Килендәште көндәш була, тиҙәр…

From Wikisource
Jump to navigation Jump to search

Килендәште көндәш була, тиҙәр… (шиғыр)
автор Фирүзә Абдуллина
Ижад итеү ваҡыты: 21.12.2015.. Нәшер ителгән: 30.01.2016..


Килендәште көндәш була, тиҙәр…


Килендәште көндәш була, тиҙәр,
Бына үҙем дә мин килендәш,
Тик иремдең еңгәй-килененә
Нишләп булайым ти мин көндәш?

Ирем һис кем менән уртаҡ түгел,
Үҙемдеке генә донъям да,
Еңеү-еңелеүҙәр - тик минеке,
Ниҙәр эшләп, нимә ҡылһам да.

Ағай-эне менән бүлешерлек
Уртаҡ атай малым юҡ минең,
Бар донъябыҙ – бергә эшләп тапҡан
Хәләл мал ул, хәләл һәр тинем.

Үҙен хөрмәт иткән һәр кешенең
Булыр тәүфиҡ, тәртип, әҙәбе,
Әгәр көндәш икән килендәшем –
Минән булмаҫ бының сәбәбе!


21.12.2015.