐ་མ་པ་བཞི་བཅུ་གདུལ་ བའི་ཆེད་དུ་དགོས་པས་བསྟན་པ་སྟེ་དྲང་དོན་དུ་རིག་པར་བྱ་ལ། འདིས་བསྐལ་པ་དེ་སྙེད་ཀྱི་ཚོགས་བཟླུམས་ན་མི་དགེ་བའི་ལས་སུ་ལྟ་ག་ལ་འགྱུར། འགྲེལ་ཆེན་ལས་ཀྱང་། དེ་ལྟར་ཤེས་རབ་དང་སྙིང་རྗེ་ལས་བྱུང་བས་གཞན་གྱི་དོན་ལ་ ཐབས་མཁས་པས་འཇུག་པར་བྱེད་པ་ལ་ནི་ལྟུང་བ་མེད་དེ་འདི་ཡང་ཉེ་བ་འཁོར་གྱིས་ཞུས་པ་དང་། ཐབས་ལ་མཁས་པའི་མདོ་ལས། ཁྱེའུ་སྐར་མ་འདི་དབང་དུ་བྱས་ཏེ་ལྟུང་བ་དང་ལྟུང་མེད་ཀྱི་རྣམ་གཞག་རིག་པར་དགྱིའོ། །ཞེས་སོ། གཉིས་པ་ལ། ཟང་ཟིང་ དང༌། ཆོས་ཀྱིས་བསྡུ་བ་གཉིས་ལས། དང་པོ་ཟང་ཟིང་ནི། ལོག་པར་ལྟུང་དང་མགོན་མེད་དང་། །བརྟུལ་ཞུགས་གནས་ལ་བགོ་བྱ་ཞིང་། རན་པ་ཙམ་དུ་བཟའ་བྱ་སྟེ། ཆོས་གོས་གསུམ་མ་གཏོགས་པ་སྦྱིན། །དམ་པའི་ཆོས་ནི་སྤྱོད་པའི་ ལུས། །ཕྲན་ཚེགས་ཆེད་དུ་གནོད་མི་བྱ། དེ་ལྟར་བྱས་ན་སེམས་ཅན་གྱི། །བསམ་པ་མྱུར་དུ་རྫོགས་པར་འགྱུར། །སྙིང་རྗེའི་བསམ་པ་མ་དག་པར། །ལུས་འདི་བཏང་བར་མི་བྱ་སྟེ། །ཅི་ནས་འདི་དང་གཞན་དག་ཏུ། །དོན་ཆེན་སྒྲུབ་ པའི་རྒྱུར་བཏང་ངོ་། །ཞེས་གསུངས་ཏེ། དང་པོས་ཟས་གོས་ལས་བྱིན་ཚུལ། གཉིས་པས་དུས་མིན་དུ་ལུས་དངོས་སུ་མི་བཏང་བའི་ཚུལ། གསུམ་པས་དོན་ཆེན་པོའི་རྒྱུར་བཏང་བར་བསྟན་ཏོ། །འདིར་འགྲེལ་ཆེན་དུ།
Page: 393 ༄༅། །ལུས་སྲུང་བའི་ཕྱིར་ལོག་པར་ལྷུང་བ་སོགས་ཏེ། སྨན་དང་གོས་ལ་སོགས་པས་བདག་གི་ལུས་ཡོངས་སུ་བསྐྱང་བར་བྱ་སྟེ་གཞན་གྱི་དོན་ལ་མཁོ་བའི་ཕྱིར་རོ། །སྨན་ནི་རྣམ་པ་གཉིས་ཏེ་རྟག་ཏུ་བྱ་བའི་སྨན་ཟན་ལ་སོགས་ པ་དང་། ན་བའི་གསོ་སྨན་ནོ། །ཟས་ཀྱི་དོན་དུ་སྤྱོད་ཡུལ་དུ་འཇུག་པ་ན་ཇི་སྐད་བསྟན་པའི་བསླབ་པ་ལ་དྲན་པ་ཉེ་བར་བཞག་པས་རྒྱུ་བར་བྱའོ། །བསོད་སྙོམས་རྙེད་པ་ལས་ཆ་བཞིར་བགོ་བར་བྱ་སྟེ་གཅིག་ནི་ལོག་པར་ལྟུང་བ་རྣམས་ ལ། གཉིས་པ་ནི་མགོན་མེད་པ་རྣམས་ལ། གསུམ་པ་ནི་ཚངས་པ་མཚུངས་པར་སྤྱོད་པ་རྣམས་ལ་བྱིན་ནས། བཞི་པ་བདག་ཉིད་བཟའ་བར་བྱའོ། །དེ་ཟ་བ་ན་ཆགས་པ་དང་བརྐམ་པ་དང་ཞེན་པས་མ་ཡིན་གྱི་གཞན་དུ་ན་ཇི་ཙམ་ལུས་འདི་བསྐྱང་བ་དང་ གནས་པར་བྱ་བའི་ཕྱིར་རན་པ་ཙམ་དུ་བཟའོ། །ཇི་ལྟར་ཧ་ཅང་ཉམ་དམས་ན་དགེ་བའི་ཕྱོགས་མི་ནུས་ལ། ཧ་ཅང་ལུས་ལྕིས་ན་གཉིད་ཀྱིས་ནོན་པར་འགྱུར་བས་སྤངས་ཏེ་རན་པར་བཟའ་སྟེ་ཟོས་ནས་དགེ་བའི་ཕྱོགས་ལ་བརྩོན་པར་བྱ་བར་ དཀོན་མཆོག་སྤྲིན་ལས་གསུངས་སོ། །རིན་ཆེན་ཕུང་པོའི་མདོར། སྲིན་བུ་རྣམས་ད་ལྟ་ཟང་ཟིང་དང་མཐར་ཆོས་ཀྱིས་བསྡུ་བའི་ཕྱིར་བཟའ་བ་དང་། འོད་སྲུང་ངས་གཉིས་ལ་དད་པས་བྱིན་པ་གནང་སྟེ་ལྡན་པ་དང་གྲོལ་བའོ། །ཞེས་གསུངས་སོ། ། ལོངས་སྤྱོད་ཐམས་ཅད་སེམས་ཅན་ཐམས་ཅད་ཀྱི་དོན་དུ་བྱིན་གྱིས་བརླབ་ཀྱི་བདག་ལ་ཆགས་པས་ལོངས་སྤྱོད་པ་ལས་ཉོན་མོངས་པ་ཅན་གྱི་ལྟུང་བར་འགྱུར་ཏེ། ཟླ་བ་སྒྲོན་མ་ལས། དེ་དག་ཁ་ཟས་རོ་ཞིམ་བསོད་པ་དག །རྙེད་ནས་རྣལ་ འབྱོར་མི་བརྩོན་ཟ་ཞིང་འཐུང་། དེ་དག་ལ་ནི་ཟས་དེ་དུག་ཏུ་འགྱུར། །བ་ལང་ཕྲུ་གུས་པད་རྩ་མ་བཀྲུམ་བཞིན། །ཞེས་སོགས་དྲངས་ཤིང་བསླབ་བཏུས་ལས་ཀྱང་གསུངས་སོ། །བཟའ་བཏུང་ནི་ཐུན་རུང་། ཉིན་ཞག་པ། ཇི་སྲིད་འཚོ་
Page: 394 བཅང་སྟེ་གསུམ་དགེ་སློང་གི་འདུལ་བར་བསྟན་ཏོ། །ཞེས་བཤད་དོ། །དེ་ཡང་འདིར་བྱང་ཆུབ་སེམས་དཔའ་རབ་བྱུང་གི་དབང་དུ་བྱས་ནས་བསོད་སྙོམས་དེ་ལས་ཆ་བཞིར་བགོས་ཏེ། དང་པོ་ལོག་པར་ལྟུང་བ་ནི་ཡི་དྭགས་དང་དུད་འགྲོ་སྟེ། དཀའ་ འགྲེལ་ཆུང་ངུར། ལོག་པར་ལྟུང་བ་ནི་ཡི་དྭགས་ལ་སོགས་བའོ། །དེ་ལ་བགོ་བ་ནི་འཕྲོག་མ་ལ་ཆང་བུ་གཉིས་བྱིན་པ་དང་། དེའི་བུ་ཐུ་བོ་དགའ་བྱེད་ལ་གཅིག་བྱིན་པ་དང་། ཁམ་གྱི་དང་པོ་ལྷག་མ་མི་ཟ་བ་ལ་བྱིན་པ་དང་། ཐ་མ་ལྷག་མ་ཟ་བ་རྣམས་ལ་ བྱིན་པའོ། །ཞེས་སོགས་ཀྱིས་མགོན་མེད་ནད་པ་དང་སྤྲང་པོ། བརྟུལ་ཞུགས་ཀྱི་གནས་ནི་དཀའ་ཐུབ་ཅན་ཏེ་ཕྱི་ནང་གཉིས་ཀའི་འོ། །འགྲེལ་ཆེན་ལས། ཚངས་པ་མཚུངས་པར་སྤྱོད་པ་ཞེས་པས་ཆོས་འདི་བ་སངས་རྒྱས་པ་ཁོ་ནར་ བསྟན་མོད། སྤྱིར་འདུལ་བར་དགེ་སློང་གིས་མུ་སྟེགས་ལ་བྱིན་པ་ན་དེས་ཁྱེད་ཅག་གི་མཆོད་གནས་ནི་མགོ་རེག་འདི་རྣམས་ཡིན་ལ། འདི་རྣམས་ཀྱི་མཆོད་གནས་ནི་ངེད་ཚོ་ཡིན་པས་ཕུལ་ལོ་ཞེས་ཁྱིམ་པ་རྣམས་ལ་ངོམ་པོ་བྱས་པས་དད་པ་ ཅན་མི་དགའ་བར་གྱུར་པ་ལ་བརྟེན་ནས་མུ་སྟེགས་ལ་མི་སྦྱིན་པར་ཡང་གསུངས་པས་དེ་ལྟ་བུའི་དགག་བྱ་ཡོད་མེད་བརྟགས་ཏེ་མེད་ན་བྱིན་དུ་རུང་ལ་ཡོད་ན་བྱིན་པར་མི་བྱའོ། །ཆ་གཅིག་ནི་བདག་ཉིད་ཀྱི་ལུས་ཀྱི་སྲིན་བུ་གསོ་བ་དང་གྲུ་ཆགས་ཀྱི་འདུ་ཤེས་ ཀྱིས་བཟང་ངན་དུ་མི་རྟོག་རོ་མི་མྱང་ཆགས་པ་དང་སྡང་བ་མེད་པར་ཤེས་བཞིན་གྱིས་བཟའོ། །འདི་རྣམས་སུ་ཕུད་དཀོན་མཆོག་ལ་དབུལ་བ་ཚིག་གིས་མ་ཐོན་ཡང་དེ་ནི་ངེས་པར་དགོས་ཏེ་སྐྱབས་འགྲོའི་བསླབ་བྱ་ཡང་ཡིན་པས་སོ། །དེ་ཡང་ཨཽ་ བུདྡྷ་ནཻ་ཝཱིདྱ་ཨཱཿཧཱུྃ་གིས་སངས་རྒྱས་ལ་དབུལ་བ་སོགས་དང་། ཨོ་ཧ་རི་ནི་སྭཱ་ཧཱས་འཕྲོག་མ་ལ་པ་སྟེར་བ་སོགས་སྔགས་བརྗོད་པ་ནི་བྱ་རྒྱུད་སོགས་གསང་སྔགས་དང་སྦྱར་བ་ཡིན་ལ། འདུལ་བ་དང་ཕར་ཕྱིན་ཐེག་པའི་སྐབས་འདིར་སེམས་དང་
Page: 395 ༄༅། །ཡུལ་དེ་ལ་སྦྱིན་དབུལ་བྱ་ཡི་སྔགས་ངེས་པར་དགོས་པ་ནི་མ་ཡིན་ཏེ། གསང་སྔགས་སུ་ཕྱག་དང་བསྐོར་བ་སོགས་ལའང་བྱིན་གྱིས་རློབ་པའི་སྔགས་དང་ཆོ་ག་ཡོད་ཀྱང་ཕར་ཕྱིན་དུ་དེ་མི་དགོས་པ་བཞིན་ནོ། །དགེ་སློང་ གི་སྣམ་སྦྱར་དང་བཅས་པའི་ཆོས་གོས་གསུམ་མམ་རབ་བྱུང་སྡེ་ལྔ་ཐུན་མོང་གི་བླ་གོས་མཐང་གོས་གདིང་བ་སྟེ་ཆོས་གོས་གསུམ་ནི་ཕྱིའི་རྟགས་ཀྱི་སྒོ་ནས་རབ་བྱུང་ཡིན་མིན་གྱི་འབྱེད་ཆོས་ཡིན་པས་དེ་ཙམ་ཞིག་མི་བཏང་ལ་ལྷག་པོ་དང་དེ་ལས་གཞན་པའི་ ཡོ་བྱད་བཏང་བའོ། །འགྲེལ་ཆེན་དུ། བྱང་ཆུབ་སེམས་དཔའི་སོ་སོར་ཐར་པ་ལས། ཡང་ལ་ལ་ཞིག་འོངས་ནས་ལྷུང་བཟེད་དང་ཆོས་གོས་སློང་ན་གལ་ཏེ་དེ་ལ་སངས་རྒྱས་ཀྱིས་གནང་བའི་ཆོས་གོས་གསུམ་ལས་ལྷག་པ་ཞིག་ཡོད་ན་ཇི་ལྟ་བ་ བཞིན་དུ་བཏང་ཞིང་སྦྱིན་པར་བྱའོ། །གལ་ཏེ་དེ་ལ་ཆོས་གོས་གསུམ་ལས་མེད་ན་གང་ལ་བསྟེན་ནས་ཚངས་པར་སྤྱོད་པ་ལ་གནས་པ་དེ་ནི་ཡོངས་སུ་བཏང་བར་མི་བྱའོ་སོགས་དྲངས་ཏེ་ཆོས་གོས་གསུམ་ཁོ་ན་ལས་མེད་པས་དེ་བཏང་ན་བཅས་པ་དང་ འགལ་ཞིང་ཧ་ཅང་གཏོང་བ་ནི་འདོད་པ་ཆུང་བ་མ་ཡིན་པའི་ཕྱིར་རོ། །ཞེས་སོ། །ཡང་སྔོན་དུ་ལུས་སེམས་ཅན་ལ་བཏང་ཟིན་ན་ཅི་ད་སྲུང་ངམ་མི་སྲུང་ཞེ་ན། དལ་འབྱོར་གྱི་ལུས་ནི་དམ་པའི་ཆོས་སྤྱོད་པའི་རྟེན་མེད་དུ་མི་རུང་བ་ཡིན་ལ། འདི་ལ་བརྟེན་ནས་ སྐད་ཅིག་སྐད་ཅིག་དང་ཉིན་ཉིན་བཞིན་དུ་ཡང་དགེ་བ་རྒྱ་ཆེར་སྒྲུབ་པ་དང་འཕེལ་བར་འགྱུར་ལ། དུས་མིན་དུ་ལུས་ཆུད་གཟན་པ་ནི་དེ་ལྟ་མིན་པའི་ཕྱིར་དུས་མིན་དུ་བཏང་བར་མི་བྱ་ལ། ལུས་དུབ་པར་བྱེད་པ་ལ་ཆོས་སུ་འདུ་ཤེས་པ་ཕྱི་རོལ་པའི་དཀའ་ ཐུབ་ལྟ་བུ་དང་བསྙུང་བ་སོགས་ཀྱིས་ལུས་ལ་གནོད་པ་ཡང་མི་བྱ་ལ། ལུས་ལ་གནོད་པའི་ས་ཕྱོགས་སུ་འགྲོ་བ་དང༌། སྨན་མ་ཡིན་པ་བསྟེན་པ་སོགས་ཀྱང་སྤངས་ཏེ། གཞན་དུ་ན་བསླབ་བཏུས་སུ་བཤད་པའི་ལུས་སྲུང་བའི་སྔགས་དེང་སང་བྱང་སྒྲ་མི་སྙན་པའི་ཚེའི་
Page: 396 རང་གཟུངས་སུ་གྲགས་པ། ཨ་ཊེ། བ་ཊེ། ན་ཊེ། ཀུ་ན་ཊེ། ཊསྐེ། ཋསྐེ། ཋ་རཀྐེ། ཨུ་རུ་མ་ཏི། རུ་རུ་མ་ཏི། ཏུ་རུ་ཧི་ལི་མི་ལི། སངྒྷ་ཛྙ་དུབ་དགྒ། ན་མསྶ་བྷཱ་སམྨཱ་སམྦུཛྙཱ་ནཱཾ། སི་ཛྙཱ་ནྟུ་མེ་མནྟྲ་པཱ་དཱསྠཱ་ཧཱ། ཞེས་བཅངས་པ་ཙམ་གྱིས་སྐྱེ་བ་དྲན་ པའི་གསང་སྔགས་ཡི་གེ་ལྔ་བཅུ་རྩ་བདུན་པ་ཞེས་བྱ་སྟེ། སྐྱ་རེངས་ཤར་བའི་ཚེ་ཅི་རིགས་བཟླས་པས་དུས་མ་ཡིན་པར་འཆི་བ་སེལ་ཞིང་ཚེ་སྲུང་བར་བྱེད་དོ། །གལ་ཏེ་ལུས་སློང་བ་ཞིག་འོངས་ན་ཡང་དོན་ཆེན་པོ་མ་ཡིན་པར་མཐོང་ན། བདག་ བྱང་ཆུབ་སེམས་དཔའ་ལས་དང་པོ་བ་ཡིན་པས་ད་ལྟ་སྦྱིན་པར་མི་ནུས་ཀྱིས། བདག་གི་བྱང་ཆུབ་ཀྱི་བར་ཆད་མ་བྱེད་ཅིག་ཅེས་བཞམས་ཏེ་བསྒོ་བས་བཟློག་པར་བྱ་ལ་སྔར་བསྟན་པ་ལྟར་ལུས་ཀྱི་རང་བཞིན་ཁོང་དུ་ཆུད་པས་སེམས་ཀྱིས་ཞེན་པར་ཡང་ མི་བྱ་ལ། དུས་མ་ཡིན་པར་བཏང་བར་ཡང་མི་བྱ་སྟེ། སྨན་གྱི་སྡོང་བུ་མྱུ་གུའི་དུས་སྲུང་ཞིང་ཕྱིས་འབྲས་བུ་ཟད་མི་ཤེས་པའི་དུས་སྤྱད་པའི་དཔེས་བསླབ་བཏུས་སུ། དཔེར་ན་སྨན་ཤིང་ལྗོན་པ་ལྟ་སྡུག་པ། །རྩ་བ་ལ་སོགས་སྤྱད་འོས་ས་ བོན་ནི། །བྱིན་ཡང་དུས་མིན་སྤྱོད་ལས་སྲུང་བྱེད་པ། །རྫོགས་པའི་སངས་རྒྱས་སྨན་ཤིང་དེ་བཞིན་ནོ། །ཞེས་སོ། །སྤྱིར་བྱང་ཆུབ་སེམས་དཔའ་རིགས་ལ་གནས་པ་སྙིང་རྗེའི་དབང་གིས་སོ་སྐྱེའི་དུས་ནའང་གཏོང་བ་བླ་མ་དྷརྨ་རཀྵི་ཏ་ལྟ་བུའང་ ཡོད་ལ། སྤྱིར་ས་དང་པོ་ཐོབ་པ་སྦྱིན་པའི་ཕར་ཕྱིན་གཙོ་བོར་སྒྲུབ་པའི་དུས་སུ་ཡིན་ལ། ཁྱད་པར་དུ་ནི་ལུས་དེས་བྱ་བ་བྱས་ཟིན་ནས་སླར་འཇིག་པ་དོན་མེད་དུ་མི་འགྱུར་བའི་ཆེད་དང་། ཡུལ་དུས་དེར་མི་རྣམས་སྦྱིན་པ་ཕྲ་མོས་ང་རྒྱལ་དུ་བྱེད་ ཅིང་དྲེགས་པ་དང༌། བརྩོན་འགྲུས་ཕྲ་མོས་ང་རྒྱལ་བ་ཤས་ཆེར་མཐོང་བ་ན་བདག་གི་ལུས་བཏང་བས་འདི་རྣམས་ཀྱི་དྲེགས་པ་གཞོམ་པར་བྱའོ་ཞེས་དགོས་པ་དེ་ལྟ་བུ་མཐོང་བ་དང་། ཡུལ་དེ་ལ་སྙིང་རྗེ་ཆེན་པོ་རང་དབང་མེད་པས་བཟོད་པར་
Page: 397 ༄༅། །མ་ནུས་པས་གཏོང་བ་སྟེ་དེ་ལྟ་བུ་ནི་དུས་སུ་གཏོང་བ་སྟེ་དེ་དག་ལ་ནི་ཅི་སྦྱིན་ནམ་མི་སྦྱིན། ནུས་སམ་མི་ནུས་ཞེས་སོམ་ཉིའི་ཁྱོགས་ལ་འཕྱང་བ་མེད་ལ། སོམ་ཉི་དང་བཅས་པའི་དུས་ནི་བཏང་བར་བྱ་བ་མ་ཡིན་པའོ། འགྲེལ་ ཆེན་ལས་ཀྱང་རྒྱས་པར་བཤད་ནས། འདིར་དགོངས་པ་ནི་འདི་ཡིན་ཏེ་སྔོན་དུ་ལུས་སེམས་ཅད་ཐམས་ཅད་ལ་བྱིན་མོད་ཀྱང་དོན་མ་ཡིན་པར་ལོངས་སྤྱོད་པ་ལས་སྲུང་བར་བྱ་བ་འབའ་ཞིག་ཡིན་ཏེ། དེ་ནི་སེར་སྣའི་གོ་སྐབས་ཀྱང་མེད་ཅིང་བཅས་པའི་ དོན་ལས་ཉམས་པ་ཡང་མེད་དོ། །ཞེས་སོ། །གཉིས་པ་ཆོས་ཀྱིས་བསྡུ་བ་ནི། མ་གུས་པ་ལ་ཆོས་མི་བཤད། །མི་ན་བཞིན་དུ་མགོ་གཡོགས་དང་། །གདུགས་དང་འཁར་བ་མཚོན་ཐོགས་དང་། མགོ་བོ་གཡོགས་པ་དག་ལའང་མིན། །དམན་ལ་ཟབ་དང་ རྒྱ་ཆེ་དང་། །སྐྱེས་པ་མེད་པར་བུད་མེད་མིན། །དམན་དང་མཆོག་གི་ཆོས་རྣམས་ལ། །མཚུངས་པར་གུས་པས་ཀུན་ཏུ་སྤྱད། །རྒྱ་ཆེན་ཆོས་ཀྱི་སྣོད་གྱུར་པ། །དམན་པའི་ཆོས་ལ་སྦྱར་མི་བྱ། །མདོ་དང་སྔགས་ཀྱིས་འདྲིད་མི་བྱ། །སྤྱོད་པ་ ཡོངས་སུ་དོར་མི་བྱ། །ཞེས་གསུངས་ཏེ། རྐང་པ་དྲུག་གིས་གང་ལ་མི་འཆད་པའི་ཡུལ་དང༌། ཕྱི་མ་དྲུག་གིས་ཇི་ལྟར་མི་འཆད་པའི་ཚུལ་གཉིས་བསྟན་ཏོ། །དེ་ཡང་འགྲེལ་ཆེན་དུ། བྱང་ཆུབ་སེམས་དཔའི་སོ་སོར་ཐར་པ་དྲངས་པ། བྱང་ཆུབ་ སེམས་དཔའ་རབ་ཏུ་བྱུང་བས་ཆོས་སྦྱིན་པ་དང་ཆོས་ཀྱི་སྦྱིན་བདག་ཏུ་བྱའོ། །བྱང་ཆུབ་སེམས་དཔའ་ཁྱིམ་པ་གང་ཞིག་གིས་སངས་རྒྱས་ཀྱི་ཞིང་གངྒཱ་ཀླུང་གི་བྱེ་མ་སྙེད་རིན་པོ་ཆེ་སྣ་བདུན་གྱིས་ཡོངས་སུ་བཀང་སྟེ་དེ་བཞིན་གཤེགས་པ་རྣམས་ལ་ཕུལ་ བ་བས། ཤཱ་རིའི་བུ་རབ་ཏུ་བྱུང་བར་གྱུར་པའི་བྱང་ཆུབ་སེམས་དཔའ་གང་གིས་ཚིག་བཞི་པའི་ཚིགས་སུ་བཅད་པ་གཅིག་བསྟན་ན་འདི་ནི་དེ་བས་ཆེས་བསོད་ནམས་མང་དུ་བསྐྱེད་དེ། ཤཱ་རིའི་བུ་དེ་བས་ན་དེ་བཞིན་གཤེགས་པརབ་ཏུ་བྱུང་བས་ཟང་ཟིང་གི་
Page: 398 སྦྱིན་པ་བྱ་བར་མ་གནང་ངོ༌། །གང་གིས་ལྷུང་བཟེད་དུ་འོངས་པ་ལྷུང་བཟེད་དུ་ཚུད་པའི་རྙེད་པ་ཆོས་དང་མཐུན་པའི་ཆོས་སུ་རྙེད་པར་གྱུར་ན་དེས་ཚངས་པ་མཚུངས་པར་སྤྱོད་པ་རྣམས་དང་ལྷན་ཅིག་ཏུ་ཐུན་མོང་དུ་བཟའ་བར་བྱའོ། །ཞེས་སོ། །ཆོས་ལ་མ་གུས་པ་ ལ་ཆོས་བསྟན་ན་དེ་ཞེ་སྡང་སྐྱེ་བར་འགྱུར་བས་རྒྱུ་དེས་དེའི་ཆོས་ལ་སྡང་བའི་བློ་རྒྱ་ཆེར་འཕེལ་བར་འགྱུར་བས་ན་མི་བཤད་པའོ། །གལ་ཏེ་མ་གུས་པར་ཤེས་ནའང་ཆོས་ཐོས་ན་དེ་ལས་ལྡོག་པར་མཐོང་ནས་བཤད་ན་ཉེས་པ་མེད་དོ། །མགོ་གཡོགས་ པ་དང་གདུགས་དང་འཁར་བ་དང་མཚོན་ཆ་དང་གོ་ཆ་ཅན་དང་མགོ་ཐོད་ཀྱིས་བཀྲིས་པ་རྣམས་ནི་མ་གུས་པ་དང་ང་རྒྱལ་གྱི་སྤྱོད་ལམ་ཡིན་པས་མི་བཤད་པ་སྟེ་དེས་ཕན་པའི་ནད་པ་ཡིན་ན་ཉེས་པ་མེད་དོ། །བློ་དམན་པ་ལ་དེས་མི་གོ་བའི་ཟབ་པ་དང་རྒྱ་ཆེ་ བའི་གཏམ་བསྟན་པར་མི་བྱ་སྟེ་དེས་ཁོང་དུ་མི་ཆུད་པའི་ཕྱིར་རོ། །གལ་ཏེ་དེ་ལ་བརྟེན་ནས་བློ་གོང་དུ་འགྱུར་བར་མཐོང་ན་ཉེས་པ་མེད་དོ། །སྐྱེས་པ་གཞན་མེད་པར་བུད་མེད་ཉིད་ལ་མི་བསྟན་པ་སྟེ་གཞན་གྱིས་མ་དད་པའི་སེམས་སྐྱེ་བའི་ཕྱིར་རོ། ། གལ་ཏེ་གདུལ་བའི་སྐབས་ཤེས་པས་ཡིན་ན་ཉེས་པ་མེད་དེ་མ་འགགས་པས་ཁྱེའུ་སྤྱི་ཏོལ་ཅན་གྱི་མ་བདེན་པ་ལ་བཀོད་པ་བཞིན་ཏེ་ཐེག་ཆེན་དུ་དེ་བས་ཀྱང་གཞན་དོན་གྱི་དགོས་པ་དབང་བཙན་པའི་ཕྱིར། ཐེག་པ་ཆེ་ཆུང་ལ་སེམས་མཉམ་པས་ གུས་པར་བྱ་སྟེ་གཞན་དུ་ན་ཐེག་དམན་སྤངས་ན་ཆོས་སྤོང་གི་ལས་ལྕི་བའི་ཕྱིར། འོན་ཀྱང་གདུལ་བྱ་ཐེག་ཆེན་དུ་ཁ་དྲང་དགོས་པ་ལ་ཐེག་དམན་གྱི་མི་བསྔགས་པ་དང་ཐེག་ཆེན་གྱི་བསྔགས་པ་བརྗོད་པ་ལ་ཉེས་པ་མེད་དོ། །ཐེག་པ་ཆེན་པོ་ཟབ་རྒྱས་ཀྱི་སྣོད་དུ་གྱུར་པ་ ལ་ཐེག་དམན་ནམ་ཐེག་ཆེན་གྱི་ཡང་དྲང་དོན་ཉི་ཚེ་བ་ཙམ་བསྟན་པར་མི་བྱ་སྟེ། དེའི་འབད་པ་དོན་མེད་དུ་འགྱུར་བའི་ཕྱིར་རོ། །འོ་ན་ཡང་རེ་ཞིག་སྣོད་མ་ཤེས་ནས་བརྟག་པའི་ཆེད་དམ་དུས་ལ་སྡོད་དགོས་པར་མཐོང་བའམ། དེར་འཁོད་པ་གཞན་ཞིག་དེའི་
Page: 399 ༄༅། །སྣོད་མ་ཡིན་པར་མཐོང་ནས་དེ་སྲིད་དུ་རྣམ་པ་གཞན་སྟོན་པ་ལ་ཉེས་པ་མེད་དོ། །འདི་ལྟར་བླང་དོར་མང་པོ་མི་དགོས་ཀྱི་མདོ་འདི་ཁོ་ན་ཀློགས་ཤིག་ཅེའམ་གསང་སྔགས་འདི་ཟློས་ཤིག་དང་གྲོལ་བར་འགྱུར་རོ། །ཞེས་སོགས་ཉན་ཐོས་ཀྱི་ མདོ་དང༌། མུ་སྟེགས་ཀྱི་གསང་སྔགས་སོགས་ཀྱིས་ཕ་རོལ་པོ་འདྲིད་པར་མི་བྱ་སྟེ། རང་ཉིད་ཀྱང་དེ་ལ་ཡིད་མི་ཆེས་ན་གཞན་ལ་ཕན་པར་ལྟ་ག་ལ་འགྱུར་བའི་ཕྱིར། གལ་ཏེ་མངོན་ཤེས་ཅན་གྱིས་ཆོས་དེ་ཁོ་ནའི་སྐལ་པ་ཅན་དུ་མཐོང་བས་གདུལ་བའི་ ཐབས་ཡིན་ན་ནི་བྲིད་པ་མ་ཡིན་ཏེ། དེ་ཉིད་ལས་དོན་ཆེན་པོར་འགྱུར་བའི་ཕྱིར། འདི་ལ་དགེ་བའི་ལྷས་ནི། སྤྱོད་པ་ཡོངས་སུ་དོར་ནས་ནི། །མདོ་དང་སྔགས་ཀྱིས་འདྲིད་མི་བྱ། །ཞེས་བྱང་ཆུབ་སེམས་དཔའི་སྡོམ་པ་ལ་བསླབ་མི་དགོས་ཀྱི་མདོ་འདི་དང་ སྔགས་འདི་ཟུངས་ཤིག་ཅེས་འདྲིད་པར་བཤད་ལ། ཁ་ཅིག་ལས་མདོ་ལས་སྟོང་པ་དང་སྔགས་ལས་འདོད་ཡོན་ལམ་དུ་བཤད་པ་ལ་བསྙད་ནས་ལམ་ལོག་པ་སྟོན་པར་འདོད་ལ། འགྲེལ་ཆེན་ལས། སྡོམ་པའི་བསླབ་པའི་སྤྱོད་པ་བྱ་བར་འོས་ པ་རྣམས་དོར་ནས་མདོ་སྡེ་ལ་སོགས་པ་བཀླགས་པ་ཉིད་ཀྱིས་ཁྱོད་དག་པར་འགྱུར་རོ་ཞེས་མི་བསྟན་ཏོ། །ཞེས་དགེ་ལྷ་དང་མཐུན་པར་བཤད་དོ། །ཡང་བྱང་ཆུབ་སེམས་དཔའི་སྤྱོད་པ་རྒྱ་ཆེན་པོ་དོར་བར་མི་བྱ་སྟེ་བསྒྲུབ་བྱའི་གཙོ་བོ་ཡིན་པའི་ཕྱིར་ཞེས་ སམ། ན་ཆོས་སྨྲ་བའི་ལུས་ཀྱི་སྤྱོད་པ་ཁྲུས་བྱས་ཤིང་ཆོས་གོས་ལེགས་པར་བསྒོས་པ་སོགས་དང་ལྡན་ལ། ངག་གི་སྤྱོད་པ་ཁ་ན་མ་ཐོ་བ་རྣམས་སྤངས་ནས་གུས་ཤིང་གཙང་སྦྲ་དང་ལྡན་པར་བྱའི་དེ་ལས་ལོག་པ་ཡ་རབས་ཀྱི་སྤྱོད་པ་ཡོངས་སུ་དོར་ཏེ་ཞིག་ པོ་སོགས་སུ་ཁས་འཆེ་བའི་ཕྱིར་ཉལ་བ་དང་གོས་སྐ་རགས་མ་བཅིངས་པ་དང་ངག་འཆལ་ཚིག་དང་གྲོང་པའི་ཚིག་ཁོ་ན་མུ་ཅོར་དུ་སྨྲ་བ་ལ་སོགས་པས་ཆོས་སྟོན་པར་མི་བྱ་སྟེ་ཆོས་ཀྱི་ཕྱིར་ལྷ་ལ་སོགས་པ་འདུས་པ་རྣམས་མི་དགའ་བ་སྤང་བའི་ཕྱིར་དང༌།
Page: 400 ཆོས་ལ་གུས་པའི་སྤྱོད་ལམ་གྱི་ཕྱིར་རོ། །གལ་ཏེ་ན་བ་ལ་སོགས་པས་མི་ནུས་ན་ཉེས་པ་མེད་དོ། །དེས་ན་ཇི་ལྟར་འབྱོར་བའི་སེང་གེའི་ཁྲི་བཤམས་པ་ལ་ཆོས་སྨྲ་བ་གཙང་སྦྲ་དང་ལྡན་པས་འཛེགས་ཏེ་ལེགས་པར་འདུག །བྱང་ཆུབ་ཀྱི་སེམས་ཀྱིས་ ཁྱབ་པར་བྱས་ནས་ཐོག་མར། བློ་གྲོས་རྒྱ་མཚོས་ཞུས་པའི་མདོ་ལས། ་མཾ་གསུངས་པ་བདུད་ཀྱི་ནུས་པ་གཞོམ་པའི་སྔགས་འདི་བརྗོད་པར་བྱ་སྟེ། ཏདྱ་ཐཱ། ཤ་མེ་ཤ་མ་ཝ་ཏི། ཤ་མི་ཏ་ཤ་ཏྲུ། ཀུ་རེ་མཾ་ཀུ་རེ། མཱ་ར་ཛི་ཏེ། ཀ་རོ་ཊེ། ཀེ་ཡཱ་རེ། ཏེ་ཇོ་ཝ་ཏི། ཨོ་ལོ་ཡི་ན། བི་ཤུདྡྷ་ནིརྨ་ལེ་མ་ལཱ་པ་ན་ཡེ། ཁུ་ཁུ་རེ། ཁ་ཁ་གྲ་ས། གྲ་ས་ནེ། ཨོ་མུ་ཁི། པ་རཾ་མུ་ཁི། ཨ་མུ་ཁི། ཤ་མི་ཏཱ་ནི། སརྦ་གྲ་ཧ་བནྡྷ་ནཱ་ནེ། ནི་གྲཧི་ཏཱ། སརྦ་པཱ་ར་པྲ་ཝཱ་དི་ན། བི་མུཀྟ་མཱ་ར་པཱ་ཤ། སྱཱ་པི་ཏྭ། བུདྡྷ་མུ་དྲ། ཨ་ནུངྒ་ཏི་ཏཱ། སརྦ་མཱ་རེ། པུ་ཙ་རི་ཏ་པ་རི་ཤུདྡྷེ། བི་གཙྪ་ནྟུ། སརྦ་མཱ་ར་ཀརྨ་ཎི། ཞེས་བརྗོད་པས་ཁོར་ཡུག་ཚུན་ཆད་དུ་བདུད་ཀྱིས་མི་ཚུགས་སོ། །དེ་ནས་ཆོས་ལེགས་པར་བཤད་ཅིང་མཐར་དགེ་བ་བསྔོ་བར་བྱའོ། །གསུམ་པ་གཞན་སེམས་སྲུང་བ་ནི། སོ་ཤིང་དང་ ནི་མཆིལ་མ་དག །དོར་བ་ན་ནི་དགབ་བར་བྱ། །གཅི་ལ་སོགས་པའང་ལོངས་སྤྱོད་པའི། །ཆུ་དང་ཐང་ལ་དོར་བ་སྨད། །ཁ་བཀང་བ་དང་སྒྲ་བཅས་དང་། །ཁ་གདངས་ནས་ནི་བཟའ་མི་བྱ། རྐང་པ་བརྐྱང་སྟེ་འཇུག་མི་བྱ། །ལག་པ་མཉམ་པར་མི་ མཉེ་འོ། །བཞོན་པ་མལ་སྟན་གནས་དག་ཏུ། །བུད་མེད་གཞན་དང་གཅིག་མི་བྱ། །འཇིག་རྟེན་མ་དད་གྱུར་པ་ཀུན། །མཐོང་དང་དྲིས་ཏེ་སྤང་བར་བྱ། །སོར་མོས་བརྡ་ནི་མི་བྱ་སྟེ། །གུས་དང་བཅས་པས་གཡས་པ་ཡི། །ལག་པ་དག་ནི་ ཀུན་གྱིས་ཀྱང་། །ལམ་ཡང་དེ་ལྟར་བསྟན་པར་བྱ། །ལག་པ་ཤས་ཆེར་བསྐྱོད་མིན་ཏེ། ཅུང་ཟད་བསྐྱོད་ནས་སྒྲ་བསྒྲགས་ལ། སེ་གོལ་ལ་སོགས་བརྡ་བྱ་སྟེ། །གཞན་དུ་མ་བསྡམས་པར་འགྱུར་རོ། །མགོན་པོ་མྱ་ངན་འདས་གཟིམས་ལྟར།
Page: 401 ༄༅། །འདོད་པའི་ཕྱོགས་སུ་ཉལ་བར་བྱ། །ཤེས་བཞིན་མྱུར་དུ་ལྡང་སེམས་ལ། །ཐོག་མ་ཉིད་དུ་ངེས་པར་སྦྱར། །བྱང་ཆུབ་སེམས་དཔའི་སྤྱོད་པ་དག །ཚད་མེད་པར་ནི་གསུངས་པ་ལས། སེམས་སྦྱང་པ་ཡི་སྤྱོད་པ་ནི། །
ངེས་པར་དེ་སྲིད་སྤྱད་པར་བྱ། །ཞེས་གསུངས་ཏེ། དང་པོ་གཉིས་ཀྱིས་མི་མཛེས་པའི་སྤྱོད་པ་སྤང་། གསུམ་པས་མ་དད་པའི་རྒྱུ་སྤང་། བཞི་པས་མ་གུས་པའི་ཚུལ་སྤང་། ལྔ་པས་མ་བསྡམས་པ་སྤང་། དྲུག་པས་ཉལ་བའི་ཚུལ་
བཤད། བདུན་པས་བྱང་ཆུབ་ཀྱི་སེམས་སྦྱང་དགོས་པར་བསྟན་ཏོ། །དེ་ཡང་སོ་ཤིང་ནི་ཤིང་བུས་སོའི་དྲི་མ་བྲུད་པ་སྟེ་དེ་དང་མཆིལ་མ་ལ་སོགས་པ་ས་གཙང་མར་མི་དོར་ཞིང་གང་དུ་དོར་བ་དེར་ཡང་དོར་བ་དེའི་སྟེང་སས་དགབ་པར་བྱ་སྟེ་གཞན་གྱིས་
མཐོང་ན་སྐྱུག་མི་བྲོ་བའི་ཕྱིར་སྟེ་འདུལ་བ་ལས་ཁ་དུག་ཅན་ཡིན་ན་སྦྲང་མ་མི་འཆི་བའི་ཕྱིར་དུའང་བཤད་ལ། འགྲེལ་ཆེན་ལས། འདི་དག་ལྷ་ལ་སོགས་པ་འཕྱ་བས་བསོད་ནམས་མ་ཡིན་པ་འབྱུང་ངོ་། །ཞེས་སོ། །བཤང་གཅི་ཡང་གཞན་
གྱིས་ཉིན་པར་གནས་པ་ལ་སོགས་པས་ལོངས་སྤྱོད་པའི་ས་ཕྱོགས་སུ་དོར་ན་སྐྱེ་བོས་དམད་པར་འགྱུར་བས་མི་དོར་རོ། །ཁ་བཀང་བ་སོགས་ནི་མ་རབས་བཀྲེས་རྔབས་ཅན་གྱི་ཚུལ་སྤང་བ་དང་བག་མེད་པའི་ཚུལ་སྤོང་བའོ། །བུད་མེད་དང་སྟན་
གཅིག་ལ་འདུག་པ་སོགས་འཇིག་རྟེན་མ་དད་པའི་རྒྱུ་གཞན་རྣམས་ཀྱང་ཡུལ་དུས་དེར་བརྟགས་ལ་སྤང་བ་ནི་དཀོན་མཆོག་སྤྲིན་ལས་གསུངས་སོ། །གཞན་ལ་ལམ་སྟོན་པ་མཛུབ་ཀེར་གྱིས་བྱེད་ན་མ་གུས་པའམ་བརྙས་པ་ཡིན་པས་དེ་སྤངས་ཏེ་
ལག་པ་གཡས་པ་ཀུན་གྱིས་གུས་པར་བསྟན་པའོ། །འགྲོ་བ་ན་ལག་པ་ཆེར་བསྐྱོགས་ཤིང་བསྐྱོད་པ་ལང་ཚོས་རྒྱགས་པའི་ཚུལ་སྤངས་ཏེ་ཅུང་ཟད་བསྐྱོད་པས་སེ་གོལ་ལམ་འཁར་སིལ་གྱི་སྒྲས་མདུན་ན་འཁོད་པའི་སྐྱེ་བོ་ལ་གོ་བར་བྱའོ། །
Page: 402 ཉལ་་བ་ན་སངས་རྒྱས་མྱ་ངན་ལས་འདས་པའམ་གཟིམས་པའི་ཚུལ་ལྟར་སེང་གེའི་ཉལ་སྟབས་གློ་གཡས་ཕབ་ལག་ཐིལ་གཡས་ཀྱི་སྟེང་དུ་འགྲམ་པ་བཞག །རྐང་པ་བརྩེགས་ཏེ་བརྐྱང་པ་འམ་པུས་མོ་བརྩེགས་ཏེ་བརྐྱང་ནས་དེ་མན་གྱེན་དུ་བསྐུམ། ལག་པ་གཡོན་བརླ་གཡོན་པའི་སྟེང་དུ་བརྐྱང་སྟེ་བདེ་བ་ཅན་དུ་འོད་དཔག་མེད་ལ་མགོ་བསྟན་པ་ལྟ་བུས་གང་མོས་པར་སྔས་གཏད་དེ་མྱུར་དུ་ལྡང་བར་བྱའོ་སྙམ་པ་དང་། ས་ཕྱོགས་དེ་ཉིན་མོ་ལྟར་འོད་ཀྱིས་ཁྱབ་པ་དང་དེ་བཞིན་གཤེགས་པ་དེ་ཡིད་ལ་ བྱས་ཏེ་ཤེས་བཞིན་དུ་ཉལ་བར་བྱ་སྟེ་གཉིད་ཀྱི་བདེ་བའི་ཆེད་དུ་མ་ཡིན་པར་འབྱུང་བ་རྣམས་མི་འཁྲུག་ཞིང་ལུས་བདེ་བར་འཚོ་བའི་ཟས་ཡིན་པའི་ཕྱིར་རོ། །ཐུན་གཅིག་གམ་གཉིས་ནས་སེམས་ཅན་ཐམས་ཅད་གཏི་མུག་ལས་བསླང་བར་བྱའོ་ཞེས་ལངས་ ཏེ་དགེ་བ་ལ་སྦྱར་བར་བྱའོ། །མདོར་ན་བྱང་ཆུབ་ཀྱི་སེམས་སྦྱོང་བ་ཁོ་ན་བྱ་བ་ཡིན་ཏེ་དེ་འཕེལ་བའི་སྤྱོད་པ་ཁོ་ན་བྱའོ། །བཞི་པ་བསླབ་པ་ཕུན་སུམ་ཚོགས་བྱེད་ཀྱི་ཡན་ལག་ལ་དྲུག །བཤགས་བསྡམ་གྱིས་བྱི་དོར་བྱ་བ། བསླབ་པའི་གཞི་དངོས། དེའི་ཆེད་དུ་བྱ་བ། རྟེན་དགེ་བའི་བཤེས་གཉེན། ཤེས་བྱེད་ཀྱི་ཁུངས། བསླབ་དོན་མདོར་བསྡུ་བའོ། །དང་པོ་བཤགས་བསྣམ་གྱིས་བྱི་དོར་བྱ་བ་ནི། ཉིན་དང་མཚན་མོ་ལན་གསུམ་དུ། །ཕུང་པོ་གསུམ་པ་གདོན་བྱ་ཞིང་། །རྒྱལ་དང་བྱང་ཆུབ་སེམས་བསྟེན་པས། ལྟུང་བའི་ལྷག་མ་དེས་ཞི་བྱ། །ཞེས་གསུངས་ཏེ། སོ་སོ་སྐྱེ་བོ་ལ་ལྟུང་བས་གཏན་མ་གོས་པ་སྲིད་པར་དཀའ་བས་ན་ཉེས་པས་གོས་པ་རྣམས་ཀྱང་ཉིན་མཚན་ཐུན་དྲུག་ཏུ་སངས་རྒྱས་སུམ་བཅུ་སོ་ལྔ་ལ་ཕྱག་བྱས་ནས་བཤགས་པའི་ཕུང་པོ་དང༌། རྗེས་སུ་ཡི་རང་བའི་ཕུང་པོ་དང་། བསྔོ་བའི་ཕུང་པོ་སྟེ་བསོད་ནམས་ཀྱི་ཕུང་པོ་གསུམ་སྟོན་པ་དཀོན་བརྩེགས་ཀྱི་ཉེ་བ་འཁོར་གྱིས་ཞུས་པ་ལས་བྱུང་བ་བྱང་ཆུབ་སེམས་དཔའི་ལྟུང་བ་བཤགས་པ་འདིས་ཉེས་པ་སྔ་མ་རྣམས་བཤགས་པར་བྱ་ཞིང་སླར་སངས་
Page: 403 ༄༅། །རྒྱས་ལ་བརྟེན་ནས་བྱང་ཆུབ་ཀྱི་སེམས་ལེན་པས་སོར་ཆུད་པར་བྱའོ། །འདིར་ཕུང་པོ་གསུམ་པའི་མདོ་གཞན་ཡོད་ཀྱང་འདིའི་ཐད་ཀྱི་བསླབ་བཏུས་སུ་ལྟུང་བཤགས་ཉིད་དྲངས་སོ། །འགྲེལ་ཆེན་ལས་ནི། ལྟུང་བའི་ལྷག་ མ་ནི་རྩ་བ་ལས་གཞན་པའམ་ཕྱིར་བཅོས་ཟིན་པ་ལས་གཞན་པ་སྟེ་བརྗེད་ངས་སམ་ཤེས་བཞིན་མ་ཡིན་པས་བྱས་པ་སོགས་སོ། །དེས་ཞེས་པ་ནི་ཕུང་པོ་གསུམ་པ་གདོན་པ་དང་བྱང་ཆུབ་ཀྱི་སེམས་དང་སངས་རྒྱས་ལ་ཡང་དག་པར་བསྟེན་པ་སྟེ་ སུན་འབྱིན་པའི་གཉེན་པོའོ། །དེ་ལ་སྟོབས་བཞིས་སྦྱང་བ་ནི་ཆོས་བཞི་པའི་མདོ་དང་། ཕུང་པོ་གསུམ་པས་སྦྱང་བ་ནི་ཉེ་བ་འཁོར་གྱིས་ཞུས་པ་དང་། བསླབ་བཏུས་དང་། བྱང་ཆུབ་ཀྱི་སེམས་ཀྱིས་སྦྱང་བ་བྱམས་པའི་རྣམ་ཐར་དང༌། སངས་རྒྱས་ལ་བསྟེན་ པས་སྦྱང་བར་ཕག་མོའི་རྟོགས་བརྗོད་ལས་གསུངས་སོ། །ཞེས་སོ། །གཉིས་པ་བསླབ་པའི་ངོ་བོ་ནི། །རང་ངམ་གཞན་གྱི་དབང་ཡང་རུང་། །གནས་སྐབས་གང་དུ་ཅི་སྤྱོད་ཀྱང་། །བསླབ་པར་གསུངས་པ་གང་ཡིན་པའི། །གནས་ སྐབས་དེ་ལ་འབད་དེ་བསླབ། །རྒྱལ་སྲས་རྣམས་ཀྱིས་མི་བསླབ་པ། །དེ་ནི་གང་ཡང་ཡོད་མིན་ཏེ། དེ་ལྟར་གནས་པའི་མཁས་པ་ལ། །བསོད་ནམས་མི་འགྱུར་གང་ཡང་མེད། །ཅེས་གསུངས་ཏེ། མདོར་ན་བྱང་ཆུབ་སེམས་ དཔས་བསླབ་བྱར་གསུངས་པ་ལས་མི་འདའ་བ་སྟེ་སྤང་བྱར་གསུངས་པ་རྣམས་སྤོང་བ་ལས་མི་འདའ་བ་དང་བསྒྲུབ་བྱར་གསུངས་པ་རྣམས་སྒྲུབ་པ་ལས་མི་འདའ་བའོ། །སྤྱིར་རྒྱལ་བའི་སྲས་ཀྱིས་ཤེས་པར་བྱ་བ་ཙམ་དུ་མི་བསླབ་པ་ནི་ཅུང་ ཟད་ཀྱང་མེད་དེ་གཞན་དོན་མཐའ་ཡས་པ་ལ་འཇུག་དགོས་པའི་ཕྱིར་དང་། དེ་ཐམས་ཅད་ལ་ཡང་འཇུག་ཀྱང་གོས་པ་མེད་པ་པདྨ་ཆུ་ནང་ན་གནས་པ་ལྟ་བུར་རང་གི་ཚུལ་ལས་མི་གཡོ་བ་དེ་ལ་ནི་བསོད་ནམས་སུ་མི་འགྱུར་བ་གཞན་མེད་པའོ། །
Page: 404 གསུམ་པ་ནི། དངོས་སམ་ཡང་ན་བརྒྱུད་ཀྱང་རུང་། སེམས་ཅན་དོན་ལས་གཞན་མི་སྤྱད། །སེམས་ཅན་ཁོ་ནའི་དོན་གྱི་ཕྱིར། །ཐམས་ཅད་བྱང་ཆུབ་ཕྱིར་བསྔོའོ། །ཞེས་གསུངས་ཏེ། གཞན་དོན་དང་བྱང་ཆུབ་ལ་དམིགས་པ་ཁོ་ན་ ཐོག་མ་ནས་དོན་དུ་གཉེར་བྱ་ཡིན་པའི་ཕྱིར་རོ། །བཞི་པ་རྟེན་དགེ་བའི་བཤེས་གཉེན་ནི། རྟག་པར་དགེ་བའི་བཤེས་གཉེན་ནི། །ཐེག་ཆེན་དོན་ལ་མཁས་པ་དང་། །བྱང་ཆུབ་སེམས་དཔའི་བརྟུལ་ཞུགས་མཆོག །སྲོག་གི་ཕྱིར་ཡང་མི་གཏོང་བའོ། །དཔལ་འབྱུང་བ་ཡི་ རྣམ་ཐར་ལས། བླ་མ་བསྟེན་པའི་ཚུལ་ལྟར་བསླབ། །ཅེས་གསུངས་ཏེ། ཡོན་ཏན་ཐམས་ཅད་དགེ་བའི་བཤེས་གཉེན་ལ་རག་ལས་ལ། དེའི་མཚན་ཉིད་ནི། ཐེག་ཆེན་གྱི་དོན་སྟོང་ཉིད་སྙིང་རྗེ་དབྱེར་མེད་དང་ཤུགས་ཀྱིས་བསྟན་པ་ཚིག་འབྲུ་གསུང་རབ་ཡན་ལག་ བཅུ་གཉིས་སམ་ཤིན་ཏུ་རྒྱས་པའི་སྡེ་སྣོད་ལ་མཁས་ཤིང་བྱང་སྡོམ་སྲོག་ཕྱིར་ཡང་མི་གཏོང་བའི་བརྟུལ་ཞུགས་བརྟན་པོ་གྲུབ་པའོ། །དེ་བསྟེན་པ་ནི་དཔལ་འབྱུང་གི་རྣམ་ཐར་ལས་བསྟན་ཏོ། །དེ་ཡང་ཚོང་དཔོན་གྱི་བུ་ནོར་བཟང་ལ། ཁྱེའུ་དཔལ་འབྱུང་ དང་བུ་མོ་དཔལ་གྱི་བློ་གྲོས་མས་ཇི་ལྟར་བསྟན་པ་བདག་གིས་མདོར་བསྡུས་པ་ནི། དེ་བས་ཁྱོད་ཀྱིས་དགེ་རྩ་གཅིག་ལ་ཆགས་པར་མ་བྱེད་ཅིག །ཆོས་སྒོའི་འོད་ཀྱི་སྣང་བ་གཅིག་ལ་གཞོལ་པར་མ་བྱེད་ཅིག །རྒྱལ་སྲས་སྤྱོད་པ་གཅིག་ཡོངས་ རྫོགས་པས་ཆོག་པར་མ་སེམས་ཤིག །སྨོན་ལམ་གཅིག་གིས་མངོན་པར་སྒྲུབ་པ་ལྷུར་ལེན་མ་བྱེད་ཅིག །བཟོད་པ་གསུམ་ལ་འཇུག་པས་ཆོག་པའི་འདུ་ཤེས་མ་སྐྱེད་ཅིག །ཕ་རོལ་ཕྱིན་དྲུག་ཡོངས་རྫོགས་ནམ་ཡང་རྒྱུན་ཆད་མ་བྱེད་ཅིག །ས་བཅུ་ཐོབ་པས་ མཐར་ཐུག་ཉིད་དུ་ཆོག་འཛིན་མ་བྱེད་ཅིག །ཚད་ཡོད་རྒྱལ་ཞིང་བཟུང་དང་སྤྱོད་པས་གྲུབ་པར་མ་སེམས་ཤིག །དགེ་བའི་བཤེས་གཉེན་ཚད་ཡོད་བསྙེན་པས་ངོམས་པར་མ་བྱེད་ཅིག །ཅི་ཕྱིར་ཞེ་ན་རྒྱལ་བའི་སྲས་རྣམས་ཀྱིས། །དགེ་བའི་རྩ་བ་ཚད་
Page: 405 ༄༅། །མེད་ཡོངས་སྡུད་ཅིང་། །ཚད་མེད་བྱང་ཆུབ་སེམས་སྒྲུབ་དེ་ཡི་རྒྱུ། །ཚད་མེད་ཡོངས་གསོག་ཡོངས་སུ་བསྔོ་ལ་སླབ། །འགྲོ་བ་ཚད་མེད་སྨིན་བྱེད་བསམ་པའི་ཁམས། །ཚད་མེད་ལ་འཇུག་དབང་པོ་ཀུན་ཤེས་བྱེད། ། མོས་པའི་རྗེས་འབྲེང་ཚད་མེད་སྤྱོད་པ་རྟོགས། །བག་ཉལ་ཡོངས་གཞོམ་འགྲོ་བ་ཚད་མེད་གདུལ། །ཚད་མེད་ལས་གཞོམ་ལྟ་ལོག་ཉོན་མོངས་སེལ། །རྣམ་དག་ཚད་མེད་བསྐྱེད་ཅིང་ཟུག་རྔུ་དབྱུང་། །ཚད་མེད་སྲིད་པའི་མཚོ་སྐེམ་ མུན་པ་སེལ། །ང་རྒྱལ་རི་བོ་ཚད་མེད་རབ་ཏུ་བསྙིལ། །ཞགས་པ་ཚད་མེད་གཏུབ་ཅིང་སྲིད་པའི་ཀླུང་། །ཚད་མེད་རབ་བརྒལ་ཚེ་ཡི་རྒྱ་མཚོའི་ཚོགས། །མུ་མཐའ་མེད་སྐེམ་འདོད་འདམ་ཚད་མེད་སྒྲོལ། །ཁམས་གསུམ་ཁྱིམ་དུ་ཐོགས་པ་ ཚད་མེད་འབྱིན། །སེམས་ཅན་ཚད་མེད་འཕགས་པའི་ལམ་ལ་འགོད། །དུག་གསུམ་སྤྱོད་པ་ཞི་བྱེད་བདུད་ཞགས་གཅོད། །བདུད་ཀྱི་ལས་ཟློག་ལྷག་བསམ་དག་པར་སྦྱོང་། །སྦྱོར་བ་སྤེལ་དང་དབང་པོ་རབ་བསྐྱེད་མོས་པ་ཡོངས་སྦྱངས་མཉམ་ ཉིད་འཐོབ། །སྤྱོད་པའི་རྗེས་འབྲང་ཡོན་ཏན་དག་བྱེད་སྤྱོད་པ་ཡོངས་རྫོགས་འཇིག་རྟེན་འཇུག །དད་པའི་སྟོབས་བསྐྱེད་བརྩོན་འགྲུས་ཉེར་བརྟན་དྲན་པ་དག་བྱེད་ཏིང་འཛིན་རྫོགས། །ཤེས་རབ་སྟོབས་སྒྲུབ་མོས་པའི་སྟོབས་བརྟན་བསོད་ནམས་སྟོབས་ བསྐྱེད་ཡེ་ཤེས་སྤེལ། །ཚད་མེད་སྟོབས་སྒྲུབ་སྟོབས་ཡོངས་རྫོགས་པ་དང༌། །ཆོས་ཀྱི་སྒོ་དང་ཕྱོགས་དང་སྣང་བ་དང༌། །གསལ་བ་རབ་འབྱེད་དབང་པོའི་རྒྱུད་སྣང་བྱེད། །ཉོན་མོངས་ནད་ཤེས་ནད་ཆེན་གསོ་བར་བྱེད། །ཆོས་ཀྱི་སྨན་སྡུད་ བདུད་རྩིའི་སྤྲིན་རབ་འགྱེད། །ཞིང་ཀུན་འདའ་ཞིང་རྒྱལ་མཆོད་འཁོར་དུ་འཇུག །བསྟན་པ་ཡོངས་བཟུང་གནོད་ཀུན་བཟོད་པར་བྱེད། །མི་ཁོམ་རྣམ་གཅོད་བདེ་བ་མ་ལུས་སྒྲུབ། །སེམས་ཅན་སྡུད་དང་གཟུངས་ཀྱི་སྒོ་ཡོངས་སྦྱོང་། །
Page: 406 སྨོན་ལམ་སྙིང་རྗེ་བརྩོན་པ་སྟོབས་དང་མངོན་པར་ཤེས། །ཡེ་ཤེས་སྣང་སྐྱེད་སེམས་ཅན་རྒྱུད་ཀྱི་རྗེས་སུ་འགྲོ། །སྲིད་པར་ལུས་འཛིན་འགྲོ་བའི་རིས་དང་སྐད་ཀུན་ཤེས། །སྤྱོད་ཡུལ་རྒྱ་ཆེན་ལ་འཇུག་ཡངས་པའི་གནས་ལ་སྤྱད། ། སྤྱོད་པ་ཟབ་མོ་ལ་ལྟ་རྟོགས་དཀའི་ཡུལ་ཡང་རིག། བགྲོད་དཀའི་ལམ་བགྲོད་སྒྲུབ་དཀའི་ཤུགས་བཟུང་འཇུག་དཀར་འཇུག །སྣ་ཚོགས་སྤྱོད་རྟོགས་ཀུན་ཏུ་ཁྱབ་པའི་རྣམ་འཕྲུལ་སྟོན། །སྤྱོད་པས་ཞིང་ཀུན་འགེངས་ཤིང་ཕ་རོལ་ཕྱིན་ ཀུན་རྫོགས། །ལུང་བསྟན་ཀུན་མནོད་ས་དང་ཞིང་ཁམས་ཐམས་ཅད་སྦྱོང་། །མཐའ་ཡས་བསྐལ་པར་བཟོད་པའི་གོ་བསྒོ་རྒྱལ་ཀུན་མཆོད། །སྨོན་ལམ་ཡོངས་སྒྲུབ་ཆོས་སྒོ་མ་ལུས་ཡོངས་དག་བྱེད། །སྤྱོད་པ་རྒྱ་ཆེན་དེ་དག་རེ་རེ་ཡང་། ། ཚད་མེད་མཐའ་མེད་བསམ་གྱིས་མི་ཁྱབ་པས། །རྒྱལ་བའི་སྤྱོད་ཡུལ་ཡོངས་སུ་དག་འགྱུར་ཏེ། །གྲངས་ཚད་མཐའ་ལ་གནས་པས་མཐར་མི་ཕྱིན། །འགྲོ་བ་གཅིག་ཡང་མ་ལུས་འདུལ་བའི་ཕྱིར། །རྒྱལ་སྲས་སྤྱོད་པ་སེམས་ཅན་ཀུན་ དང་མཉམ། །བསྐལ་པ་ཀུན་ཏུ་འགྲོ་རྣམས་སྨིན་བྱེད་ཕྱིར། །རྒྱལ་སྲས་སྤྱོད་པ་བསྐལ་པ་ཀུན་མཐས་གཏུགས། །སྐྱེ་བ་མ་ལུས་ཀུན་དུ་འཇུག་ཕྱིར་སྐྱེ་ཀུན་མཚུངས། །དུས་ཀུན་རྟོགས་ཕྱིར་དུས་རྣམས་ཀུན་དང་མཉམ་པ་ཉིད། ། ཞིང་ཀུན་དག་པར་བྱེད་ཕྱིར་ཞིང་རྣམས་ཀུན་དང་མཉམ། །ཆོས་དབྱིངས་ཀུན་འཇུག་ཀུན་གྱི་སྨོན་ལམ་སྒྲུབ་པའི་ཕྱིར། །རྒྱལ་བ་དང་ནི་རྒྱལ་སྲས་ཀུན་དང་མཚུངས་པར་འཇུག། དགེ་བའི་བཤེས་ཀུན་བསྙེན་དགོས་ཕྱིར། །དགེ་བའི་བཤེས་ རྣམས་ཀུན་དང་མཉམ། །ཆོས་རྣམས་ཀུན་གྱི་མཐའ་གང་ཡིན། །དེ་ནི་རྒྱལ་སྲས་སྤྱོད་པའི་མཐའ། །དེ་ཕྱིར་ཁྱོད་ལ་གདམས་པ་འདི་ཡིན་ཏེ། །དགེ་བའི་བཤེས་གཉེན་བཙལ་བས་སྐྱོ་མི་བྱ། །མཐོང་བས་ངོམས་པ་སྐྱེད་པར་
Page: 407 ༄༅། །མ་བྱེད་ཅིག །དམ་ཆོས་དྲི་བས་ཆོག་མི་ཤེས་པར་བྱོས། །འགྲོགས་ལས་བསམ་པ་ཕྱིར་ཟློག་མི་བྱའོ། །ནམ་དུའང་དགེ་བའི་བཤེས་ལ་ཕུ་དུད་དང་། །རིམ་གྲོའི་སྦྱོར་བ་རྒྱུན་བཅད་མི་བྱའོ། །གདམས་དང་ རྗེས་བསྟན་ལོག་པར་མི་གཟུང་ཞིང༌། །ཡོན་ཏན་འཐོབ་པར་ཐེ་ཚོམ་མ་སྐྱེད་ཅིག །དེ་ཡིས་བསྟན་ལ་ཡིད་གཉིས་མི་བྱ་སྟེ། །མཐུ་ཆེན་རྣམས་ཀྱི་འགྲོ་འདུལ་ཐབས་མང་དང༌། །འཇིག་རྟེན་གཞུག་པའི་སྤྱོད་པ་མང་པོ་ལ། །ཞེ་སྡང་ མི་བསྐྱེད་བསམ་མི་ཁྱབ་དྲན་བྱོས། །མོས་པ་ཆེ་ལས་ལུས་སེམས་མ་ལྡོག་ཅིག །ཅི་ཕྱིར་ཞེ་ན་རྒྱལ་བའི་སྲས་རྣམས་ཀྱི། །སྤྱོད་ཀུན་དགེ་བའི་བཤེས་ལ་རག་ལུས་ཏེ། །ཡོན་ཏན་ཡོངས་སུ་རྫོགས་པ་དེ་ལས་བྱུང༌། །སྨོན་ལམ་ཆུ་རྒྱུན་ འབྱུང་བའི་གངས་རི་སྟེ། །དགེ་བ་ཀུན་སྐྱེད་ཚོགས་ཀུན་ཡོངས་སུ་སྒྲུབ། །ཆོས་སྒོའི་སྣང་བ་རབ་འབྱིན་རྒྱལ་སྲས་ཀྱི། །འབྱུང་བའི་དགའ་སྟོན་དགེ་བའི་བཤེས་གཉེན་ཉིད། །དེ་ནི་བསླབ་པའི་འབྱུང་ཁུངས་ཏེ། །ཡོན་ཏན་ཆོས་རྣམས་ཀུན་གྱི་གནས། ། ལྷག་བསམ་དག་པའི་རྩ་བ་ཉིད། །བརྟན་པའི་སེམས་ཀྱི་གཡུང་དྲུང་གཞི། །གཟུངས་སྤོབས་སྣང་བ་སྐྱེད་པའི་ཉི། །རྣམ་དག་སྒོ་རྣམས་ཀུན་གྱི་མཛོད། །ཡེ་ཤེས་ཆེན་པོའི་སྣང་བ་སྟེ། །རྨད་བྱུང་སྨོན་ལམ་ཀུན་གྱི་གཏེར། །སྨོན་ལམ་ ཀུན་རྒྱུད་གཅིག་པའི་རྟེན། །དམ་ཆོས་འབྱུང་གནས་གཅིག་པུ་ཉིད། །ཡང་དག་སྒྲུབ་པའི་ཕུལ་ནི་བཤེས་གཉེན་རྒྱུད་ལས་བྱུང་། །རྒྱལ་སྲས་གསང་བའི་གནས་ཀུན་དེ་ཡི་མཛོད་ན་འདུག །དབང་པོའི་ཤུགས་དང་ཡེ་ཤེས་རྒྱ་མཚོ་རྣམ་ པར་སྤེལ། །བསོད་ནམས་གཏེར་ཀུན་མི་ཉམས་སྲུང་དང་སྐྱོབ་པར་བྱེད། །རྣམ་དག་ཀུན་བསྐྱེད་ཆོས་ཀྱི་སྤྲིན་ཆེན་ཁ་ནས་འབྱིན། །རྒྱལ་བའི་ལམ་ཀུན་དེ་ཡི་ཁོང་ན་གནས་པ་ཉིད། སངས་རྒྱས་ཀུན་གྱི་བྱང་ཆུབ་ནི། །དེ་ལ་རིམ་གྲོར་བྱས་
Page: 408 པས་འཐོབ། །རྒྱལ་སྲས་ཡོན་ཏན་ཅི་ཡོད་པ། །དེ་ནི་དགེ་བའི་བཤེས་ཀྱི་མཐུ། །བྱང་ཆུབ་སེམས་དཔའི་བྱམས་བརྩེ་དང་། །དབང་དང་ལྷག་བསམ་ཡན་ལག་དང་། །ཕན་པ་ཉེ་བར་སྒྲུབ་པ་ཀུན། །དེ་ལས་བྱུང་གིས་གཞན་དུ་མིན། ། དགེ་བའི་བཤེས་ཀྱིས་གང་ཟིན་པ། །དེ་ནི་ངན་འགྲོར་མི་ལྟུང་སྟེ། །ངེས་བཟུང་བྱང་ཆུབ་ལས་མི་ལྡོག །གང་ལ་བཤེས་གཉེན་གྱིས་བསམ་པ། །དེ་ནི་བསླབ་ལས་འགལ་མི་བྱེད། །བླ་མས་ཀུན་ཏུ་རྣམ་བསྲུངས་དེ། །སྡིག་པའི་ གྲོགས་ཀྱི་དབང་མི་འགྱུར། །གང་གིས་བསྐྱངས་རྣམས་མཐུ་ཆེན་གྱི། །ཆོས་ལས་ཉམས་པར་མི་འགྱུར་རོ། །དེ་ལྟར་ཐེག་ཆེན་དགེ་བའི་བཤེས་གཉེན་གྱིས། །ཡང་དག་ཟིན་རྣམས་བྱིས་པའི་ས་ལས་འདའ། །ཡོངས་སུ་བསྲུངས་རྣམས་ ཞི་བའི་མཐར་མི་འཇུག །ལེགས་པར་བསྐྱངས་རྣམས་འཇིག་རྟེན་ཀུན་ལས་འཕགས། །ཡང་དག་བསྐྱེད་རྣམས་སྲིད་པས་གོས་མི་འགྱུར། །མངོན་པར་བསྒྲུབས་རྣམས་བརྩམས་པ་ལས་མི་ལྡོག། ཡོངས་སུ་བཟུང་རྣམས་ལས་ཉོན་གྱིས་ མི་ཐུབ། །སྟོབས་ཀྱིས་བརྟན་པར་བྱས་རྣམས་བདུད་ལས་རྒྱལ། །དེ་ལ་བསྙེན་པར་བྱེད་རྣམས་སྤྱོད་མི་འཁྲུལ། །དེ་བསྟེན་བྱང་ཆུབ་ཡན་ལག་ཀུན་གྱིས་འཕེལ། །སྒྲིབ་པའི་ཆོས་སྤྱོད་སྡིག་ཏོ་ལྡོག་བྱེད་བྱ་དང་མི་བྱའི་གནས་ཡོངས་སྟོན། ། བག་མེད་ལས་ལྡོག་མ་རིག་མུན་སེལ་ལྟ་བའི་འཆིང་གཅོད་སྲིད་ལས་སྒྲོལ། །མཐའ་གཉིས་ལས་ཟློག་ཀུན་མཁྱེན་ལམ་སྟོན་ཤེས་རབ་མིག་སྦྱོང་སྙིང་རྗེ་སྤེལ། །བྱང་ཆུབ་སེམས་བསྐྲུན་ཕ་རོལ་ཕྱིན་སྟོན་བཟོད་པ་རྣམ་འབྱེད་ས་ལ་འགོད། ། དགེ་བའི་རྩ་བ་ཀུན་འགྲུབ་བྱེད། །ཚོགས་སྐྱེད་ཡོན་ཏན་ཐམས་ཅད་སྟོབ། །རྒྱལ་ཀུན་དྲུང་དུ་ཕྱིན་པར་བྱེད། །དོན་ཀུན་ལེན་འཇུག་ནན་ཏན་འགོད། །འབྱུང་བའི་སྒོ་སྟོན་ལམ་གོལ་སྲུང༌། །ཆོས་སྒོ་སྣང་བྱེད་ཆོས་ཆར་འབེབས། །
Page: 409 ༄༅། །ཉོན་མོངས་ཀུན་གཞིལ་རྒྱལ་བར་འགོད། །དེ་ཕྱིར་སངས་རྒྱས་རིགས་སུ་སྐྱེད་པའི་མ་དང་ཕན་པ་རྒྱ་ཆེན་སྒྲུབ་པས་ཕ་ལྟ་བུ། །བྱ་མིན་གནས་ལས་སྲུང་ཕྱིར་མ་མ་བསླབ་པ་ཁོང་དུ་ཆུད་པར་བྱེད་པས་སློབ་དཔོན་ཉིད། །ཡང་ དག་ལམ་དུ་འཛུད་པས་ལམ་མཁན་ཉོན་མོངས་ནད་ལས་ཐར་བར་བྱེད་པས་སྨན་པའི་གཙོ། །ཡེ་ཤེས་སྨན་གྱི་འབྱུང་གནས་གངས་རིའི་མཆོག་འདྲ་འཇིགས་པ་ཡོངས་སུ་སྲུང་པས་དཔའ་བོ་ཉིད། །འཁོར་བའི་ཆུ་ལས་སྒྲོལ་བའི་མཉན་པ་དང་ ཡེ་ཤེས་རིན་ཆེན་གླིང་སྐྱེལ་ཁ་ལོ་བ། །དེ་འདྲའི་ཡོན་ཏན་འབྱུང་གནས་བཤེས་གཉེན་ལ། །དེ་ལྟའི་ཡིད་བྱེད་མོས་པའི་རྒྱུན་བརྟན་པས། །རྟག་ཏུ་དགེ་བའི་བཤེས་གཉེན་བསྙེན་པར་གྱིས། །ས་བཞིན་ཁུར་གྱིས་མི་སྐྱོའི་སེམས་ཀྱི་བསྟེན། ། མོས་པ་མི་ཕྱེད་རྡོ་རྗེ་འདྲ་བར་བྱོས། །གདུང་བས་མི་བསྒུལ་ཁོར་ཡུག་འདྲ་སེམས་སྐྱེད། །ཅི་བསྒོ་ཉན་པ་བྲན་བཟང་འདྲ་བར་གྱིས། །ངག་མི་གཅོག་པས་སློབ་མ་དམ་པ་དང་། །ལས་ཀུན་སྒྲུབ་པ་འཇིག་རྟེན་བྲན་ཁོ་ལོ་དང་། །ཉོན་མོངས་གྱུར་བས་མི་སྐོ་མ་མ་དང་། །ཀ་ལོ་བདེ་བ་གཡོག་གི་སེམས་ཀྱིས་བསྟེན། །ང་རྒྱལ་མེད་ པས་ཕྱགས་བདར་བ་དང་ནི། །དུས་བཞིན་འཇུག་པ་ཟླ་བ་ཉ་བ་འདྲ། །མི་སྲུན་མེད་པ་ཅང་ཤེས་རྟ་ལྟ་བུ། །ཁུར་གྱིས་མི་ངལ་ཐེག་པ་འདྲ་བར་བྱོས། །དུལ་ཞིང་ཅང་ཤེས་གླང་པོའི་དམ་པ་དང་། །མི་བསྒུལ་མི་བསྐྱོད་རི་བོའི་དབང་པོ་འདྲ། ། མི་ཁྲོ་གུས་པ་ལོ་མ་ལྟར་མཉེན་སེམས། །ང་རྒྱལ་མེད་པས་གདོལ་བུའི་སེམས་ཀྱིས་བསྟེན། །དྲེགས་བྲལ་ཁྱུ་མཆོག་རྭ་རྩེ་བཏུབས་འདྲ་དང༌། །རློམ་སེམས་མེད་པ་འཕྱོན་བུ་ལྟ་བུ་དང༌། །འགྲོ་དང་འོང་བས་མི་སྐྱོ་གྲུ་ལྟ་བུ། །ངག་མཐར་ ཕྱིན་བྱེད་ཟམ་པ་འདྲ་སེམས་སྐྱེད། །དེ་ངོར་ལྟ་བ་མཛངས་པའི་བུ་འདྲ་དང་། །བཀའ་ལས་མི་འདའ་གཞོན་ནུ་མཁས་པའི་སེམས། །དེ་འདྲར་དལ་ཞིང་མཛངས་ལ་དུས་ཤེས་པ། །ཉེ་བའི་ཡིད་ཀྱིས་རྟག་ཏུ་བསྟེན་པར་བྱོས། །ཁྱོད་ཀྱིས་
Page: 410 བདག་ཉིད་ནད་པ་འདྲ་བ་དང་། །དགེ་བའི་བཤེས་ལ་སྨན་པ་ཟུག་རྔུ་འབྱིན། །གདམས་པ་སྨན་མཆོག་ཉམས་སུ་ལེན་པ་ནི། །ནད་རབ་འཚོ་བའི་འདུ་ཤེས་སྐྱེད་པར་གྱིས། །བདག་ནི་འགྲོན་པོ་ལམ་ཚོལ་ཞུགས་པ་ལ། །ཕན་བྱེད་དེ་ནི་ མ་གོལ་ལམ་རབ་སྟོན། །དེ་ཡིས་གདམས་ལ་ལམ་དང་ནན་ཏན་ནི། །བདེ་བའི་ཕྱོགས་སུ་འགྲོ་བའི་འདུ་ཤེས་ཞོག །ཆོས་ཀྱི་མཉམ་པ་ཆེན་པོ་དེས་བསྟན་པའི། །སྟེགས་བུ་དང་ནི་ནན་ཏན་གྲུར་ཞུགས་ཏེ། །སྲིད་པའི་རྒྱ་མཚོ་ཉམ་ངའི་ཕ་ རོལ་གྱི། །མི་གནས་རིན་ཆེན་གླིང་དུ་ཕྱིན་པར་བྱོས། །བདག་ནི་ཞིང་པ་ལོ་ཐོག་འདོད་པ་དང་། །ཕན་མཛད་དེ་ནི་ཀླུ་ཡི་དབང་པོའི་མཆོག །གདམས་པ་སྤྲིན་གྱི་བཅུད་དང་ནན་ཏན་ནི། །ལོ་ཐོག་ཡོངས་སུ་འགྲུབ་པ་དེ་ལྟར་ལྟོས། །བདག་ ཉིད་དམ་པའི་ནོར་གྱིས་དབུལ་བ་ལ། །སྨན་པར་མཛད་པ་ངལ་གསོས་དབང་པོ་དེས། །ཕན་བདེའི་ལམ་ཆེན་ཡངས་པའི་མཛོད་བྱིན་ཏེ། །དབུལ་བྲལ་མཆོག་གི་གནས་ལ་འགོད་པར་ལྟོས། །བདག་ནི་བཟོ་གནས་འདོད་པའི་སློབ་མ་དང་། ། དགེ་བའི་བཤེས་ནི་སློབ་དཔོན་དམ་པའི་གནས། །གདམས་པ་གཟོ་ཡི་ཚུལ་དང་ནན་ཏན་ནི། །བཟོ་ཀུན་ཁོང་དུ་ཆུད་པའི་འདུ་ཤེས་བསྟེན། །ཕན་བྱེད་དཔའ་བོ་གདམས་པའི་རུ་མཚོན་ཅན། །དེས་ནི་བདག་གི་འཇིགས་པ་སེལ་བར་ ལྟོས། །ཆོས་ཀྱི་གྲུ་ཆེན་ཁ་ལོ་བསྒྱུར་མཁས་དེས། །གདམས་པའི་རིན་ཆེན་གྱིས་ནི་བདག་ཅག་སྡུད། །ཕ་མའི་མཆོག་དེས་བླ་མེད་མ་ཉམས་པའི། །རྒྱལ་བའི་རིགས་སུ་བདག་ཉིད་བསྐྲུན་པར་ལྟོས། །ཕན་པ་སྦྱིན་མཛད་ཆོས་ ཀྱི་རྒྱལ་པོ་དེས། །བདག་ནི་བླ་མེད་རྒྱལ་པོར་ཅོད་པན་འཆིང་། །དེ་ལྟར་ཡོངས་སུ་དག་པའི་འདུ་ཤེས་ཀྱི། །ཡིད་ལ་བྱེད་པ་ཡང་དག་སྐྱེད་བྱས་ནས། །ཕན་བདེའི་གྲུ་ཆེན་འཇིག་རྟེན་སྨན་མཛད་པ། །དེ་རྣམས་རྟག་ཏུ་ཚུལ་
Page: 411 ༄༅། །བཞིན་བསྙེན་བཀུར་གྱིས། །ཞེས་བསྟན་ཏོ། །ལྔ་པ་ཤེས་བྱེད་ཀྱི་ཁུངས་ནི། འདི་དང་སངས་རྒྱས་བཀའ་བསྩལ་གཞན། མདོ་སྡེ་བཀླགས་ནས་ཤེས་པར་བྱ། །མདོ་སྡེ་རྣམས་ལ་སློབ་པ་གནང་། །དེ་བས་མདོ་སྡེ་བཀླག་པར་བྱ། ། ནམ་མཁའི་སྙིང་པོའི་མདོ་སྡེ་ནི། །ཐོག་མ་ཉིད་དུ་བལྟ་བར་བྱ། །གང་ཕྱིར་རྟག་ཏུ་སྤྱད་པ་ནི། །དེ་ལས་རྒྱ་ཆེར་རབ་སྟོན་པས། །བསླབ་པ་ཀུན་ལས་བཏུས་པ་ཡང་། །ངེས་པར་ཡང་དང་ཡང་དུ་བལྟ། །ཡང་ན་རེ་ཞིག་མདོར་བསྡུས་པ། ། མདོ་རྣམས་ཀུན་ལས་བཏུས་པ་བལྟ། །འཕགས་པ་ཀླུ་སྒྲུབ་ཀྱིས་མཛད་པའི། གཉིས་པོའང་འབད་པས་བལྟ་བར་བྱ། །ཞེས་གསུངས་ཏེ། དང་པོས་མཚམས་སྦྱར། གཉིས་པས་ནམ་སྙིང་གི་མདོ་ཁུངས་སུ་བསྟན། གསུམ་པས་ སློབ་དཔོན་ཉིད་ཀྱི་བསྟན་བཅོས་གཉིས་དང་། ཚིག་རྐང་གཉིས་ཀྱིས་ཀླུ་སྒྲུབ་ཞབས་ཀྱི་བསྟན་བཅོས་ཁུངས་སུ་བསྟན་ཏོ། །དེ་ཡང་དགེ་བའི་བཤེས་གཉེན་བསྟེན་ཚུལ་འདི་དང་ཕ་རོལ་ཏུ་ཕྱིན་པ་དྲུག་གི་ཚུལ་སོགས་མཐའ་ཡས་པ་རྣམས་ནི་ བཅོམ་ལྡན་འདས་ཀྱི་བཀའ་ཉིད་ལས་ཤེས་པར་བྱ་སྟེ། མདོ་སྡེའི་མིང་གིས་སྨོས་པ་ཐེག་ཆེན་གྱི་སྡེ་སྣོད་གསུམ་ལ་བསླབ་པར་བྱ་སྟེ། དེའི་ཡང་ཐོག་མར་ནམ་མཁའ་སྙིང་པོས་ཞུས་པའི་མདོ་ནི། བྱང་ཆུབ་སེམས་དཔའ་ལས་དང་པོ་པའི་ལྟུང་བ་སྦྱང་ཐབས་ དང་བཅས་པ་དེ་ལས་སྟོན་པས་ཐོག་མར་བལྟ་ལ་དེ་ནས་གཞན་ཤིན་ཏུ་རྒྱས་པའི་སྡེ་སྣོད་ཀྱི་བར་དུ་བལྟའོ། །སྤྱིར། གླང་པོ་རྙེད་ནས་གླང་པོའི་རྗེས་ནི་འཚོལ་བ་ལྟར། །ཤེས་རབ་ཕ་རོལ་ཕྱིན་ཐོས་མདོ་ཚོལ་དེ་བཞིན་ནོ། །ཞེས་སོགས་ དང་། མདོ་དང་སྔགས་ཀྱིས་འདྲིད་མི་བྱ། །ཞེས་སོགས་ཉན་ཐོས་ཀྱི་གཞུང་ལ་མདོའི་མིང་དུ་གསུངས་ནས་ཐེག་ཆེན་གྱི་མི་མཐུན་པའི་ཕྱོགས་སུ་གསུངས་པ་དང༌། སྡེ་སྣོད་གསུམ་གྱི་བྱེ་བྲག་གི་མདོ་སྡེ་ལ་དེར་བཤད་པ་ཡོད་ཀྱང་སྐབས་འདིར་ནི་ཐེག་
Page: 412 ཆེན་གྱི་བཀའ་ཙམ་ལ་མདོ་སྡེའི་མིང་གིས་གསུངས་པ་སྟེ་གཞན་དུ་ན་དཔལ་འབྱུང་གི་རྣམ་ཐར་སོགས་གང་ལས་འབྱུང་བའི་ཕལ་པོ་ཆེ་ནི་ཐེག་ཆེན་གྱི་མངོན་པ་གཙོ་ཆེ་བ་ཡིན་ཞིང་ཉེ་བ་འཁོར་གྱིས་ཞུས་པ་སོགས་ཐེག་ཆེན་གྱི་འདུལ་བ་ཡིན་པའི་ ཕྱིར་རོ། །དེ་བཞིན་དུ་སློབ་དཔོན་ཉིད་ཀྱི་བསྟན་བཅོས་གཉིས་དང་། འཕགས་པ་ཀླུའི་བསྟན་བཅོས་གཉིས་ཀྱང་སངས་རྒྱས་ཀྱི་གསུང་རབ་ཀུན་ལས་བཏུས་ཏེ་བསྟན་པ་ཉིད་ཡིན་པའི་ཕྱིར། བཀའ་དེ་དག་གི་གླེགས་བམ་མ་རྙེད་པའམ་དེ་ཙམ་ལྟ་བར་མི་ ནུས་པ་རྣམས་ཀྱིས་བསྟན་བཅོས་དེ་དག་བལྟས་པས་དོན་གྲུབ་པའོ། །འདིར་འགྲེལ་ཆེན་ལས། དགེ་བའི་བཤེས་གཉེན་མི་བཏང་ཞིང་། །ཞེས་གསུངས་པ་དེ་གསལ་བར་བྱ་བའི་ཕྱིར་རྟག་པར་སོགས་ཏེ། དགེ་བ་ནི་མངོན་མཐོ་དང་ངེས་ ལེགས་འཐོབ་པའི་མཚན་ཉིད་ཀྱི་ལས་སོ། །གཉེན་ནི་ཐུན་མོང་མ་ཡིན་པའི་ཉེ་བ་སྟེ་དེས་ལུས་སྲོག་ཆུད་འཛའ་བའི་འཇིགས་པས་འཇིགས་ཀྱང་མི་བཏང་ངོ་། །དེ་ནི་བརྒྱད་སྟོང་པའི་རྟག་ངུས་ཀྱི་ལེའུ་དང་། ཆོས་བཞི་པའི་མདོ་དང་། དཔལ་འབྱུང་ གི་རྣམ་ཐར་ལས་གསུངས་སོ། །མདོ་སྡེ་རྣམས་ལ་རྟག་ལྟ་བས། །ཞེས་པ་དེ་གསལ་བར་བྱ་བའི་ཕྱིར་འདི་དང་སོགས་ཏེ་འདིར་མ་བསྟན་པ་རྣམས་ཐེག་ཆེན་གྱི་མདོ་སྡེ་དཀོན་མཆོག་སྤྲིན་ལ་སོགས་པ་སྣ་ཚོགས་པ་ལས་བལྟའོ། །ནམ་སྙིང་ གི་མདོ་ལས། རྒྱལ་པོའི་རྩ་ལྟུང་ལྔ། བློན་པོའི་གཅིགལས་དང་པོ་པའི་བརྒྱད་རྣམས་ཇི་ལྟར་གསོ་བ་དང་བཅས་པ་བསྟན་ཏེ་བསླབ་བཏུས་མདོ་བཏུས་སློབ་དཔོན་རང་གིས་མཛད་པ་གཉིས་སུའང་བལྟའོ། །ཡང་ན་འཕགས་པ་ཀླུ་སྒྲུབ་ཀྱི་ཞལ་སྔ་ནས་ མཛད་པའི་བསླབ་པ་ཀུན་ལས་བཏུས་པ་དང་། མདོ་ཀུན་ལས་བཏུས་གཉིས་པོའང་འབད་པ་སྟེ་གུས་པས་བལྟ་བར་བྱའོ། །ཞེས་སོ། །འདི་ནི། གཉིས་པོའང་འབད་པས་བལྟ་བར་བྱ། །ཞེས་ཞི་བའི་ལྷ་ཉིད་ཀྱི་ཀུན་བཏུས་གཉིས་སུ་མ་ཟད་
Page: 413 ༄༅ ། །འཕགས་པས་མཛད་པའི་ཀུན་བཏུས་གཉིས་ཀྱང་ཡོད་པར་སྟོན་པ་ཡིན་ལ། ཁ་ཅིགགཉིས་པའང་འབད་པས་བལྟ་བར་བྱ། །ཞེས་འཕགས་པ་ཀླུའི་ཞབས་ཀྱིས་མཛད་པའི་མདོ་ཀུན་ལས་བཏུས་པ་ལྟ་ཞེས་འདོན་ པར་བྱེད་མོད། འཕགས་པའི་བསླབ་བཏུས་དེ་བོད་ན་ནི་མི་སྣང་ངོ་། །དྲུག་པ་བསླབ་དོན་མདོར་བསྡུ་བ་ནི། གང་ལས་གང་ནི་མ་བཀག་པ། །དེ་ཉིད་སྤྱད་པར་བྱ་བ་སྟེ། །འཇིག་རྟེན་སེམས་ནི་སྲུང་བའི་ཕྱིར། །བསླབ་པ་མཐོང་ནས་ཡང་དག་སྤྱད། །ཅེས་ གསུངས་ཏེ། མདོར་ན་གང་མདོ་བསྟན་བཅོས་དེ་རྣམས་ལས་སྤྱོད་པ་གང་མ་བཀག་པ་དང་མ་བཀག་པའི་ཕྱོགས་དང་མཐུན་པ་རྣམས་སྒྲུབ་པ་དང༌། བཀག་པ་དང་བཀག་པའི་ཕྱོགས་དང་མཐུན་ཤས་ཆེ་བ་རྣམས་སྤང་བ་སྟེ་འདུལ་བ་ལས་མདོར་ བསྡུས་རུང་མཐུན་སྦྱར་བའི་དོན་ཏེ་འཇིག་རྟེན་གྱི་སེམས་དང་བྱང་ཆུབ་ཀྱི་ལམ་གཉི་ག་དང་མི་འགལ་བར་སྤྱོད་པ་ནི་བྱང་ཆུབ་སེམས་དཔའི་བསླབ་པ་སྙིང་པོར་དྲིལ་བའོ། ལྔ་པ་ཤེས་བཞིན་སྲུང་བ་མདོར་བསྡུས་པ་ནི། ལུས་དང་སེམས་ཀྱི་གནས་ སྐབས་ལ། །ཡང་དང་ཡང་དུ་བརྟག་བྱ་བ། །དེ་ཉིད་ཁོ་ན་མདོར་ན་ནི། །ཤེས་བཞིན་སྲུང་བའི་མཚན་ཉིད་དོ། །ལུས་ཀྱིས་འདི་དག་སྤྱད་བར་བྱ། །ཚིག་ཙམ་བརྗོད་པས་ཅི་ཞིག་འགྲུབ། །སྨན་དཔྱད་བཀླགས་པ་ཙམ་གྱིས་ནི། །ནད་པ་ དག་ལ་ཕན་འགྱུར་རམ། །ཞེས་གསུངས་ཏེ། ཚིགས་བཅད་དང་པོས་དངོས་བསྟན། ཕྱི་མས་ཚིག་ཏུ་མི་བཞག་པར་སྒྲུབས་ཤིག་པའོ། །མདོར་ན་བདག་ཉིད་ཀྱི་ལུས་ཅི་སྤྱོད་པ་དང་། སེམས་ཅི་བསམ་པ་སྐད་ཅིག་ཡང་མ་ཡེངས་པར་བརྟག་ཅིང་ བླང་དོར་བྱ་བ་ཁོ་ན་ལ་ཤེས་བཞིན་སྲུང་བ་ཞེས་བྱའི། དེ་ལས་གཞན་དུ་ཤེས་བཞིན་སྲུང་བར་དེ་ལ་དེ་རྣམས་ཀྱང་ཐོས་པ་ཙམ་དང་དེ་ལྟ་བུ་ཞིག་གོ་ཞེས་གོ་བྱར་མི་བཞག་པར་རྒྱུད་ལ་སྦྱོར་ཞིང་ཉམས་སུ་ལོང་ཞིག་པ་དཔེ་དང་བཅས་ཏེ་བསྟན་ཏོ། །
Page: 414 བྱང་ཆུབ་སེམས་དཔའི་སྤྱོད་པ་ལ་འཇུག་པ་ལས། ཤེས་བཞིན་སྲུང་བ་ཞེས་བྱ་བ་སྟེ་ལེའུ་ལྔ་པ་རྣམ་པར་ཕྱེ་བའོ། །
ལེའུ་དྲུག་པ། བཟོད་པ་བསྟན་པ།
[edit]ལེའུ་དྲུག་པ། བཟོད་པ་བསྟན་པ། ད་ནི་བཟོད་པ་བཤད་པར་བྱ་སྟེ། དེ་ལ་ལེའུའི་འབྲེལ་ནི། ཕ་རོལ་ཏུ་ཕྱིན་པ་སྔ་མ་སྔ་མའི་དངོས་འབྲས་ནི་ཕྱི་མ་ཕྱི་མ་ཡིན་པའི་ཕྱིར། ཤེས་རབ་ཀྱི་ལེའུའི་བར་གྱི་འབྲེལ་བ་རིག་པར་བྱ་ལ། དེས་ན་ཚུལ་ཁྲིམས་དག་པ་དང་ལྡན་ན་བཟོད་བྱའི་གནས་རྣམས་ལ་བཟོད་པར་ནུས་ཤིང་། བཟོད་པ་དང་མི་ལྡན་ན་ཚུལ་ཁྲིམས་ ཀྱང་མི་འགྲུབ་པའི་ཕྱིར། དེ་མ་ཐག་ཏུ་བཟོད་པའི་ལེའུ་བཤད་ལ། འགྲེལ་ཆེན་ལས་ནི། དེ་ལྟར་ལུས་ལ་སོགས་པ་སྲུང་བ་དང་དག་པ་བསྟན་ནས་དགེ་བ་རྣམ་པར་དག་པ་བསྟན་པའི་ཕྱིར། བཟོད་བྱ་ཐོས་པ་བཙལ་བར་བྱ། །དེ་ནས་ནགས་སུ་ གནས་པར་བྱ། །མཉམ་པར་གཞག་ལ་རབ་བརྩོན་ཞིང་། །མི་སྡུག་ལ་སོགས་བསྒོམ་པར་བྱ། །ཞེས་བྱ་བ་དེ་དག་མངོན་པར་བརྗོད་པར་བྱ་བའི་ཕྱིར། ཞེས་འབྲེལ་བཙལ་ཏོ། །འདི་ལ་གཉིས། བཟོད་པ་མེད་དུ་མི་རུང་བར་བསྟན་པ་གསུམ། བཟོད་ པ་སྒྲུབ་པའི་ཐབས་ཡིད་ལ་བྱ་བ་གཉིས་བསྟན་པའོ། །དང་པོ་ལ། ཁོང་ཁྲོའི་འབྲས་བུ་གསུམ་ལས། མ་མཐོང་བའི་འབྲས་བུ་ནི། བསྐལ་པ་སྟོང་དུ་བསགས་པ་ཡི། །སྦྱིན་དང་བདེ་གཤེགས་མཆོད་ལ་སོགས། །ལེགས་སྤྱད་གང་ཡིན་དེ་ཀུན་ཀྱང་། ། ཁོང་ཁྲོ་གཅིག་གིས་འཇོམས་པར་བྱེད། །ཞེ་སྡང་ལྟ་བུའི་སྡིག་པ་མེད། །བཟོད་པ་ལྟ་བུའི་དཀའ་ཐུབ་མེད། དེ་བས་བཟོད་ལ་ནན་ཏན་དུ། །སྣ་ཚོགས་ཚུལ་གྱིས་བསྒོམ་པར་བྱ། །ཞེས་གསུངས་ཏེ། འཆགས་འཇིག་སྟོངས་གནས་ བཞི་པོ་རེ་རེ་ལ་བར་བསྐལ་ཉི་ཤུ་རེར་བྱས་པའི་བར་བསྐལ་བརྒྱད་བཅུ་ནི་རྒྱུའི་ཐེག་པའི་ལུགས་ཀྱི་འཇིག་རྟེན་གྱི་ཁམས་འདིའི་བསྐལ་པ་ཆེན་པོ་གཅིག་གོ །སྟོང་ནི་དཔེར་མཚོན་པ་ཡིན་གྱི་ངེས་བཟུང་མ་ཡིན་ཏེ་བརྒྱ་འམ་སྟོང་ངམ་ཁྲི་ལ་སོགས་པ་
Page: 415 ༄༅། །ཡང་སྟེ་ལམ་པོ་ཆེ་ལ་ཁྲི་ལམ་དུ་གྲགས་པ་ལྟ་བུའོ། །ཡུན་དེ་ལ་སོགས་པར་བསགས་པའི་དགེ་བ་ཡང་ཁོང་ཁྲོ་དྲག་པོ་གཅིག་གིས་འཇོམས་པར་བྱེད་དེ། འགྲེལ་ཆེན་དུ་དྲངས་པ་འཇམ་དཔལ་རྣམ་རོལ་གྱི་མདོ་ལས། འཇམ་དཔལ་ཁོང་ཁྲོ་ཞེས་བྱ་བ་ནི་བསྐལ་པ་བརྒྱར་བསགས་པའི་དགེ་བ་འཇོམས་པ་སྟེ། དེའི་ཕྱིར་ཁོང་ཁྲོ་ཞེས་བྱའོ། །ཞེས་དང་། ཐམས་ཅད་ཡོད་སྨྲའི་གཞུང་ལས། དགེ་སློང་དག་དགེ་སློང་འདི་སྐྲ་དང་སེན་མོའི་མཆོད་རྟེན་ལ་ཡན་ལག་ཐམས་ ཅད་ཀྱིས་ཕྱག་འཚལ་ནས་སེམས་དང་བར་བྱེད་པ་ལ་ལྟོས། བཙུན་པ་དེ་ལྟར་ལགས་སོ། །དགེ་སློང་དག་དགེ་སློང་འདིས་ཇི་ཙམ་ཞིག་ནོན་པའི་འོག་ཏུ་དཔག་ཚད་བརྒྱད་ཁྲི་བཞི་སྟོང་ན་གསེར་ལས་གྲུབ་པ་ལ་ཐུག་གི་བར་ན་བྱེ་མའི་རྡུལ་ཇི་ སྙེད་ཡོད་པ་དེ་སྙེད་དུ་དགེ་སློང་འདིས་འཁོར་ལོས་བསྒྱུར་བའི་རྒྱལ་སྲིད་སྟོང་འགྱུར་དུ་ཡོངས་སུ་སྤྱོད་པར་འགྱུར་རོ། །འོ་ན་ཕྱག་འཚལ་བ་ནི་མང་ལ་འཁོར་ལོས་བསྒྱུར་བ་ནི་ཆེས་ཉུང་ན་དགེ་བ་དེ་གང་དུ་ཟད་པ་ལགས། ཉེ་བ་འཁོར། ཇི་སྲིད་ དུ་ཚངས་པར་སྤྱོད་པ་དམ་པས་ཚངས་པ་མཚུངས་པར་སྤྱོད་པ་ལ་སྡང་བའི་སེམས་བསྐྱེད་པ་དེ་སྲིད་དུ་ཟད་པ་དང་ཉམས་པར་ཡང་དག་པར་རྗེས་སུ་མཐོང་ངོ༌། །ཉེ་བ་འཁོར། དེར་དགེ་བའི་རྩ་བ་ཆེན་པོ་འདི་ཡང་བསྲབས་པ་དང་ཡོངས་ སུ་བྱང་བ་དང་ཡོངས་སུ་ཟད་པར་འགྱུར་བ་དེ་ལྟ་བས་ན་མགལ་དུམ་ལ་ཡང་སེམས་ཀྱིས་ཁྲོ་བར་མི་བྱ་བྱམས་པར་ཤེས་པ་དང་བཅས་པའི་ལུས་ལ་ལྟ་ཅི་སྨོས། ཞེས་སོ། །དེའི་ཕྱིར་ཞེ་སྡང་ལྟ་བུའི་སྡིག་པ་མེད་དེ་མི་དགེ་བས་བསོད་ནམས་ཟིལ་གྱིས་གནོན་པ་ལྟ་བུ་གཞན་ མེད་དོ། །བཟོད་པ་སྲན་ཚུགས་པ་ལྟ་བུ་དང་འདྲ་བའི་བཀའ་ཐུབ་གཞན་མེད་དོ། །ཞེས་བཤད་དོ། །དེས་ན་གསོག་པ་ན་སྒོ་གསུམ་གྱི་དཀའ་བ་ཆེན་པོས་ཡུན་རིང་དུ་ཆུང་ངུ་ནས་བསགས་པའི་ལེགས་པར་སྤྱད་པ་དགེ་བའི་རྩ་བའི་ཕུང་པོ་ཆེན་པོ་ཡང་ཁོང་
Page: 416 ཁྲོའི་མེ་གཅིག་གིས་ཅིག་ཆར་དུ་འཇོམས་ཏེ་དགེ་བ་ཁ་ཅིག་ནི་རྨེག་མེད་པ་ཐལ་བ་ལྟ་བུར་བྱེད། ཁ་ཅིག་ནི་ཉམ་དམས་ཏེ་འབྲས་བུ་ཆུང་ངུར་བྱེད། ཁ་ཅིག་ནི་བག་ལ་ཞ་སྟེ་འབྲས་བུ་འབྱིན་མི་ནུས་པར་བྱེད་པས་ཞེ་སྡང་ལྟ་བུར་འཇིགས་སུ་རུང་བའི་སྡིག་པ་གཞན་ མེད་དོ། །གང་འཇིག་རྟེན་ན་དཀའ་བའི་གནས་སུ་གྲགས་པ་ཕྱི་རོལ་པ་ཁ་ཅིག་གིས་རྐང་པ་གཅིག་གིས་འགྲེང་བའི་བརྟུལ་ཞུགས་དང་། བ་ལང་གི་ལྕི་བས་འཚོ་བ་དང་། གཅེར་བུའི་བརྟུལ་ཞུགས་སོགས་དང་། སངས་རྒྱས་པའི་ཕྱགས་བདར་ཁྲོད་པ་བ་ དང་གཞི་ཇི་བཞིན་ལ་སོགས་པ་སྦྱངས་ཡོན་བཅུ་གཉིས་ཀྱི་དཀའ་ཐུབ་རྣམས་ཀྱང་ལུས་ཀྱི་སྤྱོད་པ་ཙམ་དུ་ཟད་པས་དེ་ཙམ་དུ་དཀའ་བ་མིན་ལ། དངོས་པོ་མེད་པའི་སེམས་ཉོན་མོངས་པའི་དངོས་པོར་སྣང་བ་བདག་ཏུ་འཛིན་པ་ལ་སོགས་པ་ཕྱིན་ཅི་ལོག་གི་ བག་ཆགས་བསྐལ་པ་མཐའ་ཡས་པར་ཐོག་མ་མེད་པ་ནས་གོམས་པ་མཐུ་བརྟས་པ་འདི་རང་གིས་རང་འདུལ་བ་ནི་ཤིན་ཏུ་དཀའ་བའི་གནས་ཏེ། དེའི་ཕྱིར་བཟོད་པ་ལྟ་བུའི་དཀའ་ཐུབ་ནི་གཞན་མེད་དེ། སངས་རྒྱས་རྣམ་གཟིགས་ཀྱི་སྔོན་གྱི་གསོ་སྦྱོང་ལས། བཟོད་ པ་དཀའ་ཐུབ་དམ་པ་བཟོད་པ་སྟེ། །མྱ་ངན་འདས་པ་མཆོག་ཅེས་སངས་རྒྱས་གསུང་། །ཞེས་སོ། །དེའི་ཕྱིར་བཟོད་པ་ཁོ་ན་ལ་ནན་ཏན་དུ་བྱའོ། །གཉིས་པ་མཐོང་ཆོས་ཀྱི་འབྲས་བུ་ནི། ཞེ་སྡང་ཟུག་རྔུའི་སེམས་འཆང་ན། །ཡིད་ནི་ཞི་བ་ཉམས་ མི་མྱོང་། །དགའ་དང་བདེ་བའང་མི་འཐོབ་ལ། གཉིད་མི་འོང་ཞིང་བརྟན་མེད་འགྱུར། །གང་དག་ནོར་དང་བཀུར་སྟི་ཡིས། །དྲིན་བྱིན་དེ་ལ་བསྟེན་གྱུར་པ། དེ་དག་ཡང་ནི་སྡང་ལྡན་པའི། །རྗེ་དཔོན་དེ་ལ་གསོད་པར་རྒོལ། །དེ་ཡིས་ མཛའ་བཤེས་སྐྱོ་བར་འགྱུར། སྦྱིན་པས་བསྡུས་ཀྱང་སྟེན་མི་བྱེད། །ཅེས་གསུངས་ཏེ། དེ་ཡང་ཚིགས་བཅད་དང་པོས་རང་ཉིད་ཟུག་རྔུས་སྡུག་བསྔལ་བར་འགྱུར་བ་དང༌། གཉིས་པས་འཁོར་སྐྱོ་བར་འགྱུར་བ་དང་། རྐང་པ་གཉིས་ཀྱིས་མཛའ་
Page: 417 ༄༅། །བཤེས་ཀྱིས་འདོར་བར་བསྟན་ཏེ། དཔེར་ན་དུག་མདའི་མདེའུ་ཁོང་དུ་ལུས་ན་བདེ་བའི་སྐབས་མེད་པ་བཞིན་དུ། ཞེ་སྡང་གིས་ནི་སྙིང་ལ་ཚེར་མ་ཟུག་པའམ་སྙིང་བཀས་པ་ལྟ་བུའི་ཟུག་རྔུ་སྐྱེ་ཞིང་། བཞིན་དམར་ཞིང་འཇིགས་སུ་ རུང་བས་གཞན་གྱིས་ལྟར་མི་མོས་པ་དང་། ས་གཞི་དམར་པོར་མཐོང་ཞིང་ཡིད་རང་དབང་མེད་པས་ཀུན་ནས་འཁྲུགས་ཏེ་ཤིན་ཏུ་བརྩེ་བའི་གནས་བུ་ལ་སོགས་པ་གམ་དུ་འོངས་པ་ལ་ཡང་ཁྲོ་ཞིང་། རང་ཤ་རང་གིས་གཅོད་པ་ཡང་ཡོད་ཅིང་། ཐབས་ཟད་པ་ཁ་ཅིག་ རང་གི་མཁོ་བའི་ཡོ་བྱད་རྣམས་ཀྱང་རྡེབ་པ་དང་གཅོག་པ་ལ་སོགས་པས་ཆུད་གཟོན་པར་བྱེད་ཅིང་། རང་དང་གཞན་དང་འདི་དང་ཕྱི་མ་ཅི་ལ་ཡང་མི་ལྟ་བར་ཐམས་ཅད་ཉམས་པར་བྱེད་པས་རྒྱུད་ཞེ་སྡང་གིས་དཀྲུགས་པ་ལྟ་བུའི་སྡུག་བསྔལ་ནི་གཞན་འགའ་ཡང་ ཡོད་པ་མིན་ལ། གང་ནོར་དང་ལོངས་སྤྱོད་ཀྱི་དྲིན་ཆེན་པོས་བསྐྱངས་པའི་འཁོར་དེ་དག་གིས་ཀྱང་མི་ཐེག་པར་གསོད་པར་རྒོལ་བ་འབྱུང་ལ། ཚིག་རྩུབ་མོས་མཛའ་བཤེས་བྱམས་པའི་གནས་རྣམས་ཀྱང་སྐྱོ་སྟེ་འབོར་བར་འགྱུར་བའི་དོན་ཏོ། །གསུམ་ པ་མཐོང་བ་དང་མ་མཐོང་བའི་འབྲས་བུ་བཤད་པ་ནི། མདོར་ན་ཁྲོ་བ་བདེར་གནས་པ། །དེ་ནི་འགའ་ཡང་ཡོད་མ་ཡིན། །ཁྲོ་བའི་དགྲ་ཡིས་དེ་ལ་སོགས། །སྡུག་བསྔལ་དག་ནི་བྱེད་པར་འགྱུར། །གང་ཞིག་བསྒྲིམས་ཏེ་ཁྲོ་འཇོམས་པ། དེ་ནི་འདི་དང་གཞན་དུ་བདེ། །ཅེས་གསུངས་ཏེ། དེ་ལྟ་བུའི་ཞེ་སྡང་གི་འབྲས་བུ་ནི་དམྱལ་བའི་སྡུག་བསྔལ་བཟོད་པར་དཀའ་བ་རྣམས་ཡིན་ཏེ། དེས་ན་གནས་སྐབས་དང་མཐར་ཐུག་གཉི་གར་གང་དུ་འཇིགས་སུ་རུང་བའི་ཕྱིར། ཁྲོ་བ་བདེ་བར་གནས་པ་ནི་འགའ་ ཡང་མེད་ལ། ཁྲོ་བས་ནི་གཡུལ་ལ་སོགས་པར་འཇུག་ཅིང་རང་གསོད་པར་འགྱུར་བ་དང་། གཞན་མཐོང་བ་དང་མ་མཐོང་བ་དང་ཐ་ན་གྲོག་མ་ལ་སོགས་པའི་བར་གྱི་སེམས་ཅན་ཉེས་པ་མེད་ཅིང་ཉམ་ཆུང་བ་དཔག་ཏུ་མེད་པ་ཡང་། རྒྱལ་པོ་གདུག་པ་ལྟ་བུ་སེམས་
Page: 418 ཅན་གཅིག་གི་ཞེ་སྡང་གི་ཞར་ལ་དམྱལ་ཐག་གཅོད་པའི་ཕྱིར། ཁྲོ་བའི་དགྲས་ནི་དེ་ལ་སོགས་པ་རང་གཞན་མཐའ་ཡས་པ་སྡུག་བསྔལ་བར་བྱེད་པ་ཡིན་ལ། དེ་ལྟ་བུའི་ཞེ་སྡང་གི་སྐྱོན་རིག་པས་མདེའུ་ཁོང་དུ་ལུས་པ་འབྱིན་པ་ལྟར་རང་རྒྱུད་ཀྱི་ཁྲོ་བ་དེ་ནན་ གྱིས་བཅོམ་སྟེ། སེམས་ལས་རུང་དུ་གྱུར་པ་ན་འདིར་ཡང་དུག་ནད་ལས་ཐར་བ་ལྟར་སེམས་ལ་དགའ་བདེ་ཁྱད་པར་ཅན་མྱོང་ཞིང་སྐྱེ་བ་གཞན་དུ་ཡང་བདེ་བ་ནས་བདེ་བར་འགྲོ་བའི་དོན་ཏེ། བཤེས་སྤྲིང་ལས་ཀྱང་། ཁྲོ་བ་སྤངས་པས་ཕྱིར་མི་ལྡོག་པ་ཉིད། ། འཐོབ་པར་འགྱུར་བར་སངས་རྒྱས་ཞལ་གྱིས་བཞེས། །ཞེས་སོ། །དེ་ལྟར་བཟོད་པ་མེད་དུ་མི་རུང་བས་བཟོད་པ་ལ་ལྷུར་བྱ་དགོས་པར་བསྟན་ནས། གཉིས་པ་བཟོད་པ་སྒྲུབ་པའི་ཐབས་ཆ་ནི་གཉིས་ཏེ། ཁྲོ་བའི་རྒྱུ་མཚན་ཟློག་པ་དྲུག་དང་། བཟོད་ པའི་འབྲས་བུ་ཡིད་ལ་བྱ་བ་བཞིའོ། །དང་པོ་ལ་ཡང་། མི་དགའ་བ་ཁྲོ་བའི་རྒྱུར་བསྟན་པ། དེའི་ཟས་ཡིད་མི་བདེ་གཞོམ་པ། དགའ་བ་དང་མི་འབྲལ་བར་དམ་བཅའ་བ། གང་ལ་བཟོད་པར་བྱ་བ་འདོད་མི་འདོད་ཀྱི་རྟོག་པ་བསྟན་པ། མི་འདོད་ པ་ལ་མི་དགའ་བའི་རྟོག་པ་གཞོམ་པ། འདོད་པའི་གེགས་བྱས་པ་ལ་མི་དགའ་བ་གཞོམ་པའོ། །དང་པོ་ནི། མི་འདོད་བྱས་དང་འདོད་པ་ཡི། །གེགས་བྱས་པ་ལས་བྱུང་གྱུར་པ། །ཡིད་མི་བདེ་བའི་ཟས་རྙེད་ནས། ཞེ་སྡང་བརྟས་ ཏེ་བདག་འཇོམས་སོ། །ཞེས་པ་དང་། གཉིས་པ་དེའི་ཟས་ཡིད་མི་བདེ་གཞོམ་པ་ནི། དེ་ལྟས་བདག་གི་དགྲ་བོ་དེའི། །ཟས་ནི་རྣམ་པར་གཞོམ་པར་བྱ། །འདི་ལྟར་བདག་ལ་གནོན་པ་ལས། །དགྲ་འདི་ལ་ནི་ལས་གཞན་མེད། །ཅེས་པ་དང་། གསུམ་པ་ནི། ཅི་ལ་ བབ་ཀྱང་བདག་གིས་ནི། །དགའ་བའི་ཡིད་ནི་དཀྲུག་མི་བྱ། །མི་དགའ་བྱས་ཀྱང་འདོད་མི་འགྲུབ། །དགེ་བ་དག་ནི་ཉམས་པར་འགྱུར། །གལ་ཏེ་བཅོས་སུ་ཡོད་ན་ནི། །དེ་ལ་མི་དགར་བྱ་ཅི་དགོས། །གལ་ཏེ་བཅོས་སུ་མེད་ན་ནི། །
Page: 419 ༄༅། །དེ་ལ་མི་དགའ་བྱས་ཅི་ཕན། །ཞེས་གསུངས་ཏེ། འདི་ལ་རྐང་པ་གཉིས་ཀྱིས་དམ་བཅས་པ་དང་། ལྷག་མས་དེའི་རྒྱུ་མཚན་བསྟན་ཏོ། །བཞི་པ་གང་ལ་བཟོད་པར་བྱ་བ་འདོད་མི་འདོད་ཀྱི་རྟོག་པ་བསྟན་པ་ནི། བདག་གམ་བདག་གི་བཤེས་རྣམས་ལ། །སྡུག་བསྔལ་བརྙས་དང་ཚིག་ རྩུབ་དང་། མི་སྙན་ཞེས་བྱར་མི་འདོད་དེ། །དགྲ་ལ་དེ་ལས་བཟློག་པས་སོ། །ཞེས་གསུངས་ཏེ། དེ་ཡང་ཁྲོ་བའི་རྒྱུ་ནི་བདག་འདོད་པའི་བྱ་བ་ལ་གེགས་བྱུང་བའམ་མི་འདོད་པའི་བྱ་བ་བྱུང་པ་ལས་དེ་ལ་མི་དགའ་བའི་བློ་སྐྱེས་པ་ཡིན་ལ། དེའི་རྒྱུ་མཚན་ གྱིས་ཡིད་ལ་མི་བདེ་བ་གཅོང་ནད་ལྟ་བུ་ཁོང་དུ་ཞུགས་ཏེ་རྟག་ཏུ་སེམས་པར་བྱེད་ལ། དེའི་མཐུ་བརྟས་པ་ན་ཁོང་ཁྲོ་དྲག་པོ་སྐྱེ་བའི་ཕྱིར་ན་མི་དགའ་བ་ནི་ཁོང་ཁྲོའི་རྒྱུ་དང་། ཡིད་མི་བདེ་ནི་དེའི་ཟས་ལྟ་བུར་རྣམ་པར་བཞག་གོ །དེ་ལ་འདོད་མི་འདོད་ཀྱི་རྟོག་པ་ནི་ བདག་ལ་གནོད་པ་བྱས་སོ། །བྱེད་དོ། །བྱེད་པར་འགྱུར་རོ་ཞེའམ། བདག་གི་ཕྱོགས་ལ་གནོད་པ་བྱས་སོ། །བྱེད་དོ། །བྱེད་པར་འགྱུར་རོ་ཞེའམ། བདག་དང་མི་མཛའ་བའི་དོན་བྱས་སོ། །བྱེད་དོ། །བྱེད་པར་འགྱུར་རོ། །ཞེས་རྟོག་པ་ཀུན་ནས་མནར་སེམས་པའི་དངོས་པོ་དགུའོ། ། ཡང་ན་ཉི་ཤུ་རྩ་བཞི་སྟེ། དཀའ་འགྲེལ་ཆུང་ངུར། འདི་ལ་ཁྲོ་བའི་རྒྱུ་ནི་མི་དགའ་བའོ། །དེའི་རྒྱུ་ནི་འདོད་པ་དང་མི་འདོད་པའི་ཆོས་སུ་ཞེན་པའོ། །འདོད་པ་དང་མི་འདོད་བ་ཡང་ཉི་ཤུ་རྩ་བཞི་སྟེ་འདོད་པ་བཅུ་གཉིས་དང་མི་འདོད་པ་བཅུ་གཉིས་སོ། །དེ་ལ་མི་འདོད་ པ་ནི་བཅུ་གཉིས་ཏེ། བདག་ལ་སྡུག་བསྔལ་བ་དང་བརྙས་པ་དང་ཚིག་རྩུབ་དང་མི་སྙན་པ་བྱུང་བ་སྟེ་བཞི་དང་། བདག་གི་བ་ལ་དེ་བྱུང་བ་བཞི་སྟེ་བརྒྱད་དང་། བདག་གི་དགྲ་ལ་དེ་ལས་བཟློག་པ་བདེ་བ་དང་རྙེད་པ་དང་བསྟོད་པ་དང་སྙན་པ་བྱུང་བ་སྟེ་བཅུ་གཉིས་སོ། ། འདོད་པ་བཅུ་གཉིས་ནི། བདག་གམ། བདག་གི་བ་ལ་བདེ་བ་ལ་སོགས་པ་བྱུང་བ་བཞི་བཞི་དང་། བདག་གི་དགྲ་ལ་སྡུག་བསྔལ་ལ་སོགས་པ་བཞི་བྱུང་བ་སྟེ་བཅུ་གཉིས་སོ། །ཞེས་སོ། །འགྲེལ་ཆེན་ལས་ནི། སྡུག་བསྔལ་ནི་རྣམ་པ་གཉིས་ཏེ་ལུས་ལ་གནོད་པ་ནི་དབྱུག་
Page: 420 པ་ལ་སོགས་བསྣུན་པ་ལས་བྱུང་བའོ། །སེམས་ལ་གནོད་པ་བརྙས་པ་ལ་སོགས་པ་ལས་བྱུང་བ་སྟེ་བརྙས་པ་ནི་ངན་པར་བྱེད་པ། ཚིག་རྩུབ་ནི་གནོད་པ་བྱེད་པའི་ཚིག་མི་སྙན་པ་དང་གྲགས་པ་མ་ཡིན་པ་སོགས་བརྗོད་པ་སྟེ་དེ་དག་ནི་མི་འདོད་པའོ། །ཞེས་སོ། །འདི་ ཡང་གཙོ་བོར་སེམས་ཅན་དུ་ཆུད་པས་འདོད་མི་འདོད་ཀྱི་བྱ་བ་བྱེད་པ་མང་བས་གནོད་པ་ལ་ཇི་མི་སྙམ་པའི་བཟོད་པའི་ཡུལ་ནི། གཙོ་བོར་སེམས་ཅན་ཡིན་ཡང་སེམས་ཅན་ཁོ་ན་ནི་མ་ཡིན་ཏེ། བེམ་པོར་གྱུར་པ་ལ་ཁྲོས་པས་ཀྱང་འབྲས་བུ་འབྱིན་པ་དགེ་སློང་ ཆོས་གོས་མགལ་དུམ་ལ་ཐོགས་པ་ལ་ཞེ་སྡང་གིས་བརྡེགས་པས་དམྱལ་བར་སྐྱེས་པ་དང༌། ཨེ་ལའི་ལོ་མ་ལ་ཞེ་སྡང་གིས་བཅད་པས་ཀླུ་ཨེ་ལའི་འདབ་ཅན་དུ་སྐྱེས་པའི་ཕྱིར་དང་། ཞེ་སྡང་གི་མཐུས་དམྱལ་པར་སྐྱེ་བ་ཡིན་གྱི་ཡུལ་གྱི་ཆ་ནས་མ་ཡིན་པའི་ ཕྱིར། སྲོག་ཅན་དང་། སྲོག་མེད་ཐམས་ཅད་ལ་ཡང་བཟོད་པར་བྱ་དགོས་སོ། །དེ་ཡང་བདག་གི་རྣམ་པ་ཀུན་ཏུ་རང་བཞིན་ཉིད་ཀྱིས་དགྲར་གྱུར་པ་ནི། སྤྱིར་ཉོན་མོངས་པ་དང་ཁྱད་པར་ཁྲོ་བ་འདི་ཡིན་ལ། དེའི་ཁ་ཟས་ནི་ཡིད་མི་བདེ་བ་འདི་ཡིན་ཏེ་ཁོང་ཁྲོ་ནི་ཡིད་མི་ བདེ་བ་དང་མཚུངས་པར་ལྡན་ནོ། །ཞེས་གསུངས་པའི་ཕྱིར་དང་། འདི་སྟོབས་འཕེལ་བ་ན་འབྲས་བུ་ཞེ་སྡང་ཁོ་ན་སྐྱེ་བར་མཐོང་བའི་ཕྱིར། དེས་ན་དེའི་ཁ་ཟས་ཡིད་མི་བདེ་བ་འདི་བདག་གིས་རྣམ་པར་གཞོམ་པར་བྱ་སྟེ། བདག་རྟེན་དལ་འབྱོར་ཐོབ། བྱང་ཆུབ་ཏུ་སེམས་ སྐྱེས། སྐྱབས་གནས་དཀོན་མཆོག་ལྟ་བུ་ཟླ་མེད་པ་ལ་བསྟེན་དུ་ཡོད་པ་འདི་ཅིའི་ཕྱིར་ཡིད་མི་བདེ་སྟེ། ད་ནི་ནམ་དུ་ཡང་ཡིད་མི་བདེ་བའི་རྟོག་པ་འདི་ཚར་བཅད་པར་བྱའི་དང་དུ་བླང་བར་མི་བྱའོ། །ཞེས་བརྟུལ་ཞུགས་བརྟན་པོ་བཅའ་ཞིང་ཡིད་མི་བདེ་བའི་འགལ་ ཟླ་ནི་སེམས་དགའ་བ་སྟེ་ད་ནི་ཅི་ནས་ཀྱང་བདག་གིས་སེམས་དགའ་བ་དང་མི་འབྲལ་བར་བྱའོ། །ཞེས་དམ་ཆེན་པོ་བཅའ་འོ། །དེ་ཡང་བདག་ཡིད་མི་དགའ་བ་དེས་ནི་བདག་ཉིད་སྡུག་བསྔལ་བར་ཟད་ཀྱི་དེས་འདོད་པ་འགྲུབ་པ་ནི་མ་ཡིན་ལ། ཡིད་མི་དགའ་བ་བསམ་པ་
Page: 421 ༄༅། །དེ་སྲིད་སྒོ་གསུམ་གྱི་དགེ་བ་རྒྱུན་འཆད་ཅིང་། དེས་སེམས་ལས་སུ་མི་རུང་བར་གྱུར་ནས་ཕྱིས་དགེ་བ་རྩོམ་པ་ན་ཡང་ལུས་ངག་གི་དགེ་བ་ལྟར་སྣང་མ་གཏོགས་སེམས་ཐག་པ་ནས་མི་འགྲུབ་པའི་ཕྱིར་དང་། དེ་ལས་སྐྱེས་པའི་ཁོང་ཁྲོས་སྔོན་གྱི་ དགེ་བ་མང་པོ་ཐལ་བར་རློག་པའི་ཕྱིར་དང༌། གལ་ཏེ་བྱ་བ་དེ་དག་ཕྱིར་བཅོས་སུ་ཡོད་ན་ནི་མི་དགའ་བ་ག་ལ་དགོས་ཏེ་མི་དགའ་བའི་བློ་བསམ་པ་དེ་སྲིད་ཀྱི་ཡུན་ཡང་མི་དགའ་བ་དོར་ནས་སླར་འཆོས་པར་རིགས་ཤིང་དེས་འགྲུབ་པའི་ཕྱིར། གལ་ཏེ་ཕྱིར་བཅོས་ སུ་མེད་ན་ནི་མི་དགའ་བ་བྱས་པས་ཅི་ཞིག་ཏུ་ཕན་ཏེ་སེམས་མི་དགའ་བ་ཙམ་ལྟ་ཞོག་བདག་ཉིད་མེར་མཆོངས་སུ་ཟིན་ཡང་བྱ་བ་དེ་ལྡོག་ཏུ་མེད་པའི་ཕྱིར། དེས་ན་བདག་གིས་ཉེས་པའི་འབྱུང་གནས་ཡིད་མི་བདེ་དང་དུ་མི་བླང་ཞིང་ཕན་ཡོན་རྒྱ་ཆེན་པོ་ཅན་གྱི་དགའ་ བའི་སེམས་ལས་གཞན་དུ་གཡོ་བར་མི་བྱའོ། །ཞེས་དམ་བཅའ་བར་བྱའོ། །འདིར་འགྲེལ་ཆེན་ལས། འདོད་པ་དང་མི་འདོད་པ་ནི་བདག་དང་བདག་གིར་འཛིན་པ་ལས་བྱུང་བ་སྟེ་བདག་དང་བདག་གི་ལ་འདོད་པ་གྲུབ་པ་ནི་འདོད་པ་སྟེ། དེ་ལས་བཟློག་པ་ནི་མི་འདོད་ པའོ། །དེ་ལྟ་བས་ན་དེ་བྱེད་པའམ་དེ་དག་དང་འགལ་བ་བྱེད་པ་ལ་ཞེ་སྡང་སྐྱེ་བར་འགྱུར་རོ། །དེ་ལྟར་ན་ཟས་ནུས་པ་དང་ལྡན་པ་ཡིད་མི་བདེ་ཉིད་ལ་བརྟེན་ནས་སྟོབས་ཡོད་པ་དང་ཞེ་སྡང་གིས་བདག་འཇོམས་སོ་སྙམ་དུ་ངེས་པར་བྱས་ནས་དེ་རྒྱས་པའི་རྒྱུ་ཉིད་དང་ པོར་གཞོམ་པར་བྱའོ། །དེ་བཅོམ་པས་ནི་བདེ་བ་ཉིད་དུ་འགྱུར་ཏེ་དེ་བཅོམ་པའི་ཕྱིར་དང༌། རྩ་བ་དང་བཅས་པ་བཅོམ་པ་ནི་སླར་ལྡང་བར་མི་རིགས་པའི་ཕྱིར་རོ། །ཞེས་བྱུང་ངོ་། །དེས་ན་གང་ལ་བཟོད་པར་བྱ་བ་ནི། སྡུག་བསྔལ་བརྙས་དང་ཚིག་རྩུབ་དང་མི་སྙན་ པ་སྟེ། བཞི་པོ་བདག་གམ་བདག་གི་བཤེས་ལ་མི་འདོད་པ་དང་དགྲ་ལ་དེ་ལས་ཟློག་པའོ། །ཞེས་དེ་བཞི་དགྲ་ལ་བྱུང་བ་ལ་དགའ་བ་རྣམས་ཚར་བཅད་དེ་དེ་དག་གིས་སེམས་མི་གཡོ་བར་བྱ་བའོ། །། ལྔ་པ་མི་འདོད་པ་ལ་མི་དགའ་བའི་རྟོག་པ་གཞོམ་པ་ནི་
Page: 422 གསུམ་སྟེ། བདག་ཉིད་ལ་ཉེས་པ་བྱེད་པ་ལ་མི་དགའ་བ་དོར་བ་གསུམ། བདག་གི་བ་ལ་ཉེས་པ་བྱེད་པ་ལ་མི་དགའ་བ་དོར་བ་གཉིས། བདག་གི་དགྲ་ལ་ལེགས་པ་བྱེད་པ་ལ་མི་དགའ་བ་དོར་བ་གསུམ་མོ། །དང་པོ་ལ་ཡང་། སྡུག་བསྔལ་བྱེད་པ་ལ་ མི་དགའ་བ་དོར་བ་གསུམ་དང་། བརྙས་པ་བྱེད་མི་དགའ་བ་དོར་བ་གཉིས་ཀྱི། དང་པོ་ལ། སྡུག་བསྔལ་དང་ལེན་གྱི་བཟོད་པ་དྲུགཆོས་ལ་ངེས་པར་རྟོག་པའི་བཟོད་པ་བཞི། གནོད་པ་ལ་ཇི་མི་སྙམ་པའི་བཟོད་པ་གསུམ་བསྟན་པའོ། །སྤྱིར་ བཟོད་པ་ཐམས་ཅད་དེ་གསུམ་དུ་འདུ་མོད་ཀྱང་། སྐབས་འདིར་སྒོམ་བདེ་བའི་ཕྱིར་དང༌། གཞུང་འདི་གོ་རིམ་སོགས་ལ་ཆེད་དུ་མ་མཛད་པར་རྡོ་རྗེའི་གླུ་ལྟ་བུར་གནས་པའི་ཕྱིར་འདི་ལྟར་བཤད་ལ། འགྲེལ་ཆེན་མཁན་པོ་དང་། བི་བྷུ་ཏིས་ནི། ཅི་ལ་བབ་ཀྱང་ བདག་གིས་ནི། །ཞེས་པ་ནས་སྡུག་བསྔལ་དང་ལེན་གྱི་བཟོད་པར་འཆད་ཀྱང་། དགེ་བའི་ལྷ་དང་། དཀའ་འགྲེལ་ཆུང་ངུའི་ལུགས་ལྟར་བྱས་པའོ། །དང་པོ་སྡུག་བསྔལ་དང་ལེན་གྱི་བཟོད་པ་ནི་དྲུག་སྟེ། སྡུག་བསྔལ་ངེས་འབྱུང་གི་རྒྱུར་སྟོན་པ། ཐར་པའི་དོན་དུ་བཟོད་ པར་བྱ་བ། གོམས་ན་སླ་བར་བསྟན་པ། བརྟགས་ཏེ་བཟོད་པར་བྱ་བ། དེ་ལྟར་བཟོད་ན་དཔའ་བོའི་དམ་པར་བསྟན་པ། སྡུག་བསྔལ་ཕན་ཡོན་ཅན་དུ་བསྟན་པའོ། །དང་པོ་སྡུག་བསྔལ་ངེས་འབྱུང་གི་རྒྱུར་སྟོན་པ་ནི། བདེ་བའི་རྒྱུ་ནི་རེས་འགའ་འབྱུང་། །སྡུག་བསྔལ་རྒྱུ་ནི་ཤིན་ཏུ་མང་། སྡུག་བསྔལ་མེད་པར་ངེས་འབྱུང་མེད། །དེ་བས་སེམས་ཁྱོད་བརྟན་པར་མནོས། །ཞེས་པ་དང༌། གཉིས་པ་ཐར་པའི་དོན་དུ་བཟོད་པར་བྱ་བ་ནི། དཀའ་ཟློག་དད་དང་ཀརྞ་པ། །བསྲེགས་དང་བཅད་སོགས་ཚོར་བ་ནི། །དོན་མེད་བཟོད་བྱེད་ཐར་པ་ཡི། །དོན་དུ་བདག་ཀོ་ཅི་ ཕྱིར་སྡར། །ཞེས་པ་དང༌། གསུམ་པ་གོམས་ན་སླ་བར་བསྟན་པ་ནི། གོམས་ན་སླ་བར་མི་འགྱུར་བའི། །དངོས་དེ་གང་ཡང་ཡོད་མ་ཡིན། །དེ་བས་གནོད་པ་ཆུང་གོམས་པས། །གནོད་པ་ཆེན་པོའང་བཟོད་པར་བྱ། །ཞེས་གསུངས་ཏེ། དེ་ཡང་འདིར་འཇིག་རྟེན་
Page: 423 ༄༅། །པ་ལ་གྲགས་པའི་བདེ་བའི་རྒྱུ་ནི་བསོད་ནམས་ཀྱི་ལས་ཡིན་ལ། དེ་ནི་གསོག་པ་ལ་བལྟོས་ཤིང་དེ་ཡང་དགེ་བའི་བློ་ལ་རག་ལས་ལ། འཇིག་རྟེན་ན་དགེ་བའི་བློ་ནི་ཤིན་ཏུ་སྐྱེ་བ་དཀོན་པའི་ཕྱིར། བདེ་བའི་རྒྱུ་ནི་བརྒྱ་ལམ་ན་ལན་རེ་འབྱུང་བར་ ཟད་ལ། སྡུག་བསྔལ་གྱི་རྒྱུ་ནི་སྡིག་པ་ཡིན་པའི་ཕྱིར། དེ་ནི་སེམས་ཅན་རྣམས་རྟག་ཏུ་སྤྱོད་པས་ཤིན་ཏུ་མང་སྟེ་དེའི་ཕྱིར་སྡུག་བསྔལ་ནི་ཆེས་མང་བས་འདི་ལ་བཟོད་པར་བྱ་བ་ཤིན་ཏུ་གལ་ཆེའོ། །ཡང་དག་པར་ན་འཁོར་བ་པ་རྣམས་བདེ་བར་འཛིན་པ་འདི་དག་ ཡང་བདེ་བ་མ་ཡིན་ཏེ་འགྱུར་བའི་སྡུག་བསྔལ་ཡིན་པའི་ཕྱིར་དང་། ཕུང་པོ་དང་ཁམས་དང་སྐྱེ་མཆེད་ལྡན་པ་ཙམ་འདི་ཁོ་ན་ནད་དང་འབྲས་དང་ཟུག་རྔུ་ལྟ་བུའི་འདུ་བྱེད་ཀྱི་སྡུག་བསྔལ་ཡིན་ཏེ། ཟག་པ་དང་བཅས་པ་ནི་སྡུག་བསྔལ་ལོ། །ཞེས་གསུངས་ལ། དེ་ལྟར་ སྡུག་བསྔལ་གྱི་ཕུང་པོ་སྲིད་པ་གསུམ་འདི་ལས་ཐར་བར་འདོད་པ་ནི་ངེས་འབྱུང་གི་བསམ་པ་ཡིན་ལ། ངེས་འབྱུང་འདི་མེད་ན་ཐར་བའི་རྒྱུ་སྒྲུབ་པའི་བློ་མི་སྐྱེ་བའི་ཕྱིར་ཐར་པ་མེད་ལ། སྡུག་བསྔལ་མེད་ན་དེ་ལས་ཐར་འདོད་ཀྱི་ངེས་འབྱུང་ཡང་མི་སྐྱེ་བའི་ཕྱིར་རོ། ། དཀའ་ཟློག་ཞེས་སོགས་ལ། སྔོན་ལྷ་རྣམས་ལྷ་མ་ཡིན་ལས་ཕམ་པའི་ཚེ་དབང་ཕྱུག་རི་རབ་ཀྱི་བྱང་ཤར་ན་དཀའ་ཐུབ་སྤྱོད་པ་མཐོང་ནས་འདིས་གྲོགས་བྱས་ན་བདག་ཅག་རྒྱལ་བར་འགྱུར་རོ། །ཞེས་བགྲོས་ཏེ་ལྷ་རྣམས་ཀྱི་འོད་གཅིག་ཏུ་བསྡུས་པས་ལྷ་མོ་ཨུ་ མ་ཞེས་བྱ་བ་ཆེས་མཛེས་པ་ཞིག་བྱུང་སྟེ་དེས་དབང་ཕྱུག་ལ་གཡོ་བསྟན་པ་ན་ཅི་ཞིག་ན་མིག་ཟུར་ཙམ་བལྟས་པ་དང་སླར་ཤ་དྲོད་ཀྱིས་ལོ་བཅུ་གཉིས་རེག་པས་དབང་ཕྱུག་ཆགས་ཏེ་ཁྱོ་ཤུག་ཏུ་གྱུར་པར་ཕྱི་རོལ་པ་ལ་གྲགས་ལ། ནང་པའི་རྒྱུད་དག་ལས་ ཀྱང་དེ་གཉིས་ལས་ནག་པོ་ཆེན་པོ་དང་དཔལ་ལྷ་མོ་སྐྱེས་ཏེ་ནག་པོ་ཆེན་པོས་བེང་དྲིལ་བ་དང་ལྷ་མོའི་ལྟེ་བ་ལ་ལྷའི་རྫོང་བཅས་པས་ལྷ་མིན་བཅོམ་མོ། །ཞེས་བཤད་ལ། དེའི་དཀའ་ཐུབ་ཟློག་པའི་ཕྱིར་ཨུ་མ་ལ་དཀའ་ཐུབ་ཟློག་མ་ཞེས་གྲགས་ལ། དེ་མགུ་ན་ཐར་བ་འཐོབ་
Page: 424 བོ་ཞེས་བྱ་བའི་ལོག་པའི་གཏན་ཚིགས་ལས་ཕྱི་རོལ་པ་དག་དེ་མཆོད་པའི་ཕྱིར་ཡན་ལག་ལ་སོགས་པ་སྲེག་པ་ཞིག་སྟེ། དཀའ་འགྲེལ་ཆུང་ངུར། དཀའ་ཟློག་ནི་དབང་ཕྱུག་ཆེན་པོའི་ཆུང་མ་སྟེ་ཨུ་མའོ། །ལྷ་ཐམས་ཅད་ཀྱིས་ཨུ་མ་སྤྲུལ་ནས་དབང་ཕྱུག་ཆེན་པོ་དཀའ་ ཐུབ་ལས་ཟློག་གོ་ཞེས་གྲགས་སོ། །ཞེས་དང་། དགེ་བའི་ལྷས། དཀའ་ཟློག་སོགས་ནི་ལག་པ་ལ་སོགས་པ་ཐར་པའི་དོན་དུ་སྲེག་པ་དང་། ཞེས་དང་། བི་བྷུ་ཏིས། ལྷ་མོ་ཙཎྜི་ཀའི་བུ་ནི་ས་ཚེ་གུ་ཆེན་པོ་ལ་ལྟོགས་ཉལ་བྱས་ཏེ་ར་ལུ་འབྲེག་པ་དང་གཅོད་པ་ལ་སོགས་ པ་བྱེད་དོ། །ཞེས་དང༌། དཀའ་འགྲེལ་ཆེན་མོར། གཏུམ་མོ་དང་དད་སོགས་ལ་གཏུམ་མོའི་བུ་ནི་གཏུམ་མོའི་བུ་སྟེ་སྟོན་ཟླ་འབྲིང་པོའི་ཚེས་དགུའི་དུས་ལ་སོགས་པར་ཞག་གཅིག་ཏུ་གསོ་སྦྱོང་བྱས་ནས་ལུས་སྲེག་པ་དང་གཅོད་པ་དང་འབིགས་པར་བྱེད་པའི་ སྡུག་བསྔལ་ཚོར་ར་བ་འབྲས་བུ་མེད་པ་ཉམས་སུ་མྱོང་བར་བྱེད་དོ། །ཞེས་བྱུང་སྟེ། གཏུམ་མོ་ནི་མིང་གི་རྣམ་གྲངས་དང་ཙཎྜི་ཀ་ནི་དེའི་སཾངྒཏའི་སྐད་དོ། །ཀརྞ་ཌ་པ་ཞེས་བྱ་བ་ནི། རྒྱ་གར་ལྷོ་ཕྱོགས་ཀྱི་ཡུལ་ཞིག་སྟེ་དེ་ན་སྔོན་གྱི་ལོག་པའི་གྲགས་པ་ཞིག་རྒྱུ་མཚན་དུ་བྱས་ པ་ལས་མཐོ་རིས་སུ་བའི་ཕྱིར་དང་། གཞན་དག་གིས་དེའི་མིང་ཐོག་མར་བྲིས་ཏེ་མཆོད་པར་བྱེད་པས་ན་དེའི་གྲགས་པ་འདོད་པའི་ཕྱིར། ཟླ་བ་གཟས་ཟིན་པའི་ཚེ་ཕན་ཚུན་དུ་མགོ་གཅོད་པར་བྱེད་པ་ཞིག་སྟེ། བི་བྷུ་ཏིས། ཡུལ་ཀརྞ་ཌར་སྐྱེས་པ་རྣམས་དང་རང་གི་མིང་ གཞན་གྱིས་ཐོག་མར་བྲི་བའི་ཕྱིར། ཕན་ཚུན་དུ་ཁེངས་པས་དགོས་པ་མེད་པར་སྡུག་བསྔལ་མྱོང་བར་བྱེད་དོ། །ཞེས་དང་། འགྲེལ་ཆེན་ལས། དེ་བཞིན་དུ་ཡུལ་ཀརྞ་ཌ་པ་ལ་སོགས་པར་བྱུང་བ་ལྷོ་ཕྱོགས་ཀྱི་རྒྱུད་དུ་གོང་མའི་མིང་འབྲི་བ་ཙམ་གྱི་ང་རྒྱལ་གྱིས་ཕན་ ཚུན་དུ་འགྲན་པར་བྱེད་པའི་བྱེད་པ་དུ་མས་སྡུག་བསྔལ་ཉམས་སུ་མྱོང་ཞིང་སྲོག་ཀྱང་འདོར་བར་བྱེད་ན། ཞེས་སོ། །དེ་ལྟར་དོན་མེད་པའི་སྡུག་བསྔལ་དེ་ལྟ་བུ་ཡང་བཟོད་པར་བྱེད་པ་དག་ཡོད་ན་བདག་གིས་དོན་ཆེན་པོ་བླ་ན་མེད་པའི་བྱང་ཆུབ་དང་སེམས་
Page: 425 ༄༅། །ཅན་ཐམས་ཅད་ཀྱི་དོན་དུ་ཅིའི་ཕྱིར་མི་བཟོད་དེ། རྒྱུ་མཚན་དེ་དག་བསམས་ནས་སྡུག་བསྔལ་མི་བཟོད་པའི་སྡར་མ་ཝ་སྐྱེས་ལྟ་བུའི་བློ་དོར་ཞིག་པའོ། །གོམས་ན་སོགས་ལ་དཀའ་འགྲེལ་ཆེན་མོར། སྡུག་བསྔལ་ཆུང་ངུ་བཟོད་ཀྱང་མགོ་བོ་ གཅོད་པ་སོགས་ཇི་ལྟར་བཟོད་ཅེ་ན། གོམས་ན་ཞེས་སོགས་ཏེ་དེ་ལ་སྡུག་བསྔལ་ཆུང་ངུ་ལ་གོམས་པ་སྔོན་དུ་བཏང་ན་དཀའ་བ་ཤིན་ཏུ་དཀའ་བ་ལ་ཡང་གོམས་པར་འགྱུར་ཏེ། དཔེར་ན། གོམས་པའི་དབང་གིས་སེམས་ཅན་རྣམས་སྡུག་བསྔལ་ལ་བདེ་བར་འདུ་ཤེས་ པ་བཞིན་དུ་སྡུག་བསྔལ་བྱུང་བ་ཐམས་ཅད་ལ་བདེ་བའི་འདུ་ཤེས་གནས་པ་གོམས་པར་བྱས་པས་བདེ་བའི་འདུ་ཤེས་ཉིད་དུ་ཉེ་བར་གནས་པར་འགྱུར་ལ། དེའི་རྒྱུ་མཐུན་གྱི་འབྲས་བུ་ཆོས་ཐམས་ཅད་ལ་བདེ་བར་འགྲོ་བའི་ཏིང་ངེ་འཛིན་འཐོབ་སྟེ། ཡབ་སྲས་མཇལ་ བ་ལས། བཅོམ་ལྡན་འདས་ཆོས་ཐམས་ཅད་ལ་བདེ་བར་འགྲོ་བ་ཞེས་བྱ་བའི་ཏིང་ངེ་འཛིན་མཆིས་ཏེ། དེ་གང་གིས་ཐོབ་པའི་བྱང་ཆུབ་སེམས་དཔའ་དམིགས་པའི་དངོས་པོ་ཐམས་ཅད་ལ་བདེ་བའི་ཚོར་བ་ཤ་སྟག་མྱོང་བར་འགྱུར་ཞིང་། སྡུག་བསྔལ་གྱི་ཚོར་ བ་ཡང་མི་མྱོང་། སྡུག་བསྔལ་ཡང་མ་ལགས་བདེ་བ་ཡང་མ་ལགས་པའི་ཚོར་བ་ཡང་མི་མྱོང་སྟེ། དེ་ལ་སེམས་ཅན་དམྱལ་བའི་གནོད་པ་ནས་ཀར་ཥ་པ་ཎ་ཙམ་དུ་བཏུབས་སམ་འབྲས་ཕྱེ་ལྟར་བཙོས་སམ་གླང་པོ་ཆེ་རྣམས་ཀྱིས་མཉེས་ཀྱང་བདེ་བའི་འདུ་ཤེས་ འཇུག་གོ །ཞེས་ལུང་དང་བཅས་ཏེ་བཤད་དོ། །འོ་ན་སྡུག་བསྔལ་བདེ་བར་འཆར་བར་འགྱུར་ན་དེ་འཁོར་བའི་བདེ་བར་འཆར་རམ། མྱ་ངན་ལས་འདས་པའི་བདེ་བར་འཆར། དང་པོ་ལྟར་ན། སྲིད་པ་ན་བདེ་བ་མེད་པ་དང་འགལ། ཕྱི་མ་ལྟར་ན། སོ་ སྐྱེས་དེ་ཉམས་སུ་བླང་མི་ནུས་པར་འགྱུར་རོ་ཞེ་ན། ཟག་བཅས་སྡུག་བསྔལ་དུ་བཤད་པ་ཡང་ཐེག་པ་ཐུན་མོང་གི་སྐབས་སུ་ཡིན་གྱི་ཐེག་ཆེན་ཐུན་མོང་མ་ཡིན་པའི་ཚེ་ལྟ་བའི་སྐབས་སུ་སྡུག་བསྔལ་དང་བདེ་བ་གང་ཡང་དམིགས་སུ་མེད་ལ། སྒོམ་པའི་ཚེ་
Page: 426 བདེ་བ་དང་སྡུག་བསྔལ་དང་བཏང་སྙོམས་གང་དུ་བསྒོམས་པ་དེར་འཆར་ཞིང་། སྤྱོད་པའི་ཚེ་རྒྱལ་པོ་ནམ་མཁས་རྒྱལ་སྲིད་ནས་ཡན་ལག་དང་དབང་པོ་རྣམས་དང་པགས་པ་དང་ཤའི་བར་དུ་བྱིན་པས་བསམ་པ་ཡོངས་སུ་རྫོགས་ཏེ་དགའ་བ་རྒྱ་ཆེན་པོ་ཐོབ་པ་ལྟར་ གཞན་དོན་དུ་གྱུར་ན་ཅི་ལྟ་བུ་ཡང་བདེ་བའི་མཆོག་ཏུ་འདུ་ཤེས་པ་སྟེ་བདེ་སྡུག་ནི་འཛིན་སྟངས་ལས་སོ་སོར་འདུ་ཤེས་པར་ཟད་ཀྱི་ངོ་བོ་ཉིད་ཀྱིས་བདེ་བའམ་སྡུག་བསྔལ་བ་དེ་དང་དེར་གནས་པ་ཞིག་ནི་ཡོད་པ་མ་ཡིན་ནོ། །དེ་བས་ན་འཁོར་བ་པ་རྣམས་ སྡུག་བསྔལ་དུ་འཛིན་པ་ལུས་ཀྱི་ན་ཚ་དང་སེམས་ཀྱི་ཟུག་རྔུ་འདི་དག་ལའང་འདི་ནི་སྡུག་བསྔལ་ལོ་ཞེས་ཞེན་པར་མི་བྱ་བར་བདེ་བ་དང་བཏང་སྙོམས་དང་སྟོང་པ་སོགས་སྣ་ཚོགས་པར་བལྟས་ཏེ་སྦྱངས་པས་དེ་དང་དེར་འཆར་བར་འགྱུར་རོ། །བཞི་པ་བརྟགས་ཏེ་ བཟོད་པར་བྱ་བ་ནི། སྦྲུལ་དང་ཤ་སྦྲང་དག་དང་ནི། །བཀྲེས་སྐོམ་ལ་སོགས་ཚོར་བ་དང་། །གཡན་པ་ལ་སོགས་བཅས་པ་ཡི། །དོན་མེད་སྡུག་བསྔལ་ཅིས་མ་མཐོང་། །ཚ་གྲང་ཆར་དང་རླུང་སོགས་དང་། །ནད་དང་འཆིང་དང་བརྡེག་སོགས་ ལ། །བདག་གིས་གཟེ་རེག་མི་བྱ་སྟེ། །དེ་ལྟར་བྱས་ན་གནོད་པ་འཕེལ། །ལ་ལ་བདག་གི་ཁྲག་མཐོང་ན། །དཔའ་བརྟན་ལྷག་པར་སྐྱེ་འགྱུར་ཡོད། ལ་ལ་གཞན་གྱི་ཁྲག་མཐོང་ན། །བོག་ཅིང་བརྒྱལ་བར་འགྱུར་བ་ཡོད། །དེ་ནི་ སེམས་ཀྱི་ངང་བརྟན་དང་། །སྡར་མའི་ཚུལ་ལས་གྱུར་པ་ཡིན། དེ་བས་གནོད་པ་ཁྱད་བསད་ཅིང་། །སྡུག་བསྔལ་རྣམས་ཀྱིས་མི་ཚུགས་བྱོས། །མཁས་པས་སྡུག་བསྔལ་བྱུང་ཡང་ནི། །སེམས་ཀྱིས་རབ་ཏུ་རྙོག་མི་བྱ། །ཞེས་གསུངས་ཏེ། དེ་ལ་ཡང་དང་པོས་དོན་མེད་ཀྱི་སྡུག་བསྔལ་ལ་བསམས་ཏེ་དོན་ལྡན་གྱི་སྡུག་བསྔལ་བཟོད་པར་བྱ་བ་དང་། གཉིས་པས་གཟེ་རེག་མི་བྱ་བ་དང་། ཚིག་རྐང་དྲུག་གིས་དཔའ་བ་དང་སྡར་མའི་དཔེ་བསྟན་པ་དང་། དེ་ནས་གཅིག་གིས་དོན་བསྡུས་ཏེ་གདམས་པའོ། །
Page: 427 ༄༅། །དེ་ཡང་དུག་སྦྲུལ་དང་དུག་སྦྲང་སོགས་དུས་ཀྱི་རྗེས་སུ་འབྲང་བའི་སྲོག་ཆགས་ཀྱིས་ལུས་ལ་ཟོས་པའི་སྡུག་བསྔལ་དང༌། བཀྲེས་སྐོམ་སོགས་འཚོ་བའི་ཡོ་བྱད་མ་ཚང་བའི་སྡུག་བསྔལ་དང་། གཡན་པ་ལ་སོགས་པ་ནད་ཀྱི་སྡུག་བསྔལ་རྣམས་དབང་མེད་ དུ་མྱོང་ཞིང་མི་བཟོད་མཐུ་མེད་པ་མཐོང་བ་ལ་བསམས་ནས་ཆོས་ཀྱིས་ཕྱིར་སྡུག་བསྔལ་ཅཱ་བྱུང་ཡང་བཟོད་པར་བྱ་ཞིང་རི་རབ་རླུང་གིས་མི་བསྒུལ་བ་ལྟར་བདག་དང་བདག་གི་ལ་གཅེས་སྤྲས་སུ་འཛིན་པའི་གཟེ་རེག་སྤངས་ཏེ་རྐྱེན་ཅིས་ཀྱང་སེམས་མི་གཡོ་བར་བྱ་ལ། གཟེ་རེག་དང་བཟོད་སྲན་གཉི་གའང་གོམས་པའི་རྩ་བ་ཅན་ཏེ་དེས་ན་གཟེ་རེག་གོམས་པ་ལས་ལྡོག་སྟེ་བཟོད་སྲན་ལ་གོམས་པར་བྱའོ། །འཇིག་རྟེན་ན་ཡང་སྡར་མ་དག་ནི་གཡུལ་ངོར་གཞན་ལ་ཁྲག་བྱུང་བ་མཐོང་བས་བརྒྱལ་འབོག་ཏུ་འགྱུར་ལ། དཔའ་བ་ དག་ནི་བདག་ཉིད་ལ་རྨ་བྱུང་ན་ལྷག་པར་ཞེ་སྡང་གིས་དཔའ་བའི་བློ་སྐྱེས་ཏེ་རྨ་ལ་ཇི་མི་སྙམ་པར་ཕ་རོལ་འཇོམས་པ་ཡོད་དེ། སེམས་ངང་གིས་བརྟན་པ་དང་སྡར་བ་དེ་ཡང་སྐྱེ་བ་གཞན་དང་གཞན་དག་ནས་དཔའ་བ་ལ་གོམས་པ་དང་སྡར་བ་ལ་གོམས་པའི་ཁྱད་པར་ ཡིན་ནོ། དེས་ན་གནོད་པ་དང་སྡུག་བསྔལ་ཐམས་ཅད་ལ་ཅི་སྙམ་དུ་མི་འཛིན་པར་ཁྱད་དུ་བསད་དེ། ཅིས་ཀྱང་སེམས་མི་གཡོ་བར་བྱ་ཞིང་ལུས་ཀྱིས་སྡུག་བསྔལ་མྱོང་ཡང་སེམས་བཟོད་པས་དང་བར་བྱའི་ཞེ་སྡང་གིས་རྙོག་པར་མི་བྱའོ། །ལྔ་པ་ནི། ཉོན་མོངས་ རྣམས་དང་གཡུལ་འགྱེད་ལ། གཡུལ་འགྱེད་ཚེ་ན་གནོད་པ་མང་། །སྡུག་བསྔལ་ཐམས་ཅད་ཁྱད་བསད་ནས། །ཞེ་སྡང་ལ་སོགས་དགྲ་འཇོམས་པ། །དེ་དག་རྒྱལ་བྱེད་དཔའ་བོ་སྟེ། །ལྷག་མ་རོ་ལ་གསོད་པའོ། །ཞེས་གསུངས་ཏེ། དགྲ་ བོ་དཔུང་ཆེན་པོ་དང་གཡུལ་འགྱེད་པ་ན་ནན་ཏན་གྱིས་སྒྲིམ་དགོས་པ་ལྟར་འཁོར་བའི་རྩ་བ་ཉོན་མོངས་པ་དང་གཡུལ་འགྱེད་པ་ལ་ནི་ཤིན་ཏུ་སྒྲིམ་དགོས་ལ། དེའི་ཚེ་ན་ལུས་སེམས་ལ་གནོད་པའི་རྣམ་པ་མང་དུ་འབྱུང་མོད་ཀྱི་དེ་ལ་ཅིར་ཡང་མི་སྙམ་པས་
Page: 428 ཁྱད་དུ་བསད་དེ། བདག་རྒྱུད་ཀྱི་ཉོན་མོངས་འཇོམས་པ་དེ་ནི་སྲིད་པ་གསུམ་ལས་འདས་པའི་དཔའ་བོ་ཡིན་ཏེ། འཇིག་རྟེན་ན་རང་བཞིན་གྱིས་འཆི་བའི་མི་ལ་སོགས་པ་གསོད་པ་དེ་ནི་ཤི་བའི་རོ་ལ་མཚོན་འདེབས་པ་ལྟར་ཟད་ཀྱི་དཔའ་བོར་བརྗོད་མི་རིགས་སོ། ། དྲུག་པ་སྡུག་བསྔལ་ཕན་ཡོན་ཅན་དུ་བསྟན་པ་ནི། གཞན་ཡང་སྡུག་བསྔལ་ཡོན་ཏན་ནི། །སྐྱོ་བས་དྲེགས་པ་སེལ་བར་བྱེད། །འཁོར་བ་པ་ལ་སྙིང་རྗེ་སྐྱེ། །སྡིག་ལ་འཛེམ་ཞིང་དགེ་ལ་དགའ། །ཞེས་གསུངས་ཏེ། སྡུག་བསྔལ་འདི་ནི་ཕན་ཡོན་ཆེན་པོ་ཅན་ཏེ། སེམས་སྐྱོ་བའི་ དབང་གིས་ང་རྒྱལ་གྱི་དྲེགས་པ་སེལ་བ་དང༌། གཞན་ལ་སྙིང་རྗེ་སྐྱེ་བ་དང༌། དེའི་རྒྱུ་སྡིག་པར་ཤེས་ཤིང་བདེ་བའི་རྒྱུ་དགེ་བར་ཤེས་ནས་བླང་དོར་ཚུལ་བཞིན་དུ་བྱེད་པར་འགྱུར་བའི་ཕྱིར་རོ། །གཉིས་པ་ཆོས་ལ་ངེས་པར་སེམས་པའི་བཟོད་པ་ལ་བཞི། ཉོན་ མོངས་ཀྱི་དབང་གིས་ཕ་རོལ་ལ་རང་དབང་མེད་པར་བསྟན་པ། རང་དབང་གི་གཙོ་བོ་སོགས་འགོག་པ། སྤྲུལ་པ་ལྟ་བུ་ཡིན་ན་ཁྲོ་བ་ཟློག་མི་རིགས་པའི་རྩོད་པ་སྤང་བ། དོན་བསྡུ་བའོ། །དང་པོ་ཉོན་མོངས་ཀྱི་དབང་གིས་ཕ་རོལ་ལ་རང་དབང་མེད་པར་བསྟན་པ་ནི། མཁྲིས་པ་ལ་སོགས་སྡུག་བསྔལ་གྱི། འབྱུང་ གནས་ཆེ་ལ་མི་ཁྲོ་བར། །སེམས་ཡོད་རྣམས་ལ་ཅི་སྟེ་ཁྲོ། །དེ་དག་ཀུན་ཡང་རྐྱེན་གྱིས་བསྐུལ། །དཔེར་ན་མི་འདོད་བཞིན་དུ་ཡང་། །ནད་འདི་འབྱུང་བར་འགྱུར་བ་ལྟར། དེ་བཞིན་མི་འདོད་བཞིན་དུ་ཡང་། །ནན་གྱིས་ཉོན་མོངས་ འབྱུང་བར་འགྱུར། །ཁྲོ་བར་བྱ་ཞེས་མ་བསམས་ཀྱང་། །སྐྱེ་བོ་རྣམས་ནི་གྱི་ནར་ཁྲོ། །བསྐྱེད་པར་བྱ་ཞེས་མ་བསམས་ཀྱང་། །ཁྲོ་བ་དེ་བཞིན་སྐྱེ་བར་འགྱུར། །ཉེས་པ་ཇི་སྙེད་ཐམས་ཅད་དང་། །སྡིག་པ་རྣམ་པ་སྣ་ཚོགས་པ། །དེ་ཀུན་རྐྱེན་གྱི་ སྟོབས་ལས་བྱུང་། །རང་དབང་ཡོད་པ་མ་ཡིན་ནོ། །རྐྱེན་རྣམས་ཚོགས་པ་དེ་དག་ཡང་། །བསྐྱེད་པར་བྱ་ཞེས་སེམས་པ་མེད། །དེས་བསྐྱེད་དེ་ཡང་བདག་སྐྱེད་ཅེས། སེམས་པ་ཡོད་པ་མ་ཡིན་ནོ། །ཞེས་གསུངས་ཏེ། དང་པོས་རྐྱེན་ལ་
Page: 429 ༄༅། །རག་ལས་པར་བསྟན། དེ་ནས་གཉིས་ཀྱིས་དཔེ་དང་སྦྱར་ཏེ་བསྒྲུབས། གཅིག་གིས་གནོད་བྱེད་ལ་རང་དབང་མེད་པར་བསྟན། ཐ་མས་རྐྱེན་དེ་དག་ཀྱང་སེམས་པ་མེད་པར་བསྟན་པའོ། །དེ་ཡང་རླུང་མཁྲིས་བད་ཀན་གྱིས་དཀྲུགས་པ་དང་ སྐྱེས་བུས་མཚོན་ཆ་བརྒྱབ་པ་གཉིས་སྡུག་བསྔལ་གྱི་རྒྱུར་མཚུངས་པ་ལས་མཁྲིས་སོགས་ལ་མི་ཁྲོ་བར་སྐྱེས་བུ་ལ་ཅིའི་ཕྱིར་ཁྲོ། དེ་གཉི་གའང་རྐྱེན་གྱིས་བསྐུལ་བར་མཚུངས་ཏེ་མཁྲིས་སོགས་ཀྱང་ཟས་སྤྱོད་དང་དུས་ལ་སོགས་པས་བསྐྱེད་པ་ལྟར་སྐྱེས་བུའི་ ཁྲོ་བ་ཡང་ཚུལ་མིན་ཡིད་བྱེད་ཀྱིས་བསྐྱེད་པའི་ཕྱིར། དེས་ན་རྒྱུ་རྐྱེན་ཚོགས་ན་མཁྲིས་སོགས་དབང་མེད་དུ་སྐྱེ་བ་ལྟར་རྒྱུ་རྐྱེན་ཚོགས་པ་ན། སྐྱེས་བུ་ལ་དབང་མེད་པར་ཁྲོ་བ་འབྱུང་བ་ཡིན་གྱི། བདག་གིས་ནི་འདི་ལ་ཁྲོ་བར་བྱའོ་ཞེས་བསམས་བཞིན་དུ་བསྐྱེད་པ་མ་ཡིན་ ལ། ཁྲོ་བའི་རྐྱེན་ཚུལ་མིན་ཡིད་བྱེད་དང་གནོད་པར་འཛིན་པ་སོགས་ཀྱང་བདག་ཅག་གིས་ཁྲོ་བ་བསྐྱེད་པར་བྱའོ་ཞེས་མི་སེམ་ཞིང་། ཁྲོ་བ་དེ་ཡང་བདག་གིས་བདག་མི་ཤེས་མོད་ཀྱི་རྒྱུ་རྐྱེན་ཚོགས་པས་གནས་སྐབས་གཞན་དུ་སྣང་བ་ཙམ་ཞིག་སྟེ། དེ་དག་སོ་སོ་ཡང་བདག་ གིས་བདག་མི་རིག་ཅིང་སེམས་པ་མེད་དེ། རྒྱུ་རྐྱེན་གྱི་གཞན་དབང་བལྟོས་པ་ཁོ་ནའོ། །འགྲེལ་ཆེན་ལས་ནི། དེ་ལྟ་བས་ན་ཆོས་ཐམས་ཅད་ལ་བྱེད་པ་མེད་པའི་ཕྱིར། འདི་ཡོད་པས་འདི་འབྱུང་ལ་འདི་སྐྱེས་པས་འདི་སྐྱེ་བའི་ཕྱིར། འགྲོ་བ་འདི་ནི་རྐྱེན་ལས་བྱུང་བ་ཙམ་སྟེ་ འདིར་འགའ་ཡང་རང་དབང་ཅན་དུ་འབྱུང་བ་མེད་དོ། །ཅེས་སོ། །གཉིས་པ་རང་དབང་གི་གཙོ་བོ་སོགས་འགོག་པ་ནི། གཙོ་བོ་ཞེས་བྱར་གང་འདོད་དང་། །བདག་ཅེས་བཏགས་པ་གང་ཡིན་པ། །དེ་ཉིད་བདག་ནི་འབྱུང་བྱ་ཞེས། །ཆེད་དུ་བསམས་ཤིང་འབྱུང་བ་མེད། །མ་སྐྱེས་པར་ནི་དེ་ མེད་ན། དེ་ཚེ་སྐྱེ་བར་འདོད་པ་གང་། །ཡུལ་ལ་རྟག་ཏུ་གཡེངས་འགྱུར་བས། །འགག་པར་འགྱུར་བ་མ་ཡིན་ནོ། །ཅི་སྟེ་བདག་དེ་རྟག་ན་ནི། །མཁའ་བཞིན་བྱེད་པ་མེད་པར་མངོན། །རྐྱེན་གཞན་རྣམས་དང་ཕྲད་ན་ཡང་། །འགྱུར་བ་མེད་
Page: 430 ལ་ཅི་བྱར་ཡོད། །བྱེད་པའི་ཚེ་ཡང་སྔོན་བཞིན་ན། །བྱེད་པས་དེ་ལ་ཅི་ཞིག་བྱས། །དེ་ཡི་བྱེད་པ་འདི་ཡིན་ཞེས། །འབྲེལ་བར་འགྱུར་བ་གང་ཞིག་ཡོད། །དེ་ལྟར་ཐམས་ཅད་གཞན་གྱི་དབང་། །དེ་ཡི་དབང་གིས་དེ་དབང་མེད། །དེ་ལྟར་ཤེས་ ན་སྦྲུལ་ལྟ་བུའི། །དངོས་པོ་ཀུན་ལ་ཁྲོ་མི་འགྱུར། །ཞེས་གསུངས་ཏེ། དེའི་དང་པོ་གཉིས་ཀྱིས་གྲངས་ཅན་པའི་འདོད་པ་བཀགདེ་ནས་གཉིས་ཀྱིས་རིགས་པ་ཅན་པ་བཀགཐ་མས་དོན་བསྡུས་པའོ། །དེ་ཡང་། གཙོ་བོ་ཞེས་བྱར་གང་འདོད་ དང་། །བདག་ཅེས་བཏགས་པ་གང་ཡིན་པ། །ཞེས་པ་ནི་གྲངས་ཅན་པས་རྡུལ་མུན་སྙིང་སྟོབས་ཆ་མཉམ་པ་ལ་གཙོ་བོ་ཞེས་རྣམ་འགྱུར་ཉེར་གསུམ་གྱི་བྱེད་པ་པོ་མཐོང་བའི་ཡུལ་མིན་པ་བེམ་པོ་དང༌། བདག་ཤེས་རིག་གི་སྐྱེས་བུ་ཞེས་བྱ་བ་རྣམ་འགྱུར་ ལ་ལོངས་སྤྱོད་པ་པོ་སེམས་པ་དང་བཅས་ཤིང༌། དེ་གཉིས་ཀ་རྟག་པ་དང་རྣམ་འགྱུར་རྣམས་ནི་མི་རྟག་གོ་ཞེས་ཀུན་ནས་བཏགས་པ་དེའོ། །དེ་ཉིད་བདག་ནི་འབྱུང་བྱ་ཞེས། །ཆེད་དུ་བསམས་ཤིང་འབྱུང་བ་མེད། །མ་སྐྱེས་པར་ནི་དེ་མེད་ན། །དེ་ཚེ་སྐྱེད་པར་ འདོད་པ་གང་། ཡུལ་ལ་རྟག་ཏུ་གཡེངས་འགྱུར་བས། འགག་པར་འགྱུར་བ་མ་ཡིན་ནོ། ཞེས་པས་དེ་འགོག་པ་སྟེ། རྐྱེན་ལ་རག་ལས་པ་རྣམས་རང་དབང་ཅན་མ་ཡིན་ཡང་གཙོ་བོ་དང་བདག་དེ་རྐྱེན་ལ་མི་ལྟོས་པས་རང་དབང་ ཅན་ཡིན་ནོ་ཞེ་ན། ཞེས་གྲངས་ཅན་པའི་དོགས་པ་སྔུན་བསུས་པ་སྟེ། དཀའ་འགྲེལ་ཆུང་ངུར། གལ་ཏེ་རྐྱེན་ལ་རག་ལས་པ་རྣམས་རང་དབང་ཅན་མ་ཡིན་ན་ཡང་གཙོ་བོ་དང་སྐྱེས་བུ་དག་ནི་རྟག་ཅིང་རྐྱེན་ལ་མི་ལྟོས་པས་རང་དབང་ཅན་ཡིན་ནོ། །དེ་ ལ་ཡོན་ཏན་གསུམ་ཆ་མཉམ་པའི་རང་བཞིན་ནི་གཙོ་བོ་སྟེ་རང་བཞིན་རྟག་པ་དེ་ཁོ་ན་མ་མཐོང་བའི་བློའི་ཡུལ་ལས་འདས་པ་ནུས་པ་ཐམས་ཅད་དང་ལྡན་པ་བེམ་པོའི་རང་བཞིན་ཡིན་ནོ། །མཐོང་བའི་སྤྱོད་ཡུལ་སྒྲ་ལ་སོགས་པ་ནི་དེའི་རྣམ་པར་འགྱུར་
Page: 431 ༄༅། །བ་དེས་བསྐྱེད་པ་རེས་འགའ་བ་ཡིན་ནོ། །རང་བཞིན་དང་རྣམ་པར་འགྱུར་བ་དག་ཀྱང་དོན་དམ་པར་གཅིག་པ་ཡིན་ཏེ། དེས་ན་གཙོ་བོ་ལས་བྱུང་བའི་རྣམ་པར་འགྱུར་བ་ནི་རང་ལས་སྐྱེས་པར་འདོད་དོ། །སྐྱེས་བུ་ནི་གང་ཟག་སོ་སོ་ཐ་ དད་པ་རིག་པའི་རང་བཞིན་འབྲས་བུ་འགའ་ཡང་སྐྱེད་པར་མི་ནུས་པ་སྟེ་རྟག་ཏུ་ཡུལ་ལ་སེམས་པའོ། །དེ་ཡང་རང་བཞིན་གྱིས་རྟག་པ་དང་གནས་སྐབས་ཀྱི་སྐྱེ་བ་དང་འཇིག་པ་དག་དང་ཡང་མ་འབྲེལ་བར་འདོད་དོ། །དེ་ལ་བདག་ལ་སྡུག་བསྔལ་སྐྱེ་བ་ན་ སྡུག་བསྔལ་དེ་ནི་གཙོ་བོ་ལས་བྱུང་བ་གཙོ་བོའི་རྣམ་པར་འགྱུར་བ་ཡིན་ནོ། །དེ་བྱིན་གྱིས་རློབ་པ་པོ་ནི་དགྲ་བོ་ལ་སོགས་པའི་སྐྱེས་བུ་ཡིན་ཏེ། སྐྱེས་བུས་མཚོན་བརྡེག་པ་དང་སྡུག་བསྔལ་མྱོང་བར་འདོད་པ་ན་གཙོ་བོས་དེའི་འདོད་པ་དང་མཐུན་པར་གནས་ སྐབས་སྐྱེད་པར་བྱེད་དོ། །དེས་ན་གཙོ་བོ་དང་སྐྱེས་བུ་གཞན་ནི་རྐྱེན་ལ་རག་མ་ལས་པར་གནོད་པ་བྱེད་པོ་དང་། སྐྱེས་བུ་ཡང་སེམས་སྔོན་དུ་བཏང་ནས་སྡུག་བསྔལ་བྱེད་པ་དང་། གཙོ་བོ་ཡང་བློ་སྔོན་དུ་བཏང་ནས་གནོད་པ་བྱེད་དོ། །བློ་ནི་འདིར་གཙོ་བོའི་རྣམ་ པར་འགྱུར་བ་ཆེན་པོའི་མཚན་ཉིད་ལ་བྱའི་སེམས་པ་ནི་མ་ཡིན་ནོ། །དེས་ན་སྐྱེས་བུ་དང་གཙོ་བོ་ལ་ཁྲོ་བར་རིགས་སོ། །ཞེས་གྲངས་ཅན་པ་དོགས་ན་ཞེས་སྔ་རྒོལ་གྱི་འདོད་པ་བཀོད་དོ། །དེ་ཡང་གཙོ་བོ་དེ་བདག་ཉིད་འབྱུང་བར་བྱའོ་ཞེས་སམ། བདག་གིས་ རྣམ་འགྱུར་བྱའོ། །ཞེས་ཆེད་དུ་བསམས་ཤིང་འབྱུང་བ་མེད་དེ། དེ་བེམ་པོ་ཡིན་པའི་ཕྱིར་དང་། རྟག་པ་ཡིན་པའི་ཕྱིར། བདག་ཤེས་རིག་གི་སྐྱེས་བུ་དེ་ཡང་བདག་ཉིད་འབྱུང་བར་བྱའོ་ཞེས་ཆེད་དུ་བསམས་ཤིང་འབྱུང་བ་མེད་དེ། དེ་རྟག་པ་ཡིན་ལ། རྟག་པ་ནི་དངོས་ པོ་མ་ཡིན་པས་ཤེས་པར་མི་རིགས་པའི་ཕྱིར། ཡང་བདག་དང་གཙོ་བོ་དེ་རྒྱུ་རྐྱེན་ལས་སྐྱེས་སམ་མ་སྐྱེས་ཞེས་དྲིའོ། །སྐྱེས་ན་ནི་མི་རྟག་པར་འགྱུར་བས་རྟག་པར་འདོད་པ་དང་འགལ་ཞིང་སྐྱེ་ན་རྒྱུ་རྐྱེན་གཞན་ལས་སྐྱེ་དགོས་པས་གཞན་ལ་མ་
Page: 432 ལྟོས་པའི་རང་དབང་ཅན་དུ་འདོད་པ་དང་ཡང་འགལ་ལོ། །མ་སྐྱེས་པར་འདོད་ན་ནི་དེ་མེད་པར་ཐལ་ཏེ། རྒྱུ་རྐྱེན་ལས་མ་བྱུང་བའི་ངོ་བོ་ཉིད་ཀྱིས་ཡོད་པ་མི་སྲིད་པའི་ཕྱིར། དེ་ལྟར་དཔྱད་པའི་ཚེ་གཙོ་བོ་དང་བདག་ཉིད་མེད་ན་དེ་ལས་རྣམ་འགྱུར་སྐྱེ་བར་འདོད་ པ་དང་། རྣམ་འགྱུར་དེ་བདག་གིས་སྤྱོད་པར་འདོད་པ་གང་ཡིན་ཏེ། རི་བོང་གི་རྭ་མེད་ན་དེའི་ཐེམ་གཉེར་བགྲང་བ་ལྟ་ག་ལ་ཡོད། ཡང་བདག་དེ་གཙོ་བོས་གཏད་པའི་རྣམ་འགྱུར་ལ་ལོངས་སྤྱོད་ན་ཡུལ་རྣམ་འགྱུར་ཉེར་གསུམ་པོ་ཐམས་ཅད་ལ་གཅིག་ཆར་ དུ་ལོངས་སྤྱོད་པས་བདག་དེ་རྟག་ཏུ་གཡེངས་པར་འགྱུར་ཏེ། བདག་རྟག་པ་ཡིན་ལ་རྟག་པ་ལ་གནས་སྐབས་གཞན་མི་སྲིད་པའི་ཕྱིར། དེ་འདོད་པར་མི་ནུས་ཏེ་བདག་དེ་མེ་ལ་ལོངས་སྤྱོད་པའི་ཚེ་དེ་ཆུ་ལ་ལོངས་མི་སྤྱོད་ཅིང་ཆུ་ལ་ལོངས་སྤྱོད་པའི་ཚེ་མེ་ལ་ མི་སྤྱོད་པ་དང་། བདེ་བའི་ཚེ་སྡུག་བསྔལ་མི་འབྱུང་ལ་སྡུག་བསྔལ་གྱི་ཚེ་བདེ་བ་མི་འབྱུང་བའི་ཕྱིར་དང་། གཟུགས་ཀྱི་ཤེས་པ་འགགས་ནས་སྒྲའི་ཤེས་པ་སྐྱེ་བ་སོགས་སྐྱེ་འགག་ཐམས་ཅད་དེ་ལ་མི་འཐད་པར་འགྱུར་བས་བདག་དེ་གཟུགས་ལ་ལོངས་སྤྱོད་པ་ སོགས་རེ་རེ་ཞིང་ནམ་དུའང་འགག་པར་འགྱུར་བ་མ་ཡིན་པར་ཐལ་བའི་ཕྱིར། འདོད་མི་ནུས་ཏེ། ཨུཏྤ་ལ་འཛིན་པ་ན་ཁ་མ་བྱེ་བ་དང་། བྱེ་བ་དང་། རྒྱས་པ་དང་། རྙིང་པ་དང་། ཟེའུ་འབྲུ་འབའ་ཞིག་ལུས་པ་དང་། དེ་མ་སྨིན་པ་དང༌། སྨིན་པ་རྣམས་ཕྱི་མའི་གནས་སྐབས་ སྐྱེས་པ་ན་སྔ་མའི་གནས་སྐབས་འགག་ཅིང་དེ་ཉམས་སུ་མྱོང་བའི་ཤེས་རིག་ཡང་སྐྱེ་འགག་ཅན་དུ་མངོན་སུམ་གྱིས་ཉམས་སུ་མྱོང་བའི་ཕྱིར་རོ་ཞེས་པ་ནི་གཞུང་གི་དོན་བཤད་པ་ཡིན་ལ། ཉེས་པ་གཞན་ཡང་མཐོང་སྟེ། གཙོ་བོ་དེ་བེམ་པོ་ ཡིན་ན་བློ་སྔོན་དུ་བཏང་ནས་རྣམ་འགྱུར་བྱེད་པར་འགལ་ཏེ་བེམ་པོ་ལ་བློ་མེད་པའི་ཕྱིར་ཏེ་ཕ་བོང་བཞིན་ནོ། །བློ་སྔོན་དུ་བཏང་ནས་རྣམ་འགྱུར་བྱེད་ན་ཤེས་པའམ་གང་ཟག་ཏུ་འགྱུར་ཏེ་སེམས་པ་དང་བཅས་པའི་ཕྱིར། ཡང་རྣམ་འགྱུར་འཆོས་པའི་རྒྱུ་
Page: 433 ༄༅། །གང་ཡིན་ཏེ་རྫ་མཁན་གྱིས་རྫ་བཟོ་བ་ལ་འཇིམ་པ་དགོས་པ་ལྟར་རོ། །རང་ཉིད་རྒྱུ་ཡིན་པའི་ཕྱིར་རང་ལ་བྱེད་དོ་ཞེ་ན། རྫ་མཁན་གྱིས་ཀྱང་འཇིམ་པ་ལས་རྫ་མི་བྱེད་པར་བདག་ཉིད་རྫར་བྱེད་པའམ་ཡང་ན་འཇིམ་པ་ཉིད་རྫ་མཁན་དུ་ ཐལ་ལོ། ཡང་དགྲ་བོས་གནོད་པ་བྱེད་པར་འདོད་པ་ན་གཙོ་བོས་དེའི་གྲོགས་བྱས་ཏེ་སྐབས་འབྱེད་ན་གཙོ་བོ་དེ་དེའི་བྲན་དུ་འགྱུར་བས་གཙོ་བོ་མི་འཐད་པ་དང༌། ཡང་ན་གནོད་པ་བྱེད་པོའི་གྲོགས་བྱེད་པ་ལྟར་གནོད་པ་བྱ་ཡུལ་དེའི་བདག་ལ་གནོད་པར་ མི་འདོད་པ་སྐྱེད་པའི་གྲོགས་ཀྱང་བྱེད་དགོས་ཏེ་རྣམ་འགྱུར་ཐམས་ཅད་སྐྱེད་པ་པོ་ཡིན་པའི་ཕྱིར། ལྟར་ན་གནོད་པར་འདོད་མི་འདོད་གཉིས་ཀ་གཙོ་བོས་ཅིག་ཆར་དུ་སྐྱེད་ན་དགྲས་གནོད་པ་བྱེད་འདོད་ཀྱི་བསམ་པ་སྐྱེས་པ་ན་དེའི་འོག་ཏུ་གཙོ་བོས་ དེའི་བསམ་པ་བཞིན་དུ་རྣམ་འགྱུར་བྱེད་པར་འགལ་ལོ། །སེམས་པ་མེད་པའི་བློ་ནི་མི་སྲིད་དེ་ཚ་བ་མ་ཡིན་པའི་མེ་མི་སྲིད་པ་ལྟར་རོ། །ཞེས་སོགས་ཀྱིས་ཀྱང་བརྒལ་དུ་རུང་ངོ་། །དཀའ་འགྲེལ་ཆུང་ངུ་ལས་ནི། བསམ་པ་ནི་འདི་ཡིན་ཏེ། གཙོ་བོ་ དང་སྐྱེས་བུ་ལས་གཙོ་བོའི་རང་བཞིན་རྟག་ཡང་བདག་ལ་གནོད་པའི་གནས་སྐབས་ཀྱི་རྣམ་པར་འགྱུར་བ་མི་རྟག་པར་ཁྱེད་འདོད་དོ། །སྐྱེས་བུ་ཡང་བདག་ལ་གནོད་པར་འདོད་པའི་སེམས་པའི་གནས་སྐབས་མཚོན་ཆ་རྡེག་པར་སེམས་པ་ལ་སོགས་ པའི་མཚན་ཉིད་ནི་རེས་འགའ་བ་དང་སྐྱེ་འཇིག་དང་ལྡན་པར་དམིགས་པས་ཁྱོད་མི་འདོད་ཀྱང་རིགས་པའི་སྟོབས་ཀྱིས་གནས་སྐབས་དེ་སྐྱེ་བ་དང་འཇིག་པ་ཅན་དུ་ཁས་བླང་དགོས་སོ། །དེས་ན་གཙོ་བོ་ཞེས་བྱར་གང་འདོད་དང་བདག་ཅེས་བཏགས་པ་ གང་ཡིན་པ་དེ་དག་གི་གནས་སྐབས་རེས་འགའ་བ་དེ་དག་ཉིད་ཀྱང་བདག་ལ་ཁྱོད་ལ་གནོད་པར་བྱ་བའི་ཕྱིར་འབྱུང་བར་བྱ་ཞེས་རྣམ་པ་དེ་ལྟར་ཆེད་དུ་བསམས་ཤིང་འབྱུང་བ་མེད་དོ། །ཁྱོད་ལ་མི་སྡུག་བྱ་བའི་ཕྱིར་སེམས་སྔོན་དུ་བཏང་ནས་སྐྱེས་པ་ནི་
Page: 434 མ་ཡིན་ནོ། །དེ་ཅིའི་ཕྱིར་ཞེ་ན། མ་སྐྱེས་པར་ནི་དེ་མེད་ན། །ཞེས་སྨོས་ཏེ་ཁྱོད་ལ་གནོད་པའི་གཙོ་བོ་དང་སྐྱེས་བུའི་གནས་སྐབས་དེ་མ་སྐྱེས་པའི་ཚེ་ན་ཡོད་དམ་མེད། གལ་ཏེ་ཡོད་ན་སྐྱེ་བ་དོན་མེད་དོ། །དེ་ལྟར་འདོད་པས་ཐལ་བ་མ་ཡིན་ནོ་སྙམ་ ན། རེ་ཞིག་གཙོ་བོས་རྣམ་འགྱུར་མི་སྐྱེད་པར་འདོད་པ་རང་གཞུང་དང་ཡང་འགལ་ལ་མངོན་སུམ་གྱིས་ཀྱང་གནོད་དོ། །སྐྱེས་བུའི་གནས་སྐབས་མི་སྐྱེ་བར་འདོད་པ་ཡང་མངོན་སུམ་དང་རྗེས་སུ་དཔག་པའི་ཚད་མ་དང་འགལ་བ་དང་ཡུལ་ཉེ་བ་མེད་ པར་ཡུལ་དམིགས་པར་མི་འདོད་པས་རང་གི་གཞུང་དང་ཡང་དོན་གྱིས་འགལ་ལོ། །དེས་ན་མ་སྐྱེས་པའི་ཚེ་ཡོད་པ་ནི་མི་རིགས་སོ། །འོན་ཏེ་དེ་མེད་ན་དེའི་ཚེ་སྐྱེ་བར་འདོད་པ་གང་ཞེས་དེའི་ཚེ་སྐྱེ་བར་འདོད་པ་གང་ཡང་མེད་དོ། །ཞེས་སྤོང་བའི་ཚིག་གོ ། དཔེར་ན། སྐྱེས་བུ་ཕུགས་ན་གནས་པ་ནི་ཕྱིར་མ་བྱུང་བའི་དུས་ནའང་ཡོད་པས་ད་ཕྱིར་བྱུང་བར་བྱའོ་སྙམ་དུ་འདོད་པར་འགྱུར་གྱི་གཙོ་བོ་དང་སྐྱེས་བུའི་གནས་སྐབས་ཁྱད་པར་རེས་འགའ་བ་དེ་ནི་མ་སྐྱེས་པའི་ཚེ་རི་བོང་གི་རྭ་ལྟར་མེད་པའི་ཕྱིར་ཁོ་བོ་སྐྱེ་བར་བྱའོ་ ཞེས་འདོད་པ་མི་སྲིད་དེ་དེ་འདོད་པ་པོ་ཉིད་མེད་པའི་ཕྱིར་རོ། །གལ་ཏེ་གཙོ་བོའི་གནས་སྐབས་ནི་མི་རྟག་པས་རང་དབང་མ་ཡིན་མོད། སྐྱེས་བུ་ནི་རང་བཞིན་ལྟར་གནས་སྐབས་ཀྱང་རྟག་པས་རང་དབང་མེད་པར་བྱུང་བ་མ་ཡིན་ནོ་སྙམ་ན་སྐྱེས་བུའི་གནས་སྐབས་ན་ རྟག་པར་ཁས་ལེན་པ་ལ་གནོད་པ་བརྗོད་པ་ནི། ཡུལ་ལ་རྟག་ཏུ་གཡེང་འགྱུར་བས། །སོགས་ཏེ་སྐྱེས་བུའི་གནས་སྐབས་བརྟགས་པ་ན་ཡུལ་ཉེ་བ་ན་ཡུལ་ལ་སེམས་པའི་མཚན་ཉིད་ཡུལ་ལ་གཡེང་བ་ཞེས་བྱ་བ་ཡུལ་ལ་ལོངས་སྤྱོད་པ་ལྟར་ཡུལ་ མི་ཉེ་བ་ན་ཡང་ཡུལ་ལ་སེམས་པས་ན་ཡུལ་ལ་སེམས་པའི་གནས་སྐབས་དེ་འགག་པར་འགྱུར་བ་མ་ཡིན་ཏེ་རེས་འགའ་ཡང་མི་ལྡོག་པར་ཐལ་ལོ། །དེ་ལྟར་ནི་འདོད་པ་ཡང་མ་ཡིན་ལ་ཚད་མ་དང་ཡང་འགལ་ལོ་ཞེས་བྱུང་མོད། གཙོ་བོས་རྣམ་འགྱུར་མི་
Page: 435 ༄༅། །བྱེད་པ་ལ་མངོན་སུམ་གྱིས་བསལ་བ་བསྟན་པ་འདི་ནི་འགྱུར་གྱི་སྐྱོན་ནམ་ཡི་གེ་ཉམས་པ་ཞིག་ཏུ་ཟད་དེ་སངས་རྒྱས་པ་རང་ལུགས་ལ་གཙོ་བོས་རྣམ་འགྱུར་བྱེད་པར་མི་འཆད་པའི་ཕྱིར་དང་། གཙོ་བོས་རྣམ་འགྱུར་བྱེད་པ་ནི་གྲངས་ཅན་པ་ འདོད་པར་ཟད་ཀྱི་སུས་ཀྱང་མ་མཐོང་བའི་ཕྱིར་རོ། འགྲེལ་ཆེན་ལས་ནི། གཙོ་བོ་དང་བདག་ཏུ་བཏགས་པ་དེ་ཚད་མས་མ་གྲུབ་སྟེ་དེ་ཉིད་རང་ཉིད་ལས་གཞན་པའི་རྒྱུ་མེད་པའི་ཕྱིར་འབྱུང་ངོ་སྐྱེའོ་ཞེས་བསམས་ནས་སྐྱེ་བ་མེད་དོ། །མ་སྐྱེས་ན་ནི་དེ་སྔ་ནས་ཡོད་པ་མ་ཡིན་ པ་མོ་གཤམ་གྱི་བུ་དང་མཚུངས་པས་ན་སྐྱེ་བར་ཅིའི་ཕྱིར་འདོད། མེད་པ་མི་སྐྱེ་ཡང་མི་གསལ་བའི་གནས་སྐབས་ལས་གསལ་བའི་གནས་སྐབས་སུ་ཡོངས་སུ་འགྱུར་བ་ཙམ་མོ་ཞེ་ན། དེ་ལྟ་ན་ཡོངས་སུ་འགྱུར་བ་དང་གསལ་བའི་གནས་སྐབས་ཉིད་ཀྱང་མེད་ན་ཇི་ལྟར་སྐྱེ། གནས་སྐབས་དེ་དེའི་རང་བཞིན་ཡིན་ན་དེ་ཡང་སྐྱེ་བར་ཐལ་བར་འགྱུར་རོ། །ཐ་དད་པ་ཡིན་ན་འབྲེལ་བ་མེད་པ་དང་འབྲེལ་བ་བཏགས་པ་ཡིན་ན་ཡང་ཐུག་མེད་དུ་འགྱུར་ཏེ་འོག་ནས་ཀྱང་འགེགས་སོ། །དེ་སྐྱེ་བར་མི་འདོད་དེ། རྟག་པའི་རང་བཞིན་སྐྱེ་ བ་མེད་པ་ཁོ་ནའོ་ཞེ་ན། འོ་ན་བོང་བུའི་རྭ་ལྟར་རྣམ་པ་ཐམས་ཅད་དུ་གཏན་མེད་པས་མ་སྐྱེས་པར་ནི་དེ་མེད་ན་ཞེས་པའི་ཉེས་པ་ཉིད་བཟློགས་པར་མི་ནུས་སོ། །གལ་ཏེ་གཙོ་བོས་གཏད་པའི་ཡུལ་ལ་ལོངས་སྤྱོད་ན་དེའི་སྔར་ལོངས་སྤྱོད་པ་པོ་མེད་པར་འགྱུར་ ལ། སྔར་འཇུག་པ་མེད་ན་ཕྱིས་ཀྱང་འཇུག་པར་མི་རིགས་ལ་ཅི་སྟེ་འཇུག་ན་ནི་ཡུལ་ལ་རྟག་ཏུ་གཡེངས་པའི་ཕྱིར་འགག་པར་མི་འགྱུར་ལ། གལ་ཏེ་གཡེངས་པ་ལས་ལྡོག་ན་ནི་མི་རྟག་པར་ཐལ་བར་འགྱུར་རོ་ཞེས་བཀྲལ་ཏོ། །གྲངས་ཅན་ལས་གཞན་ རིགས་པ་ཅན་པ་ན་རེ། བདག་དེ་ནི་རྟག་ཅིང་སེམས་པ་མེད་ལ་ནམ་མཁའ་ལྟར་ཁྱབ་པ་དང་ལས་རྣམས་ཀྱི་བྱེད་པ་པོ་དང་འབྲས་བུ་ལོངས་སྤྱོད་པ་པོ་ཡིན་ལ། སེམས་པ་མེད་ཀྱང་སེམས་པ་ཅན་དང་འབྲེལ་བས་སེམས་པར་བྱེད་པ་རང་དབང་ཅན་ཡིན་པས་དེ་ལ་
Page: 436 ཁྲོ་བར་བྱའོ། །ཞེས་འདོད་དེ། འགྲེལ་ཆེན་ལས། གྲངས་ཅན་ལས་ཁྱད་པར་ནི་སེམས་པ་མེད་པ་སྟེ་གཞན་མཚུངས་ལ་རྟག་པ་ནི་དུས་སྔ་ཕྱི་རང་བཞིན་གཅིག་པའོ། །སེམས་པ་མེད་པ་ནི་བེམས་པོའི་དོན་ཏོ། །སེམས་པ་ཅན་གཞན་དང་འབྲེལ་བས་སེམས་པར་བྱེད་ དེ། མཁའ་བཞིན་ནི་ཁྱབ་པའོ། །དེའི་ཕྱིར་མངོན་དུ་བྱེད་པ་མེད་པར་གསལ་བའོ། །གང་། གཞན་དག་འདོད་པ་སོགས་རྟེན་དང་། །རང་གི་སེམས་མེད་ངོ་བོ་དང་། །རྟག་དང་དེ་བཞིན་ཀུན་ཁྱབ་དང་། །དགེ་དང་མི་དགེའི་ལས་རྣམས་ཀྱི། ། བྱེད་པ་པོ་དང་དེའི་འབྲས་བུ། །ལོངས་སྤྱོད་པོ་དང་སེམས་པ་དང་། །ལྡན་ཕྱིར་སེམས་པའི་རང་བཞིན་གྱི། བདག་ཏུ་འདི་ནི་འདོད་པ་ཡིན། །ཞེས་བསྟན་ཏོ་ཞེས་འདོད་པ་བཀོད་དོ། །དེ་འགོག་པ་ནི། ཅི་སྟེ་བདག་དེ་རྟག་ན་ནི། །མཁའ་ བཞིན་བྱེད་པ་མེད་པར་མངོན། །ཞེས་པས་དེས་ནི་གནོད་པ་སོགས་ཅི་ཡང་བྱེད་པ་མེད་པར་ཐལ་ཏེ། རྟག་པའི་ཕྱིར། ནམ་མཁའ་བཞིན་ནོ། །རང་བཞིན་རྟག་ཀྱང་རྐྱེན་སེམས་པ་སོགས་དང་ཕྲད་པས་གནོད་པ་བྱེད་དོ་ཞེ་ན། རྐྱེན་གཞན་རྣམས་དང་ ཕྲད་ན་ཡང་། །འགྱུར་བ་མེད་ལ་ཅི་བྱར་ཡོད། །ཅེས་པས་སེམས་པ་ལ་སོགས་པའི་རྐྱེན་གཞན་རྣམས་དང་ཕྲད་ན་ཡང་བདག་གི་རང་བཞིན་འགྱུར་བ་མེད་པ་དེ་ལ་རྐྱེན་གྱིས་ཅི་བྱར་ཡོད་དེ་རི་རབ་དང་ཕྲད་པས་ནམ་མཁའ་སྲ་བར་མི་འགྱུར་བ་བཞིན་ནོ། ། ཡང་བདག་དེ་གནོད་པ་བྱེད་པའི་ཚེ་རྟག་ཅིང་སེམས་པ་མེད་ལ་ཁྱབ་པའི་སྔོན་གྱི་གནས་སྐབས་དེ་དོར་ནས་སེམས་པ་དང་བཅས་པས་གནོད་པ་བྱེད་དམ། འོན་ཏེ་སྔོན་གྱིས་གནས་སྐབས་མ་དོར་བར་བྱེད། དང་པོ་ལྟར་ན་དེ་མི་རྟག་པར་ཐལ་ལོ། །ཕྱི་མ་ལྟར་ན། བྱེད་པའི་ཚེ་ཡང་སྔོན་བཞིན་ན། །བྱེད་པས་དེ་ལ་ཅི་ཞིག་བྱས། །དེ་ཡི་བྱེད་པ་འདི་ཡིན་ཞེས། །འབྲེལ་བར་གྱུར་པ་གང་ཞིག་ཡོད། །ཅེས་པས་གལ་ཏེ་བདག་དེ་གནོད་པ་བྱེད་པའི་ཚེ་ནའང་རྟག་ཞིང་སེམས་པ་མེད་པ་སྔོན་གྱི་གནས་སྐབས་ཁོ་ན་
Page: 437 ༄༅། །ལས་འགྱུར་བ་མེད་པ་ཡིན་ན། ལྷན་ཅིག་བྱེད་པའི་རྐྱེན་གྱིས་དེ་ལ་ཅི་ཞིག་བྱས་ཤིང་བྱར་ཡོད་དམ་སྟེ་ཐགས་ཀྱི་རྐྱེན་ཚོགས་ཀྱང་ནམ་མཁའ་ཐགས་སུ་བཏག་པར་མི་ནུས་པ་བཞིན་ནོ། །གནོད་པ་ལ་སོགས་པ་དེའི་བྱེད་པའི་རྐྱེན་དང་ བྱེད་པ་པོ་བདག་དེ་ལ་བདག་གཅིག་པ་དང་དེ་ལས་བྱུང་བའི་འབྲེལ་བ་ཅི་ཞིག་ཡོད་དེ་ཐགས་མཁན་དང་རི་བོང་གི་རྭ་ལ་འབྲེལ་བ་མེད་པ་བཞིན་ནོ། །སྐབས་འདིར་དགེ་བའི་ལྷས། དངོས་པོར་གྱུར་བའི་འབྲེལ་པ་ཡང་ཡོད་པ་མ་ཡིན་ཏེ། རྗེ་བོ་ བྲན་ལ་སོགས་པ་ཡི། །ཞེས་བྱ་བ་ལ་སོགས་སྨོས་ཏེ་རྟོག་པ་ཙམ་ཡིན་པ་དེའི་ཕྱིར་དེ་དང་འབྲེལ་བ་ཞེས་བྱ་བའང་ཡོད་པ་མ་ཡིན་ནོ། །ཞེས། རྗེ་བོ་བྲན་ལ་སོགས་པའི་འབྲེལ། །རྟོག་པ་ཙམ་ཡིན་ཡོད་མ་ཡིན། །ཞེས་པའི་གཞུང་རྐང་པ་གཉིས་ ལྷག་པོར་ཡོད་པའི་་་སེམས་པ་འབྲུ་འདུག་ལ། འགྲེལ་པ་གཞན་ལ་དེ་མི་སྣང་ཡང་དེའི་ཚེ་ན་བདག་རྟག་པས་གནོད་པ་བྱེད་པ་དང་དེའི་སྐྱོན་སོགས་ལ་དངོས་མེད་དུ་གྱུར་པའི་འབྲེལ་བ་དང་དངོས་པོར་གྱུར་པའི་འབྲེལ་བ་གང་ཡང་མེད་དོ། །ཞེས་འཆད་པར་སྣང་ངོ་། ། འདི་དག་ལ་དཀའ་འགྲེལ་ཆུང་ངུ་ལས་ནི། རིགས་པ་ཅན་པ་དང་བྱེ་བྲག་པ་དག་ཐུན་མོང་དུ་བདག་ནུས་པ་ཐམས་ཅད་དང་ལྡན་པ་སེམས་དང་བེམ་པོ་གཉིས་ཀ་མ་ཡིན་པ་སེམས་པ་གཞན་དང་ལྡན་པའི་རང་དབང་ཅན་ནི་སྡུག་བསྔལ་སྐྱེད་པའི་རྒྱུར་འདོད་པ་ བཀོད་ཅིང་། དེས་སྡུག་བསྔལ་བསྐྱེད་པའི་དོན་བྱེད་ནུས་མེད་དེ་རིམ་དང་ཅིག་ཆར་གྱིས་བྱེད་པ་མེད་པའི་ཕྱིར་ཏེ། ནམ་མཁའ་བཞིན་ནོ། །གལ་ཏེ་རྐྱེན་རིམ་ཅན་ལ་བལྟོས་ནས་རིམ་གྱིས་བྱེད་དོ་ཞེ་ན། འགྱུར་བ་མེད་པ་དེ་ལ་རྐྱེན་གྱིས་ཕན་བཏགས་པ་མེད་ ལ་རྐྱེན་གྱི་ཕན་མ་བཏགས་ཀྱང་རྐྱེན་གྱིས་སྐྱེད་པར་འདོད་ན་ཧ་ཅང་ཐལ་ཏེ། རི་བོང་གི་རྭས་ཀྱང་སྐྱེད་པའམ་ཐམས་ཅད་ཀྱིས་ཀྱང་ཐམས་ཅད་སྐྱེད་བར་ཐལ་ཞིང་། བདག་དེ་རྐྱེན་གྱིས་ཕན་བཏགས་པ་དེའི་ངོ་བོར་གྱུར་ན་དེ་སྐྱེ་འཇིག་ཅན་ཏུ་འགྱུར་ཞིང་སྐྱེ་འཇིག་
Page: 438 མེད་ན་རྐྱེན་དང་ལྷན་ཅིག་པའི་ངོ་བོར་འགྱུར་བ་མི་སྲིད་དོ། །འོན་ཏེ་དེས་མ་བྱས་ཀྱང་གཞན་གྱིས་བྱས་པ་དང་ལྡན་པ་ཡིན་ནོ་ཞེ་ན། བྱེད་པའི་ཚེ་ཡང་ཞེས་ཏེ་བྱེད་པའི་མིང་ཅན་ནུས་པ་དོན་གཞན་སྐྱེད་པའི་ཚེ་ཡང་བདག་དེ་སྔར་གྱི་གནས་སྐབས་མ་བོར་ན་ བདག་བྱེད་པ་ཅན་དུ་མི་འགྱུར་ལ། བྱེད་པ་གཞན་དང་བདག་ལ་འབྲེལ་བ་གཏན་མེད་དོ། །གལ་ཏེ་བདག་གི་བྱེད་པ་གཞན་གྱིས་བསྐྱེད་པས་འབྲེལ་ལོ་ཞེ་ན། འོ་ན་བྱེད་པ་གཞན་དེའང་བྱེད་པ་གཞན་གྱིས་བྱེད་དགོས་པས་ཐུག་མེད་དུ་འགྱུར་ལ། རང་གི་ ངོ་བོས་བྱེད་པ་གཞན་དེ་བྱེད་ན་འབྲས་བུའང་རང་གི་ངོ་བོས་བྱེད་པས་རྒྱུ་ལ་མ་ལྟོས་པར་ཐལ་བས་བྱེད་པ་གཞན་ལ་དོན་མེད་པ་དང་རང་གི་ངོ་བོ་ཡང་མི་རྟག་པར་འགྱུར་རོ། །ཞེས་བཀག་གོ །འགྲེལ་ཆེན་ལས་ནི། འདི་ནི་ཅི་ཡང་མི་བྱེད་པ་ཁོ་ན་ཡིན་ཏེ་བྱ་ བ་འགའ་ལ་ཡང་མི་མཁོ་བའི་ཕྱིར། འོན་ཏེ་བྱེད་པ་མེད་པ་དེ་ལ་ཡང་ལྷན་ཅིག་བྱེད་པའི་རྐྱེན་གཞན་ཉེ་བ་ལས་བྱེད་པ་ཁས་བླང་སྟེ། གང་། ཤེས་དང་རྩོལ་བ་དང་འབྲེལ་བ། །དེ་ལ་བྱེད་པོ་ཉིད་དུ་བཤད། །ཅེས་པས་སོ་ཞེ་ན། ཤེས་ རྩོལ་སོགས་རྐྱེན་གཞན་རྣམས་དང་ཕྲད་ན་ཡང་སྔར་ལས་འགྱུར་བ་མེད་དེ། རྟག་པའི་ཕྱིར། སྔར་གྱི་རང་བཞིན་ལས་འཕོ་བ་མེད་པའི་བདག་ལ་རྐྱེན་གྱིས་ཅི་བྱར་ཡོད། ཇི་ལྟར་གང་ཞིག་སྔོན་བྱེད་པ་མེད་པའི་དུས་ན་ཡིན་པ་དེ་ལྟར་བྱེད་པའི་དུས་ན་ ཡང་ཡིན་ན་བྱེད་པ་པོའི་རང་བཞིན་དང་བྲལ་བ་དེ་ལ་བྱེད་པ་པོས་ཅི་ཞིག་བྱས། གང་གིས་ན་རྐྱེན་གཞན་དང་ཕྲད་པ་དེ་བྱ་བར་རྣམ་པར་འཇོག་པར་བྱེད་པ་ཡིན་ན་གཞན་དང་འབྲེལ་བ་གཉི་ག་མེད་པའི་ཕྱིར་ན་བདག་དེའི་བྱེད་པ་འདི་ཡིན་ནོ་ཞེས་འབྲེལ་བར་ འགྱུར་བ་གང་ཞིག་ཡོད། ཅེས་བཀག་གོ །མདོར་ན་རང་དབང་ཅན་གྱི་བདག་དང་གཙོ་བོ་སོགས་མེད་དེ་ཆོས་ཐམས་ཅད་རྒྱུ་རྐྱེན་ལ་བལྟོས་པས་ན་དེ་ལྟར་ཐམས་ཅད་གཞན་གྱི་དབང་ཅན་ཏེ་རྒྱུ་རྐྱེན་ཚོགས་པ་དེའི་དབང་གིས་འབྲས་བུ་དེ་རང་དབང་མེད་པར་
Page: 439 ༄༅། །བསྐྱེད་པའོ། །དེ་ལྟར་ཤེས་པ་ན་ཆུ་ལས་ལྦུ་བ་དང་མེ་ལས་དུ་བ་ལྟར་མེད་བཞིན་དུ་རྒྱུ་རྐྱེན་ཙམ་དུ་སྣང་བའི་ཆོས་འདི་ཐམས་ཅད་སྤྲུལ་པའམ་སྒྱུ་མ་ལྟར་རིག་སྟེ་གང་ལ་ཁྲོ་བར་བྱ་བའི་ཡུལ་དང་གང་གིས་ཁྲོ་བར་བྱེད་པའི་བདག་ ཀྱང་མི་མཐོང་བ་དེའི་ཚེ་ཆོས་གང་ལ་ཡང་ཁྲོ་བར་མི་འགྱུར་རོ། །འགྲེལ་ཆེན་ལས་ནི། དོན་དམ་པར་སུ་ཞིག་སུ་ལ་གནོད་པ་བྱེད་དེ་བས་ན་གནོད་པ་བྱེད་པོ་གང་ལ། གནོད་པ་བྱས་པ་གང་ཞིག །གང་དུ་ཞེ་སྡང་བར་འགྱུར་ཞེ་ན། མྱ་ངན་འདས་འདྲའི་དངོས་ཀུན་ལ། ། དེ་ལྟར་ཤེས་ན་སུ་ཞིག་ཁྲོ། །ཞེས་གཞུང་བཏོན་ནས་འབྲུ་གཉེར་ཏོ། །གསུམ་པ་སྤྲུལ་པ་ལྟ་བུ་ཡིན་ན་ཁྲོ་བ་ཟློག་མི་རིགས་པའི་རྩོད་པ་སྤང་བ་ནི། གང་གིས་གང་ཞིག་བཟློག་བྱ་སྟེ། །བཟློག་པའང་རིགས་པ་མིན་ཞེ་ན། །དེ་ལ་བརྟེན་ནས་སྡུག་བསྔལ་རྣམས། །རྒྱུན་ཆད་འགྱུར་འདོད་མི་རིགས་མེད། ། ཅེས་གསུངས་ཏེ། འོ་ན་ཐམས་ཅད་སྤྲུལ་པ་ལྟ་བུ་ཡིན་ན་ཟློག་པ་པོ་གང་གིས་བཟློག་བྱ་གང་ཞིག་བཟློག་པར་བྱ་བཟློག་བྱ་དང་ཟློག་བྱེད་གང་ཡང་མེད་པའི་ཕྱིར། །དེས་ན་ཁྲོ་བ་ཟློག་པའང་རིགས་པ་མིན་ནོ་ཞེ་ན། བཟློག་བྱའི་ཁྲོ་བ་དང༌། ཟློག་བྱེད་ཀྱི་གཉེན་པོ་དང་། ཟློག་པ་པོའི་གང་ཟག་རྣམས་ངོ་བོ་ཉིད་ཀྱིས་ཡོད་པ་ནི་མ་ཡིན་ཡང་ཐག་ཁྲ་ལ་སྦྲུལ་འཛིན་གྱི་བློས་བྲོས་པ་ན་གཡང་དུ་ལྷུང་ནས་སྡུག་བསྔལ་བར་བྱེད་པ་ལྟར་གློ་བུར་དུ་བྱུང་བའི་ཁྲོ་བ་འདིས་ངན་སོང་གི་གཡང་དུ་ལྷུང་བར་བྱེད་ལ། སྦྲུལ་འཛིན་གྱི་བློ་ལོག་པ་ན་འཇིགས་ པ་མེད་པ་ལྟར་ཁྲོ་བ་རང་བཞིན་མེད་པའི་གློ་བུར་བ་དེ་ཉིད་གཉེན་པོ་རང་བཞིན་མེད་པའི་གློ་བུར་བས་བཟློག་པ་དེ་ལ་བརྟེན་ནས་འབྲས་བུ་ངན་སོང་དང་མཐོང་ཆོས་ཀྱི་སྡུག་བསྔལ་རྣམས་རྒྱུན་འཆད་པར་འགྱུར་ལ། དེའི་ཕྱིར་ཐག་ཁྲ་ཡིན་གྱི་སྤྲུལ་མ་ཡིན་ནོ། །ཞེས་སྟོན་པ་ལྟར་ ཁྲོ་བ་ཟློག་པར་འདོད་པའི་ཕྱིར་འདི་ལ་མི་རིགས་པ་མེད་དོ། །འགྲེལ་ཆེན་ལས་ནི། འཐུག་འཇུག་པ་མི་རིགས་ན་ཟློག་པའང་མི་རིགས་སོ་ཞེ་ན། དེ་ལ་སོགས་ཏེ་ཆོས་ཐམས་ཅད་བྱེད་པ་མེད་པ་ཡིན་མོད་ཀྱི་དེ་ལྟ་ན་ཡང་རྟེན་ཅིང་འབྲེལ་བར་འབྱུང་བའི་སྟོབས་ཀྱིས་གཞན་
Page: 440 གྱི་དབང་ཅན་དུ་བསྟན་ལ། དེས་ན་མ་རིག་པའི་རྐྱེན་གྱི་སྟོབས་ཀྱིས་གོང་ནས་གོང་དུ་འབྲས་བུ་འདྲེན་པས་འདུ་བྱེད་ལ་སོགས་པའི་དངོས་པོ་འཇུག་ཅིང་སྔ་མ་སྔ་མ་ལོག་པ་ན་ལྡོག་སྟེ། དེས་ན་འཁོར་བའི་སྡུག་བསྔལ་གྱི་རྒྱུན་ཟློག་པར་འདོད་པས་ཞེ་སྡང་ལ་སོགས་པས་ སྡིག་པ་ལ་འཇུག་པ་ལས་ཟློག་པར་འཐད་ཅིང་དེས་མངོན་མཐོ་དང་ངེས་ལེགས་ཀྱི་རང་བཞིན་གྱི་འབྲས་བུ་སྐྱེའོ། །ཞེས་བྱུང་ངོ་། །བཞི་པ་དོན་བསྡུ་བ་ནི། དེ་བས་དགྲ་འམ་མཛའ་ཡང་རུང་། མི་རིགས་བྱེད་པ་མཐོང་གྱུར་ན། །འདི་འདྲའི་རྐྱེན་ལས་གྱུར་ཏོ་ཞེས། ། དེ་ལྟར་སོམས་ཏེ་བདེ་བར་མནོས། །གལ་ཏེ་རང་དགའས་འགྲུབ་འགྱུར་ན། །འགའ་ཡང་སྡུག་བསྔལ་མི་འདོད་པས། །ལུས་ཅན་དག་ནི་ཐམས་ཅད་ཀྱང་། །སུ་ལའང་སྡུག་བསྔལ་འབྱུང་མི་འགྱུར། །ཞེས་གསུངས་ཏེ། དེ་ལྟར་རང་དབང་མེད་ པར་ཁྲོ་བའི་སེམས་ཅན་དག་ནི་སྙིང་རྗེའི་ཡུལ་ཡིན་གྱི་ཁྲོ་བའི་ཡུལ་མིན་ལ། རྒྱུ་རྐྱེན་གཞན་མ་ཚོགས་ན་བསམས་པ་ཙམ་གྱིས་ནི་ཅི་ཡང་མི་འགྲུབ་སྟེ། སེམས་ཅན་ཐམས་ཅད་བདག་སྡུག་བསྔལ་བར་མི་འདོད་ཅིང་བདེ་བ་ཁོ་ན་འདོད་པས་ན་དེ་ལྟར་ཡང་འགྱུར་ རིགས་ཀྱང་དེ་མི་སྣང་བའི་ཕྱིར། དེས་ན་ཕ་རོལ་གྱི་སེམས་ལ་ཁྲོ་བ་བསམས་པ་ཙམ་གྱིས་ནི་བདག་ལ་གནོད་པ་ཡང་མ་ཡིན་ནོ་ཞེས་ཚིགས་སུ་བཅད་པ་ཕྱི་མ་འདི་ཞར་བྱུང་གི་རིགས་པར་བསྟན་ཏོ། །འགྲེལ་པ་དུ་མར་རྒྱུ་མེད་དུ་རང་གར་འགྲུབ་པར་འགྱུར་ ན། ཞེས་འབྲུ་བསྣན་མོད་ཀྱང་འགའ་ཡང་སྡུག་བསྔལ་མི་འདོད་པས་ཞེས་པ་དང་འབྲེལ་བའི་ཕྱིར་རང་དགའ་བ་སྟེ་བསམས་པས་འགྲུབ་ན་ཞེས་པའི་དོན་དུ་སྣང་ངོ༌། །དེ་དག་གིས་ནི་ལས་དང་པོ་བའི་ཆོས་ཟབ་མོ་ལ་ངེས་པར་སེམས་པའི་བཟོད་པ་བསྟན་གྱི་འཕགས་ པ་རྣམས་ཀྱི་དེ་ནི་བསམ་གྱི་མི་ཁྱབ་པ་ཞིག་སྟེ། ནམ་མཁའ་མཛོད་ཀྱི་མདོ་ལས། འདི་དག་བདག་ལ་གཤེ་ཡང་བཟོད་དོ་སྙམ་པ་དེ་ནི་ང་ཡིར་འཛིན་པའི་བཟོད་པའོ། །འདི་དག་གཤེ་བ་བདག་གིས་བཟོད་པར་བྱའོ་སྙམ་པ་དེ་ནི་ངར་འཛིན་པའི་བཟོད་
Page: 441 ༄༅། །པའོ། །འདི་དག་ནི་ཡི་གེ་ནོར་བའོ་སྙམ་པ་དེ་ནི་སྒྲ་དང་སྐད་ཀྱི་བཟོད་པའོ། །འདི་ཡང་སྟོང་པ་བདག་ཀྱང་སྟོང་པའོ་སྙམ་པ་དེ་ནི་ཡིད་ལ་བྱེད་པ་སྦྱོར་བའི་བཟོད་པའོ། །བདག་གིས་བཟོད་པར་བྱའོ་སྙམ་པ་དེ་ནི་རྣམ་པར་རིག་པའི་བཟོད་པ་སྟེ་འདི་ རྣམས་ནི་བཟོད་པ་ནམ་མཁའ་དང་མཚུངས་པ་མ་ཡིན་ནོ། །ཞེས་དང་། འདི་ལྟ་སྟེ་ཚིག་ནམ་མཁའ་དང་མཚུངས་པའི་ཕྱིར་གཤེ་ཡང་སླར་མི་གཤེ་བ་དང༌། ལུས་ནམ་མཁའ་དང་མཚུངས་པའི་ཕྱིར་བརྡེགས་ཀྱང་སླར་མི་བརྡེག་པ་དང༌། སེམས་ནམ་མཁའ་དང་མཚུངས་ པའི་ཕྱིར་སྤྱོས་ཀྱང་སླར་མི་སྤྱོ་བ་དང་། བསམ་པ་ནམ་མཁའ་དང་མཚུངས་པའི་ཕྱིར་ཁྲོས་ཀྱང་སླར་མི་ཁྲོ་བ་སྟེ། ཆོས་བཞི་པོ་དེ་དག་དང་ལྡན་ན་བཟོད་པ་ནམ་མཁའ་དང་མཚུངས་པ་ཡིན་ནོ། །ཞེས་དང་། སྟོང་པ་ཉིད་ལ་བཟོད་ཀྱང་ལྟ་བ་གཞིག་པའི་ཕྱིར་མ་ཡིན་པ་དང་། མཚན་མ་མེད་པ་ལ་བཟོད་ཀྱང་མཚན་མ་སེལ་བ་མིན་པ་དང་། སྨོན་པ་མེད་པར་བཟོད་ཀྱང་བྱང་ཆུབ་ཏུ་སྨོན་པ་མེད་པ་མ་ཡིན་པ་དང་། མངོན་པར་འདུ་མི་བྱེད་པ་ལ་བཟོད་ཀྱང་འདུས་བྱས་རྣམ་པར་གཞིག་པའི་ཕྱིར་་མ་ཡིན་པ་དང་། སྐྱེ་བ་མེད་པ་ལ་བཟོད་ཀྱང་འདུས་ མ་བྱས་ཀྱི་མཚན་ཉིད་ཀྱིས་མ་ཡིན་པ་དང་། འབྱུང་བ་མེད་པ་ལ་བཟོད་ཀྱང་སྐྱེ་བ་དང་གནས་པས་མ་ཡིན་པ་དང་། སེམས་ཅན་མེད་པ་ལ་བཟོད་ཀྱང་དངོས་པོ་རྣམ་པར་གཞིག་པའི་ཕྱིར་མ་ཡིན་པ་དང་། ཇི་ལྟ་བ་བཞིན་དུ་བཟོད་ཀྱང་དུས་རྣམ་པར་གཞིག་པའི་ཕྱིར་མ་ཡིན་ པ་སྟེ། བརྒྱད་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ཆོས་ལ་ངེས་པར་རྟོག་པའི་བཟོད་པའོ། །ཞེས་སོ། །གསུམ་པ་གནོད་པ་ལ་ཇི་མི་སྙམ་པའི་བཟོད་པ་སྟོན་པ་ལ་བཞི། གནོད་བྱེད་སྙིང་རྗེའི་ཡུལ་དུ་བསྟན་པ། ཁྲོ་བའི་རྒྱུ་མཚན་ལ་དཔྱད་པ། རང་ཉིད་ ཀྱིས་ཉེས་པར་བསྟན་པ། གནོད་བྱེད་དེ་བདག་ལ་ཕན་འདོགས་ཡིན་ཡང་གནོད་པའི་རྣམ་སྨིན་གྱི་སྡུག་བསྔལ་རང་བཞིན་གྱིས་མྱོང་བར་བསྟན་པའོ། །དང་པོ་གནོད་བྱེད་སྙིང་རྗེའི་ཡུལ་དུ་བསྟན་པ་ནི། བག་མེད་པས་ནི་བདག་ལ་བདག །ཚེར་མ་ལ་སོགས་གནོད་པ་བྱེད། །བུད་མེད་
Page: 442 ལ་སོགས་འཐོབ་བྱའི་ཕྱིར། །རྔམ་ཞིང་ཟས་གཅོད་ལ་སོགས་བྱེད། །ཁ་ཅིག་འགག་ཅིང་གཡང་སར་མཆོང་། །དུག་དང་མི་འཕྲོད་ཟ་བ་དང་། བསོད་ནམས་མ་ཡིན་སྤྱོད་པ་ཡིས། །རང་ལ་གནོད་པ་བྱེད་པ་ཡོད། །གང་ཚེ་ཉོན་མོངས་དབང་ གྱུར་བས། །བདག་སྡུག་ཉིད་ཀྱང་གསོད་བྱེད་པ། །དེ་ཚེ་དེ་དག་གཞན་ལུས་ལ། །གནོད་མི་བྱེད་པར་ཇི་ལྟར་འགྱུར། །ཉོན་མོངས་སྐྱེས་པས་དེ་ལྟ་བུར། །བདག་གསོད་ལ་སོགས་ཞུགས་པ་ལ། །སྙིང་རྗེ་བརྒྱ་ལ་མ་སྐྱེས་ཀྱང་། །ཁྲོ་བར་ འགྱུར་བ་ཅིའི་ཐ་ཚིག །ཞེས་གསུངས་ཏེ། འགྲེལ་ཆེན་ལས། བག་མེད་པ་ནི་མ་བརྟགས་པའོ། །ཞེས་གསུངས་ཏེ། ཕྱི་རྗེས་གཞན་མ་བལྟས་པར་ཟས་ནོར་རམ་བུད་མེད་སོགས་འཕྲལ་གྱི་བདེ་བ་སྣ་རེའི་ཆེད་དུ་སེམས་ཅན་འདི་དག་མི་བྱ་བ་ཅི་ཡང་མེད་དེ། ཉོན་ མོངས་པའི་དབང་དུ་གྱུར་པ་ན་ཤིན་ཏུ་གཅེས་པ་བདག་ཉིད་ཀྱང་བདག་ཉིད་ལ་མཚོན་བརྡེག་པ་དང་། ཤིན་ཏུ་སྡུག་པའི་བུ་སོགས་ཀྱང་གསོད་པ་ཡོད་ན་དེ་དག་གཞན་ལ་གནོད་པ་ཅིས་མི་བྱེད། འདི་ལྟར་སྨྱོན་པ་ལྟ་བུར་གནས་པ་ལ་སུ་ཞིག་ཁྲོ་སྟེ་ཤིན་ཏུ་སྙིང་ རྗེའི་ཡུལ་ཁོ་ནའོ། །གཉིས་པ་ཁྲོ་བའི་རྒྱུ་མཚན་ལ་དཔྱད་པ་ནི། གལ་ཏེ་གཞན་ལ་འཚེ་བྱེད་པ། །བྱིས་པ་རྣམས་ཀྱི་རང་བཞིན་ན། །དེ་ལ་ཁྲོ་བ་མི་རིགས་ཏེ། །སྲེག་པའི་རང་བཞིན་མེ་བཀོན་འདྲ། །འོན་ཏེ་སྐྱོན་དེ་གློ་བུར་ལ། །སེམས་ཅན་རང་བཞིན་དེས་ན་ཡང་། ། འོ་ནའང་ཁྲོ་བ་མི་རིགས་ཏེ། །མཁའ་ལ་དུད་འཐུལ་བཀོན་པ་བཞིན། །དབྱུག་པ་ལ་སོགས་དངོས་བཀོལ་ཏེ། །གལ་ཏེ་འཕེན་པ་ལ་ཁྲོ་ན། །དེ་ཡང་ཞེ་སྡང་གིས་རྦད་པས། །ཉིས་ན་ཞེ་སྡང་ལ་ཁྲོ་རིགས། །ཞེས་གསུངས་ཏེ། ཁྲོ་བ་ནི་བྱིས་པའི་ཆོས་ཉིད་ཀྱིས་ཡིན་ནོ་ཞེ་ན། མེའི་རང་བཞིན་ཚ་བའི་ཕྱིར་མེ་སྦར་ནས་ཚ་བ་ལ་ཁྲོ་མི་རིགས་པ་ལྟར་བྱིས་པ་བསྟེན་ནས་དེ་ཁྲོ་བ་ལ་ཁྲོ་མི་རིགས་པར་འགྱུར་རོ། །གལ་ཏེ་ཁྲོ་བ་གློ་བུར་བ་ཡིན་ལ་སེམས་ཅན་གྱི་ངོ་བོ་ཉིད་ཀྱིས་མ་ཡིན་ན་ནི་
Page: 443 ༄༅། །ནམ་མཁའ་ལ་དུད་པ་འཐུལ་བ་ན་ནམ་མཁས་ཉེས་སོ། །ཞེས་བཀོན་པ་ལྟ་བུ་སྟེ། དུ་བས་མིག་ཚ་བར་བྱེད་པ་ནི་དུ་བའི་ཉེས་པ་ཡིན་གྱི་ནམ་མཁའི་ཉེས་པ་མ་ཡིན་ནོ། །དབྱུག་པ་སོགས་བསྣུན་པ་ལ་ཁྲོ་ན་དབྱུག་པ་ལ་ཁྲོ་བར་རིགས་སོ། །དེ་སྐྱེས་བུས་བསྣུན་ནོ་ ཞེ་ན། སྐྱེས་བུའང་ཞེ་སྡང་གིས་རྦད་པས་ཞེ་སྡང་ལ་ཁྲོ་བ་རིགས་ལ། དེ་ལྟ་ན་སྐྱེས་བུའི་ཞེ་སྡང་ནི་བདག་གིས་མི་མཐོང་ལ་བདག་རྒྱུད་ཀྱི་ཞེ་སྡང་ནི་བདག་ཉིད་ཀྱི་མངོན་སུམ་དུ་མྱོང་བའི་ཕྱིར། རང་གི་ཞེ་སྡང་ལ་ཁྲོ་བར་རིགས་སོ། །གསུམ་པ་ནི། བདག་ གིས་སྔོན་ཆད་སེམས་ཅན་ལ། །འདི་འདྲ་བ་ཡི་གནོད་པ་བྱས། །དེ་བས་སེམས་ཅན་འཚེ་བྱེད་པ། བདག་ལ་གནོད་པ་འདི་འབྱུང་རིགས། །དེ་ཡི་མཚོན་དང་བདག་གི་ལུས། །གཉིས་ཀ་སྡུག་བསྔལ་རྒྱུ་ཡིན་ཏེ། །དེས་མཚོན་བདག་གིས་ལུས་ ཕྱུང་ན། །གང་ཞིག་ལ་ནི་ཁྲོ་བར་བྱ། །ཤུ་བ་མི་ཡི་གཟུགས་འདྲ་བ། །རེག་ཏུ་མི་བཟོད་སྡུག་བསྔལ་ཅན། །སྲེད་ལྡོངས་བདག་གིས་བཟུང་གྱུར་ན། དེ་ལ་གནོད་པ་སུ་ལ་ཁྲོ། །བྱིས་པ་སྡུག་བསྔལ་མི་འདོད་ཅིང་། །སྡུག་བསྔལ་རྒྱུ་ལ་ བརྐམས་པས་ན། །རང་གི་ཉེས་པས་གནོད་གྱུར་པ། །གཞན་ལ་བཀོན་དུ་ཅི་ཞིག་ཡོད། །དཔེར་ན་དམྱལ་བའི་སྲུང་མ་དང་། །རལ་གྲི་ལོ་མའི་ནགས་ཚལ་ལྟར། རང་གི་ལས་ཀྱིས་འདི་བསྐྱེད་ན། །གང་ཞིག་ལ་ནི་ཁྲོ་བར་བྱ། །ཞེས་ གསུངས་ཏེ། དང་པོས་སྔོན་གྱི་ལེ་ལན་ཡིན་པར་བསྟན། དེ་ནས་གཉིས་གྱིས་གནོད་བྱའི་ལུས་བཟུང་བས་ཉེས་པར་བསྟན། གཉིས་ཀྱིས་རང་གི་སྡིག་པའི་འབྲས་བུར་བསྟན་པ་སྟེ། སྔོན་ཡང་བདག་གིས་གཞན་ལ་གནོད་པ་བྱས་པས་རྣམ་སྨིན་ གྱི་འབྲས་བུ་ངན་སོང་གི་སྡུག་བསྔལ་མང་དུ་མྱོང་ནས་ད་ལྟ་མྱོང་བ་རྒྱུ་མཐུན་གྱི་འབྲས་བུ་གནོད་པ་འདི་མྱོང་བ་ཡིན་ན། ཡང་ད་ལྟ་ལན་དུ་གནོད་པ་བྱས་ནས་ཕྱིས་རྣམ་སྨིན་གྱི་འབྲས་བུ་དམྱལ་བར་སྐྱེ་ཞིང་མྱོང་བ་རྒྱུ་མཐུན་གྱི་དུས་འདི་བས་ཆེས་ལྷག་
Page: 444 པའི་གནོད་པ་ལན་གྲངས་བྱེ་བ་ཕྲག་མང་པོ་མྱོང་བར་བྱེད་དམ་ཅི། དེ་ལྟ་མོད་ཀྱི་རང་གིས་ལུས་རགས་པ་གདོས་བཅས་མི་གཙང་བའི་རང་བཞིན་འདི་བཟུང་བས་གཞན་གྱིས་མཚོན་རྡེག་པར་ཟད་ཀྱི་ནམ་མཁའ་ལྟ་བུ་ཞིག་ན་ནི་སུས་ཀྱང་ཅི་བྱར་ཡང་མེད་པས་འབེན་ ལྟ་བུའི་ལུས་ལ་ཁྲོ་བར་རིགས་སོ། །དེས་ན་སེམས་ཅན་རྣམས་ནི་འཚིག་པར་མི་འདོད་ཀྱང་མེ་ལ་ནན་གྱིས་མཆོང་བའི་ཕྱེ་མ་ལེབ་ལྟ་བུ་སྟེ་སྡུག་བསྔལ་མི་འདོད་ཀྱང་སྡུག་བསྔལ་གྱི་རྒྱུ་སྡིག་པ་ལ་ནན་གྱིས་འཇུག་པ་ཁོ་ན་ཡིན་པས་རང་བྱས་ཀྱི་འབྲས་བུ་ སྨིན་པར་ཟད་པ་ངན་སོང་གི་སྡུག་བསྔལ་ལྟ་བུ་སྟེ་རང་གི་ལས་ཀྱིས་བསྐྱེད་པས་གཞན་ལ་ཁྲོར་མེད་དོ། །བཞི་པ་ནི། བདག་གི་ལས་ཀྱིས་བསྐུལ་བྱས་ནས། །བདག་ལ་གནོད་བྱེད་རྣམས་འབྱུང་སྟེ། །དེ་ཡིས་སེམས་ཅན་དམྱལ་འདོད་ན། ། བདག་གིས་དེ་དག་མ་བརླག་གམ། །འདི་དག་ལ་ནི་རྟེན་བཅས་ནས། །བཟོད་པས་བདག་སྡིག་མང་དུ་འབྱང་། །བདག་ལ་བརྟེན་ནས་དེ་དག་ནི། །ཡུན་རིང་སྡུག་བསྔལ་དམྱལ་བར་འདོང་། །བདག་ནི་དེ་ལ་གནོད་བྱེད་ལ། །དེ་དག་བདག་ལ་ཕན་ འདོགས་ན། །ཕྱིན་ཅི་ལོག་ཏུ་ཅི་ཡི་ཕྱིར། །མ་རུངས་སེམས་ཁྱོད་ཁྲོ་བར་བྱེད། །གལ་ཏེ་བདག་ལ་བསམ་པ་ཡི། །ཡོན་ཏན་ཡོད་ན་དམྱལ་མི་འགྲོ། གལ་ཏེ་བདག་གིས་བདག་བསྲུངས་ན། །དེ་དག་ལས་འདིར་ཅི་ཞིག་བྱུང་། ། འོན་ཏེ་ལན་དུ་གནོད་བྱས་ན། །དེ་དག་བསྲུངས་པར་མ་གྱུར་ལ། །བདག་གི་སྤྱོད་པའང་ཉམས་པར་འགྱུར། །དེས་ན་དཀའ་ཐུབ་ཞིག་པར་འགྱུར། །ཞེས་གསུངས་ཏེ། དང་པོས་མདོར་བསྟན། གཉིས་པས་གསལ་བར་བཤད། གསུམ་ པས་ཕན་བཏགས་པ་ལ་ཁྲོ་མི་རིགས་པར་བསྟན། བཞི་པས་རང་སེམས་བསྲུངས་ན་ངན་འགྲོར་མི་འགྲོ་བ་བསྟན། ལྔ་པས་ལན་བྱས་ན་རང་ཉིད་ཉམས་པར་བསྟན་པ་སྟེ། བདག་རང་གི་ལས་ཀྱིས་ཕ་རོལ་པོ་བསྐུལ་ཏེ་གནོད་པ་བྱས་མོད་
Page: 445 ༄༅། །ཀྱང་བྱེད་པ་པོ་ཉིད་ཀྱིས་རྣམ་སྨིན་སྡུག་བསྔལ་མི་བཟད་པ་མྱོང་དགོས་པས་ན་བདག་གིས་གནོད་བྱེད་བརླག་པར་བྱས་ཟིན་པས་ལན་ཆེས་ཆེ་བ་བསླན་ཟིན་གྱིས་ལན་གཞན་སླན་པར་མི་བྱ་ལ། གནོད་བྱེད་ལ་བདག་གིས་བཟོད་ པ་བསྒོམས་པས་བདག་གི་སྡིག་པ་མང་དུ་འབྱང་ཞིང་དགེ་བ་ཆེར་འཕེལ་བའི་ཕྱིར། བདག་ལ་ཚུར་ཕན་ཆེར་བཏགས་པ་ཡིན་ན་དེ་ལ་ཅིའི་ཕྱིར་ཁྲོ། གལ་ཏེ་གཞན་ངན་འགྲོ་སྐྱེ་བའི་རྒྱུ་བདག་ལ་རག་ལས་པས་ན་བདག་ཡང་དེར་སྐྱེ་བས་དེའི་ཕྱིར་ཁྲོའོ་ཞེ་ན། བདག་ལ་གཞན་ངན་འགྲོར་སྐྱེ་བར་བྱའོ་སྙམ་པ་མེད་ཅིང་བསམ་པའི་ཡོན་ཏན་བཟོད་པ་ཡོད་ན་བདག་ངན་འགྲོར་ག་ལ་འགྲོ་སྟེ་རྒྱུ་མེད་པའི་ཕྱིར། དེ་ལྟར་བདག་གིས་བདག་བསྲུངས་ན་གནོད་བྱེད་དེ་དག་གིས་བདག་ངན་འགྲོར་སྐྱུར་བར་མི་ནུས་ཤིང་ སེམས་ལ་ཉེས་པ་ཅི་ཡང་བསྐྱེད་མི་ནུས་སོ། །འོན་ཏེ་ལན་དུ་གནོད་པ་བྱས་ན་བདག་གིས་བདག་མ་བསྲུངས་པ་ཡིན་པས་བདག་གི་བྱང་ཆུབ་སེམས་དཔའི་སྤྱོད་པ་ཉམས་པ་དང་དཀའ་ཐུབ་ཀྱི་དམ་པ་བཟོད་པ་ཞིག་པར་འགྱུར་བས་ན་བདག་ཉིད་སྲུང་ བ་ལ་འབད་པར་བྱའོ། །དཀའ་འགྲེལ་ཆུང་ངུ་ལས་ནི། འོན་ཏེ་བདག་ལ་བསམ་པ་ཡི། །ཞེས་པ་འདི་མ་ཁྲོས་པའི་རློམ་པ་དགག་པ་ཞེས་བདག་བཟོད་པ་དང་ལྡན་ནོ། །ཞེས་རློམ་སེམས་སྐྱེས་ན་འདི་ནི་བདག་ཉིད་བསྲུངས་པར་ཟད་པས་རང་ལ་ཕན་ བཏགས་པ་ལ་རློམ་སེམས་སྐྱེར་ཅི་ཡོད། ཅེས་པའི་དོན་ཅན་དུ་བཤད་དོ། །གཉིས་པ་བརྙས་སོགས་ལ་བཟོད་པར་བྱ་བ་ལ་བཞི། བརྙས་སོགས་ཀྱིས་ལུས་ལ་མི་གནོད་པར་བསྟན། གཞན་སྡང་བ་ཙམ་གྱིས་བདག་ལ་མི་གནོད་པར་བསྟན། རྙེད་པའི་གེགས་བྱེད་པ་ལ་ཁྲོ་མི་རིགས་པར་བསྟན། གཞན་མ་དད་པར་བྱེད་པ་ལའང་ཁྲོ་མི་རིགས་པར་བསྟན་པའོ། །དང་པོ་བརྙས་སོགས་ཀྱིས་ལུས་ལ་མི་གནོད་པར་བསྟནནི། ཡིད་ནི་ལུས་ཅན་མ་ཡིན་པས། །སུས་ཀྱང་གང་དུའང་གཞོམ་མི་ནུས། །ལུས་ལ་མངོན་པར་ཞེན་པས་ན། །
Page: 446 ལུས་ནི་སྡུག་བསྔལ་དག་གིས་གནོད། །བརྙས་དང་ཚིག་རྩུབ་སྨྲ་བ་དང་། །མི་སྙན་པ་ཡི་ཚིག་དེ་ཡིས། །ལུས་ལ་གནོད་པར་མི་འགྱུར་ན། །སེམས་ཁྱོད་ཅི་ཕྱིར་རབ་ཏུ་ཁྲོ། །ཞེས་གསུངས་ཏེ། བརྙས་པ་སྟེ་བཀུར་སྟི་ལས་ལོག་པར་བྱེད་པ་དང་། ཚིག་རྩུབ་མོ་སྟེ་མི་དགའ་བར་འགྱུར་བ་སྨྲ་བ་དང་། མི་སྙན་པ་སྟེ་གཞན་ལ་བདག་གི་བསྔགས་པ་མ་ཡིན་པ་བརྗོད་པ་རྣམས་ལ་མི་དགའ་བར་མི་རིགས་ཏེ། དེ་དག་ཙམ་གྱིས་བདག་གི་ལུས་ལ་མི་གནོད་ཅིང་སེམས་ནི་སུས་ཀྱང་མི་མཐོང་བས་གཞོམ་མི་ནུས་པའི་ཕྱིར། དེས་ གཞན་དག་བདག་ལ་མི་དགའ་བར་འགྱུར་བས་ཁྲོའོ་ཞེ་ན། གཉིས་པ་གཞན་སྡང་བ་ཙམ་གྱིས་བདག་ལ་མི་གནོད་པར་བསྟན་ནི། གཞན་དག་བདག་ལ་མི་དགའ་བ། དེས་ནི་ཚེ་འདིའམ་ཚེ་གཞན་ལ། །བདག་ལ་ཟ་བར་མི་བྱེད་ན། །བདག་ནི་ཅི་ཕྱིར་དེ་མི་འདོད། །ཅེས་གསུངས་ཏེ། གཞན་མི་ དགའ་བ་དེས་ཀྱང་བདག་ལ་ཟ་བར་མི་བྱེད་དེ་མི་དགའ་བ་ནི་ཡིད་མི་བདེ་བའི་རང་བཞིན་ཡིན་པས་སུ་ལ་ལྡན་པ་དེ་སྡུག་བསྔལ་བར་ཟད་དོ། །དེས་བདག་གི་རྙེད་པའི་བར་ཆད་བྱེད་པས་ཁྲོ་འོ་ཞེ་ན། གསུམ་པ་རྙེད་པའི་གེགས་བྱེད་པ་ལ་ཁྲོ་མི་རིགས་པར་བསྟན་ནི། རྙེད་པའི་བར་ཆད་བྱེད་པའི་ཕྱིར། གལ་ ཏེ་འདི་དག་མི་འདོད་ན། །བདག་གི་རྙེད་པ་འདིར་འདོར་གྱི། །སྡིག་པ་དག་ནི་བརྟན་པར་གནས། །བདག་ཉིད་དེ་རིང་ཤི་ཡང་སླའི། །ལོག་འཚོས་ཡུན་རིང་གསོན་མི་རུང་། །བདག་ལྟ་ཡུན་རིང་གནས་གྱུར་ཀྱང་། །འཆི་བའི་སྡུག་བསྔལ་དེ་ཉིད་ ཡིན། །རྨི་ལམ་ལོ་བརྒྱར་བདེ་མྱོང་ནས། །སད་པར་གྱུར་བ་གང་ཡིན་དང་། །གཞན་ཞིག་ཡུད་ཙམ་བདེ་མྱོང་ནས། །སད་པར་གྱུར་པ་གང་ཡིན་པ། །སད་པ་དེ་དག་གཉིས་ཀ་ལའང་། བདེ་བ་དེ་ནི་ཕྱིར་འོང་མེད། །ཚེ་རིང་ཚེ་ཐུང་གཉིས་ ཀ་ཡང་། །འཆི་བའི་དུས་སུ་དེ་འདྲར་ཟད། །རྙེད་པ་མང་པོ་ཐོབ་གྱུར་ཏེ། །ཡུན་རིང་དུས་སུ་བདེ་སྤྱད་ཀྱང་། །ཆོམ་པོས་ཕྲོགས་པ་ཇི་བཞིན་ཏུ། །སྒྲེན་མོ་ལག་པ་སྟོང་པར་འགྲོ། །། གལ་ཏེ་སྙེད་པས་གསོན་གྱུར་ན། །སྡིག་ཟད་བསོད་ནམས་
Page: 447 ༄༅། །བྱ་ཞེ་ན། །རྙེད་པའི་དོན་དུ་ཁྲོས་གྱུར་ན། །བསོད་ནམས་ཟད་སྡིག་མི་འགྱུར་རམ། །གང་གི་དོན་དུ་བདག་གསོན་པ། །དེ་ཉིད་གལ་ཏེ་ཉམས་གྱུར་ན། །སྡིག་པ་འབའ་ཞིག་བྱེད་པ་ཡི། །གསོན་པོ་དེས་ཀོ་ཅི་ཞིག་བྱ། ། ཞེས་གསུངས་ཏེ། གཅིག་གིས་རྙེད་པ་ལ་སྙིང་པོ་མེད་པར་བསྟན། རྐང་པ་གཉིས་ཀྱིས་ལོག་འཚོས་གསོན་པ་བས་ཤི་ན་ལེགས་པར་བསྟན། ཚིགས་བཅད་ཕྱེད་དང་བཞིས་འཆི་བ་ལ་རྙེད་པས་མི་ཕན་པར་བསྟན། ཚིགས་བཅད་ཐ་མ་གཉིས་ཀྱིས་ རྙེད་པ་ལ་ཞེན་ན་སྡིག་པ་འཕེལ་བར་བསྟན་ཏོ། །དེ་ཡང་ལོངས་སྤྱོད་ནི་ཚེ་ཕྱི་མར་རྗེས་སུ་འབྲང་བ་མེད་དེ། སེམས་ཅན་རྣམས་འཆི་བ་ན་ལུས་ཀྱང་ཤུལ་ཏུ་བོར་ཏེ་རྣམ་ཤེས་གཅིག་པོར་འགྲོ་ན་རྙེད་པ་གཞན་ཇི་ལྟར་འཁྱེར་དུ་ཡོད་དེ་ལས་དགེ་སྡིག་ཁོ་ན་ མ་གཏོགས་པ་སྐབས་དེར་གྲོགས་གཞན་ཅི་ཡང་ཡོད་པ་མ་ཡིན་ལ། གསོན་པའི་དུས་རྙེད་པ་སྣ་རེའི་ཆེད་དུ་ཡང་དཀའ་བ་དང་སྡིག་པ་མང་པོས་བསྒྲུབས་མོད་ཀྱང་རྙེད་པ་དེ་འགྲུབ་པར་ཡང་མ་ངེས་ལ། གྲུབ་ཀྱང་གཞན་གྱིས་དབྲོག་པ་སོགས་ཀྱིས་ཞག་གཅིག་ལོངས་ སྤྱོད་དུ་ཡོད་པར་ཡང་མ་ངེས་ལ། ལོངས་སྤྱོད་དུ་བྱུང་ཡང་འཆི་བའི་ཚེ་རྙེད་པ་དེ་ཤུལ་དུ་བཞག་ནས་དེའི་ཆེད་དུ་བསགས་པའི་སྡིག་པ་ཁོ་ན་དང་འགྲོགས་ནས་འགྲོ་བར་ཟད་ལ། སྲིད་པའི་བདེ་བ་ཐམས་ཅད་ཀྱང་འཕྲལ་མྱོང་ཙམ་དུ་སྣང་ཡང་དེ་མ་ཐག་མི་བདེན་ པར་འགགས་ཏེ། ཕྱིས་དེའི་ཚེ་དེ་ལྟར་བྱུང་ངོ་ཞེས་དྲན་པའི་ཡུལ་ཙམ་དུ་ཟད་པས་རྨི་ལམ་ལྟ་བུ་ཁོ་ན་སྟེ། རྨི་ལམ་དུ་བདེ་སྡུག་ཅི་མྱོང་ཡང་སད་པ་ན་མི་སྣང་བ་ལྟར་འཁོར་བའི་བདེ་སྡུག་ཚེ་རིང་ཐུང་རྙེད་མ་རྙེད་སོགས་སྣང་བ་ཐམས་ཅད་དེ་འདྲ་བར་ཟད་དེ། ཚོང་པ་ཆོམ་ པོས་བཅོམ་པ་ལྟར་འཆི་བདག་གི་ཆོམ་པོས་བཅོམ་པ་ན་མགོན་སྐྱབས་ཀྱི་གོས་མེད་ཅིང་དགེ་བའི་ནོར་མ་ཁྱེར་བའི་སྒྲེན་མོ་ལག་སྟོང་དུ་འགྲོ་བ་ཁོ་ནའོ། འོན་ཏེ་སྔར་རྙེད་པ་བསྒྲུབས་ཏེ་རྙེད་པ་དེས་ཕྱིས་དགེ་བ་བྱའོ་ཞེ་ན། རྙེད་པའི་དོན་དུ་ཁྲོ་བ་སོགས་སྡིག་པ་
Page: 448 བསགས་པ་དེས་བསོད་ནམས་ཟད་པར་འགྱུར་ལ། རྙེད་པ་དེས་བསོད་ནམས་ཀྱི་ལས་མ་བྱས་པའི་སྔར་བདག་འཆི་བར་འགྱུར་མི་འགྱུར་ཡང་གཏོལ་མེད་ལ། བསོད་ནམས་སྔ་མ་དག་ཟད་པར་འགྱུར་བའི་དགེ་བ་ཆུང་ངུ་དེས་ཀྱང་ཅི་ཞིག་བྱ་ལ། གྲུ་ནི་ཆུ་བོ་ལས་བརྒལ་ བའི་ཆེད་དུ་ཡིན་པ་ལྟར་བྱང་ཆུབ་སེམས་དཔའི་ལུས་ཀྱང་གཞན་དོན་དུ་དགེ་བ་སྒྲུབ་པའི་ཆེད་དུ་བཟུང་བར་ཟད་ལ། གང་གི་ཆེད་དུ་བདག་ཉིད་གསོན་པའི་དགེ་བ་ཉམས་ན་སྡིག་པ་འཕེལ་བའི་གསོན་པས་ཅི་ཞིག་བྱ་སྟེ་ངན་སོང་གི་རྒྱུ་སྒྲུབ་པ་ཁོ་ནར་ཟད་པའི་ཕྱིར་རོ། ། གལ་ཏེ་མི་སྙན་པར་བརྗོད་པ་ལས་གཞན་བདག་ལ་མ་དད་པར་འགྱུར་བས་དེའི་ཕྱིར་ཁྲོའོ་ཞེ་ན། བཞི་པ་གཞན་མ་དད་པར་བྱེད་པ་ལའང་ཁྲོ་མི་རིགས་པར་བསྟན་པ་ནི། གལ་ཏེ་སེམས་ཅན་དད་མེད་པས། །མི་སྙན་སྨྲ་ལ་ཁྲོ་ཞེ་ན། །གཞན་ལ་མི་སྙན་བརྗོད་ལའང་ཁྱོད། །དེ་བཞིན་ཅི་སྟེ་ཁྲོ་མི་བྱེད། །མ་དད་ གཞན་ལ་རག་ལས་པས། །དད་པ་མེད་ལ་ཁྱོད་བཟོད་ན། །ཉོན་མོངས་རྐྱེན་ལ་རག་ལས་པའི། །མི་སྙན་སྨྲ་ལ་ཅིས་མི་བཟོད། །ཅེས་གསུངས་ཏེ། དེ་ལྟ་ན་གཞན་གྱིས་གཞན་ལ་མི་སྙན་པར་བརྗོད་པས་ཀྱང་གཞན་ལ་མ་དད་པ་སྐྱེ་བར་མཚུངས་ པས་དེ་ལ་ཡང་ཁྲོ་བར་རིགས་སོ། །གལ་ཏེ་གཞན་དམིགས་ཡུལ་དུ་བྱས་ནས་མ་དད་པ་ལ་ཁྲོ་བར་མི་བྱེད་པས་གཞན་ལ་དད་པ་མེད་པ་ལ་ཁྱོད་བཟོད་ན་བདག་ལ་དད་པ་མེད་པ་ལའང་བཟོད་པར་རིགས་ལ། ལེགས་པར་བརྟགས་ན་བདག་ནི་གང་ནའང་ ཡོད་པ་མིན་པས་སུ་ལའང་མི་སྙན་པར་བརྗོད་པ་མེད་ལ། བརྗོད་པ་པོ་ཡང་ཉོན་མོངས་པས་རང་དབང་མེད་པར་བསྐུལ་ཏེ་བླ་རྡོལ་ཙམ་དུ་ཟད་ན་ཡང་དག་པར་སུས་ཀྱང་སུ་ལ་དམད་པ་མ་ཡིན་པའི་ཚིག་བྲག་ཆ་ལྟ་བུ་དེ་ལ་ཅིའི་ཕྱིར་མི་བཟོད། ཅེས་པའི་དོན་ ཏོ། །ཚིགས་བཅད་ཕྱི་མའི་དོན་ལ་དཀའ་འགྲེལ་ཆུང་ངུ་ལས་ནི། གཞན་ལ་དད་པ་ཉམས་པ་ནི་བརྙས་པའི་ཡུལ་གཞན་ལ་དམིགས་ཤིང་གཞན་ལ་རག་ལས་ནས་བྱུང་བ་ཡིན་གྱི་བདག་ལ་རག་ལས་ནས་བྱུང་བ་མ་ཡིན་པས་དེ་ལ་བཟོད་ན། འོ་ན་བདག་ལ་
Page: 449 ༄༅། །བརྙས་སོགས་ཀྱང་སྨྲ་བ་པོའི་བསམ་པ་ཉོན་མོངས་པའི་རང་བཞིན་ལས་བྱུང་བ་ཡིན་གྱི་ཁྱོད་ལས་ནི་དོན་དམ་པར་མ་བྱུང་བའི་ཕྱིར། དེ་ལ་ཁྱོད་ཅིས་ཏེ་ཁྲོ་ཞེས་འབྲུ་གཉེར་ཏོ། །བི་བྷུ་ཏིས་ནི། གཞན་ལས་ཐོས་ནས་མི་སྙན་པ་ སྒྲོག་པ་རྣམས་ལ་ཁྱོད་བཟོད་ཅེ་ན། དེའི་ཚེ་ཉོན་མོངས་པ་འབྱུང་བ་ཉིད་གཞན་ཡིན་ཏེ། དེ་ལ་རག་ལས་པ་ལ་ཁྱོད་ཀྱིས་བཟོད་པར་འོས་ཏེ་རིགས་པ་མཚུངས་སོ། །ཞེས་འཆད་ཅིང་། དགེ་བའི་ལྷས། གཞན་གྲགས་པ་མ་ཡིན་པ་བྱེད་པ་དད་པ་མེད་ལ་ཁྱོད་བརྩེ་ ན་གྲོགས་པོ་ལ་སོགས་པ་ལའོ། །གལ་ཏེ་དེ་ལྟར་ཡིན་ན་ཉོན་མོངས་སྐྱེས་ལ་རག་ལས་པའི་མི་སྙན་སྨྲ་ལ་ཅིས་མི་བརྩེ་སྟེ་ཕྱོགས་འདི་ལ་ཡང་རིགས་སོ། །ཞེས་འབྲུ་གཉེར་ཏོ། །དེ་ལྟར་བདག་ཉིད་ལ་གནོད་པ་བྱེད་པ་ལ་བཟོད་པ་སྒོམ་ཚུལ་བཤད་ནས། གཉིས་པ་བདག་གི་བ་ལ་གནོད་པ་བྱེད་པ་ལ་བཟོད་པ་སྒོམ་ཚུལ་ལ་ཡང་གཉིས་ཏེ། ཆོས་ལ་ངེས་པར་སེམས་པས་སྒོམ་པ་དང་། གནོད་པ་ལ་ཇི་མི་སྙམ་པས་སྒོམ་པ་བཞིའོ། །དང་པོ་ཆོས་ལ་ངེས་པར་སེམས་པས་སྒོམ་པ་ནི། སྐུ་གཟུགས་མཆོད་རྟེན་དམ་ཆོས་ལ། །འཁྱལ་ ཞིང་འཇིག་པར་བྱེད་པ་ལའང་། །བདག་གིས་ཞེ་སྡང་མི་རིགས་ཏེ། །སངས་རྒྱས་སོགས་ལ་གནོད་མི་མངའ། །བླ་མ་གཉེན་ལ་སོགས་པ་དང་། །བཤེས་ལ་གནོད་པ་བྱེད་རྣམས་ལའང་། །སྔ་མའི་ཚུལ་གྱིས་རྐྱེན་དག་ལས། །འགྱུར་བར་ མཐོང་ནས་ཁྲོ་བ་བཟློག །ཞེས་གསུངས་ཏེ། གསེར་ལ་སོགས་པ་ལས་དེ་བཞིན་གཤེགས་པའི་སྐུའི་དབྱིབས་ལྟ་བུར་བཅོས་པ་སོགས་ནི་སྐུ་གཟུགས་ཡིན་ལ། ལམ་དང་འབྲས་བུ་མཚོན་པའི་ཕྱིར་དབྱིབས་སུ་བྱས་པ་ནི་མཆོད་རྟེན་སྟེ་བིམ་པ་དང་། ཁང་བུ་ ལྟ་བུ་དང་། རྒྱལ་མཚན་ལྟར་གྲགས་པ་བརྒྱད་ལ་སོགས་པའོ། །སྟོན་པས་གསུངས་པའི་དམ་པའི་ཆོས་མིང་ཚིག་ཡི་གེ་རྣམས་ཡུལ་གྲུ་སོ་སོའི་ཡི་གེའི་མཚན་མ་ལཉྩ་ལ་སོགས་པར་བྲིས་ཏེ་གླེགས་བམ་དུ་བྱས་པ་ནི་དམ་ཆོས་ཀྱི་རྟེན་ཡིན་ལ། བསླབ་
Page: 450 པ་གསུམ་ནི་ཉམས་སུ་བླང་བྱའི་དམ་ཆོས་དངོས་ཡིན་ནོ། །དེ་ལ་སྐུ་གཟུགས་དང་། མཆོད་རྟེན་དང་། གླེགས་བམ་དེ་དག་གཞིག་པ་དང༌། ཚུལ་ཁྲིམས་དང་། ཏིང་ངེ་འཛིན་དང་། ཤེས་རབ་ཀྱི་བར་དུ་གཅོད་ཅིང་སེམས་ཅན་རྣམས་དེ་དག་ལས་ཟློག་ཏུ་འཇུག་པ་
ནི་བསྟན་པ་གཞིག་པ་ཞེས་བྱ་ཞིང་། བསྟན་པ་ལ་མ་གུས་པས་དམད་ཅིང་ཞེ་སྡང་བར་བྱེད་པ་སོགས་དེ་དག་ལ་ཁྲོ་བར་རིགས་སོ་ཞེ་ན། དེ་ཡང་སྙིང་རྗེ་དང་ལྡན་པས་དེ་ལས་ལྡོག་པར་བྱ་བ་ཡིན་གྱི། ཞེ་སྡང་བའི་གནས་ནི་མ་ཡིན་ཏེ། ཤིན་ཏུ་སྙིང་
རྗེའི་ཞིང་ཡིན་པའི་ཕྱིར་དང་། དཀོན་མཆོག་དེ་དག་ལ་ནི་གནོད་པ་མི་མངའ་བའི་ཕྱིར། དེ་བཞིན་དུ་མཁན་པོ་དང༌། སློབ་དཔོན་དང་། ཕ་མ་དང་། རིགས་ཀྱི་རྒན་རབས་སོགས་བླ་མའི་གནས་རྣམས་དང་། གཉེན་བཤེས་སོགས་ལ་གནོད་བྱེད་ལ་ཡང་།
མཁྲིས་པ་ལ་སོགས་སྡུག་བསྔལ་གྱི། །འབྱུང་གནས་ཆེ་ལ་མི་ཁྲོ་བར། སེམས་ཡོད་རྣམས་ལ་ཅིས་ཏེ་ཁྲོ། །དེ་དག་ཀུན་ཡང་རྐྱེན་གྱིས་བསྐུལ། །སོགས་དང་། དེ་བས་དགྲའམ་མཛའ་ཡང་རུང་། །མི་རིགས་བྱེད་པ་མཐོང་གྱུར་ན། །
འདི་འདྲའི་རྐྱེན་ལས་གྱུར་ཏོ་ཞེས། །དེ་ལྟར་སེམས་ཏེ་བདེ་བར་མནོས། །ཞེས་སོགས་དང་། དེ་དག་ཉིད་ཀྱི་ལས་སུ་ལྟ་བ་སོགས་སྔར་བསྟན་པ་རྣམས་ཀྱི་ཚུལ་གྱིས་རྣམ་པར་བརྟགས་ཏེ་ཁྲོ་བ་ཟློག་པར་བྱའོ། །འདིར་བི་བྷུ་ཏི་སོགས་ནི། ཉེས་
པ་ཇི་སྙེད་ཐམས་ཅད་དང་། །སྡིག་པ་རྣམ་པ་སྣ་ཚོགས་པ། །དེ་ཀུན་རྐྱེན་གྱི་སྟོབས་ལས་བྱུང་། །རང་དབང་ཡོད་པ་མ་ཡིན་ནོ། །ཞེས་པ་ཁོ་ན་ལ་སྔ་མའི་ཚུལ་གྱིས་ཞེས་པ་སྙེག་པར་བྱེད་དོ། །གཉིས་པ་གནོད་པ་ལ་ཇི་མི་སྙམ་པས་སྒོམ་པ་བཞི་ལ་ཡང་། སེམས་ཡོད་ལ་
བཀར་ཏེ་ཁྲོ་བར་མི་རིགས་པ་དང་། སྐྱོན་ཅན་ཁྱད་མེད་དུ་འགྱུར་བ་དང་། རང་གིས་ཉེས་པར་བརྟག་པ་དང་། འབྲས་བུ་ཡིད་ལ་བྱ་བ་གསུམ་བསྟན་པའོ། །དང་པོ་སེམས་ཡོད་ལ་བཀར་ཏེ་ཁྲོ་བར་མི་རིགས་པ་ནི། ལུས་ཅན་རྣམས་ལ་སེམས་ཡོད་དང་། །སེམས་མེད་གཉིས་ཀས་
སྤྱོད་འཇུག་རྣམ་བཤད་ཐེག་ཆེན་ཆོས་ཀྱི་རྒྱ་མཚོ། སྨད་ཆ། ->
སྤྱོད་འཇུག་རྣམ་བཤད་ཐེག་ཆེན་ཆོས་ཀྱི་རྒྱ་མཚོ། གསུམ་པ། ->