གཏོར་མའི་ཆོ་ག་བཞུགས།
[ 1 ] ༄། །གཏོར་མའི་ཆོ་ག་བཞུགས།། ༄༅༅། །དཀོན་མཆོག་གསུམ་ལ་ཕྱག་འཚལ་ལོ། །དང་པོ་ཐོད་པའམ་སྣོད་གང་རུང་བའི་ནང་དུ། གཏོར་མའི་ཕུད་བཀྲོས་ལ། བསང་ནན་དང་བཅས་པ་བླུགས་ལ། དེ་ནས་ [ 2 ] བདག་ཉིད་ལྷག་པའི་ལྷར་བསྒོམས་ལ། གཏོར་མའི་སྟེང་དུ་ཉི་མའི་དཀྱིལ་འཁོར་གྱི་གདན་ལ་ཧཱུྃ་མཐིང་ག་གཅིག་བསམ། དེ་ཞུ་སྟེ་གཏོར་མ་ལ་ཐིམ་པས། གཏོར་མའི་རྫས་ཀྱི་དངོས་པོ་སྦྱངས་པར་བསམ་མོ། །དེ་ནས་ཡང་པདྨ་དམར་པོ་འདབ་མ་བརྒྱད་པའི་སྟེང་། ཨ་ དམར་པོ་གཅིག་བསམ། དེ་འོད་དུ་ཞུ་སྟེ་ཐིམ་པས། ཁ་དོག་དམར་པོ་ལ་དངས་ཤིང་དག་ལ་དྲི་མ་མེད་པ། རོ་མཆོག་དང་ལྡན་པར་བསྒོམ། དེ་ནས་ཡང་ཟླ་བའི་དཀྱིལ་འཁོར་གྱི་སྟེང་དུ། ཨོཾ་དཀར་པོ་གཅིག་བསྒོམ། དེ་འོད་དུ་ཞུ་སྟེ་ཐིམ་པས། དཀར་ལ་དང་བ་རོ་མཆོག་བརྒྱ་དང་ལྡན་པའི་ བདུད་རྩིའི་རང་བཞིན་དུ་གྱུར་པར་བསམ་མོ། །དེ་ནས་བདུད་རྩི་ལས་འོད་འཕྲོས་པས། དེ་བཞིན་གཤེགས་པའི་ཐུགས་མི་རྟོག་པའི་ཡེ་ཤེས་ཀྱི་བདུད་རྩི་དང་། ལྷ་ཡུལ་ན་ཡོད་པའི་བདུད་རྩི་བཀུག་སྟེ། དེ་ལ་ཐིམ་པར་བསམ། དེ་ནས་བདུད་རྩི་དེ་ཉིད་ལས་ཡང་འོད་འཕྲོས་པས། བླ་མ་དམ་པ་ དང་བཅས་པའི་སངས་རྒྱས་དང་བྱང་ཆུབ་སེམས་དཔའ་དང་། ཕྱི་ནང་གི་ཆོས་སྐྱོང་མཁའ་འགྲོ་མ་དང་བཅས་པ་ནམ་མཁའ་ལ་བཀུག་ལ། ཨོཾ་ཨ་ཀཱ་རོ་མུ་ཁཾ་སརྦྦ་དྷརྨྨཱ་ཎཱཾ་ཨཱདྱ་ནུཏྤནྣ་ཏྭཱཏ་ཨོཾ་ཨཱཿཧཱུྃ་ཕཊ་སྭཱ་ཧཱ། ཞེས་བརྗོད་པས་གཏོར་མ་ལས་འོད་འཕྲོས་པས་སོ་སོའི་ལྕེ་ལ་རེག་པས། བདུད་ རྩིའི་བདེ་བ་ཆེན་པོའི་རོ་སྟོབས་ཤིང་མྱོང་བར་བསམ་མོ། །དེ་ནས་ཆོས་བཤད་པར་བྱ་སྟེ། ཆོས་རྣམས་གཟུགས་བརྙན་ལྟ་བུ་སྟེ། ཞེས་པ་ལ་སོགས་པ་བྱ། མཁའ་འགྲོ་མ་རྣམས་ལ་ཅི་འདོད་པའི་ལས་བཅོལ་ལོ། །བཟོད་གསོལ་བྱས་ལ་གཤེགས་སུ་གསོལ། རྫོགས་སོ།། །།
|
This work was published before January 1, 1930, and is in the public domain worldwide because the author died at least 100 years ago. |