Янгамо (2006)/Ковонь перть вейсхозсо
| ←Кить-бути морасть моро... | Ковонь перть вейсхозсо (2006) by , edited by Рябова Л. А. |
Янгамо→ |
| Нуянь Видяз. Янгамо. Келей ёвтнема, ёвтнемат, тешкст. — Саранск ош, 2006. — с. 202—234 |
[202]
| Тешкст
КОВОНЬ ПЕРТЬ ВЕЙСХОЗСО |
Ломанесь, видеяк...
Весемеде маней уцяска, марсинь паро ломанень пельде, максни аволь кияк — сонсь Верепазось. Те — марсинь. Тонавтсть вана эйсэнек школатнесэ-косо тунь лиякс. Яла нерьгсть удемезэнек: эсь уцясканзо теи-кемельди эрьвась сонсь. Кодамокс мелеть улемс, истямокс уляткак: превеекс, ёжомарицякс, манчигаекс, салыцякс, оймень костицякс... Вант, эсеть мелесь.
Стяконь кортамот. Улевельгак истя, зняро чаво кескавсо чуказь прят, антюкт, шабрань превсэ эрицят авольть уле. Весе-весе пряст сёрмадстовлизь Ломоносовонь кондямокс. Ломанесь ламонь кувалма Инешкипазонть кедькоморсо. Ковгак а кирнявтат эйстэнзэ. Кершатанзат, а кенерят чачомо. Кие, мертяно, сондензэ башка эйкакшонтень максы тетят-ават?
Аволь пек умок кайсинь ноготон — кое молемс оймсеме. Тешкстнинь-арсинь сыця шкань тевень малав ковонь перть. Мелем ульнесь молемс велев, содавтомс таркатнень, кува чийнесь эйкакш пингем, кортамс пешкедемазон эрзякс, кунсоломс шержей шкань морот-ёвкст ды ютавтомс сынст конёв лангс. Эрьва чистэ ловнынь эсь пачкан, зяро чить лиядсть те кенярксто пешксе шкантень.
Учовсь...
Тердимим каршо чистэнть прявтом ды мерсь: «Иесь стака. Пиземетне валыть визьксэнь апак сода. Сави колхозов сыргамс... Лездамо. Оймсеме седе тов нолдатан. Тельня...»
Ков молят? Мезе мерят? Сыргат каршо — пеняцяк эсеть лангс. Скирдатадызь, кочкить шка, петя — ие кармат янксеме. Ледстямс закондо, койтнеде — ёртык превстэтькак. Тесэ, вечкевиксэм, аволь Эрзянь Мастор ды мик аволь американь индеецэнь резервацияяк. Тесэ — СССР.
Омбоце чистэнть кудосто лисемадо икеле каия сявдиксэм трокс тия-тува яксемань юдмам ды сынь, теке войнав туиця, ильтема таркас.
Те ульнесь тедеде сёксня колхозов васень лисемам.
«Пушкиыо. Таго рузонь, — музгордезь меринь эськан. — Куш весть кучовлимизь эрзянь велес!» Лисни, эрзянь велетне сынсь, лездыцявтомо, тевест тейнить? Пиземеть-цярахмант тосо а эрсить?
Чизэ сумборяль. Нарьгазь ладсо, апак эрязкале ды апак лотксе, пургсесь чова, паро куш лембе, пиземне. Ииститутонок икеле начколесть зярыя автобуст. Учость пурнавоманок.
[203] Тешкс
Мартон комсьветее студентт. Ютксост кавто тейтерть. Ардтано лездамо, якстерькаень таргамо. Эзь марявояк, кода ютась часто ламо ды пачкодинек асфальтсо вельтязь покш кистэнть витев пурдыця кинть видьс. Ки улосонть — менельс сэрей — эрямо таркань лем-невтиця. Кирьпецьстэ вачказь юртонть ланга покш буквасо сёрмадозь: «Ромоданово». Якстересэ палыть лангсонзо ушкс-трокс аравтозь покш, малав велень кудонь сэрьсэ, тарвазось ды мушкорось.
Кода а улемс сокицятнень-видицятнень ды ошсо эрицятнень ютксо ояксчинтень истямо тешкстэ мейле? Кодат сёвномат? Кува ансяк эзизь стявтне-понгавтне эсь кедь челькест тарвазонь-мушкоронь тейницятне: кенкш велькска, стенава, кудо конява, тувонь кардова ды кардо икельга. Ки чиретнеде кортамскак а мезть, вастневить эрьва вайгельпень ютазь.
Тень лангс апак вано, ояксчисэ, сёвномавтомо эрямось эзь муеве. Вейкень-вейкень мель ваномадо кортамскак а мезть. Тюремасто, сави меремс, вечкема зярдояк эзь лисне. Косо лакить кежть, паро мельтненень тарка а кадови.
«Чарькодтядо-арась, мартон ардыцят, — чары-вели превсэнь мелесь, — кодамо фундамент лангсо якстердить мушкорось ды тарвазось? Сон, ловт, ловажасто теезь».
Кинень, мейсэ онкстави истят тешкстнэнь теемга валозь вересь? Васня Иисусонь «крёст» вельде валсть сонзэ, мейле... Аволь, овсе аволь истя кастови ояксчи лементь кандтниця чувтось.
Пайстомочи
Пеняцямс тенек а мезе лангс. Эрятано аволь беряньстэ. А эряви превть яжамс: мезе теемс? ков молемс? косто саемс? Ёвтасызь, невтьсызь, мусызь. Ансяк нежедть. Иестэ иес невтить, ков эскелямс, райкомтнень икельга пижестэ-кевстэ теезь кедтне; невтить, ков пурдамс, китнень чирева сялгавтнезь лемтне-невтицятнеяк. Ламотнесэ текесь: «Путь к коммунизму». Истямо «пазавань» кондямо вастымизь тей самстонокак. Те — жестьстэ теезь ды якстересэ артозь, прок верьсэ ваднезь, флаг. Куншкасонзо цятадезь содавикс тешксэсь: мушкор марто тарваз. Флагонтень недьксэнь таркас цитни-ожолды кшнинь товсюро пря.
[204] Ансяк ютавсь ки чиресэ те «пазавась», автобусонок велявтсь керш ёнов. Вайгельпешкань ютазь неявсь тувонь ферма. Тосо, содан, карматано эрямо.
«Сэрей, сэрей жестень прясь-колозось, — арсезевинь, ансяк ютавсь тувонь ферма ёнов невтицясь. — Паряк, истят сэрейть ды сюпавт тесэнь паксятнева товсюронь-мезень ментнеяк?»
Чаво мельть. Бути тесэнь сюронь кастыцятне-урядыцятне ят ёнксонь, косто понгсь пурназь ломанть, кода ней минь, парс а прат, кодамояк покш тев а теят.
Вант вана, мезес пачкодсть, «бусонь» вальмась лавтовот вакссо.
Кинть кувалт, самай «невтицянть» каршо, начколи-мелявты сёксень пизементь ало товсюронь певтеме келей пакся. «Кадови, кадови...» — кортыть тень чаротне. Мельсэньгак арась — урядави, содазь, кадови те пайстомо, рика начко паксясь апак нуе.
Паряк, аволь паксясь, паряк, минь минсь пайстомотне?
Мезе кескавсот?
Пачкодинек эрямо тарказонок.
Рудаз. Пельтне нарьгазь ладсо почолить пиземе.
Кепедия озамканть лангсто юдминем ды лисинь автобусстонть. Монськак а содан мекс, ледсь мелезэнь умонь-умонь эйкакш пингестэнь ве чи.
...Лавтовом трокс кескавне. Стазь сон пракста нуласто. Пси. Секень вант, невелят. Ушосонть теке аволь умарьковгак. Кодамо илязо уле, те чись кецневти седеем. Мекс а кенярдомс: кескавнем тыц пешксе товсюронь прядо! Карькскесь, марян, керязь кери лавтовом. Ёжом а берянь: сован кудос аволь чавонь кедть. Кецневтьса авань. Сон, содан, пиди кандозестэнть товсюронь тантей-тантей каша, чоп ули мезе путомс пей алов. Секскак натой вечкеви кескавонь ведьмеденть сэредьксэсь.
Зярдо ульнинь цёрабайне, савсь кандтнемс кутьмерьсэнь кескавнесэнть кажочи, ней — сыречи. Истя, нать, улема: кие чачи-касы те кедьёнксонть марто, сонзэ марто отьмантень чопавтияк. Вере эрицянть вановтто велькс потс а эцят.
Колхознэнь лездыцян, вейкест-вейкест рестеезь, лиссть автобусстонть ды, сеерезь-раксезь, калдор-кулдор совасть фермантень — эйзэнзэ «педявтозь», пор ведьсэ ваднезь кудонтень.
Тень эйстэ ушодовсь лия таркасо, колхозсо, эрямонок.
[205] Козонь понгинь?
Течи сисемеце чи, кода ушодынь эрямо-пиштеме од лато ало, тувонь фермасо. Лиясто, ёвтаса мелем, мерян тензэ аламнеде лиякс — тюрьма. Каня а моли истямо тарка ёнов?
Кода меремс...
Араселинь тосо. А содаса, мезе те истямось. Ансяк, моли а моли од пизэм кшнинь кенкш марто се кудонть ёнов, тевест тосонь эрицятнень, кода маряви, седе лиятат. Тосо эряви нежедемс. Стякодо, тевень апак тее, андомот кияк а карми. Тесэнь вейсхозсонть весе мекевланг: важодят-арась, топавтсак-арась нормат, пекинеть ялатеке, улиндеряй мелеть, пурнасак.
Те кода истя — а важодят? Тевтеме аштиця чуросто неят. Весе котьмить: кие паксясо, кие тракторонь парксо, кие столь-стувор экшсэ псилгали... Весе нерьгить. Калашт-кулашт кияк а яки. Ансяк вана мелень путома, тевень вечкема, ули-паронь таштамо — арась. Мезе тееви — се сэвеви.
Улить, теке марто, вейсхозонть ды тюрьманть вейсэнь моросткак. Тесэяк, олясо, мельга-мельга ванныцят, тосояк. Ансяк тесэ, монень маряви, эйстэст тосонь коряс седе ламо. Эрьвань эйстэ вейкетьстэ киськеяк ваткить. Визькс валсо кортамонь лувонтькак стака явомс кавтов. «Мать» ды «деремать» — теке лия валткак арасть. Келентькак сеске а чарькодьсак. Рузонь? Паряк, аволь? Паряк, уськень пирявксонть потмо ёно «палыцядонть» кирьгаварява кайсить седе аламо?
А содан, а содан. Превстэнь а лисни: козонь, Верепаз, тонгимик, кодамо масторс? Раужо валонь? Нузяксчинь?
Малацек эрицят
Мезе марто вастовинь течи, цекстамо таркатнесэ истямо тев авольть тее. Косто... Те ансяк тесэ истят тюнихат вастневить. Ды, паряк, превстэ лисицятнень превсэ, сынст кудосо.
Тонсь арсек: колоньгеменце иетнестэ вейсэ эрямонь вечкицятне эсь эйдинест, конанень мерить «колхоз», лемдекшнизь... бояронь лемсэ — «имени Пушкина». Теке марто, сынь ульнесть аволь дух, кода ламот арсить, превтеметь. Пушкинэнть лемензэ ды тетялемензэ эзизь тешкста. Секскак ламонень маряви, Пушкино велесэ вейсэнь хозяйствась лемдезь ине поэтэнть лемсэ.
Тесэнь модатнень «Всея Русень» инязорось [206] максоншнынзе Фёдор Фёдорович Пушкиннэнь 1612-це иестэ Пожарский князенть марто вейсэ поляктнень каршо тюреманзо кис. Оно зярдо уш эрьва кодат «пушкинтнэ» кенерькшнесть явномс эрзянь модатнень!
«Бояронь колхоз?!» — яла тень превс эзь саеве, зярдо карминь содамо теде.
Ужо, ужо... Те ансяк ламодояк ламо тамашатнеде вейкесь.
Седеяк абунгадынь, зярдо кузтемпеденть аволь васоло, конань велькссэ сыреждсь «имени Пушкина» сёрмадовксось, вастовинь сонсензэ Владимир Ильич марто. Рацяня умарь чувтнэнь алдо гипсэнь чачозо тень сеске эзь неявояк. Кияк Ильичень мельга а яки. Таркань-таркань лазновсь, артовксозо олась, каргоць-кадсь.
Пушкин боярось ды Ленин. Мезе мерят, Владимир Ильичкак бояроль, ловт, малацек ломанькс ульнесть. Кодамояк, лисни, тамаша арась вейкест-вейкест вакссо улемасонть. Каня сюпавтне 1917—1921-це иетнестэ ды мейлеяк кавтов явозь арасельть?
Монь ды минек
Мартон сыця лездыцятне однэть. Савить тень нуцькакс. Ламотненень ансяк кемгавксово малава. Тень лангс апак вано, важодить сынь лиятнень коряс а беряньстэ. Весе велень. Тевенть содасызь. Састь агрономокс тонавтнеме.
Сестэ эно мекс мельгаст якан, прок велень скалонь-ревень ваныця? Мекс чиде чис марян текень? Мекс морост вейке?
— Течи монь а нолдасамизь?
— Арась, Саша, арась.
— Сестэ, паряк, ванды? А?
— Ванды Игорь туи. Сонзэ молема шказо.
— Сестэ зярдо эно? — цёранть човине, ванькс вайгельсэнзэ маряви седейс кундыця покордавкс.
— Зярдо Витя сы...
Ды истят кевкстнемат, мерть, валскестэ чокшнес: «Нолдасамизь? Нолдасамизь?..» А содан, ков прям кекшемс те энялдомадонть, седееть пачка ютыця пшкадемадонть. Секень вант, вень куншкаткак стявттадызь. Мезеяк а теят, монь мором эсень — важодевтемс, сынст — эсест: кудов ды ансяк кудов.
Куш вейкесь эйстэдест меревель: «Кода паксятнева кадовозь сюронть идемс? Лов алов а лияды? Кода седе [207] курок якстерькаенть таргамс? Ёми, ёми, кельмевтиндеряй... сахартомо кадовтано».
Арась, истят валт-мелявкст, зяро тесэ пивттяно, марямс эзь савкшно. Паряк, эсесэнь тевесь, пилетне чумот? Однэть, чарькодеви, сявориця вейсхозонть перька нежень стявтницян. Тошнавпть. Эрьвань мелезэ чи-омбоце улемс кудосо, тетя-ава вакссо. Те истя. Ансяк...
Сестэ эно кодамо тувталось? Мекс паксятнень лангсо азорокс теевсть пиземень пельтне ды азгун вармась?
Кевкстемат
Каня карми шумбра ломань чийнеме веле юткова алга панарсо, штапо? Кие, эсь превстэнзэ лисицядо башка, совси кенкшень таркас вальмава? Арась, истят тевть паро ломанькс эрямсто а тейнить. Мик «акоськениця» Аржаев Пашадояк, Пушкинасо умок-умок эрицядонть, истят кулят эзть марсеве.
Сень кис вейсэнь хозяйствасонок «вальмава совсема» тевтнеде — кода лугань опёнкатнеде лембе пиземеде мейле. Куш сельметь конить эйстэст. А эскельдяват, секень вант, пупордят ды синдьсак пильгеть.
Певтеме ламо яжазь машинатнень ютксто сельмень икелев понгсь... хлопкань кочксема-урядамо комбайна! Тесэнь эрицятне сельмепонань пачкаяк эзть некшне хлопка. Кодамо сонзэ чачозо? Кода видить? Кода касы? Сень кис вана сельметь пештявомс вант те тамашань машинанть лангс. Кинь, кевкстемс, сатотсть превензэ шаштомс-ускомс сонзэ минек пелев?
Аволь, содави, сонсь сась. Кие-бути ветякшнызе.
Ванынь-ванынь, ды сонсь лиссь потстон: «Эх, колхоз, колхоз!»
Ды аволь ансяк хлопкань. Эйстэнзэ зярыя метрань ютазь ашти, теке ансяк заводсто ливтизь, кукурузань початкань урядыця комбайна. Мазыйть, мазыйть чикуншка ёндонь инжетне! Каня а превтеме ломань те нулгодькс тевенть теизе? Паро куш Донбассто зярс эзть пане тесэнь ды Московонь прявтнэ седень порксниця-таргиця комбайна. Кие соды, паряк, истямоськак уш килангсо, пачкоди курок.
Понксонь таркас, яла кортыть, кияк паля а орши. Ансяк тракторонь кардазсо неезденть мейле кода-бути кавтолдозевинь.
[208] Яксемань школа
Шказо чикуншкадо мейле колмо час малава. Лембе. Пиземеськак течи прянзо эзизе невтне. Сизесь, бетононь. Ансяк, сокиця-видиця, иля нузялдо, ансяк, икелень чидеть арсезь, пурнак-сэрняк Нороваванть казнензэ.
...Теке уреть, теке полонс саезть, эль-эль эскелязь молить паксяв неть самай «сокицятне-видицятне» — студентт. Сынст ансяк исяк тей панизь. Ванькс тейтерть. Келя, экономфаконь. Лездамо, содазь, ускизь. Ды истя «лездыть»! Паксяв — мекев, паксяв — мекев. Теке часонь чатат тей-тов кайсевить, ансяк вельть стамбаро. Кецнек, вейсхозонь прявт, кецнек, куш ярсамкудос пекест пештямо пачколить. Теяк тев. Куш паксяв а эрявить ямт-мезть усксемс. Кецнек, вейкест-вейкест марто мезеяк а теить. Тюрьгадыть — кисэст таго тон вал кирдть.
Яла молить... Молить паксяв. Важодеме лемезэ.
«Ков истя тынь, пайстомо ломанть, сыргиде? Уцясканк вешнеме? Козонь сонзэ ёмавтынк?» — мелем пшкадемс неть алкукскак пайстомо тейтертненень ды цёратненень.
Чатьмонить.
Ансяк маряви, кода нузякссто ды мельтеме шлебердить Пильгест эрьва эскельксэнть теемстэ: вейс-хоз, вейс-хоз...
Ванан лангозост ды арсян: «Каня машты истя састыне молеме ломанесь?» Молить икельган, теке сулейть, теке чопачат. Секень вант, пильге лангсто прыть. Эль-эль лыкить. Пувазеви вармине — ды сяворить, теке пельснаксадозь чувтт. Верепаз, паряк, тон ёвтасак тень, кие ды косо тонавтынзе истя якамо? Кие теинзе истямокс, а содат?
Покш пежетесь синдемс касыця од чувтыне, седеяк покш — нарьгамс од, эрямос ансяк совиця ойме.
Кить минь?
Вейсхозонь прявткудосто, конадо, визькс саевлимизь, мертяно рузкс «правление», чопоньпелев сыргинь кудов — тувонь фермав.
Истя, истя... Тов.
Мезе теят, эрямонь кись аволь нурькине. Аволь валаняяк. Сон эрьва козонь пачтятанзат. Косо тень ансяк эзь савкшно удсемс: вирьсэ, лей чиресэ, тикше ледема шкане штеме потсо. Студентэкс эрьва сёксня, кода нейгак, ильтнилимизь совхозга-вейсхозга. [209] Лездамо, содазь, эно ков. Эрямо таркакс тенек эрсесть клубт, школат, эрьва кодат конторат, утомт...
Ней вана понгинь тувонь кардс. Эрямонь китне, тагояк мерян, эрьва ёнов пурдтневить. Ков ансяк а ветятадызь. Куш те аламнеде седей оймавты: мерить ней те латалкстонть — комплекс. Аволь кода икеле: СТФ, тувонь кардо... Ансяк вана чинесь, юргозь туевель, тунь эзь полавтово. Качады, содазь, аволь, кода ламарень панжома шкасто. Мезе теят, чинентень тонадат. Ды, мерть, тонадынек. Сень кис ули косо костямс карть-пракстат. Те сёксень аволь коське шкава покш «плюс». Лембень кувалткак а савкшны пеняцямс. Минденек мейле сыцятнень, экономфаконь тейтертнень, ёвтасть тень монь цёратне, сельмест мик сявадыть.
Ялатеке — визькс.
Те кода истя, эрятано туво марто ве лато ало?
Кить минь сестэ?
Вень вайгель
Аксунгалесь тедеде кизэнь менелесь седе а ков. Валозь валсть пиземетне. Лосьсэ. Эзть ойма нейгак. Чи, омбоце... таго почкодп менелесь, таго ушоды начкосо сувтнеме. Тень лангс апак вано, «комплексэнек» каршо товсюро паксянть, эзь кемеве, «ардтнизь».
Сюронть усксизь тингелангс. Ансяк паро тев тень эйстэ эзь лисе. Латось кадовсь теке — менель. Эвкстаса кедем маронть потс — ноцковтса мекев. Теке тоначинь тол палы потсонзо. Секскак зяро-бути чинь ютазь пеледензэ ламо товсюронть усксизь латкс.
...Дюм вень куншкат сыргозинь авардиця авань вайгельде. «Ванстомак, Шкипаз, ванстомак!» — каятотсь ушосто. «Те кие истя? Мезе теевсь ломаненть марто?» — кивчк-кивчк ютась пряван тандадомань ды мелявксонь арсемась.
Стинь. Шаштынь вальманть ёжос. Ушосонть мода потмонь чопода. Таго пургси. Вайгелесь омбоцеде эзь маряво. Энгамсь.
Чиреминь одов. Ансяк сутяминь, таго кодат-бути кашторкст, таго апаро сеерема. Сэрьган ютась соркс. Вай, Верепаз! Те мень дюния? Кодамо чопача вальмалга злыдарди?
Валскестэнть, ансяк стинь, ледсь мелезэнь седеень раздиця вень вайгелесь. Чийнесь — пачкодсь тень окойники — вальман икельга сравтовозь паксянть трокс-кувалт Норовава. Сон кувсесь-ниреждсь нуезь-пивсэзь ды латкс сявордозь товсюронть кис.
Сонзэ, сонзэ ульнесь те вайгелесь.
[210] Куломань тюс
Варшты лиясто сёксень пельтнень экшстэ чипаесь, ды седеяк мазыйстэ артови икельган кумбакс ацазь теле лангс видезь розь паксясь. Ёвксонь кондямо, кенярксонь кандый ванькс пиже те валдось кирвази ды курок мади мекев.
Ков а варштат, ожолдыть перькат вирть ды вирьпулот, пакся чирева килеень лехат ды башка-башка чувтт. Маряви, сынст эйстэ нурьги ютазь кизэденть ды эрязь иетнеде ёвтниця ожо, нусманя, ютазь китнеде ёвтниця музыка. Кунсолат кунсоловлить!
Ожось — ильтемань ды куломань тюс. Пиже тюсось — эрямонь, касомань, тундонь, од шкань. Самай секс истя кецневтить седей пиже толсо палыця сёксень видевкстнэ, секс лангозост ванозь вадрялгады ёжот.
Эскелян Томбалькс пакся чирева.
Варштась, панжсь вальма, чипаесь. Перькан розень лисевкстнэ эзть гувкаде, кода свал, валдо-пиже артовкссост. Эзь юта те лембе валдось оймем пачка ды эзизе токнозевте седеем.
Те мезе истя лиссь?
Оно мезе.
Паксянть эзь сато виезэ кончтамс, кучомс чевте вановт Чипай тетянстэнь. Эзть панжово сельмекерензэ визькстэнть.
Истя сонзэ видизь...
Ней ды икеле
— Игорь, ёртт, ванськавтт зярыя! — кармавтан рудазов якстерькаень буртонть лангсо рашкондазь аштиця цёранть.
— Варьган ёмавтынь.
— Игорь, кундак тевс!
— Пекем вачсь.
— Игорь...
Ды истя, зярс паксясотано. Паро куш важодема шкась тей-тов якамо. Шкань чавома. Улевельгак чоп? Ды теяк: а мезть пежетьс совсемс, аволь весе Игорень кондят. Улевельтькак весе истят, оймем лисевель. Ялатеке ансяк кармавтт ды кармавтт. Лиякс кодаяк мартост а лиси. Озыть — а стявтовить, туить — а учовить. «Кадык кадови! Кадык наксады...» — певерить, маряви тень, неть валтнэ цёратнень кельпрястост.
[211] Эсь прям умок, аволь ве ие, лован ваныцякс-пансицякс.
Покорды те монь, лепшти. Ломанесь аволь ракша. Урень шкатнеяк умок прядовсть. Мезекс мельганзо ваномась? Мезекс локшось?
Мезеяк а теят, сави кирдемс.
Течи оймсема чи. Кувака-келей паксясь чаво. Ансяк минь комсешканек котьматано качамо сэнь менеленть ало. Ков-бути свал капшиця пельть, начко чаво пакся ды седейс акельгиця ризкс.
Те ней.
Аволь аламо монь кондят ваныцят ульнесть умонь-умонь шкаваяк. Лездасть сынь урень кирдицятненень Кезэрень Грециясо, ашо плантатортнэнень Америкасо, рузонь бояртнэнень Эрзянь Масторсо. Умонь шкатнева весе эрицятне ульнесть явозь колмов: урень кирдицят, ваныцят ды уреть. Явомань те лувось ванстовсь неень шкас. Аламнеде, мерема, полавтовськак: минек ёнкстнэва зярыяксть ламолгадсть, уретнень коряс, прявтнэ ды ваныцятне.
Кода, ков оргодемс истямо налкставиця, истямо безардемань тевденть? Кона ёно олячисэ важодемань ёнксось?
Азор
Колхозонь «ушмодейтне» ломантнень важодеме ильтемадост икеле кортнеме пурнавкшныть валске чоподава. Ютавтневи те тевесь механизаторонь кудосо. Лемезэ — наряд.
Тевтне кортавсть. Вейкень, «ДТ»-нь прявтонть, — тов, сокамо, омбоцень — лияв... Кие-бути вейсхозонь «бояртнэде» педясь тувталтнэнь ловномо: мекс а молить паксянь тевтне, мекс течинь чис аламо якстерькайть ильтезь заводов. Седеем эзь кирде. Монгак венстия келем.
— Мезть илядо корта, цёрат, васняяк паксятне-мезтне, сюпавчитне эрявить максомс мекев сетненень, кинь кедьстэ амзордазельть. Ансяк истя. Лиякс велень тевенек а сыремтевить!
Паксянь «ушмодейтне» чатьмонезевсть. Теке лепиясть. Минуташка кайсесть эсест пачка ноготост. Яла арсесть. Кайсизь-теизь ды шалнозевсть, теке микшнема-рамсема таркасо.
— Кодат сюпавчить?!
— Кинень эряви ней те модась?!
— Вейсхозсо, вейсхозсо мезень кувалт берянь?!
— Э-э-э...
Муевсь, зярдо весе општасть, лиякс арсицяяк. Вал ёвтась эсь прядонзо Иванов Хрол атя, прявткудонть вень ванстыцязо. Сонензэ кавксоньгемень малава. Икелень «активист», «камсаул». Колоньгеменце иетнестэ ульнесь «кулаконь» пансицятнеде, улинь-паронь сайницятнеде вейкесь.
— Истя, истя, аля! — кижнэзь серьгедсь ней макшов «активистэсь» порсо ваднезь голландканть удалдо. — Максомат, мекев максомат ломантненень эрьметне...
Зэрькстась ракамо.
Мезде? Ки лангсо?
Сэпей ламбамо
Веть торсо валсь пиземе.
Эзь кандо кеняркст валскеськак. Эрязасто, теке мерят кундасызь пулодо, уить, ванныть, мезе моли моданть лангсо, качамо пона пельть. Увны-кайсеви варма.
Вадрядонть аламо. Эрьва якстерькинесь оровтстонть таргама кавто кедьсэ. Эряви сонзэ ванськавтомс нолажа рудаздонть, цёкадемс изгнрямосо «прянзо» ды ансяк теде мейле ёртомс омбо марс. Коське шкасто таргамонь-ванськавтомань тевесь, содави, шаштоволь лиякс.
Цёратне арасть вармантень кутьмерь ёндо. Котьмить, кецнян, теке коткудавт. Носкить — вал а марят пельдест. Те истя мезе мартост теевсь?
Сезизе каштмолеманть Сидоров Миколь. Сон аволь сэрейтнеде. Чуморкс. Чамаумарензэ Якстерть мерить.
— Сахароськак, цёрат, эрси сэпей, вана кода ней, — мерсь Миколь ды таго чатьмонезевсь. Маряви, аволь ней чачсь превсэнзэ те мелесь. Васня чевелясь эйсэнзэ эсь пачканзо.
— Истя, истя, Миколь! Нартемкстэяк сэпей, — аламос каштмолемадо мейле поладынзе Сидоровонь валтнэнь седе сеедьстэ чатьмониця, ёлганя ды тейтерькс мазый Картаев Андрей.
— Виде, Андрей, ансяк сэпеенть апак сода а кармат содамо ламбамодонтькак, — тешкс путсь кортамонь ушодыцясь.
«А берянть, а берянть арсемань чудильманк, — шнынь эсь пачкан Миколь марто Андреень, — истя, истя, цёрат. Эрямонть танстезэяк, видькстама, аволь свал медь. Эрьва кодамо растезэ эрси: ризаня, чапамо, лажаня, сэпей...»
[213] Превс а саеви...
Савкшнось-эзь теть некшнемс умонь шкань утомт? Чарькодить, косо ды кода кирдсть улист-парост парго сакало нуймантнэ?
Якстере кирьпецьстэ вачказь стенатне ветеде ламо ваксонь эчксэ. Кенкшест чавозь кшнисэ-жестьсэ. Эрьвас понгавтозь ревень пряшка панжома. Сорномс а мезть: салыця, кодамо ёрок илязо уле, эйзэст а понги. Истямо утомось-кавось аволь яжамс, сезевтезьгак а сезевтеви.
Эно кода? Кода лиякс ванстомс эрьметь? Икелень сюпавтнеде ламот пинге тапггыльть-раштыльть козявчист. Ды а сорномс кисэнзэ? Те кода истя?
Минек вейсхозоськак эзь кадово келей зепе нуймантнэде. Тесэяк мелявтыть улист-парост кис. Удоманзояк ёмавтокшнызе Григорий Иванович прявтось. Яла арсесь. Ды арсизе: истямо утом-пирявкс зэрневтсь — чаракадат. Теке аволь колхознэньгак — эстензэ. Палмантне бетононь, пайметне — кшнинь. Палманьстэ палманьс таргазь уськень кодавкс. А берянь пирявксось, мезеяк а мерят. Сюдозь-пансезь «кулактне» онстосткак истямо эзть некшне.
Мезе экшсэнзэ, арсетядо, ванстови?
Колмошка-нилешка гектаронь келес — чеменииця яжазь-поркснезь тракторт, комбайнат, видемат-машинат, сокат... Пижелды ютксост кукурузань початкань урядамонь овсе од комбайнаськак.
Кодаяк тень удем сормсевксэзэнь а совавтови: мекс истя кемевиксстэ ды истямо нардев пирявкс потсо ванстови се, мезенть кияк, кодамояк лында зярдояк а саласы?
Ледстнемат
Эрьва кодат памятникть-ледстнемат вастневить оштнэва-велетнева. Сынь стявтневить ине ломантненень, вейсэнь калмотнень ланга. Эрсить сынь пижень-бронзань, мраморонь, кевень, кшнинь, гипсэнь... Певтеме ламо «рунгот» стявтнезь Лениннэнь, конань нейгак кой-кить ловить Иисусонь кондямо пазокс. Христианствадонть икеле эрзятне калмо лангс крёстт эзть стявтне. Путнесть кандолазонь турошка чувтонь кудыне. Поптнень самодо мейле ды нейгак стявтнить тумосто теезь чека-крёст. Коммунистнэ сонзэ таркас аравтнесть пирамида, прясонзо тештине. Мезе тень эйстэ лиссь — ледстнемс а эряви.
[214] Течи чопоньпелев саинь мель ютамс велеванть, якинь «церьковав».
Талайс чарынь перьканзо. Яла ваннынь, мезе кадовсь сондензэ. Зярдо-бути тесэ ламо кортазель Тесэнь сэнь менеленть ало ды Тоначинь чоподасо эрямодонть, оймень ваньксчиде, пежетнеде... Кода ансяк поптне эзть манче ломантнень, кода ансяк эзть кенгеле. Ней... Ульнесь тесэ, ванан, минералонь удобрениянь утом. Те аволь пек умок. Мезе тесэль седе икеле — ки соды. Кельме ёжо саимим те чавочпнть, те раужо кежень кевтнень лангс ванозь.
Мезе ансяк а теи мартонок шкась!
Ульнесь истя, ней — истя.
Весе раськетнестэ «ине прявтось», «вечкевикс тетясь» чавнось сетнень, конатне седе икеле, ризксэнь апак сода, чавность сынсь. Кадсь сон эседензэ ледстнемакс аволь ансяк мраморсто-кшнистэ рунгот, аволь.
Ули мель: икелень шкась мекев а велявтови. Аволь педе-пес виде. Эрси лиякскак. Церьковась эсензэ шкасто яжинзе-пултынзе, нарьгинзе, верьсэ валынзе эрзянь калмазыртнень, репештятнень, шешкинзе койтнень-илатнень. Тоначив ильтякшнось сядот тёжат эрзят. Мейле педякшность эсензэ эйскак, ды кадовсть сеть шкатнеде ледстнемакс вана истят, нупоньсэ пижелгавтозь, кирьпецень пандт. Лисни, ютазесь мекевгак мурдакшны.
Кемголмовоце чи
Течи глянкадсть кемголмово чить вейсхозов самстонок, кемголмово чить кепедтяно, пиледе усктано колхознэнь лездамонь сталмонть. Ансяк, маряви, сон таркастонзояк эзь сырга.
Течи васенцеде лиссь ойместэнь: «Верепаз, нолдамак, энялдан, эвсень те пирестэнть! Седеезэнь токась лезэвтеме те тевесь. А содан мезе теемскак...»
Ды кода, видеяк, а токи седейзэть?
Визькс валсо сёвномат, карксамга нузяксчи, певтеме кенгелемат, саламот-симемат... Аволь вейсхоз — нулгодькс тевень наксадыця чинеде пешксе чеядавкс. Кеман, се усиясонть, козонь, сы шка, ойми оймем, истят апарот нееме а карман.
Кемголмовоце чи. А кеман, а лован эйсэнзэ рузонь койтнень коряс зыянонь кандыцякс. Ансяк вана...
Покш ки чирева важодемстэ самсто Миша Нуянзин, кужосонок весемеде набоесь, эрьва ков эцниця цёрась, [215] цяк-цяк эзь понго машина алов. Томбавсь. Савсь тень теке жо чистэнть муемс машина ды ардтнемс мартонзо омбо велень шумбрачинь кудов. Кецнек куш истя, шожда тандадомасо прядовсь.
Ковкерькссэнть, козонь варштынь кудов самодонок мейле, тешкстазель: таштамковонь 13-це чи.
А кеман, а лован эйсэнзэ рузонь койтнень коряс зыянонь кандыцякс. Ансяк вана...
Чилисема ёно, содазь...
Велес совамсто васенцекс васттанзат кевстэ теезь ломань. Сон кепедизе мештеде верев вить кедензэ ды невтни сурсо чилисема ёнов.
«Ванодо, оят, валдонть чачома-сыргозема ёнов! — эрьванень ледстни те кепедезь кедесь. — Ансяк тосо, ансяк тона ёно мусынк эсь уцясканк».
Прядовсть течис паксянь тевенек, ды мон, кудов молемань таркас, видьстэ-видьстэ паксянь трокс сыргинь чилисема ёнов, аволь пек васоло Юсуповка велинентень. Сонзэ удало валаня чама пандонть экшстэ лисиця чипаесь кецневти эйсэнек налсонзо.
Васня эртевинь сёксь алов сокавиця умас. Кувалманзо мекев-васов яки «Беларусь». Трактористэсь, тунь од цёра, вакскан ютамсто мизолдозевсь ды мельспаросо кончтась тень кабинастонзо. Ансяк сонзэ мизолксозо оймем эзизе эжде. Истя сон соки — куш авардть. Эль-эль ёзы моданть. «Раужолгавтни», — марсинь, кортыть истят тевтнеде Пушкинасо. Содамс, мезе меревель те сокицянтень бодязо, стявольгак таркастонзо, косто а стякшныть, эли савольгак ёнксстонть, козонь панекшнызь 30-це иетнестэ.
Пачкодинь омбоце пакся видьс — теле лангс видезь товсюронь. Ней уш, сёксня, сон, мерть, ёмась тикше потс. Лисевкстнэ чурот. Аволь аламо видьметь ёмсевтезь ланга. Те кода, косто муевсть зняро превтне истя ёролдомс чумочинь асодыця паксянть? Кодат, кодат ментть, кодат прякат-сюкорот ней пельдензэ учнемс?
Ней ков?
Кода ков? Чилисема ёнов, содазь, ков «кедесь» невти.
Лисинь апак судря пря ёнов молиця умас. Талай ваннынь, мезе тесэ видезь. А се, а тона... Окойники содавсь — якстерькай. Нетянь цитёркс пуло, петянь марч ды чудожов — лишме ёми потмозост. Эно мезе лия касы, а кочкиндерясак?! Ды эно Пазось ламбаськаенть [216] марто! Куш тикшенть, конань потс сон ёмась, андовлизь. Теяк эзь тееве. Теньгак ловонтень порнемс кадызь.
Лисинь Атьма леенть чирес.
Вановт кецневти перькан лаймесь. Келей, теке кувтолдыця пиже парсейсэ вельтязь. Ансяк сонгак мелем эзизе вите. Раужолдыть ланганзо допрок наксадозь тикшень сяворькст. Сонсь наксадсь, кевкстнян эсень, эли наксавтызь ледезь тикшенть? Ламонь таркава, теке куракшкеть, касыть эльденачкт ды кирмалавт. Аволь, аволь аламо сюпавчи саевель икелень ополченецэсь Фёдор Пушкин. Прявтозо, царесь, содась Эрзянь Масторсо «оев» модатнеде. Содась, а стяко эрзянь велетне — Урешки, Кузлатко, Вырыпаева, Медаев, Куровеле, конань теизь Куриловакс, — максозельть эрьва кодамо тюсонь Ромодановскойтненень.
Ваннан перькан ды кевкстнян эсь прям: «Зяро весемезэ масторонть келес «паро эрямос» ветиця китнеде? Мекс эзь муеве вейкеяк, мекс перьканок зняро азортомо паксят? Зяро оймень пачк сынь ютасть?»
Арсинь-теинь ды велявтынь мекев. Чокшнесь нолдынзе сельмепонанзо. Саты лытамс. «Кедесь» манявсь: чилисема ёнов эскелямось валдос эзимим пачтя, паро тень эзь невте. Кудов, цёра, кудов, чимадема ёнов. Тосо велькссэть лато, тосо лембе. Чине? Тувонь? Кодаяк изнясак.
Парижев, оят, Парижев!
Тесэнь модась истямо раштыця, истямо раужо, мик сэньшть мери. Цитни, седеяк пек пиземеде мейле, теке мерят кияк ваднизе ойсэ. Кирдьсыть аламос ве таркасо пильгеть, ды ушоды, маряви, алдост лисеме сюронь-тикшень кастыця потьмеж.
«Оно мезе эряви теемс, — сась превзэнь, — вагоншка ильтемс те раужо сюпавчиденть Парижев. Вагоншка. Ансяк. Саты. Тосто ускан зняро жо ярмакт! Ды аволь «чувтоньгак». Алкуксонь. Умок, мон маринь, Франциянь цёратне чарыть тосонь музейсэ кирдевиця кубометранть перька, конань тов ускокшнызе почвань содыцясь Докучаев сядо иеде икеле. Теке укскат медь парь велькска. Ансяк лезэсь тень эйстэ монень кодамо?..»
Усковлия те вагононть Модамасторонь Ине ошонтень ды ушодовлинь микшнеме. Стопкань-стопкань. Кода чиньжарамот эсенек ёно. Стопка — франк, омбоце — таго франк... Эрзянь Масторс савлинь сюпавдояк сюпав алякс. Лездавлинь мейсэяк. Эрзянь Масторонтень — васняяк.
[217] Пеедькшнема?
Мельсэньгак истят тевть арасть. Самай истямо питней минек раужо, кренч тюс модась. Ламонь сельмть сявадсты. А стяко Модамасторонь Омбоце войнань шкасто ускозель эйстэнзэ Германияв аволь вейке, ламодояк ламо вагонт. Те минь, мазя превть ды пиштяка ломанть, мезекскак эйсэнзэ а ловтано.
Парижев, оят, Парижев!
Куш нейке. Ансяк... аволь Чачома Масторонь модань микшнеме.
Озавтт болт — лиси трактор
Ули валмеревкс. Сон эрьмезень раштыця модатнеде: «Ажия нерьгстат — касы крандаз».
Улить лияткак. Крандазось сынст коряс мезеяк арась, штелькске.
Тесэнь раужо-циторк модатне анокт каземс теть аволь ансяк крандаз... Озавтт, мерить яла механизатортнэ, болт — лиси трактор. Бути аволь «Т-150», сестэ мезеяк «Беларусень» кондямо. Ильведькс а теят.
Сестэ эно мекс пиже-ожо вайгельть сееретяно — а сатыть тракторонок? Оно зяро ёртнезь кшнить ды кшни пелькскеть, неть самай болтнэде!
Теньсэ, видьстэ меремс, тевеськак.
Ёртиицятнеде ды ёмсевтицятнеде — отьма. Куш сёлт эйстэст сёлтак. Дошуз ды чартьчи марто озавтыцят-кастыцят а муят чивалдосояк. А кинень кшнинь видьметнестэ тракторонть ливтемс ды мельганзо якамс. Оно мейсэ кажось.
Тов ды мекев
Юсуповкав ялатеке саинь мель молемс. Васенце снартнемадон мейле зярыя чинь ютазь.
Ютынь Атьма леенть трокс каязь сэденть ланга, валгинь Ицялов чииця келей кистэнть, ды ёзнэкс менчевиця яннэсь ветимим покш история марто те велинентень. Чуролгадсь сон, ванан. Алоль аламо чаво таркат эцить сельмс.
Абунгавтни эрямось! Неть самай Юсуповтне эрясть тестэ тёжадо ламо вайгельпень тарка, Петербургсо, чарасть царенть перька. Модаст ульнесть тесэ. Марицяльть судост Пушкинтнэнь-Юсуповтнень, содасть, кодат тесэнь модатнень танстест!
Эрьва кодат эрить ледстнемат. Содавикс Юсуповтне [218] умок тоначисэть. Лемест вана, лия тевдест башка, конатнень ютксо Распутин Григориень маштомазояк, ванстовсь те велиненть лемсэ неень шкас.
Сокардызе седеем — варштамс неть мазый таркатнень лангс — вейке куля. «Тосо, улиндеряй мелеть неемс, эри-важоди фермер, — муст-муст пейдезь ёвтась тень ве агроном, — варштак, бути шка муят, янксеме а кармат...»
Кодамо, видеяк, те «алкуксонь» фермерэсь? Мезть тейни? Меельце шкастонть сындест кортамотнеде велянзят, секень вант. Ёвтнить эйстэст, важдамо а содыть, радиось, газетатне, журналтнэ, телевидениясь... Ёвтнить — пилезэть а кельгить.
Эзинь пачкоде кирьпецьстэ теезь пельскаладо кардонтень, вастымим пиже-ожо вайгельсэ парамо. Рангсть вазт. Истя, куш пилеть потомдыть. Секень вант, караштат. «Апарс, мезе-бути а истя: вачот, эли ведест арась...» — талнозевинь марязденть.
Вастовинь вазтнэнь азорост марто. Од ломань. Вейсэ ютынек кардазганзо. Ёвтнизе, зярс якинек, кодат тевензэ. Ванынь-теинь, кунсолыя ды цётыя эстень: «Васов, вельть васов пачтимизь «икелев ды ансяк икелев» сеерематне, ламо иеде икеле «кулаконь» пансематне. Кие ней невтьсы тенек кудов кинть? Косо сон, се таркась, косто туинек седе паро уцяска мельга? Эстенек ушодомс вешнемензэ эли серьгедемс киньгак шабратнеде? Косто? Кинь? Таго киньгак варягтнестэ?»
Кенкшть
Улить кенкшть, ды улить кенкшкеть. Кудонь, школань, пирень, кардазонь, церьковань, тюрьмань... Эрсить сынь чувтонь, суликань, кшнинь... Улить кенкшть, конатнень панжозь васттадызь мизолдыця сельмть ды кулдордыця вайгельть. Улить истят, конатнень удало кекшнить мацтонь экшесь ды пурьгинеде икелень каштмолемась. Ули истямояк, кона мекев зярдояк а панжови.
Сыргинь веленть кувалт почтав. Сон овсе песэ, каладо церькованть вакссо. Кудотне тесэ — кода лия велесэяк. Вастневить келей-валдо вальмат, вастневить чавозь кенкш-вальма мартояк. Кой-конатне кукорьгадозь, прок сырькайнеть. Икельгаст пиринетне, тень лангс апак вано, элякалить эрьва кодамо тюсонь панжакайтнеде. Теке аволь сёкськак.
Сельмень икелев понгсь келес панжадо пирявкс [219] кенкшке — апак арто, паро ладсо апак понгавтояк палманентень.
«Бульчом, кодамояк вейсэнь кудо, — юв-яв ютась пряван, — эли контора. Лия-мезе а савкшны учомс вейсэнсетнень пельде...»
Эзимизь маня сельмень.
«Аптека» — кецневтимим кенкшенть видьс пачкодемстэ кузтемпенть велькссэ аволь мазыйстэ, кедьсэ тешкстазь сёрмадовксось.
Ламонь содыцят
А кенери ушось каямо ланганзо сундерьгадомань паця, вейсхозонь покш-келей гаражсо гувкадить лампат. Футболонь оскадояк покшт. Палыть пнжеласто, Валдост — сельметь конявить.
Латонть ало тей-тов ёртнезь чаровтомо-кенкштеме кеменьшка машинат. Велькссэст, вере таркатнева, чинек-венек гулькат гулдордыть.
Мезекс истямо гай толось, кинень — превс а саеви. Паряк, тюшумбар поркснезь «газтнэ-мазтнэ» чокшнестэ валскес газетат ловныть? Мелесь аволь берянь. Мезе, видеяк, теде башка сыненст каднови теемс? Веньперть кияк а чийни, а ранги, општ. Каштордт ды каштордт газетань ёнкстнэсэ. Валдонть кис пандома? Иля мелявто. Тевесь а тонь. Колхоз тень кис ули.
Ютан эрьва чокшне те гаражонть вакска, ды удемезэнь совить умонь эйкакшчидень ледстнематне — сокорсто типельдиця се шкань толнэтнеде ды сынст сумборя валдосост книгань ловномадон. Умок те ульнесь...
Петят арсематкак валдомтозь таркаванть молемстэ сакшныть: ловныть-арась нувсиця машинатнень туро сынст азорост ды азортнэнь азорост?
А кемеви...
Паксянь чай
Ветеце чи пиземевтеме. А кемевияк. Теке эзь валонк торнозь ды ков-бути капшазь седе икеле. Ней кольнезь кольни лембе, теке кизэнь, вармине. Ялатеке начконть «кшувавтомс» виезэ а саты. Ковгак а молят, аволь кизэ, аволь аштемков. Ансяк соркстась. Трактортнэде мейле лодомтне пешксеть ведте. Цивтёрдыть сынь чипаенть каршо, прок чавачамонь пелькст.
Маряви, корштындерят ведьсельметнестэ ведтенть, [220] сон ули ризаня-ламбамо. Ды кода тензэ а улемс истямокс? Якстерькаесь урядакшнови ансяк тия-тува. Пелезэ, ловт, модас каднови. Ды истя иестэ иес.
Теке маринзе арсеман Женя Эрзямасов.
— Марятадо, цёрат, арась? — гайгезевсь пшти, теке тейтерень, вайгелезэ. — Ванды весе-весе саеде мартонк кедьгеть. Марятадо? Саты сюконякшномс Клавдя баба андыцянок икеле. Чайде симеме карматано теске. Марятадо? Теске паксясо, мар чиресэ. Перьканок ведьсельметнесэ ведесь чайдеяк ламбамо...
— Виде, Женя. Монгак истя арсян, — поладынь мон Женянь валонзо, — саты потсемс ят сахар.
Цёрась мусь та-кодамо банкине, амольдясь маласо лодомнестэнть ведь ды пеедькшнемань кис ялганзо икеле начтызе келензэ.
— Вай, эзинь арсеяк, истямо ламбамо! — аламос учозь, прок кургсонзо танстень марязь, кельсэ турванзо нолсезь, апак пеедькшне серьгедсь ялганстэнь.
— Эрьга мон варчаса, — пшкадсь Миша Нуянзин ды цопадизе банкиненть. — Алкукс, вантака, ламбамо!
— Эрь монень, эрь монень, — каятотсть зярыя вайгельть.
«Зяроксть иля мере «халва», кургсот ламбамо а карми», — тонавты чилисема ёнксонь валмеревксэсь.
Аволь педе-пес виде. Ломаненть тенень-тонанень кемевтемась, кода невти эрямось, аволь уш пек стака.
«Коллективизациядо» икеле...
Эрьва валске трактористэнь кудось пешксе тыц: бригадирт, агрономт, онкстницят-ловныцят, лездыцят, утомонь, фермань прявтт... Колоньгеменьшка ломань. А кемевияк! Аволь пек умок, «коллективизациядонть» икеле, велесэнть, поптонть башка, ульнесь прявтокс ве ломань. Сеньгак вейсэнь тевтнеде башка ульнесть эсензэ кудонь-кардазонь тевензэ. Сень кис ней...
Пурнавкшныть тезэнь, тагояк мерян, «колоньге-меныпкатне» арсеме: ков ды мезень тееме кучомс комсешка механизатортнэнь. Весемеде сеедьстэ — мик рузонь велесэ! — марсевить мекс-бути Озяз Петянь ды Ченяркс Мишань лемтне. Аламнеде кирдевинь, секскак сеске эзь чарькодеве, мезде моли «стансонть» кортамось.
Те аволь кучнемат, аволь наряд, кода мерить рузкс, — те алкуксонь Земской собор. Ансяк «Всея Русень» цартне истят промкст ютавтнесть. Мелем [221] содамс: каня тосояк рузонь бояртнэ визьксэнь апак сода вейкест-вейкест эребасть раужо валсо? Се шкань эрицятне ульнесть седе превейть эли неень?
Течи колчинзэ невтизе «крикоргось». Истя удалга мерить вейсхозонь парторгтонть. Мекс — ёвтнемс а мезть. Истямо «доклад» зэрневтсь айгоронь-эльдень налксематнеде, аволь ансяк пилеть — човонетькак якстерьгады. Эрьва кодат валт цярность неть стенатнень ютксо, истят — эзть марсе. Чатьмонезевсть натой вальматнева бизныця сёксень куяв карвотнеяк. Ансяк аволь... аватне. Чамаст эзть кирвазе. Тонадсть.
Печатьс асовавтовиця раужо те валонть марязь, чарькодия, мекс рузтнэ аваст туртов кармасть мереме французонь валсо — мама. Визькстэнть. Истя сынь валдонь кандый, весемеде малавикс «матушка», «мать» валонть нарьгизь, истя тюнгольдемакс велявтызь — савсь мик кадомс. Ков маштови, «мать»-стэнть тейсть мат. Ава лементь теизь сёвнома визькс валокс. Содамс, Модамасторонть лангсо кодамояк лия раське, рузтнэде башка, аванзо...
Аволь покш општке, ды одс, теке мезеяк арасельгак, пелькстазевсть, ков кучомс Озяз Петянь ды Ченяркс Мишань.
Панжома
Пекекиське лангс мадезь, пондакш пинесь учось утомонть азоронзо. Учицянть нерезэ кувака, теке ривезень. Понань тгососькак сонзэ — тюжала-якстере.
Варштась Ривезне кенкшенть лангс ды мельсапаросо нолдызе прянзо. «Таго, маряви, а сы...» — нусманясто арсезевсь пондакшкесь.
Учи пинесь. Яла кеми: сы азоравазо ды, паряк, ёрты тензэ порнемс ловажине эли, бути ёжозо покшчинь, сывель палнэ. Улкоть, мельсэнзэ, сакшнось вадря ёжосо, моро марто, ды понгокшнось тензэ эйбаро пал.
Учось чоп, ансяк тевезэ эзь лисе. Теке ведьс ваясь учомапельксэзэ. Омбоце чи арась. Ялатеке Ривезне эзь талакадо. Соды: лиясто утомонь-кавонь прявтось таргонь перть а невтнесы судонзо.
«Бульчом, течияк а учови. Кува лыты?..» — прась мельс Ривезне ды стясь таркастонзо. Сэстызе сэрьс-кувалмос «ривезень» рунгонзо, варштась меельцеде сюмордомадо пешксе сельмсэ букань пряшка панжоманть лангс ды теине-теине рудазов яннэванть сыргась веленть кувалт.
[222] «Мезень кис пандыть, анамаз саевлизе, Паволонь кувака черентень — а чарькодеви. Мон истямонть... — машнетезь ладсо яжась пинень превензэ Ривезне кудотнень икельга «чиемстэ». — Кодат пандомкат од, виев, теке эльде, те авантень? Аштемань кис? Арась, превс а саеви, мезекс тенст, прявтнэнень, истямось эряви? Превс а саеви...»
Таго ледсь мелезэнзэ ды стясь сельмензэ икелев, теке тусто сув потсто, пекстазь кенкшесь, эйсэнзэ дуйниця, чеменьсэ токазь панжомась. Неезденть ярсамозо седеяк сась. Куш костояк кши кочомне муемс...
Ней ков?
Ривезне капшавтынзе пильгинензэ седе тов. Сон сонськак эзизе редя, кода яннэсь пачтизе Алькань кузтемпес. Вальматнень пачка марявсть морыцянь вайгельть. Пеедькшнемат. Шалт. «Ну, Ривезне, тестэ вачонь пекть а туят! — кецнезь мерсь эстензэ кискинесь, ды якстере кувака пулозо мельспародонть кирькскекс мендявсь, икельце лапанзо путынзе алце кузтемканть лангс. — Ансяк Ирина патям, Алькань урьваст, илязамам пане!»
Лиссь арсезенть коряс, теке маризь. Чикорк мерсь совамо кенкшесь, ды кузтемпес лиссь утомонь азоравась. Чамазо палозь палы. Кедьсэнзэ кирдсь ярсамонь кадовксто пешксе ведра.
— Те тон, ялгинем, тон? Паро, ялгинем, паро, эзимик стувто... — кокнозь ладсо мерсь Ирина ды венстсь Ривезнень тантейстэ качадыця, аволь пек нолсезь, сывелев зярыя ловажат ды кши кочомт.
«Кажось аволь покш — таргонь-таргонь Ирина патям а панжтни утомонзо, — сась пешксе пеке Ривезькень мельс кудов ардомсто. — Кадык кешневтиця, седеень човоргавтыця чинеяк эйстэнзэ качадокшны, кадык музгордематкак марсян пельдензэ. Тей сакшномо карман. Кадык чемениякшны утомонь панжомась. Мезекс тень эрявсь чоп учомс — шка ёмавтнемс?»
Седей марявкс
Пектеяк пек умонь шкава ульнесь эрзянь истямо кой: умаст урядамсто нуицятне, седе сеедьстэ аватне, кадыльть пелькапряшка апак нуе таркине. Те — Нороваванень эрямо кудынекс, ярсамо-симема таркинекс. Путнесть эйзэнзэ ярсамопельнеяк. А кадат — пеняцяк эсеть лангс. Кадсы умат. Мезе лиси теньстэ, ансяк тонсь кармат содамо. Телесь кувака, ледстясы. Кодамо ума паксянь азорававтомо?
[223] Ней лиялить апак уряда аволь коцтонь келесэ-кувалмосо лехинеть, лиялить келей-келей паксят. Тень кода чарькодемс? Бажатано невтемс Нороваванень вечкеманок, койтнень ванстомантень правтоманок? Паро, пек паро! Эно сестэ мекс калдордыть сюронь кирдема паренек? Мекс чеерть ардтнить сусекканок? Мекс петя кажовсто эрятано?
...Пуви-азаргали варма. Паксятне чавот. А неят важодицят. Ансяк раужо нармунть, теке раужо ёндолт, ливтнить-карныть азортомотнень велькска. Вармань ковол ды... вайгель: «Косо, козонь кадынк визьксэнк? Ков теинк Норовавань? А-а-а! Шунжатадо истя тейнезь! Ёматадо! Врадтадо-о-о...»
Кадозь паксят.
Вармань лажамо увтсонть певтеме пеняцямо. Кевекс лепшти седеем апарось. А саты коштось, стака лексемс. Косо сон, видеяк, Паксянь кирдиесь? Стувтымизь? Арась, те а истя, минь сонзэ, трицянок, стувтынек.
Мон ды Минь
Григорий Иванович ломанесь аволь менгев, аволь прянь шныця. Бути а ранги — сеедьстэ, содазь, визьксстэ — пеедькшни. Эрек сон, мезеяк а мерят. Вейсхозонь прявтонтень ансяк истямокс улемаяк. Эрьва ков кенерема. Лиякс а кода. Мелят, тень ёвтнесь, кадовкшность апак уряда ведьгеменьшка гектарт шуж. Мейле мезе? Эзь ёмавто сельведнеяк. Эсензэ улевельтькак, тевесь лия. Тедедеяк... Нусманясто, прянь нолдазь якицякс эзия некшне. Кие соды, паряк, пря а невти.
— Те мекс, кода истя? Мекс киненьгак а эряви кастозь сюпавчись? — кортазевинь аволь умок Григорий Иванович марто.
— Оно мекс... — мерсь тень прявтось, аламнес арсезевсь ды ёвтнесь аволь покш ёвкске-эрьмакай: — Умок те ульнесь. Мон чачозьгак араселинь. Велесэнек эрясть кавто цёрат: вейкень лемезэ Мон, омбоценть — Минь. Мезе тенст эзь явово, паро ладсо кияк эзь сода. Веленек содасть лиядо: эрясть лелят-ялакст, теке пинеть-псакат. Эрьвась бажась амзордамс мезеяк омбоцень пельде. Свал кечкересть вейкест-вейкест марто. Теке сеят.
Чачонь-рунгонь коряскак альгачтне ве ёнов эзть моле, теке аволь ве пекеньгак. Седе сыресь эйстэст, Мон, аволь чуморкстнэде, дёкуш, сэрей-келейгак эйстэнзэ а мерят. Сельмс акаявицятнеде. Сень кис эчке ловажа, ливчаня ды санов. Аволь стяко лиясто мерильть [224] тензэ Санай. Тевень теемстэяк кол-эряза. Экше таркава кизэнь шкава эзь кекшне. Паксянь тевть теиль, теке пештть чулгсиль.
Минь — лия. Сэрей, трюшня эчке, авелявтневиця. Виенть коряскак, мерема, Пазось эзизе маня. Виев, ансяк... мезекс сон, виесь? Кодат важодемат тень пельде — эсь мельганзояк а яки! Бувамонтькак Минь вечксы... Ули, ули мельганзо истямо пежеть. Обуцязо сонзэ — пинень. Лиякс кодаяк а мереват. Пшкадиндерят каршо вал — раздетянзат. Ансяк пона мельга, ансяк вадяшазь. Видьстэ меремс, Минь ломанесь ачарькодевикс. Ловови сюпавокс, сонсь иеде иес ардтни «покштнэнень» кедень венстезь.
Мокшнасонзо ахоли, тандавтни, тюрьмава ойсевти — ансяк пелемс паро ладсо эйстэнзэ а пелить. Велесь теевсь саламонь пизэкс. Эрьвась уски-ангори сонзэ паксясто, ды мик утомстонзояк, кода машты.
Весть Мон пелькстазевсь Минь марто: кие седе эрязасто, шкастонзо ды нарте видьсы уманзо, се ули велень прявтокс.
Эшкизь-лепштизь лелят-ялакст кедест ды шкань апак ёмсевте кундасть алтазенть топавтомо. Содасть: тундонь чись ие анды.
Валске.чоподава Мон валтызе потмарсто кептерензэ, кильдизе Ёндолонзо, путсь крандазонтень изамо ды — цярнозь паксяв.
Сезевсь Миненьгак удомазо. Ансяк стямсто, мерема, чалгавсь а те пильгенть лангс. Васня кувать вешнесь видема паргонзо. Муизе — таго кажо: потмаксозо кирдевсь ве ленге педе. Педясь крандаз чаронь ваднеме — ёмась дёготь кедьгесь. Тамашат, ды весе. Кардазсто лисемстэ сась мелезэнзэ: сыргась видеме.
Пачкодсь Минь, кода эзь эрязкале, ансяк чикуншка малава. Сонзэ самс Мон кенерсь видеме-изамо пельума. «Ялатеке тень а изняви... Сонзэ умазо панкске, монь — паксят», — прась мельс цёлак Минь ды апак капша, прок удомань пачк, кармась лишмензэ перьгавтомо.
Прядовсть видематне. Куроксто паксятне-виртне копачавсть пиже велькссэ. Кончтась весть-кавксть лембе вановтсо чипаесь. Тундонть весемеде мазый, тюссо жойниця шказо нурькине, теке лекстявкс. Эзь марявояк, кода невтизе прянзо гай кизэсь, конань куроксто полавтызе ожо-якстере пуло сёксесь.
Зярдо пелькстницятне урядызь паксяст-умаст ды онкстнизь, зяро пивсэсть сюро, чарькодсть, кие-мезе ашти. Ламо превть тенень эзть эряво. Эзь чарькодеве [225] лиясь: кода Минь се сёксестэнть лиссь-теевсь ды течис кадовсь велень прявтокс? Кие тензэ лездась, кияк а соды. Ды истя вана тарны прявт нулакс, нарьги лангсонок уш аволь вейке ие.
Вана теть ёвкске, вана теть ёвтнемине. Чарькодик, мекс эмеженек-сюронок кадовкшныть нармуннень-чеернень ярсамопелекс? — стакасто, теке лиссь шлямкудосто, таргизе оймензэ ды прядынзе валонзо Григорий Иванович, колхозонь-велень свал эрек, свал пеедькшниця прявтось.
Мезе мартот, сокиця?
Мольтяно вейкенек-вейкенек мельга эскелязь паксяв — якстерькаенть рудаздо коцькерямо. Перьканок, прок урозт, апак уряда паксят. Секень вант, сельведеть туить лангозост ванозь. Чарькодян, пек чарькодян, мезес пачкодинек ды мезе эряви теемс, ансяк виень, маряса, а сатыть.
Састь мелезэнь Некрасовонь валонзо:
Только не сжата полоска одна... Грустную думу наводит она.
Ансяк прядовсть марямга ёвтазь валон — кашторкс. Те тошкить кукурузанть рипакадозь лопанзо. Кельме алов понгонесь. Лопанзо пельскоськезь. Каштордыть, теке жестень. Пеняцить.
Эскелятано седе тов.
«Эзик стувто, мекс кадовкшнось се лехинесь апак нуе?» — пшкадсь тень, марявсь, паксясь «жестень» лопанзо ламо-ламо вайгельсэ.
«Арась, эзия», — меринь ашо тюс каштордыця лопатненень.
«Паряк, ёвтасак, мекс?» — марявсь тень, кортазевсь сонсь менелесь.
«Вашему пахарю моченьки нет... — путнинь мельга-мельцек поэтэнть валонзо. — Ней чарькодевсь, мекс?»
«Мезе сокицянть марто теевсь? Мекс зняро сэреди, мекс кодаяк а пички? — эзь кадово, яла кевкстнесь эйсэнь велькскан сравтовозь сэнь паксясь. — Кодамо кезкс ланганк ютась, кодамо орма?»
Эзинь сода мезе ёвтамскак. Визделгадынь. А мерят жо, «палыця ведесь» злыдарди велетнева ды, теке пелюма, правты-леди ломантнень. Мерят — таго текень марясак: мекс?
Велявтынь вить ёнов ды келейстэ эскелязь видьстэ-видьстэ лисинь якстерькаень оровтнес-мартнэс.
[226] Вадрясь се, мезесь берянь
А чиить паксянь тевенек, а чиить! Таргазь-урядазь икельксэнек а капши туемс ушодксстонть. Ванськавтозь якстерькаень маронок а покшолгадыть. Сокарятано талай, теезесь пек а редяви. Анокоськак а ильтяви. Машинат арасть.
Кода улемс?
«Эряви, — пургондась превсэнь мельне, — саемс зярояк ярмакт ды терявтома пандомс заводов ильтязь эрьва машинанть кис. Ансяк пештьсызь, сеске коморс. «На, Ваня, кирдть!» Паряк, тевенек седе лыкамо кармить? »
Валске марто чамдыя потмом Григорий Ивановичнень.
— Мезе-мезе? — абунгадсь прявтось, мик сельмечирькензэ верев кирнявтсть, раужо покш сельмензэ полгарьгадсть. — Ды тень кис... тень кис монь прям шуледьсызь! Содат тон теде?
— Шуледьсызь, мерят? — кевкстия ламо иеде мондень од цёранть эсензэ кельсэ-валсо.
— Содазь, керясызь.
— Ва истя, килькштятадызь? — пеедькшнезь ютавтыя суром кирьгам икельга.
— Килькштясамизь. Сельгеме а кенерят.
— Сестэ мезе кармить мартот тееме лов алов кадовиця паксятнень кис? — эзинь пота, яла исковинь.
— Охо-хо-хо-о, — кувакасто, пелькскень-пелькс таргизе кирьгапарьстэнзэ валонть Гриша Иванович, — ванан, мезеяк тон, шержей пря, а чарькодят! Ме-зе-як!
— Косто... — мизолдозь меринь тензэ.
— Монень килькш, тонеть килькш. Косто зняротнень саемс?! Кие карми понамост ды минек повсеме? Бути повсемас пачкодтяно, сави пельмастордо ламо повсемс... Косто саят зняро повсицят?! Арась, арась, мезеяк а чарькодят.
Ледстия ярмаконь вешемадо меленть ды чапия эстень: вейсэнь хозяйстватнесэ вадрясь се, мезесь берянь.
Ояксчи?
«Ояксчисэ эрят — берянь а неят», — алтни эрьванень содавикс валмеревксэсь.
Кие а кирди мель эрямс истя. Кеман, Саша Нуянзингак, цёратнестэ вейкесь, истя арси. Кода эно, зярдо теть кемгавксово ды эйсэть тердить эрямонь весе китне?
Ютксонок кавто тейтерть — Лида ды Валя. Сынь [227] паксяв а якить, пидицянь-паницянь лездыцят. Саша, ванан, нарси Валянь перька. Вейсэ кудов, ярсамкудов. Исяк чокшне — понгсть сельмень икелев — седейшкава талайс кортнесть эрямо тарканок кудыкеле. «Ах, од шка тон, од шка тон, од пинге...» — мерекшнесь поэтэсь прок сындест.
Ки чиресэ «тарвазонть-мушкоронть» вакска эрьва чистэ якатано ярсамкудов. Течи, мекев самсто, молиця ялгакс савсь тень Саша. Эскелятано апак капша. Пачкодинек ки улонтень.
— Улезэ, Саша, ояксчинк истямо, кодамо вана те тарвазонть ды мушкоронть ютксо, — прасть кельпрястон валтнэ, ды пеедькшнезь поладыя: — Прок кшни! — Сеске тень эзь чарькодеве — аволь те валонть ёвтыя, ансяк сон прок чинал, мекев а кундасак.
Цёрась седей малас эзизе сае, эзь покордаво, варштась ояксчинь якстердиця тешксэнть-невтицянть лангс ды кувать апак арсе ёвтызе мелензэ:
— Мезеяк берянь «кшнинь» ояксчистэнть а неян. Ош ды Веле, Завод ды Пакся... Виде, явозь сынь а эрявить.
Ояксчи... Ламо сондензэ кортыть, ламо ёвтнить книгатнесэ, газетатнесэ, телепередачатнесэ... невтить артовкссо, кевсэ, чувтсо, кшнисэ. Зяро морот алтазь сонензэ!
Мекс эно Модамасторось ве чияк а эряви апак тюре, войнавтомо? Мекс Ромео ды Джульеттань вечкемаст прядови пеельсэ-верьсэ?
Чангодть, Верепаз...
Ярсасть-тейсть вейсхозонь кепедицян ды, важодемань таркас, чатьмонезь сайсть ёнкс... эрямо тарканок пелев. А ялго, а машинасо паксяв эзть сырга. Тей каяван, тов. Кевкстнян, мейсэ тувталось. Стяко, энялдоман, кортамон, кармавтоман нолдызь пиле вакска. Тевем эзь лисе.
Те мезе? Ордалема? Аксунгалема? Бунт?
Эзинь ацирьгадо.
Мезть стяко пиксемс? Эрьва кодат кепсевемат эрсить: Акай Боляень, Эрзямасонь Олёнань, Василень Несмеянонь, Алексеень Кузьмань... Ламоксть стякшность эрзятне ятост каршо. Ламо верь валсть покштянь покштянок эсь олячист, кудост-утомост, Масторост кисэ тюрезь.
Меельце аволь аламо иетнестэ ульнесь ды нейгак [228] моли истямо «прянь кепсема», кодамо зярдояк ды косояк арасель. Васняяк, абунгавттанзат молема шказо — сизьгеменде ламо иеть, седеяк пек — молемань лувозо. Кияк тюреме а кайсеви, кияк а шалны. Весе таркаваст. Весе невтить пря — важодить, теке покш тев теить. Невтемс прят тевень теицякс ды мезеяк а теемс — вана кодамо те «прянь кепсеманть» тешксэзэ.
Течи цёран кепедизь пряст ды видемтизь рунгост. Окойники пургондась эйсэст каштанчи. Чарькодсть, пачкодсь седеезэст: вейсхозсо ботамонок лезэзэ вишкине, а максы сень, мезе эряви. Ледсть, маряви, мелезэст покштянь покштяст икеле шкань стякшноматне. Сполать тенк, цёрат!
Чангодть тенст, Верепаз!
Мон — японец?
Кувать тень эзь чарькодеве Пушкина велень рузтнэнь кортамонь «викшневксэст»: «мать» ды «перемать», лия кургстост а марят. Седеень човорявтыця тюнголькс валсо тесэ пургсить весе: «рядовойтне», велень прявтнэ, «крикоргось» ды сонзэ «товарищтне», аватне, покштнэ, эйкакштнэ.
Мекс истя — чарькодевсь тень аволь сеске.
Кеменьксть пшкалинь тесэнь агрономонтень: ускить максозь якстерькаенть кис квитанциятнень, ардтнек, энялдан, заводов.
Стяко. Ансяк алтнемат.
Мезе теемс?
Вастовинь Курся Витя — мекс эрзякс лемдизь рузонть, а содан — марто течи таго. «Тон усксыть-арась, аломанень пона, квитанциянок?! — рангстынь лангозонзо зяро ульнесь вием. — Ули-арась визьксчить, идемевсень сюлмавкс?!» Ёвтынь кой-кодат седе салов валткак.
Эзь кемеве: Витянь чачозо полавтовсь. Мик мизолкс ютась турванзо ланга, кецнезевсь. «Те лия тевесь! Ванан, минек ломанесят», — неявсь чачосонзо. Истямо каявома ды истят валт, содазь, эзь учне. Чарькодимим.
Омбоце чистэ эрявикс конёв панкскетне ульнесть зепсэнь. Окойники карминь содамо, зяро ускозь якстерькаенек ды мезень кис мерькатано зняро рудаз.
Кортамс тесэ «ломанень» кельсэ — те, мерть, улемс ютксост японецэкс. Иля ледстнеяк «интеллигентэнь пельдеть», а чарькодтядызь. «Кецневтимизь», Витя марто «калякамодонок» мейле японецэкс ловомом эзть [229] карма. Содасть, япон истят визькс валт авадонзо ды паздонзо аксорямо а карми! Ансяк рузтнэ содыть «бога-мать».
Мекс?
Монь койсэ, «зярыя этажсо» кортамонь лувось сюлмави эрзянь, мерянь ды лия раськетнень модаст вийсэ саемаст-габордамост марто. Сайницятне, «мазый» валсо кортазь, «стасть» сайницянь кель.
« Вейкетьксчи »
— Мон, теня... Мо-он башка карман, — ёвтызе мелензэ ды витизе ёжом Саша Нуянзин.
— Те мекс истя? Мекс арась мелеть ялгать марто вейсэ? Вейсэ седе курок машинань турояк ванськавтови, — цисланзо кис терявтан превс путомс Сашань.
— Ды ис-истяк... Мон... мон ськамон седе вечкан, — эзизе полавто мелензэ тона. Паро цёрась. А вечки тевтеме аштема. Ансяк вана келезэ понгони, кокны аламнеде.
— Паро, паро. Оно се маронть саик. Аволь покш. Самай ськамонзо важодицянень. Тукшны мелезэть — котьмак ськамот.
Саша тусь лия таркас.
Ялганзо чатьмонезевсть, теке визделгадсть. Веенстнэнь эзь еато потмовиест туемс сонзэ марто, лиятнень... Мекс тукшномс? Вейсэ седе ён. Пеедькшнемат, кулят-ёвтнемат... Ков капшамс, тевесь аволь верьгиз — а оргоди. Вармаськак вейсэнь кутьмере удало истя а вешки.
«Вай, эрямо-эрямо... — арсезевинь Нуянзинь Сашань пельде марязенть кувалма. — Тевень вечкиця валдо пря зяро ломанть ёмавтнить эсь виест ды талантост самай те «вейкетьксчпсэнть» ды «вейсэ», прок промкссо, эрямосонть!
Аволь васоло, лия мар вакссо, нурни Юрка Письмеров. Сон орголесь кудов, савсь тензэ максомс башка тев.
Чинь тевенек мольсть прядома ёнов.
Варштынь вейкень-вейкень нежедицян лангс ды абунгадынь, сеске тень эзь кемеве: Саша урядась сахаронь ундокстнэде Юрань коряс колмоксть седе ламо! Эзь кемеве теезесь «вейкетьксчинь» вечкицятнененьгак.
[230] Перегул
Озяз Петя эзизе невте прянзо течияк.
Мезе теемс?
Эрьва тевенть, кодамо илязо уле, Петя тейсы «ломанькс», кода эряви. Вейкесь берянь: ушоды — а лоткавтови. Эсь прязонзояк а кецни, лоткамс а лоткави. Кардак эйсэнзэ веленек, куш ойметь путык — а кардави.
— Перегул... — мерсь трактористнэнь лангсо покшось — аволь сэрей, штадо касмо цёрась.
— Колмоце тарго начколи... — седеймарязь тешкстызе Курся Витя агрономось, сельмс меремга — Виктор Иванович.
— Теньсэ, Иваныч, зыяноськак, — поладынзе валонзо бригадирэсь. — Бути кавто таргонь ютазь тензэ а потомдави, курок иля учне. Перегул, лиякс кодаяк а мерят.
Весе каштмолезевсть, теке киньгак лем кундасть.
Чатьмонезеват... Кие ней озы якстерькаень урядамо комбайнас? Инженерэсь? Сонзэ лездыцязо? Бригадирэсь? Сонсь Григорий Иванович, вейсхозонь прявтось?
А кинень. Петянь кондямо а муят.
— Ченяркс ялгазояк контузявсь... — од куля ёвтась «крикоргось», Сивов ялгась. — Колмоце чи уш чийни велеванть.
Ярмактне чумот. Сынь, сынь. Эзть пандо колмо ков малава, ульнесь сэтьмечи. Ды вана учовсь. Колхозонь «ушмодейтнестэяк» кой-кинь пряст увныть. Ялатеке састь нарядс важодицятнень ильтеме. Аволь кода кой-кить машинань прявтнэде... Боярт, сыненст, куш идемевсть киштест потсот, сама, прянть невтема. Озяз марто Ченяркснэнь теяк эзь тееве. Эзть пачкоде пайстомотне тракторонь калдаскак. Куш савольть, куш варштавольть, превтеметь. Савольтькак... Мезе теде полавтоволь?
Миколь совась — Кирин лиссь
— Течи, эйкакшт, сави тенек онкстнемс паксяв кинть ялго. Машина а ули, — яволявтынь, ансяк прядынек валскень ярсамонок ды лисинек вальмалов.
— А мольтяно!!! — шалнозевсть марязденть «эйкакшон ».
Косто ней муемс кодамояк крандазнэ?
Сась, уцясказон, автобус.
— Озатано? — пшкадинь ветицянтень.
— Учома?
— Учодо!
Тусь ды ёмась, прок тюгайть трескизь. Мезе теят, сави учомс.
Сась, окойники, учоманок. Ансяк, зярс сон арасель, ёмась Юра Письмеров, минек «весемеде икеле молицянок», «стахановецэнек». Коцькерямо пеелензэ-изгирямонзо стувтызе. Ношкстась эрямкудов вешнемензэ ды ёмась, теке узере анксемас.
Учома?
Эно ков молят, сави лужалемс.
Учовсь, кода ялганзо мерить, Письмаргак.
Весе, некак. Сыргинек. Ды таго апаро. Эзинек кенере велестэнть лисеме, автобусонок весть-кавксть кешнясь ды општась. Маштсь бензинэзэ.
Учосынек?
А мезть кевкстнемскак.
Ялго, содазь, умок-умок улевлинек «чачома паксясонок», якстерькай оровтонок вакссо. Киньгак мельскак эзь сакшно: истямо вадря, маней шкась стяко юты. Мейле мезе? Тесэ седе вадря. Мезень берянесь, видеяк, аштемс лембе-чевте таркинесэ? «Ушманось уды — тевесь моли», — теке минденек кортави армиянь валмеревкссэнть.
Пачкодинек чикуншка малава.
Аламос котьмамодо мейле мекев, ярсамкудов, машинань вешнеме эзинек карма, ношкстынек ялго. Седе курок.
«Кода эрят?» — кевкстнить сеедьстэ. «Чись ютась, ды паро!» — марят ламонь кургсто.
Самай истямо ладсо, истямо лувсо кепедтяно, стявттано пильге лангс Пушкин лемсэ колхозонть миньгак.
«К-700»-со бутылка мельга
Шказо чары чикуншкадо мейле вете малава. Сёксень васень ков. Чипаесь, кадык пензэяк аламнеде матрась, зярс чары-вели верьга. Улемаль тенек паксясо ды коцькерямаль рудаздо якстерькайть. Текень кис тезэнь кучимизьгак. Минь жо талай уш сынек паксясто ды лужалетяно ней тесэ, вейсхозонь ярсамкудосо.
Кандынь, путынь тарказост пенчем-ваканом, сюк-сюк ёвтынь пидицятненень, Лиданень ды Валянень, ды озынь стувор пес. Учан лиятнень ярсамонь прядомаст.
[232] Вете част. Таштамковонь жой-гай чи. Самай, самай важодема шка!
Ледсь мелезэнь чачома велем, пирень-кардазонь мелявкстнэ. Авам, патян-сазором марто носкилинек модамарень таргамо шкасто чоподас. Сялгсак койметь нетькстнэнь паро ладсо а неявомадост. Кочкицятненень паро ладсо а неявить модамартне. «Саты!» — мериль эйстэнек кияк, ды чоподава ушодылинек пештнезь кескавтнень-ведратнень каськас эли мацтс кандтнеме.
Стувор экшс ойсилинек толонь вельмевтезь. Сизят. Марявиль, кода лоскиить пилытне.
Валске стят, прок мезеяк арасельгак, ды одс кундат, тагояк чоподава, апак прядо тевентень. Ды таго чокшнес. Вана истя урялинек иень перть кастозенть. Кармавтсь псилгалемс вейкесь: весе урядазесь, каськас-мацтс каязесь — минек, сон апештявикс комш курго теледенть идицянок. Кияк эйсэнек эзь кармавто, кияк эзь нерне, эзь пансе, коршункс велькссэнек эзь аште.
Мартон эйкакштнэяк, содан, кудосо истя, кода тесэ, часост лангс а варштнить, сыньгак чоподасто чоподас эвтить. Тесэ вана, вейсхозсо... Ансяк седе курок перьгедемс истямо безарькс, истямо налкставикс тевденть ды ношкстамс, чинзэ лангс апак варшта, чокшнень ярсамонь иланть топавтомо. Ниле часос паксясонть эль кирдевить! А? Тень кода лемезэ?
Арсеман сезинзе ушосто каятыця зэртесь. Сорнозевсть ярсамкудонть стенанзояк. Те, содан, «К-700»-со сась ярсамо Сыреськин Федя — ашназа черь, сэнь сельме, тракторонзо кондямо сэрей-покш цёра. «Алкуксонь эрзя», — зярс-бути кирдинь мельсэнь. Шкань ютазь карминь содамо: эрзянь ансяк кудолемезэ, ве валгак эрзякс а соды.
Течи мекс-бути «алкуксонь эрзясь» эсь «лишмесэнзэ» ардсь ярсамо меельцекс. Те кода истя? Мезе лиссь? Сон комбайнатнень мельга айгши пакся чирева олгт, олякстомты паксятнень сокамо. Ловови паро важодицякс. Кода эно? Каня чауланень истямо виев, покш трактор максыть? Тевензэ теи часонь коряс, теке немець. Валскень вейксэ чассо сон уш паксясо, кемгавтовосо — ярсамкудов. Мезе ашти ардомс колмо-ниле вайгельпетнень истямо лишмесэ?! Ниле, ниле пель марто чассо сон уш таго тесэ — цянкаи пенчсэнзэ, чаравты ям ваканонзо. Весе кода эряви, профсоюзонь койтнень коряс.
...Туемадонок кавто-колмо чиде икеле Сыреськин, «алкуксонь эрзясь» ды «паро важось», чокшнень перть ардтнесь велеванть кудошка тракторсонзо. Иредьстэль. Мейле та-кода понгсь эрямо «фирмадонок» аволь васоло [233] сёлтонть чирес. Эли кадовсь, эли сельмтне уш эзть нее — совась тракторсонзо... экшелямо. Веденть потсто неявсь, прок ведьалксвенчень перископ, трубазо. Кода эзь лепия сонсь «экшелицясь», ве Пазось соды.
Таргасть «кудошкантъ» районнэк. Сёлтонть перька ансяк кодамо техника арасель — кран, бульдозер, гусеница лангсо покш-покш трактор... Зяро чить таргасть ваязенть, а содан. Саранов туемазонок яла эзь таргавкшно.
Эйкакшокс, нать, кадовангак...
Весе мельсэнь. Само чистэнек саезь. Кода эрямо тарка эстенек пурнынек, кода пиземе алга паксяв шлеберь-шлеберь якинек, кода якстерькайсэ машинат пештнинек... «Эйкакшон» марто бажинь куш кодаяк идемс рудазсто сахаров ашо якстерькайтнень, куш зярыяк эйстэст ильтемс заводов.
Леди ней, шкань ютазь, колхозонь прявтонть кедьстэ ярмаконь вешемань «тевем», ды нусманясто пейдезеван. «Ульнить эйкакшокс, эйкакшокс кадоваткак», — мизолдозь мурнян яла эсь прям.
Каня тень эзь неяво, каня а содылинь: превтне, паро мельтне, ламонь содамось, мазычись киненьгак неень эрямосонть а эрявить. Питнест — синдезь трёшник. Ды истят сыявкс тевть лия таркасто костояк а муят. Ансяк тесэ, те масторсонть, весе велявтозь митялкат.
Тусь омбоце ков. Омбоце ков, кода «тюртяно» якстерькаень «сюпав урожаенть» кис. Ды учотано, зярдо нолдасамизь кудов. Истя, истя. Шкась ютась ковдо ламо. Кода илязо уле, кой-мезе теинек: урядынек комбайнасо таргазь «ламбамо ундокст», аволь аламо «КАМАЗТ» ильтинек заводов. Ансяк вана кияк эзизе нее, кодамо тюсозо тесэнь целковоенть. Весе содасть текень: важодеде, важодеде ды тагояк важодеде.
Кеман: эрявольгак неень шкас Фёдор Пушкин, конань лемсэ лемдезь тесэнь вейсхозось, ламодо мезде содаволь, чарькодевель, ды сееремс «важодеде, важодеде ды важодеде» аволь саво.
Кудов, кудов!
— Ура-а-а! — вастымизь чокшне цёратне ды тейтертне, зярдо ёвтыя тенст кудов туемадо кулянть. — Кудов ванды, алят, кудов!
«Вейсхозникень» эзть содаво: эрьванть турвасо сияждсь мизолкс, кие-бути тренькаесь гитарань струнасо, [234] та-кие морась. Шалнось «вейскудонок», теке чадыведь. Весемеде пек кецнесь-сеересь Письмар Юра.
Эстеньгак, панжса потмом, а кемеви: каня алкукс пе? Каня алкукс прядовсь «сроконок»? Аволь он?
Пе! — эрьва чи рангить газетатне.
Пе! — эрьва кельсэ мотордыть кортыця-невтиця превс путыцянок — радиось ды телевидениясь.
«Пе! — ули мелем серьгедемс масторонть келес. — Ванькс седей ломанть! Седе курок тееде «пе» вейсхозтнэнень-совхозтнэнень. Лиседе ды калавтынк урень пизэнть, пурнадо лия, седе «ломанень», лезэнь седе максыця хозяйстват».
Кенярдан, ды теке марто авцорить седейсэнь пинеть. Учови-арась тень олячинь те валдось? А кадови колхозтнэде мельга чаво тарка? Мезе тееви велетнень марто? А чамить? А лиси, кода ламоксть ульнесь, бабань пейтнень ладсо? Лодорсо а певерить?
Ильтеменек сась сонсь Григорий Иванович, сонсь прявтось. Кода беряньстэ-нузякссто эзинек важоде, минь — «стахановецт». Минденек ламо ды минденек парсте кияк эзь тее. Кить, кодат факультетт ды заводт тесэ ансяк эзть нерьге рудазов сёксенть перть. Лезэсь...
Велень «инесь» ёвтась седейшкавань сюкпря, пеедькшнезь лепштизе эрьванть кедензэ, ды ойсинек автобусс.
Эль эзинь мереве совамодон икеле: «Вастомазонок, тувонь ферма!» Мезеяк эзинь мере, суския келем: ильтицянок покордавлия.
Зярыя минутань ютазь «бусонок» лиссь покш кинтень ды велявтсь витев, Саран ошонть ёнов.
Шумбрачи тенк, паксят!
* * *
Ёвтнеминетне-тешкстнэ сёрмадозельть ютазь пингень 90-це иетнень ушодовомсто. Эйсэст ёвтневи се шкадонть, невтевить ломантне, колхозонь койтне, тевтне, эрямонть седей ладсо токномазо. Вейсэнь хозяйстватне, марявсь, эрить меельце иеть, ды курок сынст полавтсызь фермерэнь лезэнь кандыця од хозяйстват. Арась, арсезенть коряс эзь лисе. Валдо мельтне-кеме-матне соласть, прок валскень сув. Советэнь шкатнестэ теезенть-путозенть калавтызь. Паро, эрямонь вадрял-гавтыця мезеяк эзь тееве. Видестэ-аволь арсекшнинь колхозтнэнь сыця шкадост, уцяскадост, невтизь комсьвейкееце пингень васень кемень иетне.