Удмурт автономиё областьлэн 3 ар улэмез (Наговицын)

Удмурт автономиё областьлэн 3 ар улэмез Автор: Иосиф Алексеевич Наговицын

Кылдытон дыр: 1924, поттэмын: Гудыри : газет. — 1924. — № 34. — 1-тӥ бам. • 27-тӥ феврале 1924-тӥ аре Шоретӥ Удмурт клубын Наговицын эшлэн верам кылыз

Эшъёсы, мон обисполкомлэсь но коммунист партилэн обкомезлэсь ӟеч мылкыдзэ, ӟеч малпамзэ ас нимыным тӥледлы верасько.

Удмурт область усьтэм дырысен та кылем куинь арзэ асьмелы туж секыт азьын, юн ужано лыктӥз. Кызьы удмурт областьлэсь ужпумъёссэ юнматоно, ватсано, нырысь ик та ужпуме кутсконо луиз.

Революция лэсьтэм бере, быдэс республикаын но, сыӵе ик асьме областямы но заводъёс пичиесеныз кутскыса бадӟымозяз куаӵкамен кылизы. Со мында войнаез адӟем, ас вылаз чидам вылысь, крестьян но туж юн начармиз. Сельской хозяйствомы но мукет промышленностьмы солэсь ятыр уллань лэзькыны луонтэм интыозь лэзькиз. Вань совет власть понна ужасьёс, кызьы таӵе дуннеысь потны быгатыны, та ужпуме кутскимы.

1922-тӥ арын Совет республикалэн бадӟым азяз сютэм ар ватсаськиз. Асьме область пуӵкын но сыӵе ик сютэм ар вал. Та 1922-тӥ ар, ноку но вунэтонтэм секыт ар вал. Нянь ӧз ни окмы. Калык сурет сиёно луиз. Тросэз калык кут мактал кулны кутскиз. Та сютэм арез, коть кӧня солы пумит ужаны выризы, турттӥзы ке но, нокызьы но дугдытыны ӧз луы. Ужасьёслэн кужыменызы вормонтэм бадӟым, зӧк сютэм ар вал. Озь ке но, кӧня ке соня ужасьёс сое каньылатӥзы. Государство нянен сюдыса, люктаса, трос лулэз кулэмлэсь возьманы быгатӥз. Веранэз ӧвӧл, государство ке юрттоно ӧй вал, солэсь но трос мурт кулоно вал. Со сяна государство крестьянлы кидысэн но юрттӥз.

Со секыт аръёсты асьмеос ортчытӥм.

Со бордысен асьмеос нош улӟыны кутским. Каллен-каллен, пичиен-пичиен асьмеос табере азьпала мынӥськом. Музъеммы пумен бадӟым кизиське, пудо животмы пумен йылэ, мукет ласянь но хозяйствомы ӝутске. Та вадесын тросэз заводъёс (предприятиос) куаӵкамен кие кутэм макеос, государстволэсь вань бурзэ сюпсем вадес, асьсэос барыш сёто ни.

Сютэм ар хозяйствоез куаӵкатэм сяна, калык югдытон, калыклэсь тазалыксэ утён ужпумъёсты но пыд выӝыёзяз шуккиз. Школаос, больницаос туж юн кулэсмизы. Кызьы бен хозяйствомес юнматом, собере школаосмес, больницаосмес уноятом? Одӥг налоген гинэ хозяйствоез юнматыны уг яра. Налог ужась крестьян муртлы вӧсь карон маке луэ. Асьме область пуӵкын промышленностьмес барыш сётны быгатӥсь карны быгатыса, асьмелэн вань бурмы йылоз, соку асьмеос ас кужыменымы улӥсь муртъёсты вӧсь картэк, калык югдытон ужез пыд йылаз ӝутны быгатом, выльысь больницаос но усьтыны кужыммы сузёз. Табере, мынам тӥледлы, эшъёсы, вераме потэ на, кызьы, малы, мар понна Удмурт Автономиё область кылдытэмын. Калык пӧлын но, оло куд огез тӥ пӧлады но озьы вераськисез шедёз: удмуртэн ӟучен азьвыл но куспазы йырйиськыса ӧз улэ.

Со озьы ӧвӧл. Удмурт калык дунне вылын вань, со сыӵе ик улэ, шока. Удмурт калык пӧлын пиосъёс ӝыныез-ятыр ӟуч сямен одӥг но уг вала. Нылкышноос ньыльмос люкса, куинь люкетэз озьы ик чик но ӟуч сямен уг валало.

Эксэй правительство дыръя сыӵе векчи калыкъёсты ултӥяса возё вал. Сыӵе ик удмурт калыкез но ултӥяса возизы. Асьтэос тодӥськоды, удмуртлэн «синтэм шыр», «пурысьтам шыр» сяна мукет нимыз ӧй вал. Асьтэос малпалэ, кыӵе секыт вал удмуртлы власть ужпумын пукись муртлэсь сыӵе мыскыллямзэ кылзӥськыны. Удмурт калык — калленэз яратӥсь калык. Ноку но со ӟуч мыскыллямы пумит шур-шар, ӵож-вай ӧз выры. Со кылзӥз, сюлмаз возиз. Ӟуч калыклэсь кышкаса, солы оскытэк улӥз. Али но тыро-пыдо уг на оскы. Ӟучлы со ноку но ас куректонзэ, мылкыдзэ уз оскытскы вераны.

Власть советов вань улӥсь калык оскытскемен кылдытэмын. Солэн оскеменыз, солэн улэменыз со кужмо, батыр. Куке удмурт калыкен учрежденняосын ужасьёс солэн кылыныз вераськыны быгатӥзы, соку гинэ со соослы оскоз. Нырысь кутскись учрежденняосын удмурт калыклэн ас кылыныз вераськемез луэ отын сое валало. Уездъёсын но, областной учрежденняосын сыӵе ик мед луоз.

Та ужъёс пумысь советъёслэн 5-ез Областной съезд трос малпано, ужано луиз. Та берпум областной съезд удмурт кылэз ӟуч кылын одӥг интые, одӥг лыдэ пуктоно шуыса кенешиз. Удмурт школаосын удмурт кылын дышетыны косӥз. Кытын ке сузяк удмурт гинэ улэ, сыӵе интыосын учрежденняосын озьы ик удмурт кылын гожъяськыны пуктӥз. Со пумын обисполком но мукет область учрежденняос ужало. Кык-куинь толэзь улса съездын та пуктэм ужъёсты зэматом шуыса, оскиськом.

Эксэй правительство дыръя чиновникъёс векчи калыкъёсты, соос пӧлын удмуртъёсты но сокем мыскыллям бере, соослы дышетскем но умой-умой йӧтылымтэ. Эксэй правительство сомында улытозь, удмуртъёс пӧлысь бадӟым школаосты пырпотэмез ог дасо мурто но уг лыдъясько, ог сю мурт гинэ шоретӥ школаосты пырпотэмъёсыз шедё. Кызьы со ӧз керпоты сомында гинэ мурт дышетыса пыр поттыны.

Та вадесын асьмелэн удмурт областямы 4 педтехникуммы ини. Отын 500 ёрос удмурт пиналъёс дышетско. Куке соку соос гуртъёсы мынозы, калык югдытӥсь луозы. Бадӟым школаосын (университетъёсын, институтъёсын) пумолы быдэ ужпумъёсы 200 мурт дышетске, пырпотэм беразы, асьмелы соос пыд воштӥсьёс луозы.

Октябрь революци гинэ асьмелы школаослэсь ӧсъёссэс усьтӥз, дышетскыны эрик сётӥз.

Курадӟись, ужась муртъёслэн гинэ ас киязы кутэм, кырмем властьсы векчи калыкъёсты но мукет калыкъёсын ог интые пуктӥз. Дунне вылын улны ог кадь эрик сётӥз, ортчем калыкъёсты ӝоген мед сутозы шуыса, ас мылыныз, ас сяменызы, кызьы ке соослы лякыт потэ, озьы ужаны эрик сётэ. Со понна ас понназы автономиё областьёс кылдытъян юрттэ. Удмурт Автономиё Область но со понна ик кылдытэмын, пӧрмытэмын.

Дано мед луоз Удмурт Автономиё Областьмы!

Ужасьлэн крестьян тупан кусыпез мед юнмалоз!

Быдэс дунне вылын пумолы быдэ, нимолы быдэ улӥсь калыкъёс огзэсты огзы яратыса, куспазы тупаса ужаны мед кутскозы.