И҆змара́гдъ/в҃

А҆́ще бꙋ́кви непра́вилнѣ зрѧ́тсѧ, грѧдѝ сѣ́мо, да грамматоси́ры є҆́млеши.

←а҃

Кни́га гл҃емаѧ и҆змара́гдъ Предисло́вїе

г҃→

Предисло́вїе.

Всѣ̑мъ поꙋче́нїємъ и҆ при́тчѧмъ, и҆́же во кни́гахъ си́хъ, на ᲂу҆твержде́нїе вѣ̑рнымъ, а҆́ще кто̀ честѝ хо́щетъ, пе́рвѣе сїю̀ при́тчꙋ прочтѝ, и҆̀же сп҃съ въ є̑ѵⷢ҇лїи ре́клъ є҆́сть ѡ҆ на́съ.

И҆з̾и́де сѣве́цъ сѣ́мене своегѡ̀: сѣ́ющꙋ же є҆мꙋ̀, ѻ҆́во падѐ при пꙋтѝ, и҆ пти́цы позоба́ша є҆̀: дрꙋго́е же падѐ на ка́мени, и҆, занѐ не бѣ̀ землѧ̀, прозѧ́бъ ᲂу҆́сше: а҆ и҆́но падѐ въ те́рнїе: дрꙋго́е же падѐ на землѝ до́брѣ, и҆ мно́гъ пло́дъ сотворѝ: а҆́ще кто̀, бра́тїе, слы́шати хо́щетъ словеса̀ ст҃а̑ѧ, и҆ въ нбⷭ҇ное црⷭ҇тво прїитѝ ᲂу҆че́нїемъ и҆́стиннымъ, то пе́рвѣе ᲂу҆мѧгчѝ зе́млю срⷣчнꙋю, да пло́дъ прїи́меши спнⷭ҇аго жи́та. Сѐ є҆́сть ре́чено: а҆́ще бж҃їе сло́во то́кмѡ слы́шимъ, а҆ не твори́мъ, ничесо́же ᲂу҆спѣ́емъ, не мо́жемъ сп҃сти́сѧ: речѐ бо гдⷭ҇ь: бл҃же́ни слы́шащїи сло́во бж҃їе и҆ творѧ́щїи є҆̀, а҆ не слы́шанїемъ то́кмѡ ѡ҆правди́тисѧ, но сотво́рше, речѐ, спⷭ҇нымъ бы́ти: без̾ дѣ́лъ бо вѣ́ра мр҃тва̀ є҆́сть, а҆ дѣла̀ же без̾ вѣ́ры: и҆́же бо кто̀ вѣ́рꙋ и҆́мать, а҆ без̾ дѣ́лъ до́брыхъ, то подо́бенъ є҆́сть и҆мꙋ́щемꙋ лицѐ без̾ ꙭ҆́чїю: а҆ и҆́же дѣла̀ и҆́мать, а҆ без̾ вѣ́ры, то ꙗ҆́кѡ во ᲂу҆́телъ сосꙋ́дъ лїе́тъ.

Слы́шите сказа́нїе при́тчи сеѧ̀.

Сѣве́цъ є҆́сть хрⷭ҇то́съ: а҆ сѣ́мѧ є҆́сть ᲂу҆че́нїе писа́нїѧ бж҃е́ственагѡ: а҆ па́дшее на ка́мени, то въ жидѣ́хъ: а҆ и҆́же при пꙋтѝ, то въ є҆ретицѣ́хъ: а҆ и҆́же въ те́рнїи, то и҆́же творѧ́тсѧ хрⷭ҇тїа́не, а҆ дѣла̀ творѧ́тъ дїа́воли, и҆ плотѝ всѧ̑ волѧ̀ дѣ́ютъ, пїѧ́нствомъ же и҆ про́чими: а҆ є҆́же на землѝ добрѣ̀, то въ кро́ткихъ и҆ въ смире́нныхъ, и҆́же всѣ́мъ срⷣцемъ ᲂу҆пова́ютъ на бг҃а, не то́кмѡ вѣ́рою, но и҆ дѣлы̀ до́брыми тща́шесѧ полꙋчи́ти жи́знь вѣ́чнꙋю ѡ҆ хрⷭ҇тѣ і҆и҃сѣ гдⷭ҇ѣ на́шемъ.

This is a translation and has a separate copyright status from the original text. The license for the translation applies to this edition only.
Original:
Translation: