Идна батыр (Кедра Митрей)/4

From Wikisource
Jump to navigation Jump to search
Идна батыр
Ньылетӥ ёзэз
Автор: Кедра Митрей
Кылдытон дыр: 1924, поттэмын: 1924.
Тӧрогурт. Бадӟым, вуж, сьӧдэктэм корка пушкын. Лапег, зӧк пулъем, паськыт ӝӧк дорын Идна батырен Блатэн пуко. Котрак бордъёс кузя ӟусъёс, вылӥяз ӝажыос. Пичиесь гинэ укноос ӵогылэмын.

Идна. Троссэ поръёсты дорамы ваим ини. Мар отысь падиез? Сюдыса гинэ соосты вордоно луэ. Ожмаськонмы уг быры. Тол куазен но мур лымыез нюлэсъёстӥ коласа ветлӥськом. Озь ке но, талы туж ум ёрме, дыр. Тушмонмылэсь кужымзэ тулыс някыртом кадь потэ. Котькудӥныз эленым эчешыны мон дась улӥсько: поръёс, татчы Тӧрогуртамы лыктыса, асьме азьын нӥзилиос сямен кыстаськозы.

Блат. Эчешыны уг дӥсьтӥськы. Уж-мугмы верамедлы лэся гинэ. Оло, асьмеос гыдыко кышноосмес но поръёс киысь таласа мозмытыны быгатом.

Идна. Ожмег батырмылэсь ӟеч иворзэ витиськом. Со вылын та виысь ож возён ужмы кылле. Толэз шулдыр ортчытоз. Майдан тушмонмылэсь кышнозэ асьме кие вуттэмез понна но тау шуыны усе. Табере поръёслэн Майдан тӧрозы Зумья кышноез сярысь сюлмаськытэк уг улы, дыр. Солэсь эсэпсэ йӧндырыса, мон Ожмегез поръёсын вераськыны ӧжыт косӥ. Оло, ӝоггем тынэсьтыд но, Блат выны, гажан Дурга пӧрасьтэ аслыд берыктозы. Ачим но мон Чоламе Тӧрогуртэ умоен вуттозы шуса оскисько.

Блат. Чырткемесь на-а бен медам соос? Туж секыт ужез уг-а ужато?

Идна. Али мон пор кышноосты татчы вайыны косӥ. Ай бен соослэн пыд улазы лымы уг-тэ ӟукырты?

Блат. Учком ай пор кышноосты но. Кыӵе, мар синмын возьматскозы.

Забир пыре; сьӧраз Зумья, мукетъёсыз но пор кышноос.

Забир. Ваи косэмедъя, батыр. Мыкырске тӥ тӧролы!

Зумья. Тӧролэн кышноез мурт тӧролы мыкыръяны дышымтэ.

Блат. Тӧро кышно вылэмзэ каль но уг вунэты. Сыӵе быдӟымъяськон нуналъёсыд быризы ини…

Идна. Мултэс кыл тон, Блат, поттылӥськод. Ымдэ ворсано луоз ӧжыт. Зумья кенаке! Удмурт выжылэн караз улэмды вылэ ӧвӧл-а маке чагиськонды?

Зумья. Эрик ышем бере, мар ушъяськод на.

Блат. Ожлэн одӥг сюресэз. Тушмонэд кие шедьыса, мазэ витемед потэ?

Идна. Сое мон уг юаськы. Быгато-а удмуртъёс тӥледыз сюдыны, вордыны? Вормонтэм секыт уж борды уг-а кыткыло?

Зумья. Зэмзэ ке верано, ас гуртам кадь улӥсько. Иськанъёсы но озьы ик шуозы. Мылкыд ӝутскемъя ужаськом, кужмысь ужаны косӥсь ӧвӧл. Кӧтмес тырмон сиськиськом. Одӥг куректонмы — гуртмылэсь мӧзмонмы вань на. Поркармы пала ялан учкыса сылӥськом но, бӧрдӥськом но.

Блат. Я, вералэ табере, кызьы поръёс Дургаме но Чола кенакме возьыло вал. Тӥляд сямен ик-а соослэн Поркарын улэмзы?

Зумья. Вань сьӧлыкмы. Уг ваты мон сое. Аслам поръёсы берзэс-азьзэс уг эскеро на. Татчы сюронмес ӧз шӧталэ, вылды. Шугомыса улэмен Дурга висьыны ӧдъяз.

Блат. Э, куазе!..

Идна. Нош Чола кызьы?

Зумья. Чола пӧрасед, тӧро, ожын бырем пиез сярысь буйгатэк бӧрдэ.

Идна. Окмоз, Зумья!.. Забир выны, кытысь ваид, отчы ик таосты ну.

Забир. Мыном я, пор кышноос.

Забир, Зумья, мукетъёсыз но пор кышноос коркась пото.

Блат. Уг вормиськы мон, тӧро, куректонме. Пие поръёсын виемын, кышное соос кие шедемын. Поръёс вылэ потыны монэ но лэзь вал. Ожмеген валче кариськыса, Поркарез ӝоггем куашкатысалмы.

Идна. Блат! Тодытэк уд улӥськы: мынам одӥг гинэ вал пичи пие, поръёс, дырзэ витьтэк, вашкала пересьёс доры келязы сое; мынам но яратон кузпалы тушмонъёсмылэн киязы улэ. Озьы луэм бере, ачид валатскы: капчи мылкыдын-а Тӧрогуртам мон пукисько. Татын удмуртъёсмылы йырвизь сётӥсь ке кулэ ӧй лусал, мон ачим Поркар вылэ бурдъяськыса кошкысал. Камашен ӵош тузкем удмурт улӥосмес люкано. Кир-пазь пазяськемез быдтоно, огкылысь ужанэ вуттоно. Эжбаймы Камашен кусыпмес каньылатыны мынӥз. Тыныд но ӧжытак чидатсконо луоз — Тӧрогуртэз возьмась кулэ. Поръёсын ожмаськонэз, кутэм талам кышноосын вошкон ужез Ожмегмы сантэм уз кары. Ыӵе ужез тодыса лэсьтоз. Солэн иворез ӝоген вуыны кулэ ини, нунал лыд озьы шуэ.

Блат. Витьыны кылдэм. Арняскын мар Ожмег ӟеч иворзэ ке ӧз вутты, мыным но бадӟым сюрес вылэ потоно луоз. Соку но дорад куриськыны лыкто. Солэсь кема уг чида, сюлмы пилиськыны медэ. (Потэ.)

Идна. Бадь пушъемлы лэсямон удмурт калыклы будыны кулэ вал. Камаш пичи визьмыныз батыръяськемез потыса, люкиськиз, ас кожаз укылтэм улыны выре. Ӵем тазьы Калмез бӧляк йыринтылэ. Модос бордысь ӵогем улвай куасьме, модос но куанермыны кутске. Сое уг но малпало. Табере ожен-а Камаш вылэ мынод? Удмуртэн удмурт ожмаськыса, югыт дунне саптаськоз, сыӵе йӧспӧртэм уж музъем бам вылтӥ вӧлскоз… Куд-огез эльёс вылтӥяськемен, соостэк бӧляк калыкенызы вераськоно, кенешоно луэ. Соиз но мыдлане усе. Мар карод бен? Эжбайлы музоныз сюрес ӧз кыль ни. Ваньмызлы вайяськем муртъёсмылы огазе кариськон мылкыдзэс берыктоно… Эжбай выны осконтэм ӧвӧл: ӟуг пуэ но тулъяськоз, котькыӵе чурыт сюлэмез небӟытоз. Витё ини солэсь ӟеч иворзэ… Э, тон, воршудэ! Пазяськем калыктэ огзы борды огзэс каньылэн ляк. Со понна туннэ мон тыныд дуно узыр виро сӥзисько. Монэ, модосэ пуктэм бере, улвайтэк, вож куартэк, сяськатэк эн кушты, ыльыс тысьтэк эн куанермыты. Тӥ но, пересьёсы, шуддэс сётэ, музъеме могъялтэм бадь ньӧрдэс пушйытэ. (Потэ.)

Кык удмуртъёс пыро.

Огез удмурт. Эк, таӵе улэмлы ёрмоно. Шайгуын выллем ӝокыт. Тӥнь Идна батыр пумиськыса но ӧз вазьылы, оло, уг но адӟы; мыкырскыса, шер вамышъяса ветлэ. Тӧрогуртамы шулдыръяськон быриз.

Кыктэтӥез удмурт. Бадӟым малпаськонэз батырмылэн. Мусо пиез пукыӵ черсэн бышкалтэмын. Поръёсын ожмаськон бырымтэ. Вала ини табере, кытысь маин, ма мылкыдэн шудон котыре кутскод.

Нырысез. Шимес, зӥбыт Тӧрогуртмы пуке, кынман шоры шедем кадь. Пиналъёслэн куаразы уг чузъяськы, огезлэсь но нылкышнолэсь чебер кырӟам куаразэ кылны уг лу, пиослэн лусйиськем шелепъёссы уг пиштыло, гидкуа аналтэмын.

Кыктэтӥез. Юрт котырын пиослы ужаны ож эрик уг сёты. Калмез бӧляклэн йӧназ, улэмез котькинлы куректон. Сыӵе уж-муг кырӟатон вадес адямиез пуны сямен вузытэ.

Нырысез. Ож зол ужасез синомытэ. Нюлэскась ӧвӧлэн кионъёс йыло. (Педласянь йыгасько.)

Кыктэтӥез. Кин со отын? Пыре я, ӧс пытсамтэ.

Домбоен Юсконой пыро.

Нырысез. Э, черъёс! Ма тӧл шуккыса тол куазен вуиды?

Юсконой. Тӧлъя ветлэмысь дугдэммы татчы вуттӥз. Ыштэм визьмес йырамы берлань пыртӥмы. Соин, Тӧрогуртмес гажаса, бертӥмы.

Домбо. Гым!.. Мӧзмемме вормытэк улӥ. Табере татчы но пыдме лёгыны югыт нунал вадьсаськиз.

Кыктэтӥез. Кин бен тӥледыз улля вал? Ас эрикеныды пегӟиды, ас мылкыдды потэмен Тӧрогуртлэсь висъяськиды.

Домбо. Эн ни лекатэ кылем кырыж ужъёсмес.

Нырысез. Ай котырдэс ӧжыт пульсатӥзы ке, соку куазь улын улэмдэс йӧндыроды. Нокыӵе эмъюм но ярадэс уз бурмыты.

Домбо. Йырмес уз-а быдтэ меда бускельёс?

Нырысез. Уз ик вешалэ, дыр.

Домбо (ас понназ). Сусыпу мульые! Возьма монэ.

Юсконой. Тӧрогуртаз-а Идна батыр? Ми со дӥне Эжбайлэсь азьвылскыса сюлворыны лыктӥм.

Домбо. Милем вожзэ поттыса, вожоослы медаз келя вал, йыркуэ ик лӧптэ. Сусыпу мульые…

Кыктэтӥез. Идна батыр алигес гинэ та коркан вал. Лыктоз, дыр, нош татчы.

Нырысез. Ма ивор Эжбай лэзиз?

Юсконой. Ачиз со Тӧрогуртэ бертэ ини. Сэзъялскиз бӧлякмы, Камашез ӵужыса сямен поттӥзы.

Домбо. Йырзэ быдтӥз ук Камашмы; бӧлякез сое уллям бере, сирпу йылэ ошкем.

Нырысез. Остэ, остэ, кылчинэ! Кыдёкын возь сыӵе черлэсь.

Домбо. Ы-гм!.. Кӧшкемыт синзэ усьтэм, тӧро вылэ тӧро луэм. Ужпи сямен ӵыжаськем. (Педлось гумыосын шудэм куара кылӥське.)

Юсконой. Эжбай, лэся, вуиз.

Кыктэтӥез. Шулдыртыса пыро.

Педлось зол кесяськем куараос кылӥсько. Кылъёссэс валаны уг лу.

Домбо. Сусыпу мульые, возьма монэ! Тыныд оскисько. Туное тон бордын шудэ, шуиз.

Кык удмуртъёс, Юсконой но коркась пото. Домбо бӧрсязы кошке. Трос пыд улын лымы ӟукыртэ. Корка пыро: Идна батыр, Эжбай, Блат, Забир, Юсконой, Домбо; удмуртъёс коркаез тырмыто.

Идна. Э, инмаре куазе, кылдысинэ, туж бадӟым тау тыныд! Пазяськем калыктэ нош огинэ люкад, тыныд сӥзем виро ӝукмес удмуртъёсыдлы огъя вылысь сиыны сётӥськод. Азьпала но, инмаре, милемыз эн кушты, калыктэ утьыса возь. Пересь бубаосмы, мумыосмы, шудбурдэс котрады возе, юмал визьмын ужаммес, нимъёстэс тодэ ваеммес эн лекатэ, ваньдылэсь нимдэс, тустэс ум валаське.

Куараос. Вождэс эн вае, пересьёс!

Эжбай. Тау, инмаре, юрттэмедлы, тау! Ас калыкедлэсь куспазы керетонзэс быдтӥд, огзылы пумит огзы ожмаськонлэсь возьмад.

Идна. Я, пиналъёсы, тэремез пукселэ. Кусыпмес сӧрись ачиз бырем…

Юсконой (Идна азе пыдесъяське). Гажан тӧро! Тӥ но, бускельёс! Юсконой укылтэм мурттэс эн куштэ. Мыдлань ужамме аслам но тодам ваеме уг лу: пушкы чиге…

Домбо (пыдес йылаз). Коть пыдул дэрие лёгалэ. Камашез музэн гинэ эн ошкытэ. Али но солэн чоньдэм пыдъёсыз син азям шонасько…

Идна. Султэ, вынъёсы! Туннэ нуналысен удмурт выжы калык вож-вож удаса будоз. Та валче кариськон нуналмы понна выльысь подэм пус кенешон коркамы пыртомы. Быдэс калыклэн кузёосыз пӧлын йырзэс мыкыртэм вынъёсмылэсь сюлэмзэс буйгатон кыл вералом. Огмы вылэ огмы вожваёнмес татын кызьпу чагез сямен чигтомы. Тупаса, ӟыгырскыса, юн мыжык кадь кужыммес тушмонлэн мӧляяз пезьгытом. (Юсконоез, собере Домбоез ӟыгыртэ.)

Юсконой. Инмар азьын кыл вазисько: калыклэн быръем тӧроезлэсь уг люкиськы.

Домбо. Мон но уг палдылы. Будӥсь пиналъёсме но валэкто. Э, батыръяськыны шӧтась кымес! (Кымсаз мыжыкеныз тышка.) Буш на вылэм сигед! (Ас понназ.) Мульые, сусыпу мульые юрттӥз.

Гумыосын шудэм куара кылӥське.

Куараос. Нош кин вуиз?

Куд-огез удмуртъёс бызьса педло пото.

Идна. Ожмеглэн гумы куараез кадь потэ.

Блат кӧня ке удмуртъёсын ӵош потэ.

Эжбай. Ваньзэ вераса ӧй быдты на, тӧро. Камаш улӥослэн гуртъёсазы вуса, удмуртъёс нырысь мыным уг оско вал. Идна батыр быремын, солэсь кулэм мугорзэ но уд шедьты шуса, пумитам вераллязы. Сыӵе иворъёс выль тӧромылы, Камашлы, пе, вуттэмын. Собере тунась-пеллясьёс но озьы ик, пе, шуо вал. Поръёс улысь Тӧрогуртэз басьтэммылы но азьло ӧз оскылэ. Тынэсьтыд корт жильыё дэремдэ возьматыса гинэ, верам кылъёсме зэме понӥзы. Оград тонэ астэ отчы ӧтьыны малпасько вал ини. Кулэез ӧйлась. Вичакыз отысь бӧлякъёс тынэсь­тыд но Ожмеглэсь Тӧрогуртэ бертэмдэс тодыса, Камаш йырзы вылэ мыным чагиськыны ӧдъязы. Созэ но тазэ Камаш умойтэм лэсьтӥз, шуо. Одӥгаз но гуртазы собере сое пыраны ӧз лэзьылэ ни. Ас калыкез вылаз сялскиз. Озь огназ кыльыса, ошкем со.

Трос пыд куараос кылӥсько. Ожмег Чолаез кунултӥз возьыса пыртэ. Удмурт кышноос но удмуртъёс мерскыса пыро. Кӧня ке поръёс но вань.

Кышноос. Чола кенак! Э, Чола кенак!

Идна. Шудбуре, утисе! Инву но гажзэ возьматэ!

Чола. Мусо кузпалы! (Идна вылэ усе, ӟыгырско.)

Ожмег. Ӟечбур, иськавынъёс!

Куараос. Кужмо лу, Ожмег!

Чола. Эк-ке-кек, батыре! Одӥг вужерме гуртам вуттӥ на! Вешаса, нуныяса вордэм пиналмы быриз!.. Со интые аслым гуэ пыроно вал…

Идна. Пересьёслэн косэмзы вамен уд мыны, пӧрасе!

Блат пыре.

Блат. Дургае, Дургае нош кытын?!

Ожмег. Дуно выны!..

Блат. Бертэм нылкышноос пӧлын солэн ымнырыз уг адскы!

Ожмег. Блат выны! Дурга сузэрмес Поркарысь ми ӧм шедьтэ ни: мумиз доры кошкыны вуэм.

Блат. Нош пурт пыриз сюлмам. (Йырсиоссэ кутса, ӧс пала мынэ.)

Ожмег. Эшъёсы! Тӧро, эльёс! Майдан но кышноез сярысь куректэ. Асьме кенакъёсмес, сузэръёсмес берыктыса, Зумьязэ берлань сётыны куре. Со вылысен гинэ вошъяськон потӥз. Зумьяез келяны понна тани поръёс лыктӥзы.

Пор. Удмурт тӧро! Порлэн тӧроез, ожез думыса, милемды каньылэн вераськыны ыстӥз. Кышнодэ ас кышноеныз воштом, шуиз. Пӧрасед дорад вуттэмын, Зумья кенакмес азямы потты.

Идна. Вуттозы азяды, али ик вуттозы. Ойдо, Зумья но Майданэз доры мед мыноз. Лякытэн вераськемлы могатӥсь уз лу… Я, удмуртъёсы, капчи шокчон но вуэ, лэся. Идналэн кизилиез кысымтэ на, мальдытса ӝуа!

Трагедилэн пумыз.