Янгамо (2006)/Кить-бути морасть моро...

From Wikisource
Jump to navigation Jump to search
Кить-бути морасть моро...  (2006) 
by Нуянь Видяз, edited by Рябова Л. А.
Нуянь Видяз. Янгамо. Келей ёвтнема, ёвтнемат, тешкст. — Саранск ош, 2006. — с. 182—200

[182]

КИТЬ-БУТИ МОРАСТЬ МОРО...

Пиченькужось аволь умок ульнесь покш велекс. Те ней, теке пейтеме курго, ков а варштат, — чаво кудот: кие ошов ажиянзо аравтынзе, кие сонськак а соды ков. Икеле лиякс ульнесь: чуросто кие эсь олясонзо кадылизе чачома велензэ, Пазонь пельде казезь неть таркатнень. Содась Ппченькужонь эрицясь: истят мазый, сюпав таркат, кува иля вешне, а муят. А стяко покштятне лемдекшнизь веленть Ппченькужо. Удалганзо, видеяк, пирявксокс ашти пиче вирь, икельганзо, вирьсэ копачазь сэрей пандтнэнь алга, чуди-кецневти мазычисэнзэ келей, свал ков-бути капшиця домка лей. Керш чиреванзо кенярдовтыть сельмть ды седей вайгельпень-кавтонь келесэ лайме лугат, куракшт, сельведь ванькс эрькть.

Тунда, лёмзёртиэнь панжовома шкасто, нармунень моротнеде ды тантей чинеденть коштось, маряви, сорны. Кунсолыть чачомань-касомань морот аволь ансяк ломантне, велень атякштнэяк неть шкатнестэ потомдтнесызь кирьгапарест ды, прянь кепедезь, кевкстнить сараз ялгаст: те мезе, кить минек апак кевкстне истя мазыйстэ чоледить?

Алопесэ, асфальтсо вельтязь кинть чиресэ, кумажава модас ваязь, нувси кудо. Эрязь иетнеде раужкадсь, матрась, чиремсь. Икелень азоравадонзо, велесэнть содавикс морсицядонть, корты коняксос чавозь лазось — «Здесь живёт заслуженная колхозница...». Умок сон, «заслуженнаясь», тоначисэ. Ансяк лазнэсь, теке пеедькшнезь, ледстни сондензэ ды талаень шкадонть. Юты ланганзо вановтот, ды токасы седееть нусманячинь коволнэ: ульнесь — арась.

Те кудось явови лиятнеде аволь ансяк пижесэ артозь лазнэсэнть, Васенцеде неемстэнзэ мерят: те аволь кудо — кородома. Эрьва ендо пирязь сэрей, ломанде эчке-келей, верьга сювозь лазонь пирявкссо. Шиферэнь латонть ланга кайсезь та-кодат кшнить, жесть панкст, трубат. Лазтнэ пирявксонь ологатнес чавнозь аволь ансяк эсксэ, сюлмсезь уськсэяк. Ушо ёндо кудонть стенанзо — лембень кис — вальма видьс маразь модасо.

Пизэнть азорозо — Оржаень Окся. Мартонзо ютавты пингензэ Вежан атя. Сон Оксядо кеменьшка иеде сыре. Печтить вейсэ кажочист уш талайде. Атянть превсэ Еейке: лембелгавтомс пизэнть — ваднемс сёвоньсэ, ускомс, лазномс пенгть, кепедемс-валтомс, кандтнемс...

[183] Тень эли, паряк, мезеньгак лиянь кис велесэнть ловить сонзэ аламнеде «токазекс». Истя-аволь — а содан. «Келяс» пек а кеман. Содан лиядо: Вежай атямезень витнезь-ваднезь кудост лиятнень марто кодаяк а човорясак. Истямось велесэнть вейке.

 

*  *  *

...1932-це пе. Шкадо мейлень сёксь.

Чугункань кинь аволь покшке станция. Стакасто кувси сыргамодонзо икеле, вийть ташты паровозось. Ютыть зырыя минутат, сон вешксты ды кецнезь сырги, ков тензэ эряви.

— Палай, кирдть! — каятотсь вагононь панжадо вальмастонть авань вайгель. — Монень аламо кадовсь эрямс. Тон трик-кастык!

Палай, вагононть вакссо учицясь, кепединзе кедензэ васоло вере вальманть пелев — саемс венстезь тапаркскенть. Тона паро ладсо эзь кундаво ды нолажтсь кшникс кельмезь моданть лангс. «Вай!» — менсь кавонест аватнень кургсто. Эйдесь эшкевемадонть пижакадсь.

Авазо, Делюнонь Олдай, мезеяк уш эзь маря, эзь нее. Сон ёжовтомо, прок пулт, новольсь вагононь эзементень. Эзизе нее вальмань пекстыцянть. Эзизе маря, кода поездэсь весть-кавксть ноцковтовсь ды састыне-састыне ушодсь вайгельпетнень ловомо.

Палай эрязасто автордызе моданть лангсто чевте, лембе тапарксонть, лепштизе мештезэнзэ ды тусь рельсатнень кувалт се пелев, ков ваксканзо капшасть вагонтнэ. Потякаесь оймась. Аванть превсэ вейкель: «Ансяк аволимизь редя, ансяк аволимизь редя...» Арась, эзь лисе тонь ладсо, апелиця Палай. Ламо сельмть ды пилеть ванстасть чилисема ёнов туиця, «кулакто» тыц пешксе поездэнть. Милициясь, кона полгарнявтнесь сельмензэ, ваннось вагонтнэнь кувалт, мусь таго-мезе акемевикс ве вагононть каршо аштиця авастонть.

— Гражданка, стойте! — марясь мельганзо Палай. — Остановитесь!

Авась седеяк келейгавтынзе эскельксэнзэ. Седеесь аноколь кирнявтомс мештьстэнзэ. «Мезе теемс? Мезе теемс?» — кевкстнесь эськанзо. Тусь чиезь. Сон кенерсь пачкодеме станциянь та-кодамо кудыне видьс, мурдась удалонзо ды ландясь, прок стардызе венелев самозо. Ансяк «озась», икелензэ палманькс стясь айгорокс ардыця сасыцязо.

[184] — Предъявляй документы, гражданка! — чеменев жестень вайгельсэ рангстась кумажадо алга раужо шинельсэсь.

Палай чатьмонсь. Ансяк укстнесь, носксь. Бажась невтемс: кодаяк а чамдови потмозо. Пакшанть кирдсь — илязо неяво — элес тапардазь, мештензэ ало...

Коень ванстыесь, мезе лангскак апак вано, содась эсензэ:

— Не кряхти, кажи пачпорт!

Палай ве кедьсэ кепедизе коцтонь палянзо, тулдаскавтызе удалксонзо ды кежень сазь рангстась:

— Вана, вана монь пачпортом, идемевсь!

Тона эзь учне истямо наянчи.

— Пту, поперечная! — сельгсь седейшкава, ахолдась кедьсэнзэ ды окойники кадызе «венельдицянть».

Весь якшамо. Васоло-васоло менелень мастортнэсэ коське ды ванькс кошттонть сорныть, маряви, цивтёркай тештне. Шказо шаштсь теле малав: лембе учомс а косто. Ансяк беряньсэяк паро ёнкскеть эрсить. Виде, ушосонть аволь лембетнеде, сень кис кись валаня, аволь рудазов. Молемс эзганзо шождыне.

Кудов, Пиченькужов, Палай пачкодсь пелеведе мейле. Сюкпря, Инешкипаз! Вайгельпетне кадовсть удалов. Молемань перть мельсэнзэ текель: илязо ормалгадо мештесэнзэ пштидезь эйдесь.

— Вана, тетяй, нуцькине теть кандынь, — кецнезь яволявтсь Палай мельганзо кудо кенкшенть пекстамсто.

— Кандыть — вадря, — мерсь каштлангсто Анош атя ды тонгинзе понань кемензэ, валгсь лембе пандонть прясто. — Мезе, уряжот уш допрок новольсь?

Атясь каясь ланганзо ташто сумань ды лиссь кудыкелев. Зярыя шкань ютазь совавтсь лавсь ды кундась потолокс чавозь кшнинь кирькскентень поводемензэ.

— Мезе ёвтат уряждот, мекс чатьмонят? — таго пшкадсь тейтеренстэнь лавсенть марто котьмамсто.

Палай путызе пакшиненть эземс. Тона эзь сода, кодат даволт велясть перьканзо — удось. Идицязо кайсесь ды кундась ловсонень суликинень вешнеме: эйкакшонть — сыргози — васняяк эряви пештямс пекинензэ. Моргасто лисемстэ мерсь тетянстэнь:

— Мезе теть меремс, берянть уряжонь тевензэ. Куш, келя, куломо кадовлимизь эсень велес.

— Мезе кармавтсь цёрыненть коряс? Кода тенек улемс мартонзо? — котьмась кудазорось ды яла кевкстнесь эсь тевензэ теиця тейтерензэ.

— Мон, келя, а эриця! Кадык куш эйдинем поладсы [185] эрямонзо. Монень, мерсь, ялатеке кулома. Тосо сонгак пужи-ёми. Вана Истятольть уряжонь валонзо. Эзь саво тенек кувать кортнемс. Милициятне, прок ёзнэть, бизмолдсть ютковаст. Ламо а кортнят. Кодамо сон пароль, тетяй!

— Теня, Палай, тон уш пря пек иля чаво. А кадсынек, стявтсынек кодаяк урозкенть. Зяро сонензэ, пелькинентень, эряви... Ловсонок ули, кастасынек.

 

*  *  *

Ютасть вете иеть.

Те шкастонть прявтнэ весементь аравтнизь таркаваст: «кулактнень» — ве эземс, тундонень видьмевтеме кадновицятнень — лияс. Лишметнень ветизь вейсэнь латалов, пурнызь крандазтнэнь, сокатнень, изамотнень. Ушодовсь «од», вейсэнь эрямо. Весе вейсэ: важодеме, оймсеме, ярсамо, тевтеме аштеме, удомо... Вадря! Кие мери — берянь, бути ломантне якить сокамо-видеме ды тикшень ледеме, прок покшчинь тешкстамо. Секскак шныцятне шныть те мазый, од, алкуксонь олячисэ эрямонть, кода маштыть. Берянесь вейке: течи лишменть кильдьсы те, ванды кияк лия, мейле... Кияк эзь сода, кинь пингстэ човсевсь ракшанть сявдиксэзэ.

Итяйть эрясть велесэнть, кода ламот лиятнеяк — аволь сюпавсто, аволь арасьчисэ: вачо эзть аште, пешксе пекеяк эзть сода. Анош атя ды ламонь акортыця тейтерезэ Палай валскень ды чокшнень перть лиятнень ладсо нерьгить кудоютксо ды кардазсо-пиресэ. Чить — вейсэнь хозяйствасо, тосояк тевтнеде аволь аламо.

Пазось эли та-кодамо лия вий чачков сезизе эрямо лувонть? Итяенсетнень майсевтсть косо-бути чилисема ёно — кулакт! Лиятненень савсь ускомс колхозонь тевтнень. Кода илязо уле, берянь эли вадря, венть полавтылизе чись, тундонть — кизэсь. Мельга-мельцек капшасть иетнеяк. Эзь марявояк, кода ютасть эйстэст вететне.

Сёксень якшамо чокшне милициянь судо алдо салазь Вежай цёрынеськак эзь кадново шкадонть. Палай, конанень сон ней мерсь авай, секе чокшнестэнть лемдекшнизе Витякс. Вежаекс аламонь-аламонь теизе покштязо. Течи Вежай, валске... ды истя церьковань лементь мендердизе эрзякс. Тонадсь тенень од авазояк. Тельня — якшамотнеде ды оршавксонь аразденть — цёрынесь, велень лия пакшатнень ладсо, седе ламо кудосоль, каштлангсоль. Лембе шкане — чинь-чоп чийнесь ушова.

Вежай вечкилизе покштянзо авадонзояк пек. Мезеяк а теят, цёрась седе малавикс цёранень. Чопотьёнов, [186] зярдо прядовильть паксянь тевтне ды атясь вана-вана сыль кудов, цёрынесь лисиль учомонзо кузтемпес. Содыль: покштязо чавонь кедть а сы.

— Покштяй, мезе течи нумолнэсь кучсь? — днльнезевиль вастовомсто сиянь вайгелезэ.

— А ёвтаса, — мизолксонь кекшезь мериль «чак-шоке» наразь пря покштязо. — Адя васня кудос соватано, мейле вансынек.

Меельце валтнэнь ёвтылинзе тошказь. Те седеяк кирвазтнинзе цёрыненть мелензэ содамс, мезе покштянзо пешторсо.

Кудосо азорось тарги нуцьканстэнь кши печтьке, зярыя чурька лопинеть, лиясто натой мезеяк ламбамне. Нуема шкасто весемеде паро казнекс сэнь сельме Вежайнень ульнесь — нумололевкс! Кецнемантень пе арасель. Кургинезэ цимболдозь цимболдсь.

— Течи вана мезе теть мерсь максомс пакся нумолось! — мери покштязо ды таргасы кескавстонзо понав кикерьканть.

 

*  *  *

Вечкезь, вейкень-вейкень мелень ванозь, мольсь эрямось Итяень кудосо. Аволь лисеяк апак учонь зыян, шкась чиевель теке ладсо седе товгак.

Весть, розень нуема шкадо икеле, паксянь станс сась Пичепень бригадирэсь. Ярсамодо мейле од сюронтень утомонь анокстыця цёратне ойсесть ве курынес таргамо. Ютась малазост Анош атяяк. Мезде мольсь кортамось, сон эзь сода.

— Анош леляй, те алкукс — финнтнэ эрзятненень малавикст? — пшкадсь тензэ Пошань Дрига, Итяйде аволь васоло эриця од цёрась.

— А? Кодат малавикст?! — эзь чарькоде атясь ды аравтызе кевкстицянть ёнов седе мариця вить пилензэ. — Теня, тон седе пижнезь кортак, пилетне монь...

Дрига кевкстизе омбоцеде.

— О-оно мезе! Келя, истя, — аламнеде абунгадозь, теке марто кецнезь, ёвтызе мелензэ Анош атя ды озась чочко лангс ялганзо юткс. — Революциядонть икеле урединь, кода ней кортыть, служинь Петербургсо. Се шкань прявтошсо. Кемеде-илядо, пидицянок-андыцянок ульнесь монь шкань финнава.

— О-о, чарькодеви, мезде кортамось туи, — нерьгстызе келензэ Дрига.

— Ужо, ужо, пекстык каштомот, — сеске кардызь лиятне, ды ёвтнемась поладовсь.

[187] — Ялгам ульнесь эрзя. Весть эсенек юткова кортамсто авась пшкадсь тенек рузокс: тынь, келя, костонь ломантне, кодамо раськень? Ды минь, мерян, эрзят. Чарькодят? «Я-я», — каршон. Те сынст кельсэ «да-да». Чамазо валдомгадсь, прок ламо неде мейле лелянзо марто вастовсь. Валонь таргсезь тень мери: «Эрзия? Тон эрзия?» Мон тензэ сынст ладсо: «Я-я, эрзия!» Монсь сурсо эсень лангс невтнян. Фнннавась ловомо — керш кедень суронзо менчеме: укси, какси, колме... Ды истя кеменьс. Мон абунгадынь: те косто истямось саевсь?.. Минекекс, вант, лапаксы. Лепштизе кеменце суронзо ды аймельгавтымим валсонзо: «Кыминь»! Тень мери: «Вы знаете, господин солдат, что мы с вами родня? Талёкая, талёкая родня...» Эзинь муе сеске, мезе ёвтамс.

— Те истя кода — родня? Как это понимать?

— А вот как, — мерсь авась, — у финнов и эрзян очень близкие языки. Давным-давно твои и мои пра-прадеды говорили на одном языке. Потому мы с тобой, господин солдат, — родня.

Мейле се «ламонь содыцянть» марто теевкшнынек паро ялгакс. Лиясто ваканнэзэнь понгонесь седе покшке тулгоня сывель палнэ эли мезеяк лия седе тантейне. Натой карминь содамо финнэнь зярыя валт, сон — эрзянь. Ансяк несамам, васолдо уш пейдезь серьгеди: «Шумбрат!» Мон каршонзо, зярдояк а стувтса: «Терве!» Тынь, цёрат, содатадо, кода финнтнэ эсест мастордост мерить? Суоми. Сувонь Мастор... Минек кельс истя ютавтови. Сувонь Мастор... Мазый лемесь!

— Анош леляй, мейсэ прядовсь тевенк се финн-аванть марто? Чей уш эзик менстякшно? — таго венстизе келензэ Пошань Дрига, ды цёратне пейдезевсть.

Пейдемакс саизе атяськак.

— Те, Дрига ялаксом, башка кортамо... Вана петя, алят! — мерсь ды стясь чочконть лангсто. — Ёвтнематне ёвтнемат, тевтне теемат. Сырган...

 

*  *  *

...Нуематне-пивсэматне прядовсть. Паксятне чамсть. Велькскаст, прок тонолт, ливтнить лембе ёнов туемадост икеле куяв грацтне. Ка-а-р! Ка-а-р!.. — маряви ломанень вайгельтнень таркас. Тарькс, суводи пиземне. Чопода пельтне апак эрязкале уить кудотнень, чувтнэнь, паксятнень велькска ды петерьсэ певердить чова сельведест. Якшамо, рудаз.

Кельме ды нолажа ёжо Анош атянь мештьсэнзэяк.

[188] Моли кудотнень икельга таргавозь янганть вейсэнь кудосто. Чоморк, чоморк... — шлеберди пильгензэ ало рудазось. Эскели ды кодаяк а ёртови прястонзо педлийкс педязь мелесь: «Мезекс тенст эряван, Мезекс? Пинге эрян — эзимизь тердтне тов, ней вант вана. Милицияв... Валоськак кодамо-бути кельме, теке гуй. Молемскак тов визькс». Ютась эсь пачканзо меельце эрязь пензэ ланга, варштнесь седе од шкань паксязонзояк. Кодамояк чумочи коень кирдицятнень икеле эзь муе. «Кемень чассо улемс милициясо...» — сёрмадозель вельсоветсэ тензэ невтезь конёвнесэнть.

Кудос пачкодезь, кузтемалдо лиссь Чеменькай кирькс пуло кискинезэ ды азоронзо эйс кирнявтнезь невтнесь вечкеманзо. Атясь вадяшамонзо, пилензэ ноцорямо эзь карма. «Те мекс, мезе теевсь азором марто?» — арсезевсь вастыкаесь, нолдызе прянзо ды покордамодонть мекев апак эрязкале эцесь тарказонзо. «Ну мезе, милицияв, тык милицияв!» — ахолдынзе Анош прястонзо ве таркасо шешкиця мельтнень ды панжизе кудыкелькс кенкшенть.

Удомась, мерят, кекшсь, кода эйкакш шкасто «кекшнемасо» налксемстэ. Полавтнесь Анош атя боканзо, полавтнесь арсемань лувонзо, снартнесь педякай мельтнень пансемс ловомасо, од порадонзо, нидензэ ледстнемасо. Стяко. Ансяк ашолгадома ёнов саизе удомань коволнэ. Несь Анош атя он: сравтовсь икелензэ келей-келей ки, пе тензэ а неяви, кавто ёнганзо, росасо пургсезь, кумажава пиже тикше. Апак учо тикшесь раужкадсь, теке палсь, ды кинть чирева, прок мода потсто, лиссть раужо палманть. Кись кармась теялгадомо ды теевсь раужо латкс ветиця яниэкс. Палмантне састь малав ды малав, апак учо вейкесь эйстэст тей-тов чиремсь ды сяворсь, сталмосонзо модас лепштизе атянть. Анош серьгедиксэль — келесь теке кевензась, а сыргавтови, вал а ёвтави. Теде сыргозськак. Марявсь, кода тандадомадонть капшазь чавсь седеезэ.

...Милициясо вастызь пеедькшнезь, теке умонь содавикс ялгаст, конань кувать эзизь некшне. Столь экшсэ аштиця келей лавтов цёрась, бешом, покшост, натой стясь таркастонзо ды столензэ трокс венстсь кедь, пшкадсь тензэ тетялемсэ. Анош аймельгадсь: «Тень кода чарькодемс?» Оймезэ ялатеке чевтемгадсь, эй покольнесь потсонзо солась. Покшось озавтызе столензэ экшс. Мизолдозь кевкстизе фамилиянзо, лемензэ, чачома иензэ, чинзэ, ёвтась зярыя згилямонь валт ды [189] општась. Те чатьмонемадонть мейле, таго згилязь ладсо, рикстедизе кевкстемасонзо:

— С белофиннами связь поддерживаешь? — ёвтынзе валтнэнь ды сялгинзе сельмензэ икелензэ аштицянть сельмс. Анош атя талакадсь.

— Не понимаю, товарищ начальник...

— Не понимаешь, говоришь? — казямо вайгельсэ омбокстынзе атянть валонзо ды путсь икелензэ машинкасо печатазь конёв лопа. — А это что такое?

— Я это, без очков не вижу...

— Тогда прочитаю сам. Слушай.

Конёвсонть валсто валс ёвтневсь паксянь стансо «лекциядонзо», Петербургсо революциядонть икеле финнава марто содавиксэкс улемадонзо. Ёвтнемазо поладозель валсо: келя, сон, Итяень Анош, эрьва кода шнась тосонь Суоминь эрямонть ды минень-сюнонь валсо сюдось колхозтнэнь. Маринзе Анош меельце валтнэнь ды прась мельс: «Отьма. Тестэ мон а менян».

— Ну-с, что скажешь, Итяень Анош, так я прочитал, не ошибся? — чикордыця вайгельсэ кевкстизе «товарищ начальникесь» икелензэ аштиця сыре ломаненть. Валаня, ойсэ вадниця кортавкстонзо эзь кадово сявнеяк.

— Да, всё это было. Почти сорок с лишним лет назад, совсем молодым, я был знаком и любил финскую женщину.

— А теперь? Всё... любишь? — згилязь ладсо поладызе кевкстеманзо тонась.

— А теперь... Проживёшь, как я, и спроси себя потом.

— А теперь? Как поддерживаете связь с белофиннами? Через кого?

— Ничего не понимаю, о каких белых финнах ведёте речь? Моя давнишняя знакомая — запишите её имя — Мерья Лехтинен, была на редкость чёрненькой...

— Хватит, меня не интересует масть твоей... Как поддерживаешь связь с финскими буржуями?

Анош атя эзь маняво. Лиссь истя, кода арсеськак. Кудов се чистэнть эзизь нолда. Эзизь нолда омбоцес — тэитькак. Эрямозо явовсь кавтов: теде икеле ды ней. Ней сон — «народонь враг».

Козонь прядови те омбоце пельксэсь, теде атясь эзь сода. Содась лиядо: ильтясызь тов, козонь, прок чопода отьмас, ёмасть васня урьвазо, мейле цёразояк.

[190]

*  *  *

Пиченькужосо тевтне чийеть-лотксесть апак сёрмадо койтнень коряс. Аношонь саемадо мейле телесь якшамоль. Савсь ламо, лиясто чизэнзэ кавксть, уштомс. Мезе лангскак апак вано, велесь эрясь: сэредсть-пичксесть, чачтнесть-кулсесть, урьвакстнесть, тешкстнесть покшчить...

Итяень кудост стявтозель Верепесэ, веленть чиресэ. Путокшнызе сонзэ Аношонь тетязо — Итяень Валдай. Дошуз, превей ульнесь ломанесь. Содась, козонь озамс пингензэ эрямо. Аволь сэрей пандо пряс. Икельганзо келей-келей лайме. Тунда, леенть чирестэнзэ лисема шкастонть, кудонть икельга сравтневи чадыведь. Пе-прядовома тензэ, маряви, а ули. Ведь, чопода-сэнь, вецана сувсо копачазь вирь ды апак визде ракиця чикуншкань чипай. Панжик вальманть ды вант мазычинть лангс седееть пешкедемс. Те — ловтнень соламсто. Ютыль шка, сыльть видематне-путоматне, ды Итяйть стувтнилизь мазычинть. Тевть, тевть, тевть...

Икельгаст лаймеванть модатнеде вадрят иля вешне. А муят. Нерьгстак, кода кортыть, ажия — касы ажиянь сэрьсэ сюро. Ялатеке эрявсь лангсост ливезькалемс чоподасто чоподас, ловонть соламосто одс прамо шказонзо.

...Палай учось тетянзо чокшнес. Эзь са. Учось омбоце чистэяк. Эзь учово. Ансяк колмоце чистэнть, уш сундерьгадозь, совась тензэ эсь велень малавикс ломань ды салава ёвтась раужо куля — тетязо а учови. Лия, келя, мезеяк иля кевкстне...

Аванть новольсть кедензэ. Ков теемс Вежаень? Иензэ вете, самай верканя шказо, ве минута таркасонзо а аштеви. Вант ды вант мельганзо, тевс иля кундсе. Телеськак аволь пандо удало.

Палай чокшнень перть налксесь цёрыненть марто. Андызе-симдизе, ацызе таркинензэ ды уш ильтиксэлизе мадеме. Текеде арсесь сонськак. Те шкастонть апак учо панжовсь кенкшесь, ды тарчксонть трокс эскельдясь Дёгань Кузя.

— Ванан, Палай, толот палы. Эрь, варштан, мерян, кода эри-пишти Палай, — цёрась аштесь каштланго кузтеманть вакссо, эзь сода, кода кортамс седейсэнзэ кирдевицядонть.

— Я, тон мекс покшкавтнят — а ютат икелев? — мерсь азоравась. Нардынзе кедензэ нардамосо ды сонсь [191] васенцекс озась стуворонть пес. Кузя ноцковтызе прястонзо шапканть, сурсемень таркас сурсо вадяшинзе лияназ ашо кувака черензэ ды озась Палаень каршо.

— Ёвтык эно, мезть якат-пакат истямо талай шкане, — мерсь Палай ды салава варштась цёранть лангс.

— Мон... Ды мон истяк, а мезень теемадо, — моткодезевсь чокшнень инжесь, — вальмалгат ютамсто... Тетять пельде арасть кулят?

— Арасть.

— Ков ёмась...

— Кузя, иля кайсе тей-тов пулосот. Редия, кекшнят, мезе-бути пелят видьстэ ёвтамодо. Паряк, тетядон мезеяк марить? — исковась Палай.

Цёрась чатьмонезевсь.

— Кадык эно истя, пулонь апак кайсе. Ёвтаса, мекс совинь. Содат, полам кулось... эрян ськамон, колмо эйкакшт сявдикссэнь. Тонгак ськамот майсят, тоньгак — эйкакш. А берянь, арсян, тенек ве чудильмас прамс. Яла седе шождынестэ карми усковомо улавось. Вана мезе марто совинь теть.

Мезе-мезе, истят валт Палай эзь учне. Сон таймазкадсь, превензэяк човоргадокшность марязденть. Кода, кодамо мирденень? Те мезе? «Тесэ весе эсень, тесэ ютазь иень эринь, — эвтезь эвтсть мельтне, — тесэ чачинь-касынь. Иетне? Ниленьгемень малава уш. Те эно а пирявкс... Мелезэньгак теде икеле Кузя эзь сакшно. Кулось низэ, кадсь тензэ эйкакш пизэ. Мейле мезе? Эри? Кадык эри. Вай, сестэ мекс седеем токнозевсь?.. Паряк, сы, велявты тетям?»

— Те кодамо эрямо — ськамот? А тев ушодомс, а пшкадемс вейкеть-вейкеть туртов, а ломань юткс лисемс. Эйкакшоськак кедеть лангсо. Мон уш эрьва ёндо арсия. Эрямо карматано монь кедьсэ. Тонь кудонтькак кадозь кудокс а кадсынек. Пиреденть кортамскак а мезть. Модарькат путтано. Кемть, берянь улеме а карми. Моньгак цёрынеть, тоньгак. Кодаяк уш трясынек. Уштнемань коряскак седе ён ды шождыне карми — ве кудо... — теке панжовозь сёлтсто ведь, певерсть чиявтыцянть кургсто валтнэ.

Палай чатьмонсь. Кунсолось ды арсесь: «Валсо вадря, весе тееви куроксто ды мазыйстэ. Тевсэ вана...» — бизнэсть прясонзо мельтне.

— Вай, Кузя! Тон куш кодаяк салава ёвтазь ёвтавлик. Ломань вельде эли кодаяк лиякс. Ней жо сеске, апак учо. Мон истямо мельс прынь: совак таргошкань [192] ютазь. Тонсь чарькодят, истят тевть весть лекстязь а тейневить. Ведьс совамодо икеле онкстнесызь домкачинзэ. Истя цёратне кортыть?

— Паро. Таргонь ютазь варштан. Монь арсемга, мутано ве ки.

— Вансынек, вансынек...

Кузя ютась поровт пелев, путызе шапканзо, велявтсь пазава угол ёнов ды мерсь:

— Лездак, Инешкипаз!

 

*  *  *

Палайть-Кузят ве сюлмосо-семиясо эрить уш ие. Кувать арсеме эзть карма: а мезть алсто сардт вешнемс, зярдо сявдиксэть лангсо ниле прят ды свал ярсамс вешиця зняро жо кургт, эрявить сынст трямс, стявтомс пильге лангс. Вечкема? Шкаяк паро ладсо эзь пракшно арсемс сондензэ. Тевть, тевть, тевть... Валске марто ды чокшне нерьгема кудоютксо, чить — колхозсо. Кудосо-пиресэ поксарязь, ютастькак читне, ды топодсь ие.

Мезеяк а теят, эрямонть эсензэ обуцязо. Течи чись-чипаесь прок од тейтерь мизолды, ванды, ванат, менеленть копачасызь раужо, тандавтниця пельть, ды сон варшты лангозот потмура вановтсо.

Истя лиссь Палай марто Кузяньгак.

Валскень перть теизь кудоютконь тевест ды тусть бригадирэнть кармавтоманзо топавтомо. Цёрынетне кадовсть кудос. Мезе мелеть, сень теить. Кияк а кардатанзат, кияк мезеяк а мери, а рангсты. Кавтотне, седе покштнэ, ношкстасть ушов: паряк, Эрьбамезнень, эсест шкавань шабра цёрыненть марто налксеме, эли лняв ковгак. Кизэ. Чийть ков мелеть.

Олячинь прявтокс кадовсть Вежай ды Кузянь веженсесь — Валдай, кода мери тензэ тетязо ашо черензэ кис. Цёрынесь тонадсь тенень ды чуросто тейнесь марицякс Миша алкуксонь лемензэ ёвтамсто.

Вежай уш тонадсь тесэ, секскак косо-мезе ашти — содасы а беряньстэ. Потмарсо вана вестькак арасель. Мезть тосо, те чопода таркасонть? Паряк, сонсензэ Юртаванть кудынезэ? Эри-эри тосо — валги. Теи мезеяк паро эрицянзо туртов — бути, чарькодеви, мелензэ витьсызь, — уцор-уцор кузи мекев. Лиясь эно кие тов кузни вень куншкава? Вежай а весть марсизе куземань кашторксонть. Весть, зярдо мекс-бути кувать эзь матедевкшне, мик марявсь яксиця. Кундындерятанзат Юртавась?

[193] Арась, арась, Анош покштязо истямо апародо эзь ёвтне. Сон, келя, Юртавась, аволь ансяк пакшат, покшткак а тандавтни: чевте седей, паронь раштый сон.

Эряви варштамс.

Кудыкелькс ёндо ужос чавнозь кузтемкатнева Вежай каткакс кузсь чопода масторонтень. Мезеяк а неяви. Ансяк кудо конянь вальминесь валдомтсь потмаронть тона пензэ. Аламос аштезь сельмтне тонадсть. Васня ковгак апак сыргсе варштась перьканзо. Сельмс каятотсь палманьшка кирьпецень трубась, эрзякс — почкось. Састыне, ваннозь-ваннозь, ютась ёнонзо. Сон аволь сеске кудосто лисезь туи верев. Сонзэ ули пельксэзэ, мерить тензэ атяка туво. Токавтызе «тувонтень» кедько-морнэнзэ — лембе. Ве таркасонть эртевсь верьга ологань трокс кайсезь, кавтонь-кавтонь сюлмсезь пекше тарадонь тенстьс. Вежай соды, мезекс сынь эрявить: сы теле, ды кармить понгавтнемест каштом ваксс ревелевкстнэнень. Порнесызь лопаст, тарадтнэнь каясызь каштомс. Лелянзо тонавтызь неть тарадтнэстэ «сэрянь» тейнеме. Керсесак пеельсэ суронь эчксэ тарадонть пельвежаськень кувалмосо. Мейле цюркинетнень лазносыть кавтов, ды «сэрят» анокт. Налксек нильтякадомазот.

Потмар сэдявкстнэ — потолоконь лазтнэ — вельтязь лопасо. Шкань перть сынь матрасть. Вельтявсть челькесэ... Ахолдат эрязасто — пештьсы коштонть. Секень вант, кешнязеват. Потмарсонть кудыкелькс ёнксонтень чемерязь чиньжарамо прят. Ламо-ламо эйстэст, оровт.

— Мезе тосо? — алдо дильнезевсь Валдаень вайгелезэ.

— Вана мезть муинь, — мерсь верьга лытыцясь ды пейдезь ёртызе чиньжарамо прянть алов.

Валдай автордызе ды ильтизе мекев верев, бажась понгомо Вежайс. Эзь понго. Сень кис Вежай автордась лия ды норовазь ёртызе Валдайс. Понгсь лавтовозонзо.

— Тонь тосо оно зяро, секс «леднят» эйсэнь! — пеняцясь алдо прянзо ванстыця цёрынесь. Тень каршо Вежай педясь ёртнеме апак вано. «Тоньгак улест ламо...» — арсесь.

Недявсть «тюреме» ды истя рожодомсть, чиньжарамо прятне, прок цянавт, ливтнесть карадо-каршо. Кудыкелькссэнть кепедевсь тусто сув.

Вежай ливчанясто ёртызе меельце прянть ды сонськак эзь кирдеве — сэрьсэнзэ «ливтясь» ёртозенть мельга. Уцор-ацор ансяк марявсь, прась стенанть ёжова. Валдай чийсь ваксозонзо, комась: «Вежай, томбавить?» — седеймарязь, эль марявиксстэ кевкстизе кирдажонзо, саизе кедте.

[194] — Мон истяко, аламнеде, — озась тона ды кедьсэ лепштизе прянзо пиледе верьга. Валдай лездась тензэ стямс, ветизе кудыкеле коникентень. Мадстизе. Прянзо алов эвкстась прялксокс кодат-бути нулат. Цёрынесь салавине кувсесь. Сэредсь пря бокась. Вельть эшкевсь кудос совамо кенкшенть вакссо нурька эземнентень. Аламос аштезь човоргадсь седеезэ, кармасть кепсетеме уксноманзо...

Палай, кудыкелькс «урядонть» неезь, ушодыксэль эйкакштнэнь старямо. Ансяк зярдо вановтозо прась кониксэ венемезь ловтаня чама Вежайс, келезэ кундатотсь.

— Цёрам, мезе мартот? — талакадсь авась, саизе кедезэнзэ. — Мекс чатьмонят?

Томбавозесь мезеяк а мериксэль. Пельсь, мурнемензэ иляст карма. Мейле савсь видькстамс:

— Прынь. Потмарсто прынь.

— Томбавить? Мезеть томбавсь?

— Прям. Вана те таркась.

Палай варштызе: пря бокась весе ульнесь сэнь — томбамаксо. Аванть саизе апаро ёжо.

Мезе теемс?

Васняяк Палай ацась кудос таркине ды кандызе цёранзо тов. Мейле тердизе Чадань Кемашань, кона содась апаро вановтто ды эшкевемадо ламо эрьва кодат кортавтомат.

Шкась такшардсь. Эйкакшось резсь, эзь стякшно тарка лангсто таргошка. Натой ярсамскак макснесть тензэ таркас. Мейле аламонь-аламонь кармась стякшномо ды, сась шка, теевсь икелень Вежайкс. Марявсь тензэ, прок одс чачсь, перьканзо ломантнеяк аламнеде лиякстомсть.

Лелянзо, Кузянь цёрынетнень пельде, конат чийнесть уш школав, апак кармавто, апак редя тонадсь ловномо. Налксить-теить «сэрясо» эли кончкесэ — саи книга. Кунсолат — лодорсо ловны. Та-та-та — маряви кудонть келес вайгелезэ. Весемеде пек мекс-бути тукшнось мелезэнзэ «Чапай».

Ловнось цёрынесь эрязасто, мазыйстэ, эрьва гайтенть ваньксстэ ёвтазь. «Эрьга, «Чапаень», — мериль лиясто авазо пеедькшнезь ладсо ды теке марто покш мельспаронь кирдезь, — ловнат, теке пештть чулгсят». Истят валтнэде седеяк сыремкшнесь Вежаень ловномань мелезэ. Эйкакш... Кие эйстэст а кенярды, зярдо шнасак?! Теяк виде, абунгалемс а мезть: сёксня школав. Аламо кадовсь.

[195] Палай кунсолось седей нильксэнзэ «та-та-танть» ды яла нусмакалесь: цёрынезэ прамодонзо мейле та-кода манявкшныль, лиясто лотксиль кортамодо ды апак учне ушодыль пеедькшнеме: хи-хи-хи... Эсь мельдензэ мирденстэнь эзь ёвтне, кирдсь потсонзо, яла кемсь — юты.

Эрьванть эсензэ ормазо, канстозо, обуцязо. Малав эрьвась бажи улемс лангсост покшокс. Ансяк вана чуросто кинь лисни арсеманзо коряс. Эзь лисе истя Палаеньгак. Пазось чачтызе а чачтницякс. Ули-арась седе покш пайстомочи авантень? Теде содыть ансяк сеть, кинь кундызе истямо ормась. Лангс ваномс — сельметь эйстэнзэ а саевить, весе, кода кортыть, мартонзо: сэнь покш сельмть, човине турват, ёлганя рунго, сэрей меште. Эрьва мейсэ дока, эрьва тевесь кедьсэнзэ лаказь лаки, а вана «авай» валонь мериця Пазось тензэ эзь максо. Авай тензэ мери ансяк Вежай, лиясто те валось маряви вийсэ педявтозь валокс — ойме а эжди. Мезеяк а теят, мирденень од шкасто эзь лисеве. Кадовкшнось араштыця умарь чувтокс. Сон копачавкшны ашосо — умарть а сюлми. Мезе лангскак уш эзь кементнеяк, ды вана Вежай, кадык аволь сонзэ потсо сюлмавсь-кассь, кадык уряжонзо, ялатеке ловсь эйсэнзэ эсь покольнекс ды теньсэ муекшнызе эрямосонть эрявиксчинзэ, эрямонть танстензэ. Шкань ютазь Пазось таго ледстизе Палаень, таго венстизе кенярксонь кептернензэ — васодевсть ды ве мельс прасть Кузя марто. Велявтызе, марявсь, сень, мезенть эзизе максокшно седе икеле. Пире эйкакшт, пире реветь, скалт, лембе кудо, пси палсемат... Эряк, Палай, кецнек! Ды Палай эрясь. Лиясто кенярксось мештезэнзэ а кельгиль. Кода свал эрси эрямосонть, эрьва мезть лиснесть, ансяк апаротне ютнесть чатьмонезь, сэредьксэнь апак тее, куроксто.

 

*  *  *

Весементь, мезесь таштавкшнось башка-башка ды вейсэ эрязь, нерькстызе аштемковонь 22-це чистэ ушодовозь войнась. Модамасторонть лангсо зярдояк истямо арасель. Таргонь ютазь Кузядо кадовсть ансяк ледстнемат: паксясо-кудоютксо вейсэнь мелявкстнэде, телень кувака ветнеде. Куломась саизе мартонзо поланзо вечкевикс коентькак — путомс нинзэ лавтов лангс кедензэ ды вечкезь лепштямс аламнеде эсензэ ёжос.

Ледстнемат, ледстнемат... Сыть — туить, сыть... Онось сезевсь. Таго Палай кадовсь ськамонзо, таго [196] цёрань вийтеме-нежевтеме. Икеле кедензэ лангсо вейкель, ней — арсемскак стака — цёрань керькс. Теке чавкалевкст учить, зярдо аваст мезеяк канды. Лездыцят? Иест-виест коряс лездыть пакшатне. Кирдить эсест мельга уряд. Пенгть совавтнпть, кардазсо ракшатнень мельга якить, урядыть... Ялатеке те — аволь тетяст. Сонзэ тевензэ а изнясыть. Потявтсак скалонть — пурнавить перькат. Эрьвань кедьсэ кечине.

Варчик тесэ улемс эсеть лангсо азорокс, снартыть тертямс идемевсень вийтнень. Пек а максыксэлизе Кузянзо Палай... Мейле мезе? Кияк кевкстизе? Саизь ды весе. Ней муик азё, велявтык. Келя, сон, Кузя, чачома масторонь ванстыця... Зярдо сакшныль авантень цяк, марявиль тензэ, кадовсь ансяк вейке: лисемс кудыкелев ды каямс кирьгас килькш. Истят раужо арсематнень Палай керилинзе, мерят, васоньпеельсэ, ды мериль эстензэ: эряви эрямс Виень путозь эскельди «цяконть» трокс ды поладсы сильдей юткова тей-тов менчевиця кинзэ. Авань, цёрань, кудоютконь, кардазонь, паксянь певтеме тевтне шкань апак учо лондадсть сонзэ лангс. Цёратнень нардазь нардызь «за Родину, за Сталина» тюреме. Секскак колхозонь тевтненьгак савсь ускомс аватненень.

...Ушосонть маряви тундонть летьке лексемазо. Кадык ков иля варшта ловшушмот, кадык исяк чинь-чоп даволось увнось ды пансесь ловонть, коштсонть ялатеке уш марявить тундонь вайгельть. Чипаеськак кувалгавтызе менелень сэнь паксятнева якамо-пакамо шканзо.

Тундо... Зяро кеняркст, зяро седеень, ёжонь эждиця морот тукшны сон мартонзо! Нейгак мель вити, нейгак эйсэнзэ учить, ансяк аволь истя, кода икеле. Ней, войнань шкасто, тундонть лия чамазо... Вачочи, таргоземат, куломат, кодат онстоткак а неят. Куломат — тосо, косо оймсемань апак сода зэрни войнась, куломат — тесэ... Кода кувалгали сон, тундось, кода певтемекс таргсеви мазый панжиковось. Ламо сави учомс, зярс розень ды товсюронь прятне пешкедить вийсэ ды сюконить сталмодонть. Теде икеле сави варчамс пешксэнь пупоркатнень-почкатнень танстест, мельгаст пиципалакстнэнь, пекше лопатнень... Карми кенереме розесь, ды ансяк сестэ, кизэнь куншкава, аватне шождынестэ таргасызь оймест: «Иесь ютавтовсь, эйкакшонок ванстовсть».

...Кись течи виде, валаня. Тундонь васень ковонть лангс апак вано, якшамо. Кинть аловпандт туемстэ «войнасо» андозь лишметне марясть пряст лишмекс. Пандочамава куземстэ — куш эстест лездак. Палай ды [197] Делюнонь Ашназа, эсензэ шкань ялгазо, кинень ветешка чиде икеле сёрмань кандтницясь пачтясь мпрдензэ маштомадо конёвне, пачкодсть Отяжвелень станцияв чопоньпелев.

Тесэ мезеяк пек эзь полавтово. Теке эзть ютаяк кавксо иеть уряжонзо пакшанть, Вежаень, идемадонзо мейле. Вана чугункань кись, конань трокс ютавтызь нурдост. Вана ве этажсо якстере-тюжасто артозь чувтонь вокзалоськак. Сондензэ аволь васоло аштесь вагонось, конань вальмава се сёксень чопода вестэнть уряжозо венстекшнизе Палайнень нуласо тапардазь эйдиненть, кона тензэ эзь кундавкшно, пракшнось кельмезь моданть лангс. Прок келей сёлмо мацейть, сыть ютазь иетнеде ледстнематне ды ёмить одс. Ансяк седеесь нурьгаты сындест мейле, ды пургонды мель: «Велявтовлиньгак сеть иетнес...»

Эрявсь, васняяк, муемс удома кудо, совамс лембе таркинес. Тундось ушодовсь ансяк стенас понгавтозь конёвнесэнть, молевксэзэ жо зярс телень. Эрьва иестэ колхозось аволь покш питнеде сивелесь лотксема тарка, ков аватне капшастькак.

Ортатнень панжинзе керш кедтеме, апак нара, мельде-валдо оршазь цёра. Палыця ведень чинесь качадсь эйстэнзэ кардазонь келес. «Эх, уш нетне...» — лиссь марямга Палаень кургсто. Аватне якшамодонть какаря кедьсэ юксизь-перьгавтызь лишметнень. Совасть кудос. Лембеденть васня кармасть сурневтеме, мейле саинзе удомань савтьщя вечкевикс ёжомарямо. Сыцятне эжнесть-тейсть, таргизь кескавнестэст кинь мезезэ ульнесь пей алов путомс ды озасть стувор экшс. Сыре, эчке, прок кандо, азоравась, апак лотксе кортазь, лакавтсь ведь. Толонь пси «чаесь» ды салтозь кпш кочомнесь седеяк вадрялгавтызь ёжост. Мерят, арасельтькак кувака кись, якшамонь скирямотне, ортань панжицянть казямо, коня алга вановтозо. Ков сон ёмась?

Мадстизь васолдо сыцятнень полок лангс. Вере, потолоконть маласо, седе лембе. Велькст-ацамот а эрявить. Палаень вишка Ашназа ялгинезэ матедевсь сеске. Сонензэ вана мекс-бути эзь удово, кодамо-бути апаро ёжо, прок сукс, порсь седейсэнзэ. Алганзо ацавкстомо лазтнэ марявсть пек калгодокс, теке мерят теде икеле свал удсесь толгань кенде лангсо.

Валске чоподава састыне — а сыргозтемс удыцятнень — валгсь полок лангсто, каизе ланганзо шубанзо ды лиссь ушов. Панжизе кудыкелькс кенкшенть. Пильгензэ сорнозевсть.

[198] Лишмезэ, конань панст ведьмеде сюлмакшнызе нурдонтень, арасель... Ашназансесъ чевте турвасонзо кочксесь кадовозь олгонь сэльгпнетнень. «Ужо, ужо, — снартызе чарькодемс Палай, — иля лапакале, паряк, оно се седе чопода таркантень ютась». Сон ваннынзе, мучкинзе весе ужинетнень, ушкс-трокс эскелпзе кардазонть. Лиснесь вальмаловгак. Лишмезэ арасель. Прок моданть пачка тусь. Аванть кедензэ сорнозевсть, тей чии, тов. Кузсь кузтемпес, ноцковтызе кундамодо кенкшенть ды совась чопода, чокшнень коряс экше кудонтень.

— Ашназа! Стякая, стяк курок! — сельведень пачк пижакадсь верьга вайгельть. — Лишменек салызь.

— А? Мезе? — каятотсь верде удомань пачк вайгель. — Кинь? Тонь?

— Монь, Монь! — рангстась омбоцеде ды бувсо лайшезевсь Палай. — Ней мезе, мезе тееме карман? Ков лрям путса? Уху-у-у...

— Шкадо икеле пря иля чаво, — мерсь полок лангсто валгомсто Ашназа, бажась оймавтомс ялганзо.

Икельце кудосто лиссь эчке, покш, теке пандо, азоравась.

— Вай, те кода истя? Зярдояк истят тевть эзть лисне, — вайкснезевсь сон.

Аватне уцор-ацор оршнесть ды лиссть ушов.

Вешнесть ёмазенть зярыя чить. Вешнесь Палай ськамонзо, вешнесть шабранзо-малавиксэнзэ марто. Лишмесь аволь тикше скирдасо салмукс. Ялатеке, кода те «скирданть» эзизь сорновтые, мезеяк тень эйстэ эзь лисе. Вешнесь милицияськак. Салыця эзть муе. Сень кис сеске муизь чумочинь теицянть — Палаень.

Пайстомо авась эзь сода: самай те кабинетсэнть, те эземсэнть озадоль тетязояк, кевкстнеськак эйсэнзэ раужо черь, теине, теке верьгизэнь, сельме секе цёрась, конань икеле ней аштесь сон. Эзь сода: кармить макснеме тензэ некеть кевкстематнень.

— Как фамилия?

— Лопаткина. — Палай мериксэль велень лемсэ — Итяень Палай, эзь мере, чарькодизе: те кудосонть истят лемть а содыть.

— Лопаткина?! Гм... у нас, кажется, лет пять-шесть назад проходил по пятьдесят восьмой статье один Лопаткин. Да, да, вспомнил, бородатый такой, плечи ого-го-го!.. Помню, помню. По пятьдесят восьмой проходил. Ты не дочь ли? — тевень ветпцясь варштась аванть лангс. — Сразу же видать — из этого гнезда.

Палай чатьмонсь. Сельмстэнзэ мельга-мельцек, теке покш эрьгть, певерсть сельведть.

[199] — Как звать?

— Палай.

— Что? Это что за тарабарщина?

Вакссост озадо аштицясь, полгаря сельме цёраломанесь — бешом, эрзя, — пелезь ладсо ютавтызе ёвтазенть рузокс — Пелагея.

— Вот так и надо было.

— Год рождения?

Палай чатьмонсь.

Пшкадсь тензэ секе цёрась:

— Кодамо иень чачомат?

Палай ёвтызе.

Чумонь теицянь мучкамось мольсь а кувать.

Эзть вано вешницятне мезе лангскак, содасть: чумо — эзизе вансто колхозонь лишменть. Моли война. Те, ловт, «вредительства». Тень кис... Снартнесь лездамс, идемс Палаень тюрьмадо колхозонь прявтоськак. Лепштизе пулонзо, зярдо ледстизь тензэ: «Ты что, соучастник?» Куш мельсэст кирдевельть пекстницятне: кадовить ававтомо ниле вишка эйкакшт. Арась, коень ванстыцятне содасть вейке: чумо. Макссть кавто иеть. Шкань апак таргсе, чадыведь шкава ильтизь пелеве ёнксонь васоло масторов. Вирень керямо. Эйкакшонзо лангс меельцеде варштамояк эзизь нолдтне.

...Дёгань Кузянь войнав саемадо мейле ютасть зярыя ковт. Пельдензэ сёрмань таркас сась конёв: «Маштовсь Сталинэнь ды чачома масторонзо кис». Теде Палан эзь сода. Кияк тензэ эзь ёвта. Малавиксэнзэ велесэнть, кить пурнавлизь, саевлизь эстест пакшатнень, арасельть. Вежаень ды Кузянь эйкакштнэнь, конатне теевкшнесть тензэ лелякс, ильтизь Пичелев, «детдомов». Кадовсть кавто чаво кудот.

 

*  *  *

Ютасть ламо-ламо иеть.

Пиченькужо.

Велесь эри эсензэ эрямосо. Кулыть, чачить, урьвакстнить, явить ломантне... Якить покшчистэ инжекс, топавтыть, кода эрьва велесэ, кудонь-пирень тевтнень. А стувтнить Пиченькужонь эрицятне «кренчень ведентькак». Пелить, вай, кода педить ёмавтомс мартонзо ояксчинть! Симить одтнэ, а кадовить эйстэст сыретнеяк. Симить цёратне, аватне, симить ушосо, кудосо, школасо... Лиясто маряви — ульця юткова яксиця саразтнэяк пупорькшнить.

[200] Лиссь се, мезентень лисемаль. Оржаень Окся, Вежай атянь полань кондямось, эседензэяк пек вечксь копордамонть. Атясь майсесь — мель путсь кардамс те апародонть: кармавтсь нинзэ тевтнень тейнеме, урядонь кирдеме, тувталт мукшнось а молемс тов, косо карми вельтязь столь.

Улевельгак козонь кукшкадомс ды ломанькс печтямс меельце иетнень, сыречинть, аволь карма чарамо ды эрьва кода савтомо те симагай Оксянтень. Сельгевель ды соваволь лия таркас. Ков туят, бути арась унжинеть? Берянь-вадря кедьсэнзэ, яла эрямо пизэ. Кизна пиземетненень а начтоват, тельня якшамотненень а сасават.

Мезть ансяк тевень вечкиця атясь эзь тейне эриця ялганзо нулгодькс тевденть кардамга — стяко. Симсь, эзь лоткавтово. Симсь коволонь ковол. Лембе шкава ламоксть пракшнось вирь чирес, кудост икелев. Мукшнылизь удга тикше потстояк. «Мезе тензэ а саты, мезе эряви? Кода очобамс, таргамс те гуень варястонть?» — майсевтсь прянзо атясь. Окойники Окся муизе сень, мезе вешнесь.

Весть куломас симевсь, кирьгапарьганзо тусь верь. Ускизе Вежай больницяв. Доктортнэ чарасть перьканзо, бажасть нельгемс куломанть кедьстэ, эзь нельгеве. Колмо чинь ютазь атязо саизе мекев — калмамс.

Кадовсь Итяень Вежай ськамонзо. Ков ней?

Ютасть вейксэ чить. Кундызе, кода маштсь, Оксянь лемензэ ды тусь велестэнть.

Мекс эзь кадово эрямо теске?

Кияк эзь сода.

Ков тусь сыре прясонзо?

Тедеяк содась ансяк сонсь.

Савиндеряй ютамс Пиченькужонь Алопева, вирев ветиця, кепедезь ды асфальтсо валозь кияванть, вановтот эртеви кадозь, меельце иеть эриця кудос. Вальма видьс «озась» модас. Вальманзо таркас — раужо покш варят. Латозо ве ёндо лондадсь. Перьканзо сэрей пирявксось прась-чиремсь. Эрьва кува касы тикше, усксевить кирьпець пелькст. Ве эсксэ, эль кирдеви, ванстовсь, пижелды лазось: «Здесь живёт заелуженная колхозница...»

Варштат ды нусмакадат.

Тесэ, те раужо, допрок каладозь, яжазь кудосонть эрясть-кецнесть, сюморгалесть, кежиявтнесть, пеедькшнесть, кутморясть, палсесть, тюрсть... Оржаень Окся ды Итяень Вежай.