Поладкстомо (2016)/Ну, кода мунямом?..
| ←Аниська | Ну, кода мунямом?.. (2016) by , edited by Ломшина Л. А., Маризь Кемаль, Малахова Е. П. |
Вечкемань тешкст→ |
| Нуянь Видяз. Поладкстомо. Без продолжения. — Саранск, 2016. — с. 267—270 |
[267]
| НУ, КОДА МУНЯМОМ?.. |
Вейкеть телеть а эрсить. Эрьва теленть эсензэ обуцязо. Тедеде сон лембе. Якшамось мокшнат а невтни. Ушосонть теке аволь якшамковгак. Весть мик пиземеяк суводсь.
— Ну, кода? Кодамо карми улеме тундось? — апак учо сезизе арсемань суринем вакссом аштицясь. — Мезе тенек канды тешкстнэнь коряс? Лов, мерть, арась...
Автобусось тыц пешксе. Вить ёном коськана, аволь пек сыре ломань.
Сон самай каизеяк ульминензэ — ушодомс кортамо.
— Мерят, тешкстнэнь коряс? — пшкадинь сонсензэ валсо.
— Сынст коряс, сынст коряс, аля, — од ломанькс, эрязасто валтнэнь ёвтазь, таго ледстизе мелензэ шабрам.
— Кода теть меремс. Содамс, кинь мезе ванды учи, икелевгак ульнесь а шождыне. Ней — кортамскак а мезть. Сядошка иеде икеле _ лиятальть тевтне.
— Те кода истя? Модась седе шождалгадсь?
Келем суския.
Мезе мерят? А кармат сувтнеме-ёвтнеме, мезе марто вастовинек меельце комсь-сядо иетнестэ. Кие ней а соды: сэнь Модаосканок теевсь Оскинекс. Сельгеме а кенерят — порксневи, лисиндеряй зыян — тюшумбар туи. Тень ней теемс мезеяк а ашти.
Теевинек содавиксэкс.
— Бульдяень Артай, — васенцекс ёвтызе лемензэ вакссом аштицясь.
— О-о, истят лемть эзинь марсеяк, — эзинь кирдеве мон.
Атясь марикскак эзь тее. Видяз — ёвтыя лемем.
— Аламо тедеде прась ловдонть, аламо, — мерсь каршом Артай.
— Виде, Артай покштяй... Ансяк теяк а стувтнема: паксянь сюпавчинть аволь свал телесь раштавты. Вансынек, мезть оршни тундось...
— Виде, виде. Теке марто, аля, иля стувтне Лиядонтькак: ламо лов — ламо сюро. Истя яла кортнильть покштянок.
— Те кода истя? — каявсь валом трокс кортыця ялгам ды каинзе лембе варьганзо.
— Перьканок цярномадонть, вана мезде. Сод, кирьгапарьс эциця газт, овтокс урныця машинат...
— А-а. Те истя, те истя. Чоп-чоп текеде телевизорось калдорды. Эрьва кода эйсэнек тандавтни. Мезе, кандолазт анокстама? Хана тенек, мерят?
— Кода теть ёвтамс...
— Мон таго секеде, мезде ушодынек, — поладсь Артай атя, — тешкстнэде. Вана теть мезе мерян: радиотне-мезтне апкажгак а содыть. Эрьва чистэ тенек текеде пенгедить: течи менельксэсь истямо, ванды истямо-истямо. Кенгелить — а нолажтнитькак. Сюлост, бешом, човине, содамс шкадо икеле. Пильгем вана витесь — тевесь лия. Ковдо икеле ёвтасы, мезе тенек менелень азорось кучи. Сон аволь радиотнекс. Манчемат а соды.
— Те кода истя? — токавсь мелем.
— Оно кода, дугай... Минань штелькс эйсэнзэ.
Артай атя састыне вадяшизе вить пильгензэ кумажава.
— Сэреди?
— А те валось, теть мерян... Васов сыргить? — кевкстимим шабрам ды варштась лангозом.
Абунгавтымизь атянть сельмензэ. Пшти сельмепонатнень алдо вансть сэньшть мериця, прок од ломанень, сельметь.
— Кеменце номер больницяв.
— Вадря. Моненьгак тов, — мерсь Артай атя ды нулновтызе прянзо, — байтяк сави тенек тов кальдердемс. — Теке марто венстизе кедензэ, аволдызе вальма суликастонть ливезенть ды, аволь кувать чатьмонемадо мейле, поладызе ёвтнеманзо. — Истя вана, Видяз! Истямо калибрань тевтне. Ушодындеряй менельсэнть мезеяк човорявомс, куш лисьмас кирнявтт. Куш... Мон яла истят шкатнестэ гитлертнэнь-сталинтнэнь ушодан лезэдеме. Ансяк лезэсь тень эйстэ... Кодамояк шождалгадома а пры. [269] Автори, теке кодамояк пачине. Авцорязь авцори. Лиясто часошка пори ловажанть вана те таркаванть, лиясто — чоп. Мейле, ванат, ушоды аламонь-аламонь потамо. Лоск-лоск маряви. Сестэ — учок. Истямо нарьгамодо мейле Пазось ушоды од тевть: эли кепети кандылов, эли варма, эли... Истя вана, оинем-ялгинем, монь «фронтовой» пильгем ваксс кодамояк барометра а путови.
— Кода, Артай покштяй, те телестэнть? Менельксэсь, кода кортыльть икеле, — «ине коське», а алтни? Ловтомо, тенсицявтомо.
— Чарькодинь. Зярс идемевсесь эзимим токше. Течи валске марто педсесь эйзэнь. Киштевтимим кода эряви. Ней учок. Веть эли вана ашолгадома ёнов лов туи. Эли таго... пиземе. Радиодонтькак виде ули. Вана вансак. Теня, гайгстака тень.
Мон таргия блокноткем. Сёрмадыя телефононзо.
Чопоньпелев теке автобуссонть ардынь важодемстэ кудов.
Понгинь таркантень, косо озадоль валмукшов атясь.
А мезень теемадо ваннынь вальмава.
Артовкстнэ румсть. Ютксост ней ульнесть седе ламо чопода тюст. Прок аволь телеяк. Ацамковсто празь ловось мольсь сэксэв, умок апак лопавтне оршавкс ёнов. Читне кеверсть тундонть пелев, ашо палянь вечкицясь вана прянзо а невтни, кадовсь та-ков.
Чокшнень перть превсэнь карась вейке мель: пры-а пры лов? Тень марявсь, раужо нула ёнов молиця ловнесь кадови телень меельце чис. Мелемгак мольсь эйстэнзэ. Истямокс, улема, эрямось теимим — свал тень эряви мезеяк од, лия, седе паро. Зярыяксть кепсия вановтом чопода вальманть пелев.
...Пелиця ашолгадомась штавтынзе венть шаршавонзо. Кепе-штапо кирнявтынь лембе вельксэнть алдо ды педявтыя судом кельме суликантень. «Кода, кода, кода?» — токнось седеем.
Ловонь аразденть майсевиця, нучк-пачк шешкезь Вальмалксом кецнесь... од, чевте ловонтень! Сон [270] копачиизе эземтнень, китнень-янтнэнь, латотнень. Чувтонь-куракшонь тарадтнэ неявсть викшневксэкс.
Шкань ютазь невтизе прянзо чипаесь. Сонгак, прок пакша, кецнесь паро кулянтень. Кирвазтсь вановтсонзо икстерькат. Сулейтеме таркатнева пор ашось артовсь Якстерть мериця тюссо.
Монгак чипаенть марто вейсэ кенярдынь ашо, валдодо пешксе валскентень. Окойники учовсь Теленек! Ансяк вана... теле — аволь? Аволь, чей, тундось копачась, каясь ланганзо куломань ябунця? Мезе те — ильтямот эли вастомат?
Муия блокноткем.
Телефононь почкось кувакасто вешкстась, мейле марявсь кальцьк-кальцьк, ды кашторксонть пачка каятотось Артай атянь эрий вайгелезэ.
Кепст-кепст мерсь седеем.
— А-а-а, Видяз... Шумбрат, оинем-ялгинем! Ну, кода мунямом? Эзинзеть маня? Кемевикс барометрам? — певерсть пилезэнь пеедькшнезекс, паро мельсэ ёвтазь кевкстематне.
— Седе а ков, Артай покштяй! Куш нейке тонь — менелень тевс чарькодицякс. Мезень кемема радионть лангс? Оршат пальто — ушосонть куш кснавт пуштак. Сыргат панарнэсэ — тарькс васттанзат. Ну мезе, сёрмадтан менель муницякс?
— Мезть кортынь, эзить стувто? Содамс соды пильгем, ансяк седе ён ули, улиндеряйть седе содыцят алкуксонь, кшнинь барометратне, аволь монь кондятнэ. Ванстозо минек теде Пазось! Чарькодить? Вастомазонок эно!