Эрзянь Мастор/2005/22/Паморькст (ёвтнеминеть)

←Стих. А. Полежаев

Эрзянь Мастор, № 22 (222), 25 ноября 2005 edited by Нуянь Видяз, Кшуманцянь Пиргуж Паморькст (ёвтнеминеть) by Нуянь Видяз

Пеедькшнемат→

Статья на сайте газеты: № 222, 25.11.2005, Паморькст (ёвтнеминеть). Нуянь Видяз

 

Паморькст (ёвтнеминеть). Нуянь Видяз

Теевельтькак весе истя...

Ютан те мазый, тусто лопасонзо тень каштордыця умарькскенть вакска, варштан лангозонзо ды сыремить мештьсэм мельспарот. Лопанзо келейть, чопода-пижеть, вармань коволтнэ мелень витезь налксить-чоледить мартост. Сёксень ушодозь од, вете-кото иесэ чувтынесь кецневтимем пиже, якстерьсэ токазь мокшнашка умарьсэнзэ. Валанят, цитнить, теке штасо ваднезь. Ведра малава валтынь.

Теленть ильтизе цельця тундось. Модась солась.

Солась ды... «Вай, те мезень дюния?!» — лиссь кургстом Мазыйненть лангс варштазь. Аштесь сон... сяворезь. «Те мезень прояв?» — мик талакадынь малазонзо ютамсто. Кундынь тарадозонзо ды уския састо, ёжонь марязь эсень ёнов, нокавтыя витемс.

Чувтынесь цяк кирдевсь модасонть. Рунгозо видьстэ эзь кирдеве. «Я, те тон мекс, Мазыйне, эль пильге лангсо аштят?» — пшкадинь марямга. Перьканзо велязь, пильгем вайсесть полда видьс модантень, потмованзо, марявсь, — варят. Максазей, паряк, лия кодамо-бути пача чувнось норат, раздинзе-поринзе Мазыйненть ундоксонзо. Секень вант, алонзо тейнесь телень ютавтомань пизэяк.

Лездамо томбавозентень. Эно кода! Васняяк чавинь эйстэнзэ пель метрашкань туро пезэмкске. Аравтыя сэредицянть видестэ стядо ды сюлмия, илязо сяворе одс, пезэмкс пентень. Мейле кандынь ведра-омбоце парсте наксадозь шукшт, чупония-кавшакавтыя алганзо-перьканзо моданть. Седе парсте шешкия-матрыя, валынь юрозонзо зярыя ведь. «Пичкак, пичкак, Мазыйне! — путынь тешкс теезь тевезэнь. — Пурнак кизэнь перть вийть».

Сась шалнозь ды та-ков капшазь, панжиков. Чачомань-сыргоземань ды кецнемань гайгиця шка. Эйстэнек кедень венстемга маласо виресь пешкедсь цёковтнень моросост пелькстамотнеде. Монень марявсь, беряньстэ морыцят ютксост арасельть. Весе «сайнесть» васень таркат. Ашосо копачавсть умарькстнэ. Сельмень сявадозь вансь лангозост Мазыйне сазорост. Ансяк кой-кува тарадкеванзо лиснесть дёкуша панжовкскеть ды берякшке, вете трёшникень покшолмасо, лопинеть. Кинень панжиков, кеняркст, кинень—...

Эскелясть чить, таргот, ковт, ютась кизэсь. Сэредицянть тунда пургондавкс лопинензэ эзть покшолгадо, — прязо тусто пижесэ эзь вельтяво. Штапо, ловт, аштесь кизэнь перть. Уцяска. Эйстэнзэ куракш алов а кекшат.

Ушосонть таштамков. Сёксень ушодкс.

Варштан Мазыйне лангс ды мельспародонть а кирдеван — мизолдозеван: мерть, лопавтомо, штапо тарадкеванзо понгавтнезь — та-кода а кемевияк! — мелень кондят покш пиже умарть. Косто, кода истя!

«Кодамо мазый улевель Моданть чамазо ды сонсь Ломанесь, теевельтькак тонь ладсо, Мазыйне, весе!» — сыть тень некеть мельтне чувтыненть лангс варштазь.

Тонь весе васенцеде...

Шалныця, свал та-ков капшиця Суранть вить чирензэ ватолат, секень вант тёкшозост куземстэ ойметь лиси. Зярыя чинь перть молиця пиземень раужо-сэнь пельтне сеедьстэ валгонить прязост оймсеме. Сестэ менелесь вейсэндявкшны моданть марто.

Сундерьгадома малава варштынь вальмаванть ды таймазкадынь: вирьсэ копачазь пандтнэнь удалдо, пекшетнень-тумотнень потсто лиссь ды ваны лангозом, терди эйсэнь, теке умонь ялгам, покштояк покш пешксе ковось.

Зяроксть нейния сонзэ лисеманзо уш эрязь, ловт, пингем перть? Каня ловови... Кодамокс? Каня ёвтави... Нейния сонзэ сэнь сувсо копачазь-сувтязь, нейния сиренень тюссо, нейния нувсицякс, арсицякс, пштистэ-кежейстэ ваныцякс, кирдевезь мизолдыцякс, ризныцякс, мелявтыцякс...

Кодамокс лиссь икелем ней — зярдояк. Ожо-якстерть ды покш, прок брага чакш, — те эно кадык, истямокс сакшнось тень. Вельть уш малав сась, теке вирьстэнть кепететсь, — вана мезе абунгавтымим. Ютак, марявсь, вайгельбешка чевгень ды калень куракшсо мазылгавтозь лайменть трокс, уйть венчкесэ Суранть тона чирев, кузть тусто чопода вирьганть Атя пандонть пряс ды улят келей чама Осканть икеле.

Шумбрачи теть, Вень Азор!

Неть валтнэнь-арсематнень ёвтазь, венстик кедеть ды апак пеле, мелень витезь, дёлязь вадяшик икелеть аштицянть чевте, экше ды валаня рунгонзо. Важдык, оймавтык, каршонзо стядо аштезь ды лангозонзо сельмень тетькезь ванозь, майсевиця-талныця ойметь. Кортник мартонзо, ёвтник мезде лажны-киторды седееть, — кунсолотанзат ды, паряк, лезды. А стяко бажась самс истя малав мартот вастовомо.

Сюкпря, Вень Азор!

«Тонь весе васенцеде!» — пейдезевсь лангозом ванозь азоравам ёвтнемадом ковонть марто вастовомадом. Виде, ялгинем-оинем: эрямосонть вейкеть мезтькак а эрсить ды зяро иля вешне а муят, весе-весе максови ансяк весть ды ансяк эсензэ чачосо — весть чачомс, весть тонавтнемс стядо аштеме, кортамо, весть марямс од шкань леенть лажноманзо, весть куломс. Весе. Пе. Чинть-ковонть ало омбоксть икеле ладсо мезеяк а тейневи, весе-весе полавтневи.

Кодамокс неия се якстерь-сэнь сыця чокшнестэнть пешксе Ковонть, зярдояк уш а неса. Неса, зяро тень Пазось макссь неемс, неса, ды ансяк лиякс.