Эрзянь ёвкст (М. Е. Евсевьев, 1928)/44
| ←Ёвкс 43 | Эрзянь ёвкст (1928) , edited by Евсевьев, Макар Евсевьевич Ёвкс 44 |
Ёвкс 45→ |
| Эрзянь ёвкст (скаскат). Пурныньзе М. Е. Евсевьев. СССР-энь Наротнэнь Центральной Издательствась. Москов, 1928 |
КОДА ОВТО МАРТО АТИНЕ РЕПСТ ВИДНЕСТЬ.
Эрясть-айшть атине ды бабине. Сынст а эйдест, а какшост. Бабась мери атястень: „Атя, давай репст виттянок!”
Сайсть сока и тусьть вирев. Пачкоцть полянынес.
Вирь чиресэнть ваны овтыне. Кильдизе атясь овтынень. Сокить — сокась-как весе сяторды овто уски. Сокизь. Вицть репст, вицть товзюро. Кенерьсть репснэ. Овтыне сась атясть валмалов и мери: „Атя ялгась, кудосат?”
— Кудосан!
— Кенерьсть репснэ, — адя таргасынек!
— Адя!
Таргизь репснэнь.
— Тон, овтыне, алкскеть саят, эли прякскеть?
— Мон, атя ялгась, прякскеть саян.
Овто саинзе лопатьнень, атясь репснэнь. Кенерьць товзюрост-как.
[ 129 ]Овтыне мери: „Ней, атя ялгась, мон алкскетьнень сайсынь, тонеть улест прякскетьне”.
Нуизь товзюронть. Атясь саиньзе прятьнень, а овтыне жниватьнень.
Атине пивсызе товзюронть и яжавць почт. Бабинесь панць репсэнь прякат.
Сась овтыне гостекс.
— Атя ялгась, кудосат?
— Кудосан! Сак, сак, овтынекай, репсэнь прякадо анттан.
Совась овтыне кудос. Бабинесь макссь тензэ репсэнь пряка. Сэвизе овтыне и мери:
— „Ай, атя ялгась, тон манимек монь, — тонть тантейть прякат, а монь аволь тантейть. Маштыть пенгеть, молят вирев; мон сэвдян!”
Майшть атянь пенгензэ. Бабинесь мери тензэ „Азё, атя вирев, пенгень майшть”.
— Пелян, овтыне сэвсамам!
— Сёровно, азё, — кельмитянок.
Саизе атине узерензэ и тусь. Мольсь вирь крайс, тюк-тюк кери.
Юты ривеське. „Ай, атине, овто эзить, нек службав панян!”
— Эзинь нек!
Тусь ривеське. Атя таго тюк-тюк кери. Маризе овто. Мольсь ваксозонзо и мери: „А, атине, сыть! ней сэвдян”.
— Илямакть сэвть, овтыне, бабам вачо кулы.
„Дили, дили” баягине марто арць ривеське.
— Атине, овто эзить нек, службав панян.
Овтынесь салавинька атинестень мери: „Мерьть эзинь нек, мерьть эзинь нек.”
Атинесь мери: „Эзинь нек!”
— А вакснэть мезе?
— Атя ялгась, мерть палсь-кандо.
— Палсь кандо!
— Палсь кандо улевель-гак, узере пезнавтовлеть эзэнзэ.
[ 130 ]Овтынесь: „Атя ялгась, пезнавт узере, пезнавт.” Атинесь кода аволды узерсэнть овто ланкс, овтонь прязо кавтов лазовсь.
Ривеське мери атястень: „Ней мезе тень максат, атине, паронь теймень кисэ?”
— Вана мезе, ривеськай, — максан тенть куйме сарас. Ванды тенть усксынь.
Атинесь вейшь шабранзо кецтэ алаша. Пуць покш куйме, тозо кавто борзойть. Саразонть саизе кедезэнзэ и тусь вирев. Саразось керьни кецензэ. Ривезесь маризе саразоньть керьнемеде, — радувась, кирнавтни — атя ялгазо тензэ куйме сараст уски.
Сась ривеськесь атянть вакс и мери: „Тон, атя ялгась, весе друк или нолда сараснэнь, монень а кунтлевить, вейте-вейте нолдак.”
Атясь нолдызе кецтэнзэ саразонть. Ривеськесь кундызе, сэвизе.
— Ну, ней нолдыть куймесэтьнень-гак.
— Арак седе малав, а то а понгить тенть.
Ривеськесь арась малав. Атясь кода нолдасыньзе куйместэнть кискатьнень. Ривеське ардозь атянть ваксто. Кискатьне мельганзо. Ривеськесь арды, сонсь пижни: „Ай, атя ялгась, манимек! ай, атя ялгась, манимек!” Арць, арць, ундо поц совась. Кискатьне эзизь нейть. Ундо поцонть ривеське кевсни сельмесэнзэ: „Тынь, сельть месть теиде, кода кискатьне арцьть мельган?”
— Минь яла ки тенть невтинек!
— Тынь, пильк, месть тейниде?
— Минь яла капшинек икелев да икелев ардынек!
— А тон, пуло, месть тейнить?
— Мон яла аволинь, кискатьнесэ маньчинь!
— Ну, мон тонть кисканень макстан сень-гис!
Ливтизе пулонзо ушов ды серьгець: „Надо, кискат, сэвинк пулом!” Кискатьне кундызь пулодо, таргизь ундостонть ушов и сэвизь.