Поладкстомо (2016)/Оня цёрась а берянель...
| ←Элина патянь ёвтнематнестэ | Оня цёрась а берянель... (2016) by , edited by Ломшина Л. А., Маризь Кемаль, Малахова Е. П. |
Пелюма→ |
| Нуянь Видяз. Поладкстомо. Без продолжения. — Саранск, 2016. — с. 292—295 |
[292]
| ОНЯ ЦЁРАСЬ А БЕРЯНЕЛЬ... |
Ютазь пингень ведьгеменце иеть... Тундонь леекс лажнось-капшась од шканок. Ламо мезе ютакшнось сельменек икельга ды седеенек пачка, ламо мезе савсь кунсоломс сеть иетнеде мейлеяк. Ансяк тундонь ветнень элесэ нусманясто цивтёрдыця тешттне, сиренень иредстиця чинесь, морыця цёковонь пелькстамотне зярдояк а стувтовить.
А стувтови, кадовсь мелезэнь, кода Панькань Палай вень куншкане чачома кудостонзо оргодекшнесь Лаваень Онянень, вечкевиксэнстэнь.
Шалнось велесь, теке сорновтозь мекшпизэ. Лисьмаланготне лиядо-мезде эзть сода. Истямо куля! Туемс алужонстэнь дюм чопода вене, тетянь-авань апак кевксте, апак чиявто, кудавтомо?! Велесь минек кезэрень, ансяк истят аймелькс тевть ды кулят арасельть. Кельтне энгамсть ансяк иешкань ютазь. Те ней кияк киньгак а кевкстни, кинень лисемс ды кинь чиявтомс. Ведьгемень иеде икеле койтне лиятальть. Ульнесь-эрясь визькс.
«Чумонь теицятне» мондень седе сырельть. Эрясть эйстэнек аволь васоло. Палай — виде, ёлганя килейне. Велень тейтертнень ютксо сонзэ кондямо мазый арасель. Эрьва ёндо Пазось казекшнизе: обуцясо, мель ваномасо, кельсэ-валсо. Тевсэяк эзь кадновкшно ялгадонзо. Превей, чевте седей, виздиця — ды истямо тев! А стяко кортыть: гувныця вечкемадо виев мезеяк арась. Сонзэ толс понгицясь анок теемс мезесь превскак а саеви: кирнявтомс ведьгев прясто, чопавтемс эень кельме ведьс, лисемс алшка цярахман алов... Пачколить пиштякатне килькшескак. Вечкема...
Оняяк цёрась а берянель. Алкуксонь мараля. Сэрей, келей лавтов. Ашназа тусто черензэ сеедьстэ менчевезь. Варштат ве ёндо — лавтовонзо лангсо, мерят, комавтозь парго. Мизолкстонзо ды чамаумарьсэнзэ яндавинетнеде аволь ве тейтерь нейнизе Оиянь онстонзо. Турванзо мазыйстэ эчкть, чамакиськезэ валаня.
[293] Тень лангс апак вано, Палаень тетязо ды авазо мелезэсткак эзть сайне: максомс тейтерест стёжна, мазый Онянень.
Кумажа алга керязь пильге? Те тувталось?
Истятнэде войнадо мейлень иетнестэ аволь аламольть. Вейкесь мокей — пильгевтеме, омбоцесь юган — кедтеме, колмоцесь... Вай, кодат ансяк эзть сакшно се «Ине ойнастонть»! Ков молят, «отечествась» эрявсь идемс, ванстомс. Ванстомс, кодамо илязо уле. Ванстомс лия модерицядо, лия ятто, мезе лангскак апак вано.
Эно мекс истямо шуморкс ды виев-превей алянень эряза Панька эзь капша максомс тейтерензэ? Истят содамотне, кодамоль Оня, войнадо мейле седеяк, эзть усксеве. Мекс Панька пурдтнесь тонадо судонзо?
Велесь аволь ош. Кода кекшнезь, салава иля тее, содамо кармить саразонь пес. Лекстявкс салавине а теят. Лавайтнеде содасть весе, юронь тешкстэст кортамс а мезть. Сындест нузякст велесэнть арасельть. Самай секс кечкереськак Палаень тетязо Панька.
Ютась се умонь, иень перть шалттонть мейле, ловт, пинге. Тундось ламоксть совсесь велентень. Удалганок чудиця Кирда лейнесь а весть коронзо невтнизе. Эйкакшолинек. Ней — «сыре пангтано».
...Серьгедимим велев раужо куля.
Кизэнь гай маней, малавгалиця сёксенть Парамодонзо олажкадыця чи. Пурнавинек уряжень ильтямо. Ильтямо тов, косто кияк эзь сакшно, кулят эзь кучне. Истят читне, конась пурнымизь течи, учнемс а савкшныть, сынсь сакшныть. Учотано уряжень кудосто ливтеманзо: цёрат, ават, одт, сыреть... Тошказь ладсо кортнетяно эсенек юткова. Кевкстематне велес понгомстон некеть: се кие? кода лемезэ? кить тетянзо-аванзо? кода кудо лемест?.. Ков туят эйстэст, истят кевкстематнеде, сакшнындерят чачома велезэть иезэнзэ весть ды сестэяк варма налокс?
Нейгак истя лиссь.
— Вирязнизэ, оно се авась кие? — пшкадинь вакссом аштиця Пошань Вирязонь нинстэнь.
[294] Аватнень ютксто сельмем икелев понгсь мандонензэ лангс нежедезь сыре, алкине, лагоря устав ломань. Прясонзо конякакс сюлмазь ашо паця, алдонзо неявить шержей черть. Оршазь раужосо. Пилысэнзэ понань цюлкат ды Колошат.
— Панькань Палай. Эли стувтык? Мельсэть Лавайнень оргодемазо? — тошкстась пилезэнь Вирязнизэ.
— Па-лай? — одс кевкстия, кургом каршо кедем аравтозь, прок эзинь марсеяк умонь-умонь тамашань тевденть ды те лемденть. Эзь кемеве... Эзь кемеве, мезе теить иетне ломаненть марто. Икелем кивчк састь-стясть кавто чувтт: ашо рунго, пиже пацясо копачазь килейне ды макшов, сем пангсо «мазылгавтозь» пой.
— Палай... — таго лиссь теке валось кургстом. — Арась-арась, а кемеви.
— Сон, сон, — оймавтымим Вирязнизэ; теке басом ниле-вете валсо ёвтнизе аванть уцясканзо. Оня, тень эзь кемеве, нарьгась нинзэ лангсо куломазонзо: паро валсо эзь пшкале, пансесь эйсэнзэ ушов, сельгенесь сельмезэнзэ. Яжась аванть уцясканзо. Каня кемгавксово иесэ тейтересь содакшнось, кинень моли? Вейке сестэ кирдевсь превсэнзэ: Оиянь чамаумарьсэ налксиця-кивчкаиця яндавинетне, сынь эзть тукшно сельмензэ икельде а чить, а веть.
Мезес пачтясызь сынь, неть яндавинетне, тейтерензэ, содась тетязо, Панька. Нокась путомс пирявкс зыянонтень, лездамс кенерезь пештинензэ туртов. Арась, эзь кирдеве, вечкемань чадыведесь салызе сёлтонть. Виензэ Панькань эзть сато.
Кунсолынь ёвтницянть вайгелензэ ды шкань-шкань кепсинь вановтом Палай ёнов.
— Тонсь кода, Вирязонь пола? — пшкадинь, прок эзинь марсеяк уцяскадонзо.
— А, иля кевкстнеяк, лемезэ ансяк — эрятано.
...Ливтизь вальмалов кандолазтнэнь. Путызь анокстазь кавто табуретка лангс. Стясть перьканзо. Ютынь монгак. Икелень уряжень ловтаня чамазо, мештензэ лангс васодезь ашо коськана кедькоморонзо. Покштянь веженсь [295] урьвазоль. Секс мерильгак тензэ пенерьва. Сынст кудост ульнесь прок эсенекесь. Каятотсь вал марто лайшема. Таргизе вайгелензэ Нинай тейтерезэ. Ламот носксть, шлёбордсть судосост. Кольгезевсть сельведем моньгак.
Цёратне нардамо вельде кепедизь кандолазтнэнь ды састо сыргасть куринканть кувалт. Эскелинь весеме марто челькеденть чевте киванть. Превсэнь чарасть уряжень кедьсэ-кудосо ютавтозь читне, эйкакшонзо марто налксематне, ёвксонь ёвтнематне, элякалематне... Ледстнематнень апак учо полавтызь Палайде марязь валтнэ. «Те кода истя?» — яла эзь кемеве тень.
...Косо се ламоксть ды эрьва кода шназь-моразь вечкемась? Певтеме ламо морот сёрмадозь ды моразь эйстэдензэ! Косо сон? Мезе те истямось? Мекс ламо тюссо артозь валтнэде мейле кадовкшныть куловт? Ламо, вельть ламо ломанть васодевить ды теевить никс-полакс вечкеманть вельде. Ламот, аёвтавикс ламот теке марто, пингень перть майсевемадо башка, мезескак а пачколить. Мезе сон, те ёжось: тундонь якстере чахрань бельге эли сардов пупиця тикше? Мезе те истямось, чанстесь?
Вирязонь нинзэ пельде марязденть прынь мельс: вечкемась — те аволь гулдордыця вайгель, аволь балягинекс кувтолдыця мизолкс ды аволь налксиця сельмть.
Эно мезе?
А содан.
...Коцт вельде кепедезь кандолазтнэ, мельганзо састо эскелиця цёратне, аватне, эйкакштнэ мольсть тов, ков пачкоди эсь шкастонзо эрьвась.
Нусманясто ваны чипаесь. Кинть кавто ёнга ожолды товзюронь пакся. Курок педить Нуемензэ.
...Палаень эрямозо... Эсень... Монгак сонзэ эйстэ, вечкемастонть, ушодокшныя. Монгак... Кие эно тень панжсы, мезе те — вечкемась?
Вановтом эртевсь эскелькстнэде тей-тов лыкиця, апак арто, ожо тюс кандолазтнэс.
«Вана кие ёвтасы, мезе вечкемась», — ютась прявам.