Эрзянь ёвкст (М. Е. Евсевьев, 1928)/05
| ←Ёвкс 4 | Эрзянь ёвкст (1928) , edited by Евсевьев, Макар Евсевьевич Ёвкс 5 |
Ёвкс 6→ |
| Эрзянь ёвкст (скаскат). Пурныньзе М. Е. Евсевьев. СССР-энь Наротнэнь Центральной Издательствась. Москов, 1928 |
КОДА АТЯТ-БАБАТ МАКСЫЗЬ ЦЁРАСТ СЯКОЙ КЕЛЬС ТОНАВТНЕМЕ.
Эрить-аштить атят бабат кавонест. Ули сынст ве цёраст. Сынь кортыть атят-бабат: „Мезес минь тонавцынек цёранок — сокамо эли морамо?”
Бабась мери: „Тонавцынек деряй сокамо, пек сон яжави, — тонавцынек лучи морамо.”
Атясь мери бабастень: „Морамо тонавтомодо, тонавцынек лучи сякой кельс.”
Ансяк истя кортасть, сась тенст ве атине и мери: „Максынк монень цёранк тонавтлеме, мон колмо иес эрьва мезес тонавца. Тонавтумань кис кецтэнк [ 21 ]мезе-як а саян, колмо иеде мейле мольть кисэнзэ — содасак, — тоньть ули, а содасак — монь ули.”
Максызь цёраст се атястень тонавтнеме. Васня сон тонавтызе цёранть разной ломанень кельс, мейле тонавтызе скотинань кельс и нармунень кельс. Цёрась колмо иес тонаць, атядонтькак ламо содамо кармась. Сон содызе, кона шкане тетязо сы, лись ки лангозонзо и мери тензэ: „Тетяй, кода тон пачкодят, атясь тейсамизь минек васня соколкс. Сонзэ монь коньдят тонавтницянзо комсь вейксэ, мон колоньгеменьцян. Сон нолдасамизь минек кардайс, минь валктанок ве жерьдине ланкс. Мон улян вить ёндо колмоцекс. Мейле тейсамизь минек ве понасо айгоркс. Артливцамизь, артливцамизь весе, ряц ладясамизь. Тон ванок, мон вить пилем чаравца. Колмоцеде тейсамизь минек гулькакс. Минь ливтнитянок, ливтнитянок — валктанок ве жердине ланкс. Мон улян керч ёндо колмоцекс.”
Ёвтыньзе нень цёрась тетянстэнь, теевсь гулькакс и тусь мекев атястень.
Мольсь тетясь атястень. Атясь теинзе весе тонавтницянзо соколкс и нолдынзе кардайс. Сынь ливтнесть, ливтнесть кардазонть велькска — валксть ве жердине ланкс.
Атясь мери цёрасть тетянстэнь: „Содык, кона тонть цёрат тесэ.”
Тетясь ваннось, ваннось — невць колмоце соколсть ланкс ды мери: „Вана те монь цёрам!”
Мейле атясь теинзе весе тонавтницятнень ве понасо айгоркс. Айгортнэ артнесьть, артнесьть кардазганть — лоткасьть весе ве ряц. Атясь ветизе тетянть икелест и мери: „Содык, кона тесэ тоньть цёрат!” Тетясь айгортнэнь ютксто-як содызе цёранзо.
Колмоцеде теинзе атясь весе тонавтницянзо гулькакс. Гулькатьне ливтнесть, ливтнесть кардазонть велькска — валксть ве жердине ланкс. Атясь мери цёрасть тетянстэнь: „Содык, кона тонть цёрат тесэ.”
[ 22 ]Тетясь гулькатьнень ютксто-як содызе цёранзо и саизе кудов.
Молить киява. Ливти каршост кренч. Кренчесь мерьсь таго месть эсь кельсэнзэ цёрастень и тусь мекев ливтязь.
Тетясь кевстизе цёранть: „Месть кренчесь кортась мартот?”
Цёрась мери: „Мон а ёвтаса тенть, месть сон кортась, а то тон паньсамак кудостот.”
Тетясь мери: „Мейсь паньдян? монь лия трицямгак арась.”
Цёрась ёвтызе тетястень, месть тензэ кортась кренчесь: „Вана месть кренчесь кортась: тон, коля, монь пильгень шлямо ведем симсак.”
Тетясь кежиявць цёранть ланкс и панизе вакстонзо.
Цёрась тусь вирев. Мусь тосо кудыне и совась эзэнзэ. Кудосонть эрить колмо цёрат: веть сынь ломать, чить велявтыть нармунькс: вейкесь — соколкс, омбоцесь — кренчекс, колмоцесь — озязокс.
Валське соколсь мери цёрастень: „Азё велявт масторон перька а мон оймсян.”
Цёрась эшкевсь масторов, теевсь соколкс и тусь ливтязь; велявтызе соколсь масторонзо, чокшне мекев сась кудостень. Омбоце чистэнть кучизе цёранть кренчесь эсь масторонзо перька велявтомо. Цёрась велявтызе кренчень масторость-как.
Колмоце чистэ кучизе озязось эсь масторонзо ванмо, сонзэ масторзо кемень масторонь трокс ульнесь.
Цёрась тусь. Мольместэ нейсь сон инязоронь кудо. Совась кудонтень. Кудосонть ашти ансяк ве инязоронь тейтерь: сонзэ тетязо и ялаксонзо тусть весе войнас. Цёрась кевкстизе тейтерьсть: „Мезеньгис тетят воюви?”
Тейтерьсь мерьсь: „Эйсэнь силой саи никс апак лемть инязоронь цёра, тетям а максы эснэнь. Тень кувалма воювить.”
[ 23 ]Цёрась велявтызе озязонь масторсть. Сась кудостень и мери ялгатьненень: „Мон ней туян вакстонк.”
Ялгатне мерить: „Туят — а кирьттядызь, а туят — а паньдядызь. Ансяк давайте эсь юткованок вал путтанок: ки эстэденек ёми — вейкень-вейкень вешнима.”
Тейсть ниленест налт, тешкстызе эрьва цёрась эсь налонзо, пезнавтызь стенас и цёрась тусь вакстост.
Сон мольсь вицтэ войнастень. Войнасонть инязорось вешни ломань: „Ки моли монь масторозон мекев-васов колмо иес сёрмань кисэ, сенень максса никс вейкине тейтерем.”
Лись ве энерал и мери инязоростень: „Мон молян, и колмо иес мекев сан.” Инязорось кучизе сонзэ. Мейле мольсь цёрась инязорость икелев и мери: „Мон аволь колмо иес — колмо часос мекев-васов якан масторозот и сёрмат тенть кандан.”
Инязорось кучизе сонзэ-як. Цёрась тусь. Пачкоць инязоронть кудозонзо, час-как шкась эзь ютак; совась кудостень и мери тейтерьстень: „Монь тетят кучимем сёрмань кисэ.” Тейтерьсь кевсни эснэнзэ: „Тон кода сыть кемень масторонь трокска?”
Цёрась мери тензэ: „Мон соколкс ливтязь сынь.”
— А лиякс мезекс-как маштат прят тейнеме?
Цёрась мери: „Мон маштан оштё прян тейнеме кренчекс и озязокс.”
Тейтерьсь таргась пулостонзо колмо толгат: соколонь, кренчень и озязонь толга и максынзе тензэ сёрматьнень.
Цёрась саинзе сёрматьнень и тусь мекев. Аламодо эзь пачкотть войнастень — ваны шкась ансяк кавто част ютась. Мусь лисьмине. Симсь, ярцась ланксонзо и маць оймсеме.
Се энералсь, кона тушкнось сёрматьнень кисэ, муизе сонзэ; керизе удомсто прянзо; таргинзе потстонзо сёрматьнень, мольсь инязоростень и максынзе тензэ.
Прядызь войнанть и мурдасьть весе эсь масторозост. Инязорось мери тейтеренстэнь: „Мон, тейтерем, [ 24 ]максытень мирьденень те энералстень: войнаньть шкане сон сакшнось кудов монь сёрман кисэ.”
Тейтерьсь мери тетянстэнь: „Мон, тетяй, а молян тенень никс: тонть сёрматьнень мон макснинь аволь тенень.”
Инязорось мери тейтерьстень: „Кенгелят, тейтерем, — монь сёрматнень те кандыньзе, максыньзе тень кедезэнь.”
Се цёранть стенас кадозь налстонть, кодак сонзэ прянзо керизе энералсь, кармасть чудьме верьть и сыйть. Ялгатьне тусть сонзэ вешнемензэ. Вешнесть, вешнесть, муизь кемень масторонь томбальде. Ваныть прязо керязь. Канцть кулы-ведь и живой ведь. Валызь кулы вецэнть — прязо педясь. Валызь живой вецэнть — вельмесь цёрась, — стясь пильге ланкс и мери ялгатьненень: „Эх, знярс мон удынь!” Ялгатьне мерить тензэ: „Минь авольдезь муйдеряк, пингезэть удовлеть теске, — прят-как тонть керязель!”
Сон варчизе потмонзо — сёрматьне поцонзо арасть. Сестэ сон чаркоць, што се энералсь прянзо керизе. Сон ёвтызе ялгатьненень, кода тевсь ульнесь. Ялганзо мерить тензэ: „Коли истямо теветь, азё седе курок инязоростень, минь туйдянок кудов.”
Цёрась тусь и мольсь инязоростень. А тосо энералсь силой саи инязоронь тейтерьсэнть никс. Тейтерьсь энералсть эснэ кевсни: „Коли тон сакшныть сёрматьнень кисэ, ёвтник, — кода сакшныть.”
Энералсь мери: „Мон ласте сакшнынь.”
Тейтерьсь мери: „Кенгелят, — мон сёрмадыя, кода сакшность сёрматьнень кисэ.”
А цёрась кинень-гак пря эзь невть, — невтизе ансяк прянзо тейтерьстень. Тейтерьсь терьдизе цёранть и мери тетянстэнь: „Тетяй, сёрматьнень саинзе монь кецтэ вана те ломансь.” Инязорось мери цёрастень: „Тон сакшнытьдеряй сёрматьнень кисэ, мейсь ино тонсь монень эзи макст?”
[ 25 ]Цёрась мери инязоростень: „Мон пачкодинь малазот — шкась кавто част-как эзь ютакшно, а мартот ладязельть колмо част, секс мон эзинь макст тенть сёрматьнень; муинь лисьмине, ярцынь-симинь ланксонзо и мадинь оймсеме. Удомсто муимем те энералсь, керизе удомсто прям, саинзе поцтон сёрматьнень и максынзе тенть.”
Инязорось мери тензэ: „Прят керязь ульнесьдеряй, кода ино тон вельмить?”
— Монь вельмевтимизь ялган.
Цёрась мери: „Эрявиньдеряйть, мон тусынь сынст.”
Инязорось мерсь тензэ: „Азё, туи.”
Цёрась тусь и туинзе ялгатнень: „Тынь вельмевтинк те цёранть?”
Сынь мерьсть: „Минь вельмевтинек.”
Инязорось кевстизе цёранть: „Кода тон колмо часос мекев-васов сакшныть монь масторозон?”
Цёрась теевсь соколкс и мери инязоростень: „Вана кода мон сакшнынь колмо часос.”
Тейтерьсь мери тетянстэнь: „Сон, тетяй, лиякс-как машты прянзо тейнеме.” Тейтерьсь ливтинзе цёранть пулосто таргазь колмо толгатьнень и конань пуцазо — лади.
Инязорось энералсть прянзо керизе, тейтерензэ максызе се цёрастень никс, и максызе тензэ весе масторонзо.
Эрясть куватьс а куватьс. Сась цёранть тетязо ялганзо марто пурнамо се масторостень. Цёрась, кодак неизе тетянзо, содызе, а тетясь эссе содак сонзэ. Совавтынзе цёрась эстензэ удомо сынст. Андынзе, симдиньзе и мацтинзе. Венень каньць сырнень вакансо пуре, путызе столанкс и мери тенст: „Сыньдеряй веть сименк, те ваканстонть симеде.”
Мейле цёрась шлинзе пильгензэ сиянь вакансо и маць. Веть тетянть сась симезэ. Пуреденть симме сон эзь смея, саизе пильгень шлямо вецть и кармась симме. Цёрась неизе сонзэ и мери: „Тетяй, иля симть те [ 26 ]вет'тенть, мон пильгень шлинь эснэнзэ, мон тонть цёратан, конань тон паник кудостот.”
Кучсь цёрась ломать аванзо кис. Туизь аванзо-як и чечемень чис эрить вейсэ.