Эрзянь Мастор/2009/24/Од ие марто, оят-ялгат! С Новым годом, друзья!

←Чачома Чи марто!

Эрзянь Мастор, № 24 (320), 28 декабря 2009 edited by Нуянь Видяз, Кшуманцянь Пиргуж Од ие марто, оят-ялгат! С Новым годом, друзья!

*Эрзянь Мастор*→

Статья на сайте газеты: № 320, 28.12.2009, Од ие марто, оят-ялгат! С Новым годом, друзья!

 

Од ие марто, оят-ялгат! С Новым годом, друзья!

Иень прядомась — те аволь ансяк валонь кирдема шка бухгалтертнэнень. Эрьвась сонсь, эрьва вейсэндявксось, прявткурось, ветийкурось, эрьва ломанесь арсезеви од иень каршо читнестэ арсезеви теездень иень перть.

Мезе, кодат седе редявикс, превс кадовиця тевть топавтсть «Эрзянь Мастор» газетась ды сонзэ чачтыцязо — эрзянь келень идема Фондось?

Васня эно газетадонть, минек кулялопадонть.

Кецнетяно, васняяк, — седе келейгадсь сёрмадыцянь кужонок. Содавикс, умок важодиця «пшти кельтнень» юткс — Мацьказонь Лёфай (Москов), Дригань Толай (Самара ёнкс), Эрюш Вежай (Мурман ёнкс), Аношонь Тумай, Терюшонь Серьгу (Н-Новгород ёнкс), Прокаень Константин (Пенза ёнкс), Петрянь Андю (С-Петербург), Калаганонь Керяз, Сазонов Лева, Биккинин Ирек, Казаконь Петя покштянок (Саран ош) — эскельдясть ды совасть эйзэнзэ од авторт. Васенцесь эйстэст — Ратанонь Татю, конань мельс мекс-бути тусь Вирьава лемесь. Те — муевкс, те — кецнема, те — изнямо. Мукшны паро валт, «алга соки», кода кортыть, превейстэ сермады Борюшонь Андямо (Москов).

Неть лемтнень лемест ёвтамсто, сонсь сы кевкстемась: кодамо статья, иень перть печатазетнень эйстэ, тусь седе мельс? Витькстамо: сонзэ ёвтамс а шожда. Эрьвась вечки мезеяк эсензэ, эрьванть эсензэ вечкевикс темазо, эсензэ вановтозо. Секскак ёвтатано аволь «Иень статья», а сермадыцятнень лемест. Ламо мельс туиця статьят печатась топонимикадо Сазонов Лев николаевич, Эрьзянь Степандо паро ёвтнемат нолдась Ратанонь Татю. Ды кода, кода а ледстямс Мацьказ Лёфаень «На Хартию надейся, да сам не плошай» видечинь валонзо?

Паз, чангодть!

Кавто иеде ламо «Эрзянь Масторонть» велькска чарасть-велясть раужо, цярахманонь кандыця пельть. Ванстынек, ловныцят, мартонк вейсэ, неть тандавтниця менель велькстнэде. Кавто иеде ламо чумондсть пакшанок «экстремизмасо», «сепаратизмасо» ды лия пелевтиця валсо-«измасо». Васня Саранонь ине судось, мельганзо те иень умарьковонь 25 чистэ Россиянь инеде-ине судось мерсть: «Эрзянь масторсо» кодамояк экстремизма арась. Илядо вешнеяк. Сонзэ,теня, «вечкевикс ялганок» нардыксэлизь газетань куростонть видечинь аштеманзо кис.

Те, мерема, пандошка изнявкс.

Чангодть, Инешкипаз!

Тедеяк ёвтамо. Кодат карьцигант вельксканок эзть чара, кода кренчтнэ эзть карно, кодат стакачить эзть пракшно, газетась свал-свал лиснесь шкастонзо ды эсензэ покшолмасо. Свал сакшнось ловныцянтень ды паро мельсэ ёвтнесь минек келенть, ды лиятненьгак, ёжодонзо. Сонзэ кеняркстонзо ды ормадонзо. Ловныцят, сюкпря тенк! Тынтеменк сон аволь валгоне элезэнк. Лездасть тенек паро сёрмадстомасо Блинов Анатолий Егорович, Тиньгаев Виктор Феофанович (Оренбург ёнкс), Прокаев Константин Васильевич, Грачева Екатерина Николаевна, Сергеева Анна Игнатьевна, Исаев Николай Степанович, Зоричева Зинаида Васильевна (Пенза ёнкс), Елисеева Галина Дмитриевна (Рязань ёнкс), Степанова Раида Евстафьевна (Москов ош), Кирсанов Виктор Пантелеевич, Кистанова Ольга Ивановна (Самара ёнкс), Андронов А.Н.(Тула ёнкс).

Чангодть, Инешкипаз!

«Эрзянь Масторось» маштозь, мезе ды кие лангскак апак невтне, мусь ки сенень, кона алтымасо тапардызе мода-масторонть — интернетэнтень. Иень перть ловность «ЭМ»-ть минек сайтстэ 3974 ломанть, теевсь сон содавиксэкс 52 масторсо. Те, содави, седей вити, кецневтни, рашты кемемат. Ламо тень кувалма электроникасо теи Петрянь Андю ды сонзэ кол, превей ялганзо.

Чангодть, Инешкипаз!

2009 иесь — ламонь кувалма кенярксов ие. Таштамковонь 24 чистэ топодсть тенек, «Эрзянь Масторонтень», 15 иеть! Сынст перть кодат ансяк газетат эзть лисне! Ламот «тов» тусть Мордовиясто, прядызь ламот эрямокист Финтнэнь-Угратнень масторсояк. «Эрзянь Масторось» — а сельмедемс! — эри, важоди, максы превть, зяро улить виензэ вансты эрзянь келенть, вансты лия раськетненьгак. Стакаль, вельть стакаль «судонь шкатнестэ» «чондатнень» кувалма, те лангс апак вано, стакачитнень пансезь нолдазель чачома чинь, мазыйстэ печатазь-артозь номер. Паз, чангодть! Эряк Эрзянь Мастор!

Аволь аламо 2009 иень перть тейсь эрзянь келень идема Фондоськак. Васняяк, содави, лездась — ульнесь нардев нежекс «Эрзянь Мастор» газетантень. Ветямкурось (прявтось Кшуманцянь Пиргуж) ламо тейсь сермадостомасонть. Кадык истя келейстэ, кода ульнесь ламо иень перть, эзь тешкставо (тувталтнэде ёвтнинек), ялатеке Эрзянь келень чись ютавтовсь. Кода свал, 20-цеде пурнавкшнось «Велень Озкс» Игнат буень Ташто Кшуманця велесэ (Мордовия)

Эрзянь келень идема Фондонть пельде 2009 иень панжиковонь 25-26 читнестэ якась Суомив, Хельсинки ошов «Дискриминация меньшинств в России» ламо масторонь семинаронтень Нуянь Видяз. Теде башка, Европань Советэсь тердтнизе сонзэ журналистэнь мелькирдема семинарс Московов. Те ульнесь

Эрзянь келень идема Фондонь прявтось, Инязорось Кшуманцянь Пиргуж (Мусалев Г.Д.) якась финнэнь-угрань Чинь тешкстамо Самарав, Пензав....

Вана истя, нурькинестэ ёвтазь, эрясь,тейсь тевензэ минек Идицянок, Эрзянь Фондось ды сонзэ, кой-зярдо шождасто, а кой-зярдо аволь пек, лексиця церазо — «Эрзянь Мастор» газетась.

Од ие марто, церат ды ават, сыреть ды одт, эйкакшт! Кемтяно, 2010 иень Якшаматянь кептерезэ карми седеяк сюпав аволь ансяк ламбаськайсэ, а паро-паро тевсэ, паро мельсэ, кецьневкссэ. Кемтяно, эрзянь келесь, минек кенярксонок ды покштояк покш мелявксонок, карми лексеме седе келейстэ, седе шождасто! Шумбрачи весенень Од иень читнестэ ды свал-свал.