Поладкстомо (2016)/Томбавозь моро
| ←Поладкстомо (келей ёвтнема) | Томбавозь моро (2016) by , edited by Ломшина Л. А., Маризь Кемаль, Малахова Е. П. |
Ильтиця чилисема→ |
| Нуянь Видяз. Поладкстомо. Без продолжения. — Саранск, 2016. — с. 121—130 |
[121]
| Ёвтнемат |
| ТОМБАВОЗЬ МОРО |
I
Телень валске.
Апак капша сон совась вальматнева ды чатьмонезь, киньгак апак кевкстне, пештизе кудопотмонть. Валдомгавтынзе чопода таркинетнень. Зяро паронь арсемат ёвтавлинь тензэ, чинь ушодыцянтень, нардавлинзеяк прястом мейсэяк апаневиця потмура, лиясто натой раужо мельтнень. Валскень каштмолеманть колси [122] стенас понгавтозь радиось. Сонгак кундась тевезэнзэ. Мезде моторды, ансяк сонсь соды.
Шлинь-теинь, оршнинь, саия чокшне анокстазь кансткем ды ютынь кудыкелькс кенкшенть малас. «Ва-ай!» — лиссь кельпрястом. Варштынь меельцеде перькам. Шкаф, оршавксонь понгавтнемка, сёрмав стенатне, конатнень мартот вейсэ педявтнекшнинек шпалереэ... Токнось седеем, веньберть а удомадонть увнось, теке баяга, прям. «Весе, атя, весе, вастомазонок уш а мерят...» — арсезевинь седеень кериця ризксэнь марязь.
Удома нупальстэ, лангат каязь халаткесэ, чатьмонезь ютыть Тон. Стить каршом. Ванат лангозом сэтьме ды теке марто майсевезь вановтсо. Чачот, ванан, ловтаня. Тонгак, неяви, венть ютавтык апак удо. А валт, а энялдомат. Чатьмонят. А мерят — нолдык чумом. Лисни, эсь прят чумочинь теицякс а ловат. Лисни, а видестэ теян мон.
Панжия кенкшенть ды валонь апак ёвта увол-авол эскельдинь тарчкскенть трокс. «Чийнеме мельгат а карман!» — эзить кирдеве, серьгедить мельгам. Валот седейзэнь эзть педя, эзимизь ацирьгавто. Ёвтытькак сынст та-кода кежень апак савтне. Ялатеке талномат эзть кекшеве, вайгелеть сорнось, марявсть эйсэнзэ «кшнинь» гайтькеть.
Кр-р-рк! — кежейстэ мерсь мельгам кенкшварясонть панжомась. «Каня, алкукс зняро иень ютазь меельцеде маринь валот ды меельцеде лисинь те кудостонть?» — кивчкадсь превсэнь. Яла тень эзь кемеве, яла кавтолдынь.
Кудыкелькс. Тапардымим экше кошт. Седеяк нардевстэ куродымизь апаро мелявкстнэ. Ков ней молян, кинень пшкадян? Кшнинь чикорксось, прок кренчень нусманяс правтыця вайгель, путсь анардтневикс тешкс моросо валдомгавтозь вейсэ эрязь иетненень. Весе, мезе ульнесь парось ютксонок, — вейсэ, кавто вайгельсэ моразь моротне, вейсэ теезь кудонь тевтне, вирьга-лугава якамотне, ковонть ало вастневематне... — кадовсть амариця кенкшенть тона ёнов. Зярдояк сави а сави одс марямс сонзэ пачк тонь молевксстэ кашторксонть? Мезеяк а содан, а содан. Потсом сиземань апак сода эвтить, чарыть-велить ютазь чокшнень [123] покордамонь ёжотне, эсь прянь идема валот. Кавонек. Мон ды седейризксэм. Мейсэ пештямс теевезь чаво тарканть? Кода солавтомс потсом эй поколенть? А содан...
Вай, а содан, а содан, а содан, |
Казямосто ёвтазь лия валрисьмеяк сась мелезэм кустематнева валгомсто: «Сы шка, ды кумажа лангсо сат тень энялдомо». Кие соды? Эрямонь кись рашков, ламо тарадт эрьва ёнов туить эйстэнзэ. Арсекшнинь каня, зярдо васенцеде вастовкшнынь Тонь марто, истямо яннэс пран?
Валскесь совась вийс. Эскелить, бизмолдыть эсь тевест яксевтемга ломантне. Весе, теке коткудавт, кандыть, чиить, капшить... Ськамонзо велькссэм таймаскадозь ашти сэнь менелесь. Сон ды мон. Кавонек. Ушованть, юв-яв чаразь, велить ловтештинеть. «Аволь ламо кадовсь тенк икелем менчевемс-чарамс. Курок, кельме ёжот, ушодан пансеменк лейга-лушмова», — тандавтни, маряви, менелень азорось.
Эскелян састыне. Капшамс а ков. Кияк косояк эйсэнь а учи. Паряк, арсезевезь молемась тешксты, кодамо ёнкс саемс ды козонь кувшкадомс?
Ломанть, ломанть, ломанть...
Превсэяк киньгак арась, мезе, кодамо апаро лиссь ютксонок.
Тонь ды Монь.
Содыцятне кавонек.
Оно се, икелем молиця аволь сэрей, прясто-пильгс оршазь кедень оршавкссо тейтеренть потмоёжодонзояк кияк мезеяк а соды. Монгак а содан. Кодат мельть якить-пакить превсэнзэ? Кодат майсемат яксить мартонзо?
Юты шка, ды явомадонок кулятне пачкодить кой-кинь пилес. Ютыть сынь коволнэкс ды оймить. Истямо уш [124] уцяскаст: чачомс, срадомс ды венемемс. Чадыведь прок: шалны-теи ды таго сови кезэрень чирезэнзэ.
Паряк, кияк мейсэяк лезды тень? Каня, а муеви истямо ломань модамасторонть лангсо? Иля вешне. Ормась, конань минсь сыргозтинек, менстяви ансяк Тонеть ды Монень.
Ков ней ки саемс? Пароль улемс вармакс. Течи тесэ, ванды тосо. Сонензэ эрямо таркат вешнемс а эряви. Козонь стардасы весь, тозонь ойми. Те вармась. Монь тевтне лиятат.
Икельгам, кинть трокс, ёндолнэкс кивчкадсь ашине, прок чомболкске, псакине. Кевкстемс сонзэ: «Ули-арась лембе пизынеть?».
Мезе теемс, мон понгинь лей куншкас |
II
Тундо. Виртне сорныть нармунень кеняркстнэде. Пиже панар снартни каямс ланганзо модась. Мизолдыця турват, валдо вановт, кецтнемадо пешксе цёковонь морот... Весе сеерить: сась, сась тундо!
Умарьпире.
Одсто, самай вийсэ эрямо шкастом, озавтнекшнинь ней уш сормсевезь чама умарь чувттнэнь ды рацяня куракштнэнь. Кодамо паро мельсэ, валскень чинтень кемезь вачкакшныя икелест пирень кудыненть. Зяро мельть, зяро бажамот ульнесть сонзэ пурнамсто! Превскак эзь совсе: эрямонь кинть ули пезэ, сы шка, ды пачкоди сон домка, потмакстомо латко чирес. Теде апак арсе, содынь сеть мазый шкатнева вейкеде: икелев, икелев; удалов апак варштне ливтязь ливтямс сырнекс кувтолдыця валскень чинтень. Пачколинь истямо пежетьскак: те кудынесь ули тень таркакс, косо Музанть марто ояксчисэ эрязь чачтан ламо-ламо книгат... Вай, од шка, кодат сёлмот келейть! Ков ансяк а сайнесызь ломантнень.
[125] Сыре чувттнэ сэрейть ды латокс келейть. Анокт пургондамо. Ютыть зярояк чить, ды ашодонть маряви, валгить лангозост оймсеме ашо мацейть...
Окойники кундынь тевентень, мейс сынь: петнеме, пильсеме аэрявикс тарадтнэнь. Арсинь, те тевесь нардасынзе прявам яксиця стака мельтнень. Арась, эзть паневе тензэ. Лажан. Истят седеень разедиця ризкст, кавтолдомат ды оймеёжонь майсемат, конатат лакасть потсом валдодонть гайгиця те валскестэнть, эрямосом арасельть. «Мекс эряви манчемс, мекс зняро манчицятнеде ды валонь акирдицятнеде? Кодамо апаро теинь, мекс лия лангс полавтымик? Мекс?» — Неть мельтне-арсематне каразь карасть пряудемем, ды эйстэст эзинь муе тарка.
Тей, од шказом, сынь вечкевикс морот марто явомадом мейле. Сон, те морось, шольнесь пилесэм ды витнесь седеем зярыя иень перть. Г айгсь цёковдояк дошузасто ды секс неть иетне марявсть тень тундонь пиже ковокс.
Ансяк...
Истят уш, сави видькстамс, эрямонть коензэ: Ушодозесь певтеме а эрси. Сезевсь, прась, прок ледезь нармунь кевев моданть мештьс, минек мороськак.
Те модапанкскесь, пирявксонть ёжова сыреждиця балягатне, аволь васоло вирьстэнть пачколиця куконь кукордомась, менелесь — ульнесть монь. Ней тень неявить-марявить сувонь пачк: васолдо-васолдо. Неявить лиякс.
Умарьчувттнэ кунсолыть ушонть, арсить, кода ютавтомс сехте мазый шкаст. Лангозост ванозь, седеяк сювордавсь седеем. Сынь учить кенярксто пешксе шкаст, монень учомс а мезть. Паряк, куш тон, чукнггоровне, ёвтасак, мекс менель сэнынтесь истямо оланя?.. Евтык, энялдан, кода таргамс седейстэм сардокс пезнавозь «А содылинь, а содылинь: тон кадсамак майсеме» моронть певтеме нусманя лувонзо?
Ней монь тосо а учить, а учить! |
[126] Видезь-путозь, валанясто ангорязь пандянть лангс валгсь уськирей. Кодамояк лия нармунне пулосонзо истя а нури. Сон варштась тей-тов ды, эрязасто чийнезь, кармась карвонь кундсеме. Кие тандавтызе — сонсь соды. Либорк! — ды теке марто прок арасельгак.
Тарказонзо сельмем икелев тусто сув потсто с__ть-теевить Тон. Чачосот нусманячи. Сонзэ пачка мизолдозь ваннат монь лангс ды аволят, тердят эйсэнь. Сак, сак, нолдык чумом. Артозь турват ды сельметь, косо апак учо кирвазить ды налксезевить кенярксонь сяткинеть, мазылгавтыть эрьвань. Тонь жо мазычись истямо шкатнестэ ламолгады зярыяксть. Тердят? Те алкукс эли ансяк он, истя тень маряви? Эли, паряк, кивчк туиця нармуненть ладсо? Ульнесь-арась. Кундык азё:
Мон а содан, а содан, а содан, |
Тундонь меельце ков. Иенть весемеде мазый шказо. Секскак, монь койсэ, сонзэ эйстэ од иентькак эряволь ушодомс. Ансяк аволь тедеденсенть. Тарькс якшамодонть, налкставиця варматнеде мазычизэяк а кецневти. Ушосонть прок талаень раужо ды рудазов шкань сёксь. Лёмзёрксось кармась ашосо чадомо ковонть васенце читнестэ. Ней уш прядовома маласо. Сон, вант, яла яки ашосо. Пинге эрян — истямо тамашань тев неян васенцеде.
Чарькодить Тон, мезде кортан? Мезекс теде ёвтнян?
Аволь гувнояк ютксонок толось, вечкемань шканок, кеман, кувалгадоволь, таргаволь, сатоволь вейсэнь кинек прядовома видьс. Капшинек. Гурнозь палынек. Секс эзть сато виенек.
[127] Эрязасто пургондомась-касомась мазый. Кинь сельмсэ а верьгелить кенярксонь тешттне ашосо пургсезь лёмзёр чувтыненть лангс ванозь? Ансяк вельть куроксто юты те элякалемась. Мерят, менелень лекстявкс. Кавто-колмо чи, ды уш, ванат, ялгат-чувтынесь ацы эстензэ ашо чевте алкс.
Ламо майсемат ютасть монь прява,
Зярдо кенкшесь монь мельга сёлговсь. Кадовсть ледстнемакс меельце валот:
«Мон а карман чийнеме мельгат».
Эрьва ломаненть эсензэ обуцязо. Кода эрьва теленть, тундонть, кизэнть. Тоньгак эсеть. Валот — кшнинь. Сыремтезьгак а мендявить. Зярдояк а потат, зярдояк мелеть а полавтсак. Зяро ковт, зяро чить ды веть печтинь Тонь пельде кулинень учозь. Куш уськева чииця, чудикерьксэкс чольдердиця вайгелеть марямс. А куш а каш... Уды телефонось. Сыргозтемс сонзэ — вал кирдят. Монгак вийть а муян теемс васень эскелькс. Се покордамось, прок вачо киска, мельгам чийни, мейсэяк а паневи. Паряк, Тонь мельсэяк арась пачтямс вал? Мелезэть куш сакшнан-арась?..
III
Сёксь.
Чувттнэ сырнень казнеть казнить, сельметь кецтневтить аволь чи, аволь кавтояк. Лиясто жойнить те тюссонть ковшка. Паро улевель, седе куватьс таргавольть неть читне. Арась, тенень а улема. Эрьвантень максови ловозь шка.
Пиже валске.
Ламо этажс кудотне явавтнить удомаст. Ютыцятнеде аламо. Урядонь кирдицятне эзть кенере янтнэнь-тротуартнэнь лангсто тенсемс сёксенть палыця мазычинзэ. Молян, ды маряви пильгем алдо аволь кашторкс — салава шошныця вайгель: тыш-тусь, тыш-тусь... Ютан зярояк, таго теке казямо вайгелесь мельгам, таго [128] текеде. Келейгавтынь эскельксэм. Кодамо-бути мель, асодавикс ёжо пансь эйсэнь икелев.
...Кадык сан, сован... Мезе Теть мерян — мезе ульнесь, се зярдояк а ули? Полавтнемат, манчемат а кармить? Истя шождасто вадрялгалевельтькак ломантнень обуцяст, течис весе улевельть ангелт; пайстомот, полань микшницят, кежть, сельмень сявадомат, колсемат авольть уле. Мезеяк, цёра, а теят, а полавтат: мезе макссть тетянок-аванок, текень марто матедевтянояк певтеме удомасо. Макснить эрьва мезть: вейкенень — видечинь кирдема, лиянень — тень мезекскак а путома. Монь Пазом — сёрмадозь валом, книгам. Тонеть те — чаво тарка. Пазокс ловокшнытинь Тоньгак, лиссь оно мезе. Эно кода седе тов эрямс, кода пингенть печтямс? Икеле, зярдо тень сакшность пек чопода шкат, яла истя мерилинь: эряви эрямс. Ды эринь. Паряк, нейгак истя теемс: ёвтамс неть муницянь-колдовицянь валтнэнь ды поладомс мартот, теке мезеяк арасельгак, эрямонь кинть?
Минь апештявицят, яла тенек мезеяк ды а саты. Тон — сырнень кедь. Тон а вечкат лужалемс теваразде. Тон... Каня, лововить обуцянь паро ёнксот? Ялатеке аламо... Аволь улеяк эйсэть се зыянось... А саты се, мезде чиремсь вейсэнь венченек. А саты. Виде. Ансяк виде теяк: эрьва ломаньсэнть мезеяк ды ули истямо, мезе аволь эряво. Секскак... Ялгинем-сяткинем, мезе карматано тееме? Кода улеме?..
Истя арсезь, эзия редяяк, кода стясь икелем истямо содавикс ламо этажсо кудось. Аволь мон, прок сон шаштсь каршом ды арась икелем сэрейдеяк сэрей пирявтокс. Ютынь зярс чаво «сыречинь» эзементь вакска ды чопавтинь чоподань кирдий вейсэнь кенкшенть тона ёнов.
Этаж, омбоце, колмоце... Кузян апак капша... А содан, кодамо вий ветимим тей ды кармавты ловомс кузтемань чалгамотнень. Вейке, кавто, колмоце... Панжи-арась? Кудосо-аволь?.. Учи? Седеем мештезэнь а кельги, бажи менемс оляс ды чавомс седе сэтьместэ ды парос кемезь.
[129] Прядовсть меельце чалгамотне, зярыяксть эскельдинь ды эртевинь содавикс кенкшентень. Прок палмань стинь каршонзо. «Эзинь маняво?» — арсезевинь ды варштынь эйзэнзэ педявтозь цифранть лангс, конань зярдо-бути путокшныя монсь. Артокшныяяк кенкшенть монсь. Бажинь тень теемс седе валанясто, седе вейкетьстэ. Мелезэть туезэ. Содынь, кода вечкат эрьва тевенть тееме парсте ды мельспаросо. Ютнинь цёкинесэнть тей-тов ды кирдинь мельсэм: кецневтян, кецневтян... Тон зяроксть тень ледстнить: кадык кувать, стакасто налкставомас, сень кис теемс весть, одс секе тевентень а велявтнемс.
Кувакасто лекстинь ды венстия кедем баягинень ловнентень. Длинь-длинь-длинь! — каятотсь кенкшенть тона ёндо. Кудосат-арась? Панжат? Тук-тук-тук! — чави седеем. Мезеяк сондензэ башка эзь маряво. «Весе, чаво кудо...» — оймавтыя эсь прям ды уш сыргиксэлинь. Пильгем эзимизь нолда.
Учан. Секундатне марявить ковокс.
Тук-тук! — каятотсь потмо кенкшенть панжомсто.
Кашт. Ней, содан, панжицясь ваны лангозом «саразонь» сельминеванть: кие тосо?
Чи-и-ко-орк.., — мерсь ушо кенкшень панжомась.
Икелем аштить Тон.
Превтне-ёжотне човорявсть: кецнемс, авардемс, кутмордамс эли нусманясто варштамс лангозот?
Лангсот монень вечкевикс раужо тюс, рунгонь тапардыця ковтат, кудоютконь чопода-сэнь трикот. Пильгсэть тонь вечкевикс ашо понань кемтне. Теке арасельтькак башка-башка эрязь ковтне. Кодамокс ульнить се потмура, седеень разедиця валскестэнть, истямокс кадовить. Некеть коняс новолезь чертне, аламнеде пеедькшниця сельмтне, турватне. Истямокс Тон ульнить монь. Ней?
Коминь. Кундыксэлинь пильгем юкснеме.
Ужонтень, козонь свал путнилинь котам, путозельть монсетнень коряс ламодо седе покш котат. Келейть, кувакат, прок сокст. Пачкам, теке электричествань сятко, ютась пшти сэредькс. Кинь? Витемтия рунгом. Тон [130] ваныть лангозом. «Неть Вирязонь, цёрань», — оймавтымик валсот ды мизолкссот. Сэредьксэсь потась, таго коминь карсемкам юкснеме. Маряса, токимик лавтовс. Витеминь.
Ванан лангозот. Тон мекс-бути вакссот тулостонть саик раужо, якстере цецясо артозь пацят ды каик лавтовот ланга. Эзь чарькодеве — мерят-арась икелев ютамс? Кевкстнемскак а эряволь. Тон аштить каршон ведень кирдиця сёлтокс. Ков ютат?
— Ней мезе: чайнедеяк уш а симдьсамак?
— Теня, симневсть симнеманок... — калгодосто ёвтазь валсо видькстыть тень. Юв-яв превгам ютась мель: рестедезь панжомс кенкшенть ды ношкстамс марязь валтнэде ков сельмем неить, ялатеке истя эзинь тее.
— Тень кода чарькодемс?
— Истя, кода ёвтыя, — та-кода каштансто мерить каршом, — мон учинь эйсэть. Кувать учинь. Учинь, маряса вайгелеть телефонсто. Ней...
Тон нолдык прят. Саик кедезэть паця пенть ды нардыть эйсэнзэ сельметь.
— Ней азё мекев. Шкат ютась...
Истя прядовсь се меельце вастомась. Истя сезевсь мазыйстэ ушодозь морось. Ней уш зяроце ие чизэнзэ кавксть ардан кудот вакска, косо, зярдояк а стувтса, тонавтыть эйсэнь морамо омбоце вайгельсэ минек вечкевикс моронть.
Ламо майсемат ютасть монь прява, |
Ардтнян тонь кудонть вакска ды эрьваксть ванан се балкононь вальманть лангс, конаньстэ, лавтовонок марязь, ваннынек ошонть-коткудавпизэнть эрямонзо лангс. Вешнян вановтсон ды кеман, лисят варштамо. Превскак а сакшны: мезе, бути нейтян лия марто?