Янгамо (2006)/Кавто веть ды пинге

From Wikisource
Jump to navigation Jump to search
Кавто веть ды пинге  (2006) 
by Нуянь Видяз, edited by Рябова Л. А.
Нуянь Видяз. Янгамо. Келей ёвтнема, ёвтнемат, тешкст. — Саранск ош, 2006. — с. 167—181

[167]

КАВТО ВЕТЬ ДЫ ПИНГЕ

Марюш учось мирдензэ чинь-чоп.

Валгсь уш покш сувтеме ёнов молиця якстере чипаесь, новольсть скалтнэ-реветне, Вася яла арасель. Прок ведьс ваясь. «Косо, кува Пазось яксевти эйсэнзэ?» — чарасть аванть прява ризнэма мельтне.

Марюш керясь кши печть ды лиссь ракшатнень вастомо. Симдинзе, мейле кундась Ашаень потявтомо. Зярс каштом икеле эземненть лангсо педясь ды кайсесь кедьгева ловсонть, кальцядевсь кудыкелькс кенкшень циндересь. «Вася, улема...» — арсезевсь кецнезь. Тарчксонть трокс калдордозь юхадсть Миколь ды Митёк кавтаськензэ. Эрьвась каподсь кечине, ды стясть аваст ваксс: учость, зярдо нурти тенст ловсо.

— Авай, тетям косо? — уш таркасто каятотсь Митёконь пшти вайгелезэ.

— Мадеде, мадеде, покольнень. Сы курок... — оймавтынзе эйкакштнэнь ды цяк эзь мереве: «Содавлиньгак, сяткинем...»

Окойники кудоютконь тевтне прядовсть. Марюш лиссь каштом икельде ды озась столенть пес. Ризксэсь, мерят, текень учоськак — ремштазь ремштызе.

«Те ков, алкукскак, ёмась? Косо? Шказо пелеве малава чары, сон яла арась... — сардокс пельнесть пряудемень сянгоря арсематне. — Те истя мень тюниха, Инешкипаз? Мезе теевсь?»

Майсемадонть авась тарка-эзем эзь мукшно. Сон стясь, каясь лавтовонзо ланга лембе паця ды лиссь кардаз удалов. Варштась ведькевест ёнов, кона аштесь авасоло пандыненть прясо, ды таймазкадсь: сон неявсь тензэ тей-тов лыкиця-чиремкшниця покштояк покш раужо крёстокс. «Осподи, Инешкипаз, те мень тандавкс, мезе мартон?» — мерсь тошказь. Окойники авантень сась ёжо, ды сон чопода сулейнекс апак пеле сыргась пиретнень юткова яннэванть неявиця ведькевенть ёнов.

Ушосонть а куш а каш, ансяк салава каштордыть [168] ды кончнить вейкест-вейкест туртов сеедьстэ сялгонезь тештне. Ведькевень сёлмотне венстизь пест-нерест верев ды кунсолыть вень менеленть ёвксонзо. Кунсолыть — сорк а теить.

Кенкшесь пекстазель.

«Вай, авакай! Те мезе истя? Косо эно Вася?» — вайкстазевсь апародонть Марюш. Чеменьсэ токазь мокшнашка панжомась чатьмонсь. Валгак эзь правто тештев менелеськак.

Ней ков?

Валдоньбуесэ Семтярень эрясть а беряньстэ. Ульнесть мик лангозост сявадыця сельмтькак. Ансяк а весенень редявсь, кода важодить сонсь Семтярь ды умок урьвакстнезь ниле цёранзо. Пазонтень пек эзть сюконякшно, кемсть эсь виест лангс, эрьва тевенть тейсть оймень путозь, кода эряви. Тундонь ды кизэнь стака шкатнестэ, зярдо маряви, тевтненень а ули пе, эзть кайсекшнеяк, удсесть лишмень очко песэ. Вейсэнь вийсэ, вейке омбоценень лездазь, Петровка ёнов кинть чирес путсть варма ведькев, мельганзо пурнасть-сэрнясть оень чавомка. Теде башка, цёратнестэ эрьванть ульнесь эсь кудозо, цела кардаз ракшанзо. Вася марто Марюшнень ведькевень питнеденть савкшнось ансяк кавксоце пельксэсь. Ялатеке сынь ловсть сонзэ эсестэкс, якасть мельганзо мельспаросо.

Марюш састыне эскелясь содавикс яннэванть мекев. Кемсь: самозонзо мирдезэ ули кудосо. Ков моли веледенть башка? Паряк, лелянстэнь совась — арсить, кода седе тов эрямс?

Манявсь. Тарадкенть, конань нерьгстакшнызе удало кенкшень циндерентень, кияк эзизе тарга.

Аванть седейсэ ангорясть кискат. Паряк, истя аволь майсеяк, марсевельгак Васядо кодаткак берянь, прянь а истя ветямодо кулят. Арась, эрить сынь вейсэ а ве ие, ды кодаткак пежетькст мельганзо эзь некшне. Улевельгак лиякс, превтькак яжамс аволь саво.

Чиремемс-оймсемс эзь сакшно мельскак. А весть стамбарнэ, илизь маря удыця эйкакштнэ, Марюш лиснесь ушов, ютнесь вальмалга. Мик кавксть пачколесь веленть куншкасо сэденть видьс. Яла кемсь: костояк ды понги каршозонзо вейсэнь эрямо ялгазо. Меельцьпелев совась кудос, комавтызе прянзо ярсамо стуворонть пес ды сутяземсь. Ансяк кенерсь сельмензэ конямо, каятотсь цёраломанень вайгель: «Нолдамизь! Нолдамизь!» Марюш тарск тейсь, кепедизе прянзо ды стясь. «Вай, Верепаз! Ды те мезе таго?»

[169] Кармась ашолгадомо.

Од чи — од тевть. Ков эйстэст туят? Сыненст ялатеке, кодат вармат лажныть — элякалиця тундонь эли сёксень чопода вень. Виде сеяк: тевде башка, оймень ормадо седе кемевикс идиця иля вешне.

Азоравась саизе ведранзо ды лиссь Ашаень потявтомо. Ансяк озась скалонть ваксс, ледсь мелезэнзэ Элюш ялгазо. «Паряк, сон марясь мезеяк? Паряк, сон мейсэяк оймавтсы китныця седеем?»

Неть мельтнень полавтызь лият.

«Кодаяк ютавтса чинть, мейле ванса, — кавтолдозь кортась эськанзо. — Шкадо икеле а мезть кепсемс велень келес шалт. Паряк, видеяк, ноготон парос прыть...»

Арась, ноготнэ паро кулят эзть кандо. Ушодовсь од, валдо налсо налксиця чи. Вася эзь учово, прок анксемас ваясь.

Семтярень Васянь ёмамодо кулясь срадсь велеванть зярыя чинь ютазь. Кияк, кода свал эрси, мездеяк паро ладсо эзь сода.

...Се чистэнть вармась энгамсь сеске чикуншкадо мейле. Теваразде Вася ваднинзе машинань ойсэ ведькевень чарыця-ёзавиця таркатнень, тенсизе челькиязь кияксонть. Лисемстэ варштась пертьпельга ды стакасто укстазевсь. Мекс — сонськак эзь сода.

Ведькевень азорось сёлгизе эсь мельганзо кавтов панжтневиця кенкшенть, понгавтызе панжоманть ды велявтсь туеме. Самай те шкастонть, теке мода потсто, стясть икелензэ асодавикс, прясто пильгс раужосо оршазь бурина цёрат.

Вася потазевсь.

— Стой, не шевелись! — рангстасть ве вайгельсэ раужосотне, эскельдясть икелев ды сеске мендизь Васянь кедензэ удалов.

— Те мезе истя? Мезе тенк эряви?! — серьгедсь цёрась ды терявтсь рикстедемс каявицятнень. Тень каршо вейкесь эйстэст лоштизе акунсолыцянть турва ланга. Васянь улозо вельтявсь верьсэ.

Ветизь ведькевенть удало тарантасонтень.

— Садись! И язык держи за зубами! — мерсь, теке кевть порксась, эйстэст седе сэреесь, бешом, покшось. — Разве не знаешь, с кем имеешь дело?

«Содан, содан, — мериксэль Вася, ды сускизе келензэ — чарькодсь: мартост педсемс а мезть. — Кода а содан, оно кодат кулят якить ланганк. А стяко лемдидизь «раужо кренчекс».

[170] Седе одось, конань судало раужолдсть муёт, юксизе палманьстэ панст ведьменть, саинзе алашанть ланга каязь кшнань ведьметнень ды озась ветицянь таркас.

Айгорось ноцковтызе тарантасонть.

Цёцяня ведькевпрянть тёкшкес валгсь кренч ды нерензэ ванськавтомадо мейле ёвтызе эсь мелензэ: кру-кранк, кру-кранк.

Васянь чавсь маштыкс.

«Те кода истя? Мезень кис? Мейсэ чумом? Ков эйсэнь ускить?» — кодаяк эзь саеве тензэ превс. Эзь кавтолдо вейкеде: вакссонзо пеедькшницятиень ды цикань кельсэ кортыцятнень пельде седеймарямо пля учне. Пшкалемскак тенст а мезть. Пилест паро валт а марить, сельмест, раужодо башка, лия тюст а неить.

Почтонь яжавтыцясь меельцеде варштась каштан сэрь, келей сёлмо ведькевензэ лангс, ды седеяк сюмордавсь седеезэ. Вансь кувать, кирьга санонзо сэредевемс. Мейле велявтызе прянзо Верепе ёнов ды, зярс эзь пурдаво кись, яла вансь васолдо неявиця, од олгсо вельтязь кудонзо лангс...

Цёранть мельс ледсь Марюш низэ. Лиссь сон ней, паряк, пире пес ды кепси вановтонзо ведькевенть ёнов: курок-аволь полазо прядсынзе тевензэ, сырги кудов? Вакссонзо, улема, прок цянавлевкскеть, аштить Миколь ды Митёк.

Модань челькесь пулокс таргавсь тарантасонть мельга. Лишменть пансть седеень апак маря. Ков истя капшасть, мекс — эзь чарькодеве. Паряк, визьксэсь пансь мельгаст? А кемеви.

«Мезень кис? Мезень кис? Мезень кис?» — цярность чаротне. Цёрась эрямонзо перть, кода кортыть, карво эзь покорда, трокс вал киненьгак эзь ёвта. Секскак «мезень кис?» кевкстемась эвтсь прясонзо ды истя майсевтсь эйсэнзэ.

Валдоньбуесь кадовсь удалов.

Чивалгома ёндо уйсь раужо-сэнь пель. Кепедьсак вановтот — тандадат. Сон копачизе чинть. Чополгадсь. Музгордезь ладсо рангстась пурьгине, ды тусь цярахман марто човор пиземе.

Пиштематнеде ды седеень пидиця мелявкстнэде Марюш полавтовсь. Седе неявиксэкс теевсть сельмензэ перька сормсевкстнэ. Чамазо кувалгадсь. Ёмась, прок арасельгак, мельс тупця мизолксозо.

Сюкпря тевтненень, сынтемест пе саволь. Эйкакштнэнь мельга якамоськак парсте лездась. Варшты авась сэнь сельмезэст — ды полавтови ёжозо. Кие соды, ков сынтемест пачкодевель.

[171] Марюшонь лавтовонзо лангс, теке менельстэ, сяворсть цёрань тевтнеяк. Ней тензэ эрявсь аволь ансяк пидемс-панемс ды якамс ракшатнень мельга — мелявтомс кардазъютконь ды лия тевтнедеяк. Паксянь урядамодонть кортамскак а мезть. Тевть-мелявкст... Сон вана меельце ков пешксесэ. Кодат пельдензэ нуемат-пивсэмат?

Пачколесь превень кевкстеме альненстэньгак. Стяконь тевть. Сон сонськак а соды, мезе теемс. Тотны. Секень вант, эсензэяк чочасы Васянь уцяскась. Важодемань мелезэяк мольсь. Розензэ умок кенерсть, сон мезть-бути учни, пели саемс кедезэнзэ тарваз.

Чопоньпелев совась Ёгань Элюш.

Марюш котьмиль каштом икеле, кедьгева-курганга кайсесь ансяк педязь ловсо. Перьканзо, теке каткалевкст, чарасть-велясть кавтаськензэ.

Марюш кадызе тевензэ ды лиссь совицянть каршо.

— Мекс бути течи аламо потявтынь! — гайгезевсь, кудонтень эзь кельге, Элюшонь вайгелезэ. — Таго, арсеви, скалтнэнь пансесть пандо прява-чирева. Тонсетесь кода, ламо макссь?

— Ды ули, паряк, исень турошка, — пандынзе кевкстницянть валонзо авась ды варштась сельмезэнзэ.

— Те а берянь... Тон мездеяк эзить маря? — та-кода лиякстомсь Элюшонь вайгелезэ меельце валтнэнь ёвтамсто. — Эзить маря...

Марюшонь кедензэ новольсть.

— Арась, эзинь... — цяк марямга мерсь сон.

Элюш ютась икелев. Озась эземпес.

— А содан кода меремскак... — мельтеме ды теке пелезь ёвтынзе инжесь валтнэнь. — Тон ансяк иля тално, оймак. Истят кортамот велеванть якить... Келя, течи веть... сыть тонь мельга, тонь панеме.

— Панеме?! — абунгадсь Марюш ялганть кургсто марязденть. Сеске превскак тензэ эзь саеве, мезде моли кортамось. — Сыть панемень эсень кудосто?

— А содан, Марюшкай, а содан. Кортыть, ули-паронк ламо. Тынкак кулакокс теидизь. Паряк, альнетень, Григанень пшкадян? Яла кодаткак превть максы.

— Совсинь...

— Мейле мезе?

— Стяконь тевть. Сон сонсь а соды, мезе теемс.

— Содат мезе, ялгинем. Монень маряви, неть тевтнень яксевтицяст Кузьмань Микита. Умок, ванан, перькат чары, тюгай саевлизе. Сельме путсь. Пелян, Васяньгак баксордызе... текень кувалма.

[172] — Лоткак, Элюш! Энялдан, лоткак, — ниреждезь пшкадсь авась, — стяконь кортамот сыргавтыть. Мезекс истямось, мезекс маштован?.. Вант лангозон.

— А содан, а содан, Марюш. Паряк, видеяк, Микитань чумозо тунь арась. Эка покш тевесь — мелезэнзэ туить. Сон кадык а чумо, ансяк самс, пелян, ялатеке сыть мельгат.

— Вай, авакай! Вай, мезес пачкодинь. Мезе ней теемс? Ков молемс? Монсь, секень вант, течи-ванды каладан... — Марюш озась эземпес. Сельведензэ эзть кирдеве.

— Паряк, Сёвонь Галёнень теть молема, велень прявтонтень? Сон, сон сельведьсэ весень казицясь. Кавтолдомс а савкшны. Седеяк вадря улевель пшкадемс эстензэ пансицянь покшонтень, Кузьмансентень.

— Стяконь валт кортат, Элюш, омбоцеде теть мерян. Якась ревесь верьгизнэнь энялдомо... Теяк истя. Сюконякшномо истятнэнь икеле а карман, содак. Кузьмансенть — лемензэяк иля ледстне.

— Сестэ мон монсь молян! — ацирьгадозь прась валонзо трокс Элюш. — Веле ютксо, нать, арсят чачтомо? Паряк, крандазсо олго лангсо? Нейке чийнян.

— Иля певерде валот, ялгинем. Ковгак а молят, якамскак а мезть. Лезэ а ули. А содасак каня Кузьмань карциганонть? Кодат лездамот учат пельдензэ? Монь оно кодамо, Элюш, энялдомам: кодаяк пачтямс валнэ тиринь тетянень. Чийнек, энялдан, Пиче лев. Кись, содазь, кувака, ды мезе теят. Кадык тетям сы, вензэ лангс апак вано.

Марюш ильтизе ялганзо тарчксонть видьс ды таго озась тарказонзо. Удома ланга эзь арсеяк. Прясонзо яла чарасть-велясть Элюшонь валонзо. «Те кода истя? Те кода истя панемс ломаненть эсь кудостонзо? Васня амзордызь Васянь, ней... Арась, арась, Пазось а кадсамам пайстомокс. О-хо-хо... Косто зняро кежть таштавсть масторонть лангсо?»

Вень каштмолеманть апак учо сезизе баягань увт.

Те мезень апаро? Кодамо зыян?

Тарнозь-сорнозь, авась каясь лавтовонзо ланга кодат-бути нулат ды лиссь кузтемпес.

Кирданов лейненть тона ёно менелесь артозель инзеень тюссо. Покш ульцянь васоло песэ палсь, содавсь артовксонть коряс, кудо. Вана, неяви, кирвазсь омбоце... Вензэ лангс апак вано, пувась виев, пильге лангсто правтыця варма. Толось, теке азарсь киска, кирнявтнесь кудодо кудос ды нильнесь эйсэст вейке омбоце мельга.

[173] Гайнесь церькова прясто валтозь ды лия таркас понгавтозь баягась, велень келес лужанясто урность кискатне, парасть скалтнэ, цяхасть лишметне. Лайшесь, марявсь, аволь ансяк модась — пельсэ, раужо содсо ацазь менелеськак.

Ава превсэнзэ Марюш кемсь: теде мейле, мезе лиссь велесэнть, кодаткак панемат а улить. Кие ней карми мартонзо шкань ёмавтнеме? Сондензэ башкаяк кажос прыцятнеде отьма. Те венть, яла оймавтнесь седеензэ, ютавтсы эсь пизэсэнзэ. Ванды уш...

Одс сась мелезэнзэ «эсь» валось, ды пицевсь ёжозо.

«Ули эли арась, алкукскак, Паз? — кавтолдозевсь авась. — Эли сон эзизе нее, зяро сельведть ды ливезь валынек вана неть стенатнень чапомсто-путомсто? Зяро веть ютавтынек Вася марто апак удо сестэ ды ведькевенть стявтомсто? Ков ванды туян эйкакшон марто? Кинень эряван?»

Ашолгадома ёнов кие-бути састыне вачкодсь вальмас. Онгозевсь кискась.

«Вай, Инешкипаз! Те кие истя? Кинь апарось кандтни? » — талнозь арсезевсь Марюш ды стясь таркастонзо. Ютась вальмантень. «Улема, тетям... Окойники пачкодсь!» — кивчкадсь пряванзо, ды капшазевсь кенкшень панжомо.

Эзь маняво. Совицясь, видеяк, ульнесь тетязо. Тол эзь вельмевте. Озасть карадо-каршо стуворонть экшс ды эстест марямга ушодсть кортнеме седе, мезе васняяк теемс, кода улемс. Ашолгадома ёнов Марюш аламодо оймась.

— Васядо мезеяк а маряви?

— Арась, прок ведьс ваясь.

— Да-а...

— Саты, тетяй. Адя зярскак чиремтяно, — ёвтызе мелензэ авась ды стясь эзементь пестэ. — Кодамо киска истямо толонь даволдо мейле судонзо нерьгстасы? Кие карми педсеме тенек?

Эль Марюш прядынзе валонзо, ушосто марязевсь кискань клявнома ды лишмень паркстнема. Текень мельга кузтемпестэ каятотсь калдордома ды цёрань вайгельть.

Авась псилгадсь, теке лакиведь ланганзо каясть.

«Осподи, Верепаз, лездак тень, энялдан, ванстомизь тоначинь чоподадонть...» — прасть кельпрястонзо валтнэ, ды сон варштась кенкшенть ёнов.

Сынськак тетят-тейтерть эзизь чарькоде, кода шаштсть ды стясть кияксонть куншкас, прок анокстасть ули-парост ванстомо.

[174] Кудо кенкшесь келейстэ панжовсь ды тарчксонть трокс васенцекс эскельдясь Кузьмань Микита. Сон сэрей, рунгозо теке курся, аламнеде мендявозь. Кувака чама. Ниленьгеменде ламо кодаяк тензэ а максат. Сельмензэ теинеть. Вановтозо пшти. Тень кис, бешом, лемдизьгак велесэнть Карциган Микитакс. Мерить истя сельмскак.

Микита — райононь ОГПУ-нь начальник. Лангсонзо чопода пижела-ожо гимнастёрка, кона аволь валдо кудосонть неяви раужокс. Пилысэнзэ кувтолдыть кедень кемть.

Кузьмансенть мельга, чавкакс кирнявтнезь, невтизе прянзо Сёвонень Гале. Сон — велень Советэнь прявт. Те таркантень путомадонзо икеле весе мерильть тензэ Гальчо. Ней истя пшкалить ансяк сельме удалга. Бути сави молемс мекскак Советэв, ледстнесызь тетялемензэяк — Гаврил Петрович.

Гальчо мельга кеверезь кеверсь кенкшенть келесэ аволь сэрей цёра. Чамазо якстере, теке оймсеме чопавтиця чипай. Те — Микитань лездыцязо. Оршазьгак покшонзо ладсо — прясто пильгс раужосо. Мештезэ чеказь кшнань каркссо.

Меельцекс совасть ды стясть, теке палманть, седе одтнэ, кавто Пашат — Тишань Паша ды Федянь Паша. Кавонест, кода мери тенст Тилюс Мика, «камсаулт». Совасть верьга вайгельть кортазь, мерят, свадьбасто сыця ломанть эли кудазорт.

— На-начит истя, Марюш, — низэнь вешниця саразокс кокнозевсь велень прявтось, — начит, тынк хвамилиянк понгсь па-панемань спискас. Указания истямо верде сась. Сави лисемс ку-кудостонть.

Гальчонь валонзо прядомаст апак учне, Кузьмань Микита ютась каштом икелев, варштась, теке никсиця пине, аксялов. Эзь нузялдо венстемс прянзо кашт-лангскак.

— Весе, Марюш! Листь кудостонть! Сайть, мезе саеви, ды ушов! — чикордыця вайгельсэ рангстась «тевензэ» прядомадо мейле Микита. — Капшак, капшак седе! Лишметне учить.

Эйкакштнэ сыргозсть. Кавонест озасть тёшаконть лангс, ёзызь сельмест ды пезнавтызь вановтост «инжетнес». «Кить неть? Мезе тенст минек кудосо эряви? Мекс сезизь удоманок?» — типельдсть сельмсэст кевкстематне.

Марюш потазевсь ды озась эземпес. Сон сялгизе вановтонзо ОГПУ-нь прявтонть лангс ды састо, коронь кирдезь, цётазь цётызе:

[175] — Эсень кудосто ковгак а лисян.

— Те кода истя — а лисят? — якстерьгадсь Микита.

— Истя вана. Каня сокоргадыть? Каня а неят, кодаман лисицясь? А течи-ванды чачтан. А лисян ковгак...

Митя атя, Марюшонь тетязо, ютась тейтерензэ ваксс.

— Тонь, паряк, пилеть потомсть?! Паряк, эзимик маря? — ёртнесь тандавтнемань валтнэнь Микита. — Тон содат, кулаконь начко пуло, кие марто пелькстнят? Содат?!

— Седе а ков. Тон, тон теить пакшан урозокс. Верень потиця — вана тон кие!

— Лоткак, е... твою мать! Нейке лоткак!

— А лоткан! Тон васня сэвик Васянь, ней монь эйс педить. На, кирдть, лоткан, — мерсь Марюш ды кежень сазь венстясь Микитанень бабань пеште. — Порть на, идемевсь! Паряк, кирьгапакшозот сялгови.

Аванть ёжозо седе вадрялгадсь: ёвтынзе мельсэнзэ кирдевикс валтнэнь. Теевсь а куш а каш. Тук-тик, тунтик... — ловсть шканть стенас понгавтозь частнэ. Чатьмонемась кувать эзь кирдеве. Микитань ялгазо-лездыцязо стясь начальникензэ ваксс, кежев букакс варштась аванть лангс ды мерсь:

— Тэк-тэ-э-к... О чём это она кудахчет? А? Галыно, скажи, чтоб по-человечески говорила. И-хи-хи-хи-и... Зато вон кака молошна... — вашокс цяхазевсь сильгев якстере чама цёрась ды венстизе кедензэ Марюшонь мештес.

Покордамодонть ды визькстэнть авась кирвазсь толпандякс. Секскак эзизе чарькоде, кода автордызе муськемань чевтелгавтомканть ды зяро ульнесь виезэ аволдась покордыцянзо лангс. «Ёминь», — сяткинекс ютась пряванзо арсемась.

Идизе ялганзо Кузьмань Микита.

Сон кундызе Марюшонь кедте, ды чевтелгавтомкась зэрьсэ прась кияксос. Весе таймазкадсть.

Марюшонь ёмась ёжозо. Сон теке пулт новольсь эзементень. Тетязо кенерсь кавалалдо кундамонзо, ванстызе стенас эшкевемадонть.

— Те мезе истя тейтядо?! — пижакадсь Митя атя. — Мезень чумозо аванть? Кискань седейть! Лиседе, нейке лиседе кудостонть!

Митя атя ломанесь аволь чуморкс: алкине, теине лавтов. Ансяк ней неявсь весемеде виевекс. Сон аноколь каявомс тейтерензэ идеме; нурькине, цёцяня сакалонзо сорность кежтнеде.

[176] Пакшатне цийнезь-авардезь чийсть аваст ваксс. Марюш укстась ды панжинзе сельмензэ.

«Вай, авакай! Те истя мезе моли моданть-масторонть лангсо? Мезе? Мезень кис неть нарьгамотне? Пелевеле лажны пожардонть, омбоце пельксэзэ — «кулаконь» пансицятнеде. Те мекс истя? Мезень чумонок Пазонть икеле?» — теке онстонзо, ютасть превганзо арсематне.

Сась ёжос эйкакштнэнь вайгельдест:

— Авай, авай, мезе мартот?! Авай, стяк, илямизь кадо! Стяк! Стяк! — пижнесть Миколь ды Митёк. Сельведтнеде начко чамаст ёзасть аваст кумажас.

— Кшу тестэ! Саты тенк цийнемс, кулаконь понат! — каявсь лангозост Микита. Сон автордызе Миколень ды лутыксэлизе авастонзо. Цёрабаесь чочась кечказокс. Эсь саеве. Микита педясь Митёкнень. Кундызе пиледе. Тона пижакадсь, прок тулевкс.

— Бунт! Ыастоящий бунт! Я это так не оставлю! — окойники сась ёжос тандадомадонть якстере бухляк чамась. — Доберусь я до вас, кулацкое отродье! У-у-у, кровопийцы...

— Угомонись, Парфирьпч. Не кричи зря, — оймавтсь Микита, сонсь каявсь Митя атянь эйс. — Ну мезе, сеянь сакал? Ванан, тонетькак сави вешнемс «лембе» таркине. Мутано, мутано. Ульть анок.

— Ансяк теке кадовськак теть, визьксчама, — адерямс ловажиненек. Саемизь, саемизь... Кие мондень башка карми Марюш мельга якамо? Саемизь. Тыненк...

— Потомдык, сыре шайтян, курговарят! — венстизе келензэ велень «бояроськак» — Гальчо. Эзь учне сон истят валт те коськана ломаненть пельде, секс апирьгадськак.

Пансицянь прявтонтень састь кодат-бути од мельть. Сон эрязасто, теке солдат, велявтсь ве кочкаря лангсо эсь перьканзо ды чатьмонезь ютась кенкшенть ёнов. Мельганзо кулдор-калдор лиссть лиятнеяк.

Кудось општ мерсь.

— Тоначисэяк илязо муеве тенст тарка, — оймензэ олясто таргазь, мерсь Митя атя.

Эйкакштнэ энгамсть.

Марюш витизе рунгонзо, озась седе ёнсто.

— Эли алкукс тусть? — пшкадсь сон лавшо, сэредицянь вайгельсэ ды вадяштынзе вакссонзо носкиця цёрыньканзо.

— Тусть, Тюгаень сюлмавкст! Оймень пидицят, аволь ломанть, — яла музгордсь тетязо. — Эрьванть Пазось ванстозо — а понгомс сынст коморс.

Атясь лиссь ды куроксто совась мекев.

[177] — Велесь теке кулома лангсо. А чульть а чальть. Ансяк тонолонь чине. Судос эци. Куш оймсек, тейтерем, аламнес, чиремть. Иля тално тевтнень кувалма, монсь тейнесынь. Скалонь потявтомась ансяк вана... Тыньгак, Миколь ды Митёк, мадеде.

Марюш мадстинзе пакшанзо. Апак кайсе мадсь сонськак.

Эрьва кодат арсемат сакшность прязонзо. Сынь бизмолдсть, теке коткудавт.

Ледсь мелезэнзэ Вася.

«Косо ней сон, пиштякась? Кие ёвтасы? Теке арасельгак. Прок валскень сув солась. Ансяк валскенсесь ёми чипайденть, сон — чопода вийденть. Куш сёрмине пельдензэ пачкодевель. Паряк, умок мода потсо? Ёвтак тень, Верепаз...»

Аванть сялгизе пштикс. Сэредьксэсь ютась пачканзо. Арсемань лувось полавтовсь. Митя атя нувсесь стуворонть экшсэ.

— Тетяй, тердик, энялдан, Ёгань Элюшонь. Скалонть эряви потявтомс. Ёжомгак пек берянь, нацяс а стяван.

— Косо сон эри?

— Эйстэнек кавто кудонь ютазь. Верепе ёно. Мусак. Ансяк седе куроксто.

Пштикстнэ ушодсть сялгонеме эрьва ёндо. Сэредсь-чулксететсь, марявсь, весе рунгозо. Конязо вельтявсь кельме ливезьсэ. «Ансяк а серьгедемс верьга вайгельть, а стявтомс Миколь марто Митёконь», — кирдсь авась мельсэнзэ. Сон састыне валгсь коник лангсто ды нулакс новольсь тетянзо туртов кияксс ацазь тарканть лангс. Учось. «Косот весе?»

Совась Элюш.

— Тон мезе истя те шкас резакалят? — пеедькшнезь ладсо, прок тунь мездеяк апак сода, пшкадсь сон ялганстэнь. — Скалтнэнь-реветненьгак кенеринек панеме...

— Берянть тевень, Элюшкай... Васняяк, ялгакай, серьгедик Палай бабань. Мейле лездак тетянень. Эйкакштнэнь седе курок саить, эйкакштнэнь... Нейке, нейке... Миколь, Митёк, стядо! Стядо, эйдинень... — кенерсь мереме ды пижакадсь: — Ва-ай! Ва-ай, авакай!..

Чачтсь Марюш чикуншка малава. Цёрынька. Чачтызе кулозекс.

Палай баба ды Элюш пурнызь-сэрнизь эйкакшкенть ды путызь Митя атянь анокставт кандолазтнэс. Сынсь сыргасть кудов.

[178] Тетят-тейтерть кадовсть ськамост.

Атясь стясь киякс куншкас ды кепедизе вановтонзо икеле уголсонть цивтёрдыця пазаватнень лангс. Чекась. Козкстась ды эль марявиксстэ кармась Инешкипазонть пельде чанстень вешеме.

«Инешкипаз — Верепаз! Ёвтык, энялдан, мекс моданть лангсо зняро кеж? Мекс зняро апарочи ютксонок? Косто, кодамо латкова-луткова пурныть зняро азарсь пинетнень? Косто? Ёвтык, энялдан. Кумажа лангс стян икелеть, Инешкипаз, кучт лангозост, корьмакай, сэньстэ палыця тол! Паряк, врадомадост мейле седе ванськады коштось. Сюконян теть модас, ильтить эрямостонок неть нулгодьксэв, верьсэ ваднезь ломантнень. Ды каня, ёвтык, сынь ломанть? РСаня чуморкс, эсензэ превсэ эриця ломанесь сезьсы апак панжо панжовкскенть? Макст, ульть седеймарицякс, Марюшнень шумбрачи. Илить тее нуцькинень, Митёконь ды Миколень, урозкекс. Инешки, идемизь...»

Чись ютась.

Чопоньпелев велентень пайстомочинь ды майсемань кандыця вармась, энгамсь. Кенерсь пансемест пельтненьгак. Менелесь кецнезь кирвазтинзе сувне пачка неявиця васень тештинензэ.

Чокшне ланга пурнавсть Семтярень кедьс Палай баба, шабраст Федянь Наталь ды Эремкань Катя баба. Седе икеле састь эсь буень бабатне ды Ёгань Элюш. Марюш серьгединзе малавиксэнзэ лайшеме-моравтомо. Мезть илязо алтне вандынь чись, эряви ильтямс тиринь покольненть ладязь койтнень коряс.

Икеле уголсо, эзем лангсо, — кандолазнэть. Эйстэст эль неяви течинь чачовт пакшиненть якстере тюс чачинезэ. Прок покшонь, кеднензэ путозь мештензэ лангс, сельмензэ конязь. Сурнэнзэ юткс Палай баба ёвкстась конёвне.

Озныцятне кирдить кедьсэст палыця штатолт. Аватнень оршамост раужот, чачост нусманят. Сынь сэтьместэ чекить пазаватненень.

Домай баба, сэрей ды коськана, сыре тейтерь, ловны псалмат. Вайгелезэ ванькс, эчкстэ жойниця. Бажи ловномс чарькодевиксстэ. Валтнэнь путнезь путни. Ялатеке рузонь синдтрезь валтнэ киненьгак а чарькодевить,

Кудосонть сэтьме. Ансяк ловныцянть вайгелезэ пелькстни чокшнень општонть марто, ды маряви, кода пикстердить, теке тошказь ёвтнить Тоначинь эрямодонть, штатолтнэ. Сынь, те вайгелесь ды каштмолемась, тесэ азорт, ветить озномань-калмамонь лувонть.

[179] Стуворось пешксе кшиде ды почт марто вакандо. Эрьванть эйс-чирес педявтозь липниця штатолнэ.

Марюш озась кандолазтнэнь ваксс. Сон вансь лангозост ды секе тев нардтнесь сельмензэ пацинесэ. «Кие саизе седейпелькскем оймензэ? Пазось эли?..» — сась мельзэнзэ кевкстема. Ёжонзо марясь беряньстэ, эль аштевсь таркасонзо. Саты а саты нардезэ? Цидярды?

Ушосто каятотсь калдордома. Мельганзо — совицянь эскелькст.

Аватне чувтомсть. Марюшонь, марявсь, лоткась чавомодо седеезэяк.

Совасть ютазь вень «инжетне». Ней ютксост ульнесть кавто милицият.

«Осподи, да порази ты, всемилостивый, врагов наших да пособников — холопов их; сотвори ты им, всемогущий, муки да страдания превеликие за страдания рабов твоих; да очисти гы землю нашу от скверны дьявола...» — ловнось Домай баба, теке мезеяк араськак, седейс токиця вайгельсэнзэ. Меельце валтнэнь сон ёвтынзе седе чуросто.

Сыцятне шешкезевсть ве таркасо. Эзть учне, нать, понгить калмамо таркас.

Ансяк талакадсть а весе.

Кузьмань Микита ды парь пеке исень цёрась кувать апак арсе эскельдясть моравтыця аваломантнень юткова икелев. Кияк эйстэст конянзо эзизе чека. Од коень теицят сынь, кодат чекамот!

Картузост ялатеке каизь.

«Пе тень, эрицякс а кадсамизь...» — ютась Марюшонь прява нусманя мелесь, ды саизе кельме ёжо.

— Саты кольнекшнемс, Сыреськина. Тонь теветь весе а учовить, — вайгелень апак кепеде ды пеень пачк ушодсь Микита. — Тонь мельга сынек! Марят? Аволь караштыть?

Марюш чатьмонсь.

— Марят, эли потомсть пилеть?

Авась аштесь кутьмере ёндо ды теке эзь маряяк. Аштесь эйдинензэ вакссо. «Те кие, кие лангс сон истя онги? Монь лангс? Паряк, верем танстензэ варчавлизе? — кевкстнесь Марюш эсь прянзо, прок онстонзо. — Вай, те, маряви, сон седейпокольнем чавицязо. Мезень кис сонзэ маштык, мезень чумозо, пайстомо ломань? Мезень кис явимик мирдем эйстэ? Ужо, ужо, Пазось тень ялатеке истяко а кадсы...»

— Ты у меня попрыгаш ещё за вчерашне, попрыгаш! Узнаш, как на власть замахиваться. А ну, [180] собирайся! — кижнэзь, прок азарсь пине, серьгедсь Микитань удалдо якстере кирькс чама цёрась.

Марюш стясь. Айгизе ве ёнов табуретканть ды велявтсь удалонзо аштицятненень. Пштистэ варштась Микитань сельмс. Тона тень эйстэ мик потазевсь.

— Куш эйкакшом, ожо горниповнем, максык калмамс, иродонь пона! — апак сеере, цётазь цётынзе валонзо авась ды шаштсь седе малав.

— Нет!!! — цикакс пижакадсь Карциган Микита.

— Тонь анамаз, аволь ава мастор лангс нолдынзеть! — апак пеле мерсь Марюш ды зяро виензэ сельгсь сень сельмс. — На, идемевсь, топодть!

— Взя-а-а-ть! — рангстась прявтонзо удалдо «гепеуншикесь». Теке марто лиссь икелев, амзордызе азораванть кедте ды вырновтызе кенкш ёнов. Омбоце кедте кундызе милиционерэсь. Ливтизь ушов.

Кудось лажакадсь лайшемань вайгельде. Миколь ды Митёк цийнезь кирнявтсть коник лангсто ды каявсть аваст мельга. Куроксто лиссть лиятнеяк.

Кудос кадовсь ансяк Домай баба.

Марюш сельведнеяк эзь правто-ёмавто. Меельце читнень-ветнень перть весе валынзе. Коськсть сельмензэ. Авардемс эзь аварде, сень кис седеяк кармась карамо седейсэнзэ стакачись. Прок киве поколь путсть потмозонзо. «Мезень кис, мезень кис, мезень кис?» — чавсь седеезэ.

Ават-цёрат лекшкадсть вальмаст икеле эчке чочконть лангс. Вакссост, стядо аштезь, шлебердсть судосост шабрань ды эсь раськень аватне. Лиссь Домай бабаяк. Кедьсэнзэ кирдсь кандолазнэтнень.

Лишме эзь неяво.

— Истя эно, Марюш, — ютась ваксозост ды кортазевсь велень прявтось. — Кулозь эйдедеть башка — кавто цёрынькат. Секскак сынек мельс — саемс кудот, панемеяк Валдоньбуестэ а карматано. Олодянь Таня — Семтярень буень. Зярс эрядо сонзэ кедьсэ. Зыянось — эйкакшонзо вейксэ — аволь покш. Кельгтядо кодаяк. Аволь боярават...

— А стувтсак паром? — чевтинестэ, теке аволь Карциган Микитаяк, пшкадсь пансицянь прявтось. — Кавтаськеть — Олодянь Танянень. Кадык эрить. Ну, кода? Паром а стувтсак? Кеман, кеман...

Авась сеске мезеяк эзь мере. Улевельгак седе паро ёжозо, те «а стувтсаконть» кис раздевлизе чама киськензэ. Ялатеке седеезэ эзь кирде:

— А стувтса, а стувтса. Бути монсь стувтса — цёран касыть... Ледстясызь.

[181] Микита тейсь амарицякс. Сон козкстась, мейле коня алга варштась бабатнень лангс ды мерсь:

— Тон вана, Домай баба, ванды соват миненек. Чарькодить? Марить? Эрявить кунсоломс молитват... Ды ломаньгак эряви Марюшонь таркас.

...Марюшонь ёжозо седеяк берякадсь. Сонсь, апак лезда, эзь молеве. Эйсэнзэ кавто ёндо ветясть Элюш ялгазо ды Олодянь Танянь покш тейтерезэ. Икелест апак капша мольсь Митя атя. Ве кедьсэнзэ ветясь Миколень, омбоцесэнть — Митёконь.

Весь маней. Ушосонть экше. Штатолнэкс типельдить менеленть келес певердезь тештинетне. Кунсолыть, бажить чарькодемс, мезе моли-тееви моданть-масторонть лангсо. Бошан чама ковось машнетезь вансь алов ды майсесь кевкстематнеде: «Ков истя сыргасть иеть пайстомо ломантне? Ков эйсэст панить? Мезень пежетест Пазонть икеле?..»

...1943-це пень якшамковось якшамоль. Веть пукштяесть чувтнэ. Чинзэ лисезь сельведень туемс цивтёрдсть латалксонть сэрьсэ шушмотне. «Телень седей» мерить те шкадонть.

Марюш эзь кирдеве, ансяк пачкодсь пелькашка кудынензэ кузтемпес, уракадсь ды комадо прась ловонть потс.

Те кудыненть сон свал ловсь Пазонть пельде казнекс. Зярдо калавтнесть пизэст-эрямост, яжиксэлизь кардазост удалов путозь шлямкудонтькак. Марюшонь энялдоманзо мезекскак эзть путо, сельведензэ эзть нее. Ве цёрась кузекшнесь уш сянго марто прястонзо олгтнень ёртнеме. Самай те шкастонть сась, теке менельстэ прась, Кузьмань Микита. Вал — ды шлямкудонть эзизь тока...

Редизе празь аванть Окся шабразо, кона лисекшнесь ведьс. Сон лездась Марюшнень стямс ды совамс кудос. Совасть, Марюш ёртызе уголсо стуворнэнть лангс мештензэ потсто таргазь конёв панкскенть ды мейсэ ульнесь прась коник лангс. «16 января 1943 года Ваши сыновья Николай Васильевич и Дмитрий Васильевич Сыреськины погибли в бою с...» — тешкстазель те раужо конёвнесэнть.

Те шкастонть раздесь черензэ ды ильсесь ризкстэнть Кузьмань Натальгак. Почтань кандтницясь пачтясь тензэ... Микитань чавовомадо истямо жо конёвне.