Янгамо (2006)/Ледезель кавксть
| ←Ульнесь якстере чокшне | Ледезель кавксть (2006) by , edited by Рябова Л. А. |
Седеень лазкс→ |
| Нуянь Видяз. Янгамо. Келей ёвтнема, ёвтнемат, тешкст. — Саран ош, 2006. — с. 138—141 |
[138]
| ЛЕДЕЗЕЛЬ КАВКСТЬ |
Велесь кукшкадсь.
Эзганзо велясть эрьва кодат кулят. А вана содамс паро ладсо — кияк мезеяк эзь сода. Видечись неть кортамотнесэ ульнесь вейке: курок парсте эрицятнень кармить почаксамост. Кинь, кона шкава, ков — марясть аламот. Паряк, ансяк велетнень лангсо «бояртнэ» ды кой-кие тескенсетнеде.
Буядо тевень вечкицят велесэнть арасельть. Эрясть сынь Покш ульцясо. Кудост покш, мазый. Неть кудотне-читне пурнавкшность тенст аволь сеске ды, седеяк, аволь эземень ёзазь. Сонсь Юртай, Буянь прявтост, маштсь тееме эрьва мезе ды та-кода аволь лиятнень ладсо — пеедькшнезь-налксезь. Тевенть свал тейсь мельспаросо. Истятольть цёранзояк. Сынст кондят вейкень-вейкень чарькодиця, велувсо эриця семият вастневить аволь сеедьстэ.
[139] Эрямосонть, савкшнось аволь весть марсемс, эряви пандомс эрьва лекстявксонть кис. Ков молят, эрямонть эсензэ коензэ. Истя лиссь Буянь мартояк. Савсь пандомс, ды пандомс покштояк покш питне. «Од эрямонь вечкицятнень» ютксто кой-кинь сельмест сявалесть Буянь кудост лангс, човсесть пейть.
Совасть тенст пелеве малава, истя бажасть кекшемс раужо тевест. Эзь лисе. Булгадонть, кона мольсь Буянь кудосо, кашказевсь весе песь.
Аволь весть валсо-мокшнасо недявкшность Буянь цёратне милиционертнэнь марто. Окойники сынст сюлмсизь ды ливтизь кудостонть. Панизь лиятненьгак.
Меельцекс колызь вейке вальманть ды эзганзо ёртнизь васоло килангов анокстазь курмост-кармост; мельгаст теке вальмаванть бызновтызь рангиця пакшатненьгак.
Булгась скимемсь ашолгадозь.
— Монь, монь куш кадомизь, — энялдсь кудонь прявтось. — Максодо тень теске куломс, кадык тетянь-авань ваксс калмасамизь. Сыре прясо ков маштован?
Покш ки лангс лисемадо икеле пансицятне пурнавсть ве таркас ды мезде-бути кортазевсть эсь ютковаст. Серьгедизь Юртай атянь.
— Вот что, козёл сивобородый, тебя и внуков твоих оставляем здесь. И без тебя довольно, план перевыполнен. Хватит.
Атясь, теке палмань, аштесь икелест ды эзь сода, мезе меремс. Мельтне прясонзо чарасть, кода чадыведь шкасто домка таркасо човось: «Кадован теске — вадря. Кода улемс нуцькатнень марто? Мезе лиси мартост тетявтомо-ававтомо? Ниле покольнеть кадовить сыре сявдиксэнь лангс...»
Юртай серьгединзе цёранзо-урьванзо. Кортызь-теизь ды прасть ве мельс — явомс эйкакштнэнь кавтов: седе покштнэнь сайсызь тов, ков паньсызь-ильтясызь, вишкинетне кадовить теске, бодяст марто. Истяткак ульнесть кортамот: кие соды, мезе тосо учи, паряк, ниленест кадомс теске?
Эйкакштнэнь ойсевтизь крандазс, покштнэ сыргасть мельганзо ялго.
— Вастомазонок, бодяй! Вастомазонок! — сеересть Юртай атянень уш покш, васов туиця нуцьканзо. Ильтицянть седеезэ сюмордозевсь, ёжозо нуваргадсь: «Мезе сынст тосо, косояк тундрасо, учи?» Вансь туицятнень мельга ды яла ахолясь эчке санов, каргоць кедьсэнзэ: «Вастомазонок...» Савить-арась зярдояк неемс? Апародонть совась кирьгапарезэнзэ навола потомкс.
[140] Телесь лембель. Юртайнень сон ютавтовсь а стакасто. Теяк виде, сюпавонь «вечкицятне» аламнеде ды вансть мелензэ. Велесэнть истямо превей, ламос чарькодиця ды кол кедь ломань арасель.
Кода эзть лепштя «верцетне», кадызь эрямо эсензэ кудос. Саизь лишмензэ, мейле нешкензэ. Скалонть эзизь. Секскак атясь пиже пакшанзо марто ютавтызе теленть покш мелявксонь апак сода.
Сась тундо. Жойнезевсь Покшсельме лейнесь. Чачома масторов самонь кеняркстонть эзть сода оймамо нармунтне. Кемевсь, шалтто пешксе шканть марто сы од, сэтьме эрямо ды зярдояк а велявтыть сёксень ризкстэ пешксе, модамасторонь келес сравтнемань читне.
Арась, истя эзь лисе. Ве кажонть полавтызе омбоце.
Беряньстэ эрицятнень кармасть панеме вейсэнь хозяйствас, рузкс — колхозс. Лишметнень, скалтнэнь, сеятнень, реветнень ды саразтнэнь мерезель ветямс «вейсэнь» кардазс. Истят покш кардазт зярс арасельть, секс саразтнэнь ды вишка ракшатнень аламос каднызь кудова. Васняяк ломантнень кедьстэ амзордызь лишметнень. Зяро лайшемат, эрдекстамот, колазь мельть ульнесть! Индялонь Васькуш, кона лишмензэ вечкилизе нидензэ пек, кавтошка иеть мейле салава якась вейсэнь кардазов ды палсесь чевте турвас вечкевикс Варманзо.
Пачкодсь седей ормань тевесь Буяскак.
Састь колхозс скалонзо ветямо уш сундерьгадозь.
— Скалот мельга вана сынек, покштяй! — мерсь конась-бути сайницятнень эйстэ.
«Трицям а максса!» — чапизе эстензэ меленть Юртай истят валтнэнь марязь.
Цярахманось а кевкстни, козонь прамс. Эзть карма «од эрямонь теицятнеяк» кевкстнеме, мезестэ ушодомс. Сыненст кодамо тев, зяро эйкакшт сыре ломаненть кедь лангсо? Мерсть тенст — теема. Сынь, мери-цятне, арсицят ды кавтолдыцят а вечкить.
Пурныцянь командась дубор-дубор лиссь кудыкелев ды тосто уш валгсь кардазс. Юртонь прявтось — мельгаст. Терявтызе ёвтнемс, совавтомс удемезэст, мекс тензэ эряви кирдемс скалонть. Энялдсь а токшемс куш иешка. Кунсоломонзо эзть арсеяк. Теке ломаньгак икелест арасель.
Скалось эсензэ калдынесэ порсь пореманзо ды шкань-шкань стакасто таргсесь оймензэ. Эзь сода, кодат ёжонь даволт чарыть-велить перьканзо. Чарькодевельгак...
[141] Вейкесь, конань кедьсэ ульнесь пикс, эскельдясь пириненть пелев. Юртай атя икельдизе ды кедень келемтезь стясь Превакшонзо икелев.
— Куш мезе тееде мартон, колхозс а максса! А кадсынь пиже нуцькан вачодо, — путнезь путнинзе валтнэнь. Сон чарькодсь — весе те стяко, валсо истятнэнь седеест а солавтсыть. Типельдсь та-косо удемсэнзэ — тейни эйкакшокс, ансяк лиякс эзь машто.
Валонь апак ёмавтне, кавто бурина цёрат рестедизь энялдыцянть пильге лангсто, колмоцесь каиксэль скалонть сюрос килькш. Юртай эзь кирдеве, терявтызе ноцковтомс пиксэнть. Эзь нельгеве. Таго стясь Превакшонзо каршо, кундась сюрозонзо.
— Кадынк, энялдан, кадынк! Сонтемензэ шанжить пакшатне. Тыненк сынст кастан! Тыненк эрявомо кармить армияв. Кадынк, кадынк! — сеересь сыре Юртай ней уш энялдозь, сельведень пачк.
Каштмолема.
Пурныцятнень прявтост вансь-вансь шержей пря ломаненть лангс, таргизе боказонзо понгавтозь наганонть ды...
Урнозевсь човине, седеень раздиця вайгельсэ кузтемалдо кискась. Котнозевсь чувто лангсо атякшось.
— Кулачье отродье!.. — кежтнеде сорныця вайгельсэ пеень пачк мерсь Юртаень маштыцязо ды истя жо апак эрязкале путызе тарказонзо ломанень маштниця «налкшкензэ».
Кудыкельде кардазс кузтемаванть, теке ленге кирькст, кеверезь-кеверсть бодяст ваксс нуцьканзо. Ландясть ды путызь пряст верьсэ артозь мештезэнзэ.
— Покштяй, стяк, стяк, илямизь кадо! — сеересть, ильсезь авардсть урозкетне, верьга вайгельть рангсть велькссэнзэ.
Превакш, конань пикссэ ветясть «од эрямос», эскельдясь азоронзо венстезь кеденть трокс ды лиссь кардазсто.