Валда ян/1928/03(4)/Масторнь кстысь или нормарьсь

←ВЛКСМ 8 с‘езць

Валда ян (1828), № 3 (4), Май ков edited by Шотин И. В. Масторнь кстысь или нормарьсь

Сембя масторнь идень неделясь пионер-отряца→

Валда ян. Эрь ковонь общественно-политический и велень-хозяйствань журнал. Нолдаец "Од веле" газетать редакцияц. — № 3 (4), 1928 кизоня, Май ков. — с. 7

Комсомолнь и од ломаннь тефть-кит.

Масторнь кстысь или нормарьсь.

Оцюста касы масторнь кстыти мярьгондихть нормарь (клубника). Но масторнь кстысь и нормарсь пяк маластонь роднят, — кода лопань, станя таньцфонь пяльденга синь фкят. Аньцек панччфснон корява опытнай ломанць содасынь, конац масторнь ксты, конац нормарь. Масторнь кстыть панчфса раштафкскятня (тычинки и пестики) эряхть атянек аванек, а нормарьть: фкя панчфсонза аньцек атя раштафкскят, омбоцеть эса — ава раштафскят и кда вармать, или мелявнятнень и унжанятнень вельдя атя и ава раштафкскятня марс аф васедихть, эста синь аф раштахть и панчфкятня кизоснон етафцазь тяфтак, ксты эзозонза аф шачи.

Сят кстыхнень эзда, конат касыхть миннь васто ванок, нормарьксь лувондовихть аньцек кафта сортт — „Шпанкассь“ и „русски клубникась“. Лядыкс сорттня сембя масторнь кстыхть. Синь ускфт Америкаста. Кода нормарть, станя масторнь кстыть-кя абуцясна фкят. Сяс сембя вастова минь карматам лемнема аньцек масторнь кстыть.

2-ця рис.
Масторнь кстыкс.

Масторнь кстыть меля якамась стама-жа теждя тев, кода инизейксть. Сон сяськомшка школаса тонафни итнендингя. Касы сон сембя вастова и соннь содасазь сиренек однек мянь тетьмаконь самос.

Кодама модаса сяда лац шачи масторнь кстысь? Сембода цебярькс лувондови сьовоню модась. Аф прокс осалста касы акша модасонга (песокуса). Песоку модась эряви лацкас навозендамс траксонь навозса, сон сяда кувать кирьди модать эса летькя. Сьовоню модати сяда лац моли алашань навозсь, сон наксадомста эжцы и ляпофцы модать.

Кстыхнень раштафтомс можна видьмостонга, но тяннь аф тиенцазь, мес пяк лама перьфкаст пльхкамада. Сяда башка, видьмоста касфтф кстыксть эзда лиси од сорт — кати сяда цебярь, кати осал.

Мзярда озафнемс кстыксня? Тя кизефксти катк эрь сад азорсь сонць муй отвед. А минь азсаськ аньцек сяннь, што рана тунда озафтф кстыкснень эзда можна сяка кизоня сявомс кстыхть. Сяда позна озафтфня тя выгодать аф макссазь. Можна озафтомс рана тунда, кизонда и сьоксенданга, аньцек аш кода озафтомс пяк жар и коськя пингоня, эста озафтфнень эзда ламось аф виенди.

Масторнь кстыксня эрявихть озафнемс паньденя ланкс, паньденятня тиемс ляпя модаста, но тиендихть дернастонга. Оржа кшнень каймоса керьсихть дернат и паньдясазь алу тишет станя, штоба тишесь калмаволь сембя вастова. Дернань паньтня пак цебярьхть, мес синнь лангозост кодамовок тишя курок касома аф кармай, модаськя шачи.

Кстыкс юрнятнень эрявихть озафнемс сяда шуроняста — 55-шка сантиметр. Пяк крхка пизонят тиендемс аф кондясти — 6-10 сантиметорхня сатыхть. Аф эрявихть озафнемс марс кафтонь — колмоннь. Озафнемста ваномс сяннь меля, штоба коряннятня молест алу. Калмосемс аньцек корянь юрнять видева. Озафнемода меля валомс и сембя паньденятнень ацамс шюжярю, аф прокс наксада навозса.

Васень кизонда кстыкснень меля якамась аф стака, эрявихть аньцек весть-кафксть кочкомс. Но омбоця кизоста сявомс и сяда тов — эрь тунда, кодак суфты масторсь, эрявихть паньденятня карянфнемс (шувондомс). Сияк керьсемс мелятень лопатня и сюрелдатня. Но коданга аф эрявихть токсемс од, пижя лопанятня.

Каряньфнемода меля паньдя ланкня эрявихть ацамс навозса и, кда эряви, кочкомс.

Уленьдярхть кстыксня озафтфт рана тунда, омбоця кизонда синь максыхть лама кстыда, конат цебярь кизонда кармахть кенерьма июнь ковть омбоцекс пяльстонза.

Колмоця кизось — сембода лама кстынь касома киза, а якамась кстыкснень меля ляды сякось-жа, кода и омбоця кизоня; тяса прибавай аньцек фкя работа — паньтнень ланкс эрявихть кеподемс паньдя китнень эзда мода. Кой лов вець, кой кочкомста-шувондомста, паньтнень ланкста модась пяяри алу, паньдя китненди. Сяс кочкомода меля паньтня арахть кеподемс оду. Тяфта-жа паньтня эрявихть кепсемс нилеця и ветеця кизотнень эздонга.

Нилеця кизонда кстыйда касы сяда кржа, сятка кармахть мелкайкстомма и сад азорти эряви думондамс лия васц кстынь озафнемать колга. Опытнай сад азорхня азонцазь, што кстыхня шачихть тяфта:

⁠1-ця кизоня паньденять ланкста, кда кстыксня
озафтфт рана тунда, кочкави... 4 килогрампт ксты.

⁠2-ця кизонда (кстыхня сембода крупнат)⁠. 16 кил.

⁠3-ця кизоня кстыхня стама-жа крупнат⁠. 32⁠„

⁠4-ця⁠„⁠„⁠„⁠„⁠. 20⁠„

5 и 6-ця⁠„⁠„⁠„⁠„⁠. 16⁠„

6 и 7-ця⁠„⁠(кстыда сынара-жа, но сяда мелкахть) . 16⁠„

Кстыхнень эзда можно шнамос тяфтама сорттня:

1. Викториясь — пяк цебярь сорць, кстыда шачи лама, аф крупнат, аф мелкахть, таньцфс — шапамнят.

2. Принцессась. — Касы лац, кстыда лама, аф прокс мелкахть, аф курок колихть, пяк цебярь вареньянди, панжи аф рана, сяс тундань марозда аф пели.

3. Рощинская‘сь. — Кстыхня касыхть оцюста, кувакат, якстерьхть, таньцтихть, кенерихть рана, но курок колихть.

4. Абрикос‘сь. — Тацьти, крупнай, кстыда лама.

5. Белай анисовайсь. — Кстысь акша, таньцти, пяк цебярь вареньянди. Тялоти эряви вельхнемс лопаса 10-15 сантиметрань серь.