Эрзянь Мастор/2006/12/Пензасо ютась эрзянь ды мокшонь книгань фестиваль

←Од книгат

Эрзянь Мастор, № 12 (236), 29 июня 2006 edited by Нуянь Видяз, Кшуманцянь Пиргуж Пензасо ютась эрзянь ды мокшонь книгань фестиваль

В Фонд "Этно-кудо"→

Статья на сайте газеты: № 236, 29.06.2006, Пензасо ютась эрзянь ды мокшонь книгань фестиваль

 

Пензасо ютась эрзянь ды мокшонь книгань фестиваль

Ютавтызь Пенза ёнксонь культурань министерствась, М. Ю. Лермонтов лемсэ Пензань, А. С. Пушкин лемсэ Мордовиянь республикань библиотекатне, Шемышеень буень администрациясь, тосонь библиотекась. Таркась — эрзянь Ташто Демкина веле. Тесэ социокультурань центра. Фестивалев сакшность велень библиотекартне, школасо тонавтыцятне ды тонавтницятне. Мордовиясто ульнесть Л. Г. Меркушкина — Республикань библиотекань прявт, Н. В. Бочканова, Н. В. Манёрова — тосо важодицятне, М. Н. Моторкина — Отяжбуень Козловка велень библиотекань прявтось ды Н. И. Ишуткин — «Чилисема» журналонь прявтредакторось.

Ве залсонть мольсь кортамо: «Велень библиотекась — раськеютконь сюлмавксонь теиця-ванстыця». Омбоце залсонть — стихень ловномань коряс пелькстамо. Эйкакштнэ оршазельть весе эрзякс. Эрьвась ловнось васня эрзянь, мейле рузонь кельсэ. Васенце тарканть саизе Юдина Виктория. Сон ловнызе Алексей Лежиковонь «Армиёва велесь» ды Яков Григошинэнь «Рожь звенит» стихотворениятнень. Тешкстазельть Антонова Янань ды Кежапкина Ленань ловномаст. Гайгсть Е. Пятаевень, А. Мартыновонь, С. Люлякинань, А. Араповонь стихест.

Концерттэнь икеле кортасть: В. З. Фасгеев — Шемышеень буень прявтось, В. Я. Прошкин — Пенза ёнксонь культурань автономиянь прявтось, В. В. Гнусарёв — Ташто Демкина велень прявтось, М. Н. Осипова ды Л. Г. Меркушкина — библиотекань прявтнэ, Н. И. Ишуткин — «Чилисема» журналонь прявтредакторось.

Пензань эрзятнененеь максозельть ламо книгат, журналт, кеняркст. Меельце шкатнестэ истямо мероприятия — книгань фестиваль — ютавтовсь васенцеде. Паро ушодксонтень — паро поладома.