Эрязденть арсезь (2010)/Ульнесть тенек магнитэкс
| ←Весть кизэнь вестэ | Эрязденть арсезь (2010) by , edited by Разгуляева Т. В. Ульнесть тенек магнитэкс |
Кодамо лем илязо кандтне...→ |
| Нуянь Видяз. Эрязденть арсезь: ёвтнеминестэ пурназь покш ёвтнема. — Саранск, 2010. — с. 103—105 |
[103]
| Ульнесть тенек магнитэкс |
АЗЁ ней ваныть Пичепень бригадань лишмень кардотнень. Варчик марямс, кода иля никсе, эйсэст кирдевиця лажаня чиненть. Кардотнень икельга крандазтнэ, лишметне, дёготь ды ливезь, чурамо начконь чинетне, латотнень велькска ливтниця [104] озязонь пельтне, сивексэнь-панстонь стамо кудынесь... ульнесть тенек, кепе чипннцятненень, покш, свал тердиця магнитэкс. Ансяк прыль ютко шка, минь — тов, лишмень кудов.
* * *
...Чикуншка. Ракшатнень мельга якицятне та-ков тусть. Паряк, ярсамо? Кияк а неяви. Ансяк чикуншкань, псисэ ды псистэ лексиця чипаесь сельмень апак кончтне ваны мельганок. Паро, пелемс а мезде, «пулонок юводемс» а кинень. Эрьмай Миша марто совинек пельсчопода кардонтень. Тесэ, эрьвась эсензэ аштема таркасонзо, кавто лишметь. Лиятне важодить, «наряд» топавтыть.
Палмань удалдо, илязан пстидеве, венстия кедем вейкенть пулос, тапардынь комором перька ниле-вете черть ды ноцковтынь весе вийсэнь. Лишмесь тарск тейсь. Сэреди, маряви. Полавтынзе пильгензэ. Текень теия омбоцеде.
Миша омбоценть пулонзо «чуролгавты».
...Локшовтомо цёрынесь а цёрыне. Эрьвась эйстэнек бажи кодамс аволь левшень — мушконь. Истямось седе нардев. Лакштядемась марявозо Пичепень келес. Седеяк паро, пачкодиндеряй Понкспе видьскак. Кадык локшот мушконьгак, левшенседенть а мезть кортамс, пезэ куроксто чевтемгады-левшии. Те берянь. Секскак кодамстонзо пезэнзэ путат-совавтат лишмень пулосто ноцордазь черть. Седе кувать а раздеви, цярномазояк виевгады. Алкуксонь локшось улезэ ваднезь дёготьсэ, мейле костязь. Сон прок аволь локшо — гуй!
...Чинь-кавтонь ютазь Миша марто пелькстнинек лакштяемасо: кинь «гуезэ» седе кувака ды васов маряви «вайгелезэ». Изнясь Миша.
* * *
...Ульнесть велесэнек лишметь, скалт, реветь, саразт... Сынст марто аволь ансяк сюлмавозелинек — эринек вейсэ. Ломаненть ды пертьпельксэнть ютксо кирдевсь гармония. Тунда ракшатнень стадав ливтема чись лововсь алкуксонь покшчикс. Ревелевкс, лиякс вирезке, марто киякссо вейсэ удсемась, вакссот сынст «хрум-хрум-хрум» пориемаст, раужо ламарь ёнов молиця вацинест тенсемась, безарьксэкс эзть маряво, натой вечкевсть. Кецневтсь ловсо ведра марто авань кардазсто совамозо. Теде уш а мезть кортамс.
[105] Се эрямодонть кадовсть веенст куловт. Ледстнемат. Велетне чамсть. Эйзэст эзть кадово а лишметь, а скалт, а... эйкакшт. Ансяк вачо пинеть чийнить чавозь вальма кудотнень перька-икельга, ды вармась злыдарди-мучки ютковаст. Эрямонть тюсонзо, сонзэ зэмезэ, мелявксонзо полавтовсть юрга. Эрзятнень эйкакшост теевсть рузокс. Пелян, парось эйсэст, содамочист, лишмевтеме-скалтомо эрязь, минек коряс а ламолгадыть.
Орданьбуесь, кецневти, зярс истямо пес, истямо зыянс эзь пачкоде, кадык шкань-шкань кувсезь, эри. Карми, кеман, эрямо седе товгак. Талновты-ризнэвти лиясь: кадови-арась сон эрзянь велекс?