Эрзянь Мастор/2004/18/Мезесь кецневти, мезесь - ...

From Wikisource
Jump to navigation Jump to search
Эрзянь Мастор, № 18 (193), 24 сентября 2004 edited by Нуянь Видяз, Кшуманцянь Пиргуж
Мезесь кецневти, мезесь — ... by Нуянь Видяз
Статья на сайте газеты: № 193, 24.09.2004, Мезесь кецневти, мезесь - ...
 
Мезесь кецневти, мезесь — ...

Мезесь кецневти. «Эрзянь Масторонть» перька пурнавсть ванькс ойме, эрзянь келень вечкиця, ламонь содыця зярыя нациянь ломанть. Лемест, фамилияст ёвтнемс а сави. Сынст содасынк публикацияст кувалма. Минек газетась аволь ве ломанень ды аволь редакциянь вийсэ теевиця газета, кодамот ламотне. Корреспондентэнек арасть. Сонзэ «чапить», ламонь кувалма, ловныцятне. Келейгадсь, васень номертнэнь коряс, географиянок: Россия, Украина, Эстония, Суоми, США… Тенек сёрмадыцятнень ютксо, эрзятнеде башка, мокшот, татарт, рузт, украинт, эст, марийть, комить, удмурт…Те кенярдовты. Седеяк пек кецневти тевесь, конань ушодызе ды теи нейгак «Эрзянь Масторось»: максь питне зыянонтень, конань кандсь ды канды «мордва» валось, ёвтнесь кить эрзятне, сынст историядост, вийтнеде, кить мелявтыть те раськенть кис. Шкань апак таргсе ушодсь ёвтнеме 1937-38 иетнестэ чумовтомо леднезь эрзянь ине ломантнеде.

Мезесь нусмакавтни. Эрзятне, ламот, а мелявтыть вандынь чидест, раськедест. А содасызь, а кирдеви мештьсэст мезе те истямо Чачома Масторсь, Чачома Келесь, Чачома Мелесь. Коськсть неть чартьчитне, валдо ды ломаненть ломанекс теиця ёжотне. Эрзянь келесь содамочисэ ды культурасо важодицятнень туртов теевсь, сави меремс, прянь трямо таркакс. Тень кувалма «Эрзянь Масторось» ламонень ловныцякс эзь тееве. Тиражозо 2500 экземплярт, эряволь, весемеде аламо, 25000.

Бажамот-кемемат. Шкась ве таркасо а ашти. Ней аволь 1994 ие. Сась тенек Интернет. Сонзэ вельде совась эрямонтень кенгелемань каршо молиця вий. Панжовсь кенкш лия вановтнэнень. Аволь ансяк масторкирдийтнень. Лиятнененьгак. Полавтовсь, ёвтазденть башка, мирэсь-мастороськак. Ней EC-нть Эстэнь Масторось, Суомись, Венгриясь. Кемтяно, Европась кармавтсы Россиянть топавтомо ломанень ды раськень праватнень.

Шкась лотксемадо а соды. Секскак эряви муемс вийть — совавтомс «Эрзянь Масторонь» лехатнес-ёнкстнэс статьят, кулят, репортажт, ёвтнемат велень эрямодонть, велень хозяйствань теезь ды теевиця тевтнеде. Теевезэ газетась седе ламоннень ловныцякс, седе интерес марто улицякс. Те ашождыне. Минек арасть питнеде важодицянок... Ялатеке тейсынек арсезь тевенть. Шказо сась. Эрзянь келень идема-ванстома темась, чарькодеви, кадови васенцекс.

Покшчи марто, вечкевикс ловныцят!

Евгений Четвергов, «ЭМ»-нь редакторось.


RU: Данная работа создана сотрудниками газеты Эрзянь Мастор и распространяется по лицензии Creative Commons Attribution 4.0 International. См. пояснение внизу заглавной страницы газеты.
EN: This work is licensed under the Creative Commons Attribution 4.0 International License as a work by Erzyan Mastor journal employee(s). See the disclaimer on the bottom of the front page of the journal.