Материкъяс да океанъяс
Уджъяс.
Мусярджынъя карта вылысь видзӧдлӧй — ваыс али муыс му вылын унджык?
Ваыс унджык. Арталӧмаӧсь да, сійӧ 2½ пӧв уна муысь.
Петкӧдлӧй карта вылысь медпаськыд васӧ — Ыджыд океан. Сійӧ ыджыдджык став материкысь ӧтлаын.
Сыбӧрся мӧд океан ыджда сертиыс Европаа-Америкаа костын. Корсьӧй сійӧс карта вылысь, шуӧй нимсӧ. Энӧ вунӧдӧй сійӧс. Ноко тӧд вылад уськӧдӧй, коді медводдза морт сы вомӧн вуджис? Петкӧдлӧй карта вылысь кытісянь петіс Колумбыс, Мушӧр моресӧ и. Видзӧдӧй бурджыка моребердса му дор визь вылас. Веськыда войланьӧ моресяньыс Европа, зэв кӧджа да куръяа доръяса. Асывладорас Европа бердас Азия ляскысьӧма, Европаыскӧд нач помся. Вежтас пыддиыс тайӧ кык материк костас Урал гӧраяс. Лунвывладорас моресяньыс Африка. Ӧтлаасьӧ оз сійӧ Азиякӧд? Кыті? Европакӧд ӧтлаасьӧ оз?
Европаыд, Азияыд да Африкаыд — медгырысь материкъяс.
Найӧс, куимнаннысӧ ӧтлаын, шуӧны Асыввывса материкӧн, Важ муӧн либӧ. Мӧвпыштӧй ноко, мыйла сідзи шуӧны?
Коді на пытшкысь медыджыдыс? Коді медічӧтыс?
Атлантическӧй океан сайын нёльӧд материк — Америка. Видзӧдӧй бурджыка, кутшӧм кык пельӧ сійӧ торъялӧ. Мӧд ног Америкасӧ шуӧны Рытыввывса материкӧн, либӧ Выль муӧн. Мыйла сідзи шуӧны, ноко думыштӧй.
Видзӧдлӧй бурджыка карта вылӧ, абу-ӧ ещӧ материкыс? Кӧні сійӧ? Австралия — медбӧръя, медічӧт материк. Сійӧс ещӧ шуӧны Лунвывса материкӧн. Аддзӧмаӧсь Америка бӧрын дыр мысти на ещӧ.
Австралия, Азия да Африка костса океанлӧн аслас ним. Кыдзи сійӧс шуӧны? Тайӧ — коймӧд океан. Ещӧ кык океан эм, таысь на ичӧтӧсь (ичӧт вӧснаыс ӧні озджык нин и океанӧн лыддьыны, а мореӧн). Ӧтиыс дзик мусяр войвылын, а мӧдыс лунвылас. Корсьӧй найӧс карта вылысь да висьталӧй нимъяссӧ.
Став океаныс мӧда-мӧдыскӧд ӧтлаавлӧма.
Гижӧй тетрадяныд океан да гырысь материк нимъяс. Велӧдӧй найӧс наиздуч, мед пыр тӧдад.
Карта вылысь вӧсни гумага пыр гижлаалӧй материк вежтасъяс. Вундӧй визьӧдыс. Материкъяссӧ мӧда-мӧд вылас пуктӧмӧн ӧтлааститӧй — коді на пиысь медыджыд, коді медічӧт.
Велӧдчӧй сюся петкӧдлыны карта вылысь материкъяссӧ, океанъяссӧ да.
 
|
This work is in the public domain in the United States because it was first published outside the United States prior to January 1, 1930. Other jurisdictions have other rules. Also note that this work may not be in the public domain in the 9th Circuit if it was published after July 1, 1909, unless the author is known to have died in 1954 or earlier (more than 70 years ago).[1]
This work might not be in the public domain outside the United States and should not be transferred to a Wikisource language subdomain (or as a file it should not be migrated to the Wikimedia Commons) that excludes pre-1930 works copyrighted at home. Данная работа, впервые изданная до 1930 года, находится в общественном достоянии по законодательству США, и может быть опубликована здесь, в мультиязычной Викитеке. Но эта работа не может быть опубликована в национальной Викитеке, которая должна подчиняться законодательству России, т. к. работы этого автора (за исключением изданных до 7 ноября 1917 года) пока не вышли в общественное достояние в России. Этот автор умер в 1967 году, соответственно эта работа выйдет в России в общественное достояние в 2038 году.
The author died in 1967, so this work is also in the public domain in countries and areas (outside Russia) where the copyright term is the author's life plus 50 years or less. |