Эрзянь ёвкст (М. Е. Евсевьев, 1928)/19
| ←Ёвкс 18 | Эрзянь ёвкст (1928) , edited by Евсевьев, Макар Евсевьевич Ёвкс 19 |
Ёвкс 20→ |
| Эрзянь ёвкст (скаскат). Пурныньзе М. Е. Евсевьев. СССР-энь Наротнэнь Центральной Издательствась. Москов, 1928 |
ОД АВА.
Эрясть атят бабат. Атянь бабань ульнесь тейтерьнест. Бабась прась — кулось. Тейтерьнесь мери тетянстэнь: „Тетяй, урьвакст, тетяй, урьвакст!” Тетясь урьваксь. Од авась мери тетястень: „Ёмавцак тейтереть — эрян мартот, а ёмавцак — а эрян”.
Тетясь кильць-повоць, озавтызе тейтерьнензэ и тусь мартонзо вирев. Мусь вирьсэнть кудыне, совавтызе тейтерьненть кудынестень и мери тензэ: „Тон, дочам, аштек тесэ, мон молян чувто керян, — медь валтан”.
Мольсь тетясь ве ёнов, сюлмась чувто пряс кавто ласт, сонсь тусь кудов. Пуви варма — ластнэ вейс вачкодевить: кулст-калст, кулст-калст. Тейтерьнесь марясыньзе и мери: „Оно косо тетям чувто кери, монень медь валты”.
Учось, учось тейтерьнесь тетясонзо — эзь сак тетязо, чизэ уш чопотьме кармась. Лись тейтерне кустима пес и серьгець: „Вирень тетят, вирь-ават, садо мартон удомо, аштеме!”
[ 70 ]Маризе яга-баба и серьгець каршонзо: „Ужо, ужо, дочинем, монсь молян мартот удомо, аштеме. Кандан тенть юдма ланго эрьгинеть, юдма ланго човалят”.
Сась яга-баба. Канць юдма ланго эрьгинеть, юдма ланго човалят. Максыньзе тейтерьнестень и мери: „На, тейтерем, керьксак, а мон мадян оймсеме; кода керьксавить тонгак матть ваксозон”. Яга бабась маць, тейтерьнесь кармась керьксамо.
Лись каськасто чомболкске и мери: „Патькай, патькай! каяк тень эрьгине, човалине, — монськак тенть паро теян”. Тейтерьнесь каясь тензэ эрьгине, каясь човалине. Чомболкскесь мери тензэ: „Кода керьксавить, патькай, эрьгеть, човалят, кекшть каштом удалов, а яга-бабанть вакс путт лепе-мукорь”.
Тейтерьнесь, кода керьксавсть эрьгензэ, човалянзо, мацтизе толсть. Яга-бабанть вакс пуць лепе-мукорь, а сонсь кекшсь каштом удалов.
Яга-бабась вемберьк сётор суски лепе мукорьс, сётор суски: „Уй, тейтерем, кодамо калгодо сывелеть”. Сэвизе лепе мукорень и тусь кудостонть.
Валське од авась мери атястень: „Азё туик тейтереть, карман мартот эрямо, а туйсак — а карман”.
Кильць-повоць атясь, тусь вирев. Муизе кудыненть и совась эзэзэнзэ. Ашти тейтерьзэ эзем прясо озадо, прок бояр-ава, эрьксэ, човалясо наряжазь. Саизе атясь и тусь мартонзо кудов.
Кискинест лись орта ланкс и онги: „Тяф, тяф! патькам сы — эрьк, човолят уски!”
Маризе од авась, „тяба!”, серьгець лангозонзо: „тон мерьть: тяф, тяф! покштям сы, ловажат-кахмарьть уски!”
Сась атясь — ускизе тейтерензэ, — тейтерьзэ човаля потсо, бояр-ава прок наряжазь.
Омбоце чистэ од авась мери атястень: „Азё ускик вирев моньгак тейтерем. Сон эрьк, човалят аволь зняро туи”.
[ 71 ]Атясь кильць-повоць, озавтызе од аванть тейтерензэ и тусь мартонзо вирев. Совавтызе секе кудынестень и кадызе, а сонсь тусь кудов.
Чопотець чизэ. Тейтерьсь лись кустима пес и серьгець: „Вирень атят, вирь ават, садо мартон удомо, садо мартон аштеме!”
Маризе яга-баба, серьгець каршонзо: „Ужо, ужо, тейтерем, монсь молян мартот удомо, аштеме! Кандан тенть юдма ланго эрьк, юдма ланго човалят”.
Тейтерьсь радувась, учи эснэнзэ. Сась яга-баба, каньць юдма ланго эрьк, юдма ланго човалят. Максынзе тейтерьстень и мери: „На, тейтерем, керьксак, а мон кашланкс мадян оймсеме. Кода керьксавить тонгак матть ваксозон”.
Яга-бабась маць кашланкс, тейтерьсь озась эзем пряс и кармась керьксамо.
Лись каськасто чомболкске и мери: „Патькай, патькай, каяк тень эрьгине, каяк човалине, моньськак теньть паро теян”.
Тейтерьсь серьгець: „Бабай, чомболкске эрьк веши, човалят!”
Яга-бабась мери: „Вачкодик пря ланга скалкасо!”
Тейтерьсь сят! вачкодизе чомболкскень пря ланга. Чомболкске тусь мекев каськас.
Керьксавсть тейтерьсть эрьгензэ, човалянзо. Наряжась и маць яга-бабанть вакс.
Яга-бабась пукштор сускизе и мери: „Уй, тейтерем, кодамо чевте сывелеть!” и сэвизе. Ловажанзо пештиньзе кептерес, сонсь тусь вирев.
Валське од авась рана-як стясь и мери: „Азё, ускик тейтерем, ды ванок нарядонзо или ёмавтне!”
Атясь кильць-повоць, тусь од аванть тейтерензэ мельга. Совась кудонтень — тейтерьсь арась. Вачтась кептерестень, тосо тейтерьсть ловажанзо.
Саизе кептеренть ловажатьнень марто и тусь кудов.
Кискинесь лись таго орта ланкс и онги: „Тяф, тяф, покштям сы, ловажат-кахмарьть уски!”
[ 72 ]Маризе од авась, „тяба!” серьгець лангозонзо, „тон мерьть: тяф, тяф, патькам сы, монень пурдань сюлгамо уски!”
Сась атясь. Лись бабась каршозонзо — тейтерьзэ арась. Прась ловажатьнень ланкс и кармась лайшеме. Лайшесь, лайшесь — кулось. Кармасть таго тетят-тейтерьть кавонест эрямо.