Правосла́вный мл҃твосло́въ/Канѡ́нъ ст҃ы́ѧ па́схи

А҆́ще бꙋ́кви непра́вилнѣ зрѧ́тсѧ, грѧдѝ сѣ́мо, да грамматоси́ры є҆́млеши.

←Часы̀ ст҃ы́ѧ па́схи

Правосла́вный мл҃твосло́въ Канѡ́нъ ст҃ы́ѧ па́схи

Пѣ̑сни трⷪ҇чны ѻ҆смѝ гласѡ́въ→

This page contains Church Slavonic text. Without proper font support, you may see question marks, boxes, or other symbols instead of letters and diacritics. Click here to download required fonts.

Канѡ́нъ ст҃ы́ѧ па́схи.

Тропа́рь, во гла́съ є҃:

Хрⷭ҇то́съ воскре́се и҆з̾ ме́ртвыхъ, сме́ртїю сме́рть попра́въ, и҆ сꙋ́щымъ во гробѣ́хъ живо́тъ дарова́въ.

Пе́рвый сті́хъ: Да воскре́снетъ бг҃ъ, и҆ расточа́тсѧ вразѝ є҆гѡ̀, и҆ да бѣжа́тъ ѿ лица̀ є҆гѡ̀ ненави́дѧщїи є҆го̀. Хрⷭ҇то́съ воскре́се: є҆ди́нощи.

Вторы́й сті́хъ: Ꙗ҆́кѡ и҆счеза́етъ ды́мъ, да и҆сче́знꙋтъ, ꙗ҆́кѡ та́етъ во́скъ ѿ лица̀ ѻ҆гнѧ̀. Хрⷭ҇то́съ воскре́се: є҆ди́нощи.

Тре́тїй сті́хъ: Та́кѡ да поги́бнꙋтъ грѣ́шницы ѿ лица̀ бж҃їѧ, а҆ пра́вєдницы да возвеселѧ́тсѧ. Хрⷭ҇то́съ воскре́се: є҆ди́нощи.

Четве́ртый сті́хъ: Се́й де́нь є҆го́же сотворѝ гдⷭ҇ь, возра́дꙋемсѧ и҆ возвесели́мсѧ во́нь. Хрⷭ҇то́съ воскре́се: є҆ди́нощи.

Сла́ва: Хрⷭ҇то́съ воскре́се: є҆ди́нощи.

И҆ ны́нѣ: Хрⷭ҇то́съ воскре́се: є҆ди́нощи.

Канѡ́нъ,
творе́нїе ст҃а́гѡ і҆ѡа́нна дамаски́на, гла́съ а҃.

Пѣ́снь а҃.

І҆рмо́съ: Воскрⷭ҇нїѧ де́нь, просвѣти́мсѧ лю́дїе: па́сха, гдⷭ҇нѧ па́сха! ѿ сме́рти бо къ жи́зни, и҆ ѿ землѝ къ нб҃сѝ, хрⷭ҇то́съ бг҃ъ на́съ преведѐ, побѣ́днꙋю пою́щыѧ.

Припѣ́въ: Хрⷭ҇то́съ воскр҃се и҆з̾ ме́ртвыхъ.

Ѡ҆чи́стимъ чꙋ̑вствїѧ, и҆ ᲂу҆́зримъ непристꙋ́пнымъ свѣ́томъ воскрⷭ҇нїѧ, хрⷭ҇та̀ блиста́ющасѧ, и҆ ра́дꙋйтесѧ, рекꙋ́ща ꙗ҆́снѡ да ᲂу҆слы́шимъ, побѣ́днꙋю пою́ще.

Нб҃са̀ ᲂу҆̀бо досто́йнѡ да веселѧ́тсѧ, землѧ́ же да ра́дꙋетсѧ, да пра́зднꙋетъ же мі́ръ, ви́димый же ве́сь и҆ неви́димый: хрⷭ҇то́съ бо воста̀, весе́лїе вѣ́чное.

Припѣ́въ: Прест҃а́ѧ бцⷣе, сп҃сѝ на́съ.

Оу҆мерщвле́нїѧ предѣ́лъ сломи́ла є҆сѝ, вѣ́чнꙋю жи́знь ро́ждшаѧ хрⷭ҇та̀, и҆з̾ гро́ба возсїѧ́вшаго дне́сь, дв҃о всенепоро́чнаѧ, и҆ мі́ръ просвѣти́вшаго.

Воскрⷭ҇шаго ви́дѣвши сн҃а твоего̀ и҆ бг҃а, ра́дꙋйсѧ со а҆пⷭ҇лы бг҃обл҃года́тнаѧ чⷭ҇таѧ: и҆ є҆́же ра́дꙋйсѧ пе́рвѣе, ꙗ҆́кѡ всѣ́хъ ра́дости вина̀, воспрїѧ́ла є҆сѝ, бг҃омт҃и всенепоро́чнаѧ.

Пѣ́снь г҃.

І҆рмо́съ: Прїиди́те пи́во пїе́мъ но́вое, не ѿ ка́мене непло́дна чꙋдодѣ́емое, но нетлѣ́нїѧ и҆сто́чникъ, и҆з̾ гро́ба ѡ҆дожди́вша хрⷭ҇та̀, въ не́мже ᲂу҆твержда́емсѧ.

Припѣ́въ: Хрⷭ҇то́съ воскр҃се и҆з̾ ме́ртвыхъ.

Ны́нѣ всѧ̑ и҆спо́лнишасѧ свѣ́та, нб҃о же и҆ землѧ̀ и҆ преиспѡ́днѧѧ: да пра́зднꙋетъ ᲂу҆̀бо всѧ̀ тва́рь воста́нїе хрⷭ҇то́во, въ не́мже ᲂу҆твержда́етсѧ.

Вчера̀ спогребо́хсѧ тебѣ̀ хрⷭ҇тѐ, совостаю̀ дне́сь воскрⷭ҇шꙋ тебѣ̀, сраспина́хсѧ тебѣ̀ вчера̀, са́мъ мѧ̀ спросла́ви, сп҃се, во црⷭ҇твїи твое́мъ.

Припѣ́въ: Прест҃а́ѧ бцⷣе, сп҃сѝ на́съ.

На нетлѣ́ннꙋю жи́знь прихождꙋ̀ дне́сь бл҃гостїю ро́ждшагѡсѧ и҆з̾ тебє̀, чⷭ҇таѧ, и҆ всѣ̑мъ концє́мъ свѣ́тъ ѡ҆блиста́вшагѡ.

Бг҃а є҆го́же родила̀ є҆сѝ пло́тїю, и҆з̾ ме́ртвыхъ, ꙗ҆́коже речѐ, воста́вша ви́дѣвши чⷭ҇таѧ, ликꙋ́й, и҆ сегѡ̀ ꙗ҆́кѡ бг҃а, пречⷭ҇таѧ, возвелича́й.

Ѵ҆пакоѝ, гла́съ д҃:

Предвари́вшыѧ ᲂу҆́тро ꙗ҆̀же ѡ҆ марі́и, и҆ ѡ҆брѣ́тшыѧ ка́мень ѿвале́нъ ѿ гро́ба, слы́шахꙋ ѿ а҆́гг҃ла: во свѣ́тѣ присносꙋ́щнѣмъ сꙋ́щаго, съ ме́ртвыми что̀ и҆́щете ꙗ҆́кѡ человѣ́ка; ви́дите грѡ́бныѧ пелєны̀, тецы́те, и҆ мі́рꙋ проповѣ́дите, ꙗ҆́кѡ воста̀ гдⷭ҇ь, ᲂу҆мертви́вый сме́рть, ꙗ҆́кѡ є҆́сть сн҃ъ бг҃а, сп҃са́ющагѡ ро́дъ человѣ́ческїй.

Пѣ́снь д҃.

І҆рмо́съ: На бжⷭ҇твеннѣй стра́жи, бг҃оглаго́ливый а҆ввакꙋ́мъ да ста́нетъ съ на́ми, и҆ пока́жетъ свѣтоно́сна а҆́гг҃ла, ꙗ҆́снѡ глаго́люща: дне́сь сп҃се́нїе мі́рꙋ, ꙗ҆́кѡ воскр҃се хрⷭ҇то́съ, ꙗ҆́кѡ всеси́ленъ.

Припѣ́въ: Хрⷭ҇то́съ воскр҃се и҆з̾ ме́ртвыхъ.

Мꙋ́жескїй ᲂу҆́бѡ по́лъ, ꙗ҆́кѡ разве́рзый двⷭ҇твеннꙋю ᲂу҆тро́бꙋ, ꙗ҆ви́сѧ хрⷭ҇то́съ: ꙗ҆́кѡ чл҃вѣ́къ же, а҆́гнецъ нарече́сѧ: непоро́ченъ же, ꙗ҆́кѡ невкꙋ́сенъ скве́рны, на́ша па́сха, и҆ ꙗ҆́кѡ бг҃ъ и҆́стиненъ, соверше́нъ рече́сѧ.

Ꙗ҆́кѡ є҆динолѣ́тный а҆́гнецъ, бл҃гослове́нный на́мъ вѣне́цъ хрⷭ҇то́съ, во́лею за всѣ́хъ закла́нъ бы́сть, па́сха чⷭ҇ти́тельнаѧ, и҆ па́ки и҆з̾ гро́ба кра́сное пра́вды на́мъ возсїѧ̀ сл҃нце.

Бг҃оѻц҃ъ ᲂу҆́бѡ дв҃дъ пред̾ сѣ́ннымъ ковче́гомъ скака́ше и҆гра́ѧ, лю́дїе же бж҃їи ст҃і́и, ѻ҆бразѡ́въ сбытїѐ зрѧ́ще, весели́мсѧ бжⷭ҇твеннѣ, ꙗ҆́кѡ воскр҃се хрⷭ҇то́съ, ꙗ҆́кѡ всеси́ленъ.

Припѣ́въ: Прест҃а́ѧ бцⷣе, сп҃сѝ на́съ.

Созда́вый а҆да́ма твоего̀ пра́ѻц҃а чⷭ҇таѧ, зи́ждетсѧ ѿ тебє̀, и҆ сме́ртное жили́ще разорѝ свое́ю сме́ртїю дне́сь, и҆ ѡ҆зарѝ всѧ̑ бжⷭ҇твенными блиста́ньми воскрⷭ҇нїѧ.

Е҆го́же родила̀ є҆сѝ хрⷭ҇та̀, прекра́снѡ и҆з̾ ме́ртвыхъ возсїѧ́вша, чⷭ҇таѧ, зрѧ́щи, до́браѧ и҆ непоро́чнаѧ въ жена́хъ и҆ кра́снаѧ, дне́сь во сп҃се́нїе всѣ́хъ, со а҆пⷭ҇лы ра́дꙋющисѧ того̀ прославлѧ́й.

Пѣ́снь є҃.

І҆рмо́съ: Оу҆́тренюемъ ᲂу҆́треннюю глꙋбокꙋ̀, и҆ вмѣ́стѡ мѵ́ра пѣ́снь принесе́мъ влⷣцѣ, и҆ хрⷭ҇та̀ ᲂу҆́зримъ, пра́вды сл҃нце, всѣ̑мъ жи́знь возсїѧ́юща.

Припѣ́въ: Хрⷭ҇то́съ воскр҃се и҆з̾ ме́ртвыхъ.

Безмѣ́рное твоѐ бл҃гоꙋтро́бїе а҆́довыми ᲂу҆́зами содержи́мїи зрѧ́ще, къ свѣ́тꙋ и҆дѧ́хꙋ хрⷭ҇тѐ, весе́лыми нога́ми, па́схꙋ хва́лѧще вѣ́чнꙋю.

Пристꙋ́пимъ свѣщено́снїи, и҆сходѧ́щꙋ хрⷭ҇тꙋ̀ и҆з̾ гро́ба ꙗ҆́кѡ женихꙋ̀, и҆ спра́зднꙋимъ любопра́зднственными чи́нми па́схꙋ бж҃їю сп҃си́тельнꙋю.

Припѣ́въ: Прест҃а́ѧ бцⷣе, сп҃сѝ на́съ.

Просвѣща́етсѧ бжⷭ҇твенными лꙋча́ми и҆ живоно́сными воскрⷭ҇нїѧ сн҃а твоегѡ̀, бг҃омт҃и пречⷭ҇таѧ, и҆ ра́дости и҆сполнѧ́етсѧ бл҃гочести́выхъ собра́нїе.

Не разве́рзлъ є҆сѝ врата̀ двⷭ҇тва въ воплоще́нїи, гро́ба не разрꙋши́лъ є҆сѝ печа́тей, цр҃ю̀ созда́нїѧ: ѿѻнꙋ́дꙋже воскрⷭ҇шаго тѧ̀ зрѧ́щи мт҃и, ра́довашесѧ.

Пѣ́снь ѕ҃.

І҆рмо́съ: Снизше́лъ є҆сѝ въ преиспѡ́днѧѧ землѝ, и҆ сокрꙋши́лъ є҆сѝ верєѝ вѣ́чныѧ, содержа́щыѧ свѧ̑занныѧ, хрⷭ҇тѐ, и҆ тридне́венъ ꙗ҆́кѡ ѿ ки́та і҆ѡ́на, воскр҃слъ є҆сѝ ѿ гро́ба.

Припѣ́въ: Хрⷭ҇то́съ воскр҃се и҆з̾ ме́ртвыхъ.

Сохрани́въ цѣ̑ла зна́мєнїѧ хрⷭ҇тѐ, воскр҃слъ є҆сѝ ѿ гро́ба, ключѝ дв҃ы не вреди́вый въ ржⷭ҇твѣ̀ твое́мъ, и҆ ѿве́рзлъ є҆сѝ на́мъ ра̑йскїѧ двє́ри.

Сп҃се мо́й, живо́е же и҆ неже́ртвенное заколе́нїе, ꙗ҆́кѡ бг҃ъ са́мъ себѐ во́лею приве́дъ ѻ҆ц҃ꙋ̀, совоскр҃си́лъ є҆сѝ всеро́днаго а҆да́ма, воскр҃съ ѿ гро́ба.

Припѣ́въ: Прест҃а́ѧ бцⷣе, сп҃сѝ на́съ.

Возведе́сѧ дре́вле держи́мое сме́ртїю и҆ тлѣ́нїемъ, воплоти́вшимсѧ ѿ твоегѡ̀ пречⷭ҇тагѡ чре́ва, къ нетлѣ́ннѣй, и҆ присносꙋ́щнѣй жи́зни, бцⷣе дв҃о.

Сни́де въ преиспѡ́днѧѧ землѝ, въ ложесна̀ твоѧ̑ чⷭ҇таѧ сше́дый, и҆ всели́выйсѧ и҆ воплоти́выйсѧ па́че ᲂу҆ма̀, и҆ воздви́же съ собо́ю а҆да́ма, воскр҃съ ѿ гро́ба.

Конда́къ, гла́съ и҃:

А҆́ще и҆ во гро́бъ снизше́лъ є҆сѝ, безсме́ртне, но а҆́довꙋ разрꙋши́лъ є҆сѝ си́лꙋ, и҆ воскрⷭ҇лъ є҆сѝ ꙗ҆́кѡ побѣди́тель хрⷭ҇тѐ бж҃е, жена́мъ мѷроно́сицамъ вѣща́вый: ра́дꙋйтесѧ! и҆ твои̑мъ а҆пⷭ҇лѡмъ ми́ръ да́рꙋѧй, па́дшымъ подаѧ́й воскрⷭ҇нїе.

І҆́косъ: Е҆́же пре́жде со́лнца сл҃нце заше́дшее и҆ногда̀ во гро́бъ, предвари́ша ко ᲂу҆́трꙋ, и҆́щꙋщыѧ ꙗ҆́кѡ днѐ мѷронѡ́сицы дѣ̑вы, и҆ дрꙋга̀ ко дрꙋзѣ́й вопїѧ́хꙋ: ѽ дрꙋги́ни! прїиди́те, вонѧ́ми пома́жемъ тѣ́ло живоно́сное и҆ погребе́ное, пло́ть воскр҃си́вшагѡ па́дшаго а҆да́ма, лежа́щꙋю во гро́бѣ. И҆́демъ, потщи́мсѧ ꙗ҆́коже волсвѝ, и҆ поклони́мсѧ, и҆ принесе́мъ мѵ̑ра ꙗ҆́кѡ да́ры, не въ пелена́хъ, но въ плащани́цѣ ѡ҆бви́томꙋ, и҆ пла́чимъ, и҆ возопїи́мъ: ѽ влⷣко, воста́ни, па́дшымъ подаѧ́й воскрⷭ҇нїе.

Та́же глаго́лемъ во гла́съ ѕ҃:

Воскрⷭ҇нїе хрⷭ҇то́во ви́дѣвше, поклони́мсѧ ст҃о́мꙋ гдⷭ҇ꙋ і҆и҃сꙋ, є҆ди́номꙋ безгрѣ́шномꙋ. Крⷭ҇тꙋ̀ твоемꙋ̀ покланѧ́емсѧ хрⷭ҇тѐ, и҆ ст҃о́е воскрⷭ҇нїе твоѐ пое́мъ и҆ сла́вимъ: ты́ бо є҆сѝ бг҃ъ на́шъ, ра́звѣ тебє̀ и҆но́гѡ не зна́емъ, и҆́мѧ твоѐ и҆менꙋ́емъ. Прїиди́те всѝ вѣ́рнїи, поклони́мсѧ ст҃о́мꙋ хрⷭ҇то́вꙋ воскрⷭ҇нїю: се́ бо прїи́де крⷭ҇то́мъ ра́дость всемꙋ̀ мі́рꙋ. Всегда̀ бл҃гословѧ́ще гдⷭ҇а, пое́мъ воскрⷭ҇нїе є҆гѡ̀: распѧ́тїе бо претерпѣ́въ, сме́ртїю сме́рть разрꙋшѝ. Триⷤ.

Воскр҃съ і҆и҃съ ѿ гро́ба, ꙗ҆́коже проречѐ, дадѐ на́мъ живо́тъ вѣ́чный, и҆ ве́лїю ми́лость. Триⷤ.

Пѣ́снь з҃.

І҆рмо́съ: Ѻ҆́троки ѿ пе́щи и҆зба́вивый, бы́въ чл҃вѣ́къ, стра́ждетъ ꙗ҆́кѡ сме́ртенъ, и҆ стрⷭ҇тїю сме́ртное въ нетлѣ́нїѧ ѡ҆блачи́тъ бл҃голепїе, є҆ди́нъ бл҃гослове́нъ ѻ҆тцє́въ бг҃ъ, и҆ препросла́вленъ.

Припѣ́въ: Хрⷭ҇то́съ воскр҃се и҆з̾ ме́ртвыхъ.

Жєны̀ съ мѵ́ры бг҃омꙋ̑дрыѧ въ слѣ́дъ тебє̀ теча́хꙋ: є҆го́же ꙗ҆́кѡ ме́ртва со слеза́ми и҆ска́хꙋ, поклони́шасѧ ра́дꙋющыѧсѧ живо́мꙋ бг҃ꙋ, и҆ па́схꙋ та́йнꙋю твои̑мъ хрⷭ҇тѐ ᲂу҆ченикѡ́мъ бл҃говѣсти́ша.

Сме́рти пра́зднꙋемъ ᲂу҆мерщвле́нїе, а҆́дово разрꙋше́нїе, и҆но́гѡ житїѧ̀ вѣ́чнагѡ нача́ло, и҆ и҆гра́юще пое́мъ вино́внаго, є҆ди́наго бл҃гослове́ннаго ѻ҆тцє́въ бг҃а, и҆ препросла́вленнаго.

Ꙗ҆́кѡ вои́стиннꙋ сщ҃е́ннаѧ, и҆ всепра́зднственнаѧ сїѧ̀ сп҃си́тельнаѧ но́щь, и҆ свѣтоза́рнаѧ, свѣтоно́снагѡ днѐ воста́нїѧ сꙋ́щи провозвѣ́стница: въ не́йже безлѣ́тный свѣ́тъ и҆з̾ гро́ба пло́тски всѣ̑мъ возсїѧ̀.

Припѣ́въ: Прест҃а́ѧ бцⷣе, сп҃сѝ на́съ.

Оу҆мертви́въ сн҃ъ тво́й сме́рть, всенепоро́чнаѧ, дне́сь, всѣ̑мъ смє́ртнымъ пребыва́ющїй живо́тъ во вѣ́ки вѣкѡ́въ дарова̀, є҆ди́нъ бл҃гослове́нный ѻ҆тцє́въ бг҃ъ, и҆ препросла́вленный.

Всѣ́мъ црⷭ҇твꙋѧй созда́нїемъ, бы́въ чл҃вѣ́къ, всели́сѧ во твою̀ бг҃облагода́тнаѧ ᲂу҆тро́бꙋ, и҆ распѧ́тїе претерпѣ́въ и҆ сме́рть, воскр҃се бг҃олѣ́пнѡ, совозста́вивъ на́съ ꙗ҆́кѡ всеси́ленъ.

Пѣ́снь и҃.

І҆рмо́съ: Се́й нарече́нный и҆ ст҃ы́й де́нь, є҆ди́нъ сꙋббѡ́тъ цр҃ь и҆ гдⷭ҇ь, пра́здникѡвъ пра́здникъ, и҆ торжество̀ є҆́сть торже́ствъ: во́ньже бл҃гослови́мъ хрⷭ҇та̀ во вѣ́ки.

Припѣ́въ: Хрⷭ҇то́съ воскр҃се и҆з̾ ме́ртвыхъ.

Прїиди́те но́вагѡ вїногра́да рожде́нїѧ, бжⷭ҇твеннагѡ весе́лїѧ, въ наро́читомъ днѝ воскрⷭ҇нїѧ, црⷭ҇твїѧ хрⷭ҇то́ва прїѡбщи́мсѧ, пою́ще є҆го̀ ꙗ҆́кѡ бг҃а во вѣ́ки.

Возведѝ ѻ҆́крестъ ѻ҆́чи твоѝ сїѡ́не и҆ ви́ждь: се́ бо прїидо́ша къ тебѣ̀ ꙗ҆́кѡ бг҃освѣ̑тлаѧ свѣти̑ла, ѿ за́пада, и҆ сѣ́вера, и҆ мо́рѧ, и҆ восто́ка ча̑да твоѧ̑, въ тебѣ̀ бл҃гословѧ̑щаѧ хрⷭ҇та̀ во вѣ́ки.

Припѣ́въ: Прест҃а́ѧ трⷪ҇це бж҃е на́шъ, сла́ва тебѣ̀.

Ѻ҆́ч҃е вседержи́телю, и҆ сло́ве, и҆ дш҃е, тремѝ соединѧ́емое во ѵ҆поста́сѣхъ є҆стество̀, пресꙋ́щественне и҆ пребжⷭ҇твенне, въ тѧ̀ крⷭ҇ти́хомсѧ, и҆ тѧ̀ бл҃гослови́мъ во всѧ̑ вѣ́ки.

Припѣ́въ: Прест҃а́ѧ бцⷣе, сп҃сѝ на́съ.

Прїи́де тобо́ю въ мі́ръ гдⷭ҇ь, дв҃о бцⷣе, и҆ чре́во а҆́дово расто́ргъ, смє́ртнымъ на́мъ воскрⷭ҇нїе дарова̀: тѣ́мже бл҃гослови́мъ є҆го̀ во вѣ́ки.

Всю̀ низложи́въ сме́рти держа́вꙋ сн҃ъ тво́й дв҃о, свои́мъ воскрⷭ҇нїемъ, ꙗ҆́кѡ бг҃ъ крѣ́пкїй совознесѐ на́съ и҆ ѡ҆божѝ: тѣ́мже воспѣва́емъ є҆го̀ во вѣ́ки.

Пѣ́снь ѳ҃.

І҆рмо́съ: Свѣти́сѧ, свѣти́сѧ, но́вый і҆ерⷭ҇ли́ме: сла́ва бо гдⷭ҇нѧ на тебѣ̀ возсїѧ̀. Ликꙋ́й ны́нѣ, и҆ весели́сѧ сїѡ́не. Ты́ же чⷭ҇таѧ красꙋ́йсѧ бцⷣе, ѡ҆ воста́нїи ржⷭ҇тва̀ твоегѡ̀.

Припѣ́въ: Хрⷭ҇то́съ воскр҃се и҆з̾ ме́ртвыхъ.

Ѽ бжⷭ҇твеннагѡ, ѽ любе́знагѡ, ѽ сладча́йшагѡ твоегѡ̀ гла́са! Съ на́ми бо нело́жнѡ ѡ҆бѣща́лсѧ є҆сѝ бы́ти, до сконча́нїѧ вѣ́ка хрⷭ҇тѐ: є҆го́же, вѣ́рнїи, ᲂу҆твержде́нїе наде́жди и҆мꙋ́ще, ра́дꙋемсѧ.

Ѽ па́сха ве́лїѧ и҆ сщ҃е́ннѣйшаѧ, хрⷭ҇тѐ! ѽ мꙋ́дросте, и҆ сло́ве бж҃їй, и҆ си́ло! подава́й на́мъ и҆́стѣе тебє̀ причаща́тисѧ, въ невече́рнѣмъ днѝ црⷭ҇твїѧ твоегѡ̀.

Припѣ́въ: Прест҃а́ѧ бцⷣе, сп҃сѝ на́съ.

Согла́снѡ дв҃о, тебѐ бл҃жи́мъ вѣ́рнїи: ра́дꙋйсѧ две́ре гдⷭ҇нѧ: ра́дꙋйсѧ гра́де ѡ҆дꙋшевле́нный: ра́дꙋйсѧ, є҆ѧ́же ра́ди на́мъ ны́нѣ возсїѧ̀ свѣ́тъ, и҆з̾ тебє̀ рожде́ннагѡ и҆з̾ ме́ртвыхъ воскрⷭ҇нїѧ.

Весели́сѧ и҆ ра́дꙋйсѧ бжⷭ҇твеннаѧ две́ре свѣ́та: заше́дый бо і҆и҃съ во гро́бъ возсїѧ̀, просїѧ́въ со́лнца свѣтлѣ́е, и҆ вѣ̑рныѧ всѧ̑ ѡ҆зари́въ, бг҃ора́дованнаѧ влⷣчце.

Е҆ѯапостїла́рїй. Самогла́сенъ:

Пло́тїю ᲂу҆снꙋ́въ, ꙗ҆́кѡ ме́ртвъ, цр҃ю̀ и҆ гдⷭ҇и, тридне́венъ воскр҃слъ є҆сѝ, а҆да́ма воздви́гъ ѿ тлѝ, и҆ ᲂу҆праздни́въ сме́рть: па́сха нетлѣ́нїѧ, мі́ра сп҃се́нїе. Триⷤ.

Стїхи̑ры па́схи. Гла́съ є҃.

Сті́хъ: Да воскре́снетъ бг҃ъ, и҆ расточа́тсѧ вразѝ є҆гѡ̀.

Па́сха сщ҃е́ннаѧ на́мъ дне́сь показа́сѧ: па́сха но́ва ст҃а́ѧ: па́сха та́инственнаѧ: па́сха всечестна́ѧ: па́сха хрⷭ҇то́съ и҆зба́витель: па́сха непоро́чнаѧ: па́сха вели́каѧ: па́сха вѣ́рныхъ: па́сха двє́ри ра̑йскїѧ на́мъ ѿверза́ющаѧ: па́сха всѣ́хъ ѡ҆свѧща́ющаѧ вѣ́рныхъ.

Сті́хъ: Ꙗ҆́кѡ и҆счеза́етъ ды́мъ, да и҆сче́знꙋтъ.

Прїиди́те ѿ видѣ́нїѧ жєны̀ бл҃говѣ̑стницы, и҆ сїѡ́нꙋ рцы́те: прїимѝ ѿ на́съ ра́дости бл҃говѣ́щенїѧ, воскресе́нїѧ хрⷭ҇то́ва: красꙋ́йсѧ, ликꙋ́й, и҆ ра́дꙋйсѧ і҆ерꙋсали́ме, цр҃ѧ̀ хрⷭ҇та̀ ᲂу҆зрѣ́въ и҆з̾ гро́ба, ꙗ҆́кѡ жениха̀ происходѧ́ща.

Сті́хъ: Та́кѡ да поги́бнꙋтъ грѣ́шницы ѿ лица̀ бж҃їѧ, а҆ пра́вєдницы да возвеселѧ́тсѧ.

Мѷронѡ́сицы жєны̀, ᲂу҆́трꙋ глꙋбокꙋ̀, предста́вшѧ гро́бꙋ живода́вца, ѡ҆брѣто́ша а҆́гг҃ла на ка́мени сѣдѧ́ща, и҆ то́й провѣща́въ и҆̀мъ си́це глаго́лаше: что̀ и҆́щете жива́гѡ съ ме́ртвыми; что̀ пла́чете нетлѣ́ннагѡ во тлѝ; ше́дше проповѣ́дите ᲂу҆ченикѡ́мъ є҆гѡ̀.

Сті́хъ: Се́й де́нь, є҆го́же сотворѝ гдⷭ҇ь, возра́дꙋемсѧ и҆ возвесели́мсѧ во́нь.

Па́сха кра́снаѧ, па́сха, гдⷭ҇нѧ па́сха, па́сха всечестна́ѧ на́мъ возсїѧ̀. па́сха, ра́достїю дрꙋ́гъ дрꙋ́га ѡ҆б̾и́мемъ. ѽ па́сха! и҆збавле́нїе ско́рби, и҆́бо и҆з̾ гро́ба дне́сь ꙗ҆́кѡ ѿ черто́га возсїѧ́въ хрⷭ҇то́съ, жєны̀ ра́дости и҆спо́лни глаго́лѧ: проповѣ́дите а҆пⷭ҇лѡмъ.

Сла́ва и҆ ны́нѣ, гла́съ є҃: Воскрⷭ҇нїѧ де́нь, и҆ просвѣти́мсѧ торжество́мъ, и҆ дрꙋ́гъ дрꙋ́га ѡ҆б̾и́мемъ. рце́мъ бра́тїе, и҆ ненави́дѧщымъ на́съ, прости́мъ всѧ̑ воскрⷭ҇нїемъ, и҆ та́кѡ возопїи́мъ: Хрⷭ҇то́съ воскре́се и҆з̾ ме́ртвыхъ, сме́ртїю сме́рть попра́въ, и҆ сꙋ́щымъ во гробѣ́хъ живо́тъ дарова́въ.

This is a translation and has a separate copyright status from the original text. The license for the translation applies to this edition only.
Original:
Translation: