Эрзянь ёвкст (М. Е. Евсевьев, 1928)/11
| ←Ёвкс 10 | Эрзянь ёвкст (1928) , edited by Евсевьев, Макар Евсевьевич Ёвкс 11 |
Ёвкс 12→ |
| Эрзянь ёвкст (скаскат). Пурныньзе М. Е. Евсевьев. СССР-энь Наротнэнь Центральной Издательствась. Москов, 1928 |
КОЛЕСНИК.
Эрясь ве колесник. Ломанесь сон аволь сюпав ульнесь; сюро а видиль — чарыть тейниль и сень эйсэ прянзо триль. Вакснэнзэ эрясть колмо сюпавт брат. Сынь колмонест ломатьне а парт ульнесть, — ваныльть ансяк ломанень обидямо.
Весть колесник анокстась миймекс чарыть цела утомо. Сюпавт братнэ неизь чарытьнень ды арсить: [ 42 ]мийсыньзедеряй колесник не черытнень, минденек пек сюпалгады: эрявить пултамс чарынзэ. Саизь ды курвастизь чарынзэ.
Колесник мери: „Палсть, палсть чарынь, мон яла теке питнест сайсынь”.
Пурныньзе куловтнэнь, вачкиньзе улавс и ранаяк та ков тусь мартост.
Мольсь, мольсь — пачкоць покш ош вакс. Листь ошостонть колмо купецть и кевстнить эйсэнзэ: „Ков молят и месть ускат”.
Колесник мери: „Молян инязоронень, ускан тензэ сякойть одижат”.
Купецьне педясть тензэ и мерить: „Невти тенек, кодат одижатнень ускат инязоростень”. Колесник мери: „А невцынь, — тынь сельметьсынк и сынь олыть эли лиякс мезекскак теевить”.
Купецьне саизь ды силой улавсть штавтызь. Ваныть — тосо куловт. Колесник мери: „Эх, мезе теиде! меринь ведь сельметьсынк. Кода ней молян инязоростень, месть тензэ ёвтан? Сон моньгак прям керясазо, тынккак керясыньзе”.
Купецьне мерить: „Иля яка инязоростень, иля ёвтне тензэ: минь тенть колмо понт ярмак макстанок”. Колесник саинзе колмо понт ярмакнэнь и мурдась кудов.
Лоткавтызе лишмензэ орта ланкс и сеери нинстэнь: „Баба, а баба, листь седе курок ярмаконь чамтлеме: цела улав ярмак ускинь”.
Маризь колмо братнэ — ваныть, — алкукс колесник цела улав ярмак усксь. Сияцть сельмест. Састь колесникень кевстнеме, косто сон саинзе ярмакнэнь.
Колесник мери: „Палсть монь чарынь. Мон пурнынь куловтнэнь и туинь микшнемест. Пачкодинь ве покш ошос, тосо куловт овсе арасть. Ютан ульця ютковасть и сеерянь: куловт микшнян! куловт микшнян! Куловт кинень а эрявить-ли? — Ош-эрицятне весе празь прасть монь куловтнэнь ланкс. [ 43 ]Вейке мери монень мийть, омбоцесь — монень. Мон саия ды миия улавом колмо понт ярмакто. Мон арсян ней кудоньть-как пултамо ды таго мольме се ошонтень кулов марто.”
Братнэ састь кудов ды мерить: эрявить минекак кудотнень пултамс ды кулов микшнеме молемс се ошостень. Саизь ды пултызь кудост-чист. Вачкасть колмо улавт куловт и тусть се ошостень микшнеме.
Ютыть ульцянть кувалт и колмонест сеерить: „Куловт микшнитянок, куловт! Куловт кинень а эрявить-ли?”
Маризь сетьне колмо купецьне, конат тандадмонь пачк максть колмо понт ярмак колесникнень, и мерить: „А, таго сась маньчеме!” Листь ульцяс, кундызь братнэнь и давай эснэст чавмо. Чавсть, чавсть, братнэ та кода меньсть кецтэст и чиезь кудов, лишместкак тоск кадызь.
Састь кудов и мерить: „Манимизь колесник, — кода ней тензэ те кеженть пантсынек?” Покш братось мери: „Сонзэ авазо пек превей, — ававтомо сонсинзэяк пезэ машты”. Саизь ды маштызь колесникень аванзо.
Колесник пурнызе-сэрьнизе аванзо, озавтызе кибиткас и тусь мартонзо та ков. Пачкоць таго покш ош вакс. Листь ошостонть колмо ломать и кевстнить эснэнзэ: „Ков молят и месть ускат?”
Колесник мери: „Молян мон инязоростень, ускан тензэ мазы тейтерь козяйкакс”. Ломатьне колмоцест педязь тензэ и мерить: „Невтик ды невтик, кодамо тейтерсть ускат инязоростень никс”. Колесник мери: „Илядо энялт-как, а невца, пелян, аволенк сельметь”.
Ломатьне колесникень эзизь кулсоно, саизь ды силой штавтызь кибитка кургонть. Ваныть — тосо кулозь сыре баба ашти.
Колесник мери: „Эх, сельменк-чаманк лисест, мезе теиде! меринь ведь сельметьсынк! Кода ней молян [ 44 ]инязоронть икелев, месть тензэ ёвтан? Сон моньгак ды тынкак прянк керясыньзе.” Ломатьне колмонест мерить: „Инескеть иля пижне, — ломать аволидизь маряк, макстанок тенть колмо понт ярмак, ансяк иля яка инязоростень, иля ёвта лангозонок”.
Колесник саинзе колмо понт ярмакнэнь и мурдась кудов. Калмизе аванзо, лоткась орта ланкс и сеери: „Баба, а баба, листь седе курок ярмаконь чамтлеме, — цела улав ярмак ускинь.”
Маризь колмо братнэ — ваныть колесник алкукс таго цела улав ярмак усксь. Листь колмонест, кевстнить эснэнзэ, — косто сон ярмакнэнь саинзе. Колесник мери: „Миия кулозь авань. Маринь мон — ве ошнэ кулозь ломать рамсить. Саия авань и молинь се ошостень. Эзинь кенерть серьгедьме: кулозь ломань микшнян! кулозь ломань кинень а эряви-ли? — ош-эрицятне празь прасть лангозон! Вейке мери: монень миик! омбоце — монень. Мон колмо понт ярмакто миия авань.”
Братнэ састь кудов и мерить: „Дайте козяйканок маштсынек ды мийсынек. Сайдянок кисэст колмонь-колмонь пондо ярмак, и минь колестникте сюпавт ульдянок.” Саизь ды маштызь козяйкаст. Путызь колмо крандазга и тусть се ошостень козяйкаст мийме, косо колесник аванзо миизе.
Эсть кенерть ошостень совамо, кода кармить колмо вайгельсэ сеереме: „Кулозь ломать кинень эрявить? Кулозь ломать микшнитянок!” Листь не колмо ломатьне, конат тандадмост пачк максть колесникнень колмо понт ярмак, кода кундасызь братнэнь, кода кармить эснэст чавмо! чавсть, чавсть — братнэ та кода менсть кецтэст и чиезь кудов, лишмест-как козейкаст марто тоск кадызь.
Састь кудов и мерить: „Таго манимизь колесник, аволь авазо, нать, сонсь колесниксь вельть дока, — эряви сонсинзэ ёмавтомс.” И арсесьть колесникень ветьс ваявтомо. Кундызь сонзэ, озавтызь кульс и [ 45 ]кулень кургонть сюмсизь. Кильсть лишме и тусть маронзо покш ведень вешнеме.
Мольсть, мольсть — пачкоцть кабак ваксс. Лоткавтызь лишмест и колмонест совасть кабакстень винадо симме, колесникень кадызь крандастнэнень.
Колесник пельсь кульстень варя и ваны. Ваксканзо пастух пани скалонь стада. Сон мери пастухстень: „Пастух, а пастух, некшныть тон инязоро?”.
— Эзинь?
— Неевлеть?
— Неевлень, ды косто нейсак?
— Вана монь эйсэ ускить инязоронень невтемень, а мон пек аволень мольть. Неевлетьдеряй инязоро, совак кульстень монь таркас, мон мекев мурдамозот вансынь скалот.
Пастухсь укстизе куленть, нолдызе тосто колесникень, а сонсь совась тарказонзо. Колесник саизе стаданть и тусь мартонзо.
Листь братнэ кабакстонть иредезь. Ускизь пастухонь покш ведь чирес и ваявтызь, сынсь мурдасть кудов. Ансяк кенерсть кудос совамо, ваныть — колесник цела стада скалт пани. Ваныть — и эсь сельмест ланкс а кемить: кода колесниксь ведь потмакстонть лись и косто скалтнэнь саинзе.
Пачкоць колесник орта ланкс и сеери: „Баба, а баба! панчт седе курок орта, — скалт цела стада панинь”.
Листь колмонест братнэ-як и кевстнить колесниксэ, косто саинзе сон скалтнэнь.
Колесник мери: „Ведь потмаксто: тосо знярыя эстэдэст.”
Братнэ мерить: „Колесник, ваявтымизь минекак, миньгак скалт пандянок и теде мейле а карматанок тенть больше кежень пандомо”.
Колесник саинзе колмонест братнэнь, озавтынзе кульс ды ваявтынзе. Сонсь сась кудов и апак мелявт кармась эрямо.