Канѡ̑ны, си́рѣчь кни́га пра́вилъ/Пра̑вила а҆гкѵ́рскагѡ собо́ра

From Wikisource
Jump to navigation Jump to search
Пра̑вила свѧты́хъ а҆по́столѡвъ, свѧты́хъ собо́рѡвъ вселе́нскихъ и҆ помѣ́стныхъ, и҆ свѧты́хъ ѻ҆те́цъ
Пра̑вила свѧта́гѡ помѣ́стнагѡ собо́ра а҆гкѵ́рскагѡ
This page contains Church Slavonic text. Without proper font support, you may see question marks, boxes, or other symbols instead of letters and diacritics. Click here to download required fonts.


Кни́га пра́вилъ свѧты́хъ а҆по́столѡвъ,
свѧты́хъ собо́рѡвъ
вселе́нскихъ и҆ помѣ́стныхъ,
и҆ свѧты́хъ ѻ҆те́цъ

Пра̑вила свѧта́гѡ помѣ́стнагѡ собо́ра а҆гкѵ́рскагѡ.
[edit]

Пра́вило а҃.
[edit]

Ѡ҆ пресвѵ́терахъ, кото́рые і҆дѡложе́ртвовали, пото́мъ возѡбнови́ли по́двигъ за вѣ́рꙋ, и҆ прито́мъ не по ᲂу҆хищре́нїю нѣ́коемꙋ, но по и҆́стинѣ, не дѣ́лаѧ предвари́тельнагѡ приготовле́нїѧ и҆ соглаше́нїѧ къ томꙋ̀, да пока́жꙋтъ себѧ̀ а҆́ки бы подверга́емыхъ мꙋче́нїѧмъ, тогда̀ ка́къ ᲂу҆потреблѧ́емы бы́ли ѻ҆́ныѧ то́кмѡ длѧ ви́да и҆ притво́рнѡ, разсꙋждено̀: да не лиша́ютсѧ че́сти сѣда́лища, но да не и҆мѣ́ютъ вла́сти соверша́ти приноше́нїе, проповѣ́дывати и҆ воѻбщѐ свѧще́нническое что́ либо дѣ́йствовати.

Пра́вило в҃.
[edit]

Подо́бнѡ и҆ дїа́конамъ і҆дѡложе́ртвовавшымъ, но пото́мъ возѡбнови́вшымъ по́двигъ вѣ́ры, присво́еннꙋю и҆̀мъ че́сть и҆мѣ́ти, но преста́ти и҆̀мъ ѿ всѧ́кагѡ свѧще́ннагѡ слꙋже́нїѧ, ѿ возноше́нїѧ хлѣ́ба и҆ ча́ши, и҆ ѿ провозглаше́нїѧ моле́нїй. А҆́ще же кото́рые и҆з̾ є҆пі́скопѡвъ ᲂу҆смо́трѧтъ въ таковы́хъ нѣ́кїй трꙋ́дъ, и҆лѝ смире́нїе кро́тости, и҆ восхотѧ́тъ нѣ́что бо́лѣе да́ти, и҆лѝ ѿѧ́ти: да бꙋ́детъ сїѐ въ и҆́хъ вла́сти.

Пра́вило г҃.
[edit]

Оу҆бѣга́ющымъ ѿ гони́телей, и҆ ᲂу҆ловлє́ннымъ, и҆лѝ прє́даннымъ ѿ свои́хъ дома́шнихъ, и҆лѝ и҆ны́мъ ѻ҆́бразомъ лишє́ннымъ и҆мѣ́нїѧ, и҆лѝ претерпѣ́вшымъ мꙋчє́нїѧ, и҆лѝ вве́ржєннымъ въ темни́цꙋ, прито́мъ вопїѧ́вшымъ, ꙗ҆́кѡ сꙋ́ть хрїстїа́не, и҆ и҆стѧ́заннымъ, и҆ междꙋ̀ тѣ́мъ, и҆лѝ нѣ́что і҆дѡложе́ртвенное въ рꙋ́ки наси́лїемъ ᲂу҆тѣсни́телей влага́емое, и҆лѝ нѣ́кꙋю пи́щꙋ по принꙋжде́нїю прїѧ́вшымъ, но непреры́внѡ и҆сповѣ́дывавшымъ, ꙗ҆́кѡ сꙋ́ть хрїстїа́не, и҆ ско́рбь свою̀ ѡ҆ слꙋчи́вшемсѧ съ ни́ми всегда̀ и҆з̾ѧвлѧ́ющымъ всѧ́кою скро́мностїю, ѡ҆дѣѧ́нїемъ, и҆ смире́нїемъ жи́зни, таковы̑мъ, ꙗ҆́кѡ внѣ̀ грѣха̀ сꙋ́щымъ, да не возбрани́тсѧ ѡ҆бще́нїе. А҆́ще же кѣ́мъ либо и҆ возбранено̀ бы́ло, ра́ди вѧ́щшей предѻсторо́жности, и҆лѝ по невѣ́дѣнїю нѣ́которыхъ: неме́дленнѡ должны̀ при́нѧты бы́ти во ѡ҆бще́нїе. Сїѐ ѿно́ситсѧ ра́внѡ и҆ къ сꙋ́щымъ ѿ кли́ра, и҆ къ прѡ́чимъ, то́ є҆сть, къ мїрѧ́намъ. Бы́ло прито́мъ и҆зслѣ́дываемо и҆ то̀, мо́гꙋтъ ли мїрѧ́не, подве́ргшїесѧ томꙋ́ же са́момꙋ наси́лїю, бы́ти производи́мы въ чи́нъ свѧще́нный, и҆ разсꙋждено̀: производи́ти и҆ таковы́хъ ꙗ҆́кѡ ничто́же согрѣши́вшихъ, а҆́ще и҆ пре́жнїй ѻ҆́бразъ и҆́хъ житїѧ̀ ѡ҆брѧ́щетсѧ пра́вымъ.

Пра́вило д҃.
[edit]

Ѡ҆ і҆дѡложе́ртвовавшихъ по принꙋжде́нїю, и҆ све́рхъ тогѡ̀ пред̾ і҆́дѡлами пи́ршествовавшихъ, кото́рые бы́въ приведены̀ и҆ съ весе́лымъ ви́домъ вошлѝ, и҆ ѻ҆де́ждꙋ ᲂу҆потреби́ли драгоцѣ́ннѣе ѻ҆быкнове́нной, и҆ ᲂу҆ча́ствовали въ пригото́вленномъ пи́ршествѣ безпе́чнѡ, разсꙋждено̀: что́бы таковы́е находи́лись го́дъ въ числѣ̀ слꙋ́шающихъ писа̑нїѧ, трѝ го́да въ числѣ̀ припа́дающихъ, два̀ го́да и҆мѣ́ли ѡ҆бще́нїе въ моли́твѣ то́кмѡ, и҆ пото́мъ встꙋпа́ли въ соверше́нное ѡ҆бще́нїе.

Пра́вило є҃.
[edit]

А҆ кото́рые вошлѝ въ ѡ҆дѣѧ́нїи печа́льномъ, и҆ возле́гши ѣ҆́ли, пла́чѧ междꙋ̀ тѣ́мъ во всѐ вре́мѧ возлежа́нїѧ, тѣ̀, а҆́ще и҆спо́лнили трехлѣ́тнее вре́мѧ припа́данїѧ, да прїи́мꙋтсѧ въ ѡ҆бще́нїе, кромѣ̀ причаще́нїѧ свѧты́хъ та̑инъ. А҆́ще же не ѣ҆́ли, то прове́дши два̀ лѣ́та междꙋ̀ припа́дающими, въ тре́тїе лѣ́то да бꙋ́дꙋтъ въ ѡ҆бще́нїи, кромѣ̀ причаще́нїѧ, та́къ что́бы соверше́нное ѡ҆бще́нїе полꙋчи́ли по тре́хъ лѣ́тахъ. Но є҆пі́скопы да и҆мѣ́ютъ вла́сть, и҆спыта́въ ѻ҆́бразъ ѡ҆браще́нїѧ, человѣколю́бствовати, и҆лѝ бо́льшее вре́мѧ покаѧ́нїѧ приложи́ти. Па́че всегѡ̀ да и҆спытꙋ́етсѧ житїѐ предше́ствовавшее и҆скꙋше́нїю, и҆ послѣ́довавшее за ѻ҆́нымъ, и҆ та́кѡ да размѣрѧ́етсѧ человѣколю́бїе.

Пра́вило ѕ҃.
[edit]

Ѡ҆ тѣ́хъ, кото́рые то́кмѡ ѿ ᲂу҆гроже́нїѧ мꙋ́ками, и҆лѝ ѿѧ́тїемъ и҆мѣ́нїй, и҆лѝ и҆згна́нїемъ, поколеба́лисѧ и҆ і҆дѡложе́ртвовали, и҆ до настоѧ́щагѡ вре́мени не пока́ѧлисѧ: а҆ ны́нѣ, ко вре́мени сегѡ̀ собо́ра, пришлѝ и҆ воспрїѧ́ли по́мыслъ ѡ҆браще́нїѧ, разсꙋждено̀: да прїи́мꙋтсѧ въ разрѧ́дъ слꙋ́шающихъ писа̑нїѧ до вели́кагѡ днѧ̀ па́схи: по вели́комъ же днѣ̀, да бꙋ́дꙋтъ трѝ лѣ́та въ разрѧ́дѣ припа́дающихъ, пото́мъ є҆щѐ два̀ лѣ́та да бꙋ́дꙋтъ въ ѡ҆бще́нїи, кромѣ̀ причаще́нїѧ, и҆ та́кѡ да вни́дꙋтъ въ соверше́нное ѡ҆бще́нїе, ꙗ҆́кѡ да и҆спо́лнитсѧ цѣ́лое шестилѣ́тїе покаѧ́нїѧ. А҆́ще же кото́рые пре́жде сегѡ̀ собо́ра при́нѧты на покаѧ́нїе: съ тогѡ̀ вре́мени счислѧ́ти и҆̀мъ нача́ло шестилѣ́тїѧ. Впро́чемъ же, а҆́ще приключи́тсѧ и҆̀мъ ѻ҆па́сность и҆ бли́зость сме́рти ѿ болѣ́зни, и҆лѝ ѿ и҆на́гѡ нѣ́коегѡ слꙋ́чаѧ: таковы́хъ прїима́ти съ ᲂу҆сло́вїемъ.Разꙋмѣ́етсѧ то̀ ᲂу҆сло́вїе, что́бы, є҆́стьли ѡ҆ста́нꙋтсѧ въ живы́хъ, и҆спо́лнили вре́мѧ покаѧ́нїѧ, по семꙋ̀ пра́вилꙋ.

Пра́вило з҃.
[edit]

Ѡ҆ тѣ́хъ, кото́рые пи́ршествовали въ ꙗ҆зы́ческїй пра́здникъ, на мѣ́стѣ присво́енномъ ꙗ҆зы́чниками, но принеслѝ и҆ ѣ҆́ли своѝ со́бствєнныѧ снѣ̑ди, разсꙋждено̀: прїима́ти и҆̀хъ въ ѡ҆бще́нїе, по двꙋлѣ́тнемъ припа́данїи: но ка́ждаго ли до́лжно прїима́ти съ причаще́нїемъ свѧты́хъ та́инъ, є҆пі́скопское дѣ́ло є҆́сть разсꙋди́ти ѡ҆ се́мъ, та́кожде и҆ про́чꙋю жи́знь ка́ждагѡ и҆спыта́ти.

Пра́вило и҃.
[edit]

Два́жды и҆ три́жды і҆дѡложе́ртвовавшїе по принꙋжде́нїю, четы́ре лѣ́та да бꙋ́дꙋтъ въ числѣ̀ припа́дающихъ, два̀ лѣ́та да бꙋ́дꙋтъ въ ѡ҆бще́нїи моли́твъ, кромѣ̀ причаще́нїѧ, и҆ въ седмо́е лѣ́то да прїи́мꙋтсѧ въ соверше́нное ѡ҆бще́нїе.

Пра́вило ѳ҃.
[edit]

А҆ кото́рые не то́кмѡ содѣ́лались ѿстꙋ́пниками, но и҆ возстава́ли на бра́тїй, и҆ принꙋжда́ли и҆̀хъ къ ѿстꙋпле́нїю, и҆лѝ бы́ли вино́вниками такова́гѡ принꙋжде́нїѧ: тѣ̀ на трѝ лѣ́та да прїи́мꙋтъ мѣ́сто междꙋ̀ слꙋ́шающими писа̑нїѧ, пото́мъ на ше́сть лѣ́тъ междꙋ̀ припа́дающими, є҆щѐ є҆ди́но лѣ́то да бꙋ́дꙋтъ въ ѡ҆бще́нїи, кромѣ̀ причаще́нїѧ, та́къ что̀ и҆спо́лнивъ десѧтилѣ́тїе полꙋ́чатъ соверше́нное ѡ҆бще́нїе. Впро́чемъ и҆ въ сїѐ вре́мѧ да бꙋ́детъ наблюда́ема и҆ всѧ̀ про́чаѧ и҆́хъ жи́знь.

Пра́вило і҃.
[edit]

Поставлѧ́емые во дїа́конѡвъ, а҆́ще при са́момъ поставле́нїи засвидѣ́тельствовали, и҆ ѡ҆б̾ѧви́ли, что̀ ѻ҆нѝ и҆мѣ́ютъ нꙋ́ждꙋ ѡ҆жени́тисѧ, и҆ не мо́гꙋтъ без̾ тогѡ̀ пребы́ти: таковы́е по́слѣ сегѡ̀ ѡ҆жени́вшись, да пребыва́ютъ въ свое́мъ слꙋже́нїи, поели́кꙋ сїѐ позво́лено бы́ло и҆̀мъ ѿ є҆пі́скопа: а҆́ще же кото́рые, ᲂу҆молча́въ ѡ҆ се́мъ и҆ принѧ́въ рꙋкоположе́нїе съ тѣ́мъ, что́бы пребы́ти без̾ жени́твы, по́слѣ встꙋпи́ли въ бра́къ: таковы̑мъ преста́ти ѿ дїа́конскагѡ слꙋже́нїѧ.Сїѐ распорѧже́нїе помѣ́стнагѡ собо́ра, є҆́сть мѣ́стное и҆з̾ѧ́тїе и҆з̾ пра́вила а҆по́стольскагѡ к҃ѕ. Шесты́й вселе́нскїй собо́ръ, ѕ҃ пра́виломъ свои́мъ, прекрати́лъ сїѐ и҆з̾ѧ́тїе, и҆ подтверди́лъ держа́тьсѧ а҆по́стольскагѡ пра́вила въ то́чности.

Пра́вило а҃і.
[edit]

Дѣ́въ ѡ҆брꙋче́нныхъ, и҆ пото́мъ и҆ны́ми похи́щенныхъ, разсꙋждено̀: возвраща́ти пред̾ѡбрꙋчи́вшымъ, а҆́ще бы и҆ наси́лїе претерпѣ́ли ѿ похи́тившихъ.

Пра́вило в҃і.
[edit]

Пре́жде креще́нїѧ і҆дѡложе́ртвовавшихъ, и҆ пото́мъ крести́вшихсѧ, разсꙋждено̀ производи́ти въ чи́нъ свѧще́нный, ꙗ҆́кѡ ѡ҆мы́вшихъ грѣ́хъ.

Пра́вило г҃і.
[edit]

Не подоба́етъ хорепі́скопамъ поставлѧ́ти пресвѵ́терѡвъ и҆лѝ дїа́конѡвъ: но нижѐ є҆пі́скопамъ и҆ны́хъ градѡ́въ во и҆ны́е, кромѣ̀ позволе́нїѧ є҆пі́скопа, чрез̾ гра́матꙋ по ка́ждой є҆па́рхїи.

Пра́вило д҃і.
[edit]

Состоѧ́щымъ въ кли́рѣ, пресвѵ́терамъ и҆лѝ дїа́конамъ, кото́рые возде́рживаютсѧ ѿ мѧ́съ, ѡ҆предѣлено̀, каса́тисѧ ѻ҆́ныхъ, и҆ пото́мъ, а҆́ще восхотѧ́тъ, воздержа́тисѧ ѿ ѻ҆́ныхъ. А҆́ще же не восхотѧ́тъ сегѡ̀, та́къ что̀ не бꙋ́дꙋтъ ꙗ҆́сти и҆ ѻ҆во́щей, полага́емыхъ съ мѧса́ми, и҆ не покорѧ́тсѧ семꙋ̀ пра́вилꙋ: да бꙋ́дꙋтъ низложены̀ ѿ своегѡ̀ чи́на.

Пра́вило є҃і.
[edit]

И҆з̾ принадлежа́щагѡ це́ркви, а҆́ще что̀ про́дали пресвѵ́теры въ небы́тность ᲂу҆ ни́хъ є҆пі́скопа, да востре́бꙋетъ ѻ҆́ное це́рковь. Е҆пі́скопа же разсꙋжде́нїю предоставлѧ́етсѧ, а҆́ще досто́итъ возврати́ти цѣ́нꙋ, и҆лѝ нѝ: поне́же ча́стѡ быва́етъ, что̀ дохо́ды ѿ про́даннагѡ съ и҆збы́ткомъ ᲂу҆жѐ возврати́ли кꙋпи́вшымъ цѣ́нꙋ ѻ҆́нагѡ.

Пра́вило ѕ҃і.
[edit]

Ѡ҆ скотоло́жствовавшихъ, и҆лѝ скотоло́жствꙋющихъ. Кото́рые впа́ли въ се́й грѣ́хъ пре́жде двадесѧтилѣ́тнѧгѡ во́зраста, тѣ̀, бы́въ пѧтьна́десѧть лѣ́тъ междꙋ̀ припа́дающими, да полꙋ́чатъ ѡ҆бще́нїе въ моли́твахъ пото́мъ, пребы́въ пѧ́ть лѣ́тъ въ се́мъ ѡ҆бще́нїи, да пристꙋ́пѧтъ къ причаще́нїю свѧты́хъ та̑инъ. Да и҆спытꙋ́етсѧ же и҆ житїѐ и҆́хъ въ то̀ вре́мѧ, когда̀ нахо́дѧтсѧ въ разрѧ́дѣ припа́дающихъ, и҆, смотрѧ̀ по томꙋ̀, да сподоблѧ́ютсѧ человѣколю́бїѧ. Пребы́вшїе же до́лгѡ въ се́мъ грѣхѣ̀, до́лгѡ да ᲂу҆де́ржатсѧ въ разрѧ́дѣ припа́дающихъ. А҆ кото́рые преше́дши ѡ҆зна́ченный во́зрастъ, и҆ же́нъ и҆мѣ́ѧ, впа́ли въ таковы́й грѣ́хъ: тѣ̀ два́десѧть пѧ́ть лѣ́тъ пребы́въ междꙋ̀ припа́дающими, да полꙋча́ютъ ѡ҆бще́нїе въ моли́твахъ. Пото́мъ и҆спо́лнивъ пѧ́ть лѣ́тъ во ѡ҆бще́нїи моли́твъ, да сподо́бѧтсѧ причаще́нїѧ. А҆́ще же нѣ́которые, и҆ же́нъ и҆мѣ́ѧ, и҆ преше́дши пѧтидесѧтилѣ́тнїй во́зрастъ, впа́ли въ се́й грѣ́хъ: таковы́е при и҆схо́дѣ ѿ сеѧ̀ жи́зни да сподо́бѧтсѧ причаще́нїѧ.

Пра́вило з҃і.
[edit]

Скотоло́жникамъ и҆ прокажє́ннымъ, и҆лѝ ѡ҆прока́зившымъ, свѧты́й собо́ръ повелѣ́лъ моли́тисѧ съ ѡ҆бꙋрева́емыми.Наименова́нїе ѡ҆бꙋрева́емыхъ ѡ҆знача́етъ и҆лѝ недопꙋска́емыхъ въ це́рковь, и҆ молѧ́щихсѧ внѣ̀, є҆́стьли слꙋчи́тсѧ, и҆ на вѣ́трѣ и҆ под̾ дожде́мъ, и҆лѝ бѣснꙋ́емыхъ.

Пра́вило и҃і.
[edit]

А҆́ще кото́рые, бы́въ поста́влены во є҆пі́скопѡвъ, но не бы́въ при́нѧты є҆па́рхїею, въ кото́рꙋю наречены̀, восхотѧ́тъ на и҆ны́ѧ є҆па́рхїи настꙋпа́ти, и҆ поста́вленныхъ та́мѡ ᲂу҆тѣснѧ́ти, и҆ воздвига́ти проти́вꙋ и҆́хъ возмꙋщє́нїѧ: таковы́хъ ѿлꙋча́ти ѿ ѡ҆бще́нїѧ церко́внагѡ. А҆́ще же восхотѧ́тъ съ пресвѵ́терами сидѣ́ти, гдѣ̀ пре́жде бы́ли пресвѵ́терами: не ѿима́ти ѿ ни́хъ сеѧ̀ че́сти. А҆́ще же бꙋ́дꙋтъ воздвига́ти смѧтє́нїѧ проти́вꙋ поста́вленныхъ та́мѡ є҆пі́скопѡвъ: лиша́ти и҆̀хъ и҆ пресвѵ́терскїѧ че́сти, и҆ бы́ти и҆̀мъ ѿрѣшє́ннымъ.

Пра́вило ѳ҃і.
[edit]

Да́вшїе ѻ҆бѣ́тъ дѣ́вства и҆ нарꙋ́шившїе ѻ҆бѣ́тъ, да и҆спо́лнѧтъ є҆пїтїмїю̀ двоебра́чныхъ. Дѣ́вамъ же, соединѧ́ющымсѧ жи́тельствомъ съ нѣ́кїими, а҆́ки съ бра́тїѧми, мы̀ сїѐ возбрани́ли.

Пра́вило к҃.
[edit]

А҆́ще чїѧ̀ жена̀ прелюбодѣ́йствовала, и҆ кто́ либо прелюбодѣ́йствовалъ: таковы̑мъ надлежи́тъ въ се́дмь лѣ́тъ прїитѝ въ соверше́нное ѡ҆бще́нїе, по сте́пенѧмъ къ томꙋ̀ ведꙋ́щымъ.

Пра́вило к҃а.
[edit]

Же́намъ, ѿ прелюбодѣѧ́нїѧ зача́вшымъ, и҆ и҆стреби́вшымъ пло́дъ, и҆ занима́ющымсѧ составле́нїемъ дѣтогꙋби́тельныхъ ѻ҆тра́въ, пре́жнимъ ѡ҆предѣле́нїемъ, возбранено̀ бы́ло причаще́нїе свѧты́хъ та̑инъ до кончи́ны: и҆ по семꙋ̀ и҆ постꙋпа́ютъ. И҆зы́скиваѧ же нѣ́что бо́лѣе снисходи́тельное, мы̀ ѡ҆предѣли́ли таковы̑мъ проходи́ти десѧтилѣ́тнее вре́мѧ покаѧ́нїѧ, по сте́пенѧмъ ᲂу҆стано́влєннымъ.

Пра́вило к҃в.
[edit]

Вино́вные въ во́льныхъ ᲂу҆бі́йствахъ, да бꙋ́дꙋтъ въ разрѧ́дѣ припа́дающихъ: соверше́ннагѡ же ѡ҆бще́нїѧ да ᲂу҆досто́иваютсѧ при концѣ̀ жи́зни.

Пра́вило к҃г.
[edit]

Винѡ́внымъ въ нево́льныхъ ᲂу҆бі́йствахъ пре́жнее ѡ҆предѣле́нїе повелѣва́етъ, въ се́дмь лѣ́тъ, по сте́пенѧмъ ᲂу҆стано́влєннымъ достига́ти соверше́ннагѡ ѡ҆бще́нїѧ: но́вое же ѡ҆предѣле́нїе, и҆сполнѧ́ти пѧтилѣ́тнее вре́мѧ въ покаѧ́нїи.

Пра́вило к҃д.
[edit]

Волхвꙋ́ющїе, и҆ послѣ́дꙋющїе ꙗ҆зы́чєскимъ ѻ҆бы́чаѧмъ, и҆лѝ вводѧ́щїе нѣ́кихъ въ до́мы своѝ, ра́ди и҆зыска́нїѧ волше́бствъ, и҆лѝ и҆ ра́ди ѡ҆чище́нїѧ, да подверга́ютсѧ пра́вилꙋ пѧтилѣ́тнѧгѡ покаѧ́нїѧ, по сте́пенѧмъ ᲂу҆стано́влєннымъ: трѝ лѣ́та припа́данїѧ, и҆ два̀ лѣ́та моли́твъ без̾ прїѡбще́нїѧ свѧты́хъ та̑инъ.

Пра́вило к҃є.
[edit]

Нѣ́кто ѡ҆брꙋчи́вшїй себѣ̀ ѻ҆трокови́цꙋ, сперва̀ растли́лъ є҆ѧ̀ сестрꙋ̀, ꙗ҆́кѡ и҆ бере́менной бы́ти є҆́й: а҆ пото́мъ ѡ҆жени́лсѧ ѡ҆брꙋче́нною, а҆ растлѣ́ннаѧ ᲂу҆дави́ласѧ. Совино́вныхъ повелѣно̀, въ продолже́нїи десѧтѝ лѣ́тъ, по ᲂу҆стано́влєннымъ сте́пенѧмъ покаѧ́нїѧ, прїѧ́ти въ число̀ стоѧ́щихъ на моли́твѣ съ вѣ́рными.