Эрзянь ёвкст (М. Е. Евсевьев, 1928)/20
| ←Ёвкс 19 | Эрзянь ёвкст (1928) , edited by Евсевьев, Макар Евсевьевич Ёвкс 20 |
Ёвкс 21→ |
| Эрзянь ёвкст (скаскат). Пурныньзе М. Е. Евсевьев. СССР-энь Наротнэнь Центральной Издательствась. Москов, 1928 |
УРУС.
Эрясть-айшть атят бабат кавонест. Сынст ульнесь ве тейтерьнест. Бабась прась — кулось, — кадовсь тейтерьнесь сиротакс. Атясь арцесь, арцесь — урьваксь лия баба ланкс. Бабасть ульнесь эсинзэ тейтерьзэ, сон эзь карма вечкеме атянь тейтерьсть эснэ, удомс как шка а максы тензэ, яла роботавты. Весть сон мери атянстэнь: „Атясь, ускик тейтереть вирев и тоск кадык, — сон монень а эряви”. Атястень а месть тейнемс — кильць лишме, озавтызе тейтерензэ и мери тензэ: „Адя, дочам, вирев пенге мельга!”
Арсть, арсть, мусть кудыне, конань удобске теизе, палакске вельтизе. Совась атясь тейтерензэ марто кудостень, аштесть аламос и атясь мери: „Ну, дочам, тон тесэ аштек, мон молян пенгень керямо!”
Тейтерьнесь мери: „Ладна, тетяй, азё!” Атясь сайсь кавто ласт, поводиньзе чувто пряс и тусь кудов. Варма пувси ластнэнь эйсэ, а сынь вейс-вейс вачколевить — друн-дран, друн-дран! Тейтерьнесь кулсуни и мери: „Оно косо тетям пенк кери”. А ластнэ яла друн-дран! друн-дран! вейс вачколевить.
Сась чокшнэ, а атясь тейтерензэ ваксс эзь са. Тейтерьнесь учось, учось — лись кустима пес и пижакаць: „Вирень тетят, вирь-ават! садо мартон удомо!” Маризе яга-баба и серьгець карчонзо: „Ужо, ужо, дочинем! моньсь сан! Юдма эрьк кандан, юдма човалят, юдма грушат!”
[ 73 ]Аламос аштезь тейтерьнесь таго пижакаць: „Вирень тетят, вирь ават! садо мартон удомо!” Яга-бабась мери: „Ужо, ужо, дочинем! руцят-палят тенть кандан!”
Кода чопулгаць, кудынестень совась яга-баба, канць юдма эрьк, юдма човалят, юдма грушат, палят-руцят и мери тейтерьстень: „Вана, дочам, теть эрьк, човалят, грушат, руцят, палят. Мон мадян удомо, а тон керьксак, наряжак ды мать ваксозон!”
Тейтерьнесь мери: „Ладна, бабай, мадян!”, яга-бабась маць и курок матедевсь, тейтерьнесь кармась керьксамо эрьк, човолят.
Каштом алдо лись чомболкске и мери: „Патькай, а патькай! каяк монень эрьгине, каяк монень грушине, каяк суре ведьмине, монсь как теньть паро теян”.
Тейтерьнесь каясь тензэ эрьгине, каясь грушине каясь суре ведьмине. Чомболкскесь мери тензэ: „Тон, патькай, керьксак-керьксак, яга-бабасть вакс пут мукорь, тоньсь кекшть каштом удалов”.
Тейтерьнесь тейсь кода чомболксось тонавтызе: керьксась, керьксась, наряжась, яга баба вакс пуць мукорь, а соньсь кекшсь каштом удалов.
Сыргойсь яга-бабась штюпи-капи, вакснэнзэ ки будим ули, и давай мукорьсть эснэ порьме. „Уй, дочам, сывелеть калгодо!” А чомболкскесь каштом алдо мери: „Да, бабай, калгодо!”
Валське яга-бабась стясь ды тусь вирев.
Бабась мери атястень: „Азё, атясь, вирев, ускить тейтереть ловажанзо!”
Атясь кильсь лишме, тусь вирев, а бабась кармась пачалксень паньме тейтерьсть поминамс.
Аламос аштезь, сась атясь, ускизе тейтерензэ наряжазь, прок бояр-ава.
Бабастень теевсь вельть апаро. Сон мери атястень: „Азё, атясь, нейке ускик монь тейтерьстькак вирев!”
[ 74 ]Атясь озавтызе бабань тейтерсть и ускизе вирев се кудынестень, соньсь повоць опеть чувто пряс кавто ласт и тусь кудов.
Чокшне бабань тейтерьсь ванцы — тетязо а сы, лись кустима пес и давай пижнеме: „Вирень тетят, вирь-ават, садо мартон удомо!”
Яга-баба таго сась. Каньць эрьк, човалят, руцят, палят и мери тейтерстень: „Керьксак, керьксак, дочинем, наряжак ды мать ваксозон”. Яга-бабась маць и матедевсь, тейтерьнесь кармась керьксамо. Лись каштом алдо чомболкске и мери: „Патькай, патькай! каяк монень эрьгине, каяк грушине, каяк суре ведьмине, моньсь как тонеть паро теян” — Тейтерьсь серьгець: „Бабай, чомболкс веши эрьгине!” Бабась мери: „Вачкодик пря ланга палкасо”. Тейтерьсь вачкудизе чомболкскень палкасо пря ланга. Чомболкскесь оргоць каштом алов.
Тейтересь керьксась, керьксась, наряжась и маць яга-бабанть вакс. Вемберть яга-бабась сыргойсь, и давай порьме тейтерьсть, а соньсь корты: „Вана, дочам, кодамо чевте сывелеть!” А тейтересь пижни: „Ох, бабакай, пек! Ох, бабакай, пек!”
Поризе яга-баба тейтеренть, а соньсь тусь вирев.
Валське бабась ранаяк кучи атясть эснэ тейтерензэ мельга: „Азё, атясь, ускик тейтерем, ды ванок, иляк томба!”
Кильць атясь лишме и тусь вирев, бабась кармась сюкоронь паньме. — „Тейтерем сы бояр-авакс наряжазь, эряви сюкородо андомс!”
Аламос аштезь ванцы — атясь арды, тейтересь а неяви. Лись бабась кардайс и мери: „Атя, косо тейтерем?” Атясь мери: „Вана мешоксо!” и максынзе ловажанзо бабастень.
Бабась аварьць, аварьць ловажатнень ланксо — кулось. А атясь кармась тейтерензэ марто вейсэ эрямо.