Эрзянь Мастор/2004/16/Раздолькин мирэнь чемпион

←Казнекс - сырнень суркст!

Эрзянь Мастор, № 16 (191), 25 августа 2004 edited by Нуянь Видяз, Кшуманцянь Пиргуж Раздолькин мирэнь чемпион

Вадим Илькаев→

Статья на сайте газеты: № 191, 25.08.2004, Раздолькин мирэнь чемпион

 

Раздолькин мирэнь чемпион. (спорт)

Вена ошсо ютавтозель мастертнэнь ютксо дзюдонь коряс мирэнь чемпионатось. Медальтнень кисэ бороцясть мирэнь 44 масторонь тыщадо ламо спортсмент. Россиянть ды минек республиканть спортивной честензэ идесь Мордовиянь содавикс спортсменэсь Виктор Раздолькин. Сон — самбонь ды дзюдонь коряс международной классонь спортонь мастер. Чачсь-кассь Отяжелень буесэ. Комсте ламо иеть служась Вооруженной Вийтнесэ. Армиясо службазо кеместэ сюлмавозель спортонть марто. Виктор Раздолькин ЦСКА команданть кисэ пельстакшнось Россиянь, Советской Союзонь ды Европань чемпионатнесэ. Сонзэ ламо изнявксонзо — сырнень, сиянь, бронзань. Кода эсензэ, истя командань пелькстамотнесэ. 1979 иестэ Виктор Раздолькин кармась Европань чемпионокс. 2003 иестэ сон изницякс ульнесь Россиянь ды Европань чемпионатсо. Сиянь медаленть саизе мирэнь чемпионатсонть, кона ютавтозель Япониясо. Тедиде вана кармась россиянь чемпионокс ды топавтызе бажамонзо — Австриясо саизе мирэнь турнирэнь «сырненть».

Эряви меремс, те турнирсэнть Виктор Разолькин эсь сталмосонть (малав 90 килограммат) ульнесь весемеде виев. Тесэ пелькстасть 22 спортсмент. Сон киненьгак эзь изняво. Шождасто ютась финалс ды кармась изницякс. Сырнеденть башка те турнирсэнть Виктор Раздолькиннэнь максызь «За вклад в развитие борьбы дзюдо» медаленть. Витькстамо, истямо казненть канднить мирэнь ансяк ниле спортсмент.