Эрзянь ёвкст (М. Е. Евсевьев, 1928)/30
| ←Ёвкс 29 | Эрзянь ёвкст (1928) , edited by Евсевьев, Макар Евсевьевич Ёвкс 30 |
Ёвкс 31→ |
| Эрзянь ёвкст (скаскат). Пурныньзе М. Е. Евсевьев. СССР-энь Наротнэнь Центральной Издательствась. Москов, 1928 |
ТЕЙТЕРЬ МАЗЫ КИЛЕЙКС ТЕЕВСЬ.
Эрясть-айшть атят бабат кавтонест. Ульнесть сынст колмо тейтерест. Атясь сустась тенст колмо паргинеть и мери „Азьдо вирев умарькс, — конанк веседе икеле пештясазо паргонзо, сень икелев мирьденень максса!”
Тейтерьнетьне саизь паргинетьнень и тусть. Вишка тейтерьнесь весемеде икеле пештизе паргинензэ и мери: „Патяй, адядо кудов, монь пешкец паргом!”
Сыргасть кудов. Патятьнень мельс апаро саинзе, — вишка сазорост сыньдест икеле мирьденень макссызь.
Ки ланксо покш патясь мери вишкиненьтень: „Тука, сазаром, прят чавсиса!” Сазорсь максызе. Сон чавсесь, чавсесь — сазорсь матедевсь. Патясь саизе ды маштызе. Дёготь ямас калмизе. Сынсь саизь умарензэ ды тусть кудов.
Кудосо тетятьне-аватьне кевстизь: „А сазоронк косо!”
Патятьне мерить: „Вирьс кадовсь: сееринек-сееринек тензэ, эзь пшкать тенек!”
Маштозь сазорсть ланкс лись мазы килей. Ютыть се килейсть вакска кавто скрипиньщик-бурлакт и мерить: „Эх, кодамо мазы килейсь, давай керясынек скрипкакс!” Сынь саизь ды керизь се килеень. Теизь скрипкакс и кармасьть эснэнзэ седямо. Скрипкась кармась морамо:
Ох, лелинем, састыне, састыне! Дёготь ямас калмимем, калмимем. |
Скрипиньщикне путызь скрипканть котумазост и тусть велес удомо:—„Кинь ортазо,—мерить,—панжадо, сенень соватанок удомо!”
Пачкоцть велес. Тейтерьсть тетянзо ортазо панжадо. Совасть сынь сонензэ удомо, скрипканть путызь лавця ланкс.
Тейтерсть тетязо неизе скрипканть и мери тенст: „Монень вельть апаро, седядо аламадо скрипкасо, паряк лучи ули.” Скрипиньщиксь саизе скрипканть. Скрипкась кармась морамо:
Ох, лелинем, састыне, састыне. |
Саизе скрипканть тетясь. Сон кармась морамо:
Ох, тетякай, састыне, стастыне! |
Мейле саизе скрипканть авась. Авасть кецэ кармась морамо:
Ох, авакай, састыне, састыне! и пев.
Терьдизь патянть и максызь скрипканть патястень. Скрипкась кармась морамо:
Душман патяй, састыне, састыне! Мэзень кисэ чавимек, чавимек? |
Патясь саизе скрипканть ды гайни каштоц ёртызе. Скрипкась теевсь гулькинекс, ливтясь каштоцтонть тетяньть пря пес и моры:
Вана косо тетям уды, |
Мейле ливтясь аванть пря пес ды кармась морамо:
Вана косо авам уды, |
Ливтясь патянть пря мес и мори:
Вана косо душман патям уды, |
Патясь мери: „Аштек мон тонть теветь тейса!” Солавць пачалго кузой ды путызе вальма ланкс. Гулькинесь морась, морась — валксь вальма ланкс ды педясть пильгензэ кузойстень. Патясь кундызе ды маштызе.