Поладкстомо (2016)/Элина патянь ёвтнематнестэ
| ←Стямось аволь прамо | Элина патянь ёвтнематнестэ (2016) by , edited by Ломшина Л. А., Маризь Кемаль, Малахова Е. П. |
Оня цёрась а берянель...→ |
| Нуянь Видяз. Поладкстомо. Без продолжения. — Саранск, 2016. — с. 278—291 |
[278]
| ЭЛИНА ПАТЯНЬ ЁВТНЕМАТНЕСТЭ |
Ульмайть
— Киньгак иля кунсоло. Икелеяк эрсильть эрьва мезть. Вастневсть салсицят-колсицяткак. Аволь зняро, кода ней, ялатеке ульнесть, — Элюш патям, тетянь сазорозо, мекс-бути укстась ды мизолкс марто варштась сельмезэнь. — Ульматнень содасыть? Эзить стувто?
— Эно кода.
— Виряй цёраст аволь тонь шкань? — чевте, истямо тень малавикс вайгельсэ таго пшкадсь сыре патям.
— Сон мондень покш. Ветешка иеде.
— Марсить-арась, мекс тенст истя мерить? Ульмайть? — кевкстницям сельмсэ кирвазсть пеедькшнемань сяткинеть, чамаумарьсэнзэ налксезевсть яндавинетне.
— Сестэ, седейпелькскем, кунсолок, ёвтнеса.
Элюш патям озась седе видестэ, варштась верев, прок тосо, велькссэнзэ, сёрмадозельть сеть тевтне-кулятне, конат ульнесть кавксоньгеменде ламо иензэ перть. Варштынь чамазонзо, ды юв-яв ютась прявам мель: «Мазый ульнесь авась, кадык иетне румтызь мазычинзэ, ялатеке мезе-бути эйстэнзэ ванстовсь. Вайгелезэ кодамоль! Нейгак, вантая, гайги, теке одонь...»
Арсезевсь ды ушодсь ёвтнеме:
— ...Те ульнесь «вейсэнь эрямонть» теемадо икеле. Иесь мельсэнь эзь кирдеве. Ванстовсь превсэнь теке: модась ульнесь явнозь, эрьванть умазо эсензэль. Кизэсь коськель. Ялатеке сюротне палокшность а берянть.
Апарось, конадо ёвтнян, лиссь нуема ланга.
Весть валскень чоподава Онай Миколь сась нуеме. Варштась цёрась модапокольнень пес содавикс уманзо келес, ды саизе апаро. Петкань-петкань путнезь пулттнэнь ланга теке кодамояк чопода вий ютась. Кой-конат правтнезельть. Аламолгадстькак. «Мень тамаша?» Ацирьгалесь-ацирьгалесь, саизе тарвазонзо ды кундась нуеме. Истя сон аламнеде оймавтызе седейризксэнзэ.
Чинзэ валгома шкава Миколь уш кудосоль.
Вензэ сазь сыргась Кевев паксяв, тов, косоль умазо ды косо чинь-чоп нусь розь. Сыргась аволь ськамонзо, саинзе шабранзо, Олёбань Дригань ды Ашаень Пумрань. Пелеве малава цёратне ульнесть таркасост. Сынь валгсть уманть маласо лугасо вельтязь лушмонтень, мусть озамо таркине. Алгаст каясть мартост саезь нулат-валат. Кармасть учомо. Кортнесть-згилясть аламос, ды кавтотне эйстэст чиремсть оймсеме.
Курок каятотсь сиземадо мейле удомань корнома. Сон колызе менельганть нерьгстнезь тешттнень эль марявикс морост, сорнозевсь эйстэнзэ мельгаст ваныця ковось.
Миколь эзь удо.
Ашолгадома ёнов марявсь тошказь ладсо кортнема. Мельганзо сеске паркстась, колызе вень [280] каштмолеманть, лишме. Ванстыцясь чарькодсь: кинь учость — састь. Чатьмонезь сыргозтинзе лиятнень. Пря бажасть а невтемс. Вансть ды учость, мезе кармить тееме «апак терде инжетне».
Зярдо улавось, кона ашолгадомань сувонть пачка неявсь латокс, вачкавсь, цёратне каштмолезь лиссть ванстома таркастост ды колмо ёндо куродызь сетнень, кинь сявадсть сельмест лиянь парочи лангс. Содызь истятнэнь сеске — Кемаень Вишкай ды кемнилеешка иесэ цёрынезэ.
Вишкай тандадсь. Келезэ кундатотсь. Эзь сода, кода ды мезе меремскак. Окойники сась ёжос, кортамонь таркас кокнозевсь.
— Ды-ды тынь косто саевиде, цёрат? — ульнесть васень валонзо.
— Те тон ёвтык, кодамо вардо тей кшувавтынзеть! — рангстась Миколь ды каявсь Вишкай лангс, кундызе кирьгапарде. Цёрынезэ, прок кискалевкс, чаразевсь перькаст, лайшезевсь. «Тетяй, тетяй!» — пижнесь сон пиже-ожо вайгельсэ.
Кие соды, мезе теевель виев-покш, теке овто, Миколь камажа Вишкай марто, аволизь идеяк тонань Миколень ялганзо. Окойники явовсть. Умань азорось лаказь лакась кежтнеде, кода ансяк эзь мере салыцядонть.
Улавонть сыргавтызь-ветизь Миколень умас. Сёвнозь-ацирьгалезь, пулттнэнь вейкень-вейкень валгстнизь крандазстонть ды стявтнизь кода эряви, ветень-ветень, копаняс. Кундыцятне колмонест озасть салыцятнень чаво крандазс, ноцковтынзе Миколь ведьметнень ды цяр ардозь сыргасть велев. Салыцятне нурьк-нурьк сыргасть мельгаст. Ялго. Кармакшнось уш ашолгадомо
Чинь ютазь Эрьмезь велень атятне пурнавсть атянь эземс. Сынь, аволь кувать арсемадо мейле, апак кавтолдо састь ве мельс: Кемаень Вишкаень ютавтомс визьксэнь киява — велень кувалт. Те тевенть топавтомс валске.
...Куринкань юткова киванть прянь нолдазь лыки-эскели чаво крандазс кильдезь лишме. Вить ёно ажиянть пес кедте сюлмазь Вишкай. Прязо пондакш. Раужо [281] черензэ ды сакалонзо апак судря. Сэксэв ашо тюс панарозо нолдазь понкстнэнь ланга. Эскели челькев киванть кепе. Лавтовонзо трокс каязь вейс сюлмазь розень кавто пултт: икеле ды удало. Лишменть вети Вишкаень цёрынезэ. Ютыть неть кавто пайстомотне колмо-ниле кудот, серьгедить верьга вайгельть:
— Мон салынь сюро! Мон — ор!
— Мон салынь сюро! Мон — ор! — сеерить вейкень-вейкень полавтнезь. Весемеде пек гайги цёрыненть пшти, теке уро, вайгелезэ:
— Ор мон! Ор мон!..
Шкань-шкань тетят-цёрат лиякстомтнить «морост»:
— Мон са-а-лыця!
— Мон са-а-лыця!..
Вайгельтне сравтневить веленть келес. Весемеде пек киртась Вишкаень ёжонзо «салыця» валось. Серьгедьсы, ды валови эзганзо пси. Турванзояк те пижнемадонть коськсть. Марявсь, пе а ули нарьгамонь кинтень, певтеме кувака велентень. Эскелясь прянь нолдазь, пельсь — кияк илязо вастово. Эрдекстась эсь прянзо весемеде покш ильведьксэнзэ кис — ламо эйкакшт нолдась; эрдекстась нинзэ, кона жигардызе саламонь тевентень; сялдсь-сюдось эсь уцясканзо. Апаро мельть тензэ сакшность кундыцятнедеяк. Мезеяк а теят, тундонь эй лангс эцицясь свал чумонды лавшо эенть.
Совась удемезэнзэ од мель: кирьгапарень разедиця, седеень раужкавтыця валонть — салыця — полавтомс седе ингелькс ёвтазь валсо. «Кода, мейсэ сонзэ полавтомс? — яжась превензэ. — Косто муемс те идиця нежиненть?» Мекс-бути ледстизе эйкакшпингензэ, читнень, зярдо ульманзо марто чоп, мездеяк лиядо апак арсе, аштесь Веждей чиресэ.
— Пултт мон ульми-инь! — серьгедсь Вишкай кецнезь.
— Пултт мон ульми-инь! — поладызе сонзэ эчке вайгеленть цёранзо човине вайгельнезэ.
Цёрынесь бажась седе эрязасто ютамс визькскирдемань кинть. Теке марто сон содась: эрязкалемась [282] стяко а юты. Пачкодиндеряйть атятненень шкадо икеле, ютавтсызь те кияванть омбоцеде. Ансяк илязт маря! Пакшась салава, кекшнезь эрязкавтнесь лишменть, истя мелявтсь тетянзо кис, шождалгавтыксэлизе пайстомочинзэ.
Пачкодсть Онаень видьс. Ульнесь-арась кияк кудост икеле, вансь-арась кияк вальмава, Вишкай эзизе нее. Сон седеяк нолдызе прянзо ды вансь ансяк пильгензэ алов. «Ансяк илязт серьгеде! Ансяк илязт серьгеде!» — яла карась превсэнзэ мелесь. Ютавсть Онаень икельга, ды цёрась седе шождынестэ таргизе оймензэ. «Кодаяк, кодаяк, ней уш аволь ламо кадовсь...» — оймавтсь эсь прянзо Вишкай.
Чинзэ куншкадо мейлес «раужо» крандазось чарась-велясь велень вете куринкатнень юткова. Салыцясь чуросто кепсесь пря. Весемеде пек скирятотсь седеезэ, зярдо вастневсть тензэ ломанть ды зярдо эйстэст кой-конатне ушолесть сюдомонзо. «Эх! Мейсэ, кода потомдасыть истятнэнь курговаряст?» — арсесь ацирьгадозь. Савсь тензэ марямс-неемс эрьва мезе: цюх сельгенемат, раксемат, згилямот, визькс валткак.
Чизэ тусь аловбандт. Прядовсть Вишкаень мадеманзояк.
Сы чинь валскестэнть веленть абунгавтызе чопода куля: Кемаень Вишкай повизе прянзо.
Се кизэстэнть саезь Эрьмезь веле ёнов молиця китнева ютасть ламо ломанть: веенстнэ — тов, лиятне — мекев. Ламо ведь чудесь веленть кувалт капшиця Кирданов лейневантькак. Ламо мезесь полавтовсь велесэнть. «Кемаень» кудо лемеськак кирдевсь-кадовсь ансяк сыретнень пряудемсэ. Седе одтнэ эйстэнзэ эзть марсеяк, содыть тунь лия кудо лем — Ульмайть.
Седе тов а ков
— ... Нарьгасть, цёрам, лангсонок эрьва кода, кие понгсь ды кода маштсть, — стакасто лекстясь Элюш патям. — Эзь тейне тень ансяк се, кинь арасель мелезэ. Мезекс ульнесь эрзянь авась? Чаво таркакс. Мерькасть эйсэнек эрьва ёндо [283] од шкасто, эзть лово ломанькс колхозтнэде икеле, мезекскак эзимизь путне сынст теемадо мейлеяк. Пшкадемс кисэнек ульнесь а кинень. Цёранок, мирденек, лелянок-ялаксонок ванстасть оймамонь апак сода та-кодамо «родина». Ве войнась прядови, вант, омбоце кирвазтить...
Шказо кизэль.
Молинек вирев.
Мезде-бути арсезь, синдтрян-кочкан коське тарадкеть. Пенгекс. Ашти мельсэть, мезе лиснесь сирттнень марто Ине войнань васенце иестэнть? Сисемшка теть ульнесь, кода а мельсэть. Телесь якшамоль. Атявтом ледстнемга, истят зярдояк арасельть. Тензэ кавксоньгеменде ламоль. Сирттнень од, иень-кавтонь тарадост весе пултакшнынзе. Кизэстэнть коськсть.
Синдтрян, монсь текеде арсян: мезде ванды андомс эйкакшом, мезе путомс икелест? Содан: почттнэде кадовсть кавто коморот. Мезе карман тееме седе тов? Мезе, мезе... Сюконян пиципалакстнэнень. Ков молят? Сави. Яла ямнень кондямо мезеяк пидян, яла пекест эцесызь.
Шпанк, шпанк-шпанк!.. — маряви коське тарадтнэнь синдтремстэ. Истят гайтть, тыжнэмадонть башка, лиснить начко пенгень паломсто.
Шпанк, шпанк!..
— Штраф плати! — теке ружиясто бахадсь пилем велькссэ пурьгинень вийсэ цёрань сянгора вайгель. Седеем тоцк мерсь. Тандадомадонть цяк эзинь ландяво.
— Ава-ат! — рангстынь пиже-ожо вайгельсэ вирень келес. «А-ат!» — серьгедсь каршом виресь.
Пешкс куракштнэнь юткова уцорсо чийсть ялгам.
— Вай, те мезе, те мезе моли? — шалнозевсть сынь.
— Ды оно, штраф веши, — сынь ёжос мон.
Вирень ваныесь содась эсензэ — пштистэ вансь лангозом ды рангсь:
— Штраф, говорю, плати! — содась эсензэ вирень ванстыцясь.
— Какая тебе штраф, косто сайса? — эзинь максо пря, пелькстазевинь мартонзо.
— Топоромгак арась. Каня а неят — кедьсэ Синдтрян?! — набойгадынь, серьгединь сонзэкс ды венстинь чаво кедем.
Перькам тапардазель пикске, конасонть мейле сюлмиксэлинь тарадтнэнь.
Ванстыцясь, раужо черь-сакало, теине сельме атя, вырк юксизе-ноцковтызе сюлмсема пикскенть.
— Штраф плати! — уш зяроцеде серьгедсь текеде, прок арасельть лия валонзо ды прок а содыль — кодат ярмакт вирев сыцянь?
Кежтнеде чамазо кирвазсь, якстерьгадсь, теке верде пешксе кендял. Ялгам шалнозевсть монь кис. Кува эрзякс, кува рузкс снартнесть совавтомс прязонзо: штрафось — а мезень кис. Эзь лезда. Мон уш истямо мельскак пракшнынь: сонзэ аволь весе кудосот. Кода илязо уле, пикскем эзизе максо.
Пурназь-анокстазь тарадкем савсть кадомс. Мезе теят вельмевтеме? Беньк-беньк сыргинь кудов чаво. Ялгам канст кандыть, мон... Зярдо истя ульнесь — вирьстэ чавонь кедть?
Лисинек кизэнь самонтень кецниця вирьстэнть.
Мольтяно, мольтяно, кияк эйстэнек варшты удалов: кели-арась мельганок раужо пона идемевсь рузось. Теке ськамонзо лытыця верьгиз, вайгельбешкань тарка эскелясь пулопесэнек. Мейле та-ков ёмась, мерят, кинть чирева лымбиця розенть потс чопавтсь.
Пиретнень удалга яннэванть пачкодинь кудов. Ютынь кардазонть пачка ды лисинь ушов. Вальмало, пиже луга лангсо, налксесть цёрынем — Миколь ды Вася. Важдаст Аню тейтерем. Неинь сынст, ды кенярксонь ёжось айгизе потстом апаронть. Теке басом тандавтымим мель: мезе муян ярсамс псакинекс неть налксицятненень?
Совинек кудос.
Шказо чикуншка.
Пурнынь ярсамс. Путынь пекше лопасто кши, таргия каштомсто чугунонть ды каинь пиципалакс ям. [285] Ашолгавтыя ловсынесэ. Совавтынь пирестэ зяро-бути чурькапрят. Ярстано, монсень седеесь лажны: те кодамо ярсамопель касыця эйкакштнэнень? Тикше ведь...
Эзинь кенере ярсамодо мейле нардамс стуворонть, голдорк мерсь кудо кенкшесь, ды тарчксонть трокс эскельдясь... вирьазорось. «Инешкипаз, Верепаз, тень кодамо давол кандызе? — талакадынь, эзинь сода, мезе меремскак. — Косто мукшны идемевсесь истят аломанень понат?»
— Денег нет, плати вещами. Иначе акт напишу! — таго кундась тандавтнемань морозонзо.
— Бабань пеште теть а эряви?! — ёртынь каршонзо ды невтия, мезе те истямось. Ней аволь вирьсэтяно, эсень кудосан.
Анокстакшнынь Мишай лелятень фронтов кучомс раужо понань — течинь чис мельсэнь — лембе цюлкат. Сынь понгавтозельть стенасо. Рединзе «инжесь». Табор ноцковтынзе таркастост!
— Мон невтян теть цюлкат! — серьгединь верьга вайгельть ды весе вийсэнь автордынь кедьстэнзэ. Тевезэ эзь лисе.
Кониксэ озадо аштесь атявтом. Сон вансь, мезе моли, чатьмонсь. Ней педясь сонензэ: каить пильгстэть понань кеметь ды весе. Атявтом сырель, тия-тува якицяль. Ялатеке рузонтень прянзо нарьгамс эзизе максо. Истят валт ёвтась, тона сеске кургонзо пекстызе. Туемс мезеньгак апак сае ялатеке мелезэ арасель.
Пе путсь атявтом, сыре Астай. Таргизе ансяк сонсь содыль козонь путозь суликинензЭ, ноцковтызе потомксонть ды нуртясь кедьгинес эйсэнзэ уликсчиденть. Мон венстинь колмо-ниле чурька лопинеть. Эзинзе сае. Каизе чинев веденть кирьгапарезэнзэ, мерсь «ух» ды эрязасто велявтсь кенкшенть ёнов. Лиссь. Дзинь-дзинь... жойнезевсть вальмань суликатне, зярдо кежень сазь вачкодизе кенкшенть.
Кода а кежиявтомс? Сон совсесь аволь кирьгапарензэ начтомо. Лияталь мелезэ, мон авань седейсэнь сеске чарькодия. Ансяк мезеяк сонзэ коряс эзь лисе.
Вана истя эринек, истя майсинек войнань шкасто.
[286]
А эстензэ, а ломаннень
— Мон таго нарьгамотнеде, — ушодызе ёвтнеманзо Элюш патям. — Ульнесь телень маней чи. Аволь пек якшамольгак. Мон, Аржаень Палай, Охрянь Оляш ды минек куринкань зярыя лия ават сыргинек пенгс. Котошканек весемезэ пурнавкшнынек. «Кильдинек» салазкенек ды — вирев.
Таргочиль. Кирдинек ве мель: течи велень ды вирень азортнэ пряст тов а невтьсызь.
Сявордынек ожань эчксэ зярыя чувтынеть. Пильсинек-керсинек ды седе курокке вачкинек улавонок. Ловось карксамга. «Нурдонок» ливтнинек шешкезь ки лангс вейсэ-вейсэ. Ськамот педсемскак а мезть. Носкомо тенек савсь байтяк. Ливезькалемс — седеяк ламо.
Лисинек вирьстэнть. Аловбандт шождынестэ валгинек Сёвонь лей пряс. Тон содат: сондензэ мейле кись туи веревбандт. Ськамот, куш сюлот лисемс ускт, «пулот» а кузтьсак. Те стакачинтькак изнинек эрьвань туртов лездазь.
Ансяк илыкень маштомс мельцек-мельцек ливтневсть стака улавонок, ансяк изнявсь пандось, сасымизь раужо тюс нурдынес кильдезь лишме. Ветицясь лоткавтызе сонзэ эйстэнек васенцекс ускицянть икелев. Нурдынестэнть стясь палманень сэрьсэ цёра. Седеяк сэрейгавтсь эйсэнзэ кочкаря видьс раужо тюс Тулупось. Кемензэ, шапказо ды сонськак — раужольть. «Раужо палмань», лиякс тензэ кодаяк а мерят.
Талакадынек. Чарькодинек: парт иля учне.
Мон ульнинь икельцекс. Ванан: «палманесь» сайсь нурдынестэнзэ вишка узерне, налксесь-тейсь мартонзо, ютась монь «улавом» ваксс ды — цёк сюлмамо пиксэнть. Лодор-лодор каладсть пенгем. Эзь мере валгак. Ансяк аёвтавикс, та-кодамо нарьгамонь мизолкс рединь чамастонзо. Истя жо чатьмонезь, чирь мизолкс марто ютынзе весе салазкетнень. Ансяк цёк-цёк-цёк марявсь. Кадовозь чочкинетнень кучкоринзе.
[287] Минь бувсо лайшеме, рангомо, шалномо.
Кинень пеняцят, кие марятанзат?
«Раужо палманесь» неикскак, марикскак эзь тее. Минь сонензэ, мерть, араселинек. Сон чатьмонезь керьксынзе чаво салазкенек, сюлмизе васенценть эсензэ нурдо пулос ды уш озыксэль нурдынезэнзэ. Лоткась. Велявтсь минек ёнов, ды окойники маринек вайгелензэ: тандавтнезь ёвтась рузкс колмо-ниле визькс валт ды тень эйсэ прядызеяк кортамонзо. Тусь.
Мезе теемс? Кандтнемс пенгтнень вейкень-вейкень? Васов. Таго самс мельгаст? Салазкеть арасть. Теемскак а кинень. Кадовсь велентень ве атя, сеяк штатолкс липниця.
Сельведень-нолгонь нардтнезь, сыргинек веле ёнов. Шказо чикуншкадо мейлель. Чипаесь налксезь налксесь. Монень марявсь, сон аламнеде оймавтокшнынзеяк сестэ покордазь ойменек.
Веледенек васоло зэрнесь верев тюрема. Мишай лелят тюрсь-воёвась немецтнень каршо. Тонь тетят, цёрам, Охрянь Олюшонь мирдезэ ды ламот лиятат удость уш се шкастонть астявтовикс удомасо. Мезень кис — ней, сыре-чидем арсезь, сеедьстэ кевкстнян эсь прям — зняро верь валозель? Сестэ тенек кортасть: «За Родину, за Сталина!» Бути аволь, сестэ эно мезень кис?
Веледенек вельть васоло, чивалгома пеле, маштнесть мирденек. Эсенек шкинень масторонок ёнга-ланга якасть «раужо палманть». Тосо — маштнесть, тесэ — ойме потмаксозояк сельгенесть. Мезень кис? Мезень?
Мезде кашторды сыре тумось
Те ульнесь умок.
Чувттнэ кайсизь кизэнь оршамост сядодо ламоксть. Ламотнестэ кадовсть макшот ды сынсткак «сэвизь» пангинеть. Тарказост кепететсть од пойть, пекшеть, пичеть...
Веенстнэ тусть, тарказост састь лият.
[288] Орданьбуестэ васолонь Астраханев ялго сыргасть кавксо цёрат. Калонь кундсеме. Эрьвась эйстэст кирдсь мельсэнзэ таштамс зярояк ярмаккеть: кинень эрявсь путомс од кудо, кинень рамамс лишме. Кинень мезе. Одтнэнь прясо чарасть-велясть урьвакстомадо мельть.
Кись тов поездсэ ардомстояк аволь маласотнеде. Тесэ — ялго. А ушодкс, а пе тензэ. Прок арсематне: прядови вейкесь — сеске поладсы мельганзо омбоцесь. Зняро эскелязь, карть савкшнось полавтнемс аволь веенст.
Молить чинь-чоп — лоткить удомо.
Кортамотнеяк, кода кись, певтеметь. Мезде ансяк эзть ледстне! Сокамонь-видемань тевтнеде, ялгадост, поладост, покшчитнеде... Ёвтнесть ёвкст, валмеревкст. Пачколесть мороскак. Ялатеке лангсост покшокс кадновсь кувакадояк кувака кись.
Молицятнень эйстэ ламот одт. Кадык стакаяк челькев кись, од шкась тензэ ялатеке а изняви. Вересь эрьванть сансо налксезь налкси.
Ве чистэнть, зярдо чопоньпелев мусть маштовикс удома тарка ды лоткасть оймсеме, од цёратне, куроксто ярсамодо мейле, ушодсть, теке букат, виест варчнеме: терявтнеме, кие седе ливчаня ды виев.
Юхмань Кандя букаксницятнень марто эзь човорявкшно. Сон аштесь озадо ве ёно ды вансь рунгонь менчицятнень лангс. «Од атякшкеть, лиякс кодаяк а мереват эйстэст! Кирнявтнить вейкест-вейкест лангс. Кодат тюрьгант...» — арсезевсь алясь эйстэст.
Ломанесь Кандя аволь лавшо кель. Кодат мельть удемсэнзэ бизмолдыть, ансяк сонсь соды. Мезть мартонзо эзть лисне, кирдсь эсь потсонзо. «Сустазь курго», — згилязь-раксезь мернесть тензэ ялганзо. «Кадык болдордыть, эрьванть кургонзо а потомдасак. Келесь ловажавтомо...» — мериль каршост эськанзо.
Валскестэнть калонь кундсеме молицятне стясть, кода свал, пиже валскеть. Удомань апак явавтне. Зярс экше, молемс седе шождыне ды истя, кода чить, а псилгадаткак.
[289] Икельцекс кияванть онкстнесь вайгельпетнень Кандя. Челькеденть ашназа кись тердсь икелев. Капшавтсь. Удалов цёрась эзь варштнеяк. Эрьва кодат мельть сакшность превезэнзэ. Седе сеедьстэ мелезэнзэ леднесь Видяш цёрынезэ, сонзэ эчкела чевте кеднензэ, васень валонзо. «Кода ней сынь монтемень? Кода тетям ськамонзо теи паксянь тевензэ? Кода авам?» — яла кевкстнесь эсь прянзо. Кувать калякась эськанзо Литова нинзэ марто, баягинекс бийнесь сонзэ вайгелезэ пилесэнзэ.
Весемеде «пижетне» ютксост ульнесть Палянь Кирдяй ды Шабаень Вармай. Сынь секе тев кайсевсть, прок цянавт вадов лангс, Кандяс. Эрьва кода бажасть ацирьгавтомс сонзэ. Згилясть лангсонзо, кода маштсть. Икелев молицясь марикскак эзь тейне. Кирдсь мельсэнзэ вейке: седе курок пачкодемс Каспиенть чирес ды кундамс тевс.
Палянь «шишигась», кода Кирдяйнень мерить Орданьбуесэ веленек, тунь ланга тусь. Пеедькшнематнеде налкставсь ды кармась путнеме Кандянень пильгень трокст. Меельцеде нерьгстызе пильгензэ ды тохмадизе цёранть кутьмерьс. Сон тертявкшнось, прамс ялатеке эзь правтово. Велявтсь сеске покордыцянзо каршо ды сельмензэ сялгинзе сонзэ чачос. «Мезе теть эряви? Мезть вешнят? Алсто сардт?» — цивтёрдсть сельмензэ кежтнеде. Вансь, меремс мезеяк эзь мере. Те покорксонтькак нилизе.
Чипаесь кепететсь тёкшкезэнзэ. Пельтнень пансинзе вейкень пес. Пси. Секень вант, ченгезевить череть.
Кись кувака коцтокс певтеме сравтовсь чикуншка ёнов.
Ков а варшты Кандя, апак соксе модат, кувака-келей нарт-лугат. Ансяк вадов лиясто понги сельметь икелев. Чары-вели сёлмосонзо нузякссто ахолязь ды ёми, теке арасельгак. Лиясто вешксты кажварч.
Чаво коське таркат...
Прок эрикс ойминеяк косояк арась. Весе кулость. Куш вирьпулыне вастоволь ды лекстяволь экше кошткинесэнзэ.
Кирдяй ды Вармай элякадсть седе а ков: сынськак эзть сода, мезе теемс. Кадык эно Вармай. Од. [290] Нарамодояк зярс а соды. Превтнеяк, ловт, эйкакшонь. Палянцесь вана, Кирдяй, мезе теи?
Самодост мейле тетязо арси урьвакстомонзо, сон теке чаула. Натой тейтерентькак содасы, кинь кармить тензэ полакс чиямо.
Ялгат-оят сасызь палманьшка сэрей Кандянь ды цюхадсть чамазонзо, раксезь-згилязь, килангонь чельке коморо.
«Те пе — тюремас пачкодсть идемевсень понатне!» — талнозевсь лангозост ванозь весемеде сыресь, Покшарь Зёко.
Арась, сонзэкс, сюкпря пазонтень, эзь лисе. Кандя аволдась тей-тов кедьсэнзэ ды, пух-пух челькев кияванть эскелязь поладызе кинзэ. Эзь варштаяк удалов. «Кев, аволь ломань...» — мерсь эськанзо, теке чапо тейсь, Зёко. Вакссонзо лап-лап молицясь Вачаень Паркай, Зёконь кирдажозо, макссь цёрантень лия питне: «Чапакс, аволь цёра. Нарьгить лангсонзо неть нолготулотне, сон кор кирди, чатьмони...» — мерсь марямга.
Альгачтнэ пряст лангс ансяк эзть стякшно.
Кирдяень содавтызе од мель.
Сон эскельдясь ки чирес, учинзе, зярдо ютыть ялганзо, ды ландясь лыткав кепканзо вельксэс. Седе мейле кортнесь-тейсь Вармай марто, сасызь Кандянь. Тошкстасть мезе-бути кавто ёндо пилезэнзэ, цяхазевсть, теке айгорт, ды Кирдяй комавтызе пешксе кепканзо Кандянь пряс.
Цёрась велявтсь ды таймаскадсь. Превс тензэ эзь саеве. Альгачтнэ пекень ёзазь ракасть лангсонзо: ха-ха-ха-ха!.. Гы-гы-гы!.. Тень неезь-марязь Кандянь прок ёзнэ пупизе. Пачканзо пси ютась. Сынсь сювордавсть мокшнанзо, ды сон, теке ажиясо, насмодизе пиле юрга нарьгакш Кирдяень.
Цёратне шалнозевсть.
Каятотсь кецнемань вайгель:
— Те вана цёра! Те вана вий! Пидизе, кода эряви!
Кандя «ламбавтыксэлизе» омбоце покордыцянзояк. Эзь кенере. Тона ношкстась прянь-полдань синдезь.
[291] Шнасть сэрей, келей лавтово Кандянь. Тохмаесть сонзэ мештес: «Те вана аля! Те вана вий...» Зярыя шкань перть кода-бути стувтызь варштамс кунст празь, ловтаня чама ломаненть лангс. Варштасть ды сеске чатьмонезевсть...
Кирдяй эзь лексе.
Зярыя часонь ютазь кадовсь эйстэнзэ аволь сэрей, тешкстэме-мезевтеме марнэ. Валаня, певтеме чаво ёнкст ды вишкине-вишкине бугорькске. Весе, мезе кадовсь ломанденть. Ансяк кортась, мольсь, пейдсь, нарьгась... ды теке арасельгак.
Кадызь уроз марнэнть сундерьгадозь. Ансяк сыргасть, валгсь лангозонзо варака. Косто сон саевсь?
Лиядсть Орданьбуень цёратне сисемнест.
Сисемнест Каспийсэ, Астраханде аволь васоло, кундсесть калт. Сисемнест шумбрасто-парсте пачкодсть кудов.
Арасельть чачома велесэст кизэде ламо. Эрямось таркасонзо эзь нерьге. Кода свал: чачсть, урьвакстсть, явсть, кулость... Кулось Юхмань Кандянь низэяк, менель сэньшть вановт Литова. Ваясь авась тикшень ледема шкава Веждейс. Кадовсь цёрынезэ. Кандя телень ушодозь урьвакстсь омбоцеде. Полакс саизе Черькай Бандань. Самай се тейтеренть, кона марто вастневсь Кирдяй, ды арсезель самодост мейле чиявтомс сонензэ.
Иетне ютасть вейке-вейке мельга, прок ведьсормсевкст эрькень чамава. Кепететсь верьсэ артозь се тюремань таркасонть сэрей-рацяня тумо. Косто саевкшнесь сэрясь неть идем, чаво ёнкстнэс — ве Верепазось соды.
Васолдо неяви сон, те сыре, ськамочидензэ апак лотксе арсиця чувтось, кинень савкшны ютамс тона пингень, ней уш кадозь кияванть. Кинень ды киде сон ванстовсь ледстнемакс? Пайстомо Кирдяйде эли уцяскав Кандядо? Теде кияк а соды.
Марсесть, бешом, рацяня тумонть ало калмонь марязденть ансяк верьга ливтий цопиця вадовтне ды келей сёлмо вармась. Сон шкань-шкань валгони чувтонть пряс ды ризксэнь марязь кашторды лопасонзо, ёвтни чаво ёнкстнэнень умонь шкатнеде.