شیرین و خوسرەو/95

From Wikisource
Jump to navigation Jump to search
شیرین و خوسرەو  (1735)  by خانای قوبادی
95. غزل گفتن نکیسا از زبان شیرین
ئیمجار نیکیسا زەریف بە ئەنداز چنگ دا نە ڕووی چەنگ شۆخ ئاواز
نە پەردەی «ماهوور» مەرکەب هومایوون بەی تەور ئینشا کەرد ئەی شیعر مەوزوون
دڵ جە نەدینت بی بە واتەی عام بنمانە باڵات، وە سەرگەردت بام
جەی موشکین کەمەند کڵاف سۆسەنی جەی شیرین ڕەند شۆخ ئەرمەنی
تا کەی، بێ مروەت، بەی تەور بێزاری؟ تا کەی منمانی تۆ پەنەش خواری؟
شیرین ئەرمەن جە بێ کەماڵی ئەر دانش چەنیت دەمێ بە تاڵی
جەریمەش ئێدەن شای دارا دەماخ بستانۆ جەو دەم ماچێ بە گوستاخ
زوڵفم ئەر دانش بە شا خەجاڵەت سیلسیلەش بەدەن، ئەسڵش بە نالەت
ئەر زامت جە تیر نیگام خەتەرەن نیگام تورکەن تورک، تورک هەر کافرەن
ئەر جە ئەگریجەم جەرگت پڕ ئیشەن عەقرەبەن عەقرەب، گونای من چێشەن
من بە وێم غەمزە بە تۆدا کەردەن تۆ پاسەت زانان من مەیلم سەردەن
ناز و غەمزەی من دەروونت کەرد ڕێش بە میرات گنۆ پەی ساحێب وێش
چون ڕووگەردانی بەی تەور ئامان پێم بویەر جە تەقسیر، تەریقم جە وێم
تەوبە بۆ ئەر لێم بدەی سەد خەنجەر ئەمجار جە ئەمرت بەرنەشوون وەبەر
مەعلووم بۆ بەغەیر لەبانت فێشتەر ئەر عاڵەم پڕ بۆ جە شیر و شەکەر
سەوگەند بە زاتێ دوور جە زەواڵەن بە زائیقەی من گشت ترش و تاڵەن
سا بۆ چون حۆری حەق شەریف کەردەم جە باغچەی ڕەنگین عیسمەت پەروەردەم
هیچکەس نەچنیەن گوڵ جە باغ من نەیاوان بۆی کەس بە دەماغ من
پەی تۆ چون پستە من شەکەر خەندم بۆ دەم شیرین کەر جە شیرەی قەندم
نیکیسا بەی نەزم نازەنین ئەو شەو خورۆش وست نە بەزم ڕەنگین خوسرەو
غزل خواندن باربد از زبان خسرو
باربود سەرمەست جە بادەی سەرخوم پەنجەش دا نە ڕووی سەرتای هەورێشم
بە پەنجەی نەهوفت پەنجەی کاو خارا ئەی غەزەل بەی تەور کەرد ئاشکرا
وات: ئیمشەو نەسیم وەنەوشەی باخم مدۆ جون شەوبۆ بۆ نە دەماخم
بۆیی بەی تەورە بۆ عەبیرین بۆ مەر بۆی چین زوڵف شۆخ شیرین بۆ
مەگەر مانگ یاوان بە ڕەوزەی گوڵ گەشت سارا بۆ مدۆ چون ڕەوزەی بەهەشت
مەگەر شەو بەندەن بە ئۆڵگەی لاهوور بە جای وەفر سەرد موارۆ کافوور؟
مەر خوسرەو نە باغ شیرین نە گەشتەن ماجی سەرزەمین عەنبەر سروشتەن
مەر ئاهووی شۆخێ جە ڕەم ڕەم کەردەن بۆی بەزم پەروێز خوتەن پەروەردەن؟
مەر ببەن عەنناب شەکەر خوردە ڕێز ماچی تووتیەن شاهی چون پەروێز
مەر مانگ ڕەخشانەن نە چەرخ ئەخزەر ئیمشەو شەو بیەن جە ڕۆ ڕۆشنتەر؟
مەر شیرین جە لەعل مەیگوون مەی نۆشەن گۆشەی هەر بەزمێ پڕ نە خرۆشەن
مەر جەمین وێش ئەو نە جام دیەن قەدر ن زانان بەی تەور ڕام بیەن
ئەر هەی شیرین ڕاز نەبات من چەندان خۆ نەبی تەقسیرات من
ڕووت ئاوەرد نە یەک، عەرزەم نەوانای بە حاڵ جەستەی خەستەم نەزانای
خۆ شیرین ئەر سەد من شای جەم شکۆم ئەمرت موتاعەن، من هەر بەندەی تۆم
ئەر سەد فراوان شاهێ ڕەنگینم من هەر جانفیدای شێوەی شیرینم
دڵ حەیران بە تەرز باڵای تووڵ تۆم بەستەی سیلسیلەی زوڵف لوول تۆم
سا بۆ با نەمروون بە داخ تۆوە بکەرروون لیمۆی وەشبۆت وە بۆوە
چون مێو مەفتوول پشتان بین وەهەم لیمۆ وە بان لیمۆ، دەم جە ناو دەم
بە خەڵوەت خەیلێ بنیشم وە شاد کۆی خەرمان خەم بدەرین وە باد
باربود جەی شیعر شۆخ عەنبەرین شیوەن وست نە گیان شیرین شیرین