Килендәште көндәш була, тиҙәр,
Бына үҙем дә мин килендәш,
Тик иремдең еңгәй-килененә
Нишләп булайым ти мин көндәш?
Ирем һис кем менән уртаҡ түгел,
Үҙемдеке генә донъям да,
Еңеү-еңелеүҙәр - тик минеке,
Ниҙәр эшләп, нимә ҡылһам да.
Ағай-эне менән бүлешерлек
Уртаҡ атай малым юҡ минең,
Бар донъябыҙ – бергә эшләп тапҡан
Хәләл мал ул, хәләл һәр тинем.
Үҙен хөрмәт иткән һәр кешенең
Булыр тәүфиҡ, тәртип, әҙәбе,
Әгәр көндәш икән килендәшем –
Минән булмаҫ бының сәбәбе!
