Поладкстомо (2016)/Улемс вадрякс а шождыне

by Нуянь Видяз

←Улевельтькак Иерэнь кондят...

Улемс вадрякс а шождыне  (2016)  by Нуянь Видяз, edited by Ломшина Л. А., Маризь Кемаль, Малахова Е. П.

Меельце эскелькс→

Нуянь Видяз. Поладкстомо. Без продолжения. — Саранск, 2016. — с. 201—210

[201]

УЛЕМС ВАДРЯКС А ШОЖДЫНЕ

Васняяк эно, ловныця ялгинем, теевтяно содавиксэкс. Ёвтнема валом седе валанясто, седе чарькодевиксстэ кармить теть пачкодеме. Кунсолок эно.

Велесэ тень мерить Миколь атя. Видькстан: вечкевиксэкс «атя» валонть а лован, ды ков молят — вечкеви-арась, иетне а кевкстнить, ветимизь эйзэнзэ, эзь марявояк. Сынь истят. Тевест теить прянь апак кепсе. Теить — чатьмонить. Вал а правтыть. Кодгемень сисем иеде икеле авам — улезэ тензэ маней тоначи — максокшнызе тень эрямонть ды мартонзо ёвтазь лементь. Мезде сон, кодамо чартьчи совавтозь эйзэнзэ, превскак эзь валгоне. Миколь ды Миколь... Мейле уш, ламо иень ютазь, карминь содамо: ульнесь косо-бути ды кодамо-бути Николай-Миколь угодник. Кие те истямось, мерема, мель эзинь путне. Эринь ды эринь мартонзо. Ды аволь аламо. Ансяк кеменьшка иеде икеле карминь содамо: лемем, конань кандтнян пешксе кескав иеть, аволь эрзянь, аволь рузоньгак, сон — кезэрень грекень. Зэмезэ сонзэ — «изнямо». А берянь. Ансяк вана «угодник» валось... А вечкса. Мезе-мезе, монь обуцясто савтомат-угодямот иля вешне — а муят. Мхы! Миколь тык Миколь, ярсамс а веши.

Лемем содасынк. Паро. Иетнедеяк, лисни, пачтинь. Аволь умок тень топодсть ёвтазетне. Тень кувалма цяркань кепсемат кодаткак арасельть. Сынст таркас эсень кондямо ашо пря ним марто копоринек чайнеде ды сельметь тетьксинек сэнь экранонтень. Тевесь, тонсь содат, [202] аволь кедьгинень цянкаемасо. Тевесь лиясо. Аволь умок ульнинь «од атянь» кувтасо, ней «одось» ков-бути либорк тусь. Тусь — а кундасак.

Мезе мерян, весемеде мазый ды малавикс, кодамо сон илязо уле, — эйкакшпингенек, мельганзо сехте валдо ледстнемакс кадови од, панжовома шканок. Те виде, пелькстамс а сави. Ялатеке эрямонть эрьва пельксэзэ эсензэкс мазый, вити мель, сюпав эрьва кодамо тевсэ. Эрьва шкась канды валдодо пешксе чить. Раужо коцтсо сынь копачавить ансяк сестэ, зярдо ломанесь пачкоди тоначинь кузтемпес.

Монь шкам арась, свал тевсан, пулькан мелявксонь эрькесэнть чинек-венек. Секскак те «кузтемнесь» онстомгак а сакшны. Тень кувалма эрямопингень шержей ютком ютавтан кенярксонь кудосо. Ломанесь, яла ледстнян, эрязо тевсэ, пильге лангсо чаразь.

Ули меленк содамс, кие мон кедьтевень коряс?

Ёвтаса: кияк арась. Тевть а вешнян, теян мезе кедь малас понги. Ну, бути седе видестэ, седе малавиксстэ — кудодей мон, рузкс — строитель. Вана кие. Эрязь иетнень перть — седе ламо ошсо — кодат ансяк кудот-мезть эзинь путо ды эзинь чапо! Ансяк профессиякс тень, тагояк мерян, а лован. Истяк, тей-тов. Монь седейтевем — мазычинь вечкиця-раштыця. Истя, истя. Те аволь прянь шнамо.

Талай уш эрян Сырезьвелесэ. Кода тей понгинь, ёвтнеме а карман: ёвтнемам вельть кувалгады. Кодамо ёжозо те веленть — тедеяк а мезть валт певердемс. Кодамо весень. Парсте содат. Пиципалакст ды кирмалавт — вана кить азоронзо. Кодат илязт уле, Сырезьвелень эрьва эрицясь, инжекс эли пандянь путнеме сакшныцясь, Бажут Миколень кудонзо вакска сельмень апак сявадо а юты. Мезеяк уш, видестэ меремс, ай-ван эйсэнзэ арась, аволь кода менельс кузиця этажост марто «од эрзятнень». Меритькак сетненень аволь кудо — коттедж. Ялатеке минек кудонок кондямо, аламнеде пря шнан, велестэнть а муят. Сонсь ды удалонзо мацтось-кардазось вельтязть валдо-сэнь жестьсэ, неекс — сайдингсэ. Стенанзо «стазь» тюжала-валдо [203] тюс теке материалсонть. Карнизэнзэ ды вальмакундонзо чувтосто керсезь. Аволь кудо — налкшке. Алкукс...

Вый, допрок стувтокшнынь ёвтамс валнэ «академия-дом». Те, содави, пеедькшнезь... Кемень классто башка косояк лиясо эзинь бота. Кемень. Ансяк. Кода меремс, лиясто киторкскеяк совси седеезэнь. Эряволь тонавтнемс... Превень коряс аволь меельцетнень ютксолинь. Ансяк... Содан зярыя диплом марто ломанть. Кортазеват мартост, ды содавттанзат мель: мезекс сынь ёзасть понксост вете иень перть? Истяяк арсезеват: максындеряй теть сехте-сехте вере эрицясь превень вельть шождыне канстке, зяро иля чийне академиятнева, те кансткесь а стакалгады.

Мейсэ, ёвтнезденть башка, сюпаван?

Аволь умок вастневинь содавикс ава марто. Умок аволь од. Мельстуиця. Кортнемасонок нолажтынек та-кода дипломтнес, шнамонь грамотатнес, медальтнес... Авась чатьмонезь совась лия нупальс ды кандсь конёвонь кирдема керьме. Таргась эйстэнзэ эрьва кода тешкстнезь, печатьсэ кемекстазь грамотат, шнамо лопат, указт-приказт. Ловинзе, эзь нузялдо, лиссь колоньгемень колмо! «Саты, саты шнамс пря...» — карвокс бизнэсь прясом мелесь.

Зяро, мертядо, монь?

Куш вейке улевель...

Икеле истятнэнь лангс, кинь мештест кувтолдыть медальтнеде, ванылинь мик аламнеде сельмень сявадозь, кирдинь кувалмаст каштанчи. Мейле, ламо иень ютазь, карминь неть «мештетнень» лангс ваномо допрок лиякс. Карминь чаркодемс, мезень кис ды кода сеедьстэ максневить неть казнетне. Вастован истямонть марто апак учо — пурдаса прям. «Пайстомо ломань.содавтсамаммелесь.

Авась покшкавтнесь «медальсэнзэ».

Мон — сынст аразьсэнть.

Нолдык чумом, ялгинем, васов туевинь седе, мезде арсян ёвтнеме. Яла эседень, визьксчама, ды эседень!

Эно витьса эильведьксэм.

...Ульнесь эйзюрковонь маней, валдосонзо налксиця-элякалиця, Эрьме ёжонь раштыця чи. Ковонзо коряс [204] лембеяк. Апак капша, мелень путозь «Педявтнян» жестень пиже тюс лехинетнень кудонь стенантень. Ушо ёндо, содави. Тевем моли. Ёжом кецневти. Превезэнь та-косто васолдо сакшныть умонь шкань моронь лувт.

Маласом, чевте ловне лангсо, кирьксэкс мендявозь, уды, паряк, онткак неи, кискинем Верьгай. Мекс истя лемдекшния — превс а саеви. Кодамо верьгиз! Те шапкашка пондакш «верьгизэнтень» аволь реве, чеерь а разедеви.

Тунь апак учо шабра кудонть эйстэ явиця пирявксонть велькска, теке ёндол, кирнявтсь бульдогост ды каявсь Верьгай лангс. Кискинесь верьга вайгельть цийнезевсь. Мон автордынь лазпе, мезе вий ахолдынь, норгиксэлия агрессоронть... Эзь понго. Кискинем верь потсоль, салава цийнесь, сорнось сэредькстэнть. Алонзо ловнесь аламнеде артовсь якстересэ. Выр-вар капшазь муинь нулыне, тапардыя ды кепедия элезэнь. Тевем кадынь, сеске сыргинь (молема вайгельпеде ламо) кудов.

Кавто чить якинь Верьгай мельга. Арась, эзь вадрялгадо ёжозо, эзь идеве. Колмоце чистэнть лиссь оймезэ. Кунсолыцяль, мелень ваныцяль. Леди мелезэнь, ёжом нуваргады.

Мезе лиссь — лиссь. Саинь лия онгайне. Сюпавчинек ванстомс арась, ялатекеа сынтемест кудоюртсонть, кардазсонть мезе-бути а саты.

Саинь левкске. Пилензэ — штереть, тюсозо ней уш алкукс верьгизэнь, чопода-шержей. Мазыйне. Вай, каня вишка пингестэ мезтькак эрсить а мазыйть ды а вечкевикст? Лемдия — Кемай. Тень чарькодема истя: кши кочомдо эсь прянь а микшниця, азоронзо а полавтниця.

Шкась эзь нузялгале. Мольсь. Эзь марявояк, ютась ие. Пешксе, теке пурцуз, левкскесь теевсь покш, пшти нерь, мазый рунго кискакс.

Андынь сонзэ базарсто рамазь сывельде! Кода а касомс? Кода а Виевгадомс? Савсь рамамс рисьме ды сюлмамс.

Истя, ёвтазденть башка, теемс савсь вана мекс.

Эрьва ломаненть эсензэ обуцязо, эсензэ ёжонь, превень тешксэзэ: кежей, эрьвела, эряза, эль лыкиця, а сыргавтовиця шаштолмасояк, превей, аптюк... Кодат [205] ансяк а вастневить ютксонок! «Обуця» валось, кирдевсь удемсэнь сыречис, ломанде кортыця. Пачатне, ракшатне, нармунтне, калтнэ, карвотне... — обуцявтомот. Сынь вейкетьстэ парыть, цяхить, кекердить, кукордыть, бизныть, бизмолдыть...

Э-э-э, ялгакай, те малавгак а истя! Эрьва сукскесь — косо илязо эря — лия малавиксэнзэ ёнов а моли. Модамасторсонть, ды мик менелькссэнтькак, мезтькак вейкеть иля вешне. Мик, яла мерян, ве видэнь атомтне-молекулатне вейкест-вейкест ёнов а молить. Весе-весе Чипаенть ало стави-тееви а вейкетьстэ. Те «кшнинь» койденть тень ледстясь од онгаем.

Кемай явовсь эсензэ кондятнэде кенярдомасонзо. Кецнесь эрямонтень, кецнесь вастовозь эрьва ломанентень, кие се илязо уле: ава, цёра, эйкакш, содавикс-аволь... Улевельгак Кемай ломань, кутморямосонзо вастовозенть пес паневлизе. Кинь а неи, ливчанясто, теке сталмозояк арась, ушоды перьканзо кирнявтнеме-чарамо. Кавто пильге лангс стякшнозь, вередеми эрязасто ды вечкезь кедензэ нолсеме-палсеме, лапасонзо рунгонзо вадяшамо.

Вальмалганок ютамсто лия ёндонь ломанесь истямо «вечкемадонть» васня талакады, мейле пелезеви — илязо амзорда. А соды мезе теемс. Кемаень толокс палыця ёжонзо кувалма а весть тенек пшкалесть пеняцицят. «Мезеяк тееде, кисканк эль эзимим правто пильге лангсто», — мерсь эйстэст вейкесь сельведень пачк. Куроксто мельганзо совась неке валтнэнь марто омбоце. Кардазсояк текекс вети прянзо: оймамо а соды, панси, а максы оля саразтнэнень. Чийни мельгаст, снартни налксеме мартост. Косто зняро псись эйсэнзэ, а содави. Мезе теемс? Сюлмия. Тень эйстэяк мезеяк эзь лисе: кирдемс кисканть свал сюлмазь седейвием эзь сатно.

Цякскадынек нинть марто.

«Мезе теемс? Кода улемс?» — чарасть-велясть превсэнек кевкстематне. Ёмавтомс? Ледемс? У-у, те а тев... Кода истя — ледемс? Мезень кис? Истямо од, мазый, [206] виев киска ды... Ледницянтькак чить тол мартояк а мусак. Цёратнеде кадовсть... Арась-арась, те а монь койсэ. Эно кода лиякс?

«Пшкадтяя ветеринартнэнень, — макссь тень превть, кецневтимим Кажань Лёня, шабранок, ськамонзо эриця, ведьгеменде ламо иесэ цёра, — тосо, кеман, ёвтасызь, кода лисемс те апаростонть». Мезе-мезе, сон чарькоди неть тевтнесэ, сонсь кирди вазошка колмо кискат.

Ардынек Кемай марто буень куншка велев. Муинек те самай ветлечебницанть. Васенцекс кевкстия, улить-арасть минек ёнкстнэсэ кудот, козонь пурнавить ды косо кирдевить азортомо кадовикс кискат-псакат. Маринь вейке: арасть. Те валдонть мейле чамдыя потмом: кодамо мельс пачкодинек эсень кондямо макшов нинь марто. «Тень теемс а стака, — оймавтымим ветважось, — рамак таблетка, улить истят минек, ды венстик вечкевикс теть Кемайнень». «Монь кедем а кепедеви. Тынсь теинк». «Арась-арась, тонсь, азор, андсак!» — кортамояк эзь карма эчке вайгель микшницясь.

Сави кармавтоманть топавтомс эстень.

Сырезьвелень чивалгома песэ васолдо неяви ведень таргамо башнянть прязо. Ведень нолдамо-лоткавтомо мон тов якан. Кудос апак совсе цюхадинек тов. Лоткавтыя машинам. Панжия кенкшенть, ды Кемай кирнявтсь оляв. Кода свал, сеске педясь нолсемем. Ветия башнянть маласо палманенть ваксс, вадяшия ды сюлмия Верьгаень поладыцянзо палманентень. «Нолдык чумом, вечкевикс Кемай, тоначив ильтян эйсэть...» — ютасть прявам сюмора мельтне. Монсь велявтынь копорьёнт ды мейгенерть каия икелензэ куловтомань плаштянть. Ризнэзь-мелявтозь лоцьк озынь урныгайкантень ды ношкстынь кудов, седе васов те сюморксов таркастонть.

Омбоце чинь валске сыргинь калмамо. Ялго. Саинь койме, монськак а содан мезекс кшикочом. Башнянть ваксс аламнеде апак пачкоде лотказевинь. Абунгадынь неезденть. Мезень тамаша? Яла тень эзь кемеве... Кемай, ведьмесэнзэ тей-тов ноцковтнезь, бажась стямс [207] кавто пильге лангс ды кутморямс, кода свал, куловтыцянзо. Кецнесь вастовомантень, юхаесь пулосонзо, кеняркстонть эль марявиксстэ цийнесь. Сонзэ паро ёжозо ютась седейзэнь. Кецнинь мартонзо. «Кемай эрий! Кемай эрий!» — чавсь прясом.

Те мезень дюния? Мекс эзизе сэве кулынькаенть? Секень вант, монь андомам ветеринаронсенть коряс ламоксть седе тантей. Секс... Эскельдинь седе малав, юксия палманьстэнть, ды кавонек, кавто ялгат, сыргинек кудов. Сон, палмань юртнэва лотксезь, чийсь икелев, мон — апак капша, вадря кайкссэ мельганзо.

Теке чинь сундерьгадома малава сась тенек шабранок Кажань Лёня. Совамсто мельганзо варсодезь варсодизе кудо кенкшенть. Мон таймазкадынь. Те мекс истя сон? Кодамо укска пупизе?

— Те истя тынь, а ломань понат, мезе тейтядо?! — ульнесть совицянть васень валонзо.

Ванынек пижницянть лангс ды эзинек чарькоде, кие-мезе истя азаргавтызе свал сэтьместэ кортыця Лёнянь.

— Тозонь, палманенть ваксс, козонь, кода ёвтнить, сюлмсик Кемаень... — седе энгамтызе вайгелензэ Лёня.

— Ну, мейле мезе?

— Мезе, мезе... Кемаеть эзизе сэве куломкаенть, монсесь вана трескизе... Паморьксэнь пес...

— А-а-а, оно мезе!

— Тарзаном куловтык! Вана мезе... Кодамоль кискась...

— Шабра, нолдык чумом — истя лиссь. Апаронть аволь арсезь теия, нолдык чумом, — мель путынь идемс прям.

...Эзинек кенере «тоначистэ сыцянтень» кецнеме ды Лёнянь Тарзанонзо кувалма ризнэме-мелявтомо, ошсто сась минек буень цёраломань. Ёвтния тензэ кисканок «вельмемань историянзо», мартонзо майсеманок. Инжесь тень видьстэ коняс: «Максынк монень, мон — вейке покш таркасо ванстыцян. Карми тень лездамо, салыцянь кундсеме...».

Марязденть кенярксом кескавс аволь кельге. Пазось, секень вант, маримим.

[208] Шкань апак таргсе «озавтынек» весень вечкиця Кемаенек инженть «Жигулис», ды теке неевтест ульнесь. Весе. Саизь оймамонь а содыцянть. «Ванстомо карми, тевень тееме... Кеман, вачодо кирдемензэ а кармить. Куловтомань-калмамонь апаротнень саизь седейстэнь», — арсезевинь, машинанть мельга ванозь.

Ютась валдосонзо дильниця Эйзюрковось, эзь редявояк, полавтызе чадысь. Сась иенть мазычинь тёкш шказо — панжиковось. Вейке маней лембе чистэ пурнынь-сэрнинь ошов. Эрявсь кой-мезе ускомс эйкакштнэнень. Ансяк кенеринь Олямезень сэрей кудост икелев лоткамо, каршом аволь васоло цитниця коня лавкатнень ёндо прянь-полдань синдезь каявсь киска. Аволь покш, аволь вишкине, чопода-шержей пона. Эль кенеринь машинастом лисеме, онгозь каявсь эйзэнь, пулосонзо юхаезь, чарась перькам, бажась нолштамс кедемм.

«Теке Кемай, — кивчк ютась прявам. — Арась, арась, те седе вишкине, те истяк, ёнонзо моли. Каня аламо эрьва кодат Пондакшт, Веркайть злыдардить эрьва кува. Мейле мезе, аламнеде моли Кемай ёнов?» — истя арсезь, эсь прянь идезь, лексезь-пувсезь кузинь аволь шождыне канстом марто ветеце этажс.

Куроксто валгинь мекев.

Ды мезе? Кискась туемадо эзь арсеяк. Учось. Учось, марявсь, монь. «Илязо уле Кемай, — таго кивчкадсь арсиця оскасом, — вельть уш сонзэкс прянзо вети». Кискась, пулонзо лангсо озадо аштезь, сельмень апак кончтне вансь лангозом. Каршом эзь кирнявто. Вансь нусманя вановтсо, келень ливтезь. «Арась, те аволь Кемай», — окойники сынь мельс.

Озынь, урновтыя моторонть, сыргинь таркастом. Кискась, ванан эйстэнь керш ёно чавачамонтень, — мельгам. Чиезь чии. Ютыя ошонь вейке куронть. Сон мельган. Ушодовсь Титов лемсэсь. Сон, содат, васня моли аловпандт, мейле, ошонь куншка ёнов, — веревпандт. Шкань-шкань варштнян чавачамонтень. Кемай — ней эзть кадово тень коряс кодаткак кавтолдомат — эйстэнь [209] эзь лиядо, чийсь зяро виезэ, келезэяк лиссь. Лоткан якстере тешкс икелев, сонгак лотки — полавтсы оймензэ. Кивчкади пижесь, сырган — сонгак ношксты. Мельганок вармакс ардыцятне вансть келень лисезь чиицянть лангс, бибикстнесть, пельсть, илязо лисе кажо. Зярдо ушодовсь веревпандт таркась, Кемай кармась, редия, аламонь-аламонь кадовомо. Пандонть пелевидьс пачкодезь, илыкезэ маштсь. Васня зяро-бути ютась молезь, мейле прась кинь леханть керш пелев. Монень марявсь, виень маштомс истямо чиемадонть лиссь оймезэ.

Теде мейле ютасть ковт.

Кемай ялгам марто истямо явовомась нейгак сельмем икеле. Сонзэ сельведте пешксе сельмензэ, сонзэ нусманя, пачкат ютыця вановтозо седейс пачколи нейгак. Чумондан, инзан эсь прям эрьва кодамо валсо. Эряволь, янксян, лоткамс, панжомс кенкшенть, ды, кода икеле эрсесь, Кемай кирнявтоволь ваксозом. Мекс мон сестэ истя эзинь тее? Кие тень эзь мере? Мекс пачтия истямо куломас? Сялдан эсь прям.

А весть марсинь: кискась урендиця пача, сон эрьва мейсэ ды эрьва кода бажи савтомс азоронстэнь кшикочомонь кис; улемс ломанентень ялгакс сонзэ кармавты пекесь. Те а истя. Малавгак а истя. Ломанесь тееви тензэ малавиксэкс эрьва ёндо. Пиненть пряудемс совить азоронзо чачозо, чинезэ, молевксэзэ... Истя сон тееви алкуксонь, «валонь кирдиця» ялгакс, кавонест истя сюлмавить нардев, а юксевиця сюлмос.

Ули валмеревкс: эрьва мезенть кисэ пандома. Питневтеме те моданть лангсо мезеяк а максови. Натой мездеяк апелеманть ды валонь кирдеманть кисэяк пандома! Седеяк покш питне веши видечинть кис аштемась. Кодат валдо, кенярксонь раштый тевть иля тее, — тонеть сави пандомс. А стяко чачсть-кассть неть видечиде кортыця валтнэ: паро теят — паро а неят. Казямот валтнэ, керязь керить! Эряволь чарькодемс лиякс: парось пандови паросо. Ансяк вана аволь чуросто лиссни кода ёвтазь, мекев-лангк. Ды ковгак теде а ношкстат...

[210] Истя лиссь Кемай мартояк.

Истяшка питне савсь тензэ пандомс вейкень кис — вечкиль. Вечкилинзе эрямонть, ломантнень. Вечкилизе азоронзо.

Тень кис...