Поладкстомо (2016)/Стякшнось эсь раськензе кисэ

From Wikisource
Jump to navigation Jump to search
Стякшнось эсь раськензе кисэ  (2016) 
by Нуянь Видяз, edited by Ломшина Л. А., Маризь Кемаль, Малахова Е. П.
Нуянь Видяз. Поладкстомо. Без продолжения. — Саранск, 2016. — с. 336—353

[336]

 
СТЯКШНОСЬ ЭСЬ РАСЬКЕНЗЕ КИСЭ.
Александр Доронинэнь «Кузьма Алексеев» романдонть тешкст

ХХ-це пингень колоньгеменце иеть... Кеняркст-кецнемат од, поптомо-бояртомо, лепштицявтомо эрямонтень. Теке марто сельведть, венть самодонзо пелемат — илязт са мельгат ушкс-трокс кшнасо каркснезь вельть марицятне-неицятне; пельть, илязо лисе кургстот кодамояк «каршо молиця» вал. Валдо, кенярксто пешксе эрямо ды пайстомочи. Зярдо, кинь «царствовамо» шкасто сынь эзть эскеля кедте кедьс кундазь? Эскелясть сынь истя колоньгеменце иетнестэяк. Эрямо... Ульнесь истя ды карми улеме ванды, вандыде мейле, свал. Эрямонь неть кавто ёнкстнэде аксялов эли кудопотмарс а эцят.

Колхоз, коммунизм, тракторт, Осоавиахим, Челюскин, Чкалов, Стаханов, Сталин ялгась... — теяк колоньгеменце ды мельгаст лия, свал та-ков капшиця иетне. Сындест башка, марявсь, СССР-нь эрямосонть лия мезеяк арась. Весе: вечкемась, кудораськень тевть, эйкакшпинге, од шка, ашосо оршазь лёмзёркс чувто... — весе-весе сюлмавозельть неть, икеле амарсевиця валтнэнь марто.

Эрьванть, кие чульть-чальть, натой черень очкинесэ арсесь лиякс, учость чопода якшамо таркат эли эсеть кедьсэ чувозь кельме латко. Те уцяскась учось аволь ансяк колхоздо лиякс кортыцятнень, эсь раськедест, чачома кельдест арсицятненьгак. Неть иетнестэ ды седе товгак ведьгевень чарыця-велиця кевенть алов рикстедекшнызь эрзянь раськенть арсиця, превей ды ванькс ойме ломанензэ. Чесноков Федя, Арапов Ваня, [337] Кулдуркаев Яша, Рябов Толя, Рябов Олодя, Васильев Тюма, Маркелов Миша, Миронов... Революциядонть мейле кодат тештть кирвазекшнесть Эрзянь Масторонть велькссэ! Кирвазсть ды прасть отьмань чоподантень. Сизьгеменде ламо истят «тештть» аравтозельть ледемс ансяк Сарансо. Панжиковонь 22-це чинь вестэнть саизь сынст эрямост. Аволь аламо талант марто ды таланттомо эрзят ильтязельть тоначив ды СССР-нь лия ёнкстнэв. Кие ней ловсынзе, зяро превей ломанть чачтовольть эрзянь раськентень се шкань «террористтнэ», «раськень яттнэ» ды «кулактне»?

Якстерьстэ артозь ды сельведьсэ валнозь колоньгеменцетнень полавтызь а седе «мазыйть» ниленьгеменце иетне. Модамасторонь Омбоце войнасонть допрок одсто чавовсть сёрмадейть, поэтт, прозаикть, публицистт, шумбра-нардев цёрат. Те — Рогожин Лёша, Агеев Женя, Кономанин Петя, Батаев Паша, Зиньков Саша, Прохоров Стёпа... Стихест, поэмаст, романост, валдо мелест саизь мартост. Саизь тов, косто кияк ды зярдояк эзь велявтне ды а велявты.

Те сталинизманть васень Зыянозо. Теде башка, кить эзть понго кевень стака чаронть алов, кармавтызь морамо ве моронть: шнамс колхозтнэнь, «родной» партиянть, Сталин ялганть; лия тематнес эцнемс эзь мереве. Эрявсь сюлмамс, педявтомс колхозтнэнень мик вечкемантькак. Эрзянь литературань вийтнень сэвинзе шкань идемевсень толось. Лавшомсть. Кундамс тевентень ды невтемс эрзянь раськенть кувака-кувака пингень историянзо ульнесь а кинень. Ялатеке 1941-це иестэ лисекшнесь Куторкин Андреень «Ламзурь» стихсэ романозо, валдочинть неекшнизе Кулдуркаев Яшань «Эрьмезезэяк», конанть кис сёрмадеенть комсь иеть кирдсть Воркутлагсо ды косто нолдакшнызь допрок шумбрачивтеме, куломо.

Сындест башка, умонь шкань сувсо копачазь иетнес-пингтнес кияк, ловт, эзь совсе. Тень туртов эрявсь шка, вийть, валонь онкстамо маштыцят. Истяяк мерема: эрявсь содамс эрзянь умонь шкань аволь ансяк моротнень-урнематнень, койтнень-кирдатнень, васняяк, — келенть. Виде, 1937-це иестэ рузонь кельсэ нолдазель православиянть [338] каршо 1743-1745-це иетнестэ тюремадонть В. И. Костылевень «Жрецы» романозо. Толпандясо Васильев Несмеянонь пултамодо материалтнэнь лангс седе домкасто кармасть ванномо «оймеёжонь инженертнэ» 1990-це иетнень прядовомсто. Неть иетнестэ лиссь Абрамов Кузьмань «Олячинть кис» романозо. Эйсэнзэ ёвтневи тетянь-авань Масторост кис эрзятнень тюремадонть, Эрзямасонь Олёнадо, Боляй Акайде, Елушонь Бажатто, Харитонов Мишадо, Осиповдо... ды лиятнеде, сетнеде, кить виень ды эсь эрямонь апак вансто тюрсть чивалгома ёндо кайсевиця яттнэнь каршо. Ялатеке авторось умок ютазь шкань сеть ёнкстнэнь, косо невтевить православиянть верев-чопода тевензэ, келейстэ ды пштистэ, артонь апак вансто эзинзе невте, ютась вакскаст ушкс. Васенцекс, кие васов неиця вановтсо варштась «Пазонть пельде важодицятнень», весемеде «ванькс ойме» азортнэнь лангс, «чопавтсь» юткозост, ульнесь Доронин Александр.

2001-це иестэ Сарансо лиссь «Кузьма Алексеев» романозо. Эйсэнзэ, кода кортыть, «алга соказь» ды тевень содазь ёвтневи эрзятнень эрямо лувдост, обуцядост, покшчидест, Пазнэнь кемемадост, седе, кодамольть сынь 19-це пингень васенце иетнестэ. Ёвтневи Обран ош ёнксонь Терюшонь буень Сеське веледе ды перьканзо аволь аламо лия эрямо таркатнеде. Ловныцясь понгони натой С.-Петербургов, Рузонь империянь прявтошонтень. Книгасонть ёвтневи аволь ансяк велень зярыя эрицятнеде, сёрмадови весе эрзянь раськеденть, икелень шкань, мейле нельгезь мастордонзо — Эрзянь Мастордо. Ёвтневи чумочинь, зыянонь, нарьгамонь кандыцятнедеяк — Петербургсо, инязортнэде-чирязтнэде, епископтнэде ды ламо лия «кендялтнэде». Те ошось, те масторонь кирдий ошось, ламо раське лангсо прявтось тевензэ вети-якавты кавтолдомань апак сода: пурны покштояк покш каявкст-налогс, саи урекс-ушманокс цёрат, ружиясо-локшосо кармавты Христоснэнь, «Менель тетянтень», озномо, суди ды маштни... Тень теи икелень шкасто нельгезь оштнэнь вельде, сынст лангс нежедезь. Истямокс ульнесь Обран [339] ошось. Сон, эрзятнень кедьстэ нельгемадонзо мейле, 1221-це иестэ теевсь Нижней Новгородокс. Романонть ламо ёнкскетнесэ-лопатнесэ ёвтневи те оштонть, эйсэнзэ азаргалиця раужо пона, нулгодькс тевтнеде.

Алексеень Кузьмадо конёвт-ледстнемат, документт ванстовсть аламо. Секскак ламо откерьтне-геройтне, сонсензэ Кузьмадо башка, «вельмевтезь» превсэ. Истя, романонь койтнень коряс, ламолгавтовсть эрицянзо. Теке марто эйсэнзэ аволь аламо прявтт-ломанть, конатнень лемест-фамилияст кадовсть историянь лопатнес. Те — Нижней ёнксонь Руновский губернаторось, Грузинский князесь, Сергей Трубецкой, Родион Хвалынский, Сан-Приест графинясь, Вениамин архиереесь, Строганов микшницясь-рамсицясь...

Романось велькска пештезь ломанде-эрицядо. Тесэ од мезеяк арась. Истя ашти тевесь те жанрасонть эрьва сёрмадозьсэнть. Маряви, эряволь арсемс ды аламнеде киртямс сынст ламочист. Сестэ Петербургсо эрицятнень таркас седе ламо, покш тарка кадоволь велесэ эрицятнень, Алексеев Кузьмань эрямонзо невтемантень. Сестэ, паряк, седе домкасто панжовольть башка ломантнень, ды тень вельде весе раськентькак, обуцяст ды потмоёжост.

Книгасонть 400 малава ёнкскеть. Явови 14 пельксэв. Эрьвасонть тештинесэ явозь ёвтнеминеть, конатнесэ ёвтневи-пачтяви те-тона тевденть, кулядонть, шкадонть.

Романось явови лия авторонсетнеде, мезенть вакска а юты арсиця ловныцясь, гайгиця сюпав кельсэнзэ. Сонзэ вельде вастоват тундонть марто, ютыть седееть пачка кенярксто лакиця моронзо, марясыть-несыть чадыведьга эйтнень каладомаст-уемаст. Зярдояк авольть невтеве пертьпельксэнть иень шканзо, сонзэ ёжонзо, гайтензэ, улевельгак сёрмадеенть пельсчаво валкскептерезэ. Кодат ансяк валт эйсэнзэ арасть!

Эрявсь ойме совавтомс се шкань эрзянь келентень. Невтезь уликсчитнеде мейле ютасть 200 иеть. Келенек полавтовсь. Полавтовсь аволь ансяк валсо. Лиякстомсь кортамо лувозояк. Муемс эрявикс умонь шкань валтнэнь [340] неень валкстнэстэ, косо сынь аравтнезь алфавитэнь коряс, аволь ансяк стака, а муевитькак. Те стакачинть изнямо лездась «Сырнень човалят» книгась. Бадул (10 ё.), тавардомс (14 ё.), Каракш (21 ё.), надамо (53 ё.), усия (69 ё.), пежеть (35 ё.), балягат (35 ё.)... Весе сынь тосто.

«Тундось ков а путсынзе пильгензэ — тосо сырнень пандт цитнить, кува а юты — веенст кеняркст мельганзо. Васня сон паксянть трокс эскельдясь — сюротне истя пижелгадсть — лангстост вановтот а саеви. Тундось комась луганть элес — тозонь балягат кепететсть, виренть велькска ливтясь — нармунень тёжа вайгельсэ моразевсь, леенть трокс чалгась — калтнэ налксеме ушодсть...» (35-36 ё.ё.)

Ловнат теде ды неяви сон теть ломанень кондямокс, моданть лангсо весень-весень полавтыцякс. Тундонть чачонзо валонь азорось невти ламо метафорасо, гиперболасо ды эпитетсэ, секс истямокс неявияк: «...путсынзе пильгензэ», «трокс эскельдясь», «комась луганть элес», «виренть велькска ливтясь»... Лиясто кой-кона ловныцятне, сюжет мельга пансицятне, эскелить пейзажонь картинатнень трокс. А. Доронинэнь пейзажонзо вакска а ютат. Вановтот педязь педи эйзэст. Педявтыцясь — келень-валонь сюпавчись, поэзиясь, морось, конань эйстэ марявить пилень кутькиця-палсиця гайтть. Сынст мазычист, сынст лексемаст маряви эрьва эпизодсонть, эрьва тевсэнть.

Ютасть, тагояк ледстясынек, 200 иеть. Эрямось полавтовсь. Ней кезэрень Сеське велесэ, кона течинь шкань Васол Константиновань буесэ, эрзянь аволь кортамо, валгак а марят. Сыре ломантне содыть вейке: «Говорят, мы были мордва...» Меельце валонть ёвтасызь ускозь, «о»-нть лангс нежедезь, кувакасто. Одтнэ вана неть валтнэньгак а содасызь. Алексеень Кузьмань шкасто ломаненть эрямозо педе-пес сюлмавозель эрзянь келенть вельде пертьпельксэнть, виртнень-паксятнень марто.

Полавтовсть ломантне, кудотне, койтне, лиякстомсь келесь. Ансяк вана виресь нейгак ашти ды вансты веленть чикуншка ёндо, вансты, кода ванстась кавтосядт иеде икеле.

[341] Машинадо-мезде арсематкак арасельть. Видестэ тейсь сёрмадеесь: Сеське велень эрицятнень эрямост юты виртнень-паксятнень элесэ чачома чистэ саезь калмазырев кандома шкас. Ломанесь ды модась сюлмавозь нардев пикссэ сюлмос. Те пиксэнть сеземазо, мезе ней редятано, ветизе сонзэ, машинанзо-интернетэнзэ марто, поэзиядо пешксе оймензэ ёмавтомантень, теизе аволь мазычинь теицякс — мазычинь тапицякс. Ней ламот эрзятне покш диплом мартот, кой-кинь зепс а кельгстявить, моро тенст — а серьгедеви, а муевить ниле-вете валт мездеяк стихсэ ёвтамс. Вант, мезе теевсь раськенть марто, кона Алексеень Кузьмань шкасто, ды зярс-бути мейлеяк, кортась урьвань саемстэ чачома кельсэнзэ, текекс стихсэ-моросо пшкалесь озномсто Инешкипазонтень. Каня ней марят истямо мезеяк?

Келесь книгасонть шкань-шкань чольдерди чудикерькскекс, лия таркатнева лажны чадыведекс. Ловнат эйсэнзэ, ды та-косто васолдо пачколи пилезэть кувака моронь жойть.

Ламо валт совасть книгань ёнкскетнес лия масторсто сыцякс, сынь стувтовкшность ды полавтовкшность рузонь валсо: миле — весла, муюкт — уст, мия — бобр, пуня — рябчик, усия — остров, алтыма — бредня, мандо — палка... Книганть песэ — валкске. Аволь эряво теде ледстнемскак — эрзякс сёрмадозь книгасо эрзянь валтнэде ёвтниця валкске. Визькс, ды ков сельметь тейсыть. Корты сон вейкеде — чачома келенек кувсемадонзо. Весемезэ валкскесэнть «стувтокайтнеде» 115. Ламо! Асодавиксэкс ламонь туртов теевсь чуварось (песок), балягась (цветок), ватась (тесть), кедьксэсь (браслет), стуворось (стол), тынгаесь (снегирь)...

Валонь вельмевтемась — те келень вельмевтема, ванстома. Кецневти. Ансяк вана те паро тевенть теезь, авторось эрзянь кой-кона содавикс валтнэнь «рестеи» рузонсетнесэ. Вана сынь: апаметьсэ, цеця, Сеськина, буто, рана, корьмай, часия, фартук, стога, арази, сажень, сруб, поровт, праздник, святой, рай, народ, ождят, наряжамс, [342] простой, лемех, горя, просека, уголият, цютькес, сад, крута, бороцямо, живстэ, столь, бойка, край, надобия, корён, колоз, зверь, бувала, алаша (тат.), побаска, палка, рыжой, берёк, грабиця, доля, ряд, кругловой, стая, молотка, колия, богатырь, кодамо станок, поляна, ягуда, нужачи...

Весе, ловт, улить эрзякс! Натой аволь рузонь фартуконтькак ули эрзянь лемезэ — икельць паця. 18-це пингестэ истя, кода ней, эрзянь келесь эзь рузыякшно. Секскак «корьмайтне», «стогатне» «бойкатне», кинь пельде илязт лисе — авторонть эли литературань откерьтнень (геройтнень) — колыть се шкань кортамо лувонть ды келенть мазычинзэ. Колыть эрямопингень видечинть. Секскак мон, ловныцясь, эрян ловномсто аволь умонь шкань ломантнень ютксо, аволь Сеське велесэяк.

Нусмакавты ды рашты апаро мельть «Нишке» валонть сёрмадома коезэ (55 ё.). Косто сон саевсь? Кие чапицязо? Натой а содатано, кода видестэ, «ломанькс» сёрмадомс Пазонок лемензэ! Кодамо сестэ минь раське?! Ули теемавал (глагол) «шкинемс» — чачтомс, раштамс, максомс эрямо. Авакай-шкинекай, шкинем — истя мерильть эйкакштнэ чачтыця-триця аваст туртов. Пазонтень вана, Модамасторонть лангс-келес весень нолдыцянтень, мерить Инешкипаз.

«Нишкесь» — те Пазонь покордамо, кадык аволь рузтнэкс, «бога-матьсэ», ялатеке покордамо.

Превскак а совси: путомс кшнинь пирявкст омбо масторонь валтнэнь икельга. Зярдо эйстэст кой-конатне арасть эрзянь кельсэ, ды вельть видестэ пачтить те эли тона меленть, ёжонть, ёнксонть, чарькодеви, — совавтомат. Кортамось моли лиядо: рузонь валтнэсэ эрзянь валтнэнь шешкемадо. «Молотка», «колия», «богатырь», «кодамо стан»... Мекс аволь «мушкир», «пезавкс», «мараля», «чекажа» ды седе тов? Мекс кодаяк а кшувавтови кельстэнек рузонь менчевезь валось «арази»? Ули валкстнесэ кезэрь пингень чевтестэ ёвтавиця-гайгиця вал — «каня». «Каня тон эзик ловно Доронин Александрань меельце романонзо?» Мезекс, видеяк, те «аразись»?

[343] Весемеде покш питнезэ романонть — эйсэнзэ невтезь эрзятнень эрямост 18-це ды 19-це пингенть ушодомсто. Невтезь лангсост весе нарьгамотне, майсематне, покордамотне. Тень тейсть Нижноень-Петербургонь, велетнева прявттнэ-кирдийтне, сынст ушмодеест ды ушманост. Весемеде верев таргазельть-кепедезельть — неевлизь весе! — поптнэнь, монахтнень, архиерейтнень ды «пазонть пельде» лия кенгелицятнень валост-тевест.

Кочкарява раужо оршамкасо якицятнень чопода тевест апак невте рузонь ды лия масторонь книгатнесэяк. Каршо молицятнень сынь пултасть толсо, повсесть, керсесть пряст-пильгест, вальсесть мода потс, ойсевтсть пезавкс лангс, понгавтнесть пильгеде ... Истят томбамкст-нарьгамот (пыткат), маряви, эзть тейне 1941-45-це иетнестэ фашисттнэяк. Игументнэ, монахтне ды раужо ризасо лия якицятне — Алексеень Кузьмань рестедизь апак инзэде лазсто теезь верькстэме-латовтомо шкапс. Лазтнэс ушо ёндо, пачк чавнозь пшти нерь эскть. Шкапось аволь покш, ансяк цяк-цяк кельгезэ ломань. Эйзэнзэ пекстазь пайстомонть кирдить чи, кавто. Аволь озамс, козоньгак а нежедевияк — рунгозо сеске пицеви салмуксонь кондямо пшти эсктнес. Ламот пракшность ёжовтомо, верь чудсь чудикерькскекс.

Арась — арась, истят верев томбамкат эзь тейне а НКВД-сь, а гестапось. Череть стить теде ловномсто. 1979-це иестэ ульнинь Ленинградсо, Атеизмань музейсэ, те — Казанень соборось. Эйсэнзэ каськатнесэ невтевсть кедьёнкстнэ, конатнень вельде «духовниктне» вешсть видькстамот, майсевтсть ды куловтнесть «еретиктнень». Мезть тосо ансяк арасельть! Рисьметь, эрьва кодат ологат, керсемканть, клещат. .. А вана шкап, конадо яволявтсь 232-це ёнкскесэнть Доронин Александр, — арасель. Содамс, сонсь «рисовизе» эли ловнось костояк истят верень чудевтиця шкаптнэде? Монахтне, секень вант, гильотинань теицятнеде васов тусть, бути те пупсиця шкапонть арсизь сынь.

Мейсэ прядови эрзянь Инешкипазонтень Алексеень Кузьмань Кемемазо, покштянь-покштянзо коест кис [344] аштемазо, кить поптнэ-архиерейтне, — парсте невтевить «Васоло Сибирев» пельксэнь меельце ёнкскетнесэ.

Вана истя, ловныця ялгай! Вана кие православиясь — превс путыцянок, коммунизмадояк вадря эрямос, натой менельс ветицянок.

Сеедьстэ ды ламот сёвныть «Эрзянь Мастор» газетанть — келезэ рузонь. Лемесь эрзянь — келесь, келя, рузонь. Мекс, алкукскак? Э-хе-хе... теяк, те лавшодояк лавшо пештеськак а чулгови! А панжови те тувталоськак — мекс «Эрзянь Масторонть» велькска сиземань апак сода, чинек-венек чарыть вадовт ды карцигант. Мекс? Рузонь келензэ кис. Сёрмадовольгак сон эрзякс, ве вадовлевкскеяк вельксэзэнзэ аволь кадово, сеске срадовольть. Мекс? А улиндеряйть ловныцят, — косто ней сайсыть эрзякс ламо ловныцятнень? — сёрмадт, мезе мелезэть сы, сёвнок, кода маштат, «вере» эрицятненьгак, куш сонсензэ Пазонтькак. Кияк а ноцковттанзат. Ушодындерят сёрмадомо рузкс...

Лисевельгак «Кузьма Алексеев» рузонь кельсэ, авторонзо палявтомо кадовлизь, судтнэстэ аволь лисне. Кие сон, Доронинэсь, кодат «праванзо» истят «кулят» сравтнемс «святой церьковадонть» ды «святой тетятнеде»?! «Церьковась истят тевть зярдояк эзь тейне!» — меревельть тензэ неть самай «тетятне».

Истяяк, паряк, лисевель: зярдояк те книгась валдо аволь нее. Зярдояк! Сядо пирявкст путневельть икельганзо. Пекстызь жо Заварюхин Николай профессоронть историянь тонавтнема книганзо «насильственной христианизациядонть» сёрмадоманзо кис! Косо сон, анок печатазь книгась? Пултызь? Панжома экшсэ? «Кузьма Алексеевде» кортамскак а мезть: типографиянь кенкштне, улевельгак книгась сёрмадозь рузокс, зярдояк авольть панжово, зярдояк аволь са ловныцянтень.

Кажостонть лиси кажо.

Улевельгак эрзянь келесь шумбра, аштевельгак пильге лангсо... эрзякскак, содави, аволизь нолда романонть, эли вастовольть нолдамстонзо стакачить. «Ловныцят» «покш [345] кудотнестэ» муевельть ламо. Те книгась вере аштицятненень — кирьгас килькш. Сыненст эрявить озныцят-кемицят, мездеяк асодыця эрицят, чатьмониця реветь. Ней ризнэвтиця ёвтамо: эрзякс ловныцятнеде вельть аламо, паро, Пурнавиндеряйть сядошка-омбоце. Косто сайсыть седе ламотнень, зярдо чачома келенек школатнесэ ды эйдень кужотнесэ эль лекси, зярдо эзизь совавто программатнес ды а «ютави» натой «Масторава» эпосось. Теде арсезь, чарькодеви, мекс истя шождынестэ, «пирявкстомо» лиссь Доронин Александрань «Кузьма Алексеев» книгазо.

Умок ёвтазь: валдось чоподавтомо зярдояк аволь уле, ламось — Вейкевтеме ды седе тов. Диалектикань койтне кевде калгодот. Сынь а содыть полавтомат. Книганть ловномсто лисить сельметь икелев асатыкстнэ, ильведевкстнэ, лавшо ёнкстнэ. Сави меремс, эйстэст аволь аламо. Мезеяк а теят: покш тев, кодамо илязо уле, ильведевкстэме а кепедеви-путови. Сынст, кода кортыть, а нолдтни ансяк каштлангсо «майсевицясь». Сеяк манчеви: кувать аштевкшны вейке боканзо лангсо — невелявкшны псиденть.

Кодат сынь, пупорькшнематне?

Весемеде пек амазылгавтыть книганть логикавтомо ёвтнезь тевтне.

«Эйзюронь читнеде мейле алкукскак лембендсь, ды ялатеке кудо ракшатнень кельме очктнес а нолдасыть — потмост каясызь. Григорь Миронычнень савсь эльдтнень туртов ведь эждямс. Ниле парть натой» (21 ё.). Чадыковсто симдемс лишметнень лембе ведте? Кодаяк а кемеви.

«Атятне а стяко кортнесть: те чистэнть баранонть коняс вачкодть, ойтнес-велькстнэс сисем кургосо пачкодть!» (92 ё.) — стака нилемс те валрисьметь вельде ёвтазь арсеманть.

«...тесэ кинзэ лангс лиссь [?] вейкине цёрынезэ...» (94 ё.). Ёртозь «Козловонь» валось. Лиси: цёрыненть вейкине цёрынезэ.

«...Чись ды сонзэ перька чамапацякс тапардазь модась — вана кинь икеле сынь сюконякшныльть» (97 ё.). Паряк, киненьгак изняви те «ребусось», монень — эзь.

[346] «Кузьма уманть песэ чистэ удсесь» (104 ё.). Эряволь, паряк, «ульнесь».

«Миколь чатьмонезь кайсинзе начко оршамканзо...» (107 ё.). Одс оршнемадонзо а ёвтави. Те лангс апак вано, вейксэ киксэнь ютазь ёвтави: «...чиремсь апак кайсе».

«Сёксь... тюжакадсть сиртне ды килейтне, кальтне уш невелямо кармасть. Чинь куншкас виресь, вант, манейдезь манейди, чопоньбелев чувттнэ лакшторт-пакшторт ушолить» (114 ё.). Те сынь мезде ушолить «лакштордомо»? Вармадо, паряк, аволь 40°-нь туро якшамодо?

«Удалксот лангс, тейтерем, сюлмик. Тов а эцить» (116 ё.). Сёрмадомаль: «Удалксозот сюлмик...» «Лангс» — рузонь келень предлог («На задницу»), Эрзянь кельсэ сон вастневи чуросто.

«А уш кизэсь — сон свал гайтев-маней, чевгень певердиця. ..»(153 ё.). «Свал маней...» Лиясто кизэнь перть чипаесь прянзо а невтни пельтнень экшстэ. Пиземесь валозь валы. «Чевгень певердиця...» Кода тень чарькодемс?

«Важодемась калмс пансекшны...» (175 ё.). Мекс — а кортави. Седе сеедьстэ, секень вант, эрси мекевланг — максни сон, ды седеяк пек зярдо тевесь тееви эсь олясо, шумбрачи ды кеняркст.

226-це ёнкссонть невтеви теле, 230-цесэнть апак учо, «сюлмавкстомо» сеске тееви тундокс. Эряволь, маряви, 229-це ёнксонь кеменце киксэнть (верде ловозь) куш прядомс лотксема тешкссэ — колмо точкасо.

«Верьгизэсь апак учо велявтсь пандочирентень, косоль, нать, пизэзэ...» (228 ё.).

Пандочиресэ, ды седеяк... тельня, пизэть верьгизтнэ а тейнить.

«...телень удомсто стявтозь озимтнестэ ливтнесть кочкодыкть» (245 ё.). Кочкодыктне — вишка саразт. Сынь ливтнить ансяк лембе масторсто самстост ды сёксь ёнов тов туемстэст. Те нармунесь — ялго якиця. Аволь ливтнить, чийнить сюротнень потмова.

«Овто латков» пелькссэнть невтеви эрзятнень тюремаст Петербургсто кучозь ушмантнэнь каршо. 348-це [347] ёнкссонть Сауш Алексеев кулы... кавксть. Теде башка: «Сон эзь нее, кода леенть тона чирес лоткасть колмо солдатт ды эрзятнень сэтьмечист ванстыця цёранть кутьмерьс педявтсть пеель...». Тамашань тев: леень тона ёндо понгомс ломаньс.

Ёнкскетнень мельцек-мельцек, апак капша велявтнезь, валтнэнь-мельтнень сувтнезь, прат мельс: сёрмадеенть сюпав валкептересь аволь свал ветясь виде киява. Поэзиясь, поэтэкс улемась сайсть верькс, тертясть прозаикенть. Валтнэсэ налксеманть, философиянь арсематнень ды лирикань потавкстнэнь потс ёми, маряви, прявт мелесь: невтемс Алексеев Кузьмань аволь ансяк майсемадо, валдодо-чоподадо пешксе эрямопингензэяк, невтемс обуцянзо-чачонзо, потмоёжонь масторонзо. Те малав весе ёми валонь кесактнень юткс.

Валсо кемельдицянтень Пазось максокшнось невтемс эрзянь кезэрень шкасто саевть покшчитнень, одирьвань саемань, калмамонь... койтнень-илатнень, сынст мазычист ды домка смустест, невтемс сынст вельде седе келейстэ се шкань эрямонть.

Кизэнь вешнема чи, Норовжорчонь чи, Калядань чи, Тавунся, Эрьбань чи, Инечи, Велень Озкс, Раськень Озкс, Кудоюртонь Озкс... Сынст эйсэ икеле шкань эрзятнень эрямост, оймест. Сынст вакска ютазь, «сыре», умонь шкатнеде сёрмадомсто, парос а прат.

Сёрмадеесь вакска эзь юта. Колоньгемень котоце-сисемеце ёнкскетнесэ кортави Инечиденть. Ансяк вана эрь-ведемань-кецнемань чинть таркас ловныцясь каваняви евреень Пасхасо (36-37 ё.ё.). А кемеви. А кемеви, Терюшонь буень эрзятне, Сеське велень эрицятне вастнильть-ильтнильть Инечинть неекс. Кода эзть лепштя инязортнэ ды поптне, 18-це пингестэ эрзянь койтне-кирдатне допрок эзть куловтовкшно. Покшчитнень ютавтнесть церьковадо башкаяк. Тень кемекстамга, ледстясынек: Порсо (Борцова) велесэ, Сеське веледенть те аволь васоло, малав 19-це пингень меельце шкатнес тейтерьаватне (седе сыретне, маряви) оршнесть эрзякс. Ули тень кувалма [348] фото. Сядо иеде теде икеле, а мезть кавтолдомс, Инечись ды лия эрьведькс читне кувтолдсть пиземечирькекс.

Мекс а невтемаль алкуксонь Инечинь картинанть? Сонзэ эйсэ паро мельть, мазычи, кецнемат, пертьпельксэнть ды ломаненть ютксо нардев сюлмавкст. Ютавтомань лувозо — кода а кецнемс! — парсте ванстовсь книгатнесэ. Тосто сонзэ таргамальгак.

Прядовсь Инечинь таргось. Сась «ледстема чись». Арась истямо Чи. Ули лемень кундамо чи. «Ледстямонь чись — святой...» — сёрмадови 42-це ёнкскесэнть. Самай «святой»! Лемень кундамо коесь тагояк книгасонть пестэ-пес ютавтови православиянь койтнень коряс. Од, православияс вийсэ панезь эрзятнень калмолангост таштодонть аволь васоло. Тозонь калмсесть комсешка иеде икеле апак «крестязетнень». Калмазырьс самодо мейле ломантне, ёвтневи, вансть-кирдсть церьковань кармавтовкстнэнь неенсетнеде пек. Марсевсть, ды нейгак марсевить тоначив туицятнеде лайшемат; книгасонть — моравтыть (46 ё.). Валтнэяк «моравтомань», тунь аволь калмамонь.

— Мекс тон, норов, арасят?..

— Сюпавчи лиссь паксянтень.

— Мезде пелят сондензэ?

— Велень сюронть пурнызе.

Кинь лем кундсеви? Тоначисэ «эриця» авань, покштянь эли лелянь-ялаксонь? Кона ёндо, мезекс тезэнь Норовавась? Авторонтень седе пштистэ ды арсезь эряволь сокарямс «Устно-поэтическое творчество мордовского народа» книгатнесэ, варштамаль А. Шахматовонь ды X. Паасоненэнь сёрмадовксозост.

Седе икеле, 45-це ёнкссонть, ловныцясь вастови аймельгавтыця кавто валрисьме марто.

«Сеськинасо (лиякс мерезь, эрзятне — Н.В.) эсь кезэрень лазтнэс кемсть шабра рузтнэде пек...» Те мезе? Кодамо ингелькс мель?

«Кулозенть путнилизь чувтосто чапозь кандолазс, ускилизь калмазырентень, путылизь тумонь сэрей мукорь лангс ды истяня каднылизьгак».

[349] Мейсэ се шкатнестэ вачксесть чапозь кандолазтнэнь крандазс эли нурдс? Крансо? Кода истямо сталмонть путнесть тумонь сэрей мукорь лангс? Кода калмазырьс пачкодемадо мейле истямонть нолдамс калмонтень? Содамаль: чувто пряс понгавтнесть тельня кулыцятнень. Калмось а чувовиль. Понгавтылизь уловонть пачадо-нармунде тапардазь керь потс. Мукорь лангс... ловнынь васенцеде.

Виде лиятась: калмонь марнэнть лангс путнильть кулыцянть сэрьсэ-келесэ кудыне. Сестэ, содави, крёсттнэде эрзятне эзть марсеяк. Истямо ожадо човине тумонь чувтынестэ чапозь чапине ванстовкшнось Сарлей велень калмазырьсэ мик 1997-це иес. Теезель сон калмамонь те койденть ледстнемакс.

«Кузьма Алексеев» — роман. Секскак ловномстонзо те ломанесь стязо ловныцянть икелев прок эрий ды малавикс, неявост-марявост сонзэ вайгелезэ, чачозо, обуцязо, тевензэ, ёжонзо, бажамонзо.

Неяви-арась, сти-арась сон истямокс книганть велькссэ аштицянтень?

Васенце ёнкстнэсэ авторось максы тензэ истямо питнечи: «чевте седей ломань ды паронь арсиця». Неть мельтне-тешкстнэ седе тов кемекставить аволь покш пачтямосо: лиятнень марто сон лезды пайстомо эриця кудораськентень модань сокамо. Теке марто а пели каямс вал лепштявицятнень кис, апак пеле пельксты велень кирдийтнень марто эсь модаст лангс праватнень идемга. Те эпизодсонть панжови обуцянь лия ёнкс — апелема.

Ломаненть тевензэ, эрямонь бажамонзо мазылгавты, максы смусть Чачома Масторонь вечкемась. Сонстемензэ «превейдеяк превеентькак», теке киртязь сёлмо нармуненть, ёми кемемазо вандынь чинтень, олыть перьканзо певтеме ламо тюстнэ. Эсь Мастортомо ломанесь — паксява-кува пансевиця коське тикше. Алексеень Кузьма зярдояк, паряк, аволь стя раськензэ, сонзэ коензэ-кирданзо кис, аволизе вечкеяк Эрзянь Масторонть.

«Мештьсэнзэ гувнось чачома ёнксонь вечкематол...» — нерькстави ве таркасонть ламодояк ламо валтнэнь [350] ютксо. Те «гувноманть» ушодксозо, нарвамо пизэзэ — чачома велесь; Сеське веленть паксянзо-луганзо, чопода вирензэ, сонзэ пиземев ды маней чинзэ, эрицянзо. Розень кенерема шкасто Кузьма малав эрьва чистэ — седеезэ а кирди — сакшны уманзо лангс варштамо, кенярдозь ванны пертьпельксэнь мазычитнень ланга, моры седеезэ. Тесэ, те велесэнть, ушодови яннэсь ды тееви шканзо ютазь келей, кадык аволь валаня, кикс Покш Масторонь вечкемантень.

Эрямосонть, моданть-масторонть лангсо мелензэ ванныть тевень вечкицянть, стака шкасто тенень-тонанень лездыцянть, ламо содыцянть. Откересь-героесь машты тикшесэ ды седейс пачкодиця чевте валсо сэредицятненень шумбрачинь максомояк.

Пшкалесть тензэ тень кувалма аволь ансяк Сеське велень эрицятне — сокийтне-видийтне, сакшность лия таркастояк, эзизь стувтне судост верьга кандтниця сюпавтнеяк. «Велесэнть Алексеев Кузьмань ловсть колдунокс, эйстэнзэ пельсть». Ламо содамочинь вийдензэ, мелень ваномадо башка, натой кой-кить пельстькак эйстэнзэ. Ды зярдо, кодамо шкатнестэ эзть пеле ламонь содыцятнеде? Вана кодамо домка, келей вановт ды оймезэнзэ ламонь кельгстиця те ломанесь.

«Ломаненть содамга, кортыть, сэвема пондо сал». Секскак улезэ сон маласот, неявиксэкс седе ламо шкань перть ды эрьва кодамо тевсэ-лувсо. Вейксэньгемень ветеце-котоце ёнкстнэсэ невтеви озкс. Сонзэ ютавтомсто чарькодеви: Алексеень Кузьма педе-пес содасынзе эрзянь кезэрень ознома койтнень, сынст превейчист, содасынзе, седе тов невтеви, рузонь православиянть мелензэ-коензэяк. Сон ламо ловны Христосонь ды Христосто книгат.

Эрямонь, Инешкипазнэнь кемемань кис аштицянть вановтонзо седе келейстэ ёвтневить эсест велень Изосим монахонть марто вастовомадо сценасонть. Петнявкскень пес панжи кунсолыцянтень мельспаронзо: эрявить идемс покштянь покштянок озномань, лемень кундамонь, [351] тейтерень чиявтомань, тевень ветямонь ды ламо-ламо лия илатнень мазычист, ванстомс чевте, оймень эждиця эрзянь келенть. Лисни, се шкань эрицятнеяк чарькодекшнызь, эсь киськесэст марякшнызь церькованть, рузонь келенть вийсэ совавтоманть зыянонзо. Россиянь ды православиянь кирдийтне кода ансяк эзть тапа «язычниктнень»: валсо, тандавтнемасо, каявкссо, илевсэ, ружиясо... Тюрьмась эйстэст свал ульнекшнесь васень таркасо. Сондензэ нардев неже Рузонь Масторсонть мезеяк арасель.

Кузьмань урядызь «панжома экшс». Ёвтнемань те пелькссэнть невтеви раужосо оршнезь «пазонь ломантнень» алкуксонь, мазый валсо апак кекшнезь чамаст, сынст чопода, кежде пешксе оймест, Пазонь лемсэ кенгелемаст, сюпавчис правтомаст. Арсиця ловныцясь чарькодьсы: церьковась — те локшо ды ламбаськай. Сынст вельде кедькоморо саевить раськеть, масторт, модамасторось.

Варштындерят, содазь, книгатнень вельде, 13-17-це пингетнес, мезе тейсть крёстонь кандтницятне Европань чивалгома пельга, кавтолдоматнеде а кадови штелькскак. «Крестовой походт», «Ведьмань кундсемат», «Варфоломеень ве» — Европасо; «Староверэнь верень валома» — Россиясо. Кодат кавтолдомат! Аломанькс ловоматнень, оймень ды рунгонь раздематнень «танстест», монахонь машинанть «виензэ» эрзянь Ине цёрась варчнизе пестэ-пес. Кода эйсэнзэ эзть мерька, эзть чаво, эзть кортавто, прянзо эзизе максо, мелензэ эзизе полавто, аштесь кезэрень койтнень-кирдатнень кис.

«Мендямс» бажасть аволь ансяк эсксэ пельнемасо ды локшосо, валсояк. А стяко зняро кирдсть эйсэнзэ монастырьсэ, кирдсть мик Нижноень Вениамин архиереенть келиясо. Яла бажасть «крёстонь покштнэ» манямс, теемс «язычникенть» христианокс. Усксизь сонзэ Строганов купецентень, Макарьевень монастырень Корнилий игуменэнтень, уездэнь Грузинский прявтонтень. Та-кода а кемевияк — зняронь таркава совавтнесть «Россиянь ятонть». Паряк, авторось прядо верьга сайни. Ялатеке сави [352] нолдамс пежетензэ: видечинть юрозо а колсеви. Синодось ды перьканзо ваканонь нолсицятне аволь аламо вий, кежть, кенгелемат-манчемат путсть, мерема, кода нейгак, эрзятнень ды лиятнень рузыявтомантень.

Ламо таркава ветнемадо мейле Алексеень Кузьмань окойники нолдызь кудов. Кирдийтне арсесть: кардавсь, а карми седе тов ютавтнеме озкст. Эзь лисе сынст ладсо. Кадомс Инешкипазонтень кемемат — те кода таргамс мештестэть седееть. Кода икеле як Сеське ды лия велень эрзятнень тердтнесь Репештяв.

Шкась мольсь, ковтне полавтнесть ковтнень, иетне — иетнень. Кузьма ды сонзэ ёнксонь кирдицятне, зярдо кармась васодевеме перькаст ятонь кирьксэсь, сайсть мель кекшемс Овто латкс. Парсте анокстазь кирдиень-инязоронь ушмодейтне муизь тестэяк. Недявсь верень валомань тюрема. Кузьмань саизь полонс ды ускизь Нижноев. Яттнэнь марто вастовомась, эряви меремс, парсте эзь невтеве. Ялатеке эйсэнзэ панжовить литературань ды эрямонь откеренть колчинзэ, ломанень кисэ мелявксонзо.

Кие, кодамоль эрзянь койтнень кис аштицясь лангс ванозь? Авторось ёвтни: «Сэрезэ кавто аршинт ды 3 вакст. Черензэ ды сельмепонанзо чопода-ашот ды пек тустот. Сельмензэ сэнть, аламнеде... Судозо лапужа, пеензэ ашот ды келейть. Башка тешксэнзэ: вить пильгсэнть, лапанть лангсо, кувака аржо, кутьмерьсэнзэ пазонь тешкс. Кортамсто чиртни турват, вайгелезэ корсяня...» Истямокс «артызе» сёрмадеесь Кузьмань портретэнзэ Зубарев урядникенть, тюрьмань ванстыцянть валсо.

«Кузьма Алексеев» романось — эрзянь литературасонть покш уликсчи. Эйсэнзэ кувакасто-келейстэ невтезь эрямонть валдо ды чопода ёнксонзо. Авольть улеяк нолдазь ловозь асатыкстнэ, сон, паряк, теевель вельть ловновиця книгакс. Ламо ильведевкстнэ шождасто витевицят. Лавшосто, автордонть башка, важодсть рецензентэсь ды, васняяк, редакторось. Эряволь тенст пшкадемс эрзянь историянь содыця ломанненьгак.

[353] Романонть эряви нолдамс омбоцеде. Витнемс асатыкстнэнь-ильведькстнэнь, ды сон тееви эрзянь историядонть пек паро книгакс.

«Сятко», 2005, 7—8 №