Эрзянь Мастор/2007/01/Кулось эрзянь ине ломань - Кизяев Александр Сергеевич

From Wikisource
Jump to navigation Jump to search
Эрзянь Мастор, № 1 (249), 12 января 2007 edited by Нуянь Видяз, Кшуманцянь Пиргуж
Кулось эрзянь ине ломань — Кизяев Александр Сергеевич
Статья на сайте газеты: № 249, 12.01.2007, Кулось эрзянь ине ломань - Кизяев Александр Сергеевич
 
Кулось эрзянь ине ломань — Кизяев Александр Сергеевич

Александр Сергеевич Кизяев (Отяж Кизай) чачсь 1951-це иень ожоковонь 31-це чистэ Нижней Новгородсо. Служась армиясо. Кишинёв ошонь музыкань училищань вокалонь сольной отделениянь прядомадо мейле важодсь Молдавиянь госфилармониясо. Вайгелезэ — драмань тенор. Анокстась солонь зярыя концертт, программазонзо совавтсь ламо эсензэ морот, вокально-инструментальной миниатюрат, прелюдият. Морот ладсесь Р. Бёрнсонь, Н. Гильенэнь, А. Лупанонь, Д. Самойловонь, В. Боковонь, Н. Рубцовонь стихест лангс. Гастролензэ ульнесть Московсо, Ленинградсо, Харьковсо, Алма-Атасо, Владивостоксо. Концертсэ ве сцена лангс лиснесь авторской моронь истят корифейтнень марто, кода Татьяна ды Сергей Никитинтнэ, Александр Розенбаум, Георгий Васильев ды Алексей Иващенко, Татьяна ды Сергей Копосовтне. Шнамонь лембе валт корязонзо ёвтасть Булат Окуджава поэтэсь, Евгений Дога композиторось. Александр Кизяев кавксть ульнесь авторской моронь Всесоюзной фестивалень лауреатокс — Московсо ды Саратовсо. Сон сёрмадсь музыка «Великолепная шестёрка», «Симфония № 1» телефильматненень, «Здравствуйте» советско-итальянской мультфильмантень. Музыкадо башка, сёрмадсь прозаяк: ёвтнемат, ёвкст, новеллат. Зепсэнзэ свал кирдсь-кандтнесь блокнотке ды сювозь карандашке: косо илязо уле, сы превезэнзэ арсема, ютавтсы конёв лангс — илязо стувтово-менстяво. 1989-це иестэ саезь эри Сарансо. Саранонь 20-це школасо пурнась-тейсь «Лисьмапря» ды «Чиньжарамо» вокало-хореографиянь ансамблят. Сёрмадсь «Пургаз цёрыне», «Пургазонь сёрма» вейке актсо операт. «Пургаз цёрынесь» невтезель муздрамань театрань сцена лангсто. Мезекс ансяк эзь саво тензэ улемс оперань путомсто-налксемстэ: режиссёрокс, либреттонь сёрмадыцякс, концертмейстерэкс, художникекс-постановщикекс, хормейстерэкс, седицякс, ролень налксицякс. 1995-це иестэ Мордкизсэ лиссь «Бажамот» книгазо, конанть сёрмадызе эрзякс ды алтызе бабанстэнь —Ирина Фёдоровна Суродейкинанень.

Кулось те иень якшамковонь 3-це чистэ. Тусь эрямостонть покш талант марто ломань, эрзянь келень кис аштицятнень эйстэ вейкесь.

Явдано седейризкс малавиксэнзэ туртов.

"Эрзянь Масторонь" теицятне ды ловныцятне


RU: Данная работа создана сотрудниками газеты Эрзянь Мастор и распространяется по лицензии Creative Commons Attribution 4.0 International. См. пояснение внизу заглавной страницы газеты.
EN: This work is licensed under the Creative Commons Attribution 4.0 International License as a work by Erzyan Mastor journal employee(s). See the disclaimer on the bottom of the front page of the journal.