Эрзянь Мастор/2004/16/Казнекс - сырнень суркст!

From Wikisource
Jump to navigation Jump to search
Эрзянь Мастор, № 16 (191), 25 августа 2004 edited by Нуянь Видяз, Кшуманцянь Пиргуж
Казнекс — сырнень суркст!
Статья на сайте газеты: № 191, 25.08.2004, Казнекс - сырнень суркст!
 
Казнекс — сырнень суркст!

Раськень Озкссо ульнесть аволь ансяк озномат, кортамот, морот, ютавтовсть спортонь коряс пелькстамоткак. Васенце турнирэсь — узерень ертнемань коряс. Сонзэ эйсэ пелькстасть эрзянь цёрат. Одтнэстэ кияк эзь понго чочкос. Финалс лиссть колмо шумбра, виев цёрат: Александр Сидоров, Алексей Андропов ды Александр Маскин. Кувать кияк эзь лисе икелев. Ськамонзо Александр Сидоров понгсь чочконтень колмоксть. Сон лиськак изницякс. Омбоце тарканть саизе Алексей Андропов, колмоценть — Александр Маскин.

Сехте талновтыцякс ульнесь национальной бороцямось. Васня кияк эзь сае мель лисемс. Муевсть кавксо цёрат. Зярдо лиссь Александр Фролов, Андревелестэ, ваныцятне ушодсть цяпамо ды сеереме: «Фролов — чемпион!» Васенце тарканть кис покш бороцямо арасель — изнясь Фролов. Колмоце таркась сатотсь Александр Сураевнень. Филологической факультетэнь тонавтницясь пелькстась пек виев бороциця марто. Сыненст эзь саво правтомс Сураевень. Зярдо бороцицятнень вакс сась Мордовиянь Прявтось Н. И. Меркушкин, весе спортсментнэнень казсь казнеть. Васенце таркань саицянтень, Фроловнень, Николай Ивановичь макссь сырнень суркс ды мерсь урьвакстомс седе курок. Омбоце таркас лисицянтень, Миша Кочановнень, максозельть сырнень част, Сураев Сашанень — сиянь част.

Ламо лембе валт ёвтасть спортсментнэ Н. И. Меркушкиннэнь ды Правительствантень се лезксэнть кис, конанть сынь максызь эрзянь покшчинь ютавтомантень.


RU: Данная работа создана сотрудниками газеты Эрзянь Мастор и распространяется по лицензии Creative Commons Attribution 4.0 International. См. пояснение внизу заглавной страницы газеты.
EN: This work is licensed under the Creative Commons Attribution 4.0 International License as a work by Erzyan Mastor journal employee(s). See the disclaimer on the bottom of the front page of the journal.