Янгамо (2006)/Ульнесь якстере чокшне
| ←Вандынь чинь куловтома | Ульнесь якстере чокшне (2006) by , edited by Рябова Л. А. |
Ледезель кавксть→ |
| Нуянь Видяз. Янгамо. Келей ёвтнема, ёвтнемат, тешкст. — Саран ош, 2006. — с. 136—138 |
[136]
| УЛЬНЕСЬ ЯКСТЕРЕ ЧОКШНЕ |
Шкась аволь айгор. Аволь машинаяк. А лоткавтсак. Сон полавты весементь, мезе перьканзо ды мезе эйсэнзэ. Лиякстомты кудотнень, пирявкстнэнь, паксятнень... Олгонь латодо ней уш ламот эзть марсеяк. Полавтовсть оршамо- ды ярсамопельтне, мельтне-арсематне, минсь. Тевесь, конадо карми ёвтневеме седе тов, ульнесь сизьгеменынка иеде икеле. Колошат, конатнесэ ней лиснить рудаз шкава кардазов-ков, кандтнесть велесэнть аламот кить. Ловт, весе якасть карьсэ.
Ульнесть истят парочист Ботаеньгак.
Ланга цивтёрк раужот, потмова — якстереть, вельтязь чевте коцтсо. Лембень кис. Ванстасть неть «цив-тёркайтнень» эсь сельмест ладсо. Бути кияк цёратнень эйстэ сырги омбо велев, юты эйсэст ансяк веле юткова, велестэ велес молемстэ сынст путнесть юдмас.
Семияст Ботаень покшоль. Цёрасо сюпаволь. Кавтаськетне, Важдай ды Кольняй, урьвакстома шка-вальть. Цёратне одт, шумбрат. Чокшне ланга «чопавтнесть» аштемкужос. Эрьвась эйстэст бажась тонгомс цивтёркай колошатнень. Истямо чансть тенст пракшнось чуросто: тетяст, Алькай атя, кирдсь неть карсемапельтнень панжома экшсэ. Сёвномаскак натой пачколесть тетят-цёрат.
Ботайде аволь васоло, теке песэнть, эрясть Кураень. Цёраст — Эрзют, ашола черь, сэрей. Яксесь алясь аштемкужов а стяко: мелезэнзэ тукшнось эсь пень ве тейтерь — Олдаень Вита. Паряк, муевлизеяк тейтеренть седейс яннэнть, паряк, кудаткак улевельть кучозь, авольть ютаяк кинзэ трокс Ботаень цёратне. Зярс-бути Вита вастневсь Эрзют марто, мейле аламонь-аламонь эйстэнзэ явовсь ды теевсь малавиксэкс Ботаень Важдайнень. Мейсэ эждизе цёрась, тейтерентень эстензэяк эзь чарькодеве. Цёратне пачколесть «кечкеремаскак». Кода илязо уле, Эрзютнэнь савсь потамс.
Прыця тештекс ютась тундось, мельганзо кизэсь.
Сась сёксь.
[137] Ботайть, конатне лиятнень коряс эрясть седе ломанькс, седе пешксе пеке, содасть: зярдо а зярдо педить велестэнть панемест. Велень прявтнэ тов, «верев», макссть конёв: Ботайтнеде сюпавт велесэнть арасть, кшувавтомс сынст шкань апак таргсе. Алькай атя умок чарькодсь: те вакска а юты. Секскак сон улист-парост кекшнесь эсь буень ломантнень ланга. Ансяк лезэсь тень эйстэ кодамо?
Алькаень седеезэ тардсь-китордсь а стяко. «Се» шкась сась.
Васенцекс варштасть-токасть эсь велень цёрат. Нилешканест. Ютксост Кураень Эрзюткак. Кулдор-калдор совасть кудыкелев, мейле кудос. Мартост кавто милиционерт. Вейкесь эйстэст таргась потмо зепстэнзэ конёв ды кармась ловномо, кинень мезе ды зяро мереви саемс мартонзо килангов. Ловнось ды кой-зярдо невтнесь таргамодонть тюжала-ожо сурсонзо: вана тень, вана сень...
Эрзют аштесь удало.
Кудосонть — сельведть, рангомат, сёвномат. Мештте мештьскак кундсесть цёратне.
Явсть Ботаень улист-парост кавтов: мезе саемс мартост ды мезе а максомс, кадомс теске, велень утомс. Оршамопельть, коцтт, пона, кемть, чакшт-вакант, велькст-ацамот... Кудонть велявтызь прянзо лангс, сокаризь киякс лаз ютконь пес. Тевесь прядома маласоль, зярдо венстизе келензэ Эрзют:
— Алькай леляй, косот тынк якстере потмо Колошатне? Важдай марто Кольняй яла яксесть эйсэст.
— Миинь, — эль марявиксстэ мерсь Алькай.
— Иля кенгеле, Алькай леляй, а умок Кольняень пильгстэ неинь, — педясь ломанентень Эрзют.
— Понгонесть кедь малазот мучкамсто?
— Арась.
— Эно мезть човорят?!
— Тон истя иля корта! Содан — эзить мие. Сынь тесэть! — рангстась Эрзют эсь прянзо азорокс марязь.
— Содат — вешнек! Вешнеде.
Эрзют пшкадсь прявтонтень ды ёвтнизе, мейсэ тевесь.
— Эрьга одс кундадоя, — мерсь покшось. Ды кармасть мучкамо одс. Ванкшность кудопотмарга, совсесть каськас, калдордсть кудыкеле, сорновтнесть нулатнень. Стяко. Колошатне эзть муеве.
— Скажи, мужик, хуже будет, — тандавтозь мерсь милиционертнэстэ вейкесь — кичкере кутьмересь ды [138] алашань чамась. — Молчишь? Заговоришь... Выведите во двор!
Пансицятне ды Алькай увол-авол лиссть кардазс. Кудо кенкшенть мельгаст тулодызь.
— Встань вот сюда, — мерсь милиционерэсь ды аравтызе атянть удало пирев лиснема кенкшенть икелев. Сонсь потась ветешка эскелькст, таргизе наганонзо ды таго пшкадсь Алькайнень: — Ты долго ещё будешь нас мучить? Скажешь или нет, где твои вонючие калоши?
Алькай чатьмонсь.
Милиционерэсь кепедизе кедензэ ды ба-бах ледсь атянть прянзо велькска.
Срадсь качамось. Алькай аштесь — сорк эзь тее, чамазо ловташкадсь.
— Скажешь или нет? — теке кендял, якстерьгадсь кежтнеде лишмень чачо милиционерэсь.
А куш а каш.
— Ёвтык, Алькай леляй, ёвтык! — кармавтсь Эрзюткак.
Ледицясь таго кепедизе кедензэ.
Те шкастонть каятотсь суликань поркснема. Панжовсь кардаз кенкшесь, ды, стакасто лексезь, вармакс совасть Важдай ды Кольняй. Важдаень кедьсэ — узере.
— Ёрты-ы-ык! — весе вийсэнзэ серьгедсь Алькай.
Эзь кенере.
Узересь ды наганось кепедезельть ве шкасто.
Васенцекс новольсь милиционерэсь. Мельганзо васня ландявсь, мейле комадо прась Алькай.