Эрзянь Мастор/2011/09/Тия якась Эрзянь келень чись!/Саран ош. Эрзянь келень Чи. Ансяк эрзякс!
| ←Прявтлопа | Эрзянь Мастор, № 9 (353), 16 мая 2011 edited by Нуянь Видяз, Кшуманцянь Пиргуж Тия якась Эрзянь келень чись! Саран ош. Эрзянь келень Чи. Ансяк эрзякс! |
Тия якась Эрзянь келень чись!/Саранск. "Мордвань чи". Ансяк ... рузокс!→ |
| Статья на сайте газеты: № 353, 16.05.2011, Тия якась Эрзянь келень чись! |
| Тия якась Эрзянь келень чись! |
| Саран ош. Эрзянь келень Чи. Ансяк эрзякс! |
* * * * * * * * * * * * * *
«Мордовский чиденть» мейле Эрзянь келень идема Фондось Эрзянь келень Чинть тешкстызе чадыковонь 16-це чистэ. Кемкавксовоцеде. Кода свал, панжицякс ульнесь «Торама» морокурось. Сонзэ моронзо кунсоломадонзо мейле пурназель атянь эзем ды кирвазстезель Штатолось, ёвтазель А.П.Рябов лемсэ Казнень Лауреатонть лемезэ — Казаков Петр Ефимович. Петя покштянок. Од лауреатонтень максозель мазыйстэ теезь-анокстазь Диплом, балягань пусмо ды казне — питнейдеяк-питней, мазыйстэ викшнезь эрзянь панар. 2010 иень паро тевень кис казезентень ёвтазельть ламо оймень эждиця, кайксэнь-настроениянь кепедиця валт, паро арсемат.
Теке марто, ёвтазель, мезде уш сермадовкшнось «ЭМ»-э, Иень Эрзянть лемезэ — Эрюш Вежай. Теде Дипломось невтезель весеменень, ловнозель эйсэнзэ сермадовксось. Сон «ЭМ»-нь те номерэнть марто кучови почта вельде Эрюш Вежайнень.
Те иладонть мейле Эрзянь келень чись поладовсь Промкссо. Эйсэнзэ кунсолозель яволявтомась тевтнеде, конатнень теинзе эрзянь келень идема Фондось 2010 иестэ. Ёвтнесь эйстэст Кшуманцянь Пиргуж, Фондонь прявтось.
Пурназель од ветямкуро. Эйзэнзэ совасть: Кшуманцянь Пиргуж, Калаганонь Керяз, Шарононь Сандра, Кузоватонь Оля, Чекаев Н. П., Нуянь Видяз, Аношонь Тумай. Прявтокс одс кармась Кшуманцянь Пиргуж. Пурназель мучкицянь-ваныцянь комиссия. Ёвтазь ломантнень кис кедест кепсизь весе.
Константинова Лида, Романова Оля ды Ёгина Тая кецневтимизь, путсть пе промксонтень кавто моросо.
Прядовсь Эрзянь келень чинь илась Эрьзянь Степанонь скульптуронть кеврунгонзо марто вастомасо. Путозель пильгензэ ваксс роза балягань пусмо.
Сакшность комсьте ламо ломанть Пензасто. Сюкпря тенк, Пензань эрзят! Ломанть ламо арасельть. Сень кис весе, вейкень пес, ловт, кортасть эрзякс ды те ульнесь, «мордовскоенть» коряс, алкуксонь Эрзянь Келень Чи. Ойме витевтсть, кецневтсть сырнеде питней эрзянь сыреж валтнэ.
|
RU: Данная работа создана сотрудниками газеты Эрзянь Мастор и распространяется по лицензии Creative Commons Attribution 4.0 International. См. пояснение внизу заглавной страницы газеты.
EN: This work is licensed under the Creative Commons Attribution 4.0 International License as a work by Erzyan Mastor journal employee(s). See the disclaimer on the bottom of the front page of the journal. |