کنیزی موعالیجه ائتمکده طبیبلرین عاجیز قالماسی، پادیشاها حاققین عیان اولماسی، حقیقی پادیشاهین درگاهینا اوز توتماسی
کنیزی موعالیجه ائتمکده طبیبلرین عاجیز قالماسی، پادیشاها حاققین عیان اولماسی، حقیقی پادیشاهین درگاهینا اوز توتماسی یازار: مولوی |
طبیبلر عاجیز قالدی، وضعیتی شاه گؤردو،
آیاق-یالین باش-آچیق، تئز مسجیده یویوردو.
داخیل اولدو مسجیده، مئحرابا طرف گئتدی،
گؤزوندن یاش آخیتدی، تانرییا سجده ائتدی.
آغلی گلدی یئرینه، قان-یاش ایچینده اؤزو،
تانرییا تعریف دئدی، شیرین ائتدی هر سؤزو.
دئدی:- سن ائی دونیانی، بندهلره بخش ائدن،
نهیی دوشونورومسه، تئز اونو درک ائدیرسن.
حالیمیزی بیلیرسن، طبیبلری گؤرورسن،
لوطفون بیزه عیاندیر، اؤزون حاققی سئویرسن.
بیزه پناه اولان سن، کاییناتین پادیشاهی.
یئنه بو دونیامیزدا، چوخالتمیشیق گوناهی.
سن دئییرسن سیرلری، من همیشه بیلنم،
سیرری بیلندن سونرا، اونو ظاهیر ائدنم.
تکببورلوک خیصلتین، قوودو بیر دومان کیمی،
باغیشلانما ایستهیی، جوشدو بیر عوممان کیمی.
شاه آغلادی دویونجا، یوخو آپاردی اونو،
یوخوسوندا گؤردو او، نورانی بیر قوجانی.
قوجا سؤیلهدی شاها، موژده وئریرم سنه،
صاباح بیر قریب گلسه، دردینی سؤیله اونا.
صاباح گلن او قریب، مهارتلی حکیمدیر،
اونا صداقت گؤستر، درده دوانی بیلیر.
علاجلاریندا اونون، موطلق سئحرینی گؤر سن،
درگاهیندا تانرینین، قودرت مئهرینی گؤر سن.
او یاتمیشدی آییلدی، یوخودا آگاه اولدو،
دؤوران دهییشدی بیردن، کنیز اؤزو شاه اولدو.
وعده چاتدی واختینا، سحر تئزجه آچیلدی،
گونش شرقدن بویلاندی، شفقلری ساچیلدی.
شاه دوروب بیر گوشهده، اولدو ایشه مونتظیر،
کی گؤرسون یوخو دوزمو، آچیلسین تئزجه بو سیرر.
گؤردو نورانی بیر شخص،گلیر سارایا طرف،
اوزو گونشتک نورلو، کؤلگهسیدیر هر طرف.
اوزاقدان یئریییردی، پارلاییردی هیلال تک،
یوخ ایدی، پئیدا اولدو، گؤروندو بیر خیال تک.
اونون برابرینده، خیال یوخدور جاهاندا،
اونا بنزر خیالی، تاپمازسان هئچ بیر یاندا.
خیال جنگی ساخلایان، صولح-و گتیرن خیال،
خیال ننگی ساخلایان فخری یئتیرن خیال.
ائله بیر خیالدیر کی، اؤولییا تیمثالیندا،
ائله بیر تیمثالدیر کی، مهرولار میثالیندا.
شاه یوخودا گؤردویو، او خیالی تانیدی،
سانکی بو گلن قوناق، گؤردویو خیال ایدی.
سانکی حاققینین نورو، اوندا اولموشدو ظاهیر،
یالنیز بصیرت گؤزو، اونو گؤرمهیه قادیر.
ائله کی، حاققین نورو، پئیدا اولدو اوزاقدان،
ائله بیل نور یاغیردی آرخادان، هم قاباقدان.
قاپیچیلار یئرینه، شاه گئتدی پیشوازینا،
یوخودا سئیر ائتدیگی، قوناغین آوازینا.
ائله کی قارشیلادی غئیبدن گلن قوناغی،
گؤردو اطرافی تامام، سانکی اولوب گول باغی.
ایکیسی بیر-بیرییله گؤروشدو تانیش کیمی،
قوجاقلاشیب اؤپوشدو، دوستونا دؤنوش کیمی.
بیری تئشنهیدی سوسوز، بیری لطافتلی سو،
بیری سرخوش کیمییدی، بیری شرارتلی سو.
دئدی: معشوقوم او یوخ، سنسن ایندی یقین بیل،
غفلتده اولموشام من، سانکی اوول نئچه ایل.
سن منه مصطفیسان، من اوللام سنه ولی،
خیدمت ائدیب باغلارام، داییم کمرله بئلی.
سن منه مصطفیسان من سنه اوللام عومر،
سنه خیدمتده اوللام، داییم باغلارام کمر.